Isaac of Nineveh: Discourse 18

ܒܚܲܕܼ ܡ̣ܢ ܝܵܘ̈ܡܵܬܼܵܐ ܐܸܙܹ̇ܠܬܼ ܠܩܸܠܵܝܬܹܗ ܕܐܲܚܵܐ ܚܲܕܼ ܩܲܕܝܼܫܵܐ: ܘܐܲܓܤܹ̇ܬܼ ܒܲܚܕܼܵܐ ܓܘܿܢܝܵܐ ܡܸܛܠ ܥܸܠܬܼܵܐ ܕܟܘܼܪܗܵܢܵܐ: ܐܲܝܟܼ pb. 140 ܕܢܸܤܥܪܲܢܝ: ܡܸܛܠ ܐܲܠܵܗܵܐ. ܐ̄ܢܵܫ ܕܹܝܢ: ܠܲܝܬܿ ܗ̄ܘ̣ܵܐ ܠܝܼ ܒܐܲܬܼܪ̈ܵܘܵܬܼܵܐ ܗܵܢܘܿܢ. ܚܵܙܹ̇ܐ ܗ̄ܘܹ̇ܝܬܼ ܠܹܗ ܓܹܝܪ ܒܠܲܝ̈ܠܵܘܵܬܼܵܐ ܠܲܗܵܢܵܐ ܐܲܚܵܐ: ܕܩܵܐܹ̇ܡ ܗ̄ܘ̣ܵܐ: ܡ̣ܢ ܩܕܼܵܡ ܥܸܕܵܢܵܐ ܤܲܓܝܼܐܵܐ. ܐܝܼܬܼ ܗ̄ܘ̣ܵܐ ܠܹܗ ܥܝܵܕܼܵܐ܆ ܕܡ̣ܢ ܩܕܼܵܡ ܟܠܗܘܿܢ ܐܲܚ̈ܝܹܐ ܢܸܬܿܬܿܥܝܼܪ ܠܬܸܫܡܸܫܬܼܵܐ. ܘܲܡܫܲܪܸܐ ܗ̄ܘܑ̣ܵܐ ܒܡܲܙܡܘܿܪܹ̈ܐ: ܘܐܵܙܹ̇ܠ ܗ̄ܘ̣ܵܐ ܒܗܘܿܢ ܚܲܕܼ ܟܡܵܐ. ܘܡܸܢܫܹܠܝ ܫܵܒܹ̇ܩ ܗ̄ܘ̣ܵܐ ܠܵܗ̇ ܠܬܸܫܡܸܫܬܼܵܐ: ܘܢܵܦܹ̇ܠ ܗ̄ܘ̣ ܥܲܠ ܐܲܦܵܘ̈ܗܝ. ܘܲܒܼܨܝܼܪ ܩܲܠܝܼܠ ܡܵܐܐ ܙܲܒܼܢ̈ܝܼܢ ܐܲܝܟܼ ܐ̄ܢܵܫ ܢܹܐܡܲܪ: ܢܵܩܹ̇ܫ ܗ̄ܘ̣ܵܐ ܪܹܫܹܗ ܒܐܲܪܥܵܐ ܬܟܝܼܒܼܵܐܝܼܬܼ ܘܚܲܪܝܼܦܵܐܝܼܬܼ: ܒܪܸܬܼܚܵܐ ܗܵܘ̇ ܕܡܸܫܬܿܓܲܪ ܗ̄ܘ̣ܵܐ ܒܠܸܒܹܗ ܡ̣ܢ ܛܲܝܒܿܘܼܬܼܵܐ. ܘܩܵܐܹ̇ܡ ܗ̄ܘ̣ܵܐ: ܘܲܡܫܲܠܸܡ ܠܲܨܠܝܼܒܼܵܐ. ܘܬܘܼܒܼ ܤܵܓܹ̇ܕܼ ܘܩܵܐܹ̇ܡ ܘܲܡܫܲܠܸܡ: ܘܬܼܘܼܒܼ ܢܵܦܹ̇ܠ ܥܲܠ ܐܲܦܵܘ̈ܗܝ. ܘܲܒܼܗܵܢܵܐ ܙܢܵܐ ܥܵܒܹ̇ܕܼ ܗ̄ܘ̣ܵܐ ܤܲܓܼܝܼ ܙܲܒܼ̈ܢܝܼܢ: ܐܲܝܟܼ ܕܠܵܐ ܡܸܫܟܲܚ ܗ̄ܘܹ̇ܝܬܼ ܠܡܸܡܵܐ. ܡܲܢܘܼ ܕܲܡܨܸܐ ܗ̄ܘ̣ܵܐ ܠܡܸܡܢܵܐ: ܤܝܵܡ ܒܘܼܪ̈ܟܹܐ ܤܲܓܝܼ̈ܐܹܐ ܕܥܵܒܹ̇ܕܼ ܗ̄ܘ̣ܵܐ ܐܲܚܵܐ ܗܵܘ̇ ܒܠܲܝ̈ܠܵܘܵܬܼܵܐ! ܘܩܵܪܹܒܼ ܗ̄ܘ̣ܵܐ ܠܘܵܬܼ ܠܨܝܼܒܼܵܐ ܘܢܵܫܹ̇ܩ ܗ̄ܘ̣ܵܐ ܠܹܗ ܥܸܤܪܝܼܢ ܢܘܼ̈ܫܩܵܬܼܵܐ: ܪܗܝܼܒܼܵܐܝܼܬܼ ܘܚܲܡܝܼܡܵܐܝܼܬܼ: ܒܪܸܚ̱ܡܬܼܵܐ ܕܲܡܙܝܼܓܼܵܐ ܒܕܸܚܠܬܼܵܐ: ܘܡܲܩܸܦ ܗ̄ܘ̣ܵܐ ܬܘܼܒܼ ܒܡܲܙܡܘܿܪܹ̈ܐ. ܘܒܲܙܒܲܢ ܙܒܲܢ ܡ̣ܢ ܚܹܐܦܹ̈ܐ ܤܲܓܝܼ̈ܐܹܐ ܕܚܘܼ̈ܫܵܒܹܐ: ܕܲܡܫܲܠܗܒܼܝܼܢ ܗ̄ܘ̣ܵܘ ܠܹܗ ܒܚܲܡܝܼܡܘܼܬܼܗܘܿܢ: ܡܵܐ ܕܠܵܐ ܡܸܫܟܲܚ ܗ̄ܘ̣ܵܐ ܡܸܟܹܝܠ ܕܲܢܤܲܝܒܲܪ ܠܫܘܼܠܗܵܒܼܵܐ ܗܵܘ̇ ܡ̣ܢ ܚܲܕܼܘܼܬܹܗ: ܡܸܢܫܹܠܝ ܡܸܙܕܟܸܐ ܗ̄ܘ̣ܵܐ: ܘܲܡܪܝܼܡ ܗ̄ܘ̣ܵܐ ܩܵܠܹܗ: ܒܗܵܝ̇ ܕܠܵܐ ܡܨܸܐ ܗ̄ܘ̣ܵܐ ܕܢܹܐܚܘܿܕܼ ܢܲܦܫܹܗ܀ ܘܡܸܬܿܕܲܡܲܪ ܗ̄ܘܹ̇ܝܬܼ ܒܛܲܝܒܿܘܼܬܼܵܐ ܕܐܝܼܬܼ ܗ̄ܘ̣ܵܐ ܠܘܵܬܹܗ ܕܐܲܚܵܐ ܗܵܘ̇: ܘܬܼܵܡܲܗ ܗ̄ܘܹ̇ܝܬܼ: ܕܲܟܼܡܵܐ ܚܦܝܼܛ ܗ̄ܘ̣ܵܐ ܘܥܝܼܪ ܒܲܥܒܼܵܕܼܵܘ̈̇ܗܝ ܕܐܲܠܵܗܵܐ܀ pb. 141 ܒܵܬܲܪ ܬܸܫܡܸܫܬܼܵܐ ܕܹܝܢ ܕܨܲܦܪܵܐ: ܡܵܐ ܕܝܵܬܹ̇ܒܼ ܗ̄ܘ̣ܵܐ ܠܩܸܪܝܵܢܵܐ: ܕܵܡܹ̇ܐ ܗ̄ܘ̣ܵܐ ܐܲܝܟܼ ܐ̄ܢܵܫ ܕܲܚܛܝܼܦ. ܘܲܒܼܟܠ ܦܵܤܘܿܩܵܐ ܕܩܵܪܹܐ: ܙܲܒܼ̈ܢܵܬܼܵܐ ܤܲܓܝܼ̈ܐܵܬܼܵܐ ܢܵܦܹ̇ܠ ܗ̄ܘܑ̣ܵܐ ܥܲܠ ܐܲܦܵܘ̈ܗܝ. ܘܲܒܼܤܘܿܓܼܐܗܘܿܢ ܕܦܸܬܼܓܼܵܡܹ̈ܐ ܦܵܫܹ̇ܛ ܗ̄ܘ̣ܵܐ ܐܝܼܕܼܵܘ̈ܗܝ ܠܲܡܫܲܝܵܐ: ܘܲܡܫܲܒܲܚ ܗ̄ܘ̣ܵܐ ܙܲܒܼ̈ܢܵܬܼܵܐ ܤܲܓܝܼ̈ܐܵܬܼܵܐ. ܓܲܒܼܪܵܐ ܗ̄ܘ̣ܵܐ ܕܲܡܫܘܼܚܬܼܵܐ: ܐܲܝܟܼ ܒܲܪ ܐܲܪܒܿܥܝܼܢ ܫܢ̈ܝܼܢ. ܙܥܘܿܪܝܵܐ ܗ̄ܘ̣ܵܬܼ ܡܹܐܟܼܘܼܠܬܹܗ: ܘܝܲܒܿܝܼܫ ܗ̄ܘ̣ܵܐ: ܘܚܲܡܝܼܡ ܗ̄ܘ̣ܵܐ ܒܡܘܼܙܵܓܹܗ. ܘܡܸܛܠ ܗܵܝ̇ ܕܥܵܨܹ̇ܐ ܗ̄ܘ̣ܵܐ ܢܲܦܫܹܗ: ܐܸܡܲܬܼܝ ܕܠܵܐ ܡܩܲܒܸܿܠ ܗ̄ܘ̣ܵܐ ܓܘܼܫܡܹܗ: ܒܲܙܒܲܢ ܙܒܲܢ ܡܸܬܼܚܙܸܐ ܗ̄ܘ̣ܵܐ ܐܲܝܟܼ ܛܸܠܵܢܝܼܬܼܵܐ. ܥܕܲܡܵܐ ܕܚܵܐܹ̇ܣ ܗ̄ܘ̣ܵܐ ܐ̄ܢܵܫ ܥܠܵܘܗܝ ܡ̣ܢ ܡܚܝܼܠܘܼܬܼܵܐ ܕܦܲܪܨܘܿܦܹܗ: ܕܫܵܠܹ̇ܡ ܗ̄ܘ̣ܵܐ ܘܗܵܘܹ̇ܐ ܗ̄ܘ̣ܵܐ ܐܲܝܟܼ ܬܲܪܬܹܝܢ ܨܸܒܼ̈ܥܵܢ. ܐܸܡܹ̇ܪܹܬܼ ܠܹܗ ܐܸܢܵܐ ܙܲܒܼ̈ܢܵܬܼܵܐ ܤܲܓܝܼ̈ܐܵܬܼܵܐ: ܕܚܘܼܣ ܥܲܠ ܗܵܢܵܐ ܤܸܕܼܪܵܐ ܬܪܝܼܨܵܐ ܕܕܼܘܼܒܵܪܵܟܼ ܐܵܚܝ: ܘܥܲܠ ܗܵܕܹܐ ܐܘܼܪܚܵܐ ܫܲܦܝܼܪܬܵܐ ܕܲܠܒܼܝܼܟܼ ܐܲܢ̄ܬܿ: ܘܠܵܐ ܬܒܲܠܒܸܠ ܘܬܸܦܤܘܿܩ ܤܸܕܼܪܵܟܼ ܗܵܢܵܐ ܕܡܘܼܬܼ ܫܸܫܠ̱ܬܼܵܐ ܪܘܼܚܵܢܵܝܬܼܵܐ: ܡܸܛܠ ܝܲܥܢܘܼܬܼܵܐ ܕܩܲܠܝܼܠ ܥܲܡܠܵܐ ܝܲܬܝܼܪܵܐ ܕܡܵܘܤܸܦ ܐܲܢ̄ܬܿ: ܘܲܡܦܝܼܫ ܠܵܟܼ ܡ̣ܢ ܟ̱ܠܹܗ ܪܲܗܛܵܟܼ. ܐܲܟܼܘܿܠ ܒܲܡܫܘܼܚܬܼܵܐ: ܕܐܲܡܝܼܢܵܐܝܼܬܼ ܬܹܐܟܼܘܿܠ. ܘܠܵܐ ܬܲܤܓܸܐ ܗܠܲܟܼܬܼܵܟܼ ܡ̣ܢ ܚܲܝܠܵܟܼ: ܕܠܵܐ ܬܦܘܼܫ ܠܵܟܼ ܓܡܝܼܪܵܐܝܼܬܼ܀ ܘܲܡܪܲܚܡܵܢ ܗ̄ܘ̣ܵܐ ܓܹܝܪ ܘܡܸܬܼܟܲܚܕܼܵܢ ܤܲܓܝܼ: ܘܲܦܨܝܼܚܵܐܝܼܬܼ ܡܪܲܚܸܡ ܗ̄ܘ̣ܵܐ. ܘܲܫܦܸܐ ܡ̣ܢ ܟܝܵܢܹܗ ܘܲܕܼܠܝܼܠ ܠܲܦܝܵܤܵܐ ܤܲܓܝܼ: ܘܚܲܟܿܝܼܡ ܒܐܲܠܵܗܵܐ. ܘܡܸܛܠ ܫܲܦܝܼܘܼܬܹܗ ܘܲܦܨܝܼܚܘܼܬܹܗ: ܥܲܠ ܟܠܢܵܫ ܪܚܝܼܡ ܗ̄ܘ̣ܵܐ: ܘܟܼܠܢܵܫ ܡܲܚܸܒܼ ܗ̄ܘ̣ܵܐ ܠܹܗ. ܘܥܲܡ ܟܠܗܘܿܢ ܐܲܚܹ̈ܐ ܦܵܠܲܚ ܗ̄ܘܑ̣ܵܐ ܛܝܼܢܵܐ ܒܸܩ̈ܠܵܝܵܬܼܗܘܿܢ ܐܸܡܲܬܼܝ ܕܐܝܼܬܼ ܗ̄ܘ̣ܵܐ ܠܗܘܿܢ: ܐܝܼܬܼ ܕܲܬܼܠܵܬܼܵܐ: ܘܐܝܼܬܼ ܕܐܲܪܒܿܥܵܐ ܝܵܘ̈ܡܵܬܼܵܐ. ܘܡ̣ܢ pb. 142 ܪܲܡܫܵܐ ܠܪܲܡܫܵܐ ܐܵܬܹ̇ܐ ܗ̄ܘ̣ܵܐ ܠܩܸܠܵܝܬܹܗ: ܥܕܲܡܵܐ ܕܫܵܠܹ̇ܡ ܗ̄ܘ̣ܵܐ ܥ̇ܒܼܵܕܹܗ ܕܐܲܚܵܐ. ܛܵܒܼ ܡܦܵܣ ܗ̄ܘ̣ܵܐ ܒܲܥ̇ܒܼܵܕܼܵܐ ܗܵܢܵܐ. ܡܵܐ ܕܐܝܼܬܼ ܗ̄ܘ̣ܵܐ ܠܹܗ ܡܸܕܸܡ: ܐܵܦܸܢ ܛܵܒܼ ܤܢܝܼܩ ܗ̄ܘ̣ܵܐ ܥܠܵܘܗܝ: ܤܲܓܝܼ ܒܵܗܹ̇ܒܼ ܗ̄ܘ̣ܵܐ ܡ̣ܢ ܦܲܪ̈ܨܘܿܦܹܐ ܕܟܼܠ ܡܘܼ̈ܫܚܵܢ. ܘܠܵܐ ܡܨܸܐ ܗ̄ܘ̣ܵܐ ܐܵܡܲ݁ܪ: ܠܲܝܬܿ ܠܝܼ: ܐܵܘ ܕܠܝܼ ܡܸܬܼܒܿܥܸܐ. ܐܵܦ ܗܵܝ̇ ܕܢܵܦܹ̇ܩ ܗ̄ܘ̣ܵܐ ܡ̣ܢ ܩܸܠܵܝܬܹܗ ܒܐܲܡܝܼܢܘܼ ܠܲܥ̇ܒܼܵܕܼܵܐ ܕܐܲܚܹ̈ܐ: ܡܸܛܠ ܒܸܗܬܿܬܼܵܐ ܕܡ̣ܢ ܦܲܪ̈ܨܘܿܦܹܐ: ܕܥܵܨܹ̇ܐ ܗ̄ܘ̣ܵܐ ܢܲܦܫܹܗ ܟܲܕܼ ܠܵܐ ܡܢܵܚ ܗ̄ܘ̣ܵܐ ܠܡܸܦܲܩ: ܟܲܕܼ ܙܲܒܼ̈ܢܵܬܼܵܐ ܤܲܓܝܼ̈ܐܵܬܼܵܐ ܐܵܡܲ݁ܪ ܗ̄ܘ̣ܵܐ ܠܝܼ ܥܲܠ ܫܚܵܩܹܗ ܕܡܲܦܲܩܬܹܗ ܕܡ̣ܢ ܩܸܠܵܝܬܹܗ. ܗܵܠܹܝܢ ܗ̄ܘ̣ܵܘ ܕܘܼܒܵܪ̈ܵܘܗܝ ܐܲܠܵܗܵܝܹ̈ܐ ܕܐܲܚܵܐ ܗܵܘ̇ ܬܡܝܼܗܵܐ. ܕܤܵܒܼܵܐ ܐ̄ܚܪܹܢܵܐ. ܒܚܲܕܼ ܡ̣ܢ ܙܲܒܼ̈ܢܝܼܢ ܐܸܙܹ̇ܠܬܼ ܠܩܸܠܵܝܬܹܗ ܕܤܵܒܼܵܐ ܚܲܕܼ ܡ̣ܢ ܥܲܬܿܝܼ̈ܩܹܐ: ܐ̄ܢܵܫ ܡܝܲܬܿܪܵܐ: ܡܲܚܸܒܼ ܗ̄ܘ̣ܵܐ ܠܝܼ ܛܵܒܼ. ܩܲܠܝܼܠ ܕܹܝܢ ܗܸܕܼܝܘܿܛ ܗ̄ܘ̣ܵܐ ܒܡܸܠܬܹܗ: ܘܢܲܗܝܼܪ ܗ̄ܘ̣ܵܐ ܒܚܘܼܫܵܒܼܵܘ̈ܗܝ ܘܥܲܡܝܼܩ. ܘܡܸܕܸܡ ܕܐܵܬܹ̇ܐ ܗ̄ܘ̣ܵܐ ܠܹܗ: ܐܲܝܟܼ ܕܡ̣ܢ ܛܲܝܒܿܘܼܬܼܵܐ ܡܡܲܠܸܠ ܗ̄ܘ̣ܵܐ. ܘܠܵܐ ܥܓܲܠ ܢܵܦܹ̇ܩ ܗ̄ܘ̣ܵܐ ܡ̣ܢ ܩܸܠܵܝܬܹܗ: ܐܸܠܵܐ ܐܸܢ ܠܐ̄ܪ̈ܵܙܹܐ ܩܲܕܝܼ̈ܫܹܐ. ܐܲܡܝܼܢ ܗ̄ܘ̣ܵܐ ܠܘܵܬܼ ܢܲܦܫܹܗ: ܘܲܫܠܸܐ. ܘܐܸܡ̇ܪܹܬܼ ܠܹܗ: ܐܲܒܵܐ: ܐܵܬܹ̇ܐ ܠܝܼ ܚܘܼܫܵܒܼܵܐ: ܕܐܹܙܲܠ ܝܵܘܡܵܐ ܕܚܲܕܼܒܿܫܲܒܵܐ ܐܸܬܸܒܼ ܒܐܸܤܛܘܵܐ ܕܥܹܕܬܵܐ: ܘܐܹܟܼܘܿܠ ܡ̣ܢ ܨܲܦܪܵܐ. ܕܢܸܚܙܸܐ ܠܝܼ ܟܠ ܕܥܵܐ݂ܠ̇ ܘܢܵܦܹ̇ܿܩ: ܐܲܝܟܼ ܕܐܸܬܿܬܿܫܝܼܛ܀ ܐܵܡܲ݁ܪ ܠܝܼ ܤܵܒܼܵܐ: ܟܬܼܝܼܒܼ: ܕܡܲܢ ܕܡܲܟܼܫܸܠ ܠܥܵܠܡܵܝܹ̈ܐ: ܠܵܐ ܢܸܚܙܸܐ ܢܘܼܗܪܵܐ. ܠܵܟܼ ܕܹܝܢ: ܠܵܐ ܝܵܕܲܥ̇ ܐ̄ܢܵܫ ܒܐܲܬܼܪ̈ܵܘܵܬܼܵܐ ܥܵܠܹܝܢ: ܘܠܵܐ ܝܵܕܼܥ̇ܝܼܢ ܡܵܢ ܛܸܒܵܟܼ. ܘܐܵܡ̇ܪܝܼܢ: ܕܝܼܚܝܼܕܼܵܝܹ̈ܐ ܡ̣ܢ ܨܲܦܪܵܐ ܐܵܟܼܠܝܼܢ. ܘܝܲܬܝܼܪܵܐܝܼܬܼ ܕܐܝܼܬܼ ܐܲܚܹ̈ܐ ܫܲܪܘܵܝܹܐ: pb. 143 ܕܲܡܚܝܼܠܝܼܢ ܒܚܘܼܫܵܒܲܝ̈ܗܘܿܢ. ܤܲܓܝܼ̈ܐܹܐ ܕܹܝܢ ܡܸܢܗܘܿܢ: ܘܐܵܦ ܡܸܬܼܒܲܢܹܝܢ ܒܵܟܼ ܗܵܫܵܐ. ܘܟܲܕܼ ܚܵܙܹ̇ܝܢ ܠܵܟܼ: ܐܵܙ̇ܠ̄ܝܼܢ ܠܒܸܤܬܲܪܗܘܿܢ. ܐܲܒܼܵܗ̈ܬܼܵܐ ܩܲܕܼܝܼܡܵܝܹ̈ܐ ܥܵܒܼ̇ܕܝܼܢ ܗ̄ܘ̣ܵܘ ܤܘܼܥܪ̈ܵܢܹܐ ܕܐܲܝܟܼ ܗܵܠܹܝܢ: ܡܸܛܠ ܐܵܬܼ̈ܘܵܬܼܵܐ ܘܚܲܝ̈ܠܹܐ ܤܲܓܝܼ̈ܐܹܐ ܕܗܵܘܹ̇ܝܢ ܗ̄ܘ̣ܵܘ ܒܐܝܼܕܼܵܝ̈ܗܘܿܢ: ܘܡܸܛܠ ܫܡܵܐ ܘܐܝܼܩܵܪܵܐ ܪܲܒܵܐ ܕܐܝܼܬܼ ܗ̄ܘ̣ܵܐ ܠܗܘܿܢ. ܘܗܵܠܹܝܢ ܤܵܥ̇ܪܝܼܢ ܗ̄ܘ̣ܵܘ ܐ̄ܢܵܫ ܐ̄ܢܵܫ ܡܸܢܗܘܿܢ: ܐܲܝܟܼ ܕܢܸܬܿܬܿܫܝܼܛ ܘܢܸܬܼܩܲܦܲܚ: ܡܸܛܠ ܕܲܢܡܲܤܸܐ ܫܘܼܒܼܚܵܐ ܕܕܼܘܼܒܵܪ̈ܵܘܗܝ: ܐܲܝܟܼ ܕܢܲܪܚܸܩ ܡܸܢܹܗ ܥܸܠܬܼܵܐ ܕܪܵܡܘܼܬܼܵܐ. ܠܵܟܼ ܕܹܝܢ: ܐܲܝܕܵܐ ܐܵܢܲܢܩܹܐ ܐܵܠ̇ܨܵܐ ܠܵܟܼ ܕܬܸܥܒܸܕܼ ܗܵܕܹܐ؟ ܠܵܐ ܝܵܕܲܥ̇ ܐܲܢ̄ܬܿ: ܕܐܵܦ ܠܕܼܘܼܒܵܪܹ̈ܐ ܬܘܼܒܼ ܡܫܘܼܚܬܼܵܐ ܐܝܼܬܼ ܠܵܟܼ ܥܲܠ ܕܐܲܝܟܼ ܗܵܠܹܝܢ؟ ܠܵܐ ܕܘܼܒܵܪܵܐ ܦܪܝܼܫܵܐ ܐܝܼܬܼ ܠܵܟܼ: ܘܠܵܐ ܫܡܵܐ. ܐܲܝܟܼ ܫܲܪܟܵܐ ܗ̄ܘ̣ ܕܐܲܚܹ̈ܐ ܡܸܬܿܕܲܒܲܪ ܐܲܢ̄ܬܿ. ܒܲܕܼܓܼܘܼܢ: ܠܵܐ ܠܢܲܦܫܵܟܼ ܡܵܘܬܲܪ ܐܲܢ̄ܬܿ ܒܗܵܕܹܐ: ܘܐܵܦ ܠܲܐ̄ܚܪ̈ܵܢܹܐ ܡܲܚܤܲܪ ܐܲܢ̄ܬܿ. ܐܵܦ ܗܵܢܵܐ ܕܘܼܒܵܪܵܐ ܠܵܘ ܠܟܼܠܢܵܫ ܡܵܘܬܲܪ: ܐܸܠܵܐ ܐܸܢ ܠܐ̄ܢܵܫܵܐ ܪܵܘܪ̈ܒܹܐ ܘܲܓܼܡܝܼܪܹ̈ܐ. ܒܗܵܝ̇ ܕܫܲܪܝܘܼܬܼܵܐ ܕܪܸ̈ܓܼܫܹܐ ܐܝܼܬܼ ܒܹܗ. ܠܫܲܪ̈ܘܵܝܹܐ ܕܹܝܢ ܘܡܸܨ̈ܥܵܝܹܐ: ܪܵܘܪܒܼܵܐܝܼܬܼ ܡܲܚܤܲܪ. ܒܲܕܼܗܸܢܘܿܢ ܥܲܠ ܙܗܝܼܪܘܼܬܼܵܐ ܝܲܬܝܼܪ ܤܢܝܼܩܝܼܢ: ܘܥܲܠ ܟܘܼܒܵܫܵܐ ܕܪܸ̈ܓܼܫܹܐ. ܤܵܒܹ̈ܐ ܓܹܝܪ ܥܲܒܼܪܘܼܗ̇ ܠܲܢܛܘܼܪܬܵܐ: ܐܲܝܟܼ ܕܐܡܝܼܪ: ܘܡܸܬܿܬܲܓܿܪܝܼܢ ܒܟܼܠ ܡܵܐ ܕܨܵܒܹ̇ܝܢ: ܘܝܵܕܼܥܝܼܢ ܠܡܹܐܬܲܪ. ܬܲܓܵܪܵܐ ܗܸܕܼܝܘܿܛܵܐ: ܒܨܸܒܼ̈ܘܵܬܼܵܐ ܪܵܘܪ̈ܒܼܵܬܼܵܐ ܝܲܬܝܼܪܵܐܝܼܬܼ ܡܲܚܤܲܪ ܩܢܘܿܡܹܗ. ܒܲܒܼܨܝܼܪܵܬܼܵܐ ܕܹܝܢ: ܟܡܵܐ ܙܲܒܼ̈ܢܝܼܢ ܐܵܬܹ̇ܐ ܠܲܩܕܼܵܡܵܘܗܝ ܦܫܝܼܩܵܐܝܼܬܼ. ܒܲܕܼܓܼܘܿܢ ܐܲܝܟܼ ܕܐܸܡ̇ܪܹܬܼ: ܒܟܼܠ ܥ̇ܒܼܵܕܼܵܐ: ܡܫܘܼܚܬܼܵܐ ܐܝܼܬܼ. ܘܲܠܟܼܠ pb. 144 ܕܘܼܒܵܪܵܐ: ܙܲܒܼܢܵܐ ܝܑܼܕܼܝܼܥ. ܘܟܼܠ ܕܡ̣ܢ ܩܕܼܵܡ ܙܲܒܼܢܵܐ ܡܫܲܪܸܐ ܒܡܸܕܸܡ ܕܲܠܥܸܠ ܡ̣ܢ ܡܫܘܼܚܬܹܗ: ܤܘܼܓܦܵܢܵܐ ܥܵܦܹ̇ܐ: ܘܠܵܐ ܝܘܼܬܼܪܵܢܵܐ. ܐܸܢ ܗܵܕܹܐ ܪܓܼܝܼܓܼܵܐ ܠܵܟܼ: ܩܲܕܼܡܵܝܑܬܼ ܤܲܝܒܲܪ ܨܲܥܪܹ̈ܐ: ܕܲܡܦܲܪܢܤܵܐܝܼܬܼ ܐܵܬܹ̇ܝܢ ܥܠܲܝܟ ܒܠܵܐ ܨܸܒܼܝܵܢܵܟܼ: ܚܵܕܼܝܵܐܝܼܬܼ ܟܲܕܼ ܠܵܐ ܡܸܫܬܿܓܸܫ ܐܲܢ̄ܬܿ ܘܤܵܢܹ̇ܐ ܠܲܡܨܲܥܪ̈ܵܢܲܝܟܼ. ܕܤܵܒܼܵܐ ܐ̄ܚܪܹܢܵܐ. ܗܘܹ̇ܝܬܼ ܒܚܲܕܼ ܡ̣ܢ ܙܲܒܼ̈ܢܝܼܢ ܒܥܸܢܝܵܢܵܐ: ܥܲܡ ܗܵܘ̇ ܟܲܫܝܼܪܵܐ ܕܲܛܥܸܡ̣ ܡ̣ܢ ܐܝܼܠܵܢ ܚܲܝܹ̈ܐ ܒܕܼܘܼܥܬܼܵܐ ܢܲܦܫܵܢܵܝܬܼܵܐ: ܕܡ̣ܢ ܨܦܲܪ ܛܲܠܝܘܼܬܼܵܐ ܘܲܥܕܲܡܵܐ ܠܪܲܡܫܵܐ ܕܤܲܝܒܿܘܼܬܼܵܐ. ܘܡ̣ܢ ܒܵܬܲܪ ܡܸܠܹ̈ܐ ܤܲܓܝܼ̈ܐܵܬܼܵܐ ܕܐܲܠܦܲܢܝ ܥܲܠ ܡܝܲܬܿܪܘܼܬܼܵܐ: ܐܵܦ ܗܵܕܹܐ ܐܸܡ݂ܲܪ ܠܝܼ: ܕܟܼܠ ܨܠܘܿܬܼܵܐ: ܐܲܝܕܵܐ ܕܦܲܓܼܪܵܐ ܠܵܐ ܥܡܝܼܠ ܒܵܗ̇: ܘܠܸܒܵܐ ܒܵܗ̇ ܠܵܐ ܚܲܫܝܼܫ: ܚܲܝܛܵܐ ܕܠܵܐ ܢܲܦܫܵܐ ܬܸܚܫܘܿܒܼ ܠܵܗ̇ ܠܲܨܠܘܿܬܼܵܐ ܗܵܝ̇܀ ܬܘܼܒܼ ܐܸܡ݂ܲܪ ܠܝܼ: ܟܠ ܒܲܪܢܵܫܵܐ ܕܹܝܢ ܕܪܵܚܹ̇ܡ ܙܵܟܼܘܼܬܼܵܐ ܒܡܸܠܬܹܗ: ܘܲܥܪܝܼܡ ܒܬܲܪܥܝܼܬܹܗ: ܘܚܲܨܝܼܦ ܒܪܸ̈ܓܼܫܵܘܗܝ: ܠܲܓܼܡܵܪ ܥܲܡܹܗ ܠܵܐ ܬܸܬܼܥܢܸܐ. ܕܠܵܐ ܬܸܛܪܘܿܕܼ ܡܸܢܵܟܼ ܠܫܲܦܝܘܼܬܼܵܐ ܗܵܝ̇ ܕܲܒܼܥܲܡܠܹ̈ܐ ܩܢܲܝܬܵܗ̇: ܘܡܵܠܹ̇ܐ ܠܠܸܒܵܟܼ ܚܸܫܘܿܟܼܵܐ ܘܲܫܓܼܘܼܫܝܵܐ܀ ܐܸܙܹ̇ܠ̄ܬܼ ܒܲܙܒܲܢ ܠܩܸܠܵܝܬܼܵܐ ܕܐ̄ܢܵܫ ܡ̣ܢ ܐܲܒܼܵܗ̈ܬܼܵܐ. ܗ̤ܘ ܕܹܝܢ ܩܲܕܝܼܫܵܐ: ܠܵܐ ܥܓܲܠ ܦܵܬܲܚ ܗ̄ܘ̣ܵܐ ܠܐ̄ܢܵܫ. ܘܟܲܕܼ ܚ̣ܙܵܢܝ ܡ̣ܢ ܟܵܘܬܵܐ ܕܐܸܢܵܐ ܐܝܼܬܲܝ: ܐܸܡ݂ܲܪ ܠܝܼ: ܠܡܸܥܲܠ ܒܵܥܹ̇ܐ ܐܲܢ̄ܬܿ؟ ܘܐܸܡ̇ܪܹܬܼ ܠܹܗ: ܐܹܝܢ. ܘܡ̣ܢ ܒܵܬܲܪ ܕܥܸܠܹ̇ܬܼ ܘܨܲܠܝܼܢܲܢ ܘܝܼܬܸܒܼܢܲܢ: ܘܡܲܠܸܠ̣ ܥܲܡܝ ܥܲܠ ܤܲܓܝܼ̈ܐܵܬܼܵܐ. ܠܚܲܪܬܼܵܐ ܫܲܐܸܠ̇ܬܹܗ ܐܵܦ ܗܵܕܹܐ ܘܐܸܡ̇ܪܹܬܼ: ܕܡܵܢܵܐ ܐܸܥܒܸܿܕܼ ܐܘܿ ܡܵܪܝ؟ ܕܐܝܼܬܼ ܐ̄ܢܵܫ̈ܝܼܢ ܕܒܲܐܡܝܼܢܘܼ ܥܵܐ̇ܠܝܼܢ ܠܘܵܬܼܝ: ܘܠܵܐ ܝܵܬܲܪ pb. 145 ܐ̄ܢܵܐ ܒܥܸܢܝܵܢܗܘܿܢ. ܘܕܐܹܡܲܪ ܠܗܘܿܢ ܕܠܵܐ ܢܸܥܠܘܼܢ: ܡܸܬܼܚܲܡܲܨ ܐ̄ܢܵܐ. ܐܸܠܵܐ ܘܐܵܦ ܡܒܲܛܠܝܼܢ ܠܝܼ ܘܡ̣ܢ ܬܸܫܡ̈ܫܵܬܼܵܐ ܕܲܥܝܵܕܼܵܐ ܟܡܵܐ ܙܲܒܼ̈ܢܝܼܢ. ܘܕܹܐܡܲܪ ܠܗܘܿܢ ܓܲܠܝܵܐܝܼܬܼ: ܠܵܐ ܡܸܫܟܲܚ ܐ̄ܢܵܐ. ܘܲܫܚܝܼܩ ܐ̄ܢܵܐ ܤܲܓܝܼ: ܒܫܲܪܒܵܐ ܗܵܢܵܐ܀ ܘܐܸܡ݂ܲܪ ܠܝܼ ܗܵܘ̇ ܛܘܼܒܼܵܢܵܐ: ܐܸܡܲܬܼܝ ܕܥܵܐ̇ܠܝܼܢ ܠܘܵܬܼܵܟܼ ܐ̄ܢܵܫܵܐ ܕܐܲܝܟܼ ܗܵܠܹܝܢ: ܪ̈ܵܚܡܲܝ ܒܸܛܠܵܢܵܐ ܘܲܡܦܲܪ̈ܩܲܝ ܤܪ̈ܝܼܩܵܬܼܵܐ: ܡܵܐ ܕܝܼܬܸܒܼܘ ܩܲܠܝܼܠ: ܥܒܸܕܼ ܢܲܦܫܵܟܼ ܐܲܝܟܼ ܡܲܢ ܕܨܵܒܹ̇ܐ ܐܲܢ̄ܬܿ ܠܲܡܩܵܡ ܠܬܸܫܡܸܫܬܼܵܐ. ܘܐܸܡܲܪ ܠܹܗ ܠܗܵܘ̇ ܡܲܢ̣ܘܼ: ܒܡܵܛܘܿܢܝܼܵܐ: ܐܵܚܝ: ܩܘܼܡ ܢܫܲܡܸܫ ܬܸܫܡܸܫܬܼܵܐ. ܡܸܛܠ ܕܥܸܕܵܢܵܐ ܕܬܸܫܡܸܫܬܿܝ ܕܝܼܠܝ ܡܲܛܝܼ ܠܹܗ: ܘܠܵܐ ܡܨܸܐ ܐ̄ܢܵܐ ܕܐܲܥܒܿܪܝܼܗ̇. ܘܐܸܠܵܐ: ܗܵܘܹ̇ܐ ܠܝܼ ܝܘܼܩܪܵܐ ܠܡܲܩܵܦܘܼ ܥܠܵܘܗܝ ܥܸܕܵܢܵܐ ܐ̄ܚܪܹܢܵܐ. ܘܗܵܘ̇ܝܵܐ ܠܝܼ ܗܵܕܹܐ: ܥܸܠܬܼܵܐ ܠܕܼܘܼܘܵܕܼܵܐ. ܘܲܠܡܸܫܒܲܩ ܡܸܢܗܘܿܢ: ܠܵܐ ܡܨܸܐ ܐ̄ܢܵܐ ܒܸܠܥܵܕܼ ܡ̣ܢ ܐܵܢܲܢܩܹܐ. ܗܵܫܵܐ ܕܹܝܢ: ܠܲܝܬܿ ܠܲܢ ܥܸܠܬܼܵܐ ܐܵܢܲܢܩܵܝܬܼܵܐ ܠܲܡܒܲܛܵܠܘܼ ܥܸܕܵܢܵܐ. ܘܠܵܐ ܬܸܫܒܿܩܝܼܘܗܝ ܟܠ ܟ̱ܠܹܗ: ܥܕܲܡܵܐ ܕܩܵܐܹ̇ܡ ܥܲܡܵܟܼ ܠܬܸܫܡܸܫܬܼܵܐ. ܘܐܸܢ ܐܵܡܲ݁ܪ: ܡܸܟܹܝܠ ܫܲܡܸܫ ܐܲܢ̄ܬܿ: ܕܐܸܢܵܐ ܐܹܙܲܠ: ܐܲܪܡܵܐ ܠܹܗ ܡܵܛܘܿܢܝܼܵܐ ܘܐܸܡ݂ܲܪ: ܫܲܡܠܵܐ ܥܲܡܝ ܚܘܼܒܵܐ: ܘܫܲܡܸܫ ܥܲܡܝ ܗܵܕܹܐ ܚܕܼܵܐ ܬܸܫܡܸܫܬܼܵܐ: ܕܐܸܬܼܥܲܕܲܪ ܒܲܨܠܘܿܬܼܵܟܼ. ܘܡܵܐ ܕܐܸܬܿܛܦܝܼܣ ܘܩܵܡܬܘܿܢ: ܐܵܘܪܸܟܹܝܗ̇ ܠܬܸܫܡܸܫܵܟܼ ܝܲܬܝܼܪ ܡ̣ܢ ܥܝܵܕܼܵܟ. ܘܗܵܟܲܢ ܬܸܥܒܸܕܼ ܠܗܘܿܢ ܟܠ ܐܸܡܲܬܼܝ ܕܥܵܐܹ̇ܝܼܢ. ܘܡܵܐ ܕܲܚ̣ܙܵܘ ܕܠܵܘ ܒܲܪ ܪܸܥܝܵܢܗܘܿܢ ܐܲܢ̄ܬܿ ܘܪܵܚܹ̇ܡ ܒܸܛܠܵܢܵܐ: ܬܘܼܒܼ ܠܐܲܝܟܵܐ ܕܫܵܡ̇ܥܝܼܢ ܕܝܼܬܲܝܟ ܐܲܢ̄ܬܿ: ܠܬܲܡܵܢ ܠܵܐ ܡܸܬܼܩܲܪܒܼܝܼܢ. ܚܙܝܼ: ܠܵܐ ܬܸܤܲܒܼ ܒܦܲܪܨܘܼܦܵܐ ܕܐ̄ܢܵܫ: ܘܲܬܼܒܲܛܸܠ ܡ̣ܢ ܥܒܼܵܕܼܵܘ̈ܗܝ ܕܐܲܠܵܗܵܐ. ܐܸܢܕܹܝܢ ܐ̄ܢܵܫ ܗ̄ܘ̣ ܡ̣ܢ ܐܲܒܼܵܗ̈ܵܬܼܵܐ: ܐܵܘ ܐܲܚܵܐ ܐܲܟܼܤܢܵܝܵܐ ܕܲܠܐܸܐ: ܬܸܫܡܸܫܬܼܵܐ pb. 146 ܪܲܒܿܬܼܵܐ ܬܸܬܼܚܫܸܒܼ ܠܵܟܼ: ܗ̤ܝ ܗܵܕܹܐ ܕܲܬܼܟܲܬܲܪ ܒܥܸܢܝܵܢܹܗ. ܐܸܢ ܕܹܝܢ ܐܵܦ ܗ̤ܘ ܐܲܟܼܤܢܵܝܵܐ ܡ̣ܢ ܗܵܠܹܝܢ ܗ̄ܘ̣ ܕܪܵܚܹ̇ܡ ܡܸܠܹ̈ܐ ܒܲܛ̈ܵܠܵܬܼܵܐ: ܐܲܢܝܼܚܲܝܗܝ ܒܡܵܐ ܕܲܡܨܸܐ ܐܲܢ̄ܬܿ: ܘܒܲܥܓܲܠ ܫܪܝܼܘܗܝ܀ ܐܸܡ݂ܲܪ ܠܝܼ ܒܲܙܒܲܢ ܐ̄ܢܵܫ ܡ̣ܢ ܩܲܕܝܼ̈ܫܹܐ: ܕܡܸܬܿܕܲܡܲܪ ܐ̄ܢܵܐ ܕܫܵܡܲܥ ܐ̄ܢܵܐ ܕܐܝܼܬܼ ܐ̄ܢܵܫܵܐ ܕܦܵܠ̇ܚܝܼܢ ܒܩܸ̈ܠܵܝܵܬܼܗܘܿܢ ܡܸܕܸܡ ܦܘܼܠܚܵܢܵܐ: ܘܲܡܫܲܡܠܹܝܢ ܐܵܦ ܩܵܢܘܿܢܹ̈ܐ ܕܩܸܠܵܝܬܼܵܐ ܕܠܵܐ ܒܘܼܨܵܪ: ܘܡܲܨܝܵܐ ܕܠܵܐ ܡܸܬܿܕܵܘܕܼܝܼܢ. ܘܐܸܡ݂ܲܪ ܡܸܠܬܼܵܐ ܕܫܵܘ̇ܝܵܐ ܠܕܼܘܼܡܵܪܵܐ. ܕܐܲܝܟܼ ܕܒܲܫܪܵܪܵܐ ܐܵܡܲ݁ܪܢܵܐ: ܕܐܸܢܵܐ ܐܵܦ ܠܡܹܐܙܲܠ ܠܲܕܼܪܵܝ ܡܲܝ̈ܵܐ: ܡܸܬܿܕܵܘܲܕܼ ܐ̄ܢܵܐ ܡ̣ܢ ܛܲܟܼܤܵܐ ܕܲܥܝܼܕܼܵܐ. ܐܲܝܟܼ ܡܲܢ ܕܐܸܬܼܥܵܘ̇ܟܹܬܼ ܠܝܼ ܒܤܘܼܥܪܵܢܵܐ: ܘܡ̣ܢ ܫܘܼܡܠܵܝܵܐ ܕܦܘܼܪ̈ܫܵܢܹܐ ܕܐܝܼܬܼ ܠܝܼ. ܐܸܫܬܲܐܲܠ ܤܵܒܼܵܐ ܡ̣ܢ ܐܲܚܵܐ: ܕܡܵܢܵܐ ܐܸܥܒܸܿܕܼ: ܕܲܟܼܡܵܐ ܙܲܒܼ̈ܢܝܼܢ ܐܝܼܬܼ ܠܝܼ ܨܒܘܼܬܼܵܐ ܘܲܤܢܝܼܩ ܐ̄ܢܵܐ ܥܠܹܝܗ̇: ܐܵܘ ܡܸܛܠ ܟܘܼܪܗܵܢܵܐ: ܐܵܘ ܡܸܛܠ ܦܘܼܠܚܵܢܵܐ: ܐܵܘ ܡܸܛܠ ܥܸܠܬܼܵܐ ܐܲܝܕܵܐ ܕܗ̤ܝ: ܐܲܝܟܲܢܵܐ ܕܥܲܡ ܥܘܼܕܼܪܵܢܵܐ ܕܡ̣ܢ ܚܫܲܚܬܼܵܗ̇ ܕܝܼܠܵܗ̇ ܡܸܫܟܲܚ ܐ̄ܢܵܐ ܠܡܸܬܿܕܲܒܵܪܘܼ ܒܫܸܠܝܵܐ ܚܲܤܝܼܪ ܝܲܬܝܼܪ. ܘܚܵܙܹ̇ܐ ܐ̄ܢܵܐ ܐ̄ܢܵܫ ܕܲܤܢܝܼܩ ܐܲܟܼܘܵܬܼܝ: ܘܡܸܙܕܟܸܐ ܐ̄ܢܵܐ ܡ̣ܢ ܡܪܲܚܡܵܢܘܼܬܼܵܐ: ܘܝܵܗܹ̇ܒܼܢܵܐ ܠܹܗ. ܐܵܘ ܢܸܫܐܠܝܼܗ̇ ܡܹܢܝ ܐ̄ܢܵܫ: ܘܡܸܬܼܐܠܸܨ ܐ̄ܢܵܐ ܡ̣ܢ ܚܘܼܒܵܐ ܘܡ̣ܢ ܦܘܼܩܕܵܢܵܐ: ܘܝܵܗܹ̇ܒܼ ܐ̄ܢܵܐ ܠܹܗ. ܘܒܼܵܬܲܪܟܸܢ: ܡܸܤܬܢܸܩ ܐ̄ܢܵܐ ܥܲܠ ܨܒܼܘܼܬܼܵܐ. ܘܗ̤ܝ ܤܢܝܼܩܘܼܬܼܝ ܕܲܥܠܹܝܗ̇ ܪܵܡ̇ܝܵܐ ܠܝܼ ܒܨܸܦܬܼܵܐ ܘܲܒܼܕܼܘܼܘܵܕܼܵܐ ܘܒܲܫܓܼܘܼܫܝܵܐ ܕܚܘܼ̈ܫܵܒܹܐ: ܘܡܲܦܪ̱ܕܼܵܐ ܡܹܢܝ ܠܟܼܘܼܢܵܫܵܐ ܕܪܸܥܝܵܢܝ: ܘܪܸܢܝܵܐ ܕܲܒܼܗܵܠܹܝܢ ܕܲܥܝܵܕܼܵܐ ܕܦܘܼܠܚܵܢ ܫܸܠܝܵܐ. ܐܲܝܟܲܢܵܐ ܕܲܟܼܡܵܐ ܙܲܒܼ̈ܢܝܼܢ ܡܸܬܼܐܠܸܨ ܐ̄ܢܵܐ ܘܐܵܦ pb. 147 ܠܡܸܦܲܩ ܡ̣ܢ ܫܸܠܝܵܐ: ܘܲܠܡܸܗܘܵܐ ܒܲܒܼܥܵܬܼܵܗ̇ ܕܲܨܒܼܘܼܬܼܵܐ. ܘܐܸܢ ܬܘܼܒܼ ܡܚܲܡܤܸܢ ܐ̄ܢܵܐ ܕܠܵܐ ܐܸܦܘܿܩ: ܒܐܘܠܨܵܢܵܐ ܪܲܒܵܐ ܘܲܒܼܒܼܘܼܠܒܵܠܵܐ ܕܬܲܪܥܝܼܬܼܵܐ ܗܵܘܹ̇ܐ ܐ̄ܢܵܐ. ܘܡܸܛܠܵܬܹܗ ܕܤܘܼܥܪܵܢܵܐ: ܫܚܝܼܩ ܐ̄ܢܵܐ ܒܐܲܡܝܼܢܘܼ ܘܲܕܼܠܝܼܚ. ܘܠܵܐ ܝܵܕܲܥܢܵܐ ܐܲܝܕܵܐ ܡ̣ܢ ܬܲܪ̈ܬܲܝܗܹܝܢ ܐܸܓܼܒܸܿܐ ܠܝܼ: ܠܗܵܝ̇ ܕܲܡܒܲܛܠܵܐ ܘܲܡܦܲܠܗܕܼܵܐ ܠܫܲܝܘܼܬܼܝ ܡܸܛܠ ܢܝܵܚܵܐ ܕܩܲܪ̈ܝܼܒܲܝ: ܐܵܘ ܕܐܲܗܡܸܐ ܡ̣ܢ ܗܵܕܹܐ ܡܸܛܠ ܕܐܹܚܲܡܤܸܢ ܒܫܸܠܝܵܐ ܘܲܡܤܲܪܩܘܼܬܼܵܐ: ܘܐܹܨܲܦ ܕܲܙܥܘܿܪ̈ܝܵܬܼܵܐ ܒܲܠܚܘܿܕܼ ܕܢܲܦܫܝ: ܟܲܕܼ ܠܵܐ ܪܡܸܐ ܠܝܼ ܠܡܸܦܲܠ ܒܡܲܪ̈ܢܝܵܬܼܵܐ ܤܲܓܼܝܼ̈ܐܵܬܼܵܐ ܘܲܒܼܨܸܦܬܼܵܐ ܡܸܛܠ ܐ̄ܢܵܫ܀ ܕܥܲܠ ܗܵܕܹܐ ܕܐܹܠܲܦ ܒܵܥܹ̇ܢܵܐ ܗܵܝ̇ ܕܫܲܦܝܼܪܵܐ: ܘܝܲܬܝܼܪ ܡܩܲܒܿܠܵܐ܀ ܘܦܲܢܝܼ ܤܵܒܼܵܐ ܘܐܸܡ݂ܲܪ: ܟܠ ܡܪܲܚܡܵܢܘܼܬܼܵܐ ܕܹܝܢ ܐܵܘ ܚܘܼܒܵܐ: ܐܵܘ ܙܸܕܼܩܬܼܵܐ: ܐܵܘ ܡܵܘܗܲܒܼܬܼܵܐ: ܘܐܲܝܕܵܐ ܕܗ̤ܝ ܘܵܠܝܼܬܼܵܐ: ܐܵܘ ܤܘܼܥܪܵܢܵܐ ܕܡܸܤܬܒܲܪ ܕܕܲܐܠܵܗܵܐ ܗ̄ܘ̣: ܕܲܡܒܲܛܸܠ ܠܵܟܼ ܡ̣ܢ ܫܸܠܝܵܐ: ܘܢܵܤܹ̇ܒܼ ܡܸܢܵܟܼ ܡܪܝܼܡܘܼܬܼܵܐ ܕܡ̣ܢ ܥܵܠܡܵܐ: ܘܪܵܡܹ̇ܐ ܠܵܟܼ ܒܨܸܦܬܼܵܐ: ܘܲܡܕܼܵܘܸܕܼ ܠܵܟܼ ܒܡܲܪܢܝܼܬܹܗ ܡ̣ܢ ܪܸܢܝܵܟܼ ܕܒܲܐܠܵܗܵܐ: ܘܦܵܤܹ̇ܩ ܠܤܸܕܼܪܵܐ ܕܲܨ̈ܠܵܘܵܬܼܵܟܼ: ܘܡܲܥܸܠ ܥܠܲܝܟ ܫܓܼܘܼܫܝܵܐ ܕܚܘܼ̈ܫܵܒܹܐ: ܘܢܵܤܹ̇ܒܼ ܡܸܢܵܟܼ ܥܸܢܝܵܢܵܐ ܟܢܝܼܫܵܐ ܕܩܸܪܝܵܢܵܐ ܘܫܲܝܢܵܐ ܕܡ̣ܢ ܦܸܗܝܵܐ: ܘܫܵܪܹܐ ܙܗܝܼܪܘܼܬܼܵܟܼ: ܘܥܵܒܹ̇ܕܼ ܠܵܟܼ ܚܠܵܦ ܐܲܤܝܼܪܵܐ ܗܲܠܵܟܼܵܐ: ܘܡ̣ܢ ܝܼܚܝܼܕܼܵܝܵܐ ܚܠܝܼܛܵܐ: ܘܲܡܥܝܼܪ ܥܠܲܝܟ ܚܲܫܹ̈ܐ ܩܒܼܝܼܪܹ̈ܐ: ܘܫܵܪܹܐ ܢܙܝܼܪܘܼܬܼܵܐ ܕܪܸ̈ܓܼܫܲܝܟ: ܘܲܡܢܲܚܸܡ ܡܝܼܬܼܘܼܬܼܵܟܼ ܕܡ̣ܢ ܥܵܠܡܵܐ: ܘܲܡܬܲܚܬܸܐ ܠܵܟܼ ܡ̣ܢ ܦܘܼܠܚܵܢܵܐ ܕܡܲܠܲܐܟܹ̈ܐ: ܕܐܝܼܬܼܵܘܗܝ ܪܸܢܝܵܐ ܝܼܚܝܼܕܼܵܝܵܐ ܕܲܒܼܚܲܕܼ: ܘܲܡܩܝܼܡ ܠܵܟܼ ܒܲܡܢܵܬܼܵܐ ܕܬܸܫܡܸܫܬܼܵܐ ܕܥܵܠܡܵܝܹ̈ܐ: ܬܹܐܒܲܕܼ ܙܲܕܝܼܩܘܼܬܼܵܐ ܗܵܝ̇. ܠܲܡܫܲܠܵܡܘܼ ܕܹܝܢ ܙܸܕܼܩܹ̈ܐ ܕܚܘܼܒܵܐ ܠܘܵܬܼ ܩܲܪܝܼܒܼܵܐ ܒܲܢܵܚܹ̈ܐ ܕܦܲܓܼܪ̈ܵܢܵܝܵܬܼܵܐ: ܦܘܼܠܚܵܢܵܐ ܗ̄ܘ̣ ܕܥܵܠܡܵܝܹ̈ܐ. ܐܵܘ ܟܹܝܬܼ pb. 148 ܕܝܼܚܝܼ̈ܕܵܝܹܐ ܗܵܠܹܝܢ ܕܲܒܼܨܝܼܪܝܼܢ ܡ̣ܢ ܦܘܼܠܚܵܢܵܐ ܕܲܒܼܫܸܠܝܵܐ: ܐܵܘ ܐܲܚܝܼܕܼܝܼܢ ܫܸܠܝܵܐ ܚܠܝܼܛܵܐ ܒܐܵܘܝܘܼܬܼܵܐ ܕܥܲܡ ܚܕܵܪܪܹ̈ܐ: ܘܡܲܥܠܵܐ ܘܡܲܦܩܵܐ ܐܲܡܝܼܢܵܐ܀ ܝܑܼܚܝܼ̈ܕܵܝܹܐ ܕܹܝܢ ܐܲܝܠܹܝܢ ܕܚܲܬܿܝܼܬܵܐܝܼܬܼ ܡܪܝܼܡܘܼܬܼܵܐ ܕܡ̣ܢ ܥܵܠܡܵܐ ܓܒܼܵܘ ܒܦܲܓܼܪܵܐ ܘܲܒܼܪܸܥܝܵܢܵܐ: ܠܲܡܩܵܡܘܼ ܒܗܵܘܢܗܘܿܢ ܨܠܘܿܬܼܵܐ ܝܑܼܚܝܼܕܵܝܬܼܵܐ ܕܡܝܼܬܼܘܼܬܼܵܐ ܕܡ̣ܢ ܥܵܒܼܘܿܪ̈ܝܵܬܼܵܐ: ܘܡ̣ܢ ܪܸܢܝܵܐ ܕܟܼܠ ܤܘܼܥܪܵܢ: ܘܲܚܙܵܬܼܵܐ ܘܥܘܼܗܕܵܢܵܐ ܕܨܸܒܼ̈ܘܵܬܼܵܐ: ܠܲܡܫܝܼܚܵܐ: ܠܵܐ ܗ̄ܘ̣ܵܐ ܒܦܘܼܠܚܵܢܵܐ ܕܗܵܠܹܝܢ ܦܲܓܼܪ̈ܵܢܵܝܵܬܼܵܐ ܘܙܲܕܝܼܩܘܼܬܼܵܐ ܕܤܘܼܗܪ̈ܵܢܹܐ ܓܠܲܝ̈ܵܐ: ܘܲܒܼܡܸܨܥܵܝܘܼܬܼܵܐ ܕܦܲܪ̈ܨܘܿܦܹܐ: ܐܲܝܟܼ ܕܲܒܼܗܘܿܢ ܢܸܙܕܲܕܩܘܼܢ ܡܫܲܡܫܝܼܢ ܠܹܗ: ܐܸܠܵܐ ܒܡܝܼܬܼܘܼܬܼܵܐ ܕܗܲܕܵܡܲܝ̈ܗܘܿܢ ܕܒܲܐܪܥܵܐ: ܐܲܝܟܼ ܡܸܠܬܹܗ ܕܲܫܠܝܼܚܵܐ: ܟܲܕܼ ܡܩܲܪܒܼܝܼܢ ܒܟܼܠܥܸܕܵܢ ܕܸܒܼ̈ܚܹܐ ܕܟܲܝ̈ܵܐ ܕܚܘܼܫܵܒܲܝ̈ܗܘܿܢ ܪܹܫܝܼܬܼܵܐ ܪܹܫܝܼܬܼܵܐ ܕܦܘܼܠܚܵܢܗܘܿܢ: ܘܚܲܫܹ̈ܐ ܕܦܲܓܼܪ̈ܲܝܗܘܿܢ ܒܲܡܤܲܝܒܿܪܵܢܘܼܬܼܵܐ ܕܐܘܼ̈ܠܨܵܢܹܐ ܕܲܚܠܵܦ ܤܲܒܼܪܵܐ ܗܵܘ̇ ܕܲܡܤܲܟܹܝܢ. ܠܡܲܪܦܵܝܘܼ ܦܘܼܠܚܵܢܵܐ ܕܲܫܡܲܝܵܢ̈ܝܵܬܼܵܐ: ܘܲܠܡܸܬܿܬܲܓܵܪܘܼ ܙܲܕܝܩܘܼܬܼܵܐ ܒܨܸܒܼ̈ܘܵܬܼܵܐ ܕܡ̣ܢ ܐܲܪܥܵܐ܀ ܐܸܬܼܪܫܝܼ ܐܲܚܵܐ ܕܲܢܦܲܢܸܣ ܡ̣ܢ ܡܵܐ ܕܐܝܼܬܼ ܠܹܗ: ܒܤܘܼܥܪ̈ܵܢܹܐ ܕܲܤܢܝܼ̈ܩܹܐ. ܘܦܲܢܝܼ ܚܬܼܝܼܪܵܐܝܼܬܼ: ܕܝܼܚܝܼ̈ܕܼܵܝܹܐ ܡ̇ܢ: ܩܲܪܝܼܒܼܝܼܢ ܠܘܵܬܼ ܙܸܕܼܩܬܼܵܐ. ܐܵܡܲ݁ܪ ܠܹܗ ܗܵܘ̇ ܕܲܪܫܵܝܗܝ: ܝܑܼܕܲܝܼܥ ܗ̄ܘ̇ ܝܼ̇ܚܝܼܕܼܵܝܵܐ ܐܲܝܢܵܐ ܕܠܵܐ ܩܲܪܝܼܒܼ ܠܘܵܬܼ ܙܸܕܼܩܬܼܵܐ. ܐܲܝܢܵܐ ܕܲܒܼܓܲܠܝܘܼܬܼ ܐܲܦܹ̈ܐ ܡܸܫܟܲܚ ܠܡܹܐܡܲܪ ܠܘܵܬܼ ܡܵܪܲܢ: ܐܲܝܟܼ ܗܵܝ̇ ܕܐܲܡܝܼܪܵܐ: ܕܗܵܐ ܚܢܲܢ ܫܒܲܩܢ ܟܠܡܸܕܸܡ ܘܐܸܬܲܝܢ ܒܵܬܼܪܵܟܼ: ܗܵܢܵܘ ܕܹܝܢ: ܗܵܘ̇ ܕܠܵܐ ܩܢܸܐ ܡܸܕܸܡ pb. 149 ܒܐܲܪܥܵܐ: ܘܠܵܐ ܥܵܡܹ̇ܠ ܒܦܲܓܼܪܹܗ ܒܐܲܪ̈ܥܵܢܵܝܬܼܵܐ: ܘܠܵܐ ܫܩܝܼܠ ܒܡܲܪܢܝܼܬܹܗ ܨܸܦܬܼܵܐ ܕܡܸܕܸܡ ܒܬܹܒܹܝܠ ܡ̣ܢ ܗܵܠܹܝܢ ܡܸܬܼܚܲܙܝܵܢ̈ܝܵܬܼܵܐ: ܘܠܵܐ ܚܵܐܲܪ ܠܡܸܩܢܵܐ. ܡܵܐ ܕܡܸܬܼܩܲܪܲܒܼ ܠܹܗ ܕܹܝܢ ܡ̣ܢ ܐ̄ܢܵܫܵ: ܡܸܤܲܬܼ ܤܘܼܢܩܵܢܹܗ ܒܲܠܚܘܿܕܼ ܡܩܲܒܸܠ: ܒܲܕܼܫܲܪܟܵܐ ܕܹܝܢ ܐܵܦܵܠܐ ܚܵܐܲܪ. ܘܐܘܼܬܼܵܘܗܝ ܐܲܝܟܼ ܦܵܪܲܚܬܼܵܐ ܒܗܘܼܦܵܟܼܵܘ̈ܗܝ: ܗܵܢܵܘ ܕܠܵܐ ܩܲܪܝܼܒܼ ܠܡܸܥܒܲܕܼ ܙܸܕܼܩܬܼܵܐ: ܒܗܵܝ̇ ܕܐܼܝܼܬܼ ܠܹܗ ܦܘܼܠܚܵܢܵܐ ܕܲܡܝܲܬܲܪ ܡ̣ܢ ܙܸܕܼܩܬܼܵܐ. ܡ̣ܢ ܗܵܘ̇ ܡܸܕܸܡ ܕܗ̤ܘ ܡܚܲܪܲܪ: ܠܐ̄ܚܪ̈ܵܢܹܐ ܐܲܝܟܲܢܵܐ ܢܸܬܸܠ؟ ܟܡܵܐ ܕܹܝܢ ܕܐ̄ܢܵܫ ܦܵܠܲܚ ܒܐܝܼܕܼܵܘ̈ܗܝ: ܘܲܡܩܲܒܸܿܠ ܐܵܦ ܡ̣ܢ ܐ̄ܚܪ̈ܵܢܹܐ: ܐܵܦ ܙܸܕܼܩܬܼܵܐ ܚܲܝܵܒܼ ܠܡܸܥܒܲܕܼ. ܡܲܗܡܝܵܢܘܼܬܼܵܐ ܕܹܝܢ ܕܡܸܢܵܗ̇: ܥܒܼܘܼܪܝܵܐ ܗ̄ܘ̣ ܓܲܠܝܵܐ ܕܥܲܠ ܦܘܼܩܕܵܢܹܐ ܕܐܲܠܵܗܵܐ. ܐܸܢܕܹܝܢ ܒܟܲܤ̈ܝܵܬܼܵܐ ܠܵܐ ܡܸܬܼܝܲܬܲܪ ܠܘܵܬܼ ܐܲܠܵܗܵܐ: ܘܠܵܐ ܝܵܕܲܥ ܠܡܸܦܠܲܚ ܠܐܲܠܵܗܵܐ ܒܪܘܼܚ: ܘܡ̣ܢ ܗܵܠܹܝܢ ܓܲܠ̈ܝܵܬܼܵܐ ܬܘܼܒܼ ܕܡܸܫܟܲܚ ܒܵܤܹ̇ܐ: ܐܲܝܢܵܐ ܤܲܒܼܪܵܐ ܐ̄ܚܪܹܢܵܐ ܐܝܼܬܼ ܠܹܗ ܬܘܼܒܼ: ܕܒܹܗ ܢܸܩܢܸܐ ܚܲܝܵܘ̈ܗ؟ ܗܵܢܵܐ ܚܪܸܡ ܗ̄ܘ̣. ܬܘܼܒܼ ܡܲܪܬܿܝܵܢܘܼܬܼܵܐ ܕܚܲܕܼ ܡ̣ܢ ܐܲܒܼܵܗ̈ܵܬܼܵܐ ܕܥܲܠ ܫܲܠܝܘܼܬܼܵܐ ܬܪܝܼܨܬܵܐ. ܬܘܼܒܼ ܐܸܡ݂ܲܪ ܐ̄ܚܪܹܢܵܐ: ܕܡܸܬܿܕܲܡܲܪ ܐ̄ܢܵܐ ܒܗܵܠܹܝܢ ܕܫܵܓܼ̇ܫܝܼܢ ܢܲܦܫܗܘܿܢ ܒܕܼܘܼܒܵܪܹ̈ܐ ܕܫܸܠܝܵܐ: ܡܸܛܠ ܗܵܝ̇ ܕܨܵܒܹ̇ܝܢ ܕܲܢܢܝܼܚܘܼܢ ܠܲܐ̄ܚܪ̈ܵܢܹܐ ܒܦܲܓܼܪ̈ܵܢܵܝܵܬܼܵܐ܀ ܬܘܼܒܼ ܐܵܡܲ݁ܪ: ܕܠܵܐ ܙܵܕܹܩ ܠܲܡܚܲܠܛܘܼ ܥܲܡ ܦܘܼܠܚܵܢܵܐ ܕܫܸܠܝܵܐ ܡܲܪܢܝܼܬܼܵܐ ܕܡܸܕܸܡ ܒܬܹܒܹܝܠ: ܤܛܲܪ ܡ̣ܢ ܗܵܠܹܝܢ ܕܒܹܗ ܒܫܸܠܝܵܐ ܐܝܼܬܼ ܠܗܘܿܢ ܐܲܬܼܪܵܐ ܠܡܸܦܠܲܚ. ܘܲܠܟܼܠ ܕܘܼܒܵܪܵܐ ܒܕܼܘܼܟܿܬܹܗ ܠܲܡܝܲܩܵܪܘܼ: ܕܠܵܐ ܢܸܗܘܸܐ ܒܠܝܼܠܝܼܢܲ ܒܕܼܘܼܒܵܪܲܢ. ܐܲܝܢܵܐ ܠܲܡ ܕܤܲܓܝܼ̈ܐܵܬܼܵܐ pb. 150 ܝܵܨܹ̇ܦ: ܥܲܒܼܕܵܐ ܗ̄ܘ̣ ܕܤܲܓܝܼ̈ܐܹܐ. ܐܲܝܢܵܐ ܕܡܲܪܦܸܐ ܟܠܡܸܕܸܡ: ܘܨܵܦ ܕܬܲܩܢܘܼܬܼܵܐ ܕܢܲܦܫܹܗ: ܪܵܚ̇ܡܵܐ ܗ̄ܘ̣ ܕܐܲܠܵܗܵܐ. ܚܙܝܼ ܕܦܵܠܚܲ ܙܸܕܼ̈ܩܵܬܼܵܐ ܘܲܡܫܲܡܠܝܲܝ̈ ܚܘܼܒܵܐ ܕܩܲܪܝܼܒܼܵܐ ܒܦܲܓܼܪ̈ܵܢܵܝܵܬܼܵܐ: ܤܲܓܝܼ̈ܐܹܐ ܐܝܼܬܼ ܒܥܵܠܡܵܐ. ܦܵܠܚܲܝ̈ ܒܫܸܠܝܵܐ ܕܹܝܢ ܫܲܦܝܼܪ ܘܥܲܢܝܲܝ̈ ܒܐܲܠܵܗܵܐ: ܠܡܲܚܤܸܢ: ܘܕܲܠܝܼ̈ܠܹܐ ܡܸܫܬܲܟܼܚܝܼܢ. ܐܵܘ ܐܲܝܠܹܝܢ ܐܝܼܬܲܝܗܘܿܢ ܡ̣ܢ ܗܵܠܹܝܢ ܕܦܵܠ̇ܚܝܼܢ ܙܲܕܝܼܩܘܼܬܼܵܐ ܒܨܸܒܼ̈ܘܵܬܼܵܐ ܘܒܲܐܪ̈ܥܵܢܵܝܵܬܼܵܐ ܡܸܙܕܲܕܩܝܼܢ: ܕܡܸܫܟܲܚ ܐ̄ܢܵܫ ܡܸܢܗܘܿܢ ܡܩܲܒܸܿܠ ܐܵܦܸܢ ܚܕܼܵܐ ܡ̣ܢ ܡܵܘ̈ܗܒܼܵܬܼܵܐ: ܡ̣ܢ ܗܵܠܹܝܢ ܕܲܡܩܲܒܿܠܝܼܢ ܡ̣ܢ ܐܲܠܵܗܵܐ ܥܵܡ̈ܠܲܝ ܒܫܸܠܝܵܐ܀ ܬܘܼܒܼ ܗ̤ܘ ܟܲܕܼ ܗ̤ܘ ܐܸܡ݂ܲܪ: ܐܸܢ ܥܵܠܡܵܝܵܐ ܐܲܢ̄ܬܿ: ܒܕܼܘܼܒܵܪܹ̈ܐ ܕܥܵܠܡܵܝܹ̈ܐ ܫܵܦܪܝܼܢ ܐܸܬܿܬܿܕܲܒܲܪ. ܘܐܸܢ ܝܑܼܚܝܼܕܼܵܝܵܐ ܐܲܢ̄ܬܿ: ܒܥܲܡܠܹ̈ܐ ܕܝܼܚܝܼ̈ܕܼܵܝܹܐ ܡܸܬܼܝܲܬܿܪܝܼܢ ܒܗܘܿܢ ܐܸܬܼܝܲܬܲܪ. ܐܸܢ ܕܹܝܢ ܒܬܲܪ̈ܬܲܝܗܹܝܢ ܨܵܒܹ̇ܐ ܐܲܢ̄ܬܿ ܠܡܸܦܠܲܚ: ܡ̣ܢ ܬܲܪ̈ܬܲܝܗܹܝܢ ܢܵܦܹ̇ܠ ܐܲܢ̄ܬܿ. ܥܲܡܠܵܐ ܕܝܼܚܝܼ̈ܕܵܝܹܐ ܗܵܢܵܘ: ܠܡܸܬܼܚܲܪܲܪܘܼ ܡ̣ܢ ܡܸܬܼܪ̈ܲܓܼܫܵܢܝܵܬܼܵܐ: ܘܲܠܡܸܬܼܐ̱ܡܵܢܘܼ ܠܘܵܬ ܐܲܠܵܗܵܐ ܒܪܸܢܝܵܐ ܕܠܸܒܵܐ: ܘܠܹܐܘܬܼܵܐ ܕܓܼܘܫܡܵܐ ܕܒܲܨܠܘܿܬܼܵܐ. ܘܐܸܢ ܡܲܨܝܵܐ ܕܲܒܼܒܸܤܝܵܢܵܐ ܕܗܵܠܹܝܢ: ܬܡܲܠܸܐ ܕܘܼܟܿܬܼܵܗ̇ ܡܝܲܬܿܪܘܼܬܼܵܐ ܥܵܠܡܵܢܵܝܬܼܵܐ: ܕܘܼܢ ܐܲܢ̄ܬܿ. ܐܵܘ ܕܲܠܡܵܐ ܟܲܝ ܤܵܦܹ̇ܩ ܝܼܚܝܼܕܼܵܝܵܐ ܥܡܝܼܠ ܒܫܲܠܝܘܼܬܼܵܐ ܠܲܬܼܪ̈ܲܝܗܘܿܢ ܕܘܼܒܵܪܹ̈ܐ ܕܲܠܒܲܪ ܘܕܲܠܓܼܵܘ: ܗܵܢܵܘ ܕܹܝܢ ܘܲܠܡܲܪܢܝܼܬܼܵܐ ܕܒܲܐܠܵܗܵܐ: ܘܲܠܡܸܛܥܲܢ ܠܸܒܹܗ ܐܵܦ ܨܸܦܬܼܵܐ ܕܲܐ̄ܚܪ̈ܵܢܹܐ. ܐܸܢܵܐ ܕܹܝܢ ܤܵܒܲܪ ܐ̄ܢܵܐ: ܕܐܵܦ ܟܲܕܼ ܢܸܫܒܘܿܩ ܟܠܡܸܕܸܡ ܐܲܝܢܵܐ ܕܫܲܦܝܼܪ ܨܵܒܹ̇ܐ ܕܢܸܬܿܕܲܒܲܪ ܠܘܵܬܼ ܐܲܠܵܗܵܐ: ܘܒܲܠܚܘܿܕܼ ܕܢܲܦܫܹܗ ܢܹܐܨܲܦ ܒܗܵܠܹܝܢ ܕܕܘܼܒܵܪܵܐ: ܐܵܦܠܵܐ ܗܵܟܲܢܵܐ: ܤܵܦܹ̇ܩ ܠܢܲܦܫܹܗ ܕܠܵܐ ܠܘܼܨܵܪ ܒܟܼܠܗܹܝܢ ܘܵܠܝ̈ܬܹܗ pb. 151 ܒܦܘܼܠܚܵܢܵܐ ܕܫܲܠܝܘܼܬܼܵܐ. ܐܸܠܵܐ ܥܕܲܟܹܝܠ ܚܲܤܝܼܪ ܗ̄ܘ̣ ܡ̣ܢ ܕܲܠܡܸܛܥܲܢ ܝܘܼܩܪܹܗ: ܐܵܦܸܢ ܟܡܵܐ ܢܦܘܼܫ ܡ̣ܢ ܚܫܲܚܬܹܗ ܘܪܸܢܝܹܗ ܕܥܵܠܡܵܐ ܒܟܼܠ: ܐܲܪܦܵܐ ܕܐܵܦ ܠܡܲܤܓܵܝܘܼ ܪܸ̈ܢܝܹܐ ܐ̄ܚܪܵܢܹܐ܀ ܫܒܼܝܼܩܝܼܢ ܠܹܗ ܕܹܝܢ ܠܡܵܪܲܢ ܐܲܝܠܹܝܢ ܕܲܡܫܲܡܫܝܼܢ ܘܤܵܥ̇ܪܝܼܢ ܠܥܲܒܼܕܵܘ̈ܗܝ ܘܠܲܒܼܢܵܘ̈ܗܝ: ܘܲܓܼܒܼܵܐ ܐܵܦ ܐܲܝܠܹܝܢ ܕܲܡܫܲܡܫܝܼܢ ܩܕܼܵܡܵܘܗܝ ܕܝܼܠܹܗ܀ ܠܵܘ ܒܲܚܘܿܕܼ ܒܤܘܼܥܪ̈ܵܢܹܐ ܕܡܲܠܟܹ̈ܐ ܐܲܪ̈ܥܵܢܵܝܹܐ ܚܵܙܹ̇ܝܢܲܢ ܕܲܫܒܼܝܼܚܝܼܢ ܘܲܡܥܲܠܹܝܢ ܒܕܲܪ̈ܓܲܝܗܘܿܢ: ܐܲܝܠܹܝܢ ܕܲܩܕܼܵܡܵܘܗܝ ܕܡܲܠܟܵܐ ܐܲܡܝܼܢܝܼܢ ܘܥܲܠܝܼܠܝܼܢ ܒܐ̄ܪ̈ܵܙܵܘܗܝ: ܡ̣ܢ ܗܵܠܹܝܢ ܕܲܥ̇ܒܼܵܕܹ̈ܐ ܕܲܠܒܲܪ ܐܲܚܝܼܕܼܝܼܢ ܒܚܘܼܒܵܐ ܕܥܲܡ ܡܲܠܟܵܐ: ܐܸܠܵܐ ܐܵܦ ܒܗܵܠܹܝܢ ܕܒܹܝܬܼ ܐܲܠܵܗܵܐ ܦܫܝܼܩܵܐ ܗ̣̄ܝ ܠܡܸܚܙܵܐ: ܕܲܟܼܡܵܐ ܦܵܪܹܗ̄ܤܝܼܵܐ ܩܢܹܝܢ ܗܵܠܹܝܢ ܕܲܒܼܥܸܢܝܵܢܵܐ ܕܥܲܡܹܗ ܡܸܬܼܐܲܪܙܝܼܢ ܒܲܨܠܘܼܬܼܵܐ ܒܟܼܠܥܸܕܵܢ: ܘܥܲܠ ܟܡܵܐ ܥܘܼܬܼܪܵܐ ܕܲܫܡܲܝܵܐ ܘܕܲܐܪܥܵܐ ܡܫܲܠܛܝܼܢ: ܘܕܲܐܝܟܲܢ ܡܸܬܼܚܲܙܝܵܐ ܡܵܪܘܼܬܼܗܘܿܢ ܥܲܠ ܟܠܗܘܿܢ ܟܝܵܢܹ̈ܐ ܕܲܒܼܪܝܼܬܼܵܐ: ܕܲܕܼܠܵܐ ܚܸܪܝܵܢ ܠܡܸܠܲܝ̈ܗܘܿܢ ܡܸܫܬܲܥܒܿܕܼܝܼܢ ܐܲܝܟܼ ܕܠܲܐܠܵܗܵܐ. ܘܲܒܼܗܘܿܢ ܪܫܝܼܡܵܐ ܨܲܠܡܵܢܘܼܬܹܗ ܓܲܠܝܵܐܝܼܬܼ ܒܪܲܒܿܘܼܬܼ ܐܝܼܩܵܪܵܐ ܕܡ̣ܢ ܟܠܗܘܿܢ ܡܠܝܼ̈ܠܹܐ ܘܚܲܪ̈ܫܹܐ: ܡ̣ܢ ܐܲܝܠܹܝܢ ܕܲܒܼܩܸܢ̈ܝܵܢܹܐ ܘܨܸܒܼ̈ܘܵܬܼܵܐ ܕܐܲܪܥܵܐ ܡܫܲܡܫܝܼܢ ܠܐܲܠܵܗܵܐ: ܘܒܲܟܼ̈ܢܵܘܵܬܼܗܘܿܢ ܡܢܝܼܚܝܼܢ ܠܹܗ. ܐܵܦܸܢ ܫܲܦܝܼܪܵܐ ܗܵܕܹܐ ܪܲܒܲܬܼ: ܐܸܠܵܐ ܠܲܢ ܙܵܕܹܩ ܠܲܢ: ܕܕܼܘܼܡܝܵܐ ܠܵܘ ܡ̣ܢ ܗܵܠܹܝܢ ܕܲܒܼܨܝܼܪܝܼܢ ܒܕܲܪ̈ܓܲܝܗܘܿܢ ܒܦܘܼܠܚܵܢܵܐ ܕܐܲܠܵܗܵܐ ܢܸܤܲܒܼ: ܐܸܠܵܐ ܡ̣ܢ ܐܲܬܼܠܹܝ̈ܛܹܐ ܕܐܘܼܪܚܲܢ: ܘܡ̣ܢ ܩܲܕܝܼ̈ܫܹܐ ܒܢܲܝ̈ ܕܘܼܒܵܪܲܢ. ܘܡ̣ܢ ܗܵܢܘܿܢ ܕܲܚܕܼܵܐ ܙܒܲܢ ܐܲܪܫܸܠ̣ܘ ܫܒܲܩ̣ܘ ܠܐܲܪܥܵܐ: ܘܲܫ̣ܕܼܵܘ ܐܝܼܕܼܵܐ ܥܲܠ ܟܲܦܬܼܵܐ ܕܲܫܡܲܝܵܐ. ܒܐܲܝܠܹܝܢ ܫܦܲܪܘ ܠܐܲܠܵܗܵܐ ܩܲܕܝܼ̈ܫܹܐ ܩܲܕܼ̈ܡܵܝܹܐ ܗܵܢܘܿܢ pb. 152 ܕܵܪ̈ܫܲܝ ܐܘܼܪܚܵܐ ܕܕܼܘܒܵܪܲܢ ܢܲܨܝܼܚܹ̈ܐ ܕܲܒܼܗܘܿܢ. ܗܵܘ̇ ܝܘܿܚܲܢܵܢ ܩܲܕܝܼܫܵܐ ܕܡ̣ܢ ܐܲܬܼܪܵܐ ܕܬܹܐܒܼܵܐܝܼܣ: ܗܵܘ̇ ܓܲܙܵܐ ܕܲܡܝܲܬܿܪܘܼܬܼܵܐ ܘܡܲܒܘܼܥܵܐ ܕܲܢܒܼܝܼܘܼܬܼܵܐ: ܕܲܠܡܵܐ ܒܦܲܓܼܪ̈ܵܢܵܝܬܼܵܐ ܡܢܝܼܚ ܗ̄ܘ̣ܵܐ ܠܲܟܼܢܵܘ̈ܬܹܗ ܠܓܼܵܘ ܡ̣ܢ ܚܒܼܘܼܫܝܹܗ: ܐܵܘ ܒܲܨܠܘܿܬܼܵܐ ܫܵܦܲܪ ܗ̄ܘ̣ܵܐ ܠܐܲܠܵܗܵܐ؟ ܕܐܝܼܬܼ ܗ̄ܘ̣ܵܘ ܕܹܝܢ: ܕܐܵܦ ܒܗܵܠܹܝܢ ܫ̣ܦܲܪܘ ܘܐܸܬܼܝܲܬܲܪܘ: ܡܵܘܕܸܐ ܐ̄ܢܵܐ. ܐܸܠܵܐ ܒܨܝܼܪܝܼܢ ܗ̄ܘ̣ܵܘ ܡ̣ܢ ܐܲܝܠܹܝܢ ܕܒܲܨܠܘܿܬܼܵܐ ܘܲܒܼܦܵܘܫܵܐ ܕܡ̣ܢ ܟܠ ܫܦܲܪܘ ܠܐܲܠܵܗܵܐ. ܥܘܼܕܼܪܵܢܵܐ ܕܡܸܢܗܘܿܢ ܠܲܟܼܢܵܘ̈ܬܼܗܘܿܢ ܕܗܵܠܹܝܢ ܕܲܒܼܫܸܠܝܵܐ ܡܸܬܼܝܲܬܿܪܝܼܢ: ܝܼܕܼܝܼܥ ܗ̄ܘ̣ ܕܡܵܢܵܘ. ܗܵܢܵܘ ܕܹܝܢ ܠܲܡܥܲܕܵܪܘܼܬܼܗܘܿܢ: ܐܸܡܲܬܼܝ ܕܐܵܠܨܵܐ ܒܡܸܠܬܼܵܐ ܕܝܘܼܬܼܪܵܢܵܐ: ܐܵܘ ܠܲܡܩܲܪܵܒܼܘܼ ܨܠܘܿܬܼܵܐ ܚܠܵܦܲܝܗܘܿܢ. ܠܒܲܪ ܡ̣ܢ ܗܵܠܹܝܢ ܕܹܝܢ: ܥܘܼܗܕܵܢܵܐ ܐܵܘ ܡܲܪܢܝܼܬܼܵܐ ܕܐ̄ܢܵܫ ܡܸܛܠ ܗܵܠܹܝܢ ܦܲܓܼܪ̈ܵܢܵܝܵܬܼܵܐ: ܠܲܡܒܼܵܬܼ ܒܠܸܒܹܗ ܕܥܵܡܲܪ ܒܫܸܠܝܵܐ: ܠܵܘ ܕܚܸܟܼܡܬܼܵܐ ܗ̣̄ܝ. ܗܵܝ̇ ܕܗܲܒܼ ܕܩܹܤܲܪ ܠܩܹܤܲܪ ܘܕܲܐܠܗܵܐ ܠܐܲܠܵܗܵܐ: ܘܲܕܼܩܲܪܝܼܒܼܵܐ ܕܝܼܠܹܗ ܘܕܲܠܵܗܵܐ ܕܝܼܠܹܗ: ܠܵܘ ܕܥܵܡܪ̈ܲܝ ܒܫܸܠܝܵܐ ܐܝܼܬܹܝܗ̇: ܐܸܠܵܐ ܕܗܵܢܘܿܢ ܕܲܠܒܲܪ ܡܸܬܿܕܲܒܿܪܝܼܢ. ܐܲܝܢܵܐ ܕܹܝܢ ܕܲܒܼܦܘܼܠܚܵܢܵܐ ܕܡܲܠܲܐܟܹ̈ܐ ܡܸܬܿܕܲܒܲܪ: ܗܵܢܵܘ ܕܹܝܢ ܒܪܸܢܝܵܐ ܕܢܲܦܫܵܐ: ܠܡܸܫܦܲܪ ܒܐܲܪ̈ܥܵܢܵܝܬܼܵܐ: ܠܵܘ ܕܝܼܠܹܗ ܗ̤ܝ. ܗܵܢܵܘ ܕܹܝܢ ܠܡܸܦܲܠ ܒܨܸܦܬܼܵܐ ܕܲܥ̇ܒܼܵܕܼܵܐ ܕܐܝܼ̈ܕܲܝܵܐ: ܐܵܘ ܠܲܡܚܵܪ ܠܡܸܤܲܒܼ ܡ̣ܢ ܐ̄ܚܪ̈ܵܢܹܐ ܘܲܠܡܸܬܲܠ ܠܲܐ̄ܚܪ̈ܵܢܹܐ. ܕܝܼܠܹܗ ܕܹܝܢ ܦܘܼܠܚܵܢܹܗ ܒܲܫܡܲܝܵܐ ܗ̄ܘ̣. ܠܵܐ ܙܵܕܹܩ ܠܹܗ ܠܝܼܚܝܼܕܼܵܝܵܐ: ܕܪܸܢܝܵܐ ܕܡܸܕܸܡ ܢܙܝܼܥ ܘܢܲܚܸܬܼ ܠܪܸܥܝܵܢܹܗ: ܡ̣ܢ ܩܵܘܡܵܐ ܕܲܩܕܼܵܡ ܐܲܠܵܗܵܐ. ܐܸܢ ܐ̄ܢܵܫ ܕܹܝܢ ܡܲܚܨܸܦ ܟܲܕܼ ܡܲܝܬܸܐ ܠܫܲܪܒܵܐ ܕܦܵܘܠܘܿܣ ܠܲܡܨܲܥܬܼܵܐ: ܕܐܵܦ ܦܵܘܠܘܿܣ ܠܲܡ ܦܵܠܲܚ pb. 153 ܗ̄ܘ̣ܵܐ: ܐܵܦ ܥܵܒܹ̇ܕܼ ܗ̄ܘ̣ܵܐ ܙܸܕ̈ܩܵܬܼܵܐ. ܠܗܵܢܵܐ ܐܵܡ̇ܪܝܼܢ ܚ̄ܢܲܢ ܠܩܘܼܒܼܠܹܗ: ܕܦܵܘܠܘܿܣ: ܚܲܕܼ ܒܲܠܚܘܿܕܼ ܗ̄ܘ̣ܵܐ: ܕܤܵܦܹ̇ܩ ܗ̄ܘ̣ܵܐ ܠܟܼܠܡܸܕܸܡ. ܐ̄ܚܪܹܢܵܐ ܕܹܝܢ ܦܵܘܠܘܿܣ: ܠܵܐ ܝܵܕܼܥܝܼܢܲܢ ܐܸܢ ܐܝܼܬܼ ܗ̄ܘ̣ܵܐ: ܕܲܡܨܸܐ ܤܵܦܹ̇ܩ ܠܟܼܠܡܸܕܸܡ ܐܲܟܼܘܵܬܹܗ. ܚܵܘܵܐ ܠܝܼ ܐܸܢ ܡܨܸܐ ܐܲܢ̄ܬܿ ܦܵܘܠܘܿܣ ܐ̄ܚܪܹܢܵܐ: ܘܡܸܬܿܛܦܝܼܣ ܐ̄ܢܵܐ ܠܵܟܼ. ܡܵܕܹܝܢ ܗܵܠܹܝܢ ܕܲܡܕܲܒܿܪܵܢܘܼܬܼܵܐ ܠܵܐ ܬܲܥܸܠ ܠܲܡܨܲܥܬܼܵܐ: ܠܘܵܬܼ ܤܘܼܥܪ̈ܵܢܹܐ ܕܓܼܵܘܵܐ. ܐ̄ܚܪܹܢܵܐ ܗ̄ܘ̣ ܓܹܝܪ ܥ̇ܒܼܵܕܼܵܐ ܕܟܼܵܪ̈ܘܿܙܹܐ: ܘܲܐ̄ܚܪܹܢܵܐ ܥ̇ܒܼܵܕܼܵܐ ܕܫܸܠܝܵܐ. ܐܲܢ̄ܬܿ ܕܹܝܢ ܐܸܢ ܫܸܠܝܵܐ ܨܵܒܹ̇ܐ ܐܲܢ̄ܬܿ ܠܡܸܠܒܲܟܼ: ܗ̤ܘܝܼ ܐܲܝܟܼ ܟܪܘܿܒܼܵܐ: ܕܡܸܕܸܡ ܕܐܲܪܥܵܐ ܠܵܐ ܝܵܨܹ̇ܦ. ܘܲܪܢܝܼ ܕܠܲܝܬܿ ܬܘܼܒܼ ܒܲܒܼܪܝܼܬܼܵܐ ܒܲܪܢܵܫܵܐ ܐ̄ܚܪܹܢܵܐ: ܐܸܠܵܐ ܐܸܢ ܐܲܢ̄ܬܿ ܒܲܠܚܘܿܕܲܝܟ: ܘܐܲܠܵܗܵܐ ܕܪܵܢܹܐ ܐܲܢ̄ܬܿ ܒܹܗ: ܐܲܝܟܼ ܕܐܲܠܦܘܼܟܼ ܐܲܒܼܵܗܲܝ̈ܟ ܕܲܩܕܼܵܡܲܝܟ ܪܕܼܵܘ. ܐܸܠܵܐ ܓܹܝܪ ܡܩܲܫܸܐ ܒܲܪܢܵܫܵܐ ܠܸܒܹܗ: ܘܐܵܚܹ̇ܕܼ ܪ̈ܲܚܡܵܘܗܝ ܥܸܨܝܵܢܵܐܝܼܬܼ: ܕܢܸܗܘܸܐ ܪܲܚܝܼܩ ܡ̣ܢ ܡܲܪܢܝܼܬܼܵܐ ܕܟܼܠܒܲܪܢܵܫ. ܠܵܐ ܕܡܸܛܠ ܐܲܠܵܗܵܐ ܘܠܵܐ ܕܦܲܓܼܪܵܢܵܝܵܐ: ܐܸܠܵܐ ܕܒܲܨܠܘܿܬܼܵܐ ܒܲܠܚܘܿܕܼ ܒܥܸܕܵܢܹ̈ܐ ܕܲܦܪܝܼܫܝܼܢ ܠܹܗ: ܕܠܵܐ ܢܸܥܘܿܠ ܚܘܼܒܵܐ ܘܪܸܢܝܵܐ ܕܐ̄ܢܵܫ ܒܠܸܒܹܗ: ܠܡܸܬܼܚܲܪܵܪܘܼ ܡ̣ܢ ܫܓܼܘܼܫܝܵܐ ܕܡܲܪ̈ܢܝܬܼܵܐ ܘܲܠܡܸܗܘܵܐ ܒܫܸܠܝܵܐ: ܠܵܐ ܡܸܫܟܲܚ. ܗܵܢܵܘ ܤܵܟܼܵܐ. ܡܵܐ ܕܹܝܢ ܕܐܵܬܹ̇ܐ ܠܵܟܼ ܚܘܼܫܵܒܼܵܐ ܠܡܸܪܢܵܐ ܒܦܲܪܨܘܿܦ ܡܝܲܬܿܪܘܼܬܼܵܐ ܒܐ̄ܢܵܫ: ܐܲܝܟܼ ܕܲܢܦܲܠܗܸܕܼ ܡܸܢܵܟܼ ܠܫܲܝܢܵܐ ܕܡ̣ܢ ܥܘܼܗܕܵܢܵܐ ܕܐܲܠܵܗܵܐ ܡܥܵܕܼ ܗܵܘܹ̇ܐ ܒܠܸܒܵܟܼ: ܐܸܡܲܪ ܠܹܗ: ܫܲܦܝܼܪ ܗ̄ܘ̣ ܕܘܼܒܵܪܵܐ: ܚܘܼܒܵܐ ܘܪ̈ܲܚܡܹܐ ܕܡܸܛܠ ܐܲܠܵܗܵܐ. ܒܪܲܡ: ܘܐܵܦ ܐܸܢܵܐ ܡܸܛܠܵܬܹܗ ܕܝܼܠܹܗ ܕܐܲܠܵܗܵܐ ܠܵܐ ܒܵܥܹ̇ܐ ܐ̄ܢܵܐ ܠܹܗ. ܟܲܬܲܪ ܠܝܼ ܠܲܡ: ܕܡܸܛܠ ܐܲܠܵܗܵܐ ܪܵܕܹܦ ܐ̄ܢܵܐ ܒܵܬܼܪܵܟܼ: ܐܵܡܲ݁ܪ ܗܵܘ̇ ܝܑܼܚܝܼܕܼܵܝܵܐ. ܐܵܡܲ݁ܪ ܠܹܗ: ܘܐܵܦ ܡܸܛܠ ܐܲܠܵܗܵܐ ܥܵܪܹܩ pb. 154 ܐ̄ܢܵܐ ܡܸܢܵܟܼ. ܐܲܒܵܐ ܗܵܟܹܝܠ ܐܲܪܤܵܢܝܼܣ: ܡܸܛܠ ܐܲܠܵܗܵܐ ܐܵܦܠܵܐ ܦܘܼܡܹܗ ܦܵܬܲܚ ܗ̄ܘ̣ܵܐ ܘܲܡܡܲܠܸܠ: ܠܵܐ ܕܝܘܼܬܼܪܵܢܵܐ ܘܠܵܐ ܕܫܸܓܼܡܵܐ. ܐ̄ܚܪܹܢܵܐ ܕܹܝܢ ܟ̱ܠܹܗ ܝܵܘܡܵܐ: ܡܸܛܠ ܐܲܠܵܗܵܐ ܡܡܲܠܸܠ ܗ̄ܘ̣ܵܐ: ܘܲܡܩܲܒܸܠ ܟܠ ܐܲܟܼܤ̈ܢܵܝܹܐ ܕܨܵܝ̇ܒܿܝܼܢ ܗ̄ܘ̣ܵܘ ܠܬܲܡܵܢ. ܗܵܘ̇ ܕܹܝܢ: ܚܠܵܦ ܗܵܕܹܐ ܓܒܼܵܐ ܠܹܗ ܫܸܬܼܩܵܐ ܘܫܸܠܝܵܐ: ܡܸܛܠܗܵܢܵܐ ܗ̤ܘ ܥܲܡ ܪܘܼܚܵܐ ܕܐܲܠܵܗܵܐ ܒܓܼܵܘ ܝܲܡܹܗ ܕܥܵܠܡܵܐ ܗܵܢܵܐ: ܒܫܲܝܢܵܐ ܡܥܲܠܝܵܐ ܪܵܕܹܢ ܗ̄ܘ̣ܵܘ ܒܲܤܦܝܼܢ̄ܬܼܵܐ ܕܕܼܘܼܒܵܪ ܫܸܠܝܵܐ: ܐܲܝܟܼ ܕܲܒܼܓܸܠܝܵܢܵܐ ܐܸܬܼܚܵܘܝܼ ܠܐܲܬܼܠ݂ܝ̈ܛܹܐ ܕܥܲܩܸܒܼܘ ܥܲܠ ܤܘܼܥܪܵܢܵܐ ܗܵܢܵܐ. ܐܵܦ ܗ̤ܘ ܟܹܝܬܼ ܫܘܼܡܵܗܵܐ ܕܫܸܠܝܵܐ ܗܵܢܵܘ: ܫܲܠܝܘܼܬܼܵܐ ܕܡ̣ܢ ܟܠ. ܐܸܢ ܓܹܝܪ ܘܐܵܦ ܒܹܗ ܒܫܸܠܝܵܐ ܡܠܸܐ ܐܲܢ̄ܬܿ ܫܓܼܘܼܫܝܵܐ: ܟܲܕܼ ܫܓܼܝܼܫ ܦܲܓܼܪܵܐ ܒܦܘܼܠܚܵܢܵܐ ܕܐܝܼ̈ܕܲܝܵܐ ܘܤܘܼܥܪ̈ܵܢܹܐ ܕܡܸܕܸܡ ܡܸܕܸܡ: ܘܢܲܦܫܵܐ ܒܡܲܪܢܝܼܬܼܵܐ ܕܲܐ̄ܚܪܹܢܵܐ: ܐܲܝܕܵܐ ܫܲܠܝܘܼܬܼܵܐ ܐܝܼܬܼ ܠܵܟܼ ܡܸܟܹܝܠ: ܠܡܹܐܨܲܦ ܕܤܲܓܝܼ̈ܐܵܬܼܵܐ ܘܲܠܡܸܫܦܲܪ ܠܐܲܠܵܗܵܐ: ܕܘܼܢ ܐܲܢ̄ܬܿ. ܒܸܠܥܵܕܼ ܫܒܼܝܼܩܘܼܬܼܵܐ ܕܟܼܠܡܸܕܸܡ ܘܡܲܪܢܝܬܼܵܐ ܕܡ̣ܢ ܟܠ: ܠܡܸܼܠܒܲܟܼ ܕܘܼܒܵܪܵܐ ܕܫܸܠܝܵܐ: ܓܘܼܚܟܵܐ ܗ̣̄ܝ ܠܝܼ ܠܡܹܐܡܲܪ.