Discourse 25

ܟܠܡܸܕܸܡ ܕܲܠܥܸܠ ܡ̣ܢ ܡܸܕܸܡ: ܓܢܝܼܙ ܗ̄ܘ̣ ܡ̣ܢ ܗܵܘ̇ ܡܸܕܸܡ ܕܡܸܢܹܗ ܘܲܠܬܲܚܬܿ. ܘܗܵܟܲܢܵܐ ܒܪܲܡ: ܠܵܐ ܗ̄ܘ̣ܵܐ ܒܬܲܚܦܝܼܬܼܵܐ ܕܓܼܘܼ̈ܫܡܹܐ pb. 183 ܐ̄ܚܪ̈ܵܢܹܐ. ܩܢܸܐ ܡ̇ܢ ܒܲܟܼܝܵܢܵܐ: ܘܲܠܗܵܝ̇. ܕܐܸܡܲܬܼܝ ܕܢܸܨܒܸܿܐ: ܢܸܤܦܲܩ ܢܲܝܬܸܐ ܓܢܝܼܙܘܼܬܹܗ ܠܓܸܠܝܵܐ܀ ܟܠ ܗܵܟܹܝܠ ܕܐܘܼܤܝܼܵܐ ܐܝܼܬܹܝܗ̇ ܡܸܬܼܝܲܕܼܥܵܢܝܼܬܼܵܐ: ܦܘܼܪ̈ܫܵܢܹܐ ܕܕܲܪܓܼܵܗ̇ ܠܵܐ ܗܘ̤ܵܘ ܒܕܲܠܒܲܪ ܡܸܢܵܗ̇: ܐܸܠܵܐ ܠܓܼܵܘ ܡ̣ܢ ܙܵܘ̈ܥܹܝܗ̇ ܡܤܲܝܟܲܝܼܢ. ܗܵܢܵܘ ܕܹܝܢ ܘܝܲܬܝܼܪ ܢܲܗܝܼܪܵܐܝܼܬܼ: ܗܵܝ̇ ܕܢܸܬܼܓܵܘܘܿܢ ܝܲܬܝܼܪ ܘܲܕܼܠܵܐ ܡܸܨܥܵܝܵܐ ܡܸܕܸܡ: ܠܩܘܼܒܵܠܵܐ ܕܢܘܼܗܪܵܐ ܩܲܕܼܡܵܝܵܐ: ܐܵܘ ܕܲܐ̄ܚܪܵܝܘܼܬܼ ܛܲܟܼܤܵܐ. ܠܵܘ ܐܲܬܼܪܵܢܵܐܝܼܬܼ: ܐܸܠܵܐ ܠܦܘܼܬܼ ܪܵܡܘܼܬܼ ܡܨܲܠܠܘܼܬܼܵܐ ܐܵܘ ܡܡܲܫܚܘܼܬܼܵܐ ܕܗܵܘ̈ܢܹܐ: ܠܘܵܬܼ ܚܲܝܠܵܐ ܡܩܲܒܿܠܵܢܵܐ ܕܪܸ̈ܡܙܹܐ ܥܸܠܵܝܹ̈ܐ܀ ܟܠ ܕܲܟܼܝܵܢܵܐ ܡ̇ܢ ܐܝܼܬܼܵܘܗܝ ܡܸܬܼܝܲܕܼܥܵܢܵܐ: ܡ̣ܢ ܐܲܝܠܹܝܢ ܕܡܸܢܹܗ ܘܲܠܬܲܚܬܿ: ܓܢܝܼܙܘܼܬܼܵܐ ܠܵܘ ܒܲܟܼܝܵܢܵܐ ܡ̣ܢ ܚܕܼܵܕܹ̈ܐ: ܐܸܠܵܐ ܒܲܡܝܲܬܿܪܘܼܬܼܵܐ ܕܙܵܘ̈ܥܹܐ. ܘܗܵܕܹܐ ܒܲܒܼ̈ܢܲܝ ܬܸܓܼܡܵܐ ܐܵܡܲ݁ܢܵܐ. ܗܵܢܵܘ ܕܹܝܢ: ܬܸܓܼܡܹ̈ܐ ܕܚܲܝ̈ܠܵܘܵܬܼܵܐ ܩܲܕܝܼ̈ܫܹܐ: ܘܬܸܓܼܡܹ̈ܐ ܕܢܲܦ̈ܫܵܬܼܵܐ: ܘܬܸܓܼܡܹ̈ܐ ܕܫܹܐܕܹ̈ܐ. ܩܲܕܼܡܵܝܹ̈ܐ ܡ̣ܢ ܡܸܨܥܵܝܹ̈ܐ: ܘܗܵܠܹܝܢ ܡ̣ܢ ܬܠܝܼܬܼܵܝܹ̈ܐ: ܐܵܦ ܒܲܟܼܝܵܢܵܐ: ܐܵܦ ܒܕܼܘܼ̈ܟܿܝܵܬܼܵܐ: ܐܵܦ ܒܙܵܘ̈ܥܹܐ. ܟܠܚܲܕܼ ܡ̣ܢ ܬܸܓܼܡܹ̈ܐ ܕܹܝܢ ܡܸܢܗܘܿܢ ܘܲܠܗܘܿܢ: ܒܝܼܕܲܥܬܼܵܐ ܓܢܝܼܙܝܼܢ ܠܚܲܘܿܬܲܝܗܘܿܢ. ܐܸܢ ܚܵܙܹ̇ܝܢ: ܘܐܸܢ ܠܵܐ ܚܵܙܹ̇ܝܢ. ܠܐܲܝܠܹܝܢ ܕܹܝܢ ܕܡ̣ܢ ܬܚܘܿܬܲܝܗܘܿܢ: ܐܵܦ ܒܹܗ ܒܲܟܼܝܵܢܵܐ. ܡܸܛܠ ܕܹܝܢ ܕܚܵܙܘܿܝܘܼܬܼܵܐ ܕܠܵܐ ܓܫܝܼ̈ܡܹܐ: ܠܵܘ ܒܕܲܠܒܲܪ ܡܸܢܗܘܿܢ ܗܵܘܝܵܐ ܚܫܲܚܬܼܵܗ̇ ܐܲܝܟܼ ܦܲܓܼܪ̈ܵܢܹܐ. ܐܸܠܵܐ ܚܙܵܬܼܗܘܿܢ ܕܠܲܚܕܼܵܕܹ̈ܐ: ܠܓܼܵܘ ܡ̣ܢ ܙܵܘܥܲܝ̈ܗܘܿܢ ܡܸܬܼܐܲܡܪܲܐ: ܕܐܝܼܬܹܝܗ̇ ܡܝܲܬܿܪܘܼܬܼܵܐ ܘܲܡܡܲܫܚܘܼܬܼܵܐ ܕܙܵܘ̈ܥܹܐ. ܡܸܛܠܗܵܢܵܐ ܐܸܢ ܒܗܵܕܹܐ ܫܘܹܝܢ: ܐܵܦ ܟܲܕܼ ܪܲܚܝܼܩܝܼܢ: ܚܵܙܹ̇ܝܢ ܠܲܚܕܼܵܕܹ̈ܐ. ܠܵܘ ܦܲܢܛܵܤܝܼܵܐܝܼܬܼ: ܐܸܠܵܐ ܒܲܚܙܵܬܼܵܐ ܫܲܪܝܼܪܬܵܐ: ܘܒܲܟܼܝܵܢܵܐ ܚܲܬܝܼܬܼܵܐ. pb. 184 ܒܲܠܚܘܿܕܼ ܥܸܠܬܼܵܐ ܕܟܼܠ ܡܥܲܠܲܝ ܡ̣ܢ ܗܵܠܹܝܢ ܦܘܼܪ̈ܫܵܢܹܐ: ܕܗ̤ܘܝܘܼ ܒܲܠܚܘܿܕܼܵܘܗܝ ܤܓܼܝܼܕܵܐ܀ ܫܹ̈ܐܕܹܐ ܕܹܝܢ: ܘܟܲܕܼ ܛܵܒܼ ܐܝܼܬܲܝܗܘܿܢ ܛܲܡ̈ܐܹܐ: ܠܵܐ ܓܠܝܼܙܝܼܢ ܡ̣ܢ ܚܙܵܬܼܵܐ ܕܲܒܼ̈ܢܲܝ ܬܸܓܼܡܲܝ̈ܗܘܿܢ. ܕܗܵܠܹܝܢ ܬܲܪܬܹܝܢ ܡܘܼ̈ܫܚܵܢ ܕܲܠܥܸܠ ܡܸܢܗܘܿܢ: ܠܵܐ ܚܵܙܹ̇ܝܢ. ܡܸܛܠ ܕܲܚܙܵܝܵܐ ܕܪܘܼܚ: ܢܲܗܝܼܪܘܼܬܼܵܐ ܗ̄ܘ̣ ܕܙܵܘ̈ܥܹܐ. ܗܸܢܘܿܢ ܐܸܢܘܿܢ ܡܲܚܙܝܼܬܼܗܘܿܢ: ܘܥܲܝܢܲܝ̈ܗܘܿܢ. ܘܐܸܡܲܬܼܝ ܕܲܚܫܸܟܼܘ ܙܵܘ̈ܥܹܐ: ܠܵܐ ܚܵܙܹ̇ܝܢ ܠܛܲܟܼܤܹ̈ܐ ܕܲܠܥܸܠ ܡܸܢܗܘܿܢ. ܠܲܚ̈ܕܼܵܕܹܐ ܕܹܝܢ: ܡܸܛܠ ܕܲܥܒܹܝܢ ܡ̣ܢ ܛܲܟܼܤܵܐ ܕܲܟܼܝܵܢܹ̈ܐ ܪ̈ܘܼܚܵܢܹܐ: ܐܲܝܟܼ ܕܡ̣ܢ ܦܸܚܡܵܐ ܕܗܵܠܹܝܢ: ܚܵܙܹ̇ܝܢ. ܗܵܠܹܝܢ ܕܫܹ̈ܐܕܹܐ ܗܵܟܲܢ܀ ܢܲܦ̈ܫܵܬܼܵܐ ܕܝܼܢ: ܟܡܵܐ ܕܛܲܡ̈ܐܵܢ ܐܸܢܹܝܢ ܘܚܲܫܝܼ̈ܟܼܵܢ: ܕܢܸܚܙ̈ܝܵܢ ܠܲܝܬܿ ܠܗܹܝܢ: ܐܵܦܠܵܐ ܠܲܒܼ̈ܢܲܝ ܬܸܓܼܡܲܝ̈ܗܹܝܢ. ܐܸܠܵܐ ܓܠܝܼ̈ܙܵܢ ܡ̣ܢ ܚܙܵܬܼܵܐ ܕܲܚܕܼܵܕܹ̈ܐ: ܐܵܦ ܡ̣ܢ ܕܢܸܚܙ̈ܝܵܢ ܩܢܘܿܡܲܝ̈ܗܹܝܢ. ܐܸܢ ܕܹܝܢ ܢܸܬܿܕܲܟ̈ܝܵܢ: ܘܲܠܛܲܟܼܤܵܐ ܩܲܕܼܡܵܝܵܐ ܕܲܒܼܪܝܼܬܼܗܹܝܢ ܢܹܐܬܼ̈ܝܵܢ: ܕܵܝ̈ܩܵܢ ܢܲܗܝܼܪܵܐܝܼܬܼ ܒܲܬܼܠܵܬܲܝ̈ܗܘܿܢ ܗܵܠܹܝܢ ܬܸܓܼܡܹ̈ܐ. ܗܵܢܵܘ ܕܹܝܢ: ܒܐܲܝܠܹܝܢ ܕܲܠܬܲܚܬܿ ܡܸܢܗܹܝܢ: ܘܒܲܐܝܠܹܝܢ ܕܲܠܥܸܠ ܡܸܢܗܹܝܢ: ܘܲܠܗܹܝܢ ܠܲܚܕܼܵܕܼ̈ܐ. ܘܲܠܗܵܠܹܝܢ ܟܠܗܘܿܢ ܬܸܓܼܡܹ̈ܐ: ܠܵܐ ܗ̄ܘ̣ܵܐ ܡܵܐ ܕܡܸܫܬܲܚܦܝܼܢ ܠܕܼܡ̈ܘܵܬܼܵܐ ܓܫܝܼ̈ܡܵܬܼܵܐ: ܘܗܵܝܕܹܝܢ ܚܵܙ̈ܝܵܢ ܠܗܘܿܢ: ܐܸܢ ܠܡܲܠܲܐܟܹ̈ܐ ܘܐܸܢ ܠܫܹ̈ܐܕܹܐ ܐܵܘ ܠܢܲܦܫܵܐ ܐ̄ܚܢܵܬܗܹܝܢ. ܐܼܠܵܐ ܒܹܗ ܒܲܟܼܵܝܵܢܗܘܿܢ ܚܵܙ̈ܝܵܢ ܠܗܘܿܢ ܟܲܕܼ ܩܵܝ̇ܡܝܼܢ ܒܛܲܟܼܤܵܐ ܕܪܘܼܚܵܢܘܼܬܼܗܘܿܢ: ܐܸܢ ܡܲܠܲܐܟܼܵܐ: ܘܐܸܢ ܫܹܐܕܼܵܐ: ܘܐܸܢ ܢܲܦܫܵܐ ܠܢܲܦܫܵܐ. ܐܸܢ ܕܹܝܢ ܬܹܐܡܲܪ ܕܠܵܐ ܡܲܨܝܵܐ ܗܵܕܹܐ: ܕܫܹܐܕܼܵܐ ܐܵܘ ܡܲܠܲܐܟܼܵܐ ܢܸܬܼܚܙܘܿܢ ܒܪܘܼܚܵܢܘܼܬܼܗܘܿܢ ܐܸܠܵܐ ܡܸܫܬܲܓܼܢܹܝܢ: ܡܵܕܹܝܢ ܠܵܐ ܢܲܦܫܵܐ pb. 185 ܗ̣̄ܝ ܕܚܵܙ̇ܝܵܐ: ܐܸܠܵܐ ܦܲܓܼܪܵܐ. ܘܡܸܟܹܝܠ: ܡܵܢ ܐܵܠܨܵܐ ܥܲܠ ܕܲܟܼܝܘܼܬܼܵܐ؟ ܗܵܐ ܐܵܦ ܠܐܲܝܠܹܝܢ ܕܠܵܐ ܕܟܹܝܢ: ܒܲܙܒܲܢ ܡܸܬܼܚܙܹܝܢ ܠܗܘܿܢ ܫܹ̈ܐܕܹܐ: ܗܵܟܲܢܵܐ ܘܡܲܠܲܐܟܹ̈ܐ. ܒܪܲܡ ܒܥܲܝܢܵܐ ܗ̄ܘ̣ ܕܦܲܓܼܪܵܐ ܚܵܙܹ̇ܝܢ ܐܸܡܲܬܼܝ ܕܚܵܙܹ̇ܝܢ: ܐܲܝܟܵܐ ܕܠܵܐ ܤܢܝܼܩܵܐ ܥܲܠ ܕܲܟܼܝܘܼܬܼܵܐ. ܒܲܕܼܓܼܘܿܢ: ܠܵܘ ܗܵܟܲܢܵܐ ܢܲܦܫܵܐ ܕܐܸܬܿܕܲܟܿܝܲܬ̤: ܐܸܠܵܐ ܒܪܘܼܚܵܢܘܼܬܼܗܘܿܢ ܚܵܙ̇ܝܵܐ ܠܗܘܿܢ: ܒܥܲܝܢܵܐ ܕܲܟܼܝܵܢܵܗ̇. ܗܵܢܵܘ ܕܹܝܢ: ܒܡܲܕܥܵܐ ܡܸܤܬܲܟܿܠܵܢܵܐ܀ ܘܲܕܼܚܵܙ̈ܝܵܢ ܬܘܼܒܼ ܢܲܦܫܵܬܼܵܐ ܠܲܚܕܼܵܕܹ̈ܐ: ܐܵܦ ܟܲܕܼ ܒܦܲܓܼܪܵܐ ܐܸܢܹܝܢ: ܠܵܐ ܬܸܬܿܕܲܡܲܪ. ܗܵܐ ܬܲܚܘܝܼܬܼܵܐ ܓܠܝܼܬܼܵܐ ܕܡܸܬܿܛܦܝܼܣ ܐܲܢ̄ܬܿ ܠܵܗ̇: ܡܸܛܠ ܤܵܗܕܵܗ̇ ܫܲܪܝܼܪܵܐ. ܗܵܢܵܘ ܕܹܝܢ: ܛܘܼܒܼܵܢܵܐ ܐܵܬܵܢܵܤܝܼܣ ܡܵܘܕܝܵܢܵܐ ܘܩܵܬܼܘܿܠܝܼܩܵܐ ܤܵܗܹ̇ܕܼ ܒܲܟܼܬܼܵܒܼܵܐ ܗܵܘ̇ ܕܲܥܒܼܝܼܕܼ ܠܹܗ ܥܲܠ ܗܘܼܦܵܟܼܵܘ̈ܗܝ ܕܡܵܪܝܼ ܐܲܢܛܘܿܢ. ܒܲܙܒܲܢ ܠܲܡ ܟܲܕܼ ܡܨܲܠܸܐ ܡܵܪܝ ܐܲܢܛܘܿܢܝܼܣ: ܚ̣ܙܵܐ ܢܲܦܫܵܐ ܕܐ̄ܢܵܫ ܟܲܕܼ ܡܸܤܬܲܠܩܵܐ ܒܐܝܼܩܵܪܵܐ ܪܲܒܵܐ. ܘܝܵܗܹ̇ܒܼ ܗ̄ܘ̣ܵܐ ܛܘܼܒܼܵܐ: ܠܗܵܘ̇ ܕܲܠܗܵܕܹܐ ܟ̱ܠܵܗ̇ ܛܲܝܒܿܘܼܬܼܵܐ ܐܸܫܬܿܘܝܼ. ܐܝܼܬܼܵܘܗܝ ܗ̄ܘ̣ܵܐ ܕܹܝܢ: ܛܘܼܒܼܵܢܵܐ ܐܲܡܘܿܢ ܗܵܘ̇ ܕܲܢܛܝܼܪܵܐ. ܪܲܚܝܼܩ ܗ̄ܘ̣ܵܐ ܠܲܡ ܡܲܪܕܹܡ ܬܠܵܬܲܥܤܲܪ ܝܵܘܡ̈ܝܼܢ: ܛܘܼܪܵܐ ܗܵܘ̇ ܕܥܵܡܲܪ ܗ̄ܘ̣ܵܐ ܒܹܗ ܛܘܼܒܼܵܢܵܐ ܐܲܢܛܘܿܢ: ܡ̣ܢ ܢܛܝܼܪܘܿܣ ܐܲܬܼܪܵܐ. ܗܵܪܟܵܐ ܡܵܕܹܝܢ ܐܸܫܬܲܪܪܲܬ̤ ܬܲܚܘܝܼܬܼܵܐ ܕܲܬܼܠܵܬܲܝ̈ܗܘܹܝܢ ܗܵܢܹܝܢ ܕܐܸܡ݂ܲܪܢܲܢ. ܗܵܢܵܘ ܕܹܝܢ: ܐܵܦ ܟܲܕܼ ܪܲܚܝܼܩܝܼܢ: ܚܵܙܹ̇ܝܢ ܟܝܵܢܹ̈ܐ ܪ̈ܘܼܚܵܢܹܐ ܠܲܚܕܼܵܕܹ̈ܐ: ܘܲܕܼܠܵܐ ܟܵܠܹ̇ܐ ܛܵܘܪܵܐ ܘܲܤܝܵܡܵܐ ܕܓܘܼ̈ܫܡܹܐ ܠܲܚܙܵܬܼܗܘܿܢ. ܘܲܕܼܚܵܙ̈ܝܵܢ ܢܲܦ̈ܫܵܬܼܵܐ ܠܲܚܕܼܵܕܹ̈ܐ ܡܵܐ ܕܐܸܬܿܕܲܟܝܼ: ܘܲܕܼܠܵܘ ܓܫܝܼܡܵܐܝܼܬܼ ܚܵܙ̈ܝܵܢ ܐܸܡܲܬܼܝ ܕܚܵܙ̈ܝܵܢ: pb. 186 ܐܸܠܵܐ ܒܲܟܼܝܵܢܵܐ ܪܘܼܚܵܢܵܐ. ܡܸܛܠ ܕܓܲܠܝܵܐ ܗ̣̄ܝ: ܕܲܚܙܵܬܼܵܐ ܓܫܝܼܡܬܼܵܐ: ܡܸܕܸܡ ܕܲܩܕܼܵܡܹܝܗ̇ ܐܝܼܬܼ ܠܵܗ̇ ܠܡܸܚܙܵܐ. ܐܸܡܲܬܼܝ ܕܹܝܢ ܕܡܲܒܼܥܲܕܼ: ܥܲܠ ܚܙܵܬܼܵܐ ܐ̄ܚܪܹܬܼܵܐ ܐܵܠܨܵܐ܀ ܗܵܢܘܿܢ ܡܲܢ ܬܸܓܼܡܹ̈ܐ ܥܸܠܵܝܹ̈ܐ: ܤܲܓܝܼܐܘܼܬܼܵܐ ܕܡܸܢܝܵܢܵܐ ܩܢܹܝܢ ܒܲܗܘܵܝܗܘܿܢ: ܕܠܵܐ ܤܵܟܼܵܐ. ܘܦܘܼܪ̈ܫܵܢܹܐ ܬܘܼܒܼ: ܘܛܲܟܼܤܹ̈ܐ ܡܸܫܬܲܡܗܝܼܢ ܒܲܝܢܵܬܼܗܘܿܢ. ܕܡܸܢܗܘܿܢ ܡܲܢ ܡܸܬܼܩܪܹܝܢ ܐܲܪ̈ܟܘܿܣ: ܘܫܘܼ̈ܠܛܵܢܹܐ: ܘܚܲܝ̈ܠܹܐ: ܘܡܵܪ̈ܵܘܵܬܼܵܐ. ܟܒܲܪ ܕܹܝܢ ܗܵܢܘܿܢ ܕܡܸܬܼܝܲܩܪܝܼܢ ܒܫܘܼܠܛܵܢܵܐ ܘܲܒܼܪܹܫܵܢܘܼܬܼܵܐ: ܙܥܘܿܪܝܼܢ ܐܸܢܘܿܢ ܒܡܸܢܝܵܢܵܐ ܡ̣ܢ ܡܫܲܥ̈ܒܿܕܹܐ ܕܤܝܼܡܝܼܢ ܠܡܸܫܬܲܥܒܵܕܼܘܼ ܠܦܘܼܩܕܵܢܗܘܿܢ: ܐܵܡܲ݁ܪ ܪܲܒܵܐ ܕܡܲܠܦܵܢܹ̈ܐ ܪܗܸܛܪܵܐ ܕܝܼܘܿܕܘܿܪܘܿܣ. ܒܚܲܝܠܵܐ ܠܲܡ ܘܲܒܼܤܘܼ̈ܟܵܠܹܐ ܪܵܘܪ̈ܒܹܐ ܘܲܡܢܵܬܼܵܢܵܝܹ̈ܐ ܐܝܼܬܲܝܗܘܿܢ: ܠܦܘܼܬܼ ܪܲܒܿܘܼܬܼܵܐ ܕܛܲܟܼܤܲܝ̈ܗܘܿܢ: ܟܲܕܼ ܡܸܬܿܕܲܪܓܼܝܼܢ ܘܤܵܠ̇ܩܝܼܢ ܡ̣ܢ ܕܪܲܓܼ ܠܲܓܼܪܲܓܼ: ܥܕܲܡܵܐ ܕܡܸܬܼܡܲܢܥܝܼܢ ܠܗܵܘ̇ ܚܲܕܼ ܕܩܲܫܝܼܫ ܘܚܲܝܠܬܼܵܢ ܡ̣ܢ ܟܠ ܘܲܫܒܼܝܼܚ: ܘܐܝܼܬܼܵܘܗܝ ܪܹܫܵܐ ܘܫܲܬܼܐܸܤܬܼܵܐ ܕܟܼܠܗܹܝܢ ܒܸܪ̈ܝܵܬܼܵܐ. ܪܹܫܵܐ ܕܹܝܢ ܐܵܡܲ݁ܪܢܵܐ܀ ܠܵܐ ܗ̄ܘ̣ܵܐ ܒܵܪܘܿܝܵܐ ܕܲܡܩܲܕܿܡܘܼܬܼ ܬܸܕܼܡܪܵܬܼܵܐ ܕܲܥܒܼܵܕܼܵܘ̈ܗܝ ܕܐܲܠܵܗܵܐ܀ ܤܲܓܝܼ ܦܲܝܝܼܫܝܼܢ ܘܲܒܼܨܝܼܪܝܼܢ ܐܸܢܘܿܢ ܡܲܠܲܐܟܹ̈ܐ ܘܪܲܒܲܝ ܡܲܠܲܐܟܹ̈ܐ ܡ̣ܢ ܡܲܕܼܪܟܼܵܢܘܼܬܼܵܐ ܕܚܸܟܼܡܬܹܗ ܕܐܲܠܵܗܵܐ: ܒܵܪܘܿܝܵܐ ܕܝܼܠܲܢ ܘܕܼܝܼܠܗܘܿܢ. ܘܗܵܢܵܐ ܟ̱ܠܹܗ ܒܨܝܼܪܝܼܢ: ܐܲܝܟܼ ܡܵܐ ܕܲܒܼܨܝܼܪܝܼܢ ܡܸܢܗܘܿܢ: ܗܵܢܘܿܢ ܕܡܸܢܗܘܿܢ ܡܬܲܚܬܹܝܢ: ܘܲܕܼܠܵܐ ܤܵܟܼ ܝܲܬܝܼܪ. ܒܨܝܼܪܹ̈ܐ ܕܹܝܢ ܐܵܡܲ݁ܪܢܵܐ: ܒܲܡܥܲܠܝܘܼܬܼܵܐ ܘܒܲܡܬܲܚܬܝܘܼܬܼܵܐ ܕܡ̣ܢ ܚܕܼܵܕܼ̈ܐ. ܠܵܐ ܗ̄ܘ̣ܵܐ ܐܲܬܼܪܵܢܵܐܝܼܬܼ: ܐܸܠܵܐ ܒܚܲܝܠܵܐ ܘܲܒܼܤܘܼܟܵܠܵܐ. ܕܢܹܐܡܲܪ ܒܚܲܝܠܵܐ ܟܝܵܢܵܝܵܐ: ܘܲܒܼܤܘܼܟܵܠܵܐ ܡܥܲܠܹܝܢ ܘܲܒܼܨܝܼܪܝܼܢ. ܠܦܘܼܬܼ ܓܹܝܪ ܡܫܘܼܚܬܼܵܐ ܕܲܩܢܹܝܢ: ܢܲܩܝܼܦܵܐ ܠܗܘܿܢ ܝܑܼܕܲܥܬܼܵܐ ܕܪܲܒܵܐ ܘܕܲܒܼܨܝܼܪܵܐ܀ pb. 187 ܠܟܼܠܗܹܝܢ ܗܵܟܹܝܠ ܐܘܼܤ̈ܝܼܵܣ ܫܡܲܝܵܢ̈ܝܵܬܼܵܐ: ܝܘܼܦܠܵܢܵܐ ܐܲܠܵܗܵܝܵܐ ܒܬܸܫܥܵܐ ܟܘܼܢܵܝܹ̈ܐ ܪ̈ܘܼܚܵܢܹܐ ܫܲܡܲܗ ܐܸܢܹܝܢ. ܘܲܠܗܘܿܢ ܠܗܵܠܹܝܢ ܬܸܓܼܡܹ̈ܐ ܬܠܵܬܼܵܐ: ܬܠܝܼܬܼܵܐܝܼܬܼ ܦܲܪܸܫ. ܕܩܲܕܼܡܵܝܗܘܿܢ: ܡܵܘܬܿܒܹ̈ܐ: ܡܥܲܠܲܝ̈ܵܐ ܘܪ̈ܵܡܹܐ ܘܩܲܕܝܼ̈ܫܹܐ. ܘܲܟܼܪ̈ܘܿܒܹܐ: ܤܲܓܝܼ̈ܐܲܝ ܥܲܝ̈ܢܹܐ. ܘܲܤܪ̈ܵܦܹܐ: ܤܲܓ̈ܝܼܐܲܝ ܓܸܦܹ̈ܐ. ܘܬܸܓܼܡܵܐ ܕܹܝܢ ܬܠܝܼܬܼܵܝ ܛܲܟܼܤܹ̈ܐ: ܡܵܪ̈ܵܘܵܬܼܵܐ ܘܚܲܝ̈ܠܹܐ ܘܫܘܼ̈ܠܛܵܢܹܐ. ܕܲܬܼܠܵܬܼܵܐ: ܐܲܪ̈ܟܘܿܣ ܘܪ̈ܲܒܲܝ ܡܲܠܲܐܟܹ̈ܐ ܘܡܲܠܲܐܟܹ̈ܐ܀ ܘܬܘܼܒܼ ܡܸܬܼܦܲܫܩܝܼܢ: ܥܸܒܼܪܵܐܝܼܬܼ. ܤܪ̈ܵܦܹܐ: ܡܲܚܡܵܢܹ̈ܐ ܘܡܵܘܩ̈ܕܼܵܢܹܐ. ܟܪ̈ܘܿܒܹܐ: ܤܲܓܝܼܐܘܼܬܼ ܝܑܼܕܲܥܬܼܵܐ: ܘܐܲܫܝܼܕܼܘܼܬܼ ܚܸܟܼܡܬܼܵܐ. ܘܡܵܘܬܿܒܹ̈ܐ: ܩܘܼܒܵܠܵܐ ܘܲܢܚܵܝܬܼܵܐ ܕܐܲܠܵܗܵܐ. ܝܲܕܘܼ̈ܥܬܼܵܢܹܐ ܕܹܝܢ ܐܸܫܬܲܡܲܗܘ ܬܸܓܼܡܵܐ ܗܵܢܵܐ ܩܲܕܼܡܵܝܵܐ: ܠܵܘ ܐܲܝܟܼ ܡܲܢ ܕܲܒܼܝܲܕܼ ܦܸܠܵܐ̈ܬܼܵܐ ܦܬܼܝܼ̈ܟܼܵܬܼܵܐ ܡܸܬܼܪ̈ܲܓܼܫܵܢܝܬܼܵܐ ܚܵܙܹ̇ܝܢ ܪܘܼܚܵܢܵܐܝܼܬܼ: ܐܵܘ ܡ̣ܢ ܟܬܼܵܒܲܝ̈ ܪܘܼܚܵܐ ܡܸܤܬܲܟܿܠܝܼܢ ܥܲܠ ܐܝܼܬܼܘܼܬܼܵܐ. ܐܸܠܵܐ ܐܲܝܟܼ ܡܲܢ ܕܡܸܬܼܡܠܹܝܢ ܢܘܼܗܪܵܐ ܡܪܲܡܪ̱ܡܵܐ ܕܟܼܠܵܗ̇ ܝܼܕܲܥܬܼܵܐ ܕܠܵܐ ܓܫܘܿܡ: ܘܡܸܤܬܲܒܼܥܝܼܢ ܐܲܝܟܼ ܕܡܲܦܲܣ ܠܗܘܿܢ ܡ̣ܢ ܬܹܐܘܿܪܝܼܵܐ ܐܝܼܬܼܚܵܬܼܵܐ ܬܠܝܼܬܼܵܝܲܬܼ ܙܲܠܝܼ̈ܩܹܐ ܕܫܘܼܦܪܵܐ ܒܵܪܹܐ ܟܠ ܫܘܼܦܪ̈ܝܼܢ: ܘܡܸܫܬܿܘܹܝܬ ܠܫܵܘܬܵܦܘܼܬܼܵܐ ܕܥܲܡ ܝܼܫܘܿܥ. ܠܵܐ ܗ̄ܘ̣ܵܐ ܒܝܘܼܩ̈ܢܹܐ ܩܲܕܝܼ̈ܫܲܝ ܨܘܼܠܵܡܵܐ: ܕܡܲܤܒܿܗܵܐܝܼܬܼ ܨܵܝ̇ܪܝܼܢ ܕܵܡܝܘܼܬܼܵܐ ܐܲܠܵܗܵܝܬܼܵܐ: ܐܸܠܵܐ ܐܲܝܟܼ ܡ̇ܢ ܕܒܲܫܪܵܪܵܐ ܩܲܪܝܼܒܼܝܼܢ ܠܘܵܬܹܗ ܡܸܬܿܛܲܒܼܥܝܼܢ ܡܸܢܹܗ ܒܲܢܤܝܼܒܼܘܼܬܼܵܐ ܩܲܕܼܡܵܝܬܼܵܐ ܕܝܼܕܲܥܬܼܵܐ ܕܢܲܗܝܼܪ̈ܵܘܗܝ ܐܲܠܵܗܵܝܹ̈ܐ. ܘܡܸܬܼܡ̱ܠܹܝܢ ܡ̣ܢ ܐܲܠܵܗܘܼܬܼܵܐ ܝܑܼܕܲܥܬܼܵܐ ܐܝܼܬܼܚܵܬܼܵܐ: ܐܲܝܟܼ ܕܒܹܝܬܼ ܡܲܠܲܐܟܹ̈ܐ: ܘܤܘܼ̈ܟܵܠܹܐ ܩܲܕܼܡܵܝܹ̈ܐ ܕܐܲܠܵܗܘܼܬܼܵܐ. ܐ̄ܚܪܵܢܝܵܐܝܼܬܼ ܘܝܲܬܝܼܪ ܢܲܗܝܼܪܵܐܝܼܬܼ ܟܘܼ̈ܢܵܝܹܐ ܕܛܲܟܼܤܹ̈ܐ ܥܸܠܵܝܹ̈ܐ. pb. 188 ܡܵܘ̈ܬܿܒܹܐ: ܡܝܲܩܪܹ̈ܐ. ܡܵܪ̈ܵܘܵܬܼܵܐ: ܫܲܠܝܼ̈ܛܲܝ ܥܲܠ ܡܲܠܟ̈ܘܵܬܼܵܐ. ܐܲܪ̈ܟܿܘܿܣ: ܡܕܲܒܿܪܵܢܲܝ ܐܵܐܲܪ܀ ܫܘܼ̈ܠܛܵܢܹܐ: ܕܫܲܠܝܼܛܝܼܢ ܥܲܠ ܥܲܡܡܹ̈ܐ: ܘܥܲܠ ܚܲܕܼ ܚܲܕܼ ܡ̣ܢ ܒܢܲܝ̈ܢܵܫܵܐ܀ ܘܚܲܝ̈ܠܹܐ: ܕܲܕܚܝܼܠ ܚܸܙܘܗܘܿܢ. ܗܵܢܵܘ ܕܹܝܢ: ܡܨܝܢ ܒܚܲܝܠܵܐ. ܤܪ̈ܵܦܹܐ: ܡܩܲܕ̈ܫܵܢܹܐ. ܟܪ̈ܘܿܒܹܐ: ܛܵܥܘܿܢܹ̈ܐ܀ ܥܝܼܪܹ̈ܐ: ܢܵܛܘܿܪܹ̈ܐ܀ ܡܲܠܲܐܟܹ̈ܐ: ܡܸܫܬܲܕܪ̈ܵܢܹܐ܀ ܒܝܵܘܡܵܐ ܩܲܕܼܡܵܝܵܐ: ܬܡܵܢܝܵܐ ܟܝܵܢܹ̈ܐ ܐܸܬܼܒܪܝܼܘ. ܫܲܒܼܥܵܐ ܒܫܸܬܼܩܵܐ: ܘܚܲܕܼ ܒܩܵܠܵܐ: ܕܐܝܼܬܼܵܘܗܝ ܢܘܼܗܪܵܐ܀ ܘܲܒܼܕܲܬܼܪܹܝܢ: ܪܩܝܼܥܵܐ܀ ܘܲܒܼܕܲܬܼܠܵܬܼܵܐ: ܟܘܼܢܵܫܵܐ ܕܡܲܝ̈ܵܐ: ܘܡܵܘܥܝܼܬܼܵܐ ܕܝܵܥ̈ܝܵܬܼܵܐ܀ ܘܲܒܼܕܲܐܪܒܿܥܵܐ: ܦܘܼܠܵܓܼܵܐ ܕܢܲܗܝܼܪܹ̈ܐ܀ ܘܒܲܕܼܚܲܡܫܵܐ: ܦܵܪܲܚܬܼܵܐ ܘܪ̈ܲܚܫܵܐ ܘܢܘܼ̈ܢܹܐ܀ ܘܲܒܼܕܸܫܬܼܵܐ: ܚܲܝ̈ܘܵܬܼܵܐ: ܘܒܲܪܢܵܫܵܐ܀ ܐܸܤܟܹܡܹܗ ܠܲܡ ܕܥܵܠܡܵܐ ܟ̱ܠܹܗ: ܐܘܼܪܟܵܐ ܘܲܦܬܼܵܝܵܐ܀ ܪܹܫܵܐ: ܡܲܕܼܢܚܵܐ܀ ܘܫܘܼܠܵܡܵܐ: ܡܲܥܪܒܼܵܐ܀ ܘܝܲܡܝܼܢܵܐ: ܓܲܪܒܿܝܵܐ܀ ܘܤܸܡܵܠܵܐ: ܬܲܚܡܢܵܐ܀ ܘܒܲܕܡܘܼܬܼ ܥܲܪܤܵܐ: ܐܝܼܬܹܝܗ̇ ܐܲܪܥܵܐ܀ ܘܲܫܡܲܝܵܐ ܥܸܠܵܝܹ̈ܐ: ܐܲܝܟܼ ܟܲܦܬܼܵܐ܀ ܘܲܫܡܲܝܵܐ ܕܲܬܼܪܹܝܢ: ܐܲܝܟܼ ܓܝܼܓܼܠܵܐ ܡܠܲܚܲܡ ܠܗܵܘ̇ ܥܸܠܵܝܵܐ. ܘܤܸܦ̈ܘܵܬܼܗܘܿܢ ܕܲܡܫܲܝܵܐ ܘܕܲܐܥܵܐ: ܕܲܒܿܝܼܩܝܼܢ ܒܲܚܕܼܵܕܹ̈ܐ܀ ܘܐܘܼܩܝܵܢܘܿܣ: ܐܲܝܟܼ ܩܲܡܪܵܐ ܥܲܦܝܼܩ ܠܗܘܿܢ. ܘܲܠܟܼܵܐ ܡܸܢܹܗ: ܛܘܼܪܹ݁ܐ ܪ̈ܵܡܹܐ ܕܤܵܠܩ̇ܝܼܢ ܥܕܲܡܵܐ ܠܲܫܡܲܝܵܐ. ܘܫܸܡܫܵܐ ܒܸܤܬܲܪ ܗܵܢܘܿܢ ܛܘܼܪܹ̈ܐ ܥܵܒܹ̇ܕܼ ܡܹܐܙܲܠܬܹܗ ܟ̱ܠܹܗ ܠܸܠܝܵܐ. ܘܝܲܡܵܐ ܪܲܒܵܐ: ܠܟܼܵܐ ܡܸܢܗܘܿܢ. ܘܲܠܒܼܝܼܟܼ ܚܲܕܼ ܒܐܲܪܒܿܥܵܐ ܒܝܲܒܿܝܼܫܬܼܵܐ: ܘܚܲܕܼ ܡ̣ܢ ܐܲܪܒܿܥܵܐ ܝܲܒܿܝܼܫܬܼܵܐ.