Isaac of Nineveh: Discourse 26

ܚܛܝܼܬܼܵܐ ܘܓܹܗܲܢܵܐ ܘܡܵܘܬܵܐ: ܟܠ ܟ̱ܠܹܗ ܨܹܝܕܼ ܐܲܠܵܗܵܐ ܠܲܝܬܿ. ܤܘܼܥܪ̈ܵܢܹܐ ܐܸܢܘܿܢ ܓܹܝܪ ܗܵܠܹܝܢ: ܘܠܵܘ ܩܢܘܿܡܹ̈ܐ܀ ܚܛܝܼܬܼܵܐ ܓܹܝܪ: ܦܹܐܪܵܐ ܗ̄ܘ̣ ܕܨܸܒܼܝܵܢܵܐ. ܘܐܝܼܬܼ ܗ̄ܘ̣ܵܐ ܐܸܡܲܬܼܝ: ܕܠܲܝܬܹܝܗ̇ ܗ̄ܘ̣ܵܬܼ. ܘܗܵܘܹ̇ܐ ܐܸܡܲܬܼܝ: ܕܠܵܐ ܬܸܗܘܸܐ. ܓܹܗܲܢܵܐ ܓܹܝܪ ܦܹܐܪܵܐ ܕܲܚܛܝܼܬܼܵܐ: ܕܠܲܙܒܲܢ ܘܐܸܡܲܬܼܝ ܕܗ̤ܘ ܫܵܩ̇ܠܵܐ ܫܘܼܪܵܝܵܐ. ܟܲܕܼ ܤܵܟܼܵܗ̇: ܠܵܐ ܝܑܼܕܲܝܼܥ. ܡܵܘܬܵܐ ܕܹܝܢ: ܦܘܼܪܢܵܤܵܐ ܗ̄ܘ̣ ܕܚܸܟܼܡ̱ܬܹܗ ܕܥܵܒܼܘܿܕܼܵܐ. ܗܵܢܵܐ ܕܲܡܠܸܐ ܙܒܲܢ ܒܲܠܚܘܿܕܼ ܫܲܠܝܼܛ ܥܲܠ ܟܵܝܵܢܵܐ: ܘܒܼܵܛܹ̇ܠ ܒܟܼܠ ܦܪܘܿܣ. ܤܵܛܵܢܵܐ: ܫܡܵܐ ܕܡܲܤܛܝܵܢܘܼܬܹܗ ܕܨܸܒܼܝܵܢܵܐ ܡ̣ܢ ܫܪܵܪܵܐ: ܘܠܵܘ ܕܲܟܼܝܵܢܵܐ ܐܝܼܬܼܵܘܗܝ ܡܵܘܕܥܵܢܵܐ܀ ܐܸܢܕܹܝܢ ܬܸܫܵܟܲܚ ܐܵܚܝ ܡܸܕܸܡ ܡܸܕܸܡ ܡ̣ܢ ܗܵܠܹܝܢ ܘܲܒܼܕܼܘܼܟ ܐ̄ܚܪܹܝܢ: ܠܵܐ ܐܲܝܟܼ ܡܸܬܼܚܙܵܘܙܸܐ ܢܸܬܼܚܫܸܒܼ ܚܢܲܢ ܒܥܲܝܢܲܝ̈ܟ: ܕܲܒܼܕܲܐ̄ܚܪ̈ܵܢܹܐ ܡܚܵܘܹ̇ܝܢ ܚ̄ܢܲܢ ܢܲܦܫܲܢ. ܐܸܠܵܐ ܡܵܠܘܿܢ ܡܲܟܿܝܼ̈ܟܹܐ: ܕܝܵܢܩܝܼܢܲܢ ܡ̣ܢ ܚܲܠܒܼܵܐ ܕܐܲܒܼܵܗܲܝ̈ܢ ܩܲܕܼܡܵܝܹ̈ܐ: ܗܵܠܹܝܢ ܕܐܲܝܟܼ ܕܲܠܬܹܐܘܿܪܝܼܵܐ ܟܲܢܸܫܢܲܢ ܤܵܡܢܲܢ ܩܕܼܵܡܲܝܢ: ܐܲܝܟܼ ܢܝܼܫܵܐ ܕܤܝܼܡ ܠܲܢ ܠܡܲܥܬܵܪܘܼ ܠܡܲܕܥܵܐ ܒܐܲܤܵܢܹ̈ܐ: ܕܲܒܼܗܘܿܢ ܢܸܪܥܸܐ ܘܢܸܬܿܬܲܪܤܸܐ. ܠܵܐ ܓܹܝܪ ܛܲܥܝܵܐ ܠܲܢ ܗܵܝ̇: ܕܠܵܐ ܐܸܬܼܥܲܠܝܼܢ ܡ̣ܢ ܛܲܟܼܤܵܐ ܕܝܵܠܘܿܦܹ̈ܐ: ܟܡܵܐ ܕܲܒܼܒܸܤܪܵܐ ܥܕܲܟܹܝܠ ܫܪܹܝܢܲܢ܀ ܦܵܪܘܿܫܘܼܬܼܵܐ ܐܝܼܬܹܝܗ̇: ܡܸܬܿܬܿܙܝܼܥܵܢܘܼܬܼܵܐ ܕܚܘܼ̈ܫܵܒܹܐ ܟܝܵܢܵܝܹ̈ܐ. ܐܸܡܲܬܼܝ ܕܗܵܠܹܝܢ ܒܐܘܼܪܚܹܗ ܕܲܟܼܝܵܢܵܐ ܪܵܕܹܝܢ ܒܙܵܘܥܲܝ̈ܗܘܿܢ: ܒܫܘܼܚܠܵܦܵܐ ܕܐܸܤܛܘܼܟܼܤܹ̈ܐ ܘܥܵܠܡܹ̈ܐ ܢܸܦܓܥܘܼܢ. ܟܲܕܼ ܕܹܝܢ pb. 190 ܒܲܬܼܪܲܝܵܢܝܼܬܼܵܐ: ܠܲܚܫܲܚܬܼܵܐ ܐ̄ܚܪܹܬܼܵܐ ܢܸܫܬܲܟܼ̈ܚܵܢ ܠܗܘܿܢ ܕܐܝܼܬܲܝܗܹܝܢ ܗܵܠܹܝܢ ܕܲܗ̤ܘܲܝ̈. ܕܟܲܕܼ ܥܦܝܼ̈ܦܹܐ ܐܸܢܘܿܢ ܒܤܘܼܟܵܠܵܐ ܟܝܵܢܹ̈ܐ ܠܲܚܫܲܚܬܼܵܐ: ܢܸܤܬܲܟܿܠܘܼܢ ܠܗܘܿܢ ܠܦܸܠܓܘܼܬܼ ܚܫܲܚܬܵܐ. ܕܐܝܬܼܵܘܗܝ: ܛܲܟܼܤܵܐ ܕܲܕܠܵܐ ܢܦܸܫ܀ ܐܸܡܲܬܼܝ ܕܲܒܼܗܲܢܝܼܐܘܼܬܼܵܐ ܕܦܸܬܼܓܼܵܡܲܝ̈ ܬܸܫܡܸܫܬܼܵܐ ܬܸܦܓܲܥ: ܗܵܝܕܹܝܢ ܗܵܘܢܵܐ ܡܸܬܼܝܲܥܲܢ: ܕܒܼܵܗ̇ ܟܲܕܼ ܒܵܗ̇ ܢܸܫܬܿܟܲܚ ܐܲܡܝܼܢܵܐܝܼܬܼ. ܐܸܢܕܹܝܬ ܫܸܐܠ̱ܬܹܗ ܕܲܬܼܡܲܠܸܐ ܨܵܒܹ̇ܐ ܐܲܢ̄ܬܿ: ܠܘܵܬܼ ܝܑܼܕܲܥܬܼܵܐ ܬܸܤܬܲܪܗܲܒܼ ܕܥܸܠܬܼܵܐ. ܠܗܵܕ݂ܹܐ ܚܲܪܝܼܦܵܐܝܼܬܼ ܐܸܢ ܬܲܕܪܸܟܼ: ܐܲܝܟܼ ܦܵܪܘܿܫܵܐ ܕܠܵܐ ܡܤܲܡܲܝ: ܠܵܐ ܥܲܤܩܵܐ ܠܵܟ: ܕܲܒܼܗܵܝ̇ ܐܲܡܝܼܢܵܐܝܼܬܼ ܕܠܵܐ ܥܘܼܟܵܪ ܬܸܬܼܒܲܤܲܡ. ܘܡܵܢܵܐ ܟܲܝ ܡܲܥܒܿܕܼܵܢܵܐ: ܗܵܘ̇ ܕܡܸܫܬܲܡܲܗ ܘܥܸܠܬܼܵܐ؟ ܠܦܲܪܙܠܵܐ ܡ̇ܢ ܫܘܿܦܝܼܢܵܐ: ܘܠܵܐ ܡܸܕܹܡ ܬܵܘܤܲܦܬܼܵܐ ܒܹܗ ܤܵܐܹ̇ܡ: ܠܡܲܝܬܵܝܘܼܬܹܗ ܠܘܵܬܼ ܡܲܒܼܗܩܘܼܬܼܵܐ ܘܨܵܡܘܿܚܘܼܬܼܵܐ. ܐܘܼܤܝܼܵܝܬܼܐ ܗ̣̄ܝ ܓܹܝܪ ܕܗܵܢܵܐ. ܐܸܠܵܐ ܡܵܢܵܐ؟ ܐܲܦܘܼܤܝܵܐ ܗ̄ܘ̣ ܕܹܝܢ ܫܵܕܹܐ ܡܸܢܹܗ: ܗܵܝ̇ ܕܡ̣ܢ ܒܠܲܝ ܦܘܼܠܚܵܢܵܐ ܤܸܠܩܲܬ̤ ܥܠܵܘܗܝ. ܘܗ̤ܝ ܟܲܕܼ ܗ̤ܝ ܬܹܐܘܿܪܝܼܵܐ ܥܲܠ ܟܝܵܢܹܗ ܕܗܵܘܢܵܐ. ܠܘܵܬܼ ܫܘܿܦܝܼܢܵܐ ܩܲܪܸܒܲܝܗܝ ܠܗܵܢܵܐ: ܘܗܵܝܕܹܝܢ ܡܸܫܟܲܚ ܐܲܢ̄ܬܿ ܠܹܗ ܕܐܲܝܟܲܢ ܡܲܒܼܗܸܩ ܒܥܸܕܵܢ ܬܸܫܡܸܫܬܼܵܐ: ܟܲܕܼ ܡܡܲܪܸܐ ܒܨܸܡܚܵܐ ܕܟܼܵܘ̈ܟܿܒܹܐ. ܠܡܸܪܕܵܐ ܓܹܝܪ ܠܲܩܕܼܵܡܵܘܗܝ ܤܘܼܥܪܵܢܵܐ: ܠܵܐ ܡܸܫܟܲܚ. ܦܲܚܝܼܫ ܡܲܢ: ܟܲܕܼ ܠܵܐ ܒܲܛܝܼܠ. ܡܸܛܠ ܡܵܢܵܐ ܒܙܘܼܡܵܪܵܐ ܐܸܡ̇ܪܹܬܼ: ܘܠܵܐ ܒܲܨܠܘܿܬܼܵܐ ܕܠܸܒܵܐ ܘܲܒܼܩܸܪܝܵܢܵܐ. ܠܡܲܚܤܸܢ ܡܸܬܼܠܒܸܟܼ ܗܵܘܢܵܐ ܬܲܡܵܢ. ܠܵܘ ܗܵܟܲܢܵܐ ܘܲܒܼܗܵܠܹܝܢ. ܝܲܨܝܼܦܘܼܬܼܵܐ ܓܹܝܪ ܙܥܘܿܪܬܵܐ: ܤܵܦ̇ܩܵܐ ܠܗܘܿܢ. ܗܵܠܹܝܢ: ܤܵܦ̇ܩܝܼܢ ܘܐܵܦ ܒܗܵܘ̇ ܠܲܡܥܲܕܵܪܘܼ. ܒܸܠܥܵܕܲܝܗܘܿܢ ܕܹܝܢ: ܤܪܝܼܩܬܼܵܐ ܡܸܫܬܲܟܼܚܵܐ pb. 191 ܝܲܨܝܼܦܘܼܬܼܵܐ ܕܒܹܗ. ܘܗܸܢܗܘܿܢ ܬܘܼܒܼ ܗܵܝܕܹܝܟ: ܡܵܐ ܕܐܲܤܵܢܵܐ ܢܸܫܠܲܡ ܕܡ̣ܢ ܟܲܕܼܘܼ: ܘܬܼܵܘܤܲܦܬܼܵܐ ܐܝܼܬܹܝܗ̇ ܘܠܵܐ ܡ̣ܢ ܕܘܼܟ ܥܠܵܘܗܝ. ܟܲܦܢܵܐ: ܝܵܕܲܥ̇ ܡܸܬܼܦܲܪܲܣ ܤܲܝܒܵܪܬܵܐ. ܕܲܢܦܘܼܫ ܕܹܝܢ ܡ̣ܢ ܕܲܠܡܹܐܟܲܠ: ܠܵܐ ܡܸܬܿܛܦܝܼܣ. ܗܲܢܝܼ ܠܹܗ ܓܹܝܪ ܠܦܲܠܵܚܵܐ: ܠܲܚܡܵܐ ܕܡ̣ܢ ܕܘܼܥܬܹܗ ܡܸܬܼܟܲܢܲܫ. ܥܕܲܡܵܐ ܓܹܝܪ ܕܕܼܵܥܹ̇ܬܼ ܠܘܼܩܕܲܡ: ܠܵܐ ܤܵܒܲܥ̇ ܠܲܚܡܵܐ ܕܩܘܼܫܬܼܵܐ. ܓܘܼܫܡܵܐ ܦܵܠܘܿܚܵܐ ܕܵܥܹ̇ܬܼ: ܘܲܡܬܲܪܤܸܐ ܠܗܵܘܢܵܐ ܡܲܠܵܠܵܐ. ܘܗܵܕܹܐ ܗܵܝܕܹܝܟ: ܐܸܡܲܬܼܝ ܕܡ̣ܢ ܬܘܼܪܤܵܝܵܐ ܕܲܥܝܵܕܼܵܐ ܘܠܵܐ ܟܝܵܢܵܝܵܐ ܢܸܬܼܡܲܤܟܲܢ ܗܵܘܢܵܐ܀ ܡܝܲܬܿܪܘܼܬܼܵܐ ܪܘܼܚܵܢܵܝܬܼܵܐ: ܒܲܪܬܼܵܐ ܗ̣̄ܝ ܕܗܵܝ̇ ܕܨܸܒܼܝܵܢܵܐ: ܘܲܩܛܝܼܪܵܝܬܼܵܐ ܕܝܼܠܹܗ. ܒܗܵܝ̇ ܟܹܝܬܼ ܕܚܹܐܪܘܼܬܼܵܐ: ܚܲܝܠܵܐ ܗ̣̄ܝ ܟܝܵܢܵܝܵܐ ܕܲܡܠܝܼܠܘܼܬܼܵܐ: ܘܠܵܐ ܐܲܤܝܼܪܘܼܬܼܵܐ. ܠܐܲܝܢܵܐ ܕܹܝܢ ܓܲܒܵܐ ܕܡܸܨܛܲܠܝܵܐ ܘܲܡܟܲܬܪܵܐ: ܡܵܘܠܕܼܵܐ ܚܲܝܠܵܐ ܐ̄ܚܪܹܢܵܐ: ܕܠܵܐ ܒܲܟܼܝܵܢܵܐ. ܡܵܐ ܕܐܸܬܼܝܼܠܸܕܼ ܗܵܢܵܐ: ܗܘ̤ܵܬܼ ܠܵܗ̇ ܗ̤ܝ ܚܹܐܪܘܼܬܼܵܐ: ܕܒܼܝܼܪܬܵܐ ܘܲܡܫܲܥܒܿܕܲܬܼ ܠܲܩܛܝܼܪܵܐ. ܘܕܲܬܼܟܼܝܼܠܵܐܝܼܬܼ ܐܹܡ݂ܲܪ: ܐܲܤܝܼܪܬܵܐ: ܘܠܵܐ ܫܲܠܝܼܛܲܬܼ ܥܲܠ ܝܵܬܼܵܗ̇. ܡ̣ܢ ܩܕܝܼܢ ܡܲܢ: ܩܛܝܼܪܵܐ ܨܸܒܼܝܵܢܵܝܵܐ. ܗܵܫܵܐ ܕܹܝܢ: ܩܛܝܼܪܵܐ ܡܫܲܥܒܸܿܕܼ ܨܸܒܼܝܵܢܵܐ. ܘܗܵܕܹܐ: ܕܲܠܘܵܬܼ ܬܪ̈ܲܝܗܘܿܢ ܓܲܒܹ̈ܐ ܡܸܬܼܚܲܙܝܵܐ ܐܵܡܲ̈ܪܢܵܐ. ܐܸܢ ܠܝܲܡܝܼܢܵܐ ܢܫܲܥܒܸܕܼ ܐ̄ܢܵܫ ܗ̤ܘ ܠܹܗ: ܘܐܸܢ ܠܤܸܡܵܠܵܐ ܐܲܬܼܪܵܐ ܢܸܬܸܠ. ܗܵܘܢܵܐ ܕܹܝܢ ܕܝܵܕܲܥ̇ ܢܸܚܙܸܐ ܩܲܛܝܼܢܵܐܝܼܬܼ: ܡܨܸܐ ܚܵܙܹ̇ܐ ܠܲܩܛܝܼܪܵܐ ܕܟܼܠܚܲܕܼ ܡ̣ܢ ܗܵܠܹܝܢ ܙܲܒܼ̈ܢܹܐ: ܟܲܕܼ ܚܲܝܠܵܐ ܗܵܘ̇ ܕܠܵܐ ܒܲܟܼܝܵܢܵܐ ܢܸܬܼܝܼܠܸܕܼ ܡ̣ܢ ܫܘܼܥܒܵܕܼܵܐ ܨܸܒܼܝܵܢܵܝܵܐ: ܕܐܲܝܟܲܢ ܟܵܒܹ̇ܫ ܠܚܹܐܪܘܼܬܼܵܐ. ܠܵܘ ܠܚܲܝܠܵܐ ܕܡ̣ܢ ܥܝܵܕܼܵܐ ܐܵܡܲ݁ܪܢܵܐ: ܗܵܘ̇ ܕܪܲܒܲܬܼ ܥܤܸܩ. ܘܗܵܢܵܐ: pb. 192 ܗܵܘ̇ ܕܲܡܫܲܡܗܝܼܢ ܠܹܗ ܬܵܒܼܘܿܥܵܐ. ܡ̣ܢ ܟܠܦܪܘܿܣ ܥܝܵܕܼܵܐ ܬܚܹܝܬܼ ܨܸܒܼܝܵܢܵܐ ܗ̄ܘ̣: ܐܵܦܸܢ ܥܡܝܼܠܵܐ ܨܒܼܘܼܬܼܵܐ ܠܡܸܡܪܲܕܼ ܡܸܢܹܗ. ܬܪܹܝܢ ܚܲܝ̈ܠܹܐ ܘܲܤܛܲܪ ܡ̣ܢ ܗܵܢܵܐ ܝܵܕܼܥܝܼܢܲܢ. ܐܸܠܵܐ ܚܲܕܼ ܡܲܢ: ܠܨܸܒܼܝܵܢܵܐ ܡܫܲܥܒܸܿܕܼ. ܗܵܘ̇ ܕܹܝܢ ܐ̄ܚܪܹܢܵܐ: ܘܠܹܗ ܠܲܟܼܝܵܢܵܐ ܚܵܤܹ̇ܝܢ. ܫܲܠܝܼܛ ܠܹܗ ܕܹܝܢ: ܘܐܵܦ ܠܲܡܫܲܚܠܵܦܘܼ ܠܲܟܼܝܵܢܵܐ. ܕܡܲܥܒܿܕܼܵܢܘܼܬܼܵܐ ܫܲܠܝܼܛܵܐ ܥܲܠ ܟܝܵܢܵܐ: ܠܐܲܝܠܹܝܢ ܕܲܡܢܲܤܝܵܐ ܠܗܘܿܢ: ܝܑܼܕܼܝܼܥܵܐ ܗ̄ܝ̣܀ ܠܫܘܼ̈ܚܠܵܦܹܐ ܕܠܸܒܵܘ̈ܵܬܼܵܐ ܘܲܠܬܲܪ̈ܥܝܵܬܼܵܐ ܠܵܐ ܕܵܡ̈ܝܵܬܼܵܐ ܕܡܸܢܗܘܿܢ ܡ̈ܥܵܕܼܵܢ ܠܡܸܬܼܝܼܠܵܕܼܘܼ: ܒܲܪܬܼ ܚܹܐܪܹ̈ܐ ܘܠܵܐ ܒܲܪܬܼ ܚܹܐܪܹ̈ܐ ܚܲܝܹ̈ܐ ܘܡܵܘܬܵܐ: ܪܲܒܲܬܼ ܡܥܲܕܪܵܐ ܠܵܐ ܫܲܘܝܘܼܬܼܵܐ ܕܬܹܐܘܿܪܝܼܵܐ: ܕܥܲܠ ܕܝܼ̈ܢܹܐ ܐܲܠܵܗܵܝܹ̈ܐ ܢܵܒܼ̈ܗܵܢ ܒܪܸ̈ܥܝܵܢܹܐ ܐ̄ܢܵܫܵܝܹ̈ܐ. ܒܗܵܕܹܐ ܠܵܐ ܫܲܘܝܘܼܬܼܵܐ ܕܤܝܼܡܵܐ ܒܲܡܨܲܥܬܼܵܐ: ܢܛܝܼܪ ܠܹܗ ܠܥܵܠܡܵܐ ܐܲܠܦܹ̈ܐ ܕܲܫ̈ܢܲܝܵܐ. ܗܵܕܹܐ ܠܵܐ ܫܲܘܝܘܼܬܼܵܐ: ܪܲܒܲܬܼ ܡܥܲܕܪܵܐ ܠܫܘܼܚܠܵܦ ܕܘܼܒܵܪܹ̈ܐ ܕܐܘܼܪܚܵܐ ܕܡܵܝܘܿܬܼܘܼܬܼܵܐ. ܘܗܵܝ̇ ܕܡ̣ܢ ܟܠ ܪܲܒܵܐ: ܠܘܵܬܼ ܬܹܐܘܿܪܝܼܵܐ ܕܕܼܝܼ̈ܢܹܐ: ܡܵܘܠܕܲܝ̈ ܡܲܤܒܿܪ̈ܵܢܘܵܬܼܵܐ ܕܥܲܠ ܐܲܠܵܗܵܐ. ܠܸܒܵܘ̈ܬܼܵܐ ܤܲܓܝܼ̈ܐܹܐ: ܡܵܐ ܕܥܲܠ̣ ܠܓܼܵܘܗܘܿܢ ܬܘܼܟܼܠܵܢܵܐ: ܐܲܝܟܼ ܐ̄ܢܵܫ ܕܲܢܤܲܒܼ ܤܲܡܵܐ ܕܡܵܘܬܵܐ. ܐܵܦ ܠܲܒܼܢܲܝ̈ܵܐ ܚܲܬܝܼ̈ܬܹܐ ܘܫܲܪܝܼܪܹ̈ܐ: ܒܲܥܤܲܪ ܡܢ̈ܵܘܵܬܼܵܐ ܕܚܘܼܒܵܐ ܕܐܝܼܬܼ ܠܗܘܿܢ: ܚܲܡܸܫ ܡܢ̈ܵܘܵܢ ܕܸܚܠܬܼܵܐ ܡܚܲܠܛܵܐ ܒܗܹܝܢ. ܠܵܐ ܤܵܦܹ̇ܩ ܟܝܵܢܵܐ ܡܸܨܛܲܠܝܵܢܵܐ: ܠܫܘܼܡܠܵܝܹܗ ܕܲܫܪܵܪܵܐ ܐܲܠܵܗܵܝܵܐ ܠܡܸܤܲܒܼ ܗܵܪܟܵܐ: ܐܵܘ ܠܡܸܕܲܥ ܠܟܼܠܹܗ ܨܸܒܼܝܵܢܵܐ ܐܲܠܵܗܵܝܵܐ: ܕܲܩܢܸܐ ܠܹܗ ܠܘܵܬܼ ܓܸܢܤܵܐ ܕܲܡܠܝܼ̈ܠܹܐ: ܐܵܦܠܵܐ ܐܲܝܟܼ ܦܵܘܠܘܿܣ ܘܕܲܐܟܼܘܵܬܹܗ. ܥܕܲܡܵܐ ܕܡܸܨܛܲܠܝܵܢܘܼܬܼܵܐ ܬܸܬܿܪܝܼܡ ܡ̣ܢ pb. 193 ܡܨܲܥܬܼܵܐ: ܕܠܵܐ ܢܸܨܛܠܸܐ ܟܝܵܢܵܐ ܒܡܲܪܓܫܵܢܘܼܬܼܵܐ ܕܗܵܕܹܐ܀ ܡܵܢܲܐ ܗ̣̄ܝ: ܫܲܘܝܘܼܬܼܵܐ ܘܠܵܐ ܫܲܘܝܘܼܬܼܵܐ؟ ܠܵܐ ܫܲܘܝܘܼܬܼܵܐ ܕܬܹܐܘܿܪܝܼܵܐ: ܕܡ̣ܢ ܚܕܼܵܐ ܢܲܦܫܵܐ ܡܫܲܠܦܵܐܝܼܬܼ ܘܠܵܐ ܕܵܡܝܵܐܝܼܬܼ: ܠܵܐ ܡܸܬܿܕܲܪܟܵܢܘܼܬܼܵܐ ܕܬܲܪܥܝܼܬܹܗ ܡܬܼܘܿܡܵܝܬܼܵܐ ܕܐܲܠܵܗܵܐ. ܫܲܘܝܘܼܬܼܵܐ ܕܹܝܢ: ܡܸܬܼܓܲܠܝܵܢܘܼܬܹܗ ܕܲܫܪܵܪܵܐ. ܘܐܸܢ ܢܩܲܒܸܠ ܬܢܵܢ ܟܝܵܢܵܐ ܡܸܨܛܲܠܝܵܢܵܐ ܫܪܵܪܵܐ ܚܲܬܝܼܬܼܵܐ: ܡܵܐܹ̇ܬܼ ܠܹܗ ܡ̣ܢ ܚܹܐܦܹ̈ܐ ܕܡܸܨܛܲܠܝܵܢܘܼܬܼܵܐ. ܗܵܝ̇ ܕܐܘܿ ܥܘܼܡܩܵܐ ܕܥܘܼܬܼܪܵܐ: ܘܕܼܝܼܢܵܘ̈ܗܝ ܠܲܡ ܠܵܐ ܡܸܬܼܒܿܨܹܝܢ. ܘܡܲܢ̣ܘܼ ܝܑܼܕܲܥ̣ ܪܸܥܝܵܢܹܗ ܕܡܵܪܝܵܐ: ܘܫܲܪܟܵܐ: ܕܡܸܬܿܕܲܡܪܵܢܵܐܝܼܬܼ ܘܲܒܼܬܸܢ̈ܚܵܬܼܵܐ ܒܵܠ̈ܩܵܢ ܒܪܸܥܝܵܢܵܐ ܒܲܙܒܲܢ ܙܒܲܢ: ܕܡ̣ܢ ܐ̄ܢܵܫ̈ܝܼܢ ܥܲܪܦܸܠܵܐ ܐܸܫܬܲܡܲܗ: ܡ̣ܢ ܗܵܕܹܐ ܠܵܐ ܫܲܘܝܘܼܬܼ ܬܹܐܘܿܪܝܼܵܐ ܘܲܡܫܲܚ̱ܠܦܘܼܬܼ ܡܲܤܒܿܪ̈ܵܢܘܵܬܼܵܐ ܡܸܬܼܝܲܠ̈ܕܵܢ: ܕܥܲܠ ܒܨܵܬܼܵܐ ܠܵܐ ܡܸܬܿܕܲܪܟܵܢܝܼܬܼܵܐ ܕܕܼܝܼ̈ܢܹܐ ܐܲܠܵܗܵܝܹ̈ܐ܀ ܡܵܐ ܕܐܸܬ̣ܼܵܐ ܕܹܝܢ ܫܘܼܡܠܵܝܹܗ ܕܲܟܼܝܵܢܵܐ ܒܥܵܠܡܵܐ ܠܵܐ ܡܸܨܛܲܠܝܵܢܵܐ: ܠܵܐ ܬܘܼܒܼ ܩܵܢܹ̇ܛ ܟܝܵܢܵܐ ܠܡܸܕܲܥ ܫܪܵܪܹܗ ܕܐܲܠܵܗܵܐ: ܕܕܲܡ ܢܸܨܛܠܸܐ ܠܤܸܡܵܠܵܐ ܡܸܛܠ ܬܘܼܟܼܠܵܢܵܐ. ܬܘܼܟܼܠܵܢܵܐ ܒܲܤܝܘܼܬܼܵܐ ܡܵܘܠܸܕܼ: ܘܐܲܫܝܼܕܼܘܼܬܼܵܐ ܕܬܲܪܥܝܼܬܼܵܐ. ܕܸܚܠܬܼܵܐ ܡ̇ܢ: ܡܥܵܕܼܵܐ ܡܚܲܝܨܵܐ ܠܡܸܨܛܲܠܝܵܢܘܼܬܼܵܐ: ܕܬܸܗܘܸܐ ܡܦܲܓܿܕܼܵܐ. ܠܵܗ̇ ܠܗܵܕܹܐ ܡܸܫܟܲܚ ܐܲܢ̄ܬܿ ܒܢܲܦܫܵܟܼ: ܒܬܹܐܘܿܪܝܼܵܐ ܕܫܘܼܚܠܵܦܵܐ ܕܕܝܼ̈ܢܹܐ ܘܲܕܼܥܵܠܡܹ̈ܐ: ܘܠܵܐ ܫܲܘܝܘܼܬܼ ܕܘܼܒܵܪܹ̈ܐ ܘܫܘܼܚܠܵܦ ܦܘܼܪ̈ܥܵܢܹܐ ܕܲܠܘܵܬܼܗܘܿܢ ܡܸܬܼܦܲܪܢܤܝܼܢ ܘܐܵܦ ܡܸܟܵܐ: ܘܟܹܐܢܘܼܬܼܵܐ ܕܲܡܚܵܘܝܵܐ ܢܲܦܫܵܗ̇ ܒܲܙܒܲܢ ܙܒܲܢ: ܘܡܸܛܠ ܡܲܓܿܪܲܬܼ ܪܘܼܚܵܐ ܡܸܬܿܬܲܟܼܤܵܐ: ܘܲܒܼܬܹܐܘܿܪܝܼܵܐ ܕܙܲܕܝܼ̈ܩܹܐ ܘܲܕܼܚܲܛܵܝܹ̈ܐ: pb. 194 ܘܤܲܩܘܼܒܼܠܵܝܘܼܬܼ ܦܸܓܼܥܹ̈ܐ ܠܵܐ ܕܵܡܝܵܝܹ̈ܐ: ܕܲܠܘܵܬܼ ܦܲܪ̈ܨܘܿܦܹܐ ܗܵܠܹܝܢ ܕܲܠܩܘܼ̈ܒܼܠܵܝܹܐ ܡܦܲܪܢܤܵܢܵܐܝܼܬܼ. ܟܲܕܼ ܒܗܵܠܹܝܢ ܬܵܐܲܪ ܡܲܕܥܵܐ: ܙܵܘܥܵܐ ܫܵܪܹܐ ܥܲܠ ܟ̱ܠܵܗ̇ ܢܲܦܫܵܐ. ܘܡܸܬܼܝܲܠܕܵܐ ܒܵܗ̇ ܡܸܟܵܐ: ܒܨܵܬܼܵܐ ܕܚܘܼ̈ܫܵܒܹܐ ܘܡܸܠܹ̈ܐ ܘܤܘܼܥܪ̈ܵܢܹܐ: ܘܲܤܝܵܡ ܬܚܘܼ̈ܡܹܐ ܚܪ̈ܝܼܩܹܐ ܕܟܹܐܢܘܼܬܼܵܐ ܐܲܠܵܗܵܝܵܐ܀ ܡܵܐ ܕܹܝܢ ܕܡ̣ܢ ܗܵܠܹܝܢ ܢܸܬܼܩܦܸܣ: ܘܲܠܘܵܬܼܵܗ̇ ܕܐܝܼܬܼܘܼܬܼܵܐ ܝܑܼܚܝܼܕܵܐܝܼܬܼ ܢܸܬܼܥܲܠܸܐ ܡܲܕܥܵܐ: ܒܝܲܕܼ ܚܵܘܪܵܐ ܕܗܵܠܹܝܢ ܕܲܟܼܝܵܢܵܐ ܗܵܘ̇ ܛܵܒܼܵܐ ܘܲܩܢܸܐ ܝܑܼܕܲܥܬܼܵܐ ܡܬܼܘܿܡܵܝܬܼܵܐ: ܕܩܲܕܝܼܡܵܐ ܠܲܗܘܵܝܵܐ ܕܟܼܠ: ܘܲܕܼܫܲܪܟܵܐ ܕܗܵܠܹܝܢ ܕܝܼܠܹܗ: ܡܸܚܕܼܵܐ ܡܸܫܬܲܕܼܝܵܐ ܠܵܗ̇ ܕܸܚܠ̱ܬܼܵܐ ܠܒܲܪ: ܘܲܒܼܬܼܘܼܟܼܠܵܢܵܐ ܡܸܤܬܿܡܸܟܼ ܪܸܥܝܵܢܵܐ. ܟܲܕܼ ܕܹܝܢ ܬܘܼܒܼ ܡ̣ܢ ܬܲܡܵܢ ܢܸܬܿܬܲܚܬܸܐ ܘܲܠܘܵܬܼ ܥܵܠܡܹ̈ܐ ܘܦܘܼܪ̈ܫܵܢܲܝܗܘܿܢ ܢܸܬܼܦܪܸܣ ܡܲܕܥܵܐ: ܡܸܟܵܐ ܥܵܪܹܩ ܗܵܢܵܐ: ܘܲܠܕܼܚ̱ܠܬܼܵܐ ܝܵܗܹ̇ܒܼ ܐܲܬܼܪܵܐ. ܒܕܵܐܦ ܗ̤ܝ ܒܛܝܼܠܘܼܬܼܵܐ: ܕܒܼܵܗ̇ ܟܲܕܼ ܒܵܗ̇ ܒܬܹܐܘܿܪܝܼܵܐ ܕܲܫܪܵܪܵܐ ܢܸܫܬܿܒܸܩ ܡܲܕܥܵܐ ܟܠܫܵܥ: ܠܵܐ ܡܸܬܛܦܝܼܤܵܐ. ܘܒܲܕܼܓܼܘܿܢ ܒܲܙܒܲܢ ܙܒܲܢ ܡܪܝܼܡܵܐ ܡ̣ܢ ܠܸܒܵܐ ܠܗܵܘ̇ ܚܲܝܠܵܐ ܕܬܼܘܼܟܼܠܵܢܵܐ ܕܡ̣ܢ ܬܹܐܘܿܪܝܼܵܐ ܚܲܬܝܼܬܬܵܐ ܐܸܬܿܬܿܙܝܼܥ: ܘܫܵܒܼܩܵܐ ܠܹܗ ܕܢܸܬܿܛܲܪܲܦ ܬܘܼܒܼ ܒܡܲܤܒܿܪ̈ܵܢܘܵܬܼܵܐ ܕܲܙܢܝܼ̈ܢ ܙܢܝܼ̈ܢ. ܐܲܝܟܼ ܕܠܵܐ ܢܦܘܼܫ ܡ̣ܢ ܕܲܢܕܼܘܼܢ ܐܲܡܝܼܢܵܐܝܼܬܼ ܚܲܬܝܼܬܼܘܼܬܼܵܐ ܕܚܘܼܫܵܒܼܵܘ̈ܗܝ ܘܲܕܼܤܘܼܥܪ̈ܵܢܵܘܗܝ: ܘܲܕܢܸܩܢܸܐ ܙܗܝܼܪܘܼܬܼܵܐ. ܒܲܕܼܠܵܐ ܝܵܕܲܥ̇ ܐܲܝܟܲܢ ܦܵܓܲܥ ܒܕܼܝܼܢܹܗ ܕܐܲܠܵܗܵܐ: ܕܠܹܗ ܫܘܼܒܼܚܵܐ ܠܥܵܠܲܡ ܥܵܠܡܝܼܢ. ܐܵܡܹܝܢ.