Discourse 28

ܚܲܕܒܿܫܲܒܵܐ: ܐ̄ܪܵܙܵܐ ܗ̄ܘ̣ ܕܝܼܕܲܥܬܼܵܐ ܕܲܫܪܵܪܵܐ. ܗܵܝ̇ ܕܥܲܡ ܒܸܤܪܵܐ ܘܲܕܼܡܵܐ ܠܵܐ ܡܸܬܼܩܲܒܿܠܵܐ: ܘܥܘܼܠܵܝܵܐ ܕܡ̣ܢ ܡܲܤܒܿܪ̈ܵܢܘܵܬܼܵܐ. ܒܥܵܠܡܵܐ ܕܹܝܢ ܗܵܢܵܐ: ܠܲܝܬܿ ܝܵܘܡܵܐ ܬܡܝܼܢܝܵܐ. ܐܸܠܵܐ ܕܹܝܢ ܐܵܦܠܵܐ ܫܲܒܿܬܼܵܐ ܫܲܪܝܼܪܬܵܐ. ܗܵܝ̇ ܕܹܝܢ ܕܐܸܬܿܬܿܢܝܼܚ ܐܲܠܵܗܵܐ ܒܝܵܘܡܵܐ ܫܒܼܝܼܥܵܝܵܐ: ܐ̄ܪܵܙܵܐ ܗ̄ܘ̇ ܕܫܸܠܝܹܗ ܕܲܟܼܝܵܢܲܢ ܡ̣ܢ ܪܲܗܛܵܐ ܕܚܲܝܹ̈ܐ ܗܵܠܹܝܢ. ܡܸܛܠ ܕܐܵܦ ܩܲܒܼܪܵܐ: ܓܫܝܼܡܵܐ ܗ̄ܘ̣. ܡܸܢܹܗ ܗ̤ܘ ܡ̣ܢ ܥܵܠܡܵܐ ܗܵܢܵܐ. ܫܬܼܵܐ ܝܵܘ̈ܡܝܼܢ: ܒܦܘܼܠܚܵܢܵܐ ܕܚܲܝܹ̈ܐ ܡܸܬܼܓܲܡܪܝܼܢ. ܘܲܫܒܼܝܼܥܵܝܵܐ: ܒܩܲܒܼܪܵܐ ܡܸܫܬܲܡܠܸܐ. ܘܲܬܼܡܝܼܢܵܝܵܐ: ܒܡܲܦܲܩܬܼܵܐ ܕܡܸܢܹܗ. ܐܲܝܟܲܢܵܐ ܓܹܝܪ ܕܐ̄ܪ̈ܵܙܹܐ ܕܚܲܕܼܒܿܫܲܒܵܐ ܒܦܸܠ̱ܐܬܼܵܐ ܡܩܲܒܿܠܝܼܢ ܬܢܵܢ ܐܲܝܠܹܝܢ ܕܫܵܘܹ̇ܝܢ: ܘܠܵܘ ܠܹܗ ܠܝܵܘܡܵܐ ܡܩܲܒܿܠܝܼܢ ܒܲܓܼܫܝܼܡܘܼܬܼܗܘܿܢ: ܗܵܟܲܢܵܐ ܘܐ̄ܪ̈ܵܙܹܐ ܕܫܲܒܿܬܼܵܐ ܐܲܝܟܼ ܕܲܒܼܬܲܚܘܝܼܬܼܵܐ pb. 203 ܡܩܲܒܿܠܝܼܢ ܟܲܫܝܼܪܹ̈ܐ ܬܢܵܢ: ܘܠܵܘ ܠܵܗ̇ ܠܫܲܒܿܬܼܵܐ ܫܲܪܝܼܪܬܵܐ: ܕܐܝܼܬܹܝܗ̇ ܢܚܵܝܬܼܵܐ ܡܫܲܡܠܲܝܬܼܵܐ ܕܡ̣ܢ ܡܲܠܙܵܢ̈ܝܬܼܵܐ. ܡ̣ܢ ܟܠܡܸܕܸܡ ܐ̄ܪܵܙܵܐ ܐܲܛܥܸܡ̣ ܠܲܢ ܐܲܠܵܗܵܐ: ܘܠܵܘ ܒܹܗ ܒܤܘܼܥܪܵܢܵܐ ܚܲܬܝܼܬܼܵܐ ܕܢܸܬܼܗܲܦܲܟܼ ܒܫܲܪܝܼܪ̈ܵܬܼܵܐ ܐܲܓܼܙܲܪ ܠܲܢ ܗܵܪܟܵܐ. ܫܲܒܿܬܼܵܐ ܓܹܝܪ ܫܲܪܝܼܪܬܵܐ ܘܠܵܐ ܦܸܠ̱ܐܬܼܵܢܵܝܬܼܵܐ: ܒܩܲܒܼܪܵܐ ܗ̄ܘ̣ ܗܵܘ̇ܝܵܐ: ܢܵܘܚܵܐ ܡܫܲܠܡܵܢܵܐ ܕܡ̣ܢ ܫܚܵܩܲܝ̈ ܚܲܫܹ̈ܐ: ܘܡ̣ܢ ܦܘܼܠܚܵܢܵܐ ܕܠܘܼܩܒܲܠܗܘܿܢ. ܟ̱ܠܹܗ ܒܲܪܢܵܫܵܐ ܡܲܫܒܸܿܬܼ ܬܲܡܵܢ: ܦܲܓܼܪܵܐ ܥܲܡ ܢܲܦܫܵܐ܀ ܒܸܫܬܼܵܐ ܝܵܘ̈ܡܝܼܢ ܛܲܟܸܣ̣ ܐܲܠܵܗܵܐ ܩܘܼܝܵܡܹܗ ܕܥܵܠܡܵܐ ܗܵܢܵܐ: ܘܐܲܩܝܼܡ̣ ܐܸܤܛܘܼܟܼܤܹ̈ܐ: ܘܝܲܗܒܹܗ ܩܘܼܝܵܡܗܘܿܢ ܠܙܵܘܥܵܐ ܠܵܐ ܫܵܠܘܿܝܵܐ ܠܬܸܫܡܸܫܬܼܵܐ: ܘܠܵܘ ܕܢܸܫܠܘܿܢ ܡ̣ܢ ܪܲܗܛܵܐ ܩܕܼܵܡ ܕܢܸܫܬܿܪܘܿܢ. ܘܡ̣ܢ ܚܲܝܠܵܐ ܕܗܵܠܹܝܢ: ܗܵܢܵܘ ܕܹܝܢ ܐܸܤܛܘܼ̈ܟܼܤܹܐ ܐܲܒܼܵܗܵܝܹ̈ܐ: ܐܲܩܝܼܡ̣ ܓܘܼܫܡܲܢ ܕܝܼܠܲܢ. ܘܠܵܐ ܠܗܘܿܢ ܝܲܗ̣̄ܒܼ ܫܸܠܝܵܐ ܕܡ̣ܢ ܙܵܘܥܲܝ̈ܗܘܿܢ: ܘܠܵܐ ܠܓܼܘܼܫܡܲܢ ܝܲܠܕܵܐ ܕܡܸܢܗܘܿܢ: ܕܲܢܢܘܼܚ ܡ̣ܢ ܦܘܼܠܚܵܢܵܐ. ܘܤܵܡ̣ ܠܗܵܠܹܝܢ ܕܒܲܢ ܬܚܘܼܡܵܐ ܠܢܵܘܚܵܐ: ܥܕܲܡܵܐ ܕܢܸܩܦܘܼܢ ܠܲܐ̄ܚܝܵܢܲܝ̈ܗܘܿܢ ܩܲܕܼܡܵܝܹ̈ܐ: ܕܐܝܼܬܼܵܘܗܝ ܫܪܵܝܵܐ ܕܡ̣ܢ ܚܲܝܹ̈ܐ. ܐܵܦ ܠܐܵܕܼܵܡ: ܗܵܟܲܢܵܐ ܐܸܡ݂ܲܪ: ܕܲܒܼܕܼܘܼܥܬܼܵܐ ܕܐܲܦܲܝ̈ܟ ܬܹܐܟܼܘܿܠ ܠܲܚܡܵܐ. ܥܕܲܡܵܐ ܠܐܸܡܲܬܼܝ؟ ܥܕܲܡܵܐ ܠܲܡ ܕܬܸܗܦܘܿܟܼ ܠܐܲܪܥܵܐ ܕܡܸܢܵܗ̇ ܐܸܬ̱ܢܤܸܒܼܬܿ. ܘܬܸܦܠܘܿܚ ܒܐܲܪܥܵܐ: ܘܬܼܵܘܥܸܐ ܠܵܟܼ ܟܘܼ̈ܒܹܐ ܘܕܲܪܕܪܹ̈ܐ. ܕܐܝܼܬܼܵܘܗܝ: ܐ̄ܪܵܙܵܐ. ܕܥܵܠܡܵܐ ܕܦܘܼܠܚܵܢܵܐ ܗ̄ܘ̣ ܥܵܠܡܵܐ ܗܵܢܵܐ. ܟܡܵܐ ܕܚܲܝ܀ ܫܲܚܠ̱ܦܵܗ̇ ܕܹܝܢ ܡܵܪܲܢ ܡ̣ܢ ܗܵܘ̇ ܠܸܠܝܵܐ ܕܲܕܼܥܸܬܼ: ܠܕܼܘܼܥܬܼܵܐ ܕܦܘܼܠܚܵܢܵܐ ܕܒܲܐܪܥܵܐ ܡܵܘܥܝܲܬܼ ܟܘܼ̈ܒܹܿܐ ܘܕܪܕܪܹ̈ܐ: ܠܕܼܘܼܥܬܼܵܐ ܕܒܲܨܠܘܿܬܼܵܐ ܐܲܟܲܚ̄ܕܼ: ܘܲܕܼܢܸܕܼܥܲܬܼ ܒܦܘܼܠܚܵܢܵܐ ܕܙܲܕܝܼܩܘܼܬܼܵܐ. ܚܲܡܫܵܐ pb. 204 ܐܲܠܦܹ̈ܐ ܕܲܫ̈ܢܲܝܵܐ ܒܗܵܝ̇ ܫܲܒܼܩܹܗ ܕܢܸܥܡܲܠ. ܒܕܲܥܕܲܟܹܝܠ ܠܵܐ ܐܸܬܼܓܲܠܝܲܬ̤ ܗ̄ܘ̣ܵܬܼ ܐܘܼܪܚܵܐ ܕܩܲܕܝܼ̈ܫܹܐ: ܐܲܝܟܼ ܫܠܝܼܚܵܐ. ܐܸܬܼܵܐ ܕܹܝܢ ܒܛܲܝܒܿܘܼܬܹܗ ܒܚܲܪܬܼܵܐ ܕܝܵܘ̈ܡܵܬܼܵܐ: ܦܲܩ̣ܕܼܵܗ̇ ܠܚܹܐܪܘܼܬܲܢ: ܕܲܬܼܫܲܚܠܸܦ ܠܕܼܘܼܥܬܵܗ̇ ܒܕܼܘܼܥܬܼܵܐ. ܡ̣ܢ ܟܠ ܦܪܘܿܣ: ܠܵܘ ܠܡܸܫܠܵܐ ܦܲܩܸܕܼ: ܚܘܼܠܵܦܵܐ ܗ̄ܘ̣ ܚ̣ܵܘܝܼ ܠܵܗ̇. ܒܲܕܼܚ̣ܵܣ ܥܠܲܝܢ: ܡܸܛܠ ܢܲܓܼܝܪܘܼܬܼ ܠܹܐܘܬܲܢ ܕܒܲܐܪܥܵܐ. ܐܸܢ ܢܸܫܠܸܐ ܕܹܝܢ ܡ̣ܢ ܕܢܸܕܼܥܲܬܼ ܒܗܵܕܹܐ: ܐܵܢܲܢܩܹܐ ܕܟܼܘܼ̈ܒܹܐ ܐܝܼܬܼ ܠܲܢ ܠܡܸܚܨܲܕܼ: ܕܐܝܼܬܼܵܘܗܝ ܫܸܠܝܵܐ ܕܡ̣ܢ ܗܵܕܹܐ: ܦܘܼܠܚܵܢܵܐ ܕܲܓܼܫܝܼܡܘܼܬܼ ܐܲܪܥܵܐ: ܗܵܝ̇ ܕܡܵܘܥܝܵܐ ܟܘܼ̈ܒܹܐ ܐܲܝܟܼ ܟܝܵܢܵܗ̇. ܒܲܫܪܵܪܵܐ: ܟܘܼ̈ܒܹܐ ܐܸܢܘܿܢ ܚܲܫܹ̈ܐ: ܕܡ̣ܢ ܙܲܪܥܵܐ ܕܲܒܼܓܼܘܼܫܡܵܐ ܝܵܥܹ̇ܝܢ ܠܲܢ. ܟܡܵܐ ܕܲܠܨܲܠܡܹܗ ܕܐܵܕܼܵܡ ܛܥܝܼܢܝܼܢܲܢ: ܐܵܢܲܢܩܹܐ: ܘܲܠܚܲܫܵܘ̈ܗܝ. ܠܲܝܬܿ ܠܵܗ̇ ܠܐܲܪܥܵܐ ܕܬܸܫܠܸܐ ܡ̣ܢ ܕܬܼܵܘܥܸܐ: ܡܵܘܥܝܵܐ ܓܹܝܪ ܐܲܝܟܼ ܟܝܵܢܵܗ̇. ܒܲܪܬܼ ܟܝܵܢܵܗ̇ ܗ̣̄ܝ ܘܐܲܪܥܵܐ ܕܝܼܠܲܢ: ܐܲܝܟܼ ܤܵܗܕܘܼܬܹܗ ܕܐܲܠܵܗܵܐ ܕܲܠܘܵܬܲܢ: ܐܲܪܥܵܐ ܠܲܡ ܕܡܸܢܵܗ̇ ܐܲܬܼܢܤܸܒܼܬܿ. ܗܵܝ̇ ܡܲܢ: ܟܘܼ̈ܒܹܐ. ܗܵܕܹܐ ܕܹܝܢ ܡܠܝܼܠܬܼܵܐ: ܚܲܫܹ̈ܐ܀ ܐܸܢܕܹܝܢ ܡܵܪܲܢ ܒܟܼܠ ܡܸܕܸܡ ܛܘܼܦܤܵܐ ܠܲܢ ܗܘ̤ܵܐ ܒܐ̄ܪܵܙܵܐ ܒܟܼܠܗܘܿܢ ܦܘܼܪ̈ܫܵܢܹܐ ܕܲܡܕܲܒܿܪܵܢܘܼܬܹܗ: ܥܕܲܡܵܐ ܓܹܝܪ ܠܲܬܼܫܲܥ ܫܵܥ̈ܝܼܢ ܕܲܥܪܘܼܒܼܬܼܵܐ ܠܵܐ ܢܵܚ̣ܝ ܡ̣ܢ ܦܘܼܠܚܵܢܵܐ ܐܸܠܵܐ ܘܡ̣ܢ ܛܘܼܪܵܦܵܐ: ܕܐܝܼܬܹܝܗ̇ ܦܸܠܐܬܼܵܐ ܕܟܼܠܗܘܿܢ ܚܲܝܲܝ̈ܢ ܐ̄ܪܵܙܵܐ ܗ̄ܘ̣ ܕܦܘܼܠܚܵܢܵܐ: ܠܫܲܒܿܬܐ ܕܹܝܢ ܠܵܐ ܐܲܩܒܸܠ̣ ܐܸܠܵܐ ܐܸܢ ܒܩܲܒܼܪܵܐ: ܐܲܝܟܵܐ ܐܸܢܘܿܢ ܗܵܠܹܝܢ ܕܐܵܡ̇ܪܝܼܢ ܕܐܝܼܬܼ ܗ̄ܘ̣ ܫܲܒܿܬܼܵܐ ܒܥܵܠܡܵܐ ܗܵܢܵܐ: ܢܵܘܚܵܐ ܕܡ̣ܢ ܚܲܫܹ̈ܐ؟ ܥܲܠ ܚܲܕܼܒܿܫܲܒܵܐ ܕܹܝܢ: ܪܲܒܲܐ ܗ̣̄ܝ ܠܡܹܐܡܲܪ. ܫܲܒܿܬܼܵܐ ܕܝܼܠܲܢ: ܝܵܘܡܵܐ ܗ̄ܘ̣ ܕܩܲܒܼܪܵܐ. ܚܲܬܿܝܼܬܵܐܝܼܬܼ: ܬܲܡܵܢ ܡܲܫܒܸܿܬܼ ܟܝܵܢܲܢ. ܡܵܕܹܝܢ ܟܠܝܘܿܡ pb. 205 ܠܡܸܥܩܲܪ ܟܘܼ̈ܒܹܐ ܡܸܢܵܗ̇ ܐܵܠܨܵܐ ܗ̣̄ܝ ܠܲܢ: ܟܡܵܐ ܕܩܲܝܵܡܵܐ ܗܵܕܹܐ ܐܲܪܥܵܐ. ܡܸܛܠ ܐܲܡܝܼܢܘܼܬܼ ܦܘܼܠܚܵܢܵܐ ܡܲܢ: ܒܨܝܼܪܘܼܬܼ ܝܲܥܪܵܐ. ܠܵܐ ܕܹܝܢ ܠܲܓܼܡܵܪ ܕܟܼܝܼܬܼܵܐ: ܘܐܵܦܸܢ ܗܵܟܲܢ. ܐܸܢ ܩܲܠܝܼܠ ܙܲܒܼܢܵܐ ܬܸܬܼܚܲܒܼܢܲܢ ܠܘܵܬܼ ܗܵܕܹܐ: ܤܵܠܹ̇ܩ ܝܲܥܪܵܐ: ܘܲܡܟܲܤܸܐ ܐܲܦܹ̈ܝܗ̇. ܘܲܠܙܲܪܥܵܟܼ ܝܵܢܹ̇ܩ: ܘܲܠܥܲܡܠܵܟܼ ܕܡ̣ܢ ܟܲܕܘܼ: ܐܲܝܟܼ ܠܵܐ ܐܝܼܬܼܵܘܗܝ. ܡܵܕܹܝܢ: ܟܠܝܘܿܡ ܤܢܝܼܩܵܐ ܠܲܡܕܲܟܵܝܘܼ. ܦܵܘܫܵܐ ܕܡ̣ܢ ܗܵܢܵܐ: ܝܲܬܝܼܪܘܼܬܼܵܐ ܕܗܵܢܘܿܢ ܡܪܲܒܸܐ.