On Human Nature - ܥܠ ܟܝܢܐ ܐܢܫܝܐ

1 :ܐܹܝܠ ܐܲܠܵܗܵܐ ܫܡܲܥ ܒܵܥܘܼܬܲܢ ܕܲܫܡܝܼܥܵܐ ܠܵܟ 2 ܘܦܲܢܵܐ ܒܪ̈ܲܚܡܲܝܟ ܫܸܐܠܲܬܼ ܢܲܦܫܲܢ ܕܲܡܦܵܣܲܬܿ ܒܵܗ̇ ܀ 3 :ܫܦܝܼܥ ܒܲܚܢܵܢܹܗ ܚܵܘܵܐ ܚܘܼܒܵܟ ܐܲܝܟ ܕܲܡܥܵܕܼ ܐܲܢ̄ܬܿ 4 ܕܠܵܐ ܢܲܗܸܠ ܒܹܗ ܣܵܢ̇ܐܵܐ ܕܐ̄ܢܵܫܵܐ ܒܲܥܒܼܵܕܼ ܐܝܼܕܲܝ̈ܟ ܀ 5 :ܥܬܿܝܼܪ ܡ̣ܢ ܟܠ ܦܬܲܚ ܒܹܝܬܼ ܓܲܙܵܟ ܠܲܣܢܝܼܩܘܼܬܲܢ 6 ܕܠܵܐ ܢܸܬܼܡܲܣܟܲܢ ܘܢܵܘܓܲܪ ܢܲܦܫܲܢ ܥܲܡ ܢܵܟܼܘܿܠܵܐ ܀ 7 :ܓܲܢܒܵܪ ܥܵܠܡܹ̈ܐ ܣܡܘܿܟ ܬܘܼܩܵܢܵܟ ܒܬܼܘܼܩܦܵܐ ܕܚܲܝܠܵܟ 8 ܕܗܵܐ ܡܸܙܕܲܥܙܲܥ ܡ̣ܢ ܩܲܫܝܘܼܬܼܵܐ ܕܚܲܫܹ̈ܐ ܘܫܹܐܕܹ̈ܐ ܀ 9 :ܐܝܼܬܼܝܵܐ ܕܲܡܠܹܝܢ ܫܡܲܝܵܐ ܘܐܲܪܥܵܐ ܡ̣ܢ ܐܝܼܬܼܘܼܬܹܗ 10 ܡܠܝܼܢ ܨܸܒܼܝܵܢܵܟ ܘܢܸܬܼܩܲܕܲܫ ܒܲܢ ܫܡܵܟ ܩܲܕܲܝܼܫܵܐ ܀ 11 :ܓܢܝܼܙ ܒܲܟܼܝܵܢܹܗ ܡ̣ܢ ܪ̈ܘܼܚܵܢܹܐ ܘܡ̣ܢ ܦܲܓܼܪܵܢܹܐ 12 ܓܠܝܼ ܒܲܢ ܚܲܝܠܵܟ ܘܚܵܘܵܐ ܥܘܼܬܼܪܵܐ ܕܒܲܣܝܼܡܘܼܬܼܵܟ ܀ 13 :ܡܲܬܼܩܸܢ ܟܠܵܐ ܕܲܒܼܪ̣ܵܐ ܒܪܝܼܬܼܵܐ ܡ̣ܢ ܠܵܐ ܡܸܕܸܿܡ 14 ܚܘܼܣ ܥܲܠ ܥܲܡܠܵܟ ܕܠܵܐ ܢܸܬܼܚܲܒܲܠ ܒܥܸܠܲܬܼ ܥܵܘ̣ܠܲܢ ܀ 15 :ܙܵܐܹ̇ܢ ܡܲܓܵܢ ܘܡܲܚܸܐ ܒܛܲܝܒܿܘܼ ܡܠܝܼܠܹ̈ܐ ܘܚܲܪ̈ܫܹܐ 16 ܦܫܘܿܛ ܝܲܡܝܼܢܵܟ ܘܣܲܒܲܥ ܢܲܦܫܲܢ ܡ̣ܢ ܡ̇ܘܗܲܒܼܬܼܵܟ ܀ 17 ܠܵܐ ܚܲܣܝܼܪܵܐ ܕܡ̣ܢ ܡܲܠܝܘܼܬܹܗ ܡܠܹܝܢ ܬܘܼܩܵܢܵܘ̈ܗܝ: pb. 258 18 :ܦܬܲܚ ܠܲܦܝܵܣܲܢ ܬܪܲܥ ܨܸܒܼܝܵܢܵܟ ܕܐܲܚܝܼܕܼ ܒܐܲܦܲܝ̈ܢ 19 :ܓܡܝܼܪ ܒܐܝܼܬܼܘܼܬܹܗ ܘܠܲܝܬܿ ܫܘܼܪܵܝܵܐ ܠܐܲܡܝܼܢܘܼܬܹܗ 20 ܓܡܘܿܪ ܒܲܥܒܼܵܕܼܵܐ ܫܘܼܕܵܝ ܡܸܠܲܝ̈ܟ ܕܲܠܘܵܬܼ ܓܸܢܣܲܢ ܀ 21 :ܨܵܐܲܪ ܬܹܒܹܝܠ ܒܣܲܡܵܐ ܕܚܘܼܒܹܿܗ ܕܠܵܐ ܡܸܬܼܦܲܟܲܗ 22 ܡܪܘܿܩ ܨܵܐܘܼܬܼܵܐ ܕܠܵܐ ܝܼܕܲܥܬܼܵܐ ܡ̣ܢ ܨܘܼܪ̈ܵܬܲܢ ܀ 23 :ܡܪܲܟܸܿܒܼ ܓܘܼܫܡܹ̈ܐ ܘܢܵܦܲܚ̇ ܢܲܦܫܵܐ ܒܓܼܵܘ ܗܲܕܵܡܹ̈ܐ 24 ܫܲܪܲܪ ܝܲܨܪܲܢ ܕܠܵܐ ܢܸܬܼܪܲܦܸܐ ܩܕܼܵܡ ܚܘܼ̈ܬܼܚܵܬܹܐ ܀ 25 :ܡܝܲܩܲܪ ܐ̄ܢܵܫܵܐ ܝܲܬܿܝܼܪ ܡ̣ܢ ܟܠ ܡܸܛܠ ܚܘܼܒܹܿܗ 26 ܚܘܼܣ ܥܲܠ ܨܲܠܡܵܐ ܕܝܲܩܝܼܪܘܼܬܼܵܟ ܕܠܵܐ ܢܸܨܛܲܥܲܪ ܀ 27 :ܒܸܫܡ ܐܝܼܬܼܘܼܬܼܵܟ ܕܠܵܐ ܪܘܼܟܵܒܼܵܐ ܩ̣ܬܲܝܬܿ ܪܘܼܟܵܒܲܢ 28 ܠܵܐ ܢܸܬܼܦܲܟܲܗ ܫܡܵܟ ܝܲܩܝܼܪܵܐ ܒܦܲܟܿܝܼܗܘܼܬܲܢ ܀ 29 :ܒܲܢ ܚܵܘܝܼܬܵܝܗܝ ܠܚܘܼܒܵܟ ܪܲܒܵܐ ܨܹܝܕܼ ܬܘܼܩܵܢܲܝ̈ܟ 30 ܠܵܐ ܬܚܵܘܸܐ ܒܲܢ ܐܵܬܼܵܐ ܕܪܘܼܓܼܙܵܐ ܠܲܥܒܼܵܕܼ ܐܝܼܕܲܝ̈ܟ ܀ 31 :ܒܲܢ ܣܲܝܸܟܼܬܵܝܗܝ ܠܲܫܡܵܐ ܪܲܒܵܐ ܕܐܘܼܡܵܢܘܼܬܼܵܟ 32 ܘܲܒܼܪܘܼܟܵܒܼܵܢ ܚܒ݂ܲܫܬܿ ܐܲܪ̈ܥܵܢܹܐ ܘܲܫܡܲܝܵܢܹ̈ܐ ܀ 33 :ܒܲܢ ܪܲܟܸܿܒܼܬܵܝܗܝ ܠܪܵܘܡ̇ܐ ܘܥܘܼܡܩܵܐ ܐܲܝܟ ܚܲܕܼ ܓܘܼܫܡܵܐ 34 ܚܲܪ̈ܫܹܐ ܒܦܲܓܼܪܲܢ ܡܠܝܼܠܹ̈ܐ ܒܢܲܦܫܲܢ ܬܲܗܪܵܐ ܪܲܒܵܐ ܀ 35 :ܠܵܐ ܡ̇ܪܝ ܬܸܫܪܹܝܘܗܝ ܠܗܵܢ ܪܘܼܟܵܒܼܵܐ ܕܪܲܟܸܿܒܼ ܚܘܼܒܵܟ 36 ܘܠܵܐ ܢܸܬܼܪܲܦܸܐ ܚܙܵܩܵܐ ܪܲܒܵܐ ܕܚܲܝܸܨ ܪܸܡܙܵܟ ܀ 37 :ܒܗܵܢ ܪܘܼܟܵܒܼܵܐ ܚܵܪܲܬ̤ ܡܸܠܲܬܼܝ ܡܚܝܼܠܲܬܼ ܚܲܝܠܵܐ 38 ܘܲܒܼܥܵܬ̤ ܕܬܸܪܕܹܿܐ ܒܐܘܼܪܚܵܐ ܕܡܸܠܹ̈ܐ ܕܐܲܣܝܼܪ̈ܵܢ ܒܹܗ ܀ 39 :ܒܗܵܢ ܐܲܣܵܪܵܐ ܐܲܩܸܬܼ ܪܸܥܝܵܢܝ ܒܨܝܼܪ ܒܘܼܝܵܢܵܐ 40 ܘܲܬܼܗܲܪ ܣܲܓܿܝܼ ܒܐܘܼܡ̇ܢܘܼܬܼܵܐ ܕܪܸܡܙܵܐ ܕܐܲܣܪܹ݂ܗ ܀ 41 :ܒܗܵܢ ܬܘܼܩܵܢܵܐ ܦܗܵܘ̣ ܚܘܼܫܵܒܲܝ̈ ܟܲܪ̈ܝܲܝ ܪܲܗܛܵܐ 42 ܘܥܲܬܸܿܕܘ ܡܸܠܹ̈ܐ ܕܢܸܒܼܢܘܿܢ ܫܲܪܒܵܐ ܩܕܼܵܡ ܫܵܡܘܿܥܹ̈ܐ ܀ 43 :ܒܗܵܢܵܐ ܣܲܒܼܪܵܐ ܚܸܙܩܲܬ̤ ܡܸܠܬܼܝ ܒܵܬܲܪ ܡܸܠܹ̈ܐ 44 ܕܐܸܦܘܿܩ ܐܲܝܬܸܿܐ ܣܒܲܪܬܼܵܐ ܕܲܫܡܵܟ ܠܲܥܒܼܵܕܼ ܐܝܼܕܲܝ̈ܟ ܀ 45 :ܒܗܵܕܹܐ ܬܸܢܘܲܝ ܪܕܹܝܬܼ ܒܹܝܬܼ ܚܘܼܩܹ̈ܐ ܕܲܟܼܬܼܝܼ̈ܒܼܵܬܼܵܐ 46 ܕܐܲܗܓܸܿܐ ܠܐ̄ܢܵܫܵܐ ܒܫܲܪܒܵܐ ܪܲܒܵܐ ܕܒܼܵܪܘܿܝܘܼܬܼܵܟ ܀ 47 :ܒܗܵܢ ܐܸܣܟܹܿܡܵܐ ܨܵܪܬܼ ܡܸܠܹ̈ܐ ܒܩܲܢܝܵܐ ܕܠܸܫܢܝ 48 ܕܲܢܚܘܼܪ ܟܠܢܵܫ ܒܨܲܠܡܵܐ ܦܲܐܝܵܐ ܕܥܵܒܼܘܿܕܼܘܼܬܼܵܟ ܀ 49 ܨܠܸܡ ܬܘܼܩܵܢܵܟ ܚܙ̇ܝܬܼ ܕܲܡܨܲܝܲܬܼ ܚܲܟܿܝܼܡܵܐܝܼܬܼ: pb. 259 50 ܘܲܒܼܥܹ̇ܝܬܼ ܕܐܸܕܼܠܸܐ ܠܦܲܐܝܘܼܬܼ ܫܘܼܦܪܹܗ ܩܕܼܵܡ ܚܲܙܵܝܹ̈ܐ ܀ 51 :ܒܲܨܠܸܡ ܨܲܠܡܲܢ ܚܙܹ̇ܝܬܼ ܕܐܲܣܝܼܪܵܐ ܒܪܝܼܬܼܵܐ ܟܠܵܗ̇ 52 ܘܲܩܪܹܝܬܼ ܐ̄ܢܵܫܵܐ ܕܢܹܐܬܼܘܿܢ ܢܸܚܙܘܿܢ ܟܠ ܒܲܟܼܝܵܢܲܢ ܀ 53 :ܟܝܵܢܵܐ ܢܲܓܼܕܲܢܝ ܕܐܸܚܙܸܐ ܟܝܵܢܹ̈ܐ ܕܐܲܣܝܼܪܝܼܢ ܒܹܗ 54 ܕܐܲܝܟܲܢ ܘܲܟܼܡܵܐ ܣܦ݂ܲܩ ܚܲܠܵܫܵܐ ܕܢܹܐܚܘܿܪ ܟܠܵܐ ܀ 55 :ܒܹܗ ܒܲܟܼܝܵܢܲܢ ܚܙܹ̇ܝܬܼ ܚܸܟܼ̈ܡܵܬܼܵܐ ܕܐܲܠܵܗܘܼܬܼܵܟ 56 ܘܲܪܢܹ̇ܝܬܼ ܕܐܝܼܕ ܗ̄ܘ̣ ܣܲܒܼܪܵܐ ܠܐ̄ܢܵܫܵܐ ܟܡܵܐ ܐܸܢ ܚܲܛܵܝ ܀ 57 :ܫܸܡ ܐܝܼܬܼܘܼܬܼܵܟ ܚܙܹ̇ܝܬܼ ܕܲܫܪܹܐ ܒܹܗ ܐܲܝܟ ܕܲܒܼܢܵܘܣܵܐ 58 ܘܐܲܚܕܲܢܝ ܬܲܗܪܵܐ ܕܐܲܝܟܲܢ ܣܵܦܹ̇ܩ ܫܝܼܛܵܐ ܠܟܲܣܝܵܐ ܀ 59 :ܫܝܼܛ ܗ̄ܘ̣ ܣܲܓܿܝܼ ܘܐܲܢ̄ܬܿ ܝܲܩܲܪܬܵܝܗܝ ܕܠܵܐ ܡܘܼܫ̈ܚܵܬܼܵܐ 60 ܘܡܲܢ ܠܵܐ ܢܸܬܼܗܲܪ ܕܲܠܫܝܼܛܘܼܬܹܗ ܓ̣ܒܲܝܬܿ ܛܵܒܼ ܡ̣ܢ ܟܠ ܀ 61 :ܘܐܸܢܗܘ̤ ܕܚܘܼܒܵܟ ܓ̣ܒܼܵܝܗܝ ܡ̣ܢ ܟܠܵܐ ܘܲܩܪ̣ܵܝܗܝ ܒܲܫܡܹܗ 62 ܡ̇ܟܹܝܢ ܢܲܫܲܪ ܕܠܵܐ ܡܲܣܠܸܐ ܐܲܢ̄ܬܿ ܓܒܼܝܼܬܼܵܐ ܕܲܓܼܒܲܝܬܿ ܀ 63 :ܐܸܢ ܡ̇ܪܘܼܬܼܵܟ ܥܒܲܕܼܬܹܗ ܡܪܵܐ ܥܲܠ ܟܠ ܕܲܗܘ̤ܵܐ 64 ܡܲܢ ܠܵܐ ܢܸܟܼܕܿܘܿܢ ܢܲܦܫܹܗ ܒܢܝܼܪܵܐ ܕܦܘܼܠܚܵܢ ܚܲܝܵܘ̈ܗܝ ܀ 65 :ܐܸܢ ܝܼܕܲܥܬܼܵܟ ܩܪܵܬ̤ ܘܩܲܪܸܒܼܬܹܗ ܠܕܲܪܓܼܵܐ ܪܵܡ̇ܐ 66 ܡܲܢ ܠܵܐ ܢܵܘܕܹܿܐ ܕܫܲܪܝܼܪ ܕܲܪܓܹܗ ܘܫܸܡ ܫܘܼܠܛܵܢܹܗ ܀ 67 :ܐܸܢ ܟܲܣܝܘܼܬܼܵܟ ܓ̣ܠܲܝܬܿ ܠܲܥܒܼܵܕܲܝ̈ܟ ܒܝܲܕ ܓܲܠܝܘܼܬܹܗ 68 ܡܲܢ ܠܵܐ ܢܸܟܼܢܘܿܫ ܚܝܵܪܹܗ ܡ̣ܢ ܟܠ ܨܹܝܕܼ ܪܘܼܟܵܒܹܗ ܀ 69 :ܐܸܢ ܒܹܗ ܒܲܕܿܩܬܿ ܐ̄ܪܵܙܵܐ ܪܲܒܵܐ ܕܲܒܼܪܵܐ ܘܪܘܼܚܵܐ 70 ܡܲܢ ܠܵܐ ܢܸܩܪܘܿܒܼ ܨܼܝܕ ܚܸܟܼܡܵܬܼ̈ܐ ܕܟܲܣ̈ܝܵܢ ܒܲܫܡܹܗ ܀ 71 :ܐܸܢ ܒܹܗ ܚܵܘܝܼܬܿ ܒܲܣܝܼܡܘܼܬܼܵܟ ܠܥܝܼܪܹ̈ܐ ܘܐ̄ܢܵܫܵܐ 72 ܡܲܢ ܠܵܐ ܢܹܐܚܘܿܒܼ ܓܵܘܣܵܐ ܒܦܲܓܼܪܹܗ ܕܲܢܦܝܼܣ ܚܠܵܦܵܘܗܝ ܀ 73 :ܐܸܢ ܗܘ̤ ܕܡܸܠܬܼܵܐ ܝܲܠܕܵܐ ܕܡܸܢܵܟ ܥܡ݂ܲܪ ܒܹܗ ܒܚܘܼܒܵܐ 74 ܡܲܢ ܠܵܐ ܢܸܩܪ݂ܝܘܗܝ ܐܲܚܝܼܕܼ ܣܵܟܼܵܐ ܕܪܵܘܡ̇ܐ ܘܥܘܼܡܩܵܐ ܀ 75 :ܐܸܢ ܒܹܗ ܫܲܡܠܝܼܬܿ ܣܵܥܘܿܪܘܼܬܼܵܐ ܕܲܚܠܵܦ ܟܠܵܐ 76 ܡܲܢ ܠܵܐ ܢܹܐܚܘܿܕܼ ܒܣܵܥܘܿܪܘܼܬܹܗ ܕܠܵܐ ܩܘܼܛܵܥܵܐ ܀ 77 :ܐܸܢ ܒܹܗ ܥܬܼܝܼܕܼ ܐܲܢ̄ܬܿ ܕܲܬܿܕܼܘܼܢ ܐܲܪܥܵܐ ܒܫܘܼܠܵܡ ܙܲܒܼܢܹ̈ܐ 78 ܡܲܢ ܠܵܐ ܢܸܕܚܲܠ ܡ̣ܢ ܒܘܼܚܪܵܢܵܐ ܕܗܵܘܹ̇ܐ ܒܐܝܼܕܼܵܘ̈ܗܝ ܀ 79 :ܘܐܸܢ ܒܹܗ ܝܵܗ̇ܒܲܬܿ ܛܘܼܒܹ̈ܐ ܠܛܵܒܹ̈ܐ ܘܢܸܓܼ̈ܕܹܿܐ ܠܒܼܝܼܫܹ̈ܐ 80 ܡܲܢ ܠܵܐ ܢܦܝܼܣܵܟ ܕܬܼܗܘܸܐ ܣܢܹܐܓܼܪܵܐ ܚܠܵܦ ܚܵܘ̈ܒܵܬܹܗ ܀ 81 ܘܐܸܢ ܗܘ̤ ܕܫܲܠܝܼܛ ܥܲܠ ܗܵܢ ܥܵܠܡܵܐ ܘܥܲܠ ܗܵܘ̇ ܕܲܥܬܼܝܼܕܼ: pb. 260 82 ܡܲܢ ܠܵܐ ܢܗܲܝܡܸܢ ܕܲܬܼܪܲܝܵܢܵܐ ܗ̄ܘ̣ ܕܐܲܠܵܗܘܼܬܼܵܐ ܀ 83 :ܠܗܵܠܹܝܢ ܕܲܪ̈ܓܹܐ ܚܙܹ̇ܝܬܼ ܕܐܸܬܼܥܲܠܝܼ ܟܝܵܢܲܢ ܫܝܼܛܵܐ 84 ܘܓܲܪܓܲܢܝ ܪܸܥܝܵܢܝ ܕܐܸܪܕܹܿܐ ܒܡܸܠܹ̈ܐ ܠܘܵܬܼ ܫܝܼܛܘܼܬܹܗ ܀ 85 :ܪܲܒܿܘܼܬܼ ܕܲܪܓܹܗ ܥܨ̣ܵܬܲܢܝ ܕܐܲܡ̣ܪܲܚ ܠܒܲܪ ܡ̣ܢ ܛܲܟܼܣܵܐ 86 ܘܐܸܚܙܘܿܩ ܒܐܘܼܪܚܵܐ ܕܪܲܒܵܐ ܒܨܵܬܼܵܗ̇ ܡ̣ܢ ܦܸܬܼܓܼܵܡܲܝ̈ ܀ 87 :ܨܹܝܕ ܟܲܣܝܘܼܬܼܵܟ ܕܲܒܼܓܲܠܝܘܼܬܹܗ ܒܥܹ̇ܝܬܼ ܕܐܸܬܼܩܲܪܲܒܼ 88 ܦܫܘܿܛ ܠܝܼ ܐܝܼܕܼܵܟ ܐܲܝܟ ܕܲܠܫܸܡܥܘܿܢ ܕܐܸܩܪܘܿܒܼ ܘܐܲܦܝܼܣ ܀ 89 :ܠܝܲܡܵܐ ܕܡܸܠܹ̈ܐ ܕܲܚܠܵܦ ܚܲܝܲܝ̈ܢ ܢ̣ܚܸܬܼܘ ܚܘܼܫܵܒܲܝ̈ 90 ܢܕܲܠܹܝܢܝ ܪܸܡܙܵܟ ܕܠܵܐ ܐܸܬܿܛܲܒܲܥ ܒܲܕܼܠܵܐ ܦܲܐ̈ܝܵܢ ܀ 91 :ܕܐܲܦܝܼܣ ܩܸܪܒܹܿܬܼ ܚܠܵܦ ܣܘܼܥܪ݁ܵܢܹܐ ܕܝܼܠܝ ܘܲܕܼܚܲܒܼܪܲܝ 92 ܚܲܝܸܠ ܙܵܘܥܲܝ̈ ܕܠܵܐ ܢܸܬܼܪܲܦܘܿܢ ܥܲܕܼ ܡܸܫܬܲܡܥܝܼܢ ܀ 93 :ܒܲܬܼܪܲܥ ܪ̈ܲܚܡܲܝܟ ܢܵܩܹ̇ܫ ܨܸܒܼܝܵܢܝ ܨܵܒܹ̇ܐ ܒܚܲܝܲܝܢ 94 ܦܬܲܚܠܲܢ ܕܢܸܥܘܿܠ ܘܢܸܣܲܒܼ ܙܸܕܩܵܐ ܐܲܝܟ ܡܸܣܟܹܿܢܹ̈ܐ ܀ 95 :ܡܸܣܟܹܿܝܢ ܘܲܨܪܝܼܟ ܓܸܢܣܲܢ ܫܝܼܛܵܐ ܡ̣ܢ ܟܠ ܛܵܒܼ̈ܢ 96 ܣܡܘܿܟ ܫܝܼܛܘܼܬܹܗ ܒܢܸܬܼܪܵܐ ܙܥܘܿܪܵܐ ܕܡ̣ܢ ܡ̇ܘܗܲܒܼܬܼܵܟ ܀ 97 :ܡܚܝܼܠ ܗ̄ܘ̣ ܣܲܓܿܝܼ ܕܲܢܟܲܢܸܫ ܠܹܗ ܡ̇ܙܘܿܢ ܙܲܒܼܢܵܐ 98 ܘܠܵܐ ܡܨܸܐ ܕܢܸܦܠܘܿܚ ܐܲܪܥܵܐ ܒܚܲܝܠܹܗ ܒܸܠܥܵܕܼ ܚܲܝܠܵܟ ܀ 99 :ܩܸܢܛܵܐ ܪܲܒܵܐ ܡܠܸܐ ܦܘܼܠܚܵܢܹܗ ܟܡܵܐ ܐܸܢ ܦܵܠܲܚ̇ 100 ܘܠܲܝܬܿ ܬܘܼܟܼܠܵܢܵܐ ܥܲܠ ܡ̇ܙܘܿܢܹܗ ܟܡܵܐ ܐܸܢ ܣܲܓܿܝܼ ܀ 101 :ܚܲܫܹ̈ܐ ܘܟܹܐܒܹ̈ܐ ܠܘܹܝܢ ܠܲܬܼܥܵܫܹܗ ܩܲܝܛܵܐ ܘܣܲܬܼܘܵܐ 102 ܘܟܼܠ ܢܸܟܼܝܵܢܝܼ̈ܢ ܐܲܡܝܼܢܝܼܢ ܠܹܗ ܠܹܗ ܘܲܠܕܝܼܠܹܗ ܀ 103 :ܣܲܓܿܝܼ ܥܲܡܠܹܗ ܘܲܙܥܘܿܪ ܐܲܓܼܪܵܐ ܕܡܸܬܼܦܲܢܹܐ ܠܹܗ 104 ܘܪܲܒܵܐ ܗ̄ܝܼ ܠܸܐܘܬܹܗ ܘܫܝܼܛ ܘܲܡܙܲܠܗܲܙ ܡ̇ܙܘܿܢ ܚܲܝܵܘ̈ܗܝ ܀ 105 :ܙܵܪܲܥ ܣܲܓܿܝܼ ܘܚܵܡܹ̇ܠ ܩܲܠܝܼܠ ܡ݂ܢ ܣܲܓܿܝܼ̈ܐܹܐ 106 ܡܛܲܪܲܦ ܘܲܫܚܝܼܩ ܘܥܲܕܼ ܡܸܬܼܒܲܣܲܡ ܒܲܠܥܹܗ ܡ̇ܘܬܵܐ ܀ 107 :ܒܩܸܢܛܵܐ ܙܵܪܲܥ ܘܲܒܼܣܘܼܪܵܕܼܵܐ ܡܟܲܢܸܫ ܦܹܐܪܹ̈ܐ 108 ܘܠܵܐ ܬܟܼܝܼܠ ܠܸܒܹ̇ܗ ܕܚܵ̇ܕܹܐ ܒܥܲܡܠܹܗ ܘܲܒܼܟܼܘܼܢܵܫܹܗ ܀ 109 :ܫܵܕܹ̇ܐ ܠܲܚܡܹܗ ܒܐܲܦܲܝ̈ ܚܲܩܠܵܐ ܕܢܸܬܼܦܲܢܹܐ ܠܹܗ 110 ܘܩܲܢܝܼܛ ܘܲܡܥܵܩ ܕܕܲܠܡܵܐ ܢܹܐܒܲܕܼ ܘܢܵܘܦܘܿܢ ܚܲܝܵܘ̈ܗܝ ܀ 111 :ܦܵܠܲܚ̇ ܐܲܪܥܵܐ ܘܪܵܢܹ̇ܐ ܕܕܲܠܡܵܐ ܬܟܼܘܼܡ ܥܲܠ ܦܹܐܪܹ̈ܐ 112 ܘܚܵܙܹ̇ܩ ܒܐܘܼܪܚܵܐ ܘܝܵܬܹ̇ܒܼ ܡ̇ܘܬܵܐ ܘܲܡܣܲܟܸܿܐ ܠܹܗ ܀ pb. 261 113 :ܐܲܝܟ ܝܵܠܕܲܬܵܐ ܡܣܲܟܸܿܐ ܠܦܹܐܪܹ̈ܐ ܐܲܝܟ ܕܠܥܘܸܠܵܐ 114 ܘܚܸܒܼܠܹ̈ܐ ܕܡ̇ܘܬܵܐ ܡܵܚܹ̇ܝܢ ܟܠܫܵܥ ܠܦܵܪܘܿܫܘܼܬܹܗ ܀ 115 :ܩܪܵܒܼܵܐ ܪܲܒܵܐ ܙܩܝܼܦ ܒܟܼܠܥܸܕܵܢ ܠܘܼܩܒܲܠ ܝܲܨܪܹܗ 116 ܘܐܸܢ ܢ̣ܵܡ ܘܲܕܡܸܟ ܥܲܠ̣ܘ ܚܘܼ̈ܬܼܚܵܬܹܐ ܘܒܲܙܘ ܚܹܐܪܘܼܬܹܗ ܀ 117 :ܒܲܬܼܪܹܝܢ ܩܹܐܪ̈ܣܝܼܢ ܪܡܸܐ ܚܲܠܵܫܵܐ ܕܒܼܝܼܫ ܚܲܕܼ ܡ̣ܢ ܚܲܕܼ 118 ܒܚܲܫܲܝ̈ ܦܲܓܼܪܹܗ ܘܡ̇ܙܘܿܢ ܚܲܝܵܘ̈ܗܝ ܢܸܓܼ̈ܕܹܿܐ ܥܦܝܼܦܹ̈ܐ ܀ 119 :ܐܲܝܟ ܕܲܒܼܥܲܪ̈ܩܹܐ ܡܢܲܓܸܿܕ ܗܘ̤ ܠܹܗ ܒܐܝܼܕܼܵܐ ܕܝܲܨܪܹܗ 120 ܘܠܲܝܬܿ ܒܹܗ ܕܘܼܟܿܬܼܵܐ ܕܠܵܐ ܫܘܼܠܵܡܵܐ ܕܚܲܫܹ̈ܐ ܡܲܠܝܵܐ ܀ 121 :ܚܲܫܝܼܫ ܘܲܡܥܵܩ ܠܘܼܩܒܲܠ ܚܲܫܘ̈ܗܝ ܘܠܘܼܩܒܲܠ ܥܲܡܠܵܘ̈ܗܝ 122 ܘܠܲܝܬܿ ܥܸܕܵܢܵܐ ܕܠܵܐ ܡܸܬܿܬܿܢܲܚ ܡܲܪܝܼܪܵܝܼܬܼ ܀ 123 :ܐܸܢ ܚ݂ܲܡ ܫܸܡܫܵܐ ܚ̣ܡܵܐ ܪܸܥܝܵܢܹܗ ܠܘܼܩܒܲܠ ܙܲܪ̈ܥܵܘܗܝ 124 ܘܐܸܢ ܓ̣ܵܙ ܡܸܛܵܐ ܝ̄ܒܸܫ̣ܘ ܚܘܼܫܵܒܼܵܘ̈ܗܝ ܥܲܡ ܢܸܨ̈ܒܵܬܹܗ ܀ 125 :ܘܐܸܢܗܘ̤ ܕܥܸܠܒܲܬ̤ ܚܲܡܝܼܡܘܼܬܼܵܐ ܩܲܛ̣ܠܹܗ ܨܲܗܝܵܐ 126 ܘܐܸܢܗܘ̤ ܕܣܸܓܲܝܲܬ̤ ܩܲܪܝܼܪܘܼܬܼܵܐ ܛܠܸܩ̣ ܡ̣ܢ ܥܲܪܝܵܐ ܀ 127 :ܐܸܢ ܐܸܬܼܡܲܣܟܲܢ ܒܛܹܢ ܩܘܼܛܵܥܵܐ ܘܐܵܘܠܸܕܼ ܪܸܛܢܵܐ 128 ܘܐܸܢ ܐܸܫܬܲܪܬܲܚ ܠܲܒܼܫ̣ܹܗ ܚܘܼܬܼܪܵܐ ܘܪܵܡܘܼܬܼ ܪܘܼܚܵܐ ܀ 129 :ܐܸܢ ܐܸܙܕܲܕܲܩ ܐܲܗܸܠ ܘܲܓܼܚܸܟ ܥܲܠ ܚܲܛܵܝܹ̈ܐ 130 ܘܐܸܢܗܘ̤ ܕܲܚܝ̣ܛܵܐ ܐܵܘܚܸܠ ܘܲܦܣ݂ܲܩ ܕܠܲܝܬܿ ܬܘܼܒܼ ܣܲܒܼܪܵܐ ܀ 131 :ܐܸܢ ܐܸܬܼܚܲܟܲܡ ܛܥ̣ܵܐ ܠܲܟܼܝܵܢܵܐ ܕܫܝܼܛܘܼܬܼ ܡܸܕܼܪܹܗ 132 ܘܐܸܢ ܡܸܫܬܲܒܼܗܲܪ ܗܘ̤ܵܐ ܠܹܗ ܚܲܝܘ̄ܬܼܵܐ ܕܠܵܐ ܒܘܼܝܵܢܵܐ ܀ 133 :ܒܣܲܓܿܝܼ ܘܒܲܙܥܘܿܪ ܚܲܫܵܘ̈ܗܝ ܣܵܓܹ̇ܝܢ ܘܥ̣ܵܘܠܹܗ ܝܵܪܹܒܼ 134 ܘܡ̇ܢܵܐ ܢܸܥܒܸܿܕܼ ܘܠܲܐܝܟܵܐ ܢܸܥܪܘܿܩ ܡܙܲܠܗܲܙ ܒܚܲܝܵܘ̈ܗܝ ܀ 135 :ܒܹܝܬܼ ܝܲܬܿܝܼܪܵܐ ܘܲܠܚܲܣܝܼܪܵܐ ܡܸܚܣܲܪ ܚܵ̇ܣܲܪ 136 ܘܐܲܝܟܲܢ ܡܲܨܝܵܐ ܕܢܸܛܲܪ ܚܲܝܵܘ̈ܗܝ ܕܠܵܐ ܢܸܟܼܝܵܢܹ̈ܐ ܀ 137 :ܥܲܣܩܵܐ ܣܲܓܿܝܼ ܠܲܒܼܢܲܝ̈ܢܵܫܵܐ ܠܡܸܚܵܐ ܫܲܦܝܼܪ 138 ܘܠܵܐ ܦܫܝܼܩ ܪܲܗܛܵܐ ܕܙܲܕܼܝܼܩܘܼܬܼܵܐ ܠܦܲܓܼܪ̈ܵܢܵܝܹܐ ܀ 139 :ܦܲܓܼܪܵܐ ܦܲܓܼܪܵܐ ܗ̄ܘ̣ ܟܡܵܐ ܐܸܢ ܢܸܪܲܓܼ ܪ̈ܘܼܚܵܢܝܵܬܼܵܐ 140 ܐܵܦ ܗܝ̤ ܪܸܓܿܬܹܗ ܠܵܘ ܕܝܼܠܹܗ ܗ̄ܝܼ ܐܸܠܵܐ ܕܲܐ̄ܚܪܹܝܢ ܀ 141 ܐ̄ܚܪܹܝܢ ܥܵܡܲ݁ܪ ܒܹܗ ܒܢܵܘܣܵܐ ܕܡܸܕܼܪܵܐ ܡܸܬܼܚܲܒܿܠܵܢܵܐ: pb. 262 142 ܘܲܒܼܚܲܝܘܼܬܹܗ ܡܗܲܒܸܿܒܼ ܩܲܠܝܼܠ ܥܲܕܼ ܡܸܬܼܚܲܒܲܠ ܀ 143 :ܚܒܼܵܠܵܐ ܗ̄ܘ̣ ܟܠܹܗ ܟܡܵܐ ܐܸܢ ܐܝܼܬܼ ܒܹܗ ܡܢܵܬܼܵܐ ܕܚܲܝܹ̈ܐ 144 ܐܵܦ ܗܝ̤ ܗܵܕܹܐ ܙܥܘܿܪܝܼܢ ܚܲܝܹܝ̈ܗ̇ ܠܡܲܚܵܝܘܼܬܹܗ ܀ 145 :ܘܐܸܢ ܚܲܝܘܼܬܼܵܐ ܕܒܹܗ ܚܲܣܝܼܪܵܐ ܗ̄ܝܼ ܡ̣ܢ ܚܲܝܘܼܬܼܵܐ 146 ܐܲܝܟܲܢ ܡܸܫܟܲܚ ܠܡܸܚܵܐ ܒܚܲܝܹ̈ܐ ܡܸܬܼܚܲܒܿܠܵܢܹ̈ܐ ܀ 147 :ܢܹܐܬܼܘܿܢ ܪ̈ܲܚܡܲܝܟ ܡ̇ܪܝ ܠܐܝܼܵܠܹܗ ܕܓܸܢܣܲܢ ܫܝܼܛܵܐ 148 ܕܗܵܐ ܚܵܒܼ݂ ܘܐܲܫܦܸܠ ܚܹܝܠ ܚܲܝܘܼܬܹܗ ܒܐܵܓܼܘܿܢ ܚܲܫܹ̈ܐ ܀ 149 :ܦܫܘܿܛ ܠܹܗ ܐܝܼܕܼܵܐ ܠܐܵܓܼܘܿܢܸܣܛܵܐ ܪܦܸܐ ܪܸܥܝܵܢܵܐ 150 ܕܗܵܐ ܙܩܲܦ̣ ܨܸܒܼܥܵܐ ܘܠܵܐ ܡܨܸܐ ܕܢܹܐܚܘܿܕܼ ܕܲܪܵܐ ܒܓܸܠܝܵܐ ܀ 151 :ܩܥܝܼ ܘܠܲܒܸܿܒܲܝܗܝ ܠܲܩܪܲܒܼܬܼܵܢܵܐ ܡܸܬܼܚܲܒܿܠܵܢܵܐ 152 ܕܗܵܐ ܐܸܬܼܪܲܦܝܼܘ ܕܪ̈ܵܥܹܐ ܕܐܝܼܕܼܵܘ̈ܗܝ ܠܡܸܚܢܵܐ ܠܢܝܼܫܵܐ ܀ 153 :ܦܩܘܿܕܼ ܠܲܟܼܝܵܢܹ̈ܐ ܡܸܬܼܝܲܕܼܥܵܢܹ̈ܐ ܕܲܢܥܲܕܲܪܘܼܢܵܝܗܝ 154 ܕܗܵܐ ܦܸܕܲܬ̤ ܠܵܗ̇ ܐܝܼܕܹܗ ܠܡܹܐܚܲܕܼ ܩܸܫܬܵܐ ܕܩܘܼܫܬܵܐ ܀ 155 :ܩܪܝܼ ܠܸܓܼܝܘܿܢܹ̈ܐ ܕܲܫܡܲܝܵܢܹ̈ܐ ܕܲܢܣܲܝܥܘܼܢܵܝܗܝ 156 ܥܲܕܼ ܠܵܐ ܢܸܦܸܠ ܘܢܸܗܘܸܐ ܓܘܼܚܟܵܐ ܠܲܒܼܥܸܠܕܲܪܹܗ ܀ 157 :ܟܬܼܘܿܒܼ ܘܫܲܕܲܪ ܠܹܗ ܣܲܩܪܵܐ ܕܲܫܡܵܟ ܕܪܲܒܿ ܡ̣ܢ ܟܠܑܵܐ 158 ܘܗܵܐ ܡܸܬܼܚܲܝܲܠ ܠܡܸܛܥܲܢ ܚܲܫܵܘ̈ܗܝ ܒܣܲܒܼܪܵܐ ܕܲܫܡܵܟ ܀ 159 :ܐܲܪܡܵܐ ܐܝܼܕܼܵܐ ܒܲܟܼܬܼܝܼ̈ܒܼܵܬܼܵܐ ܕܦܘܼܪܩܵܢ ܚܲܝܵܘ̈ܗܝ 160 ܘܗܵܐ ܡܸܣܬܲܪܕܼܝܼܢ ܚܲܫܹ̈ܐ ܘܫܹܐܕܹ̈ܐ ܕܲܢܚܘܼܪܘܼܢ ܒܹܗ ܀ 161 :ܟܐܝܼ ܒܣܸܕܼܪ̈ܲܝܗܘܿܢ ܕܲܩܪ̈ܲܒܼܬܼܵܢܹܐ ܕܲܠܚܝܼܡܝܼܢ ܠܹܗ 162 ܘܗܵܐ ܡܸܬܼܒܲܠܗܹܝܢ ܡ̣ܢ ܦܘܼܩܪܵܢܵܐ ܕܫܸܡ ܐܝܼܬܼܘܼܬܼܵܟ ܀ 163 :ܫܠܘܿܚ ܚܲܕܼ ܥܝܼܪܵܐ ܐܲܝܟ ܕܲܒܼܙܲܒܼܢܹܗ ܕܐܵܬܼܘܿܪܵܝܵܐ 164 ܘܗܵܐ ܡܸܬܼܒܲܕܿܪܝܼܢ ܚܲܝ̈ܠܲܝ ܒܝܼܫܵܐ ܕܲܟܼܪܝܼܟܼܝܼܢ ܠܹܗ ܀ 165 :ܫܲܕܲܪ ܪܸܡܙܵܟ ܐܲܝܟ ܐܹܫܲܥܝܵܐ ܠܘܵܬܼ ܚܹܙܲܩܝܵܐ 166 ܘܲܚܠܵܦ ܬܹܐܢܹ̈ܐ ܢܣܝܼܡ ܠܹܗ ܪ̈ܲܚܡܹܐ ܥܲܠ ܟܘܼܬܼ̈ܡ̇ܬܹܗ ܀ 167 :ܢܲܫܡܲܥ ܨܹܐܕܲܝܢ ܗܵܝ̇ ܒܲܪܬܼ ܩܵܠܵܐ ܕܨܹܝܕܼ ܚܹܙܲܩܝܵܐ 168 ܕܲܚܠܵܦ ܚܲܝܹ̈ܐ ܗܵܐ ܡ̇ܘܣܸܦ ܐ̄ܢܵܐ ܫܘܼܒܼܩܵܢ ܥܵܘ̣ܠܵܐ ܀ 169 :ܐܹܝܢ ܡ̇ܪܝ ܐܲܦܢܵܢ ܠܘܵܬܼ ܚܘܼܠܡܵܢܵܐ ܕܫܲܦܝܼܪ̈ܵܬܼܵܐ 170 ܕܠܑܵܐ ܢܸܬܼܒܲܣܒܲܣ ܒܲܚܒܼܵܪ̈ܵܬܼܵܐ ܕܲܫܟܼܝܼܪ̈ܵܬܲܢ ܀ 171 :ܦܘܿܩ ܒܲܒܼܥܵܬܲܢ ܐܲܝܟ ܦܸܠܐܬܼܵܐ ܕܪܲܟܸܿܒܼ ܚܘܼܒܵܟ 172 ܘܢܸܥܘܿܠ ܢܸܪܥܹܐ ܒܲܛܝܵܪ ܚܲܝܹ̈ܐ ܪ̈ܘܼܚܵܢܵܝܹܐ ܀ 173 :ܐܲܢܗܲܪ ܐܲܦܲܝ̈ܟ ܘܲܒܼܥܝܼܗ̇ ܒܪ̈ܲܚܡܲܝܟ ܠܐܲܒܿܝܼܕܼܘܼܬܲܢ 174 ܕܠܵܐ ܢܸܬܼܚܲܒܲܠ ܙܝܼܘܹܗ ܕܡܸܕܼܪܲܢ ܕܲܛܒܼܝܼܥ ܒܲܫܡܵܟ ܀ 175 :ܚܕܝܼ ܒܲܦܝܵܣܲܢ ܐܲܝܟ ܕܲܒܼܪܒܹܿܗ ܕܲܒܼܪܵܐ ܙܥܘܿܪܵܐ 176 ܘܬܲܪܓܸܿܡ ܥܲܡܲܢ ܚܲܝܹ̈ܐ ܕܣܲܒܼܪܵܐ ܕܲܪܫܝܼܡܝܼܢ ܒܹܗ ܀ pb. 263 177 :ܥܲܡ ܢܵܟܼܘܿܠܵܐ ܦܠܲܚ̣ܢܲܢ ܡܲܓܵܢ ܘܲܛܠ݂ܲܡ̄ܢ ܐܲܓܼܪܲܢ 178 ܘܲܒܼܚܲܪ̈ܘܼܒܹܐ ܕܲܪ̈ܓܼܝܼܓܼܵܬܼܵܐ ܚܝ݂ܲܝܢ ܒܝܼܫܵܐܝܼܬܼ ܀ 179 :ܚ̣ܛܲܝܢ ܘܐܲܪܓܸܿܙܢܵܟ ܟܲܕܼ ܚܵܣ ܕܲܪܓܸܙܬܿ ܐܵܘ ܪܵܓܹ̇ܙ ܐܲܢ̄ܬܿ 180 ܘܠܵܐ ܫܵܘܹ̇ܿܝܢܲܢ ܕܢܸܩܪܸܐ ܢܲܦܫܲܢ ܒܢܲܝܵ̈ܐ ܕܲܫܡܵܟ ܀ 181 :ܗܲܒܼܠܲܢ ܕܢܸܗܘܸܐ ܐܲܝܟ ܐܲܓܼܝܼܪܹ̈ܐ ܒܦܘܼܠܚܵܢ ܒܲܝܬܵܟ 182 ܘܢܸܣܲܒܼ ܙܸܕܩܵܐ ܐܲܝܟ ܡܸܣܟܹܿܢܹ̈ܐ ܡ̣ܢ ܦܵܬܼܘܿܪܵܟ ܀ 183 :ܘܐܸܢ ܗܘ̤ ܕܡܲܨܝܵܐ ܓܡܘܿܪ ܒܲܥܒܼܵܕܼܵܐ ܚܹܝܠ ܦܸܠܐܬܼܵܟ 184 ܘܐܲܝܬܵܐ ܠܓܸܠܝܵܐ ܐ̄ܪܵܙܵܐ ܕܪܲܟܸܿܒܼܬܿ ܡܸܛܠܵܬܲܢ ܀ 185 :ܐܸܡܲܪ ܨܹܐܕܲܝܢ ܕܡ̣ܢ ܡܝܼܬܼܘܼܬܼܵܐ ܚܲܝܲܝܬܿܘܿܢ ܗܵܫܵܐ 186 ܘܡ̣ܢ ܐܲܒܼܕܵܢܵܐ ܕܠܵܐ ܝܼܕܲܥܬܼܵܐ ܦܢ݂ܲܝܬܿܘܿܢ ܨܹܐܕܲܝ ܀ 187 :ܦܩܘܿܕܼ ܠܲܚܢܵܢܵܟ ܢܟܲܣܸܐ ܨܲܥܪܲܢ ܒܐܸܣܛܲܠ ܫܘܼܒܼܚܵܐ 188 ܘܲܢܣܝܼܡ ܒܐܝܼܕܲܢ ܪܲܗܒܼܘܿܢ ܚܲܝ̈ܐ ܐܲܝܟ ܥܸܙܲܩܬܼܵܐ ܀ 189 :ܢܲܦܸܣ ܪܸܡܙܵܟ ܘܢܲܬܼܩܸܢ ܩܘܼܕܼܡܲܝܢ ܕܸܒܼܚܵܐ ܕܲܒܼܪܵܟ 190 ܘܢܸܪܕܿܘܿܦ ܒܐܘܼܟܼܠܹܗ ܡܸܪܲܬܼ ܡ̇ܘܬܵܐ ܡ̣ܢ ܗܲܕܵܡܲܝ̈ܢ ܀ 191 :ܘܐܸܢ ܐܝܼܬܼ ܕܚܵܣܹ̇ܡ ܒܦܘܼܪܩܵܢ ܒܦܘܼܪܩܵܢ ܚܲܝܲܝ̈ܢ ܘܲܒܼܦܘܼܠܚܵܢܲܢ 192 ܢܫܲܝܸܢ ܚܘܼܒܵܟ ܠܡܸܪܲܬܼ ܝܲܨܪܹܗ ܒܚܲܝܘܼܬܼ ܚܲܝܹ̈ܐ ܀ 193 :ܩܪܝܼ ܠܡܲܠܲܐܟܹ̈ܐ ܘܐܲܦܨܲܚ ܐܸܢܘܿܢ ܒܝܲܕܼ ܦܘܼܢܵܝܲܢ 194 ܕܐܲܟܼܪܝܼܘ ܕܲܚ̣ܛܲܝܢ ܢܵܘܕܿܘܿܢ ܗܵܫܵܐ ܕܐܸܙܕܲܕܲܩܢܲܢ ܀ 195 :ܪܲܥܵܐ ܐܸܢܘܿܢ ܕܪܲܓܿܝܼܙܝܼܢ ܗ̄ܘ̣ܵܘ ܡܸܛܠ ܥܵܘ̣ܠܲܢ 196 ܘܐܲܦܢܵܐ ܐܸܢܘܿܢ ܠܘܵܬܼ ܬܸܫܡܸܫܬܵܐ ܕܣܘܼܢܩܵܢ ܚܲܝܲܝ̈ܢ ܀ 197 :ܢܙܝܼܥܘܼܢ ܠܐܵܐܲܪ ܒܚܲܝܠܵܐ ܕܡܸܢܵܟ ܐܲܝܟ ܕܲܡܥܵܕܼܝܼܢ 198 ܘܲܢܩܲܫܘܿܢܵܝܗܝ ܘܢܸܛܥܲܢ ܡܲܝܵ̈ܐ ܠܥܸܠ ܡ̣ܢ ܚܲܨܹܗ ܀ 199 :ܢܲܪܡܘܿܢ ܒܦܘܼܡܹܗ ܦܓܼܘܼ̈ܕܹܐ ܕܫܸܬܼܩܵܐ ܘܲܕܿܬܲܪܥܘܼܬܼܵܐ 200 ܕܠܵܐ ܢܸܬܼܒܲܥܪܲܪ ܒܝܲܕܼ ܫܘܼܚܠܵܦܵܘ̈ܗܝ ܠܒܲܪ ܡ̣ܢ ܛܲܟܼܣܵܐ ܀ 201 :ܢܸܗܘܘܿܢ ܗܸܢ̣ܘܿܢ ܐܲܝܟ ܗܸܢܝܘܿܟܹ̈ܐ ܠܥܸܠ ܡ̣ܢ ܚܲܨܹܗ 202 ܘܲܢܚܝܼܪܘܼܢܵܝܗܝ ܠܐܲܦܲܝ̈ ܐܼܲܪܥܵܐ ܠܚܹܐܦܵܐ ܕܪܲܗܛܹܗ ܀ 203 :ܢܚܙܘܿܢ ܪܲܗܛܹܗ ܐܲܝܟ ܚܲܙܵܝܹ̈ܐ ܒܐܸܣܛܵܕܝܼܘܿܢ 204 ܘܢܸܓܼܕܼܠܘܼܢ ܠܲܫܡܵܟ ܟܠܝܼܠ ܬܵܘܕܲܝܼܬܼܵܐ ܕܚܲܕܿܝܼܬܵܢ ܒܹܗ ܀ 205 :ܐܹܝܢ ܡܵܪܝ ܩܲܒܸܿܠ ܪܘܼܟܵܒܼ ܡܸܠܲܝ̈ܢ ܐܵܦܸܢ ܫܝܼ̈ܛܵܢ 206 ܘܗܲܒܼ ܦܘܼܪܥܵܢܵܐ ܠܗܸܪܓܵܐ ܕܢܲܦܫܲܢ ܐܵܦܸܢ ܦܲܪܟܿܝܼܗ ܀ 207 :ܐܹܝܢ ܡ̇ܪܝ ܐܲܫܘܵܗ̇ ܠܡܸܠܲܬܼ ܦܘܼܡܲܢ ܠܦܘܼܢܵܝ ܡܸܠܬܼܵܐ 208 ܘܢܸܫܡܲܥ ܡܸܢܵܟ ܕܬܼܘܼܒܼܘ ܚܲܛܵܝܹ̈ܐ ܐܝܼܬܼ ܗ̄ܘ̣ ܣܲܒܼܪܵܐ ܀ 209 ܐܹܝܢ ܡ̇ܪܝ ܐܲܦܨܲܚ ܠܐܵܐܲܪ ܕܲܟܼܡܝܼܪ ܡܸܛܠ ܥܵܘ̣ܠܲܢ: pb. 264 210 ܘܣܝܼܡ ܠܹܗ ܒܦܘܼܡܹܗ ܟܠܝܼܠ ܢܘܼܛ̈ܦܵܬܼܵܐ ܕܢܸܬܼܪܲܥܸܐ ܠܲܢ ܀ 211 :ܐܹܝܢ ܡ̇ܪܝ ܢܸܗܘܘܿܢ ܩܵܠܹ̈ܐ ܕܦܘܼܡܲܢ ܩܠܝܼܕܹ̈ܐ ܠܓܲܙܵܟ 212 ܘܢܸܦܬܲܚ ܢܸܣܲܒ݂ ܫܘܼܒܼܩܵܢ ܚܵܘ̈ܒܹܿܐ ܘܡ̇ܙܘܿܢ ܙܲܒܼܢܵܐ ܀ 213 :ܠܵܐ ܡ̇ܪܝ ܬܲܗܡܸܐ ܡ̣ܢ ܒܵܥܘܼܬܼܵܐ ܕܡܸܣܟܹܿܢܘܼܬܲܢ 214 ܕܠܵܐ ܢܸܬܼܪܲܦܸܐ ܣܲܒܼܪܲܢ ܕܲܥܠܲܝܟ ܒܲܦܣܵܩ ܣܲܒܼܪܵܐ ܀ 215 :ܠܵܐ ܡ̇ܪܝ ܬܲܗܦܸܟ ܐܲܦܲܝ̈ܟ ܡܸܢܲܢ ܒܲܙܒܲܢ ܪܘܼܓܼܙܵܐ 216 ܕܠܵܐ ܢܒܲܙܚܘܼܢ ܫܹܐܕܹ̈ܐ ܛܪ̈ܘܼܢܹܐ ܐܲܝܟ ܕܲܡܥܵܕܼܝܼܢ ܀ 217 :ܠܵܐ ܡܵܪܝ ܬܸܫܕܹܝܢ ܡ̣ܢ ܥܘܼܕܼܪܵܢܵܟ ܐܲܝܟ ܕܲܠܒܼܝܼܫܹ̈ܐ 218 ܕܠܵܐ ܢܸܬܿܬܿܪܝܼܡܘܼܢ ܒܝܼܫܹ̈ܐ ܒܫܸܦܠܲܢ ܐܲܝܟ ܕܲܒܼܩܲܕܼܡ̇ܐ ܀ 219 :ܠܵܐ ܡ̇ܪܝ ܬܸܗܘܸܐ ܠܵܐ ܪܲܚܡܵܢܵܐ ܕܐܲܢ̄ܬܿ ܪܲܚܡܵܢܵܐ ܐܢ̄ܬܿ 220 ܚܵܣ ܡ̇ܪܝ ܠܵܐ ܗ̤ܘܲܝܬܿ ܡܹܐܡܲܪ ܐܸܡ̇ܪܹܬܼ ܠܦܘܼܬܼ ܣܘܼܢܩܵܢܲܢ ܀ 221 :ܠܵܐ ܡ̇ܪܝ ܢܸܙܥܲܪ ܫܸܡ ܪܲܒܿܘܼܬܼܵܟ ܒܥܸܠܲܬܼ ܥܵܘ̣ܠܲܢ 222 ܠܵܐ ܕܹܝܢ ܙܵܥܲܪ ܘܠܵܐ ܐܸܢ ܢܲܪܫܲܥ ܐܵܠܹܦ ܐܲܠܦܝܼ̈ܢ ܀ 223 :ܠܵܐ ܡ̇ܪܝ ܬܸܗܘܸܐ ܒܨܝܼܪ ܥܘܼܕܼܪܵܢܵܐ ܘܡܸܣܟܹܿܝܢ ܓܲܙܵܐ 224 ܐܘܿܗ ܕܲܓܵܠ ܗ̄ܘ̣ ܡܸܕܹܿܡ ܕܐܸܡ̇ܪܹܬܼ ܥܲܠ ܐܝܼܬܼܘܼܬܼܵܟ ܀ 225 :ܠܵܐ ܡܪܝ ܬܸܗܘܸܐ ܐܲܝܟ ܬܵܘܬܵܒܼܵܐ ܒܒܼܵܪܘܿܝܘܼܬܼܵܟ 226 ܘܠܵܐ ܐܲܝܟ ܐܵܪܚܵܐ ܕܣܵܛܹ̇ܐ ܠܲܡܒܼܵܬܼ ܒܲܕܼܠܵܐ ܕܝܼܠܹܗ ܀ 227 :ܠܵܐ ܡ̇ܪܝ ܬܸܗܘܸܐ ܐܲܝܟ ܒܲܪܢܵܫܵܐ ܕܐܲܢ̄ܬܿ ܐܲܠܵܗܵܐ ܐܢ̄ܬܿ 228 ܘܠܵܐ ܐܲܝܟ ܓܲܒܼܪܵܐ ܕܠܵܐ ܡܨܸܐ ܠܡܸܦܪܲܩ ܕܐܲܢ̄ܬܿ ܦܵܪܘܿܩܵܐ ܐܢ̄ܬܿ ܀ 229 :ܘܐܸܢܗܘ̤ ܕܚܵܘ̈ܒܲܝܢ ܥܫܸܢ̣ܘ ܡ̣ܢ ܚܵܘ̈ܒܹܿܐ ܕܲܒܼܟܼܠ ܕܵܪܝܼܢ 230 ܐܲܢ̄ܬܿ ܚܘܼܣ ܡܸܛܠ ܫܡܵܟ ܝܲܩܝܼܪܵܐ ܕܲܩܪܹܝܢܲܢ ܒܹܗ ܀ 231 :ܐܸܢ ܣܲܢ̈ܝܵܬܲܢ ܐܲܣܢܝܼ ܐܲܦܹ̈ܐ ܕܐܵܐܲܪ ܫܲܦܝܵܐ 232 ܐܲܢ̄ܬܿ ܠܵܐ ܬܚܵܘܸܐ ܐܲܦܹ̈ܐ ܕܚܸܡܬܼܵܐ ܕܠܵܐ ܦܲܐ̈ܝܵܢ ܠܵܟ ܀ 233 :ܐܸܢ ܒܝܼܫܘܼܬܿܢ ܟܠܵܬ̤ ܛܵܒܼܵܬܼ̈ܐ ܡ̣ܢ ܦܘܼܡ ܥܵܘ̣ܠܵܢ 234 ܐܲܢ̄ܬܿ ܠܵܐ ܬܫܲܚܠܸܦ ܫܸܡ ܛܵܒܼܘܼܬܼܵܟ ܟܠܵܐ ܡܸܫܬܲܚܠܲܦ ܀ 235 :ܛܵܒܼ ܐܲܢܬܿ ܟܠܵܟ ܘܟܹܐܝܢ ܐܲܢ̄ܬܿ ܟܠܵܟ ܘܣܵܢܹ̇ܐ ܥܵܘ̣ܠܵܐ ܐܢ̄ܬܿ 236 ܘܠܵܐ ܡܸܬܼܡܲܫܚܵܐ ܠܵܐ ܛܵܒܼܘܼܬܼܵܟ ܘܠܑܵܐ ܟܹܐܢܘܼܬܼܵܟ ܀ 237 :ܠܵܐ ܐ̄ܢܵܫ ܝܵ̇ܕܲܥ ܕܢܸܩܪܹܝܟ ܒܲܫܡܵܐ ܕܙܵܕܩ ܠܲܫܡܵܟ 238 ܕܟܼܠ ܫܘܼܡ̇ܗܝܼ̈ܢ ܙܥܘܿܪܝܼܢ ܐܸܢܘܿܢ ܠܪܲܒܿܘܼܢ ܫܘܼܒܼܚܵܟ ܀ 239 :ܕܢܸܩܪܹܝܟ ܛܵܒܼܵܐ ܩܵܠ ܟܹܐܢܘܼܬܼܵܟ ܪܵܥܹ̇ܡ ܒܐܲܪܥܵܐ 240 ܘܐܸܢ ܬܘܼܒܼ ܟܹܐܢܵܐ ܫܡܲܝܵܐ ܘܐܲܪܥܵܐ ܡܠܹܝܢ ܡ̣ܢ ܪ̈ܲܚܡܲܝܟ ܀ pb. 265 241 :ܕܢܸܩܪܹܝܟ ܟܲܣܝܵܐ ܓܠܹܝܢ ܣܘܼܥܪ̈ܵܢܲܝܟ ܠܥܹܝܢ ܟܠ ܒܸܪ̈ܝܵܢ 242 ܕܢܸܩܪܹܝܟ ܓܲܠܝܵܐ ܠܲܝܬܿ ܒܲܥܒܼܝܼܕܹ̈ܐ ܕܣܵܦܹ̇ܩ ܕܢܸܚܙܹܝܟ ܀ 243 :ܕܢܸܩܪܹܝܟ ܕܲܫܡܲܥ ܫܡܝܼܥ ܠܵܟ ܩܵܠܲܢ ܥܲܕܼܠܵܐ ܕܢܸܩܪܹܝܟ 244 ܘܕܲܢܦܝܼܣ ܕܲܫܒܼܘܿܩ ܩܲܕܿܝܼܡ ܚܘܼܒܵܟ ܠܲܢ ܘܲܠܥܵܘ̣ܠܲܢ ܀ 245 :ܠܵܐ ܝܵ̇ܕܼܥܝܼܢܲܢ ܠܵܐ ܕܲܢܨܲܠܸܐ ܘܠܵܐ ܕܲܢܫܲܒܲܚ 246 ܘܩܲܢܝܼܛܝܼܢܲܢ ܕܢܹܐܡܲܪ ܡܸܠܹ̈ܐ ܕܠܵܐ ܦܲܐ̈ܝܵܢ ܠܵܟ ܀ 247 :ܐܲܝܟܲܢ ܢܨܲܠܸܐ ܠܠܵܐ ܚܲܣܝܼܪܵܐ ܕܲܓܼܡܝܼܪ ܟܠܹܗ 248 ܘܐܲܝܟܲܢ ܢܫܲܒܲܚ ܠܗܵܘ̇ ܕܲܒܼܫܘܼܒܼܚܹܗ ܡܩܵܘܸܐ ܡܸܡܬܼܘܿܡ ܀ 249 :ܐܸܢ ܡܸܫܬܲܒܲܚ ܝܵܪܹܒܼ ܡ̇ܕܹܝܢ ܒܝܲܕܼ ܬܸܫܒܿܘܿܚܬܵܐ 250 ܘܐܸܢܗܘ̤ ܕܝܵܪܹܒܼ ܒܫܘܼܒܼܚܵܐ ܕܡܸܢܲܢ ܗܵܘܹ̇ܐ ܓܡܝܼܪܵܐ ܀ 251 :ܐܸܢ ܡܸܨܛܲܥܲܪ ܪܲܒܿܘܼ ܨܲܥܪܹܗ ܡ̣ܢ ܬܸܫܒܿܘܿܚܬܹܿܗ 252 ܐܸܢ ܡܸܬܼܩܲܕܲܫ ܒܦܘܼܡܲܢ ܡ̇ܘܣܸܦ ܥܲܠ ܬܸܫܒܿܘܿܚܬܹܿܗ ܀ 253 :ܐܸܢ ܡܸܬܼܚܲܡܲܬܼ ܟܣܸܐ ܗ̄ܘ̣ܵܐ ܡܸܢܹܗ ܨܲܥܪܵܐ ܕܡܲܥܘܸܠ 254 ܘܐܸܢ ܡܸܬܼܪܲܥܹܐ ܚܢܲܢ ܚܵܘܝܼܢܵܝܗܝ ܫܒܼܝܼܠ ܬܲܪܥܘܼܬܼܵܐ ܀ 255 :ܘܐܸܢ ܒܲܬܼܘܵܬܼܵܐ ܣܵܥܲ݁ܪ ܡܸܕܹܿܡ ܒܵܬܲܪ ܙܲܒܼܢܵܐ 256 ܙܲܒܼܢܹ̈ܐ ܥܨ̣ܵܐܘܼܗܝ ܠܡܸܕܲܥ ܡܸܕܲܡ ܕܠܵܐ ܝܵ̇ܕܲܥ ܗ̄ܘ̣ܵܐ ܀ 257 :ܘܐܸܢ ܠܵܐ ܝܵ̇ܕܲܥ ܗܵܕܹܐ ܕܲܚܪܸܡ ܦܘܼܡ̇ܐ ܕܢܹܐܡܲܪ 258 ܡ̇ܢܵܐ ܝܲܬܿܝܼܪ ܩܢܹܐ ܒܝܼܕܲܥܬܼܵܐ ܥܲܠ ܬܘܼܩܵܢܵܘ̈ܗܝ ܀ 259 :ܠܵܐ ܐܲܪ̈ܥܵܢܹܐ ܠܵܐ ܬܸܬܼܪܲܥܘܿܢ ܐܲܪ̈ܥܵܢܵܝܵܬܼܵܐ 260 ܠܲܝܬܿ ܒܐܝܼܬܼܘܼܬܼܵܐ ܡܸܕܲܡ ܕܲܒܼܨܝܼܪ ܡ̣ܢ ܐܝܼܬܼܘܼܬܼܵܐ ܀ 261 :ܟܠ ܐܝܼܬܼܘܼܬܼܵܐ ܫܡܵܗ̇ ܒܘܼܕܵܩܵܐ ܗ̄ܘ̣ ܕܐܲܡܝܼܢܘܼܬܹܗ 262 ܘܲܠܦܘܼܬܼ ܕܐܝܼܬܹܝܗ̇ ܐܵܦ ܝܼܕܲܥܬܼܵܗ̇ ܥܲܡܵܗ̇ ܐܝܼܬܹܝܗ̇ ܀ 263 :ܩܕܼܵܡ ܟܠ ܡܸܕܲܡ ܐܝܼܬܹܝܗ̇ ܘܐܝܼܬܹܝܗ̇ ܐܲܟܼܡܵܐ ܕܐܝܼܬܹܝܗ̇ 264 ܘܠܵܐ ܛܵܥܹ̇ܐ ܠܵܗ̇ ܡܸܕܲܡ ܕܗܵܘܹ̇ܐ ܘܕܲܥܬܼܝܼܕܼ ܕܢܸܗܘܸܐ ܀ 265 :ܗܵܟܲܢ ܙܵܕܹܩ ܕܢܸܪܢܹܐ ܥܒܼܝܼܕܼܵܐ ܥܲܠ ܥܵܒܼܘܿܕܼܵܐ 266 ܘܗܵܟܲܢ ܚܲܝܵܒܼ ܡܠܝܼܠܵܐ ܕܢܸܦܪܘܿܥ ܠܝܵܗܹ̇ܒܼ ܡܸܠܬܼܵܐ ܀ 267 :ܚܵܘܒܲܬܼ ܚܘܼܒܵܐ ܚܲܝܵܒܼܝܼܢܲܢ ܠܲܡܬܲܩܢܵܢܲܢ 268 ܬܵܘ ܢܸܬܼܦܲܪܢܲܣ ܕܢܸܦܪܘܿܥ ܩܲܠܝܼܠ ܡ̣ܢ ܣܲܓܿܝܼ̈ܐܹܐ ܀ 269 :ܠܵܘ ܦܘܼܪܥܵܢܵܐ ܒܵܥܹ̇ܐ ܡܸܢܲܢ ܐܲܝܟ ܚܲܣܝܼܪܵܐ 270 ܥܸܠܠܹ̈ܐ ܡܪܲܟܲܒܼ ܕܲܝܢܲܢ ܢܸܥܬܲܪ ܡ̣ܢ ܣܝܼ̈ܡܵܬܹܗ ܀ 271 :ܣܝܼܡܲܬܼ ܚܲܝܹ̈ܐ ܕܠܵܐ ܫܘܼܠܵܡܵܐ ܩܥܹܐ ܒܲܟܼܝܵܢܹܗ 272 ܘܲܪܓܼܝܼܓܼ ܣܲܓܿܝܼ ܕܢܸܬܸܿܠ ܡܸܢܵܗ̇ ܠܲܒܼܢܲܝ̈ ܒܲܝܬܹܿܗ ܀ pb. 266 273 :ܒܢܲܝ̈ ܝܵܪܬܿܘܼܬܼܵܐ ܕܚܘܼܒܵܐ ܕܲܒܼܪܹܗ ܩ̣ܪܵܝܗܝ ܠܲܟܼܝܵܢܲܢ 274 ܥܲܠ ܗܵܝ̇ ܪܵܕܹܐ ܘܲܡܚܲܟܸܿܡ ܠܲܢ ܚܘܼܒܵܢܵܐܝܼܬܼ ܀ 275 :ܢܣܲܝܒܲܪ ܗܵܟܹܝܠ ܙܢܲܝ̈ ܡܲܪܕܿܘܼܬܼܵܐ ܕܡ̣ܢ ܡܲܪܕܿܘܼܬܹܗ 276 ܘܠܵܐ ܬܸܡܐܲܢ ܠܲܢ ܒܢܸܓܼ̈ܕܹܿܐ ܕܟܲܦܢܵܐ ܘܲܕܼܟܼܘܼܪܗܵܢܵܐ ܀ 277 :ܐܸܢܗܘ̤ ܕܫܲܪܝܼܪ ܫܡܵܐ ܕܲܒܼ̈ܢܲܝܵܐ ܥܲܠ ܪܸܥܝܵܢܲܢ 278 ܢܲܫܲܪ ܡ̇ܕܹܝܢ ܕܐܵܦ ܡܲܪܕܿܘܼܬܲܢ ܠܝܘܼܬܼܪܵܢ ܐܝܼܬܹܝܗ̇ ܀ 279 :ܕܠܵܐ ܩܘܼܛܵܥܵܐ ܢܩܲܒܸܿܠ ܢܸܓܼ̈ܕܹܿܐ ܕܡ̣ܢ ܥܵܒܼܘܿܕܲܢ 280 ܘܲܕܼܠܵܐ ܪܸܛܢܵܐ ܢܸܕܲܥ ܩܹܐܪܣܵܐ ܕܫܚܠܵܦ ܙܲܒܼܢܹ̈ܐ ܀ 281 :ܗܵܕܹܐ ܒܲܠܚܘܿܕܼ ܢܸܫܐܲܠ ܡܸܢܹܗ ܒܲܙܒܲܢ ܢܸܓܼ̈ܕܹܿܐ 282 ܕܠܵܐ ܡ̣ܪܝ ܬܲܟܿܣܲܢ ܒܲܪܘܼܓܼܙܵܐ ܩܲܫܝܵܐ ܠܦܘܼܬܼ ܣܘܼܥܪ̈ܵܢܲܝܢ ܀ 283 :ܐܲܝܟ ܒܲܪ ܐܝܼܫܲܝ ܢܦܝܼܣ ܥܲܠ ܥܵܘ̣ܠܲܢ ܪܵܥܘܿܡܵܐܝܼܬܼ 284 ܘܒܲܫܒܼܝܼܠ ܡܸܠܵܘ̈ܗܝ ܢܸܪܕܹܿܐ ܠܘܲܥܕܵܐ ܕܲܬܼܝܵܒܼܘܼܬܼܵܐ ܀ 285 :ܐܹܝܢ ܡ̇ܪܝ ܢܸܫܘܸܐ ܠܗܵܝ̇ ܒܲܪܬܼ ܩܵܠܵܐ ܕܲܠܘܵܬܼ ܕܵܘܝܼܕ 286 ܘܢܸܦܢܹܐ ܠܕܲܪܓܼܵܐ ܕܫܘܼܒܼܩܵܢ ܥܵܘ̣ܠܵܐ ܒܕܼܘܼܡܝܵܐ ܕܝܼܠܹܗ ܀ 287 :ܐܹܝܢ ܡܵܪܝ ܐܲܥܒܲܪ ܣܲܟܼܠܘܼܬܼ ܥܲܒܼܕܲܝ̈ܟ ܐܲܝܟ ܕܲܕܥܲܒܼܕܵܟ 288 ܘܐܲܫܡܲܥ ܐܸܢܘܿܢ ܩܵܠ ܫܘܼܒܼܩܵܢܵܐ ܕܲܫܡܲܥ ܟܹܐܢܵܐ ܀ 289 :ܟܹܐܝܢ ܗ̄ܘ̣ܵܐ ܕܵܘܝܼܕܼ ܘܲܚ̣ܣܲܡ ܒܝܼܫܵܐ ܘܥܲܒܼܕܹܿܗ ܒܝܼܫܵܐ 290 ܘܕܼܵܘܕܿܝܼ ܕܲܚܛ̣ܵܐ ܠܚܵܝܼܗܝ ܡ̣ܢ ܠܸܒܹܿܗ ܠܫܸܡ ܒܝܼܫܘܼܬܼܵܐ ܀ 291 :ܘܐܸܢ ܬܵܘܕܲܝܼܬܼܵܐ ܠܚܵܬ̤ ܫܸܡ ܒܝܼܫܹ̈ܐ ܘܟܸܬܼܒܲܬ̤ ܛܵܒܹ̈ܐ 292 ܡܵܕܹܝܢ ܩܲܝܵܡ ܣܲܒܼܪܵܐ ܠܒܼܝܼܫܹ̈ܐ ܕܢܸܗܘܘܿܢ ܛܵܒܹ̈ܐ ܀ 293 :ܛܵܒܼܵܐ ܕܲܫܒ݂ܲܩ ܓܵܘܪܵܐ ܘܩܸܛܠܵܐ ܒܡܸܠܲܬܼ ܦܘܼܡ̇ܐ 294 ܫܒܼܘܿܩ ܣܘܼܪ̈ܚܵܢܹܐ ܕܲܫܼܟܼܝܼܪ̈ܵܬܲܢ ܐܲܝܟ ܡܵܐ ܕܲܫܒܲܩ̣ܬܿ ܀ 295 :ܐܲܢ̄ܬܿ ܗ̄ܘ̣ ܕܲܫܒܲܩ̣ܬܿ ܗܵܘ̇ ܣܘܼܪܚܵܢܵܐ ܕܲܕܠܵܐ ܢܵܡܘܿܣ 296 ܐܲܢ̄ܬܿ ܐܵܦ ܗܵܫܵܐ ܫܒܼܘܿܩ ܚܵܘ̈ܒܵܬܲܢ ܕܲܕܼܠܵܐ ܛܲܟܼܣܵܐ ܀ 297 :ܐܲܢ̄ܬܿ ܗ̄ܘ̣ ܕܲܫܪܲܝܬܿ ܦܣܵܩܵܐ ܕܲܦܣܲܩ̣ܬܿ ܥܲܠ ܩܵܛܘܿܠܹ̈ܐ 298 ܟܠܝܼ ܐܵܦ ܗܵܫܵܐ ܢܸܓܼ̈ܕܹܿܐ ܕܛܲܝܸܒܼܬܿ ܠܛܵܠܘܿܡܘܿܬܲܢ ܀ 299 :ܐܲܢ̄ܬܿܘܼ ܕܲܚܠ݂ܲܛܬܿ ܪ̈ܲܚܡܹܐ ܒܪܘܼܓܼܙܵܐ ܒܟܼܠܗܘܿܢ ܕܵܕܹ̈ܐ 300 ܘܠܵܐ ܝܲܗ̣̄ܒܼܬܿ ܕܲܢܒܲܙܚܘܼܢ ܒܲܢ ܣܵܢ̈ܐܹܐ ܕܥܲܡܲܢ ܀ 301 :ܐܲܢ̄ܬܿܘܼ ܕܐܲܩܸܨܬܿ ܪܲܒܿܘܼܬܼ ܚܘܼܒܵܟ ܥܲܠ ܙܲܕܿܝܼܩܹ̈ܐ 302 ܘܐܲܫܘܝܼܬܿ ܐܸܢܘܿܢ ܕܲܢܦܝܼܣܘܼܢܵܟ ܟܲܕܼ ܠܵܐ ܣܢܝܼܩ ܐܲܢ̄ܬܿ ܀ 303 :ܒܚܘܼܒܵܟ ܚܲܣܝܼܬܿ ܚܵܘ̈ܒܹܿܐ ܕܥܲܡܲܢ ܡ̣ܢ ܫܘܼܪܵܝܵܐ 304 ܘܝܲܗ̣̄ܒܼܬܵܝܗܝ ܠܐܲܓܼܪܵܐ ܕܒܲܣܝܼܡܘܼܬܼܵܟ ܠܨܸܒܼܝܵܢ ܟܹܐܢܹ̈ܐ ܀ 305 ܡܸܛܠ ܟܹܐܢܹ̈ܐ ܫܒܲܩ̣ܬܿ ܣܘܼܪ̈ܚܵܢܹܐ ܕܕܼܵܪܹ̈ܐ ܩܲܕܼܡܹ̈ܐ: pb. 267 306 ܘܗܵܐ ܫܒܼܝܼܩ ܗ̄ܘ̣ ܠܵܟ ܩܕܼܵܡ ܕܲܢܦܲܝܼܣܘܼܢ ܠܒܲܣܝܼܡܘܼܬܼܵܟ ܀ 307 :ܛܢܵܢܵܐ ܐܲܪܡܝܼܬܿ ܠܲܒܼܢܲܝ̈ ܐ̄ܢܵܫܵܐ ܕܲܢܦܝܼܣܘܼܢܵܟ 308 ܕܡ̇ܐ ܕܐܲܦܝܼܣܘܼܟ ܢܸܪܢܘܿܢ ܕܲܡܨܸܝܢ ܠܡܸܚܣܲܢ ܥܵܘ̣ܠܵܐ ܀ 309 :ܨܲܠܝܼ ܡܘܼܫܹܐ ܘܚܲܣܝܼܬܿ ܥܵܘ̣ܠܵܐ ܕܣܸܓܼܕܲܬܼ ܥܸܓܼܵܠܵܐ 310 ܘܐܸܡܲܪ̣ܬܿ ܨܹܐܕܼܵܘܗܝ ܕܗܵܐ ܠܲܡ ܫܸܒܼܩܹ̇ܬܼ ܐܲܝܟ ܡ̇ܐ ܕܐܲܦܝܼܣܬܿ ܀ 311 :ܨܲܠܝܼ ܝܼܫܘܿܥ ܘܲܟܼܠܲܝܼܬܿ ܪܲܗܛܵܐ ܕܫܸܡܫܵܐ ܘܣܲܗܪܵܐ 312 ܘܣܵܡ̣ܬܿ ܒܲܟܼܬܼܵܒܼܵܐ ܕܡܸܠܲܬܼ ܝܼܫܘܿܥ ܟܠܵܬ̤ ܪ̈ܲܗܛܲܝܗܘܿܢ ܀ 313 :ܨܲܠܝܼ ܫܡܘܼܐܹܝܠ ܘܲܥܢ̣ܵܝܗܝ ܪܸܡܙܵܟ ܒܩܵܠܵܐ ܕܪܲܥܡܵܐ 314 ܘܠܹܗ ܦܲܢܝܼܬܵܝܗܝ ܠܡܸܛܪܵܐ ܕܲܗܘ̤ܵܐ ܕܠܵܐ ܒܲܥܝܵܕܼܵܐ ܀ 315 :ܨܲܠܝܼ ܕܵܘܝܼܕܼ ܕܲܚ̣ܙܵܐ ܠܥܝܼܪܵܐ ܕܚܵܪܸܒܼ ܥܲܡܵܐ 316 ܘܚܵܓܼ ܪܘܼܚܵܢܵܐ ܡ̣ܢ ܒܵܥܘܼܬܹܗ ܟܲܕܼ ܡܸܢܵܟ ܚܵܓܼ ܀ 317 :ܩܪ̣ܵܟ ܐܹܠܝܼܵܐ ܘܩܲܫܝܼܬܿ ܪ̈ܘܼܚܹܐ ܘܲܛܥ݂ܲܢ ܡܸܛܪܵܐ 318 ܘܐܲܛܸܢܬܿ ܥܲܡܵܐ ܕܡܸܠܲܬܼ ܟܹܐܢܵܐ ܐܼܣܪܲܬ̤ ܘܲܫܪ̣ܵܬ̤ ܀ 319 :ܩܪ̣ܵܟ ܐܹܠܝܼܫܵܥ ܘܐܲܦܢܝܼܬܿ ܒܐܝܼܕܼܵܘ̈ܗܝ ܡܝܼܬܼܵܐ ܠܚܲܝܹ̈ܐ 320 ܘܠܲܢܒܼܝܼܘܼܬܹܗ ܚ̣ܫܲܒܼܬܿ ܙܵܟܼܘܼܬܼܵܐ ܕܡ̣ܢ ܦܘܼܡ ܡܵܘܬܵܐ ܀ 321 :ܩܪ̣ܵܟ ܚܹܙܲܩܝܵܐ ܘܵܚܪ݂ܲܒܼܬܿ ܐܲܠܦܹ̈ܐ ܕܐܵܬܼܘܿܪ̈ܵܝܹܐ 322 ܘܟܲܕܼ ܛܵܒܼ ܗܵܡܲܢ ܗܘ̤ ܐܸܬܼܢܲܨܲܚ ܒܚܲܪܒܹܿܗ ܕܥܝܼܪܵܐ ܀ 323 :ܐܵܦ ܕܵܢܝܼܐܹܝܠ ܒܚܹܝܠ ܥܘܼܕܪܵܢܵܟ ܓܠ̣ܵܐ ܟܲܣ̈ܝܵܬܼܵܐ 324 ܘܲܠܨܸܒܼܝܵܢܹܗ ܓ̣ܕܲܠܘ ܒܵܒܼܠܵܝܹ̈ܐ ܟܠܝܼܠ ܩܘܼܠܵܣܹ̈ܐ ܀ 325 :ܒܟܼܠܗܘܿܢ ܕܵܪܹ̈ܐ ܨܲܠܝܼܘ ܟܹܐܢܹ̈ܐ ܘܲܥܢ̣ܲܝܬܿ ܐܸܢܘܿܢ 326 ܒܕܼܵܪܲܢ ܕܲܓܼܠܝܼܙ ܡ̣ܢ ܙܲܕܿܝܼܩܹ̈ܐ ܐܲܦܝܼܣ ܐܲܢ̄ܬܿ ܠܵܟ ܀ 327 :ܪܲܒܿ ܗ̄ܘ̣ ܦܝܵܣܵܐ ܕܒܲܣܝܼܡܘܼܬܼܵܟ ܡ̣ܢ ܟܠ ܟܹܐܢܝܼ̈ܢ 328 ܘܠܵܐ ܡܸܬܼܦܲܚܲܡ ܓܲܙܵܐ ܕܪ̈ܲܚܡܲܝܟ ܥܲܡ ܕܲܥܒܼܝܼ̈ܕܹܐ ܀ 329 :ܚܘܼܒܵܟ ܓܲܪܓܼ ܠܨܸܒܼܝܵܢ ܟܹܐܢܹ̈ܐ ܕܲܢܦܝܼܣܘܼܢܵܟ 330 ܘܲܕܸܠܲܬܿ ܟܹܐܢܹ̈ܐ ܣܥܘܿܪ ܨܸܒܼܝܵܢܵܟ ܒܸܠܥܵܕܼ ܟܹܐܢܹ̈ܐ ܀ 331 :ܕܝܼܠܵܟ ܐܝܼܬܼܵܘܗܝ ܦܝܵܣܵܐ ܘܡܸܠܹ̈ܐ ܕܲܦܝܼܣܵܢܹ̈ܐ 332 ܡ̇ܢ ܡܲܛܥܸܢ ܐܲܢ̄ܬܿ ܛܲܝܒܿܘܼ ܕܝܼܠܵܟ ܠܲܒܼܢܲܝ̈ ܒܲܝܬܵܟ ܀ 333 :ܬܸܗܘܸܐ ܛܵܒܼܬܼܵܐ ܟܠܵܗ̇ ܕܝܼܠܵܟ ܐܲܝܟ ܡ̇ܐ ܕܐܝܼܬܹܝܗ̇ 334 ܘܲܣܥܘܿܪ ܨܹܐܕܲܝܢ ܗܵܘ̇ ܡ̇ܐ ܕܲܣܥ݂ܲܪܬܿ ܒܫܘܼܪܵܝ ܙܲܒܼܢܹ̈ܐ ܀ 335 :ܡܲܢ ܐܲܦܝܼܣܵܟ ܕܬܸܒܼܪܸܐ ܒܪܝܼܬܼܵܐ ܟܲܕܼ ܠܵܐ ܐܝܼܬܹܝܗ̇ 336 ܘܡܲܢ̣ܘܼ ܡܲܠ̣ܟܵܟ ܕܬܹܐܣܘܿܪ ܥܵܠܡܵܐ ܒܪܘܼܟܵܒܼ ܐ̄ܢܵܫܵܐ ܀ 337 :ܡܲܢ̣ܘ ܗܘ̤ܵܐ ܠܵܟ ܡܲܠܹ̇ܝܟ ܡܸܠܟܵܐ ܕܬܸܩܪܹܝܢ ܨܲܠܡܵܟ 338 ܘܡܲܢ̣ܘܼ ܚܵܘܝܵܟ ܕܲܒܼܪܘܼܟܵܒܲܢ ܬܫܲܠܸܡ ܥܲܡܠܵܟ ܀ 339 :ܘܐܸܢ ܒܲܗܘܵܝܵܐ ܕܝܼܠܲܢ ܘܲܕܼܟܼܠ ܠܵܐ ܒܥܲܝܬܿ ܥܸܕܼܪܵܐ 340 ܡ̇ܢ ܒܵܥܹ̇ܐ ܐܲܢ̄ܬܿ ܥܸܕܼܪܵܐ ܒܥܵܘ̣ܠܲܢ ܒܵܩܵܐ ܫܝܼܛܵܐ ܀ pb. 268 341 :ܒܵܩܵܐ ܗ̄ܘ̣ ܥܵܘ̣ܠܲܢ ܠܦܘܼܬܼ ܪܲܒܿܘܼܬܼܵܐ ܕܐܲܠܵܗܘܼܬܼܵܟ 342 ܘܲܡܠܸܐ ܫܘܼܥܠܵܐ ܐܵܢ ܢܸܬܼܦܲܚܲܡ ܒܝܲܡܵܐ ܕܪ̈ܲܚܡܲܝܟ ܀ 343 :ܝܲܡܵܐ ܗ̄ܘ̣ ܪܲܒܵܐ ܚܢܵܢܵܟ ܪܲܒܵܐ ܘܪܲܒܿ ܡ̣ܢ ܝܲܡܵܐ 344 ܘܪܵܘܡ̇ܐ ܘܥܘܼܡܩܵܐ ܙܥܘܿܪܝܼܢ ܣܲܓܿܝܼ ܠܦܘܼܬܼ ܪܲܒܿܘܼܬܹܗ ܀ 345 :ܕܪܲܒܿ ܗ̄ܘ̇ ܚܢܵܢܵܟ ܫܡܲܝܵܐ ܘܐܲܪܥܵܐ ܩܵܥܹ̇ܝܢ ܗܵܕܹܐ 346 ܕܟܲܕܼ ܠܲܝܬܿ ܐܸܢܘܿܢ ܐܸܡܲܪ̣ܬܿ ܘܲܗܘ̤ܵܘ ܡ̣ܢ ܠܵܐ ܡܸܕܲܡ ܀ 347 :ܡ̣ܢ ܠܵܐ ܡܸܕܲܡ ܒܪ̣ܵܝܬܿ ܟܠܡܸܕܸܿܡ ܡܸܛܠܵܬܲܢ 348 ܘܐܲܝܟܲܢ ܡܲܨܝܵܐ ܕܬܲܗܡܸܐ ܡܸܢܲܢ ܒܲܙܒܲܢ ܪܘܼܓܼܙܵܐ ܀ 349 :ܘܲܕܼܪܲܒܵܐ ܛܵܒܼ ܘܠܵܐ ܡܸܬܼܡܲܫܚܵܐ ܡ̣ܢ ܡܲܠܵܠܹ̈ܐ 350 ܕܲܠܒܸܫ̄ܢ ܚܘܼܒܵܟ ܘܐܲܣܸܩ ܣ̣ܵܡܲܢ ܒܕܲܪܓܼܵܐ ܕܲܫܡܵܟ ܀ 351 :ܒܫܸܡ ܐܝܼܬܼܘܼܬܼܵܟ ܩܪ̣ܵܝܬܵܝܗܝ ܠܲܫܡܲܢ ܒܲܫܡܵܐ ܫܐܝܼܠܵܐ 352 ܘܗܵܫܵܐ ܒܗܘܿܢ ܒܲܥܒܼܵܕܹ̈ܐ ܢܸܗܘܸܐ ܒܕܲܪܓܹܗ܀ 353 :ܠܕܲܪܓܼܵܐ ܪܵܡ̇ܐ ܕܥܲܡ ܐܝܼܬܼܘܼܬܼܵܟ ܣܠܸ݂ܩ ܕܲܚܝܼܚܲܢ 354 ܠܵܐ ܢܸܬܿܬܿܚܬܸܿܐ ܡ̣ܢ ܪܡܪܵܡܹܗ ܒܥܸܠܲܬܼ ܥܵܘ̣ܠܲܢ ܀ 355 :ܡ̣ܢ ܝܲܡܝܼܢܵܟ ܝܵܬܹ̇ܒܼ ܦܲܓܼܪܲܢ ܘܲܒܒܼܝܼܫ ܫܘܼܒܼܚܵܐ 356 ܠܵܐ ܢܸܨܛܲܥܲܪ ܫܘܼܒܼܚܹܗ ܒܨܲܥܪܵܐ ܕܡܲܪܵܚܘܼܬܲܢ ܀ 357 :ܠܵܐ ܢܫܘܼܛܘܼܢܵܝܗܝ ܟܝܵܢܹ̈ܐ ܡܠܝܼܠܹ̈ܐ ܒܝܲܕܼ ܪܲܦܝܼܘܼܬܹܗ 358 ܕܐܲܢ̄ܬܿ ܝܲܩܲܪܬܵܝܗܝ ܒܲܫܡܵܐ ܪܲܒܵܐ ܕܐܵܠܲܗܘܼܬܼܵܟ ܀ 359 :ܠܵܐ ܡ̇ܪܒ ܬܸܗܘܸܐ ܠܫܹܐܕܹ̈ܐ ܛܪ̈ܘܼܢܹܗ ܠܡܸܫܬܲܒܼܗܵܪܘܼ 360 ܕܗܵܐ ܠܲܡ ܐܲܡܠܸܟܼܘ ܘܦܲܕܼ ܐܝܼܕܲܝ̈ܗܘܿܢ ܡ̣ܢ ܫܘܼܠܛܵܢܵܐ ܀ 361 :ܠܵܐ ܡ̇ܪܝ ܢܸܚܕܿܘܿܢ ܣܵܢ̈ܐܹܐ ܕܥܲܡܲܢ ܐܲܝܟ ܕܲܡܥܵܕܝܼܢ 362 ܕܐܲܝܟܵܘ ܕܲܣܠܸ̣ܩ ܠܕܲܪܓܼܵܘ ܪܵܡܵܐ ܕܠܵܐ ܡ̇ܝܘܿܬܹ̈ܐ ܀ 363 :ܟܲܕܿܘܼ ܐܲܩܠܝܼܘ ܘܒܲܙܲܚܘ ܒܲܫܡܵܐ ܕܝܲܩܪܬܵܢ ܒܹܗ 364 ܫܲܬܸܿܩ ܐܸܢܘܿܢ ܕܠܵܐ ܢܸܫܬܲܥܠܘܿܢ ܥܲܠ ܡ̇ܪܘܼܬܼܵܟ ܀ 365 :ܒܐܝܼܕܲܢ ܨܵܒܹ̇ܝܢ ܠܲܡܒܲܙܵܚܘܼ ܒܲܫܡܵܟ ܪܲܒܵܐ 366 ܘܟܸܢ ܡܸܬܼܪܲܥܹܝܢ ܠܡܸܫܬܲܩܵܠܘܼ ܥܲܠ ܪܲܒܿܘܼܬܼܵܟ ܀ 367 :ܠܨܲܠܡܲܢ ܣܵܢܹ̈ܝܢ ܣܵܢ̈ܐܹܐ ܕܗܘ̤ܵܘ ܠܲܫܡܵܟ 368 ܘܲܕܼܠܵܐ ܣܵܦ̇ܩܝܼܢ ܕܲܢܨܲܚܘܿܢܵܟ ܡܨܲܚܹܝܢ ܠܵܟ ܒܲܢ ܀ 369 :ܠܵܐ ܡ̇ܪܝ ܬܸܣܲܩ ܠܪܹܫ ܪܸܓܲܬܼܗܘܿܢ ܕܢܲܟܿܘܼܠܬܼܵܢܹ̈ܐ 370 ܘܠܵܐ ܢܸܫܬܲܟܼܠܲܠ ܒܸܢܝܵܢ ܙܹܐܦܵܐ ܕܲܚܬܼܝܼܪܝܼܢ ܒܹܗ ܀ 371 :ܟܐܝܼ ܒܹܗ ܒܪܵܘܡ̇ܐ ܕܪܸ̈ܥܝܵܢܲܝܗܘܿܢ ܘܢܸܦܸܠ ܒܐܲܪܥܵܐ 372 ܘܐܲܪܝܼܡ ܪܹܫܵܐ ܕܡܲܟܿܝܼܟܼܘܼܬܲܢ ܠܕܲܪܓܼܵܐ ܕܲܫܡܵܟ ܀ pb. 269 373 :ܦܪܘܿܩ ܠܲܟܼܝܵܢܲܢ ܡ̣ܢ ܐܝܼܕܲܝ̈ܗܘܿܢ ܕܲܡܚܲܒܿܠܵܢܹ̈ܐ 374 ܕܗܵܐ ܬܚܸܒܼ ܘܐܵܘܦܝܼ ܒܩܹܐܪܣܵܐ ܩܲܫܝܵܐ ܕܥܲܡ ܣܸܕܼܪ̈ܲܝܗܘܿܢ ܀ 375 :ܐܲܓܸܿܢ ܐܝܼܕܼܵܟ ܥܲܠ ܡܲܫܪܝܼܬܿܢ ܒܨܝܼܪܲܬܼ ܚܲܝܠܵܐ 376 ܕܗܵܐ ܙܸܥܪܲܬ̤ ܠܵܗ̇ ܡ̣ܢ ܡܸܢܝܵܢܵܐ ܕܪ̈ܚܡܲܝ ܩܘܼܫܬܵܐ ܀ 377 :ܬܲܢܗܲܪ ܐܲܦܲܝ̈ܟ ܒܥܘܼܡܪܲܢ ܫܝܼܛܵܐ ܡܠܸܐ ܥܵܩܵܬܼ̈ܐ 378 ܕܗܵܐ ܛܠܸ݂ܩ ܡܸܢܹܗ ܢܘܼܗܪܵܐ ܦܲܐܝܵܐ ܕܙܲܕܼܝܼܩܘܼܬܼܵܐ ܀ 379 :ܐܲܩܝܼܡ ܪܸܡܙܵܟ ܐܲܦܸܛܪܘܿܦܵܐ ܥܲܠ ܪܲܦܝܘܼܬܲܢ 380 ܕܗܵܐ ܒܲܕܿܪܬܹܗ ܠܓܲܙܵܐ ܕܢܸܣܒܲܬ̤ ܡ̣ܢ ܡ̇ܘܗܲܒܼܬܼܵܟ ܀ 381 :ܩܪܝܼ ܠܪ̈ܘܼܚܵܢܹܐ ܘܦܲܩܸܕܼ ܐܸܢܘܿܢ ܕܵܢܣܲܝܥܘܼܢܵܢ 382 ܕܗܵܐ ܥܲܠ̣ܘ ܫܹܐܕܹ̈ܐ ܘܚܲܫܹ̈ܐ ܠܙܝܼܙܹ̈ܐ ܘܒܲܙ̣ܘ ܣܝܼ̈ܡܵܬܲܢ ܀ 383 :ܫܕܲܪ ܥܝܼܪܹ̈ܐ ܘܲܢܥܝܼܪܘܼܢܵܢ ܡ̣ܢ ܕܲܡܟܿܘܼܬܲܢ 384 ܕܗܵܐ ܛܒ݂ܲܥܢܲܢ ܠܲܢ ܒܲܫܟܼܝܼܪ̈ܵܬܲܢ ܐܲܝܟ ܕܲܒܫܸܢܬܼܵܐ ܀ 385 :ܫܠܘܿܚ ܡܲܠܲܐܟܹ̈ܐ ܕܲܢܫܲܝܢܘܼܢܵܗ̇ ܠܲܫܕܓܼܝܼܫܘܼܬܲܢ 386 ܕܗܵܐ ܟܠ ܬܸܓܼܡܝܼ̈ܢ ܪܡܹܝܢ ܒܲܩܪ̈ܵܒܹܐ ܕܠܵܐ ܫܲܘܝܘܬܼܵܐ ܀ 387 :ܘܐܸܢ ܠܵܐ ܣܵܦܩ̇ܝܼܢ ܚܲܝ̈ܠܲܝ ܪܵܘܡ̇ܐ ܕܲܢܥܝܼܪܘܼܢܵܢ 388 ܢܦܝܼܣ ܒܲܪ ܓܸܢܣܲܢ ܘܲܢܫܲܝܸܢ ܠܲܢ ܥܲܡ ܪܲܒܿܘܼܬܼܵܟ ܀ 389 :ܡܨܸܐ ܕܲܢܥܲܕܲܪ ܠܲܫܓܼܝܼܫܘܼܬܲܢ ܒܐܵܓܼܘܿܢ ܥܲܡܠܹ̈ܐ 390 ܒܗܵܝ̇ ܕܐܝܼܬܼܵܘܗܝ ܒܪܵܟ ܝܼܚܝܼܪܼܵܝܵܐ ܘܐܵܦ ܡܸܨܥܵܢܲܢ ܀ 391 :ܝܵ̇ܕܲܥ ܕܲܢܦܝܼܣ ܚܠܵܦ ܚܲܝܵܒܹ̈ܐ ܚܘܼܒܵܢܵܐܝܼܬܼ 392 ܒܗܵܝ̇ ܕܲܫܩܝܼܠ ܠܹܗ ܢܸܣܝܵܢ ܚܲܫܹ̈ܐ ܕܡ̇ܝܘܿܬܼܘܼܬܼܵܐ ܀ 393 :ܡܲܢܲܣܲܝ ܗ̄ܘ̣ ܓܹܝܪ ܒܟܼܠܗܹܝܢ ܕܲܩܢܹܐ ܟܝܵܢ ܡܵܝ̈ܘܿܬܹܐ 394 ܘܝܲܬܿܝܼܪ ܝܵ̇ܕܲܥ ܠܲܡܥܲܕܵܪܘܼ ܠܲܕܼܡܸܬܼܢܲܣܹܝܢ ܀ 395 :ܠܥܸܠܲܬܼ ܫܲܝܢܵܐ ܓ̣ܫܲܝܬܵܝܗܝ ܡ̣ܢ ܟܠ ܕܲܢܫܲܝܸܢ ܟܠ 396 ܓܡܘܿܪ ܒܲܥܒܼܵܕܼܵܐ ܓܒܼܝܼܬܼܵܐ ܕܲܫܡܹܗ ܒܥܸܠܲܬܼ ܫܲܝܢܲܢ ܀ 397 :ܙܲܒܼܢܵܐ ܗ̄ܘ̣ ܗܵܫܵܐ ܕܲܢܚܵܘܸܐ ܒܲܢ ܪܲܒܿܘܼܬܼ ܕܲܪܓܹܗ 398 ܐܲܟܼܡܵܐ ܕܚܵܘܝܼ ܒܙܲܒܼܢܵܐ ܕܥܸܫܢܲܬ̤ ܚܲܝܵܒܼܘܼܬܲܢ ܀ 399 :ܐܸܢ ܟܲܕܼ ܐܝܼܬܲܝܢ ܣܵܢ̈ܐܹܐ ܕܲܫܡܵܟ ܫܲܝܸܢܬܵܢ ܒܹܗ 400 ܟܡܵܐ ܬܸܫܬܲܝܢ ܠܵܐ ܫܲܘܝܘܼܬܲܢ ܒܡܸܨܥܵܝܘܼܬܹܗ ܀ 401 :ܐܸܢ ܡ̣ܢ ܡ̇ܘܬܵܐ ܘܐܵܟܹ̇ܠܩܲܪܨܵܐ ܦܪ̣ܵܩܬܵܢ ܒܐܝܼܕܹܗ 402 ܟܡܵܐ ܬܦܲܨܐ ܠܲܢ ܡ̣ܢ ܚܘܼܬܼܚܵܬܹ̈ܐ ܒܵܩܹ̈ܐ ܫܝܼܛܹ̈ܐ ܀ 403 :ܐܸܢ ܚܲܢܦܘܼܬܼܵܐ ܘܝܗ̄ܘܼܕܼܵܝܘܼܬܼܵܐ ܥܩ݂ܲܪ ܒܲܙܩܝܼܦܹܗ 404 ܟܡܵܐ ܦܫܝܼܩܵܐ ܠܹܗ ܕܢܸܟܼܠܹܐ ܒܚܫܹ̈ܐ ܕܲܡܥܝܼܩܝܼܢ ܠܲܢ ܀ 405 :ܐܸܢ ܒܘܼܚܪܵܢܵܐ ܕܟܼܠ ܗܘ̤ ܥܵܒܹ̇ܕ ܒܫܘܼܠܵܡ ܙܲܒܼܢܹ̈ܐ 406 ܟܡܵܐ ܩܕܵܡ ܙܲܒܼܢܹ̈ܐ ܡܨܸܐ ܕܲܢܦܲܟܲܗ ܩܲܫܝܘܼܬܼ ܢܸܓܼ̈ܕܹܿܐ ܀ 407 ܐܸܢܗܘ̤ ܫܲܠܝܼܛ ܥܲܠ ܒܹܝܬܼ ܓܲܙܵܐ ܕܐܵܠܲܗܘܼܬܼܵܟ: pb. 270 408 :ܡ̇ܕܹܝܢ ܫܲܠܝܼܛ ܕܲܢܚܘܼܢ ܡܲܓܵܢ ܠܲܒܼܢܲܝ̈ ܓܸܢܣܹܗ 409 :ܚܘܼܢܹܝܗ̇ ܛܵܒܼܵܐ ܠܲܡܚܝܼܾܠܘܼܬܲܢ ܐܲܝܟ ܕܲܡܥܵܕܲܬܿ 410 ܘܗܲܒܼܠܲܢ ܙܸܕܼܩܵܐ ܒܝܲܕܼ ܒܲܪ ܓܸܢܣܲܢ ܕܐܲܚܝܼܕܼ ܓܲܙܵܟ ܀