Discourse 33

ܡܸܛܠ ܕܹܝܢ ܕܥܲܠ ܚܘܼ̈ܬܼܚܵܬܹܐ ܕܪܘܼܚܵܐ ܡ̣ܢ ܠܥܸܠ ܪܫܲܡܢܲܢ: ܕܲܢܦܲܫܸܩ ܥܸܕܵܢܵܐ ܡܲܦܸܣ. ܚܲܝܠܵܐ ܡܸܕܸܡ ܐܝܼܬܼܵܘܝܗ ܒܲܗܘܼܪܵܝܵܐ: ܕܡ̣ܢ ܚܘܼܒܵܐ ܢܵܒܲܗ ܒܠܸܒܵܐ. ܠܘܼܩܕܲܡ ܕܹܝܢ: ܕܠܵܐ ܥܸܠܠܹ̈ܐ ܕܲܪܓܸܫܬܼܵܐ ܒܕܲܡܙܝܼܥ ܠܡܘܪܙܵܓܼܵܐ ܕܠܵܐ ܚܵܘܪܵܐ ܩܢܘܿܡܵܝܵܐ: ܐܵܘ ܤܘܼܟܵܠܵܐ ܕܡܲܥܒܸܿܕܼ ܘܚܘܼܫܵܒܼܵܐ. ܘܡܸܛܠܗܵܕܹܐ ܡܸܤܬܿܒܲܪ ܕܠܵܐ ܥܸܠ̈ܠܵܬܼܵܐ ܐܲܝܟܼ ܗܵܘ̇: ܡܸܛܠ ܥܲܪܦܸܠܵܢܵܝܘܼܬܹܗ ܕܗܵܘܢܵܐ ܥܕܲܟܹܝܠ: ܠܠܵܐ ܡܢܲܦܩܹ̈ܐ pb. 219 ܡܲܢ: ܗܵܟܲܢܵܐ. ܠܲܡܫܲܡ̈ܠܲܝܵܐ ܕܹܝܢ: ܡܸܬܼܓܲܠܝܵܐ ܒܵܬܲܪܟܸܢ ܘܥܸܠܬܼܵܐ. ܥܲܡ ܒܘܼܕܵܩܵܐ ܥܘܿܕܼ ܕܥܸܠܬܼܵܐ: ܘܝܲܬܝܼܪ ܚܲܤܝܼܢܵܐܝܼܬܼ ܗܵܢܵܐ. ܗܲܢܝܼܐܝܼܬܼܵܐ ܟܹܝܬܼ ܦܵܪܚܵܐ ܒܠܸܒܵܐ. ܘܲܡܢܵܬܼܵܐ ܡܸܢܵܗ̇: ܒܓܼܘܼܫܡܵܐ ܡܫܲܡܲܪ ܡܩܲܒܿܠܵܢܵܐ: ܘܡܸܢܵܗ̇: ܠܚܲܝ̈ܠܹܐ ܢܦܫܵܢܵܝܹ̈ܐ ܡܫܲܕܲܪ. ܡܸܛܠ ܕܠܸܒܵܐ ܡܸܨܥܵܝܵܐ ܤܝܼܡ ܒܹܝܬܼ ܪܸ̈ܓܼܫܹܐ ܢܲܦܫܵܢܵܝܹ̈ܐ ܠܲܕܼܓܼܘܼܫܡܵܐ: ܠܗܵܢܘܿܢ ܡܲܢ ܐܘܿܪܓܵܢܵܐܝܼܬܼ: ܠܗܵܠܹܝܢ ܕܹܝܢ ܟܝܵܢܵܐܝܼܬܼ. ܘܗ̤ܘܝܘܼ ܡܩܲܒܿܠܵܢܵܐ: ܠܲܬܼܪ̈ܲܝܗܘܿܢ ܓܲܒܹ̈ܐ ܡܙܝܼܥ ܛܥܵܡܬܐ ܕܡܲܥܒܿܕܼܵܢܘܼܬܹܗ. ܡܸܛܠܵܬܼܵܗ̇ ܗܘ̤ ܐܵܦ ܕܲܢܦܘܼܫ ܡܸܢܹܗ ܥܵܠܡܵܐ ܡܸܬܼܥܨܸܐ: ܘܗ̤ܘ ܡ̣ܢ ܗܵܠܹܝܢ ܕܥܵܠܡܵܐ. ܥܸܠܬܼܵܐ ܐܵܠ̇ܨܵܐ ܕܲܢܥܲܩܸܒܼ܀ ܚܘܼܒܵܐ: ܡܸܕܸܡ ܗ̄ܘ̣ ܚܲܡܝܼܡܵܐ ܒܲܟܼܝܵܢܹܗ. ܘܐܸܡܲܬܼܝ ܕܲܕܼܠܵܐ ܡܘܼܫܚܵܐ ܢܵܦܹ̇ܠ ܒܐ̄ܢܵܫ: ܥܵܒܹ̇ܕܼ ܠܵܗ̇ ܐܲܝܟܼ ܫܵܢܝܼܬܼܵܐ ܠܢܲܦܫܵܐ ܗܵܝ̇. ܡܸܛܠܗܵܢܵܐ: ܠܵܐ ܡܸܫܟܲܚ ܥܵܪܹܐ ܠܹܗ ܠܸܒܵܐ ܕܐܲܪܓܸܫ̣ ܒܹܗ ܘܲܢܚܲܡܤܸܢ: ܕܠܵܐ ܒܲܟܼܡܵܝܘܼܬܼܵܐ ܐܵܦ ܫܘܼܚܠܵܦܵܐ ܢܸܬܼܚܙܸܐ ܒܹܗ ܕܠܵܐ ܒܲܥܝܵܕܼܵܐ. ܘܗܵܠܹܝܢ ܐܵܬܼ̈ܘܵܬܹܗ ܡܸܬܼܪܲܓܼܫܵܢܵܐܝܼܬܼ ܘܲܒܼܦܲܪܨܘܿܦܹܗ ܡܫܵܘܕܲܥ: ܒܲܪ ܫܵܥܬܹܗ ܤܵܡ̈ܩܵܢ ܐܲܦܵܘ̈ܗܝ ܘܪ̈ܵܘܙܵܢ: ܚܵܐܹ̇ܡ ܓܘܼܫܡܹܗ. ܕܵܚܹ̇ܩ ܡܸܢܹܗ ܩܸܢܛܵܐ: ܘܟܼܘܚܵܕܼܵܐ. ܗܵܘܹ̇ܐ: ܐܲܝܟܼ ܙܲܠܝܼܠܵܐ. ܚܲܝܠܵܐ ܕܤܘܼܬܵܬܼܵܐ: ܥܵܪܹܩ ܡܸܢܹܗ. ܚܹܐܦܵܐ ܘܕܼܘܼܘܵܕܼܵܐ: ܫܵܠܛ̇ܝܼܢ ܒܹܗ. ܚܲܝܵܘ̈ܗܝ ܒܦܸܚܡܵܐ ܕܪܵܚܡܹ̇ܗ: ܐܲܝܟܼ ܠܵܐ ܡܸܕܸܡ: ܡ̣ܢ ܗܵܐ ܡܸܟܵܐ ܒܥܲܝܢܵܘ̈ܗܝ. ܡܸܛܠܗܵܢܵܐ ܘܡܵܘܬܵܐ ܕܥܲܠ ܟܠ ܕܚܝܼܠ: ܠܹܗ: ܕܘܼܟܲܬܼ ܦܘܼܪܓܵܝܵܐ ܤܝܼܡܵܐ ܨܒܼܘܼܬܼܵܐ. ܘܥܲܡ ܟܠܗܹܝܢ: ܠܵܐ ܡܸܤܬܕܹܩ ܚܵܘܪܹܗ ܗܵܘܢܵܢܵܝܵܐ ܡ̣ܢ ܦܸܗܝܵܐ ܕܒܹܗ ܗܲܓܵܓܼܵܐܝܼܬܼ. ܛܵܘܪܵܐ ܡܲܒܼܥܲܕܼ: ܐܸܠܵܐ ܠܹܗ ܡܡܲܠܸܠ ܐܲܝܟܼ ܩܲܪܝܼܒܼܵܐ. ܟܤܸܐ ܡܲܢ ܡ̣ܢ ܚܸܙܘܵܐ: ܒܟܲܤܝܘܼܬܹܗ ܝܑܼܕܼܝܼܥܬܼܵܐ ܦܵܗܹ̇ܐ. ܚܸܙܘܹܗ ܟܝܵܢܵܝܵܐ: ܘܡܲܪܝܼܕܼ pb. 220 ܠܲܪܓܸܫܬܼܵܐ. ܒܤܘܥܪ̈ܵܢܵܘܗ ܡܲܢ: ܐܲܝܟܼ ܕܒܲܚܙܵܬܹܗ ܡܸܫܬܲܠܗܲܒܼ. ܒܲܠܚܘܿܕܼܵܘܗܝ ܫܪܸܐ: ܡܸܤܬܵܘܲܕܼ ܟܹܝܬܼ ܚܘܼܫܵܒܼܵܐ ܐܲܝܟܼ ܕܥܲܡ ܐ̄ܚܪܹܝܢ ܘܲܡܒܲܠܗܸܐ. ܒܗܵܢܵܐ ܚܲܫܵܐ ܪܘܝܼܘ ܤܵܗ̈ܕܹܐ: ܒܹܗ ܚܲܕܼܪܘܼܗ̇ ܫܠܝܼܚܹ̈ܐ ܠܐܲܪܥܵܐ ܟ̱ܠܹܗ̇ ܟܲܕܼ ܫܲܢܝܼܐܝܼܢ. ܐܸܬܿܛܲܪܲܦܘ ܩܲܕܝܼ̈ܫܹܐ: ܩܲܒܸܠ̣ܘ ܒܸܙܚܵܐ: ܗܘ̤ܵܘ ܛܲܥܲܝ̈ܵܐ ܒܚܘܼܪܒܵܐ. ܡܛܲܟܿܤܹ̈ܐ: ܘܲܗܘ̤ܵܘ ܠܵܐ ܡܛܲܟܿܤܹ̈ܐ. ܚܲܟܝܼ̈ܡܹܐ: ܘܲܫܛ̣ܵܘ ܒܨܸܒܼܝܵܢܵܐ. ܟܬܝܼ̈ܟܹܐ: ܘܐܸܙܕܲܠܲܠܘ ܒܦܘܼܪܫܵܢܵܐ. ܠܵܐ ܚܵܫܘܿܫܹ̈ܐ: ܘܥܲܡ ܒܸܤܪܵܐ. ܬܵܒܼܘܿܥܵܐ ܕܐܲܡܝܼܢ: ܘܲܫܠܝܼ ܕܠܵܐ ܥܨܵܬܼܵܐ. ܕܲܠܗܵܕܹܐ ܫܵܢܝܘܼܬܼܵܐ ܢܸܫܘܸܐ ܢܸܡܛܸܐ ܡܸܟܵܐ: ܒܪ̈ܲܚܡܵܘܗܝ ܕܲܤܓܼܝܼܕܼܵܐ ܐܲܠܵܗܲܢ: ܗܵܘ̇ ܕܡܸܨܥܵܝܵܐ ܢܤܲܒܼ ܡ̣ܢ ܓܸܢܤܲܢ: ܘܒܼܐܝܼܕܹܗ ܗܵܠܹܝܢ ܝܲܗ̣̄ܒܼܠܲܢ: ܗܵܘ̇ ܕܲܒܼܟܼܠܗܹܝܢ ܕܝܼܠܲܢ ܡܢܲܤܲܝ ܐܲܟܼܘܵܬܲܢ ܤܛܲܪ ܡ̣ܢ ܚܛܝܼܬܼܵܐ. ܡܸܛܠ ܚܕܼܵܢܵܝܘܼܬܼ ܒܸܤܪܵܐ ܟܝܵܢܵܝܵܐ ܕܥܲܡܲܢ: ܘܠܲܗܵܠܲܡ ܕܠܵܐ ܒܘܼܠܒܵܠܵܐ: ܒܚܲܕܼܵܝܘܼܬܼܵܐ ܢܵܛܪܲܬܼ ܕܝܼ̈ܠܵܝܵܬܼܵܐ ܕܲܟܼܝܵܢܹ̈ܐ: ܡܵܘܬܿܒܼܵܐ ܕܡ̣ܢ ܝܲܡܝܼܢܵܐ ܙܲܕܸܩ̣ ܠܹܗ. ܕܒܼܐܝܼܕܹܗ ܠܹܗ ܫܘܼܒܼܚܵܐ ܘܐܘܼܚܕܵܢܵܐ ܘܤܸܓܼܕܬܼܵܐ: ܗܵܫܵܐ ܘܲܒܼܚܲܝܹ̈ܐ ܕܠܵܐ ܫܘܼܠܵܡ ܠܥܵܠܲܡ ܥܵܠܡܝܼܢ ܐܵܡܹܝܢ܀ ܡ̣ܢ ܩܕܼܵܡ ܕܬܸܥܘܿܠ ܠܲܡܕܼܝܢܬܐ ܕܡܲܟܿܝܼܟܼܘܼܬܼܵܐ: ܐܸܢ ܬܸܚܙܸܐ ܩܢܘܿܡܵܟܼ ܕܲܡܢܵܚ ܐܲܢ̄ܬܿ ܡ̣ܢ ܫܚܵܩܵܐ ܕܚܲܫܹ̈ܐ: ܠܵܐ ܬܗܲܝܡܢܝܼܘܗܝ. ܟܡܹܐܢܵܐ ܡܸܕܸܡ ܐܝܼܬܼܵܘܗܝ ܕܡܸܬܿܛܲܟܲܢ ܠܵܟܼ. ܘܤܲܟܵܐ: ܒܵܬܲܪ ܢܵܘܚܵܐ ܗܵܘ̇: ܠܲܕܼܠܘܼܚܝܵܐ ܤܲܓܝܼܐܵܐ ܕܡܸܢܗܘܿܢ. ܟܲܕܼ ܥܲܠ ܟܠܗܘܿܢ ܐܵܘܵܢܹ̈ܐ ܕܲܡܝܲܬܿܪ̈ܵܬܼܵܐ ܥܵܒܲܪ ܐܲܢ̄ܬܿ: ܠܵܐ ܦܵܓܲܥ ܐܲܢ̄ܬܿ ܒܢܵܘܚܵܐ ܕܡ̣ܢ ܛܘܼܪ̈ܵܦܲܝܟ ܘܒܲܢܦܹܐܫܵܐ pb. 221 ܕܡ̣ܢ ܪ̈ܵܕܼܘܿܦܲܝܟ: ܥܕܲܡܵܐ ܕܐܸܤܡܲܟܼ ܡܲܪܕܝܼܬܼܵܟܼ ܠܐܵܘܵܢܵܐ ܕܡܲܟܿܝܼܟܼܘܼܬܼܵܐ.