Isaac of Nineveh: Discourse 36

ܐܝܼܬܼ ܠܹܗ ܬܘܼܒܼ ܐܵܦ ܥܝܵܕܹ̈ܐ ܐ̄ܚܪ̈ܵܢܹܐ ܠܲܒܼܥܸܠܕܲܪܲܢ ܤܵܛܵܢܵܐ: ܕܠܲܐܝܠܹܝܢ ܕܠܵܐܓܼܘܿܢܵܐ ܗܵܢܵܐ ܢܵܚ̇ܬܝܼܢ: ܦܘܿܪܤܬܼܵܢܵܐܝܼܬܼ ܡܦܲܪܸܫ ܠܗܘܿܢ ܠܕܲܪ̈ܵܘܗܝ ܕܠܘܼܩܒܲܠܗܘܿܢ. ܡ̣ܢ ܒܘܼܩܝܵܐ ܕܲܙܢܲܝ̈ܗܘܿܢ: ܘܲܠܦܘܼܬܼ ܢܝܼܫܵܐ ܕܦܲܪ̈ܨܘܿܦܹܐ: ܙܢܵܐ ܕܐܵܓܼܘܿܢܹܗ ܡܫܲܚܠܸܦ܀ ܠܘܵܬܼ ܐܲܝܠܹܝܢ ܕܚܵܙܹ̇ܐ ܠܗܘܿܢ ܕܨܸܒܼܝܵܢܗܘܿܢ ܪܦܸܐ: ܘܚܘܼܫܵܒܲܝ̈ܗܘܿܢ ܡܚܝܼܠܝܼܢ: ܡܸܢܹܗ ܕܫܘܼܪܵܝܵܐ ܩܲܫܝܵܐܝܼܬܼ ܡܲܩܪܸܒܼ ܥܲܡܗܘܿܢ: ܟܲܕܼ ܡܥܝܼܪ ܥܠܲܝܗܘܿܢ ܢܸܤܝ̈ܘܿܢܹܐ ܬܲܩܝܼ̈ܦܹܐ ܘܲܕܼܚܝܼ̈ܠܹܐ: ܐܲܝܟܲܢܵܐ ܕܢܲܛܥܸܩ ܐܸܢܘܿܢ ܠܲܙܢܵܝܐ ܕܒܼܝܼܫܘܼܬܹܗ: ܡ̣ܢ ܪܹܫܵܗ̇ ܕܐܘܼܪܚܵܐ. ܐܲܝܟܼ ܕܟܲܕܼ ܢܲܩܢܸܐ ܐܸܢܘܿܢ ܤܘܼܪܵܕܼܵܐ ܡܸܢܹܗ ܕܐܵܓܼܘܿܢܵܐ ܩܲܕܼܡܵܝܵܐ: ܥܲܤܩܲܬܼ ܠܲܡܪܕܝܼܬܼܵܐ ܡܸܬܼܚܲܙܝܵܐ ܠܗܘܿܢ ܐܘܪܚܵܐ ܗܵܕܹܐ. ܕܟܲܕܼ ܠܲܡ ܫܘܼܪܵܝܵܗ̇ ܗܵܟܲܢ ܥܤܸܩ ܘܲܦܫܸܐ: ܥܕܲܡܵܐ pb. 270 ܠܫܘܼܠܵܡܵܗ̇ ܡܲܢ̣ܘܼ ܢܤܲܝܒܲܪ: ܘܢܸܦܓܲܥ ܒܟܼܠܗܘܿܢ ܐܵܓܼܘܿܢܹ̈ܐ ܕܲܤܕܝܼܪܝܼܢ ܒܲܡܨܲܥܬܼܵܗ̇. ܘܠܵܐ ܬܘܼܒܼ ܢܲܡܪܚܘܼܢ ܠܡܸܤܡܲܟܼ ܩܕܼܵܡܵܘܗܝ: ܘܲܠܘܵܬܼ ܡܸܕܸܡ ܐ̄ܚܪܹܝܢ ܠܲܡܚܵܪ ܡ̣ܢ ܚܹܐܦܵܐ ܕܡܲܪܢܝܼܬܼܵܐ ܕܗܵܠܹܝܢ ܕܝܼܠܹܗ. ܘܟܲܕܼ ܩܲܠܝܼܠ ܢܚܘܼܨ ܥܠܲܝܗܘܿܢ ܠܚܹܐܦܹܗ: ܝܵܗ̇ܒܿܝܼܢ ܢܲܦܫܗܘܿܢ ܠܲܥܪܘܼܩܝܵܐ. ܡܵܠܘܿܢ ܕܹܝܢ: ܗ̤ܘ ܐܲܠܵܗܵܐ ܫܵܒܹ̇ܩ ܠܹܗ ܠܡܸܬܼܚܲܝܵܠܘܼ ܥܠܲܝܗܘܿܢ: ܟܲܕܼ ܠܵܐ ܡܥܲܕܲܪ ܠܗܘܿܢ ܒܡܸܕܸܡ: ܒܗܵܝ̇ ܕܩܲܪܝܼܪܵܐܝܼܬܼ ܘܐܲܝܟܼ ܕܲܒܼܦܘܼܠܵܓܼܵܐ ܥܵܐ̇ܠܝܼܢ ܠܐܵܓܼܘܿܢܹܗ ܕܡܵܪܝܵܐ. ܠܝܼܛ ܗ̄ܘ̣ ܠܲܡ ܟܠܡ̇ܢ ܕܥܵܒܹ̇ܕܼ ܥ̇ܒܼܵܕܹܗ ܕܡܵܪܝܵܐ ܡܲܗܡܝܵܢܵܐܝܼܬܼ: ܘܟܼܵܠܹ̇ܐ ܐܝܼܕܹܗ ܡ̣ܢ ܕܡܵܐ. ܘܬܼܘܼܒܼ: ܩܲܪܝܼܒܼ ܗ̄ܘ̣ ܥܘܼܕܼܪܵܢܹܗ ܠܕܵܚܠܵܘ̈ܗܝ. ܘܲܕܼܠܵܐ ܩܲܪܝܼܪܵܐܝܼܬܼ ܘܕܲܚܘܼܠܬܼܵܢܵܐܝܼܬܼ ܢܸܦܓܥܝܼܘܗܝ ܠܲܒܼܥܸܠܕܲܪܵܐ: ܦܵܩܹ̇ܕܼ. ܫܲܪܵܐ ܠܲܡ ܠܡܵܘܒܵܕܼܸܘܼܬܹܗ: ܘܐܸܬܼܓܲܪܵܐ ܥܲܡܹܗ ܠܲܩܪܵܒܼܵܐ. ܘܐܹܫܲܪܸܐ ܠܡܸܬܲܠ ܕܸܚܠܬܼܵܟܼ ܘܙܵܘܸܥܬܼܵܟܼ. ܥܲܠ ܐܲܦܲܝ̈ ܟܠܗܘܿܢ ܥܲܡܡܹ̈ܐ ܕܲܬܼܚܝܬܼ ܫܡܲܝܵܐ܀ ܐܸܠܵܐ ܬܡܘܼܬܼ ܡܵܘܬܵܐ ܡܸܬܼܪܲܓܼܫܵܢܵܐ ܨܸܒܼܝܵܢܵܐܝܼܬܼ ܚܠܵܦ ܪܸܚܡܬܹܗ ܕܐܲܠܵܗܵܐ: ܒܠܵܐ ܨܸܒܼܝܵܢܵܟܼ ܡܵܐܹ̇ܬܼ ܐܲܢ̄ܬܿ ܡܵܘܬܵܐ ܡܸܬܼܝܲܕܼܥܵܢܵܐ ܕܡ̣ܢ ܐܲܠܵܗܵܐ. ܠܡܸܕܸܡ ܕܲܡܢܵܬܼܵܟܼ ܗ̄ܘ̣: ܠܵܐ ܬܸܬܼܥܲܤܲܩ ܠܲܡܩܲܒܵܠܘܼ ܒܨܸܒܼܝܵܢܵܟܼ ܒܚܲܫܵܐ ܕܲܡܠܸܐ ܙܲܒܼܢܵܐ: ܘܲܠܡܸܥܲܠ ܠܬܸܫܒܿܘܿܚܬܹܗ ܕܐܲܠܵܗܵܐ. ܐܸܢܕܹܝܢ ܒܐܵܓܼܘܿܢܹܗ ܕܡܵܪܝܵܐ ܡܵܐܹ̇ܬܼ ܐܲܢ̄ܬܿ ܦܲܓܼܪܵܢܵܐܝܼܬܼ: ܗ̤ܘ ܡܵܪܝܵܐ ܡܟܲܠܸܠ ܠܵܟܼ. ܘܲܠܓܲܪ̈ܡܲܝܟ ܢܲܨܝܼ̈ܚܹܐ: ܐܝܼܩܵܪܵܐ ܕܤܵܗ̈ܕܹܐ ܡܦܲܠܸܓܼ ܠܗܘܿܢ. ܒܲܕܼܓܼܘܿܢ ܐܲܝܟܼ ܕܐܸܡ̇ܪܹܬܼ ܡ̣ܢ ܠܥܸܠ: ܡܵܐ ܕܡ̣ܢ ܫܘܼܪܵܝܵܐ ܠܵܐ ܙܪܲܙܘ: ܘܥܲܙܝܼܘ ܘܝܲܗ̣̄ܒܼܘ ܢܲܦܫܗܘܿܢ ܠܡܵܘܬܵܐ: ܡܸܟܵܐ ܒܟܼܠܗܘܿܢ ܕܲܪܹ̈ܐ: ܗܸܢܘܿܢ ܡܸܬܼܚܙܹܝܢ ܫܲܦ̈ܠܹܐ. ܡܵܠܘܿܢ ܕܹܝܢ ܟܲܕܼ ܐܵܦ ܐܲܠܵܗܵܐ ܡܲܗܡܸܐ ܒܗܘܿܢ ܠܡܸܬܼܪܕܵܦܘܼ: ܒܗܵܝ̇ pb. 271 ܕܐܲܝܟܼ ܕܲܒܼܨܵܕܼܘܵܐ ܘܐܲܝܟܼ ܕܲܒܼܢܘܼܤܵܝܵܐ ܡܢܲܤܹܝܢ ܠܲܡܫܲܠܵܡܘܼ ܥ̇ܒܼܵܕܹܗ ܕܡܵܪܝܵܐ. ܕܐܵܦ ܗ̤ܘ ܤܵܛܵܢܵܐ ܝܑܼܠܸܦ̣ ܐܸܢܘܿܢ ܡܸܢܹܗ ܕܫܘܼܪܵܝܵܐ: ܘܲܒܼܩ̣ܵܐ ܚܘܼܫܵܒܲܝ̈ܗܘܿܢ ܕܡܵܢ ܐܸܢܘܿܢ. ܗܵܢܵܘ ܕܹܝܢ: ܕܲܚܘܼ̈ܠܬܼܵܢܹܐ ܘܪ̈ܵܚܡܲܝ ܢܲܦܫܗܘܿܢ: ܡܵܠܘܿܢ ܚܵܝܤܲܝ̈ ܥܲܠ ܦܲܓܼܪܵܐ: ܘܐܲܝܟܼ ܥܲܠܥܵܠܵܐ ܪܵܕܹܦ ܠܗܘܿܢ. ܒܗܵܝ̇ ܕܐܵܦ ܚܲܝܠܵܐ ܡܸܕܸܡ ܡܸܬܼܚܲܕܼܥܵܢܵܐ ܕܚܵܙܹ̇ܐ ܒܲܥܝܵܕܼܵܐ ܠܘܵܬܼ ܢܲܨܝܼ̈ܚܹܐ: ܠܵܐ ܚܵܙܹ̇ܐ ܠܘܵܬܼ ܗܵܠܹܝܢ. ܠܦܘܼܬܼ ܨܸܒܼܝܵܢܹܗ ܓܹܝܪ ܕܐ̄ܢܵܫ ܕܲܠܘܵܬܼ ܐܲܠܵܗܵܐ ܕܪܵܚܹ̇ܡ ܥܲܡܠܹ̈ܐ ܕܡܸܛܠܵܬܹܗ: ܗܵܟܲܢܵܐ ܡܩܲܪܸܒܼ ܠܹܗ ܐܲܠܵܗܵܐ ܥܘܼܕܼܪܵܢܹܗ: ܘܲܡܚܵܘܸܐ ܥܵܠܘܗܝ ܒܛܝܼܠܘܼܬܹܗ. ܠܵܐ ܓܹܝܪ ܡܸܫܟܲܚ ܩܵܪܹܒܼ ܤܵܛܵܢܵܐ ܠܐ̄ܢܵܫ ܐܵܘ ܠܲܡܩܲܪܵܒܼܘܼ ܠܹܗ ܢܸܤܝܘܿܢܵܐ: ܐܸܠܵܐ ܗܘ̤ܵܬܼ ܠܘܵܬܹܗ ܡܲܗܡܝܵܢܘܼܬܼܵܐ ܡ̣ܢ ܗܵܘ̇ ܪܸܡܙܵܐ ܫܡܲܝܵܢܵܐ. ܐܵܘ ܡܵܐ ܕܐܸܬܼܪܲܦܝܼ ܒܨܸܒܼܝܵܢܹܗ ܘܝܲܗ̣̄ܒܼ ܢܲܦܫܹܗ ܠܚܘܼ̈ܫܵܒܹܐ ܫܟܼܝܼܪܹ̈ܐ ܕܦܸܗܝܵܐ: ܐܵܘ ܕܐܸܬܿܬܿܪܝܼܡ: ܐܵܘ ܕܐܸܬܼܦܲܠܲܓܼ. ܥܲܠ ܕܐܲܝܟܼ ܗܵܠܹܝܢ ܕܹܝܢ: ܠܵܐ ܫܵܐܹ̇ܠ ܤܵܛܵܢܵܐ ܐܲܝܟܼ ܕܥܲܠ ܐ̄ܢܵܫܵܐ ܓܡܝܼܪܹ̈ܐ ܘܪܵܘܪ̈ܒܹܐ: ܐܲܝܟܼ ܕܠܲܡܢܲܤܵܝܘܼ ܐܸܢܘܿܢ. ܒܲܕܼܝܵܕܲܥ̇: ܕܐܵܦܠܵܐ ܡܸܫܬܲܠܡܝܼܢ ܒܐܝܼܕܹܗ. ܝܵܕܲܥ̇ ܓܹܝܪ ܐܲܠܵܗܵܐ: ܕܠܵܐ ܤܵܦ̇ܩܝܼܢ: ܐܸܠܵܐ ܐܸܢ ܡܸܫܬܲܠܡܝܼܢ ܒܐܝܼܕܹܗ. ܝܵܕܲܥ̇ ܓܹܝܪ ܐܲܠܵܗܵܐ: ܕܠܵܐ ܤܵܦ̇ܩܝܼܢ: ܐܸܠܵܐ ܐܸܢ ܒܲܚܕܼܵܐ ܡ̣ܢ ܗܵܠܹܝܢ ܥܸܠ̈ܠܵܬܼܵܐ ܕܐܸܡ̇ܪܹܬܼ: ܕܡܵܕܹܝܢ ܚܲܝܠܵܐ ܕܲܒܼܛܝܼܠܘܼܬܹܗ ܕܐܲܠܵܗܵܐ ܡܸܬܼܪܲܚܲܩ ܡ̣ܢ ܠܘܵܬܼܗܘܿܢ. ܗܵܢܵܘ ܚܲܕܼ ܙܢܵܐ ܕܕܲܪܹܗ ܕܼܒܼܥܸܠܕܲܪܵܐ܀ ܠܐܲܝܠܹܝܢ ܕܹܝܢ ܕܚܵܙܹ̇ܐ ܕܓܲܢ̄ܒܵܪ ܨܸܒܼܝܵܢܗܘܿܢ: ܘܡܵܘܬܵܐ ܐܲܝܟܼ ܠܵܐ ܡܸܕܸܡ ܚܫܝܼܒܼ ܒܥܲܝܢܲܝ̈ܗܘܿܢ: ܘܒܲܛܢܵܢܵܐ ܚܲܪܝܼܦܵܐ ܢܦܲܩ̣ܘ ܟܲܕܼ ܡܲܫܠܡܵܐ ܢܲܦܫܗܘܿܢ ܠܟܼܠ ܢܸܤܝܘܿܢ ܘܲܠܡܵܘܬܵܐ: ܘܕܼܵܫ̣ܘ ܥܲܠ ܚܲܝܹ̈ܐ ܘܥܵܠܡܵܐ ܘܦܲܓܼܪܵܐ ܘܢܸܤܝܘܿܢܵܘ̈ܗܝ. ܠܗܵܠܹܝܢ: ܠܵܐ ܒܲܪ ܫܵܥܬܹܗ ܐܵܪܲܥ̇: ܘܲܡܚܵܘܸܐ ܠܗܘܿܢ ܢܲܦܫܹܗ ܐܲܝܟܼ ܕܲܒܼܤܘܿܓܼܵܐܐ. ܐܸܠܵܐ ܩܵܦܹ̇ܣ ܢܲܦܫܹܗ: pb. 272 ܘܝܵܗܹ̇ܒܼ ܠܗܘܿܢ ܐܲܬܼܪܵܐ. ܘܠܵܐ ܦܵܓܲܥ ܒܗܘܿܢ ܒܗܵܘ̇ ܚܹܐܦܵܐ ܩܲܕܼܡܵܝܵܐ: ܘܠܵܐ ܤܵܕܲ̇ܪ ܕܲܪܵܐ ܥܲܡܗܘܿܢ. ܝܵܕܲܥ̇ ܗ̄ܘ̣ ܓܹܝܪ: ܕܲܡܥܵܕܼ ܗ̄ܘ̣ ܫܘܼܪܵܝ ܕܲܪܵܐ ܗܵܘܹ̇ܐ ܚܲܡܝܼܡ: ܘܛܵܐܹ̇ܢ ܤܲܓܝܼ ܐܵܓܼܘܿܢܸܤܛܵܐ: ܘܠܵܘ ܐܲܝܟܼ ܕܐܵܬܼܝܵܐ ܡܸܙܕܟܹܝܢ ܕܲܪܵܪܹ̈ܐ ܛܲܢܵܢܹ̈ܐ. ܠܵܘ ܓܹܝܪ ܟܲܕܼ ܡܸܢܗܘܿܢ ܩܵܢܹ̇ܛ ܗܵܕܹܐ ܥܵܒܹ̇ܕܼ: ܐܸܠܵܐ ܡ̣ܢ ܗܵܘ̇ ܚܲܝܠܵܐ ܐܲܠܵܗܵܝܵܐ ܕܲܡܫܲܠܗܸܒܼ ܠܗܘܿܢ ܒܝܲܕܼ ܡܠܘܿܐܹ̈ܐ ܕܲܛܥܝܼܢܝܼܢ: ܥܕܲܡܵܐ ܕܗܸܢܘܿܢ ܡ̣ܢ ܨܒܼܘܼܬܼ ܢܲܦܫܗܘܿܢ ܫܵܕܹܝܢ ܠܹܗ ܒܩܲܠܝܼܠ ܩܲܠܝܼܠ ܟܲܕܼ ܡܸܬܿܬܿܟܼܠܝܼܢ. ܐܸܠܵܐ ܡܲܪܦܸܐ ܠܗܘܿܢ ܡܠܸܐ ܙܲܒܼܢܵܐ: ܥܕܲܡܵܐ ܕܩܵܗܹ̇ܐ ܛܢܵܢܗܘܿܢ: ܘܡܸܬܼܦܲܠܗܲܕܼ ܛܘܼܝܵܒܼܵܐ ܕܙܲܝܢܵܐ ܗܵܘ̇ ܕܥܲܬܸܕܼܘ: ܘܒܹܗ ܙܲܝܸܢ̣ܘ ܪܸܥܝܵܢܗܘܿܢ: ܒܫܘ̈ܚܠܵܦܹܐ ܕܡܸܠܹ̈ܐ ܐܲܠܵܗܵܝ̈ܵܬܐ ܘܥܘܼܗ̈ܕܵܢܹܐ ܡܥܲܕܪ̈ܵܢܹܐ ܘܲܡܚܲܝ̈ܠܵܢܹܐ: ܟܲܕܼ ܚܵܐܲܪ ܠܙܲܒܼܢܵܐ ܕܡܲܗܡܝܵܢܘܼܬܼܵܐ. ܘܡ̣ܢ ܕܲܦܟܲܗܘ ܩܲܠܝܼܠ ܚܘܼ̈ܫܵܒܹܐ ܩܲܕܼܡܵܝܹ̈ܐ: ܟܡܵܐ ܙܲܒܼ̈ܢܝܼܢ ܗܸܢܘܿܢ ܡ̣ܢ ܢܲܦܫܗܘܿܢ ܡܸܫܟܚܝܼܢ ܫܟܼܵܚ̈ܬܼܵܐ ܕܚܘܼܝܵܒܼܵܐ: ܒܝܲܕܼ ܫܘܼ̈ܕܵܠܹܐ ܕܡ̣ܢ ܬܲܪܥܝܼܬܼܵܐ ܢܵܒܼ̇ܥܝܼܢ. ܘܗܸܢܘܿܢ ܠܗܘܿܢ ܚܵܦ̇ܪܝܼܢ ܓܘܼܡܵܨܵܐ ܡ̣ܢ ܢܲܦܫܗܘܿܢ: ܒܝܲܕܼ ܦܸܗܝܵܐ ܕܚܘܼ̈ܫܵܒܹܐ ܕܡ̣ܢ ܡܲܐܝܼܢܘܼܬܼܵܐ ܡܸܬܼܝܲܠܕܝܼܢ ܒܪܸܥܝܵܢܗܘܿܢ: ܗܵܝ̇ ܕܒܼܵܗ̇ ܩܲܪܝܼܪܘܼܬܼܵܐ ܐܲܡܠܟܲܬ̤ ܥܠܲܝܗܘܿܢ. ܠܵܐ ܗ̄ܘ̣ܵܐ ܡ̣ܢ ܨܒܼܘܼܬܼ ܢܲܦܫܹܗ ܤܵܥܲܪ ܠܵܗ̇ ܤܵܛܵܢܵܐ ܠܗܵܕܹܐ: ܟܲܕܼ ܡܬܲܗܸܐ ܠܹܗ ܠܙܲܒܼܢܵܐ ܕܬܲܟܼܬܘܼܫܵܐ. ܒܲܕܼܠܵܐ ܟܲܕܼ ܚܵܐܹ̇ܣ ܥܠܲܝܗܘܿܢ: ܐܵܦܠܵܐ ܟܲܕܼ ܚܵܐܹ̇ܓܼ ܡܸܢܗܘܿܢ: ܐܲܝܟܼ ܠܵܐ ܡܸܕܸܡ ܚܫܝܼܒܝܼܢ ܒܥܲܝܵܢܵܘ̈ܗܝ. ܡܸܬܼܪܲܥܸܢܵܐ ܕܹܝܢ: ܕܚܲܝܠܵܐ ܡܸܕܸܡ ܚܕܝܼܪ ܠܗܘܿܢ ܠܐܲܝܠܹܝܢ ܕܲܒܼܪܸܬܼܚܵܐ ܕܲܠܘܵܬܼ ܐܲܠܵܗܵܐ ܫܓܼܝܼܪܝܼܢ: ܘܫܲܒܼܪܵܐܝܼܬܼ ܢܲܦܩ̣ܘ ܠܗܘܿܢ ܕܠܵܐ ܚܘܼܫܵܒܼ: ܟܲܕܼ ܥܠܵܘܗܝ ܡܸܬܿܬܲܟܼܠܝܼܢ ܒܗܲܝܡܵܢܘܼܬܼܵܐ: ܟܲܕܼ ܠܵܐ ܝܵܕܼܥܝܼܢ ܕܠܘܼܩܒܲܠ pb. 273 ܡܲܢ̣ܘܼ ܐܝܼܬܼ ܠܗܘܿܢ ܬܲܟܼܬܘܼܫܵܐ. ܒܲܕܓܼܘܿܢ ܬܵܟܹ̇ܣ ܠܹܗ ܠܝܲܨܪܵܐ ܕܒܼܝܼܫܘܼܬܹܗ ܡܸܢܗܘܿܢ: ܕܠܵܐ ܢܸܩܪܘܿܒܼ ܚܕܼܵܪܲܝܗܘܿܢ. ܒܕܲܡܦܲܓܲܕܼ ܝܲܨܪܹܗ: ܡ̣ܢ ܢܵܛܘܿܪܵܐ ܗܵܘ̇ ܕܚܵܙܹ̇ܐ ܨܹܐܕܲܝܗܘܿܢ ܐܲܡܝܼܢܵܐܝܼܬܼ. ܐܸܢܕܹܝܢ ܠܥܸܠ̈ܠܵܬܼܵܐ ܕܥܘܼܕܼܪܵܢܵܐ ܠܵܐ ܫܵܕܹܝܢ ܡܸܢܗܘܿܢ: ܕܐܝܼܬܲܝܗܘܿܢ ܬܲܟܼܫܲܦܬܼܵܐ ܘܥܲܡ̈ܠܹܐ ܘܡܲܟܿܝܼܟܼܘܼܬܼܵܐ: ܡܥܲܕܪܵܢܵܐ ܠܵܐ ܡܸܡܬܼܘܿܡ ܡܲܪܚܸܩ ܡܸܢܗܘܿܢ. ܪܸܚܡܲܬܼ ܢܝܵܚܹ̈ܐ ܕܹܝܢ: ܥܸܠܬܼܵܐ ܗ̣̄ܝ ܕܡܸܫܬܲܒܼܩܵܢܘܼܬܼܵܐ܀ ܐܸܢܕܹܝܢܢ ܒܗܵܢܹܝܢ ܡܚܲܡܤܢܝܼܢ ܚܝܼܨܵܐܝܼܬܼ: ܡ̣ܢ ܥܘܼܕܼܪܵܢܵܐ ܠܵܐ ܡܸܡܬܼܘܿܡ ܡܸܫܬܲܠܚܝܼܢ. ܘܲܒܼܥܸܠܕܲܪܵܐ: ܠܵܐ ܡܵܫܬܿܒܸܩ ܕܡܸܬܼܩܲܪܲܒܼ ܚܕܼܵܪܲܝܗܘܿܢ. ܘܐܸܢ ܗ̤ܘ ܕܡܸܫܬܲܒܼܩܝܼܢ ܒܲܙܒܲܬ ܙܒܲܢ: ܐܲܝܟܼ ܕܲܠܕܼܘܼܪܵܫܵܐ. ܟܲܕܼ ܐܲܚܝܼܕܼ ܘܬܲܩܝܼܦ ܠܗܘܿܢ ܗܵܘ̇ ܚܲܝܠܵܐ ܩܲܕܝܼܫܵܐ: ܘܠܵܐ ܕܵܚ̇ܠܝܼܢ ܡܸܢܗܘܿܢ ܕܡܢܲܤ̈ܝܵܢܹܐ. ܒܲܕܼܡܸܬܼܠܲܒܲܒܼ ܚܘܼܫܵܒܼܵܐ: ܘܒܼܵܤܹ̇ܐ ܒܗܘܿܢ ܡܸܛܠܵܬܹܗ. ܘܗ̤ܘ ܡܕܲܪܸܫ ܠܗܘܿܢ: ܐܲܝܟܼ ܐ̄ܢܵܫ ܕܡܲܠܸܦ ܤܲܚܘܵܐ ܠܛܲܠܝܵܐ ܙܥܘܿܪܵܐ. ܘܡܵܐ ܕܫܲܪܝܼ ܛܵܒܲܥ̇: ܡܕܲܠܸܐ ܠܹܗ. ܒܲܕܿܛܵܐܹ̇ܦ ܛܲܠܝܵܐ ܠܥܸܠ ܡ̣ܢ ܐܝܼ̈ܕܲܝܵܐ ܕܡܲܠܦܵܢܹܗ. ܘܐܸܡܲܬܼܝ ܕܫܲܪܝܲܬ̤ ܙܵܥܪܵܐ ܢܲܦܫܹܗ: ܗ̤ܘ ܛܲܠܝܵܐ ܕܕܲܡ ܢܸܛܒܲܥ: ܗ̤ܘ ܗܵܘ̇ ܕܲܛܥܝܼܢ ܠܹܗ ܒܐܝܼܕܼܵܘ̈ܗܝ: ܩܵܥܹ̇ܐ ܠܹܗ: ܕܠܵܐ ܬܸܕܼܚܲܠ: ܐܸܢܵܐ ܛܥܝܼܢ ܐ̄ܢܵܐ ܠܵܟܼ. ܘܐܲܝܟܼ ܐܸܡܵܐ ܬܘܼܒܼ ܕܡܲܠܦܵܐ ܗܠܲܟܼܬܼܵܐ ܠܲܒܼܪܵܗ̇ ܙܥܘܿܪܵܐ: ܕܲܡܩܝܼܡܵܐ ܠܹܗ ܒܪܘܼܚܩܵܐ ܡܸܢܵܗ̇ ܘܩܵܪܝܵܐ ܠܹܗ. ܟܲܕܼ ܗ̤ܘ ܕܹܝܢ ܛܲܠܝܵܐ ܡܫܲܪܸܐ ܠܡܹܐܬܼܵܐ ܨܹܝܕܼ ܐܸܡܹܗ: ܒܪܸ̈ܓܼܠܵܘܗܝ ܗܵܢܹܝܢ ܙܥܘܿܪ̈ܝܵܬܼܵܐ ܘܠܵܐ ܡܫܲܪܪ̈ܵܬܼܵܐ: ܡܸܛܠ ܪܲܓܼܝܘܼܬܼܗܹܝܢ ܪ̈ܵܥܠܵܢ ܠܗܹܝܢ. ܘܡܵܐ ܕܫܲܪܝܼ ܢܵܦܹ̇ܠ ܗ̤ܘ ܛܲܠܝܵܐ: ܪܵܗ̇ܛܵܐ ܐܸܡܹܗ ܘܛܵܥ̇ܢܵܐ ܠܹܗ ܥܲܠ ܕܪ̈ܵܥܹܝܗ̇. pb. 274 ܗܵܟܲܢܵܐ ܛܥܝܼܢܵܐ ܛܲܝܒܿܘܼܬܼܵܐ ܕܐܲܠܵܗܵܐ ܘܲܡܕܲܪܫܵܐ ܠܗܘܿܢ ܠܲܒܼܢܲܝ̈ܢܵܫܵܐ: ܠܐܲܝܠܹܝܢ ܕܫܲܦܝܵܐܝܼܬܼ ܘܲܦܫܝܼܛܵܐܝܼܬܼ ܡܲܓܼܥܠܝܼܢ ܢܲܦܫܗܘܿܢ ܒܐܝܼܕܲܝ̈ ܗܵܘ̇ ܕܲܒܼܪܵܐ ܐܸܢܘܿܢ: ܡ̣ܢ ܟ̱ܠܹܗ ܠܸܒܿܗܘܿܢ ܫܵܒܼܩ̇ܝܼܢ ܠܹܗ ܠܥܵܠܡܵܐ ܗܵܢܵܐ ܘܐܵܙ̇ܠܝܼܢ ܒܵܬܼܪܹܗ܀ ܐܲܢ̄ܬܿ ܕܹܝܢ ܒܲܪܢܵܫܵܐ ܕܲܢܦܲܩ̣ ܒܵܬܲܪ ܐܲܠܵܗܵܐ: ܒܟܼܠܹܗ ܙܲܒܼܢܵܐ ܕܐܵܓܼܘܿܢܵܟܼ: ܐܲܡܝܼܢܵܐܝܼܬܼ ܠܫܘܼܪܵܝܵܐ ܗ̤ܘܲܝܬܿ ܡܸܬܼܥܲܗܲܕܼ: ܘܲܠܗܵܘ̇ ܛܢܵܢܵܐ ܩܲܕܼܡܵܝܵܐ ܕܲܒܼܪܹܚܵܐ: ܘܲܠܗܵܘ̇ ܚܘܼܫܵܒܼܵܐ ܚܲܡܝܼܡܵܐ ܕܒܹܗ ܢܦܲܩ̣ܬܿ ܡ̣ܢ ܥܘܼܡܪܵܟܼ ܩܲܕܼܡܵܝܵܐ: ܘܐܲܥܸܠ̣ܬܿ ܢܲܦܫܵܟܼ ܠܤܸܕܼܪܵܐ ܕܲܩܪܵܒܼܵܐ. ܘܲܒܼܩܝܼ ܢܲܦܫܵܟܼ ܒܟܼܠܝܘܿܡ: ܕܕܲܠܡܵܐ ܩܗܵܐ ܪܸܬܼܚܵܐ ܕܢܲܦܫܵܟܼ ܡ̣ܢ ܗܵܘ̇ ܛܢܵܢܵܐ ܕܒܹܗ ܡܸܫܬܲܠܗܲܒܼ ܗ̣̄ܘܲܝܬܿ. ܕܲܠܡܵܐ ܚܲܤܝܼܪ ܐܲܢ̄ܬܿ ܡܸܕܸܡ ܡ̣ܢ ܙܲܝܢܵܐ: ܕܲܡܚܲܙܲܩ ܗ̄ܘ̣ܵܝܬܿ ܒܪܹܫ ܐܵܓܼܘܿܢܵܟܼ. ܘܐܲܪܝܼܡ ܩܵܠܵܟܼ ܐܲܡܝܼܢܵܐܝܼܬܼ ܒܓܼܵܘ ܡܲܫܪܝܼܬܼܵܐ: ܘܠܲܒܸܿܒܼ ܠܲܒܼܢܲܝ̈ ܝܲܡܝܼܢܵܐ ܚܘܼ̈ܫܵܒܼܵܐ ܒܲܝܬܵܝܹ̈ܐ. ܘܚܵܘܵܐ ܐܸܢܘܿܢ ܠܓܲܒܵܐ ܕܤܲܩܘܼܒܼܠܵܐ: ܕܥܝܼܪ ܐܲܢ̄ܬܿ ܗ̄ܘ̣. ܘܐܸܗ̤ܘ ܕܲܒܼܫܘܼܪܵܝܵܐ ܬܸܚܙܸܐ ܚܹܐܦܵܐ ܟܲܕܼ ܡܕܲܝܸܠ ܗܵܘ̇ ܕܲܡܢܲܤܸܐ: ܠܵܐ ܬܸܬܼܪܲܦܸܐ. ܕܲܠܡܵܐ: ܗܵܕܹܐ ܕܥܲܕܪܵܐ ܠܵܟܼ. ܠܵܐ ܡܲܓܵܢ ܫܵܒܹ̇ܩ ܦܵܪܘܿܩܵܟܼ ܡܸܕܸܡ ܠܡܸܗܘܵܐ ܨܹܐܕܲܝܟ: ܐܸܠܵܐ ܐܸܢ ܐܲܚܝܼܪܹܗ ܘܦܲܪܢܤܹܗ ܐܲܝܟܼ ܕܲܠܥܘܼܕܼܪܵܢܵܟܼ. ܘܠܵܐ ܬܚܵܘܸܐ ܐܲܢ̄ܬܿ ܪܲܦܝܘܼܬܼܵܐ ܡܸܢܹܗ ܕܫܘܼܪܵܝܵܐ: ܕܲܠܡܵܐ ܟܲܕܼ ܗܵܪܟܵܐ ܪܲܦܝܘܼܬܼܵܐ ܡܚܵܘܸܐ ܐܲܢ̄ܬܿ: ܠܵܐ ܬܘܼܒܼ ܡܸܫܟܲܚ ܐܲܢ̄ܬܿ ܠܲܡܩܵܩ ܩܕܼܵܡ ܫܲܪܟܵܐ ܕܒܼܵܬܲܪܗܹܝܢ: ܟܲܦܢܵܐ: ܟܘܼܪܗܵܢܵܐ: ܕܲܚܠܘܼ̈ܠܹܐ ܕܚܸܙ̈ܘܵܢܹܐ: ܥܲܡ ܕܫܲܪܟܵܐ. ܠܵܐ ܬܲܗܦܸܟܼ ܠܢܝܼܫܹܗ ܕܤܵܐܹ̇ܡ ܐܵܓܼܘܿܢܵܟܼ ܕܲܠܘܵܬܼ ܥܘܼܕܼܪܵܢܵܐ ܡܚܝܼܪ: ܠܓܲܒܵܐ ܕܤܲܩܘܼܒܼܠܵܐ: ܕܕܲܠܡܵܐ pb. 275 ܢܸܫܟܿܚܵܟܼ ܒܥܸܠܕܲܪܲܟܼ ܐܲܝܟܼ ܤܘܼܟܵܝܹܗ. ܐܸܠܵܐ ܩܪܝܼ ܠܐܲܠܵܗܵܐ ܕܠܵܐ ܫܲܠܘܵܐ: ܘܲܒܼܟܼܝܼ ܩܕܼܵܡ ܛܲܝܒܿܘܼܬܹܗ: ܘܐܸܬܼܟܲܫܲܦ ܘܐܸܬܿܛܲܪܲܦ: ܥܕܲܡܵܐ ܕܲܡܫܲܕܲܪ ܠܵܟܼ ܡܥܲܕܪܵܢܵܐ. ܐܸܢܕܹܝܢ ܚܕܼܵܐ ܙܒܲܢ ܬܸܚܙܹܝܘܗܝ ܠܗܵܘ̇ ܦܵܪܘܿܩܵܐ ܕܲܠܘܵܬܼܵܟܼ܀ ܗܠܹܝܢ ܬܪܹܝܢ ܙܲܢܲܝ̈ܵܐ ܕܬܲܟܼܬܘܼܫܵܐ ܕܲܥܕܲܡܵܐ ܠܗܵܪܟܵܐ. ܢܝܼܫܵܐ ܐ̄ܚܪܹܢܵܐ ܕܬܲܟܼܘܼܫܵܐ ܕܤܵܛܵܢܵܐ ܕܠܘܼܩܒܲܠ ܙܪ̈ܝܼܙܹܐ. ܐܸܡܲܬܼܝ ܗܵܟܹܝܠ ܕܒܼܵܬܲܪ ܗܵܠܹܝܢ ܟܠܗܹܝܢ: ܩܵܐܹ̇ܡ ܤܵܛܵܢܵܐ ܥܲܡ ܐ̄ܢܵܫ ܒܕܲܪܵܐ ܘܠܵܐ ܡܸܫܟܲܚ ܚܲܝܠܹܗ ܒܐܵܓܼܘܿܢܵܐ: ܡܵܠܘܿܢ ܕܹܝܢ ܕܗܵܘ̇ ܡܥܲܕܪܵܢܵܐ ܕܲܡܥܲܕܲܪ ܠܹܗ. ܗܵܘ̇ ܕܡܸܛܠܵܬܹܗ ܡܸܫܲܥܠܸܐ ܥܠܵܘܗܝ: ܘܗܵܢܵܐ ܟ̱ܠܹܗ ܡܥܲܕܲܪ ܘܲܡܚܲܤܸܢ ܠܹܗ: ܕܗܵܘ̇ ܕܐܝܼܬܼܵܘܗܝ ܒܸܤܪܵܐ ܥܲܒܼܝܵܐ ܘܓܼܫܡܵܐ: ܕܲܢܚܘܼܒܼ ܡ̣ܢ ܨܹܐܕܼܵܘܗܝ ܪܘܼܚܵܢܵܐ ܠܵܐ ܡܓܲܫܡܵܐ. ܡܵܐ ܕܲܚ̣ܙܵܐ ܤܵܛܵܢܵܐ ܠܗܵܢܵܐ ܟ̱ܠܹܗ ܥܘܼܕܼܪܵܢܵܐ ܕܩܲܒܸܿܠ̣ ܒܲܪܢܵܫܵܐ ܗܵܘ̇ ܡ̣ܢ ܐܲܠܵܗܵܐ: ܕܠܵܐ ܪܸ̈ܓܼܫܵܘܗܝ ܒܲܪ̈ܵܝܹܐ ܡ̣ܢ ܚܸܙ̈ܘܵܢܹܐ ܘܩܵܠܹ̈ܐ ܚܵܝ̇ܒܿܝܼܢ: ܘܠܵܐ ܚܘܼܫܵܒܼܵܘ̈ܗܝ ܡ̣ܢ ܓܘܼܪ̈ܵܓܹܐ ܘܫܘܼ̈ܕܵܠܹܿܐ ܡܸܬܼܪܲܦܹܝܢ: ܟܒܲܪ ܕܹܝܢ ܘܐܵܦ ܥܲܠ ܡܲܚ̈ܘܵܬܼܵܐ ܕܡܸܢܗܘܿܢ ܡܲܩܠܸܐ: ܘܨܵܒܹ̇ܐ ܡܸܟܹܝܠ ܕܦܘܼܤܵܐ ܢܸܒܼܥܸܐ ܕܢܲܦܪܸܩ ܡܸܢܹܗ ܠܗܵܘ̇ ܡܲܠܲܐܟܼܵܐ ܡܥܲܕܪܵܢܹܗ. ܡܵܠܘܿܢ ܕܹܝܢ ܨܵܒܹ̇ܐ ܕܲܢܤܲܡܸܐ ܗܵܘܢܹܗ ܕܗܵܘ̇ ܕܡܸܬܿܥܲܕܲܪ: ܘܡܸܫܬܿܒܸܩ ܕܠܵܐ ܐܝܼܵܠ. ܡܙܝܼܥ ܒܹܗ ܚܘܼ̈ܫܵܒܹܐ ܕܡܲܤܒܿܪܵܢܘܼܬܼܵܐ: ܕܚܲܝܠܬܼܵܢܘܼܬܼܵܐ ܡܲܢ: ܕܬܲܪܥܝܼܬܹܗ ܐܝܼܬܹܝܗ̇ ܥܸܠܬܼܵܐ ܠܗܵܕܹܐ ܟ̱ܠܵܗ̇ ܚܝܼܨܘܼܬܼܵܐ: ܘܥܘܼܬܼܪܵܐ ܫܒܼܝܼܚܵܐ ܕܲܒܼܢܲܦܫܹܗ ܩܢܸܐ. ܢܛܝܼܪܘܼܬܹܗ ܕܹܝܢ ܕܡ̣ܢ ܤܲܩܘܼ̈ܒܼܠܹܗ ܗܵܠܹܝܢ ܟܠܗܘܿܢ ܓܢܝܼ̈ܚܹܐ ܘܠܵܐ ܡܸܬܼܡܲܠܠܵܢܹ̈ܐ ܨܲܗ̈ܝܲܝ ܠܲܕܼܡܵܐ: ܒܲܙܒܲܢ pb. 276 ܠܓܸܕܼܫܹ̈ܐ: ܒܲܙܒܲܢ ܕܹܝܢ ܠܲܡܚܝܼܠܘܼܬܼܗܘܿܢ ܕܗܵܠܹܝܢ ܡܲܩܸܨ. ܫܵܠܹ̇ܐ ܐ̄ܢܵܐ ܘܡ̣ܢ ܐ̄ܚܪ̈ܵܢܝܵܬܼܵܐ: ܕܒܲܙܢܵܐ ܕܓܼܘܼܕܵܦܵܐ ܕܙܵܘܸܥܬܼܵܐ ܢܵܦ̇ܠܵܐ ܒܢܲܦܫܵܐ ܡ̣ܢ ܥܘܼܗܕܵܢܗܹܝܢ ܒܲܠܚܘܿܕܼ. ܐܝܼܬܼ ܕܹܝܢ ܐܸܡܲܬܼܝ ܕܐܵܦ ܒܐܸܤ̈ܟܹܿܡܹܐ ܕܓܸܠܝܵܢܹ̈ܐ ܕܡ̣ܢ ܐܲܠܵܗܵܐ ܙܹܐܦܹܐ ܠܲܡܨܲܥܬܼܵܐ ܡܲܝܬܸܐ: ܘܲܒܼܝܲܕܼ ܫܸܢܬܼܵܐ ܡܒܲܕܸܩ ܠܹܗ ܥܲܠ ܨܸܒܼ̈ܘܵܬܼܵܐ. ܘܲܒܼܥܝܼܪܘܼܬܼܵܐ ܬܘܼܒܼ: ܡܸܬܿܕܲܡܸܐ ܠܹܗ ܒܡܲܠܲܐܟ ܢܘܼܗܪܵܐ. ܘܗܵܠܹܝܢ ܟܠܗܹܝܢ: ܥܕܲܡܵܐ ܕܐܸܢ ܡܲܨܝܵܐ: ܐܵܦܸܢ ܩܲܠܝܼܠ ܢܸܫܠܲܡ ܠܗܘܿܢ: ܐܲܝܟܼ ܕܢܸܦܸܠ ܒܐܝܼܕܲܝ̈ܗܘܿܢ. ܐܸܢ ܕܹܝܢ ܐܵܚܹ̇ܕܼ ܠܗܘܿܢ ܠܚܘܼܫܵܒܼܵܘ̈ܗܝ ܒܲܙܗܝܼܪܘܼ ܗ̤ܘ ܒܲܪܢܵܫܵܐ ܚܲܟܿܝܼܡܵܐ: ܡܵܠܗܘܿܢ ܕܹܝܢ ܟܲܕܼ ܐܲܠܵܗܵܐ ܒܥܘܼܕܼܪܵܢܹܗ: ܘܬܼܵܠܹ̇ܐ ܚܝܵܪܵܐ ܕܠܸܒܹܗ ܒܲܫܡܲܝܵܐ: ܕܠܵܐ ܢܚܘܼܪ ܒܗܵܠܹܝܢ ܕܡܲܠܚܫܝܼܢ: ܡܸܨܛܲܢܲܥ ܗ̤ܘ ܒܥܸܠܕܒܼܵܒܼܵܐ ܬܘܼܒܼ. ܗܦܵܟܼܬܼܵܐ ܐ̄ܚܪܹܬܼܵܐ ܕܲܩܪܵܒܼܵܐ. ܗܵܕܹܐ ܚܕܼܵܐ ܫܲܪܝܼܟܼܵܐ ܠܹܗ ܡܸܟܹܝܠ: ܐܲܝܟܼ ܡ̇ܢ ܕܒܼܵܗ̇ ܐܝܼܬܼ: ܘܲܐ̄ܚܝܵܢܘܼܬܼܵܐ ܠܲܟܼܝܵܢܵܐ. ܘܟܹܐܡܲܬܼ: ܕܡܸܛܠܗܵܕܹܐ: ܝܲܬܝܼܪܵܐܝܼܬܼ ܡܤܲܟܸܐ ܠܥܘܼܪܩܵܠܹܗ ܕܒܲܪܢܵܫܵܐ. ܐܲܝܕܵܐ ܗ̣̄ܝ ܗܵܕܹܐ؟ ܡܸܬܼܦܲܪܲܣ ܕܹܝܢ ܒܟܼܠܥܸܠ̈ܠܵܢ ܕܢܲܦܛܲܥ ܒܹܗ ܨܸܒܼ̈ܘܵܬܼܵܐ ܗܵܢܹ̇ܝܢ: ܟܲܟܼܡܵܐ ܙܲܒܼ̈ܢܝܼܢ ܡܸܛܠܵܬܼܗܹܝܢ ܚܵܘܒܿܬܼܵܐ ܐܝܼܬܼ ܠܹܗ ܥܠܵܘܗܝ ܡܸܛܠ ܟܝܵܢܵܐ. ܡܸܤܬܲܡܸܐ ܓܹܝܪ ܗܵܘܢܵܐ ܡܸܬܼܟܲܬܿܫܵܢܵܐ: ܡ̣ܢ ܚܙܵܬܼܵܐ ܘܡ̣ܢ ܩܲܪܝܼܒܼܘܼܬܼܵܐ ܕܨܸܒܼ̈ܘܵܬܼܵܐ. ܘܲܕܼܠܝܼܠܵܐܝܼܬܼ ܚܵܐܹ̇ܒܼ ܒܐܵܓܼܘܿܢܵܐ: ܟܲܕܼ ܐܝܼܬܼܵܘܗܝ ܒܘܲܥܕܗܹܝܢ: ܡܵܠܘܿܢ ܕܹܝܢ ܟܲܕܼ ܤܕܼܝܼܪ̈ܵܢ ܠܥܹܢܵܘܗܝ: ܒܝܼܕܲܥܬܼܵܐ ܩܢܸܐ ܠܵܗ̇ ܚܵܪܥܵܐ ܠܗܵܕܹܐ ܐܘܼܡܵܢܘܼܬܼܵܐ: ܡ̣ܢ ܢܸܤܝܵܢܵܐ ܕܥܲܡ ܐܵܓܼܘܿܢܸܤ̈ܛܹܐ ܤܲܓܝܼ̈ܐܹܐ ܚܝܼ̈ܨܹܐ ܕܐܲܫܦܸܠ̣ܘ ܒܵܗ̇. ܘܡܸܛܠܗܵܢܵܐ ܘܗ̤ܝ ܗܵܕܹܐ: pb. 277 ܨܢܝܼܥܵܐܝܼܬܼ ܡܸܬܿܛܲܟܲܢ. ܘܐܸܢ ܠܵܗ̇ ܤܘܼܥܪܵܢܵܐܝܼܬܼ ܠܵܐ ܡܸܬܼܟܲܝܢܵܐ ܠܡܸܥܒܲܕܼ: ܡܸܛܠ ܚܲܬܿܝܼܬܼܘܼܬܼܵܐ ܕܫܸܠܝܹܗ: ܘܐܲܬܼܪܵܐ ܕܥܘܼܡܪܹܗ ܕܪܲܚܩ ܡ̣ܢ ܥܸܠ̈ܠܵܬܼܵܐ: ܐܵܦܸܢ ܒܲܫܪܲܓܼܪ̈ܲܓܼܝܵܬܼܵܐ: ܡܸܬܼܚܲܦܲܛ ܠܲܡܗܲܓܵܓܼܘܼ ܩܕܼܵܡܵܘܗܝ. ܘܕܲܡ̈ܘܵܬܼܵܐ ܠܵܐ ܫܲܪܝܼܪ̈ܵܬܼܵܐ: ܒܐܸܤܟܹܡܵܐ ܕܲܫܪܵܪܵܐ ܡܚܵܘܸܐ ܠܹܗ. ܐܲܝܟܼ ܕܢܸܬܠܗܸܩ ܒܲܚܙܵܬܼܗܹܝܢ ܘܢܸܬܼܚܲܬܼܚܲܬܼ: ܘܢܸܤܲܒܼ ܒܪܸܥܝܵܢܹܗ ܥܠܲܝܗܹܝܢ ܚܘܼ̈ܫܵܒܹܐ ܫܟܼܝܼܪܹ̈ܐ ܘܢܸܬܼܚܲܝܲܒܼ: ܘܢܲܪܚܸܩ ܡܸܢܹܗ ܗܵܘ̇ ܕܲܡܥܲܕܲܪ ܠܹܗ. ܝܵܕܲܥ̇ ܗ̄ܘ̣ ܓܹܝܪ ܕܙܵܟܼܘܼܬܹܗ ܘܚܘܼܝܵܒܹܗ: ܘܓܲܙܹܗ ܘܥܘܼܕܼܪܵܢܹܗ: ܘܟܼܠܗܹܝܢ ܕܝܼܚܝܼܕܼܵܝܵܐ: ܒܚܘܼܫܵܒܼܵܐ ܗ̄ܘ̣ ܩܵܐܹ̇ܡ. ܘܲܕܼܪܸܡܙܵܐ ܗ̄ܘ̣ ܙܥܘܿܪܵܐ: ܐܲܝܟܼ ܕܒܲܠܚܘܿܕܼ ܚܘܼܫܵܒܼܵܐ ܡ̣ܢ ܕܘܼܟܿܬܹܗ ܢܸܬܿܬܿܙܝܼܥ: ܘܡ̣ܢ ܗܵܘ̇ ܪܲܦܵܐ ܕܚܲܝܹ̈ܐ ܢܸܚܘܿܬܼ ܠܐܲܪܥܵܐ: ܘܨܸܒܼܝܵܢܵܐ ܢܚܵܘܸܐ ܒܪܸܡܙܵܐ ܕܫܵܥܬܼܵܐ. ܐܲܝܟܼ ܕܲܠܤܲܓܝܼ̈ܐܹܐ ܡ̣ܢ ܩܲܕܝܼ̈ܫܹܐ: ܕܚ̣ܵܘܝܼ ܐܸܢܘܿܢ ܕܸܡ̈ܘܵܬܼܵܐ ܕܐܲܢ̄ܬܿܬܼܵܐ ܫܲܦܝܼܪܬܵܐ. ܐܲܝܠܹܝܢ ܕܹܝܢ ܕܩܲܪܝܼܒܼܝܼܢ ܗ̄ܘ̣ܵܘ ܒܕܼܘܼܝܵܪܗܘܿܢ ܠܝܲܬܼܒܵܐ: ܐܘܼܪܚܵܐ ܕܦܲܤܚܵܐ ܘܲܬܼܪܹܝܢ ܘܲܥܕܲܡܵܐ ܠܡܲܤܝܘܿܢܵܐ: ܠܵܗ̇ ܠܐܲܢ̄ܬܿܬܼܵܐ ܫܲܪܝܼܪܵܐܝܼܬܼ ܐܸܬܼܦܲܪܲܣ ܐܲܝܬܲܝܼ ܥܠܲܝܗܘܿܢ. ܘܐܲܝܠܹܝܢ ܕܟܲܕܼ ܡܸܛܠ ܪܲܚܝܼܩܘܼܬܼܵܐ ܕܕܼܘܼܝܵܪܗܘܿܢ ܗܵܕܹܐ ܠܵܐ ܐܸܫܟܲܚ: ܕܸܡ̈ܘܵܬܼܵܐ ܕܫܘܼܦܪܵܐ ܕܐܲܢ̄ܬܿܬܼܵܐ ܚ̣ܵܘܝܼ ܐܸܢܘܿܢ. ܟܲܕܼ ܒܲܙܒܲܢ ܒܬܲܨܒܿܝܼܬܼܵܐ ܘܢܲܚ̈ܬܹܐ ܡܲܦܪ̈݁ܓܹܐ ܘܲܚܙܵܬܼܵܐ ܙܲܠܝܼܠܬܼܵܐ: ܘܒܲܙܒܲܢ ܐܵܦ ܒܐܸܤܟܹܡܵܐ ܕܐܲܢ̄ܬܿܬܼܵܐ ܥܲܪܛܸܒܵܝܬܐ ܠܗܘܿܢ ܡܸܬܼܚܵܘܸܐ. ܘܲܠܐ̄ܢܵܫ̈ܝܼܢ ܡܸܢܗܘܿܢ: ܙܟܼܵܐ ܒܝܲܕܼ ܗܵܠܹܝܢ ܘܕܲܐܟܼܘܵܬܼܗܹܝܢ. ܟܲܕܼ ܡܸܢܗܘܿܢ: ܒܹܗ ܒܤܘܼܥܪܵܢܵܐ. ܘܡܸܢܗܘܿܢ: ܒܝܲܕܼ ܛܸܠܵܢ̈ܝܵܬܼܵܐ ܐܸܬܼܓܚܸܟܼܘ ܒܝܲܕܼ ܪܲܦܝܘܼܬܼܵܐ ܕܚܘܼܫܵܒܲܝ̈ܗܘܿܢ: ܘܲܠܥܘܼܡܩܵܐ ܕܲܦܤܵܩ ܤܲܒܼܪܵܐ ܢܚܸܬܼܘ: ܘܲܠܘܵܬܼ ܥܵܠܡܵܐ ܐܸܨܛܠܝܼܘ: ܘܡ̣ܢ ܤܲܒܼܪܵܐ ܫܡܲܝܵܢܵܐ ܢܲܦܫܗܘܿܢ ܫ̣ܕܼܵܘ. ܐ̄ܚܪ̈ܵܢܹܐ ܕܹܝܢ ܐܲܝܠܹܝܢ ܕܚܝܼܨܝܼܢ pb. 278 ܗ̄ܘ̣ܵܘ ܘܢܲܗܝܼܪܝܼܢ ܡ̣ܢ ܛܲܝܒܿܘܼܬܼܵܐ: ܠܹܗ ܘܠܲܫܪܲܓܼܪ̈ܵܓܼܝܵܬܹܗ ܙܟܼܵܘ. ܘܲܠܗܲܢ̈ܝܼܵܐܬܹܗ ܕܦܲܓܼܪܵܐ ܕܵܫ̣ܘ: ܘܲܒܼܚܝܼܪܹ̈ܐ ܒܚܘܼܒܹܗ ܕܐܲܠܵܗܵܐ ܐܸܫܬܟܲܚܘ. ܘܙܲܒܼ̈ܢܵܬܼܵܐ ܤܲܓܝܼ̈ܐܵܬܼܵܐ ܘܐܵܦ ܛܸܠܵܢ̈ܝܵܬܼܵܐ ܕܕܲܗܒܼܵܐ ܘܲܕܼܨܒܼ̈ܘܵܬܼܵܐ ܝܲܩܝܼܪ̈ܵܬܼܵܐ: ܘܐܲܝܟܼ ܓܲܙܹ̈ܐ ܡܲܢ ܕܲܛܡܝܼܪܝܼܢ ܒܕܼܘܼܟ: ܩܕܼܵܡܲܝܗܘܿܢ ܡܗܲܓܸܿܓܼ. ܘܐܝܼܬܼ ܐܸܡܲܬܼܝ ܕܐܵܦ ܠܗܹܝܢ ܠܗܵܠܹܝܢ: ܒܲܫܪܵܪܵܐ ܡܚܵܘܸܐ ܠܗܘܿܢ. ܐܲܝܟܼ ܕܲܒܼܚܲܕܼ ܡ̣ܢ ܗܵܠܹܝܢ ܫܘܼ̈ܚܠܵܦܹܐ: ܡܸܫܟܲܚ ܕܲܠܡܵܐ ܠܐ̄ܢܵܫ ܡܸܢܗܘܿܢ ܢܥܵܘܸܟܼ ܘܲܢܦܝܼܫ ܡ̣ܢ ܤܲܗܛܹܗ: ܟܲܕܼ ܡܸܬܼܥܲܪܩܲܠ ܒܝܲܕܼ ܡ̣ܢ ܗܵܠܹܝܢ ܦܲܚܹ̈ܐ ܕܲܡܨܝܼ̈ܕܼܵܬܼܵܐ. ܠܵܐ ܬܲܥܠܲܢܝ: ܡܵܪܝܵܐ: ܠܗܵܠܹܝܢ ܒܘܼܚܪ̈ܵܢܹܐ. ܕܐܵܦ ܚܲܝ̈ܠܬܼܵܢܹܐ ܘܲܒܼܚܝܼܪܹ̈ܐ: ܠܡܲܚܤܸܢ ܢܵܦ̇ܩܝܼܢ ܒܗܵܢܵܐ ܬܲܪܥܵܐ ܟܲܕܼ ܙܲܟܵܝܑܝܼܢ܀ ܘܗܵܠܹܝܢ ܟܠܗܹܝܢ ܡܸܫܢܒܸܩ ܡܢܲܤܝܵܢܵܐ ܠܡܲܩܪܵܒܼܘܼ ܒܢܸܤ̈ܝܘܿܢܹܐ ܠܘܵܬܼ ܩܲܕܝܼ̈ܫܹܐ: ܐܲܝܟܼ ܕܢܸܬܼܒܿܚܲܪ ܒܗܹܝܢ ܚܘܼܒܹܗ ܕܐܲܠܵܗܵܐ ܕܲܒܼܗܘܿܢ. ܕܐܸܢ ܡܸܛܠ ܡܲܒܼܥܕܼܘܼܬܼܵܐ ܘܪܲܚܝܼܩܘܼܬܼܵܐ: ܘܠܵܐ ܫܟܼܝܼܚܘܼܬܼܵܐ ܕܨܸܒܼ̈ܘܵܬܼܵܐ ܐܝܼܬܲܝܗܘܿܢ ܪ̈ܵܚܡܹܐ ܠܐܲܠܵܗܵܐ ܘܲܡܩܵܘܹܝܢ ܒܚܘܼܒܹܗ: ܐܵܘ ܒܲܫܪܵܪܵܐ ܠܹܗ ܠܐܲܠܵܗܵܐ ܡܲܚܒܼܝܼܢ: ܘܐܵܦ ܟܲܕܼ ܢܸܗܘ̈ܝܵܢ ܘܲܫܟܼܝܼ̈ܚܵܢ ܗܵܠܹܝܢ: ܥܵܒܼܕܝܼܢ ܐܵܓܼܘܿܢܵܐ ܘܫܵܝ̇ܛܝܼܢ ܠܗܹܝܢ ܡܸܛܠܵܬܹܗ: ܘܠܵܐ ܡܸܙܕܟܹܝܢ ܘܲܡܚܲܠܦܝܼܢ ܪܸܚܡܬܹܗ ܒܓܼܘܼܪ̈ܵܓܲܝܗܹܝܢ. ܠܵܘ ܕܠܹܗ ܠܐܲܠܵܗܵܐ ܢܸܬܼܝܲܕܼܥܘܼܢ ܒܝܲܕܼ ܗܵܠܹܝܢ: ܐܸܠܵܐ ܠܐܵܟܹ̇ܠܩܲܪܨܵܐ ܕܲܪܓܼܝܼܓܼ ܤܲܓܝܼ: ܕܐܸܠܘܼ ܡܨܸܐ ܗ̄ܘ̣ܵܐ ܟܲܝ ܠܡܹܐܠܲܦ ܗܵܠܹܝܢ. ܐܲܝܟܼ ܕܐܵܦ ܥܲܠ ܐܝܼܘܿܒܼ ܐܸܡ݂ܲܪ: ܐܵܦ ܒܥ̣ܵܐ ܥܠܵܘܗܝ ܡ̣ܢ ܐܲܠܵܗܵܐ: ܤܪܝܼܩܵܐܝܼܬܼ ܠܲܡ ܚܵܚܹ̇ܠ ܐܝܼܘܿܒܼ ܠܐܲܠܵܗܵܐ؟ ܗܵܝܕܹܝܢ ܩܲܠܝܼܠ ܡܲܗܡܝܵܢܘܼܬܼܵܐ ܗܵܘ̇ܝܵܐ: ܘܩܵܪܹܒܼ ܡܢܲܤܝܵܢܵܐ ܡܫܲܠܛܵܐܝܼܬܼ: ܒܲܡܫܘܼܚܬܼܵܐ ܕܲܟܼܡܵܝܘܼܬܼܵܐ ܕܨܹܐܕܲܝܗܘܿܢ. ܗܵܝܕܹܝܢ pb. 279 ܒܵܠܹ̇ܩ ܥܵܘ̇ܠܵܐ: ܐܲܝܟܼ ܪܸܓܬܹܗ ܕܲܒܼܗܵܠܹܝܢ. ܘܡ̣ܢ ܗܵܠܹܝܢ ܡܸܬܼܒܿܩܹܝܢ ܕܫܲܪܝܼܪܝܼܢ ܒܚܘܼܒܹܗ: ܕܲܒܼܟܼܠܗܹܝܢ ܒܵܤܹ̇ܝܢ: ܘܐܲܝܟܼ ܠܵܐ ܡܸܕܸܡ ܡܸܬܼܚܲܫ̈ܒܵܢ ܒܥܲܝܢܲܝ̈ܗܘܿܢ ܒܦܸܚܡܵܐ ܕܚܘܼܒܹܗ ܕܐܲܠܵܗܵܐ ܟܲܕܼ ܡܲܟܿܝܼܟܼܝܼܢ: ܘܠܹܗ ܠܲܡܚܲܠܵܢܵܐ ܕܟܼܠ ܘܥܸܠܬܼܵܐ ܕܙܵܟܼܘܼܬܼܗܘܿܢ ܝܵܗ̇ܒܿܝܼܢ ܙܵܟܼܘܼܬܼܵܐ: ܘܒܼܐܝܼܕܼܵܘ̈ܗܝ ܡܲܓܼܥܠܝܼܢ ܠܐܵܓܼܘܿܢܵܐ. ܕܐܲܢ̄ܬܿ ܗ̄ܘ̣ ܚܲܝܠܵܬܼܵܢܵܐ: ܘܕܝܼܠܵܟܼ ܗ̄ܘ̣ ܐܵܓܼܘܿܢܵܐ. ܐܸܬܼܟܲܬܲܫ: ܘܲܙܟܼܝܼ ܒܹܗ ܡܵܪܝܵܐ ܚܠܵܦܲܝܢ. ܗܵܝܕܹܝܢ ܡܸܬܼܒܲܚܪܝܼܢ: ܐܲܝܟܼ ܕܲܗܒܼܵܐ ܒܟܼܘܼܪܵܐ ܒܝܲܕܼ ܗܵܠܹܝܢ. ܐܲܝܠܹܝܢ ܕܹܝܢ ܕܙܹܐܦܵܐ ܐܸܢܘܿܢ: ܡܸܬܼܝܲܕܼܥܝܼܢ ܬܲܡܵܢ ܒܗܵܠܹܝܢ ܒܘܼܚܪܵܢܹܐ. ܘܡܸܫܬܿܕܹܝܢ ܠܒܲܪ: ܐܲܝܟܼ ܤܘܼܠܐܵܢܵܐ. ܟܲܕܼ ܝܵܗ̇ܒܿܝܼܢ ܐܝܼܕܼܵܐ ܠܲܒܼܥܸܠܕܲܪܗܘܿܢ: ܘܢܵܦܩ̇ܝܼܢ ܚܲܝܵܒܹ̈ܐ ܡ̣ܢ ܐܵܓܼܘܿܢܵܐ: ܡܸܛܠ ܪܲܦܝܘܼܬܼܵܐ ܕܪܸܥܝܵܢܗܘܿܢ: ܐܵܘ ܟܹܝܬܼ ܡܸܛܠ ܪܵܡܘܼܬܼܗܘܿܢ: ܕܠܵܐ ܐܸܫܬܿܘܝܘܼ ܠܚܲܝܠܵܐ ܗܵܘ̇ ܚܲܤܝܼܢܵܐ ܕܥܲܡ ܩܲܕܝܼ̈ܫܹܐ ܐܲܡܝܼܢ ܠܥܘܼܕܼܪܵܢܗܘܿܢ. ܠܵܐ ܓܹܝܪ ܚܵܐܹ̇ܒܼ ܚܲܝܠܹܗ ܕܲܡܥܲܕܪܵܢܲܢ: ܬܲܩܝܼܦ ܒܟܼܠ ܘܲܡܨܸܐ ܚܹܝܠ ܟܠ ܘܙܲܟܵܝ ܒܟܼܠܙܒܲܢ: ܒܦܲܓܼܪܵܐ ܕܡܵܝܵܘ̈ܬܹܗ: ܐܸܡܲܬܼܝ ܕܥܲܡܗܘܿܢ ܢܵܚܹ̇ܬܼ ܠܕܲܪܵܐ. ܐܸܠܵܐ ܓܲܠܝܵܐ ܗ̣̄ܝ ܕܐܲܝܠܹܝܢ ܕܡܸܙܕܟܹܝܢ: ܒܸܠܥܵܕܼܵܘܗܝ ܡܸܙܕܟܹܝܢ. ܗܵܠܹܝܢ ܐܸܢܘܿܢ ܕܥܲܪܛܸܠܵܝܑܝܼܢ ܡܸܢܹܗ ܒܨܸܒܼܝܵܢܗܘܿܢ ܡܸܛܠ ܛܵܠܘܿܡܘܼܬܼܗܘܿܢ: ܕܵܠܐ ܫܵܘܹ̇ܝܢ ܠܗܵܘ̇ ܚܲܝܠܵܐ ܕܐܝܼܬܼܵܘܗܝ ܡܤܲܝܥܵܢܵܐ ܕܙܲܟܵܝܹ̈ܐ. ܐܵܦ ܡܲܪܓܿܫܝܼܢ ܘܲܒܼܙܲܒܼ̈ܢܹܐ ܕܕܲܪܵܐ ܗܸܢܘܿܢ ܗܵܠܹܝܢ: ܕܲܤܦܝܼܩܝܼܢ ܐܸܢܘܿܢ ܡ̣ܢ ܚܲܝܠܵܐ ܕܲܥܝܵܕܼܵܐ: ܗܵܘ̇ ܕܲܒܼܟܼܸܠܗܘܿܢ ܕܲܪܹ̈ܐ ܚܲܤܝܼ̈ܢܹܐ ܘܥܲܤ̈ܩܹܐ ܒܢܲܦܫܗܘܿܢ ܚܵܙܹ̇ܝܢ ܗ̄ܘ̣ܵܘ. ܕܐܲܝܟܼ ܐܲܝܟܲܢܵܐ ܡܲܪܓܫܝܼܢ؟ ܚܵܙܹ̇ܝܢ ܓܹܝܪ ܒܢܲܦܫܗܘܿܢ: ܕܗܲܢܝܼ ܠܗܘܿܢ ܚܘܼܝܵܒܼܗܘܿܢ: ܘܥܲܤܩܝܼܢ ܥܠܲܝܗܘܿܢ ܥܘܼܤܵܩܵܘ̈ܗܝ ܕܐܵܓܼܘܿܢܵܐ pb. 280 ܠܲܡܤܲܝܒܵܪܘܼ: ܐܲܝܠܹܝܢ ܕܲܒܼܗܘܿܢ ܒܟܼܠ ܙܲܒܼ̈ܢܝܼܢ ܡܸܫܬܲܟܼܚܵܐ ܗ̄ܘ̣ܵܬܼ ܠܗܘܿܢ ܙܵܟܼܘܼܬܼܗܘܿܢ ܕܲܟܼܝܵܐܝܼܬܼ. ܘܡܸܬܿܬܿܙܝܼܥܵܢܘܼܬܼܵܐ ܗܵܝ̇ ܕܲܛܢܵܢܵܐ: ܕܲܡܙܝܼܥ ܟܝܵܢܵܐ ܒܚܹܐܦܵܐ ܒܪܲܐܝܟܼ ܗܵܠܹܝܢ ܙܲܒܼ̈ܢܹܐ: ܕܡܸܬܼܥܲܙܲܙ ܗ̄ܘ̣ܵܐ ܒܚܸܡܬܼܵܐ ܢܘܼܪܵܢܵܐܝܼܬܼ: ܠܵܐ ܡܸܫܟܿܚܝܼܢ ܠܵܗ̇ ܒܢܲܦܫܗܘܿܢ. ܐܲܝܠܹܝܢ ܕܹܝܢ ܕܡ̣ܢ ܫܲܬܼܐܸܤܬܼܗܘܿܢ ܪܦܹܝܢ: ܠܵܘ ܒܲܠܚܘܿܕܼ ܡ̣ܢ ܗܵܠܹܝܢ ܐܵܓܼܘܿܢܹ̈ܐ ܘܕܲܐܝܟܼ ܗܵܠܹܝܢ: ܐܸܠܵܐ ܘܐܵܦ ܡ̣ܢ ܩܵܠ ܛܲܪ̈ܦܹܐ ܕܐܝܼ̈ܠܵܢܹܐ ܡܸܬܼܪܲܗܒܼܝܼܢ. ܘܒܼܐܘܼܠܨܵܢܵܐ ܩܲܠܝܼܠ ܕܡ̣ܢ ܟܲܦܢܵܐ ܘܟܼܘܼܪܗܵܢܵܐ ܙܥܘܿܪܵܐ ܚܵܝܒ̇ܝܼܢ ܘܟܼܵܦ̇ܪܝܼܢ: ܘܲܠܒܸܤܬܲܪܗܘܿܢ ܥܵܛ̇ܦܝܼܢ. ܫܲܪܝܼܪܹ̈ܐ ܕܹܝܢ ܘܲܒܼܚܪܹ̈ܐ: ܐܵܦܠܵܐ ܡ̣ܢ ܥܸܤ̈ܒܹܿܐ ܘܝܘܼܪܵܩܵܐ ܤܵܒܼ̇ܥܝܼܢ. ܐܸܠܵܐ ܘܐܵܦ ܟܲܕܼܸ ܥܸܩܵܪܹ̈ܐ ܘܓܸܠܹ̈ܐ ܝܲܒܿܝܼ̈ܫܹܐ ܡܸܤܬܲܝܒܿܪܝܼܢ: ܐܵܦܠܵܐ ܗܵܟܲܢܵܐ ܡܸܬܿܛܦܝܼܤܝܼܢ ܕܡ̣ܢ ܩܕܼܵܡ ܥܸܕܵܢܵܐ: ܢܸܫܪܘܿܢ ܦܘܼܡܗܘܿܢ ܠܲܛܥܘܼܡܵܐ. ܐܸܠܵܐ ܘܟܲܕܼ ܥܲܠ ܐܲܪܥܵܐ ܪܡܹܝܢ: ܘܦܲܓܼܪܵܐ ܐܸܫܬܲܦܲܠ: ܘܥܲܝ̈ܢܹܐ ܚܫܸܟܼ ܡ̣ܢ ܥܘܼܙܹܗ ܕܤܘܼܦܵܩܵܐ ܕܦܲܓܼܪܵܐ: ܘܢܲܦܫܵܐ ܩܲܪܝܼܒܼܵܐ ܠܦܘܼܡܵܐ ܡ̣ܢ ܐܘܼܠܨܵܢܵܐ: ܐܵܦܠܵܐ ܗܵܟܲܢܵܐ ܝܵܗ̇ܒܿܝܼܢ ܐܝܼܕܼܵܐ ܠܡܸܙܕܲܟܼܝܵܢܘܼܬܼܵܐ: ܠܡܸܦܲܠ ܡ̣ܢ ܨܸܒܼܝܵܢܗܘܿܢ ܚܠܝܼܡܵܐ. ܗܲܢܝܼ ܠܗܘܿܢ ܓܹܝܪ ܠܡܸܬܼܐܠܵܨܘܼ ܡܸܛܠ ܚܘܼܒܵܐ: ܒܥܲܡ̈ܠܹܐ ܕܲܚܠܵܦ ܡܝܲܬܿܪܘܼܬܼܵܐ: ܝܲܬܝܼܪ ܡ̣ܢ ܚܲܝܹ̈ܐ ܗܵܠܹܝܢ ܕܙܲܒܼܢܵܐ ܘܟܼܠ ܢܝܵܚ̈ܝܼܢ ܕܲܒܼܗܘܿܢ. ܘܟܲܕܼ ܐܘܼ̈ܠܨܵܢܹܐ ܡܸܤܬܲܩܒܿܠܝܼܢ ܠܗܘܿܢ: ܚܵܕܹܝܢ. ܕܝܵܕܼܥ̇ܝܼܢ: ܕܗܸܢܘܿܢ ܗ̄ܘ̣ ܓܵܡ̇ܪܝܼܢ ܠܗܘܿܢ. ܘܠܵܘ ܒܲܠܚܘܿܕܼ ܡܸܛܠ ܛܘܼܪ̈ܵܦܹܐ ܕܦܲܓܼܪܵܐ ܕܗܵܘܹ̇ܝܢ ܨܹܐܕܲܝܗܘܿܢ ܠܵܐ ܡܸܬܼܦܲܠܓܼܝܼܢ ܥܲܠ ܚܘܼܒܹܗ ܕܲܡܫܝܼܚܵܐ: ܐܸܠܵܐ ܐܵܦ ܥܕܲܡܵܐ ܠܛܘܼܠܵܩܵܐ pb. 281 ܕܡ̣ܢ ܚܲܝܹ̈ܐ ܗܲܢܝܼ ܠܗܘܿܢ ܠܲܡܩܲܒܵܠܘܼ ܡܸܛܠܵܬܹܗ: ܘܠܵܐ ܡܸܬܼܦܲܪܫܝܼܢ.