Isaac of Nineveh: Discourse 37

ܟܲܕܼ ܓܹܝܪ ܙܲܒܼ̈ܢܵܬܼܵܐ ܤܲܓܝܼ̈ܐܵܬܼܵܐ ܐܸܬܼܸܢܲܤ̇ܝܼܬܼ ܒܲܕܼܝܲܡܝܼܢܵܐ ܘܒܲܕܼܤܸܡܵܠܵܐ: ܘܲܒܼܩܹ̇ܝܬܼ ܢܲܦܫܝܼ ܒܲܬܼܪ̈ܲܝܗܘܿܢ ܫܘܼ̈ܚܠܵܦܹܐ ܙܲܒܼ̈ܢܝܼܢ ܤܲܓܝܼ̈ܐܵܢ: ܘܩܲܒܿܠܹ̇ܬܼ ܡܲܚ̈ܘܵܬܼܵܐ ܕܠܵܐ ܡܸܢܝܵܢ ܡ̣ܢ ܕܲܠܩܘܼܒܼܠܵܐ: ܘܐܸܫ̇ܬܿܘܝܼܬܼ ܠܥܘܼܕܼܪ̈ܵܢܹܐ ܪܵܘܪ̈ܒܹܐ ܒܟܸܤܝܵܐ: ܘܫܸܩ̇ܠܹܬܼ ܒܘܼܩܝܵܐ ܕܲܩܢܘܿܡܝ ܙܲܒܼܢܵܐ ܢܲܓܝܼܪܵܐ ܕܲܫܢܲܝ̈ܵܐ: ܒܢܸܤܝܵܢܵܐ ܗܵܕܹܐ ܝܼܠܦܹ̇ܬܼ. ܕܫܲܬܼܐܸܤܲܝ̈ ܟܠܗܹܝܢ ܛܵܒܼ̈ܬܼܵܐ: ܘܦܘܼܢܵܝܵܐ ܕܢܲܦܫܵܐ ܡ̣ܢ ܫܒܼܝܼܬܼܵܐ ܕܲܒܼܥܸܠܕܒܼܵܒܹ̈ܐ: ܘܐܘܼܪܚܵܐ ܕܲܠܘܵܬܼ ܚܲܝܹ̈ܐ ܘܢܘܼܗܪܵܐ: ܗܵܠܹܝܢ ܬܲܪܬܹܝܢ ܐܝܼܬܲܝܗܹܝܢ: ܟܵܘܫܵܐ ܕܒܲܚܕܼܵܐ ܕܘܼܟܵܐ: ܘܨܵܘܡܵܐ ܐܲܡܝܼܢܵܐ. ܗܵܢܵܘ ܕܹܝܢ: ܕܲܢܤܝܼܡ ܐ̄ܢܵܫ ܢܵܡܘܿܤܵܐ ܦܲܐܝܵܐ ܠܟܲܪܤܹܗ ܐܲܝܟܼ ܚܲܟܿܝܼܡܵܐ: ܒܝܲܕܼ ܡܵܘܬܿܒܼܵܐ ܠܵܐ ܡܸܙܕܲܥܙܲܥܢܵܐ ܕܐܲܡܝܼܢܘܼܬܼܵܐ. ܡ̣ܢ ܗܵܪܟܵܐ: ܟܘܼܒܵܫܵܐ ܕܪܸ̈ܓܼܫܹܐ. ܡ̣ܢ ܗܵܪܟܵܐ: ܥܝܼܪܘܼܬܼܵܐ ܕܗܵܘܢܵܐ. ܡ̣ܢ ܗܪܟܵܐ: ܡܫܲܝܢܘܼܬܼܵܐ ܕܚܲܫܹ̈ܐ ܒܲܥܪܝܼܪܵܐܝܹܐ: ܕܲܒܼܦܲܓܼܪܵܐ ܢܵܒܼ̇ܗܝܼܢ. ܡ̣ܢ ܗܵܪܟܵܐ: ܒܗܝܼܠܘܼܬܼܵܐ ܕܡܲܚܫ̈ܒܼܵܬܐ. ܡ̣ܢ ܗܵܪܟܵܐ: ܙܵܘ̈ܥܹܐ ܢܲܗܝܼܪܹ̈ܐ ܕܪܸܥܝܵܢܵܐ. ܡ̣ܢ ܗܵܪܟܵܐ: ܚܦܝܼܛܘܼܬܼܵܐ ܕܲܠܘܵܬܼ ܥ̇ܒܼܵܕܹ̈ܐ ܕܲܡܝܲܬܿܪܘܼܬܼܵܐ. ܡ̣ܢ ܗܵܪܟܵܐ: ܤܘܼ̈ܟܵܠܹܐ ܪ̈ܵܡܹܐ ܘܩܲܛܝ̈ܢܹܐ. ܡ̣ܢ ܗܵܪܟܵܐ: ܕܸܡ̈ܥܹܐ ܕܠܵܐ ܟܲܝܠܵܐ ܕܟܼܠܥܸܕܵܢ. ܡ̣ܢ ܗܵܪܟܵܐ: ܢܲܟܼܦܘܼܬܼܵܐ ܙܗܝܼܬܼܵܐ: ܕܪܲܚܝܼܩܵܐ ܠܲܓܼܡܵܪ ܡ̣ܢ ܢܸܤ̈ܝܵܢܹܐ ܕܕܸܡ̈ܘܵܬܼܵܐ ܕܲܒܼܪܸܥܝܵܢܵܐ. ܡ̣ܢ ܗܵܪܟܵܐ: ܕܵܘܩܵܐ ܩܲܠܝܼܠܵܐ ܘܚܲܪܝܼܦܵܐ ܕܲܠܪܘܼܚܩܵܐ. ܡ̣ܢ ܗܵܪܟܵܐ: pb. 282 ܒܘܼܝܵܢܵܐ ܥܲܡܝܼܩܵܐ ܕܥܵܡܹ̇ܕܼ ܘܡܲܕܼܪܸܟܼ ܤܬܼܝܼܪ̈ܵܬܼܵܐ ܕܟܼܠ ܥܘܼܡ̈ܩܝܼܢ. ܚܲܝܠܵܐ ܕܦܸܓܼܵܡܹ̈ܐ: ܘܙܵܘ̈ܥܹܐ ܤܬܝܼܪܹ̈ܐ ܕܲܒܼܢܲܦܫܵܐ. ܘܦܘܼܪ̈ܫܵܢܹܐ ܕܪ̈ܘܼܚܹܐ: ܘܲܕܼܚܲܝ̈ܠܹܐ ܩܲܕܝܼ̈ܫܹܐ. ܘܚܸܙ̈ܘܹܐ ܫܲܪܝܼܪܹ̈ܐ: ܘܕܸܡ̈ܘܵܬܼܵܐ ܕܫܘܼܩܪܵܐ.¬¬ ܡ̣ܢ ܗܵܪܟܵܐ: ܕܸܚܠܬܼܵܐ ܕܐܘܼܪ̈ܚܵܬܼܵܐ ܘܲܫܒܼܝܼ̈ܠܹܐ ܒܝܲܡܵܐ ܕܪܸܥܝܵܢܵܐ: ܕܦܵܤ̇ܩܵܐ ܠܡܲܗܡܝܵܢܘܼܬܼܵܐ. ܘܫܘܼܠܗܵܒܼܵܐ ܕܲܛܢܵܢܵܐ ܕܕܼܵܐܹ̇ܫ ܟܠ ܩܹܘܲܢܕܝܢܘܿܣ: ܘܦܵܤܲܥ̇ ܥܲܠ ܟܠ ܕܸܚ̈ܠܵܢ: ܘܪܸܬܼܚܵܐ ܕܒܼܵܤܲܪ ܟܠ ܪ̈ܓܼܝܼܓܼܵܢ: ܘܕܼܵܚܹ̇ܐ ܡ̣ܢ ܬܲܪܥܝܼܬܼܵܐ ܘܡܲܢܫܸܐ ܥܘܼܗܕܵܢܵܐ ܕܟܼܠܗܹܝܢ ܥܵܒܼܘܿܪ̈ܝܵܬܼܵܐ. ܥܲܡ ܐ̄ܚܪ̈ܢܝܵܬܼܵܐ ܘܲܐ̄ܚܪ̈ܵܢܝܵܬܐ. ܘܲܒܼܦܵܤܝܼ̈ܩܵܬܐ: ܚܘܼܪܵܪܵܐ ܕܒܲܪܢܵܫܵܐ ܕܲܫܪܵܪܵܐ: ܘܚܘܼܕܵܬܼܵܐ ܕܢܲܦܫܵܐ: ܘܲܩܝܵܡܬܵܐ ܕܥܲܡ ܡܫܝܼܚܵܐ ܒܡܲܠܟܿܘܼܬܼܵܐ: ܡ̣ܢ ܗܵܪܟܵܐ. ܐܲܝܢܵܐ ܕܲܒܼܗܵܠܹܝܢ ܬܲܪܬܹܝܢ ܡܲܗܡܸܐ: ܢܸܗܘܸܐ ܝܵܕܲܥ: ܕܠܵܘ ܡ̣ܢ ܗܵܠܹܝܢ ܗ̄ܘ̣ ܒܲܠܚܘܿܕܼ ܡܲܚܤܲܪ ܢܲܦܫܹܗ: ܐܸܠܵܐ ܠܫܲܬܼܐܸܤܬܐ ܗ̄ܘ̣ ܕܟܼܠܗܹܝܢ ܡܝܲܬܿܪ̈ܵܬܼܵܐ ܡܙܲܥܙܲܥ: ܒܒܲܤܝܘܼܬܼܵܐ ܕܗܵܠܹܝܢ ܬܲܪܬܹܝܢ ܡܝܲܬܿܪ̈ܵܢ. ܘܐܲܝܟܲܢܵܐ ܕܲܠܗܵܠܹܝܢ ܟܠܗܹܝܢ ܐܝܼܬܲܝܗܹܝܢ ܫܘܼܪܵܝܵܐ ܒܢܲܦܫܵܐ: ܗܵܠܹܝܢ ܪܹ̈ܫܲܝ ܦܘܼܠܚܵܢܵܐ ܕܟܼܠܗܹܝܢ ܐܲܠܵܗܵܝ̈ܬܐ: ܘܬܲܪܥܵܐ ܘܲܫܒܼܝܼܠܵܐ ܕܲܠܘܵܬܼ ܡܫܝܼܚܵܐ: ܠܐܲܝܢܵܐ ܕܐܵܚܹ̇ܕܼ ܘܲܒܼܗܹܝܢ ܡܚܲܡܤܸܢ: ܗܵܟܲܢܵܐ ܘܫܘܼܢܵܝܵܐ ܘܲܫܘܵܪܬܵܐ ܕܡܸܢܗܹܝܢ: ܠܘܵܬܼ ܗܵܢܹܝܢ ܬܲܪܬܹܝܢ ܕܲܠܩܘܼܒܼܠܵܐ ܕܗܵܠܹܝܢ: ܐܵܡܲ݁ܪܢܵܐ ܦܸܗܝܵܐ ܕܦܲܓܼܪܵܐ ܘܟܲܪܤܵܐ ܕܠܵܐ ܢܵܡܘܿܣ: ܠܫܘܼܪܵܝܵܐ ܕܟܼܠܗܹܝܢ ܕܤܲܩܘܼܒܼܠܵܐ ܠܐܲܝܠܹܝܢ ܕܐܸܬܼܐܡܲܪ ܐܲܬܼܪܵܐ ܥܵܒܹ̇ܕܼ ܒܢܲܦܫܹܗ. ܪܹܫܝܼܬܼܵܐ ܐܝܼܬܹܝܗ̇ ܘܲܠܗܵܝ̇ ܡ̇ܢ ܚܕܼܵܐ: ܕܠܘܼܩܕܼܵܡ ܠܪܸ̈ܓܼܫܵܘܗܝ ܟܒܼܝܼ̈ܫܹܐ ܢܸܫܪܸܐ ܡ̣ܢ ܐܲܤܘܼܪܹ̈ܐ ܕܟܼܵܘܫܵܐ. ܘܡܵܢܵܐ ܡܸܟܹܝܠ ܡ̣ܢ ܗܵܠܹܝܢ؟ ܡ̣ܢ ܗܵܪܟܵܐ: ܦܸܓܼܥܹ̈ܐ ܫܟܼܝܼܪܹ̈ܐ ܕܠܵܐ ܤܘܼܟܵܝ: ܩܸܢܛܵܐ ܩܲܪܝܼܒܼܵܐ ܕܡ̣ܢ pb. 283 ܡܲܦ̈ܠܵܬܼܵܐ. ܕܠܘܼܚܝܵܐ: ܘܓܲܠ̈ܠܹܐ ܥܲܫܝ̈ܢܹܐ ܕܡ̣ܢ ܚܵܘܪܵܐ ܕܥܲܝ̈ܢܹܐ ܡܸܬܿܬܿܥܝܼܪ. ܫܲܠܗܹܒܼ̈ܝܵܬܼܵܐ ܥܲܙܝܼ̈ܙܵܬܼܵܐ ܕܲܒܼܓܼܘܼܫܡܵܐ ܤܵܒܼ̈ܟܟܵܢ: ܫܲܪ̈ܥܵܬܼܵܐ ܩܲܠܝܼ̈ܠܵܬܼܵܐ ܕܲܒܼܬܲܪܥܝܼܬܼܵܐ. ܚܘܼ̈ܫܒܹܐ ܠܵܐ ܡܸܬܼܠܲܒܼ̈ܟܵܢܹܐ: ܕܲܠܘܵܬܼ ܡܲܦܘܼܠܬܼܵܐ ܡܸܤܬܲܪܗܒܼܝܼܢ. ܫܘܼܗܵܝܵܐ ܕܡ̣ܢ ܪܸܚܡ̱ܬܐ ܕܦܘܼܠܚܵܢܹܗ. ܥܛܵܝܵܐ ܕܲܒܼܩܲܠܝܼܠ ܩܲܠܝܼܠ ܕܦܘܼܪ̈ܫܵܢܹܐ ܕܫܸܠܝܵܐ. ܫܒܼܝܼܩܘܼܬܼܵܐ ܓܡܝܼܪܬܵܐ ܕܩܵܢܘܿܢܲܝ̈ ܕܘܼܒܵܪܹܗ. ܚܘܼܕܵܬܼܵܐ ܕܩܲܕܼ̈ܡܵܝܬܼܵܐ ܕܐܸܬܼܥܛܝܼ ܗ̄ܘܲܝ̈: ܘܝܘܼܠܦܵܢܵܐ ܕܥܲܠ ܐ̄ܚܪ̈ܵܢܝܬܼܵܐ ܚܲܕܼ̈ܬܼܵܬܼܵܐ ܕܠܵܐ ܝܵܕܲܥ̇ ܗ̄ܘ̣ܵܐ. ܗܵܠܹܝܢ ܕܡ̣ܢ ܫܡ̈ܘܼܥܵܬܼܵܐ ܡܫܲܚ̈ܠܦܵܬܼܵܐ ܘܐܲܡܝܼ̈ܢܵܬܼܵܐ: ܘܚܸܙܘܹ̈ܐ ܤܲܓܝܼܐܲܝ̈ ܙܢܲܝ̈ܵܐ ܕܲܕܼܠܵܐ ܒܨܸܒܼܝܵܢܵܐ: ܕܲܒܼܝܲܕܼ ܚܙܘܼܩܝܵܐ ܐܲܡܝܼܢܵܐ ܕܡ̣ܢ ܐܲܬܲܪ ܠܐܲܬܲܪ ܘܕܼܘܼܟܵܐ ܠܕܼܘܼܟܵܐ ܠܹܗ ܡܸܤܬܲܩ̈ܒܿܠܵܢ. ܐܲܝܟܲܢܵܐ ܕܚܲܫܹ̈ܐ ܗܵܢܘܿܢ ܕܲܒܼܛܲܝܒܿܘܼܬܹܗ ܕܐܲܠܵܗܵܐ ܡ̣ܢ ܟܲܕܼܘܼ ܕܡܸܟܼܘ ܒܢܲܦܫܵܐ: ܒܝܲܕܼ ܡܸܬܼܢܲܫܝܵܢܘܼܬܼܵܐ ܕܥܘܼܗ̈ܕܵܢܹܐ ܕܐܸܒܲܕܼܘ ܗ̄ܘ̣ܵܘ ܡ̣ܢ ܪܸܥܝܵܢܵܐ: ܬܘܼܒܼ ܠܘܵܬܼ ܙܵܘܥܵܐ ܡܫܲܪܹܝܢ ܠܡܸܬܼܢܲܚܵܡܘܼ. ܘܲܠܢܲܦܫܵܐ: ܠܘܵܬܼ ܥܒܼܵܕܹܵܐ ܡܫܲܪܹܝܢ ܠܡܸܥܨܵܐ. ܥܲܡ ܐ̄ܚܪ̈ܵܢܝܵܬܼܵܐ: ܕܠܵܐ ܟܠܗܹܝܢ ܐܸܬܼܢܸܐ ܠܝܼ. ܗܵܠܹܝܢ ܡܲܢ: ܡ̣ܢ ܗܵܝ̇ ܩܲܕܼܡܵܝܬܼܵܐ: ܡܸܬܼܦܲܬ̈ܚܵܢ ܥܠܵܘܗܝ ܠܲܡܤܲܝܒܵܪܘܼ ܕܵܘܝܵܐܝܼܬܼ܀ ܘܡܵܢܵܐ ܘܲܒܼܗܵܝ̇ ܐ̄ܚܪܹܬܼܵܐ؟ ܗܵܢܵܘ ܕܹܝܢ: ܕܲܢܫܲܪܸܐ ܒܲܥ̇ܒܼܵܕܼܵܐ ܕܲܚܙܝܼܪܹ̈ܐ. ܘܡܵܢܵܐ ܐܝܼܬܼܵܘܗܝ ܥ̇ܒܼܵܕܼܗܘܿܢ ܕܲܚܙܝܼܪܹ̈ܐ؟ ܕܲܕܼܠܵܐ ܬܚܘܼܡܵܐ ܢܤܝܼܡܝܼܗ̇ ܠܟܲܪܤܵܐ: ܘܲܒܼܟܼܠܙܒܲܢ ܠܡܸܡܠܝܵܗ̇: ܘܲܕܼܠܵܐ ܢܸܗܘܸܐ ܥܸܕܵܢܵܐ ܠܲܛܥܘܼܡܵܐ ܐܲܝܟܼ ܡܠܝܼ̈ܠܹܐ. ܘܡܵܢܵܐ ܡܸܟܹܝܠ؟ ܡ̣ܢ ܗܵܪܟܵܐ ܫܸܢܬܐ ܛܲܒܿܝܼܥܬܼܵܐ ܘܝܲܩܝܼܪܬܵܐ: ܝܘܼܩܪܵܐ ܤܲܓܝܼܐܵܐ ܕܦܲܓܼܪܵܐ: ܥܲܡ ܦܘܼܪܵܩܵܐ pb. 284 ܕܟܲܬܼ̈ܦܵܬܼܵܐ. ܥܸܨܝܵܢܵܐ ܕܦܵܘܫܵܐ ܕܡ̣ܢ ܬܸܫܡ̈ܫܵܬܼܵܐ: ܡܲܐܝܼܢܘܼܬܼܵܐ ܕܡ̣ܢ ܟܦܵܦܹ̈ܐ ܕܲܒܼܗܹܝܢ. ܒܲܤܝܘܼܬܼܵܐ ܕܡ̣ܢ ܤܸܓܼ̈ܕܵܬܼܵܐ ܕܲܥܝܵܕܼܵܐ: ܥܲܡܘܼܛܘܼܬܼܵܐ ܘܩܲܪܝܼܪܘܼܬܼܵܐ ܕܬܲܪܥܝܼܬܼܵܐ. ܗܵܘܢܵܐ ܐܲܛܝܼܡܵܐ ܕܠܵܐ ܦܵܪܹܫ: ܕܠܘܼܚܝܵܐ ܘܥܲܡܛܵܢܵܐ ܤܲܓܝܼܐܵܐ ܕܡܲܚܫ̈ܒܼܵܬܐ. ܥܲܪܦܸܠܵܐ ܥܒܼܝܼܬܵܐ ܘܚܸܫܘܿܟܼܬܵܐ ܕܲܦܪܝܼܤܵܐ: ܥܲܠ ܟ̱ܠܵܗ̇ ܢܲܦܫܵܐ. ܩܘܼܛܵܥܵܐ ܤܲܓܝܼܐܵܐ ܕܲܒܼܟܼܠ ܥ̇ܒܼܵܕܼ ܕܐܲܠܵܗܵܐ: ܐܲܟܲܚ̄ܕܼ ܘܲܒܼܩܸܪܝܵܢܵܐ. ܡ̣ܢ ܗܵܝ̇ ܕܠܵܐ ܛܵܥܹ̇ܡ ܒܲܤܝܼܡܘܼܬܼܵܐ ܕܤܘܼܟܵܠܗܹܝܢ ܕܡܸ̈ܠܹܐ. ܒܸܛܠܵܢܹ̈ܐ ܤܲܓܿܝܼ̈ܐܹܐ ܕܡ̣ܢ ܐܵܠ̈ܨܵܬܼܵܐ. ܗܵܘܢܵܐ ܠܵܐ ܡܸܬܼܠܲܒܼܟܵܢܵܐ: ܕܲܡܕܲܥܲܪ ܒܦܸܗܝܵܐ ܕܲܒܼܟܼܠܵܗ̇ ܬܹܒܹܝܠ: ܟܘܼܡܘܿ ܤܲܓܝܼܐܬܼܵܐ ܕܲܡܟܲܢܫܵܐ ܒܗܲܕܵܡܹ̈ܐ. ܦܲܢܛܵܤ̈ܝܼܷܵܣ ܢܕܼܝܼ̈ܕܵܬܼܵܐ ܕܟܼܠܹܗ ܠܸܠܝܵܐ: ܒܝܲܕܼ ܕܸܡ̈ܘܵܬܼܵܐ ܛܲܢ̈ܦܵܬܼܵܐ ܘܨܲܠܡܹ̈ܐ ܡܫܲܟܿܪܹ̈ܐ ܡܲܠܚܲܝ̈ ܪܸܓܿܬܼܵܐ: ܕܲܠܢܲܦܫܵܐ ܕܲܒܿܝܼܩܝܼܢ: ܘܲܡܫܲܡܠܹܝܢ ܒܵܗ̇ ܨܸܒܼܝܵܢܗܘܿܢ ܨܲܚܢܵܐܝܼܬܼ. ܘܬܸܫܘܝܼܬܹܗ ܘܦܲܓܼܪܹܗ ܟ̱ܠܹܗ ܕܲܡܛܲܢܲܦ ܒܝܲܕܼ ܤܲܓܝܼܐܘܼܬܼ ܫܸܚܠܵܐ ܕܒܸܗܬܿܬܼܵܐ: ܕܪܵܘܕܹܐ ܡܸܢܹܗ ܐܲܝܟܼ ܕܡ̣ܢ ܡܲܒܿܘܼܥܵܐ. ܘܗܵܠܹܝܢ ܠܵܘ ܒܠܲܝ̈ܠܵܘܵܬܼܵܐ ܒܲܠܚܘܿܕܼ: ܐܸܠܵܐ ܘܒܼܐܝܼܡܵܡܵܐ: ܦܲܓܼܪܵܐ ܕܫܵܚܹ̇ܠ ܒܟܼܠܥܸܕܵܢ: ܘܲܡܛܲܢܸܦ ܠܪܸܥܝܵܢܵܐ. ܘܐܲܝܟܼ ܕܡܸܢܗܘܿܢ ܕܤܘܼܥܪ̈ܵܢܹܐ: ܡ̣ܢ ܟܲܕܼܘܼ ܟܦܲܪ ܠܹܗ ܒܢܲܟܼܦܘܼܬܼܵܐ. ܘܚܲܠܝܘܼܬܼ ܚܘܼ̈ܬܼܚܵܬܹܐ ܕܡܲܥܒܿܕܼܝܼܢ ܒܓܼܘܼܫܡܹܗ ܟ̱ܠܹܗ: ܒܚܲܡܝܼܡܘܼܬܼܵܐ ܠܵܐ ܡܸܤܬܲܝܒܿܪܵܢܝܼܬܼܵܐ ܕܲܕܼܠܵܐ ܫܲܠܘܵܐ. ܚܘܼ̈ܫܵܒܹܐ ܡܓܲܪ̈ܓܼܵܢܹܐ ܕܲܛܥܝܼܢܝܼܢ ܫܘܼܦܪܹ̈ܐ ܕܦܲܪ̈ܨܘܿܦܹܐ ܕܡܸܬܿܬܿܨܝܼܪܝܼܢ ܩܕܼܵܡܵܘܗܝ ܙܲܠܝܼܠܵܐܝܼܬܼ ܒܟܼܠܗܘܿܢ ܥܸܕܵܢܵܘ̈ܗܝ ܘܲܡܚܲܬܼܚܬܼܝܼܢ: ܘܗܵܘܢܵܐ ܕܲܥܦܸܐ ܒܥܸܢܝܵܢܗܘܿܢ ܕܠܵܐ ܦܘܼܫܵܟܼ: ܘܫܵܠܹ̇ܡ ܠܗܘܿܢ ܒܝܲܐܝܼܒܼܘܼܬܼܵܐ ܘܗܸܪܓܵܐ: ܡܸܛܠ ܦܵܪܘܿܫܘܼܬܼܵܐ ܕܐܸܤܬܲܡܝܲܬ̤. pb. 285 ܘܗܵܕܹܐ ܗ̣̄ܝ ܕܐܲܡܝܼܪܵܐ ܠܚܲܕܼ ܪ̈ܲܒܵܢܹܐ ܕܦܝܼܠܵܤ̈ܘܿܦܹܐ: ܕܐܲܝܢܵܐ ܕܲܠܦܲܓܼܪܹܗ ܒܪܵܘܪ̈ܒܼܵܬܼܵܐ ܡܬܲܪܤܸܐ: ܬܚܹܝܬܼ ܩܹܐܪܤܵܐ ܤܵܐܹ̇ܡ ܢܲܦܫܹܗ. ܘܐܵܦܸܢ ܐܝܼܬܼ ܐܸܡܲܬܼܝ ܕܥܵܗܹ̇ܕܼ ܢܲܦܫܹܗ: ܘܒܼܵܥܹ̇ܐ ܕܢܸܥܨܸܐ ܗ̤ܘ ܠܹܗ: ܕܢܸܠܒܿܘܿܟܼ ܢܲܦܫܹܗ ܠܵܐ ܡܸܫܟܲܚ: ܡܸܛܠ ܡܸܬܿܬܿܙܝܼ̈ܥܵܢܘܵܬܼܵܐ ܚܲܡܝܼ̈ܡܵܬܼܵܐ ܕܲܒܼܦܲܓܼܪܵܐ: ܕܲܒܼܝܲܕܼ ܩܛܝܼܪܵܐ ܕܚܘܼܬܼܚܵܬܼܗܹܝܢ: ܚܲܝܠܬܼܵܢܵܐܝܼܬܼ ܫܸܒܼ̈ܝܵܢ ܠܵܗ̇ ܠܢܲܦܫܵܐ ܠܨܸܒܼܝܵܢܗܹܝܢ. ܐܲܝܟܼ ܕܐܸܡ݂ܲܪ ܡܠܝܼܛ ܒܲܡܠܝܼܠܘܼܬܼܵܐ ܘܪܵܡ ܒܘܼܝܵܢܵܐ ܡܵܪܝ ܕܝܼܵܕܘܿܪܘܿܣ ܕܛܲܪܤܘܿܣ: ܬܘܼܪܤܵܝܵܐ ܠܲܡ ܕܦܲܓܼܪܵܐ ܒܪܲܓܼܝܼܘܼܬܹܗ ܘܲܒܼܪܲܟܿܝܼܟܼܘܼܬܹܗ: ܪܓܸܫܬܼܵܐ ܕܚܲܫܵܐ ܚܲܪܝܼܦܵܐܝܼܬܼ ܡܲܩܢܸܐ ܠܵܗ̇ ܠܢܲܦܫܵܐ: ܘܲܚܢܝܼܓܼ ܥܠܹܝܗ̇ ܡܵܘܬܵܐ: ܘܲܠܕܼܝܼܢܹܗ ܕܐܲܠܵܗܵܐ ܕܚܝܼܠܵܐܝܼܬܼ ܩܵܢ̇ܝܵܐ. ܢܲܦܫܵܐ ܕܹܝܢ ܗܵܝ̇ ܕܐܲܡܝܼܢܵܐܝܼܬܼ ܪܵܢܝܵܐ ܒܨܸܦܬܼܵܐ ܕܐܲܝܠܹܝܢ ܕܘܵܠ̈ܝܵܢ: ܢܝܼܚܵܐ ܒܝܵܬܼܵܗ̇: ܘܲܒܼܝܼܪ̈ܵܢ ܡܲܪ̈ܢܝܵܬܼܵܗ̇: ܟܲܕܼ ܠܵܐ ܡܸܬܿܬܵܘܝܵܢܘܼܬܼܵܐ ܩܵܢ̇ܝܵܐ. ܒܛܝܼܠܘܼܬܼܵܐ ܕܥܲܠ ܡܝܲܬܿܪܘܼܬܼܵܐ: ܗܸܢܝܘܿܟܼܵܐ ܐܝܼܬܹܝܗ̇ ܕܚܲܫܹ̈ܐ. ܡܢܲܛܪܵܢܝܼܬܼܵܐ ܕܲܡܝܲܬܿܪܘܼܬܼܵܐ: ܘܬܲܪܒܿܝܼܬܼܵܐ ܕܠܵܐ ܦܘܼܠܵܓܼܵܐ. ܘܚܲܕܼܘܼܬܼܵܐ ܕܠܵܐ ܨܸܦܬܼܵܐ: ܚܲܝܹ̈ܐ ܛܵܒܹ̈ܐ: ܘܲܠܡܹܐܢܵܐ ܕܠܵܐ ܩܹܘܲܢܕܹܝܢܘܿܣ. ܦܘܼܪ̈ܦܵܥܹܐ ܓܹܝܪ ܦܲܓܼܪ̈ܵܢܵܝܹܐ: ܡܚܲܝܠܝܼܢ ܠܚܲܫܹ̈ܐ: ܘܡܲܥܫܢܝܼܢ ܠܗܘܿܢ ܥܲܠ ܢܲܦܫܵܐ. ܟܹܐܡܲܪ ܕܹܝܢ: ܘܐܲܝܟܼ ܕܡ̣ܢ ܫܸܪ̈ܫܹܝܗ̇ ܥܵܩ̇ܪܝܼܢ ܠܵܗ̇. ܘܥܲܡ ܗܵܠܹܝܢ ܟܠܗܹܝܢ: ܥܕܲܟܹܝܠ ܫܵܓܲܪ ܠܵܗ̇ ܠܟܲܪܤܵܐ ܒܝܲܕܼ ܠܲܥܒܿܘܼܬܼܵܐ: ܘܲܒܼܠܵܐ ܡܛܲܟܿܤܘܼܬܼܵܐ ܕܥܸܕܼܵܢܹ̈ܐ. ܘܠܵܐ ܨܵܒܹ̇ܐ ܕܲܒܼܝܲܕܼ ܩܲܠܝܼܠ ܚܲܫܹ̈ܐ ܕܟܲܦܢܵܐ ܢܸܫܬܲܠܲܛ ܥܲܠ ܢܲܦܫܹܗ: ܕܲܕܼܒܼܝܼܪܵܐ ܡܸܢܹܗ ܒܲܩܛܝܼܪܵܐ ܠܚܹܐܦܵܐ ܕܚܲܫܹ̈ܐ. ܗܵܠܹܝܢ ܐܸܢܘܿܢ ܦܹܐܪܹ̈ܐ ܕܒܸܗܬܿܬܼܵܐ ܕܡ̣ܢ ܟܲܪܤܵܐ: ܘܗܵܠܹܝܢ ܐܸܢܘܿܢ ܦܹܐܪܹ̈ܐ ܕܡ̣ܢ ܠܵܐ pb. 286 ܚܘܼܡܤܵܢܵܐ ܕܒܲܚܕܼܵܐ ܕܘܼܟܵܐ ܒܫܲܠܝܘܼܬܼܵܐ. ܕܒܲܕܼܓܼܘܿܢ ܐܲܝܟܼ ܡ̇ܢ ܕܲܠܗܘܿܢ ܠܗܵܠܹܝܢ ܙܲܒܼ̈ܢܹܐ ܝܵܕܲܥ̇ ܘܲܒܼܥܸܠܕܲܪܲܢ ܗܵܘ̇ ܕܢܲܩܝܼܦ ܠܲܢ ܒܟܼܠܥܸܕܵܢ: ܕܲܒܼܗܵܠܹܝܢ ܬܪܹܝܢ ܥܸܕܵܢܹ̈ܐ ܝܲܬܿܝܼܪ ܡܥܵܕܼ ܡܸܬܿܕܲܠܲܚ ܟܝܵܢܵܐ ܘܙܵܩܹ̇ܬܼ ܠܹܗ ܚܲܫܹ̈ܐ. ܘܗܵܘܢܵܐ ܡܸܬܿܕܵܘܲܕܼ ܝܲܬܝܼܪܵܐܝܼܬܼ: ܗܵܢܵܘ ܕܹܝܢ ܡ̣ܢ ܚܵܘܪܵܐ ܕܥܲܝ̈ܢܹܐ ܘܡ̣ܢ ܢܝܵܚܵܐ ܕܟܲܪܤܵܐ: ܐܵܦ ܗ̤ܘ ܡܸܬܼܚܲܦܲܛ: ܕܬܼܵܘܤܲܦܬܼܵܐ ܢܸܥܒܸܿܕܼ ܥܲܠ ܗܵܝ̇ ܕܲܟܼܝܵܢܵܐ. ܘܲܒܼܗܵܠܹܝܢ ܥܸܕܵܢܹ̈ܐ ܪܵܡܹ̇ܐ ܒܹܗ ܚܘܼ̈ܫܵܒܹܐ ܕܲܙܢ̈ܝܼܢ ܙܢ̈ܝܼܢ: ܐܲܝܟܼ ܕܐܸܢ ܡܸܫܟܿܚܵܐ ܢܸܬܼܥܲܫܲܢ ܚܲܫܵܐ ܥܲܠ ܟܝܵܢܵܐ: ܒܝܲܕܼ ܓܵܘܙܵܠܵܐ ܝܲܬܿܝܼܪܵܐ: ܘܲܢܛܲܒܲܥ ܠܐ̄ܢܵܫ ܒܡܲܦܘܼܠܬܼܵܐ. ܡܸܛܠܗܵܢܵܐ. ܙܵܕܹܩ ܘܐܵܦ ܠܲܢ: ܕܐܲܟܼܙܢܵܐ ܕܲܒܼܥܸܠܕܲܪܲܢ ܝܵܕܲܥ ܠܗܘܿܢ ܠܗܵܠܹܝܢ ܙܲܒܼ̈ܢܹܐ: ܘܐܵܦ ܚܢܲܢ ܢܸܫܬܵܘܕܲܥ ܐܸܢܘܿܢ: ܘܠܲܡܚܝܼܠܘܼܬܲܢ. ܘܲܠܚܲܝܠܹܗ ܕܲܟܼܝܵܢܲܢ ܕܠܵܐ ܤܵܦܹ̇ܩ ܠܘܼܩܒܲܠ ܚܹܐܦܹ̈ܐ ܕܡܸܬܿܬܿܙܝܼ̈ܥܵܢܘܵܬܼܵܐ ܕܡ̣ܢ ܗܵܠܹܝܢ ܙܲܒܼ̈ܢܹܐ: ܘܲܠܚܘܼ̈ܫܵܒܹܐ ܕܲܩܝܼ̈ܩܹܐ ܕܡܘܼܬܼ ܥܲܦܪܵܐ ܕܡܲܕܼܪܸܐ ܩܕܼܵܡ ܥܲܝ̈ܢܲܝܢ: ܕܠܵܐ ܢܸܫܟܲܚ ܠܡܸܚܙܵܐ ܩܢܘܿܡܲܢ: ܘܲܠܡܸܤܡܲܟܼ ܩܕܼܵܡ ܓܸܕܼܫܹ̈ܐ. ܘܲܒܼܝܲܕܼ ܢܸܤ̈ܝܵܢܹܐ ܕܐܲܝܠܹܝܢ ܕܙܲܒܼ̈ܢܵܬܼܵܐ ܤܲܓܝܼ̈ܐܵܬܼܵܐ: ܕܵܘܝܵܐܝܼܬܼ ܡܸܢܹܗ ܤܒܲܠܢܲܢ: ܕܢܸܬܼܚܲܟܲܡ ܡܸܟܹܝܠ. ܘܠܵܐ ܢܲܪܦܸܐ ܚܢܲܢ ܠܲܢ ܕܢܸܫܬܿܪܸܐ ܠܡܸܥܒܲܕܼ ܨܸܒܼܝܵܢܵܐ ܕܲܢܝܵܚܲܢ: ܘܲܢܚܘܼܒܼ ܡ̣ܢ ܟܲܦܢܵܐ: ܘܐܵܦܸܢ ܤܲܓܝܼ ܢܸܬܼܐܠܸܨ. ܐܵܘ ܕܢܸܬܿܬܿܙܝܼܥ ܡ̣ܢ ܕܘܼܟܿܬܼܵܐ ܕܫܸܠܝܲܢ: ܘܢܸܬܼܘܲܥܲܕܼ ܠܐܲܝܟܵܐ ܕܲܕܼܠܝܼܠ ܠܓܸܕܼܫܹ̈ܐ ܕܕܲܐܝܟܼ ܗܵܠܹܝܢ: ܟܲܕܼ ܓܵܒܼܠܝܼܢܲܢ ܥܸܠ̈ܠܵܬܼܵܐ ܘܲܡܪܲܟܿܒܼܝܼܢܲܢ ܦܘܼܪ̈ܤܹܐ: ܕܢܸܦܘܿܩ ܡ̣ܢ ܚܘܼܪܒܵܐ ܠܒܲܪ. ܗܵܠܹܝܢ ܕܨܸܢ̈ܥܵܬܼܵܐ ܐܸܢܹܝܢ ܓܲܠܝܵܐܝܼܬܼ: ܕܤܵܛܵܢܵܐ. ܐܸܢܕܹܝܢ ܬܚܲܡܤܸܢ ܒܚܘܼܪܒܵܐ: ܠܵܐ ܡܸܬܼܢܲܤܸܐ ܐܲܢ̄ܬܿ. ܠܵܐ ܓܹܝܪ ܚܵܙܹ̇ܐ ܐܲܢ̄ܬܿ ܐܲܢ̄ܬܿܬܼܵܐ ܒܚܘܼܪܒܵܐ: ܘܠܵܐ pb. 287 ܡܸܕܸܡ ܕܲܠܕܼܘܼܒܵܪܵܟܼ ܡܲܟܸ̇ܐ: ܘܠܵܐ ܒܢܵܬܼ̈ ܩܵܠܹ̈ܐ ܕܠܵܐ ܫܲܦܝܼܪ̈ܵܢ. ܡܵܐ ܠܵܟܼ ܘܠܐܘܼܪ̈ܚܵܬܐ ܕܡܸܼܨܪܹܝܢ: ܠܡܸܫܬܼܵܐ ܡܲܝ̈ܵܐ ܡ̣ܢ ܓܝܼܚܘܿܢ؟ ܐܸܤܬܲܟܲܠ ܡܸܕܸܡ ܕܐܵܡ̇ܲܪܢܵܐ. ܗܲܒܼ ܠܲܒܼܥܸܠܕܲܪܵܟܼ ܢܸܤܝܵܢܵܟܼ: ܒܚܘܼܡܤܵܢܵܟܼ ܕܒܲܙܥܘܿܪ̈ܝܵܬܼܵܐ: ܕܠܵܐ ܢܸܬܼܒܲܥ ܠܵܟܼ ܪܵܘܪܒܼܵܬܼܵܐ. ܒܐܲܡܝܼܢܘܼ ܢܸܗܘܸܐ ܐܝܼܬܼ ܠܵܟܼ ܢܵܡܘܿܤܹ̈ܐ ܕܗܵܠܹܝܢ ܕܲܩܪ̈ܩܵܬܼܵܐ: ܕܲܗܘ̤ܵܐ ܪܵܡܹ̇ܐ ܐܲܢ̄ܬܿ ܠܹܗ ܓܸܪܓܼܵܐ ܒܐܵܓܼܘܿܢܵܐ ܕܲܒܼܗܘܿܢ. ܕܡܸܢܗܘܿܢ ܠܵܐ ܢܸܗܘܸܐ ܤܦܝܼܩ: ܠܡܸܛܡܲܪ ܠܵܟܼ ܦܲܚܹ̈ܐ ܪܵܘܪ̈ܒܹܐ. ܐܲܝܢܵܐ ܕܹܝܢ ܕܲܠܡܸܦܲܩ ܘܲܥܕܲܡܵܐ ܬܘܼܒܼ ܠܚܲܡܸܫ ܦܤ̈ܵܥܵܢ ܡ̣ܢ ܬܲܪܥܵܐ ܕܟܼܘܼܪܚܹܗ ܠܵܐ ܡܸܬܿܛܦܝܼܣ: ܐܲܝܟܲܢܵܐ ܡܸܫܟܲܚ ܕܲܡܦܝܼܣ ܠܹܗ ܕܡ̣ܢ ܚܘܼܪܒܵܐ ܢܸܦܘܿܩ: ܐܵܘ ܕܲܠܘܲܥܕܵܐ ܕܲܩܪܝܼܬܼܵܐ ܢܸܬܼܩܲܪܲܒܼ. ܘܗܵܘ̇ ܕܐܵܦܠܵܐ ܡ̣ܢ ܟܵܘܬܼܵܐ ܡܸܙܕܟܸܐ ܕܲܢܕܝܼܩ ܠܒܲܪ ܡ̣ܢ ܚܒܼܘܼܫܝܹܗ: ܐܲܝܟܲܢ ܡܦܝܼܣ ܠܹܗ ܕܲܠܒܲܪ ܡܸܢܹܗ ܢܸܦܘܿܩ؟ ܐܲܝܢܵܐ ܕܐܲܦܠܵܐ ܒܪܲܡܫܵܐ ܥܲܡܝܼܩܵܐ ܕܢܸܤܬܲܝܒܲܪ ܡܸܬܿܛܦܝܼܣ: ܒܗܵܝ̇ ܕܲܠܒܼܵܘ̈ܬܹܐ ܡܸܬܼܪܲܓܼܪܲܓܼ: ܐܲܝܟܲܢ ܘܡ̣ܢ ܩܕܼܵܡ ܥܸܕܵܢܵܐ ܕܢܸܫܪܸܐ ܡܓܲܪܸܓܼ ܠܚܘܼܫܵܒܼܵܘ̈ܗܝ؟ ܘܗܵܘ̇ ܕܐܵܽܦ ܡ̣ܢ ܫܝܼ̈ܛܵܬܼܵܐ ܒܵܗܹ̇ܬܼ ܠܡܸܤܒܲܥ: ܐܲܝܟܲܢ ܠܘܵܬܼ ܪܵܘܪ̈ܒܼܵܬܼܵܐ ܩܵܪܹܐ ܠܹܗ؟ ܘܗܵܘ̇ ܕܐܵܦܠܵܐ ܒܦܲܓܼܪܹܗ ܕܝܼܠܹܗ ܡܸܬܿܛܦܝܼܣ ܕܢܸܬܼܒܲܩܸܐ: ܐܲܝܟܲܢܵܐ ܠܘܵܬܼ ܫܘܼܦܪܹܐ ܢܘܼܟܼܪ̈ܵܝܹܐ ܢܓܲܪܓܼܘܼܗܝ؟ ܩܲܕܼܡܵܝܑܬܼ ܡ̣ܢ ܙܥܘܿܪ̈ܝܵܬܼܵܐ ܡܸܙܕܟܸܐ ܐ̄ܢܵܫ ܟܲܕܼ ܒܵܤܹ̇ܐ: ܘܗܵܝܕܹܝܢ ܝܵܗܹ̇ܒܼ ܥܸܠܬܼܵܐ ܕܢܸܬܿܕܿܚܸܐ ܠܘܵܬܼ ܪܵܘܪ̈ܵܒܼܵܬܐ. ܘܗܵܘ̇ ܕܥܲܠ ܚܲܝܹ̈ܐ ܕܙܲܒܼܢܵܐ ܐܵܦܠܵܐ ܩܲܠܝܼܠ ܒܛܝܼܠ ܠܹܗ ܠܲܡܟܲܬܵܪܘܼ ܒܗܵܘܿܢ: ܐܲܝܟܲܢ ܡܙܝܼܥ ܠܹܗ ܡ̣ܢ ܐܘܼ̈ܠܨܵܢܹܐ ܕܲܡܝܲܒܿܠܝܼܢ ܠܘܵܬܼ ܡܵܘܬܵܐ ܗܵܘ̇ ܕܪܵܚܹ̇ܡ؟ ܗܵܟܲܢ ܐܝܼܬܼܵܘܗܝ ܩܪܵܒܼܵܐ ܕܦܵܪܘܿܫܘܼܬܼܵܐ: ܠܵܐ ܫܵܒܼܩ̇ܝܼܢ ܚܲܟܿܝ̈ܡܹܐ pb. 288 ܕܲܠܘܵܬܼ ܐܵܓܼܘܿܢܹ̈ܐ ܪܵܘܪ̈ܒܹܐ ܡܙܲܡܸܢ ܠܗܘܿܢ ܒܥܸܠܕܲܪܗܘܿܢ. ܐܸܠܵܐ ܚܘܼܡܤܵܢܗܘܿܢ ܕܲܒܼܕܲܙܥܘܿܪ̈ܝܵܢ ܕܲܡܚܵܘܹܝܢ: ܗ̤ܘ ܡܢܲܛܲܪ ܠܗܘܿܢ ܕܲܒܼܗܲܡ̈ܠܹܐ ܪܵܘܪ̈ܒܹܐ ܠܵܐ ܢܸܦܠܘܼܢ. ܩܲܕܼܡܵܝܑܬܼ ܡ̣ܢ ܨܠܘܿܬܼܵܐ ܗܵܝ̇ ܕܐܲܡܝܼܢܘܼܬܼܵܐ ܒܒܼܵܥܘܼܬܼܵܐ ܕܲܒܼܪܸܥܝܵܢܵܐ ܦܵܐܹ̇ܫ: ܘܗܵܝܕܹܝܢ ܡܦܝܼܣ ܠܹܗ: ܕܲܒܼܗܵܕܹܐ ܕܦܲܓܼܪܵܐ ܘܲܕܼܙܲܒܼ̈ܢܹܐ ܝܑܼܕܼܝܼ̈ܥܹܐ ܕܢܵܡܘܿܤܵܐܝܼܬܼ ܢܸܒܼܤܸܐ. ܘܠܘܼܩܕܲܡ ܡܸܬܼܪܲܫܲܠ ܚܘܼܫܵܒܼܵܐ: ܕܡ̣ܢ ܩܕܼܵܡ ܥܸܕܵܢܵܐ ܢܸܫܬܿܪܸܐ ܒܲܙܥܘܿܪ̈ܝܵܬܼܵܐ ܘܲܒܼܫܝܼ̈ܛܵܬܼܸܵܐ ܘܲܒܼܡܸܕܸܡ ܙܥܘܿܪ. ܘܒܼܵܬܲܪ ܡܲܦܘܼܠܬܐ ܕܡ̣ܢ ܚܘܼܡܤܵܢܹܗ: ܡܸܫܬܿܪܲܥ ܒܗܵܝ̇ ܕܠܲܥܒܵܐܝܼܬܼ. ܘܠܘܼܩܕܲܡ ܡܸܙܕܟܸܐ: ܡܵܠܘܿܢ ܕܹܝܢ ܙܥܘܿܪܝܵܐ ܒܥܲܝܢܵܘ̈ܗܝ: ܕܢܸܬܼܒܲܩܸܐ ܒܦܲܓܼܪܹܗ ܥܲܪܛܸܠܵܐܝܼܬܼ: ܐܵܘ ܒܲܤܩܝܼܠܘܼܬܼܵܐ ܕܚܲܕܼ ܚܲܕܼ ܡ̣ܢ ܗܲܕܵܡܵܘ̈ܗܝ ܕܲܢܚܘܼܪ ܟܲܕܼ ܓܠܸܐ ܡ̣ܢ ܡܵܐܢܵܐ: ܐܵܘ ܟܹܝܬܼ ܒܲܤܝܵܐܝܼܬܼ ܢܲܪܦܸܐ ܪܸ̈ܓܼܫܵܘܗܝ: ܡܵܐ ܕܢܵܦܹ̇ܿܩ ܠܲܚܫܲܚܬܐ ܕܦܲܓܼܪܵܐ: ܐܵܘ ܕܢܲܥܸܠ ܬܟܼܝܼܠܵܐܝܼܬܼ ܘܲܒܼܦܵܪܹܗ̄ܤܝܼܵܐ ܐܝܼܕܹܗ ܠܓܼܵܘ ܡܵܐܢܵܘ̈ܗܝ ܘܲܢܡܘܼܫ ܒܓܼܘܼܫܡܹܗ: ܘܗܵܝܕܹܝܢ ܒܵܠ̈ܩܵܢ ܥܠܵܘܗܝ ܐ̄ܚܪ̈ܵܢܝܵܬܼܵܐ ܘܲܐ̄ܚܪ̈ܵܢܝܬܼܵܐ. ܡܵܐ ܕܠܘܼܩܕܲܡ ܙܗܝܼܪܘܼܬܼܵܐ ܕܪܸܥܝܵܢܵܐ ܢܸܫܪܸܐ: ܘܒܲܚܕܼܵܐ ܡ̣ܢ ܗܵܠܹܝܢ ܡܲܗܡܝܵܢܘܼܬܼܵܐ ܢܚܵܘܸܐ: ܘܗܵܝܕܹܝܢ ܡܸܬܼܦܬܲܚ ܥܠܵܘܗܝ ܬܲܪܥܵܐ ܠܪܵܘܪ̈ܒܼܵܬܼܵܐ. ܚܘܼ̈ܫܵܒܲܝܢ ܕܹܝܢ: ܐܲܝܟܼ ܡܲܝ̈ܵܐ ܐܝܼܬܲܝܗܘܿܢ: ܐܲܝܟܼ ܕܲܒܼܬܲܚܘܝܼܬܼܵܐ. ܘܲܟܼܡܵܐ ܕܲܚܒܼܝܼܫܝܼܢ ܡ̣ܢ ܟܠ ܓܲܒܿܗܘܿܢ: ܒܛܲܟܼܤܗܘܿܢ ܪܵܕܹܝܢ. ܐܸܢܕܹܝܢ ܟܠ ܟ̱ܠܹܗ ܐܸܫܟܲܚܘ ܡܲܦܩܵܢܵܐ ܙܥܘܿܪܵܐ: ܡ̣ܢ ܬܲܡܵܢ ܢܵܦ̇̄ܩܝܼܢ ܠܒܲܪ: ܟܲܕܼ ܥܵܒܼ̇ܕܝܼܢ ܬܘܼܪ̈ܥܵܬܼܵܐ ܘܚܘܼܪ̈ܒܹܐ ܤܲܓܝܼ̈ܐܹܐ. ܩܵܐܹ̇ܡ ܓܹܝܪ ܗ̤ܘ ܩܲܛܝܼܢܵܐ ܕܢܵܛܲܤ ܘܲܥܕܲܢ: ܘܲܡܤܲܟܸܐ ܟܲܕܼ ܝܲܬܿܝܼܒܼ ܠܹܠܲܝ ܐܝܼܡܵܡ ܩܕܼܵܡ ܢܚܝܼܪ̈ܲܝܢ ܘܚܵܐܲܪ pb. 289 ܒܲܢ: ܕܐܲܝܢܵܐ ܐܲܪܥܵܐ ܢܸܬܼܦܬܲܚ ܠܹܗ ܥܠܲܝܢ ܒܚܲܕܼ ܡ̣ܢ ܪܸ̈ܓܼܫܲܝܢ: ܐܵܘ ܒܒܲܤܝܘܼܬܼܵܐ ܕܚܲܕܼܵܐ ܡ̣ܢ ܗܵܠܹܝܢ ܕܤܸ̇ܕܼܪܹܬܼ: ܘܡܸܚܕܼܵܐ ܡܫܲܡܲܪ ܥܠܲܝܢ ܗܵܠܹܝܢ ܕܝܼܠܹܗ. ܒܲܙܒܲܢ: ܐܵܦ ܗ̤ܘ ܟܝܵܢܲܢ. ܕܐܵܦ ܗ̤ܘ: ܪܵܚܹ̇ܡ ܢܝܵܚܵܐ ܗ̄ܘ̣: ܘܪܵܚܹ̇ܡ ܥܸܢܝܵܢܵܐ ܤܲܢܝܵܐ: ܘܪܵܚܹܡ ܨܲܕܘܵܐ: ܘܪܵܚܹ̇ܡ ܦܘܼܪܓܵܝܵܐ: ܘܪܵܚܹ̇ܡ ܪܲܦܝܘܼܬܼܵܐ. ܘܡܲܒܘܼܥܵܐ ܕܲܚܲܫܹ̈ܐ܆ ܘܝܲܡܵܐ ܕܲܕܼܠܝܼܚܘܼܬܼܵܐ. ܒܲܙܒܲܢ ܕܹܝܢ: ܗ̤ܘ ܒܥܸܠܕܲܪܲܢ. ܢܚܲܠܸܦ ܡܵܕܹܝܢ ܠܥܲܡ̈ܠܹܐ ܪܵܘܪ̈ܒܹܐ ܘܥܸܠ̈ܠܵܬܐ ܕܩܹܘܲܢܕܹܝܢܘܿܣ ܕܲܫܚܵܩܵܐ: ܒܥܲܡ̈ܠܹܐ ܙܥܘܿܪܹ̈ܐ ܕܲܡܚܵܘܹܝܢܲܢ ܒܗܵܠܹܝܢ ܙܥܘܿܪ̈ܵܝܵܬܼܵܐ ܕܠܵܐ ܡܸܕܸܡ ܐܸܢܹܝܢ: ܕܡܲܨ̈ܝܵܢ ܡܵܘ̈ܠܕܼܵܢ ܐܸܢ ܡܸܬܼܒܲܤ̈ܝܵܢ ܐܵܓܼܘܿܢܹ̈ܐ ܪܵܘܪ̈ܒܹܐ: ܘܥܲܡ̈ܠܹܐ ܥܲܤ̈ܩܲܝ ܠܬܼܘܼܪܵܨܵܐ: ܘܲܩܪ̈ܵܒܹܐ ܡܥܲܪ̈ܩܠܹܐ ܘܫܘܼܚ̈ܢܹܐ ܪܵܘܪ̈ܒܹܐ. ܡܲܢ̣ܘܼ ܕܒܼܢܦܲܩܬܼܵܐ ܙܥܘܿܪܬܵܐ: ܠܵܐ ܢܸܕܼܡܲܟܼ ܫܸܢܬܐ ܢܝܼܚܬܵܐ؟ ܐܘܿ ܚܸܟܼܡܬܐ ܟܡܵܐ ܬܗܝܼܪܲܝܬܿܝ! ܘܲܟܼܡܵܐ ܩܵܕܼܡܵܐ ܚܵܙ̇ܝܵܐ ܐܲܢ̄ܬܿܝ ܟܠܡܸܕܸܡ ܡ̣ܢ ܪܘܼܚܩܵܐ! ܛܘܼܒܼܵܘܗܝ ܠܟܼܸܠ ܕܐܸܫܟܿܚܹܟܼܣ: ܕܡ̣ܢ ܕܲܡܟܘܼܬܼܵܐ ܕܛܲܠܝܘܼܬܼܵܐ ܐܸܬܼܚܲܪܲܪ ܠܹܗ: ܗܵܝ̇ ܕܡܸܬܿܬܲܓܪܵܐ ܒܒܲܤܝܘܼܬܼܵܐ ܙܥܘܿܪܬܵܐ ܫܚܵܩܹ̈ܐ ܪܵܘܪ̈ܒܹܐ. ܘܫܲܦܝܼܪ ܐܸܡ݂ܲܪ ܚܲܟܿܝܼܡܵܐ ܚܲܕܼ: ܕܟܲܕܼ ܒܲܙܒܲܢ ܒܲܨܒܘܼܬܼܵܐ ܕܲܡܫܵܟܼܵܐ: ܕܡܸܢܫܹܠܝ ܐܸܬܿܬܿܙܝܼܥ ܘܲܬܼܪܲܨ. ܝܑܼܬܸܒܼ ܒܵܗ̇ ܒܫܵܥܬܼܵܐ: ܗܵܝ̇ ܕܠܵܐ ܫܵܘܝܵܐ ܗ̄ܘ̣ܵܬܼ ܗ̤ܝ ܨܒܼܘܼܬܼܵܐ ܠܕܸܚܠ̱ܬܐ. ܐ̄ܢܵܫ ܕܹܝܢ ܐܲܝܟܼ ܕܒܲܪܦܸܐ ܬܲܪܥܝܼܬܼܵܐ ܓܚܸܟܼ ܒܹܗ ܡܸܛܠܗܵܕܹܐ. ܦܲܢ̣ܝܼ ܠܹܗ ܦܸܬܼܓܼܵܡܵܐ: ܟܲܕܼ ܐܵܡܲ݁ܪ: ܠܵܘ ܡ̣ܢ ܗܵܝ̇ ܕܸܚ̇ܠܹܬܼ: ܡ̣ܢ ܢܸܤܝܵܢܵܐ ܗ̄ܘ̣ ܕܵܚܹ̇ܠܢܵܐ: ܕܲܟܼܡܵܐ ܙܲܒܼ̈ܢܝܼܢ ܒܲܤܝܘܼܬܼܵܐ ܕܒܲܙܥܘܿܪ̈ܝܵܬܼܵܐ: pb. 290 ܠܩܹܘܲܢܕܲܝܢܘܿܣ ܕܲܒܼܪܵܘܪ̈ܒܼܵܬܼܵܐ ܡܲܝܬܿܝܵܐ. ܡܸܛܠܗܵܕܹܐ: ܒܗܵܝ̇ ܓܹܝܪ ܕܐܸܬܿܬܿܙ̇ܝܼܥܹܬܼ ܘܠܝܼܓܼ ܠܝܼܓܼ ܬܸܪܨܹ̇ܬܼ ܝܸܬܼܒܹ̇ܬܼ: ܒܲܕܩܹ̇ܬܼ ܥܲܠ ܢܲܦܫܝܼ: ܕܥܝܼܪܵܐ ܐ̄ܢܵܐ ܗ̄ܘ̣. ܕܐܵܦܠܵܐ ܬܘܼܒܼ: ܘܲܒܼܗܵܝ̇ ܕܠܵܐ ܫܵܘܝܵܐ ܠܕܼܚܠܬܼܵܐ ܒܵܤܹ̇ܐ ܐ̄ܢܵܐ. ܦܝܼܠܵܤܘܿܦܘܼܬܼܵܐ ܗ̣̄ܝ ܓܹܷܝܪ ܗܵܕܹܐ: ܕܐ̄ܢܵܫ ܒܲܙܥܘܿܪ̈ܝܵܬܼܵܐ ܕܡܸܬܼܚܵܘ̈ܝܵܢ ܡܸܢܹܗ ܥܝܼܪܵܐܝܼܬܼ: ܢܝܵܚܹ̈ܐ ܪܵܘܪ̈ܒܹܐ ܐܵܤܹ̇ܢ ܠܢܲܦܫܹܗ. ܘܲܕܼܠܵܐ ܢܸܕܼܡܲܟܼ ܥܲܕܼ ܢܹܐܬܸܐ ܘܢܸܡܛܹܝܘܗܝ ܗ̤ܘ ܓܸܕܼܫܵܐ: ܐܸܠܵܐ ܠܥܸܠ̈ܠܵܬܐ ܕܡ̣ܢ ܩܕܼܵܡ ܙܲܒܼܢܵܐ ܢܹܐܚܘܿܕܼ: ܘܒܲܨܒܼܘܼܬܼܵܐ ܕܫܵܘܝܵܐ ܠܲܫܚܵܩܵܐ ܩܲܠܝܼܠ ܢܸܩܕܘܿܡ ܢܸܙܒܸܢ ܗܵܝ̇ ܕܪܲܒܵܐ. ܤܲܟܼ̈ܠܹܐ ܓܹܝܪ: ܝܲܩܝܼܪ ܥܠܲܝܗܘܿܢ ܢܚܵܝܵܐ ܙܥܘܿܪܵܐ ܕܩܲܪܝܼܒܼ: ܡ̣ܢ ܡܲܠܟܿܘܼܬܼܵܐ ܕܪܲܚܝܼܩܵܐ. ܛܵܒܲܐ ܗ̣̄ܝ ܕܲܒܼܟܲܫܝܼܪܘܼܬܼܵܐ ܫܘܼܢܵܩܹ̈ܐ ܠܲܡܤܲܝܒܵܪܘܼ: ܡ̣ܢ ܕܢܸܬܼܪܲܦܸܐ ܥܲܠ ܥܲܪܤܵܐ ܕܲܢܚܵܝܹ̈ܐ ܒܡܲܠܟܿܘܼܬܼܵܐ: ܒܓܼܘܼܢܵܝܵܐ ܕܫܲܦܠܘܼܬܼܵܐ. ܚܲܟܿܝܼ̈ܡܹܐ ܓܹܝܪ: ܚܲܒܿܝܼܒܼ ܥܠܲܝܗܘܿܢ ܡܵܘܬܵܐ: ܘܠܵܐ ܠܡܸܬܼܚܲܤܵܕܼܘܼ ܒܠܵܐ ܥܝܼܪܘܼܬܼܵܐ ܕܥܲܠ ܨܸܒܼ̈ܘܵܬܼܗܘܿܢ. ܗ̤ܘܲܝܬܿ ܓܹܝܪ ܥܝܼܪ ܥܲܠ ܚܲܝ̈ܝ̈ܟ: ܐܵܡܲ݁ܪ ܦܝܼܠܵܤܘܿܦܵܐ. ܒܲܪܬܼ ܓܸܢܤܵܐ ܗ̣̄ܝ ܠܲܡ ܓܹܝܪ ܕܡܵܘܬܵܐ ܫܲܪܝܼܪܵܐ: ܕܲܡܟܘܼܬܹܗ ܕܪܸܥܝܵܢܵܐ܀ ܦܝܼܠܵܤܘܿܦܵܐ ܕܒܹܝܬܼ ܐܲܠܵܗܵܐ ܒܵܤܝܼܠܸܣ ܐܵܡܲ݁ܪ: ܐܲܝܢܵܐ ܕܒܲܙܥܘܿܪ̈ܝܵܬܹܗ ܐܝܼܬܼܵܘܗܝ ܫܲܦܠܵܐ: ܕܢܸܬܼܟܲܫܲܪ ܒܪܵܘܪ̈ܒܼܵܬܹܗ: ܠܵܐ ܬܗܲܝܡܢܝܼܘܗܝ. ܐܲܝܠܹܝܢ ܕܡܸܛܠܵܬܼܗܹܝܢ ܨܵܒܹ̇ܐ ܐܲܢ̄ܬܿ ܕܬܸܚܸܐ: ܡܸܛܠܵܬܼܗܹܝܢ ܕܗܵܠܹܝܢ ܠܲܡܡܵܬܼ ܠܵܐ ܬܸܬܼܩܲܛܲܥ ܠܵܟܼ.