Discourse 38

ܙܥܘܿܪܘܼܬܼ ܢܲܦܫܵܐ: ܐܵܬ̤ܵܐ ܐܝܼܬܹܝܗ̇ ܕܲܡܩܲܛܥܘܼܬܼܵܐ. ܐܸܡܵܐ ܕܹܝܢ ܠܬܲܪ̈ܬܲܝܗܹܝܢ ܐܝܼܬܹܝܗ̇: ܒܲܤܝܘܼܬܼܵܐ. ܒܲܪܢܵܫܵܐ ܕܲܚܘܼܠܬܼܵܢܵܐ: ܒܲܬܼܪܹܝܢ ܟܘܼܪ̈ܗܵܢܝܼܢ ܡܫܵܘܕܲܥ ܕܲܟܼܪܝܼܗ. ܒܪܸܚܡܬܐ ܕܦܲܓܼܪܵܐ: ܘܒܲܒܼܨܝܼܪܘܼܬܼ ܗܲܝܡܵܢܘܼܬܼܵܐ. ܪܸܚܡܲܬܼ ܦܲܓܼܪܵܐ: ܐܵܬ̤ܵܐ ܐܝܼܬܹܝܗ̇ ܕܠܵܐ ܗܲܝܡܵܢܘܼܬܼܵܐ. ܐܲܝܢܵܐ ܕܲܡܒܲܤܲܪ ܥܠܵܘܗܝ: ܡܫܵܘܕܲܥ ܥܲܠ ܢܲܦܫܹܗ ܕܢܲܫܲܪ ܠܐܲܠܵܗܵܐ: ܘܲܡܤܲܟܸܐ ܠܕܲܥܬܼܝܼ̈ܕܼܵܢ. ܐܸܢ ܐܝܼܬܼ ܕܒܸܠܥܵܕܼ ܐܘܼ̈ܠܨܵܢܹܐ ܐܸܬܼܩܲܪܲܒܼ ܠܘܵܬܼ ܐܲܠܵܗܵܐ: ܐܵܦ ܐܲܢ̄ܬܿ ܐܸܬܿܕܲܡܵܐ ܒܹܗ. ܠܒܼܝܼܒܼܘܼܬܼܵܐ ܕܠܸܒܵܐ: ܘܗܵܝ̇ ܕܲܢܒܲܤܲܪ ܐ̄ܢܵܫ ܥܲܠ ܟܠ ܩܹܘܲܢܕܹܝܢܘܿܣ: ܡ̣ܢ ܚܕܼܵܐ ܡ̣ܢ ܬܲܪܬܹܝܢ ܥܸܠ̈ܠܵܢ ܗܵܘ̇ܝܵܐ. ܐܵܘ ܡ̣ܢ ܩܲܫܝܼܘܼܬܼ ܠܸܒܵܐ: ܐܵܘ ܡ̣ܢ ܗܲܝܡܵܢܘܼܬܼܵܐ ܤܲܓܼܝܼܐܬܼܵܐ ܕܒܲܐܠܵܗܵܐ. ܘܲܠܗܵܝ̇ ܡ̇ܢ: ܢܲܩܝܼܦܵܐ ܪܵܡܘܼܬܼܵܐ. ܠܗܵܕܹܐ ܕܹܝܢ: ܡܘܼܟܼܵܟܼܵܐ ܕܠܸܒܵܐ. ܠܵܐ ܡܸܫܟܲܚ ܒܲܪܢܵܫܵܐ ܕܢܸܩܢܸܐ ܬܘܼܟܼܠܵܢܵܐ ܕܥܲܠ ܐܲܠܵܗܵܐ: ܐܸܠܵܐ ܐܘܼܩܕܲܡ ܫܲܡܠܝܼ ܨܸܒܼܝܵܢܹܗ ܒܲܡܢܵܬܼܵܐ. ܬܘܼܟܼܠܵܢܵܐ ܕܥܲܠ ܐܲܠܵܗܵܐ ܘܓܲܢ̄ܒܵܪܘܼܬܼܵܐ ܕܠܸܒܵܐ: ܤܵܗܕܘܼܬܼܵܐ ܕܬܹܐܪܬܵܐ ܡܵܘܠܕܼܵܐ ܠܗܹܝܢ. ܡ̣ܢ ܤܵܗܕܘܼܬܼܵܐ ܠܲܡ ܫܲܪܝܼܪܬܵܐ ܕܪܸܥܝܵܢܲܢ: ܐܝܼܬܼ ܠܲܢ ܬܘܼܟܼܠܵܢܵܐ ܠܘܵܬܼ ܐܲܠܵܗܵܐ. ܤܵܗܕܘܼܬܼܵܐ ܕܪܸܥܝܵܢܵܐ ܗܵܘ̇ܝܵܐ: ܡ̣ܢ ܗܵܝ̇ ܕܐ̄ܢܵܫ ܠܵܐ ܒܤܝܼܪ ܡ̣ܢ ܢܲܦܫܹܗ ܕܐܲܗܡ̣ܝܼ ܡ̣ܢ ܘܵܠܝܼܬܼܵܐ ܟܡܵܐ ܕܐܸܫܟܲܚ. ܐܸܢ ܠܸܒܲܢ ܠܵܐ ܒܵܤܲܪ ܠܲܢ: ܓܲܠ̈ܝܵܢ ܐܸܢܹܝܢ ܐܲܦܲܝ̈ܢ ܠܘܵܬܼ ܐܲܠܵܗܵܐ. ܓܲܠܝܘܼܬܼ ܐܲܦܹ̈ܐ ܕܹܝܢ: ܡ̣ܢ ܕܘܼܒܵܪܹ̈ܐ ܬܲܩ̈ܢܹܐ: ܘܡ̣ܢ ܬܲܪܥܝܼܬܼܵܐ ܫܲܦܝܼܪܬܵܐ ܗܵܘ̇ܝܵܐ. ܩܲܫܝܵܐ ܗ̣̄ܝ ܠܲܡܫܲܡܵܫܘܼ ܥܲܒܼܕܘܼܬܼܵܐ ܠܦܲܓܼܪܵܐ. ܐܲܝܢܵܐ ܕܹܝܢ ܕܩܲܠܝܼܠ ܡ̣ܢ ܤܲܓܝܼ ܐܲܪܓܸܫ̣ ܒܤܲܒܼܪܹܗ: ܠܵܐ pb. 292 ܬܘܼܒܼ ܡܸܬܿܛܦܝܼܣ ܠܡܸܦܠܲܚ ܠܗܵܕܹܐ ܐܵܢܲܢܩܹܐ ܕܡܵܪܵܐ ܗܵܢܵܐ ܩܲܫܝܵܐ܀ ܫܸܬܼܩܵܐ ܐܲܡܝܼܪܵܐ ܘܲܢܛܘܼܪܬܵܐ ܘܲܢܛܘܼܪܬܵܐ ܕܫܸܠܝܵܐ: ܡ̣ܢ ܚܕܼܵܐ ܡ̣ܢ ܬܠܵܬܼ ܥܸܠ̈ܠܵܢ ܗܵܘܹ̇ܐ ܚܘܼܡܤܵܢܗܹܝܢ ܒܐ̄ܢܵܫ. ܐܵܘ ܡܸܛܠ ܫܘܼܒܼܚܵܐ ܕܲܒܼܢܲܝ̈ܢܵܫܵܐ: ܐܵܘ ܡܸܛܠ ܛܢܵܢܵܐ ܚܲܡܝܼܡܵܐ ܕܲܡܝܲܬܿܪܘܼܬܼܵܐ: ܐܵܘ ܕܥܸܢܝܵܢܵܐ ܡܸܕܸܡ ܐܲܠܵܗܵܝܵܐ ܐܝܼܬܼ ܠܹܗ ܡ̣ܢ ܠܓܼܵܘ: ܕܲܢܓܼܝܼܕܼ ܠܘܵܬܹܗ ܪܸܥܝܵܢܵܐ. ܐܲܝܢܵܐ ܕܹܝܢ ܕܗܵܠܹܝܢ ܐ̄ܚܪ̈ܵܝܵܬܼܵܐ ܠܲܝܬܿ ܠܹܗ: ܐܲܝܟܼ ܕܡ̣ܢ ܐܵܢܲܢܩܹܐ: ܒܗܵܝ̇ ܩܲܕܼܡܵܝܬܼܵܐ ܟܪܝܼܗ. ܡܝܲܬܿܪܘܼܬܼܵܐ ܐܝܼܬܹܝܗ̇: ܠܵܐ ܗ̄ܘ̣ܵܐ ܦܘܼܪ̈ܫܵܢܹܐ ܤܲܓܝܼ̈ܐܹܐ ܕܓܲܠܝܘܼܬܼ ܤܘܼܥܪ̈ܵܢܹܐ ܕܦܲܓܼܪܵܐ: ܐܸܠܵܐ ܠܸܒܵܐ ܕܚܲܟܿܝܼܡ ܒܤܲܒܼܪܹܗ: ܕܡܲܠܘܸܬܼ ܠܗܘܿܢ ܠܲܥ̇ܒܼܵܕܹ̈ܐ ܢܝܼܫܵܐ ܬܪܝܼܨܵܐ. ܙܲܒܼ̈ܢܝܼܢ ܓܹܝܪ ܤܲܓܼ̈ܐܵܢ: ܕܟܲܕܼ ܤܘܼܥܪ̈ܵܢܹܐ ܠܵܐ ܝܵܗ̇ܒܿܝܼܢ ܐܝܼܕܼܵܐ ܠܦܘܼܠܚܵܢܵܐ: ܪܸܥܝܵܢܵܐ ܡܸܫܟܲܚ: ܘܒܸܠܥܵܕܲܝܗܘܿܢ ܡܸܬܼܝܲܬܲܪ. ܦܲܓܼܪܵܐ ܕܹܝܢ: ܒܸܠܥܵܕܼ ܚܸܟܼܡܬܹܗ ܕܠܸܒܵܐ: ܐܵܦܠܵܐ ܟܲܕܼ ܢܸܦܠܘܿܚ ܡܸܫܟܲܚ ܝܵܬܲܪ. ܠܵܐ ܒܪܲܡ ܡܚܲܡܤܸܢ ܒܲܪܢܵܫܵܐ ܕܐܲܠܵܗܵܐ: ܐܸܡܲܬܼܝ ܕܐܝܼܬܼ ܐܲܬܼܪܵܐ ܠܦܘܼܠܚܵܢܵܐ ܕܫܲܦܝܼܪ̈ܵܬܼܵܐ: ܕܠܵܐ ܗ̄ܘ̣ܵܐ ܐܵܦ ܒܓܲܠ̈ܠܝܵܬܼܵܐ ܢܚܵܘܸܐ ܚܘܼܒܹܗ ܒܥܲܡܠܵܐ ܕܦܘܼܠܚܵܢܗܹܝܢ. ܛܲܟܼܤܵܐ ܡ̇ܢ ܩܲܕܼܡܵܝܵܐ: ܠܟܼܠܙܒܲܢ ܡܲܨܠܲܚ. ܬܪܲܝܵܢܵܐ ܕܹܝܢ: ܐܲܝܬܼ ܐܸܡܲܬܼܝ ܕܡܲܨܠܲܚ: ܘܐܝܼܬܼ ܐܸܡܲܬܼܝ ܕܠܵܐ. ܠܵܐ ܬܸܤܒܲܪ ܠܵܟܼ ܕܲܨܒܼܘܼܬܼܵܐ ܗ̣̄ܝ ܙܥܘܿܪܬܵܐ: ܕܐ̄ܢܵܫ ܥܸ̈ܠܠܵܬܼܵܐ ܕܚܲܫܹ̈ܐ ܗ̤ܘܲܝ̈ ܪ̈ܲܚܝܼܩܵܢ ܘܡܲܒܼ̈ܥܕܼܵܢ ܡܸܢܹܗ. ܡܙܝܼܥܵܢܘܼܬܼܵܐ ܡ̇ܢ ܕܗܲܕܵܡܹ̈ܐ ܬܲܚ̈ܬܵܝܹܐ: ܗܵܝ̇ ܕܒܸܠܥܵܕܼ ܚܘܼ̈ܫܵܒܹܐ ܚܲܪܝܼܦܵܐܝܼܬܼ ܗܵܘ̇ܝܵܐ: ܐܵܘ ܟܹܝܬܼ ܗܲܢܝܼܢܵܐܘܼܬܼܵܐ ܫܟܼܝܼܪܬܵܐ: ܗܵܝ̇ ܕܪܵܦ̇ܬܐ ܠܬܲܚܬܿ ܡ̣ܢ ܫܘܼܪܵܐ ܚܲܡܝܼܡܵܐܝܼܬܼ: ܘܕܼܵܒܼ̇ܪܵܐ ܠܢܲܦܫܵܐ pb. 293 ܒܫܵܢܝܘܼܬܼܵܐ ܠܒܲܪ ܡ̣ܢ ܨܸܒܼܝܵܢܵܐ. ܕܠܵܐ ܦܘܼܠܵܓܼ: ܡ̣ܢ ܟܲܪܤܵܐ ܕܡܲܠܝܵܐ ܬܸܬܼܗܲܝܡܲܢ ܠܵܟܼ ܕܢܵܒܼ̇ܥܵܐ ܒܹܗ ܒܦܲܓܼܪܵܐ. ܙܲܝܢܵܐ ܡܚܲܤܢܵܐ ܕܒܼܵܐܓܼܘܿܢܵܐ ܗܵܢܵܐ ܢܸܬܼܚܫܸܒܼ ܠܵܟܼ ܕܐܝܼܬܹܝܗ̇: ܕܐ̄ܢܵܫ ܡ̣ܢ ܚܙܵܬܼܵܐ ܕܢܸܫܹ̈ܐ ܗܘ̤ܵܐ ܪܲܚܝܼܩ. ܗܵܘ̇ ܡܸܕܸܡ ܕܲܟܼܝܵܢܵܐ ܤܵܥܲܪ ܒܚܲܝܠܹܗ: ܐܵܦܠܵܐ ܒܥܸܠܕܲܪܵܐ ܡܸܫܟܲܚ ܤܵܥܲܪ. ܠܵܐ ܬܸܤܒܲܪ ܠܵܟܼ ܕܲܟܼܝܵܢܵܐ ܛܵܥܹ̇ܐ ܥܕܲܡܵܐ ܠܡܵܘܬܵܐ: ܠܡܸܕܸܡ ܕܡ̣ܢ ܐܲܠܵܗܵܐ ܒܫܸܪ̈ܫܵܘܗܝ ܐܸܙܕܪܲܥ ܘܐܸܬܿܛܡܲܪ: ܠܝܘܼܒܵܠܹܗ ܕܲܟܼܝܵܢܲܢ ܘܲܠܒܼܘܼܚܪܵܢܲܢ ܕܒܼܵܐܓܼܘܿܢܵܐ. ܗܵܟܲܢܵܐ ܠܟܼܠ ܪܸܓܿܬܐ ܕܐܝܼܬܼ: ܪܲܚܝܼܩܘܼܬܼܵܐ ܕܨܸܒܼ̈ܘܵܬܼܵܐ ܡܲܕܼܡܟܼܵܐ ܠܵܗ̇ ܒܗܲܕܵܡܹ̈ܐ: ܘܠܲܐܒܿܝܼܕܼܘܼܬܼܵܐ ܘܲܠܛܘܼܥܝܲܝ ܝܵܗ̇ܒܵܐ ܥܘܼܗܕܵܢܵܗ̇܀ ܐ̄ܚܪ̈ܵܢܹܐ ܐܸܢܘܿܢ ܚܘܼ̈ܫܵܒܹܐ ܕܨܸܒܼ̈ܘܵܬܼܵܐ ܪ̈ܲܚܝܼܩܵܬܼܵܐ: ܕܥܵܒܼ̇ܕܝܼܢ ܡܲܥܒܲܪܬܵܐ ܫܚܝܼܡܬܐ ܒܪܸܥܝܵܢܵܐ: ܘܙܵܘܥܵܐ ܥܲܡܘܼܛܵܐ ܘܩܲܪܝܼܪܵܐ ܕܡ̣ܢ ܢܲܦܫܹܗ ܗܵܘܹ̇ܐ. ܘܲܐ̄ܚܪ̈ܵܢܹܐ ܐܸܢܘܿܢ ܕܡ̣ܢ ܡܠܘܿܐܵܐ ܚܲܝܵܐ: ܕܛܵܒܲܥ ܠܬܲܪܥܝܼܸܬܼܵܐ ܒܚܸܙܘܵܐ ܠܵܐ ܡܸܬܿܛܲܥܝܵܢܵܐ: ܘܡ̣ܢ ܩܘܼܪܒܵܐ ܡܝܼܪ ܠܹܗ ܠܚܲܫܵܐ: ܟܲܕܼ ܡܬܲܪܤܸܐ ܠܹܗ ܐܲܝܟܼ ܡܸܫܚܵܐ ܠܕܸܠܩܹܗ ܕܲܫܪܵܓܼܵܐ: ܗܵܘ̇ ܕܡ̣ܢ ܟܲܕܼܘܼ ܛܲܦܛܸܦ̣ ܘܩܲܪܝܼܒܵܐ ܗ̄ܘ̣ܵܐ ܠܕܼܘܼܥܵܟܼܵܐ: ܘܕܼܵܠܲܚ ܠܹܗ ܠܝܲܡܹܗ ܕܓܼܘܼܸܫܡܵܐ ܒܝܲܕܼ ܙܵܘܥܵܘ̈ܗܝ ܕܠܝܼ̈ܚܹܐ ܥܲܠ ܤܦܝܼܢ̄ܬܵܗ̇ ܕܬܲܪܥܝܼܬܼܵܐ܀ ܗ̤ܝ ܡܸܬܿܬܿܙܝܼܥܵܢܘܼܬܼܵܐ ܕܡ̣ܢ ܟܝܵܢܵܐ ܠܚܘܿܕܼܵܐܝܼܬܼ ܡܸܢܵܗ̇ ܘܠܵܗ̇: ܗܵܝ̇ ܕܡ̣ܢ ܐܲܠܵܗܵܐ ܒܵܪܘܿܝܵܐ ܐܲܤܝܼܢܵܐ ܒܲܢ ܠܬܲܪܒܿܝܼܬܼܵܐ ܕܥܵܠܡܵܐ ܕܦܲܓܼܪܵܐ: ܒܸܠܥܵܕܼ ܬܵܘܤܲܦܬܵܐ ܕܡ̣ܢ ܠܒܲܪ: ܠܡܸܫܓܲܫ ܠܨܸܒܼܝܵܢܵܐ ܡ̣ܢ ܫܲܦܝܼܘܼܬܹܗ: ܠܲܡܕܼܵܘܕܼܘܼܬܹܗ ܡ̣ܢ ܢܲܟܼܦܘܼܬܼܵܐ: ܠܵܐ ܡܸܫܟܿܚܵܐ. ܠܵܐ ܓܹܝܪ ܝܵܗܹ̇ܒܼ ܐܲܠܵܗܵܐ ܚܲܝܠܵܐ ܠܲܟܼܝܵܢܵܐ: ܠܡܸܙܟܵܐ ܠܨܸܒܼܝܵܢܵܐ ܡܝܲܬܿܪܵܐ ܕܲܠܘܵܬܹܗ. ܐܸܠܵܐ ܐܸܡܲܬܼܝ ܕܡܸܙܕܟܸܐ ܐ̄ܢܵܫ ܡ̣ܢ ܚܸܡܬܵܐ ܘܡ̣ܢ ܪܸܓܿܬܵܐ: pb. 294 ܠܵܘ ܗܵܝ̇ ܕܒܲܟܼܝܵܢܵܐ ܤܝܼܡܵܐ ܥܵܨ̇ܝܵܐ ܠܹܗ ܠܡܸܦܲܩ ܡ̣ܢ ܬܚܘܼܡܹܗ ܕܲܟܼܝܵܢܵܐ: ܘܬܸܗܘܸܐ ܠܒܲܪ ܡ̣ܢ ܘܵܠܝܼܬܼܵܐ: ܐܸܠܵܐ ܬܵܘܤܲܦܬܐ ܕܲܚܢܲܢ ܥܵܒܼܕܝܼܢܲܢ ܥܲܠ ܗܵܝ̇ ܟܝܵܢܵܝܬܐ: ܒܝܲܕܼ ܥܸܠ̈ܠܵܬܐ ܕܨܸܒܼܝܵܢܵܐ. ܐܲܠܵܗܵܐ: ܟܠܡܸܕܸܡ ܕܲܥ̣ܒܲܕܼ: ܫܲܦܝܼܪ ܘܲܒܼܟܲܝܠܵܐ ܥ̣ܒܲܕܼ. ܘܲܟܼܡܵܐ ܕܲܡܫܘܼܚܬܐ ܕܝܼܠܗܹܝܢ ܕܲܟܼ̈ܝܵܢܵܝܵܬܐ ܬܪܝܼܨܵܐܝܼܬܼ ܒܲܢ ܢܛܝܼܪܵܐ: ܠܲܢ ܠܡܸܓܼܪܲܦ ܐܲܝܟܼ ܕܲܒܼܡܵܡܘܿܠܵܐ ܠܒܲܪ ܡ̣ܢ ܐܘܼܪܚܵܐ ܕܢܵܡܘܿܤܵܐ ܕܐܲܠܵܗܵܐ: ܠܵܐ ܥܵܨ̈ܝܵܢ. ܐܸܠܵܐ ܙܵܘ̈ܥܹܐ ܡܫܲܝ̈ܢܹܐ ܢܵܒܲܗ ܒܲܠܚܘܿܕܼ ܦܲܓܼܪܵܐ ܒܡܸܬܿܬܿܙܝܼ̈ܥܵܢܘܵܬܹܗ. ܗܵܟܼܘܵܬܼ: ܟܡܵܐ ܕܒܲܠܚܘܿܕܼ ܝܵܕܼܥܝܼܢ ܚ̄ܢܲܢ ܕܐܝܼܬܼܵܘܗܝ ܗ̤ܘ ܚܲܫܵܐ: ܠܵܘ ܕܹܝܢ ܘܐܵܦ ܕܲܢܚܲܬܼܚܸܬܼ ܐܵܘ ܕܲܢܥܲܟܲܕܪ ܠܪܲܗܛܵܐ ܕܢܲܟܼܦܘܼܬܼܵܐ ܘܲܢܕܼܵܘܸܕܼ: ܐܵܘ ܡ̣ܢ ܡܫܲܝܢܘܼܬܼܵܐ ܠܚܸܡܬܼܵܐ. ܐܸܢܕܹܝܢ ܐܝܼܬܼ ܐܸܡܲܬܼܝ ܕܲܚܢܲܢ ܢܸܬܼܝܲܥܲܢ ܒܡܸܬܼܪ̈ܲܓܼܫܵܢܝܵܬܼܵܐ: ܗܵܕܹܝܢ ܕܡܸܛܠܵܬܼܗܹܝܢ ܘܚܸܡܬܵܐ ܕܠܵܐ ܒܲܟܼܝܵܢܵܐ ܡܥܵܕܼܵܐ ܠܡܸܤܲܒܼ ܚܹܐܦܵܐ: ܐܵܘ ܒܡܹܐܟܼܠܵܐ ܘܲܒܼܡܲܫܬܿܝܵܐ ܝܲܬܿܝܼܪܵܐ: ܐܵܘ ܒܲܚܙܵܬܼܵܐ ܕܲܒܼܩܲܪܝܼܒܼܘܼܬܼܵܐ ܕܐܲܢ̄ܬܿܬܼܵܐ ܢܸܬܼܐܡܸܢ: ܐܵܘ ܒܬܲܫ̈ܥܝܵܬܼܵܐ ܕܲܥܠܹܝܗ̇: ܗܵܢܹܝܢ ܕܡܸܢܗܹܝܢ ܢܘܼܪܵܐ ܪܸܓܿܬܼܵܢܵܝܬܐ ܡܥܵܕܼܵܐ ܡܸܬܼܒܲܥܪܪܵܐ ܒܓܼܘܼܫܡܵܐ: ܡ̣ܢ ܗܵܪܟܵܐ ܠܲܡܫܲܝܢܘܼܬܼܵܐ ܗܵܝ̇ ܕܲܟܼܝܵܢܵܐ: ܠܘܵܬܼ ܒܲܥܪܝܼܪܵܝܘܼܬܼܵܐ ܠܡܸܬܿܕܒܼܵܪܘܼ ܚܲܝܠܵܐ ܤܵܝܡܝܼܢܲܢ: ܐܵܘ ܒܡܲܠܝܘܼܬܼܵܐ ܕܟܼܘܼ̈ܡܘܿ ܕܲܒܼܘܲܪ̈ܝܼܕܹܐ: ܐܵܘ ܒܝܲܕܼ ܚܸܙ̈ܘܹܐ ܡܫܲܚ̈ܠܦܹܐ ܕܨܸܒܼ̈ܘܵܬܼܵܐ܀ ܐܝܼܬܼ ܗ̄ܘ̣ ܕܹܝܢ: ܘܐܵܦ ܕܡ̣ܢ ܡܸܫܬܲܒܼܩܵܢܘܼܬܼܵܐ ܕܡ̣ܢ ܡܲܤܒܿܪܵܢܘܼܬܼܵܐ. ܒܪܲܡ ܗܵܕܹܐ: ܠܵܘ ܕܗܵܝ̇ ܐܝܼܬܹܝܗ̇. ܠܗܵܠܹܝܢ: ܩܪ̈ܵܒܹܐ ܕܚܹܐܪܘܼܬܼܵܐ ܩܵܪܹܝܢܲܢ: ܕܐܝܼܬܹܝܗ̇ ܐܘܼܪܚܵܐ ܕܲܟܼܝܵܢܵܐ ܕܓܼܵܘܵܐ. ܩܪܵܒܼܵܐ ܕܡ̣ܢ ܡܸܫܬܲܒܼܩܵܢܘܼܬܼܵܐ ܕܡ̣ܢ ܥܸܠܲܬܼ ܡܲܤܒܪܵܢܘܼܬܼܵܐ ܗܵܘܹ̇ܐ ܢܸܕܥܝܼܘܗܝ: ܐܸܡܲܬܼܝ ܕܟܲܕܼ ܒܥܲܡ̈ܠܹܐ ܘܲܙܗܝܼܪܘܼܬܼܵܐ ܢܘܼܓܼܪܵܐ ܐܝܼܬܲܝܢ: ܘܲܠܒܲܪ ܡ̣ܢ pb. 295 ܗܵܠܹܝܢ ܥܸ̈ܠܵܠܵܬܐ ܡܸܬܿܬܿܝܼܥ ܥܠܲܝܢ ܚܹܐܦܵܐ ܕܪܸܓܿܬܼܵܐ ܕܲܠܒܲܪ ܡ̣ܢ ܚܲܝܠܵܐ. ܕܫܲܪܟܵܐ ܕܹܝܢ: ܡ̣ܢ ܪܲܦܝܘܼܸܬܲܢ ܗܵܘܹ̇ܝܢ ܒܲܢ. ܟܝܵܢܵܐ ܐܸܡܲܬܼܝ ܕܬܼܵܘܤܲܦܬܵܐ ܒܝܲܕܼ ܪܸ̈ܓܼܫܹܐ ܐܵܘ ܒܝܲܕܼ ܟܲܪܤܵܐ ܢܵܤܹ̇ܒܼ: ܠܡܸܛܲܪ ܡܸܟܹܝܠ ܠܲܡܫܘܼܚܬܼܵܐ ܗܵܝ̇ ܩܲܕܼܡܵܝܬܵܐ ܕܲܓܼܒܼܝܼܠܬܹܗ: ܠܵܐ ܡܸܬܿܛܦܝܼܣ. ܐܲܝܢܵܐ ܕܹܝܢ ܕܠܐܘܼ̈ܠܨܵܢܹܐ ܘܟܼܵܘܫܵܐ ܡܲܤܠܸܐ: ܒܠܵܐ ܨܸܒܼܝܵܢܹܗ: ܕܠܲܚܛܵܗܹ̈ܐ ܢܲܚܸܒܼ ܡܸܬܼܐܠܸܨ. ܕܠܵܐ ܗܸܢܘܿܢ ܓܹܝܪ ܕܢܸܬܼܪܲܚܲܩ ܡ̣ܢ ܓܘܼܪ̈ܵܓܹܐ ܕܲܒܼܬܲܪܥܝܼܬܼܵܐ: ܠܵܐ ܡܸܫܟܿܚܝܼܢܲܢ: ܟܡܵܐ ܕܗܵܢܘܿܢ ܤܵܓܹܝܢ: ܗܵܠܹܝܢ ܒܵܨ̇ܪܝܼܢ. ܡܸܛܠ ܕܐܘܼ̈ܠܨܵܢܹܐ: ܡܛܲܠܩܵܢܹ̈ܐ ܐܸܢܘܿܢ ܕܗܲܢܝܼܐܘܼܬܼ ܚܲܫܹ̈ܐ. ܢܚܵܝܹ̈ܐ ܕܹܝܢ ܡܪ̈ܲܒܿܝܵܢܹܐ: ܘܡܲܝܬܝܵܢܹ̈ܐ ܕܝܼܸܠܗܘܿܢ. ܡܵܕܹܝܢ ܐܸܬܼܝܲܕܼܥܲܬ̤ ܢܲܗܝܼܪܵܐܝܼܬܼ: ܕܐܲܠܵܗܵܐ ܘܡܲܠܲܐܟܼܵܘ̈ܗܝ ܒܐܘܼ̈ܠܨܵܢܹܐ ܡܸܬܼܚܲܕܹܝܢ. ܤܵܛܵܢܵܐ ܕܹܝܢ ܘܦܵܠܚܵܘ̈ܗܝ: ܒܲܢܝܵܚܹ̈ܐ. ܡܸܛܠ ܕܐܸܢ ܦܘܼܩܕܵܢܵܘ̈ܗܝ ܕܐܲܠܵܗܵܐ ܒܛܘܼܪ̈ܦܹܐ ܕܦܲܓܼܪܵܐ ܡܸܫܬܲܡܠܹܝܢ: ܚܢܲܢ ܕܹܝܢ ܠܗܵܠܹܝܢ ܢܲܤܠܸܐ: ܡܵܕܹܝܢ ܠܹܗ ܠܗܵܘ̇ ܕܐܝܼܬܼܵܘܗܝ ܤܵܝܘܿܡܵܐ ܕܦܘܼ̈ܩܕܵܢܹܐ ܡܸܬܼܦܲܪܤܝܼܢܲܢ ܠܡܲܤܠܵܝܘܼ. ܐܲܝܟܲܢܵܐ ܕܲܒܼܝܲܕܼ ܚܲܫܹ̈ܐ ܕܐܝܼܬܲܝܗܘܿܢ ܝܲܠܕܵܐ ܕܲܢܝܵܚܹ̈ܐ: ܠܗܵܝ̇ ܕܐܝܼܬܹܝܗ̇ ܥܸܠܬܼܵܐ ܕܲܡܝܲܬܿܪܘܼܬܼܵܐ ܢܒܲܛܸܠ. ܗܵܢܵܘ ܕܹܝܢ: ܐܲܠܝܼܨܘܼܬܼܵܐ. ܒܵܗ̇ ܒܲܡܫܘܼܚܬܵܐ ܕܲܢܩܲܪܸܒܼ ܠܲܢܝܵܚܹ̈ܐ ܨܹܐܕܲܝܢ: ܒܹܗ ܒܲܙܢܵܐ ܐܲܬܼܪܵܐ ܠܚܲܫܹ̈ܐ ܥܵܒܼ̇ܕܝܼܢܲܢ. ܒܗܵܝ̇ ܕܲܒܼܦܲܓܼܪܵܐ ܕܐܲܠܝܼܨ: ܠܵܐ ܡܨܹܝܢ ܦܵܗܹ̇ܝܢ ܚܘܼ̈ܫܵܒܹܐ ܒܲܤܪ̈ܝܼܩܵܬܵܐ. ܐܸܡܲܬܼܝ ܕܹܝܢ ܕܲܒܼܚܲܕܼܘܼܬܼܵܐ ܐ̄ܢܵܫ ܢܤܲܝܒܲܪ ܛܘܼܪ̈ܵܦܹܐ: ܐܵܦ ܕܲܢܦܲܓܸܕܼ ܠܚܘܼ̈ܫܵܒܹܐ: ܚܲܝܠܵܐ ܝܲܬܝܼܪܵܐ ܐܝܼܬܼ ܠܹܗ. ܒܗܵܝ̇ ܕܐܵܦܠܵܐ ܗܸܢܘܿܢ ܚܘܼ̈ܫܵܒܹܐ ܡܲܡܐܢܝܼܢ ܒܥܲܡ̈ܠܹܐ. ܐܸܡܲܬܼܝ ܗܵܟܹܝܠ ܕܒܲܪܢܵܫܵܐ ܒܥܘܼܗܕܵܢܵܐ ܕܒܼܝܼ̈ܫܵܬܹܗ ܩܲܕܼܸ̈ܡܵܝܵܬܐ ܠܲܩܢܘܿܡܹܗ ܒܐܘܼ̈ܠܨܵܢܹܐ ܢܢܲܓܸܕܸ: ܗܵܝܕܹܝܢ ܐܵܦ ܐܲܠܵܗܵܐ ܠܲܢܝܵܚܹܗ ܡܸܬܼܦܲܪܲܣ. ܐܲܝܟܼ ܡ̇ܢ ܕܚܵܕܹܐ: pb. 296 ܕܲܚ̣ܙܵܝܗܝ ܕܗ̤ܘ ܩܲܕܸܡ ܦܤܲܩ̣ ܥܲܠ ܢܲܦܫܹܗ ܓܙܵܪ ܕܝܼܢܵܐ ܡܸܛܠ ܡܲܤܛܝܵܢܘܼܬܼܵܐ ܡ̣ܢ ܐܘܼܪܚܹܗ: ܕܐܝܼܬܼܵܘܗܝ ܝܲܕܸܥܵܐ ܕܲܬܼܝܵܒܼܘܼܬܼܵܐ. ܘܲܟܼܡܵܐ ܕܗ̤ܘ ܡܤܓܸܐ ܐܵܠܹ̇ܨ ܢܲܦܫܹܗ: ܗܵܟܲܢܵܐ ܤܵܓܹ̇ܝܢ ܐܝܼܩܵܪ̈ܵܘܗܝ ܡ̣ܢ ܐܲܠܵܗܵܐ. ܟܠ ܚܲܕܼܘܼܬܼܵܐ ܕܹܝܢ ܕܥܸܠܬܼܵܗ̇ ܠܵܘ ܡܝܲܬܿܪܘܼܬܼܵܐ ܗܘ̤ܵܬܼ: ܗܵܕܹܐ ܒܲܪ ܫܵܥܬܹܗ ܢܸܒܼ̈ܗܹܐ ܕܪܸܓܿܬܵܐ ܡܙܝܼܥܵܐ ܒܗܵܘ̇ ܕܐܸܫܟܿܚܵܗ̇. ܥܲܠ ܟܠ ܪܸܓܿܬܵܐ ܚܵܫܘܿܫܬܵܐ ܕܐܝܼܬܼ ܬܸܫܬܲܟܲܠ ܗܵܕܹܐ: ܠܵܘ ܕܲܟܼܝܵܢܵܐ ܒܲܠܚܘܿܕܼ.