Narsai: For Any Saints Day - ܡܐܡܪܐ ܕܚܕ ܦܪܨܘܦܐ

1 :ܩܵܠܵܐ ܚܲܝܠܵܐ ܕܡܲܟܼܪܸܙ ܚ̈ܝܐ ܫܡܥ݂ܘ ܡܵܝܘ̈ܬܹܐ 2 ܘܲܣܢ݂ܲܘ ܥܵܠܡܵܐ ܘܪ̈ܓܼܝܼܓܼܬܗ ܥܵܒܼܘܿܪ̈ܝܵܬܐ܀ 3 :ܝܘܼܠܦܵܢ ܚܝ̈ܐ ܢܦܼܠ ܒܐܕܢܝ̈ܗܘܢ ܕܒܢܝ̈ ܐܪܥܵܐ 4 ܘܫܒܩܘܼܗܿ ܠܐܪܥܵܐ ܘܚܙ݂ܵܘ ܠܫܡܲܝܐ ܠܘܵܬ ܪ̈ܘܼܚܵܢܐ܀ 5 :ܘܫܡ݂ܥܘ ܗܘܼܘ ܩܵܠܐ ܕܩܿܪܐ ܠܐܢ̈ܫܐ ܠܒܸܝܬ ܐܠܗܐ 6 ܘܲܟܼܕܵܘ ܡܸܢܗܘܢ ܝܘܼܩܪܹܗ ܕܥܵܠܡܵܐ ܘܚܵܙ݂ܵܘ ܠܡܪܘܡܐ܀ 7 :ܕܢܚ ܝܘܼܠܦܢܗ ܕܒܪ ܐܠܗܐ ܒܪ̈ܥܝܢܗܘܢ 8 ܘܐܲܩܸܠܘ ܪܗܛܐ ܒܐܘܪܚ ܪܘܡܐ ܦܵܪܘܿܫܐܝܼܬ܀ 9 :ܫܡܲܥܘ ܦܪ̈ܘܫܐ ܕܐܝܼܬܗܘܼ ܥܠܡܐ ܕܠܐ ܡܬܚܒܠ 10 ܘܫܵܛܘܼܗܝ ܠܗܢܐ ܥܠܡܐ ܕܙܒܼܢܐ ܕܫܿܠܡ ܪܗܛܗ܀ 11 :ܥܠܡܐ ܒܥܠܡܐ ܚܲܠܦܘ ܟ̈ܐܢܐ ܚܲܟܝܼܡܵܐܝܼܬ 12 ܗܢܐ ܕܥܵܒܿܪ ܒܗܘܿ ܕܡ(ܩܲ)ܘܐ ܘܠܐ ܡܬܚܲܒܠ܀ 13 :ܥܘܼܡܪܐ ܙܐܲܒܢܐ ܕܡܠܹܐ ܐܘܪ̈ܐ ܣܢ݂ܘ ܦܪ̈ܘܫܹܐ 14 ܘܲܪܚܸܡܘ ܥܠܡܐ ܕܡܠܹܐ ܛܘܼܒܹ̈ܐ ܘܠܐ ܡܫܬܚܠܲܦ܀ 15 :(ܪ)ܓܐ ܪܒܐ ܥܒܕܘ ܩܕܝܼܫ̈ܐ ܦܵܪܘܫܐܝܼܬ 16 ܘܚܲܠܸܦܘ ܐܪܥܐ ܒܥܘܼܡܪܐ ܪܒܐ ܕܫܡܲܝ̈ܢܐ܀ 17 :ܐܘܿ ܐܓܼܪܐ ܕܒܝܬ ܐܠܗܐ ܢܣܓܝܼ ܐܘ ܫܪܘ 18 ܘܚܲܠܸܦܘ ܐܸܒܠܐ ܒܡܪܓܢܝܬܐ ܕܡܲܠܟܘܼܬ ܪܘܡܐ܀ 19 :ܝܗܒ݂ܘ ܠܐ ܡܸܕܡ ܘܲܩܢܲܘ ܥܘܼܬܪܐ ܕܠܵܐ ܡܬܚܲܠܨ 20 ܒܚܠܡܐ ܕܥܒܲܪ ܫܪܪܐ ܘܚܝ̈ܐ ܕܠܐ ܫܘܼܠܵܡܐ܀ 21 :ܫܡܲܥܘ ܗܘܘ ܩܠܗ ܕܒܪ ܐܠܗܐ ܘ(ܣ)ܚܘ ܠܐܘܼܪܥܗ 22 ܘܠܝܘܼܠܦܵܢܹܗ ܗܘ݂ܘ ܬܠܵܡܝܕܐ ܘܥܲܒ̈ܕܐ ܛܒ̈ܐ܀ 23 :ܚܙ݂ܘ ܕܦܬܝܚ ܠܗ ܓܲܙܗ ܪܒܐ ܩܕܡ ܡܵܝܘ̈ܬܐ 24 ܘܪܗܸܛܘ ܨܐܕܘܗܝ ܘܥܒܪܘ ܡܢܗ ܪܘܚܵܢܐܝܼܬ܀ 25 :ܫܡܥ݂ܘ ܗܝܿ ܕܐܡܪ ܕܣܝܡ ܠܐ ܐܩܢܘܢ ܡܸܕܡ ܒܐܪܥܐ 26 ܘܦܵܕ ܐܝܼܕ̈ܝܗܘܿܢ ܡܢ݂ ܩܢܝܵܢܐ ܘܡܼܢ ܡܲܪ̈ܗܛܐ܀ 27 :ܫܒܩܘ݂ ܥܲܡ̈ܠܗܘܿܢ ܘܢܦܩ݂ܘ (ܥܲܪܛ) ܡܼܢ ܡܲܪܗ̈ܛܐ 28 ܘܚܲܦܛܘ ܪܗܛܐ ܠܘܵܬ ܩܢܝܵܢܐ ܕܙܲܕܝܩܘܬܐ܀ 29 :ܫܒ݂ܩܘ ܐܒܗ̈ܐ ܐܪܦܝܼܘ ܐܚ̈ܐ ܟܦ݂ܪܘ ܒܲܒܠܝ̈ܐ 30 ܘܛܢ݂ܘ ܨܠܝܼܒܐ ܕܥܲܡ̈ܠܐ ܛܒ̈ܐ ܘܛܣܘܠܲܘܡܲܝܐ܀ 31 :ܐܪܦܝܼܘ ܢܸܫ̈ܐ ܘܫܵܛܘ ܒܘܼܣܵܡ̈ܐ ܦܓܪ̈ܢܵܝܹܐ 32 ܘܐܚܢ ܪ̈ܘܼܚܵܢܐ ܚܝ݂ܵܘ ܦܓܪ̈ܢܹܐ ܠܒܼܝܼ̈ܫܲܝ ܚܲܫܐ܀ 33 :ܠܡܵܪܵܐ ܛܵܒܼܵܐ ܕܲܡܠܹܐ ܪ̈ܚܡܹܐ ܢܩܸܦܘ ܩܕܝܼܫ̈ܐ 34 ܕܩܪܐ ܐܢܘܿܢ ܒܚܘܼܒܗ ܪܒܐ ܠܘܬ ܝܘܼܠܦܵܢܗ܀ 35 :ܠܐ ܢܸܕܬ ܠܗ ܠܗܿܘ ܒܲܣܝܼܡܐ ܘܡܠܹܐ ܪ̈ܚܡܹܐ 36 ܕܐܦ ܠܚܛܝ̈ܐ ܢܩܪܐ ܨܐܕܘܗܝ ܒܚܘܼܒܐ ܪܒܐ܀ 37 :ܐܲܘ ܠܘܵܬܝ ܠܐܝܐ ܫܩܝܼܠܵܝ ܡܲܘܒ̈ܠܹܐ ܝܲܩܝܼܪ̈ܬܐ 38 ܐܬܬܢܝܼܚܘ ܨܐܕܝܟ ܘܲܫܕܘ ܝܘܼܩܪܐ ܕܚܛܗܝ̈ܟܘܿܢ܀ 39 :ܐܘܿ ܛܝܒܘܬܼܐ ܕܡܲܠܝܐ ܟܠܗܿ ܡܪܚܡܵܢܘܼܬܐ 40 ܐܘܿ ܡܣܟܹܢܐ ܕܪܡܪܸܡܢ ܫܦܠܐ ܕܐܪܥܵܢܝܹܐ܀ 41 :ܠܐ ܐܡܪ݂ ܗܘ̤ܐ ܕܫܕܘ ܡܲܘܒ̈ܠܐ ܘܟܢ ܐܬܝܬܘܢ 42 ܕܠܐ ܢܬܡܲܚܠܘܿܢ ܡܼܢ ܡܲܪܕܝܼܬܐ ܕܠܘܵܬ ܚܲܝ̈ܐ܀ 43 :ܠܐ ܠܡ ܦܩܕ ܕܦܣܩܘ ܡܲܘܒ̈ܠܐ ܕܚܛܗܝ̈ܟܘܢ 44 ܕܠܐ ܢܸܬܪܦܘܢ ܘܒܲܦܣܵܩ ܣܲܒܪܐ ܢܦܘܫܘܢ ܒܐܲܪܥܐ܀ 45 :ܬܘ ܥܡ ܡܲܘܒ̈ܠܐ ܕܛܗܝ̈ܟܘܢ ܦܩܼܕ ܚܲܢܢܐ 46 ܘܐܢܵܐ ܐܲܫܒܿܘܿܩ ܘܐܚܲܣܹܝܟܼܘܿܢ ܡܼܢ ܚܘܒܝ̈ܟܘܢ܀ 47 ܦܬܝܼܚ ܗ̄ܘ ܐܪܥܐ ܘܠܙܝܼܩܹ̈ܐ ܘܠܚܲܛܝܹ̈ܐ: 48 ܘܲܫܦܝܼܥ ܚܘܼܒܹܿܐ ܕܡܵܪܹ̈ܐ ܒܲܝܬܐ ܘܠܟܼܠ ܩܿܪܹܐ܀ 49 ܒܬܪ ܗܢܐ ܙܵܪܐ ܛܵܒܐ ܕܡܠܹܐ ܪ̈ܚܡܹܐ: pb. f.61v 50 ܪܕܘ ܩܕܝܼܫ̈ܐ ܒܕܵܪ̈ܝܢ ܕܵܪ̈ܝܢ ܘܝܼܪܸܬܘ ܚܲܝ̈ܐ܀ 51 :ܟܕ ܒܐܪܐ ܗܘܼܐ ܘܡܼܢ ܕܐܬܥܲܠܝܼ ܠܘܵܬ ܝܵܠܘܕܗ 52 ܐܘܪܚܢ ܪܘܡܐ ܡܠܗܿ ܣܝܼ̈ܥܵܬܐ ܕܦܓܪ̈ܢܝܐ܀ 53 :ܟܕ ܥܵܒܪ ܗܘܼܐ ܣܦܪܝ ܝܲܡܐ ܕܛܒܪܝܘܣ 54 ܨܵܕ ܨܲܝ̈ܕܐ ܘܥܒܿܕ ܐܢܘܿܢ ܒܢܝ̈ ܥܢܝܵܢܗ܀ 55 :ܕܒܼܪ ܠܦܫܝܼ̈ܛܐ ܘܡܼܠܐ ܐܢܘܿܢ ܚܟܡܲܬ ܚܝ̈ܐ 56 ܘܫܲܕܪ ܐܢܘܿܢ ܠܐܪܒܥܦܢܝ̈ܢ ܠܲܡܣܲܒܿܪܘܼ܀ 57 :ܫܪ݂ܐ ܒܹܝܬ ܡܵܟܼܣܐ ܘܣܲܦܩ ܠܒܲܝܬܗ ܡܼܢ ܡܪ̈ܗܵܛܐ 58 ܘܲܒܩܢܝܵܢܐ ܕܙܕܝܼܩܘܼܬܐ ܣܲܡܸܝܢ ܚܲܝ̈ܘܗܝ܀ 59 :ܐܚܪܢܐ ܡܵܟܣܐ ܥܲܒܕܗ ܫܠܝܼܚܐ ܕܡܠܹܐ ܫܘܼܦܪܵܐ 60 ܘܟܠ ܕܩܢܹܐ ܗܘܼܐ ܝܗܼܒ ܠܣܢ̈ܝܼܩܐ ܘܢܩܦܗ ܘܪܕܐ܀ 61 :ܚܕܵܐ ܙܢܝܼܬܐ ܫܸܡܥܬ̤ ܛܸܒܿܗ ܕܪܹܐ ܩܢܝܢܗܿ 62 ܘܠܸܒܟܲܬ̤ ܪ̈ܓܠܘܗܝ ܘܫܩܠܬ̤ ܡܢܗ ܫܘܼܒܩܢ ܚܲܘ̈ܒܝܗ̈܀ 63 :ܢܲܩܦܘܼܗܝ ܓܲܒܪ̈ܐ ܘܪ̈ܗܸܛܘ ܒܬܪܗ ܥܲܒ̈ܕܐ ܘܚܹܐܪ̈ܐ 64 ܘܟܲܠ (ܙܲܠܝܼܐ) ܕܚܙ݂ܘ ܙܝܼܘ̤ܗ ܐܬܢܲܟܼ̈ܦܘ ܗ̄ܘܼܘ܀ 65 :ܩܲܒܠ ܡܵܟܣ̈ܐ ܘܠܐ ܢܸܕܐ ܠܗ ܡܼܢ ܚܲܛܝ̈ܐ 66 ܘܡܠܗܿ ܟܢ̈ܫܐ ܠܐܘܪܚܐ ܕܡܲܣܟܵܐ ܠܪܘܡܐ ܕܠܥܸܠ܀ 67 :ܓܲܒܪ̈ܐ ܘܢܸܫ̈ܐ ܪܗܛܘ ܗܘܘ ܘܢܲܩܦ̄ܘܼ ܚܘܼܒܵܢܐܝܼܬ 68 ܘܣܲܝܒܪ ܥܡܲܡ̈ܠܐ ܕܙܕܝܩܘܼܬܐ ܡܛܠ ܚܘܼܒܗ܀ 69 :ܘܟܕ ܐܬܥܲܠܝܼ ܘܡܼܢ ܝܡܝܼܢܐ ܕܐܒܘܼܗܝ ܝܼܬܒ 70 ܝܲܬܝܼܪ ܥܲܬܕܹ ܐܘܼܪܲܚ ܪܘܡܵܐ ܒܲܒܢܝ̈ ܐܵܕܵܡ܀ 71 :ܨܵܕܗ ܠܦܘܠܘܿܣ ܟܕ (ܓܵܙܸܡ) ܗ̄ܘܼܐ ܥܠ ܩܕܝܼ̈ܫܘܗܝ 72 ܘܥܲܒܕܗ ܢܝܼܫܵܐ ܠܟܼܠ ܢܣܝܘ̈ܢܐ ܕܡܸܛܬܹܗ܀ 73 :ܕܢܚ݂ ܗܘܼܐ ܢܘܼܗܪܗ ܒܝܬ ܩܛܪܘܿܢܐ ܩܘܼܪܢܹܝܠܘܿܣ 74 ܘܲܥܒܲܕ ܠܒܲܝܬܹܗ ܥܹܕܬܐ ܪܒܬܿܐ ܠܫܘܼ̈ ܕܫܡܸܗ܀ 75 :ܐܩܝܼܡ ܣܵܒܹ̈ܐ ܡܼܢ ܪ̈ܲܟܿܝܼܟܹܐ ܘܡܼܢ ܝܲܩܝܼܪܸ̈ܐ 76 ܘܫܲܕܪ ܐܢܘܿܢ ܒܥܦܪܗܿ ܕܐܪܥܵܐ܀ 77 :ܩܪ݂ܐ ܠܥܠ̈ܝܡܹܐ ܡܼܢ ܒܘܼܣܵܡ̈ܐ ܘܡܼܢ ܦܘܼܢ̄ܩܸ̈ܐ 78 ܘܙܲܘܸܕ ܐܢܘܿܢ ܨܘܡ̈ܐ ܥܡ̈ܝܼܠܐ ܘܲܨܠܵܘܵܬܐ܀ 79 :ܐܕܝܼܩ ܪܡܙܹܗ ܥܲܠ ܟܲܠ̈ܬܼܐ ܒܓܢܘܿܢܲܝ̈ܗܸܝܢ 80 ܘܲܫܒܲܩ ܚܲܬ̈ܢܐ ܒܢ̈ܝ ܡܝܘ̈ܬܐ ܘܐܸܙܲܠ ܒܬܪܗ܀ 81 :ܐܲܚܸܬ ܡܲܠ̈ܟܹܐ ܡܼܢ ܩܵܪ̈ܘܟܐ ܙܘܕܝܼܪܗ ܨܸܒܼܬܐ 82 ܘܒܲܪܓܸܠ ܐܲܪܗܸܛ ܐܢܘܿܢ ܒܐܘܼܪܚ ܪܘܡܐ܀ 83 :ܐܫܠܚ ܐܢܘܿܢ ܡܼܢ ܫܹܐܪ̈ܝܐ ܘܲܢܚ̈ܬܐ ܛܒܹ̈ 84 ܘܐܲܠܒܸܫ ܐܢܘܿܢ ܢܲܚ̈ܬܐ ܒ̈ܠܲܝܐ ܕܡܣܟܿܢܘܼܬܐ܀ 85 :ܕܢܚܼ ܥܲܠ ܡܲܠ̈ܟܐ ܘܕܲܒܲܪ ܐܢܘܿܢ ܚܘܼܒܹܗ 86 ܘܥܼܒܲܕ ܐܸܢܘܿܢ ܛܵܒܹ̈ܐ ܠܟܲܪܘܙܘܼܬܹܗ܀ 87 :ܒܢܝ̈ ܦܵܠܵܛܝܼܢ ܠܡܲܕܒܪܐ ܨܲܗܝܵܐ ܐܲܦܸܩ ܐܸܢܘܿܢ 88 ܘܲܥܒܲܕ ܐܢܘܿܢ ܒܢܝ̈ ܥܢܝܵܢܹܐ ܕܫܡܲܝ̈ܢܐ܀ 89 :ܛܘܼܪ̈ܐ ܘܢܐܪܟܹ̈ܐ ܡܠ݂ܵܐ ܐܢܘܿܢ ܣܸܕܪ̈ܐ ܕܡܫܒ̈ܚܵܘܼܬܐ 90 ܘܡܲܕܒܪܐ (ܦܲ)ܗܝܵܐ ܓܘܼܕ̈ܐ ܣܕܪ ܒܹܗ ܕܒܢܝ̈ ܢܘܼܗܪܐ܀ 91 ܫܩܝܼܦ̈ܐ ܪ̈ܡܐ ܘܪ̈ܫܲܝ ܛܘܼܪ̈ܐ ܡܠܹܝܢ ܩܕܝܼܫܘ̈ܗܝ܆ 92 ܘܪܵܥܿܡܝܼܢ ܡܢܗܘܢ ܩ̈ܠܐ ܪ̈ܚܝܼܡܐ ܕܚܹܝܠ ܚܸܟ̈ܡܵܬܗ܀ 93 :ܢܘܼܪܐ ܕܚܘܼܒܹܗ ܐܪܡܝܼ ܒܐܪܥܐ ܒܪ ܐܠܗܐ 94 ܘܦܓܪܹܗ ܠܥܠܡܐ ܒܪܸܚܡܲܬ ܚܝ̈ܐ ܪ̈ܘܚܵܢܝܹܐ܀ 95 :ܒܢܘܼܪܵܐ ܕܚܘܼܒܗ ܐܲܘܩܕܵܗܿ ܠܪܓܿܬܼܐ ܕܐܪ̈ܥܵܢܝܵܬܼܐ 96 ܘܢܲܦܕܹܗ ܠܥܠܡܐ ܠܗܿܘ ܒܘܼܣܵܡܐ ܕܠܐ ܡܬܚܲܒܲܠ܀ 97 :ܐܲܩܸܠ ܡܸܢܗ ܝܘܼܩܪܐ ܕܘܟ̈ܠܹܐ ܕܡ̈ܠܝܵܢ ܐܘܼ̈(ܟܿ) 98 ܘܟܲܕܢܹܗ ܒܢܝܼܪܗ ܕܗܲܢܝܼ ܘܒܲܣܝܼܡ ܘܢܝܼܚ ܘܡܫܲܝܲܢ܀ 99 :ܣܵܡ ܥܠ ܟܲܬܿܦܹܗ ܡܲܘܟܠܐ ܕܪܘܚܵܐ ܕܛܵܒ ܩܠܝܼܠܐ 100 ܘܐܲܪܨܹܗ ܒܐܘܼܪܚܹܐ ܕܡܲܣܩܵܐ ܠܪܘܡܐ ܠܒܹܬ ܡܲܠܟܘܼܬܐ܀ 101 :ܒܗܕܐ ܐܘܼܚܵܐ ܪܕܘ ܩܲܕܝܼܫ̈ܐ ܒܕܵܪ̈ܝܼܢ ܕܵܪ̈ܝܼܢ 102 ܘܥܡ ܐܠܗܐ ܦܠܸܚܘ ܙܗܝܵܐܝܼܬ ܘܲܩܢ݂ܵܘ ܚܝ̈ܐ܀ 103 :ܒܙܘܕܐ ܐܘܼܚܵܐ ܪܕܵܐ ܩܲܕܝܫܐ ܕܡܵܐ ܕܡܵܪܗ ܪܥܲܡ 104 (ܙܪܝܼܙܵܐܝܼܬܼ) ܦܠܲܚ ܒܐܫܟܵܪܐ ܕܙܕܝܩܘܬܐ܀ 105 ܡܼܢ ܛܲܠܝܘܼܬܗ 106 ܡܼܢ ܛܠܝܘܼܬܹܗ ܠܒܕܗܿ ܠܐܘܼܪܚܵܐ ܕܙܕܝܼܩܘܼܬܐ: pb. f.62r 107 ܘܬܪܝܨܵܐܝܼܬ ܪܕܵܐ ܟܹܐܵܘܵܢܵܐ ܕܩܲܕܝܼܫܘܼܬܐ܀ 108 :ܐܘܫܸܛ ܨܲܘܪܗ ܘܛܢ݂ ܢܝܼܪܹܗ ܕܒܲܪ ܐܲܠܗܐ 109 ܘܟܲܫܝܼܪܐܝܼܬ ܢܓܲܕ ܒܐܫܟܵܪܐ ܕܙܕܝܩܘܼܬܐ܀ 110 :ܫܕܵܐ ܡܼܢ ܟܲܬܦܹܗ ܡܲܘܟܠܐ ܕܥܵܠܡܐ ܕܡܲܠܝܐ ܐܘ̈ܪܹܐ 111 ܘܲܛܢ ܡܼܵܘܒܿܠܵܐ ܕܒܲܪ ܐܠܗܐ ܕܡܲܠܝܐ ܚܲܝ̈ܐ܀ 112 :[...]ܘܿܪ ܐܚܢ ܛܲܒܐ ܡܼܢ ܒܝܬ ܢܫܒܲܘ̄ ܕܥܵܠܡܐ ܣܲܟܼܠܵܐ 113 ܘܒܲܕܡܘܼܬ ܨܲܦܪܐ ܦܠ݂ܛ ܡܼܢ ܦܲܚ̈ܐ ܕܪܓܝܓܬܼܐ܀ 114 :ܥܪ݂ܩ ܡܼܢ ܥܠܡܐ ܕܚܵܢܩ ܠܒܢܘ̈ܗܝ ܒܪ̈ܓܓܬܗ 115 ܘܗܘ̤ܐ ܚܲܒܼܪܐ ܠ̈ܟܐܢܐ ܕܦܠܚ݂ܘ ܥܲܡ ܐܠܗܐ܀ 116 :ܚܵܣܠܹܗ ܦܘܼܡܗ ܡܼܢ ܥܸܢܝܵܢ̈ܐ ܐܪܥܵܢܝܹܐ 117 ܕܒܲܙܡܝܼܪ̈ܬܐ ܪ̈ܘܚܵܢܝܬܼܐ (ܗܿܪܓܼ) ܣܦ̈ܘܵܬܗ܀ 118 :ܡܼܕܵܩ ܚܘܼܫܵܒܹܗ ܡܼܢ ܥܢ̈ܝܵܢܹܐ ܐܪ̈ܥܵܢܵܝܹܐ 119 ܘܠܗܘܼܠ̈ܠܹܐ ܪ̈ܘܚܵܢܹܐ ܦܲܠܥܐ ܥܲܒܼܕܹܗ܀ 120 :ܐܗܡܝܼ ܚܝܵܪܗ ܡܼܢ ܨܒ̈ܘܵܬܗ ܕܥܠܡܐ ܗܵܢܐ 121 ܘܡܸܬܒܲܩܐ ܗܘ݂ܵܐ ܒܗܿܢܘܿܢ ܛܘܼܒ̈ܐ ܕܒܹܝܬ ܐܠܗܐ܀ 122 :ܣܒ݂ܲܪ ܡܲܫܡܲܥܬܹܗ ܕܠܐ ܬܨܘܼܬ ܩ̈ܠܐ ܦܓܼܪ̈ܢܝܹܐ 123 ܘܙܲܟܲܝ ܘܡܲܪܩܗܿ ܕܐܫܡܲܥ ܩ̈ܠܹܐ ܪ̈ܘܚܵܢܝܐ܀ 124 :ܐܣܓ ܠܸܒܗ ܡܢ݂ ܚܲܕ̈ܘܵܬܐ ܕܠܹܐ ܡܸܬܩܕ̈ܝܵܢ 125 ܘܲܙܠܲܚ ܘܲܡܠܝ݂ܗܝ ܟܠ ܚܕ̈ܘܵܬܐ ܫܡܲܝܵܢ̈ܝܵܬܐ܀ 126 :ܚܡܲܠ ܗܘ݂ܐ ܣܲܘܩܹܗ ܡܼܢ ܪ̈ܘܚܵܢܹܐ ܦܓܪ̈ܢܝܹܐ 127 ܘܡܸܬܒܲܣܡ ܗܘ݂ܐ ܒܥܸܛܪܹ̈ܐ ܙܟܲܝ̈ܐ ܕܙܕܝܩܘܼܬܐ܀ 128 :ܨܲܠܸܠ ܗܘܿܢܗ ܡܼܢ ܨܵܐܘܼܬܐ ܕܐܪ̈ܥ̈ܢܝܵܬܼܐ 129 ܘܥܲܠܝܼ ܡܵܡܹܗ ܒܛܲܟܣܵܐ ܪܵܡܵܐ ܕܪ̈ܘܼܚܵܢܹܐ܀ 130 :ܟܲܢܸܫ ܢܲܦܫܹܗ ܡܼܢ ܚܘܼܫܵܒܹ̈ܐ ܦܓܪ̈ܢܝܹܐ 131 ܘܲܙܠܲܚ ܘܲܡܠܵܗܿ ܟܠ ܥܸܢܝܵܢܹ̈ܐ ܐܠܵܗܵܝ̈ܐ܀ 132 :ܫܲܕܪ ܡܲܕܥܹܗ ܠܘܵܬ ܗܿܘ ܡܲܕܥܵܐ ܕܐܠܗܘܼܬܐ 133 ܘܡܬܒܲܩܹܐ ܗܘܼܐ ܟܗܵܢܘܿܢ ܚܝ̈ܐ ܕܠܐ ܫܘܼܠܵܡܐ܀ 134 :ܝܲܗܼܒ ܗܲܕܵܡܵܘܗ̈ܝ ܠܣܲܗܪ̈ܐ ܥܡܝܼ̈ܠܐ ܘܲܨܠܵܘܵܬܐ 135 ܘܩܲܕܝܼܫ (ܪ̈ܓܫܲܘܗܝ) ܒܟܼܠܹܗ ܪܲܗܛܵܐ ܕܙܲܕܝܼܩܘܼܬܐ܀ 136 ܙܠܝܼ ܗܘܼܐ ܙܘܥ̈ܘܗܝ ܒܢܘܼܗܪܗ ܪܒܐ ܕܙܩܝܦܘܬܐ܆ 137 ܘܲܢܗܲܪ ܟܠܹܗ ܒܫܸܡܫܵܐ ܡܫܝܼܚܐ ܕܟܠܗ ܢܘܼܗܪܐ ܗ̄ܘ܀ 138 :ܩܲܕܝܫ ܢܲܦܫܗ ܘܕܟܝܼ ܦܓܪܗ ܡܪܩ ܚܘܫܵܒ̈ܘܗܝ 139 ܘܗܘܼܐ ܟܠܹܗ ܡܵܐܢܵܐ ܕܲܟܼܝܵܐ ܠܪܘܼܡܵܐ ܚܲܝܐ܀ 140 :ܨܠܝܼܒܐ ܕܥܡ̈ܠܐ ܛܝܢ ܗܘܼܐ ܢܲܟܦܐ ܥܠ ܟܬܦ̈ܬܗ 141 ܘܪ̈ܗܛܐ ܪܲܒܵܐ ܠܒܲܝܟ ܗ̄ܘܼܵܐ ܒܐܘܪܚܐ ܕܒܹܝܬ ܡܲܠܟܘܼܬܼܐ܀ 142 :ܙܩܝܼܦܗ ܛܝܢ ܗܘܼܐ ܐܝܟ ܦܘܩܕܝܐ ܕܒܦ ܐܠܗܐ 143 ܘܗܼܘ ܠܡ ܙܩܝܼܦ ܗܘܼܐ ܠܥܵܠܡܐ ܟܠܗ (ܘܠܪ̈ܓܡܵܬܹܗ) 144 :ܒܕܡܘܼܬ ܢܸܫܪܐ ܛܣ ܛܘܼܒܢܐ ܠܥܸܠ ܡܼܢ ܦܚ̈ܐ 145 ܘܲܛܪܲܦܓܸܦܹ̈ܐ ܠܪܘܡܵܐ ܕܠܥܸܠ ܠܥܕܲܬ ܒܼܘܼܩܪܹ̈ܐ܀ 146 :ܙܪܝܼܙ ܗܘܼܐ ܚܲܣܝܵܐ ܒܥܡ̈ܠܐ ܛܒ̈ܐ ܕܙܕܝܩܘܼܬܐ 147 ܘܠܐ ܣܲܒܼܥܵܐܝܼܬ ܡܸܬܥܲܠܹܐ ܗ̄ܘܼܵܐ ܒܩܲܕܝܼܫܘܼܬܵܐ܀ 148 ܒܪܘܿܓܐ ܪܵܡܿܐ ܗܘܿ ܕܒܢ̈ܝܐ ܡܵܡ ܠܲܩܢܘܿܡܹܗ܆ 149 ܘܟܲܫܝܼܪܐܝܼܬ ܦܠܚ ܒܲܩܪܝܬܐ ܕܐܒܘܼ̄ ܟܲܣܝܐ܀ 150 ܠܲܘ ܐܝܟ ܥܲܒܕܐ ܦܠܚ ܟܫܝܼܪܐ ܩܕܡ ܡܵܪܘܼܬܐ܆ 151 ܘܠܘ ܐܓܝܼܪܐ ܚܫܒܼ ܠܲܩܢܘܡܗ ܟܕ ܦܿܠܚ ܗܘܼܐ܀ 152 :ܥܲܒܕܐ ܦܿܠܚ ܟܕ ܡܣܬܿܪܓ ܡܼܢ ܫܘܠܛܢܐ 153 ܐܦ ܐܓܝܪܐ ܡܣܲܟܐ ܠܐܓܪܗ ܘܢܣܿܒ ܫܥܬܗ܀ 154 :ܒܪܐ ܕܝܢ ܦܿܠܚ ܐܝܟ ܕܒܕܝܼܠܗ ܟܲܫܝܼܪܐܝܬ 155 ܘܫܲܪ̈ܝܪܐ ܠܗ ܕܝܪܬܐ ܐܝܼܬܘ̈ ܒܝܬ ܝܠܘܕܗ܀ 156 :ܠܫܡܫܐ ܕܢܥܪܒ ܡܣܲܟܐ ܥܒܕܐ ܐܦ ܐܓܝܪܐ 157 ܘܐܝܟ ܕܒܲܡܫܵܟܼܐ ܦܵܠܚܝܼܢ ܬܪܝܗܘܢ ܘܠܲܘ ܡܼܢ ܚܘܼܒܵܐ܀ 158 ܝܵܪܬܐ ܥܿܡܠ ܪܒܐ ܚܲܡܝܼܡܐܝܼܬ܆ pb. f.62v 159 ܘܠܩܢܝܵܢܘܗܝ ܘܥܪܒܹܐ ܟܠܫܥ݂ ܟܫܝܼܪܐܝܼܬ܀ 160 :ܒܗܵܢܐ ܛܟܣܵܐ ܦܠܚ݂ ܩܕܝܼܫܐ ܕܥܠܘܗܝ ܡܸܠܬܝ 161 ܘܟܠܗܘܢ ܚܲܝܘ̈ܗܝ ܥܡ ܐܠܗܐ ܥܡ݂ܠ ܕܟܝܐܝܼܬ܀ 162 :ܟܠܗܘܢ ܝܘܡܲܘ̈ܗܝ ܩܡ݂ ܒܐܓܘܢܵܐ ܕܙܕܝܩܘܼܬܐ 163 ܘܒܬܲܟܬܘܫܐ ܪܘܵܚܢܝܐ ܕܫܼܥܬܗ ܐܫܬܿܝ܀ 164 :ܠܘܩܒܲܠ ܣܕܪ̈ܐ ܕܚܫ̈ܐ ܘܫܐܕܵܐ ܩܡ ܢܲܨܝܼܚܐ 165 ܘܲܡܚ݂ܐ ܩܪܵܒܐ ܘܲܙܟܼܐ ܘܲܢܦܲܩ ܓܲܢܒܪܐܝܼܬ܀ 166 :ܥܡܓܘܵܝܐ ܘܥܲܡ ܒܪ̈ܝܐ ܣܕܪ ܬܟܬܘܫܐ 167 ܘܬܪܥ݂ ܣܕܪ̈ܐ ܘܢܦܩ ܙܲܟܵܝ ܡܼܢ ܐܓܘܢܐ܀ 168 :ܣܕܪ̈ܐ ܣܒܝܼܣ̈ܐ ܕܚ̈ܫܐ ܙܟܐ ܗܘ݂ܐ ܒܝܕ ܚܘܼܡܣܵܢܗ 169 ܘܝܲܗܠܐ ܕܫܐܕ̈ܐ ܪܕܦ ܩܕܝܫܐ ܒܲܨܠ̈ܘܬ̈ܗ܀ 170 :ܦܠܿܚܐ ܗܘܼܐ ܓܝܪ ܕܡܠܹܝܢ ܡܲܠ̈ܟܐ ܠܐ ܡܵܝܘܬܐ 171 ܘܡܚܲܙܩ ܗܘ݂ܠ ܟܠܗ ܒܕܝܢܵܐ ܕܙܕܝܩܘܼܬܐ܀ 172 :ܠܒܝܼܫ ܗܘ݂ܐ ܚܲܝܠܐ ܕܗܝܡܵܢܘܬܼܐ ܬܪܝܼܨܬ ܫܘܼ̄ 173 ܘܲܒܫܸܪܝܢܐ ܕܙܕܝܩܘܼܬܐ ܚܙܝܼܩ ܗܘܼܐ ܚܲܣܝܐ܀ 174 :ܣܝܼܡ ܗܘܼܐ ܒܪܹܫܗ ܚܕܐ ܣܢܢܘܪܬܐ ܕܪܘܝܵܐ ܚܲܫܠܗܿ 175 ܨܠܝܼܒܐ ܚܲܝܐ ܕܙܝܥܝܼܢ ܡܢܗ ܫܐܕ̈ܐ ܒܝܼܫ̈ܐ܀ 176 :ܠܒܝܢ ܗܘܼܐ ܒܐܝܕܗ ܩܫܬܐ ܪܒܬܐ ܕܨܘܡܵܐ ܙܲܗܝܐ 177 ܘܡܬܝܼܚܐ ܗܘܼܐ ܒܝܲܬܪܐ ܚܠܝܼܡܐ ܕܥܡ̈ܠܐ ܛܒ̈ܐ܀ 178 :ܛܝܼܢ ܗܘܼܐ ܓܐܪ̈ܐ ܕܨ̈ܘ̈ܬܐ ܚܠܝܼܡܲܬ ܓܸܦ̈ܐ 179 ܘܚܵܢܐ ܒܢܝܼܫܐ ܠܐܓܘ̈ܢܝܗܘܿܢ ܕܫ̈ܐܕܐ ܛܪ̈ܘܢܐ܀ 180 ܠܒܝܼܟ ܗܘ݂ܐ ܒܐܦܘ̈ܗܝ ܣܲܒܪܐ ܕܢܘܼܪܐ ܕܪܚܡܲܬ ܡܵܪܗ܆ 181 ܘܒܝܲܡܝܼܢܗ ܢܲܝܙܟܐ ܕܡܲܥܒܸܩ ܒܚܘܼܒܐ ܕܟܝܐ܀ 182 :ܣܐܝܢ ܗܘ݂ܐ ܒܪܓܠܘܗܝ ܚܕ ܛܘܼܝܵܒܐ ܛܢܢܐ ܟܐܢܐ 183 ܘܒܲܕܡܘܼܬ ܒܲܪܩܐ ܥܠ ܣܕܪ̈ܐ ܕܒܢ̈ܝ ܚܫܒܐ܀ 184 :ܩܫܹܐ ܗܘܼܐ ܘܲܠܒܝܼܒ ܙܪܝܼܙ ܗܘ݂ܐ ܘܩܲܠܝܼܠ ܥܝܼܪ ܗܘ݂ܐ ܘܚܦܝܼܛ 185 ܡܗܝܼܪ ܗܘ݂ܐ ܘܢܲܨܝܼܚ ܘܲܒܙܟܘܼܬܐ ܫܠܸܡܘܼ ܬܲܘܬ̈ܘ ܫܘ̄܀ 186 :ܫܐܕܵܐ ܘܚܫ̈ܐ ܐܦܢܝܼܘ ܚܲܨܐ ܩܓܡ ܢܲܨܝܼܚܐ 187 ܘܪܕܝܦܝܢ ܗܘܼܘ ܩܕܡ ܗܘܿ ܦܿܠܚܐ ܕܙܕܝܩܘܼܬܐ܀ 188 :ܬܗܲܪܘ ܒܹܗ ܣܕܪ̈ܐ ܕܫܡܲܝ̈ܢܐ ܠܒܝܼܫ̈ܝ ܢܘܼܗܪܐ 189 ܟܕ ܡܲܒܪܥ ܗܼܘܐ ܘܪܒܐ ܠܫܐܕܵܐ ܒܢ̈ܝ ܚܫܘܟܐ܀ 190 :ܚܕܝܼܘ ܒܗ ܟܢ̈ܫܐ ܕܫܡܝ̈ܢܐ ܘܥܘܼܫܢܐ ܝܲܗܒܘ ܠܗ 191 ܒܗܿܘ ܬܟܬܘܫܐ ܕܥܲܡ ܫܘܼܠܛ̈ܢܐ ܒܢ̈ܝ ܐܟܕ̈ܢܐ܀ 192 :ܐܩܪܸܟܘ ܘܲܙܟܼܐ ܒܥܘܼܫܢܐ ܡܼܢ ܬܟܬܘܫܐ 193 ܘܒܝܬ ܐܠܗܐ ܗܐ ܡܛܒ ܠܗ ܟܠܝܼܠ ܪܒܘܼܬܐ܀ 194 :ܡܲܠܵܚܐ ܗܘܼܘ ܕܕܲܒܲܪ ܐܸܠܦܹܗ ܚܲܟܿܝܼܡܐܝܼܬ 195 ܒܹܝܬ ܡܟܫܘܿܠܘ ܕܝܲܡܐ ܕܠܝܼܚܵܐ ܡܠܹܐ ܟܹܝܡ̈ܘܢܐ܀ 196 :ܟܲܢܫ ܥܘܼܬܪܐ ܕܙܕܝܩܘܼܬܐ ܒܥܡ̈ܠܐ ܛܒ̈ܐ 197 ܘܡܠܗܿ ܠܐܠܗ ܘܚܪ ܠܡܐܢܐ ܕܒܸܝܬ ܐܠܗܐ܀ 198 :ܒܝܡܐ ܪܒܐ ܪܕܐ ܐܓܼܪܐ ܕܗܲܝܡܢܘܼܬܐ 199 ܘܗܼܘ ܐܲܓܪܐ ܘܗܼܘ ܡܲܠܚܐ ܘܩܘܒܪܢܝܛܐ܀ 200 :ܩܒܲܩ ܣܘܟܢܐ ܕܗܝܡܢܘܬܐ ܡܪܬ ܓܲܙ̈ܐ 201 ܘܐܬܩܸܢ ܨܘܡ̈ܐ ܥܡ̈ܝܼܠܗ ܙܗܝ̈ܐ ܘܨܠ̈ܘܬܐ܀ 202 :ܡܬܚ ܟܬܢܐ ܠܒܐ ܕܟܝܵܐ ܘܗܲܘܢܐ ܫܲܦܝܵܐ 203 ܒܚܘܼܛܪܐ ܪܡܬܐ ܨܒܝܥܲܬ ܒܲܓܡܐ ܕܒܲܪ ܐܠܗܵܐ܀ 204 :ܪܘܼܚܐ ܚܲܝܐ ܐܲܦܪܝܢܝ ܐܠܦܹܗ ܙܲܕܝܼܩܐܝܼܬ 205 ܘܠܐ ܐܙܝܼܥܘܗܿ ܡܫܒ̈ܐ ܩܫ̈ܝܐ ܕܪ̈ܓܝܓܬܐ܀ 206 :ܦܪܚ ܥܠ ܓܲܠܝ̈ܐ ܘܛܵܣ ܗܘܼܐ ܘܲܥܒܪ ܥܠ ܡܲܟܫܘ̈ܠܐ 207 ܘܲܒܬܐܓܼܘܪܬܗ ܡܣܲܝܢ ܠܲܠܡܐܢܐ ܕܫܡܝ̈ܢܐ܀ 208 :ܢܛܝܼܪܐ ܐܠܦܹܗ ܒܠܡܹܐܝܢ ܓܲܢܬܐ ܡܲܠܝܲܬ ܛܘܼܒ̈ܐ 209 ܥܕ ܗܐ ܕܢܿܚ ܡܘܿܡ ܢܘܼܚܵܡܐ ܘܦܿܬܚ ܓܲܙܘܗܝ܀ 210 ܠܥܝܢ ܡܲܐ̈ܠܟܐ ܘܒܢܝ̈ܢܐ ܡܩܲܪܒ ܥܘܼܬܪܗ: pb. f.63r 211 ܒܟܢܫܐ ܪܒܐ ܕܟܼܢܝܼܫܝܢ ܒܹܗ ܕܵܪ̈ܐ ܟܠܗܘܿܢ܀ 212 :ܬܲܡܢ ܦܿܬܚ ܓܲܙܵܐ ܪܒܐ ܕܙܕܝܩܘܼܬܐ 213 ܩܕܡ ܗܘܿ ܡܲܠܟܐ ܕܕܝܼܠܗ ܐܢܘܿܢ ܫܡܲܝܐ ܘܐܪܥܐ܀ 214 ܡܲܘܠܸܡ ܥܘܼܬܪܐ ܕܥܡܠ̈ܘܗܝ ܛܒ̈ܐ ܠܡܪܹܐ ܥܘܼܬܪܐ܆ 215 ܘܢܣܿܒܼ ܡܢܗ ܚܝ̈ܐ ܘܛܘܒ̈ܐ ܕܠܐ ܫܘܼܠܵܡܐ܀ 216 :ܒܟܸܢܫܐ ܢܲܟܦܐ ܕܒܬܘܠ̈ܬܐ ܚܲܟܝܼܡ̈ܬܐ 217 ܚܠܝܼܛ ܩܕܝܼܫܐ ܥܲܡ ܠܲܡܦ̈ܝܕܐ ܕܥܡ̈ܠܘܗܝ ܛܒ̈ܐ܀ 218 :ܒܕܐܘܚܲܪ ܚܲܬܢܐ ܕܢܹܐܬܐ ܒܫܘܼܗ̄ ܥܡ ܡܲܠܐܟܘ̈ܗܝ 219 ܢܵܡ ܘܕܡܸܢ ܠܗ ܥܕ ܗܐ ܕܢܿܚܐ ܗܝܿ ܡܐܬܝܬܐ܀ 220 :ܒܟ݂ܢܬ ܙܒܢܐ ܢܡ ܗܘ݂ܵܐ ܚܲܣܝܐ ܙܕܝܩܐܝܼܬ 221 :ܘܗܐ ܠܡ ܡܣܲܟܐ ܠܚܬܢܐ ܕܐܬܿܐ ܘܢܿܦܸܩ ܠܐܘܼܪܥܹܗ 222 :ܗܐ ܡܠܹܐ ܡܐܢܗ ܡܪܚܡܢܘܼܬܐ ܡܸܫܚܐ ܕܟܝܵܐ 223 ܘܪܡ ܠܡܦܹܝܕܗ ܘܢܗܪ ܕܠܩܗ ܢܫܟܝܼܚ ܢܘܼܗܪܗ܀ 224 :ܡܛܲܝܒ ܕܥܬܝܼܕ ܕܢܐܬܐ ܘܢܫܡܲܥ ܕܐܬܼܐ ܚܲܬܢܐ 225 :ܛܼܢ ܠܡܦܝܕܗ ܘܲܢܦܩ݂ ܠܐܘܼܪܥܹܗ ܒܓܠܝܘܼܬ ܐܦ̈ܐ 226 :ܥ̇ܐܠ ܥܲܡܗ ܠܗܿܘ ܒܘܼܣܵܡܐ ܕܠܐ ܡܸܬܚܲܒܠ 227 ܘܗܿܘܐ ܣܡܝܼܟܐ ܒܚܠܘܼܠ ܚܝ̈ܐ ܪ̈ܘܚܵܢܝܐ܀ 228 :ܥܒܕܐ ܗ̄ܘܼ ܛܒܐ ܡܗܲܝܡܢܐ ܘܟܹܐܢܐ ܐܦ ܚܲܟܝܼܡܐ 229 ܕܦܩܕܗ ܡܵܪܹܗ ܥܠ ܦܘܼܪܢܵܣܵܐ ܕܒܢ̈ܝ ܒܲܝܬܹܗ܀ 230 :ܫܩ݂ܠ ܫܘܼܠܛܢܐ ܒܒܝܬܗܿ ܪܒܐ ܕܐܠܗܘܼܬܐ 231 ܘܦܲܪܢܣ ܥܘܼܬܪܐ ܪܘܼܚܵܢܝܐ ܠܒܢ̈ܝ ܒܲܝܬܗ܀ 232 :ܒܙܒܢܗ ܝܗܒ݂ ܗܘ݂ܐ ܦܪܣܐ ܕܚܲܝ̈ܐ ܪܘܼܚܵܢܐܝܼܬ 233 ܘܠܐ ܒܲܨܪ ܗܘ݂ܵܐ ܡܼܢ ܩܢܘܢܐ ܪܘܼܚܢܵܝܐ܀ 234 :ܥܝܼܪܐ ܚܦܝܼܛܐ ܙܪܝܼܙܐ ܬܪܝܼܨܐ ܗܘ݂ܵܐ ܒܬܫܡܬܗ 235 ܘܒܡܬܩܠܐ ܕܙܕܝܩܘܼܬܐ ܬܩܸܠ ܦܘܼܪܢܵܣܲܘܗܝ܀ 236 :ܠܐ ܢܒܗܲܬ ܒܹܗ ܗܝܿ ܡܲܚܫܒܬܐ ܕܡܲܠܝܐ ܬܘܟ̈ܐ 237 ܕܡܚܵܪ ܢܐܬܐ ܡܵܪܹܐ ܒܲܝܬܐ ܐܬܬܢܝܼܚ ܩܲܠܝܼܠ܀ 238 :ܒܗܝܿ ܡܐܬܝܬܐ ܕܡܲܠܝܐ ܙܲܘܥܵܐ ܡܬܒܲܩܐ ܗܘ݂ܐ 239 ܘܩܕܡ ܥܲܝܘ̈ܗܝ ܣܝܼܡ ܗܘ݂ܐ ܟܠܫܵܥ ܝܘܿܡ ܚܘܫܒܵܢܐ܀ 240 :ܠܐ ܡܚ݂ܐ ܠܥܒ̈ܕܐ ܙܒܼܢ̈ܝ ܒܲܕܡܐ ܐܘ ܠܐܘܡ̈ܗܵܬܐ 241 ܘܠܐ ܠܥܸܣ ܘܐܫܬܲܝ ܥܲܡ ܙܠ̈ܝܼܐܐ ܘܥܡ ܪ̈ܘܝܵܐ܀ 242 :ܒܛܟܣܐ ܬܩܢܐ ܘܒܢܟܦܘܼܬܐ ܦܲܪܢܣ ܚܝ̈ܘܗܝ 243 ܘܒܚܲܣܝܘܼܬܐ ܓܡܲܪ ܬܫܡܬܗ ܒܪܹܗ ܕܓܼܢܘܢܐ܀ 244 :ܡܣܲܟܐ ܗܘ݂ܐ ܓܝܪ ܕܢܦܢܐ ܡܪܗ ܘܚܙܐ ܟܘܼܫܪܗ 245 ܟܕ ܥܝܪ ܘܲܚܙܝܼܩ ܘܢܗܿܪ ܟܪܓܗ ܩܕܝܼܫܐܝܼܬ܀ 246 :ܛܘܼܒܐ ܢܛܝܼܪ ܠܗ ܗܘܿ ܕܐܬܡܲܠܠ ܒܦܘܡܐ ܕܟܝܵܐ 247 ܘܡܩܲܒܠ ܠܗ ܠܥܝܢ ܪ̈ܘܼܚܵܢܐ ܘܦܓܪ̈ܢܝܐ܀ 248 :ܟܟܪ̈ܐ ܕܩܲܒܠ ܡܼܢ ܗܘܿ ܡܵܪܐ ܠܐ ܡܵܝܘܿܬܐ 249 ܐܬܬܓܲܪ ܒܗܹܝܢ ܟܫܝܼܪܐܝܼܬ ܘܥܲܦ ܝܘܼܬܪܢܗܝܢ܀ 250 :ܠܐ ܚܦ݂ܪ ܒܐܪܥܐ ܘܛܫܝܼ ܟܣܦܐ ܪܘܼܚܵܢܝܐ 251 ܘܠܐ ܒܲܣܲܪ ܗܘ݂ܐ ܥܲܠ ܫܘܼܠܛܢܗ ܕܡܪܐ ܕܚܙ݂ܩ܀ 252 :ܠܵܐ ܐܗܡܝܼ ܗܘ݂ܐ ܡܢ݂ ܬܐܓܘܪܬܐ ܕܡܲܠܝܐ ܚܝ̈ܐ 253 ܘܠܐ ܒܲܛܠ ܗܘ݂ܐ ܥܠ ܝܘܬܪܢܐ ܕܙܕܝܩܘܼܬܐ܀ 254 :ܐܬܬܓܪ ܗܘ݂ܐ ܒܟܲܟܪ̈ܐ ܕܢܣܒ݂ ܟܫܝܼܪܐܝܼܬ 255 ܘܥܬܝܼܕ ܕܢܫܠ݂ܡ ܥܡܢ ܝܘܼܬܪ̈ܢܐ ܒܓܼܠܘܼܬ ܐܦ̈ܐ܀ 256 :ܡܐ ܕܡܩܲܪܸܒ ܟܲܟܪ̈ܐ ܕܢܣ݂ܒ ܝܘܼܬܪܢܗܝܢ 257 ܚܿܕܐ ܡܪܗ ܘܙܠ̇ܚ ܒܐܦܘ̈ܗܝ ܚܘܼܒܐ ܪܒܐ܀ 258 :ܫܿܡܥ ܡܢܗ ܗܝܿ ܒܲܪܬ ܩܠܐ ܕܡܲܠܝܐ ܛܘܼܒ̈ܐ 259 ܥܲܒܕܐ ܛܒܐ ܥܘܿܠ ܠܚܲܕܘܬܐ ܕܠܐ ܡܸܫܬܪܝܐ܀ 260 :ܥܡ ܒܿܪܬ ܩܿܠܐ ܛܝܿܣܝܼܢ ܨܐܕܘܗܝ ܪ̈ܘܚܵܢܝܐ 261 ܘܡܩܲܒܠܝܢ ܠܗ ܘܡܠܘܝܢ ܠܗ ܠܓܢܘܿܢ ܢܘܼܗܪܐ܀ 262 ܠܨܒܝܵܬ ܡܵܪܗܘܢ ܘܚܿܙܹܝܢ ܥܒ̈ܕܐ ܠܒܝܼܫ̈ܝ ܢܘܼܗܪܐ: pb. f.63v 263 ܘܥܠ ܬܫܡܫܬܐ ܡܛܝܒܼܝܢ ܩ̇ܝܡܝܼܢ ܒܕܚܠܐ ܪܒܐ܀ 264 :ܡܚܕܐ ܕܫܿܡܥܝܢ ܗܝܿ ܒܲܪܬ ܩܿܠܐ ܕܡܲܠܝܐ ܚܝ̈ܐ 265 ܒܕܚܠܐ ܘܚܘܼܒܐ ܡܠܘܝܢ ܟ̈ܐܢܐ ܠܒܝܬ ܡܲܠܟܘܼܬܐ܀ 266 :ܘܗܢ݂ܘܿܢ ܗܘܿܝܢ ܠܘܝܼܬܐ ܠ̈ܟܐܢܐ ܕܚܠ݂ܘ ܫܲܦܝܼܪ 267 ܘܥܠ ܐܝܼܕ̈ܝܗܘܿܢ ܥܒܲܪܘ ܗܘܼܘ ܦܲܚܬܵܐ ܘܝܼܪܬ ܘܚܝ̈ܐ܀ 268 :ܚܠܝܛܐ ܗܼܝ̄ ܥܲܡܗܘܿܢ ܢܦܫܗ ܕܟܐܢܐ ܪܘܚܢܐܝܼܬ 269 ܘܡܐ ܕܐܬܢܲܚܡܘ ܥܲܡܗܘܿܢ ܥܿܐܐ ܠܗ̇ܘ ܒܘܼܣܵܡܐ܀ 270 :ܦܘܪܥܢ ܥܡܠ̈ܘܗܝ ܗܐ ܚܵܐܪ ܠܗ ܒܲܬܪܥ ܪܘܡܵܐ 271 ܘܕܘܼܟܬܗ ܦܩܝܼܕܐ ܒܗܿܝ ܡܫܬܘܬܐ ܕܠܐ ܡܫܬܲܪܝܐ܀ 272 :ܒܢܚ̈ܬܐ ܛܒ̈ܐ ܥܿܐܠ ܚܲܣܝܐ ܠܒܸܝܬ ܡܸܫܬܘܬܐ 273 ܘܠܝܬ ܠܗ ܩܢܛܐ ܒܫܥܬܐ ܕܣܲܥܪ ܡܲܠܟܐ ܣܡ̈ܝܼܟܐ܀ 274 :ܛܘܒܐ ܠܟܸܢܫܢ ܕܐܝܼܬ ܠܗ ܐܒܐ ܒܝܬ ܩܕܝܼܫ̈ܐ 275 ܘܒܨܠ̈ܘܬܗ ܝܛܝܪܝܢ ܣܕܪ̈ܝܢ ܡܼܢ ܢܟܝ̈ܢܐ܀ 276 :ܗܠ ܕܡܘ̈ܬܗ ܙܠܚܝܢ ܒܐܬܪܐ ܕܒܝܬ ܚܘܼܣܵܝܐ 277 ܘܪܫܝܼܡ ܟܘܼܦܪܗ ܥܠ ܩܪ̈ܢܬܗ ܕܡܕܒܚܩܘܼܕܫܐ܀ 278 ܦܓܪܗ ܨܐܕܝܟ ܘܢܲܦܫܹܗ ܒܣܕܪ̈ܐ ܕܫܡܝ̈ܢܐ܆ 279 ܓܪ̈ܡܘܗܝ ܒܐܬܪܢ ܘܪܘܚܹܗ ܒܓܢܬܐ ܡܲܠܝܲܬ ܛܘܼ̈ܒܐ܀ 280 :ܩܡܠ̈ܘܗܝ ܛܒ̈ܐ ܗܐ ܥܒܝܼܕܝܼܢ ܠܲܢ ܒܹܝܬ ܝܘܠܦܢܐ 281 ܘܨܠ̈ܘܬܗ ܫܘܼܪܐ ܪܡܐ ܠܟܢ̈ܫܹܐ ܕܒܢܘ̈ܗܝ܀ 282 :ܗܠ ܕܚܝܼܚܗ ܐܝܬܘܗܝ ܣܝܼܡܬܐ ܠܡܣܟܹܢܘܬܢ 283 ܘܨܠ̈ܘܬܗ ܛܪܕܢ ܟܐܒܹ̈ܐ ܥܡܢ ܟܘܪ̈ܗܢܐ܀ 284 :ܛܘܼܒܐ ܠܟܸܢܫܢ ܕܡܸܙܕܚܝ ܒܗ ܦܓܪܗ ܙܲܗܝܵܐ 285 ܘܗܘܼܐ ܝܵܪܬܐ ܠܥܘܼܡܪܐ ܪܒܐ ܕܟ̈ܐܢܐ ܕܐܩܝܼܡܘ܀ 286 :ܐܲܘ ܚܲܒܝܼܒ̈ܝ ܢܐܚܘܕ ܓܘܣܵܐ ܒܨܠ̈ܘܬܗ 287 ܘܢܡܲܪܐ ܒܹܗ ܘܥܲܡܗ ܢܪܕܐ ܠܐܬܪ ܢܘܼܗܪܐ܀ 288 :ܒܢ̈ܝܐ ܐܝܬܝܢ ܕܐܒܐ ܚܲܣܝܐ ܡܠܹܐ ܛܲܝܒܘܼܬܐ 289 ܒܬܪ ܐܒܘܢ ܢܪܝܼܡ ܠܲܢ ܓܸܦܹ̈ܐ ܠܒܸܝܬ ܐܠܗܐ܀ 290 :ܐܝܟ ܫܘܘ̈ܕܝܐ ܢܗܘܸܐ ܥܲܒ̈ܕܐ ܪ̈ܘܼܚܵܢܝܐ 291 ܕܢܚܐ ܐܒܘܼܢ ܒܟܢܫܐ ܕܒܢܘ̈ܗܝ ܪܘܚܵܢܐܝܬ܀ 292 :ܗܵܐ ܕܡ̈ܘܵܬܗ ܩܕܝܼܫܵܬ̈ܐ ܝܕܥ̈ܐ ܛܒ̈ܐ 293 ܣܕܝܪ̈ܢ ܒܐܘܪܚܵܐ ܕܡܲܣܩܐ ܠܪܘܡܵܐ ܕܒܝܬ ܐܠܗܐ܀ 294 :ܗܵܐ ܥܩ̈ܒܵܬܹܗ ܒܐܘܪܚܵܐ ܬܪܝܼܨܬܐ ܕܙܕܝܩܘܼܬܐ 295 ܢܪܕܐ ܒܬܪܗ ܘܥܠ ܕܘܪ̈ܟܬܗ ܢܣܝܼܡ ܗܠ̈ܟܬܢ܀ 296 :ܒܝܕܥ̈ܐ ܛܒ̈ܐ ܕܦܣ̈ܥܵܬܗ ܩܕܝܼܫܵ̈ܬܐ 297 ܢܪܡܐ ܪܗܛܐ ܥܕܡܐ ܠܘܥܕܵܐ ܪܘܚܵܢܝܐ܀ 298 :ܢܬܪܘܨ ܚܲܝ̈ܝܢ ܒܐܘܪܚܗ ܕܐܒܘܢ ܦܪܘܫܐܝܼܬ 299 ܘܥܡܗ ܢܥܘܠ ܠܗܿܘ ܒܘܼܣܵܡܐ ܕܡܛܝܒ ܠܗ܀ 300 :ܐܝܟ ܗܕܝܢܐ ܚܙ݂ܩ ܗܘ݂ܐ ܐܒܘܢ ܩܕܵܡ ܚܲܒܿܝܼܒܼ̄ܘ 301 ܕܢܚܲܘܐ ܐܘܪܚܵܢ ܪܘܡܐ ܢܗܝܼܪܐܝܼܬ܀ 302 :ܒܫܘܼܠܵܡ ܐܘܼܚܐ ܕܙܕܝܩܘܼܬܐ ܗܐ ܫܪܸܐ ܚܲܣܝܐ 303 ܘܚܵܐܪ ܠܲܒܢܘ̈ܗܝ ܕܢܪܕܘܢ ܒܬܪܗ ܩܕܝܼܫܐܝܬ܀ 304 :ܗܵܐ ܒܲܠܡܐܢܐ ܕܠܲܝܬ ܒܗ ܩܢܛܐ ܣܡܝܢ ܬܓܵܪܐ 305 ܘܠܬܠܵܡܝܼܕܘ̄ ܡܓܼܵܘܙܸܠ ܢܝܼܫܐ ܕܨܐܕܘܗܝ ܢܪܕܘܢ܀ 306 :ܣܠܸܩ ܡܼܢ ܝܲܡܐ ܥܲܡ ܬܐܓܘܪܬܗ ܪܘܚܵܢܝܬܐ 307 ܘܚܵܐܪ ܠܐܠ̈ܦܐ ܕܒܝ̈ܝ ܒܲܝܬܗ ܪ̈ܘܚܢܝܐ܀ 308 :ܪܗܛܗܿ ܠܐܘܼܪܚܵܐ ܒܫܝܼܐܝܬ ܒܪܗ ܕܓܼܢܘܢܐ 309 ܘܲܒܫܘܠܡܗܿ ܗܐ ܢܝܼܚ ܘܫܠܹܐ ܠܟܠ ܡܼܢ ܩܢܛܐ܀ 310 :ܣܡܸܝܢ ܩܕܝܼܫܐ ܠܗܿܘ ܐܘܵܢܐ ܐܚܪܢܐ ܕܐܘܪܚܹܗ 311 ܘܛܲܝܒ ܐܬܪܐ ܠܟܢܫܐ ܕܒܢܘ̈ܗܝ ܪ̈ܘܚܢܝܐ܀ 312 :ܘܐܝܢܐ ܕܪܕܐ ܒܐܘܪܚܐ ܬܪܝܨܬܐ ܒܬܪ ܚܲܣܝܐ 313 ܨܐܕܘܗܝ ܡܬܐܢܝܼܚ ܘܥܲܡܗ ܦܿܪܚ ܠܐܘܪܥ ܡܪܗ܀ 314 ܨܠܘܿܬܗ ܢܸܫܐܠ ܘܒܥܩ̈ܒܵܬܗ ܒܚܘܼܒܐ ܢܸܪܗܛ: pb. f.64r 315 ܕܡܵܐ ܕܐܬܢܲܚܡܢ ܘܠܒܸܫ ܫܘܼܒܚܐ ܒܗ ܢܬܛܲܦܐ܀ 316 :ܨܠܘܿܬܗ ܕܟܐܢܐ ܘܨܠ̈ܘܬܟܘܢ ܒܢܘ̈ܗܝ ܟܲܫܝܼܪ̈ܐ 317 ܢܟܢܫ̈ܢ ܡܒܕܪ̈ܐ ܠܐܘܪܚܐ ܕܡܲܘܒܠܐ ܠܚܝ̈ܐ ܚ̈ܕܬܐ܀ 318 :ܥܲܡܟܼܘܢ ܐܟܢܘܫ ܒܗܿܘ ܥܕܢܐ ܕܥܠ̈ܡܐ ܡܲܪܗܒ 319 ܘܠܐ ܢܢܟܪܘܢܢܝ ܥܒܕ̈ܝ ܡܲܠܟܐ ܠܗܠ ܡܼܢ ܟܐܫܟܘܢ܀ 320 :ܡܐ ܕܡܬܪܗܒܝܼܢ ܓܘ̈ܕܝ ܢܘܼܪܐ ܠܡܸܚܲܬ ܠܐܪܥܐ 321 ܩܕܡ ܒܲܪ ܡܲܠܟܐ ܕܐܬܐ ܡܢܲܚܡ ܓܢܲܚܡ ܓܢܣܲܢ ܫܝܼܛܐ܀ 322 :ܡܵܐ ܕܡܣܬܕܪܝܢ ܟܢ̈ܫܐ ܕܚ̈ܝܼܠܐ ܕܒܝܬ ܓܒܪܐܝܠ 323 ܩܕܵܡ ܗܿܘ ܚܲܝܠܐ ܕܢܸܚܿܬ ܕܢܩܪܹܐ ܫܟܝܼܒ̈ܝ ܥܲܦܪܐ܀ 324 :ܡܐ ܕܣܪ̈ܦܐ ܦܵܪܚܝܼܢ ܛܝܿܣܝܼܢ ܩܕܡ ܡܐܬܝܬܗ 325 ܕܡܪܐ ܕܐܬܐ ܕܢܦܠܘܚ ܚܝ̈ܐ ܟܐܦܝ̈ ܡܝܼ̈ܬܐ܀ 326 :ܡܵܐ ܕܟܪ̈ܘܒܹܐ ܛܝܼܢܝܢ ܡܙܲܝܚܝܼܢ ܠܗܿܝ ܡܲܪܟܒܬܐ 327 ܕܥܠܝܗܿ ܡܪܲܡܪܡ ܗܿܘ ܕܝܿܢܐ ܕܚܝ̈ܐ ܘܡܝܼ̈ܬܐ܀ 328 :ܡܐ ܕܫܝܦܘܪܐ ܐܚܪܵܢܐ ܡܲܙܥܸܩ ܕܚܲܝܲܬ ܡܝܼ̈ܬܐ 329 ܘܢܿܦܠ ܙܲܘܥܐ ܘܪܝܿܒܝܼܢ ܡܝܼ̈ܬܐ ܒܓܼܘ ܕܚܝܼܚܐ܀ 330 :ܡܵܐ ܕܡܲܙܥܩܐ ܩܪܢܐ ܪܒܬܐ ܕܒܸܝܬ ܡܲܠܟܘܼܬܐ 331 ܘܩܿܪܝܐ ܕܵܪ̈ܐ ܡܼܢ ܓܲܘ ܐܪܥܐ ܠܘܿܬ ܢܘܼܚܵܡܐ܀ 332 :ܡܐ ܕܥܲܢܝܼܕ̈ܐ ܕܡܝܼܬܘ ܒܲܡܫܝܼܚܐ ܩܿܝܡܝܼܢ ܠܘܼܩܕܡ 333 ܘܫܵܠܚܝܼܢ ܘܫܿܕܝܢ ܡܵܝܘܿܬܘܼܬܐ ܘܦܵܪܚܝܼܢ ܒܵܐܬܪ܀ 334 :ܡܐ ܕܡܬܟܲܢܫܝܼܢ ܕܵܪ̈ܐ ܟܠܗܘܢ ܠܗܿܘ ܒܝܬ ܕܝܼܢܐ 335 ܘܢܦܿܠ ܙܲܘܥܐ ܘܡܲܡܠܹܝܢ ܫܸܬܩܵܐ ܥܠ ܒܸܪܝ̈ܬܐ܀ 336 :ܡܵܐ ܕܡܬܦܪܝܢ ܓܦ̈ܐ ܠܚܝ̈ܐ ܘܠܫܘܢܵܩܐ 337 ܘܦܵܪܫܝܼܢ ܣܕܪ̈ܐ ܘܠܡܲܠܘܼܬܐ ܘܠܓܼܗܲܢܵܐ܀ 338 :ܒܗܿܘ ܥܸܕܵܢܵܐ ܢܫܟܲܚ ܪ̈ܚܡܸܐ ܟܢܫܢ ܟܠܗ 339 ܘܥܲܡܗ ܕܚܲܣܝܐ ܐܒܘܢ ܟܐܢܵܐ ܢܹܐܪܲܬܼ ܚܝ̈ܐ܀ 340 :ܐܫܘܵܢ ܡܵܪܢ ܠܗܿܘ ܒܘܼܣܵܡܐ ܕܡܢ݂ ܝܲܡܝܼܢܝܢ 341 ܘܥܡ ܩܕܝܼܫ̈ܐ ܒܢܝ̈ ܡܲܠܟܘܼܬܟ ܠܟ ܬܫܒܘܚܬܐ܀ ܥܘܼܢܵܝܵܐ : ܫܘܼܒܚܐ ܠܟ ܕܠܲܝܬ ܐܒܘܵܬܟ܀ ܒܪܐ ܕܣܲܟܝܼܘ ܟ̈ܐܢܐ ܠܣܲܒܪܗ܀