Discourse 42
ܥܸܢܝܵܢܵܐ ܕܫܲܕܲܪ ܠܘܵܬܼ ܐܲܚܘܼܗܝ ܟܝܵܢܵܝܵܐ ܘܪܘܼܚܵܢܵܝܵܐ: ܕܐܲܦܝܼܤܹܗ
ܒܲܟܼܬܼܝܼ̈ܒܼܵܬܵܐ ܕܢܹܐܙܲܠ ܢܸܤܥܪܝܼܘܗܝ ܒܓܼܵܘ ܝܲܬܼܒܵܐ: ܐܲܝܟܼ ܡܲܢ ܕܲܨܗܸܐ
ܠܲܚܙܵܬܹܗ. ܡܒ.
ܠܵܘ ܐܲܝܟܼ ܡܵܐ ܕܤܵܒܲܪ ܐܲܢ̄ܬܿ: ܐܝܼܬܲܝܢ ܚܲܝ̈ܠܬܼܵܢܹܐ: ܐܘܿ ܛܘܼܒܼܵܢܵܐ.
ܐܸܠܵܐ ܟܒܲܪ ܡܦܵܣ ܐܲܢ̄ܬܿ ܒܲܡܚܝܼܠܘܼܬܼܝ: ܦܫܝܼܩ ܠܵܟܼ ܕܹܝܢ ܐܲܒܼܕܵܢܝ.
ܥܲܠ ܗܵܕܹܐ ܐܲܡܝܼܢܵܐܝܼܬܼ ܬܵܒܲܥ ܐܲܢ̄ܬܿ ܡܹܢܝ: ܗܵܝ̇ ܕܟܲܕܼ ܟܝܵܢܵܐ ܬܥܲܠܸܐ
ܡ̣ܢ ܪܸܥܝܵܢܵܐ ܕܝܵܩܹ̇ܕܼ ܒܵܟܼ ܐܲܝܟܼ ܥܝܵܕܹܗ. ܠܵܘ ܫܲܘܝܲܬܼ ܠܨܸܦܬܼܵܐ ܕܐܝܼܬܹܝܗ̇
ܘܠܵܟܼ ܡܸܬܼܚܲܙܝܵܐ: ܐܸܢܗ̤ܘ ܕܡܸܢܲܢ ܡܸܬܼܨܦܵܢܝܼܬܼܵܐ ܬܸܬܼܚܵܘܸܐ. ܠܵܐ ܬܸܒܼܥܸܐ
ܡܹܢܝ: ܗܵܘ̇ ܡܸܕܸܡ ܕܲܠܦܲܓܼܪܵܐ ܘܬܲܪܥܝܼܬܼܵܐ ܡܢܝܼܚ ܐܵܚܝ: ܐܸܠܵܐ
ܕܦܘܼܪܩܵܢܵܗ̇ ܕܢܲܦܫܝ ܐܸܬܼܦܲܪܲܣ. ܩܲܠܝܼܠ ܬܘܼܒܼ ܙܲܒܼܢܵܐ: ܘܲܥܒܲܪܢܲܢ ܡ̣ܢ
ܥܵܠܡܵܐ ܗܵܢܵܐ. ܕܒܲܟܼܡܵܐ ܦܲܪ̈ܨܘܿܦܝܼܢ ܦܵܓܲܥ̇ܢܵܐ ܡܵܐ ܕܐܹܬܸܐ ܠܬܲܡܵܢ:
ܘܒܲܟܼܡܵܐ ܙܢܲܝ̈ܵܐ ܕܐ̄ܢܵܫܵܐ ܘܕܘܼ̈ܟܿܝܬܼܵܐ: ܥܲܕܼ ܐܸܥܛܘܿܦ ܬܘܼܒܼ ܠܕܼܘܼܟܿܬܼܝ؟
pb. 314
ܘܐܲܝܠܹܝܢ ܥܸܠ̈ܠܵܬܵܐ ܕܚܘܼ̈ܫܵܒܹܐ ܡܩܲܒܿܠܵܐ ܢܲܦܫܝ ܒܦܸܓܼܥܲܝ̈ܗܘܿܢ: ܕܡܸܫܬܲܓܼܫܵܐ
ܒܝܲܕܼ ܚܲܫܹ̈ܐ ܕܡܸܬܿܬܿܥܝܼܪܝܼܢ ܒܵܗ̇؟ ܕܲܡܢܵܚܵܐ ܡܸܢܗܘܿܢ ܩܲܠܝܼܠ: ܡܸܢܵܟܼ
ܠܵܐ ܡܟܲܤ̈ܝܵܢ. ܕܡܲܟܿܝܵܐ ܠܹܗ ܗܵܟܹܝܠ ܠܝܼܚܝܼܕܼܵܝܵܐ ܚܙܵܬܼܢܗܘܿܢ ܕܥܵܠܡܵܝܹ̈ܐ:
ܘܐܲܢ̄ܬܿ ܡܦܵܣ ܐܲܢ̄ܬܿ. ܠܵܘ ܒܲܠܚܘܿܕܼ ܕܢܸܫܹ̈ܐ: ܐܸܠܵܐ ܘܐܵܦ ܕܓܲܒܼܪܹ̈ܐ܀
ܘܲܚܙܝܼ ܕܲܟܼܡܵܐ ܫܘܼ̈ܚܠܵܦܹܐ ܡܩܲܒܸܠ ܒܬܲܪܥܝܼܬܹܗ: ܐܲܝܢܵܐ ܕܲܫܠܸܐ ܙܲܒܼܢܵܐ
ܤܲܓܝܼܐܵܐ ܥܲܡ ܢܲܦܫܹܗ: ܐܸܡܲܬܼܝ ܕܬܘܼܒܼ ܒܗܵܠܹܝܢ ܦܵܓܲܥ̇ ܡܸܢܫܹܠܝ:
ܘܡܸܕܸܡ ܕܲܠܒܲܪ ܡ̣ܢ ܥܝܵܕܹܗ ܫܵܡܲܥ ܘܚܵܙܹ̇ܐ. ܐܸܢܕܹܝܢ ܦܸܓܼܥܹ̈ܐ ܕܒܼܢܲܝ̈
ܐܸܤܟܹܡܹܗ: ܡܲܟܹܿܝܢ ܠܐܲܝܢܵܐ ܕܲܪܡܸܐ ܒܐܵܓܼܘܿܢܵܐ: ܘܲܥܕܲܟܹܝܠ ܟܵܬܹ̇ܫ
ܥܲܡ ܒܥܸܠܕܲܪܹܗ: ܐܸܡܲܬܼܝ ܕܲܠܢܝܼܫܹܗ ܠܵܐ ܫܵܠܡ̇ܝܼܢ: ܒܐܲܝܕܵܐ ܒܹܪܵܐ
ܢܸܦܸܠ ܡܵܕܹܝܢ ܕܢܸܬܼܦܲܨܸܐ ܡ̣ܢ ܫܦܵܝܵܐ ܕܲܒܼܥܸܠܕܲܪܲܢ؟ ܝܲܬܝܼܪܵܐܝܼܬܼ ܠܐܲܝܠܹܢܝ
ܕܢܸܤܝܵܢܵܐ ܕܤܲܓܝܼ̈ܐܵܬܼܵܐ: ܝܑܼܕܲܥܬܵܐ ܩܢܹܝܢ ܡ̣ܢ ܟܲܕܘܼ. ܡܸܛܠܗܵܢܵܐ ܕܹܝܢ
ܕܠܵܐ ܐܵܢܲܢܩ̈ܘܿܣ: ܗܵܕܹܐ ܐܸܥܒܸܿܕܼ ܠܵܐ ܐܸܬܛܦܝܼܣ ܠܝܼ. ܠܵܐ ܢܸܛܥܸܐ
ܠܸܒܲܢ ܒܵܬܲܪ ܐܲܝܠܹܝܢ ܕܐܵܡ̇ܪܝܼܢ: ܕܠܵܐ ܒܡܸܕܸܡ ܡܤܵܓܿܦܝܼܢ ܠܲܢ
ܫܸܡܥܵܐ ܘܲܚܙܵܬܼܵܐ: ܘܕܲܫܘܹܝܢܲܢ ܠܲܡ ܒܚܘܼܪܒܵܐ ܘܲܒܼܝܲܬܼܒܵܐ: ܒܩܸܠܵܝܬܲܢ
ܘܲܠܒܲܪ ܒܚܘܼ̈ܫܵܒܲܝܢ: ܒܝܲܕܼ ܢܵܘܚܵܐ ܕܡ̣ܢ ܕܠܘܼܚܝܵܐ: ܟܲܕܼ ܠܵܐ
ܡܩܲܒܿܠܝܼܢܲܢ ܫܘܼܚܠܵܦܵܐ ܒܝܼܫܵܐ: ܘܠܵܐ ܡܲܪܓܫܝܼܢ ܚ̄ܢܲܢ ܒܦܸܓܼܥܹ̈ܐ
ܕܦܪ̈ܨܘܿܦܹܐ ܘܨܸܒܼ̈ܘܵܬܼܵܐ ܒܲܫܚܵܩܵܐ ܕܚܲܫܹ̈ܐ. ܐܲܝܠܹܝܢ ܕܗܵܠܹܝܢ ܐܵܡ̇ܪܝܼܢ:
ܐܵܦܠܵܐ ܟܲܕܼ ܡܸܬܼܡܚܹܝܢ ܝܵܕܼܥ̇ܝܼܢ. ܚܢܲܢ ܓܹܝܪ: ܠܵܐ ܥܕܲܟܹܝܠ ܠܗܵܢ
ܚܘܼܠܡܵܢ ܢܲܦܫܵܐ ܡܲܛܝܼܢ. ܫܘܼ̈ܚܢܹܐ ܐܝܼܬܼ ܠܲܢ: ܤܪ̈ܲܝܵܐ. ܕܐܸܢ ܡ̣ܢ
ܥܨܵܒܼܵܐ ܢܸܫܬܲܒܼܩܘܼܢ ܐܵܦܸܢ ܚܲܕܼ ܝܘܿܡ: ܘܡ̣ܢ ܬܚܹܝܬܼ ܐܸܤܦܠܵܢܝܼܵܐ
ܘܐܲܤܘܿܪܹ̈ܐ ܢܸܦܩܘܼܢ: ܬܵܘܼ̈ܠܥܹܐ ܢܸܪܦܬܼܘܼܢ.
Corpus Text ID:
Source:
Paulus Bedjan (ed.), Mar Isaacus Ninivita. De perfectione religiosa. (Paris/Leipzig: Otto Harrassowitz, 1909).Publication Date: March 5, 2019
Preparation of Electronic Edition:
TEI XML encoding by James E. Walters.Syriac text transcribed by .
Open Access and Copyright:
This electronic edition is designed for open access reuse. The Syriac base text is in the public domain. The TEI XML edition is copyrighted by James E. Walters and is released under a Creative Commons Attribution 4.0 International Public License (CC BY 4.0).
The HTML page is copyrighted by Vanderbilt University and released under a under a Creative Commons Attribution 4.0 International Public License (CC-BY 4.0, https://creativecommons.org/licenses/by/4.0/). Attribution for reuse should follow the suggested citation and also credit the copyright holder of the TEI XML edition.
See details...
How to Cite this Electronic Edition
Note:
Isaac of Nineveh, “Discourse 42” based upon Paulus Bedjan (ed.), Mar Isaacus Ninivita. De perfectione religiosa. (Paris/Leipzig: Otto Harrassowitz, 1909), Digital Syriac Corpus, last modified March 5, 2019, https://syriaccorpus.org/433.Bibliography:
“Discourse 42.” In Mar Isaacus Ninivita. De perfectione religiosa., edited by . Syriaca.org, 2016-. Entry published . https://syriaccorpus.org/433.Show Citation Styles