Isaac of Nineveh: Discourse 45
ܠܲܝܬܿ ܙܵܘܥܵܐ ܛܵܒܼܵܐ: ܕܠܵܘ ܡ̣ܢ ܡܵܘܗܲܒܼܬܼܵܐ ܕܲܠܥܸܠ ܢܵܦܹ̇ܠ ܒܠܸܒܵܐ.
ܘܠܲܝܬܿ ܚܘܼܫܵܒܼܵܐ ܒܝܼܫܵܐ: ܕܠܵܘ ܐܲܝܟܼ ܕܲܒܼܢܸܤܝܘܿܢܵܐ ܡܸܬܼܩܲܪܲܒܼ ܠܢܲܦܫܵܐ.
ܒܲܪܢܵܫܵܐ ܕܲܡܛ̣ܵܐ ܠܝܼܕܲܥܬܵܐ ܕܲܡܚܝܼܠܘܼܬܹܗ: ܡܛ̣ܵܐ ܠܤܵܟܼܵܠܐ
ܕܡܲܟܿܝܼܟܼܘܼܬܼܵܐ܀ ܗܲܕܿܝܵܝܵܐ ܕܛܲܝ̈ܒܿܘܵܬܹܗ ܕܐܲܠܵܗܵܐ ܠܘܵܬܼ ܒܲܪܢܵܫܵܐ:
pb. 322
ܠܸܒܵܐ ܕܡܸܬܿܬܿܙܝܼܥ ܒܩܘܼܒܵܠܛܲܝܒܿܘܼܬܼܵܐ ܐܲܡܝܼܢܵܐ܀ ܗܲܕܿܝܵܝܵܐ ܕܢܸܤ̈ܝܘܿܢܹܐ
ܩܕܼܵܡ ܢܲܦܫܵܐ: ܙܵܘܥܵܐ ܕܲܪܛܘܼܢܝܵܐ: ܕܐܲܡܝܼܢ ܕܵܐܹ̇ܠ ܒܠܸܒܵܐ. ܠܟܼܠ
ܡܚܝܼ̈ܠܵܬܹܗ ܕܒܲܪܢܵܫܵܐ: ܛܵܥܹ̇ܢ ܐܲܠܵܗܵܐ. ܠܒܲܪܢܵܫܵܐ ܕܐܲܡܝܼܢ ܡܪܲܛܸܢ:
ܠܵܐ ܡܤܲܝܒܲܪ ܕܠܵܐ ܪܵܕܹܐ ܠܹܗ. ܢܲܦܫܵܐ ܕܪܲܚܝܼܩܵܐ ܡ̣ܢ ܟ̱ܠܹܗ ܙܲܗܪܵܐ
ܕܝܼܕܲܥܬܼܵܐ: ܒܗܵܠܹܝܢ ܙܵܘ̈ܥܹܐ ܡܸܫܬܲܟܼܚܵܐ. ܦܘܼܡܵܐ ܕܐܲܡܝܼܢ ܡܵܘܕܸܐ:
ܒܘܼܪܟܿܬܼܵܐ ܡܩܲܒܸܠ ܡ̣ܢ ܐܲܠܵܗܵܐ. ܘܠܸܒܵܐ ܕܐܲܡܝܼܢ ܒܩܘܼܒܵܠܛܲܝܒܿܘܼܬܼܵܐ:
ܫܵܟܼܢܵܐ ܒܹܗ ܛܲܝܒܿܘܼܬܼܵܐ܀ ܩܕܼܵܡ ܛܲܝܒܿܘܼܬܼܵܐ: ܡܘܼܟܵܟܼܵܐ ܤܵܗܹ̇ܛ.
ܘܲܩܕܼܵܡ ܡܲܪܕܘܼܬܼܵܐ: ܪܵܗܛܵܐ ܡܲܤܒܿܪܵܢܘܼܬܼܵܐ. ܐܲܝܢܵܐ ܕܡܸܛܠ ܝܑܼܕܲܥܬܵܐ
ܡܸܬܿܬܿܪܝܼܡ ܒܬܹܐܪܬܹܗ: ܒܓܼܘܼܕܵܦܵܐ ܡܸܬܼܢܲܤܸܐ. ܘܐܲܝܢܵܐ ܕܒܲܡܝܲܬܿܪܘܼܬܼܵܐ
ܕܦܘܼܠܚܵܢܵܐ: ܒܙܵܢܝܘܼܬܼܵܐ ܡܸܬܼܡܲܨܲܥ. ܘܕܲܒܼܚܸܟܼܡܬܼܵܐ ܡܸܫܬܲܩܲܠ:
ܒܹܝܬܼ ܦܲܚܹ̈ܐ ܥܲܡܘܼ̈ܛܹܐ ܡܸܬܿܕܵܘܲܕܼ܀ ܒܲܪܢܵܫܵܐ ܕܪܲܚܝܼܩ ܡ̣ܢ ܟ̱ܠܹܗ
ܕܘܼܟܼܪܵܢܵܐ ܕܐܲܠܵܗܵܐ: ܗܵܘ̇ ܕܲܛܥܝܼܢ ܒܠܸܒܹܗ ܡܲܪܢܝܼܬܼܵܐ ܕܥܲܠ ܩܲܪܼܝܼܒܹܗ:
ܒܒܼܝܼܫܘܼܬܼ ܥܘܼܗܕܵܢܵܐ܀ ܐܲܝܢܵܐ ܕܲܡܝܲܩܲܪ ܠܟܼܠܒܲܪܢܵܫ ܒܥܘܼܗܕܵܢܵܐ
ܕܐܲܠܵܗܵܐ: ܡܸܫܟܲܚ ܡܥܲܕܪܵܢܵܐ ܠܟܼܠܒܲܪܢܵܫ: ܒܪܸܡܙܵܐ ܟܲܤܝܵܐ
ܕܐܲܠܵܗܵܐ܀ ܕܢܵܦܹ̇ܩ ܪܘܼܚܵܐ ܥܲܠ ܥܫܝܼܩܵܐ: ܡܸܫܟܲܚ ܤܢܹܐܓܼܪܵܐ
ܠܒܼܵܪܝܹܗ. ܕܝܵܗܹ̇ܒܼ ܕܪܵܥܹܗ ܠܥܘܼܕܼܪܵܢ ܩܲܪܝܼܒܹܗ: ܕܪܵܥܹܗ ܕܐܲܠܵܗܵܐ
ܢܵܤܹ̇ܒܼ ܚܠܵܦܵܘܗܝ܀ ܕܲܡܩܲܛܪܸܓܼ ܠܐܲܚܘܼܗܝ ܥܲܠ ܒܝܼ̈ܫܬܹܗ:
ܡܸܫܟܲܚ ܠܐܲܠܵܗܵܐ ܩܛܹܐܓܼܪܵܢܹܗ. ܕܲܡܬܲܪܸܨ ܠܐܲܚܘܼܗܝ ܒܬܼܵܘܵܢܹ̈ܐ:
ܡܲܐܤܸܐ ܒܝܼܫܬܹܗ. ܕܲܡܩܲܛܪܸܓܼ ܠܹܗ ܒܲܟܼܢܘܼܫܬܼܵܐ: ܡܲܥܫܸܢ ܚܒܼܵܪ̈ܵܬܹܗ.
ܕܡܲܐܤܸܐ ܠܐܲܚܘܼܗܝ ܒܲܝܬܵܐܝܼܬܼ: ܥܲܠ ܥܘܼܫܢܵܐ ܕܚܘܼܒܹܗ ܡܒܲܕܸܩ.
ܘܕܲܡܦܲܪܤܸܐ ܠܹܗ ܠܥܹܝܢ ܚܲܒܼܪ̈ܵܘܗܝ: ܚܲܝܠܵܐ ܕܲܚܤܵܡܹܗ ܐܵܘܕܲܥ̣܀
ܪܵܘܡܵܐ ܕܲܒܼܛܘܼܫܝܵܐ ܡܲܟܸܿܣ: ܐܵܤܝܵܐ ܗ̄ܘ̣ ܚܲܟܹܝܼܡܵܐ. ܘܕܲܠܥܹܝܢ ܤܲܓܝܼ̈ܐܹܐ
pb. 323
ܡܲܐܤܸܐ: ܡܒܲܙܚܵܢܵܐ ܗ̄ܘ̣ ܒܲܫܪܵܪܵܐ. ܐܵܬ̤ܵܐ ܕܲܡܪܲܚܡܵܢܘܼܬܼܵܐ: ܫܘܼܒܼܩܵܢܵܐ
ܕܟܼܠ ܤܘܼܪܚܵܢ. ܘܐܵܬ̤ܵܐ ܕܒܼܝܼܫܘܼܬܼ ܬܲܪܥܝܼܬܼܵܐ: ܫܘܼܚ̈ܠܵܦܹܐ ܕܡܸܠܹ̈ܐ
ܕܨܹܐܕܼܵܘܗܝ ܕܡܲܤܟܿܠܵܢܵܐ܀ ܐܲܝܢܵܐ ܕܠܵܐܤܝܘܼܬܼܵܐ ܡܩܲܪܸܒܼ ܡܲܪܕܘܼܬܼܵܐ:
ܒܚܘܼܒܵܐ ܪܵܕܹܐ. ܘܕܲܢܩܲܡܬܵܐ ܤܝܼܡܵܐ ܬܒܲܥܬܹܗ: ܤܦܝܼܩ ܗ̄ܘ̣ ܡ̣ܢ
ܚܘܼܒܵܐ. ܐܲܠܵܗܵܐ ܪܵܕܹܐ ܒܚܘܼܒܵܐ: ܘܠܵܘ ܐܲܝܟܼ ܕܠܲܢܩܲܡܬܼܵܐ: ܚܵܣ!
ܡܸܛܠ ܕܢܸܬܼܐܲܤܸܐ ܨܲܠܡܹܗ ܒܵܥܹ̇ܐ: ܘܠܵܐ ܢܵܛܲܪ ܪܘܼܓܼܙܵܐ: ܠܙܲܒܼܢܵܐ
ܡܲܪܝܼܕܼ ܡ̣ܢ ܬܘܼܪܨܵܐ. ܡܸܛܠ ܕܠܵܘ ܢܩܲܡܬܵܐ ܕܢܲܦܫܹܗ ܬܵܒܲܥ.
ܗܵܢܵܘ ܢܝܼܫܹܗ ܕܚܘܼܒܵܐ. ܘܡܲܪܕܘܼܬܼܵܐ ܕܚܘܼܒܵܐ: ܡܸܛܠ ܬܘܼܪܵܨܵܐ ܗ̄ܝ.
ܘܲܠܦܘܼܪܥܵܢܵܐ: ܠܵܐ ܡܚܝܼܪܵܐ ܒܢܝܼܫܵܐ܀
ܙܲܕܝܼܩܵܐ ܕܚܲܕܿܝܼܡ: ܠܐܲܠܵܗܵܐ ܕܵܡܹ̇ܐ. ܠܵܐ ܪܵܕܹܐ ܤܵܟܼ ܠܒܲܪܢܵܫܵܐ:
ܡܸܛܠ ܕܢܸܬܼܒܲܥ ܤܲܟܼܠܘܼܬܹܗ. ܐܸܠܵܐ ܕܐܵܘ ܗ̤ܘ ܢܸܬܿܬܲܪܲܨ: ܐܵܘ
ܕܲܐ̄ܚܪ̈ܵܢܹܐ ܢܸܤܬܲܪܕܼܘܼܢ. ܕܲܡܫܲܚܠܦܵܐ ܓܹܝܪ ܡ̣ܢ ܗܵܕܹܐ: ܠܲܝܬܹܿܝܗ̇
ܡܲܪܕܘܼܬܼܵܐ. ܘܗܵܕܹܐ: ܐܲܝܟܼ ܕܲܒܼܨܲܠܡܵܐ ܨܵܐܲܪ ܒܵܗ̇ ܪܘܼܚܵܐ: ܬܲܪܥܝܼܬܼܵܐ
ܕܐܝܼܬܼ ܠܹܗ ܠܐܲܠܵܗܵܐ ܡܬܼܘܿܡܵܐܝܼܬܼ. ܐܲܝܢܵܐ ܕܠܲܐܠܵܗܵܐ ܐܲܝܟܼ ܬܵܒܼܘܿܥܵܐ
ܨܵܒܹ̇ܐ ܕܢܸܪܢܸܐ: ܟܲܕܼ ܠܟܹܐܢܘܼܬܼܵܐ ܤܵܒܲܪ ܕܲܡܩܝܼܡ: ܒܠܵܐ ܛܵܒܼܘܼܬܼܵܐ
ܡܩܲܛܪܸܓܼ ܠܹܗ. ܚܵܣ ܠܹܗ ܠܗܵܘ̇ ܡܲܒܿܘܼܥ ܚܘܼܒܵܐ: ܘܝܲܡܵܐ
ܕܲܡܠܸܐ ܛܵܒܼܘܼܬܼܵܐ: ܕܦܘܼܪܥܵܢܘܼܬܼܵܐ ܫܟܼܝܼܚܵܐ ܒܹܗ. ܢܝܼܫܵܐ ܕܬܲܪܥܝܼܬܹܗ:
ܠܬܼܘܼܪܵܨܵܐ ܗ̄ܘ̣ ܕܲܒܼܢܲܝ̈ܢܵܫܵܐ. ܘܐܸܠܘܼ ܠܵܐ ܕܢܸܫܬܲܠܲܚ ܐܝܼܩܵܪ ܚܹܐܪܘܼܬܼܵܐ:
ܕܲܠܡܵܐ ܐܵܦܠܵܐ ܒܲܟܼܐܵܬܼܵܐ ܡܲܐܤܸܐ ܠܲܢ. ܬܚܘܼܡܵܐ ܕܚܹܐܪܘܼܬܼܵܐ ܒܝܲܕܼ
ܤܘܼܥܪ݁ܵܢܲܝܢ: ܚܲܝܠܵܐ ܕܓܲܠܝܘܼܬܼ ܐܲܦܹ̈ܐ ܡܲܤܪܚܵܐ ܠܲܡܠܝܼܠܘܼܬܼܵܐ. ܘܐܵܦ
ܗܵܕܹܐ: ܠܪܲܒܿܘܼܬܼ ܛܵܒܼܘܼܬܹܗ ܬܸܤܓܘܿܕܼ. ܕܠܵܐ ܐܲܝܟܼ ܕܲܒܼܕܼܝܼܠܹܗ ܨܵܒܹ̇ܐ
ܕܢܸܚܕܹܐ: ܐܸܠܵܐ ܐܲܝܟܼ ܕܲܒܼܙܸܕܼܩܹ̈ܐ ܕܲܥ̇ܒܼܵܕܲܝ̈ܢ. ܕܟܲܕܼ ܕܝܼܠܹܗ ܗ̄ܘ̣
pb. 324
ܟܠܡܸܕܸܡ: ܠܵܐ ܪܵܚܹ̇ܡ ܕܢܸܚܫܘܿܒܼ ܕܝܼܠܹܗ: ܐܸܠܵܐ ܐܲܝܟܼ ܕܲܒܼܕܼܝܼܠܲܢ
ܢܸܬܼܒܲܤܲܡ܀ ܠܦܘܼܬܼ ܛܵܒܼܘܼܬܹܗ ܕܒܲܪܢܵܫܵܐ: ܥܲܠ ܐܲܠܵܗܵܐ ܡܸܬܼܢܲܗܲܪ.
ܘܲܠܦܘܼܬܼ ܕܢܸܬܿܕܲܠܸܐ ܠܘܵܬܼ ܝܑܼܕܲܥܬܹܗ: ܠܚܹܐܪܘܼܬܼ ܢܲܦܫܵܐ ܡܸܬܼܩܲܪܲܒܼ܀
ܐܲܝܢܵܐ ܕܡܸܛܠ ܦܘܼܪܥܵܢܵܐ ܕܲܥܬܼܝܼܕܼ ܡܸܬܼܝܲܬܲܪ ܒܫܲܦܝܝܼܪ̈ܵܬܼܵܐ: ܕܠܝܼܠ
ܗ̄ܘ̣ ܤܲܓܝܼ ܠܫܘܼܚܠܵܦܵܐ. ܐܲܝܢܵܐ ܕܚܲܝܠܵܐ ܕܝܼܕܲܥܬܹܗ ܡܲܬܼܗܲܪ ܠܹܗ:
ܒܲܚܙܵܬܼܵܐ ܕܚܘܼܒܵܐ ܕܐܝܼܬܼ ܠܹܗ ܠܐܲܠܵܗܵܐ: ܗܵܢܵܐ ܐܵܦܸܢ ܒܸܤܪܹܗ
ܢܸܬܼܦܲܤܲܩ: ܠܵܐ ܒܪܸܥܝܵܢܹܗ ܡܸܬܿܬܿܪܝܼܡ: ܘܠܵܐ ܡ̣ܢ ܡܝܲܬܿܪܘܼܬܼܵܐ
ܡܸܫܬܲܓܼܢܸܐ. ܐܲܝܢܵܐ ܕܲܒܼܚܘܼ̈ܒܼܠܹܐ ܕܐܝܼܬܼ ܠܹܗ ܠܐܲܠܵܗܵܐ ܥܠܲܝܢ ܡܸܬܼܢܲܗܲܪ
ܪܸܥܝܵܢܹܗ: ܗܵܢܵܐ ܠܥܘܼܡܩܵܐ ܕܡܘܼܟܵܟܼܵܐ ܢܵܚܹ̇ܬܼ ܒܦܲܓܼܪܹܗ ܘܲܒܼܢܲܦܫܹܗ.
ܩܕܼܵܡ ܕܢܸܬܼܩܲܪܲܒܼ ܒܲܪܢܵܫܵܐ ܠܘܵܬܼ ܝܑܼܕܲܥܬܼܵܐ: ܡܸܬܿܕܠܸܐ ܘܡܸܬܿܬܲܚܬܸܐ
ܒܕܼܘܼܒܵܪܹܗ. ܡܵܐ ܕܹܝܢ ܕܐܸܬܼܩܲܪܲܒܼ ܨܹܝܕܼ ܝܑܼܕܲܥܬܼܵܐ: ܟ̱ܠܹܗ ܡܸܬܿܕܲܠܵܝܘܼ
ܡܸܬܿܕܲܠܸܐ: ܘܟܼܠ ܟܡܵܐ ܕܡܸܬܿܕܲܠܸܐ: ܠܵܐ ܫܵܠܡܵܐ ܡܲܤܲܩܬܵܗ̇
ܕܝܼܕܲܥܬܼܵܐ: ܩܕܼܵܡ ܕܢܹܐܬܸܐ ܗܵܘ̇ ܥܵܠܡܵܐ ܕܬܸܫܒܿܘܿܚܬܼܵܐ: ܘܢܸܤܲܒܼ
ܤܵܟܼܵܐ ܕܥܘܼܬܼܪܹܗ. ܟܡܵܐ ܐܸܢ ܢܸܬܼܓܡܲܪ ܒܲܪܢܵܫܵܐ ܠܘܵܬܼ ܐܲܠܵܗܵܐ:
ܡܹܐܙܲܠ ܗ̄ܘ̣ ܐܵܙܹ̇ܠ ܒܵܬܼܪܹܗ. ܒܥܵܠܡܵܐ ܕܹܝܢ ܕܲܫܪܵܪܵܐ: ܐܲܦܵܘ̈ܗܝ
ܡܚܵܘܸܐ ܠܹܗ: ܠܵܐ ܗ̄ܘ̣ܵܐ ܕܐܝܼܬܼܘܼܬܹܗ. ܟܡܵܐ ܐܸܢ ܢܸܬܼܓܵܘܘܿܢ ܘܲܕܝܼ̈ܩܹܐ
ܒܚܸܙܘܵܘ̈ܗܝ: ܦܸܠ̱ܐܬܼܵܗ̇ ܗ̄ܘ̣ ܕܲܚܙܵܬܼܵܐ ܚܵܙܹ̇ܝܢ: ܐܲܝܟܼ ܨܲܠܡܵܐ ܕܡܸܬܼܚܵܘܸܐ
ܒܝܲܕܼ ܡܲܚܙܝܼܬܼܵܐ. ܬܲܡܵܢ ܕܹܝܢ: ܠܓܸܠܝܵܢܹܗ ܕܲܫܪܵܪܵܐ ܚܵܙܹ̇ܝܢ܀
ܢܘܼܪܵܐ ܕܲܒܼܩܲܝ̈ܤܹܐ ܝܲܒܝܼ̈ܫܹܐ ܐܵܚ̇ܕܵܐ: ܥܲܤܩܵܐܝܼܬܼ ܕܵܥ̇ܟܵܐ. ܘܪܸܬܼܚܵܐ
ܕܒܲܐܠܵܗܵܐ: ܕܲܒܼܠܸܒܵܐ ܕܲܦܤܝܼܩ ܡ̣ܢ ܥܵܠܡܵܐ ܢܵܦܹ̇ܠ: ܢܲܒܼܪܲܫܬܹܗ ܠܵܐ
ܡܸܬܿܕܲܥܟܼܵܢܝܼܬܵܐ ܗ̣̄ܝ. ܘܚܲܪܝܼܦܵܐ: ܐܵܦ ܡ̣ܢ ܢܘܼܪܵܐ. ܚܲܡܪܵܐ ܡܵܐ ܕܥܲܠ̣
ܚܲܝܠܹܗ ܒܫܸܪ̈ܝܵܢܹܐ: ܛܵܥܹ̇ܐ ܗܵܘܢܵܐ ܚܲܬܝܼܬܼܘܼܬܼܵܐ ܕܟܼܠܡܸܕܸܡ.
pb. 325
ܘܥܘܼܗܕܵܢܵܐ ܕܐܲܠܵܗܵܐ ܡܵܐ ܕܐܸܚܲܕܼ ܢܘܿܡܹܐ ܒܢܲܦܫܵܐ: ܥܵܛܹ̇ܐ ܕܘܼܟܼܪܵܢܵܐ
ܕܡܸܬܼܚܲܙ̈ܝܵܢܝܵܬܼܵܐ ܡ̣ܢ ܠܸܒܵܐ. ܪܸܥܝܵܢܵܐ ܕܐܸܫܟܲܚ ܚܸܟܼܡܬܵܐ ܕܪܘܼܚ: ܐܲܝܟܼ
ܐ̄ܢܵܫ ܕܐܸܫܟܲܚ ܐܸܠܦܵܐ ܡܛܲܝܝܲܒܼܬܵܐ ܒܓܼܵܘ ܝܲܡܵܐ. ܕܡܵܐ ܕܝܼܬܸܒܼ ܒܵܗ̇:
ܡܲܥܒܿܪܵܐ ܠܹܗ ܡ̣ܢ ܝܲܡܵܐ ܕܥܵܠܡܵܐ ܗܵܢܵܐ: ܘܲܡܡܲܢܥܵܐ ܠܹܗ ܠܘܵܬܼ ܓܵܙܲܪܬܵܐ
ܕܥܵܠܡܵܐ ܕܲܥܬܼܝܼܕܼ. ܗܵܟܲܢܵܐ ܓܹܝܪ ܐܝܼܬܹܝܗ̇ ܡܲܪܓܫܵܢܘܼܬܼܵܐ ܕܲܥܬܼܝܼ̈ܕܼܵܬܼܵܐ
ܒܥܵܠܡܵܐ ܗܵܢܵܐ: ܐܲܝܟܼ ܓܵܙܲܪܬܵܐ ܙܥܘܿܪܬܵܐ ܒܓܼܵܘ ܝܲܡܵܐ. ܘܐܲܝܢܵܐ
ܕܲܠܘܵܬܼܵܗ̇ ܐܸܬܼܩܲܪܲܒܼ: ܠܵܐ ܬܘܼܒܼ ܡܸܬܿܛܲܪܲܦ ܒܡܲܚܫܘܼ̈ܠܹܐ ܕܗܲܓܵܓܲܝ̈
ܙܲܒܼܢܵܐ. ܬܲܓܵܪܵܐ ܡܵܐ ܕܫܲܡܠܝܼ ܙܸܒܼܢܹܗ: ܠܒܲܝܬܹܗ ܡܸܟܹܝܠ ܡܸܤܬܲܪܗܲܒܼ
ܕܢܹܐܙܲܠ. ܘܕܲܝܪܵܐ ܟܡܵܐ ܕܲܥܕܲܟܹܝܠ ܦܲܚ̣ܫ ܙܲܒܼܢܵܐ ܕܦܘܼܠܚܵܢܹܗ:
ܡܥܵܩ ܕܢܸܦܘܿܩ ܡ̣ܢ ܦܲܓܼܪܵܐ. ܡܵܐ ܕܹܝܢ ܕܐܲܪܓܸܫ̣ ܒܢܲܦܫܹܗ ܕܲܙܒܲܢ
ܩܹܐܪܤܹܗ ܘܲܢܤܲܒܼ ܪܲܗܒܼܘܿܢܹܗ: ܡܸܬܼܪܲܓܼܪܲܓܼ ܠܥܵܠܡܵܐ ܕܲܥܬܼܝܼܕܼ.
ܬܲܓܵܪܵܐ ܟܡܵܐ ܕܲܒܼܝܼܡܵܐ ܗ̄ܘ̣: ܙܵܘܥܵܐ ܫܪܸܐ ܥܲܠ ܗܲܕܵܡܵܘ̈ܗܝ. ܕܕܲܡ
ܢܸܙܕܩܸܦ ܡܲܚܫܘܼܠܵܐ: ܘܢܸܛܒܲܥ ܤܲܒܼܪܵܐ ܕܥܲܡܠܹܗ. ܘܕܲܝܪܵܝܵܐ
ܟܡܵܐ ܕܲܒܼܥܵܠܡܵܐ ܗ̄ܘ̣: ܩܸܢܛܵܐ ܐܲܚܝܼܕܼ ܠܦܘܼܠܚܵܢܹܗ. ܕܕܲܡ
ܢܸܬܿܬܿܥܝܼܪ ܥܠܵܘܗܝ ܟܝܼܡܘܿܢܵܐ: ܘܢܹܐܒܲܕܼ ܥܲܡܠܵܐ ܕܡ̣ܢ ܛܲܠܝܝܘܼܬܼܵܐ
ܠܤܲܝܒܲܘܼܬܼܵܐ. ܬܲܓܵܪܵܐ ܠܝܲܒܼܫܵܐ ܚܵܐܲܪ: ܘܕܲܝܪܵܝܵܐ ܠܥܸܕܵܢ ܡܵܘܬܹܗ.
ܡܲܠܵܚܵܐ ܒܟܼܵܘܟܿܒܼܵܐ ܚܵܐܲܪ: ܡܵܐ ܕܪܵܕܹܐ ܡܸܨܥܲܬܼ ܝܲܡܵܐ. ܘܲܠܘܲܥܕܹܗ
ܬܵܪܹܨ ܐܸܠܦܹܗ: ܕܲܢܚܵܘܸܐ ܠܹܗ ܠܲܠܡܹܐܢܵܐ. ܘܕܲܝܪܵܝܵܐ ܚܵܐܲܪ ܒܲܨܠܘܿܬܼܵܐ:
ܕܗ̤ܝ ܬܵܪܨܵܐ ܠܹܗ ܡܲܪܕܝܼܬܼܵܐ: ܕܠܲܐܝܢܵܐ ܠܡܹܐܢܵܐ ܢܸܬܼܪܘܿܨ ܕܘܼܒܵܪܹܗ.
ܒܲܨܠܘܿܬܼܵܐ ܚܵܐܲܪ ܕܲܝܪܵܝܵܐ ܒܟܼܠܥܸܕܵܢ: ܕܲܬܼܚܵܘܸܐ ܠܹܗ ܓܵܙܲܪܬܵܐ: ܕܒܼܵܗ̇
ܢܹܐܤܘܿܪ ܐܸܠܦܹܗ ܡ̣ܢ ܩܸܢܛܵܐ. ܘܡ̣ܢ ܬܲܡܵܢ ܬܲܡܵܢ ܢܸܥܒܸܿܕܼ ܙܘܵܕܹ̈ܐ: ܘܢܸܬܼܪܘܿܨ
pb. 326
ܬܘܼܒܼ ܠܓܼܵܙܲܪܬܵܐ ܐ̄ܚܪܹܬܼܵܐ. ܗܵܟܲܢܵܐ ܐܝܼܬܹܝܗ̇ ܡܲܪܕܝܼܬܹܗ ܕܝܼܚܝܼܕܼܵܝܵܐ:
ܟܡܵܐ ܕܐܝܼܬܼܵܘܗܝ ܒܗܵܠܹܝܢ ܚܲܝܹ̈ܐ. ܘܡ̣ܢ ܓܵܙܲܪܬܵܐ ܠܓܼܵܙܲܪܬܵܐ ܡܫܲܢܸܐ:
ܘܡ̣ܢ ܝܑܼܕܲܥܬܼܵܐ ܠܝܼܕܼܥܬܼܵܐ. ܘܐܲܝܟܼ ܕܲܒܼܫܘܼ̈ܚܠܵܦܹܐ ܕܓܼܵܙܪ̈ܵܬܼܵܐ: ܒܝܲܕܼ̈ܥܵܬܼܵܐ
ܡܫܲܚ̈ܠܦܵܬܼܵܐ ܦܵܓܲܥ̇. ܥܕܲܡܵܐ ܕܤܵܠܹ̇ܩ ܡ̣ܢ ܝܲܡܵܐ: ܘܲܠܗܵܝ̇ ܡܕܼܝܼܢ̄ܬܹܗ
ܕܲܫܪܵܪܵܐ ܡܲܪܕܝܼܬܹܗ ܬܸܡܤܲܟܼ. ܕܠܵܐ ܬܘܼܒܼ ܡܸܬܿܬܲܓܿܪܝܼܢ ܒܵܗ̇
ܥܵܡܘܿܪܹ݁ܝܗ̇: ܐܸܠܵܐ ܟܠܢܵܫ ܥܲܠ ܡܲܪ̈ܗܵܛܵܘܗܝ ܡܸܬܿܬܿܢܝܼܚ. ܛܘܼܒܼ
ܠܡܲܢ ܕܠܵܐ ܐܸܬܿܕܵܘܕܲܬ̤ ܡܲܪܕܝܝܼܬܹܗ: ܒܓܼܵܘ ܝܲܡܵܐ ܪܲܒܵܐ! ܛܘܼܒܼ
ܠܡܲܢ ܕܠܵܐ ܐܸܬܿܬܲܒܼܪܲܬ̤ ܐܸܠܦܹܗ: ܘܲܡܛ̣ܵܐ ܠܲܠܡܹܐܢܵܐ ܗܵܘ̇ ܟܲܕܼ ܚܵܪܹܐ!
ܤܲܚܵܝܵܐ ܥܲܪܛܸܠ ܥܵܡܹ̇ܕܼ ܒܓܼܵܘ ܝܵܡܵܐ: ܐܲܝܟܼ ܕܢܸܫܟܲܚ ܡܲܪܓܵܢܝܼܬܼܵܐ.
ܘܕܲܝܪܵܝܵܐ ܚܲܟܿܝܼܡܵܐ ܥܲܪܛܵܠ ܪܵܕܹܐ ܒܲܒܼܪܝܼܬܼܵܐ: ܕܢܸܫܟܲܚ ܠܡܲܪܓܵܢܝܼܬܼܵܐ
ܝܼܫܘܿܥ ܡܫܝܼܚܵܐ ܒܲܩܢܘܿܡܹܗ. ܘܡܵܐ ܕܐܸܫܟܿܚܵܗ̇: ܥܲܡܵܗ̇ ܠܵܐ ܩܵܢܹ̇ܐ
ܬܘܼܒܼ ܡܸܕܸܡ. ܡܲܪܓܵܢܝܼܬܼܵܐ: ܒܬܼܵܘܵܢܹ̈ܐ ܡܸܬܼܢܲܛܪܵܐ. ܘܒܼܘܼܤܵܡܹܗ
ܕܝܼܚܝܼܕܼܵܝܵܐ: ܒܓܼܵܘ ܫܸܠܝܵܐ. ܒܬܼܘܼܠܬܼܵܐ: ܒܲܟܼܢܘܼ̈ܫܝܹܐ ܡܸܬܼܚܲܠܨܵܐ. ܘܪܸܥܝܵܢܹܗ
ܕܕܲܝܪܵܝܵܐ: ܒܥܸܢܝܵܢܹ̈ܐ. ܦܵܪܲܚܬܼܵܐ ܡ̣ܢ ܟܠ ܕܘܼܟ ܠܩܸܢܵܗ̇ ܪܵܗ̇ܛܵܐ:
ܕܬܸܥܒܸܿܕܼ ܒܢ̈ܵܬܼܵܐ. ܘܕܲܝܪܵܝܵܐ ܦܵܪܘܿܫܵܐ: ܡܸܤܬܲܪܗܲܒܼ ܠܟܼܘܼܪܚܹܗ:
ܕܢܸܥܒܸܿܕܼ ܒܓܼܵܘܹܗ ܦܹܐܪܹ̈ܐ ܕܚܲܝܹ̈ܐ. ܚܸܘܝܵܐ ܟܲܕܼ ܟ̱ܠܹܗ ܓܘܼܫܡܹܗ
ܡܪܲܨܨܝܼܢ: ܒܪܹܫܹܗ ܡܸܙܕܗܲܪ. ܘܝܼܚܝܼܕܼܵܝܵܐ ܕܚܲܟܿܝܼܡ: ܡܸܙܕܗܲܪ ܒܟܼܠ
ܒܝܼ̈ܫܵܢ ܒܗܲܝܡܵܢܘܼܬܹܗ: ܕܐܝܼܬܹܝܗ̇ ܪܹܫܵܐ ܕܚܲܝܵܘ̈ܗܝ. ܥܢܵܢܵܐ: ܡܚܲܦܝܵܐ
ܠܫܸܡܫܵܐ. ܘܡܲܡܠܵܠܐ ܤܲܓܝܼܐܵܐ: ܠܢܲܦܫܵܐ ܕܫܲܪܝܲܬ̤ ܢܵܗ̇ܪܵܐ ܒܬܹܐܘܿܪܝܼܵܐ
ܕܲܨܠܘܼܬܼܵܐ. ܗܵܝ̇ ܦܵܪܲܚܬܼܵܐ ܕܡܸܬܼܩܲܪܝܵܐ ܚܘܼܪܒܼܵܐ: ܒܗܵܘ̇ ܙܲܒܼܢܵܐ ܪܵܘܙܵܐ
ܘܡܸܬܼܒܲܤܡܵܐ: ܐܲܝܟܼ ܡܸܠܬܼܵܐ ܕܚܲܟܿܝܼ̈ܡܹܐ: ܡܵܐ ܕܦܵܪܫܵܐ ܢܲܦܫܵܗ̇ ܡ̣ܢ
pb. 327
ܕܘܼ̈ܟܿܝܵܬܼܵܐ ܕܫܲܝܢܵܐ: ܘܐܵܙܵܠ̇ܐ ܥܵܡ̇ܪܵܐ ܒܐܲܬܼܪܵܐ ܚܘܼܪܒܵܐ. ܘܢܲܦܫܹܗ
ܕܝܼܚܕܼܵܝܵܐ: ܒܗܵܘ̇ ܙܲܒܼܢܵܐ ܡܩܲܒܿܠܵܐ ܚܲܕܼܘܼܬܼܵܐ ܫܡܲܝܵܢܼܬܼܵܐ: ܡܵܐ ܕܡܲܪܚܩܵܐ
ܝܵܬܼܵܗ̇ ܡ̣ܢ ܒܢܲܝ̈ܢܵܫܵܐ: ܘܐܵܙܵܠ̇ܐ ܥܵܡ̇ܪܵܐ ܒܐܲܬܼܪ̈ܵܘܵܬܼܵܐ ܕܲܫܠܹܝܢ: ܘܬܲܡܵܢ
ܡܤܲܟܿܝܵܐ ܠܙܲܒܼܢܵܐ ܕܡܲܦܩܵܢܵܗ̇. ܐܲܡܝܼܪܵܐ ܓܹܝܪ ܥܲܠ ܦܵܪܲܚܬܵܐ ܗܵܝ̇
ܕܡܸܬܼܩܲܪܝܵܐ ܤܹܝܪܹܝܢܵܣ: ܕܟܼܠ ܐܲܝܢܵܐ ܕܢܸܥܡܬܼܵܗ̇ ܨܵܐܹ̇ܬܼ: ܗܵܢܵܐ ܟ̱ܠܹܗ
ܡܸܫܬܿܒܸܐ ܒܵܬܼܪܵܗ̇ ܒܡܲܪܕܝܼܬܼܵܐ ܕܲܒܼܡܲܕܼܒܿܪܵܐ: ܥܕܲܡܵܐ ܕܲܒܼܚܲܠܝܘܼܬܼܵܐ
ܕܩܝܼ̈ܢܵܬܼܵܗ̇ ܛܵܥܹ̇ܐ ܚܲܝܵܘ̈ܗܝ: ܘܢܵܦܹ̇ܠ ܡܵܐܹ̇ܬܼ. ܠܗܵܕܹܐ ܕܵܡ̇ܝܵܐ ܨܒܼܘܼܬܼܵܗ̇
ܕܢܲܦܫܵܐ: ܕܐܸܡܲܬܼܝ ܕܢܵܦ̇ܠܵܐ ܒܵܗ̇ ܚܲܠܝܘܼܬܼܵܐ ܗܵܝ̇ ܫܡܲܝܵܢܝܼܬܼܵܐ: ܡ̣ܢ
ܢܸܥ̈ܡܵܬܼܵܐ ܕܦܸܬܼܓܼܵܡܵܘ̈ܗܝ ܕܐܲܠܵܗܵܐ: ܒܝܲܕܼ ܡܲܪܓܿܫܵܢܘܼܬܼܵܐ ܕܲܒܼܗܵܘܢܵܐ:
ܗܵܢܵܐ ܟ̱ܠܹܗ ܐܵܙܵܠ̇ܐ ܒܵܬܼܪܹܗ: ܥܕܲܡܵܐ ܕܛܵܥ̇ܝܵܐ ܠܚܲܝܹܝ̈ܗ̇ ܓܘܼܫܡܵܢܵܝܹ̈ܐ:
ܘܫܵܒܼ̇ܩܵܐ ܠܦܲܓܼܪܵܐ ܡ̣ܢ ܗܲܢܝܼܐܘܼܬܼܵܗ̇: ܘܡܸܬܼܥܲܠܝܵܐ ܠܘܵܬܹܗ ܡ̣ܢ
ܚܲܝܹ̈ܐ. ܚܠܹܝܢ ܚܲܝܵܘ̈ܗܝ ܕܥܵܠܡܵܐ ܗܵܢܵܐ: ܠܐܲܝܢܵܐ ܕܚܵܝܹ̇ܐ ܦܲܓܼܪܵܢܵܐܝܼܬܼ.
ܠܵܘ ܕܹܝܢ ܐܲܝܟܼ ܦܘܼܪܫܵܢܵܐ ܕܡܸܢܗܘܿܢ: ܠܐܲܝܢܵܐ ܕܦܵܪܹܫ ܡܸܢܗܘܿܢ ܒܝܲܕܼ
ܪܓܸܫܬܼܵܐ ܕܒܲܐܠܵܗܵܐ. ܐܝܼܠܵܢܵܐ ܥܕܲܡܵܐ ܕܠܵܐ ܫܵܠܲܚ ܛܲܪ̈ܦܹܐ ܩܲܕܼܡܵܝܹ̈ܐ:
ܠܵܐ ܡܲܦܸܩ ܦܸܪ̈ܥܹܐ ܚܲܕܼ̈ܬܹܐ. ܘܝܼܚܝܼܕܼܵܝܵܐ ܥܕܲܡܵܐ ܕܠܵܐ ܢܵܦܹ̇ܨ ܡ̣ܢ
ܠܸܒܹܗ ܥܘܼ̈ܗܕܵܢܹܐ ܕܩܲܕܼ̈ܡܵܝܵܬܹܗ: ܠܵܐ ܡܲܦܸܩ ܦܸܪ̈ܥܹܐ ܚܲܕܼ̈ܬܹܐ: ܒܝܲܕܼ
ܝܼܫܘܿܥܡܫܝܼܚܵܐ܀
ܪܘܼܚܵܐ: ܡܫܲܡܢܵܐ ܦܹܐܪܹ̈ܐ. ܘܪܘܼܚܵܐ ܕܐܲܠܵܗܵܐ: ܠܦܹܐܪܹ̈ܐ ܕܲܒܼܢܲܦܫܵܐ.
ܙܠܵܦܬܼܵܐ ܗܵܝ̇ ܕܡܸܬܼܓܲܒܼܠܵܐ ܒܵܗ̇ ܡܲܪܓܵܢܝܼܬܼܵܐ: ܡ̣ܢ ܐܵܐܲܪ ܡܩܲܒܿܠܵܐ
ܡܠܘܿܐܵܗ̇: ܐܲܝܟܼ ܕܐܵܡ̇ܪܵܐ ܡܸܠܬܼܵܐ. ܘܲܥܕܲܡܵܐ ܠܗܵܝܕܹܝܟ: ܒܸܤܪܵܐ ܗ̄ܘ̣
ܫܚܝܼܡܵܐ܀ ܘܠܸܒܹܗ ܕܕܲܝܪܵܝܵܐ: ܥܕܲܡܵܐ ܕܲܡܩܲܒܸܠ ܡܠܘܿܐܵܐ ܫܡܲܝܵܢܵܐ
ܒܝܲܕܼ ܤܘܼ̈ܟܵܠܹܐ: ܥܕܲܟܹܝܠ ܫܚܝܼܡܵܐ ܗ̄ܘ̣ ܦܘܼܠܚܵܢܹܗ: ܘܠܲܝܬܼ ܒܵܗ̇
pb. 328
ܒܘܼܝܵܐܵܐ ܒܓܼܵܘ ܙܠܵܦܬܹܗ܀ ܦܹܐܪܹ̈ܐ ܕܐܝܼ̈ܠܵܢܹܐ ܚܲܪܘܼܤܝܼܢ: ܘܲܓܼܥܝܼܨܝܼܢ
ܒܛܲܥܡܘܿܢ. ܘܠܵܐ ܚܵܫ̇ܚܝܼܢ ܠܡܹܐܟܼܘܼܠܬܼܵܐ: ܥܕܲܡܵܐ ܕܢܵܦ̇ܠܵܐ ܒܗܘܿܢ
ܚܲܠܝܘܼܬܼܵܐ ܡ̣ܢ ܫܸܡܫܵܐ. ܘܥܲܡ̈ܠܹܐ ܩܲܕܼ̈ܡܵܝܹܐ ܕܲܬܼܝܵܒܼܘܼܬܼܵܐ: ܡܲܪܝܼܪܝܼܢ
ܘܲܓܼܥܝܼܨܝܼܢ ܤܲܓܿܝܼ. ܘܠܵܐ ܡܒܲܝܐܝܼܢ ܠܝܼܚܝܼܕܼܵܝܵܐ: ܥܕܲܡܵܐ ܕܢܵܦ̇ܠܵܐ
ܒܗܘܿܢ ܚܲܠܝܘܼܬܼܵܐ ܗܵܝ̇ ܕܬܹܐܘܿܪܝܼܵܐ: ܕܡܫܲܢܝܵܐ ܠܠܸܒܵܐ ܡ̣ܢ ܐܲܪ̈ܥܵܢܵܝܵܬܼܵܐ:
ܘܛܵܥܹ̇ܐ ܩܢܘܿܡܹܗ܀ ܟܲܠܒܵܐ ܕܲܡܠܲܚܸܟܼ ܫܘܿܦܝܼܢܵܐ: ܡ̣ܢ ܕܡܹܗ ܫܵܬܹ̇ܐ.
ܘܠܵܐ ܝܵܕܲܥ̇ ܤܘܼܓܦܵܢܹܗ: ܡ̣ܢ ܚܲܠܝܘܼܬܼܵܐ ܕܡܸܢܹܗ. ܘܝܼܚܝܼܕܼܵܝܵܐ
ܘܡܸܬܼܪܟܸܢ ܠܡܸܫܬܼܵܐ ܫܘܼܒܼܚܵܐ ܪܤܝܼܩܵܐ: ܡ̣ܢ ܚܲܝܵܘ̈ܗܝ ܡܵܐܹ̇ܨ. ܘܠܵܐ
ܡܲܪܓܸܫ ܒܤܘܼܓܦܵܢܹܗ: ܡܸܛܠ ܚܲܠܝܘܼܬܼܵܐ ܕܫܵܥܬܼܵܐ. ܫܘܼܒܼܚܵܐ
ܕܥܵܠܡܵܝܹ̈ܐ: ܐܲܝܟܼ ܩܲܬܵܪܵܐ ܗ̄ܘ̣ ܕܲܡܟܲܤܲܝ ܒܓܼܵܘ ܝܲܡܵܐ. ܘܠܵܐ
ܡܸܬܼܝܼܕܲܥ ܠܡܲܠܵܚܵܐ: ܥܕܲܡܵܐ ܕܡܸܬܼܢܲܩܫܵܐ ܒܹܗ ܐܸܠܦܵܐ. ܘܢܵܩܹ̇ܒܼ
ܠܐܸܫܬܵܗ̇: ܘܡܸܬܼܡܲܠܝܵܐ ܡܲܝ̈ܵܐ. ܐܲܡܝܼܪܵܐ ܗ̣̄ܝ ܡܸܛܠܵܬܹܗ ܠܐܲܒܼ̈ܗܵܬܼܵܐ:
ܕܒܼܐܝܼܕܹܗ ܥܵܛ̇ܦܝܼܢ ܬܘܼܒܼ ܟܠܗܘܿܢ ܚܲܫܹ̈ܐ ܠܓܼܵܘ ܢܲܦܫܵܐ: ܐܲܝܠܹܝܢ
ܕܲܚܕܼܸܵܐ ܙܒܲܢ ܐܸܙܕܟܼܝܼܘ ܗ̄ܘ̣ܵܘ ܘܲܢܦܲܩ̣ܘ ܡܸܢܵܗ̇܀ ܥܢܵܢܵܐ ܙܥܘܿܪܬܵܐ:
ܡܚܲܦܝܵܐ ܐܸܤܦܹܪܵܐ. ܘܫܸܡܫܵܐ ܕܒܼܵܬܼܪܵܗ̇: ܨܲܚܝܝܼܚ ܤܲܓܿܝܼ. ܘܩܘܼܛܵܥܵܐ
ܙܥܘܿܪܵܐ: ܡܟܲܤܸܐ ܠܢܲܦܫܵܐ. ܘܚܲܕܼܘܼܬܼܵܐ ܕܡ̣ܢ ܒܵܬܼܪܹܗ: ܝܲܬܿܝܼܪ ܦܨܝܼܚܵܐ.
ܙܲܡܵܪܵܐ ܕܙܵܡܲܪ ܐܲܒܿܘܼܒܼܵܐ: ܡ̣ܢ ܩܵܠ ܩܝܼ̈ܢܵܬܹܗ ܠܵܐ ܡܸܬܿܬܲܪܤܸܐ.
ܘܡܵܐ ܕܐܲܪܦ̣ܝܼ ܙܡܵܪܹܗ: ܝܲܬܝܼܪ ܟܲܦܢܵܐ ܟܲܪܤܹܐ. ܘܚܲܠܝܘܼܬܼܵܐ ܕܡܸܠܹ̈ܐ
ܕܠܵܐ ܥ̇ܒܼܵܕܹ̈ܐ: ܠܵܐ ܡܤܲܒܿܥܵܐ. ܘܡܵܐ ܕܫܲܢܝܼ ܡܸܢܗܹܝܢ ܒܲܪܢܵܫܵܐ: ܝܲܬܝܼܪ
ܒܵܗܹ̇ܬܼ. ܐܲܟܼܙܢܵܐ ܕܠܵܐ ܡܲܨܝܵܐ ܕܐ̄ܢܵܫ ܢܸܫܬܸܐ ܚܲܡܪܵܐ: ܘܠܵܐ ܢܵܦܲ݁ܚ
ܪܹܝܚܵܐ ܡ̣ܢ ܦܘܼܡܹܗ: ܗܵܟܲܢܵܐ ܠܵܐ ܡܲܨܝܵܐ ܕܢܸܫܬܘܸܐ ܐ̄ܢܵܫ ܠܲܝܵܚܵܐ
pb. 329
ܪܘܼܚܵܢܵܐ ܒܕܼܘܼܒܵܪܹܗ: ܘܫܘܼܚܠܵܦܵܐ ܕܨܸܒܼ̈ܘܵܬܹܗ ܠܵܐ ܡܸܫܬܵܘܕܲܥ
ܠܚܲܟܿܝܼ̈ܡܹܐ. ܠܸܒܵܐ ܕܩܲܒܸܿܠ̣ ܙܲܪܥܵܐ ܫܡܲܝܵܢܵܐ: ܡܫܲܓܼܢܲܝ ܒܡܲܡܠܠܹܗ:
ܡܫܲܓܼܢܲܝ ܒܬܲܪܥܝܼܬܹܗ: ܡܫܲܓܼܢܲܝ ܒܕܼܘܼܒܵܪܹܗ: ܡܫܲܓܼܢܲܝ ܒܪܸ̈ܓܼܫܵܘܗܝ.
ܘܲܒܼܟܼܠܡܸܕܸܡ ܕܝܼܠܹܗ: ܡܫܲܚܠܲܦ ܡ̣ܢ ܫܲܪܟܵܐ ܕܲܒܼܢܲܝ̈ܢܵܫܵܐ ܫܚܝܼ̈ܡܹܐ.
ܘܐܲܝܟܼ ܐ̄ܢܵܫ ܕܕܲܡܝܼܟܼ ܗ̄ܘ̣ܵܐ: ܘܢܵܕܼ ܡ̣ܢ ܫܸܢܬܼܵܐ. ܠܡܹܠܹ̈ܐ ܐ̄ܪ̈ܵܙܵܢܵܝܵܬܼܵܐ
ܕܒܲܟܼܬܼܵܒܹ̈ܐ: ܕܠܵܐ ܨܠܘܿܬܼܵܐ ܘܫܸܐܠܲܬܼ ܥܘܼܕܼܪܵܢܵܐ ܕܡ̣ܢ ܐܲܠܵܗܵܐ ܠܵܐ
ܬܸܩܪܘܿܒܼ: ܟܲܕܼ ܐܵܡܲ݁ܪ ܐܲܢ̄ܬܿ: ܡܵܪܝܵܐ ܗܲܒܼܠܝܼ ܕܐܸܤܲܒܼ ܪܓܸܫܬܼܵܐ
ܕܚܲܝܠܵܐ ܕܲܒܼܗܹܝܢ. ܩܠܝܼ̈ܕܹܐ ܕܤܘܼ̈ܟܵܠܹܐ ܕܲܫܪܵܪܵܐ ܒܲܟܼܬܼܵܒܼܵܐ: ܨܠܘܼܬܼܵܐ
ܫܚܘܿܒܼ ܠܵܟܼ ܕܐܝܼܬܹܝܗ̇܀
ܐܸܡܲܬܼܝ ܕܨܵܒܹ̇ܐ ܐܲܢ̄ܬܿ ܕܬܸܬܼܩܲܪܲܒܼ ܒܠܸܒܵܟܼ ܠܘܵܬܼ ܐܲܠܵܗܵܐ:
ܠܘܼܩܕܲܡ ܒܦܲܓܼܪ̈ܵܢܵܝܵܬܼܵܐ ܚܵܘܵܐ ܠܹܗ ܚܘܼܒܵܐ. ܡ̣ܢ ܗܵܪܟܵܐ ܐܝܼܬܼܵܘܗܝ
ܫܘܼܪܵܝܵܐ ܕܕܘܼܒܵܪܵܐ. ܪܵܘܪܒܼܵܐܝܼܬܼ ܓܹܝܪ ܡܸܬܼܩܲܪܲܒܼ ܠܸܒܵܐ ܠܘܵܬܼ ܐܲܠܵܗܵܐ:
ܒܤܘܼܪܵܩܵܐ ܕܤܘܼܢܩܵܢ ܚܫܲܚܬܼܵܐ ܕܒܲܚܕܼܵܐ: ܘܢܘܼܩܵܦܵܐ ܕܲܠܥܲܡ̈ܠܹܐ. ܐܵܦ
ܡܵܪܲܢ: ܡ̣ܢ ܗܵܪܟܵܐ ܥ̣ܒܲܕܼ ܫܲܬܼܐܸܤܬܵܐ ܠܲܓܼܡܝܼܪܘܼܬܼܵܐ. ܠܚܸܫܟܵܐ
ܕܢܲܦܫܵܐ ܚܫܘܿܒܼ ܠܵܟܼ ܕܐܝܼܬܼܵܘܗܝ ܫܘܼܪܵܝܵܐ: ܒܸܛܠܵܢܵܐ. ܚܸܫܟܵܐ ܥܲܠ
ܚܸܫܟܵܐ: ܥܸܢܝܵܢܵܐ ܕܡܲܡܠܠܵܐ. ܘܥܸܠܬܵܐ ܠܩܲܕܼܡܵܝܵܐ: ܬܪܲܝܵܢܵܐ. ܐܵܦ
ܡܸܠܹ̈ܐ ܡܵܘܬܿܪ̈ܵܢܝܵܬܼܵܐ ܕܠܵܐ ܬܚܘܼܡܵܐ: ܚܸܫܟܵܐ ܥܵܒܼ̈ܕܵܢ. ܡܸܙܕܲܠܠܵܐ
ܠܵܗ̇ ܢܲܦܫܵܐ ܒܥܸܢܝܵܢܵܐ ܝܲܬܝܼܪܵܐ: ܐܵܦܸܢ ܢܸܗܘܸܐ ܕܲܠܕܼܸܚܠܲܬܼ ܐܲܠܵܗܵܐ
ܐܝܼܬܼܵܘܗܝ ܥܘܼܬܵܕܼܵܐ: ܘܲܙܢܵܐ ܕܩܘܼܪܵܒܼܵܐ. ܡܙܝܝܼܥܵܢܵܐ ܠܕܼܘܼܘܵܕܼܵܐ ܚܫܘܿܒܼ
ܠܵܟܼ ܕܐܝܼܬܼܵܘܗܝ: ܚܸܫܟܵܐ ܢܲܦܫܵܢܵܝܵܐ. ܚܸܫܟܵܐ ܕܹܝܢ ܒܢܲܦܫܵܐ: ܡ̣ܢ ܠܵܐ
ܡܛܲܟܿܤܘܼܬܼܵܐ ܕܕܼܘܼܒܵܪܹ̈ܐ܀ ܡܫܘܼܚܬܼܵܐ ܘܙܲܒܼܢܵܐ ܒܕܼܘܼܒܵܪܵܐ: ܡܲܢܗܪ̈ܵܢܹܐ
pb. 330
ܕܪܸܥܵܝܵܐ ܘܕܼܵܘܘܿܩܹ̈ܐ ܕܕܼܘܼܘܵܕܼܵܐ. ܡܵܐ ܕܡܸܬܼܒܲܠܒܲܠ ܪܸܥܵܝܵܢܵܐ ܡ̣ܢ ܠܵܐ
ܡܛܲܟܿܤܘܼܬܼܵܐ: ܚܵܫܹ̇ܟܼ. ܘܡܵܐ ܕܲܚܫܵܟܼ: ܡܸܬܿܕܵܘܕܼܵܐ ܢܲܦܫܵܐ. ܫܲܝܢܵܐ:
ܡ̣ܢ ܡܛܲܟܿܤܘܼܬܼܵܐ ܗܵܘܹ̇ܿܐ. ܘܢܘܼܗܪܵܐ: ܡ̣ܢ ܫܲܝܢܵܐ ܒܢܲܦܫܵܐ ܡܸܬܼܝܼܠܸܕܼ.
ܘܡ̣ܢ ܫܲܝܢܵܐ: ܐܵܐܲܪ ܦܨܝܼܚܵܐ ܒܪܸܥܝܵܢܵܐ. ܒܡܲܬܼܩܵܠܵܐ ܕܡܸܬܼܩܲܪܲܒܼ ܠܸܒܵܐ
ܠܚܸܟܼܡܬܼܵܐ: ܗܵܟܲܢܵܐ ܡܩܲܒܸܠ ܚܲܕܼܘܼܬܼܵܐ ܕܒܲܐܠܵܗܵܐ. ܦܘܼܪܫܵܢܵܐ ܕܚܸܟܼܡܬܼܵܐ
ܕܪܘܼܚܵܐ: ܡ̣ܢ ܗܵܝ̇ ܕܥܵܠܡܵܐ ܡܲܪܓܸܫ ܐܲܢ̄ܬܿ ܒܢܲܦܫܵܟܼ. ܒܗܵܝ̇ ܡ̇ܢ:
ܫܸܬܼܩܵܐ ܡܲܡܠܸܟܼ ܥܲܠ ܢܲܦܫܵܟܼ. ܒܗܵܕܹܐ ܕܹܝܢ: ܡܲܒܿܘܼܥܵܐ ܕܦܸܗܝܵܐ
ܬܸܗܘܸܐ. ܘܒܼܵܬܲܪ ܫܟܼܵܚܬܼܵܐ ܕܩܲܕܼܡܵܝܬܼܵܐ: ܡܸܬܼܡܠܸܐ ܐܲܢ̄ܬܿ ܡܘܼܟܵܟܼܵܐ
ܤܲܓܝܼܐܵܐ. ܘܲܒܼܗܝܼܠܘܼܬܼܵܐ: ܘܫܲܝܢܵܐ ܕܡܲܡܠܸܟܼ ܒܟܼܠܗܘܿܢ ܚܘܼܫܵܒܲܝ̈ܟ:
ܘܗܲܕܲܡܲܝܝ̈ܟ ܕܐܸܬܼܒܗܸܠܘ: ܘܲܫܠܝܼܘ ܡ̣ܢ ܬܲܙܝܼܙܘܼܬܼܵܐ ܘܕܼܘܼܘܵܕܼܵܐ. ܒܵܬܲܪ
ܫܟܼܵܚܬܼܵܐ ܕܲܬܼܪܲܝܵܢܝܼܬܼܵܐ: ܩܵܢܹܐ ܐܲܢ̄ܬܿ ܡܲܤܒܿܪܵܢܘܼܬܼܵܐ ܒܬܲܪܥܝܼܬܼܵܟܼ:
ܘܚܲܘܼ̈ܫܵܒܹܐ ܡܫܵܚ̈ܠ̱ܦܹܐ ܕܠܵܐ ܡܸܬܼܡܲܠܠܝܼܢ: ܘܕܼܘܼܥܵܪܵܐ ܕܗܵܘܢܵܐ:
ܘܪܸ̈ܓܼܫܲܝܟ ܕܗܵܘܹ̇ܝܢ ܬܲܙܝܼܙܝܼܢ ܘܝܲܨܝܼܦܝܼܢ܀
Corpus Text ID:
Source:
Paulus Bedjan (ed.), Mar Isaacus Ninivita. De perfectione religiosa. (Paris/Leipzig: Otto Harrassowitz, 1909).Publication Date: March 5, 2019
Preparation of Electronic Edition:
TEI XML encoding by James E. Walters.Syriac text transcribed by .
Open Access and Copyright:
This electronic edition is designed for open access reuse. The Syriac base text is in the public domain. The TEI XML edition is copyrighted by James E. Walters and is released under a Creative Commons Attribution 4.0 International Public License (CC BY 4.0).
The HTML page is copyrighted by Vanderbilt University and released under a under a Creative Commons Attribution 4.0 International Public License (CC-BY 4.0, https://creativecommons.org/licenses/by/4.0/). Attribution for reuse should follow the suggested citation and also credit the copyright holder of the TEI XML edition.
See details...
How to Cite this Electronic Edition
Note:
Isaac of Nineveh, “Discourse 45” based upon Paulus Bedjan (ed.), Mar Isaacus Ninivita. De perfectione religiosa. (Paris/Leipzig: Otto Harrassowitz, 1909), Digital Syriac Corpus, last modified March 5, 2019, https://syriaccorpus.org/436.Bibliography:
“Discourse 45.” In Mar Isaacus Ninivita. De perfectione religiosa., edited by . Syriaca.org, 2016-. Entry published . https://syriaccorpus.org/436.Show Citation Styles