On the Departed and the Resurrection - ܡܐܡܪܐ ܕܥܠ ܥܢܝܕ̈ܐ ܘܥܠ ܚܝܬ ܡܝ̈ܬܐ

1 :ܒܫܘܼܦܪܵܐ ܦܲܐܝܵܐ ܕܲܨܠܸܡ ܐ̄ܢܵܫ̈ܐ ܨܒܹܝ̇ܬܼ ܕܐܸܬܼܒܲܩܸܐ 2 ܘܥܲܕܼ ܒܵܥܹ̇ܐ ܐ̄ܢܵܐ ܕܐܸܚܙܹܐ ܫܘܼܦܪܹܗ ܚܙܹ̇ܝܬܼ ܡܘܼܟܵܟܹܗ. 3 :ܚܙܹܝܬܹܗ ܕܲܩܛܝܼܪ ܬܵܓܼܵܐ ܒܐܲܪܥܵܐ ܕܡܲܡܠܸܟ ܥܲܠ ܟܠ 4 ܘܗܸܦܟܹܿܬܼ̇ ܘܲܚܙܹܝ̇ܬܼ ܕܲܫܕܹܐ ܒܲܫܝܘܼܠ ܡ̣ܢ ܟܠܵܐ ܀ 5 :ܚܙܹܝ̇ܬܼ ܟܲܕܼ ܦܵܩܸܕܼ̇ ܘܡܸܫܬܲܡܥܝܼܢ ܠܹܗ ܡ̈ܠܝܼܠܹܐ ܘܚܲܪ̈ܫܹܐ 6 ܘܒܵܬܲܪ ܩܲܠܝܼܠ ܚܙܹ̇ܝܬܼ ܟܲܕܼ ܡܲܗܸܠ ܣܵܣܵܐ ܒܦܲܓܼܪܹܗ. 7 :ܚܙܹ̇ܝܬܼ ܟܲܕܼ ܝܵܬܸܒܼ̇ ܥܲܠ ܡܲܪ̈ܟܒܼܵܬܼܵܐ ܘܕܲܚܝܼܠ ܚܸܙܘܹܗ 8 ܘܬܼܘܼܒܼ ܚܵܪܹܬܼ ܒܹܗ ܕܡܲܪܟܸܿܢ ܪܹܫܹܗ ܒܲܬܼܪܲܥ ܩܲܒܼܪܵܐ ܀ 9 :ܚܙܹ̇ܝܬܼ ܕܲܡܨܲܒܸܿܬܼ ܒܲܠܒܼܘܼܫ ܒܘܼܨܵܐ ܘܲܒܼܫܹܐܪ̈ܝܹܐ 10 ܘܒܼܵܬܲܪ ܙܲܒܼܢܹ̈ܐ ܚܙܹ̇ܝܬܼ ܕܲܩܪܝܼܡܵܐ ܓܘܵܓܲܝ ܒܐܲܦܵܘ̈ܗܝ. 11 ܚܙܹ̇ܝܬܼ ܟܲܕܼ ܡܲܪܗܸܒܼ ܩܵܠ ܦܘܼܩܕܵܢܹܗ ܠܲܟܼܢܵܘ̈ܬܹܗ 12 ܘܲܪܗܸܛ ܡܵܘܬܐ ܘܒܲܠܥܹܗ ܡ̣ܢ ܫܹܠܝ ܘܲܫܬܸܩ ܩܵܠܹܗ ܀ 13 :ܚܙܹ̇ܝܬܼ ܟܲܕܼ ܒܵܢܹ̇ܐ ܘܡܵܘܪܸܒܼ ܥܘܼܡܪܹܗ ܕܠܵܐ ܡܘܼܫ̈ܚܵܬܼܵܐ 14 ܘܲܒܼܝܘܿܡ ܡܵܘܬܹܗ ܠܵܐ ܐ̄ܢܵܫ ܝܲܗܒܼ ܠܹܗ ܕܲܢܕܲܝܲܪ ܒܹܗ. pb. f.68v 15 :ܚܙܹ̇ܝܬܼ ܕܛܲܝܸܒܼ ܠܹܗ ܢܚ̈ܬܼܐ ܪ̈ܓܼܝܼܓܹܐ ܠܝܘܿܡ ܡܸܫܬܘܼܬܼܵܐ 16 ܘܣܲܪܗܸܒܼ ܡܵܘܬܿܐ ܩܛܲܪ ܠܗ ܒܲܫܝܘܿܠ ܓܢܘܢܐ ܕܐܸܒܼܠܵܐ܀ 17 :ܚܙܹ̇ܝܬܼ ܟܲܕܼ ܪܵܗܸܛ̇ ܠܲܡܟܲܢܵܫܘܼ ܕܠܵܐ ܣܲܒܼܥܘܼܬܼܵܐ 18 ܘܲܒܼܥܘܼܢܕܵܢܹܗ ܚܙ̣ܩ ܟܕܼ ܡܸܣܟܹܿܢ ܡ̣ܢ ܛܒ̈ܬܐ. 19 :ܕܠܵܐ ܝܘܼܬܼܪܵܢܵܐ ܚܙ̣ܩ ܚܲܝܠܵܢܵܐ ܡ̣ܢ ܓܵܘ ܥܘܼܡܪܹܗ 20 ܘܠܵܐ ܢܣܲܒܼ ܙܘܵܕܹ̈ܐ ܠܐܘܼܪܚܵܐ ܕܐܸܙܕܲܡܲܢ ܠܹܗ̇ ܀ 21 :ܢܦܲܩ̣ ܡ̣ܢ ܥܘܼܡܪܹܗ ܐܲܝܟ ܡܵܐ ܕܢܦ̣ܩ ܡ̣ܢ ܓܵܘ ܟܲܪܣܵܐ 22 ܥܲܪܛܸܠ ܐܸܬ̣ܵܐ ܘܥܲܪܛܸܠ ܐܸܙܲܠ̣ ܚܲܫܵܐ ܗ̄ܘ̣ ܪܲܒܵܐ. 23 :ܚܲܫܵܐ ܕܫܸܦܠܹܗ ܕܝܲܩܝܼܪ ܡ̣ܢ ܟܠ ܙܲܩܬܹܗ ܠܪܸܥܝܵܢܝ 24 ܘܚܸܫܹ̇ܬܼ ܣܲܓܿܝܼ ܥܲܠ ܡܘܼܟܵܟܹܗ ܕܓܸܢܣܲܢ ܫܝܼܛܵܐ ܀ 25 :ܚܙܹ̇ܝܬܼ ܪܘܼܡܵܪܡܹܗ ܕܐܲܝܟ ܛܸܠܵܠܵܐ ܥܩܲܪ ܡ̣ܢ ܨܐܕܵܘܗܝ 26 ܘܲܚܙܹ̇ܝܬܼ ܫܸܦܠܹܗ ܘܡܘܼܟܵܟ ܢܲܦ̣ܫܹܗ ܕܐܲܓܲܪ ܣܲܓܝܼ. 27 :ܒܫܸܠܦܹܗ ܚܵ̇ܪܹܬܼ ܕܡܲܓܸܿܣ ܒܲܫܝܼܘܠ ܘܲܥܒܼܝܼܕ ܡܸܕܼܪܵܐ 28 ܘܲܪܢܝܹ̇ܬܼ ܕܐܲܝܟܲܢ ܘܐܸܡܲܬܼܝ ܦܵܢܹ̇ܐ ܠܘܵܬܼ ܚܲܝܘܬܼܵܐ ܀ 29 :ܪܢܹܝܬܼ ܕܐܲܝܟܲܢ ܟܲܝ ܢܒܵܥܸܝ̇ܢ ܚܲܝܹ̈ܐ ܡ̣ܢ ܡܝܼܬܼܘܼܬܼܵܐ 30 ܘܐܲܝܟܲܢ ܗܵܦܸ̇ܟ ܡܸܕܪܹܗ ܫܝܼܛܵܐ ܠܘܵܬܼ ܪܘܼܡܪܵܡܹܗ. 31 :ܡ̇ܢ ܒܢܸ̇ܐ ܠܹܗ ܠܗܲܝܟܲܠ ܦܲܓܼܪܵܐ ܕܣܲܬܼܪܹܗ ܡܵܘܬܵܐ 32 ܘܡ̇ܢ ܡܲܦܵܢܐ ܠܵܗ̇ ܠܢܲܦ̣ܫܵܐ ܨܐܕܘܵܗܝ ܕܲܬܼܗܠܸܠ ܒܹܗ ܀ 33 :ܡ̇ܢ ܦܵܬܲܚ̇ ܠܹܗ ܠܬܲܪܥܵܐ ܕܲܫܝܼܘܿܠ ܕܐܲܚܝܼܕܼ ܒܲܐܦܘ̈ܗܝ 34 ܘܡ̇ܢ ܡܲܦܸܩ ܠܹܗ ܡ̣ܢ ܓܵܘ ܚܸܣܢܹ̈ܐ ܕܡܵܘܬܐ ܝܲܥܢܵܐ. 35 :ܐܲܝܢܵܐ ܚܲܝܠܵܐ ܕܢܵܦܲܚ̇ ܒܐܲܦܵܘ̈ܗܝ ܪܘܼܚ ܚܲܝܘܼܬܼܵܐ 36 ܘܡܲܩܢܹܐ ܩܵܠܵܐ ܠܪܸ̈ܓܼܫܹܐ ܡܝܼ̈ܬܹܐ ܠܡܸܙܡܲܪ ܫܘܼܒܼܚܵܐ ܀ 37 :ܐܲܝܢܵܐ ܪܸܡܙܵܐ ܕܢܵܦܹ̇ܩ ܪܵܗ̇ܛ ܒܐܲܪ̈ܒܼܥܦܸܢܝܵܢ 38 ܘܲܡܦܲܪܸܫ ܠܹܗ ܠܡܸܕܼܪܵܐ ܕܐ̄ܢܵܫ̈ܐ ܡ̣ܢ ܗܵܘ̇ ܕܐܲܪܥܵܐ. 39 :ܡܲܢ̣ܘܼ ܕܦܵܪܸܫ ܡܸܕܼܪ̈ܐ ܕܐܢܫ̈ܐ ܡ̣ܢ ܕܚܝܘ̈ܬܐ 40 ܕܐܸܟܲܠ̣ܘ ܐܢܘܢ ܘܡܝܬܼܘ ܘܐܸܬܼܚܲܠܛܘ ܦܲܓܼܪܹ̈ܐ ܒܦܲܓܼܪܹ̈ܐ܀ 41 :ܟܡܵܐ ܟܲܝ ܗܵܘܹ̇ܐ ܗܵܘ̇ ܦܘܼܩܕܵܢܵܐ ܕܦܵܩܸ̇ܕ ܠܲܡܩܵܡ 42 ܕܗܵܐ ܠܲܝܬܿ ܡܸܢܝܵܢ ܠܐܲܠܦܹ̈ܐ ܕܐܢܫ̈ܐ ܕܲܗܘ̤ܵܘ ܡܸܕܼܪ̈ܐ. 43 :ܟܡܵܐ ܟܲܝ ܐܲܠܦܹ̈ܐ ܕܫܡܝܵܢ̈ܐ ܢܵܦܩ̇ܝܢ ܒܵܥܝܹ̇ܢ 44 ܠܐܲܝܠܝܹܢ ܕܐܸܒܲܕܘ ܒܝܲܡܵܐ ܘܢܲܦܫܵܐ ܒܟ̣ܠ ܐܸܣܟܹܝܡܝܼ̈ܢ܀ 45 :ܡ̣ܢ ܐܲܝܟܵܐ ܟܲܝ ܦܢܵܝܹ̇ܢ ܘܐܵܬܹܝ̇ܢ ܒܸܣܪܵܐ ܘܓܲܪ̈ܡܹܐ 46 ܕܗܵܐ ܠܲܝܬܿ ܕܘܼܡܝܵܐ ܕܪܘܼܢܵܒܼ ܦܲܓܼܪܵܐ ܒܡܸܕܪܵܐ ܕܐܲܪܥܵܐ. 47 :ܗܘ̤ ܟܲܝ ܐܝܼܬܼܵܘܗܝ ܡܸܕܼܪܵܐ ܕܐܲܪܥܵܐ ܕܗܵܘܸ̇ܐ ܦܲܓܼܪܵܐ 48 ܘܡܲܢ̣ܘܼ ܕܡܨܐ ܠܡܦܪܫ ܡܕܪܐ ܡ̣ܢ ܒܲܪ ܓܸܢܣܹܗ܀ 49 :ܗܵܠܹܝܢ ܐܸܢܵܐ ܪܢܝܹ̇ܬܼ ܣܲܟܼܠܵܐܝܼܬܼ ܒܦܲܪܨܘܦ ܣܲܟܸ̈ܠܹܐ 50 ܘܲܬܼܢܝ̇ܬܼ ܕܝܼܠܗܘܢ ܐܲܝܟ ܗܵܘ̇ ܕܐܸܢܵܐ ܒܗܘܿܢ ܐܸܬܬܲܚ̇ܕܹܬܼ. 51 :ܪܸܥܝܵܢ ܣܲܟܼ̈ܠܹܐ ܬܢܹܝ̇ܬܼ ܡ̣ܢ ܪܸܥܝܵܢܝ ܐܲܝܟ ܪܸܥܝܵܢܗܘܿܢ 52 ܘܦܵܘܠܘܿܣ ܨܵܬܼܢܝ ܘܚܲܣܕܼܢܝ ܥܡܗܘܿܢ ܐܲܝܟ ܕܲܠܣܲܟܼܠܵܐ܀ 53 :ܟܵܪܘܿܙ ܪܘܼܚܵܐ ܘܣܵܗܕܵܐ ܒܚܝܼܪܵܐ ܕܚܵܝܲܬܼ ܡܝܼ̈ܬܹܐ 54 ܫܡܲܥ̣ ܦܘܼܠܵܓܼܵܐ ܕܚܲܝܲܬܼ ܡܝܼ̈ܬܹܐ ܘܛܢ ܘܐܸܬܼܥܲܙܲܙ. 55 :ܣܲܟܼܠܵܐ ܠܲܡ ܩܪ̣ܢܝ ܒܦܲܪܨܘܿܦ ܣܲܟܼ̈ܠܹܐ ܦܠܝܲܓܼܝܼ̈ ܠܸܒܵܐ 56 ܕܥܲܠ ܡ̇ܢ ܬܲܪܓܸܿܡܬܿ ܪܸܥܝ̇ܢ ܣܲܟܼ̈ܠܹܐ ܒܐܸܕܲܢܲܝ̈ ܐ̄ܢܵܫܵܐ܀ 57 :ܣܲܟܼܠܵܐ ܠܲܡ ܚܘܪ ܒܟܝܢ ܙܲܪܥܐ ܕܐܢ̄ܬܿ ܙܪܥ ܡ̇ܢ ܐܢ̄ܬܿ 58 ܕܐܸܢ ܠܵܐ ܡܵܐܸ̇ܬܼ ܠܵܐ ܡܨܐ ܚܲܝܹ̈ܐ ܘܛܵܥܸ̇ܢ ܦܹܐܪܹ̈ܐ. 59 :ܚܘܪ ܒܲܦܪܸܕܬܼܵܐ ܕܚܸܛܬܼܵܐ ܕܙܲܪܥܵܐ ܕܡܲܪܡܝܼܬܿ ܒܐܲܪܥܵܐ 60 ܕܡܵܝ̇ܬܐ ܠܘܼܩܕܼܵܐ ܘܐܟܸܢ ܚܵܝܵܐ ܒܐܪܵܙ ܢܘܼܚܵܡܵܐ ܀ 61 :ܗ̤ܝ ܗ̣̄ܝ ܚܸܛܬܼ̇ܐ ܕܢܵܦܠܵܐ ܘܡܵܝ̇ܬܿܐ ܒܲܕܼܡܘܼܬܼ ܦܲܓܼܪܵܐ 62 ܗ̤ܝ ܗ̄ܝܼ ܕܫܵܘܚ̇ܵܐ ܡ̣ܢ ܡܲܣܝܘܼܬܼܵܗ̇ ܒܗܸܕܼܪܵܐ ܪܲܒܐ. pb. f.69r 63 :ܒܗܵܢܵܐ ܛܲܟܼܣܵܐ ܡܵܐܸܬܼ̇ ܦܲܓܼܪܵܐ ܘܚܵܝܹ̇ܐ ܦܲܓܼܪܵܐ 64 ܘܗ̤ܘܝܘܼ ܟܲܕܼ ܗܘ̤ ܡܸܬܼܚܲܒܿܠܵܢܵܐ ܕܠܵܒܸ̇ܫ ܫܘܼܒܼܚܵܐ ܀ 65 :ܗ̤ܘܝܘܼ ܕܩܵܢܹ̇ܐ ܪܸܓܼܫܹܐ ܓ̈ܠܝܐ ܐܲܝܟ ܩܕܼܡ̈ܝܐ 66 ܘܢܲܦ̣ܫܵܐ ܗ̄ܝ̣ ܕܝܠܹܗ ܕܗܵܦܟܿܐ ܙܵܡ̇ܪܵܐ ܒܟܸܢܵܪ ܡܸܢܵܘ̈ܗܝ. 67 :ܒܦܲܓܼܪܵܐ ܘܢܲܦ̣ܫܵܐ ܩܐܸ̇ܡ ܟܠܢܵܫ ܡ̣ܢ ܒܲܪ ܕܐܝܼܬܼܵܘܗܝ 68 ܦܲܓܼܪܵܐ ܒܪܸ̈ܓܼܢܵܐ ܘܢܲܦ̣ܫܵܐ ܒܙܵܘ̈ܥܹܐ ܕܩܠܝܼܠܘܼܬܼܵܐ܀ 69 :ܦܲܓܼܪܵܐ ܗܵܘܹ̇ܐ ܠܵܐ ܡܵܝܘܿܬܼܵܐ ܚܠܵܦ ܡܝܘ̈ܬܼܵܐ 70 ܘܢܲܦ̣ܫܵܐ ܫܠܚܐ ܠܒܼܘܼܫ ܟܲܪܝܘܼܬܼܵܐ ܕܡܵܐܢܹ̈ܐ ܨܵܐܹ̈ܐ. 71 :ܗܘ̤ ܗܵܘ̇ ܦܲܓܼܪܵܐ ܕܲܗܘ̤ܵܐ ܡܸܕܼܪܵܐ ܗܵܘܹ̇ܐ ܦܲܓܼܪܵܐ 72 ܗܘ̤ܝ ܗܵܝ̇ ܢܲܦ̣ܫܵܐ ܕܒܛܠܘ ܩ̈ܠܝܗ̇ ܡܗܠܠܐ ܒܓܼܘܗ̇܀ 73 :ܦܵܘܠܘܿܣ ܣܵܗܸ̇ܕܼ ܥܲܠ ܚܘܼܒܵܠܹܗ ܘܥܲܠ ܚܘܼܕܬܗ 74 ܕܗܘ̤ ܡܸܬܼܚܲܒܲܠ ܘܗ̤ܘ ܡܸܬܼܚܲܕܲܬܼ ܒܚܲܝܠܵܐ ܕܒܪܝܗܝ. 75 :ܥܬܼܝܼܕܼ ܠܲܡ ܗܵܢܵܐ ܡܸܬܼܚܲܒܿܠܵܢܵܐ ܕܢܸܠܒܲܫ ܫܘܼܒܼܚܵܐ 76 ܘܗܵܢ ܡܵܝܘܿܬܼܵܐ ܕܢܸܚܹܐ ܒܚܲܝܹ̈ܐ ܕܠܵܐ ܡܵܝܘܿܬܹ̈ܐ܀ 77 :ܠܵܐ ܬܸܟܼܪܐ ܠܵܟ ܟܝܵܢܵܐ ܕܲܒܼܠܝܼ ܒܡܵܝܘܿܬܼܘܼܬܼܵܐ 78 ܘܠܵܐ ܬܸܬܼܦܲܠܲܓ ܥܲܠ ܚܘܼܕܵܬܼܵܐ ܕܦܲܓܼܪܵܐ ܘܢܲܦ̣ܫܵܐ. 79 :ܩܘܼܡ ܨܘܼܬܼ ܩ̈ܠܹܐ ܕܲܡܣܲܒܿܪܝܼܢ ܠܵܟ ܥܲܠ ܢܘܼܚܵܡܵܐ 80 ܘܲܩܢܝܼ ܣܲܒܼܪܵܐ ܕܗܵܘܹ̇ܐ ܣܲܒܼܪܵܐ ܠܡܵܝܘܿܬܼܘܼܬܼܵܟ܀ 81 :ܫܡܲܥ̣ ܠܲܢܒܼܝܼܵܐ ܕܩܥ̇ܐ ܒܪܘܼܚܵܐ ܠܓܼܪ̈ܡܹܐ ܡܝܼ̈ܬܹܐ 82 ܘܡܲܟܼܪܸܙ ܩܵܠܹܗ ܣܒܲܪܬܼܵܐ ܚܕܲܬܵܐ ܒܹܝܬܼ ܡܵܝܘܿܬܹ̈ܐ. 83 ܫܡ݂ܲܥ ܟܲܕܼ ܩܵܥܹ̇ܐ ܐܲܝܟ ܫܝܼܦܘܿܪܐ ܨܹܝܕܼ ܫܲܬܿܝܼܩܹ̈ܐ 84 ܘܲܡܟܲܢܸܫ ܠܹܗ ܠܟܼܠܹܗ ܚܲܝܠܵܐ ܦܲܓܼܪܵܐ ܠܘܵܬܼ ܚܘܼܕܵܬܼܵܐ܀ 85 :ܚܲܕܼ ܚܘܼܕܵܬܼܵܐ ܐܲܟܼܪܸܙ ܩܵܠܹܗ ܠܦܲܓܼܪܵܐ ܘܢܲܦ̣ܫܵܐ 86 ܘܐܲܫܩܝܼ ܐܸܢܘܿܢ ܟܵܣ ܒܘܼܝܵܐܵܐ ܕܚܲܝܲܬܼ ܡܝܼ̈ܬܹܐ. 87 :ܨܘܼܬܼ ܬܘܼܒܼ ܩܠܹܗ ܕܲܡܚܲܕܬܼܵܢܵܐ ܕܡܵܝܘܿܬܼܘܬܼܵܐ 88 ܕܲܡܚܵܘܹܐ ܠܹܗ ܐܲܝܟ ܕܲܒܼܨܒܼܥܵܐ ܠܚܘܼܕܵܬܼ ܐܢܵܫܵܐ܀ 89 :ܫܡ݂ܲܥ ܕܲܡܚܲܣܸܕܼ ܠܙܲܕܘܼܩ̈ܝܹܐ ܦܠܝܼܓܲܝ̈ ܠܸܒܵܐ 90 ܘܕܵܐܸ̇ܢ ܥܲܡ̇ܗ ܡ̣ܢ ܢܵܡܘܼܣܹ̈ܐ ܐܲܠܵܗܵܝܹ̈ܐ. 91 :ܛܵܥܹܝ̇ܢ ܐܢ̄ܬܘܿܢ ܠܲܡ ܕܠܵܐ ܝܵܕܼܥܝܼܢ ܐܢ̄ܬܿܘܿܢ ܠܡܸܩܪܵܐ ܒܣܸܦܪܹ̈ܐ 92 ܘܠܵܐ ܦܵܪܫܝܼܢ ܐܢ̄ܬܘܿܢ ܚܹܝܠ ܣܘܼܟܵܠܵܐ ܕܦܸܬܼܓܵܡܲܝ̈ܗܘܿܢ܀ 93 :ܒܲܩܝܡܬܼܵܐ ܠܲܡ ܠܲܝܬܿ ܦܘܼܪܫܵܢܵܐ ܕܓܲܒܼܪܹ̈ܐ ܘܢܸܫܹ̈ܐ 94 ܕܗܵܘܹ̇ܐ ܟܝܵܢܗܘܿܢ ܠܵܐ ܡܵܝܘܿܬܼܵܐ ܐܲܝܟ ܪ̈ܘܼܚܢܹ̈ܐ. 95 :ܗܵܐ ܕܪܲܫ̣ ܡܵܪܲܢ ܐܘܼܪܚܵܐ ܚܕܲܬܵܐ ܕܚܲܝܲܬܼ ܡܝܼܬܹ̈ܐ 96 ܬܵܘ ܢܸܪܕܹܐ ܒܵܗ̇ ܠܘܵܬܼ ܚܘܼܕܼܵܬܼܵܐ ܕܦܲܓܼܪܵܐ ܘܢܲܦ̣ܫܵܐ܀ 97 :ܗܵܐ ܐܲܟܼܪܸܙ ܠܲܢ ܣܲܒܼܪܵܐ ܛܵܒܼܵܐ ܒܩܵܠ ܦܸܬܼܓܼܵܡܘ̈ܗܝ 98 ܢܗܲܝܡܸܢ ܕܡܨܐ ܓܵܡܲ݁ܪ ܨܐܹܕܲܝܢ ܫܘܼܘܕܵܝ ܡܸܠܵܘ̈ܗܝ. 99 :ܗܵܐ ܩܥ̣ܵܐ ܡܵܘܬܵܐ ܐܲܪܝܵܐ ܪܗܝܼܒܼܵܐ ܕܚܲܒܸܿܠ ܓܸܢܣܲܢ 100 ܘܐܲܥܕܝܼ ܡܸܢܹܗ ܬܠܵܬܼܵܐ ܦܲܓܼܪ̈ܲܝܢ ܘܐܲܦܢܝܼ ܠܚܲܝܹ̈ܐ܀ 101 :ܗܵܐ ܢܚܸܬܼ ܐܵܦ ܗܘ̤ ܠܡܲܪܒܿܘܥܝܼܬܹܗ ܕܒܵܠܲܥ̇ ܐܵܢܵܫ̈ܐ 102 ܘܝܲܗܒ̣ ܠܹܗ ܦܲܓܼܪܹܗ ܘܒܲܠܥܹܗ ܘܦܲܠܛܹܗ ܩܲܠܝܼܠܵܐܝܼܬܼ. 103 :ܗܵܐ ܩ̣ܵܡ ܘܐܲܩܝܼܡ ܠܟܼܠܹܗ ܟܝܵܢܲܢ ܡ̣ܢ ܡܲܦܘܼܠܬܵܐ 104 ܘܬܲܪܥܹܗ ܠܫܘܼܪ̈ܐ ܕܲܒܼܢ̣ܵܐ ܡܵܘܬܵܐ ܒܐܲܦܲܝ̈ ܡܝܼܬܼ̈ܐ܀ 105 :ܗܵܐ ܢܦܲܩ̣ ܘܐܲܦܢܝܼ ܫܒܼܝܼܬܼܵܐ ܕܐ̄ܢܵܫܵܐ ܡ̣ܢ ܚܲܣܝܼܢܵܐ 106 ܘܫܲܩܠܹܗ ܠܙܲܝܢܹܗ ܘܒܲܙ ܡܲܫܪܝܼܬܹܗ ܘܥܲܒܼܕܹܗ ܓܘܼܚܟܵܐ. 107 :ܗܵܐ ܫܒ̣ܵܐ ܫܒܼܝܼܬܼܵܐ ܘܲܣܠܸܩ ܘܐܲܡܠܸܟ ܠܥܸܠ ܡ̣ܢ ܟܠܵܐ 108 ܘܲܥܬܼܝܼܕܼ ܕܢܹܐܬܹܿܐ ܘܲܢܚܲܕܼܬܼ ܟܠ ܒܩܵܠ ܦܸܬܼܓܵܡܵܘ̈ܗܝ܀ 109 :ܗܵܐ ܩܪܸܒܼ ܙܲܒܼܢܵܐ ܕܢܸܚܘܿܬܼ ܠܐܲܪܥܵܐ ܐܲܝܟ ܡܵܐ ܕܲܣܠܸܩ 110 ܒܦܲܓܼܪܵܐ ܓܲܠܝܵܐ ܘܚܲܝܠܵܐ ܟܲܣܝܵܐ ܕܐܲܠܗܘܼܬܼܵܐ. 111 :ܗܵܐ ܡܣܲܟܹܝܢ ܠܹܗ ܫܡܲܝܵܐ ܘܐܲܪܥܵܐ ܥܝܼܪܹ̈ܐ ܘܐܵܢܵܫ̈ܐ 112 ܕܢܸܫܪܹܐ ܐܸܢܘܿܢ ܡ̣ܢ ܫܘܼܥܒܵܕܼܵܐ ܡܸܬܼܚܲܒܿܠܵܢܵܐ܀ 113 ܗܵܐ ܡܸܬܿܬܲܢܚܵܐ ܒܪܝܼܬܹܐ ܟܠܵܗ̇ ܥܲܠ ܡܵܝܘ̈ܬܹܐ: pb. f.69v 114 ܕܐܸܡܲܬܼܝ ܢܸܗܘܘܿܢ ܠܵܐ ܡܵܝܘ̈ܬܐ ܘܠܵܐ ܚܫܘܫ̈ܐ. 115 ܢܵܚܬܵܐ ܕܐܸܒܼܠܵܐ ܠܒܼܝܼܫܝܼܢ ܐܲܟܼܚܲܕܼ ܡ̈ܠܝܼܠܹܐ ܘܚܲܪ̈ܫܹܐ 116 ܕܐܸܡܲܬܝܼ ܢܸܫܠܚܘܢ ܢܵܚܬܵܐ ܣܢܝܵܐ ܕܡܵܝܘܿܬܼܘܼܬܼܵܐ܀ 117 :ܚܸܒܼ̈ܠܹܐ ܩܫܝ̈ܐ ܡܵܚܹܝ̇ܢ ܠܐܲܪܥܐ ܐܲܝܟ ܝܲܠܕܬܵܐ 118 ܕܐܸܡܲܬܼܝ ܬܵܘܠܸܕܼ ܦܲܓܼܪܹ̈ܐ ܕܐܢܫ̈ܐ ܡ̣ܢ ܓܵܘ ܥܘܼܒܵܗ̇. 119 :ܚܲܫܵܐ ܪܲܒܐ ܛܥܝܼܢܝܼܢ ܐ̄ܢܵܫ̈ܐ ܘܪ̈ܘܼܚܵܢܵܝܹܐ 120 ܕܠܸܐܡܲܬܼܝ ܢܚܙܘܢ ܫܪܵܪܵܐ ܒܥܓܼܝܵܐ ܕܚܘܼܕܵܬܼ ܐܢܵܫ̈ܐ܀ 121 :ܒܣܲܒܼܪܵܐ ܡܣܲܟܹܿܝܢ ܥܲܒܼܕܹ̈ܐ ܛܵܒ̈ܐ ܠܡܵܪܵܐ ܒܲܝܬܵܐ 122 ܕܐܸܡܲܬܼܝ ܢܸܦܢܹܐ ܡ̣ܢ ܡܸܫܬܿܘܼܬܼܵܐ ܘܢܸܬܸܠ ܐܲܓܼܪܵܐ. 123 :ܒܣܲܒܼܪܵܐ ܠܒܼܝܼܟܼܝܼܢ ܚܲܟܿܝܼܡ̈ܬܼܵܐ ܠܲܡܦܲܝܼܕܲܝ̈ܗܹܝܢ 124 ܕܐܸܡܲܬܼܝ ܢܸܕܼܢܲܚ ܚܲܬܢܵܐ ܕܪܵܘܡܵܐ ܘܢܸܥ̈ܠܵܢ ܥܲܡܹܗ܀ 125 :ܠܣܘܼܟܵܝ ܣܲܒܼܪܵܐ ܡܣܲܟܹܝܢ ܟܸܢܫܹ̈ܐ ܕܫܡܝܢ̈ܐ 126 ܕܐܲܡܲܬܼܝ ܢܸܕܢܲܚ ܣܲܒܪܐ ܒܓܼܠܝܐ ܘܢܵܘܦܹܐ ܩܸܢܛܵܐ. 127 :ܠܗܵܘ̇ ܓܸܠܝܵܢܵܐ ܐܲܠܵܗܵܝܵܐ ܡܣܲܟܹܝܢ ܟܠܫܵܥ 128 ܕܐܸܡܲܬܼܷܝ ܢܸܬܼ̄ܦܬܲܚ ܬܲܪ̈ܥܲܝ ܪܵܘܡܵܐ ܘܲܢܩܲܒܠܘܼܢܵܝܗܝ܀ 129 :ܠܗܵܝ̇ ܒܲܪܬܼ ܩܵܠܵܐ ܨܲܠܝܵܐ ܐܸܕܼܢܵܐ ܕܪܸ̈ܥܝܵܢܲܝܗܘܿܢ 130 ܕܐܸܡܲܬܼܝ ܬ[܇܇܇]ܥܹܐ ܘܲܢܙܘܼܥ ܡܵܘܬܵܐ ܘܢܸܒܼܗܲܬܼ ܒܝܼܫܵܐ. 131 :ܛܲܟܼܣܲܐ ܢ̈ܛܪܝܼܢ ܠܗܵܘ̇ ܦܘܼܩܕܵܢܵܐ ܕܲܡܫܲܡܫܝܼܢ ܠܹܗ 132 ܕܐܸܡܲܬܼܝ ܢ̣ܦܩܘܿܕܼ ܘܢܸܩܪܘܢ ܒܐܲܪܥܵܐ ܩܵܠ ܦܘܼܪܩܵܢܵܐ܀ 133 :ܒܲܬܼܪܲܥ ܡܲܠܟܵܐ ܩܵܝ̇ܡܝܼܢ ܟܠܢܵܫ ܒܢܲܝ̈ ܦܠܵܛܝܼܢ 134 ܕܐܸܡܲܬܼܝ ܢܸܦܘܿܩ ܘܲܢܩܲܒܿܠܘܼܢܵܝܗܝ ܒܐܘܫܲܥܢܲܝ̈ܗܘܿܢ. 135 :ܟܠܝܼܠ ܙܵܟܼܘܼܬܼܵܐ ܓܵܕܼܠܝܼܢ ܒܐܝܼܕܼܵܐ ܕܙܵܘ̈ܥܹܐ ܕܲܒܼܗܘܿܢ 136 ܕܲܢܩܲܪ ܼܘܼܢܵܝܗܝ ܠܲܡܠܸܟ ܡܲܠܟܹ̈ܐ ܕܲܙܟܼܵܐ ܒܩܲܝܣܵܐ܀ 137 :ܠܵܐ ܡܸܬܼܡܠܠܵܐ ܪܸܓܲܬܼ ܚܘܼܒܹܿܗ ܕܪܸ̈ܥܝܵܢܲܝܗܘܿܢ 138 ܕܲܟ̣ܡܵܐ ܪܓܼܝܼܓܼܝܼܢ ܕܢܸܚܙܘܿܢ ܫܘܼܒܼܚܹܗ ܘܲܢܫܲܒܿܚܘܼܢܵܝܗܝ. 139 :ܩܸܢܛܵܐ ܘܚܘܼܒܵܐ ܡܲܡܠܸܟ ܐܲܟܼܚܲܕܼ ܥܲܠ ܣܸܕܼܪ̈ܲܝܗܘܿܢ 140 ܘܲܪܗܝܼܒܼܝܼܢ ܛܵܒܼ ܢܸܬܼܪܲܦܘܢ ܡ̣ܢ ܛܘܼܝܵܒܼܵܐ܀ 141 :ܡܲܚܒܼܝܼܢ ܣܲܓܿܝܼ ܘܪܵܓܝܹ̇ܢ ܣܲܓܿܝܼ ܘܩܵܢ̇ܛܝܼܢ ܣܲܓܿܝܼ 142 ܘܐܲܝܟ ܐܲܬܼܠܹܝ̈ܛܹܐ ܪܡܹܝܢ ܒܐܓܼܘܿܢܵܐ ܕܡܘܼܠܟܵܢ ܚܲܝܹ̈ܐ. 143 :ܒܪܘܼܚܵܐ ܪܵܗ̇ܛܝܼܢ ܒܐܸܣܛܵܕܝܼܘܿܢ ܪܘܼܚܵܢܝܬܿܐ 144 ܠܡܸܣܲܒܼ ܐܲܓܼܪܵܐ ܕܗܵܝ̇ ܙܵܟܼܘܼܬܼܵܐ ܕܠܵܐ ܡܸܙܕܲܟܝܵܐ ܀ 145 :ܗܵܐ ܡܲܢܲܥ ܠܹܗ ܙܒܲܢ ܦܘܼܪܥܵܢܵܐ ܕܐܓܼܘܿܢܲܝ̈ܗܘܿܢ 146 ܘܲܩܪܸܒܼ ܙܲܒܼܢܵܐ ܕܢܸܣܒܼܘܢ ܕܲܫܢܹ̈ܐ ܕܬܲܟܼܬܘܫܲܝ̈ܗܘܿܢ. 147 :ܗܵܐ ܩܸܪܒܲܬ̤ ܠܵܗ̇ ܡܲܠܟܿܘܼܬܼ ܪܵܘܡܵܐ ܕܡܲܠܟܵܐ ܕܪܵܘܡܵܐ 148 ܬܵܘ ܢܸܨܛܲܒܲܬܼ ܪܘܼܚܵܢܵܐܝܼܬܼ ܘܢܸܦܘܿܩ ܠܐܘܼܪܥܹܗ ܀ 149 :ܗܵܐ ܡܸܬܿܬܿܪܝܼܡܝܼܢ ܬܲܪ̈ܥܲܝ ܪܘܡܵܐ ܩܕܼܵܡ ܡܹܐܬܝܼܬܹܗ 150 ܕܢܸܚܘܿܬܼ ܠܲܐܪܥܵܐ ܘܢܲܣܸܩ ܥܲܡܡܹܗ ܒܢܲܝ̈ ܦܲܠܚܘܼܬܹܗ. 151 :ܬܲܗܪܵܐ ܪܲܒܵܐ ܘܛܘܼܒܼܵܐ ܘܚܲܫܵܐ ܒܝܘܿܡ ܓܸܠܝܵܢܹܗ 152 ܬܲܗܪܵܐ ܕܕܸܢܚܹܗ ܛܘܼܒܵܐ ܠܛܵܒܹ̈ܐ ܘܚܲܫܵܐ ܠܒܼܝܼܫܹ̈ܐ܀ 153 :ܒܗܸܕܪܵܐ ܘܫܘܼܒܼܚܵܐ ܡܚܵܘܹܐ ܢܲܦ̣ܫܹܗ ܠܥܝܼܪܹ̈ܐ ܘܐ̄ܢܵܫ̈ܐ 154 ܘܡ̣ܢ ܬܸܫܒܿܘܿܚܬܹܗ ܡܠ̇ܝܢ ܐܲܟܚܕܼ ܫܡܲܝܵܐ ܘܐܲܪܥܵܐ. 155 :ܪܸܡܙܵܐ ܕܚܲܝܠܹܗ ܡܪܝܼܡ ܬܲܚܦܝܼܬܼܵܐ ܕܐܲܦܲܝ̈ ܪܵܘܡܵܐ 156 ܘܕܲܢܲܚ̣ ܢܘܼܗܪܵܐ ܕܙܝܘܹܗ ܪܲܒܵܐ ܥܲܠ ܟܠ ܘܲܒܼܟܼܠ܀ 157 :ܒܲܕܼܡܘܼܬܼ ܒܲܪܩܵܐ ܕܵܢܲܚ̇ ܢܘܼܗܪܹܗ ܒܐܪ̈ܒܲܥܦܸܢܝܵܢ 158 ܘܲܙܥܘܿܪ ܢܘܼܗܪܵܐ ܡܸܬܼܚܲܙܝܵܢܵܐ ܒܦܸܚܡܵܐ ܕܢܘܼܗܪܹܗ. 159 :ܠܲܝܬܿ ܠܹܗ ܦܸܚܡܵܐ ܠܢܘܼܗܪܵܐ ܕܡܲܒܼܪܸܩ̣ ܡ̣ܢ ܦܲܪܨܘܿܦܹܗ 160 ܘܠܵܐ ܬܲܚܘܝܼܬܼܵܐ ܠܩܲܠܝܼܠܘܼܬܼܵܐ ܕܪܲܗܛܵܠ ܕܪܸܡܙܹܗ܀ 161 :ܡܲܐ̄ܬܿܝܼܢ ܒܲܪ̈̄ܩܐ ܡ̣ܢ ܦܘܼܩܕܼܵܢܹܗ ܟܡܵܐ ܐܸܢ ܩܲܠܝܼܠ 162 ܘܚܸܫܘܿܟ ܢܘܼܗܪܵܐ ܕܐܸܣܦܹܝܪ ܫܸܡܫܵܐ ܒܕܼܘܼܡܝܵܐ ܕܝܼܠܹܗ. 163 ܠܵܐ ܡܸܬܼܡܲܠܠܵܐ ܪܲܒܿܘܼܬܼ ܫܘܼܒܼܚܹܗ ܒܠܸܫܵܢ ܐ̄ܢܵܫܵܐ: pb. f.70r 164 ܘܲܙܥܘܿܪ ܦܘܼܡܵܐ ܕܟܼܠ ܕܲܥܒܼܝܼܕܼܵܐ ܗ̄ܘ̣ ܕܢܹܐܡܲܪ ܕܲܟܼܡܐ ܗ̄ܝܼ܀ 165 :ܕܚܝܼܠܵܐ ܘܩܲܫܝܵܐ ܫܵܥܬܼܵܐ ܕܕܼܢܚܹܗ ܡ̣ܢ ܟܠ ܫܵܠܝܼ̈ܢ 166 ܘܠܲܝܬܼ ܦܲܓܼܪܵܢܵܐ ܘܠܵܐ ܪܘܼܚܵܢܵܐ ܕܠܵܐ ܡܸܬܼܒܿܠܗܐ. 167 :ܬܘܗܬܐ ܪܲܒܿܬܼܵܐ ܢܵܦ̇ܠܵܐ ܡ̣ܢ ܫܸܠܝ ܥܲܠ ܒܸܪ̈ܝܵܬܵܐ 168 ܒܩܵܠ ܦܘܼܩܕܵܢܵܐ ܕܡܲܪܗܸܒܼ ܩܵܠܹܗ ܛܵܒܼ ܡܼܢ ܝܲܡܵܐ܀ 169 :ܐܲܝܟ ܐܝܙܓܲܕܵܐ ܪܵܗܸ̇ܛ ܪܸܡܙܵܐ ܩܕܼܵܡ ܦܲܪܨܿܦܹܗ 170 ܘܲܡܩܝܼܡ ܛܲܟܼܣܹ̈ܐ ܕܲܫܡܲܝܵܢ̈ܐ ܓܘܼܕܝܼ̈ܢ ܓܘܼܕܝܼ̈ܢ. 171 :ܒܛܲܟܼܣܵܐ ܗܵܝܡܝܼܢ ܪ̈ܘܼܚܵܢܵܝܹܐ ܩܕܼܵܡ ܪܲܒܿܘܼܬܹܗ 172 ܘܲܡܙܲܝܚܝܼܢ ܠܹܗ ܒܩܵܠ ܬܸܫܒܿܘܿܚܬܵܐ ܕܲܠܲܝܬܿ ܠܵܗ̇ ܦܸܚܡܵܐ ܀ 173 :ܐܵܠܸܦ ܐܲܠܦܝܼ̈ܢ ܩܵܝ̇ܡܝܼܢ ܩܕܼܵܡܵܘܗܝ ܟܲܕܼ ܕܲܚ̈ܝܼܠܝܼܢ 174 ܘܪܸܒܿܘܼ ܪ̈ܒܿܘܵܢ ܬܵܢܹܝ̇ܢ ܫܘܼܒܼܚܹܗ ܕܠܵܐ ܣܲܒܼܥܘܼܬܼܵܐ. 175 :ܚܘܼܒܹܿܗ ܡܲܡܠܸܟ ܥܲܠ ܐܵܠܦܲܝ̈ܗܘܿܢ ܕܲܫܡܝܢ̈ܐ 176 ܘܲܪܗܝܼܒܼܝܼܢ ܛܵܒܼ ܕܲܢܦܲܢܘܼܢ ܠܹܗ ܚܲܘܒܲܬܼ ܚܘܼܒܵܐ܀ 177 :ܟܪ̈ܘܿܒܹܐ ܟܕܝܼܢܝܼܢ ܥܝܼܪܹ̈ܐ ܡܙܲܝܚܝܼܢ ܣܪ̈ܵܦܹܐ ܩܵܥܹ̇ܝܢ 178 ܩܲܕܲܝܼܫ ܩܲܕܿܝܼܫ ܩܲܕܝܼܫ ܡܲܠܟܿܐ ܕܲܫܪܹܐ ܒܫܘܼܒܼܚܵܐ. 179 :ܩܲܕܿܝܼܫ ܩܵܥܹܝ̇ܢ ܒܠܸܫܵܢ ܪܘܼܚܵܐ ܪܘܼܚܵܢܵܐܝܼܬ 180 ܐܲܝܟ ܗܵܘ̇ ܠܸܥܙܵܐ ܕܲܫܡ݂ܲܥ ܦܵܘܠܘܿܣ ܕܠܵܐ ܡܸܬܼܡܲܠܲܠ܀ 181 :ܠܵܐ ܡܸܬܼܡܲܠܠܵܐ ܒܠܸܫܵܢ ܒܸܣܪܵܐ ܗܵܝ̇ ܒܲܪܬܼ ܩܵܠܵܐ 182 ܕܲܡܗܲܠܠܝܼܢ ܒܵܗ̇ ܐܲܠܵܗܵܐܝܼܬܼ ܠܲܐܲܠܵܗ ܟܠܵܐ. 183 :ܒܙܵܘܥܹ̈ܐ ܟܣܲܝܲ̈ܐ ܙܵܡ̇ܪܝܼܢ ܫܘܼܒܼܚ̇ܐ ܠܟܲܣܝܵܐ ܒܓܸܠܝܵܐ 184 ܘܟܲܠܝܵܐ ܚܙܵܬܼܗܘܿܢ ܒܐܲܦܝ̈ ܬܲܪܥܵܐ ܦܓܪܢܝܐ܀ 185 :ܦܲܓܼܪܵܐ ܚܵܙܝ̇ܢ ܟܲܕܼ ܡܸܙܕܲܝܲܚ ܥܲܠ ܡܲܪܟܲܒܼܬܼܵܐ 186 ܘܟܲܣܝܵܐ ܒܓܼܵܘܹܗ ܐܲܠܵܗܘܼܬܼܵܐ ܕܠܵܐ ܡܸܬܼܚܲܙܝܵܐ. 187 :ܟܣܝܵܐ ܒܓܠܝܐ ܦܩ̇ܕ ܡ̣ܢ ܫܠܝ ܠܘܵܬܼ ܟܢܫܝܼ̈ܗܘܿܢ 188 ܠܲܡܝܿܒܼܵܒܼܘ ܩܵܠ ܬܸܫܒܿܘܿܚܬܵܐ ܕܚܘܼܕܵܬܼ ܟܠܵܐ ܀ 189 :ܩܵܠ ܚܘܼܕܵܬܼܵܐ ܩܵܥܹ̇ܝܢ ܟܠܗܘܿܢ ܒܐܸܕܼܢܲܝ̈ ܐܲܢܵܫ̈ܐ 190 ܘܙܝ̇ܥܐ ܐܲܪܥܵܐ ܒܩܵܠܵܐ ܕܚܝܼܠܵܐ ܕܫܝܼܦܘܿܪ̈ܵܝܗܘܿܢ. 191 :ܪܥܡܵܐ ܕܩ̈ܵܠܹܐ ܗ̈ܘܹܝܢ ܟܠܗܘܿܢ ܟܡܵܐ ܕܐܝܼܬܿܝܗܘܿܢ 192 ܘܐܲܝܟ ܡܸܢܝܵܢܗܘܿܢ ܩܵܠ ܩܲܪ̈ܢܵܬܼܵܐ ܪ̈ܘܼܚܵܢܝܵܬܼܵܐ܀ 193 :ܗܕܼܝܼܪܵܐ ܚܙܵܬܼܗܘܿܢ ܘܲܫܒܼܝܼܚ ܡܲܡܠܠܵܐ ܕܦܸܬܼܓܼܵܡܲܝ̈ܗܘܿܢ 194 ܘܩܲܠܝܼܾܠ ܪܲܗܛܵܐ ܕܣܘܼܥܪ̈ܵܢܲܝܗܘܿܢ ܛܵܒܼ ܡ̣ܢ ܒܲܪܩܵܐ. 195 :ܠܥܸܠ ܡ̣ܢ ܟܠܗܘܿܢ ܐܵܬܹ̇ܐ ܒܫܘܼܒܼܚܵܐ ܡܲܠܟܿܐ ܡܫܝܼܚܵܐ 196 ܘܲܡܙܲܝܚܝܼܢ ܠܹܗ ܒܩܵܠ ܬܸܫܒܿܘܿܚܬܵܐ ܕܦܲܐܝܵܐ ܠܲܫܡܗ܀ 197 :ܪ̈ܲܒ ܡܲܠܐܟܹܐ ܛܥܝܼܢ ܙܵܟܼܘܼܬܼܵܐ ܢܝܼܫܵܐ ܨܠܝܼܒܼܵܐ 198 ܘܲܡܚܵܘܹܐ ܠܹܗ ܠܲܫܡܲܝܵ̈ܢܹܐ ܘܠܲܐܪܥܵܢܵܝܹܐ. 199 :ܩܕܼܵܡܵܘܗܝ ܐܵܬ̇ܐ ܢܝܼܫܵܐ ܕܚܲܫܹܗ ܘܲܕܼܙܵܟܼܘܼܬܹܗ 200 ܕܢܸܬܼܟܲܐܪܘܢ ܒܹܗ ܐܲܝܠܹܝܢ ܕܐܲܡ̣ܪܲܚܘ ܘܫܹܐܕܹ̈ܐ ܛܪ̈ܘܢܐ ܀ 201 :ܠܘܲܥܕܹܗ ܪܵܗܛ̇ܝܼܢ ܓܘܼܕܹ̈ܐ ܕܥܝܼܪܹ̈ܐ ܘܲܕܼܡܲܠܲܐܟܹ̈ܿܐ 202 ܘܒܹܗ ܡܸܬܼܒܲܩܹܝܢ ܒܥܲܝܢܵܐ ܟܣܝܼܬܼܵܐ ܕܪܸ̈ܥܝܵܢܲܝܗܘܿܢ. 203 :ܡܲܠܟܵܐ ܘܢܝܼܫܹܗ ܢܵܚ̇ܬܼ ܠܲܐܪܥܵܐ ܕܐܸܨܛܲܥܲܪ ܒܹܗ̇ 204 ܘܬܼܵܒܲܥ̇ ܨܲܥܪܸܗ ܘܝܵܗ̣̇ܒܼ ܕܲܫܢܹ̈ܐ ܠܲܡܩܿܒܲܠܵܢܵܘ̈ܗܝ܀ 205 :ܩܵܠܵܐ ܕܩܲܪܢܵܐ ܐܲܠܵܗܵܝܬܵܐ ܡܲܙܥܸܩ ܩܕܼܵܡܵܘܗܝ 206 ܘܟܼܵܢܫ̇ܝܼܢ ܘܐܵܬܼܝܹ̇ܢ ܡܝܼ̈ܬܹܐ ܘܚܵܝܹ̈ܐ ܠܘܲܥܕܵܐ ܕܲܫܡܹܗ. 207 :ܩܲܪܢܵܐ ܐ̄ܚܪܵܝܬܿܐ ܩܵܥ̇ܝܵܐ ܒܚܲܪܬܼܵܐ ܒܫܘܼܠܵܡ ܙܲܒܼܢܹ̈ܐ 208 ܘܒܼܵܗ̇ ܡܸܬܼܦܲܬܼܚܝܼܢ ܬܲܪ̈ܥܸܐ ܕܲܫܝܼܘܿܠ ܩܕܼܵܡ ܥܲܢܝܼܪܹ̈ܐ܀ 209 :ܪܸܡܙܵܐ ܟܲܣܝܵܐ ܪܵܗܸ̇ܛ ܥܲܡܵܗ̇ ܕܗܵܝ̇ ܒܲܪܬܼ ܩܵܠܵܐ 210 ܘܒܲܪܦܵܦ ܥܲܝܢܵܐ ܡܩܝܼܡ ܘܲܡܚܲܕܼܬܼ ܦܲܓܼܪܹ̈ܐ ܕܲܒܼܠܝܼܘ. 211 :ܩܵܠܵܐ ܘܪܸܡܙܵܐ ܩܵܥܹܝ̇ܢ ܡ̣ܢ ܫܸܠܝ ܒܐܸܕܼܢܲܝ̈ ܡܵܘܬܵܐ 212 ܕܦܲܢܵܐ ܫܒܼܝܼܬܼܵܐ ܘܗܲܒܼ ܚܘܫܒܵܢܵܐ ܕܦܲܓܼܪܹ̈ܐ ܕܐܸܒܲܕܼܘ ܀ 213 ܓܘܼܢܚܵܐ ܪܲܒܵܐ ܢܦ̇ܠ ܒܲܫܝܘܿܠ ܐܸܡܵܐ ܕܡܝܼܬܹ̈ܐ: pb. f.70v 214 ܘܲܡܒܿܠܗܝܼܢ ܠܵܗ̇ ܐܲܝܟ ܝܲܠܸܕܬܿܐ ܚܸܒ̈ܠܹܐ ܕܚ̈ܝܼܠܹܐ. 215 :ܢܸܒܼܥܵܐ ܕܐܢܫ̈ܐ ܗܵܘܹܐ ܥܘܼܒܵܗ̇ ܕܐܸܡܵܐ ܥܩܲܪܬܵܐ 216 ܘܲܟܼܡܵܐ ܕܟܼܵܡܲܬ̤ ܗܵܟܲܢ ܦܵܪܥܵܐ ܩܲܠܝܼܠܵܐܝܼܬܼ܀ 217 :ܛܲܠܵܐ ܕܪ̈ܲܚܡܹܐ ܪܵܐܸ̇ܣ ܪܸܡܙܵܐ ܒܐܲܦܹܝ̈ܗ̇ ܕܐܲܪܥܵܐ 218 ܘܒܲܕܼܡܘܼܬܼ ܙܲܪܥܵܐ ܝܵܥܝ̇ܢ ܦܲܓܼܪܹ̈ܐ ܡ̣ܢ ܕܲܚܝܼܚܵܐ. 219 :ܩܵܐ̇ܡ ܦܲܓܼܪܵܐ ܒܪܸ̈ܓܼܫܹܐ ܓܠܲܝܼ̈ܐ ܟܠܹܗ ܒܟܼܠܹܗ 220 ܘܦܵܢ̇ܝܵܐ ܢܲܦܫܵܐ ܥܲܡ ܚܸܟܼܡܼܵܬܼܵܗ̇ ܕܡܗܠܠܵܐ ܒܗ܀ 221 :ܠܝܬܿ ܗܲܕܵܡܵܐ ܕܦܵܐܹ̇ܫ ܡܸܢܹܗ ܕܦܲܓܼܪܵܐ ܒܲܫܝܘܿܠ 222 ܘܠܵܐ ܡ̣ܢ ܙܵܘ̈ܥܹܐ ܕܢܲܦܫܵܐ ܛܵܥܹ̇ܐ ܕܠܵܐ ܒܵܗ̇ ܦܵܢܹ̇ܐ. 223 :ܦܲܓܼܪܵܐ ܘܢܲܦܫܵܐ ܩܵܝ̇ܡܝܼܢ ܐܲܟܼܚܲܕܼ ܒܲܪܦܵܦ ܥܲܝܢܵܐ 224 ܘܫܵܠܚ̇ܝܼܢ ܫܵܕ̇ܝܢ ܢܲܚ̈ܬܹܐ ܕܚܲܫܵܐ ܘܠܵܒܼܫܝܼ̇ܢ ܫܘܼܒܼܚܵܐ܀ 225 :ܘܩܵܝ̇ܡܝܼܢ ܡܝܼ̈ܬܹܐ ܘܗܵܘܹ̇ܐ ܟܝܵܢܗܘܿܢ ܠܵܐ ܡܵܝܘܿܬܵܐ 226 ܘܟܸܢ ܡܸܬܼܚܲܠܦܝܼܢ ܚܲܝ̈ܐ ܕܚܝ̇ܝܢ ܠܵܗ̇ ܠܕܼܡܘܬܼܵܐ. 227 :ܚܲܕܼ ܦܘܼܩܕܵܢܵܐ ܡܩܝܼܡ ܘܲܡܫܲܚܠܸܦ ܡܝܼ̈ܬܹܐ ܘܚܵܝܹ̈ܐ 228 ܘܠܵܐ ܐ̄ܢܵܫ ܛܵܥܹ̇ܐ ܠܵܐ ܡ̣ܢ ܡܝܼ̈ܬܹܐ ܘܠܵܐ ܡ̣ܢ ܚ̈ܝܐ܀ 229 :ܩܝܵܡܬܼܵܐ ܫܘܝܵܐ ܥܲܠ ܟܠ ܦܲܓܼܪ̈ܝܢ ܘܥܲܠ ܟܠ ܢܦܫ̈ܢ 230 ܘܛܒܼ̈ܐ ܘܒܼܝܼ̈ܫܹܐ ܩܝ̇ܡܝܼܢ ܐܲܟܼܚܲܕܼ ܒܦܲܓܼܪܵܐ ܘܢܵܦ̣ܫܵܐ. 231 :ܟܠܹܗ ܟܝܵܢܵܐ ܕܡܸܕܼܪܹܗ ܕܐܲܕܵܡ ܦܵܢܹ̇ܐ ܠܚ̈ܝܐ 232 ܘܠܲܝܬܿ ܒܝܠܝܕ̈ܐ ܕܦܐ̇ܫ ܒܲܫܝܘܿܠ ܘܠܵܐ ܡܬܼܢܲܚܡ܀ 233 :ܚܲܕܼ ܗܘ̤ ܒܲܠܚܘܿܕܼ ܕܛܵܥܹܐ ܬܲܡ̇ܢ ܡ̣ܢ ܡܸܢܝܵܢܵܐ 234 ܗܵܘ̇ ܕܲܒܼܪܘܚܵܐ ܕܛܘܥܝܲܝ ܛܵܥܹ̇ܐ ܡܲܛܥܹܐ ܠܐܵܢܵܫܵܐ. 235 :ܒܲܪ ܐܲܒܼܕܵܢܵܐ ܗ̄ܘ̣ ܕܐܵܒܸܿܕܼ ܒܲܠܚܘܕܼ ܕܡ̣ܢ ܐܵܢܫܘܼܬܼܵܐ 236 ܘܠܵܐ ܡܲܫܘܹܝܢ ܠܹܗ ܪ̈ܲܚܡܹܐ ܕܢܸܥܘܿܠ ܡܒܸܢܝ̈ܵܢ ܐܵܢܫ̈ܐ܀ 237 :ܒܐܦܘ̈ܗܝ ܒܲܠܚܘܿܕܼ ܐܵܚܕܼ ܪܸܡܙܵܐ ܬܪܲܥ ܢܘܼܚܵܡܵܐ 238 ܘܠܵܐ ܡܚܵܘܹܝܢ ܠܹܗ ܐܲܦܲܝ̈ ܡܲܠܟܵܐ ܕܦܵܩܸ̇ܕܼ ܠܲܡܩܵܡ. 239 :ܒܙܲܝܢܵܐ ܕܚܝܼܠܵܐ ܡܦܲܟܲܪ ܦܲܓܼܪܹܗ ܘܙܵܘܥܲܝ̈ ܢܲܦ̣ܫܹܗ 240 ܘܲܡܛܲܒܲܥ ܠܹܗ ܒܗܵܘܬܼܵܐ ܕܲܫܝܘܿܠ ܕܠܵܐ ܫܘܠܵܡܵܐ܀ 241 :ܬܲܗܪܵܐ ܪܲܒܵܐ ܡܸܬܼܚܵܘܸܐ ܒܹܗ ܠܲܡܠܝܼܠܘܼܬܼܵܐ 242 ܕܐܲܝܟܲܢ ܐܵܒܸ̇ܕܼ ܟܝܵܢܵܐ ܚܲܝܵܐ ܡ̣ܢ ܚܲܝܘܼܬܼܵܐ. 243 :ܒܹܗ ܡܸܬܼܒܲܩܹܝܢ ܪ̈ܘܼܚܵܢܵܝܹܐ ܘܦܲܓܼܪ̈ܢܵܝܹܐ 244 ܐܢܵܫܵܐ ܒܦܲܓܼܪܹܗ ܘܥܝܪܐ ܒܢܲܦ̣ܫܹܗ ܕܡܵܘܦܝܼܢ ܡ̣ܢ ܫܹܠܝ܀ 245 ܚܕܬܿܐ ܗܵܘܝܵܐ ܒܗܵܘ̇ ܚܘܼܕܬܵܐ ܕܲܡܠܹܐ ܬܲܗܪܵܐ܀ 246 ܕܟܼܠ ܡܬܚܲܕܲܬܼ ܘܚܲܕ ܡܸܬܼܚܲܒܲܠ ܕܠܵܐ ܚܵܘܣܵܢܵܐ. 247 :ܬܲܗܪܵܐ ܪܲܒܿܐ ܒܝܘܿܡ ܓܸܠܝܵܢܗ ܕܲܡܠܸܟ ܡ̈ܲܠܟܹܐ 248 ܕܲܠܟܼܠ ܕܵܐ̇ܢ ܘܲܠܚܲܕܼ ܫܲܒܸ̇ܩ ܕܠܵܐ ܫܘܼܐܵܠܵܐ܀ 249 :ܚܕܼܘܬܼܵܐ ܘܥܵܩܬܼܵܐ ܒܝܘܿܡ ܢܘܼܚܵܡܵܐ ܠܲܬܼܪܹܝܢ ܓܲܒܿܝܼ̈ܢ 250 ܛܘܼܒܵܐ ܠܛܒܹ̈ܐ ܘܲܠܥܵܘ̈ܠܹܐ ܢܸܓܼܕܹ̈ܐ ܥܦܝܼ̈ܦܹܐ. 251 :ܟ̈ܠܝܼܠܹܐ ܘܢܸܓܼܕܹ̈ܐ ܠܒܼܝܼܟ ܦܘܼܩܕܵܢܵܐ ܩܕܼܵܡ ܕܲܝ̇ܢܵܐ 252 ܟܠܝ̈ܠܐ ܠܟܹܐܢܸ̈ܐ ܘܢܸܓܼܕܹ̈ܐ ܠܒܼܝܼܫܹ̈ܐ ܕܚܵܒ̣ܘ ܒܐܵܓܼܘܢܵܐ܀ 253 :ܫܘܼܒܼܚܵܐ ܘܨܲܥܪܵܐ ܐܲܚܲܝܼܕ ܪܸܡܙܵܐ ܐܲܝܟ ܕܲܒܼܨܸܒܼܥܵܐ 254 ܘܝܵܗܸ̇ܒܼ ܫܘܼܒܼܚܵܐ ܠܐܲܝܠܹܝܢ ܕܲܢܨܲܚ̣ܘ ܘܨܲܥܪܵܐ ܠܕܐܲܫܦܸܠܘ. 255 :ܐܲܝܟ ܫܲܠܝܼܛܵܐ ܩܕܼܵܡ ܦܘܼܩܕܵܢܵܐ ܒܲܬܼܪܲܥ ܡܲܠܥܐ 256 ܘܲܠܚܲܕܼ ܡܲܥܸܠ ܘܲܠܚܲܕܼ ܡܲܦܸܩ ܠܚܸܫܟܿܐ ܕܲܠܒܲܪ܀ 257 :ܒܟܼܘܼܪܵܐ ܕܕܝܼܢܵܐ ܡܲܥܸܠ ܢܵܣܸ̇ܟ ܠܲܡܠܝܼܠܘܼܬܼܵܐ 258 ܘܓܼܵܒܹ̇ܐ ܕܲܗܒܼܵܐ ܫܪܵܪܵܐ ܓܲܠܝܵܐ ܘܡܲܣܠܸܐ ܠܙܹܐܦܵܐ. 259 :ܒܛܲܒܼܥܵܐ ܕܡܲܠܟܿܐ ܛܵܒܲܥ̇ ܛܵܒܹ̈ܐ ܠܦܲܠܚܘܼܬܼ ܡܲܠܟܵܐ 260 ܘܲܠܥܵܘ̈ܠܹܐ ܡܲܣܠܹܐ ܘܫܵܕܹܐ ܒܓܼܵܘ ܓܹܗܲܢܵܐ܀ 261 :ܫܲܒܼܛܵܐ ܦܫܝܼܛܵܐ ܐܲܚܝܼܕܼ ܒܐܝܼܕܼܗ ܘܣܵܥܲܪ̈ ܥܵܢܹ̈ܗ 262 ܘܲܡܩܝܼܡ ܥܪ̈ܒܹܿܐ ܡ̣ܢ ܝܲܡܝܼܢܹܗ ܐܲܝܟ ܕܐܸܫܬܵܘܕܝܼ. 263 :ܪܲܒܿ ܦܘܼܪܫܵܢܵܐ ܕܗܵܘ̇ܐ ܬܲܡ̇ܢ ܨܝܕܼ ܡܲܠ̈ܠܹܐ 264 ܕܟܲܕܼ ܚܲܕܼ ܐܸܢܘܿܢ ܒܚܲܕܼ ܚܘܼܕܵܬܼܵܐ ܠܵܘ ܚܲܕܼ ܐܸܢܘܿܢ܀ 265 ܚܲܕܼ ܗܘ̤ ܟܝܵܢܵܐ ܕܲܡܠܝܼܠܘܼܬܼܵܐ ܕܥܝܼܪܹ݁ܐ ܘܐܢܵܫܹ̈ܐ: pb. f.71r 266 ܘܠܵܐ ܚܲܕܼ ܐܸܢܘܿܢ ܒܝܲܕܼ ܦܘܼܪܫܵܢܵܐ ܕܣܘܼܥܪ̈ܢܲܝܗܘܿܢ. 267 :ܒܗܵܘ̇ ܠܲܡ ܝܵܘܡܵܐ ܬܪܹܝܢ ܐܸܢ ܢܸܗܘܘܢ ܒܚܕܹܐ ܥܪܣܐ 268 ܚܲܕܼ ܡܸܬܼܥܲܠܹܐ ܠܐܦܝ̈ ܪܵܘܡܵܐ ܘܲܐ̄ܚܪܹܝܢ ܦܵܐܸܫ܀ 269 :ܬܲܪܬܹܝܢ ܐܸܢ ܐܝܼܬܼ ܕܛܚܢ̈ܵܢ ܪܲܚܝܵܐ ܒܗܵܘ̇ ܥܕܢܐ 270 ܚܕܼܵܐ ܡܸܬܕܲܒܪܵܐ ܘܲܚܕܵܐ ܦܵܝܫܵܐ ܐܲܝܟ ܕܐܝܼܬܹܝܗ̇ ܗ̄ܘ̣ܵܬܼ. 271 :ܗܵܐ ܚܵܘܝܵܬܹܗ ܡܲܠܲܬܼ ܡܵܪܢ ܠܗܵܘ̇ ܦܘܼܪܫܵܢܵܐ 272 ܕܐܲܟܲܢ ܦܵܪܸܫ ܟܹܐܢܹ̈ܐ ܘܢܲܟܼ̈ܦܹܐ ܡ̣ܢ ܥܵܘ̈ܠܹܐ܀ 273 :ܨܝܕܼ ܟܠ ܬܸܓܡܝܼ̈ܢ ܚܵܘܝܼ ܕܗܵܘܹ̇ܐ ܗܵܢ ܦܘܼܪܫܵܢܵܐ 274 ܘܐܲܝܢ ܡܵܐ ܕܓܼܵܒܹ̇ܐ ܕܟܼܪܵܐ ܐܵܦ ܢܸܩܒܼ̈ܬܼܵܐ. 275 :ܘܟܲܕܼ ܛܵܒܼ ܬܲܡ̇ܢ ܚܲܕܼ ܗ̄ܘ̣ ܟܝܵܢܵܐ ܕܓܲܒܼܪܹ̈ܐ ܘܢܫܹ̈ܐ 276 ܘܚܵܘܝܼ ܕܦܵܫ̇ܝܼܢ ܐܵܦ ܡ̣ܢ ܗܵܠܹܝܢ ܐܵܦ ܡ̣ܢ ܗܵܠܹܝܢ܀ 277 :ܒܲܕܡܘܼܬܼ ܒܲܪܩܵܐ ܥܵܒܲܪ ܪܸܡܙܵܐ ܒܹܝܬܼ ܬܸܓܼܡܲܝ̈ܗܘܿܢ 278 ܘܲܠܚܲܕܼ ܕܵܒܲܪ ܘܲܠܚܲܕܼ ܫܵܒܸ̇ܩ ܡ̣ܢ ܟܠ ܬܸܓܼܡܝܼ̈ܢ. 279 :ܛܲܟܼܣܵܐ ܪܲܒܿܐ ܡܠܹܐ ܦܘܪ̈ܫܵܢܵܐ ܐܸܦܵܢ ܦܵܪܹܫ 280 ܘܲܠܦܘܼܬܼ ܥܲܡ̈ܠܹܐ ܝܵܗܸ̇ܒܼ ܐܲܓܼܪܵܐ ܐܵܦ ܫܘܼܒܼܩܵܢܵܐ܀ 281 :ܒܚܲܕܼ ܦܘܼܪܫܵܢܵܐ ܡܲܫܘܹܐ ܠܐܢܵܫ̈ܵܐ ܘܠܪ̈ܘܼܚܵܢܹܐ 282 ܘܐܲܟܼܚܲܕܼ ܒܵܚܲܪ ܫܪܵܪܵܐ ܘܙܹܐܦܵܐ ܕܲܬܼܪܹܝܢ ܓܲܒܹܝ̈ܢ. 283 :ܠܲܓܢܘܢ ܪܵܘܡܵܐ ܡܲܥܸܠ ܢܟܼ̈ܦܹܐ ܠܒܼܝܼܫܲܝ̈ ܚܘܼܒܵܐ 284 ܘܗܵܪܟܵܐ ܒܐܪܥܵܐ ܡܪܦܐ ܠܢܦ̈ܠܐ ܕܠܐ ܐܸܨܛܲܒܲܬܼܘ܀ 285 :ܒܐܲܪܥܵܐ ܦܵܝܵܫ̇ܝܼܢ ܪ̈ܵܚܡܲܝ ܐܲܪܥܵܐ ܐܲܝܟܵܐ ܕܲܪܚܸܡܘ 286 ܘܪ̈ܓܼܝ ܕܲܠܥܸܠ ܠܥܸܠ ܡܸܬܼܥܲܠܹܝܢ ܒܓܸܦܹ̈ܐ ܕܪܘܚܵܐ. 287 :ܒܐܲܪܥܵܐ ܡܩܲܒܿܠܝܼܢ ܢܸܓܕ̈ܐ ܥܦܝܼܦܹ̈ܐ ܐܲܝܟ ܡܵܐ ܕܫܵܘܹ̇ܝܢ 288 ܘܒܼܵܗ̇ ܡܸܬܼܦܲܪܥܝܼܢ ܚܵܘܒܲܬ ܚܵܘܒܹ̈ܐ ܕܣܘܼܥܪ̈ܢܲܝܗܘܿܢ܀ 289 :ܐܲܪܥܵܐ ܗܵܘܝܵܐ ܠܗܘܿܢ ܓܹܗܲܢܼܵܐ ܠܲܒܼܢܲܝ̈ ܐܲܪܥܵܐ 290 ܘܗܸܢܘܿܢ ܪܵܕܹܝܢ ܠܲܩܢܘܿܡܲܝ̈ܗܘܿܢ ܒܐܲܝܠܹܝܢ ܕܲܚܛ̣ܵܘ. 291 :ܗܘ̤ ܠܹܗ ܡܢܲܓܸܕܼ ܝܲܨܪܵܐ ܕܲܒܼܗܘܿܢ ܦܵܪܘܿܫܵܐܝܼܬܼ 292 ܕܥܲܠ ܡ̇ܢ ܐܲܗܡܝܼܘ ܡ̣ܢ ܘܵܠܝܼܬܼܵܐ ܒܚܲܝܹ̈ܐ ܕܲܬܼܢܵܢ܀ 293 :ܗܢܘ̇ܢ ܕܵܝ̇ܢܝܢ ܠܥܵܘܠܵܐ ܕܲܒܼܗܘܿܢ ܕܚܲܝܵܒܼ ܐܸܢܘܿܢ 294 ܘܲܡܦܲܪܣܝܼܢ ܠܹܗ ܒܥܼܘܼܪ ܒܟܼܘܼ ܒܘܼ̃ܟܼܪܢܵܐ ܕܚܘܼܫܵܒܲܝܗ̈ܘܿܢ. 295 :ܕܝܼܢܵܐ ܪܲܒܿܐ ܐܵܡ̇ܪܝܼܢ ܬܲܡ̇ܢ ܥܲܡ ܚܵܘܒܲܝ̈ܗܘܿܢ 296 ܘܲܠܥܹܝܢ ܟܠܢܵܫ ܡܦܲܪܣܝܼܢ ܡܘܼܡܹ̈ܐ ܕܣܬܝܪ̈ܬܐ܀ 297 :ܡܲܪܝܼܪ ܢܸܓܼܪܹ̈ܐ ܕܡܸܬܼܢܲܓܼܕܝܢ ܠܹܗ ܡ̣ܢ ܟܠ ܢܸܓܼܕܝܢ 298 ܡܵܐ ܕܡܸܬܼܟܲܠܲܠ ܓܲܒܵܐ ܕܟܹܐܢܹ̈ܐ ܘܕܼܝܼܠܗܘܿܢ ܒܵܗܸ̇ܬܼ. 299 :ܬܲܗܪܵܐ ܪܲܒܿܐ ܚܵܙܹܝܢ ܒܝܼܫܹ̈ܐ ܒܓܲܒܵܐ ܕܛܵܒܹ̈ܐ 300 ܕܐܝܟܢ ܦܵܪܚ̇ܝܼܢ ܩܲܠܝܼܠܵܐܝܼܬܼ ܠܐܲܦܲܝ̈ ܪܵܘܡܵܐ܀ 301 :ܬܲܗܪܵܐ ܗ̄ܘ̣ ܪܲܒܵܐ ܘܲܟܼܡܵܐ ܕܢܹܐܡܲܪ ܪܲܒܿ ܡ̣ܢ ܬܲܗܪܵܐ 302 ܕܒܸܣܪܵܐ ܫܝܼܛܵܐ ܘܥܵܘܥܹܐ ܓܸܦܹ̈ܐ ܕܦܵܪܘܿܚܘܼܬܼܵܐ. 303 :ܗܵܘ̇ ܦܘܼܩܕܵܢܵܐ ܕܓܲܒܼܠܹܗ ܒܪܵܫܝܼܬܼ ܡ̣ܢ ܕܲܚܝܼܚܵܐ 304 ܗܘ̤ ܡܚܲܝܸܠ ܠܵܗ̇ ܠܦܵܪܘܚܘܼܬܹܗ ܠܡܸܦܪܲܚ ܒܐܵܐܲܪ܀ 305 :ܗܵܘ̇ ܕܲܢܦܲܚ̣ ܒܹܗ ܪܘܼܚ ܚܲܝܘܬܼܵܐ ܘܲܗܘ̤ܵܐ ܠܲܢܦܸܫ 306 ܗܘ̤ ܥܵܒܸ̇ܕܼ ܠܹܗ ܗܲܝܟܲܠ ܪܘܼܚܵܐ ܕܠܵܐ ܡܸܬܼܚܲܒܲܠ. 307 ܗܵܘ̇ ܕܐܸܬܿܬܲܚܬܲܝ ܨܹܝܕܼ ܬܘܼܩܵܢܹܗ ܚܘܼܒܵܢܵܐܝܼܬܼ܀ 308 ܗܘ̤ ܡܪܝܼܡ ܫܸܦܠܹܗ ܘܲܡܚܲܕܼܬܼ ܠܹܗ ܪܲܚܡܵܢܵܐܝܼܬܼ܀ 309 :ܒܚܘܼܒܵܐ ܘܪ̈ܲܚܡܹܐ ܓܲܒܼܠܹܗ ܒܪ̈ܫܝܼܬܼ ܘܲܩܪ̣ܝܵܗܝ ܒܲܫܡܹܗ 310 ܘܒܹܗ ܬܘܸܒܼ ܒܲܙܢܵܐ ܡܲܫܲܪ ܨܐܕܵܘܗܝ ܫܘܼܘܕܵܝ ܡܸܠܵܘ̈ܗܝ. 311 :ܒܨܲܠܡܹܗ ܟܲܢܝܹܗ ܡ̣ܢ ܫܘܼܪܵܐ ܟܲܕܼ ܡܲܬܼܩܸܢ ܠܹܗ 312 ܘܲܒܼܱܫܘܼܠܡܵܐ ܒܨܲܠܡܹܗ ܢܵܚܹ̇ܬܸ ܘܲܡܢܲܚܸܡ ܠܹܗ܀ 313 ܒܨܲܠܡܹܗ ܢܵܚܹ̇ܬܼ ܪܸܡܙܵܐ ܟܲܣܝܵܐ ܠܵܘ ܗܘ̤ ܟܲܣܝܵܐ 314 ܘܝܵܗܸ̇ܒܼ ܚܲܝܹ̈ܐ ܠܵܐ ܡܵܝܘܬܹ̈ܐ ܠܡܵܝܘܿܬܼܘܼܬܼܵܐ. 315 :ܒܐܵܕܼܵܡ ܕܲܬܼܪܹܝܢ ܗܵܘ̇ ܕܐܸܬܿܬܲܚܬܲܝ ܘܠܲܒܫܹܗ ܒܚܘܼܒܵܐ 316 ܒܹܗ ܡܸܬܿܬܿܚܬܿܐ ܕܠܵܐ ܫܘܼܢܵܝܵܐ ܒܫܘܼܠܵܡ ܙܲܒܼܢܹ̈ܐ܀ pb. f.71v 317 :ܦܲܓܼܪܵܐ ܕܲܠܒܸܫ ܨܒܼܝܵܢ ܚܘܼܒܹܿܗ ܘܲܩܪ̣ܵܝܗ ܒܲܫܡܹܗ 318 ܗܘ̤ ܡܸܬܼܥܲܛܲܦ ܨܸܒܼܝܵܢܵܐܝܼܬܼ ܘܢܵܚܸ̇ܬ ܠܐܲܪܥܵܐ. 319 :ܗܵܘ̇ ܕܐܸܣܬܲܠܲܩ ܠܥܹܝܢ ܡܲܠܲܐܟ̈ܐ ܘܲܒܼܢܲܝܢ̈ܵܫܵܐ 320 ܗܘ̤ܝܘܼ ܕܐܵܬܹ̇ܐ ܠܲܡܕܵܢ ܐܢܵܫ̈ܐ ܘܪ̈ܘܼܚܵܢܵܝܐ܀ 321 :ܒܦܲܓܼܪܵܐ ܓܲܠܝܵܐ ܚܙܵܐܘܼܗܝ ܥܝܼܪܹ̈ܐ ܟܲܕܼ ܡܸܣܬܲܠܲܩ 322 ܘܒܵܗ̇ ܒܲܚܙܵܬܼܵܐ ܐܸܡ̣ܲܪܘ ܕܐܵܬܹ̇ܐ ܐܲܝܟ ܡܵܐ ܕܲܣܠܸܩ. 323 :ܥܲܡ ܓܲܠܝܘܼܬܹܗ ܢܵܚܹ̇ܬܼ ܪܸܡܙܹܗ ܩܲܠܝܼܠܵܐܝܼܬܼ 324 ܘܲܡܚܲܕܼܬܼ ܟܠ ܘܡܲܣܸܩ ܥܲܡܹܗ ܠܐܲܬܼܪܵܐ ܕܲܠܥܸܠ܀ 325 :ܪܸܡܙܵܐ ܟܲܣܝܵܐ ܩܵܥܹ̇ܐ ܒܓܸܠܝܐ ܩܵܠܵܐ ܕܚܝܼܠܵܐ 326 ܘܲܡܙܝܼܥ ܠܲܐܪܥܵܐ ܘܡܲܪܗܸܒܼ ܣܸܕܼܪܸ̈ܐ ܕܫܡܝ̈ܢܐ. 327 :ܒܩܵܠܵܐ ܦܵܩܸ̇ܕܼ ܠܫܡܝ̈ܢܐ ܘܠܐܪ̈ܥܢܝܐ 328 ܕܩܘܼܡܘ ܘܐܸܬܼܚܲܕܲܬܼܘ ܘܲܠܒܸܫܘ ܫܘܼܒܼܚܵܐ ܕܠܵܐ ܡܸܬܼܚܲܒܲܠ܀ 329 :ܩܵܠ ܦܘܼܩܕܵܢܹܗ ܡܥܝܼܪ ܠܐܪ̈ܥܢܐ ܡ̣ܢ ܕܲܡܟܿܘܼܬܼܵܐ 330 ܘܢܵܕܼܝ̇ܢ ܩܵܝ̇ܡܝܼܢ ܐܲܝܟ ܕܡ̣ܢ ܫܸܢܬܼܵܐ ܕܝܲܩܝܼܪܘܼܬܼܵܐ. 331 :ܚܕܼܵܐ ܒܲܪܬܼ ܩܵܠܵܐ ܕܡܲܠܝܵܐ ܬܲܗܪܵܐ ܩܵܥܹ̇ܐ ܒܐܲܪܥܐ 332 ܘܪܵܥܠܝܼܢ ܡܸܢܹܗ̇ ܡ̈ܠܝܼܠܹܐ ܘܚܲܪ̈ܫܹܐ ܘܡܸܫܬܲܡܥܝܼܢ ܠܵܗ̇܀ 333 :ܟܠ ܨܵܐ̇ܬܼ ܠܵܗ̇ ܘܟܼܠ ܓܵܡܲܪ ܠܵܗ̇ ܕܠܵܐ ܫܘܼܘܚܵܪܵܐ 334 ܘܒܼܵܗ̇ ܡܸܬܚܕܬܝܢ ܪܵܘܡܵܐ ܘܥܘܼܡܩܵܐ ܘܟܼܠܡܵܐ ܕܲܒܼܗܘܿܢ. 335 ܡ̈ܠܝܼܠ ܣܵܠܵܩ̇ܝܼܢ ܠܕܲܪܓܼܐ ܪܵܡܵܐ ܕܠܲܝܬܿ ܠܹܗ ܦܸܚܡܵܐ܀ 336 ܘܚܲܪ̈ܫܹܐ ܢܵܚ̇ܝܼܢ ܡ̣ܢ ܥܲܒܼܕܘܼܬܼܵܐ ܕܦܘܼܠܚܵܢ ܐܵܢܵܫ̈ܐ܀ 337 :ܒܵܛܸ̇ܠ ܫܸܡܫܵܐ ܡ̣ܢ ܡܲܪܕܝܼܬܼܵܐ ܕܩܲܠܝܼܠܘܼܬܹܗ 338 ܘܢܵܐܸ̇ܚ ܣܲܗܪܵܐ ܡ̣ܢ ܫܘܼܚܠܵܦܵܘ̈ܗܝ ܕܲܒܼܟܼܠ ܝܲܪ̈ܚܝܼܢ. 339 :ܢܵܦܠ̇ܝܼܢ ܟܵܘܟܿܒܹ̈ܐ ܘܕܥܸܟ ܢܘܼܗܪܵܐ ܕܙܲܠܝܼܩܲܝ̈ܗܘܿܢ 340 ܘܫܵܠܹ̇ܐ ܡܲܫܒܼܵܐ ܕܪ̈ܘܼܚܹܐ ܕܐܵܐܲܪ ܘܠܵܐ ܬܘܼܒܼ ܡܸܬܿܬܿܙܝܼܥ܀ 341 :ܡܵܘܦܹܐ ܚܸܫܟܵܐ ܘܥܵܒܲܪ̇ ܛܲܟܼܣܵܐ ܕܠܸܠܝ ܐܝܼܡܵܡ 342 ܘܠܵܐ ܡܸܬܼܡܲܢ̈ܝܵܢ ܫ̈ܥܹܐ ܘܫܲܒܹ̈ܐ ܘܝܲܪܚܲܝ ܫܲܢ̄ܬܵܐ. 343 :ܝܵܒܸ̇ܫ ܢܒܼܥܵܐ ܕܥܘܼܒܵܗ̇ ܕܲܫܝܘܿܠ ܡ̣ܢ ܟܠ ܦܹܐܪ̈ܝܼܢ 344 ܘܣܵܝ̇ܦܵܐ ܒܥܝܼܵܪܵܐ ܘܚܵܝܘܲܬܼ ܫܸܢܵܐ ܘܪ̈ܲܚܫܵܐ ܡܵܘܦܹܐ܀ 345 :ܫܵܠܹ̇ܐ ܝܲܡܵܐ ܡ̣ܢ ܬܲܟܼܬܘܼܫܵܐ ܕܓܼ̈ܠܹܐ ܪ̈ܗܝܼܒܹܐ 346 ܘܠܵܐ ܬܘܼܒܼ ܪ̈ܵܗܛܵܢ ܐܸܠܦܹ̈ܿܐ ܕܐ̄ܢܵܫ̈ܐ ܠܥܸܠ ܡ̣ܢ ܚܲܨܹܗ. 347 :ܟܠ ܡܸܫܬܲܚܠܲܦ ܘܟܼܠ ܡܸܬܼܚܲܕܲܬ ܒܚܘܼܕܵܬܼ ܐܢܵܫ̈ܐ 348 ܘܥܲܠ ܟܠ ܘܲܒܼܟܼܠ ܡܲܡܠܸܟ ܢܘܼܗܪܵܐ ܕܚܲܕܼ ܒܵܪܘܿܝܵܐ܀ 349 :ܟܠ ܡܸܬܼܚܲܪܲܪ ܡ̣ܢ ܥܲܒܼܕܘܼܬܼܵܐ ܕܲܠܘܼܵܬܼ ܐ̄ܢܵܫ̈ܵܐ 350 ܘܗ̤ܘ ܒܲܪܢܵܫܵܐ ܡܕܲܝܲܪ ܒܲܐ̃ܬܼܪܵܐ ܕܠܲܝܬܿ ܒܹܗ ܩܸܢܛܵܐ. 351 :ܒܪܸܡܙܵܐ ܙܥܘܿܪܵܐ ܡܸܫܬܲܚܠܲܦ ܟܠ ܘܡܸܬܼܚܲܕܲܬܼ ܟܠ 352 ܘܠܵܐ ܡܸܬܼܡܲܠܠܐ ܩܲܠܝܼܠܘܼܬܹܗ ܕܐܲܝܟܲܢ ܘܲܟܼܡܵܐ ܗ̄ܝ̣܀ 353 :ܩܲܠܝܼܠ ܗ̄ܘ̣ ܛܵܒܼ ܗܵܘ̇ ܦܘܼܩܕܵܢܵܐ ܡ̣ܢ ܟܠ ܡܸܕܡ 354 ܘܐܸܢ ܐܝܼܬܼ ܡܕܡ ܕܩܲܠܝܼܠ ܣܲܓܝܼ ܡܲܬܿܝܼܢ ܡܸܢܹܗ. 355 :ܠܲܝܬܿ ܬܘܼܗܵܝܵܐ ܒܹܝܬܼ ܡܲܚܲܬܿܬܼܵܐ ܘܲܠܡܲܣܲܩܬܵܐ 356 ܐܵܦܠܵܐ ܐܲܝܟ ܐ̄ܢܵܫ ܕܡܲܛܪܸܦ ܥܲܝܢܹܗ ܬܸܡܪܵܐ ܠܬܸܡܪܵܐ܀ 357 :ܥܲܠ ܡܲܪܟܲܒܬܼܵܐ ܕܚܲܨܗ ܕܐܵܐܪ ܡܙܲܝܲܚ ܡܲܠܟܿܐ 358 ܠܦܲܠܚܹ̈ܐ ܚܝܼܨܹ̈ܐ ܕܐܲܩܪܸܒܼܘ ܘܲܙܟܼܵܘ ܡܸܛܠ ܚܘܼܒܹܗ. 359 :ܚܕܼܵܐ ܡܲܪܟܲܒܼܬܼܵܐ ܪܘܼܚܵܢܵܝܬܵܐ ܟܲܕܸܢ ܪܸܡܙܹܗ 360 ܘܒܼܵܗ̇ ܬܘܼܒܼ ܡܵܘܬܸܒܼ ܐܲܪ̈ܥܵܢܵܝܹܐ ܘܲܫܡܝܵܢܹ̈ܐ܀ 361 :ܗܘ̤ܝܘܼ ܪܸܡܙܹܗ ܕܗܵܘܹ̇ܐ ܥܢܵܢܵܐ ܐܵܦ ܡܲܪܟܼܒܲܬܼܵܐ 362 ܘܗܘ̤ܝܘܼ ܕܛܥܝܼܢ ܘܲܡܕܲܒܲܪ ܟܠ ܠܲܐܦܝ̈ ܪܵܘܡܵܐ܀ 363 :ܗܘ̤ܝܘܼ ܕܗܵܘܹ̇ܐ ܚܠܵܦ ܟܠܡܸܕܹܿܡ ܠܲܡܠܝܠܘܼܬܼܵܐ 364 ܘܒܹܗ ܡܸܬܼܥܲܠܹܝܢ ܥܝܼܪܹ̈ܐ ܘܐ̄ܢܵܫ̈ܐ ܠܐܲܬܼܪܵܐ ܕܲܠܥܸܠ. pb. f.72r 365 :ܗܘ̤ܝܘܼ ܕܚܵܙܸ̇ܩ ܐܲܝܟ ܪܲܒܿܚܲܝܠܵܐ ܩܕܼܵܡ ܣܸܕܲܪ̈ܲܝܗܘܿܢ 366 :ܘܗ̤ܘ ܬܘܼܒܼ ܡܟܲܢܸܫ ܣܸܕܪܸ̈ܐ ܐܚܪܵܢܹܐ ܠܘܲܥܕܵܐ ܕܲܫܡܹܗ 367 :ܚܵܙܸ̇ܩ ܡܲܠܟܿܐ ܒܪܸܫ ܡܲܫܪܝܼܬܹܗ ܠܐܦ̈ܝ ܪܵܘܡܵܐ 368 ܘܐܠ̈ܦܐ ܕܥܝܪ̈ܐ ܡ̣ܢ ܝܲܡܝܼܢܹܗ ܘܡ̣ܢ ܣܸܡܵܠܹܗ. 369 :ܥܲܡܹܗ ܚܵܙ̇ܩܝܼܢ ܒܢܲܝ̈ ܦܲܠܵܛܝܼܢ ܠܲܐܬܼܪܵܐ ܕܢܘܼܗܪܵܐ 370 ܕܢܸܗܘܘܿܢ ܥܲܡܹܗ ܒܢܲܝ̈ ܝܪܬܘܬܐ ܒܡܲܠܟܿܘܼܬܼ ܪܵܘܡܵܐ܀ 371 :ܪܲܒܵܐ ܗ̄ܝ̣ ܣܲܓܼܝ ܦܠܲܓܐ ܕܚܝܠܗ ܡ̣ܢ ܟܠ ܚܝ̈ܠܝܢ 372 ܘܠܵܐ ܡܸܬܼܡܲܠܲܠ ܗܸܕܼܪܵܐ ܘܫܘܼܒܼܚܵܐ ܕܡܸܙܕܲܝܲܚ ܒܹܗ. 373 ܥܲܡܹܗ ܐܝܼܬܹܝܗ̇ ܒܪܝܼܬܼܵܐ ܟܠܵܗ̇ ܕܲܡܠܝܼܠܘܼܬܵܐ. 374 ܐܲܠܦܹ̈ܐ ܕܥܝܼܪܹ̈ܐ ܐܵܦ ܪܸ̈ܒܿܘܵܬܼܵܐ ܕܲܒܼܢܲܝ̈ܢܵܫܵܐ܀ 375 :ܟܠܝܼܠ ܬܸܫܒܿܘܿܚܬܵܐ ܕܝܘܿܡ ܙܵܟܼܘܼܬܹܗ ܛܥܝܼܢܝܼܢ ܟܠܗܘܿܢ 376 ܘܲܡܩܲܪܒܼܝܼܢ ܠܹܗ ܒܐܝܼܕܼܵܐ ܕܙܵܘ̈ܥܹܐ ܪ̈ܘܼܚܵܢܵܝܹܐ. 377 :ܫܘܼܒܼܚܹܗ ܬܵܢܹܝܢ ܫܡܲܝܵܐ ܘܐܲܪܥܵܐ ܒܦܘܼܡ ܡ̈ܠܵܠܹܐ 378 ܟܲܕܼܦܵܪܥܝܼܢ ܠܹܗ ܚܘܒܬܼ ܚܘܼܒܵܐ ܩܵܠ ܬܸܫܒܿܘܿܚܬܵܐ܀ 379 :ܒܲܪܒܘܼܬ ܚܘܒܹܗ ܡܲܩܲܬܼ ܚܘܪܐ ܕܪ̈ܥܝܢܝܗܘܿܢ 380 ܟܲܕܼ ܡܸܬܼܝܲܐܒܼܝܼܢ ܕܐܸܡܲܬܼܝ ܦܵܬܲܚ̇ ܬܲܪ̈ܥܲܝ ܪܵܘܡܵܐ. 381 :ܪܗܝܼܒܼܝܼܢ ܣܲܓܿܝܼ ܠܡܸܚܙܵܐ ܐܘܼܪܚܵܐ ܕܐܸܙܕܲܡܲܢ ܠܹܗ̇ 382 ܕܢܸܥܠܘܢ ܢܸܣܒܼܘܢ ܡܠܝ̈ܠܹܐ ܘܕܲܫܢܹ̈ܐ ܪ̈ܘܼܚܢܵܝܹܐ܀ 383 :ܠܵܐ ܡܸܣܬܲܒܼܥܵܐ ܚܙܵܬܼܵܐ ܕܡܲܠܟܵܐ ܠܪܸ̈ܥܝܵܢܲܝܗܘܿܢ 384 ܘܲܟܼܡܵܐ ܕܚܵܙܹ̇ܝܢ ܬܘܼܒܼ ܡܸܬܼܝܲܐܒܹܝܢ ܠܡܸܬܼܒܲܩܵܝܘܼ. 385 :ܩܕܼܵܡ ܙܵܘܥܲܝ̈ܗܘܿܢ ܪܵܗܸܛ̇ ܪܸܡܙܵܐ ܩܲܠܝܼܠܵܐܝܼܬܼ 386 ܘܡܥܒܼܵܪ ܘܐܹܠܵܐ ܕܐܦܝ̈ ܬܪܥܐ ܕܒܹܝܬܼ ܡܲܠܟܿܘܼܬܼܵܐ܀ 387 :ܬܲܪܥܵܐ ܪܲܒܵܐ ܦܵܬܼܚ̇ ܡܲܠܟܿܐ ܩܕܼܵܡ ܡܥܠܬܗ 388 ܘܥܵܐܸ̇ܠ ܢܵܐܹ̇ܚ ܒܓܼܵܘ ܦܲܠܵܛܝܼܢ ܗܘ̤ ܘܲܕܼܥܲܡܹܗ. 389 :ܬܲܗܪܵܐ ܘܚܲܫܵܐ ܡܲܠܝܵܐ ܚܙܵܬܼܵܐ ܕܗܵܝ̇ ܡܲܥܲܠܲܬܿܐ 390 ܬܲܗܪܵܐ ܠܕܲܠܥܸܠ ܘܚܲܫܵܐ ܠܕܲܠܬܲܚܬܿ ܕܠܵܐ ܡܸܬܼܥܲܠܹܝܢ܀ 391 :ܛܲܒܼ ܡ̣ܢ ܛܵܒܹ̈ܐ ܡܸܬܼܒܲܩܝܼܢ ܒܹܗ ܐܵܦ ܥܵܘ̈ܵܠܹܐ 392 ܘܗܵܢ̇ܘ ܚܲܫܵܐ ܕܟܲܕ ܚܵܙܹܝ̇ܢ ܠܹܗ ܓܠܝܼܙܝܼܢ ܡܸܢܹܗ. 393 :ܒܚܲܫܵܐ ܚܵܐ̇ܪ ܗܵܘܢܵܐ ܕܲܒܼܗܘܿܢ ܕܠܵܐ ܣܲܒܼܥܘܼܬܼܵܐ 394 ܟܲܕܼ ܡܸܬܼܦܲܬܼܚܝܼܢ ܘܟܲܕܼ ܡܸܬܿܬܲܚܕܝܼܢ ܬܲܪ̈ܥܲܝ ܪܵܘܡܵܐ܀ 395 :ܚܙܵܬܼܵܐ ܚܕܲܬܵܐ ܚܵܙܹ̇ܝܢ ܐ̄ܢܵܫܵܐ ܒܲܒܼܢܲܝ̈ܢܫܵܐ 396 ܕܟܲܕܼ ܚܲܕ ܐܸܢܘܿܢ ܚܲܕܼ ܡܸܬܼܥܲܠܹܐ ܘܚܲܕܼ ܡܸܬܿܬܲܚܬܹܿܐ. 397 :ܚܲܕܲܬܵܐ ܚܵܙܹ̇ܝܢ ܐܵܦ ܪ̈ܘܼܚܵܢܹܐ ܬܸܓܼܡܹ̈ܐ ܕܫܹܐܕܹ̈ܐ 398 ܕܟܲܕܼ ܪܘܼܚ ܐܸܢܘܿܢ ܠܵܐ ܡܨܹܝܢ ܦܵܪܚ̇ܝܼܢ ܐܲܝܟ ܪ̈ܘܼܚܵܢܹܐ܀ 399 :ܒܬܸܡܗܵܐ ܩܵܝܡܝܼܢ ܐ̄ܢܵܫ̈ܐ ܒܝܼܫܹ̈ܐ ܘܫܹܐܕܹ̈ܐ ܛܪ̈ܘܼܢܐ 400 ܡܵܐ ܕܡܸܬܼܒܲܩܹܝܢ ܒܬܲܪ̈ܥܲܝ ܪܵܘܡܵܐ ܟܲܕܼ ܡܸܬܿܬܲܚܕܝܼܢ. 401 ܒܵܟܹ̇ܝܢ ܩܵܐܠܹ̇ܝܢ ܠܲܩܢܘܿܡܝܼܗܘܿܢ ܪܵܥܘܿܡܵܐܝܼܬܼ 402 ܕܚܵܙܹ̇ܝܢ ܕܐܲܚܝܼܕܼ ܬܪܲܥ ܫܘܼܒܼܩܵܢܵܐ ܩܕܼܵܡ ܐܲܦܲܝܗܘܿܢ܀ 403 :ܒܚܲܫܵܐ ܒܵܟܹ̇ܝܢ ܘܒܲܚܢ̈ܓܼܵܬܵܐ ܪ̈ܵܥܘܿܡܵܬܼܵܐ 404 ܘܥܲܦܝܼܦܵܐܝܼܬܼ ܬ̇ܢܹܝܢ ܩ̈ܵܠܹܐ ܕܲܬܼܘܵܬܼ ܢܲܦ̣ܫܵܐ. 405 :ܚܲܫܵܐ ܡܢܲܓܸܕ ܠܝܲܨܪܵܐ ܕܲܒܼܗܘܿܢ ܦܵܪܘܿܫܵܐܝܼܬܼ 406 ܘܲܬܼܘܵܬܼ ܢܲܦ̣ܫܵܐ ܕܵܝܢܐ ܡܘܼܡܹ̈ܐ ܕܲܩܢܘܿܡܲܝ̈ܗܘܿܢ܀ 407 :ܗܢܘ̣ܢ ܕܝܵܢܝܢ ܥܲܡ ܚܵܘܒܲܝ̈ܗܘܿܢ ܚܲܟܿܝܼܡܵܐܝܼܬܿ 408 ܘܐܲܝܟ ܕܲܒܼܟܼܘܼܪܵܐ ܒܵܚܪܝܼܢ ܙܹܐܦܵܐ ܕܪܸ̈ܥܝܵܢܲܝܵܗܘܿܢ. 409 :ܒܗܵܘܢܵܐ ܕܲܒܼܗܘܿܢ ܬܵܩ̇ܠܝܼܢ ܝܘܩܪܵܐ ܕܲܚܛܵܗܲܝ̈ܗܘܿܢ 410 ܘܲܠܦܘܼܬܼ ܥܵܘܠܵܐ ܡܲܣܓܹܿܝܢ ܚܲܫܵܐ ܡܲܪܝܼܪ̈ܐܝܼܬܼ܀ 411 :ܡܲܪܝܼܪ ܘܼܩܫܹܐ ܕܝܼܢܵܐ ܟܹܐܢܵܐ ܕܡܸܬܿܬܲܒܼܠܝܼܢ ܒܹܗ 412 ܘܠܵܐ ܡܸܬܼܡܲܠܠܐ ܒܠܸܫ̇ܢ ܐ̄ܢܵܫܵܐ ܩܲܫܝܘܼܬܼ ܢܸܓܼܕܵܘ̈ܗܝ. 413 :ܪܲܒܵܐ ܗ̄ܝ̣ ܗܵܘܬܼܵܐ ܕܢܲܦܠܝܼܢ ܒܵܗ̇ ܐܵܦ ܥܲܡܝܼܩܹ̈ܐ 414 ܘܥܲܣܩܹ̈ܐ ܗ̄ܝ̣ ܣܲܓܵܝܼ ܠܡܸܬܼܦܲܠܵܛܘܼ ܡ̣ܢ ܩܲܫܝܘܼܬܵܗ̇܀ 415 ܥܲܡ ܥܬܿܝܼܪܵܐ ܩܥ̇ܝܢ ܟܠܢܵܫ ܠܘܵܬܼ ܐܲܒܼܪܵܗܵܡ: pb. f.72v 416 ܕܚܘܣ ܪܚܡܢܐ ܘܐܲܦܝܼܣ ܪ̈ܲܚܡܹܐ ܕܲܢܕܲܠܘܢܲܢ. 417 :ܒܥܝܼ ܘܐܸܬܟܫܲܦ ܠܪܸܡܙܵܐ ܟܲܣܝܵܐ ܐܲܝܟ ܕܲܡܥܵܕܲܬܼ 418 ܕܢܸܪܘܿܣ ܩܲܠܝܼܠ ܛܲܠܵܐ ܕܪ̈ܲܚܡܐ ܥܲܠ ܒܝܼܫܘܼܬܼܢ܀ 419 :ܒܢܲܝ̈ ܠܵܐ ܡܨܝܵܐ ܠܲܡܦܝܼܣܵܢܹ̈ܐ ܥܢ̣ܵܐ ܐܲܒܼܪܵܗܵܡ 420 ܕܢܸܥܒܲܪ ܗܵܘܬܵܐ ܕܐܝܼܬܼ ܒܡܸܨܥܲܬܐ ܒܲܝܢܲܢ ܘܲܠܟܼܘܿܢ. 421 :ܥܗܲܕܼܘ ܕܲܪܚܸܡܬܘܢ ܐܲܪ̈ܥܵܢܝܵܬܵܐ ܘܛܘܼܒܹ̈ܐ ܕܙܲܒܼܢܵܐ 422 ܘܠܵܐ ܣܲܝܸܟܼܬܘܢ ܣܲܟܿܝܼܬܿܘܢ ܠܡܘܼܠܟܢ ܚܲܝܹ̈ܐ ܪ̈ܘܼܚܵܢܵܝܹܐ܀ 423 ܗܵܠܹܝܢ ܬܵܢܹ̇ܐ ܐܲܒܼܪܵܡ ܠܲܒܼܢܵܘ̈ܗܝ ܠܵܐ ܗ̄ܘ̣ܵܐ ܒܩܵܠܵܐ. 424 ܠܦܘܼܬܼ ܕܲܟܼܬܼܝܼܒܼܵܐ ܐܸܡ̇ܪܹܬܼ ܡܸ̈ܠܹܐ ܐܲܝܟ ܗܵܘ̇ ܕܗܘ̤ܝ̈. 425 :ܠܵܐ ܓܹܝܪ ܗܸܢܘܿܢ ܩܵܪܹܝܢ ܠܲܐܒܼܪܵܡ ܕܲܢܚܘܢ ܐܸܢܘܿܢ 426 ܘܠܵܐ ܐܲܒܼܪܵܗܵܡ ܡܨܸܐ ܕܲܢܡܲܠܸܠ ܒܸܠܥܵܕܼ ܪܸܡܙܵܐ܀ 427 :ܪܸܡܙܵܐ ܗ̄ܘ̣ ܕܐܲܚܝܼܕ ܬܪܲܥ̣ ܡܲܠܛܟܿܘܼܬܼܵܐ ܩܕܼܵܡ ܐܲܦܲܝܼ̈ܗܘܿܢ 428 ܘܗܘ̤ܝܘܼ ܕܩܵܥܹ̇ܐ ܒܦܘܼܡ ܐܲܒܼܪܵܗܵܡ ܘܕܦܝܼܫܘ ܘܐܸܫܬܲܢܲܩܘ. 429 :ܗ̤ܘܝܘܼ ܕܐܲܚܝܼܕ ܫܲܒܼܛܵܐ ܒܢܸܓܼܕܼ̈ܐ ܕܠܵܐ ܒܐܝܼܕܲ̈ܝܵܐ 430 ܘܲܠܦܘܼܬܼ ܥܲܡ̈ܠܹܐ ܡܲܣܪܲܚ ܢܸܓܼܕ̈ܐ ܠܡܸܬܼܢܲܕܼܵܢ̈ܐ܀ 431 :ܗܘ̤ ܬܘܼܒܼ ܟܲܕ ܗܘ̤ ܠܒܼܝܼܟ ܒܹܝܬ ܓܲܙܹܐ ܕܛܘܼܒܹ̈ܐ ܠܥܸܠ 432 ܘܲܠܦܘܼܬܼ ܚܘܼܒܵܐ ܝܵܗܸܿܒܼ ܐܲܓܼܪܵܐ ܠܪ̈ܵܚܡܲܝ ܚܘܼܒܵܐ. 433 :ܠܵܐ ܫܘܹܝܢ ܢܸܓܼܕܹ̈ܐ ܕܐܲܝܠܹܝܢ ܕܐܲܥܘܸܠܘ ܒܠܵܐ ܝܲܕܥܬܼܵܐ 434 ܘܥܵܠܸܒܼ̇ ܫܘܼܒܼܚܵܐ ܕܐܲܝܠܹܝܢ ܕܥܲܙܝܼܘ ܒܐܵܓܼܘܢ ܥܲܡ̈ܠܹܐ. 435 :ܠܦܘܼܬܼ ܨܒܼܝܵܢܵܐ ܡܦܲܠܸܓܼ ܪܸܡܙܵܐ ܛܘܼܒܹ̈ܐ ܘܢܸܓܼܕܹ̈ܐ 436 ܘܲܠܦܘܼܬܼ ܥܵܘܠܵܐ ܘܙܲܕܝܼܩܘܼܬܼܵܐ ܡܚܲܕܵܐ ܘܲܡܥܝܼܩ܀ 437 :ܘܟܲܕ ܛܵܒܼ ܠܵܐ ܐܝܼܬܼ ܒܗܵܘ̇ ܒܘܼܣܵܡܵܐ ܡܸܕܹܡ ܕܲܒܼܨܝܼܪ 438 ܐܡܲܪ ܦܵܘܠܘܿܣ ܕܨܡܚܿ ܫܘܼܒܼܚܵܐ ܛܵܒܼ ܡ݂ܢ ܫܘܼܒܼܚܵܐ. 439 :ܒܫܘܼܒܼܚܵܐ ܪܲܒܵܐ ܕܠܵܐ ܡܼܬܼܡܲܠܲܠ ܫܪܹܝܢ ܥܸܠ̈ܝܹܐ 440 ܘܲܒܼܫܘܼܢܵܩܵܐ ܕܠܵܐ ܡܸܬܿܬܲܢܹܐ ܪܡܹܝܢ ܬܲܚܬ̈ܝܹܐ܀ 441 :ܒܐܲܬܼܪܵܐ ܕܢܘܼܗܪܵܐ ܡܕܲܝܪܝܼܢ ܟܹܐܢ̈ܐ ܥܝܼܪܹ̈ܐ ܘܐܢܵܫ̈ܵܐ 442 ܘܲܒܼܚܸܫܘܿܟܼܵܐ ܫܪܹܝܢ ܥܘ̈ܠܐ ܘܫܹܐܕܹ̈ܐ ܕܐܲܥܘܸܠܘ. 443 :ܒܥܸܢܝܵܢ ܡܲܠܟܵܐ ܫܪܹܝܢ ܩܲܕܿܝܼܫܹ̈ܐ ܪܘܼܚܵܢܵܐܝܼܬܼ 444 ܘܥܲܡܹܗ ܒܵܣܿܡܝܼܢ ܒܐܘܼܘܼܠܵܐ ܕܪܘܼܚܵܐ ܕܠܵܐ ܡܸܬܼܚܲܒܲܠ܀ 445 :ܒܣܵܡܗܘܿܢ ܫܘܼܒܼܚܵܐ ܗ̄ܘܼ ܕܠܵܐ ܡܸܣܬܲܒܼܥܵܐ ܗܲܢܝܼܐܘܼܬܹܗ 446 ܐܵܦ ܥܸܢܝܵܢܗܘܿܢ ܩܵܠ ܬܵܘܕܝܼܬܼܵܐ ܕܠܵܐ ܫܘܼܠܵܡܵܐ. 447 :ܫܘܼܒܼܚܵܐ ܠܒܼܝܼܫܝܼܢ ܘܫܘܼܒܼܚܵܐ ܩܵܥܹܝܿܢ ܩܲܕܝܫܵܐܝܼܬܼ 448 ܠܗܵܘ̇ ܕܲܒܩܘܕܼܫܹܗ ܨܒܼܵܐ ܕܲܢܫܵܘܬܸܦ ܠܲܥܒܼܵܕܼ ܐܝܼܕܼܵܘܗܝ܀ 449 :ܚܵܙܹܝ̇ܢ ܟܹܐܢܹ̈ܐ ܠܟܲܣܝܵܐ ܕܲܟܼܣܹܐ ܘܲܓܼܠܹܐ ܒܫܘܼܒܼܚܹܗ 450 ܠܵܐ ܡܸܬܼܦܲܠܓܼܝܼܢ ܕܐܲܝܟܲܢ ܚܵܙܹܝ̇ܢ ܟܲܕ ܠܵܐ ܚܵܙܹܝ̇ܢ. 451 :ܒܡܸܬܼܚܙܝܵܢܵܐ ܚܵܙܹܝ̇ܢ ܫܘܼܒܼܚܹܗ ܕܲܓܼܢܝܼܙ ܡܢ݂ ܟܠ 452 ܘܲܒܼܝܲܕܼ ܓܲܠܝܵܐ ܢܵܚܬܼܵܐ ܚܙܵܬܼܵܐ ܕܪܸ̈ܥܝܵܢܲܝܗܘܿܢ܀ 453 :ܒܗܲܝܟܲܠ ܦܲܓܼܪܵܐ ܡܩܲܪܒܼܝܼܢ ܕܸܒܼܚܹ̈ܐ ܕܪܸ̈ܥܝܵܢܲܝܗܘܿܢ 454 ܘܠܵܐ ܫܲܠܝܼܛܝܼܢ ܠܡܸܬܼܒܲܩܵܝܘܼ ܒܩܘܕܼܵܫ ܩܘܼܕܼܫܹ̈ܐ. 455 :ܩܘܼܕܼܫܵܐ ܦܲܓܼܪܵܐ ܗ̄ܘ݂ ܡܸܬܼܚܲܙܝܵܢܵܐ ܕܪܫܝܼܬܼ ܓܸܢܣܲܢ 456 ܘܩܘܼܕܼܵܫ ܩܘܼܕܼܫ̈ܐ ܐܲܠܗܘܼܬܼܵܐ ܗ̄ܝ݂ ܕܠܵܐ ܡܸܬܼܚܲܙܝܵܐ܀ 457 :ܘܚܲܕܼ ܗܘ̤ ܩܘܼܕܼܫܵܐ ܘܲܩܕܘܿܫ ܩܘܕܼܫܹ̈ܐ ܒܲܚܕܼܵܝܘܼܬܼܵܐ 458 ܚܲܕܼ ܐܲܠܵܗܵܐ ܒܗܲܝܟܲܠ ܦܲܓܼܪܵܐ ܕܲܓܼܒܼܵܐ ܠܚܘܼܒܹܿܗ. 459 :ܚܕܼܵܐ ܬܵܘܕܝܼܬܼܵܐ ܡܩܲܪܒܼܝܼܢ ܐܢܵܫ̈ܐ ܘܪ̈ܘܼܚܢ̈ܝܐ 460 ܠܟܲܣܝܵܐ ܒܓܸܿܠܝܵܐ ܐܵܦ ܠܹܗ ܠܓܲܠܝܐ ܒܥܸܠܲܬܼ ܟܲܣܝܵܐ܀ 461 :ܒܚܲܕܼ ܗ̄ܘ݂ ܚܘܼܒܵܐ ܐܲܣܝܼܪ ܟܠܵܐ ܨܝܕ ܗܵܘ̇ ܕܲܓܼܠܹܐ 462 ܘܗܘ̤ ܒܐܝܼܬܼܘܼܬܼܵܐ ܚܕܼܵܐ ܡܵܪܘܼܬܼܵܐ ܘܚܲܕܼ ܫܘܼܠܛܵܢܵܐ. 463 :ܥܲܠ ܟܠ ܘܲܒܼܟܼܠ ܡܲܣܥܸܟ ܬܲܡܲܢ ܟܲܣܝܵܐ ܒܓܠܝܵܐ 464 ܘܲܒܼܓܲܠܝܘܼܬܹܗ ܕܵܐܹܢ ܟܠܵܐ ܐܲܝܟ ܫܘܼܘܕܵܝܹܗ܀ pb. f.73r 465 :ܐܵܦ ܥܲܠ ܗܕܹܵܐ ܓܒ̣ܝܵܗܝ ܡ̣ܢ ܟܠܵܐ ܘܫܲܥܒܸܿܕܼ ܠܹܗ̇ ܟܠ 466 ܕܢܗܘܘܢ ܚܵܙܹ̇ܝܢ ܡܸܬܿܬܿܕܝܼܵܢܵܢܹ̈ܐ ܠܐܲܝܢܵܐ ܕܕܼܵ ܐܸܢ. 467 :ܣܢܝܼܩܝܼܢ ܗ̄ܘ̣ܵܘ ܓܹܝܪ ܒܢܲܝ̈ ܡܲܠܟܿܘܿܬܐ ܘܲܒܼܢܲܝ̈ ܚܸܫܟܵܐ 468 ܕܢܸܚܙܘܢ ܡܲܢܘ ܡܦܲܠܸܓܼ ܕܲܫܢܹ̈ܐ ܘܡܲܣܪܲܝ ܢܸܓܼܕܹ̈ܐ܀ 469 :ܒܵܥܹܝ̇ܢ ܗ̄ܘ̣ܵܘ ܬܘܼܒܼ ܕܢܸܚܙܘܢ ܡܸܕܹܡ ܟܡܵܐ ܐܸܢ ܟܣܝܵܐ ܗ̄ܘ̣ 470 ܘܲܕܼܠܵܐ ܡܵܨܝܵܐ ܒܲܝܵܐ ܐܸܢܘܿܢ ܠܦܘܼܬܼ ܪܸܓܲܬܼܗܘܢ. 471 :ܚܲܟܿܝܼܡܵܐܝܼܬܼ ܣܥܲܪ ܟܠ ܕܲܣܥܲܪ ܗܵܘ̇ ܡܲܬܼܩܸܢ ܟܠ 472 ܘܠܵܐ ܡܸܬܼܡܲܠܠܵܐ ܚܸܟܼܡܲܬܼ ܚܘܼܒܹܿܗ ܕܲܟܼܡܵܐ ܗ̄ܝ̣ ܘܐܝܟܲܢ܀ 473 :ܬܡܝܼܗ ܬܘܼܩܵܢܹܗ ܘܪܲܒܿ ܚܘܼܕܵܬܹܗ ܘܲܓܼܡܝܼܪ ܚܘܼܒܹܗ 474 ܘܲܟܼܡܵܐ ܕܢܵܘܪܸܒܼ ܒܨܝܼܪ ܠܫܵܢܲܢ ܡ̣ܢ ܪܲܒܿܘܼܬܹܗ. 475 :ܚܘܼܒܹܿܗ ܚܵܘܝܼ ܒܗܵܝ̇ ܕܲܒܼܪܵܐ ܟܠ ܘܲܡܚܲܕܸܬܼ ܟܠ 476 ܘܲܡܫܵܘܬܸܦ ܟܠ ܒܥܸܢܝܵܢ ܚܘܼܒܵܐ ܕܐܲܠܵܗܘܼܬܹܗ܀ 477 :ܠܲܚܠܘܿܠ ܚܘܼܒܹܿܗ ܡܙܲܡܸܢ ܩ̇ܪܐ ܠܲܒܼܢܲܝ̈ ܒܲܝܬܹܗ 478 ܘܲܡܚܲܕܹܐ ܠܗܘܿܢ ܒܗܵܝ̇ ܡܲܠܟܿܘܼܬܼܵܐ ܕܬܼܘܼܩܵܢ ܪܵܘܡܵܐ. 479 :ܒܐܲܬܼܪܵܐ ܕܲܠܥܸܠ ܡܦܲܠܸܓܼ ܥܘܼܬܼܪܵܐ ܕܒܲܣܝܼܡܘܼܬܹܗ 480 ܘܝܵܬ̣ܒܼ̇ ܝܵܗܸ̇ܒܼ ܫܛܵܪ ܚܹܐܪܘܼܬܼܵܐ ܠܲܥܒܼܵܕ ܐܝܼܕܼܵܘ̈ܗܝ܀ 481 :ܥܘܼܬܼܪܵܐ ܕܚܲܝܹ̈ܐ ܠܵܐ ܡܝܘ̈ܬܐ ܩܢ̇ܝܢ ܐܢܫ̈ܐ 482 ܘܲܕܼܠܵܐ ܥܲܡܠܵܐ ܡܕܲܝܪܝܼܢ ܒܐܲܬܼܪܵܐ ܕܪܵܡ ܡ̣ܢ ܚܲܫܹ̈ܐ܀ 483 :ܒܲܠܡܹܐܝܢ ܫܲܝܢܵܐ ܢܵܚ̇ܝܼܢ ܐܸܠܦܹ̈ܐ ܕܗܲܕܵܡܲܝ̈ܗܘܿܢ 484 ܘܠܵܐ ܬܘܼܒܼ ܫܵܚ̇ܩܝܼܢ ܓܲܠܠܹ̈ܐ ܕܚܲܫܹ̈ܐ ܠܪܸ̈ܥܝܵܢܲܝܗܘܿܢ܀ 485 :ܒܚܹܝܠ ܛܲܝܒܿܘܼܬܼܵܐ ܩܢ̇ܝܢ ܚܝܠܐ ܠܡܸܙܡܲܪ ܫܘܼܒܼܚܵܐ 486 ܠܗܵܘ̇ ܕܲܒܼܚܘܼܒܹܿܗ ܫܵܘܬܸܿܦ ܐܸܢܘܿܢ ܠܲܫܒܼܝܼܚ̈ܵܬܹܗ. 487 :ܬܡ̇ܢ ܫܵܠܡܵܐ ܗܵܝ̇ ܕܟܬܼܝܒܼܵܐ ܥܲܠ ܒܲܪܢܵܫܵܐ 488 ܕܨܲܠܡܵܐ ܗ̄ܘ̣ ܓܲܠܝܵܐ ܕܡܲܟܪܸܙ ܟܲܣܝܵܐ ܒܝܲܕܼ ܓܲܠܝܘܼܬܹܗ܀ 489 :ܬܲܡ̇ܢ ܚܵܙܹܝ̇ܢ ܐ̄ܢܵܫ̈ܐ ܒܐܲܪܥܵܐ ܠܲܟܼܣܹܐ ܡ̣ܢ ܟܠ 490 ܘܠܵܐ ܬܘܼܒܼ ܫܵܚ̇ܩܝܼܢ ܠܡܸܒܼܥܵܐ ܒܥ̇ܬܼܵܐ ܕܲܣܬܝܼܪ̈ܵܬܼܵܐ. 491 :ܬܲܡ̇ܢ ܡܲܡܠܸܟ ܥܲܠ ܟܠ ܘܲܒܼܟܼܠ ܚܲܕܼ ܨܒܼܝܵܢܵܐ 492 ܘܠܲܝܬܿ ܕܲܡܥܨܹܐ ܠܦܘܼܬܼ ܦܘܼܪܥܵܢܵܐ ܕܚܘܒܲܬܼ ܚܘܒܐ܀ 493 :ܬܡ̇ܢ ܗܘܹ̇ܝܢ ܥܝܼܪܹ̈ܐ ܘܐܢܫ̈ܐ ܚܲܕܼ ܒܐܘܝܘܼܬܼܵܐ 494 ܘܒܲܛܸ̇ܠ ܗܪܸܬܼܵܐ ܘܡܵܘܦܹܐ ܚܣܵܡܵܐ ܘܛܵܠܸ̇ܩ ܪܘܼܓܼܙܵܐ. 495 :ܚܘܼܒܵܐ ܘܫܲܝܢܵܐ ܡܲܡܠܸܟ ܥܲܠ ܟܠ ܘܲܡܫܲܥܒܸܿܕ ܟܠ 496 ܘܚܲܕܼ ܨܒܼܝܵܢܵܐ ܡܕܲܒܲܪ ܟܠܵܐ ܐܲܝܟ ܨܸܒܼܝܵܢܹܗ܀ 497 :ܫܲܒܼܛܵܐ ܕܪܘܼܓܼܙܵܐ ܐܲܚܝܼܕ ܟܲܣܝܵܐ ܒܐܝܼܕܲܝ̈ ܓܲܠܝܵܐ 498 ܘܲܡܕܲܒܲܪܟܿܠ ܠܘܵܬܼ ܟܲܣܝܘܼܬܼܵܐ ܕܒܲܨܠܸܡ ܐ̄ܢܵܫ̈ܐ. 499 :ܠܘܲܥܕܵܐ ܕܐܢܫ̈ܐ ܪܗܛ̇ܝܼܢ ܐܢܵܫ̈ܐ ܘܪ̈ܘܼܚܵܢܵܝܹܐ 500 ܘܡܵܐ ܕܐܸܬܼܩܸܿܪܲܒܼܘ ܠܲܬܼܪܲܥ ܐܢܫܐ ܦܪܲܥ̣ܘ ܬܵܘܕܝܼܬܼܵܐ܀ 501 :ܐܲܝܟ ܕܲܒܼܨܲܠܡܵܐ ܡܸܬܼܒܲܩܝܢ ܒܹܗ ܒܲܨܠܸܡ ܐܢܵܫܵܐ 502 ܘܲܒܼܓܲܠܝܘܼܬܹܗ ܚܵܙܹ̇ܝܢ ܚܲܝܠܵܐ ܕܚܹܝܠ ܐܝܼܬܼܘܼܬܼܵܐ. 503 :ܠܵܘ ܠܐܝܼܬܼܘܼܬܼܵܐ ܚܵܙܝܐ ܥܲܝܢܵܐ ܕܲܡܠܝܼܠܘܼܬܼܵܐ 504 ܐܸܠܵܐ ܠܨܲܠܡܵܐ ܡܸܬܼܚܲܙܝܵܢܵܐ ܕܕܼܵܡ̇ܐ ܠܟܲܣܝܵܐ܀ 505 :ܕܕܼܵܡܹ̇ܐ ܐ̣ܡܪܹ̇ܬܼ ܒܪܲܒܿܘܼܬܼ ܕܲܪܓܼܐ ܠܵܘ ܒܲܟܼܝܵܢܵܐ 506 ܕܠܲܝܬܿ ܒܲܥܒܼܝܼܪܹ̈ܐ ܕܕܼܵܡܹ̇ܐ ܟܝܵܢܹܗ ܠܲܟܼܝܵܢ ܟܲܣܝܵܐ. 507 :ܒܚܘܼܒܵܐ ܐܲܫܘܝ ܠܲܥܒܼܵܕܼ ܐܝܼܕܼܵܘ̈ܗܝ ܕܢܸܬܿܕܲܡܹܐ ܠܹܗ 508 ܘܲܒܼܛܲܝܒܿܘܼܬܼܵܐ ܩܪ̣ܵܐ ܘܐܲܩܝܼܡܹܗ ܒܕܲܪܓܼܵܐ ܕܲܫܡܹܗ܀ 509 :ܦܘܼܪܣܵܐ ܗ̄ܘ̣ ܗܵܢܵܐ ܐܲܠܵܗܵܝܵܐ ܕܠܵܐ ܡܸܬܼܦܲܫܲܩ 510 ܕܐܲܝܟܲܢ ܝܲܩܲܪ ܕܝܼܠܹܗ ܒܕܼܝܠܹܗ ܚܲܟܿܝܡܵܐܝܼܬܼ. 511 :ܫܟܼ̇ܚܬܼܵܐ ܗ̄ܝ̣ ܗܕܹܐ ܕܗܵܘ̇ ܨܸܒܼܝܵܢܵܐ ܕܫܲܠܝܼܛ ܥܲܠ ܟܠ 512 ܘܲܨܢܝܼܥܵܐܝܼܬܼ ܐܲܣܪܹܗ ܠܥܵܠܡܵܐ ܒܐܲܠܵܗܘܼܬܹܗ܀ 513 :ܠܹܗ ܬܸܫܒܿܘܿܚܬܼܵܐ ܥܲܠ ܚܸܟܡ̈ܬܹܗ ܕܠܵܐ ܡܸܬܿܕܲܪ̈ܟܵܢ 514 ܕܐܲܬܼܩܸܢ ܟܠܵܐ ܘܲܡܚܲܕܼܬܼ ܟܠ ܒܚܘܼܒܵܐ ܘܪ̈ܲܚܡܹܐ܀