Discourse 52

ܝܑܼܕܲܥܬܼܵܐ ܐܸܡܲܬܼܝ ܕܲܒܼܡܸܬܼܚܲܙܝܵܢ̈ܝܵܬܼܵܐ ܦܵܗ̇ܝܵܐ: ܐܲܝܠܹܝܢ ܕܲܒܼܝܲܕܼ ܪܸ̈ܓܼܫܹܐ ܡܩܲܒܿܠܵܐ ܝܘܼܠܦܵܢܵܐ: ܕܲܥܠܲܝܗܹܝܢ: ܟܝܵܢܵܝܬܼܵܐ ܡܸܬܼܩܲܪܝܵܐ. ܘܐܸܡܲܬܼܝ ܕܲܒܼܚܲܝ̈ܠܹܐ ܡܸܬܼܝܲܕܼ̈ܥܵܢܹܐ ܕܲܠܓܼܵܘ ܡܸܢܗܘܿܢ ܘܒܲܟܼ̈ܝܵܢܹܐ ܕܠܵܐ ܓܫܘܿܡ: ܪܘܼܚܵܢܵܝܬܼܵܐ ܡܸܬܼܩܲܪܝܵܐ. ܡܸܛܠ ܕܡܲܪܓܿܫܵܢܘܼܬܼܵܐ ܡܩܲܒܿܠܵܐ ܒܪܘܼܚܵܐ: pb. 378 ܘܠܵܐ ܗ̄ܘ̣ܵܐ ܒܝܲܕܼ ܪܸ̈ܓܼܫܹܐ. ܘܲܠܬܲܪ̈ܬܲܝܗܹܝܢ ܗܵܠܹܝܢ: ܡܠܘܿܐܵܐ ܡ̣ܢ ܠܒܲܪ ܐܝܼܬܼܵܘܗܝ ܠܢܲܦܫܵܐ ܠܡܸܤܬܲܟܵܠܘܼ. ܐܸܡܲܬܼܝ ܕܹܝܢ ܕܒܼܐܝܼܬܼܘܼܬܼܵܐ: ܠܥܸܠ ܡ̣ܢ ܟܝܵܢܵܐ ܡܸܬܼܩܲܪܝܵܐ. ܘܲܒܼܠܵܐ ܝܑܼܕܲܥܬܼܵܐ ܡܵܠܘܿܢ: ܕܲܡܥܲܠܝܵܐ ܡ̣ܢ ܝܑܼܕܲܥܬܼܵܐ. ܗܵܕܹܐ ܕܹܝܢ: ܠܵܐ ܗ̄ܘ̣ܵܐ ܒܲܡܠܘܿܐܵܐ ܕܲܠܒܲܪ ܡܸܢܵܗ̇ ܡܩܲܒܿܠܵܐ ܢܲܦܫܵܐ ܬܹܐܘܿܪܝܼܵܐ ܕܲܥܠܹܝܗ̇: ܐܲܝܟܼ ܗܵܢܹܝܢ ܩܲܕܼ̈ܡܵܝܬܼܵܐ. ܐܸܠܵܐ ܕܠܵܐ ܡܠܘܿܐܵܐ ܠܓܼܵܘ ܡܸܢܵܗ̇ ܒܛܲܝܒܿܘܼ ܡܸܢܫܠܹܝ: ܕܠܵܐ ܤܘܼܟܵܝܵܐ ܡܸܬܼܓܲܠܝܵܐ ܡ̣ܢ ܠܓܼܵܘ. ܡܸܛܠ ܕܡܲܠܟܿܘܼܬܼܵܐ ܕܐܲܠܵܗܵܐ: ܠܓܼܵܘ ܡܸܢܲܢ ܗ̣̄ܝ. ܘܠܵܐ ܗ̄ܘ̣ܵܐ ܒܤܘܼܟܵܝܵܐ ܕܡ̣ܢ ܕܘܼܟ: ܘܒܲܢܛܘܼܪ̈ܵܬܼܵܐ ܐܵܬܼܝܵܐ: ܐܲܝܟܼ ܡܸܠܬܹܗ ܕܡܵܪܲܢ. ܐܸܠܵܐ ܒܓܼܵܘ ܨܘܼܪܬܹܗ ܠܲܡ ܓܢܝܼܙܬܵܐ ܕܡܲܕܿܥܵܐ ܡܸܬܼܓܲܠܝܵܐ ܕܠܵܐ ܥܸܠܬܼܵܐ: ܘܲܕܼܠܵܐ ܗܸܪܓܵܐ ܕܲܥܠܹܝܗ̇. ܒܕܼܵܐܦܠܵܐ ܡܠܘܿܐܵܐ ܠܗܸܪܓܵܐ ܕܲܥܠܹܝܗ̇ ܐܝܼܬܼ ܠܹܗ ܠܡܲܕܿܥܵܐ܀ ܩܲܕܼܡܵܝܬܼܵܐ ܠܲܡ: ܡ̣ܢ ܗܸܓܼܝܵܢܵܐ ܐܲܡܝܼܢܵܐ: ܘܚܘܼܦܵܛܵܐ ܕܲܒܼܝܘܼܠܦܵܢܵܐ. ܬܪܲܝܵܢܝܼܬܼܵܐ ܕܹܝܢ: ܡ̣ܢ ܕܘܼܒܵܪܹ̈ܐ ܬܲܩ̈ܢܹܐ: ܘܗܲܝܡܵܢܘܼܬܼܵܐ ܕܡܲܕܿܥܵܐ. ܘܲܬܼܠܝܼܬܼܵܝܬܼܵܐ ܡܸܟܹܝܠ ܫܸܪܟܲܬ̤ ܠܵܗ̇: ܠܗܲܝܡܵܢܘܼܬܼܵܐ ܒܲܠܚܘܿܕܼ. ܡܸܛܠ ܕܬܲܡܵܢ ܝܑܼܕܲܥܬܼܵܐ: ܬܸܬܼܒܲܛܲܠ. ܘܲܥ̇ܒܼܵܕܹ̈ܐ: ܢܸܤܬܲܝܟܼܘܼܢ. ܘܪܸ̈ܓܼܫܹܐ: ܢܸܗܘܘܿܢ ܝܲܬܿܝܼܪܹ̈ܐ ܠܚܘܼܫܵܚܵܐ. ܟܡܵܐ ܗܵܟܹܝܠ ܕܡ̣ܢ ܗܵܢܵܐ ܬܚܘܼܡܵܐ ܡܸܬܼܢܲܚܬܼܵܐ: ܝܑܼܕܲܥܬܼܵܐ ܡܸܬܼܩܲܪܝܵܐ. ܘܲܟܼܡܵܐ ܕܝܲܬܿܝܼܪ ܢܸܚܬܲܬ̤: ܝܲܬܝܼܪܵܐܝܼܬܼ ܡܝܲܩܪܵܐ ܝܑܼܕܲܥܬܼܵܐ. ܘܟܲܕܼ ܡܲܛܝܲܬ̤ ܠܐܲܪܥܵܐ ܘܐܲܪ̈ܥܵܢܝܵܬܼܵܐ: ܝܑܼܕܲܥܬܼܵܐ ܡܵܪܬܵܐ ܗ̣̄ܝ ܕܟܼܠܡܸܕܸܡ. ܘܒܸܠܥܵܕܹܝܗ̇: ܟܠܡܸܕܸܡ ܚܓܝܼܪܵܐ ܗ̄ܘ̣ ܘܒܲܛܝܼܠܵܐ. ܡܵܐ ܕܹܝܢ ܕܐܲܪܝܼܡܲܬ̤ ܢܲܦܫܵܐ ܚܝܵܪܪܵܗ̇ ܠܥܸܠ: ܘܦܸܫܛܲܬ̤ ܛܵܘܚܵܐ ܕܙܵܘ̈ܥܹܝܗ̇ ܠܘܵܬܼ ܫܡܲܝܵܢ̈ܝܬܼܵܐ: ܘܐܸܬܼܪܲܓܼܪܓܲܬ̤ ܠܗܵܠܹܝܢ ܕܲܒܼܥܲܝ̈ܢܹܐ pb. 379 ܕܦܲܓܼܪܵܐ ܠܵܐ ܡܸܬܼܚܲܙ̈ܝܵܢ: ܘܒܸܤܪܵܐ ܥܠܲܝܗܹܝܢ ܠܵܐ ܫܲܠܝܼܛ ܠܹܗ: ܗܵܝܕܹܝܢ ܒܗܲܝܡܵܢܘܼܬܼܵܐ ܩܵܐܹ̇ܡ ܟܠܡܸܕܸܡ.