Discourse 53

ܕܢܸܫܬܲܪܲܪ ܐ̄ܢܵܫ ܒܫܸܠܬܼܵܐ ܕܲܨܠܘܿܬܹܗ ܒܬܼܘܼܟܼܠܵܢܵܐ ܕܥܲܠ ܐܲܠܵܗܵܐ: ܡܢܵܬܼܵܐ ܗ̣̄ܝ ܪܹܫܵܝܬܼܵܐ ܕܡܵܘܗܲܒܼܬܼܵܐ ܕܗܲܝܡܵܢܘܼܬܼܵܐ. ܡܫܲܪܪܘܼܬܼ ܗܲܝܡܵܢܘܼܬܼܵܐ ܕܒܲܐܠܵܗܵܐ: ܠܵܘ ܚܠܝܼܡܘܼܬܼܵܐ ܗ̣̄ܝ ܕܬܼܵܘܕܝܼܬܼܵܐ: ܐܵܦܸܢ ܐܸܡܲܐ ܗ̣̄ܝ ܕܗܲܝܡܵܢܘܼܬܼܵܐ: ܐܸܠܵܐ ܢܲܦܫܵܐ ܕܚܵܝ̇ܪܵܐ ܒܲܫܪܵܪܹܗ ܕܐܲܠܵܗܵܐ ܡ̣ܢ ܚܲܝܠܵܐ ܕܕܘܼܒܵܪܹ̈ܐ. ܐܸܡܲܬܼܝ ܕܗܲܝܡܵܢܘܼܬܼܵܐ ܒܫܲܪ̈ܒܹܝܗ̇: ܕܥܲܡ ܕܘܼܒܵܪܹ̈ܐ ܚܠܝܼܛܵܐ: ܬܸܫܟܲܚ ܒܲܟܼܬܼܵܒܹ̈ܐ ܩܲܕܝܼ̈ܫܹܐ: ܠܵܘ ܥܲܠ ܬܪܝܼܨܘܼܬܼ ܬܵܘܕܝܼܬܼܵܐ ܬܸܤܒܼܝܼܗ̇ ܠܬܹܐܘܿܪܝܼܵܐ ܕܲܥܠܹܝܗ̇. ܠܵܐ ܡܬܼܘܿܡ ܡܸܬܿܬܲܒܼܥܵܐ ܗܲܝܡܵܢܘܼܬܼܵܐ ܕܝܵܗ̇ܒܵܐ ܦܝܵܤܵܐ ܕܬܼܘܼܟܼܠܵܢܵܐ ܡ̣ܢ ܠܵܐ ܓܡܝܼܪܹ̈ܐ: ܐܵܘ ܡ̣̤ܢ ܐܲܝܠܹܝܢ ܕܲܡܚܲܒܲܠ ܪܸܥܝܵܢܗܘܿܢ ܡ̣ܢ ܫܪܵܪܵܐ. ܡܫܲܪܪܘܼܬܼ ܗܲܝܡܵܢܘܼܬܼܵܐ ܕܹܝܢ ܓܵܠ̇ܝܵܐ ܝܵܬܼܵܗ̇ ܒܢܲܦܫܵܐ: ܠܘܼܩܒܲܠ ܦܸܚܡܵܐ ܕܥܘܼܠܵܝܵܐ ܕܲܒܼܕܼܘܼܒܵܪܹ̈ܐ: ܒܢܝܼܫܵܐ ܕܚܵܐܲܪ ܠܲܤܝܵܡܵܐ ܕܦܘܼܩܕܵܢܵܘ̈ܗܝ ܕܡܵܪܲܢ. ܢܘܼܗܪܵܐ ܕܢܲܦܫܵܐ: ܗܸܪܓܵܐ ܐܲܡܝܼܢܵܐ ܕܒܲܟܼܬܼܵܒܹ̈ܐ. ܗܸܢܘܿܢ ܓܹܝܪ ܪܵܫܡܝܼܢ ܒܡܲܕܥܵܐ ܥܘܼ̈ܫܕܵܢܹܐ ܡܵܘܬܵܪ̈ܵܢܹܐ ܠܲܙܗܝܼܪܘܼܬܼܵܐ ܕܡ̣ܢ ܚܲܫܹ̈ܐ: ܘܲܠܡܸܬܼܐܡܵܢܘܼ ܠܘܵܬܼ ܐܲܠܵܗܵܐ: ܒܚܘܼܒܵܐ ܘܲܒܼܕܲܟܼܝܘܼܬܼܵܐ ܕܲܨܠܘܿܬܼܵܐ. ܘܬܼܵܪܨܝܼܢ ܩܕܼܵܡܲܝܢ ܐܘܼܪܚܵܐ: ܕܲܡܫܲܝܢܵܐ ܒܕܼܘܼܪ̈ܟܵܬܼܵܐ ܕܩܲܕܝܼ̈ܫܹܐ. ܒܪܲܡ pb. 380 ܕܹܝܢ: ܠܵܐ ܬܸܬܟܸܠ ܥܲܠ ܝܲܕܼܥܹ̈ܐ ܕܦܸܬܼܓܼܵܡܹ̈ܐ: ܐܸܡܲܬܼܝ ܕܲܠܗܘܿܢ ܠܵܐ ܢܲܩܝܼܦܵܐ ܥܝܼܪܘܼܬܼܵܐ ܤܲܓܝܼܐܬܼܵܐ: ܘܚܲܫܝܼܫܘܼܬܼܵܐ ܐܲܡܝܼܢܬܼܵܐ ܕܒܲܨ̈ܠܵܘܵܬܼܵܐ ܕܲܒܼܟܼܠܫܵܥ̈ܝܼܢ. ܡܸܠܹ̈ܐ ܕܡ̣ܢ ܢܸܤܝܵܢܵܐ ܡܸܬܼܐܲܡܪ̈ܵܢ: ܐܲܠܨܵܐܝܼܬܼ ܩܲܒܸܠ ܐܸܢܹܝܢ: ܘܐܵܦܸܢ ܗܸܕܼܝܘܿܛܵܐ ܢܸܗܘܸܐ ܐܲܝܢܵܐ ܕܲܠܗܹܝܢ ܡܡܲܠܸܠ. ܐܵܦ ܓܲܙܵܐ ܪܲܒܵܐ ܕܡܲܠܟܹ̈ܐ ܐܲܪ̈ܥܵܢܵܝܹܐ: ܠܵܐ ܓܵܥܹ̇ܝܨ ܕܢܸܤܲܒܼ ܬܵܘܤܲܦܬܼܵܐ ܡ̣ܢ ܦܘܼܠܤܹܗ ܕܚܵܕܼܘܿܪܵܐ. ܘܡ̣ܢ ܪ̈ܨܝܼܢܹܐ ܙܥܘܿܪܹ̈ܐ: ܝܵܪܒܿܝܼܢ ܫܸܦ̈ܥܹܐ ܪܵܘܪ̈ܒܹܐ ܕܢܲܗܪ̈ܵܘܵܬܼܵܐ. ܐܸܢ ܓܹܝܪ ܥܘܼܗܕܵܢܵܐ ܕܲܡܝܲܬܿܪܹ̈ܐ ܡܚܲܕܸܬܼ ܒܲܢ ܪܸܓܿܬܼܵܐ ܕܲܡܝܲܬܿܪܘܼܬܼܵܐ ܐܸܡܲܬܼܝ ܕܗܵܘܹ̇ܝܢܲܢ ܒܥܸܢܝܵܢܗܘܿܢ ܒܡܲܚܫܲܒܼܬܲܢ: ܐܵܦ ܥܘܼܗܪܵܢܵܐ ܕܦܲܚ̈ܙܹܐ ܡܚܲܕܸܬܼ ܒܬܲܪܥܝܼܬܲܢ ܪܸܓܿܬܼܵܐ ܫܟܼܝܼܪܬܵܐ ܐܸܡܲܬܼܝ ܕܲܠܗܘܿܢ ܥܵܗܕܝܼܢܲܢ. ܒܗܵܝ̇ ܕܥܘܼܗܕܵܢܵܐ ܕܟܼܠܚܲܕܼ ܡ̣ܢ ܗܵܠܹܝܢ: ܦܘܼܪ̈ܫܵܢܹܐ ܕܤܘܼܥܪ̈ܵܢܵܘܗܝ ܪܵܫܹ̇ܩ ܒܡܲܚܫܲܒܼܬܲܢ. ܘܐܲܝܟܼ ܕܲܒܼܨܸܒܼܥܵܐ ܡܚܵܘܸܐ ܠܲܢ ܤܲܢ̈ܝܬܼܵܐ ܕܤܘܼܥܪ݁ܵܢܲܝܗܘܿܢ: ܐܵܘ ܪ̈ܵܡܵܬܼܵܐ ܕܲܡܥܲܠܝܘܼܬܼ ܕܘܼܒܵܪ̈ܲܝܗܘܿܢ: ܐܸܢ ܕܗܵܢܘܿܢ ܘܐܸܢ ܕܗܵܠܹܝܢ. ܘܐܵܠܹ̇ܨ ܠܲܢ ܗ̤ܘ ܥܘܼܗܕܵܢܵܐ ܒܓܼܘܼܪ̈ܵܓܼܵܘܗܝ: ܐܸܢ ܕܝܲܡܝܼܢܵܐ ܘܐܸܢ ܕܤܸܡܵܠܵܐ: ܕܲܗ̤ܘܲܝܢ ܗܵܪܓܝܼܢܲܢ ܒܒܲܤܝܘܼܬܼܵܐ ܕܬܲܪܥܝܼܬܲܢ. ܟܲܕܼ ܡܸܬܿܬܨܝܼܪܝܼܢ ܝܘܼ̈ܩܢܹܐ ܕܲܦܪܝܼܫܘܼܬܼ ܕܘܼܒܵܪ̈ܲܝܗܘܿܢ ܒܗܲܓܵܠܹ̈ܐ ܕܪܸܥܝܵܢܲܢ: ܘܕܲܚܢܲܢ ܚܲܙܵܝܹ̈ܐ ܕܝܼܠܗܘܿܢ ܕܢܸܗܘܸܐ ܚܸܦܝܼܛܵܐܝܼܬܼ. ܡܵܕܹܝܢ: ܠܵܐ ܗ̄ܘ̣ܵܐ ܗܸܪܓܵܐ ܕܒܼܝܼܫܬܼܵܐ ܡܤܲܓܸܦ ܒܲܠܚܘܿܕܼ ܠܲܕܼܒܹܗ ܐܲܚܝܼܕܝܼܢ: ܐܸܠܵܐ ܐܵܦ ܚܙܵܬܼܵܐ: ܐܵܦ ܥܘܼܗܕܵܢܵܐ ܬܘܼܒܼ ܕܐܲܝܠܹܝܢ ܕܲܠܗܹܝܢ ܡܫܲܡܠܹܝܢ. ܘܠܵܘ ܬܘܼܒܼ ܦܘܼܠܚܵܢܵܐ ܕܲܡܝܲܬܿܪ̈ܵܬܼܵܐ ܡܥܲܕܲܪ ܠܓܼܵܡܘܿܪܲܝܗܹܝܢ ܪܵܘܪܒܼܵܐܝܼܬܼ: ܐܸܠܵܐ ܐܵܦ ܦܲܢܛܵܤܝܼܵܐ ܕܪܸܥܝܵܢܵܐ ܕܡܸܨܛܲܠܲܡ ܡ̣ܢ ܥܘܼ̈ܗܕܵܢܹܐ ܕܦܲܪ̈ܨܘܿܦܹܐ ܐܲܝܠܹܝܢ ܕܲܠܗܹܝܢ ܦܵܠ̇ܚܝܼܢ. ܘܡ̣ܢ ܗܵܕܹܐ pb. 381 ܝܑܼܕܼܝܼܥܵܐ ܗ̣̄ܝ: ܕܐܵܦ ܐܲܝܠܹܝܢ ܕܲܠܛܲܟܼܤܵܐ ܕܕܲܟܼܝܘܼܬܼܵܐ ܩܲܪܝܼܒܼܝܼܢ ܕܢܸܬܼܡܲܛܘܿܢ: ܠܲܚܙܵܬܼܵܐ ܕܐ̄ܢܵܫܵܐ ܩܲܕܝܼ̈ܫܹܐ ܡܸܫܬܘܹܝܢ: ܒܚܸܙܘܹ̈ܐ ܕܠܸܠܝܵܐ ܐܲܡܝܼܢܵܐܝܼܬܼ. ܘܲܠܥܸܕܵܢܹ̈ܐ ܕܐܝܼܡܵܡܵܐ ܟܠܹܗ ܝܵܘܡܵܐ: ܡܠܘܿܐܵܐ ܗܵܘܹ̇ܝܢ ܠܗܘܿܢ ܠܚܲܕܼܘܼܬܼܵܐ: ܒܥܸܢܝܵܢܵܐ ܡܸܬܼܝܲܕܼܥܵܢܵܐ ܕܪܸܥܝܵܢܗܘܿܢ: ܚܸܙܘܲܝ̈ܗܘܿܢ ܕܩܲܕܝ̈ܫܹܐ ܕܐܸܬܿܛܒܲܥܘ ܒܢܲܦܫܗܘܿܢ. ܘܲܒܼܝܲܕܼ ܗܵܕܹܐ ܝܲܬܝܼܪ ܚܲܡܝܼܡܵܐܝܼܬܼ ܗܵܡ̇ܤܝܼܢ ܠܘܵܬܼ ܦܘܼܠܚܵܢܗܹܝܢ ܕܲܡܝܲܬܿܪ̈ܵܬܼܵܐ: ܘܢܘܼܪܵܐ ܝܲܬܝܼܪܬܵܐ ܡܸܫܬܲܒܼܩܵܐ ܒܗܘܿܢ ܕܪܸܚܡܬܼܵܐ ܕܲܡܝܲܬܿܪܘܼܬܼܵܐ. ܘܐܵܡ̇ܪܝܼܢ: ܕܡܲܠܲܐܟܹ̈ܐ ܩܲܕܝܼ̈ܫܹܐ ܢܵܤ̇ܒܿܝܼܢ ܕܘܼܡܝܵܐ ܕܐ̄ܢܵܫܵܐ ܝܲܩܝܼܪܹ̈ܐ ܘܲܡܝܲܬܿܪܹ̈ܐ: ܘܡܸܬܼܚܵܘܹܝܢ ܠܢܲܦܫܵܐ ܒܗܲܓܵܓܹ̈ܐ ܕܫܸܢܬܼܵܐ ܒܦܸܗܝܵܐ ܕܙܵܘ̈ܥܹܝܗ̇: ܐܲܝܟܼ ܕܲܠܚܲܕܼܘܼܬܼܵܐ ܘܓܘܼܪܵܓܼܵܐ ܝܲܬܝܼܪܵܐ. ܘܲܠܗܘܿܢ ܒܐܝܼܡܵܡܵܐ ܡܙܝܼܥܝܼܢ ܒܚܸܙܘܵܐ ܕܡܲܚܫܲܒܼܬܼܵܐ: ܘܩܵܐܹ̇ܠ ܥܲܡܠܗܘܿܢ ܕܐܝܼܡܵܡܵܐ ܡ̣ܢ ܪܘܵܙܵܐ ܕܲܒܼܐ̄ܢܵܫܵܐ ܩܲܕܝܼ̈ܫܹܐ. ܘܒܲܕܼܓܼܘܿܢ ܡܵܘܤܦܝܼܢ ܥܲܠ ܪ̈ܲܗܛܲܝܗܘܿܢ. ܗܵܟܲܢܵܐ ܘܒܲܙܒܲܢ ܬܟܼܝܼܒܼܘܼܬܹܗ ܕܲܩܪܵܒܼܵܐ: ܠܐܲܝܢܵܐ ܕܲܠܥܸܢܝܵܢܵܐ ܒܝܼܫܵܐ ܢܩܸܐ ܐܲܡܝܼܢܵܐܝܼܬܼ: ܫܹ̈ܐܕܹܐ ܒܵܗ̇ ܒܲܕܼܡܘܼܬܼܵܐ ܤܵܥ̇ܪܝܼܢ. ܟܲܕܼ ܢܵܤ̇ܒܿܝܼܢ ܕܘܼܡܝܵܐ ܠܡܸܬܼܚܵܘܵܝܘܼ ܠܢܲܦܫܵܐ: ܚܸܙ̈ܘܹܐ ܕܲܡܙܝܼܥܝܼܢ ܝܲܬܝܼܪ: ܒܥܘܼ̈ܗܕܵܢܹܐ ܕܐܝܼܡܵܡܵܐ ܠܐܲܝܢܵܐ ܕܲܡܡܲܨܲܥ ܒܗܵܠܹܝܢ. ܒܲܙܒܲ: ܘܐܵܦ ܒܲܚܙܵܬܼܵܐ ܕܚܝܼܠܬܼܵܐ ܕܡܲܪܗܒܼܵܐ ܠܢܲܦܫܵܐ ܘܡܲܡܚܠܵܐ: ܘܲܡܚܵܘܝܵܐ ܥܲܤܩܘܼܬܼܵܐ ܕܕܼܘܼܒܵܪܵܐ ܕܲܒܼܫܸܠܝܵܐ ܘܲܠܚܘܿܕܼܵܝܘܼܬܼܵܐ ܥܲܡ ܐ̄ܚܪ̈ܵܢܝܵܬܼܵܐ. ܘܲܚܢܲܢ ܗܵܟܹܝܠ ܐܲܚܲܝ̈: ܢܸܗܘܸܐ ܐܝܼܬܼ ܠܲܢ ܦܘܼܪܫܵܢܵܐ ܕܥܘܼ̈ܗܕܵܢܹܐ ܒܗܸܪܓܲܢ: ܕܒܲܐܝܠܹܝܢ ܡܸܢܗܘܿܢ ܢܸܬܼܥܢܸܐ: ܘܐܲܝܠܹܝܢ ܡܸܢܗܘܿܢ ܢܸܕܼܚܸܐ ܡ̣ܢ ܨܹܐܕܲܝܢ ܪܗܒܼܵܐܝܼܬܼ ܟܲܕܼ ܢܸܬܼܩܲܪܒܼܘܼܢ ܠܬܲܪܥܝܼܬܲܢ: ܐܸܢ ܡ̣ܢ ܒܛܝܼܠܘܼܬܼܵܐ ܕܫܹ̈ܐܕܹܐ pb. 382 ܕܫܵܕܹܝܢ ܡܠܘܿܐܵܐ ܠܚܲܫܹ̈ܐ: ܐܸܢ ܕܪܸܓܿܬܼܵܐ ܐܵܘ ܕܚܸܡܬܼܵܐ. ܘܐܸܢ ܡ̣ܢ ܡܲܠܲܐܟܹ̈ܐ ܩܲܕܝܼ̈ܫܹܐ ܕܝܵܗ̇ܒܿܝܼܢ ܪܸܡܙܵܐ ܕܲܪܘܵܙܵܐ ܘܕܝܼܕܲܥܬܼܵܐ: ܘܲܕܼܥܘܼܪ̈ܵܢܹܐ ܒܚܘܼ̈ܫܵܒܲܝܗܘܿܢ ܕܲܡܕܼܝܼܠܝܼܢ ܒܩܘܼܪܵܒܼܗܘܿܢ ܕܨܹܐܕܲܝܢ: ܘܐܸܢ ܡ̣ܢ ܥܘܼܗܕܵܢܵܐ ܕܩܲܕܝܼܡܘܼܬܼ ܤܘܼܥܪ̈ܵܢܹܐ ܘܲܪܓܸܫܬܼܵܐ: ܕܡܸܢܗܘܿܢ ܒܢܲܦܫܵܐ ܡܸܬܿܬܿܙܝܼܥܝܼܢ ܚܘܼ̈ܫܵܒܹܐ: ܕܚܵܫ̇ܚܝܼܢ ܠܐܲܝܢܵܐ ܕܗ̤ܘ ܓܲܒܵܐ. ܘܢܸܤܝܵܢܵܐ ܕܬܲܪ̈ܬܲܝܗܹܝܢ: ܒܝܼܕܲܥܬܼܵܐ ܦܵܪܘܿܫܬܼܵܐ ܢܸܩܢܸܐ: ܐܵܦ ܕܵܚܙܵܬܼܗܘܿܢ: ܐܵܦ ܕܥܸܢܝܵܢܗܘܿܢ: ܐܵܦ ܕܦܘܼܠܚܵܢܵܐ ܕܲܥ̇ܒܼܵܕܲܝ̈ܗܘܿܢ. ܘܲܠܟܼܠ ܚܕܼܵܐ ܡܸܢܗܹܝܢ ܢܲܠܘܸܬܼ ܒܲܪ ܫܵܥܬܹܗ: ܨܠܘܿܬܼܵܐ ܦܪܝܼܫܬܼܵܐ. ܚܘܼܒܵܐ ܕܡ̣ܢ ܨܸܒܼ̈ܘܵܬܼܵܐ ܡܸܬܼܩܲܝܲܡ: ܐܲܝܟܼ ܕܸܠܩܵܐ ܙܥܘܿܪܵܐ ܕܲܒܼܬܼܘܼܪܤܵܝܵܐ ܕܡܸܫܚܵܐ ܩܵܐܹ̇ܡ ܢܘܼܗܪܵܐ ܕܡܸܢܹܗ: ܘܐܲܝܟܼ ܢܲܗܪܵܐ ܕܩܵܐܹ̇ܡ ܡ̣ܢ ܡܸܛܪܵܐ: ܕܥܲܡ ܕܲܚ̣ܤܲܪ ܡܠܘܿܐܵܐ ܕܩܘܼܝܵܡܹܗ: ܦܵܫ̣ ܠܹܗ ܚܹܐܦܵܐ ܕܡܲܪܕܝܼܬܹܗ. ܚܘܼܒܵܐ ܕܐܲܠܵܗܵܐ ܐܝܼܬܼܵܘܗܝ ܥܸܠܬܹܗ: ܐܲܝܟܼ ܡܥܝܼܢܵܐ ܕܡ̣ܢ ܥܘܼ̈ܡܩܹܐ ܓܵܤܝܵܐ: ܕܠܵܐ ܡܬܼܘܿܡ ܓܵܐܹ̇ܙ ܪܸܕܼܝܵܐ ܕܡܲܪܕܝܼܬܹܗ. ܕܗ̤ܘܝܘܼ ܒܲܠܚܘܿܕܼܵܘܗܝ ܡܥܝܼܢܵܐ ܕܚܘܼܒܵܐ: ܕܠܵܐ ܚܵܤܲܪ ܡܠܘܿܐܵܐ ܕܐܲܤܵܢܹܗ܀ ܨܵܒܹ̇ܐ ܐܲܢ̄ܬܿ ܕܬܸܬܼܒܲܤܲܡ ܒܙܘܼܡܵܪܵܐ ܕܬܸܫܡܸܫܵܟ: ܘܲܪܓܸܫܬܼܵܐ ܬܸܤܲܒܼ ܕܡܸ̈ܠܲܝ ܪܘܼܚܵܐ ܕܡܸܢܵܟܼ ܡܸܙܕܲܡܪ̈ܲܢ؟ ܡܘܼܠܵܝܵܐ ܕܲܟܼܡܵܝܘܼܬܼܵܐ: ܐܲܪܦܵܐ. ܘܝܼܕܲܥܬܼܵܐ ܕܡܘܼ̈ܫܚܵܬܼܵܐ ܕܒܼܵܗ̇: ܠܵܐ ܬܩܝܼܡ. ܘܲܠܦܸܬܼܓܼܵܡܹ̈ܐ: ܒܢܝܼܫܵܐ ܕܲܨܠܘܿܬܼܵܐ ܗ̤ܘܲܝܬܿ ܐܵܡܲ̈ܪ. ܘܬܸܢܝܵܐ ܥܝܵܕܼܵܢܵܝܵܐ: ܫܒܼܘܼܩ. ܐܸܤܬܲܟܲܠ ܡܸܕܸܡ ܕܐܵܡܲ݁ܪܢܵܐ. ܘܐܲܝܠܹܝܢ ܕܬܲܫܥܝܼܬܼܵܢܵܐܝܼܬܼ ܐܲܡܝܼܪܵܢ: ܐܲܝܟܼ ܕܲܒܼܩܸܪܝܵܢܵܐ ܡܸܕܸܡ ܕܲܡܕܲܒܿܪܵܢܘܼܬܼܵܐ ܐܲܠܵܗܵܝܬܼܵܐ ܗܘ̤ܵܐ ܚܵܐܲܪ ܪܸܥܝܵܢܵܟܼ ܒܬܸܢܝܼܗܹܝܢ. ܐܲܝܟܲܢܵܐ ܕܲܒܼܤܘܼ̈ܟܵܠܹܐ ܪܵܘܪ̈ܒܹܐ ܕܲܒܼܗܹܝܢ: ܬܸܬܿܥܝܼܪ ܢܲܦܫܵܐ pb. 383 ܠܬܲܗܪܵܐ ܕܒܲܡܕܲܒܿܪܵܢܘܼܬܼܵܐ. ܘܡ̣ܢ ܗܵܪܟܵܐ ܬܸܬܿܙܝܼܥ ܐܵܘ ܠܬܸܫܒܿܘܿܚܬܼܵܐ: ܐܵܘ ܠܚܲܫܵܐ ܡܵܘܬܪܵܢܵܐ. ܘܐܲܝܠܹܝܢ ܕܲܨ̈ܠܵܘܵܬܼܵܐ ܐܸܢܹܝܢ: ܥܲܠ ܩܢܘܿܡܵܟܼ ܬܸܤܲܒܼ ܐܸܢܹܝܢ. ܡܵܐ ܕܹܝܢ ܕܐܸܫܬܲܪܪܲܬ̤ ܬܲܪܥܝܼܬܼܵܟܼ ܒܗܵܠܹܝܢ: ܕܘܼܘܵܕܼܵܐ ܡ̣ܢ ܟܲܕܼܘܼ ܝܲܗ̣̄ܒܼ ܐܲܬܼܪܵܐ ܘܫܲܢ̣ܝܼ. ܠܲܝܬܿ ܓܹܝܪ ܒܦܘܼܠܚܵܢܵܐ ܕܥܲܒܼܕܘܼܬܼܵܐ ܫܲܝܢܵܐ ܕܪܸܥܝܵܢܵܐ: ܘܠܵܐ ܒܚܹܐܪܘܼܚܵܐ ܕܲܒܼܢܲܝ̈ܵܐ ܫܓܼܘܼܫܝܵܐ ܕܕܼܘܼܘܵܕܼܵܐ. ܗ̤ܘ ܓܹܝܪ ܡܥܵܕܼ ܡܵܬܹ̇ܩ ܠܵܗ̇ ܠܲܛܥܵܡܬܼܵܐ ܕܤܘܼ̈ܟܵܠܹܐ: ܘܒܼܵܐܹ̇ܙ ܠܒܼܘܼܝܵܢܵܐ ܕܲܒܼܗܘܿܢ. ܒܲܕܼܡܘܼܬܼ ܥܠܲܩܬܼܵܐ: ܕܡܵܬܲܩܵܐ ܚܲܝܘܼܬܹܗ ܕܦܲܓܼܪܵܐ: ܒܲܕܼܡܵܐ ܕܗܲܕܵܡܵܘ̈ܗܝ. ܐܵܦ ܓܹܝܪ ܪܟܼܘܿܒܹܗ ܕܤܵܛܵܢܵܐ: ܐܸܢ ܡܲܨܝܵܐ: ܙܵܕܹܩ ܕܢܸܬܼܩܪܸܐ ܕܘܼܘܵܕܼܵܐ. ܗ̤ܘ ܤܵܛܵܢܵܐ ܒܲܕܼܡܘܼܬܼ ܗܸܢܝܘܿܟܼܵܐ ܡܥܵܕܼ ܐܲܡܝܼܢܵܐܝܼܬܼ ܪܵܟܹܒܼ ܥܲܠ ܗܵܢܵܐ: ܟܲܕܼ ܕܒܼܝܼܪ ܥܲܡܹܗ ܟܸܢܫܵܐ ܕܚܲܫܹ̈ܐ. ܘܥܲܠ ܢܲܦܫܵܐ ܕܵܘܝܼܬܼܵܐ ܥܵܐܹ̇ܠ: ܒܚܲܒܵܪܵܐ ܕܕܼܘܼܘܵܕܼܵܗ̇. ܘܐܵܦ ܗܵܕܹܐ: ܦܵܪܘܿܫܵܐܝܼܬܼ ܗ̤ܘܲܝܬܿ ܡܸܤܬܲܟܲܠ. ܕܲܡܝܲܒܿܠܵܢܵܐ ܕܡܸܠܹ̈ܐ ܐܲܝܟܼ ܕܡ̣ܢ ܦܲܪܨܘܿܦܵܐ ܢܘܼܟܼܪܵܝܵܐ ܒܦܸܬܼܓܼܵܡܹ̈ܐ ܕܙܘܼܡܵܪܵܟܼ ܘܲܨܠܘܿܬܼܵܟܼ: ܠܵܐ ܬܸܗܘܸܐ. ܕܠܵܐ ܬܸܤܬܿܒܲܪ ܠܵܟܼ ܕܲܥ̇ܒܼܵܕܼܵܐ ܕܲܫܠܝܼܚܘܼܬܼܵܐ ܡܲܤܓܸܐ ܐܲܢ̄ܬܿ ܚܦܝܼܛܵܐܝܼܬܼ: ܟܲܕܼ ܡ̣ܢ ܚܲܫܵܐ ܘܚܲܕܼܘܼܬܼܵܐ ܕܲܒܼܗܘܿܢ ܡܒܲܪܲܝ ܐܲܢ̄ܬܿ ܠܲܓܼܡܵܪ. ܐܸܠܵܐ ܐܲܝܟܼ ܕܡ̣ܢ ܦܲܪܨܘܿܦ ܝܵܬܼܵܟܼ ܗ̤ܘܲܝܬܿ ܐܵܡܲ݁ܪ ܠܗܹܝܢ ܠܡܸܠܹ̈ܐ ܡܸܬܼܟܲܫܦܵܢܵܐܝܼܬܼ: ܒܒܼܘܼܝܵܢܵܐ ܘܲܒܼܚܚܲܫܵܐ ܕܦܘܼܪܫܵܢܵܐ. ܐܲܝܟܼ ܐܲܝܢܵܐ ܕܲܡܦܵܣ: ܕܒܲܥ̇ܒܼܵܕܼܵܐ ܕܲܩܢܘܿܡܹܗ ܐܝܼܬܼܵܘܗܝ ܫܲܪܝܼܪܵܐܝܼܬܼ. ܩܘܼܛܵܥܵܐ: ܡ̣ܢ ܦܸܗܝܵܐ ܕܪܸܥܝܵܢܵܐ. ܘܦܸܗܝܵܐ: ܡ̣ܢ ܒܸܛܠܵܢܵܐ ܕܥܲܡ̈ܠܐ ܘܩܸܪܝܵܢܵܐ ܘܡ̣ܢ ܥܸܢܝܵܢܵܐ ܕܲܡܫܵܟܼܵܐ ܗܵܘܹ̇ܐ܀ ܗܵܝ̇ ܕܠܵܐ ܢܸܬܼܚܲܫܲܚ ܒܗܘܼܦܵܟܼ ܚܘܼ̈ܫܵܒܹܐ ܠܘܼܩܒܲܠ ܗܵܢܘܿܢ ܕܲܡܡܲܠܠܝܼܢ ܒܲܢ: ܐܸܠܵܐ ܒܝܲܕܼ ܬܲܟܼܫܲܦܬܼܵܐ pb. 384 ܢܸܦܤܘܿܩ ܡܲܡܠܲܠܗܘܿܢ: ܗܵܕܹܐ: ܫܘܼܘܕܵܥܵܐ ܗ̣̄ܝ ܕܗܵܘܢܵܐ ܕܐܸܫܟܲܚ ܚܸܟܼܡܬܼܵܐ ܘܚܲܝܠܵܐ ܕܡ̣ܢ ܛܲܝܒܿܘܼܬܼܵܐ. ܕܡ̣ܢ ܥܲܡܠܵܐ ܤܲܓܝܼܐܵܐ: ܚܲܪܲܪܬܹܗ ܝܑܼܕܲܥܬܹܗ ܫܲܪܝܼܪܬܵܐ. ܘܒܲܫܟܼܵܚܬܵܐ ܕܲܫܒܼܝܼ̈ܠܹܐ ܦܵܤ̈ܘܿܩܹܐ ܕܐܲܕܼܪܸܟܼ: ܤܲܓܝܼܐܘܼܬܼ ܟܪܘܼܟܼܝܵܐ ܕܐܘܼܪܚܵܐ ܢܲܓܝܼܪܬܵܐ ܦܲܤܩ̣ܵܗ̇. ܒܗܵܝ̇ ܕܐܵܦ ܠܵܐ ܒܟܼܠܙܒܲܢ ܐܝܼܬܼ ܠܲܢ ܚܲܝܠܵܐ: ܕܒܲܗ̈ܦܵܟܼܵܬܼܵܐ ܠܟܼܠܗܘܿܢ ܚܘܼ̈ܫܵܒܹܐ ܕܲܠܩܘܼ̈ܒܼܠܵܝܹܐ ܢܫܲܬܸܩ ܐܸܢܘܿܢ. ܐܸܠܵܐ ܓܵܕܼܫܵܐ ܐܸܡܲܬܼܝ ܕܢܵܤ̇ܒܿܝܼܢܲܢ ܡܸܢܗܘܿܢ ܡܚܘܿܬܼܵܐ: ܕܲܠܙܲܒܼܢܵܐ ܤܲܓܝܼܐܵܐ ܠܵܐ ܡܸܬܼܐܲܤܝܵܐ܀ ܠܘܼܩܒܲܠ ܗܵܢܘܿܢ ܕܐܝܼܬܲܝܗܘܿܢ ܒܢܲܝ̈ ܫܬܼܵܐ ܐܲܠܦܹ̈ܐ ܕܲܫܢܲܝ̈ܵܐ: ܡܲܥܸܠ ܐܲܢ̄ܬܿ ܢܲܦܫܵܟܼ ܠܕܲܪܵܐ. ܐܝܼܬܼ ܕܹܝܢ ܘܲܠܗܘܿܢ ܐܵܦ ܥܘܼܬܵܕܼܵܐ ܕܐܲܝܠܹܝܢ ܕܲܒܼܗܹܝܢ ܢܸܡܚܘܿܢܵܟܼ: ܘܝܲܬܿܝܼܪ ܡ̣ܢ ܚܸܟܼܡܬܼܵܟܼ ܘܕܼܘܼܪܵܫܵܟܼ ܕܝܼܠܵܟܼ. ܐܸܠܵܐ ܘܐܵܦ ܟܲܕܼ ܙܵܟܹ̇ܐ ܐܲܢ̄ܬܿ: ܫܘܼܚܬܼܵܐ ܕܚܘܼ̈ܫܵܒܹܐ ܡܟܲܬܡܵܐ ܗ̣̄ܝ ܒܪܸܥܝܵܢܵܟܼ: ܘܪܹܚܝܵܐ ܕܤܲܪܝܼܘܼܬܼܗܘܿܢ ܥܲܕܼ ܙܲܒܼܢܵܐ ܦܵܐܲܚ ܒܤܵܘܩܵܟܼ. ܒܝܼܫܵܐ ܕܹܝܢ ܩܲܕܼܡܵܝܵܐ: ܡ̣ܢ ܟܠܗܹܝܢ ܗܵܠܹܝܢ ܘܩܸܢܛܵܐ ܡܚܲܪܲܪ ܐܲܢ̄ܬܿ: ܒܗܵܝ̇ ܕܲܠܲܝܬܿ ܤܘܼܝܵܥܵܐ ܐܲܝܟܼ ܐܲܠܵܗܵܐ܀ ܕܸܡ̈ܥܹܐ ܐܲܡܝܼ̈ܢܵܬܼܵܐ ܕܒܲܨܠܘܿܬܼܵܐ: ܫܘܼܘܕܵܥܵܐ ܐܸܢܹܝܢ ܕܪ̈ܲܚܡܹܐ ܐܲܠܵܗܵܝܹ̈ܐ: ܕܲܫܘܵܬ̤ ܠܗܘܿܢ ܢܲܦܫܵܐ ܒܝܲܕܼ ܬܝܵܒܼܘܼܬܼܵܗ̇ ܕܐܸܬܼܩܲܒܿܠܲܬ̤: ܘܫܲܪܝܲܬ̤ ܥܵܐ̇ܠܵܐ ܠܲܦܩܲܥܬܼܵܐ ܕܫܲܦܝܼܘܼܬܼܵܐ ܒܕܸܡ̈ܥܹܐ. ܐܸܠܵܐ ܓܹܝܪ ܐܸܬܿܕܲܠܝܼܘ ܚܘܼ̈ܫܵܒܹܐ ܡ̣ܢ ܪܸܢܝܵܐ ܕܥܵܒܼܘܿܪ̈ܝܵܬܼܵܐ: ܘܲܫܕܼܵܘ ܡܸܢܗܘܿܢ ܤܲܒܼܪܹܗ ܕܥܵܠܡܵܐ: ܘܕܼܵܠܲܬ̤ ܒܗܘܿܢ ܒܲܤܝܘܼܬܼܵܐ ܕܲܥܠܵܘܗܝ: ܘܫܲܪܝܼܘ ܠܡܲܬܼܩܵܢܘܼ ܙܘܵܕܹ̈ܐ ܕܲܠܝܘܿܡ ܡܲܦܩܵܢܹܗ ܕܒܲܪܢܵܫܵܐ. ܒܲܕܼܙܠܲܬ̤ ܠܵܗ̇ ܒܢܲܦܫܵܐ ܡܲܚܫܲܒܼܬܼܵܐ ܕܨܸܒܼ̈ܘܵܬܼܵܐ ܕܲܠܗܲܠ ܡ̣ܢ ܕܲܬܼܢܵܢ: ܠܵܐ ܡܲܨܝܵܐ ܕܢܲܪ̈ܕܝܵܢ ܥܲܝ̈ܢܹܐ ܕܸܡ̈ܥܹܐ܀ ܕܡ̈ܥܹܐ ܓܹܝܪ ܡ̣ܢ pb. 385 ܗܸܪܓܵܐ ܚܲܬܝܼܬܼܵܐ ܘܲܕܼܠܵܐ ܦܸܗܝܵܐ: ܘܡ̣ܢ ܚܘܼ̈ܫܵܒܹܐ ܬܟܼܝܼ̈ܒܹܐ ܘܠܵܐ ܡܸܨܛܲܠܝܵܢܹ̈ܐ ܗܵܘ̈ܝܵܢ. ܘܲܒܼܝܲܕܼ ܥܘܼܗܕܵܢܵܐ ܡܸܕܸܡ ܩܲܛܝܼܢܵܐ ܕܢܵܦܹ̇ܠ ܒܪܸܥܝܵܢܵܐ: ܘܡܲܚܸܫ ܠܠܸܒܵܐ ܒܨܸܦܬܼܵܐ ܕܲܥܠܵܘܗܝ. ܘܡ̣ܢ ܗܵܪܟܵܐ: ܬܵܟܼ̈ܒܵܢ ܕܸܡ̈ܥܹܐ. ܐܸܡܲܬܼܝ ܕܬܸܦܢܸܐ ܠܘܵܬܼ ܥ̇ܒܼܵܕܼܵܐ ܕܐܝܼ̈ܕܲܝܵܐ ܒܐܲܡܝܼܢܘܼܬܼܵܐ ܕܲܒܼܫܸܠܝܵܟܼ: ܠܵܐ ܬܤܝܼܡܝܼܘܗܝ ܠܦܘܼܩܕܵܢܵܐ ܕܐܲܒܼܵܗ̈ܬܼܵܐ ܕܡܸܛܠܵܬܹܗ: ܬܲܚܦܝܼܬܼܵܐ ܠܪܸܚܲܬܼ ܟܸܤܦܵܐ. ܥ̇ܒܼܵܕܼܵܐ ܠܲܡ ܙܥܘܿܪܵܐ ܢܸܗܘܸܐ ܠܵܟܼ ܡܸܛܠ ܩܘܼܛܵܥܵܐ: ܐܲܝܢܵܐ ܕܠܵܐ ܫܵܓܹ̇ܫ ܠܹܗ ܠܗܵܘܢܵܐ. ܐܸܢܕܹܝܢ ܡܸܛܠ ܙܸܕܼܩܬܼܵܐ ܟܹܐܡܲܬܼ ܕܬܸܗܡܘܿܣ ܠܘܵܬܹܗ ܒܝܲܬܿܝܼܪ ܨܵܒܹ̇ܐ ܐܲܢ̄ܬܿ: ܕܲܥ ܕܲܡܝܲܬܿܪܵܐ ܨܠܘܿܬܼܵܐ ܡ̣ܢ ܙܸܕܼܩܬܼܵܐ ܒܛܲܟܼܤܵܗ̇. ܘܐܸܢ ܡܸܛܠ ܤܘܼܢܩܵܢܵܟܼ: ܐܸܢ ܠܵܐ ܬܸܬܼܝܲܥܲܢ: ܡܸܤܬܼܵܟܼ ܠܡܘܼܠܵܝܵܐ ܕܲܚܫܲܚܬܼܵܟܼ: ܗܵܘ̇ ܡܸܕܸܡ ܕܲܡܦܲܪܢܸܣ ܠܵܟܼ ܡܵܪܲܢ. ܠܵܐ ܡܸܡܬܼܘܿܡ ܐܲܪܦ̣ܝܼ ܠܦܵܠܚܵܘ̈ܗܝ: ܕܢܸܤܬܲܬܩܝܼܢ ܥܲܠ ܥܵܒܼܘܿܪ̈ܝܵܬܼܵܐ. ܒܥܵܘ ܠܘܼܩܕܲܡ ܡܲܠܟܿܘܼܬܹܗ ܕܐܲܠܵܗܵܐ ܘܙܲܕܼܝܼܩܘܼܬܹܗ: ܘܗܵܠܹܝܢ ܡܸܬܿܬܵܘ̈ܤܦܵܢ ܠܟܼܘܿܢ: ܥܲܕܼܠܵܐ ܬܸܫܠܘܼܢ: ܐܸܡ݂ܲܪ ܡܵܪܲܢ܀ ܐܸܡ݂ܲܪ ܚܲܕܼ ܡ̣ܢ ܩܲܕܝܼ̈ܫܹܐ: ܠܵܘ ܓܹܝܪ ܗܵܢܵܘ ܢܝܼܫܵܐ ܕܕܼܘܼܒܵܪܵܟܼ: ܐܲܝܟܲܢܵܐ ܕܲܬܼܤܲܒܲܥ ܠܟܲܦ̈ܢܹܐ: ܘܬܸܗܘܸܐ ܩܸܠܵܝܬܵܟܼ ܒ݂ܹܝܬܼ ܨܵܘܒܵܐ ܠܐܲܟܼܤ̈ܢܵܝܹܐ. ܗܵܢܵܐ ܓܹܝܪ ܕܘܼܒܵܪܵܐ: ܠܐܲܝܠܹܝܢ ܕܲܒܼܥܵܠܡܵܐ ܐܸܢܘܿܢ ܝܲܬܝܼܪ ܫܲܦܝܼܪ ܠܵܚܹ̇ܡ: ܘܠܵܘ ܠܝܼܚܝܼ̈ܕܼܵܝܹܐ ܡܚܲܪܪ̈ܲܝ ܡ̣ܢ ܡܲܪ̈ܢܝܵܬܼܵܐ ܕܡܸܬܼܚܲܙܝܵܢ̈ܝܵܬܼܵܐ: ܘܢܵܛܪ̈ܲܝ ܗܵܘܢܵܐ ܒܲܨܠܘܿܬܼܵܐ. ܐܸܢ ܡܸܡܬܼܘܿܡ ܬܸܫܬܿܘܸܐ ܠܝܼܚܝܼܕܼܵܝܘܼܬܼܵܐ ܩܲܠܝܼܠܲܬܼ ܡܵܘ̈ܒܠܹܐ ܒܡܲܠܟܿܘܼܬܼܵܐ ܕܚܹܐܪܘܼܬܼܵܗ̇: pb. 386 ܠܵܐ ܬܲܪܗܒܼܵܟܼ ܡܲܚܫܲܒܼܬܼܵܐ ܗܵܝ̇ ܕܕܸܚܠܬܼܵܐ ܐܲܝܟܼ ܥܝܵܕܼܵܐ: ܒܤܘܿܓܼܵܐܐ ܕܲܙܢܲܝ̈ ܫܘܼ̈ܚܠܵܦܹܐ ܕܚܘܼ̈ܫܵܒܹܐ ܕܲܗ̈ܦܵܟܼܵܬܼܵܗ̇. ܐܸܠܵܐ ܐܲܝܟܼ ܐ̄ܢܵܫ ܕܲܡܗܲܝܡܸܢ ܕܢܵܛܘܿܪܵܐ ܐܝܼܬܼ ܥܲܡܹܗ: ܘܲܡܦܵܣ ܒܚܸܟܼܡܬܹܗ ܚܲܬܝܼܬܵܐܝܼܬܼ: ܕܗ̤ܘ ܥܲܡ ܟ̱ܠܵܗ̇ ܒܪܝܼܬܼܵܐ ܬܚܹܝܬܼ ܚܲܕܼ ܡܵܪܵܐ ܐܝܼܬܲܝܗܘܿܢ: ܘܚܲܕܼ ܪܸܡܙܵܐ ܠܟܼܠܗܘܿܢ ܡܙܝܼܥ ܘܲܡܫܲܠܸܐ ܐܵܦ ܡܕܲܒܲܪ. ܘܠܵܐ ܡܸܫܟܲܚ ܚܲܕܼ ܡ̣ܢ ܟܢܵܘ̈ܬܼܵܐ ܠܚܲܒܼܪܹܗ ܕܢܲܟܸܐ ܒܸܠܥܵܕܼ ܡ̣ܢ ܦܘܼܩܕܵܢܹܗ ܕܲܡܕܲܒܿܪܵܢܵܐ: ܘܕܲܬܼܚܹܝܬܼ ܒܛܝܼܠܘܼܬܼܵܐ ܐܝܼܬܼܵܘܗܝ ܟܠ: ܗܵܟܲܢܵܐ ܩܘܼܡ ܘܐܸܬܼܠܲܒܲܒܼ. ܘܐܵܦܸܢ ܝܑܼܗܝܼܒܼܵܐ ܚܹܐܪܘܼܬܼܵܐ ܠܡܸܢܗܘܿܢ: ܠܵܐ ܗ̄ܘ̣ܵܐ ܒܟܼܠܡܸܕܸܡ: ܘܠܵܐ ܫܹ̈ܐܕܹܐ ܐܵܦܠܵܐ ܚܲܝ̈ܘܵܬܼܵܐ ܚܲܒ̈ܵܠܵܬܼܵܐ: ܘܠܵܐ ܒܢܲܝ̈ܢܵܫܵܐ ܒܒܼܝܼܫܘܼܬܼܵܐ: ܕܲܢܢܝܼܚ ܚܲܕܼ ܡܸܢܗܘܿܢ ܨܸܒܼܝܵܢܹܗ ܒܚܘܼܒܵܠܵܐ ܕܐ̄ܢܵܫ ܡܸܫܟܲܚ: ܥܕܲܡܵܐ ܕܦܵܩܹ̇ܕܼ ܪܸܡܙܵܐ ܘܡܸܬܼܝܼܗܵܒܼ ܐܲܬܼܪܵܐ ܒܲܟܼܡܵܝܘܼܬܼܵܐ܀ ܠܵܐ ܗ̄ܘ̣ܵܐ ܟܠܵܗ̇ ܚܹܐܪܘܼܬܼܵܐ ܕܬܹܐܬܸܐ ܠܤܵܥܘܿܪܘܼܬܼܵܐ: ܡܲܦܲܣ ܡ̣ܢ ܪܸܡܙܵܐ ܐܲܠܵܗܵܝܵܐ: ܘܐܸܠܵܐ: ܠܵܐ ܚܵܝܹ̇ܐ ܗ̄ܘ̣ܵܐ ܟܠ ܒܤܲܪ. ܠܵܐ ܓܹܝܪ ܫܵܒܹ̇ܩ ܡܵܪܝܵܐ ܠܼܲܒܼܪܝܼܬܹܗ: ܕܬܸܬܼܩܲܪܲܒܼ ܠܵܗ̇ ܚܹܐܪܘܼܬܼܵܐ ܕܫܹ̈ܐܕܹܐ ܐܵܘ ܕܲܒܼܢܲܝ̈ܢܵܫܵܐ: ܕܢܸܬܼܚܲܫܚܘܼܢ ܒܵܗ̇ ܚܲܕܼ ܡܸܢܗܘܿܢ ܐܲܝܟܼ ܨܸܒܼܝܵܢܗܘܿܢ. ܡܸܛܠܗܵܢܵܐ ܗ̤ܘܲܝܬܿ ܐܵܡܲ݁ܪ ܠܝܵܬܼܵܟܼܸ: ܕܢܵܛܘܿܪܵܐ ܐܝܼܬܼ ܥܲܡܝܼ. ܘܠܲܝܬܿ ܡܸܬܼܡܲܨܝܵܢܘܼܬܼܵܐ ܠܲܚܕܼܵܐ ܡ̣ܢ ܒܸܪ̈ܝܵܬܼܵܐ ܐܵܦܸܢ ܠܡܸܬܼܚܙܵܝܘܼ ܒܲܠܚܘܿܕܼ ܩܕܼܵܡܲܝ: ܐܸܠܵܐ ܡܲܦܤܵܢܘܼܬܼܵܐ ܗܘ̤ܵܬܼ ܡ̣ܢ ܠܥܸܠ. ܐܲܝܟܲܢܵܐ ܕܐܵܦܠܵܐ: ܟܲܕܼ ܒܥܲܝܢܲܝ̈ܟ ܬܸܚܙܸܐ ܘܒܸܐܕܸܢܲܝ̈ܟ ܬܸܫܡܲܥ ܠܲܓܼܙܵܡܗܘܿܢ: ܬܲܫܲܪ ܕܡܲܡܪܚܝܼܢ. ܐܸܠܘܼ ܦܘܼܩܕܵܢܵܐ ܐܝܼܬܼ ܗ̄ܘ̣ܵܐ ܠܘܵܬܼܗܘܿܢ ܡ̣ܢ ܪܸܡܙܵܐ pb. 387 ܫܡܲܝܵܢܵܐ: ܠܵܐ ܐܵܠ̇ܨܵܐ ܗ̄ܘ̣ܵܬܼ: ܠܵܐ ܡܹܐܡܪܵܐ ܐܵܦܠܵܐ ܡܸܠܹ̈ܐ. ܐܸܠܵܐ ܠܨܸܒܼܝܵܢܵܐ: ܥ̇ܒܼܵܕܼܵܐ ܢܵܩܹ̇ܦ ܗ̄ܘ̣ܵܐ. ܘܐܸܢ ܕܹܝܢ ܗܵܢܵܘ ܨܸܒܼܝܵܢܹܗ ܕܡܵܪܝ: ܐܸܡܲܪ ܐܲܢ̄ܬܿ ܠܵܟܼ: ܕܢܸܫܬܲܠܛܘܼܢ ܒܝܼ̈ܫܹܐ ܒܬܼܘܼܩܵܢܹܗ: ܐܵܦܠܵܐ ܐܸܢܵܐ ܡܸܬܼܥܲܤܲܩ ܐ̄ܢܵܐ ܠܘܼܩܒܲܠ ܗܵܕܹܐ: ܐܲܝܟܼ ܐ̄ܢܵܫ ܕܲܡܢܵܚ ܕܲܢܒܲܛܸܠ ܨܸܒܼܝܵܢܵܐ ܕܡܵܪܹܗ. ܘܒܲܕܼܓܼܘܿܢ ܐܵܦ ܒܢܸܤܝܘܿܢܵܟܼ: ܚܲܕܼܘܼܬܼܵܐ ܡܸܬܼܡܠܸܐ ܐܲܢ̄ܬܿ: ܐܲܝܟܼ ܐܲܝܢܵܐ ܕܝܼܕܲܥ̣ ܘܐܼܲܪܓܸܫ̣: ܕܡܵܪܹܗ ܐܝܼܬܼܵܘܗܝ ܠܹܗ ܡܕܲܒܿܪܵܢܵܐ. ܡܵܕܹܝܢ ܤܡܘܿܟܼ ܠܸܒܵܟܼ ܒܬܼܘܼܟܼܠܵܢ ܗܲܝܡܵܢܘܼܬܼܵܐ ܕܡܵܪܝܵܐ: ܘܠܵܐ ܬܸܬܿܙܝܼܥ: ܠܵܐ ܡ̣ܢ ܕܸܚܠܬܹܗ ܕܠܸܠܝܵܐ: ܘܐܵܦܠܵܐ ܡ̣ܢ ܓܹܐܪܵܐ ܕܦܵܪܲܚ ܒܐܝܼܡܵܡܵܐ. ܗܲܝܡܵܢܘܼܬܹܗ ܠܲܡ ܕܙܲܕܝܼܩܵܐ ܕܲܠܘܵܬܼ ܐܲܠܵܗܵܐ: ܥܵܒܼܕܵܐ ܠܗܹܝܢ ܠܚܲܝ̈ܘܵܬܼܵܐ ܕܒܲܪܵܐ ܐܲܝܟܼ ܐܸܡܪܹ̈ܐ ܘܥܸܙܹ̈ܐ. ܠܵܐ ܠܲܡ ܐܝܼܬܲܝ ܙܲܕܝܼܩܵܐ: ܕܐܸܬܿܬܿܟܸܠ ܒܐܲܠܵܗܵܐ. ܐܸܠܵܐ ܚܲܬܝܼܬܼܵܐ ܠܵܟܼ: ܕܡܸܛܠ ܦܘܼܠܚܵܢܵܐ ܕܙܲܕܝܼܩܘܼܬܼܵܐ ܢܦܲܩ̣ܬܿ ܠܚܘܼܪܒܵܐ ܤܒܼܝܼܣ ܒܐܘܼܠܨܵܢܹ̈ܐ: ܘܡܸܛܠܗܵܢܵܐ ܡܫܲܡܫܵܢܵܐ ܐܝܼܬܲܝܟ ܕܨܒܼܝܵܢܹܗ ܕܐܲܠܵܗܵܐ. ܡܵܕܹܝܢ: ܡܲܓܵܢ ܬܵܥܹ̇ܫ ܐܲܢ̄ܬܿ: ܟܲܕܼ ܤܵܒܹ̇ܠ ܐܲܢ̄ܬܿ ܛܘܼܪ̈ܵܦܹܐ ܗܵܠܹܝܢ. ܠܵܐ ܗ̄ܘ̣ܵܐ ܕܐܲܠܵܗܵܐ ܨܵܒܹ̇ܐ ܒܛܘܼܪ̈ܵܦܹܐ ܕܲܒܼܢܲܝ̈ܢܵܫܵܐ: ܐܸܠܵܐ ܕܐܲܢ̄ܬܿ ܬܩܲܪܸܒܼ ܠܹܗ ܕܸܒܼܚܬܼܵܐ ܕܚܘܼܒܵܐ: ܚܲܫܹ̈ܐ ܕܲܩܢܘܿܡܵܟܼ. ܗܵܢܵܐ ܦܘܼܪܫܵܢܵܐ ܡܚܵܘܹܝܢ ܠܐܲܠܵܗܵܐ ܟܠܗܘܿܢ ܪ̈ܵܚܡܵܘܗܝ: ܕܲܚܠܵܦ ܚܘܼܒܹܗ ܢܸܬܼܐܲܠܨܘܼܢ. ܡܸܛܠ ܕܟܼܠܗܘܿܢ ܐܲܝܠܹܝܢ ܕܨܵܒܹ̇ܝܢ ܕܲܒܼܕܸܚܠܲܬܼ ܐܲܠܵܗܵܐ ܕܢܸܚܘܿܢ ܒܝܼܫܘܿܥܡܫܝܼܚܵܐ: ܡܸܬܼܠܲܨܝܼܢ. ܘܗܵܝܕܹܝܢ ܡܲܫܠܸܛ ܠܗܘܿܢ ܥܲܠ ܤܬܼܝܼܪ̈ܵܬܼܵܐ ܕܓܲܙܵܘ̈ܗܝ܀ ܐܸܡ݂ܲܪ ܓܹܝܪ ܚܲܕܼ ܡ̣ܢ ܩܲܕܝܼ̈ܫܹܐ: ܕܐܝܼܬܼ ܗ̄ܘ̣ܵܐ ܐ̄ܢܵܫ ܝܑܼܚܝܼܕܼܵܝܵܐ ܤܵܒܼܵܐ ܝܲܩܝܼܪܵܐ: ܘܐܸܙܹ̇ܠܬܼ ܠܘܵܬܹܗ ܒܲܙܒܲܢ: ܟܲܕܼ ܫܚܝܼܩ ܐ̄ܢܵܐ ܡ̣ܢ ܢܸܤܝ̈ܘܿܢܹܐ. pb. 388 ܗ̤ܘ ܕܹܝܢ ܟܪܝܼܗ ܗ̄ܘ̣ܵܐ ܘܡܲܓܲܣ ܗ̄ܘ̣ܵܐ. ܘܟܲܕܼ ܫܲܠܸܡ̇ܬܹܗ: ܝܸܬܼܒܹ̇ܬܼ ܠܘܵܬܹܗ: ܘܐܸܡ̇ܪܹܬܼ ܠܹܗ: ܨܲܠܵܐ ܥܠܲܝ ܐܲܒܼܘܼܢ: ܕܤܲܓܝܼ ܫܚܝܼܩ ܐ̄ܢܵܐ ܡ̣ܢ ܢܸܤܝ̈ܘܿܢܹܐ ܕܫܹ̈ܐܕܹܐ. ܗ̤ܘ ܕܹܝܢ ܦܬܲܚ̣ ܥܲܝܢܵܘ̈ܗܝ ܘܚ̣ܵܪ ܒܝܼ ܫܲܦܝܼܪ: ܘܐܸܡ݂ܲܪ ܠܝܼ: ܒܹܪܝ: ܛܲܠܝܵܐ ܐܲܢ̄ܬܿ: ܘܠܵܐ ܫܵܒܹ̇ܩ ܥܠܲܝܟ ܐܲܠܵܗܵܐ ܢܸܤܝ̈ܘܿܢܹܐ. ܗܵܝܕܹܝܢ ܐܸܡ̇ܪܹܬܼ ܠܹܗ: ܕܛܲܠܝܵܐ ܐ̄ܢܵܐ: ܐܸܠܵܐ ܢܸܤܝ̈ܘܿܢܹܐ ܕܓܲܒܼܪܹ̈ܐ ܚܲܝ̈ܠܵܬܼܵܢܹܐ ܐܝܼܬܼ ܥܲܡܝ. ܗܵܝܕܹܝܢ ܐܸܡ݂ܲܪ ܠܝܼ: ܡܵܕܹܝܢ ܠܲܡܚܲܟܵܡܘܼܬܼܵܟܼ ܒܵܥܹ̇ܐ ܐܲܠܵܗܵܐ. ܘܐܸܡ̇ܪܹܬܼ ܠܹܗ ܐܸܢܵܐ: ܕܐܲܝܟܲܢ ܡܸܬܼܚܲܟܲܡܢܵܐ: ܟܲܕܼ ܟܠܝܘܿܡ ܡܵܘܬܵܐ ܛܵܥܹ̇ܡ ܐ̄ܢܵܐ؟ ܗ̤ܘ ܕܹܝܢ ܐܸܡ݂ܲܪ ܠܝܼ: ܐܲܠܵܗܵܐ ܪܵܚܹܡ ܠܵܟܼ: ܫܬܼܘܿܩ. ܥܬܼܝܼܕܼ ܗ̄ܘ̣ ܐܲܠܵܗܵܐ ܕܢܸܬܸܠ ܠܵܟܼ ܡܵܘܗܲܒܼܬܹܗ. ܬܘܼܒܼ ܐܸܡ݂ܲܪ ܠܝܼ: ܕܲܗ̤ܘܲܝܬܿ ܝܵܕܲܥ̇ ܒܹܪܝ: ܕܲܬܼܠܵܬܼܝܼܢ ܫܢ̈ܝܼܢ ܩܪܵܒܼܵܐ ܥܲܡ ܫܹ̈ܐܕܹܐ ܥܒܼܝܼܕܼ ܠܝܼ: ܟܲܕܼ ܥܸܤܪܝܼܢ ܫܢ̈ܝܼܢ ܠܵܐ ܐܸܬܼܥܲܕܪܹܬܼ ܟܠ ܟ̱ܠܹܗ. ܟܲܕܼ ܗ̤ܘܲܝ̈ ܕܹܝܢ ܥܸܤܪܝܼܢ ܘܚܲܡܸܫ ܫܢ̈ܝܼܢ: ܫܲܪܝܼ ܡܕܝܼܩ ܗ̄ܘ̣ܵܐ ܢܝܵܚܵܐ. ܘܲܟܼܡܵܐ ܕܐܵܬܹ̇ܐ ܗ̄ܘ̣ܵܐ: ܤܵܓܹ̇ܐ ܗ̄ܘ̣ܵܐ. ܘܟܲܕܼ ܗ̤ܘܲܝ̈ ܥܸܤܪܝܼܢ ܘܲܬܼܡܵܢܹܐ ܫܢܝܼ̈ܢ: ܤ̣ܓܝܼ ܝܲܬܿܝܼܪ ܒܝܲܬܝܼܪ. ܘܲܒܼܡܘܼܠܵܝܵܐ ܕܹܝܢ ܕܲܬܼܠܵܬܼܝܼܢ ܫܢ̈ܝܼܢ ܗܵܟܲܢܵܐ ܤ̣ܓܼܝܼ ܢܝܵܚܵܐ: ܕܠܵܐ ܝܵܕܲܥ̇ܢܵܐ ܟܡܵܐ ܗܵܘܹ̇ܐ. ܘܐܵܡܲ̇ܪ ܗ̄ܘ̣ܵܐ: ܕܡܵܐ ܕܒܼܵܥܹ̇ܐ ܐ̄ܢܵܐ ܕܐܹܩܘܼܡ ܒܬܸܫܡܸܫܬܼܵܐ: ܚܕܼܵܐ ܡܲܪܡܝܼܬܼܵܐ ܡܸܫܬܒܸܩ ܐ̄ܢܵܐ ܕܐܹܫܲܡܸܫ. ܕܫܲܪܟܵܐ ܕܹܝܢ: ܐܸܢ ܩܵܐܹ̇ܡ ܐ̄ܢܵܐ ܬܠܵܬܼܵܐ ܝܵܘܡ̈ܝܼܢ: ܒܬܲܗܪܵܐ ܕܥܲܡ ܐܲܠܵܗܵܐ ܗܵܘܹ̇ܐ ܐ̄ܢܵܐ: ܟܲܕܼ ܠܵܐ ܡܲܪܓܸܫ ܐ̄ܢܵܐ ܒܠܹܐܘܬܼܵܐ܀ ܗܵܐ ܥܲܡܠܵܐ ܕܙܲܒܼܢܵܐ ܤܲܓܝܼܐܵܐ: ܐܲܝܢܵܐ ܢܝܵܚܵܐ ܕܠܵܐ ܤܵܟܼܵܐ ܐܵܘܠܸܕܼ܀ ܐܝܼܬܼ ܗ̄ܘ̣ܵܐ ܚܲܕܼ ܡ̣ܢ ܐܲܒܼܵܗ̈ܵܬܼܵܐ: ܕܐܵܟܹ̇ܠ ܗ̄ܘ̣ܵܐ ܬܲܪܬܹܝܢ ܙܲܒܼܢ̈ܝܼܢ ܒܫܲܒܿܬܼܵܐ. ܘܐܸܡ݂ܲܪ ܠܲܢ: ܕܲܒܼܗܵܘ̇ ܝܵܘܡܵܐ ܕܲܡܡܲܠܸܠ ܐ̄ܢܵܐ ܥܲܡ ܐ̄ܢܵܫ: pb. 389 ܩܵܢܘܿܢܵܐ ܕܨܵܘܡܵܐ ܐܲܝܟܼ ܥܝܵܕܼܵܐ ܕܐܝܼܬܼ ܠܝܼ: ܠܵܐ ܡܸܫܟܲܚܢܵܐ ܠܡܸܛܲܪ: ܐܸܠܵܐ ܡܸܬܼܐ̱ܠܸܨ ܐ̄ܢܵܐ ܕܐܸܫܪܸܐ. ܘܐܸܤܬܲܟܲܠܢܲܢ: ܕܲܢܛܘܼܪܬܵܐ ܕܠܸܫܵܢܵܐ: ܠܵܐ ܒܲܠܚܘܿܕܼ ܡܥܝܼܪܵܐ ܠܗܵܘܢܵܐ ܠܘܵܬܼ ܐܲܠܵܗܵܐ: ܐܸܠܵܐ ܐܵܦ ܠܥܲܡ̈ܠܹܐ ܓܠܲܝ̈ܵܐ ܕܲܒܼܦܲܓܼܪܵܐ ܡܸܬܼܦܲܠܚܝܼܢ: ܚܲܝܠܵܐ ܪܲܒܵܐ ܟܲܤܝܵܐܝܼܬܼ ܡܵܘܫܛܵܐ ܠܫܘܼܡܠܵܝܗܘܿܢ. ܘܢܵܗܲܪ ܡܲܕܥܵܐ ܐܲܡܝܼܢܵܐܝܼܬܼ ܒܦܘܼܠܚܵܢܵܐ ܟܲܤܝܵܐ: ܐܲܝܟܼ ܕܐܸܡ݂ܲܪܘ ܐܲܒܼܵܗܲܝ̈ܢ. ܕܗܵܝ̇ ܕܢܸܛܲܪ ܠܦܘܼܡܵܐ: ܡܥܝܼܪܵܐ ܠܬܹܐܪܬܵܐ ܠܘܵܬܼ ܐܲܠܵܗܵܐ: ܐܸܢ ܒܝܼܕܲܥܬܼܵܐ ܢܸܫܬܘܿܩ. ܗ̤ܘ ܕܹܝܢ ܗܵܢܵܐ ܩܲܕܝܼܫܵܐ: ܓܪܸܐ ܗ̄ܘ̣ܵܐ ܤܲܓܝܼ ܒܫܲܗܪܵܐ ܕܠܲܝ̈ܠܵܘܵܬܼܵܐ: ܘܐܸܡ݂ܲܪ: ܕܗܵܘ̇ ܠܸܠܝܵܐ ܕܩܵܐܹ̇ܡ ܐ̄ܢܵܐ ܥܕܲܡܵܐ ܠܨܲܦܪܵܐ: ܘܒܼܵܬܲܪ ܡܲܙܡܘܿܪܹ̈ܐ ܡܸܬܿܬܿܢܝܼܚ ܐ̄ܢܵܐ. ܡ̣ܢ ܒܵܬܲܪ ܕܡܸܬܬܿܥܝܼܪ ܐ̄ܢܵܐ ܡ̣ܢ ܫܸܢܬܼܵܐ: ܒܗܵܘ̇ ܝܵܘܡܵܐ ܗܵܘܹ̇ܐ ܐ̄ܢܵܐ ܐܲܝܟܼ ܕܠܵܐ ܐܝܼܬܼܵܘܗ ܒܥܵܠܡܵܐ ܗܵܢܵܐ. ܘܡܸܕܸܡ ܚܘܼܫܵܒܼܵܐ ܐܲܪܥܵܢܵܝܵܐ ܥܲܠ ܠܹܒܿܝ ܠܵܐ ܤܵܠܹ̇ܩ: ܐܵܦܠܵܐ ܥܲܠ ܩܵܢܘܿܢܹ̈ܐ ܡܬܲܚܡܹ̈ܐ ܡܸܤܬܿܢܸܩ ܐ̄ܢܵܐ: ܐܸܠܵܐ ܒܬܸܡܗܵܐ ܗܵܘܹ̇ܐ ܐ̄ܢܵܐ ܝܵܘܡܵܐ ܗܵܘ̇ ܟ̱ܠܹܗ. ܒܚܲܕܼ ܡ̣ܢ ܝܵܘ̈ܡܵܬܼܵܐ ܗܵܟܹܝܠ ܕܐܝܼܬܼܵܘܗܝ ܝܵܘܡܵܐ ܗܵܘ̇ ܕܒܹܗ ܐܹܟܼܘܿܠ: ܘܐܝܼܬܼ ܗ̄ܘ̣ܵܐ ܠܝܼ ܝܵܘ̈ܡܵܬܼܵܐ ܐܲܪܒܿܥܵܐ ܕܡܸܕܸܡ ܠܵܐ ܛܥܝܼܡ ܠܝܼ. ܟܲܕܼ ܩܵܡܹ̇ܬܼ ܕܐܹܫܲܡܸܫ ܪܲܡܫܵܐ ܘܐܸܛܥܲܡ: ܩܵܡܹ̇ܬܼ ܒܕܼܵܪܬܵܐ ܕܩܸܠܵܝܬܝ: ܟܲܕܼ ܐܝܼܬܼ ܗ̄ܘ̣ܵܐ ܫܸܡܫܵܐ ܤܲܓܝܼ. ܘܲܕܼܫܲܪܝܼܬܼ ܒܲܠܚܘܿܕܼ ܒܡܲܪܡܝܼܬܼܵܐ ܕܪܹܫ ܬܸܫܡܸܫܬܼܵܐ ܐܲܪܓܫܹ̇ܬܼ: ܘܬܼܘܼܒܼ ܥܕܲܡܵܐ ܠܝܵܘܡܵܐ ܐ̄ܚܪܹܢܵܐ ܕܲܕܼܢܲܚ̣ ܫܸܡܫܵܐ ܒܐܲܦܲܝ̈: ܘܚܲܡ̣ܘ ܠܗܘܿܢ ܡܵܐܢܲܝ̈ ܥܲܠ ܓܘܼܫܡܝ: ܠܵܐ ܪܓܼܝܼܫ ܗ̄ܘܹ̇ܝܬܼ ܕܐܲܝܟܵܐ ܐܝܼܬܲܝ. ܡ̣ܢ ܕܐܲܠܨܲܢܝ ܫܸܡܫܵܐ ܟܲܕܼ ܚܵܪܹܟܼ ܗ̄ܘ̣ܵܐ ܦܲܪܨܘܿܦܝ: ܐܸܬܼܟܲܢܲܫ ܗܵܘܢܝ ܠܘܵܬܼܝ: ܘܗܵܐ ܚܵܙܹ̇ܐ ܐ̄ܢܵܐ ܕܐܝܼܬܼܵܘܗܝ ܝܵܘܡܵܐ ܐ̄ܚܪܹܢܵܐ. ܘܐܵܘܕܝܼܬܼ ܠܐܲܠܵܗܵܐ: ܕܲܟܼܡܵܐ pb. 390 ܫܦܝܼܥܵܐ ܛܲܝܒܿܘܼܬܹܗ ܠܘܵܬܼ ܒܢܲܝ̈ܢܵܫܵܐ: ܘܠܲܐܝܕܵܐ ܪܲܒܿܘܼܬܼܵܐ ܡܫܘܸܐ ܠܲܕܼܒܼܵܥܹ̇ܝܢ ܠܹܗ. ܫܠܸܡ̣ܘ ܫܲܪ̈ܒܹܐ ܕܐ̄ܢܵܫܵܐ ܩܲܕܝܼ̈ܫܹܐ.