Isaac of Nineveh: Discourse 55
ܕܡ̣ܢ ܐܲܝܟܵܐ ܡܸܬܼܢܲܛܪܵܐ ܥܝܼܪܘܼܬܼܵܐ ܟܤܝܼܬܼܵܐ ܒܓܼܵܘ ܢܲܦܫܵܐ: ܘܡ̣ܢ
ܡܵܢܵܐ ܥܵܐ̇ܠܵܐ ܕܲܡܟܘܼܬܼܵܐ ܘܩܲܪܝܼܪܘܼܬܼܵܐ ܒܪܸܥܝܵܢܵܐ: ܘܲܡܕܲܥܟܼܵܐ
ܠܚܲܡܝܼܡܘܼܬܼܵܐ ܩܲܕܝܼܫܬܼܵܐ ܡ̣ܢ ܢܲܦܫܵܐ: ܘܲܡܡܝܼܬܼܵܐ ܠܪܸܓܿܬܼܵܐ ܕܒܲܐܠܵܗܵܐ:
ܕܥܲܠ ܪ̈ܓܼܝܼܓܼܵܬܼܵܐ ܪ̈ܘܼܚܵܬܵܝܵܬܼܵܐ ܘܲܡܫܲܝܵܢ̈ܝܬܼܵܐ. ܢܗ.
ܠܲܝܬܹܝܗ̇ ܡܸܬܼܡܲܨܝܵܢܘܼܬܼܵܐ ܒܤܲܩܘܼܒܼܠܵܝܘܼܬܼܵܐ ܠܘܵܬܼ ܥܘܼܟܵܪܵܐ
ܒܪ̈ܵܓܲܝ ܫܲܦܝܼܪ̈ܵܬܼܵܐ: ܐܸܠܘܼ ܠܵܗ̇ ܠܒܼܝܼܫܘܼܬܼ ܨܸܢ̈ܥܵܬܹܗ ܐܲܦܬܼܵܐ ܠܵܐ
ܡܸܫܬܿܟܲܚ ܗ̄ܘ̣ܵܐ ܡ̣ܢ ܝܲܕܼ ܡܲܚܒܼܵܢܲܝ̈ܗܹܝܢ ܕܫܲܦܝܼܪܵܬܼܵܐ. ܐܝܼܬܹܝܗ̇ ܡܲܢ
ܨܒܼܘܼܬܼܵܐ: ܕܐܲܝܟܼ ܗܵܟܲܢܵܐ. ܠܟܼܠ ܙܵܘܥܵܐ ܕܪܸܚܡܬܼܵܐ ܕܫܲܦܝܼܪܬܵܐ ܕܐܝܼܬܼ:
ܥܲܡܹܗ ܕܫܘܼܪܵܝ ܡܸܬܿܬܿܙܝܼܥܵܢܘܼܬܼܵܐ ܢܵܩܹ̇ܦ ܠܹܗ ܛܢܵܢܵܐ ܡܸܕܸܡ: ܕܕܼܵܡܹ̇ܐ
ܠܲܕܼܓܼܘܼܡܪܹ̈ܐ ܕܢܘܼܪܵܐ ܒܚܲܡܝܼܡܘܼܬܹܗ. ܘܗ̤ܘ ܗܵܢܵܐ ܡܥܵܕܼ ܚܵܕܲܪ
ܠܹܗ ܐܲܝܟܼ ܫܘܼܪܵܐ ܠܹܗ ܠܙܵܘܥܵܐ ܗܵܘ̇ ܕܪܸܚܡܬܼܵܐ: ܘܛܵܪܹܕ ܡ̣ܢ
ܘܲܥܕܹܗ ܟܠ ܤܲܩܘܼܒܼܠܵܐ ܘܥܘܼܘܵܟܼܵܐ ܕܐܝܼܬܼ. ܥܘܼܫܢܵܐ ܕܹܝܢ ܤܲܓܝܼܐܵܐ
ܘܚܲܝܠܵܐ ܩܢܸܐ ܗܵܢܵܐ ܕܠܵܐ ܡܸܬܼܡܲܠܲܠ: ܠܲܡܚܲܤܢܘܼ ܠܟܼܠܵܗ̇ ܢܵܦܫܵܐ
ܡ̣ܢ ܕܬܸܬܼܪܲܦܸܐ ܐܵܘ ܕܬܸܬܿܙܝܼܥ ܡ̣ܢ ܚܹܐܦܹ̈ܐ ܕܟܼܠ ܥܘܼܤܵܩ̈ܝܼܢ. ܘܗܵܘ̇
ܡܲܢ ܩܲܕܡܵܝܵܐ ܐܝܼܬܼܵܘܗܝ: ܚܲܝܠܵܗ̇ ܕܪܸܓܿܬܼܵܐ ܩܲܕܝܼܫܬܼܵܐ: ܕܲܢܨܝܼܒܼܵܐ
ܒܲܟܪܝܵܢܵܗ̇ ܕܢܲܦܫܵܐ. ܗܵܢܵܐ ܕܹܝܢ: ܢܸܒܼܗܵܐ ܕܡܸܬܿܬܿܙܝܼܥ ܡ̣ܢ ܚܲܝܠܵܗ̇
pb. 393
ܕܚܸܡܬܼܵܐ ܕܲܡܟܼܝܼܢܵܐ ܒܵܗ̇: ܗܵܝ̇ ܕܡ̣ܢ ܐܲܠܵܗܵܐ ܒܲܢ ܤܝܼܡܵܐ ܡܟܲܝܢܵܐܝܼܬܼ:
ܠܡܸܛܲܪ ܬܚܘܼܡܵܘ̈ܗܝ ܕܲܟܼܝܵܢܵܐ: ܕܲܬܼܫܲܡܲܪ ܥܘܼܙܵܐ ܕܚܹܐܦܵܗ̇ ܠܡܘܼܠܵܝ
ܪܸܓܿܬܼܵܐ ܟܝܵܢܵܝܬܼܵܐ ܕܢܲܦܫܵܐ: ܕܗ̤ܝ ܗ̣̄ܝ ܡܝܲܬܿܪܘܼܬܼܵܐ. ܠܲܝܬܿ ܠܡܸܦܠܲܚ
ܡܝܲܬܿܪܘܼܬܼܵܐ ܒܸܠܥܵܕܼܵܘܗܝ. ܡܸܫܬܲܡܲܗ ܓܹܝܪ: ܛܢܵܢܵܐ. ܗ̤ܘܝܘܼ ܕܲܡܛܲܢܲܢ
ܘܲܡܙܝܼܥ ܘܲܡܫܲܠܗܸܒܼ ܘܲܡܓܲܒܲܪ ܠܒܲܪܢܵܫܵܐ ܒܲܙܒܲܢ ܙܒܲܢ: ܕܲܢܒܲܤܲܪ
ܥܲܠ ܦܲܓܼܪܵܐ ܒܐܘܼ̈ܠܨܵܢܹܐ ܘܢܸܤܝ̈ܘܿܢܹܐ ܕܚܝܼ̈ܠܹܐ ܕܐܵܪܥ̇ܝܼܢ: ܠܡܲܫܠܵܡܘܼ
ܢܲܦܫܹܗ ܬܟܼܝܼܠܵܐܝܼܬܼ ܠܡܵܘܬܵܐ: ܘܲܠܡܹܐܪܲܥ ܚܲܝ̈ܠܲܝ ܡܵܪܘܿܕܼܵܐ: ܚܠܵܦ
ܫܘܼܡܠܵܝܵܐ ܕܗܵܘ̇ ܡܸܕܸܡ ܕܐܲܚܒܲܬ̤ ܢܲܦܫܵܐ ܡܝܲܬܿܪܵܐܝܼܬܼ.
ܐ̄ܢܵܫ ܓܹܝܪ ܠܒܼܝܼܫ ܠܲܡܫܝܼܚܵܐ ܒܕܼܘܼܟ ܒܲܟܼܬܼܵܒܹܗ: ܟܲܠܒܵܐ
ܩܪܵܝܗܝ ܠܗܵܢܵܐ ܛܢܵܢܵܐ: ܘܢܵܛܘܿܪܵܐ ܕܢܵܡܘܿܤܹܗ ܕܐܲܠܵܗܵܐ: ܕܗ̤ܝ
ܗ̣̄ܝ ܡܝܲܬܿܪܘܼܬܼܵܐ. ܡܝܲܬܿܪܘܼܬܼܵܐ ܐܝܼܬܹܝܗ̇: ܫܘܼܡܠܵܝ ܢܵܡܘܿܤܵܘ̈ܗܝ
ܕܐܲܠܵܗܵܐ. ܥܵܫ̇ܢ ܓܹܝܪ ܗ̤ܘ ܗܵܢܵܐ ܚܲܝܠܵܐ ܛܲܢܵܢܵܐ: ܘܡܸܬܿܬܿܥܝܼܪ
ܘܡܸܫܬܲܠܗܲܒܼ ܠܡܸܛܲܪ ܒܲܝܬܵܐ ܒܬܲܪܬܹܝܢ ܥܸܠ̈ܠܵܢ. ܘܡܸܬܼܡܚܸܠ
ܬܘܼܒܼ ܘܢܵܐܹ̇ܡ ܘܒܼܵܤܹ̇ܐ: ܒܬܲܪܬܹܝܢ ܥܸܠ̈ܠܵܬܼܵܐ ܐ̄ܚܪ̈ܢܝܬܼܵܐ. ܘܥܸܠܬܼܵܐ
ܩܲܕܼܡܵܝܬܼܵܐ ܕܚܲܡܝܼܡܘܼܬܹܗ ܘܥܝܼܪܘܼܬܹܗ: ܐܸܡܲܬܼܝ ܕܕܸܚܠܬܵܐ ܡܸܕܸܡ
ܢܵܒܼ̇ܗܵܐ ܒܹܗ ܒܒܲܪܢܵܫܵܐ: ܒܲܕܼܩܵܢܹ̇ܛ ܥܲܠ ܐܲܦܲܝ̈ ܡܝܲܬܿܪ̈ܵܬܼܵܐ ܕܲܩܢܸܐ
ܐܵܘ ܕܲܥܬܼܝܼܕܼ ܕܢܸܩܢܸܐ. ܕܕܲܡ ܬܸܬܼܚܲܠܲܨ ܐܵܘ ܬܸܬܼܚܲܒܲܠ: ܡ̣ܢ ܓܸܕܼܫܵܐ
ܡܸܕܸܡ ܕܢܵܩܹ̇ܦ ܠܵܗ̇. ܘܗܵܕܹܐ ܡ̣ܢ ܒܛܝܼܠܘܼܬܼܵܐ ܐܲܠܵܗܵܝܬܵܐ ܡܸܬܿܬܿܙܝܼܥܵܐ:
ܒܟܼܠܗܘܿܢ ܦܵܠܚܹ̈ܝܗ̇ ܚܲܬܝܼ̈ܬܹܐ ܕܲܡܝܲܬܿܪܘܼܬܼܵܐ: ܠܥܝܼܪܘܼܬܼܵܐ ܘܲܛܢܵܢܵܐ
ܐܲܡܝܼܢܵܐ ܕܢܲܦܫܵܐ: ܕܠܵܐ ܬܸܗܘܸܐ ܢܵܝ̇ܡܵܐ. ܐܸܡܲܬܼܝ ܕܹܝܢ: ܕܗܵܕܹܐ ܕܸܚܠܬܼܵܐ
ܡܸܬܿܬܿܙܝܼܥܵܐ ܒܲܟܼܝܵܢܵܐ: ܟܲܠܒܵܐ ܗܵܢܵܐ ܕܐܸܡ݂ܲܪܢܲܢ: ܒܠܸܠܝܵܐ ܘܒܼܐܝܼܡܵܡܵܐ
pb. 394
ܐܲܝܟܼ ܬܲܢܘܼܪܵܐ ܕܲܫܓܼܝܼܪ ܚܵܐܹ̇ܡ. ܟܲܕܼ ܡܥܝܼܪ ܠܹܗ ܠܲܟܼܝܵܢܵܐ: ܕܒܲܕܼܡܘܼܬܼ
ܟܪܘܿܒܼܵܐ ܗܘ̤ܵܐ ܥܝܼܪ ܘܕܼܵܐܹ̇ܩ ܠܟܼܠ ܚܘܼܕܼܪ̈ܵܘܗܝ ܒܟܼܠܥܸܕܵܢ. ܐܲܝܟܼ
ܐ̄ܢܵܫ ܢܹܐܡܲܪ: ܐܸܢ ܦܵܪܲܚܬܼܵܐ ܬܸܥܒܲܪ ܚܕܼܵܪܵܘܗܝ: ܡܸܬܿܬܿܙܝܼܥ ܘܢܵܒܲܚ
ܒܚܹܐܦܵܐ ܚܲܪܝܼܦܵܐ ܕܠܵܐ ܡܸܬܼܡܲܠܲܠ. ܗ̤ܝ ܕܸܚܠܬܼܵܐ: ܐܸܡܲܬܼܝ ܕܲܚܠܵܦ
ܦܲܓܼܪܵܐ ܬܸܗܘܸܐ: ܤܵܛܵܢܵܝܬܼܵܐ ܗ̣̄ܝ. ܒܕܸܐܬܼܦܲܠܲܓܼ ܥܲܠ ܒܛܝܼܠܘܼܬܹܗ
ܕܐܲܠܵܗܵܐ ܒܗܲܝܡܵܢܘܼܬܹܗ: ܘܲܛܥ̣ܵܐ ܕܐܲܝܟܲܢ ܒܛܝܼܠ ܠܹܗ ܠܐܲܠܵܗܵܐ
ܥܲܠ ܐܲܝܠܹܝܢ ܕܝܵܨ̇ܦܝܼܢ ܕܲܡܝܲܬܪܘܼܬܼܵܐ: ܠܡܹܐܨܲܦ ܕܝܼܠܗܘܿܢ ܒܟܼܠܥܸܕܵܢ.
ܐܲܝܟܼ ܕܐܸܡ݂ܲܪ ܪܘܼܚܵܐ ܕܩܘܼܕܼܫܵܐ ܒܦܘܼܡܵܐ ܕܲܢܒܼܝܼܵܐ: ܥܲܝܢܵܘ̈ܗܝ ܠܲܡ
ܕܡܵܪܝܵܐ ܥܲܠ ܙܲܕܝܼ̈ܩܹܐ: ܘܐܸܕܼܢܵܘ̈ܗܝ ܠܡܸܫܡܲܥ ܐܸܢܘܿܢ. ܘܬܲܪܥܝܼܬܹܗ
ܠܲܡ ܕܡܵܪܝܵܐ: ܥܲܠ ܕܵܚܠܵܘ̈ܗܝ. ܘܐܲܝܟܼ ܕܡ̣ܢ ܦܲܪܨܘܿܦܵܐ ܕܝܼܠܹܗ ܠܘܵܬܼ
ܦܵܠܚܲܝ̈ ܡܝܲܬܿܪܘܼܬܼܵܐ ܒܕܼܘܼܟܿܬܼܵܐ ܐ̄ܚܪܹܬܼܵܐ ܐܵܡܲ݁ܪ: ܠܵܐ ܠܲܡ ܬܸܩܪܘܿܒܼ
ܠܵܟܼ ܒܝܼܫܬܼܵܐ: ܘܲܡܚܘܿܬܼܵܐ ܠܵܐ ܬܸܬܼܩܲܪܲܒܼ ܠܒܹܝܬܼ ܡܲܫܪܝܵܟܼ. ܡܸܛܠ
ܕܲܠܡܲܠܲܐܟܼܵܘ̈ܗܝ ܢܦܲܩܸܕܼ ܥܠܲܝܟܼ ܕܲܢܢܲܛܪܘܼܢܵܟܼ: ܘܥܲܠ ܕܪ̈ܵܥܲܝܗܘܿܢ
ܢܸܫܩܠܘܼܢܵܟܼ. ܥܲܡ ܫܲܪܟܵܐ ܕܦܸܬܼܓܼܵܡܹ̈ܐ ܕܲܟܼܬܼܝܼܒܼܝܼܢ. ܐܸܡܲܬܼܝ ܗܵܟܹܝܠ
ܕܲܚܠܵܦ ܢܲܦܫܵܐ ܬܸܗܘܸܐ ܗ̤ܝ ܕܸܚܠܬܼܵܐ: ܡܸܛܠ ܓܸܕܼܫܹ̈ܐ ܕܲܢܩܹܝܢ
ܠܲܡܝܲܬܿܪܘܼܬܼܵܐ: ܕܕܲܡ ܬܸܬܼܚܲܠܲܨ ܐܵܘ ܬܸܬܼܢܟܸܐ ܒܲܚܕܼܵܐ ܡ̣ܢ ܥܸܠ̈ܠܵܬܼܵܐ:
ܚܘܼܫܒܼܵܐ ܗ̄ܘ̣ ܐܲܠܵܗܵܝܵܐ ܗܵܢܵܐ: ܘܪܸܢܝܵܐ ܡܝܲܬܿܪܵܐ. ܘܡ̣ܢ ܒܛܝܼܠܘܼܬܼܵܐ
ܕܐܲܠܵܗܵܐ ܐܝܼܬܹܝܗ̇ ܗ̤ܝ ܥܵܩܬܼܵܐ ܘܕܸܚܠܬܼܵܐ ܒܢܲܦܫܵܐ: ܘܩܸܢܛܵܐ
ܕܲܡܫܲܢܸܩ ܠܪܸܥܝܵܢܵܐ ܒܨܸܦܬܹܗܘ
ܐܵܦ ܥܸܠܬܼܵܐ ܬܘܼܒܼ ܕܬܲܪܬܹܝܢ: ܕܥܘܼܫܢܹܗ ܘܬܲܒܼܪܲܫܬܹܗ ܕܟܲܠܒܵܐ
ܐܝܼܬܹܝܗ̇: ܡܵܐ ܕܲܒܼܝܲܬܝܼܪܵܐ ܝܵܪܒܵܐ ܪܸܚܡܬܼܵܐ ܕܲܡܝܲܬܿܪܘܼܬܼܵܐ ܒܢܲܦܫܵܐ.
ܒܦܘܼܚܵܡܵܐ ܓܹܝܪ ܕܪܸܚܡܬܼܵܐ ܕܲܒܼܢܲܦܫܵܐ: ܥܲܠ ܗܵܘ̇ ܡܵܐ ܕܐܲܚܝܼܕܼܵܐ
pb. 395
ܒܚܘܼܒܹܗ: ܕܗ̤ܘܝܘܼ ܚܘܼܫܵܒܼܵܐ ܐܲܠܵܗܵܝܵܐ: ܗܵܟܲܢܵܐ ܡܸܬܼܢܲܒܼܪܲܫ ܛܢܵܢܵܐ
ܗܵܢܵܐ ܟܝܵܢܵܝܵܐ ܥܲܠ ܐܲܦܹ̈ܝܗ̇. ܥܸܠ̈ܠܵܬܼܵܐ ܕܫܘܼܗܵܝܹܗ ܘܲܕܿܕܲܡܟܿܘܼܬܹܗ:
ܚܕܼܵܐ ܡܸܢܗܹܝܢ: ܐܸܡܲܬܼܝ ܕܗ̤ܝ ܪܸܚܡܬܼܵܐ ܩܵܗ̇ܝܵܐ ܘܡܸܬܼܒܲܨܪܵܐ ܒܢܲܦܫܵܐ.
ܕܬܲܪܬܹܝܢ ܕܹܝܢ: ܡܵܐ ܕܚܘܼܫܵܒܼܵܐ ܡܸܕܸܡ ܕܬܼܘܼܟܼܠܵܢܵܐ ܥܵܐܹ̇ܠ ܫܵܪܹܐ
ܒܵܗ̇ ܒܢܲܦܫܵܐ. ܟܲܕܼ ܡܸܬܿܬܿܟܸܠ ܒܲܪܢܵܫܵܐ ܘܪܵܢܹܐ ܟܡܵܐ ܙܲܒܼܢ̈ܝܼܢ: ܕܠܲܝܬܿ
ܠܹܗ ܩܸܢܛܵܐ ܡ̣ܢ ܡܸܕܸܡ ܕܡܲܨܝܵܐ ܕܲܢܤܲܓܿܦܝܼܘܗܝ. ܘܡ̣ܢ ܗܵܪܟܵܐ
ܫܵܕܹܐ ܡܸܢܹܗ ܠܙܲܝܢܵܐ ܕܲܛܢܵܢܵܐ: ܘܗܵܘܹ̇ܐ ܐܲܝܟܼ ܒܲܝܬܼܵܐ ܕܠܵܐ ܢܵܛܘܿܪܵܐ.
ܘܕܼܵܡܹ̇ܝܟܼ ܟܲܠܒܵܐ: ܘܲܠܡܲܛܪܬܵܐ ܡܲܪܦܸܐ. ܐܲܝܟܼ ܕܲܒܼܤܘܿܓܼܵܐܐ: ܡ̣ܢ
ܗܵܢܵܐ ܚܘܼܫܵܒܼܵܐ ܗܵܘܹ̇ܐ ܚܘܼܠܨܵܐ ܠܤܘܿܓܼܐܗܘܿܢ ܕܒܼܵܬܹ̈ܐ ܡܸܬܼܝܲܕܼ̈ܥܵܢܹܐ.
ܗܵܕܹܐ ܗܵܘ̇ܝܵܐ: ܐܸܡܲܬܼܝ ܕܥܵܡ̇ܛܵܐ ܠܵܗ̇ ܫܲܦܝܼܘܼܬܼ ܕܸܠܩܵܐ ܗܵܘ̇
ܕܝܼܕܲܥܬܼܵܐ ܩܲܕܝܼܫܬܼܵܐ ܕܲܒܼܢܲܦܫܵܐ. ܡ̣ܢ ܡܵܢܵܐ ܥܵܡ̇ܛܵܐ ܗܵܕܹܐ: ܐܸܠܵܐ ܐܸܢ
ܕܐܵܘ ܚܘܼܫܵܒܼܵܐ ܡܸܕܸܡ ܩܲܛܝܼܢܵܐ ܕܡܲܤܒܿܪܵܢܘܼܬܼܵܐ ܥܵܐܹ̇ܠ ܚܵܠܹ̇ܕܼ ܒܵܗ̇
ܒܢܲܦܫܵܐ: ܐܵܘ ܠܢܸܩܦܵܐ ܕܝܲܬܝܼܪܘܼܬܼ ܨܸܦܬܼܵܐ ܕܗܵܠܹܝܢ ܦܲܓܼܪ̈ܵܢܵܝܬܼܵܐ
ܡܸܬܼܪܡܸܐ ܒܲܪܢܵܫܵܐ: ܐܵܘ ܕܦܸܓܼܥܹ̈ܐ ܬܟܼܝܼ̈ܒܹܐ ܕܥܵܠܡܵܐ ܡܸܤܬܲܩܒܼܠܝܼܢ
ܠܹܗ. ܟܠ ܐܸܡܲܬܼܝ ܕܲܡܩܲܒܸܠ ܐܵܓܼܘܿܢܸܤܛܵܐ ܦܸܓܼܥܵܐ ܕܥܵܠܡܵܝܹ̈ܐ: ܒܲܪ
ܫܵܥܬܹܗ ܡܸܫܬܲܦܠܵܐ ܢܲܦܫܵܐ: ܝܲܬܝܼܪܵܐܝܼܬܼ ܕܐܲܢ̄ܬܿܬܼܵܐ. ܗܵܟܲܢܵܐ ܐܸܢ
ܢܸܤܬܲܩܒܿܠܘܼܢ ܤܲܓܝܼ̈ܐܹܐ: ܗܵܠܹܝܢ ܕܲܒܼܚܵܘܪܗܘܿܢ ܡ̣ܢ ܐܵܢܲܢܩܹܐ ܡ̣ܢ
ܫܘܼܒܼܚܵܐ ܤܪܝܼܩܵܐ ܡܸܫܬܲܚܩܵܐ ܢܲܦܫܵܐ. ܘܐܲܝܟܼ ܕܲܒܼܦܵܤܝܼ̈ܩܵܬܼܵܐ: ܡܸܬܿܕܲܡܸܐ
ܗܵܘܢܵܐ ܫܵܢܘܿܙܵܐ: ܟܠ ܐܸܡܲܬܼܝ ܕܐܵܪܲܥ̇ ܠܹܗ ܥܵܠܡܵܐ: ܠܩܘܼܒܲܪܢ݂ܝܛܵܐ
ܕܪܵܕܹܐ ܗ̄ܘ̣ܵܐ ܒܲܤܝܼܡܵܐܝܼܬܼ ܒܝܲܡܵܐ: ܟܲܕܼ ܢܵܫ̇ܒܵܐ ܠܹܗ ܪܘܼܚܵܐ ܒܲܤܝܼܡܬܼܵܐ
ܡ̣ܢ ܒܸܤܪܹܗ ܠܘܼܩܒܲܠ ܠܡܹܐܢܵܐ: ܘܢܸܢܫܹܠܝ ܢܦܲܠ̣ ܒܲܝܢܵܬܼ ܫܩܝܼ̈ܦܹܐ.
Corpus Text ID:
Source:
Paulus Bedjan (ed.), Mar Isaacus Ninivita. De perfectione religiosa. (Paris/Leipzig: Otto Harrassowitz, 1909).Publication Date: March 5, 2019
Preparation of Electronic Edition:
TEI XML encoding by James E. Walters.Syriac text transcribed by .
Open Access and Copyright:
This electronic edition is designed for open access reuse. The Syriac base text is in the public domain. The TEI XML edition is copyrighted by James E. Walters and is released under a Creative Commons Attribution 4.0 International Public License (CC BY 4.0).
The HTML page is copyrighted by Vanderbilt University and released under a under a Creative Commons Attribution 4.0 International Public License (CC-BY 4.0, https://creativecommons.org/licenses/by/4.0/). Attribution for reuse should follow the suggested citation and also credit the copyright holder of the TEI XML edition.
See details...
How to Cite this Electronic Edition
Note:
Isaac of Nineveh, “Discourse 55” based upon Paulus Bedjan (ed.), Mar Isaacus Ninivita. De perfectione religiosa. (Paris/Leipzig: Otto Harrassowitz, 1909), Digital Syriac Corpus, last modified March 5, 2019, https://syriaccorpus.org/446.Bibliography:
“Discourse 55.” In Mar Isaacus Ninivita. De perfectione religiosa., edited by . Syriaca.org, 2016-. Entry published . https://syriaccorpus.org/446.Show Citation Styles