Discourse 60

ܟܲܕܼ ܒܟܼܠܙܒܲܢ ܩܲܪܝܼܒܼܘܼ ܡܵܪܝܵܐ ܒܝܲܕܼ ܥܘܼܕܼܪ̈ܵܢܵܘܗܝ ܠܘܵܬܼ ܩܲܕܝ̈ܫܹܐ: ܒܸܠܥܵܕܼ ܡ̣ܢ ܐܵܢܲܢܩܹܐ ܠܵܐ ܡܚܵܘܸܐ ܚܲܝܠܹܗ ܒܓܲܠ̈ܝܵܬܼܵܐ: ܒܝܲܕܼ ܤܵܥܘܿܪܘܼܬܼܵܐ ܡܸܕܸܡ ܕܐܵܬ̤ܵܐ ܡܸܬܼܪܲܓܼܫܵܢܝܼܬܼܵܐ. ܕܠܵܐ ܢܸܗܘ̈ܝܵܢ ܡܥܲܕܪ̈ܵܢܝܵܬܲܢ ܦܲܟܿܝ̈ܗܵܢ: ܘܲܠܘܵܬܼ ܤܘܼܓܦܵܢܵܐ ܢܥܲܬ̈ܕܼܵܢܵܢ. ܘܗܵܕܹܐ: ܟܲܕܼ ܗܵܢܵܐ ܟ̱ܠܹܗ ܒܛܝܼܠ ܠܹܗ ܥܠܲܝܗܘܿܢ: ܕܐܵܦܠܵܐ ܚܲܕܼ ܥܸܕܵܢܵܐ ܫܵܠ̇ܝܵܐ ܡܸܢܗܘܿܢ ܤܵܥܘܿܪܘܼܬܹܗ ܒܟܸܤܝܵܐ. ܐܸܠܵܐ ܒܟܼܠܡܸܕܸܡ ܫܵܒܹ̇ܩ ܠܗܘܿܢ ܕܗܸܢܘܿܢ ܢܚܵܘܘܿܢ ܝܲܨܝܼܦܘܼܬܼܵܐ ܐܲܝܟܼ ܚܲܝܠܗܘܿܢ: ܘܒܲܨܠܘܿܬܼܵܐ ܢܸܠܐܘܿܢ. ܐܸܢܕܹܝܢ ܐܝܼܬܹܝܗ̇ ܨܒܼܘܼܬܼܵܐ ܕܲܢܚܘܼܒܼ ܡ̣ܢ ܥܲܤܩܘܼܬܼܵܗ̇ ܡܲܬܼܩܵܠܵܐ ܕܝܼܕܲܥܬܼܗܘܿܢ: ܡܵܐ ܕܗܸܢܘܿܢ ܐܸܬܼܡܚܸܠܘ ܘܦܵܫ̣ܘ ܡܸܢܵܗ̇: ܡܸܛܠ ܕܠܵܐ ܐܝܼܬܹܝܗ̇ ܕܲܟܼܝܵܢܵܐ ܤܵܦܩܘܼܬܼܵܐ: ܗ̤ܘ ܓܵܡܲܪ ܐܲܝܟܼ ܪܲܒܿܘܼܬܼܵܐ ܕܚܲܝܠܹܗ: ܐܲܝܟܼ ܕܙܵܕܹܩ ܘܝܵܕܲܥ̇ ܕܲܡܥܲܕܲܪ ܠܗܘܿܢ. ܟܡܵܐ pb. 420 ܕܡܲܨܝܵܐ: ܒܟܸܤܝܵܐ ܡܚܲܝܸܠ ܠܗܘܿܢ: ܕܢܸܬܼܡܨܘܿܢ ܠܘܼܩܒܲܠ ܥܲܤܩܘܼܬܼܵܐ ܗܵܝ̇. ܕܲܒܼܝܲܕܼ ܝܑܼܕܲܥܬܼܵܐ ܕܲܡܫܲܟܸܿܢ ܠܗܘܿܢ: ܥܵܒܹ̇ܕܼ ܕܢܸܫܬܿܪܸܐ ܥܘܼܪܩܵܠܵܗ̇. ܘܲܒܼܝܲܕܼ ܬܹܐܘܿܪܝܼܵܐ ܡܥܝܼܪ ܠܗܘܿܢ: ܠܘܵܬܼ ܬܸܫܒܿܘܿܚܬܼܵܐ. ܕܬܸܗܘܸܐ ܠܝܘܼܬܼܪܵܢܵܐ: ܠܘܵܬܼ ܬܪ̈ܲܝܗܘܿܢ ܓܲܒܹ̈ܐ. ܐܸܢܕܹܝܢ ܥܲܠ ܓܲܠܝܘܼܬܼܵܗ̇ ܕܡܲܥܒܿܕܼܵܢܘܼܬܼܵܐ ܤܢܝܼܩܵܐ ܨܒܼܘܼܬܼܵܐ: ܗܵܝܕܹܝܢ ܡܸܛܠ ܐܵܢܲܢܩܹܐ ܥܵܒܹ̇ܕܼ ܗܵܕܹܐ. ܚܲܟܿܝܼܡܝܼܢ ܐܸܢܘܿܢ ܦܘܼܪ̈ܢܵܤܵܘܗܝ: ܘܠܵܐܠ̈ܨܵܬܼܵܐ ܡܫܲܡܫܝܼܢ: ܘܠܵܐ ܗ̄ܘ̣ܵܐ ܠܫܸܓܼܡܵܐ. ܐܲܝܢܵܐ ܕܲܕܼܠܵܐ ܐܵܢܲܢܩܹܐ ܡܲܡܪܲܚ ܥܠܲ ܗܵܕܹܐ: ܐܵܘ ܒܵܥܹ̇ܐ ܡ̣ܢ ܐܲܠܵܗܵܐ ܘܡܸܬܼܪܲܓܼܪܲܓܼ ܕܬܸܕܼܡܪ̈ܵܬܼܵܐ ܘܚܲܝ̈ܠܹܐ ܒܐܝܼܕܼܵܘ̈ܗܝ ܢܸܗܘܘܿܢ: ܡܢܲܤܸܐ ܡ̣ܢ ܫܹܐܕܼܵܐ ܡܓܲܚܟܼܵܢܵܐ ܐܸܫܬܼܟܲܚ ܒܡܲܕܿܥܹܗ. ܐܸܠܵܐ ܘܫܲܒܼܗܪܵܢܵܐ: ܡܵܠܘܿܢ: ܘܲܟܼܪܝܼܗ ܒܬܹܐܪܬܵܐ. ܒܐܘܼܠܨܵܢܵܐ ܓܹܝܪ: ܠܡܸܫܐܲܠ ܥܘܼܕܼܪܵܢܵܐ ܕܐܲܠܵܗܵܐ ܙܵܕܹܩ. ܕܠܵܐ ܩܛܝܼܪܵܐ ܕܹܝܢ ܕܡܸܕܸܡ ܠܲܡܢܲܤܵܝܘܼ ܕܩܹܘܲܢܕܹܝܢܘܿܣ ܐܝܼܬܹܝܗ̇. ܘܐܵܦܠܵܐ ܙܲܕܝܼܩܵܐ ܐܝܼܬܼܵܘܗܝ ܕܲܫܪܵܪܵܐ: ܐܲܝܢܵܐ ܕܗܵܕܹܐ ܪܵܐܹ̇ܓܼ. ܗܵܝ̇ ܕܹܝܢ ܕܡܵܪܝܵܐ ܥܵܒܹ̇ܕܼ ܟܲܕܼ ܗ̤ܘ ܠܵܐ ܨܵܒܹ̇ܐ: ܗܵܕܹܐ ܠܤܘܿܓܼܐܗܘܿܢ ܕܩܲܕܝܼ̈ܫܹܐ ܫܟܼܝܼܚܵܐ. ܗܵܝ̇ ܕܐ̄ܢܵܫ ܒܨܸܒܼܝܵܢܹܗ ܢܸܪܲܓܼ ܠܗܵܕܹܐ ܟܲܕܼ ܠܲܝܬܿ ܐܵܠܨܘܼܬܼܵܐ: ܡܲܦܘܼܠܬܼܵܐ ܗ̣̄ܝ ܕܡ̣ܢ ܙܗܝܼܪܘܼܬܼܵܐ: ܘܡܸܫܬܲܪܥܵܢܘܼܬܼܵܐ ܕܡ̣ܢ ܝܑܼܕܲܥܬܼܵܐ ܕܲܫܪܵܪܵܐ. ܘܐܸܢ ܒܗܵܕܹܐ ܐܸܫܬܿܡܲܥ ܗܵܘ̇ ܕܲܡܦܝܼܣ: ܐܲܝܟܼ ܕܐܲܡܪܲܚ̣ ܠܘܵܬܼ ܡܵܪܲܢ ܘܡܸܫܟܲܚ ܐܲܬܼܪܵܐ ܥܠܵܘܗܝ: ܡܝܲܒܸܿܠ ܠܹܗ ܠܹܗ ܠܘܵܬܼ ܐ̄ܚܪܹܬܼܵܐ ܕܪܲܒܵܐ ܡܸܢܵܗ̇. ܙܲܕܝܼ̈ܩܹܐ ܕܹܝܢ ܕܲܫܪܵܪܵܐ: ܠܵܐ ܡܸܬܼܪܲܓܼܪܓܼܝܼܢ ܠܵܗ̇ ܠܗܵܕܹܐ: ܘܠܵܐ ܒܲܠܚܘܿܕܼ ܕܠܵܐ ܡܸܬܼܚܲܫܒܼܝܼܢ ܗܵܕܹܐ: ܐܸܠܵܐ pb. 421 ܐܵܦܠܵܐ ܟܲܕܼ ܡܸܬܼܝܲܗܒܵܪ ܠܗܘܿܢ ܒܵܥܹ̇ܝܢ. ܘܠܵܘ ܒܲܠܚܘܿܕܼ ܠܥܹܝܢ ܐ̄ܢܵܫ: ܐܸܠܵܐ ܐܵܦܠܵܐ ܒܹܝܬܼ ܠܗܘܿܢ ܘܲܠܢܲܦܫܗܘܿܢ܀ ܗܵܐ ܓܹܝܪ ܚܲܕܼ ܡ̣ܢ ܩܕܝܼ̈ܫܹܐ: ܟܲܕܼ ܡܸܛܠ ܫܲܦܝܘܼܬܹܗ ܐܸܬܼܝܲܗܒܲܬ̤ ܠܹܗ ܡܵܘܗܲܒܼܬܼܵܐ: ܘܲܡܩܲܕܸܡ ܗ̄ܘ̣ܵܐ ܘܝܵܕܲܥ̇ ܐܸܡܲܬܼܝ ܕܐ̄ܢܵܫ ܐܵܬܹ̇ܐ ܗ̄ܘ̣ܵܐ ܠܘܵܬܹܗ: ܒܥ̣ܵܐ ܡ̣ܢ ܐܲܠܵܗܵܐ: ܟܲܕܼ ܐܲܦܝܼܣ ܐܵܦ ܠܲܐ̄ܚܪ̈ܵܢܹܐ ܕܲܢܨܲܠܘܿܢ ܠܘܵܬܹܗ: ܕܬܸܫܬܿܩܸܠ ܡܸܢܹܗ ܡܵܘܗܲܒܼܬܼܵܐ. ܐܲܒܼ̈ܗܵܬܼܵܐ ܕܹܝܢ: ܐܵܦܠܵܐ ܒܙܲܒܼ̈ܢܹܐ ܕܐܵܠ̈ܨܵܬܼܵܐ ܒܗܵܕܹܐ ܦܵܪܹܗ̄ܤܝܼܵܐ ܡܸܬܼܚܲܫܚܝܼܢ ܗ̄ܘ̣ܵܘ. ܗܵܐ ܗܵܘ̇ ܛܘܼܒܼܵܢܵܐ ܐܲܡܘܿܢ ܓܲܒܼܪܵܐ ܩܲܕܝܼܫܵܐ ܒܲܫܪܵܪܵܐ ܚܲܕܼ ܡ̣ܢ ܐܲܒܼ̈ܗܵܬܼܵܐ ܬܡܝܼ̈ܗܹܐ: ܒܲܙܒܲܢ ܟܲܕܼ ܐܵܙܹ̇ܠ ܗ̄ܘ̣ܵܐ ܠܲܫܠܵܡܹܗ ܕܡܵܪܝ ܐܵܢܛܘܿܢܝܼܣ: ܘܲܛܥ̣ܵܐ ܒܡܲܕܼܒܿܪܵܐ: ܠܵܐ ܐܸܡ݂ܲܪ ܕܐܲܠܵܗܵܐ ܫܩܘܿܠܲܝܢܝ ܘܤܝܼܡܲܝܢܝ ܐܲܝܟܵܐ ܕܐܝܼܬܼܵܘܗܝ ܐܲܢܛܘܿܢܝܼܣ. ܟܲܕܼ ܛܵܒܼ ܡܸܫܟܲܚ ܗ̄ܘ̣ܵܐ ܠܡܸܥܒܲܕܼ ܡܸܕܸܡ ܕܕܼܵܡܹ̇ܐ ܠܗܵܕܹܐ: ܡܸܛܠ ܩܲܪܝܼܒܼܘܼܬܹܗ ܕܲܠܘܵܬܼ ܐܲܠܵܗܵܐ: ܘܐܵܢܲܢܩܹܐ ܗ̄ܘ̣ܵܬܼ ܕܲܨܒܼܘܼܬܼܵܐ. ܐܲܝܟܼ ܕܐܡܝܼܪ ܡܸܛܠ ܗܵܘ̇ ܐܲܬܼܪܵܐ: ܕܲܠܩܹܘܲܢܕܹܝܢܘܿܣ ܡܵܛ̇ܝܢ ܗ̄ܘ̣ܵܘ: ܐܲܝܠܹܝܢ ܕܛܵܥܹ̇ܝܢ ܗ̄ܘ̣ܵܘ ܒܡܲܕܼܸܒܿܪܵܠ ܗܵܘ̇. ܘܥܲܠ ܗܵܠܹܝܢ ܟܠܗܹܝܢ: ܠܵܐ ܐܸܡ݂ܲܪ ܠܐܲܠܵܗܵܐ ܗܵܕܹܐ: ܐܸܠܵܐ ܒܲܠܚܘܿܕܼ ܗܵܕܹܐ ܚܕܼܵܐ ܡܸܠܬܼܵܐ ܐܸܡ݂ܲܪ: ܡܵܪܝܵܐ ܠܲܡ: ܠܵܐ ܬܸܫܒܿܘܿܩ ܠܡܹܐܒܲܕܼ ܓܒܼܝܼܠܬܵܟ. ܚ̣ܙܲܝܬܿ ܡܲܟܿܝܼܟܼܘܼܬܼܵܐ: ܐܸܤܬܲܟܲܠ̣ܬܿ ܚܸܟܼܡܬܼܵܐ ܕܲܫܪܵܪܵܐ ܕܐܲܒܼ̈ܗܵܬܼܵܐ؟ ܐܲܠܵܗܵܐ ܕܹܝܢ ܝܲܨܝܼܦܘܼܬܼܵܐ ܕܐܝܼܬܼ ܠܹܗ ܥܲܠ ܩܲܕܝܼ̈ܫܹܐ: ܡܸܛܠ ܕܝܵܕܲܥ̇ ܗ̄ܘ̣ܵܐ ܕܫܲܪܝܼܪ ܗ̄ܘ̣ ܓܲܒܼܪܵܐ: ܘܠܵܐ pb. 422 ܡܸܬܼܡܚܸܠ ܒܚܘܼܫܵܒܹܗ ܒܝܲܕܼ ܪܵܡܘܼܬܼܵܐ: ܥ̣ܒܲܕܼ ܐܲܝܟܼ ܕܫܵܘܝܵܐ ܠܪܲܒܿܘܼܬܹܗ ܕܓܲܒܼܪܵܐ. ܘܟܲܕܼ ܗ̤ܘ ܠܵܐ ܐܲܦܝܼܣ: ܐܲܠܵܗܵܐ ܡܸܕܸܡ ܕܙܵܕܹܩ ܥ̣ܒܲܕܼ. ܘܲܕܼܡܸܟܼ ܠܲܡ: ܘܩܵܡ̣. ܘܲܚ̣ܙܵܐ ܒܲܕܼܡܘܼܬܼ ܐܝܼܕܼܵܐ ܕܒܲܪܢܵܫܵܐ ܕܬܲܠܝܵܐ ܠܥܸܠ ܡ̣ܢ ܪܹܫܹܗ ܒܲܫܡܲܝܵܐ: ܘܲܡܚܵܘܝܵܐ ܠܹܗ ܐܘܼܪܚܵܐ: ܥܕܲܡܵܐ ܕܐܸܙܲܠ̣ ܘܩܵܡ̣ ܠܥܸܠ ܡ̣ܢ ܡܥܲܪܬܹܗ ܕܛܘܼܒܼܵܢܵܐ ܐܲܢܛܘܿܢܝܼܣ. ܚ̣ܙܲܝܬܿܛ ܒܛܝܼܠܘܼܬܼܵܐ ܕܐܝܼܬܼ ܠܹܗ ܠܐܲܠܵܗܵܐ ܥܲܠ ܒܲܝܬܵܝܵܘ̈ܗܝ؟ ܡܸܫܟܲܚ ܗ̄ܘ̣ܵܐ ܓܹܝܪ ܕܐܵܦܠܵܐ ܢܸܫܒܿܩܝܼܘܗܝ ܕܢܸܛܥܸܐ. ܐܸܠܵܐ ܪܵܚܹܡ ܗ̄ܘ̣ܵܐ: ܕܢܸܕܲܥ ܕܲܟܼܡܵܐ ܒܛܝܼܠ ܠܹܗ ܥܠܵܘܗܝ. ܘܫܲܒܼܩܹܗ ܕܢܸܛܥܸܐ: ܘܚܵܘܝܹܗ ܬܘܼܒܼ ܐܘܼܪܚܵܐ ܥܹܝܢ ܒܲܓܼܠܸܐ. ܘܠܵܐ ܒܝܲܕܼ ܒܲܪܢܵܫܵܐ: ܐܸܠܵܐ ܒܝܲܕܼ ܡܲܠܲܐܟܼܵܐ ܘܒܼܵܐܐܲܪ ܡܚܵܘܸܐ ܠܹܗ. ܐܹܝܘ ܠܲܒܼܛܝܼܠܘܼܬܹܗ ܕܐܲܠܵܗܵܐ ܕܥܲܠ ܩܲܕܝܼ̈ܫܹܐ! ܐܸܬܿܕܲܟܼܪ ܘܗܵܝ̇ ܕܐܲܒܵܐ ܡܵܩܵܪܝܼܣ: ܕܟܲܕܼ ܐܵܙܹ̇ܠ ܗ̄ܘ̣ܵܐ ܠܐܸܤܩܹܛܹܐ ܟܲܕܼ ܛܥܝܼܢ ܗ̄ܘ̣ܵܐ ܐܸܤܦܪ̈ܝܼܕܹܐ. ܘܲܬܼܚܸܒܼ ܘܦܵܫ̣: ܘܝܼܬܸܒܼ ܠܹܗ: ܒܲܕܼܠܵܐ ܐܸܫܟܲܚ̣ ܕܲܢܗܲܠܸܟܼ. ܠܵܐ ܫܐܸܠ̣ ܡ̣ܢ ܐܲܠܵܗܵܐ ܡܸܕܸܡ: ܕܢܸܥܒܸܿܕܼ ܠܘܵܬܹܗ ܐܲܝܟܼ ܕܲܒܼܡܲܥܒܿܕܼܵܢܘܼܬܼܵܐ ܠܲܢܚܵܝܹܗ. ܐܸܠܵܐ ܐܲܓܼܥܸܠ̣ ܢܲܦܫܹܗ ܠܐܲܠܵܗܵܐ: ܟܲܕܼ ܐܵܡܲ݁ܪ: ܐܲܠܵܗܵܐ ܐܲܢ̄ܬܿ ܝܵܕܲܥ̇ ܐܲܢ̄ܬܿ ܕܠܲܝܬܿ ܒܝܼ ܬܘܼܒܼ ܚܲܝܠܵܐ. ܘܡܸܚܕܼܵܐ ܐܸܫܬܿܩܸܠ ܪܸܡܙܵܢܵܐܝܼܬܼ ܡ̣ܢ ܡܲܥܒܿܕܼܵܢܘܼܬܼܵܐ ܕܐܲܠܵܗܵܐ: ܘܐܸܬܿܬܿܤܝܼܡ ܐܲܝܟܵܐ ܕܒܼܵܥܹ̇ܐ ܗ̄ܘ̣ܵܐ ܠܡܹܐܙܲܠ: ܗ̤ܘ ܥܲܡ ܐܸܤܦܪ̈ܝܼܕܼܵܘܗܝ. ܙܲܕܝܼ̈ܩܹܐ ܕܹܝܢ ܕܲܫܪܵܪܵܐ ܐܲܡܝܼܢܵܐܝܼܬܼ ܗܵܕܹܐ ܪܵܢܹܝܢ ܒܢܲܦܫܗܘܿܢ: ܕܠܵܐ ܫܵܘܹ̇ܝܢ ܠܐܲܠܵܗܵܐ. ܘܲܒܼܗܵܕܹܐ ܡܸܬܼܒܿܩܹܝܢ ܕܫܲܪܝܪܝܼܢ: ܕܕܼܵܘܲܝ̈ܵܐ ܚܵܫ̇ܒܿܝܼܢ ܢܲܦܫܗܘܿܢ. ܘܲܕܼܠܵܐ ܫܵܘܹ̇ܝܢ ܠܝܲܨܝܼܦܘܼܬܼܵܐ ܕܡܸܢܹܗ: ܫܲܪܝܼܪܵܐܝܼܬܼ ܡܵܘܕܹܝܢ ܒܟܸܤܝܵܠ ܘܲܒܼܓܸܠܝܵܐ. ܘܐܲܝܟܼ ܚܲܛܵܝܹ̈ܐ ܘܲܡܫܲܦ̈ܠܹܐ ܝܲܨܝܼܦܘܼܬܼܵܐ ܘܠܹܐܘܬܼܵܐ pb. 423 ܡܚܵܘܹ̇ܝܢ ܥܲܠ ܟܠܡܸܕܸܡ: ܘܠܲܐܠܵܗܵܐ ܡܲܓܼܥܠܝܼܢ ܢܲܦܫܗܘܿܢ ܒܗܲܝܡܵܢܘܼܬܼܵܐ. ܟܲܕܼ ܗܸܢܘܿܢ: ܠܵܐ ܦܵܝ̇ܫܝܼܢ ܐܲܝܟܼ ܚܲܝܠܗܘܿܢ ܡ̣ܢ ܡܸܕܸܡ ܕܙܵܕܹܩ ܠܗܘܿܢ ܕܢܸܥܒܿܕܼܘܼܢ. ܟܲܕܼ ܗܵܕܹܐ ܒܝܲܕܼ ܪܘܼܚܵܐ ܡܸܬܼܚܲܟܿܡܝܼܢ: ܕܠܵܐ ܢܦܘܼܫܘܼܢ ܡ̣ܢ ܕܢܹܐܨܦܘܼܢ ܕܘܵܠܝܼܬܼܵܐ: ܘܡ̣ܢ ܕܢܸܥܡܠܘܼܢ ܟܡܵܐ ܕܚܲܝܼܢ. ܙܲܒܼܢܵܐ ܕܹܝܢ ܕܲܢܝܵܚܵܐ: ܠܥܵܠܡܵܐ ܕܲܥܬܼܝܼܕܼ ܢܲܛܪܹܗ. ܘܐܲܝܠܹܝܢ ܕܐܲܠܵܗܵܐ ܒܗܘܿܢ ܥܵܡܲ̈ܪ: ܠܗܵܕܹܐ ܗܵܪܟܵܐ ܠܵܐ ܪܵܓܝܼܢ ܕܢܸܗܘܘܿܢ ܡܸܬܿܬܿܢܝܼܚܝܼܢ: ܘܢܸܗܘܘܿܢ ܡܲܓܼܗܹܝܢ ܡ̣ܢ ܫܚܵܩܹ̈ܐ: ܐܵܦܸܢ ܡܸܬܼܝܼܗܸܒܼ ܠܗܘܿܢ ܒܘܼܝܼܐܵܐ ܒܗܵܠܹܝܢ ܕܪܘܼܚ: ܒܲܙܒܲܢ ܙܒܲܢ ܒܟܸܤܝܵܐ. ܘܲܡܝܲܬܿܪܘܼܬܼܵܐ ܠܵܘ ܗܵܕܲܐ ܗ̣̄ܝ: ܕܡܵܐ ܕܡܲܛܝܼ ܠܹܗ ܐ̄ܢܵܫ ܠܘܵܬܼܵܗ̇: ܢܦܘܼܫ ܠܹܗ ܡ̣ܢ ܝܲܨܝܼܦܘܼܬܼܵܐ ܘܡ̣ܢ ܠܹܐܘܬܼܵܐ. ܐܸܠܵܐ ܗܵܢܵܘ ܡܲܥܡܪܵܐ ܕܪܘܼܚܵܐ: ܕܐܲܡܝܼܢܵܐܝܼܬܼ ܗ̤ܘ ܠܹܗ ܡܫܲܥܒܸܿܕܼ ܘܥܵܨܹ̇ܐ: ܐܵܦܸܢ ܐܝܼܬܼ ܦܘܼܪܤܵܐ ܕܒܲܢܝܵܚܵܐ ܢܸܥܒܸܿܕܼܸ ܠܵܗ̇ ܠܲܨܒܼܘܼܬܼܵܐ. ܒܲܕܼܗܵܢܵܘ ܨܸܒܼܝܵܢܵܐ ܕܪܘܼܚܵܐ. ܕܠܲܐܝܠܹܝܢ ܕܥܵܡܲ̇ܪ ܒܗܘܿܢ: ܠܵܐ ܗ̄ܘ̣ܵܐ ܒܲܚܒܸܢܵܢܘܼܬܼܵܐ ܡܥܲܚܸܕܼ ܠܗܘܿܢ: ܘܠܲܢܝܵܚܹ̈ܐ ܡܙܲܡܸܢ ܠܗܘܿܢ: ܐܸܠܵܐ ܠܥܲܡ̈ܠܹܐ ܘܠܐܘܼܠܨܵܢܵܐ ܝܲܬܝܼܪܵܐ. ܘܥܝܼܪܘܼܬܼܵܐ ܡܲܠܸܦ ܠܗܘܿܢ: ܘܲܒܸܤܝ̈ܘܿܢܹܐ ܡܚܲܝܸܨ ܠܗܘܿܢ: ܘܲܠܚܸܟܼܡܬܼܵܐ ܡܩܲܪܸܒܼ ܠܗܘܿܢ. ܗܵܢܵܘ ܨܸܒܼܝܵܢܵܐ ܕܪܘܼܚܵܐ: ܕܲܒܼܛܘܼܪ̈ܦܹܐ ܢܸܗܘܘܿܢ ܡܲܚܒܼܵܢܵܘ̈ܗܝ. ܐܲܝܠܹܝܢ ܕܒܲܢܝܵܚܹ̈ܐ ܡܸܬܿܕܲܒܿܪܝܼܢ: ܠܵܐ ܗ̄ܘ̣ܵܐ ܪܘܼܚܵܐ ܕܐܲܠܵܗܵܐ ܐܝܼܬܼ ܒܗܘܿܢ: ܐܸܠܵܐ ܪܘܼܚܵܐ ܕܤܵܛܵܢܵܐ. ܪܘܼܚܵܐ ܕܐܲܠܵܗܵܐ ܠܵܐ ܨܵܒܹ̇ܐ ܒܲܢܝܵܚܹ̈ܐ ܦܲܓܼܪ̈ܵܢܵܝܹܐ: ܘܠܵܐ ܗ̄ܘ̣ܵܐ ܒܥܘܼܡܪܵܐ ܕܲܢܝܵܚܵܐ ܡܸܬܿܬܿܬܝܼܚ: ܐܸܠܵܐ ܒܥܘܼܡܪܵܐ ܕܛܘܼܪ̈ܵܦܹܐ. ܤܵܛܵܢܵܐ ܕܹܝܢ ܒܥܘܼܡܪܵܐ ܕܲܡܠܸܐ ܢܝܵܚܹ̈ܐ ܡܸܬܿܬܿܢܝܼܚ: ܐܲܝܟܼ ܤܵܗܕܘܼܬܹܗ ܕܡܵܪܲܢ. ܪܘܼܚܵܐ ܕܝܼܢ ܕܩܘܼܕܼܫܵܐ: ܡܫܲܢܸܐ ܡ̣ܢ ܢܝܵܚܵܐ: ܐܲܝܟܼ ܕܐܲܡܝܼܪ pb. 424 ܠܐܲܒܼ̈ܗܵܬܼܵܐ ܩܲܕܝܼ̈ܫܹܐ: ܕܠܵܐ ܫܵܪܹܐ ܪܘܼܚܵܐ ܕܐܲܠܵܗܵܐ ܒܦܲܓܼܪܵܐ ܕܲܫܪܸܐ ܒܲܢܝܵܚܵܐ. ܐܸܠܵܐ ܚܵܐܲܪ ܠܐܲܝܟܵܐ ܕܥܵܨܹ̇ܝܢ ܢܲܦܫܗܘܿܢ: ܒܦܲܓܼܪܵܐ ܐܲܠܝܼܨܵܐ: ܒܢܲܦܫܵܐ ܡܛܲܝܲܒܼܬܼܵܐ: ܘܥܵܒܹ̇ܕܼ ܐܵܘܵܢܵܐ ܠܘܵܬܼܗܘܿܢ: ܘܡܲܠܸܦ ܠܗܘܿܢ ܕܐܲܝܟܲܢܵܐ ܢܸܚܘܿܢ ܒܙܲܒܼܢܵܐ ܗܵܢܵܐ ܙܥܘܿܪܵܐ. ܐܲܝܠܹܝܢ ܕܠܲܚܒܼܘܼܗܝ ܠܐܲܠܵܗܵܐ: ܒܐܘܼ̈ܠܨܵܢܹܐ ܕܟܼܠ ܓܢܸܣ ܫܲܠܸܡ̣ܘ ܚܲܝܲܝ̈ܗܘܿܢ. ܟܠܗܘܿܢ ܓܹܝܪ ܙܲܕܝܼ̈ܩܹܐ: ܒܛܘܼܪ̈ܵܦܹܐ ܐܲܦܩܘܼܗܝ ܠܥܵܠܡܵܐ ܗܵܢܵܐ. ܟܠ ܟܡܵܐ ܕܲܠܘܵܬܼ ܐܲܠܵܗܵܐ ܐܸܬܼܩܲܪܲܒܼܘ: ܗܵܟܲܢܵܐ ܥܲܠ ܛܘܼܪ̈ܦܲܝܗܘܿܢ ܡܸܬܿܬܵܘܤܲܦ ܗ̄ܘ̣ܵܐ. ܚܲܕܼ ܓܹܝܪ ܡܸܢܗܘܿܢ ܒܡܵܘ̈ܡܵܬܼܵܐ ܐܸܡ݂ܲܪ: ܕܟܼܠܝܘܿܡ ܡܵܐܹ̇ܬܼ ܐ̄ܢܵܐ. ܝܵܡܹ̇ܐ ܐ̄ܢܵܐ ܠܲܡ ܒܫܘܼܒܼܗܵܪܟܼܘܿܢ ܐܲܚܲܝ̈ ܕܐܝܼܬܼ ܠܝܼ ܒܡܵܪܲܢ ܝܼܫܘܿܥ ܡܫܝܼܚܵܐ: ܕܟܼܠܝܘܿܡ ܡܵܐܹ̇ܬܼ ܐ̄ܢܵܐ. ܒܗܵܕܹܐ ܡܸܬܼܦܲܪܫܝܼܢ ܡ̣ܢ ܫܲܪܟܵܐ ܕܲܒܼܢܲܝ̈ܢܵܫܵܐ ܘܕܲܒܼܗܘܿܢ ܐܝܼܬܼܵܘܗܝ ܐܲܠܵܗܵܐ: ܕܗܸܢܘܿܢ ܒܐܘܼ̈ܠܨܵܢܹܐ ܚܵܐܹ̇ܝܢ: ܘܥܵܠܡܵܐ ܒܲܢܝܵܚܵܐ ܡܸܬܼܚܲܐܸܐ. ܠܵܐ ܐܸܨܛܒܼܝܼ ܐܲܠܵܗܵܐ ܕܢܸܗܘܘܿܢ ܡܸܬܿܬܿܢܝܼܚܝܼܢ ܡܲܚܒܼܵܢܵܘ̈ܗܝ ܒܲܦܓܲܪ: ܐܸܠܵܐ ܒܵܥܹ̇ܐ: ܕܲܟܼܡܵܐ ܕܝܲܚܝܼܢ: ܒܐܘܼܠܨܵܢܵܐ ܢܸܗܘܘܿܢ ܒܥܵܠܡܵܐ. ܟܲܕܼ ܐܲܠܝܼܨܝܼܢ: ܘܲܡܛܲܪܦܝܼܢ. ܘܲܤܢܝܼܩܝܼܢ: ܘܲܡܫܵܘܚܵܕܼܝܼܢ. ܥܲܪܓܛܸܠܵܝܝܼܢ: ܘܲܨܪܝܼܟܼܝܼܢ. ܟܪܝܼܗܝܼܢ: ܨܥܝܼܪܝܼܢ: ܡܩܲܦܚܝܼܢ. ܒܹܝܬܼ ܩܝܵܡܵܐ: ܠܲܝܬܿ ܠܗܘܿܢ. ܠܸܒܿܗܘܿܢ: ܘܲܬܼܒܼܝܼܪ. ܦܲܓܼܪܗܘܿܢ: ܘܲܡܫܲܦܲܠ. ܝܵܕܼܘܿܥܲܝ̈ܗܘܿܢ: ܘܟܼܵܦ̇ܪܝܼܢ ܒܗܘܿܢ. ܬܲܪܥܝܼܬܼܗܘܿܢ: ܘܡܲܠܝܵܐ ܥܵܩܬܼܵܐ. ܡܢܲܟܼܪܹܝܢ ܒܲܚܙܵܬܼܗܘܿܢ: ܠܟܼܠܵܗ̇ ܒܪܝܼܬܼܵܐ. ܡܢܲܟܼܟܼܪܲܝ ܡܵܘܬܲܒܼܗܘܿܢ: ܠܟܼܠܗܘܿܢ ܒܢܲܝ̈ܢܵܫܵܐ. ܕܘܼܝܵܪܗܘܿܢ ܝܑܼܚܝܼܕܼܵܝ: ܘܲܡܫܵܘܚܲܕܼ. ܓܠܝܼܙ ܡ̣ܢ ܚܙܵܬܼܵܐ ܕܥܵܠܡܵܐ: ܤܦܝܼܩ ܡ̣ܢ ܟܠ ܐܵܬܼ̈ܐ ܕܲܡܚܲܕ̈ܝܵܢܝܵܬܼܵܐ ܕܲܬܼܢܵܢ. ܡܤܲܪܲܩ: ܡ̣ܢ ܟܠ ܡܠܘܿܐܹ̈ܐ ܕܲܢܝܵܚܵܐ. ܐܸܒܼܠܵܐ: ܘܲܫܟܼܝܼܚ ܒܹܗ. ܦܨܝܼܚܘܼܬܼܵܐ: pb. 425 ܘܪܲܚܝܼܩܵܐ ܡܸܢܹܗ. ܥܩ̈ܬܼܵܐ: ܘܬܼܵܟܼ̈ܒܵܢ ܒܹܗ. ܐܵܦܠܵܐ ܚܫܲܚܬܼܵܐ ܕܦܲܓܼܪܵܐ ܐܝܼܬܼ ܠܗܘܿܢ ܡܲܠܝܵܐܝܼܬܼ ܐܲܝܟܼ ܟܠܢܵܫ. ܬܸܫܘܝܼܬܼܗܘܿܢ: ܐܲܪܥܵܐ ܗ̣̄ܝ. ܦܲܪ̈ܨܘܼܦܲܝܗܘܿܢ: ܡܵܘܩܕܝܼܢ ܡ̣ܢ ܨܵܘܡܵܐ. ܒܘܼܪ̈ܟܹܐ: ܡܪ̈ܲܫܠܵܢ ܡ̣ܢ ܡܚܝܼܠܘܼܬܼܵܐ. ܡܵܐܢܲܝ̈ ܓܵܘܵܝܹ̈ܐ: ܡܚܲܒܿܠܵܐ ܤܵܥܘܿܪܘܼܬܼܗܘܿܢ ܡ̣ܢ ܚܫܲܚܬܼܵܐ ܕܲܠܒܲܪ ܡ̣ܢ ܥܝܵܕܼ̈ܐ ܐ̄ܢܵܫܵܝܹ̈ܐ. ܗܸܢܘܿܢ ܒܵܟܹ̇ܝܢ: ܘܥܵܠܡܵܐ ܓܵܚܹ̇ܟܼ. ܗܸܢܘܿܢ ܟܡܝܼܪܝܼܢ: ܘܥܵܠܡܵܐ ܦܨܝܼܚ. ܗܸܢܘܿܢ ܨܲܝܡܝܼܢ: ܘܥܵܠܡܵܐ ܡܒܲܤܲܡ. ܒܪܝܼܬܼܵܐ ܟ̱ܠܵܗ̇ ܫܲܠܝܵܐ ܒܫܸܢܬܼܵܐ ܚܠܝܼܬܼܵܐ: ܘܗܸܢܘܿܢ ܫܵܗ̇ܪܝܼܢ ܒܲܨܠܘܿܬܼܵܐ. ܒܐܝܼܡܵܡܵܐ ܓܹܝܪ ܠܐܹܝܢ: ܘܠܸܠܝܵܐ ܠܐܵܓܼܘܿܢܵܐ ܡܙܲܡܢܝܼܢ. ܚܲܝܹ̈ܐ ܡܲܪܝܼܪܹ̈ܐ ܚܵܐܹ̇ܝܢ ܒܥܵܠܡܵܐ ܩܲܕܝܼ̈ܫܹܐ: ܒܦܲܓܼܪܵܐ ܡܡܲܟܿܟܼܵܐ: ܒܢܲܦܫܵܐ ܐܲܠܝܼܨܬܼܵܐ: ܒܥܵܩ̈ܬܼܵܐ ܕܡ̣ܢ ܟܠ ܕܘܼܟ. ܗܵܟܲܢ ܐܝܼܬܼܵܘܝܗ ܨܸܒܼܝܵܢܹܗ ܕܐܲܠܵܗܵܐ: ܕܲܒܼܒܼܝܼ̈ܫܵܬܼܵܐ ܢܸܚܘܿܢ ܟܠ ܕܡܸܬܼܩܲܪܒܼܝܼܢ ܠܹܗ. ܟܲܕܼ ܡܲܡܟܿܟܼܝܼܢ ܘܲܡܫܲܦܠܝܼܢ: ܒܟܼܠܵܗ̇ ܢܲܦܫܗܘܿܢ ܘܦܲܓܼܪܗܘܿܢ. ܡܸܢܗܘܿܢ: ܒܐܘܼ̈ܠܨܵܢܹܐ ܕܨܸܒܼܝܵܢܲܝ̈ܗܘܿܢ. ܘܡܸܢܗܘܿܢ: ܒܛܘܼܪ̈ܵܦܹܐ ܕܡ̣ܢ ܚܲܫܲܝ̈ܗܘܿܢ. ܡܸܢܗܘܿܢ: ܒܟܹܐܒܹ̈ܐ ܡܲܪܝܼܪܹ̈ܐ: ܕܲܒܼܦܲܓܼܪ̈ܲܝܗܘܿܢ ܛܥܝܼܢܝܼܢ. ܡܸܢܗܘܿܢ ܒܕܼܵܘ̈ܘܿܢܹܐ: ܘܒܲܪ̈ܕܼܘܼܦܝܹܐ ܕܡ̣ܢ ܒܢܲܝ̈ܢܵܫܵܐ. ܒܩܹܘܲܢܕܝܢܘܿܣ ܕܡ̣ܢ ܚܲܫܹ̈ܐ: ܒܩܹܘܲܢܕܹܝܢܘܿܣ ܡ̣ܢ ܫܹܐܕܹ̈ܐ: ܒܩܹܘܲܢܕܹܝܢܘܿܣ ܕܡ̣ܢ ܟܘܼܪ̈ܗܵܢܹܐ: ܒܩܹܘܲܢܕܝܹܢܘܿܣ ܕܡ̣ܢ ܡܸܤܟܹܢܘܼܬܼܵܐ. ܘܲܐ̄ܚܪ̈ܵܢܹܐ: ܐܸܬܼܪܕܹܦܘ. ܐ̄ܚܪ̈ܵܢܹܐ. ܐܸܬܼܩܛܸܠܘ. ܐ̄ܚܪ̈ܵܢܹܐ: ܐܸܬܼܢܤܲܪܘ. ܐ̄ܚܪܵܢܹܐ: ܐܸܬܼܪܓܸܡܘ. ܐ̄ܚܪ̈ܵܢܹܐ: ܒܝܲܡܵܐ ܐܸܬܿܛܲܒܲܥܘ. ܐ̄ܚܪ̈ܵܢܹܐ: ܐܸܬܼܩܲܛܲܥܘ ܗܲܕܵܡܲܝ̈ܗܘܿܢ ܟܲܕܼ ܚܲܝܝܼܢ. ܐ̄ܚܪ̈ܵܢܹܐ: ܠܲܫܥܵܬܼܵܐ ܘܲܠܒܸܙܚܵܐ ܐܸܫܬܿܠܸܡܘ. ܐ̄ܚܪ̈ܵܢܹܐ: ܠܦܘܼܡܵܐ ܕܫܲܠܗܹܒܼܝܼܬܼܵܐ ܥܲܠ̣ܘ. ܐ̄ܚܪ̈ܵܢܹܐ pb. 426 ܠܐܲܤܘܼܪܹ̈ܐ: ܘܲܠܢܸ̈ܓܼܕܹܐ ܕܚܝܼ̈ܠܹܐ. ܐ̄ܚܪ̈ܵܢܹܐ: ܠܦܘܼܡܵܐ ܕܚܲܪܒܵܐ ܥܲܠ̣ܘ. ܐ̄ܚܪܵܢܹܐ ܐܸܬܼܟܿܪܸܟܼܘ: ܟܲܕܼ ܠܒܼܝܼܫܝܼܢ ܡܸܫܟܹ̈ܐ ܕܐܸܡܪܹ̈ܐ ܘܲܕܼܥܸܙܹ̈ܐ: ܘܲܗܘ̤ܵܘ ܐܲܝܟܼ ܛܵܥܲܝ̈ܵܐ ܒܚܘܼܪܒܵܐ. ܒܐܘܼ̈ܠܨܵܢܹܐ ܗܘ̤ܵܘ ܩܲܕܝܼ̈ܫܹܐ: ܒܛܘܼܪܹ̈ܐ ܘܒܲܡܥܲܪܹ̈ܐ: ܘܲܒܼܦܲܥܪܹ̈ܝܗ̇ ܕܐܲܪܥܵܐ. ܕܐܲܝܟܼ ܗܵܠܹܝܢ ܐ̄ܢܵܫܵܐ: ܕܤܵܗܹ̇ܕܼ ܫܠܝܼܚܵܐ: ܕܠܵܐ ܫܵܘܹ̇ܐ ܗ̄ܘ̣ܵܐ ܠܗܘܿܢ ܥܵܠܡܵܐ. ܘܕܲܬܼܗܝܼܪܵܐ ܡ̣ܢ ܟܠܗܹܝܢ: ܕܲܒܼܗܵܠܹܝܢ ܟܠܗܹܝܢ: ܠܵܐ ܡܤܲܟܹܝܢ ܗ̄ܘ̣ܵܘ ܠܡܸܬܼܦܲܨܵܝܘܼ ܘܲܠܡܸܬܼܪܵܘܵܚܘܼ: ܐܲܝܟܼ ܡܸܠܲܬܼ ܛܘܼܒܼܵܢܵܐ ܫܠܝܼܚܵܐ. ܫܘܼܒܼܚܵܐ ܠܲܡܟܲܠܠܵܢܗܘܿܢ: ܕܐܵܦ ܗ̤ܘ ܒܚܲܫܵܐ ܕܲܨܠܝܼܒܼܵܐ ܓܲܡܪܵܗ̇ ܠܐܘܼܪܚܵܐ ܗܵܕܹܐ ܒܵܬܲܪ ܟܠܗܹܝܢ: ܕܲܒܼܥܸܩ̈ܒܼܵܬܹܗ ܢܸܬܿܕܲܡܘܿܢ ܐܵܦ ܩܲܕܝܼܫܵܘ̈ܗܝ. ܘܡܸܠܬܹܗ ܕܡܵܪܲܢ: ܫܸܠܡܲܬ̤ ܒܲܥ̇ܒܼܵܕܼܵܐ. ܒܥܵܠܡܵܐ ܠܲܡ: ܒܐܘܼܠܨܵܢܵܐ ܬܸܗܘܘܿܢ. ܐܸܠܵܐ ܒܝܼ: ܗܵܘ̇ܝܵܐ ܠܟܼܘܿܢ ܚܲܕܼܘܼܬܼܵܐ. ܒܚܲܝܠܵܗ̇ ܕܗܵܕܹܐ ܚܲܕܼܘܼܬܼܵܐ: ܡܸܬܼܓܲܒܿܪܝܼܢ ܩܲܕܝܼ̈ܫܹܐ ܗܵܠܹܝܢ ܠܲܡܤܲܝܒܵܪܘܼ. ܕܐܲܠܵܗܵܐ ܕܲܒܼܚܲܝܠܹܗ ܤܲܝܒܲܪܘ ܩܲܕܝܼ̈ܫܹܐ ܒܗܵܠܹܝܢ ܐܵܓܼܘܿܢܹ̈ܐ: ܘܠܵܐ ܐܸܬܼܡܚܸܠܘ ܒܤܲܒܼܪܗܘܿܢ: ܗ̤ܘ ܢܫܲܪܲܪ ܤܲܒܼܪܹܗ ܒܟܼܠܲܢ. ܐܵܡܹܝܢ܀ ܒܸܠܥܵܕܼ ܐܘܼ̈ܠܨܵܢܹܐ: ܠܲܝܬܿ ܚܲܝܹ̈ܐ. ܝܵܕܲܥ̇ ܗ̄ܘ̣ܵܐ ܐܲܠܵܗܵܐ: ܕܠܵܐ ܡܲܨ̈ܝܵܢ ܬܲܪܬܹܝܢ ܚܲܕܼ̈ܘܵܢ ܢܸܗܘ̈ܝܵܢ ܒܚܲܕܼ ܒܲܪܢܵܫܵܐ. ܘܲܕܼܠܵܐ ܡܲܨܝܵܐ ܠܲܡܚܲܡܤܵܢܘܼ ܒܚܘܼܒܹܗ ܟܲܕܼ ܡܢܵܚܝܼܢ ܒܦܲܓܼܪܵܐ: ܟܠ̣ܵܐ ܐܸܢܘܿܢ ܡ̣ܢ ܗܵܕܹܐ. ܘܚܲܤ̣ܢܵܗ̇ ܠܪܸܚܡܬܹܗ ܒܢܲܦܫܗܘܿܢ: ܒܝܲܕܼ ܓܘܼܙܵܝܵܐ ܕܡ̣ܢ ܟܠ ܗܲܢܝܼ̈ܐܵܬܹܗ ܕܥܵܠܡܵܐ. ܕܲܡܫܝܼܚܵܐ: ܗܵܘ̇ ܚܤܲܝܼܢ ܗ̄ܘ̣ ܚܘܼܒܹܗ ܡ̣ܢ ܡܵܘܬܵܐ: ܘܢܘܼܪܵܐ ܡܤܲܝܦܵܐ ܘܐܸܟܿܤܘܿܪܝܼܵܐ: ܘܢܘܼܟܼܪܵܝܘܼܬܼܵܐ ܕܡ̣ܢ ܛܘܿܗܡܵܐ pb. 427 ܘܓܼܘܼܙܵܝܵܐ ܕܡ̣ܢ ܚܲܝܹ̈ܐ: ܘܟܼܠ ܥܘܼܤܵܩ̈ܝܼܢ ܠܵܐ ܩܵܝ̇ܡܝܼܢ ܩܕܼܵܡ ܚܘܼܒܹܗ ܒܡܲܚܒܼܵܢܵܘ̈ܝܗ: ܗ̤ܘ ܢܸܓܼܠܸܐ ܒܲܢ ܚܲܝܠܵܐ ܕܚܘܼܒܹܗ. ܐܵܡܹܝܢ. ܕܡܸܛܠ ܐܲܝܠܹܝܢ ܥܸܠ̈ܠܵܬܼܵܐ ܫܵܒܹ̇ܩ ܐܲܠܵܗܵܐ ܢܸܤܝ̈ܘܿܢܹܐ ܥܲܠ