Discourse 61

ܡ̣ܢ ܚܘܼܒܵܐ ܕܲܡܚܵܘܹܝܢ ܩܲܕܝܼ̈ܫܹܐ ܠܐܲܠܵܗܵܐ: ܚܠܵܦ ܗܵܠܹܝܢ ܕܡܸܛܠ ܫܡܹܗ ܤܵܒܼ̇ܠܝܼܢ: ܟܲܕܼ ܡܸܬܼܐܲܠܨܝܼܢ ܘܠܵܐ ܦܵܪܩܝܼܢ ܡ̣ܢ ܡܝܲܬܿܪܘܼܬܼܵܐ ܕܡܲܚܸܒܼ ܠܵܗ̇ ܐܲܠܗܵܐ: ܩܵܢܹ̇ܐ ܠܸܒܿܗܘܿܢ ܦܵܪܹܗ̄ܤܝܼܵܐ ܠܲܡܚܵܪ ܠܘܵܬܹܗ ܕܠܵܐ ܬܲܚܲܦܝܼ: ܘܲܠܡܸܫܐܲܠ ܡܸܢܹܗ ܒܬܼܘܼܟܼܠܵܢܵܐ. ܪܲܒܿ ܗ̄ܘ̣ ܚܲܝܠܵܗ̇ ܕܲܨܠܘܿܬܼܵܐ ܕܲܨܠܘܿܬܼܵܐ ܕܦܵܪܹܗ̄ܤܝܼܵܐ. ܘܡܸܛܠ ܗܵܕܹܐ ܫܵܒܹ̇ܩ ܕܢܸܬܼܢܲܤܘܿܢ ܩܲܕܝܼܫܵܘ̈ܗܝ ܒܟܼܠ ܥܵܩ̈̇ܢ: ܒܐܘܼܪܚܵܐ ܕܲܠܘܵܬܹܗ: ܐܲܝܟܼ ܕܬܸܗܘܸܐ ܠܗܘܿܢ ܦܵܪܹܗ̄ܤܝܼܵܐ. ܘܲܕܼܢܸܤܒܼܘܼܢ ܬܘܼܒܼ ܒܘܩܝܵܐ ܕܥܘܼܕܼܪܵܢܹܗ: ܕܲܟܼܡܵܐ ܒܛܝܼܠ ܠܹܗ ܥܠܲܝܗܘܿܢ: ܒܩܹܘܲܢܕܹܝܢܘܿܣ ܕܡܸܫܬܿܟܲܚ ܠܗܘܿܢ ܦܵܪܘܿܩܵܐ. ܘܡܸܛܠ ܕܚܸܟܼܡܬܼܵܐ ܩܵܢܹ̇ܝܢ ܡ̣ܢ ܢܸܤܝ̈ܘܿܢܹܐ: ܕܠܵܐ ܢܸܗܘܘܿܢ ܒܘܿܪܝܼܢ ܘܲܓܼܠܝܼܙܝܼܢ ܡ̣ܢ ܕܘܼܪܵܫܵܐ ܪ̈ܵܚܡܵܘܗܝ: ܐܲܝܟܼ ܕܢܸܗܘܘܿܢ ܩܢܹܝܢ ܡ̣ܢ ܢܸܤܝܵܢܵܐ ܝܑܼܕܲܥܬܼܵܐ ܕܡܼܠܡܸܕܸܡ: ܕܠܵܐ ܢܸܬܼܓܲܚܟܘܼܢ ܦܫܝܼܩܵܐܝܼܬܼ ܡ̣ܢ ܫܹ̈ܐܕܹܐ. ܕܐܸܠܘܼ ܒܛܵܒܼ̈ܬܼܵܐ ܒܲܠܚܘܿܕܼ ܡܕܲܪܲܫ ܗ̄ܘ̣ܵܐ ܠܗܘܿܢ: ܗܵܘܹ̇ܝܢ ܚܲܤܝܼܪܝܼܢ ܡ̣ܢ ܕܘܼܪܵܫܵܐ ܕܒܲܐ̄ܚܪ̈ܵܢܝܵܬܼܵܐ: ܘܗܵܘܹ̇ܝܢ ܤܡܹܝܢ ܒܲܩܪ̈ܵܒܹܐ. ܘܐܸܢ ܢܹܐܡܲܪ ܐ̄ܢܵܫ: ܕܗ̤ܘ ܢܕܲܒܲܪ ܐܸܢܘܿܢ ܕܠܵܐ ܕܘܼܪܵܫܵܐ ܘܲܕܼܠܵܐ ܝܑܼܕܲܥܬܼܵܐ ܕܝܼܠܗܘܿܢ: ܡܵܕܹܝܢ ܨܵܒܹ̇ܐ ܕܢܸܗܘܘܿܢ ܗ̄ܘ̣ܵܘ ܐܲܝܟܼ ܬܵܘܪܹ̈ܵܐ ܘܐܲܝܟܼ ܚܸܡܪ̈ܵܐ: ܕܠܵܐ ܩܵܐܹ̇ܡ ܒܗܘܿܢ ܒܚܹܐܪܘܼܬܼܵܐ pb. 428 ܡܸܕܸܡ. ܐܵܦܠܵܐ ܛܥܵܡܬܼܵܐ ܐܝܼܬܼ ܒܛܵܒܼܬܼܵܐ. ܐܸܡܲܬܼܝ ܕܐ̄ܢܵܫ ܒܢܸܤܝܵܢܵܐ ܕܒܼܝܼ̈ܫܵܬܼܵܐ ܠܵܐ ܐܸܬܼܢܲܤܝܼ ܠܘܼܩܕܲܡ: ܘܗܵܝܕܹܝܢ ܒܵܗ̇ ܦܵܓܲܥ: ܘܠܵܘ ܒܝܼܕܲܥܬܼܵܐ ܘܚܹܐܪܵܐܝܼܬܼ ܒܵܗ̇ ܡܸܬܼܚܲܫܲܚ ܐܲܝܟܼ ܕܲܒܼܕܼܝܼܠܹܗ. ܕܲܟܼܡܵܐ ܕܹܝܢ ܚܲܠܝܵܐ ܝܑܼܕܲܥܬܼܵܐ ܕܡ̣ܢ ܕܘܼܪܵܫܵܐ ܡܸܬܼܩܲܢܝܵܐ ܘܡ̣ܢ ܢܸܤܝܵܢܵܐ ܕܥܲܡ̈ܠܹܐ: ܘܕܲܟܼܡܵܐ ܚܲܝܠܵܐ ܝܵܗ̇ܒܵܐ ܠܐܲܝܢܵܐ ܕܡ̣ܢ ܒܘܼܩܝܵܐ ܕܤܲܓܝܼ̈ܐܵܬܼܵܐ ܒܲܩܢܘܿܡܹܗ ܐܸܫܟܚܵܗ̇: ܠܗܵܢܘܿܢ ܝܑܼܕܲܝܼܥܵܐ: ܕܲܡܦܵܤܝܼܢ ܒܥܘܼܕܼܪܵܢܵܐ ܕܡ̣ܢ ܗܵܕܹܐ. ܐܵܦ ܡܚܝܼܠܘܼܬܹܗ ܕܲܟܼܝܵܢܵܐ: ܘܥܘܼܕܼܪܵܢܵܐ ܕܡ̣ܢ ܚܲܝܠܵܐ ܐܲܠܵܗܵܝܵܐ ܗܵܝܕܹܝܢ ܝܵܠ̇ܦܝܼܢ: ܡܵܐ ܕܠܘܼܩܕܲܡ ܚ̣ܤܲܟܼ ܡܸܢܗܘܿܢ ܚܲܝܠܵܐ: ܟܲܕܼ ܐܝܼܬܲܝܗܘܿܢ ܒܓܼܵܘ ܢܸܤܝ̈ܘܿܢܹܐ. ܘܢܲܪܓܫܘܼܢ ܒܲܡܚܝܼܠܘܼܬܹܗ ܕܲܟܼܝܵܢܵܐ: ܘܲܒܼܬܼܘܼܩܦܗܘܿܢ ܕܢܸܤܝ̈ܘܿܢܹܐ: ܘܲܒܼܒܼܝܼܫܘܼܬܹܗ ܕܲܒܼܥܸܠܕܒܼܵܒܼܵܐ. ܕܐܲܝܢܵܐ ܒܥܸܠܕܒܼܵܒܼܵܐ ܐܝܼܬܼ ܠܗܘܿܢ: ܘܐܲܝܢܵܐ ܟܝܵܢܵܐ ܠܒܼܝܼܫܝܼܢ: ܘܕܲܐܝܟܲܢ ܢܛܝܼܪܝܼܢ ܒܝܲܕܼ ܚܲܝܠܵܐ ܐܲܠܵܗܝܵܐ. ܘܕܲܟܼܡܵܐ ܐܸܢ ܪܵܗܛ̇ܝܼܢ ܘܕܲܟܼܡܵܐ ܐܸܢ ܡܸܬܼܥܲܠܹܝܢ: ܐܸܡܲܬܼܝ ܕܡܲܪܚܸܩ ܡܸܢܗܘܿܢ ܚܲܝܠܵܐ ܐܲܠܵܗܵܝܵܐ: ܐܲܝܟܲܢ ܬܵܚ̇ܒܿܝܼܢ ܩܕܼܵܡ ܟܠ ܚܲܫ̈ܝܼܢ. ܘܡ̣ܢ ܗܵܠܹܝܢ ܟܠܗܹܝܢ ܡܲܟܿܝܼܟܼܘܼܬܼܵܐ ܩܵܢܹ̇ܝܢ: ܘܲܠܘܵܬܼ ܐܲܠܵܗܵܐ ܚܵܒܼ̇ܨܝܼܢ: ܘܲܠܥܘܼܕܼܪܵܢܹܗ ܡܤܲܟܹܝܢ: ܘܒܲܨܠܘܿܬܼܵܐ ܡܚܲܡܤܢܝܼܢ. ܗܵܠܹܝܢ ܟܠܗܹܝܢ ܡ̣ܢ ܐܲܝܟܵܐ ܩܢ̣ܵܘ: ܐܸܠܘܼ ܒܘܼܩܝܵܐ ܠܵܐ ܢܤܲܒܼܘ ܕܪܸܒܿܘܿ ܒܝܼ̈ܫܵܬܼܵܐ: ܕܲܒܼܗܹܝܢ ܡܲܗܡܸܐ ܐܲܠܵܗܵܐ ܕܢܸܬܼܡܲܨܥܘܼܢ؟ ܘܐܲܝܟܼ ܕܠܵܐ ܠܲܡ ܐܸܬܿܬܿܪܝܼܡ ܒܝܲܬܝܼܪܘܼܬܼܵܐ ܕܓܸܠܝܵܢܹ̈ܐ: ܐܸܫܬܠܸܡ ܠܝܼ ܫܦܵܝܵܐ ܠܒܸܤܪܝ ܡܲܠܲܐܟܹܗ ܕܤܵܛܵܢܵܐ. ܐܵܦ ܗܲܝܡܵܢܘܼܬܼܵܐ ܡܫܲܪܲܪܬܵܐ ܩܵܢܹ̇ܐ ܒܲܪܢܵܫܵܐ ܡ̣ܢ ܢܸܤܝܼ̈ܘܿܢܹܐ: ܒܢܸܤܝܵܢܵܐ ܕܥܘܼܕܼܪܵܢܵܐ ܐܲܠܵܗܵܝܵܐ: ܕܒܼܘܼܩܝܹܗ ܫܩܲܠ̣ ܙܲܒܼܢ̈ܝܼܢ ܤܲܓܝܼ̈ܐܵܢ. ܘܡ̣ܢ ܗܵܐ ܡܸܟܵܐ: ܐܵܦ ܕܠܵܐ ܕܸܚܠܵܐ ܗܵܘܹ̇ܐ: ܘܲܠܒܼܝܼܒܼܘܼܬܼܵܐ ܩܵܢܹ̇ܐ ܒܢܸܤܝܘܿܢܵܐ ܡܸܛܠ ܕܘܼܪܵܫܵܐ ܕܲܩܢܸܐ. ܘܲܠܟܼܠ ܒܲܪܢܵܫ ܚܵܫܲܚ pb. 429 ܢܸܤܝܘܿܢܵܐ. ܟܲܫܝܼܪܹ̈ܐ ܡܸܬܼܢܲܤܹܝܢ: ܕܥܲܠ ܥܘܼܬܼܪܗܘܿܢ ܢܸܬܿܬܵܘܤܲܦ. ܘܲܪ̈ܦܲܝܵܐ: ܕܡ̣ܢ ܢܸܟܼܝܵܢܹ̈ܐ ܢܸܬܼܢܲܛܪܘܼܢ. ܘܕܲܡܟܹ̈ܐ: ܕܲܠܘܵܬܼ ܥܝܼܪܘܼܬܼܵܐ ܢܸܬܼܥܲܬܿܕܼܘܼܢ. ܘܪ̈ܲܚܝܼܩܹܐ: ܕܲܠܘܵܬܼ ܐܲܠܵܗܵܐ ܢܸܬܼܩܲܪܒܼܘܼܢ. ܘܒܲܝ̈ܬܵܝܹܐ: ܕܲܒܼܦܵܪܹܗ̄ܤܝܼܵܐ ܢܸܬܼܓܵܘܘܿܢ. ܟܠ ܒܪܵܐ ܕܠܵܐ ܡܕܲܪܲܫ: ܐܵܦܠܵܐ ܥܘܼܬܼܪܵܐ ܕܡ̣ܢ ܒܹܝܬܼ ܐܲܒܼܘܼܗܝ ܡܸܬܼܝܼܗܸܒܼ ܠܹܗ: ܡܸܫܟܲܚ ܕܢܸܬܼܥܲܕܲܪ ܒܹܗ. ܡܸܛܠܗܵܢܵܐ ܩܲܕܼܡܵܝܑܬܼ ܡܢܲܤܸܐ ܘܲܡܫܲܢܸܩ ܐܲܠܵܗܵܐ: ܘܗܵܕܹܝܢ ܡܵܘܗܲܒܼܬܹܗ ܡܚܵܘܸܐ. ܫܘܼܒܼܚܵܐ ܠܗܵܘ̇ ܡܵܪܵܐ ܕܲܒܼܤܲܡܡܵܢܹ̈ܐ ܡܲܨܪ̈ܦܵܢܹܐ: ܠܒܼܘܼܤܵܡܵܐ ܕܚܘܼܠܡܵܢܵܐ ܡܩܲܪܸܒܼ ܠܲܢ. ܠܲܝܬܿ ܕܠܵܐ ܩܫܸܐ ܠܹܗ ܙܲܒܼܢܵܐ ܕܕܼܘܼܪܵܫܵܐ: ܘܠܲܝܬܿ ܕܠܵܐ ܡܲܪܝܼܪ ܠܹܗ ܙܲܒܼܢܵܐ ܕܡܲܫܩܹܝܢ ܠܹܗ ܤܲܡܵܐ ܕܢܸܤܝ̈ܘܿܢܹܐ. ܐܸܠܵܐ ܕܠܵܐ ܕܹܝܢ ܗܵܟܲܢ: ܠܵܐ ܡܲܨܝܵܐ ܕܢܸܬܼܩܢܸܐ ܡܘܼܙܵܓܼܵܐ ܚܠܝܼܡܵܐ. ܐܵܦܠܵܐ ܗܵܕܹܐ ܕܲܡܤܲܝܒܲܪ: ܕܝܼܠܲܢ ܐܝܼܬܹܝܗ̇. ܡ̣ܢ ܐܲܝܟܵܐ ܠܹܗ ܠܡܵܐܢܵܐ ܕܡ̣ܢ ܛܝܼܢܵܐ: ܕܲܢܤܲܝܒܲܪ ܚܹ̈ܐܦܹܐ ܕܡܲܝ̈ܵܐ: ܐܸܢ ܢܘܼܪܵܐ ܐܲܠܵܗܵܝܬܼܵܐ ܠܵܐ ܡܚܲܝܨܵܐ ܠܹܗ؟ ܐܸܢ ܢܸܬܼܪܟܸܢ ܠܡܸܫܐܲܠ ܒܡܲܟܿܝܼܟܼܘܼܬܼܵܐ ܟܲܕܼ ܝܲܐܝܼܒܼܝܼܢܲܢ ܒܐܲܟܼܝܼܦܘܼܬܼܵܐ ܡܚܲܡܤܢܵܢܵܐܝܼܬܼ: ܕܠܡܸܕܸܡ ܢܵܤ̇ܒܝܼܢ ܚ̄ܢܲܢ.