Discourse 62

ܒܲܪܢܵܫܵܐ ܟܡܵܐ ܕܐܝܼܬܼܵܘܗܝ ܒܡܲܗܡܝܵܢܘܼܬܼܵܐ: ܡ̣ܢ ܫܵܥܲܬܼ ܡܵܘܬܵܐ ܕܵܚܹ̇ܠ. ܟܲܕܼ ܕܹܝܢ ܢܸܬܼܩܲܪܲܒܼ ܠܘܵܬܼ ܐܲܠܵܗܵܐ: ܡ̣ܢ ܦܸܓܼܥܵܐ ܕܕܼܝܼܢܵܐ. ܟܲܕܼ ܕܹܝܢ ܡܲܠܝܵܐܝܼܬܼ ܢܹܐܬܸܐ ܠܲܩܕܼܵܡܵܘܗܝ: ܒܚܘܼܒܵܐ ܡܸܬܼܒܲܠ̈ܥܵܢ ܬܲܪ̈ܬܲܝܗܹܝܢ. ܕܐܲܝܟܼ ܐܲܝܟܲܢ؟ ܟܲܕܼ ܒܝܼܕܲܥܬܼܵܐ ܘܲܒܼܕܼܘܼܒܵܪܹ̈ܐ ܕܦܲܓܼܪܵܐ pb. 430 ܩܵܐܹ̇ܡ: ܡ̣ܢ ܗܵܘܬܵܐ ܡܸܤܬܲܪܲܕܼ. ܘܟܲܕܼ ܒܝܼܕܲܥܬܼܵܐ ܢܲܦܫܵܢܵܝܬܼܵܐ ܘܕܼܘܼܒܵܪܹ̈ܐ ܬܲܩ̈ܢܹܐ: ܒܥܘܼܗܕܵܢܵܐ ܕܕܼܝܼܥܵܐ ܪܵܦܹ̇ܬܼ ܪܸܥܝܵܢܹܗ ܒܟܼܠܫܵܥ. ܒܗܵܝ̇ ܕܒܹܗ ܒܲܟܼܝܵܢܵܐ: ܬܪܝܼܨܵܐܝܼܬܼ ܩܵܐܹ̇ܡ. ܘܲܒܼܛܲܟܼܤܵܐ ܢܲܦܫܵܢܵܝܵܐ ܡܸܬܿܬܿܙܝܼܥ ܘܡܸܬܿܕܲܒܲܪ ܒܝܼܕܲܥܬܹܗ: ܘܲܒܼܕܼܘܼܒܵܪܹܗ. ܘܲܒܼܩܲܪܝܼܒܼܘܼܬܼܵܐ ܕܐܲܠܵܗܵܐ: ܫܲܦܝܼܪ ܐܝܼܬܼܵܘܗܝ. ܟܲܕܼ ܕܹܝܢ ܠܗܵܝ̇ ܝܑܼܕܲܥܬܼܵܐ ܕܲܫܪܵܪܵܐ ܢܸܡܛܸܐ: ܒܡܸܬܿܬܿܙܝܼܥܵܢܘܼܬܼܵܐ ܕܡܲܪܓܫܵܢܘܼܬܼܵܐ ܕܐ̄ܪ̈ܵܙܵܘܗܝ ܕܐܲܠܲܗܵܐ: ܘܡܸܫܬܲܪܲ ܒܤܲܒܼܪܵܐ ܕܲܥܬܼܝܼܕܼ: ܒܚܘܼܒܵܐ ܡܸܬܼܒܠܲܥ. ܗܵܘ̇ ܕܦܲܓܼܪܵܢܵܐ ܗ̄ܘ̣: ܒܲܕܼܡܘܼܬܼ ܚܲܝܘܬܼܵܐ ܡ̣ܢ ܢܸܟܼܤܬܼܵܐ ܕܵܚܹ̇ܠ. ܡܠܝܼܠܵܐ ܕܹܝܢ: ܡ̣ܢ ܕܝܼܢܹܗ ܕܐܲܠܵܗܵܐ. ܐܲܝܢܵܐ ܕܲܗܘ̤ܵܐ ܒܪܵܐ: ܠܚܘܼܒܵܐ ܫܲܦܲܪ: ܘܠܵܐ ܠܫܲܒܼܛܵܐ ܕܲܡܕܲܚܸܠ. ܐܸܢܵܐ ܠܲܡ ܘܒܲܝܬܹܗ ܕܐܵܒܼܝ: ܠܡܵܪܝܵܐ ܦܵܠ̇ܚܝܼܢܲܢ. ܚܘܼܒܵܐ ܓܹܝܪ: ܡܒܲܛܠܵܢܵܐ ܗ̄ܘ̣ ܕܕܼܚܸܠܬܼܵܐ. ܘܠܵܘ ܒܲܠܚܘܿܕܼ ܠܵܐ ܕܵܚܹ̇ܠ: ܐܸܠܵܐ ܐܵܦ ܠܫܘܼܢܵܝܵܐ ܡܸܬܼܝܲܐܲܒܼ. ܚܘܼܒܵܐ: ܫܵܪܘܿܝܵܐ ܗ̄ܘ̣ ܕܚܲܝܹ̈ܐ ܕܙܲܒܼܢܵܐ. ܐܲܝܢܵܐ ܕܲܠܚܘܼܒܵܐ ܕܐܲܠܵܗܵܐ ܡܲܛܝܼ: ܠܵܐ ܬܘܼܒܼ ܡܸܬܼܪܲܓܼܪܲܓܼ ܕܲܢܩܵܘܸܐ ܬܢܵܢ. ܚܲܒܿܝܼ̈ܒܲܝ: ܡܸܛܠ ܕܲܗܹ̇ܝܬܼ ܠܸܠܵܐ: ܠܵܐ ܡܤܲܝܒܲܪ ܐ̄ܢܵܐ ܕܐܸܛܲܪ ܐ̄ܪܵܙܵܐ ܒܫܸܬܼܩܵܐ. ܐܸܠܵܐ ܗܵܘܹ̇ܐ ܐ̄ܢܵܐ ܫܵܛܝܵܐ: ܡܸܛܠ ܝܘܼܬܼܪܲܢ ܐܲܝܲܚ̈. ܒܲܕܼܗܵܢܵܘ ܚܘܼܒܵܐ ܫܲܪܝܼܪܵܐ: ܕܠܵܐ ܡܨܸܐ ܕܲܢܟܲܬܲܪ ܒܲܨܒܼܘܼܬܼܵܐ ܕܚܘܼܒܵܐ ܡ̣ܢ ܡܲܚܒܼܵܢܵܘ̈ܗ. ܙܲܒܼ̈ܢܵܬܼܵܐ ܤܲܓܝܼ̈ܐܵܬܼܵܐ: ܟܲܕܼ ܗܵܠܹܝܢ ܡܲܟܼܬܸܒܼ ܗ̄ܘܹ̇ܝܬܼ: ܦܵܝ̈ܫܵܢ ܗ̣̄ܘܲܝ̈ ܨܸܒܼ̈ܥܵܬܼܝ ܥܲܠ ܟܲܪܛܲܝܤܵܐ. ܠܵܐ ܡܚܲܡܤ̈ܢܵܢ ܗ̄ܘܲܝ̈ ܩܕܼܵܡ ܗܲܢܝܼܐܘܼܬܼܵܐ: ܕܲܒܼܠܸܒܵܐ ܢܵܦ̇ܠܵܐ ܗ̄ܘ̣ܵܬܼ: ܘܲܡܫܲܬܿܩܵܐ ܠܪܸ̈ܓܼܫܹܐ. ܒܪܲܡ ܛܘܼܒܼܵܘܗܝ ܠܐܲܝܢܵܐ ܕܒܲܐܠܵܗܵܐ ܐܸܬܼܥܢܝܼ ܐܲܡܝܼܢܵܐܝܼܬܼ: ܘܲܢܓܲܕܼ ܢܲܦܫܹܗ ܡ̣ܢ ܟܠܗܹܝܢ ܥܵܠܡܵܢܵܝ̈ܬܼܵܠ: ܘܲܠܘܵܬܹܗ ܗܘ̤ܵܐ ܒܲܠܚܘܿܕܼܵܘܗܝ: ܒܥܸܝܢܵܢܵܐ ܕܝܼܕܲܥܬܹܗ. ܕܐܵܦܸܢ ܡܲܓܲܪ ܪܘܼܚܹܗ: ܠܵܐ ܡܵܘܚܲܪ ܤܲܓܝܼ ܡ̣ܢ ܕܢܸܚܙܹܐ ܦܹܐܪܹ̈ܐ. pb. 431 ܚܲܕܼܘܼܬܼܵܐ ܕܒܲܐܠܵܗܵܐ: ܚܲܝܠܬܼܵܢܝܵܐ ܗ̣̄ܝ ܚܲܝܹ̈ܐ ܕܲܬܼܢܵܢ. ܘܐܲܝܢܵܐ ܕܐܸܫܟܚܵܗ̇: ܠܵܐ ܒܲܠܚܘܿܕܼ ܒܚܲܫܹ̈ܐ ܠܵܐ ܡܸܬܼܒܲܩܸܐ: ܐܸܠܵܐ ܐܵܦܠܵܐ ܥܲܠ ܚܲܝܵܘ̈ܗܝ ܡܸܬܼܦܢܸܐ ܬܘܼܒܼ. ܘܠܵܐ ܪܓܸܫܬܼܵܐ ܐ̄ܚܪܹܬܼܵܐ ܐܝܼܬܼ ܠܹܗ ܡ̣ܢ ܗܵܝܕܹܝܟ. ܐܸܢ ܫܲܪܝܼܪܵܐܝܼܬܼ ܐܸܫܬܿܘܝܼ ܠܗܵܕܹܐ. ܚܠܸܐ ܚܘܼܒܵܐ: ܝܲܬܝܼܪ ܡ̣ܢ ܚܲܝܹ̈ܐ. ܘܲܚܠܸܐ ܤܘܼܟܵܠܵܐ ܕܥܲܠ ܐܲܠܵܗܵܐ: ܕܡܸܢܹܗ ܚܘܼܒܵܐ ܡܸܬܼܝܼܠܸܕܼ: ܝܲܬܝܼܪ ܡ̣ܢ ܕܸܒܼܫܵܐ ܘܡ̣ܢ ܟܲܟܵܪܝܼܬܼܵܐ. ܡܵܢܲܐ ܗ̣̄ܝ ܚܲܠܝܘܼܬܼܵܐ ܕܚܘܼܒܵܐ: ܕܝܲܬܝܼܪ ܡ̣ܢ ܚܲܝܹ̈ܐ؟ ܠܚܘܼܒܵܐ: ܠܵܐ ܟܲܪܝܵܐ ܠܹܗ ܚܠܵܦ ܡܲܚܒܼܵܢܵܘ̈ܗܝ ܠܲܡܩܲܒܵܠܘܼ ܪܸܒܿܘܿ ܡܵܘ̈ܬܝܼܢ. ܚܘܼܒܵܐ: ܝܲܠܕܵܐ ܗ̄ܘ̣ ܕܝܼܕܲܥܬܼܵܐ. ܝܑܼܕܲܥܬܼܵܐ: ܝܲܠܕܵܐ ܗ̣̄ܝ ܕܲܚܠܝܼܡܘܼܬܼ ܢܲܦܫܵܐ. ܚܠܝܼܡܘܼܬܼ ܢܲܦܫܵܐ: ܚܲܝܠܵܐ ܗ̄ܘ̣ ܕܡ̣ܢ ܡܤܲܝܒܿܪܵܢܘܼܬܼܵܐ ܡܸܬܼܝܲܠܕܵܐ ܒܢܘܼܓܼܪܵܐ. ܘܡܵܢܲܐ ܗ̣̄ܝ ܝܑܼܕܲܥܬܼܵܐ؟ ܪܓܸܫܬܼܵܐ ܕܚܲܝܹ̈ܐ ܠܵܐ ܡܵܝ̈ܘܿܬܹܐ. ܡܵܢܵܐ ܐܸܢܘܿܢ ܚܲܝܹ̈ܐ ܠܵܐ ܡܵܝ̈ܘܿܬܹܐ؟ ܡܲܪܓܫܵܢܘܼܬܼܵܐ ܕܒܲܐܠܵܗܵܐ. ܝܑܼܕܲܥܬܼܵܐ ܕܥܲܠ ܐܲܠܵܗܵܐ: ܡܲܠܟܵܐ ܗ̄ܘ̣ ܕܟܼܠ ܪ̈ܓܝܼܓܼܵܐ. ܘܠܸܒܵܐ ܕܩܲܒܿܠܵܗ̇: ܝܲܬܝܼܪܬܵܐ ܗ̣̄ܝ ܠܹܗ ܚܲܠܝܘܼܬܼܵܐ ܕܟܼܠ ܕܒܲܐܪܥܵܐ. ܡܸܛܠ ܕܲܠܚܲܠܝܘܼܬܼܵܐ ܕܝܼܕܲܥܬܼܵܐ ܕܥܲܠ ܐܲܠܵܗܵܐ: ܡܸܕܸܡ ܠܵܐ ܦܵܚܹ̇ܡ܀ ܡܵܪܝܵܐ: ܡܠܝܼ ܠܹܒܿܝ ܚܲܝܹ̈ܐ ܕܲܠܥܵܠܲܡ. ܚܲܝܹ̈ܐ ܕܲܠܥܵܠܲܡ ܐܝܼܬܲܝܗܘܿܢ: ܒܘܼܝܵܐܵܐ ܕܒܲܐܠܵܗܵܐ. ܐܲܝܢܵܐ ܕܒܼܘܼܝܵܐܵܐ ܕܒܲܐܠܵܗܵܐ ܐܸܫܟܲܚ: ܝܲܬܝܼܪ ܠܹܗ ܒܘܼܝܵܐܵܐ ܕܥܵܠܡܵܐ. ܡ̣ܢ ܡܵܢܵܐ ܡܸܬܼܪܓܸܫ ܠܒܲܪܢܵܫܵܐ ܕܩܲܒܸܠ̣ ܚܸܟܼܡܬܼܵܐ ܡ̣ܢ ܪܘܼܚܵܐ؟ ܡ̣ܢ ܗܵܝ̇ ܕܡܲܠܦܵܐ ܠܹܗ ܙܢܲܝ̈ܵܐ ܕܡܲܟܿܝܼܟܼܘܼܬܼܵܐ. ܒܟܲܤܝܘܼܬܹܗ: ܘܲܒܼܪܸ̈ܓܼܫܵܘܗܝ. ܘܡܸܬܼܓܠܸܐ ܠܹܗ ܒܡܲܕܥܹܗ: ܕܐܲܝܟܲܢܵܐ ܡܸܬܼܩܲܢܝܵܐ ܗ̤ܝ ܡܲܟܿܝܼܟܼܘܼܬܼܵܐ. ܘܡ̣ܢ ܡܵܢܵܐ ܡܸܬܼܪܓܸܫ ܕܲܡܛ̣ܵܐ pb. 432 ܠܡܲܟܿܝܼܟܼܘܼܬܼܵܐ؟ ܡ̣ܢ ܗܵܝ̇ ܕܲܢܕܼܝܼܕܼ ܥܠܵܘܗܝ ܕܢܸܫܦܲܪ ܠܥܵܠܡܵܐ ܗܵܢܵܐ: ܒܗܘܼܦܵܟܼܵܘ̈ܗܝ ܐܵܘ ܒܡܸܠܬܹܗ: ܘܤܲܢܝܵܐ ܒܥܲܝܢܵܘ̈ܗܝ ܬܸܫܒܿܘܿܚܬܹܗ ܕܥܵܠܡܵܐ ܗܵܢܵܐ. ܡܵܢܵܐ ܐܸܢܘܿܢ ܚܲܫܹ̈ܐ؟ ܓܘܼܪ̈ܵܓܹܐ ܐܸܢܘܿܢ ܕܲܒܼܨܸܒܼ̈ܘܵܬܼܵܐ ܘܲܒܼܫܲܪ̈ܒܹܐ ܕܥܵܠܡܵܐ ܗܵܢܵܐ ܤܝܼܡܝܼܢ: ܕܲܚܫܲܚܬܼܵܐ ܡܙܝܼܥܝܼܢ ܕܦܲܓܼܪ̈ܵܐ ܠܤܘܼܢܩܵܢܵܐ: ܕܠܵܐ ܒܵܛ̇ܠܝܼܢ ܓܘܼܪ̈ܵܓܲܝܗܘܿܢ ܟܡܵܐ ܕܐܝܼܬܼܵܘܗܝ ܥܵܠܡܵܐ. ܒܲܪܢܵܫܵܐ ܕܹܝܢ ܕܐܸܫܬܘܼܝ ܠܡܲܕܥܵܐ ܐܲܠܵܗܵܝܵܐ: ܘܲܛܥܸܡ̣ ܘܐܲܪܓܸܫ̣ ܒܡܸܕܸܡ ܕܲܡܝܲܬܲܪ ܡ̣ܢ ܗܵܠܹܝܢ: ܠܵܐ ܥܵܐ̇ܠܝܼܢ ܓܘܼܪ̈ܓܹܐ ܕܗܵܠܹܝܢ ܠܠܸܒܹܗ. ܒܲܕܼܕܘܼܟܿܬܼܵܐ ܕܓܘܼܪ̈ܵܓܹܐ ܐܸܚܕܲܬ̤ ܪܸܓܿܬܼܵܐ: ܕܲܡܝܲܬܿܪܵܐ ܡ̣ܢ ܕܝܼܠܗܘܿܢ. ܘܠܵܐ ܩܵܪܒܿܝܼܢ ܓܘܼܪ̈ܵܓܹܐ ܕܨܸܒܼ̈ܘܵܬܼܵܐ: ܘܐܲܝܠܹܝܢ ܕܡܸܢܗܹܝܢ ܡܸܬܼܝܲܠ̈ܕܵܢ ܠܠܸܒܹܗ. ܐܸܠܵܐ ܩܵܝ̇ܡܝܼܢ ܠܒܲܪ: ܟܲܕܼ ܒܲܛܝܼܠܝܼܢ. ܠܵܘ ܟܲܕܼ ܗܸܢܘܿܢ ܓܘܼܪ̈ܓܲܝ ܚܲܫܹ̈ܐ ܠܲܝܬܿ ܐܸܢܘܿܢ: ܐܸܠܵܐ ܠܸܒܵܐ ܕܲܡܩܲܒܸܠ ܠܗܘܿܢ: ܠܗܘܿܢ ܡܝܼܬܼܵܐ ܗ̄ܘ̣ ܘܚܲܝ: ܠܡܸܕܸܡ ܐ̄ܚܪܹܝܢ. ܠܵܘ ܕܟܲܕܼ ܦܲܚ̣ܫ ܡ̣ܢ ܙܗܝܼܪܘܼܬܼܵܐ ܘܥܲܡܠܵܐ ܕܦܘܼܪܫܵܢܵܐ: ܐܸܠܵܐ ܕܠܲܝܬܿ ܠܹܗ ܬܲܟܼܬܘܼܫܵܐ ܒܪܸܥܝܵܢܹܗ. ܡܸܛܠ ܕܤܲܒܿܝܼܥܵܐ ܬܹܐܪܬܹܗ: ܡ̣ܢ ܒܘܼܤܵܡܵܐ ܕܡܸܕܸܡ ܐ̄ܚܪܹܝܢ. ܐܲܟܼܙܢܵܐ ܕܐ̄ܢܵܫ ܤܲܒܼܝܼܥ ܡ̣ܢ ܤܲܝܒܵܪܬܵܐ ܒܲܤܝܼܡܬܼܵܐ ܘܕܲܗܝܼܢܬܼܵܐ: ܘܡܲܠܝܵܐ ܬܹܐܪܬܹܗ ܡ̣ܢ ܗܵܝ̇ ܕܲܗܝܼܢܘܼܬܼܵܐ ܘܒܼܘܼܤܵܡܵܐ. ܒܵܬܲܪ ܗܲܝܕܹܝܟ ܕܹܝܢ ܚܵܙܹ̇ܐ ܡܹܐܟܼܘܼܠܬܼܵܐ ܕܲܢܕܝܼܕܼܵܐ ܘܲܡܥܲܪܓܠܵܐ ܒܨܵܐܘܼܬܼܵܗ̇: ܠܵܘ ܒܲܠܚܘܿܕܼ ܠܵܐ ܤܢܝܼܩܵܐ ܥܲܠ ܒܛܝܼܠܘܼܬܼܵܐ ܗܵܝܕܹܝܟ ܗ̤ܝ ܬܹܐܪܬܵܐ ܕܬܸܬܼܟܠܸܐ ܕܠܵܐ ܬܸܪܲܓܼ: ܐܵܘ ܕܢܸܗܘܸܐ ܒܹܗ ܐܵܓܼܘܿܢܵܐ ܒܪܸܥܝܵܢܵܐ ܕܠܵܐ ܢܸܬܼܒܲܩܸܐ ܒܵܗ̇ ܒܓܘܼܪܵܓܼܵܐ: ܐܸܠܵܐ ܐܵܦ ܡܸܬܼܥܲܩܪܵܐ ܘܡܸܫܬܲܓܼܫܵܐ ܒܲܚܙܵܬܼܵܗ̇ ܟ̱ܠܵܗ̇ ܬܹܐܪܬܵܐ. ܠܵܐ pb. 433 ܗ̄ܘ̣ܵܐ ܡܸܛܠ ܡܛܲܪܛܫܘܼܬܼܵܗ̇ ܕܗܵܝ̇ ܒܲܠܚܘܿܕܼ: ܟܒܲܪ ܕܹܝܢ ܐܵܦ ܒܵܗ̇ ܡܢܲܦܩܝܼܢ ܗ̄ܘ̣ܵܘ ܚܲܝܵܘ̈ܗܝ ܡ̣ܢ ܩܕܝܼܡ. ܐܸܠܵܐ ܕܝܼܬܿܝܼܪܵܐܝܼܬܼ ܡ̣ܢ ܦܸܚܡܵܐ ܕܲܡܝܲܬܿܪܘܼܬܼܵܗ̇ ܕܗܵܝ̇ ܤܲܝܒܵܪܬܵܐ ܐ̄ܚܪܹܬܼܵܐ: ܕܲܡܠܵܬܼܵܗ̇ ܠܬܹܐܪܬܵܐ ܒܟܼܠ ܒܘܼܤܵܡ̈ܝܼܢ: ܗܵܟܲܢܵܐ ܐܝܼܬܹܝܗ̇ ܨܒܼܘܼܬܼܵܐ ܕܚܘܼܠܡܵܢ ܢܲܦܫܵܐ. ܠܸܒܵܐ ܕܩܲܒܸܠ̣ ܪܓܸܫܬܼܵܐ ܕܨܸܒܼ̈ܘܵܬܼܵܐ ܪ̈ܘܼܚܵܢܵܝܬܼܵܐ ܚܲܬܿܝܼܬܼܵܐܝܼܬܼ: ܘܬܹܐܘܿܪܝܼܵܐ ܕܥܵܠܡܵܐ ܕܲܥܬܼܝܼܕܼ: ܒܗܵܢܵܘ ܙܢܵܐ ܗܵܘ̇ܝܵܐ ܬܹܐܪܬܹܗ ܒܥܘܼܗܕܵܢܗܘܿܢ ܕܚܲܫܹ̈ܐ. ܘܐܲܟܼܙܢܵܐ ܕܐܸܢ ܐ̄ܢܵܫ ܢܸܨܛܪܸܟܼ ܡ̣ܢ ܥܘܼܬܼܪܵܐ: ܘܡܵܛܹ̇ܐ ܠܡܸܤܟܹܢܘܼܬܼܵܐ: ܘܗܵܘܹ̇ܐ ܨܪܝܼܟܼ ܡ̣ܢ ܤܲܝܒܵܪܬܵܐ ܗܵܝ̇ ܫܒܼܝܼܚܬܼܵܐ ܘܲܡܝܲܬܲܪܬܵܐ ܕܒܹܝܬܼ ܡܲܠܟܘܼܬܼܵܐ ܡܸܬܼܦܲܪܦܲܥ ܗ̄ܘ̣ܵܐ: ܘܢܸܛܥܸܐ ܗܸܢܝܵܢܵܐ ܘܛܲܥܡܵܐ ܕܝܼܠܵܗ̇. ܘܠܵܐ ܡܸܟܹܝܠ ܢܸܫܬܲܟܼܚܘܼܢ ܠܹܗ ܗܵܢܘܿܢ ܬܘܼܩܵܢܹ̈ܐ ܫܒܼܝܼ̈ܚܹܐ: ܘܢܸܗܘܸܐ ܤܪܝܼܩ ܐܸܤܛܘܼܡܟܹܗ ܡ̣ܢ ܒܘܼܤܵܡܵܐ ܕܕܼܘܼܢܗܘܿܢ: ܡ̇ܢ ܐܵܢܲܢܩܹܐ ܐܝܼܬܼ ܠܹܗ ܕܢܸܬܼܦܢܸܐ ܘܐܵܦ ܥܲܠ ܡܹܐܟܼܘܼܠܬܼܵܐ ܕܤܲܓܝܸ ܒܨܝܼܪܵܐ. ܗܵܟܲܢܵܐ ܗܵܘܹ̇ܐ ܐܲܝܢܵܐ ܕܐܸܫܬܿܘܝܼ ܠܚܘܼܠܡܵܢ ܢܲܦܫܹܗ. ܕܐܸܢ ܢܸܨܛܪܸܟܼ ܡ̣ܢ ܒܘܼܤܵܡܵܐ ܗܵܘ̇ ܐܲܠܵܗܵܝܵܐ: ܟܲܕܼ ܡܲܗܡܸܐ ܡ̣ܢ ܙܸܕܼܩܹܗ ܘܢܸܦܸܠ ܒܢܵܘܡܬܼܵܐ ܕܡܲܗܡܝܵܢܘܼܬܼܵܐ: ܬܘܼܒܼ ܡܸܬܼܦܬܼܵܐ ܥܲܠ ܡܹܐܟܼܘܼܠܬܼܵܐ ܗܵܝ̇ ܢܕܼܝܼܕܬܵܐ: ܕܲܡܥܲܪܓܠܵܐ ܒܟܼܠܵܗ̇ ܨܵܐܘܼܬܼܵܐ ܘܲܡܛܲܪܛܫܵܐ: ܘܠܵܐ ܒܵܚܪܵܐ ܬܹܐܪܬܵܐ: ܡܸܛܠ ܐܸܤܛܘܼܡܟܵܐ ܕܢܲܦܫܵܐ ܕܲܤܦܝܼܩ. ܢܲܦܫܵܐ ܠܲܡ ܟܦܲܢܬܼܵܐ: ܐܵܦ ܡܲܪܝܼܪ̈ܵܬܼܵܐ ܚܲܠ̈ܝܵܢ ܐܸܢܹܝܢ ܠܵܗ̇܀ ܘܬܼܘܼܒܼ: ܠܵܐ ܠܲܡ ܐ̄ܢܵܫ ܡܸܬܼܗܲܝܡܲܢ ܤܝܼܡܬܼܵܐ ܘܕܼܵܡܹ̇ܝܟ. ܐܸܢ ܕܹܝܢ ܢܵܛܲܪ ܢܵܡܘܿܤܵܐ ܕܲܙܗܝܼܪܘܼܬܼܵܐ ܘܥܲܡܠܵܐ ܕܦܘܼܪܫܵܢܵܐ: ܘܒܼܝܼܕܲܥܬܼܵܐ pb. 434 ܕܡܸܢܗܘܿܢ ܡܵܬܹ̇ܩ ܚܲܝܹ̈ܐ: ܠܲܓܼܡܵܪ ܐܵܓܼܘܿܢܵܐ ܕܓܼܘܼܪ̈ܵܓܲܝ ܚܲܫܹ̈ܐ ܠܪܸܥܝܵܢܹܗ ܠܵܐ ܩܵܪܹܒܼ. ܘܠܵܐ ܗ̄ܘ̣ܵܐ ܒܬܲܟܼܬܘܼܫܵܐ ܟܠܹܝܢ ܕܠܵܐ ܢܸܥܠܘܼܢ ܠܠܸܒܵܐ ܗܸܢܘܿܢ ܓܘܼܪ̈ܵܓܹܐ: ܐܸܠܵܐ ܗ̤ܝ ܤܲܒܼܥܘܼܬܼܵܐ ܕܬܹܐܪܬܵܐ ܢܲܦܫܵܢܵܝܬܼܵܐ ܕܡܲܠܝܵܐ ܡ̣ܢ ܝܑܼܕܲܥܬܼܵܐ: ܘܪܸܓܲܬܼ ܚܸܙ̈ܘܵܢܹܐ ܬܡܝܼ̈ܗܹܐ ܕܒܼܵܗ̇ ܫܟܼܝܼܚܵܐ: ܟܵܠ̇ܝܵܐ ܠܗܘܿܢ ܕܠܵܐ ܢܸܬܼܩܲܪܒܼܘܼܢ ܒܥܸܢܝܵܢܗܘܿܢ ܠܘܲܥܕܵܐ ܕܝܼܠܹܗ. ܠܵܘ ܟܲܕܼ ܦܲܚ̣ܫ ܡ̣ܢ ܙܗܝܼܪܘܼܬܼܵܐ: ܐܲܝܟܼ ܕܐܸܡ̇ܪܹܬܼ: ܘܥܲܡܠܵܐ ܕܦܘܼܪܫܵܢܵܐ: ܕܗܸܢܘܿܢ ܡܢܲܛܪ̈ܵܢܹܝܗ̇ ܕܝܼܕܲܥܬܼܵܐ ܕܲܫܪܵܪܵܐ ܘܢܘܼܗܪܵܐ ܢܲܦܫܵܢܵܝܵܐ: ܐܸܠܵܐ ܕܠܲܝܬܿ ܬܲܟܼܬܘܼܫܵܐ ܠܪܸܥܝܵܢܵܐ: ܡܸܛܠ ܥܸܠ̈ܠܵܬܼܵܐ ܕܐܸܬܼܬܲܩܪܲܚ. ܢܕܝܼܕܼܵܐ ܗ̣̄ܝ ܡܹܐܟܼܘܼܠܬܼܵܐ ܕܡܸܤ̈ܟܹܿܢܹܐ ܥܲܠ ܥܲܬܼܝܼܪܹ̈ܐ: ܘܤܲܝܒܵܪܬܵܐ ܕܲܟܼܪ̈ܝܼܗܹܐ ܥܲܠ ܚܠܝܼ̈ܡܹܐ. ܐܸܠܵܐ ܗ̤ܘ ܥܘܼܬܼܪܵܐ ܘܲܚܠܝܼܡܘܼܬܼܵܐ: ܡ̣ܢ ܙܗܝܼܪܘܼܬܼܵܐ ܘܚܘܼܦܵܛܵܐ ܡܸܬܼܩܲܝܡܝܼܢ. ܘܥܲܠܗܵܕܹܐ: ܗ̤ܘ ܟܝܵܢܵܐ ܤܵܗܹ̇ܕܼ. ܟܡܵܐ ܕܝܲܚ ܒܲܪܢܵܫܵܐ: ܥܲܠ ܙܗܝܼܪܘܼܬܼܵܐ ܘܚܘܼܦܵܛܵܐ ܤܢܝܼܩ: ܘܥܲܠ ܥܝܼܪܘܼܬܼܵܐ ܕܢܸܛܲܪ ܓܲܙܹܗ. ܐܸܢܕܹܝܢ ܬܚܘܼܡܹܗ ܡܲܪܦܸܐ: ܡܸܬܼܟܪܲܗ: ܘܡܸܬܼܚܲܠܲܟ. ܐܵܦܸܢ ܙܲܒܼܢܵܐ ܤܲܓܝܼܐܵܐ ܗܵܘܹ̇ܐ ܒܹܗ ܚܲܝܠܵܐ ܡ̣ܢ ܚܘܼܠܡܵܢܵܐ ܩܲܕܼܡܵܝܵܐ: ܐܸܠܵܐ ܐܸܡܲܬܼܝ ܕܬܼܵܘܤܲܦܬܼܵܐ ܠܵܐ ܢܵܤܹ̇ܒܼ: ܠܲܡܚܝܼܠܘܼܬܼܵܐ ܘܚܲܤܝܼܪܘܼܬܼܵܐ ܫܵܪܹܟܼ. ܐܵܦܠܵܐ ܗ̤ܘ ܟܝܵܢܵܐ ܡܲܠܸܦ ܠܲܢ ܥܲܠ ܗܵܠܹܝܢ: ܡܵܢܵܐ ܡ̣ܢ ܫܡܲܝܵܢ̈ܝܬܼܵܐ ܐܝܼܬܼ: ܕܕܼܘܼܡܝܵܐ ܠܬܲܚܘܝܼܬܹܗ ܠܵܐ ܫܟܼܝܼܚ ܠܲܢ ܒܲܟܼܝܵܢܲܢ؟ ܗܵܐ ܐܵܦ ܡܵܪܲܢ ܠܟܼܠܗܹܝܢ ܪ̈ܘܼܚܵܢܵܝܬܼܵܐ: ܒܲܟܼ̈ܝܵܢܵܝܬܼܵܐ ܡܫܲܪܲܪ ܗ̄ܘ̣ܵܐ ܘܲܡܤܲܬܸܬܼ ܚܲܠܗܹܝܢ ܒܢܲܦ̈ܫܵܬܲܢ. ܠܵܘ ܒܲܠܚܘܿܕܼ ܗܵܠܹܝܢ ܕܪܲܗܒܼܘܿܢܵܐ ܩܲܠܝܼܠ ܕܲܬܼܢܵܢ: ܐܸܠܵܐ ܘܗܵܢܹܝܢ ܕܓܘܫܡܵܐ ܫܲܪܝܼܪܵܐ: ܘܫܘܼܡܠܵܝܵܐ ܘܲܫܪܵܪܵܐ ܕܲܥܬܝܼ̈ܕܼܵܢ ܠܲܢ. ܠܵܐ pb. 435 ܬܸܬܿܕܲܡܲܪ ܒܗܵܠܹܝܢ ܕܐܸܡ̇ܪܹܬܼ: ܠܵܘ ܒܲܠܚܘܿܕܼ ܥܕܲܡܵܐ ܕܢܸܬܼܚܙܸܐ ܦܹܐܪܵܐ ܐܝܼܬܼ ܥܲܡܠܵܐ: ܐܸܠܵܐ ܘܐܵܦ ܥܕܲܡܵܐ ܠܲܚܡܵܠܵܐ: ܥܕܲܟܹܝܠ ܥܲܡܠܵܐ ܐܝܼܬܼܵܘܗܝ. ܚܡܵܠܵܐ ܩܵܪܹܐ ܐ̄ܢܵܐ: ܠܩܲܒܼܪܵܐ. ܐܝܼܬܼ ܕܡܵܐ ܕܲܫܡܸܢ ܦܹܐܪܵܐ: ܚܒܹ̇ܛ ܠܹܗ ܒܲܪܕܼܵܐ ܡܸܢܫܹܠܝ. ܐܲܝܢܵܐ ܕܡܸܬܼܚܲܠܲܛ ܒܨܸܒܼ̈ܘܵܬܼܵܐ ܘܡܸܫܬܪܸܐ ܠܥܸܢܝܵܢܵܐ: ܠܵܐ ܡܸܬܿܛܦܝܼܣ ܕܲܢܟܲܬܲܪ ܚܘܼܠܡܵܢܹܗ ܠܘܵܬܹܗ. ܐܸܡܲ݁ܪ ܐ̄ܢܵܐ ܕܹܝܢ: ܚܫܲܚܬܼܵܐ ܘܲܚܙܵܬܼܵܐ. ܝܼܫܘܿܥ ܡܫܝܼܚܵܐ ܡܲܠܟܵܐ ܕܥܵܠܡܹ̈ܐ: ܐܲܫܘܵܢܝ ܠܪܸܓܿܬܼܵܐ ܕܒܼܵܟܼ. ܪܲܒܿ ܗ̄ܘ̣ ܒܲܪܢܵܫܵܐ ܕܲܒܼܥܸܢܝܵܢܹܗ ܕܐܲܠܵܗܵܐ ܟܲܬܲܪ: ܘܚܲܝܵܘ̈ܗܝ ܒܹܗ ܚܲܠܸܛ̣: ܡ̣ܢ ܟܠ ܒܲܪܢܵܫܵܐ ܕܐܝܼܬܼ ܥܲܠ ܐܲܪܥܵܐ: ܘܡ̣ܢ ܟܠ ܦܘܼܠܚܵܢܵܐ ܕܡܸܬܼܫܲܡܠܸܐ ܡ̣ܢ ܡܠܝܼ̈ܠܹܐ. ܐܸܡܲܬܼܝ ܕܲܡܨܲܠܸܐ ܐܲܢ̄ܬܿ ܠܐܲܠܵܗܵܐ: ܗܵܕܹܐ ܚܕܼܵܐ ܐܸܡܲܪ ܠܹܗ: ܡܵܪܝܵܐ: ܐܲܫܘܵܢܝ ܕܐܹܡܘܼܬܼ ܠܥܸܢܝܵܢܵܐ ܕܥܵܠܡܵܐ ܗܵܢܵܐ ܒܩܘܼܫܬܼܵܐ. ܘܲܚܒܲܫܬܵܗ̇ ܬܲܡܵܢ: ܟ̱ܠܵܗ̇ ܒܵܥܘܼܬܼܵܐ. ܘܐܵܬܼܚܲܦܲܛ: ܕܒܲܥ̇ܒܼܵܕܼܵܐ ܬܸܓܼܡܘܿܪ ܒܵܟܼ ܗܵܕܹܐ. ܐܸܢ ܕܹܝܢ ܠܲܨܠܘܿܬܼܵܐ ܐܵܦ ܤܘܼܥܪܵܢܵܐ ܢܲܩܝܼܦ: ܫܲܪܝܼܪܵܐܝܼܬܼ ܒܚܹܐܪܘܼܬܹܗ ܕܲܡܫܝܼܚܵܐ ܩܵܐܹ̇ܡ ܐܲܢ̄ܬܿ. ܡܝܼܬܼܘܼܬܼܵܐ ܕܲܠܥܵܠܡܵܐ ܐܝܼܬܹܝܗ̇: ܠܵܘ ܗܵܝ̇ ܕܐܸܬܼܪܲܚܲܩ ܐ̄ܢܵܫ ܡ̣ܢ ܚܘܼܠܛܵܢܵܐ ܕܥܸܢܝܵܢ ܨܸܒܼ̈ܘܵܬܹܗ ܒܲܠܚܘܿܕܼ. ܐܸܠܵܐ ܗܵܕܲܐ ܗ̣̄ܝ ܡܝܼܬܼܘܼܬܼܵܐ ܕܲܫܪܵܪܵܐ ܕܡ̣ܢ ܥܵܠܡܵܐ: ܗܵܝ̇ ܕܠܵܐ ܢܸܬܼܝܲܐܲܒܼ ܐ̄ܢܵܫ ܠܛܵܒܼ̈ܬܹܗ ܕܥܵܠܡܵܐ ܒܥܸܢܝܵܢܵܐ ܕܡܲܕܥܹܗ. ܐܸܢܕܹܝܢ ܒܗܸܪܓܵܐ ܫܲܦܝܼܪܵܐ ܡܸܬܼܥܲܝܕܼܝܼܢܲܢ: ܡܸܬܼܟܲܚܕܼܝܼܢ ܚ̄ܢܲܢ ܡ̣ܢ ܚܲܫܹ̈ܐ ܡܵܐ ܕܦܵܓܼܥܝܼܢܲܢ ܒܗܘܿܢ. ܘܝܵܕܼܥ̇ܝܼܢ ܠܗܵܕܹܐ: ܐܲܝܠܹܝܢ ܕܲܩܢܹܝܢ ܢܸܤܝܵܢܵܐ ܒܢܲܦܫܗܘܿܢ. ܘܒܼܵܗ̇ܬܿܝܼܢܲܢ ܡ̣ܢ ܥܸܠܠܵܬܼ̈ܗܹܝܢ ܕܢܸܩܪܘܿܒܼ ܠܗܹܝܢ. ܐܸܡܲܬܼܝ ܕܠܲܥ̇ܒܼܵܕܼܵܐ ܡܸܕܸܡ ܚܠܵܦ pb. 436 ܪܸܚܡܬܹܗ ܕܐܲܠܵܗܵܐ ܡܸܬܼܪܲܓܼܪܲܓܼ ܐܲܢ̄ܬܿ ܠܡܸܩܲܦ: ܤܝܼܡ ܥܲܠ ܪܸܓܿܬܹܗ ܬܚܘܼܡܵܐ ܕܡܵܘܬܵܐ. ܗܵܟܲܢܵܐ ܘܒܹܗ ܒܤܘܼܥܪܵܢܵܐ: ܠܕܲܪܓܼܵܐ ܕܤܵܗܕܘܼܬܼܵܐ ܡܸܫܬܘܸܐ ܐܲܢ̄ܬܿ: ܒܟܼܠ ܚܲܫܵܐ ܘܢܸܟܼܝܵܢܵܐ ܕܒܼܵܟܼ ܢܸܦܓܲܥ ܠܓܼܵܘ ܡ̣ܢ ܬܚܘܼܡܵܐ ܗܵܘ̇: ܐܸܢ ܥܕܲܡܵܐ ܠܚܲܪܬܼܵܐ ܬܚܲܡܤܸܢ ܒܹܗ ܘܠܵܐ ܬܸܬܼܪܲܦܸܐ. ܗܸܪܓܵܐ ܕܚܘܼܫܵܒܼܵܐ ܡܚܝܼܠܵܐ: ܡܲܡܚܸܠ ܠܚܲܝܠܵܐ ܕܲܡܤܲܝܒܿܪܵܢܘܼܬܼܵܐ. ܪܸܥܝܵܢܵܐ ܕܹܝܢ ܡܫܲܪܪܵܐ: ܐܵܦ ܚܲܝܠܵܐ ܕܠܲܝܬܿ ܠܲܟܼܝܵܢܵܐ: ܝܵܗܹ̇ܒܼ ܠܗܵܘ̇ ܕܢܵܩܹ̇ܦ ܠܗܸܪܓܹܗ. ܡܵܪܝܵܐ: ܐܲܫܘܵܢܝ ܕܐܸܤܢܸܐ ܚܲܝܲܝ̈: ܡܸܛܠ ܚܲܝܹ̈ܐ ܕܒܼܵܟܼ. ܕܘܼܒܵܪܵܐ ܕܠܵܠܡܵܐ ܗܵܢܵܐ ܕܵܡܹ̇ܐ: ܠܲܨܚܵܚܵܐ ܡܸܕܸܡ ܕܲܟܼܬܼܝܼ̈ܒܼܵܬܼܵܐ: ܕܒܲܠܚܵܝܵܐ ܐܝܼܬܼܵܘܗܝ ܥܕܲܟܹܝܠ. ܕܟܼܠܡܵܐ ܕܨܵܒܹ̇ܐ: ܘܐܸܡܲܬܼܝ ܕܒܼܵܥܹ̇ܐ ܐ̄ܢܵܫ: ܡܸܬܿܬܵܘܤܲܦ ܘܡܸܬܼܒܲܨܲܪ ܒܹܗ: ܘܥܵܒܹ̇ܕܼ ܫܘܼܚܠܵܦܵܐ ܠܲܟܼܬܼܝܼ̈ܒܼܵܬܹܗ. ܕܘܼܸܒܵܪܵܐ ܕܲܥܬܼܝܼܕܼ ܕܵܡܹ̇ܐ ܠܐܸܫܛܵܪܹ̈ܐ ܕܡܲܤܩܝܼܢ ܠܲܡ̈ܓܲܠܹܐ: ܘܤܝܼܡ ܥܠܲܝܗܹܝܢ ܛܲܒܼܥܵܐ ܕܡܲܠܟܵܐ: ܕܠܵܐ ܬܵܘܤܲܦܬܼܵܐ ܬܵܘܤܲܦܬܼܵܐ ܘܠܵܐ ܒܘܼܨܵܪܵܐ ܗܵܘܹ̇ܐ ܠܡܸܥܒܲܕܼ ܒܗܘܿܢ. ܥܲܕܼ ܐܝܼܬܲܝܢ ܒܹܝܬܼ ܫܘܼܚ̈ܠܵܦܹܐ: ܢܸܚܙܸܐ ܢܲܦܫܲܢ. ܘܥܲܕܼ ܫܲܠܝܼܛܝܼܢܲܢ ܥܲܠ ܟܬܼܵܒܼܵܐ ܕܚܲܝܲܝ̈ܢ ܘܒܼܐܝܼ̈ܕܲܝܢ ܗ̄ܘ̣ ܟܬܼܵܒܲܢ: ܢܸܬܼܚܲܦܲܛ ܘܢܸܥܒܸܕܼ ܒܹܗ ܬܵܘܤܲܦܬܼܵܐ ܒܕܼܘܼܒܵܪܹ̈ܐ ܫܲܦܝܼܪܹ̈ܐ: ܘܢܸܠܚܸܐ ܡܸܢܹܗ ܒܘܼܨܵܪܹ̈ܐ ܕܕܼܘܼܒܵܪܹ̈ܐ ܩܲܕܼ̈ܡܵܝܹܐ ܕܠܵܐ ܚܹܐܪܘܼܬܼܵܐ. ܫܲܠܝܼܛܝܼܢܲܢ ܠܡܸܥܒܲܕܼ ܒܹܗ ܠܚܵܝܵܐ ܕܚܵܘ̈ܒܵܬܼܵܐ: ܟܡܵܐ ܕܐܝܼܬܲܝܢ ܬܢܵܢ. ܘܚܵܫܹ̇ܒܼ ܐܲܠܵܗܵܐ: ܟܠ ܫܘܼܚܠܵܦܵܐ ܕܥܵܒܼܕܝܼܢܲܢ ܒܹܗ. ܕܢܸܫܬܘܸܐ ܠܚܲܝܹ̈ܐ ܕܲܠܥܵܠܲܡ: ܡ̣ܢ ܩܕܼܵܡ ܕܢܸܬܼܩܲܪܲܒܼ ܠܲܩܕܼܵܡ ܡܲܠܟܵܐ: ܘܲܢܤܝܼܡ ܥܠܵܘܗܝ ܛܲܒܼܥܹܗ. ܟܡܵܐ ܕܲܒܼܥܵܠܡܵܐ ܗܵܢܵܐ ܐܝܼܬܲܝܢ: ܠܵܐ ܤܵܐܹ̇ܡ ܐܲܠܵܗܵܐ ܛܲܒܼܥܹܗ: ܠܵܐ ܥܲܠ ܛܵܒܼ̈ܬܲܢ ܘܠܵܐ ܥܲܠ pb. 437 ܒܝܼ̈ܫܵܬܲܢ. ܥܕܲܡܵܐ ܠܫܵܥܲܬܼ ܥܘܼܢܕܵܢܵܐ: ܕܫܲܠܸܡܢܲܢ ܥ̇ܒܼܵܕܼܵܐ ܕܐܲܬܼܪܲܢ: ܘܫܲܪܝܼܢܲܢ ܒܲܚܙܘܼܩܝܵܐ. ܘܙܵܕܹ̇ܩ ܠܲܢ ܡܸܟܹܝܠ ܕܢܸܥܒܸܕܼ: ܐܲܝܟܼ ܕܐܸܡ݂ܲܪ ܛܘܼܒܼܵܢܵܐ ܡܵܪܝ ܐܲܦܪܹܝܡ: ܕܬܸܬܿܕܲܡܸܐ ܠܲܡ ܐܲܡܝܼܢܵܐܝܼܬܼ ܢܲܦܫܲܢ: ܠܐܸܠܦܵܐ ܡܛܲܝܒܼܬܼܵܐ. ܕܐܸܡܲܝ ܢܵܦ̇ܩܵܐ ܠܵܗ̇ ܪܘܼܚܵܐ: ܠܵܐ ܝܵܕܼܥܵܐ. ܘܲܠܚܲܝܠܵܐ ܕܐܸܡܲܬܼܝ ܩܵܪܝܵܐ ܠܹܗ ܩܲܪܢܵܐ ܕܢܲܫܩܸܠ: ܠܵܐ ܝܵܕܲܥ̇. ܘܲܠܬܼܵܘܬܵܒܼܵܐ ܕܐܸܡܲܬܼܝ ܦܵܩܹ̇ܕܼ ܡܵܪܹܐ ܒܲܝܬܼܵܐ ܕܲܢܫܲܢܸܐ: ܠܵܐ ܡܦܵܣ. ܘܐܸܢ ܗܵܠܹܝܢ ܠܲܡ ܡܸܛܠ ܦܘܼܪܫܵܢܵܐ ܙܥܘܿܪܵܐ ܗܵܟܲܢ ܡܛܲܝܒܼܝܼܢ: ܟܲܕܼ ܟܒܲܪ ܬܘܼܒܼ ܗܵܦ̇ܟܿܝܼܢ ܘܡܸܬܼܦܢܹܝܢ: ܟܡܵܐ ܟܲܝ ܠܲܢ ܕܝܼܠܲܢ ܙܵܕܹܩ ܕܢܸܗܘܸܐ ܡܛܲܝ̈ܒܹܐ ܘܲܥܬܼܝܼ̈ܕܹܐ: ܩܕܼܵܡ ܗܵܘ̇ ܦܘܼܪܫܵܢܵܐ ܪܲܒܵܐ ܕܝܵܘܡܵܐ ܕܥܘܼܢܕܵܢܵܐ! ܕܢܸܬܸܠ ܠܲܢ ܡܫܝܼܚܵܐ ܡܸܨܥܵܝܵܐ ܕܚܲܝܲܝ̈ܢ: ܕܲܡܛܲܝ̈ܒܹܐ ܢܸܤܡܲܟܼ ܠܗܵܘ̇ ܓܲܫܪܵܐ ܪܲܒܵܐ ܘܬܲܪܥܵܐ ܕܥܵܠܡܵܐ ܚܲܕܼܬܼܵܐ. ܕܠܹܗ ܫܘܼܒܼܚܵܐ ܠܥܵܠܲܡ ܥܵܠܡܝܼܢ. ܐܵܡܹܝܢ.