Isaac of Nineveh: Discourse 65

pb. 443 ܬܝܵܒܼܘܼܬܼܵܐ ܐܸܡܵܐ ܗ̣̄ܝ ܕܚܲܝܹ̈ܐ. ܦܵܬܼܚܵܐ ܠܲܢ ܬܲܪܥܵܗ̇: ܒܝܲܕܼ ܥܪܘܼܩܝܵܐ ܕܡ̣ܢ ܟܠ. ܛܲܝܒܿܘܼܬܼܵܐ ܗܵܝ̇ ܕܐܵܘܒܸܕܼܢܲܢ ܒܵܬܲܪ ܡܲܥܡܘܿܕܼܝܼܬܼܵܐ ܒܝܲܕܼ ܕܘܼܒܵܪܹ̈ܐ ܕܪܲܦܝܘܼܬܼܵܐ: ܠܵܗ̇ ܡܚܲܕܬܼܵܐ ܒܲܢ ܬܝܵܒܼܘܼܬܼܵܐ: ܒܝܲܕܼ ܦܘܼܪ̈ܫܵܢܹܐ ܕܡܲܕܥܵܐ. ܡ̣ܢ ܡܲܝ̈ܵܐ ܘܪܘܼܚܵܐ ܠܒܸܫܢܲܢ ܠܲܡܫܝܼܚܵܐ: ܟܲܕܼ ܠܵܐ ܐܲܪܓܸܫܢܲܢ ܒܫܘܼܒܼܚܹܗ. ܒܝܲܕܼ ܬܝܵܒܼܘܼܬܼܵܐ ܥܵܐ̇ܠܝܼܢܲܢ ܠܒܼܘܼܤܵܡܹܗ: ܒܝܼܕܲܥܬܼܵܐ ܕܦܘܼܪ̈ܫܵܢܹܐ ܕܒܲܢ ܕܵܢ̇ܚܵܐ. ܕܓܼܠܝܼܙ ܡ̣ܢ ܬܝܵܒܼܘܼܬܼܵܐ: ܓܠܝܼܙ ܡ̣ܢ ܒܘܼܤܵܡܵܐ ܗܵܘ̇ ܕܲܥܬܼܝܼܕܼ. ܕܩܲܪܝܼܒܼ ܠܟܼܠ: ܪܲܚܝܼܩ ܡ̣ܢ ܬܝܵܒܼܘܼܬܼܵܐ. ܕܪܲܚܝܼܩ ܡ̣ܢ ܟܠ ܒܦܘܼܪܫܵܢܵܐ: ܬܲܝܵܒܼܵܐ ܗ̄ܘ̣ ܒܲܫܪܵܪܵܐ. ܡܸܚܕܼܵܐ ܕܐܲܒܼܥܸܕܼ ܒܲܪܢܵܫܵܐ ܡ̣ܢ ܨܹܝܕܼ ܐ̄ܢܵܫܵܐ ܘܲܟܼܢܲܫ̣ ܠܘܵܬܼ ܝܵܬܹܗ: ܒܲܪ ܫܵܥܬܹܗ ܡܸܬܼܪܲܫܡܝܼܢ ܒܡܲܕܥܹܗ ܙܵܘ̈ܥܹܐ ܕܲܬܼܝܵܒܼܘܼܬܼܵܐ. ܡܩܲܒܸܠ ܙܲܪܥܵܐ ܕܚܲܝܹ̈ܐ ܡ̣ܢ ܛܲܝܒܿܘܼܬܼܵܐ: ܘܒܲܕܼܡܘܼܬܼ ܥܘܸܠܵܐ ܡܸܬܿܬܿܙܝܼܥ ܒܹܗ ܚܲܫܹܐ ܕܦܘܼܪܫܵܢܵܐ. ܘܪܵܦܹ̇ܬܼ ܒܠܸܒܵܐ: ܥܘܼܗܕܵܢ ܚܲܝܹ̈ܐ ܕܥܵܠܡܵܐ ܕܲܥܬܼܝܼܕܼܾ: ܘܤܘܼܟܵܝܵܐ ܕܲܩܝܵܡܬܼܵܐ: ܘܪܸܢܝܵܐ ܕܕܼܝܼܢܵܐ. ܠܵܐ ܬܸܤܒܲܪ ܠܵܟܼ ܕܒܸܠܥܵܕܼ ܛܲܝܒܿܘܼܬܼܵܐ ܐܲܠܵܗܵܝܬܼܵܐ: ܢܵܦܹ̇ܠ ܚܲܫܵܐ ܒܪܸܥܝܵܢܵܐ. ܕܲܒܼܝܲܕܼ ܫܘܼܟܵܢܵܐ ܡܩܲܒܸܠ ܟܲܤܝܵܐܝܼܬܼ ܒܪ̈ܲܚܡܹܐ ܐܲܠܵܗܵܝܹ̈ܐ: ܒܲܬܼܘܵܬܼܵܐ ܚܲܪܝܼܦܬܼܵܐ ܒܓܼܘܼܪܵܓܼܵܐ ܕܲܠܘܵܬܼ ܚܲܝܹ̈ܐ. ܐܲܝܟܼ ܕܐܸܡ݂ܲܪ ܐܵܦ ܛܘܼܒܼܵܢܵܐ ܐܹܘܲܓܼܪܝܼܣ: ܥܸܩܵܪܵܐ ܠܲܡ ܡܫܝܼܓܼܵܢܵܐ ܐܝܼܬܼܵܘܗܝ: ܬܘܵܬܼ ܢܲܦܫܵܐ ܚܲܡܝܼܡܬܼܵܐ: pb. 444 ܕܡ̣ܢ ܡܵܪܝܵܐ ܒܝܲܕܼܸ ܡܲܠܲܐܟܹ̈ܐ ܩܲܕܝܼ̈ܫܹܐ ܠܐܲܝܠܹܝܢ ܕܬܼܵܝ̇ܒܿܝܼܢ: ܠܕܼܘܼܟܵܝܵܐ ܕܡ̣ܢ ܚܲܫܹ̈ܐ ܒܲܒܼܛܝܼܠܘܼܬܼܵܐ ܡܸܬܼܝܲܗܒܵܐ܀ ܘܬܼܘܼܒܼ ܐܵܡܲܪ: ܢܘܼܪܵܐ ܕܟܼܘܼܪܵܐ ܐܝܼܬܹܝܗ̇: ܬܘܵܬܼ ܢܲܦܫܵܐ ܚܲܡܝܼܡܬܼܵܐ: ܕܲܒܼܛܲܝܒܿܘܼܬܹܗ ܕܲܡܫܝܼܚܵܐ ܗܵܘ̇ܝܵܐ ܠܢܲܦܫܵܐ ܒܥܸܕܵܢܵܐ ܕܲܨܠܘܿܬܼܵܐ: ܘܲܒܼܬܹܐܘܿܪܝܼܵܐ ܥܘܼܗܕܵܢܵܐ ܡܲܕܼܪܸܟܼ. ܓܠܝܼܙܘܼܬܼܵܗ̇ ܕܹܝܢ ܡܲܐܤܹܝܢ: ܡܲܝ̈ܵܐ ܚܲܝܹ̈ܐ. ܪܹܫܵܐ ܕܲܬܼܝܵܒܼܘܼܬܼܵܐ: ܡܘܼܟܵܟܼܵܐ ܕܠܵܐ ܐܸܤܟܹܡ. ܤܸܩܠܵܐ ܕܢܲܚ̈ܬܹܐ: ܕܘܼܘܵܕܼܵܐ ܗ̄ܘ̣ ܕܲܬܼܝܵܒܼܘܼܬܼܵܐ. ܐܘܼܪܚܵܐ ܠܘܵܬܼ ܚܸܟܼܡܬܼܵܐ: ܡܛܲܟܿܤܘܼܬܼܵܐ ܗ̣̄ܝ ܕܗܲܕܵܡܹ̈ܐ. ܐܲܫܝܼܕܼܘܼܬܼܵܐ ܕܦܲܓܼܪܵܐ: ܕܘܼܘܵܕܼܵܐ ܗ̣̄ܝ ܕܚܸܟܼܡܬܼܵܐ. ܚܸܟܼܡܬܼܵܐ ܕܲܫܪܵܪܵܐ: ܚܵܘܪܵܐ ܗ̄ܘ̣ ܕܒܲܐܠܵܗܵܐ. ܚܵܘܪܵܐ ܕܒܲܐܠܵܗܵܐ: ܫܸܬܼܩܵܐ ܗ̄ܘ̣ ܕܚܘܼ̈ܫܵܒܹܐ. ܫܸܠܝܵܐ ܕܬܲܪܥܝܼܬܼܵܐ: ܒܗܝܼܠܘܼܬܼܵܐ ܗ̄ܘ̣ ܕܦܘܼܪܫܵܢܵܐ. ܒܠܝܼܠܘܼܬܼܵܐ ܕܪܸ̈ܓܼܫܹܐ: ܢܸܒܼܥܵܐ ܗ̣̄ܝ ܕܡܲܚܫ̈ܒܼܵܬܼܵܐ. ܪܓܸܫܬܼܵܐ ܕܒܲܐܠܵܗܵܐ: ܥܘܼܡܩܵܐ ܗ̣̄ܝ ܕܡܘܼܟܼܵܟܼܵܐ. ܬܹܐܘܿܪܝܼܵܐ ܕܲܫܪܵܪܵܐ: ܡܝܼܬܼܘܼܬܼܵܐ ܗ̣̄ܝ ܕܠܸܒܵܐ. ܠܸܒܵܐ ܕܲܒܼܩܘܼܫܬܼܵܐ ܡܝܼܬܼ ܠܥܵܠܡܵܐ: ܒܐܲܠܵܗܵܐ ܢܵܒܲܗ ܟ̱ܠܹܗ. ܡܝܼܬܼܘܼܬܼܵܐ ܕܲܫܪܵܪܵܐ: ܡܸܬܿܬܿܙܝܼܥܵܢܘܼܬܼܵܐ ܗ̣̄ܝ ܕܚܲܝܹ̈ܐ. ܛܵܒܲܐ ܗ̣̄ܝ ܕܲܢܤܘܼܩ ܚܲܝܹ̈ܐ ܒܦܵܘܫܵܐ ܕܡ̣ܢ ܟܠ: ܡ̣ܢ ܕܲܢܒܲܢܸܐ ܠܚܲܝܹ̈ܐ ܒܫܘܼܢܵܝܵܐ ܕܡ̣ܢ ܤܵܘܩܵܐ. ܛܵܒܼ ܗ̄ܘ̣ ܡܲܢ ܕܒܼܵܢܹ̇ܐ ܢܲܦܫܹܗ: ܡ̣ܢ ܡܲܢ ܕܒܼܵܢܹ̇ܐ ܬܹܒܹܝܠ. ܛܵܒܼܵܐ ܗ̣̄ܝ ܠܡܸܡܬܲܩ ܚܲܝܹ̈ܐ: ܡ̣ܢ ܕܲܠܡܦܲܠܵܓܼܵܘܼ ܚܲܝܹ̈ܐ. ܐܲܝܢܵܐ ܕܡܲܚܬܼܝܼܢ ܗܲܕܵܡܵܘ̈ܗܝ ܒܲܪ̈ܵܝܹܐ: ܚܲܝܝܼܢ ܙܵܘܥܵܘ̈ܗܝ ܓܵܘܵܝܹ̈ܐ. ܕܚܲܝܼܢ ܗܲܕܵܡܵܘ̈ܗܝ ܒܲܪ̈ܵܝܹܐ: ܐܲܡܝܼܬܼ ܠܗܲܕܵܡܹ̈ܐ ܕܚܸܟܼܡܬܼܵܐ. ܡܘܼܟܵܟܼܵܐ ܕܦܘܼܪܫܵܢܵܐ: ܝܑܼܕܲܥܬܼܵܐ ܗ̄ܘ̣ ܕܲܫܪܵܪܵܐ. ܝܑܼܕܲܥܬܼܵܐ ܕܲܫܪܵܪܵܐ: ܢܸܒܼܥܵܐ ܗ̣̄ܝ ܕܡܘܼܟܵܟܼܵܐ. ܕܡܲܪܝܼܟܼ ܒܠܸܒܹܗ: ܡܲܟܿܝܼܟܼ ܒܦܲܓܼܪܹܗ. ܕܝܲܨܝܼܦ ܒܦܲܓܼܪܹܗ: ܚܲܨܝܼܦ ܒܠܸܒܹܗ. ܕܲܕܼܠܝܼܚ ܒܦܲܓܼܪܹܗ: ܕܠܝܼܚ ܒܠܸܒܹܗ. pb. 445 ܕܲܕܼܠܝܼܚ ܒܠܸܒܹܗ: ܫܲܛܘܼܪ ܒܗܵܘܢܹܗ. ܕܫܲܛܘܼܪ ܒܗܵܘܢܹܗ: ܒܝܼ̈ܫܵܢ ܐܘܼܪ̈ܚܵܬܹܗ. ܕܒܼܝܼܫܵܐ ܐܘܼܪܚܹܗ: ܡܝܼܬܼܵܐ ܗ̄ܘ̣ ܒܚܲܝܹ̈ܐ. ܐܸܢ ܡܲܚܸܒܼ ܐܲܢ̄ܬܿ ܡܲܟܿܝܼܟܼܘܼܬܼܵܐ: ܠܵܐ ܬܸܗܘܸܐ ܪܵܚܹܡ ܨܸܒܼܬܼܵܐ. ܒܲܪܢܵܫܵܐ ܪܵܚܹ̇ܡ ܨܸܒܼܬܼܵܐ: ܕܢܤܲܝܒܲܪ ܫܝܼܛܘܼܬܼܵܐ ܠܵܐ ܡܸܫܟܲܚ. ܘܲܕܼܢܸܪܗܲܛ ܠܘܵܬܼ ܥ̇ܒܼܵܕܹ̈ܐ ܨܥܝܼܪܹ̈ܐ: ܩܲܫܝܵܐ ܗ̣̄ܝ ܠܹܗ. ܘܕܲܢܫܲܥܒܸܿܕܼ ܢܲܦܫܹܗ ܠܐܲܝܢܵܐ ܕܲܒܼܨܝܼܪ ܡܸܢܹܗ: ܒܵܗܹ̇ܬܼ. ܥܲܒܼܕܵܐ ܕܐܲܠܵܗܵܐ: ܠܵܐ ܡܸܨܛܲܒܲܬܼ ܒܦܲܓܼܪܹܗ. ܕܲܥ ܕܟܼܠ ܒܲܪܢܵܫܵܐ ܕܪܵܚܹ̇ܡ ܨܸܒܼܬܼܵܐ ܕܦܲܓܼܪܹܗ: ܐܵܦܸܢ ܐܝܼܬܼ ܠܹܗ ܫܲܦܝܼܪ̈ܵܬܼܵܐ: ܢܤܝܼܤܵܐ ܬܹܐܪܬܹܗ. ܘܟܼܠ ܕܪܵܚܹ̇ܡ ܝܘܼܬܼܪܵܢܵܐ ܕܡܸܬܼܚܙܸܐ: ܕܢܸܩܢܸܐ ܚܘܼܒܵܐ ܫܲܪܝܼܪܵܐ ܥܲܡ ܐ̄ܢܵܫ ܠܵܐ ܡܸܫܟܲܚ. ܘܟܼܠ ܕܪܵܗܹ̇ܛ ܥܲܠ ܐܝܼܩܵܪܹ̈ܐ: ܥܲܒܼܕܵܐ ܗ̄ܘ̣ ܕܥܵܠܡܵܐ ܗܵܢܵܐ. ܐܸܢ ܤܢܹܝܢ ܥܠܲܝܟ ܟܠ ܕܗܵܠܹܝܢ ܥܵܒܼ̇ܕܝܼܢ: ܐܲܢ̄ܬܿ ܐܲܪܚܸܩ ܡܸܢܗܹܝܢ. ܠܡܲܟܿܝܼܟܼܘܼܬܼܵܐ ܘܢܲܟܼܦܘܼܬܼܵܐ: ܚܲܕܼ ܐܵܕܫܵܐ ܕܫܝܼܛܘܼܬܼܵܐ ܡܥܲܕܲܪ. ܘܐܲܝܢܵܐ ܕܪܵܚܹ̇ܡ ܐܝܼܩܵܪܵܐ ܘܨܼܒܼܬܼܵܐ: ܫܪܵܪܵܐ ܕܗܵܠܹܝܢ ܡܸܢܹܗ ܠܵܐ ܬܸܒܼܥܸܐ. ܐܸܢ ܪܵܚܹ̇ܡ ܐܲܢ̄ܬܿ ܢܲܟܼܦܘܼܬܼܵܐ: ܠܵܐ ܬܸܗܘܸܐ ܪܵܚܹ̇ܡ ܦܸܗܝܵܐ. ܦܸܓܼܥܹ̈ܐ ܕܥܵܪܨܝܼܢ ܥܠܲܝܟ ܒܝܲܕܼ ܦܸܗܝܵܐ: ܕܒܲܙܗܝܼܪܘܼܬܼܵܐ ܬܹܐܚܘܿܕܼ ܒܢܲܦܫܵܟܼ ܠܢܲܟܼܦܘܼܬܼܵܐ: ܠܵܐ ܫܵܒܼܩ̇ܝܼܢ. ܟܠ ܕܪܵܚܹ̇ܡ ܦܸܗܝܵܐ: ܗ̤ܘ ܠܵܐ ܐܝܼܬܼܵܘܗܝ ܢܲܟܼܦܵܐ. ܘܟܼܠ ܕܐܲܚܝܼܕܼ ܒܥܵܠܡܵܝܹ̈ܐ: ܕܢܸܗܘܸܐ ܡܲܟܿܝܼܟܼܵܐ: ܠܵܐ ܬܗܲܝܡܸܢ. ܘܟܼܠ ܕܪܵܚܡܵܐ ܗ̄ܘ̣ ܕܐܲܠܵܗܵܐ: ܪܵܚܹ̇ܡ ܟܵܘܫܵܐ. ܒܲܪܢܵܫܵܐ ܦܲܗܵܝܵܐ ܕܢܸܛܲܪ ܒܢܲܦܫܹܗ ܫܪܵܪܵܐ ܕܠܵܐ ܛܘܼܠܫܵܐ: ܠܵܐ ܡܸܫܟܲܚ. ܬܝܵܒܼܘܼܬܼܵܐ ܤܲܓܝܼ̈ܐܹܐ ܡܚܵܘܹ̇ܝܢ: ܠܲܝܬܿ ܕܲܩܢܸܐ ܠܵܗ̇ ܫܲܪܝܼܪܵܐܝܼܬܼ: ܐܸܠܵܐ ܐܲܝܢܵܐ ܕܚܲܫܝܼܫ ܒܠܸܒܹܗ. ܚܲܫܵܐ ܕܠܸܒܵܐ: ܤܲܓܝܼ̈ܐܹܐ pb. 446 ܪܵܗ̇ܛܝܼܢ ܕܢܸܫܟܿܚܘܼܢ. ܠܲܝܬܿ ܕܡܸܫܟܲܚ ܠܹܗ ܒܲܫܪܵܪܵܐ: ܐܸܠܵܐ ܐܲܝܢܵܐ ܕܲܩܢܸܐ ܫܸܬܼܩܵܐ ܐܲܡܝܼܢܵܐܝܼܬܼ. ܟܠ ܕܥܲܒܼܕܵܐ ܗ̄ܘ̣ ܕܐܲܠܵܗܵܐ: ܡܲܚܸܒܼ ܚܲܫܝܼܫܘܼܬܼܵܐ. ܟܠ ܒܲܪܢܵܫܵܐ ܕܲܩܢܸܐ ܤܲܓܝܼܐܘܼܬܼܵܐ ܕܡܸܠܹ̈ܐ: ܐܵܦܸܢ ܬܡܝܼ̈ܗܵܬܼܵܐ ܢܸܫܬܲܥܸܐ: ܕܲܥ ܕܲܤܦܝܼܩ ܗ̄ܘ̣ ܡ̣ܢ ܠܓܼܵܘ. ܚܲܫܵܐ ܕܲܠܓܼܵܘ: ܦܓܼܘܼܕܼܵܐ ܗ̄ܘ̣ ܕܪܸ̈ܓܼܫܹܐ. ܐܸܢ ܪܵܚܹ̇ܡ ܫܪܵܪܵܐ ܐܲܢ̄ܬܿ: ܗ̤ܘܝܼ ܪܵܚܹ̇ܡ ܫܸܬܼܩܵܐ. ܒܲܕܼܡܘܼܬܼ ܫܸܡܫܵܐ ܥܵܒܹ̇ܕܼ ܠܵܟܼ ܗܵܢܵܐ ܕܬܸܬܼܢܲܗܲܪ ܒܐܲܠܵܗܵܐ: ܘܦܵܪܹܩ ܠܵܟܼ ܡ̣ܢ ܗܲܓܵܓܹ̈ܐ ܕܠܵܐ ܝܑܼܕܲܥܬܼܵܐ: ܠܹܗ ܠܐܲܠܵܗܵܐ ܡܚܲܝܸܕܼ ܠܵܟܼ ܫܸܬܼܩܵܐ. ܒܙܲܒܼܢܵܐ ܕܗܲܢܝܼ ܠܵܟܼ ܤܝܵܡ ܒܘܼܪܟܵܟܼ: ܠܵܐ ܬܸܬܼܚܲܦܲܛ ܕܬܸܥܒܸܿܕܸ ܠܹܗ ܫܘܼܠܵܡܵܐ. ܠܘܲܝ ܠܵܐ ܡܸܬܼܦܤܸܩ ܗ̄ܘ̣ܵܐ: ܟܡܵܐ ܕܐܝܼܬܲܝܟ ܒܗܵܠܹܝܢ ܚܲܝܹ̈ܐ. ܘܲܒܼܙܲܒܼܢܵܐ ܕܲܟܼܢܝܼܫ ܒܹܗ ܪܸܥܝܵܢܵܟܼ: ܠܵܐ ܬܸܦܤܘܿܩ ܨܠܘܿܬܼܵܟܼ. ܠܵܐ ܬܸܚܫܘܿܒܼ ܒܸܛܠܵܢܵܐ ܐܘܼܟܵܐ ܕܲܨܠܘܿܬܼܵܐ ܟܢܝܼܫܬܼܵܐ: ܡܸܛܠ ܦܵܘܫܵܐ ܕܡܲܙܡܘܿܪܹ̈ܐ. ܝܲܬܝܼܪ ܡ̣ܢ ܢܩܵܫܵܐ ܕܦܸܬܼܓܼܵܡܹ̈ܐ: ܒܪܵܟܼܵܐ ܕܒܲܨܠܘܿܬܼܵܐ ܐܲܚܸܒܼ. ܐܸܡܲܬܼܝ ܕܝܵܗ̇ܒܵܐ ܠܵܟܼ ܐܝܼܕܼܵܐ ܗܵܕܹܐ: ܗ̤ܝ ܬܡܲܠܸܐ ܠܵܟܼ ܚܠܵܦ ܢܸܫܡܸܫܬܼܵܐ. ܐܸܡܲܬܼܝ ܕܒܼܵܗ̇ ܒܬܸܫܡܸܫܬܼܵܐ ܡܸܫܬܲܟܿܢܵܐ ܠܵܟܼ ܡܵܘܗܲܒܼܬܼܵܐ ܕܕܸܡ̈ܥܹܐ: ܠܵܐ ܬܸܚܫܘܿܒܼ ܒܘܼܤܵܡܵܐ ܕܲܒܼܗܹܝܢ ܒܸܛܠܵܢܵܐ ܕܡܸܢܵܗ̇. ܫܘܼܡܠܵܝܵܐ ܗ̄ܘ̣ ܕܲܨܠܘܿܬܼܵܐ: ܫܘܼܟܵܢܵܐ ܕܕܸܡ̈ܥܹܐ. ܠܵܐ ܬܸܬܿܕܲܡܲܪ ܐܸܢܗ̤ܘ ܕܐܝܼܬܼ ܐܸܡܲܬܼܝ ܕܒܲܪܝܼܟܼ ܐܲܢ̄ܬܿ ܒܲܨܠܘܿܬܼܵܐ ܘܲܟܼܢܝܼܫ ܒܵܗ̇ ܪܸܥܝܵܢܵܟܼ: ܘܲܫܠܸܐ ܡ̣ܢ ܨܠܘܿܬܼܵܐ. ܗܵܕܹܐ ܡܸܫܟܲܚ ܐܲܢ̄ܬܿ: ܐܵܦ ܒܬܸܫܡܸܫܬܼܵܐ: ܐܵܦ ܒܩܸܪܝܵܢܵܐ. ܒܙܲܒܼܢܵܐ ܕܲܡܒܲܕܲܪ ܪܸܥܝܵܢܵܟܼ: ܝܲܬܿܝܿܪ ܡ̣ܢ ܨܠܘܿܬܼܵܐ ܒܩܸܪܝܵܢܵܐ ܟܲܬܲܪ. ܐܘܼܪܚܵܐ ܕܩܸܪܝܵܢܵܟܼ ܥܲܡ ܢܝܼܫܵܐ ܕܕܼܘܼܒܵܪܵܟܼ: ܢܸܗܘܸܐ ܫܘܸܐ. ܠܵܘ ܟܠ ܟܬܼܵܒܹ̈ܐ ܚܵܫ̇ܚܝܼܢ ܠܟܼܘܼܢܵܫܵܐ ܕܪܸܥܝܵܢܵܐ. ܤܘܿܓܼܵܐܐ ܕܹܝܢ ܕܲܟܼܬܼܵܒܹ̈ܐ: ܕܝܘܼܠܦܵܢܵܐ ܐܝܼܬܼ ܒܗܘܿܢ: ܠܕܲܟܼܝܘܼܬܼܵܐ ܕܹܝܢ ܠܵܐ pb. 447 ܚܵܫ̇ܚܝܼܢ. ܦܸܗܝܵܐ ܕܹܝܢ ܕܪܸܥܝܵܢܵܐ ܫܵܒܼܩ̇ܝܼܢ ܥܠܲܝܟܼ ܟܬܼܵܒܹ̈ܐ ܡܫܲܓܼܢܲܝ̈ܵܐ. ܕܲܥ ܕܠܵܘ ܟܠ ܟܬܼܵܒܼ ܕܡܲܠܸܦ ܥܲܠ ܕܸܚܠܲܬܼ ܐܲܠܵܗܵܐ: ܚܵܫܲܚ ܐܵܦ ܠܕܲܟܼܝܘܼܬܼܵܐ ܕܬܹܐܪܬܵܐ ܘܲܟܼܢܝܼܫܘܼܬܼ ܚܘܼ̈ܫܵܒܹܐ. ܥܲܡ ܐܲܝܢܵܐ ܕܠܵܐ ܝܵܕܲܥ̇ ܫܪܵܪܵܐ: ܠܵܐ ܬܸܬܼܚܪܸܐ ܥܲܡܹܗ ܥܲܠ ܚܲܬܿܝܼܬܼܘܼܬܼܵܐ ܕܗܵܠܹܝܢ. ܐܵܦ ܝܲܬܝܼܪ ܡ̣ܢ ܥܲܡܠܹ̈ܐ: ܫܲܠܝܘܼܬܼܵܐ ܐܲܚܸܒܼ. ܝܲܩܲܪ ܠܩܸܪܝܵܢܵܐ ܐܸܢ ܡܲܨܝܵܐ: ܝܲܬܝܼܪ ܡ̣ܢ ܩܵܘܡܵܐ: ܡܲܒܿܘܼܥܵܐ ܗ̄ܘ̣ ܓܹܝܪ ܕܲܨܠܘܿܬܼܵܐ ܕܟܼܝܼܬܼܵܐ. ܠܡܸܒܼܤܵܐ ܒܪܲܡ: ܘܠܵܐ ܠܲܓܼܡܵܪ. ܐܸܙܕܲܗ̄ܤ ܡ̣ܢ ܦܲܚܵܐ. ܥܸܩܪܵܐ ܗܘ̣ ܕܕܘܼܒܵܪܵܐ ܙܘܼܡܵܪܵܐ. ܒܪܲܡ ܗܵܕܹܐ ܕܲܥ: ܕܦܸܬܼܓܼܵܡܹ̈ܐ ܕܥܲܡ ܦܸܗܝܵܐ ܠܥܲܡܠܵܐ ܕܓܼܘܼܫܡܵܐ ܝܲܬܿܝܼܪ ܚܵܫ̇ܚܝܼܢ. ܡܝܲܬܲܪ ܗ̄ܘ̣ ܚܲܫܵܐ ܕܪܸܥܝܵܢܵܐ: ܡ̣ܢ ܠܹܐܘܬܼܵܐ ܕܓܘܼܫܡܵܐ. ܒܙܲܒܼܢܵܐ ܕܡܲܐܝܼܢܘܼܬܼܵܐ ܗ̤ܘܝܼ ܡܸܬܼܥܲܝܲܕ: ܕܲܬܼܙܝܼܥ ܠܲܛܢܵܢܵܐ ܩܲܠܝܼܠ. ܪܲܒܲܬܼ ܓܹܝܪ ܡܸܬܿܬܿܥܝܼܪ ܠܸܒܵܐ: ܡܲܚܸܡ ܓܹܝܪ ܘܲܠܙܵܘ̈ܥܹܝܗ̇ ܕܢܲܦܫܵܐ. ܐܲܝܟܲܢܵܐ ܕܠܘܼܩܒܲܠ ܪܸܓܿܬܼܵܐ: ܗܵܟܲܢܵܐ ܡܥܲܕܪܵܐ ܚܸܡܬܼܵܐ ܕܲܟܼܝܵܢܵܐ: ܐܵܦ ܒܙܲܒܼܢܵܐ ܕܡܲܐܝܼܢܘܼܬܼܵܐ: ܫܵܕܼܝܵܐ ܓܹܝܪ ܩܲܪܝܼܪܘܼܬܼܵܐ ܡ̣ܢ ܢܲܦܫܵܐ. ܒܲܬܼܪܹܝܢ ܥܸܕܵܢ̈ܝܼܢ ܡܥܵܕܼܵܐ ܕܬܹܐܬܸܐ ܥܠܲܝܢ ܗܵܕܹܐ ܐܲܝܟܼ ܕܲܒܼܤܘܿܓܼܵܐܐ: ܡ̣ܢ ܝܘܼܩܪܵܐ ܕܟܲܪܤܵܐ: ܘܡ̣ܢ ܡܚܝܼܠܘܼܬܼܵܐ ܝܲܬܝܼܪܬܵܐ ܕܡ̣ܢ ܥܲܡ̈ܠܹܐ. ܡܛܲܟܿܤܘܼܬܼܵܐ ܕܦܘܼܠܚܵܢܵܐ: ܢܘܼܗܪܵܐ ܗ̣̄ܝ ܕܬܲܪܥܝܼܬܼܵܐ. ܠܲܝܬܿ ܐܲܝܟܼ ܝܑܼܕܲܥܬܼܵܐ. ܟܠ ܨܠܘܿܬܼܵܐ ܕܲܒܼܠܸܠܝܵܐ ܬܩܲܪܸܒܼ: ܡ̣ܢ ܟܠ ܥܲܡ̈ܠܝܼܢ ܕܒܼܐܝܼܡܵܡܵܐ ܬܸܗܘܸܐ ܡܝܲܩܪܵܐ ܒܥܲܝܢܲܝ̈ܟ. ܠܵܐ ܬܵܘܩܲܪ ܟܲܪܤܵܟܼ: ܕܠܵܐ ܢܸܗܘܸܐ ܒܠܝܼܠ ܪܸܥܝܵܢܵܟܼ: ܘܬܸܗܘܸܐ ܫܓܼܝܼܫ ܒܦܸܗܝܵܐ ܟܲܕܼ ܩܵܐܹܡ pb. 448 ܐܲܢ̄ܬܿ ܒܠܸܠܝܵܐ: ܘܲܡܫܲܪܹܝܢ ܗܲܕܵܡܲܝ̈ܟ: ܘܲܡܠܸܐ ܐܲܢ̄ܬܿ ܟ̱ܠܵܟܼ ܪܲܦܝܘܼܬܼܵܐ. ܐܸܠܵܐ ܚܲܫܝܼܟܼܵܐ ܢܲܦܫܵܟܼ: ܘܲܡܕܵܘܕܼܝܼܢ ܙܵܘܥܲܝ̈ܟ: ܘܠܵܐ ܬܸܫܟܲܚ ܬܟܲܢܸܫ ܐܸܢܘܿܢ ܠܘܵܬܼ ܦܸܬܼܓܼܵܡܹ̈ܐ ܟܠ ܟ̱ܠܹܗ ܡܸܛܠ ܥܲܡܛܵܢܵܐ: ܘܢܸܗܘܸܐ ܦܲܟܿܝܼܗ ܥܠܲܝܟ ܛܲܥܡܵܐ ܕܟܼܠܡܸܕܸܡ. ܘܠܵܐ ܢܸܬܼܚܲܠܘܿܢ ܠܵܟܼ ܦܸܬܼܓܼܵܡܹ̈ܐ ܕܙܘܼܡܵܪܵܐ: ܗܵܢܘܿܢ ܕܡܸܛܠ ܩܲܠܝܼܠܘܼܬܼܵܐ ܘܢܲܗܝܼܪܘܼܬܼܵܐ ܕܪܸܥܝܵܢܵܐ: ܡܥܵܕܼ ܒܗܲܢܝܼܐܘܼܬܼܵܐ ܛܵܥܹ̇ܡ ܗܵܘܢܵܐ ܦܘܼܪ̈ܫܵܢܹܐ ܕܲܒܼܗܘܿܢ. ܐܸܡܲܬܝ ܕܛܲܟܼܤܵܐ ܕܦܘܼܠܚܵܢ ܠܸܠܝܵܐ ܐܸܫܬܿܓܸܫ: ܗܵܝܕܹܝܢ ܐܵܦ ܒܦܘܼܠܚܵܢܵܐ ܕܐܝܼܡܵܡܵܐ ܢܸܗܘܸܐ ܗܵܘܢܵܐ ܡܒܲܠܒܲܠ: ܘܪܵܕܹܐ ܒܥܲܡܛܵܢܵܐ. ܘܲܒܼܩܸܪܝܵܢܵܐ ܐܲܝܟܼ ܕܲܡܥܵܕܼ: ܠܵܐ ܡܸܬܼܒܲܤܲܡ. ܫܲܟܿܝܼܢܵܐ ܓܹܝܪ: ܐܲܝܟܼ ܥܲܪܦܸܠܵܐ ܥܲܠ ܙܵܘ̈ܥܹܐ. ܘܐܸܢܗܘ̤ ܕܒܲܨܠܘܿܬܼܵܐ ܢܸܬܿܬܿܙܝܼܥܘܼܢ: ܘܐܸܢ ܒܗܸܪܓܵܐ. ܒܘܼܤܵܡܵܐ ܕܒܼܐܝܼܡܵܡܵܐ ܡܸܫܬܲܟܲܢ ܠܥܲܢܘܵܝܵܐ: ܡ̣ܢ ܢܘܼܗܪܵܐ ܕܦܘܼܠܚܵܢ ܠܸܠܝܵܐ ܢܵܒܲܥ ܥܲܠ ܗܵܘܢܵܐ ܙܲܗܝܵܐ. ܟܠ ܒܲܪܢܵܫܵܐ ܕܢܸܤܝܵܢܵܐ ܕܫܸܠܝܵܐ ܠܵܐ ܢܤܝܼܒܼ ܠܹܗ ܢܘܼܓܼܪܵܐ: ܠܵܐ ܬܤܲܟܸܐ ܕܡܸܕܸܡ ܝܲܬܿܝܼܪ ܬܹܐܠܲܦ ܡܸܢܹܗ ܥܲܠ ܛܵܒܼ̈ܬܼܵܐ ܕܥܲܢܘܵܝܹ̈ܐ: ܐܵܦܸܢ ܪܲܒܲܬܼ ܚܲܟܿܝܼܡ ܘܡܲܠܦܵܢ: ܘܐܝܼܬܼ ܠܹܗ ܤܘܿܓܼܵܐܐ ܕܬܲܩ̈ܢܵܬܼܵܐ. ܐܸܙܕܲܗ̄ܪ ܕܠܵܐ ܬܲܡܚܸܠ ܦܲܓܼܪܵܟܼ ܝܲܬܿܝܼܪܵܐ: ܕܲܠܡܵܐ ܬܸܬܼܚܲܝܲܠ ܥܠܲܝܟ ܡܲܐܝܼܢܘܼܬܼܵܐ: ܘܬܲܩܲܪ ܠܢܲܦܫܵܟܼ ܡ̣ܢ ܛܥܵܡܬܼܵܐ ܕܦܘܼܠܚܵܢܵܗ̇. ܐܲܝܟܼ ܕܲܒܼܡܲܤܲܐܬܼܵܐ ܙܵܕܹ̇ܩ ܕܢܸܬܼܩܘܿܠ ܐ̄ܢܵܫ ܕܘܼܒܵܪܹܗ. ܒܙܲܒܼܢܵܐ ܕܤܲܒܿܝܼܥ ܐܲܢ̄ܬܿ: ܐܸܙܕܲܗ̄ܪ ܩܲܠܝܼܠ ܡ̣ܢ ܦܵܪܹܗ̄ܤܝܼܵܐ ܕܥܲܡ ܢܲܦܫܵܟܼ. ܢܲܟܼܦܵܐܝܼܬܼ ܢܸܗܘܸܐ ܡܵܘܬܿܒܼܵܟܼ: ܐܵܦ ܒܥܸܕܵܢܵܐ ܕܲܚܫܲܚܬܼܵܐ. ܝܲܬܝܼܪܵܐܝܼܬܼ ܗ̤ܘܝܼ ܢܟܸܦ ܘܲܙܗܸܐ: ܒܥܸܕܵܢ ܡܲܕܼܡܟܼܵܐ. ܠܵܘ ܒܲܠܚܘܿܕܼ ܒܚܘܼܫܵܒܲܝ̈ܟ: ܐܸܠܵܐ ܘܲܒܼܗܲܕܵܡܲܝ̈ܟ ܟܲܕܼ ܙܗܝܼܪܝܼܢ. ܡ̣ܢ ܡܲܤܒܿܪܵܢܘܼܬܼܵܐ: ܐܸܙܕܲܗ̄ܪ ܒܥܸܕܵܢ ܫܘܼܚ̈ܠܵܦܹܐ ܛܵܒܹ̈ܐ. ܡܚܝܼܠܘܼܬܼܵܟܼ ܕܹܝܢ ܘܒܼܘܿܪܘܼܬܼܟܼ ܕܠܘܼܩܒܲܠ pb. 449 ܩܲܛܝܼܸܢܘܼܬܼܵܗ̇: ܒܨܲܠܘܿܬܼܵܐ ܚܦܝܼܛܬܼܵܐ ܠܡܵܪܲܢ ܚܵܘܵܐ: ܕܲܠܡܵܐ ܬܸܫܬܿܒܸܩ ܕܬܸܬܼܢܲܤܸܐ ܒܤܲܢ̈ܝܵܬܼܵܐ. ܢܲܩܝܼܦܵܐ ܓܹܝܪ ܙܵܢܝܘܼܬܼܵܐ ܠܪܵܡܘܼܬܼܵܐ: ܘܛܵܥܝܘܼܬܼܵܐ. ܠܡܲܤܒܿܪܵܢܘܼܬܼܵܐ. ܒܲܥ̇ܒܼܵܕܼܵܐ ܕܐܝܼܕܲܝ̈ܟ ܡܸܤܲܬܼ ܤܘܼܢܩܵܢܵܟܼ ܐܸܬܼܚܲܫܲܚ: ܡܵܠܘܿܢ ܠܐܲܤܝܼܪܘܼܬܼܵܟܼ ܕܲܒܼܓܼܵܘ ܫܸܠܝܵܐ. ܠܵܐ ܬܸܬܼܡܚܸܠ ܒܤܲܒܼܪܵܟܼ ܥܲܠ ܝܵܨܘܿܦܵܟܼ: ܬܡܝܼܗܝܼܢ ܦܘܼܪ̈ܢܵܤܵܘܗܝ ܕܐܲܠܵܗܵܐ ܠܘܵܬܼ ܒܲܝܬܵܝܵܘ̈ܗܝ: ܕܐܵܦ ܒܡܲܕܼܒܿܪܵܐ ܫܵܗܝܵܐ: ܡܦܲܪܢܸܣ ܠܝܵܬܼܒܲܝ̈ ܥܲܠ ܤܲܒܼܪܹܗ ܕܠܵܐ ܐܝܼ̈ܕܲܝܵܐ ܕܐ̄ܢܵܫܵܐ. ܐܸܢܕܹܝܢ ܤܵܥܲܪ ܠܵܟܼ ܡܵܪܲܢ ܒܗܵܠܹܝܢ ܕܦܲܓܼܪܵܐ ܕܠܵܐ ܥܲܡܠܵܐ: ܟܲܕܼ ܐܲܢ̄ܬܿ ܝܵܨܹ̇ܦ ܐܲܢ̄ܬܿ ܕܢܲܦܫܵܐ ܒܲܠܚܘܿܕܼ: ܗܵܝܕܹܝܢ ܡܸܬܿܬܿܙܝܼܥ ܚܘܼܫܵܒܼܵܐ ܡ̣ܢ ܦܘܼܪ̈ܤܹܐ ܕܩܵܛܘܿܠܵܐ: ܕܥܸܠܬܼܵܐ ܡܸܕܸܡ ܡ̣ܢ ܟܠ ܦܪܘܿܣ: ܡ̣ܢ ܨܹܐܕܲܝܟ ܐܝܼܬܹܝܗ̇ ܠܗܵܕܹܐ ܟ̱ܠܵܗ̇ ܒܛܝܼܠܘܼܬܼܵܐ. ܘܥܲܡܹܗ ܕܚܘܼܫܵܒܼܵܐ: ܫܵܠ̇ܝܵܐ ܡܸܢܵܟܼ ܝܲܨܝܼܦܘܼܬܹܗ ܕܐܲܠܵܗܵܐ. ܘܒܼܵܗ̇ ܒܫܵܥܬܼܵܐ ܢܵܒܼܥ̇ܝܼܢ ܥܠܲܝܟ ܪܸܒܿܘ ܢܸܤܝ̈ܘܿܢܝܼܢ: ܐܸܢ ܡ̣ܢ ܡܲܗܡܝܵܢܘܼܬܼܵܐ ܕܝܵܨ̈ܘܿܦܹܐ: ܘܐܸܢ ܒܚܘܼܕܵܬܼܵܐ ܕܟܹܐܒܹ̈ܐ ܘܲܕܼܟܼܘܼܪ̈ܗܵܢܹܐ ܕܡܸܬܿܬܿܙܝܼܥܝܼܢ ܒܹܗ ܒܦܲܓܼܪܲܢ. ܠܵܘ ܡ̣ܢ ܡܸܬܿܬܿܙܝܼܥܵܢܘܼܬܼܵܐ ܠܚܘܿܕܼ ܡܲܗܡܸܐ ܐܲܠܵܗܵܐ: ܐܸܠܵܐ ܐܸܡܲܬܼܝ ܕܲܡܩܵܘܸܐ ܠܘܵܬܼܵܗ̇ ܪܸܥܝܵܢܵܐ. ܡ̣ܢ ܡܸܬܿܬܿܙܝܼܥܵܢܘܼܬܼܵܐ ܕܹܝܢ ܕܠܵܐ ܒܨܸܒܼܝܵܢܵܐ: ܠܵܐ ܪܵܕܹܐ ܘܕܼܵܐܹ̇ܢ ܐܲܠܵܗܵܐ ܠܐ̄ܢܵܫ. ܐܵܦܠܵܐ ܐܸܢܗ̤ܘ ܕܲܫܠܸܡܢܲܢ ܠܵܗ̇ ܡܠܸܐ ܫܵܥܵܐ: ܘܒܲܪ ܫܵܥܬܹܗ ܙܲܩܬܲܢ ܚܲܫܵܐ: ܘܲܬܼܘܵܬܼܵܐ ܐܲܕܼܪܸܟܼܬܲܢ. ܘܐܵܦ ܡܵܪܲܢ: ܠܵܐ ܡܲܩܸܨ ܠܲܢ ܕܐܲܝܟܼ ܗܵܕܹܐ ܡܲܤܟܿܠܵܢܘܼܬܼܵܐ: ܐܸܠܵܐ ܗܵܝ̇ ܕܚܲܬܿܝܼܬܼܵܐܝܼܬܼ ܢܲܩܦܵܗ̇ ܪܸܥܝܵܢܵܐ. ܗܵܢܵܘ ܕܹܝܢ: ܕܠܲܐܝܠܹܝܢ ܕܠܵܐ ܡܲܪܓܫܵܢܵܐܝܼܬܼ ܚܵܪܘ ܒܵܗ̇ ܘܐܲܝܟܼ ܕܲܒܼܘܵܠܝܼܬܼܵܐ: ܘܠܵܐ ܚܲܫܒܿܘܼܗ̇ ܐܲܝܟܼ ܪܸܢܝܵܐ ܕܥܵܘ̣ܠܵܐ. ܐܲܡܝܼܢܵܐܝܼܬܼ: ܗܵܕܹܐ ܢܨܲܠܸܐ ܠܡܵܪܲܢ: ܡܫܝܼܚܵܐ ܤܵܟܹܗ pb. 450 ܕܲܫܪܵܪܵܐ: ܐܲܕܢܲܚ ܫܪܵܪܵܟܼ ܒܠܸܒܵܪ̈ܵܘܬܲܢ: ܕܐܲܝܟܼ ܨܸܒܼܝܵܢܵܟܼ ܢܸܕܲܥ ܠܲܡܗܲܠܵܟܼܘܼ ܒܐܘܼܪܚܵܟܼ. ܐܸܡܲܬܼܝ ܕܚܘܼܫܵܒܼܵܐ ܡܸܕܸܡ ܒܝܼܫܵܐ ܚܲܕܼܬܼܵܐܝܼܬܼ ܐܵܘ ܡ̣ܢ ܗܵܠܹܝܢ ܕܡ̣ܢ ܢܘܼܓܼܪܵܐ ܤܒܼܝܼܤܵܐܝܼܬܼ ܢܲܦܫܹܗ ܡܚܵܘܸܐ ܒܵܟܼ: ܕܲܥ ܚܲܬܝܼܬܼܵܐܝܼܬܼ: ܕܦܲܚܵܐ ܨܵܒܹ̇ܐ ܠܡܸܛܡܲܪ ܠܵܟܼ. ܘܐܸܬܿܬܿܥܝܼܪ ܥܠܵܘܗܝ: ܒܙܲܒܼܢܵܐ. ܐܸܢܕܹܝܢ ܡ̣ܢ ܗܵܠܹܝܢ ܗ̄ܘ̣ ܕܡ̣ܢ ܓܲܒܵܐ ܕܝܲܡܝܼܢܵܐ ܘܲܕܿܛܵܒܼܬܼܵܐ: ܕܲܥ ܕܲܡܢܵܬܼܵܐ ܡܸܕܸܡ ܕܚܲܝܹ̈ܐ ܨܵܒܹ̇ܐ ܝܵܗܹ̇ܒܼ ܠܵܟܼ ܡܵܪܝܵܐ. ܘܡܸܛܠ ܗܵܕܹܐ: ܤܒܼܝܼܤܵܐܝܼܬܼ ܠܒܲܪ ܡ̣ܢ ܥܝܵܕܼܵܐ ܡܸܬܿܬܿܙܝܼܥ ܒܵܟܼ. ܐܸܢ ܓܹܝܪ ܚܘܼܫܵܒܼܵܐ ܗ̄ܘ̣ ܥܲܡܘܼܛܵܐ: ܘܲܦܠܝܼܓܼ ܐܲܢ̄ܬܿ ܥܠܵܘܗܝ: ܒܲܕܼܠܵܐ ܡܸܫܟܲܚ ܐܲܢ̄ܬܿ ܢܲܗܝܼܪܵܐܝܼܬܼ ܠܡܲܕܼܪܵܟܼܘܼ ܕܐܸܢ ܒܲܝܬܵܝܵܐ ܗ̄ܘ̣ ܐܵܘ ܓܲܢܵܒܼܵܐ: ܘܐܸܢ ܡܥܲܕܪܵܢܵܐ ܐܵܘ ܟܡܹܐܢܬܼܵܢܵܐ ܕܒܸܐܤܟܹܡ ܫܲܦܝܼܪܬܵܐ ܛܫܸܐ: ܒܲܨܠܘܿܬܼܵܐ ܚܲܪܝܼܦܬܼܵܐ ܕܠܸܠܝܵܐ ܘܕܼܐܝܼܡܵܡܵܐ: ܥܲܡ ܫܲܗܪܵܐ ܢܲܓܝܼܪܵܐ ܐܸܬܿܛܲܝܲܒܼ ܥܠܵܘܗܝ: ܘܠܵܐ ܬܸܕܚܹܝܘܗܝ ܡܸܢܵܟܼ ܘܐܵܦܠܵܐ ܬܸܫܠܲܡ ܠܹܗ: ܐܸܠܵܐ ܨܠܘܿܬܼܵܐ ܚܦܝܼܛܬܼܵܐ: ܚܲܡܝܼܡܵܐܝܼܬܼ ܥܒܸܕܼ ܡܸܛܠܵܬܹܗ. ܘܠܵܐ ܬܸܫܠܸܐ ܡ̣ܢ ܕܬܸܩܪܸܐ ܠܡܵܪܲܢ: ܘܗ̤ܘ ܡܚܵܘܸܐ ܢܲܦܫܹܗ ܓܲܠܝܵܐܝܼܬܼ: ܕܡ̣ܢ ܐܲܝܟܵܐ ܗ̄ܘ̣. ܝܲܬܝܼܪ ܡ̣ܢ ܟܠܡܸܕܸܡ: ܫܸܬܼܩܵܐ ܐܲܚܸܒܼ. ܡܩܲܪܸܒܼ ܠܵܟܼ ܠܘܵܬܼ ܦܹܐܪܵܐ: ܕܲܡܚܝܼܠ ܗ̄ܘ̣ ܠܸܫܵܢܵܐ ܠܬܼܘܼܪܓܵܡܹܗ. ܩܲܕܼܡܵܝܑܬܼ: ܚܢܲܢ ܥܵܨܹ̇ܝܢܲܢ ܢܲܦܫܲܢ ܕܢܸܫܬܿܘܿܩ. ܘܗܵܝܕܹܝܢ ܡܸܢܹܗ ܕܫܸܬܼܩܲܢ ܡܸܬܼܝܼܠܸܕܼ ܠܲܢ ܡܸܕܸܡ: ܕܢܵܓܹ̇ܕܼ ܠܲܢ ܠܫܸܬܼܩܵܐ. ܢܸܬܸܠ ܠܵܟܼ ܐܲܠܵܗܵܐ: ܕܬܸܪܓܲܫ ܒܡܸܕܸܡ ܕܡ̣ܢ ܫܸܬܼܩܵܐ ܡܸܬܼܝܼܠܸܕܼ. ܐܸܢ ܕܹܝܢ ܒܕܼܘܼܒܵܪܵܐ ܗܵܢܵܐ ܬܫܲܪܸܐ: ܠܵܐ ܝܵܕܲܥ̇ܢܵܐ ܕܲܟܼܡܵܐ ܢܘܼܗܪܵܐ ܕܵܢܲܚ ܒܵܟܼ ܡ̣ܢ ܗܵܪܟܵܐ. ܠܵܐ ܬܸܤܒܲܪ ܠܵܟܼ ܐܵܚܝ: ܕܗܵܝ̇ ܕܐܲܡܝܼܪܵܐ ܥܲܠ ܗܵܘ̇ ܬܡܝܼܗܵܐ pb. 451 ܐܲܪܤܵܢܝܼܣ: ܕܐܲܒܼܵܗ̈ܵܬܼܵܐ ܘܐܲܚܹ̈ܐ ܡܸܬܼܘܲܥܕܼܝܼܢ ܗ̄ܘ̣ܵܘ ܠܲܚܙܵܬܹܗ: ܝܵܬܹ̇ܒܼ ܗ̄ܘ̣ܵܐ ܥܲܡܗܘܿܢ ܟܲܕܼ ܫܠܸܐ: ܘܲܒܼܫܸܬܼܩܵܐ ܫܵܪܹܐ ܗ̄ܘ̣ܵܐ ܠܗܘܿܢ. ܕܨܸܒܼܝܵܢܹܗ ܒܲܠܚܘܿܕܼ ܗ̄ܘ̣ܵܬܼ ܗܵܕܹܐ: ܐܵܦܸܢ ܒܫܘܼܪܵܝܵܐ ܥ̣ܨܵܐ ܢܲܦܫܹܗ ܠܗܵܕܹܐ. ܗܲܢܝܼܐܘܼܬܼܵܐ ܡܸܕܸܡ ܡܸܬܼܝܲܠܕܵܐ ܒܠܸܒܵܐ ܡ̣ܢ ܕܘܼܪܵܫܵܐ ܕܦܘܼܠܚܵܢܵܐ ܗܵܢܵܐ ܒܵܬܲܪ ܙܲܒܼܢܵܐ: ܘܒܲܩܛܝܼܪܵܐ ܢܵܓܹ̇ܕܼ ܠܦܲܓܼܪܵܐ ܠܲܡܟܲܬܵܪܘܼ ܒܫܸܬܼܩܵܐ. ܤܘܿܓܼܵܐܐ ܕܕܸܡ̈ܥܹܐ ܡܸܬܼܝܲܠ̈ܕܵܢ ܒܲܢ ܒܕܼܘܼܒܵܪܵܐ ܗܵܢܵܐ: ܒܲܚܙܵܬܼܵܐ ܬܡܝܼܗܬܵܐ ܕܡܸܕܸܡ ܡܸܕܸܡ: ܕܡܲܪܓܸܫ ܒܗܘܿܢ ܠܸܒܵܐ ܡܦܲܪܫܵܐܝܼܬܼ. ܒܲܙܒܲܢ ܒܚܲܫܵܐ: ܘܒܲܙܒܲܢ ܡ̣ܢ ܬܸܡܗܵܐ. ܙܵܥܲܪ ܠܹܗ ܓܹܝܪ ܠܸܒܵܐ. ܘܗܵܘܹ̇ܐ ܐܲܝܟܼ ܫܲܒܼܪܵܐ. ܕܡܸܚܕܼܵܐ ܕܐܲܩܸܦ̣ ܒܲܨܠܘܿܬܼܵܐ: ܐܸܬܿܬܿܪܲܥ ܕܸܡ̈ܥܹܐ. ܪܲܒܿ ܗ̄ܘ̣ ܒܲܪܢܵܫܵܐ: ܕܲܒܼܚܘܼܡܤܵܢܵܐ ܕܗܲܕܵܡܵܘ̈ܗܝ: ܥܝܵܕܹ̈ܐ ܬܡܝܼ̈ܗܹܐ ܩܢܸܐ ܠܓܼܵܘ ܢܲܦܫܹܗ. ܟܲܕܼ ܠܟܼܠܗܘܿܢ ܥܲܡ̈ܠܹܐ ܕܕܼܘܼܒܵܪܵܐ ܗܵܢܵܐ ܒܓܲܒܵܐ ܚܲܕܼ ܬܤܝܼܡ: ܘܫܸܬܼܩܵܐ ܒܚܲܕܼ ܓܲܒܵܐ: ܫܸܬܼܩܵܐ ܢܵܬܲܥ. ܙܘܼܗܵܪܹ̈ܐ ܤܲܓܝܼ̈ܐܹܐ ܕܐܲܒܼ̈ܗܵܬܼܵܐ ܐܝܼܬܼ: ܕܟܲܕܼ ܒܲܪܢܵܫܵܐ ܠܘܵܬܼ ܫܸܬܼܩܵܐ ܩ̣ܪܸܒܼ: ܡ̣ܢ ܝܲܬܝܼܪܘܼ ܐܝܼܬܼܵܘܗܝ ܠܹܗ ܥܲܡܠܵܐ ܕܲܢܛܘܼܪܬܿܗܘܿܢ. ܕܲܗܘ̤ܵܘ ܠܗܘܿܢ: ܝܲܬܝܼܪܹ̈ܐ ܠܲܥ̇ܒܼܵܕܼܵܐ. ܘܗ̤ܘ ܐܲܬܼܥܲܠܝܼ: ܠܥܸܠ ܡܸܢܗܘܿܢ. ܒܗܵܝ̇ ܕܲܠܘܵܬܼ ܤܵܟܼܵܐ ܩ̣ܪܸܒܼ. ܐܵܦ ܡܥܲܕܪܵܢܵܐ ܗ̄ܘ̣ ܓܹܝܪ ܕܫܸܠܝܵܐ. ܕܐܲܝܟܼ ܐܲܝܟܲܢ: ܠܵܐ ܡܲܨܝܵܐ ܕܟܲܕܼ ܒܥܘܼܡܪܵܐ ܕܤܲܓܝܼ̈ܐܹܐ ܐܝܼܬܲܝܢ: ܕܠܵܐ ܢܸܦܓܲܥ ܒܲܢ ܐ̄ܢܵܫ: ܐܵܦܠܵܐ ܗܵܘ̇ ܡܲܠܲܐܟܼܵܐ ܕܐܲܠܵܗܵܐ ܐܲܪܤܵܢܝܼܣ: ܕܝܲܬܝܼܪ ܡ̣ܢ ܟܠܢܵܫ ܐܲܚܸܒܼ ܫܸܠܝܵܐ: ܐܸܫܟܲܚ ܦܪܲܩ̣ ܡ̣ܢ ܗܵܕܹܐ. ܤܘܼܩܒܵܠܵܐ ܓܹܝܪ ܕܐܲܒܼ̈ܗܵܬܼܵܐ ܘܐܲܚܹ̈ܐ ܗܵܘܹ̇ܐ ܠܘܵܬܲܢ: ܘܦܸܓܼܓܹ̈ܐ ܕܠܵܐ ܤܘܼܟܵܝ: ܘܡܹܐܙܲܠܬܼܵܐ ܕܲܠܥܹܕܬܵܐ. ܟܲܕܼ ܚ̣ܙܵܐ ܗܵܘ̇ ܒܲܪܢܵܫܵܐ ܫܵܘܹ̇ܐ ܠܛܘܼ̈ܒܹܐ: ܕܠܵܐ ܡܲܨܝܵܐ pb. 452 ܕܢܸܬܼܦܲܠܲܛ ܐ̄ܢܵܫ ܡ̣ܢ ܗܵܠܹܝܢ: ܟܡܵܐ ܕܐܝܼܬܼܵܘܗܝ ܒܩܲܪܝܼܒܼܘܼܬܼܵܐ ܕܥܘܼܡܪܵܐ ܕܲܒܼܢܲܝ̈ܢܵܫܵܐ: ܟܲܕܼ ܛܵܒܼ ܗ̤ܘ ܡܝܼ̈ܠܹܐ ܤܲܓܝܼ̈ܐܹܐ ܡܲܒܼܥܲܕܼ ܗ̄ܘ̣ܵܐ ܒܕܼܘܼܟܿܬܼܵܐ ܕܡܲܥܡܪܹܗ ܡ̣ܢ ܘܲܥܕܵܐ ܕܲܒܼܢܲܝ̈ܢܵܫܵܐ: ܘܐܵܦ ܡ̣ܢ ܝܑܼܚܝܼ̈ܕܼܵܝܹܐ ܕܥܵܡܪܝܼܢ ܗ̄ܘ̣ܵܘ ܒܕܼܘܼ̈ܟܿܝܬܼܵܐ ܗܵܢܹܝܢ: ܗܵܢܵܐ ܦܘܼܪܤܵܐ ܝܑܼܠܸܦ̣ ܡ̣ܢ ܛܲܝܒܿܘܼܬܼܵܐ: ܫܸܬܼܸܩܵܐ ܐܲܡܝܼܢܵܐ. ܕܐܵܦ ܟܲܕܼ ܐܝܼܬܼ ܐܸܡܲܬܸܝ ܕܐܵܢܲܢܩܹܐ ܗ̄ܘ̣ܵܬܼ ܕܢܸܦܬܲܚ ܬܲܪܥܵܐ ܠܐ̄ܢܵܫ̈ܝܼܢ ܡܸܢܗܘܿܢ: ܒܲܚܙܵܬܹܗ ܒܲܠܚܘܿܕܼ ܡܸܬܼܒܲܤܡܝܼܢ ܗ̄ܘ̣ܵܘ: ܥܸܢܝܵܢܵܐ ܕܹܝܢ ܕܡܸܠܬܼܵܐ ܘܕܲܚܫܲܚܬܼܸܵܗ̇: ܝܲܬܝܼܪܵܐ ܗ̄ܘ̣ܵܬܼ ܒܲܝܢܵܬܼܗܘܿܢ. ܐܲܒܼܵܗ̈ܬܼܵܐ ܤܲܓܝܼ̈ܐܹܐ ܐܸܬܿܛܲܟܲܤܘ ܒܲܚܙܵܬܼܵܐ ܗܵܕܹܐ: ܕܢܸܙܕܲܗܪܘܼܢ ܐܵܦ ܗܸܢܘܿܢ ܒܲܩܢܘܿܡܗܘܿܢ: ܕܢܸܫܩܘܿܠ ܬܲܪܒܿܝܼܬܼܵܐ ܥܘܼܬܼܪܗܘܿܢ ܪܘܼܚܵܢܵܐ: ܡ̣ܢ ܝܘܼܠܦܵܢܵܐ ܕܩܲܒܸܠ̣ܘ ܡ̣ܢ ܚܙܵܬܹܗ ܕܛܘܼܒܼܵܢܵܐ. ܚܵܙܹ̇ܝܢ ܗ̄ܘ̣ܵܘ ܠܹܗ ܐܲܡܝܼܢܵܐܝܼܬܼ: ܟܲܕܼ ܫܠܸܐ. ܐܲܝܟܲܢܵܐ ܕܤܲܓܝܼ̈ܐܹܐ ܡܸܢܗܘܿܢ: ܐܝܼܬܼ ܕܟܹܐܦܵܐ ܤܵܐܹ̇ܡ ܗ̄ܘ̣ܵܐ ܒܦܘܼܡܹܗ: ܘܐܝܼܬܼ ܕܚܲܒܼܠܵܐ ܐܵܤܲ̇ܪ ܗ̄ܘ̣ܵܐ ܒܚܲܨܹܗ ܡ̣ܢ ܠܓܼܵܘ ܠܥܘܼܗܕܵܢܵܐ: ܘܐܝܼܬܼ ܕܲܒܼܟܲܦܢܵܐ ܤܲܓܝܼܐܵܐ ܐܵܠܹ̇ܨ ܗ̄ܘ̣ܵܐ ܢܵܦܫܹܗ ܝܲܬܝܼܪ ܡ̣ܢ ܕܲܒܼܟܼܠܙܒܲܢ. ܒܙܲܒܼܢܵܐ ܕܲܥܬܼܝܼܕܼ ܗ̄ܘ̣ܵܐ ܕܢܸܦܘܿܩ ܨܹܝܕܼ ܐ̄ܢܵܫܘܼܬܼܵܐ: ܤܵܐܹ̇ܡ ܗ̄ܘ̣ܵܐ ܐܘܼܠܨܵܢܵܐ ܕܟܲܦܢܵܐ ܥܲܠ ܢܲܦܫܹܗ. ܪܵܘܪܒܼܵܐܝܼܬܼ ܓܹܝܪ ܡܥܲܕܲܪ ܗ̄ܘ̣ܵܐ ܟܲܦܢܵܐ: ܠܘܵܬܼ ܟܢܝܼܟܼܘܼܬܼܵܐ ܕܪܸ̈ܓܼܫܹܐ ܠܐܵܚ̈ܘܿܕܹܝܗ̇. ܘܤܲܓܝܼ̈ܐܹܐ ܕܐܲܝܟܼ ܗܵܠܹܝܢ ܥܵܒܼܕܝܼܢ ܗ̄ܘ̣ܵܘ: ܕܢܸܩܢܘܿܢ ܠܲܢܛܘܼܪܬܵܐ ܗܵܕܹܐ ܪܓܼܝܼܓܲܬܼ ܠܲܚܙܵܬܼܵܐ ܘܡܲܩܢܝܲܬܼ ܚܲܝܹ̈ܐ. ܐܲܒܼ̈ܗܵܬܼܵܐ ܤܲܓܝܼ̈ܐܹܐ ܐܸܫ̇ܟܿܚܹܬܼ: ܐܲܚܲܝ̈: ܪܵܘܪ̈ܒܹܐ ܘܲܬܼܡܝܼ̈ܗܹܐ: ܕܝܲܬܝܼܪ ܡ̣ܢ ܥܲܡ̈ܠܹܐ ܐ̄ܚܪ̈ܵܢܹܐ: ܥܲܠ ܛܘܼܟܵܤܵܐ ܕܪܸ̈ܓܼܫܹܐ ܒܛܝܼܠ ܗ̄ܘ̣ܵܐ ܠܗܘܿܢ: ܘܥܲܠ ܐܸܤܟܹܡܵܐ ܕܦܲܓܼܪܵܐ. ܒܲܕܼܡܸܢܗܘܿܢ ܡܸܬܼܝܼܠܸܕܼ: ܐܵܦ ܛܘܼܟܵܤܵܐ pb. 453 ܕܚܘܼ̈ܫܵܒܹܐ. ܥܸܠ̈ܠܵܬܼܵܐ ܤܲܓܝܼ̈ܐܵܬܼܵܐ ܠܒܲܪ ܡ̣ܢ ܨܸܒܼܝܵܢܵܐ ܡܸܤܬܲܩ̈ܒܿܠܵܢ ܠܒܲܪܢܵܫܵܐ: ܕܥܵܒܼ̈ܕܵܢ ܠܹܗ ܕܢܸܦܘܿܩ ܡ̣ܢ ܬܚܘܼܡܵܐ ܕܚܹܐܪܘܼܬܹܗ. ܘܐܸܠܘܼ ܒܪܸ̈ܓܼܫܵܘܗܝ ܠܵܐ ܙܗܝܼܪ ܡ̣ܢ ܥܝܵܕܼܵܐ ܐܲܡܝܼܢܵܐ ܕܩܲܕܸܡ̣ ܐܲܚܝܼܕܼ ܒܢܲܦܫܵܐ: ܥܵܒܼ̈ܕܵܢ ܠܹܗ ܕܲܠܢܘܼܓܼܪܵܐ ܤܲܓܝܼܐܵܐ ܠܵܐ ܦܵܢܹ̇ܐ ܠܗܵܘܢܹܗ: ܘܢܸܫܟܲܚ ܠܫܸܠܝܹܗ ܩܲܕܼܡܵܝܵܐ. ܬܲܪܒܿܝܼܬܼܵܐ ܕܠܸܒܵܐ: ܥܸܢܝܵܢܵܐ ܕܲܒܼܤܲܒܼܪܹܗ. ܬܲܪܒܿܝܼܬܼܵܐ ܕܹܝܢ ܕܕܼܘܼܒܵܪܵܐ: ܫܪܵܝܵܐ ܕܡ̣ܢ ܟܠ. ܥܘܼܗܪܵܢܵܐ ܕܡܵܘܬܵܐ: ܐܲܤܘܼܪܵܐ ܗ̄ܘ̣ ܛܵܒܼܵܐ ܕܗܲܕܵܡܹ̈ܐ ܒܲܪ̈ܵܝܹܐ. ܒܲܠܘܼܥܵܐ ܕܢܲܦܫܵܐ ܠܘܵܬܼ ܚܲܝܹ̈ܐ: ܚܲܕܼܘܼܬܼܵܐ ܕܲܒܼܤܲܒܼܪܵܐ ܒܓܼܵܘ ܠܸܒܵܐ ܢܵܒܼ̇ܗܵܐ. ܫܸܩܝܵܐ ܕܝܼܕܲܥܬܼܵܐ: ܢܸܤ̈ܝܘܿܢܹܐ ܐܲܡܝܼ̈ܢܹܐ ܕܡ̣ܢ ܬܪ̈ܲܝܗܘܿܢ ܫܘܼܚ̈ܠܵܦܹܐ: ܟܠܝܘܿܡ ܢܵܤܹ̇ܒܼ ܗܵܘܵܢܵܐ ܡ̣ܢ ܠܓܼܵܘ. ܫܘܼܘܵܚܵܐ ܕܠܸܒܵܐ: ܦܝܵܤܵܐ ܕܥܲܠ ܩܝܵܡܬܼܵܐ ܒܗܲܝܡܵܢܘܼܬܼܵܐ ܕܤܲܒܼܪܵܐ ܡܩܲܒܸܠ ܡ̣ܢ ܠܓܼܵܘ܀ ܐܲܫܘܵܢܝ ܡܵܪܝ ܕܐܸܚܙܸܐ ܚܢܵܢܵܟܼ ܒܢܲܦܫܝ: ܡ̣ܢ ܩܕܼܵܡ ܕܐܹܫܲܢܸܐ ܡ̣ܢ ܥܵܠܡܵܐ ܗܵܢܵܐ. ܕܐܲܪܓܸܫ ܒܲܩܢܘܿܡܝ ܒܘܼܝܵܐܵܐ ܒܫܵܥܬܼܵܐ ܗܵܝ̇: ܥܲܡ ܐܲܝܠܹܝܢ ܕܲܒܼܤܲܒܼܪܵܐ ܛܵܒܼܵܐ ܥܢܲܕܼܘ ܡ̣ܢ ܥܵܠܡܵܐ ܗܵܢܵܐ. ܦܬܲܚ ܠܒܲܝ ܐܲܠܵܗܝ ܒܛܲܝܒܿܘܼܬܼܵܟܼ: ܘܕܲܟܵܢܝ ܡ̣ܢ ܫܵܘܬܵܦܘܼܬܼܵܐ ܕܥܲܡ ܚܛܝܼܬܼܵܐ. ܘܲܕܼܪܘܿܫ ܒܠܹܒܿܝ ܐܘܼܪܚܵܐ ܕܲܬܼܝܵܒܼܘܼܬܼܵܐ: ܐܲܠܵܗܝ ܘܡܵܪܝ: ܤܲܒܼܪܝ ܘܫܘܼܒܼܗܵܪܝ: ܒܹܝܬܼ ܓܵܘܤܝ ܥܲܫܝܼܢܵܐ: ܕܒܹܗ ܢܸܢܗܪ̈ܵܢ ܥܲܝ̈ܢܲܝ: ܘܐܸܬܼܒܲܝܲܢ ܒܲܫܪܵܪܵܟܼ ܡܵܪܝܵܐ. ܐܲܫܘܵܢܝ ܡܵܪܝ ܕܐܸܛܥܲܡ ܗܵܘ̇ ܒܘܼܤܵܡܵܐ ܕܫܘܼܟܵܢ ܬܝܵܒܼܘܼܬܼܵܐ: ܕܒܹܗ ܡܸܬܼܦܲܪܫܵܐ ܢܲܦܫܵܐ ܡ̣ܢ ܡܲܥܒܿܕܼܵܢܘܼܬܼܵܐ ܕܥܲܡ ܚܛܝܼܬܼܵܐ ܘܟܼܠܹܗ ܨܸܒܼܝܵܢܵܐ ܕܒܸܤܪܵܐ ܘܲܕܼܡܵܐ. ܐܲܫܘܵܢܝ ܡܵܪܝ ܕܐܸܛܥܲܡ ܠܚܲܫܵܐ ܗܵܢܵܐ: ܕܒܹܗ ܤܝܼܡ ܫܘܼܟܵܢܵܐ ܕܲܨܠܘܿܬܼܵܐ ܕܟܼܝܼܬܼܵܐ. ܐܸܬܼܡܲܢܲܥ ܦܵܪܘܿܩܝ ܠܡܲܥܒܲܪܬܵܐ ܗܵܕܹܐ ܬܡܝܼܗܬܵܐ: ܕܒܼܵܗ̇ ܫܵܒܼܩܵܐ ܢܲܦܫܵܐ ܠܥܵܠܡܵܐ ܡܸܬܼܚܲܙܝܵܢܵܐ: pb. 454 ܘܲܡܫܲܪܹܝܢ ܒܹܗ ܙܵܘ̈ܥܹܐ ܚܲܕܼ̈ܬܹܐ ܠܡܲܥܲܠܬܼܵܐ ܕܲܠܥܵܠܡܵܐ ܪܘܼܚܵܢܵܐ: ܘܢܸܤ̈ܝܵܢܹܐ ܕܡܲܪ̈ܓܫܵܢܘܵܬܼܵܐ ܚܲܕܼ̈ܬܼܵܬܼܵܐ. ܐܲܝܢܵܐ ܕܫܲܦܝܼܪ ܡܫܲܪܸܐ ܘܲܡܫܲܠܸܡ: ܠܗܵܕܹܐ ܫܲܬܼܐܸܤܬܼܵܐ ܤܵܐܹ̇ܡ ܠܕܼܘܼܒܵܪܹܗ. ܘܲܕܼܠܵܐ ܫܲܠܘܵܐ ܠܐܲܠܵܗܵܐ ܡܦܝܼܣ: ܕܢܲܫܘܹܝܘܗܝ ܠܡܲܪܓܫܵܢܘܼܬܼܵܗ̇ ܕܗܵܕܹܐ. ܕܒܼܵܗ̇ ܡܸܙܕܲܥܵܐ ܝܑܼܕܲܥܬܼܵܐ ܕܗܵܘ̇ ܬܘܼܩܵܢܵܐ ܕܲܥܬܼܝܼܕܼ ܒܤܲܒܼܪܵܐ ܕܠܵܐ ܡܸܬܼܚܲܒܲܠ: ܕܡ̣ܢ ܛܲܝܒܿܘܼܬܼܵܐ ܕܐܲܠܵܗܵܐ ܢܛܝܼܪ ܠܲܒܼܢܲܝ̈ܢܵܫܵܐ ܒܵܬܲܪ ܫܘܼܠܵܡܹܗ ܕܥܵܠܡܵܐ ܗܵܢܵܐ. ܐܲܝܢܵܐ ܕܹܝܢ ܕܗܲܦܟܵܐܝܼܬܼ ܡܫܲܪܸܐ: ܡ̣ܢ ܠܥܸܠ ܠܬܲܚܬܿ ܐܵܬܹ̇ܐ. ܗܵܢܵܘ ܕܹܝܢ ܒܚܲܕܼܘܼܬܼܵܐ ܡܫܲܪܸܐ: ܘܲܒܼܒܸܟܼܝܵܐ ܡܫܲܠܸܡ. ܘܗܵܘܹ̇ܐ ܤܪܝܼܩ ܡ̣ܢ ܝܑܼܕܲܥܬܼܵܐ ܘܤܲܒܼܪܵܐ: ܘܐܲܝܟܼ ܦܲܓܼܪܵܐ ܕܠܵܐ ܡܨܲܠܲܡ ܘܐܲܝܟܼ ܓܘܼܫܡܵܐ ܕܠܵܐ ܡܫܲܠܲܡ ܠܩܘܼܒܵܠܵܐ ܕܢܲܦܫܵܐ. ܒܲܕܼܠܵܐ ܐܸܫܬܲܡܠܝܼ ܒܛܲܟܼܤܵܐ ܕܬܲܪܒܿܝܼܬܼܵܐ ܕܲܒܼܡܲܪܒܿܥܵܐ: ܘܐܸܬܼ݂ܵܐ ܠܘܵܬܼ ܫܘܼܡܠܵܝܵܐ ܕܚܲܝܹ̈ܐ ܕܨܲܒܡܵܢܘܼܬܼܵܐ. ܒܘܼܤܪܵܢܵܐ ܕܥܲܠ ܥܸܢܝܵܢ ܥܵܠܡܵܐ: ܐܵܬ̤ܲܐ ܗ̣̄ܝ ܕܢܲܦܫܵܐ ܕܐܲܪܓܫܲܬ̤ ܒܤܲܒܼܪܵܗ̇. ܥܝܼܪܘܼܬܼܵܐ ܟܤܝܼܬܼܵܐ: ܕܲܡܟܿܘܼܬܼܵܐ ܗ̣̄ܝ ܕܲܠܡܸܬܼܚܲܙ̈ܝܵܢܝܵܬܼܵܐ. ܙܲܝܢܵܐ ܕܠܸܒܵܐ: ܗܲܝܡܵܢܘܼܬܼܵܐ ܗ̄ܘ̣ ܕܒܲܡܫܝܼܚܵܐ: ܗܵܘ̇ ܕܲܒܼܪܸܓܿܬܼܵܐ ܕܤܲܒܼܪܵܐ ܐܵܦ ܥܲܠ ܡܵܘܬܵܐ ܡܫܝܼܚ. ܐܲܝܟܼ ܠܵܐ ܡܸܕܸܡ ܚܫܝܼܒܼ ܡܵܘܬܵܐ ܒܥܲܝܢܵܘ̈ܗܝ: ܘܠܵܐ ܓܘܼܙܵܝܵܐ ܕܡ̣ܢ ܐܲܬܼܪܹܗ: ܘܠܵܐ ܩܪ̈ܵܒܹܐ ܕܡ̣ܢ ܫܹܐܕܹ̈ܐ: ܘܠܵܐ ܢܘܼܟܼܪܵܝܘܼܬܼܵܐ ܕܡ̣ܢ ܐ̄ܢܵܫܵܐ: ܘܠܵܐ ܚܤܝܼܟܼܘܼܬܼܵܐ ܕܡ̣ܢ ܒܘܼܝܵܐܹܗ ܕܥܵܠܡܵܐ. ܡܵܢܵܐ ܗ̄ܘ̣ ܒܘܼܝܼܐܵܐ ܕܡ̣ܢ ܡܸܬܼܚܲܙ̈ܝܵܢܝܬܼܵܐ ܘܥܸܢܝܵܢܗܹܝܢ: ܥܲܡ ܒܘܼܤܵܡܵܐ ܕܤܲܒܼܪܵܐ ܕܲܒܼܠܸܒܵܐ ܡܸܬܼܪܓܸܫ؟ ܕܐܲܝܟܼ ܡ̇ܢ ܕܐܸܫܬܲܢܝܼ ܠܹܗ ܡ̣ܢ ܦܲܓܼܪܵܐ ܒܪܵܘܵܝܘܼܬܼܵܗ̇ ܕܚܲܕܼܘܼܬܹܗ: ܒܫܘܼܠܗܵܒܼܵܐ ܕܗܲܝܡܵܢܘܼܬܼܵܐ ܕܲܡܢܲܒܼܪܸܫ ܠܠܸܒܵܐ: ܘܲܡܚܲܦ̈ܝܵܢ pb. 455 ܡܸܢܹܗ ܟܠܗܹܝܢ ܡܸܬܼܚܲܙ̈ܝܵܢܝܵܬܼܵܐ: ܘܠܵܐ ܝܵܕܲܥ̇ ܕܒܲܒܼܪܝܼܬܼܵܐ: ܡܸܛܠ ܚܲܡܝܼܡܘܼܬܼܵܐ ܕܓܼܘܼܫܡܹܗ ܥܲܡ ܙܵܘ̈ܥܲܝ ܢܲܦܫܹܗ: ܘܐܲܝܟܼ ܗܵܘ̇ ܕܡ̣ܢ ܟܲܕܼܘܼ ܒܗܵܝ̇ ܡܲܠܟܿܘܼܬܼܵܐ ܩܵܐܹ̇ܡ ܡܸܤܬܲܒܼܪܵܐ ܠܹܗ ܒܗܲܝܡܵܢܘܼܬܼܵܐ ܕܪܸܥܝܵܢܹܗ. ܐܵܦܸܢ ܓܹܝܪ ܐܝܼܬܼ ܠܲܢ ܩܘܼܛܵܥܵܐ ܒܲܙܒܲܢ ܙܒܲܢ ܡܸܛܠ ܠܚܘܿܕܼܵܝܘܼܬܼܵܐ: ܟܒܲܪ ܕܹܝܢ ܘܲܡܦܲܪܢܤܵܢܵܐܝܼܬܼ ܡܸܫܬܲܒܼܩܵܐ ܗܵܕܹܐ ܠܡܸܗܘܵܐ: ܐܸܠܵܐ ܐܝܼܬܼ ܠܲܢ ܐܵܦ ܒܘܼܝܵܐܵܐ ܕܲܒܼܤܲܒܼܪܵܐ: ܕܪܲܒܿ ܡ̣ܢ ܡܸܠܬܼܵܐ ܒܗܲܝܡܵܢܘܼܬܼܵܐ ܕܠܸܒܲܢ. ܐܲܝܟܲܢܵܐ ܕܲܒܼܗܵܢܵܐ ܤܲܒܼܪܵܐ: ܐܘܼ̈ܠܨܵܢܹܐ ܐܲܝܟܼ ܠܵܐ ܡܸܕܸܡ ܚܫܝܼܒܼܝܼܢ ܠܲܢ: ܘܠܵܐ ܡܵܘܬܵܐ. ܘܫܲܦܝܼܪ ܐܸܡ݂ܲܪ ܐ̄ܢܵܫ ܡ̣ܢ ܠܒܼܝܼ̈ܫܲܝ ܐܲܠܗܵܐ: ܤܵܦ̇ܩܵܐ ܗ̣̄ܝ ܠܲܡ ܓܹܝܪ ܪܸܚܡܬܹܗ ܕܐܲܠܵܗܵܐ ܕܬܸܗܘܸܐ ܒܘܼܝܵܐܐ ܠܲܡܗܲܝܡܢܵܐ: ܐܵܦ ܒܐܲܒܼܕܵܢܵܐ ܕܢܲܦܫܹܗ. ܡܵܢܵܐ ܠܲܡ ܢܲܟܿܘܿܢܵܝܗܝ ܐܘܼ̈ܠܨܵܢܹܐ: ܠܡܲܢ ܕܐܵܦ ܒܘܼ̈ܤܵܡܹܐ ܕܲܢܝܵܚܹ̈ܐ ܫܝܼܛܝܼܢ ܐܸܢܘܿܢ ܠܹܗ ܡܸܛܠ ܛܵܒܼ̈ܬܼܵܐ ܕܲܥܬܼܝܼ̈ܕܼܵܢ؟ ܐܵܦ ܗܵܕܹܐ: ܐܵܚܝ: ܡܙܲܗܲܪ ܐ̄ܢܵܐ ܠܵܟܼ: ܕܲܒܼܟܼܠܹܗ ܕܘܼܒܵܪܵܟܼ: ܢܸܗܘܸܐ ܥܵܠܹ̇ܒܼ ܡܲܬܼܩܵܠܵܐ ܕܲܡܪܲܚܡܵܢܘܼܬܼܵܐ. ܕܬܲܪܓܸܫ ܒܵܗ̇ ܒܗܵܝ̇ ܡܪܲܚܡܵܢܘܼܬܼܵܐ: ܕܐܝܼܬܼ ܠܹܗ ܠܐܲܠܵܗܵܐ ܥܲܠ ܥܵܠܡܹ̈ܐ. ܗܵܠܹܝܢ ܕܝܼܠܲܢ: ܡܲܚܙܝܼܬܼܵܐ ܗܵܘ̈ܝܵܢ ܠܲܢ: ܠܡܸܚܙܵܐ ܒܵܗ̇ ܠܗܵܘ̇ ܬܲܦܢܟܼܵܐ ܫܲܪܝܼܪܵܐ: ܒܐܲܝܠܹܝܢ ܕܲܟܼܝܵܢܵܐܝܼܬܼ ܐܝܼܬܼ ܠܗܵܝ̇ ܐܝܼܬܼܘܼܬܼܵܐ. ܒܗܵܠܹܝܢ ܘܕܲܐܝܟܼ ܗܵܠܹܝܢ ܢܵܗܪܝܼܢܲܢ ܠܡܸܬܿܬܿܙܵܥܘܼ ܥܲܠ ܐܲܠܵܗܵܐ ܒܡܲܕܥܵܐ ܫܲܦܝܵܐ. ܠܸܒܵܐ ܚܲܪܡܵܐ ܡ̣ܢ ܡܬܼܘܿܡ: ܠܵܐ ܡܸܫܬܲܦܸܐ. ܒܲܪܢܵܫܵܐ ܡܪܲܚܡܵܢܵܐ: ܐܵܤܝܵܐ ܗ̄ܘ̣ ܕܢܲܦܫܹܗ. ܕܥܲܝܡܵܐ ܕܚܸܫܟܵܐ: ܐܲܝܟܼ ܕܲܒܼܪܘܼܚܵܐ ܥܲܙܝܼܙܬܵܐ ܪܵܕܹܦ ܡ̣ܢ ܓܵܘܹܗ. ܚܘܼܒܼܠܵܐ ܗ̣̄ܝ ܛܵܒܼܵܐ ܕܥܲܠ ܐܲܠܵܗܵܐ ܗܵܕܹܐ: ܐܲܝܟܼ ܡܸܠܬܹܗ pb. 456 ܕܐܹܘܲܢܓܲܠܝܼܘܿܢ ܕܚܲܝܹ̈ܐ. ܛܘܼܒܼܵܘܗܝ ܠܲܡܪܲܚܡܵܢܵܐ: ܕܲܥܠܵܘܗܝ ܢܸܗܘܘܿܢ ܪ̈ܲܚܡܹܐ. ܤܛܲܪ ܡ̣ܢ ܕܲܠܗܲܠ: ܐܵܦ ܐ̄ܪܵܙܵܢܵܐܝܼܬܼ ܗܵܪܟܵܐ. ܐܲܝܠܹܝܢ ܐܸܢܘܿܢ ܪ̈ܲܚܡܹܐ ܕܡ̣ܢ ܗܵܠܹܝܢ ܪܵܘܪܒܼܝܼܢ؟ ܕܟܲܕܼ ܗ̤ܘ ܡܸܬܿܬܿܙܝܼܥ ܒܪ̈ܲܚܡܹܐ ܥܲܠ ܒܲܪ ܒܸܤܪܹܗ ܘܗܵܘܹ̇ܐ ܠܹܗ ܫܵܘܬܵܦܵܐ ܒܚܲܫܹܗ: ܡܵܪܲܢ ܕܹܝܢ ܡܫܵܘܙܸܒܼ ܠܢܲܦܫܹܗ ܡ̣ܢ ܥܲܡܛܵܢܵܐ ܕܚܸܫܘܿܟܼܘܼܬܼܵܐ ܕܗ̤ܝ ܗ̣̄ܝ ܓܹܗܲܢܵܐ ܡܸܬܼܝܲܕܼܥܵܢܝܼܬܼܵܐ: ܘܲܡܩܲܪܸܒܼ ܠܵܗ̇ ܠܘܵܬܼ ܢܘܼܗܪܵܐ ܕܚܲܝܹ̈ܐ ܠܒܼܘܼܤܵܡܵܗ̇. ܘܫܲܦܝܼܪ ܐܸܡ݂ܲܪ ܛܘܼܒܼܵܢܵܐ ܐܹܘܲܓܼܪܝܼܣ: ܕܐܘܼܪܚܵܐ ܫܦܝܼܬܼܵܐ ܡ̣ܢ ܡܪܲܚܡܵܢܘܼܬܼܵܐ ܗܵܘ̇ܝܵܐ. ܡܸܛܠܗܵܢܵܐ ܐܲܝܟܼ ܕܐܸܡ̇ܪܹܬܼ: ܢܸܗܘܸܐ ܥܵܠܹ̇ܒܼ ܠܟܼܠܗܘܿܢ ܕܘܼܒܵܪ̈ܲܝܟ ܠܸܒܵܐ ܡܪܲܚܡܵܢܵܐ: ܘܬܸܫܟܲܚ ܫܠܵܡܵܐ ܠܘܵܬܼ ܐܲܠܵܗܵܐ. ܐܸܙܕܲܗ̄ܪ ܕܲܠܡܵܐ ܬܹܐܬܸܐ ܒܐܝܼܕܲܝ̈ܟ ܒܝܼܫܬܼܵܐ ܥܲܠ ܐ̄ܢܵܫ ܡܸܡܬܼܘܿܡ: ܐܵܦܠܵܐ ܥܲܠ ܒܝܼܫܵܐ. ܘܡܵܐ ܕܡܵܛ̇ܝܵܐ ܒܐܝܼܕܲܝ̈ܟ ܠܲܡܫܵܘܙܵܒܼܘܼ ܠܹܗ ܠܥܵܘܵܠܵܐ ܡ̣ܢ ܒܝܼܫܬܼܵܐ: ܠܵܐ ܬܲܗܡܸܐ. ܠܵܘ ܕܐܸܢܗ̤ܘ ܕܪܲܚܝܼܩܵܐ ܡܸܢܵܟܼ ܨܒܼܘܼܬܼܵܐ: ܬܹܐܙܲܠ ܬܲܪܡܸܐ ܢܲܦܫܵܟܼ ܒܤܘܼܥܪ̈ܵܢܹܐ ܕܕܲܐܝܟܼ ܗܵܠܹܝܢ. ܕܠܵܘ ܕܝܼܠܵܟܼ ܗ̄ܘ̣ ܗܵܢܵܐ ܥ̇ܒܼܵܕܼܵܐ. ܐܸܠܵܐ ܐܸܢܗ̤ܘ ܕܒܼܐܝܼܕܲܝ̈ܟ ܤܝܼܡܵܐ ܨܒܼܘܼܬܼܵܐ ܘܫܲܠܝܼܛ ܐܲܢ̄ܬܿ ܥܠܹܝܗ̇: ܒܕܲܐܝܟܼ ܕܲܒܼܢܸܤܝܘܿܢܵܐ ܐܸܬܼܩܲܪܒܲܬ̤ ܠܵܟܼ ܨܒܼܘܼܬܼܵܐ ܒܓܸܕܼܫܵܐ ܕܤܘܼܩܒܵܠܵܐ: ܘܐܲܥܠܵܟܼ ܐܲܠܵܗܵܐ ܠܒܼܘܼܚܪܵܢܵܐ ܒܝܲܕܼ ܡܸܫܬܲܒܼܩܵܢܘܼܬܼܵܐ: ܐܸܙܕܲܗ̄ܪ ܒܢܲܦܫܵܟܼ: ܕܲܠܡܵܐ ܬܸܗܘܸܐ ܫܵܘܬܵܦܵܐ ܒܲܕܼܡܹܗ ܕܥܵܘ̇ܠܵܐ: ܒܗܵܝ̇ ܕܠܵܐ ܡܸܬܼܚܲܦܲܛ ܐܲܢ̄ܬܿ ܠܦܘܼܨܵܝܹܗ. ܐܸܠܵܐ ܒܟܼܠܵܗ̇ ܢܲܦܫܵܟܼ ܐܸܬܼܦܲܪܲܣ ܕܲܬܼܫܵܘܙܒܼܝܼܘܗܝ: ܘܐܵܦܸܢ ܠܲܡܡܵܬܼ ܥܲܠ ܐܲܦܵܘ̈ܗܝ. ܤܵܗܕܵܐ ܐܲܢ̄ܬܿ ܫܲܪܝܼܪܵܐܝܼܬܼ ܒܗܵܕܹܐ ܫܵܥܬܼܵܐ: ܘܐܲܝܟܼ ܗܵܘ̇ ܕܲܚܠܵܦ ܚܲܛܝܹ̈ܐ ܡܵܘܬܵܐ ܕܲܨܠܝܼܒܼܵܐ ܩܲܒܸܿܠ. ܘܐܲܦܝܼܣ ܠܐܲܠܵܗܵܐ: ܕܠܵܐ ܬܸܦܘܼܩ ܡܸܢܵܟܼ ܕܝܼܠܵܟ ܗܵܕܹܐ. ܐܸܠܵܐ ܘܐܵܦܸܢ ܫܵܘܹ̇ܐ ܠܒܼܝܼܫܬܼܵܐ: ܒܐܝܼ̈ܕܲܝ pb. 457 ܐ̄ܚܪ̈ܵܢܹܐ ܢܩܲܒܸܠ ܕܝܼܢܵܐ ܕܤܘܼܥܪܵܢܹܗ. ܠܵܘ ܕܝܼܠܵܟܼ ܗ̣̄ܝ ܠܡܸܚܙܵܐ ܫܵܘܝܘܼܬܼܵܐ ܕܤܘܼܥܪ̈ܵܢܵܘܗܝ. ܒܐܝܼܕܲܝ̈ܟ ܕܝܼܠܵܟܼ: ܛܵܒܼܬܼܵܐ ܬܹܐܬܸܐ ܥܠܵܘܗܝ. ܐܸܬܿܕܲܟܼܪ ܠܗܵܘ̇ ܕܲܛܥܝܼܢ ܠܟܼܠ: ܟܲܕܼ ܩܕܼܵܡ ܥܲܝܢܵܘ̈ܗܝ ܐܝܼܬܲܝܗܘܿܢ ܤܘܼܥܪ̈ܵܢܹܐ ܕܟܼܠܢܵܫ: ܘܝܲܬܝܼܪ ܡ̣ܢ ܫܸܡܫܵܐ ܢܵܗ̇ܪܝܼܢ ܩܕܼܵܡܵܘܗܝ: ܘܤܵܦܹ̇ܩ ܠܡܵܘܒܵܕܼܘܼ ܐܸܢ ܒܵܥܹ̇ܐ ܠܟܼܠ ܐ̄ܢܵܫ ܒܗܵܘܦܵܐ ܕܦܘܼܡܹܗ. ܐܲܢ̄ܬܿ ܕܹܝܢ: ܠܵܐ ܗ̄ܘ̣ܵܐ ܕܬܲܦܸܩ ܬܒܲܥܬܼܵܐ ܥܲܠ ܤܘܼܥܪ̈ܵܢܹܐ ܘܥܵܒܼܘܿܕܲܝ̈ܗܘܿܢ ܤܝܼܡ ܐܲܢ̄ܬܿ: ܐܸܠܵܐ ܕܬܸܒܼܥܸܐ ܪ̈ܲܚܡܹܐ ܥܲܠ ܥܵܠܡܵܐ. ܘܬܸܫܗܲܪ ܚܠܵܦ ܦܘܼܪܩܵܢܵܐ ܕܟܼܠ: ܘܬܸܫܬܵܘܬܲܦ ܒܚܲܫܵܐ ܕܟܼܠܢܵܫ: ܕܙܲܕܝܼ̈ܩܹܐ ܘܲܕܚܲܛܵܝܹ̈ܐ. ܘܲܗ̤ܘܲܝܬܿ ܝܵܕܲܥ̇: ܕܐܸܢܗ̤ܘ ܕܫܵܘܹ̇ܐ ܗܵܘ̇ ܡ̇ܢ ܕܗ̤ܘ: ܠܵܐ ܡܲܒܼܥܲܕܼ ܤܲܓܝܼ ܙܲܒܼܢܵܐ: ܕܦܵܟܼܪܵܐ ܠܹܗ ܟܹܐܢܘܼܬܼܵܐ ܒܐܝܼܕܼܵܐ ܕܲܐ̄ܚܪ̈ܵܢܹܐ ܕܫܵܘܹ̇ܝܢ ܠܹܗ ܠܤܘܼܥܪܵܢܵܐ: ܘܐܲܢ̄ܬܿ ܦܵܪܹܩ ܐܲܢ̄ܬܿ ܢܲܦܫܵܟܼ: ܘܗܵܘܹ̇ܐ ܐܲܢ̄ܬܿ ܤܵܗܕܵܐ ܚܲܝܵܐ. ܘܐܵܦܠܵܐ ܗܵܕܹܐ ܙܵܕܹܩ ܠܵܟܼ ܕܬܸܒܼܥܸܐ ܘܬܸܪܢܸܐ: ܐܸܠܵܐ ܠܡܸܒܼܥܵܐ ܥܠܵܘܗܝ ܡ̣ܢ ܡܪܲܚܡܵܢܘܼܬܹܗ ܕܐܲܠܵܗܵܐ: ܕܢܸܫܬܲܚܠܲܦ ܘܢܸܗܘܸܐ ܐܲܝܟܼ ܨܸܒܼܝܵܢܹܗ ܕܐܲܠܵܗܵܐ. ܘܲܒܼܙܲܕܝܼܩܘܼܬܼܵܐ ܢܸܦܘܿܩ ܡ̣ܢ ܚܲܝܹ̈ܐ: ܘܠܵܐ ܒܦܘܿܪܥܵܢ ܥܵܘ̣ܠܵܐ. ܗ̤ܘܝܼ ܚܠܵܦ ܬܵܒܼܘܿܥܵܐ: ܦܵܪܘܿܩܵܐ. ܚܠܵܦ ܪܵܫܘܿܝܵܐ: ܡܢܝܼܚܵܢܵܐ. ܚܠܵܦ ܡܲܫܠܡܵܢܵܐ: ܤܵܗܕܵܐ. ܚܠܵܦ ܡܟܼܵܘܢܵܢܵܐ: ܡܦܝܼܤܵܢܵܐ. ܚܠܵܦ ܡܲܟܿܤܵܢܵܐ: ܤܢܹܐܓܼܪܵܐ. ܚܠܵܦ ܚܲܛܵܝܹ̈ܐ ܐܲܦܝܼܣ: ܕܢܸܤܚܲܢܢܘܼܢ. ܘܥܲܠ ܙܲܕܝܼ̈ܩܹܐ ܨܲܠܵܐ: ܕܢܸܬܼܢܲܛܪܘܼܢ. ܠܒܼܝܼ̈ܫܹܐ ܙܟܼܝܼ: ܒܒܲܤܝܼܡܘܼܬܼܵܟܼ. ܘܲܠܛܲܢܵܢܹ̈ܐ: ܐܲܬܼܡܲܗ ܒܛܵܒܼܘܼܬܼܵܟܼ. ܠܪܵܚܡܲܝ ܟܹܐܢܘܼܬܼܵܐ: ܟܲܚܸܕܼ ܒܲܡܪܲܚܡܵܢܘܼܬܼܵܟܼ. ܥܲܡ ܐܲܠܝܼ̈ܨܹܐ: ܐܸܬܼܐܲܠܨ ܒܲܬܪܥܝܼܬܼܵܟܼ. ܠܟܼܠܢܵܫ: ܐܲܚܸܒܼ. ܘܡ̣ܢ ܟܠܢܵܫ: ܐܲܪܚܸܩ. ܠܡܵܘܬܵܐ: pb. 458 ܐܸܬܼܥܲܗ̄ܕܼ. ܘܲܠܡܲܥܲܠܬܵܟܼ ܕܒܹܗ: ܐܸܬܿܛܲܝܲܒܼ. ܘܲܠܪܲܗܛܵܟܼ: ܨܲܒܸܬܼ. ܥܗܲܕܼ ܕܲܚܛܵܗܹ̈ܐ ܕܟܼܠܢܵܫ: ܠܒܹܝܬܼ ܕܝܼܢܵܐ ܩܵܕܼܡܝܼܢ ܠܗܘܿܢ. ܒܫܵܪ̈ܥܵܬܼܵܐ: ܠܵܐ ܬܼܦܤܘܿܩ ܤܲܒܼܪܵܐ. ܠܵܘ ܕܠܵܐ ܬܸܚܲܫ ܐܵܡܲ݁ܪ ܐ̄ܢܵܐ: ܐܸܠܵܐ ܠܵܐ ܕܠܵܐ ܐܵܤܝܘܼܬܼܵܐ ܬܸܚܫܘܿܒܼ ܕܐܝܼܬܲܝܗܹܝܢ. ܦܲܩܵܚ ܓܹܝܪ ܬܒܼܝܼܪܵܐ ܡ̣ܢ ܡܫܼܬܼܵܐ. ܒܗܵܝ̇ ܕܐܵܦ ܠܲܬܼܒܼܝܼܪܵܐ ܐܝܼܬܼ ܗ̄ܘ̣ ܐܵܤܝܵܐ: ܗܵܘ̇ ܕܲܒܼܥ̣ܵܐ ܪ̈ܲܚܡܹܐ ܥܲܠ ܙܵܩ̈ܘܿܦܹܐ ܒܲܙܩܝܼܦܵܐ: ܗܵܘ̇ ܕܟܲܕܼ ܒܲܙܩܝܼܦܵܐ ܬܠܸܐ ܠܩܵܛ̈ܘܿܠܹܐ ܚܲܤܝܼ. ܟܠ ܚܛܵܗܝܼ̈ܢ ܠܲܡ ܘܓܼܘܼ̈ܕܵܦܝܼܢ ܢܸܫܬܲܒܼܩܘܼܢ ܠܲܒܼܢܲܝ̈ܢܵܫܵܐ: ܗܵܢܵܘ ܕܹܝܢ: ܒܲܬܼܝܵܒܼܘܼܬܼܵܐ. ܒܩܲܠܝܼܠ ܒܸܟܼܝܵܐ ܠܫܸܡܥܘܿܢ ܕܲܟܼܦܲܪ: ܚܲܤܝܼ ܠܹܗ. ܘܒܼܵܬܲܪ ܩܝܵܡܬܹܗ: ܦܩܲܕܼ ܠܹܗ ܠܡܸܗܘܵܐ ܪܹܫܵܐ ܠܲܓܼܙܵܪܹܗ. ܬܠܵܬܼ ܙܲܒܼܢ̈ܝܼܢ ܡܫܲܐܸܠ ܠܹܗ ܪܵܚܹ̇ܡ ܐܲܢ̄ܬܿ ܠܝܼ: ܚܠܵܦ ܬܠܵܬܼ ܙܲܒܼܢ̈ܝܼܢ ܕܲܟܼܦܲܪ ܒܹܗ: ܐܲܝܟܼ ܕܲܢܫܲܪܲܪ ܠܫܘܼܒܼܩܵܢܹܗ. ܡܫܝܼܚܵܐ ܚܠܵܦ ܚܲܛܵܝܹ̈ܐ ܐܸܬܼ݂ܵܐ: ܕܢܲܐܤܸܐ ܠܲܬܼܒܼܝܼܪ̈ܲܝ ܠܸܒܵܐ ܘܢܸܥܨܘܿܒܼ ܟܹܐܒܲܝ̈ܗܘܿܢ. ܪܘܼܚܹܗ ܠܲܡ ܕܡܵܪܝܵܐ ܥܠܲܝ: ܡܸܛܠ ܗܵܢܵܐ ܡܲܫܚܲܢܝ: ܠܲܡܪܲܒܵܪܘܼ ܠܡܸܤ̈ܟܹܢܹܐ. ܘܫܲܠܚܲܢܝ ܠܡܲܐܤܵܝܘܼ ܠܲܬܼܒܼܝܼܪ̈ܲܝ ܠܸܒܵܐ: ܘܲܠܡܲܟܼܪܵܙܘܼ ܠܲܫ̈ܒܲܝܵܐ ܫܘܼܒܼܩܵܢܵܐ: ܘܠܲܥܘܼܝܼܪܹ̈ܐ ܚܙܵܝ̈ܐ: ܘܠܲܡܫܲܪܵܪܘܼ ܠܲܬܼܒܼܝܼܪܹ̈ܐ ܒܫܘܼܒܼܩܵܢܵܐ. ܘܲܫܠܝܼܚܵܐ ܒܐܸܓܲܪܬܹܗ: ܝܼܫܘܿܥ ܡܫܝܼܚܵܐ ܐܸܬ݂ܼܵܐ ܠܥܵܠܡܵܐ: ܠܡܲܚܲܝܘܼ ܠܚܲܛܵܝܹ̈ܐ. ܘܡܵܪܹܗ ܤܵܗܹ̇ܕܼ: ܠܵܐ ܓܹܝܪ ܐܸܬܹ̇ܝܬܼ ܠܙܲܕܝܼ̈ܩܹܐ ܠܡܸܩܪܵܐ. ܠܵܐ ܠܲܡ ܤܢܝܼܩܝܼܢ ܚܠܝܼ̈ܡܹܐ ܥܲܠ ܐܵܤܝܵܐ: ܐܸܠܵܐ ܐܲܝܠܹܝܢ ܕܒܼܝܼܫ ܒܝܼܫ ܥܒܼܝܼܕܼܝܼܢ. ܘܲܬܼܪܹܝܢ ܠܲܡ ܚܲܝܵܒܹ̈ܐ ܐܝܼܬܼ ܗ̄ܘ̣ܵܘ: ܠܚܲܕܼ ܡܵܪܹܐ ܚܵܘܒܵܐ. ܘܲܕܼܠܲܝܬܿ ܗ̄ܘ̣ܵܐ ܠܗܘܿܢ ܠܡܸܦܪܲܥ: ܠܲܬܼܪ̈ܲܝܗܘܿ ܫܒܲܩ̣. ܗܵܢܵܘ ܕܹܝܢ: ܟܲܕܼ ܐܲܦܝܼܤܘܼܗܝ. ܡܚܝܼܠ ܗ̣̄ܘܼ ܟܝܵܢܲܢ ܚܲܠܵܫܵܐ: ܐܸܢ ܬܩܝܼܡ ܠܲܬܼܒܲܥܬܼܵܐ pb. 459 ܟܹܐܢܘܼܬܹܗ ܕܐܲܠܵܗܵܐ. ܒܲܕܼܓܼܘܿܢ: ܒܪ̈ܲܚܡܹܐ ܡܸܬܼܚܲܫܲܚ: ܒܟܼܠܙܒܲܢ ܚܒܼܝܼܫܝܼܢ ܬܚܹܝܬܼ ܚܵܘܒܿܬܼܵܐ. ܠܵܐ ܬܸܚܛܸܐ ܐܘܿ ܒܲܢܵܫܵܐ ܒܤܘܼܟܵܝܵܐ ܕܲܬܼܝܵܒܼܘܼܬܼܵܐ: ܘܠܵܐ ܬܲܫܦܸܠ ܥܲܠ ܬܘܼܟܼܠܵܢ ܫܘܼܒܼܩܵܢܵܐ. ܐܸܬܿܕܲܟܼܪ ܕܡܵܘܬܵܐ: ܠܵܐ ܡܸܫܬܵܘܚܲܪ. ܠܵܐ ܬܸܨܛܲܢܲܥ ܠܡܸܩܪܲܒܼ ܠܗܲܢܝܼܐܘܼܬܼܵܐ ܕܲܚܛܝܼܬܼܵܐ: ܒܬܲܪܥܝܼܬܼܵܐ ܕܚܵܪܥܘܼܬܼܵܐ. ܐܲܠܵܗܵܐ: ܠܵܐ ܡܸܬܼܒܲܙܲܚ. ܩܲܕܝܼܸܡܵܐ ܝܑܼܕܲܥܬܹܗ ܠܚܘܼܫܵܒܼܵܟܼ: ܡܲܕܼܪܸܟܼ ܠܵܟܼ ܓܹܝܪ ܐܘܼܠܨܵܢܵܐ ܡܸܢܫܹܠܝ. ܘܩܵܪܹܐ ܐܲܢ̄ܬܿ: ܘܠܵܐ ܥܵܢܹ̇ܐ ܠܵܟܼ. ܐܸܡܲܬܼܝ ܕܩܵܪܹܒܼ ܐܲܢ̄ܬܿ ܠܘܵܬܼ ܬܸܫܘܝܼܬܼܵܟܼ: ܕܲܡܛ̣ܵܐ ܙܲܒܼܢܵܐ ܠܡܸܕܼܡܲܟܼ: ܐܸܡܲܪ: ܐܘܿ ܬܸܫܘܝܼܬܼܵܐ: ܕܲܠܡܵܐ ܒܗܵܢܵܐ ܠܸܠܝܵܐ ܩܲܒܼܪܵܐ ܥܬܼܝܼܕܼܵܐ ܐܲܢ̄ܬܿܝ ܠܡܸܗܘܵܐ ܠܝܼ: ܘܠܵܐ ܝܵܕܲܥ̇ ܐ̄ܢܵܐ. ܕܲܠܡܵܐ ܚܠܵܦ ܫܸܢܬܼܵܐ ܕܙܲܒܼܢܵܐ. ܗܵܝ̇ ܫܸܢܬܼܵܐ ܕܲܠܥܵܠܲܡ ܥܬܼܝܼܕܼܵܐ ܠܡܸܦܲܠ ܥܠܲܝ ܒܗܵܢܵܐ ܠܸܠܝܵܐ. ܘܐܸܢܵܐ ܡܸܬܼܪܲܥܸܐ ܐ̄ܢܵܐ ܠܛܘܼܝܵܒܼܵܐ ܕܝܵܘ̈ܡܹܐ ܘܝܲܪ̈ܚܹܐ: ܕܠܵܐ ܚܵܙܹ̇ܐ ܐ̄ܢܵܐ ܠܗܘܿܢ. ܥܲܕܼ ܐܝܼܬܼ ܠܵܟܼ ܪܸ̈ܓܼܠܹܐ: ܗܲܪܛ ܒܵܬܲܪ ܦܘܼܠܚܵܢ ܟܹܐܢܘܼܬܼܵܐ: ܡ̣ܢ ܩܕܼܵܡ ܕܢܸܦܸܠ ܒܗܹܝܢ ܗܵܘ̇ ܐܲܤܘܼܪܵܐ: ܕܠܲܝܬܿ ܠܹܗ ܬܘܼܒܼ ܦܘܼܪܤܵܐ ܠܡܸܫܬܪܵܝܘܼ. ܥܲܕܼ ܐܝܼܬܼ ܠܵܟܼ ܐܝܼ̈ܕܲܝܵܐ: ܦܫܘܿܛ ܠܲܫܡܲܝܵܐ ܒܲܨܠܘܿܬܼܵܐ: ܩܕܼܵܡ ܙܲܒܼܢܵܐ ܗܵܘ̇ ܕܢܵܦ̇ܠܝܼܢ ܕܪ̈ܵܥܲܝܟ ܡ̣ܢ ܥܸܩܵܪܗܘܿܢ: ܘܨܵܝܹ̇ܐ ܐܲܢ̄ܬܿ ܠܲܡܕܲܠܵܝܘܼ ܐܸܢܘܿܢ ܘܠܵܐ ܡܸܫܟܲܚ ܐܲܢ̄ܬܿ. ܥܲܕܼ ܐܝܼܬܼ ܠܵܟܼ ܨܸܒܼ̈ܥܵܬܼܵܐ: ܙܩܘܿܦ ܠܘܵܬܼ ܐܲܠܵܗܵܐ ܒܬܲܟܼܫܲܦܬܼܵܐ. ܕܐܵܬܹ̇ܐ ܥܸܕܵܢܵܐ: ܕܡܸܬܼܪܲܦܝܵܐ ܚܝܼܨܘܼܬܼܵܐ ܕܲܓܼܕܼܝܼܠܘܼܬܼܗܹܝܢ ܗܵܝ̇ ܤܩܝܼܠܬܼܵܐ. ܥܲܕܼ ܐܝܼܬܼ ܠܵܟܼ ܥܲܝ̈ܢܹܐ. ܡܠܝܼ ܐܸܢܹܝܢ ܕܸܡ̈ܥܹܐ ܒܲܨܠܘܿܬܼܵܐ ܒܲܒܼܟܼܵܬܼܵܐ ܕܥܲܠ ܐܲܦܲܝ̈ ܚܛܵܗܲܝ̈ܟ. ܩܕܼܵܡ ܫܵܥܬܼܵܐ pb. 460 ܕܢܸܩܪܘܿܡ ܚܸܠܵܐ ܥܲܠ ܐܘܼ̈ܟܵܡܵܬܼܵܐ: ܘܡܸܫܬܲܡܪ̈ܵܢ ܒܲܚܝܵܪܵܐ ܕܠܵܐ ܪܓܸܫܬܼܵܐ ܠܚܲܕܼ ܓܘܿܢܝܵܐ ܘܠܵܐ ܝܵܕܲܥ̇ ܐܲܢ̄ܬܿ. ܥܲܕܼ ܡܛܲܟܲܣ ܠܸܒܵܐ ܡܲܒܿܘܼܥܵܐ ܕܚܘܼ̈ܫܵܒܹܐ ܒܚܲܝܠܵܐ ܦܵܪܘܿܫܵܐ: ܐܸܬܼܪܲܥܵܐ ܐܲܝܠܹܝܢ ܕܲܡܥܲܪܪ̈ܵܢ ܠܚܲܝܲܝ̈ܨ: ܩܕܼܵܡ ܕܡܸܬܿܕܵܘܕܼܵܐ ܢܲܦܫܵܐ ܠܡܲܦܲܩܬܼܵܐ ܕܡܸܢܹܗ: ܘܗܵܘܹ̇ܐ ܒܲܝܬܼܵܐ ܕܲܨܕܸܐ ܡ̣ܢ ܥܵܡܘܿܪ̈ܵܘܗܝ. ܐܘܿ ܚܲܟܿܝܼܡܵܐ: ܠܵܐ ܢܫܲܕܠܵܟܼ ܚܘܼܫܵܒܼܵܐ ܒܤܘܼܟܵܝܵܐ ܕܚܲܝܹ̈ܐ ܐܲܪ̈ܝܼܟܹܐ. ܒܲܕܼܡܘܼܬܼ ܗܲܒܵܒܼܵܐ ܕܢܵܫܹ̇ܒܼ ܒܹܗ ܫܵܘܒܵܐ ܘܟܼܵܡܹ̇ܫ: ܢܵܦܲܚ ܒܵܟܼ ܡ̣ܢ ܓܵܘܵܟܼ: ܚܲܕܼ ܡ̣ܢ ܐܸܤܛܘܼ̈ܟܼܤܹܐ ܕܒܼܵܟܼ. ܘܟܲܕܼ ܠܵܐ ܝܵܕܲܥ̇ ܐܲܢ̄ܬܿ ܡ̣ܢ ܫܸܠܝܵܐ: ܡܸܬܼܪ̈ܲܫܠܵܢ ܒܘܼܪ̈ܟܲܝܟ. ܘܟܲܕܼ ܤܵܒܲܪ ܐܲܢ̄ܬܿ ܕܠܵܘ ܡܸܕܸܡ ܗ̄ܘ̣: ܥܲܕܼ ܡܤܵܘܤܸܐ ܐܲܢ̄ܬܿ ܠܹܗ ܠܟܼܘܼܪܗܵܢܵܐ: ܡܸܢܫܹܠܝ ܩ̣ܪܸܒܼ ܗܵܘ̇ ܟܲܫܝܼܪܵܐ: ܗܵܘ̇ ܕܲܡܓܸܿܚܟܼ ܒܚܲܟܝܼ̈ܡܹܐ. ܐܘܿ ܠܕܼܵܘܝܘܼܬܹܗ ܕܲܟܼܝܵܢܲܢ: ܕܲܟܼܡܵܠ ܐܲܚܝܼܕܼܝܼܢܲܢ ܒܪܸܚܡܬܹܗ: ܠܗܵܘ̇ ܕܠܵܐ ܨܵܒܹ̇ܐ ܐܲܠܵܗܵܐ ܕܢܸܫܒܿܩܲܢ ܒܓܼܵܘܹܗ! ܤܝܼܡ ܠܸܒܵܟܼ ܠܛܘܼܝܵܒܼܵܐ ܕܡܹܐܙܲܠܬܼܵܐ: ܐܘܿ ܒܲܪܢܵܫܵܐ. ܐܲܝܟܼ ܚܲܟܿܝܼܡܵܐ ܗ̤ܘܝܼ ܡܤܲܟܸܐ ܟܠܫܵܥ ܠܲܚܙܘܼܸܩܝܵܐ: ܟܲܕܼ ܡܸܬܼܚܲܫܲܒܼ ܐܲܢ̄ܬܿ ܟܠܝܘܿܡ: ܕܗܵܐ ܡܛ̣ܵܐ ܠܬܲܪܥܵܐ ܐܝܼܙܓܲܕܵܐ ܕܐܸܬ݂ܼܵܐ ܒܵܬܲܪܝ. ܡܵܢܵܐ ܝܲܬܿܝܼܒܼ ܐ̄ܢܵܐ؟ ܡܹܐܙܲܠܬܼܵܐ ܗ̣̄ܝ ܕܲܠܥܵܠܲܡ: ܬܘܼܒܼ ܠܲܝܬܿ ܠܝܼ ܠܡܸܦܢܵܐ ܠܟܼܵܐ. ܒܗܵܢܵܐ ܪܸܥܝܵܢܵܐ ܒܘܼܬܼ: ܒܟܼܠ ܠܸܠܝܵܐ. ܘܲܒܼܗܵܢܵܐ ܚܘܼܫܵܒܼܵܐ ܗܪܘܿܓܼ: ܒܟܼܠ ܐܝܼܡܵܡܵܐ. ܕܡܵܐ ܕܐܸܬ݂ܼܵܐ: ܬܸܦܨܲܚ ܠܐܘܼܸܪܥܹܗ: ܕܬܼܵܐ ܒܲܫܠܵܡ. ܝܸܕܼܥܹ̇ܬܼ ܕܡܹܐܬܼܵܐ ܐܵܬܹ̇ܐ ܐܲܢ̄ܬܿ: ܘܠܵܐ ܐܲܒܼܤ̇ܝܼܬܼ ܒܡܸܕܸܡ ܕܚܵܫܲܝ ܠܝܼ ܠܐܘܼܪܚܵܐ. ܐܸܙܕܵܘܲܕܼ ܠܐܘܼܪܚܵܟܼ ܢܲܓܝܼܪܬܵܐ: ܚܲܟܿܝܼܡܵܐ. pb. 461 ܐܲܪܝܼܡ ܝܘܼܩܪܵܐ ܕܫܸܢܬܼܵܐ ܡ̣ܢ ܠܸܒܵܟܼ: ܙܡܝܼܢܵܐ. ܛܲܟܸܣ ܡܵܐܢܲܝ̈ܟ ܠܡܲܦܲܩܬܼܵܐ: ܥܵܡܘܿܪܵܐ. ܩܪܸܒܼ ܠܹܗ ܘܲܥܕܵܐ ܕܨܲܦܪܵܐ: ܐܵܪܚܵܐ: ܡܵܢܵܐ ܕܲܡܝܟܼ ܐܲܢ̄ܬܿ؟ ܩܘܼܡ ܛܲܝܸܒܼ ܢܲܦܫܵܟܼ: ܡܲܠܵܚܵܐ ܪܵܕܹܐ ܒܝܲܡܵܐ: ܩܘܼܡ ܐܲܬܼܩܸܢ ܡܵܐܢܲܝ̈ ܐܸܠܦܵܟܼ: ܕܠܵܐ ܝܵܕܲܥ ܐܲܢ̄ܬܿ ܒܐܲܝܢܵܐ ܥܸܕܵܢܵܐ ܢܵܦ̇ܩܵܐ ܠܵܟܼ ܪܘܼܚܵܐ. ܐܸܬܼܥܲܬܲܕܼ ܘܐܸܬܿܛܲܝܲܒܼ: ܥܲܕܼܠܵܐ ܢܹܐܬܸܐ ܗܵܘ̇ ܕܲܡܚܲܒܸܿܠ ܨܘܼܪ̈ܵܬܼܵܟܼ. ܨܘܼܪܬܗܘܿܢ ܠܲܡ: ܬܒܲܠܸܐ ܫܝܘܿܠ. ܘܡ̣ܢ ܫܘܼܒܼܚܹܗ ܦܲܐܝܵܐ ܕܲܟܼܝܵܢܵܐ ܢܸܬܿܕܲܚܩܘܼܢ: ܘܲܠܚܘܼܪܒܵܐ ܢܸܫܪܟܼܘܼܢ ܓܘܼܫܡܲܝ̈ܗܘܿܢ. ܐܲܝܵܬܐ ܠܥܘܼܗܕܵܢܵܐ ܒܟܼܠܗܘܿܢ ܥܸܕܵܢܲܝ̈ܟ: ܠܗܵܘ̇ ܚܘܼܒܵܠܵܐ ܓܢܝܼܚ ܚܙܵܬܼܵܐ: ܗܵܘ̇ ܒܘܼܕܵܪܵܐ ܕܠܵܐ ܕܡܘܼܬܼܵܐ ܕܪܸ̈ܓܼܫܲܝܟ: ܘܗܵܝ̇ ܡܲܦܘܼܠܬܼܵܐ ܕܒܸܢܝܵܢܹܗ ܕܓܼܘܼܫܡܵܟܼ: ܗܵܘ̇ ܡܘܼܙܵܓܼܵܐ ܢܲܩܕܵܐ ܕܗܵܘܹ̇ܐ ܤܝܵܢܵܐ ܒܲܫܝܘܿܠ. ܛܘܼܒܼܵܘܗܝ ܠܡܲܢ ܕܲܒܼܚܲܕܼܘܼܬܼܵܐ ܐܵܪܲܥ ܠܹܗ ܠܥܘܼܗܕܵܢܹܗ ܕܗܵܘ̇ ܚܘܼܒܵܠܵܐ! ܛܘܼܒܼܵܘܗܝ ܠܡܲܢ ܕܲܒܼܤܲܒܼܪܵܐ ܛܵܒܼܵܐ ܤܲܟܝܼ ܠܤܘܼܥܪܵܢܵܐ ܗܵܘ̇ ܡܠܸܐ ܐ̄ܪܵܙܵܐ: ܕܒܹܗ ܟܲܤܝܵܐ ܬܗܝܼܪܘܼܬܼ ܚܲܝܠܹܗ ܪܲܒܵܐ ܕܒܼܵܪܘܿܝܵܐ! ܗܸܪܓܵܐ ܪܘܼܚܵܢܵܐ ܐܝܼܬܼܵܘܗܝ: ܥܸܢܝܵܢܵܐ ܐܲܡܝܼܪܵܐ ܕܗܵܘ̇ ܤܘܼܟܵܝܵܐ ܕܒܼܵܬܲܪ ܩܝܵܡܬܼܵܐ. ܡܫܲܪܝܵܢܹܗ ܕܙܵܘܥܵܐ ܗܵܢܵܐ ܒܪܸܥܝܵܢܵܐ: ܬܚܘܼܡܵܗ̇ ܕܲܬܼܝܵܒܼܘܼܬܼܵܐ. ܠܵܒܼܘܿܟܼܵܗ̇ ܕܲܬܼܝܵܒܼܘܼܬܼܵܐ ܒܢܲܦܫܵܐ ܐܝܼܬܼܵܘܗܝ: ܪܸܢܝܵܐ ܐܲܡܝܼܢܵܐ ܕܲܥܬܼܝܼ݁ܕܼܵܬܼܵܐ. ܕܐܸܬܿܬܿܙܝܼܥ ܒܲܬܼܝܵܒܼܘܼܬܼܵܐ: ܫܲܢܝܼ ܒܤܲܒܼܪܹܗ ܠܥܵܠܡܵܐ ܕܲܥܬܼܝܼܕܼ. ܕܲܛ̣ܥܵܗ̇ ܠܗܵܕܹܐ: ܩܵܘ̣ܝܼ ܪܸܥܝܵܢܹܗ ܒܥܵܠܡܵܐ ܗܵܢܵܐ. ܕܡܲܚܸܒܼ ܥܸܢܝܵܢܵܐ ܕܥܲܡ ܡܫܝܼܚܵܐ: ܡܲܚܸܒܼ ܠܡܸܗܘܵܐ ܒܲܠܚܘܿܕܼܵܘܗܝ. ܕܡܲܚܸܒܼ ܕܲܢܟܲܬܲܪ ܥܲܡ ܤܲܓܝܼ̈ܐܹܐ: ܪܵܚܡܵܐ ܐܝܼܬܼܵܘܗܝ ܕܥܵܠܡܵܐ ܗܵܢܵܐ. ܬܝܵܒܼܘܼܬܼܵܐ pb. 462 ܐܝܼܬܹܝܗ̇: ܟܡܝܼܪܘܼܬܼܵܐ ܐܲܡܝܼܢܬܼܵܐ ܕܠܸܒܵܐ ܒܗܘܼܓܵܝܵܐ ܕܗܵܘ̇ ܬܘܼܸܩܵܢܵܐ ܪܵܒܵܐ ܕܠܵܐ ܡܸܬܼܦܲܫܲܩ. ܕܐܲܝܟܲܢ ܟܲܝ ܐܹܡܲܢܲܥ ܠܗܵܝ̇ ܡܲܥܲܠܬܼܵܐ ܠܵܐ ܡܸܬܼܡܲܠܠܵܢܝܼܬܼܵܐ؟ ܐܸܢ ܪܵܚܹ̇ܡ ܐܲܢ̄ܬܿ ܬܝܵܒܼܘܼܬܼܵܐ: ܪܚܲܡ ܐܵܦ ܫܸܠܝܵܐ. ܠܒܲܪ ܡܸܢܹܗ ܓܹܝܪ: ܠܵܐ ܡܸܫܬܲܡܠܝܵܐ ܬܝܵܒܼܘܼܬܼܵܐ. ܐܸܢ ܐܝܼܬܼ ܕܡܸܬܼܚܪܸܐ ܥܲܠ ܗܵܕܹܐ: ܠܵܐ ܬܸܬܼܚܪܸܐ ܥܲܡܹܗ: ܠܵܐ ܓܹܝܪ ܝܵܕܲܥ̇ ܡܵܢܵܐ ܐܵܡܲ݁ܪ. ܐܸܠܘܼ ܝܑܼܕܲܥ̣ ܡܵܢܲܐ ܗ̣̄ܝ ܬܝܵܒܼܘܼܬܼܵܐ: ܝܵܕܲܥ̇ ܗ̄ܘ̣ܵܐ ܐܵܦ ܕܘܼܟܿܬܼܵܗ̇: ܘܲܕܼܠܵܐ ܡܸܬܼܓܲܡܤܵܠ ܒܲܫܓܼܘܼܫܝܵܐ. ܐܸܢ ܪܵܚܹ̇ܡ ܐܲܢ̄ܬܿ ܫܸܠܝܵܐ ܐܲܒܼܵܐ ܕܲܬܼܝܵܒܼܘܼܸܬܼܵܐ: ܪܚܲܡ ܠܲܡܩܲܒܵܠܘܼ ܗܲܢܝܼܵܐܝܼܬܼ ܐܵܦ ܚܘܼܤܪ̈ܵܢܹܐ ܙܥܘܿܪܹ̈ܐ ܕܦܲܓܼܪܵܐ: ܘܥܸܕܸܠܵܝܹ̈ܐ ܕܢܵܒܼܥ̇ܝܼܢ. ܒܸܠܥܵܕܼ ܛܘܼܝܵܒܼܵܐ ܗܵܢܵܐ. ܠܡܸܚܵܐ ܒܫܸܠܝܵܐ ܚܹܐܪܵܐܝܼܬܼ ܕܠܵܐ ܫܓܼܘܫܝܵܐ: ܠܵܐ ܡܸܫܟܲܚ ܐܲܢ̄ܬܿ. ܐܸܢܗܘ̤ ܕܲܡܒܲܤܲܪ ܐܲܢ̄ܬܿ ܥܲܠ ܗܵܢܘܿܢ: ܡܩܲܕܸܐ ܐܲܢ̄ܬܿ ܠܹܗ ܠܫܸܠܝܵܐ: ܐܲܝܟܼ ܨܸܒܼܝܵܢܹܗ ܕܐܲܠܵܗܵܐ. ܐܸܢܗ̤ܘ ܕܡܸܬܿܛܠܸܡ ܐܲܢ̄ܬܿ ܐܵܘ ܡܸܬܼܓܠܸܙ ܐܲܢ̄ܬܿ: ܐܵܘ ܡܸܬܼܡܲܝܲܩ ܐܲܢ̄ܬܿ ܘܲܕܼܫܲܪܟܵܐ: ܘܠܵܐ ܡܸܬܿܬܿܙܝܼܥ ܐܲܢ̄ܬܿ ܡܸܛܠ ܪܸܚܡܲܬܼ ܫܸܠܝܵܐ. ܪܸܚܡܲܬܼ ܫܸܠܝܵܐ ܐܝܼܬܹܝܗ̇: ܤܘܼܟܵܝܵܐ ܐܲܡܝܼܢܵܐ ܕܡܵܘܬܵܐ. ܐܲܝܢܵܐ ܕܒܸܠܥܵܕܼ ܗܸܪܓܵܐ ܗܵܢܵܐ ܥܵܐܹ̇ܠ ܠܫܸܠܝܵܐ: ܟܲܕܼ ܐܝܼܬܼ ܠܹܗ ܪܸܥܝܵܢܵܐ ܐ̄ܚܪܹܢܵܐ: ܠܵܐ ܡܸܫܟܲܚ ܛܵܥܹ̇ܢ: ܐܲܝܠܹܝܢ ܕܡܸܛܠܵܬܹܗ ܐܵܠ̇ܨܵܐ ܠܡܸܤܒܲܠ ܡ̣ܢ ܟܠ ܕܘܼܟܼ. ܠܲܡܡܵܬܼ ܥܲܠ ܐܲܦܲܝ̈ ܐܲܠܵܗܵܐ: ܘܲܠܡܸܚܵܐ ܒܐܲܠܵܗܵܐ. ܫܘܼܡܠܵܝܵܐ ܠܲܡ ܕܚܲܝܹ̈ܐ: ܗܘܓܵܝܵܐ ܕܲܒܼܡܵܘܬܼܵܐ ܕܡܸܛܠ ܐܲܠܵܗܵܐ. ܗܵܕܹܐ ܓܹܝܪ ܡܩܲܪܒܼܵܐ ܠܹܗ ܠܗܵܘܢܲܢ ܠܡܸܬܼܚܲܠܵܛܘܼ ܒܐܲܠܗܵܐ: ܐܹܘܲܓܼܪܝܼܣ ܐܵܡܲ݁ܪ. ܐܵܦ ܗܵܕܹܐ ܬܸܕܲܥ: ܐܘܿ ܦܵܪܘܿܫܵܐ: ܕܲܚܢܲܢ ܥܘܼܡܪܵܐ ܕܥܲܡ ܢܲܦܫܲܢ ܝܑܼܚܝܼܕܼܵܐܝܼܬܼ ܘܫܸܠܝܵܐ ܘܲܚܒܼܘܼܫܝܵܐ: ܠܵܘ ܡܸܛܠ ܕܥܲܡܠܵܐ ܝܲܬܿܝܼܪܵܐ ܕܩܵܢ̈ܘܿܢܹܐ ܢܸܥܡܲܠ ܓܵܒܹܝܢܲܢ. ܝܑܼܕܼܝܼܥܵܐ ܗ̣̄ܝ ܓܹܝܪ: ܕܫܵܘܬܵܦܘܼܬܼܵܐ pb. 463 ܕܥܲܡ ܤܲܓܝܼ̈ܐܹܐ: ܝܲܬܝܼܪ ܐܝܼܕܼܵܐ ܠܗܵܕܹܐ ܝܵܗ̇ܒܵܐ: ܡܸܛܠ ܚܝܼܨܘܼܬܹܗ ܕܦܲܓܼܪܵܐ. ܘܐܸܠܘܼ ܥܲܠܗܵܕܹܐ ܗ̄ܘ̣ ܐܵܠܨܵܐ ܗ̄ܘ̣ܵܬܼ: ܠܵܘ ܐ̄ܢܵܫܵܐ ܚܤܲܝ̈ܵܐ ܐܲܒܼܵܗ̈ܬܼܵܐ ܩܲܕܝܼ̈ܫܹܐ: ܫܵܒܼܩ̇ܝܼܢ ܗ̄ܘ̣ܵܘ ܥܸܢܝܵܢܵܐ ܘܚܘܼܠܛܵܢ ܐ̄ܢܵܫܵܐ: ܘܡܸܢܗܘܿܢ ܒܩܲܒܼܪܹ̈ܐ ܥܵܡ̇ܪܝܼܢ ܗ̄ܘ̣ܵܘ: ܡܸܢܗܘܿܢ ܕܹܝܢ ܚܒܼܘܼܫܝܵܐ ܕܲܒܼܟܼܘܼܪܚܵܐ ܠܚܘܿܕܼܵܝܵܐ ܓܵܒܹ̇ܝܢ ܗ̄ܘ̣ܵܘ: ܗܵܘ̇ ܕܲܠܦܲܓܼܪܵܐ ܝܲܬܝܼܪܵܐܝܼܬܼ ܡܪܲܫܸܠ ܘܲܡܦܝܼܫ ܡ̣ܢ ܫܘܼܡܠܵܝ ܩܵܢ̈ܘܿܢܹܐ. ܘܥܲܠ ܟ̱ܠܵܗ̇ ܡܚܝܼܠܘܼܬܼܵܐ ܘܫܘܼܦܠܵܐ ܗܵܘ̇ ܕܦܲܓܼܪܵܐ: ܘܥܲܤܩܘܼܸܬܼ ܟܘܼܪ̈ܗܵܢܹܐ ܕܲܠܗܘܿܢ ܡܲܕܼܪܟܼܝܼܢ: ܗܲܢܝܼܵܐܝܼܬܼ ܡܚܲܡܤܢܝܼܢ ܗ̄ܘ̣ܵܘ ܒܟܼܠܗܘܿܢ ܚܲܝܲܝ̈݁ܗܘܿܢ: ܟܲܕܼ ܐܵܦܠܵܐ ܥܲܠ ܪܸ̈ܓܼܸܠܲܝܗܘܿܢ ܕܲܢܩܘܼܡܘܼܢ: ܐܵܘ ܨܠܘܿܬܼܵܐ ܕܲܥܝܼܵܕܼܵܐ ܠܲܡܩܲܪܵܒܼܘܼ: ܐܵܘ ܕܲܢܫܲܒܿܚܘܼܢ ܠܐܲܠܵܗܵܐ ܒܦܘܼܡܗܘܿܢ ܡܸܫܟܿܚܝܼܢ ܗ̄ܘ̣ܵܘ. ܘܠܵܐ ܡܲܙܡܘܿܪܵܐ: ܘܠܵܐ ܚܕܼܵܐ ܡ̣ܢ ܐܲܝܠܹܝܢ ܕܲܒܼܓܼܘܼܫܡܵܐ ܡܸܫܬܲܡ̈ܠܝܵܢ. ܘܤܸܦܩܲܬ̤ ܠܗܘܿܢ ܡܚܝܼܠܘܼܬܼܵܐ ܒܲܠܚܘܿܕܼ ܕܦܲܓܼܪܵܐ ܘܫܸܠܝܵܐ: ܚܠܵܦ ܟܠܗܘܿܢ ܩܵܢ̈ܘܿܢܹܐ: ܘܗܵܢܵܐ ܢܝܼܫܵܐ: ܟܠܗܘܿܢ ܝܵܘ̈ܡܵܬܼܵܐ ܕܚܲܝܲܝ̈ܗܘܿܢ. ܘܲܒܼܗܵܢܵܐ ܟ̱ܠܹܗ ܒܸܛܠܵܢܵܐ ܕܡܸܤܬܿܒܲܪ: ܠܵܐ ܐܸܬܼܝܲܐܲܒܼ ܚܲܕܼ ܡܸܢܗܘܿܢ ܕܢܸܫܒܿܘܿܩ ܟܘܼܪܚܹܗ: ܘܡܸܛܠ ܒܸܛܠܵܢܵܐ ܕܡ̣ܢ ܥܲܡ̈ܠܹܐ ܩܵܢܘܿܢܵܝܹ̈ܐ ܠܒܲܪ ܢܸܦܗܸܐ: ܐܵܘ ܒܲܟܼܢܘܼ̈ܫܵܬܼܵܐ ܢܸܬܼܒܲܤܲܡ ܒܩܵܠ ܬܸܫ̈ܒܿܚܵܬܼܵܐ ܕܲܐ̄ܚܪ̈ܵܢܹܐ. ܛܵܒܼ ܗ̄ܘ̣ ܗܵܟܹܝܠ ܐܲܝܢܵܐ ܕܐܲܪܓܸܫ̣ ܒܲܚܛܵܗܵܘ̈ܗܝ: ܡ̣ܢ ܐܲܝܢܵܐ ܕܡܵܘܬܲܪ ܠܬܹܒܹܝܠ ܒܲܚܙܵܬܹܗ. ܛܵܒܼ ܗ̄ܘ̣ ܐܲܝܢܵܐ ܕܐܸܬܿܬܲܢܲܚ ܚܲܕܼ ܥܸܕܵܢ ܥܲܡ ܢܲܦܫܹܗ: ܡ̣ܢ ܐܲܝܢܵܐ ܕܲܡܩܝܼܡ ܡܝܼ̈ܬܹܐ ܒܲܨܠܘܿܬܹܗ ܟܲܕܼ ܒܹܝܬܼ ܤܲܓܝܼ̈ܐܹܐ ܕܘܼܝܵܪܹܗ. ܛܵܒܼ ܗ̄ܘ̣ ܡܲܢ ܕܐܸܫܬܘܝܼ ܠܡܸܚܙܵܐ ܢܲܦܫܹܗ: ܡ̣ܢ ܡܲܢ ܕܐܸܫܬܿܘܝܼ ܠܡܸܚܙܵܐ ܡܲܠܲܐܟܹ̈ܐ. ܗܵܢܵܐ ܡܲܢ: pb. 464 ܒܥܲܝ̈ܢܲܝ ܦܲܓܼܪܵܐ ܡܸܫܬܵܘܬܲܦ. ܗܵܘ̇ ܕܹܝܢ: ܒܥܲܝܢܵܐ ܕܢܲܦܫܵܐ. ܛܵܒܼ ܗ̄ܘ̣ ܡܲܢ ܕܒܸܐܒܼܠܵܐ ܢܩܸܦ̣ ܠܲܡܫܝܼܚܵܐ ܒܲܠܚܘܿܕܼܵܘܗܝ: ܡ̣ܢ ܡܲܢ ܕܲܡܙܲܝܲܚ ܠܹܗ ܒܲܟܼܢܘܼܫܝܵܐ. ܠܵܐ ܐ̄ܢܵܫ ܢܲܝܬܸܐ ܠܲܡܨܲܥܬܼܵܐ ܗܵܝ̇ ܕܦܵܘܠܘܿܣ: ܐܸܢܵܐ ܠܲܡ ܩܢܘܿܡܝ: ܚܸܪܡܵܐ ܐܸܗܘܸܐ ܡ̣ܢ ܡܫܝܼܚܵܐ: ܘܲܕܼܸܫܲܪܟܵܐ. ܐܲܝܢܵܐ ܕܲܢܤܲܒܼ ܚܲܝܠܹܗ ܕܦܵܘܠܘܿܣ: ܐܵܦ ܗ̤ܘ ܡܲܦܲܣ ܠܹܗ ܠܡܸܥܒܲܕܼ. ܦܵܘܠܘܿܣ ܕܹܝܢ: ܡ̣ܢ ܪܸܡܙܵܐ ܕܲܠܘܵܬܹܗ ܡܸܬܿܕܲܒܲܪ ܗ̄ܘ̣ܵܐ ܠܡܵܘܬܵܪܘܼ ܠܬܹܒܹܝܠ. ܐܲܝܟܼ ܕܐܵܦ ܗ̤ܘ ܤ̣ܗܸܕܼ: ܕܠܵܘ ܒܨܸܒܼܝܵܢܹܗ ܤܵܥܲܪ ܗ̄ܘ̣ܵܐ ܠܗܵܕܹܐ. ܩܛܝܼܪܵܐ ܠܲܡ ܤܝܼܡ ܥܠܲܝ: ܘܵܝ ܠܝܼ ܕܹܝܢ ܐܸܢ ܠܵܐ ܐܹܤܲܒܲܪ. ܐܵܦ ܓܒܼܝܼܬܹܗ ܕܦܵܘܠܘܿܣ: ܠܵܘ ܠܲܬܼܝܵܒܼܘܼܬܼܵܐ ܚܵܐܲܪ ܗ̄ܘ̣ܵܐ ܢܝܼܫܵܗ̇: ܐܸܠܵܐ ܕܲܢܤܲܒܲܪ ܠܐ̄ܢܵܫܘܼܬܼܵܐ: ܐܵܦ ܚܲܝܠܵܐ ܝܲܬܝܼܪܵܐ ܢ̣ܤܲܒܼ. ܒܲܕܼܓܼܘܿܢ: ܠܫܸܠܝܵܐ ܡܲܚܒܼܝܼܢܲܢ: ܐܵܝܚ: ܡܸܛܠ ܕܲܢܡܘܼܬܼ ܥܵܠܡܵܐ ܗܵܢܵܐ ܡ̣ܢ ܠܸܒܲܢ: ܘܢܸܬܿܕܟܲܪ ܐܲܡܝܼܢܵܐܝܼܬܼ ܠܡܵܘܬܵܐ. ܘܒܹܗ ܒܗܵܢܵܐ ܗܘܼܓܵܝܵܐ: ܠܘܵܬܼ ܐܲܠܵܗܵܐ ܢܸܬܼܩܲܪܲܒܼ ܒܠܸܒܵܐ. ܘܢܸܒܼܤܘܿܪ ܤܪܝܼܩܘܼܬܼ ܥܵܠܡܵܐ: ܘܢܸܬܿܬܿܫܝܼ̈ܛܵܢ ܪ̈ܓܼܝܼܓܼܵܬܹܗ ܒܥܲܝ̈ܢܲܝܢ. ܢܤܲܝܒܲܪ ܗܲܢܝܼܵܐܝܼܬܼ ܒܦܲܓܼܪܵܐ ܡܢܵܘܠܵܐ ܒܸܛܠܵܢܵܐ ܐܲܡܝܼܢܵܐ ܕܲܒܼܫܸܠܝܵܐ ܐܵܝܚ: ܕܢܸܫܬܿܘܸܐ ܠܒܼܘܼܤܵܡܵܐ ܥܲܡ ܐܲܝܠܹܝܢ ܕܒܲܡܥܲܪܹ̈ܐ ܘܒܲܚ̈ܠܹܠܹܝܗ̇ ܕܐܲܪܥܵܐ: ܡܤܲܟܹܝܢ ܠܓܸܠܝܵܢܹܗ ܫܒܼܝܼܚܵܐ ܕܡܲܪܲܢ ܕܡ̣ܢ ܫܡܲܝܵܐ. ܕܠܹܗ ܘܠܲܐܒܼܘܼܗܝ ܘܲܠܪܘܼܚܵܐ ܕܩܘܼܕܼܫܵܐ: ܬܸܫܒܿܘܿܚܬܼܵܐ ܘܪܘܼܡܪܵܡܵܐ ܠܥܵܠܲܡ ܥܵܠܡܝܼܢ.