Isaac of Nineveh: Discourse 66

ܡܸܛܠ ܐܵܚܝ: ܕܐܲܟܸܦܬܲܢܝ ܘܵܠܝܼܬܼܵܐ ܕܐܸܫܠܘܿܚ ܠܵܟܼ ܥܲܠ ܐܲܝܠܹܝܢ ܕܐܵܠ̈ܨܵܢ: ܡܵܘܕܲܥ ܐ̄ܢܵܐ ܠܚܘܼܒܵܟܼ ܒܝܲܕܼ ܟܬܝܼ̈ܒܼܵܬܼܝ: ܐܲܝܟܼ ܫܘܼܘܕܵܝܵܐ ܕܲܗܘ̤ܵܐ ܠܲܢ ܠܘܵܬܼܵܟܼ. ܒܕܸܐܫ̇ܟܲܚܬܵܟܼ ܓܹܝܪ: ܕܒܼܚܲܬܝܼܬܼܘܼܬܼܵܐ ܕܕܼܘܼܒܵܪܹ̈ܐ ܤܝܼܡܵܐ ܠܵܟܼ ܠܡܸܪܕܵܐ ܒܡܵܘܬܿܒܼܵܐ ܕܲܒܼܫܸܠܝܵܐ: ܘܐܵܦ ܐܸܢܵܐ ܐܲܝܠܹܝܢ ܕܫܸܡ̇ܥܹܬܼ ܡ̣ܢ ܦܵܪ̈ܘܿܫܹܐ ܥܲܠ ܦܘܼܠܚܵܢܵܐ ܗܵܢܵܐ: ܟܲܕܼ ܫܵܩܹ̇ܠ ܐ̄ܢܵܐ ܪܸܥܝܵܢܵܐ ܟܢܝܼܫܵܐ ܕܡܸܠܲܝ̈ܗܘܿܢ: ܥܲܡ ܢܸܤ̈ܝܵܢܹܐ ܩܲܪ̈ܝܼܒܹܐ ܕܲܒܼܗܘܿܢ ܒܤܘܼܥܪ̈ܵܢܹܐ: ܠܥܘܼܗܕܵܢܵܟܼ ܪܵܫܹ̇ܡ ܐ̄ܢܵܐ ܒܲܦܫܝܼܛܘܼܬܼܵܐ ܕܡܸܠܬܼܵܐ. ܟܲܕܼ ܐܵܦ ܐܲܢ̄ܬܿ ܡܥܲܕܲܪ ܐܲܢ̄ܬܿ ܩܢܘܿܡܵܟܼ ܡ̣ܢ ܥܸܢܝܵܢܵܗ̇ ܕܐܸܓܲܪܬܵܐ ܒܲܚܦܝܼܛܘܼܬܼܵܐ ܕܲܫܟܼܝܼܚܵܐ ܒܵܟܼ: ܒܗܵܝ̇ ܕܲܒܼܒܼܘܼܝܵܢܵܐ ܕܚܸܟܼܡܬܼܵܐ ܡܸܬܼܩܲܪܲܒܼ ܐܲܢ̄ܬܿ: ܠܩܸܪܝܵܢܵܐ ܕܡܸܠܹ̈ܐ ܡܤܲܝ̈ܟܼܵܬܐ ܕܐܸܓܲܪܬܲܢ ܗܵܕܹܐ: ܠܒܲܪ ܡ̣ܢ ܪܸܕܝܵܐ ܕܲܥܝܵܕܼܵܐ. ܘܐܲܝܟܼ ܢܘܼܗܵܪܵܐ ܡܸܕܸܡ ܫܵܩܹ̇ܠ ܐܲܢ̄ܬܿ ܠܗܹܝܢ: ܠܘܵܬܼ ܫܲܪܟܵܐ ܕܩܸܪܝܵܢܵܐ: ܡܸܛܠ ܤܘܼ̈ܟܵܠܹܐ ܤܒܼܝܼ̈ܤܹܐ ܘܚܲܝܠܵܐ ܕܲܛܡܝܼܪ ܒܗܹܝܢ. ܪܵܘܪܒܼܵܐܝܼܬܼ ܓܹܝܪ: ܡܸܬܼܚܲܝܲܠ ܡܲܕܥܵܐ ܒܩܸܪ̈ܝܵܢܹܐ ܕܐܲܝܟܼ ܗܵܠܹܝܢ. ܘܫܵܩܹ̇ܠ ܡܸܢܗܘܿܢ ܙܲܝܢܵܐ ܠܘܼܩܒܲܠ ܦܸܗܝܵܐ ܕܚܘܼ̈ܫܵܒܹܐ: pb. 466 ܘܠܘܼܩܒܲܠ ܩܘܼܛܵܥܵܐ ܕܲܡܥܵܕܼ ܠܡܸܗܘܵܐ: ܡ̣ܢ ܩܲܫܝܘܼܬܼܵܐ ܕܥܲܡ̈ܠܹܐ: ܘܛܵܘܪܵܐ ܡܬܼܝܼܚܵܐ ܕܲܒܼܫܸܠܝܵܐ. ܘܫܵܕܹܐ ܠܒܸܤܬܿܤܪܹܗ ܠܥܵܠܡܵܐ ܒܨܸܦܬܵܐ ܕܤܘܼܥܪ̈ܵܢܵܘܗܝ: ܒܝܲܕܼܸ ܫܘܼܠܗܵܒܼܵܐ ܕܡܸܬܼܥܲܛܲܦ ܡ̣ܢ ܐܲܝܠܹܝܢ ܕܦܵܓܲܥ ܒܗܹܝܢ: ܐܲܝܟܼ ܢܝܼܫܵܐ ܕܤܝܼܡ ܠܲܢ ܒܐܸܓܲܪܬܵܐ ܗܵܕܹܐ. ܕܡܵܢܵܐ ܐܝܼܬܼܵܘܗܝ ܡܵܘܬܿܒܼܵܐ ܘܦܘܼܠܚܵܢܵܐ ܕܫܸܠܝܵܐ: ܘܐܲܝܠܹܝܢ ܐ̄ܪ̈ܵܙܹܐ ܛܡܝܼܸܪܝܼܢ ܒܹܗ ܒܕܼܘܼܒܵܪܵܐ ܗܵܢܵܐ ܕܡ̣ܢ ܤܲܓܝܼ̈ܐܹܐ ܟܤܹܝܢ: ܘܒܼܵܬܲܪ ܐܲܝܠܹܝܢ ܫܟܼܵܚ̈ܬܼܵܐ ܪܵܗ̇ܛܝܼܢ ܟܲܫܝܼܪܹ̈ܐ ܠܡܲܕܼܪܵܟܼܘܼ ܒܫܸܠܝܵܐ. ܘܡܸܛܠ ܡܵܢܵܐ ܡܲܤܠܹܝܢ ܙܲܕܝܼܩܘܼܬܼܵܐ ܕܒܹܝܬܼ ܒܢܲܝ̈ܢܵܫܵܐ ܡܸܬܼܦܲܠܚܵܐ: ܘܥܵܪܩܝܼܢ ܡ̣ܢ ܚܙܵܬܼܵܐ ܕܥܵܠܡܵܐ: ܘܓܼܵܒܹ̇ܝܢ ܐܘܼ̈ܠܨܵܢܹܐ ܘܐܵܓܼܘܿܢܹ̈ܐ ܕܲܒܼܡܵܘܬܿܒܼܵܐ ܫܲܠܝܵܐ ܘܲܠܚܘܿܕܵܝܵܐ. ܕܡ̣ܢ ܤܘܼܟܵܠܗܹܝܢ ܘܒܲܐܝܠܹܝܢ ܕܦܵܓܼܥ̇ܝܼܢ ܒܐܸܓܲܪܬܵܐ ܗܵܕܹܐ: ܛܘܼܒܼܵܐ ܝܵܗ̇ܒܝܼܢ ܠܝܼܚܝܼ̈ܕܵܝܹܐ: ܐܲܝܠܹܝܢ ܕܡܲܦܩܝܼܢ ܚܲܝܲܝ̈ܗܘܿܢ ܕܗܵܢܵܐ ܥܵܠܡܵܐ ܒܡܵܘܬܿܒܼܵܐ ܟܢܝܼܫܵܐ ܕܥܲܡ ܢܲܦܫܗܘܿܢ. ܕܐܲܝܠܹܝܢ ܕܲܒܼܗܵܠܹܝܢ ܠܵܐ ܐܲܪܓܸܫ̣ܘ: ܝܲܬܝܼܪܬܵܐ ܗ̣̄ܝ ܠܗܘܿܢ ܡܲܪܬܿܝܵܢܘܼܬܼܵܐ ܕܥܲܡ ܙܘܼܗܵܪܹ̈ܐ ܟܠܗܘܿܢ ܥܲܠ ܛܘܼ̈ܟܵܤܹܐ ܕܲܒܼܫܸܠܝܵܐ. ܗܵܪܟܵܐ ܕܹܝܢ: ܐܲܝܟܼ ܕܲܠܘܵܬܼ ܚܲܟܿܝܼ̈ܡܹܐ ܟܵܬܹ̇ܒܼ ܐ̄ܢܵܐ. ܘܡܵܠܹ̇ܟܼ ܐ̄ܢܵܐ: ܒܚܘܼܒܵܐ. ܐܸܢ ܒܵܥܹ̇ܐ ܐܲܢ̄ܬܿ ܠܡܸܫܟܵܚܘܼ ܚܲܝܹ̈ܐ ܠܵܐ ܡܸܬܼܚܲܒܿܠܵܢܹ̈ܐ ܒܲܙܥܘܿܪܘܼܬܼܵܐ ܕܝܵܘ̈ܡܵܬܼܵܟܼ ܐܘܿ ܐܲܚܵܐ: ܡܲܥܲܠܬܵܟܼ ܕܲܠܫܸܠܝܵܐ: ܒܦܘܼܪܫܵܢܵܐ ܬܸܗܘܸܐ. [ܕ]ܬܸܫܟܲܚ: ܝܘܼܬܼܪܵܢܵܐ ܕܡܸܤܬܲܟܸܐ ܠܚܲܟܝܼ̈ܡܹܐ ܒܕܼܘܼܒܵܪܹ̈ܐ ܕܫܲܠܝܘܼܬܼܵܐ. ܘܥܲܩܸܒܼ ܥܲܠ ܦܘܼܠܚܵܢܹܗ: ܘܠܵܐ ܬܸܪܗܲܛ ܥܲܠ ܫܡܵܐ. ܘܥܘܿܠ: ܘܥܲܡܸܩ: ܘܐܲܚܨܸܦ: ܘܝܼܠܲܦ: ܘܲܩܢܝܼ: ܘܐܸܬܼܢܲܦܲܩ ܒܟܼܠܗܘܿܢ ܦܘܼܪ̈ܫܵܢܹܐ ܬܡܝܼ̈ܗܹܐ ܘܚܹܐܪ̈ܵܝܹܐ ܕܲܙܢܲܝ̈ ܦܘܼܠܚܵܢܵܐ ܕܲܒܼܫܸܠܝܵܐ. ܕܬܲܕܪܸܟܼ: ܥܲܡ ܟܠܗܘܿܢ ܩܲܕܝܼ̈ܫܹܐ: ܡܵܢܵܘ ܪܵܘܡܵܐ ܘܥܘܼܡܩܵܐ ܘܐܘܼܪܟܵܐ ܘܲܦܬܼܵܝܵܐ pb. 467 ܕܕܼܘܼܒܵܪܵܐ ܗܵܢܵܐ ܠܵܐ ܡܸܤܬܲܝܟܼܵܢܵܐ: ܡܸܛܠ ܠܵܐ ܡܤܲܝܟܼܘܼܬܼܵܐ ܕܥܘܼܬܼܪܵܐ ܗܵܘ̇ ܕܲܠܩܸܢܝܵܢܹܗ ܡܸܬܼܚܲܦܛܝܼܢ ܬܲܓܵܪ̈ܵܘܗܝ. ܘܠܵܐ ܬܢܘܼܚ: ܥܕܲܡܵܐ ܕܬܸܬܼܢܲܦܲܩ ܒܟܼܠܗܘܿܢ ܫܒܼܝܼ̈ܠܹܐ ܕܦܘܼܠܚܵܢܵܘ̈ܗܝ. ܠܟܼܠ ܤܘܼܥܪܵܢ ܕܲܒܼܢܲܝ̈ܢܵܫܵܐ ܠܫܘܼܪܵܝ ܡܸܤܬܲܥܪܵܢܘܼܬܹܗ: ܚܘܼܫܵܚܵܐ ܡܸܕܸܡ ܕܡܸܤܬܲܟܸܐ ܡ̣ܢ ܗܘܵܝܹܗ ܕܤܘܼܥܪܵܢܵܐ: ܡܙܝܼܥ ܠܕܲܥܝܵܢܵܐ ܠܘܵܬܼ ܤܝܵܡܵܐ ܕܫܲܬܼܐܸܤܬܼܵܗ̇ ܕܲܨܒܼܘܼܬܼܵܐ. ܘܢܝܼܫܹܗ ܕܗܵܢܵܐ: ܡܓܲܒܲܪ ܠܪܸܥܝܵܢܵܐ: ܠܡܸܟܥܲܢ ܥܲܤ̈ܩܵܬܼܵܐ ܕܒܹܗ. ܘܒܼܘܼܝܵܐܵܐ ܡܸܕܸܡ ܢܵܤܹ̇ܒܼ ܡܸܢܹܗ ܒܚܵܘܪܵܐ ܕܲܠܘܵܬܹܗ. ܘܐܲܝܟܼ ܐܵܚ̇ܘܿܕܼܵܐ ܡܸܕܸܡ ܐܵܚܹ̇ܕܼ ܠܗܵܘܢܵܐ: ܥܕܲܡܵܐ ܠܫܘܼܟܼܠܵܠܹܐ ܕܤܘܼܥܪܵܢܵܐ. ܗܵܟܲܢܵܐ ܘܐܵܦ ܠܦܘܼܠܚܵܢܵܐ ܝܲܩܝܼܪܵܐ ܕܫܸܠܝܵܐ ܠܡܹܐܢܵܐ ܕܐ̄ܪ̈ܵܙܹܐ: ܐܝܼܬܼ ܠܦܵܪ̈ܘܿܫܹܐ ܢܝܼܫܵܐ: ܕܲܠܘܵܬܹܗ ܚܵܐܲܪ ܪܸܥܝܵܢܵܐ ܡ̣ܢ ܕܟܲܕܼ ܪܵܡܹܐ ܕܘܼ̈ܡܤܹܐ ܩܲܕܼܡܵܝܹ̈ܐ: ܥܕܲܡܵܐ ܠܤܵܟܹܗ ܕܒܸܢܝܵܢܵܐ. ܘܲܒܼܟܼܠܗܘܿܢ ܥܲܡܠܵܘ̈ܗܝ ܢܲܓܝܼܪܹ̈ܐ ܘܥܲܤܩܹ̈ܐ: ܐܲܝܟܼ ܥܲܝ̈ܢܹܐ ܕܩܘܼܒܲܪܢܹܝܛܵܐ ܕܚܵܪ̈ܵܢ ܒܟܼܵܘ̈ܟܿܒܹܐ: ܗܵܟܲܢܵܐ ܡܲܨܸܕܼ ܚܝܵܪܹܗ ܓܵܘܝܵܐ ܕܝܼܚܼܕܼܵܝܵܐ ܒܟܼܠܹܗ ܪܲܗܛܵܐ ܕܡܲܪܕܝܼܬܹܗ: ܒܢܝܼܫܵܐ ܗܵܘ̇ ܕܲܢܤܲܒܼ ܒܪܸܥܝܵܢܹܗ: ܒܝܵܘܡܵܐ ܩܲܕܼܡܵܝܵܐ ܕܝܲܗܼ̄ܒܼ ܢܲܦܫܹܗ ܠܡܸܪܕܵܐ ܒܝܲܡܵܐ ܥܲܤܩܵܐ ܕܫܲܠܝܘܼܬܼܵܐ: ܥܕܲܡܵܐ ܕܢܸܫܟܲܚ ܠܡܲܪܓܵܢܝܼܬܼܵܐ ܗܵܝ̇ ܕܡܸܛܠܵܬܼܵܗ̇ ܫܲܡܲܪ ܢܲܦܫܹܗ ܒܲܬܼܗܘܿܡܵܘ̈ܗܝ ܠܵܐ ܡܸܬܼܓܲܫ̈ܫܵܢܹܐ ܕܝܲܡܵܐ. ܘܚܵܘܪܵܐ ܕܤܘܼܟܵܝܹܗ: ܡܲܩܸܠ ܥܠܵܘܗܝ ܠܟܼܠܹܗ ܝܘܼܩܪܵܐ ܕܦܘܼܪܠܚܵܢܵܐ: ܘܥܘܼܤܵܩܹ̈ܐ ܡܲܠܝܼ̈ܚ ܩܹܘܲܢܕܹܝܢܘܿܣ ܕܒܹܗ ܦܵܓܼܥ̇ܝܼܢ ܒܡܲܪܕܝܼܬܹܗ. ܘܐܲܝܢܵܐ ܕܲܒܼܫܘܼܪܵܝ ܕܲܒܼܫܼܪܵܝ ܡܲܥܲܠܬܹܗ ܕܲܠܫܸܠܝܵܐ: ܢܝܼܫܵܐ ܗܵܢܵܐ ܠܵܐ ܢܤܝܼܡ ܠܹܗ ܠܚܘܼܫܵܚܵܐ ܕܡ̣ܢ ܦܘܼܠܚܵܢܹܗ: ܐܸܠܵܐ ܒܫܸܓܼܡܵܐ ܥܵܡܹ̇ܠ ܐܲܝܟܼ ܐ̄ܢܵܫ ܕܠܵܐܐܲܪ ܟܵܬܹ̇ܫ: ܗܵܢܵܐ: ܠܵܐ ܡܸܡܬܼܘܿܡ ܡܲܡܸܕܼ ܡ̣ܢ ܪܘܼܚܵܐ pb. 468 ܕܩܘܼܛܵܢܵܐ ܒܟܼܠܗܘܿܢ ܚܲܝܵܘ̈ܗܝ. ܘܲܚܕܼܵܐ ܡ̣ܢ ܬܲܪܬܹܝܢ ܓܵܕܼܫܵܐ ܠܹܗ: ܕܐܵܘ ܟܲܕܼ ܠܵܐ ܡܚܲܡܤܸܢ ܠܝܘܼܩܪܵܐ ܠܵܐ ܡܸܤܬܲܝܒܿܪܵܢܵܐ: ܡܸܙܕܟܸܐ ܘܢܵܦܹ̇ܩ ܡ̣ܢ ܫܸܠܝܵܐ ܠܲܓܼܡܵܪ. ܐܵܘ ܐܸܢ ܡܥܲܙܸܐ ܒܹܗ: ܒܹܝܬܼ ܐܲܤܝܼܪܹ̈ܐ ܗܵܘ̇ܝܵܐ ܩܸܠܵܝܬܹܗ ܕܡܸܬܿܛܲܓܲܢ ܒܵܗ̇: ܕܒܲܕܼܠܵܐ ܝܵܕܲܥ̇ ܕܲܢܤܲܟܸܐ ܠܒܼܘܼܝܵܐܵܐ ܕܡܸܬܼܝܼܠܸܕܼ ܡ̣ܢ ܦܘܼܠܚܵܢܵܐ ܕܲܒܼܫܸܠܝܵܐ: ܒܲܕܼܓܼܘܿܢ ܐܵܦܠܵܐ ܕܢܸܫܐܲܠ ܒܟܹܐܒܼܵܐ ܕܠܸܒܵܐ ܘܢܸܒܼܥܸܐ ܒܚܲܫܵܐ ܕܲܨܠܘܿܬܼܵܐ: ܘܢܸܤܘܲܚ ܠܗܹܝܢ ܡܸܫܟܲܚ: ܠܐܲܝܠܹܝܢ ܕܐܲܒܼ̈ܗܲܝܢ ܡܲܠܝܼܝ̈ ܪ̈ܲܚܡܹܐ ܪ̈ܵܚܡܲܝ ܒܢܲܝ̈ܗܘܿܢ: ܫܒܲܩ̣ܘ ܠܲܢ ܫܘܼܘ̈ܕܵܥܹܐ ܒܲܟܼܬܼܵܒܹ̈ܐ ܠܲܫܟܼܵܚܬܼܵܐ ܕܚܲܝܲܝ̈ܢ܀ ܚܲܕܼ ܓܹܝܪ ܐܸܡ݂ܲܪ: ܕܐܸܢܵܐ ܝܘܼܬܼܪܵܢܵܐ ܕܡ̣ܢ ܫܸܠܝܵܐ ܗܵܢܵܘ ܠܝܼ: ܕܟܲܕܼ ܐܲܪܚܸܩ ܠܝܼ ܡ̣ܢ ܡܲܫܪܝܼܬܼܵܐ ܕܒܼܵܗ̇ ܡܝܲܬܲܒܼ ܐ̄ܢܵܐ: ܢܸܤܬܲܦܲܩ ܡܲܕܲܥܝ ܡ̣ܢ ܥܘܼܬܵܕܼܵܘ̈ܗܝ ܕܲܩܪܵܒܼܵܐ: ܘܢܸܬܦܢܸܐ ܥܲܠ ܦܘܼܠܚܵܢܵܐ ܕܲܡܝܲܬܲܪ܀ ܐ̄ܚܪܹܢܵܐ. ܫܸܠܝܵܐ: ܥܸܠ̈ܠܵܬܼܵܐ ܕܲܡܚܲܕ̈ܬܼܵܢ ܚܘܼ̈ܫܵܒܹܐ ܦܵܤܹ̇ܩ. ܘܲܠܓܼܵܘ ܡ̣ܢ ܫܘܼܪ̈ܵܘܗܝ ܡܲܥܬܸܩ ܘܲܡܦܲܟܲܗ ܠܥܘܼ̈ܗܕܵܢܹܐ ܕܡܸܬܼܩܲܕܡܵܢ̈ܘܵܬܼܵܐ. ܘܡܵܐ ܕܲܒܼܠܝܼܘ ܡܠܘܿܐܹ̈ܐ ܥܲܬܿܝܼ̈ܩܹܐ ܡ̣ܢ ܪܸܥܝܵܢܵܐ: ܥܲܠ ܟܝܵܢܵܐ ܗܵܦܹ̇ܟܼ ܗܵܘܢܵܐ ܠܬܼܘܼܪܵܨܹܗ܀ ܐ̄ܚܪܹܢܵܐ. ܐܸܠܵܐ ܠܫܸܠܝܵܐ ܡܸܛܠܗܵܕܹܐ ܪܵܗܹ̇ܛ ܐ̄ܢܵܐ: ܐܲܝܟܼ ܕܢܸܬܼܚܲܠܘܿܢ ܒܠܹܒܿܝ ܦܸܬܼܓܼܵܡܹ̈ܐ ܕܩܸܪܝܵܢܵܐ ܘܲܨܠܘܿܬܼܵܐ. ܘܟܲܕܼ ܒܗܲܢܝܼܐܘܼܬܼܵܐ ܕܤܘܼ̈ܟܵܠܲܝܗܘܿܢ ܢܸܫܬܲܬܲܩ ܠܸܫܵܢܝ: ܐܲܝܟܼ ܕܲܒܼܫܸܢܬܼܵܐ ܡܸܕܸܡ ܐܸܦܸܠ ܠܝܼ ܒܲܩܦܝܼܤܘܼܬܼܵܐ ܕܪܼ̈ܓܼܫܲܝ ܥܲܡ ܙܵܘ̈ܥܲܝ. ܘܟܲܕܼ ܬܘܼܒܼ ܒܲܢܓܝܼܪܘܼܬܼܵܐ ܕܒܹܗ ܒܫܸܠܝܵܐ: ܢܸܫܬܲܝܲܢ ܠܹܒܿܝ ܡ̣ܢ ܫܓܼܝܼܫܘܼܬܼܵܐ ܕܥܘܼ̈ܗܕܵܢܹܐ: ܢܫܲܡܲܪ ܥܠܲܝ ܒܐܲܡܝܼܢܘܼ ܓܲܠܠ̈ܐ ܕܚܲܕܼܘܼܬܼܵܐ: ܐܲܝܕܵܐ ܕܡ̣ܢ ܢܸܒܼܗܹ̈ܐ ܕܲܠܓܼܵܘ ܕܠܵܐ ܤܘܼܟܵܝ ܓܵܚ̇ܝܼܢ pb. 469 ܡܸܢܫܹܠܝ ܠܒܼܘܼܤܵܡܹܗ ܕܠܹܒܿܝ. ܗܵܠܹܝܢ ܕܟܲܕܼ ܒܲܤܦܝܼܢ̄ܬܵܗ̇ ܕܢܲܦܫܝ ܢܸܬܿܛܪܘܿܢ: ܢܛܲܒܿܥܘܼܢܵܗ̇ ܡ̣ܢ ܪܸ̈ܬܼܡܲܝ ܥܵܠܡܵܐ ܘܡ̣ܢ ܚܲܝܹ̈ܐ ܕܒܸܤܪܵܐ: ܒܲܬܼܗܘܿܡܹ̈ܐ ܬܲܚܬܵܝܹ̈ܐ ܕܫܲܠܝܘܼܬܼܵܐ ܕܒܲܐܠܵܗܵܐ܀ ܐ̄ܚܪܹܢܵܐ. ܡܘܼ̈ܫܚܵܬܼܵܐ ܕܟܲܤ̈ܝܵܬܼܵܟܼ: ܡ̣ܢ ܦܘܼܪ̈ܫܵܢܹܐ ܕܙܵܘܥܲܝ̈ܟ ܬܸܤܬܲܟܲܠ. ܕܐܲܡܝܼܢܘܼܬܼܵܐ ܐܵܡܲ݁ܪ ܐ̄ܢܵܐ: ܠܵܘ ܠܐܲܝܠܹܝܢ ܕܓܸܕܼܫܵܐ ܡܙܝܼܥ: ܘܥܸܕܵܢܵܐ ܡܲܥܒܲܪ ܠܗܘܿܢ. ܠܲܝܬܿ ܠܒܼܝܼܫ ܒܸܤܪܵܐ: ܕܐܵܪܚܵܐ ܠܵܐ ܥܵܪܹܨ ܒܒܲܝܬܹܗ: ܡ̣ܢ ܬܪ̈ܲܝܗܘܿܢ ܫܘܼܚ̈ܠܵܦܹܐ ܕܛܵܒܼ̈ܬܼܵܐ ܘܲܕܼܒܼܝܼ̈ܫܵܬܼܵܐ. ܐܸܢ ܡܲܢ ܟܲܫܝܼܪܵܐ ܗ̄ܘ̣: ܒܗܵܠܹܝܢ ܕܲܒܼܨܝܼܪܘܼܬܼܵܐ. ܡܸܛܠ ܟܝܵܢܵܐ ܟܹܝܬܼ: ܐܲܒܼ̈ܗܵܬܼܵܐ ܕܝܲܠܕܹ̈ܐ. ܘܐܸܢ ܬܘܼܒܼ ܡܲܤܡܝܵܢܵܐ ܗ̄ܘ̣: ܒܗܵܢܹܝܢ ܕܲܡܥܲܠܝܘܼܬܼܵܐ. ܡܸܛܠ ܚܡܝܼܸܪܵܐ ܗܵܘ̇ ܕܛܲܝܒܿܘܼܬܼܵܐ ܕܐܲܪܡܝܼ ܒܲܟܼܝܵܢܲܢ: ܡܸܛܠ ܗܵܘ̇ ܕܐܸܬܿܛܲܗܲܡ ܒܛܘܿܗܡܵܐ ܕܡܲܠܟܘܼܬܼܵܐ ܥܸܠܵܝܬܼܵܐ܀ ܐ̄ܚܪܹܢܵܐ. ܓܒܼܝܼ ܠܵܟܼ ܦܘܼܠܚܵܢܵܐ ܡܒܲܤܡܵܢܵܐ ܫܲܗܪܵܐ ܐܲܡܝܼܢܵܐ ܕܠܲܝ̈ܠܵܘܵܬܼܵܐ: ܕܒܹܗ ܫܠܲܚ̣ܘ ܟܠܗܘܿܢ ܐܲܒܼ̈ܗܵܬܼܵܐ ܠܒܲܪܢܵܫܵܐ ܗܵܘ̇ ܥܲܬܝܼܩܵܐ: ܘܐܸܫܬܘܝܼܘ ܠܚܘܼܕܵܬܼܵܐ ܕܡܲܕܿܥܵܐ. ܒܗܵܠܹܝܢ ܗ̄ܘ̣ ܥܸܕܵܢܹ̈ܐ ܡܲܪܓܫܵܐ ܢܲܦܫܵܐ ܒܚܲܝܹ̈ܐ ܗܵܢܘܿܢ ܠܵܐ ܡܵܝ̈ܘܿܬܹܐ: ܕܲܒܼܡܲܪܓܫܵܢܘܼܬܼܵܗ̇ ܕܲܒܼܗܘܿܢ: ܫܵܠܚܵܐ ܠܒܼܘܼܫܵܐ ܕܚܸܫܟܵܐ: ܘܗܵܘ̇ܝܵܐ ܡܩܲܒܿܠܵܢܝܼܬܼܵܐ ܕܫܘܼ̈ܟܵܢܹܐ ܕܪܘܼܚ܀ ܐ̄ܚܪܹܢܵܐ. ܠܵܐ ܡܸܫܟܿܚܵܐ ܕܟܲܕܼ ܚܵܙܹ̇ܐ ܒܲܪܢܵܫܵܐ ܦܲܪ̈ܨܘܿܦܹܐ ܤܲܓܝܼ̈ܐܹܐ: ܘܫܵܡܲܥ̇ ܒܢ̈ܵܬܼ ܩܵܠܹ̈ܐ ܡܫܲܚ̈ܠܦܵܬܼܵܐ ܕܢܘܼܟܼܪ̈ܵܝܵܢ ܠܗܸܪܓܹܗ ܪܘܼܚܵܢܵܐ: ܘܲܢܡܲܠܸܠ ܘܢܸܬܼܥܢܸܐ ܥܲܡ ܕܐܲܝܟܼ ܗܵܠܹܝܢ: ܘܢܸܤܬܦܸܩ ܡܲܕܥܹܗ ܕܲܢܚܘܼܪ ܒܲܩܢܘܿܡܹܗ ܒܟܸܤܝܵܐ: ܘܢܸܬܼܥܗܸܕܼ ܚܛܵܗܵܘ̈ܗܝ ܘܢܸܤܬܿܘܿܪ ܡܲܚܫ̈ܒܼܵܬܹܗ: ܘܢܲܨܸܕܼ ܒܐܲܝܠܹܝܢ ܕܐܵܬܼ̈ܝܵܢ ܘܢܸܬܼܥܢܸܐ ܒܲܨܠܘܿܬܼܵܐ ܟܤܝܼܬܼܵܐ܀ ܘܬܼܘܼܒܼ. ܕܲܢܟܲܒܸܫ ܐܸܢܘܿܢ pb. 470 ܒܲܪܢܵܫܵܐ ܠܗܵܠܹܝܢ ܪܸ̈ܓܼܫܹܐ ܬܚܹܝܬܼ ܡܫܲܠܛܘܼܬܼܵܐ ܕܢܲܦܫܵܐ: ܒܸܠܥܵܕܼ ܡ̣ܢ ܫܸܠܝܵܐ ܘܢܘܼܟܼܪܵܝܘܼܬܼܵܐ ܕܐ̄ܢܵܫܵܐ: ܠܵܐ ܡܸܫܟܿܚܵܐ. ܡܸܛܠ ܕܲܒܼܗܘܿܢ ܡܚܲܝܕܼܵܐ ܘܲܡܥܲܪܙܠܵܐ ܩܢܘܿܡܵܐܝܼܬܼ ܢܲܦܫܵܐ ܝܼܕܘܼܥܬܼܵܢܝܼܬܼܵܐ: ܘܥܲܡ ܙܵܘܥܲܝ̈ܗܘܿܢ ܡܸܬܼܢܲܬܿܦܵܐ: ܐܸܢ ܠܵܐ ܥܝܼܪܵܐ ܒܲܨܠܘܿܬܼܵܐ ܟܤܝܼܬܼܵܐ. ܘܬܘܼܒܼ. ܕܐܲܝܟܲܢܵܐ ܫܵܗܪܵܐ ܒܥܝܼܪܘܼܬܹܗ ܥܲܡ ܨܠܘܿܬܼܵܐ ܘܩܸܪܝܵܢܵܐ: ܡܒܲܤܸܡ ܘܲܡܚܲܟܸܐ ܘܡܲܪܘܸܙ ܘܲܡܙܲܗܸܐ ܠܵܗ̇ ܠܢܲܦܫܵܐ: ܗܵܢܘܿܢ ܝܲܬܿܝܼܪܵܐܝܼܬܼ ܡܦܵܤܝܼܢ: ܐܲܝܠܹܝܢ ܕܲܒܼܗܘܿܢ ܟ̱ܠܹܗ ܙܲܒܼܢܵܐ ܕܚܲܝܲܝ̈ܗܘܿܢ ܐܸܬܿܕܲܒܲܪܘ ܒܵܗ̇ ܒܥܲܢܘܵܝܘܼܬܼܵܐ ܚܲܬܿܝܼܬܿܬܵܐ܀ ܐܲܢ̄ܬܿ ܕܹܝܢ ܒܲܪܢܵܫܵܐ ܪܵܚܹ̇ܡ ܫܸܠܝܵܐ: ܠܗܵܠܹܝܢ ܪܸ̈ܡܙܹܐ ܡ̣ܢ ܪܸܥܝܵܢܵܐ ܕܡܸܠܲܝ̈ܗܘܿܢ ܕܐܲܒܼ̈ܗܵܬܼܵܐ ܤܝܼܡ ܠܩܘܼܒܼܠܵܟܼ ܐܲܝܟܼ ܕܲܠܢܝܼܫܵܐ: ܘܲܠܘܲܥܕܵܐ ܕܝܼܠܗܘܿܢ ܬܪܘܿܨ ܪܲܗܛܵܐ ܕܦܘܼܠܚܵܢܵܟܼ. ܘܲܩܕܼܵܡ ܟܠܡܸܕܸܡ ܐܸܬܼܚܲܟܲܡ: ܐܲܝܠܹܝܢ ܐܸܢܹܝܢ ܕܝܲܬܿܝܼܪܵܐܝܼܬܼ ܠܵܚ̈ܡܵܢ ܠܢܝܼܫܵܐ ܕܦܘܼܠܚܵܢܵܟܼ. ܘܒܸܠܥܵܕܲܝܗܹܝܢ ܕܬܸܬܼܥܲܠܲܡ ܒܝܲܕܼܥܲܬܼ ܩܘܼܫܬܼܵܐ ܠܵܐ ܡܸܫܟܲܚ ܐܲܢ̄ܬܿ: ܘܲܒܼܗܹܝܢ ܝܲܬܼܝܼܪ ܐܸܬܼܚܲܦܲܛ ܠܲܡܚܵܘܵܝܘܼ ܚܘܼܡܤܵܢܵܟܼ. ܫܸܬܼܩܵܐ: ܐ̄ܪܵܙܵܐ ܗ̄ܘ̣ ܕܥܵܠܡܵܐ ܕܲܥܬܼܝܼܕܼ. ܡܲܡܠܠܵܐ: ܐܘܿܪܓܵܢܘܿܢ ܐܝܼܬܼܵܘܗܝ ܕܥܵܠܡܵܐ ܗܵܢܵܐ. ܒܲܪܢܵܫܵܐ ܨܲܝܡܵܐ: ܒܲܟܼܝܵܢܵܐ ܕܪ̈ܘܼܚܵܢܹܐ ܡܢܲܤܸܐ ܢܲܦܫܹܗ ܠܲܡܕܲܡܵܝܘܼ. ܡ̣ܢ ܫܸܬܼܩܹܗ ܘܡ̣ܢ ܨܵܘܡܹܗ ܐܲܡܝܼܢܵܐ: ܡܸܬܼܦܪܸܫ ܒܲܪܢܵܫܵܐ ܕܐܲܝܡܝܼܢ ܒܦܘܼܠܚܵܢܵܐ ܐܲܠܵܗܵܝܵܐ ܒܟܲܤܝܘܼܬܹܗ. ܒܗܵܠܹܝܢ ܐ̄ܪܵܙܹܐ ܡܸܫܬܲܡܠܝܵܐ: ܐܵܦ ܡ̣ܢ ܗܵܢܘܿܢ ܚܲܝ̈ܠܵܘܵܬܼܵܐ ܠܵܐ ܡܸܬܼܚܲܙ̈ܝܵܢܹܐ: ܗܵܝ̇ ܬܸܫܡܸܫܬܼܵܐ ܡܲܠܝܲܬܼ ܩܘܼܕܼܫܹ̈ܐ ܕܗܵܝ̇ ܐܝܼܬܼܘܼܬܼܵܐ ܡܵܪܲܬܼ ܥܵܠܡܹ̈ܐ܀ ܐܵܦ ܐ̄ܢܵܫܝܼܢ ܕܐܸܬܼܦܪܸܫܘ ܒܲܙܒܲܢ ܠܡܸܥܲܠ ܠܓܼܵܘ ܡ̣ܢ ܐ̄ܪ̈ܵܙܹܐ ܐܲܠܵܗܵܝܹ̈ܐ: pb. 471 ܒܗܵܠܹܝܢ ܛܲܒܼ̈ܥܹܐ ܐܸܬܼܪܫܸܡܘ. ܕܡܸܢܗܘܿܢ: ܡܕܲܒܿܪܵܢܘܼܬܼܵܐ ܕܥܲܡܵܐ ܥܲܫܝܼܢܵܐ ܐܸܬܼܗܲܝܡܲܢܘ. ܘܡܸܢܗܘܿܢ: ܐܵܦ ܥܲܠ ܐܸܤܛܘܼ̈ܟܼܤܹܐ ܐܸܫܬܲܠܲܛܘ: ܘܲܒܼܕܼܘܼܡܵܪܵܐ ܪܲܒܵܐ ܟܝܵܢܹ̈ܐ ܕܲܒܼܪܝܼܬܼܵܐ ܠܦܘܼܩܕܵܢܵܐ ܕܡܸܠܲܝ̈ܗܘܿܢ ܐܸܫܬܿܡܲܥܘ. ܡܸܢܗܘܿܢ ܕܹܝܢ: ܟܲܤ̈ܝܵܬܼܵܐ ܕܲܡܤܲܬܿܪ̈ܵܢ ܒܫܸܬܼܩܹܗ ܓܢܝܼܙܵܐ ܕܡܵܪܹܟܠ: ܠܚܘܼܕܵܬܼܵܐ ܕܓܼܵܘܵܐ ܐܸܬܼܗܲܝܡܲܢܘ ܠܲܡܒܲܕܵܩܘܼ. ܐܵܦܠܵܐ ܓܹܝܪ ܦܲܐܝܵܐ ܗ̣̄ܘܲܬܼ: ܕܲܒܼܟܲܪܤܵܐ ܕܡܲܠܝܵܐ ܘܗܵܘܢܵܐ ܦܲܪܝܼܕܼܵܐ ܕܡ̣ܢ ܠܲܥܒܿܘܼܬܼܵܐ: ܢܸܫܬܲܡܫܘܼܢ ܗ̄ܘ̣ܵܘ ܕܐܲܝܟܼ ܗܵܠܹܝܢ ܐ̄ܪ̈ܵܙܹܐ: ܐܵܘ ܕܢܲܡܪܚܘܼܢ ܗ̄ܘ̣ܵܘ ܗܸܢܘܿܢ ܩܲܕܝܼ̈ܫܹܐ ܠܥܸܢܝܵܢܵܐ ܕܲܠܘܵܬܼ ܐܲܠܵܗܵܐ: ܘܨܹܝܕܼ ܟܲܤ̈ܝܵܬܼܵܐ ܕܐ̄ܪ̈ܵܙܵܘܗܝ ܠܡܸܬܼܥܲܠܵܝܘܼ: ܐܸܠܵܐ ܐܸܢ ܒܲܡܚܝܼܠܘܼܬܼܵܐ ܕܗܲܕܵܡܹ̈ܐ ܘܓܼܵܘܢܵܐ ܕܡܵܘܪܸܩ ܡ̣ܢ ܚܲܫܵܐ ܕܟܲܦܢܵܐ: ܘܗܵܢܘܵܐ ܕܲܒܼܗܝܼܠ ܥܲܠ ܛܲܥܡܹܗ ܒܤܘܼܪܵܩܵܐ ܕܡ̣ܢ ܟܠܗܘܿܢ ܚܘܼ̈ܫܵܒܹܐ ܐܲܪ̈ܥܵܢܵܝܹܐ. ܡܵܐ ܓܹܝܪ ܕܲܒܼܢܘܼܓܼܪܹܗ ܕܙܲܒܼܢܵܐ ܕܲܒܼܓܼܵܘ ܟܘܼܪܚܵܟܼ: ܒܝܲܕܼ ܥܲܡ̈ܠܹܐ ܥܡܝܼ̈ܠܹܐ ܘܲܢܛܘܼܪܬܵܐ ܟܤܝܼܬܼܵܐ: ܘܲܪܒܼܝܼܨܘܼܬܼܵܐ ܕܪܸ̈ܓܼܫܲܝܟ ܡ̣ܢ ܟܠ ܦܸܓܥ̈ܝܼܢ: ܡܲܓܸܢ ܥܠܲܝܟ ܚܲܝܠܹܗ ܕܫܸܠܝܵܐ: ܠܘܼܩܕܲܡ ܦܵܓܲܥ̇ ܐܲܢ̄ܬܿ ܒܚܲܕܼܘܼܬܼܵܐ ܗܵܝ̇ ܕܲܕܼܠܵܐ ܥܸܠܬܼܵܐ ܕܒܲܙܒܲܢ ܙܒܲܢ ܡܲܡܠܟܼܵܐ ܒܢܲܦܫܵܟܼ. ܘܗܵܝܕܹܝܢ ܡܸܬܼܦܲܬ̈ܚܵܢ ܥܲܝܢܲܝ̈ܟ ܠܡܸܚܙܵܐ ܚܲܝܠܵܐ ܕܥܵܒܼܘܿܕܼܘܼܬܹܗ ܕܐܲܠܵܗܵܐ: ܘܫܘܼܦܪܵܐ ܕܒܸܪ̈ܝܵܬܼܵܐ: ܠܦܘܼܬܼ ܟܡܵܝܘܼܬܼܵܐ ܕܕܲܟܼܝܘܼܬܼܵܟܼ. ܘܡܵܐ ܕܐܸܬܼܢܓܸܕܼ ܗܵܘܢܵܐ ܒܬܲܗܪܵܐ ܕܲܚܙܵܬܼܵܐ ܗܵܕܹܐ: ܠܸܠܝܵܐ ܡܸܟܹܝܠ ܘܐܝܼܡܵܡܵܐ ܚܲܕܼ ܗܵܘܹ̇ܐ ܠܹܗ: ܒܬܲܗܪܵܐ ܕܲܫܒܼܝܼܚܘܼܬܼ ܥ̇ܒܼܵܕܼܵܘ̈ܗܝ ܕܐܲܠܵܗܵܐ. ܘܡܸܟܵܐ: ܡܸܬܼܓܲܢܒܵܐ ܠܵܗ̇ ܡ̣ܢ ܢܲܦܫܵܐ ܪܓܸܫܬܼܵܐ ܕܚܲܫܹ̈ܐ ܒܗܲܝܢܝܼܐܝܼܬܼ ܚܙܵܬܼܵܐ ܗܵܕܹܐ. ܘܒܼܵܗ̇ ܥܵܐ̇ܠܵܐ ܠܲܬܼܪ̈ܲܝܗܘܿܢ pb. 472 ܕܲܪ̈ܓܹܐ ܕܓܸܠܝܵܢܹ̈ܐ ܡܸܬܼܝܲܕܼ̈ܥܵܢܹܐ: ܕܤܝܼܡܝܼܢ ܒܛܲܟܼܸܤܵܐ ܒܵܬܲܪ ܗܵܢܵܐ: ܡ̣ܢ ܕܲܟܼܝܘܼܬܼܵܐ ܘܲܠܥܸܠ.