Discourse 67

ܡܲܕܥܵܐ ܐܝܼܬܼܵܘܗܝ: ܪܸܓܼܫܵܐ ܪܘܼܚܵܢܵܐ: ܕܲܥܒܼܝܼܕܼ ܡܩܲܒܿܠܵܢܵܐ ܕܚܲܝܠܵܐ ܚܵܙܘܿܝܵܐ: ܐܲܝܟܼ ܒܵܒܲܬܼ ܥܲܝ̈ܢܹܐ ܒܸܤܪ̈ܵܢܵܝܬܼܵܐ: ܕܒܼܵܗ̇ ܢܤܝܼܟܼ ܢܘܼܗܪܵܐ ܡܸܬܼܪܲܓܼܫܵܢܵܐ. ܚܙܵܝܵܐ ܡܸܬܼܚܲܕܼܥܵܢܵܐ ܐܝܼܬܼܵܘܗܝ: ܝܑܼܕܲܥܬܼܵܐ ܟܝܵܢܵܝܬܼܵܐ: ܕܲܒܼܚܲܝܠܵܐ ܒܹܗ ܐܸܬܼܡܲܙܓܲܬ̤ ܥܲܡ ܬܘܼܩܵܢܹܗ ܕܲܟܼܝܵܢܵܐ: ܗܵܝ̇ ܕܲܡܫܲܡܗܝܼܢ ܠܵܗ̇ ܢܘܼܗܪܵܐ ܟܝܵܢܵܝܵܐ. ܚܲܝܠܵܐ ܩܲܕܝܼܫܵܐ ܐܝܼܬܼܵܘܗܝ: ܛܲܝܒܿܘܼܬܼܵܐ ܫܸܡܫܵܐ ܡܦܲܪܫܵܢܵܐ: ܕܐܲܝܠܹܝܢ ܕܤܝܼ̈ܡܵܢ ܒܹܝܬܼ ܢܘܼܗܪܵܐ ܠܲܚܙܵܬܼܵܐ. ܟܝܵܢܹ̈ܐ ܡ̇ܢ ܐܝܼܬܲܝܗܘܿܢ: ܨܸܒܼ̈ܘܵܬܼܵܐ ܕܐܝܼܬܲܝܗܹܝܢ ܡܸܨ̈ܥܵܝܹܐ ܡܸܬܼܦܲܪ̈ܫܵܢܹܐ ܕܡ̣ܢ ܢܘܼܗܪܵܐ ܠܲܚܙܵܬܼܵܐ. ܚܲܫܹ̈ܐ ܕܹܝܢ ܐܝܼܬܲܝܗܘܿܢ: ܐܲܝܟܼ ܐܘܼܤ̈ܝܼܵܣ ܡܸܕܸܡ ܐܲܛܝܼ̈ܡܵܬܼܵܐ: ܕܐܸܡܲܬܼܝ ܕܲܡܡܲܨ̈ܥܵܢ ܒܹܝܬܼ ܢܘܼܗܪܵܐ ܠܲܚܙܵܬܼܵܐ: ܟܵܠ̈ܝܵܢ ܡܸܢܹܗ ܦܘܼܪܫܵܢܵܐ ܕܨܸܒܼ̈ܘܵܬܼܵܐ. ܕܲܟܼܝܘܼܬܼܵܐ ܐܝܼܬܹܝܗ̇: ܡܪܝܼܩܘܼܬܼܵܐ ܕܐܵܐܲܪ ܡܸܬܼܝܲܕܼܥܵܢܵܐ: ܕܲܒܼܥܘܼܒܹܗ ܛܵܐܹ̇ܣ ܟܝܵܢܵܐ ܪܘܼܚܵܢܵܐ ܒܲܢ܀ ܗܦܵܟܼܬܹܗ܀ ܐܸܢ ܠܵܐ ܐܝܼܬܼܵܘܗܝ ܡܲܕܥܵܐ ܚܠܝܼܡܵܐ ܒܲܟܼܝܵܢܹܗ: ܠܵܐ ܡܲܥܒܿܕܼܵܐ ܒܹܗ ܝܑܼܕܲܥܬܼܵܐ. ܐܲܝܟܼ ܪܸܓܼܫܵܐ ܒܸܤܪܵܢܵܐ: ܕܐܸܡܲܬܼܝ ܕܲܢܟܸܐ ܡ̣ܢ ܥܸܠ̈ܠܵܬܼܵܐ: ܫܩܝܼܠܵܐ ܡܸܢܹܗ ܚܙܵܬܼܵܐ. ܐܸܢ ܡ̇ܢ ܐܝܼܬܼܵܘܗܝ ܡܲܕܥܵܐ ܚܠܝܼܡܵܐ: ܝܑܼܕܲܥܬܼܵܐ ܕܹܝܢ ܠܲܝܼܬܹܝܗ̇: ܠܵܐ ܡܲܥܒܸܿܕܼ ܡܲܕܥܵܐ ܦܘܼܪܫܵܢܵܐ ܒܸܠܥܵܕܹܝܗ̇ ܒܪ̈ܘܼܚܵܢܵܝܵܬܼܵܐ. ܐܲܝܟܼ ܥܲܝܢܵܐ ܕܲܚܠܝܼܡܵܐ ܒܟܼܠܗܹܝܢ ܕܝܼܠܵܗ̇: pb. 473 ܘܲܓܼܗܝܼܪܵܐ ܡ̣ܢ ܪܓܸܫܬܼܵܐ ܕܲܚܙܵܬܼܵܐ ܟܡܵܐ ܙܲܒܼ̈ܢܝܼܢ. ܐܸܢܗ̤ܘ ܗܵܟܹܝܠ ܕܗܵܠܹܝܢ ܟܠܗܹܝܢ ܢܛܝܼܪ̈ܵܢ ܒܕܼܝܼ̈ܠܵܝܵܬܼܗܹܝܢ: ܛܲܝܒܿܘܼܬܼܵܐ ܠܵܐ ܩܲܪܝܼܒܼܵܐ: ܕܠܵܐ ܡܲܥܒܿܕܼܵܢܘܼ ܡܩܵܘ̈ܝܵܢ ܟܠܗܹܝܢ ܡ̣ܢ ܬܸܫܡܸܫܬܼܵܐ ܕܦܘܼܪ̈ܫܵܢܲܝܗܹܝܢ. ܐܲܝܟܼ ܡܵܐ ܕܐܵܦ ܒܥܸܕܵܢܵܘ̈ܗܝ ܕܠܸܠܝܵܐ: ܕܡܸܛܠ ܠܲܝܬܵܝܘܼܬܼܵܐ ܕܫܸܡܫܵܐ: ܦܲܝܝܼ̈ܫܵܢ ܕܠܵܐ ܤܵܥܘܿܪܘܼ: ܘܟܲܕܼܸ ܟܠܗܹܝܢ ܫܲܪܝܼܪ̈ܵܢ ܘܲܡܫܲܡ̈ܠܝܵܢ ܒܕܼܝܼܠܗܹܝܢ. ܐܵܡܲ݁ܪ ܐ̄ܢܵܐ ܕܹܝܢ ܥܲܝܢܵܐ ܘܲܚܙܵܬܼܵܐ ܘܨܸܒܼ̈ܘܵܬܼܵܐ: ܘܠܵܐ ܦܵܪ̈ܫܵܢ ܐܵܘ ܡܸܬܼܦܲܪ̈ܫܵܢ. ܘܗܵܕܲܐ ܗ̣̄ܝ ܕܐܲܡܝܼܪܵܐ: ܕܲܒܼܢܘܼܗܪܵܟܼ ܗ̄ܘ̣ ܚܵܙܹ̇ܝܢܲܢ ܢܘܼܗܪܵܐ. ܐܸܢܕܹܝܢ ܘܐܵܦ ܛܲܝܒܿܘܼܬܼܵܐ ܫܸܡܫܵܐ ܡܸܬܼܝܲܕܼܥܵܢܵܐ ܐܝܼܬܹܝܗ̇ ܟܲܕܼ ܩܲܪܝܼܒܼܵܐ: ܘܲܡܓܲܪܓܼܵܐ ܘܲܡܫܲܕܠܵܐ ܘܡܲܥܒܿܕܼܵܐ ܘܲܡܥܝܼܪܵܐ: ܕܲܟܼܝܘܼܬܼܵܐ ܠܵ ܐܝܼܬܹܝܗ̇ ܕܒܼܵܗ̇ ܐܲܝܟܼ ܕܒܼܵܐܐܲܪ ܕܲܡܪܝܼܩ ܡ̣ܢ ܠܒܼܝܼܕܼܘܼܬܼܵܐ ܥܢܵܢܵܝܬܼܵܐ ܘܲܡܠܘܿܐܹ̈ܐ ܡܲܚܫ̈ܟܼܵܢܹܐ: ܦܫܝܼܩܵܐܝܼܬܼ ܡܸܬܼܡܲܬܼܚܝܼܢ ܠܘܵܬܲܢ ܙܲܠܝܼ̈ܩܲܝ ܫܸܡܫܵܐ ܘܲܒܼܢܘܼܗܪܵܐ ܪܓܼܝܼܓܼܵܐ: ܕܡܸܢܗܘܿܢ ܡܸܬܼܒܲܤܡܝܼܢܲܢ ܒܗܲܢܝܼܐܝܼܬܼ ܚܙܵܬܼܵܐ ܕܗܵܢܵܐ ܟܠ ܪܘܼܚܵܢܵܝܬܼܵܐ: ܚܓܼܝܼܪܵܐ ܚܙܵܬܼܵܐ ܡ̣ܢ ܦܘܼܪܫܵܢܵܐ: ܒܲܛܝܼܠ ܟܝܵܢܵܐ ܡ̣ܢ ܤܵܥܘܿܪܘܼܬܼܵܐ: ܓܠܝܼܙܵܐ ܢܲܦܫܵܐ ܡ̣ܢ ܕܲܠܡܲܪܓܵܫܘܼ ܒܗܸܢܝܵܢܹܗ ܕܫܸܡܫܵܐ ܬܪܲܝܵܢܵܐ ܕܲܕܼܢܝܼܚ ܥܲܠ ܟܠ: ܡܸܛܠ ܤܝܵܡܵܐ ܓܘܼܫܡܵܢܵܝܵܐ ܕܒܹܗ ܡܸܬܼܡܤܸܣ ܨܼܡܚܹܗ ܕܲܫܪܵܪܵܐ ܕܠܵܐ ܢܸܫܬܲܡܪܘܼܢ ܠܘܵܬܲܢ. ܡܵܕܹܝܢ: ܐܵܠܨܵܐܝܼܬܼ ܡܸܬܼܒܲܥ݁̈ܝܵܢ ܗܵܠܹܝܢ ܟܠܗܹܝܢ ܕܐܸܬܼܐܡܲܪ. ܘܡܸܛܠ ܕܲܠܡܲܚܤܸܢ ܟܠܗܹܝܢ ܗܵܠܹܝܢ ܕܠܵܐ ܒܘܼܨܵܪ ܡܸܫܬܲܟܼ̈ܚܢ ܒܚܲܕܼ ܒܲܪܢܵܫܵܐ: ܐܵܦܠܵܐ ܤܲܓܝܼ̈ܐܹܐ ܡܸܫܬܲܟܼܚܝܼܢ ܕܡܵܛܹ̇ܝܢ ܠܫܘܼܡܠܵܝܵܐ ܡܢܵܬܵܢܵܝܵܐ ܕܝܼܕܲܥܬܼܵܐ ܪܘܼܚܵܢܵܝܬܼܵܐ. ܚܲܤܝܼܪܘܼܬܼܵܐ ܡ̇ܢ ܕܐܲܝܟܼ ܗܵܟܲܢܵܐ: ܡ̣ܢ ܠܵܐ ܤܵܦܩܘܼܬܼܵܐ ܕܡܲܕܥܵܐ: ܡ̣ܢ ܠܵܐ ܚܢܵܝܘܼܬܼܵܐ ܕܢܝܼܫܵܐ: pb. 474 ܡ̣ܢ ܠܵܐ ܡܥܲܬܕܘܼܬܹܗ ܕܨܸܒܼܝܵܢܵܐ: ܡ̣ܢ ܚܲܤܝܼܪܘܼܬܼܵܐ ܕܕܲܟܼܝܘܼܬܼܵܐ: ܡ̣ܢ ܠܵܐ ܫܟܼܝܼܚܘܼܬܼܗܘܿܢ ܕܫܲܒܵܠܹ̈ܐ: ܡ̣ܢ ܟܸܠܝܵܢܵܐ ܕܛܲܝܒܿܘܼܬܼܵܐ. ܠܵܐ ܠܲܡ ܝܵܐܹ̇ܐ ܥܘܼܬܼܪܵܐ ܠܤܲܟܼܠܵܐ: ܘܐܵܦܠܵܐ ܠܥܲܒܼܕܵܐ ܕܢܸܫܬܲܠܲܛ ܒܪܵܘܪ̈ܒܼܵܬܼܵܐ. ܡ̣ܢ ܥܘܼܘܵܟܹ̈ܐ ܕܙܲܒܼܢܵܐ: ܘܐܲܬܼܪܵܐ: ܘܦܲܪܨܘܿܦܵܐ.