Narsai: On Lent I - ܕܚܲܕܼܒܿܫܲܒܵܐ ܩܲܕܼܡܵܝܵܐ ܕܨܵܘܡܵܐ

1 :ܪܸܥܝܵܢܝ ܡܲܠܟ݂ܲܢܝ ܕܐܹܡܲܪ ܕܝܼܢܵܐ ܥܲܡ ܚܘܼܫܵܒܲܝ̈ 2 ܕܲܪܚܸܡ̣ܘ ܦܸܗܝܵܐ ܘܲܣܢܵܘ ܛܲܟܼܣܵܐ ܕܡܸܠܲܬܼ ܚܲܝܹ̈ܐ ܀ 3 :ܒܕܼܝܼܢܵܐ ܥܲܠ̣ ܥܲܡܝ ܝܲܨܪܵܐ ܕܲܩܢܘܿܡܝ ܟܲܕܼ ܡܲܟܸܿܣ ܠܝܼ 4 ܕܡܸܛܠ ܡ̇ܢܵܐ ܣܢܲܬܿ ܝܘܼܬܼܪܵܢܵܐ ܪܘܼܚܵܢܵܝܵܐ ܀ 5 :ܒܲܣܢܹܐܓܼܪܘܼܬܼܵܐ ܕܚܠܵܦ ܩܘܼܫܬܵܐ ܩܵܡ̣ܘ ܚܘܼܫܵܒܲܝ̈ 6 ܘܚܲܝܒܼܘܼܢܝ ܣܲܓܿܝܼ ܕܲܟܼܡܵܐ ܛܸܠܡܹ̇ܬܼ ܐܲܝܕܵܐ ܕܦܲܐܝܵܐ ܀ 7 :ܙܵܘܥܹ̈ܐ ܗܘ̤ܵܘ ܠܝܼ ܐܲܝܟ ܬܵܒܼܘܿܥܹ̈ܐ ܒܐܲܝܠܹܝܢ ܕܲܚܛܹ̇ܝܬܼ 8 ܕܡ̇ܢܲܐ ܗ̄ܝܼ ܥܸܠܬܼܵܐ ܕܟܼܵܡ̣ܬܿ ܐܲܝܟ ܚܲܪܫܵܐ ܠܡܸܦܪܲܥ ܡܸܠܹ̈ܐ ܀ 9 :ܦܵܪܘܿܫܘܼܬܼܵܐ ܕܒܼܝܼ ܐܸܡܪܲܬ̤ ܥܲܡܝ ܐܲܝܟ ܕܲܒܼܕܝܼܢܵܐ 10 ܕܡܵܢܵܐ ܚܛܹ̇ܝܬܼ ܠܵܟ ܕܣܲܡܝ̣ܬܿ ܪ̈ܓܼܫܲܝ ܡ̣ܢ ܒܘܼܝܵܢܵܐ ܀ pb. 168 11 :ܐܲܝܟ ܫܸܢܬܼܵܐ ܩܪ̣ܵܢܝ ܘܐܲܥܝܼܪܲܢܝ ܗܵܘܢܵܐ ܥܝܼܪܵܐ 12 ܕܩܘܼܡ ܛܲܒܿܝܼܥܵܐ ܘܢܲܦܸܨ ܝܘܼܩܪܵܐ ܕܡܲܐܝܼܢܘܼܬܼܵܟ ܀ 13 :ܥܕܲܡܵܐ ܠܐܸܡܲܬܼܝ ܕܵܡ̇ܟܼܬܿ ܘܫܵܠܹ̇ܿܝܬܿ ܡ̣ܢ ܕܲܠܡܸܦܠܲܚ 14 ܫܡܲܥ ܩܵܠ ܨܼܦܪܵܐ ܕܲܡܚܲܣܸܕ ܠܹܗ ܠܲܚܒܸܢܵܢܵܐ ܀ 15 :ܟܲܕܿܘܼ ܓܲܡܲܪܬܿ ܝܵܘܡܲܝ̈ ܚܲܝܲܝ̈ܟ ܒܲܣܪܝܼܩܘܼܬܼܵܐ 16 ܦܘܼܫ ܡ̣ܢ ܦܸܗܝܵܐ ܘܐܲܥܢܵܐ ܢܲܦܫܵܟ ܒܦܘܼܠܚܵܢ ܩܘܼܫܬܵܐ ܀ 17 :ܩܪܘܿܒܼ ܠܲܥܒܼܵܕܵܐ ܐܵܦܸܢ ܗܵܫܵܐ ܒܫܘܼܠܵܡ ܝܵܘܡܵܐ 18 ܕܲܟܼܒܲܪ ܬܸܫܘܸܐ ܠܡܸܣܲܒܼ ܐܲܓܼܪܵܐ ܐܲܝܟ ܕܲܒܼܛܲܝܒܿܘܼ ܀ 19 :ܘܐܸܢܗܘ̤ ܕܲܡܚܝܼܠ ܚܲܝܠܵܐ ܕܪܸ̈ܓܼܫܲܝܟ ܡ̣ܢ ܣܘܼܥܪ̈ܵܢܹܐ 20 ܐܵܦܸܢ ܡܸܠܹ̈ܐ ܦܪܘܿܥ ܐܲܝܟ ܕܲܡܨܸܐ ܐܲܝܢܵܐ ܕܚܲܝܵܒܼ ܀ 21 :ܗܵܐ ܣܲܗܸܕܿܬܵܟ ܗܵܘܢܵܐ ܒܟܸܣܝܵܐ ܩ̣ܪܵܢܝ ܘܐܸܡ݂ܲܪ ܠܝܼ 22 ܚܙܝܼ ܠܵܐ ܬܸܫܡܲܥ ܗܵܝ̇ ܒܲܪܬܼ ܩܵܠܵܐ ܕܥܲܒܼܕܼܵܐ ܒܝܼܫܵܐ ܀ 23 :ܗܵܐ ܚܵܘܝܼܬܵܟ ܐܘܪܚܵܐ ܕܚܲܝܹ̈ܐ ܚܙܘܿܩ ܥܲܡ ܛܵܒܹ̈ܐ 24 ܠܵܐ ܬܸܬܼܠܵܘܸܐ ܠܒܼܝܼܫܹ̈ܐ ܕܪܕܼܵܘ ܒܐܘܼܪܚܵܐ ܕܦܲܬܼܝܵܐ ܀ 25 :ܟܐܝܼ ܒܲܩܢܘܿܡܵܟ ܘܐܲܟܸܿܣ ܡܘܸܡܹ̈ܐ ܕܲܟܼܢܵܘ̈ܬܼܵܟ 26 ܘܐܲܠܸܦ ܐܸܢܘܿܢ ܕܢܸܣܢܘܿܢ ܥܵܘ̣ܠܵܐ ܩܵܛܹ̇ܠ ܐ̄ܢܵܫܵܐ ܀ 27 :ܕܲܪܸܫ ܐܸܢܘܿܢ ܒܦܘܼܠܚܵܢ ܚܘܼܒܵܐ ܘܗܲܝܡܵܢܘܼܬܼܵܐ 28 ܘܠܲܒܸܿܒܼ ܐܸܢܘܿܢ ܕܢܸܩܢܘܿܢ ܣܲܒܼܪܵܐ ܕܲܥܬܼܝܼ̈ܕܼܵܬܵܐ ܀ 29 :ܐܲܥܝܼܪ ܐܸܢܘܿܢ ܒܩܵܠ ܡܘܼܠܟܵܢܵܐ ܕܡܲܠܟܿܘܼܬܼ ܪܵܘܡܵܐ 30 ܘܫܲܓܸܿܫ ܐܸܢܘܿܢ ܒܗܲܢܝܼܐܘܼܬܼܵܐ ܕܫܘܼܘܕܼܵܝ ܚܲܝܹ̈ܐ ܀ 31 :ܒܗܵܠܹܝܢ ܕܵܢܲܢܝ ܗܵܘܢܵܐ ܕܲܩܢܘܿܡܝ ܐܲܝܟ ܚܲܝܵܒܼܵܐ 32 ܘܝܸܕܲܥܹ̇ܬܼ ܕܫܲܦܝܼܪ ܡܲܠܟܲܢܝ ܕܐܸܦܢܹܐ ܠܐܘܼܪܚܵܐ ܕܚܲܝܹ̈ܐ ܀ 33 :ܬܵܘ ܡܵܝܘܿܬܹ̈ܐ ܢܸܪܕܹܿܐ ܒܐܘܼܪܚܵܐ ܕܲܕܪܲܫ̣ܘ ܟܹܐܢܹ̈ܐ 34 ܕܕܲܡ ܢܸܬܼܡܲܢܲܥ ܠܘܵܬܼ ܫܘܼܠܵܡܵܐ ܕܚܲܝܹ̈ܐ ܡܠܝܼܟܹܐ ܀ 35 :ܬܵܘ ܢܸܬܿܕܲܡܸܐ ܒܕܼܘܼܒܵܪ̈ܲܝܗܘܿܢ ܒܙܵܘܥܲܝ̈ ܢܲܦܫܵܐ 36 ܘܢܸܦܪܿܘܿܥ ܢܝܼܫܵܐ ܕܚܘܼܡܣܵܢܲܝ̈ܗܘܿܢ ܩܕܼܲܡ ܪܸܥܝܵܢܲܢ ܀ 37 :ܡܸܢܗܘܿܢ ܢܹܐܠܲܦ ܕܐܲܝܠܹܝܢ ܬܵܒܲܥ̇ ܡܵܪܵܐ ܠܥܲܒܼܕܵܘ̈ܗܝ 38 ܘܒܲܐܝܠܹܝܢ ܥܲܡܡܹ̈ܐ ܡܢܵܚ ܨܸܒܼܝܵܢܹܗ ܕܡܲܬܼܩܸܢ ܟܠܵܐ ܀ 39 :ܢܫܲܐܸܠ ܐܸܢܘܿܢ ܐܲܝܟ ܪ̈ܲܒܵܢܹܐ ܕܪ̈ܘܼܚܵܢܝܵܬܼܵܐ 40 ܕܲܢܬܲܪܐܘܼܢܵܢ ܡ̣ܢ ܫܲܒܼܪܘܼܬܼܵܐ ܠܲܓܼܡܝܼܪܘܼܬܼܵܐ ܀ 41 :ܢܸܗܘܘܿܢ ܥܲܡܠܹ̈ܐ ܕܢܸܨܚܵܢܲܝ̈ܗܘܿܢ ܐܲܝܟ ܡܲܚܙܝܼܬܼܵܐ 42 ܘܢܸܚܙܸܐ ܢܲܦܫܲܢ ܕܕܠܡܵܐ ܣܲܢܝܵܐ ܒܨܵܐܬܼܵܐ ܕܥܵܘ̣ܠܵܐ ܀ pb. 169 43 :ܒܦܲܓܼܪܵܐ ܘܢܲܦܫܵܐ ܟܲܢܸܫܘ ܥܘܼܬܼܪܵܐ ܪܘܼܚܵܢܵܝܵܐ 44 ܒܪܸ̈ܓܼܫܹܐ ܓܠܲܝܵ̈ܐ ܘܙܵܘܥܹ̈ܐ ܟܣܲܝܵ̈ܐ ܢܣܲܒܼ݂ܘ ܙܵܟܼܘܼܬܼܵܐ ܀ 45 :ܟܲܒܸܿܫܘ ܪܸ̈ܓܼܫܹܐ ܒܲܥܪܝܼܪ̈ܵܝܹܐ ܒܚܲܫܲܝ̈ ܦܲܓܼܪܵܐ 46 ܘܫܲܝܸܢܘ ܙܵܘܥܹ̈ܐ ܒܝܲܕܼ ܚܘܼܡܣܵܢܵܐ ܕܡ̣ܢ ܚܘܼܬܼܚܵܬܹ̈ܐ ܀ 47 :ܒܛܲܟܼܣܵܐ ܝܲܗ̣̄ܒܼܘ ܠܹܗ ܐܘܼܟܼܠܵܐ ܠܦܲܓܼܪܵܐ ܕܠܵܐ ܢܸܬܼܒܲܥܪܲܪ 48 ܘܲܒܼܡܘܼܫ̈ܚܵܬܼܵܐ ܪܗܸܛ ܪܸܥܝܵܢܵܐ ܥܲܡ ܗܲܕܵܡܹ̈ܐ ܀ 49 :ܦܓܼܘܼ̈ܕܹܐ ܕܨܵܘܡ̇ܐ ܐܲܪܡܝܼܘ ܙܵܘ̈ܥܹܐ ܥܲܠ ܗܲܕܵܡܹ̈ܐ 50 ܘܲܪܗܸܛ̣ܘ ܐܲܟܲܚ̄ܕܼ ܪܸ̈ܓܼܫܹܗ ܘܙܵܘܥܹ̈ܐ ܠܘܲܥܕܵܐ ܕܚܲܝܹ̈ܐ ܀ 51 :ܒܨܵܘܡ̇ܐ ܟܲܕ ܢܘܼܗܝ ܠܦܲܓܼܪܵܐ ܝܲܥܢܵܐ ܐܲܝܟ ܕܲܒܼܢܝܼܪܵܐ 52 ܕܢܸܗܘܸܐ ܦܵܠܲܚ ܒܐܸܫܟܵܪ ܚܲܝܹ̈ܐ ܪ̈ܘܼܚܵܢܵܝܹܐ ܀ 53 :ܘܲܟܼܒܲܪ ܗܵܕܹܐ ܒܐ̄ܪܵܙܵܐ ܝܲܠ̣ܦܘܼܗ̇ ܡ̣ܢ ܚܹܝܠ ܟܲܣܝܵܐ 54 ܕܨܵܘܡ̇ܐ ܥܵܗܹ̇ܢ ܠܲܡܩܲܦܵܚܘܼ ܠܲܪ̈ܓܼܝܼܓܼܵܬܼܵܐ ܀ 55 :ܥܘܼܕܪܵܢ ܪܘܼܚܵܐ ܐܲܠܸܦ ܐܸܢܘܿܢ ܚܹܝܠ ܚܸܟܼܡܵܬܼ̈ܐ 56 ܘܕܲܒܲܪܘ ܫܲܦܝܼܪ ܠܦܲܓܼܪܵܐ ܘܢܲܦܫܵܐ ܐܲܝܟ ܝܵܕܲܘܿܥܹ̈ܐ ܀ 57 :ܘܕܐܸܢ ܗܵܟܲܢܵܐ ܗ̄ܝܼ ܕܪܸܡܙܵܐ ܟܲܣܝܵܐ ܚܲܟܸܿܡ ܐܸܢܘܿܢ 58 ܡ̣ܢ ܒܲܪ ܥܲܡܪܲܡ ܢܹܐܠܲܦ ܗܵܕܹܐ ܕܫܲܪܝܼ ܒܨܵܘܡ̇ܐ ܀ 59 :ܗܘ̤ ܩܲܕܼܡ̇ܝܵܬܼ ܕܲܪܫܵܗ̇ ܠܐܘܼܪܚܵܐ ܕܨܵܘܡܵܐ ܪܓܼܝܼܓܼܵܐ 60 ܘܲܢܣܲܒܼ݂ ܥܘܼܬܼܪܵܐ ܕܪܘܼܚ ܓܸܠܝܵܢܹ̈ܐ ܒܫܘܼܠܵܡ ܨܵܘܡܹܗ ܀ 61 :ܡܸܢܸܗ̇ ܒܲܟܲܪ ܦܹܐܪܵܐ ܕܨܵܘܡܵܐ ܡܲܩܢܸܐ ܚܲܝܹ̈ܐ 62 ܘܙܲܪܥܵܗ̣̇ ܒܐ̄ܢܵܫܵܐ ܠܗܲܢܝܼܐܘܼܬܼܵܐ ܕܐܘܼܟܼܠܵܐ ܕܡܸܢܹܗ ܀ 63 :ܗܘ̤ ܐܲܦܠܲܚ ܒܵܗ̇ ܒܦܵܠܚܘܼܬܼ ܨܵܘܡ̇ܐ ܪܘܼܚܵܢܵܝܬܵܐ 64 ܘܲܢܣ݂ܲܒܼ ܐܲܓܼܪܵܐ ܐܲܦܣܘܿܢ̈ܝܵܬܼܵܐ ܕܲܥܬܼܝܼ̈ܕܼܵܬܼܵܐ ܀ 65 :ܗܘ̤ ܢ̣ܚܸܬܼ ܠܘܼܩܕܼܵܡ ܠܐܸܣܛܵܕܝܼܘܿܢ ܕܪ̈ܲܓܼܝܼܓܼܵܬܼܵܐ 66 ܘܐܸܚܲܕܼ ܕܪܵܐ ܥܲܡ ܚܘܼܬܼܚܵܬܹ̈̄ܐ ܒܪܸܓܲܬܼ ܠܲܚܡܵܐ ܀ 67 :ܐܲܪܒܿܥܝܼܢ ܝܵܘܡܝܼ̈ܢ ܩ̣ܵܡ ܒܐܵܓܼܘܿܢܵܐ ܠܹܠܲܝ ܐܝܼܡܵܡ 68 ܘܡ̣ܢ ܕܐܸܬܼܢܲܨܲܚ ܝܲܗ̣̄ܒܼ ܠܹܗ ܪܸܡܙܵܐ ܟܠܝܼܠ ܟܲܣ̈ܝܵܬܹܗ ܀ 69 :ܐܘܿ ܡ̇ܝܘܿܬܼܵܐ ܕܲܛܥ̣ܵܐ ܟܝܵܢܵܐ ܕܡ̇ܝܘܿܬܼܘܼܬܹܗ 70 ܘܲܒܼܥ̣ܵܐ ܕܢܸܕܡܸܐ ܒܠܵܐ ܡܵܝܘܿܬܹ̈ܐ ܕܠܵܐ ܡܸܬܿܬܲܪܣܹܝܢ ܀ 71 :ܐܘܿ ܦܲܓܼܪܵܢܵܐ ܕܒܲܣܲܪ ܘܬܲܗܸܠ ܒܲܪ̈ܓܼܝܼܓܼܵܬܼܵܐ 72 ܘܐܲܥܢܝܼ ܢܲܦܫܹܐ ܒܕܼܘܼܒܵܪ ܚܲܝܹ̈ܐ ܪ̈ܘܼܚܵܢܵܝܹܐ ܀ 73 :ܐܘܿ ܐܲܪܥܵܢܵܐ ܕܫܸܵܛ̣ ܠܲܥܝܵܕܹ̈ܐ ܐܪ̈ܥܵܢܵܝܹܐ 74 ܘܟܲܕܼ ܥܲܠ ܐܲܪܥܵܐ ܗ̄ܘ̣ ܡܲܪܝ ܒܚܲܝܹ̈ܐ ܕܲܫܡܲܝܵܢܹ̈ܐ ܀ 75 :ܐܘܿ ܥܦܪܵܢܵܐ ܕܲܓܼܒܼܝܼܠ ܛܝܼܢܹܗ ܒܡܲܝ̈ܐ ܕܚܲܫܹ̈ܐ 76 ܕܚܲܝܸܨܝܵܬܹܗ ܐܲܝܟ ܠܵܐ ܪܲܦܝܵܐ ܠܡܸܚܣܲܢ ܚܲܫܹ̈ܐ ܀ 77 :ܒܨܵܘܡܵܐ ܠܘܼܩܕܼܵܡ ܒ̣ܩܵܐ ܗܲܕܵܡ̇ܘ̈ܗܝ ܐܲܝܟ ܐܲܬܼܠܹܝܛܵܐ 78 ܘܝܼܕܲܥ ܕܲܡܨܸܐ ܠܡܹܐܚܲܕܼ ܕܪܵܐ ܒܦܲܓܼܪܵܐ ܘܢܲܦܫܵܐ ܀ pb. 170 79 :ܐܵܦ ܚܲܙܵܝܵܐ ܕܐܲܬܼܠܹܝܛܘܼܬܹܗ ܚܙ̣ܵܝܗܝ ܕܲܡܛܲܝܲܒܼ 80 ܘܦܲܬܼ݂ܚܵܗ̇ ܩܕܵܡ̇ܘܗܝ ܠܐܸܣܛܵܕܝܼܘܿܢ ܕܲܣܬܼܝܼܪ̈ܬܼܵܐ ܀ 81 :ܥܲܠ ܕܐܸܬܼܒܲܩܝܼ ܒܓܲܙܲܝ̈ ܪܘܼܚܵܐ ܒܗܵܘܢܵܐ ܕܪܘܼܚܵܐ 82 ܡܲܫ̣ ܟܲܣ̈ܝܵܬܵܐ ܕܠܵܐ ܡܸܬܿܕܲܪ̈ܟܵܢ ܐܸܠܵܐ ܠܪܘܼܚܵܐ ܀ 83 :ܓܠ̣ܵܐ ܠܹܗ ܪܸܡܙܵܐ ܚܹܝܠ ܐܝܼܬܼܘܼܬܼܵܐ ܕܐܝܼܬܼܵܘܗܝ ܡܸܡܬܼܘܿܡ 84 ܘܲܣܦ݂ܲܩ ܚܲܝܠܹܗ ܠܘܵܬܼ ܬܘܼܩܵܢܵܐ ܕܟܼܠܡܵܐ ܕܲܗܘ̤ܵܐ ܀ 85 :ܒܪܘܼܚܵܐ ܓܠ̣ܵܐ ܠܹܗ ܕܢܸܚܙܸܐ ܛܲܟܸܣܵܐ ܕܥܲܒܼ݂ܕܼ ܐܝܼܕܼܵܘ̈ܗܝ 86 ܘܲܚܙ̣ܵܐ ܒܗܵܘܢܵܐ ܘܬܼܢܵܐ ܒܩܵܠܵܐ ܬܘܼܩܵܢ ܟܠܵܐ ܀ 87 :ܒܗܵܘܢܵܐ ܟܲܣܝܵܐ ܩܪ̣ܵܐ ܘܐܸܬܼܗܲܓܿܝܼ ܒܲܣܬܼܝܼܪ̈ܵܬܼܵܐ 88 ܘܬܲܪܓܸܿܡ ܐܸܢܹܝܢ ܒܩܵܠܵܐ ܓܲܠܝܵܐ ܠܲܟܼܢܘܵܬܹ̈ܗ ܀ 89 :ܣܸܦܪܵܐ ܚܲܕܼܬܼܵܐ ܟ̣ܬܲܒܼ ܠܹܗ ܪܸܡܙܵܐ ܥܲܠ ܚܘܼܫܵܒܼܵܘ̈ܗܝ 90 ܘܲܗ̣ܦܲܟ ܟܲܬ̣ܒܹܿܗ ܒܠܘܼܚܹ̈ܐ ܕܟܹܐܦܵܐ ܠܝܘܼܠܦܵܢ ܐ̄ܢܵܫܵܐ ܀ 91 :ܬܠܵܬܼ ܙܲܒܼܢܵܬܼܵܐ ܨܵܪ ܐܵܬܼ̈ܘܵܬܼܵܐ ܕܣܦܲܪ ܚܲܝܹ̈ܐ 92 ܕܐܲܝܢܵܐ ܕܩܵܪܹܐ ܢܲܣܓܸܿܐ ܢܸܗܪܘܿܓܼ ܕܬܼܘܼܒܼ ܢܸܬܼܚܲܟܲܡ ܀ 93 :ܚܕܼܵܐ ܥܲܠ ܠܸܒܵܐ ܚܕܼܵܐ ܥܲܠ ܠܘܼܚܹ̈ܐ ܘܬܼܘܼܒܼ ܥܲܠ ܠܘܼܚܹ̈ܐ 94 ܬܲܪܬܹܿܝܢ ܒܪܸܡܙܵܐ ܘܲܚܕܼܵܐ ܒܐܝܼܕܼܵܐ ܕܒܸܣܪ̈ܵܢܵܝܹܐ ܀ 95 :ܗܵܐ ܗܸܓܼܝܵܢܵܐ ܪܘܼܚܵܢܵܝܵܐ ܕܐܲܠܸܦ ܪܘܼܚܵܐ 96 ܬܵܘ ܬܲܠܡܝܼ̈݊ܕܹܐ ܕܬܲܠܡܸܕܼ ܪܘܼܚܵܐ ܩܪܵܘ ܘܐܸܣܬܲܟܲܠܘ ܀ 97 :ܗܵܐ ܢܸܨܚܵܢܵܐ ܕܚܵܘܝܼ ܒܨܵܘܡ̇ܐ ܐܲܬܼܠܹܝܛ ܩܘܼܫܬܵܐ 98 ܬܵܘ ܨܲܝܵܡܹ̈ܐ ܩܒܼܘܿܥܘ ܚܘܼܡܣܵܢܹܗ ܒܪܸ̈ܥܝܵܢܲܝܟܿܘܿܢ ܀ 99 :ܗܵܐ ܦܘܼܪܥܵܢܵܐ ܕܝܲܗ̣̄ܒܼ ܠܹܗ ܡܲܠܟܵܐ ܠܦܵܠܚܵܐ ܚܲܕܬܼܵܐ 100 ܠܒܲܫܘ ܐܲܝܟ ܙܲܝܢܵܐ ܚܘܼܡܣܵܢ ܢܲܦܫܵܐ ܘܐܲܩܪܸܒܼܘ ܘܲܙܟܼܵܘ ܀ 101 :ܒܨܵܘܡ̇ܐ ܒܲܚ̣ܪܹܗ ܝܵ̇ܕܲܥ ܟܠܵܐ ܠܥܲܒܼܕܵܐ ܛܵܒܼܵܐ 102 ܘܟܸܢ ܦܲܢܝܼ ܠܹܗ ܐܲܓܼܪܵܐ ܕܥܵܠܹܒܼ ܠܲܚܦܝܼܛܘܼܬܹܗ ܀ 103 :ܠܡܵܢ ܟܲܝ ܚ݂ܲܣܟܹܿܗ ܡ̣ܢ ܡܹܐܟܼܘܼܠܬܵܐ ܠܦܲܓܼܪܵܢܵܝܵܐ 104 ܘܥܲܒܼ݂ܕܹܿܗ ܕܢܸܚܸܐ ܒܕܼܘܼܡܝܵܐ ܕܚܲܝܹ̈ܐ ܠܵܐ ܡܵܝܘܿܬܹ̈ܐ ܀ 105 :ܐ̄ܪܵܙܵܐ ܨܵܪ ܒܹܗ ܠܦܲܓܼܪ̈ܵܢܵܝܹܐ ܠܒܼܝܼܫܲܝ̈ ܚܲܫܹ̈ܐ 106 ܟܲܕܼ ܠܵܐ ܐܘܼܟܼܠܵܐ ܚܵܐܹ̇ܝܢ ܒܐܲܬܼܪܵܐ ܕܡܲܠܟܿܘܼܬܼ ܪܵܘܡ̇ܐ ܀ 107 :ܐܵܦ ܗܝ̤ ܥܸܠܬܹܗ ܕܨܵܘܡܵܐ ܗܵܕܹܐ ܗ̄ܝܼ ܠܘܵܬܼ ܦܵܪ̈ܘܿܫܹܐ 108 ܕܒܲܥܬܼܝܼ݁ܕܵܬܼܵܐ ܢܕܲܡܘܿܢ ܐ̄ܢܵܫܵܐ ܒܝܲܕܼ ܚܘܼܡܣܵܢܵܐ ܀ 109 :ܒܸܠܥܵܕܼ ܐܘܼܟܼܠܵܐ ܥܬܼܝܼܕܼܝܼܢ ܕܢܸܚܘܿܢ ܡܵܐ ܕܐܸܬܼܢܲܚܲܡܘ 110 ܘܐܲܠܸܦ ܐܸܢܘܿܢ ܕܲܢܨܘܼܪܘܼܢܵܗ̇ ܒܚܲܝܹ̈ܐ ܕܲܬܼܢܵܢ ܀ 111 :ܚܕܲܬܵܐ ܗܵܘ̇ܝܵܐ ܠܡܵܝܘܿܬܼܘܼܬܼܵܐ ܒܗܵܘ̇ ܬܘܼܩܵܢܵܐ 112 ܘܪܲܫ̣ܡܵܗ̇ ܒܐ̄ܪܵܙܵܐ ܩܕܼܵܡ ܥܲܝܢܲܝ̈ܗܘܿܢ ܕܲܢܕܲܡܘܿܢ ܒܵܗ̇ ܀ 113 :ܒܨܵܘܡܵܐ ܓܠ̣ܵܐ ܠܗܘܿܢ ܥܲܠ ܚܘܼܕܵܬܼܵܐ ܕܗܲܕܵܡܲܝ̈ܗܘܿܢ 114 ܕܫܵܠ̇ܚܝܼܢ ܢܲܚܬܵܐ ܕܡ̇ܝܘܿܬܼܘܼܬܼܵܐ ܒܐܸܣܟܹܿܝܡ ܐܘܼܟܼܠܵܐ ܀ pb. 171 115 :ܘܐܸܢܗܘ̤ ܕܨܵܘܡܵܐ ܓܠ̣ܵܐ ܠܲܢ ܐ̄ܪܵܙܵܐ ܕܚܘܼܕܵܬܼ ܦܲܓܼܪܲܢ 116 ܡܲܢ ܠܵܐ ܢܸܣܢܸܐ ܠܐܲܪ̈ܥܵܢܝܵܬܵܐ ܘܢܸܪܚܲܡ ܚܘܼܒܹܿܗ ܀ 117 :ܐܸܢ ܬܘܼܩܵܢܵܐ ܕܟܼܠܡܵܐ ܕܲܗܘ̤ܵܐ ܒܹܗ ܐܸܬܼܒܲܕܿܩ 118 ܡܲܢ ܠܵܐ ܢܚܲܡܣܸܢ ܒܦܘܼܠܚܵܢ ܥܡܲܠܹܗ ܕܢܸܫܘܸܐ ܠܐ̄ܪ̈ܵܙܹܐ ܀ 119 :ܐܸܢ ܒܲܪ ܥܲܡܪܲܡ ܕܪܚܸܡ ܚܘܼܒܹܿܗ ܙܲܗܝܹܗ ܒܫܘܼܒܼܚܵܐ 120 ܡܲܢ̣ܘܼ ܕܠܵܐ ܢܫܝܼܛ ܐܲܪ̈ܥܵܢܵܝܵܬܼܵܐ ܘܢܸܬܼܒܲܕܩ ܠܹܗ ܀ 121 :ܐܸܢ ܡ̇ܝܘܿܬܼܵܐ ܩ̣ܢܵܐ ܙܲܗܝܘܼܬܼܵܐ ܒܐ̄ܪܵܙ ܒܵܪܘܿܝܵܐ 122 ܡܲܢ ܠܵܐ ܢܒܲܣܲܪ ܥܲܠ ܟܠܡܸܕܲܡ ܘܠܹܗ ܢܸܬܼܪܲܓܼܪܲܓܼ ܀ 123 :ܐܲܝܟ ܡܲܚܙܝܼܬܼܵܐ ܩܲܒܼ݂ܥܹܗ ܠܨܵܘܡ̇ܐ ܡܘܼܫܹܐ 124 ܘܬܸܚܒܲܬ̤ ܥܲܝܢܵܐ ܕܒܸܣܪ̈ܵܢܵܝܹܐ ܕܬܸܬܼܒܲܩܸܐ ܒܹܗ ܀ 125 :ܐܘܿ ܗܲܕܵܡܹ̈ܐ ܕܲܕܚܝܼܠܝܼܢ ܗ̄ܘ̣ܵܘ ܥܲܠ ܗܲܕܵܡܹ̈ܐ 126 ܐܘܿ ܒܵܒܼܵܬܼ̈ܐ ܕܲܥܪ݂ܲܩ ܡܸܢܗܹܝܢ ܢܘܼܗܪܵܐ ܕܥܲܝܼܢܹ̈ܐ ܀ 127 :ܐܘܿ ܢܲܗܝܼܪܵܐ ܕܪܲܕܦܹܗ ܠܢܘܼܗܪܵܐ ܒܥܘܸܙܵܐ ܕܢܘܼܗܪܹܗ 128 :ܐܘܿ ܣܸܦ̈ܘܵܬܼܵܐ ܐܲܦܲܝ̈ ܬܲܪܥܵܐ ܕܦܘܼܡܵܐ ܕܒܸܣܪܵܐ 129 ܕܙܵܥ̣ܘ ܘܐܸܬܼܒܲܠܗܝܼܘ ܦܲܓܼܪܵܐ ܘܢܲܦܫܵܐ ܟܲܕܼ ܡܸܬܼܦܵܬܼ̈ܚܵܢ ܀ 130 :ܕܚܝܼܠ ܦܲܪܨܘܿܦܹܗ ܕܦܲܓܼܪܵܢܵܝܵܐ ܘܡܲܪܡܸܒܼ ܦܲܓܼܪܹ̈ܐ 131 ܘܲܡܙܝܥ ܩܵܠܵܐ ܕܡܸܠܲܬܼ ܦܘܼܡܹܗ ܠܪ̈ܓܼܫܹܐ ܘܙܵܘܥܹ̈ܐ ܀ 132 :ܬܵܘ ܚܙܵܘ ܬܸܕܼܡܘܼܪܬܵܐ ܒܦܲܓܼܪܵܐ ܕܐ̄ܢܵܫܵܐ 133 ܕܨܵܡ ܘܐܸܙܕܲܗܝܼ ܕܲܕܚܸܠܘܼ ܐ̄ܢܵܫܵܐ ܕܢܸܬܼܒܲܩܘܿܢ ܒܹܗ ܀ 134 :ܒܨܵܘܡܹܗ ܕܡܘܼܫܹܐ ܢܸܩܢܸܐ ܣܲܒܼܪܵܐ ܥܲܠ ܚܘܼܕܵܬܲܢ 135 ܕܐܸܢ ܨܵܘܡ̇ܝܼܢܲܢ ܡ̣ܢ ܒܝܼ̈ܫܵܬܼܵܐ ܫܲܪܝܼܪ ܣܲܒܼܪܲܢ ܀ 136 :ܡ̣ܢ ܒܝܼ̈ܫܵܬܼܵܐ ܢܸܚܣܘܿܟ ܠܸܒܲܢ ܥܲܡ ܣܸܦ̈ܘܵܬܲܢ 137 ܕܢܸܗܘܸܐ ܫܒܼܝܼܚܹ̈ܐ ܐܲܝܟ ܒܲܪ ܥܲܡܪܲܡ ܒܦܲܓܼܪܵܐ ܘܢܲܦܫܵܐ ܀ 138 :ܢܨܘܼܡ ܪܸܥܝܵܢܵܐ ܥܲܡ ܗܲܕܵܡܹ̈ܐ ܡ̣ܢ ܟܠ ܕܲܣܢܸܐ 139 ܘܢܸܚܣܘܿܟ ܙܵܘܥܹ̈ܐ ܡ̣ܢ ܚܘܼܬܼܚܵܬܹ̈ܐ ܐܲܝܟ ܕܡ̣ܢ ܠܲܚܡܵܐ ܀ 140 :ܚܲܕܼ ܒܲܪܢܵܫܵܐ ܐܝܼܬܼܵܘܗܝ ܐ̄ܢܵܫܵܐ ܒܦܲܓܼܪܵܐ ܘܢܲܦܫܵܐ 141 ܕܢܸܗܘܸܐ ܫܵܠܹ̇ܡ ܟܠܹܗ ܒܟܼܠܹܗ ܠܦܘܼܠܚܵܢ ܚܲܝܹ̈ܐ ܀ 142 :ܢܨܘܼܡܘܼܢ ܙܵܘܥܹ̈ܐ ܡ̣ܢ ܪܵܡܘܼܬܵܐ ܘܚܸܡܬܼܵܐ ܘܪܘܼܓܼܙܵܐ 143 ܐܲܝܟ ܗܲܕܵܡܹ̈ܐ ܡ̣ܢ ܡܹܐܟܼܘܼܠܬܵܐ ܕܐܲܪ̈ܥܵܢܵܝܵܬܼܵܐ ܀ 144 :ܢܫܝܼܓܼ ܡ̣ܢ ܠܸܒܲܢ ܚܣܵܡܵܐ ܣܲܢܝܵܐ ܡܨܲܠܸܐ ܠܢܲܦܫܵܐ 145 ܒܛܲܟܼܣܵܐ ܕܲܡܫܝܼܓܼ ܟܠܢܵܫ ܨܵܐܬܼܵܐ ܕܥܲܠ ܗܲܕܵܡܵܘ̈ܗܝ ܀ 146 :ܠܵܐ ܢܨܘܼܡ ܦܘܼܡܵܐ ܡ̣ܢ ܡܹܐܟܼܘܼܠܬܵܐ ܘܢܸܫܪܹܐ ܠܸܒܵܐ 147 ܠܵܐ ܢܸܬܲܢܲܙܪܘܼܢ ܪ̈ܓܼܫܹܐ ܕܲܠܒܲܪ ܘܢܸܦܗܘܿܢ ܙܵܘܥܹ̈ܐ ܀ 148 :ܒܨܵܘܡ̇ܐ ܢܲܐܣܸܐ ܟܹܐܢܹ̈ܐ ܕܦܲܓܼܪܲܢ ܘܡܘܼܡܹ̈ܐ ܕܢܲܦܫܲܢ 149 ܕܝܵ̇ܕܲܥ ܦܘܼܪܣܵܐ ܕܣܬܼܝܼܪ̈ܵܐ ܘܲܕܼܓܲܠ̈ܝܵܬܼܵܐ ܀ 150 :ܢܚܵܘܹܝܘܗܝ ܟܹܐܒܹ̈ܐ ܕܟܼܠܹܗ ܐ̄ܢܵܫܲܢ ܕܲܠܓܼܵܘ ܘܕܲܠܒܲܪ 151 ܕܣܵܦܹ̇ܩ ܚܲܝܠܹܗ ܕܢܲܐܣܸܐ ܦܲܓܼܪܵܐ ܘܢܸܡܪܘܿܩ ܢܲܦܫܵܐ ܀ pb. 172 152 :ܐܵܣܝܵܐ ܗ̄ܘ̣ ܛܵܒܼܵܐ ܕܡܲܐܣܸܐ ܡܲܓܵܢ ܠܲܡܡܲܚܲܝܵ̈ܐ 153 ܘܥܵܨܹ̇ܒܼ ܒܪ̈ܲܚܡܹܐ ܬܒܼܵܪܵܐ ܕܥܵܘ̣ܠܵܐ ܘܡܲܩܢܸܐ ܚܲܝܹ̈ܐ ܀ 154 :ܚܢܵܢܵܐ ܘܪ̈ܲܚܡܹܐ ܡܡܲܕܹܿܟ ܝܵܗܹ̇ܒܼ ܐܲܝܟ ܣܲܡܡܵܢܹ̈ܐ 155 ܘܣܲܒܼܪܵܐ ܘܚܘܼܒܵܐ ܡܲܫܩܸܐ ܒܟܵܪܣܵܐ ܕܗܲܝܡܵܢܘܼܬܼܵܐ ܀ 156 :ܗܲܢܝܼ ܟܵܣܹܗ ܠܲܕܼܫܵܬܹ̇ܐ ܠܹܗ ܒܗܲܝܡܵܢܘܼܬܼܵܐ 157 ܕܚܲܠܝܘܼܬܼ ܚܲܝܹ̈ܐ ܕܠܵܐ ܫܘܼܠܵܡܵܐ ܟܲܣܝܵܐ ܒܓܼܵܘܗ ܀ 158 :ܢܸܒܼܥܵܐ ܗ̄ܘ̣ ܚܲܠܝܵܐ ܕܪܵܕܹܐ ܟܠܢܵܫ ܒܐܲܡܝܼܢܘܼܬܼܵܐ 159 ܘܠܵܐ ܡܸܣܬܲܒܼܥܵܐ ܚܲܠܝܘܼܬܼ ܫܸܩܝܹܗ ܒܦܘܼܡ ܫܵܬܼܘܿܝܵܘ̈ܗܝ ܀ 160 :ܬܵܘ ܪܸ̈ܥܝܵܢܹܐ ܕܝܲܒܸܿܫ ܐܸܢܘܿܢ ܚܘܼܡܵܐ ܕܥܵܘ̣ܠܵܐ 161 ܦܲܝܼܓܼܘ ܨܲܗܝܵܐ ܕܚܘܼܫܵܒܲܝ̈ܟܿܘܿܢ ܒܟܼܵܣ ܚܲܠܝܘܼܬܼܵܐ ܀ 162 :ܬܵܘ ܦܲܟܝܼܗܹ̈ܐ ܕܲܦܟ݂ܲܗܘ ܘܲܛܥ̣ܵܘ ܡ̣ܢ ܘܵܠܝܼܬܼܵܐ 163 ܩܪܘܿܒܼܘ ܨܹܝܕ ܨܵܘܡܵܐ ܘܲܩܢܵܘ ܛܲܥܡܵܐ ܕܦܵܪܘܿܫܘܼܬܼܵܐ ܀ 164 :ܬܵܘ ܚܲܣܵܡܹ̈ܐ ܕܕܲܠܲܚ ܐܸܢܘܿܢ ܛܢܵܢܵܐ ܣܲܟܼܠܵܐ 165 ܘܫܲܢܸܘ ܪܘܼܓܼܙܵܐ ܕܝܲܨܪܵܐ ܕܲܒܼܟܼܘܿܢ ܒܚܲܠܝܘܼܬܼ ܨܵܘܡ̇ܐ ܀ 166 :ܬܵܘ ܥܵܠܘܿܒܹ̈ܐ ܐܸܢܘܿܢ ܒܝܼܫܵܐ ܒܢܸܟܼܠܹܗ 167 ܦܪܘܿܥܘ ܙܸܵܕ̈ܩܵܬܵܐ ܚܠܵܦ ܐܸܢ̈ܩܵܬܼܵܐ ܕܥܘܼܠܒܵܢܲܝ̈ܟܿܘܿܢ ܀ 168 :ܬܵܘ ܙܲܢܝܹ̈ܐ ܕܛܲܡܲܐܘ ܩܘܼܕܫܹ̈ܐ ܕܗܲܕܵܡܲܝ̈ܟܿܘܿܢ 169 ܣܲܒܼܘ ܕܘܼܟܵܝܵܐ ܒܫܵܘܬܵܦܘܼܬܼܵܐ ܕܦܘܼܠܚܵܢ ܨܵܘܡ̇ܐ ܀ 170 :ܬܵܘ ܓܲܢܵܒܹ̈ܐ ܕܚܲܠܸܨܘ ܓܲܙܸ̈ܐ ܥܵܘܵܠܐܝܼܬܼ 171 ܨܘܼܡܘ ܘܐܸܡܲܟܲܟܼܘ ܕܕܼܵܡ ܬܸܬܼܚܲܣܘܿܢ ܒܲܬܼܘܵܬܼ ܢܲܦܫܵܐ ܀ 172 :ܚܬܼܝܼܪܹ̈ܐ ܡܲܟܸܿܟܼܘ ܪܵܘܡ̇ܐ ܩܲܫܝܵܐ ܕܪܸ̈ܥܝܵܢܲܝܟܿܘܿܢ 173 ܘܲܠܒܲܫܘ ܨܵܘܡ̇ܐ ܢܲܚܬܵܐ ܢܲܟܼܦܵܐ ܕܲܦܠܸܐ ܒܚܸܙܘܹܗ ܀ 174 :ܝܲܥܢܹ̈ܐ ܟܐܵܘ ܒܵܗ̇ ܒܪܲܒܿܘܼܬܼ ܟܲܪܣܵܐ ܒܩܵܠ ܫܲܘܝܘܼܬܼܵܐ 175 ܘܐܲܚܘܿܕܘ ܒܐܲܦܹܝ̈ܗ̇ ܬܲܪܥܵܐ ܕܨܵܘܡ̇ܐ ܬܸܬܼܝܲܥܲܢ ܀ 176 :ܪ̈ܵܓܼܝ ܟܣܸܦܵܐ ܒܲܕܲܪܘ ܟܣܸܦܵܐ ܒܐܲܪܥܵܐ ܕܨܵܘܡ̇ܐ 177 ܕܬܸܥܘܿܢ ܥܘܼܬܼܪܵܐ ܕܙܲܕܲܝܼܩܘܼܬܼܵܐ ܕܠܵܐ ܡܸܬܼܚܲܒܲܠ ܀ 178 :ܪ̈ܡܚܲܝ ܫܘܼܒܼܚܵܐ ܥܪܘܿܩܘ ܡ̣ܢ ܫܘܼܒܼܚܵܐ ܦܲܚܵܐ ܢܟܼܝܼܠܵܐ 179 ܘܦܲܪܣܵܘ ܢܸܟܼܠܵܘ̈ܗܝ ܒܢܘܼܗܪܵܐ ܕܨܵܘܡ̇ܐ ܡܲܦܨܲܚ ܢܲܦܫܵܐ ܀ 180 :ܨܘܼܡ ܨܲܝܵܡܵܐ ܥܲܡ ܡܹܐܟܼܘܼܠܬܵܐ ܐܵܦ ܡ̣ܢ ܫܘܼܒܼܚܵܐ 181 ܕܲܠܡܵܐ ܬܸܥܘܿܠ ܪܸܚܡܲܬܼ ܫܘܼܒܼܚܵܐ ܘܬܸܫܪܸܐ ܨܵܘܡ̇ܟ ܀ 182 ܟܠܝܼ ܣܸܦ̈ܘܵܬܼܵܟ ܡ̣ܢ ܪܘܼܛܵܢܵܐ ܐܲܝܟ ܕܡ̣ܢ ܠܲܚܡܵܐ: pb. 173 183 ܕܲܠܡܵܐ ܬܵܘܒܸܿܕܼ ܡܸܠܬܼܵܐ ܕܦܘܼܡ̇ܟ ܥܲܡܠܹ̈ܐ ܕܢܲܦܫܵܟ ܀ 184 :ܦܪܘܿܣ ܫܘܿܫܸܦܵܐ ܕܨܵܘܡ̇ܐ ܕܲܟܼܝܵܐ ܥܲܠ ܒܵܒܼܵܬܼ̈ܟ 185 ܕܠܵܐ ܬܸܬܼܒܲܩܸܐ ܙܲܠܝܼܠܵܐܝܼܬܼ ܒܚܵܘܪܵܐ ܣܲܢܝܵܐ ܀ 186 :ܟܠܝܼ ܡ̣ܢ ܥܲܝܢܝ̈ܟ ܫܸܩܝܵܐ ܨܲܚܢܵܐ ܕܬܼܵܒܲܥ̇ ܦܲܓܪܵܐ 187 ܘܐܲܫܩܵܐ ܐܸܢܹܝܢ ܟܵܣܵܐ ܢܲܟܼܦܵܐ ܕܩܲܕܿܝܼܫܘܼܬܼܵܐ ܀ 188 :ܥܲܝܢܵܐ ܪܦܝܼܬܼܵܐ ܗ̄ܝܼ ܘܲܩܒܸܐ ܒܓܼܵܘܗ̇ ܚܝܵܪܵܐ ܪܲܦܝܵܐ 189 ܐܲܚܘܿܕܼ ܒܐܲܦܹܝ̈ܗ̇ ܬܪܲܥ ܨܸܒܼܝܵܢܵܐ ܕܲܟܼܢܝܼܟܼܘܼܬܼܵܐ ܀ 190 :ܘܼܪ̈ܝ ܢܸܩ̈ܒܼܵܬܼܵܐ ܒܫܲܦܝܘܼܬܼ ܨܵܘܡ̇ܐ ܐܲܝܟ ܡܲܚܙܝܼܬܼܵܐ 191 ܘܲܡܪ̈ܘܿܩ ܡܘܼܡܹ̈ܐ ܕܪܸ̈ܥܝܵܢܲܝܟܹܿܝܢ ܐܲܝܟ ܕܐܲܦܲܝܟܹܿܝ̈ܢ ܀ 192 :ܢܲܟܸܿܦܝ̈ ܚܵܘܪܵܐ ܕܚܘܼܫܵܒܲܝܟܹܿܝ̈ܢ ܐܲܝܟ ܕܲܒܼܢܲܚ̈ܬܹܿܐ 193 ܕܢܸܗܘܸܐ ܫܵܠܹ̇ܡ ܨܸܒܼܝܵܢ ܢܲܦܫܵܐ ܠܐܸܣܟܹܿܝܡ ܦܲܓܼܪܵܐ ܀ 194 :ܠܵܐ ܬܸܨܛܲܒܿܬܼܝܼܢ ܒܢܲܚ̈ܬܹܿܐ ܕܲܠܒܲܪ ܐܘܿ ܒܲܪܬܼ ܚܵܘܵܐ 195 ܠܒܲܫܝ ܢܲܟܼܦܘܼܬܼܵܐ ܥܲܠ ܪܸܥܝܵܢܹܟܼܝ ܐܲܝܟ ܕܥܲܠ ܕܘܼܫܡܹܟܼܝ ܀ 196 :ܛܲܟܸܿܣ ܪܲܗܛܵܐ ܕܥܝܼܢܲܝ̈ ܠܸܒܹܿܟܼܝ ܐܲܝܟ ܗܲܠܟܼܵܬܹܟܼܝ̈ 197 ܕܠܵܐ ܢܸܬܿܬܲܩܠܘܼܢ ܫܲܒܼܪ̈ܲܝ ܠܸܒܵܐ ܒܙܲܠܝܼܠܘܼܬܹܟܼܝ ܀ 198 :ܒܨܘܿܪܝ ܡ̣ܢ ܨܸܒܼܬܵܐ ܕܥܲܠ ܗܲܕܵܡܲܝ̈ܟܿܝ ܘܨܲܒܸܿܬܼܝ ܗܵܘܢܹܟܼܝ 199 ܡܪܘܿܩܝ ܪܸܥܝܵܢܹܟܼܝ ܐܲܝܟ ܦܲܪܨܘܿܦܹܟܼܝ ܒܪܲܟܼܝܘܼܬܼ ܢܲܦܫܵܐ ܀ 200 :ܚܙܵܝ ܠܵܐ ܬܸܗܘܹܝܢ ܥܸܠܲܬܼ ܟܸܫܠܵܐ ܒܨܸܒܼܬܵܐ ܕܐܲܦܲܝ̈ܟܿܝ 201 ܕܲܠܡܵܐ ܬܩܲܒܿܠܝܼܢ ܕܝܼܢܵܐ ܥܦܝܼܦܵܐ ܕܲܚܛ݂ܲܝܬܿܝ ܘܐܲܚܛܝܼܬܿܝ ܀ 202 :ܫܡܲܥܝܼ ܩܘܼܛܪܵܓܼܵܐ ܕܪܲܒܿܘܼܬܼ ܥܵܘ̣ܠܹܟܼܝ ܡ̣ܢ ܢܵܡܘܿܣܵܐ 203 ܕܲܡܓܲܢܸܐ ܠܒܼܝܼܫܘܼܬܼ ܝܲܨܪܟܼܝ ܡ̣ܢ ܟܠ ܥܵܘ̣ܠܵܝܼ̈ܢ ܀ 204 :ܗܵܐ ܚܵܘܝܼܬܹܿܟܼܝ ܡ̣ܢ ܢܵܡܘܿܣܵܐ ܡ̣ܢ ܕܲܟܼܝܵܢܵܐ 205 ܕܚܲܠܝ ܡ̣ܢ ܢܸܓܼ̈ܕܹܿܐ ܘܫܐܲܠܝ ܪ̈ܲܚܡܹܐ ܥܲܕܼ ܐܝܼܬܼ ܙܲܒܼܢܵܐ ܀ 206 :ܠܒܲܫܘ ܐܲܝܟ ܙܲܝܢܵܐ ܚܲܝܠܹܗ ܕܨܵܘܡ̇ܐ ܓܲܒܼܪܹ̈ܐ ܘܢܸܫܹ̈ܐ 207 ܕܠܲܝܬܿ ܦܘܼܪܫܵܢܵܐ ܒܐ̄ܪܵܙܵܐ ܚܲܕܼܬܼܵܐ ܕܨܵܪ ܠܲܢ ܒܐܝܼܕܹܗ ܀ 208 :ܚܕܼܵܐ ܫܲܘܝܘܼܬܼܵܐ ܕܗܵܘ̇ ܬܘܼܩܵܢܵܐ ܓܠ̣ܵܐ ܠܲܢ ܨܵܘܡ̇ܐ 209 ܐܲܟܼܡܵܐ ܕܫܵܠܲܚ ܦܲܓܼܪܵܐ ܚܒܼܵܠܵܐ ܐܵܦ ܐܸܣܟܹܿܡܵܐ ܀ 210 :ܢܨܘܼܡ ܕܲܟܼܝܵܐܝܼܬܼ ܐܲܝܟ ܕܲܦܠܸܐ ܠܹܗ ܠܐ̄ܪܵܙ ܚܘܼܕܵܬܼܵܐ 211 ܕܠܵܐ ܢܸܬܿܕܲܓܲܠ ܫܪܵܪܵܐ ܕܐ̄ܪܵܙܵܐ ܒܝܲܕܼ ܪܲܦܝܘܼܬܲܢ ܀ 212 :ܒܦܲܓܼܪܵܐ ܘܢܲܦܫܵܐ ܢܨܘܼܡ ܫܲܘܝܵܐܝܼܬܼ ܡ̣ܢ ܟܠ ܕܲܣܢܸܐ 213 ܕܠܵܐ ܢܸܬܼܥܵܘܲܟ ܨܵܘܡܵܐ ܕܦܘܼܡܵܐ ܒܝܲܕܼ ܪܸܥܝܵܢܵܐ ܀ 214 :ܠܵܐ ܢܸܚܠܘܿܛ ܒܹܗ ܒܕܸܒܼܚܵܐ ܕܨܵܘܡܲܢ ܚܲܕܼ ܡ̣ܢ ܥܵܘ̣ܠܵܝܼ̈ܢ 215 ܕܐܸܢ ܡܸܬܿܛܲܡܲܐ ܠܵܐ ܡܸܬܼܩܲܒܲܠ ܨܹܝܕܼ ܝܵ̇ܕܲܥ ܟܠ ܀ 216 :ܠܲܝܬܿ ܨܸܒܼܝܵܢܵܐ ܠܝܵ̇ܕܲܥ ܟܠܵܐ ܒܕܸܒܼܚܹ̈ܐ ܕܥܵܘ̣ܠܵܐ 217 ܘܠܵܐ ܫܵܦܲܪ ܠܹܗ ܨܵܘܡ̇ܐ ܕܦܲܓܼܪܵܐ ܒܸܠܥܵܕܼ ܢܲܦܫܵܐ ܀ pb. 174 218 :ܨܵܡ̣ܘ ܝܗ̄ܘܼܕܵܝܹ̈ܐ ܘܩܲܪܸܒܼܘ ܕܸܒܼܚܹ̈ܐ ܘܠܵܐ ܐܸܬܼܩܲܒܲܠܘ 219 ܕܲܚܠܝܼܛܵܐ ܗ̄ܘ̣ܵܬܼ ܥܲܡ ܕܸܒܼܚܲܝ̈ܗܘܿܢ ܕܚܠܲܬܼ ܫܹܐܕܹ̈ܐ ܀ 220 :ܒܪܼ̈ܓܼܿܫܹܐ ܕܲܠܒܲܪ ܨܵܡ̣ܘ ܥܸܒܼܪ̈ܵܝܹܐ ܘܠܵܐ ܗ̄ܘ̣ܵܐ ܒܙܵܘܘܥܹ̈ܐ 221 ܐܵܦ ܚܵܙܹ̇ܐ ܟܠ ܠܵܐ ܝܲܗ̄ܒܼ ܐܲܓܼܪܵܐ ܠܨܵܘܡ̇ܐ ܠܦܝܼܓܼܵܐ ܀ 222 :ܦܲܓܼܪܵܐ ܡܲܟܸܿܟܼܘ ܘܠܵܐ ܢܚ̣ܸܬܼ ܠܸܒܵܐ ܪܵܡܘܼܬܼܵܐ 223 ܒܓܸܠܝܵܐ ܫܦ݂ܲܪܘ ܗ̄ܘ̣ܵܘ ܘܣܲܪܸܩ ܐܸܢܘܿܢ ܡ̣ܢ ܦܘܼܪܥܵܢܵܐ ܀ 224 :ܟܲܕܼܵܒܼܵܐܝܼܬܼ ܬܒܲܥ̣ܘ ܡܲܪ̈ܵܚܹܐ ܐܲܓܼܪܵܐ ܕܨܵܘܡ̇ܐ 225 ܘܐܲܟܸܿܣ ܐܸܢܘܿܢ ܢܒܼܝܼܵܐ ܒܪܘܼܚܵܐ ܕܡܸܛܥܵܐ ܛܵܥܹ̇ܝܢ ܀ 226 :ܠܡܵܢܵܐ ܠܲܡ ܨܵܡ̄ܢ ܘܠܵܐ ܚܵܐܲ݁ܪ ܐܲܢ̄ܬܿ ܒܨܵܘܡܵܐ ܕܦܲܓܼܪܲܢ 227 ܠܡܵܢ ܐܸܬܼܡܲܟܲܡܼܢ ܘܠܵܐ ܐܸܬܼܒܲܩܝܼܬܿ ܒܡܘܼܟܵܟ ܢܲܦܫܲܢ ܀ 228 :ܐܘܿ ܡ̣ܢ ܚܘܼܬܼܪܵܐ ܦܥܠܵܐ ܢܟܼܝܼܠܵܐ ܕܒܲܛܝܼܠ ܟܠ ܫܵܥ 229 ܘܬܼܵܒܲܥ̇ ܐܲܓܼܪܵܐ ܐܲܝܟ ܟܲܫܝܼܪܵܐ ܠܡܵܪܹܐ ܟܲܪܡܵܐ ܀ 230 :ܐܘܿ ܪܵܡܘܼܬܼܵܐ ܣܲܬܵܐ ܕܒܼܪܵܐ ܓܠܝܼܙܲܬܼ ܦܹܐܪܹ̈ܐ 231 ܕܕܼܵܝ̇ܢܵܐ ܒܚܓܘܼܨܦܵܐ ܥܲܡ ܦܲܠܵܚܵܐ ܕܗܵܐ ܠܲܡ ܛܲܠ̣ܡܲܢܝ ܀ 232 :ܠܥܸܙ ܓܸܠܝܵܢܵܐ ܕܐ̄ܪܵܙ ܒܵܪܘܿܝܵܐ ܒܠܸܫܵܢ ܒܸܣܪܵܐ 233 ܘܐܲܟܸܿܣ ܐܸܢܘܿܢ ܕܲܟܼܕܵܒܼܵܐܝܼܬܼ ܨܵܡ̣ܘ ܘܐܸܬܼܡܲܟܲܟܼܘ ܀ 234 :ܠܵܐ ܠܲܡ ܬܨܘܼܡܘܼܢ ܐܲܝܟ ܗܵܢ ܨܵܘܡ̇ܐ ܢܒܼܝܼܵܐ ܬܲܪܓܸܿܡ 235 ܠܵܐ ܒܵܥܹ̇ܐ ܐ̄ܢܵܐ ܡܘܼܟܵܟ ܦܲܓܼܪܵܐ ܘܪܵܡܘܼܬܼ ܢܲܦܫܵܐ ܀ 236 :ܗܵܢܵܘ̇ ܨܵܘܡ̇ܐ ܕܬܼܵܒܲܥ̇ ܨܸܒܼܝܢܝ ܡ̣ܢ ܨܲܝܵܡܹ̈ܐ 237 ܠܡܸܫܪܵܐ ܩܸܛܪܹ̈ܐ ܕܩ̣ܛܲܪ ܥܵܘ̣ܠܵܐ ܒܓܼܵܘ ܪܸ̈ܥܝܵܢܹܐ ܀ 238 :ܐܸܢ ܒܵܥܹ̇ܐ ܐܲܢ̄ܬܿ ܕܢܸܗܘܸܐ ܨܵܘܡ̇ܟ ܕܟܹܐ ܡ̣ܢ ܡܘܼܡܹ̈ܐ 239 ܚܘܼܢ ܩܲܪܝܼܒܼܵܟ ܒܚܘܼܒܵܐ ܘܪ̈ܲܚܡܹܐ ܘܗܵܐ ܩܲܒܸܿܠܬܹܿܗ ܀ 240 :ܗܵܐ ܐܲܠܸܦ ܠܲܢ ܢܒܼܝܼܵܐ ܕܪܘܼܚܵܐ ܙܢܲܝ̈ ܨܲܝܵܡܹ̈ܐ 241 ܠܵܐ ܢܸܬܿܕܲܡܸܐ ܐܲܝܟ ܝܗ̄ܘܼܕܵܝܹ̈ܐ ܕܨܵܡ̣ܘ ܘܐܸܣܬܲܪܲܩܘ ܀ 242 :ܗܵܐ ܚܵܘܝܼ ܠܲܢ ܟܲܣܝܵܐ ܒܓܸܠܝܵܐ ܕܐܲܝܟܲܢ ܢܸܫܦܲܪ 243 ܢܕܲܟܸܿܐ ܢܲܦܫܲܢ ܥܲܡ ܗܲܕܵܡܲܝ̈ܢ ܠܥܲܝܢܲܝ̈ ܟܲܣܝܵܐ ܀ 244 :ܗܵܐ ܒܲܕܸܿܩ ܠܲܢ ܨܸܒܼܝܵܢ ܚܘܼܒܹܿܗ ܒܝܲܕܼ ܐܹܫܲܥܝܵܐ 245 ܢܸܬܼܩܲܢ ܟܠܫܵܥ ܐܲܝܟ ܨܼܒܼܝܵܢܹܗ ܒܐܲܝܠܹܝܢ ܕܲܡܢܵܚ ܀ 246 :ܢܸܣܥܸܐ ܚܘܼܬܼܪܵܐ ܡ̇ܘܒܸܿܕ ܥܲܡܠܹ̈ܐ ܕܦܲܓܼܪܵܐ ܘܢܲܦܫܵܐ 247 ܘܢܸܪܚܲܡ ܢܝܼܫܵܐ ܕܡܲܟܿܝܼܟܼܘܼܬܼܵܐ ܕܡܲܚܸܐ ܡܲܓܵܢ ܀ 248 :ܢܸܥܩܘܿܪ ܢܸܟܼܠܵܐ ܡܲܪܝܼܪ ܟܘܼ̈ܒܹܿܐ ܡ̣ܢ ܪܸܥܝܵܢܲܢ 249 ܘܢܸܨܘܿܒܼ ܫܲܝܢܵܐ ܡܫܲܝܸܢ ܟܠܵܐ ܒܓܼܵܘ ܡܲܚܫܲܒܼܬܲܢ ܀ 250 ܢܸܟܼܠܵܐ ܦܲܚܵܐ ܗ̄ܘ̣ ܕܲܟܼܣܸܐ ܒܢܲܦܫܵܐ ܐܲܝܟ ܕܲܒܼܦܲܚܬܵܐ: pb. 175 251 ܘܨܵܐܹ̇ܪܼ ܐ̄ܢܵܫܵܐ ܐܲܝܟ ܚܲܝ̈ܘܵܬܼܵܐ ܠܐܲܒܼܕܵܢ ܡ̇ܘܬܵܐ ܀ 252 :ܒܫܸܡ ܟܹܐܢܘܼܬܼܵܐ ܡܲܛܥܹܐ ܢܸܟܼܠܵܐ ܐܲܝܟ ܕܲܒܼܠܸܩܛܵܐ 253 ܘܲܡܚܲܬܼܚܸܬܼ ܠܹܗ ܠܝܲܨܪܵܐ ܕܢܹܐܟܼܘܿܠ ܡܸܪܵܬܼ ܡ̇ܘܬܵܐ ܀ 254 :ܢܦܲܣܸܐ ܡ̇ܕܹܝܢ ܢܸܟܼܠܵܐ ܕܵܟܼܣܸܐ ܒܓܼܵܘ ܪܸܥܝܵܢܲܢ 255 ܘܐܲܟܸܿܢ ܢܸܩܪܘܿܒܼ ܠܦܘܼܠܚܵܢ ܨܵܘܡ̇ܐ ܒܕܲܟܼܝܘܼܬܼ ܢܲܦܫܵܐ ܀ 256 :ܠܵܐ ܢܸܬܼܟܲܣܸܐ ܢܸܟܼܠܵܐ ܒܨܵܘܡܲܢ ܐܲܝܟ ܕܲܒܼܢܲܚܬܵܐ 257 ܐܲܟܼܡܵܐ ܕܲܥܒ݂ܲܕܼܘ ܒܢܲܝ̈ ܐܝܼܙܲܪܥܹܝܠ ܕܨܵܡ̣ܘ ܘܐܸܨܛܲܢܲܥܘ ܀ 258 :ܠܵܐ ܢܸܫܬܲܡܲܫ ܡܹܐܟܼܠܩܲܪܨܵܐ ܒܲܢܙܝܼܪܬܲܢ 259 ܐܲܟܼܡܵܐ ܕܥܸܒܼܕܲܬ̤ ܗܵܝ̇ ܫܵܛܝܼܬܵܐ ܠܢܵܒܼܘܿܬܼ ܚܲܣܝܵܐ ܀ 260 :ܗܵܪܟܵܐ ܢܸܚܙܸܐ ܓܘܼܢܚܵܐ ܪܲܒܵܐ ܕܲܣܥ݂ܲܪ ܢܸܟܼܠܵܐ 261 ܕܟܲܣܝܼ ܢܦܫܹܗ ܒܐܸܣܟܹܿܝܡ ܨܵܘܡ̇ܐ ܘܫܲܡܸܫ ܩܸܛܠܵܐ ܀ 262 :ܙܘܼܥܘ ܨܲܝܵܡܹ̈ܐ ܡ݂ܢ ܩܵܠ ܩܸܛܠܵܐ ܕܲܗܘ̤ܵܐ ܒܨܵܘܡܵܐ 263 ܘܲܕܼܚܲܠܘ ܕܲܠܡܵܐ ܡܣܲܬܲܪ ܢܸܟ̣ܠܵܐ ܒܪܸ̈ܥܝܵܢܲܝܟܿܘܿܢ ܀ 264 :ܚܙ̣ܵܘ ܕܲܠܡܵܐ ܐܝܼܬܼ ܕܒܼܵܥܹ̇ܐ ܕܢܸܥܠܘܿܒܼ ܒܲܕܼܡܘܼܬܼ ܐܵܚܵܒܼ 265 ܘܚܵܫܹ̇ܠ ܢܸܟܼܠܵܐ ܕܢܸܩܛܘܿܠ ܚܲܒܼܪܹ ܕܢܹܐܪܲܬܼ ܢܸܟܼܣܵܘ̈ܗܝ ܀ 266 :ܘܐܸܢ ܠܵܐ ܩܵܛܹ̇ܠ ܐܲܝܢܵܐ ܕܥܵܠܹ̇ܒܼ ܒܲܕܼܡܘܼܬܼ ܐܵܚܵܒܼ 267 ܠܒܼܵܚܲܪ ܠܸܒܵܐ ܐܲܝܟ ܩܵܛܘܿܠܵܐ ܗ̄ܘ̣ ܥܲܠ ܕܐܸܬܼܝܲܥܲܢ ܀ 268 :ܠܨܸܒܼܝܵܢ ܢܲܦܫܵܐ ܡܠܝܼܟ ܦܘܼܪܥܵܢܵܐ ܐܵܦ ܓܹܗܲܢܵܐ 269 ܘܐܲܝܕܼܵܐ ܕܨܵܒܹ̇ܐ ܒܵܗ̇ ܡܸܙܕܲܕܲܩ ܐܵܦ ܡܸܬܼܚܲܝܲܒܼ ܀ 270 :ܐܵܦ ܒܲܪ ܥܲܡܪܝܼ ܨܒܼܵܐ ܘܐܸܬܼܪܲܓܼܪܲܓܼ ܠܲܕܼܠܵܐ ܕܝܼܠܹܗ 271 ܘܩܲܛ̣ܠܹܗ ܣܲܝܦܵܐ ܕܨܸܒܼܝܵܢ ܢܲܦܫܵܐ ܕܲܩܛܲܠ ܚܲܒܼܪܹܗ ܀ 272 :ܒܝܲܕܼ ܨܸܒܼܝܵܢܵܐ ܩܲܛܠܹ݂ܗ ܠܢܵܒܼܘܿܬܼ ܘܠܵܐ ܗ̄ܘ̣ܵܐ ܒܣܲܝܦܵܐ 273 ܘܗܵܐ ܡܲܠܟܵܐ ܗ̄ܘ̣ܵܐ ܘܠܵܐ ܩ̣ܛܲܠ ܒܐܝܼܕܼܵܘ̈ܗܝ ܐܸܠܵܐ ܒܠܸܒܹܿܗ ܀ 274 :ܒܢܲܚܬܵܐ ܕܣܲܝܦܵܐ ܟܲܣܝܲܬ̤ ܐܝܼܙܒܹܿܠ ܠܣܲܝܦܹܗ ܕܐܵܚܒܼ 275 ܘܟܸܢ ܐܵܘܚܸܕܬܹܗ ܒܐܝܼܕܼܵܐ ܕܢܸܟܼܠܵܐ ܘܩܲܛܠܹܗ ܠܚܲܣܝܵܐ ܀ 276 :ܒܲܟܼܬܼܝܼ̈ܒܼܵܬܼܵܐ ܚܒܲܫܬܹܗ ܠܩܸܛܠܵܐ ܕܠܵܐ ܬܸܬܼܦܪܣܸܐ 277 ܘܛܸܒܼܥܵܬ̤ ܒܐܲܦܵܘ̈ܗܝ ܛܲܒܼܥܵܐ ܕܡܲܠܟܵܐ ܕܠܵܐ ܬܸܬܿܕܲܓܲܠ ܀ 278 :ܓܙܘܿܪܝ ܠܲܡ ܨܵܘܡܵܐ ܐܘܿ ܫܵܛܝܼܬܼܵܐ ܣܲܢܝܲܬܼ ܨܵܘܡܵܐ 279 ܘܐܵܘܬܸܿܒܼܝ ܠܢܵܒܼܘܿܬܼ ܒܪܹܫ ܨܲܝܵܡܹ̈ܐ ܨܲܗܝܲܝ̈ ܠܲܕܼܡܵܐ ܀ 280 :ܘܐܲܝܬܵܘ ܣܵܗ̈ܕܹܐ ܕܕܲܓܵܠܘܼܬܼܵܐ ܥܲܠ ܫܲܪܝܼܪܵܐ 281 ܘܢܸܦܩܘܼܢ ܪܘܼܚܵܐ ܕܨܲܚܝܼ ܠܡܲܠܟܵܐ ܐܵܦ ܠܐܲܠܵܗܵܐ ܀ pb. 176 282 :ܐܘܿ ܨܸܒܼܝܵܢܵܐ ܡܨܲܚܸܐ ܟܠܫܥܵ ܠܐܵܠܵܗ ܟܠܵܐ 283 ܕܲܗܘ̤ܵܐ ܒܢܸܟܼܠܵܐ ܬܵܒܲܥ̇ ܨܲܥܪܵܐ ܒܐܸܣܟܹܿܡ ܚܘܼܒܵܐ ܀ 284 :ܐܸܡܲܬܼܝ ܐܲܚܸܒܼܬܿܝ ܐܘܼ ܫܵܛܝܼܬܼܵܐ ܠܫܸܡ ܒܵܪܘܿܝܵܐ 285 ܘܐܲܝܟܲܢ ܝܲܩܲܪܬܿܝ ܛܲܟܼܣܲܝ̈ ܡܲܠܟܵܐ ܢܵܡܘܿܐܝܼܬܼ ܀ 286 :ܐܘܿ ܟܡܵܐ ܨܢܝܼܥܲܬܿ ܢܸܟܼܠܵܐ ܨܢܝܼܥܵܐ ܡ̇ܘܠܸܕܼ ܩܸܛܠܵܐ 287 ܘܠܲܝܬܿ ܠܵܟ ܦܸܚܡܵܐ ܐܸܠܵܐ ܐܸܢ ܐܲܢ̄ܬܿ ܐܵܘ ܨܸܢ̈ܥܵܬܵܟ ܀ 288 :ܐܘܿ ܟܡܵܐ ܢܟܼܝܼܠܲܬܿ ܝܲܪܵܨܪܵܐ ܒܝܼܫܵܐ ܕܒܼܪܸܥܝܵܢܵܐ 289 ܕܒܸܐܣܟܹܿܝܡ ܚܘܼܒܵܐ ܓܵܣܹ̇ܝܬܿ ܡܸܪܬܼܵܐ ܐܲܝܟ ܬܲܢܝܼܢܵܐ ܀ 290 :ܬܵܝܹ̈ܝܢ ܚܙܵܝܹ̈ܝܢ ܓܸܢܣܵܗ̇ ܕܚܵܘܵܐ ܪܘܼܫܥܵܗ̇ ܕܚܵܘܐ 291 ܕܓܸܙܪܲܬ̤ ܨܵܘܡ̇ܐ ܘܐܸܫܕܬ̤ ܠܲܕܡ̇ܐ ܒܫܸܡ ܟܹܐܢܘܼܬܼܵܐ ܀ 292 :ܫܡܲܥܝܗ ܘܐܸܬܿܬܿܢܲܚܝ̈ ܡܲܪܝܼܪܵܐܝܼܬܼ ܥܲܬܿܝܼܪ̈ܵܬܼܵܐ 293 ܥܲܠ ܗܵܢ ܓܘܼܢܚܵܐ ܕܣܸܥܪܲܬ̤ ܒܐܲܪܥܵܐ ܐܲܢ̄ܬܲܬܼ ܡܲܠܟܵܐ ܀ 294 :ܡܠܘܿܟܹ̈ܝܢ ܢܸܫܹ̈ܐ ܡܸܠܟܿܐ ܛܵܒܼܵܐ ܠܫܵܘܬܵܦܲܝ̈ܟܹܿܝܢ 295 ܕܠܵܐ ܬܸܬܼܚܲܝ̈ܒܼܵܢ ܒܲܕܼܡܘܼܬܼ ܐܝܼܙܒܹܿܠ ܕܡܸܠܟܲܬ̤ ܩܸܛܠܵܐ ܀ 296 :ܠܵܐ ܬܸܬܿܛܦܝܼܣܘܼܢ ܓܲܒܼܪܹ̈ܐ ܠܡܸܠ̈ܟܹܿܐ ܕܙܲܠܝܼ̈ܠܵܬܼܵܐ 297 ܕܠܵܐ ܬܸܬܼܦܲܪܣܘܿܢ ܒܲܕܡܘܼܬܼ ܐܵܚܵܒܼ ܕܪܲܓܼ ܘܐܸܬܼܦܲܪܣܝ ܀ 298 :ܠܵܐ ܐ̄ܢܵܫ ܢܸܚܠܘܿܛ ܢܸܟܼܠܵܐ ܒܨܵܡܹܗ ܐܲܝܟ ܥܵܘܵܠܹ̈ܐ 299 ܕܠܵܐ ܢܸܬܼܚܲܝܲܒܼ ܒܲܓܼܙܵܪ ܕܝܼܢܵܐ ܕܐܵܫܕܲܝ̈ ܠܲܕܼܡ̇ܐ ܀ 300 :ܢܸܛܲܢ ܟܠܢܵܫ ܛܢܵܢܵܐ ܟܹܐܢܵܐ ܐܲܝܟ ܐܹܠܝܼܵܐ 301 ܕܐܲܟܸܿܣ ܢܸܟܼܠܵܐ ܘܦܲܪܣܝܼ ܥܵܘ̣ܠܵܐ ܘܲܬܼܒܲܥ̣ ܠܲܕܼܡ̇ܐ ܀ 302 :ܒܨܵܘܡܹܗ ܢܸܕܼܡܘܿܢ ܪ̈ܵܚܡܲܝ ܨܵܘܡܵܐ ܕܲܟܼܡܵܐ ܥܲܙܝܼ 303 ܕܨܵܡ ܡ̣ܢ ܠܲܚܡܵܐ ܘܡ̣ܢ ܚܘܼܬܼܚܵܬܹܐ ܘܛܲܢ ܘܐܸܬܼܢܲܨܲܚ ܀ 304 :ܒܡܘܼܫܹܐ ܕܲܡܝܼ ܐܵܦ ܗܘ̤ ܒܨܵܘܡܹܗ ܐܲܪܒܿܥܝܼܢ ܝܵܘܡܝܼ̈ܢ 305 ܠܹܠܲܝ ܐܝܼܡܵܡ ܨܵܡ ܟܲܕܼ ܪܲܕܹܐ ܠܘܲܥܕܵܐ ܕܫܲܝܢܵܐ ܀ 306 :ܒܫܘܼܠܵܡ ܨܵܘܡܹܗ ܫ̣ܘܵܐ ܠܓܸܠܝܵܢܵܐ ܐܲܝܟ ܒܲܪ ܥܲܡܪܲܡ 307 ܘܐܲܠܦܹܗ ܩܵܠܵܐ ܚܘܼܒܵܐ ܘܪ̈ܲܚܡܹܐ ܐܲܝܟ ܕܠܡܘܼܫܹܐ ܀ 308 :ܗܵܐ ܨܲܝܵܡܹ̈ܐ ܕܫܲܡܠܝܼܘ ܨܵܘܡ̇ܐ ܒܝܲܕܼ ܣܘܼܥܪ̈ܵܢܹܐ 309 ܬܵܘ ܢܸܬܿܕܲܡܸܐ ܐܵܦܸܢ ܩܲܠܝܼܠ ܒܣܘܼܥܪ̈ܵܢܲܝܗܘܿܢ ܀ 310 :ܗܵܐ ܐܲܠܸܦܬܲܢ ܡܸܠܲܬܼ ܟܲܣܝܵܐ ܒܲܬܼܪܹܢ ܐ̄ܢܵܫܝܼ̈ܢ 311 ܕܐܲܝܢܵܐ ܕܚܵܙܹ̈ܐ ܐܲܝܟ ܥܲܡܠܲܝ̈ܗܘܿܢ ܟܠܝܼܠܵܐ ܢܵܣܹ̇ܒܼ ܀ 312 :ܢܸܗܘܘܿܢ ܡ̇ܕܹܝܢ ܕܘܼܒܵܪ̈ܲܝܗܘܿܢ ܢܝܼܫܵܐ ܠܢܲܦܫܲܢ 313 ܘܲܒܼܗܘܿܢ ܢܸܕܡܸܐ ܒܝܲܕܼ ܨܸܒܼܝܵܢܵܐ ܫܲܦܝܵܐ ܘܕܲܟܼܝܵܐ ܀ 314 :ܢܡܲܟܸܿܟ ܢܲܦܫܲܢ ܐܲܝܟ ܒܲܪ ܥܲܡܪܲܡ ܕܲܣܢ̣ܵܐ ܚܘܼܬܼܪܵܐ 315 ܘܢܲܟܸܿܣ ܥܵܘ̣ܠܵܐ ܐܲܝܟ ܐܹܠܝܼܵܐ ܕܛܲܢ ܟܹܐܢܵܐܝܼܬܼ ܀ 316 :ܗܸܢܘ̣ܿܢ ܛܲܥ̣ܢܘܼܗܝ ܠܝܘܼܩܪܹܗ ܕܥܵܡܵܐ ܐܲܝܟ ܟܲܫܝܼܪܹ̈ܐ 317 ܚܢܲܢ ܬܵܘ ܢܸܦܠܘܼܚ ܐܵܦܸܢ ܗܵܫܵܐ ܒܫܘܼܠܵܡ ܝܵܘܡ̇ܐ ܀ 318 :ܘܐܸܢܗܘ̤ ܕܲܒܼܨܝܼܪ ܪܲܗܛܵܐ ܕܐܘܼܪܚܲܢ ܡ̣ܢ ܩܲܕܼܡ̇ܝܹ̈ܐ 319 ܬܵܘ ܢܸܬܼܠܵܘܸܐ ܥܲܡ ܡܸܨܥܵܝܹ̈ܐ ܕܲܦܫܝܼܩܝܼܢ ܠܲܢ ܀ pb. 177 320 :ܐܸܢܗܘ̤ ܕܲܥܣܸܩ ܥܲܡܠܹܗ ܕܡܘܼܫܹܐ ܐܵܦ ܕܐܹܠܝܼܵܐ 321 ܗܵܐ ܕܵܢܝܼܐܹܝܠ ܕܲܦܫܝܼܩ ܨܵܘܡܹܗ ܘܢܝܼܚ ܦܘܼܠܚܵܢܹܗ ܀ 322 :ܬܠܵܬܼ ܫܵܒܼܘܿܥܝܼ̈ܢ ܨܵܡ ܕܵܢܝܼܐܹܝܠ ܒܦܲܓܼܪܹܗ ܘܢܲܦܫܹܗ 323 ܘܕܲܟܿܝܼ ܠܸܒܹܿܗ ܡ̣ܢ ܣܲܢ̈ܝܵܬܼܵܐ ܥܲܡ ܗܲܕܿܡ̇ܘ̈ܗܝ ܀ 324 :ܒܫܘܼܠܵܡ ܨܵܘܡܹܗ ܩܲܒܸܿܠ ܐܵܦ ܗܘ̤ ܐܲܓܼܪܵܐ ܕܥܲܡܠܹܗ 325 ܪܘܼܚ ܓܸܠܝܵܢܵܐ ܕܡܣܲܒܲܪ ܗ̄ܘ̣ܵܐ ܦܘܼܢܵܝ ܥܲܡܡܹ̈ܐ ܀ 326 :ܐܘܿ ܡ̇ܘܗܲܒܼܬܼܵܐ ܕܟܲܕܼ ܗܝ̤ ܪܲܒܵܐ ܗ̄ܝܼ ܡ̣ܢ ܢܵܣܘܿܒܹ̈ܐ 327 ܠܵܐ ܡܸܬܼܒܲܨܪܵܐ ܟܲܕܼ ܡܸܬܼܦܲܠܓܼܵܐ ܒܲܡ̈ܢܵܘܵܬܼܵܐ ܀ 328 :ܐܘܿ ܢܵܣܘܿܒܹ̈ܐ ܕܡ̣ܢ ܚܲܕܼ ܓܲܙܵܐ ܢܣܲܒܼ݂ܘ ܦܘܼܪܥܵܢܵܐ 329 ܘܥܬ݂ܲܪܘ ܗܸܢ̣ܘܿܢ ܘܩܵܘܝܼ ܥܘܼܬܼܪܵܐ ܐܲܝܟ ܡ̇ܐ ܕܐܝܼܬܼܵܘܗܝ ܀ 330 :ܠܚܲܕܼ ܦܘܼܪܥܵܢܵܐ ܐܲܫܘܝܼ ܐܸܢܘܿܢ ܠܲܒܼܢܲܝ̈ ܒܲܝܬܹܿܗ 331 ܕܕܲܠܡܵܐ ܢܲܟܪܘܿܢ ܐܸܢ ܡܸܬܼܝܲܩܪܝܼܢ ܚܲܕܼ ܡ̣ܢ ܚܲܒܼܪܹܗ ܀ 332 :ܚܕܼܵܐ ܡ̇ܘܗܲܒܼܬܼܵܐ ܢܣܲܒܼ݂ܘ ܫܲܘܝܵܐܝܼܬܼ ܡ̣ܢ ܚܲܕܼ ܓܲܙܵܐ 333 ܒܗܵܝ̇ ܕܬܼܪܲܨܘ ܗ̄ܘ̣ܵܘ ܨܸܒܼܝܵܢܲܝ̈ܗܘܿܢ ܠܘܵܬܼ ܚܲܕܼ ܢܝܼܫܵܐ ܀ 334 :ܒܗܘܿܢ ܙܵܕܹܩ ܠܲܢ ܠܡܸܬܿܕܲܡ̇ܝܘܼ ܒܦܘܼܠܚܵܢ ܨܵܘܡ̇ܐ 335 ܘܲܒܼܥܸܩ̈ܒܼܬܼܵܐ ܕܕܼܘܼܒܵܪ̈ܲܝܗܘܿܢ ܠܡܸܪܗܲܛ ܟܠܫܵܥ ܀ 336 :ܥܲܡܗܘܿܢ ܢܸܚܙܘܿܩ ܒܝܲܕܼ ܨܼܒܼܝܵܢܵܐ ܪܘܼܚܵܢܵܝܵܐ 337 ܕܢܡܲܢܥܘܼܢܵܢ ܠܘܵܬܼ ܟܘܼܠܟܵܢܵܐ ܕܚܘܼܕܵܬܼ ܟܠܵܐ ܀ 338 :ܒܐܘܼܪܚܵܐ ܕܨܵܘܡ̇ܐ ܢܸܪܕܹܿܐ ܦܲܓܼܪܲܢ ܥܲܡ ܪܼܥܝܵܢܲܢ 339 ܥܲܡ ܕܲܠܝܼ̈ܠܹܐ ܕܡܲܢܲܥܘ ܘܲܡ̣ܛܵܘ ܠܐܲܬܼܪܵܐ ܕܚܲܝܹ̈ܐ ܀ 340 :ܠܵܐ ܐ̄ܢܵܫ ܢܚܸܙܘܿܩ ܥܲܡ ܣܲܓܝܼ̈ܐܹܐ ܒܐܘܼܪܚܵܐ ܕܦܲܬܼܝܵܐ 341 ܕܕܲܠܡܵܐ ܢܸܫܡܲܥ ܥܲܡ ܣܲܓܿܝܼܐܹܐ ܕܙܸܠ ܠܐܲܒܼܕܵܢܵܐ ܀ 342 :ܡܫܝܼܚܵܐ ܪܹܫܲܢ ܕܲܪܫܲܢ ܒܡܸܠܵܘ̈ܗܝ ܠܗܵܝ̇ ܕܐܲܠܝܼܨܵܐ 343 ܬܵܘ ܢܸܪܕܹܿܐ ܒܵܗ̇ ܕܢܸܫܡܲܥ ܡܸܢܹܗ ܕܬܼܵܘ ܐܸܬܼܒܲܣܲܡܘ ܀ 344 :ܐܵܦ ܗܘ̤ ܒܨܵܘܡ̇ܐ ܪܕܼܐ ܒܵܗ̇ ܠܘܼܩܕܼܡ ܒܝܲܕܼ ܚܘܼܡܣܵܢܵܐ 345 ܘܡܲܢܲܥ ܘܲܡ̣ܛܐ ܠܘܵܬܼ ܫܘܼܠܵܡܵܐ ܕܲܓܼܡܝܼܪܘܼܬܼܵܐ ܀ 346 :ܒܛܲܟܼܣܵܐ ܕܥܲܒܼ̈ܕܹܿܐ ܕܲܡܝܼ ܐܵܦ ܗܘ̤ ܘܨܵܡ ܘܐܸܬܼܢܣܝܼ 347 :ܘܒܼܵܬܲܪ ܨܵܘܡܹܗ ܙܚܝܘܼܗܝ ܟܸܢܫܹ̈ܐ ܕܪ̈ܘܼܚܵܢܵܝܹܐ 348 :ܐܲܪܒܿܥܝܼܢ ܝܵܘܡܝܼ̈ܢ ܠܹܠܲܝ ܐܝܼܡܵܡ ܩ̣ܡ ܒܐܵܓܼܘܿܢܵܐ 349 ܘܲܒܼܥܸܠܕܲܪܵܐ ܟܲܕܼ ܡܸܬܼܒܲܩܸܐ ܒܚܘܼܡܣܵܢ ܢܲܦܫܹܗ ܀ pb. 178 350 :ܒܐܲܪܒܿܥܝܼܢ ܝܵܘܡܝܼ̈ܢ ܬܲܚܡܹܗ ܠܨܵܘܡܹܗ ܐܲܝܟ ܩܲܕܼܡܵܝܹ̈ܐ 351 ܕܠܵܐ ܐ̄ܢܵܫ ܢܸܪܢܹܐ ܕܕܲܠܡܵܐ ܟܝܵܢܹܗ ܪܘܼܚܵܢܵܝܵܐ ܗ̄ܘ̣ ܀ 352 :ܒܛܲܟܼܣܵܐ ܕܐܲܚ̈ܵܘܗܝ ܘܕܲܟܼܢܵܘܵܬܹ̈ܗ ܕܲܡܝܼ ܒܨܵܘܡܹܗ 353 ܕܠܵܐ ܢܸܬܼܢܲܟܼܪܸܐ ܠܥܹܝܢ ܚܲܙܵܝܵܘ̈ܗܝ ܕܕܼܵܡ ܠܵܘ ܐ̄ܢܵܫܵܐ ܗ̄ܘ̣ ܀ 354 :ܐ̄ܢܵܫܵܝܵܐ ܗ̄ܘ̣ܵܐ ܡ̣ܢ ܐ̄ܵܢܵܫܘܼܬܼܵܐ ܠܒܼܝܼܫܲܬܼ ܚܲܫܹ̈ܐ 355 ܘܙܵܕܹܩ ܗ̄ܘ̣ܵܐ ܠܹܗ ܕܲܒܟܼܠ ܡܸܕܲܡ ܢܕܹܿܡܸܐ ܒܐ̄ܢܵܫܵܐ ܀ 356 :ܠܵܘ ܐ̄ܢܵܐ ܩܪܹܝܬܹܗ ܒܲܫܡܵܐ ܕܐ̄ܢܵܫܵܐ ܡܪܵܚܵܐܝܼܬܼ 357 ܦܵܘܠܘܿܣ ܚܵܘܝܼ ܕܚܲܕܼܘܼ ܟܝܵܢܹܗ ܕܝܠܹܗ ܘܕܼܝܼܠܲܢ ܀ 358 :ܚܲܕܼ ܠܲܡ ܐܝܼܬܼܵܘܗܝ ܕܩܲܕܸܫ ܐ̄ܢܵܫܵܐ ܘܐ̄ܢܵܫܵܐ ܕܩܲܕܹܿܫ 359 ܘܡܸܛܠ ܗܵܢܵܐ ܠܵܐ ܐܸܬܼܟܲܚܲܪ ܒܲܫܡܵܐ ܕܐܲܚܵܘ̈ܗܝ ܀ 360 :ܗܘ̤ ܬܘܼܒܼ ܟܲܢܝܹܗ ܒܕܼܘܼܟܿܬܼܐ ܐ̄ܚܪܹܬܼܵܐ ܒܫܸܡ ܒܲܪܢܵܫܵܐ 361 ܟܲܕܼ ܩܵܪܹܐ ܠܹܗ ܚܲܕܼ ܡܸܨܥܵܝܵܐ ܘܚܲܕ ܒܲܪܢܵܫܵܐ ܀ 362 :ܘܐܸܢ ܡܼܬܿܬܿܩܠܝܼܢ ܗܲܪ̈ܛܝܼܩܹܐ ܒܡܸܠܲܬܼ ܦܵܘܠܘܿܣ 363 ܢܸܫܡܲܥ ܡܸܢܹܗ ܕܐܵܦ ܗܘ̤ ܠܢܲܦܫܹܗ ܐ̄ܢܵܫܵܐ ܟܲܢܼܝ ܀ 364 :ܡ̇ܢ ܠܲܡ ܐܵܡ̇ܪܝܼܢ ܥܠܲܝ ܡܢܵܘܵܬܼ ܕܐܝܼܬܲܝ ܐ̄ܢܵܫܵܐ 365 ܘܡ̇ܢ ܒܵܥܹ̇ܝܬܿܘܿܢ ܠܡܸܩܛܲܠ ܓܲܒܼܪܵܐ ܕܡܲܟܼܪܸܙ ܩܘܼܫܬܐ ܀ 366 :ܗܵܐ ܗܘ̤ ܘܐܚܵܘ̈ܗܝ ܒܲܫܡܵܐ ܕܐ̄ܢܵܫܵܐ ܩܪ̣ܵܐ ܠܲܟܼܝܵܢܹܗ 367 ܠܡܵܢ ܥܵܛܹ̇ܝܢ ܠܹܗ ܗܲܪ̈ܲܛܝܼܩܹܐ ܠܫܸܡ ܐ̄ܢܵܫܘܬܼܐ ܀ 368 :ܡܸܣܢܵܐ ܣܵܢܹ̇ܝܢ ܠܲܟܼܝܵܢ ܦܲܓܼܪܲܢ ܒܲܕܼܡܘܼܬܼ ܡ̇ܐܢܝܼ 369 ܘܡܸܛܠ ܗܵܕܹܐ ܢܵܨܹ̇ܝܢ ܥܲܡܲܢ ܐܲܝܟ ܢܘܼܟܼܪ̈ܵܝܹܐ ܀ 370 :ܒܗܵܘ̇ ܟܘܼܪܗܵܢܵܐ ܕܠܵܐ ܢܘܼܚܵܡܵܐ ܪܡܹܝܢ ܐܵܦ ܗܸܢܲܘ̣ܿܢ 371 ܘܲܣܥܵܐ ܥܠܲܝܗܘܼܢ ܐܲܝܢܵܐ ܕܡܲܟܼܪܸܙ ܢܘܼܚܵܡ ܦܲܓܼܪܵܐ ܀ 372 :ܠܲܢܣܝܼܣܘܬܼܵܐ ܕܪ̈ܥܝܵܢܲܝܗܘܿܢ ܚܙܹ̇ܝܬܼ ܐܵܦ ܗܵܫܵܐ 373 ܘܲܣܛܵܬ̤ ܡܸܠܲܬܼܝ ܡ̣ܢ ܡܲܪܕܿܝܼܬܼܐ ܕܐܘܼܪܚܹܗ ܕܨܵܘܡ̇ܐ ܀ 374 :ܒܐܘܼܪܚܵܐ ܕܨܵܘܡܵܐ ܚܸܙܩܲܬ̤ ܡܸܠܲܬܼܝ ܡ̣ܢ ܫܘܼܪܵܝܵܐ 375 ܕܓܲܪܓܿܢܝ ܚܘܼܒܵܐ ܕܐ̄ܢܵܫܵܐ ܕܢܨܲܚ̣ܘ ܒܝܲܕܼ ܨܵܘܡܲܝܗܘܿܢ ܀ 376 ܩܲܠܝܼܠܵܐܝܼܬܼ ܪܗܛ̣ܘ ܚܘܼܫܵܒܲܝ̈ ܥܲܠ ܫܲܪ̈ܒܲܝܗܘܿܢ: pb. 179 377 ܕܐܸܩܒܿܘܿܥ ܐܸܢܘܿܢ ܐܲܝܟ ܡܲܚܙܝܼܬܼܵܐ ܩܕܼܵܡ ܨܲܝܵܡܹ̈ܐ ܀ 378 :ܒܥܸܠܲܬܼ ܨܵܘܡ̇ܐ ܕܥܲܒܼܕܲܝ̈ ܡܲܠܟܵܐ ܓܲܪܓܲܢܝ ܪܸܥܝܵܢܝ 379 ܕܐܸܬܼܢܸܐ ܫܲܪܒܵܐ ܕܡܲܠܟܵܐ ܘܥܲܒܼܕܵܘ̈ܗܝ ܕܨܵܡ̣ܘ ܘܐܸܬܼܢܲܨܲܚܘ ܀ 380 :ܚܲܝܠܵܬܐ ܕܨܵܘܡܵܐ ܒܥܹ̇ܝܬܼ ܕܐܹܚܵܘܸܐ ܩܕܼܵܡ ܨܲܝܵܡܹ̈ܐ 381 ܘܐܲܝܬܿܝܼܬܼ ܣܵܗ̈ܕܹܿܐ ܠܫܘܼܪܵܪ ܡܸܠܲܝ̈ ܡܲܠܟܵܐ ܘܥܲܒܼܕܵܘ̈ܗܝ ܀ 382 :ܐܵܦ ܙܵܕܹܩ ܠܹܗ ܠܐܲܝܢܵܐ ܕܕܼܵܐܹ̇ܝܢ ܢܵܘܡܘܿܣܵܐܝܼܬܼ 383 ܕܒܲܟܼܬܼܝܼ̈ܒܼܵܬܼܵܐ ܡ̣ܢ ܒܹܝܬܼ ܐܲܪ̈ܟܹܿܐ ܢܫܲܪܲܪ ܡܸܠܵܘ̈ܗܝ ܀ 384 :ܓܲܙܲܝ̈ ܕܝܼܢܵܐ ܕܡܲܠܟܵܐ ܢܸܬܼܢܸܐ ܥܲܠ ܟܠ ܣܘܼܥܪܵܢ 385 ܘܗܵܐ ܡܸܫܬܲܪܪܝܼܢ ܡܸܠܲܝ̈ ܦܘܼܡܲܢ ܠܘܵܬܼ ܫܵܡܘܿܥܹ̈ܐ ܀ 386 :ܨܵܘܡ̇ܐ ܕܟܼܠܝܘܿܡ ܗܵܕܹܐ ܗ̄ܝܼ ܥܸܠܬܹܗ ܠܘܵܬܼ ܦܵܪ̈ܘܿܫܹܐ 387 ܕܐܲܝܟ ܕܡ̣ܢ ܠܲܚܡܵܐ ܙܵܕܹܩ ܕܲܢܨܘܼܡ ܐܵܦ ܡ̣ܢ ܥܵܘ̣ܠܵܐ ܀ 388 :ܘܬܼܘܼܒܼ ܐܵܦ ܐ̄ܪܵܙܵܐ ܗ̄ܘ̣ ܕܗܵܘ̇ ܬܘܼܩܵܢܵܐ ܕܠܵܐ ܡܸܬܼܚܲܒܲܠ 389 ܕܕܲܠܵܐ ܐܘܼܟܼܠܵܐ ܚܵܐܹ̇ܝܢ ܦܲܓܼܪܹ̈ܐ ܐܲܝܟ ܪ̈ܘܼܚܵܢܹܐ ܀ 390 :ܐܝܼܬܼ ܒܹܗ ܥܸܠܵܬܼܵܐ ܐܵܦ ܚܘܼܡܵܢܵܐ ܕܡ̣ܢ ܒܝܼ̈ܫܵܬܼܵܐ 391 ܕܡܵܐ ܕܡܸܬܼܩܲܦܲܚ ܦܲܓܼܪܵܐ ܒܨܵܘܡܵܐ ܢܛܲܟܸܿܣ ܪܲܗܛܹܗ ܀ 392 :ܥܸܠܬܼܵܐ ܕܨܵܘܡ̇ܐ ܕܐܲܪܒܿܥܝܼܢ ܝܵܘܡܝܼ̈ܢ ܦܘܼܪܣܵܐ ܗ̄ܘ̣ ܕܐܸܫܟܲܚܘ 393 ܐܵܣܵܘܵܬܼ̈ܐ ܪ̈ܘܼܚܵܢܵܝܹܐ ܠܚܘܼܠܡܵܢ ܐ̄ܢܵܫܵܐ ܀ 394 :ܚܙ̣ܵܘ ܓܹܝܪ ܕܲܢܚܝܼܠ ܟܝܵܢܵܐ ܕܐ̄ܢܵܫܵܐ ܠܪܲܗܛܐ ܕܟܼܠܝܘܿܡ 395 ܘܡܲܕܹܿܟܼܘ ܘܝܲܗ̣̄ܒܼܘ ܠܹܗ ܙܲܒܼܢܵܐ ܙܥܘܿܪܵܐ ܒܲܕܼܡܘܼܬܼ ܣܲܡܵܐ ܀ 396 :ܒܙܲܒܼܢܵܐ ܕܲܦܠܸܐ ܬܲܚܸܡܘ ܨܵܘܡ̇ܐ ܠܫܲܒܼܪܘܼܬܼ ܐ̄ܢܵܫܵܐ 397 ܘܐܸܣܲܪ̣ܘ ܐܸܢܘܿܢ ܠܘܵܬܼ ܚܘܼܡܣܵܢܵܐ ܒܪܸܓܲܬܼ ܥܹܐܕܼܵܐ ܀ 398 :ܣܵܡ̣ܘܼܗܝ ܠܨܵܘܡ̇ܐ ܐܲܝܟ ܫܲܬܸܐܣܬܼܵܐ ܠܒܸܢܝܵܢ ܚܘܼܒܵܐ 399 ܕܢܸܒܼܢܸܐ ܟܠܢܵܫ ܗܲܝܟܲܠ ܢܲܦܫܹܗ ܒܕܼܘܼܒܵܪ ܚܲܝܹ̈ܐ ܀ 400 :ܐܲܝܟ ܬܲܛܠܝܼܥܵܐ ܒܪܹܫ ܒܸܢܝܵܢܵܐ ܫܲܟܠܸܠܘ ܥܹܐܕܵܐ 401 ܕܢܸܒܼܣܲܡ ܟܠܢܵܫ ܒܗܲܝܟܲܠ ܪܘܼܚܵܐ ܕܐ̄ܪܵܙ ܢܘܼܚܵܡܵܐ ܀ 402 :ܥܸܠܬܹܗ ܕܥܹܐܕܼܵܐ ܢܘܼܚܵܡ ܦܲܓܼܪܵܐ ܗ̄ܘ̣ ܘܦܘܼܪܩܵܢ ܢܲܦܫܵܐ 403 ܘܫܲܦܝܼܪ ܐܲܠܸܦܘ ܘܦܲܓܼܪܵܐ ܘܢܲܦܫܵܐ ܢܨܘܼܡܘܼܢ ܐܲܟܲܚ̄ܕܼ ܀ 404 :ܪܫܝܼܡܵܐ ܒܹܗ ܬܘܼܒܼ ܐܵܦ ܙܵܟܼܘܼܬܹܗ ܕܡܲܠܟܵܐ ܕܪܵܘܡܵܐ 405 ܕܲܙܟܼܵܐ ܘܙܲܟܿܝܼ ܘܩ̣ܵܡ ܘܐܸܬܼܢܲܚܲܡ ܘܢܲܚܸܡ ܟܠܵܐ ܀ 406 :ܒܫܘܼܠܵܡ ܨܵܘܼܡ̇ܐ ܕܐܲܪܒܿܥܝܼܢ ܝܵܘܡܝܼ̈ܢ ܪܫܲܡ̣ ܙܵܟܼܘܼܬܹܗ 407 ܘܐܲܠܸܦ ܥܲܒܼܕܵܘ̈ܗܝ ܕܢܸܬܿܕܲܟܼܪܘܼܢܵܝܗܝ ܒܝܘܿܡ ܙܵܟܼܘܼܬܹܗ ܀ 408 :ܒܨܵܘܡܹܗ ܓܠ̣ܵܐ ܠܗܘܿܢ ܥܲܠ ܙܵܟܼܘܼܬܹܗ ܕܢܸܬܿܕܲܡܘܿܢ ܒܹܗ 409 ܘܲܒܼܙܟܼܘܼܬܹܗ ܐܲܠܸܦ ܐܸܢܘܿܢ ܠܡܸܚܣܲܢ ܚܲܫܹ̈ܐ ܀ pb. 180 410 :ܒܐܲܪܒܿܥܝܼܢ ܝܵܘܡܝܼ̈ܢ ܬܲܚܡܹܗ ܠܪ̈ܲܗܛܵܐ ܕܓܼܡܼܪܘܼܬܵܐ 411 ܕܢܸܗܘܸܐ ܩܲܠܝܼܠ ܠܐܲܝܢܵܐ ܕܪܵܕܹܐ ܠܘܲܥܕܵܐ ܕܲܠܗܲܠ ܀ 412 :ܠܥܹܐܕ ܙܵܟܼܘܼܬܹܗ ܣܵܡ̣ܹܗ ܒܛܲܟܼܣܵܐ ܕܲܠܡܹܐܝܢ ܚܲܝܹ̈ܐ 413 ܕܲܡܡܲܢܥܝܼܢ ܠܹܗ ܪ̈ܕܝܲܝ ܒܐܘܼܪܚܵܐ ܕܙܲܕܝܼܩܘܼܬܼܵܐ ܀ 414 :ܒܝܘܿܡ ܢܘܼܚܵܡܹܗ ܠܲܒܸܿܒܼ ܐܸܢܘܿܢ ܠܦܲܓܼܪ̈ܵܢܵܝܹܐ 415 ܕܠܵܐ ܢܸܬܼܪܲܦܘܿܢ ܡ̇ܐ ܕܡܸܬܼܡܲܚܠܝܼܢ ܗܲܕܵܡܲܝ̈ܗܘܿܢ ܀ 416 :ܐ̄ܪܵܙ ܢܘܼܚܵܡܵܐ ܚܵܘܝܼ ܐܸܢܘܿܢ ܒܫܘܼܠܵܡ ܨܵܘܡ̇ܐ 417 ܕܡ̇ܐ ܕܡܲܩܪܒܼܝܼܢ ܥܲܡ ܚܘܼܬܼܚܵܬܹ̈ܐ ܢܩܘܼܡܘܼܢ ܥܲܡܹܗ ܀ 418 :ܐܲܡܝܼܬܼܘ ܗܵܟܹܝܠ ܗܲܕܵܡܲܝ̈ܟܿܘܿܢ ܐܲܟܼܪܸܙ ܦܵܘܠܘܿܣ 419 ܟܲܕ ܣܘܼܥܪ̈ܵܢܹܐ ܕܲܒܼܗܲܕܡܹ̈ܐ ܐܸܡ݂ܲܪ ܕܐܲܡܝܼܬܼܘ ܀ 420 :ܢܸܩܒܿܘܿܪ ܡ̇ܕܹܝܢ ܚܲܫܲܝ̈ ܦܲܓܼܪܵܢ ܒܩܲܒܼܪܵܐ ܕܨܵܘܡ̇ܐ 421 ܕܢܸܫܘܸܐ ܠܚܲܝܹ̈ܐ ܒܫܘܼܠܵܡ ܨܵܘܡ̇ܐ ܒܝܘܿܡ ܢܘܼܚܵܡܵܐ ܀ 422 :ܥܲܡ ܣܸܦ̈ܘܵܬܼܵܐ ܢܨܘܼܡܝܼܢ ܐܲܟܲܚ̄ܕ ܙܵܘܥܹ̈ܐ ܘܪ̈ܓܼܫܹܐ 423 ܘܐܲܝܟ ܕܲܒܼܩܲܒܼܪܵܐ ܢܣܝܼܡ ܣܘܼܥܪ̈ܵܢܹܐ ܕܡ̇ܝܘܿܬܼܘܼܬܼܵܐ ܀ 424 :ܢܨܘܼ̈ܡ̇ܢ ܥܲܝܢܹ̈ܐ ܕܠܵܐ ܢܸܬܼܒܲܩ̈ܝܵܢ ܙܲܠܝܼܠܵܐܝܼܬܼ 425 ܐܵܦ ܡܲܫܡܲܥܬܼܵܐ ܕܲܠܡܵܐ ܬܩܲܒܸܿܠ ܡܹܐܟܲܠ ܩܲܪܨܵܐ ܀ 426 :ܢܨܘܼܡ ܠܸܫܢܵܐ ܣܢܹܐܓܼܪܵܐ ܕܙܵܘܥܸ̈ܐ ܘܲܕܗܲܕܵܡܹ̈ܐ 427 ܘܢܸܦܪܘܿܥ ܫܘܼܒܼܚܵܐ ܐܲܝܟ ܥܲܪ̈ܒܼܵܐ ܕܲܟܼ̈ܢܵܘܵܬܹܗ ܀ 428 :ܢܨܘܼ̈ܡ̇ܢ ܐܝܼܕܹ̈ܐ ܡ̣ܢ ܦܘܼܠܚܵܢܵܐ ܕܓܲܢܵܒܼܘܼܬܵܐ 429 ܘܪ̈ܓܼܠܹܐ ܥܲܡܗܹܝܢ ܡ̣ܢ ܕܠܡܸܪܗܲܛ ܠܡܸܣܲܒܼ ܕܲܐ̄ܚܪܹܝܢ ܀ 430 :ܢܨܘܼܡ ܪܸܥܝܵܢܵܐ ܡ̣ܢ ܚܘܼܫܵܒܹ̈ܐ ܗܵܘܢܵܐ ܘܠܸܒܵܐ 431 ܕܕܵܠܡܵܐ ܢܸܥܠܘܼܢ ܚܲܫܹ̈ܐ ܠܢܲܦܫܵܐ ܐܲܝܟ ܕܲܠܟܲܪܣܵܐ ܀ 432 :ܢܨܘܼܡ ܡ̣ܢ ܠܲܚܡܵܐ ܘܡ̣ܢ ܟܠ ܚܲܫܝܼ̈ܢ ܕܟܼܣܹܝܢ ܘܲܓܼܠܹܝܢ 433 ܕܢܸܬܸܿܠ ܟܲܣܝܵܐ ܐܲܓܼܪܵܐ ܠܦܲܓܼܪܲܢ ܘܲܠܪܸܥܝܵܢܲܢ ܀ 434 :ܗܵܢܵܘ̇ ܨܵܘܡ̇ܐ ܕܓܼܒܼܵܐ ܘܲܪܚܝܼܡ ܥܲܐ ܒܵܪܘܿܝܵܐ 435 ܡ̇ܐ ܕܡܸܬܼܢܲܟܼܪܸܐ ܦܲܓܼܪܵܐ ܘܢܲܦܫܵܐ ܡ̣ܢ ܟܠ ܕܣܢܸܐ ܀ 436 :ܗܵܟܲܢ ܙܵܕܹܩ ܠܐܲܝܢܵܐ ܕܨܵܐܹ̇ܡ ܦܵܪܘܿܫܵܐܝܼܬܼ 437 ܕܢܸܫܕܹܿܐ ܡܸܢܹܗ ܟܠ ܣܘܼܥܪ݁ܵܢܝܼܢ ܕܲܫܟܼܝܼܪ̈ܵܬܼܵܐ ܀ 438 :ܗܵܢ̇ܵܘ ܨܵܘܡ̇ܐ ܕܐܸܡ݂ܲܪ ܕܲܡܨܸܐ ܕܢܸܪܕܿܘܼܦ ܫܹܐܕܹ̈ܐ 439 ܘܠܵܐ ܢܸܬܼܦܲܢܹܐ ܟܠܝܼܠ ܙܵܟܼܘܼܬܼܵܐ ܐܲܝܟ ܐܲܬܼܠܹܝܛܵܐ ܀ 440 :ܒܗܵܢܵܐ ܢܨܲܚ̣ܘ ܗ̄ܘ̣ܵܘ ܐܵܦ ܟܵܪ̈ܘܼܙܹܐ ܕܡܸܠܲܬܼ ܚܲܝܹ̈ܐ 441 :ܘܪܲܡܪܸܡ ܐܸܢܘܿܢ ܚܲܝܠܵܐ ܕܪܘܼܚܵܐ ܠܥܹܝܢ ܚܙܵܝܹ̈ܐ 442 :ܬܵܘ ܡ̇ܝܘܿܬܹ̈ܐ ܡܚܝܼܠܲܝ̈ ܚܲܝܠܵܐ ܐܸܬܼܓܵܘܵܪܘ ܒܹܗ 443 ܕܲܡܨܸܐ ܗ̄ܘ̣ ܚܲܝܠܹܗ ܠܡܸܬܲܠ ܚܲܝܠܵܐ ܒܲܡܚܝܼܠܘܼܬܵܐ ܀ 444 :ܬܵܘ ܣܲܒܼܘ ܙܲܝܢܹܗ ܘܐܸܙܕܲܝܲܢܘ ܒܹܗ ܐܲܝܟ ܕܲܦܠܸܐ ܠܹܗ 445 ܕܬܸܙܟܿܘܿܢ ܒܐܝܼܕܹܗ ܠܲܒܼܥܸܠܕܵܪܵܐ ܘܚܲܝ̈ܠܵܘܬܹܗ ܀ 446 :ܒܙܲܝܼܢܹܗ ܢܲܩܪܸܒܼ ܥܲܡ ܚܲܣܝܼܢܵܐ ܕܡܲܩܪܸܒܼ ܥܲܡܲܢ 447 ܘܲܒܼܥܘܼܕܼܪܵܢܹܗ ܢܸܣܬܿܘܿܪ ܪܵܘܡܵܐ ܕܡ̇ܪܘܿܕܘܼܬܹܗ ܀ pb. 181 448 :ܢܹܐܡܲܪ ܟܠܢܵܫ ܒܦܘܼܡ ܨܲܝܵܡܹ̈ܐ ܠܘܵܬܼ ܡ̇ܪܘܿܕܼܵܐ 449 ܕܙܸܠ ܠܵܟ ܒܝܼܫܵܐ ܡܚܝܼܠ ܗ̄ܘ̣ ܚܲܝܠܵܐ ܠܘܼܩܒܲܠ ܨܵܘܡ̇ܐ ܀ 450 :ܓܹܐܪܹ̈ܐ. ܕܨܵܘܡ̇ܐ ܢܸܫܕܹܿܐ ܒܣܸܕܼܪ̈ܵܘܗܝ ܕܐܵܟܹܠܩܲܪܨܵܐ 451 ܘܗܵܐ ܡܸܬܼܒܲܕܿܪܝܼܢ ܚܲܝ̈ܠܘܵܬܹܗ ܡ̣ܢ ܡܲܫܪܝܼܬܲܢ ܀ 452 :ܒܢܲܦܫܵܐ ܘܦܲܓܼܪܵܐ ܢܗܲܠܸܠ ܟܠܢܵܫ ܪܘܼܚܵܢܵܐܝܼܬܼ 453 ܠܵܗܵܘ̇ ܕܲܕܪܲܫ ܠܲܢ ܐܘܼܪܚܐ ܠܪܵܘܡ̇ܐ ܒܝܲܕܼ ܙܵܟܼܘܼܬܹܗ ܀ ܥܘܼܢܵܝܵܐ: ܒܪܝܼܟ ܕܲܒܼܨܵܘܡܹܗ ܚܲܪܲܪ ܠܲܢ: ܡ̣ܢ ܥܲܒܼܕܿܘܼܬܼܵܐ ܕܲܚܒܼܵܠܵܐ ܀