Discourse 71

ܗ̤ܘܲܝܬܿ ܤܵܐܹ̇ܡ ܐܵܬ̤ܵܐ ܒܢܲܦܫܵܟܼ ܐܲܡܝܼܢܵܐܝܼܬܼ: ܘܡܸܬܼܒܲܩܸܐ. ܘܲܒܼܙܲܒܼܢܵܐ ܗܵܘ̇ ܕܬܲܪܓܸܫ ܐܲܢ̄ܬܿ ܒܵܟܼ: ܕܲܒܼܛܝܼܠܘܼܬܹܗ ܕܐܲܠܵܗܵܐ ܫܲܪܝܲܬ̤ ܓܵܠܝܵܐ ܝܵܬܼܵܗ̇ ܠܢܲܦܫܵܐ: ܐܸܤܬܲܟܲܠ ܡܸܟܹܝܠ: ܕܩܲܪܝܼܒܼ ܐܲܢ̄ܬܿ ܠܠܲܡܹܐܢܵܐ ܕܕܲܟܿܝܘܼܬܼܵܐ: ܡܵܐ ܕܹܝܢ ܕܫܲܪܝܼ ܒܲܪܢܵܫܵܐ ܠܡܸܬܼܥܲܠܵܝܘܼ ܡ̣ܢ ܚܲܫܹ̈ܐ: ܡܸܚܕܼܵܐ ܚܲܝܠܵܐ ܗܵܢܵܐ ܩܲܕܝܼܫܵܐ ܢܵܩܹ̇ܦ ܠܵܗ̇ ܠܢܲܦܫܵܐ. ܘܠܵܐ ܦܵܪܹܩ ܡܸܢܵܗ̇: ܠܵܐ ܠܸܠܝܵܐ ܘܠܵܐ ܐܝܼܡܵܡܵܐ. ܘܲܡܚܵܘܸܐ ܠܵܗ̇ ܡܕܲܒܿܪܵܢܘܼܬܹܗ ܕܐܲܠܵܗܵܐ. ܘܲܥܕܲܡܵܐ ܓܹܝܪ ܠܲܙܥܘܿܪ̈ܝܵܬܼܵܐ ܕܟܼܠ ܕܐܝܼܬܼ ܘܗܵܘܹ̇ܐ ܘܐܹܝܢ ܘܠܵܐ: ܕܡܸܤܬܲܥܪ̈ܵܢ ܠܘܵܬܼ ܒܲܪܢܵܫܵܐ ܒܟܸܤܝܵܐ ܘܲܒܼܓܸܠܝܵܐ: ܘܒܲܒܼܪܝܼܬܹܗ ܕܥܵܠܡܵܐ ܗܵܢܵܐ: ܓܵܠܹ̇ܐ ܠܵܗ̇ ܠܢܲܦܫܵܐ ܚܲܝܠܵܐ ܗܵܘ̇ ܕܢܲܩܝܼܦ ܠܵܗ̇. ܘܓܼܵܠܹ̇ܐ ܠܵܗ̇ ܚܲܝܠܵܐ ܕܥܵܒܼܘܿܕܼܘܼܬܹܗ ܕܐܲܠܵܗܵܐ: ܘܲܡܚܵܘܸܐ ܠܵܗ̇ ܒܛܝܼܠܘܼܬܼܵܐ ܐܲܠܵܗܵܝܬܐ ܕܲܕܼܠܵܐ ܫܠܘܵܐ ܢܲܩܝܼܦܵܐ ܘܤܵܥܪܵܐ ܠܟܼܠܡܸܕܸܡ ܕܗܵܕܹܐ ܒܪܝܼܬܼܵܐ. ܘܕܲܐܝܟܲܢܵܐ ܢܲܩܝܼܦܵܐ ܠܹܗ ܠܒܲܪܢܵܫܵܐ ܒܟܼܠܥܸܕܵܢ: ܘܟܲܕܼ ܗ̤ܘ ܠܵܐ ܪܓܼܝܼܫ ܘܠܵܐ ܝܵܕܲܥ ܡܢܲܛܪܵܐ ܠܹܗ ܡ̣ܢ ܤܲܩܘܼ̈ܒܼܠܹܐ ܒܟܼܠ ܙܒܲܢ: ܘܬܼܵܪܨܵܐ ܠܹܗ ܠܘܵܬܼ ܡܸܕܸܡ ܕܦܘܼܪܩܵܢܵܐ ܘܼܢܝܵܚܵܐ ܕܢܲܦܫܹܗ ܘܲܕܼܦܲܓܼܪܹܗ ܘܲܫܟܼܵܚܬܼܵܐ ܕܚܲܝܘ̈ܗܝ. ܘܡܸܟܹܝܠ ܗ̤ܘ ܟܲܕܼ ܗ̤ܘ ܚܲܝܠܵܐ ܐܲܠܵܗܵܝܵܐ: ܕܐܝܼܬܼܵܘܗܝ ܤܵܥܘܿܪܵܐ ܕܗܵܠܹܝܢ ܟܠܗܹܝܢ: ܡܚܵܘܸܐ ܢܲܦܫܹܗ ܠܒܲܪܢܵܫܵܐ ܒܟܸܤܝܵܐ: ܒܓܸܠܝܵܢܵܐ ܡܸܬܼܝܲܕܼܥܵܢܵܐ ܠܲܟܼܝܵܢܹܗ ܪܘܼܚܵܢܵܐ ܕܗ̤ܘܝܘܼ ܡܲܕܿܥܵܐ. ܡܵܐ ܕܹܝܢ ܕܐܸܫܬܘܝܼ ܒܲܪܢܵܫܵܐ ܠܲܡܩܲܒܵܠܘܼ ܠܚܲܝܠܵܐ ܗܵܢܵܐ ܒܓܼܵܘ ܢܲܦܫܹܗ: ܬܘܼܒܼ ܠܲܝܬܿ ܠܹܗ: ܐܸܠܵܐ ܬܸܡܗܵܐ ܘܫܸܬܼܩܵܐ: ܘܕܸܡ̈ܥܹܐ ܕܲܒܼܟܼܠܥܸܕܵܢ ܪ̈ܵܕܼܝܵܢ ܐܲܝܟܼ ܡܲܝ̈ܵܐ: ܘܦܵܐܹ̇ܫ ܡܸܟܹܝܠ ܒܲܪܢܵܫܵܐ pb. 490 ܡ̣ܢ ܟܠܗܘܿܢ ܥ̇ܒܼܵܕܹ̈ܐ. ܘܚܵܙܹ̇ܐ ܐܲܢ̄ܬܿ ܡܸܟܹܝܠ ܒܟܼܠܥܸܕܵܢ: ܒܗܵܕܹܐ ܚܙܵܬܼܵܐ ܕܐܲܡܝܼܢܘܼܬܼ ܒܛܝܼܠܘܼܬܹܗ ܕܐܲܠܵܗܵܐ ܕܲܠܘܵܬܼ ܥ̇ܒܼܵܕܼ ܐܲܝܼܕܼܵܘ̈ܗܝ. ܗܵܘܢܵܐ: ܟܲܕܼ ܡܸܬܼܒܠܲܥ ܒܬܸܡܗܵܐ. ܪܸ̈ܓܼܫܹܐ: ܟܲܕܼ ܫܠܹܝܢ. ܒܲܪܢܵܫܵܐ ܬܵܚܘܿܒܼܵܐ: ܕܲܤܚܝܼܦ ܥܲܠ ܐܲܦܵܘ̈ܗܝ ܒܲܨܠܘܿܬܼܵܐ. ܕܠܵܐ ܠܸܫܵܢܵܐ ܠܹܗ ܕܲܢܡܲܠܸܠ: ܘܠܵܐ ܠܸܒܵܐ ܬܘܼܒܼ ܤܵܦܹ̇ܿܩ ܕܲܢܨܲܠܸܐ. ܐܸܠܵܐ ܡ̣ܢ ܬܸܡܗܵܐ ܕܲܒܼܤܘܼܥܪ̈ܢܹܐ: ܐܵܦ ܗ̤ܝ ܨܠܘܿܬܼܵܐ ܒܲܛܝܼܠܵܐ. ܗܵܘ̇ ܒܵܛܠܵܢܵܐ ܕܲܡܝܲܬܲܪ ܡ̣ܢ ܥ̇ܒܼܵܕܼܵܐ: ܟܲܕܼ ܒܲܠܚܘܿܕܼ ܫܠܸܐ ܒܲܪܢܵܫܵܐ ܒܟܼܠܗܘܿܢ ܪܸ̈ܓܼܫܘܗܝ ܘܙܵܘܥܵܘ̈ܗܝ: ܘܒܲܐܡܝܼܢܘܼ ܤܚܝܼܦ ܪܡܸܐ ܥܲܠ ܐܲܦܵܘ̈ܗܝ ܩܕܼܵܡ ܡܵܪܹܗ. ܘܲܥܕܲܡܵܐ ܕܐܵܦ ܓܲܪ̈ܡܵܘܗܝ: ܬܸܫܒܿܘܿܚܬܼܵܐ ܡܲܤܩܝܼܢ ܒܫܸܬܼܩܗܘܿܢ ܠܐܲܠܵܗܵܐ: ܒܒܸܛܠܵܢܵܐ ܗܵܘ̇ ܕܡܸܤܬܿܒܲܪ: ܐܲܝܟܼ ܕܐܸܡ݂ܲܪ ܢܒܼܝܼܵܐ: ܕܟܼܠܗܘܿܢ ܓܲܪ̈ܡܲܝ ܢܹܐܡܪܘܼܢ: ܡܵܪܝܵܐ ܡܲܢ̣ܘܼ ܐܲܟܼܘܵܬܼܵܟܼ. ܒܗܵܘ̇ ܙܲܒܼܢܵܐ ܝܲܬܝܼܪ ܡ̣ܢ ܟܠܗܘܿܢ ܚܲܫܹ̈ܐ: ܫܹܐܕܼܵܐ ܗܵܘ̇ ܕܪܵܡܘܼܬܼܵܐ: ܟܲܕܼ ܐܲܤܝܼܪ ܘܲܪܡܸܐ ܬܚܹܝܬܼ ܪܸ̈ܓܼܠܹܝܗ̇ ܕܢܲܦܫܵܐ ܬܸܫܟܚܝܼܘܗܝ. ܒܗܵܕܹܐ ܡܵܘܗܲܒܼܬܼܵܐ ܐܲܝܟܼ ܕܐܵܡ̇ܪܝܼܢ ܡܸܫܬܿܘܸܐ ܒܲܪܢܵܫܵܐ ܠܚܘܼܒܵܐ ܕܐܲܠܵܗܵܐ: ܘܲܠܡܘܼܟܵܟܼܵܐ ܡܫܲܠܡܵܢܵܐ. ܗ̤ܝ ܗܵܕܹܐ ܡܵܘܗܲܒܼܬܼܵܐ ܩܲܕܼܡܵܝܑܬܼ: ܒܫܸܠܝܵܐ ܡܸܬܿܛܲܥܡܵܐ. ܘܐܲܝܠܹܝܢ ܕܥܲܡ ܦܘܼܠܚܵܢܵܐ ܘܲܢܛܘܼܪܬܵܐ ܠܲܓܼܡܵܪ ܠܓܼܵܘ ܡ̣ܢ ܫܸܠܝܵܐ ܗܘ̤ܵܘ: ܠܵܐ ܡܲܨܝܵܐ ܕܠܵܐ ܝܵܕܼܥܝܼܢ ܠܵܗ̇ ܠܗܵܕܹܐ. ܡܵܐ ܕܹܝܢ ܕܲܢܦܲܩ̣ ܒܲܪܢܵܫܵܐ ܠܒܲܪ ܡ̣ܢ ܫܸܠܝܵܐ ܘܐܸܚܲܕܼ ܫܲܪܝܼܘܼܬܼܵܐ: ܩܵܦ̇ܤܵܐ ܡܸܢܹܗ. ܘܟܲܕܼ ܬܘܼܒܼ ܥܲܠ̣ ܘܝܼܨܸܦ̣ ܕܢܲܦܫܹܗ ܘܐܲܩܸܦ̣ ܚܝܼܨܵܐܝܼܬܼ ܒܦܘܼܠܚܵܢܵܐ ܕܲܥܝܵܕܼܵܐ: ܬܘܼܒܼ ܦܸܫܛܲܬ̤ ܗ̤ܝ ܠܵܗ̇: ܘܚܵܘܝܲܬ̤ ܚܲܝܠܵܗ̇ ܠܢܲܦܫܵܐ. ܡܵܐ ܗܵܟܹܝܠ ܕܐܸܬܼܓܡܲܪ ܐ̄ܢܵܫ ܡܫܲܡܠܝܵܐܝܼܬܼ: ܠܓܼܵܘ ܘܲܠܒܲܪ ܢܲܩܝܼܦ ܠܹܗ ܚܲܝܠܵܐ ܗܵܢܵܐ: ܘܠܵܐ ܫܵܠܹ̇ܐ ܚܕܼܵܐ ܫܵܥܵܐ pb. 491 ܡ̣ܢ ܬܸܢ̈ܚܵܬܼܵܐ ܘܕܸܡ̈ܥܹܐ ܥܲܡ ܫܲܪܟܵܐ: ܐܸܢܗܘ̤ ܕܠܵܐ ܡܲܫܘܲܪ ܛܲܟܼܤܵܐ ܙܗܝܼܪܵܐ ܕܦܘܼܠܚܵܢܹܗ. ܐܵܦ ܗܵܫܵܐ: ܐܝܼܬܼ ܐ̄ܢܵܫܵܐ ܕܐܸܬܿܘܝܼܘ ܠܗܵܕܹܐ ܒܲܡܢܵܬܼܵܐ. ܘܲܠܗܵܘ̇ ܕܫܘܼܡܠܵܝܵܐ: ܡ̣ܢ ܗܵܕܹܐ ܡܢܵܬܼܵܢܵܝܬܼܵܐ ܕܲܠܘܵܬܼܗܘܿܢ ܡܸܫܬܿܘܕܥܝܼܢ ܕܝܼ̈ܠܵܝܵܬܼܵܗ̇. ܡܸܛܠ ܕܟܲܕܼ ܡܢܹܩܝܼܬܼܵܐ ܕܚܲܡܪܵܐ ܛܥܸܡ̣ ܐ̄ܢܵܫ ܡ̣ܢ ܓܪܵܒܼܵܐ ܪܲܒܵܐ: ܝܵܕܲܥ̇ ܠܟܼܠܹܗ ܡܸܟܹܝܠ: ܕܐܲܝܟܲܢ ܐܝܼܬܼܵܘܗܝ ܐܵܦ ܟܲܕܼ ܐ̄ܚܪ̈ܵܢܹܐ ܢܸܫܬܿܘܿܢ: ܐܸܢ ܒܲܡܢܵܬܼܵܐ ܘܐܸܢ ܟ̱ܠܹܗ ܒܟܼܠܹܗ. ܒܫܘܼܡܠܵܝܵܐ ܕܹܝܢ: ܠܵܐ ܥܓܲܠ ܡܸܫܬܿܟܲܚ ܐ̄ܢܵܫ ܕܲܩܢܸܐ: ܐܸܠܵܐ ܐܸܢ ܠܡܲܚܤܸܢ. ܡܸܛܠ ܕܗܵܢܵܐ ܚܲܝܠܵܐ: ܡܵܘܗܲܒܼܬܼܵܐ ܗ̣̄ܝ ܕܲܢܛܘܼܪܲܬܼ ܫܸܠܝܵܐ. ܘܡܸܛܠ ܕܠܲܝܬܿ ܕܐܲܚܝܼܕܼ ܒܪܼܵܪܲܢ ܗܵܢܵܐ ܡܩܲܛܥܵܐ ܫܸܠܝܵܐ ܓܡܝܼܪܵܐ ܘܲܢܛܘܼܪܬܵܐ ܡܫܲܡܠܲܝܬܼܵܐ: ܐܵܦ ܡ̣ܢ ܡܵܘܗ̈ܒܼܵܬܹܐ ܚܲܤܝܼܪܝܼܢ. ܡ̇ܢ ܕܹܝܢ ܕܩܸܢܸܐ ܠܗܵܠܹܝܢ ܝܲܕܼܥܹ̈ܐ ܒܪܘܼܫܡܵܐ ܕܲܕܼܝܘܿܬܼܵܐ: ܘܒܲܥ̇ܒܼܵܕܼܵܐ ܠܵܐ ܫܟܼܚܝܼܢ ܠܵܘܬܹܗ ܒܢܸܤܝܵܢܵܐ: ܕܵܡܹ̇ܐ ܠܐ̄ܢܵܫ ܕܲܛܥܝܼܢ ܥܲܠ ܕܪܵܥܹܗ ܟܸܢܵܪܵܐ ܕܲܡܨܲܒܲܬܼ ܘܲܡܬܲܩܲܬ ܒܡܸܢܹ̈ܐ ܚܝܼ̈ܨܵܬܼܵܐ: ܘܠܵܐ ܝܵܕܼ̈ܥܵܬ ܘܲܡܕܲܪ̈ܫܵܢ ܨܸܒܼ̈ܥܵܬܹܗ ܠܡܸܩܲܫ ܒܗܹܝܢ: ܘܲܠܡܸܬܲܠ ܦܘܼܪ̈ܫܵܢܹܐ ܕܢܸܥ̈ܡܵܬܼܵܐ ܠܒܼܘܼܤܵܡܵܐ ܕܢܲܦܫܹܗ. ܐܸܠܵܐ ܟܸܢܵܪܵܐ ܒܲܠܚܘܿܕܼ ܩܢܸܐ: ܘܠܵܘ ܐܵܦ ܐܘܼܡܵܢܘܼܬܹܗ. ܘܲܤܢܝܼܩ ܥܲܠ ܐ̄ܚܪ̈ܵܢܹܐ: ܕܢܸܙܡܪܘܼܢ ܒܹܗ ܩܕܼܵܡܵܘܗܝ ܘܲܢܒܲܤܡܘܼܢܝܵܗܝ. ܠܵܘ ܐܸܡܲܬܼܝ ܕܬܸܥܬܲܪ ܒܝܼܕܲܥܬܼܵܐ ܕܤܲܓܝܼ̈ܐܵܬܼܵܐ ܬܸܚܕܸܐ: ܐܸܠܵܐ ܟܲܕܼ ܗܵܘ̇ ܡܵܐ ܕܝܵܕܲܥ ܐܲܢ̄ܬܿ ܒܲܥ̇ܒܼܵܕܼܵܐ ܬܸܚܕܸܐ ܕܲܫܟܼܝܼ ܠܘܵܬܼܵܟܼ. ܩܲܕܼܡܵܝܬܼܵܐ ܕܹܝܢ ܒܸܠܥܵܕܼ ܗܵܝ̇ ܕܬܲܪܬܹܝܢ: ܟܲܕܼ ܒܐܝܼܕܼܵܐ ܒܐܝܼܕܼܵܐ ܠܒܸܤܬܪܵܗ̇ ܥܵܛ̇ܦܵܐ: ܘܐܵܦ ܠܪܵܡܘܼܬܼܵܐ ܢܵܩ̇ܦܵܐ ܡܸܛܠ ܒܸܛܠܵܢܵܐ. ܟܲܕܼ ܕܹܝܢ ܒܲܬܼܪܲܝܢܝܼܬܼܵܐ ܬܸܬܼܚܲܦܲܛ: ܡ̣ܢ ܟܠ ܦܪܘܿܣ ܘܐܵܦ ܒܗܵܝ̇ ܬܸܬܼܢܗܲܪ ܕܠܵܐ ܝܘܼܠܦܵܢܵܐ. ܥܲܝܢܵܗ̇ ܕܝܼܕܲܥܬܼܵܐ: ܢܸܤܝܵܢܵܐ. ܘܬܲܪܒܿܝܼܬܼܵܗ̇: ܦܘܼܠܚܵܢܵܐ ܐܲܡܝܼܢܵܐ. pb. 492 ܐܵܬ̤ܵܐ ܢܲܗܝܼܪܬܵܐ ܕܫܲܦܝܘܼܬܼܵܐ ܕܢܲܦܫܵܟܼ ܗܵܕܹܐ ܬܸܗܘܸܐ ܠܵܟܼ: ܐܸܡܲܬܼܝ ܕܟܲܕܼ ܬܸܬܼܒܲܩܸܐ ܒܲܩܢܘܿܡܵܟܼ: ܥܲܠ ܟܠܗܘܿܢ ܒܢܲܝ̈ܢܵܫܵܐ ܪ̈ܲܚܡܹܐ ܡܠܸܐ ܐܲܢ̄ܬܿ. ܘܲܒܼܚܵܘܤܵܢܵܐ ܕܲܥܠܲܝܗܘܿܢ ܡܸܬܿܛܲܪܲܦ ܠܸܒܵܟܼ ܘܝܵܩܹ̇ܕܼ ܐܲܝܟܼ ܕܲܒܼܢܘܼܪܵܐ: ܕܠܵܐ ܦܘܼܪܫܵܢܵܐ ܕܦܲܪ̈ܨܘܿܦܹܐ. ܟܲܕܼܸ ܒܝܲܕܼ ܗܵܠܹܝܢ ܐܲܡܝܼܢܵܐܝܼܬܼ: ܗܵܝ̇ ܨܘܼܪܬܵܐ ܕܐܲܒܼܵܐ ܕܒܲܫܡܲܝܵܐ ܡܸܬܼܚܲܙܝܵܐ ܒܵܟܼ. ܡܫܘܼܚܬܼܵܐ ܕܕܼܘܼܒܵܪ̈ܲܝܟ ܠܵܐ ܗ̄ܘ̣ܵܐ ܡ̣ܢ ܦܘܼܪ̈ܫܵܢܹܐ ܕܥܲܡܠܲܝ̈ܟ ܐܸܠܵܐ: ܡ̣ܢ ܫܘܼܚ̈ܠܵܦܹܐ ܕܲܡܩܲܒܸܠ ܡ̇ܕܥܵܟܼ ܬܸܤܬܲܟܲܠ. ܡܥܵܕܼ ܗ̄ܘ̣ ܦܲܓܼܪܵܐ ܠܡܸܤܚܵܐ ܒܕܸܡ̈ܥܹܐ: ܐܸܡܲܬܼܝ ܕܗܵܘܢܵܐ ܢܚܘܼܪ ܒܪ̈ܘܼܚܵܢܵܝܵܬܼܵܐ: ܟܲܕܼ ܐܲܝܟܼ ܕܡ̣ܢ ܢܲܚ̈ܠܹܐ ܫܵܦ̈ܥܵܢ ܡ̣ܢ ܥܲܝ̈ܢܹܐ: ܘܲܡܨܲܒ̈ܥܵܢ ܠܦܲܟܹ̈ܐ: ܕܠܵܐ ܥܸܨܝܵܢܵܐ: ܘܲܕܼܠܵܐ ܒܨܸܒܼܝܵܢܵܐ. ܐܸܢܵܐ ܡ̇ܢ ܝܵܕܲܥ̇ ܐ̄ܢܵܐ ܐ̄ܢܵܫ: ܕܐܵܦ ܒܓܼܵܘ ܫܸܢܬܹܗ ܐܸܬܿܬܿܚܸܕܼ ܒܬܲܗܪܵܐ ܕܒܲܐܠܵܗܵܐ ܒܬܹܐܘܿܪܝܼܵܐ ܕܡܸܕܸܡ: ܡ̣ܢ ܡܠܘܿܐܵܐ ܕܩܸܪܝܵܢܵܐ ܕܡ̣ܢ ܪܲܡܫܵܐ: ܘܟܲܕܼ ܬܲܡܝܼܗܵܐ ܢܲܦܫܹܗ ܒܗܸܪܓܵܐ ܕܬܹܐܘܿܪܝܼܵܐ ܗܵܝ̇. ܐܲܝܟܼ ܗܵܘ̇ ܕܡܲܪܓܸܫ ܗ̄ܘ̣ܵܐ: ܕܥܸܕܵܢܵܐ ܤܲܓܝܼܐܵܐ ܐܝܼܬܼ ܗ̄ܘ̣ܵܐ ܠܹܗ ܕܗܵܪܹܓܼ ܒܙܵܘ̈ܥܹܐ ܕܫܸܢܬܹܗ: ܘܡܸܬܼܒܲܩܸܐ ܒܬܸܡܗܵܐ ܕܲܚܙܵܬܼܵܐ ܗܵܝ̇. ܐܝܼܬܼܵܘܗܝ ܗ̄ܘ̣ܵܐ ܓܹܝܪ ܥܘܼܡܩܹܗ ܕܠܸܠܝܵܐ: ܘܡ̣ܢ ܫܸܠܝܵܐ ܢܵܕܼ ܡ̣ܢ ܫܸܢܬܹܗ: ܟܲܕܼ ܕܼܡܥܵܘ̈ܗܝ ܪ̈ܵܕܼܝܵܢ: ܐܲܝܟܼ ܡܲܝ̈ܵܐ. ܘܢܵܚ̈ܬܵܢ: ܥܕܲܡܵܐ ܠܚܲܕܝܹܗ. ܘܦܘܼܡܹܗ ܡܠܸܐ ܗ̄ܘ̣ܵܐ ܬܸܫܒܿܘܿܚܬܼܵܐ: ܘܠܸܒܹܗ ܗܵܪܹܓܼ ܗ̄ܘ̣ܵܐ ܒܬܹܐܘܿܪܝܼܵܐ ܢܲܓܝܼܪܵܐܝܼܬܼ: ܒܗܲܢܝܼܐܘܼܬܼܵܐ ܕܠܵܐ ܡܸܤܬܲܒܼܥܵܐ. ܘܡ̣ܢ ܤܘܿܓܼܵܐܐ ܕܕܸܡ̈ܥܹܐ ܕܲܕܼܠܵܐ ܡܫܘܼܚܬܼܵܐ ܕܡܸܬܼܐܲܫ̈ܕܵܢ ܗ̄ܘܲܝ̈ ܡ̣ܢ ܒܵܒܼ̈ܬܹܗ: ܘܡ̣ܢ ܒܘܼܠܗܵܝܵܐ ܕܢܲܦܫܹܗ ܕܐܸܬܼܪܫܸܠܘ ܗ̄ܘ̣ܵܘ ܟܠܗܘܿܢ ܗܲܕܵܡܲܝ̈ ܓܘܼܫܡܹܗ: ܘܠܸܒܹܗ ܕܪܵܦܬܼܵܐ ܒܓܼܵܘܹܗ ܗܲܢܝܼܐܘܼܬܼܵܐ ܡܸܕܸܡ: ܐܵܦܠܵܐ ܐܲܝܟܼ ܥܝܵܕܹܗ ܕܲܢܫܲܡܠܸܐ pb. 493 ܬܸܫܡܸܫܬܼܵܐ ܕܠܸܠܝܵܐ ܐܸܬܼܡܨܝܼ ܗ̄ܘ̣ܵܐ. ܐܸܠܵܐ ܠܡܲܚܤܸܢ ܡܲܙܡܘܿܪܵܐ ܡܸܕܸܡ: ܠܘܲܥܕܹܗ ܕܨܲܦܪܵܐ. ܗܵܟܲܢ ܐܸܙܕܟܼܝܼ ܗ̄ܘ̣ܵܐ ܡ̣ܢ ܤܘܿܓܼܵܐܐ ܕܕܼܡ̈ܥܹܐ: ܕܓܼܵܐܲܚ ܗ̄ܘ̣ܵܐ ܡܲܒܿܘܼܥܵܐ ܕܥܲܝܢܵܘ̈ܗܝ ܠܒܲܪ ܡ̣ܢ ܨܸܒܼܝܵܢܹܗ: ܘܡ̣ܢ ܫܲܪܟܵܐ ܕܐ̄ܚܪ̈ܵܢܝܵܬܼܵܐ. ܢܸܬܼܚܲܦܲܛ ܐܵܦ ܚܢܲܢ: ܐܲܚܲܝ̈. ܘܡܵܐ ܕܨܵܒܹ̇ܝܢܲܢ ܕܢܸܕܼܡܲܟܼ: ܩܕܼܵܡ ܥܸܕܵܢܹ̈ܐ ܤܲܓܝܼ̈ܐܹܐ: ܒܬܸܫ̈ܒܿܚܬܼܵܐ ܘܒܲܙܡܝܼܪ̈ܵܬܼܵܐ ܘܲܒܼܩܸܪܝܵܢܵܐ ܕܲܟܼܬܼܵܒܹ̈ܐ ܩܲܕܝܼ̈ܫܹܐ ܢܸܗܪܘܿܓܼ: ܟܲܕܼ ܢܵܛܪܝܼܢܲܢ ܢܲܦܫܲܢ ܡ̣ܢ ܥܘܼ̈ܗܕܵܢܹܐ ܒܝܼ̈ܫܹܐ: ܘܡ̣ܢ ܟ̱ܠܹܗ ܗܸܪܓܵܐ ܤܲܢܝܵܐ. ܘܢܲܤܐܸܢ ܒܹܝܬܼ ܓܲܙܲܢ ܟܠܗܘܿܢ ܡܠܘܿܐܹ̈ܐ ܫܲܦܝܼܪܹ̈ܐ. ܘܬܸܫܩܠܲܢ ܫܸܢܬܼܵܐ: ܟܲܕܼ ܡܠܹܝܢܲܢ ܡ̣ܢ ܥܘܼܗܕܵܢܵܐ ܕܲܐܲܠܵܗܵܐ: ܘܲܢܦܫܲܢ ܕܪܵܬܼܚܵܐ ܒܤܘܼܘܵܚܵܐ ܤܲܓܝܼܐܵܐ ܕܲܠܛܵܒܼ̈ܬܼܵܐ: ܡܸܛܠ ܛܲܝܒܿܘܼܬܼܵܐ ܕܐܲܠܵܗܵܐ ܕܲܚܕܼܝܼܪܵܐ ܠܲܢ ܒܫܸܢܬܲܢ: ܘܡܲܫܦܥܵܐ ܥܠܲܝܢ ܡܵܘ̈ܗܒܼܵܬܼܵܗ̇ ܐܵܦ ܟܲܕܼ ܕܲܡܝܼܟܼܝܼܢܲܢ. ܟܲܕܼ ܒܵܚܪܵܐ ܠܲܢ: ܕܐܸܢ ܢܩܸܕܼ ܦܲܓܼܪܲܢ ܡ̣ܢ ܟܠ ܙܢ̈ܝܼܢ ܕܛܲܡܐܘܼܬܼܵܐ: ܘܲܕܼܟܹܝܢ ܘܵܙ̈ܥܹܐ ܕܠܸܒܲܢ ܡ̣ܢ ܤܲܢ̈ܝܵܬܼܵܐ. ܘܡܸܛܠܵܬܼܵܗ̇ ܠܵܐ ܢܸܫܟܿܚܘܼܢ ܩܵܪܒܿܝܼܢ ܚܕܼܵܪܲܝܢ ܒܢܲܝ̈ ܫܘܼܠܛܵܢܹܗ ܕܚܸܫܘܿܟܼܵܐ: ܡܸܛܠ ܚܲܪܒܵܐ ܘܲܫܢܵܢܵܐ ܕܛܲܝܒܿܘܼܬܼܵܐ ܕܲܟܼܪܝܼܟܼܝܼܢ ܠܲܢ. ܘܐܸܢ ܡܸܫܟܿܚܝܼܢ ܠܲܢ ܐܲܝܟܼ ܨܸܒܼܝܵܢܗܘܿܢ ܕܡܸܬܼܪܲܚܩܵܐ ܡܸܢܲܢ ܛܲܝܒܿܘܼܬܼܵܐ: ܟܲܕܼ ܓܵܥܨܵܐ ܡܸܢܲܢ ܘܕܼܵܚܩܵܐ ܠܢܲܦܫܲܢ ܡ̣ܢ ܨܹܐܕܹܝܗ̇ ܐܲܝܟܼ ܕܠܲܫ̈ܠܲܕܹܐ ܕܝܲܬܝܼܪ̈ܵܢ ܡ̣ܢ ܚܲܝܘܼܬܼܵܐ: ܗܵܝܕܹܝܢ ܡܸܬܼܩܲܪܒܼܝܼܢ ܠܘܵܬܲܢ: ܒܟܼܠܵܗ̇ ܒܝܼܫܘܼܬܼܗܘܿܢ. ܘܲܡܢܲܤܹܝܢ ܠܲܢ ܒܟܼܠܗܘܢ ܙܵܘ̈ܥܹܐ ܢܕܹܝ̈ܕܹܐ ܘܲܕܼܚܝܼ̈ܠܹܐ: ܐܲܝܟܼ ܪܸܓܿܬܼܵܐ ܕܨܸܒܼܝܵܢܗܘܿܢ ܤܲܢܝܵܐ. ܘܐܸܡܲܬܼܝ ܕܐܲܝܟܼ ܗܵܟܲܢܵܐ ܢܸܫܬܿܟܲܚ ܓܵܕܼܫܵܐ ܠܲܢ ܒܫܸܢܬܲܢ: ܢܸܤܬܿܟܲܠ ܡܸܚܕܼܵܐ ܘܢܸܬܼܥܲܗܲܕܼ ܘܢܲܪܓܸܫ: ܕܲܒܼܗܵܢܵܐ ܠܸܠܝܵܐ ܡܲܪܚܩܵܐ ܗ̄ܘ̣ܵܬܼ ܡܸܢܲܢ ܡܲܓܿܢܵܢܘܼܬܼܵܐ ܐܲܠܵܗܵܝܬܼܵܐ. ܘܐܲܝܟܲܢܵܐ ܠܵܐ ܒܲܠܥܘܼܢ ܫܹܐܕܹ̈ܐ؟ ܐܸܠܵܐ pb. 494 ܗܵܟܼܘܵܬܼ ܒܲܚܠܘܿܕܼ ܝܲܗ̣̄ܒܼ ܐܲܦܬܼܵܐ ܠܡܸܩܪܲܒܼ ܠܲܢ: ܗܵܘ̇ ܪܸܡܙܵܐ ܐܲܠܵܗܝܵܐ ܕܒܼܐܝܼܕܹܗ ܤܝܼܡܵܐ ܢܲܦܫܵܐ ܕܟܼܠܒܤܲܪ: ܐܲܝܟܼ ܕܢܥܝܼܪܲܢ ܘܢܸܚܙܸܐ ܢܲܦܫܲܢ. ܠܵܐ ܡܲܨܝܵܐ ܕܢܸܩܪܒܘܼܢ ܠܲܢ: ܐܸܡܲܬܼܝ ܕܗ̤ܝ ܩܲܪܝܼܒܼܵܐ.