Isaac of Nineveh: Discourse 74

ܤܵܟܼܵܐ ܕܟܼܠܹܗ ܪܲܗܛܵܐ: ܒܗܵܠܹܝܢ ܬܠܵܬܼ ܐܝܼܬܼܵܘܗܝ: ܬܝܵܒܘܼܬܼܵܐ: ܘܕܲܟܼܝܘܼܬܼܵܐ: ܘܲܓܼܡܝܼܪܘܼܬܼܵܐ. ܘܡܵܢܲܐ ܗ̣̄ܝ ܬܝܵܒܼܘܼܬܼܵܐ؟ ܦܵܘܫܵܐ ܕܡ̣ܢ ܩܲܕܼ̈ܡܵܝܵܬܼܵܐ: ܘܚܲܫܵܐ ܕܲܥܠܲܝܗܹܝܢ. ܘܡܵܢܲܐ ܗ̣̄ܝ ܕܲܟܼܝܘܼܬܼܵܐ ܒܤܵܟܼܵܐ؟ ܠܸܒܵܐ ܡܪܲܚܡܵܢܵܐ ܕܥܲܠ ܟܠ ܟܝܵܢ ܕܲܒܼܪܝܼܬܼܵܐ. ܘܡܵܢܲܐ ܗ̣̄ܝ ܓܡܝܼܪܘܼܬܼܵܐ؟ ܥܘܼܡܩܵܐ ܕܡܲܟܿܝܼܟܼܘܼܬܼܵܐ: ܕܐܝܼܬܼܵܘܗܝ: ܫܒܼܝܼܩܘܼܬܼܵܐ ܕܟܼܠܡܸܕܸܡ ܕܡܸܬܼܚܙܸܐ ܘܲܕܼܠܵܐ ܡܸܬܼܚܙܸܐ. ܕܡܸܬܼܚܙܸܐ: ܟܠ ܕܲܒܼܪܸ̈ܓܼܫܹܐ. ܕܠܵܐ ܡܸܬܼܚܙܸܐ: ܟܠ ܪܸܢܝܵܐ ܕܲܥܠܲܝܗܹܝܢ܀ ܗ̤ܘ ܟܲܕܼ ܗ̤ܘ ܤܵܒܼܵܐ: ܐܸܫܬܲܐܲܠ ܒܲܙܒܲܢ ܐ̄ܚܪܹܝܢ: ܕܡܵܢܲܐ ܗ̣̄ܝ ܬܝܵܒܼܘܼܬܼܵܐ؟ ܘܐܸܡ݂ܲܪ: ܠܸܒܵܐ ܬܒܼܝܼܪܵܐ. ܘܡܵܢܲܐ ܗ̣̄ܝ ܡܲܟܿܝܼܟܼܘܼܬܼܵܐ؟ ܘܐܸܡ݂ܲܪ: ܥܦܝܼܦܘܼܬܼ ܡܝܼܬܼܘܼܬܼܵܐ ܨܸܒܼܝܵܢܵܝܵܬܼܵܐ ܕܡ̣ܢ ܟܠ. ܘܡܵܢܵܐ ܐܝܼܬܼܵܘܗܝ ܠܸܒܵܐ ܡܪܲܚܡܵܢܵܐ؟ ܘܐܸܡ݂ܲܪ: ܝܼܩܕܵܢܵܐ ܕܠܸܒܵܐ ܕܥܲܠ ܟ̱ܠܵܗ̇ ܒܪܝܼܬܼܵܐ: ܕܥܲܠ ܒܲܪܢܵܫܵܐ: ܘܦܵܪܲܚܬܼܵܐ ܘܚܲܝ̈ܘܵܬܼܵܐ: ܘܥܲܠ ܫܹܐܕܹ̈ܐ: ܘܟܼܠ ܕܐܝܼܬܼ. ܕܡ̣ܢ ܥܘܼܗܕܵܢܗܹܝܢ ܘܡ̣ܢ ܚܙܵܬܼܗܹܝܢ: ܫܵܚ̈ܠܵܢ ܥܲܝܢܵܘ̈ܗܝ ܕܸܡ̈ܥܹܐ ܒܥܘܼܙܵܐ ܕܪ̈ܲܚܡܹܐ ܕܐܵܠܹ̇ܨ ܠܠܸܒܵܐ ܕܡ̣ܢ ܚܵܘܤܵܢܵܐ ܤܲܓܝܼܐܵܐ. ܠܸܒܵܐ ܙܵܥܲܪ ܠܹܗ: ܘܠܵܐ ܡܨܸܐ ܛܵܥܹ̇ܢ ܠܡܸܫܡܲܥ ܐܵܘ ܠܡܸܬܼܒܲܩܵܝܘܼ: ܒܢܸܡܼܝܵܢܵܐ ܐܵܘ ܚܲܫܵܐ ܙܥܘܿܪܵܐ ܕܡܸܕܸܡ ܕܒܲܒܼܪܝܼܬܼܵܐ. ܘܡܸܛܠܗܵܕܹܐ ܘܐܵܦ ܥܲܠ ܠܵܐ ܡܠܝܼ̈ܠܹܐ ܘܥܲܠ ܒܥܸܠܕܒܼܵܒܼܵܘ̈ܗܝ ܕܲܫܪܵܪܵܐ: ܘܐܵܦ ܥܲܠ ܢܵܟܼܘܿܝܵܘ̈ܗܝ: ܒܟܼܠܥܸܕܵܢ ܨܠܘܿܬܼܵܐ ܕܲܒܼܕܸܡ̈ܥܹܐ pb. 508 ܡܩܲܪܸܒܼ ܠܡܸܬܼܢܛܵܪܘܼ ܘܲܠܡܸܬܼܚܲܤܵܢܘܼ. ܥܕܲܡܵܐ ܬܘܼܒܼ ܕܥܲܠ ܟܝܵܢܹ̈ܐ ܪ̈ܵܚܘܿܫܹܐ: ܡ̣ܢ ܡܪܚܡܵܢܘܼܬܹܗ ܤܲܓܝܼܐܬܼܵܐ ܕܐܲܫܝܼܕܼܵܐ ܒܠܸܒܹܗ ܕܠܵܐ ܟܲܝܠܵܐ ܒܗܵܝ̇ ܕܡܘܼܬܼܵܐ ܕܐܲܠܵܗܵܐ܀ ܘܡܵܢܲܐ ܗ̣̄ܝ ܨܠܘܿܬܼܵܐ؟ ܘܐܸܡ݂ܲܪ: ܤܦܝܼܩܘܼܬܼܵܐ ܕܬܲܪܥܝܼܬܼܵܐ ܕܡ̣ܢ ܟܠ ܕܲܬܼܢܵܢ: ܘܠܸܒܵܐ ܕܐܲܗܦܸܟܼ ܚܝܵܪܹܗ ܓܡܝܼܪܵܐܝܼܬܼ ܠܘܵܬܼ ܤܘܼܘܵܚܵܐ ܕܗܵܘ̇ ܤܲܒܼܪܵܐ ܕܲܥܬܼܝܼܕܼ. ܕܲܦܪܝܼܫ ܕܹܝܢ ܡ̣ܢ ܗܵܢܵܐ: ܚܸܠܛܵܐ ܗ̄ܘ̣ ܙܵܪܲܥ̇ ܒܲܟܼܪܵܒܹܗ ܐܲܝܢܵܐ ܕܙܵܪܲܥ̇ ܘܐܲܝܟܼ ܗܵܝ̇ ܕܢܸܕܼܒܲܪ ܦܲܕܵܢܵܐ ܒܬܼܵܘܪܵܐ ܘܒܲܚܡܵܪܵܐ ܐܲܟܼܚ̄ܕܼܵܐ܀ ܐܲܝܟܲܢ ܡܸܬܼܩܲܢܝܵܐ ܡܲܟܿܝܼܟܼܘܼܬܼܵܐ؟ ܘܐܸܡ݂ܲܪ: ܒܥܘܼܗܕܵܢܵܐ ܐܲܡܝܼܪܵܐ ܕܫܵܪ̈ܥܵܬܼܵܐ: ܘܤܘܼܟܵܝܵܐ ܩܲܪܝܼܒܼܵܐ ܕܡܵܘܬܵܐ: ܘܢܲܚ̈ܬܹܐ ܫܝܼ̈ܛܹܐ: ܘܗܵܝ̇ ܕܲܒܼܟܼܠܙܒܲܢ ܢܸܓܼܒܸܐ ܕܘܼܟܿܬܼܵܐ ܐ̄ܚܪܵܝܬܼܵܐ: ܘܲܒܼܟܼܠܡܸܕܸܡ ܠܲܥ̇ܒܼܵܕܼܵܐ ܨܥܝܼܪܵܐ ܘܡܵܟܵܐ ܢܸܪܗܲܛ: ܘܠܵܐ ܥܸܨܝܵܢܘܼܬܼܵܐ: ܘܫܸܬܼܩܵܐ ܐܲܡܝܼܪܵܐ: ܘܲܕܼܠܵܐ ܢܸܪܚܲܡ ܠܡܸܦܓܲܥ ܒܲܟܼܢܘܼ̈ܫܝܹܐ: ܘܲܕܼܢܸܗܘܸܐ ܠܵܐ ܝܑܼܕܼܝܼܥܵܐ ܘܠܵܐ ܚܫܝܼܒܼܵܐ: ܘܐܵܚܘܿܕܼܵܐ ܠܚܲܕܼ ܡ̣ܢ ܤܘܼܥܪ̈ܵܢܝܼܢ ܦܪܝܼܫܵܐܝܼܬܼ ܠܲܓܼܡܵܪ: ܘܲܕܼܢܸܤܢܸܐ ܥܸܢܝܵܢܵܐ ܕܦܲܪ̈ܨܘܿܦܹܐ: ܘܗܵܝ̇ ܕܠܵܐ ܢܸܪܚܲܡ ܝܘܼܬܼܪ̈ܵܢܹܐ. ܟܠܗܹܝܢ: ܒܵܬܲܪ ܗܵܕܹܐ. ܘܲܗܘ̤ܵܐ ܡܥܲܠܲܝ ܪܸܥܝܵܢܹܗ ܡ̣ܢ ܥܸܕܼܠܵܝܵܐ ܘܪܸܫܝܵܢܵܐ ܕܲܠܐ̄ܢܵܫ: ܘܡ̣ܢ ܛܲܢܵܢܘܼܬܼܵܐ. ܘܲܕܼܠܵܐ ܬܸܗܘܸܐ ܐܝܼܕܹܗ ܥܲܠ ܟܠ: ܘܐܝܼܕܼܵܐ ܕܟܼܠ ܒܹܗ. ܐܸܠܵܐ ܝܑܼܚܝܼܕܼܵܝ ܒܕܼܝܼܠܹܗ: ܘܲܡܫܵܘܚܲܕܼ. ܘܠܵܐ ܢܸܫܩܘܿܠ ܨܸܦܬܼܵܐ ܕܐ̄ܢܵܫ ܒܬܹܒܹܝܠ: ܤܛܲܪ ܡ̣ܢ ܕܲܩܢܘܿܡܹܗ. ܚܵܒܼܘܿܫܵܐܝܼܬܼ ܕܹܝܢ: ܐܲܟܼܤܢܵܝܘܼܬܼܵܐ ܘܡܸܤܟܹܢܘܼܬܼܵܐ ܘܲܡܫܵܘܚܕܼܘܼܬܼܵܐ ܗܵܝ̇ ܕܲܒܼܕܼܘܼܝܵܪܵܐ. ܗܵܠܹܝܢ ܝܵܠ̈ܕܵܢ ܡܲܟܿܝܼܟܼܘܼܬܼܵܐ: ܘܲܡܕܲܟ̈ܝܵܢ ܠܠܸܒܵܐ. ܐܲܝܠܹܝܢ ܕܲܡܛ̣ܵܘ ܠܲܓܼܡܝܼܪܘܼܬܼܵܐ: ܗܵܢܵܘ ܫܘܼܘܕܵܥܗܘܿܢ: ܕܐܸܢ ܟܠܝܘܿܡ ܥܤܲܪ ܙܲܒܼ̈ܢܝܼܢ ܠܝܲܩܕܵܢܵܐ ܡܸܫܬܲܠܡܝܼܢ ܚܠܵܦ ܪܸܚܡܬܼܵܐ ܕܲܒܼܢܲܝ̈ܢܵܫܵܐ: ܠܵܐ ܡܸܤܬܲܒܼܥܝܼܢ ܡ̣ܢ ܗܵܕܹܐ. pb. 509 ܐܲܝܟܼ ܕܐܵܦ ܡܘܼܫܹܐ ܐܸܡ݂ܲܪ ܠܐܲܠܵܗܵܐ: ܕܐܸܢ ܠܵܐ ܡܚܲܤܸܐ ܐܲܢ̄ܬܿ ܠܲܒܼ̈ܢܲܝ ܝܑܼܤܪܵܝܹܠ: ܥܛܝܼܢܝ ܡ̣ܢ ܤܸܦܪܵܟܼ ܕܲܟܼܬܲܒܼܬܿ. ܘܐܲܝܟܼ ܕܐܵܦ ܛܘܼܒܼܵܢܵܐ ܦܵܘܠܘܿܣ ܐܸܡ݂ܲܪ: ܕܨܵܒܹ̇ܐ ܐ̄ܢܵܐ ܕܲܬܼܪ̈ܲܝܗܘܿܢ ܥܵܠܡܹ̈ܐ ܥܲܡ ܫܒܼܝܼ̈ܚܵܬܼܵܐ ܘܲܚܢܝܼ̈ܓܼܵܬܼܵܐ ܕܲܒܼܗܘܿܢ: ܠܵܐ ܡܸܫܟܲܚܝܼܢ ܕܢܸܦܪܫܘܼܢܵܢܝ ܡ̣ܢ ܚܘܼܒܹܗ ܕܲܡܫܝܼܚܵܐ. ܨܵܒܹ̇ܐ ܐ̄ܢܵܐ ܕܐܸܗܘܸܐ ܐܸܬܼܪܲܚܲܩ ܡ̣ܢ ܡܫܝܼܚܵܐ: ܘܲܒܼ̈ܢܲܝ ܝܑܼܤܪܵܝܹܠ ܢܸܬܼܩܲܪܒܼܘܼܢ ܠܗܲܝܡܵܢܘܼܬܼܵܐ ܕܚܲܝܹ̈ܐ. ܐܸܢ ܟܲܕܼ ܗܵܟܲܢ ܬܸܗܘܸܐ: ܡܲܨܝܵܐ ܕܗܸܢܘܿܢ ܒܗܵܕܹܐ ܢܗܲܝܡܢܘܼܢ ܒܲܡܫܝܼܚܵܐ ܘܢܹܐܙܠܘܼܢ ܠܚܲܝܹ̈ܐ ܕܲܠܥܵܠܲܡ: ܘܠܵܐ ܢܸܬܼܢܲܟܼܪܘܿܢ ܡ̣ܢ ܐܲܠܵܗܵܐ ܚܲܝܵܐ: ܘܐܲܝܟܼ ܗܵܝ̇ ܕܚܵܕܹܐ ܐ̄ܢܵܐ ܒܐܘܼܪ̈ܠܨܵܢܹܐ ܕܥܲܠ ܐܲܦܲܝ̈ܟܿܘܿܢ ܥܲܡܡܹ̈ܐ. ܘܐܲܝܟܼ ܫܲܪܟܵܐ ܕܲܫܠܝܼܚܹ̈ܐ: ܕܲܚܠܵܦ ܪܸܚܡܬܼܵܐ ܕܚܲܝܹ̈ܐ ܕܲܒܼܢܲܝ̈ܢܵܫܵܐ: ܡܵܘܬܵܐ ܕܟܼܠ ܓܢܸܣ ܩܲܒܸܠ̣ܘ. ܘܤܵܟܼܵܐ ܕܟܼܠܗܹܝܢ: ܐܲܠܵܗܵܐ ܡܵܪܹܐ ܟܠ: ܕܡܸܛܠ ܪܸܚܡܬܼܵܐ ܕܲܒܼܪܝܼܬܹܗ: ܠܲܒܼܪܹܗ ܐܲܫܠܸܡ̣ ܠܡܵܘܬܵܐ ܕܲܨܠܝܼܒܼܵܐ. ܗܵܟܲܢܵܐ ܠܲܡ ܓܹܝܪ ܐܲܚܸܒܼ ܐܲܠܵܗܵܐ ܠܥܵܠܡܵܐ: ܐܲܝܟܲܢܵܐ ܕܠܲܒܼܪܹܗ ܝܑܼܚܝܼܕܼܵܝܵܐ ܢܸܬܸܠ ܚܠܵܦܵܘܗܝ. ܠܵܘ ܕܠܵܐ ܡܨܸܐ ܗ̄ܘ̣ܵܐ ܕܲܒܼܡܸܕܸܡ ܐ̄ܚܪܹܢܵܐ ܢܸܦܪܘܿܩ ܠܲܢ: ܐܸܠܵܐ ܕܚܘܼܒܹܗ ܝܲܬܝܼܪܵܐ ܒܗܵܕܹܐ ܝܲܬܝܼܪܵܐܝܼܬܼ ܡܸܫܟܚܵܐ ܗ̄ܘ̣ܵܬܼ ܕܲܢܫܵܘܕܥܲܢ: ܕܲܒܼܡܵܘܬܵܐ ܕܲܒܼܪܹܗ ܝܑܼܚܝܼܕܼܵܝܵܐ ܢܩܲܪܒܲܢ ܠܘܵܬܹܗ. ܘܐܸܠܘܼ ܐܝܼܬܼ ܗ̄ܘ̣ܵܐ ܠܹܗ ܡܸܕܸܡ ܕܝܲܩܝܼܪ ܗ̄ܘ̣ܵܐ ܡܸܢܹܗ: ܝܵܗܹ̇ܒܼ ܠܲܢ: ܡܸܛܠ ܗܵܝ̇ ܕܒܹܗ ܢܸܫܬܿܟܲܚ ܠܹܗ ܓܸܢܤܲܢ. ܘܲܕܼܡܸܛܠ ܚܘܼܒܵܐ ܤܲܓܝܼܐܵܐ: ܐܵܦܠܵܐ ܕܢܹܐܠܘܿܨ ܠܚܹܐܪܘܼܬܲܢ ܒܲܩܛܝܼܪܵܐ ܐܸܨܛܒܼܝܼ: ܟܲܕܼ ܛܵܒܼ ܡܸܫܟܲܚ ܗ̄ܘ̣ܵܐ. ܐܸܠܵܐ ܕܲܒܼܚܘܼܒܵܐ ܕܬܲܪܥܝܼܬܲܢ ܢܸܬܼܩܲܪܲܒܼ ܠܘܵܬܹܗ. ܘܗ̤ܘ ܡܵܪܲܢ: ܐܸܫܬܡܲܥ ܠܐܲܒܼܘܼܗܝ ܡܸܛܠ ܚܘܼܒܹܗ ܕܲܠܘܵܬܲܢ: ܠܲܡܩܲܒܵܠܘܼ ܥܠܵܘܗܝ ܨܥܪܵܐ ܘܚܲܫܵܐ ܒܚܲܕܼܘܼܬܼܵܐ: ܐܲܝܟܲܢܵܐ ܕܐܸܡ݂ܲܪ ܟܬܼܵܒܼܵܐ: ܕܲܚܠܵܦ ܚܲܕܼܘܼܬܼܵܐ pb. 510 ܕܐܝܼܬܼ ܗ̄ܘ̣ܵܐ ܠܹܗ: ܤܲܝܒܲܪ ܨܠܝܼܒܼܵܐ: ܘܥܲܠ ܒܸܤܬܿܬܼܵܐ ܐܲܡܤܲܪ. ܡܸܛܠܗܵܢܵܐ: ܐܸܡ݂ܲܪ ܡܵܪܲܢ ܒܗܵܘ̇ ܠܸܠܝܵܐ ܕܡܸܫܬܠܸܡ ܗ̄ܘ̣ܵܐ: ܗܵܢܵܘ ܦܲܓܼܪܝ ܕܥܲܠ ܐܲܦܲܝ̈ ܦܘܼܪܩܵܢܹܗ ܕܥܵܠܡܵܐ ܡܸܬܼܝܼܗܸܒܼ ܠܚܲܝܹ̈ܐ. ܘܗܵܢܵܘ ܕܹܡܝ ܕܲܚܠܵܦ ܟܠ ܡܸܬܼܐܫܸܕܼ ܠܫܘܼܒܼܩܵܢܵܐ ܕܲܚܛܵܗܹ̈ܐ. ܘܥܲܠ ܐܲܦܲܝ̈ܗܘܿܢ ܠܲܡ ܐܸܢܵܐ ܡܩܲܕܸܫ ܐ̄ܢܵܐ ܢܲܦܫܝ. ܘܗܵܟܲܢܵܐ ܐܵܦ ܟܠܗܘܿܢ ܩܲܕܝܼ̈ܫܹܐ: ܠܗܵܢܵܐ ܫܘܼܡܠܵܝܵܐ ܡܵܛܹ̇ܝܢ ܡܵܐ ܕܐܸܬܼܓܡܲܪܘ: ܕܒܲܐܠܵܗܵܐ ܢܸܬܿܕܲܡܘܿܢ ܒܲܫܦܝܼܥܘܼܬܼ ܚܘܼܒܵܐ ܘܪ̈ܲܚܡܹܐ ܕܲܠܘܵܬܼ ܒܢܲܝ̈ܢܵܫܵܐ. ܘܗܵܕܹܐ ܐܵܬ̤ܵܐ ܒܵܥܹ̇ܝܢ ܠܢܲܦܫܗܘܿܢ ܠܕܼܘܼܡܝܵܐ ܕܒܲܐܠܵܗܵܐ: ܕܲܒܼܚܘܼܒܵܐ ܕܩܲܪ̈ܝܼܒܲܝܗܘܿܢ ܢܸܬܼܓܲܡܪܘܼܢ. ܗܵܟܲܢܵܐ ܐܵܦ ܐܲܒܼ̈ܗܵܬܼܵܐ ܝܑܼܚܝܼ̈ܕܵܝܹܐ ܥܵܒܼ̇ܕܝܼܢ ܗ̄ܘ̣ܵܘ: ܕܲܠܗܵܝ̇ ܕܡܘܼܬܼܵܐ ܡܲܠܝܲܬܼ ܚܲܝܹ̈ܐ ܕܲܡܫܝܼܚܵܐ ܡܵܪܵܐ ܕܟܼܠ: ܒܲܩܢܘܿܡܗܘܿܢ ܢܸܫܩܠܘܼܢ ܐܲܡܝܼܢܵܐܝܼܬܼ. ܛܘܼܒܼܵܢܵܐ ܠܲܡ ܐܲܢܛܘܿܢܝܼܣ: ܠܵܐ ܡܸܡܬܼܘܿܡ ܕܵܢ ܒܢܲܦܫܹܗ ܠܡܸܥܒܲܕܼ ܥ̇ܒܵܕܼܵܐ ܕܠܹܗ ܦܲܩܲܚ: ܐܲܝܟܼ ܗܵܘ̇ ܕܲܠܩܲܪܝܼܒܹܗ ܡܵܘܬܲܪ. ܟܲܕܼ ܐܝܼܬܼ ܗ̄ܘ̣ܵܐ ܠܹܗ ܗܵܢܵܐ ܤܲܒܼܪܵܐ: ܕܝܘܼܬܼܪܵܢܵܐ ܕܩܲܪܝܼܒܹܗ: ܦܘܼܠܚܵܢܵܐ ܗܵܘܹ̇ܐ ܠܹܗ ܡܝܲܬܿܪܵܐ. ܘܐܲܝܟܼ ܕܐܲܡܝܼܪ ܡܸܛܠ ܛܘܼܒܼܵܢܵܐ ܐܵܓܼܵܬܘܿܢ: ܕܨܵܒܹ̇ܐ ܗ̄ܘܹ̇ܝܬܼ ܕܐܸܫܟܲܚ ܐܲܪܝܵܢܵܐ: ܘܐܸܬܸܠ ܠܹܗ ܦܲܓܼܪܝ: ܘܐܸܫܩܘܿܠ ܕܝܼܠܹܗ. ܚ̣ܙܲܝܬܿ ܚܘܼܒܵܐ ܡܫܲܡܠܝܵܐ؟ ܘܲܥܕܲܡܵܐ ܬܘܼܒܼ ܕܲܒܼܗܵܠܹܝܢ ܕܲܠܒܲܪ ܡܸܢܹܗ: ܠܵܐ ܡܤܲܝܒܲܪ ܗ̄ܘ̣ܵܐ ܕܠܵܐ ܡܢܝܼܚ ܠܩܲܪܝܼܒܹܗ: ܝܲܬܿܝܼܪ ܡ̣ܢ ܕܝܼܠܹܗ. ܐܲܝܟܼ ܗܵܝ̇ ܕܐܝܼܬܼ ܗ̄ܘ̣ܵܐ ܠܹܗ ܙܡܹܠܝܵܐ: ܘܲܚܙܵܗ̇ ܠܲܨܒܼܘܼܬܼܵܐ ܐܲܚܵܐ: ܘܪܲܚܡ̣ܵܗ̇. ܘܠܵܐ ܠܲܡ ܐܲܪܦܹܝܗ ܕܢܸܦܘܿܩ ܡ̣ܢ ܩܸܠܵܝܬܹܗ: ܥܕܲܡܵܐ ܕܫܲܩ̣ܠܵܗ̇. ܘܐܲܝܟܼ ܗܵܝ̇ ܬܘܼܒܼ pb. 511 ܕܐܸܢ ܐܝܼܬܼ ܗ̄ܘ̣ܵܐ ܠܹܗ ܨܒܼܘܼܬܼܵܐ: ܘܚܵܙܹ̇ܐ ܗ̄ܘ̣ܵܐ ܠܐ̄ܢܵܫ ܕܲܤܢܝܼܩ ܗ̄ܘ̣ܵܐ ܥܠܹܝܗ̇: ܬܘܼܒܼ ܠܵܐ ܡܸܫܬܲܠܲܛ ܗ̄ܘ̣ܵܐ ܥܠܹܝܗ̇. ܘܡܵܢ ܐܵܡܲ݁ܪ ܐ̄ܢܵܐ ܗܵܠܹܝܢ؟ ܕܤܲܓܝܼ̈ܐܹܐ ܡܸܢܗܘܿܢ: ܐܵܦ ܠܚܲܝ̈ܘܵܬܼܵܐ ܘܲܠܤܲܝܦܵܐ ܘܢܘܼܪܵܐ ܝܲܗ̣̄ܒܼܘ ܦܲܓܼܪ̈ܲܝܗܘܿܢ ܡܸܛܠ ܩܲܪ̈ܝܼܒܲܝܗܘܿܢ. ܠܵܐ ܡܲܨܝܵܐ ܕܢܹܐܬܸܐ ܐ̄ܢܵܫ ܠܛܲܟܼܤܵܐ ܗܵܢܵܐ ܕܚܘܼܒܵܐ: ܐܸܠܵܐ ܐܸܢ ܐܲܝܢܵܐ ܕܡܸܕܸܡ ܐܲܪܓܸܫ̣ ܟܲܤܝܵܐܝܼܬܼ ܒܤܲܒܼܪܹܗ. ܘܠܵܐ ܡܲܨܝܵܐ ܕܢܸܩܢܘܿܢ ܠܚܘܼܒܵܐ ܕܲܒܼܢܲܝ̈ܢܵܫܵܐ: ܐܲܝܠܹܝܢ ܕܡܲܚܒܼܝܼܢ ܠܹܗ ܠܥܵܠܡܵܐ ܗܵܢܵܐ. ܡܵܐ ܕܲܩܢ̣ܵܐ ܐ̄ܢܵܫ ܠܚܘܼܒܵܐ: ܠܹܗ ܠܐܲܠܵܗܵܐ ܠܲܒܼܫܹܗ ܥܲܡܹܗ. ܐܵܢܲܢܩܹܐ ܕܐܲܝܢܵܐ ܕܠܲܐܠܵܗܵܐ ܠܲܒܼܫܹܗ: ܠܵܐ ܡܸܬܿܛܦܝܼܣ ܕܢܸܩܢܸܐ ܥܲܡܹܗ ܡܸܕܸܡ: ܐܸܠܵܐ ܐܵܦ ܠܦܲܓܼܪܹܗ ܫܵܠܲܚ. ܘܐܸܢ ܠܥܵܠܡܵܐ ܠܒܼܝܼܫ: ܐܵܘ ܠܚܲܝܵܘ̈ܗܝ ܗܵܠܹܝܢ ܒܪܸܚܡܲܬܼܗܘܿܢ: ܕܢܸܠܒܲܫ ܠܐܲܠܵܗܵܐ ܠܵܐ ܫܵܒܼܩ̇ܝܼܢ ܠܹܗ ܗܵܠܹܝܢ. ܗ̤ܘ ܓܹܝܪ ܐܲܤܗܸܕܼ: ܕܐܲܝܢܵܐ ܠܲܡ ܕܠܵܐ ܫܵܒܹ̇ܩ ܘܤܵܢܹ̇ܐ ܟܠܡܸܕܸܡ ܘܐܵܦ ܠܢܲܦܫܹܗ: ܕܢܸܗܘܸܐ ܠܝܼ ܬܲܠܡܝܼܕܼܵܐ ܠܵܐ ܡܸܫܟܲܚ. ܘܠܵܘ ܒܲܠܚܘܿܕܼ ܕܢܸܢܒܿܘܿܩ: ܐܸܠܵܐ ܘܢܸܤܢܸܐ ܐܸܢܘܿܢ. ܘܐܸܢ ܬܲܠܡܝܼܕܼܵܐ ܠܵܐ ܡܸܫܟܲܚ ܕܢܸܗܘܸܐ: ܐܲܝܟܲܢ ܗܵܝ̇ ܕܢܸܥܡܲܪ ܒܹܗ؟ ܡܫܲܐܠܵܢܵܐ. ܡܸܛܠܡܵܢܵܐ ܤܲܒܼܪܵܐ ܗܵܟܲܢ ܗܲܢܝܼ ܦܘܼܠܚܵܢܹܗ: ܘܩܲܠܝܼܠܝܼܢ ܥܲܡܠܵܘ̈ܗܝ: ܘܲܕܼܠܝܼܠ ܥ̇ܒܼܵܕܹܗ ܠܢܲܦܫܵܐ؟ ܤܵܒܼܵܐ. ܡܸܛܠ ܗܵܝ̇ ܕܡܸܬܼܝܲܐܒܼܵܢܘܼܬܼܵܐ ܟܝܵܢܵܝܬܼܵܐ ܡܸܬܿܬܿܥܝܼܪܵܐ ܒܵܗ̇ ܒܢܲܦܫܵܐ: ܘܡܲܫܩܸܐ ܠܗܘܿܢ ܟܵܤܵܐ ܗܵܢܵܐ ܘܡܲܪܘܸܐ ܠܗܘܿܢ. ܘܡ̣ܢ ܗܵܝ̇ ܫܵܥܬܼܵܐ: ܬܘܼܒܼ ܠܵܐ ܡܲܪܓܫܝܼܢ ܒܠܹܐܘܬܼܵܐ: ܘܗܵܘܹ̇ܝܢ ܠܵܐ ܪ̈ܵܓܼܘܿܫܹܐ ܒܐܘܼ̈ܠܨܵܢܹܐ. ܘܲܒܼܟܼܠܹܗ ܪܲܗܛܵܐ ܕܡܲܪܕܝܼܬܼܗܘܿܢ ܗܵܟܲܢ ܡܸܤܬܲܒܼܪܵܐ ܠܗܘܿܢ: ܐܲܝܟܼ ܡܲܢ ܕܒܼܵܐܐܲܪ ܪܵܕܹܝܢ: ܕܠܵܐ ܕܘܼܪ̈ܟܵܬܼܵܐ ܐ̄ܢܵܫܵܝ̈ܬܼܵܐ. ܟܲܕܼ ܠܵܐ ܡܸܬܼܚܲܙܝܵܐ pb. 512 ܠܗܘܿܢ ܠܲܓܼܡܵܪ ܥܲܤܩܘܼܬܼܵܐ ܕܐܘܼܪܚܵܐ: ܘܐܵܦܠܵܐ ܕܐܝܼܬܼ ܩܕܼܵܡܲܝܗܘܿܢ ܢܲܚ̈ܠܹܐ ܘܪ̈ܵܡܵܬܼܵܐ. ܐܸܠܵܐ ܐܝܼܬܼܵܘܗܝ ܠܗܘܿܢ ܥܲܪܡܵܐ ܠܫܲܦܝܵܐ: ܘܐܲܬܼܪܵܐ ܥܲܤܩܵܐ ܠܲܦܩܲܥܬܼܵܐ. ܒܗܵܝ̇ ܕܟܼܠܫܵܥ: ܠܟܸܢܦܵܐ ܕܐܲܒܼܘܼܗܘܿܢ ܚܵܝ̇ܪܝܼܢ. ܠܟܼܠܗܹܝܢ ܗܵܠܹܝܢ ܕܪ̈ܲܚܝܼܩܵܢ ܘܠܵܐ ܡܸܬܲܚܲܙ̈ܝܵܢ: ܘܐܲܝܟܼ ܕܒܲܩܢܘܿܡܗܹܝܢ ܚܲܬܿܝܼܬܼܵܐ ܥܵܒܼ̇ܕܵܐ ܠܗܘܿܢ: ܕܢܸܬܼܒܲܩܘܿܢ ܒܗܹܝܢ ܦܸܠܐܬܼܵܢܵܐܝܼܬܼ: ܒܥܲܝܢܵܐ ܟܤܝܼܬܼܵܐ ܕܗܲܝܡܵܢܘܼܬܼܵܐ. ܡܸܛܠ ܗܵܝ̇ ܕܟܼܠܗܹܝܢ ܡܢ̈ܵܘܵܬܼܵܐ ܕܢܲܦܫܵܐ ܚܲܡ̣ ܠܗܹܝܢ ܐܲܝܟܼ ܕܲܒܼܢܘܼܪܵܐ: ܒܤܘܼܘܵܚܵܐ ܕܐܲܝܠܹܝܢ ܕܪ̈ܲܚܝܼܩܵܢ ܐܲܝܟܼ ܡܲܢ ܕܩܲܪ̈ܝܼܒܼܵܢ ܠܗܘܿܢ: ܠܬܲܡܵܢ ܡܸܟܹܝܠ ܡܬܼܝܼܚ ܟ̱ܠܹܗ ܛܵܘܚܵܐ ܕܚܘܼܫܵܒܲܝ̈ܗܘܿܢ: ܘܕܸܐܡܲܬܼܝ ܢܸܡܛܘܿܢ ܡܤܲܪܗܒܼܝܼܢ: ܘܐܸܡܲܬܼܝ ܕܩܵܪܒܼܝܼܢ ܠܟܼܠ ܚܕܼܵܐ ܚܕܼܵܐ ܡ̣ܢ ܡܝܲܬܿܪ̈ܵܬܼܵܐ. ܠܡܸܦܠܲܚ ܐܸܢܹܝܢ: ܠܵܐ ܗ̄ܘ̣ܵܐ ܡܢܵܬܼܵܢܵܐܝܼܬܼ ܦܵܠ̇ܚܝܼܢ ܠܗܹܝܢ: ܐܸܠܵܐ ܚܵܒܼܘܼܫܵܐܝܼܬܼ ܟ̱ܠܵܗ̇ ܒܟܼܠܵܗ̇ ܒܲܚܕܼܵܐ ܙܒܲܢ. ܒܗܵܝ̇ ܕܡܲܪܕܝܼܬܼܗܘܿܢ: ܠܵܘ ܒܐܘܼܪܲܚ ܡܲܠܟܵܐ ܥܵܒܼ̇ܕܝܼܢ ܐܲܝܟܼ ܟܠܢܵܫ: ܐܸܠܵܐ ܫܒܼܝܼ̈ܠܹܐ ܦܵܤܘܿܩܹ̈ܐ ܓܵܒܹ̇ܝܢ ܠܗܘܿܢ: ܗܵܢܘܿܢ ܕܓܲܢ̄ܒܵܪܹ̈ܐ ܘܕܲܠܝܼ̈ܠܹܐ ܪܵܕܹܝܢ ܒܗܘܿܢ: ܐܲܝܠܹܝܢ ܕܲܕܼܠܝܼܠܵܐܝܼܬܼ ܡܡܲܢܥܝܼܢ ܠܗܘܿܢ ܠܐܵܘܵܢܵܐ. ܒܗܵܝ̇ ܕܗ̤ܘ ܤܲܒܼܪܵܐ ܗܵܐ ܫܵܓܲܪ ܠܗܘܿܢ ܐܲܝܟܼ ܕܲܒܼܢܘܼܪܵܐ: ܘܠܵܐ ܡܨܸܝܢ ܫܵܠܹ̇ܝܢ ܡ̣ܢ ܬܟܼܝܼܒܼܘܼܬܼ ܪܲܗܛܵܐ ܐܲܡܝܼܢܵܐ ܒܚܲܕܼܘܲܬܼܗܘܿܢ. ܘܓܼܵܕܼܫܵܐ ܠܘܵܬܼܗܘܿܢ ܐܲܝܟܼ ܗܵܝ̇ ܕܐܸܡ݂ܲܪ ܛܘܼܒܼܵܢܵܐ ܐܹܪܲܡܝܵܐ: ܕܐܸܡ̇ܪܹܬܼ ܠܲܡ ܕܬܼܘܼܒܼ ܠܵܐ ܐܸܢܿܕܲܟܼܪܝܼܘܗܝ: ܘܠܵܐ ܐܸܡܲܠܸܠ ܒܲܫܡܹܗ. ܘܲܗܘ̤ܵܐ ܒܠܹܒܿܝ ܐܲܝܟܼ ܢܘܼܪܵܐ ܕܝܵܩܕܵܐ: ܘܚܵܒܵܐ ܒܓܲܪ̈ܡܹܐ. ܗܵܟܲܢܵܐ ܗܵܘܹ̇ܐ ܒܠܸܒܿܗܘܿܢ ܥܘܼܗܕܵܢܵܐ ܕܲܐܵܠܵܗܵܐ ܠܐܲܝܠܹܝܢ ܕܲܒܼܤܲܒܼܪܵܐ ܕܡܘܼܠܕܵܢܵܐ ܪܵܕܹܝܢ. ܫܒܼܝܼ̈݁ܠܹܐ ܦܵܤܘܿܩܹ̈ܐ: ܠܲܡܝܲܬܿܪ̈ܵܬܼܵܐ ܚܵܒܼ̈ܘܿܫܵܬܼܵܐ ܩ̇ܪܹܝܬܼ pb. 513 ܐܸܢܹܝܢ: ܗܵܝ̇ ܕܲܠܝܬܿ ܒܗܹܝܢ ܟܪܘܼܟܼܝܵܐ ܘܛܵܘܪܵܐ ܕܲܫܒܼܝܼ̈ܠܹܐ ܤܲܓܝܼ̈ܐܹܐ ܕܕܼܘܼܒܵܪܵܐ ܕܡ̣ܢ ܗܵܘ̇ ܠܗܵܢܵܐ: ܘܐܲܬܼܪܵܐ ܘܙܲܒܼܢܵܐ ܘܦܘܼܠܗܵܕܼܵܐ. ܐܸܠܵܐ ܩܵܝ̇ܡܝܼܢ ܥܠܹܝܗ̇: ܘܡܸܚܕܼܵܐ ܡܫܲܡܠܹܝܢ ܠܵܗ̇. ܡܫܲܐܠܵܢܵܐ. ܡܵܢܵܐ ܐܝܼܬܹܝܗ̇ ܠܵܐ ܚܵܫܘܿܫܘܼܬܼܵܐ؟ ܘܦܲܢܝܼ ܤܵܒܼܵܐ: ܠܵܐ ܚܵܫܘܿܫܘܼܬܼܵܐ: ܠܵܘ ܠܵܐ ܡܲܪܓܫܲܬܼ ܒܝܼܫܹ̈ܐ ܐܝܼܬܹܝܗ̇: ܐܸܠܵܐ ܠܵܐ ܡܩܲܒܿܠܲܬ ܚܲܫܹ̈ܐ. ܕܡ̣ܢ ܡܝܲܬܿܪ̈ܵܬܼܵܐ ܤܒܼܝܼ̈ܤܵܬܼܵܐ ܕܲܩܢܹܝܢ ܕܓܲܠ̈ܝܵܢ ܘܲܕܼܟܲܤ̈ܝܵܢ: ܐܸܬܼܡܚܸܠܘ ܠܗܘܿܢ ܚܲܫܹ̈ܐ: ܘܠܵܐ ܕܠܝܼܠ ܠܗܘܿܢ ܠܡܸܤܥܵܐ ܥܲܠ ܢܲܦܫܵܐ. ܘܐܵܦ ܪܸܥܝܵܢܵܐ: ܠܵܐ ܤܢܝܼܩ ܟܠܫܵܥ ܠܲܡܚܵܪ ܒܗܘܿܢ. ܒܗܵܝ̇ ܕܲܒܼܟܼܠܙܒܲܢ: ܡܸܛܠ ܒܙܵܘܥܹܗ ܡ̣ܢ ܗܸܪܓܵܐ ܘܥܸܢܝܵܢܵܐ ܕܪܸ̈ܢܝܹܐ ܡܝܲܬܿܪܹ̈ܐ: ܕܲܒܼܤܘܼܟܵܠܵܐ ܡܸܬܿܬܿܙܝܼܥܝܼܢ ܒܗܵܘܢܵܐ. ܘܡܵܐ ܕܫܲܪܝܼ ܚܲܫܵܐ ܡܸܬܿܬܿܙܝܼܥ: ܡܸܢܫܹܠܝ ܐܸܬܼܚܛܸܦ ܪܸܥܝܵܢܵܐ ܡ̣ܢ ܨܹܐܕܵܘܗܝ ܒܝܲܕܼ ܤܘܼܟܵܠܵܐ ܡܸܕܸܡ ܕܐܲܕܝܼܩ ܒܗܵܘܢܵܐ: ܘܦܵܫ̣ ܠܹܗ ܗ̤ܘ ܚܲܫܵܐ ܟܲܕܼ ܒܲܛܝܼܠ. ܐܲܝܟܼ ܕܐܸܡ݂ܲܪ ܐܵܦ ܛܘܼܒܼܵܢܵܐ ܐܹܘܲܓܼܪܝܼܣ: ܕܗܵܘܢܵܐ ܕܲܒܼܛܲܝܒܿܘܼܬܹܗ ܕܐܲܠܵܗܵܐ ܥ̇ܒܼܵܕܼ̈ܐ ܕܲܡܝܲܬܿܪܘܼܬܼܵܐ ܓܵܡܲܪ. ܘܐܸܬܲܩܲܪܲܒܼ ܠܘܵܬܼ ܝܑܼܕܲܥܬܼܵܐ: ܩܠܝܼܠ ܡܲܪܓܸܫ ܡ̣ܢ ܡܢܵܬܼܵܐ ܤܟܲܠܬܼܵܐ ܕܢܲܦܫܵܐ. ܝܑܼܕܲܥܬܹܗ ܓܹܝܪ ܚܵܛ̇ܦܵܐ ܠܹܗ ܠܪܵܘܡܵܐ: ܘܲܡܢܲܟܼܪܝܵܐ ܠܹܗ ܠܟܼܠܗܹܝܢ ܕܲܒܼܥܵܠܡܵܐ. ܘܲܒܼܗܵܝ̇ ܕܗܸܢܘܿܢ ܡܸܛܠ ܕܼܟܼܝܘܼܬܼܗܘܿܢ ܐܸܬܼܩܲܛܲܢ ܠܹܗ ܗܵܘܢܗܘܿܢ: ܘܲܗܘ̤ܵܐ ܩܲܠܝܼܠ ܘܚܲܪܝܼܦ. ܡܸܛܠ ܥܲܢܘܵܝܘܼܬܼܵܐ ܬܘܼܒܼ ܐܸܬܼܡܪܸܩ ܠܹܗ ܗܵܘܢܵܐ: ܒܕܼܝܼܒܸܫ ܠܹܗ ܓܘܼܫܡܵܐ ܘܐܵܦ ܡ̣ܢ ܤܦܝܼܩܘܼܬܹܗ ܕܫܸܠܝܵܐ ܘܲܡܬܼܝܼܚܘܼܬܹܗ ܕܙܲܒܼܢܵܐ ܕܒܹܗ. ܘܡܸܛܠ ܗܵܢܵܐ ܩܲܝܼܠܵܐܝܼܬܼ ܫܵܟܹ̇ܢ ܥܲܠ ܡܸܕܸܡ ܡܸܕܸܡ: ܕܢܵܓܼܕܵܐ ܠܹܗ ܬܹܐܘܿܝܼܵܐ ܕܲܒܼܗܘܿܢ ܠܬܲܗܪܵܐ ܕܲܠܘܵܬܹܗ. ܘܥܲܠ ܗܵܕܹܐ pb. 514 ܘܐܵܦ ܤܒܼܝܼܤܝܼܢ ܒܬܹܐܘܿܪ̈ܝܼܣ: ܘܠܵܐ ܡܬܼܘܿܡ ܚܵܤܲܪ ܠܗܘܿܢ ܡܠܘܿܐܵܐ ܕܤܘܼ̈ܟܵܠܹܐ ܡ̣ܢ ܪܸܥܝܵܢܗܘܿܢ. ܤܛܲܪ ܡ̣ܢ ܗܵܝ̇: ܕܗ̤ܘ ܪܘܼܚܵܐ ܦܹܐܪ̈ܵܘܗܝ ܡܚܲܦܸܛ ܒܗܘܿܢ. ܘܐܵܦ ܗ̤ܘ ܥܝܵܕܼܵܐ ܒܢܲܓܝܼܪܘܼܬܹܗ ܕܙܲܒܼܢܵܐ: ܥܛ̣ܵܐ ܐܸܢܘܿܢ ܠܥܘܼܗ̈ܕܵܢܹܐ ܡ̣ܢ ܠܸܒܵܐ: ܗܵܢܘܿܢ ܕܗܸܢܘܿܢ ܐܸܢܘܿܢ ܡܙܝܼ̈ܥܵܢܹܐ ܕܚܲܫܹ̈ܐ ܒܢܲܦܫܵܐ: ܘܚܲܝܠܵܐ ܪܹܫܵܝܵܐ ܕܤܵܛܵܢܵܐ. ܐܸܡܲܬܼܝ ܕܹܝܢ ܕܢܲܦܫܵܐ ܠܵܐ ܐܸܬܼܚܲܒܲܪ ܥܲܡ ܚܲܫܹ̈ܐ ܒܝܲܕܼ ܗܸܪܓܵܗ̇ ܕܲܒܼܗܘܿܢ: ܒܲܕܼܡ̣ܢ ܪܸܢܝܵܐ ܐ̄ܚܪܹܢܵܐ ܕܒܼܝܼܪܵܐ ܬܟܼܝܼܒܼܵܐܝܼܬܼ: ܠܵܐ ܡܨܼܐ ܩܵܐܹ̇ܬܼ ܚܹܝܠ ܛܸܦܪ̈ܲܝܗܘܿܢ ܒܪܸ̈ܓܼܫܹܝܗ̇ ܪ̈ܘܼܚܵܢܵܝܹܐ. ܡܫܲܐܠܵܢܵܐ. ܡܵܢܵܐ ܐܸܢܹܝܢ ܕܝܼ̈ܠܵܝܵܬܼܵܗ̇ ܕܡܲܟܿܝܼܟܼܘܼܬܵܐ؟ ܤܵܒܼܵܐ ܐܵܡܲ݁ܪ: ܐܲܝܟܲܢܵܐ ܕܡܲܤܒܿܪܵܢܘܼܬܼܵܐ ܡܒܲܕܪܵܢܝܼܬܼܵܐ ܗ̣̄ܝ ܕܢܲܦܫܵܐ ܒܦܲܢܛܵܤܝܼܵܐ ܕܦܸܗܝܵܗ̇: ܡ̣ܢ ܚܹܐܦܵܐ ܕܲܡܕܲܥܲܪ ܠܵܗ̇ ܠܡܸܦܪܲܚ ܒܲܥܢܵܢܵܐ ܕܚܘܼܫܵܒܹ̈ܝܗ̇ ܠܡܸܚܕܲܪ ܒܟܼܠܵܗ̇ ܒܪܝܼܬܼܵܐ: ܗܵܟܲܢܵܐ ܡܲܟܝܼܟܼܘܼܬܼܵܐ ܡܟܲܢܫܵܢܝܼܬܼܵܐ ܗ̣̄ܝ ܕܝܵܬܼܵܗ̇ ܒܫܲܠܝܘܼܬܼܵܐ ܕܚܘܼ̈ܫܵܒܹܐ: ܘܲܦܩܝܼܤܘܼܬܼܵܐ ܕܢܲܦܫܵܐ ܠܓܼܵܘ ܡܸܢܵܗ̇ܘ ܘܐܲܟܼܙܢܵܐ ܕܢܲܦܫܵܐ ܠܵܐ ܝܑܼܕܼܝܼܥܵܐ: ܘܠܵܐ ܠܥܲܝܢܵܐ ܕܒܸܤܪܵܐ ܡܸܬܼܚܲܙܝܵܐ: ܗܵܟܲܢܵܐ ܡܲܟܿܝܼܟܼܵܐ ܠܵܐ ܝܑܼܕܼܝܼܥ ܒܹܝܬܼ ܒܢܲܝ̈ܢܵܫܵܐ. ܘܐܲܝܟܼ ܢܲܦܫܵܐ ܒܓܼܵܘ ܦܲܓܼܪܵܐ: ܡܤܲܬܲܪ ܡ̣ܢ ܚܙܵܬܼܵܐ ܘܲܚܠܝܼܛܘܼܬܼܵܐ ܕܥܲܡ ܟܠ ܒܲܪܢܵܫ. ܡܲܟܼܝܼܟܼܵܐ ܕܲܫܪܵܪܵܐ: ܠܵܘ ܒܲܠܚܘܿܕܼ ܠܵܐ ܒܵܥܹ̇ܐ ܕܢܸܼܬܼܚܙܸܐ ܘܢܸܬܼܝܕܲܥ ܒܹܝܬܼ ܒܢܲܝ̈ܢܵܫܵܐ: ܡܸܛܠ ܓܢܝܼܙܘܼܬܹܗ ܘܲܩܦܝܼܤܘܼܬܹܗ ܕܡ̣ܢ ܟܠ: ܐܸܠܵܐ ܗܵܢܵܘ ܨܸܒܼܝܵܢܹܗ ܐܸܢ ܡܲܨܝܵܐ: ܕܐܵܦ ܗ̤ܘ ܡ̣ܢ ܢܲܦܫܹܗ ܢܸܗܘܸܐ ܥܲܡܝܼܕܼ ܘܲܚܡܝܼܠ: ܘܲܡܓܼܵܘܲܝ ܠܓܼܵܘ ܡܸܢܹܗ: ܒܫܲܠܝܘܼܬܼܵܐ ܘܦܵܘܫܵܐ ܕܙܵܘܥܵܘ̈ܗܝ ܥܲܡ ܪܸ̈ܓܼܫܵܘܗܝ ܟ̱ܠܹܗ ܒܟܼܠܹܗ: ܘܐܲܝܟܼ ܡܸܕܸܡ ܕܠܲܝܬܵܘܗܝ ܒܲܒܼܪܝܼܬܼܵܐ ܘܠܵܐ ܐܸܬ݂ܼܵܐ ܠܲܗܘܵܝܵܐ: pb. 515 ܘܠܲܝܬܵܘܗܝ ܠܲܓܼܡܵܪ ܟܠ ܟ̱ܠܹܗ: ܕܐܵܦܠܵܐ ܗ̤ܘ ܠܢܲܦܫܹܗ ܨܵܒܹ̇ܐ ܕܢܸܬܼܝܼܕܲܥ ܘܢܸܬܼܪܓܸܫ. ܘܲܟܼܡܵܐ ܕܲܓܼܢܝܼܙ ܘܲܛܫܸܐ ܘܲܚܡܝܼܠ ܡ̣ܢ ܥܵܠܡܵܐ: ܟ̱ܠܹܗ ܠܘܵܬܼ ܡܵܪܹܗ ܐܝܼܬܼܵܘܗܝ. ܡܲܟܿܝܼܟܼܵܐ ܡܸܡܬܼܘܿܡ ܠܵܐ ܡܢܵܚ ܕܢܸܚܙܸܐ ܟܢܘܼ̈ܫܝܹܐ: ܘܪܵܘܒܵܐ ܕܐܵܟܼܠܘܿܣ: ܘܙܵܘܥܵܐ ܘܩܵܠܵܐ: ܘܠܵܐ ܫܘܼܪܬܵܚܵܐ ܘܨܸܒܼܬܼܵܐ ܘܦܘܼܪ̈ܦܵܥܹܐ ܕܡܸܢܗܘܿܢ ܐܲܫܝܼܕܼܘܼܬܼܵܐ: ܘܠܵܐ ܡܲܡܠܠܵܐ ܘܥܸܢܝܵܢܵܐ ܘܩܵܠܵܐ ܘܲܙܪܝܼܩܘܼܬܼܵܐ ܕܪܸ̈ܓܼܫܹܐ. ܐܸܠܵܐ ܝܲܬܝܼܪ ܡ̣ܢ ܟܠܡܸܕܸܡ ܓܒܸܐ ܥܠܵܘܗܝ: ܟܬܝܼܫܘܼܬܼܵܐ ܘܲܩܦܝܼܤܘܼܬܼܵܐ ܕܗ̤ܘ ܥܲܡ ܕܝܼܠܹܗ: ܟܲܕܼ ܫܠܸܐ ܘܲܚܡܝܼܠ ܘܲܡܫܵܘܚܲܕܼ: ܘܲܪܡܸܐ ܥܲܡ ܢܲܦܫܹܗ ܒܐܼܲܪܵܐ ܫܲܠܝܵܐ ܕܲܤܝܼܦܩ ܡ̣ܢ ܟܠ: ܘܲܫܠܸܐ ܡ̣ܢ ܟ̱ܠܵܗ̇ ܒܪܝܼܬܼܵܐ. ܘܲܒܼܟܼܠܡܸܕܸܡ: ܙܥܘܿܪܘܼܬܼܵܐ ܘܲܡܤܲܩܡܘܼܬܼܵܐ ܘܲܤܝܼܩܘܼܬܼܵܐ ܘܡܸܤܟܹܢܘܼܬܼܵܐ ܡܚܲܒܿܒܼܵܐ ܥܠܵܘܗܝ. ܘܠܵܐ ܠܤܘܼܥܪ̈ܵܢܹܐ ܤܲܓܝܼ̈ܐܹܐ ܘܲܥ̇ܒܼܵܕܼ̈ܐ ܤܒܼܝܼ̈ܤܹܐ: ܐܸܠܵܐ ܒܟܼܠܙܒܲܢ ܒܲܤܦܝܼܩܘܼܬܼܵܐ ܘܲܕܼܠܵܐ ܪܸܢܝܵܐ ܩܝܼܡ: ܒܠܵܐ ܒܘܼܠܒܵܠܵܐ ܕܒܲܐܝܠܹܝܢ ܕܲܬܼܢܵܢ: ܕܠܵܐ ܢܸܦܩܘܼܢ ܚܘܼܫܵܒܼܵܘ̈ܗܝ ܠܒܲܪ ܡܸܢܹܗ. ܒܕܲܡܦܵܣ: ܕܐܸܢܗ̤ܘ ܕܲܒܼܤܲܓܝܼ̈ܐܵܬܼܵܐ ܢܸܦܸܠ: ܕܢܸܗܘܸܐ ܕܠܵܐ ܒܘܼܠܒܵܠܵܐ ܕܙܵܘܥܵܘ̈ܗܝ: ܠܵܐ ܡܸܫܟܚܵܐ. ܕܤܘܼܥܪ̈ܵܢܹܐ ܤܲܓܝܼ̈ܐܹܐ: ܪܸ̈ܢܝܹܐ ܐܸܢܘܿܢ ܤܲܓܝܼ̈ܐܹܐ. ܘܪܸܢܝܹܐ ܤܲܓܝܼ̈ܐܹܐ: ܟܢܘܼܫܝܵܐ ܐܸܢܘܿܢ ܕܡܲܚܫ̈ܒܼܵܬܼܵܐ: ܘܚܘܼ̈ܫܵܒܹܐ ܡܦܲܬܼܟܹ̈ܐ. ܘܲܢܦܲܩ̣ ܠܹܗ ܡܸܟܹܝܠ ܡ̣ܢ ܗܵܝ̇ ܕܢܸܗܘܸܐ ܡܥܲܠܲܚ ܡ̣ܢ ܨܸܦܬܼܵܐ ܕܐܲܪ̈ܥܵܢܵܝܵܬܼܵܐ ܒܫܲܝܢܵܐ ܕܚܘܼܫܵܒܼܵܘ̈ܗܝ: ܠܒܲܪ ܡ̣ܢ ܐܵܠ̈ܨܵܬܼܵܐ ܙܥܘܿܪ̈ܝܵܬܼܵܐ ܕܗ̤ܝ ܗ̣̄ܝ ܐܵܢܲܢܩܹܐ: ܘܪܸܥܝܵܢܵܐ ܕܲܫܩܝܼܠ ܪܸܢܝܵܐ ܝܑܼܚܝܼܕܼܵܝܵܐ ܒܙܵܘܥܵܘ̈ܗܝ ܡܫܲܝܹ̈ܐ. ܘܡܸܟܹܝܠ ܘܐܵܦ ܕܢܸܗܘܸܐ ܚܤܝܼܟܼ ܦܘܼܡܹܗ ܡ̣ܢ ܡܲܡܠܠܵܐ: ܠܵܐ ܫܵܒܼ̈ܩܵܢ ܠܹܗ pb. 516 ܐܵܠ̈ܨܵܬܼܵܐ. ܘܐܵܬܹ̇ܐ: ܘܐܵܦ ܠܗܵܝ̇ ܕܢܸܤܬܲܓܲܦ ܘܲܢܤܲܓܸܦ. ܘܡܸܟܹܝܠ: ܐܸܬܼܦܬܲܚ ܠܹܗ ܬܲܪܥܵܐ ܠܚܲܫܹ̈ܐ: ܘܐܸܙܲܠܬ̤ ܠܵܗ̇ ܒܗܝܼܠܘܼܬܼܵܐ ܕܦܘܼܪܫܵܢܵܐ: ܥܸܪܩܲܬ̤ ܡܲܟܿܝܼܟܼܘܼܬܼܵܐ: ܐܸܤܬܿܟܲܪ ܬܲܪܥܵܐ ܕܲܫܠܵܡܵܐ. ܘܡܸܛܠ ܗܠܹܝܢ ܟܠܗܹܝܢ: ܐܲܡܝܼܢܵܐܝܼܬܼ ܡܵܕܹܝܢ ܡܢܲܛܲܪ ܢܲܦܫܹܗ ܡ̣ܢ ܤܲܓܝܼ̈ܐܵܬܼܵܐ: ܘܲܒܼܟܼܠܙܒܲܢ ܡܸܫܟܲܚ ܐܲܢ̄ܬܿ ܠܹܗ ܕܲܒܼܗܝܼܠ ܘܢܝܼܚ ܘܲܟܼܢܝܼܟܼ ܘܲܢܫܲܝܲܢ. ܒܡܲܟܿܝܼܟܼܵܐ ܡܸܡܬܼܘܿܡ: ܠܲܝܬܿ ܚܹܐܦܵܐ ܘܲܪܗܝܼܒܼܘܼܬܼܵܐ ܘܕܼܘܼܘܵܕܼܵܐ: ܘܠܵܐ ܙܵܘ̈ܥܹܐ ܚܲܡܝܼ̈ܡܹܐ ܘܩܲܠܝܼ̈ܠܹܐ. ܐܸܠܵܐ ܒܟܼܠܙܒܲܢ: ܒܢܵܘܚܵܐ ܫܪܸܐ. ܐܸܢ ܡܸܬܿܕܲܒܲܩ ܫܡܲܝܵܐ ܠܐܲܪܥܵܐ: ܡܲܟܝܼܟܼܵܐ ܠܵܐ ܡܸܬܿܬܿܙܝܼܥ. ܠܵܘ ܟܠ ܕܲܒܼܗܝܼܠ: ܡܲܟܿܝܼܟܼ. ܟܠ ܕܹܝܢ ܕܡܲܟܿܝܼܟܼ: ܐܵܦ ܒܗܝܼܠ. ܡܲܟܿܝܼܟܼܵܐ ܕܠܵܐ ܟܢܝܼܟܼ: ܠܲܝܬܿ. ܟܢܝܼܟܼܵܐ ܕܹܝܢ ܕܠܵܐ ܡܲܟܿܝܼܟܼ: ܤܲܓܝܼ̈ܐܹܐ ܡܸܫܟܲܚ ܐܲܢ̄ܬܿ. ܗܵܢܵܘ ܢܝܼܚܵܐ ܘܡܲܟܿܝܼܟܼܵܐ ܕܐܸܡ݂ܲܪ ܡܵܪܲܢ: ܕܝܼܠܲܦܘ ܡܹܢܝ ܕܢܝܼܚ ܐ̄ܢܵܐ ܘܡܲܟܝܼܟܼ ܐ̄ܢܵܐ ܒܠܹܒܿܝ: ܘܡܸܫܟܿܚܝܼܢ ܐܢ̄ܬܿܘܿܢ ܢܝܵܚܵܐ ܠܢܦܫܵܬܼ̈ܟܼܘܿܢ. ܡܲܟܿܝܼܟܼܵܐ: ܒܟܼܠܙܒܲܢ ܡܢܵܚ: ܒܲܕܼ ܠܲܝܬܿ ܡܸܕܸܡ ܕܲܡܙܝܼܥ ܠܪܸܥܝܵܢܹܗ. ܐܲܝܟܼ ܕܠܵܐ ܡܸܫܟܿܚܵܐ ܕܲܢܙܝܼܥ ܐ̄ܢܵܫ ܛܘܼܪܵܐ: ܗܵܟܲܢܵܐ ܠܵܐ ܡܸܬܿܬܿܙܝܼܥ ܪܸܥܝܵܢܹܗ ܕܡܲܟܼܝܼܟܼܵܐ: ܐܸܢ ܡܲܨܝܵܐ ܠܡܹܐܡܲܪ. ܘܲܟܼܒܲܪ ܐܵܦܠܵܐ ܫܟܼܝܼܪܵܐ ܕܗ̤ܝ ܗܵܕܹܐ ܐ̄ܢܵܫ ܢܹܐܡܲܪ: ܕܡܲܟܿܝܼܟܼܵܐ: ܐܵܦܠܵܐ ܡ̣ܢ ܗܵܢܵܐ ܥܵܠܡܵܐ ܐܝܼܬܼܵܘܗܝ. ܒܗܵܝ̇ ܕܠܵܐ ܒܥܵܩ̈ܵܬܼܵܐ ܡܵܘܦܸܐ ܘܡܸܬܿܬܿܙܝܼܥ: ܐܵܦܠܵܐ ܒܐܲܝܠܹܝܢ ܕܲܕܼܚܲܕܼܘܼܬܼܵܐ ܐܸܢܹܝܢ ܬܵܗܲܪ ܘܡܸܬܼܐܫܸܕܼ. ܐܸܠܵ ܟ̱ܠܵܗ̇ ܚܲܕܼܘܼܬܹܗ ܘܲܪܘܵܙܹܗ ܫܲܪܝܼܪܵܐ: ܒܗܵܠܹܝܢ ܕܡܵܪܹܗ ܐܝܼܬܼܵܘܝ. ܢܲܩܝܼ̈ܦܵܢ ܠܵܗ̇ ܕܹܝܢ ܠܡܲܟܿܝܼܟܼܘܼܬܼܵܐ: ܡܲܬܝܼܢܘܼܬܼܵܐ: ܟܢܝܼܫܘܼܬܼ ܝܵܬܼܵܐ: ܕܗ̤ܝ ܗ̣̄ܝ ܟܢܝܼܟܼܘܼܬܼܵܐ. ܩܵܠܵܐ ܟܒܼܝܼܫܵܐ: ܙܥܘܿܪܘܼܬܼ pb. 517 ܡܲܡܠܠܵܐ: ܫܝܼܛܘܼܬܼ ܝܵܬܼܵܐ: ܒܲܤܝܘܼܬܼ ܢܲܚ̈ܬܹܐ: ܡܡܲܫܚܘܼܬܼ ܗܠܲܟܼܬܼܵܐ: ܪܟܼܝܘܼܬܼ ܚܝܵܪܵܐ: ܫܦܝܼܥܘܼܬܼ ܪ̈ܲܚܡܹܐ: ܕܠܝܼܠܘܼܬܼ ܕܼܡ̈ܥܹܐ: ܢܲܦܫܵܐ ܡܫܵܘܚܲܕܬܵܐ: ܠܸܒܵܐ ܬܒܼܝܼܪܵܐ: ܠܵܐ ܡܸܬܿܬܿܙܝܼܥܵܢܘܼܬܼܵܐ ܕܚܸܡܬܼܵܐ: ܠܵܐ ܙܪܝܼܩܘܼܬܼܵܐ ܕܪܸ̈ܓܼܫܹܐ: ܙܥܘܿܪܘܼܬܼ ܨܸܒܼ̈ܘܵܬܼܵܐ: ܙܥܪܘܼܬܼ ܚܫܲܚܬܼܵܐ ܒܟܼܠ: ܛܵܥܘܿܢܘܼܬܼܵܐ: ܡܤܲܝܒܿܪܵܢܘܼܬܼܵܐ: ܠܵܐ ܕܲܚܘܼܠܬܼܵܢܘܼܬܼܵܐ: ܓܲܢ̄ܒܵܪܘܼܬܼܵܐ ܕܠܸܒܵܐ ܕܡܸܬܼܝܼܠܕܵܐ ܡ̣ܢ ܤܸܢܐܲܬܼ ܚܲܝܹ̈ܐ ܙܲܒܼ̈ܢܵܢܵܝܹܐ: ܚܘܼܡܤܵܢܵܐ ܕܲܒܼܢܸܤܝ̈ܘܿܢܹܐ: ܙܵܘ̈ܥܹܐ ܝܲܩܝܼܪܹ̈ܐ ܘܠܵܐ ܩܲܠܝܼ̈ܠܹܐ: ܕܥܝܼܟܼܘܼܬܼܵܐ ܕܚܘܼ̈ܫܵܒܹܐ: ܢܛܝܼܪܘܼܬܼ ܐ̄ܪܵܙܵܐ: ܢܲܟܼܦܘܼܬܼܵܐ: ܢܲܟܿܝܼܚܘܼܬܼܵܐ: ܟܘܼܚܵܕܼܵܐ. ܘܝܲܬܼܝܼܪ ܡ̣ܢ ܟܠܗܹܝܢ: ܗܵܝ̇ ܕܢܸܫܬܘܿܩ ܐܲܡܝܼܢܵܐܝܼܬܼ: ܓܵܘܤܵܐ ܐܲܡܝܼܢܵܐ ܕܲܒܼܠܵܐ ܝܑܼܕܲܥܬܼܵܐ. ܠܡܲܟܿܝܼܟܼܵܐ ܡܸܡܬܼܘܿܡ: ܠܵܐ ܡܸܤܬܲܩܒܿܠܵܐ ܠܹܗ ܐܵܢܲܢܩܹܐ: ܕܥܵܒܼܕܵܐ ܠܹܗ ܕܢܸܬܿܕܵܘܲܕܼ. ܡܲܟܿܝܼܟܼܵܐ ܕܹܝܢ: ܘܟܲܕܼ ܒܲܠܚܘܿܕܼܵܘܗ ܐܝܼܬܼܵܘܗܝ: ܘܐܵܦ ܡ̣ܢ ܢܲܦܫܹܗ ܡܸܬܼܟܲܚܲܕܼ. ܡܸܬܿܕܲܡܲܪ ܐ̄ܢܵܐ ܐܝܼܬܼܵܘܗܝ ܐ̄ܢܵܫ ܡܲܟܿܝܼܟܼܵܐ ܒܲܫܪܵܪܵܐ: ܘܡܲܡܪܲܚ ܕܐܵܦܸܢ ܠܲܡܨܲܠܵܝܘܼ ܠܐܲܠܵܗܵܐ ܟܲܕܼ ܢܸܩܪܘܿܒܼ ܠܲܨܠܘܿܬܼܵܐ: ܐܵܘ ܕܫܵܘܹ̇ܐ ܠܗܵܕܹܐ: ܐܵܘ ܠܡܸܫܐܲܠ ܡܸܢܹܗ ܡܸܕܸܡ: ܐܵܘ ܕܝܵܕܲܥ ܡܵܢܵܐ ܢܨܲܠܸܐ. ܐܸܠܵܐ ܒܲܠܚܘܿܕܼ ܟܲܕܼ ܫܠܸܐ ܒܟܼܠܗܘܿܢ ܙܵܘܥܵܘ̈ܗܝ: ܘܲܡܤܲܟܵܝܘܼ ܡܤܲܟܸܐ ܒܲܠܚܘܿܕܼ ܠܪ̈ܲܚܡܹܐ: ܕܡܵܢܵܐ ܟܲܝ ܨܸܒܼܝܵܢܵܐ ܢܸܦܘܿܩ ܡܸܛܠܵܬܹܗ ܡ̣ܢ ܩܕܼܵܡ ܗܵܝ̇ ܪܲܒܿܘܼܬܼܵܐ ܤܓܼܝܼܕܬܵܐ. ܟܲܕܼ ܡܲܟ̈ܦܵܢ ܐܲܦܵܘ̈ܗܝ ܠܐܲܪܥܵܐ: ܘܚܵܘܪܵܐ ܓܵܘܝܵܐ ܕܠܸܒܹܗ ܬܠܸܐ ܥܲܠ ܬܲܪܥܵܐ ܕܲܩܕܼܘܿܫ ܩܘܼ̈ܕܼܫܹܐ ܕܲܡܪܲܝܡܵܐ. ܗܵܘ̇ ܕܥܲܪܦܸܠܵܐ ܕܲܫܟܼܝܼܢܬܹܗ ܡܲܓܼܗܲܤ ܥܲܝ̈ܢܹܐ ܕܲܤܪ̈ܵܦܹܐ: ܘܙܝܼܘܹܗ ܡܲܪܗܸܒܼ ܠܠܸܓܼܝ̈ܘܿܢܹܐ ܕܤܸܕܼܪ̈ܲܝܗܘܿܢ. ܘܫܸܬܼܩܵܐ ܪܡܸܐ ܥܲܠ ܟܠܗܘܿܢ ܬܸܓܼܡܲܝ̈ܗܘܿܢ: ܘܲܠܕܼܢܚܵܐ ܕܐ̄ܪ̈ܵܙܹܐ ܕܡ̣ܢ ܓܵܘ ܠܵܐ pb. 518 ܡܸܬܼܚܲܙܝܵܢܘܼܬܼܵܐ ܡܤܲܟܹܝܢ: ܒܥܘܼܒܵܐ ܕܠܵܐ ܐܵܐܲܪ: ܒܙܵܘܥܵܐ ܕܠܵܐ ܩܵܠܵܐ: ܒܪܸ̈ܓܼܫܹܐ ܕܠܵܐ ܓܘܼܫܡܵܐ: ܒܡܲܪܓܫܵܢܘܼܬܼܵܐ ܕܠܵܐ ܕܡܘܼ: ܕܐܘܼܤܝܼܵܐ ܕܠܵܐ ܚܸܙܘܵܐ ܕܓܸܠܝܵܢܵܐ ܕܲܥܠܲܝܗܘܿܢ: ܟܲܕܼ ܡܚܝܼܠܵܐ ܚܲܝܠܬܼܵܢܘܼܬܼܵܐ ܕܙܵܘܥܲܝ̈ܗܘܿܢ ܠܲܡܤܲܝܒܵܪܘܼ ܩܕܼܵܡ ܓܲܠܠܹ̈ܐ ܕܐ̄ܪ̈ܵܙܵܘܗܝ. ܘܲܥܕܲܡܵܐ ܠܗܵܕܹܐ ܒܲܠܚܘܿܕܼ ܡܲܡܪܲܚ: ܕܐܲܝܟܼ ܨܸܒܼܝܵܢܵܟܼ ܡܵܪܝ܀ ܗܵܠܹܝܢ ܕܹܝܢ ܥܕܲܡܵܐ ܠܗܵܪܟܵܐ ܕܢܸܪܫܘܿܡ ܠܵܟܼ ܒܦܸܬܼܓܼܵܡܹ̈ܐ ܦܫܝܼ̈ܛܹܐ: ܕܲܕܼܠܵܐ ܥܘܼܩܵܒܼܵܐ ܕܲܒܼܗܹܝܢ ܢܲܕܼܪܸܟܼ ܪܸܥܝܵܢܵܐ ܡܸܛܠ ܓܲܠܝܘܼܬܼܵܐ ܕܲܒܼ̈ܢܵܬܼ ܩܵܠܹ̈ܐ ܒܛܝܼܠܘܼܬܼܵܐ ܗܘ̤ܵܬܼ ܠܝܼ: ܐܲܝܠܹܝܢ ܕܡ̣ܢ ܩܸܪܝܵܢܵܐ ܕܲܒܼܗܹܝܢ ܒܲܠܚܘܿܕܼ: ܛܵܥܹ̇ܐ ܗܵܘܢܵܐ ܠܕܼܘܼܒܵܪ̈ܵܘܗܝ ܘܲܠܗܘܼܦܵܟܼܵܘ̈ܗܝ ܕܥܵܠܡܵܐ ܗܵܢܵܐ ܘܲܠܚܲܝܵܘ̈ܗܝ ܒܸܤܪ̈ܵܢܵܝܹܐ: ܘܲܡܫܲܢܸܐ ܒܪܸܥܝܵܢܹܗ ܡ̣ܢ ܟܲܕܘܼ ܠܗܵܘ̇ ܥܵܠܡܹܗ ܫܲܪܝܼܪܵܐ ܘܲܡܝܲܬܿܪܵܐ. ܟܲܕܼ ܡܦܝܼܣ ܐ̄ܢܵܐ ܠܚܘܼܒܵܟܼ: ܕܡܵܐ ܕܦܵܓܲܥ ܐܲܢ̄ܬܿ ܒܗܵܠܹܝܢ ܐ̄ܪ̈ܵܙܹܐ: ܠܵܐ ܬܸܦܘܿܩ ܡܸܢܗܘܿܢ ܕܠܵܐ ܝܘܼܬܼܪܵܢ ܘܢܸܫܬܲܟܚܘܼܢ ܠܘܵܬܼܵܟܼ ܦܸܬܼܓܼܵܡܹ̈ܐ ܡܝܼ̈ܬܹܐ. ܕܠܵܐ ܢܸܗܘܘܿܢ ܠܵܟܼ ܐܲܝܟܼ ܗܵܢ̇ܘܿܢ ܕܐܸܙܕܲܡܲܢܘ ܠܫܵܪܘܼܬܼܵܐ ܗܵܝ̇ ܪܘܼܚܵܢܵܝܬܼܵܐ: ܘܐܸܫܬܐܸܠܘ ܡ̣ܢ ܕܲܠܡܸܥܲܠ ܠܵܗ̇. ܗܵܐ ܦܵܬܼܘܿܪܵܐ ܡܛܲܝܲܒܼ: ܘܐܵܕܼܫܹ̈ܐ ܪ̈ܘܼܚܵܢܹܐ ܤܕܼܝܼܪܝܼܢ ܥܠܵܘܗܝ: ܘܟܼܠ ܓܹܐ̈ܘܵܬܼܵܐ ܗܵܐ ܡܲܬܼܩ̈ܢܵܢ. ܘܲܡܤܲܟܸܐ ܠܲܢ ܚܲܬܼܢܵܐ: ܕܢܸܥܘܿܠ ܢܸܬܼܒܲܤܲܡ ܥܲܡܹܗ. ܠܵܐ ܢܸܫܬܿܐܸܠ ܡܸܟܹܝܠ: ܕܲܠܡܵܐ ܬܸܬܼܐܡܲܪ ܐܵܦ ܠܘܵܬܲܢ: ܒܲܪܬܼ ܩܵܠܵܐ ܗܵܝ̇ ܕܲܗܘ̤ܵܬܼ ܡܸܛܠܵܬܼܗܘܿܢ. ܡܵܢܵܐ ܗܵܟܹܝܠ؟ ܐܵܡܹܝܢ ܐܵܡܲ݁ܪ ܐ̄ܢܵܐ ܠܟܘܿܢ: ܕܚܲܕܼ ܡܸܢܗܘܿܢ ܕܲܙܡܝܼ̈ܢܹܐ ܗܵܢܘܿܢ: ܠܵܐ ܢܸܛܥܡܘܼܢ ܡ̣ܢ ܚܫܵܡܝܼܬܲܝ.