Isaac of Nineveh: Discourse 77

ܐܘܿ ܒܲܪܢܵܫܵܐ ܚܲܠܵܫܵܐ: ܨܵܒܹ̇ܐ ܐܲܢ̄ܬܿ ܠܡܸܫܟܵܚܘܼ ܚܲܝܹ̈ܐ؟ ܗܲܝܡܵܢܘܼܬܼܵܐ ܘܡܲܟܿܝܼܘܟܼܘܼܬܼܵܐ ܠܒܼܘܿܟܼ ܠܵܟܼ: ܕܲܒܼܗܹܝܢ ܬܸܫܟܲܚ ܪ̈ܲܚܡܹܐ ܘܥܘܼܕܼܪܵܢܵܐ ܘܡܲܡܠܸܐ ܒܠܸܒܵܐ ܡ̣ܢ ܠܘܵܬܼ ܐܲܠܵܗܵܐ: ܥܲܡ ܢܘܼܛܵܪܵܐ ܕܒܼܤܸܝܵܐ ܘܲܒܼܓܸܐܝܵܐ. ܨܵܒܹ̇ܐ ܐܲܢ̄ܬܿ ܕܹܝܢ ܠܗܹܝܢ ܠܗܵܠܹܝܢ ܠܡܸܩܢܵܐ ܕܐܝܼܬܲܝܗܹܝܢ ܡܥܝܼܢܵܐ ܕܚܲܝܹ̈ܐ؟ ܦܫܝܼܛܘܼܬܼܵܐ ܠܒܼܘܿܟܼ ܠܵܟܼ: ܡ̣ܢ ܫܘܼܪܵܝܵܐ. ܒܲܦܫܝܼܛܘܼܬܼܵܐ ܗܲܠܸܟܼ ܩܕܼܵܡ ܐܲܠܵܗܵܐ: ܘܠܵܘ ܒܝܼܕܲܥܬܼܵܐ. ܠܲܦܫܝܼܛܘܼܬܼܵܐ: ܗܲܝܡܵܢܘܼܬܼܵܐ ܢܲܩܝܼܦܵܐ. ܠܩܲܛܝܼܢܘܼܬܼܵܐ ܕܹܝܢ ܘܗܘܼܦܵܟܼ ܚܘܼ̈ܫܵܒܹܐ ܕܝܼܕܲܝܬܼܵܐ: ܡܲܤܒܿܪ̈ܵܢܘܵܬܼܵܐ. ܠܡܲܤܒܿܪ̈ܵܢܘܵܬܼܵܐ ܕܹܝܢ: ܪܲܚܝܼܩܘܼܬܼܵܐ ܕܡ̣ܢ ܐܲܠܵܗܵܐ. ܐܸܡܲܬܼܝ ܕܢܲܦܝܼܠ ܐܲܢ̄ܬܿ ܩܕܼܵܡ ܐܲܠܵܗܵܐ ܒܲܨܠܘܿܬܼܵܐ: ܗܵܟܲܢܵܐ ܗ̤ܘܝܼ ܒܚܘܼܫܵܒܼܵܟܼ: ܐܲܝܟܼ ܫܵܘܫܡܵܢܵܐ: ܘܐܲܝܟܼ ܪ̈ܲܚܫܵܐ ܕܐܲܪܥܵܐ: ܘܐܲܝܟܼ ܚܲܒܿܫܘܼܫܬܼܵܐ. ܘܩܘܼܪܝܵܐܝܼܬܼ ܠܲܓܼܠܸܓܼ: ܘܠܵܐ ܬܡܲܠܸܠ ܩܕܼܵܡܵܘܗܝ ܒܝܼܕܲܥܬܼܵܐ. ܒܬܲܪܥܝܼܬܼܵܐ ܫܒܲܪܬܼܵܐ ܐܸܬܼܩܲܪܲܒܼ ܠܘܵܬܼ ܐܲܠܵܗܵܐ ܘܗܲܠܸܟܼ ܩܕܼܵܡܵܘܗܝ: ܕܬܸܫܬܿܘܸܐ ܠܗܵܝ̇ ܒܛܝܼܠܘܼܬܼܵܐ ܐܲܒܼܵܗܵܝܬܼܵܐ: ܕܗܵܘ̇ܝܵܐ ܠܐܲܒܼܵܗܹ̈ܐ ܥܲܠ ܒܢܲܝ̈ܗܘܿܢ ܫܲܒܼܪܹ̈ܐ. ܐܲܡܝܼܪ: ܕܢܵܛܲܪ ܠܫܲܒܼܪܹ̈ܐ ܡܵܪܝܵܐ. pb. 525 ܩܵܪܹܒܼ ܫܲܒܼܪܵܐ ܨܹܝܕܼ ܚܸܘܝܵܐ: ܘܠܵܒܹ̇ܟܼ ܠܹܗ ܒܨܵܘܪܹܗ: ܘܠܵܐ ܡܲܟܸܐ ܠܹܗ. ܥܲܪܛܸܠ ܡܗܲܠܸܟܼ ܫܲܒܼܪܵܐ: ܟ̱ܠܹܗ ܤܲܬܼܘܵܐ. ܘܟܲܕܼ ܐ̄ܚܪ̈ܵܢܹܐ ܠܒܼܝܼܫܝܼܢ ܘܲܡܟܲܤܹܝܢ: ܥܲܠܝܼܠ ܩܘܼܪܵܐ ܒܟܼܠܗܘܿܢ ܗܲܕܵܡܲܝ̈ܗܘܿܢ. ܗ̤ܘ ܫܠܝܼܚ ܘܝܲܐܼܝܼܒܼ ܒܝܵܘܡܵܐ ܕܥܲܪܝܵܐ ܘܲܓܼܠܝܼܕܼܵܐ: ܘܠܵܐ ܚܵܐܹ̇ܫ. ܡܸܛܠ ܕܲܡܚܲܦܲܝ ܓܘܼܫܡܵܐ ܕܫܲܒܼܪܘܼܬܼܗܘܿܢ ܒܲܠܒܼܘܼܫܵܐ ܐ̄ܚܪܹܢܵܐ ܕܠܵܐ ܡܸܬܼܚܙܸܐ: ܡ̣ܢ ܗܵܝ̇ ܒܛܝܼܠܘܼܬܼܵܐ ܟܤܝܼܬܼܵܐ ܕܢܵܛ̇ܪܵܐ ܪܲܥܕܘܼܬܼܵܐ ܕܗܲܕܵܡ݂ܹ̈ܐ ܕܫܲܒܼܪܘܼܬܼܵܐ: ܕܠܵܐ ܢܸܬܼܩܲܪܲܒܼ ܠܗܘܿܢ ܢܸܟܼܝܵܢܵܐ ܕܡ̣ܢ ܡܸܕܸܡ. ܗܵܫܵܐ ܡܗܲܝܡܸܢ ܐܲܢ̄ܬܿ ܕܐܝܼܬܼ ܒܛܝܼܠܘܼܬܼܵܐ ܟܤܝܼܬܼܵܐ: ܕܲܠܓܼܘܼܫܡܵܐ ܪܲܓܼܝܵܐ ܕܝܲܬܝܼܪ ܢܩܸܐ ܘܲܕܼܠܝܼܸܠ ܠܟܼܠ ܢܸܟܼܝܵܢ̈ܝܼܢ: ܡܸܛܠ ܪܲܓܼܝܘܼܬܹܗ ܘܲܡܚܝܼܸܠܘܼܬܼܵܐ ܕܪ̈ܘܼܟܵܒܼܵܘܗܝ: ܘܲܢܛܝܼܪ ܡܸܨܥܲܬܼ ܤܲܩܘܼ̈ܒܼܠܵܝܵܬܼܵܐ: ܘܠܵܐ ܡܲܚ̈ܫܵܢ ܠܹܗ؟ ܢܵܛܲܪ ܠܲܡ ܠܫܲܒܼܪܹ̈ܐ ܡܵܪܝܵܐ. ܠܵܐ ܡܸܛܠ ܫܲܒܼܪܹ̈ܐ ܕܒܲܟܼܝܵܢܵܐ ܒܲܠܚܘܿܕܼ ܬܸܫܡܲܥ ܘܲܬܼܗܲܝܡܸܢ ܗܵܠܹܝܢ: ܐܸܠܵܐ ܐܵܦ ܕܐܲܝܠܹܝܢ ܕܟܲܕܼ ܐܝܼܬܲܝܗܘܿܢ ܚܲܟܿܝܼ̈ܡܹܐ ܒܥܵܠܡܵܐ: ܫܵܒܼܩ̇ܝܼܢ ܝܑܼܕܲܥܬܼܗܘܿܢ: ܘܥܲܠ ܗܵܝ̇ ܚܸܟܼܡܼܵܐ ܤܵܦܩܲܬܼ ܠܟܼܠ ܡܸܤܬܲܡܟܿܝܼܢ: ܘܗܵܘܹ̇ܝܢ ܫܲܒܼܪ̈ܝܼܢ ܒܨܸܒܼܝܵܢܗܘܿܢ. ܘܗܵܝܕܹܝܢ ܝܵܠܦ̇ܝܼܢ ܚܸܟܼܡܬܼܵܐ: ܗܵܝ̇ ܕܠܵܐ ܡܸܬܼܝܼܠܦܵܐ ܒܥܲܡ̈ܠܿܠ ܕܕܼܘܼܪܵܫܵܐ. ܘܫܲܦܝܼܪ ܐܸܡ݂ܲܪ ܐܵܦ ܚܲܟܿܝܼܡ ܒܐܲܠܵܗܵܝ̈ܵܬܐ ܛܘܼܒܼܵܢܵܐ ܫܠܝܼܚܵܐ ܟܲܕܼ ܡܲܪܬܸܐ: ܕܡܲܢ ܕܤܵܒܲܪ ܕܚܲܟܝܼܡ ܗ̄ܘ̣ ܒܥܵܠܡܵܐ ܗܵܢܵܐ: ܢܸܗܘܸܐ ܠܹܗ ܤܲܟܼܠܵܐ: ܕܢܸܗܘܸܐ ܚܲܟܝܼܡܵܐ. ܒܪܲܡ ܐܲܦܝܼܣ ܠܐܲܠܵܗܵܐ: ܕܢܸܬܸܠ ܠܵܟܼ ܕܬܸܡܛܸܐ ܠܲܡܫܘܼܚܬܼܵܐ ܕܗܲܝܡܵܢܘܼܬܼܵܐ. ܐܸܢܕܹܝܢ ܠܒܼܘܼܤܵܡܵܗ̇ ܕܗܲܝܡܵܢܘܼܬܼܵܐ ܬܲܪܓܸܫ ܒܢܲܦܫܵܟܼ: ܠܵܐ ܥܲܡܩܵܐ ܠܝܼ ܕܐܹܡܲܪ: ܕܬܼܘܼܒܼ ܠܵܐ ܗܵܘܹ̇ܐ ܡܸܕܸܡ ܕܟܼܵܠܹ̇ܐ ܠܵܗ̇ ܡ̣ܢ ܡܫܝܼܚܵܐ. ܘܠܵܐ ܥܲܤܩܵܐ ܠܵܗ̇ pb. 526 ܠܡܸܫܬܿܒܼܵܝܘܼ ܒܟܼܠܥܸܕܵܢ ܡ̣ܢ ܐܲܪ̈ܥܵܢܵܝܵܬܼܵܐ: ܘܲܠܡܸܛܥܵܐ ܠܥܵܠܡܵܐ ܗܵܢܵܐ ܡܚܝܼܠܵܐ: ܘܲܠܥܘܼܗܕܵܢܵܐ ܕܨܸܒܼ̈ܘܵܬܹܗ. ܚܠܵܦ ܗܵܕܹܐ: ܕܠܵܐ ܡܲܐܝܼܢܘܼ ܨܲܠܵܐ: ܘܲܒܼܕܸܡ̈ܥܹܐ ܒܥܝܼܗ̇: ܘܚܲܡܝܼܡܵܐܝܼܬܼ ܐܸܬܼܚܲܢܲܢ. ܘܲܒܼܝܼܨܝܼܦܘܼܬܼܵܐ ܤܲܓܝܼܐܬܼܵܐ ܐܸܬܼܟܲܫܲܦ: ܥܕܲܡܵܐ ܕܬܸܤܲܒܼ. ܕܬܼܘܼܒܼ: ܠܵܐ ܠܵܐܹ̇ܐ ܐܲܢ̄ܬܿ. ܠܗܵܕܹܐ ܕܹܝܢ ܡܸܫܬܘܸܐ ܐܲܢ̄ܬܿ: ܐܸܢ ܩܲܕܼܡܵܝܑܬܼ ܬܸܥܨܸܐ ܐܲܢ̄ܬܿ ܢܲܦܫܵܟܼ: ܠܡܸܫܕܵܐ ܨܸܦܬܼܵܟܼ ܥܲܠ ܐܲܠܵܗܵܐ ܒܗܲܝܡܵܢܘܼܬܼܵܐ: ܘܲܬܼܚܲܠܸܦ ܒܛܝܼܠܘܼܬܼܵܟܼ ܒܲܒܼܛܝܼܠܘܼܬܼܵܐ ܕܝܼܠܹܗ. ܘܗܵܝܕܹܝܢ ܡܵܐ ܕܚܵܙܹ̇ܐ ܠܨܸܒܼܝܵܢܵܟܼ ܕܲܒܼܟܼܠܵܗ̇ ܫܲܦܝܘܼܬܼܵܐ ܕܬܲܪܥܝܼܬܼܵܐ ܗܲܝܡܸܢܬܵܝܗܝ ܠܐܲܠܵܗܵܐ ܥܲܠ ܨܸܒܼ̈ܘܵܬܼܵܟܼ: ܘܲܥ̣ܨܲܝܬܿ ܢܲܦܫܵܟܼ ܕܬܸܬܟܸܠ ܥܲܠ ܐܲܠܵܗܵܐ ܝܲܬܝܼܪ ܡ̣ܢ ܕܥܲܠ ܢܲܦܫܵܟܼ: ܗܵܕܹܝܢ ܗܵܘ̇ ܚܲܝܠܵܐ ܕܠܵܐ ܡܦܵܣ ܐܲܢ̄ܬܿ ܒܹܗ ܡܲܓܸܢ ܥܠܲܝܟܼ: ܕܡܲܪܓܫܵܢܵܐܝܼܬܼ ܬܸܚܲܫ ܒܚܲܝܠܵܐ ܕܐܝܼܬܼ ܠܘܵܬܼܵܟܼ: ܕܠܵܐ ܦܘܼܠܵܓܼܵܐ. ܒܗܵܢܵܐ ܚܲܝܠܵܐ ܗ̄ܘ̣ ܕܟܲܕܼ ܡܲܪܓܫܝܼܢ ܤܲܓܝܼ̈ܐܹܐ ܥܵܐܹ̇ܠܝܼܢ ܠܢܘܼܪܵܐ ܘܠܵܐ ܕܲܚ̇ܠܝܼܢ: ܘܕܼܵܪܟܿܝܼܢ ܥܲܠ ܡܲܝ̈ܵܐ ܘܠܵܐ ܡܸܬܼܦܲܠܓܼܝܼܢ ܚܘܼܫܵܒܲܝ̈ܗܘܿܢ ܕܕܲܡ ܡܸܬܿܛܲܒܿܥܝܼܢ ܒܓܼܵܘܗܘܿܢ. ܡܸܛܠ ܕܲܡܚܲܠܵܐ ܠܗܘܿܢ ܗܲܝܡܵܢܘܼܬܼܵܐ ܠܪܸ̈ܓܼܫܹܝܗ̇ ܕܢܲܦܫܵܐ: ܘܐܲܝܟܼ ܡܲܢ ܕܲܦܝܵܤܵܐ ܡܸܕܸܡ ܠܵܐ ܡܸܬܼܚܲܙܝܵܢܵܐ ܡܲܪܓܫܵܐ ܗ̤ܝ ܒܵܗ̇ ܕܠܵܐ ܢܸܬܼܡܚܸܠ ܚܘܼܫܵܒܼܵܐ: ܘܠܵܐ ܢܚܘܼܪ ܒܚܲܙܵܬܼܵܐ ܕܨܸܒܼ̈ܘܵܬܼܵܐ ܕܚܝܼ̈ܠܵܬܼܵܐ: ܐܸܠܵܐ ܒܚܵܘܪܵܐ ܡܸܕܸܡ ܕܲܡܥܲܠܲܝ ܡ̣ܢ ܪܸ̈ܓܼܫܹܐ. ܚܙܝܼ ܕܲܠܡܵܐ ܡܸܤܬܲܒܼܪܵܐ ܠܵܟܼ ܟܠ ܟ̱ܠܹܗ: ܕܗܵܝ̇ ܝܑܼܕܲܥܬܼܵܐ ܪܘܼܚܵܢܵܝܬܼܵܐ ܒܗܵܕܹܐ ܝܑܼܕܲܥܬܼܵܐ ܕܲܢܦܸܫ ܡܸܬܼܩܲܒܿܠܵܐ. ܠܵܘ ܒܲܠܚܘܿܕܼ ܕܠܵܐ ܡܸܫܟܿܚܵܐ ܕܬܸܬܼܩܲܒܲܠ ܗܵܝ̇ ܝܑܼܕܲܥܬܼܵܐ ܪܘܼܚܵܢܵܝܬܐ ܒܗܵܕܹܐ ܝܑܼܕܲܥܬܼܵܐ ܢܲܦܫܵܢܵܝܬܼܵܐ: ܐܸܠܵܐ ܕܐܵܦܠܵܐ ܡܲܪܓܵܫܘܼ ܢܲܪܓܫܘܼܢ ܒܵܗ̇ ܡܲܨܝܵܐ ܕܢܸܫܬܘܘܿܢ: ܐܲܝܠܹܝܢ ܕܲܒܼܗܵܕܹܐ ܡܸܬܼܚܲܦܛܝܼܢ ܠܡܸܬܼܿܕܲܪܵܫܘܼ. ܘܐܸܢ ܐܝܼܬܼ pb. 527 ܡܸܢܗܘܿܢ ܕܨܵܒܹ̇ܐ ܠܡܸܬܼܩܲܪܵܒܼܘܼ ܠܗܵܝ̇ ܝܑܼܕܲܥܬܼܵܐ ܕܪܘܼܚ: ܥܕܲܡܵܐ ܕܟܼܵܦܲܪ ܒܗܵܕܹܐ ܘܲܒܼܟܼܠܗܘܿܢ ܩܸܦ̈ܠܹܐ ܕܩܲܛܝܼܢܘܼܬܼܵܗ̇ ܘܲܒܼܥܘܼܪ̈ܙܵܠܹܝܗ̇: ܘܩܵܐܹ̇ܡ ܒܫܲܒܼܪܘܼܬܼܵܐ ܕܬܲܪܥܝܼܬܼܵܐ: ܐܵܦܠܵܐ ܩܲܠܝܼܠ ܕܢܸܬܼܩܲܪܲܒܼ ܠܘܵܬܼܵܗ̇ ܕܗܵܝ̇ ܡܸܫܟܲܚ. ܐܸܠܵܐ ܘܥܘܼܟܵܪܹ̈ܐ ܤܲܓܝܼ̈ܐܹܐ ܗܵܘܹ̇ܝܢ ܠܹܗ ܥܝܵܕܼ̈ܝܗ̇ ܘܙܵܘܥܹ̈ܝܗ̇ ܡܦܲܬ̈ܠܹܐ: ܥܕܲܡܵܐ ܕܲܒܼܩܲܠܝܼܠ ܩܲܠܝܼܠ ܛܵܥܹ̇ܐ ܠܗܘܿܢ. ܗܵܝ̇ ܝܑܼܕܲܥܬܼܵܐ ܪܘܼܚܵܢܵܝܬܼܵܐ: ܦܫܝܼܛܬܼܵܐ ܗ̣̄ܝ. ܘܲܒܼܚܘܼ̈ܫܵܒܹܐ ܢܲܦܫܵܢܵܝܹ̈ܐ: ܠܵܐ ܡܲܙܠܓܼܵܐ. ܥܕܲܡܵܐ ܕܡܸܬܼܚܲܪܲܪ ܪܸܥܝܵܢܵܐ ܡ̣ܢ ܤܲܓܝܼܐܘܼܬܼ ܚܘܼ̈ܫܵܒܹܐ: ܘܐܵܬܹ̇ܐ ܠܲܚܕܼܵܐ ܦܫܝܼܛܘܼܬܼܵܐ ܕܕܲܟܼܝܘܼܬܼܵܐ: ܐܵܦܠܵܐ ܕܢܲܪܓܸܫ ܒܪ̈ܘܼܚܵܢܵܝܬܼܵܐ ܡܸܫܟܲܚ. ܗܵܢܵܐ ܕܹܝܢ ܛܲܟܼܤܵܐ ܕܝܼܕܲܥܬܼܵܐ: ܕܢܸܪܓܲܫ ܐ̄ܢܵܫ ܒܗܵܘ̇ ܒܘܼܤܵܡܵܐ ܕܚܲܝܹ̈ܐ ܕܗܵܘ̇ ܥܵܠܡܵܐ ܡ̣ܢ ܗܵܪܟܵܐ: ܠܤܲܓܝܼܐܝܼܬܼ ܚܘܼ̈ܫܵܒܹܐ ܡܲܤܠܸܐ. ܘܝܼܕܲܥܬܼܵܐ ܗܵܕܹܐ ܕܲܢܦܸܫ: ܠܒܲܪ ܡ̣ܢ ܟܢܘܼ̈ܫܝܹܐ ܕܲܤܒܼܝܼܤܘܼܬܼ ܚܘܼ̈ܫܵܒܹܐ: ܕܬܸܕܲܥ ܡܸܕܸܡ ܐ̄ܚܪܹܝܢ: ܕܲܒܼܫܲܦܝܘܼܬܼ ܪܸܥܝܵܢܵܐ ܡܸܬܼܩܲܒܲܠ: ܠܵܐ ܡܸܫܟܿܚܵܐ. ܘܡܸܠܬܹܗ ܕܡܵܪܲܢ: ܠܵܐ ܡܸܬܿܕܲܓܠܵܐ. ܐܸܢ ܠܵܐ ܬܸܬܼܗܲܦܟܿܘܼܢ ܘܬܸܗܘܘܿܢ ܐܲܝܟܼ ܛܠܵܝܹ̈ܐ: ܠܡܸܥܲܠ ܠܡܲܠܟܘܼܬܹܗ ܕܐܲܠܵܗܵܐ: ܠܵܐ ܡܸܫܟܿܚܝܼܢ ܐܢ̄ܬܿܘܿܢ. ܘܗܵܐ: ܤܲܓܝܼ̈ܐܹܐ ܕܲܠܗܵܕܹܐ ܒܘܿܪܘܼܬܼܵܐ ܠܵܐ ܡܸܬܼܡܲܛܹܝܢ. ܘܲܒܼܝܲܕܼ ܥ̇ܒܼܵܕܲܝ̈ܗܘܿܢ ܫܲܦܝܼܪܹ̈ܐ: ܢܛܝܼܪܵܐ ܠܗܘܿܢ ܡܢܵܬܐ ܥܲܡ ܡܵܪܲܢ ܒܡܲܠܟܿܘܼܬܼܵܐ ܕܲܫܡܲܝܵܐ. ܐܲܝܟܼ ܡܵܐ ܕܐܵܦ ܡ̣ܢ ܤܘܼܟܵܠܵܐ ܕܛܘܼ̈ܒܹܐ ܕܤܵܡ̣ ܡܦܲܪܫܵܐܝܼܬܼ ܒܲܤܒܲܪܬܹܗ ܡܸܬܼܝܲܕܼܥܵܐ. ܕܫܘܼ̈ܚܠܵܦܹܐ: ܥܲܡ ܦܘܼܪ̈ܫܵܢܹܐ ܤܲܓܝܼ̈ܐܹܐ ܕܕܼܘܸܝܵܪܹ̈ܐ ܐܵܘܕܲܥ̣ ܒܗܘܿܢ ܒܛܘܼ̈ܒܹܐ. ܕܟܼܠܢܵܫ ܒܟܼܠ ܡܘܼ̈ܫܚܵܢ ܒܟܼܠ ܐܘܼܪܚܵܐ ܕܐܵܙܹ̇ܠ ܠܘܵܬܹܗ: ܦܬܼܝܼܚ ܗ̄ܘ̣ ܩܕܼܵܡܵܘܗܝ ܬܲܪܥܵܐ ܕܡܲܠܟܿܘܼܬܼ ܫܡܲܝܵܐ. ܐܸܠܵܐ ܗܵܝ̇ ܕܐܸܠܵܐ ܬܸܬܼܗܲܦܟܿܘܼܢ ܘܬܸܗܘܘܿܢ ܐܲܝܟܼ ܛܠܵܝܹ̈ܐ: ܠܗܵܕܹܐ ܕܡ̣ܢ ܗܵܪܟܵܐ pb. 528 ܢܲܪܓܸܫ ܐ̄ܢܵܫ ܒܗܵܘ̇ ܒܘܼܤܵܡܵܐ ܕܡܲܠܟܿܘܼܬܼܵܐ ܐܵܡܲ̈ܪ. ܡܲܠܟܿܘܼܬܼܵܐ ܕܲܫܡܲܝܵܐ: ܬܹܐܘܿܪܝܼܵܐ ܪܘܼܚܵܢܵܝܬܼܵܐ ܐܵܡ̇ܪܝܼܢ ܕܐܝܼܬܹܝܗ̇. ܘܗܵܕܹܐ ܠܵܐ ܗ̄ܘ̣ܵܐ ܒܥܲܡ̈ܠܹܐ ܕܚܘܼ̈ܫܵܒܹܐ ܡܸܫܢܲܟܼܚܵܐ: ܐܸܠܵܐ ܡ̣ܢ ܛܲܝܒܿܘܼܬܼܵܐ ܡܸܬܿܛܲܥܡܵܐ. ܘܲܥܕܲܡܵܐ ܕܡܸܬܿܕܲܟܸܐ ܐ̄ܢܵܫ: ܐܵܦܠܵܐ ܕܢܸܫܡܲܥ ܬܘܼܒܼ ܤܵܦܹ̇ܿܩ. ܡܸܛܠ ܕܡ̣ܢ ܝܘܼܠܦܵܢܵܐ: ܠܵܐ ܡܸܬܼܩܲܢܝܵܐ. ܐܸܢ ܬܸܡܛܸܐ ܕܹܝܢ ܠܕܲܟܼܝܘܼܬܼܵܐ ܒܹܪܝ: ܗܵܝ̇ ܕܡܸܬܼܩܲܝܢܵܐ ܡ̣ܢ ܗܲܝܡܵܢܘܼܬܼܵܐ ܕܠܸܒܵܐ ܘܲܒܼܫܸܠܝܵܐ ܕܡ̣ܢ ܒܢܲܝ̈ܢܵܫܵܐ: ܘܛܵܥܹ̇ܐ ܐܲܢ̄ܬܿ ܠܝܼܕܲܥܬܹܗ ܕܗܵܢܵܐ ܥܵܠܡܵܐ: ܟܲܕܼ ܠܵܐ ܪܓܼܝܼܫ ܐܲܢ̄ܬܿ: ܒܓܼܵܘܵܟܼ ܡܸܫܬܲܟܼܚܵܐ ܡܸܢܫܹܠܝ: ܕܠܵܐ ܥܘܼܩܵܒܼܵܐ ܕܒܼܵܬܼܪܵܗ̇. ܐܲܩܝܼܡ ܠܲܡ ܩܵܝܑܸܡܬܼܵܐ: ܘܤܘܿܟܼ ܥܠܹܝܗ̇ ܡܸܫܚܵܐ. ܘܬܸܫܟܲܚ: ܤܝܼܡܬܼܵܟܼ: ܒܓܼܵܘܵܟܼ. ܐܸܢܕܹܝܢ ܒܫܲܪ̈ܒܘܿܩܝܵܬܼܵܗ̇ ܕܝܼܕܲܥܵܬܐ ܢܲܦܫܵܢܵܝܬܐ ܬܸܬܿܚܸܕܼ: ܠܵܐ ܤܲܢܝܵܐ ܠܝܼ ܕܐܹܡܲܪ: ܕܠܝܼܠ ܗ̄ܘ̣ ܠܵܟܼ ܡ̣ܢ ܐܲܤܘܼܪܹ̈ܐ ܕܦܲܪܙܠܵܐ ܠܡܸܬܼܦܲܠܵܛܘܼ: ܐܵܘ ܡܸܢܵܗ̇ ܘܠܵܐ ܪܲܚܝܼܩ ܐܲܢ̄ܬܿ ܒܐܲܡܝܼܢܘܼ ܡ̣ܢ ܦܲܚܹ̈ܐ ܕܛܵܥܝܘܼܬܼܵܐ: ܘܠܵܐ ܡ̣ܢ ܡܬܼܘܿܡ ܬܸܫܟܲܚ ܬܸܤܲܒܼ ܦܵܪܹܗ̄ܤܝܼܵܐ ܘܬܼܘܼܟܼܠܵܢܵܐ ܕܲܠܘܵܬܼ ܡܵܪܲܢ. ܘܲܒܼܟܼܠܥܸܕܵܢ ܥܲܠ ܦܘܼܡܹܗ ܕܤܲܝܦܵܐ ܪܵܕܹܐ ܐܲܢ̄ܬܿ: ܘܲܕܿܬܸܗܘܸܐ ܕܠܵܐ ܚܲܫܵܐ ܠܲܓܼܡܵܪ ܠܵܐ ܡܸܫܟܲܚ ܐܲܢ̄ܬܿ. ܒܲܡܚܝܠܘܼܬܼܵܐ ܐܸܬܼܓܵܘܲܣ ܘܒܲܦܫܝܼܛܘܼܬܼܵܐ: ܕܬܸܚܸܐ ܩܕܼܵܐ ܐܲܠܵܗܵܐ ܫܲܦܝܼܪ: ܘܲܕܼܠܵܐ ܨܸܦܬܼܵܐ ܬܸܗܘܸܐ. ܐܲܝܟܲܢܵܐ ܓܹܝܪ ܕܲܢܲܩܝܼܦ ܛܸܠܵܠܵܐ ܠܓܼܘܼܫܡܹ̈ܐ: ܗܵܟܲܢܵܐ ܪ̈ܲܚܡܹܐ ܠܡܘܼܟܵܟܼܵܐ. ܡܵܕܹܝܢ ܐܸܢ ܒܗܵܠܹܝܢ ܨܵܒܹ̇ܐ ܐܲܢ̄ܬܿ ܠܡܸܬܼܗܲܦܵܟܼܘܼ: ܠܵܐ ܬܸܬܸܠ ܟܠ ܟ̱ܠܹܗ ܐܝܼܕܵܐ ܠܚܘܼ̈ܫܵܒܹܐ ܡܚܝܼ̈ܠܹܐ. ܐܸܢ ܟܠܗܘܿܢ ܢܸܟܼܝܵܢܹ̈ܐ ܘܒܼܝܼ̈ܫܵܬܼܵܐ ܘܩܹܘܲܢܕܹܝܢܘܿܣ ܚܕܝܼܪܝܼܢ pb. 529 ܠܲܟܼ ܘܲܡܕܲܚܠܝܼܢ ܠܵܟܼ: ܠܵܐ ܢܸܬܼܒܛܸܠ ܠܵܟܼ ܕܲܬܼܚܘܼܪ ܒܗܘܿܢ: ܐܵܘ ܕܬܸܚܫܘܿܒܼ ܐܸܢܘܿܢ. ܐܸܢ ܚܕܼܵܐ ܙܒܲܢ ܗܲܝܡܸܢܬܿ ܠܐܲܠܵܗܵܐ ܕܤܵܦܹ̇ܩ ܠܲܡܢܲܛܵܪܘܼܬܼܵܟܼ ܘܲܢܕܲܒܪܵܟܼ ܘܐܸܙܲܠܬܿ ܒܵܬܼܪܹܗ: ܠܵܐ ܬܘܼܒܼ ܬܹܐܨܲܦ ܐܲܢ̄ܬܿ ܕܡܸܕܸܡ ܕܐܲܝܟܼ ܗܵܠܹܝܢ. ܐܸܠܵܐ ܐܸܡܲܪ ܠܢܲܦܫܵܟܼ: ܕܤܵܦܹ̇ܩ ܗ̄ܘ̣ ܠܟܼܠ: ܗܵܘ̇ ܡܲܢ ܕܐܲܓܼܥ̇ܠܹܬܼ ܠܹܗ ܢܲܦܫܝ ܚܕܼܵܐ ܙܒܲܢ. ܐܸܢܵܐ: ܠܵܐ ܩܲܪܝܼܒܼ ܐ̄ܢܵܐ: ܗ̤ܘ ܝܵܕܲܥ. ܘܗܵܝܕܹܝܢ ܒܲܥ̇ܒܼܵܕܼܵܐ ܬܸܚܙܸܐ ܬܡܝܼ̈ܗܵܬܹܗ ܕܐܲܠܵܗܵܐ: ܕܐܲܝܟܲܢ ܩܲܪܝܼܒܼ ܗ̄ܘ̣ ܒܟܼܠܙܒܼܢ ܦܘܼܪܩܵܢܹܗ ܠܕܼܵܚܠܵܘ̈ܗܝ. ܘܲܚܕܼܝܼܪܵܐ ܠܗܘܿܢ ܒܛܝܼܠܘܼܬܹܗ: ܘܠܵܐ ܡܸܬܼܚܲܙܝܵܐ. ܘܠܵܘ ܡܸܛܠ ܕܲܥܲܝ̈ܢܹܐ ܕܲܦܼܓܼܪܵܐ ܠܵܐ ܡܸܬܼܚܙܸܐ ܢܵܛܘܿܪܵܐ ܕܥܲܡܵܟܼ: ܬܸܬܼܦܲܠܲܓܼ ܠܵܟܼ ܥܵܠܘܗܝ ܕܐܵܦܠܵܐ ܐܝܼܬܼܵܘܗܝ. ܐܝܼܬܼ ܐܸܡܲܬܼܝ ܬܘܼܒܼ: ܕܐܵܦ ܠܥܲܝ̈ܢܹܐ ܕܦܲܓܼܪܵܐ ܡܸܬܼܓܠܸܐ: ܐܲܝܟܼ ܕܲܠܫܘܼܪܵܪܵܟܼ ܕܝܼܠܵܟܼ. ܡܵܐ ܕܹܝܢ ܕܲܫ̣ܕܼܵܐ ܡܸܢܹܗ ܒܲܪܢܵܫܵܐ ܟ̱ܠܹܗ ܥܘܼܕܼܪܵܢܵܐ ܡܸܬܼܚܲܙܝܵܢܵܐ ܘܤܲܒܼܪܵܐ ܐ̄ܢܵܫܵܝܵܐ: ܘܲܢܩܸܦ̣ ܠܐܲܠܵܗܵܐ ܒܗܲܝܡܵܢܘܼܬܼܵܐ ܘܲܒܼܠܸܒܵܐ ܫܲܦܝܵܐ: ܒܲܪ ܫܵܥܬܹܗ ܢܵܩ̇ܦܵܐ ܠܹܗ ܛܲܝܒܿܘܼܬܼܵܐ: ܘܓܼܵܠܝܵܐ ܒܹܗ ܚܲܝܠܵܗ̇ ܒܥܘܼܕܼܪ̈ܵܢܹܐ ܡܫܲܚ̈ܠ̱ܦܹܐ. ܠܘܼܩܕܲܡ ܕܹܝܢ: ܒܗܵܠܹܝܢ ܓܲܠ̈ܝܵܬܼܵܐ ܘܲܕܼܦܲܓܼܪܵܐ ܡܚܵܘܝܵܐ ܠܹܗ ܥܘܼܕܼܪ̈ܵܢܹܝܗ̇: ܒܲܒܼܛܝܼܠܘܼܬܼܵܗ̇ ܕܲܥܠܵܘܗܝ. ܐܲܝܟܼ ܡܲܢ ܕܲܒܼܗܵܠܹܝܢ: ܝܲܬܝܼܪ ܡܨܸܐ ܕܢܲܪܓܸܿܫ ܒܚܲܝܠܵܐ ܕܒܲܒܼܛܝܼܠܘܼܬܹܗ ܕܐܲܠܵܗܵܐ ܕܲܥܠܵܘܗܝ. ܕܲܒܼܤܘܼܟܵܠܵܐ ܕܐܲܝܠܹܝܢ ܕܓܲܠ̈ܝܵܢ: ܢܸܫܬܲܪܲܪ ܒܐܲܝܠܹܝܢ ܕܟܲܤ̈ܝܵܢ: ܐܲܝܟܼ ܕܙܵܕܩ ܠܫܲܒܼܪܘܼܬܼ ܬܲܪܥܝܼܬܹܗ ܘܠܵܐ ܦܲܓܝܼܚܘܼܬܹܗ. ܕܐܲܝܟܼ ܐܲܝܟܲܢ؟ ܗܵܢܵܘ ܕܹܝܢ ܐܲܝܟܼ ܐ̄ܢܵܫ ܢܹܐܡܲܪ: ܕܡܸܬܿܛܲܝܲܒܼ ܠܹܗ ܤܘܼܢܩܵܢܹܗ ܕܠܵܐ ܥܲܡܠܵܐ: ܟܲܕܼ ܠܵܐ ܝܵܨܹ̇ܦ. ܘܡܲܥܒܿܪܵܐ ܡܸܢܹܗ ܓܸܕܼܫܹ̈ܐ ܤܲܓܝܼ̈ܐܹܐ pb. 530 ܕܐܸܬܼܩܲܪܲܒܼܘ ܠܘܵܬܹܗ ܟܡܵܐ ܙܲܒܼ̈ܢܝܼܢ: ܕܲܡܠܹܝܢ ܩܹܘܲܢܕܹܝܢܘܿܣ. ܘܟܲܕܼ ܗܘ̤ ܠܵܐ ܒܛܝܼܠ ܠܹܗ ܒܲܕܼܠܵܐ ܪܓܼܝܼܫ: ܕܵܚ̇ܩܵܐ ܡܸܢܹܗ ܛܲܝܒܿܘܼܬܼܵܐ ܒܕܼܘܼܡܵܪܵܐ ܪܲܒܵܐ: ܥܲܡ ܫܲܪܟܵܐ ܕܡܸܕܸܡ ܡܸܕܸܡ ܕܡܸܢܫܹܠܝ ܥܵܪܹܨ ܟܲܕܼ ܠܵܐ ܪܥܸܐ: ܕܲܟܼܡܵܐ ܙܲܒܼ̈ܢܝܼܢ ܚܘܼܒܵܠܵܐ ܕܢܦܫܵܐ: ܘܡܸܢܗܘܿܢ ܕܦܲܓܼܪܵܐ ܡܲܨܝܵܐ ܕܢܸܗܘܸܐ. ܘܢܵܛ̇ܪܵܐ ܠܹܗ ܡܸܢܗܘܿܢ: ܐܲܝܟܼ ܡܪܲܒܿܝܵܢܝܼܬܼܵܐ ܕܡܲܛܠܠܵܐ ܘܦܵܪܤܵܐ ܟܸܢܦܹ̈ܿܝܗ̇ ܥܲܠ ܒܢܹ̈ܝܗ̇: ܕܠܵܐ ܢܸܬܸܩܲܪܲܒܼ ܠܗܘܿܢ ܢܸܟܼܝܵܢܵܐ. ܘܒܹܗ ܒܥܸܕܵܢܵܐ ܥܵܒܼ̇ܕܵܐ ܠܹܗ: ܕܢܲܪܓܸܫ ܒܐܲܝܠܹܝܢ ܕܲܗܘ̤ܵܝ̈. ܟܲܕܼ ܡܚܵܘܝܵܐ ܠܹܗ ܥܸܠܲܬܼ ܐܲܒܼܕܵܢܹܗ: ܒܥܲܝ̈ܢܹܐ ܕܦܲܓܼܪܵܐ. ܘܲܠܥܘܼܕܼܪܵܢܹܗ ܕܐܲܠܵܗܵܐ ܕܲܒܼܗܘܿܢ ܒܤܘܼܥܪܵܢܹܐ: ܕܢܝܼܚܵܐܝܼܬܼ. ܘܲܠܛܘܼܠܵܩܵܐ ܕܚܲܝܵܘ̈ܗܝ ܕܲܩܪܸܒܼ ܗ̄ܘ̣ܵܐ: ܘܦܲܨܲܝܹܗ ܐܲܠܵܗܵܐ. ܗܵܟܲܢܵܐ ܘܲܡܕܲܪܫܵܐ ܠܹܗ: ܐܵܦ ܒܟܲܤ̈ܝܵܬܼܵܐ. ܘܦܵܬܼܚܵܐ ܩܕܼܵܡܵܘܗܝ ܟܡܹܐܢܹ̈ܐ ܕܡܲܚܫ̈ܒܼܵܬܼܵܐ: ܘܲܕܼܚܘܼ̈ܫܵܒܹܐ ܥܲܤ̈ܩܲܝ ܠܡܸܬܿܕܲܪܟܵܢܘܼܬܼܵܐ. ܕܲܦܫܝܼܩܵܐܝܼܬܼ ܢܸܬܿܕܪܸܟܼ ܠܹܗ ܤܘܼܟܵܠܗܘܿܢ: ܘܢܲܩܝܼܦܘܼܬܼܗܘܿܢ ܕܠܲܚ̈ܕܵܕܹܐ ܘܡܲܛܥܝܵܢܘܼܬܼܗܘܿܢ. ܘܐܲܝܢܵܐ ܠܐܲܝܢܵܐ ܢܲܩܝܼܦ: ܘܐܲܝܟܲܢ ܡܸܬܼܝܲܠܕܝܼܢ ܚܲܕܼ ܡ̣ܢ ܚܲܕܼ ܘܡܵܘܒܿܕܼܝܼܡ ܠܢܲܦܫܵܐ. ܘܲܡܦܲܪܤܝܵܐ ܩܕܼܵܡܵܘܗܝ ܟ̱ܠܹܗ ܟܡܹܐܢܗܘܿܢ ܕܫܹ̈ܐܕܹܐ: ܘܬܲܚܦܝܼܬܼܵܐ ܕܚܘܼܫܵܒܼܵܝ̈ܗܘܿܢ: ܘܡܵܢܵܐ ܢܲܩܝܼܦ ܠܟܼܠܚܲܕܼ ܡ̣ܢ ܗܵܠܹܝܢ. ܘܤܵܝ̇ܡܵܐ ܒܹܗ ܤܘܼܟܵܠܵܐ: ܕܢܸܬܼܒܲܝܲܢ ܒܡܸܕܸܡ ܕܗܵܘܹ̇ܐ. ܘܕܼܵܢܲܚ ܒܓܼܵܘ ܦܫܝܼܛܘܼܬܹܗ ܢܘܼܗܪܵܐ ܟܲܤܝܵܐ ܠܡܲܪܓܵܫܘܼ ܒܟܼܠܡܸܕܸܡ: ܘܲܒܼܚܲܝܠܵܐ ܕܙܵܘ̈ܥܲܝ ܚܘܼ̈ܫܵܒܹܐ ܩܲܛܝܼ̈ܢܹܐ. ܘܲܡܚܵܘܝܵܐ ܠܹܗ: ܐܲܝܟܼ ܕܲܒܼܨܸܒܼܥܵܐ. ܘܕܸܐܠܘܼ ܗܵܕܹܐ ܠܵܐ ܝܑܼܕܲܥ̣: ܕܡܵܢܵܐ ܥܬܼܝܼܕܼ ܗ̄ܘ̣ܵܐ ܠܡܸܓܼܕܫܹܗ: ܘܗܵܝܕܹܝܢ ܡܸܬܼܝܲܠܕܝܼܢ ܠܹܗ ܡ̣ܢ ܗܵܪܟܵܐ: ܕܟܼܠܡܸܕܸܡ ܕܲܙܥܘܿܪ ܘܲܕܼܪܲܒܿ: ܒܲܨܠܘܿܬܼܵܐ ܢܸܒܼܥܸܐ ܡ̣ܢ ܡܕܲܒܿܪܵܢܹܗ. pb. 531 ܘܡܵܐ ܕܲܒܼܟܼܠܗܹܝܢ ܗܵܠܹܝܢ ܫܲܪܲܪܬܵܗ̇ ܛܲܝܒܿܘܼܬܼܵܐ ܠܬܲܪܥܝܼܬܹܗ ܒܬܼܘܼܟܼܠܵܢܵܐ ܕܥܲܠ ܐܲܠܵܗܵܐ: ܗܵܝܕܹܝܢ ܡܸܟܹܝܠ ܡܫܲܪܝܵܐ ܡܲܥܠܵܐ ܠܹܗ ܠܢܸܤܝ̈ܘܿܢܹܐ ܒܩܲܠܝܼܠ ܩܲܠܝܼܠ. ܘܫܵܒܼܩܵܐ ܕܢܸܫܬܲܡܪܘܼܢ ܥܠܵܘܗܝ: ܢܸܤܝ̈ܘܿܢܹܐ ܐܲܝܠܹܝܢ ܕܤܵܦ̇ܩܵܐ ܡܫܘܼܚܬܹܗ ܠܡܸܛܥܲܢ ܥܘܼܤܵܩܗܘܿܢ. ܘܒܹܗ ܒܢܸܤܝܘܿܢܵܐ ܡܩܲܪܒܼܵܐ ܠܹܗ ܥܘܼܕܼܪܵܢܵܗ̇ ܡܲܪܓܫܵܢܵܐܝܼܬܼ: ܐܲܝܟܼ ܕܢܸܬܼܠܲܒܲܒܼ. ܥܕܲܡܵܐ ܕܒܼܐܝܼܕܼܵܐ ܒܐܝܼܕܼܵܐ ܢܸܬܼܢܲܦܲܩ ܘܢܸܩܢܸܐ ܚܸܟܼܡܬܼܵܐ: ܘܢܲܩܠܹܐ ܥܲܠ ܒܥܸܠܕܒܼܵܒܼܵܘ̈ܗܝ ܒܬܼܘܼܟܼܠܵܢܵܐ ܕܥܲܠ ܐܲܠܵܗܵܐ. ܠܵܐ ܓܹܝܪ ܡܲܨܝܵܐ ܕܒܸܠܥܵܕܼ ܗܵܠܹܝܢ ܢܸܬܼܚܲܟܲܡ ܒܲܪܢܵܫܵܐ ܒܲܩܪ̈ܵܒܹܐ ܪ̈ܘܼܚܵܢܹܐ: ܘܢܸܕܲܥ ܠܲܡܕܲܒܿܪܵܢܹܗ ܘܢܲܪܓܸܫ ܒܐܲܠܵܗܹܗ: ܘܢܸܫܬܲܪܲܪ ܒܗܲܝܡܵܢܘܼܬܹܗ ܟܲܤܝܵܐܝܼܬܼ: ܒܚܲܝܠܵܐ ܡ̣ܢ ܢܸܤܝܵܢܵܐ ܕܒܲܩܢܘܿܡܹܗ ܩܲܒܸܠ̣. ܘܟܼܠ ܐܸܡܲܬܼܝ ܕܚܵܙ̇ܝܵܐ ܠܹܗ ܕܫܲܪܝܼ ܡܸܬܿܬܿܙܝܼܥ ܒܹܗ ܚܘܼܫܵܒܼܵܐ ܕܡܲܤܒܿܪܵܢܘܼܬܼܵܐ ܩܲܠܝܼܠ: ܘܫܲܪܝܼ ܡܸܬܼܪܲܥܸܐ ܪܵܘܪ̈ܒܼܵܬܼܵܐ ܥܲܠ ܢܲܦܫܹܗ: ܫܵܒܼܩܵܐ ܠܗܘܿܢ ܠܢܸܤܝ̈ܘܿܢܹܐ ܕܢܸܬܼܚܲܝܨܘܼܢ ܘܢܸܬܼܥܲܫܢܘܼܢ ܥܠܵܘܗܝ ܕܢܸܕܲܥ ܡܚܝܼܠܘܼܬܹܗ. ܘܢܸܥܪܘܿܩ: ܘܢܸܬܿܛܦܸܣ ܠܐܲܠܵܗܵܐ ܒܡܲܟܼܝܼܘܼܬܼܵܐ. ܘܲܒܼܗܵܠܹܝܢ ܐܵܬܹ̇ܐ ܒܲܪܢܵܫܵܐ ܠܲܡܫܘܼܚܬܼܵܐ ܕܓܲܒܼܪܵܐ ܓܡܝܼܪܵܐ: ܒܗܲܝܡܵܢܘܼܬܼܵܐ ܘܤܲܒܼܪܵܐ ܕܲܒܼܪܹܗ ܕܐܲܠܵܗܵܐ: ܘܡܸܬܼܥܲܠܸܐ ܠܘܵܬܹܗ ܒܚܘܼܒܵܐ. ܬܡܝܼܗܵܐܝܼܬܼ ܓܹܝܪ ܡܸܬܼܝܼܕܲܥ ܥܘܼܕܼܪܵܢܹܗ ܕܐܲܠܵܗܵܐ ܕܲܠܘܵܬܼ ܒܲܪܢܵܫܵܐ: ܐܸܡܲܬܼܝ ܕܲܒܼܨܸܒܼ̈ܘܵܬܼܵܐ ܕܡܲܠ̈ܝܵܢ ܦܤܵܩ ܤܲܒܼܪܵܐ ܡܸܬܼܡܲܨܲܥ: ܘܬܲܡܵܢ ܡܚܵܘܸܐ ܐܲܠܵܗܵܐ ܚܲܝܠܹܗ ܒܦܘܼܪܩܵܢܵܐ ܕܡܸܢܗܹܝܢ. ܠܵܐ ܡܸܡܬܼܘܿܡ ܝܑܼܠܸܦ̣ ܐ̄ܢܵܫ ܠܚܲܝܠܵܐ ܐܲܠܵܗܵܝܵܐ ܒܲܢܝܵܚܵܐ ܘܲܪܘܲܚܬܼܵܐ: ܘܐܵܦܠܵܐ ܡܸܡܬܘܿܡ ܚܵܘܝܼ ܤܵܥܘܿܪܘܼܬܹܗ ܡܲܪܓܫܵܢܵܐܝܼܬܼ: ܐܸܠܵܐ ܒܐܲܬܼܪܵܐ ܫܲܠܝܵܐ ܘܲܒܼܡܲܕܼܒܹܪܵܐ: ܘܲܒܼܕܼܘܼ̈ܟܿܝܬܼܵܐ ܕܲܚܤܝܼ̈ܟܵܢ ܡ̣ܢ ܥܸܢܝܵܢܹ̈ܐ ܘܲܫܓܼܘܼܫܝܵܐ ܕܥܘܼܡܪܵܐ ܕܲܒܼܢܲܝ̈ܢܵܫܵܐ. pb. 532 ܠܵܐ ܬܸܬܿܕܲܡܲܪ ܐܸܢܗ̤ܘ ܕܟܲܕܼ ܫܲܪܝܼܬܿ ܒܲܡܝܲܬܿܪܘܼܬܼܵܐ: ܢܵܒܼܥ̇ܝܼܢ ܥܠܲܝܟ ܐܘܼ̈ܠܨܵܢܹܐ ܥܲܤ̈ܩܹܐ ܡ̣ܢ ܟܠܕܘܼܟ. ܒܕܼܵܐܦܠܵܐ ܡܝܲܬܿܪܘܼܬܼܵܐ ܡܸܬܼܚܲܫܒܵܐ ܗܵܝ̇: ܐܲܝܕܵܐ ܕܠܵܐ ܢܲܩܝܼܦܵܐ ܥܲܤܩܘܼܬܼܵܐ ܘܥܲܡ̈ܠܹܐ ܠܦܘܼܠܚܵܢܵܗ̇. ܗ̤ܝ ܓܹܝܪ ܡܝܲܬܿܪܘܼܬܼܵܐ: ܡܸܢܵܗ̇ ܕܗܵܕܹܐ ܐܸܫܬܲܡܗܲܬ̤: ܐܵܡܲ݁ܪ ܩܲܕܝܼܫܵܐ ܐܹܘܲܓܼܪܝܪܣ. ܡܥܵܕܼܵܐ ܗ̣̄ܝ ܠܲܡ ܗܵܕܹܐ ܚܐܝܼܨܘܼܬܼܵܐ: ܕܤܵܡ̈ܟܵܢ ܥܠܹܝܗ̇ ܥܲܤ̈ܩܵܬܼܵܐ. ܘܗܵܝ̇ ܕܡܸܤܬܲܠܝܵܐ ܠܵܗ̇ ܠܲܡ ܗ̤ܝ ܡܝܲܬܿܪܘܼܬܼܵܐ: ܐܸܡܲܬܼܝ ܕܥܲܡ ܢܝܵܚܹ̈ܐ ܟܕܝܼܢܵܐ: ܐܵܡܲ݁ܪ ܛܘܼܒܼܵܢܵܐ ܡܲܪܩܘܿܣ ܝܑܼܚܝܼܕܼܵܝܵܐ. ܟܠ ܡܝܲܬܪܘܼܬܼܵܐ ܕܐܝܼܬܼ: ܙܩܝܼܦܵܐ ܡܸܫܬܲܡܗܵܐ. ܒܗܵܝ: ܕܲܠܦܘܼܩܕܵܢܵܐ ܕܪܘܼܚܵܐ ܓܵܡ̇ܪܵܐ. ܡܸܛܠ ܕܟܼܠܗܘܿܢ ܐܲܝܠܹܝܢ ܕܨܵܒܹ̇ܿܝܢ ܒܕܸܚܠܲܬܼ ܐܲܠܵܗܵܐ ܕܢܸܚܘܿܢ ܒܝܼܫܘܿܡܫܝܼܚܵܐ: ܡܸܬܼܐܲܠܨܝܼܢ. ܡܲܢ ܠܲܡ ܕܨܵܒܹ̇ܐ ܕܢܹܐܬܸܐ ܒܵܬܲܪܝ: ܢܸܟܼܦܘܿܪ ܒܢܲܦܫܹܗ: ܘܢܸܫܩܘܿܠ ܙܩܝܼܦܹܗ: ܘܢܹܐܬܸܐ ܒܵܬܲܪܝ. ܡܲܢ ܕܨܵܒܹ̇ܐ ܕܢܲܚܸܐ ܢܲܦܫܹܗ ܒܲܢܝܵܚܵܐ: ܢܵܘܒܿܕܝܼܗ̇. ܘܡܲܢ ܕܢܵܘܒܸܿܕܼ ܢܲܦܫܹܗ ܡܸܛܠܵܬܼܝ: ܢܸܫܟܿܚܝܼܗ̇. ܥܲܠܗܵܕܹܐ ܩܲܕܹܡ ܤܵܡܹܗ ܡܵܪܲܢ ܩܕܼܵܡܲܝܟ ܙܩܝܼܦܵܐ: ܕܡܵܘܬܵܐ ܬܸܦܤܘܿܩ ܥܲܠ ܢܲܦܫܵܟܼ: ܘܗܵܝܕܹܝܢ ܬܫܲܡܲܪ ܢܲܦܫܵܟܼ ܠܡܹܐܙܲܠ ܒܵܬܼܪܹܗ. ܠܲܝܬܿ ܕܚܲܝܠܬܼܵܢ ܐܲܝܟܼ ܦܤܵܩ ܤܲܒܼܪܵܐ. ܗܵܢܵܐ: ܠܵܐ ܝܵܕܲܥ̇ ܕܲܢܚܝܼܒܼ ܡ̣ܢ ܡܸܕܸܡ. ܐܸܢ ܒܲܕܼܝܲܡܝܼܢܵܐ: ܘܒܲܕܼܤܸܡܵܠܵܐ. ܐܸܡܲܬܼܝ ܕܲܦܤܲܩ̣ ܓܲܒܼܪܵܐ ܒܪܸܥܝܵܢܹܗ ܤܲܒܼܪܵܐ ܕܡ̣ܢ ܚܲܝܵܘ̈ܗܝ: ܠܲܝܬܿ ܕܲܠܒܼܝܼܒܼ ܡܸܢܹܗ: ܘܠܲܝܬܼ ܒܥܸܠܕܒܼܵܒܼܵܐ ܕܡܸܫܟܲܚ ܐܵܪܲܥ̇ ܠܹܗ: ܘܠܲܝܬܼ ܐܘܼܠܨܵܢܵܐ ܕܛܸܒܹܿܗ ܡܲܡܚܸܠ ܠܬܲܪܥܝܼܬܹܗ. ܡܸܛܠ ܕܟܼܠ ܐܘܼܠܨܵܢܵܐ ܕܐܝܼܬܼ: ܠܬܲܚܬܿ ܡ̣ܢ ܡܵܘܬܵܐ ܗ̄ܘ̣. ܘܗ̤ܘ ܠܡܵܘܬܵܐ ܦܤܲܩ̣ ܥܲܠ ܢܲܦܫܹܗ ܠܲܡܩܲܒܵܠܘܼ. ܐܸܢ ܒܟܼܠܕܘܼܟ ܘܲܒܼܟܼܠ ܤܘܼܥܪܵܢ ܘܲܒܼܟܼܠܙܒܲܢ pb. 533 ܒܟܼܠܡܸܕܸܡ ܕܲܥܬܼܝܼܕܼ ܐܲܢ̄ܬܿ ܠܡܸܤܥܲܪ: ܬܤܝܼܡ ܠܵܗ̇ ܠܬܲܪܥܝܼܬܼܵܟܼ ܚܵܘܪܵܐ ܠܥܲܡܠܵܐ ܘܠܲܫܚܝܼܩܘܼܬܼܵܐ: ܠܵܘ ܒܲܠܚܘܿܕܼ ܠܒܼܝܼܒܼܵܐ ܘܠܵܐ ܡܲܐܝܼܢܵܐ ܬܸܫܬܿܟܲܚ ܒܟܼܠܙܒܲܢ: ܠܡܸܤܥܵܐ ܥܲܠ ܟܠ ܥܲܤܩܘܼܬܼܵܐ ܕܡܸܤܬܲܒܼܪܵܐ: ܘܲܒܼܚܲܝܠܬܼܵܢܘܼܬܼܵܐ ܕܚܘܼܸܫܵܒܲܝ̈ܟ ܥܵܪܩܵܐ ܡܸܢܵܟܼ ܬܲܪܥܝܼܬܼܵܐ ܕܲܚܘܼܠܬܼܵܝܼܬܼܵܐ: ܕܲܡܥܵܕܼܵܐ ܠܡܸܬܼܝܼܠܵܕܼܘܼ ܒܐ̄ܢܵܫ ܡ̣ܢ ܗܵܝ̇ ܕܠܲܢܝܵܚܵܐ ܚܵܝ̇ܪܝܼܢ ܚܘܼ̈ܫܵܒܹܐ: ܐܸܠܵܐ ܘܟܼܠܗܹܝܢ ܩܲܫ̈ܝܵܬܼܵܐ ܘܥܲܤ̈ܩܵܬܼܵܐ ܕܦܵܓܼ̈ܥܵܢ ܒܵܟܼ: ܦܫܝܼ̈ܩܵܬܼܵܐ ܘܲܕܼܠܵܝܼ̈ܠܵܬܼܵܐ ܠܵܟܼ ܢܸܬܼܚܲܙ̈ܝܵܢ. ܘܲܟܼܡܵܐ ܙܲܒܼ̈ܢܝܼܢ: ܕܲܠܩܘܼܒܼܠܵܐ ܡܸܢܼܟܲܝܢܵܐ ܨܒܼܘܼܬܼܵܟܼ: ܒܗܵܘ̇ ܡܵܐ ܕܡܸܤܬܲܟܸܐ: ܒܕܼܵܐܦܠܵܐ ܛܵܟܼ ܥܵܪ̈ܨܵܢ ܠܘܵܬܼܵܟܼ. ܡܦܵܣ ܐܲܢ̄ܬܿ ܗ̄ܘ̣ ܓܹܝܪ ܕܤܘܼܟܵܝܵܐ ܕܠܲܢܝܵܚܵܐ: ܡ̣ܢ ܥܘܼܕܼܪ̈ܵܢܹܐ ܪܵܘܪ̈ܒܹܐ: ܘܡ̣ܢ ܛܵܒܼܬܼܵܐ ܡܝܲܬܲܪܬܵܐ ܚܵܤܹ̇ܟܼ ܒܟܼܠܙܒܲܢ ܠܲܒܼܢܲܝ̈ܢܵܫܵܐ. ܕܐܵܦܠܵܐ ܐܲܝܠܹܝܢ ܕܲܒܼܥܵܠܡܵܐ ܐܸܢܘܿܢ ܗܵܢܵܐ ܒܗܘܼܦܵܟܲܝ̈ܗܘܿܢ ܕܒܲܒܼܤܲܪ ܡܵܛܹ̇ܝܢ ܠܫܘܼܡܠܵܝܵܐ ܕܨܸܒܼܝܵܢܗܘܿܢ: ܐܸܠܵܐ ܐܸܢ ܥܲܤ̈ܩܵܬܼܵܐ ܦܵܤ̇ܩܝܼܢ ܒܪܸܥܝܵܢܗܘܿܢ ܠܲܡܤܲܝܒܵܪܘܼ. ܘܲܒܼܗܵܝ̇ ܕܢܸܤܝܵܢܵܐ ܐܝܼܬܼܵܘܗܝ ܤܵܗܕܵܐ ܥܲܠ ܗܵܠܹܝܢ: ܠܲܝܬܿ ܤܘܼܢܩܵܢܵܐ ܥܲܠ ܦܝܵܤܵܐ ܕܡܸܠܹ̈ܐ. ܕܲܒܼܟܼܠܕܵܪ ܕܲܩܕܼܵܡܲܝܢ ܘܲܥܕܲܡܵܐ ܠܝܵܘܡܵܢ: ܠܲܝܬܿ ܡܸܕܸܡ ܐ̄ܚܪܹܝܢ ܕܡܸܛܠܵܬܹܗ ܡܵܘܚܠܝܼܢ ܒܢܲܝ̈ܢܵܫܵܐ ܥܲܠ ܙܵܟܼ̈ܘܵܬܼܵܐ ܘܲܡܦܝܼܫܝܼܢ ܡ̣ܢ ܤܘܼܥܪ̈ܵܢܹܐ ܡܝܲܬܿܪܹ̈ܐ: ܘܐܲܝܟܼ ܕܒܲܚܕܼܵܐ ܙܒܲܢ ܠܡܹܐܡܲܪ: ܕܒܼܵܤܹ̇ܝܢ ܡ̣ܢ ܡܲܥܲܠܬܼܵܐ ܕܲܠܡܲܠܟܿܘܼܬܼܵܐ: ܐܸܠܵܐ ܐܸܢ ܤܘܼܟܵܝܵܐ ܕܲܢܝܵܚܵܐ ܙܥܘܿܪܵܐ ܕܩܲܪܝܼܒܼ. ܘܠܵܘ ܒܲܠܚܘܿܕܼ ܗܵܕܹܐ: ܐܸܠܵܐ ܘܙܲܒܼ̈ܢܝܼܢ ܤܲܓܝܼ̈ܐܵܢ ܗ̤ܘ ܗܵܢܵܐ ܚܵܘܪܵܐ: ܓܸܕܼܫܹ̈ܐ ܥܲܤ̈ܩܹܐ ܘܢܸܤܝ̈ܘܿܢܹܐ ܩܫܲܝܵ̈ܐ ܡܥܲܬܸܕܼ ܠܟܼܠܢܵܫ: ܕܲܠܘܵܬܹܗ ܤܝܼܡ ܢܝܼܫܵܐ ܕܬܲܪܥܝܼܬܹܗ: ܘܲܠܘܲܥܕܹܗ ܪܵܕܹܝܢ ܚܘܼܫܵܒܼܵܘ̈ܗܝ. ܒܗܵܝ̇ ܕܲܡܕܲܒܪܵܢܹܗ: ܨܒܼܝܵܢܵܐ ܗ̄ܘ̣ ܕܪܸܓܿܬܼܵܐ. ܡܲܢ̣ܘܼ pb. 534 ܕܠܵܐ ܝܵܕܲܥ̇ ܕܐܵܦ ܦܵܪ̈ܲܚܬܼܵܐ: ܒܚܵܘܪܵܐ ܕܲܢܝܵܚܵܐ ܩܵܪܒܵܐ ܠܘܵܬܼ ܦܲܚܵܐ. ܕܲܠܡܵܐ ܘܐܵܦ ܡ̣ܢ ܦܵܪܲܚܬܼܵܐ: ܤܲܓܝܼ ܒܨܝܼܪܵܐ ܝܑܼܕܲܥܬܼܵܐ ܕܝܼܠܲܢ ܐܲܝܟܼ ܕܡ̣ܢ ܦܸܚܡܵܐ: ܒܛܲܫ̈ܝܵܬܼܵܐ ܘܓܸܕܼܫܹ̈ܐ ܕܲܡܚܲܦܹܝܢ ܒܨܸܒܼ̈ܘܵܬܼܵܐ ܘܤܘܼܥܪ̈ܵܢܹܐ ܘܐܲܬܼܪ̈ܵܘܵܬܼܵܐ ܘܲܒܼܡܸܕܸܡ ܡܸܕܸܡ. ܕܐܵܦ ܤܵܛܵܢܵܐ ܡ̣ܢ ܒܪܵܫܝܼܬܼ ܒܫܘܼܘܕܵܝܵܐ: ܘܬܲܪܥܝܼܬܼܵܐ ܕܲܢܝܵܚܹ̈ܐ ܗ̄ܘ̣ ܨܵܐܹ̇ܕܼ ܠܲܢ. ܐܸܠܵܐ ܡܸܛܠ ܕܬܲܪܥܝܼܬܼܵܐ ܥܲܠ ܫܲܪܒܵܐ ܕܪܸܓܿܬܼܵܐ ܪܸܗܛܲܬ̤ ܠܵܗ̇ ܒܡܸܠܬܼܵܐ: ܫ̇ܓܹܝܬܼ ܠܝܼ ܡ̣ܢ ܢܝܼܫܵܐ ܕܡ̣ܢ ܠܥܸܠ ܤܵܡܹ̇ܬܼ ܒܡܸܠܲܬܼܝ. ܕܲܒܼܟܼܠܙܒܲܢ ܚܵܘܪܵܐ ܕܐܘܼ̈ܠܨܵܢܹܐ ܢܤܝܼܡ ܠܬܲܪܥܝܼܬܼܵܐ ܒܟܼܠܡܵܐ ܕܨܵܒܹ̇ܝܢܲܢ ܕܲܢܫܲܪܸܐ ܒܐܘܼܪܚܵܐ ܕܒܹܝܬܼ ܡܵܪܲܢ: ܕܚܲܪܬܼܵܐ ܕܡܲܦܩܵܢܵܗ̇ ܟܲܫܝܼܪܵܐܝܼܬܼ ܬܸܤܡܟܲܟܼ ܠܪܹܫ. ܟܡܵܐ ܙܲܒܼ̈ܢܝܼܢ ܡܫܲܐܸܠ ܐ̄ܢܵܫ ܐܲܡܲܬܼܝ ܕܨܵܒܹ̇ܐ ܕܲܢܫܲܪܸܐ ܒܤܘܼܥܪܵܢܵܐ ܡܸܕܸܡ ܕܡܸܛܠ ܡܵܪܲܢ: ܕܐܸܢ ܐܝܼܬܼ ܠܲܡ ܟܲܝ ܢܝܵܚܵܐ ܒܲܨܒܼܘܼܬܼܵܐ: ܐܸܢ ܡܸܫܟܿܚܵܐ ܕܠܵܐ ܥܲܡܠܵܐ ܠܡܸܪܕܵܐ ܒܵܗ̇ ܦܫܝܼܩܵܐܝܼܬܼ: ܐܵܘ ܕܲܠܡܵܐ ܐܝܼܬܼ ܒܵܗ̇ ܡܸܕܸܡ ܕܲܠܦܲܓܼܪܵܐ ܐܵܠܹ̇ܨ. ܠܵܐ ܗܵܐ ܠܥܸܠ ܘܲܠܬܲܚܬܿ ܫܡܵܐ ܕܲܢܝܵܚܹ̈ܐ؟ ܡܵܢܵܐ ܐܵܡܲ̈ܪ ܐܲܢ̄ܬܿ: ܐܘܿ ܓܲܒܼܪܵܐ؟ ܠܲܫܡܲܝܵܐ ܨܵܒܹ̇ܐ ܐܲܢ̄ܬܿ ܠܡܸܤܲܩ: ܘܲܠܗܵܝ̇ ܡܲܠܟܘܼܬܼܵܐ ܕܬܲܡܵܢ ܠܡܸܤܲܒܼ: ܘܲܠܫܵܘܬܵܦܘܼܬܼܵܐ ܕܥܲܡ ܐܲܠܵܗܵܐ ܘܠܲܢܝܵܚܹ̈ܐ ܪ̈ܘܼܚܵܢܹܐ: ܘܲܠܗܵܝ̇ ܛܘܼܒܼܬܼܵܢܘܼܬܼܵܐ ܘܲܠܚܘܼܠܛܵܢܵܐ ܕܥܲܡ ܡܲܠܲܐܟܹ̈ܐ ܘܲܠܝܲܚܹ̈ܐ ܕܠܵܐ ܡܵܝ̇ܬܝܼܢ: ܘܲܡܫܲܐܸܠ ܐܲܢ̄ܬܿ ܕܐܸܢ ܐܝܼܬܼ ܒܵܗ̇ ܥܲܡܠܵܐ ܒܐܘܼܪܚܵܐ ܗܵܕܹܐ؟ ܐܹܝܘ ܠܬܸܕܼܡܘܼܪܬܵܐ: ܕܲܐܲܝܠܹܝܢ ܕܨܸܒܼ̈ܘܵܬܹܗ ܕܥܵܠܡܵܐ ܗܵܢܵܐ ܘܲܠܥܘܼܬܼܪܵܐ ܕܡܸܬܼܚܲܒܲܠ ܘܲܠܫܘܼܠܛܵܢܵܐ ܕܡܸܫܬܿܪܸܐ ܡܸܬܼܪܲܓܼܪܓܼܝܼܢ. ܥܲܠ ܓܲܠܠܹ̈ܐ ܥܲܤ̈ܩܹܐ ܕܝܲܡܵܐ: ܦܵܤ̇ܥܝܼܢ. ܘܠܐܘܼܪ̈ܚܵܬܼܵܐ ܕܚܝܼ̈ܠܵܬܼܵܐ: ܕܵܝ̇ܫܝܼܢ. ܘܡܲܪܕܝܼܬܼܵܐ ܢܲܓܝܼܪܬܵܐ ܡܲܠܝܲܬܼ ܥܲܡ̈ܠܹܐ ܘܐܘܼ̈ܠܨܵܢܹܐ ܡܤܲܝܒܿܪܝܼܢ: ܥܲܡ ܫܲܪܟܵܐ ܕܨܸܒܼ̈ܘܵܬܼܵܐ pb. 535 ܓܢܝܼ̈ܚܵܬܼܵܐ ܕܲܡܥܵܕܼܝܼܢ ܒܢܲܝ̈ܢܵܫܵܐ ܡܸܛܠ ܪܸܓܲܬܼܗܘܿܢ ܠܡܸܤܥܲܪ. ܘܠܲܓܼܡܵܪ: ܠܵܐ ܡܸܬܼܪܲܥܹܝܢ ܕܐܸܢ ܐܝܼܬܼ ܥܲܡܠܵܐ ܒܲܨܒܼܘܼܬܼܵܐ: ܐܵܘ ܫܚܵܩܵܐ ܒܗܵܘ̇ ܡܸܕܸܡ ܕܨܵܒܹ̇ܝܢ ܠܡܸܥܒܲܕܼ. ܘܲܚܢܲܢ ܒܟܼܠܕܘܼܟ: ܥܲܠ ܢܝܵܚܹ̈ܐ ܡܥܲܩܒܼܝܼܢܲܢ. ܐܸܢ ܕܹܝܢ ܐܘܼܪܚܵܐ ܕܲܙܩܝܼܦܘܼܬܼܵܐ ܒܟܼܠܙܒܲܢ ܢܸܤܲܒܼ ܒܬܲܪܥܝܼܬܲܢ: ܘܲܒܼܟܼܠܙܒܲܢ ܙܩܝܼܦܘܼܬܼܵܐ ܢܸܬܼܪܲܥܸܐ: ܐܲܝܕܵܐ ܥܲܤܩܘܼܬܼܵܐ ܠܵܐ ܗ̄ܘ̣ܵܐ ܡܸܢܵܗ̇ ܦܫܝܼܩܵܐ؟ ܐܵܘ ܕܲܠܡܵܐ ܐܝܼܬܼ ܟܠ ܟ̱ܠܹܗ ܕܠܵܐ ܡܦܵܣ ܒܗܵܕܹܐ: ܕܠܵܐ ܡܸܡܬܼܘܿܡ ܢܤܲܒܼ ܐ̄ܢܵܫ ܙܵܟܼܘܼܬܼܵܐ ܕܒܲܩܪܵܒܼܵܐ: ܘܲܩܲܒܸܠ̣ ܟܠܝܼܠܵܐ ܕܡܸܬܼܚܲܒܲܠ: ܐܵܘ ܫܲܡܸܫ̣ ܤܘܼܥܪ̈ܵܢܹܐ ܐܲܠܵܗܵܝܹ̈ܐ: ܐܵܘ ܐܲܨܠܲܚ ܒܲܚܕܼܵܐ ܡ̣ܢ ܫܒܼܝܼܚܹ̈ܬܼܵܐ ܕܲܡܝܲܬܿܪܘܼܬܼܵܐ: ܐܵܘ ܐܸܬܲܬ̤ ܒܐܝܼܕܹܗ ܪܸܓܬܼܵܐ ܕܨܸܒܼܝܵܢܹܗ ܐܵܦܸܢ ܠܵܘ ܡ̣ܢ ܗܵܠܹܝܢ ܕܲܡܩܲܠ̈ܤܵܢ: ܐܸܠܵܐ ܠܘܼܩܕܲܡ ܐܲܫܝܼܚ ܥܲܠ ܥܲܡ̈ܠܹܐ ܘܐܘܼ̈ܠܨܵܢܹܐ: ܘܲܕܼܚܲܩ̣ ܡ̣ܢ ܨܹܐܕܼܵܘܗܝ ܬܲܪܥܝܼܬܼܵܐ ܡܚܲܬܼܸܚܲܬܲܬܼ ܠܲܢܝܵܚܵܐ: ܡܵܘܠܕܲܬܼ ܡܲܐܝܼܢܘܼܬܼܵܐ ܘܕܲܚܘܼܠܬܼܵܢܘܼܬܼܵܐ: ܕܡܸܢܵܗ̇ ܪܲܦܝܼܘܼܬܼܵܐ ܕܲܒܼܟܼܠ: ܐܸܡܲܬܼܝ ܕܹܝܢ ܕܗܵܘܢܵܐ ܛܵܐܹ̇ܢ ܚܠܵܦ ܡܝܲܬܿܪܘܼܬܼܵܐ: ܪ̈ܓܼܫܹܐ ܓܠܲܝ̈ܵܐ ܤܵܘܩܵܐ ܘܓܸܫܬܼܵܐ ܫܸܡܥܵܐ ܚܙܵܬܼܵܐ ܘܚܸܟܵܐ: ܡ̣ܢ ܦܸܓܼܥܹ̈ܐ ܥܲܤ̈ܩܹܐ ܕܡܲܥܒܿܕܼܵܢ̈ܘܵܬܼܵܐ ܢܘܼܟܼܪ̈ܵܝܵܬܼܵܐ: ܕܲܠܒܲܪ ܡ̣ܢ ܥܝܵܕܼܵܐ ܘܲܬܼܚܘܼ̈ܡܹܐ ܕܚܲܝܠܵܐ ܟܵܝܢܵܝܵܐ ܕܲܢܚܘܼܒܼܘܼܢ ܠܵܐ ܝܵܕܼܥܝܼܢ. ܒܙܲܒܼܢܵܐ ܗܵܘ̇ ܕܚܸܡܬܼܵܐ ܟܝܵܢܵܐܝܼܬܼ ܤܵܥ̇ܪܵܐ ܡܲܥܒܿܕܼܵܢ̈ܘܵܬܹܗ: ܗܵܝܕܹܝܢ ܒܤܹܝܢ ܐܸܢܘܿܢ ܚܲܝܵܘ̈ܗܝ ܕܦܲܓܼܪܵܐ ܡ̣ܢ ܙܸܒܼܠܵܐ. ܡܵܐ ܕܹܝܢ ܕܠܸܒܵܐ ܡܸܬܿܛܲܢܲܢ ܒܪܘܼܚܵܐ: ܦܲܓܼܪܵܐ ܠܵܐ ܚܵܐܹ̇ܫ ܒܐܘܼ̈ܠܨܵܢܹܐ: ܘܠܵܐ ܡ̣ܢ ܕܚܝܼ̈ܠܵܬܼܵܐ ܟܵܘܹ̇ܙ. ܐܸܠܵܐ ܡܩܝܼܡ ܠܹܗ ܗܵܘܢܵܐ ܠܘܼܩܒܲܠ ܟܠܗܘܿܢ ܢܸܤܝ̈ܘܿܢܹܐ: ܐܲܝܟܼ ܐܵܕܵܡܘܿܣ ܒܚܘܼܡܤܵܢܹܗ. pb. 536 ܢܸܛܲܢ ܐܵܦ ܚܢܲܢ ܛܢܵܢܵܐ ܕܪܘܼܚ ܚܠܵܦ ܨܸܒܼܝܵܢܹܗ ܕܝܼܫܘܿܥ: ܘܡܸܬܼܪܲܕܼܦܵܐ ܡܸܢܲܢ ܟ̱ܠܵܗ̇ ܡܲܐܝܼܢܘܼܬܼܵܐ: ܕܗ̤ܝ ܡܵܘܠܵܕܼܵܐ ܪܲܦܝܘܼܬܼܵܐ ܒܬܲܪܥܝܼܬܼܵܐ. ܛܢܵܢܵܐ ܓܹܝܪ: ܝܵܠܹ̇ܕܼ ܠܘܼܒܼܵܒܼܵܐ. ܘܚܝܼܨܘܼܬܼܵܐ ܕܢܲܦܫܵܐ: ܘܟܼܘܼܫܪܵܐ ܕܦܲܓܼܪܵܐ. ܡܵܢܵܐ ܚܲܝܠܵܐ ܐܝܼܬܼ ܒܫܹܐܕܹ̈ܐ: ܐܸܡܲܬܼܝ ܕܢܲܦܫܵܐ ܡܙܝܼܥܵܐ ܛܢܵܢܵܗ̇ ܒܚܹܐܦܵܐ ܟܝܵܢܵܝܵܐ ܠܘܼܩܒܲܠܗܘܿܢ؟ ܐܦ ܝܲܨܪܵܐ ܬܘܼܒܼ: ܝܲܠܕܹܗ ܕܲܛܢܵܢܵܐ ܡܸܬܼܐܡܲܪ. ܘܟܼܠܹܗ ܥܘܼܫܢܵܐ ܠܵܐ ܡܸܬܿܬܿܙܝܼܥܵܢܵܐ ܕܗܵܘܹ̇ܐ ܒܢܲܦܫܵܐ: ܐܸܡܲܬܼܝ ܕܡܲܦܩܵܐ ܚܲܝܠܹܝ̈ܗ̇ ܠܲܥ̇ܒܼܵܕܼܵܐ: ܗ̤ܘ ܡܤܲܬ̤ܬܼ ܒܵܗ̇. ܐܵܦ ܗܵܠܹܝܢ ܟܠܝܼ̈ܠܹܐ ܕܡܵܘܕܝܵܢܘܼܬܼܵܐ ܕܲܡܩܲܒܿܠܝܼܢ ܢܲܨܝܼ̈ܚܹܐ ܤܵܗ̈ܕܹܐ ܒܚܘܼܡܤܵܢܗܘܿܢ: ܒܗܵܠܹܝܢ ܬܲܪܬܹܝܢ ܡܲܥܒܿܕܼܵܢ̈ܘܵܬܼܵܐ ܕܲܛܢܵܢܵܐ ܘܝܲܨܪܵܐ ܕܡ̣ܢ ܚܲܝܠܵܗ̇ ܕܚܸܡܬܼܵܐ ܟܝܵܢܵܝܬܼܵܐ ܡܸܬܼܝܲܠܕܝܼܢ: ܗܵܘܹ̇ܝܢ ܠܵܐ ܚܵܫܘܿܫܹ̈ܐ ܒܥܘܼܙܵܐ ܕܚܲܫܵܐ ܕܬܲܫ̈ܢܝܼܕܹܐ.