Discourse 78
ܥܲܠ ܝܘܼܬܼܪܵܢܵܐ ܕܡ̣ܢ ܥܪܘܼܩܝܵܐ ܕܡ̣ܢ ܥܵܠܡܵܐ: ܕܲܒܼܒܼܘܼܚܵܢܵܐ ܕܟܸܟܼܡܬܼܵܐ
ܐܸܬܼܦܲܪܲܣ ܡ̣ܢ ܐܲܒܼ̈ܗܵܬܼܵܐ ܦܘܼܪܤܵܐ ܗܵܢܵܐ. ܥܚ.
ܚܲܤܝܼܢ ܗ̄ܘ̣ ܓܹܝܪ ܫܲܪܝܼܪܵܐܝܼܬܼ ܘܲܥܤܸܩ ܘܛܵܒܼ ܩܫܸܐ: ܐܵܓܼܘܿܢܵܐ
ܕܗܵܘܹ̇ܐ ܒܝܲܕܼ ܩܘܼܪܒܵܐ ܕܨܸܒܼ̈ܘܵܬܼܵܐ. ܘܲܟܼܡܵܐ ܐܸܢ ܛܘܼܠܝܵܩ ܘܚܲܝܠܬܼܵܢ ܢܸܗܘܸܐ
ܐ̄ܢܵܫ: ܐܸܡܲܬܼܝ ܕܩܲܪ̈ܝܼܒܼܵܢ ܠܹܗ ܥܸܠ̈ܠܵܬܼܵܐ ܕܲܡܓܲܪ̈ܓܼܵܢ ܩܪ̈ܵܒܹܐ ܘܬܲܟܼܬܘܼ̈ܫܹܐ:
ܩܸܢܛܵܐ ܢܲܩܝܼܦ ܠܹܗ. ܘܲܕܼܠܝܼܠ ܠܡܲܦܘܼܠܬܼܵܐ: ܝܲܬܝܼܪ ܡ̣ܢ ܗܵܝ̇
ܕܗ̤ܘ ܩܢܘܼܡܹܗ ܕܤܵܛܵܢܵܐ ܒܲܩܪܵܒܼܵܐ ܓܲܠܝܵܐܝܼܬܼ ܢܸܦܓܲܥ ܒܹܗ. ܒܗܵܝ̇
ܕܲܟܼܡܵܐ ܕܒܲܪܢܵܫܵܐ ܠܵܐ ܡܲܒܼܥܲܕܼ ܡ̣ܢ ܐܲܝܠܹܝܢ ܕܠܸܒܵܐ ܕܵܚܹ̇ܠ ܡܸܢܗܹܝܢ:
pb. 537
ܐܲܡܝܼܢܵܐܝܼܬܼ ܐܝܼܬܼ ܠܹܗ ܠܲܒܼܥܸܠܕܲܪܵܐ ܐܲܬܼܪܵܐ ܥܠܵܘܗܝ. ܘܐܸܢ ܓܕܲܫ̣
ܘܩܲܠܝܼܠ ܢܵܡ̣: ܦܫܝܼܩܵܐܝܼܬܼ ܡܵܘܒܸܕܼ ܠܹܗ. ܬܲܡܵܢ ܓܹܝܪ: ܦܲܓܼܪܵܐ
ܩܲܢܝܼܛ ܕܢܸܤܬܲܓܲܦ. ܡ̣ܢ ܟܠ ܦܪܘܿܣ ܡ̣ܢ ܚܛܵܗܹ̈ܐ: ܡܲܒܼܥܲܕܼ ܗ̄ܘ̣.
ܗܵܪܟܵܐ ܕܹܝܢ: ܢܲܦܫܵܐ ܗ̄ܘ̣ ܕܲܡܩܲܒܿܠܵܐ ܡܚܘܿܬܼܵܐ ܕܠܵܐ ܡܸܬܼܚܲܙܝܵܐ:
ܘܠܵܐ ܡܲܠܐܝܵܐ ܠܹܗ ܠܲܒܼܥܸܠܓܕܲܪܵܗ̇ ܕܢܸܬܼܟܲܬܲܫ ܥܲܡܵܗ̇. ܒܗܵܝ̇ ܕܗܸܢܹܝܢ
ܨܸܒܼ̈ܘܵܬܼܵܐ ܡ̣ܢ ܢܲܦܫܗܹܝܢ: ܤܵܦ̈ܩܵܢ ܕܲܢܙܝܼ̈ܥܵܢ ܥܠܹܝܗ̇ ܫܓܼܘܼܫܝܵܐ ܕܲܩܪ̈ܵܒܹܐ
ܒܟܼܠܥܸܕܵܢ. ܘܨܸܒܒܼܝܵܢܵܐܝܼܬܼ ܡܸܬܿܕܲܒܼܪܵܐ ܒܲܫܒܼܝܼܬܼܗܹܝܢ: ܟܲܕܼ ܠܲܝܬܿ ܕܤܵܕܲܪ
ܥܲܡܵܗ̇ ܩܪܵܒܼܵܐ ܡ̣ܢ ܠܒܲܪ. ܐܸܠܵܐ ܗ̤ܝ ܐܝܼܬܹܝܗ̇ ܐܵܓܼܘܿܢܵܐ ܠܝܵܬܼܵܗ̇:
ܒܓܼܘܼܪ̈ܵܓܹܐ ܕܐܲܝܠܹܝܢ ܕܲܩܕܼܵܡ ܪܸ̈ܓܼܫܹܐ ܕܦܲܓܼܪܵܐ ܤܕܝܼܪ̈ܵܢ: ܐܲܝܟܼ ܕܐܡܝܼܪ
ܒܕܼܘܼܟ: ܕܡܵܐ ܠܲܡ ܕܐܚܝܼܕܼܵܐ ܢܲܦܫܵܐ ܒܦܸܓܼܥܵܘ̈ܗܝ ܡܲܟܿܝܵܢܹ̈ܐ ܕܥܵܠܡܵܐ:
ܗܸܢܘܿܢ ܦܸܓܼܥܹ̈ܐ ܗܵܘܹ̇ܝܢ ܠܵܗ̇ ܫܦܵܝܹ̈ܐ. ܘܐܲܝܟܼ ܗܵܘ̇: ܕܲܟܼܝܵܢܵܐܝܼܬܼ ܡܸܙܕܲܟܼܝܵܐ
ܐܸܡܲܬܼܝ ܕܲܒܼܗܘܿܢ ܦܵܓ̇ܥܵܐ. ܘܒܲܕܼܓܼܘܿܢ ܕܲܡܦܵܤܝܼܢ ܗ̄ܘ̣ܵܘ ܩܲܕܝܼ̈ܫܹܐ
ܩܲܕܼ̈ܡܵܝܹܐ ܐܲܝܠܹܝܢ ܕܒܲܫܒܼܝܼ̈ܠܹܐ ܗܵܠܹܝܢ ܪܕܼܵܘ: ܕܠܵܘ ܒܟܼܠܙܒܲܢ ܚܠܝܼܡ
ܗܵܘܢܵܐ ܕܡܸܫܟܲܚ ܕܲܢܩܘܼܡ ܒܚܲܕܼ ܛܲܟܼܤܵܐ ܠܵܐ ܡܸܨܛܲܠܝܵܢܵܐܝܼܬܼ
ܘܢܸܛܲܪ ܡܲܛܲܪܬܵܐ. ܒܗܵܝ̇ ܕܐܝܼܬܼ ܥܸܕܵܢܵܐ ܕܲܒܼܥܲܡܛܵܢܵܐ ܗܵܘ̇ܝܵܐ ܢܲܦܫܵܐ:
ܘܠܵܐ ܡܲܨܝܵܐ ܕܬܲܨܸܕܸ ܒܐܲܝܠܹܝܢ ܕܡܲܤܲܓ̈ܦܵܢ: ܒܚܸܟܼܡܬܼܵܐ ܒܲܚܸܢܘ.
ܘܐܸܬܼܥܲܛܲܦܘ ܡܤܲܪܩܝܘܼܬܼܵܐ: ܐܲܝܟܼ ܙܲܝܢܵܐ. ܕܡ̣ܢ ܐܵܓܼܘܿܢܹ̈ܐ ܤܲܓܝܼ̈ܐܹܐ:
ܡܚܲܪܪܵܐ. ܐܲܝܟܼ ܕܲܟܼܬܼܝܼܒܼ. ܕܐܝܼܬܼ ܕܡܸܬܼܦܲܠܲܛ ܡ̣ܢ ܚܵܛܵܗܹ̈ܐ: ܡܸܛܠ
ܨܪܝܼܸܟܼܘܼܬܹܗ. ܘܲܠܚܘܼܪܒܵܐ ܫܲܬܝܼܘ: ܐܲܝܟܵܐ ܕܠܲܝܬܿ ܨܸܒܼ̈ܘܵܬܼܵܐ: ܕܗܸܢܹܝܢ
ܥܸܠ̈ܠܬܼܵܐ ܕܚܲܫܹ̈ܐ. ܕܐܵܦ ܟܲܕܼ ܢܸܗܘܸܐ ܥܸܕܵܢܵܐ ܕܢܸܬܼܡܲܚܠܘܼܢ: ܠܵܐ
ܢܸܫܬܲܟܼ̈ܚܵܢ ܠܗܘܿܢ ܥܸܠ̈ܠܵܬܼܵܬ ܠܡܲܦ̈ܠܵܬܼܵܐ. ܐܵܡܲ݁ܪ ܐ̄ܢܵܐ ܕܹܝܢ: ܚܸܡܬܐ
pb. 538
ܘܪܸܓܿܬܼܵܐ ܘܐܲܟܿܬܼܵܐ ܘܫܘܼܒܼܚܵܐ: ܗܵܠܹܝܢ ܕܒܲܕܼܫܲܪܟܵܐ ܩܲܠܝܼ̈ܠܢ: ܡܸܛܠ
ܕܚܘܼܪܒܵܐ ܗ̄ܘ̣: ܘܒܹܗ ܐܸܤܬܲܬܲܪܘ ܐܲܝܟܼ ܕܲܒܼܡܲܓܼܕܠܵܐ ܕܠܵܐ ܡܸܬܼܟܒܸܫ.
ܘܗܵܝܕܹܝܢ ܐܸܫܟܲܚ ܓܲܡܲܪ ܐܵܓܼܘܿܢܹܗ ܟܠܚܲܕܼ ܚܲܕܼ ܡܸܢܗܘܿܢ ܒܫܸܠܝܵܐ:
ܐܲܝܟܵܐ ܕܪܸ̈ܓܼܫܹܐ ܠܵܐ ܐܸܫܟܲܚܘ ܬܲܥܕܝܼܪܵܐ: ܕܢܸܗܘܘܿܢ ܠܒܲܥ̈ܠܲܝ ܬܲܟܼܬܘܼܫܵܐ
ܒܝܲܕܼ ܦܸܓܼܥܹ̈ܐ ܡܤܲܓܦܵܢܹ̈ܐ. ܦܲܩܵܚ ܠܲܢ ܡܵܘܬܵܐ ܕܒܼܵܐܓܼܘܿܢܲܢ: ܘܠܵܐ
ܚܲܝܹ̈ܐ ܕܡܲܦܘܼܠܬܼܵܐ.
Corpus Text ID:
Source:
Paulus Bedjan (ed.), Mar Isaacus Ninivita. De perfectione religiosa. (Paris/Leipzig: Otto Harrassowitz, 1909).Publication Date: March 5, 2019
Preparation of Electronic Edition:
TEI XML encoding by James E. Walters.Syriac text transcribed by .
Open Access and Copyright:
This electronic edition is designed for open access reuse. The Syriac base text is in the public domain. The TEI XML edition is copyrighted by James E. Walters and is released under a Creative Commons Attribution 4.0 International Public License (CC BY 4.0).
The HTML page is copyrighted by Vanderbilt University and released under a under a Creative Commons Attribution 4.0 International Public License (CC-BY 4.0, https://creativecommons.org/licenses/by/4.0/). Attribution for reuse should follow the suggested citation and also credit the copyright holder of the TEI XML edition.
See details...
How to Cite this Electronic Edition
Note:
Isaac of Nineveh, “Discourse 78” based upon Paulus Bedjan (ed.), Mar Isaacus Ninivita. De perfectione religiosa. (Paris/Leipzig: Otto Harrassowitz, 1909), Digital Syriac Corpus, last modified March 5, 2019, https://syriaccorpus.org/469.Bibliography:
“Discourse 78.” In Mar Isaacus Ninivita. De perfectione religiosa., edited by . Syriaca.org, 2016-. Entry published . https://syriaccorpus.org/469.Show Citation Styles