Discourse 79

ܟܡܵܐ ܕܹܝܢ ܕܐܝܼܬܼܵܘܗܝ ܒܲܪܢܵܫܵܐ ܒܲܡܤܲܪܩܘܼܬܼܵܐ: ܫܘܼܢܵܝܵܐ ܕܡ̣ܢ ܚܲܝܹ̈ܐ ܢܵܒܲܗ ܒܪܸܥܝܵܢܹܗ ܐܲܡܝܼܢܵܐܝܼܬܼ. ܘܲܒܼܚܲܝܹ̈ܐ ܗܢܘܿܢ ܕܒܼܵܬܲܪ ܢܘܼܚܵܡܵܐ ܗܵܪܹܓܼ ܒܟܼܠܫܵܥ: ܘܥܘܼܬܵܕܼܵܐ ܕܚܵܫܲܚ ܠܲܕܿܬܲܡܵܢ ܡܸܬܼܦܲܪܲܣ ܒܟܼܠܙܒܲܢ. ܘܲܡܒܲܤܪܵܢܘܼܬܼܵܐ ܕܥܲܠ ܟܠ ܐܝܼܩܵܪ ܘܲܢܝܵܚ ܕܦܲܓܼܪܵܐ ܡܸܙܕܲܪܥܵܐ ܒܡܲܚܫܲܒܼܬܹܗ: ܘܚܘܼܫܵܒܼܵܐ ܕܥܲܠ ܒܲܤܝܘܼܬܹܗ ܕܥܵܠܡܵܐ ܪܵܦܹ̇ܿܬܼ ܒܪܸܗܝܵܢܹܗ ܒܟܼܠܥܸܕܵܢ. ܘܲܠܒܼܝܼܒܼ ܒܬܲܪܥܝܼܬܹܗ: ܘܠܸܒܵܐ ܓܲܢ̄ܒܵܪܵܐ ܩܢܸܐ ܒܟܼܠܙܒܲܢ: ܥܲܠ ܟܠ ܕܸܚܠܵܐ ܘܩܹܘܲܢܕܹܝܢܘܿܣ ܡܲܥܒܿܕܼܵܢܵܐ ܕܡܵܘܬܵܐ. ܒܕܼܵܐܦܠܵܐ ܡ̣ܢ ܡܵܘܬܵܐ ܩܵܢܹ̇ܛ: ܒܗܵܝ̇ ܕܲܒܼܟܼܠܫܵܥ ܡ̣ܢ ܩܘܼܪܒܵܐ ܒܹܗ ܚܵܐܲܪ ܘܲܡܤܲܟܸܐ ܠܹܗ. ܘܫܲܕܼܝܵܐ ܨܸܦܬܹܗ ܥܲܠ ܐܲܠܵܗܵܐ: ܒܟܼܠܹܗ ܬܘܼܟܼܠܵܢܵܐ ܠܵܐ ܡܸܬܼܦܲܠܓܼܵܢܵܐ. ܘܐܸܢ ܐܘܼ̈ܠܨܵܢܹܐ ܡܸܤܬܲܩܒܿܠܝܼܢ ܠܹܗ: ܐܲܝܟܼ ܐ̄ܢܵܫ ܕܝܵܕܲܥ ܘܲܡܦܵܣ ܚܲܬܝܼܬܼܵܐܝܼܬܼ ܕܲܟܼܠܝܼ̈ܠܹܐ ܡܥܲܬܿܕܝܼܢ ܠܹܗ: ܒܟܼܠܵܗ̇ ܚܲܕܼܘܼܬܼܵܐ ܡܚܲܡܤܸܢ ܒܗܘܿܢ: ܟܲܕܼ ܪܵܘܙܵܐ ܘܕܼܵܝܼ̇ܨܵܐ ܢܲܦܫܹܗ ܒܩܘܼܒܵܠܗܘܿܢ. pb. 539 ܒܗܵܝ̇ ܕܝܼܕܲܥ̣: ܕܐܲܠܵܗܵܐ ܗ̄ܘ̣ ܡܦܲܪܢܤܵܢܗܘܿܢ ܕܲܠܘܵܬܹܗ ܡܸܛܠ ܝܘܼܬܼܪ̈ܵܢܹܐ ܕܥܸܠ̈ܠܵܬܼܵܐ: ܕܠܵܐ ܝܑܼܕܲܝܼ̈ܥܵܢ ܒܦܘܼܪ̈ܢܵܤܹܐ ܕܠܵܐ ܓܠܹܝܢ. ܡܵܐ ܕܹܝܢ ܕܓܼܕܲܫ̣: ܕܡ̣ܢ ܥܸܠܬܼܵܐ ܐܲܝܕܵܐ ܕܗ̤ܝ: ܡܸܕܸܡ ܡ̣ܢ ܗܵܠܹܝܢ ܥܵܒܼܘܿܪ̈ܝܵܬܼܵܐ ܢܦܲܠ̣ ܒܐܝܼܕܹܗ ܘܲܩܢ̣ܵܐ ܒܡܲܥܒܿܕܼܵܢܘܼܬܹܗ ܕܗܵܘ̇ ܚܲܟܼܝܼܡ ܠܟܼܠ ܒܝܼ̈ܫܢ: ܒܲܪܫܵܥܬܹܗ: ܪܸܚܡܬܼܵܐ ܕܦܲܓܼܪܵܐ ܡܫܲܪܝܵܐ ܡܸܬܿܬܿܙܝܼܥܵܐ ܒܢܲܦܫܹܗ ܘܚܲܝܹ̈ܐ ܢܓܝܼܪܹ̈ܐ ܡܸܬܼܪܲܥܸܐ: ܘܚܘܼ̈ܫܵܒܹܐ ܕܐܲܝܟܼ ܕܠܲܢܝܵܚܹܗ ܕܦܲܓܼܪܵܐ ܫܵܘܚ̇ܝܼܢ ܒܹܗ ܒܟܼܠܫܵܥ. ܘܐܵܚܹ̇ܕܼ ܠܹܗ ܠܦܲܓܼܪܵܐ: ܕܐܸܢ ܡܲܨܝܵܐ: ܠܵܐ ܢܸܫܬܿܚܸܩ ܒܡܸܕܸܡ. ܘܟܼܠ ܡܸܬܼܦܲܪܲܣ: ܗܵܠܹܝܢ ܕܠܲܢܝܵܚܹܗ ܕܦܲܟܼܪܵܢ ܡܲܨܝܵܐ ܕܢܸܬܼܩܲܝ̈ܡܵܢ. ܘܡܸܬܼܒܲܪܸܐ ܠܹܗ ܡܸܢܵܗ̇ ܕܗܵܝ̇ ܚܹܐܪܘܼܬܼܵܐ ܠܵܐ ܡܫܲܥܒܲܕܬܵܐ ܕܲܠܚܲܕܼ ܡ̣ܢ ܚܘܼ̈ܫܵܒܹܐ ܕܕܸܚܠܬܼܵܐ. ܘܡܸܟܵܐ ܒܟܼܠܗܹܝܢ: ܙܵܘ̈ܥܹܐ ܡܲܥ̈ܒܿܕܼܵܢܹܐ ܕܩܸܢܛܵܐ ܘܥܸܠ̈ܠܵܬܼܵܐ ܕܕܸܚܠܬܼܵܐ ܪܵܢܹܐ ܘܡܸܬܼܚܲܫܲܒܼ. ܒܕܸܐܫܬܲܩܠܲܬ̤ ܡܸܢܹܗ ܠܒܼܝܼܒܼܘܼܬܼܵܐ ܗܵܝ̇ ܕܠܸܒܵܐ: ܕܟܲܕܼ ܡܥܲܠܝ ܗ̄ܘ̣ܵܐ ܡ̣ܢ ܥܵܠܡܵܐ ܒܲܡܤܲܪܩܘܼܬܹܗ: ܩܢܸܐ ܗ̄ܘ̣ܵܐ ܒܢܲܦܫܹܗ. ܘܡܸܛܠ ܕܲܗܘ̤ܵܐ ܝܵܪܘܿܬܼܵܐ ܠܥܵܠܡܵܐ: ܗܵܟܲܢܵܐ ܒܲܟܼܡܵܝܘܼܬܼܵܐ ܕܩܸܢܝܵܢܹܗ ܕܐܲܚܝܼܕܼ: ܐܵܦ ܕܸܚܠܬܼܵܐ ܩܲܒܸܠ̣ ܐܲܝܟܼ ܢܵܡܘܿܤܵܐ ܘܦܘܼܪܢܵܤܵܐ ܕܲܡܛܲܟܲܣ ܡ̣ܢ ܐܲܠܵܗܵܐ. ܐܲܝܢܵܐ ܓܹܝܪ ܓܲܒܵܐ ܕܲܡܛܲܝܼܸܒܼܝܼܢܲܢ ܗܲܕܵܡܲܝ̈ܢ ܠܦܘܼܠܚܵܢܹܥܗ: ܕܝܼܠܹܗ ܗܵܘܹ̇ܝܢܲܢ ܥܲܒܼ̈ܕܹܐ ܒܫܘܼܥܒܵܕܼܵܐ ܕܟܼܠܵܗ̇ ܕܸܚܠܬܼܵܐ: ܐܲܝܟܼ ܡܸܠܬܹܗ ܕܲܫܠܝܼܚܵܐ. ܩܕܼܵܡ ܡܠܗܘܿܢ ܚܲܫܹ̈ܐ: ܪܸܚܡܲܬܼ ܝܵܬܼܵܐ. ܘܲܩܕܼܵܡ ܟܠܗܹܝܢ ܡܝܲܬܿܪ̈ܵܬܼܵܐ: ܕܐ̄ܢܵܫ ܢܒܲܤܲܪ ܥܲܠ ܢܝܵܚܹ̈ܐ. ܕܲܡܬܲܪܤܸܐ ܦܲܓܼܪܹܗ ܒܲܢܝܵܚܹ̈ܐ: ܒܐܲܬܼܪܵܐ ܕܫܲܝܢܵܐ ܢܸܬܼܐܠܸܨ. ܕܡܸܬܼܸܦܲܢܲܩ ܠܲܡ ܒܛܲܠܝܘܼܬܹܗ: ܥܲܒܼܕܵܐ ܢܸܗܘܸܐ. ܘܒܲܐ̄ܚܪܵܝܬܹܗ: ܢܸܬܿܬܲܢܲܚ. ܐܲܝܟܲܢܵܐ ܕܠܵܐ ܡܲܨܝܵܐ pb. 540 ܕܐܲܝܢܵܐ ܕܲܚܒܼܝܼܫ ܪܹܫܹܗ ܠܓܵܘ ܒܥܘܼܒܵܐ ܥܲܒܼܝܵܐ ܕܡܲܝ̈ܵܐ: ܕܲܢܤܘܼܩ ܐܵܐܲܪ ܩܲܛܝܼܢܵܐ ܕܐܲܫܝܼܕܼ ܒܥܘܼܒܵܐ ܗܵܢܵܐ ܤܦܝܼܩܵܐ: ܗܵܟܲܢܵܐ ܠܵܐ ܡܲܨܝܵܐ ܕܐܲܝܢܵܐ ܕܲܥܡܝܼܕܼ ܪܸܥܝܵܢܹܗ ܒܡܲܪܢܝܼܬܼܵܐ ܕܲܬܼܢܵܢ: ܕܲܢܩܲܒܸܠ ܤܵܘܩܵܐ ܕܢܲܦܫܹܗ ܪܓܸܫܬܼܵܐ ܕܗܵܘ̇ ܐܵܐܲܪ ܫܲܦܝܵܐ ܕܥܵܠܡܵܐ ܚܲܕܼܬܼܵܐ. ܐܲܝܟܲܢܵܐ ܕܲܡܒܲܠܒܸܠ ܪܹܚܝܵܐ ܕܤܲܡ ܡܵܘܬܵܐ ܠܤܘܼܙܵܓܼܵܐ ܕܦܲܓܼܪܵܐ: ܗܵܟܲܢܵܐ ܚܙܵܬܼܵܐ ܡܫܲܟܲܪܬܵܐ ܠܫܲܝܢܵܐ ܕܬܲܪܥܝܼܬܼܵܐ. ܐܲܝܟܲܢܵܐ ܕܠܵܐ ܡܲܨܝܵܐ ܕܚܘܼܠܡܵܢܵܐ ܘܟܼܘܼܪܗܵܢܵܐ ܕܢܸܗܘܘܿܢ ܒܝܲܕܼ ܦܲܓܼܪܵܐ: ܘܠܵܐ ܢܸܬܼܚܲܒܲܠ ܚܲܕܼܸ ܡܸܢܗܘܿܢ ܡ̣ܢ ܚܲܒܼܪܹܗ: ܗܵܟܲܢܵܐ ܠܵܐ ܡܲܨܝܵܐ ܕܟܸܤܦܵܐ ܘܚܘܼܒܵܐ ܢܸܗܘܘܿܡ ܒܚܲܕܼ ܒܲܝܬܼܵܐ: ܕܠܵܐ ܢܚܲܒܸܠ ܚܲܕܼ ܡܸܢܗܘܿܢ ܠܚܲܒܼܪܹܗ. ܐܲܝܟܲܢܵܐ ܕܠܵܐ ܡܲܨܝܵܐ ܕܲܬܼܩܵܘܸܐ ܙܓܼܘܿܓܼܝܼܬܼܵܐ ܒܲܫܒܼܵܒܼܘܼܬܼܵܐ ܕܟܹܐܦܵܐ ܘܲܬܼܟܲܬܲܪ ܒܚܘܼܠܡܵܢܵܐ: ܗܵܟܲܢܵܐ ܠܵܐ ܡܲܨܝܵܐ ܕܩܲܕܝܼܫܵܐ ܢܸܗܘܸܐ ܐܲܡܝܼܢ ܡܸܬܼܘܲܥܲܕܼ ܠܲܚܙܵܬܼܵܐ ܘܡܲܡܠܠܵܐ ܕܥܲܡ ܐܲܢ̄ܬܿܬܼܵܐ: ܘܲܬܼܸܟܲܬܲܪ ܕܲܟܼܝܘܼܬܹܗ ܕܠܵܐ ܛܘܼܠܫܵܐ. ܐܲܝܟܲܢܵܐ ܕܡܸܬܼܥܲܩܪܝܼܢ ܐܝܼܠܵܢܹ̈ܐ ܡ̣ܢ ܚܘܼܪ̈ܦܹܐ ܐܲܡܝܼ̈ܢܹܐ ܕܚܹܐ̈ܦܲܝ ܡܲܝ̈ܵܐ: ܗܵܟܲܢܵܐ ܪܸܚܡܬܹܗ ܕܥܵܠܡܵܐ ܡ̣ܢ ܠܸܒܵܐ ܒܚܹܐܦܵܐ ܕܢܸܤܝ̈ܘܿܢܹܐ ܕܥܵܕܹܝܢ ܥܲܠ ܦܲܓܼܪܵܐ. ܐܲܝܟܲܢܵܐ ܕܲܡܕܲܟܹܝܢ ܤܲܡ̈ܡܵܢܹܐ ܡܢܲܦ̈ܨܵܢܹܐ ܟܘܼܡ̈ܘܿ ܒܝܼ̈ܫܹܐ ܡ̣ܢ ܦܲܓܼܪܵܐ: ܗܵܟܲܢܵܐ ܥܘܼܙܵܐ ܕܐܘܼ̈ܠܨܵܢܹܐ ܠܚܲܫܹ̈ܐ ܒܝܼ̈ܫܹܐ ܡ̣ܢ ܠܸܒܵܐ. ܐܲܝܟܲܢܵܐ ܕܠܵܐ ܡܲܨܝܵܐ ܕܢܲܪܓܸܿܫ ܡܝܼܬܼܵܐ ܒܨܸܒܼ̈ܘܵܬܼܵܐ ܕܚܲܝܹ̈ܐ: ܗܵܟܲܢܵܐ ܝܑܼܚܝܼܕܼܵܝܵܐ ܕܲܩܒܼܝܼܪ ܒܓܼܵܘ ܫܸܠܝܵܐ ܐܲܝܟܼ ܕܲܒܼܩܲܒܼܪܵܐ: ܚܤܝܼܟܼܵܐ ܢܲܦܫܹܗ ܡ̣ܢ ܟܝܼܡܘܿܢܵܐ ܕܲܡܥܵܕܼ ܥܵܛܲܪ ܡ̣ܢ ܪܓܸܫܬܼܵܐ ܕܨܸܒܼ̈ܘܵܬܼܵܐ ܕܡܸܬܼܗܲܦ̈ܟܼܵܢ ܒܹܝܬܼ ܒܢܲܝ̈݁ܢܵܫܵܐ. ܐܲܝܟܲܢܵܐ ܕܠܵܐ ܡܲܨܝܵܐ ܕܲܢܟܲܬܲܪ ܕܠܵܐ ܢܸܟܼܝܵܢܵܐ ܐܲܝܢܵܐ ܕܚܵܐܹ̇ܣ ܥܲܠ ܒܥܸܠܕܲܪܹܗ ܒܤܸܕܼܪܹܗ ܕܲܩܪܵܒܼܵܐ: ܗܵܟܲܢܵܐ ܠܵܐ ܡܲܨܝܵܐ pb. 541 ܕܚܵܐܹ̇ܣ ܐܵܓܼܘܿܢܸܤܛܵܐ ܥܲܠ ܦܲܓܼܪܹܗ ܘܬܸܫܬܵܘܙܲܒܼ ܢܲܦܫܹܗ ܡ̣ܢ ܐܲܒܼܕܵܢܵܐ. ܐܲܝܟܲܢܵܐ ܕܡܵܐ ܕܡܸܤܬܲܪܕܼܵܐ ܛܲܠܝܘܼܬܼܵܐ ܡ̣ܢ ܚܸܙ̈ܘܵܢܹܐ ܡܤܲܪ݁ܕܼܵܢܹܐ: ܪܵܗ̇ܛܵܐ ܘܒܲܫ̈ܦܘܿܠܹܐ ܕܐܲܒܼܵܗܹ̈ܝܗ̇ ܡܸܬܼܓܵܘܤܵܐ: ܗܵܟܲܢܵܐ ܘܢܲܦܫܵܐ ܟܠ ܟܡܵܐ ܕܡܸܬܼܠܲܨܵܐ ܡ̣ܢ ܤܘܼܪܵܕܼܵܐ ܕܢܸܤ̈ܝܘܿܢܹܐ: ܚܵܒܼܨܵܐ ܠܘܵܬܼ ܐܲܠܵܗܵܐ ܠܡܸܬܼܓܵܘܵܤܘܼ ܒܲܬܼܟܼܝܼܒܼܘܼܬܼܵܐ ܕܬܲܟܼܫܲܦܬܵܗ̇. ܘܲܟܼܡܵܐ ܕܬܼܵܟܼܒܿܝܼܢ ܢܸܤܝ̈ܘܿܢܹܐ: ܡܲܤܓܝܵܐ ܢܲܟܼܫܲܦܬܼܵܐ. ܘܡܵܐ ܕܐܸܬܼܪܲܘܚܲܬ̤: ܐܸܬܼܐܠܲܫܕܲܬ̤ ܠܵܗ̇ ܒܦܸܗܝܵܐ. ܐܲܝܟܲܢܵܐ ܕܐܲܝܠܹܝܢ ܕܡܸܫܬܲܠܡܝܼܢ ܠܐܝܼ̈ܕܲܝ ܕܲܝܵܢܹ̈ܐ ܠܡܸܬܼܢܲܓܵܕܼܘܼ ܚܠܵܦ ܒܝܼ̈ܫܬܼܗܘܿܢ: ܐܸܢܗܘ̤ ܕܡܸܚܕܼܵܐ ܕܐܸܬܼܩܲܪܲܒܼܘ ܠܢܸܓܼܕܹ̈ܐ: ܡܸܬܼܡܲܟܿܟܼܝܼܢ ܘܒܲܪܫܵܥܬܹܗ ܡܵܘܕܹܝܢ ܒܤܘܼܪ̈ܚܵܢܲܝܗܘܿܢ: ܡ̣ܢ ܢܸܓܼܕܗܘܿܢ ܡܸܬܼܒܲܨܲܪ: ܘܲܒܼܝܲܕܼ ܐܘܼ̈ܠܨܵܢܹܐ ܙܥܘܹܪܹ̈ܐ ܡܸܫܬܵܘܙܒܼܝܼܢ ܩܲܠܝܼܠܵܐܝܼܬܼ. ܐܸܢ ܕܹܝܢ ܐܝܼܬܼ ܒܗܘܿܢ ܕܤܲܟܼܠܝܼܢ ܘܡܸܬܼܩܲܫܹܝܢ: ܥܲܠ ܢܸܓܼܕܲܝ̈ܗܘܿܢ ܡܸܬܿܬܵܘܤܲܦ: ܘܲܠܚܲܪܬܼܵܐ ܕܠܵܐ ܒܨܸܒܼܝܵܢܗܘܿܢ ܡܵܘܕܹܝܢ ܒܵܬܲܪ ܢܸܓܼܕܹ̈ܐ ܤܲܓܝܼ̈ܐܹܐ ܟܲܕܼ ܡܬܲܠܚܝܼܢ ܓܲܒܲܝ̈ܗܘܿܢ: ܘܡܸܕܸܡ ܠܵܐ ܝܵܬܼܪܝܼܢ. ܗܵܟܲܢܵܐ ܐܵܦ ܚܢܲܢ: ܐܸܡܲܬܼܝ ܕܡܸܛܠ ܤܲܟܼ̈ܠܘܵܬܼܵܢ ܕܩܲܢܹܝܢܲܢ ܠܗܹܝܢ ܕܠܵܐ ܬܘܼܪܵܨ: ܡ̣ܢ ܐܝܼ̈ܕܲܝ ܪ̈ܲܚܡܹܐ ܐܲܠܵܗܵܝܹ̈ܐ ܡܸܫܬܲܠܡܝܼܢܲܢ ܠܐܝܼ̈ܕܲܝ ܟܹܐܢܘܼܬܼܵܐ ܕܲܝܵܢܵܐ ܕܟܼܠ: ܘܦܵܩ̇ܕܵܐ ܥܠܲܝܢ ܠܡܸܬܼܡܬܼܵܚܘܼ ܩܕܼܵܡ ܫܲܒܼܛܵܐ ܕܢܸܤ̈ܝܘܿܢܹܐ ܐܲܝܟܼ ܕܠܵܐ ܢܸܬܼܩܲܫܘܿܢ ܢܸܓܼܕܲܝ̈ܢ ܕܬܲܡܵܢ: ܐܸܢ ܒܲܪܫܵܥܬܹܗ ܕܡܸܬܼܩܲܪܲܒܼ ܠܲܢ ܫܲܒܼܛܹܗ ܕܕܲܝܢܵܐ ܡܸܬܼܡܲܟܿܟܼܝܼܢ ܚ̄ܢܲܢ ܘܡܸܬܼܥܲܗܕܝܼܢܲܢ ܤܘܼܪ̈ܚܵܢܲܝܢ: ܘܡܵܘܕܹܝܢܲܢ ܩܕܼܵܡ ܬܵܒܼܘܿܥܵܐ: ܒܝܲܕܼ ܢܸܤ̈ܝܘܿܢܹܐ ܙܥܘܿܪܹ̈ܐ ܡܸܫܬܵܘܙܒܼܝܼܢܲܢ ܩܲܠܝܼܠܵܐܝܼܬܼ. ܐܸܢܕܹܝܢ ܡܸܬܼܩܲܫܹܝܢܲܢ ܒܐܘܼ̈ܠܨܵܢܲܝܢ: ܘܠܵܐ ܡܵܘܕܹܝܢܲܢ ܕܲܚܢܲܢ ܗ̤ܘܲܝܢܲܢ ܥܸܠܬܼܵܐ ܠܗܵܠܹܝܢ ܘܫܵܘܹܝܢܲܢ ܘܐܵܦ ܝܲܬܿܝܼܪ pb. 542 ܡ̣ܢ ܗܵܠܹܝܢ: ܐܸܠܵܐ ܡܸܬܼܥܲܕܿܠܝܼܢܲܢ ܒܲܒܼܢܲܝ̈ܢܵܫܵܐ: ܘܐܝܼܬܼ ܐܸܡܲܬܼܝ ܕܲܒܼܫܹܐܕܹ̈ܐ: ܘܲܒܲܙܲܒܲܢ ܐܵܦ ܒܟܹܐܢܘܼܬܹܗ ܕܐܲܠܵܗܵܐ: ܘܢܲܦܫܲܢ ܙܲܟܵܝܹ̈ܐ ܡܩܝܼܡܝܼܢܲܢ: ܘܲܕܼܠܵܐ ܕܐܲܝܟܼ ܗܵܠܹܝܢ ܐܸܢܘܿܢ ܥ̇ܒܼܵܕܼ̈ܝܢ ܪܵܢܹܝܢܲܢ ܘܐܵܡܪܝܼܢܲܢ. ܘܠܵܐ ܪܵܢܹܝܢܲܢ ܕܐܲܠܵܗܵܐ ܝܲܬܝܼܪ ܡܸܢܲܢ ܡܦܵܣ ܘܝܵܕܲܥ ܠܲܢ: ܘܕܲܒܼܟܼܠܵܗ̇ ܐܲܪܥܵܐ ܐܝܼܬܼܵܘܗܝ ܕܝܼܢܹܗ ܕܡܵܪܝܵܐ: ܘܐ̄ܢܵܫ ܒܸܠܥܵܕܼ ܦܘܼܩܕܵܢܵܘ̈ܗܝ ܠܵܐ ܡܸܬܼܪܕܹܐ: ܟܡܵܐ ܕܐܵܬܹ̇ܐ: ܬܵܟܼ̈ܒܵܢ ܥܵܩ̈ܬܲܢ. ܘܐܘܼܠܨܵܢܲܢ: ܥܵܐܹ̇ܙ. ܘܡ̣ܢ ܚܲܕܼ ܠܚܲܒܼܪܹܗ: ܐܲܝܟܼ ܕܲܒܼܚܲܒܼܠܵܐ ܡܲܫܠܡܝܼܢ ܠܲܢ. ܥܕܲܡܵܐ ܕܢܸܕܲܥ ܢܲܦܫܲܢ ܘܢܸܬܼܡܲܟܲܟܼ: ܘܢܲܪܓܸܫ ܒܲܚܛܵܗܲܝ̈ܢ. ܡܸܛܠ ܕܒܸܠܥܵܕܼ ܕܢܲܪܓܸܫ: ܐܵܦܠܵܐ ܠܬܼܘܼܪܵܨܵܐ ܡܲܨܝܵܐ ܕܢܹܐܬܸܐ. ܘܲܠܚܲܪܬܼܵܐ ܕܲܒܼܝܲܕܼ ܐܘܼ̈ܠܨܵܢܹܐ ܤܲܓܝܼ̈ܐܹܐ ܐܸܬܼܐܠܸܨܢܲܢ: ܗܵܝܕܹܝܢ ܡܵܘܕܼܝܼܢܲܢ ܒܲܚܛܵܗܲܝ̈ܢ: ܬܵܘܕܝܼܬܼܵܐ ܕܠܵܐ ܝܘܼܬܼܪܵܢ. ܟܲܕܼ ܡܸܕܸܡ ܒܘܿܝܵܐܵܐ ܡܸܢܵܗ̇: ܠܵܐ ܗܵܘܹ̇ܐ ܠܲܢ. ܐܵܦ ܗ̤ܝ ܗܵܕܹܐ ܕܢܲܪܓܸܫ ܐ̄ܢܵܫ ܒܲܚܛܵܗܵܘ̈ܗܝ: ܡܵܘܗܲܒܼܬܼܵܐ ܗ̣̄ܝ ܕܡ̣ܢ ܐܲܠܵܗܵܐ ܕܢܵܦ̇ܠܵܐ ܒܬܲܪܥܝܼܬܼܵܐ: ܡܵܐ ܕܲܚ̣ܙܵܐ ܕܐܸܬܿܛܲܪܲܦ ܒܤܲܓܝܼܐܘܼܬܼ ܙܢܵܐ ܕܢܸܤ̈ܝܘܿܢܹܐ: ܐܲܝܟܼ ܕܠܵܐ ܢܹܐܙܲܠ ܒܟܼܠܗܹܝܢ ܗܵܠܹܝܢ ܥܵܩ̈ܬܼܵܐ ܘܐܘܼ̈ܠܨܵܢܹܐ ܕܠܵܐ ܝܘܼܬܼܪܵܢ ܡ̣ܢ ܗܵܢܵܐ ܥܵܠܡܵܐ. ܘܲܕܼܠܵܘ ܡ̣ܢ ܩܲܫܝܘܼܬܼܵܐ: ܐܸܠܵܐ ܡ̣ܢ ܠܵܐ ܝܑܼܕܲܥܬܼܵܐ ܠܵܐ ܡܸܤܬܲܟܿܠܝܼܢ ܗ̣̄ܘܲܝܢ. ܐܝܼܬܼ ܕܐܵܦ ܒܗܘܿܢ ܒܗܵܠܹܝܢ ܡܫܲܢܹܝܢ ܡ̣ܢ ܥܵܠܡܵܐ ܗܵܢܵܐ: ܘܠܵܐ ܡܵܘܕܹܝܢ ܕܚܲܝܵܒܼܝܼܢ: ܐܸܠܵܐ ܡܸܬܼܚܪܹܝܢ ܘܡܸܬܼܥܲܕܿܠܝܼܢ. ܐܲܠܵܗܵܐ ܕܹܝܢ ܡܪܲܚܡܵܢܵܐ: ܚܵܐܲܪ. ܕܐܸܢܗ̤ܘ ܕܡܸܬܼܡܲܟܿܟܼܝܼܢ: ܢܸܫܒܿܘܿܩ ܘܢܲܪܘܲܚ ܐܸܢܘܿܢ. ܘܠܵܘ ܒܲܠܚܘܿܕܼ ܕܢܸܥܒܸܿܕܼ ܠܢܸܤܝܘܿܢܗܘܿܢ ܡܲܦܩܵܢܵܐ: ܐܸܠܵܐ ܕܲܚܛܵܗܲܝ̈ܗܘܿܢ ܢܚܲܤܸܐ: ܒܬܼܵܘܕܝܼܬܼܵܐ ܙܥܘܿܪܬܵܐ ܕܠܸܒܿܗܘܿܢ. ܐܲܝܟܼ ܐ̄ܢܵܫ ܕܲܡܩܲܪܸܒܼ ܩܘܼܪܒܵܢܵܐ ܪܲܒܵܐ ܠܡܲܠܟܵܐ ܘܡܲܩܢܸܐ ܠܘܵܬܹܗ ܐܲܦܹ̈ܐ ܦܨܝܼ̈ܚܵܬܼܵܐ: ܗܵܟܲܢܵܐ pb. 543 ܡܲܢ ܕܐܝܼܬܼ ܠܹܗ ܕܸܡ̈ܥܹܐ ܒܲܨܠܘܿܬܼܵܐ ܩܕܼܵܡ ܐܲܠܵܗܵܐ ܡܲܠܟܵܐ ܪܲܒܵܐ ܕܟܼܠܗܘܿܢ ܥܵܠܡܹ̈ܐ: ܡܲܥܒܲܪ ܟܠܗܹܝܢ ܡܘܼ̈ܫܚܵܬܼܵܐ ܕܲܚܛܵܗܵܘ̈ܗܝ: ܐܵܦ ܩܵܢܹ̇ܐ ܠܘܵܬܹܗ ܐܲܦܹ̈ܐ ܦܨܝܼ̈ܚܵܬܼܵܐ. ܐܲܝܟܼ ܥܸܪܒܵܐ ܓܹܝܪ ܕܲܢܦܲܩ̣ ܡ̣ܢ ܛܝܵܪܵܐ: ܘܲܒܼܦܸܗܝܵܐ ܕܪܸܥܝܹܗ ܐܵܙܹ̇ܠ ܩܵܐܹ̇ܡ ܥܲܠ ܢܸܩܥܵܐ ܕܕܹܐܒܹ̈ܐ: ܗܵܟܲܢܵܐ ܝܑܼܚܝܼܕܼܵܝܵܐ ܕܦܵܪܹܫ ܡ̣ܢ ܐܵܘܝܘܼܬܼܵܐ ܕܚܲܒܼܪ̈ܵܘܗܝ ܒܫܸܡ ܡܵܘܬܿܒܼܵܐ ܝܑܼܚܝܼܕܼܵܝܵܐ: ܘܐܲܡܝܼܢ ܡܸܬܼܘܲܥܲܕܼ ܒܹܝܬܼ ܚܸܙ̈ܘܵܢܹܐ ܘܲܒܼܦܸܗܝܵܐ ܕܒܲܩܪܝܼܬܼܵܐ. ܐܲܝܟܼ ܐ̄ܢܵܫ ܕܲܛܥܝܼܢ ܥܲܠ ܟܲܬܼܦܹܗ ܡܲܪܓܵܢܝܼܬܼܵܐ ܤܲܓܝܼܐܲܬܼ ܕܡܲܝ̈ܵܐ: ܘܐܵܙܹ̇ܠ ܒܐܘܼܪܚܵܐ ܕܐܝܼܬܼ ܥܠܹܝܗ̇ ܛܸܒܵܐ ܤܲܢܝܵܐ: ܘܲܒܼܟܼܠ ܥܸܕܵܢ ܩܲܢܝܼܛ ܡ̣ܢ ܬܲܚܠܘܼܨܵܐ: ܗܵܟܲܢܵܐ ܡܲܢ ܕܲܛܥܝܼܢ ܡܲܪܓܵܢܝܼܬܼܵܐ ܕܢܲܟܼܦܘܼܬܼܵܐ ܘܪܵܕܹܐ ܒܥܵܠܡܵܐ ܐܘܼܪܚܵܐ ܕܲܒܼܥܸܠܕܒܼܵܒܹ̈ܐ: ܥܕܲܡܵܐ ܕܢܸܥܘܿܠ ܠܐܵܘܵܢܵܐ ܕܩܲܒܼܪܵܐ ܕܗ̤ܘܝܘܼ ܐܲܬܼܪܵܐ ܕܬܘܼܟܼܠܵܢܵܐ: ܠܲܝܬܿ ܥܠܹܝܗ̇ ܤܲܒܼܪܵܐ ܕܬܸܬܼܦܲܠܲܛ ܡ̣ܢ ܓܲܝܵܤܹ̈ܐ ܘܒܼܵܙܘܿܙܹ̈ܐ. ܕܲܠܡܵܐ ܡܸܫܟܲܚ ܗܵܘ̇ ܕܠܵܐ ܩܵܢܹ̇ܛ: ܗܵܟܲܢܵܐ ܐܵܦ ܠܵܐ ܗܵܢܵܐ ܝܵܕܲܥ̇݊: ܕܒܲܐܝܢܵܐ ܐܲܬܼܪܵܐ ܘܡ̣ܢ ܐܲܝܟܵܐ ܘܼܒܲܐܝܢܵܐ ܥܸܕܵܢܵܐ ܒܵܠ̇ܩܝܼܢ ܥܠܵܘܗܝ ܡܸܢܫܹܠܝ ܘܲܡܤܲܪܩܝܼܢ ܠܹܗ ܡ̣ܢ ܤܲܒܼܪܹܗ. ܐܝܼܬܼ: ܕܥܲܠ ܬܪܲܥ ܒܲܝܬܹܗ ܡܸܬܼܒܙܸܙ. ܕܐܝܼܬܼܵܘܗܝ: ܙܲܒܼܢܵܐ ܕܤܲܝܒܿܘܼܬܼܵܐ. ܐܲܝܟܼ ܐ̄ܢܵܫ ܕܫܵܬܹ̇ܐ ܚܲܡܪܵܐ ܒܥܸܕܵܢ ܐܸܒܼܠܵܐ ܘܪܵܘܹ̇ܐ: ܘܛܵܥܹ̇ܐ ܠܟܼܠܹܗ ܚܲܫܵܐ ܕܟܹܐܒܹܗ: ܗܵܟܲܢܵܐ ܐܲܝܢܵܐ ܕܪܵܘܹ̇ܐ ܒܚܘܼܒܵܐ ܕܐܲܠܵܗܵܐ ܒܥܵܠܡܵܐ ܗܵܢܵܐ ܕܐܝܼܬܼܵܘܗܝ ܒܹܝܬܼ ܒܵܟܹ̈ܐ: ܛܵܥܹ̇ܐ ܠܟܹܐܒܹܗ ܘܲܠܥܵܩܬܹܗ ܟ̱ܠܵܗ̇: ܘܠܵܐ ܡܲܪܓܫܵܢܵܐ ܗܵܘܹ̇ܐ ܡܸܛܠ ܪܲܘܝܘܼܬܹܗ ܒܟܼܠܗܘܿܢ ܚܲܫܹ̈ܐ ܕܲܚܛܝܼܬܼܵܐ. ܕܲܤܡܝܼܟܼ ܠܸܒܹܗ ܒܤܲܒܼܪܵܐ ܕܥܲܠ ܐܲܠܵܗܵܐ: ܚܲܝܘܲܬܼ ܟܸܢܦܵܐ ܗ̣̄ܝ ܩܲܠܝܼܠܬܼܵܐ ܢܲܦܫܹܗ. ܕܲܒܼܟܼܠܥܸܕܵܢ ܡܕܲܠܲܝ ܗ̄ܘ̣ ܪܸܗܝܵܢܹܗ ܡ̣ܢ ܐܲܪܥܵܐ: ܘܲܠܥܸܠ ܡ̣ܢ ܫܡܲܝܵܐ ܛܵܐܹ̇ܣ ܒܪܸܢܝܵܐ ܕܚܘܼܫܵܒܼܵܘ̈ܗܝ: ܕܐܝܼܬܼ ܠܹܗ pb. 544 ܨܠܘܿܬܼܵܐ ܐܲܡܝܼܢܬܼܵܐ: ܐܲܝܟܼ ܐ̄ܢܵܫ ܕܲܩܢܸܐ ܪܘܼܚܵܐ ܠܲܪܟܼܘܿܒܹܗ: ܕܠܵܐ ܡܲܕܼܪܸܟܼ ܠܹܗ ܒܥܸܠܕܒܼܵܒܹܗ. ܕܟܼܠ ܐܸܡܲܬܼܝ ܕܒܼܵܥܹ̇ܐ: ܦܵܪܲܚ ܠܹܗ ܡ̣ܢ ܨܹܐܕܼܵܘܗܝ. ܐܲܝܟܼ ܐ̄ܢܵܫ ܕܲܩܢܸܐ ܤܢܹܐܓܼܪܵܐ ܒܹܝܬܼ ܕܝܼܢܵܐ: ܗܵܟܲܢܵܐ ܡܲܢ ܕܲܡܪܲܚܸܦ ܥܲܠ ܐܲܠܝܼ̈ܨܹܐ. ܐܲܝܟܼ ܐ̄ܢܵܫ ܕܐܝܼܬܼܵܘܗܝ ܒܩܹܘܲܢܕܹܝܢܘܿܣ ܒܓܼܵܘ ܝܲܡܵܐ ܒܡܲܚܫܘܼ̈ܠܹܐ: ܘܫܵܕܹܐ ܡܵܐܢܵܘ̈ܗܝ ܡ̣ܢ ܐܸܠܦܵܐ: ܗܵܟܲܢܵܐ ܡܲܢ ܕܲܡܒܲܤܲܪ ܥܲܠ ܥܘܼܘܵܟܹ̈ܐ ܒܐܘܼܪܚܵܐ ܗܵܕܹܐ ܕܒܹܝܬܼ ܐܲܠܵܗܵܐ: ܒܥܵܠܡܵܐ ܗܵܢܵܐ ܕܐܝܼܬܼܵܘܗܝ ܝܲܡܵܐ ܚܵܢܘܿܩܵܐ. ܥܘܼܘܵܟܹ̈ܐ: ܠܵܐ ܚܵܤܪܝܼܢ. ܡܵܢܵܐ ܥܵܡܹ̇ܠ ܐܲܢ̄ܬܿ ܒܒܲܝܬܼܵܐ ܕܠܵܐ ܕܝܼܠܵܟܼ؟ ܚܙܵܬܼܵܐ ܕܡܝܼܬܼܵܐ: ܡܲܠܦܵܢܵܐ ܬܸܗܘܸܐ ܠܵܟܼ ܥܲܠ ܡܲܦܲܩܬܵܟܼ ܕܡܸܟܵܐ. ܡܵܢܵܐ ܡܲܤܓܸܐ ܐܲܢ̄ܬܿ ܐܲܤܘܼܪܹ̈ܐ ܠܢܲܦܫܵܟܼ؟ ܐܲܕܼܪܸܟܼ ܚܲܝܲܝ̈ܟ: ܥܲܕܼܠܵܐ ܢܸܚܫܲܟܼ ܢܲܗܝܼܪܵܟܼ: ܘܬܸܒܼܥܸܐ ܥܸܕܼܪܵܐ ܘܠܵܐ ܬܸܫܟܲܚ. ܚܲܝܹ̈ܐ ܗܵܠܹܝܢ: ܠܲܬܼܝܵܒܼܘܼܬܼܵܐ ܝܑܼܗܝܼܒܼܝܼܢ ܠܵܟܼ: ܠܵܐ ܬܒܲܛܸܠ ܐܸܢܘܿܢ ܒܥܸܠ̈ܠܬܼܵܐ. ܙܩܝܼܦܵܐ ܐܝܼܬܼܵܘܗܝ: ܬܲܪܥܵܐ ܕܐ̄ܪ̈ܵܙܹܐ: ܒܗܵܢܵܐ ܬܲܪܥܵܐ ܗܵܘ̇ܝܵܐ ܡܲܥܲܠܬܹܗ ܕܗܵܘܢܵܐ ܠܘܵܬܼ ܝܑܼܕܲܥܬܼܵܐ ܕܐ̄ܪ̈ܵܙܹܐ ܫܡܲܝܵܢܹ̈ܐ. ܝܑܼܕܲܥܬܹܗ ܕܲܙܩܝܼܦܵܐ: ܒܚܲܫܵܘ̈ܗܝ ܕܲܙܩܝܼܦܵܐ ܡܟܲܤܝܵܐ. ܘܐܲܝܟܼ ܫܵܘܬܵܦܘܼܬܼܵܐ ܕܲܒܼܗܘܿܢ: ܗܵܟܲܢܵܐ ܗܵܘ̇ܝܵܐ ܡܲܪܓܫܵܢܘܼܬܼܵܐ ܕܒܹܗ: ܐܲܝܟܼ ܡܸܠܬܹܗ ܕܲܫܠܝܼܚܵܐ. ܟܡܵܐ ܓܹܝܪ ܕܡܸܬܼܝܲܬܿܪܝܼܢ ܒܲܢ ܚܲܫܵܘ̈ܗܝ ܕܲܡܫܝܼܚܵܐ: ܗܵܟܲܢܵܐ ܒܦܸܚܡܗܘܿܢ ܤܵܓܹ̇ܐ ܒܘܼܝܵܐܲܢ ܒܲܡܫܝܼܚܵܐ. ܒܘܼܝܵܐܐ ܩܵܪܹܐ ܠܬܹܐܘܿܪܝܼܵܐ: ܗܵܝ̇ ܕܡܸܬܼܦܲܫܩܵܐ ܚܙܵܬܼܵܐ ܕܢܲܦܫܵܐ. ܚܙܵܬܼܵܐ: ܝܵܠܕܵܐ ܒܘܼܝܵܐܵܐ. ܠܵܐ ܡܸܫܟܿܚܵܐ ܕܬܲܫܘܲܚ ܢܲܦܫܲܢ ܦܹܐܪܹ̈ܐ ܕܪܘܼܚ: ܐܸܠܵܐ ܟܲܕܼ ܢܸܗܘܸܐ ܠܸܒܲܢ ܡܝܼܬܼܵܐ ܠܥܵܠܡܵܐ. ܐܲܒܼܵܐ ܠܲܡ ܠܢܲܦܫܵܐ ܕܡܝܼܬܲܬ̤ ܡܵܘܬܹܗ ܕܲܡܫܝܼܚܵܐ: ܡܩܝܼܡ ܠܵܗ̇ ܒܬܹܐܘܿܪܝܼܵܐ ܕܟܼܠܗܘܿܢ ܥܵܠܡܹ̈ܐ. ܘܲܐ̄ܚܪܹܬܼܵܐ. ܐܸܠܵܐ ܠܲܡ ܡܵܐܹ̇ܬܼ ܐܲܢ̄ܬܿ ܠܥܵܠܡܵܐ: ܠܵܐ ܡܸܬܼܢܲܚܲܡ pb. 545 ܒܵܟܼ ܐܵܕܼܵܡ ܪܘܼܚܵܢܵܐ. ܡܵܐ ܠܲܡ ܓܹܝܪ ܕܡܵܐܹ̇ܬܼ ܒܲܪܢܵܫܵܐ ܒܲܕܼܒܼܝܼܚܘܼܬܼܵܗ ܪܘܼܚܵܢܵܝܬܼܵܐ ܠܟܼܠܹܗ ܗܘܼܦܵܟܼܵܐ ܕܥܘܼܡܪܵܐ ܗܵܢܵܐ: ܘܐܲܓܼܥܸܠ ܚܲܝܵܘ̈ܗܝ ܠܚܲܝܹ̈ܐ ܕܒܼܵܬܲܪ ܢܘܼܚܵܡܵܐ: ܫܵܟܼܢܵܐ ܥܠܵܘܗܝ ܛܲܝܒܿܘܼܬܼܵܐ. ܘܕܼܘܼܒܵܪܹܗ: ܡܸܬܼܝܲܚܲܠ ܒܪܘܼܚ. ܘܡܵܐ ܕܲܤܢܵܝܗܝ ܠܥܵܠܡܵܐ: ܗܵܝܕܹܝܢ ܡܲܪܓܸܫ ܒܗܵܘ̇ ܕܘܼܒܵܪܵܐ ܕܒܲܪܢܵܫܵܐ ܚܲܕܼܬܼܵܐ: ܕܪܵܡ ܡ̣ܢ ܨܵܐܘܼܬܹܗ ܕܥܘܼܡܪܵܐ ܐ̄ܢܵܫܵܝܵܐ: ܘܡܸܫܬܿܘܸܐ ܠܓܸܠܝܵܢܹ̈ܐ ܐܲܠܵܗܵܝܹ̈ܐ. ܠܵܐ ܡܸܫܟܿܚܵܐ ܕܢܸܗܘܸܐ ܐܝܼܬܲܝܢ ܒܓܼܵܘܹܗ ܕܥܵܠܡܵܐ ܡܝܼ̈ܬܹܐ ܠܥܵܠܡܵܐ: ܟܡܵܐ ܕܬܲܪܥܝܼܬܲܢ ܨܵܒܼ̇ܝܵܐ ܒܲܢܝܵܚܹ̈ܐ: ܘܥܵܠܡܵܐ ܒܝܲܕܼ ܨܸܒܼ̈ܘܵܬܹܗ ܤܝܼܡ ܩܕܼܵܡ ܪܸ̈ܓܼܫܲܝܢ: ܘܲܠܥܘܼܗܕܵܢܵܐ ܒܝܲܕܼ ܪܓܸܫܬܼܵܐ ܡܚܲܕܸܬܼ: ܘܲܡܥܝܼܪ ܠܦܲܓܼܪܵܐ ܠܘܵܬܼ ܒܥܵܬܹܗ: ܒܝܲܕܼ ܩܲܪܝܼܒܼܘܼܬܼܵܐ ܕܥܲܡܗܹܝܢ: ܒܝܲܕܼ ܚܙܵܬܼܵܐ ܘܫܸܡܥܵܐ ܘܓܸܫܬܼܵܐ ܘܲܡܪܝܼܚܵܢܘܼܬܼܵܐ ܘܚܸܟܵܐ. ܘܡܝܼܬܼܘܼܬܼܵܐ ܕܢܲܦܫܵܐ ܡ̣ܢ ܥܵܠܡܵܐ ܐܝܼܬܹܝܗ̇: ܤܦܝܼܩܘܼܬܼܵܐ ܕܠܸܒܵܐ ܡ̣ܢ ܪܸܢܝܵܐ ܕܥܘܼܗܕܵܢܵܘ̈ܗܝ: ܘܲܚܤܝܼܟܼܘܼܬܼܵܐ ܕܢܲܦܫܵܐ ܡ̣ܢ ܚܘܼ̈ܫܵܒܹܐ ܕܨܸܒܼ̈ܘܵܬܹܗ: ܘܲܦܤܵܩܵܐ ܕܨܸܒܼܝܵܢܵܐ ܡ̣ܢ ܪܸܚܡܬܼܵܐ ܕܡܲܚܫܲܒܼܬܼܵܐ ܕܲܒܼܗܹܝܢ. ܠܵܐ ܓܹܝܪ ܡܲܨܝܵܐ ܕܢܸܗܘܸܐ ܠܸܒܲܢ ܒܫܲܝܢܵܐ ܕܪܵܡ ܡ̣ܢ ܕܠܘܼܚܝܵܐ: ܘܲܒܼܫܲܦܝܘܼܬܼܵܐ ܕܚܘܼܒܵܐ ܕܥܸܠܵܝܵܐ ܡ̣ܢ ܥܵܠܡܵܐ: ܟܲܕܼ ܡܸܬܼܢܲܤܟܝܼܢ ܒܓܼܵܘܹܗ ܥܘܼ̈ܗܕܵܢܹܐ ܡܚܲܕܬܼܵܢܹ̈ܐ ܡ̣ܢ ܦܸܓܼܥܹ̈ܐ ܕܨܸܒܼ̈ܘܵܬܼܵܐ ܒܝܲܕܼ ܪܸ̈ܓܼܫܹܐ ܡܩܲܒܿܠܵܢܲܝ̈ܗܹܝܢ. ܠܵܐ ܡܸܬܼܩܲܢܝܵܐ ܡܝܼܬܼܘܼܬܼ ܢܲܦܫܵܐ ܕܡ̣ܢ ܥܵܠܡܵܐ: ܐܸܠܵܐ ܐܸܡܲܬܼܝ ܕܐܵܦ ܦܲܓܼܪܵܐ ܗܘ̤ܵܐ ܠܗܲܠ ܡ̣ܢ ܪܓܸܫܬܼܵܐ ܘܲܚܙܵܬܼܵܐ ܕܨܸܒܼ̈ܘܵܬܼܵܐ.