Discourse 81

ܫܲܦܝܼܪ ܡ̣ܢ ܐܹܘܲܢܓܲܠܝܼܘܿܢ ܕܘܼܡܝܵܐ ܐܲܝܬܝܼܬܿ ܘܦܘܼܚܵܡܵܐ ܡܒܲܚܢܵܢܵܐ ܠܕܼܘܼܒܵܪܵܐ ܪܲܒܵܐ ܕܫܸܠܝܵܐ: ܐܲܝܟܼ ܗܵܘ̇ ܕܲܚܢܲܢ ܠܘܼܩܒܲܠ ܗܵܕܹܐ ܩܵܝ̇ܡܝܼܢܲܢ: ܐܵܘ ܗܵܡ̇ܤܝܼܢܲܢ ܠܡܸܫܪܝܵܗ̇ ܐܲܝܟܼ ܕܲܠܡܸܕܸܡ ܝܲܬܝܼܪܵܐ. ܡܵܪܲܢ ܠܲܡ: ܠܲܡܪܲܚܡܵܢܘܼܬܼܵܐ ܬܲܚܸܡ̣ ܠܕܼܵܡܝܘܼܬܼܵܐ ܕܲܠܘܵܬܼ ܐܲܒܼܵܐ ܠܡܸܬܼܩܲܪܵܒܼܘܼ ܠܓܼܵܡܘܿܪܹ̈ܝܗ̇. ܫܲܪܝܼܪܵܐ ܗܵܕܹܐ. ܘܐܵܦܵܠܵܐ ܚܢܲܢ ܝܑܼܚܝܼ̈ܕܼܵܐ: ܠܫܸܠܝܵܐ ܒܸܠܥܵܕܼ ܡ̣ܢ ܡܪܲܚܡܵܢܘܼܬܼܵܐ ܡܝܲܩܪܝܼܢܲܢ. ܟܲܕܼ ܡ̣ܢ ܨܸܦܬܼܵܐ ܘܲܫܓܼܘܼܫܝܵܐ ܟܡܵܐ ܕܡܲܨܝܵܐ: ܕܢܲܪܚܸܩ ܡܸܬܼܚܲܦܛܝܼܢܲܢ. ܠܵܘ ܕܠܘܼܩܒܲܠ ܐܵܢܲܢ̈ܩܵܝܬܼܵܐ ܢܩܘܼܡ ܐܸܡܲܬܼܝ ܕܥܵܪ̈ܨܵܢ: ܐܸܠܵܐ ܝܵܨ̇ܦܝܼܢܲܢ ܕܫܸܠܝܵܐ: ܡܸܛܠ ܕܲܒܼܥܸܢܝܵܢܵܐ ܝܑܼܚܝܼܕܼܵܝܵܐ ܠܘܵܬܼ ܐܲܠܵܗܵܐ ܢܸܬܼܐܡܸܢ. ܕܒܹܗ ܝܲܬܿܝܼܪ ܡܲܨܝܵܐ ܕܢܸܨܛܲܠܲܠ ܡ̣ܢ ܕܠܝܼܚܘܼܬܼܵܐ: ܘܲܠܘܵܬܼ ܒܗܝܼܠܘܼܬܼܵܐ ܕܗܵܘܢܵܐ ܢܸܬܼܩܲܪܲܒܼ ܐܵܦܸܢ ܚܕܼܵܐ ܠܲܟܼܡܵܐ. ܘܐܸܡܲܬܼܝ ܕܐܲܠܨܲܬ̤: ܐܵܦܠܵܐ ܡ̣ܢ ܗܵܝ̇ ܡܲܗܡܹܝܢܲܢ. ܟܲܕܼ ܥܵܨܝܼܢܲܢ ܢܲܦܫܲܢ ܐܲܡܝܼܢܵܐܝܼܬܼ: ܕܢܸܗܘܸܐ ܡܠܹܝܢܲܢ ܒܟܼܠܙܒܲܢ ܡ̣ܢ ܠܓܼܵܘ ܪ̈ܲܚܡܹܐ ܥܲܠ ܟܠ ܟܝܵܢ ܕܲܡܠܝܼ̈ܠܹܐ. ܗܵܟܲܢܵܐ ܓܹܝܪ ܦܵܩ̇ܕܵܐ ܡܲܠܦܵܢܘܼܬܹܗ ܕܡܵܪܲܢ: ܘܗܵܢܵܘ ܦܘܼܪܫܵܢܵܐ ܕܫܸܠܝܲܢ: ܘܠܵܘ ܕܫܸܓܼܡܵܐ. ܟܲܕܼ ܘܠܵܗ̇ pb. 567 ܠܗܵܝ̇ ܕܡ̣ܢ ܠܓܼܵܘ: ܐܸܡܲܬܼܝ ܕܥܵܢܹ̇ܐ ܙܲܒܼܢܵܐ ܠܲܥ̇ܒܼܵܕܼܵܐ ܘܐܵܢܲܢܩܹܐ ܕܨܸܒܼ̈ܘܵܬܼܵܐ: ܐܵܦܠܵܐ ܐ̄ܢܵܫ ܡܸܢܲܢ ܡܲܗܡܸܐ: ܡ̣ܢ ܕܲܒܼܤܘܼܥܪ̈ܵܢܹܐ ܢܚܵܘܸܐ ܚܘܼܒܹܗ ܓܲܠܝܵܐܝܼܬܼ. ܝܲܬܿܝܼܪܵܐܝܼܬܼ: ܐܲܝܠܹܝܢ ܕܲܠܫܸܠܝܵܐ: ܠܵܘ ܒܲܬܼܚܘܼܡܵܐ ܕܲܠܓܼܡܵܪ ܚܪܲܩ̣ܘ ܥܲܠ ܢܲܦܫܗܘܿܢ. ܘܲܕܼܠܵܐ ܢܸܦܓܥܘܼܢ ܒܐ̄ܢܵܫ: ܐܸܠܵܐ ܒܩܵܢܘܿܢܵܐ ܕܫܲܒܹ̈ܐ ܘܲܕܼܫܵܒܼ̈ܘܿܥܹܐ ܐܝܼܬܼܵܘܗܝ ܠܗܘܿܢ ܫܸܠܝܵܐ. ܐܲܝܠܹܝܢ ܓܹܝܪ ܕܐܲܝܟܼ ܗܵܠܹܝܢ: ܡ̣ܢ ܤܘܼܥܪܵܢܹܐ ܘܪ̈ܲܚܡܹܐ ܕܲܠܘܵܬܼ ܩܲܪܝܼܒܼܵܐ: ܐܲܦܠܵܐ ܡܸܨܥܲܬܼ ܬܚܘܼ̈ܡܹܐ ܕܩܵܢܘܿܢܗܘܿܢ ܠܲܡܫܲܠܵܡܘܼ ܩܵܦ̇ܤܝܼܢ ܗ̄ܘ̣ܵܘ ܢܲܦܫܗܘܿܢ. ܐܸܠܵܐ ܐܸܢ ܐܝܼܬܼ ܐܲܝܢܵܐ ܕܲܚܪܸܡ ܤܲܓܼܝܼ: ܘܠܘܼܩܒܲܠ ܐܲܦܵܘ̈ܗܝ ܘܲܠܥܹܝܢ ܒܢܲܝ̈ܢܵܫܵܐ ܫܸܠܝܵܐ ܐܲܚܝܼܕܼ. ܒܗܵܝ̇ ܕܝܵܕܼܥܝܼܢܲܢ: ܕܒܸܠܥܵܕܼ ܡ̣ܢ ܚܘܼܒܵܐ ܕܩܲܪܝܼܒܼܵܐ: ܐܦܵܠܵܐ ܗܵܘܢܵܐ ܡܸܫܟܲܚ ܒܥܸܢܝܵܢܵܐ ܘܚܘܼܒܵܐ ܐܲܠܵܗܝܵܐ ܠܡܸܬܼܬܼܢܗܵܪܘܼ. ܘܒܲܕܼܓܼܘܿܢ ܡܲܢ̣ܘܼ ܡ̣ܢ ܝܑܼܚܝܼ̈ܕܼܵܝܹܐ ܚܲܟܿܝܼ̈ܡܹܐ: ܕܟܲܕܼ ܐܝܼܬܼ ܠܹܗ ܡܵܙܘܿܢܵܐ ܘܲܠܒܼܘܼܫܵܐ: ܚ̣ܙܵܐ ܠܩܲܪܝܼܒܹܗ ܕܲܟܼܦܸܢ ܘܲܫܠܝܼܚ: ܘܚܲܡܤܸܢ ܕܢܸܚܤܘܿܟܼ ܡܸܢܹܗ؟ ܐܵܘ ܡܲܢ̣ܘܼ: ܕܟܲܕܼ ܒܲܪ ܒܸܤܪܹܗ ܟܪܝܼܗ ܘܲܡܛܲܪܲܦ ܘܚܲܤܝܼܪ ܡ̣ܢ ܤܵܥܘܿܪܹ̈ܐ: ܗ̤ܘ ܡܸܛܠ ܪܸܚܡܲܬܼ ܫܸܠܝܵܐ ܩܵܢܘܿܢܵܐ ܕܲܚܒܼܘܼܫܹܝܗ ܝܲܬܝܼܪ ܡ̣ܢ ܚܲܝܹ̈ܐ ܕܩܲܪܝܼܒܹܗ؟ ܐܲܝܟܵܐ ܕܹܝܢ ܕܨܸܒܼ̈ܘܵܬܼܵܐ ܕܐܲܝܟܼ ܗܵܠܹܝܢ ܠܵܐ ܩܲܪ̈ܝܼܒܼܵܢ: ܒܗܵܘܢܵܐ ܢܵܛܪܝܼܢܲܢ ܠܚܘܼܒܵܐ ܘܲܠܪ̈ܲܚܡܹܐ ܕܲܠܘܵܬܼ ܩܲܪܝܼܒܼܵܐ. ܐܸܡܲܬܼܝ ܕܹܝܢ ܕܤܘܼܥܪܵܢܵܐ ܩܲܪܝܼܒܼ: ܐܵܦ ܕܒܲܥ̇ܒܼܵܕܼܵܐ ܢܸܓܼܡܘܿܪ: ܡܲܠܝܵܐܝܼܬܼ ܬܵܒܲܥ ܡܸܢܲܢ ܐܲܠܵܗܵܐ. ܝܑܼܕܼܝܼܥܵܐ ܗ̣̄ܝ ܓܹܝܪ: ܕܐܸܢ ܠܵܐ ܩܢܹܝܢܲܢ ܡܸܕܸܡ: ܠܵܐ pb. 568 ܡܲܦܲܣ ܠܲܢ ܠܡܸܦܓܲܥ ܒܨܸܦܬܼܵܐ ܘܲܫܓܼܘܼܫܝܵܐ ܡܸܛܠ ܡܸܤ̈ܟܹܢܹܐ. ܐܸܠܵܐ ܡ̣ܢ ܗܵܠܹܝܢ ܕܐܝܼܬܼ ܠܲܢ ܡܸܬܿܬܲܒܼܥܝܼܢܲܢ. ܘܐܸܢ ܬܘܼܒܼ ܡܲܒܼܥܕܼܝܼܢܲܢ ܒܕܼܘܼܝܵܪܵܐ ܡ̣ܢ ܝܲܬܼܒܵܐ ܕܲܒܼܢܲܝ̈ܢܵܫܵܐ: ܘܡ̣ܢ ܚܘܼܠܛܵܢܵܐ ܘܲܚܙܵܬܼܵܐ ܕܐ̄ܢܵܫܵܐ: ܠܵܐ ܡܸܬܼܒܿܥܸܐ ܠܲܢ ܠܡܸܫܒܲܩ ܟܘܼܪܚܲܢ ܘܡܵܘܬܿܒܲܢ ܡܫܵܘܚܕܼܵܐ ܘܲܠܚܘܿܕܼܵܝܵܐ: ܘܢܸܬܸܠ ܢܲܦܫܲܢ ܕܢܸܦܘܿܩ ܢܸܦܗܸܐ ܒܥܵܠܡܵܐ: ܠܡܸܤܥܲܪ ܟܪ̈ܝܼܗܹܐ ܘܲܠܡܸܥܢܵܐ ܒܤܘܼܥܪ̈ܵܢܹܐ ܕܐܲܝܟܼ ܗܵܠܹܝܢ. ܝܑܼܕܼܝܼܥܵܐ ܗ̣̄ܝ ܓܹܝܪ: ܕܡ̣ܢ ܪܲܒܿܘܼܬܼܵܐ ܠܲܒܼܨܝܼܪܘܼܬܼܵܐ ܐܵܬܹ̇ܐ ܡܲܢ ܕܐܲܝܟܼ ܗܵܢܵܘ. ܐܸܢܕܹܝܢ ܒܥܘܼܡܪܵܐ ܗ̄ܘ̣ ܕܤܲܓܝܼ̈ܐܹܐ: ܘܩܲܪܝܼܒܼ ܠܲܒܼܢܲܝ̈ܢܵܫܵܐ ܒܡܵܘܬܿܒܼܵܐ ܐܲܡܝܼܢܵܐ ܕܥܲܡܗܘܿܢ: ܘܡܸܬܿܬܿܢܝܼܚ ܐܵܦ ܒܠܹܐܘܬܼܵܐ ܕܲܐ̄ܚܪ̈ܵܢܹܐ: ܒܲܙܒܲܢ ܚܘܼܠܡܵܢܹܗ ܘܲܒܼܟܼܘܼܪܗܵܢܹܗ: ܗ̤ܝ ܗܵܕܹܐ ܕܐܵܦ ܗ̤ܘ ܢܸܤܥܘܿܪ ܡܸܬܿܬܲܒܼܥܵܐ ܠܹܗ: ܘܠܵܘ ܕܗ̤ܘ ܡ̣ܢ ܐ̄ܚܪ̈ܵܢܹܐ ܡܲܠܝܵܐܝܼܬܼ ܬܵܒܲܥ. ܡܵܐ ܕܲܚ̣ܙܵܐ ܕܹܝܢ ܠܒܲܪ ܒܸܤܪܹܗ ܘܒܲܪ ܐܸܤܟܹܡܹܗ ܕܐܲܠܝܼܨ: ܡܵܠܘܿܢ ܘܠܲܡܫܝܼܚܵܐ ܟܲܕܼ ܫܕܸܐ ܘܡܸܬܿܛܲܪܲܦ: ܥܵܪܹܩ ܘܡܸܤܬܲܬܲܪ: ܟܲܕܼ ܡܗܲܓܸܓܼ ܫܸܠܝܵܐ ܕܲܓܵܠܵܐ. ܡܲܢ ܕܐܲܝܟܼ ܗܵܢܵܘ ܓܹܝܪ: ܗܵܢܵܐ ܕܠܵܐ ܪ̈ܲܚܡܝܼܢ ܗ̄ܘ̣. ܠܵܐ ܬܲܝܬܸܿܐ ܠܝܼ ܠܥܘܼܗܕܵܢܵܐ ܠܬܹܐܒܼܵܝܵܐ ܝܘܿܚܲܢܵܢ: ܘܠܲܐܪܤܵܢܝܼܣ ܘܲܠܕܲܐܟܼܘܵܬܹܗ. ܕܡܲܢ̣ܘܼ ܠܲܡ ܕܲܠܤܘܼܥܪ̈ܵܢܹܐ ܕܐܲܝܟܼ ܗܵܠܹܝܢ ܝܲܗ̣̄ܒܼ ܢܲܦܫܹܗ: ܐܵܘ ܝܑܼܨܸܦ̣ ܕܲܟܼܪ̈ܝܼܗܹܐ ܐܵܘ ܕܡܸܤ̈ܟܹܢܹܐ: ܘܲܒܼܤ̣ܵܐ ܒܫܸܠܝܵܐ؟ ܠܵܐ ܬܸܬܼܩܲܪܲܒܼ ܠܫܲܪ̈ܒܹܐ ܕܗܵܢܘܿܢ. ܐܸܢ ܓܹܝܪ ܐܝܼܬܲܝܟ ܪܲܚܝܼܩ ܡ̣ܢ ܟ̱ܠܹܗ ܢܝܵܚܵܐ ܘܦܸܓܼܥܵܐ ܕܐ̄ܢܵܫܵܐ ܬܲܟܼܘܵܬܼܗܘܿܢ: ܡܲܦܲܣ ܠܵܟܼ ܠܡܸܒܼܤܵܐ ܒܕܲܐܝܟܼ ܗܵܠܹܝܢ. ܐܸܢ ܕܹܝܢ ܡ̣ܢ ܗܵܝ̇ ܕܲܓܼܡܝܼܪܹ̈ܐ pb. 569 ܪܲܚܝܼܩ ܐܲܢ̄ܬܿ: ܒܲܬܼܥܵܫܹ̈ܐ ܕܹܝܢ ܕܦܲܓܼܪܵܐ ܘܥܸܢܝܵܢܹ̈ܐ ܒܟܼܠܙܒܲܢ ܐܝܼܬܲܝܟ: ܠܡܵܢܵܐ ܒܵܤܹ̇ܐ ܐܲܢ̄ܬܿ ܒܦܘܼܩܕܵܢܵܐ ܕܐܲܝܟܼ ܡܫܘܼܚܬܼܵܟܼ܆ ܟܲܕܼ ܡܸܬܼܓܵܘܲܣ ܐܲܢ̄ܬܿ ܒܕܼܘܼܒܵܪܵܐ ܪܲܒܵܐ ܕܩܲܕܝܼ̈ܫܹܐ ܕܠܹܗ ܠܵܐ ܦܲܪܝܼܒܼ ܐܲܢ̄ܬܿ؟ ܐܸܢܵܐ ܕܹܝܢ: ܐܵܦܠܵܐ ܕܐܲܝܬܸܐ ܠܥܘܼܗܕܵܢܵܐ ܠܗܵܝ̇ ܕܡܵܩܵܪܝܼܣ ܪܲܒܵܐ ܡܲܗܡܸܐ ܐ̄ܢܵܐ: ܕܐܲܝܟܼ ܕܲܠܡܲܪܤܵܢܘܼܬܼܵܐ ܕܐܲܝܠܹܝܢ ܕܒܼܵܤܹ̇ܝܢ ܥܲܠ ܐܲܚܲܝ̈ܗܘܿܢ ܪܫܝܼܡܵܐ. ܕܐܸܙܲܠ̣ ܒܲܙܒܲܢ ܕܢܸܤܥܘܿܪ ܠܐ̄ܢܵܫ ܐܲܝܢܵܐ ܕܲܟܼܪܝܼܗ ܗ̄ܘ̣ܵܐ. ܘܟܲܕܼ ܫܲܐܠܹܗ ܕܐܸܢ ܡܸܕܸܡ ܪܵܓܵܐ ܠܹܗ: ܐܸܡ݂ܲܪ ܠܹܗ: ܩܲܠܝܼܠ ܠܲܚܡܵܐ ܪܼܲܓܼܝܵܐ ܒܵܥܹ̇ܐ ܐ̄ܢܵܐ. ܡܸܛܠ ܕܗܵܢܘܿܢ ܝܑܼܚܝܼ̈ܕܵܪܝܵܐ: ܠܲܚܡܵܐ ܕܟܼܠܵܗ̇ ܫܲܢ̄ܬܼܵܐ ܐܵܦܹ̇ܝܢ ܗ̄ܘ̣ܵܘ: ܐܲܝܟܼ ܕܲܒܼܤܘܿܓܼܵܐܐ. ܗܵܟܲܢ ܐܝܼܬܼܵܘܗܝ ܗ̄ܘ̣ܵܐ ܥܝܵܕܼܵܐ ܕܐܲܬܼܪ̈ܵܘܵܬܼܵܐ ܗܵܠܹܝܢ. ܘܐܸܙܲܠ̣ ܗܵܘ̇ ܒܲܪܢܵܫܵܐ ܫܵܘܹ̇ܐ ܠܛܘܼ̈ܒܹܐ: ܓܲܒܼܪܵܐ ܒܲܪ ܬܸܫܥܝܼܢ ܫܢ̈ܝܼܢ: ܡ̣ܢ ܐܸܤܩܹܛܝܼܣ ܠܐܵܠܹܟܲܢܕܪܝܼܵܐ ܡܕܼܝܼܢ̄ܬܼܵܐ: ܐܲܪܒܿܥܝܼܢ ܡܝܼ̈ܠܹܐ ܘܝܲܬܝܼܪ: ܟܲܕܼ ܪܡܸܐ ܠܲܚܡܵܐ ܝܲܒܿܝܼܫܵܐ ܒܫܘܿܫܸܦܵܐ. ܘܚܲܠܸܦ̣ [؟]ܐܲܝܬܝܼ ܠܹܗ ܠܲܟܼܪܝܼܗܵܐ ܗܵܘ̇ ܡܸܕܸܡ ܕܲܒܼܥ̣ܵܐ. ܐܸܠܵܐ ܕܹܝܢ ܘܐܵܦ ܕܪܲܒܵܐ ܡ̣ܢ ܗܵܕܹܐ ܥ̣ܒܲܕܼ ܐ̄ܚܪܹܢܵܐ ܒܲܪ ܦܸܚܡܹܗ ܕܗܵܢܵܐ: ܐܵܓܼܵܬܘܿܢ ܐ̄ܢܵܫ: ܒܚܝܼܪܵܐ ܕܟܼܠܗܘܿܢ ܝܑܼܚܝܼܕܼܵܝܹܐ ܕܗܵܝܕܹܝܟܼ: ܓܲܒܼܪܵܐ ܕܝܲܬܝܼܪ ܡ̣ܢ ܟܠܢܵܫ ܠܫܸܠܝܵܐ ܘܫܸܬܼܩܵܐ ܡܲܝܲܩܲܪ ܗ̄ܘ̣ܵܐ. ܗܵܢܵܐ ܐܸܙܲܠ̣ ܒܲܙܒܲܢ ܠܚܲܓܵܐ: ܕܲܢܙܲܒܸܢ ܥ̇ܒܼܵܕܼ ܐܝܼܕܼܵܘ̈ܗܝ. ܘܐܸܫܟܲܚ ܐ̄ܢܵܫ ܐܲܟܼܤܢܵܝܵܐ: ܕܲܪܡܸܐ ܒܫܘܼܩܵܐ ܘܲܟܼܪܝܼܗ. ܘܐܸܓܲܪ ܒܲܝܬܼܵܐ: ܘܩ̣ܵܘܝܼ ܠܘܵܬܹܗ: ܟܲܕܼ ܦܵܠܲܚ ܒܐܝܼܕܼܵܘ̈ܗܝ: ܘܡܲܦܸܩ ܥܠܵܘܗܝ: ܘܝܵܗܹ̇ܒܼ ܐܲܓܲܪ ܒܲܝܬܼܵܐ. ܘܲܡܫܲܡܸܫ ܠܹܗ ܙܲܒܼܢܵܐ ܕܸܫܬܼܵܐ ܝܲܪ̈ܚܝܼܢ: ܥܕܲܡܵܐ ܕܐܸܬܼܚܠܸܡ ܟܲܪܝܼܗܵܐ ܗܵܘ̇. ܗܵܢܵܐ ܕܹܝܢ: ܐܲܝܟܼ ܕܡܸܫܬܲܥܝܵܐ ܬܲܫܥܝܼܬܼܵܐ: ܐܵܡܲ݁ܪ ܗ̄ܘ̣ܵܐ: ܕܒܼܵܥܹ̇ܐ ܗ̄ܘܹ̇ܝܬܼ ܕܐܸܫܟܲܚ ܐܼܲܪܝܵܢܵܐ: ܘܐܸܬܸܠ ܠܹܗ ܦܲܓܼܪܝ: pb. 570 ܘܐܸܫܩܘܿܠ ܕܝܼܠܹܗ. ܗܵܐ ܚܘܼܒܵܐ ܡܫܲܡܠܝܵܐ: ܢܸܬܿܕܲܡܸܐ ܠܐܲܒܼܵܗܲܝ̈ܢ: ܕܢܸܫܬܿܘܸܐ ܠܛܲܝܒܿܘܼܬܼܵܐ ܐܲܟܼܘܵܬܼܗܘܿܢ. ܠܕܼܵܚ̈ܠܲܝ ܐܲܠܵܗܵܐ ܡܲܢ ܚܲܒܿܝܼ̈ܒܲܝ: ܕܠܵܐ ܥܘܼܤܵܩ ܡܸܬܼܝܼܨܸܦ ܐܘܼܟܼܦܵܢܵܐ ܕܲܢܛܘܼܪܲܬܼ ܦܘܼܩܕܼܵܢܵܘ̈ܗܝ ܕܡܵܪܲܢ: ܐܵܦܸܢ ܘܲܒܼܥܲܡ̈ܠܹܐ ܢܵܦ̇ܠܵܐ ܒܐܝܼܕܲܝ̈ܗܘܿܢ ܫܟܼܵܚܬܵܗ̇: ܘܩܹܘܲܢܕܹܝܢܘܿܣ ܡܸܤܬܲܒܼܪܵܐ ܥܲܠ ܐܲܦܹ̈ܝܗ̇. ܐܸܤ݂ܲܪ ܕܹܝܢ ܫܘܼܡܠܵܝܗܘܿܢ ܘܲܬܼܠ̣ܵܝܗܝ ܡܫܝܼܚܵܐ: ܒܲܬܼܪܹܝܢ ܦܘܼ̈ܩܕܵܢܹܐ ܐܲܚܝܼ̈ܕܲܝ ܤܵܟܼܵܐ ܕܟܼܠܗܘܿܢ. ܪܸܚܡܬܼܵܐ ܐܵܡܲ݁ܪ ܐ̄ܢܵܐ ܕܐܲܠܵܗܵܐ: ܘܕܼܘܼܡܝܵܐ ܐܲܩܢܝܵܗ̇ ܕܗܵܕܹܐ: ܚܘܼܒܵܐ ܕܲܠܘܵܬܼ ܨܲܠܡܹܗ. ܘܩܲܕܼܸܡܵܝܬܼܵܐ ܩܲܢܝܵܐ: ܢܝܼܫܵܐ ܕܬܹܐܪܘܼܝܼܵܐ ܕܪܘܼܚ: ܕܬܲܪܬܹܝܢ ܕܹܝܢ: ܕܬܹܐܘܿܪܝܼܵܐ ܘܤܵܥܘܿܪܘܼܬܼܵܐ. ܡܸܛܠ ܗܵܟܹܝܠ ܕܲܟܼܝܵܢܵܐ ܐܲܠܵܗܵܝܵܐ ܦܫܝܼܛܵܐ ܗ̄ܘ̣ ܘܠܵܐ ܡܪܲܟܿܒܼܵܐ: ܘܠܵ ܡܸܬܼܚܲܙܝܵܢܵܐ ܐܲܟܲܚ̄ܕܼ ܘܠܵܐ ܤܝܼܩܵܐ ܒܲܟܼܝܵܢܹܗ: ܠܲܝܬܹܝܗ̇ ܘܐܵܦ ܕܲܤܢܝܼܩܵܐ ܬܹܐܪܬܵܐ ܒܥܸܢܝܵܢܵܗ̇: ܥܲܠ ܤܵܥܘܿܪܘܼܬܼܵܐ ܘܲܓܼܫܝܼܡܘܼܬܼ ܦܘܼܠܚܵܢܵܐ ܡܸܕܸܡ ܘܙܵܘܥܵܐ ܕܲܒܼܝܘܼܬܼܵܐ. ܦܫܝܼܛܵܐ ܗ̄ܘ̣ ܡܲܢ ܦܘܼܠܚܵܢܵܗ̇: ܘܒܲܚܕܼܵܝܘܼܬܼ ܡܢܵܬܼܵܐ ܒܡܲܕܥܵܐ ܐܲܝܟܼ ܦܫܝܼܛܘܼܬܼܵܗ̇ ܕܥܸܠܬܼܵܐ: ܡܸܤܬܲܓܼܕܵܢܝܼܬܼܵܐ ܘܕܲܠܥܸܠ ܡ̣ܢ ܡܸܬܼܪܲܓܼܫܵܢܘܼܬܼ ܪܓܸܫܬܼܵܐ ܘܲܕܼܒܸܤܪܵܐ. ܦܘܼܩܕܵܢܵܐ ܕܹܝܢ ܬܪܲܝܵܢܵܐ: ܕܐܝܼܬܹܝܗ̇ ܪܸܚܡܲܬܼ ܐ̄ܢܵܫܘܼܬܼܵܐ ܠܦܘܼܬܼ ܥܦܝܼܦܘܼܬܹܗ ܕܲܟܼܝܵܢܵܐ: ܗܵܟܲܢܵܐ ܘܲܥܦܝܼܦܵܐ ܡܸܬܼܝܼܨܸܦ ܫܘܼܡܠܵܝܹܗ. ܐܵܡܲ݁ܪ ܐ̄ܢܵܐ ܕܹܝܢ: ܗܵܝ̇ ܕܲܒܼܬܹܐܪܬܵܐ ܢܫܲܡܠܸܐ ܠܵܐ ܡܸܬܼܚܲܙܝܵܢܵܐܝܼܬܼ: ܘܕܲܒܼܦܲܓܼܪܵܐ ܐܲܟܲܚ̄ܕܼ ܘܓܲܠܝܵܐܝܼܬܼ. ܐܸܠܵܐ ܘܲܒܼܟܸܤܝܵܐ: ܘܐܲܝܠܹܝܢ ܕܲܒܼܤܘܼܗܪ̈ܵܢܹܐ ܡܸܬܼܓܲܡܪ̈ܵܢ: ܘܥܲܡ ܗܵܝ̇ ܕܬܹܐܪܬܵܐ. ܐܲܟܼܙܢܵܐ ܓܹܝܪ ܕܒܲܪܢܵܫܵܐ ܡ̣ܢ ܬܲܪܬܹܝܢ ܡܢܵܘ̈ܬܼܵܐ ܡܟܲܝܲܢ: ܗܵܢܵܘ ܕܹܝܢ ܦܲܓܼܪܵܐ ܘܢܲܦܫܵܐ: ܗܵܟܲܢܵܐ ܘܟܼܠܗܹܝܢ ܕܲܠܘܵܬܹܗ ܥܦܝܼ̈ܦܵܬܼܵܐ ܡܸܬܼܝܼܨ̈ܦܵܢ: ܠܦܘܼܬܼ pb. 571 ܥܦܝܼܦܘܼܬܼܵܐ ܕܬܼܘܼܩܵܢܹܗ. ܐܲܝܟܼ ܡܲܢ ܕܩܲܕܝܼܡܵܐ ܒܟܼܠܕܘܼܟ ܤܵܥܘܿܪܘܼܬܼܵܐ ܠܬܹܐܘܿܪܝܼܵܐ: ܠܵܐ ܡܸܬܼܡܲܨܝܵܢܝܼܬܼܵܐ ܐܝܼܬܹܝܗ̇ ܕܐ̄ܢܵܫ ܢܸܬܼܥܲܠܸܐ ܠܘܵܬܼ ܡܬܵܬܼܵܐ ܗܵܝ̇ ܕܲܡܥܲܠܝܵܐ: ܐܸܠܵܐ ܠܘܼܩܕܲܡ ܗܵܝ̇ ܕܡܵܟܵܐ ܢܸܓܼܡܘܿܪ ܒܲܥ̇ܒܼܵܕܼܵܐ. ܘܒܲܕܼܓܼܘܿܢ ܠܲܝܬܿ ܒܲܪܢܵܫܵܐ ܕܢܲܡܪܲܚ ܢܹܐܡܲܪ ܥܲܠ ܩܸܢܝܵܢ ܚܘܼܒܵܐ ܕܩܲܪܝܼܒܼܵܐ ܕܐܝܼܬܼ ܠܲܡ ܒܢܲܦܫܹܗ: ܐܸܢ ܡܦܝܼܫܵܐ ܗ̣̄ܝ ܡܢܵܬܼܵܐ ܕܲܒܼܦܲܓܼܪܵܐ ܡܸܫܬܲܡܠܝܵܐ ܐܲܝܟܼ ܚܲܝܠܵܐ ܘܙܲܒܼܢܵܐ: ܘܐܲܬܼܪܵܐ ܕܝܵܗܹ̇ܒܼ ܐܝܼܕܼܵܐ ܠܤܘܿܥܪܵܢܵܐ. ܘܗܵܝܕܹܝܟ ܡܸܬܼܗܲܝܡܢܵܐ ܡܢܵܬܼܵܐ ܕܚܘܼܒܵܐ: ܐܲܝܕܵܐ ܕܲܒܼܬܹܐܪܬܵܐ ܡܸܬܿܬܲܚܕܵܐ ܘܡܸܬܼܝܲܕܼܥܵܐ. ܡܵܐ ܕܲܒܼܗܵܠܹܝܢ ܐܸܬܼܝܼܕܲܥ̄ܢ ܡܗܲܝ̈ܡܢܹܐ ܘܫܲܪܝܼܪܹ̈ܐ ܐܲܝܟܼ ܡܸܬܼܡܲܨܝܵܢܵܘܼܬܼܵܐ: ܗܵܝܕܹܝܢ ܠܘܵܬܼ ܡܢܵܬܼܵܐ ܪܲܒܿܬܼܵܐ ܕܬܹܐܘܿܪܝܼܵܐ ܡܥܲܠܲܝܬܼܵܐ ܘܐܲܠܵܗܵܝܵܬܼܵܐ: ܡܸܬܼܝܼܗܸܒܼ ܚܲܝܠܵܐ ܠܢܲܦܫܵܐ ܠܡܸܬܼܦܫܵܛܘܼ: ܒܝܲܕܼ ܙܵܘ̈ܥܹܐ ܦܫܝܼ̈ܛܹܐ ܘܲܕܼܠܵܐ ܕܡܘܼ. ܐܲܝܟܵܐ ܕܹܝܢ ܕܠܲܝܬܿ ܠܹܗ ܠܒܲܪܢܵܫܵܐ ܐܲܬܼܪܵܐ: ܠܘܵܬܼ ܗܵܝ̇ ܕܲܒܼܤܘܼܥܪܵܢܵܐ ܢܡܲܠܸܐ ܚܘܼܒܵܐ ܕܩܲܪܝܼܒܼܵܐ ܒܲܕܼܡܸܬܼܚܲܙ̈ܝܵܢ: ܒܨܸܒܼ̈ܘܵܬܼܵܐ ܘܲܒܼܓܼܘܼܫܡܵܐ: ܤܵܦ̇ܩܵܐ ܗ̣̄ܝ ܠܹܗ ܠܐܲܠܵܗܵܐ: ܗܵܝ̇ ܕܲܒܼܬܲܪܥܝܼܬܼܵܐ ܒܲܠܚܘܿܕܼ ܬܸܬܼܢܛܲܪ ܡܸܢܲܢ ܪܸܚܡܬܼܵܐ ܕܩܲܪܝܼܒܲܢ. ܝܲܬܝܼܪܵܐܝܼܬܼ ܐܸܢܗ̤ܘ ܕܲܡܢܵܬܼܵܐ ܗܵܝ̇ ܚܵܒܼܘܿܫܬܼܵܐ: ܘܲܕܼܡܸܢܵܗ̇ ܡܝܲܬܿܪܵܐ: ܤܵܦ̇ܩܝܼܢܲܢ ܠܡܸܬܼܐܡܵܢܘܼ ܠܦܘܼܠܚܵܢܵܗ̇. ܐܸܢܕܹܝܢ ܡ̣ܢ ܟ̱ܠܵܢܵܝܘܼܬܼܵܗ̇ ܕܲܡܢܵܬܼܵܐ ܗܵܝ̇ ܚܵܒܼܘܿܫܬܼܵܐ ܚܲܤܝܼܪܝܼܢܲܢ: ܢܡܲܠܸܐ ܚܲܤܝܼܪܘܼܬܼܵܗ̇ ܒܦܘܼܩܕܵܢܵܐ ܕܒܼܵܢܼܪܵܗ̇. ܕܐܝܼܬܼܵܘܗܝ: ܒܤܵܥܘܿܪܘܼܬܼܵܐ ܡܸܬܼܪܲܓܼܫܵܢܝܼܬܼܵܐ. ܗܵܝ̇ ܕܲܠܦܘܼܬܼ ܙܲܒܼܢܵܐ ܕܥܵܪܹܨ: ܡܘܼܠܚܵ ܢܝܵܚܵܐ ܕܐܲܝܲܝ̈ܢ ܢܸܓܼܡܘܿܪ ܒܠܹܐܘܬܼܵܐ ܕܓܿܘܼܫܡܲܢ. ܕܠܵܐ ܬܸܗܘܸܐ ܚܹܐܪܘܼܬܲܢ ܠܥܸܠܲܬܼ pb. 572 ܒܸܤܪܵܐ: ܟܲܕܼ ܒܫܸܡ ܥܸܢܝܵܢܵܐ ܠܚܘܿܕܼܵܝܵܐ ܤܪ̈ܝܼܩܵܬܼܵܐ ܢܸܬܼܥܲܫ. ܝܑܼܕܼܝܼܥܵܐ ܗ̣̄ܝ ܓܹܝܪ: ܕܠܵܐ ܡܲܦܲܣ ܠܐܲܝܢܵܐ ܕܡ̣ܢ ܥܸܢܝܵܢܵܐ ܐ̄ܢܵܫܵܝܵܐ ܓܠܝܼܙ ܠܲܓܼܡܵܪ: ܘܒܲܐܠܵܗܵܐ ܥܢܸܐ ܟ̱ܠܹܗ ܟܲܕܼ ܐܝܼܬܼܵܘܗܝ ܡܝܼܬܼܵܐ ܕܲܠܟܼܠ ܒܲܓܼܠܝܼܙܘܼܬܼܵܐ ܕܡܸܢܗܘܿܢ: ܠܡܸܬܼܒܲܥ ܡ̣ܢ ܕܐܲܝܟܼ ܗܵܢܵܐ ܬܸܫܡܸܫܬܼܵܐ ܕܲܒܼܢܲܝ̈ܢܵܫܵܐ. ܐܲܝܢܵܐ ܕܹܝܢ ܕܩܵܢܘܿܢܵܐ ܕܫܸܠܝܹܗ ܬܚܘܼܡܵܐ ܗ̄ܘ̣ ܕܫܲܒܹ̈ܐ ܘܲܕܼܫܵܒܼ̈ܘܿܥܹܐ: ܘܒܼܵܬܲܪ ܫܘܼܠܵܡܵܐ ܕܩܵܢܘܿܢܹܗ: ܦܵܓܲܥ ܘܡܸܬܼܚܲܠܲܛ ܘܡܸܬܼܒܲܝܲܐ ܥܲܡ ܒܢܲܝ̈ܢܵܫܵܐ: ܡܲܗܡܸܐ ܡܲܢ ܒܐܘܼܠܨܵܢܵܐ ܕܐܲܚܵܘ̈ܗܝ: ܟܲܕܼ ܡܲܤܒܲܪ ܕܩܵܢܘܿܢܵܐ ܕܫܵܒܼܘܿܥܵܐ ܬܐܲܤܝܼܪܵܐ ܢܵܛܲܪ: ܗܵܢܵܐ: ܚܪܸܡ ܗ̄ܘ̣. ܝܑܼܕܲܝܼܥ ܗ̄ܘ̣ ܓܹܝܪ ܗܵܢܵܐ: ܡ̣ܢ ܓܠܝܼܙܘܼܬܼ ܪ̈ܲܚܡܹܐ ܘܡ̣ܢ ܡܲܤܒܿܪܵܢܘܼܬܼܵܐ ܘܡ̣ܢ ܚܘܼ̈ܫܵܒܹܐ ܕܲܓܵܠܹ̈ܐ: ܕܲܢܚܲܠܸܛ ܢܲܦܫܹܗ ܒܨܸܒܼ̈ܘܵܬܼܵܐ ܕܐܲܝܟܼ ܗܵܠܹܝܢ: ܠܵܐ ܡܸܬܼܢܲܚܲܬܼ. ܕܡܲܗܡܸܐ ܡܲܢ ܡ̣ܢ ܟܪܝܼܗܵܐ: ܠܵܐ ܢܸܚܙܸܐ ܢܘܼܗܪܵܐ. ܘܲܕܼܡܲܗܦܸܟܼ ܐܲܦܵܘ̈ܗܝ ܡ̣ܢ ܐܲܠܝܼܨܵܐ: ܢܸܚܫܲܟܼ ܐܝܼܡܵܡܹܗ. ܘܲܕܼܫܵܐܹ̇ܛ ܩܵܠܹܗ ܕܲܡܛܲܪܦܵܐ: ܒܥܲܡܛܵܢܵܐ ܢܡܘܼܫܘܼܢ ܒܢܲܝ̈ ܒܲܝܢܹܗ. ܠܵܐ ܢܨܲܥܲܪ ܠܲܫܡܵܐ ܪܵܒܵܐ ܕܫܸܠܝܵܐ ܒܠܵܐ ܝܑܼܕܲܥܬܲܢ. ܠܟܼܠ ܕܘܼܒܵܪܵܐ ܡܲܢ: ܙܲܒܼܢܵܐ ܘܐܲܬܼܪܵܐ ܘܦܘܼܪܫܵܢܵܐ. ܘܗܵܝܕܹܝܢ ܠܐܲܠܵܗܵܐ ܝܵܕܲܥ̇ ܟܠ: ܡܸܬܼܩܲܒܲܠ ܦܘܼܠܚܵܢܹܗ. ܘܕܲܤܛܲܪ ܡ̣ܢ ܗܵܠܹܝܢ: ܤܪܝܼܩ ܗ̄ܘ̣ ܦܘܼܠܚܵܢܵܐ: ܕܲܠܟܼܠ ܡܘܼ̈ܫܚܵܢ ܡܸܬܼܝܼܨܸܦ ܠܲܓܼܡܵܪܵܐ. ܐܲܝܢܵܐ ܕܲܡܤܲܟܸܐ ܕܢܸܬܼܒܲܝܲܐ ܘܢܸܤܥܬܲܪ ܒܫܸܦܠܹܗ ܡ̣ܢ ܐ̄ܚܪ̈ܵܢܹܐ: ܢܡܲܟܸܟܼ ܝܵܬܹܗ: ܐܵܦ ܕܢܸܬܼܚܲܫܲܚ ܠܘܵܬܼ ܩܲܪܝܼܒܹܗ ܒܗܘܿܢ ܒܙܲܒܼ̈ܢܹܐ ܕܡܸܬܼܢܲܤܸܐ. ܕܢܸܗܘܸܐ ܕܚܲܕܼܘܼܬܼܵܐ ܐܵܦ ܦܘܼܠܚܵܢܹܗ ܕܲܒܼܫܸܠܝܵܐ: ܘܦܲܪܝܼܩ ܡ̣ܢ ܡܲܤܒܿܪܵܢܘܼܬܼܵܐ ܘܡ̣ܢ ܛܵܥܝܘܼܬܼܵܐ ܕܫܹ̈ܐܕܹܐ܀ ܐܲܡܝܼܪ ܠܚܲܕܼ ܡ̣ܢ ܐܲܒܼܵܗܲܝ̈ܢ ܩܲܕܝܼ̈ܫܹܐ: ܐܹܘܲܓܼܪܝܼܣ pb. 573 ܐ̄ܢܵܫ ܝܲܕܼܘܼܥܬܼܵܢܵܐ: ܕܠܲܝܬܿ ܡܸܕܸܡ ܕܲܡܫܵܘܙܸܒܼ ܠܝܼܚܝܼܕܼܵܝܵܐ ܡ̣ܢ ܫܹܐܕܼܵܐ ܕܪܵܡܘܼܬܼܵܐ: ܘܲܡܥܲܕܲܪ ܠܘܵܬܼ ܬܚܘܼܡܵܐ ܕܢܲܟܼܦܘܼܬܼܵܐ ܒܲܙܒܲܢ ܫܘܼܠܗܵܒܼܵܐ ܗܵܘ̇ ܕܚܲܫܵܐ ܕܙܵܢܝܘܼܬܼܵܐ: ܐܲܝܟܼ ܗܵܝ̇ ܕܲܠܐ̄ܢܵܫܵܐ ܐܲܝܠܹܝܢ ܕܲܪܡܹܝܢ ܒܥܲܪ̈ܤܵܬܼܗܘܿܢ ܘܲܡܢܵܘܠܝܼܢ ܒܐܘܼܠܨܵܢܵܐ ܕܦܲܓܼܪܵܐ ܢܸܤܥܘܿܪ. ܪܲܒܿ ܗ̄ܘ̣ ܦܘܼܠܚܵܢܵܐ ܡܲܠܲܐܟܼܵܝܵܐ ܕܫܸܠܝܵܐ: ܐܸܡܲܬܼܝ ܕܦܘܼܪܫܵܢܵܐ ܕܐܲܝܟܼ ܗܵܢܵܐ ܚܠܝܼܛ ܥܲܡܹܗ: ܡܸܛܠ ܤܘܼܢܩܵܢܵܐ ܕܥܲܠ ܡܲܟܿܝܼܟܼܘܼܬܼܵܐ. ܒܗܵܝ̇ ܕܟܲܕܼ ܠܵܐ ܝܵܕܼܥܝܼܢܲܢ ܡܸܬܼܒܲܙܙܝܼܢ ܚ̄ܢܲܢ. ܗܵܠܹܝܢ ܐܸܡ̇ܪܹܬܼ ܐܲܝܲܝ̈: ܠܵܘ ܕܢܸܒܼܤܸܐ ܘܲܢܫܘܼܛ ܠܕܼܘܼܒܵܪܵܐ ܕܫܸܠܝܵܐ: ܚܢܲܢ ܕܲܒܼܟܼܠܕܘܼܟ ܥܲܠ ܗܵܢܵܐ ܡܦܝܼܤܝܼܢܲܢ. ܠܵܘ ܕܠܘܼܩܒܲܠ ܡܸܠܲܝ̈ܢ ܢܩܘܼܡ ܐܸܫܬܿܟܲܚܢܲ ܗܵܫܵܐ: ܠܵܐ ܐ̄ܢܵܫ ܢܸܫܡܘܿܛ ܡܸܠܬܼܵܐ ܥܲܪܛܸܠܵܝܬܼܵܐ ܡ̣ܢ ܡܹܐܡܪܲܢ: ܘܟܲܕܼ ܢܸܫܒܿܘܿܩ ܠܫܲܪܟܵܐ ܢܹܐܚܘܿܕܿ ܗܵܢܵܐ ܒܐܝܼܕܹܗ ܕܠܵܐ ܒܘܼܝܵܢ. ܥܲܗܝܼܪ ܐ̄ܢܵܐ ܕܲܒܼܕܼܘܼ̈ܟܿܝܬܼܵܐ ܤܲܓܝܼ̈ܐܵܬܼܵܐ ܐܸܡ̇ܪܹܬܼ ܟܲܕܼ ܡܦܝܼܣ ܐ̄ܢܵܐ: ܕܐܵܦܠܵܐ ܐܸܠܘܼ ܕܬܸܓܼܕܲܫ ܘܲܒܼܒܸܛܠܵܢܵܐ ܕܠܲܓܼܡܵܪ ܢܸܗܘܸܐ ܐ̄ܢܵܫ ܒܩܸܠܵܝܬܹܗ ܡܸܛܠ ܐܵܢܲܢܩܹܐ ܕܲܡܚܝܼܠܘܼܬܼܵܐ ܕܥܸܪܨܲܬ̤: ܬܸܬܼܓܿܒܸܐ ܠܹܗ ܡܸܛܠ ܗܵܕܹܐ ܡܲܦܲܩܬܼܵܐ ܓܡܝܼܪܬܵܐ ܕܡܸܢܵܗ̇ ܘܦܘܼܠܚܵܢܵܐ ܕܲܠܒܲܪ: ܛܵܒܼ ܡ̣ܢ ܒܸܛܠܵܢܵܐ ܕܬܲܡܵܢ. ܡܲܦܲܩܬܼܵܐ ܕܠܲܓܼܡܵܪ ܐܸܡ̇ܪܹܬܼ: ܠܵܘ ܕܐܸܢܗ̤ܘ ܕܐܸܤܬܲܩܒܲܠ ܒܲܙܒܲܢ ܤܘܼܥܪܵܢܵܐ ܐܵܢܲܢܩܵܝܵܐ ܕܢܵܦ̇ܩܵܢ ܒܹܗ ܫܲܒܹ̈ܐ ܡܸܕܸܡ: ܕܲܒܼܗܹܝܢ ܢܸܬܿܬܲܓܲܪ ܢܦܹܐܫܵܐ ܐܵܘ ܚܲܝܹ̈ܐ ܕܩܲܪܝܼܒܹܗ: ܒܸܛܠܵܢܵܐ ܢܸܚܫܘܿܒܼ ܗܵܕܹܐ. ܐܸܢ ܐܝܼܬܼ ܐ̄ܢܵܫ ܕܤܵܒܲܪ ܒܢܲܦܫܹܗ ܕܲܓܼܡܝܼܪܵܐ ܗ̄ܘ̣: ܘܲܡܥܲܠܲܝ ܡ̣ܢ ܟܠ ܕܲܬܼܢܵܢ ܒܐܲܡܝܼܢܘܼܬܹܗ ܕܲܠܘܵܬܼ ܐܲܠܵܗܵܐ: ܘܪܲܚܝܼܩܘܼܬܹܗ ܕܡ̣ܢ ܟܠ ܤܘܼܥܪܵܢ ܕܡܸܬܼܚܙܸܐ: ܒܘܵܠܝܼܬܼܵܐ pb. 574 ܡܸܫܬܿܐܸܠ ܐܵܦܸܢ ܡ̣ܢ ܗܵܠܹܝܢ. ܪܲܒܿ ܗ̄ܘ̣ ܥܲܡܠܵܐ ܕܦܘܼܪܫܵܢܵܐ ܠܲܕܼܡܸܤܬܲܝܲܥ ܡ̣ܢ ܐܲܠܵܗܵܐ. ܕܗ̤ܘ ܒܲܚܢܵܢܹܗ ܢܸܬܸܠ ܠܲܢ: ܕܲܢܫܲܡܠܸܐ ܡܸܠܬܹܗ ܕܗܵܘ̇ ܕܐܸܡ݂ܲܪ: ܕܟܼܠ ܡܵܐ ܕܨܵܒܹ̇ܝܢ ܐܢ̄ܬܿܘܿܢ ܕܢܸܥܒܿܕܼܘܼܢ ܠܟܼܘܿܢ ܒܢܲܝ̈ܢܵܫܵܐ: ܗܵܟܲܢܵܐ ܐܵܦ ܐܲܢ̄ܬܿܘܿܢ ܥܒܸܕܼܘ ܠܗܘܿܢ. ܕܠܹܗ ܬܸܫܒܿܘܿܚܬܼܵܐ ܘܐܝܼܩܵܪܵܐ ܡ̣ܢ ܟ̱ܠܵܗ̇ ܒܪܝܼܬܼܵܐ ܠܥܵܠܲܡ ܥܵܠܡܝܼܢ. ܐܵܡܹܝܢ.