Doctrine of Addai - ܡܠܦܢܘܬܐ ܕܐܕܝ ܫܠܝܚܐ

‏ܐܓܪܬܐ ܕܐܒܓܪ ܡܠܟܐ ܒܪ ܡܥܢܘ ܡܠܟܐ܂ ܘܕܐܡܬܝ ܫܕܪܗܿ ܗܘܐ ܠܗ ‏‏ܠܡܪܢ ܠܐܘܪܫܠܡ܂ ܘܕܐܡܬܝ ܐܬܼܐ ܗܘܐ ܐܕܝ ܫܠܝܚܐ ܠܘܬܗ ܠܐܘܪܗܝ܂ ‏‏ܘܡܕܡ ܕܡܠܠ ܒܣܒܪܬܐ ܕܟܪܘܙܘܬܗ܂ ܘܕܐܝܠܝܢ ܐܡܼܪ ܗܘܐ ܘܦܩܿܕ ܗܘܐ ܟܕ ‏‏ܢܦܩܿ ܗܘܐ ܡܢ ܥܠܡܐ ܗܢܐ܂ ܠܐܝܠܝܢ ܕܩܿܒܠܘ ܗܘܘ ܡܢܗ ܐܝܕܐ ‏‏ܕܟܗܢܘܬܐ܂ ܒܫܢܬ ܬܠܬܡܐܐ ܘܐܪ̈ܒܥܝܢ ܘܬܠܬ ܠܡܠܟܘܬܐ ‏‏[‍ܕܝܘ̈ܢܝܐ܂‍] ܘܒܡܠܟܘܬܗ [‍ܕܡܪܢ‍] ܛܝܒܪܝܣ ܩܣܪ ܪܗܘܡܝܐ܃ [ܘܒܡܠܟܘܬ]‍ܗ ܕܐܒܓܪ [ܡܠܟܐ] ܒܪ ܡܥܢܘ [ܡܠܟܐ]: ܒܐܝܪܚ ‏‏[‍ܬܫܪܝ‍] ܩܕܡ ܒܝܘܡ ܬܪ̈ܥܣܪ܃ ܫܕܪ ܗܘܐ ܐܒܓܪ ܐܘܟܡܐ ܠܡܪܝܗܒ ‏‏ܘܠܫܡܫܓܪܡܿ܂ ܪ̈ܫܢܐ ܘܡܝܩܪ̈ܐ ܕܡܠܟܘܬܗ܃ ܘܠܚܿܢܢ ܛܒܘܠܪܐ ܫܪܝܪܐ ‏‏ܥܡܗܘܢܿ܂ ܠܡܕܝܢܬܐ ܐܿܝܕܐ ܕܡܬܩܪܝܐ ܐܠܘܬܪܦܘܠܝܣ܂ ܘܐܪܡܐܿܝܬ ܕܝܼܢ ‏‏ܒܝܬ ܓܘܒܪܝܢܿ ܠܘܬ ܡܝܩܪܐ ܣܒܝܢܘܣ ܒܪ ܐܘܣܛܪܓܝܣܼ ܐܦܛܪܦܐ ܕܡܪܢ ‏‏ܩܼܣܪ܃ ܗܿܘ ܕܗܼܘ ܫܠܝܛ ܗܘܐ ܥܠ ܣܘܪܝܐ ܘܥܠ ܦܘܢܝܩܐ ܘܥܠ ܦܠܣܛܝܢܐ܃ ‏‏ܘܥܠ ܐܬܪܐ ܟܠܗ ܕܒܝܬ ܢܗܪܝܢ܂ ܘܐܘܒܠܘ ܗܘܘ ܠܗ ܐܓܪ̈ܬܐܼ ܡܛܘܠ ‏‏ܨܒܘ̈ܬܐ ܕܡܠܟܘܬܐ܂ ܘܟܕ ܐܙܠܘ ܗܘܘ ܠܘܬܗ ܩܿܒܠ ܗܘܐ ܐܢܘܢ ‏‏ܒܚܕܘܬܐܼ pb. 2 ܘܒܐܝܩܪܐ܂ ܘܗܘܼܘ ܠܘܬܗܿ ܝܘܡ̈ܬܐܼ ܥܣܪ̈ܝܢ ܘܚܡܫܐ܂ ‏‏ܘܟܬܼܒ ܗܘܐ ܠܗܘܢ ܦܚܼܡܐ ܕܐܓܪ̈ܬܐܼ܂ ܘܫܕܪ ܗܘܐ ܐܢܘܢ ܠܘܬ ‏‏ܐܒܓܪ ܡܠܟܐ܂ ܘܟܕ ܢܦܩܘ ܗܘܘ ܡܢ ܠܘܬܗܼ܂ ܚܙܩܘ ܗܘܘܼ ܘܐܬܘ ܒܐܘܪܚܐ ‏‏ܠܘܩܒܠ ܐܘܪܫܠܡ܂ ܘܚܙܘ ܗܘܘ ܐܢܫܐ ܣܓ̈ܝܐܐ ܕܐܿܬܝܢ ܗܘܘ ܡܢ ܪܘܚܩܐܿ܂ ‏‏ܕܢܚܙܘܢ ܠܡܫܝܚܐ܂ ܡܛܠ ܕܢܦܼܩ ܗܘܐ ܛܒܼܐ ܕܬܕܡܪ̈ܬܐ ܕܢܨܚ̈ܢܘܗܝܿ܂ ‏‏ܒܐܬܪ̈ܘܬܐ ܡܒ̈ܥܕܐ܂ ܘܟܕ ܚܙܘ ܐܢܘܢ ܠܐܢܫܐ ܗܿܢܘܢ ܡܪܝܗܒ ‏‏ܘܫܡܫܓܪܡ܃ ܘܚܿܢܢ ܛܒܘܠܪܐܼ܂ ܐܬܘ ܗܘܘ ܐܦ ܗܢܼܘܢ ܥܡܗܘܢ ‏‏ܠܐܘܪܫܠܡ܂ ܘܟܕ ܥܠܘ ܗܘܘ ܠܐܪܫܠܡܼ܂ ܚܙܐܘܗܝ ܗܘܘ ܠܡܫܝܚܐܼ܂ ܘܚܼܕܝܘ܂ ‏‏ܥܡ ܟܢ̈ܫܐ ܕܠܼܘܝܢ ܗܘܘ ܠܗ܂ ܘܚܿܙܝܢ ܗܘܘܼ ܐܦ ܠܝܗ̈ܘܕܝܐ܂ ܕܩܿܝܡܝܢ ܗܘܘ ‏‏ܟܢ̈ܫܝܢ ܟ̈ܢܫܝܼܢ܂ ܘܡܬܚܫܒܝܢ ܗܘܘܼ ܕܡܢܐ ܢܥܒܕܘܢ ܠܗ܂ ܡܥܩܝܢ ܗܘܘ ܓܝܪ܃ ‏‏ܕܚܿܙܝܢ ܗܘܘ ܕܣܘܓܐܐ ܕܐܢܫܘܬܐ ܕܡܢܗܘܢ ܡܘܕܝܢ ܗܘܘ ܒܗ܂ ܘܗܘܼܘ ‏‏ܬܡܿܢ ܒܐܘܪܫܠܡ ܝܘܡ̈ܬܐܼ ܥܣܪ̈ܐ܂ ܘܟܬܼܒ ܗܘܐ ܚܿܢܢ ܛܒܘܠܪܐܼ܂ ܟܠܡܕܡ ‏‏ܕܚܿܙܐ ܗܘܐ ܕܥܒܿܕ ܗܘܐ ܡܫܝܚܐ܂ ܐܦ ܫܪܟܐ ܕܡܕܡ ܕܥܒܝܕ ܗܘܐ ܠܗ ‏‏ܬܡܿܢ܂ ܩܕܡ ܕܢܐܙܠܘܢ ܗܘܘ ܠܬܡܿܢ܂ ܘܚܙܩܘ ܗܘܘܼ ܘܐܬܘ ܗܘܘ ܠܐܘܪܗܝ܂ ‏‏ܘܥܠܘ ܗܘܘ ܩܕܡ ܐܒܓܪ ܡܠܟܐ ܡܪܗܘܢ ܕܫܕܪ ܗܘܐ ܐܢܘܢ܂ ܘܝܗܒܘ ‏‏ܗܘܘ ܠܗ ܦܚܡܼܐ ܕܐܓܪ̈ܬܐ ܕܐܘܒܠܘ ܗܘܘ ܥܡܗܘܢܿ ܘܡܢ ܒܬܪ ܕܐܬܩܪܝ ‏‏ܗܘ̈ܝ ܐܓܪ̈ܬܐܼ܂ ܫܪܝܘ ܗܘܘ ܕܢܫܿܬܥܘܢ ܩܕܡ ܡܠܟܐ ܟܠ ܡܕܡ ܕܚܙܘܿ܂ ܘܟܠ ‏‏ܡܕܡ ܕܥܒܼܕ ܗܘܐ ܡܫܝܚܐ ܒܐܪܫܠܡ܂ ܘܩܼܪܐ ܗܘܐ ܚܿܢܢ ܛܒܘܠܪܐ ‏‏ܩܕܡܘܗܝܿ܂ ܟܠ ܡܕܡ ܕܟܬܼܒ ܗܘܐ pb. 3 ܘܐܝܼܬܝ ܥܡܗ܂ ܘܟܕ ܫܡܼܥ ܗܘܐ ‏‏ܐܒܓܪ ܡܠܟܐܼ܂ ܬܡܗ ܗܘܐܼ ܘܐܬܕܡܪ܃ ܐܦ ܪ̈ܘܪܒܢܘܗܝ ܕܩܿܝܡܝܢ ܗܘܘ ‏‏ܩܕܡܘܗܝ܂ ܘܐܡܼܪ ܠܗܘܢ ܐܒܓܪ܂ ܗܠܝܢ ܚܝ̈ܠܐܼ ܠܐ ܗܘܘ ܕܒ̈ܢܝ ܐܢܫܐܿ ‏‏ܐܠܐܼ ܕܐܠܗܐ܂ ܡܛܘܠ ܕܠܝܬ ܕܢܚܿܐ ܡܝ̈ܬܐܿ܂ ܐܠܐ ܐܢ ܐܠܗܐ ܒܠܚܘܕ܂ ‏‏ܨܒܿܐ ܗܘܐ ܕܝܢ ܐܒܓܪܼ܂ ܕܗܼܘ ܩܢܘܡܗ ܢܥܒܪ ܗܘܐ ܘܢܐܙܠ ܠܦܠܣܛܝܢܐܿ܂ ‏‏ܘܢܚܙܐ ܗܘܐ ܒܥܝܢ̈ܘܗܝܿ܂ ܟܠ ܡܕܡ ܕܥܒܿܕ ܗܘܐ ܡܫܝܚܐ܂ ܘܡܛܘܠ ܕܠܐ ‏‏ܐܫܟܚ ܗܘܐ ܕܢܥܒܪ ܠܐܬܪܐ ܕܪ̈ܗܘܡܝܐ ܕܠܘ ܕܝܠܗ ܗܘܐ܃ ܕܠܡܐ ܥܠܼܬܐ ‏‏ܗܕܐ ܬܩܪܐ ܗܘܬ ܠܒܥܠܕܒܒܘܬܐ ܣܢܝܬܐܼ܂ ܟܬܒ ܗܘܐ ܐܓܪܬܐܼ܂ ܘܫܕܪ ‏‏ܗܘܐ ܠܡܫܝܚܐ ܒܐܝܕܗ ܕܚܿܢܢ ܛܒܘܠܪܐ܂ ܘܢܦܼܩ ܗܘܐ ܡܢ ܐܘܪܗܝܼ ‏‏ܒܐܪ̈ܒܥܣܪܐ ܒܐܕܪ܂ ܘܥܠ ܗܘܐ ܠܐܪܫܠܡ ܒܬܪ̈ܥܣܪܐ ܒܢܝܣܢ ܒܐܪ̈ܒܥܐ ‏‏ܒܫܒܐ܂ ܘܐܫܟܚܗ ܗܘܐ ܠܡܫܝܚܐܼ܂ ܒܝܬ ܓܡܠܝܐܝܠ ܪܒܐ ܕܝܗ̈ܘܕܝܐ܂ ‏‏ܘܐܬܼܩܪܝܬ ܗܘܬ ܐܓܪܬܐ ܩܕܡܘܗܝܼ܂ ܐܿܝܕܐ ܕܟܬܝܒܐ ܗܘܬܼ ܗܟܢܐ܂ ‏‏ܐܒܓܪ ܐܘܟܡܐܼ܂ ܠܝܫܘܥ ܐܣܝܐ ܛܒܿܐ ܕܐܬܚܙܝ ܒܐܬܪܐ ܕܐܪܫܠܡ܂ ܡܪܝܼ ‏‏ܫܠܡ܂ ܫܡܿܥܬ ܥܠܝܟ ܘܥܠ ܐܣܝܘܬܟܼ܂ ܕܠܐ ܗܘܐ ܒܣܡ̈ܡܢܐ ܘܒܥܩܪ̈ܐ ‏‏ܡܐܣܐ ܐܢܬ܂ ܐܠܐ ܒܡܠܬܟ ܡܥܘܪ̈ܐܼ ܡܿܦܬܚ ܐܢܬ܂ ܘܠܚܓܝܪ̈ܐܼ ܡܗܠܟ ‏‏ܐܢܬ܂ ܘܠܓܪ̈ܒܐܼ ܡܕܟܐ ܐܢܬ܂ ܘܠܚܼܪ̈ܫܐܼ ܡܫܡܥ ܐܢܬ܂ ܘܠܪ̈ܘܚܐܼ ܘܠܒܪ ‏‏ܐܓܪ̈ܐ ܘܡܫܢ̈ܩܐ܃ ܒܗܿ ܒܡܠܬܟ ܡܐܣܐ ܐܢܬ܂ ܐܦ ܡ̈ܝܬܐܼ ܡܩܼܝܡ ‏‏ܐܢܬ܂ ܘܟܕ ܗܠܝܢ ܬܡܝ̈ܗܬܐ ܪ̈ܘܪܒܬܐ ܫܡܿܥܬ ܕܥܒܿܕ ܐܢܬܼ܂ ܣܡܿܬ ܒܪܥܝܢܝܼ܂ ‏‏ܕܐܘ ܐܠܗܐ ܐܢܬ ܕܢܚܼܬܬ ܡܢ ܫܡܝܐ pb. 4 ܘܥܒܼܕܬ ܗܠܝܼܢ܂ ܐܘ ܒܪܗ ‏‏ܐܢܬ ܕܐܠܗܐܿ܂ ܕܗܠܝܢ ܟܘܠܗܝܢ ܥܒܿܕ ܐܢܬ܂ ܡܛܠ ܗܢܐ ܟܬܿܒܬ ܒܿܥܝܬ ‏‏ܡܢܟܼ܂ ܕܬܐܬܐ ܠܘܬܝܼ ܟܕ ܣܓܿܕ ܐܢܐ ܠܟ܂ ܘܟܐܒܐ ܡܕܡ ܕܐܝܬ ܠܝ ‏‏ܬܐܣܐܼ ܐܝܟ ܕܗܝܿܡܢܬ ܒܟ܂ ܐܦ ܗܕܐ ܬܘܒ ܫܡܿܥܬ܃ ܕܝܗ̈ܘܕܝܐ ܪܛܢܝܢ ‏‏ܥܠܝܟ ܘܪܕܦܝܢ ܠܟ܃ ܘܐܦ ܕܢܙܩܦܘܢܟ ܒܿܥܝܼܢ܂ ܘܠܡܣܪܚ ܒܟ ܚܝܪܝܢ܂ ܡܕܝܢܬܐ ‏‏ܚܕܐ ܙܥܘܪܬܐ ܐܚܝܕ ܐܢܐܼ ܘܫܦܝܪܐ܂ ܘܠܬܪ̈ܝܼܢ ܣܦܩܐ ܠܡܥܡܪ ܒܗܿ ‏‏ܒܫܠܝܐ܂ ܘܟܕ ܩܒܠܗܿ ܗܘܐ ܝܫܘܥ ܠܐܓܪܬܐ ܒܝܬ ܪܒ ܟܗ̈ܢܐ ܕܝܗ̈ܘܕܝܐ܂ ‏‏ܐܡܼܪ ܠܗ ܠܚܿܢܢ ܛܒܘܠܪܐ܂ ܙܠ ܘܐܡܼܪ ܠܗ ܠܡܪܟ ܕܫܕܪܟ ܨܐܕܝܼ܂ ܛܘܒܝܟ ‏‏ܕܟܕ ܠܐ ܚܙܝܬܢܝܼ ܗܝܡܼܢܬ ܒܝ܂ ܟܬܝܒ ܓܝܪ ܥܠܝܼ܂ ܕܐܝܠܝܢ ܕܚܿܙܝܢ ܠܝܼ ܠܐ ‏‏ܢܗܝܡܢܘܢ ܒܝ܂ ܘܐܝܠܝܢ ܕܠܐ ܚܿܙܝܢ ܠܝܼ ܗܼܢܘܢ ܢܗܝܡܢܘܢ ܒܝ܂ ‏‏{‍ܘܕܟܬܿܒܬ‍} ‎‎‏ ܠܝ ܕܐܿܬܐ ܠܘܬܟܼ܂ ܗܿܘ ܡܕܡ ܕܐܿܫܬܕܪܬ ‏‏ܥܠܘܗܝ ܠܗܪܟܐܼ܂ ܡܟܝܠܼ ܐܬܿܛܠܩ ܠܗ܂ ܘܣܠܿܩ ܐܢܐ ܠܝ ܠܘܬ ܐܒܝ ܕܫܕܪܢܝ܂ ‏‏ܘܡܐ ܕܣܠܿܩܬ ܠܘܬܗܼ܂ ܡܫܕܪ ܐܢܐ ܠܟ ܠܚܕ ܡܢ ܬܠܡ̈ܝܕܝܼ܂ ܕܟܐܒܐ ܡܕܡ ‏‏ܕܐܝܬ ܠܟܿ ܢܐܣܐܼ ܘܢܚܠܡ܂ ܘܠܟܘܠ ܡܿܢ ܕܐܝܬ ܠܘܬܟܼ܂ ܢܦܼܢܐ ܐܢܘܢ ܠܚܝ̈ܐ ‏‏ܕܠܥܠܡ܂ ܘܟܪܟܟܼ ܢܗܘܐ ܒܪܝܟ܂ ܘܒܥܠܕܒܒܐ ܬܘܒܿ ܠܐ ܢܫܬܠܛ ܒܗܼ ܠܥܠܡ܂ ‏‏ܟܕ ܕܝܢ ܚܼܙܐ ܗܘܐ ܚܿܢܢ ܛܒܘܠܪܐ܃ ܕܗܟܢܐ ܐܡܼܪ ܗܘܐ ܠܗ ܝܫܘܥ܂ ܘܒܝܕ ‏‏ܕܨܿܝܪܐ ܗܘܐ ܕܡܠܟܐܼ܂ ܫܩܼܠ ܗܘܐ ܘܨܪ ܨܠܡܗ ܕܝܫܘܥ ܒܣܡ̈ܡܢܐ ‏‏ܓܒ̈ܝܐܼ܂ ܘܐܝܼܬܝ pb. 5 ܗܘܐ ܥܡܗ ܠܐܒܓܪ ܡܠܟܐ ܡܪܗ܂ ܘܟܕ ܚܙܝܗܝ ‏‏ܗܘܐ ܐܒܓܪ ܡܠܟܐ ܠܨܠܡܐ ܗܿܘܼ ܩܿܒܠܗ ܗܘܐ ܒܚܕܘܬܐ ܪܒܬܐ܂ ܘܣܡܗ ‏‏ܗܘܐ ܒܐܝܩܪܐ ܪܒܐܿ܂ ܒܚܕ ܡܢ ܒ̈ܬܐ ܕܐ̈ܦܕܢܐ ܕܝܠܗ܂ ܘܐܫܿܬܥܝ ܗܘܐ ‏‏ܠܗ ܚܿܢܢ ܛܒܘܠܪܐܼ܂ ܟܠܡܕܡ ܕܫܡܼܥ ܗܘܐ ܡܢ ܝܫܘܥܼ܂ ܟܕ ܥܒ̈ܝܕܢ ܗ̈ܘܝ ܠܗ ‏‏ܡ̈ܠܘܗܝ ܒܟܬܒ̈ܐ܂ ܘܡܢ ܒܬܪ ܕܐܣܿܬܠܩ ܗܘܐ ܡܫܝܚܐ ܠܫܡܝܐܼ܂ ܫܿܕܪ ܗܘܐ ‏‏ܝܗܘܕܐ ܬܐܘܡܐ ܠܘܬ ܐܒܓܪ܂ ܠܐܕܝ ܫܠܝܚܐܿ܂ ܗܿܘ ܕܐܝܬܘܗܝ ܗܘܐ ܚܕ ‏‏ܡܢ ܫܒܥܝܢ ܘܬܪ̈ܝܢ ܫܠܝܚ̈ܝܢ܂ ܘܟܕ ܐܬܼܐ ܐܕܝ ܠܟܪܟܐ ܕܐܘܪܗܝܼ܂ ܫܼܪܐ ܗܘܐܼ ‏‏ܒܝܬ ܛܘܒܝܐ ܒܪ ܛܘܒܝܐ ܝܗܘܕܝܐ܂ ܗܿܘ ܕܐܝܬܘܗܝ ܗܘܐܼ ܡܢ ܦܠܣܛܝܢܐ܂ ‏‏ܘܐܫܬܼܡܥ ܗܘܐ ܥܠܘܗܝܼ ܒܟܘܠܗ ܟܪܟܐ܂ ܘܥܠ ܗܘܐ ܚܕ ܡܢ ܚܐܪ̈ܘܗܝ ‏‏ܕܝܠܗ ܕܐܒܓܪ܃ ܘܐܡܼܪ ܗܘܐ ܥܠܘܗܝ ܕܐܕܝ܂ ܗܿܘ ܕܫܡܗ ܗܘܐܼ ܐܒܕܘ ܒܪ ‏‏ܥܒܕܘ܂ ܡܢ ܪ̈ܫܢܐ ܕܝܬܒ̈ܝ ܩܥܕܗ ܕܝܠܗ ܕܐܒܓܪ܂ ܕܗܐ ܐܬܼܐ ܐܝܙܓܕܐܼ ‏‏ܘܫܼܪܐ ܗܪܟܐ܂ ܗܿܘ ܕܫܠܼܚ ܗܘܐ ܠܟ ܥܠܘܗܝ ܝܫܘܥܿ܃ ܕܡܫܕܪ ܐܢܐ ܠܘܬܟ ‏‏ܚܕ ܡܢ ܬܠܡܝ̈ܕܝ܂ ܘܟܕ ܫܡܼܥ ܗܘܐ ܐܒܓܪ ܗܼܢܝܢ ܗܠܝܢ܃ ܘܓܒܪ̈ܘܬܐ ‏‏ܪ̈ܘܪܒܬܐ ܕܥܒܿܕ ܗܘܐ ܐܕܝ܃ ܘܐ̈ܣܘܬܐ ܬܡ̈ܝܗܬܐ ܕܡܐܣܐ ܗܘܐܼ܂ ܣܡ ‏‏ܗܘܐ ܒܪܥܝܢܗ ܘܐܫܪ܃ ܕܫܪܝܪܐܝܬ ܗܿܘ ܗܼܘ ܕܫܠܼܚ ܗܘܐ ܠܗ ܝܫܘܥܿ܂ ܕܡܐ ‏‏ܕܣܠܿܩܬ ܠܫܡܝܐ܃ ܐܫܕܪ ܠܟ ܠܚܕ ܡܢ ܬܠܡ̈ܝܕܝܿ܂ ܘܟܐܒܟ ܢܐܣܐ܂ ܘܫܕܪ ‏‏ܗܘܐ ܕܝܢ ܐܒܓܪܼ ܘܩܪܝܗܝ ܠܛܘܒܝܐ܂ ܘܐܡܿܪ ܗܘܐ ܠܗ܂ ܫܡܿܥܬܼ ܕܓܒܪܐ ‏‏ܚܕ ܚܝܠܬܢܐ ܐܬܼܐܼ ܘܫܼܪܐ ܒܒܝܬܟ܂ ܐܣܩܝܗܝ ܠܘܬܝ܂ ܛܟܼ ܢܫܬܟܚ ܠܝ ‏‏ܣܒܪܐ ܫܦܝܪܐ pb. 6 ܕܚܘܠܡܢܐ ܡܢ ܠܘܬܗ܂ ܘܩܿܕܡ ܗܘܐ ܛܘܒܝܐ ‏‏ܠܝܘܡܐ ܐܚܪܢܐܼ܂ ܘܕܒܪܗ ܗܘܐ ܠܐܕܝ ܫܠܝܚܐܼ܂ ܘܐܣܩܗ ܠܘܬ ܐܒܓܪ܂ ܟܕ ‏‏ܝܕܥܿ ܗܘܐ ܗܼܘ ܐܕܝܼ܂ ܕܒܚܝܠܐ ܕܐܠܗܐ ܡܫܕܪ ܗܘܐ ܠܘܬܗ܂ ܘܟܕ ܣܠܼܩ ‏‏ܗܘܐ ܐܕܝ ܘܥܠ ܗܘܐ ܠܘܬ ܐܒܓܪ܃ ܟܕ ܩܝܡܝܢ ܚܐܪ̈ܘܗܝ ܠܘܬܟܼ܂ ܘܒܗ ‏‏ܒܡܥܠܢܐ ܕܠܘܬܗܼ܂ ܚܙܘܐ ܬܡܝܗܐ ܐܬܚܙܝ ܗܘܐ ܠܗ ܠܐܒܓܪ ܡܢ ‏‏ܦܪܨܘܦܗ ܕܐܕܝ܂ ܘܒܗܿ ܒܫܥܬܐ ܕܚܼܙܐ ܗܘܐ ܐܒܓܪ ܚܙܘܐ ܗܿܘܼ܂ ܢܦܼܠ ‏‏ܗܘܐܼ ܘܣܼܓܕ ܗܘܐ ܠܐܕܝ܂ ܘܬܡܗܐ ܪܒܐ ܐܚܼܕ ܗܘܐܼ܂ ܠܟܘܠܗܘܢ ܗܿܢܘܢ ‏‏ܕܩܝܡܝܢ ܗܘܘ ܩܕܡܘܗܝ܂ ܗܼܢܘܢ ܓܝܪܼ ܠܐ ܚܙܘ ܠܚܙܘܐ ܗܿܘ ܕܐܬܚܙܝ ܗܘܐ ‏‏ܠܗ ܠܐܒܓܪ܂ ܗܝܕܝܢ ܐܡܼܪ ܠܗ ܐܒܓܪ ܠܐܕܝ܂ ܕܫܪܝܪܐܝܬ ܬܠܡܝܕܗ ܐܢܬ ‏‏ܕܝܫܘܥܿ܃ ܗܿܘ ܓܢܒܪ ܚܝܠܐ ܒܪܗ ܕܐܠܗܐܿ܂ ܗܿܘ ܕܫܠܼܚ ܗܘܐ ܠܝ ܕܡܫܕܪ ‏‏ܐܢܐ ܠܟܿ܂ ܠܚܕ ܡܢ ܬܠܡ̈ܝܕܝ ܠܐܣܝܘܬܐ ܘܠܚܝ̈ܐ܂ ܐܡܿܪ ܠܗ ܐܕܝ܂ ܡܛܠ ‏‏ܕܡܢ ܩܕܝܡ ܗܝܡܼܢܬ ܗܘܼܝܬ ܒܡܿܢ ܕܫܕܪܢܝ ܠܘܬܟܼ܂ ܡܛܘܠ ܗܿܘ ܗܼܘ ܐܫܿܬܠܚܬ ‏‏ܨܐܕܝܟ܂ ܘܟܕ ܬܘܒ ܬܗܿܝܡܢ ܒܗܼ܂ ܟܘܠ ܡܕܡ ܕܬܗܿܝܡܢ ܒܗܼ ܢܗܘܐ ܠܟ܂ ‏‏ܐܡܿܪ ܠܗ ܐܒܓܪ܂ ܗܟܢܐ ܗܝܡܿܢܬ ܒܗܼ܂ ܕܠܝܗ̈ܘܕܝܐ ܗܿܢܘܢ ܕܙܩܦܘܗܝ ܗܘܘܼ܂ ‏‏ܒܥܿܝܬ ܗܿܘܝܬ ܕܐܿܕܒܪ ܠܝ ܚܝܠܐܼ܂ ܘܐܿܙܠ ܐܚܪܘܒ ܐܢܘܢ܂ ܘܡܛܘܠ ‏‏ܡܠܟܘܬܐ ܗܿܝ ܕܪ̈ܗܘܡܝܐ ܐܬܿܢܟܦܬܿ܂ ܒܩܝܡܐ ܕܫܝܢܐ ܕܡܩܡ ܠܝܿ܂ ܥܡ ܡܪܢ ‏‏ܩܣܪ ܛܝܒܪܝܣܿ܂ ܐܝܟ ܐܒ̈ܗܝ ܩܕܡ̈ܝܐ܂ ܐܡܿܪ ܠܗ ܐܕܝ܂ ܡܪܢܼ ܨܒܝܢܐ ܗܘ ‏‏ܕܐܒܘܗܝ ܫܡܿܠܝ܂ ܘܟܕ ܫܿܠܡ ܨܒܝܢܐ ܕܝܿܠܘܕܗܼ܂ ܐܬܪܝܡ ܠܘܬ ܐܒܘܗܝ܂ pb. 7 ‏‏ܘܝܬܒܼ ܥܡܗ ܒܫܘܒܚܐܿ܂ ܗܿܘ ܕܐܝܬܘܗܝ ܗܘܐ ܒܗ ܡܢ ܥܠܡ܂ ܐܡܿܪ ܠܗ ‏‏ܐܒܓܪ܂ ܐܦ ܐܢܐ ܡܗܿܝܡܢ ܐܢܐ ܒܗܼ ܘܒܐܒܘܗܝ܂ ܐܡܿܪ ܠܗ ܐܕܝ܂ ܡܛܘܠ ‏‏ܕܗܟܢܐ ܗܝܡܼܢܬܼ܂ ܣܐܡ ܐܢܐ ܐܝܕܝ ܥܠܝܟܼ܂ ܒܫܡܗ ܕܗܿܘ ‏‏ܕܗܝܡܼܢܬ ܒܗ‍܂ ܘܒܗܿ ܒܫܥܬܐ ܕܣܡ ܗܘܐ ܐܝܕܗ ‏‏ܥܠܘܗܝܼ܂ ܐܬܐܣܝ ܡܢ ܢܟܝܢܐ ܕܟܐܒܐܿ܂ ܕܐܝܬ ܗܘܐ ܠܗ ܢܘܓܪܐ܂ ܘܬܡܼܗ ‏‏ܗܘܐ ܐܒܓܪܼ ܘܐܬܕܡܪ܂ ܕܐܝܟܢܐ ܕܫܡܝܥ ܗܘܐ ܠܗ ܥܠ ܝܫܘܥ܃ ܕܥܿܒܕ ‏‏ܗܘܐ ܘܡܐܿܣܐܼ܂ ܗܟܢܐ ܘܐܦ ܗܼܘ ܐܕܝܿ܂ ܕܠܐ ܣܡܐ ܕܡܕܡ ܡܐܣܐ ‏‏ܗܘܐ ܒܫܡܗ ܕܝܫܘܥ܂ ܘܐܦ ܠܥܒܼܕܘ ܒܪ ܥܼܒܕܘܼ܂ ܦܛܓܿܪܐ ܐܝܬ ܗܘܐ ܠܗ ‏‏ܒܪ̈ܓܠܘܗܝ܂ ܘܐܦ ܗܼܘ ܩܿܪܒ ܗܘܐ ܠܗ ܪ̈ܓܠܘܗܝ܂ ܘܣܡ ܗܘܐ ܐܝܕܗ ‏‏ܥܠܝܗܝܼܢ ܘܐܣܝܗ ܗܘܐ܂ ܘܬܘܒܼ ܠܐ ܗܘܼܬ ܠܗ ܦܛܓܿܪܐ܂ ܘܐܦ ‏‏ܒܡܕܝܢܬܐ ܟܠܗܼܿ܂ ܐܣܘܬ̈ܐ ܪ̈ܘܪܒܬܐܼ ܡܐܣܐ ܗܘܐ܂ ܘܚܝ̈ܠܐ ܬܡܝܗ̈ܐ ‏‏ܡܚܿܘܐ ܗܘܐ ܒܗܿ܂ ܐܡܿܪ ܠܗ ܐܒܓܪ܂ ܗܫܐ ܕܝܕܥܼ ܟܠ ܐܢܫ܃ ܕܒܚܝܠܗ ‏‏ܕܝܫܘܥ ܡܫܝܚܐ ܗܠܝܢ ܬܕܡܪ̈ܬܐ ܥܒܿܕ ܐܢܬ܃ ܘܗܐ ܬܡܝܗܝܢ ܚܢܢ ‏‏ܒܥܿܒ̈ܕܝܟܼ܂ ܒܿܥܐ ܐܢܐ ܗܟܝܠ ܡܢܟܼ܂ ܕܬܫܬܿܥܐ ܠܢ ܥܠ ‏‏ܡܬܝܬܗ܂ ܘܥܠ ܬܕܡܪ̈ܬܐ ܕܐܝܟܢܐ ܗܘܼܬܿ܂ ‏‏ܘܥܠ ܚܝܠܗ ܫܒܝܚܐܿ܂ ܘܥܠ ܬܕܡܪ̈ܬܐ ܐܝܠܝܢ ܕܫܡܝܥ ܗܘܐ ܠܢ ‏‏ܕܥܒܿܕ ܗܘܐܿ܂ ܐܝܠܝܢ ܕܐܢܬ ܚܼܙܝܬ ܐܢ̈ܝܢ ܥܡ ܫܪܟܐ ܕܚܒܪ̈ܝܟ܂ ܐܡܿܪ ܠܗ ܐܕܝ܂ ܡܢ ܗܕܐܼ ܠܐ ܫܬܿܩ ܐܢܐ ܕܐܟܪܙ܂ ܕܡܛܠ ‏‏ܗܕܐ pb. 8 ܗܘ ܓܝܪ ܐܫܿܬܕܪܬ ܠܗܪܟܐ ܕܐܿܡܪ ܘܐܠܦܿ܂ ܠܟܠ ܡܿܢ ܕܨܒܿܐ ‏‏ܕܢܗܿܝܡܢ ܐܟܘܬܟ܂ ܠܡܚܪ ܟܿܢܫ ܠܝ ܟܘܠܗܿ ܡܕܝܢܬܐ܂ ܘܐܙܪܘܥ ܒܗܿ ܡܠܬܐ ‏‏ܕܚ̈ܝܐܿ܂ ܒܟܪܘܙܘܬܐ ܕܡܿܟܪܙ ܐܢܐ ܩܕܡܝܟܘܢܿ܂ ܥܠ ܡܐܬܝܬܗ ܕܡܫܝܚܐ ‏‏ܐܝܟܢܐ ܗܘܬܿ܂ ܘܥܠ ܚܝܠܗ ܫܒܝܚܐ ܂ ܕܠܡܢܐ ‏‏ܘܐܝܟܢܐ ܫܠܚܗ ܗܘܐܿ܂ ܘܥܠ ܚܝܠܗ ܘܥܿܒ̈ܕܘܗܝ ܬܡܝ̈ܗܐܿ܂ ܘܥܠ ‏‏ܪ̈ܐܙܐ ܫܒܝ̈ܚܐ ܕܡܬܝܬܗܿ܂ ܐܝܠܝܢ ܕܡܠܠ ܗܘܐ ܒܥܠܡܐܿ܂ ‏‏ܘܥܠ ܚܬܝܬܘܬܐ ܕܟܪܘܙܘܬܗܿ܂ ܕܐܝܟܢܐ ܘܡܛܘܠ ܡܢܐ ܐܙܥܪ‏‎‎‏ ‏‏ܢܦܫܗ܃ ܘܐܡܟ ܗܘܐ ܐܠܗܘܬܗ ܡܪܝܡܬܐ ܒܦܓܪܐ ‏‏ܕܫܩܼܠ ܗܘܐܿ܂ ܘܐܙܕܩܦ ܗܘܐ ܘܢܚܼܬ ܠܒܝܬ ܡܝ̈ܬܐܿ܂ ܘܬܼܪܥ ‏‏ܗܘܐ ܣܝܓܐ ܗܿܘ ܕܡܡܬܘܡ ܠܐ ܐܬܬܪܥ ܗܘܐܿ܂ ܘܐܚܝ ܗܘܐ ܡܝ̈ܬܐ ‏‏ܒܩܛܠܗܿ܂ ܘܢܚܼܬ ܗܘܐ ܒܠܚܘܕܘܗܝ ܘܣܠܼܩ ܗܘܐ ܥܡ ܣܓ̈ܝܐܐ ܠܘܬ ‏‏ܐܒܘܗܝ ܡܫܒܚܐ܂ ܗܿܘ ܕܥܡܗ ܐܝܬܘܗܝ ܗܘܐ ܡܡܬܘܡ ܒܚܕܐ ‏‏ܐܠܗܘܬܐ ܡܪܝܡܬܐ܂ ܘܦܼܩܕ ܗܘܐ ܐܒܓܪ܂ ܕܢܬܠܘܢ ܠܗ ܠܐܕܝ ‏‏ܟܣܦܐ ܘܕܗܒܐ܂ ܐܡܿܪ ܠܗ ܐܕܝ܂ ܐܿܝܟܢܐ ܡܫܟܚܝܢ ܚܢܢ ܢܣܒܝܢ ܚܢܢ ܡܕܡ ‏‏ܕܠܘ ܕܝܠܢ ܗܘܿ܂ ܕܗܐ ܡܕܡ ܕܕܝܠܢ ܗܿܘ ܫܒܩܢܝܗܝ ܐܝܟ ‏‏ܕܐܬܿܦܩܕܢܢ ܡܢ ܡܪܢܿ܂ ܕܢܗܘܐ ܕܠܐ ܟܝ̈ܣܐ ܘܕܠܐ ܬܪ̈ܡܠܐܿ܂ ‏‏ܘܟܕ ܛܥܝܢܝܢ ܚܢܢ ܙܩܝ̈ܦܐ ܥܠ ܟܬܦ̈ܬܢ ܐܿܬܦܼܩܕܢܢ ܕܢܟܪܙ ܣܒܪܬܗ ‏‏ܒܟܠܗܿ ܒܪܝܬܐ܂ pb. 9 ܗܿܘ ܕܟܠܗܿ ܒܪܝܬܐ ܪܓܼܫܬ ܗܘܬ ܘܚܫܬܿ܂ ‏‏ܒܙܩܝܦܘܬܗ ܕܗܘܼܬ ܚܠܦܝܢ ܠܦܘܪܩܢܐ ܕܟܠܗܘܢ ܒܢܝ̈ܢܫܐ܂ ܘܐܫܬܥܝ ܗܘܐ ‏‏ܩܕܡ ܐܒܓܪ ܡܠܟܐ ܘܩܕܡ ܪ̈ܘܪܒܢܘܗܝ ܘܚܐܪ̈ܘܗܝܿ܂ ܘܩܕܡ ܐܓܘܣܛܝܢ ‏‏ܐܡܗ ܕܐܒܓܪ܂ ܘܩܕܡ ܫܠܡܼܬ ܒܪܬ ܡܗܪܕܬ ܐܢܬܬܗ ܕܐܒܓܪ܂ ܐܬܘ̈ܬܗ ‏‏ܕܡܪܢ ܘܬܕܡܪ̈ܬܗ ܘܚܝ̈ܠܐ ܫܒܝ̈ܚܐ ܕܥܒܿܕ ܗܘܐܿ܂ ܘܢܨܚ̈ܢܘܗܝ ܐܠܗ̈ܝܐܿ܂ ‏‏ܘܣܘܠܩܗ ܕܠܘܬ ܐܒܘܗܝ܂ ܘܕܐܝܟܢܐ ܩܿܒܠܘ ܗܘܘ ܚܝ̈ܠܐ ܘܫܘ̈ܠܛܢܐܿ܂ ܒܥܕܢܐ ‏‏ܗܿܘ ܕܐܣܿܬܠܩ ܗܘܐ܂ ܕܒܗ ܗܼܘ ܒܗܿܘ ܚܝܠܐ ܐܣܝܗ ܗܘܐ ܠܐܒܓܪ ‏‏ܘܠܥܼܒܕܘ ܒܪ ܥܒܼܕܘ ܬܪܝܢܐ ܕܡܠܟܘܬܗ܂ ܘܐܝܟܢܐ ܐܘܕܥ ܐܢܘܢ ܕܡܬܓܼܠܐ ‏‏ܠܚܪܬܐ ܕܙܒ̈ܢܐܿ܂ ܘܒܫܘܠܡܐ ܕܒܪ̈ܝܬܐ ܟܠܗܝܢܿ܂ ܘܢܘܚܡܐ ܘܩܝܡܼܬܐ ‏‏ܕܥܬܝܕܐ ܕܬܗܘܐ ܠܟܠܗܘܢ ܒܢܝ̈ܢܫܐܿ܂ ܘܦܘܪܫܢܐ ܕܗܘܼܐ ܒܝܬ ܐܡܪ̈ܐ ‏‏ܠܓܕ̈ܝܐܿ܂ ܘܒܝܬ ܡܗ̈ܝܡܢܐ ܠܟܦܘܪ̈ܐ܂ ܘܐܡܼܪ ܗܘܐ ܠܗܘܢ܂ ‏‏ܡܛܘܠ ܕܬܪܥܐ ܕܚܝ̈ܐ ܩܛܝܢܐ ܗܘ܃ ܘܐܘܪܚܐ ܕܫܪܪܐ ‏‏ܐܠܝܨܐ ܗܝ܃ ܘܡܛܠ ܗܢܐ ܕܠܝ̈ܠܐ ܐܢܘܢ ܡܗ̈ܝܡܢܐ ‏‏ܕܩܘܫܬܐ܂ ܘܒܝܕ ܕܟܦܘܪܝܐܼ ܢܝܚܗ ܗܼܘ ܕܣܛܢܐ܂ ܡܛܠ ܗܢܐ ܣܓ̈ܝܐܝܢ ܕܓ̈ܠܐ ܕܡܼܛܥܝܢ ܠܚ̈ܙܝܐ܂ ܐܠܘ ܠܐ ܓܝܪ ܡܛܠ ܕܐܝܬ ‏‏ܚܪܬܐ ܛܒܬܐ ܠܐܢܫܐ ܡܗ̈ܝܡܢܐܼ܂ ܠܐ ܢܚܿܬ ܗܘܐ ܡܪܢ ܡܢ ܫܡܝܐܿ܂ ‏‏ܘܐܿܬܐ ܗܘܐ ܠܝܠܕܐ ܘܠܚܫܐ ܕܡܘܬܐ‍܂ ܘܐܦ ‏‏ܠܐ ܠܢ ܕܝܠܢ ܡܫܕܪ ܗܘܐ ܕܢܗܘܐ ܠܗ ܟܪ̈ܘܙܐ pb. 10 ‏‏ܘܡܣܿܒܪ̈ܢܐ܂ ܘܐܝܠܝܢ ܕܚܼܙܝܢ ܚܢܢ ܘܫܡܥܢ ܚܢܢ ܡܢܗ ܕܥܒܿܕ ܗܘܐ ܘܡܿܠܦ ‏‏ܗܘܐܼ܂ ܬܟܝܠܐܝܬ ܡܟܪܙܝܢ ܚܢܢ ܩܕܡ ܟܘܠ ܐܢܫ܂ ܕܠܐ ܢܗܘܐ ܛܠܘ̈ܡܐ ‏‏ܠܫܪܪܐ ܕܣܒܪܬܗ܂ ܘܠܐ ܗܘܐ ܗܠܝܢ ܒܠܚܘܕܼ܂ ܐܠܐܼ ܐܦ ܐܝܠܝܢ ܕܗ̈ܘܝ ‏‏ܒܫܡܗ ܡܢ ܒܬܪ ܣܘܠܩܗ ܡܚܘܝܢ ܚܢܢ ܘܡܟܪܙܝܢ ܚܢܢ܂ ܐܡܿܪ ܐܢܐ ܕܝܢ ‏‏ܩܕܡܝܟܘܢܿ܂ ܡܕܡ ܕܗܘܼܐ ܘܐܣܬܥܪ ܨܝܕ ܐܢܫܐ ܐܝܠܝܢ ܕܐܟܘܬܟܘܢ ‏‏ܗܝܡܢܘ ܒܗ ܒܡܫܝܚܐܿ܂ ܕܒܪܗ ܗܼܘ ܕܐܠܗܐ ܚܝܐ܂ ܦܪܘܛܢܝܩܐ ܐܢܬܬܗ ‏‏ܕܩܠܘܕܝܣ ܩܣܪ܃ ܗܿܘ ܕܥܒܼܕܗ ܗܘܐ ܛܝܒܪܝܣ ܬܪܝܢܐ ܕܡܠܟܘܬܗ܃ ܟܕ ܐܙܼܠ ‏‏ܗܘܐ ܕܢܩܼܪܒ ܥܡ ܒ̈ܢܝ ܐܣܦܢܝܐ ܕܡܪܕܘ ܗܘܘ ܥܠܘܗܝܼ܂ ܗܼܝ ܗܕܐ ܐܢܬܬܐ܃ ‏‏ܟܕ ܐܝܬܘܗܝ ܗܘܐ ܫܡܥܘܢ ܚܕ ܡܢ ܬܠܡ̈ܝܕܐ ܒܪܗܘܡܐ ܡܕܝܢܬܐ܃ ‏‏ܘܚܙܝܐ ܗܘܬ ܐܬܘ̈ܬܐ ܘܬܕܡܪ̈ܬܐ܃ ܘܚܝ̈ܠܐ ܬܡܝ̈ܗܐ ܕܥܒܿܕ ܗܘܐ ܒܫܡܗ ‏‏ܕܡܫܝܚܐܼ܂ ܟܦܪܬ ܗܘܬ ܒܚܢܦܘܬܐ ܕܐܒܗ̈ܝܗܿ ܕܩܝܡܐ ܗܘܬ ܒܗܿ܂ ‏‏ܘܒܨܠܡ̈ܐ ܕܚܢܦܘܬܐ ܕܣܓܕܐ ܗܘܬ ܠܗܘܢ܂ ܘܒܡܫܝܚܐ ܡܪܢ ܡܗܝܡܢܐ ‏‏ܗܘܬ ܘܣܓܕܐ܂ ܘܡܫܝܚܐ ܥܡ ܐܝܠܝܢ ܕܢܩܿܝܦܝܢ ܗܘܘ ܠܗ ‏‏ܠܫܡܥܘܢ܂ ܘܐܚܝܕܐ ܗܘܬ ܠܗܼ ܒܐܝܩܪܐ ܪܒܐ܂ ܘܡܢ ܒܬܪ ܗܟܢܐܼ܂ ܨܒܬ ‏‏ܗܘܬܼ ܕܐܦ ܐܪܫܠܡ ܬܚܙܐ ܗܘܬܿ܂ ܘܕܘܟ̈ܝܬܐ ܐܝܠܝܢ ܕܒܗܝܢ ܐܣܬܥܪܘ ‏‏ܗܘܘ ܚܝ̈ܠܘܗܝ ܕܡܪܢ܂ ܘܩܡܼܬ ܗܘܬ ܚܦܝܛܐܝܬܼ܂ ܘܢܚܼܬܬ ܗܘܬ ܡܢ ܪܗܘܡܐ ‏‏ܠܐܪܫܠܡ܂ ܗܼܝܼ ܘܬܪܝܢ ܒܢ̈ܝܗܿ ܥܡܗܿ܂ ܘܚܕܐ ܒܪܬܗܿ ܒܬܘܠܬܐ܂ ܘܟܕ ܥܐܠܐ ‏‏ܗܘܬ ܠܐܘܪܫܠܡܼ܂ ܢܦܼܩܬܿ ܗܘܬ ܠܗܿ pb. 11 ܡܕܝܢܬܐ ܠܩܘܒܠܗܿ܂ ܘܩܒܠܘܗܿ ‏‏ܗܘܘ ܒܐܝܩܪܐ ܪܒܐ ܐܝܟ ܕܠܡܿܠܟܬܐ ܡܪܬܗ ܕܐܬܪܐ ܪܒܐ ܕܒܝܬ ‏‏ܪ̈ܘܡܝܐ܂ ܝܥܩܘܒ ܕܝܢ ܕܥܒܝܕ ܗܘܐ ܡܕܒܪܢܐ ܘܦܩܘܕܐ ܒܥܕܬܐ ܕܒܢܝܐ ‏‏ܗܘܬ ܠܢ ܬܡܢ܃ ܟܕ ܫܡܼܥ ܗܘܐ ܕܡܛܠ ܡܢܐ ܐܙܠܼܬܿ ܗܘܬ ܠܬܡܢ܃ ܩܡ ‏‏ܗܘܐ ܘܐܙܠ ܗܘܐ ܨܝܕܝܗܿ܂ ܘܥܠ ܗܘܐ ܠܘܬܗܿ ܐܝܟܐ ܕܫܪܝܼܐ ܗܘܬܿ܂ ‏‏ܒܐܦܕܢܐ ܪܒܐ ܕܒܝܬ ܡܠܟܘܬܗ ܕܐܝܪܘܕܝܣ ܡܿܠܟܐ܂ ܘܟܕ ܚܙܬܗ ܗܘܬ ‏‏ܩܒܠܬܗ ܗܘܬ ܒܚܕܘܬܐ ܪܒܬܐܼ܂ ܘܐܦ ܠܗ ܐܝܟ ܕܠܫܡܥܘܢ ܟܐܦܐ܂ ‏‏ܘܚܘܝ ܗܘܐ ܠܗܿ ܐܦ ܗܘ ܐܣܘ̈ܬܐ ܘܚܿܝ̈ܠܐ ܐܝܟ ܫܡܥܘܢ܂ ܘܐܡܼܪܬܿ ‏‏ܠܗ܂ ܚܿܘܐ ܠܝ ܓܓܘܠܬܐ ܗܿܝ ܕܐܙܕܩܦ ܗܘܐ ܒܗܿ ܡܫܝܚܐ܂ ܘܩܝܣܐ ‏‏ܕܨܠܝܒܘܬܗ ܕܐܬܬܠܝ ܗܘܐ ܒܗ ܡܢ ܝܘ̈ܕܝܐ܂ ܘܩܒܪܐ ܗܿܘ ܕܐܬܬܣܝܡ ‏‏ܗܘܐ ܒܗ܂ ܐܡܿܪ ܠܗܿ ܗܼܘ ܝܥܩܘܒ܂ ܗܠܝܢ ܬܠܬܝ̈ܗܝܢ ܕܨܒܝܐ ܡܠܟܘܬܟܝ ‏‏ܕܬܚܼܙܝܢܿ܂ ܬܚܝܬ ܐܝܼܕܐ ܐܢ̈ܝܢ ܕܝܘ̈ܕܝܐ܂ ܗܼܢܘܢ ܐܢܘܢ ܕܐܚܝܕܝܢ ܠܗ̈ܝܢܿ܂ ܘܠܐ ‏‏ܫܒܩܝܢ ܠܢ ܕܢܐܙܠ ܢܨܿܠܐ ܬܡܢ ܩܕܡ ܓܓܘܠܬܐ ܘܩܒܪܐ܂ ܘܐܦܠܐ ܩܝܣܐ ‏‏ܕܨܠܝܒܘܬܗ ܨܿܒܝܢ ܠܡܬܼܠ ܠܢ܂ ܘܠܐ ܗܕܐ ܒܠܚܘܕ܃ ܐܠܐ ܐܦ ܡܪܕܦ ‏‏ܪܕܦܝܢ ܠܢ܃ ܕܠܐ ܢܣܿܒܪ ܘܢܿܟܪܙ ܒܫܡܗ ܕܡܫܝܚܐ܂ ܘܙܒ̈ܢܬܐ ܣܓ̈ܝܐܬܐ ܘܐܦ ‏‏ܒܝܬ ܐܣܝܪ̈ܐ ܚܒܫܝܢ ܠܢ܂ ܘܟܕ ܫܡܼܥܬܿ ܗܘܬ ܗܠܝܼܢ܂ ܒܗܿ ܒܫܥܬܐ ܦܼܩܕܬܿ ‏‏ܗܘܬ ܗܼܝ ܡܿܠܟܬܐܿ܂ ܘܐܝܬܝܘ ܗܘܘ ܩܕܡܝܗܿ܃ ܠܚܘܢܝܐ ܒܪ ܚܼܿܢܢ ܟܗܢܐ܂ ‏‏ܘܠܿܓܼܕܠܝܐ ܒܪ ܩܝܦܐ܂ ܘܠܝܗܘܕܐ ܒܪ ܥܼܿܒܕ ܫܠܘܡ܂ ܪ̈ܝܫܐ ܘܦܩ̈ܘܕܐ ܕܝܘ̈ܕܝܐ܂ ‏‏ܘܐܡܼܪܬܿ pb. 12 ܠܗܘܢ܂ ܐܫܠܡܘ ܠܓܓܘܠܬܐ ܘܩܒܪܐ ܘܩܝܣܐ ‏‏ܕܨܠܝܒܘܬܐ ܠܝܥܩܘܒ ܘܠܐܝܠܝܢ ܕܫܠܡܝܢ ܠܗ܂ ܘܠܐ ܐܢܫ ܢ̈ܟܠܐ ܐܢܘܢ ‏‏ܕܢܫܡܫܘܢ ܬܡܢ ܐܝܟ ܥܝܕܐ ܕܬܫܡܫܬܗܘܢ܂ ܘܟܕ ܦܩܼܕܬܿ ܗܟܢܐ ܠܟܗ̈ܢܐܼ܂ ‏‏ܩܡܬ ܗܘܬ ܕܬܐܙܠ ܘܬܚܙܐ ܐܢܝ̈ܢ ܠܕܘ̈ܟܝܬܐ ܗܿܢ̈ܝܢ܂ ܘܐܦ ܕܬܿܫܠܡ ܗܘܬ ‏‏ܐܬܪܐ ܗܿܘ ܠܗ ܠܝܥܩܘܒ ܘܠܐܝܠܝܢ ܕܐܝܬ ܗܘܘ ܥܡܗ܂ ܘܒܬܪܟܢ ܥܠܬ ‏‏ܗܘܬ ܠܩܒܪܐ܂ ܘܐܫܟܚܬ ܗܘܬ ܒܓܘܗ ܕܩܒܪܐ ܬ̈ܠܬܐ ܙܩܝܦ̈ܝܢ܂ ܚܕ ܕܡܪܢ ‏‏ܘܬܪܝܢ ܕܗܿܢܘܢ ܓܿܝ̈ܣܐ ܕܙܩܝܦܝܢ ܗܘܘ ܥܡܗ ܡܢ ܝܡܝܢܗ ܘܡܢ ܣܡܠܗ܂ ‏‏ܘܒܗ ܒܥܕܢܐ ܗܿܘ ܕܥܠܬ ܠܓܘ ܩܒܪܐ܃ ܗܼܝ ܘܒܢ̈ܝܗܿ ܥܡܗܼܿ܂ ܒܗܿ ܒܫܥܬܐܼ܂ ‏‏ܢܦܠܼܬ ܗܘܬ ܒܪܬܗܿ ܒܬܘܠܬܐܼ ܘܡܝܼܬܬ܂ ܕܠܐ ܟܐܒܐܿ ܘܕܠܐ ܟܘܪܗܢܐܼ܂ ‏‏ܘܕܠܐ ܥܠܼܬܐ ܡܕܡ ܕܡܘܬܐ܂ ܘܟܕ ܚܙܬ ܗܘܬ ܡܠܟܬܐ܃ ܕܡܝܼܬܬ ܠܗܿ ‏‏ܒܪܬܗܿ ܡܢ ܫܠܝܐܼ܂ ܒܼܪܟܬ ܗܘܬܼ܂ ܘܡܨܠܝܐ ܒܓܘܗ ܕܩܒܪܐ܂ ܘܐܡܪܐ ܗܘܬ ‏‏ܒܨܠܘܬܗܿ܂ ܐܠܗܐ ܕܝܗܼܒ ܢܦܫܗ ܠܡܘܬܐ ܚܠܦ ܟܠܗܘܢ ܒ̈ܢܝ ܐܢܫܐ܃ ‏‏ܘܐܙܕܩܦ ܒܐܬܪܐ ܗܢܐ܃ ܘܐܬܣܝܡ ܒܩܒܪܐ ܗܢܐ܃ ܘܐܝܟ ܐܠܗܐ ܡܚܐ ‏‏ܟܠ ܩܡ ܘܐܩܝܡ ܥܡܗ ܠܣܓ̈ܝܐܐܼ܂ ܕܠܐ ܢܫܡܼܥܘܢ ܝܗ̈ܘܕܝܐ ܙܩ̈ܘܦܐ܃ ‏‏ܘܐܦ ܚ̈ܢܦܐ ܛܥ̈ܝܐ܃ ܗܿܢܘܿܢ ܕܟܿܦܪܬ ܒܨ̈ܠܡܝܗܘܢ ܘܒܓܠܝ̈ܦܝܗܘܢ܃ ‏‏ܘܒܕܚ̈ܠܬܗܘܢ ܕܚܢܦܘܬܐ܃ ܘܢܚܙܘܢ ܒܝ ܟܕ ܡܗܠܝܢ ܒܝ܃ ܘܢܐܡܪܘܢ ܕܟܘܠܗ ‏‏ܕܗܘܬܗܿ ܗܕܐ܃ ܥܠ ܕܟܦܼܪܬ ܒܐܠܗ̈ܐ ܕܣܓܕܐ ܗܘܬ ܠܗܘܢ܃ ܘܐܘܼܕܝܬ ‏‏ܒܡܫܝܚܐ ܕܠܐ ܝܕܥܐ pb. 13 ܗܘܬ ܠܗ܃ ܘܐܙܼܠܬ ܕܬܝܩܪ ܕܘܟܬ ܩܒܪܗ ‏‏ܘܨܠܝܒܘܬܗܼ܂ ܘܐܢ ܐܢܐ ܡܪܝ ܠܐ ܫܿܘܝܐ ܐܢܐ ܕܐܫܬܡܥ܃ ܥܠ ܕܣܿܓܕܬ ‏‏ܠܒܪ̈ܝܬܐ ܚܠܦܝܟܼ܂ ܐܢܬܼ ܚܘܣ ܡܛܠ ܫܡܟ ܣܓܝܕܐ܂ ܕܠܐ ܢܬܿܓܕܦ ‏‏ܒܐܬܪܐ ܗܢܐܿ܂ ܐܝܟ ܕܓܿܕܦܘ ܥܠܝܟ ܒܨܠܝܒܘܬܟ܂ ܘܟܕ ܗܠܝܢ ܒܨܠܘܬܗܿ ‏‏ܐܡܪܐ ܗܘܬ܃ ܘܒܚܫܐ ܕܓܥܬܗܿ ܬܢܝܐ ܗܘܬ ܩܕܡ ܟܠ ܐܝܠܝܢ ܕܐܝܬ ‏‏ܗܘܐ ܬܡܿܢܼ܂ ܩܼܪܒ ܠܘܬܗܿ ܒܪܗܿ ܩܫܝܫܐܼ ܘܐܡܼܪ ܠܗܿ܂ ܫܡܥ ܡܕܡ ܕܐܡܿܪ ‏‏ܐܢܐ ܩܕܡ ܡܠܟܘܬܟܝ܂ ܐܢܐܼ ܗܟܢܐ ܣܒܿܪ ܐܢܐ ܒܪܥܝܢܝ ܘܒܡܚܫܒܬܝܼ܂ ‏‏ܕܗܢܐ ܡܘܬܐ ܕܗܕܐ ܚܬܝ ܕܡܢ ܫܠܝܐܼ܂ ܠܐ ܗܘܐ ܣܪܝܩܐܝܬ ܗܘܿܐ܂ ܐܠܐ ‏‏ܣܘܥܪܢܐ ܗܘ ܗܢܐ ܬܡܝܗܐܼ܂ ܕܐܠܗܐ ܢܫܬܒܚ ܒܗܼ܂ ܘܠܐ ܗܘܐ ܕܫܡܥܗ ‏‏ܢܬܿܓܕܦܿ܂ ܐܝܟ ܕܣܼܒܪܘ ܐܝܠܝܢ ܕܫܡܥܘ ܗܕܐ܂ ܗܐ ܥܠܢ ܚܢܢ ܠܩܒܪܐܿ ‏‏ܘܐܫܟܚܢ ܚܢܢ ܒܗܿ ܬܠܬܐ ܙܩܝ̈ܦܐ܂ ܘܠܐ ܝܕܥܝܢ ܚܢܢ ܐܝܢܘ ܡܢܗܘܢ ‏‏ܙܩܝܦܐܿ܂ ܗܿܘ ܕܐܬܬܠܝ ܒܗ ܡܫܝܚܐ܂ ܒܡܘܬܗܿ ܕܗܕܐ ܚܬܝܼ܂ ܡܫܟܚܝܢ ܚܢܢ ‏‏ܕܢܚܙܐܼ ܘܢܐܠܦ ܐܝܢܘ ܙܩܝܦܗ ܕܡܫܝܚܐ܂ ܠܐ ܓܝܪ ܡܗܡܐ ܡܫܝܚܐ ܡܢ ‏‏ܐܝܠܝܢ ܕܡܗܝܡܢܝܢ ܒܗ ܘܒܿܥܝܢ ܠܗ܂ ܗܼܝ ܕܝܢ ܡܠܟܬܐ ܦܪܘܛܢܝܩܐ܃ ܟܕ ܛܒ ‏‏ܡܪܝܪܐ ܗܘܬ ܢܦܫܗܿ ܒܥܕܢܐ ܗܿܘܼ܂ ܚܼܪܬ ܗܘܬ ܒܪܥܝܢܗܼܿ܂ ܕܚܟܝܡܐܝܬ ‏‏ܘܟܢܐܝܬ ܘܬܪܝܨܐܝܬ ܐܡܼܪ ܗܘܐ ܒܪܗܿ ܗܼܢܝܢ ܗܠܝܢܿ ܘܫܩܼܠܬ ܗܘܬ ܒܐܝ̈ܕܝܗܿ ‏‏ܚܕ ܡܢ ܙܩܝ̈ܦܐܼ܂ ܘܣܡܼܬ ܥܠ ܫܠܕܐ ܕܒܪܬܗ ܕܪܡܝܐ ܗܘܬ ܩܕܡܝܗܿ܂ ܘܐܡܼܪܬ ‏‏ܗܘܬ ܒܨܠܘܬܗܿ܂ ܐܠܗܐ ܕܚܘܝ ܗܘܐ ܚܝ̈ܠܐ pb. 14 ܬܡܝ̈ܗܐ ܒܐܬܪܐ ‏‏ܗܢܐ܃ ܐܝܟ ܕܫܡܥܢܢ ܘܗܝܡܢܼܢ܂ ܐܢ ܕܝܠܟ ܗܼܘ ܡܪܝ ܗܢܐ ܙܩܝܦܐ܃ ܘܒܗ ‏‏ܐܬܼܬܠܝܬ ܗܘܬ ܐܢܫܘܬܟ ܡܢ ܡܪ̈ܚܐܼ܂ ܚܿܘܐ ܚܝܠܐ ܥܙܝܙܐ ܘܬܩܝܦܐ ‏‏ܕܐܠܗܘܬܟܿ܂ ܕܒܓܘ ܐܢܫܘܬܐ ܫܪܝܐ ܗܘܬ܂ ܘܬܚܐ ܗܕܐ ܒܪܬܝܼ܂ ܘܬܩܘܡܼ ‏‏ܘܢܫܬܒܚ ܒܗܿ ܫܡܟ܂ ܟܕ ܦܢܿܝܐ ܢܦܫܗܿ ܠܓܘ ܦܓܪܗܿ܂ ܘܢܒܗܬܘܢ ܙܩܘ̈ܦܝܟܼ ‏‏ܘܢܚܕܘܢ ܣܓܘ̈ܕܝܟ܂ ܘܩܘܼܝܬ ܗܘܬ ܛܘܼܪܐ ܣܓܝܐܐ ܡܢ ܒܬܪ ܕܐܡܼܪܬ ‏‏ܗܘܬ ܗܟܢܐ܂ ܘܒܬܪܟܼܢ܂ ܫܩܠܬܗ ܗܘܬ ܠܙܩܝܦܐ ܗܿܘ ܡܢ ܫܠܕܐ ܕܒܪܬܗܼܿ܂ ‏‏ܘܣܡܼܬ ܗܿܘ ܚܪܢܐ܂ ܘܐܡܼܪܬ ܗܘܬ ܬܘܒ ܒܨܠܘܬܗܿ܂ ܐܠܗܐ ܕܒܪܡܙܗ ‏‏ܩܝܿܡܝܢ ܥܠܡ̈ܐ ܘܒܪ̈ܝܬܐ܃ ܘܨܒܿܐ ܒܚ̈ܝܐ ܕܟܘܠܗܘܢ ܒܢܝ̈ܢܫܐ ܕܡܬܦܼܢܝܢ ‏‏ܠܘܬܗ܃ ܘܠܐ ܡܗܡܐ ܡܢ ܒܥܘܬܐ ܕܐܝܠܝܢ ܕܒܿܥܝܢ ܠܗܼ܂ ܐܢ ܕܝܠܟ ܗܼܘ ‏‏ܡܪܝ ܗܢܐ ܙܩܝܦܐܼ܂ ܚܿܘܐ ܚܝܠܐ ܕܢܨܚ̈ܢܝܟ ܐܝܟ ܕܡܥܕ ܐܢܬ܂ ܘܬܚܐ ‏‏ܗܕܐ ܒܪܬܝܼ ܘܬܩܘܡ܂ ܘܢܒܗܬܘܢ ܚܢ̈ܦܐ ܣܓ̈ܕܝ ܠܒܪ̈ܝܬܟ ܚܠܦܝܟ܂ ܘܢܘܕܘܢ ‏‏ܡܗܝܡ̈ܢܐ ܘܫܪ̈ܝܪܐܼ܂ ܕܡܬܦܼܬܚ ܦܘܡܗܘܢ ܠܬܫܒܘܚܬܟܿ܂ ܩܕܡ ܐܝܠܝܢ ‏‏ܕܟܦܪܝܢ ܒܟ܂ ܘܐܓܼܪܬ ܗܘܬ ܛܘܼܪܐ ܣܓܝܐܐ ܒܬܪ ܗܠܝܢܿ ܘܫܩܠܬܗ ܗܘܬ ‏‏ܙܩܝܦܐ ܗܿܘ ܕܬܪ̈ܝܢ ܡܢ ܒܪܬܗܼܿ܂ ܘܫܩܼܠܬ ܗܘܬ ܙܩܝܦܐ ܗܿܘ ܕܬܠܬܐܼ܂ ‏‏ܘܣܡܬܗ ܥܠ ܒܪܬܗܿ܂ ܘܟܕ ܒܥܝܐ ܗܘܬ ܕܬܪܝܡ ܗܘܬ ܥܝܢ̈ܝܗܿ ܠܫܡܝܐ܃ ‏‏ܘܬܦܼܬܚ ܗܘܬ ܦܘܡܗܿ ܒܨܠܘܬܐܼ܂ ܒܗܿ ܒܫܥܬܐ ܘܒܗ ܒܥܕܢܐܼ܂ ܐܝܟ ‏‏ܡܼܛܪܦ ܬܡܪܐ ܠܥܝܢܐܼ܂ ܕܩܼܪܒ ܗܘܐ ܙܩܝܦܐ ܗܿܘ ܠܫܠܕܐ ܕܒܪܬܗܼܿ܂ ܚܝܬ ‏‏ܗܘܬ ܒܪܬܗܼܿ܂ pb. 15 ܘܩܡܼܬ ܗܘܬ ܡܢ ܫܠܝܐ܂ ܘܡܫܒܚܐ ܗܘܬ ܠܐܠܗܐ ‏‏ܕܐܚܝܗܿ ܗܘܐ ܒܙܩܝܦܗ܂܀ ܡܠܟܬܐ ܕܝܢ ܦܪܘܛܢܝܩܐ܃ ܟܕ ܚܙܬ ܗܘܬ ‏‏ܕܐܝܟܢܐ ܚܝܬ ܗܘܬ ܒܪܬܗܼܿ܂ ܐܬܙܼܝܥܬ ܗܘܬܿ ܘܐܬܪܗܒܬܼ ܛܒ܂ ܘܟܕ ܪܗܝܒܐ ‏‏ܗܘܬ ܡܫܒܚܐ ܗܘܬܼ ܠܡܫܝܚܐ܂ ܘܗܝܼܡܢܬ ܗܘܬ ܒܗܿ܂ ܕܒܪܗ ܗܼܘ ܕܐܠܗܐ ‏‏ܚܝܐ܂ ܐܡܿܪ ܠܗܿ ܒܪܗܿ܃ ܚܙܼܝܬܝ ܡܪܬܝܼ܂ ܕܐܠܘ ܗܕܐ ܠܐ ܗܘܼܬ ܝܘܡܢܐܼ܂ ‏‏ܓܕܫܐ ܗܘܬ ܕܫܒܩܝܢ ܗܘܝܢ ܙܩܝܦܐ ܗܢܐ ܕܡܫܝܚܐ ܕܚܝܬ ܒܗ ܚܬܝܼ܂ ‏‏ܘܐܚܕܝܢ ܗܘܝܼܢ܂ ܘܡܝܩܪܝܢ ܗܘܝܢ ܕܚܕ ܡܢ ܗܿܢܘܢ ܓܝ̈ܣܐ ܩܛܘ̈ܠܐ܂ ܗܫܐܿ ‏‏ܗܐ ܚܼܙܝܢܢ ܘܚܼܕܝܢܢܿ ܘܡܫܝܚܐ ܐܫܬܒܚ ܒܗܿ ܕܗܕܐ ܣܥܼܪ܂ ܘܫܩܠܬܗ ܗܘܬ ‏‏ܠܙܩܝܦܗ ܕܡܫܝܚܐܼ܂ ܘܝܗܒܬܗ ܗܘܬ ܠܝܥܩܘܒܼ܂ ܐܝܟ ܕܢܬܢܛܪ ܗܘܐ ‏‏ܒܐܝܩܪܐ ܪܒܐ܂ ܘܦܩܼܕܬ ܗܘܬ ܕܢܬܒܼܢܐ ܗܘܐ ܒܢܝܢܐ ܪܒܐ ܘܡܝܬܪܐܿ܂ ܥܠ ‏‏ܓܓܘܠܬܐ ܕܐܙܕܩܦ ܗܘܐ ܒܗܿ܃ ܘܥܠ ܩܒܪܐ ܕܐܬܣܝܡ ܗܘܐ ܒܗ܂ ‏‏ܐܝܟ ܕܢܬܝܩܪ̈ܢ ܕܘܟܝ̈ܬܐ ܗܠܝܼܢ܂ ܘܢܗܘܐ ܗܘܐ ܬܡܿܢ ܒܝܬ ܘܥܕܐ ‏‏ܕܨܠܘܬܐܼ ܘܟܢܘܫܝܐ ܕܬܫܡܫܬܐ܂ ܂ ܃ ܡܠܟܬܐ ܕܝܢ ܟܕ ܚܙܬ ܗܘܬ ‏‏ܐܢܫܘܬܐ ܟܘܠܗܿ ܕܡܕܝܢܬܐ܃ ܕܟܢܼܫܬ ܗܘܬ ܠܚܙܬܐ ܗܕܐ ܕܣܘܥܪܢܐ ܗܢܐܼ܂ ‏‏ܦܩܼܕܬ ܗܘܬܼ܂ ܕܕܠܐ ܬܚܦܝܬܐ ܕܐܝܩܪܐ ܕܡ̈ܠܟܬܐܿ܂ ܬܐܙܠ ܗܘܬ ܒܪܬܗܿ ‏‏ܥܡܗܿ܃ ܓܠܝܐܝܬ ܠܐܦܕܢܐ ܕܡܠܟܐ ܕܫܪܝܐ ܗܘܬ ܒܗ܂ ܐܝܟ ܕܢܚܙܝܗܿ ‏‏ܗܘܐ ܟܠ ܐܢܫܼ ܘܢܫܒܚ ܠܐܠܗܐ܂ ܥܡܐ ܕܝܢ ܕܝܗ̈ܘܕܝܐ ܘܕܚ̈ܢܦܐ܃ ܗܿܢܘܢ ‏‏ܕܚܼܕܝܘ ܗܘܘ ܒܫܘܪܝܗܿ ܕܗܕܐ ܘܐܬܦܨܚܘܼ܂ ܐܬܟܡܪܘ ܗܘܘ pb. 16 ‏‏ܒܫܘܠܡܗܿ ܕܗܕܐܼ ܛܒ܂ ܡܢܚܝܢ ܗܘܘ ܓܝܪ ܐܠܘ ܠܐ ܗܘܼܬ ܗܕܐ܂ ܕܚܿܙܝܢ ‏‏ܗܘܘ܂ ܕܡܛܠܬܗܿ ܕܗܕܐܼ܂ ܣܓܝܐ̈ܐ ܗܝܡܢܘ ܗܘܘ ܒܗ ܒܡܫܝܚܐ܂ ܝܬܝܪܐܝܬ ‏‏ܕܝܢ ܕܚܿܙܝܢ ܗܘܘܼ܂ ܕܣܓ̈ܝܐܢ ܐܬܘ̈ܬܐ ܕܗ̈ܘܝܢ ܗ̈ܘܝ ܒܫܡܗ ܡܢ ܒܬܪ ‏‏ܣܘܠܩܗܿ܂ ܝܬܝܪ ܡܢ ܗܠܝܢ ܕܗ̈ܘܝ ܩܕܡ ܣܘܠܩܗ܂ ܘܐܦ ܠܐܬܪ̈ܘܬܐ ܪ̈ܚܝܩܐܼ܂ ‏‏ܐܙܼܠ ܗܘܐ ܛܒܼܗ ܕܣܘܥܪܢܐ ܗܢܐ ܕܐܣܬܥܪ܂ ܘܐܦ ܠܫܠܝܚ̈ܐ ܚܒܪ̈ܝܿ܂ ‏‏ܕܡܣܿܒܪܝܢ ܗܘܘ ܠܡܫܝܚܐ܂ ܘܗܘܼܐ ܗܘܐ ܫܠܝܐ ܒܥ̈ܕܬܐ ܕܐܪܫܠܡܼ ‏‏ܘܡ̈ܕܝܢܬܐ ܕܚܕܪ̈ܝܗܿ܂ ܘܐܝܠܝܢ ܕܠܐ ܚܙܘ ܗܕܐ ܥܡ ܐܝܠܝܢ ܕܚܙܘ ܗܕܐܼ܂ ‏‏ܡܫܒܚܝܢ ܗܘܘ ܠܐܠܗܐ܂ ܘܟܕ ܣܠܩܐ ܗܘܬ ܡܠܟܬܐ ܡܢ ܐܪܫܠܡ ‏‏ܠܪܗܘܡܐ ܡܕܝܢܬܐܼ܂ ܟܠ ܡܕܝܢܬܐ ܕܥܐܠܐ ܗܘܬ ܠܗܼܿ܂ ܠܚܙܬܐ ܕܒܪܬܗܿ ‏‏ܚܒܨܝܢ ܗܘܘ ܕܢܚܙܘܢ܂ ܘܟܕ ܥܼܠܬ ܗܘܬ ܠܪܗܘܡܐܼ܂ ܐܫܬܼܥܝܬ ܗܘܬ ܩܕܡ ‏‏ܩܠܘܕܝܣ ܩܣܪ܃ ܗܼܢܝܢ ܗܠܝܢ ܕܗ̈ܘܝ ܗ̈ܘܝ܂ ܘܟܕ ܫܡܼܥ ܗܘܐ ܩܣܪܼ܂ ܦܩܼܕ ܗܘܐ ‏‏ܕܢܦܩܘܢ ܗܘܘ ܟܘܠܗܘܢ ܝܗ̈ܘܕܝܐ ܡܢ ܐܬܪܐ ܕܐܝܛܠܝܐ܂ ܟܕ ܒܟܠܗ ‏‏ܐܬܪܐ ܗܿܘܼ܂ ܣܘܥܪܢܐ ܗܢܐ ܡܬܡܠܠ ܗܘܐ ܡܢ ܣܓ̈ܝܐܐ܂ ܘܐܦ ܩܕܡ ‏‏ܫܡܥܘܢ ܟܐܦܐܼ܂ ܐܫܬܼܥܝܬ ܗܘܬ ܗܼܝ ܗܕܐ ܕܗܘܼܬ܂ ܟܠܡܕܡ ܗܟܝܠ ‏‏ܕܣܥܪܝܢ ܫܠܝܚ̈ܐ ܚܒܪ̈ܝܼܢ܂ ܩܕܡ ܟܠ ܐܢܫ ܡܟܪܙܝܢ ܚܢܢ܂ ܕܢܫܼܡܥܘܢܼ ܐܦ ܐܝܠܝܢ ‏‏ܕܠܐ ܝܕܥܝܢ܂ ܐܝܠܝܢ ܕܒܐܝܕܢ ܣܿܥܪ ܡܫܝܚܐ ܓܠܝܐܝܬ܂ ܕܢܫܬܒܚ ܡܪܢ ܡܢ ‏‏ܟܠܢܫ܂ ܘܗܠܝܢ ܕܬܿܢܝܬ ܩܕܡܝܟܘܢ܃ ܕܬܕܥܘܢܼ ܘܬܬܒܝܢܘܢ ܟܡܐ ܪܒܐ ‏‏ܗܝܡܢܘܬܗ pb. 17 ܡܫܝܚܐܿ܂ ܠܐܝܠܝܢ ܕܡܬܢܩܦܝܢ ܠܗ ܫܪܝܪܐܝܬ܂ ܂ ܝܥܩܘܒ ‏‏ܕܝܢ ܡܕܒܪܢܐ ܕܥܕܬܐ ܕܐܘܪܫܠܡ܃ ܗܿܘ ܕܒܥܝ̈ܢܘܗܝ ܚܙܝܗܝ ܗܘܐ ܠܣܘܥܪܢܐ ‏‏ܗܿܘܼ܂ ܟܬܒܗ ܗܘܐ ܘܫܕܪܗ ܠܫܠܝܚ̈ܐ ܚܒܪ̈ܝܿ܂ ܠܡܕܝ̈ܢܬܐ ܕܐܬܪ̈ܘܬܗܘܢ܂ ܘܐܦ ‏‏ܗܿܢܘܢ ܫܠܝܚ̈ܐܼ܂ ܟܬܒܝܼܢ ܘܡܘܕܥܝܢ ܠܗ ܠܝܥܩܘܒܿ܂ ܟܘܠ ܡܕܡ ܕܣܥܼܪ ܡܫܝܚܐ ‏‏ܒܐܝ̈ܕܝܗܘܢ܂ ܘܡܬܩܪܝܢ ܩܕܡ ܟܠܗ ܟܢܫܐ ܕܥܡܐ ܕܥܕܬܐ܂ ܘܟܕ ܫܡܼܥ ‏‏ܗܘܐ ܐܒܓܪ ܡܠܟܐ ܗ̈ܢܼܝܢ ܗܠܝܢ܃ ܗܼܘ ܘܐܓܘܣܛܝܢ ܐܡܗ܃ ܘܫܠܡܼܬ ܒܪܬ ‏‏ܡܗܼܪܕܬ܃ ܘܦܩܘܪ ܘܥܒܕܫܡܫ܃ ܘܫܡܫܓܪܡ ܘܥܒܕܘ ܘܐܙܝ ܘܒܪ ܟܠܒܐ܃ ܥܡ ‏‏ܫܪܟܐ ܕܚܒܪ̈ܝܗܘܢܼ܂ ܚܿܕܝܢ ܗܘܘܼ ܛܒ܂ ܘܡܫܒܚܝܢ ܗܘܘ ܠܐܠܗܐܼ ܟܠܗܘܢ܂ ‏‏ܘܒܡܫܝܚܐܼ ܡܘܕܝܢ ܗܘܘ܂ ܐܡܿܪ ܠܗ ܐܒܓܪ ܡܠܟܐ ܠܐܕܝ܂ ܨܒܿܐ ܐܢܐ ‏‏ܕܟܠܡܕܡ ܕܫܡܼܥܢܢ ܡܢܟ ܝܘܡܢܐ܃ ܘܫܪܟܐ ܬܘܒ ܕܐܚܪ̈ܢܝܬܐܼ܂ ܩܕܡ ܟܘܠܗܿ ‏‏ܡܕܝܢܬܐ ܬܐܡܪ ܐ̈ܢܝܼܢ ܓܠܝܐܝܬܼ܂ ܘܢܿܫܡܼܥ ܟܠܢܫ ܟܪܘܙܘܬܐ ܕܣܒܪܬܗ ‏‏ܕܡܫܝܚܐ ܕܡܿܠܦ ܐܢܬ ܠܼܢ܂ ܘܢܬܢܝܚܼ ܘܢܬܿܩܝܡ ܒܝܘܠܦܢܐ ܕܡܿܠܦ ܐܢܬ ܠܢܿ ‏‏ܘܢܬܒܝܢܘܢ ܣܓ̈ܝܐܐܼ ܕܟܢܐܝܬ ܗܝܿܡܢܬ ܒܗ ܒܡܫܝܚܐܿ܂ ܒܐܓܪܬܐ ܕܫܿܕܪܬ ‏‏ܗܿܘܝܬ ܠܗ܂ ܘܢܕܥܘܢܼ ܕܐܠܗܐ ܗܘ ܒܪ ܐܠܗܐ܂ ܘܬܠܡܝܕܗ ܐܢܬ ܫܪܝܪܐ ‏‏ܘܡܗܝܡܢܐܿ܂ ܘܚܝܠܗ ܫܒܝܚܐ ܒܥܿܒ̈ܕܐ ܡܚܘܐ ܐܢܬܿ܂ ܩܕܡ ܐܝܠܝܢ ܕܨܒܿܝܢ ‏‏ܕܢܗܝܡܢܘܢ ܒܗ܂ ܘܒܬܪ ܝܘܡܐ ܗܿܘܼ܂ ܦܩܼܕ ܗܘܐ ܐܒܓܪ ܠܥܒܕܘ ܒܪ ܥܒܕܘ܃ ‏‏ܗܿܘ ܕܐܬܐܿܣܝ ܗܘܐ ܡܢ ܟܐܒܐ ܡܪܝܪܐ ܕܪ̈ܓܠܘܗܝ܂ pb. 18 ܕܢܫܕܪ ܗܘܐ ‏‏ܟܪܘܙܐܼ܂ ܘܢܩܪܐ ܗܘܐܼ ܒܟܘܠܗܿ ܡܕܝܢܬܐ܂ ܘܬܬܿܟܢܫ ܗܘܬ ܐܢܫܘܬܐ ܟܘܠܗܿ܂ ‏‏ܓܒܪ̈ܐܼ ܘܢܫ̈ܐ܂ ܠܕܘܟܬܐ ܗܿܝ ܕܡܬܩܪܝܐܼ ܒܝܬ ܬܒܿܪܐ܂ ܠܐܬܪܐ ܪܘܝܚܐ ‏‏ܕܒܝܬ ܥܘܝܕܐ ܒܪܗ ܕܥܒܕܢܚܕ܂ ܕܢܫܡܼܥܘܢ ܗܘܘ ܡܠܦܢܘܬܗ ܕܐܕܝ ܫܠܝܚܐ܂ ‏‏ܘܕܐܝܟܢܐ ܡܿܠܦ ܗܘܐ܂ ܘܒܫܡ ܡܼܢܘ ܡܐܣܐ ܗܘܐ܂ ܘܒܐܝܢܐ ܚܝܠܐ ‏‏ܐܬܘ̈ܬܐ ܗܠܝܢ ܥܒܿܕ ܗܘܐ܂ ܘܬܕܡܪ̈ܬܐ ܗܠܝܢ ܣܥܿܪ ܗܘܐ܂ ܡܛܠ ܕܟܕ ‏‏ܐܣܝܗ ܗܘܐ ܠܐܒܓܪ ܡܠܟܐܼ܂ ܚܐܪ̈ܐ ܗܘ ܒܠܚܘܕ ܕܩܝܡܝܢ ܗܘܘ ܩܕܡܘܗܝ ‏‏ܘܚܙܐܘܗܝ ܗܘܘܿ܂ ܟܕ ܐܣܝܗ ܗܘܐ ܒܡܠܬܗ ܕܡܫܝܚܐ܂ ܗܿܘ ܕܐܣܘ̈ܬܐ ‏‏ܣܓ̈ܝܐܐܼ ܠܐ ܐܫܟܚܘ ܗܘܘ ܕܢܐܣܘܢܝܗܝ܂ ܘܓܒܪܐ ܐܟܣܢܝܐܼ ܐܣܝܗ ‏‏ܗܘܐ ܒܗܝܡܢܘܬܐ ܕܡܫܝܚܐ܂ ܘܟܕ ܐܬܼܟܢܫܬ ܗܘܬ ܟܘܠܗܿ ܡܕܝܢܬܐ ‏‏ܓܒܪ̈ܐ ܘܢܫ̈ܐ܃ ܐܝܟ ܕܦܩܼܕ ܗܘܐ ܡܠܟܐܼ܂ ܩܿܝܡܝܢ ܗܘܘ ܬܡܿܢܼ܂ ܥܘܝܕܐ ‏‏ܘܠܒܿܘ܂ ܘܚܦܣܝܿ ܘܒܪ ܟܠܒܐ܂ ܘܠܒܘܿܒܢܐܿ ܘܚܼܣܪܘܢܼ ܘܫܡܫܓܪܡ܂ ܥܡ ‏‏ܚܒܪ̈ܝܗܘܢ ܕܐܟܘܬܗܘܢ܂ ܪ̈ܫܢܐܼ ܘܚܐܪ̈ܐ ܕܡܠܟܐܼܿ ܘܦܩ̈ܘܕܐ ܘܦܠܚ̈ܐ ‏‏ܟܘܠܗܘܢܿ܂ ܘܐܢܫܐ ܐܘܡ̈ܢܐ ܕܐ̈ܝܕܝܐ ܘܝܗ̈ܘܕܝܐܿ܂ ܘܚ̈ܢܦܐ ܕܐܝܬ ܗܘܘ ܒܗ ‏‏ܒܟܪܟܐ ܗܢܐ܃ ܘܐܟܣ̈ܢܝܐ ܕܐܬܪ̈ܘܬܐ ܕܡܢ ܨܘܒܐ ܘܡܢ ܚܪܢܿ܂ ܘܫܪܟܐ ‏‏ܕܥܡܘܪ̈ܘܗܝ ܕܐܬܪܐ ܗܢܐ ܟܠܗ ܕܒܝܬ ܢܗܪܝܼܢ܂ ܩܝܡܝܢ ܗܘܘ ܟܠܗܘܢܼ܂ ‏‏ܕܢܫܼܡܥܘܢ ܗܘܘ ܡܠܦܢܘܬܗ ܕܐܕܝܿ܂ ܕܫܼܡܥܘ ܗܘܘ ܥܠܘܗܝܿ܂ ܕܬܠܡܝܕܗ ܗܼܘ ‏‏ܕܝܫܘܥܿ܂ ܗܿܘ ܕܐܙܕܩܦ ܗܘܐ pb. 19 ܒܐܪܫܠܡܿ܂ ܘܡܐܣܐ ܗܘܐ ‏‏ܐܣܘ̈ܬܐ ܒܫܡܗ܂ ܘܫܿܪܝ ܗܘܐ ܗܼܘ ܐܕܝܿ܂ ܕܢܐܡܪ ܗܘܐ ܠܗܘܢܼ ܗܟܢܐ܂ ‏‏ܫܡܼܥܘ ܟܠܟܘܢ ܘܐܿܬܒܝܢܘ܂ ܒܡܕܡ ܕܐܡܿܪܢܐ ܩܕܡܝܟܘܢ܂ ܕܠܐ ܗܘܐ ‏‏ܐܣܝܐ ܐܿܝܬܝ ܕܣܡ̈ܡܢܐ ܘܥܩܪܐ ܕܐܘܡܢܘܬܐ ܕܒ̈ܢܝ ܐܢܫܐ܂ ܐܠܐ ܐܿܝܬܝ ‏‏ܬܠܡܝܕܗ ܕܝܫܘܥ ܡܫܝܚܐܿ܂ ܐܣܝܐ ܕܢܦܫ̈ܬܐ ܡܛܪ̈ܦܬܐܼ܂ ܘܦܪܘܩܐ ܕܚ̈ܝܐ ‏‏ܥܬܝ̈ܕܐ܂ ܒܪܐ ܕܐܠܗܐ ܕܢܚܼܬ ܗܘܐ ܡܢ ܫܡܝܐ܃ ܘܠܒܼܫ ܗܘܐ ܦܓܪܐ ‏‏ܘܗܘܼܐ ܒܪܐܢܫܐ܂ ܘܝܗܼܒ ܗܘܐ ܢܦܫܗ ܘܐܙܕܩܦܼ ܚܠܦ ܟܠܗܘܢ ܒ̈ܢܝ ܐܢܫܐ܂ ‏‏ܘܟܕ ܐܬܬܠܝ ܗܘܐ ܥܠ ܩܝܣܐܼ܂ ܐܚܫܟ ܗܘܐ ܫܡܫܐ ܒܪܩܝܥܐ܂ ܘܟܕ ܥܠ ‏‏ܗܘܐ ܠܓܘ ܩܒܪܐܼ܂ ܐܬܢܚܡ ܗܘܐܼ ܘܢܦܼܩ ܗܘܐ ܡܢ ܩܒܪܐ ܥܡ ‏‏ܣܓ̈ܝܐܐ܂ ܘܐܝܠܝܢ ܕܢܛܪܝܢ ܗܘܘ ܩܒܪܐܼ܂ ܠܐ ܚܙܘ ܗܘܘ ܐܝܟܢܐ ܢܦܼܩ ܗܘܐ ‏‏ܡܢ ܩܒܪܐ܂ ܘܥܝܪ̈ܐ ܕܪܘܡܐܼ܂ ܗܿܢܘܢ ܗܘܼܘ ܟܪ̈ܘܙܐ ܘܡܣܿܒܪ̈ܢܐ ܕܩܝܡܼܬܗ܂ ‏‏ܗܿܘ ܕܐܠܘ ܠܐ ܨܒܼܐܼ ܠܐ ܡܐܬ ܗܘܐ܂ ܡܛܠ ܕܡܪܗ ܗܘ ܕܡܘܬܐ ‏‏ܡܦܩܢܐ܂ ܘܐܠܘ ܠܐ ܕܫܼܦܪ ܠܗܼ܂ ܐܦ ܠܐ ܬܘܒ ܦܓܪܐ ܠܒܿܫ ܗܘܐ܂ ܒܝܕ ‏‏ܕܗܘܝܘ ܓܒܘܠܗ ܕܦܓܪܐ܂ ܗܿܘ ܓܝܪ ܨܒܝܢܐ ܕܐܪܟܢܗ ܗܘܐ ܠܝܠܕܐ ܕܡܢ ‏‏ܒܬܘܠܬܐܼ܂ ܗܼܘ ܬܘܒ ܬܚܬܝܗ ܗܘܐ ܠܚܫܐ ܕܡܘܬܐܿ܂ ܘܐܡܟ ܗܘܐ ‏‏ܪܒܘܬܐ ܕܐܠܗܘܬܗ ܡܪܝܡܬܐܼ܂ ܗܿܘ ܕܐܝܬܘܗܝ ܗܘܐ ܨܝܕ ܐܒܘܗܝ ܡܢ ‏‏ܡܬܘܡ ܘܡܢ ܥܠܡ܂ ܗܿܘ ܕܡܠܠܘܗܝ ܗܘܘ ܢܒ̈ܝܐ ܕܡܢ ܩܕܝܡ ܒܪ̈ܐܙܝܗܘܢܿ ‏‏ܘܨܪܘ ܗܘܘ ܕܡܼ̈ܘܬܐ ܕܝܠܕܗ ܘܕܚܫܗ܃ pb. 20 ܘܕܢܘܚܡܗ ܘܕܣܘܠܩܗ ‏‏ܕܠܘܬ ܐܒܘܗܝܿ܂ ܘܥܠ ܡܘܬܒܗ ܕܡܢ ܝܡܝܢܐ܂ ܘܗܐ ܡܣܬܓܕ ܡܢ ܥ̈ܠܝܐ ‏‏ܘܬܚ̈ܬܝܐܼ܂ ܗܿܘ ܕܣܓܝܕܐ ܗܘ ܡܢ ܡܬܘܡ̈ܘܗܝ܂ ܐܦܢ ܓܝܪ ܚܙܬܗ ܕܒܢܝ̈ܢܫܐ ‏‏ܗܘܬܼ܂ ܐܠܐ ܚܝܠܗ ܘܝܕܥܬܗ ܘܫܘܠܛܢܗܼ ܕܐܠܗܐ ܗܘ܂ ܐܝܟ ܕܗܼܘ ܐܡܼܪ ‏‏ܠܢ܂ ܕܗܐ ܡܟܝܠ ܐܫܬܒܚ ܒܪܗ ܕܐܢܫܐ܂ ܘܐܠܗܐ ܕܒܗ ܡܫܒܚ ܠܗ܂ ‏‏ܒܚܝ̈ܠܐ ܘܒܬܕܡܪ̈ܬܐ܂ ܘܒܐܝܩܪܗ ܕܡܢ ܝܡܝܢܐ܂ ܦܓܪܗ ܕܝܼܢ ܐܪܓܘܢܐ ܗܘ ‏‏ܕܟܝܐ ܕܐܠܗܘܬܗ ܡܫܒܚܬܐ܂ ܕܒܗ ܗܼܘ ܐܫܟܚܢ ܚܢܢ ܕܢܚܘܪ ܒܡܪܘܬܗ ‏‏ܟܣܝܬܐ܂ ܠܗܢܐ ܗܟܝܠ ܝܫܘܥ ܡܫܝܚܐ ܡܟܪܙܝܢܼܢ ܘܡܣܿܒܪܝܢ ܚܢܢ܂ ܘܥܡܗ ‏‏ܠܐܒܘܗܝ ܡܫܒܚܝܢ ܚܢܼܢ܂ ܘܠܪܘܚܐ ܕܐܠܗܘܬܗ ܡܪܡܪܡܝܢ ܚܢܼܢ ܘܣܓܕܝܢ ܚܢܢ܂ ‏‏ܡܛܠ ܕܗܟܢܐ ܐܬܦܩܕܢ ܡܢܗ܂ ܕܢܥܡܕ ܘܢܚܿܣܐ ܠܐܝܠܝܢ ܕܡܗܝܡܢܝܼܢ܂ ܒܫܡ ‏‏ܐܒܐ ܘܒܪܐܼ ܘܪܘܚܐ ܕܩܘܕܫܐ܂ ܐܦ ܢܒ̈ܝܐ ܕܡܢ ܩܕܡܝܼܢ ܗܟܢܐ ܐܡܪܝܢ ‏‏ܗܘܘ܂ ܕܡܪܝܐ ܐܠܗܢ ܫܕܪ ܠܢܼ ܘܪܘܚܗ܂ ܘܐܢ ܐܡܿܪ ܐܢܐ ܡܕܡ ܕܠܐ ‏‏ܟܬܝܒ ܒܢܒ̈ܝܐܼ܂ ܠܐ ܢܩܿܒܠܘܢ ܝܗ̈ܘܕܝܐ ܕܩܝܿܡܝܢ ܒܝܢܬܟܘܢ ܘܫܡܥܝܢ ܠܝ܂ ‏‏ܘܐܢ ܬܘܒ ܡܬܕܟܪ ܐܢܐ ܫܡܗ ܕܡܫܝܚܐ܃ ܥܠ ܐܝܠܝܢ ܕܐܝܬ ܠܗܘܢ ‏‏ܟܐ̈ܒܐ ܘܟܘܪ̈ܗܢܐ ܘܠܐ ܡܬܚܠܡܝܢ ܒܗܢܐ ܫܡܐ ܡܫܒܚܐܼ܂ ܠܐ ܢܗܝܡܢܘܢ ‏‏ܣܓ̈ܕܝ ܠܥܿܒܕ ܐܝ̈ܕܝܗܘܢ܂ ܐܢ ܗܟܝܠ ܟܬܝ̈ܒܢ ܐ̈ܢܝܢ܃ ܐܝܠܝܢ ܕܐܡܪܝܢ ܐܢܚܢܢ ‏‏ܒܣܼܦܪ̈ܐ ܘܒܢܒ̈ܝܐ܃ ܘܡܫܟ̈ܚܢ ܘܡܚ̈ܘܝܢ ܚܝ̈ܠܐ ܕܚܘܠܡܢܗܝܢ ܒܟܪ̈ܝܗܐܼ܂ ܠܐ ‏‏ܐܢܫ ܢܚܘܪ ܒܢ ܕܠܐ ܦܘܪܫܢܐ pb. 21 ܕܗܝܡܢܘܬܐ ܕܡܟܪܙܝܢ ܚܢܢܿ܂ ‏‏ܕܐܠܗܐ ܐܙܕܩܦ ܚܠܦ ܟܘܠܗܘܢ ܒ̈ܢܝ ܐܢܫܐ܂ ܘܐܢ ܐܝܬ ܐܝܠܝܢ ܕܠܐ ‏‏ܨܒܿܝܢ ܕܢܬܛܦܝܣܘܢ ܠܡ̈ܠܝܢ ܗܠܝܼܢ܂ ܢܩܿܪܒܘܢ ܨܐܕܝܼܢ܂ ܘܢܓܠܼܘܢ ܠܢ ܡܿܢܘ ‏‏ܪܥܝܢܗܘܢܿ ܕܐܟܘܬܗ ܕܟܘܪܗܢܐ ܕܬܪܥܝܬܗܘܢܼ܂ ܢܩܿܪܒ ‏‏ܣܡܐ ܡܐܣܝܢܐ ܠܚܘܠܡܢܐ ܕܡܚܘܬܗܘܢ܂ ܐܦܢ ܓܝܪ ܠܐ ‏‏ܩܪܝܒܝܢ ܗܘܝܬܘܢ ܒܥܕܢܐ ܕܚܫܗ ܕܡܫܝܚܐܼ܂ ܐܠܐ ܒܫܡܫܐ ܕܚܼܫܟ ܗܘܐ ‏‏ܘܚܿܙܝܬܘܢܼ܂ ܐܝܠܦܘܼ ܘܐܬܒܝܢܘ ܥܠ ܓܘܢܚܐ ܪܒܐ ܕܗܘܼܐ ‏‏ܗܘܐ ܒܗܿܘ ܥܕܢܐ ܕܙܩܝܦܘܬܗ܃ ܕܗܿܘ ܕܦܪܚܼܬ ܣܒܪܬܗ ‏‏ܒܟܘܠܗܿ ܐܪܥܐܿ܂ ܒܐ̈ܬܘܬܐ ܕܥܒܕܝܢ ܬܠܡܝ̈ܕܘܗܝ ܚܒܪ̈ܝܢ ܒܟܘܠܗܿ ܐܪܥܐ܂ ‏‏ܘܐܝܠܝܢ ܕܥܒܪ̈ܝܐ ܗܘܘ܃ ܘܠܫܢܐ ܗܿܘ ܥܒܪܝܐ ܕܝܠܝܕܝܢ ܗܘܘ ‏‏ܒܗ ܝܕܥܝܢ ܗܘܘ ܒܠܚܘܕܼ܂ ܗܐ ܝܘܡܢܐܼ ܡܡܠܠܝܢ ܒܟܠ ܠܫܢ̈ܝܢ܂ ܕܢܫܼܡܥܘܢ ‏‏ܪ̈ܚܝܩܐ ܘܢܗܝܡܢܘܢ ܐܝܟ ܩܪ̈ܝܒܐܼ܂ ܕܗܿܘ ܕܒܠܼܒܠ ܠܫ̈ܢܐ ‏‏ܕܡܪ̈ܚܐ ܒܦܢܝܬܐ ܗܕܐ ܕܩܕܡܝܼܢ܂ ܗܘܝܘ ܡܿܠܦ ‏‏ܒܐܝ̈ܕܝܢ ܝܘܡܢܐܿ܂ ܗܝܡܢܘܬܐ ܕܩܘܫܬܐ ܘܕܫܪܪܐܼܿ ܒܒܨܝܪ̈ܐ ‏‏ܘܒܕܘ̈ܝܐ ܕܡܢ ܓܠܝܠܐ ܕܦܠܣܛܝܢܐ܂ ܐܦ ܐܢܐ ܓܝܪ ܕܚܿܙܝܢ ܐܢܬܘܢ ܠܝܼ܂ ‏‏ܡܢ ܦܢܐܣ ܐܝܿܬܝ܂ ܡܢ ܐܬܪ ܕܢܿܦܩ ܝܘܪܕܢܢ ܢܗܪܐ܂ ‏‏ܘܐܿܬܓܒܝܬ ܥܡ ܚܒܪ̈ܝ ܕܐܗܘܐ pb. 22 ܟܪܘܙܐ ܠܣܒܪܬܐ ܗܕܐܿ܂ ܕܒܗܿ ‏‏ܗܼܘ ܗܐ ܪ̈ܥܡܢ ܦܢܝ̈ܬܐ ܕܒܟܘܠ ܐܬܪ ܒܫܡܗ ܡܫܒܚܐ ܕܡܫܝܚܐ ܣܓܝܕܐ܂ ‏‏ܠܐ ܗܟܝܠ ܐܢܫ ܡܢܟܘܢ ܢܩܿܫܐ ܪܥܝܢܗ ܡܢ ܩܘܫܬܐܿ܂ ܘܢܪܚܩ ܬܪܥܝܬܗ ܡܢ ‏‏ܫܪܪܐ܂ ܠܐ ܬܫܼܬܒܘܢ ܒܬܪ ܚܘܫ̈ܒܐ ܕܛܘܥܝܝ ܡܘܒܕܢܝܬܐܿ܂ ܕܡܼܠܝܢ ܦܣܩ ‏‏ܣܒܪܐ ܕܡܘܬܐ ܡܪܝܪܐ܂ ܘܠܐ ܬܬܼܚܕܘܢ ܒܥ̈ܝܕܐ ܒܝ̈ܫܼܐ ܕܚܢܦܘܬܐ ‏‏ܕܐܒܗ̈ܝܟܘܢ܂ ܘܬܬܪܚܩܘܢ ܠܟܘܢ ܡܢ ܚ̈ܝܐ ܕܩܘܫܬܐ ܘܕܫܪܪܐ ܕܒܡܫܝܚܐ܂ ‏‏ܡܛܘܠ ܕܐܝܠܝܢ ܕܡܗܝܡܢܝܢ ܒܗܼ܂ ܗܢܼܘܢ ܡܬܗܝܡܢܝܢ ܩܕܡܘܗܝ܂ ܗܿܘ ܕܢܚܼܬ ‏‏ܠܘܬܢ ܒܚܢܢܗܿ܂ ܕܢܒܿܛܠ ܡܢ ܐܪܥܐ ܕܒܚ̈ܐ ܕܚܢܦܘܬܐܿ܂ ܘܢܘܩ̈ܝܐ ‏‏ܕܦܬܟܪܘܬܐ܂ ܕܬܘܒܼ ܠܐ ܢܣ̈ܬܓܕܢ ܒܪ̈ܝܬܐ܂ ܐܠܐ ܠܗ ܘܠܐܒܘܗܝܼ ܥܡ ‏‏ܪܘܚܐ ܕܩܘܕܫܗ ܢܣܓܘܕ܂ ܐܢܐ ܓܝܪ ܐܝܟ ܕܦܩܼܕ ܠܝ ܡܪܝܼ܂ ܗܐ ܡܿܟܪܙ ‏‏ܐܢܐܼ ܘܡܿܣܒܪ ܐܢܐ܂ ܘܟܣܦܗ ܥܠ ܦܬܘܪܐܼ ܗܐ ܪܡܿܐ ܐܢܐ ܩܕܡܝܟܘܢܿ ‏‏ܘܙܪܥܐ ܕܡܠܬܗܼ ܙܪܥܿ ܐܢܐ ܒܐ̈ܕܢܐܼ ܕܟܠܢܫ܂ ܘܐܝܠܝܢ ܕܨܒܿܝܢ ܕܢܩܿܒܠܘܢܼ܂ ‏‏ܕܝܠܗܘܢ ܗܘܼ ܦܘܪܥܢܐ ܛܒܿܐ ܕܬܘܕܝܬܐ܂ ܘܐܝܠܝܢ ܕܠܐ ܡܬܛܦܝܣܝܼܢ܂ ܚܠܼܐ ‏‏ܕܪ̈ܓܠܝ ܢܿܦܨ ܐܢܐ ܥܠܝܗܘܢܼ ܐܝܟ ܕܐܡܼܪ ܠܝ ܡܪܝ܂ ܬܘܒܘ ܗܟܝܠ ‏‏ܚܒܝ̈ܒܝ ܡܢ ܐܘܪ̈ܚܬܐ ܒܝܫ̈ܬܐܿ܂ ܘܡܢ ܥܿܒ̈ܕܐ ܣܢ̈ܝܐ܂ ܘܐܬܦܼܢܘ ܠܘܬܗ ‏‏ܒܨܒܝܢܐ ܛܒܿܐ ܘܫܦܝܪܐܼ܂ ܐܝܟ ܕܐܬܦܼܢܝ ܗܼܘ ܠܘܬܟܘܢ ‏‏ܒܚܢܢܗ ܘܒܪ̈ܚܼܡܘܗܝ ܥܬܝܪ̈ܐ܂ ܘܠܐ ܬܗܘܘܢ ‏‏ܐܝܟ ܕܪ̈ܐ pb. 23 ܩܕܡ̈ܝܐ ܕܥܒܪܘ܃ ܕܡܛܘܠ ܕܩܿܫܝܘ ܗܘܘ ܪܥܝܢܗܘܢ ܡܢ ‏‏ܕܚܠܬܗ ܕܐܠܗܐܿ܂ ܩܒܿܠܘ ܗܘܘ ܡܣܡ ܒܪܫܐ ܓܠܝܐܝܬ܂ ‏‏ܕܗܢܼܘܢ ܢܬܪܕܘܢ ܗܘܘܼ܂ ܘܐܝܠܝܢ ܕܐܿܬܝܢ ܒܬܪܗܘܢܿ ܢܙܘܥܘܢ ܘܢܕܚܠܘܢ܂ ‏‏ܟܠܗ ܓܝܪ ܕܐܬܼܐ ܡܪܢ ܠܥܠܡܐܼ܂ ܕܢܠܦܢ ܘܢܚܿܘܝܼܢ܂ ܕܒܫܘܠܡܐ ܗܘ ‏‏ܕܒܪ̈ܝܬܐ ܗܿܘܐ ܢܘܚܡܐ ܠܟܠܗܘܢ ܒܢ̈ܝ ܐܢܫܐ܂ ܘܒܗܿܘ ‏‏ܥܕܢܐܼ ܡܬܨܝܪܝܢ ܕܘܒܪ̈ܝܗܘܢ ܒܩܢܘܡ̈ܝܗܘܢܼ܂ ܘܗܿܘܝܢ ܦܓܪ̈ܝܗܘܢ ܡ̈ܓܠܼܐ ‏‏ܠܟܬܝܒ̈ܬܐ ܕܟܐܢܘܬܐܼ܂ ܘܠܝܬ ܬܡܿܢ ܕܠܐ ܝܕܥܿ ܣܦܼܪܐ܂ ܡܛܘܠ ܕܟܠܢܫܼ ‏‏ܟܬܝܒ̈ܬܐ ܕܣܦܼܪܗ ܗܿܘܐ ܩܿܪܐ ܒܗܿܘ ܝܘܡܐ܂ ܘܚܘܫܒܢܐ ܕܣܘܥܪ̈ܢܘܗܝܼ ܐܿܚܕ ‏‏ܒܨܒ̈ܥܬܐ ܕܐܝ̈ܕܘܗܝ܂ ܗܟܢܐ ܕܐܦ ܗܕܝ̈ܘܛܐܼ܂ ܗܿܘܝܢ ܝܕܥܝܢ ܣܼܦܪܐ ܚܕܬܐ ‏‏ܕܠܫܢܐ ܚܕܬܐ܂ ܘܠܝܬ ܕܐܡܿܪ ܠܚܒܪܗ ܕܩܪܝ ܠܝ ܗܢܐ܂ ܡܛܘܠ ܕܚܕܐ ‏‏ܡܠܦܢܘܬܐܼ܂ ܘܚܕ ܝܘܠܦܢܐ ܡܡܠܟܼ ܥܠ ܟܠܗܘܢ ܒ̈ܢܝ ܐܢܫܐ܂ ܬܬܨܝܪ ܗܟܝܠ ‏‏ܗܕܐ ܡܪܢܝܬܐ ܩܕܡ ܥܝܢܝ̈ܟܘܢܿ ܘܠܐ ܬܥܒܪ ܡܢ ܪܥܝܢܟܘܢܿ ܡܛܠ ܕܐܢ ܡܢ ‏‏ܪܥܝܢܟܘܢ ܥܒܪܐܼ܂ ܡܢ ܟܢܘܬܐܼ ܠܐ ܥܒܪܐ܂ ܘܒܥܘ ܪ̈ܚܡܼܐ ܡܢ ܐܠܗܐܼ܂ ‏‏ܕܢܫܒܘܩ ܠܟܘܢ ܟܦܘܪܝܐ ܣܢܝܐ ܕܚܢܦܘܬܟܘܢܿ܂ ܕܫܒܩܬܘܢ ܠܗܿܘ ܕܒܪܟܘܢ ‏‏ܥܠ ܐ̈ܦܝܗܿ ܕܐܪܥܐ܃ ܘܡܚܿܬ ܡܛܪܗ ܘܡܕܢܚ ܫܡܫܗ ܥܠܝܟܘܢܼ܂ ܘܣܓܕܬܘܢ ‏‏ܚܠܦܘܗܝ ܠܥܒܼ̈ܕܘܗܝ܂ ܦܬܟܪ̈ܐ ܓܝܪ ܘܓ̈ܠܝܦܐ ܨܠܡ̈ܐ ܕܚܢܦܘܬܐ܃ ܘܟܠ ܡܕܡ ‏‏ܕܒܪܝܬܐ ܗܘ ܕܬܟܝܠܝܢ ܐܢܬܘܢ ܥܠܝܗܘܢ܃ pb. 24 ܘܣܓܕܝܢ ܐܢܬܘܢ ‏‏ܠܗܘܢܼ܂ ܐܠܘ ܐܝܬ ܗܘܐ ܒܗܘܢ ܪܓܫܬܐ ܘܒܘܝܢܐܼ܂ ܚܠܦ ܕܐܢܬܘܢ ‏‏ܣܓܕܝܢ ܐܢܬܘܢ ܠܗܘܢ ܘܡܝܩܪܝܢ ܐܢܬܘܢ ܠܗܘܢ܃ ܠܗܘܢ ܗܼܘ ܙܕܩ ܗܘܐ ‏‏ܕܢܩܿܒܠܘܢ ܛܝܒܘܬܟܘܢܿ܂ ܕܓܠܦܬܘܢ ܘܐܿܬܩܢܬܘܢ ܐܢܘܢ܂ ܘܫܪܪܬܘܢ ‏‏ܩܒܼܥܬܘܢ ܐܢܘܢ ܒܨ̈ܨܐ ܕܠܐ ܢܬܬܙܝܥܘܢ܂ ܐܠܘ ܓܝܪ ܪ̈ܓܝܫܢ ܗ̈ܘܝ ‏‏ܒܪ̈ܝܬܐ ܒܐܝܩܪ̈ܝܟܘܢ ܕܨܐܕܝܗܝܼܢ܂ ܥܠܝܟܘܢ ܡܒ̈ܓܢܢ ܗ̈ܘܝ ܟܕ ܩ̈ܥܝܢ ܠܟܘܢܼ܂ ‏‏ܕܠܐ ܬܣܓܕܘܢ ܠܟܢܘ̈ܬܟܘܢܼ܂ ܕܐܟܘܬܟܘܢ ܥܒܝܕܝܢ ܘܒܼܪܝܢ܂ ܡܛܠ ܕܠܘ ‏‏ܕܢܣܬܓܕܢ ܥܒ̈ܝܕܢ ܒܪ̈ܝܬܐ܂ ܐܠܐܼ ܕܢܣܓܕܢ ܠܒܪܘܝܗܝܢ܂ ܘܢܫ̈ܒܚܢ ܠܗܿܘ ‏‏ܕܒܼܪܐ ܐܢ̈ܝܢ܂ ܘܐܝܟ ܡܐ ܕܡܣܬܪܐ ܛܝܒܘܬܗ ܗܪܟܐ ܠܡܪ̈ܚܐܼ܂ ܗܟܢܐ ‏‏ܥܬܝܕܐ ܕܬܬܒܥ ܟܢܘܬܗ ܠܟܦܘܪ̈ܐ ܬܡܿܢ܂ ܚܿܙܐ ܐܢܐ ܠܗ ܓܝܪ ܠܟܪܟܐ ‏‏ܗܢܐܼ܂ ܕܣܓܿܝ ܣܒܝܣ ܒܚܢܦܘܬܐ ܕܠܘܩܒܠ ܐܠܗܐ܂ ܡܿܢܘ ܗܢܐ ܢܒܼܘ ‏‏ܦܬܟܪܐ ܥܒܝܕܐ ܕܣܓܕܝܢ ܐܢܬܘܢ ܠܗ܃ ܘܒܝܠ ܕܡܝܩܪܝܢ ܐܢܬܘܢ ܠܗ܂ ܗܐ ‏‏ܓܝܪ ܐܝܬ ܒܟܘܢ ܕܣܓܕܝܢ ܠܒܪܬ ܢܝܟܠ ܐܝܟ ܚܪ̈ܢܝܐ ܫܒ̈ܒܝܟܘܢܼ܂ ‏‏ܘܠܬܼܪܥܬܐܼ ܐܝܟ ܡܒ̈ܓܝܐ܂ ܘܠܢܫܪܐ ܐܝܟ ܥܪ̈ܒܝܐ܂ ܘܠܫܡܫܐ ܘܠܣܗܪܐܼ ‏‏ܐܝܟ ܫܪܟܐ ܕܚܪ̈ܢܐ ܕܐܟܘܬܟܘܢ܂ ܠܐ ܬܫܬܒܘܢ ܒܙܠܝܩ̈ܐ ܕܢܗܝܪ̈ܐܿ܂ ‏‏ܘܒܟܘܟܒܬܐ ܕܨܡܚܐ܂ ܠܝܛ ܗܼܘ ܓܝܪ ܩܕܡ ܐܠܗܐܿ܂ ܟܘܠ ܡܿܢ ܕܣܓܿܕ ‏‏ܠܒܪ̈ܝܬܐ܂ ܐܦܢ ܓܝܪ ܐܝܬ ܒܗܝܢ ܒܒܪ̈ܝܬܐ ܕܐܝܟ ܪܘܪ̈ܒܢ ܡܢ ܚܒܪ̈ܬܗܝܼܢ܂ ‏‏ܐܠܐ ܟܢܘ̈ܬܐ ܐ̈ܢܝܢ ܕܚܒܪ̈ܬܗܝܢ ܐܝܟ ܕܐܡܿܪܬ ܠܟܘܢ܂ ܟܐܒܐ ܗܘ ܓܝܪ ‏‏ܡܪܝܪܐ ܗܢܐ ܕܠܝܬ ܠܗ ܐܣܝܘܬܐܿ܂ pb. 25 ܕܢܣܓܕܘܢ ܥܒ̈ܝܕܐ ܠܥܒ̈ܝܕܐܿ܂ ‏‏ܘܢܫܒܚܢ ܒܪ̈ܝܬܐ ܠܚܒܪ̈ܬܗܝܢ܂ ܐܝܟܢܐ ܓܝܪ ܕܠܐ ܡܫܟܚܢ ܩܝ̈ܡܢ ܒܚܝܠ ‏‏ܢܦܫܗܝܢ܃ ܐܠܐ ܒܚܝܠܐ ܕܗܿܘ ܕܒܼܪܐ ܐܢ̈ܝܼܢ܂ ܗܟܢܐ ܠܐ ܡܫܟ̈ܚܢ ܕܢܣܬ̈ܓܕܢ ‏‏ܥܡܗ ܘܢܬܝܩܪ̈ܢ ܥܡܗ܂ ܓܘܕܦܐ ܗܘ ܓܝܪ ܒܬܪ̈ܬܝܗܝܢ܂ ܒܒܪ̈ܝܬܐ ܟܕ ‏‏ܡܣ̈ܬܓܕܢܿ ܘܒܒܪܘܝܐ ܟܕ ܡܫܘܬܦܢ ܠܗ ܒܪ̈ܝܬܐ ܕܢܘܟܪ̈ܝܢ ܠܟܝܢܐ ‏‏ܕܐܝܬܘܬܗ܂ ܟܠܗܿ ܓܝܪ ܢܒܝܘܬܐ ܕܢܒ̈ܝܐ܃ ܘܟܪܘܙܘܬܐ ܕܝܠܢ ܕܒܬܪ ܢܒ̈ܝܐ ‏‏ܗܕܐ ܗܝܼ܂ ܕܠܐ ܢܣܬ̈ܓܕܢ ܒܪ̈ܝܬܐ ܥܡ ܒܪܘܝܐ܂ ܘܠܐ ܬܘܒ ܢܬܟܕܢܘܢ ‏‏ܒܢܝ̈ܢܫܐ ܒܢܝܪܐ ܕܚܢܦܘܬܐ ܕܚܒܿܠܐ܂ ܠܐ ܗܘܐ ܕܝܢ ܡܛܠ ܕܡܬܚ̈ܙܝܢ ‏‏ܒܪ̈ܝܬܐ ܐܡܿܪ ܐܢܐ ܕܠܐ ܢܣܬ̈ܓܕܢ܂ ܐܠܐ ܟܠ ܡܕܡ ܕܥܒܝܕܐ ܗܘܼ ܒܪܝܐ ‏‏ܗܘ܂ ܐܢ ܡܬܚܙܐܼ ܘܐܢ ܠܐ ܡܬܚܙܐ܂ ܪܘܫܥܐ ܗܘ ܡܪܝܪܐ ܗܢܐܿ܂ ‏‏ܕܢܣܝܡ ܠܗ ܫܡܐ ܡܫܒܚܐ ܕܐܠܗܘܬܐ܂ ܠܐ ܗܘܐ ܓܝܪ ܠܒܪ̈ܝܬܐ ‏‏ܐܟܘܬܟܘܢ ܡܟܪܙܝܢ ܚܢܢ ܘܣܓܕܝܢ ܚܢܢ܂ ܐܠܐܼ ܠܡܪܐ ܕܒܪ̈ܝܬܐ܂ ܙܘܥܐ ‏‏ܓܝܪ ܗܿܘ ܕܐܙܝܥ ܐܢܝ̈ܢ ܒܙܩܝܦܐܼ܂ ܗܼܘ ܣܗܿܕܼ܂ ܕܟܘܠ ܡܕܡ ܕܥܒܝܕܐ ܗܘܼ܂ ‏‏ܒܚܝܠܐ ܗܘ ܕܥܒܘܕܗ ܬܠܼܐ ܘܩܐܡ܂ ܗܿܘ ܕܐܝܬܘܗܝ ܗܘܐܼ ܩܕܡ ܥܠܡ̈ܐ ‏‏ܘܒܪ̈ܝܬܐ܂ ܗܿܘ ܕܠܐ ܡܬܕܪܟ ܟܝܢܗܼ܂ ܒܕܠܐ ܡܬܚܙܐ ܟܝܢܗ܂ ܘܥܡ ܐܒܘܗܝ ‏‏ܡܬܩܕܫ ܒܡܪ̈ܘܡܐ ܥ̈ܠܝܐ܂ ܡܛܠ ܕܡܪܐ ܗܘܼ ܘܐܠܗܐ ܗܘ ܕܡܢ ܡܬܘܡ܂ ‏‏ܗܕܐ ܗܝ ܡܠܦܢܘܬܢ ܒܟܠ ܐܬܪ ܘܒܟܠ ܦܢ̈ܝܢ܂ ܘܗܟܢܐ ܐܬܿܦܩܕܢܢ ܕܢܟܪܙ ‏‏ܠܐܝܠܝܢ ܕܫܡܥܝܢ ܠܢ܂ ܠܐ ܗܘܐ ܩܛܝܪܐܝܬ܂ ܐܠܐ ܒܝܘܠܦܢܐ ܕܩܘܫܬܐ ‏‏ܘܒܚܝܠܐ ܕܐܠܗܐ܂ ܘܐܬܘ̈ܬܐ ܕܗ̈ܘܝܢ pb. 26 ܒܫܡܗܼ܂ ܗܿܢܝܢ ܣܗ̈ܕܢ ܥܠ ‏‏ܗܝܡܢܘܬܢ ܕܫܪܝܪܐ ܘܡܗܝܡܢܐ܂ ܐܬܛܦܝܣܘ ܗܟܝܠܿ ܠܡ̈ܠܝܼ܂ ܘܩܿܒܠܘ ܡܕܡ ‏‏ܕܐܿܡܪܬ ܘܐܡܿܪ ܐܢܐ ܩܕܡܝܟܘܢܿ ܘܕܠܐ ܐܬܒܥ ܡܘܬ̈ܝܟܘܢܼ܂ ܗܐ ܡܣܼܓܐ ‏‏ܐܢܐ ܩܕܡܝܟܘܢܼ ܙܗܝܪܘܬܐ܂ ܩܿܒܠܘ ܡ̈ܠܝ ܒܘܠܝܬܐܼ ܘܠܐ ܬܗܡܘܢ܂ ܩܪܘܒܘ ‏‏ܠܘܬܝ ܪ̈ܚܝܩܝ ܡܢ ܡܫܝܚܐ ܘܗܘܼܘ ܩܪ̈ܝܒܐ ܠܡܫܝܚܐ܂ ܘܚܠܦ ܕܒܚ̈ܐ ܘܢܘܩ̈ܝܐ ‏‏ܕܛܥܝܘܬܐܼ܂ ܩܿܪܒܘ ܠܗ ܡܟܝܠܼ ܕܒ̈ܚܐ ܕܬܘܕܝܬܐ܂ ܡܢܐ ܗܝ ܕܝܢ ܥܿܠܬܐ ‏‏ܪܒܬܐ ܕܒܢܼܝܐ ܠܟܘܢ ܡܨܥܬ ܟܪܟܐ ܗܢܐܿ܂ ܘܕܐܙܠܝܢ ܘܐܿܬܝܢ ܡܿܢܩܝܢ ܥܠܝܗܿ ‏‏ܠܕܝ̈ܘܐܿ܂ ܘܡܕܒܚܝܢ ܒܗܿ ܠܫܐ̈ܕܐ܂ ܘܐܢ ܟܬܒ̈ܐ ܠܐ ܝܕܥܝܢ ܐܢܬܘܢ܃ ܗܼܘ ‏‏ܟܝܢܐ ܒܚܙܬܗ ܠܐ ܡܿܠܦ ܠܟܘܢܼ܂ ܕܥܝ̈ܢܐ ܐܝܬ ܠܗܘܢ ܠܦܬܟܪ̈ܝܟܘܢܼ ܘܠܐ ‏‏ܚܿܙܝܢ܂ ܘܐܢܬܘܢ ܕܚܿܙܝܢ ܐܢܬܘܢ ܒܥܝ̈ܢܐ܃ ܒܗܿܝ ܕܠܐ ܡܬܒܝܢܝܢ ܐܢܬܘܢ܂ ܗܘܝܼܬܘܢ ܠܟܘܢ ‏‏ܐܦ ܐܢܬܘܢܼ ܐܟܘܬܗܘܢ܂ ܕܠܐ ܚܿܙܝܼܢ ܘܠܐ ܫܡܥܝܢ܂ ܘܐܝܩܐ ܗܘ ܬܟܒܝܢ ‏‏ܩܠܝܟ̈ܘܢ ܣܪ̈ܝܩܐܿ܂ ܠܐ̈ܕܢܐ ܚܼܪ̈ܫܬܐ܂ ܟܕ ܗܢܿܘܢ ܠܐ ܥܕܝܠܝܼܢ ‏‏ܒܗܿܝ ܕܠܐ ܫܡܥܝܢ܂ ܡܛܠ ܕܟܝܢܐ ܐܢܘܢܿ ܚܼܪܫܐܼ ‏‏ܘܫܬܝܩܐ܂ ܥܕܠܝܐ ܕܝܢ ܕܛܡܝܪܐ ܒܗ ܟܐܢܘܬܐܼ ܕܝܠܟܘܢ ܗܘ܂ ܕܠܐ ܨܒܿܝܢ ‏‏ܐܢܬܘܢ ܕܬܬܿܒܝܢܘܢ܂ ܐܦ ܠܐ ܒܗܢܐ ܡܕܡ ܕܚܿܙܝܢ ܐܢܬܘܢܿ ܠܐ ܓܝܪ ‏‏ܫܒܩܐ ܠܟܘܢ ܥܪܦܠܐ ܕܛܘܥܝܝ ܕܩܪܝܡܐ ܥܠ ܪܥܝܢܝܟܘܢܿ܂ ܕܬܼܩܢܘܢ ‏‏ܢܘܗܪܐ ܫܡܿܝܢܐ pb. 27 ܕܐܝܬܘܗܝ ܒܘܝܢܐ ܕܝܕܥܬܐ܂ ܥܪܘܩܘ ܗܟܝܠ ܡܢ ‏‏ܥܒ̈ܝܕܐ ܘܒܪ̈ܝܐܿ܂ ܐܝܟ ܕܐܡܿܪܬ ܠܟܘܢ܂ ܕܒܫܡܐ ܗܘ ܒܠܚܘܕ ܡܬܩܪܝܢ ‏‏ܐܠܗ̈ܐܼ܂ ܟܕ ܠܘ ܐܠܗ̈ܐ ܐܢܘܢ ܒܟܝܢܗܘܢ ܘܐܬܿܩܪܒܘ ܠܘܬ ܗܿܘ ܕܒܟܝܢܗ ‏‏ܐܝܬܘܗܝ ܐܠܗܐܿ܂ ‏ܡܢ ‏‏ܡܬܘܡ ܘܡܢ ܥܠܡ܂ ܘܠܐ ܗܘܐ ܥܒܿܕܐ ܗܘ ܐܝܟ ܦܬܟܪ̈ܝܟܘܢܼ܂ ܘܐܦ ܠܐ ‏‏ܒܪܝܬܐ ܘܬܘܩܢܐ ܐܝܟ ܨܠܡ̈ܐ‏‎‎‏ ܕܡܫܬܒܗܪܝܢ ‏‏ܐܢܬܘܢ ܒܗܘܢ܂ ܡܛܘܠ ܕܐܦܢ ܠܒܼܫ ܦܓܪܐ ܗܢܐܼ܂ ܐܠܗܐ ܐܝܬܘܗܝ ‏‏ܗܘܐ ܥܡ ܐܒܘܗܝ܂ ܒܪ̈ܝܬܐ ܓܝܪ ܕܐܬܬܙܝܥ ܗ̈ܘܝ ‏‏ܒܩܛܠܗ܃ ܘܐܬܪܗܒ ܗ̈ܘܝ ܒܚܫܐ ܕܡܘܬܗܼ܂ ܗܼܢܝܢ ܣܗ̈ܕܢ ܕܗܘܝܘ ܕܒܼܪܐ ‏‏ܒܪ̈ܝܬܐ܂ ܠܐ ܗܘܐ ܓܝܪ ܚܠܦ ܒܪ ܐܢܫܐ ‏‏ܙܥܼܬ ܐܪܥܐ܂ ܐܠܐܼ ܚܠܦ ܗܿܘ ܕܪܩܼܥ ܗܘܐ ܐܪܥܐ ܥܠ ܡ̈ܝܐ܂ ‏‏ܘܠܐ ܗܘܿܐ ܚܠܦ ܒܪ ܐܢܫܐ ܚܼܫܟ ܗܘܐ ܫܡܫܐ ܒܨܠܝܒܐ܂ ‏‏ܐܠܐܼ ܚܠܦ ܗܿܘ ܕܥܼܒܕ ܢܗܝܪ̈ܐ ܪ̈ܘܪܒܐ܂ ܘܠܐ ܗܘܐ ‏‏ܒܒܪܢܫܐ ܐܬܢܚܡܘ ܗܘܘ ܟܐ̈ܢܐ ܘܙܕܝ̈ܩܐܼ܂ ܐܠܐ ܒܗܿܘ ܕܝܗܼܒ ܗܘܐ ‏‏ܫܘܠܛܢܐ ܕܡܘܬܐ ܡܢ ܪܫܼܝܬܐ܂ ܘܠܐ ܗܘܐ ܒܒܪ ܐܢܫܐ ܐܨܛܪܝ ܗܘܐ ‏‏ܐ̈ܦܝ ܬܪܥܐ ܕܗܝܟܠܐ ܕܝܗ̈ܘܕܝܐ ܡܢ ܪܝܫ ܠܪܝܫܼ܂ ܐܠܐܼ ܒܗܿܘ ܕܐܡܼܪ ܗܘܐ ‏‏ܠܗܘܢ ܕܗܐ ܫܒܝܩ ܒܝܬܟܘܢ ܚܪܒܐ܂ ܗܐ ܓܝܪ ܐܠܘ ܠܐ ‏‏ܕܝܕܥܘ ܗܿܢܘܢ ܕܙܩܦܘܗܝ ܕܒܪܗ ܗܿܘ ܕܐܠܗܐܼ܂ ܠܐ ‏‏ܗܘܐ ܚܘܪܒܐ ܕܡܕܝܢܬܗܘܢ pb. 28 ܡܟܪܙܝܢ ܗܘܘ܂ ܐܦ ܠܐ ‏‏ܗܘܐ ܥܠ ܢܦܫܗܘܢ ܘܝ̈ܐ ܡܛܦܝܢ ܗܘܘ܂ ܐܦ ܠܐ ܓܝܪ ܐܠܘ ‏‏ܨܒܘ ܗܘܘ ܕܢܗܡܘܢ ܡܢ ܗܕܐ ܬܘܕܝܬܐܿ܂ ܫܒܩܝܢ ܗܘܘ ‏‏ܠܗܘܢ ܓܘܢ̈ܚܐ ܕܚܝ̈ܠܐ ܕܗܘܘ ܒܗܿܘ ܥܕܢܐ܂ ܗܐ ܓܝܪ ܐܦ ܡܢ ܒܢܝ̈ܗܘܢ ‏‏ܕܙܩܘ̈ܦܐܼ܂ ܥܒܝܕܝܢ ܝܘܡܢܐ ܟܪ̈ܘܙܐ ܘܡܣܿܒܪ̈ܢܐܿ܂ ܥܡ ܫܠܝܚ̈ܐ ܚܒܪ̈ܝܿ܂ ܒܟܘܠܗܿ ‏‏ܐܪܥܐ ܕܦܠܣܛܝܢܐܿ܂ ܘܒܝܬ ܫܡܪ̈ܝܐ ܘܒܟܠܗ ܐܬܪܐ ܕܦܠܫܬ̈ܝܐ܂ ܘܫܝܛܝܢ ‏‏ܦܬܟܪ̈ܐ ܕܚܢܦܘܬܐܼ ܘܡܬܝܩܪ ܙܩܝܦܗ ܕܡܫܝܚܐ܂ ܘܡܘܕܝܢ ܥܡ̈ܡܐ ܘܒܪ̈ܝܬܐܼ ‏‏ܒܐܠܗܐ ܕܗܘܼܐ ܒܪ ܐܢܫܐ܂ ܐܢ ܟܝܬ ܟܕ ܒܐܪܥܐ ܐܝܬܘܗܝ ‏‏ܗܘܐ ܝܫܘܥ ܡܪܢ܃ ܗܝܡܢܬܘܢ ܗܘܝܬܘܢ ‏‏ܒܗ ܕܒܪܗ ܗܼܘ ܕܐܠܗܐ܃ ܘܩܕܡ ܕܬܫܡܥܘܢ ܗܘܝܬܘܢ ܡܠܬܐ ܕܟܪܘܙܘܬܗ܃ ‏‏ܐܘܕܝܬܘܢ ܒܗ ܕܐܠܗܐ ܗܘ܃ ܗܫܐ ܕܣܠܼܩ ܠܘܬ ܐܒܘܗܝ܃ ܘܚܙܝܬܘܢ ‏‏ܐܬܘ̈ܬܐ ܘܬܕܡܪ̈ܬܐ ܕܗ̈ܘܝܢ ܒܫܡܗ܃ ܘܡܠܬܐ ܕܣܒܪܬܗ ܫܡܥܬܘܢ ‏‏ܒܐܕ̈ܢܝܟܘܢܼ܂ ܠܐ ܐܢܫ ܡܢܟܘܢ ܢܬܦܿܠܓ ܒܪܥܝܢܗܿ܂ ܐܝܟ ܕܢܬܿܩܝܡ ܠܘܬܟܘܢ ‏‏ܫܘܘܕܝܐ ܕܒܘܪܟܬܗ ܕܫܠܼܚ ܠܟܘܢܿ܂ ܕܛܘܒܝܟܘܢ ܕܗܝܡܢܬܘܢ ܒܝ ܟܕ ܠܐ ‏‏ܚܙܝܬܘܢܢܝ܂ ܘܡܛܘܠ ܕܗܟܢܐ ܗܝܡܢܬܘܢ ܒܝܼ܂ ܟܪܟܐ ܕܥܡܪܝܢ ܐܢܬܘܢ ܒܗ ‏‏ܢܗܘܐ ܒܪܝܟܼ܂ ܘܒܥܠܕܒܒܐܿ ܠܐ ܢܫܬܠܛ ܒܗܼ ܠܥܠܡ܂ ܠܐ ܗܟܝܠ ܬܣܛܘܢ ‏‏ܡܢ ܗܝܡܢܘܬܗ܂ ܕܗܐ ܫܡܥܬܘܢ ܘܚܙܝܬܘܢ ܐܝܠܝܢ ܕܣܗ̈ܕܢ ‏‏ܠܗܝܡܢܘܬܗ܂ ܕܒܪܐ ܗܘ ܣܓܝܕܐܿ܂ pb. 29 ܘܐܠܗܐ ܗܘ ܡܫܒܚܐܿ܂ ‏‏ܘܡܠܟܐ ܗܘ ܙܟܝܐܿ܂ ܘܚܝܠܐ ܗܘ ܬܩܝܦܐܿ܂ ܘܒܗܝܡܢܘܬܗ ܗܘ ‏‏ܫܪܝܪܬܐ ܡܫܟܚ ܐܢܫ ܩܿܢܐܿ܂ ܥܝܢܐ ܕܪܥܝܢܐ ܫܪܝܪܐܿ܂ ܘܡܬܒܝܢ ܕܟܘܠ ‏‏ܡܿܢ ܕܣܓܿܕ ܠܒܪ̈ܝܬܐܼ܂ ܪܘܓܙܐ ܗܘ ܕܟܐܢܘܬܐ ܡܕܪܟ ܠܗ܂ ܟܠ ‏‏ܡܕܡ ܓܝܪ ܕܐܡܪܝܢ ܚܢܢ ܩܕܡܝܟܘܢܼ܂ ܐܝܟ ܕܩܿܒܠܢ ܚܢܢ ܡܢ ܡܘܗܒܬܗ ‏‏ܕܡܪܢ ܐܡܪܝܢ ܚܢܼܢ܂ ܘܡܠܦܝܢ ܚܢܢ ܘܡܚܘܝܢ ܚܢܼܢ ܕܬܼܩܢܘܢ ܚܝ̈ܝܟܘܢ܂ ܘܠܐ ‏‏ܬܘܒܕܘܢ ܪ̈ܘܚܬܟܘܢ ܒܛܘܥܝܝ ܕܚܢܦܘܬܐ܂ ܡܛܠ ܕܕܢܚܼ ܠܗ ܢܘܗܪܐ ܫܡܿܝܢܐ ‏‏ܒܒܪܝܬܐܼ܂ ܘܗܘܝܘ ܕܓܒܼܐ ܗܘܐ ܠܐܒܗ̈ܬܐ ܩܕܡ̈ܝܐܿ܂ ܘܠܟܐ̈ܢܐ ܘܠܢܒ̈ܝܐܿ܂ ‏‏ܘܡܠܠ ܗܘܐ ܥܡܗܘܢ ܒܓܠܝܢܐ ܕܪܘܚܐ ܕܩܘܕܫܐ܂ ܗܘܝܘ ܓܝܪ ܐܠܗܐ ‏‏ܕܝܗ̈ܘܕܝܐ ܕܙܩܦܘܗܝ܂ ܘܚ̈ܢܦܐ ܛܥ̈ܝܐܼ ܠܗ ܗܼܘ ܣܓܕܝܼܢ ܐܦ ܟܕ ܠܐ ܝܕܥܝܢ܂ ‏‏ܡܛܠ ܕܠܝܬ ܐܠܗܐ ܐܚܪܢܐ ܒܫܡܝܐ ܘܒܐܪܥܐ܂ ܘܗܐ ܣܠܩܐ ܠܗ ‏‏ܬܘܕܝܬܐܼ܂ ܡܢ ܐܪ̈ܒܥ ܦܢܝ̈ܬܗܿ ܕܐܪܥܐ܂ ܗܐ ܗܟܝܠ ܫܡܼܥ ‏‏ܐ̈ܕܢܝܟܘܢ ܡܕܡܼ ܕܠܐ ܫܡܝܥ ܗܘܐ ܠܟܘܢ܂ ܘܗܐ ܬܘܒ ܚ̈ܙܝ ܥܝܢܝ̈ܟܘܢ ‏‏ܡܕܡܼ܂ ܕܠܐ ܡܢ ܡܬܘܡ ܚܼܙܐ ܗܘܐ ܠܟܘܢ܂ ܠܐ ܗܟܝܠ ܬܗܘܘܢ ܛܠܘ̈ܡܐ ‏‏ܠܡܕܡ ܕܫܡܥܬܘܢ ܘܚܙܝܬܘܢ܂ ܐܥܒܪܘ ‏‏ܡܢܟܘܢ ܪܥܝܢܐ ܡܪܘܕܐ ܕܐ̈ܒܗܝܟܘܢܼܿ ܘܚܪܪܘ ܢܦܫ̈ܬܟܘܢ ܡܢ ‏‏ܢܝܪܐ ܕܚܼܛܝܬܐ ܕܡܡܠܟܐ ܥܠܝܟܘܢܿ܂ ܒܢܘܩ̈ܝܐ ܘܒܕܒܚ̈ܐ ܕܩܕܡ ܓܠܝܦ̈ܐ܂ ‏‏ܢܿܬܒܛܠ ܠܟܘܢ ܥܠ ܚܝ̈ܝܟܘܢ ܐܒ̈ܝܕܐܼ܂ ܘܥܠ pb. 30 ܡܪܟܢ ‏‏ܪܫܟܘܢ ܒܛܝܠܐ܂ ܘܩܢܘ ܪܥܝܢܐ ܚܕܬܐܿ܂ ܗܿܘ ܕܣܓܿܕ ܠܥܒܘܕܐ ܘܠܐ ‏‏ܠܥܒܝܕܐ܂ ܗܿܘ ܕܨܝܪ ܒܗ ܨܠܡܐ ܕܩܘܫܬܐ ܘܕܫܪܪܐܿ܂ ܕܐܒܐ ܘܕܒܪܐ ‏‏ܘܕܪܘܚܐ ܕܩܘܕܫܐ܂ ܟܕ ܬܗܝܡܢܘܢ ܘܬܥܡܕܘܢܿ܂ ܒܫܡ̈ܗܐ ܬܠܝ̈ܬܝܐ ‏‏ܘܡܫܒ̈ܚܐ܂ ܗܕܐ ܗܝ ܓܝܪ ܡܠܦܢܘܬܢ ܘܟܪܘܙܘܬܢ܂ ܠܐ ܗܘܐ ܓܝܪ ‏‏ܒܣܓ̈ܝܐܬܐ ܡܬܗܝܡܢ ܫܪܪܗ ܕܡܫܝܚܐ܂ ܘܐܝܠܝܢ ܕܨܒܿܝܢ ܕܢܬܛܦܝܣܘܢ ‏‏ܠܡܫܝܚܐ ܝܕܥܝܢ ܐܢܬܘܢܼ܂ ܕܙܒܢ̈ܬܐ ܣܓ̈ܝܐܬܐ ܬܢܿܝܬ ܡ̈ܠܝ ܩܕܡܝܟܘܢܼ܂ ‏‏ܕܬܐܠܦܘܢܼ ܘܬܬܒܝܢܘܢ ܒܡܕܡ ܕܫܡܥܝܢ ܐܢܬܘܢ܂ ܘܚܢܢ ܢܚܕܐ ܒܗܕܐܼ܂ ‏‏ܐܝܟ ܐܟܪܐ ܒܚܩܠܗ ܒܪܝܟܬܐ܂ ܘܐܠܗܢ ‏‏ܢܫܬܒܚ ܒܬܝܒܘܬܟܘܢ ܕܠܘܬܗ܂ ܘܟܕ ܐܢܬܘܢ ܚܿܝܝܢ ܐܢܬܘܢ ܒܗܕܐܼ܂ ܐܦ ‏‏ܚܢܢ ܕܡܿܠܟܝܢ ܚܢܢ ܠܟܘܢ ܗܕܐܼ܂ ܠܐ ܡܬܛܠܡܝܢܢ ܐܓܪܐ ܒܪܝܟܐ ܕܗܕܐ܂ ‏‏ܘܡܛܠ ܕܬܟܝܠ ܐܢܐ܃ ܕܗܿܘܝܢ ܐܢܬܘܢ ܐܪܥܐ ܒܪܝܟܬܐ܃ ‏‏ܐܝܟ ܨܒܝܢܗ ܕܡܪܝܐ ܡܫܝܚܐ܃ ܡܛܠ ܗܢܐ ܚܠܦ ܚܠܼܐ ‏‏ܕܪ̈ܓܠܝ ܕܐܬܐܡܪ ܠܢ܃ ܕܢܿܦܨ ܥܠ ܟܪܟܐ ܕܠܐ ܡܩܿܒܠ ܡ̈ܠܝܼܢ܂ ‏‏ܗܐ ܢܿܦܨܬ ܝܘܡܢܐ ܥܠ ܬܪܥܐ ܕܐ̈ܕܢܝܟܘܢ ܦܬܓ̈ܡܐ ‏‏ܕܣܦܘ̈ܬܝܼ܂ ܕܒܗܘܢ ܨܝܼܪܐ ܡܬܝܬܗ ܕܡܫܝܚܐ܂ ܕܗܼܘܬܼ ܐܦ ‏‏ܕܥܬܝܕܐ ܕܬܗܘܐ܂ ܘܩܝܡܼܬܐ ܘܢܘܚܡܐܼ ܕܟܠܗܘܢ ܒܢܝ̈ܢܫܐ܂ ܘܦܘܪܫܢܐ ‏‏ܕܗܿܘܐ ܒܝܬ ܡ̈ܗܝܡܢܐ ܠܟܦܘܪ̈ܐ ‍ܘܡܣܡ ܒܪܝܫܐ ܒܝܫܐ ܕܢܛܝܪ ܠܐܝܠܝܢ ‏‏ܕܠܐ ܝܕܥܝܢ ‏ܠܐܠܗܐ ܘܡܘܠܟܢܐ ܒܪܝܟܐ pb. 31 ܕܚܕܘ̈ܬܐ ‏‏ܕܥܬ̈ܝܕܢܿ܂ ܕܢܩܿܒܠܘܢܿ ܐܝܠܝܢ ܕܗܝܡܢܘ ܒܗ ܒܡܫܝܚܐܿ܂ ܘܣܓܕܘ ‏‏ܠܗ ܘܠܐܒܘܗܝ ܪܡܐܿ܂ ܘܐܘܕܝܘ ܒܗ ܘܒܪܘܚܐ ܕܐܠܗܘܬܗ܂ ܘܡܟܝܠ ܙܕܩ ܠܢ ‏‏ܕܢܫܿܠܡ ܡܠܬܢ ܕܗܫܐܼ܂ ܘܐܝܠܝܢ ܕܩܿܒܠܘ ܡܠܬܗ ܕܡܫܝܚܐܼ ܢܿܩܘܘܢ ܨܐܕܝܢ܂ ‏‏ܘܐܦ ܐܝܠܝܢ ܕܨܒܿܝܢ ܕܢܫܬܘܬܦܘܢ ܥܡܢ ܒܨܠܘܬܐ܂ ܘܟܢ ܢܐܙܠܘܢ ‏‏ܠܒ̈ܬܝܗܘܢ܂ ܘܚܼܕܝ ܗܘܐ ܒܗܕܐ ܗܼܘ ܐܕܝ ܫܠܝܚܐܿ܂ ܕܚܼܙܐ ܗܘܐ ‏‏ܕܣܘܓܐܐ ܕܐܢܫܘܬܐ ܕܡܕܝܢܬܐ ܦܫܬ ܠܗܿ ܠܘܬܗ܂ ܘܕܠܝ̈ܠܐ ܗܘܘ ܐܝܠܝܢ ‏‏ܕܠܐ ܩܘܝܘ ܗܘܘ ܒܗܿܘ ܥܕܢܐ܂ ܟܕ ܐܦ ܗܢܼܘܢ ܗܠܝܢ ܕܠܝ̈ܠܐܼ܂ ܒܬܪ ‏‏ܝܘܡ̈ܬܐ ܩܠܝܠܼ܂ ܩܒܿܠܘ ܗܘܘ ܠܡ̈ܠܘܗܝ܂ ܘܗܝܡܢܘ ܗܘܘ ‏‏ܒܣܒܪܬܐ ܕܟܪܘܙܘܬܗ ܕܡܫܝܚܐ܂ ܘܟܕ ܐܡܼܪ ܗܘܐ ܗܠܝܢ ܐܕܝ ܫܠܝܚܐܼ܂ ‏‏ܩܕܡ ܟܠܗ ܟܪܟܐ ܕܐܘܪܗܝ܃ ܘܚܼܙܐ ܗܘܐ ܐܒܓܪ ܡܠܟܐ܃ ܕܟܘܠܗܿ ܡܕܝܢܬܐ ‏‏ܚܼܕܝܬ ܗܘܬ ܒܡܠܦܢܘܬܗ܃ ܓܒܪ̈ܐ ܘܢ̈ܫܐ ܫܘܝܐܝܬ܃ ܘܐܡܪܝܢ ܠܗ܃ ܕܫܪܝܪ ‏‏ܗܼܘ ܘܡܗܼܝܡܢ ܡܫܝܚܐ ܕܫܕܪܟ ܠܘܬܢܼ܂ ܘܐܦ ܗܼܘ ܚܕܝܼ ܛܒ ܒܗܕܐ܂ ܟܕ ܡܫܒܚ ܗܘܐ ܠܐܠܗܐ܂ ܕܐܝܟ ܡܐ ܕܫܡܼܥ ‏‏ܗܘܐ ܡܢ ܚܢܢ ܛܒܘܠܪܐ ܕܝܠܗ ܥܠ ܡܫܝܚܐܼ܂ ܗܟܢܐ ܚܿܙܐ ‏‏ܚܝ̈ܠܐ ܬܡܝܗ̈ܐܿ܂ ܕܥܒܿܕ ܗܘܐܿ܂ ܗܼܘ ܐܕܝ ܫܠܝܚܐ ܒܫܡܗ ܕܡܫܝܚܐ܂ ܘܐܡܼܪ ‏‏ܠܗ ܐܦ ܗܼܘ ܐܒܓܪ ܡܠܟܐ ܠܐܕܝ ܫܠܝܚܐ܂ ܐܝܟ ‏‏ܡܐ ܕܫܿܠܚܬ pb. 32 ܠܗ ܠܡܫܝܚܐ ܒܐܓܪ̈ܬܝ ܕܠܘܬܗ܃ ‏‏ܘܐܝܟ ܡܐ ܕܫܠܚ ܠܝ ܐܦ ܗܿܘ܃ ܘܩܿܒܠܬ ܡܢܟ ܕܝܠܟ ‏‏ܝܘܡܢܐܼ܂ ܗܟܢܐ ܡܗܿܝܡܢ ܐܢܐܼ ܟܘܠ ܝܘܡ̈ܝ ܚܝ̈ܝ܂ ܘܒܗܝܢ ܒܗܠܝܢ ܡܩܘܐ ‏‏ܐܢܐܼ܂ ܟܕ ܡܫܬܒܗܪ ܐܢܐ܂ ܡܛܠ ܕܝܕܥܿ ܐܢܐܼ܂ ܕܠܝܬ ‏‏ܚܝܠܐ ܚܪܢܐ ܕܗ̈ܘܝܢ ܒܫܡܗܿ܂ ܗܠܝܢ ܐܬܘ̈ܬܐ ܘܬܕܡܪ̈ܬܐܿ܂ ܐܠܐ ܒܚܝܠܗ ‏‏ܕܡܫܝܚܐ ܕܡܿܣܒܪ ܐܢܬ ܠܗ ܒܩܘܫܬܐ ܘܒܫܪܪܐ܂ ܘܡܟܝܠ ܠܗ ܗܼܘ ܣܓܿܕ ‏‏ܐܢܐܼ܂ ܐܢܐܼ ܘܡܥܢܘ ܒܪܝ܂ ܘܐܓܘܣܛܝܼܢ ܘܫܠܡܬ ܡܠܟܬܐ܂ ܘܡܟܝܠ ܟܠ ‏‏ܐܝܟܐ ܕܨܒܿܐ ܐܢܬܼ܂ ܒܼܢܝ ܥܕܬܐ ܒܝܬ ܨܘܒܐܿ܂ ܕܐܝܠܝܢ ‏‏ܕܗܝܡܢܘ ܘܡܗܝܡܢܝܢ ܒܡ̈ܠܝܟ܂ ܘܐܝܟ ܡܐ ܕܦܩܝܕ ܠܟ ܡܢ ܡܪܟܼ܂ ܗܘܼܝܬ ‏‏ܡܫܡܫ ܐܢܬ ܒܥ̈ܕܢܐ ܬܟܝܠܐܝܬ܂ ܘܐܝܠܝܢ ܕܗܿܘܝܢ ܥܡܟ ܡܠܦ̈ܢܐ ‏‏ܒܣܒܪܬܐ ܗܕܐܼ܂ ܕܫ̈ܢܐ ܪ̈ܘܪܒܐ ܡܛܝܒ ܐܢܐ ܕܐܿܬܠ ‏‏ܠܗܘܢ܂ ܕܡܕܡ ܥܡ ܬܫܡܫܬܐܼ ܠܐ ܢܗܘܐ ܠܗܘܢ ܥܒܿܕܐ ܐܚܪܢܐ܂ ܘܟܘܠ ‏‏ܡܕܡ ܕܡܬܒܥܐ {{‍ܠܟ‍}} ܠܢܦܩ̈ܬܗ ܕܒܝܬܐܼ܂ ܐܢܐ ܝܗܿܒ ܐܢܐ ܠܟܼ ܕܠܐ ‏‏ܚܘܫܒܢ܂ ܟܕ ܗܘܝܐ ܡܠܬܟ ܫܠܝܛܐ ܘܡܡܠܼܟܐ ‏‏ܒܟܪܟܐ ܗܢܐ܂ ܘܕܠܐ ܐܢܫ ܚܪܢܐܼ܂ ܗܘܼܝܬ ܥܐܿܠ ܐܢܬ ܠܘܬܝ ܡܫܠܛܐܝܬ ܠܐܦܕܢܐ ܕܐܝܩܪܗܿ ܕܡܠܟܘܬܝ܂ ܘܟܕ ܢܚܼܬ ܗܘܐ ‏‏ܐܒܓܪ pb. 33 ܡܠܟܐ ܠܐܦܕܢܐ ܕܡܠܟܘܬܗܼ܂ ܚܿܕܐ ܗܘܐܿ ܗܼܘ ‏‏ܘܪ̈ܘܪܒܢܘܗܝ ܥܡܗ܂ ܥܒܕܘ ܘܓܪܡܝ ܘܫܡܫܓܪܡ܂ ‏‏ܘܐܒܿܘܒܝ ܘܡܗܼܪܕܬ܂ ܥܡ ܫܪܟܐ ܕܚܒܪ̈ܝܗܘܢܿ ܒܟܠ ܡܕܡ ‏‏ܕܚ̈ܙܝ ܗ̈ܘܝ ܥܝܢܝ̈ܗܘܢܿ܂ ܘܫܡܼܥ ܗ̈ܘܝ ܐܦ ܐ̈ܕܢܝܗܘܢ܂ ܘܒܚܕܘܬܐ ܕܠܒܗܘܢܼ܂ ‏‏ܡܫܒܚܝܢ ܗܘܘ ܐܦ ܗܢܼܘܢ ܠܐܠܗܐ܂ ܕܐܦܢܝ ܗܘܐ ܪܥܝܢܗܘܢ ܠܘܬܗܼ܂ ܟܕ ‏‏ܟܦܪܝܢ ܗܘܘ ܒܚܢܦܘܬܐ ܕܩܝܡܝܢ ܗܘܘ ܒܗܼܿ܂ ܘܡܘܕܝܢ ܗܘܘ ܒܣܒܪܬܗ ‏‏ܕܡܫܝܚܐ܂ ܘܟܕ ܒܿܢܐ ܗܘܐ ܐܕܝ ܥܕܬܐܼ܂ ܡܩܿܪܒܝܢ ܗܘܘ ܒܗܿ ܢܕܪ̈ܐ ‏‏ܘܩܘܪ̈ܒܢܐܿ܂ ܗܿܢܘܢܼ ܘܐܢܫܘܬܐ ܕܡܕܝܢܬܐ܂ ܘܬܡܿܢ ‏‏ܡܫܡܫܝܢ ܗܘܘ ܟܠ ܝܘܡ̈ܝ ܚܝ̈ܝܗܘܢ܂ ܘܩܼܪܒܘ ܗܘܘ ܠܘܬܗ ‏‏ܕܐܕܝܼ܂ ܥܘܝܕܐܼ ܘܒܪ ܟܠܒܐ܂ ܐܝܠܝܢ ܕܪ̈ܫܐ ܐܢܘܢܼ ܘܦܩ̈ܘܕܐ܂ ‏‏ܘܠܒ̈ܝܫܝ ܚܘ̈ܪ‍ܐ ܕܡܠܟܐ܂ ܘܡܿܫܐܠܝܢ ܗܘܘ ‏‏ܠܗ ܠܐܕܝ ܥܠ ܫܪܒܗ ܕܡܫܝܚܐ܂ ܕܢܐܡܪ ܠܗܘܢܼ܂ ܕܐܝܟܢܐ ‏‏ܠܡ ܟܕ ܐܠܗܐ ܗܘܐܿ܂ ܡܬܚܙܐ ܗܘܐ ܠܗܘܢ ܐܝܟ ܒܪ ܐܢܫܐܿ܂ ‏‏ܘܐܝܟܢܐ ܡܫܟܚܝܢ ܗܘܝܬܘܢ ܚܝܪܝܢ ܐܢܬܘܢ ‏‏ܒܗ܂ ܘܠܟܠܗܘܢ ܡܢܝܼܚ ܗܘܐ ܠܗܘܢ ܥܠ ܗܕܐ܂ ܥܠ ܟܘܠ ܕܚ̈ܙܝ ܥܝܢܝ̈ܗܘܢ܂ ܘܥܠ ܟܘܠ ܡܐ ܕܫܡܼܥ ܗ̈ܘܝ ܐܕܢܝ̈ܗܘܢ ܡܢܗ܂ ‏‏ܘܟܠܡܕܡ ܕܐܡܪܘ ܗܘܘ ܥܠܘܗܝ ܢܒ̈ܝܐ܃ ܬܿܢܐ ܗܘܐ ܩܕܡܝܗܘܢܼܿ ܘܡܩܿܒܠܝܢ ‏‏ܗܘܘ ܡ̈ܠܘܗܝ ܒܣܝܡܐܝܬܼ ܘܡܗܝܡܢܐܝܬ܂ ܘܠܝܬ ܗܘܐ ܐܢܫ ܕܩܐܡ pb. 34 ‏‏ܗܘܐ ܠܩܘܒܠܗ܂ ܠܐ ܓܝܪ ܫܒܩܝܢ ܗܘܘ ܢܨܚ̈ܢܐ ܕܥܒܿܕ ܗܘܐܿ܂ ܕܢܩܘܡ ‏‏ܗܘܐ ܐܢܫ ܠܩܘܒܠܗ܂ ܫܘܝܕܐ ܕܝܢ ܘܥܒܼܕܢܒܘ܃ ܪ̈ܫܐ ܕܟܘܡܪ̈ܐ ‏‏ܕܟܪܟܐ ܗܢܐ܃ ܥܡ ܦܝܪܘܙ ܘܕܢܩܼܘ ܚܒܪ̈ܝܗܘܢ܃ ܟܕ ܚܙܘ ܗܘܘ ‏‏ܐܬ̈ܘܬܐ ܕܥܒܿܕ ܗܘܐܼ܂ ܪܗܛܘ ܗܘܘ ܘܥܩܪܘ ܗܘܘ ܥܠܘ̈ܬܐܿ܂ ‏‏ܕܥܠܝܗܝܢ ܡܕܒܚܝܢ ܗܘܘܿ܂ ܩܕܡ ܢܒܼܘ ܘܒܝܠ ܐܠܗ̈ܝܗܘܢ܂ ‏‏ܠܒܪ ܡܢ ܥܿܠܬܐ ܪܒܬܐ ܕܡܨܥܬ ܟܪܟܐ܂ ܘܩܥܿܝܢ ܗܘܘ ܘܐܡܪܝܼܢ܂ ܕܫܪܝܪܐܝܬ ‏‏ܗܢܐܼ ܬܠܡܝܕܐ ܕܗܿܘ ܪܒܐ ܡܗܝܪܐ ܘܫܒܝܚܐܿ܂ ܕܫܡܥܝܢ ‏‏ܗܘ‍{{‍ܘ‍}} ܟܠ ܐܝܠܝܢ ܕܥܒܿܕ ܗܘܐ ܒܐܬܪܐ ‏‏ܕܦܠܣܛܝܢܐ܂ ܘܟܘܠ ܐܝܠܝܢ ܕܡܗܝܡܢܝܢ ܗܘܘ ܒܡܫܝܚܐܼ܂ ܡܿܩܒܠ ܗܘܐ ‏‏ܠܗܘܢ ܐܕܝ܂ ܘܡܥܡܕ ܗܘܐ ܠܗܘܢ ܒܫܡ ܐܒܐ ܘܒܪܐ ܘܪܘܚܐ ܕܩܘܕܫܐ܂ ‏‏ܘܐܝܠܝܢ ܕܠܟܐ̈ܦܐ ܘܠܩܝ̈ܣܐ ܣܓܕܝܢ ܗܘܘܼ܂ ܠܘܬ ܪ̈ܓܠܘܗܝ ܝܬܒܝܢ ܗܘܘ܂ ‏‏ܟܕ ܝܠܦܝܢ ܘܡܬܿܟܘܢܝܢܿ܂ ܡܢ ܟܬܝܫܘܬܐ ܕܫܢܝܘܬܐ ܕܚܢܦܘܬܐ܂ ‏‏ܐܦ ܝܗ̈ܘܕܝܐ ܝܕܥ̈ܝ ܢܡܘܣܐ ܘܢܒ̈ܝܐ܃ ܐܝܠܝܢ ܕܪ̈ܟܝܟܐ ܡܿܙܒܢܝܢ ܗܘܘܼ܂ ܐܦ ‏‏ܗܢܼܘܢ ܐܬܛܦܝܣܘ ܗܘܘܼ܂ ܘܐܬܬܠܡܕܘ ܘܐܘܕܝܘ ܗܘܘ ܒܡܫܝܚܐܼ܂ ܕܒܪܗ ܗܼܘ ‏‏ܕܐܠܗܐ ܚܝܐ܂ ܠܐ ܕܝܢ ܐܒܓܪ ܡܠܟܐ܃ ܘܠܐ ܐܕܝ ‏‏ܫܠܝܚܐ܃ ܥܨܿܐ ܗܘܐ ܠܐܢܫ ܕܩܛܝܪܐܝܬ ܢܗܝܡܢ pb. 35 ܗܘܐ ܒܗ ‏‏ܒܡܫܝܚܐ܂ ܡܛܠ ܕܕܠܐ ܩܛܝܪܐ ܕܐܢܫܼ܂ ܩܛܝܪܐ ܕܐܬ̈ܘܬܐ ܥܨܿܐ ܗܘܐܼ܂ ‏‏ܠܣܓ̈ܝܐܐ ܕܢܗܝܡܢܘܢ ܗܘܘ ܒܗ܂ ܘܒܚܘܒܐ ܡܿܩܒܠܝܢ ܗܘܘ ܡܠܦܢܘܬܗܿ܂ ‏‏ܟܠܗ ܐܬܪܐ ܗܢܐ ܕܒܝܬ ܢܗܪܝܢ܂ ܘܦܢܝ̈ܬܐ ܟܠܗܝܢ ܕܚܕܪ̈ܘܗܝ܂ ܐܓܝ ܕܝܢ ‏‏ܥܒܿܕ ܫܐܪ̈ܝܐ ܘܚ̈ܘܕܐ ܕܡܠܟܐ܃ ܘܦܠܘܛ ܘܥܒܫܠܡܐ܃ ‏‏ܘܒܪܣܡܝܐ ܥܡ ܫܪܟܐ ܕܚܪ̈ܢܐ ܚܒܪ̈ܝܗܘܢܼܿ ܢܩܦܘܗܝ ܗܘ‍{{‍ܐ‍}} ‏‏ܠܐܕܝ ܫܠܝܚܐܼ܂ ܘܩܿܒܠ ܗܘ‍{{‍ܐ‍}} ܐܢܘܢܼ܂ ܘܫܘܬܦ ܐܢܘܢ ܥܡܗ ‏‏ܒܬܫܡܫܬܐ܂ ܟܕ ܩܿܪܝܢ ܗܘܘ ܒܕܝܬܩܐ ܥܬܝܩܬܐ ܘܚܕܬܐܼ ܘܒܢܒ̈ܝܐ܂ ‏‏ܘܒܣܘܥܪ̈ܢܝܗܘܢ ܕܫܠܝܚ̈ܐ ܟܠܝܘܡ ܒܗܘܢ ܡܬܗܿܓܝܢ ܗܘܘ܂ ܟܕ ܡܿܦܩܕ ‏‏ܗܘܐ ܠܗܘܢ ܙܗܝܪܐܝܬܼ܂ ܕܗܘܼܘ ܕܟܝܢ ܦܓܪ̈ܝܟܘܢܼ ܘܩܕܝܫܝܢ ‏ ‏ܓܘܫܡܝܟܘܢܿ ܐܝܟ ܕܙܕܿܩ ‏‏ܠܐܢܫܐ ܕܩܿܝܡܝܢ ܩܕܡ ܡܕܒܚܗ ܕܐܠܗܐ܂ ܘܗܘܼܝܬܘܢ ܠܡ ܪܚܝܩܝܢ ܡܢ ‏‏ܡܘܡܬܐ ܕܓܠܬܐܿ܂ ܘܡܢ ܩܛܠܐ ܕܪܘܫܥܐܿ܂ ܘܡܢ ܣܗܕܘܬܐ ܕܫܘܩܪܐܿ܂ ‏‏ܕܒܓܘܪܐ ܦܬܝܟܐ܂ ܘܡܢ ܚܿܪ̈ܫܐ ܕܠܝܬ ܥܠܝܗܘܢ ܪ̈ܚܼܡܐ܂ ܘܡܢ ܢܚ̈ܫܐܿ ‏‏ܘܩܼܨ̈ܡܐܼ ܘܙܟܘܪ̈ܐ܂ ܘܡܢ ܚ̈ܠܩܐܿ ܘܒܝܬ ܝ̈ܠܕܐ܂ ܕܡܫܬܒܗܪܝܢ ܒܗܘܢ ܟܠܕ̈ܝܐ ‏‏ܛܥ̈ܝܐ܂ ܘܡܢ ܟܘܟ̈ܒܐ ܘܡܠܘ̈ܫܐ ܕܬܟܝܠܝܢ ܥܠܝܗܘܢ ܫܢ̈ܝܐ܂ ܘܐܪܚܩܘ ‏‏ܡܢܟܘܢ ܡܣܒ ܒܐ̈ܦܐ ܕܥܘܼܠܐܿ܂ ܘܫܘܚ̈ܕܐ ܘܩܘܪ̈ܒܢܐ ܕܡܬܚܿܝܒܝܢ ܒܗܘܢ ‏‏ܙܟ̈ܝܐ܂ ܘܥܡ ܗܕܐ ܬܫܡܫܬܐ pb. 36 ܕܐܬܩܪܝܬܘܢ ܠܗܼܿ܂ ܠܐ ܬܘܒ ‏‏ܢܗܘܐ ܠܟܘܢ ܦܘܠܚܢܐ ܚܪܢܐ܂ ܡܪܝܐ ܗܘ ܓܝܪ ܦܘܠܚܢܐ ܕܬܫܡܫܬܟܘܢܼ ‏‏ܟܠ ܝܘܡ̈ܝ ܚܝ̈ܝܟܘܢ܂ ܘܗܘܼܝܬܘܢ ܚܦܝܛܝܢ ܠܡܬܠ ܪܘܫܡܐ ܕܡܥܡܘܕܝܬܐ܂ ‏‏ܘܠܐ ܗܘܼܝܬܘܢ ܪܚܿܡܝܢ ܝܘܬܪ̈ܢܘܗܝ ܕܥܠܡܐ ܗܢܐ܂ ܘܗܘܼܝܬܘܢ ܫܡܥܝܢ ‏‏ܐܢܬܘܢ ܕܝܢܼܐ ܒܟܐܢܘܬܐ ܘܒܩܘܫܬܐ܂ ܘܠܐ ܬܗܘܘܢ ܬܘܩܠܬܐ ܠܥܘܝܪ̈ܐܼ܂ ‏‏ܕܕܠܡܐ ܢܬܓܿܕܦ ܒܟܘܢ ܫܡܗ ܕܗܿܘ ܕܦܬܿܚ ܗܘܐ ܠܥܘܝܪ̈ܐ ܐܝܟ ܡܐ ‏‏ܕܚܼܙܝܢܢ܂ ܟܠ ܡܼܢ ܗܟܝܠ ܕܚܿܙܝܢ ܠܟܘܢܼ܂ ܢܬܒܝܢܘܢܼ ܕܫܠܡܝܢ ܐܢܬܘܢ ܗܘܿ܂ ܠܟܠ ‏‏ܡܕܡ ܕܡܟܪܙܝܢ ܐܢܬܘܢ ܘܡܠܦܝܢ ܐܢܬܘܢܿ ܘܡܫܡܫܝܢ ܗܘܘ ܥܡܗ ܒܥܕܬܐ ‏‏ܕܒܢܼܐ ܗܘܐ ܗܼܘ ܐܕܝܼ܂ ܡܢ ܡܠܬܗ ܘܦܘܩܕܢܗ ܕܐܒܓܪ ܡܠܟܐ܂ ܟܕ ‏‏ܡܬܦܪܢܣܝܢ ܗܘܘ ܡܢ ܕܡܠܟܐ ܘܡܢ ܕܚܐܪ̈ܘܗܝܿ܂ ܘܡܿܝܬܝܢ ܡܢܗܘܢ ‏‏ܠܒܝܬܐ ܕܐܠܗܐܿ܂ ܘܡܢܗܘܢ ܠܦܘܪܢܣܐ ܕܡ̈ܣܟܢܐ܂ ܥܡܐ ܕܝܢ ܣܓܝܐܐ ‏‏ܟܠܝܘܡ ܒܝܘܡܼ܂ ܟܢܿܫܝܢ ܗܘܘ ܘܐܿܬܝܢ ܠܨܠܘܐ ‏‏ܕܬܫܡܫܬܐ܂ ܘܠܕܝܬܩܐ ܥܬܝܩܬܐ ܘܚܕܬܐ ‏‏ܕܕܝܛܣܪܘܢ܂ ܘܒܚܼܝܬ ܡܝ̈ܬܐ ܡܗܝܡܢܝܢ ܗܘܘܼ܂ ‏‏ܘܠܥܢܝ̈ܕܝܗܘܢ ܒܣܒܪܐ ܕܢܘܚܡܐ ܩܿܒܪܝܢ ܗܘܘ܂ ܘܥܐ̈ܕܐ ܕܥܕܬܐܼ ‏‏ܒܙܒܢܝ̈ܗܘܢ ܥܒܕܝܢ ܗܘܘ܂ ܘܟܠ ܝܘܡ ܒܫܗܪܐ ܕܥܕܬܐܼ ‏‏ܐܡܝܢܝܢ ܗܘܘ܂ ܘܣܘܥܪ̈ܢܐ ܕܙܕܩ̈ܬܐܼ ܣܥܪܝܢ ܗܘܘ܂ ܨܝܕ ܟܪ̈ܝܗܐܼ ܘܚܠܝ̈ܡܐ܂ ‏‏ܐܝܟ ܝܘܠܦܢܗ ܕܐܕܝ ܕܨܐܕܝܗܘܢ܂ pb. 37 ܘܒܚܕܪ̈ܝܗܿ ‏‏ܕܡܕܝܢܬܐܼ ܥܕ̈ܬܐ ܡܬܒܼ̈ܢܝܢ ܗ̈ܘܝ܂ ܘܐܝܕܐ ܕܟܗܢܘܬܐܿ ܡܩܿܒܠܝܢ ܗܘܘ ܡܢܗܼ ‏‏ܣܓ̈ܝܐܐ܂ ܗܟܢܐ ܕܐܦ ܡܕܢܚ̈ܝܐܼ܂ ܒܕܡܼܘܬ ܬܓܪ̈ܐܼ܂ ܠܒܝܬ ‏‏ܪ̈ܗܘܡܝܐ ܥܒܪܝܢ ܗܘܘܿ܂ ܕܢܚܙܘܢ ܗܘܘ ܐܬܘ̈ܬܐ ܕܥܒܿܕ ܗܘܐ‎‏ ‏‏ܐܕܝ܂ ܘܐܝܠܝܢ ܕܡܬܬܠܡܕܝܢ ܗܘܘ ܡܢܗܘܢܼ܂ ܡܩܿܒܠܝܢ ܗܘܘ ‏‏ܡܢܗܘܢ ܐܝܕܐ ܕܟܗܢܘܬܐ܂ ܘܒܐܬܪܐ ܕܝܠܗܘܢ ܕܐܬܘܪ̈ܝܐܼ܂ ‏‏ܠܒ̈ܢܝ ܥܡܗܘܢ ܡܬܠܡܕܝܢ ܗܘܘ܂ ܘܒ̈ܬܐ ܕܨܠܘ̈ܬܐܿ ܒܟܣܝܐܼ ܬܡܿܢ ܥܒܕܝܢ ܗܘܘ܂ ܡܢ ܩܢܛܐ ܕܣܓ̈ܕܝ ܠܢܘܪܐ ܘܡܝܩܪ̈ܝ ‏‏ܠܢܘܪܐ܂ ܢܪܣܝ ܕܝܢ ܡܠܟܐ ܕܐܬܘܪ̈ܝܐ܃ ܟܕ ܫܡܼܥ ܗܘܐ ܗܢܼܝܢ ‏‏ܗܠܝܢ ܕܥܿܒܕ ܐܕܝ ܫܠܝܚܐ܃ ܫܠܼܚ ܗܘܐ ܠܗ ܠܐܒܓܪ ܡܠܟܐ܂ ‏‏ܕܐܘ ܫܕܪ ܠܝ ܓܒܪܐ ܗܿܘ ܕܗܠܝܢ ܐܬܘ̈ܬܐ ܥܒܿܕ ܨܐܕܝܟ܃ ‏‏ܕܐܚܙܝܘܗܝ ܘܐܫܡܥ ܡܠܬܗܼ܂ ܐܘ ܫܠܘܚ ܠܝ ܟܘܠ ܐܝܠܝܢ ܕܚܼܙܝܬ ‏‏ܕܥܒܼܕ ܒܟܪܟܐ ܕܝܠܟ܂ ܘܟܬܼܒ ܗܘܐ ܠܗ ܐܒܓܪ ‏‏ܠܢܼܪܣܝ܂ ܘܐܘܕܥܗ ܗܘܐܼ ܟܠܗܿ ܬܫܥܝܬܐ ܕܫܪܒܗ ܕܐܕܝ܂ ܡܢ ܫܘܪܝܐܼ ‏‏ܠܫܘܠܡܐ܂ ܘܠܐ ܫܒܼܩ ܗܘܐ ܡܕܡ ܕܠܐ ܟܬܼܒ ܗܘܐ ܠܗ܂ ܟܕ ܕܝܢ ܫܡܼܥ ‏‏ܗܘܐ ܢܼܪܣܝ ܐܝܠܝܢ ܕܐܬܟܬܒ ܗ̈ܘܝ ܠܗܼ܂ ܬܡܼܗ ܗܘܐ ܘܐܬܼܕܡܪ܂ ܐܒܓܪ ‏‏ܕܝܢ ܡܠܟܐ܃ ܡܛܠ ܕܠܐ ܐܫܟܚ ܗܘܐ ܕܢܥܒܪ ܠܒܝܬ ܪ̈ܗܘܡܝܐ܃ ܘܢܐܙܠ ‏‏ܗܘܐ ܠܦܠܣܬܝܢܐ ܘܢܩܿܛܠ ܗܘܐ ܠܝܗ̈ܘܕܝܐ܃ ܥܠ ܕܙܩܦܘ ‏‏ܗܘܘ ܠܡܫܝܚܐܼ܂ ܟܬܼܒ ܗܘܐ ܐܓܪܬܐܼ܂ pb. 38 ܘܫܕܪ ܗܘܐ ܠܘܬ ‏‏ܛܝܒܪܝܘܣ ܩܣܪ܂ ܟܕ ܟܬܼܒ ܒܗܼܿ ܗܟܢܐ܂ ܐܒܓܪ ܡܠܟܐ ܠܡܪܢ ܛܝܒܪܝܣ ܩܣܪܼ ‏‏ܫܠܡ܂ ܟܕ ܝܕܥܿ ܐܢܐ܃ ܕܡܕܡ ܡܢ ܡܠܟܘܬܟ ܠܐ ܡܬܟܣܐܼ܂ ܟܬܿܒ ‏‏ܐܢܐ ܘܡܘܕܥ ܐܢܐ ܠܫܠܛܢܟ ܕܚܝܠܐ ܘܪܒܐ܂ ܕܝܗ̈ܘܕܝܐ ܕܬܚܝܬ ܐܝܕܟ ‏‏ܕܥܡܪܝܢ ܒܐܬܪܐ ܕܦܠܣܛܝܢܐܼ܂ ܐܬܿܟܢܫܘ ܗܘܘܼ ܘܙܩܦܘ ܗܘܘ ܕܠܐ ‏‏ܣܟܠܘܬܐ ܕܡܘܬܐ ܠܡܫܝܚܐ܂ ‏‏ܟܕ ܥܒܿܕ ܗܘܐ ܩܕܡܝܗܘܢ ܐܬܘ̈ܬܐ ܘܬܕܡܪ̈ܬܐܿ܂ ܘܡܚܘܐ ܗܘܐ ܠܗܘܢ ‏‏ܚܝ̈ܠܐ ܚܣ̈ܝܢܐ ܘܐܬܘ̈ܬܐ܂ ܗܟܢܐܼ ܕܐܦ ܡܝ̈ܬܐ ܐܚܝ ‏‏ܗܘܐ ܠܗܘܢ܂ ܘܒܥܕܢܐ ܕܙܩܦܘܗܝ ܗܘܘܼ܂ ܚܼܫܟ ‏‏ܫܡܫܐܼ ܘܙܥܼܬ ܐܪܥܐ܂ ܘܪܥܼܠ ܗ̈ܘܝ ܟܘܠܗܝܢ ܒܪ̈ܝܬܐ܂ ܘܐܝܟ ܕܡܢ ܨܐܕܝܗܘܢ ܒܗܢܐ ܣܘܥܪܢܐܼ܂ ܐܘܦܼܝܬ ‏‏ܗܘܬ ܠܗܿ ܟܘܠܗܿ ܒܪܝܬܐ ܘܥܡܘܪ̈ܝܗܿ‍܂ ܘܡܟܝܠ ܡܠܟܘܬܟ ‏‏ܝܕܥܐܼ܂ ܡܢܐ ܙܕܩ ܕܬܦܩܘܕ ܥܠ ܥܡܐ ܕܝܗ̈ܘܕܝܐ ܕܗܠܝܢ ܥܒܼܕ܂ ܘܟܬܼܒ ܗܘܐ ‏‏ܛܝܒܪܝܘܣ ܩܣܪܼ܂ ܘܫܕܪ ܗܘܐ ܠܐܒܓܪ ܡܠܟܐ܂ ܘܗܟܢܐ ܟܬܼܒ ܠܗ܂ ‏‏ܕܐܓܪܬܐ ܕܫܪܝܪܘܬܟ ܕܠܘܬܝܼ܂ ܩܿܒܠܬܼ ܘܐܬܩܼܪܝܬ ܩܕܡܝ܂ ܥܠ ܡܕܡ ‏‏ܕܣܥܪܘ ܗܘܘ ܝܗ̈ܘܕܝܐ ܒܙܩܝܦܐ܂ ܘܐܦ ܦܝܠܛܘܣ ‏‏ܗܓܡܘܢܐܼ܂ ܟܬܼܒ ܗܘܐ ܘܐܘܕܥܗ ܠܐܘܠܒܝܢܣ ‏‏ܗܘܦܪܟܐ ܕܝܠܝܿ܂ ܥܠܝܗܝܢ ܕܗܠܝܢ ܕܟܬܼܒܬ ‏‏ܠܝ܂ ܡܛܠ ܕܝܢ ܩܪܒܐ ܕܒܢ̈ܝ ܐܣܦܢܝܐ܃ ܕܡܪܕܘ ܥܠܝ ܩܐܡ pb. 39 ܒܗܢܐ ‏‏ܙܒܢܐܼ܂ ܡܛܠ ܗܢܐ ܠܐ ܐܫܿܟܚܬ ܕܐܬܒܥܗܿ ܠܨܒܘܬܐ ܗܕܐ܂ ܡܛܝܼܒ ‏‏ܐܢܐ ܕܝܢ ܕܡܐ ܕܗܘܼܐ ܠܝ ܫܠܝܐܼ܂ ܐܦܩܘܕ ܥܠܝܗܘܢ ܢܡܘܣܐܝܬ܂ ܥܠ ‏‏ܝܗ̈ܘܕܝܐ ܕܠܐ ܣܥܪܘ ܢܡܘܣܐܝܬ܂ ܘܡܛܠ ܗܢܐ ܐܦ ܦܝܠܛܘܣ ‏‏ܕܥܒܝܕ ܗܘܐ ܠܝ ܬܡܿܢ ܗܓܡܘܢܐܼ܂ ܫܿܕܪܬ ܚܠܦܘܗܝ ܐܚܪܢܐ܂ ܘܫܪܝܬܗ ܠܗܼ ‏‏ܒܨܥܪܐ܂ ܥܠ ܕܢܦܼܩ ܡܢ ܢܡܘܣܐ ܘܥܒܼܕ ܗܘܐ ܨܒܝܢܐ ܠܝܗ̈ܘܕܝܐܿ܂ ܘܙܩܼܦ ‏‏ܗܘܐ ܠܡܫܝܚܐ ܠܢܝܚܗܘܢ ܕܝܗ̈ܘܕܝܐ܂ ܗܿܘ ܕܐܝܟ ܕܫܡܿܥ ܐܢܐ ‏‏ܥܠܝܗܘܢܼ܂ ܚܠܦ ܙܩܝܦܐ ܕܡܘܬܐ ܕܢܬܝܩܪ ܘܠܿܐ ܗܘܐܼ܂ ‏‏ܘܢܣܬܓܕ ܡܢܗܘܢ ܙܕܩܿ ܗܘܐ܂ ܝܬܝܪܐܝܬ ܕܒܥܝ̈ܢܝܗܘܢ ܚܿܙܝܢ ‏‏ܗܘܘ ܟܠ ܡܕܡ ܕܥܼܒܕ ܗܘܐ܂ ܐܢܬ ܕܝܢ ܐܝܟ ܫܪܝܪܘܬܟ ܕܠܘܬܝ܃ ܘܩܝܼܡܐ ‏‏ܫܪܝܪܐ ܕܝܠܟ ܘܕܐܒܗ̈ܝܟܼ܂ ܫܦܝܪ ܥܒܼܕܬ ܕܟܬܼܒܬ ܠܝ ܗܟܢܐ܂ ܘܩܿܒܠܗ ܗܘܐ ‏‏ܐܒܓܪ ܡܠܟܐ ܠܐܪܣܛܝܕܣܿ܂ ܕܐܫܬܕܪ ܗܘܐ ܡܢ ܛܝܒܪܝܣ ‏‏ܩܣܪ ܨܐܕܘܗܝ܂ ܘܦܢܼܐ ܗܘܐ ܫܕܪܗ ܗܘܐ ܒܕܫ̈ܢܐ ܕܐܝܩܪ̈ܐܿ܂ ‏‏ܕܙܕܿܩ ܠܗܿܘ ܡܿܢ ܕܫܕܪܗ ܠܘܬܗ܂ ܘܢܦܼܩ ‏‏ܡܢ ܐܘܪܗܝܼ܂ ܘܐܙܼܠ ܗܘܐܼ ܠܬܝܩܼܢܘܬܐ܂ ‏‏ܐܝܟܐ ܕܐܝܬܘܗܝ ܗܘܐ ܩܠܘܕܝܣ ܬܪܝܢܐ ܕܡܠܟܐ܂ ܘܡܢ ܬܡܿܢ ‏‏ܬܘܒ ܐܙܼܠ ܗܘܐܼ ܠܐܪܛܝܩܐ܂ ܕܬܡܿܢ ܗܘܐ ܛܝܒܪܝܘܣ ܩܣܪ܂ ܓܐܝܣ ܕܝܢ܃ ‏‏ܦܢܝ̈ܬܐ ܕܚܕܪ̈ܘܗܝ ܕܝܠܗ ܕܩܣܪ ܢܛܿܪ pb. 40 ܗܘܐ܂ ܘܐܫܬܥܝ ܗܘܐ ‏‏ܘܐܦ ܗܼܘ ܐܪܣܛܝܕܣ ܩܕܡ ܛܝܒܪܝܘܣ ܥܠ ܚܝ̈ܠܐ ܕܥܒܼܕ ܗܘܐ ܐܕܝܿ܂ ܩܕܡ ‏‏ܐܒܓܪ ܡܠܟܐ܂ ܘܡܢ ܕܗܘܼܐ ܗܘܐ ܠܗ ܫܠܝܐ ܡܢ ܩܪܒܐܼ܂ ‏‏ܫܕܪ ܗܘܐ ܩܿܛܠ ܡܢ ܪ̈ܫܢܐ ܕܝܗ̈ܘܕܝܐܿ܂ ‏‏ܕܐܝܬ ܗܘܐ ܒܦܠܣܛܝܢܐ܂ ܘܟܕ ܫܡܼܥ ܗܘܐ ܐܒܓܪ ܡܠܟܐܼ܂ ܚܼܕܝ ܗܘܐ ‏‏ܒܗܕܐܼ ܛܒ܂ ܕܩܿܒܠܘ ܗܘܘ ܝܗ̈ܘܕܝܐ ܡܣܡ ܒܪܫܐ ܐܝܟ ܕܙܕܿܩ܂ ܂ ܘܡܢ ܒܬܪ ‏‏ܫܢ̈ܝܐ ܕܒܢܼܐ ܗܘܐ ܐܕܝ ܫܠܝܚܐ ܥܕܬܐ ܒܐܘܪܗܝ܃ ܘܐܬܩܢܗܿ ܗܘܐ ܒܟܠ ‏‏ܡܕܡ ܕܙܕܿܩ ܗܘܐ ܠܗܿ܃ ܘܬܠܡܕ ܗܘܐ ܠܣܘܓܐܐ ܕܐܢܫܘܬܐ ܕܡܕܝܢܬܐ܃ ‏‏ܘܐܦ ܒܩܘܪ̈ܝܐ ܚܪ̈ܢܝܬܐ ܕܪ̈ܚܝܩܢ ܘܕܩܪ̈ܝܒܼܢ܂ ܒܢܼܐ ܗܘܐ ܥܕ̈ܬܐܿ ܘܟܠܠܼ ‏‏ܘܨܒܼܬ܂ ܘܡܫ̈ܡܫܢܐ ܘܩܫܝ̈ܫܐܼ ܐܩܝܡ ܗܘܐ ܒܗܝܢ܂ ܘܘܕܩܿܪܝܢ ‏‏ܗܘܐ ܟܬܒ̈ܐܼ ܐܠܦ ܗܘܐ ܒܗܝܢ ܘܛܟ̈ܣܐ ܕܬܫܡܫܬܐܿ ܠܓܘܼ ‏‏ܘܠܒܪ ܐܠܼܦ ܗܘܐ܂ ܒܬܪ ܗܠܝܢ ܟܠܗܝܼܢ܂ ܐܬܟܪܗ ܗܘܐ ‏‏ܟܘܪܗܢܐ ܕܢܿܦܩ ܗܘܐ ܒܗ ܡܢ ܥܠܡܐ ܗܢܐ܂ ܘܩܪܐ ܗܘܐ ܠܐܓܝ ܩܕܿܡ ‏‏ܟܠܗ ܟܢܫܐ ܕܥܕܬܐܼ܂ ܘܩܿܪܒܗ ܗܘܐܼ ܘܥܒܼܕܗ ܗܘܐ ܡܕܒܪܢܐ ܘܦܩܘܕܐ ‏‏ܒܕܘܟܬܗ܂ ܘܠܦܠܘܛ ܕܡܫܡܫܢܐ ܗܘܐܼ܂ ܥܒܼܕܗ ܗܘܐܼ ܩܫܝܫܐ܂ ܠܥܒܼܕܫܠܡܐ ‏‏ܕܣܿܦܪܐ ܗܘܐ܃ ܥܒܼܕܗ ܗܘܐܼ ܡܫܡܫܢܐ܂ ܘܟܕ ܟܢܝܫܝܢ ܗܘܘ ܘܩܝܿܡܝܢ ܠܘܬܗ܃ ‏‏ܚܐܪ̈ܐ ܘܪ̈ܫܢܐ܃ ܒܪ ܟܠܒܐ ܘܒܪ ܙܛܝܼ ܘܡܪܝܗܒ ܒܪ ܒܪ ܫܡܫ܃ ܘܣܢܼܩ ܒܪ ‏‏ܥܘܝܕܐ܃ ܘܦܝܪܘܙ ܒܪ ܦܛܪܝܩ ܥܡ ܫܪܟܐ pb. 41 ܕܚܒܪ̈ܝܗܘܢܼ܂ ܐܡܼܪ ‏‏ܠܗܘܢ ܐܕܝ ܫܠܝܚܐ܂ ܝܕܥܝܢ ܐܢܬܘܢ ܘܣܗܕܝܢ ܐܢܬܘܢ ܟܠܟܘܢ ‏‏ܕܫܡܥܝܢ ܠܝܼ܂ ܕܟܠ ܡܕܡ ܕܡܟܪܙ ܗܿܘܝܬ ܠܟܘܢܼ ܘܡܿܠܦ ܗܿܘܝܬ ܠܟܘܢ܃ ܘܫܡܥܝܢ ‏‏ܗܘܝܬܘܢ ܡܢܝܼ܂ ܗܟܢܐ ܐܿܬܕܒܪܬ ܒܝܢܬܟܘܢ܂ ܘܚܙܝܬܘܢܼ ܐܦ ܒܥܿܒ̈ܕܐ܂ ‏‏ܡܛܘܠ ܕܗܟܢܐ ܦܩܿܕ ܠܢ ܡܪܢܿ ܕܗܿܘ ܡܕܡ ܕܡܟܪܙܝܢ ܚܢܢ ܒܡ̈ܠܐ ܩܕܡ ܥܡܐܼ܂ ‏‏ܒܥܿܒܕܐ ܗܿܘܝܢ ܚܢܢ ܣܥܪܝܢ ܚܢܢ ܠܗ ܩܕܡ ܟܠ ܐܢܫ܂ ܘܐܝܟ ܛܟ̈ܣܐ ‏‏ܘܢܡ̈ܘܣܐ ܕܣܼܝܡܝܢ ܒܐܪܫܠܡ ‏‏ܘܡܬܿܕܒܪܝܢ‏ ܒܗܘܢ ܐܦ ܫܠܝܚ̈ܐ ܚܒܪ̈ܝܼ܂ ܗܟܢܐ ܐܦ ܐܢܬܘܢܼ܂ ‏‏ܠܐ ܬܫܿܢܘܢ ܡܢܗܘܢܼ ܘܠܐ ܬܒܿܨܪܘܢ ܡܢܗܘܢ ܡܕܡ܂ ܐܝܟܢܐ ܕܐܦ ܐܢܐ ‏‏ܒܗܘܢ ܗܼܘ ܡܬܿܕܒܪ ܗܿܘܝܬ ܒܝܢܬܟܘܢ܂ ܘܠܐ ܫܿܢܝܬ ܡܢܗܘܢ ‏‏ܠܝܡܝܢܐ ܘܠܣܡܠܐܼ܂ ܕܠܐ ܐܿܬܢܟܪܐ ܗܿܘܝܬ ܠܚ̈ܝܐ ‏‏ܡ̈ܠܝܟܐ ܕܢܛܝܪܝܢ ܠܐܝܠܝܢ ܕܒܗܠܝܢ ܡܬܿܕܒܪܝܢ܂ ܐܙܕܗܪܘ ܗܟܝܠ ܒܬܫܡܫܬܐ ‏‏ܗܕܐ ܕܐܚܝܕܝܢ ܐܢܬܘܢ܂ ܘܒܕܚܠܬܐܿ ܘܒܪܬܝܬܐܼ ܗܘܼܝܬܘܢ ܩܝܿܡܝܢ ܒܗܿ܂ ܘܡܫܡܫܝܼܢ ܟܠ ܝܘܡ܂ ܠܐ ܗܘܼܝܬܘܢ ܡܫܡܫܝܢ ܒܗܿ ‏‏ܒܥ̈ܝܕܐ ܒܣ̈ܝܐ܂ ܐܠܐܼ ܒܦܘܪܫܢܐ ܕܗܝܡܢܘܬܐ܂ ܘܬܫܒܚ̈ܬܗ ܕܡܫܝܚܐܿ ܡܢ ‏‏ܦܘܡܟܘܢܼ ܠܐ ܢܒ̈ܛܠܢ܂ ܘܡܐܝܢܘܬܐ ܒܫܪܪܐ ܕܥ̈ܕܢܐ ‏‏ܠܘܬܟܘܢܼ ܠܐ ܬܬܩܪܒ܂ ܐܙܕܗܼܪܘ ܒܫܪܪܐ ܕܐܚܝܕܝܢ ܐܢܬܘܢܿ܂ ܘܒܝܘܠܦܢܐ ‏‏ܕܩܘܫܬܐ ܕܩܒܿܠܬܘܢܿ܂ ܘܒܝܪܬܘܬܐ ܕܚ̈ܝܐ pb. 42 ܕܡܿܓܥܠ ܐܢܐ ܠܟܘܢ܂ ‏‏ܡܛܠ ܕܩܕܡ ܒܝܡ ܕܡܫܝܚܐ ܡܬܬܒܥܝܢ ܐܢܬܘܢ ܠܗܼܿ܂ ܡܐ ܕܥܒܿܕ ܚܘܫܒܢܐ ‏‏ܥܡ ܪ̈ܥܘܬܐ ܘܥ̈ܠܢܐܿ܂ ܘܡܐ ܕܢܣܿܒ ܟܣܦܗ ܡܢ ܬܓܪ̈ܐ ܒܪܒܝܬܐ ‏‏ܕܝܘܬܪ̈ܢܐ܂ ܒܪ ܡܠܟܐ ܗܘ ܓܝܪ܂ ܘܐܙܼܠ ܘܢܣܿܒ ܡܠܟܘܬܐ ܘܢܗܦܘܟ܂ ‏‏ܘܢܐܬܐ ܘܢܥܼܒܕ ܢܘܚܡܐܼ ܠܟܠܗܘܢ ܒܢ̈ܝ ܐܢܫܐ܂ ܘܗܝܕܝܢ ܝܬܿܒ ܥܠ ܟܘܪܣܝܐ ‏‏ܕܟܐܢܘܬܐܿ ܘܕܐܿܢ ܡܝ̈ܬܐ ܘܚܝ̈ܐ ܐܝܟ ܕܐܡܼܪ ܠܢ܂ ܥܝܢܐ ‏‏ܟܣܝܬܐ ܕܪܥܝܢܟܘܢ ܡܢ ܪܘܡܐ ܥܠܝܐܼ ܠܐ ‏‏ܬܬܥܡܝܨ܂ ܕܠܐ ܢܣܓܝܢ ܬܘܩ̈ܠܬܟܘܢ ܒܐܘܪܚܐ ܕܠܝܬ ܒܗܿ ܬܘܩ̈ܠܬܐܼ܂ ‏‏ܘܐܦ ܠܐ ܬܘܫܐ ܣܢܝܐ ܒܫܒܝ̈ܠܝܗܿ܂ ܗܘܼܝܬܘܢ ܒܥܿܝܢ ‏‏ܐܢܬܘܢ ܐܒ̈ܝܕܬܐ܂ ܘܦܩܕܝܢ ܐܢܬܘܢ ܕܛܥ̈ܝܢ܂ ܘܚܿܕܝܢ ܐܢܬܘܢ ܒܫܟܝܚ̈ܬܐ܂ ‏‏ܗܘܼܝܬܘܢ ܥܨܒܝܢ ܬܒܝܪ̈ܬܐܼ܂ ܘܢܛܪܝܢ ܐܢܬܘܢ ܫܡܝܼ̈ܢܬܐ܂ ܡܛܘܠ ‏‏ܕܒܐ̈ܝܕܝܟܘܢ ܡܬܬܒܥܢ ܢܩ̈ܘܬܗ ܕܡܫܝܚܐ܂ ܠܐ ܗܘܼܝܬܘܢ ܚܝܪܝܢ ܐܢܬܘܢ ‏‏ܠܐܝܩܪܐ ܥܒܘܪܐ܂ ܪܥܿܝܐ ܓܝܪ ܕܚܐܪ ܕܢܬܝܩܪ ܡܢ ܡܪܥܝܬܗܼ܂ ܒܝܫ ܒܝܫ ‏‏ܩܝܡܐ ܡܢܗ ܡܪܥܝܬܗ܂ ܬܿܗܘܐ ܣܓܝܐܐ ܒܛܝܠܘܬܟܘܢ ܥܠ ܐܡܪ̈ܐ ‏‏ܫܒܪ̈ܐܿ܂ ܕܡܠܐܟ̈ܝܗܘܢ ܚܿܙܝܢ ܦܪܨܘܦܗ ܕܐܒܐ ܕܠܐ ܡܬܚܙܐ܂ ܘܠܐ ‏‏ܬܗܘܘܢ ܟܐܦܐ ܕܬܘܩܠܬܐ ܩܕܡ ܥܘܝܪ̈ܐ܂ ܐܠܐ ܢܩ̈ܠܝ ܐܘܪܚܐ ܘܫܒܝܠܐ ‏‏ܒܐܬܪܐ ܥܣܩܐܿ܂ ܒܝܢܬ ܝܗ̈ܘܕܝܐ ܙܩܘ̈ܦܐ ܘܚܢ̈ܦܐ ܛܥ̈ܝܐ܂ ܥܡ ܗܠܝܢ ܗܼܘ ‏‏ܓܝܪ ܒܠܚܘܕ ܬܪ̈ܝܢ pb. 43 ܓܒ̈ܝܢ ܐܝܬ ܠܟܘܢ ‏‏ܩܪܒܐܿ܂ ܕܬܚܘܘܢ ܫܪܪܐ ܕܗܝܡܢܘܬܐ ܕܐܚܝܕܝܢ ܐܢܬܘܢ܂ ܘܟܕ ‏‏ܫܠܼܝܢ ܐܢܬܘܢܼ܂ ܚܙܬܟܘܢ ܡܢܟܦܬܐ ܘܝܩܝܪܬܐܿ܂ ܬܗܘܐ ܡܩܼܪܒܐ ܚܠܦܝܟܘܢܿ܂ ‏‏ܥܡ ܗܿܢܘܢ ܕܣܿܢܝܢ ܠܩܘܫܬܐ ܘܪܚܿܡܝܢ ܠܫܘܩܪܐ܂ ܠܐ ‏‏ܬܗܘܘܢ ܡܩܦܚܝܢ ܠܡܣܟ̈ܢܐ ܩܕܡ ܥܬܝܪ̈ܐ܂ ܣܿܦܩ ܠܗܘܢ ܓܝܪܼ ܢܓܼܕܐ ‏‏ܒܝܼܫܐ ܕܡܣܟܢܘܬܗܘܢܿ ܠܐ ܬܬܓܢܼܒܘܢ ܒܚܘ̈ܫܒܐ ܣܢ̈ܝܐ ܕܣܛܢܐܼ܂ ܕܠܐ ‏‏ܬܗܘܘܢ ܥܪ̈ܛܠܝܐ ܡܢ ܗܝܡܢܘܬܐ ܕܠܒܝܫܝܢ ܐܢܬܘܢ܂ ܦܫܝܩ ܗܼܘ ܓܝܪ ‏‏ܟܦܘܪܝܐ ܡܢ ܗܝܡܢܘܬܐܼ܂ ܐܝܟ ܕܕܠܝܠܿ ܚܛܗܐ ܡܢ ܙܕܝܩܘܬܐ܂ ܐܙܕܗܪܘ ‏‏ܗܟܝܠ ܡܢ ܙܩ̈ܘܦܐ ܘܠܐ ܬܗܘܘܢ ܠܗܘܢ ܪ̈ܚܿܡܐܼ܂ ܕܠܐ ܬܬܒܥܘܢ ‏‏ܥܡܗܘܢ ܕܡܗ ܕܡܫܝܚܐ ܕܡܠܼܝܢ ܐܝ̈ܕܝܗܘܢܿ ܘܝܕܥܝܢ ܐܢܬܘܢ ܘܣܗܕܝܢ ‏‏ܐܢܬܘܢ܃ ܕܟܠܡܕܡ ܕܐܡܪܝܢ ܐܢܚܢܢ ܘܡܠܦܝܢܢ ܒܫܪܒܗ ܕܡܫܝܚܐܼ܂ ܟܬܝܒ ܗܼܘ ‏‏ܒܣܼܦܪܐ ܕܢܒ̈ܝܐܼ ܘܣܝܡ ܨܐܕܝܗܘܢܿ ܘܣܗ̈ܕܢ ܡ̈ܠܝܗܘܢ ܠܡܠܦܢܘܬܢܿ܂ ܥܠ ‏‏ܕܝܢܼܗ ܘܚܫܗ ܘܩܝܡܼܬܗ ܘܣܘܠܩܗ ܕܡܫܝܚܐ܂ ܘܠܐ ܝܕܥܝܢ ܕܟܕ ܩܝܿܡܝܢ ‏‏ܠܩܘܒܠܼܢ܂ ܠܘܩܒܠ ܡ̈ܠܐ ܕܢܒ̈ܝܐ ܩܝܿܡܝܢ܂ ܘܐܝܟܢܐ ܕܒܚ̈ܝܝܗܘܢ ܪܕܦܝܢ ܗܘܘ ‏‏ܠܗܘܢ ܠܢܒ̈ܝܐܼ܂ ܗܟܢܐ ܐܦ ܗܫܐ ܡܢ ܒܬܪ ܡܘ̈ܬܝܗܘܢܼ܂ ܪܕܦܝܢ ܠܗ ܠܫܪܪܐ ‏‏ܕܟܬܝܒ ܒܢܒ̈ܝܐ܂ ܐܙܕܗܪܘ ܬܘܒ ܐܦ ܡܢ ܚܢ̈ܦܐܿ܂ ܕܣܓܕܝܢ ܠܫܡܫܐ ‏‏ܘܠܣܗܪܐܿ܂ ܘܠܒܝܠ ܘܠܢܿܒܘ܃ ܘܠܫܪܟܐ ܕܩܿܪܝܢ ܠܗܘܢ ܗܿܢܘܢ pb. 44 ܐܠܗ̈ܐ܂ ‏‏ܟܕ ܠܘ ܐܠܗ̈ܐ ܐܢܘܢ ܒܟܝܢܗܘܢܿ ܥܪܘܩܘ ܗܟܝܠ ܡܢܗܘܢ܂ ܡܛܘܠ ܕܠܒܪ̈ܝܐ ‏‏ܘܠܥܒ̈ܝܕܐ ܣܓܕܝܢ܂ ܘܐܝܟ ܕܫܡܝܥ ܠܟܘܢ ܡܢ ܩܕܝܡܼ܂ ܟܠܗ ܕܐܬܼܐ ܡܪܢ ‏‏ܠܥܠܡܐܼ܂ ܕܠܐ ܬܘܒ ܢܣܬܓܕܢ ܘܢܬܝܩܪ̈ܢ ܒܪ̈ܝܬܐ܂ ܡܛܘܠ ܕܒܪܡܙܐ ܗܘ ‏‏ܕܥܒܘܕܗܝܢ ܩܝ̈ܡܢ܂ ܘܐܡܬܝ ܕܨܒܿܐ ܫܿܪܐܼ ܘܡܒܿܛܠ ܠܗܝܢ܃ ܘܗ̈ܘܼܝܢ ܐܝܟ ܕܠܐ ‏‏ܐܝܬܝܗܝܢ܂ ܗܘ ܓܝܪ ܨܒܝܢܐ ܕܒܼܪܐ ܐܢ̈ܝܢ ܠܒܪ̈ܝܬܐܼ܂ ܚܪܪ ܐܢܘܢ ܠܒܢܝ̈ܢܫܐ ‏‏ܡܢ ܢܝܪܐ ܕܚܢܦܘܬܐ ܕܒܪ̈ܝܬܐ܂ ܝܕܥܝܢ ܐܢܬܘܢ ܓܝܪܼ܂ ܕܟܠ ܡܿܢ ܕܣܓܿܕ ‏‏ܠܥܒܼ̈ܕܐ ܕܡܠܟܐ ܥܡ ܡܠܟܐܼ܂ ܡܘܬܐ ܕܣܝܦܐ ܡܫܟܚ ܠܗ ܒܣܓܕܬܗ܂ ܠܐ ‏‏ܬܗܘܘܢ ܡܥܩܿܒܝܢ ܥܠ ܟܣܝ̈ܬܐܿ܂ ܘܡܿܫܐܠܝܢ ܥܠ ܣܬܝܪ̈ܬܐܿ܂ ܕܟܬ̈ܝܒܢ ‏‏ܒܟܬܒ̈ܐ ܩܕ̈ܝܫܐ ܕܐܚܝܕܝܢ ܐܢܬܘܢ܂ ܠܐ ܬܗܘܘܢ ܕܝܿܢܝܢ ܠܡ̈ܠܐ ܕܢܒ̈ܝܐ܂ ‏‏ܐܬܕܟܪܘ ܘܚܙܘܼ ܕܒܪܘܚܐ ܕܐܠܗܐ ܐܡܝܪ̈ܢ܂ ܘܡܿܢ ܕܠܢܒ̈ܝܐ ܪܫܐܼ܂ ܠܪܘܚܐ ‏‏ܗܘ ܕܐܠܗܐ ܪܫܿܐܼ ܘܕܐܿܢ܂ ܗܿܝ ܕܚܣ ܠܟܘܢ ܡܢ ܗܕܐ܂ ܡܛܠ ܕܐܘܪ̈ܚܬܗ ‏‏ܕܡܪܝܐܼ ܬܪ̈ܝܨܢ ܐܢܝ̈ܢ܂ ܘܙܕܝ̈ܩܐ ܡܗܠܟܝܢ ܒܗܝܢ ܕܠܐ ܬܘܩܠܬܐܼ܂ ܘܟܦܘܪ̈ܐ ‏‏ܡܬܿܩܠܝܢ ܒܗܝܼܢ܂ ܡܛܘܠ ܕܠܝܬ ܠܗܘܢ ܥܝܢܐ ܟܣܝܬܐ ܕܪܥܝܢܐ ܟܣܝܐܿ܂ ܗܿܘ ‏‏ܕܠܐ ܣܢܝܩ ܥܠ ܫܘܐ̈ܠܐ ܕܠܝܬ ܒܗܘܢ ܝܘܬܪܢܐ܂ ܐܠܐܼ ܐܢ ܚܘܣܪܢܐ܂ ‏‏ܐܬܕܟܪܘ ܕܝܢܼܐ ܕܠܘܚܡܐ ܕܢܒ̈ܝܐܿ܂ ܘܡܠܬ ܡܪܢ ܕܡܬܚܼܡܐ ܥܠ ܡ̈ܠܝܗܘܢܿ܂ ‏‏ܕܒܢܘܪܐ ܗܘ ܕܐܿܢ ܡܪܝܐܿ܂ ܘܒܗܿ ܡܬܼܒܩܝܢ ܟܠܗܘܢ ܒܢܝ̈ܢܫܐ܂ ܡܛܠ ܗܢܐܼ ‏‏ܐܝܟ ܐܪ̈ܚܐ ܘܐܝܟ ܬܘ̈ܬܒܐ܃ ܕܒܿܝܬܝܢ ܘܡܿܩܕܡܝܢ ܠܒܬ̈ܝܗܘܢܼ܂ ܗܟܢܐ ‏‏ܗܘܼܬ pb. 45 ܚܫܝܒܐ ܠܟܘܢ ܢܦܫܟܘܢ ܒܥܠܡܐ ܗܢܐ܂ ܕܡܢ ܗܪܟܐ ܡܫܩܼܠܝܢ ‏‏ܐܢܬܘܢܼ܂ ܠܐܬܪ̈ܘܬܐ ܕܐܙܼܠ ܒܪܐ ܕܢܛܝܒ ܠܟܠ ܡܿܢ ܕܫܿܘܐ ܠܗܘܢ܂ ܡ̈ܠܟܐ ‏‏ܕܐܬܪ̈ܘܬܐܼ܂ ܚܝ̈ܠܘܬܗܘܢ ܐܙܠܝܢ ܩܕܡܝܗܘܢܿ܂ ܘܡܛܝܒܝܢ ܠܗܘܢ ܒܝܬ ܡܫܪܝܐ ‏‏ܠܐܝܩܪܗܘܢܿ ܗܢܐ ܕܝܢ ܡܠܟܐ ܕܝܠܼܢ܂ ܗܘܝܘ ܗܐ ܐܙܝܠ ܕܢܛܝܒ ܠܦܠܚ̈ܘܗܝܿ܂ ‏‏ܐܘ̈ܢܐ ܒܪ̈ܝܟܐ ܕܢܼܫܪܘܢ ܒܗܘܢ܂ ܠܐ ܗܘܐ ܓܝܪ ܣܪܝܩܐܝܬ ܒܼܪܐ ܐܠܗܐ ‏‏ܠܒܢܝ̈ܢܫܐ܂ ܐܠܐ ܕܢܗܘܘܢ ܠܗ ܣܓܘ̈ܕܐܼ ܘܡܫܒܚ̈ܢܐ܂ ܗܪܟܐܿ ܘܬܡܼܿܢ ܠܥܠܡ܂ ‏‏ܕܐܝܟ ܕܠܐ ܗܼܘ ܥܒܿܪܼ ܘܠܐ ܡܫܒܚ̈ܢܘܗܝ ܒܿܛܠܝܢ܂ ܡܛܠ ܗܠܝܢܿ ܘܐܦ ܗܼܘ ‏‏ܡܘܬܝ ܕܗܐ ܦܟܝܪ ܐܢܐ ܘܪܡܼܐ ܐܢܐ ܒܟܘܪܗܢܗܼ܂ ܐܝܟ ܫܢܬܐ ܕܠܠܝܐ ‏‏ܗܘܿܐ ܚܫܝܒ ܒܥܝ̈ܢܝܟܘܢܿ ܘܐܬܕܟܪܘ ܕܒܚܫܗ ܕܒܪܐܼ܂ ܥܒܼܪ ܘܒܼܛܠ ܡܘܬܗ ‏‏ܕܕܒܿܪ ܠܒܢ̈ܝ ܐܢܫܐܿ܂ ܘܣܛܢܐ ܕܡܚܼܛܐ ܠܣܓ̈ܝܐܐ ܘܡܩܼܪܒ ܥܡ ܫܪ̈ܝܪܐܿ܂ ‏‏ܕܢܗܘܘܢ ܕܠܐ ܫܪܪܐ܂ ܘܐܝܟܢܐ ܕܐܟܪܐ ܕܪܡܿܐ ܐܝܕܗ ܥܠ ܚܪܒܐ ܕܦܕܢܐ܃ ‏‏ܐܢ ܗܼܘ ܕܚܐܿܪ ܠܒܣܬܪܗ܃ ܠܐ ܡܫܟܚܝܢ ܬܪܝܨܝܢ ܚܛܘ̈ܛܐ ܩܕܡܘܗܝܼ܂ ‏‏ܗܟܢܐ ܐܦ ܐܢܬܘܢ ܕܐܬܩܪܝܬܘܢ ܠܡܘܗܒܬܐ ܗܕܐ ܕܬܫܡܫܬܐܼ܂ ‏‏ܗܘܼܝܬܘܢ ܙܗܝܪܝܼܢ܂ ܕܠܐ ܬܕܘܿܕܘܢ ܒܨܒܘ̈ܬܗ ܕܥܠܡܐ ܗܢܐ܂ ܕܕܠܡܐ ‏‏ܬܬܿܥܘܟܘܢ ܠܟܘܢ ܡܢ ܗܿܘ ܡܕܡ ܕܐܬܩܪܝܬܘܢ ܠܗ܂܂ ܠܪ̈ܫܢܐ ܘܠܕܝܢ̈ܐ ‏‏ܕܡܬܿܩܪܒܝܢ ܠܗܘܢܼ܂ ܟܕ ܠܐ ܢܣܒܝܢ ܐܢܬܘܢ ܒܐ̈ܦܝܗܘܢܼ ܒܡܕܡ܂ ܘܐܢ ܕܝܢ ‏‏ܡܣܿܟܠܝܼܢܿ ܗܘܼܝܬܘܢ ܡܿܟܣܝܢ ܐܢܬܘܢ pb. 46 ܠܗܘܢܼ ܟܐܢܐܝܬ܂ ܕܐܢܬܘܢ ‏‏ܬܚܘܘܢ ܦܪܗܣܝܐ ܕܬܪܝܨܘܬܟܘܢܼ܂ ܘܗܼܢܘܢܼ ܢܬܟܿܘܢܘܢ܂ ܕܠܐ ܬܘܒ ܗܘܼܘ ‏‏ܡܬܿܕܒܪܝܢ ܒܨܒܝܢ ܢܦܫ̈ܬܗܘܢܿ ܗܕܐ ܕܝܢ ܒܛܝܠܼܘܬܐ ܬܗܘܐ ܠܟܘܢܼ ܟܠ ‏‏ܝܘܡ̈ܝ ܚܝܝ̈ܟܘܢ܂ ܕܟܠ ܒܬܪ ܫܦܝܪ̈ܬܐ ܗܘܼܝܬܘܢ ܪܗܛܝܢ܂ ܟܕ ܡܠܟܝܢ ܐܢܬܘܢܼ ‏‏ܐܦ ܠܐܚܪ̈ܢܐ ܥܠܝܗܝܢ܂ ܒܗܠܝܢ ܗܼܘ ܓܝܪ ܡܫܟܚܝܢ ܒܢ̈ܝ ܐܢܫܐܿ܂ ܚܝܝ̈ܗܘܢ ‏‏ܩܕܡ ܐܠܗܐ܂ ܐܘܪܝܬܐ ܕܝܢ ܘܢܒ̈ܝܐ ܘܐܘܢܓܠܝܘܢ܃ ܕܩܿܪܝܢ ܐܢܬܘܢ ܒܗܘܢ ‏‏ܒܟܠ ܝܘܡ ܩܕܡ ܥܡܐ܃ ܘܐܓܪ̈ܬܗ ܕܦܘܠܘܣ܃ ܕܫܕܪ ܠܢ ܫܡܥܘܢ ܟܐܦܐ ‏‏ܡܢ ܪܗܘܡܐ ܡܕܝܢܬܐ܃ ܘܦܪܟܣܣ ܕܬܪܥܣܪ ܫܠܝܚ̈ܐ܃ ܕܫܕܪ ܠܢ ܝܘܚܢܢ ܒܪ ‏‏ܙܒܕܝ ܡܢ ܐܦܣܣ܃ ܠܗܘܢ ܠܗܠܝܢ ܟܬܒ̈ܐܼ܂ ܗܘܝܬܘܢ ܩܪܝܢ ܒܗܘܢ ܒܥ̈ܕܬܗ ‏‏ܕܡܫܝܚܐ܂ ܘܥܡ ܗܠܝܢ ܬܘܒܿ ܡܕܡ ܐܚܪܝܼܢ ܠܐ ܬܩܼܪܘܢ܂ ܟܕ ܠܝܬ ܬܘܒ ‏‏ܡܕܡ ܐܚܪܝܢ ܕܟܬܝܒ ܒܗ ܫܪܪܐ ܕܐܚܝܕܝܢ ܐܢܬܘܢܿ ܐܠܐ ܐܢ ܟܬܒ̈ܐ ‏‏ܗܠܝܢ ܕܠܒܝܟܝܢ ܐܢܬܘܢ ܒܗܝܡܢܘܬܐ ܗܿܝ ܕܐܬܩܪܝܬܘܢ ܠܗܿ܂ ܘܡܪܢ ܐܒܓܪ ‏‏ܡܠܟܐ ܘܚܐܪ̈ܘܗܝ ܡܝܩܪ̈ܐ܃ ܕܫܡܼܥܘ ܡܕܡ ܕܡܿܠܠܬ ܩܕܡܝܟܘܢ ܝܘܡܢܐܼ܂ ‏‏ܣܦܩܝܢ ܕܢܗܘܘܢ ܠܝ ܣܗ̈ܕܐ ܒܬܪ ܡܘܬܝܼ ܕܡܠܦܢܘܬܗ ܕܡܪܢ ܐܬܼܟܿܪܙܬ ܩܕܡ ‏‏ܟܠ ܐܢܫܼ ܚܦܝܛܐܝܬ܂ ܘܡܕܡ ܥܡ ܡܠܬܗܼ ܠܐ ܩܿܢܝܬ ܒܥܠܡܐ܂ ܣܦܩܐ ܗܘܬ ‏‏ܠܝ ܓܝܪ ܡܠܬܗ ܕܥܬܿܪܬ ܒܗܿ܃ ܘܐܥܿܬܪܬ ܒܗܿ ܠܣܓ̈ܝܐܐܼ܂ ܕܗܼܝ ܬܬܠܘܐ ܠܝ ‏‏ܒܐܘܪܚܐ ܗܕܐ ܕܚܿܙܩ ܐܢܐ ܒܗܿ܃ ܩܕܡ ܡܫܝܚܐ ܕܫܕܪ ܒܬܪܝܿ܂ ܘܐܪܕܐ ܒܗܿ ‏‏ܠܘܬܗ܂ ܝܕܥܝܢ ܐܢܬܘܢ pb. 47 ܓܝܪ ܕܐܡܿܪܬ ܠܟܘܢܼ܂ ܕܢܦܫ̈ܬܐ ܟܠܗܝܢ ‏‏ܕܒܢܝ̈ܢܫܐ ܕܢܦܩ̈ܢ ܡܢ ܦܓܪܐ ܗܢܐ܂ ܠܐ ܡܝ̈ܬܢ܂ ܘܚ̈ܝܼܢ ܐ̈ܢܝܼܢ ܘܩܝܼ̈ܡܢܿ ܘܐܝܬ ‏‏ܠܗܝܢ ܐ̈ܘܢܐܼ ܘܒܝܬ ܡܫܪܝܐ ܕܢܘܿܚܐ܂ ܠܐ ܓܝܪ ܒܿܛܠ ܗܘܢܐ ܘܡܕܥܐ ‏‏ܕܢܦܫܐ܂ ܡܛܘܠ ܕܨܠܡܐ ܕܐܠܗܐ ܨܝܪ ܒܗܿ ܕܠܐ ܡܐܿܬ܂ ܠܐ ܗܘܐ ܓܝܪ ‏‏ܐܝܟ ܦܓܪܐ ܗܝ ܕܠܐ ܪܓܫܬܐܿ܂ ܕܠܐ ܡܪܓܫ ܒܚܿܒܠܐ ܣܢܝܐ ܕܫܿܪܐ ‏‏ܥܠܘܗܝ܂ ܐܓܪܐ ܘܦܘܪܥܢܐܼ ܠܐ ܡܫܟܚܐ ܡܩܿܒܠܐ ܡܢ ܒܠܥܕܘܗܝ܂ ܡܛܘܠ ‏‏ܕܠܐ ܗܘܐ ܕܝܠܗܿ ܗܼܘ ܒܠܚܘܕ ܥܡܠܐ܂ ܐܠܐܼ ܐܦ ܕܦܓܪܐ ܕܫܪܝܐ ܗܘܬ ‏‏ܒܗ܂ ܡܪ̈ܘܕܐ ܕܝܢ ܕܠܐܠܗܐ ܠܐ ܝܕܥܝܼܢ܂ ܡܬܬܘܝܢ ܬܡܿܢ ܕܠܐ ܝܘܬܪܢܐ܂ ‏‏ܐܢܬܘܢ ܕܝܢ ܕܐܝܬܝܟܘܢ ܕܡܫܝܚܐ܃ ܕܫܡܗ ܡܫܒܚܐ ܣܝܡ ܥܠܝܟܘܢ ‏‏ܘܡܡܠܟܼ܂ ܗܼܘ ܬܿܪܨ ܠܟܘܢ ܒܐܘܪܚܐ ܕܩܘܫܬܐܿ܂ ܕܬܪܕܘܢ ܒܗܿ ܘܬܡܿܢܥܘܢ ‏‏ܘܬܕܪܟܘܢܿ܂ ܠܗܿܘ ܡܕܡ ܕܡܠܝܟ ܘܢܛܝܪ ܠܐܝܠܝܢ ܕܠܐ ܣܿܛܝܢ ܡܢܗ܃ ܘܡܿܩܘܝܢ ‏‏ܐܝܟ ܕܐܬܼܩܪܝܘ ܗܘܘ ܡܢ ܡܪܢ܂ ܘܟܕ ܗܕܐ ܡܠܬܐ ܐܡܼܪ ܗܘܐܼ܂ ܫܼܠܝ ‏‏ܗܘܐ ܠܗ ܐܕܝ ܫܠܝܚܐܼ ܘܫܬܼܩ܂ ܘܥܢܼܐ ܐܓܝ ܥܒܿܕ ܫܐܪ̈ܝܐ ܕܡܿܠܟܐ܃ ‏‏ܘܦܠܘܛ ܘܥܒܫܠܡܐ܃ ܥܡ ܫܪܟܐ ܕܚܒܪ̈ܝܗܘܢܼ܂ ܘܐܡܼܪ ܗܘܘ ܠܗ ܠܐܕܝ ‏‏ܫܠܝܚܐ܂ ܣܗܿܕ ܗܼܘ ܡܫܝܚܐ ܕܫܠܚܟ ܨܐܕܝܢ܃ ܘܐܠܦܬܢ ܗܝܡܢܘܬܐ ‏‏ܫܪܝܪܐ܃ ܘܐܩܢܝܬܢ ܚܝ̈ܐ ܕܩܘܫܬܐ܃ ܕܐܝܟܢܐ ܕܫܡܥܢܢ ܡܢܟ ܘܩܿܒܠܢ ܚܢܢ܃ ‏‏ܙܒܢܐ ܗܢܐ ܟܠܗ ܕܗܘܼܝܬ ܠܘܬܢܼ܂ ܗܟܢܐ ܡܿܩܘܝܢܼܢ ܟܠ ܝܘܡ̈ܝ ܚ̈ܝܝܢ܂ ܘܡܢ ‏‏ܣܓܕܬܐ ܕܥܒ̈ܝܕܐ ܘܕܒܪ̈ܝܐ܃ ܕܣܓܕܝܢ ܗܘܘ ܠܗܘܢ pb. 48 ܐܒ̈ܗܝܼܢ ܥܪܩܝܢ ‏‏ܚܢܢ܂ ܘܥܡ ܝܗ̈ܘܕܝܐ ܘܙܩ̈ܘܦܐܼ ܠܐ ܡܬܚܠܛܝܢܢ܂ ܘܝܪܬܘܬܐ ‏‏ܗܕܐ ܕܩܿܒܠܢܢ ܡܢܟܼ ܠܐ ܡܪܦܝܢ ܚܢܢ܂ ܘܒܗܿ ܗܼܘ ܢܦܩܝܢ ܚܢܢ ܡܢ ܥܠܡܐ ‏‏ܗܢܐ܂ ܘܒܝܘܡܗ ܕܡܪܢ ܩܕܡ ܒܝܡ ܕܝܿܢܐ ܕܟܐܢܘܬܐܼ܂ ܬܡܿܢ ‏‏ܢܦܿܢܐ ܠܢ ܝܪܬܘܬܐ ܗܕܐܼ ܐܝܟ ܕܐܡܼܪܬ ܠܢ܂ ܘܟܕ ܐܬܐܡܪ ܗ̈ܘܝ ܗܢܼܝܢ ‏‏ܗܠܝܼܢ܂ ܩܡ ܗܘܐ ܐܒܓܪ ܡܠܟܐ ܘܪ̈ܘܪܒܢܘܗܝܼ܂ ‏‏ܘܚܐܪ̈ܐ ܟܠܗܘܢ ܕܡܠܟܘܬܗ܂ ܘܐܙܼܠ ܗܘܐ ܠܐܦܕܢܐ ‏‏ܕܝܠܗ܂ ܟܕ ܡܥܩܝܢ ܗܘܘ ܥܠܘܗܝ ܟܘܠܗܘܢܿ܂ ܕܡܐܬ ܗܘܐ܂ ܘܫܕܪ ܗܘܐ ܠܗ ‏‏ܠܒܘ̈ܫܐ ܡܝܩܪ̈ܐ ܘܪ̈ܫܝܐܿ܂ ܕܢܬܩܒܪ ܗܘܐ ܒܗܘܢܿ ܘܟܕ ܚܼܙܐ ܐܢܘܢ ܐܕܝܼ ‏‏ܫܠܼܚ ܠܗ܂ ܕܠܐ ܒܚ̈ܝܝ ܫܩܿܠܬ ܡܢܟ ܡܕܡ‍܂ ܘܠܐ ܡܕܓܠ ܐܢܐ ܒܝ ܡܠܬܗ ܕܡܫܝܚܐ ܕܐܡܼܪ ‏‏ܠܝܿ܂ ܕܠܐ ܬܣܒܘܢ ܡܢ ܐܢܫ ܡܕܡܿ܂ ܘܠܐ ܬܩܼܢܘܢ ܡܕܡ ܡܥܠܡܐ ‏‏ܗܢܐ܂ ܘܡܢ ܒܬܪ ܬܠܬܐ ܝܘܡ̈ܝܢ ܚܪ̈ܢܝܢ܃ ܕܐܬܐܡܪ ܗ̈ܘܝ ‏‏ܗܼܢܝܢ ܗܠܝܢ ܡܢ ܐܕܝ ܫܠܝܚܐ܃ ܘܫܡܼܥ ܗܘܐ ܘܩܿܒܠ ܣܗܕܘܬܐ ܕܡܠܦܢܘܬܐ ‏‏ܕܟܪܘܙܘܬܗ ܡܢ ܒ̈ܢܝ ܬܫܡܫܬܗܼ܂ ܩܕܡ ܚܐܪ̈ܐ ܟܠܗܘܢ ‏‏ܢܦܼܩ ܗܘܐ ܠܗ ܡܢ ܥܠܡܐ ܗܢܐ܂ ܘܐܝܬܘܗܝ ܗܘܐ ܝܘܡܐܼ‏‏‎‎‏ ܚܡܫܐ ܒܫܒܐ܂ ܒܐܪ̈ܒܥܣܪܐ ܒܐܝܪ ܝܪܚܐ܂ ‏‏ܘܒܐܒܠܐ ܪܒܐ ܘܒܚܫܐ ܡܪܝܪܐ ܗܘܼܬ ܥܠܘܗܝܼ ܟܠܗܿ pb. 49 ܡܕܝܢܬܐ܂ ‏‏ܠܐ ܗܘܐ ܕܝܢ ܟܪ̈ܣܛܝܢܐ ܒܠܚܘܕ ܡܥܩܝܢ ܗܘܘ ܥܠܘܗܝܼ܂ ܐܠܐ ܐܦ ‏‏ܝܗ̈ܘܕܝܐܼ ܘܚ̈ܢܦܐ ܕܐܝܬ ܗܘܐ ܒܗ ܒܟܪܟܐ ܗܢܐ܂ ܐܒܓܪ ܕܝܢ ܡܠܟܐܼ܂ ‏‏ܝܬܝܪ ܡܢ ܟܠ ܐܢܫ ܡܥܩ ܗܘܐ ܥܠܘܗܝ܂ ܗܿܘܼ ܘܪ̈ܘܪܒܢܐ ܕܡܠܟܘܬܗ܂܂ ‏‏ܘܒܟܪܝܘܬܐ ܕܪܥܝܢܗܼ܂ ܫܛ ܗܘܐܼ ܘܫܒܩܗ ܠܐܝܩܪܐ ܕܡܠܟܘܬܗ ܒܗܿܘ ‏‏ܝܘܡܐ܂ ܘܒܕܡ̈ܥܐ ܚܢܝ̈ܓܬܐ ܒܿܟܐ ܗܘܐ ܠܗ ܥܡ ܟܠ ܐܢܫ܂ ܘܥܡܐ ܟܠܗ ‏‏ܕܡܕܝܢܬܐ ܕܚܿܙܐ ܗܘܐ ܠܗܼ܂ ܡܬܕܡܪ ܗܘܐ ܒܗܼ ܕܟܡܐ ܚܐܿܫ ܗܘܐ ‏‏ܥܠܘܗܝ܂ ܘܒܐܝܩܪܐ ܪܒܐ ܘܡܝܬܪܐܼ܂ ܙܝܚ ܗܘܐ ܘܩܒܪܗܼ܂ ܐܝܟ ܚܕ ܡܢ ‏‏ܪ̈ܘܪܒܢܐ ܡܐ ܕܡܐܿܬ ܗܘܐ܂ ܘܣܡܗ ܗܘܐ ܒܩܒܪܐ ܪܒܐ ܕܓ̈ܠܦܐ ‏‏ܕܨܒ̈ܬܐܿ܂ ܗܿܘ ܐܝܢܐ ܕܣܝܼܡܝܢ ܗܘܘ ܒܗ ܕܒܝܬ ܐܪܝܘܿ܂ ‏‏ܐܒܗ̈ܬܐ ܕܐܒܘܗܝ ܕܐܒܓܪ ܡܠܟܐ܂ ܬܡܿܢ ‏‏ܣܡܗ ܗܘܐܼ ܚܫܝܫܐܝܬ܂ ܒܟܪܝܘܬܐܼ ܘܒܥܩܬܐ ܪܒܬܐ܂ ܘܥܡܐ ܟܘܠܗ ‏‏ܕܥܕܬܐܼ܂ ܐܿܙܠ ܗܘܐ ܡܢ ܥܕܢܐ ܠܥܕܢܐܼ܂ ܘܡܿܨܠܐ ܗܘܐ ܬܡܼܿܢ ܚܦܝܛܐܝܬ܂ ‏‏ܘܕܘܟܪܢܐ ܕܥܘܗܕܢܗ ܥܒܕܝܢ ܗܘܘܼ ܡܢ ܫܢܐ ܠܫܢܐ܂ ܐܝܟ ‏‏ܦܘܩܕܢܐ ܘܝܘܠܦܢܐ ܕܡܩܼܒܠ ܗܘܐ ܠܗܘܢ ܡܢܗ ܕܐܕܝ ܫܠܝܚܐܿ܂ ‏‏ܘܐܝܟ ܡܠܬܗ ܕܐܓܝܿ܂ ܕܗܼܘ ܗܘܿܐ ܡܕܒܪܢܐ ܘܦܩܘܕܐ ܘܝܪܬܐ ܕܟܘܪܣܝܗ ‏‏ܡܢ ܒܬܪܗ܃ ܒܐܝܕܐ ܕܟܗܢܘܬܐ ܕܩܿܒܠ ܗܘܐ ܡܢܗܼ ܩܕܡ ܟܠ ܐܢܫ܂ ܘܐܦ ‏‏ܗܼܘ ܒܗܿ ܒܐܝܕܐ ܕܩܿܒܠ ܗܘܐ ܡܢܗܼ܂ ܥܒܿܕ ܗܘܐ ܟܗ̈ܢܐ pb. 50 ܘܡܕܒܪ̈ܢܐܼ܂ ‏‏ܒܟܠܗ ܐܬܪܐ ܗܢܐ ܕܒܝܬ ܢܗܪܝܢ܂ ܘܐܦ ܗܼܢܘܢ ܓܝܪ ‏‏ܐܟܘܬܗ ܕܝܠܗ ܕܐܕܝ ܫܠܝܚܐܼ܂ ܗܟܢܐ ܐܚܝܕܝܢ ܗܘܘ ܡܠܬܗ܃ ‏‏ܘܫܡܥܝܢ ܗܘܘ ܘܡܩܿܒܠܝܢܿ܂ ܐܝܟ ܝܪܬܐ ܛܒܐ ‏‏ܘܡܗܝܡܢܐ ܕܫܠܝܚܗ ܕܡܫܝܚܐ ܣܓܝܕܐ܂ ܟܣܦܐ ܕܝܢ ܘܕܗܒܐ ܡܢ ܐܢܫܼ ܠܐ ‏‏ܫܩܿܠ ܗܘܐ܂ ܘܡܘܗ̈ܒܬܐ ܕܪ̈ܘܪܒܢܐܼ ܠܐ ܩܪ̈ܒܢ ܗ̈ܘܝ ܨܐܕܘܗܝ܂ ܚܠܦ ܓܝܪ ‏‏ܕܗܒܐ ܘܣܐܡܐܼ܂ ܒܢܦܫ̈ܬܐ ܕܡ̈ܗܝܡܢܐ ܡܥܼܬܪ ܗܘܐ ܠܗܿ ‏‏ܠܥܕܬܗ ܕܡܫܝܚܐ܂ ܩܝܿܡܐ ܕܝܢ ܟܠܗ ܕܓܒܪ̈ܐ ܘܕܢܫ̈ܐܼ܂ ܢܟܦܝܢ ܗܘܘܼ ܘܙܗܼܝܢ܂ ‏‏ܘܩܕܝܫܝܢ ܗܘܘܼ ܘܕܟܼܝܢܿ ܘܝܚܝܕܐܝܬ ܘܢܟܦܐܝܬ ܥܡܪܝܢ ‏‏ܗܘܘ ܕܠܐ ܛܘܠܫܐ܂ ܒܥܝܪܘܬܐ ܕܬܫܡܫܬܐ ܙܗܝܐܝܬ܂ ܒܫܩܠ ܛܥܢܗܘܢ ‏‏ܕܠܘܬ ܡܣܟ̈ܢܐ܂ ܒܣܘܥܪ̈ܢܝܗܘܢ ܕܠܘܬ ܟܪ̈ܝܗܐ܂ ܗ̈ܠܟܬܗܘܢ ܓܝܪ ܫܘܒܚܐ ‏‏ܡ̈ܠܝܢ ܗ̈ܘܝ ܡܢ ܚ̈ܙܝܐ܂ ܘܕܘܒܪ̈ܝܗܘܢܼ ܬܫܒܘܚܬܐ ܥܛܝܦܝܢ ܗܘܘ ܡܢ ܢܘܟܪ̈ܝܐ܂ ‏‏ܐܝܟܢܐ ܕܐܦ ܟܘܡܪ̈ܐ ܕܒܝܪ ܢܿܒܘ ܘܒܝܠܼ܂ ܐܝܩܪܐ ܠܗܘܢ ܦܿܠܓܝܢ ܗܘܘܼ ܟܠ ‏‏ܥܕܢ܂ ܒܚܙܬܗܘܢ ܝܩܝܪܬܐ܂ ܒܡܠܬܗܘܢ ܫܪܝܪܬܐ܂ ܒܦܪܗܣܝܐ ܕܐܝܬ ܗܘܐ ‏‏ܨܐܕܝܗܘܢ܂ ܘܒܚܐܪܘܬܗܘܢ ܕܒܝܥܢܘܬܐ ܠܐ ‏‏ܟܕܝܢܐ ܗܘܬܿ܂ ܘܬܚܝܬ ܥܕܠܝܐ ܠܐ ܚܒܝܫܐ ܗܘܬ܂ ܟܘܠ ܡܿܢ ܓܝܪ ܕܚܿܙܐ ܗܘܐ ܠܗܘܢܼ܂ ܠܐܘܪܥܗܘܢ ܪܗܿܛ ܗܘܐ ܕܢܫܼܐܠ ܗܘܐ ܫܠܡܗܘܢܼ ‏‏ pb. 51 ܝܩܝܪܐܝܬ܂ ܡܛܠ ܕܐܦ ܗܼܝ ܚܙܬܗܘܢܼ ܫܠܡܐ ܦܪܣܐ ܗܘܬ ܥܠ ‏‏ܚ̈ܙܝܐ܂ ܒܕܡܼܘܬ ܡܨܝ̈ܕܬܐ ܓܝܪ ܦܪ̈ܝܣܢ ܗ̈ܘܝ ܡܠܝ̈ܗܘܢ ܕܫܝܢܐ ܥܠ ܡܪ̈ܝܕܐܼ܂ ‏‏ܟܕ ܥܐܠܝܢ ܗܘܘ ܠܓܘ ܡܢ ܛܝܪܐ ܕܩܘܫܬܐ ܘܕܫܪܪܐ܂ ܠܝܬ ܗܘܐ ‏‏ܕܝܢ ܕܚܿܙܐ ܗܘܐ ܠܗܘܢ ܘܟܿܘܙ ܗܘܐ ܡܢܗܘܢܼ܂ ܒܕܠܐ ‏‏ܣܥܪܝܢ ܗܘܘ ܡܕܡ ܕܠܐ ܒܙܕܩܐ ܘܕܠܐ ܒܘܠܝܬܐ܂ ܘܒܝܕ ܗܠܝܼܢ܂ ܓ̈ܠܼܝܢ ܗ̈ܘܝ ‏‏ܐܦܝ̈ܗܘܢ ܒܟܪܘܙܘܬܐ ܕܡܠܦܢܘܬܗܘܢܼ ܨܝܕ ܟܠܢܫ܂ ܗܿܘ ܓܝܪ ܡܕܡ ܕܐܡܪܝܢ ‏‏ܗܘܘ ܠܐܚܪ̈ܢܐ ܘܡܪܬܝܢ ܠܗܘܢ܃ ܗܢܼܘܢ ܒܥܿܒ̈ܕܐ ܡܿܚܘܝܢ ܗܘܘ ܠܗ ‏‏ܒܩܢܘܡ̈ܝܗܘܢ ܘܫܡ̈ܘܥܐ ܕܚܿܙܝܢ ܗܘܘ܃ ܕܥܡ ܡ̈ܠܝܗܘܢ ‏‏ܥܿܒܕ̈ܝܗܘܢ ܕܠܐ ܦܝܣܐܼ܂ ܣܓ̈ܝܐܐ ܡܬܬܠܡܕܝܢ ܗܘܘ ܠܗܘܢ܂ ܘܒܡܠܟܐ ‏‏ܡܫܝܚܐ ܡܘܕܝܢ ܗܘܘܼ܂ ܟܕ ܡܫܒܚܝܢ ܗܘܘ ܠܐܠܗܐܿ܂ ܕܐܦܢܝ ܐܢܘܢ ܠܘܬܗ܂ ‏‏ܘܡܢ ܒܬܪ ܫ̈ܢܝܐ ܕܡܘܬܗ ܕܐܒܓܪ ܡܠܟܐܼ܂ ܩܡ ܗܘܐ ܚܕ ܡܢ ܒܢ̈ܘܗܝ ‏‏ܡܪ̈ܝܕܐܼ ܕܠܐ ܡܬܛܦܝܣ ܗܘܐ ܠܫܪܪܐ܂ ܘܫܠܼܚ ܠܗ ܠܐܓܝܼ܂ ‏‏ܟܕ ܝܬܿܒ ܗܘܐ ܒܥܕܬܐ܃ ܕܥܿܒܕ ܠܝ ܚ̈ܘܕܐ ܕܕܗܒܐܿ܂ ܐܝܟ ܡܐ ܕܥܒܿܕ ‏‏ܗܘܼܝܬ ܠܐܒ̈ܗܝ ܡܢ ܩܕܝܡ܂ ܫܠܼܚ ܠܗ ܐܓܝܼ܂ ܕܠܐ ܡܪܦܐ ܐܢܐ ܬܫܡܫܬܗ ‏‏ܕܡܫܝܚܐ ܕܐܬܼܓܥܠܬ ܠܝ ܡܢ ܬܠܡܝܕܗ ܕܡܫܝܚܐܿ܂ ܘܥܿܒܕ ܐܢܐ ܚ̈ܘܕܐ ‏‏ܕܒܝܫ̈ܬܐ܂ ܘܟܕ ܚܼܙܐ ܗܘܐ ܕܠܐ ܡܬܛܦܝܣ ܠܗܼ܂ ‏‏ܫܕܪ ܗܘܐ ܬܒܪ ܫܩ̈ܘܗܝܼ܂ ܟܕ ܝܬܿܒ ܗܘܐ ܒܥܕܬܐܼ ‏‏ܘܡܬܪܓܡ܂ ܘܟܕ pb. 52 ܡܐܬܼ‍܂ ܐܘܡܝ ܗܘܐ ܠܦܠܘܛ ‏‏ܘܠܥܒܫܠܡܐܼ܂ ܕܒܒܝܬܐ ܗܢܐ ܕܡܛܠ ܫܡܗ ܗܐ ܡܐܬ ܐܢܐܼ܂ ‏‏ܒܗ ܣܝܡܘܢܢܝ ܘܩܘܒܪܘܢܢܝ܂ ܘܐܝܟ ܕܐܘܡܝ ܗܘܐܼ܂ ܗܟܢܐ ‏‏ܣܡܘܗܝ ܗܘܘ܂ ܠܓܘ ܡܢ ܬܪܥܐ ܡܨܥܝܐ ܕܥܕܬܐ܂ ܒܝܬ ܓܒܪ̈ܐ ܠܢܫ̈ܐ܂ ‏‏ܘܗܼܘܐ ܗܘܐ ܐܒܠܐ ܪܒܐ ܘܡܪܝܪܐܼ܂ ܒܟܘܠܗܿ ܥܕܬܐܼ ܘܒܟܠܗܿ ܡܕܝܢܬܐ܂ ‏‏ܥܠ ܚܫܐ ܕܐܒܠܐ ܕܗܘܼܐ ܒܓܘܗܼܿ܂ ܐܝܟ ܕܗܘܼܐ ܗܘܐ ‏‏ܐܒܠܐ ܟܕ ܡܝܬ ܐܕܝ ܫܠܝܚܐ܂ ܘܡܛܠ ܕܥܡ ܬܘܿܒܪܐ ܕܫܩ̈ܘܗܝ ‏‏ܡܝܬ ܗܘܐ ܠܗ ܪܗܝܒܐܝܬ ܘܡܣܪܗܒܐܝܬܼ܂ ܠܐ ܐܫܟܚ ܗܘܐ ܕܢܣܝܡ ‏‏ܐܝܕܐ ܥܠ ܦܠܘܛ܂ ܐܙܼܠ ܗܘܐ ܗܼܘ ܦܠܘܛ ܠܐܢܛܝܘܟܝܼ܂ ܘܩܿܒܠ ܗܘܐ ‏‏ܐܝܕܐ ܕܟܗܢܘܬܐܼ܂ ܡܢ ܣܪܦܝܘܢ ܐܦܣܩܦܐ ܕܐܢܛܝܘܟܝ܂ ܗܿܘ ܕܐܦ ܗܼܘ ‏‏ܣܪܦܝܘܢ ܐܦܝܣܩܘܦܐ ܕܐܢܛܝܘܟܝܼ܂ ܡܩܒܠܐ ܗܘܬ ܠܗ ܐܝܕܐܼ܂ ‏‏ܡܢ ܙܦܪܝܢܘܣ ܐܦܝܣܩܘܦܐ ܕܐܢܛܝܟܝܐ ܡܕܝܢܬܐ܂ ܡܢ ‏‏ܝܘܒܠܐ ܕܐܝܕܐ ܕܟܗܢܘܬܐ ܕܫܡܥܘܢ ܟܐܦܐܿ܂ ܗܿܘ ܕܩܿܒܠ ܗܘܐ ܡܢ ܡܪܢܿ܂ ‏‏ܕܗܘܼܐ ܗܘܐ ܬܡܿܢ ܐܦܝܣܩܘܦܐ ‏‏ܒܪܗܘܡܐ ܥܣܪ̈ܝܢ ܘܚܡܫ ܫ̈ܢܝܢܿ܂ ܒܝܘܡ̈ܝ ܩܣܪ̈܂ ܗܿܘ ܕܐܡܠܟ ܗܘܐ ܬܡܿܢ ‏‏ܬܠܬܥܣܪ̈ܐ ܫܢ̈ܝܢ܂܂ ܘܐܝܟܢܐ ܕܐܝܬ ܥܝܕܐ ܒܡܠܟܘܬܗ ܕܐܒܓܪ ܡܠܟܐ ‏‏ܘܒܟܠ ܡ̈ܠܟܘܢ܃ ܘܟܘܠ ܡܕܡ ܕܡܬܐܡܪ ‏‏ܩܕܡܘܗܝ܃ ܡܬܟܬܒ ܘܡܬܣܝܡ ܒܝܬ ܥܘܗܕܢܐܼ܂ ܗܟܢܐ ܐܦ ܠܒܿܘܒܢܐ pb. 53 ‏‏ܒܪ ܣܿܢܩ ܒܪ ܥܒܫܕܪ ܣܿܦܪܐ ܕܡܠܟܐܿ܂ ܟܬܿܒ ܗܘܐ ܗܼܢܝܢ ‏‏ܗܠܝܢ ܕܐܕܝ ܫܠܝܚܐ܂ ܡܢ ܫܘܪܝܐܼ ܠܫܘܠܡܐ܂ ܟܕ ܪܡܿܐ ܗܘܐ ܐܝܕܐ ‏‏ܕܣܗܕܘܬܐܼ܂ ܐܦ ܚܿܢܢ ܛܒܘܠܪܐ ܫܪܝܪܐ ܕܡܿܠܟܐ܂ ܘܣܡ ܗܘܐ ‏‏ܒܝܬ ܥܘܗ̈ܕܢܐ ܕܟܬܒ̈ܐ ܕܡ̈ܠܟܐܿ܂ ܐܝܟܐ ܕܦܘܩ̈ܕܢܐ ܘܢܡ̈ܘܣܐ ‏‏ܣܝܡܼܝܢܿ܂ ܘܕܙܒܿܢܝܢ ܘܕܡܙܒܢܝܢ ܬܡܿܢ ܢܛܝܪܝܢܿ܂ ܒܙܗܝܪܘܬܐܿ ܕܠܐ ܒܣܝܢܐ ܡܕܡ܂