On Lent III - ܕܚܲܕܼܒܿܫܲܒܵܐ ܕܲܬܼܠܵܬܼܵܐ ܕܨܵܘܡܵܐ

1 :ܐܘܼܪܚܵܐ ܕܪܲܫ ܠܝܼ ܒܲܪ ܬܵܘܬܵܒܹ̈ܐ ܕܐܸܪܕܹܿܐ ܒܡܸܠܹ̈ܐ 2 ܘܲܒܼܥܹ̇̄ܿܝܬܼ ܕܐܸܚܙܘܿܩ ܠܘܵܬܼ ܣܘܼܥܪ̈ܵܢܹܐ ܕܟܼܵܪܘܿܙܘܼܬܹܗ ܀ 3 :ܛܢܵܢܵܐ ܢܲܛܪܲܢܝ ܠܘܵܬܼ ܝܘܼܠܦܵܢܵܐ ܕܡܸܠܲܝ̈ ܪܘܼܚܵܐ 4 ܕܐܸܣܲܪ݂ ܘܲܫܪ݂ܵܐ ܐܲܝܟ ܨܸܒܼܝܵܢܹܗ ܘܠܵܐ ܐܸܬܿܕܲܓܵܠ ܀ 5 :ܟܠ̣ܵܐ ܒܲܥܢܵܢܹ̈ܐ ܘܝܲܒܸܿܫ ܐܸܢܹܝܢ ܐܲܝܟ ܥܲܩܪ̈ܵܬܼܵܐ 6 ܘܲܗܦ݂ܲܟ ܨܲܠܝܼ ܘܪܲܓܿܝܼ ܐܸܢܹܝܢ ܒܪܸܡܙܵܐ ܟܲܣܝܵܐ ܀ 7 :ܢܚܸ݂ܬܼ ܐܲܝܟ ܐܲܪܝܵܐ ܠܡܲܪܒܿܘܿܥܝܼܬܹܗ ܕܡ̇ܘܬܵܠܐ ܝܲܥܢܵܐ 8 ܘܐܲܥܕܲܝ ܡܸܢܹܗ ܓܙܵܪܵܐ ܕܐ̄ܢܵܫܵܐ ܒܥܘܼܕܼܪܵܢ ܡ̇ܪܹܗ ܀ 9 ܥ̣ܒܲܕܼ ܬܲܟܼܬܿܘܼܫܵܐ ܥܲܡ ܐܲܠܵܗܹ̈ܐ ܘܦܲܠܵܚܲܝ̈ܗܘܿܢ: pb. 182 10 ܘܚܵܒܲܬ̤ ܛܘܼܥܝܲܝ ܘܲܢܨ݂ܲܚ ܒܐܝܼܕܹܗ ܚܹܝܠ ܟܲܣܝܘܼܬܼܵܐ ܀ 11 :ܙܟܼܵܐ ܒܐܵܓܼܘܿܢܵܐ ܒܚܹܝܠ ܥܘܼܕܪܵܢܵܐ ܐܲܠܵܗܵܝܵܐ 12 ܘܐܲܒܼܗܸܬܼ ܐܸܢܘܿܢ ܠܲܕܠܵܐ ܐܵܠܵܗ ܒܫܸܡ ܐܲܠܵܗܵܐ ܀ 13 :ܘܲܕܼܠܵܐ ܢܸܛܥܹܐ ܒܲܪ ܡ̇ܝܘܿܬܹ̈ܐ ܟܝܵܢܹܗ ܫܝܼܛܵܐ 14 ܐܲܗܡܝܼ ܡܸܢܹܗ ܘܙܵܥ ܡ̣ܢ ܩܵܠܵܐ ܕܐܸܠܥܵܐ ܪܦܝܼܬܼܵܐ ܀ 15 :ܬܲܪܬܹܿܝܢ ܝܼܠܸܦ݂ ܒܲܪ ܬܵܘܬܵܒܹ̈ܐ ܒܗܵܕܹܐ ܥܸܠܬܼܵܐ 16 ܫܝܼܛܘܼܬܼ ܡܸܕܪܹܗ ܘܚܘܼܒܵܐ ܕܡ̇ܪܹܗ ܕܠܘܵܬܼ ܐ̄ܢܵܫܵܐ ܀ 17 :ܚܵܘܝܼ ܛܢܵܢܹܗ ܕܲܠܘܵܬܼ ܟܲܣܝܵܐ ܒܝܲܕܼ ܡܹܐܙܲܠܬܹܿܗ 18 ܘܲܫܡ݂ܲܥ ܩܵܠܵܐ ܡܠܸܐ ܚܵܘܣܵܢܵܐ ܒܫܘܼܠܵܡ ܐܘܼܪܚܹܗ ܀ 19 :ܚ̣ܙܲܩ ܛܲܢܵܢܵܐ ܒܚܲܡܝܼܡܘܼܬܹܗ ܐܲܝܟ ܓܲܠܘܵܝܵܐ 20 ܘܲܫܐܸܠ ܡ̇ܘܬܵܐ ܘܲܫܟܸ݂ܒܼ ܘܲܛܒܲܥ ܒܟܼܪܝܘܼܬܼ ܠܸܒܹܿܗ ܀ 21 :ܩܪ̣ܵܝܗܝ ܓܸܠܝܵܢܵܐ ܕܩܘܼܡ ܐܸܵܬܿܬܲܪܣܵܐ ܒܲܪ ܬܵܘܬܵܒܹ̈ܐ 22 ܕܩܲܫܝܵܐ ܗ̄ܝ̣ ܡܸܢܵܟ ܐܘܼܪܚܵܐ ܕܐܲܪܡܝܼܬܿ ܕܠܵܐ ܬܘܼܪܣܵܝܵܐ ܀ 23 :ܗܵܐ ܛܲܝܸܒ̣ ܠܵܟ ܪܸܡܙܵܐ ܟܲܣܝܵܐ ܐܘܼܟܼܠܵܐ ܓܲܠܝܵܐ 24 ܘܣܲܒܼ ܘܐܸܣܬܲܝܒܲܪ ܘܕܲܥ ܠܲܟܼܝܵܢܵܟ ܘܚܘܼܣ ܥܲܠ ܓܸܢܣܵܟ ܀ 25 :ܘܩ̣ܵܡ ܛܲܢܵܢܵܐ ܘܲܚ̣ܙܵܐ ܕܡܲܬܼܩܲܢ ܦܵܬܼܘܼܪ ܪܸܡܙܵܐ 26 ܘܐܼܟܲܠ̣ ܘܐܸܫܬܿܝܼ ܘܲܗܦ݂ܲܟ ܘܲܛܒܲܥ ܟܲܕܼ ܟܲܪܝܵܐ ܠܹܗ ܀ 27 :ܬܲܪܬܹܿܝܢ ܙܲܒܼܢܝܼ̈ܢ ܩ݂ܪܵܝܗܝ ܪܘܼܚܵܢܵܐ ܠܦܲܓܪܵܢܵܝܵܐ 28 ܕܩܘܼܡ ܡ̇ܝܘܿܬܵܐ ܘܬܲܪܣܵܐ ܢܲܦܫܵܟ ܒܐܘܼܟܼܠܵܐ ܕܪܸܡܙܵܐ ܀ 29 :ܗܵܘ̇ ܦܘܼܩܕܵܢܵܐ ܕܙܵܢܹܗ ܒܚܝܠܵܐ ܒܝܲܕܼ ܫܲܬܿܝܼܩܹ̈ܐ 30 ܗܘ̤ ܐܵܦ ܗܵܫܵܐ ܝܲܗ̣̄ܒ ܠܹܗ ܐܘܼܟܼܠܵܐ ܒܝܲܕܼ ܡܲܠܵܠܹ̈ܐ ܀ 31 :ܡܠܝܼܠܹ̈ܐ ܘܚܲܪ̈ܫܹܐ ܕܲܝܠܸܘ ܩܘܼܕܼܡ̇ܘܗܝ ܒܲܚܫܵܡܝܼܬܹܗ 32 ܘܲܕܠܵܐ ܥܲܡܠܵܐ ܚ̣ܝܵܐ ܛܲܡܵܡܵܐ ܕܲܚܠܵܦ ܩܘܼܫܬܵܐ ܀ 33 :ܐܸܟܲܠ̣ ܘܐܸܫܬܿܝܼ ܐܘܼܟܼܠܵܐ ܕܐ̄ܢܵܫܵܐ ܘܫܸܩܝܵܐ ܕܐܲܪܥܵܐ 34 ܘܲܥܢ̣ܵܐ ܚܲܝܠܵܐ ܕܲܫܡܲܝܵܢܹ̈ܐ ܒܐܲܪ݁ܥܵܢܵܝܵܬܼܵܐ ܀ 35 :ܠܡܵܢ ܟܲܝ ܝܲܗ̣̄ܒܼ ܠܹܗ ܚܲܝܠܵܐ ܟܲܣܝܵܐ ܒܐܘܼܟܼܠܵܐ ܓܲܠܝܵܐ 36 ܘܥܲܠ ܡ̇ܢ ܐܲܩܸܨ ܚܹܝܠ ܥܘܼܕܼܪܵܢܹܗ ܥܲܠ ܡܹܐܟܼܘܼܠܬܵܐ ܀ 37 :ܒܐܘܼܟܼܠܵܐ ܕܝܲܗ̣̄ܒܼ ܠܹܗ ܚܵܘܝܼ ܕܐ̄ܢܵܫܵܐ ܗ̄ܘ̣ ܣܢܝܼܩ ܥܲܠ ܐܘܼܟܼܠܵܐ 38 ܘܲܒܼܥܘܼܕܼܪܵܢܹܗ ܓܠ̣ܵܐ ܥܲܠ ܚܲܝܠܹܗ ܕܢܵܛܲܪ ܐ̄ܢܵܫܵܐ ܗ̄ܘ̣ ܀ 39 :ܒܝܲܕܼ ܡܹܐܟܼܘܼܠܬܵܐ ܐܲܠܸܦ ܐ̄ܢܵܫܵܐ ܕܒܼܐܘܼܟܼܠܵܐ ܚܵܐܹ̇ܝܢ 40 ܘܲܒܼܝܲܕܼ ܪܸܡܙܹܗ ܓܠ݂ܵܐ ܕܐܸܢ ܨܵܒܹ̇ܐ ܡܲܚܸܐ ܩܲܠܝܼܠ ܀ 41 ܠܵܘ ܕܲܥܣܸܩ ܠܹܗ ܕܲܕܠܵܐ ܬܘܼܟܼܠܵܐ ܢܵܛ̣ܲܪ ܚܲܝܲܝ̈ܢ: pb. 183 42 ܐܸܠܵܐ ܕܢܵܘܕܲܥ ܕܚܲܝܹ̈ܐ ܕܙܲܒܼܢܵܐ ܒܐܘܼܟܼܠܵܐ ܟܕܝܼܢܝܼܢ ܀ 43 :ܠܵܐ ܛܵܥܹ̇ܐ ܗ̄ܘ̣ܵܐ ܠܝܵܕܲܥ ܟܠܵܐ ܚܘܼܬܼܪܵܐ ܕܣܲܟܼܠܹ̈ܐ 44 ܕܲܥܬܼܝܼܕܼܝܢ ܗ̄ܘ̣ܵܘ ܕܢܲܛܥܘܿܢ ܠܐ̄ܢܵܫܵܐ ܒܐܸܣܟܹܿܡܲܝ̈ܗܘܿܢ ܀ 45 :ܓܲܠܝܵܐ ܗ̄ܘ̣ܵܬܼ ܠܹܗ ܡܲܪܵܚܘܼܬܼܵܐ ܕܪܸ̈ܥܝܵܢܲܝܗܘܿܢ 46 ܕܟܲܕܼ ܡ̇ܝܘܿܬܼܝܼܢ ܚܵܛ̇ܦܝܼܢ ܕܲܪܓܼܵܐ ܕܠܵܐ ܡ̇ܝܘܿܬܹ̈ܐ ܀ 47 :ܩܲܕܹܿܡ ܦܲܣܩ̣ܵܗ̇ ܠܪܸܚܡܲܬܼ ܫܘܼܒܼܚܵܐ ܒܝܲܕܼ ܐܹܠܝܼܵܐ 48 ܕܕܲܠܡܵܐ ܬܸܣܥܸܐ ܡ̇ܝܘܿܬܼܘܼܬܼܵܐ ܠܪܵܘܡ̇ܐ ܕܚܲܝܹ̈ܐ ܀ 49 :ܒܐܘܼܟܼܠܵܐ ܕܝܵܡ̇ܐ ܝܲܗ̣̄ܒܼ ܒܹܗ ܚܲܝܠܵܐ ܕܢܚܸܐ ܝܵܘ̈ܡܹܐ 50 ܘܲܒܼܫܵܪܘܼܬܼܵܐ ܕܚܲܕܼ ܥܸܕܵܢܵܐ ܪܕܼܵܐ ܡܲܣܝܘܿܢܹ̈ܐ ܀ 51 :ܩ̣ܵܡ ܠܹܗ ܗܲܠܸܟ ܒܝܲܕܼ ܡܹܐܟܼܘܼܠܬܵܐ ܒܲܪ ܬܵܘܬܵܒܹ̈ܐ 52 ܐܲܪܒܿܥܝܼܢ ܝܵܘ̈ܡܝܼܢ ܠܹܠܲܝ ܐܝܼܡܵܡ ܥܕܲܡ̇ܐ ܠܚܘܿܪܝܼܒܼ ܀ 53 :ܒܚܹܝܠ ܡܹܐܟܼܘܼܠܬܵܐ ܐܸܡ݂ܲܪ ܕܲܪܕܼܵܐ ܠܵܘ ܐ̄ܢܵܫܵܐܝܼܬܼ 54 ܟܲܕܼ ܡܲܠܸܦ ܠܲܢ ܕܚܹܝܠ ܥܘܼܕܪܵܢܹܗ ܫܪܹܐ ܒܲܥܒܼܵܕܵܘ̈ܗܝ ܀ 55 :ܐܲܪܒܿܥܝܼܢ ܝܵܘܡܝܼ̈ܢ ܪܕܼܵܐ ܛܲܢܵܢܵܐ ܟܲܕܼ ܡܸܬܼܥܲܙܲܙ 56 ܘܟܼܵܝ̇ܬܹܒܼ ܟܠܝܘܿܡ ܩܪܵܒܼܵܐ ܩܲܫܝܵܐ ܥܲܠ ܡܲܪ̈ܵܚܹܐ ܀ 57 :ܡܲܢܲܥ ܘܲܡ̣ܛܵܐ ܠܒܹܝܬܼ ܐܵܘܢܵܐ ܕܫܘܼܠܵܡ ܐܘܼܪܚܹܗ 58 ܘܫܲܡ݂ܲܥ ܩܵܠܵܐ ܕܲܡܫܲܐܸܠ ܠܹܗ ܐܲܝܟ ܠܵܐ ܝܵ̇ܕܲܥ ܀ 59 :ܡ̇ܢ ܥܵܒܹ̇ܕܼ ܐܲܢ̄ܬܿ ܬܢܵܢ ܐܹܠܝܼܵܐ ܡܲܠܸܠ ܥܲܡܹܗ 60 ܡܲܢ̣ܘܼ ܛܲܪܕܼܵܟ ܡ̣ܢ ܓܵܘ ܫܲܝܢܵܐ ܠܚܘܼܪܒܵܐ ܕܚܝܼܠܵܐ ܀ 61 :ܐܘܿ ܪܲܒܿܘܼܬܼܵܐ ܕܥܘܼܡܩܵܐ ܟܲܣܝܵܐ ܕܐܲܠܵܗ ܟܠܵܐ 62 ܕܲܡܫܲܐܸܠ ܠܹܗ ܠܒܲܪ ܬܵܘܬܵܒܹ̈ܐ ܕܡ̇ܢ ܥܵܒܹ̇ܕܼ ܐܲܢ̄ܬܿ ܀ 63 :ܢܲܛܪܹܗ ܒܪܸܡܙܵܐ ܕܢܸܚܙܘܿܩ ܨܹܐܕܵܪܘܗܝ ܠܘܵܬܼ ܢܝܼܚܘܼܬܼܵܐ 64 ܘܲܒܼܥ̣ܵܐ ܕܢܹܐܠܲܦ ܥ̣ܠܲܬܼ ܐܘܼܪܚܹܗ ܐܲܝܟ ܠܵܐ ܝܵ̇ܕܲܥ ܀ 65 :ܠܹܗ ܗ̄ܘ̣ ܫܲܐܸܠ ܕܡ̇ܢ ܥܵܒܹ̇ܕܼ ܐܲܢ̄ܬܿ ܐܲܝܟ ܠܵܐ ܝܵ̇ܕܲܥ 66 ܕܢܸܕܪܘܿܫ ܐܘܼܪܚܵܐ ܕܢܸܪܕܹܿܐ ܢܒܼܝܼܵܐ ܠܘܵܬܼ ܦܸܬܼܓܼܵܡܵܘ̈ܗܝ ܀ 67 :ܦܲܢܝܼ ܟܹܐܢܵܐ ܠܲܟܼܣܸܐ ܡ̣ܢ ܟܠ ܕܡܸܛܲܢ ܛܸܢܹ̇ܬܼ 68 ܕܲܛܥ̣ܵܐ ܥܲܡܵܟ ܩܝܵܡܵܐ ܪܲܒܵܐ ܕܟܲܣܝܘܼܬܼ ܚܘܼܒܵܟ ܀ 69 :ܒܲܛܠܸܘ ܕܸܒܼܚܹ̈ܐ ܕܚܲܝܵܒܼܝܼܢ ܗ̄ܘ̣ܵܘ ܠܡܸܦܪܲܥ ܠܲܫܡܵܟ 70 ܘܩܲܪܸܒܼܘ ܐܸܢܘܿܢ ܠܲܫܡܵܐ ܕܫܹܐܕܹ̈ܐ ܕܢܘܼܟܼܪܵܝܝܼܢ ܠܵܟ ܀ 71 :ܢܒܼܝܲܝ̈ܟ ܩܲܛܸܠܘ ܘܐܸܫܲܕܼܘ ܕܸܡܗܘܿܢ ܕܠܵܐ ܚܵܘܣܵܢܵܐ 72 ܘܐܸܢܵܐ ܗ̄ܘ̣ ܦܵܫܹ̇ܬܼ ܘܗܵܐ ܒܵܥܹ̇ܝܢ ܢܲܦܫܝ ܐܲܝܟ ܕܲܟܼ̈ܢܵܘܵܬܼܝ ܀ 73 ܩܪ̣ܵܝܗܝ ܓܸܠܝܵܢܵܐ ܟܲܕܼ ܡܲܫܡܲܥ ܠܹܗ ܨܸܒܼܝܵܢ ܟܲܣܝܵܐ: pb. 184 74 ܕܦܘܿܩ ܩܘܼܡ ܘܲܫܡܲܥ ܘܲܚܙܝܼ ܘܝܼܠܲܦ ܘܢܘܼܚ ܡ̣ܢ ܚܸܡܬܼܵܟ ܀ 75 :ܗܵܐ ܥܵܒܹ̇ܕܼ ܐ̄ܢܵܐ ܪܘܼܚܵܐ ܘܙܵܘܥܵܐ ܘܫܲܠܗܼܒܼܝܼܬܼܵܐ 76 ܘܲܡܙܝܼܥ ܐ̄ܢܵܐ ܠܵܗ̇ ܠܐܲܪܥܵܐ ܩܕܼܵܡܲܝܟ ܠܲܝܟ ܨܸܒܼܝܵܢܵܟ ܀ 77 :ܪܡ݂ܲܙ ܦܘܼܩܕܵܢܵܐ ܠܲܕܼܠܵܐ ܪ̈ܓܼܫܹܐ ܘܐܲܪܗܸܒܼ ܐܸܢܘܿܢ 78 ܢܘܼܪܵܐ ܘܪܘܼܚܵܐ ܫܓܲܫ̣ܘ ܠܲܚܕܼܵܕܹ̈ܐ ܘܙܵܥܲܬ̤ ܐܲܪܥܵܐ ܀ 79 :ܟܠ̣ܵܐ ܒܬܲܫܢܝܼܩܹ̈ܐ ܘܐܲܙܝܼܥ ܐܸܢܘܿܢ ܩܕܼܵܡ ܛܲܢܵܢܵܐ 80 ܕܲܟܒܼܵܐ ܕܢܲܣܸܦ ܢܘܼܪܵܐ ܕܚܸܡܬܹܗ ܒܥܵܘ̣ܠܹܗ ܕܥܲܡܵܐ ܀ 81 :ܒܙܵܘܥܵܐ ܘܢܘܼܪܵܐ ܓܠ̣ܵܐ ܥܲܠ ܝܲܨܪܹܗ ܕܗܵܕܹܐ ܒܵܥܹ̇ܐ 82 ܕܲܢܙܝܼܥ ܠܐܲܪܥܵܐ ܘܢܵܘܩܸܕܼ ܐ̄ܢܵܫܵܐ ܒܢܘܼܪܵܐ ܘܪܘܼܚܵܐ ܀ 83 :ܚܵܘܝܹܗ ܪܘܼܚܵܐ ܘܐܲܪܟܸܿܢ ܙܵܘܥܵܐ ܘܗܵܝܕܹܿܝܢ ܢܘܼܪܵܐ 84 ܘܐܲܫܡܲܥ ܩܵܠܵܐ ܕܠܵܐ ܨܵܒܹ̇ܐ ܐ̄ܢܵܐ ܕܗܵܠܹܝܢ ܐܸܣܥܘܿܪ ܀ 85 :ܐܲܢ̄ܬܿ ܐܲܝܟ ܐ̄ܢܵܫܵܐ ܕܐ̄ܢܵܫܵܐ ܒܵܥܹ̇ܝܬܼ ܕܬܼܵܘܒܸܿܕܼ ܐ̄ܢܵܫܵܐ 86 ܘܠܝܼ ܠܵܐ ܦܲܐܝܵܐ ܕܠܵܟ ܐܸܬܿܕܡܸܐ ܒܐܲܒܼܕܵܢ ܐ̄ܢܵܫܵܐ ܀ 87 :ܒܵܬܲܪ ܢܘܼܪܵܐ ܐܲܫܡܲܥ ܨܹܐܕܼܵܘܗܝ ܩܵܠ̇ܐ ܢܝܼܚܵܐ 88 ܟܲܕܼ ܡܲܠܸܦ ܠܹܗ ܥܲܠ ܨܸܒܼܝܵܢܹܗ ܕܪܵܚܹ̇ܡ ܐ̄ܢܵܫܵܐ ܗ̄ܘ̣ ܀ 89 :ܙܵܥ ܐܹܠܝܼܵܐ ܡ̣ܢ ܩܲܫ̈ܝܵܬܼܵܐ ܕܣܲܕܲܪ ܩܘܼܕܵܡܵܘܗܝ 90 ܘܟܲܣܝܼ ܐܲܦܵܘ̈ܗܝ ܡ̣ܢ ܣܘܼܪܵܕܼܵܐ ܕܚܸܙܘܵܐ ܩܲܫܝܐ ܀ 91 :ܡܲܠܸܠ ܥܲܡܹܗ ܩܵܠܵܐ ܕܬܸܢܝܵܐ ܕܡ̇ܢ ܥܵܒܼ̇ܕܼ ܐܲܢ̄ܬܿ 92 ܘܦܲܢܝܼ ܐܵܦ ܗܘ̤ ܐܲܝܟ ܕܲܒܩܲܕܼܡ̇ܐ ܕܡܸܛܲܢ ܛܸܢܲܬܼ ܀ 93 :ܪܲܟܸܿܢ ܢܲܦܫܹܗ ܡ̣ܢ ܩܲܫܝܘܼܬܼܵܐ ܒܩܵܠܵܐ ܢܝܼܚܵܐ 94 ܘܣ̣ܵܡ ܠܹܗ ܢܝܼܫܵܐ ܫܲܝܢܵܐ ܕܐ̄ܢܵܫܵܐ ܕܢܸܚܢܵܐ ܠܩܘܼܒܼܠܹܗ ܀ 95 :ܗܦܘܿܟ ܠܲܡ ܠܐܘܼܪܚܵܟ ܠܘܵܬܼ ܣܘܼܥܪ̈ܵܢܹܐ ܕܢܒܼܝܼܘܼܬܼܵܐ 96 ܕܗܵܐ ܫܸܒܼܩܹ̇ܬܼ ܠܝܼ ܐܲܠܦܹ̈̄ܐ ܫܲܒܼܥܵܐ ܕܡܸܫܬܿܡܥܝܼܢ ܠܝܼ ܀ 97 :ܣܒ݂ܲܪ ܛܲܢܵܢܵܐ ܕܗܘ̤ܝܘ ܒܲܠܚܘܿܕ ܢܒܼܝܼܵܐ ܘܟܹܐܢܵܐ 98 ܘܐܲܠܦܹܗ ܩܵܠܵܐ ܕܐܝܼܬܼ ܠܹܗ ܚܲܒܼܪܹ̈ܐ ܒܕܸܚܠܲܬܼ ܡ̇ܪܹܗ ܀ 99 :ܕܫܸܒܼܩܹ̇ܬܼ ܐܸܡ݂ܲܪ ܐܲܠܦܹ̈ܐ ܫܲܒܼܥܵܐ ܕܠܵܐ ܛܥ̣ܵܘ ܘܲܣܓܸܕܼܘ 100 ܟܲܕܼ ܡ̇ܘܕܲܥ ܠܲܢ ܕܪܸܡܙܹܗ ܢܲܛܲܪ ܠܪܸ̈ܥܝܵܢܲܝܗܘܿܢ ܀ 101 :ܫܒ݂ܲܩ ܕܲܠܝܼܠܹ̈ܐ ܡ̣ܢ ܣܲܚܝܼ̈ܠܹܐ ܒܝܲܕܼ ܥܘܼܕܼܪܵܢܹܗ 102 ܘܠܵܐ ܓܪ̣ܵܦ ܐܵܢܘܿܢ ܚܹܐܦܵܐ ܕܥܵܘ̣ܠܵܐ ܠܣܸܓܼܕܲܬܼ ܛܘܼܥܝܲܝ ܀ 103 :ܒܫܲܪܟܵܐ ܕܲܫܒ݂ܲܩ ܘܠܵܐ ܐܸܫܬܵܘܬܲܦܘ ܒܣܸܓܼܕܲܬܼ ܒܲܥܠܵܐ 104 ܐܲܠܦܹܗ ܠܟܹܐܢܵܐ ܢܝܼܫܵܐ ܕܪ̈ܲܚܡܵܘܗܝ ܕܲܠܘܵܬܼ ܐ̄ܢܵܫܵܐ ܀ 105 :ܙܸܠ ܠܲܡ ܘܲܡܫܘܿܚ ܡܲܠܟܵܐ ܘܡܲܠܟܵܐ ܠܥܲܡܵܐ ܘܥܲܡܡܹ̈ܐ 106 ܕܲܢܩܲܦܚܘܼܢܵܗ̇ ܠܡܲܪܵܚܘܼܬܹܗ ܕܥܲܡܵܐ ܥܲܛ̣ܠܵܐ ܀ 107 :ܡܫܘܿܚ ܬܘܼܒܼ ܘܐܲܩܝܼܡ ܢܒܼܝܼܵܐ ܕܪܘܼܚܵܐ ܕܢܸܗܘܸܐ ܚܠܵܦܲܝܟ 108 ܕܐܲܝܢܵܐ ܕܦܵܠܹ̇ܛ ܡ̣ܢ ܟܹܐܢܘܼܬܼܵܐ ܒܹܗ ܡܸܬܼܢܲܓܲܕܼ ܀ 109 ܦܢ̣ܵܐ ܛܲܢܵܢܵܐ ܡ̣ܢ ܩܲܫܝܘܼܬܼܵܐ ܠܘܵܬܼܢ ܢܝܼܚܘܼܬܼܵܐ: pb. 185 110 ܘܲܪܕܼܵܐ ܒܐܘܼܪܚܵܐ ܕܒܲܣܝܼܡܘܼܬܼܵܐ ܠܘܵܬܼ ܚܵܣܢܵܐ ܀ 111 :ܡ̣ܫܲܚ ܠܲܢܒܼܝܼܵܐ ܘܲܐܩܝܼܡ ܡܲܠܟܵܐ ܠܥܲܡܵܐ ܘܥܲܡܡܹ̈ܐ 112 ܘܲܢ̣ܩܸܦ ܡܸܠܹ̈ܐ ܠܘܵܬܼ ܣܘܼܥܪܵܢܵܐ ܒܟܼܵܪܘܿܙܘܼܬܹܗ ܀ 113 :ܒܗܵܕܹܐ ܥܸܠܬܼܵܐ ܢܲܓܼܕܹܿܗ ܪܸܡܙܵܐ ܥܕܲܡ̇ܐ ܠܚܘܿܪܝܼܒܼ 114 ܕܲܒܼܕܼܘܼܪܵܫܵܐ ܢܸܩܢܸܐ ܚܘܼܒܵܐ ܠܘܵܬܼ ܩܲܪ̈ܝܼܒܼܵܘ̈ܗܝ ܀ 115 :ܚܙ̣̰ܵܩ ܟܲܕܼ ܛܲܢܵܢ ܕܢܹܐܙܲܠ ܢܸܩܒܿܘܿܠ ܥܲܠ ܡܲܪ̈ܵܚܹܐ 116 ܘܐܲܠܦܸܗ ܩܵܠܵܐ ܐܘܼܪܚܵܐ ܕܫܲܝܢܵܐ ܕܲܠܘܵܬܼ ܐ̄ܢܵܫܵܐ ܀ 117 :ܦܢ̣ܵܐ ܡ̣ܢ ܚܘܼܪܒܵܐ ܠܘܵܬܼ ܒܲܝܬܵܝܹ̈ܐ ܕܲܣܢ̣ܵܘ ܫܲܝܢܵܐ 118 ܘܲܚܙ̣ܵܐ ܕܲܟܼܪܝܼܗ ܥܲܡܵܐ ܘܡܲܠܟܐ ܒܟܹܐܒܼܵܐ ܕܥܵܘ̣ܠܵܐ ܀ 119 :ܡܸܛܠ ܥܵܘ̣ܠܵܐ ܫܲܒܼ݂ܩܹܗ ܠܥܲܡܵܐ ܘܲܣܢ̣ܵܐ ܠܡܲܠܟܵܐ 120 ܘܕܲܦ̣ܢܐ ܘܐܸܬܼܵܐ ܚܙ̣ܵܐ ܕܲܢܣܝܼܣܝܼܢ ܥܲܡܵܐ ܘܡܲܠܟܵܐ ܀ 121 :ܟ̣ܠܵܐ ܒܐܸܫܵܬܼܵܐ ܕܣܸܓܼܕܲܬܼ ܒܲܥܠܵܐ ܒܲܡܠܸܐ ܙܲܒܼܢܵܐ 122 ܘܲܢܒ݂ܲܥ ܟܹܐܒܼܵܐ ܕܥܵܠܘܿܒܼܘܼܬܼܵܐ ܕܟܼܣܸܐ ܒܢܲܦܫܵܐ ܀ 123 :ܡܲܠܟܵܐ ܝܲܥܢܵܐ ܚܙ̣ܵܐ ܘܐܸܬܼܪܲܓܼܪܵܓܼ ܠܲܕܼܠܵܐ ܕܝܼܠܹܗ 124 ܘܟܲܣܝܼ ܙܹܐܦܵܐ ܕܲܟܼܣܸܐ ܒܠܸܒܹܿܗ ܒܫܸܡ ܟܹܐܢܘܬܼܵܐ ܀ 125 :ܠܢܵܒܼܘܿܬܼ ܐܸܡ݂ܲܪ ܕܗܲܒܼ ܠܝܼ ܟܲܪܡ̇ܟ ܒܟܸܣܦܵܐ ܛܵܒܼܵܐ 126 ܐܵܘ ܐܸܬܸܿܠ ܠܵܟ ܟܲܪܡ̇ܐ ܚܠܵܦܵܘܗܝ ܕܛܵܒܼ ܡ̣ܢ ܕܝܼܠܵܟ ܀ 127 :ܘܲܕܠܵܐ ܨܵܬܲܬ̤ ܥܵܠܘܿܒܼܘܼܬܹܗ ܒܐܸܣܟܸܿܝܡ ܙܲܒܼܢܵܐ 128 ܕܲܠܝܼܚ ܚܘܼܫܵܒܼܵܘ̈ܗܝ ܒܟܲܪܝܘܼܬܼ ܢܲܦܫܵܐ ܕܠܵܐ ܒܘܼܝܵܢܵܐ ܀ 129 :ܕܡܸܟ ܐܵܚܒܼ ܟܲܕܼ ܟܲܪܝܵܐ ܠܹܗ ܘܠܵܐ ܨܒܼܵܐ ܕܢܸܠܥܲܣ 130 ܥܲܠ ܦܬܼܓܼܵܡܵܐ ܕܕܼܝܼܢܵܐ ܟܹܐܢܵܐ ܕܲܥܢܵܝܗܝ ܢܵܒܼܘܼܬܼ ܀ 131 :ܐܝܼܙܒܹܠ ܫܸܡܥܲܬ̤ ܕܐܲܫܦܸܠ ܝܲܥܢܵܐ ܩܕܼܵܡ ܟܹܐܢܘܼܬܼܵܐ 132 ܘܠܸܛܫܲܬ̤ ܣܲܝܦܵܐ ܒܝܲܕܼ ܨܸܢܥܵܬܼܵܐ ܠܘܼܩܒܲܠ ܩܘܼܫܬܵܐ ܀ 133 :ܠܡܵܢ ܟܲܪܝܵܐ ܠܵܟ ܘܲܫܚܝܼܩ ܠܸܒܟ ܐܸܡܪܲܬܼ ܠܐܵܚܵܒܼ 134 ܠܡܵܢ ܡܲܫܦܸܠ ܐܲܢ̄ܬ ܡ݂ܢ ܩܵܠ ܛܲܪܦܵܐ ܕܫܸܡ ܟܹܐܢܘܼܬܼܵܐ ܀ 135 :ܠܡܵܢ ܠܵܐ ܚܝܹܨܬ ܠܘܵܬ ܣܘܼܥܪܵܢܹܐ ܕܥܵܠܘܿܒܼܘܼܬܼܵܐ 136 ܘܡܿܢ ܕܲܡܝܟ ܐܲܢ̄ܬܿ ܡܲܢ ܨܸܢܥܵܬܼܵܐ ܕܟܼܘܼܢܵܫ ܟܸܣܦܵܐ ܀ 137 :ܪܲܦܝܵܐ ܐܝܼܬܲܝܟ ܐܵܦ ܢܲܫܝܼܫܵܐ ܒܦܘܼܠܚܵܢ ܥܵܘܠܵܐ 138 ܘܠܵܐ ܡܲܟܼܫܲܪ ܐܲܢ̄ܬܿ ܕܬܲܗܘܹܐ ܡܲܠܟܵܐ ܥܲܠ ܝܼܣܪܵܝܹܠ ܀ 139 :ܩܘܼܡ ܠܲܡ ܐܲܟܼܘܿܠ ܘܐܸܫܬܿܝܼ ܘܲܚܕܼܝܼ ܘܢܸܛܐܲܒܼ ܠܸܒܵܟ 140 ܕܐ̄ܢܵܐ ܐܸܬܸܠ ܠܵܟ ܟܲܪܡܹܗ ܕܢܵܒܼܘܿܬܼ ܟܲܕ ܠܵܐ ܨܵܒܹܐ ܀ 141 :ܚܸܫܠܲܬܸ ܙܲܝܢܵܐ ܕܲܢܟܼܝܼܠܘܼܬܼܵܐ ܒܓܼܵܘ ܪܸܥܝܵܢܵ̈ܗܿ 142 ܕܬܹܐܫܘܿܕ ܠܲܕܡܵܐ ܒܫܸܡ ܟܹܐܢܘܼܬܼܵܐ ܢܵܡܘܿܣܵܐܝܼܬܼ ܀ 143 ܚ݂ܡܲܠܬܹܗ ܠܣܲܝܦܵܐ ܕܲܠܛܲܫ ܢܸܟܼܠܵܐ ܒܓܼܵܘ ܐܸܓܲܪܬܵܐ: pb. 186 144 ܘܐܲܣ݂ܪܹܗ ܙܹܐܦܵܐ ܠܓܼܵܘ ܡ݂ܢ ܢܲܚܬܵܐ ܕܲܟܼܬܼܝܼ̈ܒܼܵܬܼܵܐ ܀ 145 :ܟܸܬܼܒܲܬܸ ܥܵܘܼܠܵܐ ܘܚܸܬܼܡܲܬ̤ ܫܘܼܩܼܪܵܐ ܕܐܲܨܲܚ ܢܸܟܼܠܵܐ 146 ܘܬܲܪܓܸܿܡܘ ܐܸܢܘܿܢ ܣܵܦܪܹ̈ܐ ܕܙܹܐܦܵܐ ܒܡܲܣܲܒܼ ܒܐܲܦܹ̈ܐ ܀ 147 :ܐܘܿ ܐܸܓܲܪܬܵܐ ܕܲܟܼܬܼܝܼܒܼܵܐ ܗ̄ܘܵܬܼ ܒܫܸܡ ܟܹܐܢܘܼܬܼܵܐ 148 ܘܲܟܼܣܵܐ ܗ̄ܘ݂ܵܐ ܒܵܗܿ ܢܸܟܼܠܵܐ ܡܵܘܠܸܕ ܩܸܛܠܵܐ ܀ 149 :ܒܫܸܡ ܟܹܐܢܘܼܬܼܵܐ ܨܒܼܵܬ̤ ܫܵܛܝܼܬܼܵܐ ܕܬܸܣܥܘܿܪ ܩܸܛܠܵܐ 150 ܕܠܵܐ ܬܸܬܦܲܪܣܹܐ ܒܝܼܫܘܼܬܼ ܢܸܟܼܠܵܗܿ ܩܕܼܵܡ ܚܲܙܵܝܹ̈ܐ ܀ 151 :ܒܢܲܚܬܵܐ ܦܲܐܝܵܐ ܢܵܡܘܿܣܵܝܵܐ ܟܲܣܝܲܬ̤ ܥܼܵܘܠܵܗܿ 152 ܕܐܲܝܢܵܐ ܕܦܵܪܹܫ ܫܸܡ ܐܲܠܵܗܵܐ ܢܡܘܼܬܼ ܒܲܪܓܼܘܡܝܵܐ ܀ 153 :ܒܗܵܕܹܐ ܬܸܢܘܲܝ ܟܸܬܼܒܲܬ̤ ܐܵܦ ܗܸܝ ܠܘܵܬܼ ܙܹܐܦܵܢܹܐ 154 ܕܐܵܘܬܲܒܼܘ ܓܲܒܼܪܹ̈ܐ ܣܵܗܕܲܝ̈ ܥܵܘܠܵܐ ܠܘܼܩܒܲܠ ܢܵܒܼܘܿܬܼ ܀ 155 :ܓܙܘܿܪܘ ܠܲܡ ܨܵܘܡܵܐ ܘܲܠܒܲܫܘ ܚܲܫܵܐ ܐܲܝܟ ܦܵܪܘܿܫܹܐ 156 ܘܲܬܼܒܲܥܘ ܨܲܥܪܵܐ ܕܫܸܡ ܐܲܠܵܗܵܐ ܘܡܲܠܟܵܐ ܕܥܲܡܵܐ ܀ 157 :ܨܵܘܡܵܐ ܘܚܲܫܵܐ ܢܸܗܘܘܿܢ ܣܵܗ̈ܕܹܐ ܒܲܕܡܹܗ ܕܢܵܒܼܘܿܬܼ 158 ܕܫܵܘܹܐ ܠܡܵܘܬܵܐ ܗ̄ܘܼ ܕܨܲܚܝܼ ܠܡܲܠܟܵܐ ܘܠܲܐܠܵܗ ܟܠܵܐ ܀ 159 :ܥ݂ܒܲܕܼܘ ܠܲܡ ܓܲܒܼܪܹ̈ܐ ܒܢܲܝ̈ ܐܝܼܙܲܪܥܹܝܠ ܣܵܒܹ̈ܐ ܘܚܹܐܪܹܐ 160 ܐܲܝܟ ܡܵܐ ܕܲܟܼܬܼܝܼܒܼ ܩܸܛܠܵܐ ܕܢܸܟܼܠܵܐ ܥܲܠ ܬܲܡܝܼܡܵܐ ܀ 161 :ܟܲܢܸܫܘ ܥܲܡܵܐ ܘܲܓܼܙܲܪܘ ܨܵܘܡܵܐ ܘܪܲܟܸܒܼܘ ܢܸܟܼܠܵܐ 162 ܘܚܲܝܒܼܘ ܠܲܕܼܡܵܐ ܕܬܲܡܝܼܡ ܠܸܒܵܐ ܒܣܵܗܕܿܘܼܬܼܵܐ ܫܘܼܩܪܵܐ ܀ 163 :ܐܘܿ ܣܵܗܕܿܘܼܬܼܵܐ ܕܟܲܕ ܠܵܐ ܙܲܪܥܵܗܿ ܩܵܠܵܐ ܒܐܸܕܼܢܹ̈ܐ 164 ܒܲܛܢ݂ܵܗܿ ܠܸܒܵܐ ܒܢܸܩܦܵܐ ܕܢܸܟܼܠܵܐ ܘܐܵܘܠܸܕܼ ܩܸܛܠܵܐ ܀ 165 :ܐܘܿ ܪܸܥܝܵܢܵܐ ܨܸܡܚܵܐ ܦܲܐܝܵܐ ܕܲܡܠܝܼܠܘܼܬܵܐ 166 ܕܲܚܫ̣ܟ ܢܘܼܗܪܹܗ ܒܣܵܗܕܿܘܼܬ ܫܘܼܩܪܵܐ ܕܕܸܡ ܙܲܟܵܝܵܐ ܀ 167 :ܚܪܸ݂ܫܘ ܡܲܠܵܠܹ̈ܐ ܡ̣ܢ ܘܵܠܝܼܬܼܵܐ ܠܒܲܪ ܡ̣ܢ ܚܲܪ̈ܫܹܐ 168 ܘܚܲܝܸܒܼܘ ܠܲܕܼܡܵܐ ܠܵܐ ܚܲܝܵܒܼܵܐ ܘܠܵܐ ܐܸܬܼܒܲܝܲܢܘ ܀ 169 :ܡ̣ܝܼܬܼ ܬܲܡܝܼܡܵܐ ܒܣܵܝܦܵܐ ܕܟܹܐܦܹ̈ܐ ܕܠܲܛܫܹܗ ܢܸܟܼܠܵܐ 170 ܘܚܲܛܦ̣ܵܗ̇ ܝܲܥܢܵܐ ܠܝܵܪܬܘܼܬܼ ܒܲܝܬܹܿܗ ܕܬܸܗܘܸܐ ܕܝܼܠܹܗ ܀ 171 :ܩ̣ܪܵܝܗܝ ܓܸܠܝܵܢܵܐ ܕܪܸܡܙܵܐ ܟܲܣܝܵܐ ܠܒܲܪ ܬܵܘܬܵܒܹ̈ܐ 172 ܕܩܘܼܡ ܛܲܢܵܢܵܐ ܘܲܬܼܒܲܥ ܠܲܕܼܡܵܐ ܕܐܲܫܕ݂ܲܗ ܢܸܟܼܠܵܐ ܀ 173 :ܚܵܘܵܐ ܛܢܵܢܵܟ ܐܲܝܟ ܥܲܙܝܼܙܵܐ ܠܘܵܬܼ ܥܵܘܵ݁ܠܵܐ 174 ܘܲܬܼܒܲܥ ܒܐܝܼܕܼܵܘ̈ܗܝ ܕܡܹܗ ܕܲܛܠܝܼܡܵܐ ܘܠܵܐ ܬܸܬܼܟܲܚܲܕܼ ܀ 175 :ܙܸܠ ܘܐܸܡܲܪ ܠܹܗ ܕܗܵܟܲܢ ܐܵܡܲ݁ܪ ܝܵ̇ܕܲܥ ܟܠܵܐ 176 ܕܲܩܛ݂ܲܠܬܿ ܘܝܼܪܸܬܿܬܿ ܠܵܐ ܫܲܪܝܼܪܵܐ ܐܲܟܼܡܵܐ ܕܲܣܒ݂ܲܪܬܿ ܀ pb. 187 177 :ܒܲܕܼܡ̇ܐ ܕܐܸܫܲܕܿܬܿ ܐܵܡܹ̇ܕܼܢܵܐ ܠܹܗ ܠܲܕܼܡܵܟ ܒܐܲܪܥܵܐ 178 ܘܡܸܬܼܢܲܩܲܡ ܐ̄ܢܵܐ ܕܡܵܐ ܕܲܢܒܼܝܲܝ̈ ܒܥܸܠܲܬܼ ܢܵܒܼܘܿܬܼ ܀ 179 :ܙܲܝܸܢ ܢܲܦܫܹܗ ܦܵܠܚܵܐ ܛܵܒܼܵܐ ܒܙܲܝܢܵܐ ܕܪܘܼܚܵܐ 180 ܕܢܹܐܙܲܠ ܢܲܩܪܸܒܼ ܥܲܡ ܥܵܘܵ݁ܠܵܐ ܕܕܼܵܫ ܟܹܐܢܘܼܬܼܵܐ ܀ 181 :ܚܙ̣ܵܝܗܝ ܛܲܢܵܢܵܐ ܠܝܲܩܝܼܪ ܠܸܒܵܐ ܕܲܒܼܗܝܼܠ ܒܲܕܼܡܵܐ 182 ܘܲܫ̣ܡܲܛ ܣܲܝܦܵܐ ܕܡܸܠܲܬܼ ܪܘܼܚܵܐ ܘܚܵܘܝܼ ܠܩܘܼܒܼܠܹܗ ܀ 183 :ܗܵܐ ܠܲܡ ܫܲܡܸܫܬܿ ܩܸܛܠܵܐ ܒܢܸܟܼܠܵܐ ܘܝܼܪܸܬܿܬܿ ܟܲܪܡܵܐ 184 ܠܵܐ ܕܹܝܢ ܣܵܠ̇ܩܵܐ ܠܘܵܬܼ ܫܘܼܠܵܡܵܐ ܪܸܓܲܬܼ ܢܸܟܼܠܵܟ ܀ 185 :ܩܲܕܡܹܗ ܕܝܼܢܵܐ ܐܲܠܵܗܵܝܵܐ ܠܝܲܨܪܵܟ ܒܝܼܫܵܐ 186 ܘܐܲܫܕܹܿܗ ܠܲܕܼܡܵܟ ܒܲܕܼܡܵܐ ܕܐܸܫܲܕܿܬܿ ܩܕܼܵܡ ܣܘܼܥܪ̈ܵܢܹܐ ܀ 187 :ܝܲܗ̣̄ܒܼ ܕܲܝܵܢܵܐ ܐܵܦܵܦܵܣܝܼܣ ܕܡܵܘܬܵܐ ܕܲܥܠܲܝܟ 188 ܘܲܫܡ݂ܲܛ ܣܲܝܦܵܐ ܩܲܣܛܘܼܢܵܪܵܐ ܪܸܡܙܵܐ ܟܲܣܝܵܐ ܀ 189 :ܒܕܘܼܟܿܬܼܵܐ ܕܐܸܫܲܕ݂ܿܬܿ ܠܲܕܼܡܹܗ ܕܢܵܒܼܘܿܬܼ ܕܡܵܟ ܢܸܫܬܲܦܲܥ 190 ܘܬܲܡ̇ܢ ܬܸܗܘܸܐ ܐܝܼܙܒܸܿܠ ܕܸܒܼܚܵܐ ܠܟܲܠ̈ܒܹܿܐ ܝܲܥܢܹ̈ܐ ܀ 191 :ܘܡܸܛܠ ܕܐܲܨܠܲܚ ܥܵܘ̣ܠܵܐ ܒܐܝܼܕܲܝ̈ܟ ܡ̣ܢ ܟܠ ܕܲܗܘ̤ܵܘ 192 ܒܵܟ ܬܸܬܼܢܲܨܲܚ ܐܵܦ ܟܹܐܢܘܼܬܼܵܐ ܒܕܝܼܢܵܐ ܩܲܫܝܵܐ ܀ 193 :ܒܗܸ݂ܬܼ ܥܵܘܵ݁ܠܵܐ ܡ̣ܢ ܙܲܕܝܼܩܵܐ ܟܲܕܼ ܠܵܐ ܨܵܒܹ̇ܐ 194 ܘܲܫܩ݂ܲܠ ܬܵܓܹܗ ܘܲܠܒܸܫ݂ ܣܲܩܵܐ ܘܗܲܠܸܟ ܚܸܦܝܵܝ ܀ 195 :ܚܲܫ̣ ܘܐܸܬܼܟܲܫܲܦ ܥܲܠ ܣܘܼܥܪܵܢܵܐ ܕܲܕܠܵܐ ܢܵܡܘܿܣ 196 :ܕܪܲܓܼ ܘܐܸܬܼܝܲܥܲܢ ܘܲܚ̣ܛܲܦ ܘܲܩܛ݂ܲܠ ܘܕܼܵܫ ܦܘܼܩܕܵܢܵܐ 197 :ܗܘ̤ܵܐ ܦܸܬܼܓܼܵܡܵܐ ܕܪܸܡܙܵܐ ܟܲܣܝܵܐ ܥܲܠ ܐܹܠܝܼܵܐ 198 ܟܲܕܼ ܡܲܠܸܦ ܠܹܗ ܕܲܟܼܡܵܐ ܪܓܼܝܼܓܼܵܐ ܕܢܲܦܫܵܐ ܀ 199 :ܚ̇ܙܹܝܬܼ ܠܲܡ ܕܲܒܼܗܸ̣ܬܼ ܐܵܚܵܒܼ ܡܲܠܟܵܐ ܡ̣ܢ ܩܕܼܵܡ ܐܲܦܲܝ̈ 200 ܘܠܒܸܫ̣ ܚܲܫܵܐ ܒܓܼܵܘ ܪܸܥܝܵܢܹܗ ܥܲܠ ܡ̇ܐ ܕܲܣܥ݂ܲܪ ܀ 201 :ܚܠܵܦ ܕܲܒܼܗܸ݂ܬܼ ܡܹܢܝ ܘܝܼܕܲܥ ܕܐܲܣܟܸܿܠ ܒܲܕܼܡ̇ܐ ܕܐ̄ܢܵܫܵܐ 202 ܠܵܐ ܡܲܝܬܸܿܐ ܐ̄ܢܵܐ ܒܝܼܫܬܵܐ ܒܝܵܘܡ̇ܘ̈ܗܝ ܥܲܠ ܝܲܠܕܵܬܹ̈ܗ ܀ 203 :ܒܝܵܘܡܲܝ̈ ܡܲܠܟܵܐ ܕܪܵܚܹ̇ܡ ܥܵܘ̣ܠܵܐ ܒܲܕܡܘܼܬܼ ܐܲܒܪܘܼܗܝ 204 ܬܵܒܲܥ̇ ܐ̄ܢܵܐ ܠܹܗ ܠܒܲܝܬܹܿܗ ܕܐܵܚܵܒܼ ܕܡ̇ܐ ܕܲܢܒܼܝܲܝ̈ ܀ 205 :ܫܠܸ̣ܡ ܦܘܼܣܩܵܢܵܐ ܕܪܸܡܙܵܐ ܟܲܣܝܵܐ ܕܥܲܠܝ ܥܵܘܵ݁ܠܵܐ 206 ܘܥܲܬܼܕܼ ܢܲܦܫܹܗ ܠܘܵܬܼ ܬܲܟܼܬܿܘܼܫܵܐ ܕܐܲܕܼܘܿܡ̇ܝܹ̈ܐ ܀ 207 :ܒܠܲܥ̣ ܡܲܪܵܚܵܐ ܒܓܼܵܐܪܵܐ ܩܲܫܝܵܐ ܕܲܫܕ݂ܵܝܗܝ ܪܸܡܙܵܐ 208 ܘܫܸܠܡܲܬ̤ ܨܐܓܼܵܘܗܝ ܡܸܠܬܹܗ ܕܟܹܐܢܵܐ ܐܲܝܟ ܕܐܸܬܼܢܲܒܿܝܼ ܀ 209 :ܓܹܐܪܹ̈ܐ ܕܟܹܐܦܹ̈ܐ ܫܕܼܵܘ ܥܵܘܵ݁ܠ̈ܐ ܒܢܵܒܼܘܿܬܼ ܟܹܐܢܵܐ 210 ܐܵܦ ܡܲܪܵܚܵܐ ܒܠܲܥ̣ ܡ̣ܢ ܒܝܼܫܹ̈ܐ ܒܲܕܼܡܘܼܬܼ ܢܵܒܼܘܿܬܼ ܀ 211 :ܡ̣ܝܼܬܼ ܥܵܘ݁ܵܠܵܐ ܘܐܸܒܲܕܼ ܣܲܒܼܪܹܗ ܡ̣ܢ ܟܹܐܢܘܼܬܼܵܐ 212 ܘܐܲܫܠܸܡ ܬܵܓܹܗ ܠܝܵܪܬܵܐ ܒܝܼܫܵܐ ܕܕܼܵܡܹ̇ܐ ܠܐܲܒܼܘܼܗܝ ܀ pb. 188 213 :ܘܡܸܛܠ ܕܲܪܗܸܛ ܩܲܠܝܼܠܵܐܝܼܬܼ ܒܐܘܼܪܚܵܐ ܕܥܵܘ̣ܠܵܐ 214 ܢܦܲܠ̣ ܡ̣ܢ ܫܸܠܝܵܐ ܒܦܲܚܵܐ ܕܟܹܐܒܼܵܐ ܕܲܨܠ̣ܵܝܗܝ ܪܸܡܙܵܐ ܀ 215 :ܫܲܕܲܪ ܣܲܟܼܠܵܐ ܠܲܡܫܲܐܠܘܼ ܥܲܠ ܡܲܪܕܿܘܼܬܹܗ 216 ܕܢܸܚܙܸܐ ܐܸܢ ܐܝܼܬܼ ܦܘܼܪܣܵܐ ܕܡܲܐܣܸܐ ܬܒܼܵܪܹܗ ܩܲܫܝܵܐ ܀ 217 :ܚܙ݂ܲܩܘ ܐܝܼ̈ܙܓܼܕܹܿܐ ܠܲܡܫܲܐܸܠܘܼ ܠܲܕܠܵܐ ܐܲܠܵܗ 218 :ܘܣܵܓܼܵܗ̇ ܠܐܘܼܪܚܵܐ ܩܕܼܵܡ ܐܲܦܲܝ̈ܗܘܿܢ ܒܲܪ ܬܵܘܬܵܒܹ̈ܐ 219 :ܓܠ̣ܵܝܗܝ ܛܲܢܵܢܵܐ ܠܢܸܟܼܠܵܐ ܕܠܸܒܹܿܗ ܕܒܲܪ ܥܵܘܵܠܹ̈ܐ 220 ܕܼܟܼܡܵܐ ܐܲܣܝܼܪ ܒܪܸܚܡܲܬܼ ܫܹܐܪܹ̈ܐ ܒܲܕܼܡܘܼܬܼ ܐܲܒܼܘܼܗܝ ܀ 221 :ܕܙܸܠܘ ܘܐܸܡ݂ܲܪܘ ܠܹܗ ܠܚܲܣܝܼܪ ܠܸܒܵܐ ܓܡܝܼܪ ܒܲܚܛܝܼܬܼܵܐ 222 ܕܠܲܝܬܿ ܐܲܠܵܗܵܐ ܒܥܲܡܵܐ ܓܲܒܼܝܵܐ ܕܡܲܐܣܸܐ ܟܹܐܒܼܵܟ ܀ 223 :ܚܠܵܦ ܕܐܲܛܥܝܼܬܵܝܗܝ ܠܐܲܠܵܗ ܟܠܵܐ ܒܠܵܐ ܐܲܠܵܗܹ̈ܐ 224 ܢܸܦܣܘܿܩ ܚܲܝܲܝ̈ܟ ܕܠܵܐ ܢܲܚܘܿܢܵܟ ܫܹܐܕܹ̈ܐ ܕܲܪܚܸܡ̣ܬܿ ܀ 225 :ܥܛܲܦܘ̣ ܐܝܼ̈ܙܓܲܕܹܿܐ ܠܘܵܬܼ ܥܵܘ̇ܠܵܐ ܕܫܲܕܲܪ ܐܸܢܘܿܢ 226 ܘܐܲܝܬܿܝܼܘ ܛܸܒܵܐ ܕܦܣܵܩ ܣܲܒܼܪܵܐ ܠܲܕܼܠܵܐ ܣܲܒܼܪܵܐ ܀ 227 :ܫܲܐܸܠ ܐܸܢܘܿܢ ܕܡܲܢ ܐܲܦܢܝܼܟܼܘܿܢ ܩܲܠܝܼܠܵܐܝܼܬܼ 228 ܘܚܵܘܝܘܼܗܝ ܗܸܢܘ̣ܿܢ ܕܣܵܢ̇ܐܹܗ ܕܐܲܒܼܘܼܟ ܟܠ̣ܵܢ ܡ̣ܢ ܐܘܼܪܚܲܢ ܀ 229 :ܚܲܝܸܠ ܢܲܦܫܹܗ ܟܪܝܼܗܵܐ ܕܲܪܡܸܐ ܒܲܬܼܪܹܝܢ ܟܹܐܒܼܝܼ̈ܢ 230 ܘܲܠܛ݂ܲܫ ܣܲܝܦܵܐ ܠܚܲܪܒܵܐ ܕܟܹܐܢܹ̈ܐ ܒܲܕܼܡܘܼܬܼ ܐܲܒܼܘܼܗܝ ܀ 231 :ܙܲܝܸܢ ܚܲܝܠܵܐ ܡܚܝܼܠ ܒܐܵܓܼܘܿܢܵܐ ܠܘܼܩܒܲܠ ܩܘܼܫܬܵܐ 232 ܘܚܵܒܼ݂ ܡ̇ܢ ܚܲܝܠܹܗ ܡ̣ܢ ܚܹܝܠ ܪܘܼܚܵܐ ܕܲܒܼܛܲܡܵܢܵܐ ܀ 233 :ܪܲܒܵܐ ܕܚܲܡܫܝܼܢ ܣܠܸ̣ܩ ܟܲܕܼ ܓܵܙܹ̇ܡ ܥܲܠ ܐܹܠܝܼܵܐ 234 ܘܲܒܼܫܘܼܒܼܗܵܪܹܗ ܡܲܗܸܠ ܗ̄ܘ̣ܵܐ ܒܹܗ ܒܒܲܪ ܬܵܘܬܵܒܹ̈ܐ ܀ 235 :ܚܘܿܬܼ ܠܲܡ ܒܲܥܓܲܠ ܢܒܼܝܼܵܐ ܕܪܘܼܚܵܐ ܘܠܵܐ ܬܸܫܬܵܘܚܲܪ 236 ܕܡܲܠܟܵܐ ܒܵܥܹ̇ܐ ܕܢܚܙܸܐ ܐܲܦܲܝ̈ܟ ܩܲܠܝܼܠܵܐܝܼܬܼ ܀ 237 :ܢܒܼܝܼܵܐ ܕܲܫܡ݂ܲܥ ܩܵܠܵܐ ܕܚܘܼܬܼܪܵܐ ܡ̣ܢ ܡܲܪܵܚܵܐ 238 ܫܕ݂ܵܐ ܒܹܗ ܓܹܐܪܹ̈ܐ ܕܢܘܼܪܵܐ ܘܝܼܩܸܕ ܥܲܡ ܡܲܫܪܝܼܬܹܗ ܀ 239 :ܣܸܦܲܬ̤ ܢܘܼܪܵܐ ܕܪܸܡܙܵܐ ܟܲܣܝܵܐ ܒܪ̈ܲܟܼܫܵܐ ܕܐ̄ܢܵܫܵܐ 240 ܘܝܼܩܸܕܼ݂ ܙܲܝܢܵܐ ܥܲܡ ܠܵܒܼܘܼܫܵܘ̈ܗܝ ܠܒܼܝܼܫܲܝ̈ ܚܘܼܬܼܪܵܐ ܀ 241 :ܠܵܐ ܐܲܙܝܼܥܹܗ ܠܒܲܪ ܥܵܘܵ݁ܠܵܐ ܓܘܼܢܚܵܐ ܕܲܗܘ̤ܵܐ 242 ܘܲܦܢ̣ܵܐ ܘܫܲܕܲܪ ܪܲܒܵܐ ܕܚܲܡܫܝܼܢ ܕܕܼܵܡܹ̇ܐ ܠܩܲܕܼܡ̇ܐ ܀ 243 :ܣܠܸ݂ܩ ܡܲܪܵܚܵܐ ܒܫܘܼܥܠܵܝ ܠܸܒܵܐ ܠܘܵܬܼ ܛܲܢܵܢܵܐ 244 ܘܫܲܪܝܼ ܡܲܗܸܠ ܕܚܘܿܬܼ ܠܲܡ ܒܲܥܓܲܠ ܕܡܲܠܟܵܐ ܒܵܥܹ̇ܐ ܀ 245 :ܘܕܲܣܠܸ̣ܩ ܚܘܼܬܼܪܹܗ ܠܪܵܘܡ̇ܐ ܪܲܒܵܐ ܕܲܢܒܼܝܼܘܼܬܼܵܐ 246 ܢܚܸ݂ܬܼ ܟܲܕܼ ܒܲܗܝܼܬܼ ܠܘܵܬܼ ܡܘܼܟܵܟܼܵܐ ܐܲܝܟ ܩܲܕܼܡ̇ܝܵܐ ܀ 247 ܥܲܙܝܼ ܒܓܼܘܼܡܕܹܿܗ ܝܲܩܝܼܪ ܠܸܒܵܐ ܘܛܲܒܿܝܼܥ ܒܐܲܪܥܵܐ: pb. 189 248 ܘܲܦܢܵܐ ܘܫܲܕܲܪ ܪܲܒܵܐ ܕܚܲܡܫܝܼܢ ܕܲܬܼܠܵܬܼ ܙܲܒܼܢܝܼ̈ܢ ܀ 249 :ܚܙ̣ܵܐ ܡܲܟܿܝܼܟܼܵܐ ܕܙܲܝܢܵܐ ܕܚܘܼܬܼܪܵܐ ܡܲܟܸܿܢ ܚܲܒܼܪ̈ܵܘܗܝ 250 ܘܲܠܒܸܫ̣ ܙܲܝܢܵܐ ܕܡܲܟܿܝܼܟܼܘܼܬܼܵܐ ܕܠܵܐ ܢܸܬܼܚܲܝܲܒܼ ܀ 251 :ܣܠܸܩ݂ ܡܲܟܝܼܟܼܵܐ ܘܲܥܪܝܼ ܕܲܢܦܝܼܣ ܡܲܟܿܝܼܟܼܵܐܝܼܬܼ 252 ܕܬܸܬܼܝܲܩܲܪ ܢܲܦܸܫܝ ܘܠܵܐ ܬܲܩܸܟ ܠܝܼ ܚܛܵܗܵܐ ܕܐܸܬܹ̇ܝܬܼ ܀ 253 :ܘܲܕܼܠܵܐ ܙܲܝܸܢ ܢܲܦܸܫܹܗ ܒܚܘܼܬܼܪܵܐ ܐܲܝܟ ܕܲܩܕܼܵܡ̇ܘܗܝ 254 ܪܡܲܙ ܓܸܠܝܵܢܵܐ ܠܘܵܬܼ ܛܲܢܵܢܵܐ ܕܚܘܿܬܼ ܙܸܠ ܥܲܡܹܗ ܀ 255 :ܠܒܸܫ̣ ܐܹܠܝܼܵܐ ܙܲܝܢܵܐ ܟܲܣܝܵܐ ܕܲܢܒܼܝܼܘܼܬܼܵܐ 256 ܘܲܢܚܸܬܼ ܩܲܛ̣ܠܹܗ ܒܩܵܠ ܦܸܬܼܓܼܵܡܵܘ̈ܗܝ ܠܒܲܪ ܩܵܛܘܿܠܵܐ ܀ 257 :ܗܵܟܲܢ ܐܸܡ݂ܲܪ ܗܵܘ̇ ܕܐܲܪܓܸܿܙܬܵܝܗܝ ܒܲܕܼܠܵܐ ܐܲܠܵܗ 258 ܕܥܲܪܣܵܐ ܕܲܣܠܸܩ̣ܬܿ ܠܵܐ ܬܘܼܒܼ ܬܼܚܘܿܬܼ ܘܬܸܚܙܸܐ ܚܲܝܹ̈ܐ ܀ 259 :ܦܲܣܩܹܗ ܠܣܲܒܼܪܹܗ ܡ̣ܢ ܚܲܝܘܼܬܼܵܐ ܒܣܲܝܦܵܐ ܕܪܘܼܚܵܐ 260 ܘܚܲܬܸܿܡ ܡܸܠܵܘ̈ܗܝ ܒܝܲܕܼ ܣܘܼܥܪ̈ܵܢܹܐ ܒܒܲܝܬܹܿܗ ܕܐܵܚܵܒܼ ܀ 261 :ܫܲܟܼܠܸܠ ܘܲܓܼܡ݂ܲܪ ܪܵܘܡ̇ܐ ܪܲܒܵܐ ܕܢܒܼܝܼܘܼܬܼܵܐ 262 ܘܲܢܚܸܬܼ ܐܸܠܦܵܐ ܕܟܼܵܪܘܙܘܼܬܹܗ ܒܲܠܡܹܐܝܢ ܫܲܝܢܵܐ ܀ 263 :ܪܡܲܙ ܠܹܗ ܟܲܣܝܵܐ ܒܚܲܕܼ ܓܸܠܝܵܢܵܘ̈ܗܝ ܪ̈ܘܼܚܵܢܵܝܹܐ 264 ܕܬܼܵܐ ܢܘܼܚ ܠܐܝܵܐ ܒܲܠܡܹܐܝܢ ܚܲܝܹ̈ܐ ܠܥܸܠ ܡ̣ܢ ܡ̇ܘܬܵܐ ܀ 265 :ܬܵܐ ܐܸܬܼܒܲܣܲܡ ܒܐ̄ܪܵܙ ܚܘܼܕܵܬܵܐ ܕܠܵܐ ܡ̇ܝܘܿܬܹ̈ܐ 266 ܘܩܵܘܵܐ ܒܚܲܝܹ̈ܐ ܒܛܲܟܼܣܵܐ ܚܲܕܼܬܼܵܐ ܕܡܲܠܟܿܘܼܬܼ ܪܵܘܡ̇ܐ ܀ 267 :ܬܵܐ ܥܘܿܠ ܘܲܚܙܝܼ ܐܲܝܟ ܕܲܒܼܐ̄ܪܵܙܵܐ ܠܗܵܝ̇ ܡܲܠܟܿܘܼܬܼܵܐ 268 ܕܙܲܡܸܢܬܿܘܿܢ ܠܵܗ̇ ܒܝܲܕܼ ܡܸܠܲܝ̈ܟܿܘܿܢ ܥܲܡܵܐ ܘܥܲܡܡܹ̈ܐ ܀ 269 :ܩܕܼܵܡ ܣܘܼܥܪ̈ܵܢܹܐ ܡܚܵܘܸܐ ܐ̄ܢܵܐ ܠܵܟ ܬܘܼܩܵܢ ܚܲܝܹ̈ܐ 270 ܛܲܝܸܒܼ ܨܸܒܼܝܵܢܝ ܠܪ̈ܘܼܚܵܢܵܝܹܐ ܘܦܲܓܼܪ̈ܵܢܵܝܹܐ ܀ 271 :ܒܚܲܝܹ̈ܐ ܚܲܕܼܬܹ̈ܐ ܕܠܵܐ ܫܘܼܠܵܡܵܐ ܥܬܼܝܼܕ ܐ̄ܢܵܐ ܕܐܸܛܲܪ 272 ܥܝܼܪܹ̈ܐ ܘܐ̄ܢܵܫܵܐ ܟܲܕܼ ܡܸܬܼܓܲܐܹܝܢ ܪܘܼܚܵܢܵܐܝܼܬܼ ܀ 273 :ܒܵܟ ܝܵܗܹ̇ܒܼ ܐ̄ܢܵܐ ܐܵܬܼܵܐ ܕܫܲܝܢܵܐ ܠܓܸܢܣܵܐ ܕܐ̄ܢܵܫܵܐ 274 ܚܲܝܲܝ̈ܟ ܢܸܗܘܘܿܢ ܐܲܝܟ ܪܲܗܒܼܘܿܢܵܐ ܠܡܵܝܘܿܬܼܘܼܬܼܵܐ ܀ 275 :ܒܵܟ ܥܵܪܹ̇ܒܼ ܐ̄ܢܵܐ ܠܟܼܠܹܗ ܓܸܢܣܵܟ ܕܢܸܚܘܿܢ ܥܲܡܵܟ 276 ܘܲܒܼܫܘܼܢܵܚܵܟ ܡܚܲܬܸܿܡ ܐ̄ܢܵܐ ܠܹܗ ܠܫܘܼܘܕܲܝ ܡܸܠܲܝ̈ ܀ 277 :ܒܵܟ ܕܵܪܹܫ ܐ̄ܢܵܐ ܐܘܼܪܚܵܐ ܠܚܲܝܹ̈ܐ ܕܠܵܐ ܫܘܼܠܵܡܵܐ 278 ܕܠܵܐ ܦܵܣܹ̇ܩ ܠܹܗ ܡ̇ܘܬܵܐ ܝܲܥܢܵܐ ܠܡܸܢܝܵܢ ܚܲܝܲܝ̈ܟ ܀ 279 :ܒܵܟ ܡܲܣܓܸܿܐ ܐ̄ܢܵܐ ܣܲܒܼܪܵܐ ܛܵܒܼܵܐ ܠܲܕܼܠܵܐ ܣܲܒܼܪܑܵܐ 280 ܕܠܵܐ ܢܸܬܼܪܲܦܘܿܢ ܡ̣ܢ ܬܘܼܟܼܠܵܢܵܐ ܕܲܚܪܘܼܪ̈ܲܝܗܘܿܢ ܀ 281 :ܡܚܵܘܹܐ ܐ̄ܢܵܐ ܒܵܟ ܕܠܵܐ ܡܲܣܠܸܐ ܠܝܼ ܥܲܦܪܹܗ ܕܐܵܕܼܵܡ 282 ܕܗܵܐ ܝܲܩܲܪܬܹܿܗ ܠܫܝܼܛܘܼܬܼ ܡܸܕܼܪܹܗ ܒܝܲܕܼ ܙܘܼܝܵܚܵܟ ܀ pb. 190 283 :ܫܡ݂ܲܥ ܐܹܠܝܼܵܐ ܕܲܡܫܲܢܹܐ ܠܹܗ ܪܸܡܙܵܐ ܒܚܲܝܹ̈ܐ 284 ܘܲܒܼܥ̣ܵܐ ܢܟܲܣܹܝܘܗܝ ܠܝܘܼܬܼܪܵܢ ܐ̄ܢܵܫܵܐ ܠܓܼܵܘ ܡ̣ܢ ܫܸܬܼܩܵܐ ܀ 285 :ܣܒ݂ܲܪ ܛܲܢܵܢܵܐ ܕܗܵܕܹܐ ܦܲܐܝܵܐ ܠܡܲܟܿܝܼܟܼܘܼܬܹܗ 286 ܕܠܵܐ ܢܸܫܬܲܒܼܗܲܪ ܟܝܵܢܵܐ ܫܝܼܛܵܐ ܒܲܕܼܠܵܐ ܕܝܼܠܹܗ ܀ 287 :ܝܵܕܲ݁ܗ ܟܠܵܐ ܚܙ̣ܵܐ ܨܼܒܼܝܵܢܹܗ ܗܵܘ̇ ܕܲܚܙ̣ܐ ܠܹܗ 288 ܘܲܓܠ̣ܵܝܗܝ ܐ̄ܪܵܙܵܐ ܕܝܘܼܬܼܪܵܢ ܐ̄ܢܵܫܵܐ ܠܪܸܥܝܵܢ ܐ̄ܢܵܫܵܐ ܀ 289 :ܐܵܦ ܙܵܕܹܩ ܗ̄ܘ̣ܵܐ ܕܠܵܐ ܬܸܬܼܟܲܣܸܐ ܥܸܠܲܬܼ ܚܲܝܲܝ̈ܢ 290 ܕܓܲܠܝܵܐ ܕܓܲܠܝܵܐ ܬܘܼܒܼ ܢܸܫܬܲܪܲܪ ܒܲܥܬܼܝܼ̈ܕܵܬܼܵܐ ܀ 291 :ܒܗܵܕܹܐ ܬܸܢܘܲܝ ܓܠܵܝ̣ܗܝ ܒܵܪܘܿܝܵܐ ܠܫܘܼܢܝܵ ܥܲܒܼܕܹܿܗ 292 ܕܢܹܐܣܘܿܪ ܐ̄ܢܵܫܵܐ ܒܚܘܼܒܵܐ ܕܚܲܝܹ̈ܐ ܕܠܵܐ ܫܘܼܠܵܡܵܐ ܀ 293 :ܐܵܦ ܐܹܠܝܼܵܐ ܠܵܘ ܐܲܝܟ ܚܵܣܹ̇ܡ ܒܝܘܼܬܼܪܵܢ ܚܲܝܲܝ̈ܢ 294 ܨܒܼܵܐ ܕܲܢܟܲܣܸܐ ܡ̣ܢ ܪܸܥܝܵܢܲܢ ܫܘܼܢܝܵ ܚܲܝܵܘ̈ܗܝ ܀ 295 :ܚܵܪ̣ ܛܲܢܵܢܵܐ ܕܕܲܠܡܵܐ ܬܸܗܘܸܐ ܐܘܼܪܚܵܐ ܕܚܲܝܹ̈ܐ 296 ܥܸܠܲܬܼ ܚܘܼܬܼܪܵܐ ܐ̇ܦ ܥܸܕܠܵܝܵܐ ܠܲܕܒܼܵܬܵܪܟܸܿܢ ܀ 297 :ܐܲܪܡܝܼ ܐܘܼܪܚܵܐ ܘܪܲܟܸܿܒܼ ܥܸܠܬܼܵܐ ܠܘܵܬܼ ܬܲܠܡܝܼܕܹܗ 298 ܕܐܲܠܵܗܝ ܫܲܕܿܪܲܢܝ ܒܐܘܼܪܚܵܐ ܕܐܸܪܕܸܿܐ ܒܲܝܢܲܝ ܘܠܹܗ ܀ 299 :ܒܲܕܿܩܹܗ ܪܸܡܙܵܐ ܠܫܘܼܢܝܵ ܚܲܝܵܘ̈ܗܝ ܠܪܸܥܝܵܢ ܐ̄ܢܵܫܵܐ 300 ܘܲܩܕܼܵܡ ܟܠܢܵܫ ܓܠ̣ܵܝܗܝ ܠܐܹܠܝܼܫܵܥ ܐܲܝܟ ܫܲܪܝܼܪܵܐ ܀ 301 :ܚܲܝܘܼ ܡܵܪܝܵܐ ܘܚܲܝܵܐ ܗ̄ܝ̣ ܢܲܦܸܫܵܟ ܥܢܵܝ̣ܗܝ ܠܐܹܠܝܼܵܐ 302 ܕܠܵܐ ܫܵܒܹ̇ܩ ܐ̄ܢܵܐ ܚܘܼܒܵܟ ܪܲܒܵܐ ܥܕܲܡܵܐ ܠܚܲܪܬܼܵܐ ܀ 303 :ܠܒܹܝܬܼ ܐܹܝܠ ܐܸܡ݂ܲܪ ܕܫܲܕܼܪܲܢܝ ܡ̇ܪܝܵܐ ܐ̄ܪܵܙܵܢܵܐܝܼܬܼ 304 ܠܐܲܬܼܪܵܐ ܕܫܵܘܹ̇ܐ ܕܢܸܬܼܟܲܢܸܐ ܒܹܗ ܫܸܡ ܐܲܠܵܗܵܐ ܀ 305 :ܪܸܡܙܵܐ ܟܲܣܝܵܐ ܓܠ̣ܵܐ ܠܲܢܒܼܝܹ̈ܐ ܥܸܠܲܬܼ ܐܘܼܪܚܹܗ 306 ܘܲܢܦ݂ܲܩܘ ܠܐܘܼܪܥܹܗ ܕܲܢܙܚܝܘܼܢܵܝܗܝ ܒܪܘܼܚ ܓܸܠܝܵܢܐ ܀ 307 :ܥܢ̣ܵܘ ܚܲܙܵܝܹ̈ܐ ܕܲܥܬܼܝܼ̈ܕܵܬܼܵܐ ܠܘܵܬܼ ܬܲܠܡܝܼܕܹܗ 308 ܕܝܵ̇ܕܲܥ ܐܲܢ̄ܬܿ ܟܲܝ ܕܝܵܘܡܵܢ ܢܵܣܹ̇ܒܼ ܡ̇ܪܝܵܐ ܠܡܵܪܵܟ ܀ 309 :ܘܦܲܢܝܼ ܐܸܢܘܿܢ ܒܪܘܼܚ ܓܸܠܝܵܢܵܐ ܐܲܝܟ ܝܵܕܲܘܿܥܵܐ 310 ܕܲܓܼܠܸܐ ܗ̄ܘ̣ ܠܝܼ ܐ̄ܪܵܙܵܐ ܗܵܢܵܐ ܫܬܼܘܿܩܘ ܡ̣ܢ ܗܵܕܐ ܀ 311 :ܐܵܦ ܠܐܝܼܪܝܼܚܘܿ ܐܸܚܲܝܕܼ ܥܸܠܬܼܵܐ ܠܘܵܬܼ ܬܲܠܡܝܼܕܗ 312 ܘܦܲܣܩ̣ܵܗ̇ ܠܥܸܠܬܹܗ ܒܫܸܡ ܐܲܠܵܗܵܐ ܘܚܲܝܹ̈ܐ ܕܢܲܦܫܹܗ ܀ 313 :ܢܦ݂ܲܩܘ ܐܵܦ ܬܲܡܵܢ ܢܒܼܝܼ̈ܐ ܒܪܘܼܚܵܐ ܠܐܘܼܪܥܹܗ ܕܟܹܐܢܵܐ 314 ܟܲܕܼ ܡܸܬܼܢܲܒܹܿܝܢ ܥܲܠ ܫܘܼܢܵܝܹܗ ܕܡ̣ܢ ܨܹܝܕ ܐ̄ܢܵܫܵܐ ܀ 315 :ܝܵ̇ܕܲܥ ܐܲܢ̄ܬܿ ܠܲܡ ܕܝܵܘܡ̇ܢ ܢܵܣܹ̇ܒܼ ܡ̇ܪܝܵܐ ܠܡܵܪܵܟ 316 ܢܒܼܝܹ̈ܐ ܫܲܐܸܠܘ ܠܘܵܬܼ ܐܹܠܝܼܫܵܥ ܘܐܸܡ݂ܲܪ ܕܲܫܬܼܘܿܩܘ ܀ 317 :ܚܙ̣ܵܐ ܛܲܢܵܢܵܐ ܕܲܓܼܠܵܝ̣ܗܝ ܪܘܼܚܵܐ ܠܐ̄ܪܵܙ ܫܘܼܢܵܝܹܗ 318 ܘܐܸܚܲܕ݂ ܥܸܠܬܼܵܐ ܠܘܵܬܼ ܬܲܠܡܝܼܕܹܗ ܕܲܬܼܠܵܬܼ ܙܲܒܼܢܝܼ̈ܢ ܀ 319 ܡܵܪܝܵܐ ܫܲܕܿܪܲܢܝ ܥܕܲܡܵܐ ܠܝܘܿܪܕܿܢܵܢ ܕܐܹܙܲܠ ܘܐܸܗܦܘܿܟ: pb. 191 320 ܘܠܵܐ ܐܸܬܼܪܲܦܝܼ ܚܲܡܝܼܡ ܠܸܒܵܐ ܒܝܲܕ ܥܸܠ̈ܠܵܬܼܵܐ ܀ 321 :ܪܘܼܚܵܐ ܠ̣ܥܸܙ ܒܹܗ ܕܢܸܦܘܿܩ ܢܸܚܙ̣ܐ ܬܲܗܪܵܐ ܪܲܒܵܐ 322 ܟܲܕܼ ܡܸܙܕܲܝܲܚ ܥܲܦܪܹܗ ܕܐܵܕܼܵܡ ܡ̣ܢ ܪ̈ܘܼܚܵܢܹܐ ܀ 323 :ܚܙ݂ܲܩ ܐܹܠܝܼܵܐ ܒܐܘܼܪܚܵܐ ܚܕܲܬܵܐ ܠܒܲܪ ܡ̣ܢ ܐ̄ܢܵܫܵܐ 324 ܘܲܡ̣ܚܵܐ ܠܡܲܝ̈ܵܐ ܘܙܵܥ ܡ̣ܢ ܩܕܼܵܡ̇ܘܗܝ ܟܝܵܢܵܐ ܚܲܪܫܵܐ ܀ 325 :ܐܲܪܝܼܡ ܢܲܚܬܹܿܗ ܘܲܡ̣ܚܵܐ ܠܢܲܗܪܵܐ ܘܠܲܦܓܹܗ ܠܲܬܼܪܹܝܢ 326 ܘܠܵܐ ܐܸܬܼܥܲܣܲܩܘ ܒܲܥܪܝܼܪ̈ܵܝܹܐ ܠܘܼܩܒܲܠ ܡܸܠܬܹܗ ܀ 327 :ܟܝܵܢܵܐ ܚܲܪܫܵܐ ܕܚܹܝ̣ܠ ܡ̣ܢ ܪܸܡܙܵܐ ܕܲܟܼܣܸܐ ܒܢܲܚܬܵܐ 328 ܘܢ̣ܵܚ ܡ̣ܢ ܪܲܗܛܹܗ ܘܲܢܛܲܪ ܛܲܟܼܣܵܐ ܕܠܑܵܐ ܒܲܟܼܝܵܢܵܐ ܀ 329 :ܥܲܒܲܪ ܐܹܠܝܼܵܐ ܥܲܡ ܬܲܠܡܝܼܕܹܗ ܐܲܝܟ ܕܲܒܼܝܲܒܼܫܵܐ 330 ܘܲܦܢ̣ܵܐ ܢܲܗܪܵܐ ܐܲܝܟ ܕܲܒܼܩܲܕܼܡܵܐ ܠܪܲܗܛܵܐ ܕܐܘܼܪܚܹܗ ܀ 331 :ܩܵܡ̣ ܕܲܢܬܿܪܓܸܿܡ ܪܲܒܵܐ ܬܲܩܢܵܐ ܠܘܵܬܼ ܬܲܠܡܝܼܕܼܗ 332 ܘܲܢܦܲܫܸܩ ܠܹܗ ܐ̄ܪܵܙܵܐ ܕܟܲܣܝܼ ܒܝܲܕܼ ܥܸܠ̈ܠܵܬܼܵܐ ܀ 333 :ܡܵܢܵܐ ܨܵܒ̇ܝܬܿ ܫܐܲܠ ܘܐܸܬܸܿܠ ܠܵܟ ܥܘܼܬܼܪܵܐ ܕܪܘܼܚܵܐ 334 ܥܲܕܠܵܐ ܐܸܬܿܕܼܒܲܪ ܠܐܲܝܟܵܐ ܕܣܵܡ݂ܲܢܝ ܪܸܡܙܑܵܐ ܠܡܹܐܙܲܠ ܀ 335 :ܫܐܸ݂ܠ ܬܲܠܡܝܼܕܼܵܐ ܠܪܲܒܵܐ ܢܲܟܼܦܵܐ ܙܲܝܢܵܐ ܥܦܝܼܦܵܐ 336 ܕܢܹܐܙܲܠ ܢܲܩܪܸܒܼ ܒܝܲܕܼ ܥܘܼܕܪܵܢܹܗ ܠܘܼܩܒܲܠ ܛܘܥܝܲܝ ܀ 337 :ܪܲܒܵܐ ܕܲܚܙܵܐ ܕܐܲܣܓܿܝܼ ܘܲܫܐܸ̣ܠ ܠܒܲܪ ܡ̣ܢ ܛܲܟܼܣܵܐ 338 ܟܠ̣ܵܝܗܝ ܡ̣ܢ ܗܵܕܹܐ ܥܲܕܼ ܡܸܫܬܿܢܸܐ ܘܟܸܢ ܝܵܗܹ̇ܒܼ ܠܹܗ ܀ 339 :ܠܵܘ ܒܲܚܣܵܡܵܐ ܟܠ̣ܵܐ ܡ̇ܘܗܲܒܼܬܼܵܐ ܡ̣ܢ ܬܲܠܡܝܼܕܹܗ 340 ܗܘ̤ ܬܲܠܡܝܼܕܼܵܐ ܐܲܡܪܲܚ ܣܲܓܿܝܼ ܘܣ̣ܵܡ ܠܹܗ ܛܲܟܼܣܵܐ ܀ 341 :ܐܸܢܗܘ̤ ܕܬܸܚܙܹܝܢܝ ܕܲܡܫܲܢܹܐ ܠܝܼ ܪܸܡܙܵܐ ܡܸܢܵܟ 342 ܣܲܒܼ ܡ̇ܘܗܲܒܼܬܼܵܐ ܐܲܟܼܡܵܐ ܕܲܫܐܸܠܬܿ ܘܝܲܩܲܪ ܕܲܪܓܹܗ ܀ 343 :ܠܵܘ ܦܘܼܠܵܓܼܵܐ ܕܥܲܠ ܫܘܼܢܵܝܹܗ ܣܕܲܩ ܪܸܥܝܵܢܹܗ 344 ܐܸܠܵܐ ܕܲܪܢܵܐ ܕܕܲܠܡܵܐ ܩܲܝܵܡ ܦܵܘܫܹܗ ܩܲܠܝܼܠ ܀ 345 :ܐܸܢ ܕܵܒܲܪ ܠܝܼ ܦܘܼܩܕܵܢ ܟܲܣܝܵܐ ܠܒܲܪ ܡ̣ܢ ܐ̄ܢܵܫܵܐ 346 ܢܸܗܘܸܐ ܥܲܡܵܟ ܚܲܝܠܵܐ ܕܪܘܼܚܵܐ ܐܲܝܟ ܨܸܒܼܝܵܢܵܟ ܀ 347 :ܫܲܠܸܡ ܪܲܒܵܐ ܠܘܵܬܼ ܬܲܠܡܝܼܕܹܗ ܙܘܼܗܵܪ ܡܸܠܵܘ̈ܗܝ 348 ܘܡܲܛܝܼܘ ܟܸܢܫܹ̈ܐ ܕܲܫܡܲܝܵܢܹ̈ܐ ܕܲܢܫܲܢܘܿܢܵܝܗܝ ܀ 349 :ܚܵܘܝܘܼ ܛܲܟܼܣܵܐ ܕܪ̈ܲܟܼܫܵܐ ܕܢܘܼܪܵܐ ܕܲܟܼܕܝܼܢܝܼܢ ܗ̄ܘ̣ܵܐ 350 ܐܵܦ ܡܲܪܟܲܒܼܬܼܵܐ ܕܲܚܙܝܼܩܵܐ ܗ̄ܘ̣ܵܬܼ ܒܥܲܪ݁ܩܲܝ ܢܘܼܪܵܐ ܀ 351 :ܓܝܼܓܠܹ̈ܐ ܕܢܘܼܪܵܐ ܡܸܬܼܚܲܙ̈ܝܵܢ ܗ̣̄ܘܲܝ̈ ܬܚܹܝܬܼ ܡܲܪܟܲܒܼܬܼܵܐ 352 ܘܓܸܦܹ̈ܐ ܕܢܘܼܪܵܐ ܩܢܹܝܢ ܗ̄ܘ̣ܵܘ ܪ̈ܲܟܼܫܵܐ ܐܲܝܟ ܦܵܪ̈ܘܿܚܐ ܀ 353 :ܠܵܘ ܢܘܼܪܵܐ ܗ̄ܘ̣ܵܬܼ ܗܵܝ̇ ܡܲܪܟܲܒܼܬܼܵܐ ܕܡܸܬܼܚܲܙܝܵܐ ܗ̄ܘ̣ܵܬܼ 354 ܐܵܦܠܵܐ ܪ̈ܲܟܼܫܵܐ ܩܢܹܝܢ ܗ̄ܘ̣ܵܘ ܪܸ̈ܓܼܫܹܐ ܐܵܘ ܪ̈ܲܟܵܒܹܐ ܀ pb. 192 355 :ܚܸܙܘܵܐ ܗ̄ܘ̣ܵܐ ܓܹܝܪ ܘܠܑܵܐ ܗ̄ܘ̣ܵܐ ܓܘܼܫܡܵܐ ܕܡܸܬܼܚܵܘܸܐ ܗ̄ܘ̣ܵܐ 356 :ܚܙܵܬܼܵܐ ܕܢܘܼܪܵܐ ܘܐܸܣܟܹܿܝܡ ܪ̈ܲܟܼܫܵܐ ܕܠܵܐ ܪܘܼܟܵܒܹ̈ܐ 357 :ܪ̈ܘܼܚܵܢܵܝܹܐ ܚܵܘܝܼܘ ܪ̈ܲܟܼܫܵܐ ܐܲܝܟ ܕܲܡܥܵܕܹܝܢ 358 ܘܲܠܪܘܼܡܪܵܡܹܗ ܕܒܲܪ ܬܵܘܬܵܒܹ̈ܐ ܟܕܲܢܘ̣ ܡܲܪܟܼܒܼܬܼܵܐ ܀ 359 :ܪܸܡܙܵܐ ܟܲܣܝܵܐ ܐܲܪܗܸܒܼ ܐܸܢܘܿܢ ܠܘܸܬܼ ܣܘܼܥܪܵܢܵܐ 360 ܕܒܲܕܼܚܝܼ̈ܠܵܬܼܵܐ ܢܚܵܘܘܿܢ ܚܸܙܘܵܐ ܕܪܘܼܡܪܵܡ ܐ̄ܢܵܫܵܐ ܀ 361 :ܐ̄ܪܵܙܵܐ ܪܲܒܵܐ ܨܵܪܘ ܪ̈ܘܼܚܵܢܹܐ ܠܐܲܪ̈ܥܵܝܹܐ 362 ܕܗܵܐ ܡܸܬܼܥܲܠܸܐ ܟܝܵܢܵܐ ܫܝܼܛܵܐ ܠܘܵܬܼ ܪܘܼܡܪܵܡ̇ܐ ܀ 363 :ܒܝܲܕܼ ܡܲܪܟܼܒܼܬܼܵܐ ܪܫܲܡ̣ܘ ܙܘܼܝܵܚܵܐ ܕܥܲܦܪܹܗ ܕܐܵܕܼܵܡ 364 ܕܡܝܼܩܲܪ ܠܹܗ ܪܸܡܙܵܐ ܠܚܲܪܬܼܵܐ ܒܝܲܕܼ ܣܘܼܟܵܠܵܐ ܀ 365 :ܒܚܲܕܼ ܕܲܡܫܲܢܸܐ ܘܠܵܐ ܒܵܠ݁ܲܥ ܠܹܗ ܡ̇ܘܬܵܐ ܝܲܥܢܵܐ 366 ܨܵܪ ܠܲܢ ܐ̄ܪܵܙܵܐ ܕܚܲܝܹ̈ܐ ܚܲܕܼܬܹ̈ܐ ܕܠܵܐ ܫܘܼܠܵܡܵܐ ܀ 367 ܒܝܲܕ ܐܹܠܝܼܵܐ ܓܠ̣ܵܐ ܒܵܪܘܝܵܐ ܠܡܵܝܘܿܬܼܘܼܬܼܵܐ. 368 ܕܩܲܝܵܡ ܣܲܒܼܪܵܐ ܠܲܕܼܠܵܐ ܣܲܒܼܪܵܐ ܒܫܘܼܠܵܡ ܙܲܒܼܢܹ̈ܐ ܀ 369 :ܥܒ݂ܲܕܼ ܫܘܼܢܵܝܹܗ ܒܚܲܕܼ ܪ̈ܘܼܚܵܢܹܐ ܒܚܸܘܙܵܐ ܪܲܒܵܐ 370 ܕܲܢܒܲܕܸܿܩ ܠܲܢ ܥܲܠ ܫܘܼܢܵܝܲܢ ܕܲܠܘܵܬܼ ܪܵܘܡ̇ܐ ܀ 371 :ܐܵܽܦ ܡܲܪܟܸܿܒܼܬܼܵܐ ܕܲܡܙܲܝܚܵܐ ܗ̄ܘ̣ܵܬܼ ܠܒܲܪ ܬܵܘܬܵܒܹ̈ܐ 372 ܠܐܲܦܲܝ̈ ܪܵܘܡ̇ܐ ܡܚܵܘܸܐ ܗ̄ܘ̣ܵܐ ܠܹܗ ܪܸܡܙܵܐ ܠܪܲܛܹܗ ܀ 373 :ܗܘ̤ܵܐ ܦܲܓܼܪܵܢܵܐ ܐܲܝܟ ܗܸܢܝܘܿܟܼܵܐ ܠܥܸܠ ܡ̣ܢ ܪܘܼܚܵܐ 374 ܘܐܸܚܲܕܼ ܒܸܣܪܵܐ ܒܥܲܪ̈ܩܲܝ ܢܘܼܪܵܐ ܘܠܵܐ ܐܸܣܬܲܢܲܛ ܀ 375 :ܐܘܿ ܦܲܓܼܪܵܢܵܐ ܕܲܪܟܸܒܼ ܪܘܼܚܵܐ ܘܦܲܓܸܿܕܼ ܢܘܼܪܵܐ 376 ܐܘܿ ܒܸܣܪܵܢܵܐ ܕܠܵܐ ܐܸܬܼܚܲܪܵܟ ܒܫܲܠܗܸܒܼܝܼܬܼܵܐ ܀ 377 :ܐܘܿ ܝܲܩܝܼܪܵܐ ܕܲܩܼܢܵܐ ܓܸܦܹ̈ܐ ܕܦܵܪܘܿܚܘܼܬܼܵܐ 378 ܐܘܿ ܡ̇ܝܘܿܬܼܵܐ ܕܠܵܐ ܩܸܬܲܬ̤ ܒܹܗ ܐܝܼܕܼܵܐ ܕܡ̇ܘܬܵܐ ܀ 379 :ܣܵܡ̣ܡܹܗ ܪܸܡܙܵܐ ܒܝܲܕܼ ܪ̈ܘܼܚܵܢܹܐ ܠܥܸܠ ܡ̣ܢ ܪ̈ܲܟܼܫܵܐ 380 ܘܦܵܫ̣ ܠܲܡ ܡܲܥܦ̄ܪܹܗ ܐܲܝܟ ܪܲܗܒܼܘܿܢܵܐ ܠܘܵܬܼ ܬܲܠܡܝܼܕܹܗ ܀ 381 :ܒܢܲܚܬܵܐ ܕܦܲܓܼܪܹܗ ܝܲܗ̣̄ܒܼ ܠܹܗ ܐܵܬ̤ܐ ܕܡܸܕܹܿܡ ܕܲܫܐܸ̣ܠ 382 ܕܲܥܦܝܼܦܵܐܝܼܬܼ ܩܲܒܸܿܠ ܕܲܪܓܼܵܐ ܒܓܸܠܝܵܐ ܘܟܸܣܝܵܐ ܀ 383 :ܪܟܸܒܼ ܒܸܣܪܵܢܵܐ ܠܥܸܠ ܡ̣ܢ ܪܘܼܚܵܐ ܘܲܦܪ݂ܲܚ ܒܐܵܐܲܪ 384 ܘܬܲܪܨܹܗ ܪܸܡܙܵܐ ܠܫܘܼܠܵܡ ܐܘܼܪܚܹܗ ܠܘܲܥܕܵܐ ܕܲܥܕܹܢ ܀ 385 :ܠܲܥܕܹܢ ܫܲܢܝܼ ܒܲܪ ܬܵܘܬܵܒܹ̈ܐ ܘܠܵܘ ܠܲܫܡܲܝܵܐ 386 ܘܒܲܐܪܥܵܐ ܢܲܛܪܹ݂ܗ ܪܸܡܙܵܐ ܒܚܲܝܹ̈ܐ ܘܠܵܘ ܒܲܪܩܝܼܥܵܐ ܀ 387 :ܠܵܐ ܓܹܝܪ ܕܲܪ̈ܫܵܗ݂̇ ܠܐܘܼܪܚܵܐ ܕܪܵܘܡ̇ܐ ܪ̈ܓܼܠܹܗ ܕܒܸܣܪܵܐ 388 ܘܠܵܐ ܐܸܬܼܦܲܚܲܬ̤ ܗܵܝ̇ ܡܲܥܲܠܬܵܐ ܠܡܵܝܘܿܬܼܘܼܬܼܵܐ ܀ 389 ܚܲܕܼ ܗ̄ܘ̣ ܒܲܠܚܘܿܕܼ ܡ̣ܢ ܡ̇ܝܘܿܬܹ̈ܐ ܣܠܸ̣ܩ ܠܲܫܡܲܝܵܐ: pb. 193 390 :ܗܵܘ̇ ܕܥ̣ܡܲܪ ܒܹܗ ܦܬ݂ܲܚ ܗ̄ܘ̣ܵܐ ܪܩܝܼܥܵܐ 391 ܥܲܠ ܕܲܢܫܲܡܸܫ ܒܲܩܕܼܘܿܫ ܩܘܼܕܫܹ̈ܐ ܚܠܵܦ ܡ̇ܝܘܼܬܹ̈ܗ ܀ 392 :ܗܘ̤ܝܘܼ ܕܲܣܠܸ̣ܩ ܥܲܡ ܨܸܒܼܝܵܢܵܐ ܕܲܢ̣ܚܸܬܼ ܨܹܐܕܼܵܘܗܝ 393 ܘܗܘ̤ ܐܸܬܼܥܲܠܝܼ ܠܥܸܠ ܡ̣ܢ ܟܠܵܐ ܕܲܢܫܲܠܸܡ ܟܠ ܀ 394 :ܒܡܸܠܬܼܵܐ ܕܝܼܠܹܗ ܕܠܵܐ ܡܸܫܬܲܪܝܵܐ ܬܲ̇ܚܸܡ̄ܢ ܡܸܠܬܲܢ 395 ܕܠܲܝܬܿ ܐ̄ܢܵܫ ܕܲܣܠܸܩ̣ ܡ̣ܢ ܡ̇ܝܘܿܬܹ̈ܐ ܐܸܠܵܐ ܐܸܢ ܗܘ̤ ܀ 396 :ܠܐܲܦܲܝ̈ ܪܵܘܡ̇ܐ ܢܲܓܼܕܹܿܗ ܪܸܡܙܵܐ ܠܒܲܪ ܬܵܘܬܵܒܹ̈ܐ 397 ܘܡ̣ܢ ܕܐܸܬܼܥܲܠܝܼ ܣܵܡܹ݂ܗ ܒܲܥܕܹܝܢ ܒܐܲܬܼܪܵܐ ܦܲܐܝܵܐ ܀ 398 :ܬܲܡ̇ܢ ܢܲܛܪܹܗ ܥܲܡ ܒܲܪ ܓܸܢܣܹܗ ܚܢܘܿܟ ܕܐܸܫܬܲܢܝܼ 399 ܕܬܲܡ̇ܢ ܢܸܗܘܘܿܢ ܠܒܲܪ ܡ̣ܢ ܚܲܫܵܐ ܒܐ̄ܪܵܙ ܡܲܠܟܿܘܼܬܼܵܐ ܀ 400 :ܒܗܘܿܢ ܚܵܘܝܼ ܠܲܢ ܐܵܬ̤ܐ ܕܫܲܝܢܵܐ ܕܲܠܘܵܬܼ ܓܸܢܣܲܢ 401 ܘܲܒܼܚܲܝܲܝ̈ܗܘܿܢ ܡ̣ܠܲܟ ܚܲܝܘܼܬܼܵܐ ܠܡܵܝܘܿܬܼܘܼܬܼܵܐ ܀ 402 :ܗܡܲܝܪܹ̈ܐ ܕܚܘܼܒܵܐ ܐܸܚܲܕ݂ ܐܸܢܘܿܢ ܠܫܲܝܢܵܐ ܕܐ̄ܢܵܫܵܐ 403 ܘܲܟܼܡܵܐ ܕܗܸܢܘ̣ܿܢ ܒܐܲܬܼܪܵܐ ܕܚܲܝܹ̈ܐ ܫܲܪܝܼܪ ܣܲܒܼܪܲܢ ܀ 404 :ܚܪܘܼܪܹ̈ܐ ܕܢܲܦܫܵܐ ܘܢܘܼܚܵܡ ܦܲܓܼܪܵܐ ܐܸܫܬܵܘܕܿܝܼ ܠܲܢ 405 ܘܲܥܒ݂ܲܪ ܐܸܢܘܿܢ ܐܲܝܟ ܥܲܪ̈ܒܹܐ ܒܐܸܫܛܵܪ ܚܲܝܲܝ̈ܢ ܀ 406 :ܐܲܪܡܝܼܘ ܐܝܼܕܼܵܐ ܒܲܕܼܝܵܬܹܩܹܐ ܕܚܘܼܕܵܬܼ ܦܲܓܼܪܵܝܢ 407 ܒܗܵܝ̇ ܕܲܢܛܝܼܪܝܼܢ ܗܲܕܵܡܲܝ̈ܗܘܿܢ ܕܠܵܐ ܢܸܟܼܝܵܢܹ̈ܐ ܀ 408 :ܦܲܠܓܹܗ ܠܙܲܒܼܢܵܐ ܕܥܘܼܡܪܵܐ ܕܙܲܒܼܢܵܐ ܠܲܡ̈ܢܵܘܵܬܼܵܐ 409 ܕܢܸܙܪܘܿܥ ܣܲܒܼܪܵܐ ܕܚܵܝܑܬܼ ܡܝܼ̈ܬܹܐ ܒܟܼܠܗܘܿܢ ܕܵܪܹ̈ܐ ܀ 410 :ܫܲܢܝܼ ܠܲܚܢܘܿܟ ܒܥܸܣܪܵܐ ܕܵܪ̈ܝܼܢ ܕܚܲܒܸܿܠܘ ܛܲܟܼܣܵܐ 411 ܘܐܲܠܸܦ ܐܸܢܘܿܢ ܒܝܲܕܸ ܫܘܼܢܵܝܹܗ ܡ̣ܢ ܚܸܡܬܹܗ ܀ 412 :ܒܡܸܨܥܲܬܼ ܕܵܪܹ̈ܐ ܕܒܲܪ ܐܹܠܝܼܵܐ ܘܢܲܛܪܹܗ ܒܚܲܝܹ̈ܐ 413 ܘܲܒܼܪܘܼܡܪܵܡܹܗ ܓܠ̣ܵܐ ܥܲܠ ܫܘܼܒܼܚܵܐ ܕܠܵܐ ܡܵܝܘܿܬܹ̈ܐ ܀ 414 :ܒܫܘܼܠܵܡ ܙܲܒܼܢܹ̈ܐ ܢܣ݂ܲܒܼ ܚܲܕܼ ܡܸܢܲܢ ܐܲܝܟ ܪܹܫܝܼܬܼܵܐ 415 ܘܲܒܼܝܲܕܼ ܕܸܒܼܚܹܗ ܪܲܥܝܼ ܠܟܼܠܵܐ ܥܲܡ ܪܲܒܿܘܼܬܹܗ ܀ 416 :ܠܵܘ ܐܲܝܟ ܥܲܒܼ̈ܕܹܿܐ ܢܲܛܪܹܗ ܒܚܲܝܹ̈ܐ ܠܒܲܪ ܡ̣ܢ ܐ̄ܢܵܫܵܐ 417 ܕܥܲܒܼ̈ܕܹܿܐ ܒܐܲܪܥܵܐ ܘܗܘ̤ ܐܲܝܟ ܡܵܪܵܐ ܠܥܸܠ ܒܲܫܡܲܝܵܐ ܀ 418 :ܚܢܘܼܟ ܘܐܹܠܝܼܵܐ ܒܐܲܪܥܵܐ ܢܛܝܼܪܝܼܢ ܒܐܲܬܼܪܵܐ ܕܲܥܕܹܝܢ 419 ܘܗܘ̤ ܒܲܫܡܲܝܵܐ ܡܲܡܠܸܟ ܥܲܠ ܟܠ ܥܲܡ ܢܵܣܘܿܒܹܗ ܀ 420 :ܒܓܼܵܘ ܦܲܪܕܲܝܣܵܐ ܐܲܥܡܲܪ ܐܸܢܘܿܢ ܠܥܲܒܼ̈ܕܹܿܐ ܛܵܒܹ̈ܐ 421 ܚܠܵܦ ܪܲܗܒܼܘܿܢܵܐ ܕܗܵܘ̇ ܬܘܼܩܵܢܵܐ ܕܠܵܐ ܡܸܬܼܚܲܒܲܠ ܀ 422 :ܠܵܘ ܦܘܼܪܥܵܢܵܐ ܢܣ݂ܲܒܼܘ ܫܲܪܝܼܪܹ̈ܐ ܥܘܼܡܪܵܐ ܕܲܥܕܝܢ 423 ܕܲܢܛܝܼܪ ܐܲܓܼܪܵܐ ܕܲܟܼܠܝܼܠܲܝ̈ܗܘܿܢ ܒܡܲܠܟܿܘܼܬܼ ܪܵܘܡ̇ܐ ܀ 424 :ܩܲܕܸܿܡ ܓܹܝܪ ܚܵܪ̣ ܗܵܘ̇ ܝܵ̇ܕܲܥ ܟܠ ܒܥܘܼܕܼܪܵܢ ܚܲܝܲܝ̈ܢ 425 ܘܢܲܛܪܹ݂ܗ ܒܐ̄ܪܵܙܵܐ ܠܡܘܼܠܟܵܢ ܟܹܐܢܹ̈ܐ ܡܸܛܠܵܬܲܢ ܀ pb. 194 426 :ܠܲܢ ܗ̄ܘ̣ ܚܵܐܲܪ ܘܟܸܢ ܓܵܡܲ݁ܪ ܠܹܗ ܠܫܘܼܘܕܲܝ ܡܸܠܵܘ̈ܗܝ 427 ܕܢܸܣܲܒܼ ܐܲܟܲܚ̄ܕ ܚܪܘܼܪܹ̈ܐ ܕܦܲܓܼܪܲܢ ܘܦܘܼܪܩܵܢ ܢܲܦܫܲܢ ܀ 428 :ܗܵܐ ܕܼܪܫܲܬ̤ ܠܲܢ ܥܸܠܲܬܼ ܟܹܐܢܹ̈ܐ ܐܘܼܪܚܵܐ ܠܚܲܝܹ̈ܐ 429 ܬܵܘ ܢܸܪܕܹܿܐ ܐܲܝܟ ܕܲܒܼܐ̄ܪܵܙܵܐ ܠܘܵܬܼ ܫܘܼܠܵܡܵܐ ܀ 430 :ܗܵܐ ܚܵܘܝܼ ܠܲܢ ܒܝܲܕܼ ܫܘܼܢܵܝܵܐ ܕܲܬܼܪܹܝܢ ܐ̄ܢܵܫܵܐ 431 ܕܲܡܫܲܢܹܐ ܠܲܢ ܠܘܵܬܼ ܬܘܼܩܵܢܵܐ ܕܠܵܐ ܡܸܬܼܚܲܒܲܠ ܀ 432 :ܬܵܘ ܢܸܬܼܪܸܘܿܟ ܠܲܢ ܢܝܼܫܵܐ ܕܟܹܐܢܹ̈ܐ ܘܢܼܚܢܸܐ ܠܩܘܼܒܼܠܹܗ 433 ܘܲܢܚܘܼܪ ܟܠܢܵܫ ܒܝܲܕܼ ܚܘܼܡܣܵܢܵܐ ܕܪܸ̈ܥܝܵܢܲܝܗܘܿܢ ܀ 434 :ܥܢܝܼܪ ܕܲܡܟܿܘܼܬܲܢ ܒܩܵܠܵܐ ܚܲܠܝܵܐ ܕܦܸܬܼܓܼܵܡܲܝ̈ܗܘܿܢ 435 ܘܢܸܪܕܿܘܿܦ ܝܘܼܩܪܵܐ ܕܲܪ̈ܓܼܝܼܓܼܵܬܼܵܐ ܡ̣ܢ ܪܸܥܝܵܢܲܢ ܀ 436 :ܢܫܝܼܓܼ ܚܘܼܫܵܒܲܝ̈ܢ ܡ̣ܢ ܨܵܐܘܼܬܼܵܐ ܕܥܵܘܠܵܐ ܣܲܢܝܵܐ 437 ܘܢܸܚܙ̣ܐ ܢܲܦܫܲܢ ܒܝܲܕ ܡܲܚܙܝܼܬܼܵܐ ܕܕܘܼܒܵܪ̈ܲܝܗܘܿܢ ܀ 438 :ܐܲܝܟ ܢܛܘܼܪܹ̈ܐ ܟܪܝܼܟܼܝܼܢ ܟܠܢܵܫ ܠܡܲܫܪܝܼܬܼ ܓܸܢܣܲܢ 439 ܠܵܐ ܢܸܬܼܪܲܦܸܐ ܕܲܠܡܵܐ ܢܸܬܼܪܘܿܥ ܒܝܼܫܵܐ ܠܣܸܕܪ̈ܲܝܢ ܀ 440 :ܢܡܲܪܸܐ ܟܠܫܵܥ ܒܕܼܘܼܒܵܪ̈ܲܝܗܘܿܢ ܠܘܵܬܼ ܫܘܼܠܵܡܵܐ 441 ܝܵܘܡ̇ܢ ܘܲܡܚܵܪ ܕܗܵܐ ܡܲܢܲܥ ܠܹܗ ܫܘܼܠܵܡ ܚܲܝܲܝ̈ܢ ܀ 442 :ܒܗܲܝܡܵܢܘܼܬܼܵܐ ܙܟܼܵܘ ܢܲܨܝܼܚܹ̈ܐ ܠܚܲܫܹ̈ܐ ܕܲܒܼܗܘܿܢ 443 ܒܵܗ̇ ܢܸܬܼܓܵܘܲܣ ܒܟܼܠ ܬܲܟܼܬܿܘܼܫܝܼ̈ܢ ܕܦܲܓܼܪܵܐ ܘܢܲܦܫܵܐ ܀ 444 :ܣܲܟܿܪܵܐ ܐܝܼܬܹܝܗ̇ ܡܩܲܒܿܠܲܬܼ ܓܹܐܪܹ̈ܐ ܕܲܒܼܥܸܠܕܲܪܵܐ 445 ܘܠܵܐ ܚܵܣܹ̇ܝܢ ܠܵܗ̇ ܣܲܝܦܵܐ ܕܢܘܼܪܵܐ ܠܫܲܪܝܼܪܘܼܬܼܵܗ̇ ܀ 446 :ܒܵܗ̇ ܡܸܬܼܒܲܚܪܝܼܢ ܪܸܥܝܵܢ ܐ̄ܢܵܫܵܐ ܐܲܝܟ ܕܲܒܼܟܼܘܼܪܵܐ 447 ܘܪܸܬܼܚܵܐ ܕܚܲܫܹ̈ܐ ܡܚܵܘܸܐ ܙܹܐܦܵܐ ܕܣܲܢܝܼܘܼܬܼ ܢܲܦܫܵܐ ܀ 448 :ܢܸܗܘܸܐ ܕܲܗܒܼܵܐ ܪܸܥܝܵܢ ܢܲܦܫܲܢ ܒܟܼܘܼܪ ܒܘܼܚܪܵܢܵܗ̇ 449 ܘܠܵܐ ܢܸܬܼܪܲܦܸܐ ܩܕܼܵܡ ܚܘܼܬܼܚܵܬܹ̈ܐ ܕܝܲܨܪܲܢ ܒܝܼܫܵܐ ܀ 450 :ܒܝܼܫܘܿܥ ܢܸܚܘܼܪ ܐܵܦ ܢܸܬܿܕܲܡܸܐ ܒܚܘܼܡܣܵܢ ܢܲܦܫܲܢ 451 ܕܲܗܘ̤ܵܐ ܪܹܫܵܐ ܐܵܦ ܓܵܡܘܿܪܵܐ ܕܗܲܝܡܵܢܘܼܬܲܢ ܀ 452 :ܚܠܵܦ ܚܲܕܼܘܼܬܼܵܐ ܨܠܝܼܒܵܐ ܣܲܝܒܲܪ ܡܸܛܠܵܬܲܢ 453 :ܢܩܵܘܸܐ ܒܚܘܼܒܵܐ ܕܗܲܝܡܵܢܘܼܬܹܗ ܕܢܲܡܠܸܟ ܥܲܡܹܗ ܥܘܼܢܵܝܵܐ: ܢܸܗܘܸܐ ܨܵܘܡܲܢ ܠܲܡܫܝܼܚܵܐ: ܙܘܿܦܵܐ ܠܚܘܼܪܵܪ ܟܘ̈ܬܼܡ̇ܬܲܢ ܀