Demonstration 5: On Wars - ܬܚܘܝܬܐ ܕܩܪ̈ܒܐ

ܗܢܐ ܪܢܝܐ ܢܦܠ ܠܝ ܒܗܢܐ ܙܒܢܐ܂ ܥܠ ܙܘܥܐ ܕܥܬܝܕ ܠܡܗܘܐ ܒܗܢܐ ܙܒܢܐ܂ ܘܚܝܠܐ ܕܟܢܫ ܢܦܫܗ ܠܚܪܒܐ܂ ܙܒ̈ܢܐ ܕܝܢ ܡܩܕܡܝܢ ܘܣܝܡܝܢ ܠܐܠܗܐ܂ ܙܒ̈ܢܐ ܕܫܝܢܐ܂ ܒܝܘ̈ܡܝ ܛܒ̈ܐ ܘܟܐ̈ܢܐ ܡܫܬܠܡܝܢ܂ ܘܙܒ̈ܢܐ ܕܒܝܫ̈ܬܐ ܣܓ̈ܝܐܢ ܒܗܘܢ܂ ܒܝܘ̈ܡܝ ܒܝ̈ܫܐ ܘܥܘ̈ܠܐ ܡܫܬܠܡܝܢ܂ ܟܬܝܒ ܓܝܪ ܗܟܢܐ܂ ܕܛܒܬܐ ܥܬܝܕܐ ܠܡܗܘܐ܂ ܘܛܘܒܘܗܝ ܠܡܢ ܕܒܐܝܕܗ ܬܐܬܐ܂ ܘܒܝܫܬܐ ܥܬܝܕܐ ܠܡܗܘܐ܂ ܐܠܐ ܘܝ ܠܡܢ ܕܒܐܝܕܗ ܬܐܬܐ܂ ܐܬܬ ܛܒܬܐ ܠܥܡܗ ܕܐܠܗܐ܂ ܘܛܘܒܐ ܠܘܬ ܡܢ ܕܒܐܝܕܗ ܐܬܬ ܛܒܬܐ ܡܩܘܐ܂ ܘܐܬܥܝܪܬ ܒܝܫܬܐ ܥܠ ܚܝܠܐ ܟܢܝܫܐ܂ ܒܝܕ ܒܝܫܐ ܘܪܡܐ ܕܡܫܬܒܗܪ܂ ܘܐܦ ܘܝܐ ܬܡܢ ܡܟܬܪ܂ ܠܘܬ ܡܢ ܕܒܝܫܬܐ ܒܐܝ̈ܕܘܗܝ ܡܬܬܥܝܪܐ܂ ܠܐ ܕܝܢ ܬܥܕܘܠ ܚܒܝܒܝ ܠܒܝܫܐ ܕܒܝܫܬܐ ܐܪܡܝ ܠܣܓ̈ܝܐܐ܂ ܡܛܠ ܕܙܒ̈ܢܐ ܡܩܕܡܝܢ ܘܣܝܡܝܢ܂ ܘܡܛܐ ܙܒܢ ܫܘܠܡܗܘܢ܀

ܡܟܝܠ ܡܛܠ ܕܙܒܢ ܒܝܫܐ ܗܘ܂ ܒܐܪܙ ܫܡܥ ܗܢܐ ܡܕܡ ܕܟܬܒܢܐ ܠܟ܂ ܟܬܝܒ ܓܝܪ ܗܟܢܐ܂ ܕܡܕܡ ܕܪܡ ܒܝܬ ܒܢܝ̈ܢܫܐ܂ ܩܕܡ ܐܠܗܐ ܢܕܝܕ ܗܘ܂ ܘܬܘܒ ܟܬܝܒ܂ ܕܟܠ ܡܢ ܕܢܬܬܪܝܡ ܢܬܡܟܟ܂ ܘܟܠ ܕܢܬܡܟܟ ܢܬܪܝܡ܂ ܐܦ ܐܪܡܝܐ ܐܡܪ܂ ܕܠܐ ܢܫܬܒܗܪ ܚܝܠܬܢܐ ܒܚܝܠܗ܂ ܐܦ ܠܐ ܥܬܝܪܐ ܒܥܘܬܪܗ܂ ܘܫܠܝܚܐ ܛܘܒܢܐ ܬܘܒ ܐܡܪ܂ ܕܡܢ ܕܡܫܬܒܗܪ ܒܡܪܝܐ ܢܫܬܒܗܪ܂ ܘܕܘܝܕ ܐܡܪ܂ ܕܚܙܝܬ ܠܪܫܝܥܐ ܕܡܬܬܪܝܡ܂ ܘܡܬܥܠܐ ܐܝܟ ܐܪܙܐ ܕܠܒܢܢ܂ ܘܟܕ ܥܒܪܬ ܠܝܬܘܗܝ܂ ܘܒܥܝܬܗ܂ ܘܠܐ ܐܫܟܚܬܗ܀

ܟܠ ܡܢ ܕܐܫܬܒܗܪ ܐܬܡܟܟ܂ ܐܫܬܒܗܪ ܩܐܝܢ ܥܠ ܗܒܝܠ ܐܚܘܗܝ ܘܩܛܠܗ܂ ܘܐܬܬܠܝܛ ܘܗܘܐ ܙܐܥ ܘܢܐܕ ܒܐܪܥܐ܂ ܬܘܒ ܐܫܬܒܗܪ ܣܕܘ̈ܡܝܐ ܥܠ ܠܘܛ܂ ܘܢܦܠܬ ܥܠܝܗܘܢ ܢܘܪܐ ܡܢ ܫܡܝܐ ܘܐܘܩܕܬ ܐܢܘܢ܂ ܘܐܬܗܦܟܬ ܥܠܝܗܘܢ ܡܕܝܢܬܗܘܢ ܘܐܫܬܒܗܪ ܥܣܘ ܥܠ ܝܥܩܘܒ ܘܪܕܦܗ܂ ܘܝܥܩܘܒ ܩܒܠ ܒܘܟܪܘܬܗ ܘܒܘܪ̈ܟܬܗ ܕܥܣܘ܂ ܘܐܫܬܒܗܪܘ ܒ̈ܢܝ ܝܥܩܘܒ ܥܠ ܝܘܣܦ ܘܢܦܠܘ ܣܓܕܘ ܠܗ ܒܡܨܪܝܢ܂ ܘܐܫܬܒܗܪ ܦܪܥܘܢ ܥܠ ܡܘܫܐ ܘܥܠ ܥܡܗ܂ ܛܒܥ ܦܪܥܘܢ ܒܝܡܐ ܗܘ ܘܚܝܠܗ܂ ܘܐܫܬܒܗܪܘ ܕܬܢ ܘܐܒܝܪܡ ܥܠ ܡܘܫܐ܂ ܘܢܚܬܘ ܟܕ ܚܝ̈ܝܢ ܠܫܝܘܠ܂ ܘܓܙܡ ܓܘܠܝܕ ܥܠ ܕܘܝܕ ܘܢܦܠ ܩܕܡܘܗܝ ܘܐܬܬܒܪ܂ ܘܪܕܦ ܬܘܒ ܫܐܘܠ ܠܕܘܝܕ ܘܢܦܠ ܒܚܪܒܐ ܕܦܠܫ̈ܬܝܐ܂ ܘܐܬܪܝܡ ܥܠܘܗܝ ܐܒܫܠܘܡ ܘܩܛܠܗ ܝܘܐܒ ܒܩܪܒܐ܂ ܐܫܬܒܗܪ ܬܘܒ ܒܪܗܕܕ ܥܠ ܐܚܒ܂ ܘܐܫܬܠܡ ܒܐܝܕܐ ܕܐܝܣܪܝܠ܂ ܘܓܕܦ ܣܢܚܝܪܝܒ ܥܠ ܚܙܩܝܐ ܘܐܠܗܗ܂ ܘܗܘܐ ܚܝܠܗ ܫ̈ܠܕܐ ܡܝܬ̈ܬܐ ܟܕ ܢܦܩ ܚܕ ܡܢ ܥܝܪ̈ܐ ܘܚܪܒ܂ ܒܡܫܪܝܬܗ ܬܡܢܥܣܪ̈ܐ ܪ̈ܒܘܢ ܘܚܡܫܐ ܐ̈ܠܦܝܢ܂ ܒܨܠܘܬܗ ܕܚܙܩܝܐ܂ ܒܨܠܘܬܗ ܕܐܫܥܝܐ ܢܒܝܐ ܡܫܒܚܐ ܕܢܒ̈ܝܐ܂ ܘܐܬܪܝܡ ܐܚܒ ܥܠ ܡܝܟܐ܂ ܘܣܠܩ ܘܢܦܠ ܒܪܡܬ ܓܠܥܕ܂ ܘܐܫܬܒܗܪܬ ܐܝܙܒܠ ܥܠ ܐܠܝܐ܂ ܘܐܟܠܘܗ ܟܠܒ̈ܐ ܒܝܪܬܘܬܐ ܕܐܝܙܪܥܝܠ܂ ܘܐܫܬܒܗܪ ܗܡܢ ܥܠ ܡܘܪܕܟܝ܂ ܘܗܦܟ ܥܘܠܗ ܒܪܫܗ܂ ܘܐܫܬܒܗܪܘ ܒܒ̈ܠܝܐ ܥܠ ܕܢܝܐܝܠ܂ ܘܐܪܡܝܘܗܝ ܒܓܘܒܐ ܕܐܪ̈ܝܘܬܐ܂ ܘܕܢܝܐܝܠ ܣܠܩ ܟܕ ܙܟܝ܂ ܘܗܢܘܢ ܢܦܠܘ ܚܠܦܘܗܝ ܒܓܘܒܐ܂ ܬܘܒ ܐܫܬܒܗܪܘ ܒܒ̈ܠܝܐ ܘܐܟܠܘ ܩܪ̈ܨܐ ܕܚܢܢܝܐ ܘܕܚܒܪ̈ܘܗܝ܂ ܘܢܦܠܘ ܒܐܬܘܢܐ ܕܢܘܪܐ܂ ܘܣܠܩܘ ܟܕ ܙܟܝܝܢ܂ ܘܫܠܗܒܝܬܐ ܐܟܠܬ ܠܐܟ̈ܠܝ ܩܪ̈ܨܐ܀

ܐܡܪ ܓܝܪ ܢܒܘܟܕܢܨܪ܂ ܕܐܣܩ ܠܫܡܝܐ܂ ܘܠܥܠ ܡܢ ܟܘܟ̈ܒܘܗܝ ܕܐܝܠ ܐܪܝܡ ܟܘܪܣܝ܂ ܘܐܬܒ ܒܛܘܪ̈ܐ ܪ̈ܡܐ ܕܒܫ̈ܦܘܠܝ ܓܪܒܝܐ܂ ܐܡܪ ܥܠܘܗܝ ܐܫܥܝܐ܂ ܕܡܛܠ ܕܗܟܢܐ ܐܪܝܡܟ ܠܒܟ܂ ܡܟܝܠ ܠܫܝܘܠ ܬܬܚܬܐ܂ ܘܟܠ ܕܚܙܝܢ ܠܟ ܢܬܡܗܘܢ ܒܟ܂ ܘܐܦ ܣܢܚܝܪܝܒ ܗܟܢܐ ܐܡܪ ܗܘܐ܂ ܕܐܣܩ ܠܪܘܡܐ ܕܛܘܪ̈ܐ܂ ܘܐܦ ܠܫܦܘܠܘܗܝ ܕܠܒܢܢ܂ ܐܢܐ ܐܚܦܘܪ ܘܐܫܬܐ ܡ̈ܝܐ܂ ܘܐܘܒܫ ܒܦܪ̈ܣܬܐ ܕܪ̈ܟܫܝ ܟܠܗܘܢ ܢܗܪ̈ܘܬܐ ܥܡܝ̈ܩܐ܂ ܘܡܛܠ ܕܗܟܢܐ ܐܬܬܪܝܡ܂ ܐܡܪ ܬܘܒ ܥܠܘܗܝ ܗܘ ܐܫܥܝܐ܂ ܕܠܡܐ ܡܫܬܒܗܪ ܢܪܓܐ ܥܠ ܡܢ ܕܦܣܩ ܒܗ ܐܘ ܡܬܪܝܡ ܡܣܪܐ ܥܠ ܡܢ ܕܢܣܪ ܒܗ܂ ܐܘ ܡܫܬܩܠ ܫܒܛܐ ܥܠ ܡܢ ܕܡܪܝܡ ܠܗ܂ ܐܢܬ ܠܡ ܣܢܚܝܪܝܒ ܢܪܓܐ ܐܢܬ ܒܐܝ̈ܕܝ ܕܦܣܩ܂ ܘܡܣܪܐ ܐܢܬ ܒܐܝ̈ܕܝ ܕܢܣܪ܂ ܘܫܒܛܐ ܒܝܕ ܡܢ ܕܡܪܝܡ ܠܡܪܕܘܬܐ܂ ܘܚܘܛܪܐ ܐܝܬܝܟ ܕܡܚܘܬܐ܂ ܐܫܬܕܪܬ ܥܠ ܥܡܐ ܚܠܦܐ܂ ܘܬܘܒ ܐܬܦܩܕܬ ܥܠ ܥܡܐ ܐܟܬܢܐ܂ ܕܬܫܒܐ ܫܒܝܬܐ ܘܬܒܘܙ ܒܙܬܐ܂ ܘܥܒܕܬ ܐܢܘܢ ܠܟܠܗܘܢ ܒܢ̈ܝ ܐܢ̈ܫܐ ܘܠܟܠܗܘܢ ܥܡ̈ܡܐ ܐܝܟ ܣܝܢܐ ܕܫܘ̈ܩܐ܂ ܘܟܕ ܗܠܝܢ ܟܠܗܝܢ ܥܒܕܬ ܠܡܢܐ ܐܬܪܝܡܬ ܥܠ ܡܢ ܕܐܚܝܕ ܠܟ܂ ܘܐܫܬܒܗܪܬ ܥܠ ܡܢ ܕܢܣܪ ܒܟ܂ ܘܚܣܕܬ ܠܡܕܝܢܬܗ ܕܩܕܝܫܐ܂ ܘܐܡܪܬ ܠܒ̈ܢܝ ܐܘܪܫܠܡ܂ ܕܠܡܐ ܡܫܟܚ ܐܠܗܟܘܢ ܠܡܦܨܝܘܬܟܘܢ ܡܢ ܐܝ̈ܕܝ܂ ܘܐܡܪܚܬ ܘܐܡܪܬ܂ ܕܡܢܘ ܡܪܝܐ ܕܡܦܨܐ ܠܟܘܢ ܡܢ ܐܝ̈ܕܝ܂ ܡܛܠ ܗܢܐ ܫܡܥ ܦܬܓܡܗ ܕܡܪܝܐ ܕܐܡܪ܂ ܕܐܬܒܪ ܠܐܬܘܪܝܐ ܒܐܪܥܝ܂ ܘܥܠ ܛܘܪ̈ܝ ܐܕܘܫܝܘܗܝ܂ ܘܡܐ ܕܐܬܬܒܪ ܘܐܬܕܝܫ ܫܝܛܐ ܠܗ ܒܬܘܠܬܐ ܒܪܬ ܨܗܝܘܢ܂ ܘܡܢܝܕܐ ܪܫܗ ܒܪܬ ܐܘܪܫܠܡ܂ ܘܐܡܪܐ ܠܡܢ ܚܣܕܬ ܘܓܕܦܬ܂ ܘܥܠ ܡܢ ܐܪܝܡܬ ܩܠܟ܂ ܐܪܝܡܬ ܥܝܢ̈ܝܟ ܠܡܪܘܡܐ ܥܠ ܩܕܝܫܐ ܕܐܝܣܪܝܠ܂ ܘܒܐܝܕܐ ܕܐܝ̈ܙܓܕܝܟ ܚܣܕܬ ܠܡܪܝܐ܂ ܗܫܐ ܚܙܝ ܕܢܦܠ ܩܠܕܐ ܒܢܚܝܪܟ܂ ܘܒܠܡܐ ܒܣ̈ܦܘܬܟ܂ ܘܗܦܟܬ ܒܠܒܐ ܬܒܝܪܐ ܕܐܬܝܬ ܒܠܒܐ ܪܡܐ܂ ܘܩܛܠܗ ܡܢ ܐܝ̈ܕܝ ܚܒܝ̈ܒܘܗܝ ܗܘܐ܂ ܘܒܝܬ ܬܘܟܠܢܗ ܬܡܢ ܐܣܬܚܦ ܘܢܦܠ ܩܕܡ ܐܠܗܗ܂ ܘܐܦ ܝܐܝܐ ܗܘܐ ܚܒܝܒܝ ܕܗܢܐ ܕܒܚܐ ܘܩܘܪܒܢܐ ܠܘܩܒܠ ܗܘ ܐܠܗܐ ܕܬܟܝܠ ܗܘܐ ܥܠܘܗܝ܂ ܘܒܝܬ ܣܓܕܬܗ ܗܘܐ܂ ܦܓܪܗ ܕܘܟܪܢܐ ܠܦܬܟܪܗ܀

ܬܘܒ ܐܬܬܪܝܡ ܕܟܪܐ ܘܐܬܥܠܝ܂ ܘܕܩܪ ܠܡܥܪܒܐ ܘܠܓܪܒܝܐ ܘܠܬܝܡܢܐ ܘܡܟܟ ܚܝܘ̈ܬܐ ܣܓܝܐ̈ܬܐ܂ ܘܠܐ ܩܡ ܩܕܡܘܗܝ ܥܕܡܐ ܕܐܬܐ ܨܦܪܝܐ ܡܢ ܡܥܪܒܐ ܘܡܚܝܗܝ ܠܕܟܪܐ ܘܬܒܪ ܩܪ̈ܢܬܗ܂ ܘܡܟܟܗ ܛܒ ܠܕܟܪܐ܂ ܐܝܬܘܗܝ ܕܝܢ ܕܟܪܐ ܡܠܟ ܡܕܝ ܘܦܪܣ ܕܗܘ ܕܪܝܘܫ܂ ܘܨܦܪܝܐ ܐܠܟܣܢܕܪܘܣ ܒܪ ܦܝܠܝܦܘܣ ܡܩܕܘܢܝܐ܂ ܚܙܐ ܓܝܪ ܕܢܝܐܝܠ ܕܟܪܐ ܟܕ ܒܡܕܢܚܐ ܗܘܐ܂ ܩܕܡ ܬܪܥܐ ܕܫܘܫܢ ܒܝܪܬܐ ܕܒܥܝܠܡ ܡܕܝܢܬܐ܂ ܥܠ ܢܗܪܐ ܐܘܠܝ܂ ܘܡܕܩܪ ܠܡܥܪܒܐ ܘܠܓܪܒܝܐ ܘܠܬܝܡܢܐ܂ ܘܟܠܗܝܢ ܚܝ̈ܘܬܐ ܠܐ ܩܡ ܩܕܡܘܗܝ܂ ܘܨܦܪܝܐ ܕܥ̈ܙܐ ܢܦܩ ܡܢ ܡܕܝܢܬ ܝܘܢ̈ܝܐ ܘܐܬܪܝܡ ܥܠ ܕܟܪܐ܂ ܘܡܚܝܗܝ ܘܬܒܪ ܠܬܪ̈ܬܝܗܝܢ ܩܪ̈ܢܬܗ܂ ܠܪܒܬܐ ܘܠܙܥܘܪܬܐ܂ ܘܠܡܢܐ ܕܝܢ ܐܡܪ ܕܬܒܪ ܠܬܪ̈ܬܝܗܝܢ ܩܪ̈ܢܬܗ܂ ܐܠܐ ܡܛܠ ܕܡܟܟ ܠܬܪ̈ܬܝܗܝܢ ܡܠܟܘ̈ܬܐ ܕܡܕܒܪ ܗܘܐ܂ ܙܥܘܪܬܐ ܕܡ̈ܕܝܐ ܘܪܒܬܐ ܕܦܪ̈ܣܝܐ܂ ܟܕ ܐܬܐ ܕܝܢ ܐܠܟܣܢܕ ܪܘܣ ܝܘܢܝܐ ܩܛܠܗ ܠܕܪܝܘܫ ܡܠܟ ܡܕܝ ܘܦܪܣ܂ ܗܟܢܐ ܓܝܪ ܐܡܪ ܠܗ ܠܕܢܝܐܝܠ ܡܠܐܟܐ ܟܕ ܡܦܫܩ ܠܗ ܚܙܘܐ ܕܕܟܪܐ ܕܚܙܝܬ ܡܠܟ ܡܕܝ ܘܦܪܣ܂ ܘܨܦܪܝܐ ܡܠܟܐ ܕܝܘ̈ܢܝܐ܂ ܡܢ ܙܒܢܐ ܓܝܪ ܕܐܬܬܒܪ ܬܪ̈ܬܝܗܝܢ ܩܪ̈ܢܬܐ ܕܕܟܪܐ܂ ܘܥܕܡܐ ܠܗܢܐ ܙܒܢܐ܂ ܗܘܝܢ ܫܢ̈ܝܐ ܫܬܡܐܐ ܘܐܪ̈ܒܥܝܢ ܘܬܡ̈ܢܐ܀

ܡܟܝܠ ܕܟܪܐ ܩܪ̈ܢܬܗ ܡܬܬܒܪܢ ܐܢܝܢ܂ ܘܟܕ ܩܪ̈ܢܬܗ ܡܬܒܪܢ ܗܐ ܡܬܥܠܐ ܘܡܬܪܝܡ ܠܘܩܒܠ ܚܝܘܬܐ ܪܒܝܥܝܬܐ܂ ܕܥܫܝܢܐ ܘܬܩܝܦܐ܂ ܕܫ̈ܢܝܗ ܕܦܪܙܠܐ ܘܛܦܪ̈ܝܗ ܕܢܚܫܐ܂ ܘܐܟܠܥ ܘܡܕܩܐ܂ ܘܡܕܡ ܕܡܘܬܪܐ ܒܪ̈ܓܠܝܗ ܕܝܫܐ܂ ܐܘܢ ܕܟܪܐ ܕܩܪ̈ܢܬܗ ܡܬܒܪܢ܂ ܫܠܝ ܠܟ ܡܢ ܚܝܘܬܐ ܘܠܐ ܬܗܪܝܗ ܕܠܡܐ ܬܐܟܠܟ ܘܬܕܩܟ܂ ܩܕܡ ܨܦܪܝܐ ܕܟܪܐ ܠܐ ܐܫܟܚ ܠܡܩܡ܂ ܩܕܡ ܚܝܘܬܐ ܕܚܝܠܬܐ ܐܝܟܢܐ ܩܐܡ܂ ܕܦܘܡܗ ܡܡܠܠ ܪܘܪ̈ܒܢ܂ ܘܡܕܡ ܕܡܫܟܚܐ ܪܒܥܐ ܥܠܘܗܝ܂ ܐܝܟ ܐܪܝܐ ܥܠ ܓܙܪܗ܂ ܡܢ ܕܡܗܪ ܠܐܪܝܐ ܗܘܐ ܡܢܬܗ܂ ܘܡܢ ܕܡܥܝܪ ܠܚܝܘܬܐ ܐܟܠܐ ܠܗ܂ ܘܐܝܢܐ ܕܐܙܠ ܢܦܠ ܬܚܝܬ ܪ̈ܓܠܝܗ ܕܚܝܘܬܐ ܕܝܫܐ ܠܗ܂ ܚܝܘܬܐ ܓܝܪ ܠܐ ܡܬܩܛܠܐ܂ ܥܕܡܐ ܕܝܬܒ ܥܬܝܩ ܝܘ̈ܡܬܐ ܥܠ ܟܘܪܣܝܐ܂ ܘܩܪܒ ܩܕܡܘܗܝ ܒܪ ܐܢ̈ܫܝܢ܂ ܘܡܬܝܗܒ ܠܗ ܫܘܠܛܢܐ܂ ܘܗܝܕܝܢ ܡܬܩܛܠܐ ܚܝܘܬܐ ܗܝ܂ ܘܐܒܕ ܓܘܫܡܗ܂ ܘܗܘܝܐ ܡܠܟܘܬܗ ܕܒܪ ܐܢ̈ܫܝܢ܂ ܡܠܟܘܬ ܥܠܡ܂ ܘܫܘܠܛܢܗ ܠܕܪܕܪ̈ܝܢ܀

ܫܠܝ ܠܟ ܐܘܢ ܕܡܬܬܪܝܡ܂ ܠܐ ܬܫܬܒܗܪ܂ ܐܢ ܓܝܪ ܥܘܬܪܟ ܐܪܝܡ ܠܒܟ܂ ܠܐ ܗܘܐ ܣܓܝ ܡܢ ܕܚܙܩܝܐ܂ ܕܥܠ ܕܐܫܬܒܗܪ ܒܗ ܩܕܡ ܒܒ̈ܠܝܐ܂ ܐܫܬܩܠ ܠܗ ܟܘܠܗ ܘܐܙܠ ܠܒܒܠ܂ ܘܐܢ ܒܒ̈ܢܝܟ ܡܫܬܒܗܪ ܐܢܬ܂ ܡܬܕܒܪܝܢ ܠܗܘܢ ܡܢܟ ܠܘܬ ܚܝܘܬܐ܂ ܐܝܟ ܕܐܬܕܒܪܘ ܒܢ̈ܘܗܝ ܕܚܙܩܝܐ ܡܠܟܐ܂ ܘܗܘܘ ܡܗܝ̈ܡܢܐ ܒܗܝܟܠܗ ܕܡܠܟܐ ܕܒܒܠ܂ ܘܐܢ ܒܚܟܡܬܟ ܡܫܬܒܗܪ ܐܢܬ܂ ܠܐ ܗܘܝܬ ܡܝܬܪ ܡܢ ܪܒܐ ܕܨܘܪ܂ ܕܚܣܕܗ ܚܙܩܝܐܝܠ ܕܐܡܪ ܠܗ܂ ܕܠܡܐ ܚܟܝܡ ܐܢܬ ܡܢ ܕܢܝܐܝܠ܂ ܐܘ ܟܣܝ̈ܬܐ ܚܙܝܬ ܒܚܟܝܡܘܬܟ܂ ܘܐܢ ܒܫ̈ܢܝܟ ܕܣܓܝ ܐܬܥܠܝ ܪܥܝܢܟ܂ ܠܐ ܗ̈ܘܝ ܣܓ̈ܝܐܢ܂ ܐܝܟ ܕܝܠܗ ܕܪܒܐ ܕܨܘܪ܂ ܕܕܒܪ ܡܠܟܘܬܐ ܝܘܡ̈ܝ ܥܣܪܝܢ \ܘܬܪ̈ܬܝܢ ܡ̈ܠܟܘܢ/ܘܬܪ̈ܝܢ ܡܠܟܝܢ/ ܕܒܝܬ ܝܗܘܕܐ܂ ܕܗܘܝܢ ܫܢܝ̈ܗܘܢ ܐܪܒܥܡܐܐ ܘܐܪܒܥܝܢ ܫ̈ܢܝܢ܂ ܘܟܕ ܣܓܝ ܫܢ̈ܘܗܝ ܕܡܠܟܐ ܕܨܘܪ܂ ܗܢܐ ܟܠܗ ܙܒܢܐ܂ ܗܟܢܐ ܐܡܪ ܗܘܐ ܒܠܒܗ܂ ܕܐܠܗܐ ܐܢܐ܂ ܘܒܡܘܬܒܐ ܕܐܠܗܐ ܝܬܒܬ ܒܠܒܐ ܕܝܡ̈ܡܐ܂ ܐܡܪ ܠܗ ܓܝܪ ܚܙܩܝܐܝܠ܂ ܒܪܢܫܐ ܐܢܬ܂ ܘܠܐ ܗܘܝܬ ܐܠܗܐ܂ ܟܕ ܗܠܟ ܓܝܪ ܕܠܐ ܡܘܡ ܪܒܐ ܕܨܘܪ܂ ܒܝܬ ܟܐ̈ܦܐ ܕܢܘܪܐ܂ ܗܘܘ ܥܠܘܗܝ ܪ̈ܚܡܐ܂ ܘܟܕ ܐܬܪܝܡ ܠܒܗ܂ ܐܘܒܕܗ ܟܪܘܒܐ ܕܡܛܠ܀

ܘܡܢܐ ܐܢܝܢ ܠܡ ܟܐ̈ܦܐ ܕܢܘܪܐ܂ ܐܠܐ ܐܢ ܒܢ̈ܝ ܨܗܝܘܢ ܘܒܢ̈ܝ ܐܘܪܫܠܡ܂ ܒܙܒܢܐ ܓܝܪ ܩܕܡܝܐ܂ ܒܝܘ̈ܡܝ ܕܘܝܕ ܘܫܠܝܡܘܢ ܒܪܗ܂ ܗܘܐ ܚܝܪܡ ܪܚܡܐ ܠܕܒܝܬ ܐܝܣܪܝܠ܂ ܘܟܕ ܐܫܬܒܝܘ ܠܗܘܢ ܡܢ ܐܬܪܗܘܢ܂ ܚܕܝ ܠܗܘܢ ܘܪܦܣ ܒܪܓܠܗ܂ ܘܠܐ ܥܗܕ ܪܚܡܘܬܐ ܕܒܝܬ ܕܘܝܕ܂ ܘܕܐܡܪܬ ܕܟܐ̈ܦܐ ܕܢܘܪܐ ܒܢ̈ܝ ܝܗܘܕܐ ܐܬܩܪܝܘ܂ ܠܐ ܗܘܐ ܡܢ ܪܥܝܢܝ ܐܡܪܬ܂ ܐܠܐ ܐܪܡܝܐ ܢܒܝܐ ܐܡܪ ܥܠܝܗܘܢ܂ ܟܕ ܓܝܪ ܡܒܟܐ ܠܗܘܢ ܒܐܘ̈ܠܝܬܗ ܘܐܡܪ܂ ܕܒ̈ܢܝ ܨܗܝܘܢ ܡܝܬܪܝܢ ܗܘܘ ܡܢ ܟܐ̈ܦܐ ܛܒ̈ܬܐ܂ ܘܬܘܒ ܐܡܪ܂ ܕܐܝܟܢܐ ܡܫܬܕܝܢ ܟܐ̈ܦܐ ܕܩܘܕܫܐ ܒܪܝܫ ܟܠܗܘܢ ܫܘܩ̈ܐ܂ ܘܬܘܒ ܐܡܪ ܒܢܒܝܐ܂ ܕܟܐ̈ܦܐ ܗܘ̈ܝ ܩܕܝܫ̈ܬܐ ܕܫܕܝܢ ܗܘ̈ܝ ܒܐܪܥܗ܂ ܘܗܢܝܢ ܗܠܝܢ ܟܐ̈ܦܐ܂ ܢܘܪܐ ܝܩܕܐ ܗܘܬ ܒܗܝܢ܂ ܐܝܟ ܕܐܡܪ ܐܪܡܝܐ܂ ܕܗܘܐ ܦܬܓܡܗ ܕܡܪܝܐ ܒܠܒܝ܂ ܐܝܟ ܢܘܪܐ ܕܝܩܕܐ ܘܚܒܐ ܒܓܪ̈ܡܝ܂ ܘܬܘܒ ܐܡܪ ܠܗ ܠܐܪܡܝܐ ܕܗܐ ܝܗܒ ܐܢܐ ܦܬܓܡܝ ܒܦܘܡܟ ܢܘܪܐ܂ ܘܥܡܐ ܗܢܐ ܢܗܘܘܢ ܐܝܟ ܩܝ̈ܣܐ܂ ܘܬܘܒ ܐܡܪ܂ ܕܦܬ̈ܓܡܝ ܐܝܟ ܢܘܪܐ ܢܦܩܝܢ܂ ܘܐܝܟ ܦܪܙܠܐ ܕܓܙܪ ܟܐܦܐ܂ ܡܛܠ ܗܢܐ ܒ̈ܝܢܝ ܢܒ̈ܝܐ ܡܗܠܟ ܗܘܐ ܚܝܪܡ ܪܒܐ ܕܨܘܪ܂ ܕܐܬܩܪܝܘ ܟܐ̈ܦܐ ܕܢܘܪܐ܀

ܘܬܘܒ ܐܡܪ ܠܗ܂ ܕܗܘܝܬ ܥܡ ܟܪܘܒܐ ܕܡܫܝܚ ܘܡܛܠ܂ ܟܪܘܒܐ ܓܝܪ ܡܠܟܐ ܐܬܩܪܝ ܕܡܬܡܫܚ ܗܘܐ ܡܫܚܐ ܕܩܘܕܫܐ܂ ܘܗܘ ܡܛܠ ܗܘܐ ܥܠ ܟܠܗ ܥܡܗ܂ ܐܝܟ ܕܐܡܪ ܐܪܡܝܐ܂ ܕܪܘܚܐ ܕܐ̈ܦܝܢ ܡܫܝܚܗ ܕܡܪܝܐ܂ ܗܘ ܕܐܡܪܢ ܕܒܛܠܠܗ ܢܚܐ ܒܝܬ ܥܡ̈ܡܐ܂ ܒܛܠܠܗ ܓܝܪ ܕܡܠܟܐ ܝܬܒܝܢ ܗܘܘ ܟܕ ܒܪܫܗܘܢ ܩܐܡ ܗܘܐ܂ ܘܟܕ ܢܦܠ ܠܗ ܟܠܝܠܐ ܕܪܫܗܘܢ ܗܘܘ ܠܗܘܢ ܕܠܐ ܛܠܠܐ܂ ܘܐܢ ܐܢܫ ܢܐܡܪ ܕܥܠ ܡܫܝܚܐ ܗܘ ܐܡܝܪܐ ܡܠܬܐ ܗܕܐ ܢܩܒܠ ܡܕܡ ܕܟܬܒ ܐܢܐ ܠܗ ܕܠܐ ܚܪܝܢܐ܂ ܘܗܟܢܐ ܢܬܛܦܝܣ܂ ܕܥܠ ܡܠܟܐ ܗܘ ܐܡܝܪܐ܂ ܐܡܪ ܓܝܪ ܐܪܡܝܐ ܚܠܦ ܥܡܐ܂ ܕܘܝ ܠܢ ܕܢܦܠ ܟܠܝܠܐ ܕܪܝܫܢ܂ ܘܡܫܝܚܐ ܠܡ ܠܐ ܢܦܠ܂ ܡܛܠ ܕܩܡ ܠܗ ܠܝܘܡܐ ܬܠܝܬܝܐ܂ ܡܠܟܐ ܓܝܪ ܢܦܠ ܡܢ ܒܝܬ ܝܗܘܕܐ܂ ܘܬܘܒ ܠܐ ܬܩܢܬ ܡܠܟܘܬܗܘܢ܂ ܘܕܐܡܪ ܬܘܒ ܕܐܘܒܕܗ ܟܪܘܒܐ ܕܡܛܠ܂ ܟܪܘܒܐ ܓܝܪ ܕܐܘܒܕܗ܂ ܢܒܘܟܕܢܨܪ ܗܘ ܐܝܟ ܕܟܬܝܒ܂ ܕܦܥܠܘܬܐ ܥܒܕ ܒܨܘܪ܂ ܘܠܐ ܐܬܝܗܒ ܠܗ ܡܢ ܨܘܪ ܐܓܪܐ ܠܚܝܠܗ܂ ܘܚܠܦ ܦܥܠܘܬܐ ܕܨܘܪ܂ ܐܬܝܗܒܬ ܠܗ ܐܪܥܐ ܕܡܨܪܝܢ܂ ܘܠܡܢܐ ܕܝܢ ܠܐ ܐܬܝܗܒ ܠܗ ܐܓܪܐ ܡܢ ܨܘܪ ܠܢܒܘܟܕܢܨܪ܂ ܐܠܐ ܡܛܠ ܕܐܙܠ ܠܗ ܒܝܡܐ ܥܘܬܪܗ ܘܠܐ ܢܣܒܗ ܢܒܘܟܕܢܨܪ܂ ܘܒܗ ܒܙܒܢܐ ܗܘ܂ ܐܘܒܕܗ ܟܪܘܒܐ ܕܡܛܠ ܕܐܝܬܘܗܝ ܢܒܘܟܕܢܨܪ܂ ܬܪ̈ܝܢ ܓܝܪ ܟܪ̈ܘܒܝܢ ܗܘܝܢ܂ ܚܕ ܕܡܫܝܚ ܘܡܛܠ܂ ܘܚܕ ܕܡܛܠ ܘܠܐ ܡܫܝܚ܂ ܡܢ ܠܥܠ ܓܝܪ ܐܡܪ܂ ܕܗܘܝܬ ܥܡ ܟܪܘܒܐ ܕܡܫܝܚ ܘܡܛܠ܂ ܘܡܢ ܠܬܚܬ ܐܡܪ܂ ܕܐܘܒܕܟ ܟܪܘܒܐ ܕܡܛܠ܂ ܘܠܐ ܐܡܪ ܕܡܫܝܚ܂ ܢܒܘܟܕܢܨܪ ܓܝܪ ܠܐ ܡܫܝܚ ܗܘܐ܂ ܐܠܐ ܐܢ ܕܘܝܕ ܘܫܠܝܡܘܢ܂ ܘܡ̈ܠܟܐ ܐܚܪ̈ܢܐ ܕܗܘܘ ܒܬܪܗܘܢ܂ ܘܐܝܟܢܐ ܐܬܩܪܝ ܢܒܘܟܕܢܨܪ ܕܡܛܠ ܐܠܐ ܒܚܙܘܐ ܕܐܝܠܢܐ ܟܕ ܚܙܐ ܐܝܠܢܐ ܡܨܥܬ ܐܪܥܐ܂ ܕܬܚܘܬܘܗܝ ܥܡܪܢ ܟܠܗܝܢ ܚܝ̈ܘܬܐ ܕܕܒܪܐ܂ ܘܥܠ ܥܘ̈ܦܘܗܝ ܫܟܝܢ ܟܠܗ ܥܘܦܐ ܕܫܡܝܐ܂ ܘܡܢܗ ܡܬܬܪܣܐ ܗܘܐ ܟܘܠ ܒܣܪ܂ ܟܕ ܦܫܪ ܠܗ ܕܢܝܐܝܠ ܚܠܡܗ܂ ܐܡܪ ܠܗ ܕܢܝܐܝܠ܂ ܐܢܬ ܗܘ ܐܝܠܢܐ ܗܘ ܐܝܠܢܐ ܕܚܙܝܬ ܡܨܥܬ ܐܪܥܐ܂ ܘܬܚܘܬܝܟ ܥܡܪܝܢ ܟܠܗܘܢ ܥܡ̈ܡܐ܂ ܡܛܠ ܗܢܐ ܗܘ ܗܘܐ ܟܪܘܒܐ ܕܡܛܠ܂ ܕܐܘܒܕܗ ܠܪܒܐ ܕܨܘܪ܂ ܥܠ ܕܚܕܝ ܠܒ̈ܢܝ ܐܝܣܪܝܠ܂ ܕܐܫܬܒܝܘ ܡܢ ܐܪܥܗܘܢ܂ ܘܥܠ ܕܐܬܪܝܡ ܠܒܗ܂ ܚܪܒܬ ܐܦ ܗܝ ܨܘܪ ܫܒ̈ܥܝܢ ܫܢ̈ܝܢ܂ ܐܝܟ ܐܘܪܫܠܡ ܕܝܬܒܬ ܒܚܘܪܒܐ ܫܒܥܝܢ ܫ̈ܢܝܢ܂ ܐܡܪ ܓܝܪ ܥܠܝܗ ܐܫܥܝܐ܂ ܕܬܛܥܐ ܨܘܪ ܫܒܥܝܢ ܫ̈ܢܝܢ܂ ܐܝܟ ܝܘܡ̈ܝ ܡܠܟܐ ܚܕ܂ ܘܬܙܢܐ ܒܟܠܗܝܢ ܡ̈ܠܟܘܬܐ ܕܥܠ ܐ̈ܦܝ ܐܪܥܐ܀

ܐܘ̄ ܕܡܬܬܪܝܡ ܘܡܬܥܠܐ܂ ܫܘܒܗܪܗ ܕܠܒܟ ܠܐ ܢܛܥܝܟ܂ ܘܬܐܡܪ ܐܣܩ ܥܠ ܐܪܥܐ ܟܗܝܢܬܐ܂ ܘܥܠ ܚܝܘܬܐ ܥܫܝܢܬܐ܂ ܠܐ ܓܝܪ ܡܬܩܛܠܐ ܚܝܘܬܐ ܡܢ ܐܝ̈ܕܝ ܕܟܪܐ ܟܕ ܡܬܒܪܢ ܩܪ̈ܢܬܗ܂ ܨܦܪܝܐ ܓܝܪ ܬܒܪ ܩܪ̈ܢܬܗ ܕܕܟܪܐ܂ ܗܫܐ ܗܘܐ ܠܗ ܨܦܪܝܐ ܚܝܘܬܐ ܥܫܝܢܬܐ܂ ܡܛܠ ܕܟܕ ܒ̈ܢܝ ܝܦܬ ܐܚܕܘ ܡܠܟܘܬܐ܂ ܘܗܢܘܢ ܩܛܠܘ ܠܕܪܝܘܫ ܡܠܟܐ ܕܦܪܣ܂ ܗܫܐ ܚܝܘܬܐ ܪܒܝܥܝܬܐ ܒܠܥܬ ܠܬܠܝܬܝܬܐ܂ ܘܗܝ ܬܠܝܬܝܬܐ ܒ̈ܢܝ ܝܦܬ ܐܢܘܢ܂ ܘܪܒܝܥܝܬܐ ܒ̈ܢܝ ܫܝܡ ܐܢܘܢ܂ ܕܗܢܘܢ ܒ̈ܢܝ ܥܣܘ܂ ܡܛܠ ܕܟܕ ܚܙܐ ܕܢܝܐܝܠ ܚܙܘܐ ܕܐܪܒܥ ܚܝ̈ܘܢ܂ ܚܙܐ ܩܕܡܐܝܬ ܕܒ̈ܢܝ ܚܡ ܙܪܥܗ ܕܢܡܪܘܕ ܕܗܢܘܢ ܒܒ̈ܠܝܐ܂ ܘܕܬܪ̈ܬܝܢ ܕܦܪ̈ܣܝܐ ܘܕܡ̈ܕܝܐ܂ ܕܐܝܬܝܗܘܢ ܕܒ̈ܢܝ ܝܦܬ܂ ܘܕܬܠܬ ܕܝܘ̈ܢܝܐ ܐܚܝ̈ܗܘܢ ܕܡ̈ܕܝܐ܂ ܘܕܐܪ̈ܒܥ ܕܒ̈ܢܝ ܫܝܡ ܕܗܢܘܢ ܒ̈ܢܝ ܥܣܘ܂ ܗܘܬ ܠܗ ܓܝܪ ܫܘܬܦܘܬܐ ܕܒ̈ܢܝ ܝܦܬ ܥܡ ܒ̈ܢܝ ܫܝܡ܂ ܘܐܫܬܩܠܬ ܡܕܒܪܢܘܬܐ ܡܢ ܒ̈ܢܝ ܝܦܬ ܙܥܘܪܐ܂ ܘܐܬܝܗܒܬ ܠܫܝܡ ܩܫܝܫܐ܂ ܘܥܕܡܐ ܠܝܘܡܢܐ ܗܝ ܗܝ ܐܝܬܝܗ܂ ܘܥܕܡܐ ܠܥܠܡ܂ ܡܐ ܕܝܢ ܕܗܘܐ ܙܒܢ ܫܘܠܡ ܡܕܒܪܢܘܬܗܘܢ ܕܒ̈ܢܝ ܫܝܡ܂ ܡܩܒܠ ܠܗ ܠܡܠܟܘܬܐ ܫܠܝܛܐ ܕܢܦܩ ܡܢ ܒ̈ܢܝ ܝܗܘܕܐ܂ ܟܕ ܢܐܬܐ ܒܡܐܬܝܬܗ ܕܬܪ̈ܬܝܢ܀

ܒܚܙܘܐ ܓܝܪ ܕܢܒܘܟܕܢܨܪ ܟܕ ܚܙܐ܂ ܕܐܘܕܥ ܕܢܝܐܝܠ ܘܚܘܝ ܠܢܒܘܟܕܢܨܪ܂ ܟܕ ܚܙܐ ܨܠܡܐ ܕܩܐܡ ܠܩܘܒܠܗ܂ ܘܪܫܗ ܕܨܠܡܐ ܕܕܗܒܐ܂ ܘܚܕܝܗ ܘܕܪ̈ܥܘܗܝ ܕܣܐܡܐ ܘܟܪܣܗ ܘܥܛܡ̈ܬܗ ܕܢܚܫܐ܂ ܘܫ̈ܩܘܗܝ ܘܪ̈ܓܠܘܗܝ ܕܦܪܙܠܐ ܘܕܚܨܦܐ܂ ܘܐܡܪ ܠܗ ܕܢܝܐܝܠ ܠܢܒܘܟܕܢܨܪ܂ ܐܢܬ ܗܘ ܪܫܐ ܕܕܗܒܐ܂ ܘܠܡܢܐ ܐܬܩܪܝ ܪܫܐ ܕܕܗܒܐ ܐܠܐ ܡܠܬܗ ܕܐܪܡܝܐ ܫܠܡܬ ܥܠܘܗܝ܂ ܐܡܪ ܓܝܪ ܐܪܡܝܐ܂ ܟܣܐ ܕܕܗܒܐ ܒܒܠ ܒܐܝܕܗ ܕܡܪܝܐ܂ ܕܡܫܩܐ ܠܟܠܗ ܐܪܥܐ ܡܢ ܚܡܪܗ܂ ܘܐܦ ܪܝܫ ܡ̈ܠܟܘܬܐ ܟܠܗܝܢ ܒܒܠ ܐܬܩܪܝܬ܂ ܐܝܟ ܕܟܬܝܒ܂ ܕܗܘܬ ܪܝܫ ܡܠܟܘܬܗ ܕܢܡܪܘܕ ܒܒܠ܀

ܘܐܡܪ ܕܚܕܝܗ ܘܕܪ̈ܥܘܗܝ ܕܨܠܡܐ ܕܣܐܡܐ܂ ܗܘ ܚܘܝ ܥܠ ܡܠܟܘܬܐ ܕܡܟܝܟܐ ܡܢܗ ܕܐܝܬܘܗܝ ܕܪܝܘܫ ܡܕܝܐ܂ ܡܛܠ ܕܡܠܟܘܬܐ ܒܡܬܩܠܐ ܩܒܠ܂ ܐܬܩܠܬ ܓܝܪ ܡܠܟܘܬܐ ܕܒܝܬ ܢܡܪܘܕ ܘܐܫܬܟܚܬ ܚܣܝܪܐ܂ ܘܟܕ ܚܣܝܪܐ ܩܒܠܗ ܕܪܝܘܫ܂ ܡܛܠ ܗܢܐ ܐܡܪ ܕܡܟܝܟܐ ܗܝ ܡܠܟܘܬܗ܂ ܘܡܛܘܠ ܕܚܣܝܪܐ ܗܘܬ ܠܐ ܫܠܛܘ ܒ̈ܢܝ ܡܕܝ ܒܟܠܗ ܐܪܥܐ܂ ܕܟܪܣܗ ܘܥܛܡ̈ܬܗ ܕܨܠܡܐ ܕܢܚܫܐ܂ ܘܕܐܡܪ ܕܡܠܟܘܬܐ ܕܬܠܬ ܬܫܠܛ ܒܟܠܗ ܐܪܥܐ܂ ܕܐܝܬܝܗ ܡܠܟܘܬܐ ܕܒ̈ܢܝ ܝܘܢ܂ ܕܗܢܘܢ ܒ̈ܢܝ ܝܦܬ܂ ܥܠ ܡܠܟܘܬܐ ܓܝܪ ܕܐܚܝ̈ܗܘܢ ܥܠܘ ܒ̈ܢܝ ܝܘܢ܂ ܡܛܠ ܕܡܕܝ ܘܝܘܢ ܒ̈ܢܝ ܝܦܬ ܐܢܘܢ܂ ܣܟܠ ܗܘܐ ܕܝܢ ܡܕܝ܂ ܘܚܣܝܪ ܡܢ ܕܠܡܕܒܪܘ ܡܠܟܘܬܐ܂ ܥܕܡܐ ܕܐܬܐ ܝܘܢ ܐܚܘܗܝ ܕܚܟܝܡ ܘܨܢܝܥ܂ ܠܡܘܒܕܘ ܡܠܟܘܬܐ܂ ܫܠܛ ܓܝܪ ܐܠܟܣܢܕܪܘܣ ܒܪ ܦܝܠܝܦܘܣ ܒܟܠܗ ܐܪܥܐ܀

ܘܫܩ̈ܘܗܝ ܘܪ̈ܓܠܘܗܝ ܕܨܠܡܐ ܕܦܪܙܠܐ܂ ܕܐܝܬܝܗ ܡܠܟܘܬܐ ܕܒ̈ܢܝ ܫܝܡ܂ ܕܗܢܘܢ ܒ̈ܢܝ ܥܣܘ܂ ܕܚܣܝܢܐ ܐܝܟ ܦܪܙܠܐ܂ ܘܐܡܪ ܕܐܝܟ ܦܪܙܠܐ ܕܫܚܩ ܘܡܕܩ ܟܠ ܗܟܢܐ ܐܦ ܡܠܟܘܬܐ ܪܒܝܥܝܬܐ ܬܫܚܘܩ ܘܬܟܒܘܫ ܟܠ܂ ܘܦܪܫ ܥܠ ܪ̈ܓܠܐ ܘܨܒ̈ܥܬܐ ܕܡܢܗܝܢ ܕܦܪܙܠܐ ܘܡܢܗܝܢ ܕܚܨܦܐ ܕܛܝܢܐ܂ ܐܡܪ ܓܝܪ ܕܗܟܢܐ ܢܬܚܠܛܘܢ ܒܙܪܥ ܐܢܫܐ܂ ܘܠܐ ܢܗܘܘܢ ܕܒܩܝܢ ܚܕ ܠܚܕ܂ ܐܝܟ ܕܠܐ ܡܬܚܠܛ ܦܪܙܠܐ ܥܡ ܛܝܢܐ܂ ܗܕܐ ܥܠ ܡܠܟܘܬܐ ܪܒܝܥܝܬܐ ܚܘܝ܂ ܡܛܠ ܕܡܠܟܘܬܐ ܕܒ̈ܢܝ ܥܣܘ܂ ܠܐ ܗܘܐ ܡܠܟ ܒܪ ܡܠܟ ܩܐܡ ܗܘܐ ܕܢܕܒܪ ܡܠܟܘܬܐ܂ ܐܠܐ ܟܕ ܐܬܟܢܫܘ ܒܢ̈ܝ ܥܣܘ ܠܡܕܝܢܬܐ ܥܫܝܢܬܐ܂ ܘܥܒܕܘ ܒܝܬ ܒܘܠܐ܂ ܘܡܢ ܬܡܢ ܡܩܝܡܝܢ ܗܘܘ ܪܫܐ ܕܡܕܝܢܬܐ܂ ܓܒܪܐ ܚܟܝܡܐ ܕܢܕܒܪ ܡܠܟܘܬܐ܂ ܕܠܐ ܟܕ ܢܬܩܘܠ ܐܢܘܢ ܡܕܒܪ ܡܠܟܘܬܗܘܢ ܢܫܬܟܚܘܢ ܠܗܘܢ ܚܣܝܪܝܢ܂ ܘܬܫܬܩܠ ܠܗ ܡܢܗܘܢ ܡܠܟܘܬܐ܂ ܐܝܟ ܕܐܫܬܩܠܬ ܡܠܟܘܬܐ ܕܒ̈ܢܝ ܢܡܪܘܕ ܫܒܗܪܢܐ܂ ܘܐܬܝܗܒܬ ܠܒ̈ܢܝ ܡܕܝ ܣܟܠܐ܂ ܘܗܘ ܡܠܟܐ ܕܩܐܡ ܗܘܐ ܙܪܥܗ ܕܗܘ ܡܠܟܐ ܕܩܕܡܘܗܝ܂ ܡܘܒܕ ܗܘܐ ܠܗ܂ ܘܠܐ ܕܒܩܝܢ ܗܘܘ ܚܕ ܠܚܕ܂ ܒܪܡ ܕܝܢ ܙܪܥ ܐܢܫܐ ܕܐܬܡܬܠ ܒܛܝܢܐ܂ ܗܟܢܐ ܗܝ ܨܒܘܬܐ܂ ܕܡܐ ܕܡܬܓܒܐ ܗܘܐ ܡܠܟܐ ܠܡܠܟܘܬܐ܂ ܐܬܚܠܛ ܠܗ ܒܥܩܪܐ ܕܡܠܟܘܬܐ ܕܦܪܙܠܐ܀

ܘܚܘܝ ܕܒܝ̈ܘܡܝ ܗܢܘܢ ܡ̈ܠܟܐ ܕܩܝܡܝܢ ܒܡܠܟܘܬܐ܂ ܢܩܝܡ ܐܠܗ ܫܡܝܐ ܡܠܟܘܬܐ ܕܠܥܠܡܝܢ ܠܐ ܬܬܚܒܠ܂ ܘܠܐ ܬܥܒܪ܂ ܕܐܝܬܝܗ ܡܠܟܘܬܐ ܕܡܠܟܐ ܡܫܝܚܐ܂ ܕܗܝ ܡܥܒܪܐ ܠܡܠܟܘܬܐ ܪܒܝܥܝܬܐ܂ ܘܡܢ ܠܥܠ ܐܡܪ܂ ܕܚܙܝܬ ܟܐܦܐ ܕܐܬܓܙܪܬ ܕܠܐ ܒܐܝ̈ܕܝܢ܂ ܘܡܚܬܗ ܠܨܠܡܐ ܥܠ ܪ̈ܓܠܘܗܝ ܕܦܪܙܠܐ ܘܕܚܨܦܐ ܘܕܩܩܬ ܐܢܝܢ ܛܒ܂ ܘܠܐ ܐܡܪ ܕܡܚܬܗ ܥܠ ܪܫܗ ܠܨܠܡܐ܂ ܘܠܐ ܥܠ ܚܕܝܗ ܘܕܪ̈ܥܘܗܝ܂ ܘܐܦܠܐ ܥܠ ܟܪܣܗ ܘܥܛܡ̈ܬܗ܂ ܐܠܐ ܥܠ ܪ̈ܓܠܘܗܝ܂ ܡܛܠ ܕܡܢ ܟܠܗ ܨܠܡܐ ܪ̈ܓܠܐ ܗܘ ܒܠܚܘܕ ܐܬܝܐ ܗܝ ܟܐܦܐ ܡܫܟܚܐ܂ ܘܒܦܬܓܡܐ ܕܒܬܪܗ ܐܡܪ ܕܐܬܕܩܩܘ ܐܟܚܕܐ ܦܪܙܠܐ ܘܢܚܫܐ܂ ܘܣܐܡܐ ܘܕܗܒܐ܂ ܒܬܪܗܘܢ ܓܝܪ ܡܐ ܕܡܡܠܟ ܡܠܟܐ ܡܫܝܚܐ܂ ܘܗܝܕܝܢ ܡܡܟܟ ܠܡܠܟܘܬܐ ܐܪܒܝܥܝܬܐ ܘܫܚܩ ܠܟܠܗ ܨܠܡܐ܂ ܨܠܡܐ ܓܝܪ ܟܠܗ ܥܠܡܐ ܐܬܩܪܝ܂ ܘܪܫܗ ܢܒܘܟܕܢܨܪ܂ ܘܚܕܝܗ ܘܕܪ̈ܥܘܗܝ ܡܠܟ ܡܕܝ ܘܦܪܣ܂ ܘܟܪܣܗ ܘܥ̈ܛܡܬܗ ܡܠܟܐ ܕܝܘ̈ܢܝܐ܂ ܘܫܩ̈ܘܗܝ ܘܪ̈ܓܠܘܗܝ ܡܠܟܘܬܐ ܕܒ̈ܢܝ ܥܣܘ܂ ܘܟܐܦܐ ܕܡܚܬܗ ܠܨܠܡܐ ܘܫܚܩܬܗ ܘܡܠܬ ܡܢܗ ܟܠܗ ܐܪܥܐ܂ ܡܠܟܘܬܐ ܕܡܠܟܐ ܡܫܝܚܐ܂ ܕܡܒܛܠ ܡܠܟܘܬܐ ܕܗܢܐ ܥܠܡܐ܂ ܘܗܘ ܡܡܠܟ ܠܥܠܡ ܥܠܡܝܢ܀

ܬܘܒ ܫܡܥ ܥܠ ܚܙܘܐ ܕܐܪܒܥ ܚܝ̈ܘܢ ܕܚܙܐ ܕܢܝܐܝܠ܂ ܟܕ ܣܠܩܢ ܡܢ ܝܡܐ܂ ܘܡܫܓܢܝܢ ܚܕܐ ܡܢ ܚܕܐ܂ ܘܗܢܐ ܗܘ ܚܙܘܗܝܢ܂ ܩܕܡܝܬܐ ܐܝܟ ܐܪܝܐ܂ ܘܓ̈ܦܐ ܕܢܫܪܐ ܐܝܬ ܠܗ܂ ܘܚܙܝܬ ܕܐܬܡܪܛܘ ܓ̈ܦܝܗ܂ ܘܐܝܟ ܐܢܫܐ ܥܠ ܪ̈ܓܠܝܗ ܩܡܬ܂ ܘܠܒܐ ܕܐܢܫܐ ܐܬܝܗܒ ܠܗ܂ ܘܚܝܘܬܐ ܕܬܪ̈ܬܝܢ ܕܡܝܐ ܠܕܒܐ܂ ܘܠܚܕ ܣܛܪ ܩܡܬ܂ ܘܬܠܬ ܐ̈ܠܥܝܢ ܒܦܘܡܗ ܒܝܬ ܫܢ̈ܝܗ܂ ܘܚܝܘܬܐ ܕܬܠܬ ܐܝܟ ܢܡܪܐ܂ ܘܐܝܬ ܠܗ ܐܪܒܥܐ ܓ̈ܦܝܢ ܘܐܪܒܥܐ ܪ̈ܫܝܢ܂ ܘܚܝܘܬܐ ܪܒܝܥܝܬܐ ܕܚܝܠܐ ܘܥܫܝܢܐ ܘܬܩܝܦܐ ܝܬܝܪܐܝܬ܂ ܘܫ̈ܢܐ ܪܘܪ̈ܒܬܐ ܐܝܬ ܠܗ܂ ܐܟܠܐ ܘܡܕܩܐ ܘܡܕܡ ܕܡܘܬܪܐ ܒܪ̈ܓܠܝܗ ܕܝܫܐ܂ ܝܡܐ ܓܝܪ ܪܒܐ ܕܚܙܐ ܕܢܝܐܝܠ܂ ܗܢܘ ܥܠܡܐ܂ ܘܗܠܝܢ ܐܪܒܥ ܚܝ̈ܘܢ܂ ܗܠܝܢ ܐܪܒܥ ܡ̈ܠܟܘܢ܂ ܕܡܢ ܠܥܠ ܪ̈ܫܝܡܢ܀

ܚܝܘܬܐ ܓܝܪ ܩܕܡܝܬܐ ܐܡܪ ܥܠܝܗ܂ ܕܕܡܝܐ ܠܐܪܝܐ܂ ܘܓ̈ܦܐ ܕܢܫܪܐ ܐܝܬ ܠܗ܂ ܚܝܘܬܐ ܓܝܪ ܩܕܡܝܬܐ ܐܝܬܝܗ ܡܠܟܘܬܐ ܕܒܒܠ܂ ܕܕܡܝܐ ܠܐܪܝܐ܂ ܗܟܢܐ ܓܝܪ ܟܬܒ ܐܪܡܝܐ ܘܐܡܪ܂ ܢܩܝܐ ܛܥܝܬܐ ܐܝܣܪܝܠ܂ ܐܪ̈ܝܘܬܐ ܐܛܥܝܘ ܐܢܘܢ܂ ܩܕܡܝܐ ܐܟܠܗ ܡܠܟܐ ܕܐܬܘܪ܂ ܘܗܢܐ ܐܚܪܝܐ܂ ܥܫܢ ܡܢܗ ܢܒܘܟܕܢܨܪ ܡܠܟܐ ܕܒܒܠ܂ ܘܐܪܝܐ ܩܪܝܗܝ ܐܪܡܝܐ ܘܐܡܪ܂ ܕܓ̈ܦܐ ܕܢܫܪܐ ܐܝܬ ܠܗ܂ ܗܟܢܐ ܓܝܪ ܟܬܝܒ܂ ܕܟܕ ܢܦܩ ܢܒܘܟܕܢܨܪ ܠܡܕܒܪܐ ܥܡ ܚܝ̈ܘܬܐ܂ ܣܥܪܗ ܐܪܒܐ ܐܝܟ ܕܢܫܪܐ܂ ܘܐܡܪ ܕܚܙܝܬ ܕܐܬܡܪܛܘ ܓܦܝ̈ܗ܂ ܘܥܠ ܪ̈ܓܠܝܗ ܐܝܟ ܐܢܫܐ ܩܡܬ܂ ܘܠܒܐ ܕܐܢܫܐ ܐܬܝܗܒ ܠܗ܂ ܠܘܩܕܡ ܓܝܪ ܒܚܙܘܐ ܕܨܠܡܐ ܐܬܡܬܠ ܒܕܗܒܐ܂ ܕܡܝܬܪ ܡܢ ܟܠ ܡܕܡ ܕܡܫܬܡܫ ܒܥܠܡܐ܂ ܘܒܚܙܘܐ ܕܚܝܘ̈ܬܐ ܐܬܡܬܠ܂ ܒܐܪܝܐ ܕܡܝܬܪ ܒܬܩܝܦܘܬܗ܂ ܡܢ ܟܠܗܝܢ ܚܝ̈ܘܬܐ܂ ܘܐܬܡܬܠ ܬܘܒ ܒܢܫܪܐ ܕܢܨܝܚ ܡܢ ܟܠܗ ܦܪܚܬܐ܂ ܡܕܡ ܕܟܬܝܒ ܥܠܘܗܝ ܐܫܬܠܡ ܒܗ܂ ܐܡܪ ܓܝܪ ܥܠܘܗܝ ܡܪܝܐ܂ ܕܐܢܐ ܗܘ ܝܗܒܬܗ ܢܝܪܐ ܕܦܪܙܠܐ܂ ܥܠ ܨܘܪܐ ܕܟܠܗܘܢ ܥܡ̈ܡܐ܂ ܘܢܦܠܚܘܢ ܠܡܠܟܐ ܕܒܒܠ ܫܒܥܝܢ ܫ̈ܢܝܢ܂ ܘܐܦ ܚܝܘܬܐ ܕܒܪܐ ܘܦܪܚܬܐ ܕܫܡܝܐ܂ ܝܗܒܬ ܠܗ ܠܡܦܠܚܗ܂ ܟܕ ܗܘܐ ܓܝܪ ܡܠܟܐ ܒܕܡܘܬ ܪܫܐ ܕܕܗܒܐ ܦܠܚܘܗܝ ܒ̈ܢܝ ܐܢܫܐ܂ ܐܝܟ ܕܠܡܠܟܐ܂ ܘܟܕ ܢܦܩ ܠܡܕܒܪܐ ܦܠܚܝܗܝ ܚܝܘܬܐ/ܚܝ̈ܘܬܐ/ ܐܝܟ ܕܠܐܪܝܐ܂ ܘܟܕ ܗܘܐ ܣܥܪܗ ܐܝܟ ܕܢܫܪܐ܂ ܦܠܚܬܗ ܦܪܚܬܐ ܕܫܡܝܐ ܐܝܟ ܕܠܢܫܪܐ܂ ܘܟܕ ܐܬܪܝܡ ܠܒܗ ܘܠܐ ܐܝܕܥ ܕܫܘܠܛܢܐ ܡܢ ܫܡܝܐ ܗܘ ܐܬܝܗܒ ܠܗ܂ ܐܬܬܒܪ ܠܗ ܢܝܪܐ ܕܦܪܙܠܐ ܡܢ ܨܘܪܐ ܕܒܢ̈ܝ ܐܢܫܐ܂ ܘܢܦܩ ܥܡ ܚܝܘ̈ܬܐ܂ ܘܚܠܦ ܠܒܐ ܕܡܠܟܐ ܐܬܝܗܒ ܠܗ ܠܒܐ ܕܐܪܝܐ܂ ܘܟܕ ܐܫܬܩܠ ܥܠ ܚܝܘܬܐ܂ ܐܫܬܩܠ ܡܢܗ ܠܒܐ ܕܐܪܝܐ܂ ܘܐܬܝܗܒ ܠܗ ܠܒܐ ܕܦܪܚܬܐ܂ ܘܟܕ ܝܥܘ ܠܗ ܓ̈ܦܐ ܐܝܟ ܕܢܫܪܐ܂ ܐܬܪܝܡ ܠܗ ܥܠ ܦܪܚܬܐ܂ ܘܗܝܕܝܢ ܐܬܡܪܛܘ ܠܗܘܢ ܐܦ ܓ̈ܦܘܗܝ܂ ܘܐܬܝܗܒ ܠܗ ܠܒܐ ܫܦܠܐ܂ ܘܟܕ ܝܕܥ ܕܫܠܝܛ ܗܘ ܡܪܝܡܐ ܒܡܠܟܘܬܐ ܕܐܢܫܐ܂ ܕܠܡܢ ܕܨܒܐ ܢܬܠܝܗ܂ ܗܝܕܝܢ ܫܒܚ ܐܝܟ ܒܪ ܐܢܫܐ܀

ܘܚܝܘܬܐ ܕܬܪ̈ܬܝܢ ܐܡܪ ܥܠܝܗ܂ ܕܕܡܝܐ ܠܕܒܐ܂ ܘܥܠ ܚܕ ܣܛܪ ܩܡܬ܂ ܡܛܘܠ ܕܟܕ ܩܡܬ ܡܠܟܘܬ ܡܕܝ ܘܦܪܣ܂ ܒܡܕܢܚܐ ܩܡܬ܂ ܘܬܠܬ ܐ̈ܠܥܝܢ ܒܦܘܡܗ܂ ܡܛܠ ܕܡܕܩܪ ܗܘܐ ܕܟܪܐ ܠܡܥܪܒܐ ܘܠܓܪܒܝܐ ܘܠܬܝܡܢܐ܂ ܠܬܠܬ ܪ̈ܘܚܝ ܫܡܝܐ܂ ܗܢܝܢ ܗܠܝܢ ܬܠܬ ܪ̈ܘܚܐ ܐܚܝܕ ܗܘܐ܂ ܘܡܕܩܪ ܒܕܡܘܬ ܬܠܬ ܐ̈ܠܥܝܢ ܕܒܦܘܡܗ ܕܕܒܐ܂ ܥܕܡܐ ܕܢܦܩ ܨܦܪܝܐ ܡܢ ܡܥܪܒܐ܂ ܘܡܚܝܗܝ ܠܕܟܪܐ܂ ܘܐܥܕܝ ܐܠܥ̈ܐ ܕܒܦܘܡܗ܀

ܘܚܝܘܬܐ ܕܬܠܬ ܐܡܪ ܥܠܝܗ ܕܕܡܝܐ ܠܢܡܪܐ܂ ܘܐܝܬ ܠܗ ܓ̈ܦܐ ܐܪܒܥܐ ܕܦܪܚܬܐ܂ ܥܠ ܓܒ̈ܝܗ܂ ܘܐܪܒܥܐ ܪ̈ܫܝܢ ܐܝܬ ܠܗ ܠܚܝܘܬܐ ܗܝ܂ ܚܝܘܬܐ ܓܝܪ ܕܬܠܬ܂ ܐܝܬܘܗܝ ܐܠܟܣܢܕܪܘܣ ܡܩܕܘܢܝܐ܂ ܬܩܝܦ ܗܘܐ ܓܝܪ ܐܝܟ ܢܡܪܐ܂ ܘܐܪܒܥܐ ܓ̈ܦܝܢ ܘܐܪܒܥܐ ܪ̈ܫܝܢ ܕܐܝܬ ܠܚܝܘܬܐ܂ ܡܛܠ ܕܝܗܒ ܡܠܟܘܬܐ ܠܐܪܒܥܐ ܪ̈ܚܡܘܗܝ ܕܢܕܒܪܘܢ ܒܬܪܗ܂ ܟܕ ܐܬܐ ܘܩܛܠܗ ܠܕܪܝܘܫ ܘܐܡܠܟ ܚܠܦܘܗܝ܀

ܘܚܝܘܬܐ ܪܒܝܥܝܬܐ ܐܡܪ܂ ܕܕܚܝܠܐ ܘܥܫܝܢܐ܂ ܘܬܩܝܦܐ ܝܬܝܪܐܝܬ܂ ܐܟܠܐ ܘܡܕܩܐ܂ ܘܡܕܡ ܕܡܘܬܪܐ ܒܪ̈ܓܠܝܗ ܕܝܫܐ܂ ܐܝܬܝܗ ܕܝܢ ܡܠܟܘܬܐ ܕܒ̈ܢܝ ܥܣܘ܂ ܡܛܘܠ ܕܡܢ ܒܬܪ ܕܐܡܠܟ ܗܘܐ ܐܠܟܣܢܕܪܘܣ ܡܩܕܘܢܝܐ܂ ܗܘܬ ܠܗ ܡܠܟܘܬܐ ܕܝܘ̈ܢܝܐ܂ ܟܕ ܐܦ ܗܘ ܐܠܟܣܢܕܪܘܣ ܡܢܗܘܢ ܗܘ ܡܢ ܝܘܢ̈ܝܐ܂ ܐܠܐ ܚܙܘܗ ܕܚܝܘܬܐ ܬܠܝܬܝܬܐ ܥܠܘܗܝ ܗܘ ܫܠܡ܂ ܟܕ ܚܕܐ ܗܝ ܬܠܝܬܝܬܐ ܘܪܒܝܥܝܬܐ܂ ܐܡܠܟ ܕܝܢ ܐܠܟܣܢܕܪܘܣ ܫܢ̈ܝܢ ܬܪ̈ܬܥܣܪܐ܂ ܘܗܘܘ ܡ̈ܠܟܐ ܕܝܘܢ̈ܝܐ ܡܢ ܒܬܪ ܒܬܪ ܐܠܟܣܢܕܪܘܣ܂ ܗܘܝܢ ܫܒܬܥܣܪ ܡ̈ܠܟܝܢ܂ ܘܗܘܝܢ ܫܢܝ̈ܗܘܢ ܡܐܬܝܢ ܘܫܬܝܢ ܘܬܫܥ ܫܢ̈ܝܢ܂ ܡܢ ܣܠܘܩܘܣ ܢܝܩܢܘܪ܂ ܘܥܕܡܐ ܠܦܛܠܡܐܘܣ܂ ܘܗܘܘ ܩܣܪ̈ܝܢܐ܂ ܡܢ ܐܓܘܣܛܘܣ ܘܥܕܡܐ ܠܦܝܠܝܦܘܣ ܩܣܪܝܢܐ܂ ܥܣܪܝܢ ܘܫܒܥܐ ܡ̈ܠܟܝܢ܂ ܘܗܘܝܢ ܫܢ̈ܝܗܘܢ ܡܐܬܝܢ ܘܬܫܥܝܢ ܘܬܠܬ ܫ̈ܢܝܢ: ܘܫ̈ܢܝܢ ܬܡܢܥܣܪ̈ܐ ܕܣܘܪܘܣ܀

ܐܡܪ ܓܝܪ ܕܢܝܐܝܠ ܕܡܣܬܟܠ ܗܘܝܬ܂ ܒܩܪ̈ܢܬܐ ܥܣܪ ܕܒܪܫܗ ܕܚܝܘܬܐ܂ ܩܪ̈ܢܬܐ ܓܝܪ ܥܣܪ܂ ܥܣܪܐ ܡ̈ܠܟܝܢ ܩܡܘ ܒܗܘ ܙܒܢܐ܂ ܥܕܡܐ ܠܐܢܛܝܟܘܣ܂ ܘܐܡܪ ܕܩܪܢܐ ܙܥܘܪܬܐ ܣܠܩܬ ܡܢ ܒܝܢܬ ܗܠܝܢ ܥܣܪ܂ ܘܬܠܬ ܢܦܠ ܡܢ ܩܕܡܝܗ܂ ܟܕ ܩܡ ܓܝܪ ܐܢܛܝܟܘܣ ܒܡܠܟܘܬܐ܂ ܡܟܟ ܬܠܬܐ ܡ̈ܠܟܝܢ܂ ܘܐܬܪܝܡ ܥܠ ܩܕܝ̈ܫܐ ܕܡܪܝܡܐ܂ ܘܥܠ ܠܐܪܫܠܡ/ܠܐܘܪܫܠܡ܂/ ܘܛܡܐ ܒܝܬ ܡܩܕܫܐ܂ ܘܒܛܠ ܕܒܚܬܐ ܘܩܘܪ̈ܒܢܐ܂ ܫܒܘܥܐ ܘܦܠܓܘܬ ܫܒܘܥܐ܂ ܕܗܘܝܢ ܫܢܝ̈ܐ ܥܣܪ ܘܦܠܓܗ܂ ܘܐܥܠ ܙܢܝ̈ܐ ܠܒܝܬܗ ܕܡܪܝܐ܂ ܘܒܛܠ ܢܛܘܪ̈ܬܐ ܕܒܢܡܘܣܐ܂ ܘܩܛܠ ܒܢܝ̈ܢܫܐ ܙܕܝܩ̈ܐ܂ ܘܐܫܠܡ ܠܦܪܚܬܐ ܕܫܡܝܐ܂ ܘܠܚܝܘܬܐ ܕܐܪܥܐ܂ ܫܠܡܬ ܓܝܪ ܒܝܘ̈ܡܬܗ܂ ܡܠܬܐ ܕܐܡܪ ܕܘܝܕ܂ ܕܐܠܗܐ ܥܠܘ ܥܡ̈ܡܐ ܠܝܪܬܘܬܟ܂ ܘܛܡܐܘ ܠܗܝܟܠܟ ܩܕܝܫܐ܂ ܥܒܕܘܗ ܠܐܘܪܫܠܡ ܚܪܒܬܐ܂ ܝܗܒܘ ܫ̈ܠܕܐ ܕܥܒ̈ܕܝܟ ܡܐܟܘܠܬܐ ܠܦܪܚܬܐ ܕܫܡܝܐ܂ ܘܒܣܪܐ ܕܙܕܝܩ̈ܝܟ ܠܚܝܘܬܐ ܕܐܪܥܐ܂ ܐܫܕܘ ܕܡܗܘܢ ܐܝܟ ܡܝܐ܂ ܚܕܪ̈ܝܗ ܕܐܘܪܫܠܡ܂ ܘܠܝܬ ܕܩܒܪ܂܂܂܂ ܗܕܐ ܓܝܪ ܒܗܘ ܙܒܢܐ ܫܠܡܬ܂ ܟܕ ܐܬܩܛܠ ܓܒܪܐ ܣܒܐ ܘܥܬܝܩ ܝܘܡ̈ܬܐ܂ ܐܠܝܥܙܪ܂ ܘܒ̈ܢܝ ܫܡܘܢܝ ܛܘܒܢܝܬܐ܂ ܕܗܘܝܢ ܫܒܥܐ܂ ܘܟܕ ܝܗܘܕܐ ܘܐܚ̈ܘܗܝ ܡܬܟܬܫܝܢ ܗܘܘ ܥܠ ܐ̈ܦܝ ܥܡܗܘܢ܂ ܟܕ ܥܡܪܝܢ ܗܘܘ ܒܛܫܝ̈ܬܐ܂ ܒܗܘ ܙܒܢܐ ܥܒܕܬ ܩܪܢܐ ܩܪܒܐ ܥܡ ܩܕܝܫ̈ܐ܂ ܘܐܬܡܨܝܬ ܚܝܠܗܘܢ܂ ܘܡ̈ܠܐ ܥܠ ܡܪܝܡܐ ܡܠܠ ܐܢܛܝܟܘܣ ܓܒܪܐ ܥܘܠܐ܂ ܘܚܠܦ ܙܒ̈ܢܐ ܘܥ̈ܕܢܐ܂ ܘܒܛܠ ܩܝܡܐ ܕܐܒܪܗܡ܂ ܘܫܪܐ ܫܒܬܐ ܕܢܝܚܐ܂ ܦܩܕ ܓܝܪ ܥܠ ܝܗܘ̈ܕܝܐ ܕܠܐ ܢܗܘܘܢ ܓܙܪܝܢ܂ ܡܛܠ`ܗܢܐ ܐܡܪ ܥܠܘܗܝ܂ ܕܢܣܒܪ ܠܡܚܠܦܘ ܙܒ̈ܢܐ ܘܥܕ̈ܢܐ ܘܢܡܘܣ̈ܐ܂ ܘܐܬܝܗܒܘ ܒܐܝܕܗ܂ ܥܕ ܥܕܢ ܥ̈ܕܢܝܢ ܘܦܠܓܘܬ ܥܕܢ܂ ܕܐܝܬܘܗܝ ܥܕܢ ܘܦܠܓܘܬ ܥܕܢ܂ ܫܒܘܥܐ ܘܦܠܓܗ܂ ܕܐܝܬܝܗܝܢ ܥܣܪ ܫܢ̈ܝܢ ܘܦܠܓܗ܂ ܐܡܪ ܬܘܒ܂ ܘܕܝܢܐ ܝܬܒ ܘܫܘܠܛܢܗ ܫܩܠܘ ܡܢܗ܂ ܕܢܚܒܠܘܢܗ ܘܢܘܒܕܘܢܗ ܥܕܡܐ ܠܣܘܦܗ ܕܡܠܟܘܬܐ܂ ܡܛܝ ܓܝܪ ܕܝܢܐ ܠܐܢܛܝܟܘܣ܂ ܕܝܢܐ ܡܢ ܫܡܝܐ܂ ܘܐܬܟܪܗ ܒܟܘܪܗܢܐ ܥܛܠܐ ܘܒܝܫܐ܂ ܘܡܢ ܪܝܚܗ ܕܣܪܝ܂ ܐܢܫ ܠܐ ܩܪܒ ܗܘܐ ܠܘܬܗ܂ ܟܕ ܬܘ̈ܠܥܐ ܪ̈ܚܫܢ ܗܘ̈ܝ ܘܢܦܩܢ ܡܢܗ܂ ܘܐܟܠܢ ܒܣܪܗ܂ ܥܠ ܕܐܠܨ ܠܬܘܠܥܗ ܕܝܥܩܘܒ܂ ܘܣܪܝ ܒܣܪܗ ܒܚܝ̈ܘܗܝ܂ ܥܠ ܕܐܣܪܝ ܫ̈ܠܕܐ ܕܒ̈ܢܝ ܐܪܫܠܡ/ܐܘܪܫܠܡ܂/ ܘܠܐ ܐܬܩܒܪܘ܂ ܘܗܘܐ ܛܡܐܐ ܒܥ̈ܝܢܝ ܢܦܫܗ܂ ܥܠ ܕܛܡܐ ܡܩܕܫܗ ܕܐܠܗܐ܂ ܘܨܠܝ ܘܠܐ ܐܫܬܡܥ܂ ܥܠ ܕܠܐ ܫܡܥ ܐܢܩܬܐ ܕܙܕܝ̈ܩܐ ܕܩܛܠ܂ ܟܬܒ ܓܝܪ ܐܓܪܬܐ ܘܫܕܪ ܠܝܗܘ̈ܕܝܐ܂ ܘܩܪܐ ܐܢܘܢ ܪ̈ܚܡܝ܂ ܘܠܐ ܪܚܡ ܥܠܘܗܝ ܐܠܗܐ܂ ܘܒܗ ܒܬܫܢܝܩܗ ܡܝܬ܀

ܐܡܪ ܬܘܒ ܕܢܩܒܠܘܢ ܡܠܟܘܬܐ ܩܕ̈ܝܫܐ ܕܡܪܝܡܐ܂ ܡܢܐ ܢܐܡܪ ܥܠ ܗܕܐ܂ ܕܠܡܐ ܒܢ̈ܝ ܐܝܣܪܝܠ ܩܒܠܘ ܡܠܟܘܬܐ ܕܡܪܝܡܐ܂ ܚܣ܂ ܐܘ ܕܠܡܐ ܗܘ ܥܡܐ ܐܬܐ ܥܠ ܥ̈ܢܢܝ ܫܡܝܐ܂ ܗܕܐ ܥܒܪܬ ܠܗ ܡܢܗܘܢ܂ ܐܡܪ ܓܝܪ ܥܠܝܗܘܢ ܐܪܡܝܐ܂ ܟܣܦܐ ܡܣܠܝܐ ܩܪܘ ܐܢܘܢ܂ ܡܛܠ ܕܐܣܠܝ ܐܢܘܢ ܡܪܝܐ܂ ܬܘܒ ܐܡܪ܂ ܕܠܐ ܢܘܣܦ ܠܡܚܪ ܒܗܘܢ܂ ܘܐܫܥܝܐ ܐܡܪ ܥܠܝܗܘܢ܂ ܥܒܪܘ ܥܒܪܘ ܘܠܛܡ̈ܐܐ ܠܐ ܬܬܩܪܒܘܢ܂ ܘܥܠ ܩܕܝ̈ܫܐ ܕܡܪܝܡܐ ܗܟܢܐ ܐܡܪ ܥܠܝܗܘܢ܂ ܕܠܥܠܡ ܥܠܡܝܢ ܢܐܪܬܘܢܗ ܠܡܠܟܘܬܐ܂ ܗܢܘܢ ܓܝܪ ܐܬܢܝܚܘ ܩܠܝܠ܂ ܡܢ ܫܩܠܐ ܕܡ̈ܠܟܐ ܘܕܫ̈ܠܝܛܢܐ܂ ܡܢ ܒܬܪ ܓܝܪ ܡܘܬܗ ܕܐܢܛܝܟܘܣ܂ ܥܕܡܐ ܕܡܠܘ ܫܒ̈ܘܥܐ ܫܬܝܢ ܘܬܪ̈ܝܢ܂ ܘܐܬܐ ܒܪ ܐܢ̈ܫܝܢ ܕܢܚܪܪ ܐܢܘܢ ܘܢܟܢܫ ܐܢܘܢ܂ ܘܗܢܘܢ ܠܐ ܩܒܠܘܗܝ܂ ܐܬܐ ܓܝܪ ܕܢܣܒ ܡܢܗܘܢ ܦܐܪ̈ܐ ܘܠܐ ܝܗܒܘ ܠܗ܂ ܡܛܠ ܕܗ̈ܘܝ ܠܗܘܢ ܓܘ̈ܦܢܝܗܘܢ ܡܢ ܓܦܬܐ ܕܣܕܘܡ܂ ܘܡܢ ܫܬܠܬܐ ܕܥܡܘܪܐ܂ ܟܪܡܐ ܓܝܪ ܝܥܘ ܒܗ ܟܘ̈ܒܐ܂ ܘܛܥܢ ܠܗ ܚܪ̈ܘܒܐ܂ ܘܚܡܪܗܘܢ ܗܘܐ ܠܗ ܚܠܐ܂ ܘܦܐܪ̈ܝܗܘܢ ܡܪܪܐ܂ ܠܐ ܡܫܟܚܝܢ ܟܘܒ̈ܐ ܠܡܬܪܟܟܘ܃ ܐܦ ܠܐ ܚܠܐ ܗܦܟ ܠܟܝܢܐ ܕܚܡܪܐ܂ ܐܦ ܠܐ ܡܪܪܐ ܡܬܗܦܟܢ ܠܟܝܢܐ ܚܠܝܐ܀

ܩܕܡ ܓܝܪ ܐܫܥܝܐ ܐܘܬܒ ܥܠܝܗܘܢ ܕܝ̈ܢܐ܂ ܓܒܪ̈ܐ ܡܢ ܝܗܘܕܐ܂ ܕܐܬܢܨܒܬ ܒܗܘܢ ܢܨܒܬܐ ܚܕܬܬܐ/ܚܕܬܐ/ ܘܚܒܝܒܬܐ܂ ܕܐܝܬܝܗܘܢ ܕܝܢ ܗܠܝܢ ܕܝ̈ܢܐ܂ ܗܢܘܢ ܕܝܬܒܝܢ ܥܠ ܬܪܥܣܪ ܟܘܪ̈ܣܘܢ܂ ܘܕܝ̈ܢܝܢ ܠܬܪ̈ܬܥܣܪܐ ܫܪ̈ܒܬܗܘܢ܂ ܘܗܟܢܐ ܐܡܪ ܠܗܘܢ ܠܕܝ̈ܢܐ܂ ܕܘܢܘ ܒܝܢܝ ܘܠܟܪܡܝ܂ ܡܢܐ ܠܡ ܬܘܒ ܘܠܐ ܗܘܐ ܐܘܢ ܓܒܪ̈ܐ ܕܝ̈ܢܐ܂ ܠܡܥܒܕ ܠܟܪܡܝ ܘܠܐ ܥܒܕܬ ܠܗ܂ ܕܗܐ ܢܨܒܬܗ ܫܒܘ̈ܩܐ܂ ܘܗܘܘ ܠܗܘܢ ܓܦܬܐ ܢܘܟܪܝܬܐ܂ ܐܚܕܪܬ ܣܝܓܗ ܥܝܪ̈ܝ ܫܡܝܐ܂ ܘܒܢܝܬ ܡܓܕܠܗ ܗܝܟܠܐ ܩܕܝܫܐ܂ ܘܚܦܪܬ ܡܥܨܪܬܗ ܡܥܡܘܕܝܬܐ ܕܟܗ̈ܢܐ܂ ܘܐܚܬܬ ܥܠܘܗܝ ܡܛܪܐ ܡ̈ܠܝ ܢܒ̈ܝܝ܂ ܘܟܣܚܬܗ ܘܦܠܚܬܗ ܡܢ ܥܒ̈ܕܐ ܕܐܡܘܪ̈ܝܐ܂ ܣܟܝܬ ܕܢܥܒܕ ܥܢ̈ܒܐ ܙܕܝܩܘܬܐ܂ ܘܥܒܕ ܠܗ ܚܪ̈ܘܒܐ ܥܘܠܐ ܘܚܛܝܬܐ܂ ܣܟܝܬ ܠܕܝܢܐ ܘܗܘܐ ܚܛܘܦܝܐ܂ ܘܠܙܕܝܩܘܬܐ ܘܗܘܐ ܝܠܠܬܐ܂܂܂܂܂ ܫܡܥܘ ܓܒܪ̈ܐ ܕܝ̈ܢܐ ܡܕܡ ܕܥܒܕܢܐ ܠܗ ܠܟܪܡܝ܂ ܬܪܥ ܐܢܐ ܣܝܓܗ ܘܢܗܘܐ ܠܕܝܫܐ܂ ܘܥܩܪ ܐܢܐ ܡܓܕܠܗ ܘܢܗܘܐ ܠܒܙܬܐ܂ ܘܐܥܒܕܗ ܕܚܘܪܒܐ ܢܗܘܐ܂ ܥܠ ܕܥܒܕ ܚܪ̈ܘܒܐ܂ ܘܠܐ ܢܬܦܠܚ ܘܠܐ ܢܬܟܣܚ܂ ܘܢܐܥܘܢ ܒܗ ܟܘܒ̈ܐ ܘܝܥܪܐ܂ ܘܐܦܩܘܕ ܠܥܢ̈ܢܐ ܕܠܐ ܢܚܬܢ ܥܠܘܗܝ ܡܛܪܐ܂ ܦܪܩܘ ܓܝܪ ܥܝܪ̈ܝ ܫܡܝܐ ܡܢ ܣܝܓܗ ܕܟܪܡܐ܂ ܘܐܬܥܩܪ ܡܓܕܠܐ ܒܝܬ ܬܘܟܠܢܗܘܢ ܥܫܝܢܐ܂ ܐܣܬܚܦܬ ܡܥܨܪܬܐ ܬܕܟܝܬܐ ܕܚܘ̈ܒܝܗܘܢ܂ ܟܕ ܕܕܠܐ ܡܘܡ ܗܘܬ ܓܦܬܐ܂ ܠܐ ܐܙܠܐ ܗܘܬ ܠܥܒܕܐ܂ ܗܫܐ ܕܐܟܠܬܗ ܢܘܪܐ ܘܚܪܒܬ܂ ܐܝܟܢܐ ܐܙܠܐ ܠܥܒܕܐ܂ ܬܪ̈ܬܝܢ ܣܘ̈ܟܝܗ ܐܟܠܬ ܢܘܪܐ܂ ܘܓܘܗ ܚܪܒ܂ ܬܪ̈ܬܝܢ ܓܝܪ ܣܘ̈ܟܝܗ ܬܪ̈ܬܝܢ ܡ̈ܠܟܘܬܐ܂ ܘܓܘܗ ܕܚܪܒ ܐܝܬܝܗ ܐܘܪܫܠܡ܂ ܐܫܬܕܪܘ ܠܘܬܗܘܢ ܡܢ ܡܪܐ ܟܪܡܐ ܥܒ̈ܕܐ ܣ̈ܓܝܐܐ܂ ܘܩܛܠܘ ܐܢܘܢ܂ ܘܦܐܪ̈ܐ ܠܡܪܐ ܟܪܡܐ ܠܐ ܫܕܪܘ܂ ܒܐܚܪܝܬ ܥܒ̈ܕܐ ܐܫܬܕܪ ܒܪܐ ܚܒܝܒܐ܂ ܕܢܣܒ ܡܢܗܘܢ ܦܐܪ̈ܐ܂ ܘܢܘܒܠ ܠܡܫܕܪܢܗ܂ ܘܐܚܕܘܗܝ ܗܢܘܢ ܘܐܦܩܘܗܝ ܠܒܪ ܡܢ ܟܪܡܐ܂ ܘܦܣܩܘ ܣ̈ܟܐ ܡܢ ܗ̈ܛܛܘܗܝ ܕܟܪܡܐ܂ ܘܩܒܥܘ ܒܐܝ̈ܕܘܗܝ܂ ܘܟܦܢ ܘܒܥܐ ܡܢܗܘܢ ܠܡܐܟܠ܂ ܘܫܩܠܘ ܝܗܒܘ ܠܗ ܡܪܪܐ ܡܢ ܦܐܪ̈ܘܗܝ ܕܟܪܡܐ܂ ܘܨܗܝ ܘܒܥܐ ܡܢܗܘܢ ܠܡܫܬܐ܂ ܘܝܗܒܘ ܠܗ ܚܠܐ ܘܠܐ ܨܒܐ ܠܡܫܬܐ܂ ܘܓܕܠܘ ܟܘ̈ܒܐ ܕܝܥܘ ܒܗ ܒܟܪܡܐ܂ ܘܣܡܘ ܠܗ ܒܪܫܗ ܕܒܪ ܡܪ̈ܘܗܝ ܕܟܪܡܐ܂ ܡܢ ܙܒܢܐ ܓܝܪ ܕܗܘܐ ܟܪܡܐ܂ ܗܠܝܢ ܦܐܪ̈ܐ ܚܘܝ܂ ܥܩܪܗ ܡܪܗ ܘܫܕܝܗܝ ܒܢܘܪܐ܂ ܘܢܨܒ ܒܗ ܒܟܪܡܐ ܓܘ̈ܦܢܐ ܛܒ̈ܬܐ܂ ܕܝܗܒܢ ܦܐܪ̈ܐ ܘܡܚܕܝܢ ܠܦܠܚܐ܂ ܟܪܡܐ ܓܝܪ ܡܫܝܚܐ ܗܘ܂ ܘܐܒܘܗܝ ܦܠܚܐ܂ ܘܓܘ̈ܦܢܐ ܗܢܘܢ ܕܫܬܝܢ ܡܢ ܟܣܗ܂ ܡܟܝܠ ܗܘܐ ܟܪܡܐ ܚܠܦ ܟܪܡܐ܂ ܘܡܠܟܘܬܐ ܬܘܒ ܒܡܐܬܝܬܗ܂ ܐܫܠܡܗ ܠܪ̈ܗܘܡܝܐ܂ ܕܐܬܩܪܝܘ ܒ̈ܢܝ ܥܣܘ܂ ܘܗܢܘܢ ܒ̈ܢܝ ܥܣܘ ܢܛܪܝܢ ܡܠܟܘܬܐ ܠܝܗܘܒܗ܀

ܘܡܠܟܘܬ ܥܠܡ ܝܪܬ ܥܡܐ ܩܕܝܫܐ܂ ܕܐܬܓܒܝ ܚܠܦ ܥܡܐ܂ ܐܛܢ ܐܢܘܢ ܓܝܪ ܒܥܡ ܕܠܐ ܥܡ܂ ܘܒܥܡܐ ܣܟܠܐ ܐܪܓܙ ܐܢܘܢ܂ ܘܚܪܪ ܠܗ ܥܡܐ ܩܕܝܫܐ܂ ܗܐ ܓܝܪ ܟܠܗ ܩܝܡܗ ܕܐܠܗܐ ܡܚܪܪ܂ ܡܢ ܫܩܠܐ ܕܡ̈ܠܟܐ ܘܕܫܠܝ̈ܛܢܐ܂ ܐܦܢ ܓܝܪ ܠܚܢ̈ܦܐ ܦܠܚ ܒܪܢܫܐ܂ ܒܪܫܥܬܗ ܕܡܬܩܪܒ ܠܩܝܡܗ ܕܐܠܗܐ ܐܬܚܪܪ ܠܗ܂ ܘܝ̈ܗܘܕܝܐ ܦܠܚܝܢ ܥܒܕܘܬܐ ܒܝܬ ܥܡ̈ܡܐ܂ ܗܟܢܐ ܓܝܪ ܐܡܪ ܥܠܝܗܘܢ ܥܠ ܩܕܝ̈ܫܐ܂ ܕܢܐܪܬܘܢ ܠܡܠܟܘܬܐ ܕܬܚܝܬ ܫܡܝܐ܂ ܐܢ ܓܝܪ ܥܠܝܗܘܢ ܐܡܪ܂ ܠܡܢܐ ܦܠܚܝܢ ܥܒܕܘܬܐ ܒܝܬ ܥܡ̈ܡܐ܂ ܘܐܢ ܢܐܡܪܘܢ ܕܥܕܟܝܠ ܠܐ ܗܘܬ܂ ܐܠܐ ܗܘܝܐ ܡܠܟܘܬܐ ܕܡܬܝܗܒܐ ܠܒܪ ܐܢ̈ܫܝܢ܂ ܕܫܡܝܐ ܗܝ ܐܘ ܕܐܪܥܐ܂ ܘܗܐ܂ ܪܫܝܡܝܢ ܐܢܘܢ ܒ̈ܢܝܗ ܕܡܠܟܘܬܐ܂ ܘܩܒܠܘ ܚܪܘܪ̈ܝܗܘܢ ܡܢ ܗܢܐ ܥܠܡܐ܂ ܟܕ ܓܝܪ ܐܝܬܝܗ ܗܫܐ܂ ܠܐ ܨܒܝܐ ܕܬܫܬܥܒܕ ܠܚܝܠܗ ܕܡܠܟܐ܂ ܕܐܬܐ ܘܫܩܠ ܡܠܟܘܬܗ܂ ܐܠܐ ܢܛܪܐ ܗܡܝܪ̈ܘܗܝ ܒܐܝܩܪܐ܂ ܡܛܘܠ ܕܟܕ ܢܐܬܐ ܡܒܛܠ ܡܠܟܘܬܐ܂ ܕܠܐ ܒܪܘܓܙܐ ܢܐܬܐ ܥܠܝܗܘܢ܂ ܡܐ ܕܐܬܐ ܓܝܪ ܡܢ ܕܕܝܠܗ ܗܝ ܡܠܟܘܬܐ܂ ܒܡܐܬܝܬܗ ܕܬܪ̈ܬܝܢ܂ ܫܩܠ ܡܕܡ ܕܝܗܒ܂ ܘܗܘܐ ܗܘ ܡܠܟܐ ܠܥܠܡ ܥܠܡܝܢ܂ ܘܠܐ ܥܒܪܐ ܡܠܟܘܬܗ܂ ܡܛܠ ܕܗܘܝܐ ܠܗ ܡܠܟܘܬ ܥܠܡ܀

ܡܢ ܩܕܝܡ ܓܝܪ ܝܗܒ ܡܠܟܘܬܐ ܠܒ̈ܢܝ ܝܥܩܘܒ܂ ܘܫܥܒܕ ܠܗܘܢ ܒܢ̈ܝ ܥܣܘ܂ ܐܝܟ ܕܐܡܪ ܐܝܣܚܩ ܠܥܣܘ܂ ܕܠܝܥܩܘܒ ܐܚܘܟ ܬܦܠܘܚ܂ ܘܟܕ ܠܐ ܬܘܒ ܐܟܫܪܘ ܒܡܠܟܘܬܐ܂ ܫܩܠܗ ܡܢܗܘܢ ܕܒ̈ܢܝ ܝܥܩܘܒ܂ ܘܝܗܒܗ ܠܒ̈ܢܝ ܥܣܘ܂ ܥܕܡܐ ܕܐܬܐ ܡܢ ܕܕܝܠܗ ܗܝ܂ ܘܡܫܠܡܝܢ ܦܪܬܩܐ ܠܝܗܘܒܗ܂ ܘܠܐ ܟܝܡܝܢ ܥܠܝܗ܂ ܘܡܫܬܥܒܕ ܠܗ ܢܛܪ ܡܠܟܘܬܐ܂ ܠܗܘ ܕܟܠ ܠܗ ܡܫܬܥܒܕ܂ ܡܛܠ ܗܢܐ ܗܕܐ ܡܠܟܘܬܐ ܕܒܢ̈ܝ ܥܣܘ܂ ܠܐ ܡܫܬܠܡܐ ܒܝܕ ܚܝ̈ܠܐ ܟܢܝ̈ܫܐ ܕܨܒܝܢ ܕܢܣܩܘܢ ܥܠܝܗ܂ ܡܛܠ ܕܡܠܟܘܬܐ ܠܝܗܘܒܗ ܗܘ ܡܬܢܛܪܐ܂ ܘܗܘ ܡܢܛܪ ܠܗ܂܂܂܂܂ ܘܥܠ ܗܕܐ ܕܟܬܒܬ ܠܟ ܚܒܝܒܝ܂ ܕܡܠܟܘܬܐ ܕܒ̈ܢܝ ܥܣܘ ܠܝܗܘܒܗ ܗܘ ܡܬܢܛܪܐ܂ ܠܐ ܬܬܦܠܓ ܥܠܝܗ܂ ܕܠܐ ܡܙܕܟܝܐ ܗܝ ܡܠܟܘܬܐ܂ ܡܛܠ ܕܓܒܪܐ ܓܢܒܪܐ ܕܫܡܗ ܝܫܘܥ ܐܬܐ ܒܚܝܠܐ܂ ܘܙܝܢܗ ܫܩܝܠ ܟܠܗ ܚܝܠܐ ܕܡܠܟܘܬܐ܂ ܘܒܨܝ ܘܚܙܝ܂ ܕܐܦ ܒܟܣܦ ܪܫܐ ܥܡܗܘܢ ܟܬܝܒ܂ ܘܐܝܟܢܐ ܕܟܬܝܒ ܒܟܣܦ ܪܫܐ ܥܡܗܘܢ܂ ܐܦ ܡܥܕܪ ܠܗܘܢ܂ ܘܢܝܫܗ ܣܓܝ ܒܐܬܪܐ ܗܘ܂ ܘܙܝܢܗ ܠܒܝܫܝܢ ܘܠܐ ܚܝܒܝܢ ܒܩܪܒܐ܂ ܘܐܢ ܬܐܡܪ ܠܝ܂ ܕܠܡܢܐ ܒܫ̈ܢܝ ܡ̈ܠܟܐ ܕܩܕܡ ܗܠܝܢ܂ ܙܟܐܘܗ ܠܚܝܘܬܐ ܘܫܥܒܕܘܗ ܡܛܠ ܕܪ̈ܝܫܐ ܘܡ̈ܠܟܐ ܕܩܝܡܝܢ ܗܘܘ܂ ܒܗܘ ܙܒܢܐ ܒܡܠܟܘܬܐ ܕܒ̈ܢܝ ܥܣܘ܂ ܠܐ ܨܒܘ ܕܢܕܒܪܘܢ ܥܡܗܘܢ ܠܩܪܒܐ܂ ܠܓܒܪܐ ܕܟܬܝܒ ܥܡܗܘܢ ܒܟܣܦ ܪܫܐ܂ ܡܛܠ`ܗܢܐ ܐܫܬܥܒܕܬ ܚܝܘܬܐ ܩܠܝܠ܂ ܐܠܐ ܠܐ ܐܬܩܛܠܬ܀

ܗܠܝܢ ܕܝܢ ܕܟܬܒܬ ܠܟ ܚܒܝܒܝ ܡܕܡ ܕܟܬܝܒ ܒܕܢܝܐܝܠ܂ ܠܐ ܗܘܐ ܠܣܟܐ ܡܛܝܬ ܐܢܝܢ܂ ܐܠܐ ܠܟܐ ܡܢ ܣܟܐ܂ ܘܐܢ ܐܢܫ ܢܬܚܪܐ ܥܠܝܗܝܢ܂ ܗܟܢܐ ܐܡܪ ܠܗ܂ ܕܠܐ ܚܬܝܡܢ ܡ̈ܠܐ ܗܠܝܢ܂ ܡܛܠ ܕܡ̈ܠܘܗܝ ܕܐܠܗܐ ܠܐ ܡܣܬܝܟܢ܂ ܘܐܦܠܐ ܡܬܚܬܡܢ܂ ܒܪܢܫܐ ܓܝܪ ܣܟܠܐ ܐܡܪ܂ ܥܕܡܐ ܠܗܪܟܐ ܡܛܝܢ ܡ̈ܠܐ܂ ܘܬܘܒ ܠܝܬ ܠܡܘܣܦܘ ܥܠܝܗܝܢ܂ ܘܠܡܒܨܪ ܡܢܗܝܢ܂ ܥܘܬܪܗ ܓܝܪ ܕܐܠܗܐ ܠܐ ܡܬܚܫܒ ܘܠܐ ܡܣܬܝܟ܂ ܐܢ ܓܝܪ ܬܣܒ ܡܝܐ ܡܢ ܝܡܐ ܠܐ ܡܬܝܕܥ ܚܘܣܪܢܗ܂ ܘܐܢ ܬܫܩܘܠ ܚܠܐ ܡܢ ܣܦܬܗ܂ ܠܐ ܒܨܪ ܡܢܝܢܗ܂ ܘܐܢ ܬܡܢܐ ܟܘ̈ܟܒܝ ܫܡܝܐ܂ ܠܐ ܬܩܘܡ ܥܠ ܣܟܗܘܢ܂ ܘܐܢ ܬܕܠܩ ܢܘܪܐ ܡܢ ܝܩܕܢܐ܂ ܡܕܡ ܠܐ ܡܬܒܨܪ܂ ܘܐܢ ܬܣܒ ܡܢ ܪܘܚܗ ܕܡܫܝܚܐ܂ ܡܫܝܚܐ ܡܕܡ ܠܐ ܚܣܪ܂ ܘܐܢ ܡܫܝܚܐ ܢܥܡܪ ܒܟ܂ ܠܐ ܗܘܐ ܒܟ ܗܘ ܫܠܡ ܠܗ܂ ܘܐܢ ܬܥܘܠ ܫܡܫܐ ܒܟ̈ܘܐ ܕܒܝܬܟ܂ ܠܐ ܗܘܐ ܟܠܗ ܫܡܫܐ ܠܟ ܡܛܐ܂ ܘܗܠܝܢ ܟܠܗܝܢ ܕܚܫܒܬ ܠܟ܂ ܒܡܠܬܗ ܕܐܠܗܐ ܐܬܒܪܝ܂ ܡܛܠ ܗܢܐ ܗܘܝܬ ܝܕܥ܂ ܕܠܡܠܬܗ ܕܐܠܗܐ ܠܐ ܐܢܫ ܡܛܐ܂ ܐܘ ܡܛܐ ܠܣܟܗ܂ ܡܛܠ ܗܢܐ ܠܐ ܢܗܘܐ ܠܟ ܚܪܝܢܐ ܥܠ ܗܠܝܢ܂ ܘܬܐܡܪ ܕܗܠܝܢ ܐܢܘܢ ܘܟܕܘ܂ ܐܠܐ ܗܠܝܢ ܡܢܝ ܫܡܥ܂ ܘܐܦ ܠܐܚ̈ܝܢ ܒ̈ܢܝ ܗܝܡܢܘܬܢ ܥܩܒ ܥܠܝܗܝܢ܂ ܡܢ ܓܝܪ ܕܡܡܝܩ ܒܡ̈ܠܝ ܐܚܘܗܝ܂ ܐܦܢ ܢܐܡܪ ܕܕܝܠܝ ܚܟ̈ܝܡܢ ܠܐ ܬܫܡܥ ܡ̈ܠܘܗܝ܂܂܂܂ ܘܥܠ ܕܟܬܒܬ ܠܟ ܥܠ ܗܠܝܢ ܚܝ̈ܠܐ ܕܡܬܪܓܫܝܢ ܠܩܪܒܐ܂ ܠܐ ܗܘܐ ܐܝܟ ܡܕܡ ܐܬܓܠܝ ܠܝ܂ ܕܐܘܕܥܬܟ ܗܠܝܢ܂ ܐܠܐ ܫܡܥ ܠܡ̈ܠܐ ܕܪܫܗ ܕܐܓܪܬܐ܂ ܕܟܠ ܡܢ ܕܐܬܬܪܝܡ ܗܘ ܐܬܡܟܟ܂ ܐܦܢ ܓܝܪ ܢܣܩܘܢ ܚܝ̈ܠܐ ܘܢܙܟܘܢ܂ ܕܥ ܕܝܢ ܕܡܪܕܘܬܗ ܗܝ ܕܐܠܗܐ܂ ܘܐܢ ܢܙܟܘܢ܂ ܒܕܝܢܐ ܟܐܢܐ ܡܬܚܝܒܝܢ܂ ܒܪܡ ܕܝܢ ܗܕܐ ܗܘܝܬ ܝܕܥ܂ ܕܚܝܘܬܐ ܠܙܒܢܗ ܗܘ ܡܬܩܛܠܐ܂ ܐܢܬ ܕܝܢ ܐܚܝ ܒܗܢܐ ܙܒܢܐ܂ ܐܬܚܦܛ ܠܡܒܥܐ ܪ̈ܚܡܐ܂ ܕܢܗܘܐ ܫܝܢܐ ܥܠ ܥܡܗ ܕܐܠܗܐ܂܂܂܂