On Lent IV - ܕܚܲܕܼܒܿܫܲܒܵܐ ܕܐܲܪܒܿܥܵܐ ܕܨܵܘܡܵܐ

1 :ܒܡܲܫܟܲܢ ܙܲܒܼܢܵܐ ܕܚܵܫܘܿܫܘܼܬܼܵܐ ܫܪܹܝܢ ܡ̇ܝܘܿܬܹ̈ܐ 2 ܘܩܲܠܝܼܠ ܙܲܒܼܢܵܐ ܡܕܲܝܲܪ ܟܠܢܵܫ ܒܚܲܝܹ̈ܐ ܕܲܬܼܢܵܢ ܀ 3 :ܪܵܗܹ̇ܛ ܙܲܒܼܢܵܐ ܒܚܲܕ ܫܘܼܚܠܵܦܵܐ ܕܲܡܣܲܪܗܸܒܼ ܠܹܗ 4 ܘܥܲܡܹܗ ܕܙܲܒܼܢܵܐ ܗܵܘܹ̇ܝܢ ܐ̄ܢܵܫܵܐ ܐܲܝܟ ܛܸܠܵܠܵܐ ܀ 5 :ܠܚܸܠܡܵܐ ܕܵܡܹ̇ܐ ܥܵܠܡܵܐ ܒܪܲܗܛܹܗ ܘܲܒܼܫܘܼܚܠܵܦܘ̈ܗܝ 6 ܘܒܲܕܼܡܘܼܬܼ ܗܸܒܼܠܵܐ ܡ̇ܘܦܹܝܢ ܚܲܝܹ̈ܐ ܕܡ̇ܝܘܿܬܼܘܼܬܼܵܐ ܀ 7 :ܗܸܒܼܠܵܐ ܗ̄ܘ̣ ܐ̄ܢܵܫܵܐ ܘܲܗܒܸܠ ܗܸܒܼܠܝܼ̈ܢ ܚܲܝܹ̈ܐ ܕܙܲܒܼܢܵܐ 8 ܘܣܵܗܹ̇ܕܼ ܙܲܒܼܢܵܐ ܘܫܘܼܚܠܵܦ ܚܲܝܹ̈ܐ ܕܗܸܒܼܠܵܐ ܐܸܢܘܿܢ ܀ 9 :ܙܲܒܼܢܵܐ ܠܙܲܒܼܢܵܐ ܡܲܥܒܲܪ ܘܲܪܗܝܼܒܼ ܐܲܝܟ ܚܵܙܘܿܩܵܢ 10 ܘܝܵܗܹ̇ܒܼ ܐܲܬܼܪܵ ܙܲܒܼܢܵܐ ܠܙܲܒܼܢܵܐ ܕܠܵܐ ܢܸܬܼܥܵܘܲܟ ܀ 11 :ܕܵܪܵܐ ܠܕܼܵܪܵܐ ܡܝܲܒܸܿܠ ܝܵܗܹ̇ܒܼ ܩܘܼܝܵܡ ܚܲܝܹ̈ܐ 12 ܘܡ̇ܘܬܵܐ ܪܵܗܹ̇ܛ ܐܲܝܟ ܗܲܕܿܝܼܐܵܐ ܩܕܼܵܡ ܟܠ ܕܵܪ̈ܝܼܢ ܀ 13 :ܚܵܙܹ̇ܩ ܙܲܒܼܢܵܐ ܕܠܑܵܐ ܫܘܼܚܵܪܵܐ ܘܕܼܵܪܵܐ ܥܲܡܹܗ 14 ܘܩܵܥܹ̇ܐ ܚܲܪܫܵܐ ܠܘܵܬܼ ܡܲܠܵܠܵܐ ܕܠܵܐ ܬܸܫܬܵܘܚܲܪ ܀ 15 ܙܲܒܼܢܵܐ ܒܪܲܗܛܹܗ ܡܲܟܸܿܣ ܟܠܫܵܥ ܠܲܡܠܝܼܠܘܼܬܼܵܐ: pb. 196 16 ܠܡܵܢ ܡܸܫܬܲܚܩܲܬܿܝ ܕܠܵܐ ܝܘܼܬܼܪܵܢܵܐ ܦܲܐ̈ܝܵܢ ܀ 17 :ܐܲܝܟ ܡܲܠܵܠܵܐ ܩܵܥܹ̇ܐ ܚܲܪܫܵܐ ܠܘܵܬܼ ܦܵܪ̈ܘܿܫܹܐ 18 :ܕܚܘܼܪܘ ܘܐܸܬܼܒܲܩܵܘ ܒܫܘܼܚܠܵܦ ܙܲܒܼܢܵܐ ܘܫܘܼܢܵܝ ܚܲܝܹ̈ܐ 19 :ܐܲܝܢܵܘ ܙܲܒܼܢܵܐ ܕܩܵܘܝܼ ܪܲܗܛܹܗ ܕܠܵܐ ܫܘܼܚܠܵܽܦܵܐ 20 ܘܐܸܡܲܬܼܝ ܟܲܬܲܪܘ ܐ̄ܢܵܫܵܐ ܒܚܲܝܹ̈ܐ ܕܠܑܵܐ ܫܘܼܢܵܝܵܐ ܀ 21 :ܡܲܢ̣ܘܼ ܕܟܼܵܠܹ̇ܗ ܕܫܸܡܫܵܐ ܕܠܵܐ ܢܸܫܬܲܚܠܲܦ 22 ܘܡܲܢ̣ܘܼ ܐܲܪܡܝܼ ܦܓܼܘܼ̈ܕܹܐ ܒܡܵܘܬܵܐ ܕܠܵܐ ܢܸܩܪܘܿܒܼ ܠܹܗ ܀ 23 :ܝܲܗ̄ܒܼ ܟܸܣܦܵܐ ܘܡܲܪ̈ܓܵܢܝܵܬܼܵܐ ܘܲܙܒܲܢ ܚܲܝܹ̈ܐ 24 ܘܡܲܢ̣ܘܼ ܣܲܬܲܪ ܦܲܓܼܪܹܗ ܒܛܘܼܫܝܵܐ ܡ̣ܢ ܟܘܼܪܗܵܢܵܐ ܀ 25 :ܐܲܝܢܵܘ ܡܲܠܟܵܐ ܕܲܢܛ݂ܲܪ ܚܲܝܵܘ̈ܗܝ ܡ̣ܢ ܢܸܟܼܝܵܢܹ̈ܐ 26 ܘܐܸܡܲܬܼܝ ܟܲܕܼ ܡ̣ܝܬܼ ܩܵܘܝܼ ܬܵܓܹܗ ܘܠܵܐ ܐܸܬܼܚܲܒܲܠ ܀ 27 :ܠܲܝܬܿ ܡ̇ܝܘܿܬܼܵܐ ܕܲܫܡܹܗ ܐ̄ܢܵܫܵܐ ܕܠܵܐ ܡ̇ܝܘܿܬܼܵܐ ܗ̄ܘ̣ 28 ܘܠܲܝܬܿ ܥܲܦܪܵܢܵܐ ܕܠܵܘ ܥܲܡ ܡܸܕܼܪܹܗ ܓܒܼܝܼܠܝܼܢ ܚܲܫܵܘ̈ܗܝ ܀ 29 :ܘܐܸܢ ܡܵܝܘܿܬܼܵܐ ܗ̄ܘ̣ ܘܢܲܚ̈ܬܹܿܐ ܕܚܲܫܹ̈ܐ ܠܒܼܝܼܫ ܪܸܥܝܵܢܹܗ 30 ܡܵܢ ܡܸܫܬܲܒܼܗܲܪ ܥܲܦܪܵܐ ܫܝܼܛܵܐ ܒܚܲܝܹ̈ܐ ܕܙܲܒܼܢܵܐ ܀ 31 :ܗܵܐ ܥܘܼܢܕܲܢܹܗ ܩܵܥܹ̇ܐ ܒܩܵܠܵܐ ܥܲܠ ܚܘܼܒܵܠܹܗ 32 ܕܥܲܦܪܵܐ ܗ̄ܘ̣ ܐ̄ܢܵܫܵܐ ܘܲܠܕܿܚܝܼܚܵܐ ܗܵܦܹ̇ܟ ܡܸܕܪܹܗ ܀ 33 :ܐܲܝܟ ܐܲܓܼܝܼܪܵܐ ܡܕܲܝܼܪ ܒܐܲܪܥܵܐ ܥܲܦܪܵܢܵܝܵܐ 34 ܘܒܲܕܼܡܘܼܬܼ ܥܲܒܼܪܵܐ ܡܣܲܟܸܿܐ ܠܡܵܘܬܵܐ ܐܲܝܟ ܕܠܲܪܲܡܫܵܐ ܀ 35 :ܒܝܲܠܕܵܐ ܡ̇ܘܓܲܪ ܐܲܝܟ ܕܲܒܼܨܲܦܪܵܐ ܒܦܘܼܠܚܵܢ ܐܲܪܥܵܐ 36 ܘܥܸܕܵܢ ܪܲܡܫܵܐ ܡܢܝܼܚ ܠܹܗ ܡ̇ܘܬܵܐ ܐܲܝܟ ܕܲܒܼܫܸܢܬܼܵܐ ܀ 37 :ܠܵܐ ܩܢܹܐ ܡܸܕܹܿܡ ܕܠܵܐ ܡܸܬܼܚܲܒܲܠ ܥܲܡ ܚܘܼܒܵܠܹܗ 38 ܘܗܘ̤ ܥܲܡ ܕܝܼܠܹܗ ܗܵܦܹ̇ܟ ܟܠܫܵܥ ܠܘܵܬܼ ܫܝܼܛܘܼܬܼܵܐ ܀ 39 :ܠܡܵܢܵܐ ܡܵܕܹܝܢ ܚܬܝܼܪ ܡ̇ܝܘܿܬܼܵܐ ܒܲܕܼܠܵܐ ܕܝܼܠܹܗ 40 ܕܗܵܐ ܠܵܐ ܡܵܘܬܲܪ ܠܵܐ ܗܘ̤ ܠܕܝܼܠܹܗ ܘܠܵܐ ܕܝܼܠܹܗ ܠܹܗ ܀ 41 :ܠܕܝܼܠܹܗ ܡܫܲܚܠܸܦ ܙܲܒܼܢܵܐ ܒܚܲܝܵܘ̈ܗܝ ܘܚܵܙܹ̇ܐ ܘܫܵܠܹ̇ܐ 42 ܘܠܹܗ ܕܵܒܲܪ ܠܹܗ ܡ̇ܘܬܵܐ ܠܲܫܝܘܿܠ ܘܫܲܬܿܝܼܩ ܕܝܼܠܹܗ ܀ 43 :ܠܵܐ ܟܹܝܬܼ ܬܸܚܕܹܿܐ ܩܢܹܐ ܩܸܢܝܵܢܹ̈ܐ ܐܲܝܟ ܗܵܘ̇ ܕܲܩܢ݂ܲܝܬܿ 44 ܕܗܵܐ ܡܸܬܼܢܲܟܼܪܹܗ ܐܲܢ̄ܬܿ ܡ̣ܢ ܕܝܼܠܵܟ ܘܕܝܼܠܵܟ ܡܸܢܵܟ ܀ 45 :ܩܪܝܼ ܩܸܢܝܵܢܲܝ̈ܟ ܘܐܲܩܝܼܡ ܐܸܢܘܿܢ ܒܥܸܕܵܢ ܡܵܘܬܵܟ 46 ܘܲܚܙܝܼ ܐܸܢ ܐܝܼܬܼ ܕܦܵܬ݁ܲܚ ܦܘܼܡܹܗ ܘܲܡܦܝܼܣ ܡܵܘܬܵܐ ܀ 47 ܟܲܢܸܫ ܥܲܒܼܕܲܝ̈ܟ ܘܐܲܠܒܸܿܫ ܐܸܢܘܿܢ ܙܲܝܢܵܐ ܕܚܝܼܠܹܗ: pb. 197 48 ܘܢܸܫܕܿܘܿܢ ܓܹܐܪܹ̈ܐ ܒܣܸܕܪ̈ܲܝ ܡ̇ܘܬܵܐ ܕܠܵܐ ܢܲܟܿܘܿܢܵܟ ܀ 49 :ܙܲܝܸܢ ܐܵܦ ܐܲܢ̄ܬܿ ܙܵܘܥܲܝ̈ ܢܲܦܫܵܟ ܘܚܘܿܬܼ ܠܐܵܓܼܘܿܢܵܐ 50 ܘܐܲܚܘܿܕܼ ܕܲܪܵܐ ܥܲܡ ܟܘܼܪܗܵܢܵܐ ܘܲܣܚܘܿܦ ܘܲܫܕܝܼܘܗܝ ܀ 51 :ܘܐܸܢ ܗܘ̤ ܕܲܡܚܝܼܠ ܚܹܝܠ ܗܲܕܵܡܲܝ̈ܟ ܡ̣ܢ ܬܲܟܼܬܿܘܼܫܵܐ 52 ܛܲܝܸܒܼ ܟܸܣܦܵܐ ܘܗܲܒܼ ܩܘܼܪܒܵܢܵܐ ܘܦܲܠܸܛ ܢܲܦܫܵܟ ܀ 53 :ܠܵܐ ܥܲܬܿܝܼܪܵܐ ܠܵܐ ܐܝܼܬܿܝܗܹܝܢ ܗܵܠܹܝܢ ܕܲܬܼܢ̇ܝܬܼ 54 ܘܠܵܐ ܡܸܬܼܪܲܥܹܐ ܡ̇ܘܬܵܐ ܒܫܘܼܚܕܵܐ ܠܡܸܣܲܒ̣ ܒܐܲܦܲܝ̈ܟ ܀ 55 :ܘܐܸܢ ܨܵܒܹ̇ܐ ܐܲܢ̄ܬܿ ܕܘܼܢ ܟܹܐܢܵܐܝܼܬܼ ܐܲܝܟ ܦܵܪܘܿܫܵܐ 56 ܘܐܲܥܸܠ ܡܸܠܲܝ̈ ܠܒܼܘܼܚܪܵܢ ܢܲܦܫܵܟ ܘܲܚܙܝܼ ܕܟܹ̈ܐܢܵܢ ܀ 57 :ܚܘܼܪ ܬܲܩܢܵܐܝܼܬܼ ܒܥܲܝܢܵܐ ܫܦܝܼܬܼܵܐ ܕܦܵܪܘܿܫܘܼܬܼܵܐ 58 ܘܲܚܙܝܼ ܕܗܸܒܼܠܵܐ ܗ̄ܘ̣ ܥܘܼܡܪܵܐ ܕܚܲܝܲܝ̈ܢ ܘܲܬܼܚܘܿܬܼ ܩܸܢܛܵܐ ܗ̄ܘ̣ ܀ 59 :ܥܘܼܡܪܲܢ ܣܵܗܹ̇ܕܼ ܥܲܠ ܫܘܼܢܵܝܲܢ ܕܠܵܐ ܘܝܼܠܲܢ ܗ̄ܘ̣ 60 ܕܗܵܐ ܩܲܪܸܡ ܠܲܢ ܒܚܲܕܼ ܫܘܼܚܠܵܦܵܐ ܠܘܵܬܼ ܟܠܡܸܕܹܿܢ ܀ 61 :ܠܵܐ ܟܹܝܬܼ ܬܸܚܕܹܿܐ ܐܘܿ ܒܲܪܢܵܫܵܐ ܒܩܸܢܝܵܢ ܙܲܒܼܢܵܐ 62 ܘܠܵܐ ܬܸܬܼܪܵܘܪܲܒܼ ܥܲܠ ܡܸܣܟܿܢܵܐ ܕܲܒܼܨܝܼܪ ܥܘܼܡܪܹܗ ܀ 63 :ܠܵܐ ܬܩܲܦܲܚܲܝܗܝ ܒܲܚܬܼܝܼܪܘܼܬܼܵܟ ܠܡܲܪܝܼܪ ܢܲܦܫܟ 64 ܕܠܵܐ ܬܸܬܼܩܲܦܚ ܒܲܓܼܙܵܪ ܕܝܼܢܵܐ ܕܟܹܐܝܢ ܒܘܼܚܪܵܢܹܗ ܀ 65 :ܠܵܐ ܬܸܬܼܚܲܫܲܚ ܚܲܪܡ̇ܢܵܐܝܼܬܼ ܨܹܝܕܼ ܡܲܢ ܕܲܣܢ̣ܩ 66 ܕܠܵܐ ܬܸܬܿܛܲܒܲܥ ܥܲܡ ܥܲܬܿܝܼܪܵܐ ܒܗܵܘܬܼܵܐ ܕܲܫܝܘܼܠ ܀ 67 :ܥܗܲܕܼ ܫܘܼܢܵܩܹܗ ܐܵܦ ܚܸܢ̈ܓܼܵܬܹܗ ܕܲܒܼܓܹܗܲܢܵܐ 68 ܕܲܟܼܡܵܐ ܐܲܦܝܼܣ ܘܲܗ̤ܘܲܝ̈ ܡܸܠܵܘ̈ܗܝ ܝܲܬܿܝܼܪ̈ܵܬܼܵܐ ܀ 69 :ܠܑܵܐ ܬܸܬܼܒܲܣܲܡ ܐܲܢ̄ܬܿ ܒܲܠܚܘܿܕܲܝܟ ܐܲܝܟ ܕܲܒܼܕܼܝܼܠܵܟ 70 ܕܠܵܐ ܬܸܬܼܢܲܟܼܪܸܐ ܠܫܵܘܬܵܽܦܘܼܬܼܵܐ ܕܛܘܼܒܹ̈ܐ ܡܠܝܼܟܹ̈ܐ ܀ 71 :ܠܵܐ ܬܸܬܼܦܲܢܲܩ ܒܐܪ̈ܥܵܢܵܝܵܬܼܵܐ ܠܒܲܪ ܡ̣ܢ ܛܲܟܼܣܵܐ 72 ܕܠܵܐ ܢܸܣܓܿܘܿܢ ܠܵܟ ܢܸܓܼ̈ܕܹܿܐ ܥܦܝܼܦܹ̈ܐ ܕܠܵܐ ܡܸܢܝܵܢܵܐ ܀ 73 :ܐܢܝܼܚ ܐܲܢ̄ܬܿ ܠܵܟ ܐܲܟܼܡܵܐ ܕܲܦܐܸܐ ܠܚܲܝܹ̈ܐ ܕܙܲܒܼܢܵܐ 74 ܘܗܲܒܼ ܝܲܬܿܝܼܪܵܐ ܠܐܲܝܢܵܐ ܕܚܲܣܝܼܪ ܡ̣ܢ ܡ̇ܙܘܿܢܵܐ ܀ 75 :ܠܵܘ ܕܝܼܠܵܟ ܗ̄ܘ̣ ܥܘܼܬܼܪܵܐ ܕܲܩܢܹܝܬܼ ܐܸܠܵܐ ܕܡ̇ܪܵܟ 76 ܦܲܪܢܸܣ ܢܲܦܫܵܟ ܘܲܟܼ̈ܢܵܘܵܬܼܵܟ ܐܲܝܟ ܪܲܒܿ ܒܲܝܬܵܐ ܀ 77 :ܪܲܒܿ ܒܲܝܬܵܐ ܐܲܢ̄ܬܿ ܠܵܐ ܗ̄ܘ̣ܵܐ ܒܟܼܠܗܹܝܢ ܒܐܲܝܠܹܝܢ ܕܲܩܢܹܝܬܿ 78 ܘܚܘܼܫܒܵܢ ܢܸܟܼܣܲܝ̈ܟ ܥܬܼܝܼܕܼ ܐܲܢ̄ܬܿ ܕܬܸܬܸܿܠ ܠܡܵܪܹܐ ܒܲܝܬܵܐ ܀ 79 ܡ̇ܪܹܐ ܒܲܝܬܵܐ ܐܲܠܵܗ ܟܠܵܐ ܗ̄ܘ̣ ܕܐܲܬܼܩ̣ܢ ܟܠܵܐ: pb. 198 80 ܘܐܲܫܠܸܡ ܥܘܼܬܼܪܵܐ ܕܒܲܣܝܼܡܘܼܬܹܗ ܠܲܥܒܼܵܕܼ ܐܝܼܕܵܘ̈ܗܝ ܀ 81 :ܗܘ̤ ܝܲܗ̣̄ܒܼ ܥܘܼܬܼܪܵܐ ܠܲܕܼܥܲܬܿܝܼܪܝܼܢ ܒܐܲܪ̈ܥܵܢܝܵܬܼܵܐ 82 ܕܢܸܒܼܚܘܿܪ ܐܸܢܘܿܢ ܒܲܕܼܠܵܐ ܕܝܼܠܗܘܿܢ ܐܸܢ ܫܲܪܝܼܪܝܼܢ ܀ 83 :ܗܘ̤ ܬܘܼܒܼ ܙܲܠܗܸܙ ܡ̇ܙܘܿܢ ܙܲܒܼܢܵܐ ܠܲܕܼܡܸܣܟܹܿܢܝܼܢ 84 ܕܢܸܒܼܩܸܐ ܐܸܢܘܿܢ ܒܚܲܣܝܼܪܘܼܬܼܵܐ ܐܲܝܟ ܕܲܒܼܟܼܘܼܪܵܐ ܀ 85 :ܡܨܸܐ ܗ̄ܘ̣ܵܐ ܕܢܸܬܸܿܠ ܥܘܼܬܼܪܵܐ ܠܟܼܠܢܵܫ ܐܲܝܟ ܡܵܐ ܕܲܠܚܲܕܼ 86 ܐܸܠܵܐ ܗܵܕܹܐ ܠܵܐ ܥܵܕܼܪܵܐ ܗ̄ܘ̣ܵܬܼ ܠܲܡܠܝܼܠܘܼܬܼܵܐ ܀ 87 :ܝܵ̇ܕܲܥ ܗ̄ܘ̣ܵܐ ܓܹܝܪ ܩܕܼܵܡ ܕܢܲܬܼܩܸܢ ܟܠ ܕܐܲܝܟܲܢ ܢܸܬܸܿܠ 88 ܘܐܲܚܝܕܼܵܐ ܦܲܐܝܵܐ ܠܦܵܪܘܿܫܘܼܬܼܵܐ ܠܒܼܝܼܫܲܬܼ ܚܲܫܹ̈ܐ ܀ 89 :ܠܚܲܕܼ ܝܲܗ̣̄ܒܼ ܥܘܼܬܼܪܵܐ ܕܢܸܒܼܩܸܐ ܝܲܨܪܹܗ ܒܲܕܼܠܵܐ ܕܝܼܠܹܗ 90 ܘܲܠܚܲܕܼ ܡܲܣܟܸܿܢ ܕܲܒܢܹܣܝܵܢܵܐ ܢܕܲܪܸܫ ܚܲܝܵܘ̈ܗܝ ܀ 91 :ܠܵܐ ܗ̄ܘ̣ܵܐ ܗܘ̤ ܣܢܝܼܩ ܕܢܹܐܠܲܦ ܐܸܢܘܿܢ ܐܲܝܟ ܠܵܐ ܝܵ̇ܕܲܥ 92 ܐܸܠܵܐ ܕܢܵܘܕܲܥ ܚܹܝܠ ܚܸܪܼ̈ܡܵܬܼܵܐ ܕܣ̣ܵܡ ܒܲܡܠܝܼܠܹ̈ܐ ܀ 93 :ܒܝܲܬܿܝܼܪ ܚܲܣܝܼܪ ܨܒܼܵܐ ܕܲܢܒܲܕܸܿܩ ܥܘܼܬܼܪܵܐ ܕܢܲܦܫܵܐ 94 ܕܲܟܼܡܵܐ ܡܥܲܠܝܵܐ ܦܵܪܘܿܫܘܼܬܹܗ ܡ̣ܢ ܚܲܝܘܵܬܼܵܐ ܀ 95 :ܠܚܲܝܘ̄ܬܼܵܐ ܫܘܸܐ ܠܵܗ̇ ܥܘܼܬܼܪܵܐ ܪܲܒܵܐ ܘܡܸܣܟܹܿܢܘܼܬܼܵܐ 96 ܘܠܑܵܐ ܡܸܬܼܚܲܬܿܪܵܐ ܘܠܵܐ ܡܸܬܼܓܲܡܪܵܐ ܒܝܲܬܿܝܼܪ ܘܒܲܙܥܘܿܪ ܀ 97 :ܢܲܦܫܵܐ ܕܐ̄ܢܵܫܵܐ ܣܝܼܡܲܬܼ ܓܲܙܹ̈ܐ ܗ̄ܝܼ ܕܦܵܪܘܿܫܘܼܬܼܵܐ 98 ܘܗܝ̤ ܫܲܠܝܼܛܵܐ ܕܬܸܚܕܹܿܐ ܒܣܲܓܿܝܼ ܘܬܼܟܼܪܵܐ ܒܩܲܠܝܼܠ ܀ 99 :ܒܓܲܙܵܐ ܕܝܲܨܪܵܗ̇ ܣܵܡ̣ ܚܸܟܼܡܵܬܼ̈ܗ̇ ܡܲܬܼܩܸܢ ܟܠܵܐ 100 ܕܐܲܝܟ ܒܘܼܚܵܪܵܢܵܗ̇ ܬܦܲܪܢܸܣ ܓܲܙܵܐ ܕܡܲܓܼܥܲܠ ܒܐܝܼܕܹܝ̈ܗ̇ ܀ 101 :ܡ̇ܪܹܝܢ ܓܲܠܝܵܐ ܗ̄ܝܼ ܕܲܠܒܼܘܼܚܪܵܢܲܢ ܝܲܗ̣̄ܒܼ ܬܲܪ̈ܬܲܝܗܹܝܢ 102 ܕܲܚܢܲܢ ܢܸܗܘܸܐ ܣܵܗ̈ܕܹܿܐ ܒܕܼܝܼܢܵܐ ܠܒܼܝܼܫܲܘܼܬܼ ܢܲܦܫܲܢ ܀ 103 :ܠܲܝܬܿ ܠܵܟ ܡ̇ܕܹܝܢ ܐܘܿ ܥܲܬܿܝܼܪܵܐ ܦܘܼܢܵܝ ܡܸܠܹ̈ܐ 104 ܘܠܵܐ ܡܨܹܝܬܿ ܕܬܸܙܟܸܿܐ ܟܲܕܼ ܡܸܬܿܬܲܒܼܥܲܬܿ ܕܲܠܡܵܢ ܐܲܥܘܸܠܬܿ ܀ 105 :ܠܵܘ ܥܲܠ ܕܲܩܢܲܝܬܿ ܕܵܐܹ̇ܝܢ ܥܲܡܵܟ ܕܵܐܹ̇ܝܢ ܟܠܵܐ 106 ܐܸܠܵܐ ܕܲܗ̤ܘܲܝܬܿ ܓܠܝܼܙ ܡ̣ܢ ܪ̈ܲܚܡܹܐ ܘܣܵܢܹ̇ܐ ܐ̄ܢܵܫܵܐ ܀ 107 :ܡܸܛܠ ܐ̄ܢܵܫܵܐ ܝܲܗ̣̄ܒܹܿܗ ܠܥܘܼܬܼܪܵܐ ܗܵܘ̇ ܡܲܥܬܲܪ ܟܠ 108 ܘܐܲܢ̄ܬܿ ܣܲܬܼܪܬܵܝܗܝ ܘܲܓܼܠܲܙܬܿ ܐ̄ܢܵܫܵܐ ܡ̣ܢ ܚܲܝܲܝ̈ܗܘܿܢ ܀ 109 :ܒܡܵܙܘܿܢ ܙܲܒܼܢܵܐ ܬܠܹܝܢ ܚܲܝܲܝ̈ܗܘܿܢ ܕܲܒܼܢܲܝ̈ܢܵܫܵܐ 110 ܘܐܲܝܢܵܐ ܕܟܼܵܠܹ݁ܐ ܚܲܝܹ̈ܐ ܕܐ̄ܢܵܫܵܐ ܩܵܛܹ̇ܠ ܐ̄ܢܵܫܵܐ ܗ̄ܘ̣ ܀ 111 :ܡܲܢ ܠܵܐ ܢܸܒܼܟܸܿܐ ܥܲܠ ܥܲܬܿܝܼܪܵܐ ܓܠܝܼܙ ܡ̣ܢ ܪ̈ܲܚܡܹܐ 112 ܕܲܗܘ̤ܵܐ ܚܲܒܼܪܵܐ ܒܒܼܝܼܫܘܼܬܼ ܝܲܨܪܹܗ ܠܩܵܛܹ̇ܠ ܐ̄ܢܵܫܵܐ ܀ 113 :ܐܸܢ ܠܲܝܬܿ ܡܸܕܹܿܡ ܕܪܲܒܿ ܡ̣ܢ ܐ̄ܢܵܫܵܐ ܒܟܼܠ ܡ̇ܐ ܕܲܗܘ̤ܵܐ 114 ܠܲܝܬܿ ܬܘܼܒܼ ܡܵܕܹܝܢ ܕܒܼܝܼܫ ܡ̣ܢ ܐ̄ܢܵܫܵܐ ܕܣܵܢܹܐ ܠܐ̄ܢܵܫܵܐ ܀ 115 ܠܡܵܢܵܐ ܣܢ݂ܲܝܬܵܢܝ ܐܘܿ ܥܲܬܿܝܼܪܵܐ ܐܲܝܟ ܕܲܠܒܼܝܼܫܵܐ: pb. 199 116 ܘܲܗ̤ܘܲܝܬܿ ܣܵܢ̇ܐܵܐ ܠܐ̄ܢܵܫܵܐ ܕܐܝܼܬܼܵܘܗܝ ܨܠܸܡ ܒܵܪܘܿܝܵܐ ܀ 117 :ܠܡܵܢ ܐܸܬܼܢܲܟܼܪܝܼܬܿ ܠܫܲܝܢܵܐ ܕܐ̄ܢܵܫܵܐ ܣܵܢܐܵܐ ܕܐ̄ܢܵܫܵܐ 118 ܘܲܥܒ݂ܲܕܿܬܿ ܢܲܦܫܵܟ ܓܠܝܼܙ ܡ̣ܢ ܪ̈ܲܚܡܹܐ ܒܲܕܼܡܘܼܬܼ ܒܝܼܫܵܐ ܀ 119 :ܦܢܝܼ ܡܼܢ ܬܵܘܫܵܐ ܕܲܚܬܼܝܼܘܼܬܼܵܐ ܛܘܼܪܵܐ ܚܲܪܒܵܐ 120 ܘܲܥܡܲܪ ܒܐܲܪܥܵܐ ܕܡܲܟܿܝܼܟܼܘܼܬܼܵܐ ܕܢܝܼܚ ܦܘܼܠܚܵܢܵܗ̇ ܀ 121 :ܐܲܥܢܵܐ ܢܲܦܫܵܟ ܒܥܸܢܝܵܢ ܐ̄ܢܵܫܵܐ ܪ̈ܵܚܡܲܝ ܫܲܝܢܵܐ 122 ܘܟܲܒܸܿܫ ܝܲܨܪܵܟ ܒܢܝܼܪܵܐ ܢܝܼܚܵܐ ܕܡܲܟܿܝܼܟܼܘܼܬܼܵܐ ܀ 123 :ܙܪܘܿܥ ܙܸܕܼܩܵܬܼ̈ܟ ܒܐܲܪܥܵܐ ܕܐ̄ܢܵܫܵܐ ܕܠܵܐ ܡܸܬܿܛܲܠܡܵܐ 124 ܘܣܲܟܵܐ ܠܣܲܒܼܪܵܐ ܦܹܐܪܵܐ ܕܲܟܼܣܹܝܢ ܚܲܝܹ̈ܐ ܒܐܘܼܟܼܠܹܗ ܀ 125 :ܗܲܒܼ ܠܲܣܢܝܼܩܵܐ ܘܚܘܼܬ ܠܲܡܥܵܩܵܐ ܘܐܲܢܝܼܚ ܝܲܬܼܡ̇ܐ 126 ܘܐܲܢܗܲܪ ܐܲܦܲܝ̈ܟ ܘܠܵܐ ܬܼܟܼܪܸܐ ܠܵܟ ܟܲܕܼ ܝܵܗܹ̇ܒܼ ܐܲܢ̄ܬܿ ܀ 127 :ܚܙܝܼ ܠܵܐ ܬܸܬܸܿܠ ܟܲܕܼ ܟܲܪܝܵܐ ܠܵܟ ܘܲܡܥܵܺܩ ܠܸܒܵܟ 128 :ܕܲܠܡܵܐ ܬܸܫܡܲܥ ܗܵܝ̇ ܒܲܪܬܿ ܩܵܠܵܐ ܕܲܠܘܵܬܼ ܩܵܐܝܢ 129 :ܐܵܦ ܗܘ̤ ܖܲܪܸܒܼ ܕܸܒܼܚܵܐ ܣܲܢܝܵܐ ܕܕܼܵܡܹ̇ܐ ܗ̄ܘ̣ܵܐ ܠܹܗ 130 ܘܕܲܚܙ̣ܵܝܗܝ ܟܹܐܢܵܐ ܕܲܟܼܡܝܼܪ ܠܸܒܹܿܗ ܐܲܣܠܝܼ ܘܲܫ̣ܕܼܷܵܝܗܝ ܀ 131 :ܠܵܐ ܟܹܝܬܼ ܬܸܙܪܘܿܥ ܙܪܲܥ ܙܸܕܼܩܵܬܼ̈ܟ ܒܲܦܣܵܩ ܣܲܒܼܪܵܐ 132 ܕܠܵܐ ܢܸܬܿܛܲܠܡܘܼܢ ܦܹܐܪܹ̈ܐ ܕܥܲܡܠܲܝ̈ܟ ܡ̣ܢ ܦܘܼܪܥܵܢܵܐ ܀ 133 :ܠܲܝܬܿ ܦܘܼܪܥܵܢܵܐ ܠܦܹܐܪܹ̈ܐ ܕܗܵܘܹ̇ܝܢ ܡ̣ܢ ܟܲܪܝܘܼܬܼܵܐ 134 ܘܠܵܐ ܡܸܬܼܩܲܒܿܠܝܼܢ ܕܸܒܼܚܹ̈ܐ ܣܢܲܝ̈ܵܐ ܩܕܼܵܡ ܚܵܙܹ̇ܐ ܟܠ ܀ 135 :ܬܪܹܝܢ ܚܘܼܣܪ̈ܵܢܹܐ ܩܵܢܹ̇ܐ ܐܲܝܢܵܐ ܕܝܵܗܹ̇ܒܼ ܘܲܟܼܡܝܼܪ 136 ܕܡܵܘܒܸܿܕܼ ܕܝܼܠܹܗ ܘܚܵܒܹ̇ܫ ܢܲܦܫܹܗ ܬܚܹܝܬܼ ܡܲܪܫܘܼܬܼܵܐ ܀ 137 :ܒܕܝܼܢܵܐ ܥܦܝܼܦܵܐ ܡܩܲܛܪܸܓܼ ܗܘ̤ ܠܹܗ ܒܝܲܕܼ ܡܵܘܗܲܒܼܬܹܗ 138 ܘܠܵܐ ܡܸܬܼܒܲܝܲܢ ܕܲܠܡܵܢ ܝܵܗܹ̇ܒܼ ܘܲܠܡܵܢ ܚܵܐܹ̇ܒܼ ܀ 139 :ܝܵܗܹ̇ܒܼ ܘܲܡܥܝܼܩ ܠܗܵܘ̇ ܝܵܗܘܿܒܼܵܐ ܕܝܲܗ̣̄ܒܼ ܠܹܗ ܘܲܠܟܼܠ 140 ܘܠܵܐ ܡܸܬܼܒܲܝܲܢ ܕܗܘ̤ ܠܹܗ ܒܕܝܼܠܹܗ ܡܲܒܿܐܸܫ ܥܲܝܢܹܗ ܀ 141 :ܕܐܲܠܵܗ ܟܠܵܐ ܗ̄ܘ̣ ܟܠܡܵܐ ܕܲܩܐܹܝܢ ܡܲܠ̈ܟܹܿܐ ܘܡܵܟܹ̈ܐ 142 ܘܡ̣ܢ ܡ̇ܘܗܲܒܼܬܹܗ ܥܵܬܼ̇ܪܝܼܢ ܐ̄ܢܵܫܵܐ ܘܫܲܡܲܝܵܢܹ̈ܐ ܀ 143 :ܠܹܗ ܗ̄ܘ̣ ܙܵܕܹܩ ܕܢܸܬܸܿܠ ܕܝܼܠܹܗ ܒܚܘܿܒܵܐ ܕܲܟܼܝܵܐ 144 ܕܠܵܐ ܢܸܬܼܩܲܛܪܲܓܼ ܒܲܕܼܠܵܐ ܕܝܼܠܲܢ ܐܲܝܟ ܕܲܒܼܕܼܝܼܠܲܢ ܀ 145 :ܘܐܸܢ ܕܝܼܠܹܗ ܗ̄ܘ̣ ܥܘܼܬܼܪܵܐ ܘܚܲܝܹ̈ܐ ܘܦܘܼܪܥܵܢ ܐܲܓܼܪܵܐ 146 ܠܡܵܢ ܡܸܫܬܲܒܼܗܲܪ ܥܲܦܪܵܐ ܫܝܼܛܵܐ ܕܣܝܼܡ ܒܹܗ ܕܲܗܒܼܵܐ ܀ 147 ܦܵܘܠܘܿܣ ܬܲܚܸܡ ܕܠܵܐ ܢܸܫܬܲܒܼܗܲܪ ܟܠ ܕܲܥܒܼܝܼܕܼܵܐ ܗ̄ܘ̣: pb. 200 148 ܘܐܸܢ ܡܸܫܬܲܒܼܗܲܪ ܒܡܵܪܝܵܐ ܒܲܠܚܘܿܕܼ ܢܪܝܼܡ ܪܸܥܝܵܢܹܗ ܀ 149 :ܥܲܠ ܥܵܒܼܘܿܕܵܐ ܢܲܩܸܨ ܟܠܢܵܫ ܡܸܕܹܿܡ ܕܲܩܢܹܐ 150 ܣܛܲܪ ܡ̣ܢ ܥܵܘ̣ܠܵܐ ܕܕܝܼܠܲܢ ܐܝܼܬܼܵܘܗܝ ܘܒܲܢ ܡܸܫܬܲܡܲܫ ܀ 151 :ܕܝܲܨܪܲܢ ܐܝܼܬܼܵܘܗܝ ܥܵܘ̣ܠܵܐ ܕܢܲܦܫܲܢ ܘܠܵܘ ܕܲܐ̄ܚܪܹܢܵܐ ܗ̄ܘ̣ 152 ܘܟܲܕܼ ܛܵܒܼ ܥܵܘ̣ܠܵܐ ܗ̄ܘ̣ ܐܸܡܲܬܼܝ ܕܨܵܒܹ̇ܐ ܡܙܲܕܸܿܩ ܥܵܘ̣ܠܹܗ ܀ 153 :ܗܘ̤ ܠܹܗ ܣܵܗܹ̇ܕܼ ܥܲܠ ܫܘܼܠܛܵܢܵܐ ܕܦܵܪܘܿܫܘܼܬܹܗ 154 ܕܲܒܼܨܸܒܼܝܵܢܹܗ ܙܲܟܹ̇ܐ ܘܚܵܐܹ̇ܒܼ ܒܐܲܝܠܹܝܢ ܕܲܩܢܸܐ ܀ 155 :ܬܵܘ ܡ̇ܝܘܿܬܹ̈ܐ ܛܲܟܸܿܣܘ ܪܲܗܛܵܐ ܕܨܸܒܼܝܵܢܲܝ̈ܟܿܘܿܢ 156 ܕܗܵܐ ܐܸܬܼܓܲܠܲܝܲܬ̤ ܕܨܸܒܼܝܵܢܲܢ ܗ̄ܘ̣ ܕܫܲܠܝܼܛ ܥܲܠ ܟܠ ܀ 157 :ܠܨܸܒܼܝܵܢ ܢܲܦܫܹܗ ܢܸܥܕܿܘܿܠ ܟܠܢܵܫ ܡܵܐ ܕܡܸܬܼܪܲܦܸܐ 158 ܘܲܒܼܒܼܘܼܚܪܵܢܹܗ ܢܚܘܼܪ ܒܲܩܢܘܿܡܹܗ ܘܢܲܟܸܿܣ ܥܵܘ̣ܠܹܗ ܀ 159 :ܝܲܨܪܵܐ ܢܸܗܘܸܐ ܐܲܝܟ ܕܲܝܵܢܵܐ ܠܟܼܠ ܣܘܼܥܪ̈ܵܢܲܝܢ 160 ܘܲܠܒܼܘܼܚܪܵܢܹܗ ܢܲܥܸܠ ܥܵܘ̇ܠܵܐ ܘܙܲܕܲܝܼܩܘܼܬܼܐ ܀ 161 :ܚܵܘܒܿܬܼܵܐ ܚܲܝܵܒܼ ܟܠ ܕܲܡܠܝܼܠܵܐ ܗ̄ܘ̣ ܠܡܸܕܲܥ ܗܵܠܹܝܢ 162 ܘܐܸܢ ܠܵܐ ܦܵܪܲܥ ܝܲܨܪܹܗ ܡܲܟܸܿܣ ܠܛܵܠܘܿܡܘܼܬܹܗ ܀ 163 :ܠܵܐ ܟܹܝܬܼ ܢܸܛܠܘܿܢ ܚܹܝܠ ܚܸܟܼ̈ܡܵܬܼܵܐ ܕܲܟܼܣܸܐ ܒܢܲܦܫܲܢ 164 ܘܢܵܘܠܸܕܼ ܪܸܛܢܵܐ ܕܠܵܐ ܒܘܼܝܵܢܵܐ ܥܲܠ ܥܵܒܼܘܿܕܲܢ ܀ 165 :ܠܵܐ ܢܸܫܬܲܒܼܗܲܪ ܟܲܕܼ ܣܲܓܿܝܼ ܠܲܢ ܥܘܼܬܼܪܵܐ ܘܚܲܝܠܵܐ 166 ܘܠܵܐ ܬܸܟܼܪܸܐ ܠܲܢ ܟܲܕܼ ܫܝܼܛ ܥܘܼܡܪܲܢ ܘܲܡܚܝܼܠ ܦܲܓܼܪܲܢ ܀ 167 :ܠܵܐ ܢܼܬܼܪܵܘܪܲܒܼ ܒܪܲܒܿܘܼܬܼ ܕܲܪܓܼܵܐ ܕܪܹܫܢܘܼܬܼܵܐ 168 ܘܠܵܐ ܢܸܨܛܲܡܥܲܪ ܠܡܸܫܬܲܥܒܵܕܼܘܼ ܠܛܲܟܼܣܵܐ ܬܲܩܢܵܐ ܀ 169 :ܐܲܝܢܵܐ ܕܦܵܩܹ̇ܕ ܢܡܲܕܸܿܟ ܡܸܠܵܘ̈ܗܝ ܒܡܸܠܲܬܼ ܫܲܝܢܵܐ 170 ܘܐܲܝܢܵܐ ܕܫܵܡܲ݁ܪ ܢܸܦܪܘܿܥ ܛܲܝܒܿܘܼ ܐܲܝܟ ܚܲܝܵܒܼܵܐ ܀ 171 :ܐܲܝܢܵܐ ܕܪܹܫܵܐ ܗ̄ܘ̣ ܢܸܗܘܸܐ ܪܹܫܵܐ ܒܗܘܿܢ ܒܲܥܒܼܵܕܹ̈ܐ 172 ܒܲܕܼܡܘܼܬܼ ܪܹܫܵܐ ܕܒܹܗ ܡܸܬܼܢܲܗܲܪ ܟܠܹܗ ܓܘܼܫܡܵܐ ܀ 173 :ܐܲܝܢܵܐ ܕܐܝܼܬܼܵܘܗܝ ܡܸܫܬܿܡܥܵܢܵܐ ܒܕܼܘܼܟܲܬܼ ܪܼ̈ܓܼܠܹܗ 174 ܢܸܪܕܹܿܐ ܟܠܫܵܥ ܠܘܵܬܼ ܕܲܦܩܝܼ̈ܕܼܵܢ ܒܲܕܼܡܘܼܬܼ ܪܸ̈ܓܼܠܹܐ ܀ 175 :ܐܲܝܢܵܐ ܕܢܲܗܝܼܪ ܝܲܨܪܵܐ ܕܢܲܦܫܹܗ ܠܡܸܦܪܲܫ ܫܲܦܝܼܪ 176 ܢܚܵܘܸܐ ܐܘܼܪܚܵܐ ܠܲܕܼܚܸܫܘܿܟܼܝܼܢ ܡ̣ܢ ܒܘܼܝܵܢܵܐ ܀ 177 :ܐܲܝܢܵܐ ܕܩܲܠܝܼܠ ܫܸܡܥܵܐ ܕܗܵܘܢܹܗ ܠܲܡܨܵܬܼ ܩܘܼܫܬܵܐ 178 ܢܲܙܥܸܩ ܩܵܠܹܗ ܐܲܝܟ ܫܝܼܦܘܿܪܵܐ ܒܐܸܕܢܲܝ̈ ܥܲܛܠܹ̈ܐ ܀ 179 :ܐܲܝܢܵܐ ܕܚܲܪܝܼܦ ܣܝܦܵܐ ܕܡܸܠܬܹܗ ܠܡܸܩܛܲܠ ܥܵܘ̣ܠܵܐ 180 ܢܸܚܪܘܿܒܼ ܣܸܕܼܪܹ̈ܐ ܕܒܲܥܸܠܕܲܪܵܐ ܒܝܲܕܼ ܦܸܬܼܓܼܵܡܵܘ̈ܗܝ ܀ 181 ܐܲܝܢܵܐ ܕܚܲܟܿܝܼܡ ܘܝܵ̇ܕܲܥ ܛܲܟܼܣܵܐ ܕܡܸܠܲܬܼ ܚܲܝܹ̈ܐ: pb. 201 182 ܢܲܩܢܸܐ ܛܲܥܡܵܐ ܠܲܕܼܦܲܟܿܝܼܗܝܼܢ ܡ̣ܢ ܘܵܠܝܼܬܼܵܐ ܀ 183 :ܐܲܝܢܵܐ ܕܫܲܪܝܼܪ ܚܘܼܒܵܐ ܕܢܲܦܫܹܗ ܒܗܲܝܡܵܢܘܼܬܼܵܐ 184 ܢܡܲܕܸܿܟ ܐܘܼܟܼܠܵܐ ܪܘܼܚܵܢܵܝܵܐ ܠܫܲܒܼܪܘܼܬܼ ܐ̄ܢܵܫܵܐ ܀ 185 :ܐܲܝܢܵܐ ܕܲܚܠܝܼܡ ܡ̣ܢ ܟܘܼ̈ܬܼܡ̇ܬܼܵܐ ܕܲܪ̈ܓܼܝܼܓܼܵܬܼܵܐ 186 ܢܫܝܼܓܼ ܗܲܕܵܡܹ̈ܐ ܕܲܟܼܢܵܘܵܬܹ̈ܗ ܡ̣ܢ ܣܲܢ̈ܝܵܬܼܵܐ ܀ 187 :ܐܲܝܢܵܐ ܕܩܲܕܿܝܼܫ ܡ̣ܢ ܛܲܡܐܘܼܬܼܵܐ ܕܪܸܓܲܬܼ ܒܸܣܪܵܐ 188 ܢܸܪܘܿܣ ܡܸܠܵܘ̈ܗܝ ܒܲܕܼܡܘܼܬܼ ܛܲܠܵܐ ܥܲܠ ܚܲܛܝܹ̈ܐ ܀ 189 :ܐܲܝܢܵܐ ܕܲܥܢܸܐ ܒܗܸܪܓܼܵܐ ܬܲܩܢܵܐ ܕܪ̈ܘܼܚܵܢܝܵܬܼܵܐ 190 ܢܥܲܝܹܕܼ ܚܲܒܼܪ̈ܵܘܗܝ ܒܫܸܡܥܵܐ ܛܵܒܼܵܐ ܕܦܘܼܠܚܵܢ ܚܲܝܹ̈ܐ ܀ 191 :ܐܲܝܢܵܐ ܕܝܲܠܝܼܦ ܘܨܵܒܹ̇ܐ ܕܢܲܠܸܦ ܠܲܕܼܗܸܕܼܝܘܿܠܛܝܼܢ 192 ܢܲܡܲܫܲܚ ܡܸܠܵܘ̈ܗܝ ܠܦܘܼܬܼ ܪܸ̈ܥܝܵܢܹܐ ܘܐܲܟܸܿܢ ܢܲܠܸܦ ܀ 193 :ܢܹܐܡܲܪ ܪܲܒܵܐ ܠܘܵܬܼ ܬܲܠܡܝܼܕܹܗ ܕܚܘܼܪ ܒܝܼ ܘܝܼܠܲܦ 194 ܘܐܵܦ ܬܲܠܡܝܼܕܼܵܐ ܢܸܚܢܸܐ ܠܢܝܼܫܵܐ ܕܡܸܠܲܝ̈ ܪܲܒܹܿܗ ܀ 195 :ܠܵܐ ܢܸܫܬܲܩܲܠ ܪܲܒܵܐ ܒܚܘܼܬܼܪܵܐ ܥܲܠ ܬܲܠܡܝܼܕܹܗ 196 ܘܠܵܐ ܬܲܠܡܝܼܕܼܵܐ ܢܨܲܚܸܐ ܠܪܲܒܵܐ ܕܲܡܚܲܟܸܿܡ ܠܹܗ ܀ 197 :ܢܸܗܘܸܐ ܪܲܒܵܐ ܒܕܘܼܟܲܬܼ ܥܲܝܢܵܐ ܠܪܸ̈ܓܼܫܲܝ ܦܲܓܼܪܵܐ 198 ܘܢܸܪܕܿܘܿܢ ܪܸ̈ܓܼܫܹܐ ܒܵܬܲܪ ܥܲܝܢܵܐ ܠܵܘܬܼ ܝܘܼܠܦܵܢܵܐ ܀ 199 :ܢܡܲܠܸܐ ܛܲܟܼܣܵܐ ܕܡܸܠܲܬܼ ܦܘܼܡ̇ܐ ܨܹܝܕ ܗܲܕܵܡܹ̈ܐ 200 ܘܐܵܦ ܗܲܕܵܡܹ̈ܐ ܢܨܘܼܬܼܘܼܢ ܩܵܠܹܗ ܕܠܵܐ ܣܲܒܼܥܘܼܬܼܵܐ ܀ 201 :ܒܛܲܟܼܣܵܐ ܕܦܲܓܼܪܵܐ ܢܹܐܣܘܿܪ ܚܘܼܒܲܢ ܚܲܕܼ ܨܹܝܕܼ ܚܲܒܼܪܹܗ 202 ܐܲܝܟ ܡܵܐ ܕܲܚܙܝܼܩ ܦܲܓܼܪܵܐ ܒܪܸ̈ܓܼܫܹܐ ܘܚܲܕܼ ܗ̄ܘ̣ ܟܠܹܗ ܀ 203 :ܚܲܕܼ ܗ̄ܘ̣ ܦܲܓܼܪܵܐ ܘܠܵܐ ܡܸܬܼܦܲܠܲܓܼ ܒܦܘܼܪܫܵܢ ܪܸ̈ܓܼܫܹܐ 204 ܘܟܲܕܼ ܣܲܓܿܝܼܐܝܼܢ ܫܘܹܝܢ ܒܐܵܘܝܘܼܬܼܵܐ ܕܠܵܐ ܡܸܣܬܲܕܿܩܵܐ ܀ 205 :ܚܲܕܼ ܗ̄ܘ̣ ܡܫܝܼܚܵܐ ܪܹܫܵܐ ܕܥܹܕܿܬܵܐ ܓܘܼܫܡܵܐ ܕܲܟܼܝܵܐ 206 ܘܲܒܼܚܲܕܼ ܚܘܼܒܵܐ ܦܠܸܐ ܕܲܢܩܵܘܘܿܢ ܦܲܓܼܪܹ̈ܐ ܡܫܝܼܚܹ̈ܐ ܀ 207 :ܐܸܢ ܗܲܕܵܡܹ̈ܐ ܦܪܝܼܫܝܼܢ ܘܲܫܘܹܝܢ ܒܲܕܼܡܸܬܼܚܲܙ̈ܝܵܢ 208 ܟܡܵܐ ܢܸܬܼܙܩܘܼܢ ܙܵܘ̈ܥܹܐ ܟܣܲܝܵ̈ܐ ܨܹܝܕ ܟܲܣ̈ܝܵܬܼܵܐ ܀ 209 :ܦܪܝܼܫܝܼܢ ܪܸ̈ܓܼܠܹܐ ܒܣܘܼܥܪ̈ܵܢܲܝܗܘܿܢ ܚܲܕܼ ܨܹܝܕ ܚܲܒܼܪܹܗ 210 ܘܫܲܘܸܐ ܪܲܗܛܵܐ ܕܦܘܼܠܚܵܢܲܝ̈ܗܘܿܢ ܨܹܝܕܼ ܚܲܕܼ ܓܘܼܫܡܵܐ ܀ 211 :ܠܲܝܬܿ ܗܲܕܵܡܵܐ ܕܚܲܣܸܕܼ ܚܲܒܼܪܹܗ ܒܟܲܫܝܼܪܘܼܬܹܗ 212 ܘܠܵܐ ܐܸܬܼܝܲܥܲܢܘ ܘܲܥܠܲܒܼܘ ܐܘܼܟܼܠܵܐ ܕܣܘܼܢܩܵܢܲܝ̈ܗܘܿܢ ܀ 213 :ܒܛܲܟܼܣܵܐ ܕܪܸ̈ܓܼܫܹܐ ܢܚܘܼܪ ܒܲܚܕܵܕܹ̈ܐ ܐܲܝܟ ܦܵܪ̈ܘܿܫܹܐ 214 ܘܐܲܝܟ ܗܲܕܵܡܹ̈ܐ ܢܕܲܡܸܐ ܟܠܢܵܫ ܒܝܲܕܼ ܣܘܼܥܪ̈ܵܢܲܝܢ ܀ 215 :ܚܝܼܨ ܪܸܥܝܵܢܵܐ ܢܠܲܒܸܿܒܼ ܩܵܠܹܗ ܠܐܲܝܢܵܐ ܕܲܡܚܝܼܠ 216 ܘܢܸܥܨܘܿܒܼ ܚܲܫܹܗ ܒܣܲܡܵܐ ܕܣܲܒܼܪܵܐ ܕܠܵܐ ܡܸܬܼܦܲܟܲܗ ܀ 217 :ܢܲܟܼܠܸܐ ܒܙܲܠܝܼܾ ܢܲܦܫܵܐ ܕܠܐ ܢܸܙܕܲܠܲܠ 218 ܘܪܵܚܹ̇ܡ ܫܲܝܢܵܐ ܢܫܲܬܸܿܩ ܚܸܡܬܼܵܐ ܕܪ̈ܲܓܘܼܙܬܼܵܢܹܐ ܀ 219 ܥܪܝܼܡܵܐ ܠܚܲܣܝܼܪ ܗܵܘܢܵܐ ܠܡܸܕܲܥ ܩܘܼܫܬܵܐ: pb. 202 220 ܘܟܲܫܝܼܪ ܥܲܡܠܹ̈ܐ ܢܥܝܼܪ ܠܲܪ̈ܦܲܝܵܐ ܠܦܘܼܠܚܵܢ ܚܲܝܹ̈ܐ ܀ 221 :ܩܢܹܐ ܩܸܢܝܵܢܹ̈ܐ ܢܦܲܪܢܸܣ ܥܘܼܬܼܪܹܗ ܚܲܟܿܝܼܡܵܐܝܼܬܼ 222 ܘܚܲܣܝܼܪ ܢܸܟܼܣܹ̈ܐ ܢܸܛܲܪ ܢܲܦܫܹܗ ܡ̣ܢ ܪܘܼܛܵܢܵܐ ܀ 223 :ܚܠܝܼܡ ܗܲܕܵܡܹ̈ܐ ܠܵܐ ܢܫܝܼܛ ܝܲܨܪܹܗ ܠܐܲܝܢܵܐ ܕܲܣܓܼܝܼܦ 224 ܘܢܲܣܝܼܣ ܓܘܼܫܡܵܐ ܠܵܐ ܢܸܬܼܪܲܦܸܐ ܒܝܲܕܼ ܩܘܼܛܵܥܵܐ ܀ 225 :ܦܠܸܐ ܒܲܚܙܵܬܼܵܐ ܠܵܐ ܢܲܗܸܠ ܒܹܗ ܒܲܫܟܼܝܼܪ ܐܲܦܹ̈ܐ 226 ܘܲܣܥܸܐ ܚܸܙܘܵܐ ܠܵܐ ܬܸܟܼܪܸܐ ܠܹܗ ܕܥܲܠ ܡ̇ܢ ܗܵܟܲܢ ܀ 227 :ܡܗܝܼܪ ܒܲܣܘܵܕܼܵܐ ܛܲܟܸܿܣ ܡܸܠܲܝ̈ܟ ܡ̣ܢ ܫܘܼܒܼܗܵܪܵܐ 228 ܘܲܟܼܪܸܐ ܡܸܠܬܼܵܐ ܟܠܝܼ ܠܸܫܵܢܵܟ ܡ̣ܢ ܓܘܼܕܵܦܵܐ ܀ 229 :ܚܲܪܝܼܦ ܙܵܘ̈ܥܹܐ ܚܙܝܼ ܠܵܐ ܬܸܣܥܸܐ ܥܲܠ ܟܲܣ̈ܝܵܬܼܵܐ 230 ܘܲܒܼܗܝܼܠ ܗܵܘܢܵܐ ܠܵܐ ܬܸܬܼܡܲܬܿܢ ܨܹܝܕ ܝܘܼܠܦܵܢܵܐ ܀ 231 :ܪܵܚܹ̇ܡ ܟܸܣܦܵܐ ܠܵܐ ܬܸܬܼܝܲܥܲܢ ܠܡܸܣܲܒܼ ܕܲܐ̄ܚܪܹܝܢ 232 ܕܠܵܐ ܢܸܩܪܘܿܢܵܟ ܣܸܦܪ̈ܲܝ ܪܘܼܚܵܐ ܐܵܚܵܒܼ ܕܲܬܼܪܹܝܢ ܀ 233 :ܪܵܚܹ̇ܡ ܫܘܼܒܼܚܵܐ ܠܵܐ ܬܨܘܼܪ ܥܲܡܠܲܝ̈ܟ ܠܥܹܝܢ ܚܲܙܵܝܹ̈ܐ 234 ܕܠܵܐ ܬܸܫܬܵܘܬܲܦ ܒܗܵܝ̇ ܒܲܪܬܼ ܩܵܠܵܐ ܕܲܦܪܝܼܫܵܝܵܐ ܀ 235 :ܢܙܝܼܪ ܡ̣ܢ ܚܲܡܪܵܐ ܚܙܝܼ ܠܵܐ ܬܸܡܙܘܿܓܼ ܚܸܡܬܼܵܐ ܒܫܸܩܝܵܟ 236 ܕܲܠܡܵܐ ܬܸܪܘܸܐ ܒܫܸܩܝܵܐ ܕܪܘܼܓܼܙܵܐ ܘܬܸܥܛܹܐ ܗܵܘܢܵܟ ܀ 237 :ܐܲܡܝܼܢ ܨܵܐܹ̇ܡ ܚܣܘܿܠ ܪܸܥܝܵܢܵܟ ܡ̣ܢ ܣܲܢ̈ܝܵܬܼܵܐ 238 ܕܠܵܐ ܬܸܬܼܢܵܘܲܠ ܒܟܲܦܢܵܐ ܕܲܬܼܢܵܢ ܘܲܒܼܓܹܗܲܢܵܐ ܀ 239 :ܥܢܹܐ ܒܲܨܠܘܼܬܼܵܐ ܨܲܠܵܐ ܒܟܸܣܝܵܐ ܐܲܝܟ ܕܐܸܬܼܦܲܩܲܕܿܬܿ 240 ܕܲܠܡܵܐ ܢܣܲܪܸܩ ܫܘܼܒܼܚܵܐ ܣܪܝܼܩܵܐ ܥܲܡܠܹ̈ܐ ܕܢܲܦܫܵܟ ܀ 241 :ܢܟܸܦ ܒܲܚܝܵܪܹܗ ܠܵܐ ܬܸܬܼܒܲܩܸܐ ܒܫܘܼܦܪܵܐ ܕܐܲܦܹ̈ܐ 242 ܕܠܵܐ ܬܸܬܼܥܲܪܩܲܠ ܒܲܡܨܝܼ̈ܕܼܵܬܼܵܐ ܕܪܸܓܲܬܼ ܒܸܣܪܵܐ ܀ 243 :ܒܚܵܘܪܵܐ ܣܲܢܝܵܐ ܢܦܲܠ̣ܘ ܚܲܩܝܼܪܹ̈ܐ ܡ̣ܢ ܕܼܪ̈ܓܲܝܗܘܿܢ 244 ܘܚܵܒܼ݂ܘ ܓܲܢ̄ܒܵܪܹ̈ܐ ܡ̣ܢ ܚܘܼ̈ܬܼܚܵܬܹܐ ܕܦܸܓܼܥܵܐ ܕܐܲܦܹ̈ܐ ܀ 245 :ܚܵܘܪܵܐ ܕܥܲܝܢܹ̈ܐ ܦܲܟܼ݂ܪܹܗ ܠܫܸܡܫܘܿܢ ܓܲܢ̄ܒܵܪ ܚܲܝܠܵܐ 246 ܘܫܘܦܪܵܐ ܕܐܲܦܹ̈ܐ ܨܵܕܹܗ ܠܕܼܵܘܝܼܕܼ ܢܲܗܝܼܪ ܗܵܘܢܵܐ ܀ 247 :ܘܐܸܢ ܓܲܢ̄ܒܵܪܹ̈ܐ ܘܩܲܢ̈ܝܲܝ ܗܵܘܢܵܐ ܢܦܲܠ̣ܘ ܒܲܚܙܵܬܼܵܐ 248 ܡܲܢ ܠܵܐ ܢܸܛܲܪ ܚܝܵܪܵܐ ܕܥܲܝܢܵܘ̈ܗܝ ܡ̣ܢ ܬܘܼܩ̈ܠܵܬܼܵܐ ܀ 249 :ܥܲܝܢܵܐ ܪܦܝܼܬܼܵܐ ܗ̄ܝ̣ ܘܩܸܒܼܝܵܐ ܕܡܲܚ̈ܵܐ ܚܒܼܝܼܫ ܒܲܡܥܝܼܢܵܗ̇ 250 ܘܐܸܢ ܡܸܬܿܬܲܪܥܝܼܢ ܡܛܝܼܦܝܼܢ ܦܲܓܼܪܵܐ ܘܡܲܦܗܹܝܢ ܢܲܦܫܵܐ ܀ pb. 203 251 :ܐܲܚܘܿܕܼ ܢܲܟܼܦܵܐ ܬܲܪܥܵܐ ܕܥܲܝܢܲܝ̈ܟ ܘܛܲܪ ܒܵܒܼܵܬܼ̈ܟ 252 ܕܠܵܐ ܢܸܬܼܚܲܠܲܨ ܓܲܙܵܐ ܕܟܲܢܸܫܬܿ ܒܲܙܗܝܼܪܘܼܬܼܵܐ ܀ 253 :ܠܵܐ ܬܼܬܒܲܩܸܐ ܒܫܘܼܦܪܵܐ ܕܐܲܦܹ̈ܐ ܒܲܡܠܸܐ ܙܲܒܼܢܵܐ 254 ܕܲܠܡܵܐ ܬܸܗܘܸܐ ܫܟܼܝܼܪ ܒܲܚܙܬܼܵܐ ܒܲܚܠܘܿܠ ܪܵܘܡܵܐ ܀ 255 :ܐܵܦ ܐܲܢ̄ܬܿܝ ܚܵܘܵܐ ܟܲܣܵܝ ܐܲܦܲܝ̈ܟܿܝ ܒܢܲܚܬܵܐ ܢܲܟܼܦܵܐ 256 ܕܠܵܐ ܢܸܬܿܬܿܨܝܼܪܘܼܢ ܢܲܟܼܦܹ̈ܐ ܒܦܲܚܹ̈ܐ ܕܚܵܘܪܹܟܼܝ ܣܲܢܝܵܐ ܀ 257 :ܛܲܟܸܿܣܝ ܪܲܗܛܵܐ ܕܝܲܨܪܵܐ ܕܢܲܦܫܹܟܼܝ ܘܲܕܒܼܵܒܼܵܬܹ̈ܟܼܝ 258 ܕܠܵܐ ܢܸܬܿܬܲܩܠܘܼܢ ܪ̈ܵܕܝܲܝ ܒܐܘܼܪܚܵܐ ܒܲܫܒܼܝܼܠ ܥܲܝܢܲܝ̈ܟܿܝ ܀ 259 :ܚܘܼܪܝ ܬܲܩܢܵܐܝܼܬܿ ܘܨܲܒܸܿܬܼܝ ܢܲܦܫܹܟܼܷ ܒܲܟܼܢܝܼܟܼܘܼܬܼܵܐ 260 ܕܲܠܡܵܐ ܬܦܘܼܫܝܼܢ ܠܒܲܪ ܡ̣ܢ ܬܿܪܥܵܐ ܥܲܡ ܣܲܟܸ̈ܠܵܬܼܵܐ ܀ 261 :ܛܲܝܸܒܼܝ ܡܸܫܚܵܐ ܘܦܘܿܩܝ ܒܲܠܘܝܼܬܼܵܐ ܕܚܲܟܝܼ̈ܡܵܬܼܵܐ 262 ܕܲܠܡܵܐ ܢܸܕܼܥܲܟ ܠܲܡܦܹܝܕܼ ܚܘܼܒܹܿܟܼܝ ܘܬܸܗܘܹܝܢ ܓܘܼܚܟܵܐ ܀ 263 :ܠܵܐ ܬܸܨܛܲܒܿܬܼܝܼܢ ܒܨܸܒܼܬܵܐ ܕܐܲܦܹ̈ܐ ܒܲܪ̈ܵܝܵܬܼܵܐ 264 ܕܠܵܐ ܢܲܗܠܘܼܢ ܒܹܟܼܝ ܫܵܝܪܲܝ ܫܲܦܝܼܪ ܒܫܘܼܦܪܵܐ ܕܢܲܦܫܵܐ ܀ 265 :ܟܠܵܝ ܗܲܠܟܼܵܬܹ̈ܿܟܼܷܝ ܥܲܡ ܒܵܒܼܵܬܹ̈ܟܼܝ ܡ̣ܢ ܣܲܢ̈ܝܵܬܼܵܐ 266 ܕܠܵܐ ܢܸܩܪܘܿܢܹܟܼܝ ܟܹܐܦܵܐ ܨܚܲܬܬܼܵܐ ܕܫܲܕܼܝܵܐ ܒܫܘܼܩܵܐ ܀ 267 :ܚܘܼܪܝ ܘܐܸܬܼܒܲܝܲܢܝ ܕܦܚܵܐ ܥܲܝܢܹܟܼܝ ܘܨܸܒܼܬܵܐ ܕܐܲܦܲܝ̈ܟܿܝ 268 ܘܒܹܟܼܝ ܡܸܬܿܬܿܨܝܼܕܼܝܢ ܪܼ̈ܓܼܫܹܐ ܘܙܵܘܥܹ̈ܐ ܐܲܝܟ ܕܲܒܼܦܲܝܵܐ ܀ 269 :ܦܲܚܵܐ ܐܢ̄ܬܿܝ ܟܠܹܟܼܝ ܕܲܛܡܝܼܪ ܒܐܲܪܥܵܐ ܩܕܼܵܡ ܗܲܠ̈ܟܼܵܬܼܵܐ 270 ܘܠܵܐ ܐ̄ܢܵܫ ܝܵ̇ܕܲܥ ܕܐܲܝܟܲܢ ܢܵܦܹ̇ܠ ܒܲܡܨܝܼ̈ܬܹܟܼܝ ܀ 271 :ܒܩܸܛܪܹ̈ܐ ܨܢܝܼܥܹ̈ܐ ܙܩܝܼܪܝܼܢ ܢܸܫ̈ܒܹܿܐ ܕܲܪ̈ܓܲܝܼܓܼܵܬܹܟܼܝ 272 ܘܣܲܓܿܝܼ ܥܲܣܩܵܐ ܠܡܸܬܼܦܲܠܵܛܘܼ ܡ̣ܢ ܨܸܢܥܵܬܹ̈ܟܼܝ ܀ 273 :ܠܚܲܓܼܠܵܐ ܕܵܡ̇ܝܲܬܿܝ ܕܩܵܪܹܐ ܠܡܵܘܬܵܐ ܠܲܒܼܢܲܝ̈ ܓܸܢܣܹܗ 274 ܘܲܒܼܢܸܥ̈ܡܵܬܹܗ ܩܵܛܹ̇ܠ ܚܲܒܼܪ̈ܵܘܗܝ ܘܡܵܐܹ̇ܬܼ ܐܵܦ ܗܘ̤ ܀ 275 :ܒܲܕܼܡܘܼܬܼ ܚܲܓ̣ܠܵܐ ܡܚܲܬܼܚܸܬܼ ܚܸܙܘܹܟܼܝ ܠܲܕܼܚܵܐܲܪ ܒܹܟܼܝ 276 ܘܲܒܼܫܘܼܓܵܫܲܝ̈ܟܿܝ ܨܵܝ̇ܕܲܬܿܝ ܫܲܒܼܪܹ̈ܐ ܐܲܝܟ ܦܵܪ̈ܲܚܬܼܵܐ ܀ 277 :ܡܵܘܬܵܐ ܥܦܝܼܦܵܐ ܚܒܼܝܼܫ ܒܲܩܠܘܼܒܼܝܵܐ ܕܝܲܨܪܹܟܼܝ ܒܝܼܫܵܐ 278 ܘܩܵܪܹܐ ܠܐ̄ܢܵܫܵܐ ܠܘܵܬܼ ܐܲܒܼܕܵܢܵܐ ܐܲܝܟ ܕܲܠܫܲܝܢܵܐ ܀ 279 ܠܠܸܩܛܵܐ ܕܵܡܹ̇ܐ ܡܲܡܠܠܵܐ ܕܦܘܼܡܹܟܼܝ ܩܕܼܵܡ ܗܸܕܼܝܘܿܛܹ̈ܐ: pb. 204 280 ܘܡܵܐ ܕܐܸܬܼܪܲܓܼܪܲܓܼܘ ܠܡܹܐܟܲܠ ܡܸܢܹܗ ܡ̣ܝܼܢܼܘ ܒܲܚܛܝܼܬܼܵܐ ܀ 281 :ܠܲܝܬܿ ܨܲܝܵܕܼܵܐ ܕܲܡܗܝܼܪ ܡܸܢܹܟܼܝ ܠܲܡܨܵܕܸ ܐ̄ܢܵܫܵܐ 282 ܘܠܲܝܬܿ ܦܵܪܲܚܬܵܐ ܕܩܵܪܝܵܐ ܫܲܦܝܼܪ ܐܲܝܟ ܫܘܼܓܵܫܲܝܟܿܝ ܀ 283 :ܥܪܝܼܡܲܬܿܝ ܣܲܓܿܝܼ ܠܐܘܼܡ̇ܢܘܼܬܼܵܐ ܕܨܲܝܕܵܐ ܕܐ̄ܢܵܫܵܐ 284 ܘܠܵܐ ܐ̄ܢܵܫ ܝܵ̇ܕܲܥ ܠܲܡܬܲܢܵܝܘܼ ܙܢܲܝ̈ ܨܸܢ̈ܥܵܬܹܟܼܝ ܀ 285 :ܚܲܟܿܝܼܡ ܝܲܨܪܹܟܼܝ ܠܡܸܩܪܵܐ ܒܣܸܦܪ̈ܵܘܗܝ ܕܩܵܛܹ̇ܠ ܐ̄ܢܵܫܵܐ 286 ܘܲܫܒܲܪ ܠܸܒܹܿܟܼܝ ܠܡܸܬܼܗܲܓܵܝܘܼ ܒܚܸܟܼܡܲܬܼ ܩܘܼܫܬܵܐ ܀ 287 :ܗܘ̤ܝܘܼ ܗܘ̤ܵܐ ܠܹܟܼܝ ܪܲܒܵܐ ܡܗܝܼܪܵܐ ܡ̣ܢ ܫܘܼܪܵܝܵܐ 288 ܘܒܲܟܼܬܼܝܼ̈ܒܼܵܬܹܗ ܩܪܲܝܬܿܝ ܘܐܸܬܼܗܲܓܿܝܼܬܿܝ ܘܲܚ̣ܛܲܝܬܿܝ ܘܐܲܚܛܝܼܬܿܝ ܀ 289 :ܦܘܼܫܝ ܡ̣ܢ ܗܸܪܓܲܗ ܕܣܵܦܪܵܐ ܢܟܼܝܼܠܵܐ ܡܲܠܸܦ ܙܹܐܦܵܐ 290 ܘܬܼܵܝ ܐܸܬܼܗܲܓܵܝ ܒܣܸܦܪܲܝ ܪܘܼܚܵܐ ܕܡܲܩܢܹܝܢ ܚܲܝܹ̈ܐ ܀ 291 :ܠܵܐ ܬܸܬܿܕܡܹܝܢ ܠܚܵܘܵܐ ܐܸܡܹܟܼܝ ܕܫܸܡܥܲܬ̤ ܡܸܠܟܹܿܗ 292 ܘܐܸܟܼܠܲܬ̤ ܦܹܐܪܵܐ ܘܝܸܠܕܲܬ̤ ܡܵܘܬܵܐ ܠܲܕܼܒܼܝܬܼ ܐܵܕܸܵܡ ܀ 293 ܗܵܐ ܬܘܼܒܼ ܬܵܘܥܹܝܢ ܡܸܪܲܬܼ ܡ̇ܘܬܵܐ ܒܝܲܕܼ ܨܸܢܥܵܬ̈ܟܼܝ ܀ 294 :ܟܲܕܿܘܼ ܩܛܲܠ̣ܬܿܝܼܢ ܒܐܘܼܟܼܠܵܐ ܕܦܹܐܪܵܐ ܕܪܸܓܼܬܼ ܐܸܡܹܟܼܝ 295 ܠܵܐ ܬܡܝܼܬܼܝܼܢܲܢ ܒܪܸܓܲܬܼ ܒܸܣܪܵܐ ܐܲܝܟ ܕܲܒܼܦܹܐܪܵܐ ܀ 296 :ܦܘܼܫܝ ܠܵܐ ܬܸܗܘܹܝܢ ܡܨܝܼܕܿܬܵܐ ܕܥܵܘ̣ܠܵܐ ܩܕܼܵܡ ܚܲܙܵܝܹ̈ܐ 297 ܕܗܵܐ ܐܸܬܼܦܲܟܪܘ ܟܠ ܡܘܼܫ̈ܚܵܬܼܵܐ ܒܢܸܫ̈ܒܹܐ ܕܐܲܦܲܝ̈ܟܿܝ ܀ 298 :ܠܘܲܝ ܣܲܢܝܵܐ ܗ̣̄ܘܲܝܬܿܝ ܒܚܸܙܘܵܐ ܕܐܲܦܲܝ̈ܟܿܝ ܐܲܝܟ ܪܸܥܝܵܢܹܟܼܝ 299 ܕܕܲܡ ܓܵܥܨܝܼܢ ܗ̄ܘ̣ܵܘ ܫܲܒܼܪܵܝ ܠܸܒܵܐ ܡ̣ܢ ܣܲܢܝܘܼܬܹܟܼܝ ܀ 300 :ܐܘܲܝ ܠܵܐ ܣܓܼܝܼ ܠܹܟܼܝ ܨܸܒܼܬܵܐ ܕܐܲܦܹ̈ܐ ܘܡܲܪ̈ܓܵܢܝܵܬܼܵܐ 301 ܟܲܒܲܪ ܡܲܗܡܹܝܢ ܗ̄ܘ̣ܵܘ ܪ̈ܵܚܡܲܝ ܨܸܒܼܬܵܐ ܡ̣ܢ ܥܸܢܝܵܢܹܟܼܝ ܀ 302 :ܡܲܢ ܕܹܝܢ ܐܲܪܡܝܼ ܩܹܐܡ̇ܐ ܒܥܲܝܢܲܝ̈ܟܿܝ ܘܲܒܼܗܲܠ̈ܟܼܬܹܟܼܝ 303 ܘܐܲܥܸܠ ܚܲܒܼܫܹܟܼܝ ܒܓܼܵܘ ܢܵܡܲܪܬܵܐ ܐܲܝܟ ܚܲܝ̈ܘܵܬܼܵܐ ܀ 304 :ܡܲܢ ܕܹܝܢ ܐܲܣܪܹܗ ܠܝܲܨܪܹܟܼܝ ܒܝܼܫܵܐ ܒܙܲܝܢܵܐ ܟܠܫܵܥ 305 ܟܒܲܪ ܫܵܠܹ̇ܐ ܗ̄ܘ̣ܵܐ ܩܵܠܵܐ ܕܕܼܵܠܲܚ̇ ܫܲܝܢܵܐ ܕܐ̄ܢܵܫܵܐ ܀ 306 :ܡܲܢ ܕܹܝܢ ܐܲܪܡܝܼ ܛܲܒܼܥܵܐ ܕܫܸܬܼܩܵܐ ܥܲܠ ܠܸܫܵܢܹܟܼܝ 307 ܟܒܲܪ ܦܵܐܹ̇ܫ ܗ̄ܘ̣ܵܐ ܡ̣ܢ ܕܲܠܡܸܚܪܲܒܼ ܣܸܕܼܪܹ݁ܐ ܕܐ̄ܢܵܫܵܐ ܀ 308 :ܛܘܼܒܼܵܘܗܝ ܠܐܲܝܢܵܐ ܕܣܲܟܲܪ ܐܸܕܢܵܘ̈ܗܝ ܘܠܵܐ ܨܵܬܼ ܡܸܠܲܝ̈ܟܿܝ 309 ܘܲܗܘ̤ܵܐ ܚܲܪܫܵܐ ܠܘܵܬܼ ܥܸܢܝܵܢܵܐ ܕܙܲܠܝܼܠܘܼܬܹܟܼܝ ܀ 310 :ܛܘܼܒܼܵܘܗܝ ܠܐܲܝܢܵܐ ܕܟܲܕܼ ܥܲܡܹܟܼܝ ܗ̄ܘ̣ ܠܵܘ ܥܲܡܟܼܝ ܗ̄ܘ̣ 311 ܘܲܥܡ݂ܲܪ ܥܲܡܹܟܼܝ ܘܲܢ̣ܛܲܪ ܢܲܦܫܹܟ ܡ̣ܢ ܢܸܟܼܝܵܢܲܝ̈ܟܿܝ ܀ 312 :ܛܘܼܒܼܵܘܗܝ ܠܐܲܝܢܵܐ ܕܠܵܐ ܛܥ̣ܵܐ ܒܫܲܪܒܹܿܟܼܝ ܢܝܼܫܵܐ ܕܡܸܠܵܘܗܝ 313 ܘܠܵܐ ܐܸܬܿܕܵܘܲܕܼ ܒܲܗ̈ܦܵܟܼܵܬܼܵܐ ܕܙܲܠܝܼܠܘܼܬܹܟܼܝ ܀ pb. 205 314 :ܒܫܲܪܒܹܿܟܼܝ ܐܲܣܛܝܼܬܼ ܡ̣ܢ ܡܲܪܕܲܝܼܬܼܵܐ ܕܲܫܒܼܝܼܠ ܡܸܠܲܝ̈ 315 ܕܲܚܙܹ̇ܝܬܼ ܕܲܣܓܼܝܼܘ ܦܲܚܹ̈ܐ ܕܢܸܟܼܠܲܝ̈ܟܿܝ ܕܠܵܐ ܡܸܢܝܵܢܵܐ ܀ 316 :ܫܲܪܒܹܿܟܼܝ ܢܲܓܼܕܲܢܝ ܡ̣ܢ ܥܸܢܝܵܢܵܐ ܕܲܠܘܵܬܼ ܟܠ ܐ̄ܢܵܫ 317 ܕܲܚܙܹ̇ܝܬܼ ܕܐܲܣܝܼܪ ܥܵܠܡܵܐ ܟܠܹܗ ܒܥܸܢܝܵܢ ܚܘܼܒܹܿܟܼܝ ܀ 318 :ܠܵܐ ܡ̣ܢ ܒܝܼܫܘܼ ܐܸܟܼܠܹ̇ܬܼ ܩܲܪ̈ܨܲܝܟܿܝ ܐܲܝܟ ܡ̇ܐ ܕܲܣܒ݂ܲܪܬܿܝ 319 ܘܠܵܘ ܠܹܟܼܝ ܓܲܢܝܼܬܼ ܐܸܠܵܐ ܠܝܲܨܪܹܟܼܝ ܕܚܵܛܹ̇ܐ ܘܡܲܚܛܹܐ ܀ 320 :ܐܵܦ ܠܹܗ ܠܝܲܨܪܹܟܼܝ ܠܵܐ ܓܲܢܝܼܬܹܿܗ ܐܲܝܟ ܕܲܠܒܼܝܼܫܵܐ 321 ܐܸܠܵܐ ܕܟܲܕܼ ܛܵܒܼ ܡܲܒܼܐܸܫ ܟܠܢܵܫ ܠܹܗ ܘܲܠܚܒܼܪ̈ܵܘܗܝ ܀ 322 :ܠܵܘ ܒܲܟܼܝܵܢܵܐ ܐܲܣܝܼܪ ܝܲܨܪܹܟܼܝ ܐܲܝܟ ܫܲܬܿܝܼܩܹ̈ܐ 323 ܘܠܵܘ ܒܲܠܚܘܿܕܲܝܟܿܝ ܩܲܢܝܲܬܿܝ ܙܵܘܥܹ̈ܐ ܠܘܵܬܼ ܚܘܼܬܼܚܵܬܹ̈ܐ ܀ 324 :ܫܘܸܐ ܗ̄ܘ̣ ܒܘܼܚܪܵܢܵܐ ܕܦܵܪܘܿܫܘܼܬܹܟܼܝ ܒܲܕܼܡܘܼܬܼ ܓܲܒܼܪܵܐ 325 ܘܐܸܢ ܫܵܦܲܪ ܠܹܟܼܝ ܠܵܐ ܡܸܬܼܒܲܨܪܲܬܿܝ ܡ̣ܢ ܦܘܼܠܚܵܢܹܗ ܀ 326 :ܚܲܕܼ ܗ̄ܘ̣ ܝܲܨܪܵܐ ܕܦܵܪܘܿܫܘܼܬܼܵܐ ܕܓܲܒܼܪܹ̈ܐ ܘܢܸܫܹ̈ܐ 327 ܘܚܲܕܼ ܗ̄ܘ̣ ܚܲܝܠܵܐ ܘܚܹܐܪܘܼܬܼ ܢܲܦܫܵܐ ܕܙܵܟܹ̇ܐ ܘܚܵܐܹ̇ܒܼ ܀ 328 :ܠܵܐ ܗ̄ܘ̣ܵܐ ܬܸܓܼܡܵܐ ܕܢܸܫܹ̈ܐ ܡܲܣܠܲܝ ܨܼܝܕܼ ܝܵ̇ܕܲܥ ܟܠ 329 ܐܸܠܵܐ ܝܲܨܪܵܐ ܕܡܲܪ̈ܵܚܬܼܵܐ ܕܠܵܐ ܡܸܬܼܟܲܚܲܕܸ ܀ 330 :ܠܵܘ ܥܸܢܝܵܢܵܐ ܕܲܟܼܢܝܼ̈ܟܼܵܬܼܵܐ ܡܲܚܛܸܐ ܠܐ̄ܢܵܫܵܐ 331 ܐܸܠܵܐ ܫܸܕܠܵܐ ܕܙܲܠܝܼ̈ܠܵܬܼܵܐ ܡܲܦܗܸܐ ܠܫܲܒܼܪܹ̈ܐ ܀ 332 :ܠܵܐ ܛܡܲܐ ܢܸܩܦܵܐ ܕܫܵܘܬܵܦܘܼܬܼܵܐ ܕܫܲܪܝܼܪ̈ܵܬܼܵܐ 333 ܐܸܠܵܐ ܒܝܼܫܘܼ ܫܸܩܝܵܐ ܨܲܚܢܵܐ ܕܕܲܠܵܐ ܢܵܡܘܿܣ ܀ 334 :ܕܲܟܼܝܵܐ ܗ̄ܝܼ ܐܲܢ̄ܬܿܬܼܵܐ ܟܲܕܼ ܪܲܚܝܼܩܵܐ ܡ̣ܢ ܨܲܚܢܘܼܬܼܵܐ 335 ܘܩܲܕܿܝܼܫ ܘܲܕܼܟܸܐ ܢܸܩܦܵܐ ܕܥܲܡܵܗ̇ ܘܝܲܠܕܵܐ ܕܡܸܢܵܗ̇ ܀ 336 :ܫܲܘܝܵܐ ܗ̄ܝܼ ܒܥܲܡܠܹ̈ܐ ܘܲܒܼܦܘܼܪܥܵܢܵܐ ܗܝ̤ ܘܐܵܦ ܓܲܒܼܪܵܗ̇ 337 ܘܐܲܟܲܚ̄ܕܼ ܝܵܪܬܿܝܼܢ ܥܘܼܡܪܵܐ ܕܙܲܒܼܢܵܐ ܘܡܲܠܟܿܘܼܬܼ ܪܵܘܡ̇ܐ ܀ 338 :ܗܵܪܟܵܐ ܦܪܝܼܫܝܼܢ ܒܐܸܣܟܹܿܡܲܝ̈ܗܘܿܢ ܚܲܕܼ ܡ̣ܢ ܚܲܒܼܪܹܗ 339 ܠܗܲܠ ܠܲܝܬܿ ܕܸܟܼܪܹ̈ܐ ܘܠܵܐ ܢܸܩ̈ܒܼܵܬܼܵܐ ܕܚܲܕܼܘܼ ܟܝܵܢܵܐ ܀ 340 :ܘܐܸܢ ܚܲܕܼ ܐܸܢܘܿܢ ܒܐܲܬܼܪܵܐ ܕܲܕܟܸܐ ܡ̣ܢ ܢܸܟܼܝܵܢܹ̈ܐ 341 ܠܵܐ ܐ̄ܢܵܫ ܢܸܦܪܘܿܫ ܡܸܕܲܡ ܕܐܲܫܘܝܼ ܐܲܠܵܗ ܟܠܵܐ ܀ 342 :ܚܲܕܼ ܗ̄ܘ̣ ܟܝܵܢܵܐ ܕܓܲܒܼܪܹ̈ܐ ܘܢܸܫܹ̈ܐ ܘܚܲܕܼ ܒܵܪܘܿܝܵܐ 343 ܘܲܠܚܲܕܼ ܢܝܼܫܵܐ ܘܵܠܹ̇ܐ ܕܢܸܚܢܘܿܢ ܒܣܘܼܥܪ̈ܵܢܲܝܗܘܿܢ ܀ 344 :ܠܵܐ ܠܲܡ ܓܲܒܼܪܵܐ ܠܒܲܪ ܡ̣ܢ ܐܲܢ̄ܬܿܬܼܵܐ ܒܗܲܝܡܵܢܘܼܬܼܵܐ 345 ܐܵܦܠܵܐ ܐܲܢ̄ܬܿܬܼܵܐ ܠܒܲܪ ܡ̣ܢ ܓܲܒܼܪܵܐ ܒܕܸܚܠܲܬܼ ܩܘܼܫܬܵܐ ܀ 346 :ܓܲܒܼܪܵܐ ܢܡܲܠܹܐ ܕܘܼܟܲܬܼ ܪܹܫܵܐ ܠܢܸܫܹ̈ܐ ܪܸ̈ܓܼܠܹܐ 347 ܘܐܲܢ̄ܬܿܬܼܵܐ ܬܸܪܕܸܿܐ ܒܛܲܟܼܣܵܐ ܕܲܦܠܸܐ ܠܪܸ̈ܓܼܠܹܐ ܕܲܠܬܲܚܬܿ ܀ 348 :ܢܸܗܘܸܐ ܓܲܒܼܪܵܐ ܐܲܝܟ ܠܸܫܵܢܵܐ ܟܸܢܵܪ ܡܸܢܹ̈ܐ 349 ܘܢܙܸܪܘܿܥ ܟܠ ܫܵܥ ܩܵܠܹ̈ܐ ܢܲܟܼܦܹ̈ܐ ܒܐܸܕܼܢܲܝ̈ ܢܵܫܹ̈ܐ ܀ 350 :ܢܨܘܼ̈ܬܼܵܢ ܢܸܫܹ̈ܐ ܩܵܠ ܦܸܬܼܓܼܵܡܵܘ̈ܗܝ ܒܗܲܝܡܵܢܘܼܬܼܵܐ 351 ܘܢܸܬ̈ܠܵܢ ܦܸܐܪܹ̈ܐ ܕܕܲܟܼܝܘܼܬܼ ܢܲܦܫܵܐ ܣܲܒܼܪܵܐ ܘܚܘܼܒܵܐ ܀ pb. 206 352 :ܠܵܐ ܢܸܬܿܛܲܠܡܘܼܢ ܩܵܠܲܝ̈ ܦܘܼܡܹܗ ܕܐܲܝܢܵܐ ܕܙܵܪܲܥ 353 ܘܠܵܐ ܡܲܫܡܲܥܬܼܵܐ ܬܟܼܘܼܡ ܥܲܠ ܙܲܪܥܵܐ ܕܡܸܠܲܬܼ ܚܲܝ̈ܐ ܀ 354 :ܙܪܘܿܥ ܐܲܢ̄ܬܿ ܓܲܒܼܪܵܐ ܡܸܠܲܬܼ ܚܲܝܹ̈ܐ ܒܐܸܕܢܲܝ̈ ܢܸܫܹ̈ܐ 355 ܘܐܲܢ̄ܬܹܿܝܢ ܢܸܫܹ̈ܐ ܩܲܒܸܿܠ̈ܝ ܘܲܫܡܲܥܝ̈ ܠܣܵܗܕܿܘܼܬܼ ܓܲܒܼܪܹ̈ܐ ܀ 356 :ܚܵܘܒܲܬܼ ܚܘܼܒܵܐ ܚܲܝܵܒܼܝܼܢܲܢ ܚܲܕ ܨܼܝܕܼ ܚܲܒܼܪܹ̈ܐ 357 ܦܪܘܿܥܘ ܠܲܚܕܼܵܕܹ̈ܐ ܘܲܠܒܼܵܪܘܿܝܵܐ ܐܲܚܕܵܐ ܕܦܲܐܝܵܐ ܀ 358 :ܚܘܼܒܵܐ ܕܲܟܼܝܵܐ ܡܨܸܐ ܦܵܪܲܥ ܠܵܗ̇ ܠܚܵܘܒܲܬܼ ܐ̄ܢܵܫܵܐ 359 ܘܗܘ̤ ܥܵܒܹ̇ܕܼ ܠܲܢ ܪ̈ܲܚܡܹܐ ܠܟܲܣܝܵܐ ܘܲܠܪ̈ܘܼܚܵܢܹܐ ܀ 360 :ܐܲܚܸܒܼܘ ܓܲܒܼܪܹ̈ܐ ܚܕܼܵܐ ܬܼܵܘܕܲܝܼܬܼܵܐ ܕܚܲܕܼ ܒܵܪܘܿܝܵܐ 361 ܘܲܪ̈ܚܲܡܝ ܢܸܫܹ̈ܐ ܚܕܼܵܐ ܫܲܘܝܘܼܬܵܐ ܕܚܲܕܼ ܐܲܠܵܗܵܐ ܀ 362 :ܐܘܕܼܵܘ ܫܲܦܝܼܪ ܐܲܟܼܡܵܐ ܕܲܦܐܹܐ ܠܝܲܨܪܵܐ ܕܲܒܼܟܼܘܿܢ 363 ܚܕܵܐ ܐܝܼܬܼܘܼܬܼܵܐ ܘܝܲܕܼ ܫܘܼܠܛܵܢܵܐ ܩܢܘܿܡܹ̈ܐ ܬܠܵܬܐ ܀ 364 :ܐܵܘܕܵܘ ܕܐܝܼܬܼܵܘܗܝ ܟܝܵܢܵܐ ܫܲܘܝܵܐ ܕܠܵܐ ܡܸܬܼܦܲܠܲܓܼ 365 ܘܐܝܼܬܼܵܘܗܝ ܡܸܡܬܼܘܿܡ ܐܲܟܼܡܵܐ ܕܐܝܼܬܼܵܘܗܝ ܕܠܵܐ ܫܘܼܪܵܝܵܐ ܀ 366 :ܐܵܘܕܼܵܘ ܕܐܝܼܬܼܵܘܗܝ ܐܲܒܼܵܐ ܘܲܒܼܪܵܐ ܘܪܘܼܚܵܐ ܕܡܸܢܹܗ 367 ܚܲܕܼ ܝܵܠܘܿܕܼܵܐ ܘܚܲܕܸ ܝܼܠܝܼܕܼܵܐ ܘܚܲܕ ܢܵܦܘܿܩܵܐ ܀ 368 :ܐܵܘܕܵܘ ܒܐܲܒܼܵܐ ܕܠܵܐ ܐܝܼܬܼ ܐܸܡܲܬܼܝ ܕܠܵܘ ܐܲܒܼܵܐ ܗ̄ܘ̣ܵܐ 369 ܘܗܲܝܡܸܢܘ ܒܲܒܼܪܵܐ ܕܠܵܐ ܐܝܼܬܼ ܙܲܒܼܢܵܐ ܒܹܝܬܼ ܠܹܗ ܠܐܲܒܼܘܼܗܝ ܀ 370 :ܩܲܠܸܣܘ ܘܐܵܘܪܸܒܼܘ ܠܪܘܼܚܵܐ ܕܐܝܼܬܼܵܘܗܝ ܚܲܕܼ ܒܐܝܼܬܼܘܬܼܵܐ 371 ܘܠܵܐ ܒܨܝܼܪ ܘܲܙܥܘܿܪ ܡ̣ܢ ܫܘܼܠܛܵܢܵܐ ܕܐܲܒܼܵܐ ܘܲܒܼܪܵܐ ܀ 372 :ܩܪܵܘ ܬܲܩܢܵܐܝܼܬܼ ܐܲܒܼܵܐ ܘܲܒܼܪܵܐ ܘܪܘܼܚܵܐ ܕܩܘܼܕܼܫܵܐ 373 ܟܝܵܢܵܐ ܕܲܫܘܸܐ ܘܠܵܐ ܡܸܬܼܦܲܠܲܓܼ ܒܝܲܕܼ ܫܘܼܚܠܵܦܵܐ ܀ 374 :ܠܵܐ ܡܸܫܬܲܚܠܲܦ ܐܲܠܵܗ ܟܠܵܐ ܡ̣ܢ ܡܵܐ ܕܐܝܼܬܼܵܘܗܝ 375 ܘܠܵܐ ܡܸܣܬܲܝܲܟ ܟܝܵܢ ܐܝܼܬܼܘܼܬܹܗ ܠܓܼܵܘ ܡ̣ܢ ܣܵܟܼܵܐ ܀ 376 :ܠܲܝܬܿ ܠܲܕܝܵܢܹܗ ܕܬܸܚܙܹܝܘܗܝ ܥܲܝܢܵܐ ܒܪܸ̈ܓܼܫܹܐ ܕܲܠܒܲܪ 377 ܘܠܵܐ ܩܢܹܐ ܩܵܠܵܐ ܡܸܬܼܪܲܓܼܫܵܢܵܐ ܐܲܝܟ ܦܲܓܼܪ̈ܢܹܐ ܀ 378 ܐܝܼܬܼܝܵܐ ܗ̄ܘ̣ ܟܠܹܗ ܘܟܲܣܝܵܐ ܗ̄ܘ̣ ܟܠܹܗ ܘܫܲܘܝܵܐ ܗ̄ܘ̣ ܟܠܹܗ ܀ 379 ܘܲܓܼܡܝܼܪ ܟܠܹܗ ܒܐܲܠܵܗܘܼܬܹܗ ܘܥܵܒܼܘܿܕܘܼܬܹܗ ܀ 380 :ܪܸܡܙܹܗ ܬܲܩܸܢ ܫܡܲܝܵܐ ܘܐܲܪܥܵܐ ܘܟܼܠܡܵܐ ܕܲܒܼܗܘܿܢ 381 ܘܡ̣ܢ ܠܵܐ ܡܸܕܸܿܡ ܒܝܼܪܵܐ ܟܠܡܸܕܹܿܡ ܕܲܟܼܣܸܐ ܘܲܓܼܠܹܐ ܀ 382 :ܙܲܒܼܢܵܐ ܬܲܚܸܡ ܠܲܥܒܼܵܕܼ ܐܝܼܕܵܘ̈ܗܝ ܐܲܝܟ ܕܲܫܦ݂ܲܪ ܠܹܗ 383 ܘܐܸܡܲܬܼܝ ܕܲܨܒܼܵܐ ܐܲܝܬܲܝ ܠܓܸܠܝܵܐ ܟܲܣܝܘܼܬܼ ܚܘܼܒܹܿܗ ܀ 384 :ܡܸܛܠ ܚܘܼܒܹܿܗ ܒܝܼܪܵܐ ܟܠ ܡܸܕܲܡ ܘܠܵܘ ܠܲܢܝܵܚܹܗ 385 ܘܲܠܬܼܘܼܩܵܢܵܘ̈ܗܝ ܚܵܘܝܼ ܚܲܝܠܹܗ ܘܠܵܘ ܠܐܝܼܬܼܘܼܬܹܗ ܀ 386 :ܗܘ̤ ܬܲܩܸܢ ܟܠ ܡ̣ܢ ܠܵܐ ܡܸܕܲܡ ܒܚܹܝܠ ܨܸܒܼܝܵܢܹܗ 387 ܘܗܘ̤ ܚܲܕܲܬܼ ܟܠ ܒܫܘܼܠܵܡ ܙܲܒܼܢܹ̈ܐ ܒܲܨܠܸܡ ܨܲܠܡܗ ܀ pb. 207 388 :ܕܝܼܠܹܗ ܐܝܼܬܼܵܘܗܝ ܗܘܵܝܵܐ ܩܲܕܡܵܐ ܕܡ̣ܢ ܠܵܐ ܡܸܕܲܡ 389 ܐܵܦ ܚܘܼܕܵܬܼܵܐ ܕܲܒܼܚܲܕܼ ܐܝܼܬܼܵܘܗܝ ܕܝܼܠܹܗ ܀ 390 :ܒܩܲܕܡܵܐ ܬܲܩܸܢ ܡ̣ܢ ܠܵܐ ܡܸܕܲܡ ܐܲܝܟ ܥܵܒܼܘܿܕܵܐ 391 ܘܗܵܫܵܐ ܚܲܕܲܬܼ ܠܲܥܒܼܵܕܼ ܐܝܼܕܵܘ̈ܗܝ ܐܲܝܟ ܚܲܟܿܝܼܡܵܐ ܀ 392 :ܬܲܩܸܢ ܟܠܵܐ ܘܚܲܕܲܬܼ ܟܠܵܐ ܚܲܟܿܝܼܡܵܐܝܼܬܼ 393 ܐܲܝܟ ܡ̇ܐ ܕܲܦܐܹܐ ܠܚܹܝܠ ܐܝܼܬܼܘܼܬܹܗ ܕܲܟܼܣܸܐ ܡ̣ܢ ܟܠ ܀ 394 :ܒܲܨܠܸܡ ܐ̄ܢܵܫܵܐ ܫܲܠܸܡ ܥܲܡܠܹܗ ܒܪܵܫܝܼܬܼ ܕܲܒܼܪܵܐ 395 ܘܲܒܼܒܲܪܢܵܫܵܐ ܚܲܕܲܬܼ ܘܐܲܚܝܼ ܒܫܘܼܠܵܡ ܙܲܒܼܢܹ̈ܐ ܀ 396 :ܒܬܼܘܼܩܵܢ ܐ̄ܢܵܫܵܐ ܚܒ݂ܲܫ ܟܠ ܡܸܕܲܡ ܐܲܝܟ ܕܲܒܼܒܲܝܬܵܐ 397 ܘܒܲܨܠܸܡ ܐ̄ܢܵܫܵܐ ܥܡ݂ܲܪ ܨܸܒܼܝܵܢܹܗ ܐܲܝܟ ܕܲܒܼܢܵܘܣܵܐ (ܐ) ܀ 398 :ܒܐ̄ܢܵܫܵܐ ܐܲܣܪܹܗ ܠܟܼܠܹܗ ܚܲܝܠܵܐ ܕܒܼܵܪܿܘܿܝܘܼܬܹܗ 399 ܘܲܒܼܒܲܪܢܵܫܵܐ ܡܚܲܕܲܬܼ ܟܠܑܵܐ ܘܕܼܵܐܹ̇ܢ ܟܠܵܐ ܀ 400 :ܒܨܲܠܡܹܗ ܟܲܢܝܹܗ ܠܲܨܠܸܡ ܐ̄ܢܵܫܵܐ ܟܲܕܼ ܬܲܩܸܢ ܟܠ 401 ܘܒܹܗ ܡܸܬܼܚܵܘܸܐ ܐܲܝܟ ܕܲܒܼܨܲܠܡܵܐ ܟܲܕܼ ܕܵܐܹ̇ܝܢ ܟܠ ܀ 402 :ܠܲܨܠܸܡ ܐ̄ܢܵܫܵܐ ܚܵܙܹ̈ܝܢ ܐ̄ܢܵܫܵܐ ܘܪ̈ܘܼܚܵܢܵܝܹܐ 403 ܕܥܵܒܹ̇ܕܼ ܕܝܼܢܵܐ ܘܒܼܵܚܲܪ ܥܵܘ̣ܠܵܐ ܘܡܲܣܠܸܐ ܘܓܼܵܒܹ̇ܐ ܀ 404 :ܒܗܲܝܟܲܠ ܦܲܓܼܪܹܗ ܣܵܓܹ̇ܕ ܟܠܵܐ ܠܐܲܠܵܗ ܟܠܵܐ 405 ܘܲܒܼܓܼܵܠܝܘܼܬܹܗ ܚܵܙܹ̇ܝܢ ܟܠܵܐ ܠܲܟܼܣܸܐ ܡ̣ܢ ܟܠ ܀ 406 :ܒܪܼ̈ܓܼܫܹܐ ܕܲܠܒܲܪ ܚܵܙܹ̇ܝܢ ܦܲܓܼܪܵܐ ܡܸܬܼܚܙܝܵܢܵܐ 407 ܘܲܒܼܝܲܕܼ ܙܵܘܥܹ̈ܐ ܠܐܲܠܵܗܘܼܬܼܵܐ ܕܠܵܐ ܡܸܬܼܚܲܙܝܵܐ ܀ 408 :ܒܦܲܓܼܪܹܗ ܢܵܚܝܼܢ ܫܘܼܐܵܠܲܝ̈ܗܘܿܢ ܐܲܝܟ ܕܒܲܠܡܹܐܢܵܐ 409 ܘܠܵܐ ܡܸܫܬܲܚܩܝܼܢ ܒܲܒܼܥܵܬܼ ܟܲܣܝܵܐ ܕܲܟܼܣܸܐ ܒܓܼܵܘܹܗ ܀ 410 :ܒܚܘܼܒܹܿܗ ܟܕܝܼܢܝܼܢ ܐܲܪ̈ܥܵܢܵܝܹܐ ܘܲܫܡܲܝܵܢܹ̈ܐ 411 ܘܲܡܗܲܠܠܝܼܢ ܒܹܗ ܚܕܼܵܐ ܬܵܘܕܲܝܼܬܼܵܐ ܠܚܲܕܼ ܒܵܪܘܿܝܵܐ ܀ 412 :ܬܵܘ ܢܸܬܼܩܲܪܲܒܼ ܠܗܲܝܟܲܠ ܦܲܓܼܪܹܗ ܒܗܲܝܡܵܢܘܼܬܼܵܐ 413 ܘܲܢܩܲܪܸܒܼ ܒܹܗ ܕܸܒܼܚܹ̈ܐ ܕܚܘܼܒܵܐ ܕܬܼܵܒܲܥ̇ ܚܘܼܒܹܿܗ ܀ 414 :ܬܵܘ ܢܸܣܓܿܪܕܼ ܒܹܗ ܐܲܝܟ ܕܲܒܼܢܵܘܣܵܐ ܐܲܠܵܗܵܝܵܐ 415 ܘܲܢܗܲܠܸܠ ܒܹܗ ܐܲܠܵܗܵܐܝܼܬܼ ܠܐܲܠܵܗ ܟܠܵܐ ܀ 416 :ܬܵܘ ܢܸܚܙܐ ܒܹܗ ܠܲܟܼܣܸܐ ܡ̣ܢ ܟܠ ܒܗܲܝܡܵܢܘܼܬܼܵܐ 417 ܘܲܢܗܲܝܡܸܢ ܒܹܗ ܒܓܼܠܝܵܐ ܘܟܸܣܝܵܐ ܗܵܪܟܵܐ ܘܬܲܡ̇ܢ ܀ 418 :ܒܗܲܝܡܵܢܘܼܬܼܵܐ ܡܨܸܐ ܪܸܥܝܵܢܵܐ ܠܡܸܕܲܥ ܗܵܠܹܝܢ 419 ܘܗ̤ܝ ܓܵܠ̇ܝܵܐ ܠܹܗ ܐ̄ܪ̈ܙܹܐ ܟܣܲܝܵ̈ܐ ܕܲܣܬܼܝܼܪ̈ܵܬܼܵܐ ܀ 420 :ܒܐܝܼܕܼܵܗ̇ ܚܵܙܹ̇ܐ ܠܲܕܼܪ̈ܲܚܝܼܩܵܢ ܐܲܝܟ ܩܲܪ̈ܝܼܒܼܵܢ 421 ܘܫܲܪܝܼܪ̈ܵܢ ܠܹܗ ܐܲܝܟ ܗܵܘ̇ ܕܲܗ̤ܘܲܝ̈ ܒܝܲܕܼ ܣܘܼܥܪ̈ܵܢܹܐ ܀ 422 :ܒܓܲܙܵܗ̇ ܟܲܣܝܵܐ ܣܝܼܡܲܬܼ ܚܲܝܹ̈ܐ ܕܲܥܬܼܝܼ̈ܕܼܵܬܼܵܐ 423 ܘܡܸܢܵܗ̇ ܥܵܬܼ̇ܪܝܼܢ ܪ̈ܘܼܚܵܢܵܝܹܐ ܘܦܲܓܼܪ̈ܵܢܵܝܹܐ ܀ 424 :ܐܲܝܟ ܐܹܘܩܝܼܢܵܐ ܠܒܼܝܼܕܼܵܐ ܠܥܵܠܡܵܐ ܒܝܲܡܵܐ ܕܚܲܫܹ̈ܐ 425 ܕܠܵܐ ܢܸܬܼܪܲܦܸܐ ܒܹܝܬܼ ܡܲܚܫܘܼܠܹ̈ܐ ܕܲܪ̈ܓܼܝܼܓܼܵܬܼܵܐ ܀ pb. 208 426 :ܬܵܘ ܢܹܐܣܘܿܪ ܒܵܗ̇ ܐܸܠܦܵܐ ܕܢܲܦܫܲܢ ܐܲܝܟ ܕܒܹܐܘܩܝܼܢܵܐ 427 ܘܢܸܛܲܪ ܚܘܼܒܵܐ ܒܹܝܬܼ ܚܘܼܬܼܚܵܬܹ̈ܐ ܕܓܲܠܠܹ̈ܐ ܫܓܼܝܼܫܹ̈ܐ ܀ 428 :ܬܵܘ ܢܸܚܙܘܿܩ ܒܵܗ̇ ܐܲܝܟ ܗܲܕܲܝܼܐܵܐ ܕܝܵ̇ܕܲܥ ܕܲܠܗܲܠ 429 ܘܲܢܡܲܢܲܥ ܒܵܗ̇ ܠܘܵܬܼ ܫܘܼܠܵܡܵܐ ܕܡܲܠܟܿܘܼܬܼ ܪܵܘܡܵܐ ܀ 430 :ܬܵܘ ܢܸܚܙܹܐ ܒܵܗ̇ ܝܲܨܪܵܐ ܕܢܲܦܫܲܢ ܐܲܝܟ ܕܲܒܼܟܼܘܼܪܵܐ 431 ܘܢܲܣܠܸܐ ܥܵܘ̣ܠܵܐ ܘܢܸܓܼܒܸܿܐ ܚܘܼܒܵܐ ܪܵܚܡܵܐ ܕܩܘܼܫܬܵܐ ܀ 432 :ܬܵܘ ܢܸܓܼܠܸܐ ܠܵܗ̇ ܡܘܼܡܹ̈ܐ ܕܦܲܓܼܪ̈ܲܝܢ ܘܲܕܼܪܸ̈ܥܝܵܢܲܝܢ 433 ܘܲܒܼܣܲܡ̈ܡܵܢܹܝܗ̇ ܢܲܐܣܸܐ ܟܹܐܒܲܝ̈ܢ ܕܲܠܓܼܵܘ ܘܕܲܠܒܲܪ ܀ 434 :ܐܵܣܝܵܐ ܗ̄ܝܼ ܛܵܒܼܵܐ ܕܝܵ̇ܕܲܥ ܦܘܼܪ̈ܣܹܐ ܕܲܡ̈ܡܲܚܲܝܵܐ 435 ܘܠܲܝܬܿ ܥܘܼܕܼܪܵܢܵܐ ܕܠܵܘ ܒܒܹܝܬܼ ܓܲܙܵܗ̇ ܡܡܲܕܲܟ ܘܲܚܡܝܼܠ ܀ 436 :ܝܵ̇ܕܼܥܵܐ ܕܬܲܐܣܸܐ ܠܲܕܼܥܲܬܿܝܼܪܝܼܢ ܘܠܲܕܼܡܸܣܟܹܿܢܝܼܢ 437 ܘܥܲܠ ܥܘܼܕܼܪܵܢܵܗ̇ ܣܢܝܼܩܝܼܢ ܟܹܐܢܹ̈ܐ ܐܵܦ ܥܵܘܵܠܹ̈ܐ ܀ 438 :ܬܵܐ ܥܲܬܿܝܼܪܵܐ ܓܠܝܼ ܠܵܗ̇ ܟܹܐܒܹ̈ܐ ܕܥܵܠܘܿܒܼܘܼܬܼܵܟ 439 ܘܗܲܒܼ ܙܸܕܼ̈ܩܵܬܼܵܐ ܘܣܲܒ̣ ܠܵܟ ܣܲܡܵܐ ܕܡܲܐܣܸܐ ܥܵܘ̣ܠܵܟ ܀ 440 :ܬܵܐ ܡܸܣܟܹܿܢܵܐ ܐܲܚܘܿܕܼ ܓܵܘܣܵܐ ܒܚܹܝܠ ܥܘܼܕܼܪܵܢܵܗ̇ 441 ܘܲܦܠܘܿܚ ܥܲܡܵܗ̇ ܕܠܵܐ ܩܘܼܛܵܥܵܐ ܒܕܝܹܢܵܪ ܚܲܝܹ̈ܐ ܀ 442 :ܬܵܐ ܙܲܕܲܝܼܩܵܐ ܣܝܼܡ ܣܝܼ̈ܡܵܬܼܵܐ ܒܚܸܣܢܲܝ̈ ܚܘܼܒܿܗ̇ 443 ܘܐܲܪܡ̇ܐ ܛܲܒܼܥܵܐ ܕܫܲܪܝܼܪܘܼܬܼܵܗ̇ ܥܲܠ ܪܸܥܝܵܢܵܟ ܀ 444 :ܬܵܐ ܚܲܛܵܝܵܐ ܟܬܼܘܿܒܼ ܩܲܪܸܒܼ ܠܵܗ̇ ܬܘܵܬܼ ܪܸܥܝܵܢܵܐ 445 ܘܣܝܼܡ ܡܸܫܟܵܢܵܐ ܚܲܫܵܐ ܘܕܼܡܠܹ̈ܐ ܘܣܲܒܼ ܫܘܼܒܼܩܵܢܵܐ ܀ 446 :ܬܵܐ ܙܲܠܝܼܠܵܐ ܢܲܟܸܿܦ ܢܲܦܫܵܟ ܒܡܲܟܿܝܼܟܼܘܼܬܼܵܗ̇ 447 ܘܲܠܒܲܫ ܢܲܚܬܵܐ ܕܩܲܕܼܝܼܫܘܼܬܼܵܐ ܥܲܠ ܗܲܕܵܡܲܝ̈ܟ ܀ 448 :ܬܵܐ ܓܲܢܵܒܼܵܐ ܦܘܼܫ ܡ̣ܢ ܬܵܘܫܵܐ ܘܲܪܕܝܼ ܒܐܘܼܚܵܗ̇ 449 ܘܣܲܟܵܐ ܠܣܲܒܼܪܵܗ̇ ܕܕܲܡ ܬܸܬܸܿܠ ܠܵܟ ܫܛܵܪ ܚܵܘ̈ܒܵܬܼܵܟ ܀ 450 :ܬܵܐ ܓܲܝܵܪܵܐ ܩܲܕܸܿܫ ܦܲܓܼܪܵܟ ܒܩܲܕܼܝܼܫܘܼܬܼܵܗ̇ 451 ܘܪܘܿܣ ܥܲܠ ܟܠܵܟ ܡܲܚ̈ܝܵܐ ܕܟܲܝ̈ܵܐ ܕܐ̄ܪܵܙ ܫܘܼܒܼܩܵܢܵܐ ܀ 452 :ܬܵܐ ܡܲܟܿܝܼܟܼܵܐ ܪܕܲܝܼ ܒܲܠܘܝܼܬܼܵܐ ܕܡܲܟܿܝܼܟܼܘܼܬܼܵܗ̇ 453 ܘܡܲܢܲܥ ܥܲܡܵܗ̇ ܠܲܠܡܹܐܝܢ ܫܲܝܢܵܐ ܕܠܵܐ ܟܲܪܝܘܼܬܵܐ ܀ 454 :ܚܵܘܵܐ ܫܒܲܪܬܼܵܐ ܬܵܝ ܐܸܬܼܚܲܟܲܡܝ ܒܗܲܝܡܵܢܘܼܬܼܵܐ 455 ܘܲܩܢܝ ܗܵܘܢܵܐ ܠܡܸܛܲܪ ܢܲܦܫܹܟܼܝ ܡ̣ܢ ܣܵܩܘܿܪܹܟܼܝ ܀ 456 :ܐܲܝܟ ܡܲܚܙܝܼܬܼܵܐ ܩܒܼܘܿܥܝ ܕܲܟܼܝܘܼܬܼܵܗ̇ ܩܕܼܵܡ ܪܸܥܝܵܢܹܟܼܝ 457 ܘܲܡܪܘܿܩܝ ܨܵܐܬܼܵܐ ܕܥܲܠ ܚܘܼܫܵܒܲܝ̈ܟܿܝ ܒܦܲܐܝܘܼܬܼ ܫܘܼܦܪܵܗ̇ ܀ 458 ܫܠܘܿܚܝ ܬܲܚܦܝܼܬܼܵܐ ܕܠܵܐ ܝܼܕܲܥܬܼܵܐ ܨܸܒܼܬܵܐ ܕܲܠܒܲܪ: pb. 209 459 ܘܨܲܒܸܿܬܼܝ ܢܲܦܫܹܟܼܝ ܒܢܲܚܬܵܐ ܦܲܐܝܵܐ ܕܲܟܼܢܝܼܟܼܘܼܬܼܵܐ ܀ 460 :ܠܒܼܘܼܫ ܢܲܟܼܦܘܼܬܼܵܐ ܠܒܲܫܝ ܥܲܠ ܦܲܓܼܪܹܟܼܝ ܘܥܲܠ ܪܸܥܝܵܢܹܟܼܝ 461 ܘܲܚܠܵܦ ܦܲܚܵܐ ܗ̤ܘܵܝ ܡܲܚܙܝܼܬܼܵܐ ܠܥܲܝܢܲܝ̈ ܐ̄ܢܵܫܵܐ ܀ 462 :ܕܝܼܢܵܐ ܕܲܠܗܲܠ ܩܒܼܘܿܥܝ ܠܹܟܼܝ ܢܝܼܫܵܐ ܩܕܼܵܡ ܒܵܒܼܵܬܹܟܼܝ̈ 463 :ܘܚܘܼܪܝ ܘܐܸܬܼܒܲܩܵܝ ܒܐܲܓܼܪܵܐ ܡܠܝܼܟܼܵܐ ܘܲܒܼܫܘܼܢܵܩܵܐ 464 :ܫܲܪܝܼܪ ܘܲܒܼܚܝܼܪ ܕܝܼܢܵܐ ܕܲܥܬܼܝܼܕܼ ܠܛܵܒܹ̈ܐ ܘܒܼܝܼܫܹ̈ܐ 465 ܘܲܕܠܵܐ ܫܘܼܠܵܡ ܡܩܲܒܸܿܠ ܟܠܢܵܫ ܠܐܲܝܕܼܵܐ ܕܫܵܘܹ̇ܐ ܀ 466 :ܕܠܵܐ ܫܘܼܠܵܡܵܐ ܚ̇ܵܕܹܝܢ ܛܵܒܹ̈ܐ ܘܒܼܵܟܹ̇ܝܢ ܒܝܼܫܹ̈ܐ 467 ܘܠܲܦܘܼܬܼ ܥܲܡܠܹ̈ܐ ܦܠܹܐ ܒܘܼܣܵܡܵܐ ܘܲܥܦܝܼܦ ܢܸܓܼܕܼܵܐ ܀ 468 :ܬܵܘ ܢܸܬܿܬܲܓܲܪ ܥܲܕܼ ܐܝܼܬܼ ܘܲܒܼܢܵܐ ܠܡܸܬܿܬܲܓܵܪܘܼ 469 ܕܲܠܡܵܐ ܢܹܐܬܸܐ ܙܒܲܢ ܫܘܼܠܵܡܵܐ ܘܢܸܚܣܲܪ ܥܲܡܠܲܢ ܀ 470 :ܬܵܘ ܢܸܩܥܹܐ ܠܲܢ ܪ̈ܲܚܡܹܐ ܡܸܟܵܐ ܒܡܵܡܘܿܢ ܙܲܒܼܢܵܐ 471 ܕܲܢܩܲܒܿܠܘܼܢܵܢ ܒܲܡܛܲܠܠܲܝ̈ܗܘܿܢ ܕܠܵܐ ܡܸܫܬܼܪ̈ܲܝܵܢ ܀ 472 :ܒܚܘܼܒܵܐ ܢܸܣܥܘܿܪ ܠܲܕ̈ܢܵܘܵܬܲܢ ܘܲܠܥܵܒܼܘܿܕܲܢ 473 ܕܲܡܨܸܐ ܗ̄ܘ̣ ܚܘܼܒܵܐ ܠܡܸܥܒܲܕܼ ܐ̄ܢܵܫܵܐ ܐܲܠܵܗܵܝܹ̈ܐ ܀ 474 :ܢܕܘܼܢ ܟܹܐܢܵܐܝܼܬܼ ܥܲܡ ܪܸܥܝܵܢܲܢ ܒܐܲܝܠܹܝܢ ܕܲܚ̣ܛܲܝܢ 475 ܘܢܲܟܸܿܣ ܝܲܨܪܲܢ ܗܘ̤ ܠܲܩܢܘܿܡܹܗ ܐܲܝܟ ܦܵܪܘܿܫܵܐ ܀ 476 :ܢܸܬܼܢܸܐ ܟܠܢܵܫ ܠܝܲܨܪܵܐ ܕܢܲܦܫܹܗ ܗܵܝ̇ ܒܲܪܬܼ ܩܵܠܵܐ 477 ܕܚܲܝܵܐ ܗ̄ܝܼ ܡܸܠܬܹܗ ܕܐܲܠܵܗ ܟܠܵܐ ܘܟܹܐܝܢ ܒܘܼܚܪܵܢܹܗ ܀ 478 :ܢܬܲܪܓܸܿܡ ܝܲܨܪܵܐ ܥܲܡ ܠܸܫܵܢܵܐ ܥܲܠ ܕܲܥܬܼܝܼ̈ܕܼܵܢ 479 ܘܲܢܦܲܫܸܩ ܠܹܗ ܐ̄ܪ̈ܙܹܐ ܕܲܟܼܣܹܝܢ ܒܐܲܬܼܪܵܐ ܕܲܠܥܸܠ ܀ 480 :ܢܚܵܘܸܐ ܗܵܘܢܵܐ ܠܥܲܝܢܲܝ̈ ܦܲܓܼܪܵܐ ܝܘܼܩܢܵܐ ܦܲܐܝܵܐ 481 ܕܗܵܘ̇ ܒܘܼܣܵܡܵܐ ܕܠܵܐ ܡܸܣܬܲܒܼܥܵܐ ܗܲܢܝܼܐܘܼܬܹܗ ܀ 482 :ܒܗܵܘܢܵܐ ܢܸܚܙܹܝܘܗܝ ܘܢܸܬܼܝܲܐܲܒܼ ܠܹܗ ܒܪܸܚܡܲܬܼ ܢܲܦܫܵܐ 483 ܕܲܒܼܫܘܼܠܵܡܵܐ ܢܩܲܒܸܿܠ ܥܘܼܬܼܪܹܗ ܐܲܦܝܼܢ ܒܐܲܦܝܼ̈ܢ ܀ ܥܘܼܢܵܝܵܐ. ܫܘܼܒܼܚܵܐ ܠܵܟ ܫܵܒܹ̇ܩ ܚܵܘ̈ܒܹܿܐ: ܐܵܠܹܦ ܥܲܠ ܐܵܠܹܦ ܙܲܒܼܢܝܼ̈ܢ: