Narsai: On Reproof - ܥܲܠ ܡܸܣܟܹܿܢܘܼܬܼܵܐ

1 :ܡܸܣܟܹܿܝܢ ܙܲܒܼܢܵܐ ܕܐܸܣܬܲܩܒܲܠ ܠܝܼ ܒܝܲܕܼ ܬܵܘܬܵܒܼܘܼܬܼܝ 2 ܘܲܡܙܲܠܗܲܙ ܒܹܗ ܩܸܢܝܵܢ ܚܲܝܹ̈ܐ ܪ̈ܘܼܚܵܢܵܝܹܐ ܀ 3 :ܒܝܼܫ ܕܘܼܒܵܪܵܐ ܕܐܸܬܼܟܲܝܲܢ ܠܝܼ ܒܹܝܬܼ ܐܲܪ̈ܥܵܢܹܐ 4 ܘܲܥܣܸܩ ܣܲܓܿܝܼ ܠܐܲܝܢܵܐ ܕܨܵܒܹܿܐ ܠܡܸܚܵܐ ܫܲܦܝܼܪ ܀ 5 :ܡܕܼܵܘܲܕܼ ܥܘܼܡܪܵܐ ܕܫܲܒܲܬܼ ܝܵܘܡܲܝ̈ ܡ̣ܢ ܟܠ ܝܵܘܡܝܼ̈ܢ 6 ܘܠܲܝܬܿ ܒܹܗ ܛܲܟܼܣܵܐ ܕܕܼܵܡܹ̇ܐ ܩܲܢ̈ܝܲܝ ܡܸܠܬܼܵܐ ܀ 7 :ܥܲܡܘܼܛ ܢܘܼܗܪܵܐ ܕܦܵܪܘܿܫܘܼܬܼܵܐ ܢܘܼܗܪܵܐ ܕܲܬܼܪܹܝܢ 8 ܘܠܲܝܬܿ ܕܲܡܡܲܕܸܿܟ ܠܲܕܼܦܲܟܿܝܼܗܝܼܢ ܒܡܸܠܲܬܼ ܩܘܼܫܬܵܐ ܀ 9 :ܡܚܝܼܠ ܒܸܢܝܵܢܵܐ ܕܗܲܝܡܵܢܘܼܬܼܵܐ ܛܥܝܼܢܲܬܼ ܟܠܵܐ 10 ܘܠܵܐ ܐ̄ܢܵܫ ܡܲܠܸܦ ܠܡܸܒܼܢܵܐ ܫܲܦܝܼܪ ܕܲܟܼܝܘܼܬܼ ܢܲܦܫܹܗ ܀ 11 :ܩܲܪܝܼܪ ܚܘܼܒܵܐ ܕܚܲܡܝܼܡ ܪܸܬܼܚܹܗ ܛܵܒܼ ܡ̣ܢ ܢܘܼܪܵܐ 12 ܘܪܵܬܲܚ ܟܠܢܵܫ ܒܪܘܼܓܼܙܵܐ ܩܲܫܝܵܐ ܠܘܼܩܒܲܠ ܚܲܒܼܪܹܗ ܀ 13 :ܡܚܝܼܠ ܣܘܼܟܵܝܵܐ ܣܲܒܼܪܵܐ ܕܐܲܚܝܼܕܼ ܬܪܲܥ ܡܲܠܟܿܘܼܬܼܵܐ 14 ܘܲܚܠܝܼܡ ܦܲܓܼܪܵܐ ܒܙܵܘ̈ܥܲܝ ܢܲܦܫܵܐ ܒܪܸܓܲܬܼ ܐܲܪܥܵܐ ܀ 15 :ܫܝܼܛܝܼܢ ܘܲܒܼܣܹܝܢ ܚܲܝܹ̈ܐ ܘܣܸܦܪܹ̈ܐ ܡܚܲܟܿܡܲܝ̈ ܐ̄ܢܵܫܵܐ 16 ܘܒܲܛܝܼܠ ܪܲܗܛܵܐ ܕܦܵܪܘܿܫܘܼܬܼܵܐ ܘܕܲܟܼܬܼܝܼ̈ܒܼܵܬܼܵܐ ܀ 17 :ܐܲܝܟ ܠܵܐ ܡܸܕܸܿܡ ܚܫܝܼܒܼ ܥܸܢܝܵܢܵܐ ܕܪ̈ܘܼܚܵܢܝܵܬܼܵܐ 18 ܘܗܵܪܹܓܼ ܟܠܢܵܫ ܒܐܲܪ̈ܥܵܢܵܝܵܬܼܵܐ ܕܠܵܐ ܣܲܒܼܥܘܼܬܼܵܐ ܀ 19 :ܒܨܝܼܪ ܕܘܼܒܵܪܵܐ ܕܩܲܕܿܝܼܫܘܼܬܼܵܐ ܡ̇ܐܢܵܐ ܕܲܟܼܝܵܐ 20 ܘܲܪܚܝܼܡ ܦܸܗܝܵܐ ܕܙܲܠܝܼܠܘܼܬܼܵܐ ܣܝܵܢܵܐ ܣܲܪܝܵܐ ܀ 21 :ܒܠܝܼܠ ܙܘܼܘܵܓܼܵܐ ܕܛܲܟܼܣܵܐ ܬܲܩܢܵܐ ܕܒܼܵܪܘܿܝܘܼܬܼܵܐ 22 ܘܪܵܗܹ̇ܛ ܟܠܢܵܫ ܒܐܘܼܪܚܵܐ ܫܟܼܝܼܪܬܵܐ ܕܓܼܝܵܪܘܼܬܼܵܐ ܀ 23 :ܕܲܓܵܠܘܼܬܼܵܐ ܘܩܸܛܠܵܐ ܘܓܼܵܘܪܵܐ ܣܓܼܝܼܘ ܥܲܠ ܐܲܪܥܵܐ 24 ܘܲܛ̣ܠܸܦܘ ܘܐܵܦܝܼܘ ܦܹܐܪܹ̈ܐ ܕܚܘܼܒܵܐ ܡ̣ܢ ܐ̄ܢܵܫܘܼܬܼܵܐ ܀ 25 :ܚܲܪ̈ܫܹܐ ܘܩܸܨܡܹ̈ܐ ܘܢܸܚܫܹ̈ܐ ܘܪ̈ܝܼܩܹܐ ܥ̣ܫܸܢܘ ܒܲܒܼܪܝܼܬܼܵܐ 26 ܘܪܲܕܼܦܘܼܗܝ ܠܩܘܼܫܬܵܐ ܕܠܵܐ ܢܸܫܬܲܠܲܛ ܒܲܒܼܢܲܝ̈ܢܵܫܵܐ ܀ 27 :ܡܬܼܝܼܚ ܫܘܼܠܛܵܢܵܐ ܕܫܹܐܕܹ̈ܐ ܩܫܲܝ̈ܵܐ ܒܣܘܼܥܪ̈ܵܢܲܝܗܘܿܢ 28 ܘܟܲܕܼܢܘܼܗܝ ܠܥܵܠܡܵܐ ܒܢܝܼܪܵܐ ܩܲܫܝܵܐ ܕܓܼܘܼܕܵܦܲܝ̈ܗܘܿܢ ܀ pb. 211 29 :ܙܥ݂ܲܪ ܠܹܗ ܓܲܒܵܐ ܕܲܡܫܲܡܫܵܢܹ̈ܐ ܕܙܲܕܲܝܼܩܘܼܬܼܵܐ 30 ܘܐܲܡܝܼܢ ܟܠܢܵܫ ܦܵܠܲܚ ܐܲܪܥܵܐ ܕܠܵܐ ܩܘܼܛܵܥܵܐ ܀ 31 :ܕܲܠܝܼܠܝܼܢ ܛܵܒܼ ܪ̈ܵܚܡܲܝ ܗܸܪܓܵܐ ܕܪ̈ܘܼܚܵܢܝܵܬܼܵܐ 32 ܘܠܲܝܬܿ ܡܸܢܝܵܢܵܐ ܠܪ̈ܵܚܡܲܝ ܚܘܼܒܵܐ ܕܐܲܪ̈ܥܵܢܝܵܬܼܵܐ ܀ 33 :ܒܐܲܪ̈ܥܵܢܝܵܬܼܵܐ ܥܢܹܝܢ ܐܲܪ̈ܥܵܢܹܐ ܠܹܠܲܝ ܐܝܼܡܵܡ 34 ܘܠܵܐ ܣܦܲܩ ܗܵܘܢܵܐ ܠܡܸܬܼܠܵܐ ܚܝܵܪܹܗ ܠܐܲܦܲܝ̈ ܪܵܘܡ̇ܐ ܀ 35 :ܕܲܠܬܲܚܬܿ ܒܵܥܹ̈ܝܢ ܙܡܝܼܢܹ̈ܐ ܕܲܩܪܹܝܢ ܠܡܲܠܟܿܘܼܬܼ ܪܵܘܡ̇ܐ 36 ܘܗܵܪܟܵܐ ܪܓܼܝܼܓܼܝܼܢ ܠܲܡܩܵܘܵܝܘܼ ܒܥܘܼܡܪܵܐ ܕܐܲܪܥܵܐ ܀ 37 :ܡ̇ܝܘܿܬܼܘܼܬܼܵܐ ܐܸܣܪܲܬ̤ ܐܸܢܘܿܢ ܒܚܲܒܼܠܹ̈ܐ ܕܚܲܫܹ̈ܐ 38 ܘܗܲܢܝܼ ܠܟܼܠܢܵܫ ܒܹܝܬܼ ܐܲܣܝܼܪܹ̈ܐ ܕܡ̇ܝܘܿܬܼܘܼܬܼܵܐ ܀ 39 :ܠܵܐ ܐ̄ܢܵܫ ܡܲܪܓܸܿܫ ܒܩܲܫܝܘܼܬܼ ܙܲܝܢܵܐ ܕܚܵܫܘܿܫܘܼܬܼܵܐ 40 ܘܠܲܝܬܿ ܕܲܡܣܲܟܸܿܐ ܠܡܸܬܼܦܲܠܵܛܘܼ ܡ̣ܢ ܩܲܫܝܘܼܬܹܗ ܀ 41 :ܒܥܘܼܡܪܵܐ ܫܚܝܼܩܵܐ ܕܲܡܠܹܐ ܩܸܢܛܵܐ ܪܓܼܝܼܓܼܝܼܢ ܠܲܡܦܵܫ 42 ܘܠܵܐ ܡܸܬܼܝܲܐܒܼܝܼܢ ܠܗܵܘ̇ ܬܘܼܩܵܢܵܐ ܕܠܵܐ ܡܸܬܼܚܲܒܿܠ ܀ 43 :ܩܸܢܝܵܢ ܙܲܒܼܢܵܐ ܡܝܲܩܲܪ ܘܲܪܚܝܼܡ ܥܲܠ ܚܲܝܲܝ̈ܗܘܿܢ 44 ܐܲܝܟ ܠܵܐ ܫܲܪܝܼܪ ܚܫܝܼܒܼ ܒܘܼܣܵܡܵܐ ܕܚܲܝܹ̈ܐ ܡܠܝܼܟܹ̈ܐ ܀ 45 :ܠܲܝܬܿ ܕܲܡܣܲܟܸܿܐ ܠܗܵܘ̇ ܣܘܼܟܵܝܵܐ ܕܲܡܠܸܐ ܛܘܼܒܹ̈ܐ 46 ܘܐܸܢ ܠܵܐ ܕܡܸܠܹ̈ܐ ܗܘ̤ ܐܵܡܲ݁ܪ ܠܹܗ ܘܠܵܘ ܣܘܼܥܪ̈ܵܢܹܐ ܀ 47 :ܒܡܸܠܹ̈ܐ ܡܬܲܢܹܝܢ ܟܠ ܛܵܒܼܵܬܼ̈ܐ ܕܠܵܐ ܡܵܬܼܡܲܠ̈ܠܢ 48 ܘܟܲܕܼ ܫܲܪܝܼܪ̈ܵܢ ܠܵܐ ܫܲܪܝܼܪ̈ܵܢ ܠܪܸ̈ܥܝܵܢܲܝܗܘܿܢ ܀ 49 :ܐܲܝܟ ܬܲܫܥܝܼܬܼܵܐ ܚܫܝܼܒܼ ܣܘܼܥܪܵܢܵܐ ܕܥܵܠܡܵܐ ܕܲܥܬܼܝܼܕܼ 50 ܘܕܵܚܹ̇ܠ ܟܠܢܵܫ ܟܲܕܼ ܠܵܐ ܕܵܚܹ̇ܠ ܫܲܪܝܼܪܵܐܝܼܬܼ ܀ 51 :ܠܵܐ ܫܲܪܝܼܪ̈ܵܢ ܫܲܪܝܼܪ̈ܵܬܼܵܐ ܠܠܵܐ ܫܲܪܝܼܪܹ̈ܐ 52 ܘܕܲܓܵܠܵܐܝܼܬܼ ܡܚܵܘܹܝܢ ܒܘܼܫܬܵܐ ܒܣܘܼܥܪ̈ܵܢܲܝܗܘܿܢ ܀ 53 :ܐܸܣܟܹܿܝܡ ܚܘܼܒܵܐ ܕܪܸܚܡܲܬܼ ܩܘܼܫܬܵܐ ܥܲܠ ܗܲܕܵܡܹ̈ܐ 54 ܘܙܵܘܥܲܝ̈ ܢܲܦܫܵܐ ܓܠܹܝܢ ܘܲܡܦܲܣܹܝܢ ܒܠܵܐ ܕܲܟܼܝܘܼܬܼܵܐ ܀ 55 :ܦܲܓܼܪܵܐ ܡܨܲܒܿܬܼܵܐ ܐܲܝܟ ܐܝܼܠܵܢܵܐ ܕܵܛܥܝܼܢ ܦܹܐܪܹ̈ܐ 56 ܘܲܒܼܪܸܥܝܵܢܵܐ ܠܲܝܬܿ ܒܹܗ ܣܓܼܘܼܠܵܐ ܕܐܲܡܝܼܢܘܼܬܼܵܐ ܀ 57 :ܒܛܲܪ̈ܦܹܐ ܡܗܲܒܹܿܒ̣ ܟܲܪܡܹܗ ܕܚܲܒܿܝܼܒܼܝ ܐܲܝܟ ܟܲܫܪܵܐ 58 ܘܲܒܼܓܼܵܘ ܣܵܘܟܵܘ̈ܗܝ ܟܣܹܝܢ ܚܲܪ̈ܘܼܒܹܐ ܕܠܵܐ ܡܸܬܼܐܲܟܼܠܝܼܢ ܀ 59 ܠܣܲܬܼܘܵܐ ܕܵܡܹ̇ܐ ܙܲܒܼܢܵܐ ܕܲܡ̣ܛܵܢܝ ܥܲܡ ܐܲܪ̈ܥܵܢܹܐ: pb. 212 60 ܘܐܲܝܟ ܐܝܼܠܵܢܹ̈ܐ ܓܠܝܼܙܝܼܢ ܐ̄ܢܵܫܵܐ ܡ̣ܢ ܛܵܒܼܵܬܹ̈ܐ ܀ 61 :ܥܲܪܝܵܐ ܕܥܵܘ̣ܠܵܐ ܐܸܚܲܕܼ ܒܐܲܪܥܵܐ ܕܲܡܠܝܼܠܘܼܬܼܵܐ 62 ܘܦܵܫ̣ܘ ܦܲܠܵܚܹ̈ܐ ܡ̣ܢ ܦܘܼܠܚܵܢܵܐ ܕܫܲܦܝܼܪ̈ܵܬܼܵܐ ܀ 63 :ܬܲܠܓܵܐ ܕܪܘܼܫܥܵܐ ܢܚܸ݂ܬܼ ܥܲܠ ܙܵܘܥܹ̈ܐ ܐܲܝܟ ܕܥܲܠ ܛܘܼܪܹ̈ܐ 64 ܘܲܟܼܠܵܗ̣̇ ܠܐܘܼܪܚܵܐ ܘܠܲܝܬܿ ܕܡܗܲܠܸܟ ܨܹܝܕܼ ܟܹܐܢܘܼܬܼܵܐ ܀ 65 :ܪܸܚܡܲܬܼ ܟܸܣܦܵܐ ܚܒ݂ܲܛܼܵܗ̇ ܠܢܲܦܫܵܐ ܒܲܕܼܡܘܼܬܼ ܒܲܪܕܵܐ 66 ܘܲܢܬ݂ܲܪܘ ܛܲܪ̈ܦܹܐ ܕܗܲܝܡܵܢܘܼܬܼܵܐ ܡ̣ܢ ܪܸܥܝܵܢܵܐ ܀ 67 :ܐܲܝܟ ܥܲܠܥܵܠܵܐ ܢܫܲܒܼ݂ ܣܲܢ̈ܝܵܬܼܵܐ ܒܚܲܡܵܐ ܕܗܵܘܢܵܐ 68 ܘܙܵܥ ܘܐܸܬܼܒܲܠܗܝܼ ܩܹܘܒܲܪܢܹܝܛܵܐ ܝܲܨܪܵܐ ܡܗܝܼܪܵܐ ܀ 69 :ܡܲܫܒܼܵܐ ܩܲܫܝܵܐ ܕܲܪ̈ܓܼܝܼܠܼܵܬܼܵܐ ܢܩ݂ܲܫ ܒܲܒܼܪܝܼܬܼܵܐ 70 ܘܡ̇ܛ̣ܘ ܚܘܼܫܵܒܹ̈ܐ ܕܠܵܐ ܒܢ̣ܵܘ ܫܲܦܝܼܪ ܒܸܢܝܵܢ ܚܘܼܒܵܐ ܀ 71 :ܥܵܠܘܿܒܼܘܼܬܼܵܐ ܫܓܲܪܬܼܵܗ̇ ܠܐܲܪܥܵܐ ܒܠܵܐ ܫܲܘܝܘܼܬܼܵܐ 72 ܘܲܚܡ̣ܵܐ ܫܲܝܼܢܵܐ ܘܝܼܒܸܫܘ̣ ܪ̈ܲܚܡܹܐ ܘܓܼܵܙ ܚܵܘܣܵܢܵܐ ܀ 73 :ܪܸܚܡܲܬܼ ܩܘܼܫܬܵܐ ܥܸܠܲܬ̤ ܚܸܠܕܲܬ̤ ܒܓܼܵܘ ܚܘܼܫܵܒܹ̈ܐ 74 ܘܐܲܝܟ ܨܲܪܨܘܼܪܵܐ ܡܚܵܬ̤ ܘܐܵܘܒܸܿܫܬܹܗ ܠܥܸܩܵܪ ܢܲܦܫܵܐ ܀ 75 :ܚܘܼܬܼܪܵܐ ܛܪܘܼܢܵܐ ܡ̣ܪܲܕܼ ܒܲܫܩܝܼܦܵܐ ܕܪܵܡܘܼܬܼ ܪܘܼܚܵܐ 76 ܘܫܲܪܝܼ ܡܲܩܪܸܒܼ ܠܘܼܩܒܲܠ ܣܸܕܼܪܹ̈ܐ ܕܡܲܟܿܝܼܟܼܘܼܬܼܵܐ ܀ 77 :ܚܣܵܡܵܐ ܓܵܪܣܵܐ ܟܡܝܼܢ ܒܐܘܼܪ̈ܚܵܬܼܵܐ ܩܕܼܵܡ ܚܵܙܘܼܩܹ̈ܐ 78 ܘܢܲܟܼܬܹܿܗ ܠܥܵܠܡܵܐ ܒܢܝܼܒܹ̈ܐ ܩܫܲܝܵ̈ܐ ܕܡܲܪܝܼܪܘܼܬܹܗ ܀ 79 :ܘܐܲܝܟ ܡ̇ܫܘܿܛܵܐ ܪܚ݂ܸܫ ܩܘܼܛܵܥܵܐ ܒܪܸܥܝܵܢ ܐ̄ܢܵܫܵܐ 80 ܘܐܸܟܲܠ̣ ܦܹܐܪܹ̈ܐ ܘܐܲܬܲܪ ܛܲܪ̈ܦܹܐ ܘܦܵܫ̣ ܥܸܩܵܪܵܐ ܀ 81 :ܐܲܝܟ ܥܸܩܵܪܵܐ ܦܵܫ̣ ܪܸܥܝܵܢܵܐ ܕܠܵܐ ܕܘܼܒܵܪܹ̈ܐ 82 ܘܩܲܠܝܼܠ ܒܲܠܚܘܼܕܼ ܩܲܝܵܡܵܐ ܒܹܗ ܚܲܝܘܼܬܼ ܚܲܝܹ̈ܐ ܀ 83 :ܚܪܸ݂ܒܼ ܘܐܸܬܼܝܲܒܲܫ ܟܲܪܡܵܐ ܡܠܝܼܠܵܐ ܕܣܲܬܵܘ̈ܗܝ ܕܐܵܕܼܵܡ 84 ܘܕܸܿܫܘܼ݂ܗܝ ܫܹܐܕܹ̈ܐ ܒܲܥܪܝܼܪ̈ܵܝܹܐ ܐܲܝܟ ܥܵܒܼܘܿܪܹ̈ܐ ܀ 85 :ܠܵܐ ܦܵܫܲܬ̤ ܒܹܗ ܚܕܵܐ ܛܘܿܛܝܼܬܼܵܐ ܕܠܵܐ ܐܸܬܼܢܲܟܼܝܲܬ̤ 86 ܘܐܸܢܗܘ̤ ܕܦܵܫܲܬ̤ ܠܲܝܬܿ ܒܵܗ̇ ܚܲܡܪܵܐ ܕܗܲܢܝܼܐܘܼܬܼܵܐ ܀ 87 :ܘܵܝܠܲܢ ܕܲܠܡܵܐ ܕܵܐܹ̇ܝܢ ܥܲܡܲܢ ܡܵܪܹܐ ܟܲܪܡܵܐ 88 ܘܲܡܩܲܛܪܸܓܼ ܠܵܗ̇ ܠܛܵܠܘܿܡܘܼܬܲܢ ܐܲܝܟ ܕܝܗ̄ܘܼܕܼܵܝܹ̈ܐ ܀ 89 :ܘܵܝܠܲܢ ܕܲܠܡܵܐ ܡܙܲܡܸܢ ܩܵܪܹܐ ܟܝܵܢܹ̈ܐ ܚܲܪ̈ܫܹܐ 90 ܕܢܸܗܘܘܿܢ ܣܵܗ̈ܕܹܿܐ ܥܲܠ ܒܝܼܫܘܼܬܲܢ ܕܛܠܸܡܲܬ̤ ܚܘܼܒܹܿܗ ܀ 91 :ܘܵܝܠܲܢ ܢܹܐܡܲܪ ܥܲܡ ܟܵܪܘܿܙܵܐ ܢܒܼܝܼܵܐ ܕܪܘܼܚܵܐ 92 ܕܲܗܘ̤ܵܘ ܐ̄ܢܵܫܵܐ ܠܸܩܛܵܐ ܕܩܲܝܛܵܐ ܐܲܝܟ ܡܵܐ ܕܲܟܼܬܼܝܼܒܼ ܀ 93 :ܠܲܝܬܿ ܒܹܗ ܒܟܲܪܡܲܢ ܣܓܼܘܼܠܵܐ ܕܗܲܢܝܼ ܐܲܝܟ ܕܠܲܡܹܐܟܲܠ 94 ܘܠܵܐ ܒܲܟܵܪܬܵܐ ܕܢܸܬܼܒܲܝܲܐ ܒܵܗ̇ ܪܸܡܙܵܐ ܕܢܲܨ̣ܒܹܿܗ ܀ 95 :ܐܵܡܲ݁ܪ ܡ̇ܪܹܝܢ ܐܲܝܟ ܒܲܪܬܼ ܩܵܠܵܐ ܕܢܒܼܝܼܘܼܬܼܵܐ 96 ܕܐܸܒܲܕܼ ܚܲܣܝܵܐ ܘܠܲܝܬܿ ܬܘܼܒܼ ܕܲܬܼܪܝܼܨ ܒܲܒܼܢܲܝ̈ܢܵܫܵܐ ܀ 97 ܒܠܸܒܿܗܘܿܢ ܢܸܟܼܠܵܐ ܘܲܒܼܣܸܦ̈ܘܵܬܼܗܘܿܢ ܟܲܕܵܒܼܘܼܬܼܵܐ: pb. 213 98 ܘܐܲܝܟ ܨܲܝܵܕܹ̈ܐ ܛܵܡ̇ܪܝܼܢ ܦܲܚܹ̈ܐ ܒܠܸܫܵܢܲܝ̈ܗܘܿܢ ܀ 99 :ܩܢܹܐ ܫܘܼܠܛܵܢܵܐ ܡܲܚܨܸܦ ܫܵܐܹ̇ܠ ܥܵܘܵ݁ܠܵܐܝܼܬܼ 100 ܘܐܵܦ ܕܲܝܵܢܵܐ ܡܲܣܓܸܿܐ ܬܵܒܼܵܥ̇ ܚܲܪܡܵܢܵܐܝܼܬܼ ܀ 101 :ܪܲܒܵܐ ܡܡܲܠܸܠ ܐܲܝܟ ܨܸܒܼܝܵܢܹܗ ܘܠܵܐ ܡܸܬܼܟܲܚܲܕܼ 102 ܘܐܲܝܟ ܠܵܐ ܐ̄ܢܵܫܵܐ ܚܫܝܼܒܼܝܼܢ ܐ̄ܢܵܫܵܐ ܠܪܵܡܘܼܬܼ ܪܘܼܚܹܗ ܀ 103 :ܐܲܝܢܵܐ ܕܡܲܠܸܦ ܒܚܘܼܬܼܪܵܐ ܡܲܠܸܦ ܘܠܵܘ ܡ̣ܢ ܞܘܼܒܵܐ 104 ܘܐܲܝܢܵܐ ܕܝܵܠܹ̇ܦ ܒܪܸܚܡܲܬܸ ܕܲܪܓܼܵܐ ܚܦܝܼܛ ܨܹܝܕܼ ܪܲܒܹܿܗ ܀ 105 :ܠܵܐ ܡܲܠܦܵܢܵܐ ܚܵܢܹ̇ܐ ܠܢܝܼܫܵܐ ܕܪܲܒܵܐ ܡܫܝܼܚܵܐ 106 ܘܠܵܘ ܝܵܠܘܿܦܵܐ ܪܵܕܹܐ ܒܛܲܟܼܣܵܐ ܕܬܲܠܡܝܼܕܘܼܬܼܵܐ ܀ 107 :ܥܲܡܘܼܛ ܢܘܼܗܪܵܐ ܕܪܲܒܵܢܘܼܬܼܵܐ ܨܼܝܕ ܬܲܠܡܝܼܕܹ̈ܐ 108 ܘܦܲܟܿܝܼܗ ܛܲܥܡܵܐ ܕܬܲܠܡܝܼܕܘܼܬܼܵܐ ܒܦܘܼܡ ܪ̈ܲܒܢܹܐ ܀ 109 :ܡܸܠܹ̈ܐ ܡܲܠܸܦ ܪܲܒܵܐ ܚܬܼܝܼܪܵܐ ܘܠܵܘ ܣܘܼܥܪ̈ܵܢܹܐ 110 ܘܡܸܠܹ̈ܐ ܫܡܲ݁ܥ ܐܵܦ ܬܲܠܡܝܼܕܼܵܐ ܘܠܵܘ ܣܘܼܟܵܠܵܐ ܀ 111 :ܒܥܲܝܢܲܝ̈ ܒܸܣܪܵܐ ܡܲܗܓܹܿܐ ܠܫܲܒܼܪܹ̈ܐ ܒܡܸܠܲܝ̈ ܪܘܼܚܵܐ 112 ܘܲܠܗܲܕܵܡܹ̈ܐ ܡܚܵܘܸܐ ܚܲܝܠܹ̈ܐ ܕܲܣܬܼܝܼܪ̈ܵܬܼܵܐ ܀ 113 :ܚܵܐܲ݁ܪ ܒܸܣܪܵܐ ܒܸܣܪܵܢܵܐܝܼܬܼ ܒܪ̈ܘܼܚܵܢܝܵܬܼܵܐ 114 ܘܐܲܝܟ ܛܸܠܵܠܵܐ ܚܫܝܼܒܼ ܒܘܼܕܵܩܵܐ ܕܲܥܬܼܝܼ̈ܕܵܬܼܵܐ ܀ 115 :ܒܪ̈ܓܼܫܲܝ ܦܲܓܼܪܵܐ ܥܢܸܐ ܒܲܪܢܵܫܵܐ ܒܲܕܼܠܵܐ ܪܸ̈ܓܼܫܹܐ 116 ܘܐܲܝܟ ܕܲܒܼܚܸܠܡܵܐ ܦܵܗܹ̇ܐ ܒܐ̄ܪ̈ܵܙܹܐ ܐܲܠܵܗܵܝܹ̈ܐ ܀ 117 :ܠܚܸܠܡܵܐ ܕܵܡܹ̇ܐ ܫܪܵܪܵܐ ܒܕܼܵܪܲܢ ܟܲܕܼ ܡܸܬܿܬܿܢܹܐ 118 ܘܲܟܼܒܲܪ ܫܲܪܝܼܪ ܚܸܠܡܵܐ ܠܣܲܟܼܠܹ̈ܐ ܝܼܬܿܝܼܪ ܡܸܢܹܗ ܀ 119 :ܫܲܪܝܼܪ ܚܸܠܡܵܐ ܠܠܵܐ ܫܲܪܝܼܪܹ̈ܐ ܘܟܲܕ ܛܵܒܼ ܕܲܓܵܠ 120 ܘܣܵܘ̇ܚܝܼܢ ܠܐܘܼܪܥܹܗ ܟܲܕܼ ܡܸܬܿܬܿܢܹܐ ܛܵܒܼ ܡ̣ܢ ܩܘܼܫܬܵܐ ܀ 121 :ܩܵܥܑܹ̇ܐ ܩܘܼܫܬܵܐ ܒܲܟܼܬܼܝܼ̈ܒܼܵܬܼܵܐ ܘܠܵܐ ܐ̄ܢܵܫ ܨܵܐܹ̇ܬܼ 122 ܘܨܵܠܝܵܐ ܐܸܕܼܢܵܐ ܕܐܲܪ̈ܥܵܢܵܝܹܐ ܠܡܸܫܡܲܥ ܕܐܲܪܥܵܐ ܀ 123 :ܐܲܡܝܼܢ ܪܵܗܹ̇ܛ ܒܹܝܬܼ ܐܵܬܼ̈ܘܵܬܼܵܐ ܗܘ̤ ܒܲܠܚܘܿܕܵܘܗܝ 124 ܘܣܲܓܿܝܼ ܟܸܢܫܵܐ ܕܪ̈ܕܝܼܝ ܒܐܘܼܪܚܵܐ ܦܬܼܝܼܬܼܵܐ ܕܥܵܘ̣ܠܵܐ ܀ 125 :ܢܲܗܝܼܪ ܕܸܠܩܹܗ ܛܵܒܼ ܡ̣ܢ ܫܸܡܫܵܐ ܠܚܵܙܝܲ̈ ܫܲܦܝܼܪ 126 ܘܲܠܚܸܫܘܿܟܹ̈ܐ ܪܚܝܼܡ ܚܸܫܘܿܟܼܵܐ ܛܵܒ̣ ܡ̣ܢ ܢܘܼܗܪܹܗ ܀ 127 :ܪܓܼܝܼܓܼ ܥܸܢܝܵܢܹܗ ܛܵܒܼ ܡ̣ܢ ܕܲܗܒܼܵܐ ܘܡܲܪܓܵܢܝܵܬܼܵܐ 128 ܘܪ̈ܵܓܲܝ ܟܸܣܦܵܐ ܐܵܦܠܵܐ ܕܐܝܼܬܼܵܘܗܝ ܪܓܼܝܼܫܝܼܢ ܡܸܡܬܼܘܿܡ ܀ 129 :ܚܠܸܐ ܡ̣ܢ ܕܸܒܼܫܵܐ ܘܟܲܟܵܪܝܼܬܼܵܐ ܠܚܸܟܵܐ 130 ܘܥܲܠ ܥܵܘܵܠܹܐ ܡܲܪܝܼܪ ܫܸܩܝܹܗ ܘܠܵܐ ܡܸܬܼܩܲܒܲܠ ܀ 131 :ܠܪ̈ܵܚܡܲܝ ܚܘܼܒܹܿܗ ܪܚܝܼܡ ܥܸܢܝܵܢܹܗ ܘܗܲܢܝܼ ܐܘܼܟܼܠܹܗ 132 ܘܥܲܠ ܛܵܠܘܿܡܹ̈ܐ ܩܫܹܐ ܐܵܦ ܫܲܪܒܹܿܗ ܟܲܕܼ ܡܸܬܼܡܲܠܲܠ ܀ 133 :ܢܒܼܝܼܵܐ ܩܵܥܹ̇ܐ ܕܝܲܩܝܼܪ ܡ̣ܢ ܟܠ ܘܲܚܠܸܐ ܡ̣ܢ ܟܠ 134 ܘܥܲܠ ܦܲܪܝܼܗܹ̈ܐ ܦܲܟܿܝܼܗ ܛܲܥܡܹܗ ܘܫܝܼܛ ܥܵܢܝܵܢܹܗ ܀ 135 ܕܵܘܝܼܕܼ ܩܲܒܸܿܠ ܕܢܸܛܲܪ ܡܸܠܵܘ̈ܗܝ ܒܲܙܗܝܼܪܘܼܬܼܵܐ: pb. 214 136 ܘܥܲܛܠܲܝ̈ ܠܸܒܵܐ ܥܪܲܩܘ̣ ܡ̣ܢ ܨܹܐܕܼܵܘܗܝ ܡ̣ܢ ܒܝܼܫܵܐ ܀ 137 :ܒܝܼܫܵܐ ܚܲܫܒ̣ܿܘܼܗܝ ܐ̄ܢܵܫܵܐ ܒܝܼܫܹ̈ܐ ܠܥܸܢܝܵܢ ܩܘܼܫܬܵܐ 138 ܘܐܲܝܟ ܕܡ̣ܢ ܣܲܡܵܐ ܕܥܲܙܝܼܙ ܪܹܚܝܹܗ ܓܥ݂ܲܨܘ ܡ̣ܢ ܫܸܩܝܹܗ ܀ 139 :ܒܟܹܐܒܹ̈ܐ ܩ̈ܫܲܝܵܐ ܕܲܪ̈ܓܼܝܼܓܼܵܬܼܵܐ ܪܡܹܝܢ ܡ̇ܝܘܿܬܹ̈ܐ 140 ܥܲܠ ܗܵܝ̇ ܩܲܫܝܵܐ ܡܸܠܲܬܼ ܩܘܼܫܬܵܐ ܥܲܠ ܟܹܐܒܲܝ̈ܗܘܿܢ ܀ 141 :ܠܲܟܼܪܝܼܗ ܦܲܓܼܪܵܐ ܕܵܡܹ̇ܝܢ ܐ̄ܢܵܫܵܐ ܟܪ̈ܝܼܗܲܝ ܢܲܦܫܵܐ 142 ܕܩܲܢܝܼܛ ܕܢܸܓܼܠܸܐ ܥܲܣܩܘܼܬܼ ܟܹܐܒܹܗ ܠܐܵܣܵܘ̈ܬܼܵܐ ܀ 143 :ܡܸܩܢܲܛ ܩܵܢ̇ܛܝܼܢ ܐܵܦ ܚܲܛܵܝܹ̈ܐ ܥܲܠ ܚܵܘ̈ܒܲܝܗܘܿܢ 144 ܘܠܵܐ ܡܸܬܼܩܲܪܒܼܝܼܢ ܠܲܬܼܪܲܥ ܩܘܼܫܬܵܐ ܐܵܣܝܵܐ ܕܡܲܓܵܢ ܀ 145 :ܡܸܒܿܗܲܬܼ ܒܵܗ̇ܬܿܝܼܢ ܕܲܢܚܵܘܘܿܢܵܝܗܝ ܠܟܹܐܒܼܵܐ ܕܲܒܼܗܘܿܢ 146 ܘܠܵܐ ܡܸܬܼܒܲܝܢܝܼܢ ܕܟܹܐܒܼܵܐ ܕܲܥܬܸ̣ܩ ܥܣܸܩ ܚܘܼܠܡܵܢܹܗ ܀ 147 :ܒܠܑܵܐ ܝܼܕܲܥܬܼܵܐ ܡܟܲܣܹܝܢ ܫܘܼܚܢܹ̈ܐ ܕܣܘܼܥܪ̈ܵܢܲܝܗܘܿܢ 148 ܘܠܵܐ ܡܸܬܼܒܲܩܹܝܢ ܕܒܼܵܬܲܪ ܡ̇ܘܬܵܐ ܠܲܝܬܿ ܚܘܼܠܡܵܢܵܐ ܀ 149 :ܡܸܛܥܵܐ ܛܵܥܹ̇ܝܢ ܒܣܲܒܼܪܵܐ ܕܪ̈ܲܚܡܹܐ ܕܚܵܢ̇ܝܼܢ ܡܲܓܵܢ 150 ܘܠܵܐ ܡܸܣܬܲܟܿܠܝܼܢ ܕܐܸܢ ܐܝܼܬܼ ܪ̈ܲܚܡܹܐ ܐܵܦ ܟܹܐܢܘܼܬܼܵܐ ܀ 151 :ܕܐܝܼܬܼ ܗ̄ܘ̣ ܪ̈ܲܚܡܹܐ ܗ̄ܘ̣ ܠܵܟ ܐܘܿ ܒܲܪܢܵܫܵܐ 152 ܡ̇ܕܹܝܢ ܩܲܒܸܿܠ ܕܐܝܼܬܼ ܟܹܐܢܘܼܬܼܵܐ ܕܠܵܐ ܡܸܙܕܲܟܼܝܵܐ ܀ 153 :ܐܸܢܗܘ̤ ܕܙܵܟܹ̇ܝܢ ܪ̈ܲܚܡܹܐ ܒܕܝܼܢܵܐ ܠܲܝܬܿ ܟܹܐܢܘܼܬܼܵܐ 154 ܘܐܸܢ ܟܹܐܢܵܐܝܼܬܼ ܕܵܐܹ̇ܢ ܟܹܐܢܵܐ ܠܲܝܬܿ ܚܵܘܣܵܢܵܐ ܀ 155 :ܐܸܢܗܘ̤ ܕܟܹܐܢܵܐ ܗ̄ܘ̣ ܢܩܲܒܸܿܠ ܡ̇ܕܹܝܢ ܕܟܹܐܝܢ ܒܘܼܚܪܵܢܹܗ 156 ܘܢܹܐܠܲܦ ܫܲܦܝܼܪ ܕܟܹܐܢܵܐ ܘܛܵܒܼܵܐ ܠܵܘ ܫܝܼܥܵܐܝܼܬܼ ܀ 157 :ܕܟܹܐܝܢ ܒܵܪܘܿܝܵܐ ܫܲܦܝܼܪ ܡ̇ܘܕܸܿܐ ܟܠ ܕܲܥܒܼܝܼܕܼܵܐ ܗ̄ܘ̣ 158 ܘܕܲܡܪܲܚܡܵܢܵܐ ܗ̄ܘ̣ ܣܵܗܹ̇ܕܼ ܚܘܼܒܹܿܗ ܕܲܠܘܵܬܼ ܓܸܢܣܲܢ ܀ 159 :ܦܵܪܘܿܫܵܐܝܼܬܼ ܘܵܠܹ̇ܐ ܕܢܸܩܪܹܝܘܗܝ ܟܹܐܢܵܐ ܘܛܵܒܼܵܐ 160 ܕܛܵܒܼ ܠܲܕܿܬܼܵܐܹ̇ܒܼ ܘܟܹܐܝܢ ܟܲܕܼ ܬܵܒܲܥ̇ ܠܲܕܠܵܐ ܬܵܐܹ̇ܒܼ ܀ 161 :ܠܲܢ ܗ̄ܘ̣ ܓܲܠܝܵܐ ܕܝܲܨܪܲܢ ܫܲܠܝ̣ܛ ܥܲܠ ܬܲܪ̈ܬܲܝܗܹܝܢ 162 ܘܐܸܢ ܫܵܦܲ݁ܪ ܠܹܗ ܡܫܲܚܠܸܦ ܢܸܓܼ̈ܕܲܐ ܠܘܵܬܼ ܚܵܘܣܵܢܵܐ ܀ 163 :ܘܐܸܢ ܒܹܗ ܣܝܼܡܵܐ ܣܝܼܡܲܬܼ ܓܲܙܹ̈ܐ ܕܚܲܝܹ̈ܐ ܘܡ̇ܘܬܵܐ 164 ܠܡܵܢ ܡܸܬܼܥܲܕܲܠ ܝܲܨܪܲܢ ܒܝܼܫܵܐ ܡܲܪܵܚܵܐܝܼܬܼ ܀ 165 :ܝܲܨܪܲܢ ܐܲܚܝܼܕ ܬܪܲܥ ܡܲܠܟܿܘܼܬܼܵܐ ܐܸܢ ܨܵܒܹ̇ܝܢܲܢ 166 ܘܗܘ̤ܝܘܼ ܕܡܲܥܸܠ ܘܗܘ̤ܝܘܼ ܕܡܲܦܸܩ ܐܲܝܟ ܨܸܒܼܝܵܢܹܗ ܀ 167 :ܐܵܦ ܗܵܘ̇ ܩܵܠܵܐ ܕܕܲܪܫܵܗ̇ ܠܐܘܼܪܚܵܐ ܕܡܲܠܟܿܘܼܬܼ ܪܵܘܡ̇ܐ 168 ܩ̣ܥܵܐ ܕܡܲܠܟܿܘܼܬܑܼܵܐ ܠܓܼܵܘ ܡ̣ܢ ܐ̄ܢܵܫܵܐ ܗ̄ܝܸ ܘܲܒܼܗܘܿܢ ܫܲܪܝܵܐ ܀ 169 :ܘܐܸܢ ܡܲܠܟܿܘܼܬܼܵܐ ܡܲܠܝܲܬܼ ܚܲܝܹ̈ܐ ܒܐ̄ܢܵܫܵܐ ܫܲܪܝܵܐ 170 ܠܲܝܬܿ ܟܹܝܬܼ ܕܲܣܟܲܠ ܡ̣ܢ ܒܲܪܢܵܫܵܐ ܕܣܵܢܹ̇ܐ ܚܲܝܵܘ̈ܗܝ ܀ 171 ܐܲܝܟܲܢ ܠܵܐ ܗ̄ܘ̣ܵܐ ܣܵܢܹ̇ܐ ܠܚܲܝܵܘ̈ܗܝ ܣܵܢܹ̇ܐ ܫܪܵܪܵܐ: pb. 215 172 ܕܫܵܒ̇ܩ ܐܘܼܪܚܵܐ ܕܪܲܗܒܼܘܿܢ ܚܲܝܹ̈ܐ ܘܪܵܕܹܐ ܒܬܼܵܘܫܵܐ ܀ 173 :ܠܘܼܩܒܲܠ ܝܲܨܪܹܗ ܘܠܘܼܩܒܲܠ ܩܘܼܫܬܵܐ ܩܵܐܹ̇ܡ ܐ̄ܢܵܫܵܐ 174 ܕܟܲܕܼ ܝܵܕܼܘܿܥܵܐ ܗ̄ܘ̣ ܛܵܠܹ̇ܡ ܗܘ̤ ܠܹܗ ܘܠܲܡܬܲܩܢܵܢܹܗ ܀ 175 :ܛܠܘܼܡܝܵܐ ܪܲܒܵܐ ܛܠܲܡ̣ܘ ܡ̇ܝ̈ܘܿܬܹܐ ܠܚܲܝܹ̈ܐ ܕܲܒܼܗܘܿܢ 176 ܕܫܵܛܘ̣ ܢܵܡܘܿܣܵܐ ܕܣܵܡ̣ ܒܵܪܘܿܝܵܐ ܠܛܘܼܟܵܣܲܝ̈ܗܘܿܢ ܀ 177 :ܫܒܲܩ̣ܘ ܦܘܼܩܕܵܢܵܐ ܕܪܲܡܪܸܡ ܐܸܢܘܿܢ ܠܥܸܠ ܡ̣ܢ ܟܠܵܐ 178 ܘܲܪܚܸܡ̣ܘ ܚܘܼܒܵܐ ܕܐܵܟܹ̇ܠܩܲܪܨܵܐ ܕܨܲܥܲܪ ܐܸܢܘܿܢ ܀ 179 :ܐܲܫܝܼܛܘ ܠܲܫܡܵܐ ܕܝܲܩܲܪ ܐܸܢܘܿܢ ܒܲܫܒܼܝܼ̈ܚܵܬܹܗ 180 ܝܲܗ̣̄ܒܼܘ ܐܝܼܩܵܪܵܐ ܕܫܸܡ ܪܲܒܿܘܼܬܼܵܐ ܠܲܕܼܠܵܐ ܐܲܠܵܗ ܀ 181 :ܕܵܫܘ̣ ܢܵܡܘܿܣܵܐ ܢܘܼܗܪܵܐ ܘܡܸܠܚܵܐ ܐܵܦ ܗܲܕܿܝܼܐܵܐ 182 ܕܕܼܵܪܹܫ ܐܘܼܪܚܵܐ ܘܡܲܩܢܸܐ ܛܲܥܡܵܐ ܘܡܲܢܗܲܪ ܗܵܘܢܵܐ ܀ 183 :ܬܪܲܥ̣ܘ ܦܘܼܩܕܵܢܵܘ̈ܗܝ ܫܘܼܪܵܐ ܪܵܡ̇ܐ ܕܒܲܦܲܝ̈ ܥܵܘ̣ܠܵܐ 184 ܘܥ݂ܲܠ ܚܲܝ̈ܘܵܬܼܵܐ ܥܝܵܕܹ̈ܐ ܒܝܼܫܹ̈ܐ ܘܚܲܒܸܿܠܘ ܦܹܐܪ̈ܵܘܗܝ ܀ 185 :ܥܪ̈ܵܕܹܐ ܘܕܒܹ̈ܐ ܘܐܲܪ̈ܝܵܘܵܬܼܵܐ ܙܢܲܝ̈ ܒܝܼ̈ܫܵܬܼܵܐ 186 ܣܥ̣ܵܘ ܥܲܠ ܟܲܪܡ̇ܐ ܢܵܡܘܿܣܵܝܵܐ ܕܦܘܼܠܚܵܢ ܐ̄ܢܵܫܵܐ ܀ 187 :ܒܵܩܹ̈ܐ ܘܩܲܡܨܹ̈ܐ ܐܵܦ ܕܲܒܵܒܹ̈ܐ ܪ̈ܲܚܫܵܐ ܫܝܼܛܵܐ 188 ܟܢܲܫܘ̣ ܥܲܠ ܛܲܪ̈ܦܵܘܗܝ ܘܐܲܬܲܪܘ ܦܹܐܪ̈ܘܗܝ ܘܒܲܕܲܪܘ ܐܸܒܹܿܗ ܀ 189 :ܒܲܕܼܡܘܼܬܼ ܪ̈ܲܚܫܵܐ ܪܚܸܫܘ̣ ܚܘܼܫܵܒܹ̈ܐ ܒܲܥܪܝܼܪ̈ܵܝܐ 190 ܘܲܣܒ݂ܲܟܼܘ ܘܲܡ̣ܛܵܘ ܠܪܵܘܡ̇ܐ ܪܲܒܵܐ ܕܢܵܡܘܣ ܪܘܼܚܵܐ ܀ 191 :ܦܲܓܼܪܵܐ ܘܢܲܦܫܵܐ ܦ̣ܩܲܪܘ ܘܐܸܫܬܲܚܝܲܢܘ ܒܲܪ̈ܓܼܝܼܓܼܵܬܼܵܐ 192 ܘܠܵܐ ܐܸܬܼܒܲܩܝܼܘ ܒܲܫܟܼܝܼܪ̈ܵܬܲܐ ܕܪܸ̈ܥܝܵܢܲܝܗܘܿܢ ܀ 193 :ܟܪܘܿܡ̇ܐ ܕܟܲܠܒܵܐ ܩܢܵܬ̤ ܙܵܢܝܘܼܬܼܵܐ ܠܘܼܩܒܲܠ ܩܘܼܫܬܵܐ 194 ܘܲܟܼܡܵܐ ܕܟܼܵܐܹ̇ܐ ܒܙܲܠܝܼܠܘܼܬܼܵܗ̇ ܗܝ̤ ܐܲܝܟ ܕܐܝܼܬܹܝܗ̇ ܀ 195 :ܓܲܢܵܒܲܘܼܬܼܵܐ ܠܸܒܼܟܲܬ̤ ܚܘܼܨܦܵܐ ܕܕܹܐܒܼܵܐ ܝܲܥܢܵܐ 196 ܘܪܸܒܿܘܿ ܩܵܠܵܝܼ̈ܢ ܐܸܢ ܩܵܥܹ̇ܝܢ ܒܵܗ̇ ܠܵܐ ܡܸܬܼܟܲܚܕܼܵܐ ܀ 197 :ܚܣܵܡܵܐ ܦܲܩܪܵܐ ܕܡ̇ܘܠܸܕܼ ܩܸܛܠܵܐ ܦܩ݂ܲܪ ܐܲܝܟ ܐܲܪܝܵܐ 198 ܘܐܲܪܝܼܡ ܩܵܠܹܗ ܥܲܠ ܕܲܝܵܢܹܐ ܘܠܘܼܚܵܡܲܝ̈ܗܘܿܢ ܀ 199 :ܥܵܠܘܿܒܼܘܼܬܼܵܐ ܗܘ̤ܵܬܼ ܐܲܝܟ ܕܸܒܵܐ ܟܪܘܿܡܬܼܵܢܝܼܬܼܵܐ 200 ܘܲܟܼܡܵܐ ܕܫܵܬܼ̇ܝܵܐ ܕܡ̇ܐ ܕܲܥܠܝܼܒܹ̈ܐ ܬܘܼܒܼ ܡܸܬܼܠܲܗܩܵܐ ܀ 201 :ܪܸܚܡܲܬܼ ܡܸܣܦܵܐ ܛܸܡܪܲܬ̤ ܦܲܚܹ̈ܐ ܒܝܲܡܵܐ ܘܚܲܒܼܫܑܵܐ 202 ܘܨܵܕܲܬ̤ ܥܲܡܡܹ̈ܐ ܘܲܡܕܼܝܼ̈ܢܵܬܼܵܐ ܠܓܼܵܘ ܡ̣ܢ ܥܘܼܒܵܗ̇ ܀ 203 :ܪܸܚܡܲܬܼ ܫܘܼܒܼܚܵܐ ܣܸܟܼܪܲܬ̤ ܐܸܕܢܹܝ̈ܗ̇ ܡ̣ܢ ܒܘܼܝܵܢܵܐ 204 ܘܐܲܝܟ ܐܵܟܹܕܢܵܐ ܫܵܛܲܬ̤ ܚܲܝܠܵܐ ܕܲܒܼܓܼܵܘ ܣܸܦܪܹ̈ܐ ܀ 205 ܕܲܓܵܠܘܼܬܼܵܐ ܒܲܪܬܹܗ ܕܒܼܝܼܫܵܐ ܕܝܲܠܕܹܵܗ̇ ܒܲܥܕܹܢ: pb. 216 206 ܥܒܲܪܬܹܗ ܠܐܲܒܼܘܼܗ̇ ܒܐܘܼܡܵܢܘܼܬܼܵܐ ܕܡܹܐܟܲܠ ܩܲܪܨܵܐ ܀ 207 :ܠܬܲܥܠܵܐ ܕܵܡ̇ܝܵܐ ܒܲܗ̈ܦܵܟܵܬܼܵܐ ܕܲܓܵܠܵܬܼ̈ܐ 208 ܘܐܲܝܟ ܕܲܒܼܢܸܩܥܹ̈ܐ ܚܵܠ̇ܕܵܐ ܒܐܲܪܥܵܐ ܕܠܵܐ ܬܸܬܼܦܲܪܣܸܐ ܀ 209 :ܚܘܼܬܼܪܵܐ ܥܪܵܕܼܵܐ ܕܪܵܕܹܐ ܒܚܘܼܪܒܵܐ ܕܠܵܐ ܒܘܼܝܵܢܵܐ 210 ܡ̣ܪܲܕܼ ܡ̣ܢ ܢܝܼܪܵܐ ܕܡܲܟܿܝܼܟܼܘܼܬܼܵܐ ܡܫܲܝܢܲܬܼ ܐ̄ܢܵܫܵܐ ܀ 211 :ܪܲܒܿܘܼܬܼ ܟܲܪܣܵܐ ܫܝܘܿܠ ܒܵܠܲܥܬܼܵܐ ܕܠܵܐ ܡܸܬܼܡܲܠܝܵܐ 212 ܒܠܲܥܬܹ̣ܗ ܠܥܵܠܡܵܐ ܘܠܵܐ ܐܸܬܼܝܲܕܼܥܲܬ̤ ܕܐܸܟܼܠܲܬ̤ ܡܸܕܹܿܡ ܀ 213 :ܪܸܛܢܵܐ ܡܢܝܼܢܵܐ ܕܫܝܼܛ ܒܲܚܙܵܬܹܗ ܘܒܼܝܼܫ ܚܘܼܒܵܠܹܗ 214 ܥܒ݂ܲܪ ܥܲܠ ܚܲܩܠܵܐ ܕܦܵܪܘܿܫܘܼܬܼܵܐ ܘܚܲܒܸܿܠ ܦܹܐܪܸ̈ܝܗ̇ ܀ 215 :ܚܸܡܬܼܵܐ ܣܸܦܲܬ̤ ܒܲܕܼܡܘܼܬܼ ܢܘܼܪܵܐ ܒܥܵܒܼܵܐ ܕܢܲܦܫܵܐ 216 ܘܝܼܩܸܕܼܘ ܐܲܟܲܚ̄ܕܼ ܪ̈ܲܓܼܫܹܐ ܘܙܵܘܥܹ̈ܐ ܒܚܲܡܝܼܡܘܼܬܼܵܗ̇ ܀ 217 :ܐܲܝܟ ܕܲܒܼܢܘܼܪܵܐ ܚ̣̄ܩܸܕܼ ܘܐܸܣܬܲܝܲܛ ܫܲܦܝܼܪ̈ܵܬܼܵܐ 218 ܘܠܵܐ ܦܵܫ̣ ܦܹܐܪܵܐ ܕܗܲܢܝܼܬܘܼܬܼܵܐ ܒܟܲܪܡܵܐ ܕܐ̄ܢܵܫܵܐ ܀ 219 :ܐܲܝܟ ܚܲܝ̈ܘܵܬܼܵܐ ܥܲܠܘ̣ ܚܘܼ̈ܬܼܚܵܬܹܐ ܠܓܼܵܘ ܕܲܝܵܢܵܐ 220 ܘܐܸܟܲܠܘ̣ ܦܹܐܪ̈ܵܘܗܝ ܘܫܲܒܼܩ̣ܘܼܗܝ ܥܲܪܛܸܠ ܐܲܝܟ ܕܲܒܼܣܲܬܼܘܵܐ ܀ 221 :ܣܲܬܼܘܵܐ ܩܲܫܝܵܐ ܕܲܪ̈ܓܼܝܼܓܼܵܬܼܵܐ ܢܓܲܪ ܒܲܒܼܪܝܼܬܼܵܐ 222 ܘܲܒܼܛܸܠ ܥܵܠܡܵܐ ܡ̣ܢ ܦܘܼܠܚܵܢܵܐ ܪܘܼܚܵܢܵܝܵܐ ܀ 223 :ܚܸܫܟܵܐ ܕܛܘܼܥܝܲܝ ܠܸܠܝܵܐ ܕܲܬܼܪܹܝܢ ܥܠܲܒ̣ ܠܲܫܪܵܪܵܐ 224 ܘܲܣܠܸܩ ܙܹܐܦܵܐ ܠܕܲܪܓܼܵܐ ܪܵܡܵܐ ܠܥܸܠ ܡ̣ܢ ܩܘܼܫܬܵܐ ܀ 225 :ܐܲܝܟ ܐܝܼܡܵܡܵܐ ܕܝܲܪ̈ܝܲܚ ܣܲܬܼܘܵܐ ܙܥܲܪ ܛܵܒܼܵܬܼ̈ܐ 226 ܘܐܲܝܟ ܪܲܒܿܘܼܬܼܵܐ ܕܠܲܝ̈ܠܵܘܵܬܼܵܐ ܥܫܸ݂ܢ ܒܝܼ̈ܫܵܬܼܵܐ ܀ 227 :ܠܲܝܬܿ ܒܹܗ ܒܕܼܵܪܲܢ ܕܘܼܡܝܵܐ ܕܩܲܝܛܵܐ ܒܦܘܼܠܚܵܢ ܚܲܝܹ̈ܐ 228 ܘܠܲܝܬܿ ܕܲܡܥܲܙܸܐ ܩܕܼܵܡ ܚܘܼ̈ܬܼܵܚܵܬܹܐ ܐܲܝܟ ܕܲܒܼܚܘܼܡܵܐ ܀ 229 :ܐܲܝܟ ܕܲܒܼܣܲܬܼܘܵܐ ܚܒܼܝܼܫ ܪܸܥܝܵܢܵܐ ܒܗܲܝܟܲܠ ܦܲܓܼܪܵܐ 230 ܘܲܡܥܵܘܸܟ ܠܵܗ̇ ܠܟܲܫܝܼܪܘܼܬܹܗ ܥܲܪܝܵܐ ܕܥܵܘ̣ܠܵܐ ܀ 231 :ܒܥܵܒܼܘܿܪ̈ܝܵܬܼܵܐ ܩܲܝܛܵܐ ܗܲܢܝܼ ܠܐܲܪ̈ܥܵܢܵܝܹܐ 232 ܘܒܲܥܬܼܝܼ̈ܕܼܵܬܼܵܐ ܒܣܲܬܼܘܵܐ ܟܡܝܼܪܵܐ ܡܢܵܚܝܼܢ ܠܲܡܦܵܫ ܀ 233 :ܠܦܠܚܵܢ ܥܵܘ̣ܠܵܐ ܙܥܘܿܪ ܫܘܼܚܠܵܦܵܐ ܕܝܲܪ̈ܚܲܝ ܫܲܢ̄ܬܵܐ 234 ܘܲܠܕܘܼܪܵܫܵܐ ܕܙܲܕܼܝܼܩܘܼܬܼܵܐ ܘܠܵܐ ܚܲܕܼ ܝܵܘܡܵܐ ܀ 235 :ܒܲܫܟܼܝܼܪ̈ܵܬܼܵܐ ܩܲܝܛܵܐ ܘܣܲܬܼܘܵܐ ܘܠܵܐ ܐ̄ܢܵܫ ܡܲܡܐܸܢ 236 ܘܲܒܼܬܲܩ̈ܢܵܬܼܵܐ ܦܸܠܓܿܘܼܬܼ ܝܵܘܡ̇ܐ ܘܣܲܓܿܝܼ ܪܸܛܢܵܐ ܀ 237 :ܡ̇ܙܘܿܢ ܙܲܒܼܢܵܐ ܠܲܝܬܿ ܣܲܒܼܥܘܼܬܼܵܐ ܠܲܡܟܲܢܵܫܘܼ 238 ܘܩܹܢܝܵܢ ܚܲܝܹ̈ܐ ܟܣܸܐ ܥܸܢܝܵܢܹܗ ܐܲܝܟ ܝܲܬܿܝܼܪܵܐ ܀ 239 :ܐܲܝܟ ܝܲܬܿܝܼܪܵܐ ܚܫܝܼܒܼ ܥܲܠ ܣܲܟܼܠܹ̈ܐ ܥܸܢܝܵܢ ܪܘܼܚܵܐ 240 ܘܐܲܝܟ ܕܲܒܼܠܸܠܝܵܐ ܫܠܹܝܢ ܘܲܒܼܗܝܼܠܝܼܢ ܡ̣ܢ ܛܵܒܼܵܬܹ̈ܐ ܀ 241 :ܐܲܝܟ ܕܲܒܼܫܸܢܬܼܵܐ ܛܲܒܿܝܼܥ ܦܲܓܼܪܵܐ ܥܲܡ ܪܸܥܝܵܢܵܐ 242 ܘܠܵܐ ܡܸܬܿܬܿܥܝܼܪܝܼܢ ܠܩܵܠ ܟܘܼܘܵܢܵܐ ܕܡܲܩܢܹܐ ܚܲܝܹ̈ܐ ܀ 243 ܫܸܢܬܼܵܐ ܕܥܵܘ̣ܠܵܐ ܪܚܝܼܡܵܐ ܣܲܓܿܝܼ ܠܲܚܒܸܢܵܢܹ̈ܐ: pb. 217 244 ܘܠܵܐ ܗܲܢܝܼ ܠܗܘܿܢ ܠܡܸܫܡܲܥ ܩܵܠܵܐ ܕܥܹܕܵܢ ܨܲܦܪܵܐ ܀ 245 :ܒܡܸܣܟܹܿܢܘܼܬܼܵܐ ܪܓܼܝܼܓܼܝܼܢ ܠܲܡܦܵܫ ܒܢܲܝ̈ ܡܸܣܟܹܿܢܵܐ 246 ܘܠܵܐ ܡܸܬܼܝܲܐܒܼܝܼܢ ܠܥܘܼܬܼܪܵܐ ܪܲܒܵܐ ܕܲܟܼܣܸܐ ܒܪܵܘܡܵܐ ܀ 247 :ܒܐܲܬܼܪܵܐ ܕܪܵܘܡܵܐ ܟܣܸܐ ܒܘܼܣܵܡܵܐ ܕܠܵܐ ܡܸܬܼܚܲܒܲܠ 248 ܘܥܲܠ ܐܲܪ̈ܥܵܢܹܐ ܐܲܪܥܵܐ ܪܚܝܼܡܵܐ ܛܵܒܼ ܡ̣ܢ ܪܵܘܡܵܐ ܀ 249 :ܫܡܲܝܵܢ̈ܝܵܬܼܵܐ ܕܠܵܐ ܡܸܬܼܚܲܙ̈ܝܵܢ ܡ̣ܠܲܟ ܠܲܟܼܝܵܢܲܢ 250 ܘܥܲܦܪ̈ܵܢܵܝܹܐ ܒܥܲܦܪܵܐ ܒܵܥܹ̇ܝܢ ܠܲܡܩܵܘܵܝܘܼ ܀ 251 :ܒܪܵܘܡ̇ܐ ܩܲܒܼ݂ܥܹܗ ܠܢܝܼܫܵܐ ܚܲܝܵܐ ܕܫܘܼܘܕܵܝ ܡܸܠܵܘ̈ܗܝ 252 ܘܠܲܝܬܿ ܕܡܕܲܡܸܐ ܐܵܦܠܵܐ ܒܡܸܠܹ̈ܐ ܠܡܸܝܢܵܐ ܠܩܘܼܒܼܠܹܗ ܀ 253 :ܒܚܲܝܠܵܐ ܕܪܘܼܚܵܐ ܬܲܪܓܸܿܡ ܐܸܢܹܝܢ ܠܲܥܬܼܝܼ̈ܕܼܵܬܼܵܐ 254 ܘܐܲܝܟ ܕܲܒܼܨܸܒܼܥܵܐ ܐܸܢܹܝܢ ܒܝܲܕܼ ܟܵܪ̈ܘܿܙܵܘܗܝ ܀ 255 :ܐܲܝܟ ܕܲܒܼܕܲܦܵܐ ܨܵܪ ܒܲܡܓܲܠܹ̈ܐ ܛܘܼܒܹ̈ܐ ܘܢܸܓܼ̈ܕܹܿܐ 256 ܕܢܸܗܘܸܐ ܫܲܠܝܼܛ ܠܥܲܝܢܲܝ̈ ܒܸܣܪܵܐ ܠܡܸܚܙܵܐ ܕܟܲܣ̈ܝܵܢ ܀ 257 :ܒܲܕܼܡܘܼܬܼ ܨܲܠܡܵܐ ܩ̣ܒܲܥ ܦܘܼܩܕܼܵܢܵܘ̈ܗܝ ܒܲܟܼܬܼܝܼ̈ܒܼܵܬܼܵܐ 258 ܕܢܸܚܙܘܿܢ ܐ̄ܢܵܫܵܐ ܫܪܵܪܵܐ ܕܲܫܡܹܗ ܒܝܲܕܼ ܓܲܠ̈ܝܵܬܼܵܐ ܀ 259 :ܒܓܼܵܘ ܦܵܠܵܛܝܼܢ ܕܲܟܼܬܼܝܼ̈ܒܼܵܬܼܵܐ ܪܫܲܡ̣ ܟܲܣܝܘܼܬܹܗ 260 ܕܢܸܥܘܿܠ ܟܠܢܵܫ ܢܚܘܼܪ ܒܐܝܼܬܼܘܼܬܼܵܐ ܒܚܲܕܼ ܐܵܬܼ̈ܘܬܼܵܐ ܀ 261 :ܪܲܒܿܘܼܬܼ ܚܘܼܒܹܿܗ ܨܒܼܵܐ ܕܲܢܚܵܘܸܐ ܠܲܥܒܼܵܕܼ ܐܝܼܕܵܘ̈ܗܝ 262 ܘܲܟܼܬ݂ܲܒܼ ܣܸܦܪܵܐ ܘܐܲܗܓܿܝܼ ܐܸܢܘܿܢ ܚܘܼܒܵܢܵܐܝܼܬܼ ܀ 263 :ܚܹܝܠ ܪܲܒܿܘܼܬܹܗ ܨܵܪ ܒܐܵܬܼ̈ܘܼܬܼܵܐ ܠܵܘ ܐܝܼܬܼܘܼܬܹܗ 264 ܘܣܵܥܘܿܪܘܼܬܹܗ ܚܒܲܫ̣ ܒܲܡܓܲܠܹ̈ܐ ܘܠܵܘ ܟܲܣܝܘܼܬܹܗ ܀ 265 :ܠܒܼܘܼܝܵܐ ܐ̄ܢܵܫܵܐ ܒ̣ܢܵܐ ܦܵܠܵܛܝܼܢ ܕܲܟܼܬܼܝܼ̈ܒܼܵܬܼܵܐ 266 ܘܐܲܥܸܠ ܣܵܡ̣ ܒܵܗ̇ ܥܘܼܗܕܵܢ ܐ̄ܪ̈ܵܙܹܐ ܕܲܣܬܝܼܪ̈ܵܬܹܗ ܀ 267 :ܐܲܝܟ ܒܹܝܬܼ ܓܲܙܵܐ ܥܒ݂ܲܕܼ ܢܵܡܘܿܣܵܐ ܪܘܼܚܵܢܝܵܐ 268 ܘܟܲܢܸܫ ܘܲܡ̣ܠܵܝܗܝ ܓܙܵܪ̈ܲܝ ܕܝܼܢܹ̈ܐ ܕܥܲܠ ܣܵܪ̈ܘܿܚܹܐ ܀ 269 :ܒܹܝܬܼ ܡܲܠܟܿܘܼܬܼܵܐ ܒ̣ܢܵܐ ܠܹܗ ܒܐܲܪܥܵܐ ܡܠܸܐ ܟܠ ܒܸܪ̈ܝܵܢ 270 ܘܐܲܫܠܸܛ ܐ̄ܢܵܫܵܐ ܕܲܢܕܲܝܪܘܼܢ ܒܹܗ ܩܲܕܿܝܼܫܵܐܝܼܬܼ ܀ 271 :ܐܲܣܸܢ ܣܵܡ̣ ܒܹܗ ܓܲܙܵܐ ܕܪܘܼܚܵܐ ܕܠܵܐ ܡܸܣܬܲܝܲܟ 272 ܕܢܸܗܘܸܐ ܣܵܦܹ̇ܩ ܠܐܲܪ̈ܥܵܢܵܝܹܐ ܘܠܲܫܡܲܝܵܢܹ̈ܐ ܀ 273 :ܥܒ݂ܲܕܼ ܓܹܐܙܲܒܼܪ̈ܵܘܗܝ ܒܢܲܝܵ̈ܐ ܕܚܘܼܒܹܿܗ ܩܲܪ̈ܝܲܝ ܒܲܫܡܹܗ 274 ܕܲܢܦܲܠܓܼܘܼܢܵܝܗܝ ܚܲܟܿܝܼܡܵܐܝܼܬܼ ܐܲܝܟ ܝܵܕܼܘܿܥܹ̈ܐ ܀ 275 :ܢܵܛ̇ܪ̈ܲܝ ܓܲܙ̣ܵܐ ܐܲܠܵܗܵܝܵܐ ܗܘ̤ܵܘ ܓܲܢܵܒܹ̈ܐ 276 ܘܚܲܠܸܦܘ ܥܘܼܬܼܪܵܐ ܕܲܫܒܼܝܼ̈ܚܵܬܼܵܐ ܒܲܨܥܝܼܪ̈ܵܬܼܵܐ ܀ 277 :ܒܢܲܝ̈ ܦܵܠܵܛܝܼܢ ܐܲܦܸܩܘ ܐ̄ܪ̈ܵܙܹܐ ܕܲܡܠܸܟ ܡܲܠ̈ܟܹܿܐ 278 ܘܐܲܪܝܼܡܘ ܐܝܼܕܼܵܐ ܥܲܠ ܒܵܪܘܿܝܵܐ ܕܝܲܩܲܪ ܐܸܢܘܿܢ ܀ 279 :ܥܲܒܼܕܲܝ̈ ܡܲܠܟܵܐ ܥܪܲܩ̣ܘ ܡ̣ܢ ܡܲܠܟܵܐ ܕܡܲܡܠܸܟ ܥܲܠ ܟܠ 280 ܘܲܩ̣ܛܲܪܘ ܐ̄ܪ̈ܵܙܹܐ ܥܲܡ ܡܵܪܘܿܕܼܵܐ ܕܢܸܗܘܘܿܢ ܕܝܼܠܹܗ ܀ 281 :ܒܢܲܝ̈ ܡܲܠܟܿܘܼܬܼܵܐ ܫܒܲܩ̣ܘ ܥܸܢܝܵܢܵܐ ܕܒܹܝܬܼ ܡܲܠܟܿܘܼܬܼܵܐ 282 ܘܫܲܪܝܼܘ ܡܬܲܢܹܝܢ ܥܲܠ ܣܘܼܥܪ̈ܵܢܹܐ ܕܐܲܟܵܪܘܼܬܼܵܐ ܀ pb. 218 283 :ܙܡܝܼܢܲܝ̈ ܚܲܬܼܢܵܐ ܣܢܵܘ ܒܘܼܣܵܡܵܐ ܪܘܼܚܵܢܵܝܵܐ 284 ܘܲܢܦܲܩ̣ܘ ܦܵܗܹ̇ܝܢ ܒܹܝܬܼ ܐܘܼܪ̈ܚܵܬܼܵܐ ܠܡܸܬܿܬܿܓܵܪܘܼ ܀ 285 :ܒܢܲܝ̈ ܐܲܠܵܗܵܐ ܕܲܫܘ̣ܵܘ ܠܲܫܡܵܐ ܕܠܵܐ ܡ̇ܝ̈ܘܿܬܹܐ 286 ܢܚܸܬܼܘ ܡ̣ܢ ܕܲܪܓܼܵܐ ܐܲܠܵܗܵܝܵܐ ܘܩܵܡ̣ܘ ܥܲܠ ܐܲܪܥܵܐ ܀ 287 :ܡ̣ܝܼܬܼܘ ܡ̇ܝܘܿܬܹ̈ܐ ܕܲܡܟܲܢܹܝܢ ܗ̄ܘ̣ܵܘ ܠܵܐ ܡ̇ܝܘܿܬܹ̈ܐ 288 ܘܲܦܣܲܩ̣ܘ ܣܲܒܼܪܵܐ ܕܠܵܐ ܬܘܼܒܼ ܦܵܢܹ̇ܝܢ ܠܲܫܡܵܐ ܕܐܵܘܒܸܿܕܼܘ ܀ 289 :ܒܟܼܠܗܹܝܢ ܛܲܠܡ̣ܘܼܗܝ ܠܪܸܡܙܵܐ ܟܲܣܝܵܐ ܕܝܲܩܲܪ ܐܸܢܘܿܢ 290 ܘܫܵܛ̣ܘ ܢܵܡܘܿܣܹܗ ܘܕܲܠܸ̇ܠܘ ܡܸܠܵܘ̈ܗܝ ܕܠܵܐ ܡܸܫܬܲܪ̈ܝܵܢ ܀ 291 :ܒܝܲܕܼ ܢܵܡܘܿܣܵܐ ܢܲܣܝܼ ܐܸܢܘܿܢ ܕܲܟܼܡܵܐ ܣܢ̣ܵܐܘܼܗܝ 292 ܘܒܲܟܼܬܼܝܼ̈ܒܼܵܬܼܵܐ ܒܲܚܝܼܪܹܗ ܠܙܹܐܦܵܐ ܕܪܸ̈ܥܝܵܢܲܝܗܘܿܢ ܀ 293 :ܐܲܝܟ ܕܲܠܟܼܘܼܪܵܐ ܐܲܥܸܠ ܐܸܢܘܿܢ ܒܝܲܕܸ ܦܘܼܩܕܵܢܵܘ̈ܗܝ 294 ܘܕܲܟܿܝܼ ܐܸܢܘܿܢ ܘܠܵܐ ܐܸܬܿܕܲܟܿܝܼܘ ܡ̣ܢ ܣܲܢ̈ܝܵܬܼܵܐ ܀ 295 :ܬܵܘ ܟܹܝܬܼ ܢܹܐܡܲܪ ܐܲܝܟ ܒܲܪܬܼ ܩܵܠܵܐ ܕܲܢܒܼܝܼܘܼܬܼܵܐ 296 ܕܲܣܪܝܼܩܵܐܝܼܬܼ ܨܲܪܦܲܢ ܪܘܼܚܵܐ ܒܟܼܘܼܪ ܢܵܡܘܿܣܵܐ ܀ 297 :ܢܬܲܢܸܐ ܚܸܣܕܲܢ ܐܲܝܟ ܐܹܪܲܡܝܵܐ ܠܲܒܼܢܲܝ̈ ܥܲܡܹܗ 298 ܕܲܕܠܵܐ ܝܘܼܬܼܪܵܢ ܗܘ̤ܵܬܼ ܡܲܪܕܿܘܼܬܼܵܐ ܨܼܝܕܼ ܒܝܼܫܘܼܬܿܢ ܀ 299 :ܣܲܓܿܝܼ ܕܵܡ̇ܝܵܐ ܛܵܠܘܿܡܘܼܬܿܢ ܠܕܲܝܗܘܼܕܵܝܹ̈ܐ 300 ܘܝܲܬܼܝܼܪ ܡܸܢܗܘܿܢ ܡ̣ܪܲܕܼ ܪܥܝܵܢܲܢ ܡ̣ܢ ܝܘܼܠܦܵܢܵܐ ܀ 301 :ܠܵܐ ܣܢ̣ܵܘ ܥܲܡܵܢ ܠܡܸܠܲܝ̈ ܪܘܚܵܐ ܐܲܝܟ ܡ̇ܐ ܕܲܚܢܲܢ 302 ܘܠܵܐ ܐܸܬܼܦܲܠܲܓܼܘ ܥܲܠ ܕܲܥܬܼܝܼܕܵܢ ܒܕܼܘܼܡܝܵܐ ܕܝܼܠܲܢ ܀ 303 :ܠܵܐ ܫܵܛ̣ܘ ܘܐܲܣܠܝܼܘ ܝܼܣܲܪ̈ܵܠܵܝܹܐ ܠܪ̈ܲܒܵܢܲܝܗܘܿܢ 304 ܐܲܟܼܡܵܐ ܕܨܲܚܝܼܘ ܘܨܲܥܲܪܘ ܥܲܡܡܹ̈ܐ ܠܝܵܕܼܥܲܝ̈ ܩܘܼܫܬܵܐ ܀ 305 :ܠܵܐ ܐܸܬܼܓܲܕܲܦ ܫܸܡ ܒܵܪܘܿܝܵܐ ܒܹܝܬܼ ܥܸܒܼܪ̈ܵܝܹܐ 306 ܐܲܝܟ ܨܘܿܚ̈ܝܵܬܼܵܐ ܕܨܲܚܝܼܘ ܚܲܢܦܹ̈ܐ ܠܗܲܝܡܵܢܘܼܬܲܢ ܀ 307 :ܫܒܲܪ ܗ̄ܘ̣ܵܐ ܥܲܡܵܐ ܠܘܵܬܼ ܕܘܼܒܵܪܵܐ ܕܲܓܼܡܝܼܪܘܼܬܼܵܐ 308 ܘܲܠܦܘܼܬܼ ܙܲܒܼܢܹܗ ܠܵܐ ܥܕܝܼܠ ܣܲܓܿܝܼ ܒܐܲܝܠܹܝܢ ܕܐܲܡܪܲܚ ܀ 309 :ܥܡܡܹ̈ܐ ܕܩܲܒܸܿܠܘ ܐܲܓܝܼܪܵܐ ܓܡܝܼܪܵܐ ܕܡܲܠܟܿܘܼܬܼ ܪܵܘܡ̇ܐ 310 ܗܦܲܟܼܘ ܠܲܥܝܵܕܹ̈ܐ ܕܙܲܠܝܼܠܘܼܬܼܵܐ ܛܵܒܼ ܡ̣ܢ ܫܲܒܼܪܹ̈ܐ ܀ 311 :ܐܲܪܦܝܼܘ ܐܘܼܟܼܠܵܐ ܕܣܝܼܡ ܒܲܟܼܬܼܵܒܼܵܐ ܕܠܵܐ ܡܸܬܼܚܲܒܲܠ 312 ܘܲܗܦܲܟܼܘ ܝܵܢ̇ܩܝܼܢ ܚܲܠܒܼܵܐ ܪܲܦܝܵܐ ܕܲܢܛܘܼܪ̈ܵܬܼܵܐ ܀ 313 :ܡܨܲܚܹܝܢ ܟܠܫܵܥ ܠܝܗ̄ܘܼܕܼܵܝܘܼܬܼܵܐ ܘܲܠܚܲܢܦܘܼܬܼܵܐ 314 ܘܠܵܐ ܡܸܬܼܒܲܝܢܝܼܢ ܕܲܟܼܡܵܐ ܒܣܝܼܪܝܼܢ ܡ̣ܢ ܬܲܪ̈ܬܲܝܗܹܝܢ ܀ 315 :ܕܵܝ̇ܢܝܼܢ ܥܲܡܗܘܿܢ ܕܥܲܠ ܡ̇ܢ ܛܵܥܹ̇ܝܢ ܡ̣ܢ ܨܹܝܕܼ ܩܘܼܫܬܵܐ 316 ܘܠܵܐ ܡܸܬܼܒܲܩܹܝܢ ܕܗܸܢܘܿܢ ܛܵܥܹ̇ܝܢ ܡ̣ܢ ܛܵܥܲܝܵ̈ܐ ܀ 317 :ܡܝܲܩܪܝܼܢ ܚܲܢܦܹ̈ܐ ܠܐܲܠܵܗܵܝ̈ܗܘܿܢ ܐܲܝܟ ܕܠܛܵܒܹ̈ܐ 318 ܘܐܲܠܵܗ ܟܠܵܐ ܒܣܸܐ ܠܝܼܩܵܪܹܗ ܡ̣ܢ ܣܵܓܼܘܿܕܼܵܘ̈ܗܝ ܀ 319 ܪܚܝܼܡ ܝܘܼܠܦܵܢܵܐ ܕܟܼܠ ܗܹܪܹ̈ܣܝܼܣ ܥܲܠ ܫܵܡܘܿܥܵܘ̈ܗܝ: pb. 219 320 ܘܝܘܼܠܦܵܢ ܩܘܼܫܬܵܐ ܫܝܼܛ ܘܲܡܨܲܥܲܪ ܡ̣ܢ ܫܡܵܫܵܘ̈ܗܝ ܀ 321 :ܥܢܹܝܢ ܝܗ̄ܘܼܕܵܝܹ̈ܐ ܒܲܢܛܘܼܪ̈ܵܬܼܵܐ ܕܠܵܐ ܫܲܪܝܼܪ̈ܵܢ 322 ܘܟܲܕܼ ܛܵܒܼ ܡܲܣܠܹܝܢ ܚܦܝܼܛܝܼܢ ܣܵܓܲܝܼ ܐܲܝܟ ܒܲܝܬܵܝܹ̈ܐ ܀ 323 :ܢܵܛ̇ܪܝܼܢ ܛܲܟܼܣܵܐ ܕܪ̈ܲܒܵܢܲܝܗܘܿܢ ܡ̇ܢܝܼܢܵܝܹ̈ܐ 324 ܘܠܵܐ ܡܸܬܼܪܲܦܹܝܢ ܡ̣ܢ ܕܘܼܒܵܪܗܘܿܢ ܟܲܕܼ ܛܵܒܼ ܙܹܐܦܵܐ ܗ̄ܘ̣ ܀ 325 :ܦܵܪܥܝܼܢ ܚܘܼܒܵܐ ܠܡܲܠܦܵܢܲܝ̈ܗܘܿܢ ܡܲܪ̈ܩܝܘܿܢܸܣܛܹܐ 326 ܘܟܲܕܼ ܕܲܓܵܠܝܼܢ ܠܒܼܝܼܫܝܼܢ ܕܘܼܡܝܵܐ ܕܫܲܪܝܼܪ̈ܵܬܼܵܐ ܀ 327 :ܛܲܢܵܢܝܼܢ ܛܵܒܼ ܕܒܹܝܬܼ ܐܵܪܝܼܘܿܣ ܥܲܠ ܕܲܟܼܬܼܝܼ̈ܒܼܵܢ 328 ܘܡܲܣܓܹܿܝܢ ܒܵܢܹ̇ܝܢ ܥܲܠ ܫܲܬܸܐܣܬܼܵܐ ܕܠܵܐ ܫܲܪܝܼܪܵܐ ܀ 329 :ܟܬܼܝܼܫܝܼܢ ܡܓܼܘܼܫܹ̈ܐ ܒܲܡܓܼܫܘܼܬܼܵܐ ܒܸܕܼܝܵܐ ܕܫܹܐܕܹ̈ܐ 330 ܘܲܡܙܲܝܚܝܼܢ ܠܵܗ̇ ܐܲܝܟ ܗܵܝ̇ ܕܐܝܼܬܹܝܗ̇ ܟܲܕܼ ܠܵܐ ܐܝܼܬܹܝܗ̇ ܀ 331 :ܠܲܝܬܿ ܒܲܒܼܪܝܼܬܼܵܐ ܥܲܡܵܐ ܕܛܵܥܹ̇ܐ ܠܲܕܼܣܵܓܹܕܼ ܠܹܗ 332 ܘܠܵܐ ܕܲܡܚܲܠܸܦ ܣܸܓܼܕܲܬܼ ܡ̇ܪܵܐ ܕܲܡܫܲܡܸܫ ܠܹܗ ܀ 333 :ܢܥܝܼܪܝܼܘܗܝ ܡ̇ܕܹܝܢ ܠܒܲܪ ܚܹܠܲܩܝܵܐ ܩܵܠܵܐ ܕܓܼܒܼܵܝܗܝ 334 ܕܲܢܩܘܼܡ ܢܲܬܼܡܲܗ ܟܝܵܢܹ̈ܐ ܚܲܪ̈ܫܹܐ ܐܲܝܟ ܕܲܒܼܩܲܕܡ̇ܐ ܀ 335 :ܩܘܼܡ ܐܹܪܲܡܝܵܐ ܘܕܘܼܢ ܟܹܐܢܵܐܝܼܬܼ ܐܲܝܟ ܕܲܡܥܵܕܲܬܿ 336 ܘܲܩܪܝܼ ܣܵܗ̈ܕܹܿܐ ܫܡܲܝܵܐ ܘܐܲܪܥܵܐ ܥܲܠ ܒܝܼܫܘܼܬܿܢ ܀ 337 :ܬܲܪܬܹܿܝܢ ܒܝܼ̈ܫܵܢ ܥܒ݂ܲܕܼܘ ܐܵܦ ܥܲܡܡܹ̈ܐ ܒܲܕܼܡܘܼܬܼ ܥܲܡܵܐ 338 ܕܲܫܒ݂ܲܩܘ ܗܸܪܓܵܘ ܕܪ̈ܘܼܚܵܢܝܵܬܼܵܐ ܘܲܪܚܸܡ̣ܘ ܕܐܲܪܥܵܐ ܀ 339 :ܫ̣ܒܲܩܘ ܢܵܡܘܿܣܵܐ ܢܸܒܼܥܵܐ ܚܲܠܝܵܐ ܕܡܲܪܕܸܿܐ ܚܲܝܹ̈ܐ 340 ܘܲܚܦ݂ܲܪܘ ܒܸܕܼܝܵܐ ܕܟܲܕܵܒܼܘܼܬܼܵܐ ܓܘܼ̈ܒܹܿܐ ܪ̈ܥܝܼܥܹܐ ܀ 341 :ܒܥܲܡܡܹ̈ܐ ܫܸܠܡܲܬ̤ ܐܵܦ ܗܵܝ̇ ܕܐܸܡܲܪ ܕܥܲܒܼܕܵܐ ܗ̄ܘ̣ ܥܲܡܵܐ 342 ܕܲܫܒܲܩ̣ܘ ܩܘܼܫܬܵܐ ܘܪܲܓܼܘ ܥܸܢܝܵܢܵܐ ܕܲܣܪ̈ܝܼܩܵܬܼܵܐ ܀ 343 :ܥܠܲܝܗܘܿܢ ܦܲܐܝܵܐ ܐܵܦ ܕܢܸܢ̱ܗܡܘܼܢ ܐܲܪ̈ܝܵܘܵܬܼܵܐ 344 ܕܗܸܢ̣ܘܿܢ ܦܲܬܼܚܘܼܗܝ ܠܦܘܼܡ̇ ܕܫܹ̈ܐܕܹܐ ܠܲܡܓܲܕܵܦܘܼ ܀ 345 :ܥܲܠ ܥܒܼܪ̈ܵܝܹܐ ܢܗܸܡ̣ܘ ܒܵܒܼܵܠܵܝܹ̈ܐ ܘܐܵܬܼܘܿܪ̈ܵܝܹܐ 346 ܥܠܲܝܢ ܗܵܐ ܢܵܗܹ̇ܡ ܐܵܟܹ̇ܠܩܲܪܨܵܐ ܐܲܪܝܵܐ ܡܠܝܼܠܵܐ ܀ 347 ܠܥܲܡܵܐ ܕܐܲܪܫܲܥ ܒܲܙܘܼܗܝ ܥܲܡܡܹ̈ܐ ܕܒܼܝܼܫܝܼܢ ܡܸܢܹܗ: pb. 220 348 ܘܠܲܢ ܥܲܠ ܕܲܚ̣ܛܲܝܢ ܗܵܐ ܕܵܝ̇ܫܝܼܢ ܠܲܢ ܚܲܫܹ̈ܐ ܘܫܹ̈ܐܕܹܐ ܀ 349 :ܬܒܲܥܬܼܵܐ ܕܥܵܘ̣ܠܹܗ ܩܲܒܸܿܠ ܥܲܡܵܐ ܒܐܝܼܕܼܵܐ ܕܥܲܡܡܹ̈ܐ 350 ܘܕܼܝܼܠܲܢ ܩܲܝܵܡ ܢܸܓܼܕܵܐ ܕܥܵܘ̣ܠܲܢ ܠܝܘܿܡ ܒܘܼܚܪܵܢܵܐ ܀ 351 :ܡ̇ܕܹܝܢ ܥܵܠ̇ܒܵܐ ܬܒܲܥܬܼܵܐ ܕܝܼܠܲܢ ܠܕܲܝܗܘܼܕܵܝܹ̈ܐ 352 ܕܲܠܗܘܿܢ ܢܲܓܸܿܕ ܒܐܝܼܕܵܐ ܕܐ̄ܢܵܫܵܐ ܘܠܲܢ ܒܲܩܢܘܿܡܹܗ ܀ 353 :ܩܲܫܝܵܐ ܣܲܓܿܝܼ ܬܒܲܥܬܼܵܐ ܕܝܼܠܹܗ ܛܵܒܼ ܡ̣ܢ ܕܐ̄ܢܵܫܵܐ 354 ܘܣܵܗܹ̇ܕ ܦܵܘܠܘܿܣ ܕܩܸܢܛܵܐ ܗ̄ܘ̣ ܪܲܒܵܐ ܠܡܸܦܲܠ ܒܐܝܼܕܼܵܘ̈ܗܝ ܀ 355 :ܚܲܝܵܐ ܗ̄ܝܼ ܡܸܠܬܹܗ ܐܵܦ ܚܲܪܝܼܦܵܐ ܛܵܒܼ ܡ̣ܢ ܣܲܝܦܵܐ 356 ܘܐܲܝܟ ܕܲܒܼܢܘܼܪܵܐ ܒܵܚܲ݁ܪ ܙܹܐܦܵܐ ܕܲܒܼܓܼܵܘ ܢܲܦܫܵܐ ܀ 357 :ܒܕܼܝܼܢܵܐ ܥܵܐܹ̇ܠ ܥܲܡ ܚܘܼܫܵܒܹ̈ܐ ܕܪܲܓܼܘ ܒܝܼܫܹ̈ܐ 358 ܘܲܡܦܲܪܣܸܐ ܠܗܘܿܢ ܠܥܹܝܢ ܡܲܠܲܐܟܹ̈ܐ ܘܲܒܼܢܲܝ̈ܢܵܫܵܐ ܀ 359 :ܕܝܼܢܵܐ ܪܲܒܵܐ ܐܲܡܲ݁ܪ ܥܲܡܵܗ̇ ܕܦܵܪܘܿܫܘܼܬܿܢ 360 ܕܛܸܠܡܲܬ̤ ܗ̤ܝ ܠܵܗ̇ ܘܠܲܒܼ̈ܢܵܬܼ ܩܵܠܵܘ̈ܗܝ ܩܲܕܿܝܼ̈ܫܬܼܵܐ ܀ 361 :ܒܕܝܼܢܵܐ ܟܹܐܢܵܐ ܡܲܕܸܿܣ ܥܵܘ̣ܠܵܐ ܕܡܲܪܵܚܘܼܬܿܢ 362 ܕܫܵܛܲܬ̤ ܡܸܠܵܘ̈ܗܝ ܘܠܵܐ ܐܸܬܼܟܲܚܕܲܬ̤ ܡ̣ܢ ܦܘܼܩܕܵܢܵܘ̈ܗܝ ܀ 363 :ܚܲܟܿܝܼܡܵܐܝܼܬܼ ܡܲܣܪܲܚ ܢܸܓܼ̈ܕܹܿܐ ܥܲܠ ܒܝܼܫ̈ܬܲܢ 364 ܕܕܼܵܫܢ݂ܲܢ ܛܲܟܼܣܵܐ ܕܣܝܼܡ ܒܲܟܼܝܵܢܵܐ ܘܒܲܟܼܬܼܝܼ̈ܒܼܵܬܼܵܐ ܀ 365 :ܐܘܼܡ̇ܢܵܐܝܼܬܼ ܬܵܒܲܥ̇ ܥܲܡܠܹ̈ܐ ܒܟܲܦܬܼܵܐ ܕܪܸܡܙܹܗ 366 ܘܡܲܣܠܸܐ ܕܙܵܐܹ̇ܠ ܘܓܼܵܒܹ̇ܐ ܕܢܵܬܲ݁ܥ ܒܲܓܼܡܝܼܪܘܼܬܼܵܐ ܀ 367 :ܬܒܲܥܬܼܵܐ ܩܫܝܼܬܼܵܐ ܘܢܸܓܼ̈ܕܹܿܐ ܥܦܝܼܦܹ̈ܐ ܡܠܸܐ ܦܘܼܩܕܵܢܹܗ 368 ܥܲܠ ܡܪ̈ܵܚܹܐ ܕܵܠܐ ܩܲܕܸܿܡܘ ܚܲܪ̣ܘ ܒܲܓܼܙܵܪ ܕܝܼܢܵܘ̈ܗܝ ܀ 369 :ܥܝܵܪܵܬܵܐ ܬܲܒܼܵܬܵܐ ܬܵܒܲܥ̇ ܕܚܘܼܒܹܿܗ ܪܲܒܵܐ ܘܲܕܼܠܘܼܚܵܡܵܘ̈ܗܝ 370 ܕܩܲܕܸܿܡ ܚܵܘܝܼ ܚܘܼܒܹܿܗ ܘܢܸܓܕܸܵܘ̈ܗܝ ܘܠܵܐ ܦܪܲܫ̣ܘ ܘܝܼܕܲܥܘ̣ ܀ 371 :ܠܦܘܼܬܼ ܡܘܼܠܟܵܢܵܘ̈ܗܝ ܡܲܣܓܸܐ ܘܬܼܵܒܲܥ̇ ܡ̣ܢ ܒܲܝܬܵܝܵܘ̈ܗܝ 372 ܕܠܵܐ ܐܸܬܼܝܲܐܒܼܘ ܠܲܡܣܲܟܵܝܘܼ ܠܚܲܝܹ̈ܐ ܥܬܝܼ̈ܕܹܐ ܀ 373 :ܡܘܼܠܟܵܢ ܚܲܝܹ̈ܐ ܕܠܵܐ ܫܘܼܠܵܡܵܐ ܪܫܡ̣ ܒܲܟܼܬܼܵܒܼܵܘ̈ܗܝ 374 ܕܢܸܚܙܿܢ ܐ̄ܢܵܫܵܐ ܒܲܟܼܬܼܝܼ̈ܒܼܵܬܼܵܐ ܠܲܕܠܵܐ ܫܘܼܠܵܡ ܀ 375 :ܐܘܼܪܚܵܐ ܫܦܝܼܬܼܵܐ ܕܡܲܠܝܵܐ ܫܲܝܢܵܐ ܕܪܲܫ̣ ܒܲܢܒܼܝܼ̈ܘ̈ܗܝ 376 ܕܢܸܪܕܹܿܐ ܟܠܢܵܫ ܒܹܝܬܼ ܣܘܼܪ̈ܓܵܕܹܐ ܠܘܵܬܼ ܕܲܥܝܼ̈ܕܼܵܢ ܀ 377 :ܐܲܝܟ ܡܲܚܙܝܼܬܼܵܐ ܩܒ݂ܲܥ ܢܵܡܘܿܣܵܐ ܒܹܝܬܼ ܐܲܪ̈ܥܵܢܹܐ 378 ܕܲܢܚܘܼܪܘܼܢ ܒܹܗ ܘܢܸܚܘܙܿܢ ܡܘܼܡܹ̈ܐ ܕܲܩܢܘܿ ܡܲܝ̈ܗܘܿܢ ܀ 379 :ܬܲܪܬܹܿܝܢ ܚܵܘܝܼ ܒܲܝܕܼ ܢܵܡܘܿܣܵܐ ܠܲܕܚܵܐܲ݁ܪ ܒܹܗ 380 ܛܘܼܒܹ̈ܐ ܡܠܝܼܟܹ̈ܐ ܘܢܸܓܼ̈ܕܹܿܐ ܥܩܝܼܦܹ̈ܐ ܠܲܕܼܫܵܐܹ̇ܛ ܠܹܗ ܀ 381 :ܥܲܠ ܬܲܪ̈ܬܲܝܗܹܝܢ ܕܵܐܹ̇ܢ ܥܲܡܲܢ ܘܲܡܢܲܓܸܿܕ ܠܲܢ 382 ܪܲܓܲܢ ܛܘܼܒܹ̈ܐ ܘܲܣܢܲܝܢ ܢܸܓܼ̈ܕܹܿܐ ܐܲܝܟ ܦܵܪ̈ܘܿܫܹܐ ܀ 383 :ܠܦܵܪܘܿܫܘܿܬܿܢ ܦܠܸܐ ܗ̄ܘ̣ܵܐ ܠܡܸܦܪܲܫ ܐܲܝܕܵܐ ܕܦܲܐܝܵܐ 384 ܘܲܕܸܠܵܐ ܦܪܲܫܢ݂ܲܢ ܥܬܝܼܕܼ ܗ̄ܘ̣ ܕܢܸܦ̄ܪܫܲܢ ܡ̣ܢ ܡܘܼܠܟܵܢܵܘ̈ܗܝ ܀ pb. 221 385 :ܠܲܡܠܝܼܠܘܼܬܿܢ ܡܸܬܼܒܲܥܝܵܐ ܗ̄ܘ̣ܵܬܼ ܠܡܸܬܼܒܲܥ ܩܘܼܫܬܵܐ 386 ܘܲܕܸܠܵܐ ܬܸܒܼܥܲܬ̤ ܗܵܐ ܡܸܬܿܬܲܒܼܥܵܐ ܒܕܝܼܢܵܐ ܟܹܐܢܵܐ ܀ 387 :ܚܲܝܵܒܼܘܼܬܿܢ ܚܲܝܵܒܼܵܐ ܗ̄ܘ̣ܵܬܼ ܠܡܸܦܪܲܥ ܫܘܼܒܼܚܵܐ 388 ܘܲܕܼܠܵܐ ܦܸܪܥܲܬ̤ ܗܵܐ ܡܸܬܼܦܲܪܥܵܐ ܕܠܵܐ ܚܵܘܣܵܢܵܐ ܀ 389 :ܫܵܘܹ̇ܝܢܲܢ ܓܹܝܪ ܕܲܥܦܝܼܦܵܐܝܼܬܼ ܢܸܬܸܿܠ ܕܝܼܢܵܐ 390 ܕܠܵܐ ܩܲܛܪܸܓܼܢܲܢ ܠܲܫܟܼܝܼܪ̈ܵܬܲܢ ܒܕܼܝܼܢܵܐ ܕܢܲܦ̰ܫܲܢ ܀ 391 :ܡܲܢ̣ܘܼ ܕܲܣܡܸܐ ܡ̣ܢ ܒܘܼܝܵܢܵܐ ܐܲܝܟ ܡܵܐ ܕܲܚܢܲܢ 392 ܕܠܵܐ ܕܵܢ̄ܢ ܢܲܦ̰ܫܲܢ ܥܲܕܼܠܵܐ ܢܹܐܬܼܐ ܕܝܼܢܵܐ ܕܚܝܼܠܵܐ ܀ 393 :ܡܲܢ̣ܘܼ ܕܲܩܥܹܐ ܠܸܒܵܐ ܕܟܹܐܦܵܐ ܒܕܼܘܼܡܝܵܐ ܕܝܼܠܲܢ 394 ܕܠܵܐ ܐܸܬܼܪܲܟܲܟܼܢ ܠܵܐ ܒܫܘܼܘܕܵܝܹ̈ܐ ܘܠܵܐ ܒܠܘܼܚܵܡܹ̈ܐ ܀ 395 ܦܲܟܿܝܼ̈ܗܵܬܼܵܐ ܗ̤ܘܲܝ̈ ܩܲܫ̈ܝܵܬܼܵܐ ܠܡܵܪܘܿܕܼܘܼܬܲܢ. 396 ܘܝܲܬܿܝܼܪ̈ܵܬܼܵܐ ܗ̤ܘܲܝ̈ ܢܝܼ̈ܚܵܬܼܵܐ ܠܥܲܛܠܘܼܬܼ ܢܲܦ̰ܫܲܢ ܀ 397 :ܠ̣ܐܝܼܘ ܟܵܪ̈ܘܿܙܹܐ ܒܲܟܼܬܼܝܼ̈ܒܼܵܬܼܵܐ ܘܠܵܐ ܐ̄ܢܵܫܵ ܨܵܐܹ̇ܬܼ 398 ܘܲܬܼܚܸܒ̣ ܚܲܝܠܵܐ ܕܠܸܫܵܢܲܝ̈ܗܘܿܢ ܡ̣ܢ ܕܲܠܡܸܩܥܵܐ ܀ 399 :ܫܠܸܡ̣ ܕܸܡ̈ܘܵܬܼܵܐ ܘܲܡ̈ܢܵܘܵܬܼܵܐ ܘܥܵܘ̣ܠܲܢ ܩܲܝܵܡ 400 ܘܐܵܘܦܝ̣ܘ ܚܸܙܘܸ̈ܐ ܘܐܵܦ ܓܸܠܝܵܢܹ̈ܐ ܘܗܘ̤ ܐܲܝܟ ܕܐܝܼܬܼܵܘܗܝ ܀ 401 :ܩܸܛܠܲܬ̤ ܐܘܼܪܚܵܐ ܕܐܝܼܙܓܲܕܿܘܼܬܼܵܐ ܕܲܫܡܲܝܵܢܹ̈ܐ 402 ܘܠܵܐ ܦܵܫ̣ ܪܲܗܛܵܐ ܕܡܲܪܵܚܘܼܬܿܢ ܡ̣ܢ ܣܲܢ̈ܝܵܬܼܵܐ ܀ 403 :ܚܲܪ̈ܫܹܐ ܒܲܠܚܘܿܕܼ ܐܸܫܬܲܕܲܪܘ ܒܐܝܼܙܓܲܕܿܘܼܬܼܵܐ 404 ܘܗܵܐ ܛܵܒܼ ܓܲܠܝܵܐ ܗ̄ܝܼ ܕܐܵܦܠܵܐ ܗܸܢ̣ܘܿܢ ܦܵܫ̣ܘ ܡ̣ܢ ܗܵܕܹܐ ܀ 405 :ܛܵܒܼ ܟܵܘܸܢܘ ܠܲܢ ܐܵܦ ܫܲܬܼܝܼܩܹ̈ܐ ܟܲܕܼ ܛܵܒܼ ܚܲܪ̈ܫܝܼܢ 406 ܘܲܚܠܵܦ ܩܵܠܵܐ ܡܲܠܸܠܘ ܥܲܡܲܢ ܒܫܘܼܚܠܵܦܲܝ̈ܗܘܿܢ ܀ 407 :ܫܸܡܫܵܐ ܕܲܚܸܫܟ ܡ̣ܢ ܣܲܢ̈ܝܵܬܲܢ ܛܲܫܝܼ ܢܘܼܗܪܹܗ 408 ܘܣܲܗܪܵܐ ܕܥܲܡ݂ܲܛ ܡܼܪܵܚܘܼܬܲܢ ܗܦܲܟܼ݂ܬܹܗ ܠܲܕܼܡܵܐ ܀ 409 :ܒܲܪ̈ܩܹܐ ܕܐܵܘܩܸܕܼܘ ܢܘܼܪܵܐ ܕܚܸܡܢܲܢ ܫܸܓܼܪܵܬ̤ ܐܸܢܘܿܢ 410 ܘܪ̈ܲܥܡܹܐ ܕܐܲܙܝܼܥܘ ܒܩܵܠ ܓܘܼܕܵܦܲܢ ܩܢ̣ܵܘ ܬܵܘܣܲܦܬܵܐ ܀ 411 :ܐܲܪܥܵܐ ܕܙܵܥܲܬ̤ ܥܵܘ̣ܠܲܢ ܝܼܩ݂ܲܪ ܥܲܠ ܟܲܬܼܦܵܬܼ̈ܗ̇ 412 ܘܐܲܝܟ ܕܲܒܼܦܘܼܡܵܐ ܩܥܵܬ̤ ܐܲܟܸܿܣܬܲܢ ܒܝܲܕܼ ܢܵܘܕܵܢܵܐ ܀ 413 :ܩܲܝܛܵܐ ܕܐܵܘܩܸܕܼ ܦܹܐܪܹ̈ܐ ܒܚܘܼܡܵܐ ܚܣܵܡܲܢ ܫܲܓܼܪܹܗ 414 ܘܣܲܬܼܘܵܐ ܕܐܲܓܲܪ ܒܲܩܲܪܝܼܪܘܼܬܼܵܐ ܪܸܛܢܲܢ ܡܲܬܼܚܹܗ ܀ 415 :ܟܹܐܒܲܝ̈ܢ ܕܲܣܓܼܝܼܘ ܒܝܼܫܘܼܬܼ ܝܲܨܪܲܢ ܝܸܠܕܲܬ̤ ܐܸܢܘܿܢ 416 ܘܡܵܘܬܵܐ ܪܗܝܼܒܼܵܐ ܚܢܲܢ ܣܲܪܗܸܒܼܢܵܝܗܝ ܠܡܸܕܼܒܲܪ ܢܲܦ̰ܫܲܢ ܀ 417 :ܥܲܡܵܐ ܕܐܲܩܪܸܒܼ ܠܘܼܩܒܲܠ ܥܲܡܵܐ ܚܢܲܢ ܕܲܚܝܼܢܵܝܗܝ 418 ܘܡܲܠܟܵܐ ܕܐܲܫܦܸܠ ܘܚܵܒܼ ܒܲܩܪܵܒܼܵܐ ܚܵܘ̈ܒܲܝܢ ܚܲܝܒܼܘܼܗܝ ܀ 419 ܒܲܢ ܐܸܬܿܕܲܘܲܕܼ ܛܲܟܼܣܵܐ ܬܲܩܢܵܐ ܕܪܹܫܵܢܘܼܬܼܵܐ: pb. 222 420 ܘܒܲܢ ܐܸܨܛܲܥܲܪ ܕܲܪܓܼܵܐ ܪܵܡ̇ܐ ܕܫܸܡ ܟܵܗܢܘܼܬܼܵܐ ܀ 421 :ܒܚܸܪܚܵܘܼܬܿܢ ܥܲܠ̣ ܚܸܪܝܵܢܵܐ ܘܐܲܡܠܸܟ ܒܐܲܪܥܵܐ 422 ܘܗܵܐ ܡܸܬܼܟܲܬܿܫܝܼܢ ܟܵܗܢܹ̈ܐ ܘܡܲܠ̈ܟܹܿܐ ܚܲܕܼ ܠܘܼܩܒܲܠ ܚܲܕܼ ܀ 423 :ܒܓܸܠܝܵܐ ܘܟܸܣܝܵܐ ܡܲܩܪܸܒܼ ܟܠܢܵܫ ܠܘܼܩܒܲܠ ܚܲܒܼܪܹܗ 424 ܘܠܲܝܬܿ ܫܘܼܠܵܡܵܐ ܠܬܲܟܼܬܿܘܼܫܲܝ̈ܗܘܿܢ ܠܹܠܲܝ ܐܝܼܡܵܡ ܀ 425 :ܒܩܹܐܪܣܵܐ ܩܲܫܝܵܐ ܕܠܵܐ ܫܲܘܝܘܼܬܼܵܐ ܪܡܹܝܢ ܟܠ ܬܸܓܿܡܝܼ̈ܢ 426 ܘܡ̣ܢ ܟܠ ܓܲܒܿܝܼ̈ܢ ܦܲܚܹ̈ܐ ܛܡܝܼܪܹ̈ܐ ܩܕܼܵܡ ܗܲܠܵܟܹ̈ܐ ܀ 427 :ܒܩܸܢܛܵܐ ܘܕܸܚܠܵܐ ܫܪܹܐ ܪܸܥܝܵܢܵܐ ܡ̣ܢ ܪܸܥܝܵܢܵܐ 428 ܘܠܲܝܬܿ ܕܲܡܗܲܝܡܸܢ ܐܵܦܠܵܐ ܕܫܲܪܝܼܪ ܚܘܼܒܹܿܗ ܒܲܐ̄ܚܪܹܝܢ ܀ 429 :ܒܠܸܒܵܐ ܘܠܸܒܵܐ ܡܡܲܠܸܠ ܟܠܢܵܫ ܥܲܡ ܩܪܝܼܒܹܗ 430 ܘܩܲܢܝܼܛ ܠܸܒܵܐ ܕܕܲܡ ܠܵܐ ܫܵܠ̈ܡܵܢ ܡܸܠܹ̈ܐ ܠܠܸܒܵܐ ܀ 431 :ܦܫܝܼܛ ܠܸܫܵܢܹܗ ܘܩܲܪܝܼܒܼ ܡܲܡܠܸܠܹܗ ܘܢܲܗܝܼܪ ܩܵܠܹܗ 432 ܘܲܦܬܼܝܼܠ ܠܸܒܵܐ ܘܪܲܓܿܘܼܙ ܩܵܠܹܗ ܘܚܸܫܘܿܟ ܓܵܘܢܹܗ ܀ 433 :ܣܵܘܲ݁ܚ ܘܲܦܨܝܼܚ ܦܸܓܼܥܵܐ ܕܐܲܦܹ̈ܐ ܠܘܼܩܒܲܠ ܐܲܠܹ̈ܐ 434 ܘܐܲܒܼܝܼܠ ܘܲܟܼܡܝܼܪ ܝܲܨܪܵܐ ܕܲܠܓܼܵܘ ܐܲܝܟ ܕܥܲܠ ܡܝܼܬܑܼܵܐ ܀ 435 :ܡܢܲܫܸܩ ܦܘܼܡ̇ܐ ܠܦܘܼܡ̇ܐ ܡܢܵܬܹܗ ܚܘܼܒܵܢܵܐܝܼܬܼ 436 ܘܗܵܘܢܵܐ ܡܥܲܡܸܩ ܛܵܡܲ݁ܪ ܦܲܚܹ̈ܐ ܚܲܪܡ̇ܢܵܐܝܼܬܼ ܀ 437 :ܩܸܢܛܵܐ ܗ̄ܘ̣ ܪܲܒܵܐ ܠܡܸܪܕܵܐ ܠܘܲܥܕܵܐ ܕܲܠܡܹܐܝܢ ܚܲܝܹ̈ܐ 438 ܕܐܲܝܟ ܕܲܒܼܫܸܢܬܼܵܐ ܡܟܲܣܹܝܢ ܚܲܫܹ̈ܐ ܒܝܲܡܵܐ ܕܢܲܦ̰ܫܵܐ ܀ 439 :ܡܲܢ̣ܘܼ ܡܸܫܟܲܚ ܕܢܸܚܙܘܿܩ ܒܐܘܼܪܚܵܐ ܕܡܲܠܟܿܘܼܬܼ ܪܵܘܡܵܐ 440 ܚܘܼܫܒܹ̈ܐ ܟܡܝܼܢܝܼܢ ܘܲܛܫܹܝܢ ܐܲܝܟ ܓܲܝܵܣܹ̈ܐ ܀ 441 :ܫܲܦܝܼܪ ܡ̇ܕܹܝܢ ܩܪܹܝ̇ܬܹܗ ܒܝܼܫܵܐ ܠܙܲܒܼܢܵܐ ܕܲܡ̣ܛܵܢܝ 442 ܕܒܼܝܼܫ ܘܲܡܙܲܠܗܲܙ ܘܲܡܠܸܐ ܩܸܢܛܵܐ ܠܲܕܼܪܵܕܹܐ ܒܹܗ ܀ 443 :ܫܲܦܝܼܪ ܝܸܗ̄ܒܹܿܬܼ ܘܵܝܵܐ ܠܲܩܢܘܿܡܝ ܒܫܘܼܪܵܝ ܡܸܠܲܝ̈ 444 ܕܛܠܸ݂ܩ ܘܐܵܘܦܝܼ ܡ̇ܙܘܿܢ ܚܲܝܹ̈ܐ ܒܲܫܢܲܝ̈ ܚܲܝܹ̈ܐ ܒܲܫܢܲܝ̈ ܚܲܝܲܝ̈ ܀ 445 :ܒܝܵܘܡܲܝ̈ ܫܸܠܡܲܬ̤ ܗܵܝ̇ ܕܲܟܼܬܼܝܼܒܼܵܐ ܕܐܸܒܲܕܼ ܚܲܣܝܵܐ 446 ܘܠܲܝܬܿ ܒܲܒܼܪܝܼܬܼܵܐ ܕܲܬܼܘܵܬܼ ܢܲܦ̰ܫܵܐ ܒܓܼܵܘ ܪܸܥܝܵܢܹܗ ܀ 447 :ܡܹܐܡܲܪ ܐܸܡܹ̇ܪܹܬܼ ܐܵܦ ܐ̄ܢܵܐ ܘܠܵܐ ܗ̄ܘ̣ܵܐ ܡܸܣܥܲܪ ܣܸܥܵܪܬܼ 448 ܘܲܡܓܲܙܲܝ ܐ̄ܢܵܐ ܡ̣ܢ ܛܵܒܼܵܬܼ̈ܐ ܛܵܒܼ ܡ̣ܢ ܚܲܒܼܪ̈ܲܝ ܀ 449 :ܝ̣̇ܥܪܵܐ ܕܚܵܘ̈ܒܹܿܐ ܡܠܹܝܢ ܚܘܼܫܵܒܲܝ̈ ܐܲܝܟ ܕܲܟܼܢܵܘ̈ܬܼܝ 450 ܘܠܲܝܬܿ ܒܹܗ ܒܪܸܥܝܵܢܝ ܦܹܐܪܵܐ ܕܗܲܢܝܼ ܠܡܵܪܹܐ ܟܲܪܡ̇ܐ ܀ 451 :ܡܸܠܹ̈ܐ ܪܲܟܿܒܹܬܼ ܐܲܝܟ ܚܲܝܵܒܼܵܐ ܩܕܼܵܡ ܕܲܝܵܢܵܐ 452 ܕܕܲܡ ܢܸܬܼܪܲܟܼܢܘܼܢ ܪ̈ܲܚܡܹܐ ܒܕܝܼܢܵܐ ܠܘܵܬܼ ܚܲܝܵܒܼܘܼܬܼܝ ܀ 453 :ܒܥܸܠܲܬܼ ܡܠܹ̈ܐ ܥܸܠܹ̇ܬܼ ܕܐܵܘܓܲܪ ܒܫܘܼܠܵܡ ܝܵܘܡ̇ܐ 454 ܕܲܟܼܒܲܪ ܐܸܫܘܸܐ ܠܢܸܬܼܪܵܐ ܙܥܘܿܪܵܐ ܕܦܘܼܪܥܵܢ ܐܲܓܼܪܵܐ ܀ pb. 223 455 :ܩܵܠܵܐ ܫܸܡܥܹ̇ܬܼ ܕܗܵܝ̇ ܒܲܪܬܼ ܩܵܠܵܐ ܕܨܸܝܕܼ ܐܲܓܼܝܼܪܹ̈ܐ 456 ܘܗ̤ܝ ܚܲܦܸܛܬܲܢܝ ܕܐܵܘܓܲܪ ܠܸܫܵܢܝ ܒܦܘܼܠܚܵܢ ܡܸܠܹ̈ܐ ܀ 457 :ܪܸܡܙܵܐ ܕܲܦܩ݂ܲܕܼ ܠܡܸܬܲܠ ܐܲܓܼܪܵܐ ܕܹܝܢܵܪ ܕܹܝܢܵܪ 458 ܗܘ̤ ܐܸܡ݂ܲܪ ܠܝܼ ܕܩܘܼܡ ܐܸܬܼܟܲܫܲܪ ܦܵܥܠܵܐ ܫܲܦܠܵܐ ܀ 459 :ܪ̈ܲܚܡܹܐ ܕܐܲܓܼܪܘܼܗ̇ ܠܫܝܼܛܘܼܬܼ ܓܸܢܣܲܢ ܠܦܘܼܠܚܵܢ ܩܘܼܫܬܵܐ 460 ܢܲܫܘܘܿܢ ܐܵܦ ܠܝܼ ܠܦܘܼܪܥܵܢ ܐܲܓܼܪܵܐ ܕܕܹܝܢܵܪ ܚܲܝܹ̈ܐ ܀