Chronicle of Zuqnin, Part 2

pb. 160

ܬܘܒ ܡܟܬܒܢܘܬ ܕܣܘܩܪܛܝܣ. ܫܪܒܐ ܐܚܪܢܐ ܐܝܟ ܕܒܩܦܠܼܝܘܢ. ܫܢܬ ܫ̈ܬܡܐܐ ܘܥܣܪ̈ ܠܐܠܟܣܢܕܪܘܣ ܡܩܕܘܢܝܐ ܡܠܟܐ ܕܝܘܢܝ̈ܐܼ. ܐܪܝܘܣ ܣܕܩ ܥܕܬܐ. .. ܟܕ ܐܡܿܪ ܕܠܐ ܠܡ ܐܝܬܘܗܝ ܐܠܗܐ ܐܡܝܢܐܝܬ ܐܒܐܼ. ܐܠܐ ܐܝܬ ܐܡܬܝ ܕܠܐ ܐܝܬܘܗܝ ܐܠܗܐ ܐܒܐ. ܘܠܐ ܐܡܝܢܐܝܬ ܐܝܬܘܗܝ ܡܠܬܐܐܠܗܐ. ܐܠܐ ܡܢ ܠܐ ܡܕܡ ܗܘܼܐ. ܗܿܘ ܓܝܪ ܕܐܝܼܬܘܗܝ ܐܠܗܐ ܠܗܿܘ ܕܠܐ ܐܝܬܘܗܝ܆ ܡܢ ܡܕܡ ܕܠܐ ܐܝܬܘܗܝ ܥܒܼܕ. ܡܛܠܗܕܐ ܐܦ ܐܝܬ ܗܘܐ ܐܡܬܝ ܕܠܐ ܐܝܬܘܗܝ. ܒܪܝܬ ܓܝܪ ܐܝܬܘܗܝ ܘܥܒܿܕܐ ܒܪܐ. ܐܠܐ ܕܝܢ ܐܦܠܐ ܕܕܿܡܐ ܒܐܝܬܘܬܐ ܠܐܒܐ ܐܝܬܘܗܝ. ܘܠܐ ܡܠܬܐ ܫܪܝܪܐ ܘܟܝܢܐ ܕܐܒܐ. ܘܠܐ ܚܟܡܬܗ ܐܝܟ ܕܐܡܼܪ ܫܠܡܘܢ. ܐܠܐ ܚܕ ܡܢ ܥܿܒ̈ܕܐ ܐܝܬܘܗܝ ܘܗܘ̈ܝܐ. ܫܐܝܠܐܝܬ ܕܝܢ ܡܠܬܐ ܘܚܡܬܐ ܐܬܥܒܼܕ. ܐܦ ܗܼܘ ܠܡܠܬܐ ܚܬܝܬܐ:ܬ ܘܠܚܼܟܡܬܗ ܕܐܠܗܐ ܗܿܝ ܕܒܗ: ܘܠܟܠܡܕܡ ܐܦ ܠܗ ܥܒܼܕ ܐܠܗܐ. ܡܛܠ ܗܢܐ ܐܦ ܡܫܬܚܠܦܢܐ ܗܘ ܘܡܫܬܓܢܝܢܐ ܒܟܝܢܗܼ. ܐܝܟ ܕܐܦ ܟܠܗܘܢ ܡ̈ܠܝܠܐ. ܡܢܟܪܝܐ ܕܝܢ ܘܡܒܥܕܐ ܘܢܘܟܪܝܐ ܐܝܬܘܗܝ ܡܠܬܐ ܡܢ ܐܝܬܘܬܗ ܕܐܒܐ. ܘܓܢܝܙܐ ܐܒܐ ܠܒܪܐ. ܐܦ (ܠܐ) ܓܝܪ ܡܫܠܡܢܐܝܬ ܘܒܩܘܫܬܐ ܡܫܘܕܥ ܠܗ ܡܠܬܐ ܠܐܒܐ. ܘܠܐ ܕܢܚܙܘܗܝ ܚܬܝܬܐܝܬ ܡܨܼܐ. ܐܦܠܐ ܓܝܪ ܠܐܝܬܘܬܐ ܕܩܢܘܡܗ ܝܿܕܥ ܒܪܐ ܐܝܟ ܕܐܝܬܝܗܿ. ܡܛܠܬܢ ܓܝܪ ܥܒܼܝܕ. ܐܝܟܢܐ ܕܠܢ ܒܗ ܐܝܟ ܕܒܝܕ ܐܘܪܓܢܢ ܢܒܪܐ ܐܠܗܐ. ܘܠܐ ܡܢ ܟܕܘ ܡܬܩܝܡ ܗܘܐ܇ ܐܠܘ ܠܐ ܕܠܢ ܨܒܼܐ ܗܘܐ ܐܠܗܐ pb. 161 ܕܢܒܪܐ. ܫܐܠ ܐܢܘܢ ܐܢܫ: ܕܐܢ ܗܼܘ ܕܡܨܐ ܡܠܬܐ ܐܠܗܐ ܕܢܫܬܚܠܦ: ܐܝܟ ܕܐܦ ܣܛܢܐ ܐܫܬܚܠܦܼ. ܘܠܐ ܙܥܘ ܠܡܐܡܪ ܕܡܨܐ ܗܘ. ܡܫܬܚܠܦܢܐ ܗܘ ܟܝܢܗܼ ܥܠ ܕܥܒܝܕܐ ܐܝܬܘܗܝ.. ܘܬܘܒ ܐܘܣܦܼ ܘܐܡܼܪ. ܕܐܢ ܐܒܐ ܝܠܼܕ ܠܒܪܐܼ. ܫܘܪܝܐ ܕܗܘܿܝܐ ܐܝܬ ܠܗ ܠܗܿܘ ܕܐܬܝܠܕܼ. ܘܡܢ ܗܕܐ ܝܕܥܐܼ. ܕܐܝܬ ܗܘܼܐ ܐܡܬܝ ܕܠܐ ܐܝܬܘܗܝ ܗܘܐ ܒܪܐ. ܘܡܟܝܠ ܢܩܦܐ ܡܢ ܐܢܢܩܐܼ. ܕܡܢ ܠܐ ܡܕܡ ܢܗܘܐ ܐܝܬ ܠܗ ܩܢܘܡܐ.܀ ܡܩܝ̈ܡܢܝܗܿ ܕܝܢ ܕܗܕܐ ܗܪܣܝܣܼ ܗܠܝܢ ܐܝܬܝܗܘܢ. ܐܪܝܘܣ ܘܐܟܝܠܝܣܼ. ܘܐܝܬܝܠܝܘܣ ܘܩܪܦܘܢܝܣ. ܘܐܚܪܢܐ ܐܪܝܣ. ܘܐܚܪ̈ܢܐ ܣܓܝ̈ܐܐ ܥܡ ܐܘܒܝܣ ܕܢܝܩܡܘܕܝܐܼ. ܘܬܐܓܢܝܘܣ ܕܢܩܝܐ.܀ ܐܩܪܒ ܕܝܢ ܠܩܘܒܠܗܿ ܠܘܩܕܡܼ. ܩܕܝܫܐ ܦܓܪܘܣ ܐܦܝܣܩܦܐ ܕܐܠܟܣܢܕܪܝܐܼ. ܘܒܬܪܗܼ ܐܟܝܠܘܣ ܕܝܠܗܿ ܕܐܠܟܣܢܕܪܝܐ. ܘܬܘܒ ܐܠܟܣܢܕܪܘܣܼ ܗܿܘ ܕܒܝ̈ܘܡܘܗܝ ܐܬܟܢܼܫܬܿ ܣܘܢܗܕܣ ܕܢܩܝܐ.܀܀ ܫܢܬ ܫ̈ܬܡܐܐ ܘܚܡܫܥܣܪ̈ܐܼ. ܦܩܼܕ ܡܠܟܐܼ ܕܢܬܥܩܪ̈ܘܢ ܒܝܬ ܦܬܟܪ̈ܐ ܘܢܬܬܒܪܘܢ ܓ̈ܠܝܦܐ.܀܀ ܫܢܬ ܫܬܡ̈ܐܐ ܘܫܒܥܣܪ̈ܐܼ. ܥܒܼܕ ܡܠܟܐ ܩܘܣܛܢܛܝܢܘܣܼ. ܕܢܬܒ̈ܢܝܢ ܥܕ̈ܬܐ ܡܫܡ̈ܗܬܐ. ܕܚܕ ܡܢܗܝܢ ܐܝܬܝܗܿ ܒܕܘܟܬܐ ܕܡܬܩܪܝܐ ܒܠܘܛܐ ܕܡܡܪܐ. ܗܿܘ ܕܬܚܘܬܘܗܝ ܐܒܪܗܡ ܠܡ̈ܠܐܟܐ ܩܒܠ. ܐܝܠܦ ܕܝܢ ܡܿܠܟܐܼ ܕܥܠܿܬܐ ܕܚܦܢܐ ܒܕܘܟܬܐ ܗܿܝ ܣܝܼܡܐ ܗܘܬ. ܘܕܒ̈ܚܐ ܕܚܢ̈ܦܐ ܡܬܩܪܒܝܢ ܗܘܼܘ. .. ܐܚܪܝܬܐ ܕܝܢܼ ܒܒܥܠܒܟ ܦܩܼܕ ܕܬܬܒܢܐܼ. ܡܛܠ ܥܠܼܬܐ ܕܕܐܝܟ ܗܕܐ. ܒܢ̈ܝ ܗܿܝ ܡܕܝܢܬܐܼ. ܡܢܼܘ ܕܝܢ ܗܘܼܐ ܠܗܘܢ ܡܢ ܒܪܫܝܬ ܣܐܡ ܢܡܘܣܐ ܠܝܬ ܠܝ ܠܡܐܡܪܼ . . . . ܕܥܝܕܐ ܕܐܝܟ ܗܢܐ pb. 162 ܢܗܘܐ ܐܝܬ ܠܗܘܢܼ ܕܢ̈ܫܝܗܘܢ ܕܓܘܐ ܢܗܘ̈ܝܢ. ܘܡܛܠ ܗܕܐ ܦܠܓܘܬܐ ܐܝܬ ܗܘܬ ܒܝܢܬܗܘܢ ܥܠ ܗܘܿ ܕܡܬܝܠܕܼ ܕܒܪ ܡܢܼܘ ܐܝܬܘܗܝ. ܕܐܒ̈ܗܐ ܓܝܪ ܘܒܢܝ̈ܐܼ ܐܦܠܐ ܚܕ ܒܘܚܢܐ ܐܝܬܘܗܝ ܗܘܼܐ. ܠܒܢ̈ܬܗܘܢ ܓܝܪ ܒܬܘ̈ܠܬܐ ܠܐܟ̈ܣܢܐ ܥܒܪ̈ܝ ܐܘܪܚܐ ܝܿܗܒܝܢ ܗܘܘ ܕܢܙܢܘܢ ܒܗ̈ܝܢ. ܗܢܐ ܕܝܢ ܥܝܕܐ ܕܡܢ ܒܪܫܝܬ ܠܘܬܗܘܢ ܐܚܝܕ ܗܘܐܼ ܕܢܫܪܘܗܝ ܡܠܟܐ ܐܬܚܦܛ. ܘܒܢܡܘܣܐ ܦܐܝܐܼ ܟܕ ܡܥܠܐ ܠܗܘܢ ܘܠܒܢ̈ܬܗܘܢ ܡܢ ܙܠܝܠܘܬܐܼ. ܕܢܫܬܕܥܘܢ ܫܪܒܬܗܘܢ ܥܒܼܕ ܐܢܘܢ. ܘܟܕ ܒܢܐ ܥܕܬܐ ܘܦܩܕ ܕܢܣܬܝܡ ܬܡܢ ܐܦܝܣܩܦܐ ܘܩܠܝܪܝܩܘ ܕܟܗ̈ܢܐ. ܒܦܘܪܣܐ ܕܐܝܟ ܗܢܐܼ. ܠܒܝ̈ܫܬܐ ܕܒܥܠܒܟ. ܝܬܝܪܐܝܬ ܕܢܙܥܙ̈ܢ ܥܒܪܕ.܀ ܒܗ ܕܝܢ ܒܙܒܢܐ ܗܢܐܿ. ܟܕ ܣܬܪ ܢܘܣܐ ܕܒܦܘܩܘ ܕܠܒܢܢ ܐܝܬ ܗܘܐ ܠܐܦܪܘܕܝܛܐ. ܦܬܘܪ̈ܐ ܙܦܪ̈ܐ ܕܠܚܡܐ ܕܗܘܝܢ ܗܘܘ ܬܡܢ ܦܣܼܩ. ܗܠܝܢ ܕܡܬܩܪܝܢ ܗ̈ܠܝܝܠܝܐ.܀܀ ܫܢܬ ܫܬ̈ܡܐܐ ܘܬܡܢܥܣܪ̈ܐܼ. ܗܘܐ ܬܘܠܡܕܐ ܠܥܡܐ ܗܢܕܘܝܐ. ܬܘܒ ܕܝܢ ܥܘܗܕܢܐ ܥܒܿܕܝܢܢ ܘܕܐܝܟܢܐ ܒܙܒܢ̈ܘܗܝ ܕܝܠܗ ܕܡܿܠܟܐܼ. ܟܪܣܛܝܢܘܬܐ ܒܟܠ ܦܢ̈ܝܢ ܣܓܝܐ ܗܘܬ. ܒܗܘܢ ܓܝܪ ܒܙܒ̈ܢܐ ܗܠܝܢ܆ ܐܦ ܥܡ̈ܡܐ ܗܢܕ̈ܘܝܐ ܓܘ̈ܝܐ ܘܕܐܝܒܪ̈ܝܐ ܫܪܝܪܐܝܬ ܠܟܪܣܛܝܢܘܬܐ ܐܬܘ. ܡܛܠ ܡܢܐ ܗܿܝ ܕܓܘ̈ܝܐܼ. ܒܡܠܬܝ ܐܘܣܿܦܬ. ܒܝܕ ܙܥܘܪ̈ܝܬܐ ܐܡܿܪ ܐܢܐ. ܟܕ ܫ̈ܠܝܚܐ ܒܝܕ ܦܣܐ ܠܒܝܬ ܥܡ̈ܡܐ ܡܪܕܝܬܗܘܢ ܥܒܕܘ ܬܘܡܐ ܫܠܝܚܘܬܐ ܕܠܘܬ ܦܪ̈ܬܘܝܐ ܩܒܠ ܗܘܐ. ܘܡܬܝ ܠܐܪܥܐ ܕܟܘܫ ܐܫܬܕܪ ܗܘܐ. ܠܒܪ ܬܘܠܡܝ ܡܛܬܗ ܗܢܕܘ. ܗܝ ܕܠܗ ܠܟܘܫ ܕܒܝܩܐ. ܗܢܕܘ ܗܟܝܠ ܓܘܝܬܐ ܗܢܕܘ. ܗܝ ܕܠܗ ܠܟܘܫ ܕܒܝܩܐ. ܗܢܕܘ ܗܟܝܠ ܓܘܝܬܐ ܗܝ ܕܕܒܝܩܝܢ ܠܗܿ ܘܥܡܪܢ ܒܗܿ ܥܡ̈ܡܐ ܒܪ̈ܒܪܝܐܿ. ܕܒܠܫ̈ܢܐ ܡܫ̈ܚܠܦܐ ܡܬܚܫܚܝܢ. ܠܗܕܐ ܡܢ ܩܕܡ ܙܒܢ̈ܘܗܝ ܕܩܘܣܛܢܛܝܢܣܼ pb. 163 ܡܠܬܐ ܕܟܪܣܛܝܢܘܬܐ ܒܚܕ ܡܢ ܦܘܪܣܝܢ ܠܐ ܐܢܗܪܬ. ܐܝܕܐ ܕܝܢ ܐܝܬܝܗܿ ܥܠܬܐܼ. ܗܝ ܕܐܦ ܠܗܘܢ ܗܫܐ ܠܟܪܣܛܝܢܘܬܐ ܐܝܬܝܬܼ. ܐܡܿܪܐܢܐ ܐܦ ܠܗܿ. ܡܪܘܦܝܣ ܐܢܫ ܦܝܠܘܣܦܐ ܐܝܬܘܗܝ. ܒܓܢܣܗ ܡܢ ܨܘܪ: ܫܩܠ ܛܥܢܐ ܗܘܐ ܠܗ ܕܢܚܙܝܗܿ ܠܗܕܐ ܗܢـ[ـܕܘ] ܘܢܫܬܥܐ ܥܠܝܗܿ. ܟܕ ܛܐܿܢ ܐܦ ܗܼܘ ܒܡܛܪܝܕܘܪܘܣ ܦܝܠܣܦܐ. ܗܘܿ ܕܡܢ ܩܕܡܘܗܝ. ܗܕܐ ܥܒܼܕ ܗܘܐ. ܘܕܒܪ ܠܗ ܬܪ̈ܝܢ ܡܢ ܛܠܝ̈ܐ ܒܢ̈ܝ ܓܢܣܗ. ܐܝܠܝܢ ܕܐܦ ܗܢܘܢ ܒܡܠܝܠܘܬܐ ܕܝܘܢ̈ܝܐ ܪܕܝܢ ܗܘܘ. ܘܥܡܗܘܢ ܠܗܢܕܘ ܐܙܠ. ܘܡܢ ܒܬܪ ܕܐܬܟܪܟ ܒܟܠܗܿ ܘܗܘܐ ܚܙܝܐ ܕܟܠܗܿ. ܐܝܟ ܨܒܝܢܗ. ܡܛܠ ܣܢܝܩܘܬܐ ܕܣܝܒܪܬܐܼ. ܐܚܝܪ ܐܠܦܗ ܠܕܘܟܬܐ ܚܕܐ ܕܐܝܬ ܒܗܿ ܠܡܐܢܐ. ܓܕܫ ܓܝܪ ܕܩܠܝܠ ܙܒܢܐ ܢܫܬܪܐ ܩܝܡܐ ܕܫܝܢܐ ܕܐܝܬ ܗܘܐ ܒܝܬ ܪ̈ܗܘܡܝܐ ܠܗܢ̈ܕܘܝܐ. ܘܐܚܕ ܐܢܘܢ ܗܢܕ̈ܘܝܐ ܠܦܝܠܘܣܦܐ ܗܿܘ. ܘܠܐܝܠܝܢ ܕܥܡܗ ܪܕܝܢ ܗܘܘ ܒܐܠܦܐܼ. ܘܣܛܪ ܡܢ ܗܠܝܢ ܬܪ̈ܝܢ ܛܠܝ̈ܢ ܟܠܗܘܢ ܩܛܠܘ. ܠܗܘܢ ܕܝܢ ܠܛܠܝ̈ܐ ܐܚܕܘ ܐܢܘܢܼ ܒܗܝ ܕܚܣܘ ܥܠ ܚܙܬܗܘܢ. ܘܩܪܒܘ ܐܢܘܢ ܐܝܩܪܐ ܠܡܠܟܐ ܕܗܢܕܘ. ܗܼܘ ܕܝܢ ܡܠܟܐ ܟܕ ܚܕܝ ܒܚܙܬܗܘܢ ܕܛ̈ܠܝܐ ܘܐܪܓܫ ܒܝܕܥܬܗܘܢܼ ܠܚܕ ܡܢܗܘܢ ܕܫܡܗ ܗܘܐ ܐܕܣܝܣ. ܫܩܝܐ ܕܦܬܘܪܗ ܥܒܕܗ. ܠܗܿܘ ܐܚܪܢܐ ܕܫܡܗ ܦܪܡܘܛܝܣܼ ܟܠܛܘܩܪܐ ܕܒܝܬ ܡܠܟܘܬܐ ܐܩܝܡܗ. ܒܬܪ ܕܝܢ ܩܠܝܠܼ ܟܕ ܩܪܒ ܗܘ ܡܠܟܐ ܠܡܡܠܬ. ܥܠ ܒܪܐ ܓܝܪ ܙܥܘܪܐ ܘܐܢܬܬܐ ܠܣܘܥܪ̈[ܢܐ ܕܡܠܟܘܬܐ] ܫܒܩ. ܗܝ ܕܝܢ ܐܢܬܬܐ ܕܡܠܟܐܼ ܥܠ ܒܪܗ ܗܿܘ ܙܥܘܪ ܩܘܡܬܐ ܕܐ[ܝܬ ܠܗܿ] ܒܥܬܿ ܡܢܗܘܢ ܕܢܨܦܘܢ ܕܝܠܗܼ. ܥܕܡܐ ܕܢܐܬܐ ܠܩܘܡܬܐ ܕܓܒܪܐ.. ܘܟܕ ܐܬܬܦܝܣܘ ܠܗܿ ܗܢܘܢ ܛܠܝ̈ܐܼ. ܡܢ ܟܕܘ ܦܘܪܢܣܐ ܕܣܘܥܪ̈ܢܘܗܝ ܕܡܠܟܐ ܩܒܠ pb. 164 ܥܠܝܗܘܢ. ܐܝܬܘܗܝ ܕܝܢ ܗܿܘ ܕܟܠܡܕܡ ܡܦܪܢܣ ܗܘܐ ܦܪܡܘܢܛܝܣ. ܫܩܠ ܛܥܢܐ ܕܝܢ ܐܝܬ ܗܘܐ ܠܗܘܢܼ ܕܢܥܩܒܘܢ ܐܦ ܥܠ ܬܓܪ̈ܐ ܐܝܠܝܢ ܕܠܟܘܪܐ ܗܿܘ ܨܿܝܒܝܢ. ܕܟܕ ܢܫܟܚܘܢ ܐܢܫ ܕܐܝܬܘܗܝ ܟܪܣܛܝܢܐ ܢܦܓܥܘܢ ܒܗ. ܟܕ ܕܝܢ ܐܫܟܚܘ ܘܝܠܦ ܡܢܗܘܢ ܥܠ ܐܝܠܝܢ ܕܠܘܬܗܘܢ ܐܣܬܥܪܘ. ܡܟܝܠ ܡܦܣܝܢ ܗܘܘ ܕܒܕ̈ܘܟܝܬܐ ܕܫܠܝܐ ܢܫܬܒܩܘܢ ܠܡܥܡܪ. ܐܝܟܢܐ ܕܒܗܝܢ ܨܠܘܬܐ ܕܟܪܣܛܝܢܘܬܐ ܢܫܡܠܘܢ. ܡܢ ܒܬܪ ܕܝܢ ܙܒܢܐ ܩܠܝܠܼ ܐܦ ܗܝܟܠܐ ܒܢܘ. [ܘܬܠܡܕܘ ܠܐܢܫـ]ܝ̈ܢ ܡܢ ܗܢ̈ܕܘܝܐܼ. ܘܥܒܕ ܐܢܘܢ ܕܥܡܗܘܢ ܒܨ̈ܠܘܬܐ ܢܗܘܘܢ ܡܬܟܢܫܝܢ. ܘܡܢ ܒܬܪ ܕܛܠܝܐ ܗܿܘ ܒܪܗ ܕܡܠܟܐ ܠܩܘܡܬܐ ܡܫܠܡܢܝܬܐ ܐܬܼܐܼ. ܦܪܡܘܛܝܣ ܘܚܒܪܗ ܐܫܠܡ ܠܗ ܡܪ̈ܗܛܐ: ܗܠܝܢ ܕܫܦܝܪ ܡܢܗܘܢ ܐܬܦܪܢܣ. ܘܫܐܠܝܢ ܗܘܘ ܡܢܗ ܕܢܦܢܘܢ ܡܢ ܟܕܘ ܠܐܬܪܝܗܘܢ. ܘܡܠܟܐ ܘܐܡܗ ܕܢܦܫܘܢ ܡܦܝܣܝܢ ܗܘܘ ܠܗܘܢ. ܗܢܘܢ ܕܝܢ ܟܕ ܠܐ ܡܬܛܦܝܣܝܢ ܗܘܘܼ. ܫܒܩ ܐܢܘܢ ܠܨܒܝܢܗܘܢ. ܘܡܟܝܠ ܒܪܚܡܬ ܐܬܪܗܘܢ ܡܢ ܬܡܢ ܡܫܢܝܢ ܗܘܘ. ܐܕܣܝܣ ܗܟܝܠ ܟܕ ܡܬܚܦܛ ܕܢܚܙܐ ܠܐܒ̈ܗܘܗܝ ܘܠܓܢܣܗܼ ܠܨܘܪ ܡܪܕܝܬܗ ܥܒܕ. ܦܪܡܘܢܛܣ ܕܝܢ ܐܬܥܠܠ ܠܐܠܟܣܢܕܪܝܐ ܘܠܐܦܝܣܩܦܐ ܕܬܡܢ ܐܘܕܥ ܥܠ ܟܠܗܝܢ ܐܝܠܝܢ ܕܐܣܬܥܪ ܠܘܬܗܘܢ. ܐܦ ܟܕ ܚܘܝܗ. ܥܠ ܡܙܠܗܘܢ ܕܠܗܢܕܘ܆ ܘܕܐܝܬ ܠܗܘܢ ܣܘܟܝܐ ܠܗܢܕ̈ܘܝܐ ܕܢܩܒܠܘܢ ܟܪܣܛܝܢܘܬܐ. ܘܒܥܿܐ ܗܘܐ ܡܢܗ ܕܢܫܕܪ ܐܦܝܣܩܦܐ ܘܩܠܪ̈ܝܩܘ ܠܬܢ. ܘܠܐ ܢܗܡܐ ܡܢ ܐܢ̈ܫܐ ܕܨܒܝܢ ܘܡܨܝܢ ܠܡܚܐ. ܗܘܿ ܕܝܢ ܐܦܝܣܩܘܦܐ ܟܕ ܐܬܚܫܒ ܗܿܝ ܕܥܕܪܐ ܠܗ ܠܦܪܡܘܛܝܣ ܥܒܼܕ ܕܢܩܒܠ ܥܠܘܗܝ ܐܦܝܣܩܦܘܬܐ ܕܬܡܢ. ܟܕ ܐܡܿܪܼ ܕܠܐ ܡܫܬܟܚ pb. 165 ܠܗܘܢ ܕܝܬܝܪ ܡܢܟ ܐܣܬܥܪܬ ܗܕܐ. ܗܼܘ ܕܝܢ ܦܪܡܢܘܛܝܣܼ ܟܕ ܐܫܬܘܝ ܠܕܪܓܐ ܕܐܦܝܣܩܦܘܬܐܼ. ܠܐܬܪܐ ܕܗܢܕܘ ܦܢܼܐܼ. ܘܟܪܘܙܐ ܕܟܪܣܛܝܢܘܬܐ ܬܡܢ ܗܘܼܐ. ܘܒܢܼܐ ܗܘܼܐ ܐܦ ܗܝ̈ܟܠܐ ܣ̈ܓܝܐܐ. ܘܐܫܬܘܝ ܠܛܝܒܘܬܐ ܐܠܗܝܬܐ. ܐܝܟܢܐ ܕܐܦ ܐܬܘ̈ܬܐ ܣܓܝ̈ܐܬܐ ܢܥܒܕ ܘܕܣ̈ܓܝܐܐ ܥܡ ܢܦܫ̈ܬܐ ܐܦ ܦܓܪ̈ܐ ܡܐܣܐ ܗܘܐ.܀ ܒܗܢܐ ܙܒܢܐ ܡܬܝܕܥ ܗܘܐ ܐܢܛܘܢܝܣ ܝܚܝܕܝܐ. ܘܦܘܠܐ ܕܝܪܝܐ ܩܕܡܝܐ.܀ ܡܬܝܕܥܝܢ ܒܪܗܘܡܐ ܡܬܕܝܥ ܝܘܠܝܘܣ ܦܛܪܝܪܟܐ. ܒܐܢܛܝܟܝܐ ܐܘܣܛܬܝܘܣ ܦܛܪܝܪܟܐ. ܒܩܘܣܛܢܛܝܢܦܘܠܝܣ ܐܣܛܢܩܠܘܣ ܦܛܪܝܪܟܐ. ܒܐܘܪܫܠܡ ܡܬܝܕܥ ܡܟܣܝܡܣ. ܡܬܝܕܥܝܢ ܕܝܢ ܐܦ ܗܘܣܝܣ ܐܦܝܣܩܦܐ ܕܩܘܪܕܒܝܣܼ ܡܕܝܢܬܐ ܕܒܐܛܠܝܐ. ܘܦܦܢܘܛ ܐܦܝܣܩܦܐ ܕܚܕܐ ܡܢ ܡܕ̈ܝܢܬܐ ܕܬܐܒܝܘܣ.܀܀ ܫܢܬ ܫܬܡ̈ܐܐ ܘܬܫܥܣܪ̈ܐܼ. ܡܝܬ ܩܕܝܫܐ ܐܣܛܪܒܝܠܘܣ ܦܛܪܝܪܟܐ ܕܩܘܣܛـ[ـܢـܛـ]ـܝܢܐ ܦܘܠܝܣ. ܘܗܘܼܐ ܚܠܦܘܗܝ ܩܕܝܫܐ ܦܛܪܦܘܠܝܣ.܀܀ ܫܢܬ .ܣܿ. ܘܥܣܪ̈ܝܢ ܘܚܕܐܼ. ܗܘܐ ܙܘܥܐ ܪܒܐܼ. ܘܒܐܬܪ̈ܘܬܐ ܣܓܝ̈ܐܐ ܚܘܒ̈ܠܐ ܪܘܪ̈ܒܐ ܥܒܼܕ.܀܀ ܘܒܫܢܬ ܫܬܡ̈ܐܐ ܘܥܣܪ̈ܝܢ ܘܐܪ̈ܒܥܐܼ. ܗܘܐ ܩܪܒܐ ܒܝܬ ܠܝܩܢܘܣ ܠܕܒܝܬ ܩܘܣܛܢܛܢܣ. ܠܝܩܢܘܣ ܕܝܢ ܗܿܘ ܕܥܡܗ ܡܡܠܟ ܗܘܐܼ. ܟܕ ܒܬܪ̈ܥܝܬܐ ܕܚܢ̈ܦܐ ܐܚܝܕ ܗܘܼܐܼ. ܣܢܐ ܗܘܐ ܠܟܪ̈ܣܛܝܢܐ. ܘܕܢܥܝܪ ܕܝܢ ܥܠܝܗܘܢ ܪܕܘܦܝܐ ܓܠܝܐܼ. ܡܛܠ ܕܚܠܬܐ ܕܡܠܟܐ ܩܘܣܛܢܛܝܢܣ ܟܘܙ ܗܘܐ. ܟܣܝܐܝܬ ܕܝܢ ܥܠ ܣ̈ܓܝܐܐ ܡܥܬܕ ܗܘܐ. ܒܬܪ ܕܝܢ ܙܒܢܐ ܩܠܝܠ ܐܦ ܓܠܝܐܝܬ ܕܢܟܐ ܐܢܘܢ ܡܡܪܚ ܗܘܐ. ܘܡܢ ܟܕܘ ܩܪܒܐ ܒܕܘ̈ܟܝܢ ܕܘܟ̈ܝܢ ܡܥܬܕ ܗܘܐ. ܘܡܛܠ ܕܠܓܡܪ ܠܐ ܛܥܝܐ ܗܘܬܼ ܠܗ pb. 166 ܠܡܠܟܐ ܩܘܣܛܢܛܝܢܘܣ ܕܗܢܝܢ ܗܠܝܢ ܘܐܚܪ̈ܢܝܬܐ ܛܪܘܢܐܝܬ ܣܥܼܪ ܗܘܐ. ܘܡܢ ܗܕܐ ܕܝܢ ܥܠܬܐ ܠܥܩܬܐ ܣܓܝܐܬܐܼ ܘܠܒܥܠܕܒܒܘܬܐ ܕܥܠܘܗܝܼ ܩܘܣܛܢـ ܐܬܙܝܥ. ܘܡܟܝܠ ܒܩܪ̈ܒܐ ܐܝܬܝܗܘܢ ܗܘܘ ܟܠܝܘܡ. ܟܕ ܐܬܦܣܩ ܡܢ ܡܨܥܬܐ ܚܘܒܐ ܗܿܘ ܕܐܣܟܝܡܐ ܕܡܥܛܦ ܗܘܐ. ܘܡܢ ܒܬܪ ܙܒܢܐ ܩܠܝܠܼ. ܕܢܡܚܘܢ ܩܪܒܐ ܥܡ ܚܕܕ̈ܐ ܐܬܬܙܝܥܘ. ܘܟܕ ܬܟ̈ܬܘܫܐ ܣ̈ܓܝܐܐ ܒܝܡܐ ܘܒܝܒܫܐ ܡܢܗܘܢ ܗܘܘ. ܠܚܪܬܐ ܠܘܬ ܟܪܘܣܘܦܠܝܣ ܕܒܝܬܘܢܝܐܼ. ܚܕ ܡܢ ܠܡ̈ܐܢܐ ܐܝܬܝܗܿ ܕܟܠܩܕܘܢܐ: ܐܙܕܟܝ ܘܐܫܠܡ ܢܦܫܗ ܠܝܩܢܣ ܛܪܘܢܐ. ܟܕ ܕܝܢ ܐܚܕܗ ܒܚ̈ܝܐ ܚܣ ܥܠܘܗܝܼ. ܘܡܩܛܠ ܠܐ ܩܛܠܗ. ܕܢܥܡܪ ܒܬܣܠܢܝܩܐ ܕܝܢ ܐܝܟ ܕܒܫܠܝܐ ܦܩܼܕ ܠܗ.܀܀ ܘܒܫܢܬ .ܣܿ. ܘܥܣܪܝܢ ܘܬܪ̈ܬܝܢ܆ ܗܼܘ ܕܝܢ ܛܪܘܢܐܼ. ܟܿܢܫ ܠܗ ܐܢܫ̈ܐ ܒܪܒܪ̈ܝܐܼ. ܘܡܬܦܪܣ ܗܘܐ ܕܡܙܕܟܝܢܘܬܗ ܠܙܟܘܬܐ ܢܦܢܐ. ܘܟܕ ܝܠܦ ܡܠܟܐ ܥܠ ܗܕܐܼ ܕܢܪܡܝܘܗܝ ܫܩܠ ܛܥܢܐ ܗܘܐ ܠܗܼ. ܘܦܩܼܕ ܥܠܘܗܝ ܘܐܬܩܛܠ.܀ ܒܗܢܐ ܕܝܢ ܙܒܢܐ ܡܬܝܕܥ ܡܐܢܝ ܗܪܝܛܝܩܐ. ܘܕܡܢ ܐܝܟܐ ܐܝܬܘܗܝ ܐܡܪܝܢܢ. ܐܠܐ ܒܝܬ ܚ̈ܛܐ ܛܒ̈ܬܐ ܡܥܕܝܢ ܐܦ ܙܝ̈ܙܢܐ ܠܡܥܠܘ. ܚܣܡܐ ܓܝܪ ܠܘܩܒܠ ܫܦܝܪ̈ܬܐ ܪܚܡ ܠܡܟܡܢ. ܢܒܼܥܬܿ ܓܝܪ ܡܢ ܩܕܡ ܩܠܝܠ ܠܙܒ̈ܢܘܗܝ ܕܩܘܣܛܢܛܝܢܣ ܡܢ ܟܪܣܛܝܢܘܬܐ ܫܪܝܪܬܐܼ. ܟܪܣܛܝܢܘܬܐ ܕܡܚܢܦܐ. ܐܝܟ ܡܐ ܕܠܢܒ̈ܝܐܼ ܢܒ̈ܝܐ ܐܚܪ̈ܢܐ ܕܓܠ̈ܐ. ܘܠܫ̈ܠܝܚܐܼ ܫܠܝ̈ܚܐ ܕܟܕܒܘܬܐ ܢܿܩܦܝܢ ܗܘܘ.. ܗܝܕܝܢ ܓܝܪ ܕܚܠܬܐ ܕܦܪܩܘܠܝܣܼ ܗܘ ܕܡܫܬܡܗ ܗܘܐ ܒܝܬ ܝܘܢܝ̈ܐ ܦܝܠܘܣܦܐܼ. ܕܐܝܬܝܗܿ ܟܪܣܛܝܢܘܬܐ ܘܥܠ ܢܦܫܗܿ ܡܚܘܝـ[ـܐ] ܗܘܬ. ܒܝܕ ܡܐܢܝ . . . . . . . . . . . . ܕܫܒ̈ܥܐ ܕܬܫܥܝܬܗ ܒܗܕܐ ܐܦܣ . . . . . . ܢܬܬܐ . . . . . . . . ܗܼܘ ܠܢ. ܟܕ ܠܘ ܡܫܡܠܝܬܐ ܐܝܬܝܗܿ ܬܫܥܝܬܗܼ. ܡܛܠ ܗܕܐ ܡܬܚܙܝܐ pb. 167 ܠܝ ܕܐܠܨܐܼ ܕܗܿܘ ܡܕܡ ܕܡܢ ܠܥܠ ܐܬܒܨܪ ܐܡܠܐ. ܡܬܝܕܥ ܓܝܪ ܕܡܢܼܘ ܗܘ ܡܐܢܝܼ. ܘܕܡܢ ܐܝܟܐ. ܛܝܝܐ ܐܢܫ ܕܫܡܗ ܣܩܘܬܝܢܣܼ. ܐܢܬܬܐ ܐܝܬ ܗܘ[ܬ] ܠـ[ـܗ] ܕܫܒܝܐ ܡܢ ܬܐܒܝܣ ܥܠܝܬܐ. ܘܟܕ ܡܛܠܬܗܿ ܕܗܕܐܼ. ܒܡܨܪܝܢ ܥܡܼܪ ܘܒܝܘܠܦܢܐ ܕܡܨܪ̈ܝܐ ܐܬܪܕܝ: ܕܚܠܬܐ ܕܦܪܩܘܠܝܣ ܦܬܘܓܪܣ ܥܠ ܟܪܣܛܝܢܘܬܐ ܐܥܠ. ܘܐܡܼܪ ܬܪ̈ܝܢ ܟܝ̈ܢܝܢ܆ ܛܒܐ ܘܒܝܫܐ. ܐܝܟܢܐ ܕܐܦ ܒܝܘܠܦܢܗ ܕܦܪܩܘܠܝܣܼ. ܠܒܝܫܐ ܙܡܟܘܬܐ ܡܫܡܗ ܠܗ: ܠܛܒܐ ܕܝܢ ܪܚܡܬܐ. ܠܗܢܐ ܣܩܘܿܬܝܢܣܼ ܬܠܡܝܕܐ ܗܘܐ ܒܘܕܘܣܼ. ܗܼܘ ܕܡܢ ܩܕܝܡ ܛܪܝܒܢܬܘܣ ܡܬܩܪܐ ܗܘܐ. ܘܟܬܒ̈ܐ ܐܝܠܝܢ ܡܢ ܐܬܣܝܡܼ ܠܗܠܝܢ ܕܡܛܥܐ ܗܘܐ ܒܗܘܢܼ. ܡܫܠܡ ܗܘܐ. ܒܫܡܐ ܕܝܢ ܗܢܘܢ ܕܡܬܐܡܪܝܢ ܡܠܦܝܢ. [ܒـ]ـܕܚܠܬܐ ܕܝܢ ܐܝܬܝܗܘܢ ܕܚܢܦܘܬܐ ܠܐܠܗ̈ܐ ܣܓܝ̈ܐܐ ܡܪܬܐ ܡܐܢܝ ܠܡܕܚܠܼ. ܒܗܿܝ ܕܐܝܬܘܗܝ ܗܘܐ ܗܼܘ ܕܠܐ ܐܠܗ. ܘܫܡܫܐ ܡܠܦ ܕܢܣܬܓܕ. ܘܚܠܩܐ ܡܥܠܠ. ܘܝܘܒܠ ܦܓܪ̈ܐ ܐܡܿܪ. ܘܓܠܝܐܝܬ ܒܬܪ ܕܚܠܬܐ ܕܦܪܩܘܠܝܣ ܘܕܦܘܬܓܪܘܣܼ ܘܕܫܪܟܐ ܕܡܨܪ̈ܝܐ ܐܼܙܠ. ܘܠܡܫܝܚܐ ܕܗܘܐ ܒܦܓܪ ܠܐ ܡܩܒܠ. ܐܠܐ ܐܡܿܪ ܠܗ ܕܒܦܢܛܣܝܐ ܐܬܚܘܝ. ܘܠܢܡܘܣܐ ܘܠܢܒ̈ܝܐ ܛܠܿܡ. ܘܠܢܦܫܗ ܦܪܩܠܝܛܐ ܡܫܡܗ. ܗܠܝܢ ܕܢܘܟܪ̈ܝܢ ܟܠܗܝܢ ܠܥܕܬܐ ܐܪ[ܬܕܘܟܣܘ ܡܝܬܐ.] ܐܦ [ܫܠܝܚܐ ܕܢܫܡܗ] ܢܦܫܗ ܐ[ܡܪܚ. ܐܠܐ ܕܝܠܗܿ ܗܕܐ] ܟܕܒܘܬܐ ܘܪܘܫܥܐܼ ܕܝܢܐ ܐܝܟ ܕܫܘܐ [ܩܒܼܠ. ܒܝܕ ܥܠܬܐ ܕܕܐܝܟ] ܗܕܐ. ܒܪܗ ܕܡܠܟܐ ܕܦܪ̈ܣܝܐ ܒܟܘܪܗܢܐ [ܢܦܝܠ ܗܘܐ . . . .] ܘܐܒܘܗܝܼ ܐܝܟ ܕܠܡܐܡܪ [ܟܠ ܟ̈ܐܦܝܢ ܡܙܝܥ ܗܘܐ] ܕܒܪܗ ܡܢ ܟܘܪܗܢܐ pb. 168 ܗܿܘ ܢܬܚܠܡ. ܘ[ܝܠܼܦ ܥܠ] ܡܐܢܝ. ܘܟܕ ܣܒܿܪ ܗܘܐ ܕܫܪܪܐ ܐܝܬܝܗܝܢ ܐܝܠܝܢ ܕܥܠ ܢܦܫܗ ܡܦܩܩ ܗܘܐ. ܡܫܕܪ ܐܘܝܟ ܕܠܫܠܝܚܐ [ܐܝܬܝ ܠܗ] ܟܕ ܣܿܒܪ ܕܒܐܝ̈ܕܘܗܝ ܡܬܚܠܡ ܒܪܗ. ܗܼܘ ܕܝܢ ܐܙܠ ܘܡܥܛܦ ܐܣܟܝܡܐ ܗܘ ܓܢܝܒܐ ܕܩܢܐ ܗܘܐ. ܡܚܕܗܿ ܐܬܓܥܠ [ܠܗ ܒܪܗ] ܕܡܠܟܐ. ܘܟܕ ܚܙܐ ܡܠܟܐ ܕܡܢ ܟܕܘ ܒܪܗ ܡܝܬ [ܒܐܝܕ̈ܘܗܝܼ.] ܚܒܫܗ ܘܡܛܝܒ ܗܘܐ ܕܡܣܡ ܒܪܝܫܐ [ܢܦܪܘܥ] ܠܗ. ܡܐܢܝ ܕܝܢ ܥܪܩ ܡܢ ܬܡܢܼ ܒܐܝܢܐ ܕܗܼܘ ܦܘܪܣܐ. [ܘܠܒܝܬ] ܢܗܪ̈ܝܢ ܐܫܬܘܙܒ. ܐܠܐ ܐܦ ܗܟܢܐ ܟܕ ܥܩܒ ܡܠـ[ܟܐ] . . . . . . . ܡܢ ܒܝܬ ܢܗܪ̈ܝܢ. [ܘܢܫܛܗܼ] ܘܡܠܝܗܝ ܠܓܠـ[ܕܗ] ܬܒܢܐ [ܘܙ]ܩܦܗ ܩܕܡ ܬܪܥܐ [ܕܡܕܝܢܬܐܼ] ܠܚܙܬܐ [ܕܥܒܘܪ̈ܐ] ܠܬ. . . . ܘܠܫܥܬܐ ܒܝܫܬܐ. ܡܢ [ܐܝܟܐ ܕܦܠܚ] ܐܢܫ ܡܢ ܬܡܢ ܫܩܠ ܐܓܪܗ.܀܀ ܫܢܬ ܫ̈ܬܡܐܐ ܘܬܠ̈ܬܝܢ ܘܫ̈ܬܼ. ܐܬܟܢܫܬܿ ܣܘܢܗܕܣ ܕܢܩܝܐ. ܡܩܝ̈ܡܢܝܗܿ ܕܝܢ [ܕܗܕܐ ܣܘܢܗܕܘ]ܣ ܐܝܬܝܗܘܢ ܗܠܝܢ. ܗܘܣܝܣ ܐܦܝܣܩܘܦܐ [ܕܩܘܪܕܒܝܣ]. ܘܐܠܟܣܢܕܪܣ ܦܛܪܝܪܟܐ ܕܐܠܟܣܢܕܪܝܐ. ܝܘܠܝܘܣ [ܕܪܗܘܡܐܼ. ܒܝܕ ܢܛܪ̈ܝ ܕܘܟܬ]ܗ: ܒܝܛܘܢ ܘܒܝܩܢܛܝܘܣ ܩܫ̈ܝܫܐ. [ܘܦܦܢܘܛ ܕܬܐ]ܒܝܘܣ: ܘܣܦܝܪܝܕܘܢ ܕܩܘܦܪܘܣ.. ܘܝܬܝܪ ܡܢ [ܟܠ ܐܬܝܕܥ ܚܠـ]ـܝܨܐ ܬܡܢ ܐܬܢܣܝܘܣ ܡܫܡܝܢܐ ܕܐܠܟܣܢܕܪܝܐ. [ܘܦܣܩܬܿ ܘܫـ]ـܕܬܿ ܡܢ ܥܕܬܐ ܠܐܪܝܣ pb. 169 ܘܠܟܠܗܘܢ ܐܝܠܝܢ ܕܫܠܡܝܢ ܠܬܪܥܝܬܗ: ܠܐܘܣܒܝܣ ܕܢܩܘܡܕܝܐ. ܘܠܬܐܘܓܢܝܣ ܕܢܩܝܐ. [ܘܠܡܪܝ ܟܠܩܕ]ܘܢܝܐ. ܘܠܐܚܪ̈ܢܐ ܣܓܝ̈ܐܐ ܥܡܗܘܢ.܀܀ ܫܢܬ ܫܬܡ̈ܐܐ [ܘܬܠ̈ܬܝܢ] ܘܫܒ̈ܥܼ. ܡܝܬ ܩܕܝܫܐ ܐܠܟܣܢܕܪܘܣ ܐܦܝܣܩܘܦܐ [ܕܐܠܟܣܢܕܪܝܐ.] ܘܗܘܐ ܚܠܦܘܗܝ ܐܬܢܣܝܘܣ ܡܫܡܢܐ ܕܬܡܢ.܀܀ [ܫܢܬ ܫܬܡ̈ܐܐ] ܘܬܠܬ̈ܝܢ ܘܬܫ̈ܥܼ. ܡܝܬ ܦܛܪܦܘܠܝܣ ܐܦܝܣ ܕܩܘܣܛܢܛܝܢܐ ܦܘܠܝܣ. ܘܗܘܐ ܚܠܦܘܗܝ ܩܕܝܫܐ ܐܠܟܣܢܕܪܘܣ.. ܒܗܢܐ ܙܒܢܐ ܡܬܝܕܥܝܢ ܐܦ ܐܘܣܛܬܝܘܣ [ܕܐܢܛܝܟܝܐ. ܘܡܟـ]ـܣܝܡܣ ܐܦܝܣܩܦܐ ܕܐܘܪܫܠܡ.܀܀ ܫܢܬ [ܫܬܡ̈ܐܐ ܘܐܪ̈]ܒܥܝܢ܆ ܐܬܟܢܫܬܿ ܣܘܢܗܕܘܣ ܒܐܢܛܝܟܝܐ. ܘܫܕܬܿ ܠܐܘܣܛܬܝܘܣ ܕܐܢܛܝܟܝܐ.. ܘܗܘܐ ܒܗܿ ܒܡܕܝܢܬܐ ܪܥܠܐ [ܪܒܐ.] ܐܝܟܢܐ ܕܒܨܝܪ ܩܠܝܠ ܟܠܗܿ ܡܕܝܢܬܐ ܩܪܝܒܐ ܗܘܬ [ܕܬܬܗܦܟ] ܘܬܐܒܕ. ܘܡܢ ܚܪܝܢܐ ܕܐܦܣܩ̈ܦܐܼ ܗܘܐ [ܟܘܪܣܝܐ] ܐܢܛܝܟܝܐ ܕܠܐ ܐܦܣܩܦܐ ܬܡ̈ܢܐ ܫܢ̈ܝܢ ܘܗܝܕܝܢ [ܐܬܬܣܝܡ] ܡܢ ܗܠܝܢ ܕܫܠܡܝܢ ܠܬܪܥܝܬܗ ܕܐܪܝܘܣܼ. ܐܘܦܪܘܢܣ.܀܀ ܫܢܬ ܫܬܡ̈ܐܐ ܘܐܪ̈ܒܥܝܢ ܘܚܕܐܼ. ܗܘܐ ܪܥܠܐ ܕ. . . . . . . . . . . . [ܕܘܟ̈ܝܬܐ] ܣܓܝ̈ܐܬܐ ܐܘܒܕ.܀܀ ܘܒܫܢܬ ܫ̈ܬܡܐܐ ܘܐܪ̈ܒܥܝܢ [ܘܬܠ̈ܬܼ. ܗܘܐ] ܐܝܬܠܗܐ ܐܦܝܣܩܦܐ ܒܐܘܪܗܝ. ܘܗܼܘ ܒܢܐ [ܩܘܡـ]ـܛܪܝܢ ܘܓܒܐ ܡܕܢܚܝܐ ܕܥܕܬܐ.܀܀ ܘܒܫܢܬ ܫܬܡ̈ܐܐ ܘ.ܡ. [ܘܬܪ̈ܬܝܢ܆] ܥܒܼܕ ܩܘܣܛܢܛܝܢܣ ܠܒܢ̈ܘܗܝ ܩܣܪ̈ܣ. ܟܕ [ܩܘܣܛܢܛܝܢܐ] ܒܪܐ ܒܘܟܪܗ ܥܒܕ ܥܠ ܐܬܪ̈ܘܬܐ ܡܕܢ̈ܚܝܐ. ܘܗܼܘ [ܒܢܐ] ܠـ[ܬܠܐ ܕܡܘ]ܙܠܬ ܒܝܬ ܢܗܪ̈ܝܢ. ܘܥܠ ܫܡܗ ܩܘܣܛܢܛܝܢܐ[ܦܘ]ܠܝܣ ܫܡܗܗܿ. ܒܢܼܐ ܬܘܒ ܘܠܐܡܕ ܡܕܝܢܬܐ ܕܒܝܬ [ܢܗܪ̈ܝܢ..] ܘܠܗܿܘ ܕܬܪ̈ܝܢܼ ܐܡܠܟܗ ܥܠ ܐܬܪ̈ܘܬܐ ܡܥܪ̈ܒܝܐܿ. ܕܫܡܗ pb. 170 [ܩـ]ـܘܣܛܢܛܝܘܣ. ܠܗܿܘ ܕܝܢ ܕܬܠܬܐܼ ܕܫܡܗ ܩܣܛܣܼ. ܒܪܗܘܡܐ.܀܀ ܫܢܬ ܫܬܡ̈ܐܐ ܘܐܪ̈ܒـ[ܥܝܢ] . . . . ܒܛܠܘܡܝܐ ܦ. . . . . . ܠܗ ܕ . . . . ܘܡܛܠ ܕܠܐ ܙܿܕܩ ܕܐܝܟ ܒܫܬܩܐ . . . . ܕܒܪ[ܡܙ]ܐ ܘܒܪܓܠܐ ܩܠܝܠܬܐ ܐܡܪ ܐܢܐ ܠܟ ܩܠܝܠ ܥܠܘܗܝ . . . . . ܗܢܐ . . ܣܛܢܐ [ܕܒܟܠܙܒܢ ܡܐܢܐ] ܥܒܼܕ ܠܗ ܗܠܝܢ [ܕ] . . . . ܠܐܒܕܢـ[ܗܘܢ] ܗܠـ[ـܝܢ] . . . . . ܒܗܘܢ ܝܢܗ ܘܣܥܘܪ̈ܢـ[ـܘܗܝ]. ܒܗ ܕܝܢ ܒܙܒܢܐ ܗܢܐܼ ܢܒܼܥ ܒܗܿ ܒܥܕܬܐ ܐܘܣܒܝܣ ܐܦܝܣ ܕܢܝܩܡܘܕܝܐ. ܘܬܐܓܢܝܣ ܐܦܝܣܩܦܐ ܕܢܩܝܐ. ܗܠܝܢ ܕܠܐ ܐܦܝ̈ܣܩܦܐ ܙܿܕܩ ܠܡܩܪܐ ܐܢܘܢܼ. ܐܠܐ ܐܟܠܩܪ̈ܨܐܼ ܐܘܟܝܬ [ܗܘ] ܐܢܛܝܟܪܣܛܘܣ: ܡܛܠ ܣܕ̈ܩܐ ܘܚܪ̈ܝܢܐ ܘܫܓܘ̈ܫܝܐ ܘܒܝ̈ܫܬܐ [ܣܓܝ̈ܐܬܐ] ܕܥܒܕ ܒܥܕܬܐ ܩܕܝܫܬܐ ܘܒܥܡܗ ܕܐܠܗܐ.. ܗܠܝܢ [ܡܛܒ ܕܒܬܪܥܝܬܗ] ܕܐܪܝܘܣ ܢܦܝܠܝܢ ܗܘܘ܆ ܒܝܫ̈ܬܐ ܣܓܝ̈ܐܬܐ [ܐܣܒܠܘܗܝ] ܠܩܕܝܫܐ ܐܬܢܣܝܘܣ ܕܐܠܟܣܢܪܝܐܼ ܘܠܦܘܠܐ ܕܩܘܣܛܢܛܝܢܐ ܦܘܠܝܣ ܥܠ ܕܠܐ ܩܒܠܘܗܝ ܠܐܪܝܣܘ ܪܫܝܥܐ. [ܗܢܘܢ ܥܒـ]ـܕ ܢܟܠܐ ܥܠܘܗܝܼ ܘܩܪܒ ܠܡܠܟܐ: ܕܡܕܡ ܕܝܩܒ ܡܠܟܐܼ ܠܐܣܕܝܦܠܢ ܕܡܣ̈ܟܝܢܐ ܕܐܠܟܣܢܕܪܝܐܼ. ܗܼܘ ܚܼܛܦ ܠܗ.. ܘܬܘܒ ܥܒܕ ܥܠܘܗܝ ܢܟܠܐܼ ܘܩܪܒ ܠܡܠܟܐ ܕܐܡܿܪܝܢ܆ ܕܠܐ ܨܿܒܐ ܕܢܬܠ . . . . ܚ̈ܛܐ ܕܡܬܝܗܒ̈ܢ ܡܢ ܐܠܟܣܢܕܪ̈ܝܐ ܠܕܡܣܝܘܢ. ܘܒܬܪ ܗܢܐ ܬܘܒܼ ܐܡܼܪ. pb. 171 ܕܥܠ ܡܠܟܘܬܐ ܨܿܒܐ ܕܢܬܢܟܠ.. ܘܬܘܒܼ ܐܝܬܝܘܗܿ ܐܝܕܐ ܕܡܝܬܐ ܘܐܡܿܪܝܢ ܕܗܼܘ ܠܒܟ ܠܗ ܘܡـ[ܢܚܫ] ܒܗܿ.܀܀ ܫܢܬ ܫܬܡ̈ܐܐ ܘܐܪ̈ܒܥܝܢ ܘܚ̈ܡܫܐܼ. (ܦܩܕ ܡܠܟܐ) ܕܬܬܟܢܫ ܣܘܢܗܕܘܣ ܕܐܦܝ̈ܣܩܦܐ ܒܛܪܣܣܼ. ܘܬܘܒ ܦܩܕ ܕܡܢ ܬܡܢ ܠܐܘܪܫܠܡ ܚܕܬܐ (ܢܬܟܢܫܘܢܼ) ܘܬܡܢ ܬܡܢ܆ ܘܥܠܬܗ ܕܐܬܢܣܝܘܣ ܢܥܩܒܘܢ ܫܦܝܪ.. ܩܕܝܫܐ ܕܝܢ ܐܬܢܣܝܘܣ ܒܟܠܗܝܢ ܙܟܝܐ ܐܫܬܟܚ. ܒܗܿܝ ܕܚܙܬܗ ܕܐܪܣܝܢܣ ܚܘܝܬ ܘܣܗܕܬܼ. ܐܦ ܐܝ̈ܕܘܗܝ ܬܪ̈ܬܝܗܝܢ ܚܘܝ ܕܠܐ ܐܬܩܛܥ [ܡܢ ܓܘܫܡـ]ـܗ. ܡܛܠ ܕܕܝܠܗ ܐܡܿܪܝܢ ܗܘܘ ܕܐܝܬܝܗܿ ܐܝܕܐ. ܐܠܗܐ ܕܝܢ ܐܦ [ܟܕ ܠܐ ܨܒܐ] ܨܝܒܗ ܐܦ ܠܗ ܠܐܪܣܢܝܣ ܠܣܘܢܗܕܣ. ܒܝܕ ܗܿܝ ܕܪ[ܚܡ ܕܗܘܼ] ܒܥܝ̈ܢܘܗܝ ܢܗܘܐ ܚܙܝܐ ܠܢܟܠܐ ܗܿܘ ܕܪܟܒ.܀܀ ܫܢܬ ܫܬܡ̈ܐܐ ܘܐܪ̈ܒܥܝܢ ܘܐܪ̈ܒܥܼ. ܐܬܒܢܝܬܿ ܐܘܪܫܠܡ ܚܕܬܐ. ܡܢ ܗܠܝܢ ܡܠܟܬܐܼ. ܐܢܬܬܗ ܕܩܘܣܛܢܛܝܣܼ ܘܐܦ ܐܡܗ ܕܩܘܣܛܢܛܝܢܘܣ ܪܒܐ.܀܀ ܫܢܬ ܫܬܡ̈ܐܐ ܘܐܪ̈ܒܥܝܢ ܘܫ̈ܬ. ܐܫܬܕܝ ܩܕܝܫܐ ܐܬܢܣܝܘܣ ܠܐܟܣܘܕܝܐ. ܠܘ ܥܠ ܐܦ̈ܝ ܗܝܡܢܘܬܐܼ. ܐܠܐ ܒܝܕ ܢܟܠܐ ܕܐܦܣܩ̈ܦܐ ܕܥܒܕ ܥܠܘܗܝ ܥܠ ܕܠܐ [ܩܒܠ] ܠܐܪܝܣ.

ܟܢ̈ܫܢ ܟܠܗܝܢ ܫܢ̈ܝܐ ܡܢ ܫܢܬ .ܝܗ. ܕܛܒܪܝܘܣ ܘܕܢـ[ܚܗ] ܕܦܪܘܩܢܼ ܥܕܡܐ ܠܫܢܬ ܥܣܪ̈ܝܢ ܘܬܡ̈ܢܐ ܕܩܘܣܛܢܛܝܢܣ ܡܠܟܐܼ. ܫܢ̈ܝܐ ܫ̈ܬܡܐ ܘ.ܡ. ܘܫ̈ܬ.܀ ܘܡܢ ܫܢܬ ܪ̈ܬܝܢ ܕܕܪܝܘܣܼ ܕܒܗܿ ܐܬܚܕܬ ܗܝܟܠܐ ܕܒܐܘܪܫܠܡܼ. pb. 172 ܫܢ̈ܝܐ ܬܡܢ̈ܡܐܐ ܘܚܡ̈ܫܢ ܘܚ̈ܡܫ.܀ ܡܢ ܫܠܝܡܘܢ ܘܒܢܝܢܐ ܩܕܡܝܐ [ܕܗܝܟܠܐ ܕܒܐܘܪܫܠܡ ܫܢ̈ܝܐ ܐܠܦܐ ܘܬܠܬܡ̈ܐܐ] ܘܫܬ̈ܝܢ ܘܫܒ̈ܥ.܀ [ܡܢ ܡܘܫـ]ـܐ ܘܡܠܟܐ ܩܕܡܝܐ ܕܐܬܢ̈ܝܐ ܩܩܪܘܦܣܼ. [ܫܢ̈ܝܐ] ܐܠܦܐ ܘܬܡ̈ܢܡܐܐ ܘܐܪ̈ܒܥܝܢ ܘܚ̈ܡܫ.܀ ܡܢ ܐܒܪܗܡ ܘܡܠܟܘܬܐ ܕܢܝܢܘܣ ܘܕܫܡܝܪܡܼ. (ܫܢ̈ܝܐ) ܬܪܝܢ ܐܠܦܝܢ ܘܬܠܬܡ̈ܐܐ ܘܚ̈ܡܫܝܢ. ܡܢ ܛܘܦܢܐ ܥܕܡܐ ܠܐܒܪܗܡܼ. ܫܢ̈ܝܐ ܬܫ̈ܥܡܐܐ ܘܐܪ̈ܒܥܝܢ ܘܬܪ̈ܬܝܢ.܀ ܡܢ ܐܕܡ ܘܥܕܡܐ ܠܛܘܦܢܐܼ. ܬܪ̈ܝܢ ܐܠܦ̈ܝܢ ܘܡ̈ܬܝܢ ܘܐܪ̈ܒܥܝܢ ܘܬܪ̈ܬܝܢ.܀ ܐܚܕ ܟܠܗ ܙܒܢܐ ܕܫ̈ܝܢܐ ܗܠܝܢ܆ ܚܡ̈ܫܐ ܐܠܦܝܢ ܘܬܠܬ̈ܝܢ ܘܐܪ̈ܒܥ.

ܫܢܬ ܫ̈ܬܡܐܐ ܘܐܪ̈ܒܥܝܢ ܘܫ̈ܬܼ. ܐܬܩܒܠ ܐܪܝܘܣ ܒܥܕܬܐܼ. ܘܦܩܼܕ ܡܠܟܐ ܠܐܠܟܣܢܕܪܘܣ ܕܩܘܣܛܢܛܝܢܐ ܦܘܠܝܣ ܕܢܩܒܠܝܘܗܝ ܒܫܘܬܦܘܬܐ. ܘܐܦܼ ܗܼܘ ܪܫܝܥܐ ܐܘܣܒܝܣ ܕܚܩܡܕܝܐ ܓܙܡ ܥܠܘܗܝܼ. ܕܐܢ ܠܐ ܡܩܒܠ ܠܗ ܠܐܪܝܣܼ ܢܥܒܕ ܩܛܪܣܝܣ ܕܝܠܗ. [ܗܼܘ ܕܝܢ] ܩܕܝܫܐܼ ܠܘܬ ܡܕܒܚܐ ܩܕܝܫܐ ܪܗܛܼ. ܘܬܚܝܬ ܦܬܘܪܐ ܩܕܝܫܐ ܥܠ ܐܦ̈ܘܗܝ ܫܛܚ ܢܦܫܗ. ܘܗܟܢܐ ܐܡܿܪ ܗܘܐ ܒܠܘܬܗ: ܕܐܢ ܗܼܘ ܕܥܬܝܕܐ ܕܬܫܬܪܪ ܗܝܡܢܘܬܗ ܕܐܪܝܣܼ. ܗܼܘ ܠܝܘܡܐ ܗܿܘ ܕܦܪܝܫ ܠܒܥܬܐܼ. ܐܦܠܐ ܢܡܛܐ ܐܦܠܐ ܢܚܙܐ. ܐܢ ܕܝܢ ܗܝܡܢܘܬܐ ܗܝ ܕܗܘܼ ܐܚܝܕ ܒܗܿ ܐܝܬܝܗܿ ܫܪܝܪܬܐܼ. ܐܪܝܘܣ ܥܓܠ ܢܬܠ ܕܝܢܐ ܕܪܘܫܥܗܼ ܗܼܘ ܕܐܝܬܘܗܝ ܗܘܐܥܠܬܐ ܕܒܝܫܬܐ ܟܠܗܿ.. ܐܪܝܘܣ ܕܝܢ ܨܒܐ ܕܢܛܥܐ ܒܥܕܬܐ ܐܦ ܒܡܠܟܐܼ. ܟܬܿܒ ܐܝܟ ܡܢ ܕܡܗܝܡܢ ܒܟܪܛܝܣܐ ܘܠܗ ܠܗܢܐ ܬܚܝܬ ܫܚܬܗ pb. 173 ܛܥܝܢ ܗܘܐ ܘܥܒܕ ܡܘܡܬܐ ܠܡܠܟܐ ܟܕ ܐܡܼܪ ܕܒܫܪܪܐ ܗܟܢܐ ܡܬܪܥܐ ܐܢܐܼ. ܐܝܟ ܡܐ ܕܟܬܝܒ. ܟܕ ܠܗܝܡܢܘܬܐ [ܕܪܫܝܡ] ܒܟܪܛܝܣܐ ܐܚܪܢܐ ܐܘܫܛ ܠܡܠܟܐ. ܝܘܡܐ ܕܝܢ ܫܒܬܐ ܗܼܘܐ. ܘܦܩܕ ܡܠܟܐ ܕܢܬܩܒܠ ܠܫܘܬܦܘܬܐ. ܟܕ ܓܝܪ ܢܦܩ [ܕܢܐܙܠ ܠܘܬ ܐܠܟܣܢܕܪܘܣ . . . . . . .] ܠܐܘܣܒܝܣ ܒܐܝܩܪܐ ܕ. . . . . ܐܙܕܝܚ ܗܘ . . . . . ܕܡܕܝܢܬܐ. ܟܕ ܩܪܒ ܠܫܘܩܐ ܕܡܬܩܪܐ ܦܘܪܣ ܕܩܘܣܛܢܛܝܢܐ܆ ܐܝܟܐ ܕܐܣܛܘܢܐ ܕܡܬܩܪܐ ܕܐܪܓܘܢܐܼ. ܡܢ ܫܠܝ ܕܚܠܬܐ ܡܕܡ ܕܡܢ ܬܐܪܬܗ ܐܚܕܐ ܠܗ ܠܐܪܝܣ. ܘܥܡܗܿ ܕܕܚܠܬܐ ܐܦ ܪܘܦܝܐ ܘܫܪܝܐ ܕܚܟܪܣܐ. ܟܕ ܕܝܢ ܥܩܒ ܥܠ ܒܝܬ ܐܝܩܪܐܼ. ܘܝܠܦ ܕܐܝܟܐ ܫܟܝܚ: ܡܚܕܗ ܒܣܬܪ ܦܘܪܣ ܠܚܫܚܬܐ [ܕܟܪܣܗ ܐܙܠܼ]. ܘܒܪ ܫܥܬܗ ܟܪܝܬ ܪܘܚܐ ܣܓܝܐܬܐ ܫܩܼܠܬܗܼ. ܘܥܡܗ ܕܬܒܬܗ ܐܦ ܕܡܐ ܣܓܝܐܐ ܢܦܼܩ. ܘܡܢ ܒܬܪ ܗܕܐܼ ܢܦܩܼܬܿ ܐܦ ܡܪܕܝܬܐ ܕܩܘܛܥ ܡܥ̈ܝܐ. ܘܥܡ ܗܠܝܢ ܐܦ ܫܪܝܐ ܕܛܚܠܗ ܘܕܟܒܕܗ. ܘܗܟܢܐ ܡܚܕܗ ܡܝܬ. ܗܼܘ ܕܝܢ ܒܝܬ ܐܝܩܪܐ ܥܕܡܐ ܠܗܫܐ ܐܝܬܘܗܝ ܗܘܐ ܒܩܘܣܛܢܛܝܢܦܘܠܝܣ ܒܐܣܛܘܐ ܕܡܬܩܪܐ ܕܡܩܠܪ̈ܐܼ. ܘܟܠ ܕܡܛܝܢ ܠܗ ܙܩܦܝܢ ܥܠܘܗܝ ܨܒܥܐ. ܟܕ ܡܙܝܥ ܠܗܘܢ ܥܘܗܕܢܐ ܕܡܘܬܗܼ ܕܗܿܘ ܕܐܝܟ ܗܐ ܗ[ܠܝܢ] ܣܥܼܪܬܿ ܨܠܘܬܗ ܕܐܠܟܣܢܕܘܣ.܀܀ ܫܢܬ ܫܬܡ̈ܐܐ ܘܐܪ̈ܒܥܝܢ ܘܬܫܥܼ. ܡܝܬ ܩܘܣܛܢܛܝܢܣ ܪܒܐ ܘܩܒܠ ܒܢܘ̈ܗܝ ܡܠܟܘܬܗ. ܚܝܐ ܕܝܢ ܫ̈ܬܝܢ ܘܚܡ̈ܫ ܫܢ̈ܝܢ. ܐܡܠܟ ܕܝܢ ܡܢܗܝܢ ܬܠܬ̈ܝܢ ܘܬ̈ܠܬ pb. 174 ܫܢ̈ܝܢ.܀ ܘܒܗܿ ܒܫܢܬܐ ܗܕܐܼ ܢܦܼܩ ܡܢ ܥܠܡܐ ܗܢܐ ܐܦ ܩܕܝܫܐ ܡܪܝ ܝܥܩܘܒ ܐܦܝܣܩܦܐ ܕܢܨܝܒܝܢ.܀܀ ܫܢܬ ܫܬܡ̈ܐܐ ܘܚ̈ܡܫܝܢ܆ ܐܪܡܝ ܐܘܣܒܝܣ ܕܢܩܡܘܕܝܐ ܫܓܘܫܝܐ ܒܥܕܬܐܼ ܡܛܠ ܗܝܡܢܬܘܗ ܕܐܪܝܘܣ.܀ ܘܒܗܿ ܒܫܢܬܐ ܗܕܐܼ ܗܦܟ ܩܕܝܫܐ ܐܬܢܣܝܣ [ܠܐܠܟܣܢܕܪܝܐ.]܀܀ ܫܢܬ ܫܬܡ̈ܐ ܘܚܡ̈ܫܝܢ ܘܚܕܐܼ. ܡܝܬ ܐܘܣܒܝܣ ܕܩܣܪܝܐ. ܘܗܘܼܐ ܚܠܦܘܗܝ ܐܩܩܣ.܀܀ ܫܢܬ ܫ̈ܬܡܐܐ ܘܚ̈ܡܫܝܢ ܘܬܪ̈ܬܝܢ܆ ܡܝܬ ܩܕܝܫܐ ܐܠܟܣܢܪܕܣ ܕܩܘܣܛܢܛܝܢܦܘܠܝܣ. ܘܥܒܕ ܚܠܦܘܗܝܼ ܗܢܘܢ ܕܢܩܦܝܢ ܠܬܪܥܝܬܗ ܕܐܪܝܣܼ. ܠܡܩܕܘܢܝܣ: [ܘܗܠܝܢ] ܕܢܩܦܝܢ ܠܡܠܬܐ ܕܒܪ ܐܝܬܘܬܐܼ ܠܦܘܠܐ.܀܀ ܫܢܬ ܫ̈ܬܡܐܐ ܘ.ܢܓ.: ܐܬܛܪܕ ܦܘܠܐ ܡܢ ܩܘܣܛܢܛܝܢܦܘܠܝܣ.. ܘܐܝܬܝ ܡܠܟܐ ܠܐܘܣܒܝܣ ܕܢܩܡܘܕܝܐ ܠܬܡܢ.܀܀ ܫܢܬ ܫ̈ܬܡܐܐ ܘܚ̈ܡܫܝܢ ܘܐܪ̈ܒܥܼ. ܟܢܫ ܐܘܣܒܝܣ ܕܢܩܡܘܕܝܐ ܣܘܢܗܕܣ ܒܐܢܛܝܟܝܐ. ܘܣـ[ـܡ ܗܝܡܢܘܬܐ] ܠܒܪ ܡܢ ܗܿܝ ܕܢܩܝܐ. ܘܛܪܕ ܠܐܬܢܣܝܘܣ ܡܢ ܐܠܟܣܢܕܪܝܐܼ. ܘܥܒܼܕ ܚܠܦܘܗܝ ܠܓܪܝܓܪܝܘܣ. ܘܠܗܢܐ ܒܐܝܕܐ ܕܪ̈ܗܘܡܝܐ ܥܕܪ.܀܀ ܫܢܬ ܫ̈ܬܡܐܐ ܘܚ̈ܡܫܝܢ ܘܚܡ̈ܫܼ. ܡܝܬ ܗܼܘ ܐܘܣܒܝܣܘܥܡܐ ܟܠܗ ܠܦܘܠܐ ܥܠ ܟܘܪܣܝܐ ܐܘܬܒ. [ܘܐܪ̈ܝܢܘ] ܐܘܬܒ ܠܡܩܕܘܢܝܣ.܀܀ ܫܢܬܿ ܫܬܡ̈ܐܐ] ܘܫܬܝܢ܆ ܐܬܒܢܝܬܿ ܐܡܕܼ ܘܬܠܐ ܡ̈ܕܝܢܬܐ . . . . . . . . .ـܗ ܩܘܣܛܢܛܝܢܣ ܙܥܘܪܐ.܀܀ ܫܢܬ ܫܬܡ̈ܐܐ ܘܫ̈ܬܝܢ ܘܚܕܐܼ. ܗܘܼܐ ܩܪܒܐ ܒܝܬ ܩܘܣܛܢܛܝܢܣ ܙܥܘܪܐ ܠܩܘܣܛܢܛܝܣ [ܐܚܘܗܝ. ܘܐܬܩܛܠ ܩܘܣܛܢܛܝܢܣܼ. ܘܝܪܬ ܡܠܟܘܬܗ ܩܘܣܛܢܛܝܣ] ܘܩܣܛܣ.܀܀ ܫܢܬ ܫ̈ܬܡܐܐ pb. 175 ܘܫ̈ܬܝܢ ܘܬܪ̈ܬܝܢ܆ ܐܫܬܕܪ ܐܪ[. . . . . ܡܢ ܡܠܟـ]ـܐ ܕܢܦܩ [ܡܢ ܥܕܬܐ ܠܦܘܠܐ]. ܘܩܛܠܘܗܝ ܒܢ̈ܝ ܩܘܣܛܢܛܝܢ.܀܀ ܫܢܬ .ܣܿ. [ܘܫ̈ܬܝܢ ܘܬ̈ܠܬܼ.] ܐܦܩ ܐܪ̈ܝـ[ـܢܘ ܠܓܪܝܓܪ]ܝܘܣ ܡܢ ܐܠܟܣܢܪܕܝܐܼ. [ܘܥܒܼܕ ܚܠܦܘܗܝ ܠܓܝܪܓܝܘܣ.]܀܀ ܫܢܬ ܫ̈ܬܡܐܐ ܘܫ̈ܬܝܢ ܘܐܪ̈ܒܥܼ. ܢܦܩ ܦܘܠܐ ܡܢ ܩܘܣܛܢܛܝܢܘܦܠܝܣܼ. ܘܐܥܠ ܡܠܟܐ ܚܠܦܘܗܝ [ܠܡܩܕ]ܘܢܣ. ܘܟܕ [ܡܥܠܝܢ ܠܗ] ܐܬܩܛܠ ܡܢ ܥܡܐ ܕܡܕܝܢܬ ܬ̈ܠܬܐ ܐܠܦ̈ܝܢ ܘܡ̈ܐܐ ܘܚܡ̈ܫܝܢ ܓܒܪ̈ܝܢ܆܀܀ ܫܢܬ ܫ̈ܬܡܐܐ ܘܫ̈ܬܝܢ ܘܫܒ̈ܥܼ. ܐܬܟܢܼܫܬܿ ܣܘܢܗܕܣ ܗܿܝ ܕܒܣܪܕܩܝܐ. ܘܙܕܩܬܿ ܠܦܘܠܐ ܘܠܐܬܢܣܝܘܣ ܟܘܪ̈ܣܘܬܗܘܢ.܀܀ ܫܢܬ ܫ̈ܬܡܐܐ ܘܫ̈ܬܝܢ ܘܬܡ̈ܢܐܼ. ܢܚܬ ܐܬܢܣܝܘܣ ܠܐܠܟܣܢܪܕܝܐ. ܘܟܕ ܢܚܬ ܟܢܼܫ ܡܟܣܝܡܘܣ ܕܐܘܪܫܠܡ [ܣܘܢܗܕܣܼ. ܘܐܬܚܝܕ]ܘ ܥܡ ܚܕ̈ܕܐ.. ܒܗܢܐ ܕܝܢ ܙܒܢܐ ܡܬܝܕܥ ܐܦܪܝܢ ܡܠܦܢܐ.܀܀ ܘܒܫܢܬ ܫܬܡ̈ܐܐ ܘܫܒ̈ܥܝܢ܆ ܡܪܕ ܒܛܪܢܝܘܢ ܘܡܓܢܝܛܝܣ [ܒܪܗܘܡܐܼ ܘܩܛܠܘܗܝ ܠܩܘܣܛܣ ܡܠܟܐ.]܀ ܘܒܗܿ ܒܫܢܬܐ ܗܕܐܼ. ܢܦܩ ܦܘܠܐ ܘܐܬܢـ[ـܣܝܣ ܡܢ ܟܘܪ̈ܣܘܬ]ܗܘܢܼ. ܦܘܠܐ ܕܝܢ ܟܕ ܡܘܒܠܝܢ ܠܗܼ ܗܢܘܢ ܕܕܒܪܝܢ ܗܘܘ ܠܗܼ ܚܢܩܘ ܒܠܠܝܐ ܒܩܘܩܘܣ ܡܕܝܢܬܐ.. ܐܬܢܣܝܘܣ [ܥܪܩ ܘܐܫܬ]ܘܙܒ. ܐܦ ܠܘܩܝܘܣ ܕܐܕܪܝܢܦܘܠܝܣܼ. ܟܕ ܐܣܝܪ ܒܦܪܙܠܐ ܝܩܝܪܐܼ ܒܝܬ ܐܣܝܪ̈ܐ ܡܝܬ. ܡܩܕܘܢܝܣ ܕܝܢ ܟܕ ܐܚܕ ܥܕܬܐܼ ܒܝ̈ܫܬܐ ܪ̈ܘܪܒܬܐ ܥܒܕܼ. ܘܩ̈ܛܠܐ [ܣܓܝ̈ܐܐ] ܒܗܠܝܢ ܕܡܘܕܝܢ ܒܒܪ ܐܝܬܘܬܐ. [ܐܟܡܐ] ܕܐܦܠܐ ܛܪ̈ܘܢܐ ܣܓܕ̈ܝ ܦܬܟܪ̈ܐ [ܠܐ ܥܒܕܘ.. ܓܝܪܓـ]ـܝܣ ܕܝܢ ܕܐܠܟܣܢܕܪܝܐ ܥܫܢܬܼ ܒܝܫܬܗܼ ܝܬܝܪ ܡܢ ܕܡܩܕܘܢܝܣ. ܡܢ ܒܬܪ ܓܝܪ ܫܒ̈ܥܐ ܝܘ̈ܡܝܢ ܕܥܐܕܐ ܕܦܛܝܪ̈ܐܼ. ܒܬܘ̈ܠܬܐ ܠܒܝܬ pb. 176 ܐܣܝܪ̈ܐ ܡܬܕܒܪ̈ܢ ܗܘ̈ܝ. ܐܦܝܣܩ̈ܦܐ ܕܡܢ ܪ̈ܗܘܡܝܐ ܒܐܣܘܪ̈ܐ ܡܬܬܝܬܝܢ ܗܘܘ. ܒ̈ܬܐ ܕܝܢ ܕܝܬܡ̈ܐ ܘܕܐܪ̈ܡܠܬܐ ܡܬܒܙܙܝܢ ܗܘܘ. ܘܩ̈ܛܠܐ ܣܓܝ̈ܐܐ ܒܟܠܕܘܟ ܗܘܝܢ ܗܘܘ.. ܒܗܢܐ ܝܢ ܙܒܢܐܼ ܩܡ ܦܛܝܢܣ ܐܦܝܣܩܦܐ ܘܣܕܩ ܥܕܬܐܼ. ܘܗܝܡܢܘܬܐ ܗܿܝ ܕܣܒܠܝܘܣ ܘܕܦܘܠܐ ܫܡܝܫܛܝܐ ܚܕܬ. ܘܡܛܠܗܕܐ ܦܩܕ ܡܠܟܐ ܕܬܬܟܢܫ ܣܘܢܗܘܕܣ ܒܣܝܪܝܡܝܘܢ. ܘܗܝܡܢܘܬܐ ܐܚܪܬܐ ܚܕܬ ܟܕ ܐܦܠܐ ܒܗܕܐ ܫܠܡ ܒܚܕ̈ܕܐ. ܘܡܛܠܗܕܐ [ܦܩܕ ܡܠܟـ]ـܐ ܕܒܐܪܝܡܢܘܣ ܢܬܟܢܫܘܢ ܟܠܗܘܢ ܐܦ̈ܝܣܩܦܐ ܕܡܥܪܒܐ.. ܡܕܢ̈ܚܝܐ ܕܝܢ ܐܬܟܢܫ ܒܢܩܡܘܕܝܐ. ܘܗܘܐ ܒܗܿ ܪܥܒܐ ܪܒܐ ܘܢܦܼܠܬܿ ܘܛܡܼܪܬܿ ܠܥܡܘܪ̈ܝܗܿ. ܘܡܛܠ ܗܕܐ ܐܬܟܢܫ ܠܣܠܘܟܝܐ ܕܐܝܣܘܪܝܐ ܘܐܦܠܐ ܗܠܝܢ ܫܠܡ ܠܚܕܕ̈ܐ.܀܀ ܫܢܬ ܫܬܡ̈ܐܐ ܘܫܒ̈ܥܝܢ ܘܚܕܐܼ. ܗܘܐ ܩܪܒܐ ܨܝܕ ܡܘܪܣܘܢ ܒܝܬ ܡܕܓܢܝܛܝܣ ܛܪܘܢܐܼ ܘܠܩܘܣܛܢܛܝܣ ܡܠܟܐ. ܘܐܙܕܟܝ ܡܓܢܝܛܝܣ. ܘܚܝܠܗ ܐܬܚܪܒܼ ܘܗܼܘ ܥܪܩ.܀܀ ܘܒܫܢܬ ܫܬܡ̈ܐܐ ܘܫܒ̈ܥܝܢ ܘܬܪ̈ܬܝܢ܆ ܩܡ ܐܐܛܝܣ ܗܪܛܝܩܐܼ ܘܫܓܫ ܥܕܬܐ. ܘܦܩܕ ܡܠܟܐܼ ܘܐܬܟܼܢܫܬܿ ܣܘܢܗܕܣ ܒܡܝܕܘܠܝܢܐ. ܘܐܬܟܢܫܘ ܠܬܡܢ ܝܬܝܪ ܡܢ ܬܠܡ̈ܐܐ ܐܦܝ̈ܣܩܦܐ. ܘܟܕܐܪܓܫ ܦܘܠܝܢܘܣ ܐܦܝܣܩܘܦܐ ܕܛܒܪܝܘܣ ܕܒܓܠܝܠܐܼ ܘܐܘܣܒܝܘܣ ܕܐܪܩܠܘܢܼ ܘܕܝܘܢܘܣ ܕܐܠܒܐܼ. ܕܨܒܝܢ ܕܢܥܒܕܘܢ ܩܬܪܣܝܣ ܕܐܬܢܣܝܘܣ: ܩܡ ܚܝܠܬܢܐܝܬ ܘܟܠܘܗܝ ܠܟܢܫܐ ܡܢ ܗܕܐ.܀ ܘܒܗܿ ܒܫܢܬܐ ܗܕܐܼ. ܡܝܬ ܐܒܪܗܡܐ ܐܦܝܣـ ܕܐܘܪܗܝ. ܘܐܬܼܐ ܒܪܣܐ ܡܢ ܚܪܢ ܠܐܘܪܗܝ ܒܦܘܩܕܢܐ ܕܡܠܟܐ.܀܀ܫܢܬ ܫܬܡ̈ܐܐ ܘܫܒ̈ܥܝܢ ܘܬ̈ܠܬܼ. ܐܫܬܕܝ ܡܩܕܘܢܝܣ. ܘܗܘܐ ܒܕܘܟܬܗ ܩܕܝܫܐ ܡܠܝܛܣܼ. ܗܼܘ ܕܒܬܪ pb. 177 ܩܠܝܠ ܟܘܪܣܐ [ܕܐܢܛܝܟ] ܩܒܠ.܀ ܘܒܗܿ ܒܫܢܬ ܗܕܐܼ. ܡܝܬ ܩܘܣܛܢܛܝܣ ܡܠܟܐ. ܘܗܘܐ ܚܠܦܘܗܝ ܝܘܠܝܢܘܣ. ܚܝܐ ܕܝܢ ܐܪ̈ܒܥܝܢ ܘܚ̈ܡܫܐ ܫܢ̈ܝܢ. ܐܡܠܟ ܕܝܢ ܡܢܗܝܢ ܬܠܬ̈ܝܢ ܘܬܡ̈ܢܐ ܫܢ̈ܝܢ.܀ ܬܘܒ ܕܝܢ ܒܗ ܒܗܢܐ ܙܒܢܐܼ. ܐܦܘܠܢܪܝܘܣ ܩܡ ܘܣܕܩ ܥܕܬܐܼ. ܘܗܪܣܝܣ ܕܝܠܗ ܚܘܝ. ܘܩܕܡܐܝܬ ܕܝܢ ܐܡܿܪ ܗܘܐܼ. ܕܠܐ ܫܩܠ ܐܠܗܐ ܡܠܬܐ ܢܦܫܐ ܒܡܕܒܪܢܘܬܐ ܕܐܢܫܘܬܐ. ܘܒܬܪܟܝܢ ܐܝܟ ܐܝܠܝܢ ܕܠܗܕܐ ܒܝܕ ܡܬܬܘܝܢܘܬܐ ܐܠܗܐ: ܡܕܥܐ ܕܝܢ ܠܝܬ ܗܘܐ ܠܗܼܿ. ܐܠܐ ܗܼܘ ܡܠܬܐ ܐܠܗܐ ܐܝܬܘܗܝܐ ܗܐ (ܚܠܦ ܡܕܥܐ) ܒܒܪܢܫܐ ܕܐܫܬܩܠ. ܥܠ ܗܕܐ ܕܝܢܼ ܐܡܪܝܢ ܒܠܚܘܕ ܕܦܪܫܝܢ ܡܢܢ ܐܝܠܝܢ ܕܒܟܘܢܝܐ ܗܢܐ ܡܬܩܪܝܢ.. ܠܬܠܝܬܝܘܬܐ ܕܝܢ ܕܒܪ ܐܝܬܘܬܐ ܐܝܬܝܗܿ ܐܡܪܝܢ.܀ ܬܘܒ ܕܝܢ ܐܦ ܡܩܕܘܢܝܣ ܣܕܩ ܥܕܬܐܼ. ܘܐܡܪܚ ܘܐܡܼܪ: ܕܠܪܘܚܐ ܩܕܝܫܐ ܒܡܠܬܐ ܐܠܗܝܬܐ ܕܥܠ ܬܠܝܬܝܘܬܐ ܕܢܪܢܐ ܠܐ ܐܨܛܒܝ.܀ ܐܦ ܐܘܣܛܬܝܘܣ ܕܣܒܣܛܝܐ ܐܡܼܪ ܕܐܢܐ ܐܦ ܠܐ ܐܠܗܐ ܠـ[ـܡܫܡܗ] ܠܪܘܚܐ ܩܕܝܫܐ ܡܡܪܚ ܐܢܐ. ܡܛܠ ܗܕܐ ܥܠܬܐ ܡܬܟܬܫܝܢ ܥܡ ܪܘܚܐ ܩܕܝܫܐܼ. ܩܪܝܢ ܠܗܘܢ. ܗܢܘܢ ܕܡܘܕܝܢ ܒܡܠܬܐ ܕܒܪ ܐܝܬܘܬܐ.܀܀ ܫܢܬ ܫ̈ܬܡܐܐ ܘܫ̈ܒܥܝܢ ܘܐܪ̈ܒܥ܆ ܗܘܐ ܥܠ ܥܕܬܐ ܪܘܕܦܝܐ ܩܫܝܐ ܡܢ ܐܝܕ̈ܝ ܝܘܠܝܢܣ ܪܫܝܥܐ. ܘܐܣܗܕ ܥܡܐ ܣܓܝܐܐ. ܘܡܛܠ ܕܪܕܘܦܝܐ ܗܘܐ [ܡܒܠܒـ]ـܠܐ ܣܓܝ̈ܐܐ ܐܒܕܘ ܒܗ. ܐܘܣܒܝܘܣ ܕܝܢ ܐܦܝܣܩܦܐ ܕܪܗܘܡܐܼ. ܘܟܠܗܘܢ ܪܘܪ̈ܒܢܐ ܕܝܠܗܿ ܩܡ pb. 178 ܚܝܠܬܢܐܝܬ ܒܐܓܘ̈ܢܐ. ܘܫܢܕ̈ܐ ܣܓܝ̈ܐܐ ܣܒܠ ܡܢ ܛܪܘܢܐ. ܐܠܐ ܠܐ ܡܝܬ܀ ܡܟܣܝܡܣ ܕܝܢ ܒܪ ܗܘܦܪܟܐ ܕܩܘܣܛܢܛܝܢܦܘܠܝܣ ܘܬܐܕܪܣ ܡܘܕܝܢܐ ܘܗܠܦܕܝܣ ܪܒ ܚܠܐ ܐܣܗܕ.. ܒܝܬ ܫܡܪ̈ܝܐ ܕܝܢ ܥܡܐ ܣܓܝܐܐ ܕܕܝܪ̈ܝܐ ܕܐܙܠܝܢ ܗܘܘ ܠܨܠܘܬܐ ܐܣܗܕ: ܡܛܠ ܕܢܦܠ ܥܠܝܗܘܢ ܫܡܪ̈ܝܐ ܘܝܗ̈ܘܕܝܐ: ܘܩܛܠ ܐܢܘܢ ܠܟܠܗܘܢ ܒܚܘܛܪ̈ܐ.. ܝܘܠܝܢܣ ܕܝܢ ܡܠܟܐ ܐܠܨ ܐܢܘܢ ܠܝܗܘܕ̈ܝܐ ܕܢܕܒܚܘܢܼ: ܘܕܒܚ. ܘܒܥܘ ܡܢ ܡܠܟܐ ܕܢܬܒܢܐ ܗܝܟܠܐ ܕܝܠܗܘܢ ܕܒܐܘܪܫܠܡ. ܘܦܩܕ ܠܗܘܢ ܕܢܬܒܢܐ. ܘܡܢ ܕܡܣܝܘܢ ܢܬܝܗ̈ܒܢ ܠܗܘܢ ܢ̈ܦܩܬܐ. ܘܡܛܠ ܗܕܐ ܟܠ ܡܕܡ ܩܠܝܠܐܝܬ ܛܝܒ ܗܘܘ. ܟܐ̈ܦܐ ܘܩܝ̈ܣܐ. ܘܠܒ̈ܢܐ ܕܫܓܪ̈ܢ ܘܟܠܫܐ ܚܠܦ ܛܝܢܐ. ܘܐܚܪ̈ܢܝܬܐ ܐܝܠܝܢ ܕܚ̈ܫܚܢ ܠܒܢܝܢܐ.. ܩܕܝܫܐ ܕܝܢ ܩܘܪܠܣ ܐܦܝܣܩܦܐ ܕܐܘܪܫܠܼܡܼ. ܟܕ ܗܠܝܢ ܚܼܙܐ ܐܬܢܒܝ ܘܐܡܪ ܕܙܒܢܐ ܗܘܼ ܕܡܠܬ ܦܪܘܩܢ ܬܣܒ ܫܘܠܡܐ. ܕܟܐܦ ܥܠ ܟܐܦ ܠܐ ܬܫܬܒܩ ܗܪܟܐ. ܗܠܝܢ ܕܝܢ ܩܕܡ ܐܡܪ ܩܕܝܫܐ ܩܘܪܝܠܣ.܀ ܒܠܠܝܐ ܕܝܢ ܗܘܐ ܙܘܥܐ ܪܒܐܼ. ܐܝܟܢܐ ܕܢܣܩܢ ܟܐܦ̈ܐ ܕܫ̈ܐܬܣܘܗܝ ܥܬ̈ܝܩܬܐ ܕܗܝܟܠܐ. ܘܟܠܗܝܢ ܢܙܕܪܩܢ ܒܝܕ ܩܫܝܘܬܐ ܕܝܠܗ ܕܙܘܥܐ. ܘܐܦ ܒ̈ܬܐ ܐܝܠܝܢ ܕܩܪ̈ܒܝܒܝܢ ܗܘܘ ܠܗܿ ܠܕܘܟܬܐ ܐܬܥܩܪܘ. ܘܐܙܼܠ ܛܒܐ ܕܗܘܦܟܝܐ ܗܘ ܒܟܠܗܿ ܐܪܥܐ.. ܘܬܘܒ ܠܝܘܡܐ ܐܚܪܢܐܼ ܢܚܼܬܬܿ ܢܘܪܐ ܡܢ ܫܡܝܐ. ܘܚܒܠܬܿ ܟܠܗ ܥܒܿܕܐ ܕܐܪ̈ܕܝܟܠܐ ܘܕܒܢܝ̈ܐ ܘܕܡ̈ܐܢܝ ܐܡ̈ܢܘܬܐ ܐܚܪ̈ܢܝܬܐ. ܐܝܬ ܗܐܘ ܗܟܝܠ ܠܡܚܙܐ ܕܝܩܕܢ ܡܢ ܫܠܗܒܝܬܐ ܕܢܘܪܐ ܐܪ̈ܙܦܬܐ ܘܟ̈ܠܒܬܐ ܘܦ̈ܠܩܐ ܘܐܟ̈ܣܝܕܐ. ܘܐܝܟ ܕܠܡܐܡܪ ܟܠܗ ܥܒܿܕܐ ܕܡܛܝܒ ܗܘܐ ܠܗܘܢ ܠܒܢܝܢܐ. ܘܟܠܗ ܝܘܡܐ ܝܩܕܐ ܗܘܬ ܒܗܘܢ ܢܘܪܐ ܒܡ̈ܐܢܐ. ܝܗ̈ܘܕܝܐ ܕܝܢ ܒܕܚܠܬܐ ܪܒܬܐ ܗܘ. ܘܟܕ ܠܐܨܒܝܢܼ ܡܘܕܝܢ ܗܘܘ ܕܡܫܝܚܐ ܐܝܬܘܗܝ ܐܠܗܐ. ܠܐ ܕܝܢ ܥܒܕܝܢ ܗܘܘ ܨܒܝܢܗ. ܐܦܠܐ ܬܕܡܘܪܬܐ pb. 179 ܬܠܝܬܝܬܐ ܕܗܘܬ ܒܗܘܢ ܐܝܬܝܬ ܐܢܘܢ ܠܘܬ ܗܝܡܢܘܬܐ. ܒܠܠܝܐ ܕܝܢ ܐܚܪܢܐܼ ܚܬܡ̈ܐ ܕܨܠܝܒܐ ܒܛܘܦܐ ܕܙ̈ܠܝܩܐ ܥܠ ܡܐܢ̈ܝܗܘܢ ܐܬܚܙܝܘ ܕܛܒܝܥܝܢ. ܘܟܕ ܗܘܐ ܐܝܡܡܐ ܘܚܙܘ ܐܬܿܐ ܗܕܐ ܒܥܘܢ ܕܫܝܛܘܢ ܘܡܪܩܘܢܝܗܿ. ܒܟܠ ܦܘܪ̈ܣܝܢ. ܘܠܐ ܐܫܟܚ.. ܝܘܠܝܢܘܣ ܕܝܢ ܚܠܗ ܕܡܠܟܐ ܛܪܘܢܐܼ. ܟܕ ܐܼܙܠ ܠܐܘܪܫܠܡ. ܘܥܼܠ ܠܗܝܟܠܐ ܩܕܝܫܐܼ. ܘܐܦ ܓܫܦ ܒܡ̈ܐܢܐ ܩ̈ܕܝܫܐ ܕܥܕܬܐ ܕܬܡܢ܆ ܡܚܝܗܝ ܡܪܝܐ ܘܪܦܬ ܒܬܘ̈ܠܥܐ ܘܡܝܬ.܀ ܒܗܢܐ ܕܝܢ ܙܒܢܐ ܡܬܝܕܥܝܢ ܪ̈ܥܘܬܐ ܒܥܕܬܐ: ܓܪܓܪܝܘܣ ܣܒܐ ܕܢܙܝܢܙܘ ܥܡ ܒܢ̈ܘܗܝ. ܒܣܠܝܘܣ ܕܩܣܪܝܐ. ܡܪܝܘܣ ܕܟܠܩܕܘܢܐ. ܗܢܐ ܨܥܪ̈ܐ ܪܘܪ̈ܒܐ ܩܪܒ ܠܛܪܘܢܐ. ܘܡܛܠ ܕܣܡܝܐ ܗܘܐ: ܠܐ ܼ ܐܡܼܪ ܠܗܼ. [ܡܐܣܐ ܠܟ ܓܠܝܠܝܐ]. ܐܬܢܣܝܘܣ ܕܐܠܟܣܢܕܪܝܐ. ܡܬܝܕܥ ܕܝܢ ܐܦ ܐܘܣܒܝـ[ܣ ܕܪܗܘܡܐ.] ܘܐܦ ܩܘܪܝܠܣ ܕܐܘܪܫܠܡ. ܘܡܝܛܣ ܕܩܘܣܛܢܛܝܢܦܘܠܝܣ. ܘܦܘܠܝܢܐ ܕܐܢܛܝܟܝܐܼ. ܘܠܘܩܦܪ ܐܦܝܣܩܦܐ ܕܦܪܗܠܝܘܢ ܡܕܝܢܬܐ.. ܡܬܝܕܥ ܕܝܢ ܐܦ ܐܝܠܪܝܘܣܼ ܐܦܝܣܩܦܐ ܕܦܘܩܛܒܘܢ. ܗܢܐ ܒܕܡܘܬ ܥܡܘܕܐ ܚܝܠܬܢܐܼ ܠܟܠܗܘܢ ܐܬܪ̈ܘܬܐ ܕܡܥܪܒܐ ܒܡܠܬܐ ܕܒܪ ܐܝܬܘܬܐ ܡܩܝܡ ܗܘܐ ܘܡܫܪܪ. ܡܬܝܕܥ ܕܝܢ ܐܦ ܘܠܓܝܫ ܕܢܨܒܝܢ. ܘܐܘܣܒܝ ܐܦܝܣܩܦܐ ܕܫܡܝܫܛ. ܘܐܬܢܣܝܘܣ ܐܚܪܢܐ ܕܐܢܩܘܪܐ ܘܐܘܪܢܝܣ ܕܩܢܫܪܝܢ.. ܡܬܝܕܥ ܕܝܢ ܒܗܢܐ ܙܒܢܐ ܬܘܒܼ ܩܕܝܫܐ ܝܘܠܝܢܐ ܣܒܐ.܀܀ ܫܢܬ ܫܬܡ̈ܐܐ ܘܫ̈ܒܥܝܢ ܘܐܪ̈ܒܥܼ. ܢܚܬ ܝܘܠܢܣ ܡܠܟܐ ܠܒܝܬ ܦܪ̈ܣܝܐ. ܘܚܪܒܗܿ ܠܟܠܗܿ ܐܪܥܐ ܕܡܢ ܢܨܒܝܢ ܘܥܕܡܐ ܠܩܛܝܣܦܢ ܕܒܝܬ pb. 180 ܐܪ̈ܡܝܐ. ܘܓܠܝ ܡܢ ܬܡܢ ܥܡܐ ܣܓܝܐܐ. ܘܐܘܬܒ ܐܢܘܢ ܒܛܘܪܐ ܕܣܢܣܘ.. ܘܒܗܿ ܒܫܢܬܐ ܡܝܬ ܒܝܬ ܦܪ̈ܣܝܐ ܒܓܐܪܐ ܕܦܪܚ ܒܐܐܪ. ܘܐܡܠܟ ܒܘܕܬܗ ܝܘܒܝܢܘܣ ܪܒ ܚܝܠܗ. ܘܥܒܕ ܫܝܢܐ ܒܝܬ ܡ̈ܠܟܘܬܐ. ܘܝܗܒ ܠܢܨܒܝܢ ܠܦܪ̈ܣܝܐ. ܘܐܦ ܪܕܘܦܝܐ ܕܒܝܬ ܦܪ̈ܣܐ ܒܛܠ ܒܫܝܢܐ ܕܥܒܕ. ܘܥܕ̈ܬܐ ܟܠܗܝܢ ܐܬܦܬܚܘ. ܘܥܡܐ ܟܠܗ ܕܢܨܒܝܢ ܓܠܝܘ ܠܐܡܕ ܕܒܝܬ ܢܗܪ̈ܝܢ. ܘܒܢܐ ܠܗܘܢ ܫܘܪ̈ܐ ܡܢ ܡܥܪܒܐ ܠܗܿ ܠܡܕܝܢܬܐ.܀܀ ܫܢܬ ܫܬܡ̈ܐܐ ܘܫܒ̈ܥܝܢ ܘܚ̈ܡܫܼ. ܐܬܟܢܫܬ ܣܘܢܗܕܣ ܒܐܢܛܝܟܝܐ. ܘܩܝܡܬܿ ܠܗܝܡܢܘܬܐ ܕܢܩܝܐ.. ܘܒܗܿ ܒܫܢܬܐܼ. ܐܬܟܢܫܬܿ ܒܓܢܓܪܐ. ܘܫܕܘ ܠܡܩܕܘܢܝܣ ܘܠܐܘܣܛܬܝܘܣ ܕܣܒܣܛܝܣ.܀ ܘܒܗܿ ܒܫܢܬܐܼ. ܡܝܬ ܝܘܒܝܢܘܣ ܡܠܟܐ. ܘܐܡܠܟ ܚܠܦܘܗܝ ܘܠܢܛܝܢܘܣ ܒܪܗܘܡܐ. [ܘ]ܘܠܝܣ ܐܚܘܗܝܿ ܒܩܘܣܛܢܛܝܢܐ ܦܘܠܣ. ܘܠܢܛܝܢܘܣ ܕܝܢ ܡܢ ܗܝܡܢܘܬܐ [ܕܒܪ ܐܝܬܘܬܐ ܐܝܬܘܗܝ.] ܘܗܘ ܘܠܝܣ ܐܪܝܢܐ. ܘܐܦ [ܐܩܝܡ ܪܕܘܦܝܐ ܥܠ ܥܕܬܐ. ܘܢܚܬ ܠܐܢܛܝܟܝܐ ܘܩܫܝܐܝܬ ܪܕܦ ܠܟܠܗܘܢ] ܗܢܘܢ ܕܡܘܕܝܢ ܒܡܠܬܐ ܕܒܪ ܐܝܬܘܬܐ.܀ ܘܒܗܿ ܒܫܢܬܐ ܗܕܐܼ ܡܪܕ ܒܩܘܣܛܢܛܝܢܦܘܠܝܣ ܦܪܩܘܦܝܣ.. ܘܒܗܿ ܬܒܘ ܗܘܐ ܙܘܥܐ ܪܒܐܼ ܘܡܕܝ̈ܢܬܐ ܣܓܝ̈ܐܬܐ ܚܒܠ.܀܀ ܫܢܬ ܫܬܡ̈ܐܐ ܘܫܒ̈ܥܝܢ ܘܫ̈ܬܼ. ܥܒܪ ܝܡܐ ܠܬܚܘܡܗ: ܘܗܢܐ ܟܠܗ ܓܪܘܦܝܐ ܥܒܕܼ ܐܝܟܢܐ ܕܐܬܪ̈ܘܬܐ ܕܡܢ ܩܕܝܡ ܝܒܝ̈ܫܐ ܐܝܬܝܗܘܢ ܗܘܘ ܘܡܢ ܐܢ̈ܫܐ ܡܬܕܝܫܝܢ܆ ܐܠܦ̈ܐ ܢܿܪܕܝܢ ܒܗܘܢ. ܡܢ ܐܬܪ̈ܘܬܐ ܕܝܢ ܐܚܪ̈ܢܐ ܙܐܠܗܗܢܐ ܟܠܗ ܐܪܚܩܼ. ܐܝܟܢܐ ܕܝܒܝܫܬܐ ܬܬܚܙܐ.܀܀ ܫܢܬ ܫܬܡ̈ܐܐ ܘܫܒ̈ܥܝܢ ܘܫ̈ܒܥܼ. ܐܬܩܛܠ ܛܪܘܢܐ ܦܪܩܘܦܝـ[ـܣ]. [ܡܠܟܐ ܕܝܢ ܦܩܕ] ܘܥܩܪܗ ܠܫܘܪܐ pb. 181 ܕܟܠܩܕܘܢܐ܆ ܥܠ ܕܩܒܠܬܿ ܠܛܪܘܢܐ ܘܨܥܪܬܼ ܠܡܠܟܐ.܀܀ ܫܢܬ ܫܬܡ̈ܐܐ ܘܫܒ̈ܥܝܢ ܘܬܡ̈ܢܐܼ. ܫܕܝ ܘܠܝܣ ܠܟܠܗܘܢ ܐܦܝ̈ܣܩܦܐ ܕܡܘܕܝܢ ܒܡܠܬܐ ܕܒܪ ܐܝܬܘܬܐܼ ܠܐܟܣܘܪܝܐܼ: ܣܛܪ ܡܢ ܒܣܠܝܣ ܘܓܪܓܪܝܣ ܕܢܙܝܢܙܘ.. ܒܗܢܐ ܙܒܢܐܼ ܐܥܠ ܘܠܝܣ ܡܝ̈ܐ ܠܩܘܣܛܢܛܝܢܘܦܠܝܣ. ܘܥܟܕ ܪܕܘܦܝܐ ܥܠ ܗܢܘܢ ܕܡܘܕܝܢ ܒܪ ܐܝܬܘܬܐ.܀܀ ܫܢܬ ܫ̈ܬܡܐܐ ܘܫܒ̈ܥܝܢ ܘܬܫ̈ܥܼ. ܗܘܐ ܙܘܥܐ ܩܫܝܐ ܒܒܬܘܢܝܐ ܘܐܬܗܼܦܟܬܿ ܒܗ ܢܩܝܐ ܡܕܝܢܬܐ ܒܚܕܥܣܪ ܒܬܫܪܝ ܩܕܝܡ.. ܘܒܗ ܒܙܒܢܐ ܗܢܐ ܗܘܐ ܪܥܠܐ ܐܚܪܢܐ ܒܐܠܝܣܦܘܢܛܼ. ܘܡܕ̈ܝܢܬܐ ܣ̈ܓܝܐܬܐ ܢܦܠ ܒܗ.܀ ܘܒܗܿ ܒܫܢܬܐ ܗܕܐܼ. ܡܝܬ ܩܕܝܫܐ ܝܘܠܝܢܘܣ ܣܒܐ..܀ ܘܬܘܒ ܒܗܿ ܒܫܢܬܐ ܗܕܐ ܡܝܬ ܩܕܝܐ ܐܘܣܒܝܣ ܐܦܝܣܩܦܐ ܘܣܗܕܐ ܕܪܗܘܡܐܼ. ܘܗܘܼܐ ܚܠܦܘܗܝ ܠܝܒܪܝܘܣ.. ܡܬܝܕܥ ܕܝܢ ܐܦ ܐܘܓܪܝܣ ܐܦܝܣܩܦܐ ܕܩܘܣܛܢܛܝܢܐܦܘܠܝܣ. ܘܡܠܝܛܘܣ ܘܐܘܣܛܬܝܘܣ ܕܐܢܛܝܟܝܐ.. ܘܩܘܪܝܠܘܣ ܕܐܘܪܫܠܡ. ܘܐܬܢܣܝܘܣ ܕܐܠܟܣܢܕܪܝܐ.܀ ܒܗܢܐ ܕܝܢ ܙܒܢܐ ܐܢܘܡܝܣ ܣܕܩ ܥܕܬܐ ܟܕ ܐܡܼܪ ܕܐܠܗܐ ܥܠ ܟܝܢܗ ܡܕܡ ܝܬܝܪ ܡܢܢ ܠܐ ܝܿܕܥ. ܘܠܐ ܝܕܝܥܐܼ ܠܗ ܡܿܢ ܝܬܝܪܐܼ ܠܢ ܕܝܢ ܒܨܝܪܐ: ܐܠܐ ܗܿܘ ܡܕܡ ܕܚܢܢ ܝܿܕܥܝܢܢ ܥܠܘܗܝ ܗܼܘ ܝܕܥ. ܘܡܕܡ ܕܐܝܬ ܠܗ ܬܘܒ ܠܗܘ ܗܼܘ ܡܫܟܚ ܒܢ ܕܠܐ ܫܘܚܠܦܐ. ܗܠܝܢ ܗܟܝܠ ܘܐܚܪ̈ܢܝܬܐ ܣܓܝ̈ܐܬܐ ܐܡܼܪ ܐܢܘܡܝܣ.܀ ܒܗ ܕܝܢ ܙܒܢܐ ܐܬܩܫܝ ܪܕܘܦܝܐ ܥܠ ܗܢܘܢ ܕܡܘܕܝܢ ܒܒܪ ܐܝܬܘܬܐܼ ܡܢ ܐܪ̈ܝܢܘ. ܟܕ ܡܨܥܪܝܢ ܠܗܘܢܼ ܘܪܕܦܝܢ ܗܿ[ܢܘܢ] ܘܡܚܝܢ ܠܗܘܢ ܘܪܡܝܢ ܒܝܬ ܐܣܝܪ̈ܐܼ ܘܡܚܣܪܝܢ ܠܗܘܢ ܒܡܪ̈ܗܛܝܗܘܢ. ܘܟܕ ܕܝܢ ܗܠܝܢ ܠܐ ܣܝܒܪ ܐܬܘ ܠܘܬ ܡܠܟܐ ܕܢܒܥܘܢ ܡܢܗ ܫܠܡܐ. ܡܣܒܪܝܢ ܐܦܢ ܩܠܝܠ ܢܬܬܢܝܚܘܢ ܡܢ ܩܛܝܪܐ. ܐܠܐ ܟܕ pb. 182 [ܗܕܐ ܐܬܚܫܒ ܣܓܝ] ܢܦܠܘ ܡܢ ܣܒܪܗܘܢ. ܕܐܣܒܪ ܕܠܘܬ ܓܒܪܐ ܥܘܠܐ ܟܐܢܘܬܐ ܡܫܟܚܝܢ.. ܐܬܓܒܝܘ ܗ[ܟܝܠ ܓܒܪ̈ܐ] ܢܟ̈ܦܐ ܡܢ ܟܗ̈ܢܐ ܕܥܕܬܐ ܒܡܢܝܢܐ ܬܡ̈ܢܝܢ ܕ[ܪ̈ܝܫܝܗܘܢ ܐܝܬܝـ]ـܗܘܢ ܗܘܘ ܗܠܝܢ. ܐܘܪܒܢܘܣ ܘܬܐܕܘܪܣ ܘܡܢܕܡܣ. ܘܐܬܘ ܠܢܩܡܪܝܐ. ܘܩܪܒܘ [ܒܥܘܬܐ ܠܡܠܟܐܼ. ܟܕ ܡܠܦܝܢ] ܠܗ ܩܛܝܪܐ ܘܒܝ̈ܫܬܐ ܕܣܒܠܝܢ [ܗܘܘ. ܡܠܟܐ] ܕܝܢ ܐܬܚܬ ܥܠܝܗܘܢ ܘܦܩܕ [ܠܡܘܕܣܛܐ ܗܘܦܪ]ܟܐ ܡܛܫܝܐܝܬ ܕܢܩܛܠ ܐܢܘܢ ܠܓܒܪ̈ܐ.. ܗܢܐ ܕܝܢ ܟܕ ܩܒܠ ܗܘܐ ܦܘܩܕܢܐܼ. ܣܡ ܐܢܘܢ ܒܐܠܦܐ ܘܐܘܩܕ ܒܗ ܢܘܐܪ. ܘܗܟܢܐ ܐܘܩܕ ܐܢܘܢ ܒـ. . . . . . . . . . . ܀ ܘܒܗ ܒܙܒܢܐܗܢܐ [ܗܘܐ ܟܦܢܐ] ܪܒܐ [ܒܟܠܗܘܢ ܐܬܪ̈ܘܬܐ] ܕܦܪܘܓܝܐ. ܘܡܢ ܐܘܠܨܢܐ ܣܓܝܐܐ ܐܣܬܪܩܬ ܐܪܥܐ ܟܠܗܿ ܘܥܠܼܬ ܠܩܘܣܛܢـ.܀܀ [ܫܢܬ ܫܬ]ܡ̈ܐܐ ܘܬ̈ܡܢܝܢ܆ ܡܝܬ ܩܕܝܫܐ] ܐܬܢܣܝܘܣ ܕܐܠܟܣܢܕܪܝܐ. ܘܗܘܐ ܚܠܦܘܗܝ [ܩܕܝܫܐ ܦܛܪܘܣ.] ܐܬܢܣܝܘܣ ܕܝܢ ܦܪܢܣ ܥܕܬܐ ܐܪ̈ܒܥܝܢ ܘܫ̈ܬ ܫܢ̈ܝܢܼ ܒܩܝܕܢܣ ܪܒܐ.܀܀ [ܫܢܬ ܫܬ]ܡ̈ܐܐ ܘܬܡܢ̈ܝܢ ܘܚܕܐܼ. ܐܬܪܕܦ [ܦܛܪܘܣ ܕܐܠܟܣܢܕܪܝܐ.] ܘܥܡܗ ܟܠܗܘܢ ܥܘܡܪ̈ܐ ܕܒܡܕܒܪܐ. ܘܟܠܗܘܢ ܝܚܝ̈ܕܝܐ ܕܬܡܢ. ܡܢܐܘܙܝܐ ܕܐܢܛܝܟܝܐ. ܘܠܘܩܝܣ ܕܐܠܟܣܢܕܪܝܐ ܐܪ̈ܝܢܘ.܀ ܡܬܝܕܥܝܢ ܕܝܢ ܒܗܢܐ ܙܒܢܐ ܕܝܪ̈ܝܐ ܐܢܛܘܢܝܘܣ. ܐܡܢܝܘܣ. ܦܝܘܪ. ܐܣܕܘܪܣ. ܦܡܒܘ. ܦܛܪܘܣ. ܡܩܪܝܣ ܡܨܪܝܐ. ܘܡܩܪܝܣ ܐܠܟܣܢܕܪܝܐ.. ܗܠܝܢ ܕܝܢ ܬܪ̈ܝܗܘܢ ܐܫܬܕܝܘ ܠܓܙܪܬܐ ܚܕܐ. ܕܐܝܬ ܒܗܿ ܒܢ̈ܝܢܫܐ ܣܓܝ̈ܐܐ ܕܒـ[ـܪ̈ܒܪܝܐ. ܘܐܝܟ ܕܡܢ] ܛܝܒܘܬܐ ܐܠܗܝܬܐ ܠܟܠܗܘܢ ܥܡܪ̈ܝ ܓܙܪܬܐ ܗܿܝ ܠܘܬ ܐܠܗܐ ܐܦܢܝܘ.܀ ܘܒܗܿ ܒܗܕܐ ܫܢܬܐܼ. ܐܬܒܢܝܬ ܒܝܬ ܡܥܡܘܕܝܬܐ ܕܐܘܪܗܝ.܀ ܒܬܪ ܠܝܒܪܝܘܣ pb. 183 ܕܪܗܘܡܐ ܩܒܠ ܛܪܘܢܣ ܕܐܡܣܘܣ. ܘܒܬܪ ܩܘܪܝܠܘܣ ܕܐܘܪܫܠܡ ܩܡ ܝܘܚܢܢ.܀܀ ܫܢܬ ܫܬܡ̈ܐܐ ܘܬܡ̈ܢܝܢ ܘܬ̈ܠܬ. ܡܝܬ ܘܠܛܝܢܘܣ ܡܠܟܐ ܕܪܗܘܡܐ. ܘ. . . . . . . . . . . . . . ܒܪܗ . . . . . . . . . . . . . . . . . . . . . . . ܬܘܐܡܠܟ ܢܠܢܛܝܢܘܣ.܀܀ ܫܢܬ ܫ̈ܬܡܐܐ ܘܬܡ̈ܢܝܢ ܘܐܪ̈ܒܥܼ. ܡܝܬ ܩܕܝܫܐ ܡܪܝ ܐܦܪܝܡ ܡܠܦܢܐ. ܒܬܫܬܥܣܪ ܒܚܙܝܪܢ.܀܀ ܫܢܬ ܫܬܡ̈ܐܐ ܘܬܡ̈ܢܝܢ ܘܫ̈ܬܼ. ܐܚܪܒܘ ܓܘ̈ܬܝܐ (ܠܐܪܥܐ) ܕܪ̈ܗܘܡܝܐ.܀܀ ܫܢܬ ܫܬܡ̈ܐܐ ܘܬܡ̈ܢܝܢ ܘܫܒ̈ܥܼ. ܗܘܼܐ ܩܪܒܐ ܒܝܬ ܛܝ̈ܝܐ ܠܪ̈ܗܘܡܝܐ. ܥܠ ܛܝ̈ܝܐ ܕܝܢ ܡܡܠܟܐ ܗܘܼܬ ܒܗܢܐ ܙܒܢܐ ܡܘܝܢܐ.. ܗܕܐ ܕܝܢ ܡܘܝܐ ܐܡܼܪܬܿ ܕܐܢ ܠܐ ܡܬܝܗܒ ܠܗܿ ܡܘܫܐ ܐܦܝܣܩܦܐܼ ܕܐܝܬܘܗܝ ܗܘܐ ܓܢܣܗ ܡܢ ܓܢܣܐ ܕܛܝ̈ܝܐ: ܕܢܫܠܐ ܩܪܒܐ ܦܘܪܣܐ ܠܐ ܐܝܬ.. ܗܢܐ ܕܝܢ ܡܘܫܐ ܡܫܡܗܐ ܐܝܬܘܗܝ ܗܘܐ ܒܗܝܡܢܘܬܐ ܘܒܐܒܝܠܘܬܐ. ܘܒܚ̈ܝܐ ܢܟ̈ܦܐ ܘܒܐ̈ܬܘܬܐ ܡܨܠܚ ܗܘܐ. ܡܛܠ ܕܒܡܕܒܪܐ ܕܐܝܚ̈ܝܕܝܐ ܐܬܪܒܝ. ܠܗܢܐ ܫܐܼܠܬܿ ܡܘܝܐܼ ܕܢܗܘܐ ܐܦܝܣܩܦܐ ܠܒܢ̈ܝ ܥܡܗ. ܘܗܒܕܐ ܬܢܘܝ ܢܒܛܠ ܩܪܒܐ.. ܪ̈ܒܝ ܚܝܠܐ ܕܝܢ ܕܪ̈ܗܘܡܝܐ ܟܕ ܗܕܐ ܫܡܥܼ ܩܒܠ ܕܥܠ ܗܕܐ ܬܢܘܝ ܢܥܒܕܘܢ ܫܝܢܐ. ܘܦܩܕ ܕܗܕܐ ܒܥܓܠ ܬܗܘܐ. ܡܘܫܐ ܕܝܢ ܟܕ ܐܬܬܚܕ ܐܝܬܝܘܗܝ ܠܐܠܟܣܢܕܪܝܐ ܕܬܡܢ ܢܩܼܒܠ ܣܝܡ ܐܝܕܐ ܡܢ ܠܘܩܝܣ. ܡܘܫܐ . . . . . . . . . . ܟܕ ܐܡܪ [ܕܠܟܗܢـ]̤ܘܬܐ [ܠܐ ܫܘܐ ܐܢܐ.] ܐܢ ܕܝܢ [ܗܕ ܡܥܕܪܐ ܠܨܒܘ̈]ܬܐ ܕܓܘܐ. ܠܐ ܢܣܝܡ ܥܠܝ ܠܘܩܝܣ [ܐܝܕܐ: ܡܛܠ pb. 184 ܕܡܠܝܐ] ܝܡܝܢܗ ܕܡܐ ܣܓܝܐܐ. ܠܘܩܝܣ [ܕܝܢ ܐܡܪ ܕܠܐ ܘܿܠܐ] ܠܡܨܥܪܘܼ. ܐܠܐ ܠܘܩܕܡ ܠܡܠܦ ܡܢܗ ܕܘܓܡܐ ܕܚܠܬܗ.. ܘܡܘܫܐ ܠܘܬ ܗܢܐܐܡܪ ܠܕܐ ܡܬܒܥܝܐ ܡܠܬܐܼ. ܐܠܐ [ܣܘܥܪ̈ܢܝܟ] ܡܟܣܝܢ ܠܟ ܕܥܼܒܕܬ [ܒܡ̈ܗܝܡܢܐ]܇ ܕܕܚܠܬܟ ܠܘ [ܕܟܪܣܛܝܢܐ] ܐܝܬܝܗܿ. ܟܪܣܛܝܢܐ ܓܝܪ ܠܐ ܡܚܐ ܘܠܐ ܡܨܚܐ ܘܠܐ [ܡܬܟܬܫ.] ܠܥܒܕܗ ܓܝܪ [ܕܐܠܗܐ ܠܐ ܙܿܕܩ] ܠܗܼ. ܕܢܬܟܬܫ. ܥܒܼܕ̈ܝܟ ܓܝܪ ܕܝܠܟ ܓܥܝܢܼ ܒܝܕ ܗܠܝܢ [ܕܐܫܬ]ܕܝܘ ܠܐܟܘܪܝܐܼ. ܘܐܬܪܡܝܘ [ܠܚܝܘ̈ܬܐ.] ܘܩܒܠ ܡܘ̈ܬܐ ܡܫܚ̈ܠܦܐ. ܘܪܒܐ ܗܼܝ ܬܚܘܝܬܐ ܕܐܝܠܝܢ ܕܒܥܝ̈ܢܐ ܡܬܚ̈ܙܝܢ܆ ܝܬܝܪ ܡܢ ܐܝܠܝܢ ܕܒܐܕ̈ܢܐ ܡܫ̈ܬܡܥܢ܀ ܘܟܕ ܗܠܝܢ ܥܡ ܣܓܝ̈ܐܬܐ ܐܚܪ̈ܢܝܬܐ ܐܡܼܪ ܡܘܫܐ ܠܘܬ ܠܘܩܝܣܼ. ܐܬܕܒܪ ܡܢ ܩܪ̈ܝܒܘܗܝ ܠܛܘܪܐ: ܕܢܩܒܠ ܣܝܡ ܐܝܕܐ ܡܢ ܗܢܘܢ ܕܒܐܟܣܘܪܝܐ ܐܝܬܝܗܘܢ ܗܘܘ. ܘܗܟܢ ܒܝܕ ܐܦܝܣܩܦܘܬܗ ܕܩܕܝܫܐ ܡܘܫܐܼ ܒܛܠ ܩܪܒܐ ܒܝܗ ܛܝ̈ܝܐ ܠܪ̈ܗܘܡܝܐ. ܘܐܡܠܟ ܫܝܢܐ ܒܝܢܬ ܡ̈ܠܟܘܬܐ.܀܀ ܫܢܬ ܫܬܡ̈ܐܐ ܘܬܡ̈ܢܝܢ ܘܬܡ̈ܢܐܼ.: ܐܬܛܪܕ ܠܘܩܝܣ ܡܢ ܐܠܟܣܢܕܪܝܐܼ. ܘܗܦܟ ܩܕܝܫܐ ܦܛܪܘܣ ܡܢ ܐܟܘܣܪܝܐ ܘܝܼܬܒ ܥܠ ܟܘܪܣܝܗ. ܘܒܬܪ ܩܠܝܠ ܡܝܬ. ܘܗܘܼܐ ܠܚܦܘܗܝ ܩܕܝܫܐ ܛܝܡܬܝܘܣ.܀܀ ܘܫܢܬ ܫܬܡ̈ܐܐ ܘܬܡ̈ܢܝܢ ܘܬܫ̈ܥܼ. [ܐܚܪܒܘ]ܗܿ ܒܪ̈ܒܪܝܐ ܠܐܪܥܐ [ܕܬܪܩܐ. ܘܥܕܡܐ ܠܗܿ] ܠܩܘܣܛܢܛܝܢܦܘܠܣ ܡܛܘ. ܘܢܼܦܩ ܥܠܝܗܘܢ [ܘܠܝܣܼܫ ܘܟܕ ܡܩܪܒ ܥـ[ـܡܗܘܢ ܐܬܩܛܠ] ܡܢܗܘܢ. ܘܐܚܕ [ܡܠܟܘܬܗ] ܓܪܛܝܢܘܣ.. ܘܫܩܠ ܠܗ ܫܘܬܦܐ ܥܡܗ ܒܡܠܟܘܬܐ [ܠܬܐܘܕܘܣܝܘܣ] ܪܒܐ.܀ ܘܒܗܿ ܒܫܢܬܐܼ ܗܦܟܘ ܟܠܗܘܢ ܐܦܝ̈ܣܩܦܐ ܡܢ ܐܟܣܘܪܝܐ: ܘܐܚܕ ܥ̈ܕܬܗܘܢ. ܘܫܩܠ ܐܪܬܕܘܟܣܘ ܥܕܬܐ ܒܐܘܪܗܝ. ܘܗܘܐ ܠܗܘܢ ܐܦܝܣܩܦܐ ܐܘܠܘܓܝܘܣ. pb. 185 ܘܒܢܼܐ ܒܝܬ ܡܪܝ ܕܢܝܐܝܠܼ [ܕܐܬܩܪܝ] ܒܝܬ ܡܪܝ ܕܝܡܝܛ.܀܀ ܫܢܬ ܫ̈ܬܡܐܐ ܘܬܫ̈ܥܝܢ܆ ܢܩܫܘ ܒܪܒܪ̈ܝܐ ܥܠ ܩܘܣܛܢܛܝܢܦܘܠܝܣ. ܘܡܠܟܬܐ ܕܘܡܢܝܩܐ ܝܗܒܼܬܿ ܡܢ ܛܡܝܘܢ ܠܪ̈ܗܘܡܝܐ ܕܗܒܐ ܘܙܝܢܐ. ܘܢܦܩܘ ܥܠܝܗܘܢ ܒܠܠܝܐ ܘܚܪܒܘ ܐܢܘܢ ܘܪܕܦܘ ܐܢܘܢ.. ܘܚܝܠܐ ܣܓܝܐܐ ܕܛܝ̈ܝܐ [ܝܗܼܒܬܿ ܡܘܝܐ] ܠܪ̈ܗܘܡܝܐ ܕܢܥܕܪܘܢ ܐܢܘܢ ܘܥܠ ܠܘܬܗܘܢ.܀܀ ܫܢܬ ܫ̈ܬܡܐܐ ܘܬܫ̈ܥܝܢ ܘܬܪ̈ܬܝܢ܆ ܗܘܐ ܬܘܒ ܩܪܒܐ ܒܝܬ ܪ̈ܗܘܡܝܐ ܘܠܒܪ̈ܒܪܝܐܼ. ܘܐܬܚܪܒܘ ܩܕܡ ܬܐܕܘܣܝܘܣ ܡܠܟܐ.܀܀ ܫܢܬ ܫܬܡ̈ܐܐ ܘܬܫ̈ܥܝܢ ܘܬܠܬ̈ ܠܐܠܟܣܢܕܣܼ. ܐܬܟܼܢܫܬܿ ܒܩܘܣܛܢܛܝܢܦܘܠܣ ܣܘܢܗܕܣ ܕܡ̈ܐܐ ܘܚܡ̈ܫܝܢ. ܘܪ̈ܝܫܝܗܿ ܕܝܢ ܐܝܬܝܗܘܢ ܗܠܝܢ: ܛܝܒܡܐܬܘܣ ܕܐܠܟܣܢܕܪܝܐ. ܡܠܛܣ ܕܐܢܛܝܟܝܐ. ܕܡܣܘܣ ܕܪܗܘܡܐ. ܒܛܘܪ ܕܩܘܣܛܢܛܝܢܦܘܠܝܣ. ܝܘܚܢܢ ܕܐܘܪܫܠܡ. ܡܬܝܕܥܝܢ ܕܝܢ ܒܗܿ ܐܦ̈ܝܣܩܦܐ ܗܠܝܢ܆ ܓܪܝܓܪܝܘܣ ܕܢܙܝܢܙܘ. ܓܪܝܓܪܝܘܣ ܕܢܘܣܐ. [ܐܘܠܘܓܝܘܣ ܕܐܘܪܗܝ.] ܐܠܝܕܣ ܕܩܣܪܝܐ. ܦܐܠܓܝܣ ܕܠܕܩܝܐ. ܕܝܕܪܘܣ [ܕܛܪܣܘܣ. ܐܛܪܝܘܣ] ܕܡܠܝܛܝܢܐ. ܐܡܦܝܠܘܟܝܣ ܕܐܝܩܢܝܘܢ. ܘܐܪܡܝ ܐܝܕ̈ܝܐ . . . . ܘܫܪܪ ܠܗܿ ܠܗܡܢܘܬܐ ܕܢܩܝܐ. ܘܦܠܓ ܗܘܦܪ̈ܟܝܣ ܘܦܛܪ̈ܝܪܟܘ[ܬܐ. ܟܕ ܝܗܒ] ܠܕܡܣܣ ܕܪܗܘܡܐ ܪܝܫܘܬܐ ܕܐ[ܛܠܝܐ] ܘܟܠܗܘܢ ܐܬܪ̈ܘܬܐ ܡܥܪ̈ܒܝܐ [ܘܥ̈ܠܝـ]ـܐ ܕܓܠܠܝܐ ܘܕܐܣܦܢܝܐ ܢܫܬܡܥܘܢ pb. 186 ܠܗ.. ܒܬܪܗ ܝܗܼܒ ܠܢܩܛܘܪ ܕܩܘܣܛܢܛܝܢܦܘܠܝܣ ܘܟܠܗܘܢ ܐܬܪ̈ܘܬܐ ܕܐܣܝܐ ܘܡܕܢܚܐ ܕܝܘ̈ܢܝܐ ܢܫܬܡܥܘܢ ܠܗ.. ܒܬܪ ܗܢܐ ܝܗܒ ܠܛܡܐܬܐܣ ܕܐܠܟܣܢܕܪܝܐܼ. ܘܡܨܪܝܢ ܘܐܓܝܦܛܘܣ ܘܟܠܗܘܢ ܐܬܪ̈ܘܬܐ ܓܘ̈ܝܐܼ ܠܗ ܢܫܬܡܥܘܢ.. ܒܬܪ ܗܢܐ ܕܝܢ [ܝܗܒ] ܠܡܠܝܛܘܣ ܕܐܢܛܝܟܝܐ ܘܦܠܣܛܝܢܐ ܘܓܙܝܪܬܐ ܘܟܠܗܘܢ ܐܬܪ̈ܘܬܐ ܡܕ̈ܢܚܝܐ ܘܬܚ̈ܬܝܐ ܕܒܝܬ ܦܪ̈ܣܝܐܼ ܠܗ ܢܫܬܡܥܘܢ.܀܀ ܫܢܬ ܫܬܡ̈ܐܐ ܘܬܫ̈ܥܝܢ ܘܐܪ̈ܒܥܼ. ܡܝܬ ܩܕܝܫܐ ܡܠܝܛܘܣ ܒܩܘܣ ܦܘܠܝܣ. ܘܐܚܼܬܘ ܠܫܠܕܗ ܠܐܢܛܝܟܝܐ. ܘܗܘܼܐ ܚܠܦܘܗܝ ܦܘܠܝܢܣ.܀ ܘܒܗܿ ܒܫܢܬܐ ܗܕܐܼ. ܐܠܥ ܡܠܟܐ ܓܪ̈ܡܘܗܝ ܕܦܘܠܘܣ ܫܠܝܚܐ ܠܩܘܣܛܢܛܝܢܦܘܠܣ.܀܀ ܫܢܬ ܫ̈ܬܡܐܐ ܘܬܫ̈ܥܝܢ ܘܚܡ̈ܫܼ. ܒܢܐ ܬܝܕܣܝܘܣ ܡܠܟܐ ܠܪܫܥܝܢܐ ܕܒܝܬ ܢܗܪ̈ܝܢ.܀܀ ܫܢܼܬ ܫܬܡ̈ܐܐ ܘܬܫ̈ܥܝܢ ܘܫ̈ܬܼ. ܐܡܠܟ ܐܪܩܕܝܘܣ ܒܪ ܬܝܕܣܝܘܣ ܥܡܐ ܒܘܗܝ.܀܀ ܫܢܬ ܫܬܡ̈ܐܐ ܘܬܫ̈ܥܝܢ ܘܫ̈ܒܥܼ. ܡܝܬ ܩܕܫܝܐ ܛܝܡܬܐܘܣ ܕܐܠܟܣܢܕܪܝܐ. ܘܩܒܠ ܕܘܟܬܗ ܬܐܦܝܠܘܣ.܀ ܘܒܗܿ ܒܫܢܬܐ ܗܕܐܼ. ܡܪܕ ܡܟܣܝܡܘܣ ܛܪܘܢܐ. ܘܩܛܠܗ ܠܓܪܛܝܢܣ ܡܠܟܐ.܀܀ ܘܫܢܬ ܫ̈ܬܡܐܐ ܘܬܫ̈ܥܝܢ ܬܡ̈ܢܐܼ. ܐܩܪܒ ܬܐܕܣܝܘܣ ܡܠܟܐ ܥܡ ܡܟܣܝܡܣ ܛܪܘܢܐܼ ܘܠܗ ܩܛܠ. ܘܚܪܒ ܚܝܠܗ.܀ ܘܒܗܿ ܒܫܬܐܗܕܐܼ. ܡܝܬ ܩܕܝܫܐ ܐܘܠܘܓܝܣ ܐܦܝܣܩܦܐ ܕܐܘܪܗܝ. ܘܩܒܠ ܕܘܟܬܗ ܩܘܪܐ. ܘܗܼܘ ܐܝܬܝ ܠܓܠܘܣܩܡܐ ܕܬܘܡܐ ܫܠܝܚܐ ܠܐܘܪܗܝ.܀܀ ܫܢܬ ܫ̈ܬܡܐܐ ܘܬܫ̈ܥܝܢ ܘܬܫ̈ܥܼ. ܐܬܥܩܪ ܟܠܗܘܢ ܢܘ̈ܣܐ ܕܦܬܟܪ̈ܐ ܡܢ ܐܠܟܣܢܕܪܝܐܼ ܒܦܘܩܕܢܐ ܕܡܠܟܐ ܘܒܝܣܦܝܘܬܐ ܕܬܐܦܝܠܝܘܣ ܦܛܪܝܪܟܐ ܕܬܡܢ.܀ ܘܒܗܿ ܒܫܢܬܐ ܗܕܐ܆ ܗܘܼܐ ܐܘܓܪܝܣ ܦܛܪܝܪܟܐ ܒܐܢܛܝܟܝܐ ܥܡ ܦܠܘܝܢܐ.܀܀ ܘܒܫܢܬ ܫܒ̈ܥܡܐܐܼ. ܐܬܚܝܕܘ ܥܕܬܐ ܕܢܐܘܛܝܢܘ ܠܐܪ̈ܬܕܘܟܣܘ. ܘܐܬܬܪܝܡ ܡܢ ܡܨܥܬܐ ܩܫܝܫܐ ܕܣܝܡ pb. 187 ܗܘܐ ܥܠ ܬܝܒܘܬܐ. ܘܫܒܩ ܕܟܠ ܐܢܫ ܐܝܟ ܕܬܐܪܬܗ ܢܬܩܪܒ ܠܘܬ ܪ̈ܐܙܐ ܐܠܗܗܝܐ.܀܀ ܫܢܬ ܫܒ̈ܥܡܐܐ ܘܚܕܐܼ. ܗܐ ܫܓܘܫܝܐ ܒܥܕܬܐ ܡܛܠ ܦܨܚܐ.܀܀ ܘܒܫܢܬ ܫܒ̈ܥܡܐܐ ܘܬܪ̈ܬܝܢ܆ ܐܡܠܟ ܐܢܘܪܝܘܣ.܀܀ ܫܢܬ ܫܒ̈ܥܡܐܐ ܘܬܠܬܼ̈. ܡܪܕ ܐܘܓܢܝܣ ܛܪܘܢܐ.܀܀ ܘܒܫܢܬ ܫܒ̈ܥܡܐܐ ܘܐܪ̈ܒܥܼ. ܩܛܠܗ ܐܘܓܢܝܘܣ ܛܪܘܢܐ ܠܘܠܢܛܝܢܝܢܣ ܡܠܟܐܼ ܥܠ ܬܫܘܝܬܗ.܀܀ ܫܢܬ ܫܒ̈ܥܡܐܐ ܘܚ̈ܡܫܼ. . . . . . . . . . . ܠܐܘܓܢܝܣ ܒܓܠܠܝܐ. ܡܠܟܐ ܕܝܢ . . ܪܒܐ [ܠܐܠܗܐ ܩـ]ـܪܐ ܠܐܝܠܗ. ܐܠܗܐ ܕܝܢܼ ܗܿܘ ܕܠܐ ܡܗܡܐ [ܡܢ ܨܠܘܬܐ] ܕܕܚ̈ܠܘܗܝܼ. ܐܦܠܐ ܗܪܟܐ ܐܗܡܝ ܡܢ ܨܠܘܬܗ ܕܡܠܟܐ [ܙܕܩܐ. ܐܠܐ] ܟܕ ܣܕܪ ܩܪܒܐܼ. ܪܘܚܐ ܩܫܝܬܐ ܢܫܒܬܿ ܗܘܬܿ ܘܓܐܪ̈ܐ ܕܒܝܬ ܐܘܓܢܝܣ ܥܠܝܗܘܢ ܡܿܗܦܟܐ ܗܘܬܿ. ܘܐܦ ܠܗܠܝܢ ܬܘܒ ܕܒܝܬ ܬܝܕܘܣܝܣ [ܒܚܐܦܐ ܪܒܐ ܥܠܝܗܘܢ] ܡܿܝܬܝܐ ܗܘܬܿ. ܘܗܼܘ ܛܪܘܢܐ ܐܬܩܛܠܼ. ܘܚܝܠܗ ܟܠܗ ܐܒܕ ܒܩܪܒܐ.܀܀ ܫܢܬ ܫܒ̈ܥܡܐܐ ܘܫ̈ܬܼ. ܡܝܬ ܬܝܕܘܣܝܣ ܡܠܟܐ. ܘܐܚܕܘ ܒܢ̈ܘܗܝ ܫܘܠܛܢܗ.܀ ܘܒܗܿ ܒܫܢܬܐ ܗܪܐܼ. ܥܠܘܢ ܗܘ̈ܢܝܐ ܠܐܪܥܐ ܕܒܝܬ ܪ̈ܗܘܡܝܐ. ܘܐܚܪܒܘ ܐܬܪ̈ܘܬܐ ܟܠܗܘܢ ܕܣܘܪܝܐ ܕܒܫ̈ܦܘܠܝ ܛܘܪܐ ܨܗܝܐ. ܗܢܘ ܕܝܢ ܐܪܙܢ ܘܡܝܦܪܩܛ ܘܐܡܕ ܘܗܙܝܛ ܘܫܡܫܝܛ. ܘܟܕ ܥܒܪ ܦܪܬܼ. ܩܛܠ ܓܫܪܐ ܥܠܝܗܘܢ. ܘܐܬܟܢܫ ܚܝܠ̈ܘܬܐ ܕܪ̈ܗܘܡܝܐ ܡܢ ܓܒ̈ܝܢ ܥܠܝܗܘܢ. ܘܚܪܒܘ ܐܢܘܢ. ܘܐܢܫ ܠܐ ܐܫܬܘܙܒ ܡܢܗܘܢ.܀ ܒܗܢܐ ܙܒܢܐ ܐܬܚܒܫܘ ܥܡܐ ܒܚܣܢܐ ܕܙܝܛ. ܟܕ ܡܢܥ ܕܝܢ ܪܘܓܙܐ ܗܢܐ ܠܐܪܥܐ ܕܐܡܕ ܕܚܝܠܐ ܕܗܘܢܝ̈ܐܼ. ܥܪܩ ܥܡܐ ܟܠܗ ܕܐܬܪܐܼ. ܘܥܼܠ ܠܚܣ̈ܢܐ pb. 188 ܕܥܠ ܕܩܠܬ ܢܗܕܐ ܘܠܥ ܕܐܒܐ܇ ܕܡܬܩܪܝܢ ܚܣܢܐ ܕܙܝܛ ܪܒܐ ܘܚܣܢܐ ܕܙܝܛ ܣܩܘܛܐ. ܘܚܣܢܐ ܕܐܝܓܠ ܗܿܘ ܕܣܢܚܪܝܒ ܡܠܟܐ ܕܐܬܘܪ. ܗܢܐ ܕܝܢ ܚܣܝܢܐ ܪܒܐ ܕܙܝܛ ܒܝܬ ܕܩܠܬ ܠܕܒܐ ܐܝܬܘܗܝ ܗܘܐ. ܕܒܐ ܥܒܪ ܡܢ ܡܥܪܒܐ ܠܫܘܪܐ ܘܕܩܠܬ ܡܢ ܡܕܢܚܐ. ܘܚܒܟܝܢ ܥܠ ܚ̈ܕܕܐ ܬܝܡܢܐ ܠܫܘܪܐ. ܘܣܓܝ ܥܣܩܐ ܘܠܐ ܡܬܟܒܫܢܐ ܐܝܬܘܗܝܼ. ܒܗܿܝ ܕܒܪܘܡܐ ܣܓܝܐܐ ܩܐܡ ܘܬܪܥܐ ܚܕ ܐܝܬ ܠܗ.. ܗܘܢܝ̈ܐ ܕܝܢ ܐܚܕ ܠܬܪܥܐ ܕܫܘܪܐ. ܘܐܦ ܠܙܡܙܘܪ̈ܐ ܕܢܚܬܝܢ ܠܕܩܠܬ ܘܠܕܒܐܼ ܩܡܘ ܥܢܝܗܘܢ ܘܐܚܕܘ ܐܢܘܢ. ܥܕܡܐ ܕܣܦܘܢ ܒܢ̈ܝܢܫܐ ܒܓܘܗ ܡܢ ܨܗܝܐ. ܘܗܠܝܢ ܕܦܫ ܠܚܪܬ ܐܫܠܡܘܗܝ ܠܚܣܢܐ.. ܗܘܢܝ̈ܐ ܕܝܢܼ ܡܛܠ ܕܕܠܐ ܪ̈ܚܡܐ ܐܢܼܘܢ: ܚܪܒܘܗܝ ܠܥܡܐ ܟܠܗ ܒܦܘܡܐ ܕܣܝܦܐܿ. ܘܕܫܪܟܐ ܫܒܘ ܐܢܘܢ. ܘܐܘܩܕܘܗܝ ܒܢܘܪܐܼ. ܘܠܐ ܬܘܒ ܐܬܝܬܒ ܚܣܝܢܐ ܗܿܘ ܟܠ ܟܠܗ.. ܪܘܦܝܢܣܘ ܕܝܢ ܗܘܦܪܟܐ ܕܡܠܟܐܼ ܟܕ ܠܘܬ ܪ̈ܓܠܘܗܝ ܕܡܠܟܐ ܝܬܝܒ ܩܛܠܘܗܝ ܪ̈ܗܘܡܝܐ. ܥܠ ܠܡ ܕܒܝܕ ܛܪܘܢܘܬܗ ܗܼܘ ܗܘܐ ܥܠܬܐ ܠܡܬܝܬܐ ܕܗܘ̈ܢܝܐ.܀܀ ܫܢܬ ܫܒ̈ܥܡܐܐ ܘܫܒ̈ܥܼ. ܡܝܬ ܢܩܛܘܪ ܐܦܝܣܩܦܐ ܕܩܘܣܛܢـ. ܘܗܘܼܐ ܚܠܦܘܗܝ ܩܕܫܝܐ ܝܘܚܢܢ. ܗܢܐ ܕܝܢ ܝܘ[ܚܢܢ ܐܝܬܘܗܝ ܗܘܐ ܒܓܢܣܗ ܡܢ ܐܢܛܝܘܟܝܐ] ܕܣܘܪܝܐ. ܒܪܗ ܕܣـ[ـܩܘܢܕܘܣ] . . . . . . . . . ܪܒܐ ܕܒܢܿܝ ܡܕܝܢܬܐ. ܘܐܝܬܘܗܝ ܬܠܡܕܝܗ ܕܠܝܒܢܝܘܣ ܣܘܦܣܛܐ. ܒܥܡ̈ܠܐ ܕܝܢ ܪ̈ܘܪܒܐ ܐܬܪܕܝ ܡܢ ܩܕܝܫܐ ܐܘܓܪܝܣ ܘܒܣܝܠܝܣ ܕܩܣܪܝܐ.܀܀ ܫܢܬ ܫܒ̈ܥܡܐܐ ܘܬܡ̈ܢܐܼ. ܘܗܘܼܐ ܬܐܕܘܪܣ ܐܦܝܝܣܩܦܐ ܕܡܡܦܣܝܣܛܐ. [ܘܡܟܣܝܡܘܣ ܒـ]ـܣܠـ[ـܘܩܝܐ.܀ ܒܗܢܐ ܕܝܢ ܙܒܢܐ] ܡܬܝܕܥ ܥܒܣܡܝܐ pb. 189 ܡܠܦܢܐܼ. ܒܪ ܚܬܗ ܕܡܪܝ ܐܦܪܝܡ . . . . . . . ܘܥܒܕ ܡܕܪ̈ܫܐ ܥܠ ܡܬܝܬܐ ܕܗܘ̈ܢܝܐ.܀܀ ܫܢܬ ܫܒ̈ܥܡܐܐ ܘܬܫ̈ܥܼ. ܐܫܬܓܫ ܥܡܐ ܕܐܠܟܣܢܪܕܝܐܼ. ܡܢ ܗܢܘܢ ܕܡܗܝܡܢܝܢ [ܟܗܢܘ]ܬܐ. ܟܕ ܠܐ ܫܿܠܝܢ ܗܘܘ ܡܢ ܗܿܝ ܕܢܥܝܪܘܢ ܫܓܘܫܝܐ ܗܢܘܢ ܥܠܝܗܘܢ ܟܗ̈ܢܐ ܥܠ ܚܕܕܧܐ ܩܝܡܝܢ ܗܘܘ ܘܠܒܝܗܫܬܐ ܡܬܕܪܫܝܢ [ܗܘܘ.] ܘܪܫܐ ܕܝܢ ܕܒܝܫܬܐ ܡܢ ܡܨܪܝܢ ܗܘܐ ܗܘܐ. ܡܛܠ ܥܠܬܐ ܕܐܝܟ ܗܕܐܼ. ܕܐܢ ܦܓܪܐ ܐܝܬ ܠܗ ܠܐܠܗܐ ܘܒܐܣܟܡܐ ܐܝܬܘܗܝ ܗܘܐ ܕܒܪܢܫܐ. ܐܘ ܕܠܐ ܦܓܪܐ ܗܼܘܼ. ܘܡܚܪܪ ܡܢ ܐܝܢܐ ܕܗܼܘ ܐܣܟܡܐ ܕܒܪܢܫܐ. ܘܡܢ ܗܕܐ ܥܠܬܐ ܚܪ̈ܝܢܐ ܘܫ̈ܓܘܫܝܐ ܣܓܝ̈ܐܐ ܡܬܙܝܥܝܢ ܡܢ ܣ̈ܓܝܐܐ. ܐܝܬ ܓܝܪ ܡܢܗܘܢ ܕܠܗܕܐ ܡܠܬܐ ܫܠܡܝܢ ܗܘܘ. ܐܚܪ̈ܢܐ ܕܝܢ ܡܠܬܐ ܕܕܠܩܘܒܠܐ ܡܿܩܝܡܝܢ ܗܘܘ. ܘܝܬܝܪܐܝܬ ܡܢ ܕܝܪ̈ܝܐ.܀܀ ܫܢܬ ܫܒ̈ܥܡܐܐ ܘܥܣܪܼ. ܣܘܪܝܢܐ ܕܓܒܠ ܡܬܝܕܥ. ܐܢـ[ـܛܝܟܝܣ] ܕܥܟܘ.܀܀ ܫܢܬ ܫܒ̈ܥܡܐܐ ܘܚܕܥܣܪ̈ܐܼ. ܡܬܝܕܥ ܐܦـ[ـܝܦܢܘܣ] ܕܩܦܪܘܣ. ܘܬܝܕܘܪܣ ܕܡܡܦܝܣܛܘܣܼ. ܡܦܫܩܢܐ ܕܟܬܒ̈ܐ ܡܬܝܕܥ.܀܀ ܘܒܫܢܬ ܫܒ̈ܥܡܐܐ ܫܒܥܣܪ̈ܐܼ. ܢܦܩܘܼ ܝܘܚܢܢ ܕܩܘܛܢـ ܡܢ ܟܘܪܣܝܗ. ܒܪܡ ܠܘ ܥܠ ܐܦ̈ܝ ܗܝܡܢܘܬܐܼ. ܐܠܐ ܡܛܠ ܡܟܣܢܘܬܐ ܓܠܝܬܐ ܕܠܘܬ [ܡܠܟܬܐ. ܕܐܦ] ܗܝܼ ܡܠܟܬܐ ܡܢ ܒܬܪ ܐܪ̈ܒܥܐ ܝܘ̈ܡܝܢ ܕܐܟܣܘܪܝܐ ܕܝܘܚܢܢ ܡܝܬܬܿ. ܘܟܠܢܫ ܐܡܼܪ ܕܥܠ ܥܘܠܐ ܕܥܒܼܕܬܿ ܒܩـ[ـܬܪܝܣܝܣ ܕܝܘܚܢܢ] (ܗܿܝ ܕܗܘܬܼ.)܀ ܘܬܘܒ ܒܗܿ ܒܫܢܬܐܼ. ܗܘܐ ܒܪܕܐ ܪܒܐ. ܕܠܐ ܐܬܚܙܝ [ܡܬܘܡ] ܐܟܘܬܗ. ܘܩܘܪܝܢܝ ܐܦܝܣܩܦܐ ܕܟܠܩܕܘܢܐܼ [ܩܿܪܐ ܗܘܼܐ] ܠܝܘܚܢܢ ܪܫܝܥܐ. ܘܟܕ ܟܢܝܫܐ ܣܘܢܗܕܘܣܼ ܕܼܫ ܡـ[ـܪܘܬܐ] ܥܠ ܪܓܠܗ ܕܩܘܪܝܢܝܼ. ܕܠܐ ܡܢ ܨܒܝܢܗ. ܘܡܢ ܗܕܐ ܬ[ܡܣܘܬܐ] ܥܒܕܬ ܐܝܟܐܢ ܕܡܢ ܐܘܠܨܢܐ ܗܕܐ pb. 190 ܙܒ̈ܢܝܢ ܣܓܝ̈ܐܬܐ [ܬܬܢܣܪ.] ܘܐܦ ܗܼܝ ܪܓܠܐ ܐܚܪܬܐ ܬܬܢܣܪ. ܡܛܠ ܕܪܥܼܐ ܟܐܒܐ ܒܟܠ ܦܓܪܗ. ܘܥܠ ܗܕܐܼ ܣ̈ܓܝܐܐ ܐܡܿܪܝܢ ܗܘܘܼ ܐܬܬܒܥ ܩܘܪܝܢܝ. [ܘܒܪܕܐ] ܢܚܬ. ܘܡܠܟܬܐ ܡܝܬܬ.. ܘܐܦ ܥܕܬܐ ܗܘܐ ܒܗܿ [ܣܕܩܐ.] ܠܘ ܡܛܠ ܗܝܡܢܘܬܐܼ. ܐܠܐ ܥܠ ܐܦ̈ܝ ܛܠܘܡܝܐ ܕܗܘܐ ܥܠ [ܝܘܚܢܢ.] ܗܘܐ ܕܝܢ ܚܠܦܘܗܝ ܐܪܝܣܩܘܣ ܐܚܘܗܝ ܕܢܩܛܘܪܼ. ܗܿܘ ܕܡܢ ܩܕܡ ܝܘܚܢܢ.܀܀ ܫܢܬ ܫܒܥ̈ܡܐܐ ܘܬܡܢܥܣܪ̈ܐܼ. ܡـ[ـܝܬ] ܗܿܘ ܐܪܝܣܩܘܣ [ܐܦܝܣܩܦܐ ܕܩܘܣܛܢܛܝܢܦܘܠܝܣ]܀ ܫܢܬ ܫܒ̈ܥܡܐܐ ܘܥܣܪ̈ܝܢ܆ [ܡܝܬ ܐܪܩܕܝܣ] ܡܠܟܐ. ܗܘܼܐ ܚܠܦܘܗܝ ܬܝܕܣܝܘܣ ܙܥܘܪܐ ܒܪܗ. ܐܡܠܟ ܕܝܢ ܐܪܩܕܝܣ ܥܡ ܬܝܕܣܝܣ ܐܒܘܗܝܼ. ܬܠܬܥܣܪ̈ܐ ܫܢ̈ܝܢ. ܘܒܬܪ ܐܒܘܗܝܼ ܪ̈ܒܥܣܪܐ ܫܢ̈ܝܢ. ܘܟܠܗܘܢ [ܚܝ̈ܘܗܝ ܬ̈ܠـ]ـܬܝܢ ܘܚܕܐ ܫܢܬܐ.܀܀ ܫܢܬ ܫܒ̈ܥܡܐ ܘܥܣܪ̈ܝܢ ܘܚܕܐܼ. ܡܝܬ ܩܕܫܝܐ ܬܝܦܝܠܘܣ ܦܛܪܝܪܟܐ [ܕܐܠܟܣܝܢܕܪ]ܝܐ. ܘܗܘܐ ܒܕܘܟܬܗ ܩܕܫܝܐ ܩܘܪܝܠܣ ܒܪ ܐܚܘܗܝ.܀܀ ܫܢܬ ܫܒ̈ܥܡܐܐ ܘܥܣܪ̈ܝܢ ܘܬܪ̈ܬܝܢ܆ ܗܘܐ ܕܝܐܓܢܝܣ ܐܦܝܣܩܦܐ ܒܐܘܪܗܝ. ܘܒܢܼܐ ܒܝܬ ܒܪܐܠܗܐ.܀ ܘܒܗܿ ܒܫܢܬܐ ܗܕܐܼ. ܐܬܚܝܕ ܡܩܕܘܢܝܣ ܠܥܕܬܐܼ ܘܩܒܠ [ܗܝܡܢـ]ـܘܬܐ ܕܒܪ ܐܝܬܘܬܐ. ܘܐܫܬܕܝ ܬܝܕܘܣܝܣ ܡܢ ܟܘܪܣܝܗ. ܘܩܒܼܠ ܕܘܟܬܗ ܐܓܪܦܐ.܀܀ ܘܒܫܢܬ .ܥܿ. ܘܥܣܪ̈ܝܢ ܘܬܠܬܼ̈. ܡܝܬ ܗܼܘ ܕܝܐܓܢܝܣ. ܘܩܒܠ ܗܘܐ ܕܘܟܬܗ ܩܕܝܫܐ ܪܒܘܠܐ. ܘܒܢܐ ܒܝܬ ܡܪܝ ܐܣܛܦܢܣܼ. ܕܐܝܬܘܗܝ ܒܝܬ ܟܢܘܫܬܐ ܕܝ̈ܗܘܕܝܐ.܀܀ ܫܢܬ ܫܒܥܡ̈ܐܐ ܘܥܣܪ̈ܝܢ ܘܐܪ̈ܒܥܼ. ܒܐܝܪܚ ܢܝܣܢ ܗܘܐ ܫܦ̈ܥܐ ܪ̈ܘܪܒܐ pb. 191 ܘܩܫ̈ܝܫܐ ܒܕܝܨܢ ܐܝܢܐ ܕܡܨܥܬ ܐܘܪܗܝ ܥܒܪܼ ܒܥܕܢܐ ܕܠܠܝܐ. ܘܐܫܬܟܪ ܡ̈ܦܩܢܘܗܝ ܕܝܠܗ ܕܢܗܪܐ. ܘܚܒܘ ܡܝ̈ܐ. ܘܫܦܥ ܥܠ ܟܠܗܘܢ ܫܘ̈ܩܐ. ܘܟܠܗܘܢ ܒ̈ܬܐ ܕܠܒ̈ܢܐ . . . . . ܘܛܝܢܐ ܬܪܘܢ ܘܢܦܠ ܥܠ ܡܪ̈ܝܗܘܢ. ܘܚܢܩ ܐܢܘܢ ܒܓܘܗܘܢ. ܘܐܠܐ ܐܢ ܒ̈ܬܐ ܐܝܠܝܢ ܕܡܫܪܪܝܢ ܒܟܐܦܐ ܘܟܠܫܐܼ. ܠܐ ܦܫ ܡܕܡ ܕܠܐ ܐܬܚܒܠ ܒܝܕ ܡܡܘܠܐ݊: ܐܠܐ ܐܢ ܩܠܝܠ ܕܒܫܦܘܠܬܐ ܕܛܘܪܐ ܐܝܬܝܗܘܢ. ܟܕ ܐܦ ܒܗܘܢ ܒܒ̈ܬܐ ܕܟܠܫܐܼ ܣܓܝ̈ܐܐ ܐܬܚܢܩ ܒܗܘܢ ܒܬܚܬܝܗܘܢ. ܟܕ ܕܝܢ ܐܬܪܥ ܫܘܪܐ ܡܢ ܩܫܝܘܬܗ ܕܡܡܘܠܐܼ. ܓܪܦ ܥܡܗ ܒ̈ܬܐ ܘܩܝ̈ܣܐ [ܘܩܢܝܐ ܘܒܢܝܢ̈ܫܐ] ܘܨܒܘ̈ܬܐ ܟܠܗܝܢ ܕܚܫܚܬܐ [ܕܚܝ̈ܝܗܘܢ ܕܒܢܝ̈ܢܫܐ]. ܟܕ ܐܦ ܝܬܝܪ ܡܢ ܓܘ̈ܢܚܐ ܘܕܥܒܕ ܒܡܕܝܢܬܐܼ. ܥܒܕ ܒܦܩܥܬܐ ܟܠܗܿ ܕܐܘܪܗܝ ܘܕܚܪܢ ܘܕܟܠܗ ܡܚܬܗ ܥܕܡܐ ܕܚܒܟ [ܒܦܪܬ.]܀܀ ܒܗܢܐ ܕܝܢ ܙܒܢܐܼ. ܥܡܐ ܣܓܝܐܐ ܕܚܢ̈ܦܐ [ܐܬܗܝܡܢ ܘ]ܥܡܕ ܡܢ ܥܠܬܐ ܕܐܝܟ ܗܕܐ. ܝܗܘܕܝܐ ܓܝܪ [ܒܪ ܡܫܪܝܐ] ܐܝܬ ܗܘܐ ܕܪܡܐ ܒܥܪܣܐ ܡܢ ܫܢ̈ܝܐ ܣ̈ܓܝܐܬܐ. [ܘܟܠܗܿ] ܐܡܢܘܬܐ ܕܐܣܝܘܬܐ ܐܬܚܘܝܬ ܒܗ. ܘܐܘܦܝ ܟܠܗܝܢ [ܨ̈ܠܘ]ܬܐ ܝܗ̈ܘܕܝܬܐ. ܘܟܕ ܡܕܡ ܡܢܗܝܢ ܠܐ ܐܬܥܕܪܼ. ܐܬܓܘܣ ܒܡܥܡܘܕܝܬܐ ܩܕܝܫܬܐ ܕܟܪ̈ܣܛܝܢܐ. ܘܗܝܡܢ ܕܒܗܕܐ ܗܼܘ ܒܠܚܘܕ ܡܬܐܣܐ. ܘܟܕ ܗܕܐ ܕܝܢ ܠܐܛܝܩܣ ܦܛܪܝܪܟܐ ܐܬܝܕܝܥܬܿ. ܬܠܡܕܗ ܘܣܒܪܗ ܥܠ ܡܥܡܘܕܝܬܐ ܕܒܡܫܝܚܐ. ܘܦܩܕ ܕܟܕ ܛܥܝܢܝܢ ܠܗ ܒܥܪܣܐܼ. ܢܘܒܠܘܢܝܗܝ ܠܒܝܬ ܡܥܡܘܕܝܬܐ. ܘܗܼܘ ܕܝܢ ܝܗܘܪܝܐ ܗܿܘ ܡܫܪܝܐ ܒܗܝܡܢܘܬܐ ܫܪܝܪܬܐܼ. ܩܒܠ ܡܥܡܘܕܝܬܐ. ܘܟܕ ܡܢ ܡ̈ܝܐ ܣܠܩ ܡܬܚܪܐ pb. 192 ܐܬܚܙܝ ܡܢ ܟܠܗܘܢ ܟܐܒ̈ܘܗܝ. ܘܥܡ ܗܠܝܢ ܕܚܠܝܡܝܢ ܡܕܝܨ ܗܘܐ. ܗܕܐ ܕܝܢ ܐܬܐܼ ܒܙܒܢܐ ܗܢܐ ܐܬܚܙܝܬܼ. ܕܡܛܠܬܗܿ ܚܢ̈ܦܐ ܣܓܝ̈ܐܐ ܗܝܡܝܢ ܘܥܡܕ.܀ ܘܬܘܒ ܕܒܢ ܒܙܒܢܐ ܗܢܐܼ ܩܫܝܫܐ ܣܡܒܛܝܣ ܕܩܘܣܛܢܛܝـ ܫ̈ܓܘܫܐ ܣܓܝ̈ܐܐ ܐܪܡܝ ܒܥܕܬܐܼ ܡܢ ܥܠܬ ܦܨܚܐ. ܘܟܕ ܚܙܐ ܕܝܢ ܡܪܩܝܢܘܣ ܐܦܝܣܩܦܐ ܠܫ̈ܓܘܫܐ ܣܓܝ̈ܐܐ ܕܥܒܼܕ܆ ܐܡܪ. ܠܘܝ ܥܠ ܟܘ̈ܒܐ ܣܝܡ ܗܘܐ ܠܝ ܐܝ̈ܕܝ ܘܠܐ ܥܠ ܣܒܛܝܣ.܀܀ ܫܢܬ ܫܒܥܡ̈ܐܐ ܘܥܣܪ̈ܝܢ ܘܚ̈ܡܫܼ. ܩܕܫܝܐ ܡܪܘܬܐ ܐܦܝܣܩܦܐ ܕܡܝܦܪܩܛܐ ܡܬܝܕܥ.. ܗܢܐ ܐܫܬܕܪ ܡܢ ܡܠܟܐ ܬܝܕܣܝܣ ܠܘܬ ܐܝܙܕܓܪܕ ܡܠܟܐ ܕܦܪܗܣܝܐ. ܘܥܒܕ ܫܝܢܐ ܒܝܢܬܗܘܢ.܀ ܘܒܗ ܒܗܢܐ ܙܒܢܐ ܐܬܟܢܫܬܿ ܣܘܢܕܘܣ ܦܪܣܬܐ ܘܩܝܡܬܿ ܠܗܝܡܢܘܬܐ ܕܢܩܝܐ. ܪ̈ܫܢܝܗܿ ܕܝܢ ܐܝܬܝܗܘܢ (ܗܘܘ) ܡܪܘܬܐ ܕܡܝܦܪܩܛܐ. ܘܝܒܠܗܐ ܩܬܠܝܩܐ ܕܩܛܝܣܦܢ.. ܐܬܟܢܫܼܬܿ ܕܝܢ ܒܗܿ ܒܩܛܝܣܦܢ.܀ ܒܬܪ ܦܘܠܝܢܐ ܕܐܢܛܝܟܝܐܼ ܩܒܠ ܕܝܢ ܦܪܦܘܪܝܘܣ. ܘܒܬܪܗ ܐܠܟܣܢܕܪܣ.. ܒܪܘܡܐ ܕܝܢ ܡܢ ܒܪܬ ܕܡܣܘܣܼ ܗܘܼܐ ܦܛܪܝܪܟܐ ܬܡܢ ܣܪܝܩܝܣ. ܘܒܬܪܗ ܐܢܣܛܣ. ܘܡܢ ܒܬܪ ܗܢܐ ܐܝܢܘܩܢܛܝܣ. ܘܡܢ ܒܬܪܗ ܙܘܣܝܡܘܣ. ܘܬܘܒ ܒܘܢܦܛܝܣ. ܘܡܢ ܒܬܪ ܗܢܐ ܩܒܠ ܩܕܝܫܐ ܩܠܣܛܝܢܘܣ܀ ܒܗܢܐ ܕܝܢ ܙܒܢܐ ܡܬܝܕܥܝܢ ܪܒܘܠܐ ܕܐܘܪܗܝ. ܐܩܝܩܣ ܐܦܝܣܩܦܐ ܕܐܡܕ. ܘܐܩܝܩܣ ܐܪܚܢܐ ܕܫܡܝܫܛ..܀܀ ܫܢܬ ܫܒܥ̈ܡܐܐ ܘܥܣܪ̈ܝܢ ܘܬܡ̈ܢܐ܆ ܐܠܘܪܝܟܣ ܒܪܒܪܝܐ ܐܚܪܒܗܿ ܠܪܗܘܡܐ. ܘܐܦܩ ܠܥܡܘܪ̈ܝܗܿ ܒܫܒܝܐ.܀܀ ܫܢܬ ܫܒ̈ܥܡܐܐ ܘܥܣܪ̈ܝܢ pb. 193 ܘܬܫܥܼ. ܩܛܠܗ ܬܝܕܣܝܘܣ ܠܐܠܘܪܝܟܣ ܒܪܒܪܝܐ. ܘܐܦ ܚܝܠܗ ܟܠܗ ܐܒܕ ܒܩܪܒܐ.܀ ܒܗܢܐ ܕܝܢ ܙܒܢܐܼ ܡܠܦܢܐ ܡܪܝ ܐܝܣܚܩ ܡܢ ܐܡܕ ܡܕܝܢܬܐ ܕܒܝܬ ܢܗܪ̈ܝܢ ܡܬܝܕܥܼ. ܘܡܟܬܒ ܡܐܡܪ̈ܐ ܥܠ ܚܪܒܗܿ ܕܪܘܡܐ ܪܒܬܐ.܀܀ ܘܒܫܢܬ ܫܒ̈ܥܡܐܐ ܘܬ̈ܠܬܝܢ܆ ܥܒܕ ܝܗܘ̈ܕܝܐ ܟܡܐܢܐ [ܠܟܪ̈ܣܝܛܢܐ] ܒܐܠܟܣܢܕܪܝܐ. ܘܥܡܐ ܣܓܝܐܐ ܐܘܒܕ ܡܢܗܘܢ. ܘܦܩܼܕ ܥܠܝܗܘܢ ܡܠܟܐܼ. ܘܐܬܚܪܒܘ ܟܠܗܘܢ. ܘܕܫܪܟܐ ܛܪܕ ܐܢܘܢ ܡܢܗܿ.܀܀ ܫܢܬ ܫܒ̈ܥܡܐܐ ܘܬ̈ܠܬܝܢ ܘܚܕܐܼ. ܩܼܡ ܐܘܛܘܟܐ [ܗܪܛܝܩܐܼ ܘܣܕܩ ܥܕܬܐ.܀܀ ܫܢܬ ܫܒ̈ܥܡܐܐ ܘܬ̈ܠܬܝܢ ܘܬܪ̈ܬܝܢ܆ ܩܼܡ ܪܕܘܦܝܐ ܩܫܝܐ ܘܥܙܝܙܐܼ ܘܕܠܐ ܪ̈ܚܡܐܼ. ܒܐܪܥܐ ܕܦܪ̈ܣܝܐ ܥܠ ܟܪ̈ܣܛܝܢܐ.܀܀ ܫܢܬ ܫܒ̈ܥܡܐܐ ܘܬ̈ܠܬܝܢ ܘܐܪ̈ܒܥܼ. ܐܣܗܕ ܩܕܝܫܐ ܝܥܩܘܒ ܡܦـ[ܣܩܐ.] ܡܢ ܒܝܬ ܠܦܛ ܡܝܕܢܬܐ ܕܗܘ̈ܙܝܐ.܀܀ ܫܢܬ ܫܒ̈ܥܡܐܐ ܘܬܠܬܝܢ ܘܚ̈ܡܫܼ. ܐܫܬܒܝܬ ܐܪܙܘܢ ܡܢ ܪ̈ܗܘܡܝܐ.. ܒܗܕܐ ܓܝܪ ܫܢܬܐ ܢܚܬ ܚܝܠܐ ܣܓܝܐܐ ܕܪ̈ܗܘܡܝܐ. ܘܫܒܗܿ ܠܐܪܙܝܢ ܕܦܪ̈ܣܐ ܘܐܝܬܝܗܿ ܠܐܡܕ. ܘܢܦܩ ܩܕܝܫܐ ܐܩܝܩܣ ܐܦܝܣܩܦܐ ܕܐܡܕ. ܘܫܩܠ ܕܗܒܐ ܡܢ ܥܕܬܐ ܕܝܠܗܿ ܕܐܡܕ܆ ܘܦܪܩ ܡܢ ܫܒܝܬܐ ܥܣܪ̈ܐ ܐܠܦܝ̈ܐ ܒ̈ܬܐ. ܘܐܦ ܪܘܪ̈ܒܢܐ ܦܪܩ ܕܫܪܟܐ. ܘܒܙܘ̈ܕܐ ܫܦܝܪ̈ܐ ܫܕܪ ܐܢܘܢ ܠܐܬܪܗܘܢ.܀ ܘܒܗܿ ܒܫܢܬܐ ܡܚܐ ܩܪܒܐ ܗܘܼ ܐܪܕܒܘܪ (ܪܒ) ܚܝܠܐ ܕܪ̈ܗܘܡܝܐ ܥܡ ܢܪܣܐ ܕܦܪ̈ܣܐ ܘܚܒܘܼ ܢܪܣܐ ܘܚܝܠܗܼ ܘܥܪܩ.܀܀ ܫܢܬ ܫܒ̈ܥܡܐܐ ܘܬ̈ܬܠܝܢ ܘܫ̈ܬܼ. ܢܚܼܬ ܬܘܒ ܚܝܠܐ ܕܪ̈ܗܘܡܝܐܼ ܘܢܩܫ ܥܠ ܢܨܒܝܢ. ܘܚܫܒܘܗܿ ܡܢ ܕܐܠܨܘܗܿ ܠܡܕܝܢܬܐ. ܘܥܒܕ ܥܠܝܗܿ ܦܘܪ̈ܩܣܐ ܕܩܝܣܐ ܕܡܗܠܟܝܢ ܘܩܕܒ ܥܠ ܓܢܒ ܫܘܪܐ. ܘܠܐܢ̈ܫܐ ܣܓܝ̈ܐܐ ܡܢ ܗܢܘܢ ܕܡܩܿܪܒܝܢ ܗܘܘ ܥܠ ܫܘܪܐ pb. 194 ܩܛܠ.. ܢܪܣܐ ܕܝܢ ܥܬܕ ܐܦ ܗܼܘ ܚܝܠܐ ܣܓܝܐܐ ܕܦܪ̈ܣܝܐ ܠܡܩܪܒܘ ܥܡ ܪ̈ܗܘܡܝܐ. ܘܫܠܚ ܢܪܣܐ ܠܐܪܕܒܘܪ. ܕܒܬܢܘܝ ܢܥܒܕܘܢ ܩܪܒܐ. ܘܢܬܚܡܘܢ ܕܘܟܬܐ ܘܝܘܡܐ ܠܬܟܬܘܫܐ.. ܪܒ ܚܝܠܐ ܕܝܢ ܕܪ̈ܗܘܡܝܐ ܐܡܼܪ ܠܐܝ̈ܙܓܕܐܼ. ܕܗܟܐܢ ܐܡܪ ܠܢܪܣܐܼ. ܕܠܘ ܐܡܬܝ ܕܐܢܬ ܒܿܥܐ ܐܢܬܼ ܥܒܕܝܢ ܩܪܒܐ ܡܠ̈ܟܐ ܕܪ̈ܗܘܡܝܐ.. ܘܟܕ ܗܠܝܢ ܡܬܐܡܪ̈ܢ ܗܘ̈ܝܼ ܫܕܪ ܡܠܟܐ ܕܪ̈ܗܘܡܝܐ ܚܝܠܐ ܣܓܝܐܐ. ܟܕ ܨܿܒܐ ܗܘܐ ܕܢܚܣܘܢ ܠܦܘܪ̈ܣܝܐ. ܐܦ ܐܫܠܡܗ ܠܩܪܒܐ ܟܠܗ ܒܐܕ̈ܝ ܐܠܗܐ. ܘܬܟܝܠܐܝܬ ܐܬܠܒܒ ܥܠ ܗܕܐ. ܘܡܛܠ ܕܗܡܝܢ ܡܠܟܐ ܒܐܠܗܐܼ ܩܠܝܠܐܝܬ ܐܫܟܚ ܡܢܗ ܥܘܕܪܢܐ. ܟܕ ܓܝܪ ܟܠܗܘܢ ܗܢܘܢ ܕܒܩܘܣܛܢܛܝܢܦܘܠܣ ܒܐܓܘܢܐ ܘܒܩܢܛܐ ܪܒܐ ܐܝܬܝܗܘܢ: ܕܡܢܐ ܓܼܕܫ ܒܩܪܒܐܼ. . . ܡܠܐܟ̈ܐ ܓܝܪ ܕܐܠܗܑܼ ܐܬܚܙܝܘ ܥܠ ܓܢܒ ܒܬܘܢܝܐܼ ܠܐܝܠܝܢ ܕܡܛܠ ܣܘܥܪ̈ܢܝܗܘܢ ܐܙܿܠܝܢ ܗܘܘ ܠܩܘܣܛܢܛܝܢܦܠܝܣ. ܘܦܩܕ ܐܢܘܢ ܕܢܐܡܪܘܢ ܠܡܠܟܐ ܘܠܥܡܐ ܕܢܬܠܒܒܘܢ ܘܢܨܠܘܢ. ܐܦ ܢܗܝܡܢܘܢ ܒܐܠܗܐ ܕܪ̈ܗܘܡܝܐ ܙܿܟܝܢ. ܟܕ ܐܡܪܝܢ ܕܡܢ ܐܠܗܐ ܐܫܬܕܪܘ ܕܢܬܠܘܢ ܙܟܘܬܐ ܠܪ̈ܗܘܡܝܐ ܒܩܪܒܐ.. ܒܪܗܪܢ ܕܝܢ ܡܠܟܐ ܕܦܪ̈ܣܐ. ܟܕ ܚܙܐ ܕܐܬܚܪܒ ܚܝܠܗ: ܘܐܬܪܐܕܐܪܙܘܢ ܐܫܬܒܝ. ܘܐܦ ܢܨܒܝܢ ܐܬܬܣܝܡܬ ܒܐܘܠܨܢܐ ܕܚܒܘܫܝܐ. ܘܬܘܒ ܥܠܝܗܘܢ ܩܪܒܐ ܡܢ ܟܠ ܓܒ̈ܝܢ. ܥܬܕ ܗܼܘ ܩܢܘܡܗ ܕܢܐܬܐ ܠܩܪܒܐ. ܘܟܕ ܙܥܘ [ܗܟܝܠ ܡܢ ܚܝܠܐ] ܕܪ̈ܗܡܝܐܼ ܐܓܪ ܠܡܘܢܕܪ ܡܠܟܐ ܕܛܝ̈ܝܐ ܘܠܚܝܠܗ ܕܢܐܬܐ ܠܥܘܕܪܢܗ. ܘܟܕ ܕܝܢ ܐܬܼܐ ܡܘܢܕܪ ܥܡ ܪ̈ܒܘܬܐ ܣܓܝ̈ܐܬܐ ܕܛܝ̈ܝܐ: ܡܠܒܒ ܗܘܐ ܠܗ ܠܡܠܟܐ ܕܦܪ̈ܣܝܐܼ. ܟܕ ܡܫܬܘܕܐ ܠܗ ܕܒܥܓܠ ܡܫܥܒܕ ܠܗ ܪ̈ܗܘܡܝܐ [ܘܡܫܠܡ ܠܗ ܐܢܛܝܟܝܐ] ܕܣܘܪܝܐ. ܒܪܡ pb. 195 ܠܐ ܗܘܐ ܫܘܠܡܐ ܕܠܫܘܘܕܝܗ. ܐܠܗܐ ܓܝܪ [ܐܪܡܝ] ܕܚܠܬܐ ܒܛܝ̈ܝܐ. ܘܐܣܒܪܘ ܗܘܘ ܕܚܝܠܐ ܕܪ̈ܗܘܡܝܐ ܐܬܼܐ ܥܠܗܝܘܢ. ܘܟܕ ܐܫܬܓܫܘ ܘܠܝܬ ܗܘܐ ܠܗܘܢ ܐܬܪܐ ܕܢܥܪܩܘܢ: ܫܕܘ ܢܦܫܗܘܢ ܒܢܗܪܐ ܦܪܬ ܟܕ ܡܙܝܢܝܢ. ܘܐܬܚܢܩ ܡܢܗܘܢ ܐܝܟ ܥܣܪ̈ ܪ̈ܒܘܬܢ ܒܢ̈ܝܢܫܐ ܘܒܥܝܪ̈ܗܘܢ.. ܘܐܦ ܐܪܕܒܘܪ ܬܘܒ ܒܝܕ ܢܟܠܐܼ ܠܫܒ̈ܥܐ ܪ̈ܫܝ ܚܝܠ̈ܘܬܐ ܕܛܝ̈ܝܐ ܩܛܠ. ܘܗܠܝܢ ܐܚܪ̈ܢܐ ܕܐܫܬܚܪ ܒܝܕ ܡܥܕܪܢܘܬܐ ܕܐܠܗܐ ܩܠܝܠܐܝܬ ܐܬܚܪܒܘ.

ܦܘܣܩܐ ܡܢ ܬܫܥܝܬܐ ܕܥܠ ܗܠܝܢ ܬܡܢܝܐ ܛܠܝ̈ܐ ܕܐܦܣܘܣ. ܗܢܘ ܕܝܢ ܕܡܟܣܝܡܠܝܢܐ ܘܕܝܡܠܝܟܐ ܘܕܡܪܛܠܘܣ ܘܕܝܢܘܣܘܝ ܘܝܗܘܢܝܣ ܘܣܪܦܝܘܢ ܘܐܟܣܘܣܛܕܝܢܘܣ ܘܕܐܢܛܘܢܝܢܘܣ ܣ̈ܗܕܐ ܒܢ̈ܝ ܪܘܪ̈ܒܢܐ ܕܐܦܣܘܣ܀ ܒܗܢܐ ܕܝܢ ܙܒܢܐ ܗܪܣܝܣ ܕܛܘܥܝܝ ܘܕܘܘܕܐ ܐܒܥܼܬܿ ܒܕܝܐ ܘܫܓܫܼܬܿ ܘܕܠܚܬܿ ܠܥܕܬܐ. ܟܕ ܨܿܒܝܐ ܠܡܚܿܦܝܘ ܡܘܠܦܟܢܐ ܕܚܝܬ ܡܗܝܬܐܼ. ܘܨܼܒܘ ܠܡܒܛܠܘ ܫܘܘܕܝܐ ܕܩܝܡܬܐ ܕܫܟ̈ܒܝ ܥܦܪܐܼ. ܕܝܼܗܒ ܡܪܢ ܠܥܕܬܗ. ܘܛܒ̈ܐ ܡ̈ܕܘܕܐ ܒܐܕ̈ܢܘܗܝ ܕܡܿܠܟܐ ܡܗܝܡܢܐ ܢܦܠܝܢ ܗܘܘܼ. ܘܐܦ ܣܓܕ̈ܝ ܠܨ̈ܠܡܐ ܕܐܝܬ ܗܘܐ ܒܦܠܛܝܢ ܕܝܠܗܼ. ܟܬܒ̈ܝ ܙܐܦܐ ܒܓܠܝܐ ܩܕܡ ܐܦ̈ܘܗܝ ܐܕܢܚ ܗܘܘ: ܘܐܦܝ̈ܣܩܦܐ ܪ̈ܚܡܝ ܛܢܦܘܬܐܼ ܕܡܬܚܙܝܢ ܘܡܫܬܒܚܝܢ ܒܗܢܐ ܙܒܢܐܿ. ܒܥܕܬܐ ܡܥܪܩܠܘܬܐ ܣܓܝܐܬܐ ܐܪܡܝ. ܘܐܝܬܘܗܝ ܗܘܐ ܪܝܫܐ ܒܫܓܘܫܝܐܼ ܬܐܕܪܘܣ ܐܦܝܣܩܦܐ ܕܓܐܝܣ ܡܕܝܢܬܐܼ pb. 196 ܥܡ ܫܪܟܐ ܕܐܝܠܝܢ ܕܠܐ ܙܿܕܩ ܕܫܡ̈ܗܝܗܘܢ ܢܬܥܗܕ ܒܬܫܥܝܬܐ ܗܕܐ ܕܡܘ̈ܕܝܢܐ. ܡܛܠ ܕܫܓܫܘ ܠܥܕܬܗ ܕܐܠܗܐ܇ ܘܫܦܝܘܬܐ ܕܗܝܡܢܘܬܐ ܕܠܼܚ ܒܝܕ ܥܘܩ̈ܒܐ ܗܦܝ̈ܟܐ ܕܡ̈ܠܝܗܘܢ. ܗܝܕܝܢ ܗܼܘ ܬܝܕܣܝܘܣ ܡܿܠܟܐ ܡܚܫܒܬܗ ܟܠܝܘܡܼ ܒܒܟܝܐ ܡܬܕܠܚܐ ܗܘܬܼ. ܘܒܝܬ ܦܘܪ̈ܬܟܐ ܣ̈ܓܝܐܐ ܢܦܠ ܗܘܐ. ܟܕ ܚܿܙܐ ܗܘܐ ܗܝܡܢܘܬܐ ܕܥܕܬܐܼ. ܕܠܟܐ ܘܠܟܐ ܡܬܢܬܦܐ ܗܘܬ. ܡܢ ܗܪ̈ܝܛܝܩܘ ܓܝܪܼ ܐܡܿܪܝܢ ܗܘܘ܆ ܕܠܝܬ ܢܘܚܡܐ ܠܡ̈ܝܬܐ. ܘܐܚܪ̈ܢܐ ܬܘܒܼ ܐܡܿܪܝܢ ܗܘܘ܆ ܕܦܓܪܐ ܕܒܠܝܘ ܘܐܬܚܒܠܘ ܘܐܬܒܕܪ ܠܐ ܡܬܢܚܡ. ܐܠܐ ܠܡ ܢܦܫܐ ܗܘ ܒܠܚܘܕ ܡܩܿܒܠܐ ܡܘܠܟܢܐ ܕܚܝ̈ܐ. ܘܛܥܘ ܠܗܘܢ ܡܡ̈ܠܠܝ ܙܐܦܐܼ. ܘܠܐ ܐܣܬܟܠ ܕܠܐ ܡܬܘܡ ܐܬܝܠܕ ܥܘܠܐ ܡܢ ܟܪܣܐ ܒܠܥܕ ܦܓܪܐܿ. ܘܠܐ ܢܒܥ ܓܘܫܡܐ ܡܢ ܡܪܒܥܐ ܒܠܥܕ ܡܢ ܢܦܫܐ ܢܫܡܬܐ ܕܚ̈ܝܐ. ܘܐܬܚܪܫ ܡܕܥܗܘܢܼ ܘܠܐ ܨܬ ܠܡܘܠܟܢܐ ܕܐܼܡܪ ܡܪܢ܆ ܕܡ̈ܝܬܐ ܐܝܠܝܢ ܕܒܩܒܪ̈ܐ ܐܢܘܢ܆ ܢܫܡܥܘܢ ܩܠܗ ܕܒܪܗ ܕܐܠܗܐܼ ܘܢܚܘܢ.. ܘܬܘܒ ܐܡܝܪ ܕܢܬܬܥܝܪܘܢ ܘܢܫܒܚܘܢ ܫ̈ܟܒܝ ܥܦܪܐ.. ܘܬܘܒ ܐܡܝܪ ܕܢܬܬܥܝܪܘܢ ܘܢܫܒܚܘܢ ܫ̈ܟܒܝ ܥܦܪܐ.. ܘܬܘܒ ܐܡܝܪ ܕܗܐ ܦܬ̇ܚ ܐܢܐ ܩܒܪ̈ܝܗܘܢ܆ ܘܡܿܦܩܐܢܐ ܠܟܘܢ ܡܢ ܩܒܪ̈ܝܗܘܢ.. ܗܪ̈ܛܝܩܘ ܕܝܢܼ ܣܦܝ̈ܩܝ ܡܢ ܚܝ̈ܐܼ. ܗܦܟܘܗܿ ܗܘܘ ܠܚܠܝܘܬܐ ܕܚܝ̈ܐ ܠܡܪܪܐ ܕܢܦܫܗܘܢ: ܘܠܪ̈ܥܝܢܐ ܡܿܢ ܡܪ̈ܝܩܐ ܕܡ̈ܗܝܡܢܐ ܕܠܚܘ ܘܥܪܩܠܘ.. ܘܬܚܒ ܗܘܐ ܪܥܝܢܗ ܕܡܠܟܐ ܬܝܕܣܝܘܣܼ ܘܐܬܢܫܫ ܘܐܬܟܪܗ. ܘܢܦܠ ܥܠ ܣܩܐ ܘܩܛܡܐ ܒܩܝܛܘܢܐ ܕܡܫܟܒܗ.. ܗܝܕܝܢ ܗܼܘ ܐܠܗܐ ܡܪܚܡܢܐܼ. ܗܧܘ ܕܠܐ ܨܒܿܐ ܕܐܢܫ ܢܐܒܕ܆ ܡܢ ܐܘܪܚܐ ܕܫܪܪܐ: ܨܒܐ ܕܢܩܢܐ ܚܘܠܡܢܐ ܠܪ̈ܥܝܢܐ ܟܪ̈ܝܗܐܿ. ܘܢܬܓܠܐ ܡܘܠܟܢܐ ܕܚܝ̈ܐ ܒܩܝܡܬܐ ܕܫ̈ܟܒܐܿ. ܕܠܙܒܢܐ ܗܿܘ ܢܛܝܪܝܢ ܗܘܘ ܒܐܝܕܥܬܗ. ܘܕܢܓܝܠ ܢܫܕܐ ܣܡܐ ܡܟܪܗܢܐ ܡܢ pb. 197 ܫܦܝܘܬܐ ܕܥܕܬܐ. ܘܕܢܣܡܘܟ ܒܢܝܢܗܿ ܡܢ ܓ̈ܠܠܐ ܡܙ̈ܠܗܙܐ ܘܙܝ̈ܙܢܐ ܕܛܒܪܘ ܒܗܿ. ܘܕܢܙܠܓ ܢܘܗܪܐ ܘܒܘܝܝܐ ܥܠ ܬܝܕܣܝܘܣ ܡܿܠܟܐ. ܘܥܡ ܐܒ̈ܗܘܗܝ ܢܫܬܡܠܐ ܒܟܠܝܠܐ ܕܙܟܘܬܐ.. ܗܝܕܝܢ ܡܢ ܫܠܝܼ ܐܕܝܠ ܐܠܗܐ ܒܪܥܝܢܗ ܕܐܪܠܝܣܼ ܡܪܗܿ ܕܢܘܡܐ ܕܡܥܪܬܐ ܗܿܝ ܕܒܗܿ ܡܘ̈ܕܢܝܐ ܫܟܝܒܝܢ ܗܘܘ: ܕܛܝܪܐ ܠܩܢܝܢܗ ܢܒܢܐ ܬܡܢ ܒܚܦܛܝܘܬܐ. ܘܥ̈ܒܼܕܐ ܘܦ̈ܥܠܐ ܝܘܡܐ ܘܬܪ̈ܝܢ ܬܡܢ ܠܐܿܝܢ ܗܘܘ. ܘܟܐ̈ܦܐ ܡܢ ܦܘܡ ܩܒܪ̈ܐ ܐܚܪ̈ܢܐ ܡܥܓܠܝܢ ܗܘܘ. ܘܐܦ ܡܢ ܦܘܡ ܡܥܪܬܐ ܗܿܝܼ ܟ̈ܐܦܐ ܠܢܝܢܐ ܡܿܝܬܝܢ ܗܘܘ. ܘܒܠܠܝܐ ܕܝܘܡܐ ܕܬܪ̈ܝܢ܆ ܟܕ ܦܘܡ ܡܥܪܬܐ ܐܬܦܠܫ: ܗܝܕܝܢ ܦܘܩܕܢܐܕܐܠܗܐ ܡܚܝܢܐ ܪܣܡ ܚܝ̈ܐ ܠܫܟ̈ܝܒܐ ܕܒܗܿ ܫܟܒܝܢ ܗܘܘ. ܘܗܿܘ ܕܠܥܘܼܠܐ ܚܒܝܫܐ ܝܿܗܒ ܢܫܬܡܐ ܕܚܝ̈ܐ ܒܟܪܣܗܿ ܕܐܡܗ: ܘܗܿܘ ܨܒܝܢܐ ܕܒܩܦܥܬܐ ܓܪ̈ܡܐ ܙܪ̈ܝܩܐ ܘܝܒ̈ܝܫܐ ܪܟܒ ܘܢܚܡ. ܘܗܿܘ ܚܝܠܐ ܕܠܠܥܙܪ ܩܒܝܪܐ ܩܼܪܐܼ. ܘܐܦܩܗ ܡܢ ܩܒܪܐ (ܒܚܝ̈ܐ): ܗܼܘ ܒܪܬܡܐ ܕܦܘܡܗܼ. ܪܘܚܐ ܕܚܝ̈ܐ ܝܗܼܒ ܐܦܠ ܠܡܘܕ̈ܝܢܐ ܗܿܢܘܢܼ ܕܒܡܥܪܬܐ ܫܟܒܘ ܗܘܘ. ܘܬܩܢܘ ܘܝܬܒܘ ܒܚܕܘܬܐ ܘܒܙܗܝܘܬܐ ܕܦܪ̈ܨܘܦܝܗܘܢ. ܘܐܝܟ ܕܒܨܦܪܐ ܕܟܠ ܝܘܡܼ ܫܠܡܐ ܚܕ ܕܚܕ ܫܐܠܝܢ ܗܘܘ: ܟܕ ܐܬܿܐ ܕܡܘܬܐ ܠܐ ܡܬܚܙܝܐ ܗܘܬ ܒܗܘܢ. ܢܚ̈ܬܝܗܢ ܓܝܪ ܟܕ ܠܒܝܫܝܢ ܗܘܘܼ. ܟܕ ܕܡܟ: ܗܟܢܐ ܐܝܬܝܗܘܢ ܗܘܘ ܥܠ ܓܘܫ̈ܡܝܗܘܢ. ܘܦܓܪܐ ܘܒܣܪܐ ܕܩ̈ܢܘܡܝܗܘܢ ܗܘܐ ܟܠܗ ܘܐܝܟ ܕܡܢ ܨܦܪܐ ܠܪܡܫܐ ܕܡܟܘ ܗܘܘ ܒܠܚܘܕ ܘܐܬܬܥܝܪܘ ܣܒܪܝܢ ܗܘܘ. ܘܐܝܟ ܗܿܘ ܕܨܒܘܬܐ ܘܡܪܢܝܬܐ ܕܪܡܫܐܼ. ܗܘ ܩܝܡܝܐ ܗܘܬ ܒܗܘܢ. ܘܐܝܟ ܗܿܘ ܕܕܩܝܣ ܒܗܘܢ ܪܢܐ ܗܘܐ ܡܬܚܫܒܝܢ ܗܘܘ. ܘܟܕ pb. 198 ܟܡܝܪܝܢ ܘܐܒܝܠܝܢܼ ܘܥܝ̈ܢܝܗܘܢ ܕܡ̈ܥܢ ܗ̈ܘܝ܆ ܚܪܘ ܠܘܬ ܝܡܠܝܟܐ ܣܥܘܪܗܘܢܼ ܘܡܫܐܠܝܢ ܗܘܘ ܠܗ. ܘܝܠܦܝܢ ܡܢܗ ܥܠ ܐܝܠܝܢ ܕܡܬܡ̈ܠܠܢ ܗܘ̈ܝ ܒܡܕܝܢܬܐ ܒܪܡܫܐ. ܐܼܡܪ ܠܗܘܢ. ܐܝܟ ܡܕܡ ܕܐܡܿܪܬ ܠܟܘܢ ܕܒܪܡܫܐ ܐܬܬܒܥܢܢ ܕܢܕܒܿܚ ܠܦܬܟܪ̈ܐ. ܥܢܼܐ ܕܝܢ ܡܟܣܡܠܝܢܐ ܘܐܡܼܪ ܠܗܘܢ: ܐܚ̈ܝܼ. ܥܬܝܕܝܢܢ ܗܘ ܕܩܕܡ ܒܐܡܐ ܕܚܝܠܬܐ ܕܡܫܝܚܐ ܢܩܘܡ: ܐܠܐ ܡܢ ܩܕܡ ܒܐܡ ܕܕܝܢܐ ܕܒܢܝ̈ܢܫܐ ܠܐ ܢܬܚܠܼ. ܘܠܐܢܟܦܘܪ ܒܚܝ̈ܐ ܕܐܝܬ ܠܢ ܒܗܝܡܢܘܬܐ ܕܒܪܗ ܕܐܠܗܐ. ܘܐܼܡܪ ܠܝܡܠܝܟܐܼ. ܡܟܝܠ ܥܕܢܐ ܕܣܝܒܪܬܐܼ ܠܙܒܢܗ ܗܘܼܐ. ܐܠܐ ܣܒ ܟܣܦܐܼ ܘܡܛܝ ܠܡܕܝܢܬܐܼ. ܘܝܠܦ ܥܠ ܐܝܠܝܢ ܕܡܢ ܕܩܝܣ [ܡܠܟܐ ܡܬܦܩܕܢܼ. ܘܬܐ. ܗܢܘ ܕܝܢ ܐܘܣܦ ܠܢ ܥܠ] ܣܝܒܪܬܐ ܗܿ ܕܐܝܼܬܝܬ ܠܢ ܒܪܡܫܐܼ. ܘܬܐ. ܡܛܠ ܕܡܙܠܗܙܐ ܗܘܼܬ. [ܘܗܐ] ܟܦܢܝܢܢ. ܟܕ ܣܒܪܝܢ ܗܘܘܼ. ܕܫܢܬܐ ܗܼܘ ܕܠܠܝܐ ܒܠܚܘܕ ܕܡܟܝـ[ـܢ ܗܘܘ]. ܘܩܼܡ ܝܠܡܝܟܐ ܒܨܦܪܐܼ. ܐܝܟ ܥܝܕܐ ܕܟܠ ܝܘܡ. ܘܢܣܒ ܡܢ [ܟܣܦܐ] ܕܒܟܝܣܐ ܘܡܢ ܡܘܢܝܛܐ ܕܫ̈ܬܝܢ [ܘܬܪ̈ܬܝܢ ܘܡܢ ܕܐܪ̈ܒܥܝܢ ܘܐܪ̈ܒܥ ܕܒܕܪܐ ܗܿܘ܆ ܗܿܝ ܕܒܝ̈ܘܡܝ ܡܿܠܟܐ ܕܡܢ ܩܕܡ ܩܠܝܠ] ܙܒܢܐ ܕܝܘܡܝ̈ܗܘܢ [ܕܡܘ̈ܕܝܢܐ] ܐܬܛܒܼܥܬ. ܕܐܝܬܝܗܿ [ܩܕܡ ܬܠܬܡ̈ܐܐ ܘܫܒ̈ܥܝܢ ܘܬܪ̈ܬܝܢ] ܫ̈ܢܝܢ܆ ܥܕܡܐ ܠܝܘܡܐ ܗܿܘ [ܕܒܗ ܐܬܬܥܝܪܘ ܡܘ̈ܕܝܢܐ. ܘܠܨܦܕܗ ܕܝܘܡܐܼ] ܟܕ ܒܗܘܪܼ. ܢܦܩ ܝܡܠܝܟܐ ܡܢ ܡܥܪܬܐ. ܘܟܕ ܚܼܙܐ ܟܐܦ̈ܐ ܕܣܝ̈ܡܢ ܬܡܢ ܐܬܕܡܪ. ܐܠܐ ܠܐ ܐܝܬܝ ܥܠ ܒܠܗܼ ܕܡܢܐ ܗܘܝܗ. ܘܢܚܼܬ ܡܢ ܛܘܪܐܼ. ܘܪܕܐ ܗܘܐ ܕܢܐܬܐ ܠܡܕܝܢܬܐܼ ܠܐ ܒܐܘܪܚܐ: ܡܛܠ [ܕܩܢܝܛ ܗܘܐ] ܕܕܠܡܐ ܐܢܫ ܢܫܬܘܕܥܗܼ. ܘܢܝܬܝܘܗܝ ܩܕܡ ܡܿܠܟܐ ܕܩܝܣ. ܘܠܐ ܝܕܿܥ ܗܘܐ [ܕܓܪ̈ܡܘܗܝ ܕܛܢܦܐ] ܚܪ̈ܝܒܝܢ ܗܿܘܘ ܘܫܼܕܝܢ ܒܓܘ [ܫܝܘܠ. ܘܟܕ ܝܡܠܝܟܐ pb. 199 ܠܬܪܥـ]ـܐ ܕܡܕܝܢܬܐ ܩܼܪܒ ܗܘܐܼ. ܐܪܝܡ ܥܝ̈ܢܘܗܝ ܘܚܼܙܐ ܠܢܝܫܐ [ܕܨܠܝܒܐ ܥـ]ـܠ ܬܪܝܥܐ ܕܡܕܝܢܬܐܼ. ܕܡܢ ܠܥܠ ܩܒܝܥ ܗܘܐ. [ܘܟܕ ܚܼܙܐ] ܘܬܡܗ. ܘܡܓܢܒ [ܗܘܐ ܚܝܪܗܼ. ܘܚܐܿܪ ܒܗ] ܠܟܐ ܘܠܟܐ ܒܗܝܠܐܝܬ. ܘܐܿܙܠ ܗܘܐ [ܘܐܿܬܐ. ܘܪܢܿܐ ܗܘܐ ܡܬܕܡܪ ܒܚـ[ـܘ̈ܫܒܘܗܝ. ܘܐܬܟܪܟ [ܠܬܪܥܐ ܐܚܪܢܐ. ܘܗܟܢܐ ܚܼܙܐܼ] ܘܬܡܗ. ܘܐܬܟܪܟ ܠܟܠܗܿ ܡܕܝܢـ[ـܬܐܼ ܥܠ ܟܠܗܘܢ ܬܪ̈ܥܐ: ܘܚܼܙܐ ܕܥܠ ܟـ]ـܠܗܘܢ ܬܪ̈ܥܝܗܿ ܢܝܚܐ ܕܨܠܝܒܐ [ܩܒܝܥ ܗܘܐ.] ܘܐܫܬܓܢܝܬ ܠܗܿ ܐܦ ܡܕܝܢܬܐ ܒܥܝ̈ܢܘܗܝ. ܒܢ̈ܝܢܐ ܐܚܪ̈ܢܐ [ܕܠܐ ܚܼܙܝܢ] ܗܘܘ ܠܗ. ܘܡܗܠܟ ܗܘܐ ܘܬܡܗ. ܐܝܟ ܐܢܫ ܕܐܚܝܕܝܢ ܠܗ [ܨܘܪ̈ܢܐ.] ܘܐܬܼܐ ܘܩܼܡ ܥܠ ܬܪܥܐ ܗܿܘ ܕܣܡܝܟ ܗܼܘ ܥܠܘܗܝ [ܡܢ ܩܕܝܡܼ.] ܘܐܬܕܡܪ. ܒܝܬ ܠܗ ܘܠܢܦܫܗ ܐܡܿܪ ܗܘܐ: ܕܡܢܐ ܗܼܝ ܟܝ ܗܕܐ ܕܢܝܫܐ ܕܨܠܝܒܐ ܗܢܐ ܒܪܡܫܐ ܒܬܘ̈ܢܐ ܣܝܡ ܗܘܐܼ. [ܘܗܐ ܒܨܦܪܐ] ܣܝܡ ܥܠ ܬܪܥܗܿ ܕܡܕܝܢܬܐ ܟܕ ܚܕܪܐ ܘܡܟܢܫ [ܗܘܐ ܗܘܢܗ] ܘܠܒܟ ܗܘܐ ܦܓـ[ـܪܗ. ܟܕ ܐܿܡܪ] ܟܒܪ ܚܠܡܐ ܗܼܘ. ܘܒܬܪ[ܟܝܢ ܠܒܒ ܢܦܫܗ]. ܘܟܕ ܡܟܣܝ ܕܝܫܗ ܒܦܪܝܣܗܼ. ܥܼܠ ܐܼܙܠ [ܠܟܪܟܐ. ܘܟܕ ܥܐܠ ܒܫܘܩܐܼ. ܫܿܡܥ ܗܘܐ ܡܢ ܣ̈ܓܝـ]ـܐܐ ܟܕ ܡܡܠܠܝܢ ܚܕ ܥܡ ܚܕܼ. ܘܝܡܝܢ ܒܫܡܐ ܕܡܫܝܚܐܼ ܘ[ܝܬܝܪܐܝܬ ܕܿܚܠ] ܗܘܐܼ. ܘܐܫܬܓܢܝ ܒܚܘ̈ܫܒܘܗܝ. ܘܐܬܟܠܝܼ ܘܗܼܘ ܠܢܦܫܗ ܐܡܿܪ] ܗܘܐ: ܕܡܢܐ ܗܼܝ [ܟܝ ܗܕܐܼ ܠܐ ܝܿܕܥ ܐܢܐ.] ܕܗܐ ܒܪܡܫܐ ܠܝܬ ܗܘܐ ܐܢܫ ܕܓܠܝܐܝܬ ܡܡܠܠ [ܒܫܡܗ ܕܡܫܝܚܐ:] ܘܗܫܐ [ܒܨܦܪܐܼ ܠܫܢܐ] ܕܟܠܢܫܼ ܗܐ ܗܿܪܓ ܒܗ. [ܘܐܡܪ ܗܘܐ ܠܢܦܫܗܼ] ܟܒܪ ܠܘ ܗܕܐ ܗܝ [ܐܦܣܣ ܡܕܝܢܬܐ.] ܕܗܐ ܒܢ̈ܝܢܝܗܿ ܡܫܚܠܦܝܢܼ ܘܡܠܬܗܿ ܡܫܓܢܝܐ ܒܠܫܢܗܿ. ܘܡܕܝܢܬܐ ܐܚܪܬܐ [ܠܐ ܝܿܕܥ ܐܢܐ] ܕܩܪܝܒܐ ܗܝܼ [ܠܢ܆ ܘܠܐ ܚܙܝܐ] ܠܝ. ܘܩܼܡ ܘ[ܡܬܕܡܪ ܗܘܼܐ ܠܗ] ܒܝܬ ܠܗ ܘܠܢܦܫܗ. ܘܦܓܥ ܒܗ ܥܠܝܡܐ [ܚܕܼ ܘܫܐܠܗܼ. ܘܐܡܼـ]ـܪ܆ pb. 200 ܐܡܪ ܠܝܼ ܥܠܝܡܐܼ. ܡܿܢ ܫܡܗ ܠܡܕܝܢܬܐ ܗܕܐ. ܐܡܼܪ ܠܗܼ ܥܠܝܡܐ ܗܿܘܼ. ܫܡܗܿ ܐܦܣܘܣ. ܘܟܕ ܕܝܢ ܡܿܬܕܡܪ ܝܡܠܝܟܐܼ ܐܡܼܪ ܠܢܦܫܗ: [ܟܒـ]ـܪ ܠܝ ܓܼܕܫ ܡܕܡ ܘܛܥܿܝܬ ܒܗܘܢܝ. ܐܦܘܩ ܠܝ ܒܥܓܠ ܡܢ [ܡܕܝܢـ]ـܬܐ ܗܕܐ܆ ܕܠܡܐ ܐܛܥܐ ܘܐܿܒܕ. ܕܗܐ ܨܘܪ̈ܢܐ ܐܚܝܕܝܢ ܠܝ.. ܗܠܝܢ ܟܠܗܝܢ [ܗܼܘ ܝـ]ـܡܠܝܟܐ ܬܢܐ ܠܢܼ ܡܢ ܟܕ ܣܼܠܩ ܠܘܬ ܚܒܪ̈ܘܗܝ ܠܡܿܥܪܬܐ. [ܟܕ] ܐܬܓܠܝܬܿ ܢܚܡܘܬܗܘܢ ܘܐܬܟܬܒܬܿ ܒܟܬܒܐ.. ܗܝܕܝܢ ܝܡܠܝܟܐ ܟܕ ܪܗܝܒ ܕܢܦܘܩ ܠܗ ܡܢ ܡܕܝܢܬܐܼ. ܩܪܒ ܠܘܬ ܡܙܒ̈ܢܝ ܠܚܡܐ ܒܐܣܟܡܐ ܕܚܕܘܪܐ. ܘܐܦܩ ܡܢ ܟܝܣܗ ܟܣܦܐ. ܘܝܗܿܒ ܠܡ̈ܙܒܢܝ ܠܚܡܐ. ܗܼܢܘܢ ܕܝܢ ܚܪܘ ܒܟܣܦܐܼ. ܘܒܚܙܬܐ ܕܡܘܢܝܛܐ ܕܟܡܐ ܪܘܪܒܐܼ ܘܬܡܗ. ܘܚܕ ܥܠ ܚܕ ܡܝܒܠܝܢ ܗܘܘ ܠܗܿ. ܘܡܠܚܫܝܢ ܘܚܝܪܝܢ ܒܓܒܪܐ. ܘܐܿܡܪܝܢܼ ܗܢܐ ܣܝܡܬܐ ܐܫܟܚ. ܘܐܝܬܝܗܿ ܡܢ ܩܕܡ ܕܪ̈ܐ ܘܫܢ̈ܝܐ.. ܝܡܠܝܟܐ ܕܝܢ ܚܐܿܪ ܗܘܐ ܒܗܘܢ ܕܡܠܚܫܝܢ ܗܘܘ ܠܥܘܗܝܼ ܘܚܝܪܝܢ ܒܗܼ. ܘܐܬܬܙܝܥ. ܘܡܢ ܕܚܠܬܐ ܟܠܗ ܦܓܪܗ ܪܐܿܬ ܗܘܐ. ܘܣܿܒܪ ܗܘܼܐ ܕܡܫܬܘܕܥܘ ܐܫܬܘܕܥܘܗܝܼ. ܘܡܬܪܥܝܢ ܕܠܘܬ ܕܩܝܣ ܡܠܿܟܐ ܢܘܒܠܘܢܝܗܝ.. ܐܚܪ̈ܢܝ ܕܝܢ ܒܐܦ̈ܘܗܝ ܩܪܒܝܢ ܗܘܘ ܘܚܝܪܝܢ.. ܘܗܼܘ ܟܕ ܡܠܼܐ ܕܚܠܬܐ. ܘܩܿܐܡܼ ܐܡܼܪ ܠܗܘܢ: ܒܿܥܐ ܐܢܐ ܡܢܟܘܢܼ. ܗܐ ܟܣܦܐܼ ܝܗܝܒ ܠܝ ܠܟܘܢܼ ܘܠܚܡܐ ܠܐ ܒܿܥܐ ܐܢܐ ܕܐܣܒ.. ܗܼܢܘܢ ܕܝܢ ܐܪܡܝܘ ܥܠܘܗܝ ܐܝܕ̈ܝܐܼ ܘܐܚܕܘܗܝ. ܘܐܡܿܪܝܢ ܠܗܼ ܡܢ ܐܝܡܼܟܐ ܐܢܬܼ. ܕܣܝܡܬܐ ܕܡ̈ܠܟܐ ܩܕ̈ܡܝܐ ܡܫܟܚ ܠܟ. ܚܘܢ ܟܝܬ ܕܫܘ̈ܬܦܐ ܢܗܘܐ ܠܟ. ܘܡܟܣܝܢ ܥܠܝܟ. ܘܐܠܐܼ ܠܕܝܢܐ ܕܡܘܬܐ ܡܫܬܠܡ ܐܢܬ. ܗܼܘ ܕܝܢ ܬܡܗ ܒܢܦܫܗܼ ܠܕܝܢܐ ܕܡܘܬܐ ܡܫܬܠܡ ܐܢܬ. ܗܼܘ ܕܝܢ ܬܡܗ ܒܢܦܫܗܼ ܘܐܼܡܪ: ܗܐ ܡܢ ܗܿܝ ܕܠܐ ܕܚܿܠ ܗܿܘܝܬ ܡܢܗܼܿ. ܐܦ ܗܝܼ pb. 201 ܐܬܬܘܣܦܬܿ ܠܝ ܠܣܘܪܕܐ. ܐܡܪܝܢ ܠܗ ܐܢ̈ܫܐ ܗܿܢܘܢܼ. ܠܐ ܡܫܟܚܐ ܣܝܡܬܐ ܡܬܛܫܝܐܼ ܐܘ ܥܠܝܡܐ. ܐܝܟ ܡܐ ܕܣܿܒܪ ܐܢܬ.. ܗܼܘ ܕܝܢ ܝܡܠܝܟܐܼ. ܠܐ ܝܿܕܥ ܗܘܐ ܡܢܐ ܢܐܡܪ ܠܗܘܢ ܥܠ ܗܕܐ.. ܗܼܢܘܢ ܕܝܢ ܚܙܘ ܕܫܬܝܩ ܘܠܐ ܡܡܠܠܼ. ܘܐܫܩܠ ܦܪܝܣܗܼ ܐܪܡܝܘ ܒܨܘܪܗ. ܘܟܕ ܩܝܡܝܢ ܡܨܥܬ ܫܘܩܐ ܪܒܐܼ ܘܐܠܨܝܢ ܠܗܼ. ܪܗܼܛܬܿ ܡܠܬܐ ܒܟܠܗܿ ܡܕܝܢܬܐ. ܘܐܼܡܪ܇ ܕܚܕ ܡܫܟܚ ܣܝ̈ܡܬܐ ܐܫܬܟܚ. ܘܓܚܘ ܟܢ̈ܫܐܼ. ܘܟܢܫ ܠܘܬܗ. ܘܚܝܪܝܢ ܗܘܘ ܒܗ ܘܐܡܪܝܢܼ. ܕܗܢܐ ܥܠܝܡܐ ܢܘܟܪܝܐ ܗܼܘ ܘܠܐ ܚܼܙܐ ܠܢ ܡܡܬܘܡ. ܘܐܦܢ ܨܿܒܐ ܗܘܐ ܝܡܠܝܟܐ ܕܢܡܠܠ ܘܢܦܝܣ ܐܢܘܢܼ ܕܠܐ ܡܫܟܚ ܠܗ ܣܝܡܬܐܼ. ܡܢ ܗܿܝ ܕܟܠܢܫ ܐܡܿܪ ܗܘܐܼ ܕܠܐ ܝܿܕܥ ܐܢܐ ܠܗ: ܬܡܗ ܗܘܐ ܘܦܿܝܫ ܡܢ ܡܠܬܗ.. ܗܼܘ ܓܝܠ ܬܟܝܠ ܗܘܐ ܒܢܦܫܗܼ. ܘܣܿܒܪ ܕܐܒ̈ܗܐ ܐܝܬ ܠܗ ܒܡܕܝܢܬܐ. ܘܓܢܣܐ ܪܒܐ ܘܝܕܝܥܐ ܐܝܬ ܠܗ ܒܟܪܟܐ ܐܦܝܣܘܣ. ܘܝܿܕܥ ܗܘܐ ܘܫܪܝܪܐ ܠܗܼ. ܕܒܪܡܫܐ ܠܟܠܢܫ ܝܿܕܥ ܗܘܐܼ. ܘܒܨܦܪܐ ܐܦܠܐ ܚܕ ܐܫܬܘܕܥܗ. ܘܐܝܟ ܫܢܝܐ ܚܐܿܪ ܗܘܐ ܕܢܚܙܐ ܐܢܫ ܡܢ ܐܚ̈ܘܗܝ ܘܝܕ̈ܘܥܘܗܝܼ ܘܠܝܬ. ܘܟܕ ܐܚܝܕܝܢ ܠܗ ܨܘܪ̈ܢܝܐܼ ܘܩܐܿܡ ܗܘܐ ܒܝܢܬ ܟܢ̈ܫܐ. ܗܝܕܝܢ ܪܒܼܬܿ ܡܕܝܢܬܐ ܘܪܗܼܛܬܿ ܡܠܬܐ ܠܥܕܬܐ. ܘܐܫܬܡܥܬܿ ܠܩܕܝܫܐ ܡܪܝܣ ܐܦܝܣܩܦܐ ܕܝܠܗ ܕܟܪܟܐ. ܐܦ ܐܓܘܣܛܣ ܐܢܬܘܦܛܣ ܒܥܕܢܐ ܗܿܘܼ. ܠܘܬ ܐܦܝܣܩܦܐ ܐܣܬܩܒܠ. ܨܒܝܢܗ ܓܝܪ ܕܐܠܗܐ ܘܥܕ ܐܢܘܢ ܐܟܚܕܐܼ. ܕܣܝܡܬܐ ܕܚܝܬ ܡܝܬܐ ܒܐ̈ܝܕܝܗܘܢ ܬܬܓܠܝܐ ܠܟܠܗܘܢ ܥܡ̈ܡܝܢ. ܘܦܩܕ ܬܪ̈ܝܗܘܢ ܕܒܙܗܝܪܘܬܐ ܢܗܘܐ ܥܠܝܡܐܼ ܘܢܐܬܐ ܠܘܬܗܘܢܼ. ܟܕ (ܟܣܦܐ) ܒܐܝܕܗ ܘܢܓܕܘܢܝܗܝ ܗܟܝܠ ܠܝܡܠܝܟܐ ܕܢܘܒܠܘܢܝܗܝ ܠܥܕܬܐܼ. ܘܗܼܘ ܣܿܒܪ ܗܘܐ ܕܠܘܬ ܕܩܝܣ ܡܿܠܟܐ ܡܘܒܠܝܢ ܠܗ. ܘܠܟܐ ܘܠܟܐ ܚܐܿܪ pb. 202 ܗܘܐ. ܟܕ ܟܢ̈ܫܐ ܓܚܟܝܢ ܗܘܘ ܥܠܘܗܝܼ. ܐܝܟ ܕܥܠ ܫܢܝܐ. ܘܗܟܢܐ ܒܢܘܬܦܐ ܪܒܐܼ ܐܘܒܠܘܗܝ ܠܥܕܬܐ. ܐܢܬܘܦܛܣ ܘܡܪܝܣ ܫܩܼܠ ܟܣܦܐ ܡܢ ܐܝܕܗܼ ܘܐܬܕܡܪ ܒܗ. ܘܐܡܼܪ ܠܗ ܐܢܬܘܦܛܣ ܠܝܡܠܝܟܐ: ܐܝܟܐ ܗܝ ܣܝܡܬܐ ܕܐܫܟܼܚܬ. ܕܗܐ ܐܦ ܟܣܦܐ ܡܢܗܿ ܐܚܝܕ ܐܢܬ ܒܐܝܕܟ.. ܝܡܠܝܟܐ ܐܡܼܪ: ܣܝܡܬܐ ܡܡܬܘܡ ܠܐ ܐܫܟܿܚܬܼ. ܐܝܟ ܕܐܡܿܪܝܢ ܐܢܬܘܢ ܥܠܝ. ܐܠܐ ܐܢܐ ܝܿܕܥ ܐܢܐܼ. ܕܡܢ ܟܣܦܐ ܕܐܒ̈ܗܝܼ. ܘܡܢ ܥܘܪܦܢܐ ܕܟܪܟܐ ܗܢܐ ܐܝܬܘܗܝ ܟܣܦܐ ܕܐܝܬ ܒܐܝܕ̈ܝ. ܡܢܐ ܐܢ̈ܝܢ ܓܝܪ ܗܠܝܢ ܕܗܘܢܝܼ ܠܐ ܝܿܕܥ ܐܢܐ.. ܐܢܬܘܦܛܣ ܕܝܢ ܐܡܼܪ: ܡܢ ܐܝܡܟܐ ܐܢܬ.. ܝܡܠܝܟܐ ܐܡܼܪ: ܐܝܟ ܕܣܿܒܪ ܐܢܐܼ. ܡܢ ܡܕܝܢܬܐ ܗܕܐ ܐܝܬܝ.. ܐܡܼܪ ܠܗܼ. ܒܪ ܡܢ ܐܢܬ. ܘܡܿܢ ܝܿܕܥ ܠܟ ܢܐܬܐ ܢܣܗܕ ܥܠܝܟ.. ܘܐܡܼܪ ܠܗܘܢ ܫܡ ܐܒܗ̈ܘܗܝ: ܘܠܐ ܝܿܕܥ ܐܢܘܢ ܐܢܫ. ܐܦܠܐ ܐܢܫ ܐܫܕܘܥܗܼ. ܠܐ ܠܗܼ ܘܠܐ ܠܐܒ̈ܗܘܗܝ.. ܐܢܬܘܦܛܣ ܐܡܼܪ: ܕܠܐ ܐܢܬܼ ܘܫܪܪܐ ܠܝܬ ܠܘܬܟ.. ܗܼܘ ܕܝܢ ܩܐܿܡ ܗܘܐܼ ܘܡܪܟܢ ܪܝܫܗ. ܟܕ ܫܠܼܐ ܘܨܕܘܕ. ܘܐܡܿܪܝܢܢ ܗܘܘܼ ܟܒܪ ܫܢܝܐ ܗܘ. ܐܚܪ̈ܢܐ ܕܝܢ ܐܡܿܪܝܢܼ ܠܐܼ. ܐܠܐ ܗܼܘ ܡܫܢܐ ܢܦܫܗܼ ܕܐܝܟܢܐ ܢܬܦܿܠܛ ܡܢ ܐܢܢܩܐ ܗܕܐ.. ܐܢܬܘܦܛܣ ܚܐܿܪ ܗܘܐ ܒܗ ܒܚܡܬܐܼ ܘܐܡܪ. ܐܝܟܢܐ ܢܚܫܒܟ ܫܢܝܐ. ܐܘ ܐܝܟܢ ܢܗܝܡܢܟ ܕܟܣܦܐ ܡܢ ܟܝܣܐ ܕܐܒ̈ܗܝܟ ܗܘܼ. ܕܗܐ ܆ܛܒܥܐ ܕܐܡܘܢܝܛܐ ܡܢ ܟܬܝܒ̈ܬܐ ܕܒܗܼܿ. ܥܒܝܪܐ ܗܼܝ ܠܡ̈ܬܝܢ ܘܫܒ̈ܥܝܢ ܫ̈ܢܝܢ. ܘܩܠܝܠ ܩܕܝܡ ܠܕܩܝܣ ܡܿܠܟܐ. ܘܠܐ ܐܬܚܠܛܬܼ ܒܐܡܘܢܝܛܐ ܐܚܪܬܐ. ܘܠܐ ܕܡܝܐ ܠܐܡܘܢܛܝܐ ܗܕܐ ܕܐܝܬ ܒܗܿ ܡܣܒܐ ܘܡܬܠܐ ܕܥܠܡܐ. ܕܠܡܐ ܩܕܡܝܢ ܐܒܗ̈ܝܟ ܠܕܪ̈ܐ ܘܠܫ̈ܢܝܐ ܣܓܝ̈ܐܬܐܼ. ܕܗܐ ܐܢܬ ܥܠܝܡܐ ܐܢܬ: ܘܨܿܒܐ ܐܢܬ ܕܬܛܥܐ ܒܣܒ̈ܐ ܘܒܚܝ̈ܡܐ ܕܐܦܣܘܣ ܡܕܝܢܬܐ. pb. 203 ܡܟܝܠ ܦܩܿܕ ܐܢܐ ܕܠܐܣܘܪ̈ܐ ܘܠܢ̈ܓܕܐ ܬܫܬܠܡܼ. ܥܕܡܐ ܕܬܘܕܐ ܐܝܟܐ ܗܼܝ ܣܝܡܬܐ ܕܐܫܟܼܚܬ.. ܗܝܕܝܢ ܝܡܠܝܟܐ ܟܕ ܫܡܼܥ ܗܠܝܢܼ ܢܦܼܠ ܥܠ ܐܦ̈ܘܗܝ ܩܕܡܘܗܝܼ ܘܐܡܼܪ ܠܗܘܢܼ ܒܿܥܐ ܐܢܬ ܡܢܟܘܢܼ ܡܪ̈ܝܼ. ܚܕܐ ܕܡܫܐܠ ܐܢܐ ܠܟܘܢ܇ ܐܡܪܘ ܠܝ܇ ܘܟܠ ܕܒܠܒܝ ܓܿܠܐ ܐܢܐ ܠܟܘܢ. ܕܩܝܣ ܡܿܠܟܐ ܕܐܝܬ ܗܢܘܐ ܒܡܕܝܢܬܐ ܗܕܐܼ ܐܝܟܘܼ.. ܗܝܕܝܢ ܡܪܝܣ ܐܡܪܼ. ܠܝܬ ܒܪܝܼ ܡܿܠܟܐ ܝܘܡܢܐ ܒܐܪܥܐ ܕܫܡܗ ܕܩܝܣ: ܐܠܐ ܐܢ ܚܕܼ ܕܡܝܬ ܡܢ ܕܪ̈ܐ ܣܓܝ̈ܐܐ.. ܗܝܕܝܢ ܥܢܼܐ ܝܡܠܝܟܐܼ ܘܐܡܪܼ. ܟܕ ܣܝ̈ܡܢ ܐܦ̈ܘܗܝ ܒܐܪܥܐ ܩܕܡܝܗܘܢܼ. ܘܐܡܪ: ܡܟܝܠ ܡܪܝܼ ܠܝ ܨܘܪ̈ܢܐ ܐܚܝܕܝܢ ܠܝ. ܘܡܠܬܝ ܠܐ ܡܬܗܝܡܢܐ ܠܒܪܢܫ. ܬܘ ܥܡܝܼ ܘܐܚܘܝܟܘܢ ܚܒܪ̈ܝ ܕܒܡܥܪܬܐ ܕܒܐܢܟܝܠܝܘܣ. ܘܡܢܗܘܢ ܝܠܦܬܘܢ. ܐܦ ܐܢܐ ܝܿܕܥ ܐܢܐܼ ܕܡܢ ܩܕܡ ܕܩܝܣ ܡܿܠܟܐ ܬܡܢ ܐܝܬܝܢܼ ܗܐ ܝܘ̈ܡܬܐ. ܘܗܐ ܒܪܡܫܐ ܚܓܙܿܝܬ ܕܥܠ ܕܩܝܣ ܡܿܠܟܐ ܠܡܕܝܢܬܐ ܐܦܣܘܣ. ܐܢ ܐܦܣܘܣ ܗܼܝ ܡܕܝܢܬܐ ܗܕܐܼ ܠܐ ܝܿܕܥ ܐܢܐ.. ܗܝܕܝܢ ܡܪܝܣ ܐܦܝܣܩ ܬܗܪ ܒܗܿ ܒܗܕܐܼ ܘܐܼܡܼ. ܡܕܡ ܗܘ ܓܠܝܢܐ ܗܢܐܿ. ܕܚܘܝ ܐܠܗܐ ܒܝܕ ܥܠܝܡܐ ܗܢܐ. ܐܠܐ ܢܐܙܠ ܢܚܙܝܘܗܝ.. ܘܩܡ ܗܼܘ ܡܪܝܣ ܘܐܢܬܘܦܛܣ ܥܡܗܼ (ܘܝܬܒܘ) ܥܠ ܪ̈ܟܘܒܐܼ. ܘܚܐܪ̈ܐ ܘܪܘܪ̈ܒܢܐ ܕܟܪܟܐ ܘܟܢ̈ܫܐ ܕܡܕܝܢܬܐ ܥܡܗܘܢܼ. ܘܣܠܩ ܠܛܘܪܐ. ܘܟܕ ܡܛܝܘ ܠܡܥܪܬܐܿ. ܥܼܠ ܝܡܠܝܟܐ ܩܕܡܝܗܘܢ ܠܘܬ ܡܘ̈ܕܝܢܐ. ܘܥܼܠ ܒܬܪܗ ܡܪܝܣ ܐܦܼܝܣ. ܘܗܼܘ ܥܐܠ ܒܬܪܥܐ ܕܡܥܪܬܐ ܐܫܟܚ ܒܙܘܝܬܐ ܕܬܪܥܐ ܡܢ ܝܡܝܢܐ ܓܠܘܣܩܡܐ ܚܕ ܕܢܚܫܐ. ܘܪܡܼܝܢ ܥܠܘܗܝ ܛܒ̈ܥܐ ܬܪ̈ܝܢ ܕܣܐܡܐܼ. ܘܫܩܠܗ. ܘܩܡ ܒܬܪܥܐ ܡܢ ܠܒܪ: ܘܩܼܪܐ ܠܚܐܪ̈ܐ ܘܠܪܘܪ̈ܒܢܐ ܕܟܪܟܐ. ܘܩܕܡ ܐܢܬܘܦܛܣ ܐܪܝܡ ܚ̈ܬܡܐ ܗܠܝܢ. ܘܦܼܬܚ ܘܐܫܟܚ ܠܘ̈ܚܐ ܬܪ̈ܝܢ ܕܐܒܪܐ. ܘܩܪܐܼ ܘܗܟܢܐ ܟܬܝܒ ܗܘܐ pb. 204 ܒܗܝܢ܆ ܡܢ ܩܕܡ ܕܩܝܘܣ ܡܠܟܐܼ ܥܕܩ ܡܟܣܡܠܝܢܐ ܘܝܡܠܝܟܐ. ܘܡܕܛܠܘܣ ܘܕܝܢܘܣܘܣ ܘܝܗܘܢܝܣ ܘܣܪܦܝܘܢ ܘܐܟܣܘܣܛܝܕܝܢܘܣ ܘܐܢܛܘܢܝܢܘܣ ܡܘ̈ܕܝܢܐ. ܗܠܝܢ ܕܒܦܘܩܕܢܐ ܕܡܠܟܐ ܐܣܬܪܦܬ ܒܐܦ̈ܝܗܘܢ ܡܥܪܬܐ ܗܕܐ ܒܟܐ̈ܦܐ. ܘܟܬܝܒܐ ܡܘܕܝܢܘܬܗܘܢ ܡܢ ܠܬܚܬ.. ܘܟܕ ܩܪܘ ܐܢ̈ܝܢ ܠܟܬܝܒ̈ܬܐ ܗܠܝܢܼ ܬܡܗ. ܘܫܒܚܘ ܠܐܠܗܐܼ ܥܠ ܬܕܡܪ̈ܬܐ ܘܦܪ̈ܝܫܬܐ ܕܡܚܘܐ ܠܒܢܝ̈ܢܫܐ. ܘܐܙܥܩܘ ܟܠܗܘܢ ܒܩܠܐ ܕܬܫܒܘܚܬܐ. ܘܥܠܘ ܐܫܟܚܘ ܐܢܘܢ ܠܡܘ̈ܕܝܢܐ ܗܠܝܢܼ ܟܕ ܝܬܼܒܝܢ ܒܙܗܝܘܬܐ. ܘܕܡܿܝܢ ܦܪ̈ܨܘܦܝܗܘܢ ܠܪܘܕܐ ܫܪܘܝܐ. ܘܢܦܠܘ ܡܪܝܣ ܥܡ ܐܢܬܘܦܛܝܣ. ܘܣܓܕ ܠܗܘܢ ܥܠ ܐܪܥܐܼ. ܗܼܢܘܢ ܘܪܘܪ̈ܒܢܐ ܘܟܢ̈ܫܐ ܟܠܗܘܢ. ܟܕ ܡܫܒܚܝܢ ܠܡܫܝܚܐ ܡܪܗܘܢ܇ ܕܫܘܘ ܕܢܚܙܘܢ ܚܙܬܐ ܗܕܐ ܬܡܝܗܬܐ. ܘܐܦ ܣܿܗܕܝܢ ܕܡܠܠ ܥܢܗܘܢ. ܘܟܠܗܝܢ ܐܝܠܝܢ ܕܒܝܘ̈ܡܝ ܕܩܝܣ ܡܿܠܟܐ ܐܘܕܥ ܠܡܪܝܣ ܘܠܐܢܬܘܦܛܝܣ ܘܠܪܘܪ̈ܒܢܐ ܕܟܪܟܐ. ܘܒܪ ܫܥܬܗ ܪ̈ܟܒܐ ܐܫܬܠܚ ܠܘܬ ܬܝܕܣܝܘܣ ܡܿܠܟܐ ܒܟܗܬܝܒܬܐ. ܘܐܡܼܪ ܠܗ. ܕܒܥܓܠ ܬܐܬܐ ܡܠܟܘܬܟ. ܘܬܚܘܐ ܬܕܡܪ̈ܬܐ ܕܒܝ̈ܘܡܝ ܡܠܟܘܬܟ ܚܘܝ ܐܠܗܐ ܒܥܠܡܐ. ܢܘܗܪܐ ܓܝܪ ܕܡܘܠܟܢ ܕܚܝ̈ܐ ܡܢ ܥܦܪܐ ܨܼܡܚ ܠܢ܆ ܘܩܝܡܬܐ ܕܥܢ̈ܝܕܐ ܡܢ ܩܒܪ̈ܐ ܕܢܚܬ ܒܦܓܪ̈ܐ ܙܗ̈ܝܐ ܕܐܬܚܕܬ.. ܟܕ ܕܝܢ ܫܡܼܥ ܡܿܠܟܐ ܬܝܕܣܝܘܣ ܒܪ ܫܥܬܗ ܩܡ ܡܢ ܣܩܐ ܘܩܛܡܐ ܕܥܠܘܗܝ ܡܟܝܟ ܗܘܐ. ܘܐܬܚܼܝܠܬܿ ܪܘܚܗ ܕܙܟܝܐܼ ܘܐܙܕܗܝ. ܘܦܼܪܣ ܐܝܕ̈ܘܗܝ ܠܘܬ ܐܠܗܐܼ ܘܐܡܼܪ: ܡܘܕܐ ܐܢܐ ܠܟ ܒܪܐ ܡܫܝܚܐܼ ܡܠܟܐ ܕܫܡܝܐ ܘܕܐܪܥܐܼ. ܕܡܢ ܫܡܫܐ ܕܙܕܝܩܘܬܐ ܢܘܗܪܐ ܕܢܼܚ ܠܢ. ܘܠܐ ܕܥܼܟ ܫܪܓܐ ܕܡܘܕܝܢܘܬܝܼ. ܡܢ ܒܝܬ ܠܡܦܝܕܐ ܕܐܒ̈ܗܝ. ܘܠܐ ܥܼܡܛ ܘܢܼܬܪ ܛܒܥܐ ܕܗܝܡܢܘܬܝܼ ܡܢ ܬܓܐ ܙܟܝܐ ܕܩܘܣܛܢܛܝܢܘܣ ܡܿܠܟܐ pb. 205 ܡܗܝܡܢܐ. ܘܫܼܡܥ ܐܦ̈ܝܣܩ ܘܪ̈ܘܪܒܢܝ ܡܿܠܟܐ ܥܡܗ. ܘܩܠܝܠܐܝܬ ܒܪ̈ܟܫܐ ܘܒܩܪ̈ܘܟܐ ܘܡܪ̈ܟܒܬܐܼ. ܐܬܘ ܡܢ ܩܘܛܢܛܝܢܐ ܠܐܦܣܘܣ ܡܕܝܢܬܐ. ܘܢܦܼܩܬܿ ܟܠܗܿ ܡܕܝܢܬܐ ܠܐܘܪܥܗ ܕܡܿܠܟܐܼ. ܥܡ ܐܦܝܣܩ̈ܦܐ ܘܪܘܪ̈ܒܢܐ ܕܟܪܟܐ. ܘܣܠܩܘ ܠܘܬ ܡܘܕ̈ܝܢܐ ܕܒܡܥܪܬܐ ܕܒܐܢܟܝܠܐܣ ܛܘܪܐ. ܘܣܘܚܘ ܡܘܕ̈ܝܢܐ ܠܐܘܪܥܗ ܕܡܿܠܟܐ. ܘܒܚܙܬܗ ܐܙܕܗܝ ܡܫܟܐ ܕܐܦ̈ܝܗܘܢ.. ܘܥܦܩ ܐܢܘ̤ܼ ܘܒܟܼܐ ܥܠ ܨܘܪ̈ܝܗܘܢ. ܘܝܬܒ ܩܕܡܝܗܘܢ ܥܠ ܥܦܪܗܿ ܕܐܪܥܐ. ܘܚܐܪ ܗܘܐ ܒܗܘܢܼ. ܘܡܫܒܚ ܗܘܐ ܠܐܠܗܐ. ܟܕ ܪܥܿܡ ܗܘܐ ܠܒܗ ܒܬܘܕܝܬܐܼ. ܘܐܼܡܪ: ܒܚܙܬܟܘܢܼ ܐܝܟ ܗܿܘ ܕܒܡܿܠܟܐ ܡܫܝܚܐ ܚܐܿܪ ܐܢܐܿ. ܟܕ ܩܪܐ ܠܠܥܙܪ ܘܢܼܦܩ ܡܢ ܩܒܪܐ. ܘܐܝܟ ܕܡܢ ܟܕܘ ܩܠܗ ܫܿܡܥ ܐܢܐ ܒܡܬܝܬܗ ܘܒܫܘܒܗܪܗܼ. [ܟܕ ܡܢ ܩܒܪ̈ܐ ܢܿܦܩܝܢ] ܡܝ̈ܬܐ ܠܐܘܪܥܗ ܕܠܐ ܬܘܗܝܐ.. ܘܐܼܡܪ ܡܟܣܡܠܝܢܐ ܠܡܿܠܟܐܼ. ܡܟܝܠ ܦܘܫ ܒܫܠܡܐ ܒܫܠܡܘܬܐ ܕܗܝܡܢܘܬܟ. ܘܡܫܝܚܐ ܝܫܘܥ ܒܪܐ ܕܐܠܗܐܼ ܢܢܛܪ ܠܡܠܟܘܬܟ ܡܢ ܕܘܒܪ̈ܘܗܝ [ܕܒܝܫܐ] ܬܬܗܝـ]ـܡܢ ܠܟ ܕܝܢ ܕܡܛܠܬܟ ܗܘ ܐܥܝܪܢ ܡܪܢ ܩܕܡ [ܝܘܡܐ ܪܒܐ ܕܘܚܡܐ. ܚـ]ـܢܢ ܓܝܪܼ ܐܝܟ ܥܘܼܠܐ ܕܟܡܐ ܕܫܼܪܐ ܒܟܪܣܗܿ ܕܐܡܗ ܠܐ (ܪܓܝܫ) ܠܐ ܒܐ[ܝܩܪ]ܐ ܘܠܐ ܒܨܥـ[ـܪܐܼ ܘܠܐ ܒܓܐܝܘܬܐ] ܘܫܦܠܐܼ. ܘܟܕ ܚܝܼ ܠܐ ܪܓܝܫ [ܒܡܘܬܐ ܘܒܚܝ̈ܐ:] ܗܟܐܢ ܐܦ ܚܢܢ [ܫܠܼܝܢ ܗܘܝܢ ܘܢܝـ]ـܚܼܝܢ܇ ܐܝܟ ܕܡ̈ܟܐ [ܕܠܐ ܪܢܝـ]ـܐ. ܘܟܕ ܗܠܝܢ [ܐܡܪܘ] ܟܕ ܡܠܟܐ ܘ[ܚܐܪ̈ܐ ܘܐܦ̈ܣܩܦـ]ـܐ ܚܝܪܝܢ ܒܗܘܢܼ [ܢܡܘ] ܘܕܡܟܘ. ܘܥܠ ܥܦܪܐ ܐܣܡܟܘ ܪ̈ܝܫܝܗܘܢܼ. ܘܐܫܠܡ ܪ̈ܘ[ܚܬܗܘܢܼ ܒܦـ]ـܘܩܕܢܐ ܕܐ[ܠܗܐ. pb. 206 ܘܩܡ] ܡܿܠܟܐ ܠܥܠ ܡܢܗܘܢܼ. ܟܕ ܒܿܟܐ. ܘ[ܠܒ̈ܘܫܝ ܡܠـ]ـܟܘܬܗܼ [ܦܪܣ ܠܥܠ] ܡܢܗܘܢ ܥܠ ܓܘܫ̈ܡܝܗܘܢ. ܘܣܪܩܒ ܡܿܠܟܐ ܕܬܡ̈ܢܝܐ ܓܠܘ̈ܣـ[ܩܡܐ ܕܕܗܒـ]ـܐ ܢܗܘܘ ܠܓܘܫ̈ܡܝܗܘܢ. ܘܒܗ ܒܠܠܝܐ ܐܬܚܙܝܘ ܠܡܿܠܟܐ ܒܚܠܡܐܼ. ܘܗܟܘܬ ܐܡܼܪܘ ܠܗ: ܕܡܢ ܥܦܪܐ ܐܬܢܚܡ ܦܓـ[ـܪ̈ܝܢ. ܠܐ ܗܘܐ] ܡܢ ܕܗܒܐ ܘܣܐܡܐ. ܐܦ ܗܫܐ ܒܗ ܒܕܘܟܬܢܼ ܥܠ ܥܦܪܐ ܫܒܘܩ ܠܢ ܒܡܥܪܬܐ. ܗܝܕܝܢ ܡܿܠܟܐ ܒܪ ܫܥܬܗ ܦܩܼܕ܆ [ܘܩܘ̈ܦܣܐ ܕܕ]ܗܒܐ ܬܩܢ ܬܚܘܬܝܗܘܢ. ܘܫܒܼܩ ܗܢܘܢ ܒܕܘ̈ܟܝܬܗܘܢܼ. [ܥܕܡܐ ܠܝܘܡܢـ]ـܐ. ܘܒܟܢܘܫܝܐ ܪܒܐ ܕܐܦܝܣܩ̈ܦܐܼ. ܗܘܐ ܥܐܕܐ ܪܒܐ ܕܕܘ[ܟܪܢܐ ܠܡܘܕ̈ܝܢܐ.] ܘܥܼܒܕ ܡܿܠܟܐ ܙ[ܕܩܬܐ ܪܒܬܐ ܠܟـ[ـܠܗܘܢ ܡ̈ܣܟܢܐ ܕܐܬܪܐ. [ܘܫܼܪܐ ܠܐܦܣ̈ܩ] ܕܐܣܝܪ̈ܝܢ ܗܘܘܼ. ܒܐܟܣܘܪܝܐ. ܘܒܚܕܘܬܐ ܕܗܝܡܢܘܬܗ ܗ[ܦܟ ܘܐܬܘ] ܥܡܗ ܐܦ ܐܦܣ̈ܩܦܐ ܠܩܘܣܛܢܛܝܢܘ ܦܘܠܝܣ. ܟܕ ܡܫܒܚܝܢ [ܗܘܘ] ܠܐܠܗܐ ܡܪܐ ܕܡ̈ܝܬܐ ܘܕܚܝ̈ܐ. ܕܐܦ ܚܢܢ ܥܡܗܘܢ ܢܫܒܚ ܐܦ ܢܩܠܣ ܠܬܠܝܬܝܘܬܐ ܡܫܒܚܬܐ ܕܐܒܐ ܘܕܒܪܐ ܘܪܘܚܐ ܩܕܝܫܐ. ܗܫܐ ܘܒܟܠܙܒܢܼ ܘܠܥܠܡ ܥܠܡܝܢ. ܐܡܝܢ܀ ܢܗܦܘܟ ܠܢ ܠܣܕܪܐ ܕܬܫܥܝܬܢܼ. ܗܫܐ ܫܠܡ ܦܘܣܩܐ ܕܬܫܥܝܬܐ ܕܛܠܝ̈ܐ ܕܐܦܣܘܣ ܡܕܝܢܬܐ...

ܬܘܒ. ܫܢܬ ܫܒܥ̈ܡܐܐ ܘܬܠ̈ܬܝܢ ܘܫ̈ܒܥܼ. ܢܚܼܬ ܗܠܝܘܢ ܠܒܝܬ ܢܗܪ̈ܝܢ܆ ܕܢܥܒܕ ܫܝܢܐ ܥܡ ܦܪ̈ܣܝܐ. ܘܟܕ ܐܬܼܐ ܗܠܝܘܢ ܠܒܝܬ ܢܗܪ̈ܝܢ܆ ܘܢܚܼܬ ܠܬܚܬ ܡܢ ܕܪܐ: ܫܪܐ ܒܚܪܝܬܐ ܗܿܝ ܕܥܒܕܘ ܬܡܢ ܪ̈ܗܘܡܝܐ ܩܕܡ ܩܠܝܠܼ ܡܛܠ ܢܘܛܪܗܘܢܼ. [ܘܫܕܪ ܗܘܐ ܐܝܙܓܕܐ ܥܠ pb. 207 ܫܠܡܐܼ] ܠܡܟܣܝܡܣ ܓܒܪܐ ܚܟܝܡܐ. ܗܢܐ ܟܕ [ܐܙܠ] ܠܘܬ ܡܠܟܐ [ܕܦܪ̈ܣܝܐ ܡܛܝܒܐܝܬ] ܨܒܼܐ ܗܘܐ ܕܢܩܒܠܗܿ ܠܐܝܙܓܕܘܬܐ܆ ܡܛܠ ܕܣܓܝ [ܓܡܪ] ܡܢ ܚܝܠܩ ܒܟܦܢܐ. ܐܠܐ ܠܐ ܫܒܩܘܗܝ ܕܢܥܒܕ ܗܕܐܼ. ܗܢܘܢ ܕܡܬܩܪܝܢ ܒܝܬ ܦܪ̈ܣܝܐܼ. ܠܐ ܡ̈ܝܘܬܐ. ܕܗܘܘ ܐܝܟ ܥܣܪܐ ܐܠܦ̈ܝܢ [ܓܒܪ̈ܐ ܚ̈ܝܠܬܢܐ. ܟܕ ܐܡܿܪ]ܝܢ ܕܠܐ ܢܩܒܠ ܫܝܢܐ ܥܕܡܐ [ܕܐܙܠܝܢܢ ܘܢܦܠܝܢܢ] ܥܠܝܗܘܢ ܡܢ ܫܠܝ ܟܕ ܠܐ ܡܛܝܒܝܢ. ܘܚܒܫܗ ܠܐܝܙܓܕܐ ܗܿܘ ܘܢܿܛܪ ܗܘܐ ܠܗ. ܘܫܕܪ ܠܐ ܡ̈ܝܘܬܐܼ. ܕܢܦܠܘܢ ܥܠ ܗܠܝܘܢ ܘܕܥܡܗܼ ܒܩܪܒܐ. ܘܟܕ ܕܝܢ ܐܬܼܘ ܐܬܦܠܓܘ ܠܬܪ̈ܬܝܢ ܡ̈ܢܘܢ܇ ܘܚܒܫ ܒܡܨܥܬܐ ܠܟܢܦܐ ܚܕܐ ܕܪ̈ܗܘܡܝܐ . . . . . . . . ܘ ܠܡܢܬܐ ܚܕܐ ܕܦܪ̈ܣܝܐܼ ܡܥܬܕܝܢ ܗܘܘ ܥܠܝܗܘܢ. ܡܛܠ ܕܡܢܬܐ ܐܚܪܬܐ ܕܦܪ̈ܣܝܐ ܒܟܡܐܢܐ ܝܿܬܒܐ ܗܘܬ ܡܢ ܒܣܬܪܗܘܢܼ ܘܠܐ ܡܬܚܙܝܐ ܗܘܬ ܠܗܘܢ. ܡܛܠ ܕܡܢ ܫܠܝ ܐܪܡܝܘ ܥܠܝܗܘܢ. ܘܟܕ ܥܬܝܕ ܗܘܐ ܕܢܗܘܐ ܩܪܒܐܼ. ܘܐܬܚܒܫܘ ܪ̈ܗܘܡܝܐ ܒܡܨܥܬܐܼ. ܘܐܦ ܩܪܒܝܢ ܠܡܐܒܕܘ ܩܠܝܠܐܝܬ ܐܕܝܩ ܡܢ ܫܠܝ ܚܝܠܐ ܕܪ̈ܗܘܡܝܐ ܡܢ ܪܡܬܐ ܚܕܐܼ. ܐܝܟ ܥܣܪ̈ܝܢ ܐܠܦ̈ܝܢ. ܟܕ ܪܓܫܝܢ ܒܗܿܝ ܕܩܕܡܝܗܘܢ. ܗܠܝܢ ܕܒܝܕ ܡܕܒܪܢܘܬܐ ܐܠܗܝܬܐ ܗܘ̈ܝ. ܡܫܥܒܕܝܢ ܗܘܘ [ܕܝܢ] ܠܦܪܩܝܦܣ. ܗܢܐ ܕܝܢ ܟܕ ܚܼܙܐ ܕܩܪܒܝܢ ܠܡܒܕܘ ܪ̈ܗܘܡܝܐ [ܚܒܪ̈ܘܗܝܼ] ܐܬܼܐ ܡܢ ܒܣܬܪܗܘܢ ܕܦܪ̈ܣܝܐ. ܘܐܬܚܒܫܘ ܡܟܝܠ ܦܪ̈ܣܝܐ ܒܡܨܥܬܐ. ܘܠܟܠܗܘܢ ܒܥܕܢܐ ܙܥܘܪܐ ܩܛܠ. ܘܗܦܟܘ ܐܦ ܥܠ ܗܿܝ ܡܢܬܐ ܐܚܪܬܐ ܕܝܿܬܒܐ ܗܘܬ ܒܟܡܝܢܐܿ. ܘܠܟܠܗܘܢ ܚܪܒܘ. pb. 208 ܘܗܟܢܐ ܗܠܝܢ ܕܡܬܩܪܝܢ ܒܝܬ ܦܪ̈ܣܝܐ ܠܐ ܡܝ̈ܘܬܐܼ. ܡܝ̈ܘܬܐ ܐܬܚܙܝܘ. ܡܫܝܚܐ ܥܒܼܕ ܬܒܥܬܐ ܡܢ ܦܪ̈ܣܐ ܥܠ ܕܩܛܠܘ ܗܘܘ ܠܣ̈ܓܝܐܐ ܥܒ̈ܕܘܗܝ ܟܪ̈ܣܛܝܢܐ. ܟܕ ܕܝܢ ܝܕܥܘܼ ܡܠܟܐ ܕܦܪ̈ܣܝܐ ܒܗܬܬܐ ܗܕܐ ܕܗܘܬ ܠܗܼ. ܥܒܼܕ ܠܢܦܫܗ ܐܝܟ ܠܐ ܝܕܥ ܡܢܐ ܗܘܿܐ. ܘܩܒܠܗ ܗܘܐ ܠܐܙܓܕܐܼ. ܘܐܡܼܪ ܠܗ. ܕܠܘ ܡܛܠ ܪ̈ܗܘܡܝܐܼ. ܥܿܒܕ ܐܢܐ ܫܝܢܐ. ܐܠܐܼ ܠܟ ܝܗܿܒ ܐܢܐ ܛܝܒܘܬܐ. ܘܗܟܢܐ ܗܟܝܠ ܐܬ[ܟܠܝ] ܡܢ ܦܪܣ ܩܪܒܐ ܡܛܠ ܟܪ̈ܣܛܝܢܐ ܕܬܡܢ. ܘܐܦ ܪܕܘܦܝܐ ܕܦܪ̈ܣܝܐ ܕܥܠ ܟܪ̈ܣܛܝܢܐ ܕܐܪܥܗܘܢ ܫܠܐ. ܀ ܀ ܫܢܬ ܫܒ̈ܥܡܐܐ ܘܬܠ̈ܬܝܢ ܘܬܫ̈ܥܼ. ܡܝܬ ܐܛܝܩܘܣ ܐܦܝܣܩܦܐ ܕܩܘܣܛܢـ ܦܘܠܝܣ. ܘܗܘܼܐ ܚܠܦܘܗܝ ܣܝܣܝܢܘܣ.܀ ܘܒܫܢܬ ܫܒ̈ܥܡܐܐ ܘܐܪ̈ܒܥܝܢ ܘܚܕܐܼ. ܡܝܬ ܗܼܘ ܣܝܣܝܢܘܣ. ܘܗܘܼܐ ܒܕܘܟܬܗ ܢܣܛܘܪܝܘܣ.܀܀ ܘܬܘܒ ܒܫܢܬ ܫܒ̈ܥܡܐܐ ܘܐܪܒܥܝܢ ܘܬܠ̈ܬܼ. ܣܕܩ ܢܫܛܘܪܝܘܣ ܠܥܕܬܐܼ ܘܠܗܝܡܢܘܬܐ ܫܪܝܪܬܐ. ܘܐܡܼܪ. ܕܠܐ ܙܿܕܩ ܠܡ ܕܡܪܝܡ ܝܠܕܬ ܐܠܗܐ ܬܬܩܪܐ.. ܘܬܘܒ ܐܡܼܪ. ܕܐܢܐܼ ܠܗܘܿ ܕܗܘܼܐ ܒܪ ܝܪܚܐ ܘܬܪ̈ܝܢ܆ ܐܠܗܐ ܠܐ ܡܫܡܞ ܐܢܐ.܀ ܥܠ ܗܿܝ ܕܐܝܟܢܐ ܗܘܬ ܠܗ [ܬܘܩܒܬܐ] ܠܢܣܛܘܪܝܣ ܘܢܦܠ ܒܟܘܪܗܢܐ ܕܐܝܟ ܗܢܐ. ܠܐ ܐܢܫ ܢܣܒܪ ܥܠ ܢܝܣܛܘܪܝܣ ܡܥܩܐ ܕܡܢ ܩܕܡ ܥܠܬܐ ܗܕܐ ܐܝܬ ܗܘܐ ܠܗ ܫܘܬܦܘܬܐ ܩܬܘܩܠܬܐ ܗܕܐܼ. ܘܐܠܐܼ ܘܠܐ ܠܦܛܪܝܪܟܘܬܐ ܕܩܘܛܣܢܛܝܢܦܘܠܝܣ ܡܬܩܪܒܐ ܗܘܐ. ܐܠܐ ܓܼܕܫ ܠܗ ܗܿܝ ܕܐܡܼܪ ܟܬܒܐ܇ ܕܐܝܬ ܢܟܦܬܐ ܕܒܿܪܝܐ ܚܛܗ̈ܐ. ܘܟܕ ܨܼܒܐ ܕܢܝܩܪ ܠܪܚܡܗܼ. ܐܬܫܝܛ ܗܼܘ. ܘܟܕ ܒܥܼܐ ܕܢܕܠـ[ـܐ] ܡܢ ܨܡܪܬܐܼ. ܛܒܼܥ ܗܼܘ ܒܗܘܬܐ ܕܐܒܕܢܐ. ܡܛܠ ܕܓܒܪܐ ܗܘܐ ܠܐ ܪܕܝܐ ܒܝܕ ܩܪܝܢܐ ܕܟ̈ܬܒܐ ܐܠܗ̈ܝܐ. ܓܼܕܫ ܕܝܢ ܘܗܘܬܿ ܠܗ ܬܘܩܬܐ ܕܐܝܟ ܗܕܐ.. pb. 209 ܩܫܝܫܐ ܚܕ ܐܝܬܘܗܝ ܗܘܐ ܡܢ ܐܢܛܝܟܝܐ ܨܝܕܘܗܝܼ ܕܫܡܗ ܗܘܐ ܐܢܣܛܘܣ. ܠܗܢܐ ܒܐܝܩܪܐ ܣܓܝܐܐ ܐܚܝܕ ܗܘܐ ܠܗ. ܘܡܬ[ܡܠـ]ـܟ ܗܘܐ ܒܗ ܒܨܒ̈ܘܬܐ.. ܗܢܐ ܕܝܢ ܒܚܕ ܡܢ ܝܘ̈ܡܝܢ܆ ܟܕ ܗܼܘ ܐܢܣܛܘܣ ܡܬܪܓܡ ܒܥܕܬܐܿ. ܐܡܼܪ. ܕܠܡܪܝܡ ܝܠܕܬܿ ܐܠܗܐܼ. ܐܢܫ ܠܐ ܢܩܪܐ. ܡܪܝܡ ܓܝܪ ܒܪܬ ܐܢ̈ܫܐ ܗܼܝ. ܘܐܠܗܐ ܡܢ ܒܪܬ ܐܢ̈ܫܐܼ. ܕܢܬܝܠܕ ܠܐ ܡܨܝܐ.. ܘܟܕ ܗܕܐ ܐܫܬܡܥܬܿ [ܠܟܗ̈ܢܐ] ܘܠܥܡܐ ܟܠܗ ܕܠܚـ[ـܬ]. ܡܢ ܒܪܝܫܝܬ ܓܝܪ ܩܒܠ ܕܡܫܝܚܐ ܐܠܗܐ ܗܼܘܿ. ܘܕܠܐ ܢܦܪܫܘܢ ܒܝܕ ܡܕܒܪܢܘܬܐ ܠܐܢܫܘܬܐ ܡܢ ܐܠܗܘܬܐ ܩܒܠ.. ܟܕ ܓܝܪ ܕܠܘܚܝܐ ܕܐܝܟ ܗܢܐ ܒܥܕܬܐ ܗܘܼܐ ܐܬܚܦܛ ܗܼܘ ܢܣܛܘܪܝܣܼ. ܢܫܘܙܒ ܒܝܕ ܥܠܢ ܥܠܢ ܕܡ̈ܠܐ ܠܪܚܡܗ ܡܢ ܟܫܠܐ ܕܐܝܟ ܗܢܐ. ܠܐ ܓܝܪ ܨܒܿܐ ܗܘܐܼ ܒܝܕ ܪܚܡܘܬܗ ܕܨܝܕܘܗܝܼ ܢܟܣܝܘܗܝ ܐܝܟ ܡܓܕܦܢܐ. ܘܡܛܠ ܗܕܐ ܨܿܒܐ ܗܘܐ ܢܫܪܪ ܠܡܠܬܗ ܕܐܢܣܛܘܣ. ܘܥܒܼܕ ܒܥܕܬܐ ܥܠ ܗܕܐ ܬܘܓܡܐ. ܘܫܪܝ ܕܢܩܿܝܡ ܒܗ ܠܡܠܬܗ ܕܐܢܣܛܘܣ. ܘܒܟܠ ܕܘܟ ܠܡܠܬܐ ܕܝܠܕܬ ܐܠܗܐ ܡܦܩ ܗܘܼܐ. ܘܡܢ ܥܠܬܐ ܗܕܐ ܣܕ̈ܩܐ ܣܓܝ̈ܐܐ ܗܘܘ ܒܥܕܬܐ.܀ ܥܠ ܬܘܓܡܐ ܗܘ ܕܥܒܼܕ ܢܣܛܘܪܝܘܣ ܒܥܕܬܐ ܕܩܘܣܛܢܛܝܢܦܘܠܝܣܼ ܐܡܿܪ ܩܕܝܫܐ ܦܛܪܐ ܐܒܪܝܐܼ ܕܗܘ ܗܘܐ ܚܙܝܐ ܕܝܠܗ ܕܣܘܥܪܢܐ ܗܢܐܼ. ܐܝܟ ܡܐ ܕܣܼܗܕ ܩܕܡܝܢ. ܗܢܐ ܕܝܢ ܦܛܪܐ ܐܒܪܝܐ ܒܪܗ ܐܝܬܘܗܝ ܗܘܐ ܕܡܿܠܟܐ ܕܐܒܪ̈ܝܐ. ܘܢܣܒܗ ܕܝܢ ܬܝܕܣܝܘܣ ܡܿܠܟܐ ܕܪ̈ܗܘܡܝܐ ܡܢܗ ܗܡܝܪܐܼ. ܕܠܐ ܢܬܢܟܠ ܥܠܘܗܝ. ܘܐܝܟ ܒܪܐ ܪܒܝܗ ܬܝܕܣܝܘܣ ܡܿܠܟܐܿ. ܘܦܠܘܟܪܝܐ ܚܬܗ ܕܡܿܠܟܐ. ܘܟܕ ܪܒܐ ܐܚܒܘ ܠܕܘܒܪ̈ܐ ܢܟ̈ܦܐ ܕܕܝܪܝܘܬܐܼ. ܘܫܒܼܩ ܠܒܝܬ ܡܠܟܘܬܐ. ܘܠܚܪܐ ܗܘܼܐ ܐܦܝܣܩܦܐ ܕܐܦܡܝܐ. pb. 210 ܗܢܐ ܕܝܢ ܣܗܕ ܘܐܡܪ. ܕܟܕ ܐܝܬܝ ܗܘܿܝܬ ܥܕܟܝܠ ܒܩܘܣܛܢܛܝܢܦܘܠܝܣܼ ܡܢ ܩܕܡ ܕܐܟܦܘܪ ܒܥܠܡܐ: ܟܕ ܚܝ ܥܕܟܝܠ ܢܣܛܘܪܝܣܿ. ܘܐܝܬ ܗܘܐ ܠܗ ܐܦܝܣܩܘܦܬܐ. ܕܟܕ ܡܫܬܡܠܐ ܗܘܐ ܕܘܟܪܢܐ ܕܐܪ̈ܒܥܝܢ ܣܗ̈ܕܐ ܩܕ̈ܝܫܐܼ. ܒܥܕܬܐ ܕܡܬܩܪܝܐ ܕܝܠܕܬ ܐܠܗܐ. ܟܕ ܩܡ ܕܢܬܪܓܡ ܩܕܡ ܟܠܗ ܥܡܐ ܒܩܪܝܒܘܬܐ ܕܝܠܝ. ܐܝܬܘܗܝ ܗܘܐ ܕܝܢ ܢܫܝ ܩܠܐ ܘܢܨܝܚ ܩܠܐ. ܫܪܝ ܕܢܓܕܦܼ ܘܢܐܡܪ ܠܐܦ̈ܝ ܡܨܥܬܗ ܕܬܘܪܓܡܗ: ܠܐ ܬܫܬܒܗܪܝܢ ܡܪܝܡܼ ܐܝܟ ܗܘ ܕܠܐܠܗܐ ܝܠܕܬܝ. ܠܐ ܓܝܪ ܝܠܕܬܝ ܐܘ ܡܝܬܪܐ ܠܐܠܗܐܼ. ܐܠܐ ܒܪܢܫܐܼ ܐܘܪܓܢܢ ܕܐܠܗܐ.. ܘܡܚܕܗ ܕܐܼܡܪ ܗܕܐܼ. ܗܘܼܐ ܠܗ ܕܝܘܐ ܥܠܝܗܿ ܕܒܐܡܐ. ܕܗܟܢܐ ܥܡ ܦܬܗ ܐܦ ܐܝܕܗ ܕܝܡܝܢܐ ܬܬܗܦܟ ܠܒܣܬܪܗܿ. ܘܟܕ ܡܫܦܠ ܘܥܬܝܕ ܗܘܐ ܠܡܦܠܼ ܚܛܦܘܗܝ ܡܕ̈ܝܠܢܐ ܘܡܫ̈ܡܫܢܐܪ. ܘܛܥܢܘܗܝ ܘܐܥܠܘܗܝ ܠܕܝܩܘܢܝܘܢ. ܘܡܢ ܗܝܕܝܢ ܣܘܓܗ ܕܥܡܐ ܫܢܝ ܡܢ ܫܘܬܦܘܬܗܼ. ܘܝܬܝܪܐܝܬ ܗܠܝܢ ܕܒܦܠܛܝܢ. ܘܐܦ ܐܢܐ ܡܢ ܩܕܡ ܟܠܗܘܢ. ܘܟܕ ܛܒ ܪܚܝܡ ܗܘܿܝܬ ܡܢܗ.. ܗܢܐ ܗܟܝܠ ܗܟܢܐ ܫܪܥ ܘܢܼܦܠܼ ܐܝܟ ܟܘܟܒ ܢܘܓܗ ܡܢ ܫܡܝܐ. ܘܠܐ ܗܦܟ ܡܢ ܨܒܝܢܗ ܒܝܫܐ܇ ܡܛܠ ܕܐܬܥܠܠܘ ܒܗ ܣܛܢܐ. ܀܀ ܫܢܬ ܫܒܥܡ̈ܐܐ ܘܐܪ̈ܒܥܝܢ ܘܐܪ̈ܒܥܼ. ܐܬܟܢܼܫܬܿ ܣܘܢܗܕܣ ܩܕܡܝܬܐ ܒܐܦܣܘܣ. ܘܐܚܪܡܬܿ ܘܫܕܬܿ ܠܪܫܝܥܐ pb. 211 ܢܣܛܘܪܝܣ. ܡܛܠ ܕܠܐ ܨܼܒܐ ܕܢܗܦܘܟ ܡܢ ܗܿ، ܡܐ ܕܩܐܡ ܗܘܐ ܒܗ.. ܪ̈ܝܫܝܗܿ ܕܝܢ ܕܣܘܢܗܕܣ ܐܝܬܝܗܘܢ ܗܠܝܢ: ܩܕܝܫܐ ܩܘܪܝܠܣܼ ܦܛܪܝܪܟܐ ܕܐܠܟܣܢܕܪܝܐ. ܡܡܢܘܢ ܕܐܦܣܘܣ. ܝܘܒܝܠܢܘܣ ܕܐܘܪܫܠܡ. ܝܘܚܢܢ ܕܐܛܝܟܝܐ. ܘܡܬܝܕܥܝܢ ܕܝܢ ܐܦ ܪܒܘܠܐ ܕܐܘܪܗܝ. ܐܩܝܩܣ ܕܐܡܕ. ܘܐܩܝܩܝܣ ܐܚܪܢܐ ܕܫܡܝܫܛ. ܀܀ ܫܢܬ ܫܒܥܡ̈ܐܐ ܘܐܪ̈ܒܥܝܢ ܘܫܬܼ. ܡܝܬ ܩܕܝܫܐ ܡܪܝ ܪܒܘܬܐ ܕܐܘܪܗܝ. ܘܗܘܼܐ ܚܠܦܘܗܝ ܗܝܒܐ. ܗܢܐ ܒܢܼܐ ܥܕܬܐ ܚܕܬܐ. ܗܿܝ ܕܘܝܡܢܐ ܒܝܬ ܫܠܝ̈ܚܐ ܡܬܩܪܝܐ.܀ ܒܗܢܐ ܙܒܢܐ ܡܬܝܕܥܝܢ ܩܕܝܫܐ ܡܪܝ ܒܪܨܘܡܐ ܕܒܝܬ ܫܡܝ̈ܫܛܝܐ.. ܘܩܕܝܫܐ ܫܡܥܘܢ ܕܐܣܛܘܢܗ.܀ ܘܬܘܒ ܒܗܢܐ (ܙܒܢܐܼ) ܓܘܢܚܐ ܪܒܐ ܘܐܒܕܢܐ ܡܪܝܪܐ ܗܘܐ ܒܥܡܐ ܕܝܗܘܕ̈ܝܐ. ܡܢ ܥܠܬ ܛܥܝܘܬܐܼ. ܐܝܕܐ ܕܡܛܠܬܗܿ ܟܪ̈ܣܛܝܢܐ ܣܓܝ̈ܐܐ ܗܘܘ ܡܢܗܘܢ.. ܓܕܼܫ ܠܗܘܢ ܥܠܬܐ ܕܐܝܟ ܗܕܐ. ܝܗܘܕܝܐ ܕܝܢ ܚܕ ܡܛܥܝܢܐ ܐܬܚܙܝ ܗܘܐ ܒܩܪܝܛܐ: ܘܥܿܒܕ ܗܘܐ ܢܦܫܗ ܡܘܫܐ. ܘܐܡܿܪ ܗܘܼܐ ܠܗܘܢ ܕܐܫܬܕܪ ܡܢ ܫܡܝܐܼ ܕܢܦܩ ܠܝܗ̈ܘܕܝܐ ܕܥܿܡܪܝܢ ܒܓܙܪܬܐ ܗܿܝܼ. ܘܢܥܒܪ ܐܢܘܢ ܒܝܡܐ. ܐܡܿܪ ܗܘܐ ܓܝܪ܆ ܕܗܿܘܝܘܼ ܗܿܘ ܕܐܥܒܪ ܠܒܢ̈ܝ ܐܝܣܪܐܝܠ ܡܢ ܩܕܝܡ ܒܝܡܐ ܕܣܘܦ.. ܘܫܢܬܐ ܚܕܐ ܡܬܟܪܟ ܗܘܐ ܒܩܘܪ̈ܝܐ ܘܒܡܕ̈ܝܢܬܐ ܕܓܙܪܬܐ ܗܿܝ. ܘܡܦܝܣ ܗܘܐ ܠܝܗ̈ܘܕܝܐ ܕܥܿܡܪܝܢ ܒܗܿܝ ܕܢܩܒܠܘܢ ܡܠܘ̈ܗܝ. ܘܡܿܠܟ ܗܘܐ ܠܗܘܢ ܕܢܫܒܩܘܢ ܠܩܢܝܢܗܘܢ.. ܐܫܬܘܕܝ ܠܗܘܢ ܕܐܝܟ ܕܒܝܒܫܐ ܡܥܒܪ ܠܗܘܢ ܒܝܡܐ ܠܐܪܥܐ ܕܡܘܠܟܢܐ.. ܗܢܘܢ ܕܝܢ ܐܬܕܒܪܘ ܒܬܪ ܣܒܪܐ ܕܡ̈ܠܐ ܗܠܝܢ. ܘܡܗܝܡܢܝܢ ܗܘܘ ܡܟܝܠ ܡܢ ܟܠܗ ܚܝܠܗܘܢ ܘܡܒܣܝܢ ܗܘܘ ܕܝܢ ܐܦ ܒܡܕܡ ܕܩܢܝܢ. ܟܕ ܫܒܿܩܝܢ ܠܐܝܢܐ ܕܗܼܘ ܕܢܿܣܒ pb. 212 ܐܝܟ ܨܒܝܢܗ. ܘܟܕ ܡܛܝ ܝܘܡܐ ܗܿܘ ܕܒܗ ܬܚܡ ܠܗܘܢܼ ܝܗܘܕܝܐ ܗܿܘ ܡܛܥܝܢܐ: ܗܼܘ ܡܿܢ ܐܙܿܠ ܗܘܐ ܒܪܝܫܐܼ. ܐܙܿܠܝܢ ܗܘܘ ܕܝܢ ܒܬܪܗ ܟܠܗܘܢ ܥܡ ܢܫ̈ܝܗܘܢ ܘܒܢ̈ܝܗܘܢ ܒܟܘܠ ܡܘ̈ܫܚܢ. ܘܐܝܬܝ ܐܢܘܢ ܠܩܪܩܦܬܐ ܚܕܐ ܕܒܛܘܪܐ ܕܢܕܝܐ ܠܝܡܐ. ܘܦܩܼܕ ܗܘܐ ܠܗܘܢ ܕܢܫܕܘܢ ܒܝܡܐ ܢܦܫ̈ܬܗܘܢ. ܗܟܢܐ ܥܒܕ ܐܢܘܢ ܕܐܙܠܘ ܩܕ̈ܡܝܐ ܠܗܿܝ ܩܪܢܐܼ ܡܚܕܗ ܡܝܬ. ܟܕ ܡܛܪܦܝܢ ܘܐܚܪ̈ܢܐ ܟܕ ܡܬܚܢܩܝܢ ܒܡܝ̈ܐ. ܘܐܝܟ ܕܠܡܐܡܪ܆ ܟܠܗܘܢ ܡܬܚܒܠܝܢ ܗܘܘ. ܐܠܘ ܐܢ̈ܫܐ ܟܪ̈ܣܛܝܢܐܼ. ܐܝܟ ܕܡܢ ܡܕܒܪܢܘܬܐ ܕܐܠܗܐܼ. ܨܝ̈ܕܐ ܘܬܓܪ̈ܐ ܕܐܣܬܩܒܠܘ ܬܡܢ ܠܐ ܐܕܪܟܘܢ ܘܦܨܝܘܢ ܠܐܝܠܝܢ ܕܡܬܚܢܩܝܢ ܗܘܘ ܘܗܝܕܝܢ ܫܩܠ ܡܪܓܫܢܘܬܐ ܕܫܢܝܘܬܗܘܢܼ. ܟܕ ܪܡܝܢ ܒܒܝ̈ܫܬܐ. ܘܠܐ[ܚܪ̈ܢܐ ܕܐܬܿܝܢ] ܗܘܘ ܕܢܫܕܘܢ ܢܦܫܗܘܢ ܒܝܡܐܼ ܟܠܘ ܐܢܘܢܼ ܗܿܢܘܢ ܕܐܣܬܩܒܠܘ. ܟܕ ܐܡܿܪܝܢ ܠܗܘܢ ܥܠ ܐܒܕܢܐ ܕܗܢܘܢ ܩ̈ܕܡܝܐ ܕܫܕܘ ܢܦܫܗܘܢ. ܘܟܕ ܕܝܢ ܐܫܬܘܕܥܘܗܝ ܠܛܘܥܝܝ ܡܬܥܕܠܝܢ ܗܘܘ ܒܗܝܡܢܘܬܗܘܢ ܡܣܪܗܒܬܐ. ܘܨܿܒܝܢ ܗܘܘ ܕܢܩܛܠܘܢ ܐܦ ܠܡܘܫܐ ܕܕܓܠܘܬܐ. ܘܠܐ ܐܫܟܚ ܕܢܠܒܟܘܢܝܗܝ. ܠܐ ܓܝܪ ܡܬܚܙܐ ܗܘܐ ܠܗܘܢ. ܗܘܐ ܕܝܢ ܡܣܒܪܢܘܬܐ ܠܣܓܝ̈ܐܐ ܥܠܘܗܝ ܕܕܝܘܐ ܗܘܐ ܕܡܥܛܦ ܗܘܐ (ܐܣܟܝܡܐ) ܕܒܪܢܫܐ. ܕܐܬܚܙܝ ܐܝܟ ܕܠܚܘܒܠܐ ܕܥܡܗܘܢ. ܡܛܠܗܢܐ ܢܝܫܐܼ ܣܓܝ̈ܐܐ ܡܢ ܝܗܘ̈ܕܝܐ ܐܪܫܠܘ ܫܒܩܘ ܝܗܘܕܝܘܬܐܼ. ܘܐܬܓܘܣ ܒܟܪܣܛܝܢܘܬܐ. ܀ ܀ ܘܒܫܢܬ ܫܒ̈ܥܡܐܐ ܘܐܪ̈ܒܥܝܢ ܘܫܒ̈ܥܼ. ܡܝܬ ܡܟܣܝܡܘܣ ܐܦܝܣܩܘܦܐ ܕܩܘܣܛܢܛܝܢܦܘܠܝܣ. ܘܩܒܠ ܬܪܘܢܣ ܕܝܠܗ ܩܕܝܫܐ ܦܪܘܩܠܘܣ. ܘܗܼܘ ܦܪܘܩܠܘܣ ܐܝܬܝ ܠܓܪ̈ܡܘܗܝ ܕܩܕܝܫܐ ܡܪܝ ܝܗܘܢܝܣ ܡܢ ܐܟܣܘܪܝܐ ܠܩܘܣܛܢܛܝܢܦܘܠܝܣ. ܘܚܝܕ pb. 213 ܠܗܠܝܢ ܕܦܠܝܓܝܢ ܗܘܘ ܡܛܠܬܗ.܀ ܒܗܢܐ ܕܝܢ ܙܒܢܐܼ ܝܘܚܢܢ ܨܼܒܐ ܕܢܚܪܘܒ ܐܪܥܐ ܕܪܗܘܡܐ ܪܒܬܐܼ. ܥܡ ܒܪܒܪ̈ܝܐ ܣܓܝ̈ܐܐ. ܘܟܕ ܡܟܢܫܝܢ ܘܨܒܿܝܢ ܕܢܼܚܪܒܘܢ ܠܪܗܘܡܐ ܥܡ ܐܬܪ̈ܘܬܐ ܟܠܗܘܢ ܡܥܪ̈ܒܝܐ ܕܐܝܛܠܝܐܼ. ܫܡܥ ܡܿܠܟܐ ܒܗܕܐ. ܗܼܘ ܕܝܢ ܐܝܟ ܥܝܕܗܼ ܥܠ ܐܠܗܐ ܫܼܕܐ ܟܠܗ ܨܦܬܗ. ܘܠܗ ܐܓܥܠ ܟܠܗ ܦܘܪܢܣܐ ܕܝܠܗ ܕܣܘܥܪܢܐ. ܟܕ ܡܬܡܢ ܒܨܠܘܬܐ ܚܦܝܛܐܝܬ. ܘܠܐ ܐܫܬܼܘܚܪ ܕܢܿܣܒ ܐܝܠܝܢ ܕܒܿܥܐ ܗܘܐ.. ܢܦܼܠ ܓܝܪ ܒܪܩܐ ܡܢ ܫܡܝܐ ܘܡܚܝܗܝ ܠܪܝܫܗܘܢ ܘܐܘܩܕܗܼ. ܘܠܣܓܝ̈ܐܐ ܡܢ ܒܪ̈ܒܪܝܐ ܕܥܡܗ. ܘܗܠܝܢ ܕܫܪܟܐ ܐܬܚܒܠܘ ܒܢܦܩܐ ܩܫܝܐ ܘܢܣ̈ܝܣܐ. ܘܒܚܪܬܐ ܬܘܒ ܢܚܬܬܿ ܢܘܪܐ ܡܢ ܫܡܝܐ ܘܚܪܒܼܬܿ ܠܣܘܓܐܐ ܡܢ ܗܢܘܢ ܕܐܫܬܘܚܪܘ. ܘܗܕܐ ܒܚܕܠܬܐ ܪܒܐ ܥܒܼܕܬܿ ܠܒܪ̈ܒܪܝܐ. ܕܚܙܘ ܕܡܢ ܐܠܗܐ ܡܬܥܕܪܝܢ ܪ̈ܗܘܡܝܐܼ. ܘܗܼܢܘܢ ܕܠܐ ܩܪܒܐ ܐܒܕܝܢ. ܘܫܢܝܘ ܡܢ ܐܪܥܗܘܢ. ܀ ܀ ܫܢܬ ܫܒ̈ܥܡܐܐ ܘܚܡ̈ܫܝܢ ܘܚ̈ܡܫܼ. ܡܝܬ ܩܕܝܫܐ ܩܘܪܝܠܘܣ ܦܛܪܝܪܟܐ ܕܐܠܟܣܢܕܪܝܐ. ܀ ܀ ܘܒܫܢܬ ܫܒ̈ܥܡܐܐ ܘܚܡ̈ܫܝܢ ܘܫ̈ܬܼ. ܗܘܼܐ ܕܝܩܪܣ ܦܛܪܝܪܟܐ ܕܝܠܗܿ ܕܐܠܟܣܢܕܪܝܐ. ܀ ܀ ܘܒܫܢܬ ܫܒ̈ܥܡܐ ܘܚ̈ܡܫܝܢ ܘܫܒ̈ܥܼ. ܐܬܟܼܢܫܬܿ ܣܘܢܗܕܘܣ ܕܬܪ̈ܬܝܢ ܒܐܦܣܘܣ. ܪ̈ܝܫܝܗܿ ܕܝܢ ܕܗܕܐ ܣܘܢܗܕܘܣ ܐܝܬܝܗܘܢ ܗܠܝܢ: ܩܕܝܫܐ ܕܝܣܩܪܣ ܦܛܪܝܪܟܐ ܕܐܠܟܣܢܪܝܐ. ܘܝܘܒܢܝܠܝܣ ܐܦܣ ܕܐܘܪܫܠܡ. ܘܝܘܠܝܘܣ ܐܦܝܣܩܦܐ ܕܩܘܼ. ܘܡܠܐ ܕܘܟܬܗ ܕܠܐܘܢ ܕܪܗܘܡܐ. ܡܛܠ ܕܠܐ ܥܕܟܝܠ ܐܨܛܠܝ ܗܘܐ ܠܗ ܠܐܘܢ ܠܒܪ ܡܢ ܗܝܡܢܘܬܐ ܫܪܝܪܬܐ ܕܢܩܝܐ. ܘܐܣܛܦܢܐ ܬܘܒ ܐܦܝܣ ܕܐܝܪܦܘܠܝܣ. ܘܐܚܪ[ܡ] ܕܝܢ ܒܗܿ ܒܣܘܢܕܘܣܼ. ܠܦܘܠܝܢܣ ܦܛܪܝܪܟܐ ܕܩܘܣܛܢܛܝܢܦܘܠܝܣ. ܘܠܐܘܣܒܝܣ ܕܕܘܠܪܝܘܢ. ܘܠܕܡܢܘܣ ܦܛܪܝܪܟܐ ܕܐܛܝܟܝܐ. [ܘܠܛܝܕܪܝܛܐ pb. 214 ܕ]ܩܘܪܣ. ܘܠܗܒܐ ܕܐܘܪܗܝ. ܠܕܢܝܐܝܠ ܕܚܪܢ. [ܘܠܣـ]ـܘܦܪܢܝܣ ܕܬܠܐ. ܀ ܘܒܗܕܐ ܫܢܬܐ ܐܬܢܒܝ ܗܘܐ ܦܠܐܓܝܘܣ ܩܫܝܫܐ ܐܘܪܗܝܐ. ܗܿܘ ܕܡܢ ܗܒܐ ܐܬܛܪܕܼ. ܥܠ ܕܡܟܣ ܗܘܐ ܠܗܼ ܥܠ ܒܝܫܘܬ ܗܝܡܢܘܬܗ. ܘܐܡܪ ܕܡܫܬܥܐ ܗܘܐ ܠܢ ܗܼܘ ܐܒܐ ܦܛܪܐ ܐܒܪܝܐܼ. ܡܛܠ ܛܘܒܬܢܐ ܦܝܠܐܓܝܘܣ ܐܘܪܗܝܐܼ. ܕܐܝܬ ܗܘܐ ܠܗ ܕܘܒܪ̈ܐ ܕܡܝܬܪܘܬܐ. ܘܐܝܬܘܗܝ ܗܘܐ ܕܝܪܝܐ ܘܢܒܝܐ: ܕܟܕ ܫܡܥ ܠܡ ܓܘܕ̈ܦܐ ܕܗܒܐ ܐܦܝܣܩܦܐ ܕܐܘܪܗܝܼ. ܐܟܣܗ ܓܠܝܐܝܬ ܘܣܿܓܝ ܚܼܫ ܡܢܗ. ܘܟܕ ܐܬܪܕܦ ܡܢܗ. ܐܬܼܐ ܠܡܢ̈ܘܬܐ ܕܦܠܣܛܝܢܐ. ܘܝܼܬܒ ܒܫܠܝܐܿ. ܟܕ ܥܕܟܝܠ ܚܝ ܗܘܐ ܝܘܒܝܠܐܣܼ. ܡܢ ܩܕܡ ܣܘܢܗܕܘܣ ܘܡܬܥܒܪܢܘܬܐ ܕܗܝܡܢܘܬܐ. ܘܗܟܢܐ ܥܡܪܬܿ ܒܗ ܛܝܒܘܬܐܿ. ܐܝܟ ܕܢܬܡܠܐ ܪܘܚܐ ܕܢܒܝܘܬܐܼ ܘܣܒܝܣܐܝܬ ܢܚܙܐ ܚܙܘ̈ܢܐ. ܗܿܘ ܕܟܕ ܒܟܠ ܙܒܢ ܐܬܿܐ ܗܘܐ ܠܘܬ ܐܒܐ ܦܛܪܐ ܕܐܝܬܘܗܝ (ܗܘܐ) ܗܝܕܝܢ ܒܫܠܝܐ ܒܠܐܒܪܐ ܕܡܝܘܡܐ ܕܓܙܐ. ܡܛܠ ܚܘܒܐ ܣܓܝܐܐ ܕܐܝܬ ܗܘܐ ܠܗܘܢ ܨܝܕ ܚܕ̈ܕܐ. ܒܚܕ ܡܢ ܝܘ̈ܡܝܢ܆ ܟܕ ܡܛܝܠ ܘܡܒܚܢ ܥܡܗ ܕܐܒܐ: ܡܛܠ ܚܘ̈ܫܒܐ ܘܡܝܬܪ̈ܘܬܐ ܕܒܐܠܗܐܼ ܘܒܕܘܟܬܐ ܚܝܠܬܢܝܬܐ ܕܝܠܗܿ ܣܘܢܕܘܣ ܕܟܠܩܕܘܢܐܼ ܫܢ̈ܝܐ ܫܒ̈ܥܼ. ܡܬܥܒܪܢܘܬܐ ܕܥܬܕܝܐ ܗܘܬ ܕܬܗܘܐ ܒܟܠܩܕܘܢܐ ܡܢ ܐܦܝܣ̈ܩܦܐ. ܟܕ ܐܦ ܫܡܗ ܕܪܫܥܐ ܡܪܩܝܢܐ ܐܡܼܪ: ܗܿܘ ܕܒܝ̈ܘܡܬܗ ܘܒܐܝ̈ܕܘܗܝ ܥܬܝܕܐ ܗܘܬ ܕܬܗܘܐ. ܗܠܝܢ ܕܫܪܟܐ ܒܐܝܕܐ ܒܐܝܕܐ. ܟܕ ܐܡܼܪ ܐܦ ܠܦܛܪܐ: ܕܠܝ ܘܠܟܼ ܐܒܐ. ܐܝܬ ܠܗ pb. 215 ܠܙܒܢܐ ܗܿܘ ܕܢܕܪܟ. ܗܿܘ ܕܟܕ ܡܬܕܪܦܝܢܢ ܥܡ ܟܠܗܘܢ ܩܕ̈ܝܫܐ. ܗܠܝܢ ܕܠܐ ܡܬܪܡܝܢ ܕܢܫܠܡܘܢ ܠܥܒܘܪܝܐ ܕܒܗܝܡܢܘܬܐ. ܘܗܟܢܐ ܒܗ ܒܪܕܘܦܝܐ ܢܫܬܡܠܐ. ܗܿܝ ܕܐܦ ܗܘܼܬ ܘܫܠܡܬܿ ܐܝܟ ܡܠܬܗ ܒܚܪܬܐ. ܀ ܬܘܒ ܐܬܢܒܝ ܥܠ ܦܠܘܟܪܝܐ ܚܬܗ ܕܬܝܕܣܝܣܝ ܘܡܪܝܒܢـ[ـܝـ]ـܬܗ ܕܐܒܐ ܦܛܪܐ ܐܒܪܝܐܼ. ܘܥܠ ܩܪܒܗܿ ܕܥܡ ܩܕ̈ܝܫܐܼ ܘܫܬܦܘܬܗܿ ܕܥܡ ܡܪܩܝܢܐ܇ ܗܼܘ ܟܕ ܗܼܘ ܐܒܐ ܦܠܐܓܝܘܣ ܢܒܝܐܼ. ܐܝܟ ܕܡܫܬܥ ܗܘܐ ܠܢ ܐܒܐ ܦܛܪܐ܇ ܕܟܕ ܐܝܬܘܗܝ ܗܘܐ ܥܡ ܩܕܝ̈ܫܐ ܐܚܪ̈ܢܐ ܠܘܬܗ ܕܣܒܐܿ. ܬܘܒ ܒܚܙܘܐ ܐܚܪܢܐܼ ܐܡܿܪ ܗܘܐ ܡܢ ܩܕܡ ܣܘܢܗܕܣ. ܘܫܪܝ ܕܢܐܡܪ ܟܕ ܒܿܟܐ. ܘܝ ܦܠܘܟܪܝܐ. ܘܝ ܦܠܘܟܪܝܐ. ܘܝ ܦܠܘܟܪܝܐ. ܘܟܕ ܣܓܝܐܬܐ ܐܬܩܪܒܬܿ ܠܗ ܦܝܣܬܐ ܡܢܢ܆ ܕܢܓܠܐ ܠܢ ܡܢܐ ܗܿܝ ܕܡܬܐܡܪܐ ܡܢܗ: ܐܡܼܪ ܕܦܠܘܟܪܝܐ ܗܿܝ ܕܐܫܬܘܕܝܬܿ ܠܐܠܗܐ ܒܬܘܠܘܬܐܼ. ܘܐܫܝܕܬܿ ܠܢܣܛܘܪܝܣܼ. ܠܗܿܝ ܕܟܠܗܘܢ ܩܕ̈ܝܫܐ ܕܒܟܘܠܕܘܟ ܟܿܬܒܝܢ ܗܘܘܼ ܐܝܟ ܕܠܩܕܝܫܬܐ ܘܒܬܘܠܬܐ. ܗܿܝ ܕܩܝܡܐ ܗܘܬ ܒܐܦ̈ܝ ܐܪ̈ܬܕܟܣܘ. ܥܬܝܕܐ ܕܬܥܒܪ ܥܠ ܗܝܡܢܘܬܐ ܘܥܠ ܒܬܘܠܘܬܐ܆ ܘܬܗܘܐ ܠܓܒܪܐ ܕܫܡܗ ܡܪܩܝܢܐܼ. ܘܬܫܚܘܩ ܠܩܕ̈ܝܫܐ. ܗܿܝ ܕܐܦ ܗܘܬ. ܘܫܠܡܬܿ ܡܠܬܗ. ܘܥܒܼܪܬܿ ܥܠ ܫܘ̈ܘܕܝܗܿ ܘܕܟܝܘܬ̈ܿ ܕܫܐܬܘܕܝܬܿ ܠܡܫܝܚܐ. ܘܐܙܕܘܓܬܿ ܠܡܪܩܝܢܐ. (ܘܗܘܼܬ ܝܪܘܬܬܐ] ܕܡܠܟܘܬܗ ܘܕܪܘܫܥܗܼ ܘܕܫ̈ܘܢܩܐ ܕܢܛܝܪܝܢ ܠܗ. ܐܡܿܪ ܘܒܬܪ ܫܢ̈ܝܐ ܫ̈ܬ ܢܡܬܘܢ ܬܪ̈ܝܗܘܢ. ܟܕ ܠܐ ܫܿܒܩܝܢ ܝܪܬܐ܀ ܬܘܒ ܥܠ ܝܘܒܝܢܠܐܘܣ ܕܐܘܪܫܠܡܼ ܐܡܼܪ ܗܼܘ ܟܕ ܗܼܘ ܦܠـ[ـܐܓܝܘܣ ܩܫܝܫܐܼ. ܐܝܟ] ܕܐܫܬܥܝ ܠܢ ܦܡܦܝܠܝܣ ܡܫܡܝܢ ܕܥܕܬܐ ܕܐܘܪܫܠܡܼ. ܕܐܝܬܘܗܝ pb. 216 ܗܘܐ ܪܚܡܗ. ܕܥܼܠ ܥܡܗ ܒܙܒܢ ܕܢܿܨܠܐ ܒܕܘܟܬܐ ܩܕܝܫܬܐ ܕܓܓܘܠܬܐ. ܟܕ ܥܕܟܝܠ ܠܠܝܐ ܗܘܼܐ. ܗܢܐ ܓܝܪ ܥܝܕܐ ܐܝܬ ܗܘܐ ܠܗ. ܘܟܕ ܩܐܿܡ ܘܡܿܨܠܐ ܐܬܚܛܦ ܠܚܙܘܐ. ܘܟܕ ܐܬܬܚܕ ܡܢ ܒܟܝܐ ܘܡܢ ܕܡ̈ܥܐܼ. ܫܪܝ ܠܡܐܡܪ: ܝܘܒܝܢܠܐܣ. ܝܘܒܢܝܠܐܣ. ܘܠܚܪܬܐ ܡܢ ܕܫܠܐ ܒܟܝܐ ܘܚܙܘܐܼ. ܐܫܬܐܠ ܡܢܗ ܕܫܡܫܐ ܦܡܦܝܠܝܣܼ ܟܕ ܠܚܘܕܐܝܬ ܢܦܠ ܩܕܡܘܗܝ: ܕܡܢܐ ܐܝܬܝܗܝܢ (ܗܠܝܢ) ܕܚܙܘܐ ܕܝܘܒܝܢܠܐܣ. ܘܡܛܠ ܡܢܐ ܕܠܐ ܫܠܝܐ ܥܡ ܒܟܝܐ ܡܙܥܩ ܗܘܐܼ ܕܝܘܒܝܢܠܐܣ. ܗܼܘ ܕܝܢ ܐܡܿܪ: ܕܐܝܟ ܙܢܐ ܕܗܫܐ ܚܿܙܐ ܐܢܬ ܠܗ ܠܝܘܒܢܠܐܣܿ ܕܡܢ ܕܝܪ̈ܝܐ ܘܩܠܝܪܝܩܘ ܡܙܕܝܚ: ܗܟܢܐ ܐܢ ܒܚܝ̈ܐ ܕܗܪܟܐ ܐܝܬܝܟܼ. ܐܝܬ ܠܟ ܕܬܚܝܙܝܘܗܝ ܕܡܢ ܪ̈ܗܘܡܝܐ ܘܕܝܘ̈ܢܐ ܡܬܬܝܿܬܐ.܀ ܐܦ ܐܠܝܕܝܘܣ ܕܩ̈ܠܝܬܐ ܐܬܢܒܝܼ ܘܐܡܼܪ ܥܠ ܪܘܕܦܝܐܼ ܘܥܠ ܡܠܟܐ ܡܪܩܝܢܐܼ. ܩܕܡ ܕܢܗܘܐ. ܐܦ ܥܠ ܕܝܣܩܪܘܣ ܕܐܠܟܣܢܪܝܐܼ ܕܠܐ ܡܫܬܡܥ ܠܗ ܘܡܬܪܕܦ ܡܢܗܼ. ܚܘܝ. ܐܫܬܥܝ ܠܢ ܝܘܚܢܢ ܩܫܝܫܐ ܕܐܠܟܣܢܕܪܝܐܼ. ܗܿܘ ܕܡܬܐܡܪ ܗܘܐ ܕܒܝܬ ܛܛܝܢܐܼ. ܓܒܪܐ ܝܕܝܥܐ ܘܡܫܒܚܐ: ܕܟܕ ܐܢܐ ܠܡ ܛܠܝܐܼ. ܗܘܬ ܠܝ ܪܚܡܘܬܐ ܕܐܟܦܘܪ ܒܥܠܡܐ. ܘܟܕ ܐܝܬ ܗܘܐ ܠܝ ܥܠܝܕܐ ܐܡܢܥ ܠܘܬ ܐܒܐ ܐܠܝܕܘܣ ܢܒܝܐ ܕܩ̈ܠܝܬܐ: ܪܗܿܛܬ ܠܘܬܗ ܕܐܓܠܐ ܠܗ ܪܚܡܘܬܐ ܕܝܠܝ. ܘܐܠܦ ܡܢܗ ܐܢܗܘ ܕܡܬܩܢ ܡܪܝܐ ܪܓܬܐ ܕܝܠܝ ܘܚܦܝܛܘܬܐ. ܘܐܦܝܣܗ ܕܢܨܠܐ ܥܠܝ. ܗܼܘ ܕܝܢ ܐܡܼܪ: ܕܟܬܪ ܛܘܣ. ܠܐ ܓܝܪ ܚܿܙܐ ܐܢܐ ܗܫܐ ܒܗܝܠܘܬܐ. ܐܠܐ ܙܠܼ ܫܠܝ. ܟܕ ܝܿܨܦ ܐܢܬ ܕܫܘܫܛܐ ܕܕܘܒܪ̈ܐ ܕܡܝܬܪܘܬܐ. ܡܢ ܒܬܪ ܓܝܪ ܙܒܢܐ ܝܕܝܥܐܼ. ܥܬܝܕ ܪܕܘܦܝܐ ܕܢܕܪܟ ܠܥܕܬܐ. ܘܗܝܕܝܢ ܟܕ ܥܿܪܩ ܐܢܬܼ pb. 217 ܐܿܬܐ ܐܢܬ ܠܗܪܟܐܿ. ܘܗܘܿܐ ܐܢܬ ܕܝܪܝܐ. ܘܐܢܐ ܐܡܿܪܬ ܠܗ. ܠܐܒܐ ܐܠܝܕܘܣܼ. ܕܐܝܢܐ ܪܕܘܦܝܐܼ. ܐܪܐ ܚܢܦܘܬܐ ܥܕܝܕܐ ܕܬܠܒܘܟ. ܐܡܪ ܠܝܼ ܠܐ. ܐܠܐ ܩܿܝܡ ܡܠܟܐ ܪܫܝܥܐܼ ܕܫܡܗ ܡܪܩܝܢܐ. ܘܡܿܥܒܕ ܠܐܦ̈ܝܣܩܦܐ ܕܒܟܬܒܐ ܢܐܡܪܘܢ܇ ܕܠܐ ܐܝܬܘܗܝ ܗܘܼܐ ܐܠܗܐ ܗܿܘ ܕܐܨܛܠܒ. ܘܟܕ ܟܠܗܘܢ ܗܠܝܢ ܢܫܠܡܘܢ ܠܗ ܘܫܬܡܥܘܢܼ. ܒܠܚܘܕܘܗܝ ܐܦܝܣܩܦܐ ܕܐܠܟܣܢܕܪܝܐܼ. ܐܡܿܪ ܐܢܐ ܕܝܣܩܪܣ: ܠܐ ܡܫܬܡܥ ܠܗ. ܡܛܠ ܗܕܐ ܡܫܬܠܡ ܐܦ ܡܬܪܕܦ ܠܐܟܣܘܪܝܐ. ܘܒܗܿ ܥܢܕ.. ܘܟܕ ܐܢܐ ܐܡܿܪܬ ܠܗ: ܕܫܒܩ ܠܗܼ ܥܡܐ ܕܐܠܟܣܢܪܝܐܼ ܕܢܐܙܠ ܠܐܟܣܘܪܝܐ. ܐܡܼܪ ܠܝ. ܡܬܥܨܐܼ. ܘܐܚܪܢܐ ܗܿܘܐ ܚܠܦܘܗܝܼ ܟܦܘܪܐ. ܘܟܕ ܐܢܐ ܐܬܥܿܝܩܬ ܒܗܠܝܢ ܕܐܬܐܡܪܘ. ܐܡܼܪ ܗܼܘ. ܐܠܐ ܐܝܬ ܠܗ ܠܐܠܗܐ ܕܢܩܝܡ ܠܗ ܒܝ̈ܘܡܬܐ ܗܢܘܢ ܟܗܢܐ ܕܥܿܒܕ ܨܒܝܢܗ: ܟܕ ܡܘܕܥ ܥܠ ܛܘܒܬܢܐ ܛܝܡܬܐܘܣ: ܘܡܬܩܛܠ ܠܡ ܗܿܘ ܕܩܕܡܘܗܝ ܕܛܪܘܢܐܝܬ ܗܘܐ: ܟܕ ܪܡܿܙ ܥܠ ܦܪܛܘܪܝܘܣ ܪܫܝܥܐ. ܗܼܘ ܕܝܢ ܡܗܝܡܢܐܼ. ܟܕ ܡܟܬܪ ܝܘ̈ܡܬܐ ܩܠܝܠ ܒܐܦܣܩܦܘܬܐܼ ܠܐܟܣܘܪܝܐ ܡܫܬܕܐ.. ܘܟܕ ܗܠܝܢ ܐܡܿܪ ܗܼܘ ܣܒܐ [ܘܫܠܐܼ. ܒܥܩܬܐ ܪܒܬܐ] ܗܘܿܝܬ ܘܐܡܿܪܬ: ܡܪܝ ܐܒܐܼ. ܡܟܬܪ ܗܼܘ ܐܦܝܣ [ܒܐܟܣܘܪܝܐ.] ܘܐܒܿܕܐ ܡܕܝܢܬܐ ܘܟܠܗܿ ܡܨܪܝܢ܆ ܘܐܚܿܕ ܪܘܫܥܐ. ܗܼܘ ܕܝܢ ܫܿܠܐ ܗܘܐ. ܘܟܕ ܟܬܪܬ ܟܕ ܡܦܝܣ ܐܢܐ ܠܗ: ܐܡܼܪ ܠܝܼ ܐܢ ܗܼܘ ܕܐܝܬ ܙܒܢܐ ܗܿܦܟ. ܘܟܕ ܡܟܬܪ ܩܠܝ ܙܒܢܐܼ. ܥܢܕ ܒܗܝܡܢܘܬܐ ܬܪܝܨܬܐ. ܘܟܕ ܗܠܝܢ ܐܡܼܪ ܫܠܝ. ܘܢܦܿܠܬ ܩܕܡܘܗܝ. ܟܕ ܨܿܒܐ ܗܘܿܝܬ ܐܠܦ ܡܢܗ ܗܠܝܢ ܕܒܬܪܟܝܢ. ܗܼܘ ܕܝܢ ܐܡܼܪ ܠܝܼ. ܣܿܦܩ ܠܟ ܥܕܡܐ ܠܗܪܟܐ.. ܡܟܝܠ ܓܝܪ ܒܬܪ ܗܠܝܢ ܙܒܢܐ ܕܐܢܛܝܟܪܣܛܘܣ ܡܕܪܟ.܀ ܐܦ ܐܒܐ ܙܝܢܘܢ ܐܡܼܪ pb. 218 ܥܠ ܣܘܢܗܕܣ ܘܪܕܘܦܝܐ ܕܩܕ̈ܝܫܐ. ܗܝ ܕܝܢ ܘܐܒܐ ܙܝܢܘܢ ܗܿܘ ܡܬܟܪܟܢܐ ܘܢܒܝܐܼ. ܡܢ ܟܦܪ ܣܥܪܬܐ. ܩܪܝܬܐ ܕܐܝܬܝܗܿ ܒܦܠܣܛܝܢܐ. ܗܢܐ ܐܡܿܪ ܠܐܒܐ ܣܛܦܢܐ ܡܫܡܫܢܐ ܕܐܘܪܫܠܡܼ. ܘܐܢܒܝ ܩܕܡ ܣܘܢܗܕܘܣ ܕܟܠܩܕܘܢܐ. ܟܕ ܓܝܪ ܣܛܦܢܐ ܨܿܒܐ ܗܘܐ ܕܢܐܙܠ ܒܐܟܣܢܝܘܬܐ ܡܛܠ ܐܠܗܐܼ. ܘܢܫܬܘܐ ܒܐܝܩܪܐ ܕܐܟ̈ܣܢܝܐ. ܘܡܛܠܗܕܐ ܐܬܼܐ ܠܘܬ ܐܒܐ ܙܝܢܘܢܼ ܙܡܥܩܒ ܠܗܼ. ܕܐܢ ܗܼܘ ܕܡܬܩܢ ܡܪܝܐ ܚܦܝܛܘܬܗ: ܗܼܘ ܕܝܢ ܐܡܼܪ ܠܗ. ܕܙܠ ܗܫܐ. ܥܬܝܕ ܗܼܘ ܓܝܪ ܪܕܘܦܝܐ ܘܩܘܡܐ ܕܗܪ̈ܛܝܩܘܼ. ܕܢܕܪܟ ܠܥܕܬܐܿ. ܡܛܠ ܗܝܡܢܘܬܐ ܬܪܝܨܬܐ. ܘܗܝܕܝܢܼ ܟܕ ܠܐ ܨܿܒܐ ܐܢܬܼ (ܢܿܦܩ ܐܢܬ) ܒܐܟܣܝܢܘܬܐ. ܐܢ ܗܼܘ ܕܐܪܬܕܟܣܘ ܬܟܬܟܪܼ. ܘܒܗܿ ܬܫܬܡܠܐ. ܡܛܠ ܣܘܢܗܪܣ ܕܗܘܝܐ ܒܟܠܩܕܘܢܐ.܀ ܥܠ ܐܢܫ ܩܕܝܫܐ ܕܥܡܿܪ ܗܘܐ ܒܫܠܝܐ. ܘܥܠ ܩܪܗ ܕܣܛܢܐ ܕܥܡܗ. ܘܕܓܠܼܐ ܠܗ ܡܛܠ ܣܘܢܗܕܘܣ. ܘܕܡܢܗ ܠܡ ܡܬܟܢܫܐ. ܡܫܬܥܐ ܗܘܐ ܠܢ ܐܒܐ ܐܢܘܩܢܛܝܘܣ ܕܡܢ ܦܡܦܘܠܝܐܼ. ܓܒܪܐ ܢܟܦܐ ܘܪܝܫܐ ܕܐܚ̈ܐܼ. ܟܕ ܐܡܿܪ: ܕܐܝܬ ܒܦܡܦܘܠܝܐ ܫܠܒܐ ܚܕ ܪܒܐ ܘܥܡܝܩܐ ܕܒܗ ܐܢܫ ܡܢ ܩܕ̈ܝܫܐ ܘܥܢ̈ܘܝܐ ܥܿܡܪ. ܚܼܙܐ ܡܢ ܩܕܡ ܣܘܢܗܕܘܣ ܠܐܟܠܩܪܨܐ ܕܐܬܼܐ ܠܘܬܗ ܘܐܡܼܪ ܠܗܼ. ܕܟܕ ܢܿܦܠ ܐܢܬܼ ܣܓܘܕ ܠܝ. ܗܼܘ ܕܝܢ ܩܕܝܫܐ ܢܦܚܠ ܒܗ ܘܓܥܪ. ܘܫܢܝ ܫܐܕܐ ܗܿܘ ܛܢܦܐ. ܟܕ ܐܡܿܪ ܠܘܬܗ: ܠܡܢܐ ܐܫܬܐܠܼܬ ܕܬܣܓܘܕ ܠܝ. ܗܐ ܡܟܢܫ ܐܢܐ ܣܘܢܗܕܘܣ ܠܟܠܗܘܢ ܐܦܝ̈ܣܩܦܐ ܠܟܠܩܕܘܢܐܼ. ܘܥܿܒܕ ܐܢܐ ܣܘܢܗܕܣ. ܘܬܡܢ ܟܠܗܘܢ ܐܦ̈ܝܣܩܦܐ ܠܝ ܢܣܓܕܘܢ.܀ ܬܘܒ ܐܒܐ ܦܘܠܐ ܬܐܒܚܐ ܐܡܿܪ: ܕܡܢ pb. 219 ܒܬܪ ܥܣܪ̈ܝܢ ܫܢ̈ܝܢܼ ܥܒܘܪܝܐ ܐܝܬ ܠܗ ܕܢܗܘܐ ܡܢ ܐܦ̈ܝܣܩܦܐ. ܗܿܘ ܕܐܝܬܘܗܝ ܗܘܐ ܡܬܪܚܩܢܘܬܐ ܕܡܢ ܐܠܗܐ. ܗܿܝ ܕܩܕܡ ܐܡܼܪ ܫܠܝܚܐ. ܘܗܕܐ ܒܝܕ ܐܢܫ ܪܫܝܥܐ ܕܗܿܘܐ ܡܠܟܐܼ. ܕܫܡܗ ܡܪܩܝܢܐ. ܗܿܘ ܕܝܢ ܡܠܟܐ ܒܬܪ ܫ̈ܬ ܫܢ̈ܝܢܼ ܘܝܬܝܪ ܩܠܝܠܼ ܥܿܢܕ. ܘܡܢ ܒܬܪܗ ܗܿܘܐ ܐܢܫ ܙܒܢܐ ܙܥܘܪܐ ܕܓܠ ܫܝܢܐ ܡܢܬܐܝܠ ܒܥܕܬܐܼ ܘܫܿܠܐ. ܘܗܟܢܐ ܡܬܥܪ̈ܓܠܝܢ ܣܘܥܪ̈ܢܐ ܥܕܡܐ ܠܡܬܝܬܗ ܕܐܢܛܝܟܪܣܛܣ.܀ ܬܘܒ ܐܒܐ ܐܢܕܪܝܐ: ܗܢܐ ܟܕ ܗܘܐ ܒܚܙܘܐܼ ܚܼܙܐ ܟܢܫܐ ܣܓܝܐܐ ܕܐܦܝ̈ܣܩܦܐܼ. ܕܫܓܪܝܢ ܬܢܘܪܐ ܡܣܒܪܢܐܝܬܼ. ܘܒܒܘܣܐ ܫܦܝܪܐ ܕܕܡܿܐ ܠܢܘܗܪܐܼ. ܟܕ ܪܡܿܝܢ ܠܗ ܬܡܢ. ܘܫܝܥܝܢ ܗܘܘ ܠܗ ܡܢ ܟܠ ܓܒܗܝܢ ܠܗ ܠܬܢܘܪܐ. ܐܝܟܢܐ ܕܐܦܠܐ ܬܢܢܐ ܢܬܚܙܐ ܡܢܗܼ. ܐܦܠܐ ܐܐܪ ܢܥܘܠ ܠܗ. ܘܡܢ ܒܬܪ ܬܠܬܐ ܝܘ̈ܡܝܢ ܚܙܝܗܝ ܠܗ ܠܒܒܘܣܐܼ ܕܢܿܦܩܼ. ܟܕ ܫܪܝܪ ܡܢ ܬܢܘܪܐ. ܘܝܼܕܥ ܕܡܪܝܐ ܐܝܬܘܗܝ. ܘܐܝܟ ܡܢ ܕܐܝܬ ܗܘܐ [ܥܝܕܐ ܕܢܡܠܠ ܠܗܼ.] ܐܡܼܪ ܠܗܼ. ܡܪܝܐܼ ܡܿܢ ܐܢܘܢ ܗܠܝܢ ܕܥܒܼܕ ܠܟ ܗܕܐܼ ܘܐܪܡܝܟ ܒܬܢܘܪܐ. ܗܼܘ ܕܝܢ ܐܡܼܪ ܠܘܬܗ: ܐܦܝܣܩ̈ܦܐ ܬܘܒ ܨܠܒܘܢܝ. ܘܬܫܒܘܞܚܬܝ ܐܬܚܫܒܘ ܕܢܣܒܘܢ. ܘܛܒܐܝܬ ܐܡܼܪ. ܕܟܘܪܗܢܐ ܕܝܗ̈ܘܕܝܐ ܟܪܝܗܝܢ ܢܣܛܘܪ̈ܝܢܐ. ܒܪܢܫܐ ܫܚܝܡܐ ܐܡܿܪܝܢ ܠܗ ܠܗܿܘ ܕܐܨܛܠܒܼ. ܘܠܘ ܐܠܗܐ ܕܐܬܒܣܪ.. ܘܬܘܒ ܟܕ ܚܪ ܣܒܐܼ. ܚܼܙܐ ܣܒܐ ܚܕ ܡܢ ܪܘܚܩܐܼ ܟܕ ܩܐܿܡܼ. ܘܠܗܠܝܢ ܐܦܝܣ̈ܩܦܐ ܐܚܪ̈ܢܐ ܠܐ ܫܿܠܡ ܗܘܐܿ. ܘܠܐ ܡܫܬܘܬܦ ܗܘܐ ܥܡܗܘܢ. ܘܠܐ ܟܕ ܫܿܓܪܝܢ ܠܗ ܠܬܢܘܪܐ ܐܦܠܐ ܟܕ ܐܪܡܝܘܗܝ ܠܛܠܝܐ ܘܫܥܘܗܝ. ܘܗܼܘ ܣܒܐ ܐܡܼܪ pb. 220 ܠܘܬܗ ܕܛܠܝܐܼ. ܗܢܐ ܣܒܐ ܡܢܘܿ ܐܝܬܘܗܝ. ܗܼܘ ܕܝܢ ܐܡܼܪ. ܕܝܣܩܪܘܣ ܐܝܬܘܗܝ܇ ܪܝܫ ܐܦܝ̈ܣ ܕܐܠܟܣܢܪܕܝܐ. ܕܗܼܘ ܒܠܚܘܕܘܗܝ ܠܐ ܐܫܬܘܬܦ ܒܡܚܫ̈ܒܬܗܘܢ. ܘܗܼܘ ܣܒܐܼ ܐܝܟ ܡܿܢ ܕܫܩܠ ܦܪܪܣܝܐܼ. ܐܬܚܝܠ ܘܐܡܼܪ ܠܡܪܝܐ: ܘܗܕܐ ܡܢ ܐܝܟܐ ܐܝܬܝܗܿ. ܕܗܐ ܟܠܗܘܢ ܐܦܝܣܩ̈ܦܐ ܕܐܠܟܣܢܕܪܝܐܼ ܥܕܡܐ ܠܡܘܬܐ ܡܬܟܬܫܝܢ ܚܠܦ ܫܪܪܐ.. ܗܼܘ ܕܝܢ ܐܡܼܪ: ܡܢ ܟܕ ܫܡܥܘܢ ܩܘܪܝܢܝܐ ܛܥܢ ܨܠܝܒܐ ܕܝܠܝ. ܩܘܪܝܢܐ ܕܝܢ ܡܢ ܡܢܬܐ ܕܡܨܪܝܢ ܐܝܬܝܗܿ: ܘܡܢ ܗܝܕܝܢ ܩܕܡܬ ܐܬܝܕܥܬ ܒܢܒܝܘܬܐ ܕܥܬܝܕܐ ܡܨܪܝܢ܆ ܗܿܝ ܕܡܢܬܐ ܕܝܠܗܿ ܐܝܬܝܗܿ ܩܘܪܝܢܐ. ܗܿܝ ܕܒܠܘܒܐ ܣܝܡܐ: ܕܥܕܡܐ ܠܫܘܠܡܐ ܨܠܝܒܐ ܕܝܠܝ ܬܛܥܢ ܘܠܝ ܬܩܦ. ܘܛܢܢܐ ܕܚܠܦܝ ܬܚܘܐ ܥܕܡܐ ܠܡܘܬܐ.܀ ܗܘܐ ܕܝܢ ܒܩܘܣܛܢܛܝܢܦܘܠܝܣ ܦܛܪܝܪܟܐܼ. ܚܠܦ ܦܘܠܝܢܐܼ ܐܢܛܘܠܝܘܣ. ܒܐܢܛܝܟܝܐ ܚܠܦ ܕܡܢܘܣܼ ܡܟܣܝܡܣ. ܒܐܘܪܗܝ ܚܠܦ ܗܒܐܼ ܢܘܢܐ.. ܣܘܢܗܕܣ ܕܝܢ ܕܬܪ̈ܬܝܢ ܕܐܦܣܘܣ ܚܬܼܡܬܿ ܠܟܠܗܿ ܗܝܟܢܘܬܐ ܕܢܩܝܐ. ܘܫܪܪܬܿ ܐܦ ܠܗܿܝ ܩܕܡܝܬܐ ܕܐܦܣܘܣܼ. ܕܠܐ ܒܘܨܪܐ ܕܡܕܡ.܀܀ ܫܢܬ ܫܒܥ̈ܡܐܐ ܘܚܡ̈ܫܝܢ ܘܬܡ̈ܢܐܼ. ܢܚܼܬ ܥܠ ܐܘܪܫܠܡ ܘܥܠ ܟܠܗܝܢ ܩܘܪ̈ܝܐ ܕܚܕܪ̈ܝܗܿ ܥܦܪܐ ܣܓܝܐܐ ܡܢ ܫܡܝܐ ܘܫܝ̈ܦܐ ܕܟܠ ܕܡܘܢ. ܟܕ ܓܝܪ ܥܬܕܝܐ ܗܘܬ ܕܬܗܘܐ ܣܘܢܗܕܣ ܠܐ ܢܡܘܣܝܬܐ. ܡܢ ܫܠܝ ܗܘܐ ܫܡܝܐ ܥܡܘܛܐ ܥܡ ܚܫܘܟܐ ܘܥܪܦܠܐ. ܫܝ̈ܘܦܐ ܐܬܡܛܪܘ ܒܡܕܝܢܬܐ ܩܕܝܫܬܐ ܘܒܟܠܗܝܢ ܩܘܪ̈ܝܐ ܕܚܕܪ̈ܝܗܿ. ܘܒܕܘܟܝ̈ܬܐ ܣܓܝ̈ܐܬܐ ܕܦܠܣܛܝܢܐ. ܫܘܝ̈ܝ ܒܛܘܦܣܐ ܒܟܡܕܡ. ܘܕܿܡܝܢ ܗܘܘ ܠܗܠܝܢ ܕܡܢ ܒܢܝ̈ܢܫܐ ܡܬܬܩܢܝܢ. ܘܐܝܬ ܠܗܘܢ ܛܒ̈ܥܐ ܡܫ̈ܚܠܦܐ ܘܫܟܝܪ̈ܐ. ܕܗܟܢܐ ܣܓܝ̈ܐܐ ܢܠܩܛܘܢ ܡܢܗܘܢ. ܘܟܕ ܐܢ̈ܫܝܢ ܐܬܚܫܚ ܒܗܘܢ ܒܠܐ ܝܕܝܥܬܐ ܐܣܬܡܝܘܼ. pb. 221 ܘܐܡܿܪܝܢ ܗܘܘܼ ܕܗܘܣܝܟܝܘܣ ܗܿܘ ܐܡܘܪܟܐ ܕܐܘܪܫܠܡܼ. ܟܕ ܣܓܝ ܟܿܢܫ ܡܢܗܘܢܼ ܚܘܝ ܐܦ ܠܡܠܟܬܐ ܐܘܕܩܝܐ. ܘܫܕܪ ܐܦ ܠܩܘܛܢܛܝܢܦܘܠܝܣ ܠܬܚܘܝܬܐ ܕܐܬܿܐ ܗܿܝ ܕܡܫܘܕܥܐ ܗܘܬ ܕܣܡܝܘܬܐ ܕܐܚܿܕܐ ܒܥܠܡܐ. ܒܝܕ ܟܦܘܪܝܐ ܕܐܦܝ̈ܣܩܦܐ. ܡܬܚܙܐ ܗܘܐ ܕܝܢ ܐܦ ܥܦܪܐ ܣܓܝܐܐ ܠܬܚܬ ܡܢܗܘܢ ܕܫܝ̈ܘܦܐ ܒܬܚܘܝܬܐ ܕܡܢ ܫܡܝܐ ܢܚܬ.܀܀ ܫܢܬ ܫܒ̈ܥܡܐܐ ܘܚ̈ܡܫܝܢ ܘܬܫ̈ܥܼ. ܨܠܝܒܐ ܡܝܩܪܐ ܓܝܪ ܗܿܘ ܕܡܢܗܪ ܗܘܐ ܘܡܒܪܩ ܒܝܬ ܣܘܠܩܐ ܩܕܝܫܐܼ ܡܢ ܫܢ̈ܝܐ ܣܓܝ̈ܐܬܐܼ. ܟܕ ܡܢ ܫܠܝ ܐܬܚܪܟ ܡܢ ܢܘܪܐ. ܘܠܥܦܪܐ ܐܬܗܦܟ. ܐܝܬܘܗܝ ܓܝܪ ܪܒܐܼ. ܕܣܝܡ ܗܘܐ ܡܢ ܗܠܢܐ ܡܠܟܬܐ ܒܗܝܠܟܐ ܕܐܘܪܫܠܡ. ܟܕ ܕܝܢ ܗܕܐ ܗܘܬܼ. ܙܥܙܥܬܿ ܠܒܐ ܕܟܠܗܘܢ ܕܚ̈ܠܝ ܐܠܗܐ. ܐܝܟܢܐ ܕܡܠܟܬܐ ܕܚܠܬ ܐܠܗܐ ܐܘܕܩܝܐܼ ܐܝܟ ܕܠܒܘܚܐ ܘܠܦܝܣܬܐ ܕܥܡܐܼ ܚܠܦܘܗܝ ܕܢܚܫܐ ܬܥܒܕ܇ ܗܿܘ ܕܐܦ ܗܫܐ ܡܬܚܙܐ ܘܡܢܗܪܼ. ܕܐܝܬ ܒܗ ܠܝܛܪ̈ܐ ܐܫ̈ܬܐ ܐܠܦܝܐ ܢܚܫܐ.܀܀ ܫܢܬ ܫܒ̈ܥܡܐܐ ܘܫ̈ܬܝܢ ܘܬܪ̈ܬܝܢ܆ ܡܝܬ ܛܘܒܢܐ ܬܝܕܣܝܘܣ ܙܥܘܪܐ. ܘܒܝܘܡܐ ܕܡܘܬܗ ܗܘܐ ܩܠܐ ܡܢ ܫܡܝܐ ܕܐܡܪ: ܕܗܐ ܐܒܕ ܚܣܝܐ ܡܢ ܐܪܥܐܼ. ܘܠܝܬ ܕܡܝܬܐ ܥܠ ܒܠܗ.. ܗܢܐ ܕܝܢ ܩܠܐ ܠܟܠܗܘܢ ܗܢܘܢ ܕܒܡܕܝܢܬ ܡܠܟܘܬܐ ܐܫܬܡܥ. [ܚܝܐ ܕܝܢ ܬܝܕܣܝܘܣ ܡܠܟܐ] ܚܡ̈ܫܝܢ ܫܢ̈ܝܢ. ܘܐܡܠܟ ܡܢܗܝܢ ܐܪ̈ܒܥܝܢ ܘܬܪ̈ܬܝܢ܆ [ܡܛܘܠ] ܕܒܪ ܬܡ̈ܢܐ ܫܢܗܝܢ ܐܡܠܟ. ܟܕ ܐܢܬܡܘܣ ܗܘܦܪܟܐ ܗܘܐ ܠܗ ܡܪܒܝܢܐ.܀ ܥܠ ܡܠܟܘܬܐ ܕܡܪܩܝܢܐ ܘܥܠ ܚܫܘܟܐ ܕܩܛܪ ܒܝܘܡܐ ܕܣܡ ܒܗ ܬܓܐ. ܟܕ ܡܫܘܥ ܥܠ ܥܘܪܩܠܐ ܕܥܒܪ ܒܥܕܬܐ ܘܒܥܠܡܐ. ܩܼܡ ܕܝܢ ܒܡܠܟܘܬܐ ܡܢ pb. 222 ܒܬܪܗ ܡܪܩܝܢܣ. ܘܒܗ ܓܝܪ ܒܝܘܡܐ ܕܐܬܥܠܝ ܠܡܠܟܘܬܐܼ ܘܩܛܼܪ ܬܓܐ ܡܪܩܝܢܐ ܪܫܝܥܐ: ܡܢ ܫܠܝܐ ܚܫܘܟܐ ܐܚܕ ܒܟܠܗܿ ܐܪܥܐ ܥܡ ܥܡܛܢܐ ܘܚܠܐ ܕܢܿܚܬ ܗܘܐ. ܘܚܫܘܟܐ ܗܘܐ ܕܐܝܟ ܗܿܘ ܕܐܚܕ ܠܡܨܪܝܢ: ܗܟܢܐ ܐܥܡܛܗ ܠܐܐܪܼ. ܐܝܟܢܐ ܕܟܠܗܘܢ ܥܡܘܪ̈ܝܗܿ ܕܡܕܝܢܬ ܡܠܟܘܬܐܼ ܒܕܚܠܐ ܪܒܐ ܘܒܓܘܫܝܐ ܣܓܝܐܐܼ ܢܗܘܘܢ. ܘܪܘܪܒܐܝܬ ܡܝܠܠܝܢ ܗܘܘܼ ܘܡܬܒܠܝܢ. ܐܝܟ ܗܘܿ ܕܫܘܠܡܐ ܒܥܓܠ ܡܕܪܟ. ܐܝܬܝܗܿ ܗܘܬ ܗܕܐ ܢܒܝܘܬܐ ܕܚܫܐ ܕܥܬܕܝܐ ܗܘܬ ܕܬܗܘܐ ܥܠ ܟܠܗܿ ܐܪܥܐܼ. ܒܐܝܕ̈ܘܗܝ ܕܝܠܗ ܕܛܪܘܢܐ. ܘܕܣܡܝܘܬܐ ܘܕܚܫܘܟܘܬܐ ܕܡܢ ܕܚܠܬ ܐܠܗܐ. ܐܟܡܐ ܕܟܠܗܿ ܒܪܝܬܐܼ ܐܝܟ ܐܢܫ ܢܐܡܪܼ. ܠܐ ܡܬܡܠܠܢܐܝܬ ܐܒܝܠܐ ܗܘܬܼ ܘܩܕܡܐ ܡܫܘܕܥܐ ܟܦܘܪܝܐ ܕܒܐܠܗܐ ܗܿܘܐ ܗܘܐ. ܘܕܚܩܒܘܬܐ ܕܗܝܡܢܘܬܐ ܬܪܝܨܬ ܫܘܒܚܐܼ. ܡܢܗ ܕܡܠܟܐ ܪܫܝܥܐܼ ܘܡܢ ܟܢܘܫܝܐ ܣܓܝܐܐ ܕܐܦ̈ܝܣܩܦܐ ܕܡܬܥܡܪܢܝܬܐ. ܗܼܘ ܕܝܢ ܚܫܟܐ ܗܟܢܐ ܟܬܪܼ ܥܕܡܐ ܠܪܡܫܐ. ܗܼܘ ܕܝܢ ܛܪܘܢܐܼ ܟܕ ܚܼܙܐ ܫܓܘܫܝܐ ܘܐܒܠܐ ܕܐܣܛܪ̈ܛܝܘܛܐ ܘܕܟܠܗܿ ܡܕܝܢܬܐܼ. ܘܕܟܠܢܫ ܡܢܚܫ ܗܘܐ ܡܛܠ ܡܠܟܘܬܗܼ. ܐܝܟ ܡܿܢ ܕܥܬܕܝܐ ܗܘܬ ܕܬܗܘܐ ܟܠܠܗ ܥܠܡܐ ܡܢܥܙܙܢܝܬܐ ܕܒܝ̈ܫܬܐ ܪ̈ܘܪܒܬܐ: ܕܚܠ ܘܒܫܓܘܫܝܐ ܪܒܐ ܗܘܼܐ. ܘܩܕܡ ܣܡ ܟܬܝ̈ܒܬܐ ܕܕܡܣܝܘܢ܆ ܟܕ ܡܬܚܟܡ ܠܪܘܓܙܐ ܕܡܢ ܐܠܗܐ. ܘܡܣܒܪ ܒܢܦܫܗ ܕܡܛܥ ܠܥܡ̈ܡܐ. ܐܡܿܪ ܗܘܼܐ ܓܝܪ ܗܿܝ ܕܠܩܘܒܠܐ. ܐܝܟܢܐ ܕܗܼܝ ܟܬܝܒܬܐ ܡܠܦܐ ܠܗܠܝܢ ܕܦܿܓܥܝܢ ܒܗ. ܕܙܿܕܩ ܕܡܫܪܬܚܘܬܐ ܕܛܒ̈ܬܐ ܪܘܪ̈ܒܬܐ ܢܣܟܐ ܟܠܗ ܥܠܡܐ ܡܢ ܡܠܟܘܬܐ ܕܝܠܝ. ܕܚܫܐ ܡܿܢ ܕܡܠܟܐ ܕܩܡܝ ܡܬܛܪܕ. ܟܕ ܡܩܒܠ ܠܗ ܢܘܗܪܐ ܕܫܦܝܪܘܬ ܪܝܫܢܘܬܐ ܕܝܠܝ.. ܘܐܝܬܘܗܝ ܗܢܐ ܫܘܪܝܐ ܘܩܕܡܝܐ ܕܦܘ̈ܩܕܢܐ ܕܝܠܗ. ܗܕܐ ܟܬܝܒܬܐ ܟܕ ܒܟܠܗܿ pb. 223 ܬܐܒܝܠ ܐܬܣܼܡܬܿ. ܠܗܠܝܢ ܕܐܝܬ ܠܗܘܢ ܐܕ̈ܢܐ (ܕܢܫܡܥܘܢܼ) ܘܥܝ̈ܢܐ ܕܢܚܙܘܢܼ ܘܠܒܐ ܕܢܣܬܟܠܘܢܼ ܡܟܣܢܘܬܐ ܚܬܝܬܐ ܘܬܚܘܝܬܐ ܟܬܝܒܬܐ ܐܝܬܝܗܿ. ܗܿܝ ܕܡܚܕܗ ܘܕܠܐ ܥܘܟܪ ܐܕܪܟܼܬܿ ܒܝܕ ܚܦܝܛܘܬܗ ܕܛܪܘܢܐܼ ܡܬܥܒܪܢܘܬܐ ܘܡܬܪܚܩܢܘܬܐ. ܕܡܢ ܐܠܗܐܿ. ܕܗܘܼܬ ܡܢ ܐܦܝܣ̈ܩܦܐ ܒܟܠܩܕܘܢܐ܀ ܡܪܩܝܢܘܣ ܕܝܢ ܢܣܼܒ ܠܦܠܘܟܪܝܐܼ ܚܬܗ ܕܬܝܕܣܝܣ ܡܠܟܐ ܙܥܘܪܐ. ܡܢ ܒܬܪ ܚܡ̈ܫܝܢ ܫܢ̈ܝܢ ܕܢܛܪܬܿ ܒܬܘܠܘܬܗܿ. ܘܐܦ ܠܢܣܛܘܪܝܣ ܗܼܝ ܫܕܝܬܿ. ܘܥܒܪܬܿ ܥܠ ܣܘܘܕ̈ܝܗܿ ܕܥܠ ܡܫܝܚܐ ܘܐܦ ܥܠ ܗܝܡܢܘܬܗ. ܘܡܛܠ ܕܠܐ ܬܦܘܩ ܡܢ ܦܠܛܝܢܼ ܗܘܼܬ ܠܡܪܩܝܢܐ ܒܢ̈ܫܐ. ܘܫܠܡܬܿ ܠܘܬܗܿ ܢܒܝܘܬܐ ܕܐܬܢܒܝ ܥܠܝܗܿ ܡܢ ܩܕܡ ܙܒܢܐ ܣܓܝܐܐܼ ܩܫܝܫܐ ܦܠܐܓܝܘܣ ܐܘܪܗܝܐ: ܕܐܝܬ ܠܗܿ ܠܦܠܘܟܪܝܐܼ ܕܬܥܒܪ ܥܠ ܫܘ̈ܘܕܝܗܿ ܕܒܬܘܠܘܬܐ ܘܗܝܡܢܘܬܐ. ܘܬܫܬܘܬܦ ܠܡܪܩܝܢܐܼ ܘܒܐܝ̈ܕܝܗܘܢ ܗܝܡܢܘܬܐ ܬܬܚܒܠ. ܐܟܡܐ ܕܡܢ ܠܥܠ ܟܬܝܒ.܀ ܥܠ ܗܿܝܼ ܕܐܝܟܢܐ ܘܡܢ ܐܝܟܐ ܫܪܝܘ ܒܝ̈ܫܬܐ ܢܒܥܢ ܥܒܕܬܐ ܘܒܗܝܡܢܘܬܐ ܒܗܿ ܒܫܢܬܐ ܗܕܐ. ܠܐ ܡܣܠܝܐ ܠܐܕ̈ܢܝ ܦܪ̈ܘܫܐܼ. ܟܕ ܢܫܡܥܘܢ ܒܣܕܪܐ ܗܢܐ ܕܪܡܐ ܠܢܼ ܥܠ ܒܝ̈ܫܬܐ ܕܫܘܚ ܒܥܕܬܐ ܕܡܢ ܐܝܟܐ ܫܪ̈ܝܘ. ܘܡܿܢ ܙܼܪܥ ܘܐܦ ܡܿܢ ܐܫܩܝ ܠܥܩܪܐ ܗܢܐ ܡܪܝܪܐܼ. ܕܥܒܼܕ ܣܘ̈ܟܐ ܘܦܐܪ̈ܐܼ ܘܟܢܦ ܠܟܠܗܿ ܒܪܝܬܐ. ܬܝܕܪܝܛܐ ܗܿ، ܕܡܢ ܕܝܩܪܘܣ ܐܫܬܕܝܼ. ܡܛܠ ܒܝܫܘܬ ܗܝܡܢܘܬܐܼ. ܥܡ ܗܒܐ ܕܐܘܪܗܝ. ܘܕܢܝܐܝܠ ܕܚܪܢ. ܘܦܠܘܝܢܘܣ ܕܩܘܣܛܢـ ܥܡ ܚܒܪ̈ܝܗܘܢ ܗܠܝܢ ܕܐܬܢܦܩ ܥܡܗܘܢ. ܟܕ ܐܫܟܚ ܠܗܘܢ ܙܒܢܐ ܕܥܗܢ ܠܛܝܥܘܬܗܘܢ܆ ܟܢܫ ܕܗܒܐ pb. 224 ܣܓܝܐܐܼ ܘܣܠܩܘ ܠܘܬ ܠܐܘܢ ܦܛܪܝܪܟܐ ܕܪܗܘܡܐ. ܘܥܠ ܟܠܗܝܢ ܐܘܕܥܘܗܝ. ܘܒܫܘܚܕܐ ܗܿܘ ܕܡܥܘܪ ܥܝܢ̈ܝܗܿ ܕܢܦܫܐܼ ܫܥܒܕܘܗܝ ܠܛܝܥܘܬܗܘܢܼ ܘܥܒܼܪ ܥܠ ܗܝܡܢܘܬܗ. ܘܥܒܼܕ ܠܗܘܢ ܟܬܒܐ ܐܝܟ ܨܒܝܢܗܘܢ. ܗܿܘ ܕܡܬܩܪܐ ܛܘܡܣܐܼ ܐܝܟ ܕܠܘܩܒܠ ܝܘܠܦܢܗ ܕܐܘܛܘܟܐ. ܟܼܬܒ ܕܝܢ ܗܼܘ ܠܐܘܢܼ ܘܐܥܓܠ ܐܢܘܢ ܠܡܿܠܟܐ ܡܪܩܝܢܐܼ. ܘܠܐܢܬܬܗ ܦܠܘܟܪܝܐ ܚܬܗ ܕܬܝܕܣܝܣ. ܗܠܝܢ ܥܒܼܕ ܕܗܒܐ ܒܠܐܘܢ ܦܛܪܝܪܟܐ ܘܒܗܝܡܢܘܬܐ.. ܦܠܘܟܪܝܐܼ ܡܛܠ ܕܡܝܩܪ ܠܐܘܢ ܥܠ ܬܝܕܣܝܣ ܐܚܘܗܿ. ܩܒܼܠܬܿ [ܠܛܡܣܗ.] ܘܐܦ ܠܡܪܩܝܢܐ ܫܥܒܕܬܗ [ܠܢܝܚܗ] ܕܠܐܘܢ.. ܐܠܐ ܒܪܡ ܒܝ̈ܘܡܝ ܬܝܕܣܝܣܼ ܬܪܝܨ ܫܒܘܚܐ ܐܝܬܘܗܝ ܠܐܘܢ. ܘܣܓܝܘܬ ܕܗܒܐ ܕܐܬܩܪܒ ܠܗ ܡܢ ܬܝܕܪܝܛܐ ܘܦܠܘܝܢܐ ܘܗܒܐ. ܗܪܟܐ ܐܬܚܒܠ ܒܢܦܫܗ ܘܒܗܝܡܢܘܬܗ. ܘܚܒܠܗܿ ܠܟܠܗܿ ܥܕܬܐ ܒܝܕ ܡܨܝܥܘܬܗ܀܀ ܫܢܬ ܫܒ̈ܥܡܐܐ ܘܫ̈ܬܝܢ ܘܐܪ̈ܒܥܼ. ܦܩܼܕ ܡܪܩܝܢܐ ܡܠܟܐܼ. ܘܐܬܟܢܫܬܿ ܫܘܢܗܕܘܣ ܕܒܟܠܩܘܕܢܐ ܘܐܬܟܢܫܘ ܐܦܝܣ̈ܩܦܐ ܠܬܡܢ ܒܡܢܝܢܐ ܚܡ̈ܫܡܐܐ ܘܫ̈ܬܝܢ ܘܫܒ̈ܥ. ܘܟܕ ܐܬܟܢܫܘ ܘܐܬܩܪܝ ܛܘܡܣܐ ܕܠܐܘܢܼ ܩܼܡ ܟܠܗܘܢ ܫܘܝܐܝܬܼ. ܘܐܪܡܘ ܥܠ ܢܦܫܗܘܢ ܬܠ̈ܬܝܢ ܘܫ̈ܬ ܙܒ̈ܢܝܢ: ܕܠܐ ܢܩܒܠܘܢ ܠܛܘܡܣܐܼ. ܘܠܐ ܢܫܠܡܘܢ ܠܗ. ܘܟܕ ܐܬܼܐ ܡܠܟܐ ܡܪܩܝܢܐܼ. ܦܼܩܕ ܕܟܠ ܡܢ ܕܠܐ ܢܩܒܠ ܠܛ.ܘܡܣܐ܆ ܢܩܘܡ ܡܢ ܟܘܪܣܝܐ ܘܢܬܒ ܥܠ ܐܪܥܐ: ܘܡܛܠ ܕܪܚܡ ܟܘܪܣܘܬܗܘܢ ܘܪܝܫܢܘܬܗܘܢܼ ܥܒܼܪ ܥܠ ܚܪ̈ܡܝܗܘܢܼ ܘܐܦ ܥܠ ܗܝܡܢܘܬܐܼ. ܘܝܼܬܒ ܫܠܘ ܥܠ ܟܘܪ̈ܣܘܬܗܘܢ. ܘܐܠܐ ܐܢ ܒܠܚܘܕ ܕܝܣܩܪܣ ܕܐܠܟܣܢܕܪܝܐܼ ܠܐ ܩܼܡ. ܘܐܫܬܕܝ ܠܓܢܓܪܐ. ܘܥܒܼܕ ܚܠܦܘܗܝ ܠܦܪܛܪܝܣܘ ܣܢܩܠܗ.. ܪ̈ܝܫܝܗܿ ܕܝܢ ܕܗܕܐ ܣܘܢܗܕܣܘ ܐܝܬܝܗܘܢ ܗܠܝܢ: ܐܢܛܘܠ ܕܩܘܣܛܢܛܝܢܐܦܘܠܝܣ. ܝܘܒܝܢܠܐܣ ܕܐܘܪܫܠܡ. ܬܝܕܪܝܛܐܼ pb. 225 ܗܿܘ ܕܐܫܬܕܝ ܡܢ ܕܝܘܣܩܪܘܣ. ܥܡ ܢܛܪ̈ܝܢ ܕܘܟܬܗ ܕܠܐܘܢ ܕܪܗܘܡܐ.܀ ܥܠ ܚܙܘܐ ܗܿܘܕ ܐܬܚܙܝ ܒܗܿ ܒܟܠܩܕܘܢܐ. ܐܦܠܐ ܗܕܐ ܡܣܠܝܐ ܡܢ ܕܢܣܝܡܝܗܿ ܒܣܕܪܐ ܗܢܐ. ܩܕܡ ܝܘܡ̈ܬܐ ܙܥܘܪ̈ܐ ܕܦܼܩܕ ܡܠܟܐ ܕܬܬܟܢܫ ܗܿܝ ܣܘܢܗܕܣ ܠܟܠܩܕܘܝܢܐܼ. ܐܬܚܙܝ ܒܕܡܘܬ ܓܒܪܐ ܗܢܕܘܝܐ ܙܥܘܪܐ. ܕܣܿܓܝ ܡܫܟܚܪ ܒܚܙܬܗ ܘ . . . . ܘܒܚܙܘܗ. ܟܕ ܡܫܬܥܐ ܘܡܪܩܕ ܟܒܗܠܘܢ ܫܘ̈ܩܐ ܕܝܠܗܿ ܕܟܠܩܕܘܝܢܐܼ. ܒܦܠܓܗ ܕܝܘܡܐ. ܘܗܟܢܐ ܐܬܚܙܝ ܠܟܠܗܘܢ ܒܢ̈ܝ ܡܕܝܢܬܐ ܗܿܝ. ܘܠܐ ܐܢܫ ܐܫܟܚ ܠܡܚܕܗ. ܐܝܟܢܐ ܕܟܕ ܗܕܐ ܗܘܬ ܠܘܬܗܘܢ ܒܢ̈ܝ ܡܕܝܢܬܐ ܒܐܒܠܐ ܥܒܼܕܬܿ. ܟܕ ܐܡܿܪܝܢ ܕܣܕܩܐ ܐܝܬ ܠܗ ܠܣܛܢܐܼ ܕܢܪܡܐ ܒܥܠܡܐܼ. ܒܝܕ ܡܫܬܒܩܢܘܬܐ ܕܡܢ ܐܠܗܐ. ܗܿܝ ܕܐܦ ܓܼܕܫܬܿ ܒܥܒܕܐ.܀ ܡܬܝܕܥܝܢ ܕܝܢ ܒܗܢܐ ܙܒܢܐ ܠܘܬ ܬܪ̈ܝܨܝ ܫܒܘܚܐ: ܕܝܩܪܣ ܕܐܠܟܣܢܕܪܝܐ. ܦܛܪܣ ܐܒܪܝܐ. ܘܪܡܢܘܣ ܪܝܫܕܝܪܐ. ܘܒܣܝܠܝܣܼ ܗܿܘ ܕܥܒܕ ܒܢ̈ܝ ܐܘܪܫܠܡ ܚܠܦ ܝܘܒܝܢܠܐܣ. ܡܪܩܝܢܐ ܕܝܪܝܐ. ܒܪܨܘܡܐ ܫܡܝܫܛܝܐܼ ܕܝܪܝܐ. ܫܡܥܘܢ ܕܐܣܛܘܢܗ. ܡܬܝܕܥܝܢ ܕܝܢܼ ܫܡܥܘܢ ܕܝܪܝܐ ܕ. . . . ܘܫܒ̈ܥܝܢ ܬܠܡܝܕ̈ܘܗܝ. ܦܘܠܣ ܕܨܘܪܬܐ. ܝܥܩܘܒܼ ܕܟܦܪܐ ܪܚܝܡܐ.. ܥܕܡܐ ܠܗܢܐ ܙܒܢܐܼ. ܟܠܗܘܢ ܐܝܠܝܢ ܕܪܚܡܝܢ ܗܘܘ ܩܘܡܐܼ. ܒܐܝ̈ܠܢܐ ܡܫܿܡܠܝܢ ܗܘܘ ܚܝܝ̈ܗܘܢ. ܡܢ ܫܡܥܘܢ ܫܪܝ ܠܡܗܘܐ ܐܣܛܘ̈ܢـ[ܪܐ] ܒܥܠܡܐ.. ܡܢ ܒܬܪ ܓܝܪ ܐܝܠܝܢ ܕܐܣܬܥܪ ܒܣܘܢܗܕܣ ܕܟܠܩܕܘܢܐ ܢܒܥܘܢ ܚܪ̈ܝܢܐ. ܘܣܓܝܘ . ܘܐܬܥܝܪܘ ܫܓܘ̈ܫܝܐ ܒܟܠܗܿ ܥܕܬܐܼ ܕܒܟܠ ܐܬܪ. ܘܦ̈ܠܓܘܬܐ ܗ[ܘ̈]ܝ ܒܟܠܕܘܟ. ܘܥܡ̈ܡܐ ܡܗܝ̈ܡܢܐ ܒܚܕ̈ܕܐ ܢܦܼܠ. ܘܪ̈ܥܘܬܐ ܒܚܕ̈ܕܐ ܒܐܟܬܐ ܩܛܘܠܬܐܼ pb. 226 ܘܒܣܢܬܐ ܗܝ ܡܘܒܢܝܬܐ ܣܒܿܟܝܢ ܗܘܘ ܒܚܕ̈ܕܐ: ܒܚܣ̈ܕܐ ܡܿܢ ܘܒܪ̈ܕܘܦܝܐ ܘܒܒܝ̈ܫܬܐ . ܘܠܘ̈ܚܡܐ ܐܟ̈ܬܢܐ. ܐܝܟܢܐ ܕܐܝܟ ܡܐ ܕܟܬܝܒܼ. ܢܗܘܐ ܟܠܗ ܬܓܡܐ ܕܟܪ̈ܣܛܝܢܐ ܚܣܕܐ ܠܫܒ̈ܒܘܗܝ. ܘܡܘܝܩܐ ܘܒܘܙܚܐ ܠܐܝܠܝܢ ܕܒܚܕܪ̈ܝܗܘܢ ܐܢܘܢ.. ܐܝܟܢܐ ܕܟܕ ܥܡܐ ܣܟܠܐ ܘܠܐ ܗܘܐ ܚܟܝܡܐ ܕܨܠܘ̈ܒܐܼ. ܟܕ ܡܡܝܩܝܢ ܗܘܘ ܘܡܒܙܚܝܢ ܗܘܘ [ܒܟܪ̈ܣܛܝܢܐܼ: ܠܡܪܚܘܬܐ] ܕܐܝܟ ܗܕܐ ܢܐܬܘܢܿ ܐܝܟ ܕܢܟܬܒܘܢ ܟܬܒܐ. [ܕܩܒܼܥ ܒܬܪܥܗ] ܕܕܡܘܣܝܢ ܒܡܕܝܢܬ ܡܠܟܘܬܐܼ. ܕܐܝܟ ܗܢܐ܀ ܐܝܓܪܬܐ ܕܥܒܕ ܝܗ̈ܘܕܝܐ ܠܘܬ ܡܪܩܝܢܐ ܡܠܟܐ ܒܬܪ ܫܪܝܗܿ ܕܣܘܢܗܕܣ ܕܟܠܩܕܘܢܐܼ. ܠܡܪܚܡܢܐ ܡܠܟܐ ܡܪܩܝܢܐ: ܥܡܐ ܕܥܒܪ̈ܝܐ. ܗܢܐ ܟܠܗ ܙܒܢܐ ܡܣܬܒܪܝܢ ܗܘܿܝܢܼ ܐܝܟ ܗܿܘ ܕܠܐܠܗܐ ܨܠܒܘ ܐܒܗ̈ܝܢ܆ ܘܠܐ ܗܘܐ ܠܒܪܢܫܐ. ܡܢ ܕܝܢ ܕܐܬܟܢܫܬܿ ܣܘܢܗܕܣ ܗܕܐ ܩܕܝܫܬܐ ܕܒܟܠܩܕܘܝܢܐܼ. ܘܚܘܝܬܿ ܕܠܒܪ ܢܫܐ ܙܩܦܼ܆ ܘܠܐ ܗܘܐ ܠܐܠܗܐ. ܡܛܠܗܕܐ ܡܦܝܣܝܢܢ ܕܣܟܠܘܬܐ ܗܕܐ ܬܬܒܩ ܠܢ܆ ܘܟܢܘ̈ܫܬܢ ܢܬܦܢ̈ܝܢ ܠܢ.. ܠܗܕܐ ܟܠܗܿ ܡܪܚܘܬܐ ܐܫܟܚ ܠܡܐܬܐ ܥܡܐ [ܕܛܥܐ] ܠܐܠܗܐ ܕܥܒܕܗܼ ܘܨܚܝ ܠܬܩܝܦܐ ܕܦܪܩܗ.܀܀ ܫܢܬ ܫܒܥ̈ܡܐܐ ܘܫ̈ܬܝܢ ܘܫ̈ܬܼ. ܗܘܐ ܙܘܥܐ ܪܒܐ ܘܕܚܝܠܐ. ܘܢܦܼܠܝܢ ܒܗ ܡܕ̈ܝܢܬܐ ܘܕܘ̈ܟܝܬܐ ܣܓܝ̈ܐܬܐ. ܐܝܟܢܐ ܕܛܪܝܦܠܝܣ ܟܠܗܿ ܐܬܗܦܟܬܿ܇ ܗܿܝ ܕܦܘܢܩܝܐ.܀܀ ܘܒܫܢܬ ܫܒ̈ܥܡܐܐ ܘܫ̈ܬܝܢ ܘܬܫ̈ܥܼ. ܒܢܼܐ ܢܘܢܐ ܐܦܝܣܩܦܐ ܕܐܘܪܗܝܿ ܒܝܬ ܝܘܚܢܢ ܡܥܡܕܢܐ ܘܐܘܓܪܣܐ [ܕܡܣ̈ܟܢܐ] ܠܒܪ ܡܢ ܬܪܥܐ ܕܒܝܬ ܫܡܫ... ܒܢܼܐ ܕܝܢ ܒܗ ܒܐܘܓܪܣܐ ܒܝܬ ܣܗ̈ܕܐ ܠܡܪܝ ܩܘܙܡܐ ܘܠܡܪܝ pb. 227 ܕܘܡܝܢܐ.܀܀ ܫܢܬ ܫܒ̈ܥܡܐܐ ܘܫܒ̈ܥܝܢ܆ ܗܘܼܐ ܙܘܥܐ ܩܫܝܐ ܘܢܦܠܬܿ ܒܼܗ ܐܢܛܝܟܝܐ ܕܣܘܪܝܐ: ܗܦܘܟܝܐ ܕܐܪ̈ܒܥܐ [ܠܗܿ. ܡܓܗ̈ܝ] ܚܕܒܫܒܐ ܒܬܠ̈ܬܥܣܪ ܒܐܝܠܘܠ. ܘܫܼܕܪ ܠܐܘܢ ܡܠܟܐ ܕܗܒܐ ܣܓܝܐܐܼ. ܘܒܢܼܐ ܡܣܚ̈ܦܬܗܿ.܀܀ ܫܢܬ ܫܒ̈ܥܡܐܐ ܘܫܒ̈ܥܝܢ ܘܚܕܐܼ. ܡܝܬ ܩܕܫܝܐ ܡܪܝ ܫܡܥܘܢ ܕܐܣܛܘܢܗ. ܟܕ ܐܪܕܒܘܪ ܐܣܛܪܛܝܠܛܝܣ ܕܡܕܢܚܐ. ܘܐܬܟܢܫܘ ܟܠܗܘܢ ܐܢܛܝ̈ܘܟܝܐܼ. ܟܕ ܩܿܥܝܢ ܘܡܿܪܒܝܢ ܥܠܘܗܝ ܕܢܫܕܪ ܚܝܠܐ ܕܢܚܛܦ ܠܗܘܢ ܦܓܪܗ ܕܛܘܒܢܐܼ. ܘܢܝܬܝܘܗܝ ܠܗܘܢ ܒܡܕܝܢܬܗܘܢ. ܗܼܘ ܝܕܢ ܐܪܕܒܘܪ ܫܕܪ ܚܝܠܐ ܣܓܝܐܐ ܕܓܘ̈ܬܝܐ. ܘܒܩܪܒܐ ܪܒܐ ܐܫܟܚܘܢ ܠܡܚܛܦ ܠܦܓܪܗ ܕܛܘܒܢܐܼ ܘܢܝܬܘܢܝܗܝ ܠܐܢܛܝܟܝܐܼ. ܐܝܟܢܐ ܕܟܕ ܒܙܘܚܐ ܪܒܐ ܐܬܩܒܠ ܡܢ ܐܢ̈ܛܝܟܝܐܼ. ܡܚܕܗ ܥܒܼܕ ܠܗ ܒܝܬ ܣܗ̈ܕܐ ܪܒܐܼ ܘܐܬܣܝܡ ܒܗ ܒܓܠܘܣܩܡܐ.܀܀ ܫܢܬ ܫܒ̈ܥܡܐܐ ܘܫܒ̈ܥܝܢ ܘܫ̈ܬܼ. ܐܦܩ ܦܘܩܕܢܐ ܠܐܘܢ ܡܠܟܐ ܕܠܐ ܐܢܫ ܢܡܪܚ ܕܢܦܠܘܚ ܒܚܕܒܫܒܐܼ. ܘܠܐ ܩܝܬܪܐ ܐܘ ܐܒܘܒܐ ܐܘ ܦܠܓܐ ܐܘ ܚܕ ܡܢ ܡܐܢ̈ܝ ܙܡܪܐܼ ܢܡܪܚ ܐܢܫ ܕܢܬܚܫܚ ܒܝܘܡܐ ܩܕܝܫܐ ܕܚܕܒܫܒܐ. ܐܠܐ ܟܠܡܕܡ ܢܒܛܠܼ. ܘܒܥܕܬܐ ܟܠܢܫ ܢܬܥܢܐܼ ܘܟܠܢܫ ܢܬܬܢܝܚ.܀܀ ܫܢܬ ܫܒ̈ܥܡܐܐ ܘܫܒ̈ܥܝܢ ܘܫܒ̈ܥܼ. ܒܢܼܐ ܠܐܘܢ ܡܠܟܐ ܠܩܠܝܢܩܣ ܕܒܝܬ ܢܗܪ̈ܝܢ.܀܀ ܫܢܬ ܫܒ̈ܥܡܐܐ ܘܬܡ̈ܢܝܢ ܘܬܪ̈ܬܝܢ܆ ܡܝܼܬ ܢܘܢܐ ܐܦܝܣܩܦܐ ܕܐܘܪܗܝ܆ ܘܗܘܼܐ ܚܠܦܘܗܝ ܩܘܪܐ.܀܀ ܫܢܬ ܫܒܥ̈ܡܐܐ ܘܬܡ̈ܢܝܢ ܘܬ̈ܠܬܼ. ܐܩܝܡ ܠܐܘܢ ܡܠܟܐ ܪܕܘܦܝܐ ܩܫܝܐ ܥܠ ܐܪ̈ܝܢܘܼ. ܒܟܠܗܘܢ ܐܬܪ̈ܘܬܐ ܕܘܚܕܢܗ. ܟܕ ܛܪܕ ܘܕܚܩ ܠܗܘܢ ܘܫܩܠ ܥܕ̈ܬܗܘܢܼ. ܘܦܩܼܕ ܕܠܐ ܢܬܟܢܫܘܢ ܟܠ ܟܠܗ.܀܀ ܫܢܬ ܫܒ̈ܥܡܐܐ ܘܬܡ̈ܢܝܢ ܘܐܪ̈ܒܥܼ. ܢܚܬ pb. 228 ܩܛܡܐ ܡܢ ܫܡܝܐ ܒܕܡܘܬ ܡܛܪܐ. ܘܟܼܫܐ ܥܠ ܐܪܥܐ ܘܥܠ ܩܪ:̈ܡܝܕܐ ܙܪܬܐ ܚܕܐ. ܘܗܘܼܬ ܟܠܗܿ ܡܕܝܢܬܐ ܘܟܠܗ ܦܠܛܝܐ ܒܕܚܠܐ ܪܒܐ. ܘܕܚܠܬܐ ܘܙܘܥܬܐ ܣܓܝܐܬܐ ܗܘܬ ܥܠ ܟܠܗܘܢ ܒܢܝ̈ܢܫܐ. ܟܕ ܐܡܝܢܝܢ ܒܒܥܘܬܐ ܘܒܚܫܐ ܘܕܡ̈ܥܐ ܒܠܠܝܐ ܘܒܐܝܡܡܐܼ. ܟܕ ܟܠܢܫ ܗܕܐ ܐܡܿܪ ܗܘܐ: ܕܗܢܐ ܩܛܡܐ ܕܢܚܼܬ ܡܢ ܫܡܝܐ ܢܘܪܐ ܐܝܬܘܗܝ ܗܘܐ ܕܒܪܘܓܙܐ [ܡܡܛـ]ـܪ ܐܠܗܐ ܥܠ ܐܪܥܐ. ܘܒܪ̈ܚܡܘܗܝ ܕܐܠܗܐ ܚܝܐ ܚܼܣ ܥܠ ܥܠܡܐܼ. ܘܕܥܟܗܼܿ. ܘܗܘܬܼ ܩܛܡܐܿ. ܕܠܐ ܬܘܩܕܝܘܗܝ ܘܬ[ܣܝـ]ـܦܝܘܗܣ ܠܟܠܗ ܓܢܣܐ ܕܒܢܝ̈ܢܫܐ. ܘܗܫܐ ܢܬܘܒ ܡܢ ܒܝ̈ܫܬܢܼ. ܕܠܐ ܠܓܡܪ ܢܐܒܕ ܒܚ̈ܛܗܝܢ.܀܀ ܫܢܬ ܫܒ̈ܥܡܐܐ ܘܬܡ̈ܢܝܢ ܘܚ̈ܡܫܼ. ܗܘܼܐ ܝܩܕܢܐ ܪܒܐ ܒܡܕܝܢܬ ܡܠܟܘܬܐ܇ ܕܠܐ ܡܡܬܘܡ ܗܘܼܐ ܒܝܫ ܐܟܘܬܗ ܕܗܢܐܼ. ܐܫܬܠܛܬܿ [ܒܗܿ ܢܘܪܐ ܒܩܝܦܐܝܬܼ] ܘܐܘܩܕܬ ܡܢ ܝܡܐ ܠܝܡܐ. ܘܠܐ ܣـ . . . . . . ܐܝܟܢܐ ܠܝܬ ܠܗ ܣܟܐ . . . ܟܕ ܚܼܙܐ ܡܠܟܐ ܠܐܘܢ ܐܬܥܠܝ ܘܥܪܩ ܠܗ ܠܥܒܪܐ ܕܒܝܬ ܡܪܝ ܡܐܡܐ ܘܡܢ [ܥܩܬܗ] ܝܿܬܒ ܠܗ ܬܡܢ ܝܪ̈ܚܡܐ ܫ̈ܬܐ. ܒܢܼܐ ܕܝܢ ܬܡܢ ܠܡܐܢܐ ܪܒܐ ܕܡܬܩܪܐ ܕܢܐܘܢ ܐܝܒܠܘܢ.܀܀ ܫܢܬ ܫܒ̈ܥܡܐܐ ܘܬܡ̈ܢܝܢ ܘܫ̈ܬܼ. ܐܡܿܠܟ ܠܐܘܢ ܣܒܐܼ [ܠܠܐܘܢ ܒܪ] ܒܪܬܗ ܒܪܗ ܕܙܐܢܘܢܼ. ܥܡܗ ܒܡܠܟܘܬܐ.܀܀ ܫܢܬ ܫܒܥ̈ܡܐܐ ܘܬܡܢ̈ܝܢ ܘܬܡ̈ܢܐܼ. ܡܝܼܬ ܠܐܘܢ ܣܒܐ ܘܐܚܕ ܡܠܟܘܬܐ ܠܐܘܢ ܙܥܘܪܐܼ. ܟܕ ܗܼܘ ܒܪ ܫܒ̈ܥ ܫܢܗܝܢ.܀܀ ܫܢܬ ܫܒ̈ܥܡܐܐ ܘܬܡ̈ܢܝܢ ܘܬܫ̈ܥܼ. ܐܛܥܝܬܗ ܐܡܗ ܠܠܐܘܢ ܙܥܘܪܐܼ. ܐܝܟ ܕܠܒܒܘܣܐܼ ܘܐܡܼܪܬܿ ܠܗ: ܕܡܐ ܕܣܼܓܕ ܠܟ ܐܒܘܟ ܥܡ ܪ̈ܝܫܝܢܐܼ. ܣܒ ܬܓܐ ܕܒܪܝܫܟ ܘܣܡ pb. 229 (ܒܪܝܫܗ). ܗܼܘ ܕܝܢ ܠܐܘܢ ܙܥܘܪܐܼ ܕܐܝܬܘܗܝ ܗܘܐ ܒܒܘܣܐ ܙܥܘܪܐ ܒܪ ܫܒ̈ܥ ܫܢ̈ܝܢ܆ ܥܒܼܕ ܗܟܢܐ. ܘܫܩܠ ܟܠܝܠܐ ܕܒܪܫܗ ܕܡܠܟܘܬܗ. ܘܣܡ ܒܪܝܫܐ ܕܐܒܘܗܝ. ܘܗܝܕܝܢ ܐܬܚܙܝ ܙܐܢܘܢ ܡܟܝܠ ܐܚܝܕ ܡܠܟܘܬܐܼ. ܐܝܬܘܗܝ ܗܘܐ ܒܓܢܣܗ ܐܝܣܘܪܝܐ.. ܠܐܘܢ ܒܪܗ ܥܒܼܕܗ ܗܘܦܛܣ.܀܀ ܫܢܬ ܫܒܥ̈ܡܐܐ .ܨ. ܡܪܕ ܥܠ ܙܐܢܘܢ ܒܣܠܝܩܘܣܼ ܐܚܘܗܿ ܕܒܝܪܝܢܐܼ ܐܢܬܬ ܠܐܘܢ ܪ[ܒܐܼ ܕܢܚـ]ـܘܕ ܡܠܟܘ[ܬܐ]. ܙܐܢܘܢ ܕܝܢ ܐܬܦܠܛ ܠܐܝܣܘܪܝܐܼ. ܘܝܼܬܒ ܬܡܢ.܀܀ ܫܢܬ ܫܒ̈ܥܡܐܐ ܘܬܫ̈ܥܝܢ ܘܚܕܐܼ. ܗܘܼܐ ܙܘܥܐ ܩܫܝܐ. ܘܢܦܼܠܬܿ ܒܗ ܓܒܐܠܝܐ ܡܝܕܢܬܐ ܕܣܘܪܝܐ. ܘܫܕܪ ܒܣܠܝܩܘܣ [ܚܡ̈ܫܝܢ] ܠܝܛܪ [ܕܗܒܐܼ. ܘܒܢܼܗܿ].܀܀ ܫܢܬ ܫܒ̈ܥܡܐܐ ܘܬܫ̈ܥܝܢ ܘܬܪ̈ܬܝܢ܆ ܗܦܟ ܙܐܢܘܢ ܠܩܘܣܛܢܛܝܢܦܘܠܝܣ ܒܚܠܐ ܣܓܝܐܐܼ. ܘܐܬܩܒܠ [ܡܢ ܟܠܗܿ] ܣܢܩܠܛܣ. ܘܒܫܠܝܘܩܣ ܥܪܼܩ ܠܥܕܬܐ [ܪܒܬܐܼ ܘܥܠ] ܠܡܥܡܘܕܝܬܐ. ܘܫܕܪ ܙܐܢܘܢܼ ܘܫܠܚ ܡܢܗ ܐܣܟܡܐ ܕܡܠܟܘܬܐܼ. ܘܡܢ ܐܢܬܬܗ ܘܡܢ ܒܢ̈ܘܗܝ. ܘ[ܡܛܠ ܕܣܡ] ܠܗܘܢ ܡܠܬܐܼ ܕܠܐ ܡܬܩܛܠܝܢ ܡܢـ[ـܗ ܒܪܒـ]ـܐܼ. ܫܕܪ ܐܢܘܢ [ܕܝܢ ܠܠܝܡܝܣ ܩܣܛܪܝܐ] ܕܩܦـ[ـܕܘܟܝܐ. ܘܐܬܚܒܫܘܢ ܒܚܕ ܡܢ ܦܘܪ̈ܟـ]ـܣܐ ܕܒܗ. ܘܫܥ ܠܬܪܥܐ ܒܐܦ̈ܝܗܘܢܼ. ܘܡܝܬ ܬܡܢ. ܘܟܕ ܚܝܝܢܼ [ܐܬ]ܩܒܪܘ.܀܀ ܫܢܬ ܫܒܥ̈ܡܐܐ ܘܬܫ̈ܥܝܢ ܘܐܪ̈ܒܥ܆ ܫܕܐ ܙܐ[ܢܘܢ ܦܛܪܘܣ ܩܛܪܝܪܟܐ ܕܐܢܛܝܟܝܐ] ܠܐܟܣܘܪܝܐ. [ܠܘ ܥܠ ܐܦ̈ܝ ܗܝ̈ܡـ[ـܢܘܬܐܼ. ܐܠܐ ܡܛܠ ܕܐܢܬܟܠ ܥܠܘܗܝܼ ܘܐܫܬܘܝ] ܥܡ ܒܣܠܝܩܣ. ܘ[ܥܼܒܕ ܚܠܦܘܗܝܼ] ܠܐܣܛܦܢܐ. [ܗܢܐ ܟܕ ܩܠܝܠ ܠܒܟܼ ܐܫܬܟܚ] ܕܐܝܬܘܗܝ [ܢܣܛܘܪܝܢܐ. ܘܟܕ ܢܼܦܩ] ܕܢܥܒܕ ܕܘܟܪܢܐ ܕܐܪ̈ܒܥܝܢ ܣܗ̈ܕܐܼ ܠܒܪ ܡܢ ܡܕܝܢܬܐ. ܐܬܟܢܫܘ pb. 230 ܩܠܝܪ̈ܝܩܘܝܗܼ ܘܠܛܫܘ] ܩܢܝ̈ܐܼ ܘܕܓـ[ܫܘܗܝ ܘܡܝܼܬ. ܘܫܕܘ ܫܠܕܐ ܒܐܘܪܢܛܐ ܢܗܪܐ. ܘܟܕ ܫܡܼܥ] ܙܐܢܘܢ [ܗܕܐ. ܘܡܢ ܗܠܝܢ ܥܒܼܕ] ܬܒܥܬܐ. [ܘܥܼܒܕ ܒܬܪܗ ܩܠܐܢܕܝܘܢܼ. ܗܢܐ ܕܐܦ ܐܫـ[ـܬܟܚ ܢܣܛܘܪܝܢܐ. ܘܫـ]ـܕܘܗܝ ܠܐܟܣܘܪܝܐ.. ܗܝـ[ـܕܝܢ ܗܘܬ ܡܢ] ܐܢܛܝ̈ܟܝܐ ܩܥܬܐ ܣܓܝܐܬܐܼ [ܡܛܠ ܦܘܢܝܗ] ܕܦܛܪܘܣ ܗܼܘ ܕܐ[ܫܬܪܝ. ܘܦܼܩܕ] ܡܿܠܟܐ ܕܢܬܦܢܐ. ܘܠـ[ـܒܼܟ ܬܪܘܢܣ ܕܝܠܗܼ] ܟܠܗܘܢ ܝـ[ـܘ̈ܡܝ ܚܝܘ̈ܗܝ. ܘܡܝܬ ܬܡܢ] ܒܗܿ ܒܐܢܛܝܟܝܐ.܀܀ ܫܢܬ ܫܒ̈ܥܡܐܐ ܘܬܫܥ̈ܝܢ ܘܫ̈ܬܼ. ܥܒܼܕ ܙܐܢܘܢ ܡܿܠܟܐ ܟܬܒܐ ܗܢܐ ܕܡܬܩܪܐ ܗܢܛܝܩܘܢܼ. ܘܚܿܝܕ ܠܥܕܬܐ ܒܝܘ̈ܡܬܗ. [ܟܕ ܓܝܪ ܩܡ] ܗܘܐ ܙܐܢܘܢ ܒܡܠܟܘܬܐܼ. [ܘܐܫܟܚܗܿ ܠܥܕܬܐ ܩܕܝܫܬܐ ܕܒـ[ـܟܠ ܐܬܪ ܕܠܝܚܐ ܘܫܓܝܫܐ. ܘܣܕ̈ܩܐ ܬܘܒ ܡܢ ܥܠܬ ܚܘܕ̈ܬܐܼ ܕܠܒܪ ܡܢ ܛܟـ[ـܣܐ ܥܕܬܢܝܐܼ ܗܘܘ [ܒܣܘܢܗܕܣ ܕܒܟܠܩܕܘܢܐ] ܡܕܝܢܬܐ ܐܬ[ܟܼܢܫܬܿ ܘܫܪܟܐ ܕܒܠܝܠܘܬܐ ܕܒܗܿ. ܘ]ܟܕ ܒܣܓܝ̈ܐܬܐ ܐܬ[ܦܪܣ ܕܢܫܠܐ ܫܓܘ̈ܫܝܐ ܕܒܟܠ] ܐܬܪ: ܐܬܚܫܒ ܘܥܒܼܕ [ܟܬܒ ܙܥܘܪܐ ܕܚـ]ـܘܝܕܐ ܗܘܐ ܗܢـ[ܛܝܩܘܢ ܗܢܐܼ ܕܐܝܟ ܕܐܡܿܪܬ:] ܕܥܕܡܐ ܠܗܝܕܝܢ [ܦܠܝܓܝܢ ܗܘܘ ܥܡ̈ܡܐ ܣܓܝ̈ܐܐ ܡܢܚܕ̈ܕܐ.. ܟܕ ܐܦ ܗܟܢܐ ܗ[ܠܝܢ ܕܡܢ ܗܪ̈ܛܝܩܐ] ܚܬܝ̈ܬܐ ܐܝܬܝܗܘܢ ܗܘܘܼ. ܓܒܐ ܕܣـ[ـܩܘܒܠܝܘ]ܬܐ ܣܕܪ ܠܘܩܒܠܗ ܕܟܬܒܐ ܠ . . . . . ܐܠܐ ܐܝܟ ܕܟـ[ـܬܝܒ: ܕܐܬܚܫܒ ܗܘܘ ܬܪܥـ]ـܝܬܐ ܘܠܐ ܐܬܡܨܝ ܚܝܠܐ. ܥܕܬܐ ܕܝܢ ܩܕܝܫܬܐ ܟܕ ܡܦܩ ܒܪܘܚܐ ܕܥܒܼܕ ܟܒܬܐ ܩܼܒܠܠܬܿ. ܡܢ ܗܝܕܝܢ ܠܘܬ ܚܘܕܝܐ ܐܬܼܬܿ. ܘܢܘܚܐ ܘܫܠܝܐ ܒܝܢܬ ܓܒ̈ܐ ܗܘܐ. ܘܒܝ̈ܫܬܐ ܣܒܝ̈ܣܬܐܼ. ܘܚܪ̈ܝܢܐ ܕܒܟܠ ܐܬܪ ܐܬܒܛܠ.. ܐܬܚܙܠܝ ܠܝ ܕܝܢ ܕܐܦ ܠܗ ܠܟܬܒܐ ܗܢܐܼ ܟܕ ܛܒ ܒܟܠܕܘܟ ܫܒܝܚܼ. ܒܣܕܪܐ ܗܢܐ ܐܣܝܡܘܗܝ: ܕܐܝܬܘܗܝ ܗܟܢܐ.

ܨܚܚܐ ܕܟܬܒܐ ܗܢܛܝܩܘܢ ܕܥܼܒܕ ܙܐܢܘܢ ܡܠܟܐܼ. ܡܛܠ ܚܘܝܕܐ ܕܥܕܬܐ: ܕܐܝܬ ܗܟܢܐ: ܐܘܛܘܩܪܐܛܘܪ ܩܣܪ pb. 231 ܙܐܢܘܢ ܡܗܝܡܢܐ ܙܟܝܐ܆ ܡܬܢܨܚ ܒܙܟܘܬܐ ܪܒܐ ܘܡܝܩܪܐ ܐܡܝܢܐܝܬ ܐܓܘܣܛܣ. ܠܐܦ̈ܝܩܦܐ ܘܥ̈ܡܡܐ ܕܐܝܬ ܒܡܨܪܝܢ ܘܒܐܠܟܣܢܕܪܝܐ ܘܒܠܘܒܐܐ ܘܒܦܢܛܦܘܠܝܣ. ܫܘܪܪܐ ܘܩܘܝܡܐ ܘܚܝܠܐ ܘܙܝܢܐ ܠܐ ܡܙܕܟܝܢܐ ܕܡܠܟܘܬܢܼ ܝܿܕܥܝܢܢ ܕܐܝܬܘܗܝ ܗܝܡܢܘܬܐ ܗܿܝܕ ܒܠܚܘܕܝܗܿ ܐܝܬܝܗܿ ܬܪܝܨܬܐ ܘܫܪܝܪܬܐ. ܗܝܿ ܕܒܝܕ ܡܓܢܢܘܬܐ ܐܠܗܝܬܐ ܣܡܘ ܐܝܠܝܢ ܕܒܢܩܝܐ ܐܬܟܢܫܘ ܗܘܘ ܬܠܡ̈ܐܐ ܘܬܡ̈ܢܬܥܣܪ ܐܒ̈ܗܬܐ ܩܕ̈ܝܫܐ. ܬܚܡܘ ܕܝܢ [ܒܗܿ ܒܕܘܟܬܐ] ܬܘܒ ܘܐܝܠܝܢ ܕܒܩܘܣܛܢـ ܐܬܟܢܫܘ ܡ̈ܐܐ ܘܚܡ̈ܫܝܢ ܐܒܗ̈ܬܐ [ܩܕܗܝܫܐ܇ ܟܕ ܒܠܠܝܐ] ܘܒܐܡܡܐ ܒܨܠܘܬܐ ܐܡܝܢܐܝܬ ܘܝܨܦܘܬܐ ܘܢܡ̈ܘܣܐ ܡܬܚܫܚܝܢ [ܚܢܢ܇ ܕܬܬܝܬܪ ܒܐܝـ]ـܕܗܿ ܥܕܬܐ ܩܕܝܫܬܐ ܕܒܟܠ ܐܬܪ ܩܬܘܠܝܩܐ ܘܫܠܝܚܝܬܐ. ܗܝܿ ܕܐܝܬܝܗܿ [ܐܡܐ] ܠܐ ܡܬܚܒܠܢܝܬܐ ܟܝܬ ܘܠܐ ܡܫܬܪܝܢܝܬܐ ܕܫܒܛܐ ܕܡܠܟܘܬܢ. ܟܕ ܒܫܝܢܐ ܘܒܐܘܝܘܬܐ ܕܠܘܬ ܐܠܗܐܼ ܥܡ̈ܡܐ ܡܗ̈ܝܡܢܐ ܡܟܬܪܝܢ. ܨܠܘ̈ܬܐ ܡܬܩ̈ܒܠܢܝܬܐ ܕܚܠܦ ܡܠܟܘܬܢ ܗܘܘ ܡܩܪܒܝܢ܇ ܥܡ ܚ̈ܣܝܐ ܐܦܣ̈ܩܦܐ ܘܕܚ̈ܠܝ ܠܐܠܗܐ ܩܠܝܪ̈ܝܩܘ ܘܪ̈ܝܫܝ ܕܝܪ̈ܬܐ (ܘܕܝܪ̈ܝܐ). ܟܕ ܓܣܪ ܐܠܗܐ ܪܒܐ ܘܡܚܝܢܢ ܝܫܘܥ ܡܫܝܚܐܼ. ܗܿܘ ܕܡܢ ܠܬܘܠܬܐ ܘܝܠܕܬ ܐܠܗܐ ܡܪܝܡ ܐܬܓܫܡ ܘܐܬܝܕܠ: ܬܘܝܕܬܐ ܘܦܘܠܚܢܐ ܕܡܢ ܫܠܡܘܬܐ ܡܫܒܚ. ܘܡܛܝܒܐܝܬ ܡܩܿܒܠ. ܓܢ̈ܣܐ ܓܝܪ ܕܒ̈ܥܠܕܒܒܐ ܓܪܣܝܢ ܘܡܬܥܛܝܢ. pb. 232 ܟܠܗܘܢ ܕܝܢ ܒ̈ܢܝܢܫܢܐ ܨܘܪܗܘܢ ܟܦܝܢ ܠܐܘܚܕܢܢ ܕܒܬܪ ܐܠܗܐ. ܟܕ ܫܝܢܐ ܘܛ̈ܒܐ ܕܡܢ ܗܢܐ ܘܡܘܘܙܓܐ ܫܦܝܪܐ ܕܐܐܪ ܘܟܗܝܢܘܬܐ ܕܦܐܪ̈ܐ ܘܟܠܗܝܢ ܐܝܠܝܢ ܕܦܩܚܢ ܠܒ̈ܢܝܫܢܐ ܫܦܝܥܐܝܬ ܡܬܝܗܒܢ. ܗܟܢܐ ܗܟܝܠ ܟܕ ܗܝܡܢܘܬܐ ܕܠܐ ܡܘܡܼ. ܠܢ ܘܠܣܘܥܪ̈ܢܐ ܕܪ̈ܗܘܡܝܐ ܡܫܘܙܒܐ܆ ܒܥܘ̈ܬܐ ܐܬܩܪܒ ܠܢ ܡܢ ܪ̈ܚܡܝ ܠܐܠܗܐ ܪ̈ܝܫܝ ܕܝܪ̈ܬܐ ܘܡܕܒܪ̈ܢܐ ܘܐܚܪ̈ܢܐ ܐܝܚ̈ܝܕܝܐ. ܟܕ ܒܕ̈ܡܥܐ ܡܬܟܫܦܝܢ܆ ܕܚܕܝܘܬܐ ܕܥ̈ܕܬܐ ܩܕ̈ܝܫܬܐ ܬܗܘܐ܆ ܘܢܬܢܩܦܘܢ ܗܕ̈ܡܐ ܠܗܕ̈ܡܐ܇ ܐܝܠܝܢ ܕܣܿܢܝܢ ܫܦܝܪ̈ܬܐܼ ܡܢ ܙܒܢܐ ܣܓܝܐܐ ܕܝܢܼ ܠܡܦܪܫ ܐܣܬܪܗܒ ܒܝܿܕܥܝܢ ܕܟܕ ܡܩܪܒܝܢ ܥܡ ܓܘܫܡܐ ܡܫܠܝܡܢܐ ܕܥܕܬܐܼ ܡܙܕܟܝܢ. ܓܕܫܬ ܓܝܪ ܡܢ ܗܕܐ ܕܕܪ̈ܐ ܕܠܐ ܡܢܝܢܐ ܐܝܠܝܢ ܕܗܘܿ ܙܒܢܐ ܒܗܠܝܢ ܟܠܗܝܢ ܫ̈ܢܝܐ ܕܚ̈ܝܐܼ ܐܥܒܪ. [ܡܢܗܘܢ ܡܿܢܼ] ܟܕ ܕܓܠܝܙܝܢ ܡ ܡܣܚܪܘܬܐ ܕܝܠܕܐ ܕܡܢ ܕܪܝܫ ܢܐܙܠܘܢ. ܡܢܗܘܢ ܕܝܢ ܟܕ ܠܐ ܐܫܬܘܬܦܘ ܗܘܘ ܒܫܘܬܦܘܬܐ ܕܐܠܗܝܬܐܼ ܠܘܬ ܡܦܩܢܐ ܗܿܘ ܕܡܢ ܐܢܫ̈ܝܬܐ ܕܠܝܬ ܠܡܫܬܐܠܘ ܡܢܗ ܢܬܕܒܪܘܢ. ܘܠܪ̈ܒܘܬܐ ܕܩ̈ܛܠܐܼ ܢܬܡܬܚܘܢ. ܘܒܣܘܓܐܐ (ܕܕܡܐܼ) ܬܬܬܛܢܦܼ ܠܘ ܒܠܚܘܕܝ ܗܝ ܐܼܪܥܐ܆ ܐܠܐܼ ܐܦ ܡܢ ܟܕܘ ܐܐܪ ܟܠܗ. ܗܠܝܢ ܡܢ ܗܘ ܕܠܐ ܡܠܚܐ ܕܠܘܬ ܛܒ̈ܬܐ ܨܒܝܢܢ ܢܫܚܠܦ ܐ̈ܢܝܢ. ܡܛܠ ܗܕܐ ܗܟܝܠܼ ܕܬܕܥܘܢ ܝܨܦܝܢܢ ܕܐܠ ܚܢܢ ܘܥ̈ܕܬܐ ܕܐܪ̈ܬܕܘܟܣܘܢ ܕܒܟܠܗ ܫܠܘܛܢܐ ܕܡܠܟܘܬܢܼ ܘܪ̈ܚܡܝ ܐܠܗܐ ܟܗ̈ܢܐ ܐܝܠܝܢ ܕܡܕܒܪܝܢ ܠܗܝܢ܆ ܕܚܕ ܣܝܡܐܼ ܘܚܕ ܬܚܘܡܐ ܕܗܝܡܢܘܬܐ ܩܒܠܢܢ. ܐܝܢܐ ܕܡܢ ܠܥܠ ܐܬܐܡܪܘ܆ ܬܕܬܠܡ̈ܐܐ ܘܬܡܢܬܥܣܪ̈ pb. 233 ܐܒ̈ܗܬܐ ܩܕ̈ܝܫܐ: ܗܿܘ ܕܬܚܡܘ ܐܝܠܝܢ ܕܐܬܥܗܕܘ ܡܐܐ ܘܚ̈ܡܫܝܢ ܐ̈ܒܗܬܐ. ܘܬܘܒ ܡܬܝܢ ܥܣܪܝܢ܆ ܠܐ ܗܼܘܐ ܠܢܼ ܘܠܐ ܗܿܘܐ ܠܢܼ ܘܠܐ ܕܐܝܬܘܗܝ ܠܐܢܫ ܝܿܕܥܝܢܢ. ܐܢܗܼܘ ܕܩܢܐ ܐܢܫ ܠܒܪ ܡܢܗ ܕܗܢܐ ܬܚܘܡܐ ܕܐܒܗ̈ܬܐ ܩܕ̈ܝܫܐ ܬܠܬܡ̈ܐܐ ܘܬܡܢܬܥܣܪܼ̈ ܗܠܝܢ ܕܒܪܘܚܐ ܩܕܝܫܐ ܐܬܟܢܫܘ: ܢܘܟܪܝܐ ܚܫܒܝܢܢ ܠܗ. ܗܢܘ ܕܝܢܼ ܐܝܟ ܕܐܡܪܝܢܢ܆ ܬܟܝܠܝܢܢ ܕܡܢܛܪ ܠܡܠܟܘܬܢ܆ ܘܠܟܠܗܘܢ ܥܡ̈ܡܐ ܐܝܠܝܢ ܕܡܫܬܘܝܢ ܠܡܥܡܘܕܝܬܐ ܡܚܝܢܝܬܐ܆ ܠܗܢܐ ܟܕ ܡܩܒܠܝܢ ܥܡܕܝܢ. ܗܿܘ ܕܠܗ ܐܬܕܢܝܘ ܟܠܗܘܢ ܐܒ̈ܗܬܐ ܩ̈ܕܝܫܐ ܕܒܐܦܣܘܣ ܐܬܟܢܫܘ ܡܬܝܢ ܘܥܣܪܝܢ. ܐܝܠܝܢ ܕܐܦ ܥܒܕ ܩܬܪܣܝܣ ܕܢܣܛܘܪܝܣ ܪܫܝܥܐ. ܘܕܐܝܠܝܢ ܕܗܠܝܢ ܕܝܠܗ ܡܬܪܥܝܢ ܒܬܪܟܢ. ܕܠܗ ܠܗܢܐ ܢܣܛܘܪܝܣ܆ ܐܦ ܚܢܢ ܘܠܐܘܛܘܟܐܼ. ܐܝܟ ܡܿܢ ܕܐܬܪܥܝܘ ܕܠܩܘܒܠܐ ܕܐܝܠܝܢ ܕܐܬܐܡܪܼ ܡܚܪܡܝܢܢ. ܟܕ ܡܩܒܠܝܢܢ ܐܦ ܠܬܪ̈ܥܣܪ ܩܦ̈ܠܐ ܕܐܬܐܡܪ ܡܢ ܫܿܘܐ ܠܥܘܗܕܢܐܼ ܪܚܿܡ ܐܠܗܐ ܩܘܪܝܠܘܣ ܗܿܘ ܕܗܘܼܐ ܪܝܫܐ ܕܐܦܣ̈ܩܦܐ ܕܐܠܟܣܢܕܪܝܐ.. ܡܘܕܝܢܢ ܐܝܚܝܕܝܐ ܒܪܗ ܕܐܠܗܐܼ ܗܿܘ ܕܫܪܝܪܐܝܬ ܐܬܒܪܢܫ ܡܪܢ ܝܫܘܥܡܫܝܚܐ. ܗܿܘ ܕܐܝܬܘܗܝ ܒܪ ܟܝܢܐ ܕܐܒܐ ܒܐܠܗܘܬܗ܆ ܘܒܪ ܟܝܢܐ ܕܝܠܢܼ ܗܼܘ ܟܕ ܗܼܘ ܒܐܢܫܘܬܐ. ܗܿܘ ܕܢܚܼܬ ܘܐܬܿܓܫܡ ܡܢ ܪܘܚܐ ܕܩܘܕܫܐ ܘܡܢ ܡܪܝܡ ܒܬܘܠܬܐ ܝܠܕܬ ܐܠܗܐ܆ ܘܚܕ ܐܝܬܘܗܝ ܒܪܐܼ ܘܠܐ ܗܘܐ ܬܪ̈ܝܢ. ܕܚܕ ܓܝܪ ܐܝܚܝܕܝܐ ܒܪܗ ܕܐܠܗܐ܇ ܐܡܪܝܢܢ ܕܐܝܬܝܗܝܢ ܬܕܪ̈ܬܐ ܘܚ̈ܫܐ ܐܝܠܝܢ ܕܨܒܝܢܐܝܬ ܣܝܒܪ ܒܒܣܪܐ. ܐܝܠܝܢ ܕܝܢ ܕܡܦܪܫܝܢ ܘܡܒܠܒܠܝܢ܆ ܐܘ ܦܢܛܣܝܐ ܡܥܠܝܢ ܠܓܡܪ ܠܐ ܡܩܒܠܝܢ ܚܢܢ. ܡܛܠ ܕܡܬܓܫܡܢܘܬܐ ܫܪܝܪܬܐ ܘܕܠܐ ܚܛܝܬܐ܇ ܕܡܢ ܝܠܕܬ ܐܠܗܐܼ ܬܘܣܦܬܐ ܕܒܪܐܼ ܠܐ ܥܒܼܕܬܿ. ܟܬܪܬܿ ܬܠܝܬܝܠ݈ܐܼ ܬܠܝܬܠܘܬܐܼ. ܐܦ ܟܕ ܐܬܓܫܡ ܚܕ ܡܢ ܬܠܝܬܝܘܬܐܿ. ܐܠܗܐ ܡܠܬܐ. ܟܕ ܝܿܕܥܝܬܘܢ ܗܟܝܠ ܕܠܐ pb. 234 ܥܕ̈ܬܐ ܩܕ̈ܝܬܐ ܕܒܟܠ ܕܘܟ ܕܐܪ̈ܬܕܟܣܐ: ܘܠܐ ܐܝܠܝܢ ܕܡܕܒܪܝܢ ܠܗܝܢ ܪ̈ܚܡܝ ܐܠܗܐ ܟܗ̈ܢܐ: ܘܠܐ ܡܠܟܘܬܐ ܕܝܠܢ ܣܝܡܐ ܐܚܪܢܐ ܐܘ ܬܚܘܡܐ ܐܚܪܢܐ ܕܗܝܡܢܘܬܐ ܠܒܪ ܡܢ ܐܝܢܐ ܕܐܬܐܡܪܘ ܡܢ ܐܒܗ̈ܬܐ ܩܕܝ̈ܫܐ: ܠܐ ܩܒܠܘ ܐܘ ܡܩܒܠܝܢ. ܐܬܘܘܼ ܘܗܘܘ ܒܫܝܢܐ ܐܠܗܝܐܼ. ܟܕ ܠܐ ܡܬܦܠܓܝܬܘܢ. ܗܠܝܢ ܓܝܪ ܟܬܒܢܢ. ܠܐ ܗܘܐ ܟܕ ܡܚܕܬܝܢܢ ܗܝܢܡܘܬܐܼ. ܐܠܐ ܟܕ ܠܟܘܢ ܡܦܝܣܝܢܢ. ܟܠ ܐܝܢܐ ܕܝܢ ܕܡܕܡ ܐܚܪܝܢ ܐܬܪܥܝ ܐܘ ܡܬܪܥܐܗܫܐܐܘ ܐܡܬܝ ܕܗܼܘ܆ ܐܘ ܒܟܠܩܕܘܢܐ ܐܘ ܒܐܝܕܐ ܕܗܝܼ ܣܘܢܗܕܣ܆ ܡܚܪܡܝܢܢ. ܝܬܝܪܐܝܬ ܐܝܠܝܢ ܕܐܬܡܪܘ ܡܢ ܢܣܛܘܪ̈ܝܢܐ ܘܡܢ ܐܘܛܘ̈ܟܝܢܐ. ܘܠܐܝܠܝܢ ܕܗܠܝܢ ܕܝܠܗܘܢ ܡܬܪܥܝܢ. ܐܬܿܢܩܦܗܟܝܠ ܠܚܕܐ ܐܡܐ ܪܘܚܢܝܬܐ ܥܕܬܐ ܩܕܝܫܬܐ ܘܫܠܝܚܝܬܐ. ܟܕ ܡܬܒܣܡܝܢ ܥܡܢ ܒܗܿ ܒܫܘܬܦܘܬܐ ܐܠܗܝܬܐܼ ܐܝܟ ܐܝܟ ܬܚܘܡܐ ܕܗܝܡܢܘܬܐ. ܗܿܘ ܕܐܝܬܘܗܝ ܚܕ ܒܠܚܘܕ. ܗܿܘ ܕܡܢ ܠܥܠ ܐܬܐܡܪ܇ ܕܐܒ̈ܗܬܐ ܩ̈ܕܝܫܐ. ܐܡܢ ܩܕܝܫܬ ܒܟܠ ܥܕܬܐ܆ ܐܝܟ ܕܠܒ̈ܢܝܐ ܚܒ̈ܝܒܐ ܡܣܟܝܐ ܠܟܘܢ ܕܬܥܦܩܟܘܢ. ܘܠܡܫܡܥܼ ܩܠܟܘܢ ܡܣܘܚܐ. ܣܪܩܒܘ ܗܟܝܠ [ܢܦܫܟـ]ـܘܢ. ܟܕ ܓܝܪ ܗܕܐ ܥܒܕܝܬܘܢ܆ ܘܠܒܣܝܡܘܬܗ [ܕܡܚܼܝܢܢ ܡܫܝܚܐ] ܐܠܗܐ ܠܬܘܟܘܢ ܢܬܿܦܝܬܘܢ. ܘܡܢ ܡܠܟܘܬܢ ܡܫܬܒܚܝܬܘܢ...

ܨܠܘ ܥܠܝܢ ܓܒ̈ܝܐ ܕܐܠܗܐ. ܗܠܝܢ ܟܠܗܝܢ ܣܦܩ̈ܢ ܠܚܘܒܟܘܢ ܐܠܗܝܐ. ܨܠܘ ܥܠܝܢ. ܫܠܡ.

[Chronicle of Ps. Joshua the Stylite] pb. 235 ܬܘܒܼ ܡܟܬܒܢܘܬܐ ܕܬܫܥܝܬܐ ܕܙܒ̈ܢܐ ܕܐܘܠܨܢܐ ܕܗܘܼܐ ܒܐܘܪܗܝ ܘܒܐܡܕܼ. ܘܒܟܠܗ ܒܝܬ ܢܗܪܝܢ. ܩܒܿܠܬ ܟܬܝ̈ܒܬܐ ܕܚܣܝܘܬܐ ܪܚܡܬ ܠܐܠܗܐܼ ܐܘܿ ܡܝܬܪܐ ܕܓܒܪ̈ܐ ܘܩܫܝܫܐ ܘܪܝܫ ܕܝܪܐ ܣܪܓܝܣ: ܗܠܝܢ ܕܒܗܝܢ ܦܩܼܕܬ ܠܝ ܕܐܟܬܘܒ ܐܝܟ ܕܠܥܘܗܕܢܐ: ܕܐܡܬܝ ܐܬܼܐ ܩܡܨܐ: ܘܐܡܬܝ ܫܡܫܐ ܚܫܟܘܼ. ܘܐܡܬܝ ܗܘܼܐ ܙܘܥܐ ܘܟܦܢܐ ܘܡܘܬܢܐ: ܘܩܪܒܐ ܕܪ̈ܗܘܡܝܐ ܘܕܦܪ̈ܣܝܐ. ܥܡ ܗܠܝܢ ܕܝܢ ܐܦ ܩܘ̈ܠܣܐ ܪܘܪ̈ܒܐ ܕܥܠܝ ܫܟܝܚܝܢ ܗܘܘ ܒܗܝܢ. ܗܢܿܘܢ ܕܒܟܘܚܕܐ ܪܒܐ ܐܩܝܡܘܢܝ ܒܝܬ ܠܝ ܘܠܢܦܫܝ. ܒܝܕ ܕܐܦܠܐ ܚܕ ܡܢܗܘܢ ܫܟܝܚ ܠܘܬܝ ܒܥܒܿܕܐ. ܨܒܿܝܬ ܕܝܢ ܐܢܐ ܕܐܟܬܘܒ ܐܝܠܝܢ ܕܒܟܼ. ܘܠܐ ܣܦܼܩܬܿ ܥܝܢ ܕܬܪܥܝܬܝܿ. ܠܡܬܒܩܝܘ ܘܠܡܚܙܐ ܐܝܟ ܕܐܝܬܝܗܿ ܠܐܣܛܠܐ ܕܬܕܡܘܪܬܐ ܕܙܩܼܪ ܠܟ ܘܐܠܒܫܟ ܨܒܝܢܟ ܟܫܝܪܐ. ܓܠܝܐܝܬ ܓܝܪ ܐܬܚܙܼܝܬܿܕܒܚܘܒܐ ܡܡܠܝܢܗ ܕܢܡܘܣܐ ܪܬܿܚ ܐܢܬ. ܕܠܘ ܒܠܚܘܕ ܕܐܚ̈ܐ ܕܬܚܝܬ ܐܝܕܟ ܐܝܬܝܗܘܢ ܒܙܒܢܐ ܗܢܐ ܝܨܝܦܬܼ. ܐܠܐ ܘܠܟܠܗܘܢ ܪ̈ܚܡܝ ܝܘܠܦܢܐܕ ܥܬܝܕܝܢ ܠܡܥܠ ܠܗ ܠܥܘܡܪܟ ܒܪܝܟܐ. ܘܒܝܕ ܟܬܝ̈ܒܬܐܼ ܨܿܒܐ ܐܢܬ ܒܚܦܝܛܘܬܟ ܠܡܫܒܩ ܥܘܿܗܕܢܝܗܝܢ ܕܡܪ̈ܕܘܬܐ܇ ܐܝܠܝܢ pb. 236 ܕܒܙܒ̈ܢܝܢ ܐܣܬܥܪܘ ܡܛܠ ܚ̈ܛܗܝܢ. ܕܟܕ ܢܩܪܘܢ ܘܢܚܙܘܢ ܐܝܠܝܢ ܕܠܢ ܓܼܕܫܼ. ܢܙܕܗܪܘܢ ܡܢ ܚܛܗ̈ܝܢܼ ܘܢܬܦܨܘܢ ܡܢ ܢ̈ܓܕܝܢ. ܠܡܬܡܗ ܕܝܢ ܒܡܠܝܘܬܗ ܕܚܘܒܟ܆ ܗܿܘ ܕܥܠ ܟܠܢܫ ܡܫܬܦܥܼ. ܠܐ ܡܘܦܐ ܐܘ ܚܿܣܪ. ܘܕܢܬܐܡܪ ܡܿܢ ܐܝܟ ܕܐܝܬܘܗܝܼ ܠܐ ܡܨܢܐ. ܒܕܠܐ ܩܪܒܿܬ ܠܥܒܿܕܗܼ ܐܦܠܐ ܕܐܫܬܥܿܐ ܥܠܘܗܝ ܝܿܕܥܢܐܼ ܡܢ ܥܢܝܢܐ ܕܚܕܐ ܙܒܢ ܗܘܼܐ ܠܘܬܝ܇ ܘܒܕܡܘܬ ܝܘܢܬܢ ܡܚܒܢܐ ܫܪܝܪܐ ܐܬܣܼܪܬ ܠܘܬܝ ܒܚܘܒܐ. ܠܐ ܗܘܼܬ ܝܢ ܪܒܐ ܐܝܟ ܗܕܐ. ܗܝܿ ܕܢܦܫܗ ܕܝܘܢܬܢ ܢܩܼܦܬܿ ܠܢܦܫܗ ܕܕܘܝܕ. ܟܕ ܚܙܼܐ ܕܒܐܝ̈ܕܘܗܝ ܓܢܒܪܐ ܐܬܩܼܛܠ ܘܡܫܪܝܬܐ ܐܬܦܪܩܬܿ. ܡܛܠ ܕܥܠ ܐܦ̈ܝ ܫܦܝܪ̈ܬܐ ܪܚܡܗ. ܐܢܬ ܕܝܢ ܟܕ ܡܕܡ ܕܫܦܝܪ ܒܝ ܠܐ ܚܙܼܝܬܼ. ܝܬܝܪ ܡܢ ܢܦܫܟ ܐܚܒܬܢܝ. ܐܦܠܐ ܗܝܿ ܕܦܨܝܗ ܝܘܢܬܢ ܠܕܘܝܕ ܡܢ ܡܘܬܐ ܕܒܐܝ̈ܕܝ ܫܐܘܠ ܫܿܘܝܐ ܠܕܘܡܪܐܿ. ܠܦܘܬ ܗܕܐ ܕܝܠܟ. ܡܛܠ ܕܥܕܟܝܠ ܡܕܡ ܕܚܝܒ ܗܘܐ ܠܗ ܦܼܪܥܗ. ܗܘܝܘ ܓܝܪ ܦܨܝܗ ܩܕܡܝܐ ܡܢ ܡܘܬܐܿ. ܘܝܗܼܒ ܠܗ ܚ̈ܝܐ ܘܠܟܠܗ ܒܝܬ ܐܒܘܗܝܿ. ܕܠܐ ܢܡܘܬܘܢ ܒܐܝ̈ܕܘܗܝ ܕܦܠܫܬܝܐ. ܘܟܕ ܕܐܝܟ ܗܠܝܢ ܡܢܝ ܠܟ ܠܐ ܐܣܬܥܪ܆ ܗܐ ܒܟܠܥܕܢ ܡܦܝܣ ܐܢܬ ܠܐܠܗܐ ܚܠܦܝ܇ ܕܐܬܦܨܐ ܡܢ ܣܛܢܐ ܘܠܐ ܢܩܛܠܢܝ ܒܚ̈ܛܗܐ. ܐܠܐ ܗܕܐ ܘܿܠܝܐ ܠܡܐܡܪܼ ܕܒܕܡܘܬ ܕܘܝܕ ܠܫܐܘܠ ܐܚܒܬܢܝ. ܘܗܟܢܐ ܪܘܐ ܐܢܬ ܒܓܣܝܐܘܬܗܿ ܕܪܚܡܬܟ. ܥܕܡܐ ܕܡܢ ܪܬܚܗ ܕܚܘܒܟ. ܐܦܠܐ ܕܐܝܿܕܐ ܗܝ ܡܫܘܚܬܝ ܬܕܥ. ܐܠܐ ܬܬܪܥܐ ܥܠܝܼ ܐܝܠܝܢ ܕܪܘܪ̈ܒܢ ܡܢܝ. ܒܙܒܢܐ ܓܝܪ ܕܩܕܡ ܗܢܐ܇ ܒܡܠܦܢܘܬܐ ܕܒܟ̈ܬܝܒܬܟܼ ܣܢܝܩܘܬܝ ܡܡܿܠܐ ܗܘܝܬ. ܘܗܟܢܐ ܝܨܝܦ ܗܘܝܬ ܕܝܠܝܼ. ܒܕܡܘܬ ܐܒ̈ܗܐ. ܕܟܕ ܡܕܡ ܡܢ pb. 237 ܒܢ̈ܝܗܘܢ ܠܐ ܐܬܗܢܝܘܿ. ܝܨܝܦܝܢ ܕܟܠܗܝܢ ܐܝܠܝܢ ܕܡܬܒ̈ܥܝܢ ܠܗܘܢ. ܝܘܡܢܐ ܕܝܢ ܒܦܪܘܫܘܬܟ ܢܦܫܟ ܡܟܼܟܬ: ܘܠܝ ܬܒܼܥܬ ܐܟܬܘܒ ܠܟܼ ܐܝܠܝܢ ܕܡܢ ܚܝܠܝ ܩܫ̈ܝܢ. ܕܒܗܿ ܒܗܕܐ ܝܬܝܪܐܝܬ ܬܐܪܒ. ܕܟܕ ܝܬܝܪ ܡܢܝ ܕܝܠܝ ܝܿܕܥܬ ܠܗܝܢ܇ ܡܢܝ ܨܒܿܐ ܐܢܬ ܠܡܐܠܦ ܐܢܝܢ. ܐܦܠܐ ܐܢܐ ܚܿܣܡ ܐܢܐ ܒܟ܇ ܘܡܫܬܐܠ ܐܢܐ ܡܢ ܡܕܡ ܕܦܩܼܕܬ. ܒܪܡ ܕܝܢ ܕܥܼ. ܕܐܦ ܐܢܐ ܟܕ ܚܿܙܐ ܗܘܝܬ ܠܐܬܘ̈ܬܐ ܗܠܝܢ ܕܡܣܬܥܪ̈ܢ ܘܠܡܪ̈ܕܘܬܐ ܕܐܬܿܝܢ ܒܬܪܗܝܢ܆ ܪܢܿܐ ܗܘܝܬ ܕܫܘ̈ܝܢ ܐܢ̈ܝܢ ܕܢܬܟ̈ܬܒܢ ܘܢܬܢܛܪ̈ܢ ܒܥܘܗܕܢܐܿ. ܘܠܐ ܢܫܪ̈ܟܢ ܠܛܘܥܝܝ. ܘܒܕܚܝܪ ܗܘܝܬ ܒܡܚܝܠܘܬܗ ܕܪܥܝܢܝ: ܘܒܗܕܝܘܛܘܬܗܿ ܕܢܦܫܝܼ. ܡܫܬܐܠ ܗܘܝܬ ܡܢ ܗܕܐ.ܗܫܐ ܕܝܢ ܕܡܢܟ ܐܬܦܩܕ ܠܝ ܗܼܝ ܗܕܐ ܠܡܣܥܪܼ. ܗܟܢܐ ܒܕܚܠܬܐ ܐܝܬܝ܆ ܐܝܟ ܐܢܫ ܕܟܕ ܣܚܘܐ ܫܦܝܪ ܠܐ ܝܿܕܥܿ. ܡܬܦܩܕ ܠܗ ܠܡܚܬ ܠܥܘܡܩܐ ܕܡܝ̈ܐ. ܘܡܛܠ ܕܬܟܝܠ ܐܢܐ ܥܠ ܨ̈ܠܘܬܟ ܡܕܠ̈ܝܢܝܬܐ: ܕܡܢܟ ܠܘܬ ܐܠܗܐ ܡܫܬܕܪ̈ܢ ܚܠܦܝ ܐܡܝܢܐܝܬܼ. ܡܗܝܡܢܐ ܕܒܢܛܝܪܘܬܐ ܕܡܢ ܛܘܒܥܐܼ ܡܬܿܕܠܐ ܐܢܐ ܡܢ ܝܡܐ ܕܐܪܡܝܬܢܝ ܒܗ. ܟܕ ܐܝܟ ܚܝܠܝ ܒܪ̈ܩܩܘܗܝ ܣܚܿܐ ܐܢܐܼ. ܡܛܠ ܕܠܐ ܡܬܡܝܫ ܥܘܡܢܩܗ. ܡܢܼܘ ܓܝܪ ܣܦܿܩ ܠܡܬܿܢܝܘ ܐܝܟ ܡܐ ܕܘܿܠܐ ܥܠ ܐܝܠܝܢ ܕܡܢ ܐܠܗܐ ܡܣܬܥܪ̈ܢ܇ ܠܒܘܛܠܐ ܕܚ̈ܛܗܐ ܘܠܡܪܕܘܬܐ ܕܣ̈ܟܠܘܬܐ ܒܚܟܡܬܗ. ܚܬܝܬܘܬܐ ܓܝܪ ܕܡܕܒܪܢܘܬܗ ܕܐܠܗܐܼ. ܐܦ ܡܢ ܡ̈ܠܐܟܐ ܣܟܝܐ ܗܝ. ܡܫܟܚܬ ܠܡܕܥ ܗܕܐ. ܡܢ ܗܘܿ ܡܬܠܐ ܕܙܝ̈ܙܢܐ ܕܐܝܬ ܒܐܘܢܓܠܝܘܢ. ܟܕ ܓܝܪ ܐܡܪܘ ܠܗ ܥܒܕ̈ܘܗܝ ܠܡܪܐ ܒܝܬܐܿ. ܕܨܿܒܐ ܐܢܬ ܢܐܙܠ ܢܿܓܒܐ ܐܢܘܢܼ. ܐܡܼܪ ܠܗܘܢ ܗܘܿ ܕܝܿܕܥ ܗܘܐ ܠܗܘܢ ܠܣܘܥܪ̈ܢܐ ܐܝܟ ܕܐܝܬܝܗܘܢܼ. ܕܠܐ. ܕܕܠܡܐ ܟܕ ܡܓܒܝܢ ܐܢܬܘܢ ܙܝ̈ܙܢܐܿ. ܬܥܩܪܘܢ ܥܡܗܘܢܼ ܐܦ pb. 238 ܚ̈ܛܐ. ܗܕܐ ܕܝܢ ܐܝܟ ܝܕܥܬܢ ܐܡܿܪܝܢܢ. ܕܡܛܠ ܣܓܝܐܘܬܐ ܕܚ̈ܛܗܝܢܣܒܝܐܝܬ ܡܪ̈ܕܘܬܢ ܗܘܼܷ̈. ܘܐܠܘ ܠܐ ܡܢܛܪܢܘܬܗ ܕܐܠܗܐ ܚܙܝܩܐ ܠܗ ܠܥܠܡܐ ܕܠܐ ܢܫܬܪܐܼ. ܟܒܪ ܕܝܢ ܐܘܦܝܘ ܚܝ̈ܐ ܕܟܠܗܘܢ ܒܢܝ̈ܢܫܐ. ܒܐܝܠܝܢ ܓܝܪܙܒ̈ܢܐܒܬܟܒܐ ܓܼܕܫ ܐܘܠܨܢ̈ܐ ܕܝܐܟ ܗܠܝܢ. ܐܠܐ ܒܗܠܝܢ ܕܚܢܢ ܗܐ ܩܝܡܝܢܢ ܒܗܘܢ. ܘܡܛܠ ܕܥܠܬܗܘܢ ܠܐ ܒܛܠܬܼ. ܐܦ ܗܼܢܘܢ ܥܕܟܝܠ (ܠܐ) ܒܛܠܘ. ܥܡ ܗܢܐ ܡܕܡ ܚܼܙܝܢܢ ܒܥܝ̈ܢܝܢ. ܘܫܡܥܢ ܒܐܕܢ̈ܝܢ. ܘܒܗ ܩܝܡܝܢܢ܇ ܣܪܘܕܢܝ ܐܦ ܛܒ̈ܐ ܕܪܘܚܩܐ ܘܕܩܘܪܒܐ. ܘܓܘ̈ܢܚܐ ܕܐܣܬܥܪܘ ܒܕܘܟܐ ܕܘܟܐ. ܙܘ̈ܥܐ ܕܚܝܠ̈ܐ. ܗܦ̈ܘܟܝܐ ܕܡܗܕܝܢܬܐ. ܟܦ̈ܢܐ ܥܡ ܡܘ̈ܬܢܐ. ܩܪ̈ܒܐ ܘܫܓܘ̈ܫܝܐ. ܫܒܝܐ ܘܓܘܠܝܐ ܕܐܬܪ̈ܘܬܐ. ܥܩܘܪ̈ܝܐ ܐܦ ܝܩܕܢܐ ܕܥܕ̈ܬܐ. ܗܠܝܢ ܕܐܦ ܐܢܬ ܟܕ ܐܬܗܪܘܟ ܒܣܓܝܘܬܗܝܢܿ ܫܠܚܼܬ ܠܝ ܐܟܬܘܒ ܐܢܝܿܢܼ ܒܡ̈ܠܐ ܕܟܪܝܘܬܐ ܘܕܚܢܓܬܐ ܕܡܬܗܪ̈ܢ ܠܩܪ̈ܘܝܐ ܘܠܫܡܘ̈ܥܐ. ܘܝܿܕܥܢܐ ܕܗܕܐ ܒܛܢܼܢܟ. ܗܿܘ ܕܥܠ ܫܦܝܪ̈ܬܐ ܐܡܼܪܬܿܗܿ. ܕܬܗܘܐܬܘܬܐ ܐܦ ܒܐܝܠܝܢ ܕܫܿܡܥܝܢ ܠܗܝܢܼ ܘܢܬܩܪܒܘܢ ܠܬܝܒܘܬܐ. ܐܠܐ ܕܥܼ. ܕܐܚܪܝܬܐ ܗܝ ܕܐܢܫ ܚܢܝܓܐܝܬ ܢܟܬܒ. ܘܐܚܪܝܬܐ ܗܝܕܫܪܝܪܐܝܬ. ܐܢ ܓܝܪ ܢܨܒܐ ܐܢܫ ܟܠ ܡܿܢ ܕܐܝܬܘܗܝ ܒܡܠܝܠܘܬܐ ܟܝܢܝܬܐܼ. ܡܿܟܬܒ ܗܘ ܬܫܥ̈ܝܬܐ ܟܪ̈ܝܬܐ ܘܚܢܝ̈ܓܬܐ. ܐܢܐ ܕܝܢ ܒܘܪܐ ܐܢܐ ܒܡܠܬܝ܆ ܘܠܗܠܝܢ ܗܼܘ ܡܥܗܕ ܐܢܐ ܒܟܬܒܐ ܗܢܐܼ. ܠܐܝܠܝܢ ܕܟܠܗܘܢ ܒܢܝ̈ܢܫܐ ܕܐܝܬ ܒܐܬܪܢ ܣܿܗܕܝܢ ܥܠܝܗܝܢ ܕܫܪܝܪ̈ܢ. ܘܕܝܠܗܘܢ ܗܝ ܕܐܝܠܝܢ ܕܩܿܪܝܢ ܐܘܿ ܫܿܡܥܝܢ܇ ܕܟܕ ܡܒܿܚܢܝܢ ܠܗܝܢ ܐܢ ܨܒܿܝܢ܇ ܢܬܩܪܒܘܢ ܠܬܝܒܘܬܐ. ܟܒܪ ܕܝܢ ܐܡܿܪ ܐܢܫܼ ܕܡܢܐ ܝܘܬܪܢܐ ܡܢ ܗܠܝܢ ܠܐܝܠܝܢ ܕܩܿܪܝܢ܆ ܐܢ ܗܘܼ ܕܡܪܬܝܢܘܬܐ ܠܐ ܬܗܘܐ ܚܠܝܛܐ ܒܗܝܢ ܒܡ̈ܠܐ. ܐܢܐ pb. 239 ܕܝܢܼ ܐܝܟ ܡܿܢ ܕܗܕܐ ܠܐ ܡܨܐ ܐܢܐ ܕܐܥܒܕܿ. ܐܡܿܪ ܐܢܐܼ ܕܣ̈ܦܩܢ ܐܢܗܝܢ ܗܠܝܢ ܡܪ̈ܕܘܬܐ ܕܐܬܼܝ ܥܠܝܢ܇ ܕܢܟܘܢܢ ܠܢ ܘܠܐܝܠܝܢ ܕܡܢ ܒܬܪܢ. ܘܐܦ ܢܠ̈ܦܝܢ ܒܥܘܗܕܢܗܝܢ ܘܒܩܪܝܢܗܝܢ. ܕܡܛܠ ܚܛܗ̈ܢܝ ܐܫܬܕܪ ܥܠܝܢ. ܐܠܘ ܕܝܢ ܗܕܐ ܠܐ ܡܿܠܦܢ ܗܘ̈ܝ ܠܢ܆ ܐܦ ܕܠܐ ܝܘܬܪܢ ܐܝ̈ܬܝܗܝܢ ܗܘ̈ܝ ܠܘܬܢ. ܐܠܐ ܗܕܐ ܠܝܬ ܠܡܐܡܪ. ܕܕܘܟܬ ܡܠܦܢܘܬܐ ܡܡ̈ܠܝܢ ܠܢ ܓܝܪ ܡܪ̈ܕܘܬܐ: ܘܕܡܛܠ ܚ̈ܛܗܝܢ ܡܫܬܕܪ̈ܢ ܥܠܝܢ. ܟܠܗܘܢ ܡܗܝ̈ܡܢܐ ܕܬܚܝܬ ܫܡܝܐ ܣܿܗܕܝܢ܆ ܟܕ ܫܿܠܡܝܢ ܠܡܠܬܗ ܕܛܘܒܢܐ ܦܘܠܘܣ ܕܐܡܿܪ: ܕܟܕ ܡܬܕܝܢܝܢܢ ܡܢ ܡܪܢ ܡܬܪܕܝܘ ܡܬܪܕܝܢܢ܇ ܕܠܐ ܥܡ ܥܠܡܐ ܢܬܚܝܒ. ܟܠܗ ܓܝܪ ܕܡܬܪܕܝܢ ܒܢܝ̈ܢܫܐ ܒܥܠܡܐ ܗܢܐ ܡܛܠ ܕܢܬܟܠܘܢ ܡܢ ܚ̈ܛܗܝܗܘܢ܆ ܘܢܗܘܐ ܦܫܝܚ ܠܗܘܢ ܗܘܿ ܕܝܢܐ ܕܥܠܡܐ ܕܥܬܝܕ. ܘܐܝܠܝܢ ܕܒܥܠܼܬ ܡܣܟܠ̈ܢܐ ܡܬܕܪܝܢ ܟܕ ܗܼܢܘܢ ܠܐ ܚܛܘܼ. ܐܓܪܐ ܥܦܝܦܐ ܡܬܬܘܣܦ ܠܗܘܢ. ܡܪܚܡܢܘܬܐ ܕܝܢ ܕܗܘܿܝܐ ܒܟܠܙܒܢ ܐܦ ܥܠ ܐܝܠܝܢ ܕܠܐ ܫܿܘܝܢ܆ ܡܛܠ ܒܣܝܡܘܬܗ ܘܛܝܒܘܬܗ ܘܢܓܝܪܘܬ ܪܘܚܗ ܕܐܠܗܐܿ. ܕܨܿܒܐ ܕܢܬܩܝܡ ܥܠܡܐ ܗܢܐ: ܥܕܡܐ ܠܙܒܢܐ ܗܘܿ ܕܚܪܝܩ ܒܝܕܥܬܗܼ ܗܝܿ ܕܠܐ ܛܿܥܝܐ. ܘܕܗܠܝܢ ܗܟܢܐ ܐܝܬܝܗܝܢ܆ ܓܠܝܐ ܗܝ ܗܕܐ ܡܢ ܬܚܘ̈ܝܬܐ ܕܟ̈ܬܒܐ ܩܕܝ̈ܫܐ܇ ܘܡܢ ܐܝܠܢ ܕܠܘܬܢ ܐܣܬܥܪ̈ܘ. ܕܠܗܝܢ ܣܝܡܐ ܠܢ ܕܢܬܟܬܘܒ. ܗܐ ܓܝܪ ܣܡܟܘ ܥܠܝܢ ܐܘ̈ܠܨܢܐ ܕܟܦܢܐܼ. ܐܦ ܕܡܘܬܢܐ ܒܙܒܢܐ ܗܘܿ ܕܩܡܨܐ: ܥܕܡܐ ܕܩܪܝܒܝܢ ܗܘܝܢ ܠܡܫܼܪܟ ܠܐܒܕܢܼ. ܘܐܬܪܚܡ ܥܠܝܢ ܐܠܗܐ ܟܕ ܠܐ ܫܿܘܝܢܢ. ܘܝܗܼܒ ܠܢ ܩܠܝܠ ܢܦܝܫܐ ܡܢ ܐܘܠܨ̈ܢܐ ܕܬܟܿܒܝܢ ܗܘܘܠܢ. ܘܗܕܐ ܐܝܟ ܕܐܡܿܪܬ ܡܛܠ pb. 240 ܛܝܒܘܬܗ. ܫܚܠܦ ܠܢ ܕܝܢ ܐܦ ܢܓܕ̈ܐ ܡܢ ܒܬܪ ܕܐܬܢܦܼܫܢܢ. ܘܡܚܢ ܒܐܝ̈ܕܝ ܐܬܘܪܝܐ ܕܡܫܬܡܗ ܫܒܛܐ ܕܪܘܓܙܐ. ܠܐ ܗܘܐ ܝܕܢ ܠܚܐܪܘܬܗܘܢ ܕܦܘܪ̈ܣܝܐ ܡܒܿܛܠ ܐܢܐ ܕܐܡܿܪ ܐܢܐܼ ܕܐܠܗܐ ܡܼܚܢ ܒܐܝ̈ܕܝܗܘܢ. ܐܦܠܐ ܒܬܪ ܐܠܗܐ ܥܕܠܝܐ ܕܡܪܚܘܬܗܘܢ ܡܿܝܬܐ ܐܢܐܼ. ܐܠܐ ܟܕ ܡܬܪܥܐ ܐܢܐ ܕܡܛܠ ܚ̈ܛܗܝܢ ܠܐ ܥܒܼܕ ܡܢܗܘܢ ܬܒܥܬܐܼ. ܣܿܡܬ ܗܿܝ ܕܗܼܘ ܡܚܼܢ ܒܐܝ̈ܕܝܗܘܢ. ܨܒܝܢܗ ܓܝܪ ܕܥܡܐ ܒܝܫܐ ܝܬܝܪܐܝܬ ܡܬܚܙܐ ܒܗܕܐ ܕܪ̈ܚܡܐ ܠܐ ܥܒܕܘܼ ܥܠ ܐܝܠܝܢ ܕܐܬܡܣܪܘ ܩܕܡܘܗܝ. ܡܥܕ ܗܘܐ ܓܝܪ ܡܿܚܘܐ ܨܒܝܢܗ ܡܐܚܿܕܐ ܒܒܝܫܬܐ ܕܒܢ̈ܝ ܐܢܫ̈ܐ. ܐܝܟ ܕܐܦ ܢܒܝܐ ܡܚܣܕ ܠܗ ܒܗܿ ܒܗܕܐ ܘܐܡܿܪ: ܟܕ ܡܬܢܒܐ ܗܘܐ ܥܠ ܚܘܪܒܗܿ ܕܒܒܠܼ. ܐܝܟ ܕܡܢ ܦܘܡܗ ܕܡܪܝܐ. ܪܓܙܿܬ ܥܠ ܥܡܝ ܕܛܘܫܘ ܝܪܬܘܬܝ. ܘܐܫܿܠܡܬ ܐܢܘܢ ܒܐܝ̈ܕܝܟܝܼ. ܘܠܐ ܥܒܼܕܬ ܥܠܝܗܘܢ ܪ̈ܚܡܐ. ܐܦ ܠܢ ܗܟܝܠ ܗܟܢܐ ܐܒܐܫܘ ܒܨܒܝܢܗܘܢ ܕܠܐ ܪ̈ܚܡܐ. ܐܝܟ ܕܡܥܕܝܢ. ܐܦܢ ܓܝܪ ܠܗ ܠܓܘܫܡܢ ܠܐ ܐܬܡܛܝ ܚܘܛܪܐ ܕܡܚܘܬܗܘܢ. ܘܥܠ ܡܕܝܢܬܢ ܠܐ ܐܐܫܟܚܘ ܠܡܫܬܠܛܘ. ܡܛܠ ܕܐܦܠܐ ܡܫܟܚܐ ܗܘܬ ܕܢܬܒܛܠ ܫܘܘܕܝܐ ܕܡܫܝܚܐ ܗܿܘ ܕܐܫܬܘܕܝ ܠܐܒܓܪ ܡܠܟܐ ܡܗܝܡܢܐܼ. ܟܕ ܐܡܪ: ܕܟܪܟܟ ܢܗܘܐ ܒܪܝܟܿ. ܘܒܥܠܕܒܒܐ ܠܐ ܢܫܿܠܛ ܒܗ ܠܥܠܡ. ܐܠܐ ܒܝܕ ܡܗܝ̈ܡܢܐ ܐܝܠܝܢ ܕܐܬܒܙܙܘ ܘܐܫܬܒܼܝܘ ܘܐܬܩܼܛܠܘ ܘܐܬܚܪܒܘ ܒܡܕܝ̈ܢܬܐ ܐܚܪ̈ܢܝܬܐ ܕܐܬܟܒܫܘ: ܘܗܘܼܘ ܐܝܟ ܣܝܢܐ ܕܫܘ̈ܩܐܿ. ܘܛܥܡܘܗܝ ܠܚܫܐ ܕܠܐ ܒܙܥܘܪ ܟܠܗܘܢ ܐܝܠܝܢ ܕܝܠܼܦܘ ܕܢܚܫܘܢ ܥܡ ܐܝܠܝܢ ܕܚܿܫܝܢ. ܘܐܝܠܝܢ ܬܘܒ ܕܡܢܗܕܐ ܪܚܝܩܝܢ ܗܘܘܼ. ܒܩܢܛܐ ܕܥܠ pb. 241 ܢܦܫܗܘܢ ܐܫܿܬܢܩܘ ܒܠܐ ܗܝܡܢܘܬܗܘܢ. ܕܣܒܪܝܢ ܗܘܘ ܕܐܦ ܥܠ ܐܘܪܗܝ ܡܫܬܠܛ ܒܥܠܕܒܒܐܼ݂ ܐܝܟ ܕܥܠ ܡܕܝ̈ܢܬܐ ܐܚܪ̈ܢܝܬܐ. ܗܠܝܢ ܕܥܬܝܕܝܢܢ ܠܡܟܬܒ ܠܟ ܥܠܝܗܝܢ. ܡܛܠ ܕܝܢ ܕܐܝܟ ܡܠܬܗ ܕܚܟܝܡܐ ܫܠܝܡܘܢܼ. ܒܓܘܪܓܐ ܡܬܥܼܒܕ ܩܪܒܐ: ܘܐܢܬ ܗܼܝ ܗܕܐ ܨܿܒܐ ܐܢܬ ܠܡܐܠܦܿ. ܡܢ ܐܝܠܝܢ ܥܠ̈ܠܬܐ ܐܬܓܪܓܼ. ܨܿܒܐ ܐܢܐ ܕܐܘܕܥܟܼ ܐܝܟ ܕܒܦ̈ܣܝܩܬܐܼ ܕܡܢ ܐܝܟܐ ܩܪܗܝ ܥܠ̈ܠܬܐ. ܐܦܢ ܡܣܬܒܪܐ ܕܥܠ ܨܒ̈ܘܬܐ ܕܥܒܪ ܙܒܢܗܝܢ ܡܡܿܠܠ ܐܢܼܐ. ܘܗܝܕܝܢ ܒܬܪ ܩܠܝܠ ܐܘܕܥܟܼ. ܐܦ ܕܗܠܝܢ ܥ̈ܠܠܬܐ ܡܢ ܐܡܬܝ ܐܬܚܿܝܠ. ܐܦܢ ܓܝܪ ܡܠ ܣܘܥܪ̈ܢܐ ܓܠ̈ܝܐ ܫܩܼܠ ܥܠܼܬܐ. ܗܠܝܢ ܕܠܗܘܢ ܨܒܿܐ ܐܢܐ ܕܐܫܿܬܥܐ ܠܟ. ܐܝܟ ܡܿܢ ܕܢܗܝܪܐܝܬ ܬܗܘܐ ܡܦܣ ܐܢܬ ܒܗ ܒܫܪܒܐ ܗܢܼܐ. ܕܠܐ ܬܬܪܡܐ ܥܡ ܐܢܫ̈ܐ ܣܟ̈ܠܐ ܠܡܥܕܠ ܠܐܚܝܕ ܫܘܠܛܢܐ ܡܠܟܐ ܡܗܝܡܢܐ ܐܢܣܛܘܣ. ܠܘ ܓܝܪ ܗܘܼ ܐܝܬܘܗܝ ܫܘܪܝܗ ܕܩܪܒܐܼ. ܐܠܐ ܡܢ ܙܒܢܐ ܣܓܝܐܐ ܐܝܬ ܠܗ ܕܡܬܓܪܓ. ܐܝܟ ܡܐ ܕܡܫܟܚ ܐܢܬ ܠܡܣܬܟܿܠܘ ܡܢ ܗܠܝܢ ܕܟܿܬܒ ܐܢܐ ܠܟ܀ pb. 242 ܪ̈ܗܘܡܝܐ ܒܫܢܬ ܫ̈ܬܡܐܐ ܘܬܫ̈ܥܼ. ܠܢܨܒܝܢ ܡܕܝܢܬܐ ܒܢܘ. ܘܗܼܘܝܬ ܒܫܘܠܛܢܗܘܢ ܫ̈ܬܝܢ ܘܚܡ̈ܫ ܫܢ̈ܝܢ. ܡܢ ܒܬܪ ܡܘܬܗ ܕܝܘܠܢܘܣ ܕܒܦܪܣܼ. ܗܼܘ ܕܗܼܘܐ ܒܫܢܬ ܫ̈ܬܡܐܐ ܘܫܒ̈ܥܝܢ ܘܐܪ̈ܒܥܼ. ܝܘܒܢܝܢܘܣ ܗܘܿ ܕܐܡܠܟ ܒܬܪܗ ܥܠ ܪ̈ܗܘܡܝܐܼ. ܠܫܢܐ ܝܬܝܪ ܡܢ ܟܠܡܕܡ ܝܩܪ. ܘܥܠ ܐܦ̈ܝ ܗܕܐ ܝܗܒ ܠܦܪ̈ܣܝܐ ܕܢܫܬܠܛܘܢ ܥܠ ܢܨܒܝܢ܇ ܙܒܢܐ ܕܡܐܐ ܘܥܣܪܝܢ ܫ̈ܢܝܢ. ܘܒܬܪܟܝܢ ܢܦܢܘܢܗܿ ܠܡܪ̈ܝܗܿ. ܫܠܼܡ ܗܟܝܠ ܗܠܝܢ ܒܙܒܢܗ ܕܙܝܢܘܢ ܡܠܟܐ ܕܪ̈ܗܘܡܝܐ. ܘܦܘܪ̈ܣܐ ܕܢܿܦܢܘܢ ܡܕܝܢܬܐ ܠܐ ܨܒܼܘ. ܘܗܕܐ ܨܒܘܬܐ ܐܥܝܪܬܿ ܗܪܬܐ. ܬܘܒ ܕܝܢܼ ܩܝܿܡܐ ܐܝܬ ܗܘܐ ܒܝܬ ܪ̈ܗܘܡܝܐ ܠܦܘܪ̈ܣܝܐܼ. ܕܐܢ ܗܼܘ ܕܢܣܬܢܩܘܢ ܥܠ ܚ̈ܕܕܐ ܐܡܬܝ ܕܗܘܿܐ ܠܗܘܢ ܩܪܒܐ ܥܡ ܚܕ ܡܢ ܥܡ̈ܡܐ: ܢܥܕܪܘܢ ܚ̈ܕܕܐ. ܟܕ ܝܿܗܒܝܢ ܬܠܬ ܡ̈ܐܐ ܐܢܫ̈ܐ ܚܝܠ̈ܬܢܐ ܥܡ ܙܝܢܗܘܢ ܘܪ̈ܟܫܗܘܢ. ܐܘ ܬܠ̈ܬܡܐܐ ܐܣܬܪ̈ܝܢ ܚܠܦ ܠ ܓܒܪ. ܗܢܘ ܕܝܢ ܐܝܟ ܡܕܡ ܕܨܿܒܐ ܓܒܐ ܕܡܣܬܢܩ. ܪ̈ܗܘܡܝܐ ܗܟܝܠ ܒܥܘܕܪܢܐ ܕܐܠܗܐ ܡܪܐ ܟܠܼ ܥܠ ܥܘܕܪܢܐ ܕܡܢ ܦܪ̈ܣܐ ܠܐ ܐܣܬܢܩܘ. ܡܠ̈ܟܐ ܓܝܪ ܡܗ̈ܝܡܢܐ ܩܡ ܒܡܠܟܘܬܐ ܡܢ ܗܘܿ ܙܒܢܐܼ. ܘܥܕܡܐ ܠܗܫܐ. ܘܒܥܘܕܪܢܐ ܕܡܢ ܫܡܝܐܼ ܫܘܠܛܢܗܘܢ ܐܬܚܝܠ. ܡܠ̈ܟܐ ܕܝܢ ܕܦܪ̈ܣܩܐ ܡܫܕܪܝܢ ܗܘܘ ܐܝ̈ܙܓܕܐܼ. ܘܫܿܩܠܝܢ ܕܗܒܐ ܡܛܠ ܣܢܝܩܘܬܗܘܢ. ܘܠܐ ܗܘܐܒܚܘܫܒܢ ܡܕܐܬܐ ܫܿܩܠܝܢ ܗܘܘ. ܐܝܟ ܡܐ ܕܣܿܒܪܝܢ ܗܘܘ ܣ̈ܓܝܐܐ. ܒܝܘ̈ܡܬܢ ܓܝܪ ܕܝܠܢ܇ ܦܪܘܙ ܡܠܟܐ ܕܦܪ̈ܣܐ ܡܛܠ ܩܪ̈ܒܐ ܕܗܘܘ ܠܗ ܥܡ ܟ̈ܝܘܢܝܐ ܕܗܼܢܘܢ ܗܘ̈ܢܝܐ: [ܙܒܢ̈ܬܐ] ܣܓ̈ܝܐܬܐ ܫܩܼܠ ܕܗܒܐ ܡܢ ܪ̈ܗܘܡܝܐ. ܘܠܐ ܗܘܼܐ ܒܬܒܥܬܐ ܕܡܕܐܬܐܼ. ܐܠܐ ܟܕ ܡܿܛܢ ܗܼܘܐ ܠܗܘܢ ܐܝܟ pb. 243 ܕܚܠܦܝܗܘܢ ܥܿܒܕ ܗܘܐ ܠܗܘܢ ܠܬܟ̈ܬܘܫܘܗܝ. ܕܠܐ ܠܡ ܢܥܒܪܘܢ ܠܐܬܪܐ ܕܝܠܟܘܢ. ܥܿܒܕܐ ܗܘܬ ܕܝܢ ܠܡܠܬܐ ܠܡܬܗܝܡܢܘܼ. ܚܪܒܐ ܘܫܒܝܐ ܕܥܒܕܘ ܗܘ̈ܢܝܐ ܒܝܬ ܪ̈ܘܡܝܐܿ. ܒܫܢܬ ܫܒܥ̈ܡܐܐ ܘܫܒܥܿ. ܒܝܘ̈ܡܝ ܐܢܘܪܝܘܣ ܘܐܪܩܕܝܣ ܡܠ̈ܟܐ ܒܢ̈ܘܗܝ ܕܬܐܕܘܣܝܘܣ ܪܒܐ. ܘܐܫܬܠܡܼܬܿ ܗܘܬ ܒܐܝ̈ܕܝܗܘܢ ܟܠܗܿ ܣܘܪܝܐܼ. ܒܝܕ ܢܟܝܠܘܬܐ ܕܪܘܦܝܢܐ ܗܘܦܪܟܐܼ. ܘܒܪܦܝܘܬܐ [ܕܐܕܝ] ܣܛܪܛܝܠܛܝܣ. ܒܝܕ ܥܘܕܪܢܐ ܕܕܗܒܐ ܕܩܿܒܠ ܗܘܐ ܡܢ ܪ̈ܗܘܡܝܐܼ. ܫܥܒܕ ܐܢܘܢ ܦܪܘܙ ܠܗܘܢ̈ܝܐܼ. ܘܕܘ̈ܟܝܬܐ ܣܓܝ̈ܐܬܐ ܡܢ ܐܬܪܗܘܢ ܫܩܠܼ. ܘܐܘܣܦ ܥܠ ܡܠܟܘܬܗ. ܠܚܪܬܐ ܕܝܢ ܐܫܬܒܝ ܡܢܗܘܢ. ܘܟܕ ܫܡܼܥ ܙܝܢܘܢ ܡܠܟܐ ܕܪ̈ܗܘܡܝܐܼ. ܫܕܪ ܕܗܒܐ ܡܢ ܕܝܠܗܼ ܘܦܪܩܗ ܘܫܿܝܢܗ ܥܡܗܘܢ. ܘܐܩܝܡ ܠܗܘܢ ܦܪܘܙ ܩܝܿܡܐ ܠܗܘ̈ܢܝܐܼ. ܕܠܐ ܬܘܒ ܢܥܒܪ ܥܠܝܗܘܢ ܬܚܘܡܐ ܕܐܬܪܗܘܢ ܠܩܪܒܐ. ܘܗܦܟܼ ܘܕܓܠ ܩܝܿܡܗ ܒܕܡܘܬ ܨܕܩܝܐ. ܘܐܙܼܠ ܠܡܩܪܒܘ. ܘܐܟܘܬܗ ܐܬܡܣܪܘ ܒܐܝ̈ܕܝ ܒܥܠܕܒ̈ܒܘܗܝ. ܘܟܠܗ ܚܝܠܗ ܐܬܚܪܒ ܘܐܬܒܕܪ. ܘܗܼܘ ܐܬܬܚܕ ܟܕ ܚܝ. ܘܐܫܬܘܕܝ ܒܫܒܗܪܢܘܬܗܼ. ܕܢܬܠ ܚܠܦ ܦܘܪܩܢܐ ܕܚܝ̈ܘܗܝܼ ܬܠ̈ܬܝܢ ܟܘܕܗܢܘܢ ܟܕ ܛܥ̈ܝܢܝܢ ܙܘ̈ܙܐ. ܘܫܕܪ ܠܐܬܪܐ ܕܐܘܚܕܢܗ ܘܠܡܚܣܢ ܟܿܢܼܫ ܥܣܪܝܢ ܛܥ̈ܢܝܢ. ܟܠܗ ܓܝܪ ܓܙܐ ܕܡܠܟܐ ܕܩܕܡܘܗܝ ܣܦܼܩܗ ܗܘܐ ܒܩܪ̈ܒܐ ܩܕ̈ܡܝܐ. ܚܠܦ ܗܠܝܢ ܕܝܢ ܥܣܪܐ ܛܥ̈ܢܝܢ ܐܚܪ̈ܢܝܢ ܣܡ ܠܘܬܗܘܢ [ܡܫـ]ـܟܢܐ ܘܗܡܝܪܐ ܩܘܕ ܒܪܗ܆ ܥܕ ܡܫܕܪ ܠܗܘܢ. ܘܐܩܝܡ ܥܡܗܘܢ ܩܝܿܡܐ ܕܬܪ̈ܬܝܢ ܙܒܢ̈ܝܢ܆ ܕܠܠܐ ܬܘܒ ܢܩܪܒ. ܘܟܕ ܦܢܐ ܠܡܠܟܘܬܗܼ. ܐܪܡܝ ܟܣܦ ܪܝܫܐ ܥܠ ܟܠܗܿ ܐܪܥܗ. ܘܫܕܪ ܥܣܪܐ ܛܥ̈ܢܝܢ ܙܘ̈ܙܐܼ. ܘܦܪܩܗ ܠܒܪܗ. ܘܬܘܒ ܟܿܢܼܫ ܠܗ ܚܝܠܐ ܘܐܙܠ ܠܡܩܪܒܘ. ܘܡܠܬܗ ܕܢܒܝܐ ܗܘܿ ܕܐܡܿܪ: ܕܚܿܙܝܬ ܪܫܝܥܐ ܕܡܬܬܪܝܡ ܐܝܟ ܐܝܠ̈ܢܐ ܕܥܒܐܿ. .ܟܕ ܥܒܿܪܬ pb. 244 ܠܝܬܘܗܝ ܘܒܥܿܝܬܗܼ. ܘܠܐ ܐܫܟܿܚܬܗܼ. ܬܡܢ ܒܥܒܿܕܐ ܐܫܬܡܠܝܬܿ ܒܗ. ܟܕ ܓܝܪ ܗܐ ܩܪܒܐ ܘܐܫܬܓܫ ܡܫܪ̈ܝܬܐ ܒܚ̈ܕܕܐ: ܐܬܚܪܒܘ ܟܠܗ ܚܝܠܗܼ. ܘܗܘܼ ܐܬܒܥܝ ܘܠܐ ܐܫܬܟܚ. ܘܥܕܡܐ ܠܝܘܡܢܐ ܠܐ ܐܝܬܝܕܥ ܡܢܐ ܗܘܼܐ ܡܢܗ. ܠܐ ܐܢ ܬܚܝܬ ܫ̈ܠܕܐ ܕܩܛܝ̈ܠܐ ܐܬܛܡܪܘ: ܘܠܐ ܐܢ ܒܝܡܐ ܫܼܕܐ ܢܦܫܗܼ. ܘܠܐ ܐܢ ܒܦܥܪܐ ܕܐܪܥܐ ܟܼܡܢ ܘܐܬܚܒܠ ܡܢܟܦܢܐܼ. ܘܠܐ ܐܢ ܒܥܒܐ ܛܫܼܐ ܘܐܬܐܟܠܘ ܡܢ ܚܝܘ̈ܬܐ.

ܒܝܘ̈ܡܘܗܝ ܕܝܢ ܕܝܠܗ ܕܦܪܘܙܼ. ܐܦ ܡܠܟܘܬܐ ܕܪ̈ܗܘܡܝܐ ܐܫܬܓܫܬܿ. ܣܐܢܬܐ ܓܝܪ ܐܝܬ ܗܘܼܬ ܠܗܘܢ ܠܒܢ̈ܝ ܦܠܛܝܢ ܠܘܬ ܙܝܢܘܢ ܡܠܟܐ. ܡܛܠ ܕܒܓܢܣ ܐܣܘܪܝܐ ܐܝܬܘܗܝ ܗܘܐ. ܘܡܼܪܕ ܥܠܘܗܝ ܒܣܠܝܩܘܣܼ ܘܐܡܠܟ ܚܠܦܘܗܝ. ܘܒܬܪܟܝܢ ܐܬܓܒܪ ܙܝܢܘܢܼ ܘܬܩܢ ܥܠ ܡܠܟܘܬܗ. ܘܡܛܠ ܕܢܣܝ ܠܫܐܢܬܐ ܕܣܓ̈ܝܐܐ ܕܠܘܬܗܼ. [ܚܣـ]ـܢܐ ܚܕ ܡܪܝܕܐ ܐܬܩܢ ܠܗ ܒܐܬܪܗ. ܐܝܟ ܕܐܢ ܗܘܼ ܕܢܓܕܫ ܠܗ [ܕܒܝܼܫ] ܡܕܡܼ. ܢܗܘܐ ܠܗ ܠܒܝܬ ܡܥܪܩܐ. ܐܝܬ ܗܘܐ ܠܗ ܕܝܢ ܒܪ [ܪܐܙܐ] ܒܗܕܐܼ ܐܣܛܪܛܠܛܣ ܕܐܛܝܟܝܐܼ. ܕܫܡܗ ܐܠܘܣ. ܕܐܝܬܘܗܝ ܗܘܐ ܗܼܘ ܐܣܘܪܝܐ. ܠܟܠܗܘܢ ܓܝܪ ܒܢ̈ܝ ܥܡܗ ܝܗܼܒ ܕܪ̈ܓܐ ܕܐܝܩܪܐ [ܘܕܫـ]ـܘܠܛܢܐ. ܕܡܛܘܠܬܗܿ ܕܗܕܐ ܝܬܝܪ ܐܝܬܢܣ ܡܢ ܪ̈ܗܘܡܝܐ. ܟܕ ܕܝܢ ܐܬܬܩܢ ܚܣܢܐ ܒܟܠ ܡܕܡ ܕܡܬܒܥܐ ܗܘܐ ܒܗ: ܘܐܬܬܣܝܡ ܒܗ ܡܢ ܐܠܘܨ ܕܗܒܐ ܣܓܝܐܐ ܕܠܐ ܚܘܫܒܢ܆ ܐܬܼܐ ܠܡܕܝܢܬ ܡܠܟܘܬܐܿ. ܐܝܟ ܕܢܘܕܥܝܘܗܝ ܠܙܝܢܘܢ ܕܐܫܬܡܠܝ ܨܒܝܢܗ. ܙܝܢܘܢ ܕܝܢ ܡܛܠ ܕܝܿܕܥ ܗܘܐ ܠܗ ܕܢܟܝܠܐ ܗܘܐ ܘܠܡܠܟܘܬܐ ܡܬܪܓܪܓܼ. ܦܩܼܕ ܠܚܕ ܡܢ ܦܠܗܚܐ ܕܢܩܛܠܝܘܗܝ. ܘܟܕ ܝܘ̈ܡܬܐ ܣܓܗܝܐܐ ܒܥܿܐ ܗܘܐ ܗܿܘ ܕܐܬܦܩܼܕ ܠܗ pb. 245 ܥܗܝܢܐ ܠܣܘܥܪܢܗ ܒܟܣܝܐ ܘܠܐ ܐܫܟܚܼ. ܦܼܓܥ ܒܗ ܒܐܠܘܣ ܒܓܘ ܦܠܛܝܢ܆ ܘܫܡܛ ܣܝܦܗ ܘܐܪܝܡܗ ܠܡܡܚܝܗ. ܘܡܚܕܗܿ ܚܕ ܡܢ ܦܠ̈ܚܐ ܕܢܩܝܦܝܢ ܠܐܠܘܣܼ ܡܚܝܗܝ ܒܣܟܝܢܐ ܒܕܪܥܗܼ. ܘܢܦܼܠ ܣܝܦܐ ܡܢ ܐܝܕܗ܆ ܘܦܣܩܗܿ ܠܐܕܢܗ ܕܐܠܘܣ. ܙܝܢܘܢ ܐܝܟ ܡܿܢ ܕܠܐ ܢܬܦܪܣܐ ܢܟܠܗ ܕܠܘܬ ܐܠܘܣ܆ ܒܪ ܫܥܬܗ ܦܩܼܕ ܥܠ ܦܠܚܐ ܗܘܿ ܕܬܫܬܩܠ ܩܪܩܦܬܗ ܕܠܐ ܫܘܐܠܐ. ܗܝܼ ܕܝܢ ܗܕܐ ܝܬܝܪ ܥܒܕܬܗ ܠܐܠܘܣ ܕܢܣܒܪ ܕܙܝܢܘܢ ܦܩܼܕܗ. ܘܩܡ ܚܙܩ ܡܢ ܬܡܘܢܼ ܘܢܚܼܬ ܠܐܢܛܝܘܟ. ܟܕ ܣܡ ܒܪܥܝܢܗܼ. ܕܐܡܬܝ ܕܢܗܐ ܠܗ ܐܬܪܐ ܢܬܩܪܒ ܠܦܘܪܥܢܝܘܬܐ. ܙܝܢܘܢ ܕܝܢ ܡܛܠ ܕܕܚܠ ܗܘܐ ܡܢ ܐܠܘܣ܇ ܥܠ ܕܝܿܕܥ ܗܘܐ ܒܝܫܘܬܗܼ. ܫܕܪ ܠܘܬܗ ܐܢܫ̈ܐ ܕܢܦܘܩ ܠܗ ܪܘܚܐ: ܕܠܘ ܠܡ ܡܢ ܠܘܬܗ ܐܣܬܥܪ ܢܟܠܐ ܗܿܘ. ܗܼܘ ܕܝܢ ܠܐ ܠܡܩܛܠܗ ܨܒܿܐ ܗܘܐ. ܘܠܪܥܝܢܗ ܩܫܝܐ ܕܐܠܘܣ ܕܢܪܟܪܟ ܠܐ ܐܫܟܚ. ܒܣܪ ܓܝܪ ܥܠܘܗܝ ܘܠܐ ܨܒܼܐ ܕܢܫܬܡܥ ܠܦܘܩܕܢܗ ܘܢܐܙܠ ܠܘܬܗ. ܠܚܪܬܐ ܕܝܢ ܫܕܪ ܥܠܘܗܝ ܙܝܢܘܢ ܐܣܛܪܛܠܛܣ ܐܚܪܢܐ ܕܫܡܗ ܗܘܐ ܠܐܢܛܝܣܼ. ܥܡ ܚܝܠܐ ܕܬܚܝܬ ܐܝ̈ܕܘܗܝ. ܘܦܩܕܗ ܕܒܩܛܝܪܐ ܢܩܝܘܗܝ ܠܘܬܗ. ܘܐܢ ܡܬܚܡܙܐ ܠܩܘܒܠܗ ܐܦ ܢܩܛܠܝܘܗܝ. ܘܟܕ ܐܬܼܐ ܗܘܼ ܗܢܐ ܠܐܢܛܝܟܝܐ ܐܬܚܒܠܘ ܒܕܒܗܐ ܡܢ ܐܠܘܣ. ܘܓܼܠܐ ܠܗ ܥܠ ܦܘܩܕܢܐ ܕܩܛܠܐ ܕܐܬܝܗܒ ܠܗ. ܐܠܘܣ ܕܝܢ ܟܕ ܚܼܙܐ ܕܠܐ ܟܣܝ ܡܢܗ ܡܕܡ. ܚܘܝ ܐܦ ܗܘܼ ܕܗܒܐ ܣܓܝܐܐܐ ܕܐܝܬ [ܒـ]ـܐܝ̈ܕܘܗܝܿ. ܕܡܛܠܬܗ ܨܒܿܐ ܗܘܐ ܙܝܢܘܢ ܢܩܛܠܝܘܗܝ. ܘܐܦܝܣܗ ܠܠܢܛܝܣ ܕܢܫܼܬܘܐ ܠܗܼ ܘܢܡܪܕ ܥܡܗ. ܟܕ ܡܚܿܘܐ ܗܘܐ ܠܗ ܐܦ ܣܐܢܬܐ ܕܪ̈ܗܘܡܝܐ ܕܠܘܬ ܙܝܢܘܢ. ܘܟܕ ܗܢܐ ܐܬܬܦܝܣܼ. ܐܫܟܚ ܐܠܘܣ ܕܢܚܘܐ ܨܒܝܢܗ. ܒܠܚܘܕܘܗܝ ܓܝܪ ܠܐ ܡܫܟܚ ܗܘܐ pb. 246 ܕܢܡܪܕ. ܘܐܦܠܐ ܕܢܡܠܟ ܗܘܼ ܩܢܘܡܗܼ. ܡܛܠ ܕܐܦ ܠܗܼ ܣܿܢܝܢ ܗܘܘ ܪ̈ܗܘܡܝܐ ܡܛܠ ܛܘܗܡܗܼ ܘܡܛܠ ܪܥܝܢܗ ܩܫܝܐ. ܐܡܠܟ ܕܝܢ ܠܐܢܛܣ ܒܐܢܛܝܟܝܐ ܒܫܡܐܼ. ܟܕ ܐܠܘܣ ܗܘܼ ܐܝܬܘܗܝ ܡܕܒܪܢܐ ܕܨܒܘ̈ܬܐ. ܐܝܟ ܕܐܡܿܪܝܢܢ ܚܕܚ̈ܕܢܐܼ. ܐܦ ܕܢܩܛܠܝܘܗܝ ܠܠܐܢܛܝܣ ܡܬܚܫܒ ܗܘܐܼ ܐܢ ܗܼܘ ܕܢܙܟܘܢ ܠܙܝܢܘܢ. ܢܩܝܦ ܗܘܐ ܠܗܘܢ ܕܝܢ ܓܒܪܐ ܚܕ ܚܪܫܐ ܘܙܐܦܢܐܼ. ܕܫܡܗ ܦܢܦܪܦ. ܗܘܿ ܕܠܟܠܗܝܢ ܨܒܘ̈ܬܗܘܢ ܒܠܒܠ ܘܐܗܦܟ ܠܒܣܬܪܗ ܒܝܕ ܙܐܦܗ. ܡܛܠ ܕܬܫܬܪܪ ܠܗܘܢ ܡܠܟܘܬܐ ܫܕܪܘ ܐܝܙ̈ܓܕܐ ܠܒܝܬ ܦܘܪ̈ܣܝܐܼ. ܥܡ ܕܗܒܐ ܣܓܝܐܐ ܕܢܩܝܡܘܢ ܥܡܗܘܢ ܩܝܿܡܐ ܕܪܚܡܘܬܐ. ܘܐܘ ܐܢ ܗܘ ܕܡܬܒܥܐ ܠܗܘܢ ܚܝܠܐ ܠܥܘܕܪܢܐ ܢܫܕܪܘܢ ܠܗܘܢ. ܙܝܢܘܢ ܕܝܢ ܟܕ ܫܡܼܥ ܥܠ ܐܝܠܝܢ ܕܓܕܫ ܒܐܢܛܝܟܝܐܼ. ܠܚܕ ܡܢ ܣܛܪ̈ܛܠܛܣ ܕܫܡܗ ܝܘܚܢܢܼ ܫܕܪ ܠܬܡܘܢܼ ܥܡ ܚܝܠܐ ܣܓܝܐܐ. ܗܠܝܢ ܕܝܢ ܕܒܝܬ ܐܠܘܣ ܘܠܢܛܝܣ. ܟܕ ܫܡܥ ܥܠܝ ܚܝܠܐ ܣܓܝܐܐ ܕܐܬܿܐ ܥܠܝܗܘܢܼ. ܙܥܼ ܠܒܗܘܢ. ܘܐܦ ܐܢܛܝܗܟܝܐ ܬܘܒ ܕܚܼܙܠܘ ܕܠܐ ܡܫܟܚܝܢ ܗܘܘ ܠܡܣܝܒܪܐ ܚܒܘܫܝܐ. ܘܐܪܝܒܘ ܥܠܝܗܘܢ. ܕܢܦܩܘܢ ܠܗܘܢ ܡܢ ܡܕܝܢܬܐ. ܘܐܢܗܼܘ ܕܡܫܟܚܝܢ ܢܐܪܥܘܢ ܩܪܒܐ. ܗܕܐ ܝܬܝܪܐܝܬ ܐܙܝܥܬܿ ܠܕܒܝܬ ܐܠܘܣ. ܘܐܬܚܫܒܘ ܕܢܦܩܘܢ ܠܗܘܢ ܡܢ ܐܢܛܝܟܝܐ: ܘܢܥܒܪܘܢ ܢܗܪܐ ܦܪܬ ܠܡܕܢܚܐ. ܘܫܕܪ ܠܐܢܫ ܡܢ ܕܝܠܗܘܢ ܕܫܡܗ ܗܘܐ ܡܛܘܪܢܝܢܐ ܥܡ ܚܡ̈ܫܡܐܐ ܦܪ̈ܫܝܢ܇ ܕܢܬܩܢ ܠܗܘܢ ܒܝܬ ܡܠܟܘܬܐ ܒܐܘܪܗܝ. ܐܘܪ̈ܗܝܐ ܕܝܢ ܩܼܡ ܠܩܘܒܠܗ. ܘܐܚܕܘ ܬܪ̈ܥܐ ܕܡܕܝܢܬܐ. ܘܢܛܪ ܫܘܪܐ ܒܢܡܘܣܐ ܕܩܪܒܐܼ. ܘܠܐ ܫܒܩܘܗܝ ܠܡܥܠ. ܘܟܕ pb. 247 ܗܕܐ ܫܡܼܥܘ ܕܒܝܬ ܐܠܘܣܼ. ܐܬܥܨܝ ܕܢܪܥܘܢ ܒܩܪܒܐ ܠܝܘܚܢܢ. ܘܠܐ ܐܫܟܚ ܒܚܝܠ ܗܕܐ. ܡܛܠ ܕܢܦܠ ܥܠܝܗܘܢ ܝܘܚܢܢ ܓܢܒܪܐܝܬ. ܘܚܪܒ ܣܘܓܗ ܕܚܝܠܐ ܕܥܡܗܘܢ. ܘܐܚܪ̈ܢܐ ܐܬܒܕܪ ܟܠܢܫ ܠܡܕܝܢܬܗ. ܘܗܼܢܘܢ ܒܕܠܐ ܡܫܟܚܝܢ ܗܘܘ ܠܡܫܝܒܪܘ ܚܐܦܗܼ. ܕܒܼܪ ܠܐܝܠܝܢ ܕܐܫܬܚܪ ܠܘܬܗܘܢܼ. ܘܐܫܬܘܙܒ ܠܚܣܢܐ ܗܘܿ ܕܐܡܿܪܬ ܡܢ ܠܥܠ ܥܠܘܗܝܼ ܕܡܪܝܕ ܗܘܐ. ܘܐܦ ܐܣܝܢ ܒܟܠܡܕܡ. ܝܘܚܢܢ ܕܝܢ ܪܕܦ ܒܬܪܗܘܢ ܘܠܐ ܐܕܪܟ ܐܢܘܢܼ ܘܫܼܪܐ ܠܗ . . . . . . ܚܕܪ̈ܝ ܚܣܝܢܐܼ ܘܢܿܛܪ ܗܘܐ ܠܗܘܢ. ܗܢܼܘܢ ܕܝܢ ܡܛܠ ܕܬܟܝܠܝܢ ܗܘܘ ܥܠ ܡܡܪܕܘܬܗ ܕܚܣܝܢܐܼ. ܫܪܘ ܠܚܝܠܐ ܕܥܡܗܘܢ ܠܡܚܬ. ܟܕ ܐܪܦܝܘ ܠܘܬܗܘܢ ܠܡܓܒ̈ܝܐ ܘܠܚܠ̈ܝܨܐ ܒܠܚܘܕ. ܝܘܚܢܢ ܕܝܢ ܐܢܝܚ ܚܡܬܗ ܒܐܝܠܝܢ ܕܢܚܬ ܡܢ ܚܣܝܢܐ. ܠܕܒܝܬ ܐܠܘܣ ܕܝܢ ܕܢܣܓܦ ܒܡܕܡ ܠܐ ܐܫܟܚ. ܡܛܠ ܥܣܩܘܬܗ ܕܝܢ ܕܟܝܢܗ ܕܕܘܟܬܐܕܣܢܐܼ. ܐܦ ܒܥܒܿܕ ܐܝ̈ܕܝܐ ܬܡܝܗܐܝܬ ܡܡܿܪܕܐ ܗܘܬ. ܘܐܠܐ ܐܢ ܚܕܐ ܐܘܪܚܐ ܠܝܬ ܗܘܐ ܕܣܿܠܩܐ ܠܗ. ܗܝܿܕ ܬܪ̈ܝܢ ܐܟܚܕܐ ܕܢܣܩܘܢ ܒܗܿ ܠܐ ܡܨܝܢ ܗܘܘ ܡܛܠ ܩܛܝܢܘܬܗܿ. ܡܢ ܒܬܪ ܕܝܢ ܙܒܢܐ ܓܣܝܐܐ ܟܕ ܐܘܦܝ ܨܢ̈ܥܬܗ ܕܝܘܚܢܢ܆ ܢܟܠܐ ܗܘܐ ܥܠ ܕܒܝܬ ܐܠܘܣܼ ܡܢ ܐܝܠܝܢ ܕܥܡܗܘܢ܆ ܘܐܬܟܒܼܫ ܟܕ ܕܡܟܝܢ. ܘܒܦܘܩܕܢܗ ܕܙܝܢܘܢ ܐܬܩܛܠ ܬܪ̈ܝܗܘܢ ܥܡ ܐܝܠܝܢ ܕܐܫܠܡ ܐܢܘܢ. ܘܐܬܦܣܩܘ ܐܝ̈ܕܝܐ ܕܟܠ ܐܝܠܝܢ ܕܥܡܗܘܢ. ܕܐܝܟ ܗܢܐ ܕܝܢ ܫܚܩܐ ܐܝܬ ܗܘܐ ܒܝܬ ܪ̈ܗܘܡܝܐ ܒܝܘ̈ܡܝ ܦܪܘܙ. ܡܢ ܒܬܪ ܕܝܢ ܕܐܬܒܥܝ ܘܠܐ ܐܫܬܟܚܼ ܐܝܟ ܕܡܢ ܠܥܠ ܐܡܿܪܬܼ. ܒܠܫ ܐܚܘܗܝ ܐܡܠܟ ܥܠ ܦܘܪ̈ܣܝܐ ܚܠܦܘܗܝ. ܗܢܐ ܐܝܬܘܗܝ ܓܒܪܐ ܡܟܝܟܐ ܘܪܚܡ ܫܝܢܐ. ܘܡܕܡ ܒܝܬ ܓܙܐ ܕܦܘܪ̈ܣܐ ܠܐ ܐܫܟܚ. pb. 248 ܘܐܪܥܗ ܚܪܒܐ ܡܢ ܫܒܝܐ ܕܗܘܢ̈ܝܐ.. ܠܐ ܓܝܪ ܛܥܝܐ ܠܚܟܡܬܟ ܕܟܡܐ ܚܘܣܪ̈ܢܐ ܘܢܦܩ̈ܬܐ ܗܘ̈ܝܢ ܠܡܠ̈ܟܐ ܒܩܪ̈ܒܐ. ܐܦ ܟܕ ܡܙܟܐ ܢܙܟܘܢ܇ ܫܒܘܩ ܐܡܬܝ ܕܐܦ ܚܿܝܒܝܢ. ܘܡܢ ܠܘܬ ܪ̈ܗܘܡܝܐ ܥܘܕܪܢܐ ܕܡܕܡ ܠܐ ܗܘܐ ܠܗ ܐܝܟ ܕܠܐܚܘܗܝ. ܫܕܪ ܓܝܪ ܐܝ̈ܙܓܕܐ ܠܘܬ ܙܝܢܘܢ ܕܢܫܕܪ ܠܗ ܕܗܒܐ: ܘܡܛܠ ܕܒܨܦܬܐ ܕܩܪܒܐ ܕܒܝܬ ܐܠܘܣ ܘܠܐܢܛܝܣ ܐܝܬܘܗܝ. ܘܡܛܠ ܕܥܗܕ ܗܘܐ ܬܘܒ ܠܕܗܒܐ ܗܘܿ ܕܐܫܬܕܪ ܗܘܐܡܢܗܘܢ ܒܫܘܪܝܐ ܕܡܪܘܕܘܬܗܘܢ܆ ܕܬܡܢ ܒܝܬ ܦܪܗܣܝܐ ܫܿܪܟ ܗܘܐ. ܠܐ ܨܒܼܐ ܕܢܫܕܪ ܠܗ ܡܕܡ. ܐܠܐ ܫܠܚ ܠܗܼ. ܕܣܿܦܩܝܢ ܠܟ ܫܩ̈ܠܐ ܕܢܨܒܝܢ ܕܢܿܣܒ ܐܢܬ. ܕܗܐ ܫܢ̈ܝܐ ܣܓܝ̈ܐܬܐ ܠܪ̈ܗܘܡܝܐ ܙܕܿܩܝܢ. ܒܠܫ ܕܝܢ ܡܛܠ ܕܠܝܬ ܗܘܐ ܠܗ ܕܗܒܐ ܕܢܬܪܣܐ ܠܚܝ̈ܠܘܬܗܼ. ܐܬܫܝܛ ܒܥܝܢܗܝܗܘܢ. ܡܓܘ̈ܫܐ ܕܝܢ ܬܘܒ ܣܿܢܝܢ ܗܘܘ ܠܗ. ܥܠ ܕܡܒܛܠ ܗܘܐ ܢܡܘ̈ܣܝܗܘܢ. ܘܨܒܿܐ ܗܘܐ ܕܢܒܢܐ ܒܠܢܣ ܒܡܕܝ̈ܢܬܐ ܠܡܣܚܘܬܐ.ܘܟܕ ܚܼܙܘ ܕܠܐ ܚܫܝܒ ܒܥܝܢ̈ܝ ܚܝ̈ܠܘܬܗܼ ܐܚܕܘܗܝ ܘܥܿܘܪ ܥܝܢ̈ܘܗܝ. ܘܐܩܝܡ ܚܠܦܘܗܝܼ ܠܩܘܕ ܒܪܗ ܕܦܪܘܣ ܐܚܘܝܼ. ܗܘܿ ܕܐܬܟܪܢܢ ܫܡܗ ܡܢ ܠܥܠܿ. ܕܡܡܫܟܢ ܗܘܐ ܒܝܬ ܗܘ̈ܢܝܐ. ܕܗܘܝܘ ܗܢܐ ܕܐܙܝܥ ܩܪܒܐ ܥܡ ܪ̈ܗܘܡܐܿ. ܡܛܠ ܕܠܐ ܐܬܝܗܒ ܠܗ ܕܗܒܐ. ܫܕܪ ܓܝܪ ܐܙܝܓܕܐ ܘܦܝܠܐ ܚܕ ܪܒܐ ܠܐܩܝܪܗ ܕܡܠܟܐܼ ܐܝܟ ܕܢܫܕܪ ܠܗ ܕܗܒܐ. ܘܥ ܡܼܛܐ ܐܝܙܓܕܐ ܠܐܢܛܝܟܝܐ ܕܣܘܪܝܐܼ ܡܝܬ ܙܝܢܘܢ. ܘܐܡܠ ܟܒܬܪܗ ܐܢܣܛܘܣ. ܘܟܕ ܐܘܕܥܗ ܐܝܙܓܕܐ ܕܦܘܪ̈ܣܝܐ ܠܩܘܕ ܡܪܗܼ. ܥܠ ܫܘܚܠܦܐ ܕܗܘܼܐ ܒܡܠܟܘܬܐ ܕܪ̈ܗܘܡܝܐ܇ ܫܠܚ ܠܗܼ ܕܒܚܦܝܛܘܬܐ ܢܣܩ ܘܢܫܐܠ ܕܗܒܐ ܗܘܿ ܕܥܝܕܐ. ܐܘ ܠܡܐܡܪ ܠܡܠܟܐܼ ܕܩܒܠ ܩܪܒܐ. ܘܚܠܦ ܕܘܿܠܐ ܗܘܐ ܠܗ ܕܡ̈ܠܐ ܕܫܝܢܐ ܘܕܫܠܡܐ [ܢܡܿܠܠܼ.] ܘܢܚܕܐ ܥܡܗ ܒܪܝܫܢܘܬܐ pb. 249 ܕܡܕܒܪܢܘܬܗ ܗܝ ܕܚܬܐܝܬ ܡܢ ܐܠܗܐ ܠܗ ܐܬܝܗܒܬܼ. ܒܡ̈ܠܐ ܕܓܙܡܐ ܡܪܡܪ ܠܬܪܥܝܬܗ ܕܡܠܟܐ ܡܗܝܡܢܐ ܐܢܣܛܘܣ. ܗܘܼ ܕܝܢ ܟܕ ܫܡܼܥ ܡܠ̈ܘܗܝ ܫܒܗܪ̈ܢܝܬܐ ܘܝܠܼܦ ܥܠ ܙܢܘ̈ܗܝ ܒܝܗܫܐ: ܘܕܚܕܬ ܠܗܪܣܝܣ ܢܕܝܕܬܐ ܕܡܓܘܫܘܬܐ ܕܡܬܩܪܝܐ ܕܙܪܕܫܬܩܢܐ: ܕܗܝܼ ܗܕܐ ܡܠܦܐ ܕܢܗܘ̈ܝܢ ܢܫ̈ܐ ܕܓܘܐ: ܘܟܠܢܫ ܥܡ ܐܝܠܝܢ ܕܨܒܿܐ ܢܫܬܘܬܦ: ܘܕܐܒܫ ܠܐܪ̈ܡܢܝܐ ܕܬܚܝܬ ܫܘܠܛܢܗܼ ܥܠ ܕܠܐ ܣܿܓܕܝܢ ܗܘܘ ܠܢܘܪܐ. ܫܛܗܼ ܘܠܐ ܫܕܪ ܠܗ ܕܗܒܐܼ. ܐܠܐ ܫܠܚ ܠܗܼ. ܕܐܝܟ ܕܠܐ ܙܝܢܘܢ ܗܘܿ ܕܡܡܠܟ ܗܘܐ ܩܕܡܝ ܫܕܪܼ. ܘܠܐ ܐܢܐ ܡܫܿܕܪ ܐܢܐܼ ܥܕܡܐ ܕܬܦܢܐ ܠܝ ܢܨܒܝܢ. ܘܠܐ ܓܝܪ ܙܥܘܪ̈ܝܢܼ ܩܪ̈ܒܐ ܕܐܝܬ ܠܝ ܥܡ ܒܪ̈ܒܪܝܐ ܕܡܬܩܪܝܢ ܓܪ̈ܡܢܩܘ ܘܥܡ ܐܝܠܝܢ ܕܡܬܩܪܝܢ ܒܠ̈ܡܘܿ. ܘܥܡ ܣܓ̈ܝܐܐ ܐܚܪ̈ܢܐ. ܘܠܐ ܫܿܒܩ ܐܢܐ ܚܝܠ̈ܘܬܐ ܕܪ̈ܗܘܡܝܐ ܘܡܬܪܨܐ ܐܢܐ ܕܝܠܟ. ܟܕ ܫܼܡܥ ܕܝܢ ܐܪ̈ܡܢܝܐ ܕܬܚܝܬ ܐܝܕܗ ܕܩܘܕ܆ ܕܠܐ ܐܬܦܢܝ ܠܗ ܠܫܠܡܐ ܡܢ ܪ̈ܗܘܡܝܐ: ܐܬܠܒܒܘ ܘܐܬܚܝܠܘ. ܘܥܩܪ ܒ̈ܬܐ ܕܢܘܪܐ ܕܒܢܼܝܢ ܗܘܘ ܠܦܘܪ̈ܣܝܐ ܒܐܬܪܗܘܢ. ܘܩܛܠ ܠܡܓܘܗܫܐ ܕܒܝܢܬܗܘܢ. ܘܫܕܪ ܥܠܝܗܘܢ ܩܘܕ ܠܡܪܙܒܢܐ ܚܕ ܥܡ ܚܝܠܐܼ ܕܢܣܝܡ ܒܪܝܫܗܘܢ ܘܕܢܗܦܟ ܐܢܘܢ ܕܢܣܓܕܘܢ ܠܢܘܪܐ. ܘܐܩܪܒ ܥܡܗ ܘܚܪܒܘܗܝ ܠܗ ܘܠܚܝܠܗ. ܘܫܕܪܘܢ ܐܝܙ̈ܓܕܐ ܠܘܬ ܡܠܟܐ ܐܝܟ ܕܠܗ ܢܫܬܥܒܕܘܢ܆ ܘܠܐ ܨܒܼܐ ܢܩܒܠ ܐܢܘܢܼ. ܕܠܐ ܢܣܬܒܪ ܕܩܪܒܐ ܕܥܡ ܦܘܪ̈ܣܝܐ ܡܓܿܪܓ. ܐܝܠܝܢ ܗܟܝܠ ܕܥܿܕܠܝܢ ܠܗ ܥܠ ܕܠܐ ܝܗܼܒ ܕܗܒܐܼ. ܢܥܿܕܠܘܢ ܠܐܝܢܐ ܕܒܥܼܐ ܕܠܐ ܕܝܠܗ܇ ܐܝܟ ܕܒܩܛܝܪܐ. ܐܠܘ ܓܝܪ ܒܥܼܐ ܗܘܐ ܒܫܝܢܐ ܘܒܦܝܣܐ ܡܫܬܕܪ ܗܘܐ ܠܗܼ. ܐܠܐ ܩܿܫܝ ܪܥܝܢܗ ܒܕܡܘܬ ܦܪܥܘܢܼ ܘܓܼܙܡ ܥܠ ܩܪܒܐ. ܬܟܝܠܝܢܢܢ ܕܝܢ ܥܠ ܟܐܢܘܬܗ ܕܐܠܗܐܼ ܕܐܦ pb. 250 ܡܣܡܒܪܝܫܐ ܕܝܬܝܪ ܡܢ ܕܗܘܿ ܡܝܬܝܐ ܥܠܘܗܝ ܡܛܠ ܢܡܘܣܘ̈ܗܝ ܛܢ̈ܦܐ܇ ܕܨܒܼܐ ܢܚܒܠ ܢܡܘܣܗ ܕܟܝܢܐܿ. ܘܢܒܛܠ ܐܘܪܚܐ ܕܕܚܠܬ ܐܠܗܐ. ܬܘܒ ܕܝܢ ܐܦ ܩܕܫ̈ܝܐ ܟܠܗܘܢ ܕܬܚܝܬ ܐܝܕܗ ܡܪܕܘ ܥܠܘܗܝ܆ ܘܒܥܿܝܢ ܗܘܘ ܕܢܥܠܘܢ ܠܢܨܒܝܢ. ܘܢܡܠܟܘܢ ܒܗܿ ܡܠܟܐ ܡܢ ܕܝܠܗܘܢ. ܙܒܢܐ ܕܠܐ ܒܙܥܘܪ ܐܬܟܬܫ ܥܠܝܗܿ. ܘܐܦ ܛܡܘܪ̈ܝܐ ܬܘܒ ܕܥܿܡܪܝܢ ܒܐܪܥܐ ܕܦܘܪ̈ܣܝܐ܇ ܟܕ ܚܙܘ ܕܠܐ ܡܬܝܗܒ ܠܗܘܢ ܡܢܗ ܡܕܡܼ ܡܼܪܕ ܥܠܘܗܝ. ܘܬܟܝܠܝܢ ܗܘܘ ܗܠܝܢ ܥܠ ܛܘܪ̈ܐ ܪ̈ܡܐ ܕܥܿܡܪܝܢ ܗܘܘ ܒܗܘܢ. ܘܢܿܚܬܝܢ ܘܒܿܙܝܢ ܘܚܿܛܦܝܢ ܠܩܘܪܗܝܐ ܕܚܕܪ̈ܝܗܘܢܼ. ܘܠܬܓܪ̈ܐ ܘܐܟܣ̈ܢܝܐ ܘܠܒܢ̈ܝ ܐܬܪܐ ܘܣܿܠܩܝܢ. ܐܦ ܚܐܪ̈ܐ ܕܡܠܟܘܬܗ ܣܿܐܢܝܢ ܗܘܘ ܠܗ܇ ܡܛܠ ܕܐܦܣ ܠܢܫ̈ܝܗܘܢ ܕܢܓܘܪ̈ܢ. ܐܦ ܛܝܝ̈ܐ ܬܘܒ ܕܬܚܝܬ ܐܝ̈ܕܘܗܝܼ ܟܕ ܚܼܙܘ ܒܠܝܠܘܬܐ ܕܡܠܟܘܬܗܼ. ܡܓܝܣܝܢ ܗܘܘ ܐܦ ܗܼܢܘܢ ܐܝܟ ܚܝܠܗܘܢ ܒܟܠܗ ܐܬܪܐ ܕܦܘܪ̈ܣܝܐ.. ܩܡ ܕܝܢ ܒܙܒܢܐ ܗܢܐ ܫܚܩܐ ܐܚܪܢܐ ܐܦ ܒܝܬ ܪ̈ܗܘܡܝܐ.. ܐܣܘܪ̈ܝܐ ܓܝܪ ܡܢ ܒܬܪ ܡܘܬܗ ܕܙܝܢܘܢ. ܡܼܪܕ ܥܠ ܡܠܟܐ ܐܢܣܛܘܣ. ܘܨܒܿܝܢ ܗܘܘ ܕܗܢܘܢ ܢܩܝܡܘܢ ܠܡܠܟܐ ܐܝܢܐ ܕܫܿܦܪ ܠܗܘܢ. ܘܟܕ ܫܡܼܥ ܩܘܕ ܗܼܝ ܗܕܐ܆ ܣܒܼ ܕܙܒܢܐ ܐܝܟܚ ܠܗܼ. ܘܫܕܪ ܐܝ̈ܙܓܕܐ ܠܒܝܬ ܪ̈ܗܘܡܝܐ ܟܕ ܣܿܒܪ ܕܕܚܿܠܝܢ ܘܡܕܫܪܝܢ ܠܗ ܕܗܒܐ. ܡܛܠ ܗܝܿ ܕܡܪܕܝܕܝܢ ܗܘܘ ܥܠܝܗܘܢ ܐܣܘܪ̈ܝܐ. ܐܦ ܡܠܟܐ ܐܢܣܛܘܣ ܫܠܼܚ ܠܗ. ܕܐܢ ܗܼܘ ܕܒܿܥܝܬ ܒܝܙܦܬܐܼ ܡܫܕܪ ܐܢܐ ܠܟ ܐܢ ܕܝܢ ܡܛܠ ܫܪܒܐ ܕܥܝܿܕܐܼ. ܠܐ ܫܿܒܩ ܐܢܐ ܚ̈ܝܠܘܬܐ ܕܪ̈ܗܘܡܝܐ ܕܬܥܫܝܢ ܒܩܪܒܐ ܕܐܣܘܪ̈ܝܐ: ܘܗܘܿܐ ܐܢܐ ܡܥܕܪܢܐ ܠܦܘܪ̈ܣܝܐ. ܒܗܠܝܢ ܗܟܝܠܼ ܐܬܡܟܟ ܪܥܝܢܗ ܕܩܘܕ܆ ܡܛܠ ܕܡܫܚܒܬܗ ܠܐ ܣܠܼܩܬܿ ܠܪܝܫ. ܐܙܕܟܝܘ ܐܣܘܪ̈ܝܐ. ܘܐܬܚܪܒ ܘܐܬܩܛܠܘ. ܘܐܬܥܩܪ ܘܩܕܝܢ ܟܠܗܝܢ ܡܕܝ̈ܢܬܗܘܢ. ܪܘܪ̈ܒܢܐ ܕܝܢ pb. 251 ܕܦܪ̈ܣܝܐ ܐܬܚܿܫܒܘ ܗܘܘ ܒܟܣܝܐ ܕܢܩܛܠܘܢܝܗܝ ܠܩܘܕܼ. ܡܛܠ ܕܘܒܪ̈ܘܗܝ ܛܡ̈ܐܐ ܘܢܡܘ̈ܣܘܗܝ ܗܦܝ̈ܟܐ܆ ܘܟܕ ܐܬܝܕܥܬܿ ܠܗ ܗܕܐܼ. ܫܒܼܩ ܡܠܟܘܬܗ ܘܥܪܩ ܠܒܝܬ ܗܘ̈ܢܝܐܼ. ܠܘܬ ܡܠܟܐ ܗܘܿ ܕܐܬܪܒܝ ܠܘܬܗ ܟܕ ܐܝܬܘܗܝ ܗܘܐ ܒܡܫܟܢܘܬܐ.. ܐܡܠܟ ܚܠܦܘܗܝ ܥܠ ܦܘܪ̈ܣܝܐܼ ܙܡܫܦ ܐܚܘܗܝ. ܗܼܘ ܕܝܢ ܩܘܕ ܢܣܼܒ ܠܗ ܒܝܬ ܗܘ̈ܢܝܐ ܐܢܬܬܐ ܕܐܝܬܝܗܿ ܒܪܬ ܚܬܗ. ܘܗܼܝ ܚܬܗ ܐܫܬܒܝܬܿ ܠܬܡܢ ܒܩܪܒܐܼ ܗܘܿ ܕܒܗ ܐܬܩܛܠ ܐܒܘܗܝ. ܘܡܛܠ ܕܒܪܬ ܡܠܟܐ ܐܝܬܝܗܿ ܗܘܬܼ. ܒܢܿܫܐ ܠܡܠܟܐ ܕܗܘ̈ܢܝܐ ܗܘܬ. ܘܗܘܼܬ ܠܗ ܡܢܗܿ ܒܪܬܐ. ܘܟܕ ܥܪܩ ܠܬܡܢ ܩܘܕ ܝܗܒܬܗܿ ܠܗ ܒܢ̈ܫܐ. ܗܼܘ ܕܝܢ ܟܕ ܗܘܼܬ ܠܗ ܦܪܣܝܐ ܕܐܬܚܬܢ ܠܡܠܟܐܼ. ܒܟܠܝܘܡ ܩܕܡܘܗܝ ܡܬܒܟܐ ܗܘܐ. ܟܕ ܫܿܐܠ ܡܢܗ ܕܢܬܠ ܠܗ ܚܝܠܐ ܠܥܘܕܪܢܐ: ܐܝܟ ܕܢܐܬܐ ܢܩܛܘܠ ܠܪܘܪ̈ܒܢܐ ܘܢܼܬܩܢ ܥܠ ܡܠܟܘܬܗ. ܘܐܬܝܗܒ ܠܗ ܡܢ ܚܡܘܗܝ ܚܝܠܐ ܠܐ ܙܥܘܪ ܐܝܟ ܕܫܐܠ. ܘܟܕ ܡܢܼܥ ܕܢܐܬܐ ܠܐܪܥܐ ܕܦܪ̈ܣܝܐܼ. ܫܡܼܥ ܐܚܘܝܗܝ ܘܫܿܢܝ ܡܢ ܩܕܡܘܗܝ. ܘܗܘܼ ܓܡܪ ܨܒܝܢܗ܆ ܘܩܿܛܠ ܠܪܘܪ̈ܒܢܐ. ܘܫܠܼܚ ܐܦ ܠܛܡܘܪ̈ܝܐܼ ܟܕ ܓܙܿܡ ܠܗܘܢܼ. ܕܐܢ ܗܘܼ ܕܠܐ ܢܫܬܥܒܕܘܢ ܠܗ ܒܨܒܝܢܗܘܢܼ ܥܬܝܕܝܢ ܐܢܘܢ ܕܒܩܪܒܐ ܢܙܕܟܘܢ. ܐܢ ܕܝܢ ܢܗܘܘܢ ܠܗ ܒܢ̈ܝ ܚܝܠܐܼ. ܢܥܠܘܢ ܥܡܗ ܠܐܪܥܐ ܕܪ̈ܗܘܡܝܐ. ܘܡܢ ܒܙܬܐ ܕܬܡܢ ܢܦܿܠܓ ܠܗܘܢ ܟܠܡܕܡ ܕܐܬܛܠܡܘ. ܗܼܢܘܢ ܕܝܢ ܕܚܠܘ ܡܢ ܚܝܠܐ ܕܗܘ̈ܢܝܐ ܘܐܫܠܡܘ ܠܗ. ܩܕܫ̈ܝܐ ܕܝܢ ܕܫܿܪܝܢ ܥܠ ܢܨܒܝܢ܆ ܟܕ ܫܡܥ ܗܠܝܢ܆ ܐܦ ܗܼܢܘܢ ܐܫܬܥܒܕܿ. ܛܝ̈ܝܐ ܕܝܢ ܟܕ ܝܠܼܦ ܕܩܪܒܐ ܥܬܝܕ ܠܡܥܒܕ ܥܡ ܪ̈ܗܘܡܝܐܼ. ܒܚܘܝܚܘܬܐ ܪܒܬܐ ܐܬܟܢܫܘ ܠܘܬܗ. ܐܪ̈ܡܢܝܐ ܕܝܢ ܡܛܠ ܕܕܚܿܠܝܢ ܗܘܘ ܕܕܠܡܐ ܢܬܢܩܡ pb. 252 ܡܢܗܘܢܼ ܡܛܠ ܗܿܢܘܢ ܒ̈ܬܐ ܕܢܘܐ ܕܥܩܪܘ ܗܘܘ ܡܢ ܩܕܝܡܼ. ܠܐ ܨܒܼܘ ܕܢܫܬܡܥܘܢ ܠܗ. ܗܼܘ ܕܝܢ ܟܿܢܼܫ ܚܝܠܐܼ ܘܐܩܪܒ ܥܡܗܘܢ. ܘܟܕ ܐܬܥܫܢ ܡܢܗܘܢ܆ ܠܐ ܚܼܪܒ ܐܢܘܢ. ܐܠܐ ܐܫܬܘܕܝ ܠܗܘܢܼ. ܕܐܦܠܐ ܕܢܣܓܕܘܢ ܠܢܘܪܐܼ ܥܿܨܿܐ ܐܢܘܢ܆ ܐܢ ܢܗܘܘܢ ܠܗ ܡܥܕܪ̈ܢܐ ܒܩܪܒܐ ܕܥܡ ܪ̈ܗܘܡܝܐ. ܘܗܢܼܘܢ ܡܢ ܕܚܠܬܗܘܢܼ ܟܕ ܠܐ ܪܥܼܝܢ ܗܘܘ ܐܬܛܦܝܣ. ܐܝܠܝܢ ܕܝܢ ܣܥܼܪ ܗܘܼܐ ܩܘܕ ܡܢ ܕܥܼܠ ܒܬܚܘ̈ܡܐ ܕܪ̈ܗܘܡܝܐ܇ ܒܙܒܢܗܝܢ ܥܬܝܕ ܐܢܐ ܕܐܚܘܝܟ. ܗܫܐ ܕܝܢ ܡܛܠ ܕܐܦ ܥܠ ܐܬܘ̈ܬܐ [ܘܡܪ̈ܕ]ܘܬܐ ܕܗܘ̈ܝ ܒܙܒܢܗܝܢ܇ ܘܥܠ ܩܡܨܐܼ ܘܥܠ ܡܘܬܢܐ ܘܝܘܩܕܢܐܼ ܦܩܼܕܬ ܠܝ ܐܟܿܬܘܒ. ܘܗܢ̈ܝܢ ܩܕ̈ܝܡܢ ܒܙܒܢܐܼ. ܥܠܝܗܝܢ ܡܿܦܢܐ ܐܢܐ ܠܗܿ ܠܡܠܬܝ. ܘܕܠܐ ܬܗܘܐ ܒܠܝܠܐ ܬܫܥܝܬܐܼ. ܗܐ ܪܫܿܡ ܐܢܐ ܠܗܝܢ ܠܫܢ̈ܝܐ ܒܐܝܕܐ ܒܐܝܕܐ ܟܕ ܡܦܿܪ̈ܫܢ. ܘܥܠ ܟܠܚܕܐ ܡܢܗܝܢ ܡܢܗܿ ܘܠܗܿ ܟܿܬܒܢܐ ܡܕܡ ܕܐܣܬܥܝܪ ܒܗܿ. ܟܕ ܐܠܗܐ ܢܗܘܐ ܠܝ ܡܣܝܥܢܐ ܒܥܘܕܪܢܐ ܕܨܠ̈ܘܬܐ ܕܓܒܝܘܬܟ..

ܫܢܬ ܬܡܢ̈ܡܐܐ ܘܫܬ ܕܐܠܟܣܢܕܪܘܣ. ܥܠ ܥܠܼܬܗ ܕܗܟܝܠ ܕܩܪܒܐ ܘܕܐܝܟܢܐ ܐܬܓܪܓܼ. ܣܦܩܐܝܬ ܐܘܕܥܬܟ. ܐܝܟ ܕܣܿܒܪ ܐܢܐܼ ܐܘܿ ܐܒܘܢ܇ ܟܕ ܒܙܥܘܪ̈ܝܬܐ ܟܿܬܒܬ ܐܢܗܝܢ ܠܗܠܝܢ ܠܬܫܥ̈ܝܬܐܿ. ܡܛܠ ܕܥܿܪܩܬ ܡܢ ܐܪܝܟܘܬܐ ܕܡܠܬܐ. ܡܢܗ̈ܝܢ ܕܝܢ ܒܟ̈ܬܒܐ ܥܬܝܩ̈ܬܐ ܐܫܿܟܚܬ. ܘܡܢܗܝܢ ܝܿܠܦܬ ܡܢ ܦܓܥܐ ܕܐܢܫ̈ܐ ܕܫܡܫ ܐܝܙܓܕܘܬܐ ܠܘܬ ܬܪ̈ܝܗܘܢ ܡܠ̈ܟܐ. ܘܐܚܪ̈ܢܝܬܐ ܡܢ ܐܝܠܝܢ ܕܒܗܘܢ ܒܣܘܥܪ̈ܢܐ ܗܠܝܢ ܐܣܬܩܒܠܘ. ܗܫܐ ܕܝܢ ܥܠ ܐܝܠܝܢ ܕܠܘܬܢ ܐܣܬܥܪܘ ܨܒܿܐ ܐܢܐ pb. 253 ܕܐܘܕܥܟ. ܡܛܠ ܕܡܢ ܗܕܐ ܫܢܬܐ ܩܒܠ ܫܘܪܝܐ ܡܪ̈ܕܘܬܐ ܚܣܝ̈ܢܬܐܼ. ܘܐܬܘ̈ܬܐ ܕܗܘܼܝ ܒܝ̈ܘܡܬܢ.

ܚܕܝܪ ܗܘܐ ܒܙܒܢܐ ܗܢܐ ܚܘܠܡܢܐ ܠܟܠܗ ܐܬܪܢ. ܟ̈ܐܒܐ ܕܝܢ ܘܟܘܪ̈ܗܢܐ ܕܢܦܫ̈ܬܢܼ. ܣܓܝܐܝܢ ܗܘܘ. ܐܠܗܐ ܕܝܢ ܕܨܒܿܐ ܒܚܛܗܝܐ ܕܢܬܘܒܘܢ ܡܢ ܚܛ̈ܗܝܗܘܢ ܘܢܐܚܘܢܼ. ܐܝܟ ܡܚܙܝܬܐ ܥܒܕܗ ܠܗ ܠܓܘܫܡܢ. ܘܫܘ̈ܚܢܐ ܡܿܠܝܗ ܠܟܠܗ ܦܓܪܢ. ܕܒܝܕ ܒܿܪܝܘܬܢ ܢܚܘܝܢ ܠܡܢܐ ܕܡܿܝܐ ܓܘܝܬܢ. ܘܒܝܕ ܟܘ̈ܬܡܬܐ ܕܦܓܪ̈ܝܢܼ ܢܐܠܦ ܕܟܡܐ ܣܢ̈ܝܢ ܟܘ̈ܬܡܬܐ ܕܢܦܫܢ. ܘܐܝܟܢܐ ܕܟܠܗܘܢ ܒܢܝ̈ܢܫܐ ܚܛܘ. ܟܠܗܘܢ ܒܠܥܘ ܒܡܚܘܬܐ ܗܕܐ. ܥܒ̈ܝܐ ܓܝܪ ܘܢܦ̈ܩܐ ܗܘܼܘ ܒܟܠܗܘܢ ܒܢ̈ܝ ܡܕܝܢܬܢ ܘܡܪ̈ܒܠܢ ܗܘ̈ܝ ܐܦ̈ܐ ܕܣܓ̈ܝܐܐ ܘܡܠܝܢ ܡܘܓܠܐ. ܘܥܒܝܕܝܢ ܗܘܘ ܚܙܬܐ ܕܙܘܥܬܐ. ܐܝܬ ܕܝܢ ܐܚܪ̈ܢܐ ܕܟܠܗ ܓܘܫܡܗܘܢ ܡܬܡܠܐ ܫܘ̈ܚܢܐ ܐܘ ܚܡ̈ܛܐ: ܥܕܡܐ ܠܦܣ̈ܐ ܕܐܝ̈ܕܝܗܘܢ ܘܠܬܚܬܝܐ ܕܪ̈ܓܠܝܗܘܢ. ܘܐܝܬ ܐܚܪ̈ܢܐ ܕܬܘܪ̈ܥܬܐ ܪܘܪ̈ܒܬܐ ܒܚܕ ܚܕ ܡܢ ܗܕܡ̈ܝܗܘܢ ܗܘ̈ܝܢ ܗܘ̈ܝ. ܒܛܝܒܘܬܗ ܕܝܢ ܕܐܠܗܐ ܕܥܠܝܗܘܢ ܡܓܢܐ ܗܘܬܿ. ܠܐ ܟܐܒܐ ܡܩܿܘܐ ܗܘܐ ܨܝܕ ܐܢܫ ܙܒܢܐ ܣܓܝܐܐܼ. ܘܠܐ ܡܘܡܐ ܐܘ ܣܘܪܚܢܐ ܗܘܿܐ ܗܘܐ ܒܓܘܫܡܐ. ܐܠܐ [ܐܦܢ] ܫܘܡ̈ܬܗܝܢ ܕܡܚܘ̈ܬܐ ܝܕܝ̈ܥـ[ـܢ] ܗܘ̈ܝ ܒܬܪ ܚܘܠܡܢܐܼ. ܗܕܡ̈ܐ ܒܢܛܝܪܘܬܐ ܡܫܬܒܩܝܢ ܗܘܘ ܕܢܡܠܘܢ ܚܫܚܬܐ ܕܬܫܡܫܬܗܘܢ ܒܓܦܪܐ. ܡܙܿܕܒܢܝܢ ܗܘܘ ܕܝܢ ܒܗܢܐ ܙܒܢܐ ܒܐܘܪܗܝ ܬܠ̈ܬܝܢ ܡܕ̈ܝܢ ܚ̈ܛܐ ܒܕܝܢܪܐ ܘܣܥܪ̈ܐ .ܢܢ...

ܫܢܬ ܬܡܢ̈ܡܐܐ ܘܫܒܥ. ܒܝܘܡ ܫܒܬܥܣܪ ܒܐܝܪܚ ܐܝܕܪ ܕܫܢܬܐ ܗܕܐ: ܟܕ ܛܒ̈ܬܐ ܡܢ ܫܡܝܐ ܠܟܠܗܘܢ ܒܢܝ̈ܢܫܐ ܫܦܝܥܐܝܬ ܡܫܬܕܪ̈ܢ ܗܘ̈ܝ܆ ܘܥܠ̈ܠܬܐ pb. 254 ܒܒܘܪܟܬܐ ܣܓܝ̈ܐܢ ܗܘ̈ܝ. ܘܡܛܪܐ ܢܿܚܬ ܗܘܐܿ. ܘܦܐܪ̈ܐ ܕܐܪܥ ܒܙܒܢܗܘܢ ܡܬܪܒܝܢ ܗܘܼܘܼ. ܣܘܓܗܘܢ ܕܒܢ̈ܝ ܡܕܝܢܬܐ ܣܒܪܐ ܕܚܝ̈ܝܗܘܢ ܦܣܩܘ ܗܘܘ ܠܡܪܫܥܘ ܓܠܝܐܝܬ. ܘܟܕ ܒܓܘ̈ܬܐ ܡܬܦܪܦܥܝܢ ܗܘܘܼ. ܐܦܠܐ ܬܘܕܝܬܐ ܕܥܠ ܐܦ̈ܝ ܡܘ̈ܒܬܗ ܕܐܠܗܐܼ ܡܢܗܘܢ ܡܫܬܕܪܐ ܗܘܬ. ܐܠܐ ܒܡܗܡܝܢܘܬܐ ܕܝܡܢ [ܩܘܒܠܛܝܒܘܬܐ] ܐܝܬܝܗܘܢ ܗܘܘܼ. ܘܒܟܘܪ̈ܗܢܐ ܕܚ̈ܛܗܐ ܡܬܚܿܒܠܝܢ ܗܘܘ. ܘܟܕ ܠܐ ܣܦܼܩ ܠܗܘܢ ܚ̈ܛܗܐ ܟܣ̈ܝܐ ܘܓܠ̈ܝܐ ܕܒܗܘܢ ܥܢܼܝܢ ܗܘܘܼ. ܐܬܛܝܒܘ ܒܝܘܡܐ ܗܢܐ ܕܪܫܝܡ: ܕܐܝܬܘܗܝ ܝܘܡ ܕܥܪܘܒܬܐ ܡܓܗ̈ܝ ܫܒܬܐܿ. ܕܡܪܩܕ ܒܗ ܐܪܟܣܐ ܘܡܬܩܪܝܐ ܛܪܝܡܪܝܢ. ܘܐܕܠܩ ܩܢܕ̈ܝܠܐ ܣܓܝ̈ܐܬܐ ܠܐܝܩܪܗ ܕܥܐܕܐ ܗܢܐܼ ܕܠܐ ܡܢܝܢ܆ ܟܕ ܥܝܿܕܐ ܗܢܐ ܠܝܬ ܗܘܐ ܒܗܿ ܒܡܝܕܢܬܐ ܡܢ ܩܕܝܡ. ܘܡܢ ܬܪܥܐ ܕܬܐܛܪܘܢ ܘܥܕܠܡܐ ܠܬܪܥܐ ܕܟ̈ܦܐ܆ ܣܕܝܪ̈ܢ ܗܘ̈ܝ ܠܗܘܢ ܥܠ ܐܪܥܐ ܥܠ ܝܕ ܢܗܪܐ. ܘܣܡ ܥܠ ܣܦܬܗ ܩܢܕܝ̈ܠܐ ܟܕ ܢܗܪ̈ܢ. ܘܬܠ̈ܝܢ ܗܘ̈ܝ ܒܐܣ̈ܛܘܐ ܘܒܐܢܛܝܦܘܪܘܣܼ ܘܒܫܘܩ ܥܠܬܐ ܘܒܕܘ̈ܟܝܬܐ ܣܓܝ̈ܐܬܐ. ܡܛܠ ܕܝܢ ܪܘܫܥܐ ܗܢܐ ܐܬܿܐ ܕܬܕܡܘܪܬܐ ܡܢ ܐܠܗܐ ܐܣܬܥܪܬ ܐܝܟ ܕܠܟܘܘܢܗܘܢ. ܢܝܫܐ ܓܝܪ ܕܨܠܝܒܐ ܗܘܿ ܕܠܒܝܟ ܒܐܝܕܗ ܐܢܕܪܝܢܛܐ ܕܛܘܒܢܐ ܩܘܣܛܢܛܝܢܘܣ ܡܠܟܐ ܐܪܚܩ ܡܢ ܐܝܕܗ ܕܝܠܗ ܕܐܢܛܪܝܢܛܐ ܐܝܟ ܐܡܬܐ ܚܕܐܼ. ܘܩܿܘܝ ܗܟܢܐ ܝܘܡܐ ܕܥܪܘܒܬܐ ܘܕܫܒܬܐ ܥܕܡܐ ܠܪܡܫܐ. ܒܝܘܡܐ ܕܝܢ ܕܚܕܒܫܒܐܼ ܐܬܼܐ ܗܘܼ ܢܝܫܐ ܡܢ ܨܒܘܬ ܢܦܫܗ ܘܐܬܩܪܒ ܠܕܘܟܬܗ. pb. 255 ܘܐܚܕܗ ܗܘ ܐܢܕܪܝܢܛܐ ܒܐܝܕܗ. ܐܝܟ ܡܕܡ ܕܠܒܝܟ ܗܘܐ ܠܗ ܡܢ ܩܕܝܡ. ܘܒܝܕ ܐܬܿܐ ܗܕܐ ܐܣܬܟܠܘ ܦܪ̈ܘܫܐ ܕܣܘܥܪܢܐ ܗܘܿ ܕܐܫܬܡܫ. ܪܚܝܩ ܗܘܐ ܡܢ ܨܒܝܢܗ ܕܐܠܗܐ.

ܫܢܬ ܬܡܢ̈ܡܐܐ ܘܬܡܢܐ. ܠܐ ܕܝܢ ܣܦܼܩܬܿ ܠܢ ܐܬܿܐ ܗܕܐ ܕܡܢ ܠܥܠܼ ܕܒܗܿ ܢܬܟܠܐ ܡܢ ܪܘܫܥܐܼ. ܐܠܐ ܝܬܝܪܐܝܬ ܣܿܥܝܢ ܗܘܝܢ ܘܡܬܩܪܒܝܢ ܠܘܬ ܚܛ̈ܗܐ ܕܠܝܠܐܝܬ. ܘܕܩ̈ܕܩܐ ܩܪ̈ܨܐ ܕܚܒܪ̈ܝܗܘܢ ܐܟܿܠܝܢ ܗܘܘ. ܘܪܘܪ̈ܒܐ ܡܣܒ ܒ̈ܐܦܐ ܡܠܼܝܢ ܗܘܘ. ܘܚܣܡܐ ܘܢܟܝܠܐܼ ܒܟܠܢ ܐܫܬܠܛ. ܘܓܘܪܐ ܘܙܢܝܘܬܐ ܣܓܼܝܬܿ. ܐܬܥܫܢ ܕܝܢ ܟܐܒܐ ܗܘܿ ܕܢܦ̈ܩܐ ܒܒܢ̈ܝܢܫܐ ܘܥܝ̈ܢܐ ܕܣܓܝ̈ܐܐ ܐܣܬܪܚ ܒܗܿ ܒܡܕܝܢܬܐ ܘܒܩܘܪ̈ܝܐ. ܗܘܐ ܕܝܢ ܛܢܢܐ ܫܦܝܪܐ ܠܡܪܝ ܩܘܪܐ ܐܦܝܣܩܦܐܼ. ܘܚܿܦܼܛ ܠܒܢܿܝ ܡܕܝܢܬܐ ܕܢܥܒܕܘܢ ܠܩܛܩܝܢ ܕܣܐܡܐܼ ܠܐܝܩܪܐ ܕܡ̈ܐܢܫ ܪ̈ܐܙܐ. ܕܗܘܼܘ ܡܬܣܝܡܝܢ ܒܗܿ ܡܐ ܕܐܿܙܠܝܢ ܠܡܫܡܫܘ ܒܗܘܢ܇ ܒܕܘܟܪܢܐ ܕܚܕ ܡܢ ܣ̈ܗܕܐܼ. ܘܟܠܢܫ ܝܗܼܒ ܡܕܡ ܕܣܿܦܩ ܗܘܐ ܒܐܝ̈ܕܘܗܝ. ܐܘܛܘܟܝܢܐ ܕܝܢ ܒܥܠܗܿ ܕܐܘܪܝܢܐ ܗܼܘ ܚܿܘܝ ܩܕܡܝܐ ܨܒܢܐ ܫܦܝܪܐ. ܘܝܗܼܒ ܡܢ ܕܝܠܗ ܕܝܢܪ̈ܐ ܡܐܐ.. ܐܫܬܪܝ ܕܝܢ ܐܢܣܛܘܣ ܗܓܡܘܢܐܼ. ܘܐܬܼܐ ܠܕܘܟܬܗ ܐܠܟܣܢܕܪܘܣܼ ܒܫܘܠܡܗܼ ܕܗܕܐ ܫܢܬܐ. ܘܚܪܪ ܫܘ̈ܩܐ ܕܡܕܝܢܬܐ ܡܢ ܙܒܠܐܼ. ܘܥܩܼܪ ܡܨܛܗܦܬܐ ܕܒܢ̈ܝܢ ܗܘ̈ܝ ܠܐܘ̈ܡܢܐ ܒܐܣ̈ܛܘܐ ܕܘܒܫܘ̈ܩܐ. ܘܣܡ ܩܒܘܬܐ ܩܕܡ ܦܪܘܛܪܝܢ ܕܝܠܗ ܘܢܩܼܒ ܢܩܒܐ ܒܟܣܝܗܿ. ܘܟܬܼܒ ܠܥܠ ܡܢܗܿ ܕܟܠ ܡܢܿ ܕܒܥܿܐ ܕܢܘܕܥ ܡܕܡܼ. ܘܠܐ ܦܫܝܩܼ ܠܗ ܓܠܝܐܝܬܼ ܢܟܬܘܒ ܘܢܫܕܐ ܒܓܘܗܿ ܕܠܐ ܕܚܠܬܐ. ܘܡܢ ܗܕܐ ܥܠܬܐܼ. ܨܒܘ̈ܬܐ ܣܓܝ̈ܐܬܐ ܝܠܼܦ ܕܟܿܬܒܝܢ ܗܘܘ pb. 256 ܣܓܝ̈ܐܐ ܘܫܿܕܝܢ ܒܗܿ. ܘܝܿܬܒ ܐܡܝܢܐܝܬ ܟܠܗܘܢ ܝܘܡ̈ܬܐ ܕܥܪܘܒܬܐ ܒܒܝܬ ܣ̈ܗܕܐ ܕܡܪܝ ܝܘܚܢܢ ܡܥܡܕܢܐܼ ܘܕܡܪܝ ܐܕܝ ܫܠܝܚܐ. ܘܫܿܪܐ ܕܝ̈ܢܐܕܠܐ ܚܘܫܪܢܐ. ܘܐܬܚܝܠܘ (ܛܠܝ̈ܡܐ) ܥܠ ܛܠ̈ܘܡܝܗܘܢ܇ ܘܒܙܝ̈ܙܐ ܥܠ ܒܙܘ̈ܙܝܗܘܢ. ܘܩܪܒܘ ܠܗ ܕܝ̈ܢܝܗܘܢ. ܘܕܢܘܼ ܐܢܘܢ. ܕܝ̈ܢܐ ܕܝܢ ܕܐܥܬܩܘ ܝܬܝܪ ܡܢ ܚܡ̈ܫܝܢ ܫܢ̈ܝܢ܆ ܘܠܐ ܐܬܒܒܥܘܼ. ܐܬܩܪܒܘ ܩܕܡܘܗܝ ܘܐܫܬܪܝܘ. ܒܢܼܐ ܕܝܢ ܦܿܪܦܛܢ ܗܿܘ ܕܠܘܬ ܬܪܥ ܕܟ̈ܦܐ܆ ܘܫܿܪܝ ܗܘܐ ܬܘܒ ܠܡܒܢܐ ܕܝܡܣܝܢ. ܕܪܫܝܡܐ ܗܘܬ ܗܘܬ ܩܕܡ ܙܒܢܐ ܕܫܢܝ̈ܐ܇ ܠܡܬܒܢܝܘ ܠܘܬ ܣܝܛܩܐ ܕܥܒܘܪܐ. ܘܦܩܕ ܕܗܘܘ ܬܿܠܝܢ ܐܘܡ̈ܢܐ ܥܠ ܚܢܘ̈ܬܗܘܢ ܒܡ̈ܓܗܝ ܚܕܒܫܒܐ: ܨܠ̈ܝܒܐ ܟܕ ܢܿܚܪ̈ܝܢ ܒܗܘܢ ܚܡܫܐ ܦܢ̈ܣܐ..

ܫܢܬ ܬܡܢ̈ܡܐܐ ܘܬܫܥ܀܀܀ ܘܟܕ ܗܠܝܢ ܡܣܬܥܪ̈ܢ ܗܘ̈ܝܼ. ܡܼܛܐ ܬܘܒ ܙܒܢܐ ܕܥܐܕܐ ܗܘܿ ܕܬܫܥ̈ܝܬܐ ܕܚܢܦܘܬܐ ܡܙܕܡܪ̈ܢ ܒܗ. ܘܐܘܣܦ ܒܢ̈ܝ ܡܕܝܢܬܐ ܥܠ ܒܛܝܠܘܬܐܕܐܝܬ ܗܘܬ ܠܗܘܢ ܥܠܘܗܝ. ܘܩܕܡ ܝܘ̈ܡܬܐ ܫܒ̈ܥܐܼ ܣܠܩܿܝܢ ܗܘܘ ܟܢܝܫܐܝܬ ܡܢ ܬܐܛܪܘܢ ܒܥܕܢܐ ܕܪܡܫܐܼ ܟܕ ܠܒܝܫܝܢ ܟܬܢ̈ܝܬܐ. ܘܡܟܿܣܝܢ ܦܩ̈ܝܠܐ ܘܫܪ̈ܝܢ ܚܣܝ̈ܗܘܢ ܘܢܗܪ̈ܢ ܩܕܡܝܗܘܢ ܩܢܕܝ̈ܠܐ ܘܡܥܛܪܝܢ ܡܘܩܠܐ ܘܫܗܪܝܢ ܟܠܗ ܠܠܝܐܼ ܘܡܬܟܪܟܝܢ ܒܡܕܝܢܬܐ. ܘܡܩܧܠܣܝܢ ܠܐܪܟܝܣܛܐ ܥܕܡܐ ܠܨܦܪܐܼ. ܒܙܡܿܪܐ ܘܒܩܥܬܐ ܘܒܐܣܛܪܢܝܐ. ܘܒܗܠܝܢ ܥܠ̈ܬܐܼ. ܐܕܫ ܗܘܘ ܠܗܘܢ ܐܦ ܡܢ ܕܠܡܐܙܠ ܠܨܠܘܬܐܼ. ܘܠܐ ܐܢܫ ܡܿܝܬܐ ܗܘܐ ܥܠ ܒܠܗ ܘܿܠܝܬܐ. ܐܠܐ ܒܚܬܝܘܬܐ ܡܗܿܠܝܢ ܗܘܘ ܒܢܟܦܘܬܐ ܕܐܒܗ̈ܝܗܘܢܼ. ܕܠܐ ܠܡ ܝܿܕܥܝܢ ܗܘܘ ܠܡܥܒܕ ܗܠܝܢ ܐܟܘܬܢ. ܘܐܡܪܝܢ ܗܘܘܼ . ܕܒܘܪ̈ܐ ܐܦ ܗܕܝ̈ܘܛܐ ܐܝܬܝܗܘܢ ܗܘܘ pb. 257 ܥܡܘܪ̈ܝܗܿ ܕܡܕܝܢܬܐܿ. ܕܒܙܒ̈ܢܐ ܩܕܡ̈ܝܐ. ܘܗܟܢܐ ܣܿܥܝܢ ܗܘܘ ܒܘܪܫܥܐ. ܘܠܝܬ ܗܘܐ ܐܢܫ ܕܡܟܿܘܝܢ ܘܠܐ ܕܡܿܟܣ ܘܠܐ ܕܡܿܪܬܐ. ܘܟܕ ܛܒ ܒܐܘܪܗܝ ܐܣܬܩܒܠ ܗܘܐ ܐܟܣܢܝܐ ܐܦܝܣܩܦܐ ܕܡܒܘܓܿ. ܗܘܿ ܕܝܬܝܪ ܡܢ ܐܚܪ̈ܢܐ ܡܣܬܒܪ ܕܡܩܒܠܐ ܥܠܘܗܝ ܢܐܠܐܐ ܒܡܠܦܢܘܬܐ܆ ܠܐ ܡܿܠܠ ܥܡܗܘܢ ܥܠ ܗܢܐ ܫܪܒܐ ܝܬܝܪ ܡܢ ܚܕ ܝܘܡ. ܐܠܐ ܐܠܗܐ ܒܡܪܚܡܢܘܬܗܼ. ܚܿܘܝ ܠܗܘܢ ܓܠܝܐܝܬܿ. ܒܛܝܠܘܬܐ ܕܐܝܬ ܠܗ ܥܠܝܗܘܢ: ܕܢܬܠܟܘܢ ܡܢ ܥܘܠܗܘܢ. ܒܣ̈ܠܝܩܘܣ ܓܝܪ ܬܪ̈ܬܝܢ ܘܒܝܬ ܦܫܘܪܬܐ ܕܕܡܣܝܢ ܩܝܛܝܬܐ ܢܦܼܠ ܘܒܝܕ ܛܝܒܘܬܗ ܕܐܠܗܐ ܐܢܫ ܠܐ ܐܟܝ ܬܡܢ. ܟܕ ܛܒ ܐܢܫ̈ܐ ܣܓܝ̈ܐܐ ܐܝܬ ܗܘܘ ܒܗܿ. ܕܦܿܠܚܝܢ ܠܓܘ ܘܠܒܪ. ܘܠܐ ܡܝܼܬܘ ܡܢܗܘܢܼ. ܐܠܐ ܐܢ ܬܪ̈ܝܢ ܐܢܫ̈ܝܢ ܕܐܬܪܒܼܨܘ ܟܕ ܥܿܪܩܝܢ ܡܢ ܩܠܐ ܕܡܦܘܠܬܐ ܒܬܪܥܐ ܕܒܝܬ ܡܝ̈ܐ. ܘܟܕ ܡܬܬܠܝܢ ܒܗ ܡܢ ܬܪ̈ܝܢ ܓܒ̈ܘܗܝ ܠܟܐ ܘܠܟܐ ܠܡܟܪܟܘܬܗܼ. ܐܬܬܗܝܘ ܒܗܢܐ ܚܪܝܢܐܼ ܕܐܝܢܐ ܡܢܗܘܢ ܢܦܘܩ ܩܕܡܝܐ. ܘܢܦܼܠ ܥܠܝܗܘܢ ܟ̈ܐܦܐ ܘܡܝܼܬ. ܡܿܘܕܝܢ ܗܘܘ ܕܝܢ ܠܐܠܗܐ ܟܠܗܘܢ ܦܪ̈ܘܫܐܿ: ܕܚܣܟܗܿ ܠܡܕܝܢܬܐ ܡܢ ܐܒܠܐ ܕܣܓܝ̈ܐܐ. ܥܬܝܕܐ ܗܘܬ ܓܝܪ ܗܿܝ ܕܝܡܣܝܢ ܕܬܣܿܚܐ ܒܝܘ̈ܡܬܐ ܩܪ̈ܝܒܐ. ܗܟܢܐ ܕܝܢ ܢܦܼܠܬܿ ܥܕܡܐ ܕܟ̈ܐܦܝܗܿ ܬܚ̈ܬܝܬܐ ܕܥܠ ܦܘܡܗܿ ܕܐܪܥ ܒܢ̈ܝܢ ܗܘ̈ܝ܇ ܐܬܥܩܪܘ ܡܢ ܕܘܟ̈ܝܬܗܝܢ.܀. ܒܗܿ ܕܝܢ ܒܗܕܐ ܫܢܬܐ ܐܬܼܐ ܦܘܩܕܢܐ ܕܐܢܣܛܘܣ ܡܠܟܐܼ. ܕܢܫܬܒܩ ܕܗܒܐ ܕܝܿܗܒܝܢ ܗܘܘ ܐܘܡ̈ܢܐ ܚܕܐ ܠܐܪ̈ܒܥ ܫ̈ܢܝܢ܆ ܘܢܬܚܪܪܘܢ ܡܢ ܡܐܕܬܐ. ܠܐ ܗܘܐ ܠܐܘܪܗܝ ܒܠܚܘܕ ܐܬܼܐ ܗܘܐ ܗܢܐ ܦܘܩܕܢܐܼ. ܐܠܐ ܠܟܠܗܝܢ ܡܕܝ̈ܢܬܐ ܕܐܘܚܕܢܐ pb. 258 ܕܪ̈ܗܘܡܝܐ. ܝܿܗܒܝܢ ܗܘܘ ܕܝܢ ܐܘܪ̈ܗܝܐ ܚܕܐ ܠܐܪ̈ܒܥ ܫܢ̈ܝܢ܆ ܠܝܛܪ̈ܐ ܕܕܗܒܐ ܡ̈ܐܐ ܘܐܪ̈ܒܥܝܢ. ܘܚܼܕܝܬܿ ܟܠܗܿ ܡܕܝܢܬܐ. ܘܠܒܫܘ ܚܘܪ̈ܐ ܟܠܗܘܢܼ. ܡܢ ܪܒܐ ܘܥܕܡܐ ܠܙܥܘܪܐ. ܘܛܥܢܘ ܩܪ̈ܝܘܢܐ ܟܕ ܢܗܪ̈ܝܢܼ ܘܦܝܪ̈ܡܐ ܟܕ ܡܿܥܛܪ̈ܝܢ. ܘܢܦܩܘ ܒܡܙܡܘܪ̈ܐ ܘܒܬܫ̈ܒܚܬܐܼ. ܟܕ ܡܘܕܝܢ ܠܐܠܗܐܼ ܘܡܩܿܠܣܝܢ ܠܡܠܟܐܼ. ܠܒܝܬ ܣܗ̈ܕܐ ܕܡܪܝ ܣܪܓܝܣܼ ܘܕܡܪ ܫܡܥܘܢ. ܘܩܪܒܘ ܬܡܘܢ ܩܘܪܒܢܐ. ܘܥܠܘ ܠܡܕܝܢܬܐ ܘܥܒܕ ܥܐܕܐ ܕܚܕܘܬܐ ܘܕܒܣ̈ܡܐ ܟܠܗܿ ܫܒܬܐ. ܘܐܩܝܡܘ ܕܢܗܘܘܢ ܥܿܒܕܝܢ ܠܗ ܠܥܐܕܐ ܗܢܐ ܟܠ ܫܢܐ ܒܫܢܐ.. ܘܓܢܼܝܢ ܗܘܘ ܘܒܿܣܡܝܢ ܟܠܗܘܢ ܐܘܡ̈ܢܐܼ. ܘܣܿـ[ـܚܝܢ ܘ]ܣܿܡܟܝܢ ܒܕܪܬܐ ܕܥܕܬܐܼ. ܘܒܟܠܗܘܢ ܐܣ̈ܛܘܐ ܕܡܕܝܢܬܐ. ܒܗܿ ܕܝܢ ܒܗܕܐ ܫܢܬܐ ܒܐܪܚ ܚܙܝܪܢܼ. ܒܝܘܡ ܚܡܫܐܼ. ܢܦܼܩ ܡܢ ܥܠܡܐ ܗܢܐܼ ܡܪܝ ܩܘܪܐ ܐܦܝܣܩܦܐ. ܘܗܘܼܐ ܚܠܦܘܗܝ ܦܓܪܐ. ܘܐܘܣܦ ܥܠ ܥܐ̈ܕܝܗܿ ܕܫܢܬܐ ܥܐܕܐ ܕܐܘܫ̈ܥܢܐ. ܘܫܡ ܥܝܿܕܐ ܕܢܬܩܕܫܘܢ ܡܝ̈ܐ ܒܠܠܝܐ ܡܓܗ̈ܝ ܥܐܕܐ ܕܒܝܬ ܕܢܚܐ. ܘܥܠ ܡܫܝܚܐ ܕܡܫܝܚܘܬܐ ܒܚ̈ܡܫܐ ܒܫܒܐ . . . .ܠܥܝܢ ܟܠܗ ܥܡܐܼ. ܥܡ ܫܪܟܐ ܕܥܐ̈ܕܐ ܐܚܪ̈ܢܐ . . ܐܫܬܪܝ ܐܠܟܣܢܕܪܐ ܗܓܡܘܢܐܼ. ܘܗܘܐ ܚܠܦܘܗܝ ܕܝܡܣܬܢ. ܘܒܦܘܩܕܢܗܼ ܐܬܚܘܪܘ ܟܠܗܘܢ ܐܬܛ̈ܘܐ ܕܡܕܝܢܬܢ. ܐܝܠܝܢ ܕܝܢ ܕܡܢܿܣܝܢ ܗ̈ܘܝ ܠܗܘܢ ܨܒܘ̈ܬܐ ܐܬܬܥܝܩܘ ܗܘܘ ܣܘܓܐܐ ܒܗܕܐ. ܐܡܿܪܝܢ ܗܘܘ ܓܝܪ ܕܐܬܿܐ ܗܝܿ . . . . . .ܢܐ ܥܠ ܩܪ̈ܒܝܬܐ ܕܒܡܬܐ ܕܗܘܿܝܢ. pb. 259 ܫܢܬ ܬܡܢ̈ܡܐܐ ܘܥܣܪ. ܬܚܘܝܬܐ ܕܝܢ ܕܟܐܢܘܬܐ ܕܐܠܗܐ ܐܬܓܼܠܝܬܿ ܥܠܝܢ ܒܙܒܢܐ ܗܢܐ ܠܡܒܛܠܘ ܕܘܒܪ̈ܝܢ ܒܝ̈ܫܐ. ܘܒܐܪܚ ܐܝܪ ܕܫܢܬܐ ܗܕܐ: ܕܡܛܠ ܝܘܡܐ ܕܢܬܥܒܕ ܒܗ ܥܐܕܐ ܗܘܿ ܒܝܫܐ ܕܚܢܦܘܬܐܼ. ܢܦܼܩ ܩܡܨܐ ܝܓܐܐ ܠܐܬܪܢ ܡܢ ܬܝܡܢܐ. ܘܡܕܡ ܒܗܿ ܒܫܢܬܐ ܠܘܬܢܼ ܠܐ ܣܼܪܚ ܘܠܐ ܐܟܝܼ. ܐܠܐ ܒܠܚܢܕ ܕܢܼܨܒ ܒܗ ܒܐܬܪܢܼ ܕܠܐ ܒܙܥܘܪ. ܘܟܕ ܢܨܒܬܐ ܕܙܪܥܗ ܒܐܪܥܐ ܢܨܒܝܐ ܗܘܬܼ. ܙܘ̈ܥܐ ܕܚܝ̈ܠܐ ܥܠ ܐܪܥܐ ܗܘܝܢ ܗܘܘ. ܘܗܕܐ ܓܠܝܐ ܗܝܼ. ܕܡܛܠ ܕܢܥܝܪܘܢܗܿ ܠܐܢܫܘܬܐ ܡܢ ܛܘܒܥܐ ܕܚܛܝܬܐ ܗܘܿܝܢ ܗܘܘ܆ ܕܠܐ ܬܿܬܪܕܐ ܒܟܦܢܐ ܘܒܡܘܬܢܐ.܀ ܒܐܪܚ ܐܒ ܕܝܢ ܕܝܠܗܿ ܕܫܢܬܐ ܗܕܐܼ. ܐܬܼܐ ܦܘܩܕܢܐ ܡܢ ܡܠܟܐ ܐܢܣܛܘܣ܆ (ܕܢܬܒܛܠ) ܩܘܢܓܝܢ ܒܡܕܝ̈ܢܬܐ ܕܒܝܬ ܪ̈ܗܘܡܝܐ܀ ܒܐܪܚ ܐܠܘܠ ܗܘܐ ܙܘܥܐ ܥܫܝܢܐܼ ܘܩܠܐ ܪܒܐ ܡܢ ܫܡܝܐ ܥܠ ܐܪܥܐ ܐܫܬܼܡܥ. ܐܝܟܢܐ ܕܐܪܥܐ ܡܢ ܫܪ̈ܫܝܗܿ ܐܬܬܙܝܥܬܿ ܒܗ ܒܩܠܐ ܗܘܿ: ܘܟܠܗܝܢ ܩܘܪ̈ܝܐ ܘܡܕܝ̈ܢܬܐ ܐܪܓܫܘ ܒܗ ܒܩܠܐ ܗܘܿ ܘܒܙܘܥܐ. ܘܫܡ̈ܥܐ ܬܟܝ̈ܒܐ ܘܛܒ̈ܐ ܕܠܐ ܫܦܿܪܝܢܼ ܡܢ ܟܠ ܦܢ̈ܝܢ ܐܬܘ ܠܢ. ܘܐܝܟ ܡܐ ܕܐܡܿܪܝܢ ܚܕ̈ܚܕܢܐ. ܐܬܿܐ ܬܡܝܗܬܐ ܐܬܚܼܙܝܬܿ ܒܢܗܪܐ ܦܪܬ ܘܒܚܡܝܡܬܐ ܕܐܒܪܢܐ. ܕܓܼܙ ܪܕܝܐ ܕܢܒܥܝ̈ܗܘܢ ܒܗ ܒܝܘܡܐ ܗܢܐܼ. ܘܠܐ ܡܣܬܒܪܐ ܠܝ ܗܕܐ ܕܕܓܠܐ. ܡܛܠ ܕܟܡܐ ܙܒ̈ܢܝܢ ܡܨܛܪܝܐ ܗܝ ܐܪܥܐ ܒܙܘ̈ܥܐܼ. ܘܓܕܫ ܕܐܦ ܡܝ̈ܐ ܕܪܕܝܢ ܒܗܝܢ ܒܕܘ̈ܟܝܬܐ ܕܦܩ̈ܥܢ ܢܬܟܠܘܢ ܡܢ ܡܪܕܝܬܗܘܢ. ܘܐܝܬ ܐܡܬܝ ܕܐܦ ܠܓܒܐ ܐܚܪܢܐ ܡܨܛܠܝܢ. ܐܝܟܢܐ ܕܐܦ ܛܘܒܢܐ ܕܐܘܕ ܟܕ ܡܫܬܥ ܒܬܫܒܘܚܬܐ ܕܬܡܢܥܣܪ̈ܐ: ܥܠ ܡܣܡ ܒܪ̈ܝܫܐ. pb. 260 ܕܐܬܼܘ ܡܢ ܐܠܗܐ ܥܠ ܒܥܠ̈ܕܒܒܝܘܗܝܿ. ܒܝܕ ܙܘܥܐ ܕܐܪܥܐ ܘܬܘܠܚܐ ܕܛܘܪ̈ܐܿ. ܘܐܚܪ̈ܢܝܬܐ ܕܐܝܟ ܗܠܝܢ ܡܘܕܥܿ. ܕܐܦ ܗܕܐ ܐܣܬܼܥܪܬܿ. ܐܡܼܪ ܓܝܪ ܕܐܬܓܠܼܝܘ ܡܒܘ̈ܥܐ ܕܡܝ̈ܐ. ܘܐܬܚܼܙܝ ܫ̈ܬܐܣܝܗܿ ܕܬܝܒܝܠ. ܡܢ ܟܐܬܟ ܡܪܝܐ.. ܐܬܼܬ ܕܝܢ ܐܦ ܐܝܓܪܬܐ ܒܗ ܒܝܪܚܐ ܗܢܐܼ. ܘܐܬܩܪܝܬܿ ܩܕܡ ܟܠܗ ܟܢܫܐ ܕܥܕܬܐ: ܕܢܦܼܠܬܿ ܢܝܩܘܦܠܘܝܣ ܡܕܢܝܬܐ ܡܢ ܫܠܝܐ. ܥܕܢ ܦܠܓܗ ܕܠܠܝܐܼ. ܘܚܼܡܠܬܿ ܒܓܘܗܿ ܟܠܗܘܢ ܥܡܘܪ̈ܝܗܿ. ܐܦ ܐܟܣ̈ܢܝܐ ܕܐܝܬ ܗܘܐ ܬܡܢ. ܘܐܚ̈ܐ ܡܢ ܐܣܟܘ̈ܠܐ ܕܝܠܢ ܕܚܿܙܩܝܢ ܗܘܘ ܠܬܡܢ: ܐܝܠܝܢ ܕܐܫܬܟܚ ܒܓܘܗܿ ܬܡܢ ܐܬܛܡܪܘ. ܘܚܒܪ̈ܝܗܼܘܢ ܕܐܬܼܘ ܐܫܬܥܝܘ ܠܢ. ܟܠܗ ܓܝܪ ܫܘܪܐ ܕܡܕܝܢܬܐ ܟܕ ܟܪܟ: ܘܟܠܡܕܡ ܕܐܝܬ ܠܓܘ ܡܢܗܼ ܐܬܗܦܼܟ ܒܠܠܝܐ ܗܿܘܼ. ܘܠܐ ܦܼܫ ܐܢܫ ܡܢܗܘܢ ܒܚܝ̈ܐ: ܐܠܐܐܢ ܐܦܝܣܩܦܐ ܕܝܠܗܿ ܕܡܕܝܢܬܐ. ܘܬܪ̈ܝܢ ܐܢܫ̈ܝܢ ܐܚܪ̈ܢܝܢ ܕܕܡܿܟܝܢ ܗܘܘ ܒܣܬܪ ܩܢܟܐ ܕܡܕܒܚܐ ܕܥܕܬܐ. ܘܟܕ ܢܦܼܠ ܬܛܠܝܠܐ ܕܒܝܬܐ ܗܘܿ. ܕܕܡܿܟܝܢ ܗܘܘ ܒܗ: ܐܣܬܡܟ ܚܕ ܓܒܐ ܕܩܝ̈ܣܘܗܝ ܥܠ ܐܣܬܐ ܕܝܠܗ ܕܡܕܒܚܐܼ ܘܠܐ ܛܡܼܪ ܐܢܘܢ. ܘܗܟܢܐ ܐܫܬܥܝ ܠܝ ܐܚܐ ܚܕ ܪܚܡ ܫܪܪܐ܆ ܕܒܥܕܢܐ ܕܪܡܫܐ ܕܗܘܿ ܠܠܝܐ ܕܒܗ ܢܦܼܠܬܿ. ܒܓܘܗܿ ܡܿܓܣܝܢ ܗܘܝܢ ܐܢܐ ܘܚܕ ܚܒܪܝ. ܘܐܬܩܿܛܦܬ ܠܗ ܘܐܡܪ ܠܝ. ܩܘܡܼ ܢܿܦܩܝܢܢ ܒܿܝܬܝܢܢ ܠܒܪ ܡܢ ܡܕܝܢܬܐ܇ ܒܚܦܪܐ ܗܘܿ ܕܐܝܬ ܠܢ ܥܝܿܕܐ. ܡܛܠ ܕܠܐ ܡܫܟܚ ܐܢܐ ܠܡܒܬ ܗܪܟܐ. ܕܐܐܪ ܟܐܝܪ ܥܠܝܼ ܘܠܐ ܐܬܿܝܐ ܠܝ ܫܼܢܬܐ. ܘܿܩܡܼܢ ܐܢܐ ܘܗܘܼ. ܘܢܦܼܩܢܢ ܠܒܪ ܡܢ ܡܕܝܢܬܐ. ܘܒܼܬܢܢ ܒܚܦܪܐ ܗܘܿ ܐܝܟ ܥܝܿܕܢ. ܘܟܕ ܩܪܒ ܥܕܢܐ ܕܢܘܓܗܼ. ܐܥܿܝܪܬܗ ܠܐܚܐ ܗܿܘ ܕܐܝܬ ܗܘܐ ܥܡܝܼ ܘܐܡܿܪܬ ܠܗ. ܩܘܡ ܠܟܼ ܡܛܠ ܕܢܓܼܗܬܿ ܠܗܿ. ܘܢܥܘܠ ܠܡܕܝܢܬܐ ܘܢܥܘܪ ܣܘܥܪܢܢ. ܘܩܡܼܢܐܢܐ ܘܗܘܿ. ܘܐܬܼܝܢ ܠܡܕܝܢܬܐ ܘܐܫܟܚܢܗܿ ܟܕ pb. 261 ܗܦܝܟܝܢ ܟܠܗܘܢ ܒܢܝ̈ܢܝܗܿ. ܘܛܡܪܝܢ ܬܡܢ ܐܢܫ̈ܐ ܘܒܥܝܪܐܼ. ܘܬܘܪ̈ܐ ܘܓܡ̈ܠܐ. ܘܐܙܿܠ ܗܘܐ ܩܠܐ ܕܢܗܓܗܘܢ ܡܢ ܓܘ ܐܪܥܐ. ܘܐܝܠܝܢ ܕܐܬܟܢܫܘ ܠܬܡܢ܆ ܐܦܩܘܗܝ ܠܐܦܝܣܩܘܦܐ ܡܢ ܬܚܝܬ ܩܝ̈ܣܐ ܗܠܝܢ ܕ[ܥܕܬ]ܐ ܕܡܣܬܪ ܗܘܐ ܒܗܘܢ. ܘܒܥܿܐ ܗܐܘ ܠܗ ܠܚܡܐ ܘܚܡܪܐ ܒܕܗܘܢ ܢܫܡܠܝܘܗܝ ܠܐܪܙܐ. ܡܛܠ ܕܟܠܗܿ ܡܕܝܢܬܐ ܗܦܝܟܐ ܗܘܬ. ܘܠܝܬ ܗܘܐ ܒܗܿ ܡܕܡ ܕܩܐܿܡ. ܘܟܐܝܢ ܐܣܬܩܒܠ ܥܒܿܪ ܐܘܪܚܐ ܐܢܫ ܛܘܒܢܐ: ܘܝܗܼܒ ܠܗ ܦ̈ܬܐ ܙܥܘܪ̈ܝܬܐ ܘܩܠܝܠ܆ ܘܩܿܪܒ ܩܘܪܒܢܐ ܘܨܿܠܝ. ܘܫܘܬܦ ܐܢܘܢ ܠܐܝܠܝܢ ܕܐܝܬ ܗܘܐ ܬܡܢ ܠܐܪܙܐ ܕܚܝ̈ܐ. ܘܕܡܿܐ ܗܘܐ ܒܥܕܢܐ ܗܘܿ ܐܝܟ ܕܣܿܒܪ ܐܢܐܼ ܠܠܘܛ ܙܕܝܩܐ ܟܕ ܡܢ ܣܕܘܡ ܐܬܦܿܠܛ. ܘܗܠܝܢ ܥܕܡܐ ܠܗܪܟܐ ܣ̈ܦܩܢ.܀ ܬܘܒ ܕܝܢ ܒܗܿ ܒܓܪܒܝܐ ܐܝܬ ܗܘܐ ܒܝܬ ܣܗ̈ܕܐ ܚܕ ܕܡܬܩܪܐ ܕܐܪܫܡܫܛ. ܐܝܢܐ ܕܡܫܪܪܐܝܬ ܒܢܼܐ ܗܘܐ ܘܦܐܝܐܝܬ ܡܨܒܬ ܗܘܐ. ܘܒܝܘܡܐ ܝܕܝܥܐ ܗܘܿ ܕܒܗ ܗܘܿܐ ܗܘܐ ܕܘܟܪܢܗ ܕܩܕܝܫܐ: ܕܣܡܝܢ ܒܗ ܟܠ ܫܢܐ ܒܫܢܐ܇ ܐܬܟܢܫܘ ܣܓܝ̈ܐܐ ܠܬܡܢ ܡܢ ܟܠ ܦܢ̈ܝܢ. ܐܝܬ ܕܠܨܠܘܬܐܼ ܘܐܝܬ ܕܠܬܓܘܪܬܐ. ܦܘܪܢܣܐ ܓܝܪ ܣܓܝܐܐ ܗܘܿܐ ܗܘܐ ܠܐܢܫܘܬܐ ܒܟܢܫܐ ܗܘܿ ܕܡܬܟܿܢܫ ܗܘܐ ܒܗ. ܘܟܕ ܥܡܐ ܣܓܝܐܐ ܐܝܬ ܗܘܐ ܒܗܼ ܕܓܒܪ̈ܐ ܘܕܢܫ̈ܐ ܘܕܛܠ̈ܝܐ: ܘܟܠ ܩܘ̈ܡܢ ܘܟܠ ܡܘ̈ܫܚܢ܆ ܗܘܼܘ ܒܪ̈ܩܐ ܕܚܝ̈ܠܐ ܘܦܩ̈ܥܐ ܥܫܝ̈ܢܐ. ܘܩ̈ܠܐ ܕܙܘܥܬܐ. ܘܥܼܪܩܬܿ ܟܠܗܿ ܐܢܫܘܬܐ ܠܒܝܬܼ ܣܗ̈ܕܐ ܗܘܿ: ܠܡܚܕ pb. 262 ܓܘܣܐ ܒܓܪ̈ܡܝܗܘܢ ܕܛܘ̈ܒܢܐ. ܘܟܕ ܒܕܚܠܬܐ ܪܒܬܐ ܐܝܬܝܗܘܢ ܗܘܘ܆ ܘܒܨܠܘܬܐ ܘܒܬܫܡܫܬܐ ܩܿܝܡܝܢ ܗܘܘ ܒܦܠܓܗ ܕܠܠܝܐܼ. ܢܦܼܠ ܒܝܬ ܣ̈ܗܕܐ ܗܿܘܼ ܘܣܘܓܗܘܢ ܕܒܢܝ̈ܢܫܐ ܕܐܝܬ ܗܘܐ ܒܗܼ ܟܒܫ ܬܚܘܬܘܗܝ. ܗܼܝ ܝܕܢ ܗܕܐ ܐܣܬܥܼܪܬ ܒܝܘܡܐ ܗܘܿ ܕܢܝܩܦܘܠܝܣ ܢܦܼܠܬܿ ܗܘܼܬ.

ܫܢܬ ܬܡܢ̈ܡܐܐ ܘܚܕܥܣܪ̈ܐ. ܒܗܠܝܢ ܗܟܝܠ ܟܘܠܗܘܢ ܙܘ̈ܥܐ ܘܓܘ̈ܢܚܐ ܐܢܫ ܡܢܢ ܡܢ ܒܝܫ̈ܬܗܼ ܠܐ ܐܬܟܼܠܝ. ܘܕܠܐ ܡܦܩ ܒܪܘܚܐ ܦܫ ܐܬܪܢ ܘܡܕܝܢܬܢ: ܒܗܝܿ ܕܐܚܪ̈ܝܐ ܠܡܪܕܘܬܐ ܐܬܢܛܪܢ. ܘܕܠܐ ܕܚܠܘܢ ܫܡ̈ܥܐ ܕܪܘܚܩܐ܆ ܒܠܼܥܢ ܡܚܘܬܐ ܕܠܝܬ ܠܗܿ ܐܣܝܘܬܐ. ܢܙܕܩ ܗܟܝܠ ܠܟܢܘܬܗ ܕܐܠܗܐ ܘܢܐܡܪ܇ ܕܙܕܝܩ ܗܘܼ ܡܪܝܐ. ܘܛܒ ܬܪ̈ܝܨܝܢ ܕܝ̈ܢܘܗܝ. ܕܗܐ ܒܡܓܪܬ ܪܘܚܗ ܥܕܟܝܠܼ. ܒܝܕ ܐܬܘ̈ܬܐ ܘܬܕܡܪ̈ܬܐ ܨܒܿܐ ܠܡܬܟܣܢ ܡܢ ܒܝ̈ܫܬܢ. ܒܐܪܚ ܬܫܪܝܢ ܩܕܝܡ ܕܫܢܬܐ ܗܕܐ: ܒܥܝܪ̈ܝܢ ܘܬܠܬܐ ܒܗܼ ܝܘܡ ܫܒܬܐܼ. ܥܡ ܡܣ̈ܩܝ ܫܡܫܐܼ ܢܘܗܪܗ ܡܢܗ ܐܬܚܛܦ ܘܓܝܓܠܐ ܕܢܘܗܪܗ ܠܣܐܡܐ ܕܡܿܝܐ ܗܘܬܿ. ܘܙܠܝ̈ܩܐ ܕܡܬܚܙܝܢ ܠܝܬ ܗܘܐ ܠܗ. ܘܥܝ̈ܢܝܢ ܡܬܒ̈ܩܝܢ ܗܘ̈ܝ ܒܗ ܕܠܝܠܐܝܬ ܕܠܐ ܥܘܘܟܐ. ܠܐ ܓܝܪ ܐܝܬ ܗܘܐ ܠܗ ܨܡ̈ܚܐ ܐܘ ܙܠܓ̈ܐ ܐܘ ܙܠܝ̈ܩܐ ܕܬܟܿܣܝܢ ܠܗ̈ܝܢ ܡܢ ܕܢܚܘܪ̈ܢ ܒܗ. ܐܠܐ ܐܝܟ ܕܦܫܝܩ ܠܢ ܠܡܚܪ ܒܣܗܪܐ: ܗܟܢܐ ܐܦ ܒܗ ܚܿܝܪܝܢ ܗܘܼܝܢ. ܘܩܘܝ ܗܟܢܐܥܕܡܐ ܠܐܦ̈ܝ ܬܡ̈ܢܐ ܫܥ̈ܝܢ. ܘܐܪܥܐ ܕܝܢ ܕܕܢܝܚ ܗܘܐ ܥܠܝܗܼܿ ܩܠܝܠ ܒܘܗܪܐ ܕܐܝܬ ܗܘܐܼ ܡܿܣܒܗܐ ܗܘܬܼ. ܐܝܟ ܗܘܿ ܕܩܛܡܐ ܐܘ ܟܒܪܝܬܐ ܒܕܝܪ ܗܘܐ ܥܠܝܗܿ. ܗܘܼܬ ܕܝܢ ܒܝܘܡܐ ܗܢܐ ܐܬܿܐ ܐܚܪܬܐ ܕܕܚܠܬܐ ܘܕܙܘܥܬܐ ܒܫܘܪܐ ܕܡܕܝܢܬܐ. ܘܗܕܐ ܡܛܠ ܗܝܡܢܘܬܗ ܕܡܠܟܗܿ܆ pb. 263 ܘܟܐܢܘܬܐ ܕܥܡܘܪ̈ܝܗܿ ܕܒ̈ܙܒܢܐ ܩܕܡ̈ܝܐܼ. ܫܘܬ ܠܡܩܒܠܘ ܒܘܪܟܬܐ ܡܢ ܡܪܢ. ܩܪܝܒܐ ܗܘܬ ܠܡܚܡܠ ܥܡܘܪ̈ܝܗܿ ܕܒܙܒܢܐ ܗܢܐܿ. ܡܛܠ ܣܘܓܐܐ ܕܚ̈ܛܗܝܗܘܢ. ܬܘܪܥܬܐ ܓܝܪ ܗܘܼܬ ܒܫܘܪܐ ܡܢ ܬܝܡܢܐ ܠܬܪܥܐ ܪܒܐ܆ ܘܡܢ ܟ̈ܐܦܝܗܿ ܕܕܘܟܬܐ ܐܬܒܕܪܘ ܠܪܘܚܩܐ ܡܢܗܿ ܠܐ ܙܥܘܪ. ܒܦܘܩܕܢܐ [ܕܝܢ] ܕܐܒܘܢ ܡܪܝ ܦܛܪܐ ܐܦܝܣܩܘܦܐܼ ܒܥܘ̈ܬܐ ܗ̈ܘܼܝ ܘܟܠܢܫ ܪ̈ܚܡܐ ܡܢ ܐܠܗܐ ܒܿܥܐ ܗܘܐ. ܕܒܼܪ ܓܝܪ ܠܟܠܗ ܩܠܪܘܣ ܕܝܠܗܼ. ܘܠܟܠܗ ܩܝܿܡܐ ܕܓܒܪ̈ܐ ܘܕܢܫ̈ܐܼ. ܘܠܟܠܗܘܢ ܒܢ̈ܝܗܿ ܕܥܕܬܐ ܩܕܝܫܬܐ: ܥܬܝܪ̈ܐ ܥܡ ܡܣܟ̈ܢܐ. ܓܒܪ̈ܐ ܥܡ ܢܫ̈ܐ ܘܛ̈ܠܝܐ: ܘܟܕ ܛܿܥܢܝܢ ܨܠ̈ܝܒܐ ܒܟܠܗܘܢ ܫܘ̈ܩܝܗܿ ܕܡܝܕܢܬܐ ܡܬܟܪܟܝܢ ܗܘܘܼ. ܒܡܙܡܘܪ̈ܐ ܘܒܬܫ̈ܒܚܬܐ ܘܒܠܒܘ̈ܫܐ ܐܘܟ̈ܡܐ ܕܡܘܟܟܐ. ܐܦ ܕܝܪ̈ܬܐ ܟܠܗܝܢ ܕܒܐܬܪܢܼ. ܒܚܦܝܛܘܬܐ ܪܒܬܐ ܕܬܫܡܫܬܐ ܩܝ̈ܡܢ ܗܘ̈ܝ. ܘܒܨܠ̈ܘܬܐ ܕܟܠܗܘܢ ܩܕܝ̈ܫܐܼ. ܢܘܗܪܗ ܕܫܡܫܐ ܥܠ ܕܘܬܗ ܬܼܩܢ܆ ܘܠܘܒܒܐ ܩܠܝܠ ܗܘܼܐ ܠܢ.܀ ܒܬܫܪܝ ܕܝܢ ܐܚܪܝܢ ܚܼܙܝܢܢ ܐܬܘ̈ܬܐ ܬܠܬ ܒܫܡܝܐܼ ܥܕܢ ܦܠܓܗ ܕܝܘܡܐ. ܚܕܐ ܡܢܗܝܢܼ ܒܡܨܥܬܗܿ ܕܫܡܝܐ ܒܓܒܐ ܬܝܡܢܝܐ. ܕܕܡܿܝܐ ܒܓܘܢܗܿ ܠܩܫܬܐ ܕܗܘܿܝܐ ܒܥܢ̈ܢܐ. ܘܟܦܦܗܿ ܚܐܿܪ ܠܥܠ܆ ܗܢܘܿ ܕܝܢܼ [ܟܦܘܬܗܿ] ܠܬܚܬ ܘܪ̈ܝܫܝܗܿ ܠܥܠ. ܘܚܕܐ ܡܢ ܡܕܢܚܐܼ. ܘܐܚܪܝܬܐ ܬܘܒ ܡܢ ܡܥܪܒܐ. ܘܬܘܒ ܒܟܢܘܢ ܐܚܪܝܼ. ܚܼܙܝܢܢ ܐܬܿܐ ܐܚܪܬܐ ܡܢ ܡܥܪܒܐ ܘܬܡܝܢܐܼ. ܒܗܿ ܒܓܘܢܝܐܼ ܕܕܓܡܿܝܐ ܗܘܬ ܠܢܝܙܟܐ: ܘܡܢܗܘܢ ܕܒܢܝ̈ܢܫܐ ܐܡܿܪܝܢ ܗܘܘ ܥܠܝܗܿ ܕܡܟܢܫܬܐ ܗܼܝ ܕܐܒܕܢܐ. ܘܡܢܗܘܢ ܬܘܒ ܐܡܿܪܝܢ ܗܘܘ ܕܢܝܙܟܐ ܗܼܘ ܕܚܪܒܐ.. ܥܕܡܐ ܠܗܪܟܐ ܒܛܒ̈ܐܼ. ܘܒܐܬܘ̈ܬܐ ܡܬܪܕܝܢ ܗܘܝܢ. ܡܟܐ pb. 264 ܕܝܢ ܘܠܗܠ܆ ܡܢܘ ܣܿܦܩ ܠܡܐܡܪ ܥܠ ܐܘܠܨܢܐ ܕܚܕܪܗ ܠܐܬܪܢ ܡܢ ܟܠܗܝܢ ܦܢ̈ܝܬܐ. ܒܐܪܚ ܐܕܪ ܕܫܢܬܐ ܗܕܐܼ. ܢܦܼܩ ܥܠܝܢ ܩܡܨܐ ܡܢ ܐܪܥܐܼ. ܐܝܟܢܐ ܕܡܛܠ ܣܓܝܐܘܬܗ ܗܟܢܐ ܐܣܒܪܢܢ܆ ܕܠܘ ܒܠܚܘܕ ܢܨܒܬܐ ܕܐܝܬ ܗܘܐ ܒܗܿ ܒܐܪܥܐ ܢܦܩܼܬܿ ܥܠܝܢ܇ ܐܠܐ ܐܝܟ ܕܗܘܿ ܐܐܪ ܓܿܣܐ ܗܘܐ ܠܗ ܥܠܝܢ. ܘܐܝܟ ܗܘ ܬܘܒ ܕܡܢ ܫܡܝܐ ܥܠܝܢ ܢܿܚܬ ܗܘܐ. ܘܟܕ ܐܝܬܘܗܝ ܙܚܠܐܼ. ܐܟܼܠ ܘܓܿܡܪ ܥܪܒ ܟܠܗܿ. ܘܟܠܗ ܒܝܬ ܪ̈ܝܫܥܝܢܝܐ ܘܒܝܬ ܬܠܝ̈ܐܼ. ܘܒܝܬ ܐܘܪ̈ܗܝܐ. ܘܡܢ ܕܦܼܪܚ ܗܿܘܐ ܗܘܼܐ ܡܬܚܙܐ ܕܣܪ̈ܢܘܗܝ܇ ܡܢ ܬܚܘܡܐ ܕܐܬܘܪ ܘܥܕܡܐ ܠܝܡܐ ܕܡܪܥܒܐ. ܠܓܪܒܝܐ ܕܝܢ ܐܙܠܼ ܥܕܡܐ ܠܬܚܘܡܐ ܕܒܝܬ ܐܘܪ̈ܛܝܐ. ܘܐܡܼܠ ܘܚܪܒ ܐܢܘܢ ܠܐܬܪ̈ܘܬܐ ܗܠܝܢ܆ ܘܓܡܿܪ ܟܠܡܕܡ ܕܐܝܬ ܗܘܐ ܒܗܘܢ. ܐܝܟܢܐ ܕܐܦ ܡܢ ܩܕܡ ܕܢܗܘܐ ܩܪܒܐܼ. ܢܚܙܝܗܿ ܒܥܝ̈ܢܝܢ ܠܗܿܝ ܕܐܡܝܪܐ ܥܠ ܒܒܠܝܐ. ܕܐܝܟ ܦܪܕܝܣܐ ܕܥܕܢ ܐܪܥܐ ܩܕܡܘܗܝ܇ ܘܒܬܪܗ ܡܕܒܪܐ ܚܪܒܐ. ܘܐܠܘ ܠܐ ܪܡܙܗ ܕܡܪܝܐ ܟܠܼܝܗܝܼ. ܠܒܢܝ̈ܢܫܐ ܘܠܒܥܝܪܐ ܐܟܿܠ ܗܘܐ܇ ܐܝܟ ܡܐܕܫܡܼܥܢܢ ܕܥܒܼܕ ܗܘܐ ܒܚܕܐ ܡܢ ܩܘܪ̈ܝܐ. ܕܣܡ ܐܢܫܐ ܝܠܘܕܐ ܙܥܘܪܐ ܒܚܩܠܐ ܟܕ ܥܿܒܕܝܢ ܥܒܿܕܐܼ. ܘܥܕ ܐܙܠܝܢ ܡܢ ܪܝܫܗܿ ܠܪܝܫܗܿ ܕܚܩܠܐܼ ܫܘܚ ܥܠܘܗܝ ܘܠܓܙܗ ܡܢ ܚܝ̈ܐ. ܘܡܚܕܗܿ ܒܐܪܚ ܢܝܣܢܼ ܫܪܝ ܠܡܗܼܘܐ ܝܘܩܪܢܐ ܕܥܒܘܪܐ ܘܕܟܠܡܕܡ ܘܡܙܕܒܢܝܢ ܗܘܘ ܐܪ̈ܒܥܐ ܡ̈ܕܝܢ ܚܛ̈ܐ ܒܕܝܢܪܐ.. ܘܒܐܪܚ ܚܙܝܪܢ ܘܬܡܘܪ ܡܬܦܪܣܝܢ ܗܘܘ ܥܡܘܪ̈ܝܗܘܢ ܕܐܬܪ̈ܘܬܐ ܗܠܝܢ ܠܡܚܐ. ܘܙܪܥ ܦܪܓܐ ܕܢܗܐܘ ܠܗܘܢ ܠܚܫܚܬܐܼ. ܘܠܐ ܣܦܼܩ ܠܗܘܢ. ܡܛܠ ܕܠܐ ܐܫܟܚ. ܘܥܕ ܡܫܬܠܡܐ ܫܢܬܐܼ. ܕܐܘܢܐ ܚܕܪ ܐܢܘܢ ܠܒܢܝ̈ܢܫܐ ܡܢܟܦܢܐܼ. ܘܙܿܒܢܘ pb. 265 ܩܢܝܢܗܘܢ ܒܦܠܓܘܬ ܛܝ̈ܡܘܗܝ. ܒܥܝܪܐ ܘܬܘܪ̈ܐ ܘܥܢܐ ܘܚܙܝܪ̈ܐ. ܡܛܠ ܕܐܟܼܠ ܩܡܨܐ ܠܟܠܗܿ ܥܠܠܬܐܼ. ܘܠܐ ܠܒܥܝܪܐ. ܘܐܪܦܝܘ ܣܓܝ̈ܐܐ ܐܬܪ̈ܘܬܗܘܢܼ. ܘܫܿܢܝܘ ܠܐܬܪ̈ܘܬܐ ܐܚܪܗܢܐ ܕܓܪܒܝܐ ܘܕܡܥܪܒܐ. ܘܐܝܠܝܢ ܡܚܝ̈ܠܐ ܕܐܝܬ ܗܘܐ ܒܩܘܪ̈ܝܐ. ܘܣ̈ܒܐ ܘܛ̈ܠܝܐܼ. ܘܢܫ̈ܐ ܘܝܠ̈ܘܕܐܼ. ܘܐܝܠܝܢ ܕܐܫܬܢܩܘ ܡܢ ܟܦܢܐܼ. ܕܠܐ ܡܫܟܚܝܢ ܗܘܘ ܠܡܗܿܠܟܘ ܘܠܡܐܙܠ ܠܐܬܪ̈ܘܬܐ ܪ̈ܚܝܩܐܼ. ܥܠܘ ܗܘܘ ܠܗܘܢ ܠܡܕܝ̈ܢܬܐ ܕܢܚܪܕܪܘܢ ܘܢܐܚܘܢ. ܘܨܕܝ ܩܘܪ̈ܝܣ ܣܓܝ̈ܐܬܐ ܘܐܓܘܪ̈ܣܐ ܡܢ ܒܢܝ̈ܢܫܐ. ܠܐ ܕܝܢ ܐܡܕܘ ܡܢ ܡܣܡܿ ܒܪܝܫܐ܆ ܐܦܠܐ ܐܝܠܝܢ ܕܐܙܠܘ ܠܐܬܪ̈ܘܬܐ ܪ̈ܚܝܩܐ. ܐܠܐ ܐܝܟܢܐ ܕܟܬܝܒ ܥܠ ܥܡܐ ܐܝܣܪܠܝܐ: ܕܠܟܪ ܕܢܿܦܩܝܢ ܗܘܘܼ ܐܝܕܗ ܕܡܪܝܐ ܗܘܿܝܐ ܗܘܐ ܥܠܝܗܘܢ ܠܒܝܫܬܐ. ܗܟܢܐ ܐܦ ܠܗܘܢ ܓܼܕܫ. ܨܦܼܚ ܠܗܘܢ ܓܝܪ ܡܘܬܢܐ ܒܐܬܪ̈ܘܬܐ ܕܐܙܠܘ ܠܗܘܢ. ܘܐܦ ܐܝܠܝܢ ܕܥܠܘ ܠܐܘܪܗܝܼ. ܬܘܒ ܡܘܬܢܐ ܐܕܪܟ ܐܢܘܢ. ܗܘܿ ܕܒܬܪ ܩܠܝܠ ܡܫܬܥܿܢܐ ܥܠܘܗܝ ܐܝܟ ܡܐ ܕܣܿܦܩ ܐܢܐ. ܐܝܟ ܡܕܡ ܕܗܘܼܐ ܕܝܢ ܣܿܒܪ ܐܢܐ ܕܠܝܬ ܐܢܫ ܕܣܿܦܩ ܕܢܐܡܪܝܘܗܝ.. ܗܫܐ ܕܝܢ ܥܠ ܝܘܩܪܢܐ ܕܒܥܼܝܬ ܡܢܝ ܐܟܬܘܒ ܠܟ: ܠܐ ܓܝܪ ܨܒܿܐ ܗܘܿܝܬ ܕܥܠ ܗܕܐ ܡܕܡ ܐܪܫܘܡ. ܥܿܨܐ ܐܢܐ ܕܝܢ ܢܦܫܝ ܕܠܐ ܬܣܬܒܪ ܠܟܼ. ܕܐܝܟ ܗܘܿ ܕܥܠ ܦܘܩܕܢܟ ܐܒܿܣܝܬ. ܡܙܕ̈ܒܢܢ ܗܘ̈ܝ ܚ̈ܛܐ ܒܗܢܐ ܙܒܢܐܼ. ܐܪ̈ܒܥܐ ܡܕ̈ܝܢ ܚ̈ܛܐ ܒܕܝܢܪܐ. ܘܣܥܪ̈ܐ ܫ̈ܬܐ. ܚ̈ܡܨܐ ܩܒܐ ܒܚܡܫ̈ܡܐܐ ܢܘ̈ܡܝܢ. ܘܩܒܐ ܕܓܘ̈ܡܐܼ ܒܐܪ̈ܒܥܡܐܐ ܢܘ̈ܡܝܢ. ܘܩܒܐ ܕܛܠܦ̈ܚܐܼ ܒܬܠܬܡ̈ܐܐ ܘܫ̈ܬܝܢ ܢܘ̈ܡܝܢ. ܒܣܪܐ ܕܝܢ ܥܕܟܝܠ ܠܐ ܝܩܼܪ. ܐܠܐ ܟܡܐ ܕܙܒܢܐ ܩܿܪܒ ܗܘܐ ܠܩܕܡܘܗܝ. ܝܘܩܪܢܐ ܣܿܓܐ ܗܘܐ: ܘܐܘܠܨܢܐ pb. 266 ܕܟܦܢܐܼ. ܥܿܫܢ ܗܘܐ ܥܠ ܒܢܝ̈ܢܫܐ. ܘܫܘܝܬܐ ܕܟܠ ܡܕܡ ܕܠܐ ܡܬܟܠ ܗܘܐ ܗܘܼܬܼ. ܕܠܒܘ̈ܫܐ ܘܕܡ̈ܐܢܐ ܘܕܨܒܘ̈ܬܐ ܕܒ̈ܬܐ: ܟܕ ܒܦܠܓܘܬ ܛܝ̈ܡܝܗܝܢ ܐܘ ܒܚܕܐ ܡܢ ܬ̈ܠܬ ܡܙܕܒܢܢ ܗܘ̈ܝ ܨܒ̈ܘܬܐܼ. ܘܠܐ ܣ̈ܦܩܢ ܗܘ̈ܝ ܡܠܬܪܣܝܘ ܡܪ̈ܝܗܝܢ܇ ܡܛܠ ܣܓܝܐܘܬ ܝܘܩܪܢܐ ܕܠܚܡܐ. ܒܗܢܐ ܙܒܢܐ ܚܙܼܩ ܐܒܘܢ ܡܪܝ ܦܛܪܐ ܠܘܬ ܡܠܟܐ܇ ܕܢܦܝܣܝܘܗܝ ܠܡܫܒܩ ܣܘܢܛܠܝܐ. ܠܒܟ ܕܝܢ ܕܝܿܢܐ ܠܡܪ̈ܝܢ ܩܘܪ̈ܝܐ ܘܐܠܼܿܨ ܐܢܘܢ ܐܘܠܨܢܐ ܪܒܐ ܘܬܒܼܥ ܐܢܘܢ. ܘܥܕ ܗܘܼ ܐܦܝܣܩܦܐ ܡܦܝܣ ܗܘܐ ܠܗ ܠܡܠܟܐܼ. ܕܗܒܐ ܡܢ ܕܝܿܢ ܠܡܕܝܢܬ ܡܠܟܘܬܐ ܐܫܬܕܪ. ܘܟܕ ܚܙܼܐ ܠܗ ܡܠܟܐ ܕܣܠܼܩ ܠܗ ܕܗܒܐܼ. ܠܐ ܨܼܒܐ ܠܡܫܒܩ. ܕܠܐ ܕܝܢ ܢܫܕܪܝܘܗܝ ܠܐܒܘܢ ܣܦܝܩܐܝܬܼ ܫܒܼܩ .ܒ. ܦ̈ܠܣ ܠܩܘܪ̈ܝܝܐ ܘܛܝ̈ܡܝ ܕܝܿܗܒܝܢ ܗܘܘ. ܘܚܪܪ ܠܒܢ̈ܝ ܡܕܝܢܬܐ ܕܠܐ ܢܡܠܘܢ ܡܝ̈ܐ ܠܪ̈ܗܘܡܝܐ. ܘܗܘܼ ܬܘܒ ܕܝܿܢܐ ܚܙܼܩ ܠܘܬ ܡܠܟܐܼ ܟܕ ܐܣܝܪ ܣܝܦܗ. ܘܫܒܼܩ ܠܐܘܣܝܒ ܠܡܛܪ ܕܘܟܬܗ ܘܠܡܒܕܪܘ ܡܕܝܢܬܐ. ܘܟܕ ܚܙܼܐ ܗܘܼ ܗܢܐ ܐܘܣܒܼ. ܕܠܐ ܡܡܕܝܢ ܢܚ̈ܬܘܡܐ ܠܡܥܒܕ ܠܚܡܐ ܠܫܘܩܐܿ. ܡܛܠ ܣܓܝܐܘܬܐ ܕܐܢܫ̈ܐ ܩܘܪ̈ܝܝܐ ܕܡܠܝܐ ܗܘܬ ܡܕܝܢܬܐ. ܘܡܛܠ ܡܣ̈ܟܢܐ ܕܠܝܬ ܗܘܐ ܠܗܘܢ ܠܚܡܐ ܒܒ̈ܬܝܗܘܢܼ. ܦܩܼܕ ܕܟܠܡܢ ܕܒܥܿܐ ܢܥܼܒܕ ܠܚܡܐ ܘܢܙܿܒܢ ܒܫܘܩܐ. ܘܐ̈ܬܝ ܢܫ̈ܐ ܝܗܘ̈ܕܝܬܐܼ. ܘܝܗܼܒ ܠܗܝܢ ܚ̈ܛܐ ܡܢ ܐܦܬܛܢ. ܘܥܒ̈ܕܢ ܠܚܡܐ ܠܫܘܩܐ. ܡܬܐܠܨܝܢ ܗܘܘ ܕܝܢ ܡܣ̈ܟܢܐ ܐܦ ܗܟܢܐ܆ ܡܛܠ ܕܠܝܬ ܗܘܐ ܠܗܘܢ ܛܝ̈ܡܐ ܠܡܙܼܒܢ ܒܗ̈ܝܢ ܠܚܡܐ. ܘܡܬܟܪܟܝܢ ܗܘܘ ܒܫܘ̈ܩܐ ܘܒܐܣ̈ܛܘܐ ܘܒܕܪ̈ܬܐ ܠܡܚܕܪ ܠܗܘܢ ܦܬܬܐ pb. 267 ܕܠܚܡܐ܆ ܘܠܝܬ ܗܘܐ ܐܢܫ ܕܡܫܪܬܚ ܗܘܐ ܠܚܡܐ ܒܒܝܬܗ. ܘܡܐ ܕܚܕܪ ܗܘܐ ܚܕ ܡܢܗܘܢ ܡ̈ܥܐ ܘܠܐ [ܡܨܐ] ܕܢܙܼܒܢ ܒܗܝܢ ܠܚܡܐ܆ ܙܒܿܢ ܗܘܐ ܠܗ ܒܗܝܢ ܠܦܬܐ܆ ܐܘ ܟܪܒܐ ܐܘ ܡܘܠܟܝܢ. ܘܐܟܿܠ ܚܝܐܝܬ.ܘܡܢ ܗܕܐ ܥܠܬܐ ܗܘܼܐ ܝܘܩܪܢܐ ܕܝܪܩܐ ܘܚܣܝܪܘܬܐ ܕܟܠܡܕܡ ܒܡܕܝܢܬܐ ܘܩܘܪ̈ܝܐ. ܐܝܟܢܐܼ. ܘܣܥܘ ܐܢܫ̈ܐ ܘܥܠܘ ܠܕܘܟܝ̈ܬܐ ܩܕܝ̈ܫܬܐ܆ ܘܡܢ ܟܦܢܗܘܢ ܐܟܠܘ ܩܘܕܫܐ ܐܝܟ ܠܚܡܐ ܫܚܝܡܐ. ܐܚܪ̈ܢܐ ܕܝܢ ܡܢ ܓܘܫܡ̈ܐ ܡܝ̈ܬܐ ܕܠܐ ܡܬܐܟܠܝܢ ܦܣܩܘܢ ܘܒܫܠܘ ܘܐܟܠܘ. ܘܣܗܕܐ ܕܗܠܝܢ ܐܝܬܝܗܿ ܫܪܝܪܘܬܟ.

ܫܢܬ ܬܡܢܡ̈ܐܐ ܘܬܪܬܥܣܪ̈ܐ. ܒܗܕܐ ܕܝܢ ܫܢܬܐ ܒܬܪ ܩܛܦܐ ܡܙܿܕܒܢ ܗܘܐ ܚܡܪܐ ܫ̈ܬܐ ܟܝ̈ܠܝܢ ܒܕܝܢܪܐܿ. ܘܩܒܠܐ ܕܐܦܫ̈ܬܐ ܒܬܠܬܡ̈ܐܐ ܢܘܡ̈ܝܢ. ܘܥܫܢ ܟܦܢܐ ܒܩܘܪ̈ܝܐ ܘܒܡܕܝܢܬܐ. ܐܝܠܝܢ ܓܝܪ ܕܐܫܬܚܪܘ ܒܩܘܪ̈ܝܐ ܟܘ̈ܫܢܐ ܐܟܿܠܝܢ ܗܘܘ. ܐܟܚܪ̈ܢܐ ܟܡܫ̈ܘܢܐ ܡܿܩܒܠܝܢ ܗܘܘ ܠܡܣܼܒܥ. ܘܐܝܠܝܢ ܕܡܕܝܢܬܐ܆ ܦܿܗܝܢ ܗܘܘ ܒܝܢܬ ܫܘ̈ܩܐܼ ܘܡܓܒܝܢ ܥܩܪ̈ܐ ܘܛܪ̈ܦܐ ܕܝܘܪ̈ܩܐ ܟܕ ܦܝܠܝܢ ܒܙܒܠܐ ܘܐܟܿܠܝܢ. ܘܕܿܡܟܝܢ ܗܘܘ ܒܐܣ̈ܛܘܐ ܒܫܘ̈ܩܐ. ܘܥܿܘܝܢ ܒܠܠܝܐܼ ܘܒܐܝܡܡܐ ܡܢ ܐܘܠܨܢܐ ܕܟܦܢܐ. ܘܐܬܕܿܝܒ ܦܓܪ̈ܝܗܘܢܼ. ܘܐܬܬܥܝܩܘ ܘܕܡܿܝܢ ܗܘܘ ܠܫܪܘܪܐ ܡܛܠ ܩܛܝܢܘܬܐ ܕܦܓܪ̈ܝܗܘܢ. ܘܡܠܝܐ ܗܘܬ ܡܢܗܘܢ ܟܠܗܿ ܡܕܝܢܬܐܼ. ܘܫܿܪܝܘ ܡܝܿܬܝܢ ܒܐܣ̈ܛܘܐ ܘܒܫܘ̈ܩܐ.. ܕܝܡܣܬܢ ܕܝܢ ܗܓܡܘܢܐ ܟܕ ܣܠܼܩ ܠܘܬ ܡܠܟܐܼ. ܐܘܕܥܗ ܥܠ ܗܢܐ ܐܘܠܨܢܐ. ܘܝܗܼܒ ܠܗ ܡܠܟܐ ܕܗܒܐܼ ܠܐ ܙܥܘܪ ܕܢܦܠܓ ܠܡ̈ܣܟܢܐ. ܘܟܕ ܐܬܼܐ ܡܼܢ ܠܘܬܗ pb. 268 ܠܐܘܪܗܝܼ. ܛܒܼܥ ܡܢܗܘܢ ܐܢܫ̈ܐ ܣ̈ܓܝܐܐ ܒܩ̈ܕܠܝܗܘܢ ܒܛܒ̈ܥܐ ܕܐܒܪܐ. ܘܝܿܗܒ ܗܘܐ ܠܟܠܚܕ ܡܢܗܘܢܼ ܠܝܛܪܐ ܕܠܚܡܐ ܒܝܘܡܐ. ܠܐ ܕܝܢ ܡܫܟܚܝܢ ܗܘܘ ܠܡܚܐ. ܡܛܠ ܕܡܫܿܢܩܝܢ ܗܘܘ ܡܢ ܐܘܠܨܢܐ ܕܟܦܢܐ ܕܕܝܿܒ ܐܢܘܢ.. ܘܥܫܼܢ ܡܘܬܢܐ ܒܙܒܢܐ ܗܢܐ ܕܐܪܚ ܬܫܪܝ ܐܚܪܝ. ܘܬܘܒ ܒܐܪܚ ܟܢܘܢ ܩܕܡ܇ ܟܕ ܫܪܝ ܠܡܗܼܘܐ ܩܘܪܫܐ ܘܓܠܝܕܐ. ܡܛܠ ܕܒܐܣ̈ܛܘܐ ܘܒܫܘ̈ܩܐ ܒܿܝܬܝܢ ܗܘܘܼ. ܥܠ ܫܼܢܬܗܘܢ ܫܼܢܬ ܡܘܬܐ ܡܿܕܪܟܐ ܗܘܬ ܠܗܘܢ. ܦܿܥܝܢ ܗܘܘ ܕܝܢ ܫܒܪ̈ܐ ܘܝܠ̈ܘܕܐ ܒܟܠ ܫܘ̈ܩܝܢ܆ ܕܐܝܬ ܕܡܝ̈ܬܢ ܐܡܗ̈ܬܗܘܢ܆ ܘܐܝܬ ܕܫܒ̈ܩܢ ܗܘ̈ܝ ܠܗܘܢ. ܘܥܪ̈ܩܢ ܡܐ ܕܒܥܿܝܢ ܠܡܠܥܣ. ܡܛܠ ܕܠܝܬ ܗܘܐ ܠܗܝܢ ܕܢܬ̈ܠܢ ܠܗܘܢ. ܘܫ̈ܕܝܢ ܗ̈ܘܝ ܫ̈ܠܕܐ ܒܟܠ ܫܘ̈ܩܝܢܼ ܟܕ ܡܦܪ̈ܣܝܢ. ܘܠܐ ܡܿܡܕܝܢ ܗܘܘ ܒܢ̈ܝ ܡܕܝܢܬܐ ܠܡܥܦܝܘ ܐܢܘܢ. ܡܛܠ ܕܥܕ ܡܿܦܩܝܢ ܗܘܘ ܩܕܡ̈ܝܐ ܕܡܝܬܼ. ܡܚܕܗܿ ܕܥܛܦܘ ܗܘܘܼ. ܡܫܟܚܝܢ ܗܘܘܐܚܪ̈ܢܐ. ܒܫܩܠ ܛܥܢܐ ܕܝܢ ܕܡܪܝ ܢܘܢܐ ܟܣܢܕܟܪܐ: ܡܬܟܪܟܝܢ ܗܘܘ ܐܚ̈ܐ ܡܢ ܒܬܪܟܝܢ܆ ܘܡܟܿܢܫܝܢ ܠܗܝܢ ܠܫ̈ܠܕܐ ܗܠܝܢ. ܘܟܢܫܐ ܗܘܼܬ ܟܠܗܿ ܡܕܝܢܬܐ ܠܬܪܥܐ ܕܟܣܢܕܘܟܝܢ܆ ܘܢܿܦܩܝܢ ܗܘܘ ܘܩܒܪܝܢ ܠܗܘܢ ܡܢ ܨܦܪܐ ܠܨܦܪܐ. ܘܐܦ ܪ̈ܒܝ ܒ̈ܬܐ ܕܥܕܬܐ. ܡܪܝ ܬܘܬܐܝܠ ܩܫܝܫܐܼ ܘܡܪܝ ܣܛܪܛܢܝܩܐ. ܗܘܿ ܕܒܬܪ ܙܒܢܐ ܐܫܬܘܝ ܠܕܪܓܐ ܕܐܦܣܩܦܘܬܐ ܒܚܪܢ ܡܕܝܢܬܐ. ܐܬܩܢܘ ܐܓܘܪܪܐ ܚܕ ܒܒܢܝܢܐ ܕܥܕܬܐ ܕܐܘܪܗܝ. ܘܥܿܠܝܢ ܗܘܘ ܐܝܠܝܢ ܕܡܫܿܢܩܝܢ. ܡܿܓܣܝܢ ܬܡܢ. ܘܡܫܬܟܚܢ ܗܘ̈ܝ ܫܠ̈ܕܐ ܣܓܝ̈ܐܬܐ ܒܐܘܓܪܪܐܼ ܘܩܿܒܪܝܢ ܗܘܘ ܠܗܝܢ ܥܡ ܕܟܣܢܕܘܟܝܢ. ܘܗܓܡܘܢܐ ܣܼܪܦ ܬܪ̈ܥܐ ܕܒܣ̈ܝܠܝܩܘܣ ܕܠܘܬ ܕܝܡܣܢ ܣܬܘܝܬܐܼ. ܘܐܪܡܝ ܒܗܿ ܬܒܢܐ ܘܣܪ̈ܝܓܬܐ. ܘܕܡܿܟܝܢ ܗܘܘ ܬܡܢ. ܘܠܐ ܣܿܦܩ ܗܘܬ pb. 269 ܠܗܘܢ. ܘܟܕ ܚܙܘ ܪܘܪ̈ܒܢܐ ܕܡܕܝܢܬܐܼ. ܐܦ ܗܢܼܘܢ ܐܬܩܢܘ ܐܘܓܪܪ̈ܐ. ܘܥܿܠܝܢ ܗܘܘ ܣܓܝ̈ܐܐ ܘܡܣܬܬܪܝܢ ܒܗܘܢ. ܐܦ ܪ̈ܗܘܡܝܐ ܐܬܩܢܘ ܕܘ̈ܟܝܬܐܼ. ܘܕܡܿܟܝܢ ܗܘܘ ܒܗܝܢ ܟܪ̈ܝܗܐ ܘܝܿܨܦܝܢ ܗܘܘ ܕܢܦܩ̈ܬܗܘܢ. ܡܿܝܬܝܢ ܗܘܘ ܒܡܘܬܐ ܬܟܝܒܐ ܘܚܢܝܓܐ. ܘܟܕ ܟܠܝܘܡ ܣ̈ܓܝܐܐ ܡܢܗܘܢ ܡܬܩܒܪܝܢ ܗܘܘܼ. ܬܘܒܼ ܡܣܓܐ ܣܓܝܢ ܗܘܘ. ܢܦܼܩ ܓܝܪ ܫܒܡܥ ܒܟܘܪܐ ܕܡܕܝܢܬܐ܆ ܕܐܝܬ ܠܗܘܢ ܠܐܘܪ̈ܗܝܐ ܝܨܝܦܘܬܐ ܠܐܝܠܝܢ ܕܣܢܝܩܝܢ. ܘܡܛܠ ܗܕܐ ܥܠܬܐ܆ ܥܠܼܬܿ ܠܡܕܝܢܬܐ ܣܘܓܐܐ ܕܐܢܫܘܬܐ ܕܠܐ ܡܢܝܢ.. ܬܘܒ ܕܝܢ ܒܠܢܐ ܕܐܝܬ ܠܬܚܬ ܡܢ ܒܝܬ ܫܠ̈ܝܚܐ. ܠܘܬ ܬܪܥܐ ܪܒܐܼ ܟܪ̈ܝܗܐ ܡܠܝܐ ܗܘܬ. ܘܫܠ̈ܕܐ ܣܓܝ̈ܐܬܐ ܢܦ̈ܩܢ ܗܘ̈ܝ ܡܢܗܿ ܟܠܝܘܡ. ܚܦܝܛܐ ܗܘܬ ܕܝܢ ܟܠܗܿ ܡܕܝܢܬܐ ܠܡܠܘܝܘ ܟܢܝܫܐܝܬ: ܠܗܠܝܢ ܕܡܢ ܟܣܢܕܘܟܝܢ ܢܿܦܩܝܢ ܗܘܘ. ܒܡܙܡܘܪ̈ܐ ܘܒܬܫܒ̈ܚܬܐ ܘܒܡܕܪ̈ܫܐ. ܘܒܩ̈ܠܐ ܕܡܠܼܝܢ ܣܒܪܐ ܕܢܘܚܡܐ. ܘܢܫ̈ܐ ܬܘܒ ܒܒܟܝܐ ܚܢܝܓܐ ܘܒܩ̈ܠܐ ܪ̈ܥܘܡܐ. ܟܕ ܒܪܝܫܗܘܢ ܐܙܿܠ ܗܘܐ ܪܥܝܐ ܚܦܝܛܐ ܡܪܝ ܦܛܪܐ: ܘܥܡܗܘܢ ܬܘܒ ܐܝܬ ܗܘܐ ܕܝܿܢܐ. ܘܟܠܗܘܢ ܒܢܗܝ ܚܐܪ̈ܐ. ܘܡܐ ܕܐܬܩܒܪ ܗܘܘ ܗܠܝܢ܆ ܗܝܕܝܟ ܗܦܿܟ ܗܘܐ ܟܠܢܫܼ. ܘܡܠܘܐ ܗܘܐ ܠܗܠܝܢ ܕܒܫܒܒܘܬܗ. ܘܟܕ ܡܠܘ ܩܒܪ̈ܐ ܕܟܣܢܕܟܝܢ ܘܕܥܕܬܐܼ. ܢܦܼܩ ܗܓܡܘܢܐܼ. ܘܦܼܬܚ ܩܒܪ̈ܐ ܥܬܝ̈ܩܐ: ܕܐܝܬ ܨܝܕ ܒܝܬ ܡܪܝ ܩܘܢܐ: ܕܒܼܢܝܢ ܗܘܘ ܠܩܕܡ̈ܝܐ ܒܫܩܠܛܥܢܐ. ܘܡܠܼܘ ܐܢܘܢ. ܘܬܘܒ ܦܬܚܘ ܐܚܪ̈ܢܐ ܘܠܐ ܣܦܼܩܘ ܠܗܘܢ. ܘܠܚܪܬܐ ܟܠ ܐܫܢܐ ܕܗܘܼ ܩܒܪܐ ܥܬܝܩܐ ܕܐܝܬ ܦܿܬܚܝܢ ܘܡܿܠܝܢ ܠܗ. ܝܬܝܪ ܓܝܪ ܡܢ ܡ̈ܐܐ ܫܠ̈ܕܝܢ ܢܦ̈ܩܢ ܗܘ̈ܝ ܟܠܝܘܡ ܡܢ ܟܣܢܕܘܟܝܢ܆ ܘܝܘ̈ܡܬܐ ܣܓܝ̈ܐܐ ܡ̈ܐܐ ܘܥܣܪ̈ܝܢ. ܘܥܕܡܐ ܠܡ̈ܐܐ ܘܬ̈ܠܬܝܢ. ܡܢ ܪܝܫܗ ܕܬܫܪܝ ܐܚܪܝ ܘܥܕܡܐ ܠܫܘܠܡܗ pb. 270 ܕܐܕܪ. ܘܠܝܬ ܗܘܐ ܠܡܫܡܥ ܒܙܒܢܐ ܗܘܿ ܡܢ ܟܠܗܘܢ ܫܘ̈ܩܐ ܕܡܕܝܢܬܐ܇ ܐܠܐ ܐܘ ܒܟܝܐ ܕܥܠ ܥܢܝ̈ܕܐܿ. ܐܘ ܩ̈ܠܝ ܓܥܬܐ ܕܡܫ̈ܢܩܐ. ܡܿܝܬܝܢ ܗܘܘ ܐܦ ܒܕܪ̈ܬܐ ܕܥܕܬܐ ܣܓܝ̈ܐܐ. ܘܒܕܪ̈ܬܐ ܕܡܕܝܢܬܐܿ ܘܒܦܘ̈ܬܩܐ. ܐܦ ܒܐܘܪ̈ܚܬܐ ܡܿܝܬܝܢ ܗܘܘ ܟܕ ܐܿܬܝܢ ܕܢܥܠܘܢ ܠܡܕܝܢܬܐ.. ܘܒܐܪܚ ܫܒܛ ܬܘܒܼ ܥܫܼܢ ܝܘܩܪܢܐܼ ܘܣܼܓܐ ܡܘܬܢܐ. ܘܡܙ̈ܕܒܢܢ ܗܘ̈ܝ ܚ̈ܛܐܼ ܬܠܬܥܣܪ̈ ܩ̈ܒܐ ܒܕܝܢܪܐ. ܘܣܥܪ̈ܐ ܬܡܢܬܥܣܪ̈ ܩܒ̈ܝܢ. ܘܠܝܛܪܐ ܕܒܣܪܐ ܒܡܐܐ ܢܘ̈ܡܝܢ. ܘܠܝܛܪܐ ܕܬܪܢܓܬܐ ܒܬ̈ܠܬܡܐܐ ܢܘ̈ܡܝܢ. ܘܒܝܥܬܐ ܒܐܪ̈ܒܥܝܢ ܢܘ̈ܡܝܢ. ܘܣܟܐ ܕܟܠܡܕܡ ܕܡܬܐܟܠ ܒܝܘܩܪܢܐ.. ܘܗܘ̈ܝ ܒܥܘ̈ܬܐ ܒܐܪܚ ܐܕܪ. ܡܛܠ ܡܘܬܢܐ ܕܢܬܟܠܐ ܡܢ ܐܟܣ̈ܢܝܐ. ܘܕܡܿܝܢ ܗܘܘ ܒܢ̈ܝ ܡܕܝܢܬܐ ܟܕ ܡܬܟܿܫܦܝܢ ܡܛܘܠܬܗܘܢܼ ܠܛܘܒܢܐ ܕܘܝܕܼ ܟܕ ܐ̱ܿܪ ܗܘܐ ܠܡܠܐܟܐ ܕܚܪܒ ܠܥܡܗ: ܕܐܢ ܐܢܐ ܚܿܛܝܬ ܘܐܣܿܟܠܬܼ. ܗܠܝܢ ܥܢ̈ܐ ܬܡܝ̈ܡܬܐ ܡܢܐ ܚ̈ܛܝ. ܬܗܘܐ ܠܗܿ ܐܝܕܟ ܒܝ ܘܒܒܝܬ ܐܒܝ.. ܒܐܪܚ ܢܝܣܢ ܕܝܢ ܫܪܝ ܡܘܬܢܐ ܒܒܢ̈ܝ ܡܕܝܢܬܐ. ܘܢܦ̈ܩܢ ܗܘ̈ܝ ܥܪ̈ܣܬܐ ܣܓܝ̈ܐܬܐ ܒܝܘܡܐ ܚܕ܆ ܘܠܐ ܐܢܫ ܩܐܿܡ ܗܘܐ ܥܠ ܡܢܝܢܝܗܝܢ. ܠܘ ܕܝܢ ܒܐܘܪܗܝ ܒܠܚܘܕ ܗܘܼܐ ܗܢܐ ܚܪܒܐ ܕܡܘܬܢܐܼ. ܐܠܐ ܡܢ ܐܢܛܝܟܝܐܼ ܘܥܕܡܐ ܠܢܨܝܒܝܢܼ ܗܟܢܐܡܬܚܪܒܝܢ ܗܘܘ ܒܢܝ̈ܢܫܐ ܘܡܫܬܢܩܝܢ ܒܟܦܢܐ ܘܒܡܘܬܢܐ. ܘܡܝܼܬ ܣܓܝ̈ܐܐ ܡܢ ܥܬܝܪ̈ܐ. ܕܠܐ ܟܦܢܝܢ ܗܘܘ. ܐܦ ܡܢ ܪܘܪ̈ܒܢܐ ܕܡܕܝܢܬܐ ܣܓܝ̈ܐܐ ܡܝܼܬܘ ܒܫܢܬܐ ܗܕܐ.. ܘܒܐܝܪܚ ܚܙܝܪܢ ܘܬܡܘܙܼ. ܡܢ ܒܬܪ ܚܨܕܐ ܣܿܒܪܝܢ ܗܘܝܼܢ ܕܡܟܠ ܡܓܗܝܢܢ ܡܢ ܝܘܩܪܢܐ. ܠܐ ܕܝܢ ܩܿܒܠܢ ܣܘܟܝܢ ܐܝܟ ܡܐ ܕܣܿܒܪܝܢ ܗܘܝܢ. ܐܠܐ ܥܕܡܐ ܠܚܡ̈ܫܐ ܡܕܝ̈ܢ ܒܕܝܢܪܐ ܡܙܕܒ̈ܢܢ ܗܘ̈ ܚ̈ܛܐ ܕܥܠܠܬܐ ܚܕܬܐ.

ܫܢܬ ܬܡܢ̈ܡܐܐ ܘܬܠܬܥܣܪ̈ܐ. ܡܢ ܒܬܪ ܕܝܢ ܗܠܝܢ ܐܘܠ̈ܨܢܐ ܕܩܡܨܐ ܘܕܟܦܢܐ ܘܕܡܘܬܢܐ ܕܟܿܬܒܬ ܠܟ pb. 271 ܥܠܝܗܘܢܼ. ܢܦܝܫܐ ܩܠܝܠ ܗܘܼܐ ܠܢ ܒܪ̈ܚܡܘܗܝ ܕܐܠܗܐܼ. ܕܢܫܟܚ ܠܡܣܝܒܪܘ ܠܗܠܝܢ ܕܥܬܝ̈ܕܢܼ. ܐܝܟܢܐ ܕܡܢܗܘܢ ܕܣܘܥܪ̈ܢܐ ܐܫܬܘܕܥܢ. ܗܘܐ ܓܝܪ ܩܛܦܐ ܣܓܝܐܐ. ܘܐܙܿܕܒܢ ܚܡܪܐ ܡܢ ܡܥܨܪܬܐ ܥܣܪ̈ܝܢܘܚ̈ܡܫܐ ܟܝ̈ܠܝܢ ܒܕܝܢܪܐ. ܘܐܬܦܪܢܣܘ ܡܣܟ̈ܢܐ ܡܢ ܟܪ̈ܡܐ ܒܝܕ ܥܠܠܬܐ ܕܐܦܫ̈ܬܐ. ܗܟܢܐ ܓܝܪ ܐܡܿܪܝܢܢ ܗܘܘ ܐܟܪ̈ܐ ܘܦܠ̈ܚܐ: ܕܣܓܝܐܐ ܗܘܬ ܥܠܠܬܐ ܕܐܦܫ̈ܬܐܼ. ܝܬܝܪ ܡܢ ܕܚ̈ܛܐ. ܡܫܒܐ ܓܝܪ ܚܡܝܡܐ ܗܘܼܐܿ. ܟܕ ܫܿܪܝ ܗܘܐ ܟܪܡܐ ܠܡܒܫܘ. ܘܣܘܓܗܼ ܝܒܼܫ. ܘܗܟܢܐ ܡܬܐܡܪ ܗܘܐ ܡܢ ܦܪ̈ܘܫܐܼ. ܕܒܡܦܪܢܣܘܬܗ ܕܐܠܗܐ ܡܪܐ ܟܠ ܐܣܬܥܼܪܬܿ. ܘܚܠܝܛܘܬ ܪ̇ܡܐ ܕܒܡܪܕܘܬܐܿ. ܐܝܬܝܗܿ ܗܘܬ ܨܒܘܬܐܗܕܐ. ܕܢܣܬܡܟܘܢ ܩܘܪ̈ܝܝܐ ܒܝܕ ܐܦܫ̈ܬܐ ܗܠܝܢ ܕܗܼܘ̈ܝ. ܘܠܐ ܢܣܘܦܘܢ ܒܟܦܢܐܼ ܐܝܟ ܕܒܫܢܬܐ ܗܝܿ ܕܥܒܼܪܬܿ. ܡܛܠ ܕܐܦ ܒܙܒܢܐ ܗܢܐ ܐܪ̈ܒܥܐ ܡܕܝ̈ܢ ܚ̈ܛܐ ܒܕܝܢܪܐ ܡܙܕܒܢܢ ܗܘ̈ܝܼ ܒܠܚܘܕ. ܘܣܥܪ̈ܐ ܫ̈ܬܐ. ܕܐܝܟ ܗܕܐ ܗܟܝܠ ܐܬܿܐ ܕܪ̈ܞܡܐ ܗܘܼܬ ܒܙܒܢܐ ܕܬܫܪ̈ܝܬܐ. ܐܦ ܣܬ[ܘܐ] ܕܝܢ ܟܠܗ ܕܫܢܬܐ ܗܕܐܼ ܐܝܬܘܗܝ ܗܘܐ ܡܛܝܪܐܼ ܝܬܝܪ ܡܢ ܣܿܓܝ. ܘܙܪܥܐ ܕܐܙܕܪܥ ܣܠܼܩ ܒܐܬܪ ܐܬܪ ܝܬܝܪ ܡܢ ܩܘܡܬܐ ܕܓܒܪܐ. ܟܕ ܥܕܟܝܠ ܠܐ ܡܿܛܐ ܗܘܐ ܢܝܣܢ. ܘܐܦ ܟܪ̈ܒܝܗܼܿ ܕܐܪܥܐ ܛܥܝܢܝܢ ܗܘܘ ܒܨܝܪ ܩܠܝܠܼ. ܡܢ ܐܝܿܕܐ ܕܙܪܝܥܐ. ܗܟܢܐܐܦ ܐܓܪ̈ܐ ܕܒ̈ܬܐ ܐܘܥܝܘ ܥܡܝܪܐ ܣܓܝܐܐ. ܗܘܿ ܕܚܨܕܘ ܐܢܫ̈ܝܢ܆ ܘܒܕܡܘܬ ܓܪ̈ܣܛܝܐ ܕܚܩܐ ܙܿܒܢܘܗܝ. ܘܡܛܠ ܕܫܢܢܐ ܐܝܬ ܗܘܐ ܒܗܼ. ܘܒܩܘܡܬܗ ܡܫܿܠܡܢ ܗܘܐܼ. ܠܐ ܐܬܝܕܥ ܠܙܒܘ̈ܘܗܝ.܀ pb. 272 ܡܣܿܟܝܢ ܗܘܼܝܢ ܕܝܢ ܐܦ ܒܗܕܐ ܫܢܬܐ ܘܡܿܣܒܪܝܢ܆ ܕܫܘܝܬܐ ܪܒܬܐ ܕܥܒܘܪܐ ܗܿܘܝܐ ܐܝܟ ܫܢܗܝܐ ܕܡܢ ܩܕܝܡ. ܘܗܕܐ ܡܫܚܒܬܐ ܠܐ ܣܠܼܩܬܿ ܠܪܝܫ. ܒܐܪܚ ܐܝܪ ܓܝܪ ܢܦܼܩܬܿ ܪܘܚܐ ܕܫܘܒܐ ܝܘ̈ܡܬܐ ܬ̈ܠܬܐܼ. ܘܫܒ ܟܠܗ ܥܒܘܪܐ ܕܐܬܪܢ. ܣܛܪ ܡܢ ܕܘ̈ܟܝܬܐ ܙܥܘܪ̈ܝܬܐ.. ܒܗ ܕܝܢ ܒܝܪܚܐ ܗܢܐ܇ ܟܕ ܡܼܛܐ ܝܘܡܐ ܕܡܬܥܒܕ ܒܗ ܥܐܕܐ ܗܘܿ ܒܝܫܐ ܕܬܫ̈ܥܝܬܐ ܕܝܘ̈ܢܝܐ: ܕܡܘܕܥ ܠܢ ܥܠܘܗܝ ܡܢ ܠܥܠܼ. ܐܬܼܐ ܦܘܩܕܢܐ ܡܢ ܡܠܟܐ ܐܢܣܛܘܣܼ. ܕܬܘܒ ܠܐ ܢܪܩܕܘܢ ܐܪ̈ܟܝܣܛܐ. ܐܦܠܐ ܒܚܕܐ ܡܢ ܡܕܝ̈ܢܬܐ ܕܐܘܚܕܢܐ ܕܡܠܟܘܬܗ. ܡܿܢ ܕܚܿܐܪ ܗܟܝܠ ܒܡܦܩܢܐ ܕܨܒܘ̈ܬܐܼ. ܠܐ ܥܿܕܠ ܠܢ ܥܠ ܗܝܿ ܕܐܡܼܪܢ܇ ܕܡܢ ܥܠܬ ܪܘܫܥܐ ܕܦܿܠܚܝܢ ܗܘܘ ܒܢܗܝ. ܡܝܕܢܬܐ ܒܥܐܕܐ ܗܿܘܿ. ܐܬܕܿܪܓ ܘܐ̈ܬܼܝ ܥܠܝܢ ܡܪ̈ܕܘܬܐ ܕܟܦܢܐ ܘܕܡܘܬܢܐ. ܗܐ ܓܝܪ ܥܕ ܡܠܼܝܢ ܬ̈ܠܬܝܢ ܝܘ̈ܡܝܢ ܡܢ ܒܬܪ ܕܐܬܒܛܠܼ. ܚ̈ܛܐ ܕܡܙܕܒܢܢ ܗܘ̈ܝ ܐܪ̈ܒܥܐ ܡܕܝ̈ܐ ܒܕܝܢܪܐܼ. ܐܙܕܒܢ ܬܪܥܣܪ̈. ܘܣܥܪ̈ܐ ܕܡܙܕܒܢܢ ܗܘ̈ ܫ̈ܬܐ ܡܕܝ̈ܢ܆ ܐܙܕܒܢ ܥܣܪܝܢ ܘܬܪ̈ܝܢ. ܘܐܬܝܕܥܬ ܓܠܝܐܝܬ ܠܟܠܢܫܼ. ܕܡܫܟܚ ܗܘ ܨܒܝܢܗ ܕܐܠܗܐܿ ܕܐܦ ܠܥܠܠܬܐ ܙܥܘܪܬܐ ܢܒܪܟܿ. ܘܢܬܠ ܣܒܥܐ ܠܐܝܠܝܢ ܕܬܝܿܒܝܢ ܡܢ ܚ̈ܛܗܝܗܘܢ. ܟܕ ܛܒ ܓܝܪ ܟܝܠܗ ܥܒܘܪܐ ܫܒ ܗܘܐ ܐܝܟ ܕܐܡܿܪܬ. ܘܡܢ ܫܪܟܢܐ ܩܠܝܠ ܕܐܫܬܚܪ. ܗܕܐ ܟܠܗܿ ܪܘܚܬܐ ܗܘܼܬ ܒܓܘ ܬ̈ܠܬܝܢ ܝܘ̈ܡܝܢ. ܟܒܪ ܕܝܢ ܐܦ ܥܕܟܝܠ ܐܡܿܪ ܐܢܫܼ. ܕܠܐ ܫܦܝܪ ܐܬܪܥܼܝܬ. ܗܕܐ ܓܝܪ ܬܝܒܘܬܐ ܠܐ ܗܘܐ ܕܨܒܝܢܐ ܐܝܬܝܗܿ ܗܘܬ܇ ܕܡܛܘܠܬܗܿ ܢܗܘܘܢ ܪ̈ܚܡܐ. ܡܿܠܟܐ ܓܝܪ ܒܿܛܠܗ ܠܥܐܕܐ ܗܘܿ ܒܩܛܝܪܐܼ. ܒܗܝܿ ܕܦܩܼܕ ܕܟܠ ܟܠܗ ܠܐ ܢܪܩܕܘܢ ܐܪ̈ܟܝܣܛܐ. ܚܢܢ ܕܝܢ ܐܡܿܪܝܢܢܼ ܕܐܠܗܐ ܡܛܠ ܣܘܓܐܐ ܕܛܝܒܘܬܗܼ. ܥܠܬܐ ܗܘ ܒܥܿܐ ܗܘܐ ܕܢܪܚܡܼ. ܐܦ ܥܠ ܐܝܠܝܢ ܕܠܐ ܫܿܘܝܢ. ܘܐܝܬ pb. 273 ܠܢ ܬܚܘܝܬܐ ܡܢ ܗܿܝ ܕܐܬܪܚܡ ܥܠ ܐܚܒܼ. ܟܕ ܐܬܟܿܚܕ ܡܢ ܡܟܣܢܘܬܗܕ ܐܠܝܐ: ܘܠܐ ܐܝܼܬܝ ܒܝܘ̈ܡܘܗܝ ܒܝܫܬܐ ܗܝܿ ܕܩܕܝܡܐ ܚܪܝܩܐ ܗܘܬ ܥܠ ܒܝܬܗ. ܠܐ ܗܘܐ ܕܝܢ ܗܟܢܐܼ ܐܡܿܪ ܐܢܐ: ܕܗܢܘ ܚܛܗܐ ܒܠܚܘܕ ܐܝܬ ܗܘܐ ܕܡܫܬܡܿܫ ܒܡܕܝܢܬܢ. ܣܓܝ̈ܐܝܢ ܐܢܘܢ ܓܝܪ ܚܛ̈ܗܐ ܕܡܣܬܥܪ̈ܝܢ ܒܟܣܝܐ ܘܒܓܠܝܐ. ܘܡܛܠ ܕܐܦ ܡܕܒܪ̈ܢܐ ܡܫܘܬܦܝܢ ܒܗܘܢ܆ ܠܐ ܨܒܿܝܬ ܕܐܩܪܘܚ ܐܢܘܢ ܠܚܛ̈ܗܐ: ܕܠܐ ܐܬܠ ܥܠܬܐ ܠܐܝܠܝܢ ܕܪܚܡܝܢ ܕܢܬܥܠܕܘܢ܇ ܘܢܐܡܪܘܢ ܥܠܝܢ ܕܠܘܩܒܠ ܪ̈ܝܫܢܐ ܡܡܠܠ ܐܢܐ. ܕܠܐ ܕܝܢ ܟܠ ܟܠܗ ܐܫܒܩܝܗܿ ܠܨܒܘܬܐ ܟܕ ܡܚܿܦܝܐ: ܡܛܠ ܕܐܦ ܡܢ ܠܥܠ ܐܫܬܿܘܕܝܬ ܕܐܫܿܘܕܥܟ ܡܢ ܐܝܟܐ ܐܬܬܥܝܪ ܥܠܝܢ ܩܪܒܐ: ܘܕܠܐ ܬܘܒ ܐܡܿܪ ܡܕܡ ܥܠ ܡܪ̈ܚܡܐ: ܡܠܠܬܗ ܕܢܒܝܐ ܣܐܿܡ ܐܢܐ ܕܡܢܗܿ ܬܣܬܟܠ. ܗܘܿ ܕܟܕ ܚܼܙܐ ܠܒܗܢܝ ܥܡܗ ܕܡܬܚܫܚܝܢ ܒܣܘܥܪ̈ܢܐ ܕܕܡܿܝܢ ܠܗܠܝܢ ܕܝܘܡܢܐ ܡܣܬܥܪܝܢ ܒܡܕܝܢܬܢ ܘܝܬܝܪܐܝܬ ܠܘܬܟܘܢ ܘܒܟܘܠܗܿ ܟܘܪܐ. ܐܡܼܪ ܠܘܬܗܘܢ ܐܝܟ ܕܡܢ ܦܘܡܗ ܕܡܪܝܐ܆ ܕܘܝܿ ܠܕܐܡܿܪ ܠܐܒܐ ܡܢܐ ܡܘܕܠ ܐܢܬ. ܘܠܐܢܬܬܐ ܡܢܐ ܒܿܛܢܐ ܐܢܬܝ. ܥܠ ܫܪܟܐ ܕܐܚܪ̈ܢܝܬܐܼ. ܠܡܫܼܬܩ ܦܩܚ. ܡܛܠ ܕܙܿܕܩ ܗܘ ܠܡܫܡܥ ܠܡܠܬܗ ܕܟܬܒܐ ܕܐܡܿܪܐ: ܕܡܿܢ ܕܡܣܬܟܠ ܒܙܒܢܐ ܗܘܿ ܢܫܬܘܩ ܠܗ. ܡܛܠ ܕܙܒܢܐ ܗܼܘ ܕܒܝܫܬܐ. ܐܢ ܕܝܢ ܢܬܠ ܡܪܢ ܘܢܚܙܝܟ ܒܚܘܠܡܢܐܼ. ܐܝܟ ܡܐ ܕܡܨܝܢܢܼ ܡܡܠܠܝܢܢ ܥܡܟ ܥܠ ܗܠܝܢ.. ܗܫܐ ܕܝܢ ܫܡܼܥ ܥܠ ܓܘ̈ܢܚܐ ܕܐܣܬܥܪܘ ܒܫܢܬܐ ܗܕܐܼ. ܘܥܠ ܐܬܿܐ ܗܝܿ ܕܐܬܚܼܙܝܬܿ ܒܝܘܡܐ ܗܘܿ ܒܕܗ ܐܣܬܥܪܘܿ. ܡܛܠ ܕܐܦ ܗܕܐ ܗܘ ܬܒܼܥܬ ܒܐܝܕܢ. ܒܝܘܡ ܥܣܪ̈ܝܢ ܘܬܪܗܝܢ ܒܐܝܪܚ ܐܒ ܕܫܢܬܐ ܗܕܐ ܒܡܓ̈ܗܝ ܥܪܘܒܬܐܼ. ܢܘܪܐ ܣܓܝܐܬܐ ܐܬܚܼܙܝܬܿ pb. 274 ܠܢ ܟܕ ܡܬܢܒܪܫܐ ܒܦܢܝܬܐ ܕܪܒܝܐ ܟܠܗ ܠܠܝܐ. ܘܗܟܢܐ ܣܿܒܪܝܢ ܗܘܝܢܼ ܕܒܡܡܘܠܐ ܕܢܘܪܐ ܥܬܝܕܐ ܗܘܬ ܕܬܟܿܦܪ ܠܟܠܗܿ ܐܪܥܐ ܒܠܠܝܐ ܗܘܿ. ܪ̈ܚܡܘܗܝ ܕܝܢ ܕܡܪܢ ܢܛܪܘܢܢ ܕܠܐ ܢܟܝܢܐ. ܐܫܬܕܪܬ ܠܢ ܕܝܢ ܐܝܓܪܬܐ ܡܢ ܐܢܫ̈ܐ ܝܕܘ̈ܥܝܢ܇ ܕܚܿܙܝܩܢ ܗܘܼܘ ܠܐܘܪܠܡܼ. ܕܐܝܬ ܗܘܐ ܒܗܿ ܗܟܢܐ. ܕܒܗܘܿ ܠܠܝܐ ܕܒܗ ܐܬܚܼܙܝܬܿ ܢܘܪܐ ܗܝܿ ܣܓܝܐܬܐ ܕܡܬܓܘܙܠܐܼ. ܐܬܗܼܦܟܬܿ ܦܛܠܡܝܣ ܡܕܝܢܬܐ ܕܗܼܝ ܥܟܘ. ܘܠܐ ܐܫܬܚܪ ܒܗܿ ܡܕܡ ܕܩܐܿܡ. ܘܬܘܒ ܕܝܢ ܒܬܪ ܝܘ̈ܡܬܐܼ. ܐܬܘ ܠܘܬܢ ܐܢܫ̈ܐ ܨܘܪ̈ܝܐ ܘܨܕ̈ܢܝܐ ܘܐܡܼܪܘ ܠܢ܆ ܕܒܗܘܿ ܝܘܡܐ ܕܐܬܚܼܙܝܬܿ ܒܗ ܢܘܪܐ ܘܐܬܗܼܦܟܬܿ ܦܛܠܡܐܝܕܐ. ܒܗ ܒܝܘܡܐ ܗܘܿ ܢܦܼܠ ܦ̈ܠܓܝܗܝܢ ܕܡܕܝ̈ܢܬܗܘܢ. ܗܢܘ ܕܝܢ ܦܠܓܗܿ ܕܨܘܪ ܘܦܠܓܗܿ ܕܨܝܕܘܢ. ܐܦ ܒܒܪܘ ܢܦܼܠ ܒܝܬ ܫܒܬܐ ܕܝܗܘ̈ܕܝܐ ܒܠܚܘܕܘܗܝ. ܒܗ ܒܝܘܡܐ ܗܘܿ ܕܥܟܘ ܐܬܗܦܟܬܼ. ܒܢ̈ܝ ܢܩܡܘܕܝܐ ܕܝܢ ܠܣܛܢܐ ܐܫܬܠܡܘ ܕܢܬܪܕܘܢ. ܘܣܘܓܗܘܢ ܡܢ ܕܝ̈ܘܐ ܡܫܬܢܩܝܢ ܗܘܘ. ܥܕܡܐ ܕܠܡܠ̈ܘܗܝ ܕܡܪܢ ܐܬܥܗܕܘ܇ ܘܒܨܘܡܐ ܘܒܨܠܘܬܐ ܐܬܐܡܢܘܿ. ܘܩܿܒܠܘ ܐܣܝܘܬܐ.. ܐܦ ܩܘܕ ܕܝܢ ܒܪ ܦܕܘܙ ܡܠܟܐ ܕܦܪ̈ܣܝܐܼ. ܒܗ ܒܝܘܡܐ ܗܢܐ ܕܐܬܚܼܙܝܬܿ ܒܗ ܢܘܪܐ ܗܝܿ. ܟܿܢܫ ܠܟܠܗ ܚܝܠܐ ܕܦܪ̈ܣܝܐ܆ ܘܐܬܼܐ ܘܣܠܼܩ ܥܠ ܓܪܒܝܐ. ܘܥܼܠ ܒܬܚܘܡܐ ܕܪ̈ܗܘܡܝܐ. ܥܡ ܚܝܠܐ ܗܘܿ ܕܗܘ̈ܢܝܐ ܕܐܝܬ ܗܘܐ ܠܘܬܗ. ܘܫܼܪܐ ܥܠ ܬܐܕܣܘܦܝܠܣ ܕܐܪܡܢܝ. ܘܟܒܫܗܿ ܒܝܘܡ̈ܬܐ ܙܥܘܪ̈ܐ. ܡܕܒܪܢܐ ܓܝܪ ܕܐܬܪܐ ܗܘܿ. ܕܫܡܗ ܩܘܣܛܢܛܝܢܐܼ. ܡܪܕ ܥܠ ܪ̈ܗܘܡܝܐܼ. ܘܐܫܠܡ ܠܗ. ܡܛܠ ܒܥܠܕܒܒܘܬܐ ܡܕܡ ܕܐܝܬ ܗܘܬ ܠܗ ܠܘܬ ܡܠܟܐ. ܒܼܙܗܿ ܗܟܝܠ ܗܼܘ ܩܘܕ ܠܡܕܝܢܬܐ ܘܚܪܒܗܿ ܘܐܘܩܕܗܿ. pb. 275 ܘܠܟܠܗܝܢ ܩܘܪ̈ܝܐ ܕܒܦܢܬܐ ܕܓܪܒܝܐ ܐܚܪܒ. ܘܠܣܪ̈ܝܕܐ ܕܐܫܬܚܪܘ ܕܒܼܪܘ ܒܫܒܝܐ. ܘܠܩܘܣܛܢܝܢܐ ܥܒܼܕܗ ܠܗ ܪܒ ܚܝܪܐ. ܘܫܒܼܩ ܒܬܐܕܣܘܦܝܠܝܣ ܡܛܪܬܐܼ ܘܫܼܩܠ ܡܢ ܬܡܢ.

ܫܢܬ ܬܡܢ̈ܡܐ ܘܐܪ̈ܒܥ ܥܣܪܐ. ܐܦ ܥܠ ܐܬܪܐ ܕܝܢ ܕܒܝܬ ܢܗܪ̈ܘܬܐ ܕܒܗ ܥܿܡܪܝܢܢܼ ܥܩ̈ܬܐ ܪܘܪ̈ܒܬܐ ܣܡܼܟ ܒܫܢܬܐ ܗܕܐ. ܐܝܟܢܐ ܕܗܠܝܢ ܕܥܠ ܐܘܪܫܠܡ ܓܼܙܪ ܡܫܝܚܐ ܡܪܢ ܒܫܒܪܬܗ ܘܫܡܠܝ ܒܥܒܿܕܐ. ܘܐܝܠܝܢ ܬܘܒ ܕܥܠ ܘܫܠܡܗ ܕܥܠܡܐ ܗܢܐ ܐܬܡܿܠܠܼ. ܢܗܼܘ̈ܝܢ ܠܚ̈ܡܢ ܐܦ ܠܐܝܠܝܢ ܕܠܢ ܓܼܕܫ̈ ܒܙܒܢܐ ܗܢܐ. ܡܢ ܒܬܪ ܓܝܪ ܕܗܘܘ ܙܘ̈ܥܐ ܒܕܘܟܐ ܕܘܟܐܐܝܟ ܡܐ ܕܟܿܬܒܬ ܠܟ: ܘܡܢ ܒܬܪ ܕܗܘܘ ܟܦ̈ܢܐ ܘܡܘ̈ܬܢܐ: ܘܗܼܘ̈ܝ ܕܚܠ̈ܬܐ ܘܣܘܪ̈ܕܐ: ܘܐܬܘ̈ܬܐ ܪܘܪ̈ܒܬܐ ܡܢ ܫܡܝܐ ܐܬܚ̈ܙܝܼ. ܩܡ ܥܡܐ ܥܠ ܥܡܐ ܘܡܠܟܘ ܥܠ ܡܠܟܘ. ܘܢܦܼܠܢܢ ܒܦܘܡܐ ܕܚܪܒܐ. ܘܐܫܬܼܒܝܢ ܠܟܠ ܐܬܪ. ܘܐܬܕܝܫܘܼ ܐܬܪܢ ܡܢ ܥܡ̈ܡܐ ܢܘܟܪ̈ܝܐ. ܐܝܟܢܐ ܕܐܠܘܠܐ ܒܡܠ̈ܘܗܝ ܕܡܪܢ ܕܐܡܼܪ: ܕܡܐ ܕܫܡܿܥܝܢ ܐܢܬܘܢ ܩܪ̈ܒܐ ܘܫܓܘ̈ܫܝܐ ܠܐ ܬܕܚܠܘܢ܆ ܥܬܝ̈ܕܢ ܐܢܝܢ ܓܝܪ ܠܘܩܕܡ ܗܠܝܢ ܠܡܗܘܐ: ܐܠܐ ܠܐ ܥܕܟܝܠ ܡܼܛܬܿ ܚܪܬܐ. ܡܡܪܚܝܢ ܗܘܝܢ ܠܡܐܡܪ ܕܡܼܛܐ ܠܗ ܫܠܘܡܗ ܕܥܠܡܐ. ܡܛܠ ܕܐܦ ܣܓܝ̈ܐܐ ܗܟܢܐ ܐܬܪܥܝܘ ܘܐܡܼܪܘ. ܚܢܢ ܕܝܢ ܡܬܒܩܝܢ ܗܼܘܝܢ ܕܠܘ ܒܟܠܗ ܥܠܡܐ ܗܘܐ ܩܪܒܐ ܗܢܐ. ܘܥܡ ܗܕܐ ܐܬܥܗܕܢ ܐܦ ܠܡܠ̈ܘܗܝ ܕܛܘܒܢܐ ܦܘܠܘܣ܆ ܗܿܢܝܢ ܕܒ̈ܝܢ ܙܗܿܪ ܗܘܐ ܠܬܣ̈ܠܘܢܩܝܐ ܡܛܠ ܡܬܝܬܗ ܕܡܪܢ ܟܕ ܐܡܿܪ܇ ܕܠܐ ܢܬܬܘܗܘܢ ܠܐ ܡܢ ܡܠܬܐ ܘܠܐ ܡܢ ܪܘܚܐ: ܘܠܐ ܡܢ ܐܝܓܪܬܐ ܡܫܓܝܢܝܬܐܼ. ܕܐܝܟ ܕܡܢ pb. 276 ܠܘܬܗ ܗܝ. ܕܗܐ ܠܡ ܡܿܛܝ ܝܘܡܗ ܕܡܪܝܐ: ܘܚܘܝ ܕܠܐ ܡܨܝܐ ܕܢܗܘܐ ܫܘܠܡܐ ܥܕܡܐ ܕܡܬܓܠܐ ܡܫܝܚܐ ܕܓܠܐ. ܡܢ ܗܠܝܢ ܗܟܝܠ ܡ̈ܠܐ ܕܡܪܢ ܘܕܫܠܝܚܗ ܐܣܬܟܠܢ܆ ܕܠܐ ܗܘܐ ܡܛܠ ܕܙܒܢܐ ܗܘܐܚܪܝܐܼ ܓܕܫ ܠܢ ܗܠܝܢ܆ ܐܠܐ ܠܡܪܕܘܬܐ ܕܝܠܢ ܗܘ̈ܝ ܡܛ ܠܕܥܫܢܘ ܚܛ̈ܗܝܢ... ܐܬܼܐ ܓܝܪ ܩܘܕ ܡܿܠܟܐ ܕܦܘܪ̈ܣܝܐ ܡܢ ܓܪܒܝܐ: ܒܝܘܡ ܚܡ̈ܫܐ ܒܐܝܪܚ ܬܫܪܝ ܩܕܝܡ܆ ܒܝܘܡ ܫܒܬܐܼ. ܘܫܼܪܐ ܥܠ ܐܡܕ ܡܕܝܢܬܐ ܕܐܝܬܝܗܿ ܠܘܬܢ ܒܝܬ ܢܗܪ̈ܘܬܐ. ܗܘܼ ܘܟܠܗ ܚܝܠܗ. ܐܢܣܛܘܣ ܕܝܢ ܡܠܟܐ ܕܪ̈ܗܘܡܝܐ: ܟܕ ܫܡܼܥ ܕܟܿܢܼܫ ܩܘܕ ܚܝܠܗ܆ ܠܐ ܨܼܒܐ ܕܢܪܥܼܝܘܗܝ ܒܩܪܒܐ. ܡܛܠ ܕܠܐ ܢܬܐܫܕ ܕܡܐ ܕܬܪ̈ܝܗܘܢ ܓܒ̈ܐ. ܐܠܐ ܫܕܪ ܠܗ ܕܗܒܐ ܒܝܕ ܪܘܦܢܐ ܘܦܩܼܕܗܼ ܕܐܢ ܗܘܼ ܕܥܠ ܬܚܙܐ ܐܝܬܘܗܝ ܩܘܕ܇ ܘܥܕܟܝܠ ܠܐ ܥܒܝܪ ܠܒܝܬ ܪ̈ܗܘܡܝܐ܆ ܢܬܠ ܠܗ ܕܗܒܐܼ ܘܢܫܪܝܘܗܝ. ܟܕ ܕܝܢ ܡܛܼܐ ܪܘܦܝܢܐ ܠܩܣܪܝܐ ܕܩܦܕܘܩܝܐ܇ ܫܡܼܥ ܕܐܚܪܒ ܐܢܝ̈ܢ ܩܘܕ܇ ܠܐܓܝܠ ܘܠܨܘܦ ܘܠܐܪܡܢܝ ܘܠܥܪܒܼ. ܫܒܼܩܗ ܠܕܗܒܐ ܒܩܣܪܝܐ ܘܐܙܼܠ ܠܘܬܗ. ܘܐܡܼܪ ܠܗ ܕܢܦܘܩ ܡܢ ܬܚܘܡܐ ܘܢܿܣܒ ܕܗܒܐ. ܗܘܼ ܕܝܢ ܠܐ ܨܒܼܐ. ܐܠܐ ܐܚܕܗ ܠܪܘܦܢܐ. ܘܦܩܼܕ ܕܢܬܢܼܛܪ. ܘܐܬܟܬܫ ܥܠ ܐܡܕܼ ܗܘܼ ܘܟܠܗ ܚܝܠܗ ܒܟܠ ܐܣܟܝܡ ܕܩܪܒܐ. ܒܐܝܡܡܐ ܘܒܠܠܝܐ. ܘܒܢܼܐ ܥܠܝܗܿ ܟܘܕܢܬܐ. ܘܒܢܼܘ ܐܡ̈ܕܝܐ ܘܐܘܣܦ ܥܠ ܪܘܡܗ ܕܫܘܪܐ. ܘܟܕ ܐܬܬܪܝܡܬ ܟܘܕܢܬܐܼ. ܩܿܪܒܘ ܪܝܫ ܕܟܪܐ ܦܘܪ̈ܣܝܐ. ܘܟܕ ܢܩܫܼܘ ܒܫܘܪܐ ܬܟܝܒܐܝܬ ܐܬܪܦܝ ܒܢܝܢܐ ܗܘܿ ܚܕܬܐ. ܡܛܠ ܕܠܐ ܥܕܟܝܠ ܐܬܝܬܒ ܗܘܼܐ ܘܢܦܼܠ. ܐܡܕ̈ܝܐ ܕܝܢ ܦܠܫܘ ܦܘܠܫܬܐ ܒܫܘܪܐ ܬܚܝܬ ܟܘܕܢܬܐܼ. ܘܓܼܪܘܗܝ ܠܡܕܪܐ ܕܟܫܼܐ ܗܘܐ ܒܗܿ ܠܓܘ ܡܕܝܢܬܐ ܟܣܝܐܝܬ܆ ܟܕ ܬܠܿܝܢ pb. 277 ܗܘܘ ܠܗ ܠܥܒܕܐ ܒܩܝ̈ܡܬܐ. ܘܐܬܦܚܬܬܿ ܟܘܕܢܬܐ ܘܢܦܼܠܬܿ. ܘܟܕ ܠܐ ܡܬܡܨܐ ܗܘܐ ܩܘܕ ܚܝܠܗܿ ܕܡܕܝܢܬܐܼ. ܫܕܪ ܠܢܥܡܢ ܡܿܠܟܐ ܕܛܝ̈ܝܐ ܥܡ ܟܠܗ ܚܝܠܗܼ. ܕܢܐܙܠܘܢ ܥܠ ܬܝܡܢܐ ܠܒܝܬ ܚܪ̈ܢܝܐ. ܘܐܦ ܡܢ ܚܝܠܐ ܕܦܘܪ̈ܣܝܐ ܩܪܒܼܘ ܠܩܕܡܝܗܘܢܼ. ܥܕܡܐ ܠܩܘܣܛܢܛܝܢܐ ܡܕܝܢܬܐ ܕܗܼܝ ܬܠܐ. ܘܒܿܙܝܢ ܗܘܘ ܘܚܿܛܦܝܢ ܘܡܿܚܪܒܝܢ ܠܟܠܗ ܐܬܪܐ. ܒܝܘܡ ܬܫܬܥܣܪ̈ ܕܝܢ ܒܗ ܒܝܪܚܐ ܕܬܫܪܝ ܐܚܪܝ. ܢܦܼܩ ܐܠܘܡܦܝܣ ܕܘܟܣܬ ܕܬܠܐ ܘܐܘܓܢܝܣ ܕܘܟܣ ܕܡܠܝܛܝܢܐܿ ܕܢܚܬ ܗܘܐ ܒܗ ܒܙܢܐܼ. ܗܼܢܘܢ ܘܚܝܠܗܘܢ܆ ܘܠܐܝܠܝܢ ܦܘܪ̈ܣܝܐ ܕܐܫܟܚ ܒܩܘܪܗܝܐ ܕܚܕܪ̈ܝ ܬܠܐܼ. ܚܼܪܒ ܐܢܘܢ. ܘܟܕ ܐܬܦܢܝܘ ܠܡܥܛܦ ܠܡܕܝܢܬܐܼ. ܐܘܕܥ ܐܢܘܢ ܐܢܫܼ. ܕܚܡ̈ܫܡܐܐ ܐܢܫ̈ܝܢ ܐܝܬ ܒܚܝܠܐ ܚܕ. ܘܠܘ ܣܿܓܝ ܪܚܝܩܝܢ ܡܢܗܘܢ. ܘܗܼܢܘܢ ܐܬܛܝܒܘ ܠܡܐܼܙܠ ܥܠܝܗܘܢ. ܘܚܝܠܐ ܕܪ̈ܗܘܡܝܐ ܕܥܡܗܘܢ܇ ܐܬܦܠܗܕܘ ܗܘܘ ܠܗܘܢ ܠܡܿܫܠܚܘ ܩܛܝ̈ܠܐ. ܘܡܛܠ ܕܠܠܝܐ ܗܘܼܐ ܦܩܕ ܐܠܘܡܦܝܣ ܕܢܿܕܠܩܘܢ ܢܘܪܐ ܥܠ ܪܝܫ ܪܡܬܐ. ܘܢܩܪܘܢ ܒܩܪ̈ܢܬܐ ܐܝܟ ܡܢ ܕܢܬܟܢܫܘܢ ܠܘܬܗܘܢ ܐܝܠܝܢ ܕܐܬܦܠܗܕܘ. ܡܪ̈ܙܒܢܐ ܕܝܢ ܕܦܘܪ̈ܣܝܐ ܗܠܝܢ ܕܫܪܝܢ ܗܘܘ ܒܬܠܒܫܡܝ ܩܪܝܬܐ. ܟܕ ܚܼܙܘ ܙܗܪܐ ܕܢܘܪܐ ܘܫܡܼܥ ܩܠܐ ܕܩܪ̈ܢܬܐ܆ ܙܿܝܢܘ ܠܟܠܗ ܚܝܠܗܘܢ ܘܐܬܼܘ ܥܠܝܗܘܢ. ܘܟܕ ܚܼܙܘ ܦܪ̈ܫܐ ܕܪ̈ܗܘܡܝܐ ܠܦܘܪ̈ܣܝܐ ܕܣ̈ܓܝܐܝܢ ܐܢܘܢ ܡܢܗܘܢܼ. ܗܦܼܟ ܠܗܘܢ. ܪ̈ܓܠܝܐ ܕܝܢ ܠܐ ܐܡܕܘ ܠܡܬܦܿܠܛܘܼ. ܐܠܐ ܐܬܠܼܨܘ ܠܗܘܢ ܠܡܩܪܒܘ. ܘܐܬܟܢܫ ܘ ܐܣܬܕܪܘ ܠܩܪܒܐ. ܘܥܒܕ ܠܗܿܝ ܕܡܬܩܪܐ ܟܠܘܢܢ ܕܗܼܝ ܓܐܠܐ. ܘܐܩܪܒܘ ܥܕܢܐ ܣܓܝܐܐ. ܘܟܕ ܣܼܓܐ ܠܗ ܥܠܝܗܘܢ (ܚܝܠܐ) ܕܦܘܪ̈ܣܝܐ܆ ܘܐܬܬܘܣܦܘ ܬܘܒ ܥܠܝܗܘܢ ܗܘ̈ܢܝܐ ܘܛܝ̈ܝܐܼ. pb. 278 ܘܐܬܬܪܥܘ ܠܗ ܣܕܪ̈ܝܗܘܢ ܘܐܫܬܓܫܘ ܒܚ̈ܕܕܐ. ܘܐܬܚܠܦܛܘ ܒܝܢܬ ܦܪ̈ܫܐ. ܘܒܛܦܪܗܐ ܕܪ̈ܟܫܐ ܕܛܝ̈ܝܐ ܐܬܬܕܝܫ ܘܐܬܡܥܼܣܘ ܘܐܬܚܪܒܘ ܣܓܝ̈ܐܐ ܡܢ ܪ̈ܗܘܡܝܐܼ ܘܫܪܟܐ ܐܫܬܼܒܝ.. ܘܒܝܘܡ ܥܣܪܝܢ ܘܫ̈ܬܐ ܒܗܼ ܒܝܪܚܐ ܗܢܐ: ܐܬܼܐ ܐܦ ܢܥܡܢ ܡܢ ܬܝܡܢܐ ܘܥܼܠ ܠܒܝܬ ܚܪ̈ܢܝܐ܇ ܘܚܼܪܒ ܘܒܙܼ. ܘܫܒܼܐ ܐܢܫܘܬܐ ܘܒܥܝܪܐ ܘܩܢܝܢܐ ܕܟܠܗ ܒܝܬ ܚܪ̈ܢܝܐ. ܘܐܬܼܐ ܐܦ ܥܕܡܐ ܠܐܘܪܗܝ. ܟܕ ܡܿܚܪܒ ܘܒܝܿܙ ܘܫܿܒܐ ܠܟܠܗ̈ܝܢ ܩܘܪ̈ܝܐ ܡܢܝܢܐ ܕܒܢܝ̈ܢܫܐ ܕܕܒܼܪ ܒܫܒܝܬܐܼ. ܬܡ̈ܢܬܥܣܪ ܐܠܦ̈ܝܢ ܘܚܡܫ̈ܡܐܐ. ܣܛܪ ܡܢ ܐܝܠܝܠܢ ܕܐܬܩܛܠܘ ܘܣܛܪ ܡܢ ܒܥܝܪܐ ܘܩܢܝܢܐ ܘܒܙܬܐ ܕܟܠ ܨܒܘ̈ܢ. ܥܠܬܐ ܕܝܢ ܕܟܠܗ ܥܡܐ ܗܢܐ ܢܫܬܟܚ ܒܩܘܪ̈ܝܣܼ. ܗܘܼܐ ܙܒܢܐ ܕܩܛܦܐ. ܕܠܘ ܒܠܚܘܕ ܒܢ̈ܝ ܩܘܪ̈ܝܐ ܢܿܦܩܝܢ ܗܘܘ ܠܩܛܦܐܼ. ܐܠܐ ܣܓܝ̈ܐܐ ܚܪ̈ܢܝܐ ܘܐܘܪ̈ܗܝܐ ܢܦܩܘ ܘܐܫܬܒܝ. ܘܡܛܠ ܗܠܝܢ ܐܬܬܚܕܬܿ ܐܘܪܗܝ ܘܡܬܢܛܪܐ ܗܘܬ. ܘܐܬܚܦܪܘ ܦܣ̈ܐ ܘܐܬܬܩܢ ܫܘܪܐ. ܘܐܣܬܪܦܘ ܬܪ̈ܥܐ ܕܡܕܝܢܬܐ ܒܦ̈ܣܝܠܬܐ. ܡܛܠ ܕܒܠܝܝܢ ܗܘܘ. ܘܒܥܼܘ ܕܢܚܕܬܘܢ ܐܢܘܢ܇ ܘܢܥܒܕܘܢ ܡܘ̈ܟܠܐ ܠܩܛܪ̈ܩܛܐ ܕܢܗܪܐ܇ ܕܕܠܡܐ ܐܢܫ ܢܥܘܠ ܡܢܗܘܢ. ܘܠܐ ܐܫܬܟܚ ܦܪܙܠܐ ܕܣܿܦܩ ܠܗ ܠܥܒܿܕܐ. ܘܐܬܦܼܩܕ ܦܘܩܕܢܐܼ. ܕܬܬܠ ܟܠ ܕܪܬܐ ܕܐܝܬ ܒܐܘܪܗܝ ܥܣܪ ܠܝܛܪ̈ܝܢ ܦܪܙܠܐ. ܘܟܕ ܗܕܐ ܐܣܬܥܪܬܿ ܐܬܓܡܪ ܥܒܿܕܐ. ܐܘܓܢܝܣ ܕܝܢ ܟܕ ܚܼܙܐ ܕܠܐ ܡܫܟܚ ܕܢܪܘܥ ܠܦܘܪ̈ܣܝܐ ܟܠܗܘܢ܆ ܕܒܼܪ ܠܚܝܠܐ ܕܐܫܬܚܪ ܠܗܼ ܘܐܙܼܠ ܥܠ ܡܛܪܬܐ ܗܝܿ ܕܐܝܬ ܗܘܼܬ ܠܗܘܢ ܒܬܐܕܣܘܦܘܠܣ ܘܚܼܪܒ ܠܐܝܠܝܢ ܕܐܝܬ ܗܘܐ ܒܗܿ ܘܢܣܒܗܿ ܠܡܕܝܢܬܐ ..ܩܘܕ ܕܝܢ ܥܕܟܝܠ ܥܠ ܐܡܕ ܡܿܩܪܒ ܗܘܐ. ܘܡܬܚܼܪܐ ܗܘܐ ܘܥܧܡܠ ܕܢܪܝܡܝܗܿ ܠܟܘܕܢܬܐ ܗܝܿ ܕܢܦܼܠܬܿ. ܘܦܩܼܕ ܠܦܪ̈ܣܝܐ ܕܒܟ̈ܐܦܐ pb. 279 ܘܒܩܝ̈ܣܐ ܢܡܠܘܢܗܿ ܘܕܢܝܿܬܘܢ ܡ̈ܐܢܐ ܕܣܥܪܐ ܘܕܥܡܪܐ ܘܕܟܬܢܐ: ܘܢܥܒܕܘܢ ܐܢܘܢ ܒܕܡܘܬ ܫܠ̈ܝܦܐ ܐܘ ܣ̈ܩܐܼ. ܘܢܡܠܘܢܐܢܘܢ ܡܕܪܐܼ ܘܢܒܢܘܢܠܥܠ ܡܢ ܟܘܕܢܬܐܗܝܿ ܕܥܒܕ ܐܝܟ ܕܬܪܝܡܠܘܩܒܠ ܫܘܪܐ ܩܠܝܠܐܝܬ. ܗܝܕܝܢ ܐܡ̈ܕܝܐ ܪܟܒ ܡܐܢܐ. ܗܘܿ ܕܗܼܢܘܢ ܦܘܪ̈ܣܝܐ ܛܘܒܚܐ ܟܢܝܘܗܝܼ. ܡܛܠ ܗܝܿ ܕܠܟܠܗ ܥܡܠܗܘܢ ܥܿܘܟ. ܘܠܗܘܢ ܚܿܒܠ. ܫܿܕܝܢ ܗܘܘ ܒܗ ܓܝܪ ܐܡܗܕܝܐ ܒܡܐܢܐ ܗܘܼܿ. ܟ̈ܐܦܐ ܪܘܪ̈ܒܬܐܼ ܕܬܩܠܐ ܗܘܬ ܚܕܐ ܡܢܗܝܢ ܝܬܝܪ ܡܢ ܬܠܬ̈ܡܐܐ ܠܝܛܪ̈ܝܢ. ܘܗܟܢܐܐܬܬܠܚܬ ܬܟܣܝܬܐ ܕܥܡܪ ܟܘܒܐ ܕܡܣܬܬܪܝܢ ܗܘܘ ܦܘܪ̈ܣܝܐ ܬܚܬܝܗܿ. ܘܐܬܛܒܚܘ ܐܝܠܝܢ ܕܬܚܘܬܝܗܿ ܩܿܝܡܝܢ ܗܘܘ. ܘܐܬܬܒܪ ܐܦ ܪܝܫ ܕܟܪܐ. ܡܛܠ ܐܡܝܢܘܬܗܝܢ ܕܟ̈ܐܦܐ ܕܕܠܐ ܫܘܠܐ ܡܫܬܕܝܢ ܗܘ̈ܝ. ܠܐ ܓܝܪ ܡܨܝܢ ܗܘܘ ܐܡܕ̈ܝܐ ܕܒܡܕܡ ܐܚܪܢܐ ܢܣܿܓܦܘܢ ܐܢܘܢ ܠܦܪ̈ܣܝܐ: ܐܝܟ ܕܒܝܕ ܟ̈ܐܦܐ ܪܘܪ̈ܒܬܐ. ܡܛܠ ܕܬܟܣܝܬܐ ܗܝܿ ܕܥܡܪ ܟܘܒܐ ܕܪܨܝܕܐ ܗܘܬ ܥܠ (ܟܘܕܢܬܐ) ܙܒܢ̈ܝܢ ܣ̈ܓܝܐܢ܆ ܘܡܫܿܦܥܝܢ ܗܘܘ ܥܠܝܗܿ ܦܘܪ̈ܣܝܐ ܡܝ̈ܐ. ܘܠܐ ܡܬܢܟܝܐ ܗܘܬ ܡܢ ܓܐܪ̈ܐ ܡܛܠ ܥܒܝܘܬܗܿ. ܘܠܐ ܡܢ ܢܘܪܐ ܡܛܠ ܪܛܝܒܘܬܗܿ. ܟ̈ܐܦܐ ܕܝܢ ܗܠܝܢ ܪܘܪ̈ܒܬܐ ܕܡܢ ܛܘܒܚܐ ܡܫܬܕܝܢ ܗܘ̈ܝ. ܠܬܟܣܝܬܐ ܘܠܓܒܪ̈ܐ ܘܠܡ̈ܐܢܝ ܙܝܢܐ ܚܿܒܠ. ܘܗܟܢܐ ܐܙܕܟܝܘ ܦܘܪ̈ܣܝܐ ܘܐܗܡܝܘ ܡܢ ܕܠܡܥܡܠ ܒܟܘܕܢܬܐ ܗܝ܇ ܘܐܬܡܠܟܘ ܕܢܗܦܟܘܢ ܠܐܬܪܗܘܢ. ܡܛܠ ܕܒܬܠܬ̈ܐ ܝܪ̈ܚܝܢ ܕܝܬܿܒܘ ܥܠܝܗܿ܆ ܚܡ̈ܫܝܢ ܐܠܦܝܢ ܡܢܗܘܢ ܐܬܚܪܒܘ ܒܩܪ̈ܒܐ ܕܟܠܝܘܡ ܡܬܥܒܕܝܢ ܗܘܘ ܒܠܠܝܐ ܘܒܐܝܡܡܐ.. ܐܡܕ̈ܝܐ ܕܝܢ ܐܬܬܟܠܘ ܥܠ ܙܟܘܬܗܘܢ ܘܢܦܠܘ ܒܡܗܡܝܢܘܬܐ ܘܠܐ ܢܛܪܘ ܫܘܪܐ ܒܚܦܝܛܘܬܐܼ ܐܝܟ ܕܡܢ ܩܕܝܡ. ܘܒܝܘܡ ܥܣܪ̈ܐ ܒܐܪܚ ܟܢܘܢ ܚܪܝ ܚܡܪܐ ܣܓܝܐܐ ܐܫܬܼܝܘ pb. 280 ܢܛܪ̈ܝ ܫܘܪܐ ܡܛܠ ܥܠܬܐ ܕܩܘܪܫܐ. ܘܟܕ ܗܘܐ ܠܠܝܐ ܕܡܟܘ ܘܐܬܛܒܥܘ ܒܫܼܢܬܐ ܝܩܝܪܬܐ. ܘܐܚܪ̈ܢܐ ܫܒܩܘ ܡܛܪܬܗܘܢܼ ܡܛܠ ܕܡܛܪܐ ܢܚܿܬ ܗܘܐ ܘܢܚܼܬ ܠܡܣܬܬܪܘ ܒܒ̈ܬܝܗܘܢ. ܐܢ ܗܟܝܠ ܒܪܦܝܘܬܐ ܗܕܐܼ ܐܝܟ ܡܐ ܕܚܢܢ ܣܿܒܪܝܢܢܼ ܘܐܢ ܒܢܟܠܐ ܕܡܫܠܡܢܘܬܐܼ ܐܝܟ ܕܐܢܫ̈ܝܢ ܐܡܼܕ܇ ܘܐܢ ܒܡܣܡ ܒܪܝܫܐ ܕܡܢ ܐܠܗܐܼ. ܦܘܪ̈ܣܝܐ ܐܫܬܠܛܘ ܒܫܘܪܐ ܕܐܡܕ ܒܝܕ ܣܒ̈ܠܬܐ. ܟܕ ܠܐ ܬܪ̈ܥܐ ܦܬܝܚܝܢܼ ܘܠܐ ܫܘܪܐ ܬܪܝܥ. ܘܚܪܒܘܗܿ ܠܡܕܝܢܬܐ: ܘܒܙܘ ܩܢܝܢܗܿ ܘܕܫ ܩܘܕܫܐ. ܘܨܥܪ ܬܫܡܫܬܗܿ. ܘܫܠܚ ܗܝܟܠ̈ܝܗܿ. ܘܕܒܪ ܒܫܒܝܬܐܠܥܡܘܪ̈ܝܗܿ. ܣܛܪ ܡܢ ܣ̈ܒܐ ܘܣܓܝ̈ܦܐ ܘܐܝܠܝܢ ܕܐܬܛܿܫܝܘ. ܘܫܒܩܘ ܬܡܢ ܡܛܪܬܐ ܬܠܬ̈ܐ ܐܠܦ̈ܝܢ ܓܒܪ̈ܝܢ. ܘܢܚܼܬܘ ܟܠܗܘܢ ܠܛܘܪܐ ܕܫܝܓܪ. ܡܛܠ ܕܝܢ ܕܠܐ ܢܬܐܠܨܘܢ ܦܘܪ̈ܣܝܐ ܕܦܼܫ ܡܢ ܪܝܚܐ ܕܫܠ̈ܕܝܗܘܢ ܕܐܡܕܝ̈ܐ܆ ܐܦܩܘ ܘܟܫܘ ܐܢܝܢ ܬܪ̈ܬܝܢ ܟܫ̈ܝܢ ܠܒܪ ܡܢ ܬܪܥܐ ܓܪܒܝܝܐ. ܕܗܘܿܐ ܗܘܐ ܡܢܝܢܐ ܕܐܝܠܝܢ ܕܢܦܼܩܘ ܒܗ ܒܬܪܥܐ ܓܪܒܝܝܐܼ ܝܬܝܪ ܡܢ ܬܡܢ̈ܝܢܐܠܦ̈ܝܢ܆ ܣܛܪ ܡܢ ܐܠܝܠܝܢ ܕܐܦܩ ܟܕ ܚܝܝܢ. ܘܪܓܡܘ ܐܢܘܢ ܠܒܪ ܡܢ ܡܕܝܢܬܐ. ܘܣܛܪ ܡܢ ܐܝܠܝܢ ܕܕܿܓܫ ܠܥܠ ܡܢ ܟܘܕܢܬܐ ܗܝܿ ܕܥܒܕ. ܘܣܛܪ ܡܢ ܐܝܠܝܢ ܕܐܫܕܝܘܢ ܒܕܩܠܬ. ܘܕܡܝܼܬ ܒܟܠ ܫܘܚܠ̈ܦܝܢ ܕܠܐ ܣܿܦܩܝܢܢ ܠܡܬܢܝܘ ܥܠ ܡܘ̈ܬܝܗܘܢ.. ܗܝܕܝܢ ܫܪܝܗܝ ܩܘܕ ܠܪܘܦܝܢܐ ܕܢܼܐܙܠ ܘܢܬܢܐ ܠܡܠܟܐ ܐܝܠܝܢ ܕܐܣܬܥܪܘ. ܗܘܼ ܕܝܢ ܒܟܠܕܘܟ ܥܠ ܚܘ̈ܒܠܐ ܗܠܝܢ ܡܬܿܢܐ ܗܘܐ. ܘܡܢ ܗܠܝܢ ܛܒ̈ܐ ܐܬܪ̈ܗܒ ܡܕܝ̈ܢܬܐ ܕܒܡܕܢ̈ܚܝ ܦܪܬ. ܘܐܬܛܝܒ ܠܡܥܼܪܩ ܠܡܥܪܒܐ. ܡܝܩܪܐ ܕܝܢ ܝܥܩܘܒ ܦܪܝܘܕܘܛܐܼ ܗܘܿ pb. 281 ܕܡܐܡܪ̈ܐ ܣ̈ܓܝܐܐ ܣܝܼܡܝܢ ܠܗ ܥܠ ܦܣܘ̈ܩܐ ܕܟܬܒ̈ܐܼ ܘܣܘ̈ܓܝܬܐ ܘܙܡܝܪ̈ܬܐ ܥܒܝܕ ܠܗ ܥܠ ܙܒܢܐ ܗܘܿ ܕܩܡܨܐܿ. ܠܐ ܐܗܡܼܝ ܐܦܠܐ ܒܙܒܢܐ ܗܠܢܐ ܡܢ ܐܝܕܐ ܕܦܐܝܐ ܗܘܬ ܠܗ. ܐܠܐ ܟܬܼܒ ܐܝܓܪ̈ܬܐ ܕܡܪܬܝܢܘܬܐ ܠܟܠܗܝܢ ܡܕܝ̈ܢܬܐ. ܟܕ ܡܿܬܟܠ ܠܗܘܢ ܥܠ ܦܘܪܩܢܐ ܕܐܠܗܐ. ܘܡܠܒܒ ܠܗܘܢ. ܕܠܐ ܢܥܪܩܘܢ. ܐܦ ܡܠܟܐ ܐܢܣܛܘܣ ܟܕ ܫܡܼܥ ܫܕܪ ܚܝܠܐ ܣܓܝܐܐ ܕܪ̈ܗܘܡܝܐ ܕܢܿܣܬܘܢ ܒܗܝܢ ܒܡܕܝ̈ܢܬܐ ܘܢܛܪܘܢ ܐܢܝܢ. ܠܩܘܕ ܕܝܢ ܠܐ ܣܦܼܩܬܿ ܠܗ ܒܙܬܐ ܟܼܠܗܿ ܕܒܼܙ ܘܫܒܼܝܬܐ ܕܫܒܼܐ. ܘܠܐ ܣܒܼܥ ܡܢ ܕܡܐ ܣܓܝܐܐ ܕܐܫܕܘ. ܐܠܐ ܫܕܪ ܐܝܙ̈ܓܕܐ ܠܘܬ ܡܠܟܐܼ ܕܫܿܕܪ ܠܝ ܕܗܒܐ. ܐܘ ܩܿܒܠ ܩܪܒܐ. ܗܠܝܢܼ ܒܐܪܚ ܢܝܣܢ. ܡܠܟܐ ܕܝܢ ܕܗܒܐ ܠܐ ܫܕܪ: ܐܠܐ ܐܬܛܝܒ ܠܡܬܢܿܩܡܘ ܘܠܡܬܒܥ ܥܝܪܬܐ ܕܐܝܠܝܢ ܕܐܒܼܕܘ. ܘܒܐܝܪܚ ܐܝܪ ܫܕܪ ܥܠܘܗܝ ܬܠܬ̈ܐ ܪ̈ܝܫܝ ܚܝܠ̈ܘܬܐ. ܐܪܒܝܢܕܐ ܘܦܛܪܝܩ ܘܗܘܦܛܼ ܘܡܕܒܪ̈ܐ ܣܓܝ̈ܐܐ ܥܡܗܘܢ. ܘܢܚܼܬ ܐܪܒܝܢܕܐ ܘܫܼܪܐ ܥܠ ܬܚܘܡܐ ܠܘܬ ܕܪܐ ܘܥܡ̈ܘܕܝܢ ܠܐܦ̈ܝ ܢܨܒܝܢ ܡܕܝܢܬܐ. ܘܐܝܬ ܗܘܐ ܥܡܗܼ ܬܪܥܣܪ̈ ܐܠܦ̈ܝܢ ܓܒܪܗܝܢ. ܘܦܛܪܝܩ ܘܗܘܦܛܣ ܫܪܘ ܥܠ ܐܡܕ. ܠܡܦܩܘ ܡܢ ܢܬܡܢ ܡܛܪܬܐ ܕܦܪ̈ܣܝܐ. ܘܐܝܬ ܗܘܐ ܥܡܗܘܢ ܐܪ̈ܒܥܝܢ ܐܠܦ̈ܝܢ. ܢܚܼܬ ܕܝܢ ܐܦ ܒܙܒܢܐ ܗܢܐܼ ܐܦܝܘܢ ܗܘܦܟܪܐܼ ܘܝܬܼܒ ܒܐܘܪܗܝ ܠܡܐܨܦ ܕܬܪܣܝܬܗ ܕܚܝܠܐ ܕܪ̈ܘܡܝܐ ܕܥܡܗܘܢ. ܘܡܛܠ ܕܠܐ ܡܿܡܕܝܢ ܗܘܘ ܢܚ̈ܬܘܡܐ ܠܡܥܒܕ ܠܚܡܐܼ. ܦܩܼܕ ܕܢܬܝ̈ܗܒܢ ܚ̈ܛܐ ܠܟܠܗܝܢ ܕܪ̈ܬܐ ܕܐܝܬ ܒܐܘܪܗܝܼ ܘܢܥܒܕܘܢ ܒܘܩܠܛܢ ܒܢܦ̈ܩܬܐ ܕܝܠܗܘܢ. ܘܐܦܩܘ ܐܘܪ̈ܗܝܐ ܒܙܒܢܬܐ ܩܕܡܝܬܐܼ ܫܬܡ̈ܐܐ ܘܬܠܬ̈ܝܢ ܐܠܦ̈ܝܢ ܡ̈ܕܘܬܐ.. ܩܘܕ ܕܝܢ ܟܕ ܚܼܙܐ pb. 282 ܕܙܥܘܪܝܢ ܐܢܘܢ ܗܠܝܢ ܕܒܝܬ ܐܪܒܝܢܕܐܼ. ܫܕܪ ܥܠܝܗܘܢ ܚܝܠܐ ܕܐܝܼܬ ܗܘܐ ܠܘܬܗ ܒܫܝܓܪܼ ܥܣܪ̈ܝܢ ܐܠܦ̈ܝܢ ܦܘܪ̈ܣܝܐ. ܘܪܕܦ ܐܢܘܢ ܐܪܒܝܢܕܐ ܙܒܢܬܐ ܘܬܪ̈ܬܝܢ. ܥܕܡܐ ܕܐܬܬܚܝܘ ܠܘܬ ܬܪܥܐ ܕܢܨܒܝܢ܆ ܟܕ ܡܬܚܪܒܝܢ. ܘܣܓܝ̈ܐܐ ܡܢ ܥܪ̈ܘܩܐ ܒܬܪܥܐ ܐܬܚܢܩܘܼ. ܟܕ ܚܿܒܨܝܢ ܠܡܥܠ.. ܒܐܪܚ ܬܡܘܙ ܕܝܢ ܐܬܟܢܫܘ ܥܡ ܦܘܪ̈ܣܝܐܼ. ܐܦ ܗܘ̈ܢܝܐ ܘܛܝܝ̈ܐ ܠܡܐܬܐ ܥܠܘܗܝ. ܘܩܘܣܛܢܛܝܢܐ ܒܪܝܫܗܘܢ. ܘܟܕ ܝܠܼܦ ܗܕܐ ܡܢ ܓܫܘ̈ܫܐ܆ ܫܕܪ ܠܩܠܝܘܦ ܚܠܒܝܐ ܠܘܬ ܦܛܪܝܩ ܘܗܦܝܛ ܟܕ ܐܡܿܪ. ܕܬܘ ܠܘܬܝ ܘܗܘܼܘ ܠܝ ܡܥܕܪ̈ܢܐ. ܡܛܠ ܕܚܝܠܐ ܣܓܝܐܐ ܥܬܝܕ ܠܡܐܬܐ ܥܠܝܢ. ܗܢܼܘܢ ܕܝܢ ܠܐ ܐܫܬܡܼܥܘ. ܐܠܐ ܥܠ ܕܘ̈ܟܝܬܗܘܢ ܩܿܘܝܘ ܠܘܬ ܐܡܕ. ܟܕ ܕܝܢ ܐܬܘ ܦܘܪ̈ܣܝܐ ܥܠ ܗܠܝܢ ܕܒܝܬ ܐܪܒܝܢܕܐܼ. ܠܐ ܐܫܟܚ ܠܡܬܟܬܫܘ ܥܡܗܘܢ. ܐܠܐ ܫܒܩ ܡܫܪܝܬܗܘܢ. ܘܐܬܦܠܛ ܠܬܠܐ ܘܠܐܘܪܗܝ. ܘܟܠܗ ܥܒܿܕܗܘܢ ܐܬܒܙܙ ܘܐܫܬܼܒܝ. ܕܒܝܬ ܦܛܪܝܩ ܕܝܢ ܘܗܘܦܛܼ ܡܪܟܒܝܢ ܗܘܘ ܬܠܬ̈ܐ ܡܓ̈ܕܠܝܢ ܕܩܝܣܐ ܠܡܣܡ ܒܗܘܢ ܠܫܘܪܐ ܕܐܡܕ. ܘܟܕ ܐܫܬܡܠܝ ܬܘܩܢܗܘܢ ܕܡܓ̈ܕܠܐ ܒܢܦ̈ܩܬܐ ܣܓܝ̈ܐܬܐ: ܘܐܬܚܙܩ ܒܦܪܙܠܐ ܕܠܐ ܢܬܢܟܘܢ ܡܢ ܡܕܡ: ܗܝܕܝܢ ܐܬܒܕܿܩ ܠܗܘܢ ܡܕܡ ܕܓܕܫ ܒܬܚܘܡܐ. ܘܐܘܩܕ ܐܢܘܢ ܠܡܓ̈ܕܠܐ. ܘܫܩܠ ܡܢ ܬܡܢ܆ ܘܐܼܙܠ ܒܬܪ ܦܘܪ̈ܣܝܐܼ. ܘܠܐ ܐܕܪܟܘ ܐܢܘܢ. ܚܕ ܕܝܢ ܡܢ ܡܕܒܪ̈ܢܐ ܕܫܡܗ ܦܪܙܡܢ ܘܐܚܪܢܐ ܕܫܡܗ ܬܐܕܘܪܐ܆ ܫܕܪ ܒܨܢܥܬܐ ܥܢܐ ܕܬܥܒܪ ܠܘܬ ܐܡܕ. ܘܗܢܼܘܢ ܘܚܝܠܗܘܢ ܝܬܒܼ ܒܟܡܝܢܐ܆ ܘܟܕ ܚܙܘܗ ܦܘܪ̈ܣܝܐ ܠܥܢܐܼ ܡܢ ܓܘ ܐܡܕ܇ ܢܦܩܘ ܡܢܗܘܢ ܐܝܟ ܐܪ̈ܒܥܡܐܐ ܓܒܪܗܐ ܓܒܝ̈ܐ ܕܢܚܛܦܘܢܗܿ. ܘܩܡ ܪ̈ܗܘܡܝܐ ܕܝܿܬܒܝܢ ܗܘܘ ܒܟܡܐܢܐܼ ܘܚܪܒ ܐܢܘܢ ܘܠܪܝܫܗܘܢ ܐܚܕ ܟܕ ܚܝ pb. 283 ܘܐܫܬܘܕܝ ܠܗܘܢܼ. ܕܢܫܠܡܝܗܿ ܠܗܘܢ ܠܐܡܕ. ܘܡܛܠ ܗܕܐ ܗܦܟ ܠܗܘܢ ܠܬܡܢ ܦܛܪܝܩ ܘܗܦܛ. ܘܟܕ ܠܐ ܐܫܟܚ ܡܪܙܒܢܐ ܗܘܿ ܕܢܫܡܠܐ ܫܘܘܕܝܗ ܡܛܠ ܕܠܐ ܐܬܬܦܝܣ ܠܗ ܗܠܝܢ ܕܒܓܘ ܡܕܝܢܬܐ܆ ܦܩܕ ܥܠܘܗܝܼ ܐܣܛܪܛܠܛܣ ܕܢܙܕܩܦ.܀ ܛܝܝ̈ܐ ܕܝܢ ܕܦܘܪ̈ܣܝܐ ܐܬܘ ܠܚܒܘܪܐ: ܘܢܦܩ ܥܠܝܗܘܢ ܛܝܡܣܛܪܛܐ ܕܘܟܣ ܕܩܠܢܝܩܘܣ. [ܘܚܪܒ ܐܢܘܢ]. ܐܦ ܛܝܝ̈ܐ ܕܒܝܬ ܪ̈ܗܘܡܝܐ ܕܡܬܩܪܝܢ ܕܒܝܬ ܬܥܠܒܐܼ. ܐܙܠܘ ܠܘܬ ܚܐܪܬܐ ܢܥܡܢܼ ܘܐܫܟܚ ܫܝܿܪܬܐ ܕܣܿܠܩܐ ܠܘܬܗ. ܘܓܡ̈ܠܐ ܕܡܿܣܩܝܢ ܠܗ ܢܢܚܬ. ܘܢܦܠܘ ܥܠܝܗܘܢ ܘܚܪܒܘ ܐܢܘܢ. ܘܠܓܡ̈ܠܐ ܫܒܼܘ ܥܠܝܗܿ ܕܝܢ ܕܚܝܪܬܐ ܠܐ ܩܡܘ. ܡܛܠ ܕܥܠܼܬ ܗܘܬܠܗܿ ܠܡܕܒܪܐ ܓܘܝܐ. ܬܘܒ ܕܝܢ ܐܬܟܢܫܘ ܒܐܝܪܚ ܐܒ ܟܠܗ ܚܝܠܐ ܕܦܘܪ̈ܣܝܐ. ܘܗܘ̈ܢܐ ܘܩܕܫ̈ܝܐ ܘܐܪ̈ܡܢܝܐ. ܘܐܬܼܘ ܥܕܡܐ ܠܐܘܦܕܢܐ. ܘܫܡܥܘ ܕܒܝܬ ܦܛܪܝܩ. ܘܩܡ ܠܡܐܙܠ ܥܠܝܗܘܢ. ܘܟܕ ܥܕܟܝܠ ܒܐܘܪܚܐ ܐܝܬܝܗܘܢ ܗܘܘ ܪ̈ܗܘܡܝܐ܇ ܘܠܩܪܒܐ ܠܐ ܣܕܪܘ ܗܘܘ. ܐܪܥ ܦܘܪ̈ܣܝܐ ܠܩܕܡ̈ܝܐ ܘܡܼܚܘ ܐܢܘܢ. ܘܟܕ ܗܦܼܛ ܠܒܣܬܪܗܘܢ ܐܝܠܝܢ ܕܒܠܥܘ܆ ܚܙܘ ܫܪܟܗ ܕܚܝܠܐ ܕܪ̈ܗܘܡܝܐ ܠܩܕܡ̈ܝܐ ܕܐܬܡܚܝܘ. ܢܦܠܬܿ ܥܠܝܗܘܢ ܕܚܠܬܐ. ܘܠܐ ܟܬܪ ܠܡܬܟܬܫܘ. ܐܠܐ ܗܦܟ ܦܛܪܝܩ ܩܕܡܝܐ ܘܟܠܗ ܚܝܠܐ ܒܬܪܗ. ܘܥܒܼܪ ܢܗܪܐ ܦܪܬ ܘܐܫܬܘܙܒܘ ܠܫܡܝܫܛ ܡܕܝܢܐ. ܘܒܠܥ ܕܝܢ ܒܩܪܒܐ ܗܢܐ ܐܦ ܢܥܡܢ ܡܠܟܐ ܕܛܝܝ̈ܐ ܕܦܪ̈ܣܝܐ. ܚܕ ܕܝܢ ܡܢ ܡܕܒܪ̈ܢܐ ܕܪ̈ܗܘܡܝܐ ܕܫܡܗ ܦܛܪ̈ܐܼ ܥܪܩ ܠܚܣܝܢܐ ܕܐܫܦܝܪܢ. ܘܟܕ ܚܕܪܘܗܝ ܦܪ̈ܣܝܐ ܠܚܣܢܐܼ. ܕܚܠܘ ܡܢܗܘܢ ܒܢ̈ܝ ܚܣܝܢܐ. ܘܐܫܠܡܘܗܝ ܠܗܘܢ. ܘܕܒܪܘܗܝ ܦܘܪ̈ܣܝܐ ܟܕ ܐܣܝܪ܆ ܘܠܪ̈ܗܘܡܝܐ ܕܐܝܬ ܗܘܐ ܥܡܗ pb. 284 ܩܛܠ. ܠܒܢܗܝ ܚܣܢܐ ܕܝܢ ܒܡܕܡ ܠܐ ܐܟܝܘ.܀. ܩܘܕ ܕܝܢ ܡܠܟܐ ܕܦܪ̈ܣܝܐܼ ܡܬܚܫܒ ܗܘܐ ܕܢܐܬܐ ܥܠ ܐܪܒܝܢܕܐ ܠܐܘܪܗܝ. ܡܓܪܓ ܗܘܐ ܠܗ ܐܦ ܢܥܡܢ ܡܠܟܐ ܕܛܝ̈ܝܐܼ ܡܛܠ ܡܕܡ ܕܓܼܕܫ ܠܫܝܪܬܗ. ܚܕ ܕܝܢ ܪܝܫ ܝܗܠܐ ܡܢ ܚܝܪܬܐ ܕܢܥܡܢ܆ ܕܐܝܬܘܗܝ ܟܪܣܛܝܢܐܼ. ܥܢܼܐ ܘܐܡܼܪ. ܕܠܐ ܬܫܬܚܩ ܡܠܟܘܬܗܘܢ ܬܐܙܠ ܥܠ ܐܘܪܗܝ ܠܩܪܒܐ. ܡܛܠ ܕܡܠܬܐ ܠܐ ܡܫܬܪܝܢܝܬܐ ܕܡܫܝܚܐܼ ܗܿܘ ܕܣܿܓܕܝܢ ܠܗܼ. ܐܝܬ ܥܠܝܗܿ. ܕܒܥܠܕܒܒܐ ܠܐ ܢܫܬܠܛ ܒܗܿ ܠܥܠܡ. ܢܥܡܢ ܕܝܢ ܟܕ ܗܕܐ ܫܡܼܥ ܓܙܼܡ ܕܕܒܝ̈ܫܢ ܡܢ ܐܝܠܝܢ ܕܒܐܡܕ ܐܣܬܥܪ ܢܥܒܕ ܒܐܘܪܗܝ. ܘܡ̈ܠܐ ܕܓܘܕܦܐ ܡܿܠܠ. ܐܦ ܡܫܝܚܐܓܝܪ ܐܬܿܐ ܓܠܝܬܐ ܚܘܝ ܒܗ. ܒܗ ܓܝܪ ܒܥܕܢܐ ܕܓܕܦ܆ ܐܬܥܿܒܝܬܿ ܡܚܘܬܐ ܗܝܿ ܕܒܠܥ ܗܘܐ ܒܪܝܫܗ. ܘܐܬܢܦܚܬ ܗܘܬ ܟܠܗܿ ܩܪܩܦܬܗ. ܘܩܡܼ ܐܙܼܠ ܠܫܡܟܢܗ. ܘܟܿܬܪ ܒܐܘܠܨܢܐ ܗܢܐ ܬܪ̈ܝܢ ܝܘ̈ܡܝܢ ܘܡܝܼܬ. ܠܡܪܚܘܬܗ ܕܝܢ ܕܩܘܕ ܐܦܠܐ ܐܬܿܐ ܗܕܐ ܬܟܣܼܬ ܡܢ ܨܒܝܢܗ ܒܝܫܐ. ܐܠܐ ܐܩܝܡ ܡܿܠܟܐ ܚܠܦ ܢܥܡܢܼ ܘܩܡ ܕܢܐܬܐ ܠܩܪܒܐ. ܘܟܕ ܡܼܛܐ ܠܘܬ ܬܠܐ. ܫܼܪܐ ܥܠܝܗܿ. ܝܗܘ̈ܕܝܐ ܕܝܢ ܕܐܝܬ ܗܘܐ ܬܡܢܼ ܐܬܚܫܒܘ ܕܢܫܠܡܘܢܗܿ ܠܗܿ ܠܡܝܕܢܬܐ. ܘܒܡܓܕܠܐ ܕܒܝܬ ܣܓܕܬܗܘܢ܇ ܗܘܿ ܕܐܦ ܠܗܘܢ ܡܫܠܡ ܗܘܐ ܕܢܛܪܘܢܝܗܝ. ܥܒܼܕ ܚܠܠܐ. ܘܐܘܕܥ ܠܦܘܪ̈ܣܝܐ ܡܛܠܬܗܼ ܕܢܦܠܫܘܢܝܗܼ ܘܢܥܠܘܢ ܒܗ. ܗܕܐ ܕܝܢ ܐܬܒܕܩܬܿ ܠܩܡܝܣ ܦܛܪܐܼ ܗܘܿ ܕܐܝܬܘܗܝ ܒܫܒܝܬܐ܆ ܘܐܼܦܝܣ ܠܐܝܠܝܢ ܕܢܛܪܝܢ ܗܘܘܼ ܠܗ ܕܢܩܪܒܘܢܝܗܝ ܠܘܬ ܫܘܪܐ ܟܕ ܐܡܿܪ܆ ܕܠܒܘ̈ܫܐ ܘܡ̈ܐܢܐ ܐܝܬ ܠܗ ܕܡܕܡ ܡܕܡ ܕܣܝܡܝܢ ܠܗ ܒܡܕܝܢܬܐ. ܘܒܥܼܐ ܕܢܦܝܣ ܠܬ̈ܠܝܐ ܡܛܘܠܬܗܘܢ ܕܢܬܠܘܢ ܠܗ. ܘܐܬܛܦܝܣ ܠܗ ܢܛܘܪ̈ܐ ܘܩܪܒܘܗܝ. ܗܘܼ ܕܝܢ ܐܡܼܪ ܠܦܠ̈ܚܐ ܕܩܝܡܝܢ ܗܘܘ ܥܠ pb. 285 ܫܘܪܐܿ. ܕܢܩܪܘܢ ܠܗ ܠܩܡܣ ܠܐܢܛܝ܇ ܗܘܿ ܕܢܿܛܪ ܗܘܐ ܠܗܿ ܒܙܒܢܐ ܗܘܿ ܠܡܕܝܢܬܐ. ܘܩܪܘܗܝ ܠܗ ܘܠܡܕܒܪ̈ܢܐ. ܘܡܿܠܠ ܥܡܗܘܢ ܦܛܪܐ ܕܪܗܘܡܐܝܬ ܘܓܠܼܐ ܠܗܘܢ ܥܠ ܢܟܠܐ ܕܝܗܘ̈ܕܝܐ. ܘܡܛܠ ܕܠܐ ܬܬܝܕܥ ܨܒܘܬܐ ܠܘܦܪ̈ܣܝܐ. ܫܐܠ ܡܢܗܘܢ ܕܢܬܠܘܢ ܠܗ ܙܘܓܐ ܚܕ ܕܡ̈ܐܢܐ. ܘܗܼܢܘܢ ܩܕܡܝܐܝܬ ܚܘܝܘ ܢܦܫܗܘܢܼ ܐܝܟ ܗܘܿ ܕܡܬܦܝܪܝܢ ܒܗ. [ܗܝܕ]ܝܢ [ܫܕ]ܘ ܠܗ ܡܢ ܫܘܪܐ ܙܘܓܐ ܚܕ ܕܡ̈ܐܢܐ. ܡܛܠ ܕܦܐ [ܒܫـ]ـܪܪܐ ܣܢܝܩ ܗܘܐ ܥܠ ܡ̈ܐܢܐ ܕܢܠܒܫ. ܘܗܝܕܝܢ ܢܚܼܬ ܡܢ ܫܘܪܐ. ܘܐܝܟ ܗܘܿ ܕܠܐ ܪܓܝܫܝܢ ܗܘܘ ܒܢܟܠܐ ܕܝܗܘ̈ܕܝܐܿ. ܘܠܐ ܝܿܕܥܝܢ ܗܘܘ ܕܐܝܿܕܐ ܗܝ ܕܘܟܬܐܼ. ܡܬܟܪܟܝܢ ܗܘܘ ܘܡܬܒܩܝܢ ܒܫ̈ܬܐܣܘܗܝ ܕܟܠܗ ܫܘܪܐ. ܐܝܟ ܨܒܝܢ ܕܢܚܙܘܢ ܕܕܠܡܐ ܠܡ ܒܥܿܐ ܘܩܢܐ. ܗܕܐ ܕܝܢ ܥܒܼܕ ܡܛܠ ܦܛܪܐ. ܕܕܠܡܐ ܢܕܥܘܢ ܦܘܪ̈ܣܝܐ ܕܗܼܘ ܦܪܣܝܗܿ ܠܨܒܘܬܐ: ܘܢܣܓܘܢ ܥܠܘܝܗ ܐܘܠ̈ܨܢܼܐ. ܠܚܪܬܐ ܐܬܼܘ ܠܕܘܟܬܐ ܗܝܿ ܕܢܿܛܪܝܢ ܗܘܘ ܒܗܿ ܝܗܘ̈ܕܝܐ܆ ܘܐܫܟܚ ܕܚܦܝܪ ܘܡܛܝܒܘ ܠܗܘܢ ܒܓܘ ܡܓܕܠܐ ܚܦܪܐ ܥܫܝܢܐ ܐܝܟ ܕܐܬܐܡܪ ܠܗܘܢ. ܘܟܕ ܚܙܘ ܪ̈ܗܘܡܝܐ ܕܐܝܬ ܗܘܐ ܬܡܢ܆ ܢܦܼܩܘ ܥܠܝܗܘܢ ܒܚܡܬܐ ܪܒܬܐ. ܘܐܬܟܪܟܘ ܒܟܠܗܿ ܡܝܕܢܬܐܼ. ܘܚܪܒ ܠܟܠ ܕܐܫܟܚ ܡܢ ܝܗܘ̈ܕܝܐܿ. ܠܓܒܪ̈ܐ ܘܠܢܫ̈ܐܼ. ܘܠܣܒ̈ܐ ܘܠܛܠܝ̈ܐ. ܘܗܕܐ ܣܿܥܪܝܢ ܗܘܘ ܝܘ̈ܡܬܐ. ܘܠܡܚܣܡܢ ܫܠܼܝܘ ܡܢ ܚܘܒܠܗܘܢ ܒܦܘܩܕܢܐ ܕܩܡܣ ܠܐܢܛܝ ܘܒܦܝܣܐ ܕܛܘܒܢܐ ܒܪܗܕܕ ܐܦܝܣܩܦܐ. ܘܠܡܕܝܢܬܐ ܙܗܝܪܐܝܬ ܢܿܛܪܝܢ ܗܘܘ ܒܠܠܝܐ ܘܒܐܝܡܡܐ. ܟܕ ܡܬܟܪܟ ܗܘܐ ܗܼܘ ܩܕܝܫܐ ܒܪܗܕܕ ܘܣܿܥܪ ܠܗܘܢ ܘܡܨܿܠܐ ܥܠܝܗܘܢ ܘܡܒܿܪܟ ܠܗܘܢ. ܘܡܫܿܒܚ ܠܝܨܝܦܘܬܗܘܢ ܘܡܚܿܦܛ ܠܗܘܢ. ܘܪܐܿܝܣ ܥܠܝܗܘܢ ܘܥܠ ܫܘܪܐ ܕܡܕܝܢܬܐ ܡܝ̈ܐ ܕܡܥܡܘܕܝܬܐ. ܛܥܝܢ ܗܘܐ ܕܝܢ pb. 286 ܘܡܿܟܪܟ ܥܡܗ ܐܦ ܩܘܕܫܐܼ. ܠܡܫܘܬܦܘ ܐܢܘܢ ܒܐܪܙܐ ܥܠ ܕܘ̈ܟܝܬܗܘܢܼ. ܕܕܠܡܐ ܡܛܠ ܗܕܐ ܥܠܬܐ: ܢܫܒܘܩ ܚܕ ܡܢܗܘܢ ܡܛܪܬܗܼ ܘܢܚܘܬ ܡܢܫܘܪܐ. ܢܦܼܩ ܕܝܢ ܒܬܟܝܠܘܬܐ ܐܦ ܠܘܬ ܡܠܟܐ ܕܦܪ̈ܣܝܐ ܘܡܠܠ ܥܡܗ ܘܪܝܚܗ. ܩܘܕ ܕܝܢ ܟܕ ܚܼܙܐ ܝܩܝܪܘܬܗ ܕܓܒܪܐ: ܘܐܪܓܫ ܐܦ ܒܥܝܪܘܬܐ ܕܪ̈ܗܘܡܝ. ܠܐ ܐܬܚܼܙܝܬܿ ܠܗ ܕܦܩܚܐ ܕܢܒܛܠ ܠܘܬ ܬܠܐ ܒܟܠܗ ܗܘܿ ܚܝܠܐ ܕܐܝܬ ܗܘܐ ܥܡܗ. ܚܕܐܼ ܡܛܠ ܕܠܐ ܫܟܝܚܐ ܗܘܬ ܠܗ ܬܪܣܝܬܐ ܒܐܬܪܐ ܕܚܪܝܒ ܗܘܼܐܼ. ܘܐܚܪܬܐܼ ܕܩܿܢܛ ܗܘܼܐ ܕܕܠܡܐ ܢܬܟܢܫܘܢ ܪ̈ܒܝ ܚܝ̈ܠܐ ܕܪ̈ܗܘܡܝܐ ܚܕ ܠܘܬ ܚܕܼ. ܘܢܐܬܘܢ ܥܠܘܗܝ ܐܟܚܕܐ. ܘܡܛܠ ܗܠܝܢ ܩܠܝܠܐܝܬ ܐܫܩܼܠ ܠܐܦ̈ܝ ܐܘܪܗܝ. ܘܫܪܐ ܥܠ ܢܗܪܐ ܕܓܠܒ ܕܡܬܩܪܐ ܕܡܕܝ̈ܐܼ ܐܝܟ ܥܣܪܗܝܢ ܝܘ̈ܡܝܢ. ܡܪ̈ܚܐ ܕܝܢ ܐܝܠܝܢ ܕܐܝܬ ܗܘܐ ܒܚܝ̈ܠܘܬܗ܇ ܡܬܟܪܟܝܢ (ܗܘܘ) ܒܐܬܪܐ ܘܡܿܚܪܒܝܢ ܠܗ. ܒܝܘܡ ܫ̈ܬܐ ܒܐܪܚ ܐܠܘܠ. ܥܩܼܪܘ ܐܘܪ̈ܗܝܐ ܟܠܗܝܢ ܕܝܪ̈ܬܐ ܘܦܘ̈ܬܩܐ ܕܩܪܝܒܝܢ ܗܘܘ ܨܝܕ ܫܘܪܐ. ܘܐܘܩܕ ܠܟܦܕ ܨܠܡ ܩܪܝܬܐ ܕܗܼܝ ܢܓܒܬ. ܘܓܼܡܘ ܟܠܗܘܢ ܣܝ̈ܓܐ ܕܓ̈ܢܐ ܘܠܦܪ̈ܕܝܣܐ ܕܚܕܝܪܝܢ ܗܘܘ. ܘܦܣܩܘ ܐܝ̈ܠܢܐ ܕܒܓܘܗܘܢ. ܘܐܠܥܘ ܓܪ̈ܡܐ ܕܟܠܗܘܢ ܣܗ̈ܕܐ ܕܐܝܬ ܗܘܐ ܚܕܪ̈ܝ ܡܕܝܢܬܐ܆ ܘܐܣܩ ܙܝܢܐ ܠܫܘܪܐ. ܘܩܛܼܪ ܦܪ̈ܣܐ ܕܣܥܪܐ ܠܥܠ ܡܢ ܥܥܝ̈ܬܐ. ܒܝܘܡ ܬܫ̈ܥܐ ܒܗ ܒܝܪܚܐ ܗܢܐܿ ܫܠܼܚ ܠܗ ܦܘܕ ܠܐܪܒܝܢܕܐ܆ ܕܐܘ ܢܩܒܠ ܒܡܕܝܢܬܐ ܠܡܪܙܒܢܐ ܕܝܠܗܼ. ܐܘܿ ܢܦܘܩ ܠܘܬܗ ܠܦܩܥܬܐܿ. ܐܝܟ ܨܿܒܐ ܠܡ ܕܢܩܝܡ ܥܡܗ ܩܝܿܡܐ ܕܫܝܢܐ. ܒܟܣܝܐ ܕܝܢ ܦܩܼܕ ܠܚܝܠܚ܆ ܕܐܢ ܝܿܗܒ ܠܗܘܢ ܐܪܒܝܢܕܐ ܕܢܥܠܘܢ ܠܡܕܝܢܬܐ ܬܗܦܟܘܢ ܘܢܠܒܟܘܢ ܫܘܪܐ ܘܡ̈ܥܠܝܗܿ. ܥܕ ܐܬܿܐ ܗܿܘ ܘܥܿܐܠ ܒܬܪܗܘܢܼ. ܘܐܢ ܠܒܪ ܢܦܘܩ ܠܘܬܗܘܢ ܢܟܡܼܢܘܢ pb. 287 ܠܗܼ. ܘܢܚܛܦܘܢܝܗܝ ܒܚܝ̈ܐܼ. ܘܢܘܒܠܘܢܝܗܝ ܠܘܬܗ. ܐܪܒܝܢܕܐ ܕܝܢܼ ܡܛܠ ܕܩܿܢܛ ܗܘܐ ܕܢܬܠ ܠܗܘܢ ܕܢܥܠܘܢ ܠܡܕܝܢܬܐܼ. ܢܦܩ ܠܘܬܗܘܢ ܠܒܪ. ܟܕ ܠܐ ܐܪܚܩ ܣܝܓ ܡܢ ܡܕܝܢܬܐܼ ܐܠܐ ܥܕܡܐ ܠܒܝܬ ܡܪܝ ܣܪܓܝܣ. ܘܐܬܼܐ ܠܘܬܗ ܒܐܘܝ ܕܐܝܬܘܗܝ ܗܘܐ ܐܣܛܒܝܕ: ܕܡܬܦܿܫܩ ܡܓܝܣܛܪܘܣ ܕܦܘܪ̈ܣܝܐ: ܘܐܡܼܪ ܠܗ ܠܐܪܒܝܢܕܐܼ. ܕܐܢܗܼܘ ܕܒܿܥܼܝܬ ܕܢܥܒܕ ܫܝܢܐܼ ܗܒ ܠܢ ܥܣܪ̈ܐ ܐܠܦ̈ܝܢ ܠܝܛܪ̈ܐ ܕܕܗܒܐ. ܘܐܩܝܡ ܠܢ ܩܝܿܡܐܼ ܕܫܿܩܠܝܢܢ ܟܠ ܫܢܬܐ ܕܗܒܐ ܗܘܿ ܕܥܿܝܕܐ. ܘܐܫܬܘܕܝ ܕܝܢܼ ܐܪܒܝܢܕܐ ܠܡܬܠ ܥܕܡܐ ܠܫܒ̈ܥܐ ܐܠܦ̈ܝܢ ܠܝܛܪ̈ܐ. ܘܠܐ ܨܼܒܘ ܠܡܩܒܠܘ. ܘܗܘܼܘ ܟܕ ܡܬܚܪܝܢ ܥܡܗ܇ ܡܢ ܨܦܪܐ ܘܥܕܡܐ ܠܬܫ̈ܥ ܫ̈ܥܝܢ. ܘܡܛܠ ܕܠܐ ܐܫܟܚ ܥܗܝܢܐ ܠܢܟܝܠܘܬܗܘܢܼ. ܡܛܠ ܪ̈ܗܘܡܝܐ ܕܢܿܛܪܝܢ ܗܘܘ ܠܗ: ܘܕܩܿܢܛܝܢ ܗܘܘ ܬܘܒܼ ܠܡܿܩܪܒܘ ܥܡ ܐܘܪܗܝ ܡܛܠ ܡܕܡ ܕܓܼܕܫ ܠܢܥܡܢܼ ܫܒܩܘܝ ܠܐܪܒܝܢܕܐ ܒܐܘܪܗܝܼ ܘܐܙܠ ܠܡܿܩܪܒܘ ܥܡ ܚܪܢ. ܘܠܛܝ̈ܝܐ ܟܠܗܘܢܼ ܫܕܪ ܠܣܪܘܓ. ܪ̈ܝܦܝܐ ܕܝܢ ܕܐܝܬ ܗܘܐ ܒܚܪܢܼ. ܢܦܩ ܟܣܝܐܝܬ ܡܢ ܡܕܝܢܬܐ ܘܢܦܠ ܥܠܝܗܘܢ. ܘܩܛܠ ܡܢܗܘܢ ܫ̈ܬܝܢ ܓܒܪܝܢ. ܘܠܒܟ ܒܚܝ̈ܐ ܠܪܝܫܗܘܢ ܕܗܘ̈ܢܝܐ. ܘܡܛܠ ܕܓܒܪܐ ܗܘܐ ܝܕܝܥܐܼ. ܘܣܓܝ ܝܩܝܪ ܗܘܐ ܥܠ ܡܠܟܐ ܕܦܘܪ̈ܣܝܐܼ ܐܫܬܘܕܝ ܠܚܪ̈ܢܝܐ: ܕܐܢ ܢܬܠܘܢܝܗܝ ܠܗ ܒܚܝ̈ܐܼ ܠܐ ܡܿܩܪܒ ܥܡܗܘܢ. ܗܼܢܘܢ ܕܝܢ ܕܚܠܘ ܡܢ ܩܪܒܐ ܘܝܗܼܒܘܗܝ ܠܗܘܢܝܐ ܗܘܿ. ܟܕ ܫܕܪ ܥܡܗ ܐܝܟ ܕܠܐܝܩܪܗ ܐܠܦ ܘܚܡܫ̈ܡܐܐ ܕܟܪ̈ܐ ܕܥܢܐܼ. ܥܡ ܨܒܘ̈ܬܐ ܐܚܪ̈ܢܝܬܐ. ܛܝ̈ܝܐ ܕܝܢ ܕܦܘܪܗܣܝܐܼ ܗܿܢܘܢ ܕܐܫܬܕܪ ܠܣܪܘܩܼ ܐܙܠܘ ܥܕܡܐ ܠܢܗܪܐ ܦܪܬ. ܟܕ ܡܚܪܒܝܢ ܘܫܿܒܝܢ ܘܒܿܙܝܢ ܟܠ ܕܡܫܟܚܝܢ. ܦܛܪܝܩܝܘܠܝܣ ܕܝܢܼ ܚܕ ܡܢ ܡܕܒܪ̈ܢܐ ܕܪ̈ܗܘܡܝܐ ܘܒܛܠܝܢܘܣ ܒܪܗܼ. pb. 288 ܥܕܟܝܠ ܒܗܢܐ ܙܒܢܐ ܐܬܼܐ ܗܘܐ ܡܢ ܡܥܪܒܐ ܕܢܚܘܬ ܠܩܪܒܐ. ܘܒܠܒܝܒܘܬܐ ܕܠܐ ܩܢܛܐ ܐܝܬܘܗܝ ܗܘܐ܇ ܒܗܝܿ ܕܠܐ ܩܪܝܒ ܗܘܐ ܠܐܝܠܝܢ ܕܐܣܬܥܪ ܒܩܕܡܝܬܐ. ܘܟܕ ܥܒܼܪ ܢܗܪܐܼ ܐܪܥ ܒܚܕ ܡܢ ܡܕܒܪ̈ܢܐ ܕܦܘܪ̈ܣܝܐ. ܘܐܩܒܪ ܥܡܗ. ܘܠܟܠܗܘܢ ܦܘܪ̈ܣܝܐ ܕܥܡܗ ܚܼܪܒ. ܘܣܼܡ ܐܦܘ̈ܗܝ ܕܢܐܬܐ ܠܐܘܪܗܝ. ܘܫܼܡܥ ܡܢ ܥܪܗܘܩܐܼ ܕܚܕܪܗܿ ܩܘܕ ܠܡܕܝܢܬܐ. ܘܗܦܼܟ ܥܒܼܪ ܢܗܪܐܼ. ܘܒܫܡܝܫܛ ܟܿܬܪ.. ܒܝܘܡ ܫܒܬܥܣܪ̈ ܒܝܪܚܐ ܗܢܐܼ ܒܐܪ̈ܒܥܐ ܒܫܒܐܼ. ܚܙܝܼܢܢ ܠܡ̈ܠܘܗܝ ܕܡܫܝܚܐ ܘܠܫܘܘ̈ܕܝܘܗܝ ܕܠܘܬ ܐܒܓܪ. ܟܕ ܒܥܒܿܕܐ ܡܬܓܡܪܝܢ. ܟܿܢܫ ܓܝܪ ܩܘܕ ܠܟܠܗ ܚܝܠܗ: ܘܫܩܼܠ ܡܢ ܢܗܪܐ ܦܪܬ. ܘܐܬܼܐ ܫܼܪܐ ܥܠ ܐܘܪܗܝ. ܡܬܝܚܐ ܗܘܬ ܕܝܢ ܡܫܪܝܬܗ ܡܢ ܒܝܬ ܣܗ̈ܕܐ ܕܡܪܝ ܩܘܙܡܐ ܘܕܡܪܝ ܕܘܡܝܢܐ܇ ܟܕ ܫܪܝܢ ܥܠ ܓܢ̈ܐ ܟܠܗ̈ܝܢ ܘܥܠ ܒܝܬ ܡܪܝ ܣܪܓܝܢ ܘܥܠ ܒܟܝܢ ܩܪܝܬܐܼ. ܘܥܕܡܐ ܠܒܝܬ ܡܘܕܝ̈ܢܐ. ܘܦܬܝܗܿ ܥܕܡܐ ܠܫܚܘܪܬܐ ܕܨܪܝܢ. ܗܢܐ ܟܠܗ ܚܝܠܐ ܕܠܐ ܡܢܝܢܐ ܚܕܪܗܿ ܠܐܘܪܗܝ ܒܝܘܡܐܼ. ܣܛܪ ܡܢ ܡܛܪ̈ܬܐ ܕܣܝܼܡܢ ܗܘ̈ܝ ܠܗ ܒܛܘܪ̈ܐ ܘܒܪ̈ܡܬܐ. ܘܡܠܝܐ ܗܘܬ ܕܝܢ ܟܠܗܿ ܦܩܥܬܐ ܡܢܗܘܢ ܦܬܝܚܝܢ ܗܘܘ ܟܠܗܘܢ ܬܪ̈ܥܝܗ ܕܡܕܝܢܬܐܼ. ܘܠܐ ܐܫܟܚܘ ܦܘܪ̈ܣܝܐ ܕܢܥܠܘܢ ܠܗܿ ܡܛܠ ܒܘܪܟܬܗ ܕܡܫܝܚܐ. ܐܠܐ ܢܦܼܠܬܿ ܥܠܝܗܘܢ ܕܚܠܬܐܼ. ܘܩܿܘܝܘ ܥܠ ܕܘܟ̈ܝܬܗܘܢܼ. ܟܕ ܐܢܫ ܠܐ ܡܿܩܪܒ ܥܡܗܘܢܼ ܡܢ ܨܦܪܐ ܘܥܕܡܐ ܠܐܦ̈ܝ ܬܫ̈ܥ ܫ̈ܥܝܢ. ܗܝܕܝܢ ܢܦܼܩ ܚܕܚ̈ܕܢܐ ܡܢ ܡܕܝܢܬܐ ܘܐܩܪܒܘ ܥܡܗܘܢܿ ܘܠܣܓܝ̈ܐܐ ܦܪ̈ܣܝܐ ܩܛܠܼ ܘܡܢܗܘܢ ܠܐ ܢܦܼܠ ܚܕ ܓܒܪ. ܢܫ̈ܐ ܕܝܢ ܛܥܝ̈ܢܢ ܗܘ̈ܝ ܡܝ̈ܐܼ. ܘܡܦ̈ܩܢ ܠܒܪ ܡܢ ܫܘܪܐܼ ܕܢܫܬܘܢ ܐܝܠܝܢ ܕܡܿܩܪܒܝܢ. ܘܛܠܝ̈ܐ ܫܒܪ̈ܐ ܒܩ̈ܠܥܐ ܫܿܕܝܢ ܗܘܘ.. ܛܪܕܘ ܐܢܘܢ ܗܟܝܠ ܐܢܫ̈ܐ ܙܥܘܪ̈ܐ ܕܢܦܩ ܡܢ ܡܕܝܢܬܐܼ. pb. 289 ܘܐܪܚܩ ܐܢܘܢ ܡܢ ܠܘܬ ܫܘܪܐ. ܡܛܠ ܕܠܘ ܣܓܝ ܦܪܝܩܝܢ ܗܘܘ ܡܢܗܼ ܐܠܐ ܐܝܟ ܡܫܕܐ ܒܩܫܬܐ. ܘܐܼܙܠܘ ܫܼܪܘ ܥܠ ܓܢܒ ܩܘ̈ܒܐ ܩܪܝܬܐ. ܠܒܬܪܗ ܕܝܢ ܕܝܘܡܐܼ. ܢܦܼܩ ܬܘܒ ܐܪܒܝܢܕܐ ܠܒܪ ܡܢ ܬܪܥܐ ܪܒܐ. ܘܟܕ ܩܐܿܡ ܠܘܩܒܠ ܚܝܠܐ ܕܦܘܪ̈ܣܝܐܼ. ܫܠܼܚ ܠܗ ܠܩܘܕ. ܕܗܐ ܚܙܼܝܬ ܒܢܣܝܢܐܼ. ܕܡܕܝܢܬܐ ܠܐ ܗܘܬ ܕܝܠܟܼ. ܘܠܐ ܕܐܢܣܘܛܘܣ: ܐܠܐ ܡܕܝܢܬܐ ܕܡܫܝܚܐ ܗܼܝ ܗܘܿ ܕܒܪܟܗܿ. ܘܩܼܡ ܠܘܩܒܠ ܚܝܠ̈ܘܬܟܼ. ܕܠܐ ܢܫܬܠܛܘܢ ܥܠܝܗܿ. ܘܫܠܚ ܠܗ ܩܘܕ܇ ܕܗܒ ܠܝ ܗܡܝܪ̈ܐ ܕܠܐ ܢܿܦܩܝܢ ܐܢܬܘܢ ܒܬܪܝ ܡܐ ܕܫܩܿܠܬ ܕܐܙܠܼ. ܘܫܕܪ ܠܝ ܐܢܫ̈ܐ ܗܠܝܢ ܕܠܒܟܬܘܢ ܐܬܡܠܝܼ ܘܕܗܒܐ ܗܘܿ ܕܐܫܬܘܼܕܝܬܿ. ܘܡܿܪܚܩ ܐܢܐ ܠܝ ܡܢ ܡܕܝܢܬܐ. ܘܝܗܼܒ ܠܗ ܐܪܒܝܢܕܐ ܠܩܡܣ ܒܣܝܠܿ. ܘܠܐܢܫ̈ܐ ܕܐܬܠܒܟܘ ܡܢܗ. ܗܕܘܘ ܐܪ̈ܒܬܥܣܪ ܓܒܪ̈ܝܢ. ܘܐܩܝܡ ܥܡܗ ܩܝܿܡܐܼ ܕܢܬܠ ܠܗ ܬܪܗܝܢ ܐܠܦ̈ܝܢ ܠܝܛܪ̈ܐ ܕܗܒܐ ܥܠ ܕܬܥܣܪ̈ ܝܘ̈ܡܝܢ. ܘܫܩܼܠ ܩܘܕ: ܘܐܙܠܼ ܫܼܪܐ ܒܕܗܒܢܐ. ܠܦܪܬܙܡܝܐ ܕܝܢ ܠܐ ܟܬܪ. ܐܠܐ ܫܕܪ ܠܝܘܡܐ ܕܒܬܪܗܼ. ܠܐܢܫ ܡܢ ܕܝܠܗ ܕܫܡܗ ܗܘܪܡܝܙܕ: ܘܦܩܕܗ ܕܢܝܬܐ ܬܠܬܡ̈ܐܐ ܠܝܛܪ̈ܐ ܕܗܒܐ. ܐܪܒܝܢܕܐ ܕܝܢ ܟܿܢܼܫ ܠܘܬܗ ܠܪܘܪ̈ܒܢܐ ܕܡܕܝܢܬܐ ܕܢܬܚܫܒܘܢ ܕܐܝܟܢܐ ܡܬܓܒܐ ܕܗܒܐ ܗܘܿ. ܘܟܕ ܚܙܘܗܝ ܠܗܘܪܡܙܕ ܕܐܬܼܐ ܠܗ ܒܥܓܠ. ܐܬܚܝܠ ܥܠ ܬܘܟܠܢܗ ܕܡܫܝܚܐ. ܘܐܬܠܒܒܘܼ ܘܐܡܼܪ ܠܗ ܠܐܪܒܝܢܕܐ. ܕܚܢܢ ܠܓܒܪܐ ܕܓܠܐܼ ܠܐ ܡܫܿܕܪܝܢܢ ܕܗܒܐ. ܡܛܠ ܕܐܝܟ ܕܗܦܼܟ ܒܡܠܬܗ܆ ܘܠܐ ܩܿܘܝ ܥܕ ܡܛܐ ܝܘܡܐ ܕܐܩܝܼܡܬ ܠܗܼ. ܗܟܢܐ ܗܿܦܟ ܘܡܕܓܠ ܡܐ ܕܫܩܼܠ ܕܗܒܐ. ܚܢܢ ܡܗܝܡܢܝܢܢ ܕܐܢ ܡܿܩܪܒ ܥܡܢ ܬܘܒ ܡܬܟܐܪ. ܡܛܠ ܕܡܫܝܚܐ ܩܐܿܡ ܒܐܩ̈ܝ ܡܕܝܢܬܗ. ܗܝܕܝܢ ܐܬܚܝܠ ܐܦ pb. 290 ܐܪܒܝܢܕܐܼ. ܘܫܠܼܚ ܠܗ ܠܩܘܕ܇ ܕܗܫܐ ܝܿܕܥܝܢܢ ܕܠܘ ܡܠܟܐ ܐܢܬ. ܠܝܬ ܓܝܪ ܡܠܟܐ ܕܐܡܿܪ ܡܠܬܐ ܘܗܿܦܟ ܡܕܓܠ. ܘܐܢ ܕܝܢ ܡܕܓܠܼ ܠܘ ܡܠܟܐ ܗܘ. ܡܟܝܠ ܕܡܢܟ ܐܬܚܼܙܝܬܿ ܕܓܠܘܬܐܿ. ܫܕܪ ܠܝ ܠܩܡܣ ܒܣܝܠ. ܘܡܕܡ ܕܣܿܦܩܐ ܒܐܝ̈ܕܝܟ ܠܡܥܼܒܕ ܥܿܒܕ. ܗܝܕܝܢ ܐܬܡܪܡܪ ܩܘܕ. ܘܙܿܝܢ ܠܦܝ̈ܠܐ ܕܐܝܬ ܗܘܐ ܥܡܗ. ܘܫܩܼܠ ܗܘܼ ܘܟܠܗܿ ܡܫܪܝܬܗ. ܘܐܬܼܐ ܬܘܒ ܠܡܩܪܒܘ ܥܡ ܐܘܪܗܝ. ܒܝܘܡ ܥܣܪ̈ܝܢ ܘܐܪ̈ܒܥܐ ܒܐܪܚ ܐܠܘܠ. ܒܝܘܡ ܐܪ̈ܒܥܐ ܒܫܒܐ. ܘܚܕܪܗܿ ܠܡܕܝܢܬܐ ܡܢ ܟܠܗܘܢ ܓܒܝ̈ܗܿ. ܝܬܝܪ ܡܢ ܕܒܩܕܡܝܬܐ. ܟܕ ܟܠܗܘܢ ܬܪ̈ܥܝܗܿ ܦܬܝܚܝܢ ܗܘܘ. ܐܪܒܝܢܕܐܕܝܢ ܦܩܼܕ ܗܘܼܐ ܠܪ̈ܘܡܝܐܼ. ܕܠܐ ܢܩܪܒܘܢ ܥܡܗ. ܐܝܟ ܡܿܢ ܕܠܐ ܬܬܚܙܐ ܕܓܠܘܬܐ ܡܢ ܕܝܠܗ. ܩܠܝܠ ܕܝܢ ܡܢ ܩܘܪ̈ܝܝܐ ܕܐܝܬ ܗܘܐ ܒܡܝܕܢܐ ܢܦܩܼܘ ܠܩܘܒܠܗ ܒܩܠ̈ܥܐ. ܘܠܣܓܝ̈ܐܐ ܡܢ ܠܒܝܼ̈ܫܐ ܕܥܡܗ ܐܪܡܝܘ. ܘܡܢܗܘܢ ܐܦܠܐ ܚܕ ܢܦܼܠ. ܡܿܚܨܦܢ ܗܘ̈ܝ ܕܝܢ ܠܓܝܘܢ̈ܘܗܝ ܠܡܥܠܘ ܠܡܕܝܢܬܐ. ܘܡܐ ܕܩܪܒܘ ܠܘܬ ܬܪ̈ܥܝܗܿ܆ ܒܕܡܘܬ ܓܿܠܐ ܙܩܝܦܐ ܕܡܢ ܚܼܠܐܼ. ܡܬܡܟܟܝܢ ܡܫܬܗܝܢ ܗܘܘ ܘܥܿܛܦܝܢ. ܡܛܠ ܕܝܢ ܚܪܝܦܘܬܗ ܕܫܒܩܐ ܕܪ̈ܟܫܗܘܢ܆ ܩܠ̈ܥܐ ܕܝܢ ܒܝܢܬܗܘܢ ܡܬܚܠܛܝܢ ܗܘܘ. ܘܟܕ ܓܐܪ̈ܐ ܫܿܕܝܢ ܗܘܘ ܦܘܪ̈ܣܝܐ܆ ܘܦܪ̈ܘܢܐ ܡܢܝܦܝܢ ܗܘܘ ܗܘ̈ܢܝܐ܆ ܘܪ̈ܘܡܚܐ ܠܘܩܒܠܗܘܢ ܬܪܨܝܢ ܗܘܘ ܛܝܝ̈ܐ܇ ܠܡܟܝܘ ܚܕ ܡܢܗܘܢ ܠܐ ܡܬܡܨܝܢ ܗܘܘ. ܐܠܐ ܐܝܟ ܦܠ̈ܫܬܝܐ ܗܿܢܘܢ ܕܣܠܼܩܘ ܥܠ ܫܡܫܘܢ܆ ܕܟܕ ܛܒ ܣܓܝܐܝܢ ܗܘܘ ܘܡܙܝܢܝܢ܆ ܠܡܩܛܠ ܠܐ ܐܫܟܚ܆ ܗܘܼ ܕܝܢ ܟܕ ܥܪܛܠܝ ܡܢ ܙܝܢܐ ܒܦܟܐ ܕܚܡܪܐ ܠܐܠܦ ܡܢܗܘܢ ܩܛܠ. ܗܟܢܐ ܐܦ pb. 291 ܦܘܪ̈ܣܝܐ ܘܗܘ̈ܢܝܐ ܘܛܝ̈ܝܐ: ܟܕ ܗܼܢܘܢ ܘܪ̈ܟܫܗܘܢ ܢܿܦܠܝܢ ܗܘܘ ܡܢ ܟ̈ܐܦܐ ܕܫܕܝܢ ܗܘܘ ܩܠ̈ܥܐ: ܐܦܠܐ ܠܚܕ ܡܢܗܘܢ ܐܫܟܚ ܠܡܩܛܠ. ܘܡܢ ܕܚܙܘ ܕܠܐ ܠܡܕܝܢܬܐ ܡܫܟܚܝܢ ܠܡܥܠ܇ ܘܠܐ ܐܠܢܫ̈ܐ ܥܪ̈ܛܠܝܐ ܕܚܠܛܝܢ ܒܝܢܬܗܘܢ ܠܡܗܪܘܼ. ܐܪܡܝܘ ܢܘܪܐ ܒܝܬ ܡܪܝ ܣܪܓܝܣܘܒܝܬ ܡܘܕ̈ܝܢܐ. ܘܒܟܠܗܝܢ ܕܝܪ̈ܬܐ ܕܐܫܬܚܪܘ. ܘܒܥܕܬܐ ܕܢܓܒܬ. ܠܗܕܐ ܓܝܪ ܫܒܩܘܗܿ ܗܘܘ ܒܢ̈ܝ ܡܕܝܢܬܐ. ܐܪܒܝܢܕܐ ܕܝܢ ܣܛܪܛܠܝܛܝܣ܆ ܟܕ ܚܙܼܐ ܚܦܝܛܘܬܗܘܢ ܕܩܘܪ̈ܝܝܐܼ ܘܕܠܐ ܐܥܦܪܘ ܘܠܥܘܕܪܢܐ ܕܠܿܘܼܐ ܗܘܼܐ ܠܗܘܢܼ. ܟܿܢܼܫ ܐܢܘܢ ܒܬܪܗ ܕܝܘܡܐܼ. ܠܟܠܗܘܢ ܩܘܪ̈ܝܝܐ ܕܐܝܬ ܗܘܐ ܒܐܘܪܗܝ ܠܥܕܬܐ. ܘܝܗܼܒ ܠܗܘܢ ܡܘܗܒ̈ܬܐ ܬܠܡ̈ܐܐ ܕܝܢܪ̈ܝܢ. ܩܘܕ ܕܝܢ ܫܩܼܠ ܡܢ ܐܘܪܗܝܼ. ܘܐܙܠܼ ܫܼܪܐ ܥܠ ܢܗܪܐ ܦܪܬ. ܘܡܢ ܬܡܢ ܫܕܪ ܐܙܝ̈ܓܕܐ ܠܘܬ ܡܿܠܟܐܼ ܕܢܘܕܥܘܢܝܗܝ ܥܠ ܡܬܝܬܗ. ܛܝ̈ܝܐ ܕܝܢ ܕܐܝܬ ܗܘܐ ܥܡܗ ܥܒܪܘ ܢܗܪܐ ܠܡܥܒܪܐ ܘܒܼܙܘ ܘܐܚܪܒܘ ܘܫܒܘ ܘܐܘܩܕ ܟܠ ܕܐܫܟܚ. ܩܠܝܠ ܕܝܢ ܡܢ ܦܪ̈ܫܐ ܕܦܪ̈ܣܝܐ ܐܙܠܼ ܠܒܛܢܢ ܘܡܛܠ ܕܬܪܝܥ ܗܘܐ ܫܘܪܗܿ܆ ܠܐ ܐܫܟܚܘ ܕܢܩܘܡܘܢ ܠܘܩܒܠܗܘܢ. ܐܠܐ ܕܠܐ ܩܪܒܐ ܩܿܒܠ ܐܢܘܢܼ. ܘܡܕܝܢܬܐ ܐܫܠܡ ܠܗܘܢ.

ܫܢܬ ܬܡܢ̈ܡܐܐ ܘܚܡܫ̈ܥܣܪܐ. ܡܠܟܐ ܕܝܢ ܕܪ̈ܗܘܡܝܐ ܟܕ ܝܠܼܦ ܥܠ ܐܝܠܝܢ ܕܗܘ̈ܝܼ. ܠܩܠܠܪ ܡܓܣܛܪܘܣ ܕܝܠܗܼ ܫܼܕܪ ܥܡ ܚܝܠܐ ܣܓܝܐܐ. ܘܟܕ ܫܡܼܥ ܩܘܕ ܗܼܝ ܗܕܐ. ܥܒܼܕ ܡܫܩ̈ܠܢܘܗܝ ܥܡܗ ܕܢܗܪܐ ܦܪܬ. ܐܝܟ ܕܢܐܙܠ ܢܬܒ ܒܐܬܪܐ ܕܝܠܗ ܕܡܬܩܪܐ ܕܒܝܬ ܐܪ̈ܡܝܐ. ܘܟܕ ܡܛܝ ܠܐܦ̈ܝ ܩܠܢܝܩܘܣܼ. ܫܕܪ ܠܬܡܘܢ ܡܪܙܒܢܐ ܚܕ pb. 292 ܕܢܩܪܒ ܥܡܗܘܢ. ܘܢܦܼܩ ܥܠܘܗܝ ܛܝܡܣܛܪܛܐ ܕܘܟܣܼ. ܘܚܪܒ ܠܚܝܠܝܗ ܟܠܗ. ܘܠܗ ܐܚܕ ܒܚܝ̈ܐ. ܘܟܕ ܡܢܥ ܩܘܕ ܠܡܼܕܝܢܬܐܼ. ܣܼܕܪ ܠܩܘܒܠܗܿ ܟܠܗ ܚܝܠܗܼ ܟܕ ܓܿܙܡ ܕܢܥܩܪܝܗܿ ܘܢܿܦܩ ܠܟܠܗܘܢ ܥܡܘܪ̈ܝܗܿ ܒܪܚܪܒܐ ܘܒܫܒܝܐܿ. ܐܢ ܗܼܘ ܕܠܐ ܢܬܠܘܢܝܗܝ ܠܗ. ܕܚܼܠ ܕܝܢ ܕܘܟܣ ܡܢ ܣܓܝܐܘܬܐ ܕܚܝܠܐ ܕܦܪ̈ܣܝܐܼ. ܘܝܗܼܒܗ.. ܡܓܝܣܛܪܘܣ ܕܝܢ ܩܠܠܪܝܣܼ ܟܕ ܡܢܥ ܠܡܒܘܓ ܕܥܠ ܢܗܪܐ ܦܪܬ: ܘܚܼܙܐ ܕܐܫܩܠܗ ܩܘܕ ܡܢ ܩܕܡܘܗܝ. ܘܕܡܢܥ ܠܗ ܬܘܒ ܥܕܢܗ ܕܣܬܘܐ܇ ܘܠܐ ܡܫܟܚ ܠܡܐܙܠ ܒܬܪܗ܆ ܩܪܐ ܐܢܘܢ ܠܪ̈ܒܝ ܚܝ̈ܠܐ ܕܪ̈ܗܘܡܝܐܼ. ܘܫܼܪܐ ܐܢܘܢ ܡܛܠ ܗܿܝ ܕܠܐ ܐܫܬܼܡܥܘ ܠܚܕ̈ܕܐ. ܘܦܿܠܓ ܠܗܘܢ ܡܕܝ̈ܢܬܐ ܕܢܣܬܘܢ ܒܗ̈ܝܢ ܥܕ ܗܘܿܐ ܝܘܡܐ ܕܩܪܒܐ.܀ ܘܒܥܣܪ̈ܝܢ ܘܚܡ̈ܫܐ ܒܟܢܘܢ ܩܕܝܡܼ. ܐܬܼܐ ܦܘܩܕܢܐ ܡܢ ܡܠܟܐܼ ܘܬܫܬܒܩ ܣܘܢܛܠܝܐ ܠܟܠܗ ܒܝܬ ܢܗܪ̈ܘܬܐ. ܦܘܪ̈ܣܝܐ ܕܝܢ ܕܐܝܬ ܗܘܐ ܒܐܡܕ܇ ܟܕ ܚܙܼܘ ܕܐܒܥܕ ܠܗ ܚܝܠܐ ܕܪ̈ܗܘܡܝܐ ܡܢ ܠܘܬܗܘܢ܆ ܦܬܼܚ ܬܪ̈ܥܐ ܕܡܕܝܢܬܐ ܐܡܕ. ܘܢܿܦܩܝܢ ܗܘܘ ܘܥܿܠܝܢ ܠܟܪ ܕܨܿܒܝܢ. ܘܡܙܒܿܢܝܢ ܗܘܘ ܠܬܓܪ̈ܐ ܢܚܫܐ ܘܐܢܟܐ ܘܦܪܙܠܐ. ܘܡ̈ܐܢܝ ܐܘܪ̈ܩܥܬܐ ܘܟܠܡܕܡ ܕܡܫܬܟܚ ܗܘܐ ܒܗܿ. ܘܣܝܡܝܢ ܗܘܘ ܒܗܿ ܐܦ ܐܦܬܛܢ. ܦܛܪܝܩ ܕܝܢ ܟܕ ܫܡܼܥ ܗܕܐ ܫܩܼܠ ܡܢ ܡܠܛܝܢܐ ܕܬܡܢ ܡܣܬܐ ܗܘܐܼ. ܘܐܬܼܐ ܫܼܪܐ ܥܠ ܐܡܕ. ܘܠܟܠܗܘܢܼ ܬܓܪ̈ܐ ܕܐܫܟܚ ܕܡܿܚܬܝܢ ܗܘܘ ܠܬܡܢ ܥܒܘܪܐ ܘܡܫܚܐ܇ ܘܠܐܝܠܝܢ ܬܘܒ ܕܙܒܿܢܝܢ ܗܘܘ ܨܒܘ̈ܬܐ ܡܢ ܬܡܢ ܩܛܠ ܐܢܘܢ. ܐܫܟܚ ܕܝܢ ܐܦ ܠܦܘܪ̈ܣܝܐ ܕܐܫܬܕܪܘ ܡܢ ܩܘܕ ܕܢܿܝܬܘܢ ܠܬܡܢ ܙܝܢܐ ܘܥܒܘܪܐ ܘܚܝܘ̈ܬܐܼ ܘܚܼܪܒ ܐܢܘܢ. ܘܫܩܼܠ ܟܠܕ ܐܝܬ ܥܠܝܗܘܢ. ܘܟܕ ܝܼܕܥ ܩܘܕ ܫܕܪ ܥܠܘܗܝ ܠܡܪܙܒܢܐ ܚܕ ܕܢܬܢܩܡ ܡܢܗ. ܘܟܕ ܩܪܒ ܠܘܬ ܚ̈ܕܕܐ ܠܡܬܟܬܫܘ܇ ܪ̈ܗܘܡܝܐ ܡܛܠ pb. 293 ܕܚܠܬܐ ܕܚܘܒܬܗܘܢ ܩܕܡܝܬܐܼ. ܡܠܼܟܘܗܝ ܠܦܛܪܝܩܼ ܕܢܥܪܘܩ. ܘܗܘܼ ܐܫܬܡܥ ܠܗܕܐ. ܘܒܣܘܪܗܒܗܘܢ ܟܕ ܠܐ ܝܿܕܥܝܢ ܗܘܘ ܠܐܝܟܐ ܐܙܿܠܝܢ܆ ܐܙܠ ܦܓܥܘ ܒܢܗܪܐ ܚܕ ܕܡܬܩܪܐ ܟܠܬ. ܘܡܛܠ ܕܣܬܘܐ ܗܘܐ. ܘܡܠܝܐ ܪܒܐ ܐܝܬ ܗܘܐ ܒܗܼ. ܠܐ ܐܫܟܼܚ ܕܢܥܒܪܘܢܝܗܝ. ܐܠܐ ܟܠ ܐܝܢܐ ܡܢܗܘܢ ܕܐܣܬܪܗܒ ܠܡܥܒܪ ܒܢܗܪܐ ܐܬܚܢܩܘ ܥܡ ܣܘܣܝܗ. ܘܟܕ ܚܼܙܐ ܦܛܪܝܩܼ ܠܒܒ ܐܢܘܢ ܠܪ̈ܗܘܡܝܼܐ. ܟܕ ܐܡܿܪ. ܐܘܿ ܓܒܪ̈ܐ ܪ̈ܗܘܡܝܐܼ. ܠܐ ܢܿܒܗܬ ܛܘܗܡܢ ܘܦܠܚܘܬܢ܇ ܘܢܥܪܘܩ ܡܢ ܒܥܠܕܒ̈ܒܝܢ. ܐܠܐ ܢܬܦܢܐ ܥܠܝܗܘܢ: ܟܒܪ ܢܬܡܼܨܐ ܚܝܠܗܘܢ. ܘܐܢ ܕܝܢ ܗܼܢܘܢ ܢܬܥܫܢܘܢ ܥܠܝܢ܆ ܦܩܚ ܠܡܡܼܬ ܒܦܘܡܐ ܕܚܪܒܐ ܒܫܡܐ ܛܒܐ ܕܚܠܝܨܘܬܐܼ. ܘܠܐ ܠܡܐܒܕ ܐܝܟ ܫܦ̈ܠܐ ܒܚܢܘܩܝܐ ܕܡܝ̈ܐ. ܗܝܕܝܢ ܐܬܛܦܝܣ ܪ̈ܗܘܡܝܐ ܠܡܼܠܟܗܿ. ܡܛܠ ܐܢܢܩܐ ܕܢܗܪܐ. ܘܗܦܼܟ ܥܠ ܦܘܪ̈ܣܝܐ ܒܚܡܬܐ ܘܚܼܪܒܘ ܐܢܘܢ. ܐܡܕ. ܘܫܕܪ ܦܛܪܝܩ ܟܿܢܼܫ ܠܘܬܗ ܐܘܡ̈ܢܐܡܢ ܡܕܝ̈ܢܬܐ ܐܚܪ̈ܢܝܬܐܼ. ܘܩܘܪ̈ܝܝܐ ܣܓܝ̈ܐܐ. ܘܦܩܼܕ ܠܗܘܢ ܕܢܚܦܪܘܢ ܒܐܪܥܐܼ ܘܢܥܒܕܘܢ ܚܠܠܐ ܬܚܝܬ ܫܘܪܐ. ܕܢܬܪܦܐ ܘܢܦܠ.܀ ܒܐܝܪܚ ܐܕܪ ܟܕ ܡܬܟܢܫܝܢ ܗܘܘ ܫܪܟܐ ܕܪ̈ܗܘܡܝܐ ܠܡܚܬ ܥܡ ܡܓܣܛܪܣܼ ܐܬܿܐ ܡܕܡ ܡܢ ܐܠܗܐ ܐܬܝܼܗܒܬܿ ܠܗܘܢ ܕܢܬܠܒܒܘܢ ܘܢܬܬܟܠܘܢ ܥܠ ܙܟܘܬܐ. ܒܟܬܒܐ ܕܝܢ ܐܬܼܝܕܥܬܿ ܠܢ ܡܢ ܒܢ̈ܝ ܥܕܬܐ ܕܙܓܡܐ. ܕܠܐ ܕܝܢ ܬܣܬܒܪ ܕܡܢ ܝܕܠܝ ܐܡܿܪ ܐܢܐ ܡܕܡ. ܐܘܿ ܕܠܫܡܥܐ ܕܓܠܐ ܐܬܛܦܿܝܣܬ ܕܐܿܫܪ܇ ܠܗܝܢ ܠܡ̈ܠܐ ܕܝܠܗܿ ܕܐܝܓܪܬܐ ܗܝܿ ܕܐܬܼܬ ܠܢ ܣܿܝܡ ܐܢܐܼ. ܕܐܝܬܝܗܝܢ ܗܟܢܐ. ܫܡܼܥ ܗܟܝܠ ܬܕܡܘܪܬܐ ܘܚܕܘܬܐ ܕܫܘܒܚܐ܆ ܕܠܐ ܗܘܼܬ ܐܟܘܬܗܿ. ܡܛܠ ܕܗܕܐ ܕܝܠܢ pb. 294 ܗܝܼ ܘܕܝܠܟܘܢ ܘܕܟܠܗܘܢ ܪ̈ܗܘܡܝܐ. ܣܘܥܪܢܐ ܗܘ ܓܝܪ ܬܡܝܗܐܼ. ܕܥܣܩܐ ܠܬܪܥܝܬܐ ܕܒܢ̈ܝ ܒܣܪܐ ܕܢܫܪܘܢܝܗܝ. ܚܢܢ ܕܝܢ ܒܥܝܢ̈ܝܢ ܚܼܙܝܢ ܘܠܒܟܢܝܗܝ ܘܒܣܦ̈ܘܬܢ ܩܼܝܢ. ܕܠܐ ܟܫܠܐ ܕܡܕܡ ܙܿܕܩ ܠܟܘܢ ܕܬܫܿܪܘܢ. ܒܬܫܬܥܣܪ̈ ܒܐܕܪ ܒܝܘܡ ܥܪܘܒܬܐ܇ ܕܐܝܬܘܗܝ ܝܘܡ ܩܛܠܗ ܕܦܪܘܩܢ. ܝܠܼܕܬܿ ܘܙܬܐ ܒܝܥܬܐ ܒܥܓܪ ܩܪܝܬܐ ܕܒܟܘܪܐ ܕܙܓܡܐ. ܘܟܬܝܒ ܒܗܿ ܟܬܝ̈ܒܬܐ ܝܘܢ̈ܝܬܐ ܕܫܦܝܪ̈ܢܼ ܘܡܬܩܪܝܢ. ܐܝܬܝܗܝܢܼ ܐܝܟ ܓܘܫܡܐ ܕܝܠܗܿ ܕܒܝܥܬܐ ܘܪ̈ܡܢ ܒܚܙܘܗܝܢ ܘܒܓܫܬܗܝܢ܆ ܒܕܡܘܬ ܟܬܝ̈ܒܬܐ ܗܠܝܢ ܕܟܬܒܝܢ ܕܝܪ̈ܝܐ ܥܠ ܦܬܕܪ̈ܐ ܕܒܘܪܟܬܐ. ܘܡܬܪܓܫܐ ܕܡܘܬܐ ܕܝܠܗܝܢ ܐܦ ܠܣܡ̈ܝܐ. ܐܝܬܝܗܝܢ ܕܝܢ ܗܟܢܐ. ܪܫܝܡ ܨܠܝܒܐ ܒܓܒܗܿ ܕܒܝܥܬܐ. ܘܡܢܗ ܥܕܡܐ ܕܐܬܼܐ ܡܼܛܐ ܠܗ ܟܕ ܚܕܪ ܘܟܿܪܟ ܠܒܝܥܬܐ. ܟܬܝܒ ܪ̈ܗܘܡܝܐ. ܘܬܘܒ ܪܫܝܡ ܨܠܝܒܐ ܐܚܪܢܐ. ܘܡܢܗ ܥܕܡܐ ܕܐܬܼܐ ܡܼܛܠ ܠܗ ܟܬܝܒܼ ܙܟܿܝܢ. ܨܠ̈ܝܒܐ ܚܕ ܠܥܠ ܡܢ ܚܕ ܪܫܼܝܡܝܢ. ܘܫܡ̈ܗܐ ܚܕ ܠܥܠ ܡܢ ܚܕ ܟܬܝܒܝܢ. ܘܠܝܬ ܟܪܣܛܝܢܐ ܐܘܿ ܝܗܘܕܝܐ ܕܢܚܙܐ ܬܕܡܘܪܬܐ ܗܕܐ܆ ܘܢܫܠܐ ܦܘܡܗ ܡܢ ܬܫܒܘܚܬܐ. ܠܟܬܝ̈ܒܬܐ ܕܝܢ ܕܟܬܼܒܬܿ ܝܡܝܢܗ ܕܐܠܗܐ ܒܓܘ ܡܪܒܥܐ܇ ܕܢܕܡܐ ܒܗ̈ܝܢ ܠܐ ܡܿܡܪܚܝܢܢ ܕܣܓܝ ܫܦܝܪ̈ܢ. ܟܠ ܡܢ ܗܟܝܠ ܕܫܿܡܥ ܬܫܪ ܠܗ ܕܠܐ ܦܘܠܓܐ.. ܗܠܝܢ ܐܢܗܝܢ ܡ̈ܠܟܐ ܕܐܝܓܪܬܐ ܗܝܿ ܕܙܘܓܡ̈ܛܝܐ. ܠܼܗܿ ܕܝܢ ܠܒܝܥܬܐܼ ܝܗܒܼܘܗܿ ܐܝܠܝܢ ܕܐܬܝܼܠܕܬܿ ܒܩܪܝܬܗܘܢ pb. 295 ܠܐܪܒܝܢܕܐ.܀ ܪ̈ܗܘܡܝܐ ܕܝܢ ܐܬܟܢܫܘ ܚܝܠܐ ܣܓܝܐܐ ܘܢܚܼܬܘ ܫܼܪܘ ܠܘܬ ܪܝܫܥܝܢܐ ܡܕܝܢܬܐ. ܐܦ ܡܢ ܩܘܕ ܕܝܢ ܐܫܬܕܪܘ ܐܝܟ ܥܣܪ̈ܐ ܐܠܦܝܢ ܕܢܐܬܘܢ ܥܠ ܦܛܪܝܩ. ܘܥܼܠܘ ܫܼܪܘ ܒܢܨܒܝܢ ܕܢܬܬܢܝܚܘܢ ܬܡܢ. ܘܫܕܪܘ ܒܥܝܪܗܘܢ ܕܬܪܥܐ ܒܛܘܪܐ ܕܫܝܓܪ. ܘܟܕ ܫܡܼܥ ܒܓܝܣܛܪܘܣ ܫܕܪ ܠܛܝܡܣܛܪܛܐ ܕܘܟܣ ܕܩܠܢܝܩܣܼ. ܥܡ ܫ̈ܬܐ ܐܠܦܝܢ ܦܪ̈ܫܝܢ. ܘܐܙܠܘ ܢܦܼܠ ܥܠ ܐܝܠܝܢ ܕܪܥܿܝܢ ܗܘܘ ܠܗܘܢ ܠܪ̈ܟܫܐܼ ܘܚܼܪܒ ܐܢܘܢ. ܘܕܒܼܪ ܡܢ ܬܡܢ ܪ̈ܟܫܐ ܘܥܢܐ ܘܒܙܬܐ ܣܓܝܐܬܐ. ܘܗܦܼܟ ܠܘܬ ܚܝܠܐ ܕܪ̈ܗܘܡܝܐ ܠܪܝܫܥܝܢܐ. ܗܝܕܝܢ ܫܩܼܠ ܟܠܗܘܢ ܟܢܝܫܐܝܬܼ. ܘܐܙܼܠ ܫܼܪܘ ܥܠ ܐܡܕ ܡܕܝܢܬܐܼ ܠܘܬ ܦܛܪܝܩ.܀ ܒܐܝܪܚ ܐܝܪ ܗܼܘܐ ܩܠܝܘܦ ܚܠܒܝܐ ܗܘܦܪܟܐ. ܘܐܬܼܐ ܝܬܼܒ ܒܐܘܪܗܝ. ܘܝܗܼܒ ܚ̈ܛܐ ܠܐܘܪ̈ܗܝܐ ܕܢܥܒܕܘܢ ܼ ܒܘܩܠܛܢ ܒܢܦܩ̈ܬܗܘܢ. ܘܐܦܼܘ ܒܙܒܢܐ ܗܢܐ ܚ̈ܛܐ ܡܕܘ̈ܬܐ ܬܡܢ̈ܡܐܐ ܘܚܡ̈ܫܝܢ ܐܠܦ̈ܝܢ. ܐܦܝܘܢ ܕܝܢ ܐܙܠܼ ܠܐܠܟܣܢܕܪܝܐ. ܕܐܦ ܬܡܢ ܢܥܒܕ ܒܘܩܠܛܢ ܘܢܫܕܪ ܠܚܡܐ.܀ ܦܛܪܝܩ ܕܝܢ ܟܕ ܡܛܝ ܒܚܠܠܐ ܗܘܿ ܕܚܦܼܪ ܗܘܐܬܚܝܬ ܫܘܪܐ ܕܐܡܕ. ܣܡܟܗ ܒܩܝ̈ܣܐ ܘܐܪܡܝ ܒܗܘܢ ܢܘܪܐ. ܘܐܬܪܦܝ ܐܦܘ̈ܗܝ ܒܪ̈ܝܬܐ ܕܫܘܪܐ ܘܢܼܦܠ. ܘܓܘ̈ܝܬܐ ܩܿܝ̈ܡܢ ܗܘ̈ܝ. ܘܐܬܪܥܝ ܕܒܗ ܒܚܠܠܐ ܢܚܦܘܪ ܘܢܥܘܠ ܠܓܘ ܡܕܝܢܬܐ. ܘܟܕ ܦܠܫܗ ܠܚܦܪܐ ܘܫܪܝܘ ܪ̈ܗܘܡܝܐ ܠܡܣܼܡ܆ ܚܼܙܬܿ ܐܢܘܢ ܐܢܬܬܐ ܚܕܐ ܐܡܕܝܬܐ. ܘܡܢ ܚܕܘܬܗܿ ܩܥܬܿ ܡܢ ܫܠܝܼ ܕܗܐ ܪ̈ܗܘܡܝܐ ܥܿܠܝܢ ܠܡܕܝܢܬܐ. ܘܫܡܥܼܘܗܿ ܦܘܪ̈ܣܝܐ ܘܪܗܼܛܘ ܥܼܠ ܩܕܡܝܐ ܕܣܠܼܩܘܕܓܼܫܘܗܝ. ܘܒܬܪܗ ܣܠܼܩ ܓܘܬܝܐ ܕܫܡܗ ܐܠܕ. ܘܥܒܝܕ ܗܘܐ ܛܪܝܒܘܢܐ ܒܚܪܢ. ܘܠܬܠܐ ܡܢ ܦܪ̈ܣܝܐ ܗܿܢܘܢ ܕܓܼܫ. ܘܐܚܪܢܐ ܡܢ ܪ̈ܗܘܡܝܐ ܠܐ ܣܠܩܘ ܒܬܪܗ. ܡܛܠ ܕܐܪܓܫܘ ܗܘܘ pb. 296 ܠܗܘܢ ܦܪ̈ܣܝܐ. ܘܟܕ ܚܼܙܐ ܐܠܕ ܕܠܝܬ ܐܢܫ ܕܣܠܿܩ ܕܚܠܼ ܘܗܦܼܟ ܠܒܣܬܪܗ. ܘܐܬܪܥܝ ܕܠܫܠܕܗ ܕܪܗܘܡܝܐ ܗܘܿ ܕܢܦܼܠ܆ ܥܡܗ ܢܿܚܬܝܗܿ ܕܠܐ ܢܒܿܙܚܘܢ ܒܗܿ ܦܪ̈ܣܝܐ. ܘܟܕ ܓܐܿܪ ܠܗܿ ܠܫܠܕܐ ܘܢܿܚܬ ܒܦܘܡܗ ܕܚܦܪܐ ܡܚܘܗܝ ܦܪ̈ܣܝܐ ܐܦ ܠܗ ܘܨܠܦܼܘܗܝ. ܘܬܼܪܨ ܠܬܡܘܢ ܡܝ̈ܐ ܡܢ ܥܝܢܐ ܪܒܬܐ ܕܩܪܝܒܐ ܗܘܬ ܠܗܼ. ܘܚܢܩܘ ܬܡܢ ܥܝܢܐ ܪܒܬܐ ܕܩܪܝܒܐ ܗܘܬ ܠܗܼ. ܘܚܢܩܘ ܬܡܢ ܐܪ̈ܒܥܐ ܡܢ ܠܒܝ̈ܫܐ ܕܪ̈ܗܘܡܝܐ ܕܡܛܝܒܝܢ ܗܘܘ ܠܡܣܼܡ. ܘܫܪܟܗܘܢ ܥܪܩܘ ܘܢܦܩ ܡܢ ܬܡܢ. ܘܦܘܪ̈ܣܝܐ ܟܢܼܫ ܟ̈ܐܦܐ ܡܢ ܓܘ ܡܕܝܢܬܐ ܘܣܟܕܘܗܝ ܠܚܦܪܐ. ܘܠܥܠ ܡܢܗ ܟܫܼܘ ܡܕܪܐ ܣܓܝܐܐ. ܘܢܿܛܪܝܢ ܗܘܘ ܙܗܝܪܐܝܬ ܟܠܗܘܢ ܚܕܪ̈ܘܗܝܼ. ܕܕܠܡܐ ܡܢ ܕܘܟܬܐܐܚܪܝܬܐ ܢܬܦܠܫ. ܚܦܼܪ ܕܝܢ ܦܣ̈ܐ ܡܢ ܠܓܘ ܥܡ ܟܠܗ ܫܘܪܐܼ ܟܕ ܚܕܪ ܘܡܠܼܘ ܐܢܝ̈ܢ ܡܝ̈ܐ. ܐܝܟ ܕܐܢ ܗܘܼ ܕܥܿܒܕܝܢ ܪ̈ܗܘܡܝܐ ܚܠܠܐ ܐܚܪܢܐ ܢܕܘܒܘܢ ܡܝ̈ܐ ܠܓܘܗ ܘܢܬܝܕܥ. ܘܟܕ ܝܠܦܼ ܦܛܪܝܩ ܗܼܝ ܗܕܐ ܡܢ ܡܿܫܠܡܢܐ ܕܢܚܼܬ ܠܘܬܗܼ. ܐܗܡܝ ܡܢ ܚ̈ܠܠܐ.. ܒܚܕ ܡܢ ܝܘ̈ܡܝܢ ܕܝܢܼ ܟܕ ܫܼܪܐ ܟܠܗ ܚܝܠܐ ܕܪ̈ܗܘܡܝܐ ܘܒܗܝܠܼ. ܓܘܪܓܐ ܗܘܼܐ ܠܩܪܒܐ ܗܟܢܐ. ܛܠܝܐ ܚܕ ܪܥܿܐ ܗܘܐ ܓܡ̈ܠܐ ܘܚܡܪ̈ܐ. ܘܗܿܠܟ ܚܡܪܐ ܟܕ ܪܥܿܐܼ ܘܥܼܠ ܠܗ ܠܘܬ ܫܘܪܐ. ܘܛܠܝܐ ܕܚܼܠ ܕܢܥܘܠ ܢܝܬܝܘܗܝ. ܘܚܕ ܡܢ ܦܪ̈ܣܝܐ ܟܕ ܚܼܙܝܗܝ ܢܚܼܬ ܒܚܿܒܠܐ ܡܢ ܫܘܪܐ. ܘܨܿܒܐ ܗܘܐ ܕܢܦܣܩܝܘܗܝ ܘܢܣܩܝܘܗܝ ܕܢܗܘܐ ܠܗܘܢ ܠܡܟܠܬܐ. ܠܐ ܓܝܪ ܐܝܬ ܗܘܐ ܒܣܪܐ ܒܓܘ ܡܕܝܢܬܐ ܠܓܡܪ. ܚܕ ܕܝܢ ܡܢ ܦܠ̈ܚܐ ܕܪ̈ܗܘܡܝܐ ܕܐܝܬܘܗܝ ܒܛܘܗܡܗ ܓܠܝܠܝܐ ܫܡܼܛ ܣܝܦܗ ܘܣܟܪܗ ܫܩܼܠ ܒܣܡܠܗ ܘܪܗܼܛ ܥܠ ܦܪܣܝܐ ܕܢܩܠܝܘܗܝ. ܘܡܛܠ ܕܡܿܢܥ ܗܘܐ ܠܗ ܠܘܬ ܫܘܪܐ܇ ܫܕܘ ܗܠܝܢ ܕܩܿܝܡܝܢ ܠܥܠ ܡܢ ܫܘܪܐ ܟܐܦܐ ܚܕܐ ܪܒܬܐ ܘܦܼܥܘܩ ܠܓܠܝܠܝܐ ܗܘܿ. pb. 297 ܘܦܘܪܣܝܐ ܫܪܝ ܕܢܣܩ ܠܕܘܟܬܗ ܒܚܿܒܠܐ. ܘܟܕ ܡܿܛܝ ܠܦܠܓܗ ܕܫܘܪܐܼ. ܩܿܪܒ ܚܕ ܡܢ ܡܕܒܪܗܢܐ ܕܪ̈ܗܘܡܝܐ: ܟܕ ܐܿܙܠܝܢ ܗܘܘ ܩܕܡܘܗܝ ܬܪܗܝܢ ܫܩܝ̈ܠܝ ܣܟܪ̈ܐܼ. ܘܫܼܕܐ ܟܕ ܐܿܙܠܝܢ ܗܘܘ ܩܕܡܘܗܝ ܬܪ̈ܝܢ ܫܩܝ̈ܠܝܠ ܣܟܪ̈ܐ. ܘܫܼܕܐ ܓܐܪܐ ܡܢ ܒܝܢܬܗܘܢ ܘܡܼܚܝܗܝ ܠܦܘܪܣܝܐ ܗܘܿ. ܘܫܕܝܗܝ ܠܘܬ ܓܠܝܠܝܐ ܗܿܘ. ܘܩܥܬܐ ܡܢ ܬܪ̈ܝܗܘܢ ܓܒ̈ܐ ܗܘܼܬ. ܘܡܛܠ ܗܕܐ ܐܬܬܙܝܥܘ ܘܩܡܘ ܠܡܿܒܩܪܒܘ. ܘܟܠܗܘܢ ܚܝ̈ܠܘܬܐ ܕܪ̈ܗܘܡܝܐ ܠܡܕܝܢܬܐ ܚܕܝܪܝܢ ܗܘܘ ܟܢܝܫܐܝܬ ܘܣܒܝܒܐܝܬ. ܘܢܦܼܠ ܡܢܗܘܢ ܐܪܒܥܝܢ ܓܒܪ̈ܝܢ ܘܡ̈ܐܐ ܘܚܡ̈ܫܝܢ ܐܬܚܝܘ. ܘܡܢ ܦܪ̈ܣܝܐ ܕܥܠ ܫܘܪܐ ܬܫܥܐ ܒܠܚ.ܘܕ ܐܬܚܼܙܝܘ ܕܡܝܼܬ. ܕܠܝܗܠܐ ܗܘܘ ܡܡܚܝ̈ܐ. ܥܣܼܩ ܗܘܐ ܓܝܪ ܠܡܿܩܪܒܘ ܥܡܗܘܢ: ܟܡܐ ܕܒܪܘܡܐ ܕܫܘܪܐ ܐܝܬܗܝܘܢ ܗܘܘ. ܡܛܠ ܕܐܦ ܒ̈ܬܐ ܙܥܘܪ̈ܐ ܒܢܼܘ ܠܗܘܢ ܥܠ ܟܠܗ ܫܘܪܐ. ܘܒܓܘܗܘܢ ܩܿܝܡܝܢ ܗܘܘ ܘܡܩܪܒܝܢ ܘܠܗܠܝܢ ܕܠܒܪ ܠܐ ܡܬܚܙܝܢ ܗܘܘ. ܡܝܓܣܛܪܘܣ ܘܪ̈ܒܝ ܚܝܠܐ ܕܝܢܼ ܐܬܚܫܒܘ ܕܠܐ ܙܿܕܩ ܠܗܘܢ ܕܢܩܪܒܘܢ ܥܡܗܘܢ. ܡܛܠ ܕܠܐ ܗܘܐ ܒܩܠܗܘܢ ܗܘܿܝܐ ܙܟܘܬܐ ܠܪ̈ܗܘܡܝܐ. ܒܗܝܿ ܕܩܪܒܐ ܕܥܡ ܟܠܗܘܢ ܦܘܪ̈ܣܝܐ ܩܿܝܡ ܠܗܘܢ. ܘܐܢ ܗܼܘ ܕܩܘܕ ܡܙܕܟܐܼ. ܗܼܢܘܢ ܡܫܠܡܝܢ ܢܦܫܗܘܢ ܐܘ ܣܿܝܦܝܢ ܒܚܒܘܫܝܗܘܢ. ܘܡܛܠ ܗܕܐ ܦܩܼܕ ܕܠܐ ܐܢܫ ܢܩܪܒ ܥܡܗܘܢ. ܕܕܠܐ ܒܥܠܬ ܐܝܠܝܢ ܕܡܝܬܝܢ ܐܘ ܡܬܡܚܝܢ ܡܢ ܪ̈ܗܘܡܝܐ܆ ܣܓܝܐܘܬܗ ܕܚܝܠܐ ܬܬܦܠܗܕ.܀ ܒܐܪܝܚ ܚܙܝܪܢ ܕܝܢܼ ܩܘܣܛܢܛܝܢܐ ܗܘܿ ܕܐܙܠܼ ܗܘܐ ܥܡ ܦܪ̈ܣܝܐܼ. ܟܕ ܚܼܙܐ ܕܠܐ ܐܨܠܚܬܿ ܨܒܘܬܗܘܢ܆ ܥܪܩ ܡܢ ܠܘܬܗܘܢ. ܗܘܼ ܘܬܪ̈ܬܝܢ ܢܫ̈ܝܢ ܝܕܝ̈ܥܬܐ ܕܡܢ ܐܡܕ: ܕܡܢ ܡܠܟܐ ܕܦܪ̈ܣܝܐ ܐܬܝܼܗܒ ܗܘ̈ܝ ܠܗ. ܘܝܘܡ̈ܬܐ ܐܪܒܬܥܣܪ̈ ܪܼܕܐ ܠܝܠܝ ܐܝܡܡ ܒܡܕܒܪܐ ܕܠܝܬ ܒܗ ܐܢܫܼ ܥܡ ܕܠ̈ܠܝܠܐ ܕܥܡܗ. ܘܟܕ ܡܢܥ ܠܘܬ ܫܝܢܐ. pb. 298 ܫܘܕܥ ܢܦܫܗ ܠܛܝ̈ܝܐ ܕܪ̈ܗܘܡܝܐܿ. ܘܕܒܪܘܗܝ ܘܐܝܬܝܘܗܝ ܠܩܣܛܪܐ ܕܡܬܩܪܐ ܫܘܪܐ. ܘܡܢ ܬܡܢ ܫܕܪܘܗܝ ܠܐܘܪܗܝ. ܘܟܕ ܫܡܼܥ ܡܠܟܐ ܥܠ ܡܬܝܬܗܼ. ܫܕܪ ܒܬܪܗ. ܘܟܕ ܡܿܢܥ ܕܢܣܩ ܠܘܬܗܼ. ܦܩܼܕ ܠܚܕ ܡܢ ܐܦܝܣ̈ܩܦܐܼ. ܕܢܣܝܡ ܥܠܘܗ ܝܐܝܕܐ ܕܩܫܝܫܘܬܐ. ܘܢܐܙܠ ܢܿܬܒ ܒܢܩܝܐ ܡܕܝܢܬܐܼ ܘܩܕܡܘܗܝ ܠܐ ܢܬܚܙܐ ܘܐܦܠܐ ܠܣܘܥܪܢܐ ܢܬܩܿܪܒ.܀ ܩܘܕ ܕܝܢ ܡܛܠ ܕܟܕ ܟܒܫܗܿ ܠܐܡܕ܆ ܥܼܠ ܐܦ ܠܕܝܡܣܝܢ ܕܝܠܗܿ. ܘܢܣܝ ܠܥܘܕܪܢܐ ܕܡܢ ܡܣܚܘܬܐ. ܦܩܼܕ ܗܘܐ ܡܚܕܗܿ ܕܢܚܼܬ ܠܐܬܪܗܼ. ܕܢܬܒܢ̈ܝܢ ܒܠ̈ܢܣ ܒܟܠܗܘܢ ܡܚܘ̈ܙܐ ܕܒܝܬ ܦܘܪ̈ܣܝܐ. ܥܕܝܕ ܕܝܢ ܛܝܝܐ ܕܬܚܝܬ ܐܝܕܐ ܕܦܪ̈ܣܝܐܼ. ܐܫܠܡ ܗܘܼ ܘܟܠܗܼ ܚܝܠܗ. ܘܐܫܬܥܒܕ ܠܪ̈ܗܘܡܝܐ. ܬܘܒ ܕܝܢ ܒܐܝܪܚ ܬܡܘܙܼ. ܐܩܪܒܘ ܪ̈ܗܘܡܝܐ ܥܡ ܦܘܪ̈ܣܝܐ ܕܒܐܡܕ. ܘܓܢܐܣ ܕܘܟܣ ܕܐܪܒܝܐ ܠܣܓܝ̈ܐܐ ܡܢܗܘܢ ܡܿܚܝ ܒܓܐܪ̈ܐ. ܟܕ ܚܡ ܝܘܡܐ ܪܬܚܘ ܥܠܘܗܝ ܙܝܢܗ. ܘܫܼܪܐ ܚܙܩܐ ܕܫܪܝܢܗ ܩܠܝܠ. ܘܫܕܘ ܡܢ ܐܡܕ ܓܐܪܗܐ ܕܒܠܣܛܣ ܘܡܚܘܗܝ ܘܡܝܼܬ. ܟܕ ܚܼܙܐ ܕܝܢ ܡܓܣܛܪܣܼ. ܕܣܘܓܦܢܐ ܗܘܿܐ ܠܗ ܡܢ ܗܕܐ ܕܝܿܬܒ ܥܠ ܐܡܕ܇ ܕܒܼܪ ܚܝܠܗ ܘܢܚܼܬ ܠܒܝܬ ܦܪ̈ܣܝܐ. ܘܠܦܛܪܝܩ ܫܒܩܗ ܠܘܬ ܐܡܕ. ܘܐܦ ܐܪܒܝܢܕܐ ܕܒܼܪ ܚܝܠܗ ܘܥܼܠܘ ܠܐܪܡܢܝ ܕܦܪ̈ܣܝܐ. ܘܚܼܪܒ ܡܢ ܐܪ̈ܡܢܝܐ ܘܡܢ ܦܪ̈ܣܝܐ ܥܣܪ̈ܐ ܐܠܦܝܢ ܓܒܪ̈ܝܢ. ܘܫܒܼܘ ܢܫ̈ܐ ܘܛܠ̈ܝܐ ܬܠܬ̈ܝܢ ܐܗܠܦܝܢ. ܘܩܘܪ̈ܝܐ ܣܓܝ̈ܐܬܐ ܒܙܘ ܘܐܘܩܕ. ܘܡܕ ܗܦܼܟܘ ܕܢܐܬܘܢ ܠܘܬ ܐܡܕܼ ܥܢܐ ܘܬܘܪ̈ܐ ܘܒܥܝܪܐ ܕܒܼܪܼ. ܡ̈ܐܐ ܘܥܣܪ̈ܝܢ ܐ̈ܠܦܝܢ. ܘܟܕ ܥܿܒܪܝܢ ܥܠ ܓܢܒ ܢܨܒܝܢ ܡܕܝܢܬܐܼ. ܝܬܒܘ ܪ̈ܗܘܡܝܐ ܒܟܡܐܢܐ. ܘܠܫܒܝܬܐ ܡܿܥܒܪܝܢ ܗܘܘ ܕܠܝ̈ܠܐ ܕܢܿܩܦܝܢ ܠܗܿ. ܘܟܕ ܚܼܙܐ ܡܪܙܒܢܐ ܚܕ ܕܐܝܬ ܗܘܐ ܬܡܢܼ ܕܙܥܘܪܝܢ ܐܢܘܢܼ. ܙܿܝܢ ܚܝܠܗ ܘܢܦܼܩ pb. 299 ܕܢܥܕܝܗܿ ܡܢܗܘܢ. ܘܗܢܼܘܢ ܚܘܝܘ ܢܦܫܗܘܢ ܐܝܟ ܥܿܪܩܝܢ. ܘܦܘܪ̈ܣܝܐܼ ܐܬܠܒܒܘ ܘܪܕܦܝܢ ܗܘܘ ܠܗܘܢ. ܘܟܕ ܐܪܚܩ ܡܢ ܠܘܬܗܘܢܼ. ܩܼܡܘ ܪ̈ܗܘܡܝܐ ܡܢ ܟܡܐܢܐܼ ܘܚܪܒܘ ܐܢܘܢ. ܘܐܢܫ ܠܐ ܐܬܦܠܛ ܡܢܗܘܢ. ܗܘܿܝܢ ܗܘܘ ܐܝܟ ܫ̈ܒܥܐ ܐ̈ܠܝܢ ܓܒܪ̈ܝܢ. ܐܦ ܡܘܫܠܩ ܕܝܢ ܐܪܡܢܝܐ: ܕܬܚܝܬ ܐܝܕܐ ܕܦܪ̈ܣܝܐ܇ ܐܫܠܡ ܗܘܼ ܘܟܠܗ ܚܝܠܗܼ ܘܐܫܬܥܒܕ ܠܪ̈ܗܘܡܝܐ.

ܫܢܬ ܬܡܢ̈ܡܐܐ ܘܫܬܬܥܣܪ̈ܐ. ܘܣܪ̈ܝܕܐ ܕܝܢ ܘܦܠ̈ܝܛܝ ܚܪܒܐܼ ܕܒܐܡܕ ܐܫܬܚܪܘ ܡܢ ܥܡܘܪ̈ܝܗܿ: ܒܛܘܪܦܐ ܘܒܫܘܢܩܐ ܣܓܝܐܐ ܐܝܬܝܗܘܢ ܗܘܘ ܡܢ ܟܦܢܐ. ܕܚܠܘ ܓܝܪ ܡܢܗܘܢ ܦܘܪ̈ܣܝܐܼ. ܕܕܠܡܐ ܢܫܠܡܘܢܗܿ ܠܡܕܝܢܬܐ ܠܪ̈ܗܘܡܝܐ. ܘܦܼܟܪ ܐܢܘܢ ܠܟܠܗܘܢ ܓܒܪ̈ܐ ܕܐܝܬ ܗܘܘ ܬܡܢ܆ ܘܫܼܕܘ ܐܢܘܢ ܒܩܘܢܝܓܝܢ. ܘܗܟܢܐ ܣܦܘ ܒܟܦܢܐ ܘܐܦ ܒܦܟܪ̈ܐ ܕܠܥܠܡ. ܠܢ̈ܫܐ ܕܝܢ ܝܿܗܒܝܢ ܗܘܘ ܡܢ ܡܟܘܠܬܗܘܢܼ. ܡܛܠ ܕܓܿܝܪܝܢ ܗܘܘ ܒܗ̈ܝܢ. ܘܬܘܒ ܡܛܠ ܕܡܬܒܥܝܢ ܗܘܗܝ ܠܗܘܢ ܠܡܼܛܚܢ ܘܠܡܼܦܐ ܠܗܘܢ. ܘܟܕ ܚܣܼܪܬܿ ܠܗܿ ܠܗܘܢ ܬܪܣܝܬܐ ܐܒ̈ܣܝܘ ܒܗ̈ܝܢ ܘܫܒܼܩܘ ܐܢܝ̈ܢ ܕܠܐ ܣܝܒܪܬܐ. ܠܐ ܓܝܪ ܫܿܩܠ ܗܘܐ ܚܕ ܡܢܗܘܢ ܒܗܕܐ ܫܢܬܐ: ܐܠܐ ܐܢ ܡܠܐ ܚܘܦܢܗ ܣܥܪ̈ܐ ܒܝܘܡܐ. ܒܣܪܐ ܕܝܢ ܘܚܡܪܐ ܐܘ ܡܕܡ ܐܚܪܝܢ ܕܡܟܘܠܬܐܼ. ܟܠ ܟܠܗ ܠܝܬ ܗܘܐ ܠܗܘܢ. ܘܡܛܠ ܕܣܓܝ ܕܚܿܠܝܢ ܗܘܘ ܡܢ ܪ̈ܗܘܡܝܐܼ. ܡܢ ܡܛܪ̈ܬܗܘܢ ܠܐ ܡܫܿܢܝܢ ܗܘܘ ܠܓܡܪ. ܐܠܐ ܥܒܼܕ ܠܗܘܢ ܬܢܘܪ̈ܐ ܙܥܘܪ̈ܐ ܥܠ ܫܘܪܐܼ. ܘܐܣܩ ܠܗܘܢ ܪ̈ܚܘܬܐ ܕܐܝ̈ܕܝܐ. ܘܥܠ ܕܘ̈ܟܝܬܗܘܢ ܛܿܚܢܝܢ ܗܘܘ ܠܗܿ ܠܗܿܝ ܚܘܦܢܐ ܕܣܥܪ̈ܐܼ ܘܐܦܿܝܢ ܘܐܟܿܠܝܢ. ܐܣܩ ܕܝܢ ܐܦ ܥܪ̈ܒܐ ܪܘܪ̈ܒܬܐ ܕܠܝܫܐ ܘܣܼܡ ܐܢܝ̈ܢ ܒܝܬ ܥܥܝ̈ܬܐ ܘܡܠܼܘ ܐܢܝ̈ܢ ܡܕܪܐ. ܘܙܪܥܘ ܒܗ̈ܝܢ ܝܪ̈ܩܘܢܐ. ܘܡܕܡ ܕܝܿܥܐ ܗܘܐ ܒܗ̈ܝܢ ܐܟܿܠܝܢ ܗܘܘ.܀ ܠܡܬܼܢܐ ܡܕܡ ܕܣܿܥܪܗܢ ܗܘ̈ܝ ܢܫ̈ܐ ܕܬܡܢ܆ ܟܒܪ ܠܐ ܡܬܗܝܡܢܐ ܠܐܝܠܝܢ ܕܡܢ ܒܬܪܢ. ܝܘܡܢܐ ܠܝܬ ܐܢܫ pb. 300 ܡܢ ܐܝܠܝܢ ܕܚܿܦܝܛܝܢ ܠܡܕܥ ܨܒܘ̈ܬܐܿ. ܕܠܐ ܫܡܝ̈ܥܢ ܠܗ ܟܠܗܝܢ ܐܝܠܝܢ ܕܐܣܬܥܪ. ܐܦܢ ܢܗܘܐ ܕܒܪܘܚܩܐ ܣܓܝܐܐ ܡܒܥܕ ܡܢ ܠܘܬܢ. ܐܬܟܢܫ ܗܟܝܠ ܣܓܝ̈ܐܬܐ ܘܩܼܛܪ ܐܪ̈ܙܐ ܒܝܢܬܗܝܢܼ ܘܢܦ̈ܩܢ ܗܘ̈ܝ ܡܓܢܒܐܝܬ ܠܫܘ̈ܩܐ ܕܡܕܝܢܬܐܼ. ܒܪܡܫܐ ܐܘ ܒܨܦܪܐ. ܘܠܡܢ ܕܡܫܟ̈ܚܢ ܗܘ̈ܝ ܐܢ ܐܢܬܐ ܘܐܢ ܛܠܝܐ [ܘܐܢ] ܣܒܐ ܕܡܨܝ̈ܢ ܗܘ̈ܝ ܒܚܝܠܗܼ ܚܛ̈ܦܢ ܗܘ̈ܝ ܠܗ ܠܓܘ ܒܝܬܐܼ ܘܩ̈ܛܠܢ ܘܐܟ̈ܠܢ ܠܗܼ. ܒܫܠܩܐ ܐܘ ܒܛܘܝܐ. ܘܟܕ ܐܬܩܪܣܝ ܡܢ ܪܝܚܐ ܕܛܘܝܐ: ܘܐܬܝܼܕܥܬܿ ܨܒܘܬܐ ܠܡܪܙܒܢܐ ܗܿܘ ܕܐܝܬ ܗܘܐ ܬܡܢ܆ ܐܫܬܢܕ ܒܣܓܝ̈ܐܬܐ ܡܢܗܝܢ ܘܩܼܛܠ ܐܢܝܢ. ܘܐܬܚܠܡ ܠܐܝܠܝܢ ܕܦܫ܆ ܕܬܘܒ ܠܐ ܢܣܥܪ̈ܢ ܗܕܐ ܘܢܩ̈ܛܠܢܼ ܠܐܢܫ. ܐܦܣ ܠܗܝܢ ܕܝܢ ܠܡܐܟܠ ܐܝܠܝܢ ܕܡܝ̈ܬܝܢ. ܘܗܕܐ ܣܿܥܪ̈ܢ ܗܘ̈ܝ ܓܠܝܐܝܬ. ܘܐܟܠ̈ܢ ܒܣܪܐ ܡܝܼܬܐ ܕܒܢܝ̈ܢܫܐ ܘܫܪܟܗܝܢ ܣܘ̈ܢܐ ܕܪ̈ܓܠܝܗܝܢ ܘܟܣ̈ܣܐ ܒܠ̈ܝܐ ܘܨܒܘ̈ܬܐ ܢܕܝ̈ܕܬܐ ܡܠܿܩ̈ܛܢ ܗܘ̈ܝ ܡܢ ܫܘ̈ܩܐ ܘܡܢ ܕܪ̈ܬܐ ܘܐܟܿܠܢ. ܠܚܝܠ̈ܘܬܐ ܕܝܢ ܕܪ̈ܗܘܡܝܐ ܡܕܡ ܠܐ ܚܣܝܪ ܗܘܐ ܠܗܘܢ. ܐܠܐ ܟܠܡܕܡ ܡܬܝܗܒ ܗܘܐ ܠܗܘܢ ܒܥܕܢܗܼ. ܕܡܢ ܦܘܩܕܢܐ ܕܡܠܟܐ ܢܿܚܬ ܗܘܐ ܒܝܨܝܦܘܬܐ ܣܓܝܐܬܐ. ܘܝܬܝܪ ܡܢ ܕܒܡܕܝ̈ܢܬܐ ܫܫܟܝ̈ܚܢ ܗܘܗܝ ܨܒܘ̈ܬܐ ܕܡܙܿܕܒܢ̈ܢ ܒܡܫܪ̈ܝܬܗܘܢܼ. ܕܡܐܟܠܐ ܘܕܡܫܬܝܐ ܘܕܣܘܢܐ ܘܕܠܒܘܫܐ. ܟܠܗܝܢ ܕܝܢ ܡܕܝ̈ܢܬܐ ܐܦ̈ܝܢ ܗܘ̈ ܒܘܩܠܛܢ ܒܐܝ̈ܕܝ ܢܚ̈ܬܘܡܐܼ. ܘܡܫܕܪ̈ܢ ܠܗܘܢ. ܝܬܝܪܐܝܬ ܐܘܪ̈ܗܝܐ. ܐܦܼܘ ܓܝܪ ܒܢ̈ܝ ܡܕܝܢܬܐ ܒܕܪ̈ܬܐ܇ ܐܦ ܒܗܕܐ ܫܢܬܐ ܡܢ ܦܘܩܕܢܗ ܕܩܠܝܘܦ ܗܘܦܪܟܐܼ. ܫܬܡܗܐܐ ܘܬܠ̈ܬܝܢ ܐܠܦ̈ܝܢ ܡܕܘ̈ܬܐ. ܣܛܪ ܡܢ ܡܕܡ ܕܐܦܘ ܩܘܪ̈ܝܝܐ ܒܟܘܠܗܿ ܟܘܪܐ܇ ܘܢܚ̈ܬܘܡܐ ܐܟܣ̈ܢܝܐ ܘܒܢ̈ܝ ܐܬܪܐ.܀ ܣܠܼܩ ܬܘܒ ܕܝܢ ܒܗܕܐ ܫܢܬܐܼ. pb. 301 ܡܪܝ ܦܛܪܐ ܐܦܝܣ ܠܘܬ ܡܠܟܐܼ ܕܢܦܝܣܝܘܗܝ ܠܡܫܒܩ ܣܘܢܛܠܝܐ. ܘܥܢܝܗܝ ܡܠܟܐ ܩܫܝܐܝܬ. ܘܐܬܥܕܠ ܒܗ ܥܠ ܕܫܒܼܩ ܝܨܝܦܘܬܐ ܕܥܠ ܡܣܟ̈ܢܐ܇ ܒܙܒܢܐ ܕܐܝܟ ܗܢܐܿ. ܘܣܠܼܩ ܠܘܬܗ. ܐܡܼܪ ܗܘܼܐ ܓܝܪܼ. ܕܗܘܼ ܐܠܗܐ ܪܡܐ ܗܘܐ ܒܠܒܗ. ܐܢ ܗܘܼ ܕܘܿܠܐܼ ܕܠܐ ܦܝܣܐ ܕܐܢܫ ܠܡܣܥܪ ܫܦܝܪܬܐ ܠܘܬ ܡܕܝܢܬܐ ܒܪܝܟܬܐ. ܟܕ ܕܝܢ ܥܕܟܝܠ ܬܡܢ ܐܝܬܘܗܝ ܗܘܐ ܐܦܝܣܩܦܐܼ. ܫܕܪ ܡܠܟܐ ܫܘܒܩܢܐ ܠܟܠܗ ܒܝܬ ܢܗܪ̈ܘܬܐ ܒܐܝ̈ܕܝ ܐܚܪܢܐܼ. ܟܕ ܗܘܼ ܠܐ ܪܓܝܫ. ܐܦ ܠܒܝܬ ܡܒܓ̈ܝܐܼ. ܫܒܼܩ ܚܕܐ ܡܢ ܬ̈ܠܬ ܕܣܘܢܛܠܝܐ.܀ ܡܕܒܪ̈ܢܐ ܕܝܢ ܕܪ̈ܗܘܡܝܐ ܗܿܢܘܢ ܕܫܼܪܝܢ ܗܘܘ ܥܠ ܐܡܕܼ. ܢܿܚܬܝܢ ܗܘܘ ܒܓܝ̈ܣܐ ܒܐܪܥ ܕܦܪ̈ܣܝܐܼ ܘܒܿܙܝܢ ܘܫܿܒܝܢ ܘܡܚܪܒܝܢ. ܘܓܠܝܘ ܦܪ̈ܣܝܐ ܡܢ ܩܕܡܝܗܘܢ. ܘܥܒܪ ܢܗܪܐ ܕܩܠܬ. ܘܐܫܟܚ ܬܡܢ ܦܪ̈ܫܐ ܕܦܪ̈ܣܝܐ: ܕܡܬܟܢܫܝܢ ܗܘܘ ܠܡܐܬܐ ܥܠܝܗܘܢ ܕܪ̈ܗܘܡܝܐ. ܘܐܬܠܒܒܘ ܥܠܝܗܘܢ. ܘܦܫܘ ܒܥܒܪ ܕܩܠܬ. ܘܥܼܒܪ ܒܬܪܗܘܢ ܪ̈ܗܘܡܝܼܐ. ܘܠܟܠܗܘܢ ܦܪ̈ܫܐ ܕܦܪ̈ܣܝܐ ܚܪܒܘ. ܕܗܿܘܝܢ ܗܘܘ ܐܝܟ ܥܣܪܐ ܐܠܦ̈ܝܢ ܓܒܪܝܢ. ܘܩܢܝܢܐ ܕܟܘܠܗܿ ܓܠܘܬܐ ܒܙܘ. ܘܐܘܩܕ ܩܘܪ̈ܝܐ ܣܓܝ̈ܐܬܐ. ܘܩܼܛܠ ܟܠ ܕܟܪܐ ܕܒܗ̈ܝܢ. ܡܢ ܒܪ ܬܪܬܥܣܪ̈ܐ ܫܢ̈ܝܢ ܘܠܥܠ. ܘܢܫ̈ܐ ܘܛ̈ܠܝܐ ܫܒܼܘ. ܗܟܢܐ ܓܝܪ ܦܩܼܕ ܗܘܼܐ ܡܝܓܣܛܪܣ ܠܟܠܗܘܢ ܡܕܒܪ̈ܢܐ܇ ܕܐܢ ܗܘܼ ܕܡܫܬܟܚ ܐܢܫ ܡܢ ܪ̈ܗܘܡܝܐ ܕܡܫܘܙܒ ܕܟܪܐ ܡܢ ܒܪ ܬܪܬܥܣܪ̈ܐ ܫܢ̈ܝܢ ܘܠܥܠ܆ ܗܘܼ ܢܬܩܛܠ ܚܠܦܘܗܝ. ܘܒܟܠ ܩܪܝܬܐ ܕܥܿܠܝܢ ܠܗܼܿ. ܠܐ ܢܫܒܩܘܢ ܒܗܿ ܐܦ ܚܕ ܒܝܬܐ ܕܩܿܐܡ. ܘܡܛܠܗܕܐ ܦܪܫ ܐܢܫ̈ܐ ܚܝܠ̈ܬܢܐ. ܡܢ ܪ̈ܗܘܡܝܐܼ. ܘܩܘܪ̈ܝܝܐ ܣܓܝ̈ܐܐ ܕܐܬܠܘܝܘ ܠܗܘܢ ܟܕ ܢܿܚܬܝܢ. ܘܡܢ ܒܬܪ ܕܝܿܩܕܝܢ ܗܘܘ ܬܛ̈ܠܝܠܐ ܘܕܥܟܐ ܗܘܬ ܢܘܪܐܿ. ܥܩܪܝܢ ܗܘܘ ܐܦ ܠܗ̈ܝܢ ܠܐܣ̈ܐ. ܦܣܩܝܢ ܗܘܘ ܕܝܢ pb. 302 ܘܡܚܒܠܝܢܼ ܐܦ ܟܪ̈ܡܐ ܘܙܝ̈ܬܐ ܘܟܠܗܘܢ ܐܝܠ̈ܢܐ. ܐܦ ܛܝܝ̈ܐ ܕܝܢ ܕܪ̈ܗܘܡܝܐ ܥܒܼܪ ܕܩܠܬ ܡܢ ܩܕܡܝܗܘܢܼ ܘܒܙܘ ܘܒܫܘ ܘܐܚܪܒ ܟܠ ܕܐܫܟܚ ܒܝܬ ܦܪ̈ܣܝܐ. ܟܕ ܝܿܕܥܢܐ ܗܘܼ ܕܝܢ ܕܠܟܠܗܝܢ ܨܒܘ̈ܬܐ ܒܫܩܠ ܛܥܢܐ ܡܒܚܢ ܐܢܬܼ. ܬܬܒܝܢ ܩܕܝܫܘܬܟ ܐܦ ܒܗܕܐܼ. ܕܠܛܝ̈ܝܐ ܕܬܪ̈ܝܗܘܢ ܓܒ̈ܐܼ. ܥܠܬ ܝܘܬܪܢܐ ܪܒܐ ܩܪܒܐ ܗܢܐ ܗܘܐ. ܘܓܡܪ ܨܒܝܢܗܘܢ ܒܬܪ̈ܬܝܗܝܢ ܡܠ̈ܟܘܬܐ.܀ ܩܘܕ ܕܝܢ ܟܕ ܚܼܙܐ ܕܡܚܿܒܠܝܢ ܠܗ ܪ̈ܗܘܡܝܐ ܠܐܬܪܐ܇ ܘܠܝܬ ܐܢܫ ܕܩܐܿܡ ܠܘܩܒܠܗܘܢ [ܨܼܒܐ] ܕܢܐܬܐ ܠܐܘܪܥܗܘܢ. ܘܡܛܠܗܕܐ ܫܕܪ ܠܐܣܛܒܝܕ ܠܘܬ ܡܝܓܣܛܪܘܣ ܕܢـ[ـܡܠܠ] ܥܠ ܫܝܢܐ. ܟܕ ܐܝܬ ܗܘܐ ܥܡܗ ܚܝܠܐ ܐܝܟ ܥܣܪ̈ܝܢ ܐܠܦ̈ܝܢ. ܫܕܪ ܕܝܢ ܠܟܘܠܗܘܢ ܝܕܝ̈ܥܐܼ ܕܫܒܼܐ ܗܘܐ ܡܢ ܐܡܕ. ܘܠܩܛܪܐ ܗܘܿ ܕܕܒܼܪ ܡܢ ܐܫܦܪܝܢ. ܘܠܒܣܝܠ ܗܘܿ ܕܫܩܼܠ ܗܘܐ ܡܢ ܐܘܪܗܝ ܒܗܡܝܪ̈ܐ. ܐܦ ܠܫܠܕܗ ܬܘܒ ܕܐܠܘܡܦܝܣ ܕܘܟܣܼ. ܕܢܚܼܬ ܗܘܐ ܒܐܙܓܕܘܬܐ ܠܘܬܗ ܘܡܝܼܬ ܬܡܢ܆ ܫܕܪܗܿ ܗܘܐ ܒܓܠܣܩܡܐ ܟܕ ܛܒܝܥܐ. ܕܢܚܿܘܐ ܕܠܐ ܗܘܐ ܠܒܪ ܡܢ ܡܘܬܐ ܗܘܿ ܕܟܝܢܐ ܡܝܼܬ. ܘܣܗܕܝܢ ܥܒ̈ܕܘܗܝ ܘܐܝܠܝܢ ܕܢܚܼܬ ܥܡܗ. ܘܫܩܠ ܐܢܘܢ ܡܓܝܣܛܪܘܣ. ܘܫܕܪ ܐܢܘܢ ܠܐܘܪܗܝ ܣܛܪ ܡܢ ܕܝܿܢܐ ܕܐܡܕ ܘܩܡܣ ܦܛܪܐ. ܪܓܼܙ ܓܝܪ ܘܐܬܚܡܬ. ܘܨܿܒܐ ܗܘܐ ܕܢܿܡܝܬ ܐܢܘܢ. ܐܡܼܪ ܗܘܐ ܓܝܪ ܕܒܪܦܝܘܬܗܘܢ ܐܫܬܠܡ ܕܘ̈ܟܝܬܐ ܕܢܿܛܪܝܢ ܗܘܘ. ܘܥܠ ܗܕܐ ܣܿܗܕܝܢ ܦܘܪ̈ܣܝܐ ܕܠܐ ܡܬܟܒܫܢܐ ܐܝܬܘܗܝ ܫܘܪܐ ܕܐܡܕ. ܐܣܛܒܝܕ ܕܝܢ ܒܿܥܐ ܗܘܐ ܡܢܗ ܘܡܬܟܫܦ ܠܗܼ. ܕܢܬܠ ܠܗ ܚܠܦܝܗܘܢ ܕܗܠܝܢ ܕܐܝܬܝܼ ܠܦܪ̈ܣܝܐ ܕܒܐܡܕ ܚܒܝܫܝܢ ܗܘܘ. ܡܛܠ ܕܐܦܢ ܡܢ ܕܠܚܬܗܘܢ ܡܚܡܣܢܝܢ ܗܘܘ. ܐܠܐ ܒܐܘܠܨܢܐ ܣܓܝܐܐ ܐܝܬܝܗܘܢ ܗܘܘ ܡܢ ܟܦܢܐ. ܡܓܝܣܛܪܣ ܕܝܢ ܐܡܼܪ. ܕܫܪܒܗܘܢ ܕܗܠܝܢ ܠܐ ܬܬܟܪ ܠܝܼ ܡܛܠ ܕܒܡܕܝܢܬܐ pb. 303 ܕܝܠܢ ܚܒܝܫܝܢ ܘܥܒ̈ܕܝܢ ܐܢܘܢ. ܐܡܿܪ ܠܗ ܐܣܛܒܝܕ. ܡܕܝܢ ܫܒܘܩܝܢܝܼ ܐܫܿܕܪ ܠܗܘܢ ܣܝܒܪܬܐ. ܠܐ ܓܝܪ ܦܐܐ ܠܟܿ. ܕܢܣܘܦܘܢ ܥܒ̈ܕܝܟ ܒܟܦܢܐ. ܐܡܬܝ ܓܝܪ ܕܬܼܨܒܐ ܦܫܝܩ ܗܘܼ ܠܟ ܠܡܩܼܛܠ ܐܢܘܢ. ܐܡܿܪ ܠܗܼ ܫܕܪ. ܐܡܿܪ ܐܣܛܒܝܕ. ܝܡܝ ܠܝ ܐܢܬ ܘܟܠܗܘܢ ܡܕܒܪ̈ܢܐ ܘܪ̈ܒܝ ܚܝܠܐ ܕܐܝܬ ܠܘܬܟܼ ܕܠܐ ܐܢܫ ܡܩܿܛܠ ܠܗܘܢ ܠܐܝܠܝܢ ܕܡܕܪ ܐܢܐ. ܘܐܝܡܝܘ ܠܗ ܟܠܗܘܢ. ܣܛܪ ܡܢ ܢܘܢܝܣܐ ܕܘܟܣܼ ܕܠܝܬ ܗܘܐ ܥܡܗܘܢ ܒܐܦܪܣܢܐ. ܡܛܠܗܕܐ ܓܝܪ ܫܒܩܗ ܗܘܐ ܡܓܝܣܛܪܣܼ. ܕܐܢ ܗܿܘܝܐ ܡܘܡܬܐ ܡܕܡ ܠܐ ܢܬܬܚܕ ܒܗܿ. ܫܕܪ ܗܟܝܠ ܐܣܛܒܝܕ ܬܠܬܡ̈ܐܐ ܓܡ̈ܠܝܢ ܛܥܝܢܝܢ ܫ̈ܠܝܦܐ ܕܠܚܡܐ. ܘܒܓܘܗܘܢ ܣܝܡܝܢ ܗܘܘ ܓܐܪ̈ܐ. ܘܩܡ ܥܠܝܗܘܢ ܢܘܢܝܣܐ ܘܢܣܼܒ ܐܢܘܢ ܡܢܗܘܢܼ. ܘܠܐܝܠܝܢ ܕܐܝܬ ܗܘܐ ܥܡܗܘܢ ܩܿܛܠ. ܟܕ ܕܝܢ ܡܒܿܓܢ ܗܘܐ ܐܣܛܒܝܕ ܥܠ ܗܕܐܼ. ܘܫܿܐܠ ܗܘܐ ܡܢ ܡܓܝܣܛܪܣ܇ ܕܠܐ ܡܫܟܚ ܐܢܐ ܐܕܥ ܡܢܘܼ ܗܕܐ ܣܼܥܪ܇ ܡܛܠ ܣܓܝܐܘܬܗ ܕܚܝܠܐ ܕܐܝܬ ܥܡܝ. ܐܢ ܕܝܢ ܝܿܕܥܬ ܡܢܘܼ. ܘܐܝܬ ܒܟ ܚܝܠܐ ܠܡܬܢܩܡܘ ܡܢܼ ܠܐ ܟܿܠܐ ܐܢܐ ܠܟ. ܐܣܛܒܝܕ ܕܝܢ ܡܢ ܗܕܐ ܕܚܼܠ. ܘܥܠ ܫܝܢܐ ܡܦܝܣ ܗܘܐ.. ܘܟܕ ܝܘ̈ܬܡܐ ܣܓ̈ܝܐܐ ܥܒܪ ܡܢ ܕܡܦܝܣܼ. ܩܘܪܫܐ ܪܒܐ ܗܘܼܐܼ. ܘܬܠܓܐ ܘܓܠܝܕܐ ܣܓܝܐܐ. ܘܫܒܼܩ ܪ̈ܗܘܡܝܐ ܡܫܪ̈ܝܬܗܘܢ ܚܕ ܚܕܼ. ܘܟܠܢܫ ܛܥܼܢ ܡܕܡ ܕܡܛܝܗܝ ܡܢ ܒܙܬܐ ܘܐܙܠܼ ܕܢܘܒܠ ܠܐܬܪܗ܇ ܘܐܝܠܝܢ ܕܦܼܫܘ ܘܠܐ ܐܙܠܼܘ ܠܐܬܪ̈ܘܬܗܘܢܼ. ܥܠܼܘ ܠܬܠܐ ܠܪܝܫ ܥܝܢܐ ܘܠܐܘܪܗܝ. ܕܢܣܬܬܪܘܢ ܡܛܠ ܩܘܪܫܐ. ܐܣܛܒܝܕ ܕܝܢ ܟܕ ܚܼܙܐ ܕܐܬܪܦܝܘ ܪ̈ܗܘܡܝܐ. ܘܠܐ ܚܡܣܢܘ ܠܡܩܡ ܩܕܡ pb. 304 ܥܪܝܐ. ܫܠܼܚ ܠܡܓܣܛܪܣ. ܕܐܘ ܥܼܒܕ ܫܝܢܐ܆ ܘܫܒܘܩ ܢܦܩܝܢ ܦܘܪ̈ܣܝܐ ܡܢ ܐܡܕ܇ ܐܘ ܩܿܒܠ ܩܪܒܐ. ܡܓܝܣܛܪܣ ܕܝܢ ܦܩܼܕ ܠܩܡܣ ܝܘܣܛܝܢܐ܇ ܕܢܿܟܢܫܗ ܠܚܝܠܐܼ ܘܠܐ ܐܬܡܨܝ. ܘܟܕ ܚܼܙܐ ܕܐܬܦܠܗܕ ܠܗܘܢ ܣܘܓܐܗܘܢ ܕܪ̈ܗܘܡܝܐ ܡܢ ܠܘܬܗܼ. ܥܒܼܕ ܫܝܢܐ ܘܫܒܼܩ ܐܢܘܢ ܠܦܘܪ̈ܣܝܐ ܠܡܦܼܩ ܡܢ ܐܡܕ ܒܗܕܐ ܬܢܘܝ. ܕܐܢ ܗܘܼ ܕܫܦܝܪ [ܠܬܪ̈ܝـ]ـܗܘܢ ܡ̈ܠܟܐܼ. ܘܡܚܿܬܡܝܢ ܥܠ ܡܕܡ ܕܥܒܼܕܼ. ܘܐܠܐ ܢܗܘܐ ܩܿܝܡ [ܠـ]ـܗܘܢ ܩܪܒܐ. ܡܠܟܐ ܕܝܢ ܕܪ̈ܗܘܡܝܐܼ ܟܕ ܝܠܼܩ ܗܠܝܢ ܕܗܘ̈ܝܼ. ܦܩܼܕ ܕܢܬܬܣܝܡ ܐܦܬܛܢ ܒܟܠܗܝܢ ܡܕܝ̈ܢܬܐܼ. ܘܝܬܝܪܐܝܬ ܒܐܡܕ. ܐܝܟ ܡܿܢ ܕܝܢ ܕܢܫܪܝܗܿ ܠܒܥܠܕܒܒܘܬܐ ܘܢܚܨܝܘܗܝ ܠܫܝܢܐ܇ ܐܝܩܪ̈ܐ ܕܝܢ ܘܕܫ̈ܢܐ ܫܕܪ ܠܗ ܠܩܘܕ. ܒܝܕ ܐܢܫ ܕܫܡܗ ܠܐܘܢ. ܘܡܐܢ̈ܝ ܕܬܫܡܫܬܐ ܕܦܬܘܪܗ ܟܠܗܘܢ ܕܕܗܒܐ.܀ ܕܟܡܐ ܕܝܢܼ ܐܬܠܨܘ ܐܘܪ̈ܗܝܐ ܐܝܠܝܢ ܕܡܿܚܬܝܢ ܗܘܘ ܥܒܘܪܐ ܠܐܡܕ܇ ܠܝܬ ܐܢܫ ܕܝܿܕܥܼ. ܐܠܐ ܐܝܠܝܢ ܕܒܗ ܒܣܘܥܪܢܐ ܩܼܝܡܝܢ ܗܘܘ. ܣܘܓܗܘܢ ܓܝܪ ܒܐܘܪܚܐ ܡܝܼܬܘ ܗܼܢܘܢ ܘܒܥܝܪܗܘܢ.܀ ܡܝܬܪܐ ܕܝܢ ܝܘܚܢܢ ܐܦܝܣܩܦܐ ܕܐܡܕܼ ܐܬܬܢܝܚ ܗܘܐ ܠܗ ܡܢ ܩܕܡ ܕܢܫܪܘܢ ܥܠܝܗܿ ܦܘܪ̈ܣܝܐ. ܘܣܠܼܩ ܗܘܘ ܒܢ̈ܝ ܩܠܪܘܣ ܕܝܠܗܿ ܠܘܬ ܩܕܝܫܐ ܘܪܚܡ ܐܠܗܐܿ. ܘܕܡܨܒܬ ܒܟܠ ܫܘܦܪ̈ܐ ܐܠܗ̈ܝܐܿ. ܚܠܝܨܐ ܘܢܨܝܚܐ ܡܪܝ ܦܘܠܝܢܣ ܦܛܪܝܪܟܐ ܕܐܢܛܝܟܝܐ. ܕܢܣܝܡ ܠܗܘܢ ܐܦܝܣܩܦܐ. ܘܠܒܟܘ ܐܢܘܢ ܒܐܩܪܐ ܟܠܗܘܢ ܝܘ̈ܡܬܐ ܕܗܼܘܘ ܬܡܢ. ܘܒܬܪܟܝܢ (ܟܕ) ܐܬܦܛܠܘ ܡܢ ܫܒܝܐܼ. ܡܝܬܪܐ ܢܘܢܐ ܩܫܝܫܐ ܘܪܒܝܬܐ ܕܥܕܬܐ ܕܝܠܗܿ ܕܐܡܕ܇ ܐܦܝܣܘܗܝ ܩܠܪ̈ܝܩܘܣ ܠܦܛܪܝܪܟܐܼ. ܘܥܒܼܕܗ ܠܗܘܢ pb. 305 ܐܦܝܣܩܦܐ. ܘܗܘ ܡܝܬܪܐ ܢܘܢܐ ܟܕ ܩܒܠ ܪܝܫܘܬ ܟܗܢܘܬܐ. ܫܕܪ ܠܬܘܡܐ ܟܘܪܐܦܝܣܩܦܐ ܕܝܠܗ ܠܩܘܣܛܢܛܝܢܐܦܘܠܣ. ܕܢܕܒܪ ܠܐܡܕ̈ܝܐ ܕܐܝܬ ܗܘܐ ܬܡܢܿ. ܘܕܢܫܐܠ ܡܘܗܒܬܐ ܡܕܡ ܡܢ ܡܠܟܐ. ܘܐܫܬܘܝܘ ܥܡܗ ܐܝܠܝܢ ܕܐܝܬ ܗܘܐ ܬܡܢ܆ ܘܐܦܝܣܘ ܠܡܠܟܐܼ ܕܗܼܘ ܬܘܡܐ ܢܗܘܐ ܠܗܘܢ ܐܦܝܣܩܘܦܐ. ܘܩܒܠ ܡܿܠܟܐ ܒܥܘܬܗܘܢ. ܘܫܠܼܚ ܠܗ ܠܦܛܪܝܪܟܐ ܕܠܐ ܢܥܨܐ ܐܢܘܢ. ܘܐܦ ܡܠܟܐ ܝܗܼܒ ܠܗܘܢ ܕܝܿܢܐ ܐܝܢܐ ܕܫܐܼܠ. ܝܗܼܒ ܕܝܢ ܡܠܟܐ ܘܦܛܪܝܪܟܐ ܡܘܗ̈ܒܬܐ ܠܥܕܬܐ ܕܐܡܕ܆ ܘܕܗܒܐ ܣܓܝܐܐ ܕܢܦܿܠܓ ܠܡ̈ܣܟܢܐ. ܘܡܛܠܗܕܐ ܐܬܟܢܼܫܘ ܠܬܡܢ܆ ܟܠܗܘܢ ܐܝܠܝܢ ܕܒܐܬܪ̈ܘܬܐ ܐܚܪ̈ܢܐ ܦܿܗܝܢ ܗܘܘ. ܘܡܿܦܩܝܢ ܗܘܘ ܫܠ̈ܕܐ ܕܡܝ̈ܬܐ ܟܠܝܘܡ ܡܢ ܐܡܕ܇ ܘܗܝܕܝܢ ܫܿܩܠܝܢ ܗܘܘ ܡܕܡ ܕܡܬܦܩܕ ܠܗܘܢ.. ܐܦ ܐܘܪܒܝܩ ܕܝܢ ܡܗܝܡܢܐ ܕܡܿܠܟܐ܇ ܗܘܿ ܕܙܕܩ̈ܬܐ ܪܘܪ̈ܒܬܐ ܠܗ ܥܒܝ̈ܕܢ ܗܘ̈ܝ ܒܐܪܥܐ ܕܐܘܪܫܠܡ ܘܒܐܬܪ̈ܘܬܐ ܐܚܪ̈ܢܐܼ. ܢܚܼܬ ܠܬܡܢ. ܘܝܗܒ ܬܡܢ ܕܝܢܪܐ ܕܝܢܪܐ. ܘܐܬܼܐ ܡܢ ܬܡܢ ܠܐܘܪܗܝ. ܘܝܗܼܒ ܠܟܠ ܐܢܬܬܐ ܕܨܒܬ ܕܬܣܼܒ ܛܪܡܣܝܢ. ܘܠܟܠ ܛܠܝܐ ܙܘܙܐ ܚܕ. ܫܩܠ ܒܨܝܪ ܩܠܝܠ ܟܠܗ̈ܝܢ ܢܫ̈ܐ. ܕܣܢ̈ܝܩܢ ܘܕܠܐ ܣܢܝ̈ܩܢ.܀. ܒܗܿ ܕܝܢ ܒܗܕܐ ܫܢܬܐܼ. ܡܢ ܒܬܪ ܕܫܠܼܐ ܩܪܒܐܼ. ܚܝܘ̈ܬܐ ܒܝ̈ܫܬܐ ܐܬܓܪܝ ܒܢ. ܗܠܝܢ ܕܒܥܠܬ ܣܘܓܐܐ ܕܫܠ̈ܕܐ ܕܢܦܼܠ ܗܘ̈ܝ ܒܩܪ̈ܒܐ ܗܢܿܘܢܼ. ܐܛܥܡ ܗܘ̈ܝ ܠܡܐܟܠ ܦܓܪ̈ܐ ܕܒܢܝ̈ܢܫܐ. ܘܟܕ ܪܒܚ ܘܐܘܦܝܘ ܫܠ̈ܕܐ ܕܩܛܝ̈ܠܐܼ. ܥܿܠ̈ܢ ܗܘ̈ܝ ܚܝܘ̈ܬܐ ܠܓܘ ܩܘܪ̈ܝܐ ܘܚܿܛ̈ܦܢ ܗܘ̈ܝ ܛ̈ܠܝܐ ܘܐܟܿܠ̈ܢ܆ ܘܢܿܦܠ̈ܢ ܗܘ̈ܝ ܐܦ ܥܠ ܓܒܪ̈ܐ ܡܫܘ̈ܚܕܐ ܒܐܘܪ̈ܚܬܐ ܘܡܣܿܪ̈ܚܢ ܠܗܘܢ. ܗܟܢܐ ܕܝܢ ܕܚܿܠܝܢ ܗܘܘ܆ ܕܒܙܒܢܐ ܕܐܕܪܐܼ ܠܝܬ ܗܘܿܐ ܐܢܫ ܒܟܠܗܿ ܟܘܪܐܿ. ܕܢܒܘܬ ܒܐܕܪܗ ܕܠܐ pb. 306 ܥܪܙܠܐ܇ ܡܢ ܕܚܠܬܐ ܕܚܝܘ̈ܬ ܫܼܢܐ. ܒܡܥܕܪܢܘܬܗ ܕܝܢ ܕܡܪܢ܇ ܗܘܿ ܕܒܟܠܙܒܢ ܒܛܝܠ ܠܗ ܥܠܝܢ܇ ܘܡܢ ܟܠ ܢܣܝܘ̈ܢܝܢ ܒܪ̈ܚܡܘܗܝ ܡܦܿܨܐ ܠܢ܆ ܢܦܼܠ ܡܢܗܝܢ ܒܐܝ̈ܕܝ ܩܘܪ̈ܝܝܐܼ. ܘܕܓܼܫ ܐܢܝ̈ܢ. ܘܫܕܪ ܦܓܪ̈ܝܗܝܢ ܟܕ ܡܝܬܢ ܠܐܘܪܗܝ. ܐܦ ܨܝ̈ܕܐ ܠܒܼܟ ܡܢܗ̈ܝܢ܆ ܘܦܟܪܘ ܘܐܝܿܬܝܘ ܐܢܝܢ ܟܕ ܚܝܗܢ. ܘܚܼܙܐ ܟܠܢܫ ܘܫܒܚ ܠܐܠܗܐܿ. ܗܘܿ ܕܐܡܼܪ ܕܕܚܠܬܟܘܢ ܘܙܘܥܬܟܘܢ ܐܿܬܠ ܥܠ ܟܠܗܿ ܚܝܘܬܐ ܕܐܪܥܐ. ܐܦܢ ܓܝܪ ܡܛܠ ܚܛ̈ܗܝܢ ܐܫܬܕܪ ܥܠܝܢ ܚܕܒܐ ܘܟܦܢܐ ܘܡܘܬܢܐ ܘܫܒܝܐ. ܘܚܝܘ̈ܬܐ ܒܝ̈ܫܬܐ ܘܡܪ̈ܕܘܬܐ ܐܚܪ̈ܢܝܬܐ ܕܟܬܝ̈ܒܢ ܘܕܠܐ ܟܬܝ̈ܒܢ܆ ܐܠܐ ܒܛܝܒܘܬܗ ܡܢ ܟܠܗܝܢ ܦܼܪܩܢ. ܘܐܦ ܠܝ ܒܨܝܪܐܼ ܚܿܝܠ ܡܛܠ ܪ̈ܚܡܘܗܝ ܒܝܕ ܨܠܘܬܟܼ ܕܐܝܟ ܚܝܠܝ ܐܟܬܘܒ ܡܢ ܐܝܠܝܢ ܕܐܣܬܥܪ܇ ܠܥܘܗܕܢܐ ܕܗܠܝܢ ܕܣܒܼܠܘ ܐܢܝܢܼ ܘܠܝܘܠܦܢܐ ܕܐܝܠܝܢ ܕܡܢ ܒܬܪܢ ܗܿܘܝܢ. ܕܐܢ ܨܿܒܝܢ ܒܗܠܝܢ ܩܠܝܠ ܕܟܿܬܒܬ ܢܫܟܚܘܢ ܠܡܬܚܟܡܘ. ܣܓܝ̈ܐܢ ܐܢܝܢ ܓܝܪ ܐܝܠܝܢ ܕܫܿܒܩܬܿ. ܡܢ ܐܝܠܝܢ ܕܟܿܬܒܬ. ܐܦ ܓܝܪ ܡܢ ܫܘܪܝܐ ܐܡܿܪܬܼ. ܕܠܘ ܠܟܠܗܝܢ ܣܿܦܩ ܐܢܐ. ܐܘܠ̈ܨܢܐ ܓܝܪ ܕܚܕ ܚܕ ܐܢܫ ܒܠܚܘܕܘܗܝ ܣܼܒܠ܇ ܐܠܘ ܐܬܟܼܬܒܘ ܬܫܥ̈ܝܬܐ ܪܘܪ̈ܒܬܐ ܗܘܿܝܢ ܗܘ̈ܝ. ܕܟܬܒܐ ܪܒܐ ܠܐ ܣܦܼܩ ܗܘܐ ܠܗ̈ܝܢ. ܘܐܝܬ ܠܟ ܕܬܕܥܼ ܡܢ ܗܠܝܢ ܕܐܚܪ̈ܢܐ ܡܿܟܬܒܝܢ. ܐܦ ܗܿܢܘܢ ܕܒܫܡܐ ܕܦܪ̈ܘܩܐ ܠܥܘܕܪܢܢ ܐܬܼܘܼ. ܟܕ ܢܿܚܬܝܢ ܗܘܘ ܘܟܕ ܣܿܠܩܝܢ. ܒܨܝܪ ܩܠܝܠ ܐܝܟ ܒܥܠ̈ܕܒܒܐ ܒܿܙܝܢ ܗܘܘ ܠܢ. ܣܓܝ̈ܐܐ ܓܝܪ ܡܣ̈ܟܢܐ ܐܬܚܬܘ ܡܢ ܥܪ̈ܣܬܗܘܢ ܘܕܡܼܟܘ ܒܗܝܢ܇ ܘܡܪ̈ܝܗܝܢ ܥܠ ܐܪܥܐ ܡܿܓܣܝܢ ܗܘܘ ܒܝܘܡܐ ܕܥܪܝܐ. ܘܠܐܚܪ̈ܢܐ ܛܪܕܘ ܘܐܦܩܘ ܡܢ ܒ̈ܬܝܗܘܢܼ. ܘܥܼܠ ܫܼܪܘ ܒܗܘܢ. ܘܒܥܝܪܐ ܕܐܚܪ̈ܢܐ ܒܩܛܝܪܗܘܢ ܐܝܟ ܕܒܫܒܝܐ pb. 307 ܕܒܿܪܝܢ ܗܘܘ. ܘܬܟܣܝܿܬܐ ܕܐܚܪ̈ܢܐ ܡܢ ܦܓܪ̈ܝܗܘܢ ܡܿܫܠܚܝܢ ܗܘܘ ܘܫܿܩܠܝܢ. ܥܡ ܐܚܪ̈ܢܐ ܒܡܚܘ̈ܬܐ ܩܫ̈ܝܬܐ ܡܬܚܫܚܝܢ ܗܘܘܼ ܡܛܠ ܨܒܘܬܐ ܐܝܕܐ ܕܗܼܝ. ܘܥܡ ܐܚܪ̈ܢܐܼ. ܒܫܘ̈ܩܐ ܡܬܩܛܪܓܝܢ ܗܘܘ ܘܡܚܣܪܝܢ ܠܗܘܢ ܡܛܠ ܥܠܼܬܐ ܙܥܘܪܬܐ. ܘܡܟܘܠܬܐ ܒܨܝܪܬܐ ܟܠܢܫܼ ܘܐܣܢܐ ܕܐܠܬ ܗܘܐ ܠܚܕܚ̈ܕܢܐ ܒܩܘܪ̈ܝܐ ܘܒܡܕܝ̈ܢܬܐܼ. ܓܠܝܐܝܬ ܒܿܙܝܢ ܗܘܘ. ܘܒܝܬ ܐܘܪ̈ܚܬܐ ܥܠ ܣܓܝ̈ܐܐ ܢܿܦܠܝܢ ܗܘܘ. ܘܡܛܠ ܕܝܢ ܕܠܐ ܣ̈ܦܝܢ ܗܘ̈ܝ ܠܗܘܢ ܕܪ̈ܬܐ ܘܦܘ̈ܬܩܐ ܕܡܕܝܢܬܐܼ. ܥܡ ܐܘܡ̈ܢܐܼ ܒܚܢܘ̈ܬܗܘܢ ܫܪܝܢܼ ܗܘܘ. ܘܠܥܝܢ ܟܠܢܫܼ ܒܢ̈ܫܐ ܡܫܿܛܠܝܢ ܗܘܘ ܒܫܘ̈ܩܐ ܘܒܒ̈ܬܐ. ܘܡܢ ܢܫ̈ܐ ܣܒ̈ܬܐ ܘܐܪ̈ܡܠܬܐ ܘܡܣܟ̈ܢܬܐܼ. ܡܫܚܐ ܘܩܝ̈ܣܐ ܘܡܠܚܐ ܘܨܒܘ̈ܬܐ ܐܚܪ̈ܢܝܬܐ ܠܢܦܩ̈ܬܗܘܢ ܫܿܩܠܝܢ ܗܘܘ. ܘܒܬܫܡܫܬܗܘܢ ܡܢ ܦܘܚܢܗܝܢ ܠܗܝܢ ܡܒܿܛܠܝܢ ܗܘܘ. ܘܣܟܐܼ. ܠܟܠܢܫ ܐܿܠܨܝܢ ܗܘܼܘ ܠܪܘܪ̈ܒܐ ܘܠܕܩ̈ܕܩܐ. ܘܠܐ ܐܫܬܒܼܩ ܐܢܫ ܕܠܐ ܡܼܛܝܗܝ ܡܢ ܒܝܼܫܬܗܘܢ. ܘܐܦ ܪ̈ܝܫܢܐ ܒܢ̈ܝ ܐܬܪܐ܇ ܐܝܠܝܢ ܕܣܝܡܝܢ ܗܘܘ ܠܡܛܟܣܘ ܘܠܡܣܪܝܘ ܐܢܘܢ܇ ܐܝܕܗܝܗܘܢ ܠܫܘܚܕܐ ܦܫ̈ܝܛܢ ܗܘ̈ܝ. ܘܟܕ ܡܢ ܟܠܢܫ ܫܿܩܠܝܢ ܗܘܘܼ. ܠܐܢܫ ܠܐ ܚܿܣܟܝܢ ܗܘܘ. ܐܠܐ ܠܗܠܝܢ ܕܩܕܡܐܝܬ ܥܠܝܗܘܢ ܡܿܦܩܝܢ ܗܘܘܼ. ܡܢ ܒܬܪ ܝܘ̈ܡܬܐܼ ܠܐܚܪ̈ܢܐ ܡܫܿܕܪܝܢ ܗܘܘ. ܘܐܦ ܥܠ ܩܫܝ̈ܫܐ ܘܡܫ̈ܡܫܢܐ ܫܪܝܢ ܗܘܘ. ܟܕ ܛܒ ܐܝܬ ܗܘܐ ܠܗܘܢ ܣܩܪܐ ܕܡܠܟܐܼ ܕܠܐ ܢܫܪܘܢ ܥܠܝܗܘܢ. ܘܡܢܐ ܠܐܿܐ ܐܢܐ ܣܓܝ̈ܐܬܐ ܠܡܣܕܪ. ܕܟܒܪ ܐܦܠܐ ܐܝܠܝܢ ܕܪܘܪ̈ܒܝܢ ܡܢܝ ܠܐ ܣܿܦܩܝܢ ܠܗ̈ܝܢ.܀ ܡܢ ܒܬܪ ܕܝܢ ܕܥܒܼܪ ܢܗܪܐ ܦܪܬ ܠܡܥܪܒܐ܆ ܘܡܓܣܛܪܣ ܐܙܠܼ ܠܘܬ ܡܠܟܐ܆ ܘܐܪܒܝܢܕܐ ܠܐܢܛܝܘܟܝ܇ ܘܦܛܪܝܩ ܠܡܠܛܝܢܐ܇ ܘܦܙܡܢ ܠܐܦܡܝܐ܇ ܘܬܐܕܘܪܐ ܠܕܪܡܣܘܩ܇ ܘܩܠܝܘܦ ܠܡܒܘܓܼ. ܗܘܼܐ ܢܦܝܫܐ pb. 308 ܩܠܝܠ ܒܐܘܪܗܝܼ. ܘܒܣܼܡܬܿ ܠܗܿ ܙ݀ܥܘܪܘܬ ܐܢܫ̈ܐ ܕܦܫ ܒܗܿ. ܘܐܘܠܘܓ ܗܓܡܘܢܐܼ ܝܿܨܦ ܗܘܐ ܠܡܒܢܝܘܬܗܿ. [ܝܗܒ] ܠܗ [ܡܠـ]ـܟܐ ܡ̈ܬܝܟ ܠܝܛܪ̈ܝܢ ܠܢܦܩ̈ܬܐ ܕܒܢܝܢܐ. ܘܒܢܼܐ ܘܚܕܬ ܠܟܠܗ ܒܪ ܫܘܪܐ ܕܟܪܟ ܠܡܕܝܢܬܐ. ܘܚܕܬ ܬܘܒ ܘܐܬܩܢ ܐܓܘ̈ܓܐ ܬܪ̈ܝܢ ܕܥܿܠܝܢ ܡܢ ܬܠܙܡܐ ܩܪܝܬܐ ܘܡܢ ܡܘܕܕ. ܘܒܢܼܐ ܘܫܟܠܠ ܐܦ ܕܝܡܣܝܢ ܗܿܝ ܕܢܦܠܼܬܿ. ܚܿܕܬ ܕܝܢ ܐܦ ܦܪܘܛܪܝܢ ܕܝܠܗ. ܘܒܿܢܝ ܣܘܓܐܐ ܒܟܠܗܿ ܡܕܝܢܬܐ. ܐܦ ܠܐܦܝܣܩܘܦܐ ܝܗܼܒ ܠܗ ܡܠܟܐܼ ܥܣܪ̈ܝܢ ܠܝܛܪ̈ܝܢ ܠܢܦ̈ܩܬܐ ܘܠܚܘܕܬܐ ܕܫܘܪܐ. ܘܼܐܘܪܒܝܩ ܡܗܝܡܢܐܼ ܥܣܪ ܠܛܝܪܗܝܢ ܕܢܒܢܐ ܒܝܬ ܣܗ̈ܕܐ ܠܛܘܒܢܝܬܐ ܡܪܝܡ. ܘܡܫܒܚܐ ܕܝܢ ܕܡܬܝܗܒ ܗܘܐ ܠܒܝܬ ܣܗ̈ܕܘܬܐ ܘܠܕܝܪ̈ܬܐ ܡܢ ܦܘܬܩܐ ܕܡܫܝܚܐܼ. ܕܗܿܘܐ ܗܘܐ ܫ̈ܬܐ ܐܠܦ̈ܝܢ ܬܡܢ̈ܡܐܐ ܩܣ̈ܛܐܼ ܫܩܠܗ ܡܢܗܘܢ ܗܘܼ ܗܓܡܘܢܐ. ܘܦܩܼܕ ܕܢܢܗܪ ܒܐܣ̈ܛܘܐ ܕܡܕܝܢܬܐ. ܘܣܿܓܝ ܒܥܼܘ ܡܢܗ ܦܪܡܘܢܪ̈ܐ ܡܛܠܬܗܿ ܘܠܐ ܐܬܛܦܝܣ. ܘܕܠܐ ܢܣܬܒܪ ܕܠܗܝ̈ܟܠܐ ܕܒܢ̈ܝܢ ܠܐܠܗܐ ܫܐܿܛ܆ ܝܗܼܒ ܡܢ ܕܝܠܗ ܠܟܠ ܒܝܬ ܣ̈ܗܕܐ ܡ̈ܬܝܢ ܩܣ̈ܛܐ. ܥܕܡܐ ܕܝܢ ܠܗܕܐ ܫܢܬܐܼ. ܐܪ̈ܒܥ ܡܕ̈ܝܢ ܚܛ̈ܐ ܒܕܝܢܪܐ ܡܙܕܒ̈ܢܢ ܗܘ̈ܝ. ܘܣܥܪ̈ܐ ܫ̈ܬܐ. ܘܚܡܪܐ ܬܪܬܝܢ ܟܝ̈ܠܬܐ. ܡܢ ܒܬܪ ܕܝܢ ܥܠܠܬܐ ܚܕܬܐ ܐܙܕܒܿܢܝܢ ܫ̈ܬܐ ܡܕ̈ܝܢ ܚܛܗܐ ܒܕܝܢܪܐܼ ܘܣܥܪ̈ܐ ܥܣܪ̈ܐ.܀ ܛܝܝ̈ܐ ܕܝܢ ܕܦܘܪ̈ܣܝܐ ܠܐ ܫܠܼܝܘ ܐܘ ܫܟܼܬܘ܇ ܐܠܐ ܥܒܼܪ ܠܒܝܬ ܪ̈ܗܘܡܝܐܿ. ܒܠܥܕ ܡܢ ܦܘܪ̈ܣܝܐܿ. ܘܫܒܘ ܬܪ̈ܬܝܢ ܩܘܪ̈ܝܐ. ܘܟܕ ܝܠܼܦ ܗܕܐ ܡܪܙܒܢܐ ܕܦܪ̈ܣܝܐ ܕܐܝܬ ܗܘܐ ܒܢܣܒܝܢ܇ ܠܒܟ ܠܪ̈ܝܫܢܝܗܘܢ ܘܩܼܿܛܠ ܐܢܘܢ. ܘܐܦ ܛܝܝ̈ܐ ܕܒܝܬ ܪ̈ܗܘܡܝܐܼ ܥܒܼܪ ܕܠܐ ܦܘܩܕܢܐ ܠܒܝܬ ܦܪ̈ܣܝܐܼ. ܘܫܒܘ ܐܓܘܪܣܐ ܚܕ. ܘܟܕ ܐܫܬܡܥܼܬ ܨܒܘܬܐ ܗܕܐ ܠܡܓܝܣܛܪܘܣܼ. ܢܚܼܬ ܗܘܐ ܠܗ ܓܝܪ ܒܫܘܠܡܗܿ ܕܗܕܐ pb. 309 ܫܢܬܐ ܠܐܦܡܝܐ: ܫܠܼܚ ܠܛܝܡܣܛܪܛܐ ܕܘܟܣ ܕܩܠܢܝܩܘܣܿ. ܘܠܒܼܟ ܚ̈ܡܫܐ ܡܢ ܪ̈ܝܫܢܝܗܘܢ. ܘܬܪ̈ܝܢ ܡܢܗܘܢܼ ܩܼܛܠ ܒܣܝܦܐܼ. ܘܬܠ̈ܬܐ ܙܩܼܦ ܥܠ ܩܝ̈ܣܐ. ܦܪܙܡܢ ܕܝܢ ܫܩܼܠ ܡܢ ܐܦܡܝܐܿ. ܡܢ ܒܬܪ ܕܢܚܼܬ ܠܬܡܢ ܡܓܝܣܛܪܘܣܼ. ܘܐܬܼܐ ܫܼܪܐ ܒܐܘܪܗܝ. ܩܿܒܠ ܕܝܢ ܡܢ ܡܠܟܐ ܫܘܠܛܢܐܼ. ܕܢܗܘܐ ܪܒ ܚܝܠܐ ܚܠܦ ܗܘܦܛܝܣ.܀ ܫܘܪܐ ܕܝܢ ܕܒܛܢܢ ܩܣܛܪܐ ܕܒܣܪܘܓܼ. ܕܢܦܝܠ ܗܘܐ ܘܡܬܪܥ ܟܠܗ܇ ܐܬܒܢܝ ܘܐܬܚܕܬ ܒܫܩܠ ܛܥܢܐ ܕܐܘܠܓܝܣ ܗܓܡܘܢܐ ܕܐܘܪܗܝ.܀ ܡܝܬܪܐ ܕܝܢ ܗܕܣ ܩܫܝܫܐ ܩܼܪܡ ܒܢܚܫܐ ܬܪ̈ܥܐ ܕܒܝܬ ܓܒܪ̈ܐ ܕܥܕܬܐ ܕܐܘܪܗܝ.

ܫܢܬ ܬܡ̈ܢܡܐܐ ܘܫܒܥܣܪ̈ܐ. ܡܕܒܪ̈ܢܐ ܕܝܢ ܕܚܝܠܐ ܕܪ̈ܗܘܡܝܐ [ܫܘܕܥܘ] ܠܡܠܟܐܼ. ܕܣܘܓܦܢܐ ܕܪܒܐ ܗܘܐ ܠܚܝܠ̈ܘܬܐ ܡܢ ܗܕܐܼ. ܕܠܝܬ ܠܗܘܢ ܡܕܝܢܬܐ ܕܝܿܬܒܐ ܥܠ ܬܚܘܡܐ. ܟܠ ܐܡܬܝ ܓܝܪ ܕܢܿܦܩܝܢ ܗܘܘ ܪ̈ܗܘܡܝܐ ܡܢ ܬܠܐ ܐܘ ܡܢ ܐܡܕܼ. ܕܢܬܟܪܟܘܢ ܒܥܪܒ ܡܛܠ ܓܝ̈ܣܐ܇ ܒܩܼܢܛܐ ܗܘܿܝܢ ܗܘܘܿ. ܟܠ ܐܝܟܐ ܕܫܪܝܢ ܗܘܘܿ. ܡܢ ܢܡܟܠܐ ܕܒ̈ܥܠܕܒܒܐ. ܘܐܢ ܬܘܒ ܢܓܕܫ ܕܚܝ̈ܠܘܬܐ ܕܣܓܝ̈ܐܝܢ ܡܢܗܘܢ ܡܫܟܚܝܢ ܗܘܘܼ. ܘܡܬܚܿܫܒܝܢ ܗܘܘ ܠܡܗܼܦܟ ܠܒܬܪܗܘܢ܇ ܥܡܠܐ ܪܒܐ ܡܣܝܒܪܝܢ ܗܘܘܼ ܒܗܝܿ ܕܠܐ ܩܪܒܝܐ ܗܘܬ ܠܗܘܢ ܡܕܝܢܬܐ ܕܢܣܬܬܪܘܢ ܒܗܿ. ܘܡܛܠܗܕܐ ܡܠܟܐ ܕܢܬܒܢܐ ܫܘܪܐ ܠܕܪܐ ܩܪܝܬܐ ܕܝܿܬܒܐ ܥܠ ܬܚܘܡܐ ܦܩܼܕ. ܘܐܬܓܒܝܘ ܦܣ̈ܘܠܐ ܡܢ ܟܠܗܿ ܣܘܪܐܿ. ܘܢܚܼܬܘ ܠܬܡܢ ܘܒܢܿܝܢ ܗܘܘ ܠܗ. ܦܪ̈ܣܝܐ ܕܝܢ ܢܿܦܩܝܢ ܗܘܘ ܡܢ ܢܨܝܒܝܢ ܘܡܒܿܛܠܝܢ pb. 310 ܗܘܘ ܠܗܘܢ. ܘܥܠ ܗܕܐ ܫܩܼܠ ܦܪܙܡܢ ܡܢ ܐܘܪܗܝ. ܘܢܼܚܬ ܝܬܼܒ ܒܐܡܕ. ܘܢܿܦܩ ܗܘܐ ܠܘܬ ܐܝܠܝܢ ܕܒܿܢܝܢ܆ ܘܡܣܝܥ ܗܘܐ ܠܗܘܢ. ܐܦ ܢܚܫܝܪܐ ܪܒܐ ܒܚܝܘ̈ܬܐ ܥܿܒܕ ܗܘܐ. ܘܝܬܝܪܐܝܬ ܒܚܙܝܪ̈ܝ ܒܪܐ ܕܣܓܝܘ ܬܡܢ ܡܢ ܕܚܒܪ ܐܬܪܐ. ܨܐܕ ܗܘܐ ܡܢܗܘܢ ܝܬܝܪ ܡܢ ܐܪ̈ܒܥܝܢ ܒܝܘܡܐ ܚܕ. ܠܬܚܘܝܬܐ ܕܝܢ ܕܢܚܫܝܪܬܢܘܬܗ ܐܦ ܠܐܘܪܗܝ ܫܕܪ ܡܢܗܘܢ ܕܚܝܝܢ ܘܕܩܛܠܝܠܝܢ.܀ ܡܝܬܪܐ ܕܝܢ ܣܪܓܝܣ ܐܦܝܣܩܦܐ ܕܒܝܪܬܐ ܩܣܛܪܐܼ ܕܝܿܬܒܐ ܠܘܬܢ ܥܠ ܢܗܪܐ ܦܪܬܼ. ܫܪܝ ܕܢܒܢܐ ܐܦ ܗܘܘܼ ܫܘܪܐ ܠܡܕܝܢܬܗ. ܘܝܗܼܒ ܠܗ ܡܠܟܐ ܕܗܒܐ ܠܐ ܙܥܘܪ ܠܢܦ̈ܩܬܗ. ܐܦ ܠܐܘܪܘܦܘܣܼ ܕܝܿܬܒܐ ܡܥܪ̈ܒܝ ܢܗܪܐ ܒܗܦܪܟܝܐ ܕܡܒܘܓ. ܦܩܕ ܡܓܝܛܪܘܣ ܕܢܬܒܢܐ ܠܗܿ ܫܘܪܐ. ܘܠܐܿܝܢ ܗܘܘ ܒܗ ܒܢ̈ܝ ܐܬܪܐ ܐܝܟ ܚܝܠܗܘܢ.܀ ܡܢ ܒܬܪ ܕܝܢ ܕܢܚܼܬ ܦܪܙܡܢ ܠܐܡܕ܇ ܐܬܼܐ ܚܠܦܘܗܝ ܪܘܡܢܘܣ ܕܘܟܣ. ܘܝܬܼܒ ܒܐܘܪܗܝܼ ܗܘܼ ܘܚܝܠܗ. ܘܕܩ̈ܬܐ ܣܓܝ̈ܐܬܐ ܒܡ̈ܣܟܢܐ ܥܿܒܕ ܗܘܐ. ܡܠܟܐ ܕܝܢ ܥܠ ܟܠܗܝܢ ܫܦܝܪ̈ܬܐܼ. ܐܘܣܦ ܐܦ ܒܗܕܐ ܫܢܬܐܼ. ܘܫܕܪ ܫܘܒܩܢܐ ܕܣܘܢܛܠܝܐ ܠܟܠܗ ܒܝܬ ܢܗܪ̈ܘܬܐ. ܘܚܕܝܘ ܟܠܗܘܢ ܫܦܝܪ̈ܬܐܼ. ܐܘܣܦ ܐܦ ܒܗܕܐ ܫܢܬܐܼ. ܘܫܕܪ ܫܘܒܩܢܐ ܕܣܘܢܛܠܝܐ ܠܟܠܗ ܒܝܬ ܢܗܪ̈ܘܬܐ. ܘܚܕܝܘ ܟܠܗܘܢ ܡܪ̈ܝ ܩܘܪ̈ܝܐܿ ܘܠܡܠܟܐ ܡܩܠܣܝܢ ܗܘܘ.܀ ܩܘܛܢܐ ܕܝܢ ܕܥܡܐ ܪܛܢܿܝܢ ܗܘܘܼ. ܘܩܿܥܝܢ ܘܐܡܿܪܝܢܼ ܕܠܐ ܙܕܩܿ ܕܢܼܫܪܘܢ ܥܠܝܢ ܓܘ̈ܬܝܐ܇ ܐܠܐ ܥܠ ܡܪ̈ܝ ܩܘܪ̈ܝܐ. ܐܝܟ ܡܿܢ ܕܗܼܢܘܢ ܐܬܥܕܪܘ ܒܫܘܒܩܢܐ ܗܢܐ. ܗܘܦܪܟܐ ܕܝܢ ܦܩܼܕ ܕܬܗܘܐ ܫܐܠܬܗܘܢ. ܘܟܕ ܫܪܝܬܿ ܗܕܐ pb. 311 ܕܬܣܬܥܪܼ. ܐܬܟܢܫܘ ܟܠܗܘܢ ܪܘܒ̈ܒܢܐ ܕܡܕܝܢܬܐ ܠܘܬ ܪܘܡܢܘܣ ܕܘܟܣܼ. ܘܐܦܝܣܘܗܝܼ ܘܐܡܿܪܝܢ ܠܗ܇ ܬܦܩܘܕ ܪܒܘܬܟ ܡܢܐ ܘܿܠܐ ܕܢܣܒ ܟܠܚܕ ܡܢ ܓܘ̈ܬܝܐ ܒܝܪܚܐܼ. ܕܠܡܐ ܡܐ ܕܥܠܘ ܠܒ̈ܬܐ ܕܐܢܫ̈ܐ ܡܫܪ̈ܬܚܐ ܢܒܙܘܢ܆ ܐܝܟܢܐ ܕܐܦ ܠܩܘܛܢܐ ܒܿܙܝܢ ܗܘܘ. ܘܗܘܼ ܩܒܠ ܦܝܣܗܘܢ ܘܦܩܼܕ ܠܗܘܢ ܕܢܒܣܘܢ ܐܣܦܕܐ ܕܡܫܚܐ ܒܝܪܚܐ. ܘܡܿܬܝܢ ܠܝܛܪ̈ܝܢ ܩܝ̈ܣܐ. ܘܥܪܣܐ ܘܬܫܘܝܬܐ ܠܒܝܬ ܬܪ̈ܝܢ ܡܢܗܘܢ. ܘܗܼܢܘܢ ܘܓܘ̈ܬܝܐ ܟܕ ܫܡܼܥܘ ܦܘܩܕܢܐ ܗܢܐ ܪܗܛܘ ܥܠ ܪܘܡܢܘܣ ܕܘܟܣܼ ܠܕܪܬܐ ܕܒܝܬ ܒܪܣܐ ܕܢܩܛܠܘܢܝܗܝ. ܘܟܕ ܣܿܠܩܝܢ ܒܣܒܠ̈ܬܐ ܕܒܝܬ ܡܫܪܝܗܼ. ܫܡܼܥ ܩܠ ܪܘܒܗܘܢ ܘܫܓܝܫܘܬܗܘܢܼ ܘܐܦ ܐܣܬܟܠ ܡܢܐ ܨܿܒܝܢ ܠܡܣܥܪ. ܘܩܠܝܠܐܝܬ ܙܝܢܗ ܠܒܼܫ ܘܫܩܼܠ ܡ̈ܐܢܘܗܝ ܘܣܝܦܗ ܫܡܼܛ. ܘܩܡ ܥܠ ܬܪܥܐ ܥܠܝܐ ܕܒܗ ܫܪܝܢ ܗܘܘ. ܟܕ ܠܚܕ ܡܢ ܓܘ̈ܬܝܐ ܠܐ ܩܼܛܠ. ܐܠܐ ܣܝܦܗ ܡܢܝܦ ܗܘܐ܆ ܘܟܿܠܐ ܗܘܐ ܠܩܕ̈ܡܐ ܕܣܿܠܩܝܢ ܡܢ ܕܠܡܥܠ ܥܠܘܗܝ. ܘܐܝܠܝܢ ܕܡܢ ܠܬܚܬ ܥܿܨܝܢ ܗܘܘ ܒܚܡܬܗܘܢ ܠܐܝܠܝܢ ܕܠܥܠ ܡܢܗܘܢ ܠܡܣܩ ܘܠܡܥܠ ܥܠܝܗܘܢ. ܒܝܕ ܣܒ̈ܠܬܐ ܕܝܢ ܕܕܪܬܐ ܗܿܝܼ ܥܡܐ ܣܓܝܐܐ ܐܚܕܘ܇ ܐܝܟ ܕܡܦܣܐ ܚܣܝܘܬܟ. ܟܕ ܗܟܝܠ ܩܕܡ̈ܝܐ ܕܣܠܼܩܘ ܠܐ ܡܫܟܚܝܢ ܗܘܘ ܠܡܥܠܼ ܡܛܠ ܕܚܠܬܐ ܕܚܪܒܐ܇ ܘܐܚܪ̈ܢܐ ܠܗܘܢ ܚܿܒܨܝܢ ܗܘܘ܆ ܓܒܪ̈ܐ ܐܬܬܒܪ ܘܢܦܼܠ ܥܠܝܗܘܢ. ܘܡܝܬܘ ܕܠ̈ܠܝܠܐ ܡܢܗܘܢ. ܘܣܓܝ̈ܐܐ ܐܣܬܪܚܘ pb. 312 ܗܕܡ̈ܝܗܘܢ ܘܗܿܘܼܘ ܣܓܝ̈ܦܐ. ܘܬܘܒ ܠܐ ܐܬܐܣܼܝܘ. ܪܘܡܢܣ ܟܕ ܗܼܘܬ ܠܗ ܐܦܬܐ ܒܝܕ ܡܦܘܠܬܐ ܗܕܐܼ. ܥܠ ܐܓܪܐ ܥܪܩ ܡܢ ܕܪܬܐ ܠܚܒܪܬܗܿ ܘܐܬܦܠܛ. ܘܬܘܒ ܡܕܡ ܠܐ ܐܡܼܪ ܠܗܘܢ. ܘܡܢ ܗܕܐ ܥܠܬܐ ܦܫܘ ܠܗܘܢ ܐܝܟܐ ܕܫܪܝܢ ܗܘܘ܇ ܟܕ ܡܛܕܒܪܝܢ ܒܨܒܝܢ̈ܝ ܢܦܫܗܘܢܼ. ܘܐܢܫ ܕܬܟܿܣ ܠܗܘܢ ܠܝܬ ܗܘܐ. ܐܦܠܐ ܕܟܿܠܐ ܐܘ ܕܡܿܪܬܐ ܗܘܐ ܠܗܘܢ.܀ ܐܦܝܣܩܘܦܐ ܕܝܠܢ ܡܪܝ ܦܛܪܐܼ ܒܟܘܪܗܢܐ ܩܫܝܐ ܘܥܣܩܐ ܐܝܬܘܗܝ ܗܘܐ ܟܠܗܿ ܗܕܐ ܫܢܬܐ.. ܒܐܪܚ ܢܝܣܢ ܕܝܢ܆ ܬܘܒ ܝܬܝܪܐܝܬ ܥܫܼܢ ܐܘܠܨܢܐ ܥܠ ܡܕܝܢܬܢ. ܟܿܢܫ ܓܝܪ ܡܓܣܛܪܘܣ ܠܟܠܗ ܚܝܠܐܼ. ܘܩܡ ܕܢܚܘܬ ܠܒܝܬ ܦܪ̈ܣܝܐܿ. ܕܢܩܝܡ ܘܢܚܕܬ ܥܡܗܘܢ ܩܝܿܡܐ ܕܫܝܢܐ. ܘܟܕ ܥܼܠ ܠܐܘܪܗܝ ܐܬܼܘ ܠܘܬܗ ܐܝܙ̈ܓܕܐ ܕܦܪ̈ܣܝܐ܆ ܘܐܘܕܥܘܗܝܼ ܕܐܣܛܒܝܕ ܗܘܿ ܕܐܬܼܐ ܠܐܘܪܥܗ܇ ܕܢܩܝܡ ܥܡܗ ܩܝܿܡܐܼ ܡܝܼܬ. ܘܡܦܝܣܝܢ ܗܘܘ ܠܗ ܘܐܡܿܪܝܢ܇ ܕܙܿܕܩ ܠܗ ܐܢ ܗܼܘ ܕܠܫܝܢܐ ܢܚܼܬܿ. ܕܠܐ ܢܥܒܪ ܡܢ ܐܘܪܗܝ܇ ܥܕܡܐ ܕܐܣܛܒܝܕ ܐܚܪܢܐ ܢܫܬܕܪ ܡܢ ܠܘܬ ܡܠܟܐ ܕܦܪ̈ܣܝܐ. ܘܗܼܘ ܒܥܘܬܗܘܢ ܩܼܒܠ. ܘܒܐܘܪܗܝ ܝܬܼܒ ܝܪ̈ܚܐ ܚܡ̈ܫܐ. ܘܡܛܠ ܕܠܐ ܣܿܦܩܐ ܗܘܬ ܡܕܝܢܬܐ ܠܓܘ̈ܬܝܐ ܕܐܝܬ ܗܘܐ ܥܡܗܼ. ܐܦ ܒܩܘܪ̈ܝܐ ܫܼܪܝܢ ܗܘܘ. ܘܟܠܗܝܢ ܕܝܪ̈ܬܐ ܪܘܪ̈ܒܬܐ ܘܙܥܘܪ̈ܝܬܐ ܕܚܕܪ̈ܝ ܡܕܝܢܬܐ. ܗܟܢܐ ܐܦܠܐ ܐܝܠܝܢ ܕܒܝܚܝܕܝܘܬܐ ܥܿܡܪܝܢ ܗܘܘܿ. ܐܫܬܒܩܘ ܕܢܕܝܪܘܢ ܒܫܠܝܐ ܕܡܿܚܒܝܢ ܠܗ. ܡܛܠ ܕܐܦ ܥܠܝܗܘܢ ܫܼܪܝܢ ܗܘܘ ܒܝܕܝܪ̈ܬܗܘܢ. ܗܟܢܐ ܓܝܪ ܐܬܠܥܒܘ ܒܡܐܟܠܐ ܘܒܡܫܬܝܐܿ. ܒܗܝܿ ܕܠܘ ܡܢ ܕܝܠܗܘܢ ܐܟܿܠܝܢ ܗܘܘ ܒܝܘܡܐ ܩܕܡܝܐ ܕܐܬܘ܇ ܐܝܟܢܐ ܕܡܢܗܘܢ ܟܕ ܒܒ̈ܬܐ ܥܠ̈ܝܐ ܐܬܒܣܡܘ ܢܦܼܩܘ pb. 313 ܒܠܠܝܐ ܟܕ ܡܬܒܘܪܪܝܢ ܡܢ ܚܡܪܐ ܣܓܝܐܐܼ. ܘܕܪܟܘ ܥܠ ܐܬܪܐ ܣܦܝܩܐ ܘܠܥܘܡܩܐ ܐܣܬܚܦܘ. ܘܒܫܘܠܡܐ ܒܝܫܐܼ ܡܢ ܚܝ̈ܐ ܫܢܝܘ. ܐܚܪ̈ܢܐ ܕܝܢ ܟܕ ܝܿܬܒܝܢ ܘܫܿܬܝܢܼ ܐܬܛܒܥܘ ܒܫܼܢܬܐ ܘܢܦܼܠܘ ܡܢ ܒ̈ܬܐ ܥܠ̈ܝܐܼ. ܘܡܝܬܘ ܥܠ ܕܘܟ̈ܝܬܗܘܢ. ܐܚܪ̈ܢܐ ܕܝܢ ܥܠ ܥܪ̈ܣܬܗܘܢ ܐܬܩܠܝܘ ܡܢ ܡܟܘܠܬܐ ܣܿܓܝܐܬܐ. ܐܚܪ̈ܢܐ ܕܝܢ ܠܗܘܢ܇ ܡܛܠ ܣܘܪ̈ܚܢܐ ܙܥܘܪ̈ܐ. ܐܚܪ̈ܢܐ ܕܝܢ ܕܥܼܠܘ ܠܓܢܬܐܿ ܕܢܣܒܘܢ ܝܪܩܐܼ. ܘܩܡ ܓܢܢܐ ܕܢܟܠܐ ܐܢܘܢ ܕܠܐ ܢܣܼܒܘܢ܆ ܡܿܘܬܐ ܒܝܕ ܓܐܪܐ ܐܘܫܛ ܠܗ ܘܕܡܗ ܠܐ ܐܬܬܒܥ. ܐܚܪ̈ܢܐ ܕܝܢ ܟܕ ܡܬܪܒܝܐ ܒܝܫܬܗܘܢ: ܘܠܝܬ ܐܢܫ ܕܬܟܿܣ ܠܗܿ. ܘܐܝܠܝܢ ܕܫܼܝܢ ܗܘܘ ܥܠܝܗܘܢ ܒܝܕܥܬܐ ܣܓܝܐܬܐ ܡܬܕܒܪܝܢ ܗܘܘ ܥܡܗܘܢܼ. ܘܟܠܡܕܡ ܐܝܟ ܨܒܝܢܗܘܢ ܣܿܥܪܝܢ ܗܘܘ: ܒܕܠܐ ܝܿܗܒܝܢ ܗܘܿܘ ܠܗܘܢ ܐܬܪܐ ܠܡܒܿܐܫܘ ܠܗܘܢ܆ ܐܙܕܟܝܘ ܡܢ ܚܡܬܗܘܢ ܘܠܚܕ̈ܕܐ ܩܿܛܼܠ. ܕܐܝܬ ܗܘܐ ܒܗܘܢ ܕܝܢ ܐܦ ܐܚܪ̈ܢܐ ܕܡܛܣܐܝܬ ܚܿܐܝܢ܆ ܠܐ ܟܣܝܐ ܡܢ ܝܕܥܬܟ. ܠܐ ܓܝܪ ܡܫܟܚܐ ܕܒܚܝܠܐ ܣܓܝܐܐ ܕܐܝܟ ܗܘܿ: ܕܠܐ ܐܦ ܗܟܢܐ ܢܫܬܟܚܘܢ ܒܗ. ܒܝܫܬܗܘܢ ܕܒܝ̈ܫܐ ܗܟܢܐ ܥܫܢܼܬ ܠܡܒܐܫܘܼ. ܥܕܡܐ ܕܐܦ ܐܝܠܝܢ ܕܡܪܚܝܢ ܗܘܘ ܒܐܘܪ̈ܗܝܐܼ. ܐܫܝܚܘ ܕܡܕܡ ܕܠܐ ܘܿܠܐ ܢܣܥܪܘܢ. ܪܓܢܐ ܓܝܪ ܕܥܠ ܡܓܝܣܛܪܘܣ ܒܟܪ̈ܛܝܣܐ ܪܫܡܘܼ. ܘܒܕܘ̈ܟܝܬܐ ܝܕܝ̈ܥܬܐ ܕܡܕܝܢܬܐ ܟܣܝܐܝܬ ܩܒܥܘ. ܗܘܼ ܕܝܢ ܟܕ ܫܡܼܥܼ. ܠܐ ܐܬܚܿܡܬ ܐܝܟܢܐ ܕܡܨܐ ܗܘܐ. ܘܠܐ ܥܿܩܒ ܥܠ ܗܘܿ ܡܿܢ ܕܗܕܐ ܣܼܥܪ. ܐܦܠܐ ܠܡܕܝܢܬܐ ܡܕܡ ܕܒܝܫ ܐܬܚܿܫܒ ܠܡܣܥܪ ܡܛܠ ܒܣܝܡܘܬܗ. ܐܠܐ ܫܩܠ ܛܥܢܐ ܣܓܝܐܐ ܗܘܐ ܕܒܥܓܠ ܘܩܠܝܠܐܝܬ ܡܢ ܐܘܪܗܝ ܢܫܿܢܐ. pb. 314 ܫܢܬ ܬܡܢ̈ܡܐܐ ܘܬܡܢܥܣܪ̈ܐ ܕܒܼܪ ܗܟܝܠ ܢܓܝܣܛܪܘܣ ܠܟܠܗ ܚܝܠܗ ܘܢܚܼܬ ܠܬܚܘܡܐ. ܘܐܬܼܐ ܠܘܬܗ ܐܝܙܓܕܐ ܕܦܪ̈ܣܝܐ ܠܕܪܐ ܡܕܝܢܬܐ. ܟܕ ܐܝܬ ܗܘܐ ܥܡܗ ܐܦ ܗܡܝܪ̈ܐ ܕܐܫܬܕܪܘ ܡܢ ܐܣܛܒܝܕ. ܘܬܘܒ ܐܦܝܣܘܗܝܼ ܕܐܢ ܗܘܼ ܕܫܝܢܐ ܨܿܒܐ ܕܢܥܒܕ܇ ܙܿܕܩ ܠܗ ܕܢܫܕܪ ܐܦ ܗܘܼ ܗܡܝܪ̈ܐ ܚܠܦ ܗܠܝܢ ܕܩܿܒܠ. ܘܒܬܪܟܝܢ ܢܬܩܪܒܘܢ ܒܚܘܒܐ ܬܪ̈ܝܗܘܢ ܓܒ̈ܐ. ܘܢܩܒܠܘܢ ܐܦ̈ܐ ܕܚ̈ܕܕܐ ܒܚܡ̈ܫܡܐܐ ܚܡ̈ܫܡܐܐ ܦܪ̈ܫܝܢ ܟܕ ܠܐ ܡܙܿܝܢܝܢ܇ ܘܗܝܕܝܢ ܢܬܒܘܢ ܒܐܦܪܣܝܢܐ ܘܐܝܠܝܢ ܕܘܠܐ ܢܣܥܼܪܘܢ. ܘܩܿܒܼܠ ܦܝܣܗܘܢܼ. ܘܗܡܝܪ̈ܐ ܫܕܪ. ܘܠܐܘܪܥܗ ܕܐܣܛܒܝܕ ܒܝܘܡܐ ܕܐܬܐܡܪ ܠܗܼ ܐܙܠܼ ܕܠܐ ܙܝܢܐ. ܡܛܠ ܕܝܢ ܕܩܿܢܛ ܗܘܐ܇ ܕܕܠܡܐ ܢܟܠܐ ܡܕܡ ܢܗܘܐ ܥܠܘܗܝ ܡܢ ܦܪ̈ܣܝܐ܆ ܐܩܝܡ ܠܟܠܗ ܚܝܠܐ ܕܪ̈ܗܘܡܝܐ ܡܢܩܒܘܠ ܟܕ ܡܙܝܢܝܢ. ܘܐܬܿܐ ܝܗܼܒ ܠܗܘܢܼ ܘܦܿܩܼܕ ܐܢܘܢ ܕܐܢܗܘܼ ܕܐܬܿܐ ܗܝܿ ܡܬܚܙܝܐ ܠܗܘܢܼ ܩܠܝܠܐܝܬ ܢܡܢܥܘܢ ܠܗܬܗ. ܟܕ ܐܬܼܐ ܕܝܢ ܐܦ ܐܣܛܒܝܕ ܠܐܘܪܥܗܼ. ܘܝܬܼܒ ܒܐܦܪܣܢܐ ܗܼܢܘܢ ܪ̈ܗܘܡܝܐ ܘܟܠܗܘܢ ܡܕܒܪ̈ܢܐ ܕܥܡܗܘܢܼ. ܣܡ ܠܒܠܗ ܐܢܫ ܡܢ ܦܠ̈ܚܐ ܕܪ̈ܗܘܡܝܐܼ. ܘܚܼܙܐ ܕܙܝܢܐ ܠܒܝܫܝܢ ܡܢ ܠܓܘ ܟܠܗܘܢ ܐܝܠܝܢ ܕܐܬܼܘ ܥܡ ܐܣܛܒܝܕ. ܘܗܝܼ ܗܕܐ ܐܘܕܥܘ ܠܦܪܙܡܢ ܪܝܫ ܚܝܠܐ ܘܠܛܡܣܛܪܛܐ ܕܘܟܣ. ܘܗܢܼܘܢ ܐܬܼܐ ܗܝܿ ܠܚܝܠ̈ܘܬܐ ܚܘܝܘ. ܘܡܚܕܗܿ ܝܒܼܒܘ ܘܡܼܛܘ ܠܘܬܗܘܢ. ܘܠܐܣܛܒܝܕ ܘܝܐܠܝܢ ܕܥܡܗܼ ܒܨܥܬܐ ܚܒܼܫܘ. ܚܝܠܐ ܕܝܢ ܕܒܡܫܪܝܬܐ ܕܦܪ̈ܣܝܐ܇ ܟܕ ܝܼܕܥ ܕܐܬܚܒܫ ܐܣܛܒܝܕ ܘܐܝܠܝܢ ܕܥܡܗܼ ܥܪܩܘ ܡܢ ܕܚܠܬܗܘܢܼ. ܘܥܠܘ ܠܢܨܒܝܢ. ܪ̈ܗܘܡܝܐ ܕܝܢ ܨܿܒܝܢ ܗܘܘ ܠܐܣܛܒܝܢ ܠܡܚܕ ܐܦ ܠܐܝܠܝܢ ܕܥܡܗ ܠܡܩܛܠ. pb. 315 ܘܡܓܝܣܛܪܘܣ ܡܦܝܣ ܗܘܐ ܠܗܘܢܼ. ܕܠܐ ܢܗܘܘܢ ܥܠܬܐ ܠܚܪܒܐ ܘܢܬܚܩܘܢ ܠܫܝܢܐ. ܘܠܡܚܣܢ ܐܨܛܒܝܘ. ܘܗܼܢܘܢ ܕܝܢ ܐܫܬܡܥܘ ܠܗ ܘܫܒܩܘܗܝ ܠܐܣܛܒܝܕ ܠܡܦܩܼ ܘܠܝܐܝܠܝܢ ܕܥܡܗܼ ܡܢ ܒܝܢܬܗܘܢ܆ ܟܕ ܡܕܡ ܠܐ ܐܟܝܘ ܐܢܘܢ. ܐܦ ܓܝܪ ܒܙܟܘܬܗܘܢܼ ܡܫܝ̈ܢܐ ܐܝܬܝܗܘܢ ܡܕܒܪ̈ܢܐ ܕܪ̈ܗܘܡܝܐ. ܐܣܛܒܝܕ ܕܝܢ ܟܕ ܫܿܢܝ ܠܡܫܪܝܬܗ. ܘܚܼܙܐ ܕܥܠܼܘ ܠܗܘܢ ܦܪ̈ܣܝܐ ܠܢܨܒܝܢ܆ ܕܚܠܘ ܗܘܼ ܕܢܩܿܘܐ ܒܠܚܘܕܘܗܝ܆ ܘܥܼܠ ܐܦ ܗܘܼ ܠܘܬܗܘܢ. ܘܥܿܨܐ ܗܘܐ ܠܗܘܢ ܠܡܦܼܩ ܥܡܗ ܡܢ ܡܕܝܢܬܐ. ܘܡܢ ܕܚܠܬܗܘܢܼ ܠܐ ܨܿܒܝܢ ܗܘܘ ܠܡܦܼܩ. ܘܡܛܠ ܕܝܢ ܕܠܐ ܬܬܓܠܐ ܕܚܠܬܗܘܢ ܠܪ̈ܗܘܡܝܐ܆ ܫܕܪ ܐܣܛܒܝܕܼ ܐܝܬܝ ܒܪܬܗ ܠܢܨܒܝܢ. ܘܐܝܟ ܢܡܘܣܐ ܕܦܪ̈ܣܐ ܫܼܩܠܗܿ ܒܢܫ̈ܐ. ܟܕ ܕܝܢ ܫܠܚ ܠܗ ܡܓܝܣܛܪܘܣ ܒܡܘ̈ܡܬܐ ܕܠܐ ܐܢܫ ܡܿܟܐ ܠܟ܆ ܐܦܠܐ ܐܢ ܒܠܚܘܕܝܟ ܬܦܘܩܼ. ܦܢܝ ܗܘܼ ܦܬܓܡܐ܇ ܕܠܐ ܗܘܐ ܡܢ ܕܚܠܬܐ ܠܐ ܢܿܦܩ ܐܢܐ. ܐܠܐ ܐܝܟ ܡܿܢ ܕܢܡܠܘܢ ܝܘ̈ܡܬܐ ܕܡܫܬܘܬܐ. ܘܟܕ ܛܒ ܒܟܠܗܿ ܨܒܘܬܐ ܡܦܣ ܗܘܐ ܡܓܝܣܛܪܘܣ܆ ܐܝܟ ܗܿܘ ܕܠܐ ܝܿܕܥ ܡܿܗܡܐ (ܗܘܐ). ܒܬܪ ܝܘ̈ܡܬܐ ܕܝܢܼ ܟܕ ܢܦܼܩ ܐܣܛܒܝܕ ܠܘܬܗܼ. ܠܟܠܗܝܢ ܥܠ̈ܬܐ ܕܣܝ̈ܡܢ ܗܘ̈ܝ ܠܝ ܕܢܬܒܥ ܐܢܝܢ ܠܦܪ̈ܣܝܐܿ. ܒܿܛܠ ܒܪܚܡܬ ܫܝܢܐ. ܘܩܝܿܡܐ ܐܩܝܡ ܥܡܗܘܢ. ܘܫܝܢܐ ܥܒܕ. ܘܟ̈ܬܒܐ ܒܝܢܬܗܘܢ ܟܬܼܒܘ. ܘܙܒܢܐ ܝܕܝܥܐ ܬܚܡܘ ܒܗܘܢܼ. ܕܩܪܒܐ ܥܠ ܚ̈ܕܕܐ ܠܐ ܢܙܝܥܘܢ. ܘܟܠܗܘܢ ܚܝܠ̈ܘܬܐ ܚܿܕܝܢ ܗܘܘ ܘܪܘܙܝܢ ܒܫܝܢܐ ܕܗܘܼܐ. ܘܟܕ ܥܕܟܝܠ ܬܡܢ ܐܝܬܝܗܘܢ ܗܘܘ ܒܬܚܘܡܐ܆ ܩܿܒܠ ܗܘܼ ܩܠܠܪܣ ܡܓܝܣܛܪܣ ܘܩܠܝܘܦܝܣ܇ ܐܝܓܪ̈ܬܐ ܕܡܠܟܐ ܐܢܣܛܘܣ. ܕܝܨܝܦܘܬܐ ܘܡܪܚܡܢܘܬܐ ܕܥܠܐܬܪܐ ܟܠܗ ܕܒܝܬ ܢܗܪ̈ܘܬܐ pb. 316 ܡ̈ܠܼܝܢ ܗܘ̈ܝ܆ ܘܗܟܢܐ ܟܬܼܒ ܠܗܘܢ. ܕܐܢ ܗܘܼ ܕܝܿܕܥܝܢ ܕܘܿܠܐ ܕܬܫܬܒܩ ܣܘܢܛܠܝܐܼ. ܢܗܘܐ ܐܝܬ ܠܗܘܢ ܫܘܠܛܢܐ ܕܕܠܐ ܥܘܟܪ ܢܫܒܩܘܢ. ܘܗܼܢܘܢ ܐܬܚܫܒܘ ܕܬܫܬܒܩ ܠܒܝܬ ܐܡ̈ܕܝܐ ܟܠܗܿ ܣܘܢܛܠܝܐ. ܘܠܒܝܬ ܐܘܪ̈ܗܝܐ ܦܠܓܗܿ. ܘܗܝܼ ܗܕܐ ܫܕܪܘ ܐܘܕܥܘ ܒܐܘܪܗܝ. ܘܒܬܪ ܩܠܝܠ ܐܦ ܐܝܓܪ̈ܬܐ ܐܚܪ̈ܢܝܬܐ ܫܕܪܘܼ. ܕܥܠ ܫܝܢܐ ܕܗܘܼܐ ܡܘܕܥ̈ܢ ܗܘ̈ܝ.. ܘܒܝܘܡ ܥܣܪ̈ܝܢ ܘܬܡܢܝܐ ܒܐܝܪܚ ܬܫܪܝ ܐܚܪܝ܆ ܕܒܼܪ ܠܟܠܗ ܚܼܝܠܐ ܘܣܠܼܩ ܡܢ ܬܚܘܡ̈ܐ. ܘܟܕ ܡܢܥ ܠܐܘܪܗܝܼ. ܐܬܪܥܝ ܗܘܐ ܡܓܝܣܛܪܘܣ ܕܠܐ ܢܥܘܠ ܠܗܿ܇ ܡܛܠ ܪܛܢܗܘܢ ܕܥܠܘܗܝ. ܘܛܘܒܢܐ ܒܪܗܕܕ ܐܦܝܣܩܘܦܐ ܕܬܠܬ ܐܦܝܣܩܼ. ܕܠܐ ܢܬܠ ܐܬܪܐ ܠܚܡܬܐ ܕܬܫܬܛܠ ܒܗ. ܘܠܐ ܢܫܒܘܩ ܡܢ ܒܬܪܗ ܥܩܒܬܐ ܐܘ ܡܪܢܝܬܐ ܠܐܢܫ. ܘܗܘܼ ܡܛܝܒܐܝܬ ܠܦܝܣܗ ܩܿܒܼܠ. ܘܐܦ ܐܘܪ̈ܗܝܐ ܟܠܗܘܢ ܒܚܘܝܚܘܬܐ ܪܒܬܐ ܢܦܩܘ ܠܩܘܒܠܗܼ ܟܕ ܛܥܝܢܝܢ ܩܪ̈ܝܘܢܐܼ ܡܢ ܪܒܐ ܘܥܕܡܐ ܠܙܥܘܪܐ. ܘܐܦ ܟܠܗܘܢ ܩܠܝܪܗܝܩܘ ܘܒܢ̈ܝ ܩܝܿܡܐ ܘܕܝܪ̈ܝܐ ܥܡܗܘܢ ܢܦܼܩܘ. ܘܥܠܼܘ ܠܡܕܝܢܬܐ ܒܚܕܘܬܐ ܪܒܬܐ. ܘܠܚܝܠܐ ܟܠܗ ܫܪܝܗܝ ܒܪܝ ܝܘܡܐ ܠܡܚܼܙܩ. ܘܗܘܼ ܩܘܝ ܝܘ̈ܡܬܐ ܬ̈ܠܬܐ ܘܝܗܒܼ ܠܗܓܡܘܢܐ ܡ̈ܬܝܢ ܕܝܢܪ̈ܝܢ ܕܢܦܠܓ ܡܘܗ̈ܒܬܐ. ܘܒܢ̈ܝ ܡܕܝܢܬܐ ܟܕ ܚܿܕܝܢ ܒܫܝܢܐ ܕܗܘܼܐ܇ ܘܪܘܿܙܝܢ ܒܓܗܝܬܐܕܡܟܝܠ ܗܿܘܝܐ ܠܗܘܢ ܡܢܐܘܠܨܢܐ ܕܩܿܝܡܝܢ ܒܗ܇ ܘܕܝܿܨܝܢ ܒܣܒܪܐ ܕܫܦܝܪ̈ܬܐ ܕܡܣ̈ܬܟܝܢ ܠܡܐܬܐ܇ ܘܡܘܕܝܢ ܠܐܠܗܐ ܕܒܛܝܒܘܬܗ ܘܒܪ̈ܚܡܘܗܝ ܐܪܡܝ ܫܝܢܗ ܥܠ ܬܪ̈ܬܝܗܝܢ ܡܠ̈ܟܘܬܐ܆ ܒܬܫܒܚ̈ܬܐ ܕܙܕܩ̈ܢ ܠܗ ܘܠܡܿܢ ܕܫܕܪܗܼ ܠܘܝܘܗܝ ܟܕ ܚܿܙܩ.. ܐܢܗܘܼ ܕܐܚܪܢܐܝܬ ܐܬܚܙܝ ܡܠܟܐ ܗܢܐ ܒܫܘܠܡܐ ܕܚܝ̈ܘܗܝܼ. ܠܐ ܐܢܫ ܢܬܥܣܩ ܥܠ ܩܘܠ̈ܣܘܗܝ. pb. 317 ܐܠܐ ܢܬܥܗܕ ܐܝܠܝܢ ܕܡܢ ܫܠܝܡܘܢ ܐܣܬܥܪܘ ܒܙܒܢܐ ܕܫܘܠܡܐ ܕܚܝܘ̈ܗܝ܀

ܗܠܝܢ ܩܠܝܠ ܡܢ ܣܓܝ ܐܝܟ ܕܐܬܡܿܨܝܢ ܟܿܬܒܬ ܠܚܘܒܟ. ܟܕ ܠܐ ܨܿܒܐ ܐܢܐܼ ܘܟܕ ܨܿܒܐ ܐܢܐ. ܟܕ ܠܐ ܨܿܒܐ ܐܢܐ ܡܿܢ܆ ܡܛܠ ܕܠܐ ܐܠܿܐܐ ܗܿܘܝܬ ܠܝܕܘܥܐ ܚܟܝܡܐ. ܕܝܬܝܪ ܡܢܝ ܡܦܿܣ ܒܗܝܢ ܒܗܠܝܢ. ܟܕ ܨܿܒܐ ܐܢܐ ܕܝܢ܆ ܡܛܠ ܡܫܬܡܥܢܘܬܐ ܕܠܦܘܩܕܢܟ. ܘܡܟܝܠ ܡܦܝܣ ܐܢܐ ܕܐܦ ܐܢܬ ܬܡܠܐ ܫܘܘܕܝܐ ܕܒܐܝܓܪܬܟ܆ ܕܨܠܘܬܐ ܐܡܝܢܐܝܬ ܬܩܪܒ ܠܐܠܗܐ ܥܠ ܚܛܝܘܬܝ. ܗܘܿܝܐ ܠܝ ܓܝܪ ܒܛܝܼܠܘܬܐ ܡܟܝܠ ܕܝܿܠܦܬ ܨܒܝܢܟ܆ ܘܐܝܠܝܢ ܕܡܣܬܥܪ̈ܢ ܒܙܒ̈ܢܐ ܕܐܬܿܝܢ ܘܫܿܘܝܢ ܠܥܘܗܕܢܐ: ܪܫܡ ܐܢܐ ܘܡܫܕܪ ܠܐܒܗܘܬܟܿ. ܐܢܗܘܼ ܕܡܩܘܐ ܐܢܐ ܒܚܝ̈ܐ. ܢܨܠܐ ܕܝܢܼ ܚܢܢ ܡܢܗܪܟܐܿ ܘܐܒܗܘܬܟ ܡܢ ܬܡܢ܆ ܘܟܠܗܘܢ ܒܢ̈ܝ ܐܢܫ̈ܐ ܡܢ ܟܠܕܘܟ: ܕܥܠ ܫܘܚܠܦܐ ܪܒܐ ܕܗܘܐ ܒܥܠܡܐ ܬܗܘܐ ܐܝܬܝܗܿ ܡܠܬܐ ܕܬܫܥܝܬܐ. ܘܐܝܟ ܕܠܐ ܠܗܠܝܢ ܕܒܙܒ̈ܢܐ ܒܝܼ̈ܫܐ ܣܦܼܩܢܢ ܠܡܼܬܢܐ ܐܝܟ ܡܐ ܕܐܝܬܗܝܢ: ܡܛܠ ܣܓܝܐܘܬܐ ܕܥܩ̈ܬܗܝܢ. ܐܦܠܐ ܠܗܠܝܢ ܕܐܬܿܝ̈ܢ ܢܫܟܚ ܠܡܫܬܥܝܘ ܡܢ ܣܓܝܐܘܬܐ ܕܛܒ̈ܬܗܝܢ. ܐܠܐ ܬܗܘܐ ܚܿܝܒܐ ܡܠܬܢ: ܡܢ ܕܠܡܐܡܪ ܥܠ ܕܘܒܪܐ ܛܒܐ ܕܒܢ̈ܝ ܡܕܝܢܬܐ ܕܝܠܢ: ܘܥܠ ܫܝܢܐ ܘܫܠܡܐ ܕܡܿܡܠܟ ܒܗ ܒܥܠܡܐ. ܘܥܠ ܣܒܥܐ ܪܒܐ ܕܗܿܘܐ܆ ܘܡܫܪܬܚܘܬܐ ܣܓܝܼܐܬܐ ܕܥܿܠܠܬܐ ܕܒܘܪܟܬܐ ܕܐܠܗܐܼ ܗܘܿ ܕܐܡܼܪ ܕܢܬܛܥ̈ܝܢ ܥܩ̈ܬܐ ܩܕܡ̈ܝܬܐ ܘܐܦ ܢܬܟܣ̈ܝܢ ܡܢ ܩܕܡܝ. ܕܠܗ ܫܘܒܚܐ ܠܥܠܡ ܥܠܝܡܢ. ܐܡܝܢ܀