John Rufus: Plerophoriae - ܦܠܝܪ̈ܦܘܪܝܣ ܐܘܟܝܬ ܣܗ̈ܕܘܬܐ ܘܓܠܝ̈ܢܐ ܕܗܘܘ ܡܢ ܐܠܗܐ ܠܘܬ ܩܕܝ̈ܫܐ

Corrections?  Copy   TEI   Text  
Show  
section :
page break :
Table of Contents  
§1 §2 §3 §4 §5 §6 §7 §8 §9 §10 §11 §12 §13 §14 §15 §16 §17 §18 §19 §20 §21 §22 §23 §24 §25 §26 §27 §28 §29 §30 §31 §32 §33 §34 §35 §36 §37 §38 §39 §40 §41 §42 §43 §44 §45 §46 §47 §48 §49 §50 §51 §52 §53 §54 §55 §56 §57 §58 §59 §60 §61 §62 §63 §64 §65 §65 §66 §67 §68 §69 §70 §71 §72 §73 §74 §75 §76 §77 §78 §79 §80 §81 §82 §83 §84 §85 §86 §87 §88 §89
pb. 11

ܬܘܒ ܦܠܝܪ̈ܦܘܪܝܣ ܐܘܟܝܬ ܣܗ̈ܕܘܬܐ ܘܓܠܝ̈ܢܐ ܕܗܘܘ ܡܢ ܐܠܗܐ ܠܘܬ ܩܕܝ̈ܫܐ. ܡܛܠ ܗܪܣܝܣ ܕܬܪܝܢ ܟܝ̈ܢܐ܇ ܘܡܬܥܒܪܢܘܬܐ ܕܗܘܬ ܒܟܠܩܝܕܘܢܐ܇ ܕܡܟܬܒ̈ܢ ܠܐܢܫ ܡܢ ܬܠܡܝ̈ܕܘܗܝ ܕܩܕܝܫܐ ܦܛܪܘܣ ܐܒܪܝܐ ܕܫܡܗ ܩܫܝܫܐ ܝܘܚܢܢ ܕܒܝܬ ܪܘܦܝܢܐ ܐܢܛܝܘܟܝܐ. ܐܦܝܣܩܘܦܐ ܕܡܝܘܡܐ ܕܓܙܐ.

1 §1

ܐ.- ܡܫܬܥܐ ܗܘܐ ܠܢ ܛܘܒܬܢܐ ܐܒܘܢ ܘܐܦܝܣܩܦܐ ܐܒܐ ܦܛܪܘܣ ܐܒܪܝܐ. ܕܟܕ ܐܝܬܘܗܝ ܗܘܐ ܥܕܟܝܠ ܒܩܘܣܛܢܛܝܢܐܦܘܠܝܣ ܡܢ ܩܕܡ pb. 12 ܕܢܟܦܘܪ ܒܥܠܡܐ: ܟܕ ܚܝ ܥܕܟܝܠ ܢܣܛܘܪܝܣ: ܘܐܝܬܘܗܝ ܗܘܐ ܒܐܦܝܣܩܦܘܬܐ. ܕܟܕ ܡܫܬܡܠܐ ܗܘܐ ܕܘܟܪܢܐ ܕܐܪ̈ܒܥܝܢ ܣܗ̈ܕܐ ܩܕܝ̈ܫܐ: ܒܥܕܬܐ ܕܡܬܩܪܝܐ ܡܪܝܐ ܟܕ ܩܡ ܕܢܬܪܓܡ ܩܕܡ ܟܠܗ ܥܡܐ ܒܩܪܝܒܘܬܐ ܕܝܠܝ: ܐܝܬܘܗܝ ܗܘܐ ܕܝܢ ܢܫܝ ܩܠܐ ܘܢܨܝܚ ܩܠܐ. ܫܪܝ ܕܢܓܕܦ ܘܕܢܐܡܪ ܠܐܦܝ ܡܨܥܬܐ ܕܬܘܪܓܡܗ. ܠܐ ܬܫܬܒܗܪܝܢ ܡܪܝܡ. ܐܟ ܗܿܘ ܕܠܐܠܗܐ ܝܠܕܬܝ. ܠܐ ܓܝܪ ܝܠܕܬܝ ܐܘ ܡܝܬܪܬܐ ܠܐܠܗܐ. ܐܠܐ ܒܪܢܫܐ ܐܘܪܓܢܘܢ ܕܐܠܗܐ. ܘܡܚܕܐ ܕܐܡܪ ܗܕܐ. ܗܘܐ ܠܗ ܕܝܘܐ ܥܠܝܗܿ ܕܒܐܡܐ. ܕܗܟܢܐ ܥܡ ܦܐܬܗ ܐܦ ܐܝܕܗ ܕܝܡܝܢܐ ܬܬܗܦܟ ܠܗܿ ܠܒܣܬܪܗ. ܘܟܕ ܡܬܦܫܠ ܘܥܬܝܕ ܗܘܐ ܠܡܦܠ ܚܛܦܘܗܝ ܡܕܝ̈ܠܢܐ ܘܡܫ̈ܡܫܢܐ. ܘܛܥܢܘܗܝ ܘܐܥܠܘܗܝ ܠܒܝܬ ܕܝܘܩܢܝܩܘܢ. ܘܡܢ ܗܝܕܝܢ ܣܘܓܐܗ ܕܥܡܐ ܕܡܕܝܢܬܐ. ܫܢܝ ܡܢ ܫܘܬܦܘܬܗ. ܝܬܝܪܐܝܬ ܗܠܝܢ ܕܒܦܠܛܝܢ. ܘܐܦ ܐܢܐ ܡܢ ܩܕܡ ܟܠܗܘܢ. ܘܟܕ ܛܒ ܪܚܝܡ ܗܘܝܬ ܡܢܗ܀ pb. 13

2 §2

ܒ- ܬܘܒ ܡܫܬܥܐ ܗܘܐ ܠܢ ܗܘ ܐܒܐ܆ ܡܛܠ ܛܘܒܢܐ ܦܠܐܓܝܘܣ ܐܘܪܗܝܐ. ܕܐܝܬ ܗܘܐ ܠܗ ܕܘܒܪ̈ܐ ܕܡܝܬܪܘܬܐ. ܘܐܝܬܘܗܝ ܗܘܐ ܕܝܪܝܐ ܘܢܒܝܐ. ܘܟܕ ܫܡܥ ܠܡ ܓܘܕ̈ܦܐ ܕܗܝܒܐ ܐܦܝܣܩܘܦܐ ܕܐܘܪܗܝ. ܘܐܟܣܗ ܓܠܝܐܝܬ. ܣܓܝ ܚܫ ܡܢܗ. ܘܟܕ ܐܬܪܕܦ ܐܬܐ ܠܕܘܟܬܐ ܚܕܐ ܕܦܠܣܛܝܢܐ ܘܝܬܒ ܒܫܠܝܐ ܟܕ ܥܕܟܝܠ ܚܝ ܗܘܐ ܝܘܒܢܠܐܘܣ ܡܢ ܩܕܡ ܣܘܢܗܕܘܣ ܘܡܬܥܒܪܢܘܬܐ ܕܗܝܡܢܘܬܐ. ܘܗܟܢܐ ܥܡܪܬ ܒܗ ܛܝܒܘܬܐ ܐܟ ܕܢܬܡܠܐ ܪܘܚܐ ܕܢܒܝܘܬܐ. ܘܐܫܬܘܝ ܕܣܒܝܣܐܝܬ ܢܚܙܐ ܚܙܘ̈ܢܐ. ܗܿܘ ܕܟܕ ܒܟܠ ܙܒܢ ܐܬܿܐ ܗܘܐ ܠܘܬ ܐܒܐ ܦܛܪܐ܇ ܕܐܝܬܘܗܝ ܗܘܐ ܗܝܕܝܢ ܒܫܠܝܐ ܒܠܐܒܪܐ ܕܡܝܘܡܐ ܕܓܐܙܐ. ܡܛܠ ܚܘܒܐ ܣܓܝܐܐ ܕܐܝܬ ܗܘܐ ܠܗܘܢ ܨܝܕ ܚܕܕ̈ܐ. ܒܚܕ ܡܢ ܝܘܡܝܢ܆ ܟܕ ܡܛܝܠ ܘܡܒܚܢ ܥܡܗ ܕܐܒܐ: ܡܛܠ ܚܘܫܒ̈ܐ ܘܡܝܬܪ̈ܘܬܐ ܕܒܐܠܗܐ: ܒܕܘܟܝ̈ܬܐ ܚܠܢܝ̈ܬܐ ܕܝܠܗܿ ܕܠܐܒܪܐ. ܐܡܿܪ ܗܘܐ ܕܗܘܐ ܒܬܡܗܐ. ܘܚܙܐ ܡܢ ܩܕܡ ܣܘܢܗܕܘܣ ܫܢܝ̈ܐ ܫܒܥ ܡܬܥܒܪܢܘܬܐ pb. 14 ܕܥܬܝܕܐ ܗܘܬ ܕܬܗܘܐ ܒܟܠܩܝܕܘܢܐ ܡܢ ܐܦܝܣ̈ܩܘܦܐ. ܟܕ ܐܡܪ ܘܫܡܗ ܕܪܫܝܥܐ ܡܠܟܐ ܡܪܩܝܢܐ: ܗܿܝ ܕܒܝܘ̈ܡܬܗ ܘܒܐܝ̈ܕܘܗܝ ܥܬܝܕܐ ܗܘܬ ܕܬܗܘܐ. ܘܗܠܝܢ ܕܫܪܟܐ ܕܒܐܝܕܐ ܒܐܝܕܐ. ܟܕ ܐܡܿܪ. ܕܐܦ ܠܝ ܘܠܟ ܐܒܐ: ܐܝܬ ܠܗ ܠܙܒܢܐ ܗܿܘ ܕܢܕܪܟ ܗܘܐ܆ ܗܿܘ ܕܟܕ ܡܬܪܕܦܝܢܢ ܥܡ ܟܠܗܘܢ ܩܕܝܫ̈ܐ. ܗܠܝܢ ܕܠܐ ܡܬܪܡܝܢ ܕܢܫܠܡܘܢ ܠܥܒܘܪܝܐ ܕܗܝܡܢܘܬܐ. ܒܗ ܒܪܕܘܦܝܐ ܢܫܬܡܠܐ. ܗܿܝ ܕܐܦ ܗܘܬ ܠܚܪܬܐ܀

3 §3

ܓ- ܐܝܬܘܗܝ ܗܘܐ ܗܘ ܟܕ ܗܘ ܐܒܐ ܦܠܐܓܝܘܣ ܢܒܝܐ. ܐܟ ܕܡܫܬܥܐ ܗܘܐ ܐܒܐ ܕܝܠܢ: ܟܕ ܩܪܝܒ ܥܡ ܩܕܝܫ̈ܐ ܐܚܪ̈ܢܐ ܠܘܬܗ ܕܣܒܐ. ܬܘܒ ܒܚܙܘܐ ܐܚܪܢܐ ܗܘܐ ܡܢ ܩܕܡ ܣܘܢܕܘܣ ܘܫܪܝ ܕܢܐܡܪ ܥܡ ܒܟܝܐ. ܘܝ ܦܠܘܟܪܝܐ. ܘܝ ܦܠܘܟܪܝܐ. ܘܝ ܦܠܘܟܪܝܐ. ܘܟܕ ܣܓܝ ܣܓܝܐܝܬ ܐܬܩܪܒܬ ܠܗ ܦܝܣܬܐ ܡܢܢ. ܕܢܓܠܐ ܡܢܐ ܗܘ ܕܡܬܐܡܪ ܡܢܗ: ܐܡܪ ܕܦܠܘܟܪܝܐ ܗܿܝ ܕܐܫܬܘܕܝܬ ܠܐܠܗܐ ܒܬܘܠܘܬܐ ܘܫܕܬ ܠܢܣܛܘܪܝܣ. ܗܿܝ ܕܟܠܗܘܢ ܩܕܝܫ̈ܐ ܕܒܟܠ ܕܘܟ ܟܬܒܝܢ ܗܘܘ ܐܟ ܕܠܩܕܝܫܬܐ ܘܒܬܘܠܬܐ ܗܿܝ ܕܩܝܡܐ ܗܘܬ ܒܐܦ̈ܝ ܐܪܬܐܕܟܣܝܐ. ܥܬܝܕܐ ܕܬܥܒܪ ܥܠ ܗܝܡܢܘܬܐ pb. 15 ܘܥܠ ܒܬܘܠܘܬܐ. ܘܬܫܚܘܩ ܠܩܕܝܫ̈ܐ: ܗܿܝ ܕܐܦ ܗܘܬ. ܘܥܒܪܬ ܥܠ ܫܘܘ̈ܕܝܐ ܕܕܟܝܘܬܐ ܕܐܫܬܘܕܝܬ ܠܡܫܝܚܐ. ܘܐܙܕܘܓܬ ܠܡܪܩܝܢܐ. ܘܗܘܬ ܝܪܘܬܬܐ ܕܡܠܟܘܬܗ ܘܕܪܘܫܥܗ. ܘܕܫܘܢ̈ܩܐ ܕܢܛܝܪܝܢ ܠܗ܀

4 §4

ܕ- ܬܘܒ ܗܘ ܟܕ ܗܘ ܦܠܓܝܘܣ ܩܫܝܫܐ. ܐܟ ܕܐܫܬܥܝ ܦܡܦܝܠܘܣ ܡܫܡܫܢܐ ܕܥܕܬܐ ܕܐܘܪܫܠܡ. ܕܐܝܬܘܗܝ ܗܘܐ ܪܚܡܗ. ܥܠ ܒܙܒܢ ܥܡܗ ܕܢܿܨܠܐ ܒܕܘܟܬܐ ܩܕܝܫܬܐ ܕܓܓܘܠܬܐ. ܟܕ ܥܕܟܝܠ ܠܠܝܐ ܗܘܐ: ܗܢܐ ܓܝܪ ܥܝܕܐ ܐܝܬ ܗܘܐ ܠܗ. ܘܟܕ ܩܐܿܡ ܘܡܿܨܠܐ. ܐܬܚܛܦ ܠܚܙܘܐ. ܘܟܕ ܐܬܬܚܕ ܡܢ ܐܒܠܐ ܘܡܢ ܕܡܥ̈ܐ. ܫܪܝ ܠܡܐܡܪ. ܝܘܒܢܠܐܘܣ. ܝܘܒܢܠܐܘܣ. ܝܘܒܢܠܐܘܣ. ܘܠܚܪܬܐ ܕܡܢ ܕܫܼܠܐ ܡܢ ܚܙܘܐ. ܐܫܬܐܠ ܡܢܗ ܕܫܡܫܐ ܦܡܦܝܠܘܣ ܟܕ ܠܚܘܕܐܝܬ ܢܦܠ ܩܕܡܘܗܝ: ܕܡܢܐ ܐܝܬܝܗܝܢ ܗܠܝܢ ܕܚܙܘܐ: ܘܡܛܠ ܡܢܐ ܕܠܐ ܫܠܝܐ ܡܙܥܩ ܗܘܐ ܕܝܘܒܢܠܐܘܣ. ܐܡܼܪ: ܕܝܘܒܢܠܐܘܣ܆ ܗܟܢܐ ܚܿܙܐ ܐܢܬ ܠܗ ܐܢܗܘ ܕܚܝ ܐܢܬ. ܕܡܢ ܪ̈ܗܘܡܝܐ ܘܫܐܕ̈ܐ pb. 16 ܡܙܕܝܚ. ܐܟܡܐ ܕܗܫܐ ܚܿܙܐ ܐܢܬ ܠܗ ܠܝܘܒܢܠܐܘܣ. ܕܡܢ ܕܝܪ̈ܝܐ ܘܩܠܝܪ̈ܝܩܘ ܡܙܕܝܚ܀

5 §5

ܗ- ܗܘ ܗܢܐ ܟܕ ܚܿܙܐ ܒܪܘܚ ܗܿܝ ܕܥܬܝܕܐ. ܐܡܿܪ ܗܘܐ ܠܗ ܠܩܕܝܫܐ ܐܒܐ ܘܠܛܘܒܬܢܐ ܝܘܚܢܢ ܐܘܢܘܟܣܐ܆ ܕܐܬܗܿܓܘ ܒܟܬܒ̈ܐ ܐܠܗ̈ܝܐ ܒܢ̈ܝ. ܘܡܐ ܕܡܫܝܚܐ ܥܕ̈ܬܗ ܢܗܝܡܢܟܘܢ ܨܠܘ ܥܠܝ܀ ܟܕ ܩܿܕܡ ܡܫܘܕܥ. ܣܿܝܡ ܐܝܕܐ ܕܥܠܝܗܘܢ. ܕܗܟܢܐ ܟܕ ܡܬܕܡܪ ܛܘܒܢܐ ܐܒܐ ܦܛܪܐ: ܘܠܝܬ ܗܘܐ ܠܗ ܗܢܝܐܝܬ ܠܘܬ ܗܠܝܢ ܕܡܬܐܡܪܢ ܗܿܘܝ: ܒܗܿܝ ܕܥܿܪܩ ܗܘܐ ܘܡܢܗ ܕܫܡܐ ܕܣܝܿܡ ܐܝܕܐ. ܟܕ ܐܬܬܥܝܩ ܐܡܪ ܠܣܒܐ. ܠܐ ܝܿܕܥ ܐܢܬ ܡܢܐ ܐܡܿܪ ܐܢܬ ܐܘ ܣܒܐ.. ܗܘ ܕܝܢ ܦܠܐܓܝܘܣ ܟܕ ܐܬܦܨܚ ܐܡܪ. ܐܢܐ ܝܿܕܥ ܐܢܐ ܡܢܐ ܐܡܿܪ ܐܢܐ. ܘܗܿܘ ܕܒܿܥܐ ܕܢܬܬܥܝܩ ܢܬܬܥܝܩ܀

6 §6

ܘ- ܗܢܐ ܒܙܒܢܐ ܕܥܒܘܪܝܐ ܕܗܝܡܢܘܬܐ. ܗܕܐ ܨܠܘܬܐ ܐܝܬ ܗܘܐ ܠܗ ܐܡܝܢܐܝܬ. ܡܪܝܐ ܐܠܗܐ ܕܝܠܝ. ܢܛܪܝܢܝ ܠܐ ܡܬܥܒܪܢܐ ܒܗܝܡܢܘܬܐ ܬܪܝܨܬܐ. ܥܕܡܐ ܠܫܘܠܡܐ ܘܠܐ ܡܬܩܪܒܢܐ ܠܫܘܬܦܘܬܐ ܕܗܠܝܢ ܕܒܟܠܩܝܕܘܢܐ ܛܠܡܘܢ ܗܝܡܢܘܬܐ. ܘܐܝܟܐ ܕܨܒܿܐ ܐܢܬ ܘܐܝܟܢܐ ܕܨܒܿܐ pb. 17 ܐܢܬ ܣܒ ܪܘܚܝ. ܐܦܢ ܒܝܬ ܩܦܠܝܘܢ ܘܐܦܢ ܒܦܘܛܩܐ. ܒܠܚܘܕ ܠܐ ܡܬܥܒܪܢܐ ܢܛܪܝܢܝ. ܗܿܝ ܕܐܦ ܗܘܬ. ܒܐܣܩܠܘܢܐ ܓܝܪ ܠܘܬ ܐܢܫ ܩܘܪܝܠܘܣ ܩܦܝܠܐ ܬܪܝܨ ܗܝܡܢܘܬܐ ܕܪܕܝܦ ܗܘܐ ܡܛܠ ܬܪܝܨܘܬ ܫܘܒܚܐ ܡܢ ܡܝܘܡܐ ܘܡܫܢܝ ܗܘܐ ܠܗ ܠܐܣܩܠܘܢܐ ܘܬܡܢ ܦܿܠܚ ܗܘܐ ܩܦܝܠܘܬܐ. ܘܟܕ ܥܪܩ ܗܘܐ ܦܠܐܓܝܘܣ ܛܘܒܢܐ ܘܡܬܛܫܐ ܗܘܐ ܠܘܬܗ ܒܠܠܝܐ ܡܕܡ ܒܗ ܐܫܬܡܠܝ ܐܟ ܨܠܘܬܗ ܘܢܒܝܘܬܗ. ܗܿܝ ܕܟܕ ܝܠܦܘܢ ܐܢܫܝ̈ܢ ܡܢ ܐܚ̈ܐ ܚܦܝ̈ܛܐ ܕܡܝܘܡܐ ܐܬܘ ܒܠܠܝܐ. ܘܢܣܒܘ ܗܘܘ ܫܠܕܗ ܘܥܦܝܘܗܝ ܒܠܐܒܪܐ ܒܕܝܪܗ ܕܪܚܡ ܠܡܫܝܚܐ ܗܪܘܢ ܡܿܙܒܢ ܚ̈ܛܐ. ܘܒܗ ܒܠܠܝܐ ܗܿܘ ܕܐܫܬܡܠܝ܇ ܟܕ ܡܬܪܕܦܝܢ ܗܝܕܝܢ ܐܦܝܣܩܘ̈ܦܐ ܬܪ̈ܝܨܝ ܗܝܡܢܘܬܐ. ܫܢܝ ܐܒܐ ܦܛܪܐ ܐܦܝܣܩܘܦܐ. ܘܟܕ ܐܝܬܘܗܝ ܒܐܟܣܘܪܝܢܟܘܣ ܕܬܐܒܝܕܐ: ܡܢ ܪܘܚܩܐ ܕܐܟ ܗܢܐ. ܚܙܝܗܝ ܒܚܙܘܐ ܠܗ ܠܛܘܒܢܐ ܦܠܐܓܝܘܣ ܕܐܬܐ ܠܘܬܗ ܒܚܕܘܬܐ ܘܒܦܪܨܘܦܐ ܦܨܝܚܐ ܘܫܐܠ ܒܫܠܡܗ ܘܐܡܪ܇ ܐܒܐ ܨܠܐ ܡܛܠܬܝ ܘܐܓܥܠܝܢܝ. ܡܛܠ ܕܚܿܙܩ ܐܢܐ ܠܘܬ ܡܪܝܐ. ܘܟܕ ܪܫܡ ܗܘ ܐܒܐ ܠܝܘܡܐ ܕܒܗ pb. 18 ܚܙܐ ܠܚܙܘܐ. ܠܐܚܪܝܬܐ ܐܫܟܚ ܕܗܘ ܐܝܬܘܗܝ ܝܘܡܐ ܗܿܘ ܕܒܗ ܐܫܬܡܠܝ ܡܘܕܝܢܐ ܪܒܐ ܦܠܐܓܝܘܣ. ܠܗܢܐ ܐܡܗ ܟܕ ܨܝܿܡܐ ܫܒܐ. ܒܩܕܝܫܘܬܐ ܒܛܢܬ ܘܝܠܕܬ ܘܪܒܝܬ. ܘܟܕ ܐܬܓܒܪ ܘܗܘܐ ܕܡܫܘܚܬܐ܆ ܟܕ ܡܝܬ ܐܢܫ ܡܢ ܗܠܝܢ ܡܫܒܚ̈ܐ ܕܡܕܝܢܬܐ ܘܚܙܝܗܝ ܕܡܬܠܘܐ. ܒܬܘܬ ܢܦܫܐ ܗܘܐ. ܘܡܚܕܐ ܡܢ ܠܘܘܝܬܐ ܗܿܝ ܥܪܩ ܠܕܝܪܐ. ܟܕ ܐܬܒܿܝܢ ܒܫܛܝܘܬܐ ܕܗܢܐ ܥܠܡܐ. ܘܗܟܢܐ ܗܘܐ ܡܐܢܐ ܓܒܝܐ܀

7 §7

ܙ- ܐܫܬܥܝ ܠܢ ܛܘܒܢܐ ܝܘܚܢܢ ܩܫܝܫܐ ܕܐܠܟܣܢܕܪܝܐ: ܗܿܘ ܕܡܬܐܡܪ ܗܘܐ ܕܒܝܬ ܛܛܝܢܐ: ܓܒܪܐ ܝܕܝܥܐ ܘܡܫܒܚܐ: ܕܟܕ ܐܢܐ ܠܡ ܛܠܝܐ. ܗܘܬ ܠܝ ܪܚܡܬܐ ܕܐܟܦܘܪ ܒܥܠܡܐ. ܘܟܕ ܐܝܬ ܗܘܐ ܠܝ ܥܝܕܐ ܐܡܢܥ ܠܘܬ ܐܒܐ ܠܕܝܘܣ ܢܒܝܐ ܗܿܘ ܕܩܠܝ̈ܬܐ ܪܗܛܬ ܠܘܬܗ ܕܐܓܠܐ ܠܗ ܪܚܡܬܐ ܕܝܠܝ. ܘܐܝܠܦ ܡܢܗ: ܐܢܗܘ ܕܡܬܩܢ ܡܪܝܐ ܪܓܬܐ ܕܝܠܝ ܘܚܦܝܛܘܬܐ. ܘܐܦܝܣܗ ܕܢܨܠܐ ܥܠܝ. ܗܘ ܕܝܢ ܐܡܪ: ܕܟܬܪ ܛܐܘܣ. ܠܐ ܓܝܪ ܚܿܙܐ ܐܢܐ ܗܫܐ ܒܗܝܠܘܬܐ. ܐܠܐ ܙܠ ܫܠܝ. ܟܕ ܝܨܦ ܐܢܬ ܕܫܘܫܛܐ ܕܕܘܒܪ̈ܐ ܕܡܝܬܪܘܬܐ. ܡܢ ܒܬܪ ܓܝܪ ܙܒܢܐ ܝܕܝܥܐ. ܥܬܝܕ ܪܕܘܦܝܐ pb. 19 ܢܕܪܟ ܠܥܕܬܐ. ܘܗܝܕܝܢ ܟܕ ܥܿܪܩ ܐܢܬ ܐܬܿܐ ܐܢܬ ܠܗܪܟܐ ܘܗܿܘܐ ܐܢܬ ܕܝܪܝܐ. ܘܟܕ ܐܢܐ ܐܡܿܪܬ ܠܗ ܠܐܒܐ ܐܠܝܕܝܘܣ ܕܐܝܢܐ ܪܕܘܦܝܐ: ܐܪܐ ܚܢܦܘܬܐ ܥܬܝܕܐ ܕܬܠܒܘܟ܆ ܐܡܪ ܠܝ ܠܐ. ܐܠܐ ܩܐܿܡ ܡܠܟܐ ܪܫܝܥܐ ܕܫܡܗ ܡܪܩܝܢܐ. ܘܡܿܥܒܕ ܠܐܦܝܣ̈ܩܘܦܐ ܕܒܟܬܒܐ ܢܐܡܪܘܢ. ܕܠܐ ܐܝܬܘܗܝ ܐܠܗܐ ܗܿܘ ܕܐܨܛܠܒ. ܘܟܕ ܟܠܗܘܢ ܗܠܝܢ ܢܫܬܡܥܘܢ ܠܗ ܘܢܫܠܡܘܢ܆ ܒܠܚܘܕܘܗܝ ܐܦܝܣܩܘܦܐ ܕܐܠܟܣܢܕܪܝܐ. ܐܡܿܪ ܐܢܐ ܕܝܢ ܕܝܣܩܘܪܘܣ܆ ܠܐ ܡܫܬܡܥ ܠܗ. ܘܡܛܠ ܗܕܐ ܡܬܪܕܦ ܘܡܫܬܠܡ ܠܐܟܣܘܪܝܐ ܘܒܗܿ ܥܢܿܕ. ܘܟܕ ܐܢܐ ܐܡܪܬ ܠܗ܇ ܕܫܒܿܩ ܥܡܐ ܕܐܠܟܣܢܕܪܝܐ: ܕܢܐܙܠ ܠܐܟܣܘܪܝܐ. ܐܡܼܪ ܠܝ ܕܐܝܢ. ܡܬܥܨܐ ܓܝܪ ܘܐܚܪܢܐ ܗܿܘܐ ܚܠܦܘܗܝ ܟܦܘܪܐ. ܘܟܕ ܐܢܐ ܐܬܬܥܝܩܬ ܒܗܠܝܢ ܕܐܬܐܡܪ܆ ܐܡܼܪ ܗܘ. ܐܠܐ ܐܝܬ ܠܐܠܗܐ ܕܢܩܝܡ ܠܗ ܒܝܘ̈ܡܬܐ ܗܠܝܢ. ܟܗܢܐ ܕܥܿܒܕ ܨܒܝܢܗ. ܟܕ ܡܘܕܥ ܥܠ ܛܘܒܢܐ ܛܝܡܬܐܘܣ. ܘܡܬܩܛܠ ܠܡ ܗܿܘ ܕܩܕܡܘܗܝ ܕܛܪܘܢܐܝܬ ܗܘܐ. ܟܕ ܪܡܿܙ ܥܠ ܦܪܘܛܪܝܘܣ ܪܫܝܥܐ. ܗܘ ܕܝܢ ܛܝܡܬܐܘܣ ܟܕ ܡܟܬܪ ܩܠܝܠ ܝܘ̈ܡܬܐ ܒܐܦܝܣܩܦܘܬܐ. ܠܐܟܣܘܪܝܐ ܡܫܬܕܐ. ܘܟܕ ܗܠܝܢ ܐܡܪ ܗܘ ܣܒܐ ܘܫܠܐ. ܒܥܩܬܐ ܪܒܬܐ ܗܘܝܬ ܘܐܡܪܬ. ܡܪܝ ܐܒܐ. ܡܟܬܪ ܗܟܝܠ pb. 20 ܒܐܟܣܘܪܝܐ ܗܿܘ ܐܦܝܣܩܘܦܐ ܐܪܬܘܕܟܣܐ: ܘܐܒܿܕܐ ܡܕܝܢܬܐ ܘܟܠܗܿ ܡܨܪܝܢ ܘܐܚܿܕ ܪܘܫܥܐ. ܗܘ ܕܝܢ ܫܠܐ ܗܘܐ. ܘܟܕ ܟܬܪܬ ܘܡܦܝܣ ܐܢܐ ܐܡܪ ܠܝ ܐܢ ܗܘ ܕܐܝܬ ܙܒܢܐ ܗܿܦܟ. ܘܟܕ ܡܟܬܪ ܩܠܝܠ ܙܒܢܐ. ܥܢܕ ܒܗܝܡܢܘܬܐ ܬܪܝܨܬܐ. ܘܟܕ ܗܠܝܢ ܐܡܪ ܘܫܠܐ. ܢܦܠܬ ܩܕܡܘܗܝ ܟܕ ܨܿܒܐ ܗܘܝܬ ܐܝܠܦ ܡܢܗ ܗܠܝܢ ܕܒܬܪܟܢ. ܗܘ ܕܝܢ ܐܡܼܪ. ܣܦܿܩ ܠܟ ܥܕܡܐ ܠܗܪܟܐ. ܡܟܝܠ ܕܝܢ ܒܬܪ ܗܠܝܢ ܙܒܢܐ ܕܐܢܛܝܟܪܝܣܛܘܣ ܡܕܪܟ܀

8 §8

ܚ- ܗܝ ܕܝܢ ܗܕܐ ܘܛܘܒܢܐ ܙܐܢܘܢ ܗܿܘ ܡܬܟܪܟܢܐ ܘܢܒܝܐ ܡܢ ܟܦܪ ܣܥܪܬܐ܇ ܩܪܝܬܐ ܕܝܢ ܐܝܬܝܗܿ ܗܕܐ ܕܡܬܐܡܪܐ ܒܦܠܣܛܝܢܐ܆ ܠܐܒܐ ܐܣܛܦܢܐ ܕܝܪܝܐ܆ ܘܕܠܚܪܬܐ ܗܘܐ ܫܡܫܐ ܕܐܘܪܫܠܡ. ܐܬܢܒܝ ܡܢ ܩܕܡ ܣܘܢܕܘܣ ܕܟܠܩܝܕܘܢܐ. ܟܕ ܓܝܪ ܗܘ ܨܒܿܐ ܗܘܐ ܕܢܐܙܠ ܒܐܟܣܢܝܘܬܐ ܡܛܠ ܐܠܗܐ: ܘܢܫܬܘܬܦ ܒܡܝܬܪܘܬܐ ܕܐܟܣܢܝܘܬܐ: ܘܡܛܠ ܗܕܐ ܐܬܐ ܠܘܬ ܐܒܐ ܙܐܢܘܢ ܘܡܫܐܠ pb. 21 ܗܘܐ: ܕܐܢܗܘ ܕܡܬܩܢ ܡܪܝܐ ܚܦܝܛܘܬܗ. ܫܡܥ ܗܘܐ ܡܢܗ. ܕܗܫܐ ܙܠ ܫܠܝ. ܥܬܝܕ ܗܘ ܓܝܪ ܪܕܘܦܝܐ ܘܩܘܡܐ ܕܗܪ̈ܛܝܩܘ ܕܢܕܪܟ ܠܥܕܬܐ ܡܛܠ ܗܝܡܢܘܬܐ ܬܪܝܨܬ ܫܘܒܚܐ. ܘܗܝܕܝܢ ܟܕ ܠܐ ܨܒܿܐ ܐܢܬ ܢܦܿܩ ܐܢܬ ܒܐܟܣܢܝܘܬܐ. ܐܢ ܗܼܘ ܕܡܚܒ ܐܢܬ ܕܐܪܬܘܕܘܟܣܐ ܬܟܬܪ. ܗܿܝ ܕܐܦ ܓܕܫܬ ܠܗ܆ ܟܕ ܒܚܪܬܐ ܫܢܝ ܠܐܟܣܢܝܘܬܐ. ܘܒܗܿ ܐܫܬܡܠܝ ܡܛܠ ܣܘܢܗܕܘܣ ܕܟܠܩܝܕܘܢܐ. ܘܟܕ ܥܝܕܐ ܟܝܬ ܐܝܬ ܗܘܐ ܠܗ ܕܟܠܗܘܢ ܗܿܢܘܢ ܕܡܢ ܟܠ ܕܘܟ ܕܝܪ̈ܝܐ ܢܩܒܠ ܗܘ ܛܘܒܬܢܐ ܙܐܢܘܢ: ܘܕܚܘܫܒܗ ܕܟܠܚܕ ܚܕ ܡܢܗܘܢ ܢܫܡܥ܆ ܘܗܠܝܢ ܕܐܝܬܝܗܝܢ ܕܦܘܪܩܢܐ ܠܟܠܚܕ ܢܐܡܪ. ܠܚܪܬܐ ܟܕ ܩܕܡ ܚܙܐ ܒܝܫ̈ܬܐ ܗܠܝܢ ܕܥܬܝܕ̈ܢ ܕܢܕܪ̈ܟܢ ܠܥܡܪܬܐ: ܡܢ ܟܦܘܪܘܬܐ ܕܗܿܘܝܐ ܒܟܠܩܝܕܘܢܐ. ܚܒܼܫ ܢܦܫܗ ܡܢ ܩܕܡ ܫܢܬܐ ܚܕܐ ܕܟܦܘܪܘܬܐ. ܘܠܐ ܠܐܢܫ ܡܟܝܠ ܡܩܒܠ ܗܘܐ. ܘܟܕ ܒܐܒܠܐ ܘܬܐܢܚ̈ܬܐ ܐܝܬܘܗܝ ܗܘܐ. ܗܟܢܐ ܫܡܠܝ ܫܢܬܐ ܚܕܐ ܡܢ ܩܕܡ ܣܘܢܗܕܘܣ ܕܟܦܘܪ̈ܐ܀

9 §9

ܬ- ܡܫܬܥܐ ܗܘܐ ܠܢ ܐܒܐ ܐܝܢܘܩܢܛܝܘܣ ܕܡܢ ܦܡܦܘܠܝܐ. ܓܒܪܐ ܢܟܦܐ ܘܪܝܫܐ ܕܐܚ̈ܐ ܟܕ ܐܡܿܪ ܕܐܝܬ ܒܦܡܦܘܠܝܐ ܫܠܒܐ ܪܒܐ ܘܥܡܝܩܐ ܕܒܗ ܐܢܫ ܡܢ pb. 22 ܩܕܝܫ̈ܐ ܘܥܢܘ̈ܝܐ: ܚܙܐ ܒܙܒܢ ܡܢ ܩܕܡ ܣܘܢܗܕܘܣ ܠܐܟܠܩܪܨܐ ܕܐܬܐ ܠܘܬܗ ܘܐܡܼܪ ܠܗ܆ ܕܟܕ ܢܦܿܠ ܐܢܬ ܣܓܘܕ ܠܝ. ܘܟܕ ܩܕܝܫܐ ܢܦܚ ܒܗ ܘܓܥܪ܆ ܫܢܝ ܫܐܕܐ ܗܿܘ ܛܢܦܐ ܟܕ ܐܡܿܪ ܠܘܬܗ܆ ܠܡܢܐ ܐܫܬܐܠܬ ܕܬܣܓܘܕ ܠܝ. ܗܐ ܡܟܢܫ ܐܢܐ ܠܟܠܗܘܢ ܐܦܝܣܩܘ̈ܦܐ. ܘܥܒܿܕ ܐܢܐ ܣܘܢܗܕܘܣ. ܘܬܡܢ ܟܠܗܘܢ ܐܦܝܣܩܘ̈ܦܐ ܢܣܓܕܘܢ ܠܝ܀

10 §10

ܝ- ܘܟܒܪ ܡܕܡ ܕܥܬܝܕ ܕܢܬܐܡܪ. ܠܐ ܡܫܬܪܪܢܐ. ܘܕܫܘܐ ܠܬܕܡܘܪܬܐ ܡܣܬܒܪ ܠܐܢܫ̈ܝܢ. ܡܛܠ ܕܝܢ ܕܓܒܪ̈ܐ ܢܟܦ̈ܐ ܘܣܒ̈ܐ ܘܕܫܘܝܢ ܠܫܪܪܐ: ܘܕܝܪ̈ܝܐ ܩܕܝܫ̈ܐ ܐܫܬܥܝܘ ܠܝ: ܘܠܗܠܝܢ ܕܗܝܕܝܢ ܓܢܝܢ ܗܘܘ ܒܕܝܪܗ ܕܐܒܐ ܪܘܡܢܐ. ܟܕ ܐܣܬܩܒܠܘܢ ܒܕܘܟܪܢܗ܆ ܐܒܐ ܐܛܪܒܝܘܣ ܓܒܪܐ ܠܐ ܕܓܠܐ: ܐܒܐ ܦܪܓܡܝܘܣ. ܐܒܐ ܬܐܘܡܐ ܕܘܓܝܐ ܬܠܡܝܕܗ ܪܝܫܝܐ ܕܐܒܐ ܪܘܡܢܐ܇ ܘܣܒ̈ܐ ܐܚܪ̈ܢܐ ܣܓܝ̈ܐܐ ܘܫܦܝܪ̈ܝ ܬܐܪܬܐ. ܠܐ ܚܦܝܘ ܐܬܐ ܕܗܘܬ ܒܦܠܣܛܝܢܐ ܕܩܿܕܡܐ ܗܘܬ ܡܘܕܥܐ ܟܦܘܪܝܐ ܕܐܦܝܣܩܘ̈ܦܐ. ܟܕ ܓܝܪ ܥܬܝܕܐ ܗܘܬ ܕܬܗܘܐ ܣܘܢܗܕܘܣ ܠܐ ܢܡܘܣܝܬܐ. ܡܢ ܫܠܝܐ ܗܘܐ ܫܡܝܐ ܥܡܘܛܐ. ܥܡ ܚܫܟܐ ܘܥܪܦܠܐ. ܘܫܝ̈ܦܐ ܐܬܡܛܪܘ ܒܡܕܝܢܬܐ ܩܕܝܫܬܐ ܘܒܟܠܗ̈ܝܢ pb. 23 ܩܘܪ̈ܝܐ ܕܚܕܪ̈ܝܗܿ: ܘܒܕܘܟܝ̈ܬܐ ܣܓܝ̈ܐܬܐ ܕܦܠܣܛܝܢܐ. ܕܫܘܝܢ ܒܛܘܦܣܐ ܒܟܠ ܡܕܡ. ܘܕܡܿܝܢ ܗܘܘ ܠܗܠܝܢ ܕܡܢ ܒܢܝ̈ܢܫܐ ܡܬܬܩܢܝܢ. ܘܐܝܬ ܗܘܐ ܠܗܘܢ ܛܒ̈ܥܐ ܡܫܚ̈ܠܦܐ ܘܫܟܝܪ̈ܐ. ܕܗܟܢܐ ܣܓܝ̈ܐܐ ܢܠܩܛܘܢ ܡܢܗܘܢ. ܘܟܕ ܐܢܫ̈ܝܢ ܐܬܚܫܚܘ ܒܗܘܢ ܒܠܐ ܝܕܥܬܐ ܐܣܬܡܝܘ. ܘܐܡܪܝܢ ܗܘܘ: ܕܗܘܣܝܟܝܘܣ ܗܿܘ ܐܡܘܪܐ ܕܐܘܪܫܠܡ. ܟܕ ܣܓܝ ܟܢܿܫ ܡܢܗܘܢ ܚܘܝ ܠܡܠܟܬܐ ܐܘܕܘܩܝܐ. ܘܫܕܪ ܠܩܘܣܛܢܛܝܢܐܦܘܠܝܣ ܠܬܚܘܝܬܐ ܕܐܬܿܐ ܗܿܝ. ܕܡܫܘܕܥܐ ܗܘܬ ܠܣܡܝܘܬܐ ܕܐܚܿܕܐ ܒܥܠܡܐ. ܡܛܠ ܟܦܘܪܝܐ ܕܐܦܝܣܩܘܦ̈ܐ ܐܟ ܕܐܡܪ ܐܫܥܝܐ ܢܒܝܐ. ܕܐܣܬܡܝܘ ܥܒ̈ܕܘܗܝ ܕܐܠܗܐ. ܡܬܚܙܐ ܗܘܐ ܕܝܢ ܥܦܪܐ ܣܓܝܐܐ ܕܩܝܩܐ ܠܬܚܬ ܡܢܗܘܢ ܕܫܝ̈ܦܐ ܠܬܚܘܝܬܐ ܕܡܢ ܠܥܠ ܢܚܬܘܢ ܘܐܡܪܝܢ ܗܘܘ ܐܢܫܝ̈ܢ ܡܢ ܗܢܘܢ ܕܩܪܝܒܝܢ ܗܘܘ ܕܥܕܟܝܠ ܘܗܫܐ ܒܓܬܬܐ ܩܪܝܬܐ ܢܛܝܪ ܐܣܦܪܝܕܐ ܕܡܼܠܐ ܡܢܗܘܢ. ܘܠܗܿܠܝܢ ܣܗܕ ܗܘܐ ܛܘܒܢܐ ܐܒܐ ܕܝܠܢ ܦܛܪܘܣ ܟܕ ܐܡܿܪ ܗܟܢܐ: ܕܒܝܘ̈ܡܬܐ ܗܠܝܢ ܢܗܝܪܐܝܬ ܫܼܡܥ ܕܗܘܬ ܐܬܐ ܗܕܐ ܡܢ ܗܠܝܢ ܕܚܙܘ. ܟܕ ܐܝܬܘܗܝ pb. 24 ܗܘܐ ܗܝܕܝܢ ܒܫܠܝܐ ܒܕܝܪܐ ܕܡܝܘܡܐ. ܘܐܒܐ ܐܢܕܪܬܐ ܬܠܡܝܕܗ ܡܫܪܪ ܗܘܐ. ܕܐܦ ܗܼܘ ܒܥܝܢܘܗ̈ܝ ܚܼܙܐ ܗܠܝܢ ܬܠܬܐ. ܐܬܐ ܗܕܐ ܕܗܘܬ ܕܫܝ̈ܦܐ ܘܗܿܘ ܫܡܪܝܐ ܕܡܢ ܩܕܝܡ ܐܝܬܘܗܝ ܗܘܐ ܣܡܝܐ ܘܐܬܚܙܝ ܠܗ: ܗܿܘ ܕܫܦ ܒܥܝܢܘ̈ܗܝ ܡܢ ܕܡܐ ܕܕܝܪ̈ܝܐ ܩܕܝܫ̈ܐ ܕܐܬܩܛܠܘ ܠܘܬ ܢܐܦܘܠܝܣ ܒܙܒܢܐ ܕܟܦܘܪܘܬܐ. ܘܩܘܪܒܢܐ ܗܿܘ ܕܗܘܐ ܕܡܐ ܘܦܓܪܐ ܓܠܝܐܝܬ܇ ܒܝܬ ܫܠܝ̈ܚܐ ܕܩܣܪܝܐ: ܟܕ ܐܙܠܘ ܐܒܗ̈ܬܐ ܩܕܝܫ̈ܐ ܬܪ̈ܝܨܝ ܫܘܒܚܐ. ܠܐܘܪܥܗ ܕܝܘܒܢܐܠܘܣ ܟܦܘܪܐ. ܟܕ ܗܦܟ ܡܢ ܣܘܢܕܘܣ ܐܟ ܕܢܟܣܘܢܝܗܝ ܐܘ ܕܦܝܣܐ ܢܥܒܕܘܢܝܗܝ ܕܢܬܘܒ ܘܢܬܪܨ ܢܦܫܗ. ܘܐܬܟܠܝܘ ܡܢ ܐܪܟܘܢܐ ܕܢܥܠܘܢ ܠܩܣܪܝܐ ܡܛܠ ܕܥܡܐ ܣܓܝܐܐ ܐܝܬܝܗܘܢ ܗܘܘ. ܘܟܕ ܥܡܐ ܣܓܝܐܐ ܐܬܐܫܕ ܥܠܝܗܘܢ. ܘܐܦܝܣ ܐܢܘܢ ܕܢܥܒܕܘܢ ܩܘܪܒܢܐ ܒܝܬ ܫܠܝܚ̈ܐ ܕܐܝܬܘܗܝ ܠܒܪ ܡܢ ܡܕܝܢܬܐ. ܡܢ ܗܿܘ ܕܟܕ ܫܩܠܘ ܡܗ̈ܝܡܢܐ ܣܓܝ̈ܐܐ ܘܢܛܪܘ ܠܘܬܗܘܢ ܐܫܟܚܘܗܝ ܒܬܪܟܢ ܠܦܓܪܐ ܘܕܡܐ ܫܪܝܪܐ܇ ܘܣܗܕ ܗܘܐ ܠܬܕܡܘܪܬܐ ܗܕܐ܆ ܘܐܒܐ ܡܐܟܣܘܣ ܩܫܝܫܐ ܓܒܪܐ ܫܪܝܪܐ ܟܕ ܐܡܿܪ܆ ܕܗܘ ܗܘܐ ܚܙܝܐ ܕܪܐܙܐ ܕܐܟ ܗܢܐ. pb. 25 ܘܐܢܕܝܢ ܐܢܫ ܠܐ ܡܫܪ ܠܐܬܐ ܗܕܐ ܕܗܘܬ܆ ܕܫܘܝܐ ܠܬܕܡܘܪܬܐ܇ ܕܗܠܝܢ ܫܝ̈ܦܐ. ܟܕ ܝܿܠܦ ܗܿܘ ܡܕܡ ܕܗܘܐ ܗܝܕܝܢ ܕܕܿܡܐ ܠܗ: ܘܡܬܬܘܕܐ ܡܢ ܟܠܢܫ ܘܡܣܬܗܕ ܒܟܬܝܒܬܐ ܕܡܘܣܝܬܐ܆ ܢܩܒܠ ܠܫܘܪܪܐ. ܒܗ ܓܝܪ ܒܝܘܡܐ ܕܐܬܥܠܝ ܠܡܠܟܘܬܐ ܘܩܛܪ ܟܠܝܠܐ ܡܪܩܝܢܐ ܪܫܝܥܐ: ܡܢ ܫܠܝܐ܆ ܚܫܟܐ ܐܚܕ ܒܟܠܗܿ ܥܡܪܬܐ ܥܢ ܥܡܛܢܐ ܘܚܠܐ ܕܢܿܚܬ ܗܘܐ ܘܚܫܟܐ ܗܼܘܐ ܕܐܟ ܗܢܐ܆ ܐܟ ܗܿܘ ܕܐܚܕ ܠܡܨܪܝܢ. ܗܟܢܐ ܓܝܪ ܐܥܡܛܗ ܠܐܐܪ. ܐܝܟܢܐ ܕܟܠܗܘܢ ܥܡܘܪ̈ܝܗܿ ܕܡܕܝܢܬ ܡܠܟܘܬܐ. ܒܕܚܠܐ ܣܓܝܐܐ ܘܒܫܓܘܫܝܐ ܢܗܘܘܢ ܟܠܗܘܢ ܒܟܠܕܘܟ ܘܢܬܐܒܠܘܢ ܘܪܘܪܒܐܝܬ ܡܝܠܠܝ ܗܘܘ ܘܡܬܐܒܠܝܢ. ܐܟ ܗܿܘ ܕܫܘܠܡܐ ܒܥܓܠ ܡܕܪܟ. ܐܝܬܝܗܿ ܗܘܬ ܕܝܢ ܗܕܐ. ܢܒܝܘܬܐ ܕܚܫܟܐ ܕܥܬܝܕ ܗܘܐ ܕܢܐܬܐ ܥܠ ܟܠܗܿ ܥܡܪܬܐ܇ ܒܐܝܕܘ̈ܗܝ ܕܝܠܗ ܕܛܪܘܢܐ. ܘܕܣܡܝܘܬܐ ܘܕܚܫܘܟܘܬܐ ܕܡܢ ܕܚܠܬ ܐܠܗܐ. ܐܟܡܐ ܕܟܠܗܿ ܒܪܝܬܐ ܐܟ ܐܢܫ ܢܐܡܪ ܠܐ ܡܬܡܠܠܢܐܝܬ ܐܒܿܠܐ ܗܘܬ. ܘܩܿܕܡܐ ܗܘܬ ܡܫܘܕܥܐ ܟܦܘܪܝܐ ܕܒܐܠܗܐ ܗܿܘܐ ܗܘܐ. ܘܕܚܝܩܘܬܐ ܕܗܝܡܢܘܬܐ ܬܪܝܨܬ ܫܘܒܚܐ. ܡܢܗ ܕܪܫܝܥܐ ܡܠܟܐ. ܘܡܢ ܟܢܫܐ ܕܐܟ ܗܟܢ ܣܓܝܐܐ ܕܐܦܝܣܩܘ̈ܦܐ ܕܡܬܥܡܪܢܝܬܐ. ܗܘ ܕܝܢ ܚܫܟܐ pb. 26 ܗܟܢܐ ܟܬܪ ܥܕܡܐ ܠܪܡܫܐ. ܘܕܗܠܝܢ ܬܚܘܝܬܐ ܘܣܗܕܘܬܐ ܘܦܠܝܪܘܦܪܝܐ ܕܠܐ ܦܘܫܟܐ. ܠܐ ܐܝܬܝܗܿ ܡܢ ܠܒܪ. ܐܠܐ ܡܢܗܝܢ ܕܟܬܝܒ̈ܬܗ ܕܡܬܟܬܫ ܥܡ ܐܠܗܐ ܛܪܘܢܐ: ܕܣܝ̈ܡܢ ܕܐܡܘܣܐܝܬ. ܟܕ ܓܝܕ ܚܙܐ ܫܓܘܫܝܐ ܘܐܒܐܐ ܕܐܣܛܪ̈ܛܝܘܛܐ ܘܕܟܠܗܿ ܡܕܝܢܬܐ. ܘܕܟܠ ܐܢܫ ܡܢܚܫ ܗܘܐ ܡܛܠ ܡܠܟܘܬܗ. ܐܟ ܡܿܢ ܕܥܬܝܕܐ ܗܘܬ ܕܬܗܘܐ ܠܟܠܗ ܥܠܡܐ ܡܛܝܒܢܝܬܐ ܕܒܝܫ̈ܬܐ ܪ̈ܘܪܒܬܐ. ܕܚܠ ܘܒܫܓܘܫܝܐ ܪܒܐ ܗܘܐ. ܘܩܕܡ ܣܡ ܟܬܝܒ̈ܬܐ ܕܐܡܘܣܝܘܢ ܟܕ ܡܨܛܢܥ ܠܪܘܓܙܐ ܕܡܢ ܐܠܗܐ. ܘܡܣܒܪ ܠܗ ܕܡܛܥܐ ܠܥܡܡ̈ܐ. ܐܡܿܪ ܗܘܐ ܓܝܪ ܗܿܝ ܕܠܩܘܒܠܐ. ܐܟ ܕܗܝ ܟܬܝܒܬܐ ܡܠܦܐ ܠܗܠܝܢ ܕܦܓܿܥܝܢ ܒܗܿ. ܕܙܕܿܩ ܕܡܫܪܬܚܘܬܐ ܕܛܒ̈ܬܐ ܪ̈ܘܪܒܬܐ ܢܣܟܐ ܟܠܗ ܥܠܡܐ ܡܢ ܡܠܟܘܬܝ. ܕܚܫܟܐ ܡܼܢ ܕܗܿܘ ܡܠܟܐ ܕܡܢ ܩܕܡܝ ܡܬܛܪܕ. ܟܕ ܡܩܒܠ ܠܗ ܢܘܗܪܐ ܕܫܦܝܪܘܬ ܪܝܫܢܘܬܐ ܕܝܠܝ. ܘܕܐܝܬܘܗܝ ܗܢܐ ܫܘܪܝܐ ܘܩܕܡܝܐ ܕܦܘܩ̈ܕܢܐ ܕܝܠܗ. ܗܕܐ ܟܬܝܒܬܐ ܟܕ ܒܟܠܗܿ ܬܒܝܠ ܐܬܬܣܝܡܬ: ܠܗܠܝܢ ܕܐܝܬ ܐܕܢ̈ܐ ܕܢܫܡܥܘܢ ܘܥܝ̈ܢܐ ܕܢܚܙܘܢ ܘܠܒܐ ܕܢܣܬܟܠܘܢ ܡܟܣܢܘܬܐ ܘܬܚܘܝܬܐ ܚܬܝܬܐ܆ ܘܩܝܡܬܐ ܟܬܝܒܬܐ ܐܝܬܝܗܿ ܗܿܝ ܕܡܚܕܐ ܘܕܠܐ ܥܘܟܪܐ ܒܝܕ pb. 27 ܚܦܝܛܘܬܐ ܕܛܪܘܢܘܬܗ ܐܕܪܟܬ ܡܬܥܒܪܢܘܬܐ ܘܡܬܪܚܩܢܘܬܐ ܕܡܢ ܐܠܗܐ. ܕܗܘܬ ܡܢ ܐܦܝܣܩܘ̈ܦܐ ܕܟܠܩܝܕܘܢܐ܀

11 §11

ܝܐ- ܐܦ ܓܝܪ ܘܬܚܘܝܬܐ ܐܚܪܬܐ ܕܐܟ ܗܕܐ ܗܘܬ ܒܗܘܢ ܒܝܘ̈ܡܬܐ ܒܐܘܪܫܠܡ܇ ܕܩܕܡܐ ܡܘܕܥܐ ܛܠܘܡܝܐ ܕܒܐܠܗܐ. ܨܠܝܒܐ ܓܝܪ ܡܝܩܪܐ ܗܿܘ ܕܡܢ ܫܢܝ̈ܐ ܣܓܝ̈ܐܬܐ ܡܢܗܪ ܗܘܐ ܘܡܒܪܩ ܒܝܬ ܣܘܠܩܐ ܩܕܝܫܐ ܕܐܝܬܘܗܝ ܗܘܐ ܪܒܐ. ܟܕ ܡܢ ܫܠܝܐ ܐܬܚܪܟ ܡܢ ܢܘܪܐ. ܘܠܥܦܪܐ ܐܫܬܕܝ. ܙܥܙܥ ܠܒܐ ܕܟܠܗܘܢ ܕܚܠ̈ܝ ܐܠܗܐ. ܐܝܟܢܐ ܕܡܠܟܬܐ ܕܚܠܬ ܐܠܗܐ ܐܘܕܩܝܐ ܠܒܘܝܐܐ ܘܠܦܝܣܬܐ ܕܥܡܐ ܚܠܦܘܗܝ ܕܢܚܫܐ ܬܥܒܕ. ܗܿܘ ܕܐܦ ܗܫܐ ܡܬܚܙܐ ܕܡܢܗܪ ܕܐܝܬ ܒܗ ܢܚܫܐ ܫܬܐ ܐܠܦ̈ܝܐ ܠܝܛܪ̈ܐ܀

12 §12

ܝܒ- ܗܘܐ ܒܙܒܢ ܥܢܝܢܐ ܠܐܒܐ ܦܛܪܐ ܐܦܝܣܩܘܦܐ ܨܝܕ ܐܒܐ ܐܫܥܝܐ ܕܝܿܬܒ ܗܘܐ ܒܫܠܝܐ. ܒܐܢܕܩܛܝܘܢܐ ܕܕܘܕܩܛܐ. ܒܩܪܝܒܘܬܐ ܕܐܚ̈ܐ ܕܝܠܢ ܙܟܪܝܐ ܘܐܢܕܪܝܐܐ pb. 28 ܣܘܢ̈ܩܠܘ ܐܡܿܪ ܐܢܐ ܕܝܠܗ ܕܐܒܐ ܦܛܪܐ. ܘܡܫܬܥܝܢ ܗܘܘ ܠܢ. ܗܠܝܢ ܕܡܢܗ ܕܐܒܐ ܐܫܥܝܐ ܐܬܐܡܪ̈ܝܢ. ܐܡܪ ܗܘܐ ܕܝܢ ܕܝܕܿܥ ܐܢܐ ܕܒܙܒܢ ܐܬܡܢܥܬ ܠܘܬ ܐܢܫ ܡܢ ܗܢܘܢ ܩܕܝܫ̈ܐ ܪ̈ܘܪܒܐ. ܕܐܝܬܘܗܝ ܗܘܐ ܐܒܐ ܦܘܠܐ ܗܿܘ ܬܐܒܝܐ ܕܡܟܝܠ ܐܣܐܒ ܗܘܐ. ܘܐܝܬܘܗܝ ܗܘܐ ܠܥܠ ܠܬܚܬ ܒܡܫܘܚܬܐ. ܕܡܐܐ ܘܥܣܪܝܢ ܫܢܝ̈ܢ. ܘܗܕܐ ܢܒܝܘܬܐ ܫܡܥܬ ܡܢܗ. ܕܡܢ ܒܬܪ ܥܣܪ̈ܝܢ ܫܢܝ̈ܢ ܥܒܘܪܝܐ ܐܝܬ ܠܗ ܕܢܗܘܐ ܡܢ ܐܦܝܣܩ̈ܘܦܐ. ܗܿܘ ܕܐܝܬܘܗܝ ܡܬܪܚܩܢܘܬܐ ܕܡܢ ܐܠܗܐ. ܗܿܝ ܕܩܕܡ ܐܡܪ ܫܠܝܚܐ. ܗܘܝܐ ܒܝܕ ܐܢܫ ܪܫܝܥܐ ܕܗܿܘܐ ܡܠܟܐ. ܕܫܡܗ ܡܪܩܝܢܐ. ܗܘ ܕܝܢ ܡܠܟܐ ܒܬܪ ܫܬ ܫܢܝ̈ܢ ܘܩܠܝܠ ܥܢܿܕ. ܘܡܢ ܒܬܪܗ ܗܿܘܐ ܐܢܫ ܕܓܠܐ ܙܒܢܐ ܙܥܘܪܐ ܘܥܒܿܕ ܫܝܢܐ ܡܢܬܐܝܬ ܒܥ̈ܕܬܐ ܘܫܿܠܐ. ܘܗܟܢܐ ܡܬܥܪ̈ܓܠܝܢ ܣܘܥܪ̈ܢܐ ܥܕܡܐ ܠܡܬܝܬܗ ܕܐܢܛܝܟܪܝܣܛܘܣ܀

13 §13

ܝܓ- ܘܠܗܕܐ ܢܒܝܘܬܐ ܫܘܝܐ ܘܫܠܡܐ ܗܿܝ ܕܗܘܬ ܡܢ ܐܒܐ ܙܐܢܘܢ ܗܿܘ ܕܡܬܩܪܐ ܗܘܐ ܬܠܝܬܝ ܩܠܝ̈ܬܐ. ܕܝܿܬܒ ܗܘܐ ܒܫܠܝܐ ܒܐܢܛܘܢ ܕܐܠܟܣܢܕܪܝܐ ܐܝܟܢܐ ܕܣܟܘܠܝܣܛܝܩܐ ܗܿܘ ܪܒܐ ܐܦܝܢܛܛܝܣ ܐܫܬܥܝ. ܐܡܿܪ ܗܘܐ ܓܝܪ ܕܟܕ ܐܝܬܝ ܒܐܠܟܣܢܕܪܝܐ. ܘܥܕܟܝܠ ܛܠܝܐ ܐܝܬܝ ܗܘܝܬ: ܘܩܪܿܐ ܗܘܝܬ ܬܡܢ. ܥܝܕܐ pb. 29 ܐܝܬ ܗܘܐ ܠܝ ܒܗܝܡܢܘܬܐ. ܕܣܒܝܣܐܝܬ ܐܨܘܒ ܠܘܬܗ ܕܣܒܐ. ܘܟܕ ܒܙܒܢ ܐܙܠܬ ܐܟ ܥܝܕܐ ܠܘܬܗ: ܘܡܢ ܫܠܝܐ ܩܡܬ ܠܘܬ ܩܠܝܬܗ܆ ܚܙܝܬܗ ܕܝܿܬܒ ܘܠܒܝܟ ܣܝܪܐ ܒܐܝ̈ܕܘܗܝ. ܘܥܝܢܘ̈ܗܝ ܡܩܬ ܗܘܐ ܠܗܝܢ ܠܥܠ. ܘܟܕ ܣܒܪ ܗܘܝܬ ܕܡܨܠܝܘ ܡܨܠܐ ܗܘܐ: ܐܬܟܠܝܬ ܩܠܝܠ ܐܟ ܕܢܫܠܡ ܨܠܘܬܗ. ܟܕ ܕܝܢ ܩܘܝ ܡܬܚܐ ܣܓܝܐܐ ܠܐ ܡܙܕܥܙܥܢܐ. ܐܢܐ ܒܝ ܡܬܚܫܒ ܗܘܝܬ. ܕܐܠܗܐ ܓܠܐ ܠܗ ܠܣܒܐ ܚܛܗ̈ܝ܆ ܘܡܛܠ ܗܕܐ ܠܐ ܡܣܬܘܕ ܥܡܝ܇ ܘܠܐ ܗܢܝܐܝܬ ܩܒܠܢܝ. ܟܕ ܕܝܢ ܩܠܝܠ ܬܘܒ ܟܬܪܬ: ܘܣܒܐ ܟܬܪ ܒܚܙܘܐ. ܐܗܦܟܬ ܢܦܫܝ ܐܟ ܗܿܘ ܕܥܬܝܕ ܐܢܐ ܐܫܢܐ. ܗܘ ܕܝܢ ܒܩܠܐ ܪܒܐ ܐܙܥܩ ܠܘܬܝ܇ ܡܢܐ ܐܙܿܠ ܐܢܬ. ܘܟܕ ܒܪܟܬ ܣܓܕܬ ܠܗ. ܗܘ ܕܝܢ ܟܕ ܡܕܡ ܐܚܪܢܐ ܠܐ ܐܡܼܪ ܠܝ܆ ܐܡܪ ܠܝ ܕܙܠ ܟܬܘܒ. ܐܝܬܘܗܝ ܗܘܐ ܕܝܢ ܗܝܕܝܢ ܪܝܫ ܐܦܝܣܩܘ̈ܦܐ ܛܘܒܢܐ ܛܝܡܬܐܘܣ ܐܪܬܘܕܘܟܣܐ ܒܐܟܣܘܪܝܐ. ܐܡܪ ܣܒܐ ܒܬܪ ܫܢܝ̈ܐ ܝܕ̈ܝܥܬܐ. ܗܦܟ ܛܘܒܢܐ ܛܡܬܐܘܣ ܡܢ ܐܟܣܘܪܝܐ ܘܡܩܝܡ ܐܪܬܘܕܘܟܣܝܐ. ܘܡܢ ܒܬܪ ܬܪ̈ܬܝܢ ܫܢܝ̈ܢ ܥܢܿܕ. ܘܡܢ ܒܬܪܗ ܗܿܘܐ ܐܦܝܣܩܘܦܐ ܐܪܟܝܕܝܩܘܢ ܕܝܠܗ. ܘܒܝ̈ܘܡܝ ܗܿܘ ܗܿܘܐ ܣܕܩܐ ܒܥ̈ܕܬܐ ܕܠܐ ܡܬܐܣܐ ܥܕܡܐ ܠܡܐܬܝܬܗ ܕܐܢܛܝܟܪܝܣܛܘܣ܀ pb. 30

14 §14

ܝܕ- ܡܫܬܥܐ ܗܘܐ ܠܢ ܐܦ ܗܕܐ ܐܒܐ ܦܘܠܐ: ܗܿܘ ܕܐܝܬܘܗܝ ܗܘܐ ܣܘܦܣܛܐ. ܕܥܡܪ ܗܘܐ ܥܡ ܐܒܐ ܐܢܕܪܝܐܐ ܣܒܐ ܘܢܒܝܐ. ܓܒܪܐ ܦܠܚܐ ܘܫܪܝܪܐ. ܕܡܢ ܩܕܡ ܣܘܢܕܘܣ ܗܘܐ ܐܢܫ ܡܢ ܗܠܝܢ ܩܕܝܫ̈ܐ ܪ̈ܘܪܒܐ ܕܡܨܪܝܢ. ܗܿܘ ܕܟܕ ܗܘܐ ܒܚܙܘܐ. ܚܙܐ ܟܢܫܐ ܣܓܝܐܐ ܕܐܦܝܣܩܘ̈ܦܐ. ܕܫܿܓܪܝܢ ܬܢܘܪܐ ܣܓܝ ܡܬܢܒܪܫܢܐܝܬ. ܘܒܒܘܣܐ ܫܦܝܪܐ ܕܕܡܿܐ ܠܢܘܗܪܐ ܟܕ ܪܡܿܝܢ ܠܗ ܬܡܢ. ܘܫܝܥܝܢ ܗܘܘ ܠܗ ܡܢ ܟܠ ܓܒܝ̈ܢ ܠܗ ܠܬܢܘܪܐ܆ ܐܟ ܕܐܦܠܐ ܬܢܢܐ ܢܬܚܙܐ ܡܢܗ܆ ܐܦܠܐ ܐܐܪ ܢܥܘܠ ܠܗ. ܘܡܢ ܒܬܪ ܬܠܬܐ ܝܘܡ̈ܝܢ ܚܙܐܘܗܝ ܠܗ ܠܒܒܘܣܐ ܕܢܦܿܩ ܟܕ ܫܪܝܪ ܡܢ ܬܢܘܪܐ. ܘܝܕܥ ܕܡܪܝܐ ܐܝܬܘܗܝ. ܘܐܟ ܡܿܢ ܕܐܝܬ ܗܘܐ ܠܗ ܥܝܕܐ ܕܢܡܠܠ ܠܗ܆ ܐܡܪ ܠܗ܆ ܡܪܝܐ. ܡܿܢ ܐܢܘܢ ܗܠܝܢ ܕܥܒܕܘ ܠܟ ܗܕܐ ܘܐܪܡܝܘܟ ܒܬܢܘܪܐ. ܗܘ ܕܝܢ ܐܡܪ ܠܘܬܗ. ܐܦܝܣܩܘ̈ܦܐ ܬܘܒ ܨܠܒܘܢܝ. ܘܬܫܒܘܚܬܝ ܐܬܚܫܒܘ ܕܢܚܛܦܘܢ. ܘܛܒܐܝܬ ܐܡܪ. ܟܘܪܗܢܐ ܓܝܪ ܕܝܗ̈ܘܕܝܐ ܟܪܝܗܝܢ ܢܣܛܘܪ̈ܝܢܐ. ܕܒܪܢܫܐ ܫܚܝܡܐ ܐܡܿܪܝܢ ܠܗ ܠܗܿܘ ܕܐܨܛܠܒ. ܘܠܘ ܐܠܗܐ ܕܐܬܒܣܪ.. ܘܬܘܒ ܟܕ ܚܪ ܣܒܐ. ܚܙܐ ܣܒܐ ܚܕ ܡܢ ܪܘܚܩܐ ܕܩܿܐܡ. ܘܠܗܠܝܢ ܐܚܪ̈ܢܐ ܐܦܝܣܩܘ̈ܦܐ ܠܐ ܫܿܠܡ ܗܘܐ pb. 31 ܘܠܐ ܡܫܬܘܬܦ ܗܘܐ ܥܡܗܘܢ. ܘܠܐ ܟܕ ܫܿܓܪܝܢ ܠܗ ܠܬܢܘܪܐ. ܐܦܠܐ ܟܕ ܐܪܡܝܘܗܝ ܠܛܠܝܐ ܘܫܥܘܗܝ. ܘܗܘ ܣܒܐ ܐܡܼܪ ܠܘܬܗ ܕܛܠܝܐ. ܗܢܐ ܣܒܐ ܡܢܘ ܐܝܬܘܗܝ܆ ܗܘ ܕܝܢ ܐܡܪ ܕܝܘܣܩܪܘܣ ܐܝܬܘܗܝ ܪܝܫ ܐܦܝܣܩܘ̈ܦܐ ܕܐܠܟܣܢܕܪ̈ܝܐ. ܕܗܘ ܒܠܚܘܕܘܗܝ ܠܐ ܐܫܬܘܬܦ ܒܡܚܫ̈ܒܬܗܘܢ. ܘܗܘ ܣܒܐ ܐܟ ܡܿܢ ܕܫܩܠ ܦܪܗܣܝܐ. ܐܬܚܝܠ ܘܐܡܪ ܠܡܪܝܐ. ܡܪܝ. ܘܗܕܐ ܡܢ ܐܝܟܐ ܐܝܬܝܗܿ. ܕܗܐ ܣܓܝܐܝܬ ܐܦܝܣ̈ܩܘܦܐ ܕܐܠܟܣܢܕܪܝܐ ܥܕܡܐ ܠܡܘܬܐ ܡܬܟܬܫܝܢ ܚܠܦ ܫܪܪܐ܆ ܗܘ ܕܝܢ ܐܡܪ: ܡܢ ܟܕ ܫܡܥܘܢ ܩܘܪܝܢܝܐ ܛܥܢ ܨܠܝܒܐ ܕܝܠܝ. ܩܘܪܝܢܐ ܕܝܢ ܡܢ ܡܢܬܐ ܕܡܨܪܝܢ ܐܝܬܝܗܿ. ܘܡܢ ܗܝܕܝܢ ܩܕܡܬ ܐܬܝܕܥܬ ܢܒܝܐܝܬ. ܕܥܬܝܕܐ ܡܨܪܝܢ ܗܿܝ ܕܡܢܬܐ ܕܝܠܗܿ ܐܝܬܝܗܿ ܩܘܪܝܢܐ: ܗܿܝ ܕܒܠܘܒܐ ܣܝܡܐ. ܕܥܕܡܐ ܠܫܘܠܡܐ ܨܠܝܒܐ ܕܝܠܝ ܬܛܥܢ ܘܠܝ ܬܩܦ܆ ܘܛܢܢܐ ܕܚܠܦܝ ܬܚܘܐ ܥܕܡܐ ܠܡܘܬܐ܀

15 §15

ܝܗ- ܠܫܘܪܪܐ ܕܗܕܐ ܘܦܠܪܘܦܪܝܐ ܡܢ ܐܠܨ̈ܬܐ ܐܝܬܝܗܿ ܕܢܘܣܦ ܒܬܫܥܝܬܐ ܗܿܘ ܡܕܡ ܕܫܡܥܬ. ܡܢ ܗܿܘ ܕܐܙܠ ܠܐܟܣܘܪܝܐ. ܥܡ ܛܘܒܬܢܐ ܛܝܡܬܐܘܣ. ܘܩܪܝܒ ܗܘܐ ܠܥܘܢܕܢܗ ܕܝܠܗ ܕܩܕܝܫܐ. ܘܒܪܬ ܩܠܗ ܫܿܡܥ ܗܘܐ ܟܕ ܡܬܢܐ. ܡܫܬܥܐ ܗܘܐ ܓܝܪ. ܕܟܕ ܥܬܝܕ ܗܘܐ ܕܢܫܬܡܠܐ ܗܘ ܛܘܒܬܢܐ ܛܝܡܬܐܘܣ. ܩܪܐ ܠܗܠܝܢ ܩܕܡ̈ܝܐ ܕܩܠܝܪܘܣ ܘܐܡܪ ܠܗܘܢ. ܐܦܢ ܫܛܝܐ ܗܿܘܐ ܐܢܐ ܐܟ ܕܐܡܪ ܛܘܒܢܐ pb. 32 ܫܠܝܚܐ. ܒܪܡ ܡܣܒܪ ܐܢܐ ܕܡܢ ܐܠܝ̈ܨܬܐ ܐܝܬܝܗܿ ܕܐܟ ܕܠܙܗܝܪܘܬܐ ܕܝܠܟܘܢ ܘܠܝܕܥܬܐ ܘܫܘܘܕܥܐ ܕܙܒܢܐ ܗܢܐ ܕܐܕܪܟ: ܡܕܡ ܕܓܕܫ ܠܝ ܟܕ ܐܝܬܝ ܛܠܝܐ ܙܥܘܪܐ. ܘܡܢ ܨܦܪܐ ܐܙܿܠ ܗܘܝܬ ܠܐܣܟܘܠܐ. ܐܫܬܥܐ ܠܟܘܢ. ܟܕ ܦܓܥ ܒܝ ܣܒܐ ܚܕ ܒܣܝܡܐ ܘܢܟܦܐ ܘܦܐܝܐ ܠܐܠܗܐ. ܠܒܟܢܝ ܒܐܝ̈ܕܘܗܝ ܒܪܝܫܝ. ܘܢܫܩ ܒܦܪܨܘܦܐ ܦܨܝܚܐ ܘܗܕܝܪܐ. ܟܕ ܐܡܿܪ ܠܝ. ܫܠܡ ܠܟ ܛܝܡܬܐܘܣ ܐܦܝܣܩܘܦܐ ܕܫܘܠܡܐ. ܘܟܕ ܐܡܪ ܬܠ̈ܬ ܙܒ̈ܢܝܢ ܠܐ ܡܬܚܙܝܢܐ ܗܘܐ. ܘܬܘܒ ܠܐ ܚܙܝܬܗ ܥܕܡܐ ܠܫܘܠܡܐ܀

16 §16

ܝܘ- ܗܘܬ ܠܝ ܒܙܒܢ ܟܕ ܥܡܿܪ ܐܢܐ ܒܐܘܪܫܠܡ ܐܘܪܚܐ ܕܡܘܒܠܐ ܡܢ ܫܝܠܘܚܐ ܥܠ ܥܘܡܩܐ: ܠܕܘܟܝ̈ܬܐ ܕܠܗܠ ܡܢܗ. ܐܝܬ ܗܘܐ ܕܝܢ ܥܡܝ ܕܪܕܐ ܗܘܐ. ܘܐܢܫ ܝܕܝܥܐ ܡܢ ܥܡܘܪ̈ܐ ܕܡܕܝܢܬܐ: ܘܝܕܘܥܐ ܕܕܘܟܝ̈ܬܐ ܗܠܝܢ. ܘܟܕ ܚܪܬ ܠܓܒܐ ܕܐܘܪܚܐ ܕܣܡܠܐ. ܚܙܝܬ ܬܚܝܬ ܛܘܪܐ ܕܬܡܢ ܕܝܪܐ ܪܒܬܐ ܕܒܿܠܝܐ ܘܡܢܦܠܐ. ܘܠܚܕܪ̈ܝܗܿ ܐܝܠܢ̈ܐ ܡܫܚ̈ܠܦܐ. ܡܢܗܘܢ ܡܿܢ ܝܒܝ̈ܫܐ. ܡܢܗܘܢ ܕܝܢ ܕܐܬܒܥܪܪܘ. ܘܗܘܘ ܟܘܒܢܝ̈ܐ ܘܟܪܡܐ ܒܗܿ ܒܕܡܘܬܐ ܕܗܘܘ ܕܠܐ ܚܫܚܬܐ. ܘܟܕ ܡܬܕܡܪ ܐܢܐ ܐܡܪܬ ܠܗܿܘ ܕܪܕܐ ܗܘܐ ܥܡܝ. pb. 33 ܬܗܝܪ ܐܢܐ ܕܐܝܟܢܐ ܟܕ ܟܠܗܘܢ ܗܠܝܢ ܐܟܣܢ̈ܝܐ ܐܬܝܢ ܠܐܘܪܫܠܡ. ܘܡܬܚܦܛܝܢ ܕܢܫܟܚܘܢ ܕܘܟܝ̈ܬܐ ܣܓܝ̈ܐܬܐ. ܘܢܙܒܢܘܢ ܘܢܒܢܘܢ ܠܗܘܢ ܕܝܪ̈ܬܐ ܘܒܝܬ ܫܠܝܐ: ܦܫܬ ܕܘܟܬܐ ܗܕܐ ܕܠܐ ܡܥܡܪܐ ܘܗܘܬ ܠܚܘܪܒܐ. ܐܪܐ ܕܡܢܘ ܐܝܬܝܗܿ. ܗܘ ܕܝܢ ܟܕ ܐܬܦܨܚ ܐܡܪ ܠܘܬܗܿ. ܕܝܪܐ ܗܕܐ ܕܝܘܒܢܠܐܘܣ ܐܝܬܝܗܿ ܗܘܬ. ܘܟܕ ܒܗܿ ܫܠܐ ܗܘܐ. ܐܬܐ ܠܐܦܝܣܩܦܘܬܐ. ܘܡܢ ܕܗܘܬ ܣܘܢܕܘܣ ܕܟܠܩܝܕܘܢܐ ܠܒܪ ܡܢ ܡܣܒܪܢܘܬܐ ܐܟ ܕܡܢ ܡܚܘܬܐ ܕܪܘܓܙܐ ܕܐܠܗܐ. ܐܬܬ ܠܚܘܪܒܐ ܕܐܟ ܗܢܐ. ܘܗܘܬ ܐܟ ܕܚܿܙܐ ܐܢܬ ܕܘܟܬܐ ܗܕܐ ܒܝܕ ܡܦܘܠܬܐ: ܠܐ ܡܬܥܡܪܢܝܬܐ ܘܚܪܒܬ ܒܟܠ. ܟܕ ܠܐ ܐܢܫ ܡܫܟܚ ܕܢܥܡܪ ܒܗܿ. ܘܟܕ ܐܬܕܡܪܬ ܐܟܚܕܐ ܘܐܬܬܢܚܬ ܐܡܪܬ: ܕܒܫܪܪܐ ܚܒܪܗ ܕܝܗܘܕܐ ܗܘܐ ܝܘܒܢܠܐܘܣ. ܐܟ ܕܐܡܼܪ ܡܛܠܬܗ ܛܘܒܢܐ ܕܝܣܩܪܘܣ. ܘܡܛܠ ܗܕܐ ܠܘܛܬܗ ܕܝܗܘܕܐ ܝܪܬܬ ܕܘܟܬܐ ܗܕܐ. ܘܡܛܠܬܗ ܟܬܒܐ ܢܦܝܚ ܒܪܘܚܐ ܐܡܿܪ. ܕܕܝܪܗ ܬܗܘܐ ܚܪܒܐ. ܘܒܡܫܟ̈ܢܘܗܝ ܠܐ ܢܗܘܐ ܕܥܡܪ܀

17 §17

ܝܙ- ܘܗܕܐ ܥܗܝܕ ܐܢܐ ܕܫܡܥܬ. ܡܢ ܐܒܘܢ ܐܒܐ ܦܛܪܐ ܥܡ ܣܓܝ̈ܐܐ. ܐܟ ܡܿܢ ܕܐܝܬ ܗܘܐ ܠܗ ܥܝܕܐ ܠܝܘܒܢܠܐܘܣ ܕܒܝ̈ܘܡܬܐ ܗܠܝܢ ܩܕܝܫ̈ܐ ܐܪ̈ܒܥܝܢ ܢܬܟܪܟ ܒܕܝܪ̈ܬܐ ܕܐܝܬ ܚܕܪ̈ܝ ܡܕܝܢܬܐ ܩܕܝܫܬܐ: ܘܢܣܥܘܪ ܐܟ ܥܝܕܐ ܥܬܝܩܐ pb. 34 ܠܗܠܝܢ ܕܡܬܥܢܘ̈ܝܢ ܒܗܝܢ. ܐܬܐ ܘܠܘܬ ܣܒܐ ܐܢܫ ܡܢ ܗܠܝܢ ܥܬܝ̈ܩܐ ܘܥܢܘ̈ܝܐ ܪ̈ܘܪܒܐ ܕܩܪܝܒܝܢ ܠܐܠܗܐ. ܘܟܕ ܝܕܥ ܗܿܘ ܩܪܝܒܘܬܗ. ܐܚܕ ܬܪܥܐ ܕܩܠܝܬܗ. ܘܟܕ ܙܪܒܗ ܫܠܝ ܗܘܐ ܠܓܘ. ܟܕ ܕܝܢ ܡܛܐ ܝܘܒܢܠܐܘܣ ܘܥܡܐ ܢܩܝܦ ܗܘܐ ܠܗ ܩܠܝܪ̈ܝܩܘ ܡܕܝܢ̈ܝܐ. ܘܢܩܿܫܝܢ ܗܘܘ ܒܬܪܥܐ ܠܐ ܦܬܚ. ܟܕ ܕܝܢ ܟܬܪܘ ܗܿܢܘܢ ܘܓܙܡܝܢ ܗܘܘ: ܐܘ ܕܢܣܩܘܢ ܡܢ ܐܣܬܐ ܐܘ ܕܢܬܒܪܘܢ ܬܪܥܐ. ܫܪܝ ܣܒܐ ܕܢܩܥܐ. ܐܢܛܝܟܪܝܣܛܘܣ ܙܠ ܡܢܝ. ܠܐ ܡܪܦܐ ܐܢܐ ܠܐܢܛܝܟܪܝܣܛܘܣ ܕܢܥܘܠ ܠܩܠܝܬܝ. ܠܐ ܥܐܠ ܝܗܘܕܐ ܡܫܠܡܢܐ ܠܗܪܟܐ. ܘܐܚܪ̈ܢܝܬܐ ܣܓܝ̈ܐܬܐ ܕܐܟ ܗܠܝܢ ܐܡܿܪ ܗܘܐ. ܘܟܕ ܡܬܚܡܬܝܢ ܗܘܘ ܗܠܝܢ ܕܐܝܬ ܗܘܘ ܥܡ ܝܘܒܢܠܐܘܣ. ܐܟܚܕܐ ܕܝܢ ܘܡܬܢܟܦܝܢ ܗܘܘ ܒܗܠܝܢ ܕܡܬܐܡܪ̈ܢ ܗܘ̈ܝ. ܐܡܼܪ ܠܘܬܗܘܢ ܝܘܒܢܠܐܘܣ. ܫܘܒܩܘܗܝ. ܡܢ ܗܘܢܗ ܢܦܝܩ. ܥܢܘܝܘܬܐ ܓܝܪ ܣܓܝܐܬܐ ܝܒܫܬ ܡܘܚܗ. ܘܠܐ ܝܕܥ ܡܢܐ ܐܡܿܪ. ܗܠܝܢ ܐܬܬܙܥܩ ܒܡܕܝܢܬܐ ܟܠܗܿ. ܘܒܟܘܪܐ ܕܝܠܗܿ. ܘܟܠܗܘܢ ܗܢܘܢ ܕܫܡܥܘ. ܢܛܪܝܢܢ ܗܘܘ ܕܢܚܙܘܢ ܗܿܘ ܡܕܡ ܕܗܿܘܐ. ܟܕ ܝܿܕܥܝܢ ܠܗ ܠܣܒܐ ܗܿܘ. ܕܓܒܪܐ ܗܘܐ ܩܕܝܫܐ ܘܪܚܡܐ ܕܐܠܗܐ. ܕܡܠܐ ܡܢ ܛܝܒܘܬܐ ܪܘܚܢܝܬܐ. ܘܕܠܐ ܐܡܿܪ ܡܕܡ ܣܦܝܩܐܝܬ܀ pb. 35

18 §18

ܝܚ- ܗܘܐ ܕܝܢ ܘܐܚܪܝܢܐ ܡܕܡ ܕܐܟ ܗܕܐ ܐܬܐ ܒܝܘ̈ܡܬܐ ܗܿܢܘܢ. ܐܟ ܕܗܘ ܐܒܐ ܕܝܠܢ ܦܛܪܘܣ ܐܫܬܥܝ ܠܢ. ܟܕ ܒܙܒܢܐ ܗܿܘ ܘܥܕܟܝܠ ܥܡܿܪ ܗܘܐ ܒܐܘܪܫܠܡ. ܘܗܘ ܚܙܗܿ ܠܗܿܝ ܕܗܘܬ.. ܐܡܿܪ ܗܘܐ ܓܝܪ ܕܒܥܕܬܐ ܗܿܝ ܕܡܬܩܪܝܐ ܦܪܘܒܛܝܩܐ ܕܡܥܡܘܕܝܬܐ: ܒܗܿܝ ܕܠܗܿܘ ܡܫܪܝܐ ܐܣܝ ܡܪܝܐ. ܐܢܫ ܛܠܝܐ ܐܢܓܢܣܛܝܣ ܡܢ ܗܠܝܢ ܕܡܛܟܣܝܢ ܒܗܿ. ܟܕ ܝܘܡܗ ܡܡܠܐ ܗܘܐ: ܘܡܩܕܡ ܗܘܐ ܒܗܿ ܒܕܘܟܬܐ ܩܕܝܫܬܐ. ܚܙܝܗܝ ܓܠܝܐܝܬ ܠܡܪܢ ܘܐܠܗܢ ܝܫܘܥ. ܕܥܐܠ ܗܘܐ ܠܬܡܢ ܒܫܘܒܚܐ ܘܒܟܢܫܐ ܕܩܕܝܫ̈ܐ. ܘܟܕ ܚܙܐ ܢܗܝܪ̈ܐ ܕܥܕܬܐ: ܕܡܢܗܘܢ ܡܢ ܕܥܝܟܝܢ ܗܘܘ: ܡܢܗܘܢ. ܕܝܢ ܕܒܣܝܐܝܬ ܬܩܝܢܝܢ ܗܘܘ. ܩܥܐ ܘܐܡܼܪ. ܡܢܐ ܐܥܒܕ ܠܗܠܝܢ܇ ܕܛܒ̈ܬܐ ܕܐܟ ܗܠܝܢ ܡܣܪܚ ܐܢܐ ܠܗܘܢ܇ ܘܡܫܚܐ ܘܚܡܪܐ ܘܗܠܝܢ ܕܫܪܟܐ ܚܫ̈ܚܬܐ. ܘܠܐ ܡܬܘܡ ܡܕܡ ܚܣܝܪ ܠܗܘܢ. ܕܗܟܢܐ ܥܠܬܐ ܬܗܘܐ ܠܗܘܢ ܕܢܗܡܘܢ ܘܢܒܣܘܢ ܒܬܫܡܫܬܐ ܕܝܠܝ. ܐܘܗ ܡܢ ܝܘܒܢܠܐܘܣ. ܗܿܘ ܥܒܕܗ ܠܒܝܬܝ ܡܥܪܬܐ ܕܠܣܛܝ̈ܐ. ܘܡܠܝܗܝ ܙܢ̈ܝܐ ܘܓܝܪ̈ܐ ܘܡܛܘ̈ܫܐ. ܘܟܕ ܗܠܝܢ ܐܡܿܪ ܗܘܐ܆ ܥܠ ܠܕܝܩܢܝܩܘܢ ܘܦܩܕ ܕܢܬܦܬܚܘܢ ܦܪ̈ܕܝܣܩܐ܇ ܗܠܝܢ ܕܐܝܬ ܗܘܐ ܒܗܘܢ ܡܐܢ̈ܐ ܩܕܝܫ̈ܐ. ܘܟܕ ܚܙܐ ܕܐܦ pb. 36 ܒܗܘܢ ܡܒܿܣܝ ܘܐܚܪ̈ܢܝܬܐ ܕܕܡܝ̈ܢ ܐܙܥܩ ܘܐܡܪ ܠܗܠܝܢ ܕܐܝܬ ܗܘܘ ܥܡܗ. ܣܒܘ ܐܢܘܢ ܐܢܬܘܢ ܘܐܫܝܓܘ ܐܢܘܢ ܫܦܝܪ. ܘܒܕܘܪܘ ܥܠܝܗܘܢ ܩܪܛ. ܘܣܝܡܘ ܐܢܘܢ ܛܒܐܝܬ. ܘܟܕ ܗܕܐ ܗܘܬ܆ ܟܕ ܢܦܿܩ ܡܢ ܕܝܘܩܢܝܩܘܢ ܚܙܝܗܝ ܠܗܿܘ ܐܢܓܢܘܣܛܝܣ ܕܡܢ ܕܚܠܬܐ ܡܬܩܦܣ ܗܘܐ ܘܡܬܛܫܐ. ܘܐܡܪ. ܘܗܢܐ ܡܢܐ ܥܒܿܕ ܗܪܟܐ. ܐܦܩܘܗܝ ܡܟܐ. ܗܘ ܕܝܢ ܟܕ ܢܦܠ ܥܠ ܐܦܘ̈ܗܝ. ܐܡܪ ܪܚܡ ܥܠܝ. ܘܡܪܝܐ ܐܡܪ ܠܘܬܗ. ܦܘܩ ܡܟܐ. ܠܐ ܝܕܿܥ ܐܢܐ ܥܒܕܝ̈ܟ. ܗܘ ܕܝܢ ܗܢܐ ܟܕ ܟܬܪ ܘܡܬܟܫܦ ܗܘܐ܆ ܐܡܼܪ ܠܘܬܗ ܡܪܝܐ. ܡܬܬܘܐ ܐܢܬ ܡܟܝܠ܆ ܘܫܠܐ ܐܢܬ ܡܢ ܡܗܡܝܢܘܬܟ. ܗܘ ܕܝܢ ܐܡܪ ܠܘܬܗ. ܐܢܗܘ ܕܪ̈ܚܡܝܟ ܡܥܕܪܝܢ ܠܝ ܐܟ ܚܝܠܝ ܥܒܿܕ ܐܢܐ. ܘܗܟܢܐ ܟܕ ܫܢܝ ܡܪܝܐ. ܟܬܪ ܡܟܝܠ ܡܢ ܝܘܡܐ ܗܿܘ ܒܬܡܗܐ ܘܒܐܒܠܐ ܠܐ ܡܣܬܝܟܢܐ. ܘܒܬܐܢ̈ܚܬܐ ܠܐ ܡܬܡܠܠܢܝ̈ܬܐ ܐܚܝܕ ܗܘܐ. ܘܟܕ ܐܝܡܡܐ ܗܘܐ. ܪܗܛܘ ܡܫܡܫ̈ܢܐ ܕܥܕܬܐ ܗܿܝ܆ ܘܥܡܐ ܕܒܗܿ ܒܫܒܒܘܬܐ. ܘܟܕ ܚܙܐܘܗܝ ܕܗܟܢܐ ܐܒܝܠ ܘܡܪܩܕ܆ ܬܒܥܝܢ ܗܘܘ ܠܗ ܕܢܐܡܪ ܥܠܬܐ. ܗܘ ܕܝܢ ܒܦܐܪܝܣܝܐ ܐܡܪ ܠܗܘܢ ܟܠܗ ܚܙܘܐ ܕܗܘܐ ܠܗ. ܟܕ ܝܗܿܒ ܫܘܪܪܐ ܠܗܠܝܢ ܕܡܬܐܡܪ̈ܢ܆ ܠܗܘܢ ܠܡܐܢ̈ܐ ܩܕܝܫ̈ܐ. ܟܕ ܦܬܚܘ ܓܝܪ ܠܦܪ̈ܕܝܣܩܐ܆ pb. 37 ܐܫܟܚܘ ܐܢܘܢ ܕܒܙܠܝܩܐ ܐܠܗܝܐ ܡܒܪܩܝܢ. ܘܐܟ ܥܦܪܐ ܒܕܝܪ ܗܘܐ ܥܠܝܗܘܢ ܚܠܦ ܩܪܛ܇ ܕܐܝܬܘܗܝ ܗܘܐ ܐܟܣܢܝܐ ܘܫܿܘܐ ܠܬܕܡܘܪܬܐ܆ ܗܡ ܪܝܚܐ ܢܨܝܚܐ ܘܒܣܝܡܐ. ܐܝܟܢܐ ܕܟܕ ܐܫܬܡܥܬ ܗܕܐ ܒܟܠܗܿ ܡܕܝܢܬܐ. ܪܗܛܐ ܕܥܡܡ̈ܐ ܢܗܘܐ ܠܬܡܢ. ܐܢܐ ܕܝܢ ܘܢܝܚ ܢܦܫܐ ܐܚܝ ܝܘܚܢܢ ܟܕ ܐܙܠܢܢ. ܚܙܝ̈ܐ ܗܘܝܢܢ ܕܬܕܡܘܪܬܐ ܕܐܟ ܗܕܐ. ܝܘܒܢܠܐܘܣ ܕܝܢ ܟܕ ܗܠܝܢ ܫܡܥ܇ ܘܠܐ ܡܣܝܒܪ ܗܘܐ ܒܗܬܬܐ ܘܡܟܣܢܘܬܐ ܕܗܠܝܢ ܕܐܬܐܡܪ̈ܝܢ ܡܛܠܬܗ܆ ܠܘ ܓܝܪ ܒܛܘܫܝܐ ܗܘܐ ܡܕܡ. ܒܠܠܝܐ ܫܩܠܗ ܠܗܿܘ ܕܗܠܝܢ ܚܙܐ. ܘܠܐ ܡܬܚܙܝܢܐ ܥܒܕܗ. ܐܝܟܢܐ ܕܝܢ ܘܐܝܟܐ ܐܠܗܐ ܝܕܿܥ. ܘܗܕܐ ܕܝܢ ܐܡܪ ܗܘܐ ܗܘ ܛܘܒܬܢܐ ܦܛܪܘܣ. ܕܝܕܥ ܐܢܐ ܐܢܫ ܡܢ ܗܠܝܢ ܛܘܒܢ̈ܐ ܕܫܠܝܢ ܒܗܿ ܒܡܕܝܢܬܐ ܩܕܝܫܬܐ: ܐܢܕܝܢ ܡܛܠܬܗ ܐܘ ܡܛܠ ܐܢܫ ܐܚܪܝܢ ܐܡܪ ܗܘܐ ܚܬܝܬܐܝܬ ܠܐ ܫܘܕܥ. ܐܡܪ ܕܝܢ ܕܝܿܕܥ ܐܢܐ ܠܗܢܐ܆ ܕܟܕ ܒܚܙܘܐ ܗܘܐ ܒܝܘ̈ܡܬܗ ܕܝܘܒܢܠܐܘܣ ܘܚܙܐ ܛܢܦܘ̈ܬܐ ܕܗܘ̈ܝܢ ܠܓܘ ܒܒܝܬ ܩܘܕܫܐ. ܡܢ ܝܘܡܐ ܗܿܘ ܠܐ ܐܨܛܒܝ ܕܢܥܘܠ ܥܡܗ ܠܥܕܬܐ. ܘܐܦܠܐ ܕܡܢ ܐܝܕܗ ܢܩܒܠ ܩܘܪܒܢܐ. ܐܠܐ ܠܚܘܕܐܝܬ ܒܕܝܘܩܢܝܩܘܢ ܢܣܿܒ ܗܘܐ. ܠܐ ܓܝܪ ܥܕܟܝܠ ܗܘܐ ܗܘܬ ܡܬܥܒܪܢܘܬܐ ܕܒܟܠܩܝܕܘܢܐ. ܕܡܿܢ ܕܝܢ ܐܝܬܘܗܝ ܗܘܐ ܗܘ ܩܕܝܫܐ ܕܚܙܝܗܝ ܠܗܢܐ ܚܙܘܐ ܠܐ ܐܡܪ ܠܢ܀ pb. 38

19 §19

ܝܛ- ܐܠܐ ܗܕܐ ܡܘܣܦ ܗܘܐ ܒܬܫܥܝܬܐ ܛܘܒܢܐ ܐܒܐ ܕܝܠܢ ܕܠܐ ܕܓܠܐ: ܓܒܪܐ ܕܐܠܗܐ. ܕܟܕ ܠܐ ܡܣܝܒܪ ܗܘܐ ܫܟܝܪܘܬܐ ܕܗܠܝܢ ܕܗܘ̈ܝܢ ܗܘ̈ܝ ܡܢ ܝܘܒܢܠܐܘܣ ܘܒܢ̈ܝ ܓܢܣܗ ܘܣܘܢܩ̈ܠܘ ܕܝܠܗ: ܘܚܙܐ ܗܘܐ ܟܫܠܐ ܕܣܓܝ̈ܐܐ. ܘܐܟ ܕܒܣܘܓܐܐ ܕܗܠܝܢ ܕܐܬܝܢ ܗܘܘ ܠܬܡܢ ܡܢ ܟܠܕܘܟ ܐܟܣ̈ܢܝܐ܇ ܐܟ ܕܡܢ ܡܦܘܚܝܬܐ ܐܠܗܝܬܐ܆ ܡܢ ܬܫܥ ܫܥ̈ܝܢ ܚܒܫ ܢܦܫܗ ܒܠܚܘܕܘܗܝ ܒܩܠܝܬܐ܆ ܘܟܕ ܡܫܕܐ ܢܦܫܗ ܩܕܡ ܐܠܗܐ ܥܡ ܕܡܥ̈ܐ ܡܪ̈ܝܪܬܐ ܘܐܒܠܐ: ܘܣܒܝܣܐܝܬ ܟܿܐܦ ܗܘܐ ܒܘܪ̈ܟܐ ܘܩܿܐܡ ܗܘܐ. ܐܟ ܕܡܢ ܦܪܨܘܦܐ ܕܐܠܗܐ ܡܬܡܠܐ ܗܘܐ ܘܐܡܿܪ. ܕܡܘܢ ܘܿܠܐ ܗܘܐ ܐܥܒܕ ܠܒܢܝ̈ܢܫܐ ܕܠܐ ܥܒܕܬ ܡܛܠ ܦܘܪܩܢܗܘܢ. ܫܡܝܐ ܩܝܡܬ. ܐܪܥܐ ܣܬܬܬ. ܦܪܕܝܣܐ ܢܨܒܬ. ܟܠܗܿ ܒܪܝܬܐ ܐܥܒܪܬ ܠܒܘܣܡܗܘܢ. ܘܡܢ ܒܬܪ ܡܬܥܒܪܢܘܬܐ ܕܐܕܡ. ܢܡܘܣܐ ܝܗܒܬ. ܪ̈ܝܫܝ ܐܒܗ̈ܬܐ ܘܢܒܝ̈ܐ ܫܕܪܬ. ܪܒܘܬ ܐܬܘ̈ܬܐ ܘܬܕܡܪ̈ܬܐ ܥܒܕܬ ܠܦܝܣܐ ܕܝܠܗܘܢ. ܘܠܐܚܪܝܬܐ ܠܝܚܝܕܝܐ ܒܪܐ ܕܝܠܝ ܫܕܪܬ ܡܛܠܬܗܘܢ. ܗܿܘ ܕܟܕ ܐܬܐ ܠܘܬܗܘܢ܆ ܐܟܪܙ ܡܠܟܘܬܐ ܕܫܡܝܐ. ܫܟܢ ܫܘܒܩܢ ܚܛܗ̈ܐ. ܠܟܪ̈ܝܗܐ ܕܝܠܗܘܢ ܐܣܝ. ܠܣܡ̈ܝܐ ܥܒܕ ܕܢܚܙܘܢ. ܠܚܓܝܪ̈ܐ ܕܢܗܠܟܘܢ. ܠܫܐܕ̈ܐ ܛܪܕ. ܡܛܠܬܗܘܢ ܐܨܛܠܒ. ܡܛܠܬܗܘܢ pb. 39 ܡܝܬ. ܘܟܕ ܒܛܠ ܠܡܘܬܐ ܩܡ ܡܢ ܒܝܬ ܡܝ̈ܬܐ. ܘܣܒܪܐ ܕܩܝܡܬܐ ܫܪܪ. ܘܟܕ ܠܫܡܝܐ ܐܣܬܠܩ ܫܕܪ ܪܘܚܐ. ܫܠܝ̈ܚܐ ܘܐܘܢܓܠܝ̈ܣܛܐ ܫܠܚ. ܦܬܟܪ̈ܐ ܗܦܟ. ܘܚܠܦ ܗܠܝܢ ܟܠܗܝܢ. ܛܠܡܝܢ ܠܝ ܘܠܢܡܘܣ̈ܝ. ܘܠܦܘܩ̈ܕܢܝ ܕܝܫܝܢ. ܘܠܗܝܡܢܘܬܝ ܡܥܒܪܝܢ. ܗܐ ܡܫܬܒܩ ܠܗܘܢ ܒܝܬܗܘܢ ܚܪܒܐ܀ ܘܒܬܪ ܚܙܘܐ ܗܢܐ ܠܐ ܫܠܐ ܗܘܐ ܟܠ ܝܘܡ̈ܝܢ ܕܗܝ ܟܕ ܗܝ ܬܫܡܫܬܐ ܢܡܠܐ. ܟܕ ܗܘ ܟܕ ܗܘ ܐܒܠܐ ܡܿܩܪܒ ܗܘܐ ܒܠܚܘܕܘܗܝ ܥܡ ܦܬܓ̈ܡܐ ܕܐܟ ܗܠܝܢ ܘܕܡܥ̈ܐ ܙܒܢܐ ܣܓܝܐܐ܆ ܥܕܡܐ ܕܥܬܝܕ ܗܘܐ ܕܢܬܩܪܒ ܙܒܢܐ ܕܥܒܘܪܝܐ ܕܗܘܐ ܒܟܠܩܝܕܘܢܐ܀

20 §20

ܟ- ܓܢܬܐ ܩܪܝܬܐ ܕܐܝܬܝܗܿ ܥܠ ܚܡܫܬܥܣܪ ܡܝ̈ܠܐ ܕܡܕܝܢܬܐ ܩܕܝܫܬܐ܆ ܕܣܝܡܐ ܠܡܢܬܐ ܓܪܒܝܝܬܐ ܕܩܕܡܐܝܬ ܡܿܢ ܐܝܬܝܗܿ ܗܘܬ ܕܡܠܟܬܐ ܐܘܕܩܝܐ܇ ܗܫܐ ܕܝܢ ܡܢ ܕܝܬܝܩܐ ܕܝܠܗܿ ܕܥܕܬܐ ܕܐܘܪܫܠܡ. ܒܗܕܐ ܗܘܐ ܐܢܫ ܩܫܝܫܐ ܡܢܗܿ ܕܩܪܝܬܐ ܕܫܡܗ ܗܘܐ ܦܘܠܐ܆ ܕܪܚܡ ܡܢ ܛܠܝܘܬܗ ܡܥܡܪܐ ܥܢܘܝܐ ܘܡܨܒܬ ܗܘܐ ܒܟܠܗܿ ܡܝܬܪܘܬܐ ܐܘܢܓܠܝܬܐ܇ ܩܕܝܫܘܬܐ܇ ܒܬܘܠܘܬܐ܇ ܢܟܦܘܬܐ܇ ܪܚܡܬ ܡܣܟ̈ܢܐ. ܘܚܘܒܐ ܕܐܟܣ̈ܢܝܐ. ܡܝܩܪܐ ܠܟܠܗ ܥܡܐ ܘܠܗܿ ܠܡܠܟܬܐ. ܘܠܘܬ ܐܠܗܐ ܓܒܝܐ. pb. 40 ܗܢܐ ܒܗܿ ܒܩܪܝܬܐ܆ ܩܢܘܒܝܘܢ ܐܘܟܝܬ ܥܘܡܪܐ ܪܒܐ ܘܚܙܝܐ ܩܝܡ. ܘܐܒܐ ܕܟܢܫܐ ܣܓܝܐܐ ܕܕܝܪ̈ܝܐ ܗܘܐ. ܘܠܚܪܬܐ ܐܬܚܛܦ ܡܢܗܘܢ ܕܝܠܗܘܢ ܕܥܡܘܪ̈ܝܗܿ ܕܩܪܝܬܐ. ܘܗܘܐ ܩܫܝܫܐ ܕܥܕܬܐ ܕܝܠܗܿ ܕܩܪܝܬܐ. ܡܛܠ ܗܢܐ ܡܫܪܪܝܢ ܐܢܫܝ̈ܢ ܗܠܝܢ ܕܢܣܝܢܐ ܐܝܬ ܗܘܐ ܠܗܘܢ ܕܝܠܗ ܕܓܒܪܐ. ܕܟܕ ܟܠܗܝܢ ܗܠܝܢ ܫܢܝ̈ܐ ܡܟܢܫ ܗܘܐ ܠܗܿ ܠܩܪܝܬܐ: ܓܒܪ̈ܐ ܐܟܚܕܐ ܘܢܫ̈ܐ. ܐܬܥܢܘܝ ܥܡ ܡܝܬܪ̈ܬܐ ܐܚܪ̈ܢܝܬܐ܆ ܕܠܐ ܢܚܘܪ ܘܢܚܙܐ ܦܪܨܘܦܐ ܕܐܢܬܬܐ. ܘܟܕ ܗܕܐ ܝܠܦܬ ܡܪܬܐ ܐܘܕܩܝܐ: ܘܒܢܣܝܢܐ ܗܕܐ ܐܕܪܟܬ܆ ܡܢܗ ܒܠܚܘܕܘܗܝ ܡܩܒܠܐ ܗܘܬ ܩܘܪܒܢܐ ܥܕܡܐ ܠܥܘܢܕܢܐ. ܘܡܢ ܐܢܫ ܐܚܪܝܢ ܠܐ. ܠܐ ܡܢ ܐܦܝܣܩܘܦܐ. ܘܠܐ ܡܢ ܩܠܝܪܝܩܐ. ܘܐܦܠܐ ܐܢ ܕܝܪܝܐ ܐܝܬܘܗܝ ܗܘܐ. ܘܠܡܝܬܪܘܬܗ ܕܒܐܠܗܐ ܕܗܢܐ ܣܗܿܕ ܗܘܐ ܘܛܘܒܬܢܐ ܐܒܐ ܕܝܠܢ ܦܛܪܐ܆ ܟܕ ܣܓܝ ܛܒ ܐܚܒܗ ܘܐܬܚܝܕ ܠܗ܀ ܗܢܐ ܛܘܒܬܢܐ ܦܘܠܐ ܟܕ ܡܟܝܠ ܣܘܢܗܕܘܣ ܕܟܠܩܝܕܘܢܐ ܡܬܟܢܫܐ ܗܘܬ ܕܗܠܝܢ ܕܛܠܡܘܢ܆ ܒܚܙܘܐ ܕܠܠܝܐ ܗܘܐ܆ ܘܚܙܐ ܦܩܥܬܐ ܚܕܐ ܪܒܬܐ܆ ܕܐܚܿܕܐ ܗܘܬ ܐܟ ܕܠܡܐܡܪ ܟܠܗܿ ܐܢܫܘܬܐ ܘܒܡܨܥܬܗܿ ܕܦܩܥܬܐ ܚܙܐ ܬܠܠܐ ܚܕ ܪܡܐ ܘܠܥܠ ܡܢ ܬܠܠܐ ܩܝܒܘܪܝܢ. ܕܛܥܝܢܐ ܗܘܬ ܡܢ ܐܣܛܘܢ̈ܐ ܕܕܗܒܐ pb. 41 ܘܕܣܐܡܐ. ܘܒܡܨܥܬܗܿ ܡܕܒܚܐ ܕܩܐܡ܆ ܕܡܢ ܟܐܦ̈ܐ ܝܩܝܪ̈ܬܐ ܘܡܪ̈ܓܢܝܬܐ ܛܒ̈ܬܐ ܡܬܩܢ. ܘܙܠܝܩ̈ܐ ܠܐ ܡܬܡܠܠ̈ܢܐ ܡܫܿܡܪ. ܘܠܚܕܪ̈ܘܗܝ ܟܢܫܐ ܣܓܝܐܐ ܕܩܕܝܫ̈ܐ ܕܩܝܡܝܢ ܘܡܫܡܫܝܢ ܠܗ ܠܡܕܒܚܐ܆ ܕܡܢܗܘܢ ܐܟ ܕܐܡܼܪ ܐܢܫ̈ܝܢ ܝܕܿܥ ܗܘܐ܆ ܕܚܝܝܢ ܗܘܘ ܘܥܕܡܐ ܠܗܝܕܝܢ. ܘܡܢ ܫܡܝܐ ܒܪܬ ܩܠܐ ܗܘܬ ܕܐܡܪܐ. ܡܿܚܪܡ ܡܿܢ ܕܐܡܿܪ ܬܪ̈ܝܢ ܟܝ̈ܢܐ. ܘܗܠܝܢ ܕܩܝܡܝܢ ܗܘܘ ܒܚܕܪ̈ܘܗܝ ܕܡܕܒܚܐ. ܒܠܚܘܕܝܗܘܢ ܥܢܝܢ ܗܘܘ ܒܩܠܐ ܪܒܐ. ܐܡܝܢ. ܗܠܝܢ ܕܝܢ ܥܡܡ̈ܐ ܕܡܠܝܢ ܗܘܘ ܠܗܿ ܠܦܩܥܬܐ. ܟܕ ܫܠܝܢ ܩܝܡܝܢ ܗܘܘ ܒܕܚܠܬܐ ܘܙܘܥܐ ܟܕ ܬܡܝܗܝܢ. ܘܬܘܒ ܗܝ ܒܪܬ ܩܠܐ ܐܠܗܝܬܐ ܡܙܥܩܐ ܗܘܬ. ܡܚܪܡ ܡܿܢ ܕܡܦܠܓ ܠܗܿܘ ܚܕ ܘܠܐ ܡܬܦܠܓܢܐ. ܡܚܪܡܝܢ ܟܦܘܪ̈ܐ. ܘܗܠܝܢ ܒܠܚܘܕܝܗܘܢ ܥܢܝܢ ܗܘܘ ܐܡܝܢ܀ ܟܕ ܕܝܢ ܫܠܝܝ̈ܢ ܗܠܝܢ ܕܚܙܘܐ ܡܟܝܠ ܐܬܐ ܗܘ ܠܘܬܗ ܣܒܐ܆ ܘܒܥܩܬܐ ܪܒܬܐ ܐܚܝܕ ܘܒܬܢܚ̈ܬܐ. ܟܕ ܡܬܚܫܿܒ ܗܘܐ ܘܡܬܪܢܐ: ܕܕܠܡܐ ܡܕܡ ܕܐܝܬ ܒܗ ܟܫܠܐ: ܗܘܐ ܡܢ ܣܘܢܕܘܣ ܕܟܠܩܝܕܘܢܐ ܘܡܢ ܝܘܒܢܠܐܘܣ. ܐܦ ܓܝܪ ܗܿܘ ܠܐ ܚܣܝܐ܆ ܡܥܒܪܬܐ ܥܠ ܩܢܘܒܝܘܢ ܕܝܠܗ ܥܒܕ. ܟܕ ܣܠܩ ܗܘܐ ܠܩܘܡܛܛܘܢ. ܡܝܩܪ ܗܘܐ ܠܗ ܓܝܪ ܗܘ ܝܘܒܢܠܐܘܣ. ܟܕ ܚܙܐ ܗܘܐ ܠܡܠܟܬܐ ܐܘܕܩܝܐ ܕܐܝܬ ܗܘܐ ܠܗܿ ܠܘܬܗ ܣܓܿܝ ܗܝܡܢܘܬܐ. ܘܐܡܿܪ ܗܘܐ pb. 42 ܠܗ ܠܣܒܐ. ܕܡܛܠ ܗܟܢܐ ܥܿܒܪܬ ܥܠܝܟ܆ ܐܟܡܐ ܕܠܐ ܬܘܒ ܡܣܟܐ ܐܢܐ ܕܐܚܙܝܟ. ܠܐܓܘܢܐ ܓܝܪ ܣܠܩܝܢܢ܆ ܘܐܟܣܘܪܝܐ ܣܝܡܐ ܠܢ܆ ܐܘ ܕܢܕܘܫ ܬܐܪܬܢ ܕܒܐܠܗܐ. ܬܒܥܝܢ ܠܢ ܓܝܪ ܕܢܛܠܘܡ ܘܢܟܦܘܪ ܒܗܝܡܢܘܬܐ ܕܐܒܗ̈ܝܢ. ܘܗܠܝܢ ܕܣܝܡܘܢ ܚܪܫܐ ܘܕܝܗ̈ܘܕܝܐ ܢܬܪܥܐ. ܐܟ ܡܿܢ ܕܠܐ ܐܝܬܘܗܝ ܐܠܗܐ ܡܫܝܚܐ ܗܿܘ ܕܚܫ ܡܛܠܬܢ. ܨܠܐ ܡܕܝܢ ܚܠܦܝܢ ܡܪܝ ܐܒܐ. ܕܠܐ ܒܣܝܒܘܬܝ ܐܒܗܬ܀ ܗܠܝܢ ܗܟܝܠ ܟܕ ܥܗܝܕ ܣܒܐ. ܘܗܠܝܢ ܕܚܙܘܐ ܡܬܚܿܫܒ ܘܡܬܕܡܪ܇ ܘܐܝܬܘܗܝ ܗܘܐ ܕܠܐ ܦܘܪܣܐ. ܚܙܐ ܬܘܒ ܒܠܠܝܐ ܠܗ ܠܝܘܒܢܠܐܘܣ ܕܩܿܐܡ ܒܓܘܢܝܐ ܚܕܐ ܟܕ ܫܠܝܚ ܘܡܬܛܫܐ ܡܢ ܒܗܬܬܐ. ܟܕ ܡܫܚܿܪ ܗܘܐ ܟܠܗ ܐܟ ܫܓܘܪܐ ܕܩܐܡܝܢܐ ܟܕ ܦܪܙܘܡܐ ܟܒܝܢ ܗܘܐ ܨܥܐ ܘܡܠܐ ܪ̈ܘܩܥܐ. ܘܟܕ ܩܥܐ ܒܩܠܐ ܪܒܐ ܠܘܬܗ ܗܘ ܣܒܐ ܐܡܪ. ܡܪܝ ܪܝܫ ܐܦܝܣܩ̈ܘܦܐ ܡܢܘ ܗܢܐ ܕܓܕܫ ܠܟ. ܡܢܐ ܡܫܘܕܥ ܥܠ ܐܣܟܡܐ ܗܢܐ ܕܠܒܝܫ ܐܢܬ܆ ܗܘ ܕܝܢ ܐܡܪ ܡܘܢ ܐܥܒܕ ܠܚܛܗ̈ܝ. ܗܐ ܚܙܿܐ ܐܢܬ ܠܒܗܬܬܐ ܕܝܠܝ. ܕܗܒܐ ܣܓܝܐܐ ܡܟܢܫ ܐܢܐ ܠܐܢܛܝܟܪܝܣܛܘܣ. ܡܛܠ ܕܥܬܝܕ ܕܢܥܒܕ ܩܪܒܐ ܥܡ ܥܦܪܐ܀ ܟܕ ܕܝܢ ܩܡ ܗܘ ܣܒܐ. ܘܬܗܪ ܒܚܙܘܐ ܘܐܬܪܢܝ ܕܠܐ ܡܕܡ ܛܒܐ pb. 43 ܗܘܐ ܒܣܘܢܕܘܣ. ܐܠܐ ܡܐܠܘܢ ܟܫܠܐ. ܡܣܟܐ ܗܘܐ ܠܫܪܪܐ ܕܦܠܪܘܦܪܝܐ ܒܝܕ ܡܦܩܢܐ. ܘܟܕ ܒܟܠ ܕܘܟ ܐܬܟܪܙ ܟܦܘܪܝܐ. ܡܬܕܡܪ ܣܒܐ ܒܚܙܘܐ ܕܗܘܐ ܠܘܬܗ. ܘܟܕ ܒܥܿܐ ܗܘܐ ܣܒܐ ܕܡܢܐ ܐܝܬܘܗܝ ܗܿܘ ܡܕܡ ܕܐܡܼܪ ܠܘܬܗ ܒܚܙܘܐ ܗܘ ܝܘܒܢܠܐܘܣ ܡܛܠ ܐܢܛܝܟܪܝܣܛܘܣ ܕܥܬܝܕ ܕܢܥܒܕ ܩܪܒܐ ܥܡ ܥܦܪܐ. ܐܣܬܟܠ ܟܕ ܡܬܢܗܿܪ ܡܢ ܪܘܚܐ ܩܕܝܫܐ. ܕܗܿܝ ܕܥܡ ܥܦܪܐ ܗܢܐ ܡܫܘܕܥܐ. ܝܕܝܥܐ ܕܥܡ ܒܪܢܫܐ ܕܐܝܬܘܗܝ ܡܢ ܥܦܪܐ ܘܡܢ ܐܪܥܐ ܐܬܓܒܠ. ܘܟܠܗܘܢ ܗܠܝܢ ܕܐܝܬܝܗܘܢ ܥܦܪ̈ܢܐ ܘܒܐܪܥܐ ܐܚܝܕܝܢ. ܥܬܝܕ ܕܠܗܠܝܢ ܢܐܚܘܕ ܘܢܙܟܐ܇ ܘܠܗܘܢ ܢܛܥܐ ܐܢܛܝܟܪܝܣܛܘܣ܀

21 §21

ܟܐ- ܡܢ ܗܪܟܐ ܡܟܝܠ ܬܫܥܝܬܐ ܙܝܥܬܐ ܘܕܚܝܠܬܐ ܠܩܘܝܡܐ ܕܫܪܪܐ ܡܬܐܠܨ ܐܢܐ ܕܐܫܬܥܐ. ܟܕ ܐܠܗܐ ܫܪܝܪܐ ܣܗܿܕ. ܒܗܿܘ ܕܐܢܐ ܗܘܝܬ ܒܢܣܝܢܐ ܕܝܠܗܿ. ܟܕ ܒܫܡܥܐ ܕܠܐ ܦܘܫܟܐ ܘܡܢ ܗܠܝܢ ܕܚܙܘ ܗܘ ܫܪܪܐ ܫܡܥܬ ܘܕܠܐ ܦܘܫܩܐ ܗܘܝܬ܀ ܐܝܬ ܡܕܝܢܬܐ ܒܐܝܣܘܪܝܐ ܕܗܟܢܐ ܡܬܩܪܝܐ ܛܝܛܘܦܘܠܝܣ. ܡܛܠ ܕܡܢ ܛܝܛܘܣ ܡܠܟܐ ܟܡܐ ܙܒܢܝܢ ܐܬܒܢܝܬ. ܕܗܕܐ ܗܘܐ ܐܦܝܣܩܘܦܐ ܕܫܡܗ ܗܘܐ ܦܢܘܦܪܘܦܝܘܣ. pb. 44 ܓܒܪܐ ܢܟܦܐ ܘܩܢܘܒܝܗ ܐܪܟܝܣ ܐܘܟܝܬ ܪܝܫ ܥܘܡܪܐ ܕܐܝܬ ܗܘܐ ܒܐܬܪܐ ܗܿܘ. ܘܡܢ ܩܢܘܒܝܘܢ ܒܩܛܝܪܐ ܐܬܢܓܕ. ܘܟܗܢܘܬܐ ܕܡܕܝܢܬܐ ܗܿܝ ܩܒܠ. ܟܕ ܕܝܢ ܗܘܬ ܣܘܢܕܘܣ ܒܟܠܩܝܕܘܢܐ. ܒܣܝܠܝܘܣ ܡܝܛܪܘܦܘܠܝܛܝܣ ܕܡܕܝܢܬܐ ܣܠܘܩܝܐ ܕܐܝܣܘܪܝܐ. ܟܕ ܐܙܠ ܠܣܘܢܕܘܣ ܫܩܠܗ ܘܠܗܢܐ ܥܡܗ ܥܡ ܐܦܝܣܩ̈ܘܦܐ ܐܚܪ̈ܢܐ. ܗܿܘ ܕܟܕ ܐܬܐ ܠܣܘܢܕܘܣ܇ ܘܚܙܐ ܬܟܬܘܫܐ ܕܡܢ ܫܘܪܝܐ ܕܣܘܓܐܗ̈ܘܢ ܕܐܦܝܣܩܘ̈ܦܐ ܕܚܠܦ ܫܪܪܐ. ܕܐܟ ܕܠܡܐܡܪ ܟܠܗܘܢ ܡܚܪܡܝܢ ܗܘܘ ܠܗܿܢܘܢ ܕܐܡܪܝܢ ܗܘܘ ܬܪ̈ܝܢ ܟܝ̈ܢܐ܇ ܘܫܠܡܝܢ ܗܘܘ ܠܛܘܒܢܐ ܕܝܣܩܘܪܘܣ ܘܠܐ ܡܩܒܿܠܝܢ ܗܘܘ ܠܛܘܡܣܗ ܕܠܐܘܢ ܘܠܐ ܠܗܠܝܢ ܕܒܟܐܢܘܬܐ ܐܫܬܕܝܘܢ. ܠܦܠܘܝܢܐ ܘܠܗܝܒܐ ܘܠܬܐܕܪܝܛܘܣ. ܘܟܕ ܚܙܐ ܬܘܒ ܡܦܘܠܬܐ ܕܒܬܪ ܗܟܢ ܕܝܠܗܘܢ ܘܟܦܘܪܝܐ. ܘܠܡܬܟܬܫܢܐ ܕܚܠܦ ܫܪܪܐ ܕܝܣܩܘܪܘܣ ܕܐܫܬܕܝ ܡܢܗܘܢ܇ ܠܗܠܝܢ ܕܝܢ ܗܪ̈ܝܛܝܩܘ ܕܩܕܝܡܝܢ ܐܡܝܪܝܢ ܘܡܬܟܬܫ̈ܝ ܥܡ ܐܠܗܐ ܕܐܬܩܲܒܠܘ ܕܠܐ ܕܝܢܐ ܘܠܐ ܩܢܘܢܐܝܬ܇ ܘܫܩܠܘ ܟܘܪ̈ܣܘܬܗܘܢ. ܫܢܝ ܠܒܝܬ ܡܫܪܝܗ. ܘܟܕ ܚܒܫ ܢܦܫܗ ܫܗܪ ܗܘܐ ܒܕܡܥ̈ܐ ܘܒܚܢ̈ܓܬܐ. ܘܓܥܿܐ ܗܘܐ ܠܘܬ ܡܪܢ ܘܐܡܿܪ ܐܠܗܐ ܕܫܪܪܐ ܘܦܪܘܩܐ ܕܥܠܡ̈ܐ: ܢܘܗܪܐ ܫܪܝܪܐ: ܣܒܪܐ ܕܝܠܝ ܡܢ ܛܠܝܘܬܝ܆ ܠܐ ܬܫܒܘܩܝܢܝ ܠܥܒܕܟ ܕܐܦܿܠ ܡܢ ܣܒܪܐ ܕܝܠܟ ܘܒܣܝܒܘܬܝ pb. 45 ܐܗܘܐ ܕܚܝܩܐ ܘܟܦܘܪܐ. ܐܠܐ ܐܘܕܥܝܢܝ ܨܒܝܢܟ. ܘܡܛܠ ܕܗܕܝܘܛܐ ܐܝܬܝ܆ ܘܣܓܝ̈ܐܐ ܡܨܛܢܥܝܢ ܠܫܪܪܐ. ܓܠܝ ܠܝ ܡܛܠ ܕܝܢܐ ܠܐ ܡܬܛܥܝܢܐ. ܕܗܠܝܢ ܕܗܘ̈ܝ ܒܗܕܐ ܣܘܢܕܘܣ. ܐܢܗܘܐ ܕܐܟ ܨܒܝܢܟ ܗܘ̈ܝ. ܘܕܐܝܠܝܢ ܡܩܿܒܠܝܢ ܥܠܝܟ. ܕܝܘܣܩܘܪܣ ܪܝܫ ܐܦܝܣܩ̈ܘܦܐ ܕܐܠܟܣܢܕܪܝܐ ܗܿܘ ܕܐܫܬܕܝ ܡܢܗܘܢ. ܐܘ ܗܠܝܢ ܐܚܪ̈ܢܐ. ܗܠܝܢ ܕܠܗܢܘܢ ܪ̈ܫܝܥܐ ܕܐܡܝܪܝܢ ܕܠܐ ܕܝܢܼܐ ܩܒܿܠܘ. ܘܠܛܘܡܣܗ ܕܠܐܘܢ ܫܪܪܘ. ܕܗܟܢܐ ܟܕ ܒܛܝܒܘܬܟ ܐܩܒܠ ܦܠܪܘܦܘܪܝܐ. ܕܠܐ ܦܘܫܟܐ ܘܩܢܛܐ ܥܕܡܐ ܠܕܡܐ ܐܩܘܡ ܒܫܪܪܐ. ܘܠܐ ܐܥܒܪ ܥܠ ܗܝܡܢܘܬܐ ܕܐܒܗ̈ܬܐ ܕܝܠܝ. ܘܣܒܪܐ ܕܒܟ. ܘܗܟܢܐ ܟܕ ܫܡܠܝ ܬܠܬܐ ܐܝܡܡ̈ܐ ܘܠܝ̈ܠܘܬܐ܇ ܟܕ ܒܿܪܟ ܩܕܡ ܡܪܝܐ ܘܡܬܟܫܦ. ܚܙܐ ܚܙܘܐ ܕܐܟ ܗܢܐ. ܛܘܡܣܐ ܚܕ ܕܟܪܛܝܣܐ ܪܒܐ. ܕܦܫܝܛ ܡܢ ܫܡܝܐ܆ ܘܢܚܿܬ ܥܕܡܐ ܠܐܪܥܐ. ܘܡܢ ܬܪ̈ܝܗܘܢ ܓܒܘ̈ܗܝ ܡܟܐ ܘܡܟܐ ܒܟܬܝ̈ܒܬܐ ܪܘܪ̈ܒܬܐ ܟܬܝܒ ܗܘܐ. ܡܚܪܡܐ ܣܘܢܕܘܣ ܗܕܐ. ܟܦܪܘ ܒܝ. ܟܦܪܘ ܒܝ. ܡܚܪܡܝܢ ܡܚܪܡܝܢ. ܘܟܕ ܚܙܐ ܚܙܘܐ ܗܢܐ. ܗܘܐ ܒܦܠܪܦܪܝܐ ܪܒܬܐ ܕܠܐ ܦܘܫܟܐ. ܘܡܚܕܐ ܒܠܠܝܐ ܟܕ ܫܒܩ ܠܟܠܢܫ ܛܦ ܘܐܙܠ ܠܡܕܝܢܬܗ. ܘܟܕ ܠܗܿ ܐܬܡܢܥ. ܟܢܿܫ ܟܠܗ ܥܡܐ ܕܡܕܝܢܬܐ. ܘܐܡܪ ܠܗܘܢ ܟܠܗܝܢ pb. 46 ܐܝܠܝܢ ܕܐܣܬܥܪ̈ܝܢ ܒܟܠܩܝܕܘܢܐ. ܘܕܟܦܪܘ ܐܦܝܣܩܘ̈ܦܐ ܒܐܪܬܘܕܟܣܝܐ. ܘܕܐܝܟܢܐ ܡܢ ܫܡܝܐ ܩܒܿܠ ܦܠܪܘܦܘܪܝܐ ܕܡܛܠ ܗܕܐ. ܘܡܣܗܕ ܗܘܐ ܠܗܘܢ ܘܐܡܪ. ܕܡܛܠ ܗܕܐ ܐܬܚܦܛܬ ܐܕܪܟ ܘܐܩܕܿܘܡ ܘܫܪܪܐ ܐܫܘܕܥܟܘܢ. ܕܠܐ ܫܘܕܠܐ ܡܕܡ ܘܛܘܥܝܝ ܬܗܘܐ ܠܟܘܢ. ܘܐܢ ܗܘ ܕܡܛܝܒ̈ܐ ܐܝܬܝܟܘܢ ܕܫܪ̈ܝܪܐ ܥܡܝ ܬܩܘܡܘܢ. ܘܠܐ ܡܙܕܥܙ̈ܥܢܐ ܡܢ ܗܝܡܢܘܬܐ ܬܪܝܨܬ ܫܘܒܚܐ. ܘܠܝ ܢܩܿܦܝܢ ܐܢܬܘܢ ܘܥܪܩܝܢ ܐܢܬܘܢ ܡܢ ܗܠܝܢ ܟܦܘܪ̈ܐ ܘܡܢ ܩܘܪܒܢܗܘܢ. ܡܛܝܒܐ ܐܝܬܝ ܕܐܟܬܪ ܥܡܟܘܢ. ܘܥܕܡܐ ܠܕܡܐ ܐܬܟܬܫ ܚܠܦ ܦܘܪܩܢܟܘܢ. ܘܐܢ ܗܘ ܕܡܬܒܥܐ ܐܣܝܡ ܢܦܫܝ ܚܠܦܝܟܘܢ. ܐܢ ܕܝܢ ܢܝܫܐ ܐܝܬ ܠܟܘܢ. ܕܠܒܣܝܠܝܘܣ ܡܛܪܘܦܠܝܛܝܣ ܬܫܬܘܬܦܘܢ. ܘܠܗܠܝܢ ܕܫܘܝܢ ܠܗ ܒܬܪܥܝܬܐ. ܡܦܿܨܝ ܐܢܐ ܡܢ ܕܡܐ ܕܝܠܟܘܢ. ܐܢܐ ܕܝܢ ܦܪܿܩ ܐܢܐ ܘܡܫܘܙܒ ܐܢܐ ܢܦܫܝ. ܘܟܕ ܗܟܢܐ ܫܠܗܒ ܠܒܘ̈ܬܗܘܢ ܒܚܘܒܐ ܕܐܠܗܐ ܘܒܛܢܢܐ ܕܫܪܪܐ. ܡܢ ܒܬܪ ܗܟܢ ܫܒܥܣܪܐ ܫܢܝ̈ܢ ܟܬܪ ܒܐܦܝܣܩܦܘܬܐ. ܟܕ ܢܛܪ ܡܪܥܝܬܗ ܒܬܡܝܡܘܬܐ ܕܠܐ ܡܘܡ. ܘܕܠܐ ܥܒܘܪܝܐ ܕܗܝܡܢܘܬܐ ܬܪܝܨܬ ܫܘܒܚܐ. ܘܗܠܝܢ ܟܕ ܣܓܝ ܐܬܢܣܝ ܒܩ̈ܝܢܕܢܘ ܘܒܢܟ̈ܠܐ. ܘܡܢܗ ܕܒܣܝܠܝܘܣ ܡܛܪܘܦܠܝܛܝܣ ܕܐܝܣܘܪܝܐ ܘܡܢ ܗܿܘ ܕܡܬܐܡܪ ܗܘܐ ܦܛܪܝܪܟܐ ܕܡܕܝܢܬܗ ܕܐܢܛܝܟܘܣ. ܡܥܕܪ̈ܢܐ ܓܝܪ ܐܝܬܝܗܘܢ ܗܘܘ ܗܠܝܢ ܕܒܝܫܘܬ pb. 47 ܫܘܒܚܐ ܕܒܟܠܩܝܕܘܢܐ. ܟܕ ܒܣܘܬܪܐ ܕܐܠܗܐ ܘܛܝܒܘܬܐ ܟܬܪ ܠܐ ܡܬܪܦܝܢܐ ܘܠܐ ܡܙܕܥܙܥܢܐ ܘܠܐ ܡܬܗܦܟܢܐ. ܘܢܛܪ ܠܡܪܥܝܬܗ: ܘܗܟܢܐ ܡܫܒܚܐܝܬ ܫܢܝ ܨܝܕ ܐܠܗܐ ܦܪܘܩܐ ܕܝܠܗ ܡܫܝܚܐ. ܟܕ ܩܛܝܪ ܟܠܝܠܐ ܕܡܘܕܝܢܘܬܐ܀ ܡܢ ܐܠܨܬܐ ܡܟܝܠ ܐܝܬܝܗܿ ܠܝ. ܕܠܫܘܪܪܐ ܕܗܠܝܢ ܕܫܡܥܝܢ. ܐܫܬܥܐ ܥܠܬܐ. ܕܡܢ ܐܝܟܐ ܗܘܬ ܠܝ ܦܠܪܘܦܘܪܝܐ ܕܐܟ ܗܕܐ܀

22 §22

ܟܒ- ܦܛܪܘܣ ܗܿܘ ܕܗܘܐ ܪܝܫ ܐܦܝܣܩܘ̈ܦܐ ܕܐܢܛܝܘܟܝܐ ܒܙܒ̈ܢܐ ܕܐܢܩܘܩܠܝܘܢ: ܡܢ ܗܿܘ ܕܐܦ ܩܫܝܫܘܬܐ ܟܕ ܠܐ ܫܘܐ ܐܢܐ ܩܒܠܬ. ܟܕ ܗܦܼܟ ܡܢ ܐܟܣܘܪܝܐ ܠܐܢܛܝܘܟܝܐ ܘܪܝܫܘܬ ܟܗܢܘܬܐ ܩܒܿܠ. ܘܣܘܢܕܝܩܐ ܕܝܠܗ ܫܕܪ ܠܡܕܒܪܢܐ ܕܥܕܬܐ ܕܐܠܗܐ ܩܕܝܫܬܐ ܕܐܘܪܫܠܡ. ܡܪܛܘܪܝܣ ܕܝܢ ܐܝܬܘܗܝ ܗܘܐ ܗܢܐ: ܒܐܝ̈ܕܝ ܐܢܫ ܕܡܬܟܢܐ ܗܘܐ ܦܛܪܐ ܐܦܝܣܩܘܦܐ. ܕܐܝܬܘܗܝ ܗܘܐ ܗܢܐ ܐܝܣܘܪܝܐ ܒܓܢܣܗ: ܡܢ ܗܿܝ ܕܩܕܝܡܐ ܐܡܝܪܐ ܛܝܛܘܦܘܥܝܣ. ܕܡܿܕܒܪ ܗܘܐ ܐܦܝܣܩܦܘܬܐ ܐܟ ܬܠܡܝܕܐ ܘܣܘܢܩܠܘܣ: ܘܐܝܬܘܗܝ ܗܘܐ ܝܪܘܬܐ ܕܛܒܝܒ ܒܟܠ ܘܛܘܒܬܢܐ ܘܡܘܕܝܢܐ ܦܢܘܦܪܘܦܝܘܣ ܐܦܝܣܩܘܦܐ. ܗܕܐ ܓܝܪ ܐܣܬܒܪ ܘܕܫܘܐ ܗܘܐ ܕܪܝܫ ܟܗܢܘܬܗ ܕܗܿܘ ܢܩܒܿܠ ܘܕܥܬܝܕ ܗܘܐ ܕܛܢܢܐ ܕܫܿܘܐ ܠܕܝܠܗ: ܚܠܦ ܗܝܡܢܘܬܐ ܬܪܝܨܬ ܫܘܒܚܐ ܢܚܿܘܐ܆ ܟܕ ܫܕܪ ܥܡܗ pb. 48 ܘܐܢܫ ܩܫܝܫܐ ܕܥܕܬܐ ܕܐܢܛܝ̈ܘܟܝܐ. ܕܫܡܗ ܗܘܐ ܫܠܝܡܘܢ܇ ܘܐܝܬܘܗܝ ܗܘܐ ܒܓܢܣܗ ܐܪܡܢܝܐ. ܗܿܘ ܕܗܿܘܐ ܗܘܐ ܠܗ ܒܙܒܢ ܘܠܡܣܟܢܘܬܝ ܣܘܢܩܠܐ ܐܟܚܕܐ. ܘܣܓܝ ܪܚܝܡ ܗܘܐ ܡܢܝ. ܟܕ ܦܩܕ ܐܢܘܢ ܕܡܢ ܟܠ ܦܪܘܣ ܢܦܝܣܘܢ ܠܡܚܝܠܘܬܝ ܕܐܗܦܘܟ ܠܘܬܗ. ܟܕ ܓܝܪ ܫܢܝܬ ܐܢܐ ܡܢ ܒܬܪ ܐܟܣܘܪܝܐ ܕܝܠܗ ܘܐܘܚܕܢܐ ܕܡܢ ܗܪ̈ܝܛܝܩܘ ܡܢ ܡܕܝܢܬܐ ܕܐܢܛܝ̈ܘܟܝܐ. ܐܫܬܘܝܬ ܕܒܥܢܝܢܐ ܐܗܘܐ ܕܐܒܗ̈ܬܐ ܩܕܝܫ̈ܐ ܒܦܠܣܛܝܢܐ. ܘܝܬܝܪܐܝܬ ܕܐܒܐ ܕܝܠܝ ܘܩܐܡ ܒܪܝܫܝ ܘܡܩܒܠ ܐܟܣ̈ܢܝܐ ܐܒܐ ܦܛܪܐ ܐܦܝܣܩܘܦܐ ܗܿܘ ܐܒܪܝܐ. ܘܥܢܘܝܐ ܪܒܐ ܐܒܐ ܐܫܥܝܐ. ܘܟܕ ܥܬܝܪܐܝܬ ܐܬܒܣܡܬ ܒܚܩܒܗ ܕܝܠܗ ܕܩܕܝܫܐ. ܦܢܝܬ ܦܬܓܡܐ. ܕܡܟܝܠ ܒܦܠܣܛܝܢܐ ܐܥܿܡܪ. ܘܠܐ ܡܬܦܪܫܢܐ ܐܗܘܐ ܡܢ ܗܝܡܢܘܬܐ ܕܝܠܗܘܢ ܘܣܒܪܐ ܘܝܘܬܪܢܐ. ܟܕ ܫܠܝܐ ܠܒܿܟ ܐܢܐ ܒܐܘܪܫܠܡ ܐܝܟܐ ܕܒܙܒܢܐ ܗܿܘ ܟܢܘܫܝܐ ܣܓܝܐܐ ܕܐܒܗ̈ܬܐ ܐܪܬܐܕܟܣ̈ܘ. ܐܝܬ ܗܘܐ ܠܗܘܢ ܡܥܡܪܐ ܘܩܠܝ̈ܬܐ ܕܫܠܝܐ. ܟܕ ܕܝܢ ܐܬܘ ܠܗܿ ܠܡܕܝܢܬܐ ܩܕܝܫܬܐ܇ ܗܠܝܢ ܕܝܒܠܘ ܐܢܝܢ ܠܗܝܢ ܠܣܘܢ̈ܕܝܩܐ. ܐܡܿܪ ܐܢܐ ܕܝܢ ܦܛܪܘܣ ܐܦܝܣܩܘܦܐ ܕܛܝܛܦܘܠܝܣ ܘܫܠܝܡܘܢ ܩܫܝܫܐ: ܘܥܩܒܘܢ ܣܓܝܐܝܬ ܘܐܫܟܚܘܢܗܿ ܠܡܣܟܢܘܬܝ. ܩܝܡܝܢ ܗܘܘ ܥܠܝ ܚܪܝܦܐܝܬ ܘܕܠܐ ܫܠܝܐ. ܟܕ ܐܠܨܝܢ ܠܝ ܘܡܬܚܪܝܢ ܕܡܢ ܟܠܦܪܘܣ ܢܕܒܪܘܢܢܝ. ܟܕ ܡܚܘܝܢ ܠܝ ܘܣܘܓܐܐ ܕܐܝܠܡ̈ܛܐ. ܐܘܟܝܬ ܙܘ̈ܕܐ ܕܐܘܪܚܐ ܘܐܓܪ̈ܬܐ ܕܪܝܫ pb. 49 ܐܦܝܣܩ̈ܦܐ ܦܛܪܘܣ. ܕܒܚܕܘܬܐ ܣܓܝܐܬܐ ܘܦܝܣܬܐ ܡܠܝ̈ܢ ܗܘ̈ܝ. ܟܕ ܡܘܣܦܝܢ ܘܗܕܐ ܠܦܝܣܬܐ ܕܕܐܟ ܗܠܝܢ. ܦܘܩ̈ܕܐ ܐܝܬ ܠܢ ܡܢܗ ܠܦܠܪܘܦܘܪܝܐ ܕܝܠܟ. ܕܡܢ ܟܠܦܪܘܣ ܢܦܝܣܟ ܕܬܐܬܐ ܠܘܬܗ ܟܕ ܐܡܿܪ. ܕܒܠܚܘܕ ܢܐܬܐ ܠܘܬܝ ܢܚܙܐ ܚܕܕ̈ܐ. ܘܗܒܘܢ ܠܗ ܡܠܬܐ ܕܠܐ ܐܢܫ ܐܠܨ ܠܗ ܕܢܣܿܒ ܩܘܪܒܢܐ ܟܕ ܠܐ ܦܝܣܐ ܥܒܝܕ. ܐܠܐ ܒܫܝܢܐ ܡܿܫܡܪ ܐܢܐ ܠܗ܀ ܗܠܝܢ ܕܠܐ ܥܘܟܪܐ ܠܩܕܝܫܐ ܐܒܐ ܕܝܠܝ ܘܦܪܘܩܐ ܒܬܪ ܐܠܗܐ ܐܒܐ ܦܛܪܐ ܐܒܪܝܐ ܝܕܝܥ̈ܬܐ ܥܒܕܬ. ܕܟܢܝܫ ܗܘܐ ܗܿܝܕܝܢ ܒܕܘܟܝ̈ܬܐ ܕܠܘܬ ܡܕܝܢܬܐ ܐܣܩܠܘܢܐ ܟܕ ܡܬܟܫܦ ܗܘܝܬ ܡܦܝܣ ܐܢܐ. ܕܗܝ ܡܬܚܙܝܐ ܠܗ ܐܦܘܩܪܣܝܣ ܩܠܝܠܬܐ ܢܫܕܪ ܠܝ. ܘܡܢ ܒܬܪ ܩܠܝܠ ܝܘܡ̈ܬܐ ܩܒܠܬ ܡܢܗ ܦܘܢܝ ܦܬܓܡܐ ܕܐܟ ܗܢܐ܇ ܐܓܪܬܐ ܕܩܕܝܫܐ ܦܛܪܐ ܐܒܪܝܐ. ܟܕ ܩܪܝܢܢ ܟܬܝܒܬܐ ܕܢܟܦܘܬܟ ܟܠܢ ܡܚܒ̈ܢܝܟ. ܒܐܒܠܐ ܗܘܝܢ ܚܢܢ ܘܩܘܛܦܐ ܘܬܢܚ̈ܬܐ܇ ܟܕ ܚܙܝܢܢ ܦܚܘܗ̈ܝ ܕܐܟܠܩܪܨܐ. ܕܡܿܬܦܪܣ ܒܟܠ ܘܡܥܬܕ ܕܢܚܿܠܨ ܣܒܪܟ ܘܦܘܪܩܢܟ ܕܒܐܠܗܐ. ܘܢܒܗܬ ܥܡ̈ܠܝܟ ܗܠܝܢ ܕܥܡܠܬ ܚܠܦ ܢܦܫܟ ܘܗܝܡܢܘܬܐ ܬܪܝܨܬ ܫܘܒܚܐ. ܩܕܝܡܐ ܓܝܪ ܝܕܝܥܐ pb. 50 ܕܐܢ ܗܘ ܕܐܙܠ ܐܢܬ ܠܐܢܛܝܘܟܝܐ܆ ܟܕ ܡܢ ܪ̈ܚܡܐ ܘܡܢܗ ܕܗܿܘ ܕܐܚܝܕ ܬܡܢ ܡܫܬܓܫ ܐܢܬ ܘܡܬܛܦܝܣ. ܐܘ ܥܬܝܕ ܐܢܬ ܕܬܫܬܘܬܦ ܠܗ. ܐܘ ܬܫܬܡܪ ܒܥܠܕܒܒܐ: ܐܢ ܗܘ ܕܡܫܬܒܩ ܐܢܬ. ܥܒܿܕ ܡܕܝܢ ܐܟ ܚܝܠܟ܆ ܘܚܢܢ ܗܪܟܐ ܐܟ ܕܡܨܝܢܢ ܥܒܿܕܝܢܢ ܕܠܐ ܠܐܠܗܐ ܬܛܪܐ. ܘܐܢܬ ܠܟ ܪ̈ܘܪܒܬܐ ܬܚܣܪ. ܘܠܢ ܚܒܝ̈ܒܝܟ ܬܥܲܝܩ܀ ܟܕ ܗܕܐ ܐܦܘܩܪܣܝܣ ܩܒܠܬ܆ ܫܪܪܬ ܠܒܝ ܕܐܬܛܦܝܣ ܠܩܕܝ̈ܫܐ ܡܠܠܘܢ. ܐܘ ܠܗܠܝܢ ܕܡܛܥܝܢ. ܘܠܡܪܢ ܘܦܪܘܩܢ ܐܬܟܫܦܬ. ܕܠܐ ܢܗܡܐ ܡܢܝ. ܗܿܘ ܕܒܪ̈ܚܡܘܗܝ ܐܦܩܢܝ ܡܢ ܚܫܘܟܐ ܘܛܠܠ̈ܐ ܕܡܘܬܐ. ܟܕ ܕܝܢ ܗܠܝܢ ܕܡܢ ܐܢܛܝܘܟܝܐ ܩܫܝܐܝܬ ܣܝܡܝܢ ܗܘܘ ܥܠܝ: ܘܡܢ ܟܠ ܦܪܘܣ ܡܬܚܪܝܢ ܗܘܘ ܕܢܣܒܘܢܢܝ܇ ܐܬܘ ܕܝܢ ܥܡܗܘܢ ܘܩܝܡܝܢ ܗܘܘ ܥܠܝ ܘܗܠܝܢ ܕܡܢ ܐܪܐܒܝܐ ܒܝ̈ܬܝܝ ܘܒܢ̈ܝ ܓܢܣܝ: ܗܠܝܢ ܕܟܕ ܫܡܥܘ ܘܗܘܘ ܒܚܕܘܬܐ: ܐܟ ܥܠܡܝ̈ܐ ܘܕܗܠܝܢ ܕܥܠܡܐ ܡܬܪܥܝܢ ܗܘܘ: ܡܚܕܐ ܪܗܼܛܘ ܠܘܬܝ. ܟܕ ܟܠ ܡܙܝܥܝܢ ܗܘܘ ܘܡܣܪܗܒܝܢ ܠܗܦܘܟܝܐ ܕܝܠܝ ܕܠܐܢܛܝܘܟܝܐ. ܘܟܕ ܐܢܐ ܠܘܬ ܡܪܝܐ ܥܪܩܬ. ܘܕܠܐ ܫܠܝܐ ܢܦܿܠ ܗܘܝܬ ܩܕܡܘܗܝ: ܘܐܒܗ̈ܬܐ ܩܕܝܫ̈ܐ ܡܬܟܬܫܝܢ ܗܘܘ ܥܡܝ ܒܨܠܘ̈ܬܗܘܢ. ܗܘܬ ܡܕܒܪܢܘܬܐ ܐܠܗܝܬܐ ܕܐܟ ܗܕܐ. ܢܦܠܘܢ ܒܟܘܪܗܢܐ ܥܣܩܐ ܘܕܩܪܝܒ ܗܘܐ ܠܩܝܢܕܘܢܘܣ܇ ܗܿܘ ܕܡܬܐܡܪ pb. 51 ܐܡܝܛܪܝܛܐܘܣ ܗܢܘ ܕܝܢ ܦܠܓܘܬ ܬܠܬܐ. ܐܘܟܝܬ ܐܫܬܐ ܬܠܝܬܝܬܐ. ܡܢ ܫܠܝܐ ܬܪ̈ܝܗܘܢ ܦܛܪܐ ܐܦܝܣܩܦܐ ܘܫܠܝܡܘܢ ܩܫܝܫܐ. ܟܕ ܕܝܢ ܐܬܝܕܥ ܠܝ ܟܘܪܗܢܗܘܢ܆ ܐܬܚܙܝܬ ܠܝ ܕܦܐܝܐ ܘܡܘܬܪܐ ܕܐܣܥܘܪ ܐܢܘܢ. ܟܕ ܡܢ ܩܕܝܡ ܥܣܩܐܝܬ ܐܝܬ ܗܘܐ ܠܝ. ܘܐܬܚܿܙܐ ܠܟܠܢܫ. ܟܕ ܕܝܢ ܐܙܠܬ ܠܐܝܟܐ ܕܫܼܪܝܢ ܗܘܘ܆ ܠܒܝܬܐ ܬܡܝܗܐ ܘܚܙܝܐ. ܚܙܝܬ ܠܐܦܝܣܩܘܦܐ ܕܠܘܩܒܠ ܬܪܥܐ ܣܝܡ ܗܘܐ ܘܡܬܦܘܪܪ ܗܘܐ. ܗܿܘ ܕܟܕ ܡܛܠ ܩܪܝܒܘܬܐ ܕܝܠܝ ܫܡܥ. ܘܗܟܢܐ ܟܕ ܡܢ ܐܫܬܐ ܡܫܬܠܗܒ ܗܘܐ ܘܡܬܦܘܪܪ. ܫܘܪ ܘܩܡ ܡܢ ܥܪܣܐ. ܟܕ ܩܥܿܐ ܘܐܡܿܪ: ܬܐ ܒܫܠܡ ܥܒܕܗ ܕܡܫܝܚܐ. ܒܪܬ ܩܠܐ ܕܝܢ ܕܗܿܘ ܐܡܿܪ ܐܢܐ. ܐܬܪܚܡ ܥܠܝ. ܐܬܪܚܡ ܥܠܝ. ܚܛܝܬ ܒܟ. ܚܛܝܬ ܒܟ. ܒܟ ܐܝܬܝܗܿ ܗܿܝ ܕܐܚܿܐ ܘܕܐܡܘܬ. ܝܕܿܥ ܐܢܐ ܚܬܝܬܐܝܬ ܕܡܛܠܬܟ ܗܠܝܢ ܚܿܐܫ ܐܢܐ܆ ܘܪܓܙܐ ܕܐܠܗܐ ܐܬܐ ܥܠܝ. ܟܐܝܢ ܕܝܢܐ ܕܐܠܗܐ܆ ܠܐ ܣܦܿܩ ܠܝ ܐܒܕܢܐ ܕܝܠܝ ܘܡܬܥܒܪܢܘܬܐ. ܐܠܐ ܐܦ ܠܟ ܗܿܘ ܕܫܦܝܪ ܩܿܐܡ ܩܿܪܐ ܗܘܝܬ܇ ܕܗ̈ܢܝܢ ܟܕ ܗ̈ܢܝܢ ܥܡܝ ܬܚܫ ܘܬܗܘܐ ܟܦܘܪܐ. ܡܬܟܫܦ ܐܢܐ ܠܟ ܡܢ ܝܘܡܐ ܗܢܐ ܠܐ ܬܘܒ ܡܠܙܝܢܢ ܠܟ. ܐܟ ܕܨܿܒܐ ܐܢܬ ܥܒܿܕ܆ ܒܠܚܘܕ ܐܬܟܫܦ ܚܠܦܝ. ܚܐܪ ܐܢܬ ܓܝܪ ܒܫܚܩܢ ܘܒܩܝܢܕܘܢܘܣ. ܒܗܿܘ ܕܒܗ ܐܝܬܝܢ ܬܪ̈ܝܢ. ܘܕܒܗ ܒܣܘܩܐ ܐܚܪܝܐ ܐܝܬܝܢ܀ ܐܢܐ pb. 51 ܕܝܢ ܟܕ ܠܘܬ ܗܠܝܢ ܕܡܬܐܡܪ̈ܢ ܡܬܕܡܪ ܗܘܝܬ ܘܒܬܡܗܐ ܗܘܝܬ. ܘܡܫܐܠ ܗܘܝܬ ܕܡܢܐ ܗܝ ܥܠܬܐ ܕܗܠܝܢ ܦܬܓܡ̈ܐ. ܘܕܫܘܚܠܦܐ ܕܐܟ ܗܟܢ. ܘܫܪܝ ܗܘ ܥܡ ܩܘܛܦܐ ܣܓܝܐܐ ܘܕܡܥ̈ܐ. ܕܡܢ ܠܥܠ ܘܡܢ ܫܘܪܝܐ ܢܫܛܥܐ ܟܠܗ ܡܠܘܐܐ. ܗܿܘ ܕܣܡܬ ܡܛܠ ܛܘܒܬܢܐ ܦܢܘܦܪܦܝܘܣ ܐܦܝܣܩܘܦܐ ܘܡܘܕܝܢܐ. ܗܿܘ ܕܗܿܘܐ ܗܘܐ ܠܗ ܐܒܐ ܕܝܠܗ ܘܪܝܫ ܕܝܪܗ܇ ܕܐܝܟܢܐ ܗܘܐ ܒܣܘܢܗܕܘܣ. ܘܟܕ ܚܙܐ ܡܢ ܫܘܪܝܐ ܬܟܬܘܫܐ ܕܐܦܝܣܩܘ̈ܦܐ ܕܚܠܦ ܫܪܪܐ ܘܡܫܠܡܢܘܬܐ ܘܟܦܘܪܝܐ ܕܒܬܪ ܗܟܢܐ܇ ܘܕܚܒܫ ܢܦܫܗ ܒܝܬ ܡܫܪܝܗ ܘܡܦܝܣ ܗܘܐ ܠܡܪܝܐ. ܘܕܠܐܝܕܐ ܦܠܪܦܘܪܝܐ ܐܫܬܘܝ ܘܓܠܝܢܐ܇ ܘܕܐܝܟܢܐ ܐܬܐ ܠܡܕܝܢܬܗ ܘܐܟܪܙ ܠܗܘܢ ܫܪܪܐ. ܘܟܦܘܪܝܐ ܕܗܘܐ ܦܪܣܝ܇ ܘܕܐܝܟܢܐ ܥܕܡܐ ܠܚܪܬܐ ܟܬܪ ܠܐ ܡܬܪܟܢܢܐ ܘܠܐ ܟܦܘܪܐ ܘܕܗܟܢܐ ܐܫܬܡܠܝ ܒܫܘܒܚܐ ܘܒܣܝܒܘܬܐ ܫܦܝܪܬܐ. ܘܡܛܠ ܢܦܫܗ ܡܟܝܠ ܒܒܗܬܬܐ ܘܒܕܡܥ̈ܐ ܡܬܢܐ ܗܘ ܦܛܪܐ. ܕܐܝܟܢܐ ܐܫܬܕܠ ܡܢ ܪܓܬܐ ܕܐܦܝܣܩܦܘܬܐ. ܘܐܬܛܦܝܣ ܠܒܣܝܠܝܘܣ ܡܛܪܘܦܠܝܛܝܣ ܘܥܒܪ ܥܠ ܗܝܡܢܘܬܐ. ܘܗܘܐ ܫܘܬܦܐ ܕܣܘܢܕܘܣ ܕܗܠܝܢ ܟܦܘܪ̈ܐ܀ ܐܢܐ ܕܝܢ ܟܕ ܗܠܝܢ ܫܡܥܬ ܘܐܬܟܡܪܬ ܒܢܦܫܝ ܘܐܬܒܝܢܬ ܒܪܒܘܬܐ ܕܪ̈ܚܡܘܗܝ ܕܐܠܗܐ ܕܠܘܬ ܡܥܩܘܬܝ pb. 53 ܡܢ ܒܬܪ ܥܢܝܢܐ. ܡܚܕܐ ܪܗܛܬ ܠܘܬ ܩܕܝܫܬܐ ܩܝܡܬܐ. ܟܕ ܢܛܪܬ ܙܒܢܐ ܕܫܠܝܐ. ܘܢܦܠܬ ܩܕܡ ܡܕܒܚܐ ܘܓܓܘܠܬܐ ܣܓܝܕܬܐ. ܥܡ ܕܡܥ̈ܐ ܡܪ̈ܝܪܬܐ ܕܡܢ ܥܘܡܩܐ ܕܠܒܝ. ܩܥܿܝܬ ܘܐܡܿܪܬ. ܡܪܝܐ ܡܢܘ ܐܝܬܝ ܐܢܐ. ܝܚܛܐ ܘܟܠܒܐ ܕܣܪܐ: ܬܘܠܥܐ܇ ܒܝܬ ܡܡܪܡܪܢܐ. ܡܥܪܬܐ ܕܠܣܛܝ̈ܐ܇ ܩܒܪܐ ܕܡܿܟܠܫ܆ ܕܗܟܢܐ ܐܫܕܬ ܥܠܝ ܣܘܓܐܐ ܕܡܪܚܡܢܘܬܟ ܘܕܬܕܡܪ̈ܬܟ ܕܐܣܓܝܬ ܘܥܒܕܬ ܐܟ ܪ̈ܚܡܝܟ ܘܚܝܘܣܬܢܘܬܟ. ܕܗܟܢܐ ܗܠܝܢ ܕܡܛܠ ܗܕܐ ܐܬܘ܇ ܘܨܿܒܝܢ ܘܒܟܠܦܘܪܣܝܢ ܡܬܛܟܢܝܢ ܘܥܨܝܢ ܘܡܚܦܛܝܢ ܠܝ ܕܟܦܘܪܐ ܐܗܘܐ. ܘܐܦܠ ܡܢ ܣܒܪܐ ܕܒܟ ܘܡܢ ܬܐܪܬܐ ܛܒܬܐ. ܕܗܼܢܘܢ ܢܗܘܘܢ ܠܝ ܫܘܪܪܐ ܘܒܢܝܢܐ ܘܙܘܗܪܐ. ܡܢܐ ܗܟܝܠ ܐܦܪܘܥ ܠܡܪܝܐ ܐܠܗܐ ܕܝܠܝ. ܡܛܠ ܟܠܗܝܢ ܕܥܒܕܬ ܥܡ ܥܒܕܟ. ܡܛܠ ܗܕܐ ܡܩܪܒ ܐܢܐ ܠܟ ܗܿܝ ܕܕܘܝܕ ܟܕ ܐܡܿܪ ܐܢܐ. ܛܒ ܡܘܕܐ ܐܢܐ ܠܡܪܝܐ ܒܦܘܡܝ. ܘܒܡܨܥܬܐ ܕܣܓܝ̈ܐܐ ܐܫܒܚܝܘܗܝ. ܡܛܠ ܕܩܡ ܡܢ ܝܡܝܢܗ ܕܒܝܫܐ. ܕܢܦܪܩܝܘܗܝ ܡܢ ܪ̈ܕܘܦܐ܀ ܗܠܝܢ ܬܪ̈ܬܝܗܝܢ ܬܫܥܝ̈ܬܐ ܕܕܚܝ̈ܠܢ ܘܫܪ̈ܝܪܢ܆ ܕܟܐܢܐ ܐܬܚܫܒܬ ܛܒ ܘܕܣܓܝ ܐܠܨܐ. ܕܐܟ ܕܒܩܝܡܬܐ ܕܡܘܣܝܐ ܩܕܡ ܟܠܢܫ ܐܣܝܡ܆ ܠܝܕܥܬܐ ܕܟܠܗܘܢ ܕܚ̈ܠܝ ܐܠܗܐ ܘܛܢܢ̈ܐ ܕܗܝܡܢܘܬܐ ܬܪܝܨܬ ܫܘܒܚܐ܆ pb. 54 ܘܢܬܛܦܝܣܘܢ ܡܢ ܟܠܗܿ ܢܦܫܐ ܘܕܠܐ ܦܘܫܟܐ܇ ܕܡܢ ܠܥܠ ܡܢ ܫܡܝܐ ܢܦܝܩ ܓܙܪ ܕܝܢܐ ܕܬܬܚܪܡ ܣܘܢܕܘܣ ܕܟܠܩܝܕܘܢܐ܆ ܘܟܠܗܝܢ ܗܠܝܢ ܕܐܣܬܥܪ̈ܝܢ ܒܗܿ. ܘܟܠܗܘܢ ܗܠܝܢ ܕܥܡܗܘܢ ܡܬܪܥܝܢ ܗܢܝܢ ܟܕ ܗܢܝܢ ܘܡܠܦܝܢ܀ ܡܛܠ ܕܝܢ ܕܠܐܝܣܘܪܝܐ ܐܬܥܗܕܬ. ܕܢܩܿܦܐ ܐܝܬܝܗܿ ܕܠܫܘܪܪܐ ܕܗܠܝܢ ܕܐܬܐܡܪ ܐܘܣܦ܆ ܐܦ ܗܕܐ ܬܫܥܝܬܐ܇ ܗܿܝ ܕܛܘܒܢܐ ܐܣܛܦܢܘܣ܇ ܗܿܘ ܕܗܘܐ ܪܝܫ ܕܝܪܐ ܕܕܝܪܐ ܕܡܬܐܡܪܐ ܕܛܐܓܘܢ. ܕܐܝܬܝܗܿ ܒܣܠܘܩܝܐ ܕܐܝܣܘܪܝܐ. ܗܿܘ ܕܗܘܐ ܒܙܒܢ ܛܢܢܐ ܩܕܡܝܐ ܕܗܝܡܢܘܬܐ ܬܪܝܨܬ ܫܘܒܚܐ܇ ܘܪܝܫܐ ܕܨܡܚܐ ܗܢܐ ܕܗܫܐ ܐܢܗܪ ܩܕܡܐܝܬ ܒܐܝܣܘܪܝܐ: ܘܡܢ ܬܡܢ ܒܟܠܗܿ ܡܕܢܚܐ. ܗܿܘ ܕܒܗ ܒܐܓܘܢܐ ܐܫܬܒܚ ܘܐܫܬܡܠܝ. ܘܐܬܟܬܫ ܬܟܬܘܫܐ ܫܦܝܪܐ ܘܫܡܠܝ ܪܗܛܗ܆ ܘܡܛܠ ܗܠܝܢ ܫܩܠ ܟܠܝܠܐ ܟܐܢܐܝܬ܀

23 §23

ܟܓ.- ܐܝܬܝܗܿ ܕܝܢ ܬܫܥܝܬܐ ܕܐܟ ܗܕܐ܆ ܪܚܡܗ ܘܚܒܝܒܗ ܐܡܿܪ ܐܝܿܬܝ ܗܘܝܬ ܕܒܣܝܠܝܘܣ. ܗܿܘ ܕܗܘܐ ܐܦܝܣܩܘܦܐ ܒܣܠܘܩܝܐ ܕܐܝܣܘܪܝܐ. ܡܣܬܒܪ ܗܘܐ ܓܝܪ ܕܫܦܝܪܐܝܬ ܘܡܠܝܠܐܝܬ ܡܬܪܓܡ ܗܘܐ. ܗܿܘ ܕܟܕ ܐܬܟܢܫܬ ܣܘܢܕܘܣ ܕܟܠܩܝܕܘܢܐ ܐܬܟܢܫ ܒܗܿ ܐܦ ܗܘ: ܥܡ ܐܚܪ̈ܢܐ ܐܦܝܣܩܘ̈ܦܐ ܕܡܢ ܐܝܣܘܪܝܐ ܕܬܚܝܬ ܫܘܠܛܢܗ. ܗܿܘ ܕܩܕܡ ܗܟܢܐ ܡܣܬܒܪ ܗܘܐ ܛܢܢܐ ܘܐܪܬܐܕܟܣܐ ܚܬܝܬܐ. pb. 55 ܟܕ ܕܝܢ ܐܬܝܗܒ ܒܟܠ ܕܘܟ ܘܐܫܬܡܥ ܟܦܘܪܝܐ ܕܗܘܐ ܬܡܢ܆ ܠܟܠܢܫ ܬܡܗܐ ܐܚܕ ܗܘܐ ܘܬܕܡܘܪܬܐ. ܘܠܐ ܡܫܪܝܢ ܗܘܘ ܕܐܦ ܒܣܝܠܝܘܣ ܟܦܪ ܘܐܫܬܓܡ ܒܡܫܠܡܢܘܬܐ ܕܗܠܝܢ ܐܚܪ̈ܢܐ. ܘܡܢ ܩܕܡ ܟܠܗܘܢ ܠܝ ܕܐܝܬܝ ܗܘܝܬ ܪܚܡܗ ܘܡܩܠܣܢܗ. ܟܕ ܕܝܢ ܠܐܣܘܪܝܐ ܗܦܟ: ܘܥܬܝܕ ܗܘܐ ܕܢܥܘܠ ܡܛܪܦܘܠܝܛܝܣ. ܣܓܝ̈ܐܐ ܡܬܦܫܟܝܢ ܗܘܘ܆ ܟܕ ܕܝܢܝܢ ܗܘܘ ܕܠܐ ܢܫܬܘܬܦܘܢ ܥܡܗ. ܥܕܡܐ ܕܢܣܒܘܢ ܦܠܪܘܦܘܪܝܐ ܡܫܡܠܝܐܝܬ ܡܛܠ ܫܪܪܐ. ܕܥܡܗܘܢ ܐܝܬܝ ܗܘܝܬ. ܘܐܢ ܐܡܿܪ ܛܘܒܢܐ ܐܣܛܦܢܘܣ. ܟܕ ܐܝܬܝ ܗܘܝܬ ܥܕܟܝܠ ܥܠܡܝܐ. ܘܡܬܦܫܟ ܗܘܝܬ ܘܡܦܝܣ ܗܘܝܬ ܠܐܠܗܐ ܒܗܝܡܢܘܬܐ ܘܒܠܒܐ ܦܫܝܛܐ: ܕܢܘܕܥ ܫܪܪܐ ܕܡܛܠ ܗܕܐ ܠܡܣܟܢܘܬܝ. ܘܡܚܕܐ ܒܗ ܒܠܠܝܐ ܗܿܘ܆ ܐܣܒܪܬ ܕܚܙܝܬܗ ܠܗ ܠܒܣܝܠܝܘܣ ܕܗܦܟ܆ ܘܕܟܠܗ ܥܡܐ ܪܗܛ ܠܐܘܪܥܗ. ܘܒܐܝܩܪܐ ܘܬܫܒܘܚܬܐ ܘܩܘܠܣܐ ܐܥܠܘܗܝ ܠܥܕܬܐ. ܘܟܕ ܥܬܝܕ ܗܘܐ ܟܢܫܐ ܕܥܡܐ ܣܓܝܐܐ ܕܢܫܬܡܠܐ: ܘܗܘ ܩܿܐܡ ܗܘܐ ܒܡܕܒܚܐ ܒܩܪܝܒܘܬܐ ܕܟܠܗܿ ܡܕܝܢܬܐ: ܥܡ ܢܫ̈ܐ ܘܒܢܝ̈ܐ. ܥܠ ܡܢ ܬܪ̈ܥܐ ܡܥܪ̈ܒܝܐ ܕܥܕܬܐ܆ ܐܢܫ ܕܚܝܠܐ ܒܚܙܬܐ ܘܪܡܐ ܘܡܫܒܚܐ. ܘܟܕ ܦܣܩ ܠܥܡܐ. ܫܩܠ ܚܐܦܐ ܥܠ ܒܣܝܠܝܘܣ. ܕܩܿܐܡ ܗܘܐ ܘܥܬܝܕ ܕܨܠܘܬܐ ܢܫܡܠܐ. ܘܐܪܡܝ ܨܒܥܐ ܕܐܝܕܗ ܕܝܡܝܢܐ pb. 56 ܒܦܘܡܗ ܘܐܗܦܟ ܠܘܬ ܦܪܨܘܦܗ. ܘܗܟܢܐ ܡܢܬܦ ܗܘܐ ܘܓܐܪ ܗܘܐ ܠܗ. ܟܕ ܐܢܫ ܠܐ ܟܿܠܐ ܗܘܐ ܘܠܐ ܡܡܪܚ ܗܘܐ ܕܢܨܘܪ. ܘܐܦܩܗ ܡܢ ܥܕܬܐ ܘܛܪܕܗ ܘܫܕܝܗܝ. ܐܝܬܝܗܿ ܗܘܬ ܕܝܢ ܗܕܐ܆ ܢܒܝܘܬܐ ܕܗܠܝܢ ܕܥܬܝܕܢ ܗܘ̈ܝ ܕܢܗܘ̈ܝܢ. ܒܩܛܣܛܣܝܣ ܕܗܫܐ ܗܘܬ ܡܢ ܩܕܝܫܐ ܘܛܘܒܬܢܐ ܣܐܘܪܐ. ܪܝܫ ܐܦܝܣ̈ܩܘܦܐ ܕܪܒܬ ܡܕܝ̈ܢܬܐ ܐܢܛܝܘܟܝܐ. ܗܐ ܓܝܪ ܐܫܬܬܩ ܫܡܗ ܕܒܣܝܠܝܘܣ ܘܐܬܠܚܝ ܡܢ ܕܝܘ̈ܦܛܟܘ. ܘܗܘܐ ܡܣܠܝܐ ܡܢ ܐܠܗܐ ܘܡܢ ܩܕܝܫ̈ܐ. ܡܢ ܗܪܟܐ ܢܣܝܡ ܒܠܐ. ܕܐܦܢ ܐܓܪ ܪܘܚܗ ܐܠܗܐ: ܐܠܐ ܗܫܐ ܡܢ ܒܬܪ ܙܒܢܐ ܕܐܟ ܗܢܐ. ܗܐ ܗܘܐ ܡܦܩܢܗ ܕܗܢܐ ܚܙܘܐ. ܒܪܡ ܡܢ ܟܕ ܗܘܐ ܟܦܘܪܝܐ ܒܣܘܢܕܘܣ ܕܟܠܩܝܕܘܢܐ. ܗܠܝܢ ܕܥܬܕܘܗܝ ܡܢ ܗܿܘ ܙܒܢܐ. ܫܕ̈ܝܝ ܠܒܪ ܐܝܬܝܗܘܢ ܘܡܚܪ̈ܡܐ܆ ܡܢ ܐܠܗܐ ܘܡܢ ܒܢܝ̈ܢܫܐ. ܐܡܿܪ ܣܒܐ ܐܣܛܦܢܐ ܗܝܕܝܢ ܛܠܝܐ ܐܝܬܝ ܗܘܝܬ ܘܥܠܡܝܐ. ܘܠܐ ܡܢܣܝ ܒܚܬܝܬܘܬܐ ܕܕܘܓܡ̈ܛܐ ܐܠܗ̈ܝܐ. ܘܟܕ ܚܙܝܬ ܠܟܠܗܘܢ ܕܡܬܬܛܥܝܢ ܡܢܗ: ܡܨܢܥܐ ܗܘܐ ܓܝܪ ܒܗܿܝ ܕܢܐܡܪ: ܘܐܣܬܒܪ ܕܠܟܠܢܫ ܡܦܝܣ ܗܘܐ ܕܬܪܝܨܐܝܬ ܡܡܠܠ: ܟܕ ܡܟܣܐ ܒܗܬܬܗ ܘܪܘܫܥܗ܆ ܐܦ ܐܢܐ ܐܫܬܓܡܬ ܥܡ ܟܠܗܘܢ ܘܐܫܬܘܬܦܬ ܥܡܗ. pb. 57 ܟܕ ܗܫܐ ܕܝܢ ܐܫܬܘܝܬ ܐܕܥ ܢܘܗܪܐ ܕܫܪܪܐ. ܘܡܫܘܬܦܐ ܐܗܿܘܐ ܒܩܘܪܒܢܐ ܕܐܪ̈ܬܐܕܟܣܘ. ܐܬܥܗܕܬ ܠܗܿܘ ܚܙܘܐ. ܘܡܢܗ ܐܟ ܕܒܣܘܓܐܐ ܩܒܠܬ ܦܠܝܪܘܦܘܪܝܐ ܫܪܝܪܬܐ܀

24 §24

ܟܕ.- ܐܘܣܦ ܕܝܢ ܘܗܕܐ ܡܛܠܬܗ. ܐܡܪ ܠܝ ܓܝܪ. ܘܐܟ ܕܠܚܒܝܒܐ ܘܪܚܡܿܐ ܓܠܐ ܠܝ: ܕܐܢܫ ܡܢ ܥܒܕܘܗ̈ܝ ܕܡܫܝܚܐ ܡܢ ܩܕܡ ܙܒܢܐ. ܚܙܐ ܚܙܘܐ ܕܐܟ ܗܢܐ. ܟܕ ܐܡܿܪ ܡܛܠ ܡܣܟܢܘܬܝ. ܣܒܿܪ ܗܘܝܬ ܐܡܿܪ ܕܚܙܿܐ ܗܘܝܬ ܒܝܬܐ ܪܒܐ. ܕܐܝܬ ܠܗ ܛܘܦܣܐ ܕܥܕܬܐ. ܘܒܗ ܣܘܓܐܐ ܕܟܘܪ̈ܣܘܬܐ. ܘܒܟܘܪ̈ܣܘܬܐ ܐܦܝܣ̈ܩܘܦܐ ܣܓܝ̈ܐܐ. ܘܕܐܢܬ ܡܢ ܫܠܝܐ ܥܿܐܠ ܗܘܝܬ. ܟܕ ܡܛܠܬܝ ܐܡܿܪ ܗܘܐ. ܘܟܕ ܚܙܝܬ ܐܢܘܢ ܕܝܬܒܝܢ ܩܥܝܬ ܘܐܡܪܬ. ܗܐ ܟܦܘܪ̈ܐ ܘܡܪ̈ܚܩܢܐ. ܘܫܩܠܬ ܦܪܓܠܐ ܘܛܪܕܬ ܘܐܦܩܬ ܐܢܘܢ. ܘܟܘܪ̈ܣܘܬܗܘܢ ܗܦܟܬ. ܘܗܠܝܢ ܟܕ ܒܟܘܚܕܐ ܡܬܢܐ ܗܘܐ ܗܘ ܐܒܐ ܐܣܛܦܢܐ. ܘܡܫܐܠ ܗܘܐ ܕܢܐܠܦ ܡܢܝ. ܡܢܐ ܐܪܐ ܐܝܬܝܗܿ ܗܕܐ ܐܬܐ. ܘܐܢܐ ܐܡܿܪܬ ܕܠܐܠܗܐ ܝܕܝܥܐ. ܒܪܡ ܕܝܢ ܚܙܘܐ ܕܚܝܠܐ ܐܝܬܘܗܝ ܘܠܘ ܒܛܝܠܐ. ܐܟ ܕܝܢ ܕܡܦܩܢܐ ܚܘܝ: ܐܘܚܕܢܐ ܕܗܫܐ܆ ܕܡܢܗ ܘܒܐܝ̈ܕܘܗܝ ܗܝܡܢܘܬܐ ܬܪܝܨܬ ܫܘܒܚܐ ܘܡܣܠܝܢܘܬܐ ܘܚܪܡܐ ܕܐܦܝܣܩ̈ܘܦܐ ܗܪ̈ܝܛܝܩܘ. ܡܫܘܕܥ ܚܙܘܐ܀

25 §25

ܟܗ.- ܫܡܥ ܘܐܚܪܬܐ ܐܦܘܦܣܝܣ ܕܢܦܩܬ ܡܢ ܫܡܝܐ. ܥܠ ܣܘܢܗܕܘܣ pb. 58 ܕܟܠܩܝܕܘܢܐ. ܕܗܿܝ ܕܗܘܐ ܫܡܘܥܗܿ܆ ܗܘ ܣܗܕܗܿ ܘܟܪܘܙܗܿ ܛܘܒܬܢܐ ܪܘܡܢܐ ܗܿܘ ܕܒܟܠ ܕܘܟ ܡܬܬܙܥܩ. ܗܿܘ ܕܗܘܐ ܪܝܫ ܕܝܪܐ ܘܡܕܒܪܢܐ ܕܕܝܪܐ ܪܒܬܐ ܕܐܝܬܝܗܿ ܗܘܬ ܠܐܦܝ ܬܩܘܐ ܩܪܝܬܐ܇ ܕܣܝܡܐ ܠܬܝܡܢܐ ܡܢ ܐܘܪܫܠܡ ܐܟ ܚܡܫܬܥܣܪ ܡܝ̈ܠܐ. ܕܒܗܿ ܠܥܠ ܡܢ ܫܬܡ̈ܐܐ ܕܝܪ̈ܝܐ ܐܝܬ ܗܘܐ ܒܙܒܢܐ ܗܿܘ. ܕܡܬܪܥܝܢ ܗܘܘ ܡܢܗ ܕܩܕܝܫܐ. ܘܠܒܝܟܝܢ ܗܘܘ ܫܠܝܐ. ܟܕ ܓܝܪ ܒܟܠܗܿ ܡܕܢܚܐ ܐܫܬܡܥ ܟܦܘܪܝܐ ܘܥܒܘܪܝܐ ܕܝܘܒܢܠܐܘܣ ܘܕܗܠܝܢ ܕܐܬܟܢܫܘ ܒܟܠܩܝܕܘܢܐ: ܕܡܬܐܡܪܝܢ ܗܘܘ ܐܦܝܣܩܘ̈ܦܐ. ܒܐܒܠܐ ܠܐ ܡܣܬܝܟܢܐ ܘܒܥܩܬܐ ܝܩܝܪܬܐ ܐܬܬܚܕܘ ܡܗܝ̈ܡܢܐ ܕܒܟܠ ܕܘܟ. ܘܐܟ ܕܒܣܘܓܐܐ ܬܓܡܐ ܩܕܝܫܐ ܕܕܝܪ̈ܝܐ. ܘܟܕ ܢܦܩܘܢ ܡܢ ܕܝܪ̈ܬܗܘܢ. ܪܗܛܘܢ ܐܟ ܕܨܝܕ ܐܒܐ ܕܓܘܐ ܘܠܒܝܫ ܠܐܠܗܐ. ܘܕܒܟܠ ܙܒܢ ܩܿܐܡ ܩܕܡ ܐܠܗܐ. ܐܡܿܪ ܐܢܐ ܕܝܢ ܩܕܝܫܐ ܪܘܡܢܐ ܘܡܦܝܣܝܢ ܗܘܘ ܠܗ ܕܒܕܡܘܬܐ ܕܐܠܝܐ ܢܒܝܐ ܢܛܢ ܛܢܢܐ ܕܫܘܐ ܠܡܪܝܐ. ܘܠܐ ܢܗܡܐ ܒܗܝܡܢܘܬܐ ܕܡܫܠܡܐ: ܘܒܪܘܫܥܐ ܕܐܚܝܕ. ܟܕ ܡܥܗܕܝܢ ܠܗ ܗܠܝܢ ܕܫܡܥܘ ܡܢ ܟܦܘܪܝܐ ܕܝܘܒܢܠܐܘܣ. ܟܕ ܥܬܝܕ ܗܘܐ ܕܢܐܙܠ ܠܣܘܢܕܘܣ. pb. 59 ܘܡܣܗܕ ܗܘܐ ܠܟܠܢܫ. ܘܐܡܿܪ ܗܘܐ. ܕܡܢ ܕܫܿܠܡ ܠܛܘܡܣܐ ܗܢܐ: ܥܡ ܣܝܡܘܢ ܚܪܫܐ ܘܝܗܘܕܐ ܡܫܠܡܢܐ ܐܝܬ ܠܗ ܡܢܬܐ. ܘܐܟ ܝܗ̈ܘܕܝܐ ܙܕܩ ܠܗ ܕܢܩܒܠ ܓܙܘܪܬܐ. ܘܟܕ ܗܘ ܡܬܐܠܨ ܗܘܐ ܡܢ ܣܘܓܐܐ ܕܕܝܪ̈ܝܐ ܩܕܝ̈ܫܐ: ܘܡܬܬܒܥ ܗܘܐ ܕܢܦܘܩ ܡܢ ܕܝܪܗ ܘܥܡܗܘܢ ܢܛܢ: ܘܟܠ ܥܡ̈ܠܐ ܢܩܒܠ ܚܠܦ ܫܪܪܐ. ܐܦܝܣ ܐܢܘܢ ܟܕ ܐܡܿܪ. ܟܬܪܘܢ ܠܝ ܩܠܝܠ ܝܘܡ̈ܬܐ. ܘܡܢ ܒܬܪ ܠܡ ܗܠܝܢ ܐܬܝܢ ܐܢܬܘܢ ܠܘܬܝ. ܘܗܿܘ ܡܕܡ ܕܦܠܪܘܦܪܝܣܐ ܥܒܿܕ ܠܝ ܡܪܝܐ. ܥܒܿܕ ܐܢܐ. ܘܟܕ ܢܦܩ ܡܢ ܩܢܘܒܝܘܢ ܕܝܠܗ ܘܒܠܚܘܕܘܗܝ ܐܬܡܢܥ ܠܡܕܒܪܐ: ܘܝܘ̈ܡܬܐ ܥܣܪܐ ܘܠܝ̈ܠܘܬܐ ܫܡܠܝ ܟܕ ܢܦܿܠ ܩܕܡ ܡܪܝܐ. ܘܨܿܒܐ ܗܘܐ ܕܢܬܓܠܐ ܠܗ ܨܒܝܢܗ ܘܕܝܢܗ ܡܛܠ ܗܠܝܢ ܕܗܘ̈ܝ ܒܟܠܩܝܕܘܢܐ ܡܛܠ ܛܒ̈ܐ ܡܫܚ̈ܠܦܐ ܕܡܬܗܦܟܝܢ ܗܘܘ ܒܟܠ ܕܘܟ: ܕܡܢ ܐܢܫ̈ܝܢ ܡܿܢ ܡܣܬܠܝܢ ܗܘܘ ܘܒܝܫܐܝܬ ܡܬܐܡܪܝܢ ܗܘܘ: ܡܢ ܐܢܫܝ̈ܢ ܕܝܢ ܡܬܩܒܠܝܢ ܗܘܘ: ܘܡܢ ܒܬܪ ܫܘܠܡܐ ܕܝܘ̈ܡܬܐ ܥܣܪܐ. ܫܡܥ ܒܪܬ ܩܠܐ ܕܐܡܪܐ ܡܢ ܫܡܝܐ. ܙܠ ܗܝܡܢ ܐܟ ܕܥܼܡܕܬ ܒܗܝܡܢܘܬܐ ܕܬܠܬܡܐܐ ܘܬܡܢܬܥܣܪ ܘܡܬܦܪܩ ܐܢܬ. ܘܟܕ ܢܣܒ ܦܠܪܦܪܝܐ ܡܫܡܠܝܬܐ ܗܦܟ ܠܩܢܘܒܝܘܢ ܕܝܠܗ. ܘܓܠܐ ܠܐܢܫܝܢ ܢܟܦ̈ܐ pb. 60 ܘܣܒ̈ܐ ܕܝܕܥܬܐ ܕܩܢܘܒܝܘܢ ܕܝܠܗ ܗܠܝܢ ܕܚܙܘܐ. ܗܢܘܢ ܕܝܢ ܐܡܪܘ ܠܘܬܗ. ܘܗܢܘܢ ܗܠܝܢ ܕܐܬܟܢܫܘܢ ܒܟܠܩܝܕܘܢܐ. ܗܝ ܗܕܐ ܡܫܪܪܝܢ ܗܘܘ ܗܝܡܢܘܬܐ ܕܬܠܬܡܐܐ ܘܬܡܢܬܥܣܪ. ܘܠܗ ܢܩܿܦܝܢ ܐܟ ܕܠܡܐܡܪ: ܘܒܕܓܘܢ ܗܘ ܬܚܘܡܐ ܕܬܠܬܡܐܐ ܘܬܡܢܬܥܣܪ. ܩܕܡܘ ܣܡܘ ܒܬܚܘܡܗܘܢ ܠܫܘܕܠܐ ܘܠܛܘܥܝܝ ܕܣܓܝ̈ܐܐ. ܘܬܘܒ ܐܙܠ ܠܡܕܒܪܐ ܘܒܠܚܘܕܘܗܝ. ܘܟܕ ܣܒܠ ܗܘ ܟܕ ܗܘ ܥܡܠܐ ܘܥܒܿܕ ܗܘܐ ܥܢܘܝܘܬܐ. ܡܬܟܫܦ ܗܘܐ ܠܡܪܝܼܐ. ܕܢܣܒ ܦܠܪܘܦܘܪܝܐ ܡܫܡܠܝܬܐ. ܘܐܬܐ ܠܗ ܩܠܐ ܕܐܡܿܪ ܙܠ. ܠܗܠܝܢ ܩܦ ܘܠܡܠܦܢܘܬܗܘܢ ܘܒܡܫܠܡܢܘܬܗܘܢ ܟܬܪ. ܠܦܛܪܐ ܪܝܫ ܐܦܝܣܩ̈ܘܦܐ ܕܐܠܟܣܢܕܪܝܐ. ܘܠܓܪܝܓܪܝܘܣ ܕܢܐܩܣܪܝܐ: ܗܿܘ ܪܒܐ ܘܥܒܿܕ ܬܕܡܪ̈ܬܐ. ܘܠܝܘܠܝܣ ܕܪܗܘܡܐ. ܘܠܐܬܢܣܝܘܣ ܘܠܒܣܝܠܝܘܣ ܘܠܓܪܝܓܪܝܘܣ ܘܠܝܘܚܢܢ ܕܩܘܣܛܢܛܝܢܐܦܘܠܝܣ ܘܠܩܘܪܝܠܘܣ ܘܠܩܠܣܛܝܢܘܣ ܘܠܕܝܣܩܪܘܣ. ܘܟܕ ܩܒܿܠ ܦܠܪܘܦܘܪܝܐ ܡܫܡܠܝܬܐ. ܥܡ ܚܕܘܬܐ ܗܦܟ ܠܕܝܪܗ. ܘܟܕ ܠܗܘܢ ܠܗܠܝܢ ܩܕܝܫ̈ܐ ܐܡܪ ܫܡܥ ܡܢܗܘܢ ܕܐܦ ܗܠܝܢ ܟܦܘܪ̈ܐ ܡܣܬܒܪܝܢ ܕܠܗܠܝܢ ܢܩܿܦܝܢ. ܟܕ ܡܦܫܩܝܢ ܕܓܠܐܝܬ ܡܠܦ̈ܢܘܬܗܘܢ. ܘܡܛܥܝܢ ܠܦܫܝ̈ܛܐ. ܡܕܝܢ ܙܕܿܩ ܕܦܠܪܘܦܪܝܐ ܢܗܝܪܬܐ ܘܠܐ ܡܬܦܫܟܢܝܬܐ ܬܫܐܠ ܡܢ ܪ̈ܚܡܘܗܝ ܕܐܠܗܐ. ܕܐܢ ܗܘ pb. 61 ܕܒܝܫܐܝܬ ܐܬܪܥܝܬ ܣܘܢܕܘܣ ܕܟܠܩܝܕܘܢܐ ܐܘ ܐܢ ܛܒܐܝܬ. ܘܟܕ ܢܦܼܩ ܠܡܕܒܪܐ ܘܐܬܚܫܚ ܒܢܙܝܪܘܬܐ ܘܟܘܫܐ ܚܝܠܬܢܐ. ܒܨܠܘܬܐ ܥܡ ܕܡܥ̈ܐ ܡܪ̈ܝܪܬܐ ܘܬܐܢܚ̈ܬܐ. ܫܿܐܠ ܗܘܐ ܡܢ ܪ̈ܚܡܘܗܝ ܕܡܪܝܐ ܐܦܘܩܪܝܣܝܣ ܓܠܝܬܐ ܘܕܠܐ ܦܘܫܟܐ. ܘܐܬܬ ܠܗ ܕܐܟ ܗܕܐ. ܚܙܐ ܒܦܠܓܗ ܕܝܘܡܐ ܛܘܡܣܐ ܚܕ ܪܒܐ ܕܢܿܚܬ ܡܢ ܫܡܝܐ. ܘܟܬܝܒܢ ܒܗ ܗܠܝܢ. ܟܦܪܘܢ ܗܠܝܢ ܕܒܟܠܩܕܘܢܐ. ܥܒܪܘܢ. ܥܒܪܘܢ. ܘܝܐ ܠܗܘܢ ܘܚܪܡܐ. ܘܟܕ ܗܕܐ ܦܠܪܘܦܪܝܐ ܫܩܠ ܡܢ ܐܠܗܐ ܗܘ ܛܘܒܢܐ ܟܠܗ ܗܢܐ ܐܬܢܒܪܫ ܒܛܢܢܐ ܚܠܦ ܫܪܪܐ ܘܗܝܡܢܘܬܐ ܬܪܝܨܬ ܫܘܒܚܐ. ܐܝܟܢܐ ܕܢܪܦܐ ܕܝܪܗ ܘܟܢܫܐ ܣܓܝܐܐ ܕܐܚ̈ܐ. ܒܣܝܒܘܬܐ ܥܡܝܩܬܐ ܘܡܚܝܠܬܐ ܕܦܓܪܐ. ܘܢܐܙܠ ܥܡ ܗܠܝܢ ܕܐܬܘ ܠܘܬܗ ܡܢ ܐܪܐܒܝܐ ܘܡܢ ܦܠܣܛܝܢܐ ܕܝܪ̈ܝܐ ܩܕܝܫ̈ܐ ܘܛܢܢ̈ܐ. ܘܩܕܡܐܝܬ ܡܿܢ ܐܬܚܫܒܘ. ܕܢܐܪܥܘܢ ܠܦܪܒܛܝܣ ܝܘܒܢܠܐܘܣ ܟܕ ܦܢܐ ܒܪܡܘܬܐ ܣܓܝܐܬܐ ܘܗܕܪܐ ܕܡܢ ܡܿܠܟܐ ܡܢܗܿ ܕܣܘܢܕܘܣ ܕܛܠܘ̈ܡܐ. ܘܕܢܢܣܘܢ ܕܒܡ̈ܠܟܐ ܘܒܦܝ̈ܣܐ ܕܡ̈ܠܐ ܘܒܡ̈ܠܐ ܪ̈ܟܝܟܬܐ: ܢܦܢܘܢܝܗܝ ܡܢ ܨܒܝܢܐ ܒܝܫܐ. ܘܢܗܦܟܘܢܝܗܝ ܠܬܪܝܨܘܬܐ ܕܕܘܓܡ̈ܛܐ. ܟܕ ܕܝܢ ܐܫܟܚܘܗܝ ܠܐ ܡܬܛܦܝܣܢܐ. ܘܕܬܟܝܠ ܥܠ ܡܠܟܐ ܡܬܚܒܠܢܐ. ܘܕܦܣܝܩ ܠܗ ܕܠܗ ܢܫܦܪ ܡܠܠܘܢ ܐܘ ܠܐܠܗܐ. ܟܕ ܒܐܦܘ̈ܗܝ ܐܚܪܡܘܗܝ ܟܠܗ ܟܢܫܐ ܕܩܕܝ̈ܫܐ ܗܦܟܘܢ pb. 62 ܠܐܘܪܫܠܡ. ܘܐܬܟܢܫܘܢ ܬܡܢ ܐܟ ܕܠܡܐܡܪ ܟܠܗܘܢ ܕܝܪ̈ܝܐ ܩܕܝܫ̈ܐ ܘܥܠܡ̈ܝܐ ܡܢ ܟܠ ܡܕܝ̈ܢܢ. ܘܐܦܝܣܩ̈ܘܦܐ ܐܪ̈ܬܘܕܟܣܘ. ܗܠܝܢ ܕܦܫܘ ܗܘܘ ܘܠܐ ܣܠܩܘ ܠܣܘܢܕܘܣ. ܘܩܕܡܐܝܬ ܡܿܢ ܒܚܪܡܐ ܟܬܝܒܐ ܠܚܠܫܐ ܝܘܒܢܠܐܘܣ ܐܪܡܝܘ ܘܫܕܘ ܘܐܟܪܙܘ. ܘܡܢ ܒܬܪ ܗܕܐ ܒܦܣܝܦܘܣ ܕܓܘܐ. ܩܪܘ ܐܦܝܣܩܘܦܐ ܛܢܢܐ ܘܚܣܝܐ ܕܡܨܒܬ ܗܘܐ ܒܟܠܗܿ ܡܝܬܪܘܬܐ ܫܠܝܚܝܬܐ. ܐܡܪ ܐܢܐ ܕܝܢ ܛܘܒܬܢܐ ܬܐܘܕܣܝܣ ܠܝܥܩܘܒ ܕܬܪܝܢ ܘܐܚܘܗܝ ܕܡܪܢ܆ ܘܪܝܫܐ ܘܡܗܕܝܢܐ ܘܪܥܝܐ ܐܩܝܡܘܗܝ ܒܗܿ ܒܡܕܝܢܬܐ ܩܕܝܫܬܐ. ܘܒܐܝ̈ܕܘܗܝ ܘܡܢܗ ܐܦܝܣܩ̈ܘܦܐ ܣܡܘܢ ܒܟܠܗ̈ܝܢ ܡܕܝ̈ܢܬܐ. ܟܕ ܥܡܡ̈ܐ ܪܗܿܛܝܢ ܗܘܘ ܒܚܦܝܛܘܬܐ ܣܓܝܐܬܐ. ܘܓܒܝܢ ܐܟܚܕܐ ܘܡܩܪܒܝܢ ܗܘܘ. ܗܿܘ ܕܠܟܠܢܫ ܫܦܪ ܗܘܐ. ܘܡܨܒܬ ܗܘܐ ܒܗܝܡܢܘܬܐ ܬܪܝܨܬܐ ܘܒܕܘܒܪ̈ܐ ܕܠܐ ܥܕܠܝ܀ ܐܢܕܝܢ ܐܢܫ ܠܐ ܡܿܫܪ ܠܗܠܝܢ ܕܐܬܐܡܪ. ܫܠܝܛ ܠܗ ܠܗܿܘ ܕܕܐܟ ܗܢܐ ܕܢܲܣܒ ܒܐܝ̈ܕܘܗܝ ܐܓܪܬܐ ܗܿܝ ܕܟܬܒ ܠܗܘܢ ܐܒܐ ܪܘܡܢܐ ܨܝܕ ܐܘܕܩܝܐ ܡܠܟܬܐ. ܟܕ ܐܝܬܘܗܝ ܒܐܢܛܝܘܟܝܐ. ܕܐܬܪܕܦ ܠܬܡܢ ܡܢ ܪܫܝܥܐ ܘܛܪܘܢܐ ܡܪܩܝܢܐ. ܘܡܢܗܿ ܦܠܪܘܦܘܪܬܢܐ ܢܗܘܐ ܟܠܗ ܫܪܪܐ. ܡܛܠ ܣܘܥܪܢܐ ܗܢܐ ܕܣܝܡ. ܡܠܝܐ ܓܝܪ ܟܠܗ ܚܟܡܬܐ ܘܡܠܦܢܘܬܐ. pb. 63 ܠܘ ܒܠܚܘܕ ܡܛܠ ܥܠܬܐ ܕܗܠܝܢ ܗܝܕܝܢ ܓܕܫ. ܐܠܐ ܘܣܝܡܐ ܕܚܬܝܬܘܬܐ ܕܕܘܓܡ̈ܛܐ ܕܫܪܪܐ: ܘܕܗܝܡܢܘܬܐ ܠܐ ܡܚܒܠܬܐ ܘܕܠܐ ܛܘܥܝܝ. ܘܣܦܩܐ ܠܟܠ ܕܨܒܿܐ ܘܡܣܬܟܠ ܠܬܚܘܝܬܐ ܕܠܐ ܦܘܫܟܐ ܘܣܘܬܬܐ ܕܫܪܪܐ. ܘܠܡܟܣܢܘܬܐ ܕܥܒܘܪܝܐ ܕܒܟܠܩܕܘܢܐ܀

26 §26

ܟܘ- ܐܦܠܢܘܣ ܐܢܫ ܗܘܐ ܩܫܝܫܐ ܒܩܣܪܝܐ ܕܟܢܿܫ ܗܘܐ ܬܡܢ ܥܕܬܐ ܐܠܗܝܐ ܕܐܪ̈ܬܐܕܟܣܘ. ܓܒܪܐ ܕܒܟܠܡܕܡ ܟܢܝܟܐ ܘܩܕܝܫܐ. ܘܥܠ ܟܠܢܫ ܝܩܝܪ ܗܘܐ ܘܟܚܝܕ. ܗܿܘ ܕܣܓܝ ܚܫ ܘܚܘܝ ܛܢܢܐ ܚܠܦ ܗܝܡܢܘܬܐ ܬܪܝܨܬܐ. ܗܢܐ ܡܫܬܥܐ ܗܘܐ ܘܐܡܿܪ. ܕܟܕ ܛܘܒܬܢܐ ܘܡܘܕܝܢܐ ܪܝܫ ܐܦܝܣ̈ܩܘܦܐ ܛܝܡܬܐܘܣ: ܥܕܟܝܠ ܐܝܬܘܗܝ ܗܘܐ ܒܐܟܣܘܪܝܐ ܒܟܪܣܘܢܐ. ܐܙܠ ܠܘܬܗ ܕܢܣܥܪܝܘܗܝ. ܘܕܢܼܫܬܘܐ ܠܒܘܪܟܬܐ ܕܡܢܗ. ܟܕ ܕܝܢ ܚܙܝܗܝ ܕܐܝܬ ܠܗ ܫܘܚܢܐ ܒܝܫܐ ܒܪܓܠܗ. ܗܿܘ ܕܩܪܿܝܢ ܠܗ ܐܣܘ̈ܬܐ ܩܩܘܐܝܬܝܣ ܕܡܬܦܫܩ ܕܝܢ ܒܝܫ ܙܢܐ. ܕܗܘܐ ܥܒܿܕ ܬܡܣܘܬܐ. ܥܕܠ ܗܘܝܬ ܠܡ ܠܣܘܢܩ̈ܠܐ ܕܝܠܗ. ܐܟ ܡܿܢ ܕܡܒܣܝܢ ܗܘܘ pb. 464 ܒܚܘܠܡܢܗ ܕܣܒܐ. ܗܢܼܘܢ ܕܝܢ ܢܦܿܩܝܢ ܗܘܘ ܠܝ ܪܘܚܐ ܟܕ ܐܡܪܝܢ. ܕܣܓܝ ܙܒ̈ܢܬܐ ܐܬܟܫܦܝܢ ܘܒܥܝܢ ܡܢܗ ܕܢܫܒܘܩ ܠܢ ܕܢܨܘܠ ܠܗ ܠܫܘܚܢܐ: ܘܐܣܝܘܬܐ ܗܿܝ ܕܠܚܡܐ ܢܣܝܡ ܠܗ܆ ܘܠܐ ܐܫܟܚܢ ܕܢܦܝܣܝܘܗܝ. ܐܠܐ ܗܫܐ ܗܐ ܐܝܬܝ ܡܪܝܐ ܪܚܡܬ ܐܠܗܐ ܕܒܟ ܘܫܦܝܪ ܥܒܿܕ ܐܢܬ ܕܐܦ ܐܢܬ ܬܥܒܕ ܐܟ ܚܝܠܟ. ܡܕܝܢ ܟܕ ܐܦ ܐܢܐ ܚܿܐܫ ܐܢܐ ܥܡ ܣܒܐ. ܘܡܫܬܠܗܒ ܗܘܝܬ ܒܚܘܒܐ ܠܒܟܬ ܪ̈ܓܠܘܗܝ ܕܩܕܝܫܐ ܕܠܐ ܩܪܝܒܘܬܐ ܕܐܚ̈ܐ. ܐܝܟܢܐ ܕܠܐ ܐܣܬܒܪ ܕܒܡܠܟܐ ܕܝܠܗܘܢ ܗܕܐ ܥܒܕܬ. ܘܡܬܟܫܦ ܗܘܝܬ ܘܐܡܿܪ ܐܢܐ. ܐܬܪܚܡ ܥܠܝ. ܘܫܟܿܢ ܠܝ ܗܿܘ ܡܕܡ ܕܫܿܐܠ ܐܢܐ ܡܢܟ. ܗܘ ܕܝܢ ܩܕܝܫܐ ܐܡܪ ܩܘܡ܇ ܕܗܿܘ ܡܕܡ ܕܡܨܝܐ ܘܒܥܿܐ ܐܢܬ ܥܒܿܕܝܢܢ. ܐܢܐ ܕܝܢ ܟܬܪܬ ܟܕ ܢܦܝܠ ܐܢܐ ܥܠ ܐܦ̈ܝ. ܘܐܡ̈ܪ ܐܢܐ ܕܠܐ ܫܠܝܐ: ܕܠܐ ܩܿܐܡ ܐܢܐ ܐܢܗܘ ܕܠܐ ܝܗܿܒ ܐܢܬ ܠܝ ܫܘܟܢܐ. ܗܘ ܕܝܢ ܩܕܝܫܐ ܐܡܼܪ ܕܠܐ ܐܬܚܪܐ. ܚܕܐ ܓܝܪ ܙܒܢܬܐ ܐܡܪܬ. ܕܗܿܘ ܡܕܡ ܕܡܨܝܐ ܘܠܐܠܗܐ ܫܦܝܪ ܥܒܿܕ ܐܢܐ. ܘܟܕ ܩܡܿܬ ܡܦܝܣ ܗܘܝܬ܆ ܕܢܦܣ ܠܝ ܘܢܫܒܩܢܝ. ܕܒܝܨܝܦܘܬܐ ܐܥܒܕ ܗܿܝ ܕܡܨܝܐ ܘܡܘܬܪܐ. ܡܛܠ ܫܘܚܢܐ ܗܿܘ ܕܐܝܬ ܗܘܐ ܒܪܓܠܗ. ܗܘ ܕܝܢ ܐܡܼܪ ܠܘܬܝ ܟܬܪ ܗܫܐ ܘܬܒ ܫܡܥ. ܘܠܐ ܬܗܘܐ ܚܪܝܝܐ. ܘܟܕ ܨܒܥܗ ܣܡ ܥܠ ܥܝܢܗ ܐܡܼܪ ܠܝ. ܚܘܪ ܡܢܐ ܚܙܿܐ ܐܢܬ ܗܪܟܐ. ܠܐ ܚܙܿܐ ܐܢܬ ܒܒܒܬܐ ܕܥܝܢܐ ܕܝܠܝ: ܐܟ ܫܘܡܬܐ ܡܕܡ ܥܒܝܬܐ. ܐܢܐ ܕܝܢ ܐܡܪܬ ܕܐܝܢ. ܘܗܘ ܐܡܼܪ ܠܝ. ܘܐܦ ܐܢܐ ܐܢ ܗܿܘܐ ܐܢܐ ܫܛܝܐ. ܐܠܐ ܒܪܡ ܐܝܟܢܐ ܕܐܢܬ ܬܬܛܦܝܣ ܘܬܫܠܐ ܡܢ ܠܙܬܐ. ܡܢ ܐܠܨ̈ܬܐ ܐܝܬ ܠܝ ܕܐܫܬܥܐ ܠܟ: ܡܢ ܐܝܟܐ ܗܕܐ ܓܕܫܬ ܠܝ. ܟܕ ܡܩܕܡ ܗܘܝܬ ܒܙܒܢ ܘܫܗܿܪ ܐܢܐ. ܘܬܫܡܫܬܐ ܙܥܘܪܬܐ ܡܫܡܠܐ ܐܢܐ. ܡܢ ܫܠܝܐ ܐܬܐ ܐܢܫ ܕܚܝܠܐ ܘܙܝܥܐ ܐܘܟܡܐ ܘܫܘܚܪܐ. ܘܕܕܐܟ ܗܟܢܐ ܐܝܬܘܗܝ ܗܘܐ. ܐܟ ܗܿܘ ܕܢܒܝܐ ܐܝܘܒ ܨܿܐܪ ܠܗ ܠܣܛܢܐ. ܘܟܕ ܬܪܥ ܐܣܬܐ ܥܠ ܘܐܚܝܕ ܗܘܐ ܒܐܝܕܗ ܛܘܡܣܐ ܪܒܐ. ܘܟܕ ܝܡܝܢܗ ܡܘܫܛ ܐܟܚܕܐ ܘܡܙܝܥ. ܩܥܐ ܘܐܡܼܪ ܗܐ ܡܢܘ ܒܠܚܘܕܘܗܝ ܕܩܿܐܡ ܠܘܩܒܠ ܨܒܝܢܝ. ܗܐ ܡܿܢ ܠܐ ܡܫܬܥܒܕ ܠܝ. ܣܒ ܐܦܢ ܗܫܐ ܘܐܪܡܐ ܐܝܕܐ. ܟܕ ܡܙܝܥ ܘܡܣܪܗܒ ܘܫܓܫ ܒܓܙܡܐ. ܘܡܣܒܪ ܠܗ ܕܡܕܚܠ ܠܝ ܒܒܪܬ ܩܠܗܿ. ܐܢܐ ܕܝܢ ܟܕ ܠܘܒܼܒܐ ܫܩܿܠܬ ܡܢ ܡܪܝܐ ܘܐܬܚܝܠܬ: ܐܡܪܬ ܠܗ ܕܠܐ ܗܘܐ ܡܕܡ ܕܐܡܿܪ ܐܢܬ. ܐܦܠܐ ܥܒܿܕ ܐܢܐ ܨܒܝܢܟ. ܠܐ ܗܿܘܐ ܐܢܐ ܡܬܟܬܫ ܥܡ ܐܠܗܐ ܘܡܪܘܕܐ ܐܟܘܬܟ. ܝܕܿܥ ܐܢܐ ܡܚܝܠܘܬܟ. ܠܐ ܡܕܚܠ ܐܢܬ ܠܝ ܐܦܠܐ ܡܣܪܕ ܐܢܬ ܠܝ ܒܓܙܡ̈ܝܟ ܘܒܗܓܓܘܬܟ. ܘܟܕ ܒܗܠܝܢ ܐܬܚܡܬ ܘܪܬܚ: pb. 66 ܘܒܫܪܪܐ ܐܟ ܚܘܝܐ ܘܬܢܝܢܐ ܡܪܬܐ ܩܫܝܬܐ ܐܬܡܠܝ: ܘܠܒܝܟ ܗܘܐ ܐܟ ܕܐܡܪܬ ܒܝܡܝܢܗ ܛܘܡܣܐ ܗܿܘ. ܬܠܐ ܘܡܚܐ ܒܚܡܬܐ ܥܠ ܥܝܢܐ ܕܝܠܝ. ܘܟܐܒܐ ܕܕܐܟ ܗܢܐ ܡܪܝܪܐ ܥܒܕ ܠܝ. ܐܟ ܡܿܢ ܕܐܢܐ ܐܣܒܪ ܕܐܬܚܨܝܬ ܠܗܿ ܥܝܢܝ ܘܢܦܠܬ. ܘܗܿܕܐ ܡܢ ܠܐ ܗܘܬ ܒܥܘܕܪܢܐ ܕܐܠܗܐ. ܟܕ ܕܝܢ ܡܢ ܨܦܪܐ ܥܠܘܢ ܠܘܬܝ ܐܚ̈ܐ. ܚܙܘ ܐܟ ܛܘܦܬܐ ܕܕܡܐ ܘܒܣܪܐ. ܕܡܿܪܦܝܐ ܗܘܬ ܘܢܚܿܬܐ ܡܢ ܥܝܢܐ ܕܝܠܝ. ܘܐܟ ܕܒܣܘܓܐܐ ܕܗܝ ܥܝܢܐ ܟܠܗܿ ܕܥܝܟܐ ܗܘܬ. ܘܠܝܬ ܗܘܐ ܒܗܿ ܡܕܡ. ܡܢ ܗܿܘ ܐܣܟܝܡܐ ܩܕܡܝܐ ܕܫܪܝܪ. ܟܕ ܕܝܢ ܒܟܿܝܢ ܗܘܘ ܘܐܒܝܠܝܢ: ܘܡܦܝܣܝܢ ܗܘܘ ܕܐܦܣ ܠܗܘܢ ܐܟ ܕܢܬܚܫܚܘܢ ܒܢ̈ܨܠܐ: ܘܒܗܠܝܢ ܕܒܥܝܕܐ ܕܡܨܝܢ ܗܘ̈ܝ ܕܢܐܣܝܢ ܠܒܝ̈ܫܬܐ: ܣܿܒܪܝܢ ܗܘܘ ܓܝܪ ܟܡܐ ܙܒ̈ܢܝܢ ܕܡܢ ܪܘܡܐ ܘܡܢ ܥܠܬܐ ܕܐܟ ܗܕܐ ܓܕܫ ܓܕܫܐ ܕܐܟ ܗܢܐ. ܠܐ ܫܒܿܩܬ ܐܢܘܢ. ܟܕ ܐܡܿܪ ܐܢܐ. ܕܐܢܐ ܝܕܿܥ ܐܢܐ ܡܢ ܐܝܟܐ ܗܕܐ ܗܘܬ ܠܝ. ܡܛܠ ܗܕܐ ܠܐ ܬܬܚܪܘܢ ܘܐܦܠܐ ܬܫܚܩܘܢܢܝ. ܐܣܝܐ ܓܝܪ ܕܝܠܝ ܚܕ ܐܝܬܘܗܝ ܗܿܘ ܕܒܫܡܝܐ. ܘܟܕ ܟܬܪܬ ܒܡܣܝܒܪܢܘܬܐ. ܘܫܿܕܐ ܗܘܝܬ ܢܦܫܝ ܩܕܡ ܡܪܝܐ ܘܫܐܠ ܐܢܐ ܠܪ̈ܚܡܘܗܝ. ܐܬܐ ܠܝ ܥܘܕܪܢܐ ܕܡܢܗ. ܗܘ ܓܝܪ ܐܠܗܢ ܝܫܘܥ ܡܫܝܚܐ ܐܬܚܙܝ ܠܝ. ܘܣܡ ܐܝܕܘ̈ܗܝ ܕܠܐ ܛܘܠܫܐ ܥܠ ܥܝ̈ܢܝ ܘܐܣܝܢܝ. ܘܝܗܒ ܠܝ ܕܐܚܙܐ. ܘܫܒܩ ܠܝ pb. 67 ܠܥܘܗܕܢܐ ܠܐ ܡܬܛܥܝܢܐ ܘܠܩܘܒܠ ܛܝܒܘܬܐ ܕܣܥܘܪܘܬܗ ܛܒܬܐ ܫܘܡܬܐ ܗܕܐ ܙܥܘܪܬܐ. ܘܗܫܐ ܚܬܝܬܐܝܬ ܝܕܿܥ ܐܢܐ ܕܗܿܘ ܕܐܝܬܝ ܥܠܝ ܢܣܝܘܢܐ ܗܿܘ ܘܡܚܘܬܐ. ܗܘ ܐܦ ܗܫܐ ܒܡܫܬܒܩܢܘܬܐ ܕܡܢ ܡܪܢ ܘܗܢܐ ܫܘܚܢܐ ܐܝܬܝ ܥܠ ܪܓܠܝ. ܘܐܝܟܢܐ ܕܗܝܕܝܢ ܗܝܡܢܬ ܒܡܪܝܐ: ܘܟܕ ܐܬܟܫܦܬ ܠܗ ܗܘܐ ܠܝ ܠܚܘܠܡܢܐ. ܗܟܢܐ ܘܐܦ ܗܫܐ ܕܠܐ ܦܘܫܟܐ ܡܗܝܡܢ ܐܢܐ. ܕܡܢܗ ܒܥܓܠ ܗܘܝܐ ܠܝ ܣܥܘܪܘܬܐ. ܡܛܠ ܗܕܐ ܡܦܝܣ ܐܢܐ ܠܢܟܦܘܬܟ ܕܬܫܠܐ. ܘܬܦܣܘܩ ܡܢ ܠܙܬܐ ܕܡܛܠ ܗܕܐ܀ ܗܝ ܟܕ ܗܝ ܬܫܥܝܬܐ. ܘܡܢ ܐܚܪ̈ܢܐ ܣܓܝ̈ܐܐ ܫܡܥܬ ܕܝܕܥܝܢ ܗܘܘ ܚܬܝܬܐܝܬ ܘܒܢܣܝܢܐ ܘܒܥܢܝܢܐ ܗܘܘ ܕܝܠܗ ܕܪܝܫ ܐܦܝܣܩܘ̈ܦܐ ܛܝܡܬܐܘܣ. ܬܘܒ ܕܝܢ ܘܡܢ ܐܢܫ ܚܕ ܡܢ ܗܢܘܢ ܕܗܘܘ ܠܗ ܣܘܢܩ̈ܠܐ. ܘܒܗܿ ܒܟܪܣܘܢܐ ܟܢܝܫܝܢ ܗܘܘ ܠܘܬܗ: ܘܡܫܡܫܝܢ ܗܘܘ ܠܗ ܒܐܟܣܘܪܝܐ. ܘܡܢ ܗܪܟܐ ܟܕ ܗܠܝܢ ܒܢܣܝܢܐ ܐܝܠܦ ܛܘܒܬܢܐ ܛܝܡܬܐܘܣ: ܙܕܩܐܝܬ ܒܣܒܝܣܘܬܐ ܕܐܓܪ̈ܬܗ ܘܒܡܟܬܒ̈ܢܘܬܗ ܐܚܪ̈ܢܝܬܐ܇ ܫܐܕܢܝܬܐ ܡܫܡܗ ܠܣܘܢܕܘܣ ܕܟܠܩܝܕܘܢܐ. ܐܟ ܡܿܢ ܕܡܢܗ ܕܐܟܿܠܩܪܨܐ ܐܬܟܢܫܬ ܘܐܬܬܥܒܕܬ. ܘܪܗܛܬܐ ܩܕܡܝܬܐ ܐܝܬܝܗܿ ܕܐܢܛܝܟܪܝܣܛܘܣ. ܘܗܝ ܐܝܬܝܗܿ ܡܪܘܕܘܬܐ ܗܿܝ ܕܫܿܡܗܿ ܦܘܠܘܣ ܫܠܝܚܐ ܟܕ ܟܬܒ ܠܬܣܠܘ̈ܢܝܩܝܐ܀ pb. 68

27 §27

ܟܙ.- ܙܐܢܘܢ ܐܢܫ ܦܠܚܐ ܗܿܘ ܦܪܝܡܝܩܪܐ ܕܐܪܝܬܡܘܣ ܕܕܩܘ̈ ܕܣܝܡ ܒܐܠܟܣܢܕܪܝܐ. ܐܫܬܕܪ ܡܢ ܩܘܣܡܐ ܩܘܒܩܠܪܐ ܠܦܠܣܛܝܢܐ. ܕܢܛܪ ܠܐܒܐ ܦܛܪܐ ܐܦܝܣܩܘܦܐ ܕܝܠܢ. ܘܠܐܒܐ ܐܫܥܝܐ ܝܚܝܕܝܐ ܗܿܘ ܫܿܠܝܐ ܥܕܡܐ ܠܡܐܬܝܬܐ ܕܝܠܗ. ܟܕ ܡܣܟܐ ܗܘܐ ܕܫܩܿܠ ܠܗܘܢ ܠܘܬ ܡܿܠܟܐ ܙܐܢܘܢ. ܗܕܐ ܓܝܪ ܡܦܩܕ ܗܘܐ ܕܢܥܒܕ. ܗܿܘ ܕܟܕ ܐܬܐ ܠܦܠܣܛܝܢܐ ܡܫܬܥܐ ܗܘܐ ܠܛܘܒܬܢܐ ܒܩܪܝܒܘܬܢ. ܬܫܥܝܬܐ ܕܐܟ ܗܕܐ. ܕܐܢܫ ܦܛܪܐ ܕܐܝܬܘܗܝ ܗܘܐ ܣܟܘܠܪܐ. ܗܢܐ ܒܙܒܢ ܡܬܢܐ ܗܘܐ ܠܝ. ܕܡܚܒܢܐ ܐܝܬܝ ܗܘܝܬ ܣܓܝ ܕܢܣܛܘܪܝܣ ܘܡܫܒܚ ܗܘܝܬ ܠܣܘܢܕܘܣ ܕܟܠܩܝܕܘܢܐ ܘܠܡܪܩܝܢܐ ܡܠܟܐ. ܘܣܓܝ ܙܒ̈ܢܬܐ ܩܿܐܡ ܗܘܝܬ ܠܘܩܒܠ ܗܠܝܢ ܕܡܩܛܪܓܝܢ ܠܗܘܢ. ܘܚܙܝܬ ܒܠܠܝܐ ܐܢܫ ܕܐܡܿܪ ܠܝ. ܥܕܡܐ ܠܐܡܬܝ ܛܥܿܐ ܐܢܬ. ܘܠܐ ܨܒܿܐ ܐܢܬ ܕܬܩܦ ܠܫܪܪܐ. ܬܐ ܐܪܐ ܐܚܘܐ ܠܟ ܕܒܐܝܠܝܢ ܡܿܢ ܐܝܬܘܗܝ ܬܐܘܕܣܝܣ ܡܠܟܐ. ܒܐܝܠܝܢ ܕܝܢ ܡܪܩܝܢܘܣ. ܘܚܘܝ ܠܝ ܒܕܘܟܬܐ ܚܕܐ ܕܡܠܝܐ ܢܘܗܪܐ ܠܐ ܡܬܩܪܒܢܐ ܠܛܘܒܬܢܐ ܬܐܘܕܣܝܣ ܒܫܘܒܚܐ ܠܐ ܡܬܡܠܠܢܐ. ܘܕܡܒܪܩ ܝܬܝܪ ܡܢ ܫܡܫܐ. ܘܐܘܒܠܢܝ ܠܕܘܟܬܐ ܐܚܪܬܐ ܕܡܠܝܐ ܬܢܢܐ ܘܥܡܛܢܐ pb. 69 ܘܚܫܘܟܐ ܘܐܡܼܪ ܠܝ. ܚܙܿܐ ܐܢܬ ܠܡܪܩܝܢܐ ܕܡܫܬܢܩ ܬܡܢ. ܘܐܡܪܬ܆ ܘܠܐ ܐܢܫ ܚܙܿܐ ܐܢܐ. ܗܘ ܕܝܢ ܚܪ ܒܫܡܝܐ ܘܐܡܼܪ. ܡܪܝܐ ܢܥܒܪ ܩܠܝܠ ܥܡܛܢܐ ܕܢܚܙܐ ܘܢܗܝܡܢ. ܘܚܙܝܬ ܠܡܪܩܝܢܐ. ܕܬܠܐ ܗܘܐ ܒܩܘܪ̈ܩܣܐ ܕܦܪܙܠܐ ܒܡܨܥܬܐ ܕܢܘܪܐ ܘܡܫܬܢܩ. ܘܗܟܢܐ ܐܬܛܦܝܣܬ ܘܗܘܝܬ ܐܪܬܐܕܟܣܐ܀

28 §28

ܟܚ- ܩܘܪܝܩܘܣ ܘܝܘܠܝܘܣ ܢܟܦ̈ܐ ܕܝܪ̈ܝܐ ܩܘܦܪ̈ܝܐ ܒܓܢܣܐ ܘܫܘ̈ܝܝ ܠܡܬܗܝܡܢܘ. ܡܫܬܥܝܢ ܗܘܘ ܠܛܘܒܬܢܐ ܐܒܐ ܦܛܪܐ ܕܚܬܝܬܐܝܬ ܝܕܥܿܝܢ ܘܒܢܣܝܢܐ ܐܬܛܦܝܣܘܢ. ܕܒܝܬ ܣܗ̈ܕܐ ܐܝܬ ܒܩܝܦܪܘܣ ܕܐܢܫ ܣܗܕܐ ܕܗܫܐ ܫܡܗ ܠܐ ܥܗܿܕ ܐܢܐ. ܕܐܝܬ ܗܘܬ ܠܗ ܛܝܒܘܬܐ ܕܫܘܟܢܐ ܥܡ ܗܠܝܢ ܣܥܘܪ̈ܘܬ ܬܕܡܪ̈ܬܐ. ܕܐܢ ܗܘ ܕܐܢܫ ܢܫܬܘܕܐ ܕܢܩܪܒ ܬܡܢ ܥܪܒܐ ܐܘ ܝܘܢܐ: ܐܘ ܡܢ ܗܠܝܢ ܕܐܟ ܗܟܢ ܕܐܟ ܥܝܕܐ ܡܬܩܪܒܝܢ. ܒܪܡ ܘܒܕܘܟܝ̈ܬܐ ܐܚܪ̈ܢܝܬܐ ܕܒܝܬ ܣܗ̈ܕܘܬܐ ܣܓܝ̈ܐܐ. ܡܫܡܪ ܠܗ ܡܢ ܒܝܬܗ܆ ܘܗܘ ܡܢ ܢܦܫܗ ܐܙܠ. ܘܡܫܬܟܚ ܒܗ ܒܒܝܬ ܣܗ̈ܕܐ ܟܕ ܐܢܫ ܠܐ ܡܗܿܕܐ ܠܗ. ܘܠܐ ܐܢܫ ܡܢ ܗܠܝܢ ܕܦܓܥܝܢ ܒܗ ܡܡܪܚ ܕܢܓܫܘܦ ܒܗ. ܗܢܐ ܣܗܕܐ ܩܕܝܫܐ ܟܕ ܗܦܟܘ ܐܦܝܣܩܘ̈ܦܐ ܡܢ ܣܘܢܕܘܣ ܕܟܠܩܕܘܢܐ: ܘܒܥܝܢ ܗܘܘ pb. 70 ܕܢܛܥܘܢ ܠܦܫܝ̈ܛܐ. ܐܟ ܕܡܕܡ ܒܝܫܐ ܠܐ ܗܘܐ. ܓܠܝܐܝܬ ܡܬܚܙܐ ܗܘܐ ܒܐܘܪ̈ܚܬܐ ܠܗܠܝܢ ܕܡܢ ܥܝܕܐ ܐܬܝܢ ܗܘܘ ܠܗܝܟܠܐ ܕܝܠܗ: ܟܕ ܡܣܗܕ ܠܗܘܢ ܘܐܡܿܪ. ܐܢܐ ܐܝܬܝ ܦܠܢ܆ ܗܿܘ ܕܐܙܠܝܢ ܐܢܬܘܢ ܨܐܕܘܗܝ. ܠܐ ܬܐܙܠܘܢ ܠܬܡܢ. ܘܐܦܠܐ ܬܫܬܘܬܦܘܢ ܥܡ ܟܦܘܪ̈ܐ. ܐܢܐ ܓܝܪ ܡܛܠ ܗܢܐ ܐܪܚܩܬ ܡܢ ܬܡܢ ܘܠܐ ܡܬܚܙܐ ܐܢܐ ܬܡܢ܀

29 §29

ܟܛ- ܗܕܐ ܕܕܡܝܐ ܐܝܬܝܗܿ ܘܠܗܿܝ ܕܐܣܬܥܪܬ ܒܣܒܣܛܐ ܕܒܦܠܣܛܝܢܐ. ܐܝܟܐ ܕܣܝܡܐ ܫܠܕܐ ܟܠܗܿ ܕܝܘܚܢܢ ܡܥܡܕܢܐ. ܘܒܙܒܢܐ ܕܣܘܢܕܘܣ ܕܟܠܩܝܕܘܢܐ ܦܪܡܘܢܪܐ ܐܝܬ ܗܘܐ ܒܗܿ ܒܕܘܟܬܐ. ܩܕܝܫܐ ܘܛܘܒܬܢܐ ܩܘܣܛܢܛܝܢܐ. ܗܿܘ ܕܒܟܠ ܙܒܢ ܡܬܒܣܡ ܗܘܐ ܒܚܙܘܗ ܕܡܥܡܕܢܐ. ܐܝܬ ܗܘܐ ܓܝܪ ܕܘܟܬܐ ܐܟܣܕܪܐ ܕܒܝܬ ܣܗ̈ܕܐ ܡܢܗܿ ܘܠܗܿ. ܘܕܡܩܣܡܣܐ ܒܩܢ̈ܩܠܘܣ ܒܗܿܝ ܕܐܝܬ ܬܪ̈ܝܢ ܓܠܘܣܩ̈ܡܐ ܕܩܪܝܡܝܢ ܒܕܗܒܐ ܘܒܣܐܡܐ. ܘܩܢ̈ܕܠܐ ܕܠܐ ܕܥܟ̈ܢ ܐܝܬ ܩܕܡܝܗܘܢ. ܕܐܝܬܘܗܝ ܚܕ ܕܩܕܝܫܐ ܝܘܚܢܢ ܡܥܡܕܢܐ. ܘܚܕ ܕܢܒܝܐ ܐܠܝܫܥ. ܘܬܪܘܢܘܣ ܣܝܡ ܘܡܫܘܝ ܒܗܿ ܒܕܘܟܬܐ. ܥܠ ܗܿܘ ܕܠܐ ܐܢܫ ܝܿܬܒ ܗܘܐ. ܡܕܝܢ ܗܘ ܛܘܒܬܢܐ ܩܘܣܛܢܛܝܢܐ: ܟܕ pb. 71 ܩܿܐܡ ܗܘܐ ܟܠ ܠܠܝܐ ܠܫܗܪܐ. ܩܕܡܐܝܬ ܠܗܿܝ ܐܟܣܕܪܐ ܥܐܠ ܗܘܐ. ܘܟܕ ܝܗܿܒ ܗܘܐ ܫܠܡܐ ܠܗܠܝܢ ܓܠܘܣ̈ܩܡܐ. ܡܬܩܢ ܗܘܐ ܠܗܠܝܢ ܩܢ̈ܕܠܐ. ܘܠܟܘܪܣܝܐ ܗܿܘ ܡܫܘܐ ܗܘܐ ܝܨܝܦܐܝܬ. ܗܠܝܢ ܐܫܬܥܝ ܠܢ ܡܛܠܬܗ܆ ܛܘܒܬܢܐ ܐܠܬܘܣ ܩܫܝܫܐ. ܗܿܘ ܕܡܢ ܩܕܝܡ ܐܬܥܗܕܢ ܚܢܢ. ܗܿܘ ܕܟܢܫܗܿ ܠܥܕܬܐ ܬܪܝܨܬ ܫܘܒܚܐ ܕܐܠܗܐ ܕܒܩܣܪܝܐ. ܗܿܘ ܕܟܕ ܟܬܪ ܠܘܬܗ ܕܩܕܝܫܐ ܩܘܣܛܢܛܝܢܘܣ. ܘܗܘܐ ܬܠܡܝܕܐ ܕܝܠܗ ܐܡܼܪ ܕܟܕ ܚܙܝܬܗ ܕܗܟܢܐ ܝܿܨܦ ܗܘܐ ܒܟܠܝܘܡ ܕܝܠܗ ܕܬܪܘܢܘܣ. ܢܦܠܬ ܩܕܡܘܗܝ ܘܡܦܝܣ ܗܘܝܬ ܠܗ. ܕܢܐܡܪ ܠܝ ܥܠܬܐ. ܕܡܛܠ ܡܢܐ ܟܕ ܐܢܫ ܠܐ ܝܿܬܒ ܒܬܪܘܢܘܣ ܝܨܝܦܘܬܐ ܕܝܠܗ ܕܐܟ ܗܕܐ ܥܒܿܕ ܗܘܐ. ܗܘ ܕܝܢ ܩܕܡܐܝܬ ܡܫܬܐܠ ܗܘܐ ܕܢܐܡܪ. ܟܕ ܕܝܢ ܚܙܢܝ ܕܒܗܝܡܢܘܬܐ ܟܿܬܪܬ ܐܡܪ. ܕܟܠ ܠܠܝܐ ܐܟ ܕܒܣܘܓܐܐ. ܟܕ ܩܕܡܐܝܬ ܦܿܬܚ ܐܢܐ ܘܥܿܐܠ ܐܢܐ. ܡܫܟܚ ܐܢܐ ܠܗ ܠܩܕܝܫܐ ܡܥܡܕܢܐ ܥܠܘܗܝ ܕܬܪܘܢܘܣ. ܘܐܟ ܡܿܢ ܕܐܝܬ ܗܘܐ ܠܗ ܦܪܐܝܣܝܐ ܠܛܘܒܬܢܐ ܩܘܣܛܢܛܝܢܣ ܠܘܬܗ ܕܩܕܝܫܐ ܝܘܚܢܢ. ܟܕ ܗܘܐ ܛܠܘܡܝܐ: ܘܐܦܝܣܩܘ̈ܦܐ ܗܠܝܢ ܕܗܘܘ ܡܢ ܛܘܒܬܢܐ ܬܐܘܕܣܝܣ ܪܝܫ ܐܦܝܣܩ̈ܦܐ ܐܬܛܪܕܘܢ ܡܢ ܡܪܩܝܢܐ. ܐܠܝܨ ܗܘܐ pb. 72 ܒܚܘܫ̈ܒܘܗܝ ܡܛܠ ܬܪ̈ܬܝܢ. ܐܘ ܕܟܕ ܥܪܩ ܡܢ ܩܘܪܒܢܐ ܕܟܦܘܪ̈ܐ ܢܬܓܠܙ ܡܢ ܥܢܝܢܐ ܕܩܕܝܫܐ ܡܥܡܕܢܐ. ܐܘ ܬܘܒ ܕܟܕ ܡܟܬܪ ܢܗܘܐ ܛܠܘܡܐ. ܘܡܬܟܫܦ ܗܘܐ ܠܩܕܝܫܐ ܪܗܛܐ ܩܕܡܝܐ ܕܡܫܝܚܐ ܕܢܢܗܪ ܗܘܢܗ. ܘܢܓܠܐ ܠܗ ܗܿܝ ܕܫܦܝܪܐ ܠܐܠܗܐ. ܘܚܙܐ ܠܩܕܝܫܐ ܕܐܡܪ ܠܗ. ܩܫܝܫܐ ܠܐ ܬܘܒܕ ܢܦܫܟ ܡܛܠܬܝ ܘܬܟܦܘܪ ܒܗܝܡܢܘܬܟ ܐܠܐ ܦܘܩ ܘܛܪ ܗܝܡܢܘܬܟ ܕܠܐ ܥܒܘܪܝܐ. ܘܠܐܝܟܐ ܕܐܙܿܠ ܐܢܬ ܥܡܟ ܐܝܬܝ. ܘܗܟܢܐ ܟܕ ܢܼܦܩ ܕܠܐ ܡܘܡ ܒܐܟܣܢܝܘܬܐ ܐܬܢܛܪ ܒܚܝ̈ܐ ܩܕܝ̈ܫܐ. ܘܒܗܝܡܢܘܬܐ ܬܪܝܨܬ ܫܘܒܚܐ ܥܕܡܐ ܠܚܪܬܐ. ܟܕ ܐܬܟܬܫ ܐܓܘܢܐ ܛܒܐ ܘܟܠܝܠܐ ܕܡܘܕܝܢܘܬܐ ܩܛܪ܀

30 §30

ܠ- ܠܦܠܪܘܦܪܝܐ ܕܕܐܟ ܗܕܐ ܘܠܚܙܘܐ ܐܫܬܘܝ ܘܕܚܿܠ ܡܢ ܐܠܗܐ ܩܫܝܫܐ ܙܘܣܝܡܘܣ ܗܿܘ ܐܟܣܢܝܐ ܓܒܪܐ ܢܟܦܐ. ܘܕܐܫܬܘܝ ܕܢܥܡܪ ܥܡ ܛܘܒܬܢܐ ܐܒܐ ܦܛܪܐ. ܘܥܕܡܐ ܠܚܪܬܐ ܢܛܪ ܒܠܐ ܡܬܥܒܪܢܘܬܐ ܗܝܡܢܘܬܐ ܬܪܝܨܬ ܫܘܒܚܐ. ܘܗܘ ܐܬܢܛܪ ܡܢܗܿ. ܗܢܐ ܟܕ ܒܪܐܝܬܘ ܘܒܛܘܪ ܣܝܢܝ ܫܿܠܐ ܗܘܐ. ܘܥܡ ܐܒܗ̈ܬܐ ܬܪ̈ܝܨܝ ܫܘܒܚܐ ܐܝܬ ܗܘܐ ܠܗ ܫܘܬܦܘܬܐ. ܫܒܩ ܗܠܝܢ ܕܘܟܝ̈ܬܐ ܐܟ ܕܗܘ ܡܫܬܥܐ ܗܘܐ pb. 73 ܠܝ ܘܐܬܐ ܠܐܘܪܫܠܡ. ܘܟܕ ܐܚܒ ܕܘܒܪܐ ܕܒܗܠܝܢ ܕܘܟܝ̈ܬܐ ܩܕܝܫ̈ܬܐ. ܡܬܟܪܟ ܗܘܐ ܕܢܫܟܚ ܠܗ ܕܘܟܬܐ ܕܥܒܕܐ ܠܫܠܝܐ. ܘܟܕ ܐܬܐ ܠܒܝܬ ܐܝܠ. ܐܝܟܐ ܕܚܿܙܐ ܪܝܫ ܐܒܗ̈ܬܐ ܝܥܩܘܒ ܠܣܒܠܬܐ. ܐܬܪܚܡ ܡܢ ܦܪܡܘܢܪܐ ܕܗܿܝ ܕܘܟܬܐ ܘܟܕ ܣܓܝܐܝܬ ܡܬܩܪܒܐ ܗܘܬ ܠܗ ܦܝܣܬܐ ܡܢܗ ܕܢܟܬܪ ܬܡܢ. ܘܡܫܬܘܕܐ ܗܘܐ ܠܗ ܕܢܝܚܐ ܕܫܿܘܐ ܢܩܪܒ ܠܗ. ܓܠܝܐܝܬ ܐܘܕܝ ܠܗ ܕܠܐ ܡܫܟܚ ܗܘܐ ܗܕܐ ܕܢܥܼܒܕ ܡܛܠ ܕܡܢ ܩܘܪܒܢܐ ܕܗܠܝܢ ܟܦܘܪ̈ܐ ܕܒܟܠܩܝܕܘܢܐ ܥܪܝܩ. ܬܘܒ ܡܫܬܘܕܐ ܗܘܐ ܠܗ ܗܿܘ ܟܕ ܐܡܿܪ. ܕܐܦ ܠܐ ܚܕܐ ܠܙܬܐ ܢܩܪܒ ܠܗ ܡܛܠ ܗܕܐ ܒܠܚܘܕ ܐܡܿܪ ܕܟܬܪ ܗܪܟܐ. ܘܡܪܡܿܪ ܐܢܬ ܥܡܝ. ܘܝܨܦ ܐܢܬ ܕܕܘܟܬܐ ܗܕܐ. ܘܟܕ ܐܨܛܠܝ ܗܘܢܗ ܠܘܬ ܗܠܝܢ. ܚܙܐ ܒܠܠܝܐ ܠܪܝܫ ܐܒܗ̈ܬܐ ܝܥܩܘܒ ܓܒܪܐ ܡܠܐ ܚܘܪ̈ܬܐ ܘܡܝܩܪܐ ܘܟܚܝܕܐ: ܕܡܥܛܦ ܦܪܝܣܐ ܘܠܒܝܟ ܫܒܘܩܬܐ ܘܗܟܢܐ ܡܛܝܠ ܗܘܐ ܒܗܿ ܒܕܘܟܬܐ ܘܩܪܒ ܠܘܬܗ ܘܐܡܪ. ܕܐܝܟܢ ܟܕ ܐܢܬ ܐܪܬܐܕܟܣܐ ܐܝܬܝܟ. ܘܡܫܬܘܬܦ ܐܢܬ ܥܡ ܐܪ̈ܬܐܕܟܣܘ. ܒܥܿܐ ܐܢܬ ܕܗܪܟܐ ܬܬܐܡܢ. ܠܐ ܡܛܠܬܝ ܬܥܒܪ ܥܠ ܗܝܡܢܘܬܟ. ܐܠܐ ܐܝܨܦ ܘܥܪܘܩ ܡܢ ܫܘܬܦܘܬܐ ܕܠܘܬ ܟܦܘܪ̈ܐ. ܘܠܐ ܚܣܿܪ ܠܟ ܡܕܡ ܡܢ ܛܒ̈ܬܐ. pb. 74 ܘܠܐ ܕܘܟܬܐ. ܘܠܐ ܗܠܝܢ ܕܚܫܚܬܐ. ܘܟܕ ܥܼܪܩ ܗܟܢܐ ܥܕܡܐ ܠܚܪܬܐ ܐܬܢܼܛܪ ܠܐ ܡܨܛܠܝܢܐ. ܒܕܘܒܪ̈ܐ ܩܕܝܫ̈ܐ ܘܒܗܝܡܢܘܬܐ ܬܪܝܨܬ ܫܘܒܚܐ܀

31 §31

ܠܐ- ܡܫܬܥܐ ܗܘܐ ܠܢ ܛܘܒܬܢܐ ܐܒܐ ܦܛܪܐ ܐܦܝܣܩܘܦܐ܆ ܡܛܠ ܐܢܫ ܡܢ ܩܕܝܫ̈ܐ ܕܡܬܩܪܐ ܗܘܐ ܗܠܝܕܪܘܣ ܪܥܝܐ. ܗܿܘ ܕܫܢܝ ܡܢ ܥܠܡܐ ܘܐܬܐ ܠܪܝܫܐ ܕܛܘܪ̈ܐ ܘܠܥ̈ܒܐ ܕܛܘܪܘܣ ܕܩܝܠܝܩܝܐ. ܘܟܕ ܓܒܐ ܠܗ ܡܥܡܪܐ ܕܥܡ ܚܝܘ̈ܬܐ ܒܥܪܝܪ̈ܝܬܐ ܣܓܝ ܫܢܝ̈ܐ. ܟܕ ܛܥܿܐ ܗܘܐ ܠܐܢܫܐ ܡܕܝܪ ܗܘܐ ܬܡܢ. ܘܒܣܝܒܪܬܐ ܕܠܐ ܬܘܩܢܐ ܡܬܚܫܚ ܗܘܐ ܒܢܘܪ̈ܒܐ ܕܩܝܣܐ ܘܕܥܩܪ̈ܐ ܕܒܪܐ. ܘܡܛܠ ܗܕܐ ܣܥܪܗ ܐܝܬܘܗܝ ܗܘܐ ܠܗ ܚܠܦ ܡܪܛܘܛܐ ܒܣܬܘܐ ܘܒܩܝܛܐ. ܨܝ̈ܕܐ ܕܝܢ ܕܐܝ̈ܠܐ ܘܕܚܝ̈ܘܬܐ ܒܥܪܝܪ̈ܝܬܐ: ܟܕ ܐܬܘ ܐܟ ܕܡܥܕܿܝܢ ܠܕܘܟܝ̈ܬܐ ܗܠܝܢ. ܚܙܐܘܗܝ ܡܢ ܪܘܚܩܐ ܠܩܕܝܫܐ ܘܐܣܒܪܘ ܕܚܝܘܬܐ ܐܟܣܢܝܬܐ ܐܝܬܘܗܝ ܡܛܠ ܩܛܣܛܣܝܣ ܕܝܠܗ ܒܥܪܝܪܝܬܐ. ܘܟܕ ܢܩܫܘܢ ܡܨܝܕܬܐ. ܨܕܘܗܝ. ܡܢ ܒܬܪ ܫܢܝ̈ܐ ܣܓܝ̈ܐܬܐ ܕܥܢܘܝܘܬܐ ܕܐܟ ܗܕܐ. ܘܟܕ ܗܟܢܐ ܐܬܝܕܥ: ܘܠܐ ܡܫܟܚ ܗܘܐ ܬܘܒ ܕܢܬܚܫܚ ܒܕܘܒܪ̈ܐ ܕܡܣܪܩܘܬܐ ܘܢܩ̈ܦܝ ܠܨܠܝܒܐ. ܐܬܛܦܝܣ ܡܠܘܢ ܕܝܢ ܐܬܥܨܝ ܡܢ ܥܡܘܪ̈ܐ ܕܕܘܟܝ̈ܬܐ ܗܠܝܢ ܕܢܐܬܐ ܠܥܠܡܐ. ܘܟܕ ܥܼܡܪ ܒܕܝܪܐ ܗܘܐ ܐܒܐ ܕܕܝܪ̈ܝܐ. ܗܢܐ ܟܕ ܥܬܝܕ pb. 75 ܗܘܐ ܕܢܥܢܕ. ܩܪܐ ܠܬܠܡܝܕܘܗ̈ܝ ܘܐܡܪ ܠܗܘܢ. ܕܡܢ ܒܬܪ ܥܣܪܝܢ ܘܐܪܒܥ ܫܢܝ̈ܢ. ܗܘܿܐ ܟܦܘܪܝܐ ܕܗܝܡܢܘܬܐ ܡܢ ܐܦܣܩܘ̈ܦܐ. ܐܠܐ ܡܐ ܕܚܙܿܝܢ ܐܢܬܘܢ ܕܗܘܐ ܫܘܪܝܐ ܕܗܕܐ ܡܬܬܙܝܥܢܘܬܐ ܥܪܘܩܘ ܠܡܨܪܝܢ. ܡܢ ܬܡܢ ܓܝܪ ܥܬܝܕ ܕܢܬܢܛܪ ܫܪܟܢܐ ܕܐܪ̈ܬܐܕܘܟܣܐ. ܘܒܦܠܣܛܝܢܐ ܗܿܝ ܕܣܥܪܘܢ. ܘܐܟ ܕܐܡܿܪ ܗܘܐ ܛܘܒܬܢܐ ܐܒܐ ܕܝܠܢ ܐܙܠ ܠܡܨܪܝܢ. ܘܐܫܟܚ ܚܕ ܡܢ ܬܠܡܝ̈ܕܘܗܝ ܕܥܕܟܝܠ ܚܝ ܘܬܡܢ ܫܿܠܐ ܗܘܐ. ܐܢܫ ܣܒܐ ܘܩܕܝܫܐ. ܘܗܠܝܢ ܡܢܗ ܫܡܥܬ ܘܐܬܛܦܝܣܬ܀

32 §32

ܠܒ- ܬܘܒ ܐܡܪ ܛܘܒܬܢܐ ܐܒܐ ܦܛܪܐ. ܕܝܿܕܥ ܐܢܫ ܡܢ ܩܕܝܫ̈ܐ. ܕܟܕ ܡܝܬ ܛܘܒܬܢܐ ܘܐܪܬܘܕܘܟܣܐ ܬܐܘܕܣܝܣ ܡܠܟܐ. ܟܕ ܝܬܒ ܒܩܠܝܬܗ ܫܡܥ ܩܠܐ ܡܢ ܫܡܝܐ ܕܐܡܿܪ. ܗܐ ܫܡܝܐ ܡܬܬܙܝܥ ܘܥܬܝܕ ܕܢܦܿܠ ܘܢܣܪܘܚ ܐܪܥܐ. ܘܠܐ ܟܿܐܒ ܠܐܢܫ. ܡܝܬ ܠܗ ܓܝܪ ܡܠܟܐ ܪܒܐ ܬܐܕܘܣܝܣ ܐܪܬܘܕܘܟܣܐ܀

33 §33

ܠܓ- ܬܘܒ ܡܫܬܥܐ ܗܘܐ ܠܢ ܐܒܐ ܡܛܠ ܐܢܫ ܩܘܡܛܝܢܘܣ. ܡܢ ܗܠܝܢ ܢܨܝ̈ܚܐ ܕܐܠܟܣܢܕܪܝܐ. ܕܒܟܠܙܒܢ ܐܬܿܐ ܗܘܐ ܨܐܕܘܗܝ. ܘܡܢܗ ܡܫܬܘܬܦ ܗܘܐ pb. 76 ܒܪ̈ܐܙܐ. ܡܿܬܢܐ ܗܘܐ ܠܗ ܠܡ. ܕܒܙܒܢܐ ܗܿܘ ܕܐܝܬܘܗܝ ܗܘܐ ܒܬܐܒܝܣ ܪܫܝܥܐ ܢܣܛܘܪܝܣ ܒܐܟܣܘܪܝܐ: ܐܫܬܠܚܬ ܡܢ ܩܘܡܝܣ ܕܐܬܠ ܪܘܓܐ ܠܦ̈ܠܚܐ ܕܬܡܢ. ܘܡܢ ܐܠܨ̈ܬܐ ܗܘܝܬ ܒܥܢܝܢܗ. ܘܣܓܝ ܡܢ ܓܘܕܦ̈ܘܗܝ ܫܿܡܥܬ. ܘܟܕ ܐܝܬܝ ܒܥܢܝܢܗ܆ ܐܬܐ ܐܢܫ ܕܡܣܒܪ ܩܪܝܬܗ ܕܠܥܠ. ܘܕܗܐ ܡܚܕܐ ܐܬܐ ܡܓܣܛܪܝܢܘܣ ܕܥܬܝܕ ܗܘܐ ܕܢܣܒܗ. ܘܟܕ ܐܫܬܩܠ ܒܬܪܥܝܬܗ. ܘܗܘܐ ܒܚܕܘܬܐ ܗܘ ܙܝܥܐ ܐܡܼܪ. ܡܢܐ. ܕܠܡܐ ܒܝܫܐܝܬ ܐܡܿܪ ܗܘܝܬ: ܕܠܐ ܐܝܬܘܗܝ ܐܠܗܐ ܡܫܝܚܐ. ܘܠܐ ܡܪܝܡ ܝܠܕܬ ܐܠܗܐ. ܘܥܡܗ ܕܦܬܓܡܐ ܐܫܬܪܝ ܠܫܢܗ ܘܢܚܬ ܠܒܪ ܡܢ ܦܘܡܗ ܣܓܝ. ܘܗܟܢܐ ܟܕ ܐܟܿܠ ܠܗ ܡܝܬ. ܡܢ ܩܕܡ ܝܘܡܐ ܚܕ ܕܢܐܬܐ ܡܓܣܛܪܝܢܘܣ ܗܿܘ ܕܡܫܕܪ ܗܘܐ ܡܛܠ ܗܕܐ. ܘܐܟ ܕܐܡܿܪ ܗܘܐ ܘܡܫܪܪ ܗܘܐ ܐܒܐ ܬܐܘܕܘܪܐ ܕܝܪܝܐ. ܗܿܘ ܕܠܚܪܬܐ ܗܘܐ ܐܦܝܣܩܘܦܐ: ܟܕ ܐܙܠ ܠܕܘܟܬܐ ܗܿܝ: ܘܒܗ ܒܢܣܝܢܐ ܗܘܐ ܘܐܫܬܪܪ. ܕܐܦܠܐ ܐܪܥܐ ܩܒܠܬ ܫܠܕܗ ܡܢ ܒܬܪ ܡܘܬܗ. ܐܠܐ ܬܠܬ ܙܒ̈ܢܬܐ ܙܢܩܬܗ. ܐܝܟܢܐ ܕܢܬܐܠܨܘܢ ܥܡܘܪ̈ܐ ܕܬܡܢ ܕܢܟܪܟܘܢܝܗܝ ܒܐܣܦܪܝܕܐ. ܘܢܬܠܘܢܝܗܝ ܒܐܣܬܐ. ܬܫܥܝܬܐ ܕܝܢ ܕܡܛܠ ܗܕܐ ܣܡ ܛܘܒܢܐ ܛܝܡܬܐܘܣ. ܒܬܫܥܝܬܐ ܐܩܠܣܝܣܛܣܩܐ ܕܡܟܬܒ pb. 77 ܠܗ. ܗܿܝ ܕܡܣܒܪ ܐܢܐ ܕܐܢ ܡܪܢ ܢܫܟܢ. ܣܿܐܡ ܐܢܐ ܠܗܿ ܒܗܠܝܢ ܕܗܪܟܐ ܟܬܝܒ̈ܢ܀

34 §34

ܠܕ- ܦܘܛܡܘܢ ܐܢܫ ܡܢ ܗܢܘܢ ܩܕܝ̈ܫܐ ܕܝܪ̈ܝܐ ܥܬܝܩ̈ܐ ܕܐܝܬ ܒܐܣܩܝܛܐ. ܣܠܩ ܡܢ ܬܡܢ ܘܒܡܨܪܝܢ ܡܕܝܪ ܗܘܐ: ܒܙܒܢܐ ܗܿܘ ܒܩܠܝܬܐ. ܘܒܗ ܒܙܒܢܐ ܗܿܘ ܟܕ ܫܢܝ ܡܢ ܦܠܣܛܝܢܐ. ܐܝܬܘܗܝ ܗܘܐ ܒܡܨܪܝܢ. ܘܥܡܿܪ ܗܘܐ ܐܒܐ ܕܝܠܢ. ܘܐܡܿܪ ܗܘܐ ܡܛܠܬܗ. ܕܫܘܟܢܐ ܕܐܟ ܗܢܐ ܐܝܬ ܗܘܐ ܠܗ ܥܠ ܫܐܕ̈ܐ. ܐܝܟܢܐ ܕܡܝ̈ܐ ܒܠܚܘܕ ܒܫܡܐ ܕܡܫܝܚܐ ܢܪܘܣ ܥܠ ܗܠܝܢ ܕܡܬܢܣܝܢ. ܘܗܟܢܐ ܢܛܪܘܕ ܠܫܐܕ̈ܐ. ܟܕ ܕܝܢ ܫܡܥ ܡܛܠ ܓܒܪܐ ܛܘܒܢܐ ܕܡܬܩܪܐ ܣܦܠܐܪܝܣ. ܐܙܠ ܕܢܬܒܪܟ ܡܢܗ. ܟܕ ܡܿܛܫܐ ܢܦܫܗ ܕܠܐ ܢܬܝܕܥ ܕܡܢܘ. ܘܡܢ ܐܝܟܐ ܐܝܬܘܗܝ. ܘܦܪܘܛܪܝܘܣ ܗܝܕܝܢ ܒܐܠܟܣܢܕܪܝܐ ܡܕܝܪ ܗܘܐ. ܘܥܩ̈ܬܐ ܣܓܝ̈ܐܬܐ ܠܩܕܝ̈ܫܐ ܣܥܿܪ ܗܘܐ. ܗܘ ܕܝܢ ܦܛܡܘܢ ܟܕ ܝܕܥ ܒܪܘܚ ܠܐܒܐ ܕܡܿܢ ܐܝܬܘܗܝ. ܐܡܪ ܠܗ ܗܕܐ ܡܚܕܐ ܕܥܠ܇ ܠܐ ܬܬܥܝܩ ܐܒܐ ܦܛܪܐ ܐܦܝܣܩܘܦܐ ܠܐ ܬܬܥܝܩ. ܢܥܧܒܕ ܓܝܪ ܐܠܗܐ ܬܒܥܬܐ ܐܝܬ ܠܗ ܒܥܓܠ. ܗܐ ܓܝܪ ܥܕܬܐ ܕܐܠܗܐ ܡܦܝܣܐ ܚܠܦܝܟܘܢ ܪ̈ܝܫܝ ܟܗ̈ܢܐ.. ܘܗܢܐ ܫܟܿܒ pb. 78 ܥܡ ܕܟܪ̈ܐ. ܘܩܛܘܠܐ ܡܬܩܛܠ. ܟܕ ܡܛܠ ܦܪܘܛܪܝܘܣ ܐܡܿܪ. ܘܡܢ ܒܬܪ ܬܠܬܐ ܝܘܡ̈ܝܢ ܐܬܩܛܠ ܦܪܘܛܪܝܘܣ܀

35 §35

ܠܗ- ܗܘܐ ܐܢܫ ܡܫܡܫܢܐ ܕܐܝܬܘܗܝ ܗܘܐ ܒܓܢܣܗ ܐܢܛܝܘܟܝܐ. ܡܢ ܗܠܝܢ ܝܕܝ̈ܥܐ ܕܩܠ̈ܪܝܩܘ. ܕܫܡܗ ܗܘܐ ܒܣܝܠܝܘܣ. ܗܿܘ ܕܗܘܐ ܡܗܿܕܝܢܐ ܕܦܘܪܩܢܗ ܕܐܒܐ ܦܛܪܘܣ ܟܕ ܐܝܬܘܗܝ ܛܠܝܐ. ܘܐܝܬܘܗܝ ܗܘܐ ܒܡܕܝܢܬܐ ܕܡܠܟܘܬܐ. ܘܐܪܡܝ ܒܗ ܢܘܪܐ ܘܚܝ̈ܐ ܕܕܝܪܝܘܬܐ. ܘܐܡܿܪ ܗܘܐ ܗܘ ܛܘܒܬܢܐ ܡܛܠܬܗ. ܕܫܼܒܩ ܥܠܡܐ ܘܛܥܼܢ ܨܠܝܒܐ ܕܡܫܝܚܐ ܘܢܩܦܗ. ܘܬܠܬܝܢ ܘܚܡܫ ܫܢܝ̈ܢ ܒܡܕܒܪܐ ܕܬܒܐܝܣ ܒܠܚܘܕܘܗܝ ܥܡܿܪ ܗܘܐ ܘܫܼܠܐ. ܘܠܚܪܬܐ ܫܡܥ ܩܠܐ ܡܢ ܫܡܝܐ ܕܐܡܪ ܠܗ. ܒܣܠܝܐ. ܙܠ ܠܡܥܬܥܡܪܢܝܬܐ. ܘܐܬܟܬܫ ܚܠܦ ܗܝܡܢܘܬܐ. ܥܬܝܕ ܗܘ ܓܝܪ ܕܢܗܘܐ ܟܦܘܪܝܐ ܕܝܚܝܕܝܐ ܒܪܗ ܕܐܠܗܐ ܡܢ ܐܦܝܣ̈ܩܘܦܐ ܘܡܠܟ̈ܐ. ܘܟܕ ܐܬܐ ܠܕܘܟܝ̈ܬܐ ܕܠܘܩܝܐ ܐܬܪܐ. ܐܫܟܚ ܕܘܟܬܐ ܚܕܐ ܥܠ ܝܡܐ ܫܩܝܦܐ ܕܐܝܬܝܗܿ ܠܐ ܡܬܬܕܝܫܢܝܬܐ. ܘܬܪܬܥܣܪ̈ܐ ܫܢܝ̈ܢ ܥܡܪ ܬܡܢ. ܟܕ ܗܢܘܢ ܕܘܒܪ̈ܐ ܘܥܢܘܝܘܬܐ ܐܝܬ ܗܘܐ ܠܗ. ܗܠܝܢ ܕܐܝܬ ܗܘܐ ܘܠܗܿܘ ܕܩܕܝܡ ܐܡܝܪ ܐܒܐ ܐܠܝܐܕܪܘܣ ܗܿܘ ܕܐܝܬܘܗܝ ܗܘܐ ܪܥܝܐ. ܟܕ pb. 79 ܕܝܢ ܐܠܦܐ ܫܟܢܬ ܬܡܢ: ܘܢܘ̈ܛܐ ܢܦܩܘ ܡܛܠ ܚܫܚܬܗܘܢ ܘܐܫܟܚܘܗܝ: ܘܐܘܕܥܘܗܝ ܠܥܡܘܪ̈ܐ ܕܬܡܢ. ܗܟܢܐ ܟܕ ܐܬܝܕܥ ܐܬܛܦܝܣ ܡܢ ܐܢܫܐ ܕܐܬܪܐ ܗܿܘ ܕܢܐܬܐ ܠܕܘܟܝ̈ܬܐ ܡܬܥܡܪ̈ܢܝܬܐ ܕܒܠܘܩܝܐ. ܘܟܕ ܐܬܐ ܬܪܝܢ ܩܢܘܒ̈ܝܐ ܐܩܝܡ ܕܝܪ̈ܝܐ ܩܕܝ̈ܫܐ ܚܕ ܡܿܢ ܕܓܒܪ̈ܐ. ܐܚܪܢܐ ܕܝܢ ܕܢܫ̈ܐ. ܒܝܘ̈ܡܬܐ ܗܠܝܢ ܪܫܝܥܐ ܢܣܛܘܪܝܣ ܐܦܝܣܩܘܦܐ ܕܩܘܣܛܢܛܝܢܐܦܘܠܣ ܐܝܬܘܗܝ ܗܘܐ܆ ܘܡܟܪܙ ܗܘܐ ܓܘܕܦܘ̈ܗܝ. ܘܫܡܥ ܬܘܒ ܩܠܐ ܡܢ ܫܡܝܐ ܕܐܡܿܪ ܠܗ. ܒܣܠܝܐ. ܐܬܚܦܛ ܘܙܠ ܠܩܘܣܛܢܛܝܢܐܦܘܠܝܣ. ܘܐܟܣ ܠܪܫܝܥܐ ܢܣܛܘܪܝܘܣ ܕܡܓܕܦ. ܘܟܦܪ ܒܗܝܡܢܘܬܐ ܕܒܝ. ܗܘ ܕܝܢ ܟܕ ܠܐ ܐܬܥܟܪ ܐܬܐ ܠܗ ܠܩܘܣܛܢܛܝܢܐܦܘܠܝܣ. ܘܟܕ ܥܠ ܠܥܕܬܐ ܘܐܕܪܟܗ ܠܪܫܝܥܐ ܢܣܛܘܪܝܘܣ ܕܩܿܐܡ ܥܠ ܒܝܡ ܘܡܬܪܓܡ. ܐܟܣܗ ܩܕܡ ܟܠܗ ܥܡܐ ܟܕ ܐܡܿܪ. ܬܪܨ ܐܢܬ ܠܟ ܐܦܝܣܩܘܦܐ.. ܒܝܫܐܝܬ ܡܠܦ ܐܢܬ. ܡܢܐ ܗܿܦܟ ܐܢܬ ܘܡܿܦܬܠ ܐܢܬ ܕܘܓܡ̈ܛܐ ܕܐܒ̈ܗܬܐ. ܘܟܕ ܗܿܘ ܟܬܪ ܒܕܘܓܡܗ. ܩܥܐ ܘܐܡܪ ܗܘ ܒܣܝܠܝܘܣ. ܚܪܡܐ ܥܠܝܟ ܢܣܛܘܪܝܣ. ܘܥܠ ܪܘܫܥܟ. ܘܡܢ ܒܬܪ ܕܐܫܬܪܝ ܟܢܫܐ ܟܕ ܩܪܝܗܝ ܗܘ ܢܣܛܘܪܝܣ ܒܩܪܝܒܘܬܐ ܕܐܦܝܣܩ̈ܦܐ ܕܐܫܬܟܚܘܢ ܬܡܢ ܦܪܣܝ ܪܘܫܥܗ ܗܘ ܒܣܝܠܝܘܣ. ܘܠܚܪܬܐ ܐܬܩܪܒ ܠܘܬ ܡܠܟܐ ܬܐܕܘܣܝܣ ܟܕ pb. 80 ܥܒܿܪ ܒܫܘܩܐ. ܘܒܩܠܐ ܪܒܐ ܐܡܪ ܠܘܬܗ. ܡܿܠܟܐ ܠܡܢܐ ܟܕ ܥܡܝܕ ܐܢܬ ܒܬܠܝܬܝܘܬܐ. ܒܬܠܝܬܝܘܬܐ ܠܐ ܡܘܕܐ ܐܢܬ. ܗܠܝܢ ܓܝܪ ܕܡܠܦ ܢܣܛܘܪܝܣ ܕܠܩܘܒܠܐ ܕܠܬܠܝܬܝܘܬܐ ܐܝܬܝܗܝܢ. ܘܟܕ ܐܬܠܒܟ ܡܢ ܦܠܘܝܢܘܣ ܗܿܘ ܬܪܩܝܐ. ܕܐܝܬܘܗܝ ܗܘܐ ܗܝܕܝܢ ܡܓܝܣܛܪܘܣ ܘܛܪܘܢܐ. ܣܓܝ ܚܫ ܡܢܗ ܘܐܬܢܓܕ ܘܒܠܥ. ܘܟܕ ܐܣܬܢܝ ܡܢ ܟܠܢܫ ܐܟܣܘܪܝܐ ܡܢܗ ܐܬܚܿܝܒ. ܘܟܕ ܡܬܬܟܪܙ ܗܘܐ ܒܡܕܝܢܬܐ. ܐܬܚܛܦ ܡܢ ܥܡܐ ܘܐܬܥܠܠ ܡܢܗܘܢ ܠܒܝܬܐ ܕܩܕܝܫܬܐ ܐܘܦܡܝܐ. ܘܬܡܢ ܡܕܝܪ ܗܘܐ ܙܒܢܐ. ܟܕ ܡܬܟܫܦ ܠܡܪܝܐ ܗܿܘ ܕܫܕܪܗ. ܘܡܦܝܣ ܠܗ ܘܒܿܥܐ ܡܢܗ ܕܠܐ ܢܗܡܐ ܥܕܡܐ ܠܚܪܬܐ. ܕܪܫܝܥܐ ܢܣܛܘܪܝܣ ܢܓܡܕ ܥܠ ܕܚܠܬ ܐܠܗܐ. ܘܟܕ ܒܗܠܝܢ ܐܝܬܘܗܝ ܗܘܐ. ܗܘܬ ܡܕܒܪܢܘܬܐ ܕܐܟ ܗܕܐ: ܟܕ ܢܦܩ ܠܫܘܩܐ ܛܘܒܬܢܐ ܬܐܘܕܣܝܣ ܡܠܟܐ. ܢܦܠ ܩܪܡܝܕܐ ܡܢ ܠܥܠ ܘܓܫܦ ܒܪܝܫܗܿ. ܘܥܕܡܐ ܠܩܠܝܠ ܠܩܝܢܕܘܣ ܕܡܘܬܐ ܐܝܬܝܗ. ܘܟܕ ܐܬܦܪܩ ܠܒܪ ܡܢ ܣܒܪܐ. ܘܗܘܐ ܒܕܚܠܬܐ ܘܙܘܥܐ ܣܓܝܐܐ. ܚܙܐ ܐܢܫ ܒܠܠܝܐ ܕܐܡܿܪ ܠܗ. ܕܡܛܠ ܒܣܝܠܝܘܣ ܥܒܕܐ ܕܐܠܗܐ ܗܕܐ ܚܫܬ. ܡܛܠ ܕܠܐ ܫܿܡܥ ܐܢܬ ܠܗ: ܕܡܬܟܬܫ ܡܛܠ ܕܚܠܬ ܐܠܗܐ. ܘܡܚܕܐ ܫܕܪ ܐܝܬܝܗ ܠܩܕܝܫܐ. ܘܟܕ ܢܿܦܩ ܠܗ ܪܘܚܐ ܡܦܝܣ ܗܘܐ ܠܗ ܕܢܐܠܦ ܡܢܗ. ܡܢܐ ܐܢܝܢ pb. 81 ܗܠܝܢ ܕܡܢܝ̈ܚܢ ܠܗ. ܘܢܥܒܕ. ܗܘ ܕܝܢ ܐܡܿܪ. ܠܐ ܒܿܥܐ ܐܢܐ ܗܠܝܢ ܕܡܢܝ̈ܚܢ ܠܝ. ܐܠܐ ܗܠܝܢ ܕܫܦܪ̈ܢ ܠܐܠܗܐ: ܘܡܩ̈ܝܡܢ ܠܥܕ̈ܬܗ. ܦܩܘܕ ܕܬܗܘܐ ܣܘܢܕܘܣ ܕܢܬܟܣܣܘܢ ܓܘܕ̈ܦܐ ܕܢܣܛܘܪܝܣ ܕܥܠ ܐܠܗܐ. ܘܬܗܘܐ ܩܬܪܣܝܣ ܕܝܠܗ ܘܢܫܬܕܐ. ܗܢܐ ܓܝܪ ܐܝܬܘܗܝ ܨܒܝܢܐ ܕܐܠܗܐ. ܘܕܠܐ ܥܘܟܪܐ ܐܬܛܦܝܣ ܡܠܟܐ. ܘܦܩܕ ܕܬܗܘܐ ܣܘܢܕܘܣ ܒܐܦܣܘܣ. ܘܬܗܘܐ ܩܬܪܣܝܣ ܕܢܣܛܘܪܝܣ ܘܢܫܬܕܐ ܠܐܟܣܘܪܝܐ܀

36 §36

ܠܘ- ܡܫܬܥܐ ܗܘܐ ܠܢ ܐܒܐ ܦܛܪܐ ܐܦܝܣܩܘܦܐ. ܕܐܢܬܬܗ ܗܘܬ ܕܕܡܪܝܐܘܣ ܕܗܘܐ ܗܘܦܪܟܐ ܦܪܘܛܪܝܘܢ. ܛܘܒܬܢܝܬܐ ܐܠܝܢܐ ܐܢܬܬܐ ܩܕܝܫܬܐ ܘܝܗܒܬ ܙܕܩ̈ܬܐ ܘܕܒܟܠܡܕܡ ܪܚܡܬܝ ܡܫܝܚܐ. ܘܡܢ ܩܕܡ ܬܥܬ ܫܢܝ̈ܢ ܕܢܗܘܐ ܐܦܝܣܩܘܦܐ ܢܣܛܘܪܝܘܣ. ܐܬܚܙܝ ܠܗܿ ܡܠܐܟܐ ܕܐܡܿܪ. ܐܠܝܢܐ ܐܠܝܢܐ. ܡܢ ܒܬܪ ܬܠ̈ܬ ܫܢܝ̈ܢ ܦܠܢ ܥܬܝܕ ܕܢܬܒ ܐܦܝܣܩܘܦܐ ܒܩܘܣܛܢܛܝܢܐܦܘܠܝܣ. ܚܙܝ ܛܪܝ ܢܦܫܟܝ ܘܠܐ ܬܣܒܝܢ ܩܘܪܒܢܐ ܡܢܗ. ܘܡܢ ܒܬܪ ܬܠܬ ܫܢܝ̈ܢ ܗܘܐ ܢܣܛܘܪܝܘܣ. ܘܠܐ ܨܒܿܝܐ ܗܘܬ ܡܬܘܡ ܕܬܩܒܠܗ ܒܒܝܬܗܿ ܕܐܬܐ ܠܘܬܗܧ ܙܒ̈ܢܝܢ ܣܓܝ̈ܐܢ ܕܢܚܙܝܗܿ. ܘܐܦܠܐ ܕܬܫܬܘܬܦ ܒܪ̈ܐܙܐ ܡܢܗ. ܐܠܐ ܟܕ ܫܡܥܬ ܓܘܕܦܘ̈ܗܝ ܘܐܬܢܒܪܫܬ ܒܛܢܢܐ ܐܠܗܝܐ܇ pb. 82 ܘܒܿܥܝܐ ܗܘܬ ܕܬܛܦܝܣ ܒܫܪܪܐ ܐܬܬ ܠܥܕܬܐ. ܓܕܫ ܕܝܢ ܕܒܗ ܒܝܘܡܐ ܟܕ ܡܬܪܓܡ ܗܘܐ. ܢܐܬܐ ܛܘܒܢܐ ܒܣܝܠܝܘܣ ܫܡܫܐ ܕܐܢܛܝܘܟܝܐ: ܗܿܘ ܕܐܬܥܗܕܢܢ ܒܗܠܝܢ ܕܩܕܝ̈ܡܢ ܘܢܟܣܗ. ܘܗܿܝ ܡܿܢ ܠܥܠ ܡܢ ܐܣܛܘ̈ܐ ܥܠܝ̈ܐ ܒܩܠܐ ܪܡܐ ܩܥܬ ܘܐܚܪܡܬܗ ܟܕ ܐܡܿܪܐ. ܚܪܡܐ ܥܠܝܟ ܐܢܛܝܟܪܝܣܛܣ. ܟܕ ܥܗܝܕܐ ܚܠܡܐ ܗܿܘ ܕܚܙܬ ܡܛܠ ܦܠܢ. ܡܛܠ ܕܗܪ̈ܛܝܩܐ ܬܪ̈ܝܝ ܟܝ̈ܢܐ ܡܫܘܕܥ ܗܘܐ ܗܘ ܚܠܡܐ. ܘܡܛܠ ܕܗܕܐ ܐܬܥܗܕܬ. ܢܩܿܦܐ ܕܢܬܕܡܪ ܘܒܗܿܝ ܕܠܚܪܬܐ ܓܕܫܬ ܠܗ ܠܢܣܛܘܪܝܣ ܒܐܟܣܘܪܝܐ. ܠܫܘܪܪܗ ܕܚܠܡܐ ܫܪܝܪܐ ܕܛܘܒܬܢܝܬܐ ܐܠܝܢܐ. ܡܛܠ ܓܝܪ ܕܐܫܬܕܝ ܠܐܟܣܘܪܝܐ ܠܐܘܣܝܘܣ. ܘܐܬܬܨܝܕ ܡܢ ܒܪ̈ܒܪܝܐ ܕܡܬܩܪܝܢ ܡܙ̈ܝܩܘ. ܘܗܘܐ ܫܒܝܐ ܘܐܬܦܪܩ. ܠܐ ܡܟܝܠ ܐܫܬܒܩ ܕܒܗܿ ܒܐܣܝܘܣ ܢܟܬܪ. ܐܠܐ ܒܡܕܝܢܬܐ ܕܡܬܩܪܝܐ ܦܢܘܣ. ܕܗܟܢܐ ܐܬܟܢܝܬ ܡܢ ܚܝܘܬܐ ܗܿܝ ܬܪܝܢܬ ܟܝܢܐ. .ܬܡܢ ܡܬܢܛܪ ܗܘܐ ܥܕܡܐ ܠܚܪܬܐ ܒܙܒܢܐ ܗܿܘ ܕܐܡܝܪ ܠܢ. ܘܒܡܚܘܬܐ ܕܪܘܓܙܐ ܕܐܠܗܐ. ܫܼܩܠ ܓܙܪ ܕܝܢܐ. ܡܠܠܘܢ ܕܝܢ ܒܠܥ ܘܡܝܬ. ܘܠܫܘܪܪܐ ܕܗܕܐ. ܡܢ ܐܠܨ̈ܬܐ ܐܬܚܙܝܬ ܠܝ. ܕܗܝ ܡܢܬܐ ܡܢ ܬܫܥܝܬܐ ܕܣܝܡܐ ܡܛܠ ܗܕܐ. ܠܛܘܒܬܢܐ ܛܝܡܬܐܘܣ ܪܝܫ pb. 83 ܐܦܝܣ̈ܩܘܦܐ. ܐܣܝܡ ܗܪܟܐ ܒܗܠܝܢ ܕܟܬܝܒܢ܀ ܕܩܕܝܫܐ ܛܝܡܬܐܘܣ ܐܪܟܝܐܦܝܣܩܦܘܣ ܗܿܝ ܕܐܠܟܣܢܕܪܝܐ ܡܢ ܬܫܥܝܬܐ ܗܿܝ ܕܟܬܒ ܟܕ ܐܝܬܘܗܝ ܒܓܢܓܪܐ܀ ܒܙܒܢܐ ܗܿܘ ܒܡܫܬܒܩܢܘܬܐ ܘܒܨܒܝܢܐ ܕܐܠܗܐ. ܓܕܫ ܡܛܠ ܚܛܗ̈ܝܢ ܣܓ̈ܝܐܐ. ܕܢܥܢܕ ܛܘܒܬܢܐ ܡܠܟܢ ܬܐܘܕܣܝܣ. ܡܢ ܒܬܪ ܫܢܬܐ ܚܕܐ ܕܗܘܐ ܣܘܢܗܕܘܣ ܗܿܝ ܕܬܪܬܝܢ ܒܐܦܣܘܣ: ܗܿܘ ܕܝܢ ܕܒܬܪܗ ܩܿܒܠ ܡܠܟܘܬܐ ܠܐ ܐܬܕܡܝ ܒܛܢܢܗ ܚܡܝܡܐ ܕܡܛܠ ܗܝܡܢܘܬܐ. ܘܒܕܓܘܢ ܟܠܗܝܢ ܗܥܝܢ ܕܒܥܕܬܐ ܐܬܒܠ̈ܒܠܢ܆ ܘܣܩܘܒܠܐܝܬ ܠܢܡܘܣܐ ܕܗܘܐ ܥܠ ܗܪ̈ܝܛܝܩܘ. ܡܢ ܫܿܘܐ ܠܥܘܗܕܢܐ ܛܘܒܬܢܐ ܬܐܘܕܣܝܣ ܢܦܩ ܗܘ̈ܝ. ܡܢ ܗܝܕܝܢ ܘܥܕܡܐ ܠܗܫܐ. ܡܬܪ̈ܕܦܝܢ ܓܝܪ ܕܚܠ̈ܝ ܐܠܗܐ. ܘܟܠ ܠܫܢ ܡܓܕܦܢܐ ܘܡܪܚܐ ܫܩܠ ܦܪܗܣܝܐ ܕܢܐܡܪ ܥܠ ܡܫܝܚܐ. ܡܚܕܐ ܓܝܪ ܡܢ ܒܬܪ ܕܐܡܠܟ ܡܪܩܝܢܐ. ܫܕܪ ܠܡܨܪܝܢ ܐܢܫ ܛܪܝܒܘܢܐ ܕܢܘܛܪ̈ܐ ܕܢܩܪܐ ܠܪܫܝܥܐ ܢܣܛܘܪܝܣ ܘܠܕܘܪܬܐܘܣ ܐܢܫ ܕܗܘܐ ܐܦܝܣܩܘܦܐ. ܗܿܘ ܕܗܘ ܡܢ ܢܦܫܗ ܐܙܠ ܠܐܟܣܘܪܝܐ ܥܡ ܢܣܛܘܪܝܣ ܒܨܒܝܢܗ. ܐܟ ܕܝܢ ܕܐܫܬܥܝܘ ܐܢܫ̈ܝܢ. ܣܓܝ ܐܝܬܘܗܝ ܗܘܐ ܝܕܘܥܐ ܘܡܚܒܢܐ ܗܘ ܕܘܪܬܐܘܣ ܕܗܿܘ ܕܗܝܕܝܢ ܐܡܠܟ. pb. 84 ܟܕ ܕܝܢ ܐܕܪܟ ܗܿܘ ܕܐܫܬܕܪ ܛܪܝܒܘܢܐ ܠܬܐܒܝܕܐ: ܐܟ ܕܐܬܝܕܥܬ ܠܚܪܬܐ ܠܣܓ̈ܝܐܐ: ܠܘ ܓܝܪ ܒܓܘܢܝܐ ܐܣܬܥܪܬ ܗܕܐ܆ ܐܫܟܚܗ ܠܢܣܛܘܪܝܣ ܒܗܿܝ ܕܡܬܩܪܝܐ ܦܢܘܣ ܕܐܝܬܝܗܿ ܡܕܝܢܬܐ ܕܬܐܒܝܕܐ܆ ܟܕ ܒܚܣܢܐ ܡܕܡ ܡܬܢܛܪ ܗܘܐ. ܘܒܟܘܪܗܢܐ ܙܝܥܐ ܡܬܢܘܠ ܗܘܐ. ܓܕܫ ܕܝܢ ܕܗܘ ܢܣܛܘܪܝܣ ܡܢ ܒܪ̈ܒܪܝܐ ܢܬܠܒܟ ܡܢ ܐܘܣܘܣ. ܡܢ ܐܝܟܐ ܕܐܟܣܘܪܣܬܢܐ ܗܘܐ ܡܢ ܛܘܒܬܢܐ ܡܠܟܐ ܬܐܘܕܣܝܣ܆ ܘܢܙܕܒܢ ܒܗܿ ܒܡܕܝܢܬܐ ܦܢܘܣ ܡܢܗܘܢ ܕܒܪ̈ܒܪܝܐ ܠܐܢܫܐ ܕܝܠܗܿ. ܘܟܕ ܗܕܐ ܝܠܦ ܐܢܕܪܝܐܐܩܘܡܝܣ. ܕܐܝܬܘܗܝ ܗܘܐ ܗܝܕܝܢ ܒܬܐܒܝܕܐ: ܟܕ ܚܝ ܗܝܕܝܢ ܗܘ ܡܿܠܟܐ ܬܐܘܕܣܝܣ. ܡܠܟܗ ܠܗ ܠܢܣܛܘܪܝܣ. ܟܕ ܫܿܠܚ ܠܗ ܡܢ ܒܬܪ ܕܐܙܕܒܢ. ܕܢܬܒ ܘܢܫܠܐ ܒܗܿ ܒܩܣܛܪܐ. ܘܠܐ ܢܥܒܕ ܡܕܡ ܡܪܚܐ ܘܢܡܠܠ. ܘܟܕ ܗܿܘ ܕܐܫܬܕܪ ܡܢ ܡܠܟܐ: ܐܫܟܚܗ ܠܢܣܛܘܪܝܣ ܕܟܪܝܗ ܒܦܢܘܣ ܡܕܝܢܬܐ ܐܟ ܕܩܕܝܡ ܐܡܿܝܪ ܥܡ ܕܘܪܬܐܘܣ. ܚܘܝ ܠܗܘܢ ܗܠܝܢ ܕܐܬܦܩܕ. ܘܡܛܠ ܡܨܪ̈ܝܐ ܘܐܟ ܕܒܪܐܙܐ ܡܕܡ ܫܘܕܥ ܐܢܘܢ. ܕܠܐ ܢܗܘܐ ܠܗܘܢ ܢܟܠܐ ܡܕܡ ܠܗܠܝܢ ܕܐܬܩܪܝܘܢ. ܟܕ ܕܝܢ ܕܘܪܐܬܘܣ ܐܦܝܣܗ: ܕܢܟܬܪ ܩܠܝܠ ܡܛܠ ܡܚܝܠܘܬܗ ܕܢܣܛܘܪܝܣ. ܝܘܡܐ ܡܢ ܝܘܡܐ ܢܣܛܘܪܝܣ ܠܒܝܫ ܒܝܫ ܐܬܿܐ ܗܘܐ. ܟܕ ܓܝܪ ܠܫܢܗ ܐܫܬܪܝ ܘܥܒܪ ܦܘܡܗ. ܟܕ pb. 85 ܐܝܬܘܗܝ ܬܡܢ ܗܘ ܛܪܝܒܘܢܐ. ܘܒܪܬ ܩܠܐ ܠܐ ܝܕܝܥܐ ܗܘܬ: ܟܠܝܘܡ ܬܘܒ ܡܬܪܦܐ ܗܘܐ ܘܡܫܬܪܐ ܠܫܢܗ. ܥܕܡܐ ܕܐܬܐ ܠܚܙܬܐ ܕܚܝܠܬܐ ܘܡܥܩܬܐ. ܐܝܟܢܐ ܕܫܪܪ ܗܘ ܛܪܝܒܘܢܐ ܕܐܫܬܕܪ ܠܣܓܝ̈ܐܐ ܡܢ ܒܬܪ ܗܟܢܐ. ܟܕ ܐܠܗܐ ܐܝܬܘܗܝ ܗܘܐ ܡܨܥܝܐ ܒܗܠܝܢ ܕܐܬܡܪ̈ܝܢ. ܡܫܬܥܐ ܗܘܐ ܓܝܪ ܕܡܢ ܟܠܗ̈ܝܢ ܗܠܝܢ ܡܕܝܢ̈ܬܐ ܐܟ ܕܠܡܐܡܪ ܕܐܝܬ ܗ̈ܘܝ ܒܫܒܒܘܬܐ ܕܦܢܘܣ ܡܕܝܢܬܐ. ܒܚܦܝܛܘܬܐ ܐܝܬܝ ܐܣܘ̈ܬܐ ܒܚܝܪ̈ܐ. ܘܠܐ ܐܫܟܚܘܢ ܕܡܕܡ ܢܘܬܪܘܢܝܗܝ ܠܗܿܘ ܕܟܪܝܗ ܗܘܐ. ܐܠܗܐ ܓܝܪ ܐܝܬܘܗܝ ܗܘܐ ܠܡ ܗܿܘ ܕܡܚܝܗܝ. ܘܠܣ̈ܓܝܐܐ ܝܕܝܥܐ ܥܼܒܕܗ ܠܡܘܬܗ ܙܝܥܐ ܒܝܕ ܬܫܥܝܬܗ. ܘܒܨܥܝܘܬܐ ܕܐܣܘ̈ܬܐ. ܘܟܕ ܗܘ ܢܣܛܘܪܝܣ ܡܝܬ. ܩܒܪܗ ܕܘܪܬܐܘܣ ܒܕܘܟܬܐ ܚܕܐ ܟܕ ܐܝܬܘܗܝ ܥܡܗ ܗܿܘ ܛܪܝܒܘܢܐ ܕܐܫܬܕܪ. ܘܡܢ ܒܬܪ ܡܘܬܗ ܕܗܿܘ. ܗܦܟ ܗܘ ܛܪܝܒܘܢܐ ܐܙܠ ܠܩܘܡܝܛܛܘܢ ܐܦܝܘܢ܀

37 §37

ܠܙ- ܬܘܒ ܘܗܕܐ ܫܡܿܥܬ ܡܢ ܐܒܐ ܕܡܫܬܥܐ ܗܘܐ. ܟܕ ܒܐܪܩܐ ܡܕܝܢܬܐ ܕܦܘܢܝܩܐ ܥܡܗ ܡܕܝܪ ܗܘܝܬ ܬܡܢ. ܘܐܡܿܪ ܗܘܐ. ܕܟܕ ܥܕܟܝܠ ܒܒܘܣܐ ܐܝܬܝ pb. 86 ܗܘܝܬ ܘܥܿܡܪ ܗܘܝܬ ܒܩܘܣܛܢܛܝܢܐܦܘܠܝܣ ܒܦܠܛܝܢ: ܘܙܗܝܪ ܗܘܝܬ ܒܢܦܫܝ ܘܥܢܘܐܝܬ ܚܿܝܐ ܗܘܝܬ. ܫܩܿܠܬ ܚܘܫ̈ܒܐ ܒܬܪܥܝܬܝ. ܡܛܠ ܪܐܙܐ ܕܬܠܝܬܝܘܬܐ ܩܕܝܫܬܐ. ܕܐܝܟܢܐ ܟܕ ܚܕ ܐܠܗܐ ܡܘܕܝܢܢ܇ ܡܗܝܡܢܝܢ ܚܢܢ ܒܬܠܝܬܝܘܬܐ ܫܘܝܬ ܒܐܘܣܝܐ ܘܡܬܘܡܝܬܐ ܘܕܠܐ ܫܘܪܝ܆ ܘܕܐܢ ܗܘ ܕܚܕ ܡܢ ܬܠܝܬܝܘܬܐ ܐܝܬܘܗܝ ܗܿܘ ܕܐܬܒܿܣܪ ܡܛܠܬܢ. ܘܟܕ ܗܘܐ ܒܚܙܘܐ ܐܡܿܪ ܗܘܐ. ܕܚܙܐ ܠܩܕܝܫܐ ܦܛܪܘܣ ܫܠܝܚܐ ܕܫܩܠܗ ܘܐܝܬܝܗ ܠܕܘܟܬܐ ܪܡܬܐ܆ ܘܐܟ ܒܒܘܣܐ ܐܩܝܡܗ ܩܕܡܘܗܝ. ܘܚܘܝ ܠܗ ܒܫܡܝܐ ܢܘܗܪܐ ܪܒܐ ܘܠܐ ܡܬܩܪܒܢܐ. ܘܠܐ ܡܬܕܪܟܢܐ. ܕܐܝܬ ܗܘܐ ܠܗ ܓܝܓܠܐ ܐܟ ܛܘܦܣܐ ܕܫܡܫܐ. ܘܐܡܼܪ ܠܗ. ܗܐ ܐܒܐ. ܘܡܚܕܐ ܐܓܪܢܐ ܕܢܩܝܦ ܠܗܿܘ ܩܕܡܝܐ ܘܕܒܟܠ ܡܕܡ ܕܿܡܐ ܠܗ. ܘܒܡܨܥܬܗ ܠܡܪܢ ܐܟ ܕܡܬܬܨܝܪ ܢܨܪܝܐ. ܘܬܘܒ ܐܡܼܪ ܠܗ. ܕܗܐ ܒܪܐ. ܘܥܡܗ ܢܘܗܪܐ ܕܬܠܬܐ. ܕܕܡܿܐ ܒܟܠܡܕܡ ܠܗܠܝܢ ܩܕܡ̈ܝܐ. ܘܠܩܕܝܫܐ ܦܛܪܘܣ ܕܐܡܿܪ ܠܗ. ܕܗܐ ܪܘܚܐ ܩܕܝܫܐ. ܚܕܐ ܐܘܣܝܐ. ܚܕ ܟܝܢܐ. ܚܕܐ ܬܫܒܘܚܬܐ. ܚܕ ܚܝܠܐ. ܚܕ ܢܘܗܪܐ. ܚܕܐ ܐܠܗܘܬܐ. ܬܠܬܐ ܩܢܘ̈ܡܐ. ܐܠܐ ܟܕ ܬܠܬܝܗܘܢ ܠܐ ܡܬܩܪ̈ܒܢܐ ܐܝܬܝܗܘܢ. ܗܿܘ ܒܠܚܘܕ ܡܨܥܝܐ: ܡܕܡܝ ܗܘܐ ܕܐܝܬ ܗܘܐ ܠܗ ܚܙܬܐ ܕܒܪܢܫܐ ܢܨܪܝܐ: ܠܬܚܘܝܬܐ ܕܗܿܘ ܕܐܨܛܠܒ ܚܕ ܡܢ ܬܠܝܬܝܘܬܐ ܩܕܝܫܬܐ pb. 87 ܐܝܬܘܗܝ. ܘܠܘ ܐܚܪܢܐ. ܠܐ ܬܗܘܐ. ܗܠܝܢ ܕܝܢ ܬܪ̈ܝܢ ܐܚܪ̈ܢܐ ܢܘܗܪܐ ܒܠܚܘܕ ܠܐ ܡܬܩܪܒܢܐ ܘܕܠܐ ܐܣܟܝܡܐ ܘܠܐ ܡܬܕܪܟܢܐ ܘܠܐ ܡܬܗܘܢܢܐ܀

38 §38

ܠܚ- ܐܢܝܐܢܘܣ ܐܢܫ. ܗܘܐ ܐܣܟܘܠܣܛܝܩܐ ܢܟܦܐ ܘܟܢܝܟܐ ܘܐܪܬܘܕܟܣܐ. ܕܐܟ ܗܟܢܐ ܓܝܪ ܐܝܬܘܗܝ ܗܘܐ ܐܦ ܐܒܐ ܕܝܠܗ. ܗܢܐ ܟܕ ܗܘ ܫܝܪܐ ܒܐܠܟܣܢܕܪܝܐ ܐܫܬܘܝ ܕܢܩܒܠ ܡܥܡܘܕܝܬܐ ܡܢ ܐܒܐ ܕܝܠܢ. ܘܒܬܪ ܗܝܕܝܢ ܗܘܐ ܒܩܠܝܩܝܐ. ܘܟܕ ܒܡܕܝܢܬ ܡܠܟܘܬܐ ܩܡ ܬܡܢ ܢܣܒ ܐܢܬܬܐ ܟܢܝܟܬܐ. ܘܕܡܨܒܬܐ ܒܗܠܝܢ ܐܚܪ̈ܢܝܬܐ. ܠܘ ܕܝܢ ܐܪܬܐܕܟܣܬܐ. ܐܠܐ ܠܬܪ̈ܝܝ ܟܝ̈ܢܐ ܡܫܬܘܬܦܐ ܗܘܐ. ܘܟܕ ܙܒ̈ܢܝܢ ܣܓܝ̈ܐܢ ܡܢܗ ܡܬܢܓܕܐ ܗܘܬ ܕܬܐܬܐ ܨܝܕ ܐܪ̈ܬܐܕܘܟܣܘ ܟܬܪܬ ܠܐ ܡܬܛܦܝܣܢܝܬܐ ܐܝܟܢܐ ܕܢܬܬܙܝܥ ܒܛܢܢܐ ܐܠܗܝܐ. ܘܒܚܘܒܐ ܩܕܝܫܐ. ܘܢܟܬܘܒ ܣܒܝܣܐܝܬ ܠܛܘܒܢܐ ܐܒܐ ܕܝܠܢ ܕܐܝܬܘܗܝ ܗܘܐ ܒܦܠܣܛܝܢܐ. ܡܢܗ ܓܝܪ ܒܠܚܘܕܘܗܝ ܡܩܒܠ ܗܘܐ ܩܘܪܒܢܐ. ܕܢܒܥܐ ܚܠܦ ܐܢܬܬܗ ܡܢ ܐܠܗܐ. ܕܢܕܚܩܝܗܿ ܡܢ ܫܘܬܦܘܬܐ ܕܬܪ̈ܝܝ ܟܝ̈ܢܐ. ܘܟܕ ܗܘ ܩܕܝܫܐ ܐܬܟܫܦ. ܗܘܬ ܡܕܒܪܢܘܬܐ ܕܐܟ ܗܕܐ: ܒܟܘܪܗܢܐ ܥܣܩܐ ܢܦܠܬ ܗܝ ܛܘܒܢܝܬܐ ܐܟ ܕܢܬܦܣܩ ܥܠܝܗܿ ܡܢ ܐܣܘ̈ܬܐ ܡܫܡܠܝܐܝܬ. ܘܟܕ ܩܪܝܒܐ ܠܫܘܠܡܐ. ܚܙܬ ܚܙܘܐ ܕܐܟ ܗܢܐ. ܕܐܬܬܘܒܠܬ ܡܢ pb. 88 ܡܠܐܟ̈ܐ ܠܕܘܟܬܐ ܚܕܐ ܥܡܘܛܬܐ: ܘܕܡܠܝܐ ܚܫܟܐ ܘܣܪܝܘܬܐ. ܘܒܗܿ ܩ̈ܠܐ ܕܗܢܘܢ ܕܒܿܟܝܢ. ܘܕܠܝܬ ܠܗܘܐ ܘܠܐ ܚܕ ܢܘܚܐ ܐܘ ܒܘܝܐܐ. ܘܕܡܢ ܬܡܢ ܬܘܒ. ܫܩܠܘܗܿ ܡܠܐܟ̈ܐ ܘܐܘܒܠܘܗܿ ܠܕܘܟܬܐ ܐܚܪܬܐ ܕܡܠܝܐ ܢܘܗܪܐ ܘܬܫܒܘܚܬܐ. ܘܚܕܘܬܐ ܕܠܐ ܡܬܡܠܐ. ܘܚܙܬ ܟܢܫܐ ܕܩܕܝܫ̈ܐ ܬܡܢ ܕܠܒܝܫܝܢ ܗܘܘ ܠܒܘ̈ܫܐ ܢܗܝܪ̈ܐ ܘܡܫܒܚܝܢ ܗܘܘ ܠܐܠܗܐ. ܘܬܘܒ ܡܠܐܟ̈ܐ ܕܐܡܪܝܢ ܠܗܿ. ܕܗܐ ܗܠܝܢ ܐܝܬܝܗܘܢ܇ ܗܿܢܘܢ ܕܒܥܠܟܝ ܥܡܗܘܢ ܡܫܬܘܬܦ. ܗܠܝܢ ܕܝܢ ܐܚܪ̈ܢܐ ܐܝܬܝܗܘܢ ܗܠܝܢ ܕܡܫܬܘܬܦܝܢ ܥܡ ܐܦܝܣܩܘ̈ܦܐ ܗܿܢܘܢ ܕܡܩܿܒܠܝܢ ܠܣܘܢܕܘܣ ܕܟܠܩܝܕܘܢܐ. ܐܢ ܗܟܝܠ ܨܒܝܐ ܐܢܬܝ ܕܬܗܘܐ ܠܟܝ ܫܘܬܦܘܬܐ ܥܡ ܗܠܝܢ܆ ܡܦܝܣܝܢܢ ܡܛܠܬܟܝ ܠܡܪܢ. ܕܢܬܠ ܠܟܝ ܦܪܘܬܣܡܝܐ ܕܚܝ̈ܐ ܫܢܬܐ ܚܕܐ. ܩܘܡܝ ܡܕܝܢ ܘܢܝܼܚ ܥܡ ܓܒܪܟܝ܆ ܟܕ ܗܝ ܗܝܡܢܘܬܗ ܐܝܬ ܠܟܝ. ܘܒܫܘܬܦܘܬܗ ܢܿܛܪܐ ܐܢܬܝ ܢܦܫܟܝ ܡܢ ܟܠܗܿ ܚܛܝܬܐ ܘܡܢ ܡܗܡܝܢܘܬܐ. ܘܟܕ ܬܫܠܡ ܫܢܬܐ. ܐܬܝܢܢ ܘܫܩܠܝܢܢ ܠܟܝ܆ ܘܣܝܡܝܢܢ ܠܟܝ ܒܗܕܐ ܕܘܟܬܐ. ܘܟܕ ܗܝ ܡܢ ܡܚܝܠܘܬܐ ܐܬܢܦܫܬ. ܡܚܕܐ ܩܪܬ ܠܓܒܪܗܿ ܕܝܿܬܒ ܗܘܐ ܥܡ ܣܓܝ̈ܐܐ ܒܒܝܬܐ ܐܚܪܢܐ ܒܐܒܠܐ. ܘܠܒܝܫ ܗܘܐ ܐܘܟܡ̈ܐ. ܗܘ ܕܝܢ ܕܠܐ ܥܘܟܪܐ ܩܡ. ܕܗܟܢܐ ܕܢܣܒܪܘܢ ܗܠܝܢ ܕܩܪܝܒܝܢ ܗܘܘ ܠܗ ܕܡܝܬܬ ܠܗܿ. ܗܘ ܕܝܢ ܐܬܐ ܠܘܬܗܿ. ܘܟܕ pb. 89 ܐܫܟܚܗܿ ܕܢܦܝܫܐ. ܐܦܩ ܟܠܗܘܢ ܠܒܪ. ܘܝܠܦ ܗܘܐ ܡܢܗܿ ܕܡܢܐ ܐܝܬܝܗܿ ܡܕܒܪܢܘܬܐ ܗܿܝ ܕܗܘܬ ܡܢ ܐܠܗܐ ܡܛܠܬܗܿ. ܗܝܕܝܢ ܗܝ ܓܠܝܐܝܬ ܟܠܗܝܢ ܗܠܝܢ ܕܚܙܘܐ ܐܫܬܥܝܬ. ܘܡܙܥܩܐ ܗܘܬ ܠܘܬܗ ܘܐܡܪܐ܆ ܕܒܟ ܐܝܬܝܗܿ ܗܿܝ ܕܐܬܚܠܡ. ܘܐܢ ܗܘ ܕܒܿܥܐ ܐܢܬ ܠܝ ܕܐܚܿܐ ܘܐܗܘܐ ܥܡܟ. ܗܒ ܠܝ ܡܢ ܩܘܪܒܢܐ ܩܕܝܫܐ ܕܐܪ̈ܬܘܕܘܟܣܘ. ܡܢ ܐܝܟܐ ܕܡܫܬܘܬܦ ܐܢܬ. ܗܘ ܕܝܢ ܟܕ ܐܬܛܦܝܣ ܕܨܒܝܢܐ ܕܐܠܗܐ ܐܝܬܘܗܝ ܘܪܫܡ ܠܝܘܡܐ ܕܒܗ ܚܙܬ ܚܙܘܐ: ܐܝܬ ܗܘܐ ܠܗ ܕܝܢ ܘܩܘܪܒܢܐ. ܕܡܫܬܕܪ ܗܘܐ ܠܗ ܟܠ ܫܢܬܐ ܡܢ ܐܒܐ ܦܛܿܪܐ ܐܦܝܣܩܘܦܐ: ܟܕ ܗܝܡܢܗܿ ܘܐܬܬܟܠ ܥܠܝܗܿ: ܘܩܕܡܐܝܬ ܬܒܥܗܿ ܡܠܬܐ. ܝܗܒ ܠܗܿ ܡܢ ܪ̈ܐܙܐ ܦܪ̈ܘܩܝܐ. ܘܟܕ ܩܡܬ ܘܚܝܬ ܚܝ̈ܐ ܢܟܦ̈ܐ ܘܕܡܝܬܪܘܬܐ ܒܐܪܬܘܕܘܟܣܝܐ ܘܒܟܠܗܿ ܬܩܢܘܬܐ. ܒܗ ܒܫܘܠܡܐ ܕܫܢܬܐ ܐܫܬܡܠܝܬ. ܘܗܠܝܢ ܬܕܡܪ̈ܬܐ܆ ܗܘ ܣܟܠܣܛܝܩܐ ܐܢܝܐܢܘܣ ܐܫܬܥܝ ܠܗܠܝܢ ܕܥܡ ܪܝܫܕܝܪܐ ܘܐܦܝܣܩܘܦܐ ܐܒܐ ܝܘܚܢܢ. ܘܐܒܐ ܝܘܠܝܢܐ ܩܫܝܫܐ: ܘܐܒܐ ܐܢܕܪܝܐܐ ܘܦܘܠܐ. ܘܐܒܐ ܬܐܘܕܘܪܐ ܘܟܠܗ ܟܢܘܫܝܗܘܢ. ܟܕ ܐܫܬܠܚ ܠܗܘܢ ܡܢ ܡܠܟܐ ܙܐܢܘܢ ܘܐܙܠܝܢ ܠܩܘܣܛܢܛܝܢܐܦܘܠܝܣ܀ pb. 90

39 §39

ܠܛ- ܠܗܕܐ ܬܫܥܝܬܐ ܕܡܿܐ ܘܫܪܒܐ ܕܡܛܠ ܛܘܒܢܐ ܩܠܘܕܝܢܐ܇ ܕܗܘܐ ܐܦܝܛܪܘܦܐ ܥܠ ܟܠܥܘܢ ܢܟܣ̈ܐ ܕܥܕܬܐ ܕܐܠܘܬܪܦܘܠܝܣ ܡܕܝܢܬܐ. ܕܡܫܬܘܬܦ ܗܘܐ ܡܿܢ ܥܡ ܐܦܝܣܩܘܦ̈ܐ. ܐܝܬ ܗܘܐ ܠܗ ܕܝܢ ܗܝܡܢܘܬܐ ܘܚܘܒܐ ܕܛܘܒܢܐ ܐܒܐ ܪܘܡܢܐ ܘܥܿܒܕ ܗܘܐ ܙܕܩ̈ܬܐ ܣܓܝ̈ܐܬܐ ܘܪ̈ܘܪܒܬܐ ܥܡ ܕܝܪܐ ܗܿܝ ܕܝܠܗ. ܘܟܕ ܚܝ ܘܡܢ ܒܬܪ ܥܘܢܕܢܗ. ܘܐܦ ܗܢܐ ܓܝܪ ܐܬܡܚܠ. ܘܟܕ ܗܘܐ ܒܗܠܝܢ ܕܫܘܠܡܐ܆ ܐܫܬܘܝ ܠܚܙܘܐ. ܘܠܦܠܪܦܪܝܐ ܕܕܡܿܝܐ ܠܗܿܝ. ܘܡܚܕܐ ܕܠܐ ܥܘܟܪܐ ܦܩܕ ܠܒܝ̈ܬܝܘܗܝ ܒܠܠܝܐ: ܟܕ ܐܢܫ ܠܐ ܚܿܙܐ. ܕܢܣܒܘܢܝܗܝ ܘܢܘܒܠܘܢܝܗܝ ܠܕܝܪܐ ܕܐܒܐ ܪܘܡܢܐ ܕܐܝܬܝܗܿ ܗܘܬ ܥܠ ܚܡܫܐ ܡܝ̈ܠܐ. ܘܟܕ ܐܬܐ ܠܬܡܢ ܘܐܫܬܘܕܝ ܠܐܒܗ̈ܬܐ ܩܕܝܫ̈ܐ ܘܪ̈ܝܫܝ ܕܝܪ̈ܬܐ ܗܠܝܢ ܕܥܡ ܐܒܐ ܠܐܘܢܛܝܝ. ܘܐܘܕܝ ܘܐܫܬܥܝ ܠܗܘܢ ܗܠܝܢ ܕܚܙܘܐ. ܣܓܝ ܐܬܟܫܦ ܘܐܦܝܣ ܥܡ ܕܡܥ̈ܐ ܒܚܢ̈ܓܬܐ. ܕܠܘ ܒܠܚܘܕ ܩܘܪܒܢܐ ܕܐܪ̈ܬܐܕܘܟܣܘ ܢܫܬܘܐ ܕܢܫܬܘܬܦ܆ ܐܠܐ ܘܒܐܣܟܝܡܐ ܕܕܝܪ̈ܝܐ. ܘܟܕ ܬܠܬܐ ܝܘ̈ܡܝܢ ܒܠܚܘܕ ܚܝܐ ܒܟܠܗ ܚܕܘܬܐ ܘܪܘܙܐ ܐܫܬܡܠܝ. ܘܥܡ ܩܫܝ̈ܫܐ ܐܬܬܣܝܡ. ܕܗܢܐ ܕܝܢ ܦܘܪܩܢܐ ܕܫܿܘܐ ܠܬܕܡܘܪܬܐ ܗܘܬ ܠܗ ܥܠܬܐ ܙܕܩܬܐ ܗܿܝ ܕܟܠ ܡܫܟܚܐ܀ pb. 91

40 §40

ܡ- ܛܘܒܢܐ ܒܘܢܝܦܛܐܘܣ ܗܿܘ ܪܗܘܡܝܐ ܩܫܝܫܐ. ܗܟܢܐ ܗܘܐ ܛܢܢܐ ܚܡܝܡܐ ܥܠ ܣܘܢܕܘܣ ܕܒܟܠܩܝܕܘܢܐ܆ ܐܝܟܢܐ ܕܐܦܠܐ ܒܥܢܝܢܐ ܫܚܝܡܐ ܢܩܒܠ ܐܢܫ ܡܢܗܘܢ. ܐܦܠܐ ܠܥܠܡܝܐ ܐܘ ܡܬܘܡ ܕܢܣܿܬܘܕ ܥܡܗ. ܐܠܐ ܐܢܗܘ ܩܕܡܐܝܬ ܢܚܪܡ ܠܣܘܢܗܕܘܣ ܕܟܠܩܝܕܘܢܐ. ܐܦܢ ܗܘ ܕܒܐܘܪܚܐ ܢܦܓܥ ܗܘܐ ܒܗ ܐܢܫ. ܘܝܬܝܪܐܝܬ ܒܗܿܝ ܕܚܿܙܐ ܗܘܐ ܠܗ ܚܙܘܐ ܕܐܟ ܗܢܐ. ܟܕ ܗܘܐ ܛܠܘܡܝܐ. ܐܣܬܒܪ ܠܗ ܠܡ ܕܚܿܙܐ ܗܘܐ ܐܢܫ ܡܝܬܐ ܕܣܝܡ ܒܥܪܣܐ ܩܕܡ ܩܕܝܫܬܐ ܩܝܡܬܐ ܕܣܿܪܐ ܣܓܝ. ܘܕܡܠܐ ܗܘܐ ܐܐܪ ܡܢ ܣܪܝܘܬܗ. ܘܕܗܢܐ ܡܢ ܫܠܝ ܚܝܐ ܘܥܬܝܕ ܗܘܐ ܕܢܡܠܟ ܘܐܚܝܕ ܗܘܐ ܒܐܝܕܗ ܟܬܒܐ. ܗܿܘ ܕܟܕ ܝܗܒܗ ܠܩܫܝܫܐ ܒܘܢܦܛܝܣ ܐܡܼܪ. ܣܒ ܡܢܝ ܟܬܒܐ ܗܢܐ. ܗܿܘ ܕܡܢ ܠܒܪ ܡܿܢ ܢܨܝܚܐܝܬ ܡܨܒܬ ܗܘܐ. ܟܕ ܕܝܢ ܩܒܠ ܡܢܗ ܘܦܬܚ. ܐܫܟܚܗ ܡܢ ܠܓܘ ܕܡܠܐ ܫܘܚܪ̈ܐ. ܫܘܘܕܥܐ ܕܝܢ ܐܝܬܘܗܝ ܗܘܐ ܗܢܐ ܕܟܕ ܢܣܛܘܪܝܣ ܡܿܢ ܐܝܬܘܗܝ ܗܘܐ ܡܝܬܐ. ܚܝܐ ܒܐܝ̈ܕܝ ܝܘܒܢܠܐܘܣ. ܕܗܘܐ ܝܪܘܬܐ ܕܫܘܒܚܐ ܣܪܝܩܐ ܕܗܿܘ. ܐܡܪ ܗܘܐ ܕܝܢ ܘܗܕܐ ܛܘܒܢܐ ܐܒܐ ܦܛܪܐ ܕܗܟܢܐ ܡܠܐ ܠܥܕܬܐ ܡܢ ܐܢܫܐ ܡܗ̈ܡܝܢܐ ܕܘܝܐ ܝܘܒܢܠܐܘܣ. ܕܡܕܡ ܕܐܟ ܗܢܐ ܢܗܘܐ ܒܝܘ̈ܡܬܗ. ܟܕ ܗܘ ܐܒܐ ܦܛܪܐ ܒܙܒܢܐ ܗܿܘ ܫܠܐ ܗܘܐ ܒܗܿ ܒܡܕܝܢܬܐ ܩܕܝܫܬܐ܀ pb. 92

41 §41

ܡܐ- ܐܢܫ ܡܫܡܫܢܐ ܡܒܣܝܢܐ. ܟܕ ܢܛܪ ܝܘܡܐ ܕܬܫܡܫܬܗ ܒܩܕܝܫܬܐ ܩܝܡܬܐ ܘܒܝܬ ܣܗ̈ܕܐ ܩܕܝܫ̈ܐ. ܐܫܬܘܬܦ ܥܡ ܐܢܬܬܐ. ܘܥܠ ܕܢܕܡܟ ܐܟ ܥܝܕܐ ܠܓܘ ܒܕܘܟܬܐ ܩܕܝܫܬܐ ܕܓܓܘܠܬܐ ܒܒܝܬܐ ܥܠܝܐ. ܘܡܛܠ ܕܩܝܛܐ ܗܘܐ ܒܥܪܣܐ ܕܡܫܿܘܝܐ. ܘܟܕ ܬܪ̈ܥܐ ܐܚܝܕܝܢ ܗܘܘ ܩܠܐ ܗܘܐ: ܐܘ ܟܡܐ ܛܡܐܘܬܐ ܡܠܝܗܝ ܠܒܝܬܐ ܕܝܠܝ ܝܘܒܢܠܐܘܣ. ܛܡܝܘܗܝ. ܠܨܥܠܐ ܗܢܐ ܫܕܘ ܠܒܪ. ܘܡܢ ܨܦܪܐ ܟܕ ܬܪ̈ܥܐ ܐܚܝܕܝܢ ܐܫܬܟܚ ܗܿܘ ܒܫܘܩܐ ܩܕܡ ܒܝܬ ܣܗ̈ܕܐ ܩܕܝܫ̈ܐ ܟܕ ܕܡܝܟ ܒܥܪܣܐ ܘܡܬܒܿܙܚ. ܐܝܟܢܐ ܕܟܕ ܣܓܝ̈ܐܐ ܢܪܗܛܘܢ. ܘܗܿܘ ܢܬܬܥܝܪ ܘܢܪܓܫ ܒܒܗܬܬܗ. ܘܢܗܘܐ ܒܬܘܬ ܢܦܫܐ܆ ܘܢܐܡܪ ܠܟܠܢܫ ܚܛܝܬܗ ܥܡ ܕܡܥ̈ܐ. ܐܚܕܬ ܕܝܢ ܕܚܠܬܐ ܘܙܘܥܬܐ ܠܟܠܢܫ ܒܗܿܝ ܕܐܣܬܥܪܬ. ܘܒܕܓܘܢ ܠܡ ܟܕ ܡܬܢܟܦ ܝܘܒܢܠܐܘܣ ܦܣܩܗ ܡܢ ܬܫܡܫܬܐ. ܘܡܛܠ ܗܕܐ ܐܡܿܪ ܗܘܐ ܐܒܐ ܡܛܠ ܛܘܒܢܐ ܓܪܢܛܐܘܣ ܫܡܫܐ ܗܿܘ ܕܗܿܝܕܝܢ ܐܝܬܘܗܝ ܗܘܐ ܡܢ ܕܝܪܐ ܕܛܘܒܢܝܬܐ ܡܠܐܢܐ ܕܟܕ ܥܬܝܕ ܗܘܐ ܕܢܥܒܕ ܬܡܢ ܬܫܡܫܬܐ ܕܪܡܫܐ ܬܪܝܢ ܬܪܝܢ ܨܿܐܡ ܗܘܐ܀ pb. 93

42 §42

ܡܒ- ܨܒܐ ܕܝܢ ܗܼܘ ܝܘܒܢܠܐܘܣ ܡܢ ܩܕܡ ܣܘܢܗܕܘܣ ܕܟܠܩܝܕܘܢܐ. ܕܟܪܛܘܢܝܣܐ ܢܥܒܕܗ ܠܛܘܒܢܐ ܐܒܐ ܟܕ ܫܼܠܐ ܗܘܐ ܒܡܕܝܢܬܐ ܩܕܝܫܬܐ ܒܩܠܝܬܗ܇ ܕܐܝܬܝܗܿ ܗܘܬ ܥܠ ܓܢܒ ܦܘܪܩܣܐ ܕܪܝܫ ܐܒܗ̈ܬܐ ܕܘܝܕ. ܘܡܛܠ ܕܐܪܓܫ ܗܘ ܛܘܒܢܐ. ܢܿܛܪ ܗܘܐ ܢܦܫܗ. ܘܠܐ ܢܿܦܩ ܗܘܐ ܠܕܘܟ. ܟܕ ܕܝܢ ܟܢܘܫܝܐ ܗܘܐ ܒܩܕܝܫܬܐ ܨܗܝܘܢ. ܫܕܪ ܐܢܫܐ ܕܢܚܛܦܘܢܝܗܝ ܡܢ ܩܠܝܬܗ ܕܩܪܝܒܐ ܗܘܬ ܘܢܝܬܘܢܝܗܝ ܠܘܬܗ. ܘܟܕ ܥܬܝܕܝܢ ܗܘܘ ܕܢܩܪܒܘܢ ܠܩܠܝܬܗ ܗܿܢܘܢ ܕܐܫܬܠܓܘܢ. ܫܡܥ ܩܠܐ ܕܐܡܪ ܠܗ܆ ܩܘܡ ܥܪܘܩ ܡܢ ܗܢܐ ܬܪܥܐ ܙܥܘܪܐ. ܡܛܠ ܕܐܫܬܕܪܘܢ ܐܢܫ̈ܝܢ ܒܬܪܟ ܡܢ ܝܘܒܢܠܐܘܣ. ܕܢܣܒܘܢܟ ܒܩܛܝܪܐ. ܕܟܪܛܘܢܝܣܐ ܢܥܒܕܟ. ܘܡܚܕܐ ܩܡ ܘܫܕܐ ܢܦܫܗ ܡܢ ܐܓܪܐ ܡܕܡ ܪܡܐ. ܘܒܥܘܕܪܢܐ ܕܡܪܝܐ ܟܕ ܡܥܕܪ ܠܗ ܘܢܿܛܪ ܠܗ܆ ܥܠ ܪ̈ܓܠܘܗܝ ܩܡ ܬܪܝܨܐܝܬ ܟܕ ܢܦܠ. ܘܗܟܢܐ ܟܕ ܦܠܛ. ܥܪܩ ܡܢ ܐܝ̈ܕܝܐ ܕܗܠܝܢ. ܘܡܢ ܗܿܘ ܝܘܡܐ ܠܐ ܨܒܐ ܕܢܬܟܢܫ ܥܡ ܗܿܘ ܠܐ ܚܣܝܐ.

43 §43

ܡܓ- ܐܢܬܬܐ ܐܢܫ ܒܕܘܟܝ̈ܬܐ ܕܐܣܩܠܘܢܐ ܛܘܒܢܝܬܐ ܡܝܩܐ. ܕܐܝܬܝܗܿ ܗܘܬ ܥܕܡܐ ܠܒܪܬ ܡܐܐ ܫܢܝ̈ܢ. ܟܕ ܚܝܿܐ ܘܡܬܕܒܪܐ ܒܥܢܘܝܘܬܐ ܘܒܟܠܗܿ ܢܟܦܘܬܐ pb. 94 ܘܕܚܠܬ ܐܠܗܐ. ܘܐܝܬ ܗܘܐ ܠܗܿ ܢܣܝܢܐ ܕܛܝܒܘܬܐ ܕܐܠܗܐ. ܘܡܢܗ ܦܠܪܘܦܘܪܝܬܢܐ ܗܘܬ ܡܛܠ ܛܠܘܡܝܐ ܗܿܘ ܕܗܘܐ ܒܣܘܢܕܘܣ ܕܟܠܩܝܕܘܢܐ܆ ܠܥܝܢ ܟܠܢܫ. ܦܪܣܝܬܗܿ. ܘܝܗܿܒܐ ܗܘܬ ܛܘܒܐ ܠܗܠܝܢ ܕܠܐ ܐܫܬܘܬܦܘ ܒܗܿ. ܘܡܫܪܪܐ ܗܘܬ ܠܗܘܢ. ܘܚܙܬ ܠܣܛܢܐ ܓܠܝܐܝܬ ܕܓܿܙܡ ܠܗܿ ܡܘܬܐ ܘܬܡܿܪ ܠܗܿ. ܡܛܠ ܡܢܐ ܐܢܬܝ ܡܡܪܚܐ ܐܢܬܝ ܬܟܫܠܝܢ ܐܢܫܐ ܒܣܘܢܕܘܣ ܪܒܬܐ ܘܬܐܟܠܝܢ ܩܪ̈ܨܝܗܿ. ܘܟܕ ܫܕܗܿ ܕܐܝܬܝܗܿ ܗܘܬ ܣܒܬܐ ܡܢ ܡܣܛܒܬܐ ܕܣܝܡܐ ܗܘܬ ܥܠܝܗܿ. ܘܙܒܢܐ ܣܓܝܐܐ ܟܬܪ ܟܕ ܡܩܪܒ ܥܡܗܿ. ܥܕܡܐ ܕܐܬܚܝܠܬ ܒܗܝܡܢܘܬܐ: ܘܫܩܠܬ ܥܦܪܐ ܘܫܕܬ ܥܠܘܗܝ ܒܫܡܗ ܕܡܪܝܐ. ܘܗܟܢܐ ܐܥܪܩܬܗ. ܐܝܟܢܐ ܕܠܐ ܡܟܝܠ ܢܡܪܚ ܕܢܬܩܪܒ ܠܘܬܗܿ. ܘܗܕܐ ܐܫܬܥܝ ܠܢ ܐܒܐ ܬܐܘܕܘܪܐ ܩܫܝܫܐ. ܗܿܘ ܕܙܒܢ̈ܬܐ ܐܬܥܢܝ ܥܡܗܿ. ܘܢܣܒ ܡܢ ܡܝܬܪܘܬܗܿ ܘܡܢ ܩܕܝܫܘܬܗܿ.

44 §44

ܡܕ- ܛܘܒܢܝܬܐ ܐܘܪܒܩܝܐ ܡܫܡܫܢܝܬܐ. ܐܝܬܝܗܿ ܗܘܬ ܒܪܬܐ ܕܐܢܫ ܡܢ ܐܦܝܣܩܘ̈ܦܐ ܕܩܪ̈ܛܐ. ܗܝ ܕܟܕ ܡܝܬ ܐܒܘܗܿ ܪܚܡܬ ܠܡܫܝܚܐ ܘܟܦܪܬ ܒܥܠܡܐ. pb. 95 ܥܡ ܐܚܘܗܿ ܛܘܒܢܐ ܐܘܦܪܐܣܝܘܣ ܘܟܕ ܟܦܘܪܝܐ ܡܫܡܠܝܐ ܕܥܠܡܐ ܫܩܠܬ. ܐܡܿܪ ܐܢܐ ܕܝܢ ܐܟܣܢܝܘܬܐ. ܟܕ ܫܒܩܬ ܠܡܕܝܢܬܗܿ ܘܐܬܬ ܠܡܕܝܢܬܐ ܩܕܝܫܬܐ ܥܡ ܐܚܘܗܿ. ܨܝܕ ܕܘܟܬܐ ܩܕܝܫܬܐ ܕܣܘܠܩܐ ܕܝܪܐ ܙܒܢܘܢ. ܘܒܗܿ ܒܫܠܝܐ ܝܬܒܝܢ ܗܘܘ. ܟܕ ܡܬܥܢܘܝܢ ܠܫܦܝܪ. ܘܐܡܝܢܝܢ ܗܘܘ ܒܬܫܡܫܬܐ ܕܐܠܗܐ. ܓܕܫ ܕܝܢ ܒܬܪ ܙܒܢܐ. ܘܩܕܝܫܐ ܐܦܝܣܩܘܩܐ ܐܦܝܦܢܝܘܣ ܕܡܢ ܦܡܦܘܠܝܐ. ܡܢ ܒܬܪ ܗܦܘܟܝܗ. ܕܐܢܩܘܩܠܝܘܢ ܟܕ ܠܐ ܐܨܛܒܝ ܕܢܫܠܡ ܠܗܠܝܢ ܐܦܝܣ̈ܩܘܦܐ ܐܚܪ̈ܢܐ ܒܗܦܘܟܝܗ. ܢܬܛܪܕ ܡܢ ܥܕܬܗ ܕܒܦܡܦܘܠܝܐ ܘܢܦܘܩ ܒܐܟܣܢܝܘܬܐ. ܘܢܐܬܐ ܠܡܕܝܢܬܐ ܩܕܝܫܬܐ ܘܡܢܗܘܢ ܢܬܩܿܒܠ. ܘܥܡܗܘܢ ܢܗܘܐ ܠܗ ܫܠܝܐ ܘܥܢܘܝܘܬܐ. ܠܬܚܘܝܬܐ ܕܟܠܢܫ ܘܫܘܪܪܐ ܘܒܢܝܢܐ. ܟܕ ܕܝܢ ܚܣܡ ܒܗܠܝܢ ܐܟܠܩܪܨܐ. ܐܙܝܥ ܥܠܝܗܘܢ ܪܕܘܦܝܐ ܕܐܟ ܗܢܐ. ܡܕܒܪܢܐ ܕܗܝܕܝܢ ܕܐܘܪܫܠܡ ܫܕܪ ܗܟܝܠ ܠܐܪܟܝܕܝܩܘܢ ܕܒܝܬ ܣܘܠܩܐ ܥܡ ܐܢܫ̈ܝܢ ܐܚܪ̈ܢܐ ܕܢܟܣ ܐܢܘܢ. ܗܿܘ ܕܝܢ ܟܕ ܐܬܐ ܠܘܬܗܘܢ ܘܚܙܐ ܡܝܬܪܘܬܗܘܢ ܐܟ ܡܐ ܕܩܪܝܒ ܗܘܐ ܠܗܘܢ. ܡܠܟ ܠܗܘܢ ܘܐܡܪ: ܐܫܬܘܬܦܘܢ ܥܡ ܐܦܝܣܩܦܐ ܘܐܝܬ ܠܟܘܢ ܕܝܪܛܘܢ ܘܫܠܝܐ ܘܪܚܡܬܗ. ܘܟܕ ܛܘܒܢܝܬܐ ܐܡܿܪܐ ܗܘܬ. pb. 96 ܕܐܝܟܢܐ ܡܨܝܢܢ ܕܢܥܒܪ ܥܠ ܫܘܘܕܝܐ ܕܗܘܐ ܠܢ ܥܡ ܡܫܝܚܐ. ܘܢܫܬܘܬܦ ܥܡ ܣܘܢܘܕܘܣ ܕܟܠܩܝܕܘܢܐ. ܐܡܼܪ ܗܿܘ. ܕܒܩܝܢܕܘܢܘܣ ܕܝܠܝ ܐܫܬܘܬܦܘܢ. ܘܠܐ ܐܝܬܝܗܿ ܠܟܘܢ ܗܕܐ ܚܛܝܬܐ. ܘܛܘܒܢܝܬܐ ܦܢܝܬ ܠܘܬܗ. ܘܐܡܪܬ. ܐܡܪ ܠܝ ܡܪܝ ܐܒܐ. ܘܠܟܡܐ ܫܿܘܐ ܩܝܢܕܘܢܘܣ ܕܝܠܟ. ܕܒܕܐܟ ܗܢܐ ܐܙܒܢ ܦܘܪܩܢܐ ܕܢܦܫܝ. ܒܕܓܘܢ ܫܡܥ. ܩܕܝܫ̈ܐ ܚܢܘܟ ܘܢܘܚ ܘܕܢܝܐܝܠ ܐܢ ܗܘ ܕܢܩܒܠܘܢ ܘܢܡܠܟܘܢܢܝ ܕܐܫܬܘܬܦ ܠܟܘܢ. ܘܐܦܢ ܡܢ ܠܥܠ ܡܢ ܫܡܝܐ ܩܠܐ ܢܗܘܐ ܕܐܡܿܪ ܠܝ: ܐܬܛܦܝܣ ܠܟܘܢ ܘܐܫܬܘܬܦ ܥܡܟܘܢ. ܠܐ ܡܬܘܡ ܐܨܛܒܐ ܘܐܥܒܕ ܗܕܐ܇ ܐܢܗܘ ܕܠܐ ܐܒܐ ܕܝܠܝ ܛܝܡܬܐܘܣ ܕܝܪܝܐ ܘܩܕܝܫܐ܇ ܗܿܘ ܕܐܫܠܡ ܠܝ ܗܝܡܢܘܬܐ ܬܪܝܨܬ ܫܘܒܚܐ ܒܩܪ̈ܛܐ ܗܘ ܢܚܐ ܘܢܐܬܐ ܘܢܫܪܝܢܝ ܡܢ ܕܝܢܐ ܘܚܪܡܐ ܗܿܘ ܕܣܡ ܥܠܝ. ܗܿܘ ܕܐܝܬ ܠܗ ܐܕܢ̈ܐ ܕܢܫܡܥ ܢܫܡܥ܀ ܡܛܠ ܕܝܢ ܕܐܫܬܘܝܘ ܕܚܠܦ ܡܫܝܚܐ ܥܡ ܩܕܝܫܐ ܐܦܝܦܢܝܘܣ ܢܨܛܥܪܘܢ ܘܢܬܪܕܦܘܢ. ܘܕܬܫܬܩܠ ܡܢܗܘܢ ܕܝܪܐ ܥܡ ܥܒܕܐ ܕܐܝܬ ܗܘܐ ܒܗܿ: ܘܢܩܛܪܘܢ ܟܠܝܠܐ ܕܡܘܕܝܢܘܬܐ. ܐܙܠܘܢ ܠܐܠܟܣܢܕܪܝܐ. ܘܡܢ ܩܠܝܪ̈ܝܩܘ ܐܪ̈ܬܐܕܘܟܣܘ ܕܬܡܢ ܘܕܝܪ̈ܝܐ ܘܥܠܡ̈ܝܐ ܒܐܝܩܪܐ ܐܬܩܒܠܘܢ. ܘܒܣܓܝܐܘܬ ܙܢܝ̈ܐ ܫܒܚܘܢ pb. 97 ܠܐܠܗܐ ܘܐܫܬܒܚܘܢ ܡܢܗ. ܘܠܚܪܬܐ ܗܦܟܘܢ ܠܡܝܘܡܐ ܕܓܐܙܐ. ܘܪܗܛܐ ܕܡܘܕܝܢܘܬܗܘܢ ܫܠܡܘܢ ܬܡܢ ܘܐܫܬܡܠܝܘܢ. ܗܝ ܕܝܢ ܠܒܝܫܬ ܠܐܠܗܐ ܛܘܒܢܝܬܐ ܘܢܒܝܬܐ: ܘܕܡܠܝܐ ܡܢ ܟܠܗܿ ܛܝܒܘܬܐ ܕܪܘܚܐ ܩܕܝܫܐ ܐܝܬܝܗܿ ܗܘܬ. ܡܝܬܬܐ ܒܦܓܪ. ܘܕܚܿܝܐ ܕܝܢ ܒܪܘܚ ܘܗܿܝ ܕܫܪܝܪܐ ܢܐܡܪ: ܟܕ ܡܢܬܐ ܛܒܬܐ ܓܒܬ ܠܗܿ. ܒܫܡܝܐ ܐܝܬ ܠܗܿ ܕܘܝܪܐ܀

45 §45

ܡܗ- ܡܫܬܥܐ ܗܘܐ ܠܢ ܛܘܒܢܐ ܐܒܐ. ܡܛܠ ܐܢܫ̈ܝܢ ܬܪ̈ܝܢ ܩܕܝܫ̈ܐ ܕܝܪ̈ܝܐ ܥܬܝܩ̈ܐ ܩܝܠܝ̈ܩܝܐ ܛܘܪܩܘܛܐܘܣ ܘܐܪܡܓܐܢܝܣ ܕܣܠܩܘܢ ܠܩܘܡܛܛܘܢ ܒܝܘ̈ܡܬܗ ܘܐܫܬܥܝܘܢ ܠܗ. ܕܬܐܕܘܪܣ ܗܿܘ ܪܫܝܥܐ ܗܪܛܝܩܐ ܐܦܝܣܩܘܦܐ ܕܡܡܦܝܣܛܐ. ܗܿܘ ܬܪ̈ܝܝ ܟܝܢ̈ܐ ܕܗܘܐ ܪܒܗ ܢܣܛܘܪܝܣ ܥܡ ܕܝܕܘܪܘܣ ܗܟܢܐ ܦܩܪ ܥܠ ܐܠܗܐ. ܐܝܟܢܐ ܕܢܫܪܐ ܐܟ ܕܡܢܗ ܠܐܓܪ̈ܬܐ ܕܐܝܬ ܒܦܪܟܣܝܣ ܕܫܠܝ̈ܚܐ ܘܐܘܢܓܠܝܘܢ ܕܝܘܚܢܢ. ܘܟܕ ܠܡ ܥܠܢܢ ܠܘܬܗ ܘܪܫܝܢܢ. ܟܐܐ ܒܢ ܟܕ ܐܡܿܪ. ܕܠܐ ܐܝܬܝܗܿ ܕܕܝܪ̈ܝܐ ܕܗܠܝܢ ܕܐܟ ܗܟܢ ܢܒܨܘܢ. ܘܗܟܢܐ ܫܿܡܪ ܠܢ ܒܨܥܪܐ. ܘܡܢ ܒܬܪ ܬܠܬܐ ܝܘ̈ܡܝܢ ܟܕ ܗܘܐ ܠܗ ܕܝܘܐ ܘܐܟܿܠ ܗܘܐ ܢܦܫܗ ܡܝܬ܀ pb. 98 ܘܡܢ ܒܬܪ ܐܢܩܘܩܠܝܘܢ ܕܝܪ̈ܝܐ ܣܓܝ̈ܐܐ ܘܩܕܝܫ̈ܐ ܒܟܠ ܕܘܟ ܒܚܝܠܐ ܘܛܝܒܘܬܐ ܕܡܫܝܚܐ. ܠܐ ܐܨܛܒܝܘ ܕܢܫܠܡܘܢ ܠܗܦܘܟܝܗܿ. ܐܠܐ ܟܕ ܐܫܬܠܗܒܘܢ ܒܛܢܢܐ ܐܠܗܝܐ. ܟܬܪܘܢ ܒܗܿ ܒܗܝܡܢܘܬܐ ܬܪܝܨܬܐ ܘܡܿܘܕܝܢܘܬܐ܀

46 §46

ܡܘ- ܗܘܬ ܬܚܘܝܬܐ ܕܐܟ ܗܕܐ ܒܦܡܦܘܠܝܐ. ܕܝܪ̈ܝܐ ܐܢܫܝ̈ܢ ܕܫܠܡܝܢ ܗܘܘ ܠܗܠܝܢ ܬܪ̈ܝܝ ܟܝ̈ܢܐ ܐܦܝܣܩܘ̈ܦܐ. ܟܕ ܒܥ̈ܒܐ ܦܣܩܝܢ ܗܘܘ ܩܝ̈ܣܐ. ܐܪܡܝܘ ܥܡ ܕܝܪ̈ܝܐ ܐܪ̈ܬܘܕܘܟܣܘ ܟܕ ܡܒܚܢܝܢ ܡܛܠ ܗܝܡܢܘܬܐ ܘܡܬܦܫܟܝܢ. ܘܫܦܪ ܠܗܘܢ ܠܬܪ̈ܝܗܘܢ ܓܒ̈ܐ ܕܢܣܝܢܐ ܒܢܘܪܐ ܢܥܒܕܘܢ. ܘܕܝܢܐ ܡܢ ܬܡܢ ܢܣܒܘܢ. ܘܐܪܡܝܘܢ ܒܓܘܙܠܬܐ ܕܢܘܪܐ ܗܿܘ ܐܢܩܘܩܠܝܘܢ ܕܗܝܡܢܘܬܐ ܬܪܝܨܬܐ ܘܣܝܡܐ ܕܗܝܡܢܘܬܐ ܕܣܘܢܕܣ ܕܒܟܠܩܝܕܘܢܐ ܥܡ ܛܘܡܣܐ ܕܠܐܘܢ. ܘܡܟܬܪܝܢ ܗܘܘ ܕܢܩܒܠܘܢ ܕܝܢܐ ܕܐܠܗܐ. ܘܡܚܕܐ ܕܠܐ ܥܘܟܪܐ ܟܕ ܓܫܦܘܢ ܒܢܘܪܐ ܬܚܘܡܐ ܘܛܘܡܣܐ ܕܠܐܘܢ. ܡܚܕܐ ܗܘܘ ܩܛܡܐ ܘܥܦܪܐ. ܗܿܘ ܕܝܢ ܐܢܩܘܩܠܝܘܢ ܐܠܗܝܐ ܐܬܢܛܪ ܕܠܐ ܡܘܡ ܘܕܠܐ ܢܟܝܢܐ ܒܡܨܥܬܗܿ ܕܢܘܪܐ. ܘܡܛܠ ܗܕܐ ܟܕ ܐܬܬܘܝܘ ܗܠܝܢ ܒܢ̈ܝ ܫܘܬܦܘܬܐ ܕܟܦܘܪ̈ܐ. ܐܪܚܩܘܢ ܡܢ ܛܘܥܝܝ. ܘܟܕ ܛܢܢܐ ܫܩܠܘܢ ܕܕܚܠܬ ܐܠܗܐ ܗܘܘ ܐܪ̈ܬܐܕܘܟܣܘ܀

47 §47

ܡܙ- ܘܐܢ ܐܢܫ ܠܐ ܡܗܝܡܢ ܠܬܕܡܘܪܬܐ ܗܕܐ ܕܐܠܗܐ ܐܝܬܘܗܝ ܣܗܕܗܿ. ܗܐ pb. 99 ܕܕܿܡܝܐ ܠܗܿ ܗܘܬ. ܐܝܟܢܐ ܕܐܫܬܥܝ ܠܢ ܛܘܒܢܐ ܒܣܝܠܝܕܝܣ ܗܿܘ ܕܝܪܝܐ ܒܚܝܪܐ. ܕܒܩܪܝܬܐ ܚܕܐ ܐܝܬܝܗܿ ܥܠ ܓܢܒ ܦܛܠܡܝܕܐ ܗܘܐ ܡܕܡ ܕܐܟ ܗܢܐ. ܐܝܟܐ ܕܐܝܬܝܗܿ ܕܝܪܗ ܕܐܒܐ ܩܠܘܕܝܢܐ ܗܿܘ ܕܗܘܐ ܒܙܒܢܐ ܗܿܘ ܕܟܦܘܪܝܐ ܛܢܢܐ ܘܐܓܘܢܣܛܐ ܘܪܝܫ ܬܟܬܘܫܐ ܕܗܝܡܢܘܬܐ ܬܪܝܨܬ ܫܘܒܚܐ. ܐܝܬܘܗܝ ܕܝܢ ܗܿܘ ܡܕܡ ܕܗܘܐ ܕܐܟ ܗܢܐ. ܩܫܝܫܐ ܕܩܪܝܬܐ ܗܿܝ ܥܡ ܐܢܫ ܡܢ ܥܡܘܪܝܗܿ: ܗܕܝܘܛܐ ܡܿܢ܆ ܐܪܬܐܕܟܣܐ ܕܝܢ ܘܛܢܢܐ ܕܗܝܡܢܘܬܐ ܡܒܚܢ ܗܘܐ ܡܛܠ ܗܝܡܢܘܬܐ. ܘܐܠܨ ܗܘܐ ܠܗ ܕܡܫܬܘܬܦ ܥܡܗ ܐܘ ܕܢܫܢܐ ܡܢ ܩܪܝܬܐ. ܘܟܕ ܟܠܗܘܢ ܒܢ̈ܝ ܩܪܝܬܐ ܩܝܡܝܢ ܗܘܘ ܠܘܬܗ ܩܿܪܐ ܗܘܐ ܠܗ ܗܿܘ ܩܫܝܫܐ ܠܗܿܘ ܐܪܬܐܕܘܟܣܐ. ܟܕ ܐܡܿܪ. ܒܿܥܐ ܐܢܬ ܢܬܒܚܪ ܡܿܢ ܐܝܬܘܗܝ ܗܿܘ ܕܛܒܐܝܬ ܡܗܝܡܢ܆ ܢܘܚܕ ܢܘܪܐ ܘܢܪܡܐ ܐܢܐ ܘܐܢܬ ܝܡܝ̈ܢܐ ܕܝܠܢ ܒܢܘܪܐ. ܘܗܿܘ ܕܡܬܢܛܪܐ ܐܝܕܗ ܕܠܐ ܢܟܝܢܐ܆ ܝܕܝܥܐ ܕܠܘܬܗ ܐܝܬܝܗܿ ܗܝܡܢܘܬܐ ܬܪܝܨܬ ܫܘܒܚܐ. ܟܕ. ܕܝܢ ܥܠܡܝܐ ܐܡܿܪ ܗܘܐ. ܕܐܢܐ ܥܠܡܝܐ ܐܝܬܝ ܘܚܛܝܐ. ܐܢܬ ܕܝܢ ܩܫܝܫܐ. ܘܐܝܟܢܐ ܡܨܐ ܐܢܐ ܕܒܗܕܐ ܐܬܬܕܝܢ ܥܡܟ. ܒܢ̈ܝ ܩܪܝܬܐ ܕܝܢ ܗܠܝܢ ܕܩܝܡܝܢ ܗܘܘ ܫܒܚܘ ܘܢܩܫܘ ܟܦܐ ܡܛܘܠ ܦܪܘܛܣܝܣ ܗܕܐ. ܘܣܪܗܒܝܢ ܗܘܘ ܕܗܕܐ ܬܗܘܐ. ܩܿܒܠ ܗܿܘ ܐܪܬܘܕܘܟܣܐ. ܘܡܚܕܐ ܩܝܣ̈ܐ ܣܓܝ̈ܐܐ ܐܬܟܢܫܘ. ܘܢܒܪܫܬܐ pb. 100 ܐܬܬܪܝܡܬ ܠܥܠ. ܘܟܕ ܒܣܪ̈ܥܦܝܬܐ ܩܛܪܘܢ ܐܝ̈ܕܝܐ ܕܬܪ̈ܝܗܘܢ ܗܢܘܢ ܒܢ̈ܝ ܩܪܝܬܐ. ܩܪܒܘܢ ܨܝܕ ܢܘܪܐ ܘܓܫܦܘܢ. ܘܐܝܕܗ ܡܢ ܕܩܫܝܫܐ ܡܚܕܐ ܕܠܐ ܥܘܟܪܐ ܝܩܕܬ ܟܠܗܿ. ܗܿܝ ܕܝܢ ܕܗܿܘ ܡܗܝܡܢܐ ܐܪܬܘܕܘܟܣܐ ܥܠܡܝܐ܆ ܟܬܪܬ ܕܠܐ ܢܟܝܢܐ. ܘܡܫܪܪ ܗܘܐ ܠܢ ܗܘ ܛܘܒܢܐ ܒܣܝܠܝܕܝܣ ܕܝܪܝܐ. ܕܡܿܙܒܢ ܡܫܚܐ ܐܝܬܝ ܗܘܝܬ ܗܝܕܝܢ. ܘܒܗܠܝܢ ܕܘܟܝ̈ܬܐ ܟܕ ܙܒܿܢ ܐܢܐ ܡܫܚܐ ܐܫܬܘܝܬ ܕܐܥܒܕ ܥܢܝܢܐ ܥܡ ܓܒܪܐ ܗܿܘ ܡܘܕܝܢܐ. ܘܐܚܿܕܐ ܥܡܗ ܘܐܬܒܣܡ ܘܐܫܬܪܪ܀

48 §48

ܡܚ- ܫܡܥ ܬܘܒ ܕܕܡܿܝܐ ܠܗܕܐ ܬܕܡܘܪܬܐ. ܕܗܘܬ ܒܩܪܝܬܐ ܚܕܐ ܕܣܠܛܘ ܕܡܬܩܪܝܐ ܐܦܬܐ. ܗܿܝ ܕܐܝܬ ܥܠ ܓܒܗܿ ܘܕܝܪܐ ܕܩܕܝܫܐ ܣܠܘܢܐ ܐܒܐ ܕܕܝܪ̈ܝܐ. ܐܝܟܐ ܕܬܡܢ ܥܡܿܪ ܗܘܐ ܐܢܫ ܕܝܪܝܐ ܢܟܦܐ ܘܡܟܝܟܐ ܘܡܡܫܚܐ ܒܒܣܝܡܘܬܐ ܕܡܬܟܢܐ ܐܦܝܦܢܝܘܣ ܕܠܒܝܟ ܗܘܐ ܗܝܡܢܘܬܐ ܬܪܝܨܬܐ ܥܡ ܥܡܘܪܬܗ. ܗܿܝ ܕܫܩܠܗܿ ܡܢ ܐܒܗ̈ܬܐ ܩܕܝܫ̈ܐ ܘܕܝܪ̈ܝܐ ܐܪ̈ܬܐܕܘܟܣܘ. ܐܡܿܪ ܐܢܐ ܕܝܢ ܡܢ ܛܘܒ̈ܢܐ ܛܛܝܢܐ ܘܡܪܘܢ ܕܐܝܬܝܗܘܢ ܗܘܘ ܒܢ̈ܝ ܓܢܣܗ. ܒܥܠܕܒܒܐ ܕܝܢ ܕܓܘܐ ܘܣܿܥܪ pb. 101 ܢܟ̈ܠܐ ܟܕ ܚܣܡ ܒܦܘܪܩܢܐ ܕܗܠܝܢ. ܐܙܝܥ ܥܠܝܗܘܢ ܩܫܝܫܐ ܕܩܪܝܬܐ ܓܒܪܐ ܚܝܠܬܢܐ ܘܕܝܿܢܐ. ܗܿܘ ܕܟܕ ܚܙܝܗܝ ܠܓܒܪܐ ܕܗܘ ܒܠܚܘܕܘܗܝ ܣܕܩ ܡܢ ܥܕܬܐ ܗܿܝ ܕܝܠܗ: ܘܕܠܐ ܡܫܬܘܬܦ ܗܘܐ ܠܗ ܘܠܐ ܠܒ̈ܢܝ ܩܪܝܬܐ ܗܿܝ. ܒܢ̈ܝ ܩܪܝܬܐ ܡܠܠܘܢ ܠܛܿܫܝܢ ܗܘܘ ܠܗ ܘܥܠܘܗܝ܆ ܩܪܐ ܠܗ ܘܓܙܡ ܥܠܘܗܝ ܡܚܘ̈ܬܐ ܘܨܥܪ̈ܐ ܘܛܪܘܕܝܐ ܕܠܒܬܪܗ ܠܡ ܕܝܘܡܐ. ܐܢܗܘ ܕܠܐ ܢܬܩܪܒ ܘܢܫܬܘܬܦ ܥܡܗ܆ ܗܠܝܢ ܢܚܫ. ܗܘ ܕܝܢ ܡܣܟܢܐ ܐܪܬܐܕܘܟܣܐ ܐܡܪ ܠܘܬܗ. ܡܢ ܠܐ ܡܬܡܨܝ̈ܢܝܬܐ ܐܝܬܝܗܿ ܕܐܥܒܪ ܥܠ ܗܝܡܢܘܬܝ. ܗܿܝ ܕܩܒܠܬ ܡܢ ܐܒܗ̈ܬܐ ܩܕܝܫ̈ܐ. ܟܕ ܕܝܢ ܐܫܬܪܝ. ܛܝܿܒ ܢܦܫܗ ܠܥܪܘܩܝܐ: ܘܕܢܿܩܪܒ ܠܐܠܗܐ ܐܟܣܢܝܘܬܐ. ܟܕ ܡܚܘܐ ܠܐܠܗܐ ܫܚܩܐ ܕܐܝܬܘܗܝ ܒܗ܆ ܘܐܘܠܨܢܐ ܕܡܛܠ ܫܡܗ. ܘܠܒܬܪܗ ܕܝܘܡܐ ܟܕ ܚܠܝܡ ܘܠܝܬ ܗܘܐ ܠܗ ܡܕܡ ܕܒܝܫ ܠܗܿܘ ܩܫܝܫܐ ܥܢܕ. ܕܗܟܢܐ ܟܠܗܘܢ ܥܡܘܪ̈ܝܗܿ ܕܩܪܝܬܐ ܒܕܚܠܬܐ ܢܗܘܘܢ܆ ܘܢܬܕܡܪܘܢ ܒܗܿܝ ܕܗܘܬ. ܘܢܫܒܩܘܢܝܗܝ ܠܐܪܬܘܕܘܟܣܐ ܐܦܝܦܢܝܘܣ. ܘܠܐ ܡܟܝܠ ܢܐܠܙܘܢܝܗܝ. ܗܿܘ ܕܟܕ ܩܿܒܠ ܟܠܝܠܐ ܕܛܢܢܐ ܫܦܝܪܐ ܡܢ ܕܝܢܐ ܬܪܝܨܐ. ܐܫܬܘܝ ܕܒܩܢܘܒܝܢ ܕܐܒܘܢ ܩܕܝܫܐ ܛܘܒܢܐ ܐܫܥܝܐ ܢܬܡܚܠ. ܡܢ ܐܝܟܐ ܕܡܥܕ ܗܘܐ pb. 102 ܕܢܫܬܘܬܦ ܒܪ̈ܐܙܐ. ܘܟܕ ܐܫܬܡܠܝ ܬܡܢ. ܐܬܥܦܝ ܒܥܕܬܐ ܒܝܢܬ ܩܕܝܫ̈ܐ. ܒܩܒܪܐ ܕܐܝܬܘܗܝ ܒܠܚܘܕܘܗܝ܀

49 §49

ܡܛ- ܟܕ ܐܒܐ ܫܢܝ ܡܢ ܡܝܘܡܐ ܡܢ ܒܬܪ ܣܥܘܪܘܬܐ ܘܐܝܬܘܗܝ ܗܘܐ ܒܐܠܟܣܢܕܪܝܐ. ܘܬܡܢ ܡܢ ܐܢܫ ܡܢ ܗܠܝܢ ܪ̈ܚܡܝ ܐܟܣܢ̈ܝܐ ܘܪ̈ܚܡܝ ܩܕܝܫ̈ܐ ܐܬܩܒܠ. ܘܠܣ̈ܓܝܐܐ ܛܥܿܐ ܗܘܐ. ܐܒܐ ܦܝܘܪ ܐܒܐ ܕܕܝܪ̈ܝܐ ܓܒܪܐ ܢܒܝܐ ܘܛܒܝܒܐ ܒܟܠܕܘܟ ܫܡܥ ܩܠܐ ܕܐܡܿܪ ܠܗ. ܩܘܡ ܪܕܝ ܠܡܕܝܢܬܐ ܐܠܟܣܢܕܪܝܐ. ܘܟܕ ܥܿܐܠ ܐܢܬ ܨܝܕ ܐܦܝܣܩܘܦܐ ܦܛܪܐ ܗܿܘ ܡܘܕܝܢܐ ܕܛܪܝܕ ܘܡܛܫܝ ܬܡܢ. ܒܝܐܝܗܝ ܘܫܪܪܝܗܝ. ܘܐܬܒܣܡܘ ܥܡ ܚܕܕ̈ܐ. ܘܟܕ ܐܡܪ ܐܒܐ ܦܝܘܪ: ܕܡܿܢ ܡܚܘܐ ܠܝ ܕܘܟܬܐ ܕܐܝܬܘܗܝ ܒܗܿ. ܐܡܼܪ ܠܗ ܩܠܐ. ܕܫܿܪܐ ܒܐܘܪܚܐ ܘܠܐ ܬܐܨܦ. ܘܩܡ ܒܠܠܝܐ ܘܐܬܐ ܠܡܕܝܢܬܐ. ܘܟܕ ܥܠ ܒܬܪܥܐ. ܚܼܙܐ ܥܡܘܕܐ ܕܢܘܪܐ ܕܡܗܿܕܐ ܠܗ. ܠܘ ܒܠܚܘܕ ܒܫܘܩܐ ܐܠܐ ܘܥܕܡܐ ܠܕܪܬܐ܆ ܘܒܗ ܒܡܣܩܢܐ ܕܣܒ̈ܠܬܐ ܒܣܓܝܐܘܬ ܡܕܝܪ̈ܐ ܥܕܡܐ ܕܡܛܐ ܠܕܘܟܬܐ ܗܿܝ ܕܒܗܿ ܐܝܬܘܗܝ ܗܘܐ ܩܕܝܫܐ ܦܛܪܐ. ܣܠܩ ܗܘܐ ܕܝܢ ܗܘ ܐܒܐ ܦܝܘܪ ܘܟܕ ܢܼܩܫ pb. 103 ܒܬܪܥܐ ܘܛܘܒܢܐ ܕܚܿܠ ܗܘܐ ܕܢܦܬܚ ܠܗ: ܡܛܠ ܕܠܐ ܝܿܕܥ ܗܘܐ ܡܢܘ܆ ܐܡܪ ܐܒܐ ܦܝܘܪ: ܠܐ ܬܕܚܠ ܐܒܐ ܦܛܪܐ. ܐܢܐ ܐܝܬܝ ܡܣܟܢܐ ܦܝܘܪ. ܡܪܝܐ ܫܕܪܢܝ ܠܘܬܟ. ܘܗܟܢܐ ܟܕ ܦܬܚ ܬܪܥܐ ܩܒܠܗ ܠܩܕܝܫܐ. ܘܚܕܝܘ ܥܡ ܚܕ̈ܕܐ ܘܪܘܪܒܐܝܬ ܐܬܒܝܐܘ. ܓܕܫ ܕܝܢ ܕܡܪܗ ܕܒܝܬܐ ܐܝܬ ܗܘܬ ܠܗ ܒܒܘܣܐ ܫܒܪܐ ܘܥܕܟܝܠ ܠܐ ܥܡܝܕ ܗܘܐ ܘܐܦܝܣܗ ܠܐܒܐ ܕܢܥܡܕܗ. ܘܟܕ ܛܘܒܢܐ ܡܫܬܐܠ ܗܘܐ. ܒܗܿܝ ܕܠܝܬ ܗܘܐ ܠܗ ܕܘܟܬܐ ܕܚܫܚܐ: ܘܠܐ ܗܠܝܢ ܕܘܿܠܐ ܕܢܠܒܟܘܢ ܥܡܗ ܒܬܫܡܫܬܐ ܩܪܝܒܝܢ ܗܘܘ܆ ܟܬܪ ܗܿܘ ܟܕ ܡܬܚܪܐ ܘܡܦܝܣ ܠܗ. ܐܝܟܢܐ ܕܢܬܐܠܨ ܛܘܒܬܢܐ ܕܢܐܚܘܕ ܬܪܥܐ ܘܠܐ ܢܦܬܚ. ܗܿܝ ܕܐܠܗܐ ܕܢܕܥ. ܕܐܝܟܢܐ ܟܕ ܐܬܦܬܚ ܬܪܥܐ ܐܫܬܟܚ ܗܿܘ ܫܒܪܐ ܩܕܡ ܩܕܝܫܐ܇ ܟܕ ܪܚܿܫ ܘܡܬܥܪܓܠ. ܒܗܿܝ ܕܣܓܝ ܬܡܗ ܗܘ ܩܕܝܫܐ. ܘܟܕ ܐܬܛܦܝܣ ܕܨܒܝܢܐ ܕܐܠܗܐ ܐܝܬܘܗܝ ܩܿܒܠ ܕܢܥܡܕܗ. ܘܟܕ ܠܝܬ ܐܢܫ ܥܡܗ: ܐܠܐ ܐܒܐ ܦܝܘܪ ܕܗܝܕܝܢ ܐܣܬܩܒܠ. ܟܕ ܠܐ ܐܝܬܘܗܝ ܩܠܝܪܝܩܐ ܐܠܐ ܫܚܝܡܐ. ܒܪܡ ܕܝܢ ܡܛܠ ܐܘܠܨܢܐ ܐܦܝܣ ܠܗ ܕܢܠܒܟܗ ܠܒܒܘܣܐ ܠܥܠ ܡܢ ܠܩܢܐ܆ ܕܗܟܢܐ ܐܫܝܕܘܬܐ ܕܡܝ̈ܐ ܢܥܒܕ. ܘܟܕ ܐܬܐ ܗܿܘ ܕܢܠܒܘܟ. ܚܙܐ ܛܝܒܘܬܐ ܕܟܗܢܘܬܐ ܠܥܠ ܡܢ ܪܝܫܗ ܕܛܘܒܬܢܐ. pb. 104 ܘܕܚܿܠ ܘܥܪܩ. ܘܩܿܥܐ ܗܘܐ ܘܐܡܿܪ: ܐܘܒܣܐܝܣ ܐܘܒܣܐܝܣ. ܗܿܘ ܕܡܬܦܫܩ ܡܪܝ ܡܪܝ. ܟܕ ܕܝܢ ܠܒܟܗ ܛܘܒܬܢܐ. ܠܡܚܣܢ ܐܦܝܣܗ ܕܢܓܫܘܦ ܥܡܗ ܒܥܿܒܕܐ ܩܕܝܫܐ. ܟܕ ܐܡܿܪ ܠܗ܆ ܠܐ ܬܕܚܠ ܡܢ ܕܝܢܐ܇ ܐܟ ܗܿܘ ܕܠܐ ܫܿܘܐ ܐܢܬ. ܡܛܠ ܕܡܢ ܐܘܠܨܢܐ ܗܕܐ ܗܘܝܐ ܐܟ ܨܒܝܢܗ ܕܐܠܗܐ. ܐܝܟܢܐ ܕܡܗܝܡܢܐ ܗܢܐ ܘܪܚܿܡ ܐܟܣܢܝ̈ܐ ܕܩܿܒܠ ܠܢ. ܢܫܬܘܐ ܠܒܘܪܟܬܟ ܘܠܛܝܒܘܬܐ ܕܡܢ ܐܠܗܐ܀

50 §50

ܢܢ- ܗܘ ܗܢܐ ܐܒܐ ܦܝܘܪ ܒܙܒܢ ܟܕ ܒܚܙܘܐ ܗܘܐ܆ ܚܙܐ ܟܢܫܐ ܣܓܝܐܐ ܕܕܝܪ̈ܝܐ ܕܛܥܝܢܝܢ ܨܠܝܒܐ ܚܕ ܪܒܐ ܥܠ ܟܬܦ̈ܬܗܘܢ ܡܢ ܬܪ̈ܝܗܘܢ ܪ̈ܝܫܘܗܝ܆ ܟܕ ܦܢܝܢ ܠܒܣܬܪܗܘܢ ܠܘܩܒܠ ܚܕܕ̈ܐ. ܘܗܠܝܢ ܡܿܢ ܕܡܬܬܠܝܢ ܠܟܐ. ܠܗܠܝܢ ܕܝܢ ܠܓܒܐ ܣܩܘܒܠܝܐ. ܘܕܟܥܟܪܝܢ ܗܘܘ ܠܚ̈ܕܕܐ܆ ܘܡܢ ܚܕܕ̈ܐ ܡܬܥܟܪܝܢ ܗܘܘ. ܗܿܝ ܕܡܫܘܕܥܐ ܗܘܬ ܠܣܕܩܐ ܕܗܫܐ ܗܘܐ ܒܚܪܝܢܐ ܘܬܟܬܘܫܐ ܕܐܓܦܛܝ̈ܐ ܘܕܦܠܣܛܝ̈ܢܝܐ ܕܝܪ̈ܝܐ ܐܪ̈ܬܘܕܘܟܣܘ. ܟܕ ܣܒܪܝܢ ܬܪܝܗܘܢ ܓܒ̈ܐ ܡܛܠ ܛܢܢܐ ܣܓܝܐܐ ܘܚܬܝܬܘܬܐ ܕܚܠܦ ܫܪܪܐ ܡܬܟܬܫܝܢ ܗܘܘ. ܗܿܝ ܕܐܦ ܐܢܫ ܥܬܝܩܐ ܡܢ ܩܕܝܫ̈ܐ ܐܒܐ ܠܘܩܝܣ pb. 105 ܗܿܘ ܕܩܠܝ̈ܬܐ. ܟܕ ܒܪܘܚܐ ܩܿܕܡ ܚܙܐ. ܫܘܕܥ ܟܕ ܐܡܿܪ ܠܗܠܝܢ ܕܥܡܗ. ܐܢ ܚܝܝ̈ܢ ܐܢܫܝ̈ܢ ܡܢܟܘܢ ܥܬܝܕ ܕܢܕܪܟ ܙܒܢܐ܆ ܕܒܗ ܬܪ̈ܝܢ ܡܬܠܒܟܝܢ ܕܢܣܗܕܘܢ ܚܠܦ ܡܫܝܚܐ ܘܡܛܠ ܐܪܬܘܕܟܣܝܐ. ܘܠܐ ܡܫܬܘܬܦܝܢ ܥܡ ܚܕܕ̈ܐ܀

51 §51

ܢܐ- ܗܟܢܐ ܘܛܘܒܢܝܬܐ ܐܘܪܒܩܝܐ ܗܿܝ ܕܡܢ ܠܥܠ ܐܬܥܗܕܢܢ. ܚܙܘܐ ܕܚܝܠܐ ܚܙܬ. ܟܕ ܗܝ ܗܕܐ ܡܫܘܕܥܐ. ܚܙܬ ܓܝܪ ܗܝ ܠܗܿ ܐܟ ܕܒܥܝܿܕܐ ܕܝܠܗܿ. ܕܣܠܩܐ ܗܘܬ ܒܠܠܝܐ ܠܒܝ ܣܘܠܩܐ ܩܕܝܫܐ܆ ܕܬܣܓܘܕ ܒܫܠܝܐ ܒܠܚܘܕܝܗܿ. ܘܟܕ ܐܬܟܦܦܬ ܥܠ ܕܪ̈ܓܐ. ܚܙܬ ܒܐܣܛܘܐ ܩܕܡ ܒܝܬ ܣܘܠܩܐ ܩܕܝܫܐ܆ ܐܢܬܬܐ ܐܢܫ ܕܠܒܝܫܐ ܗܘܬ ܢܚ̈ܬܐ ܕܐܪܓܘܢܐ. ܘܡܢܗܪܐ ܗܘܬ ܒܗܿ ܒܐܢܐܪܬܝܟܝܣ ܘܡܢ ܕܚܠܬܐ ܟܕ ܐܬܬܙܝܥܬ ܢܦܠܬ ܥܠ ܐܦܝ̈ܗܿ. ܘܣܝܡܐ ܗܘܬ ܥܠ ܐܪܥܐ. ܩܕܝܫܬܐ ܕܝܢ ܝܠܕܬ ܐܠܗܐ. ܗܝ ܓܝܪ ܐܝܬܝܗܿ ܗܘܬ. ܩܪܒܬ ܘܐܩܝܡܬܗܿ ܟܕ ܐܡܿܪܐ: ܠܐ ܬܕܚܠܝܢ ܐܡܐ. ܠܐ ܬܣܬܪܗܒܝܢ. ܘܟܕ ܠܒܟܬܗܿ ܒܐܝܕܗܿ ܡܕܝܪܐ ܗܘܬ ܥܡܗܿ. ܘܟܕ ܡܢܗܪܐ ܐܕܝܩܬ ܡܢ ܐܣܛܘܐ ܠܬܚܬ. ܟܕ ܡܬܒܩܝܐ ܒܛܘܪܐ. ܐܡܿܪܐ ܠܗܿ ܠܐܡܐ ܐܘܪܒܩܝܐ. ܚܿܙܝܐ ܐܢܬܝ ܐܡܬܗ ܕܐܠܗܐ: ܐܝܟܢܐ ܐܝܬܘܗܝ ܛܘܪܐ܆ ܚܿܙܐ ܠܟܝ ܒܙܒܢ ܗܟܢܐ܆ ܐܡܪܝ ܠܝ ܐܝܟܢܐ ܚܿܙܝܐ ܐܢܬܝ ܠܗ. ܗܝ ܕܝܢ ܐܡܪܬ: ܚܿܙܝܐ ܐܢܐ ܠܛܘܪܐ ܟܠܗ܆ ܐܟ ܡܐ ܕܡܪܟܒ pb. 106 ܡܢ ܨܠܝ̈ܚܐ ܕܩܝ̈ܣܐ. ܘܐܡܪܬ ܝܠܕܬ ܐܠܗܐ. ܗܐ ܐܟ ܕܚܿܙܝܐ ܐܢܬܝ ܠܛܘܪܐ ܗܢܐ܆ ܗܟܢܐ ܡܟܝܠ ܬܗܘܐ ܥܕܬܗ ܕܐܠܗܐ ܣܕܩ̈ܐ ܥܕܡܐ ܠܚܪܬܐ܀

52 §52

ܢܒ- ܠܘܢܛܝܣ ܡܢ ܗܠܝܢ ܕܡܣܬܒܪܝܢ ܕܐܝܬܝܗܘܢ ܓܢܣܐ ܢܨܝܚܐ ܘܚܙܝܐ ܕܐܣܩܠܘܢܐ. ܠܚܪܬܐ ܟܦܪ ܒܥܠܡܐ ܘܗܘܐ ܕܝܪܝܐ ܘܪܝܫܕܝܪܐ. ܠܗܿܘ ܕܐܬܢܒܝ ܠܗ ܩܕܝܫܐ ܙܐܢܘܢ ܡܕܒܪܝܐ ܕܐܦܝܣܩܘܦܐ ܗܿܘܐ ܐܢܬ. ܘܠܐ ܡܐܿܬ ܐܢܬ ܐܦܝܣܩܘܦܐ. ܡܕܝܢ ܟܕ ܗܘܐ ܐܦܝܣܩܘܦܐ ܕܐܣܩܠܘܢܐ ܐܟ ܢܒܝܘܬܐ܆ ܐܬܚܿܦܛ ܕܢܩܢܐ ܠܗ ܪܚܡܘܬܐ ܘܦܪܣܛܣܝܐ ܕܢܣܛܘܪܝܣ ܗܿܘ ܗܪܛܝܩܐ. ܕܐܚܝܕ ܗܘܐ ܗܝܕܝܢ ܥܕܬܐ ܕܩܘܣܛܢܛܝܢܐܦܘܠܝܣ. ܐܝܬܘܗܝ ܗܘܐ ܕܝܢ ܕܡܠܐ ܟܠܗ ܡܣܐܒ ܒܐܦ̈ܐ ܘܬܪܥܝܬܐ ܕܥܠܡܐ. ܘܒܕܓܘܢ ܟܕ ܐܟܣܘܪܣܬܝܢܐ ܗܘܐ ܪܫܝܥܐ ܢܣܛܘܪܝܣ. ܐܝܩܪ̈ܐ ܘܫܘ̈ܟܢܐ ܫܕܪ ܠܗ ܠܐܟܣܘܪܝܐ. ܘܟܕ ܡܢ ܒܬܪ ܗܟܢܐ ܗܘܬ ܣܘܢܕܘܣ ܕܟܠܩܝܕܘܢܐ ܣܠܩ ܐܦ ܗܘ. ܘܐܟ ܕܐܡܪܝܢ ܗܘܘ ܕܩܿܪܐ ܗܘܐ ܥܗ ܠܝܘܒܢܠܐܘܣ ܕܢܪܡܐ ܐܝܕܐ ܒܟܦܘܪܘܬܐ ܝܬܝܪ ܡܢ ܟܠܗܘܢ ܗܘ ܐܝܬܘܗܝ ܗܘܐ. ܘܟܕ ܗܕܐ ܐܝܠܦܘܢ ܒܢ̈ܝ ܐܣܩܠܘܢܐ ܘܛܢܐܘܢ. ܡܛܝܒܝܢ ܗܘܘ ܕܟܕ ܗܿܦܟ ܠܐ ܢܩܒܠܘܢܝܗܝ. ܐܠܐ ܐܘ ܕܢܛܪܕܘܢܝܗܝ܆ pb. 107 ܐܘ ܕܢܪܓܡܘܢܝܗܝ. ܘܡܛܠ ܗܕܐ ܟܕ ܗܦܟ ܘܐܬܡܢܥ ܒܠܠܝܐ ܠܐܣܩܠܘܢܐ. ܟܕ ܝܕܥ ܛܢܢܐ ܕܥܡܐ ܕܒܗܿ܆ ܗܦܟ ܠܩܘܦܪܘܣ. ܘܟܕ ܡܝܬ ܬܡܢ. ܫܩܠܘܗܝ ܗܠܝܢ ܕܝܠܗ܆ ܘܐܬܚܦܛܘܢ ܡܛܫܝܐܝܬ ܕܢܝܬܘܢܝܗܝ ܠܐܣܩܠܘܢܐ. ܘܬܡܢ ܒܠܠܝܐ ܢܥܦܘܢܝܗܝ. ܘܟܕ ܐܫܬܟܚܬ ܐܠܦܐ ܕܛܝܦܐ ܗܘܬ ܡܢ ܩܘܡܛܛܘܢ. ܒܗܿ ܐܪܡܝܘܗܝ. ܐܝܬ ܗܘܐ ܕܝܢ ܒܗܿ ܒܐܠܦܐ ܫܠܕܐ ܕܐܢܫ ܗܢܝܘܟܐ ܕܐܝܬܘܗܝ ܗܘܐ ܡܢܗܿ ܕܐܫܩܠܘܢܐ ܘܐܬܩܪܝ ܠܩܘܣܛܢܛܝܢܐܦܘܠܝܣ. ܘܬܡܢ ܢܨܝܚܐܝܬ ܡܚܿܘܐ ܗܘܐ ܗܠܝܢ ܕܐܘܡܢܘܬܐ. ܘܟܕ ܡܝܬ. ܡܫܚܘܗܝ ܒܕܒܫܐ ܗܠܝܢ ܕܝܠܗ. ܘܒܓܠܘܣܩܡܐ ܕܐܒܪܐ ܣܡܘܗܝ. ܘܡܿܝܬܝܢ ܗܘܘ ܠܗ ܠܘܬ ܗܠܝܢ ܕܝܠܗ. ܟܕ ܗܘܐ ܕܝܢ ܟܝܡܘܢܐ ܩܫܝܐ ܒܝܡܐ ܘܡܚܫܘܠܐ ܩܡ: ܘܣܝܡ ܗܘܐ ܩܝܢܕܘܢܣ ܕܡܘܬܐ ܥܠ ܗܠܝܢ ܕܒܗܿ܆ ܢܘ̈ܛܐ ܡܦܩܝܢ ܗܘܘ ܘܫܕܝܢ ܡܢ ܛܥܢܐ: ܐܟ ܒܿܥܝܢ ܕܢܼܩܠܘܢ ܡܢܗܿ. ܘܥܡ ܟܠܗܝܢ ܐܬܚܫܒܘܢ ܕܐܦ ܫܠܕܗ ܕܗܢܝܘܟܐ ܢܫܕܘܢ. ܘܒܠܚܘܕ ܗܝ ܕܐܦܝܣܩܘܦܐ ܢܠܒܟܘܢ. ܡܛܠ ܐܝܩܪܐ ܕܐܦܝܣܩܦܘܬܐ. ܘܟܕ ܟܐܢܘܬܗ ܕܐܠܗܐ ܡܕܒܪܐ ܗܘܬ܇ ܟܕ ܡܣܪܗܒܝܢ ܢܘ̈ܛܐ ܡܢ ܡܚܫ̈ܘܠܐ ܘܟܝܡܘܢܐ. ܚܠܦ ܗܿܝ ܕܗܢܝܘܟܐ ܫܠܕܐ ܕܠܐܘܢܛܝ ܫܕܘ ܒܝܡܐ. ܘܟܕ ܛܦܘ ܘܐܬܘ ܠܐܣܩܠܘܢܐ܆ ܒܫܠܝܐ ܩܪܘ ܠܒܝ̈ܬܝܘܗܝ ܕܝܠܗ pb. 108 ܕܠܐܘܢܛܝ. ܘܫܩܠܘ ܫܠܕܐ ܒܠܠܝܐ ܩܕܡ ܕܠܐ ܐܢܫ ܡܢ ܡܕܝܢܬܐ ܢܕܥ܆ ܘܐܬܚܦܛܘܢ ܕܥܘܦܝܐ ܕܝܠܗ ܢܥܒܕܘܢ. ܘܟܕ ܦܬܚܘܗܝ ܠܓܠܘܣܩܡܐ ܕܢܩܒܪܘܢ ܫܠܕܐ. ܐܫܬܟܚ ܗܢܝܘܟܐ ܒܟܠܗ ܐܣܟܡܗ. ܟܕ ܣܝܡ ܩܣܕܐ ܒܪܝܫܥ ܘܠܒܝܟ ܫܒܛܗ ܘܡܿܚܙܩ ܒܦܣܝܩ̈ܬܐ. ܘܟܕ ܒܗܬܘܢ܆ ܦܩܕܘܢ ܠܗܠܝܢ ܕܩܪܝܒܝܢ ܗܘܘ܆ ܕܠܐ ܐܢܫ ܢܕܥ ܣܟ. ܐܠܐ ܐܟ ܗܿܘ ܕܦܓܪܗ ܕܐܦܝܣܩܘܦܐ ܠܐܘܢܛܝ ܐܝܬܘܗܝ܆ ܗܟܢܐ ܠܘܝܘܗܝ ܠܗܢܝܘܟܐ. ܐܡܪܝܢ ܗܘܘ ܕܝܢ ܕܒܪܢܫܐ ܛܒܐ ܗܿܘܐ ܗܘܐ ܠܗ ܘܕܣܓܝ ܪܚܿܡ ܗܘܐ ܕܢܬܠ ܙܕܩܬܐ. ܘܢܛܪ ܦܘܩ̈ܕܢܐ. ܘܗܟܢܐ ܐܫܬܡܠܝܬ ܢܒܝܘܬܐ ܕܩܕܝܫܐ ܙܐܢܘܢ. ܘܗܠܝܢ ܘܡܢ ܐܚܪ̈ܢܐ ܣܓܝ̈ܐܐ ܫܡܥܬ ܕܡܫܪܪܝܢ. ܕܚܿܠ ܠܐܠܗܐ ܕܝܢ ܐܒܐ ܙܟܪܝܐ ܩܫܝܫܐ ܐܡܿܪ ܗܘܐ. ܡܛܠ ܙܘܣܝܡܘܣ ܕܐܝܬܘܗܝ ܗܘܐ ܩܕܡܝܐ ܕܐܣܩܠܘܢܐ. ܕܗܘ ܐܫܬܥܝ ܠܝ ܟܕ ܡܫܪܪ ܕܒܗ ܒܚܙܘܐ ܩܿܒܠ ܘܦܠܪܦܘܪܬܢܐ ܗܘܐ. ܒܪ ܓܢܣܗ ܓܝܪ ܐܝܬܘܗܝ ܗܘܐ ܕܠܐܘܢܛܝ. ܘܥܡ ܗܠܝܢ ܐܚܪ̈ܢܐ ܟܕ ܒܪܐܙܐ ܐܬܩܪܝܘ ܠܩܒܘܪܬܗ. ܚܿܙܝܐ ܗܘܐ ܕܗܠܝܢ ܘܣܗܕܐ.

53 §53

ܢܓ- ܐܡܿܪ ܗܘܐ ܐܒܐ. ܡܢ ܩܕܡ ܬܠܬ ܫܢܝ̈ܢ ܕܬܗܘܐ ܣܘܢܕܘܣ ܕܟܠܩܝܕܘܢܐ. ܐܫܬܟܚܢܢ ܐܟܚܕܐ ܐܢܐ ܘܛܘܒܢܐ ܬܐܘܕܛܘܣ. ܘܐܢܫ̈ܝܢ ܡܢ ܐܒܗ̈ܬܐ ܒܐܘܪܫܠܡ. ܘܠܐܦ̈ܝ pb. 109 ܫܒ̈ܥ ܫܥ̈ܝܢ ܕܝܘܡܐ. ܚܙܝܢܢ ܓܠܝܐܝܬ ܟܠܢ ܬܠܬܐ ܫܡ̈ܫܐ ܒܫܡܝܐ. ܠܗܢܐ ܡܿܢ ܠܡܕܢܚܐ. ܠܗܢܐ ܕܝܢ ܠܡܥܪܒܐ. ܘܠܗܢܐ ܒܡܨܥܬܐ ܕܫܡܝܐ. ܐܝܢܐ ܕܝܢ ܐܝܬܘܗܝ ܚܝܠܐ ܘܚܙܘܐ ܗܘ. ܐܠܗܐ ܒܠܚܘܕܘܗܝ ܝܿܕܥ. ܡܫܘܕܥ ܕܝܢ ܦܢܛܘܣ ܘܡܦܩܢܐ ܕܣܘܥܪܢܐ܀

54 §54

ܢܕ- ܐܡܿܪ ܗܘܐ ܐܒܐ܆ ܕܟܕ ܐܢܐ ܒܡܨܪܝܢ. ܒܙܒܢܐ ܗܿܘ: ܟܕ ܐܫܬܡܠܝ ܒܣܗܕܘܬܐ ܕܚܠܦ ܫܪܪܐ ܒܩܘܣܛܢܛܝܢܐܦܘܠܝܣ܇ ܛܘܒܢܐ ܬܐܘܕܣܝܣ ܪܝܫ ܐܦܝܣܩܘ̈ܦܐ ܕܐܘܪܫܠܡ. ܚܙܝܬܗ ܒܗ ܒܠܠܝܐ ܕܡܬܥܠܐ ܗܘܐ ܠܫܡܝܐ. ܟܕ ܡܥܛܦ ܐܣܛܠܐ ܚܘܪܬܐ. ܗܿܝ ܕܐܝܬ ܥܝܕܐ ܕܢܠܒܫܘܢ ܐܦܝܣܩܘ̈ܦܐ ܕܐܘܪܫܠܡ ܡܐ ܕܡܿܥܡܕܝܢ. ܢܗܝܪܬܐ ܡܕܡ ܘܡܒܪܩܐ ܥܕܡܐ ܕܥܠ ܠܫܡܝܐ. ܘܟܕ ܪܫܡܬ ܝܘܡܐ. ܠܚܪܬܐ ܟܕ ܐܬܝܕܥ ܥܘܢܕܢܗ ܐܫܟܚܬ ܕܗܘ ܝܘܡܐ ܐܝܬܘܗܝ ܕܒܗܿ ܚܙܝܬ ܗܿܘ ܚܙܘܐ܀

55 §55

ܢܗ- ܠܘܬ ܗܠܝܢ ܕܐܡܪܝܢ ܠܢ ܕܟܠܗܿ ܬܒܝܠ ܡܬܩܪܒܐ ܒܥ̈ܕܬܐ. ܘܐܢܬܘܢ ܒܠܚܘܕܝܟܘܢ ܕܐܝܬܝܟܘܢ ܙܥܘܪ̈ܐ ܣܕܝܩܝܢ ܐܢܬܘܢ: ܘܐܡܪܝܢ ܐܢܬܘܢ ܢܦܫܟܘܢ pb. 110 ܐܪ̈ܬܘܕܘܟܣܘ ܘܛܢܢ̈ܐ ܕܫܪܪܐ. ܐܫܠܡܘ ܠܢ ܐܒܗ̈ܬܐ ܕܗܟܢܐ ܢܦܢܐ ܠܗܘܢ ܦܬܓܡܐ܀ ܐܬܕܟܪܘܢ ܟܡܐ ܪ̈ܒܘܬܐ ܒܠܚܘܕ ܟܠܗܘܢ ܡܬܪ̈ܚܩܢܐ ܘܡܬܥܒܪ̈ܢܐ ܗܘܘ. ܘܒܡܕܒܪܐ ܐܒܕܘ. ܘܠܘ ܒܠܚܘܕ ܡܢ ܛܒ̈ܬܐ ܕܠܥܠܡ ܢܦܠܘ. ܐܠܐ ܘܡܢ ܕܢܥܠܘܢ ܠܐܪܥܐ ܕܡܘܠܟܢܐ ܐܬܟܠܝܘ ܒܝܕ ܛܠܘܡܘܬܗܘܢ. ܘܗܿܘ ܣܐܡ ܢܡܘܣܐ ܐܟܚܕܐ ܘܢܒܝܐ ܪܒܐ ܡܘܫܐ ܡܪܬܐ ܗܘܐ ܘܐܡܿܪ. ܠܐ ܬܗܘܐ ܥܡ ܣܓܝ̈ܐܐ ܒܒܝܫܬܐ܀ ܘܬܘܒ ܒܦܪܣ ܟܕ ܟܠܗܘܢ ܫܒܝ̈ܐ ܕܝܗܿܘܕܐ ܣܓܕܘ ܠܨܠܡܐ ܕܡܠܟܐ. ܗܠܝܢ ܬܠ̈ܬܐ ܛܠ̈ܝܐ ܟܬܪܘ ܠܐ ܡܨܛܠܝ̈ܢܐ ܘܠܐ ܡܬܥܒܪ̈ܢܐ. ܘܡܛܠ ܗܕܐ ܠܘ ܒܠܚܘܕ ܗܢܘܢ ܟܕ ܫܒܿܚܘܢ ܠܐܠܗܐ ܐܫܬܒܚܘܢ ܡܢܗ܆ ܐܠܐ ܘܠܗ ܠܡܿܠܟܐ ܘܠܣܓܝ̈ܐܐ ܕܗܝܕܝܢ ܩܪܝܒܝܢ ܗܘܘ. ܡܛܝܒ̈ܢܐ ܗܘܘ ܕܝܕܝܥܘܬ ܐܠܗܐ ܕܠܐ ܛܘܥܝܝ. ܕܐܝܠܝܢ ܗܟܝܠ ܨܒܿܐ ܐܢܬ ܕܬܗܘܐ ܡܫܘܬܦܐ. ܘܥܡܗܘܢ ܬܗܘܐ ܠܟ ܡܢܬܐ. ܥܡ ܝܫܘܥ ܒܪ ܢܘܢ ܘܟܠܒ ܒܪ ܝܘܦܢܐ܇ ܘܗܠܝܢ ܬܠܬܐ ܛܠܝ̈ܐ ܕܒܒܒܠ. ܐܘ ܥܡ ܟܠܗ ܥܠܡܐ ܕܣܓܕܘ ܠܨܠܡܐ ܕܕܗܒܐ. ܗܝ ܗܕܐ ܐܬܚܫܒ ܘܡܛܠ ܥܡܐ ܣܓܝܐܐ ܕܗܘܐ ܒܟܠܩܝܕܘܢܐ ܒܣܘܢܕܘܣ ܕܟܦܘܪ̈ܐ. ܕܡܛܠܬܗܿ ܝܬܝܪ pb. 111 ܠܚܿܡܐ ܐܝܬܝܗܿ ܕܢܐܡܪ ܗܿܝ ܡܠܬܐ ܟܗܢܝܬܐ ܕܐܪܡܝܐ ܢܒܝܐ. ܕܪ̈ܥܘܬܐ ܣܓܝ̈ܐܐ ܚܒܠܘܢ ܟܪܡܐ ܕܝܠܝ. ܘܛܡܐܘ ܝܪܬܘܬܝ. ܣܡܘܢ ܡܢܬܐ ܕܝܠܝ ܪܓܝܓܬܐ ܒܚܘܪܒܐ ܕܠܐ ܡܬܬܕܝܫ. ܘܬܘܒ ܕܛܒ ܗܘ ܚܕ ܕܥܿܒܕ ܨܒܝܢܐ ܕܡܪܝܐ ܡܢ ܐܠܦܐ܀

56 §56

ܢܘ- ܟܕ ܗܦܟ ܟܦܘܪܐ ܝܘܒܢܠܐܘܣ ܡܢ ܣܘܢܕܘܣ ܕܛܠܘ̈ܡܐ ܫܦܪ ܠܐܒܗ̈ܬܐ ܩܕܝܫ̈ܐ ܐܪ̈ܬܘܕܘܟܣܘ ܘܕܝܪ̈ܝܐ ܕܐܝܬ ܒܦܠܣܛܝܢܐ ܕܢܐܪܥܘܢ ܒܗ ܒܐܘܪܚܐ. ܘܐܟ ܚܝܠܗܘܢ ܢܥܒܕܘܢ. ܘܢܦܝܣܘܢܝܗܝ ܕܢܕܥ ܣܟܠܘܬܗ. ܘܢܬܪܨ ܢܦܫܗ. ܘܢܫܕܐ ܟܫܠܐ ܡܢ ܬܒܝܠ. ܐܦܝܣܘܗܝ ܕܝܢ ܘܠܛܘܒܢܐ ܐܒܐ ܦܛܪܐ ܕܟܢܝܫ ܗܘܐ ܗܝܕܝܢ ܒܠܐܒܪܐ ܕܡܝܘܡܐ ܕܢܐܙܠ ܥܡܗܘܢ. ܘܟܕ ܡܫܬܐܠ ܗܘܐ: ܒܗܿܝ ܕܠܐ ܡܿܥܕ ܗܘܐ ܕܢܦܘܩ ܡܢܗܿ. ܘܡܛܠ ܥܢܝܢܐ ܕܐܢܫܝ̈ܢ ܥܠܡܝ̈ܐ: ܘܐܟ ܕܒܣܘܓܐܐ ܕܗܠܝܢ ܕܡܢ ܩܘܡܛܛܘܢ: ܡܢ ܗܠܝܢ ܓܝܪ ܣܓܝ̈ܐܐ ܐܝܬ ܗܘܐ ܠܝܘܒܢܠܐܘܣ ܕܢܚܿܬܝܢ ܗܘܘ ܥܡܗ ܠܥܘܕܪܢܗ ܘܠܢܘܛܪܗ܆ ܐܬܚܙܝ ܠܗ ܦܪܘܩܢ ܟܕ ܐܡܿܪ. ܐܢܐ ܡܬܛܠܡ ܐܢܐ: ܘܗܝܡܢܘܬܝ ܡܬܥܒܪܐ. ܘܐܢܬ ܐܝܩܪܟ ܘܫܠܝܟ ܒܿܥܐ ܐܢܬ. ܘܗܟܢܐ ܐܬܬܙܝܥ ܘܩܡ ܪܕܐ. ܟܕ ܟܠܗܘܢ ܒܚܘܝܚܘܬܐ ܐܟ ܕܢܣܗܕܘܢ ܐܙܠܝܢ ܗܘܘ. ܘܟܕ ܥܢܝܢܐ ܗܘܐ ܠܐܒܗ̈ܬܐ pb. 112 ܠܘܬܗ ܕܝܘܒܢܠܐܘܣ ܠܐ ܚܣܝܐ: ܘܛܘܒܢܐ ܬܐܘܕܣܝܣ ܕܝܪܝܐ ܗܿܘ ܕܗܘܐ ܡܢ ܡܗ̈ܝܡܢܐ ܠܚܪܬܐ ܪܝܫ ܐܦܝܣ̈ܩܘܦܐ ܒܐܘܪܫܠܡ. ܡܟܣ ܗܘܐ ܠܗ ܒܦܪܗܣܝܐ ܟܦܘܪܝܐ ܕܗܘܐ ܒܟܠܩܝܕܘܢܐ: ܐܟ ܡܿܢ ܕܩܪܝܒ ܗܘܐ ܒܟܠ ܙܒܢ ܘܝܕܥ ܗܘܐ ܟܠܗܝܢ ܕܐܣܬܥܪ̈ܝܢ. ܘܡܣܒ ܒܐܦ̈ܐ ܘܟܦܘܪܝܐ ܕܝܠܗ ܕܝܘܒܢܠܐܘܣ ܡܦܪܣܐ ܗܘܐ. ܐܬܚܡܬ ܗܘ ܝܘܒܢܠܐܘܣ ܘܦܩܕ ܠܐܢܫ ܕܐܢܩܘܪܝܘܢ: ܡܢ ܗܿܢܘܢ ܕܢܩܝܦܝܢ ܗܘܘ ܠܗ܆ ܕܠܗܢܐ ܒܙܗܝܘܬܐ ܢܥܒܕ ܐܟ ܕܠܫܓܘܫܐ ܘܩܿܐܡ ܠܘܩܒܠ ܨܒܝܢܐ ܕܡܠܟܐ. ܘܟܕ ܥܬܝܕ ܗܘܐ ܗܿܘ ܕܗܕܐ ܢܥܒܕ. ܐܫܬܠܗܒ ܒܛܢܢܐ ܛܘܒܢܐ ܦܛܪܘܣ ܟܕ ܥܕܟܝܠ ܕܝܪܝܐ ܐܝܬܘܗܝ ܗܘܐ: ܘܠܐ ܐܝܬ ܗܘܐ ܠܗ ܪܒܘܬܐ ܕܐܦܝܣܩܦܘܬܐ܇ ܝܿܕܥ ܗܘܐ ܠܗ ܒܚܝܠܐ ܕܢܒܝܘܬܐ. ܐܢܬ ܡܛܠ ܗܝܡܢܘܬܐ ܡܡܪܚ ܐܢܬ ܕܬܡܨܥ܆ ܐܘ ܕܟܠܟܠܗ ܬܡܠܠ. ܠܘ ܙܦܠܢ ܘܙܦܠܢ ܒܗܢܐ ܠܠܝܐ ܥܒܕܬ܆ ܐܢܐ ܐܝܬܝ ܙܥܘܪܐ ܕܟܠܗܘܢ ܩܕܝܫ̈ܐ ܕܗܪܟܐ. ܒܿܥܐ ܐܢܬ ܐܡܿܪ ܘܬܚܘܬ ܢܘܪܐ ܡܚܕܐ ܡܢ ܫܡܝܐ: ܘܬܛܠܩܟ ܠܟ ܘܠܗܠܝܢ ܕܢܩܝܦܝܢ ܠܟ. ܗܝܕܝܢ ܟܕ ܗܘܐ ܗܿܘ ܒܕܚܠܐ ܘܙܘܥܐ ܘܝܕܥܗ ܡܿܢ ܐܝܬܘܗܝ܆ ܢܦܠ pb. 113 ܩܕܡ ܪ̈ܓܠܘܗܝ. ܟܕ ܡܦܝܣ ܠܗ ܩܕܡ ܟܠܢܫ܆ ܫܒܘܩ ܠܝ ܡܪܝ ܢܐܒܪܢܘܓܝ. ܠܐ ܝܕܥܬ ܕܩܕܝܫܘܬܟ ܗܪܟܐ ܐܝܬܝܗܿ. ܘܗܟܢܐ ܫܡܪܗ ܠܛܘܒܢܐ ܬܐܘܕܘܣܝܣ. ܟܕ ܠܐ ܡܕܡ ܡܟܝܠ ܐܡܪܚ ܕܬܘܒ ܢܐܡܪ ܐܘ ܢܣܥܘܪ ܥܠ ܩܕܝܫ̈ܐ. ܘܫܩܠܗ ܠܝܘܒܢܠܐܘܣ ܘܗܦܟ ܠܩܣܪܝܐ܀

57 §57

ܢܙ- ܡܫܬܥܐ ܗܘܐ ܠܢ ܐܒܐ ܦܘܠܐ ܗܿܘ ܐܦܘܣܦܝܣܛܘܢ: ܗܿܘ ܕܐܝܬܘܗܝ ܗܘܐ ܒܪ ܫܠܝܗ ܕܣܒܐ ܐܒܐ ܐܢܕܪܝܐܐ ܘܡܕܒܪܝܐ. ܕܒܙܒܢܐ ܕܣܘܢܕܘܣ ܕܟܠܩܝܕܘܢܐ. ܬܪܝܢ ܒܫܠܝܐ ܐܝܬܝܢ ܗܘܝܢ. ܐܢܐ ܘܐܚܐ ܕܝܠܝ. ܕܫܡܗ ܗܘܐ ܬܐܘܣܒܝܘܣ. ܓܒܪܐ ܡܠܝܠܐ ܘܕܝܕܥܬܐ ܣܓܝܐܬܐ ܐܝܬ ܗܘܬ ܠܗ ܕܚܟܡܬܐ ܕܥܠܡܐ. ܘܡܬܦܫܟ ܗܘܐ ܡܛܠ ܕܘܓܡܐ ܕܗܠܝܢ ܬܪ̈ܝܝ ܟܝ̈ܢܐ. ܘܡܦܝܣ ܗܘܐ ܠܡܪܝܐ ܕܢܩܿܒܠ ܦܝܣܐ ܡܢ ܛܝܒܘܬܗ. ܕܐܝܟܢܐ ܡܛܠ ܗܕܐ ܘܿܠܐ ܠܗ ܕܢܬܪܥܐ ܘܠܐܝܠܝܢ ܢܩܿܦ. ܠܗܠܝܢ ܕܡܫܬܐܠܝܢ ܕܢܐܡܪܘܢ ܬܪ̈ܝܢ ܟܝ̈ܢܐ. ܐܘ ܠܗܠܝܢ ܕܡܩܒܠܝܢ. ܘܐܬܚܙܝ ܠܗ ܩܕܝܫܐ ܝܘܚܢܢ ܐܘܢܓܠܣܛܐ ܕܐܡܿܪ ܠܘܬܗ: ܬܐܘܣܒܝܐ. ܗܿܘ ܕܐܝܬܘܗܝ ܗܘܐ ܡܢ ܒܪܫܝܬ. pb. 114 ܗܿܘ ܕܫܡܥܢܢ ܗܿܘ ܕܐܬܓܠܝ ܠܢ. ܘܒܥܝ̈ܢܝܢ ܚܙܝܢܢ. ܘܒܐܝ̈ܕܝܢ ܓܫܢ. ܡܠܬܐ ܕܚܝ̈ܐ. ܘܟܕ ܗܟܢܐ ܩܿܒܠ ܦܝܣܐ ܘܐܫܬܪܪ. ܟܪܘܙܐ ܕܫܪܪܐ ܗܘܐ܀

58 §58

ܢܚ- ܐܢܫ ܐܢܝܐ ܩܫܝܫܐ ܗܘܐ ܘܪܒܝܬܐ ܕܥܕܬܐ ܩܕܝܫܬܐ ܕܒܐܘܪܫܠܡ. ܗܢܐ ܡܢ ܒܬܪ ܟܦܘܪܝܐ ܫܢܝ. ܘܟܕ ܗܘܐ ܛܢܢܐ ܐܪܬܐܕܘܟܣܐ. ܡܫܬܥܐ ܗܘܐ ܠܛܘܒܢܐ ܐܒܐ ܦܛܪܐ ܘܠܐܒܐ ܐܣܛܦܢܐ ܩܫܝܫܐ܆ ܕܟܕ ܗܘܬ ܣܘܢܗܕܘܣ ܒܐܦܣܘܣ: ܒܗܿܝ ܕܐܣܬܠܝ ܢܣܛܘܪܝܣ ܪܫܝܥܐ. ܣܠܩ ܠܬܡܢ ܥܡ ܝܘܒܢܠܐܘܣ ܘܡܢ ܗܝܕܝܢ ܟܕ ܚܙܐ ܒܗ ܡܣܒ ܒܐܦ̈ܐ ܣܓܝܐܐ: ܘܕܡܛܝܒ ܗܘܐ ܕܢܫܠܡ: ܐܠܘ ܠܐ ܕܡܢ ܛܘܒܬܢܐ ܩܘܪܝܠܘܣ ܘܡܢ ܛܢܢܗ ܚܡܝܡܐ ܘܦܪܗܣܝܐ ܕܝܠܗ ܓܠܝܐܝܬ ܡܬܟܚܕ ܗܘܐ ܘܕܚܿܠ ܗܘܐ܆ ܠܐ ܡܟܝܠ ܡܢ ܐܝܕܘܗ̈ܝ ܨܒܐ ܕܢܣܒ ܩܘܪܒܢܐ. ܐܟ ܕܡܢ ܢܿܣܒ ܒܐܦ̈ܐ ܘܡܬܥܒܪܢܐ܀

59 §59

ܢܛ- ܐܢܗܘ ܕܐܡܪܝܢ ܠܢ ܗܠܝܢ ܕܒܟܠܩܝܕܘܢܐ ܛܠܡܘ. ܕܡܢ ܐܝܟܐ ܩܿܪܝܢ ܐܢܬܘܢ ܠܢ ܥܒܘܪ̈ܐ ܐܘܟܝܬ ܛܠܘ̈ܡܐ. ܐܡܿܪܝܢܢ ܠܗܘܢ: ܕܢܡܘܣܐ ܐܝܬܘܗܝ ܫܠܝܚܝܐ ܕܐܡܪ: ܐܢ ܓܝܪ ܠܐܝܠܝܢ ܕܣܬܪܬ ܬܘܒ ܠܗܝܢ ܒܿܢܐ ܐܢܐ܆ ܥܒܘܪܐ ܡܚܘܐ ܐܢܐ ܢܦܫܝ. ܐܢܬܘܢ ܡܕܝܢ ܕܒܐܦܣܘܣ ܐܣܠܝܬܘܢ ܠܢܣܛܘܪܝܣ ܗܿܘ ܕܪܘܫܐ ܕܬܪ̈ܝܢ pb. 115 ܟܝܢ̈ܐ. ܘܒܗܿ ܟܕ ܒܗܿ ܣܬܪܬܘܢ ܗܿܝ ܕܢܬܐܡܪܘܢ ܬܪ̈ܝܢ ܟܝ̈ܢܐ. ܘܐܚܪܡܬܘܢ ܠܗܠܝܢ ܕܗܟܢܐ ܐܡܪܚܘ ܐܘ ܡܡܪܚܝܢ ܕܢܬܪܥܘܢ ܐܘ ܢܐܠܦܘܢ܆ ܐܝܟܢܐ ܠܐ ܐܝܬܝܟܘܢ ܡܚܝ̈ܒܐ ܘܥܒܘܪ̈ܐ: ܕܗܠܝܢ ܕܣܬܪܬܘܢ ܗܝܕܝܢ܇ ܗܢܝܢ ܟܕ ܗܢܝܢ ܒܢܝܬܘܢ ܒܟܠܩܝܕܘܢܐ. ܡܛܠ ܕܚܠܐ ܐܢܫܝܐ ܘܢܝܚܐ ܘܫܘܓܫܐ ܕܡܠܟܐ ܪܫܝܥܐ. ܘܠܪ̈ܫܝܥܐ ܬܐܘܕܪܝܛܘܣ ܘܗܝܒܐ ܕܠܐ ܕܝܢܐ ܩܿܒܠܬܘܢ. ܕܦܣܝܩܝܢ ܗܘܘ ܘܫܕܝܢ ܡܛܠ ܪܘܫܥܐ ܗܢܐ. ܘܠܘ ܒܠܚܘܕ ܚܕܐ ܙܒܢܬܐ: ܐܠܐ ܘܬܪ̈ܬܝܢ ܘܬܠܬ ܘܐܪܒܥ ܘܚܡܫ. ܒܗ ܒܙܢܐ ܗܢܐ ܕܡܬܥܒܪܢܘܬܐ ܢܦܠܬܘܢ. ܟܕ ܣܬܪܝܢ ܐܢܬܘܢ ܠܪܘܫܥܐ. ܘܬܘܒ ܒܿܢܝܢ ܐܢܬܘܢ ܠܗ. ܐܝܟܢܐ ܓܝܪ ܕܐܡܿܪܬ. ܟܕ ܒܣܘܢܕܘܣ ܕܒܐܦܣܘܣ ܠܕܘܓܡܐ ܗܢܐ ܪܫܝܥܐ ܣܬܪܬܘܢ. ܠܗ ܟܕ ܠܗ ܬܘܒ ܒܩܘܣܛܢܛܝܢܦܘܠܝܣ ܒܢܝܬܘܢ. ܥܡ ܬܪ̈ܝܝ ܟܝ̈ܢܐ ܦܠܘܝܢܐ. ܘܬܘܒ ܡܢ ܒܬܪ ܩܠܝܠ܆ ܒܣܘܢܕܘܣ ܗܿܝ ܕܬܪܬܝܢ ܕܗܘܬ ܒܐܦܣܘܣ. ܟܕ ܝܿܬܒ ܒܪܝܫܐ ܚܣܝܐ ܕܝܣܩܪܘܣ ܦܛܪܝܪܟܐ ܐܪܬܐܕܘܟܣܐ: ܘܝܘܒܢܠܐܘܣ ܥܡ ܟܢܘܫܝܐ ܕܐܦܝܣܩܘ̈ܦܐ ܐܪ̈ܬܘܕܘܟܣܘ. ܠܗ ܠܪܘܫܥܐ ܣܬܪܬܘܢ. ܘܡܢ ܒܬܪ ܩܠܝܠ ܙܒܢܐ. ܠܗ ܟܕ ܠܗ ܓܠܝܐܝܬ ܒܣܘܢܗܕܘܣ ܕܟܠܩܝܕܘܢܐ ܒܢܝܬܘܢ. ܘܐܝܟܢܐ ܕܩܕܡܬ ܐܡܪܬ pb. 116 ܠܬܐܘܕܪܝܛܣ ܘܠܗܝܒܐ ܕܠܐ ܕܝܢܐ ܩܒܠܬܘܢ. ܗܠܝܢ ܕܡܛܠ ܪܘܫܥܐ ܗܢܐ ܫܕܝܢ ܗܘܘ. ܘܬܘܒ ܒܐܢܩܘܩܠܝܘܢ ܗܿܘ ܕܗܘܐ ܒܝܘ̈ܡܬܗ ܕܛܘܒܢܐ ܛܝܡܬܐܘܣ ܐܪܟܝܦܝܣܩܘܦܣ ܠܗ ܟܕ ܠܗ ܠܪܘܫܥܐ ܒܟܦܘܪܘܬܐ ܟܘܠܢܝܬܐ ܘܬܒܠܝܬܐ ܒܙܚܬܘܢ. ܘܒܬܪ ܩܠܝܠ ܒܢܝܬܘܢ ܒܗܿܘ ܕܡܬܐܡܪ ܐܢܛܝܩܘܩܠܝܘܢ. ܟܕ ܡܡܠܝܢ ܐܢܬܘܢ ܗܿܝ ܕܐܡܝܪܐ ܡܢ ܐܪܡܝܐ ܢܒܝܐ ܗܟܢܐ: ܐܝܠܦܘܢ ܕܢܙܝܥܘܢ ܪ̈ܓܠܐ ܕܝܠܗܘܢ. ܘܠܐ ܚܣܘ ܥܠ ܗܿܘ ܕܐܝܬܘܗܝ܀ ܩܢܝܐ ܕܡܬܬܙܝܥ ܡܢ ܪܘܚܐ ܗܘܝܬܘܢ. ܘܕܡܢ ܟܠ ܪܘܚܐ ܡܬܢܫܒܝܢ ܘܡܙܕܥܙܥܝܢ. ܘܕܥܠ ܬܪ̈ܝܗܘܢ ܩܦܣܝ̈ܟܘܢ ܬܚܓܪܘܢ ܒܟܠܙܒܢ. ܘܠܐ ܡܡܬܘܡ ܩܡܬܘܢ ܒܐܘܪܚܐ ܕܫܪܪܐ. ܕܡܛܠܬܟܘܢ ܟܬܝܒ ܕܠܗܠܝܢ ܕܥܿܒܕܝܢ ܡܬܥܒܪܢܘܬܐ ܣܢܝܬ. ܘܐܠܗܐ ܡܛܠܬܗܘܢ ܡܫܘܕܥ ܘܐܡܿܪ ܒܐܫܥܝܐ ܢܒܝܐ ܨܐܕܘܗܝ ܕܫܘܠܡܐ: ܕܬܦܩܘܢ ܘܬܚܙܘܢ ܫܪ̈ܝܬܐ ܕܓܒܪ̈ܐ ܗܠܝܢ ܕܐܥܠܝܘ ܒܝ. ܬܘܠܥܗܘܢ ܓܝܪ ܠܐ ܡܿܝܬܐ ܘܢܘܪܗܘܢ ܠܐ ܕܥܿܟܐ. ܘܢܗܘܘܢ ܠܚܙܬܐ ܠܟܠܒܣܪ. ܘܠܘ ܒܠܚܘܕ ܡܛܠ ܗܠܝܢ ܥܒܘܪ̈ܐ ܐܝܬܝܟܘܢ ܘܡܬܩܪܝܢ ܐܢܬܘܢ. ܐܠܐ ܘܡܛܠ ܕܬܚܘܡܐ ܥܒܪܬܘܢ ܕܣܘܢܕܘܣ ܩܕܡܝܬܐ ܕܒܐܦܣܘܣ ܗܿܝ ܕܫܕܬ ܠܢܣܛܘܪܝܣ. ܕܬܚܡܬ ܕܠܐ ܫܠܝܛ ܠܐܢܫ ܡܟܝܠ ܘܠܐ ܡܢ pb. 117 ܐܦܝܣܩܘ̈ܦܐ ܘܠܐ ܡܢ ܩܠܝܪ̈ܝܩܐ ܕܐܚܪܢܐ ܣܝܡܐ ܐܘ ܡܠܦܢܘܬܐ ܡܛܠ ܗܝܡܢܘܬܐ ܢܣܝܡ ܐܘ ܢܚܘܐ ܐܘ ܢܟܬܒ ܐܘ ܢܪܟܒ. ܠܒܪ ܡܢ ܗܿܘ ܕܐܬܬܣܝܡ ܩܕܡܝܬ ܡܢ ܬܠܬܡܐܐ ܘܬܡܢܬܥܣܪ ܐܦܝܣܩܘ̈ܦܐ ܥܡ ܪܘܚܐ ܩܕܝܫܐ. ܗܠܝܢ ܕܝܢ ܕܡܡܪܚܝܢ ܕܢܥܒܕܘܢ ܡܕܡ ܕܐܟ ܗܢܐ ܢܗܘܘܢ ܐܝܬܝܗܘܢ ܢܘܟܪ̈ܝܐ. ܐܦܝܣܩܘ̈ܦܐ ܡܢ ܐܦܝܣܩܦܘܬܐ. ܘܩܠܪ̈ܝܩܐ ܡܢ ܩܠܝܪܘܣ. ܠܗ ܕܝܢ ܠܬܚܘܡܐ ܟܕ ܚܬܝܬܐܝܬ ܝܿܕܥܝܢ ܗܘܘ ܠܗ ܗܠܝܢ ܕܐܬܟܢܫܘܢ ܒܟܠܩܝܕܘܢܐ. ܩܕܡܐܝܬ ܩܡܘܢ ܡܚܕܐ ܟܕ ܠܐ ܨܒܿܝܢ ܗܘܘ ܕܡܕܡ ܕܐܟ ܗܢܐ ܢܚܕܬܘܢ܆ ܟܕ ܩܿܥܝܢ ܒܩ̈ܠܐ ܓܠ̈ܝܐ ܘܡܙܥܩܝܢ. ܕܣܝܡܐ ܐܚܪܢܐ ܠܐ ܐܢܫ ܥܿܒܕ ܘܠܐ ܣܿܥܝܢ ܚܢܢ ܘܠܐ ܡܡܪܚܝܢ ܚܢܢ. ܐܒܗ̈ܬܐ ܟܠܘ. ܣܦܩ̈ܢ ܗܠܝܢ ܕܡܢ ܗܢܘܢ ܐܬܬܣܝܡܝܢ. ܠܒܪ ܡܢ ܗܠܝܢ ܕܢܐܡܪ ܐܘ ܕܢܬܪܥܐ ܐܘ ܕܢܣܝܡ ܠܐ ܡܨܝܢܢ. ܠܝܬ ܫܘܠܛܢܐ ܕܢܗܘܐ ܣܝܡܐ ܐܚܪܢܐ. ܩܢܘܢܐ ܐܝܬܘܗܝ ܕܐܡܿܪ ܕܣܦܩܢ ܗܠܝܢ ܕܐܬܬܣܝ̈ܡܝܢ. ܘܕܐܟ ܗܠܝܢ ܣܓܝ̈ܐܐ ܒܗܠܝܢ ܗܘܦܡ̈ܢܡܛܐ ܕܗܿܘܘ ܗܝܕܝܢ ܟܬܝܒܢ. ܠܡܟܣܢܘܬܐ ܘܠܬܗܠܠܬܐ ܕܡܣܒ ܒܐܦܝ̈ܗܘܢ ܘܕܥܒܘܪܝܐ ܕܝܠܗܘܢ. ܐܠܐ ܘܗܿܝ ܕܢܬܬܚܪܡܘܢ ܡܢܢ. ܩܢܘܢܐ ܐܚܪܢܐ pb. 118 ܫܠܝܚܝܐ ܡܿܦܩܕ ܘܐܡܿܪ. ܡܿܢ ܕܡܣܒܪ ܠܟܘܢ ܠܒܪ ܡܢ ܡܐ ܕܣܒܪܬܟܘܢ ܢܗܘܐ ܚܪܡ. ܘܬܘܒ ܐܦܢ ܐܢܐ ܦܘܠܘܣ ܐܘ ܡܠܐܟܐ ܡܢ ܫܡܝܐ ܢܣܒܪܟܘܢ ܠܒܪ ܡܢ ܗܿܘ ܡܕܡ ܕܩܒܠܬܘܢ ܢܗܘܐ ܚܪܡ. ܡܕܝܢ ܡܛܠ ܕܠܒܪ ܡܢ ܐܘܢܓܠܝܘܢ ܣܒܪܘܢ ܠܢ: ܘܣܛܪ ܡܢ ܡܕܡ ܕܩܒܠܢܢ ܡܢ ܣܘܢܕܘܣ ܕܬܠܬܡ̈ܐܐ ܘܬܡܢܬܥܣܪ ܐܒܗ̈ܬܐ ܩܕܝܫ̈ܐ: ܘܝܬܝܪܐܬܝ ܡܢ ܗܿܝ ܕܒܐܦܣܘܣ ܗܿܝ ܕܫܕܬ ܠܢܣܛܘܪܝܘܣ. ܘܐܣܠܝܬ ܠܕܘܓܡܐ ܕܬܪ̈ܝܢ ܟܝ̈ܢܐ. ܐܚܪܢܐ ܣܝܡܐ ܚܕܬܐ ܒܝܫܐܝܬ ܣܒܪܘܢ ܗܠܝܢ ܕܐܬܟܢܫܘ ܒܟܠܩܝܕܘܢܐ. ܘܒܗܕܐ ܡܚܝ̈ܒܐ ܗܘܘ ܠܚܪܡܐ ܫܠܝܚܝܐ. ܟܐܢܐܝܬ ܡܢ ܟܠܗܘܢ ܕܚ̈ܠܝ ܐܠܗܐ ܡܬܬܚܪܡܝܢ. ܡܕܝܢ ܠܘ ܡܛܠ ܐܘܬܢܛܝܐ ܘܠܐ ܡܢ ܕܝܢܐ ܕܝܠܢ ܠܗܠܝܢ ܡܚܪܡܝܢܢ. ܐܠܐ ܟܕ ܢܩܦܝܢܢ ܠܩܢܘ̈ܢܐ ܫܠܝܚܝ̈ܐ. ܘܠܬܚܘ̈ܡܐ ܕܐܒܗ̈ܬܐ ܩܕܝܫ̈ܐ ܘܥܒܘܪ̈ܐ ܘܡܬܬܚܪ̈ܡܢܐ ܐܝܬܝܗܘܢ ܠܢ܀

60 §60

ܣ- ܓܒܪܐ ܚܕ ܕܚܿܠ ܡܢ ܐܠܗܐ ܚܙܐ ܒܙܒܢ ܒܚܙܘܐ ܟܢܘܫܝܐ ܕܟܠܗܘܢ ܐܦܝܣܩܘ̈ܦܐ ܘܠܩܕܝܫܐ ܦܘܠܘܣ ܫܠܝܚܐ ܕܩܿܐܡ ܒܡܨܥܬܗܘܢ. ܘܡܿܙܥܩ ܗܘܐ ܘܐܡܿܪ: ܗܠܝܢ ܐܝܬܝܗܘܢ ܦܘܪ̈ܓܠܐ ܕܝܠܝ ܠܘܬܟܘܢ. ܗܠܝܢ ܐܝܬܝܗܘܢ ܩܝ̈ܡܐ ܕܝܠܝ ܕܐܩܝܡܬ ܠܟܘܢ. ܗܠܝܢ ܐܢܘܢ ܦܘܩ̈ܕܢܝ. ܘܡܢ ܒܬܪ ܕܪܫܐ ܐܢܘܢ ܐܡܪ ܠܗܘܢ. pb. 119 ܣܒܘ ܐܫܝܓܘ ܐܦܝ̈ܟܘܢ ܡܢ ܩܘܠܬܐ ܗܕܐ. ܐܝܬ ܗܘܘ ܓܝܪ ܒܡܨܥܬܗܘܢ ܕܣܝܡܐ ܩܘܠܬܐ ܕܡܠܝܐ ܡܝ̈ܐ. ܘܟܕ ܡܫܝܓܝܢ ܗܘܘ ܐܫܬܟܚ̈ܝܢ ܐܦܝ̈ܗܘܢ ܕܟܠܗܘܢ ܕܡܓܪ̈ܒܢ. ܘܐܡܪ ܠܘܬܗܘܢ ܗܟܢܐ ܘܠܐ ܚܕ ܡܢܟܘܢ ܐܫܬܟܚ ܕܟܝܐ܀

61 §61

ܣܐ- ܫܿܡܥ ܐܢܐ ܕܠܐܢܫ ܡܢ ܩܕܝܫ̈ܐ ܗܘܬ ܦܪܗܣܝܐ ܨܝܕ ܪܫܝܥܐ ܡܪܩܝܢܐ. ܘܟܕ ܡܟܣ ܕܘܓܡܐ ܕܬܪ̈ܝܝ ܟܝ̈ܢܐ. ܦܨܝܚܐܝܬ ܘܩܕܝܫܐܝܬ ܐܡܪ ܠܗ. ܐܢܐ ܠܡܫܝܚܐ ܩܪܝܒ ܗܘܝܬ. ܘܥܡܗ ܡܬܟܪܟ ܗܘܝܬ ܒܟܠ ܕܘܟ. ܘܟܕ ܥܿܒܕ ܗܘܐ ܬܕܡܪ̈ܬܐ ܘܡܐܣܐ ܗܘܐ ܘܡܠܦ ܘܟܕ ܡܨܛܚܐ ܗܘܐ ܘܡܬܪܕܦ: ܘܟܕ ܐܬܠܒܟ ܘܐܬܢܓܕ ܘܐܨܛܠܒ ܘܚܫ: ܘܐܬܩܒܪ ܘܩܡ ܘܐܣܬܠܩ܆ ܘܝܬܒ ܡܢ ܝܡܝܢܐ ܕܐܒܘܗܝ. ܒܟܠ ܕܘܟ ܥܡܗ ܗܘܝܬ. ܘܗܿܘ ܕܚܿܙܝܬ ܕܡܠܦ ܘܡܐܣܐ ܘܡܩܝܡ ܡܝ̈ܬܐ. ܗܘ ܟܕ ܗܘ ܚܙܝܬ ܘܕܠܐܐ ܘܕܒܿܟܐ ܘܕܟܿܦܢ ܘܕܨܿܗܐ. ܘܕܡܣܝܒܪ ܗܠܝܢ ܚܫ̈ܐ ܐܚܪ̈ܢܐ. ܘܠܐ ܡܡܬܘܡ ܚܿܙܝܬ ܒܗ ܬܪ̈ܝܢ ܐܚܪܢܐ ܘܐܚܪܢܐ. ܐܠܐ ܠܗ ܟܕ ܠܗ ܒܟܠܙܒܢ ܕܣܿܥܪ ܗܠܝܢ ܘܗܠܝܢ ܘܕܚܿܐܫ ܘܕܡܫܬܒܚ. ܘܚܕ ܟܝܢܐ ܕܐܠܗܐ ܡܠܬܐ ܕܡܒܣܪ. ܘܟܕ ܐܬܕܡܪ ܒܓܒܪܐ ܘܐܬܢܟܦ ܗܘ ܪܫܝܥܐ܆ ܫܡܪܗ ܒܐܝܩܪܐ ܘܒܫܝܢܐ܀ pb. 120

62 §62

ܣܒ- ܘܬܘܒ ܐܚܪܢܐ ܥܒܕܗ ܕܡܫܝܚܐ ܕܫܡܗ ܝܘܚܢܢ ܩܘܡܛܝܢܘܣ ܕܗܠܝܢ ܡܗ̈ܝܡܢܐ ܕܒܐܠܟܣܢܕܪܝܐ. ܥܡ ܩܘܡܝܘܣ ܕܝܠܗ ܡܬܚܪܐ ܗܘܐ ܕܐܝܬܘܗܝ ܗܘܐ ܡܢ ܢܣܛܘܪ̈ܝܢܐ ܕܣܘܪ̈ܝܝܐ. ܒܕܘܚܡܐ ܕܝܢ ܕܬܪ̈ܝܢ ܟܝ̈ܢܐ ܒܝܫܐܝܬ ܡܛܒܥ ܗܘܐ. ܘܐܡܿܪ ܗܘܐ ܠܘܬܗ. ܕܡܘܕܐ ܐܢܬ ܕܝܠܕܬ ܐܠܗܐ ܐܝܬܝܗܿ ܩܕܝܫܬܐ ܒܬܘܠܬܐ. ܐܝܛܐ ܟܕ ܗܘ ܐܡܿܪ ܕܡܘܕܐ ܐܢܐ ܕܝܠܕܬ ܐܠܗܐ ܘܝܠܕܬ ܡܫܝܚܐ. ܦܢܝ ܠܗ. ܡܢܐ ܗܟܝܠ܆ ܬܪ̈ܝܢ ܝܠܕܬ ܐܘ ܚܕ. ܘܟܕ ܗܘ ܐܬܐܠܨ ܐܣܬܟܪ ܦܘܡܗ ܐܝܟܢܐ ܕܗܠܝܢ ܕܩܪܝܒܝܢ ܘܫܡܥܝܢ ܗܘܘ ܢܬܕܡܪܘܢ. ܘܢܫܒܚܘܢ ܠܐܠܗܐ. ܡܛܠ ܚܟܡܬܐ ܕܐܬܝܗܒܬ ܠܥܒܕܗ ܚܠܦ ܫܪܪܐ܀

63 §63

ܣܓ- ܐܒܐ ܝܘܚܢܢ ܐܦܝܣܩܘܦܐ ܗܿܘ ܕܡܬܩܪܐ ܕܕܝܘܩܘܢܝܐ ܘܪܝܫܕܝܪܐ ܕܕܝܪܐ ܕܒܡܨܪܝܢ ܓܒܪܐ ܩܕܝܫܐ ܘܚܟܝܡܐ. ܐܡܿܪ ܗܘܐ ܡܛܠ ܣܘܢܕܘܣ ܕܟܠܩܝܕܘܢܐ ܕܗܿܕܐ ܒܟܠܙܒܢ. ܒܪܬ ܩܠܐ ܝܗܘܕܝܬܐ ܐܡܝܪܐ ܠܡܫܝܚܐ. ܕܐܢܬ ܡܛܠ ܡܢܐ ܟܕ ܒܪܢܫܐ ܐܝܬܝܟ. ܥܿܒܕ ܐܢܬ ܢܦܫܟ ܐܠܗܐ: ܟܕ ܡܿܫܘܐ ܐܢܬ ܢܦܫܟ ܠܐܠܗܐ܀

64 §64

ܣܕ- ܒܦܡܦܘܠܝܐ ܡܪܩܝܢܘܣ ܐܢܫ ܥܠܡܝܐ ܛܢܢܐ ܐܪܬܐܕܘܟܣܐ. ܐܟܣ ܠܐܦܝܣܩܘܦܐ ܕܡܕܝܢܬܐ ܩܕܡ ܥܕܬܐ ܕܡܬܪܓܡ ܗܘܐ ܒܝܫܐܝܬ ܡܛܠ ܗܝܡܢܘܬܐ. pb. 121 ܘܐܬܠܒܟ ܡܢ ܐܪܟܘܢܐ. ܘܡܚܘ̈ܬܐ ܒܝܫ̈ܬܐ ܘܩܫܝ̈ܬܐ ܒܠܥ ܥܠ ܚܨܗ ܘܥܠ ܟܪܣܗ ܠܡܘܬܐ. ܘܗܟܢܐ ܐܬܬܘܒܠ ܠܒܝܬܗ ܟܕ ܐܣܬܒܪ ܕܡܝܝܬ. ܘܡܢ ܒܬܪܗ ܕܝܘܡܐ ܐܫܬܟܚ ܟܕ ܠܝܬ ܠܗ ܡܕܡ ܕܒܝܫ. ܐܡܿܪ ܗܘܐ ܕܝܢ ܠܡܗ̈ܝܡܢܐ. ܕܡܢ ܒܬܪ ܬܠܬܐ ܟܪ̈ܘܒܐ ܚܿܙܐ ܗܘܝܬ ܠܐܢܫ ܕܠܒܝܫ ܡܐ̈ܢܐ ܚܘܪ̈ܐ ܘܩܿܐܡ ܗܘܐ ܡܢ ܝܡܝܢܝ. ܘܠܐ ܡܟܝܠ ܡܪܓܫ ܗܘܝܬ ܒܗܠܝܢ ܡܚܘ̈ܬܐ. ܐܠܐ ܐܟ ܦܦܪܘܢ ܓܫܦܝܢ ܗܘܘ ܒܝ. ܓܒܪܐ ܕܝܢ ܚܕ ܕܐܝܬ ܗܘܐ ܠܗ ܚܟܬܐ ܒܥܪܝܪܝܬܐ ܘܠܐ ܡܬܐܣܝܢܬܐ ܡܢ ܫܢܝ̈ܐ ܣܓܝ̈ܐܬܐ ܡܢ ܗܿܘ ܕܡܐ ܕܪܕܐ ܗܘܐ ܡܢ ܓܘܫܡܗ ܕܝܠܗ ܕܡܪܩܝܢܐ ܟܕ ܒܗܝܡܢܘܬܐ ܢܿܣܒ ܘܫܓ ܡܚܕܐ ܐܬܕܟܝ ܡܢ ܟܐܒܐ܀

65 §65

ܣܗ- ܟܕ ܗܘܐ ܐܦܝܣܩܘܦܐ ܐܒܐ ܕܝܠܢ ܛܘܒܬܢܐ ܐܒܐ ܦܛܪܐ ܝܬܒ ܒܥܕܬܐ ܕܝܠܗ ܒܡܝܘܡܐ. ܘܒܙܒܢܐ ܗܿܘ ܐܒܐ ܐܫܥܝܐ ܗܿܘ ܝܚܝܕܝܐ: ܟܕ ܟܢܝܫ ܒܩܠܝܬܗ. ܕܐܟ ܗܢܐ ܚܙܘܐ ܚܙܐ. ܟܫܝܬܐ ܡܕܡ ܪܒܬܐ ܘܪܡܬܐ ܘܣܪܝܬܐ ܒܡܨܥܬ ܥܡܪܬܐ. ܕܠܒܝܟܐ ܗܘܬ ܐܟ ܕܒܣܘܓܐܐ ܠܟܠܗܿ. ܘܡܥܪܩܐ ܗܘܬ ܠܣ̈ܓܝܐܐ ܡܢ ܣܪܝܘܬܗܿ. ܘܡܠܐܟܐ ܡܢ ܫܡܝܐ ܕܢܿܚܬ ܘܠܒܝܟ ܐܡܝܬܐ. ܘܐܡܿܪ ܗܘܐ ܠܐܒܐ ܦܛܪܐ ܐܦܝܣܩܘܦܐ. ܕܩܿܒܠ ܗܕܐ ܐܣܩܦܝܬܐ ܡܢܝ. ܘܕܟܐ ܥܡܪܬܐ ܡܢ ܣܪܝܘܬܐ pb. 122 ܗܘܐ. ܐܢܬ ܓܝܪ ܐܬܦܩܕܬ ܕܗܕܐ ܬܚܪܪ. ܘܟܕ ܩܕܝܫܐ ܡܫܬܐܠ ܗܘܐ ܘܐܡܿܪ. ܕܠܐ ܡܫܟܚ ܐܢܐ ܕܗܕܐ ܐܥܒܕ. ܠܒܪ ܓܝܪ ܡܢ ܚܝܠܐ ܕܝܠܝ ܐܝܬܘܗܝ ܣܘܥܪܢܐ: ܘܕܟܘܠܢܐܝܬ ܐܡܿܪ ܠܥܠ ܡܢ ܚܝܠܐ ܐܢܫܝܐ. ܠܐ ܫܿܠܐ ܗܘܐ ܗܿܘ ܡܠܐܟܐ ܟܕ ܣܝܡ ܗܘܐ ܥܠܘܗܝ ܥܕܡܐ ܕܥܨܝܗܝ ܕܢܣܝܗܿ ܠܗܿ ܠܐܡܝܬܐ: ܐܟ ܕܠܡܕܟܝܘ ܠܥܡܪܬܐ. ܘܟܕ ܚܙܐ ܐܒܐ ܐܫܥܝܐ ܗܠܝܢ. ܡܢ ܪܝܫܗ ܕܨܦܪܐ ܟܕ ܢܼܦܩ ܡܢ ܩܠܝܬܗ. ܐܬܐ ܠܘܬ ܛܘܒܢܐ ܠܡܝܘܡܐ ܘܟܕ ܚܙܝܗܝ ܘܐܬܒܪܟܘ ܡܢ ܚܕܕ̈ܐ: ܘܐܫܬܥܝ ܠܗ ܚܙܘܐ ܗܢܐ. ܬܘܒ ܗܦܟ ܠܩܠܝܬܗ. ܐܝܢܐ ܕܝܢ ܡܦܩܢܐ ܗܿܘܐ ܗܘܐ ܠܚܙܘܐ ܗܢܐ. ܠܚܟܝܡܐ ܒܠܚܘܕܘܗܝ ܐܠܗܐ ܘܝܿܕܥ ܟܠ ܓܠܝܐ. ܡܫܘܕܥ ܕܝܢ ܦܢܛܘܣ ܘܙܒܢܐ ܕܐܿܬܐ܀

65 §65

ܣܗ- ܛܘܒܢܐ ܛܝܡܬܐܘܣ ܐܪܟܝܦܣܩܦܘܣ ܕܐܠܟܣܢܕܪܝܐ ܘܡܘܕܝܢܐ. ܟܕ ܐܝܬܘܗܝ ܒܟܪܣܘܢܐ܆ ܐܫܬܥܝ ܠܗ ܠܐܒܐ ܝܘܚܢܢ ܕܐܫܬܕܪ ܠܗ ܡܢ ܐܒܗ̈ܬܐ ܐܪ̈ܬܐܕܘܟܣܘ ܕܒܦܠܣܛܝܢܐ: ܘܡܢ ܐܒܐ ܦܛܪܐ ܐܦܝܣܩܘܦܐ ܠܣܥܘܪܘܬܐ ܘܒܘܝܐܐ܆ pb. 123 ܘܐܡܪ. ܕܟܕ ܐܬܟܢܫܬ ܣܘܢܗܕܘܣ ܕܟܠܩܝܕܘܢܐ. ܚܿܙܝܬ ܒܚܙܘܐ ܕܡܫܬܡܠܐ ܗܘܐ ܟܢܘܫܝܐ ܒܥܕܬܐ ܕܐܠܟܣܢܕܪܝܐ. ܘܟܕ ܩܪܒܬ ܐܣܧܒ ܩܘܪܒܢܐ. ܐܫܬܟܚ ܡܿܢ ܠܚܡܐ ܫܘܚܪ̈ܐ. ܘܚܡܪܐ ܚܠܐ. ܟܕ ܡܫܘܕܥܝܢ ܡܫܬܒܩܢܘܬܐ ܕܥܬܝܕܐ ܗܘܬ ܕܬܗܘܐ ܡܢ ܛܝܒܘܬܐ ܕܐܠܗܐ ܒܥ̈ܕܬܐ

66 §66

ܣܘ- ܬܘܒ ܗܕܐ ܕܐܫܬܥܝ ܠܗ ܠܓܒܪܐ ܪܝܫ ܐܦܝܣܩܘ̈ܦܐ ܛܝܡܬܐܘܣ. ܕܟܕ ܥܬܝܕ ܗܘܐ ܛܘܒܬܢܐ ܕܝܣܩܪܘܣ ܕܢܐܙܠ ܠܣܘܢܕܘܣ ܚܙܝܬ ܚܙܘܐ ܕܐܟ ܗܢܐ. ܠܗ ܠܛܘܒܬܢܐ ܕܝܣܩܪܘܣ ܕܥܿܐܠ ܠܒܝܬ ܣܗ̈ܕܐ ܕܩܕܝܫܐ ܝܘܚܢܢ ܡܥܡܕܢܐ ܕܢܫܐܠ ܫܠܡܗ ܕܐܙܿܠ܆ ܘܢܣܒ ܡܢܗ ܨܠܘܬܐ. ܘܡܢ ܒܬܪ ܨܠܘܬܐ. ܣܼܠܩ ܥܠ ܕܪ̈ܓܐ ܕܢܬܒ ܐܟ ܥܝܕܐ. ܘܟܕ ܐܝܬܒ. ܟܠܗ ܩܠܪܘܣ ܗܦܟ ܡܢܗ܆ ܘܫܒܩܘܗܝ. ܐܢܐ ܕܝܢ ܒܠܚܘܕܝ ܢܩܦܬܗ. ܘܟܕ ܢܩܝܦ ܐܢܐ ܠܗ. ܗܐ ܕܐܒܐ ܪܒܐ ܦܩܪܐ ܐܪܥ ܒܢ. ܘܫܩܠ ܚܐܦܐ ܥܠ ܩܕܝܫܐ ܕܝܣܩܪܘܣ. ܘܟܕ ܠܒܟܗ ܒܩܕܠܗ܆ ܢܿܟܬ ܗܘܐ ܠܗ. ܐܟܡܢ ܕܝܢ ܕܫ̈ܢܐ ܠܝܬ ܗܘܐ ܠܗ܆ ܠܐ ܡܚܣܪ ܗܘܐ ܠܗ. ܘܚܙܝܬ ܐܢܫ ܦܠܚܐ ܕܐܬܚܘܝ ܘܠܕܐܒܐ ܗܿܘ ܒܥܪܝܪܝܐ ܩܛܠ. ܝܕܝܥܐ ܕܝܢ ܕܗܿܘ ܕܐܒܐ ܐܝܬܘܗܝ ܗܘܐ ܦܪܘܛܪܝܘܣ܀ pb. 124

67 §67

ܣܙ- ܘܗܕܐ ܕܝܢ ܐܫܬܥܝ ܠܗ ܠܓܒܪܐ: ܪܝܫ ܐܦܝܣܩܘ̈ܦܐ ܛܝܡܬܐܘܣ. ܡܿܣܒܪ ܗܘܝܬ ܠܡ ܕܒܙܒܢܐ ܗܿܘ ܚܿܙܐ ܗܘܝܬ ܣܘܣܝܐ ܡܕܡ ܒܥܪܝܪܝܐ ܘܩܫܝܐ. ܘܒܥܿܛ ܗܘܐ ܒܪ̈ܓܠܘܗܝ. ܘܫܓܿܫ ܗܘܐ ܠܗܿ ܠܥܡܪܬܐ. ܘܟܕ ܟܠܢܫ ܥܿܪܩ ܗܘܐ ܡܢܗ܆ ܐܢܐ ܒܠܚܘܕܝ ܐܬܠܒܒܬ ܘܐܪܥܬܗ. ܘܟܕ ܒܚܝܠܐ ܕܐܠܗܐ ܙܟܝܬܗ܆ ܦܟܪܬܗ ܘܚܒܫܬܗ ܒܩܠܝܬܐ. ܘܠܐ ܡܟܝܠ ܐܬܚܙܝ. ܐܝܬܘܗܝ ܗܘܐ ܕܝܢ ܐܪܐ ܡܪܩܝܢܘܣ ܗܿܘ ܪܫܝܥܐ. ܘܡܘܬܗ ܕܒܪܘܓܙܐ ܕܐܠܗܐ܀

68 §68

ܣܚ- ܬܘܒ ܕܝܢ ܘܚܙܘܐ ܐܚܪܢܐ ܐܫܬܥܝ ܠܗ܆ ܗܿܘ ܕܗܘ ܦܪܘܛܘܪܝܣ ܫܪܝܗܝ ܠܗ ܒܢܦܫܗ. ܟܕ ܐܝܬܘܗܝ ܗܘܐ ܩܠܪܝܩܐ ܥܡܗ ܗܝܕܝܢ. ܚܿܙܐ ܗܘܝܬ ܠܡ ܐܢܫ ܛܪܘܢܐ ܕܥܠ ܠܥܕܬܐ. ܘܡܩܪܒ ܗܘܐ ܥܡ ܟܠ. ܘܠܗܠܝܢ ܡܿܢ ܡܿܚܐ ܗܘܐ. ܠܗܠܝܢ ܕܝܢ ܪܕܦ ܗܘܐ. ܘܠܗܠܝܢ ܩܿܛܠ ܗܘܐ. ܘܠܐܚܪ̈ܢܐ ܡܨܿܚܐ ܗܘܐ. ܘܟܕ ܛܢܬ ܐܢܐ ܘܠܐ ܡܣܝܒܪ ܗܘܝܬ ܦܩܪܘܬܐ ܕܐܟ ܗܕܐ ܘܩܪܒܐ. ܐܬܚܝܠܬ ܡܢ ܡܪܝܐ. ܘܟܕ ܫܩܠܬ ܬܟܝܠܘܬܐ ܐܬܩܪܒܬ ܠܘܬܗ. ܘܒܙܘܥܦܐ ܛܪܕܬܗ ܡܢ ܥܕܬܐ. ܘܠܒܬܪܗ ܕܝܘܡܐ ܟܕ ܐܢܐ ܠܡ ܡܫܬܥܐ ܐܢܐ ܚܙܘܐ ܠܩܠܪ̈ܝܩܘ. ܟܕ ܩܪܝܒ ܗܘ ܦܪܘܛܪܝܣ ܦܢܝ ܦܬܓܡܐ ܘܐܡܪ: ܡܢ ܒܬܪ ܩܕܝܫܐ ܕܝܣܩܪܘܣ. ܐܢܫ ܗܪܛܝܩܐ ܐܝܬ ܠܗ ܕܢܠܒܘܟ ܠܥ̈ܕܬܐ. ܘܐܢܬ ܐܝܬ ܠܟ ܕܬܪܕܦܝܘܗܝ. ܘܬܗܘܐ ܚܠܦܘܗܝ ܐܦܝܣܩܘܦܐ܀ pb. 125

69 §69

ܣܛ- ܗܘ ܟܕ ܗܘ ܦܪܘܛܪܝܘܣ ܐܡܿܪ ܗܘܐ. ܨܝܕ ܐܢܫ ܡܢ ܢܫ̈ܐ ܩܕܝܫ̈ܬܐ. ܕܒܙܒܢܐ ܗܿܘ ܟܕ ܐܫܬܡܥܬ ܒܐܠܟܣܢܕܪܝܐ ܩܬܪܣܝܣ ܘܐܟܣܘܪܝܐ ܕܛܘܒܬܢܐ ܕܝܣܩܪܘܣ. ܐܡܪܬ ܕܗܿܘ ܕܗܿܘܐ ܡܢ ܒܬܪ ܕܝܣܩܪܘܣ. ܐܢܛܝܟܪܝܣܛܘܣ ܐܝܬܘܗܝ. ܘܒܕܓܘܢ ܒܗ ܒܦܪܨܘܦܗ ܗܠܝܢ ܐܟܣܬܗ ܠܦܪܘܛܪܝܘܣ. ܘܟܕ ܣܓܝ̈ܐܬܐ ܚܫܬ ܡܢܗ܆ ܟܠܝܠܐ ܕܡܘܕܝ̈ܢܐ ܩܛܪܬ܀

70 §70

ܥ- ܛܘܒܢܐ ܐܘܓܪܝܣ ܐܚܐ ܕܝܠܝ ܟܕ ܥܡ ܐܦܝܣܩܘ̈ܦܐ ܡܫܬܘܬܦ ܗܘܐ. ܟܕ ܢܿܦܩ ܡܢ ܒܝܪܝܛܘܣ: ܥܡ ܙܟܪܝܐ ܘܐܢܛܠܐܘܣ ܘܦܝܠܝܦܘܣ ܕܢܟܦܪܘܢ ܒܥܠܡܐ. ܐܬܐ ܠܨܘܪ ܠܘܬ ܐܒܐ ܐܠܝܐ ܩܫܝܫܐ. ܘܦܝܣܐ ܗܘܐ ܡܛܠ ܗܝܡܢܘܬܐ ܬܪܝܨܬܐ ܬܡܢ. ܘܟܕ ܥܬܝܕ ܗܘܐ ܡܢ ܒܬܪܗ ܕܝܘܡܐ ܕܢܚܪܡ ܠܣܘܢܗܕܘܣ ܕܟܠܩܝܕܘܢܐ ܘܢܬܩܪܒ ܡܢܗ ܚܙܐ ܒܠܠܝܐ ܗܿܘ ܕܒܪܢܫܐ ܠܡ ܕܠܫܢܗ ܬܡܘܣܘܬܐ ܐܝܬ ܗܘܐ ܐܟ ܚܟܬܐ ܡܕܡ ܥܬܝܩܬܐ ܕܣܪܝܐ. ܘܡܚܕܐ ܪܩܗܿ ܘܐܬܚܠܡ. ܘܒܬܪܗ ܕܝܘܡܐ ܐܟ ܕܐܡܿܪܬ ܟܕ ܥܬܝܕ ܕܢܬܩܿܪܒ ܘܢܚܪܡ ܠܣܘܢܕܘܣ ܐܬܕܟܪ ܠܚܠܢܗ. ܕܗܝ ܗܕܐ ܡܫܘܕܥܐ ܗܘܬ ܚܟܬܐ ܣܪܝܬܐ܆ ܣܪܝܘܬܐ ܕܗܠܝܢ ܬܪ̈ܝܝ ܟܝ̈ܢܐ܀ pb. 126

71 §71

ܥܐ- ܗܘ ܕܝܢ ܚܝܠܗ ܕܚܠܡܐ ܚܙܐ. ܘܐܚܐ ܐܢܣܛܘܣ ܕܝܪܝܐ ܐܘܪܗܝܐ: ܗܿܘ ܕܗܿܘܐ ܗܘܐ ܠܗ ܣܟܘܠܣܛܝܩܐ. ܟܕ ܓܝܪ ܐܝܬܘܗܝ ܥܕܟܝܠ ܒܒܝܪܝܛܘܣ. ܘܡܬܩܪܒ ܗܘܐ ܡܢ ܟܦܘܪ̈ܐ ܚܼܙܐ ܐܢܫ ܣܒܐ ܘܩܕܝܫܐ ܘܟܚܝܕܐ ܕܐܡܿܪ ܠܗ. ܐܢܗܘ ܕܒܿܥܐ ܐܢܬ ܕܬܬܦܪܩ ܣܒ ܠܟ ܣܘܣܝܐ. ܘܪܗܛ ܨܝܕ ܐܦܝܣܩܘܦܐ ܦܛܪܐ ܐܒܪܝܐ ܘܡܢܗ ܫܿܩܠ ܐܢܬ ܪܘܫܡܐ ܫܪܝܪܐ ܘܡܬܦܪܩ ܐܢܬ. ܘܡܚܕܐ ܠܡ ܢܦܨܬ ܟܠ ܡܕܡ. ܘܐܬܝܬ ܨܝܕ ܐܒܐ܆ ܟܕ ܐܝܬܘܗܝ ܗܘܐ ܗܝܕܝܢ ܒܐܦܬܘܪܝܕܐ ܨܝܕ ܐܒܐ ܓܪܝܓܪܝܘܣ. ܘܟܕ ܐܫܬܥܝ ܠܗ ܗܠܝܢ ܕܚܙܘܐ ܘܕܣܓܝ̈ܐܢ ܡܢܗܝܢ ܗܠܝܢ ܕܚܙܐ ܗܘܐ ܠܗ. ܟܕ ܐܝܬܘܗܝ ܗܘܐ ܒܐܢܛܝܘܟܝܐ ܘܒܡܣܩܬܗ ܕܩܕܝܡ̈ܢ ܗܘ̈ܝ ܡܫܘܕܥܢ. ܕܘܿܠܐ ܠܗ ܕܢܪܚܩ ܡܢ ܥܠܡܐ: ܘܩܿܪܝܢ ܗܘ̈ܝ ܠܗ ܠܫܘܢܝܐ ܘܠܥܪܘܩܝܐ ܡܫܡܠܝܐ ܕܡܢ ܥܠܡܐ ܗܢܐ: ܘܐܬܛܦܝܣ ܘܐܦܝܣ ܘܐܬܩܿܒܠ ܡܢܗ. ܘܐܬܬܠܡܕ ܠܗܝܡܢܘܬܐ ܬܪܝܨܬܐ. ܘܟܕ ܐܚܪܡ ܠܣܘܢܕܘܣ ܕܟܠܩܝܕܘܢܐ ܗܘܐ ܕܝܪܝܐ ܠܘܬܗ ܘܐܫܬܐܠ ܡܢ ܥܠܡܐ. ܡܫܬܥܐ pb. 127 ܗܘܐ ܠܢ ܕܝܢ ܕܟܕ ܥܬܝܕ ܗܘܐ ܕܢܬܩܪܒ ܒܗ ܒܠܠܝܐ. ܡܣܒܪ ܗܘܝܬ ܠܡ ܕܚܿܙܐ ܗܘܝܬ ܠܢܦܫܝ. ܐܟ ܥܡܝܕܐ ܚܕܬܐ ܘܕܠܒܝܫ ܗܘܝܬ ܐܣܛܠܐ ܢܨܝܚܬܐ. ܘܕܣܓܝ̈ܐܐ ܐܙܠܝܢ ܗܘܘ ܩܕܡܝ. ܕܛܥܝܢܝܢ ܗܘܘ ܩܪ̈ܝܘܢܐ. ܘܟܕ ܐܢܐ ܒܝ ܡܬܦܫܟ ܗܘܝܬ ܘܡܬܚܫܒ ܕܐܝܟܢܐ ܗܘܬ ܠܝ ܗܕܐ: ܟܕ ܚܕܐ ܙܒܢ ܥܡܝܕ ܐܢܐ ܡܢ ܫܒܪܘܬܝ܆ ܚܙܝܬܗ ܠܗ ܠܣܒܐ ܗܿܘ ܕܚܙܝܬ ܒܒܝܪܝܛܘܣ ܕܐܡܿܪ ܠܝ: ܕܠܐ ܬܕܚܠ ܘܠܐ ܬܬܦܫܟ. ܠܐ ܓܝܪ ܐܝܬܘܗܝ ܗܢܐ ܥܡܕܐ ܕܬܪ̈ܝܢ. ܐܠܐ ܟܠܗܘܢ ܗܠܝܢ ܕܗܘܝܢ ܐܪ̈ܬܐܕܟܣܘ ܠܢܘܗܪܐ ܕܐܟ ܗܢܐ ܡܫܬܘܝܢ܆ ܘܠܫܘܒܚܐ ܘܢܨܝܚܘܬܐ܀

72 §72

ܥܒ- ܗܘ ܟܕ ܗܘ ܚܙܘܐ ܚܙܐ ܘܪܚܡ ܠܡܫܝܚܐ ܓܥܐܝܘܢ܇ ܕܐܝܬܘܗܝ ܗܘܐ ܡܢ ܩܕܡܝ̈ܐ ܕܛܟܣܝܣ ܕܐܪܟܘܢܐ. ܗܿܘ ܕܡܢ ܣܒܣܛܐ ܕܦܠܣܛܝܢܐ. ܕܒܗܿ ܣܝܡܐ ܫܠܕܐ ܕܩܕܝܫܐ ܝܘܚܢܢ ܡܥܡܕܢܐ. ܟܕ ܓܝܪ ܦܓܥ ܒܛܘܒܬܢܐ ܦܛܪܐ ܐܦܝܣܩܘܦܐ: ܘܡܢܗ ܐܬܬܠܡܕ ܘܩܿܒܠ ܚܬܝܬܘܬܐ ܕܗܝܡܢܘܬܐ ܬܪܝܨܬ ܫܘܒܚܐ. ܘܥܬܝܢ ܗܘܐ ܕܢܚܪܡ ܠܣܘܢܕܘܣ ܕܟܠܩܝܕܘܢܐ ܘܢܫܬܘܬܦ ܥܡ ܩܕܝܫ̈ܐ. ܚܿܙܐ ܗܘܐ ܗܘ ܠܗ ܒܚܙܘܐ ܕܠܠܝܐ ܕܠܒܝܫ ܚܘܪ̈ܐ. ܘܕܐܙܠܝܢ ܩܕܡܘܗܝ ܣܓܝ̈ܐܐ ܐܟ ܕܩܕܡ ܥܡܝܕܐ ܥܡ pb. 128 ܠܡܦܝ̈ܕܐ ܘܢܗܝܪ̈ܐ. ܘܗܟܢܐ ܟܕ ܐܬܛܦܝܣ ܐܪܚܩ ܡܢ ܫܘܬܦܘܬܐ ܕܡܪ̈ܚܩܢܐ. ܘܗܘܐ ܐܪܬܘܕܘܟܣܐ ܘܛܢܢܐ܀

73 §73

ܥܓ- ܣܟܘܠܣܛܝܩܐ ܕܝܢ ܙܟܪܝܐ ܗܿܘ ܕܡܢ ܡܝܘܡܐ. ܕܐܝܬܘܗܝ ܗܘܐ ܐܪܬܐܕܘܟܣܐ ܘܣܓܝ ܛܢܢܐ ܘܚܬܝܬܐ ܒܕܘܓܡ̈ܛܐ: ܐܝܟܢܐ ܬܘܒ ܡܟܝܠ ܘܕܠܐܚܪ̈ܢܐ ܢܘܬܪ ܣܦܩ ܗܘܐ. ܟܕ ܐܝܬܘܗܝ ܗܘܐ ܒܒܝܪܝܛܘܣ. ܚܙܐ ܢܦܫܗ ܕܐܟ ܗܿܘ ܠܡ ܕܐܝܬܘܗܝ ܗܘܐ ܒܥܕܬܐ ܕܗܠܝܢ ܕܫܠܡܝܢ ܕܬܡܢ. ܘܟܕ ܠܡ ܟܢܘܫܝܐ ܡܫܬܡܠܐ ܗܘܐ: ܘܡܫ̈ܡܫܢܐ ܝܗܿܒܝܢ ܗܘܘ ܟܣܐ܇ ܕܠܘ ܒܟܠ ܦܬܓܡܐ ܩܕܝܫ ܘܐܪܙܢܝܐ ܐܡܪܝܢ ܗܘܘ. ܐܠܐ ܗܿܘ ܚܠܦ ܐܚܪܢܐ ܫܟܝܪܐ ܘܠܐ ܟܢܝܟܐ. ܘܟܕ ܫܓܝܫ ܘܡܣܬܪܗܒ. ܚܙܐ ܠܐܒܐ ܐܫܥܝܐ ܐܒܐ ܕܕܝܪ̈ܝܐ ܕܝܿܕܥ ܗܘܐ ܠܗ. ܣܓܝ ܓܝܪ ܙܒ̈ܢܝܢ ܚܿܙܐ ܗܘܐ ܠܗ. ܟܕ ܐܡܿܪ ܠܗ. ܥܪܘܩ ܡܢ ܥܕܬܐ ܕܗܠܝܢ ܐܪ̈ܒܝܥܝܐ ܘܐܬܦܪܫ ܡܢܗܘܢ܀

74 §74

ܥܕ- ܪܚܡ ܐܠܗܐ ܕܝܢ ܩܫܝܫܐ ܕܐܠܟܣܢܕܪ̈ܝܐ ܕܫܡܗ ܗܘܐ ܬܐܡܝܣܘܢ ܓܒܪܐ ܛܒܝܒܐ ܒܢܟܦܘܬܐ ܘܒܕܘܒܪ̈ܐ ܕܟܢܝܟܘܬܐ ܬܢܝ ܠܢ. ܕܟܕ ܐܚܕ ܥܕܬܐ ܕܒܐܠܟܣܢܕܪܝܐ ܣܠܦܐܩܪܝܘܣ. ܫܡܫܐ ܠܡ ܗܘܝܬ ܗܝܕܝܢ ܕܥܕܬܐ ܕܢܪܐܩܪܘܪܐ. pb. 129 ܘܠܒܝܟ ܗܘܝܬ ܕܝܘܩܢܝܩܘܢ ܘܡܗܝܡܢ ܗܘܝܬ ܡܠܢ̈ܐ ܕܬܫܡܫܬܐ ܘܡܢ ܐܠܝ̈ܨܬܐ ܬܡܢ ܦܐܫ ܗܘܝܬ ܘܕܡܟ ܗܘܝܬ. ܐܦܝܣܩܘܦܐ ܕܝܢ ܕܝܠܗܿ ܕܡܕܝܢܬܐ ܪܕܝܦ ܗܘܐ ܡܢ ܒܢ̈ܝ ܡܕܝܢܬܐ. ܐܟ ܗܪܛܝܩܐ ܘܟܕ ܐܙܠ ܣܠܐܦܝܘܪܝܣ ܫܩܠ ܠܗ ܕܬܘܒ ܢܗܦܘܟ ܘܢܠܒܘܟ ܥܕܬܐ. ܐܢܐ ܕܝܢ ܐܟ ܕܐܡܿܪܬ ܟܕ ܠܒܝܟ ܐܢܐ ܕܝܘܩܢܝܩܘܢ ܐܬܚܫܒܬ ܕܐܟܬܪ ܠܡܐܬܝܬܗ ܘܐܫܠܡ ܠܗ ܩܕܡܐܝܢ ܟܠܚܕ ܡܢ ܡܐܢ̈ܐ ܘܗܟܢ ܐܥܪܘܩ ܡܢ ܡܐܟܠ ܩܪܨܐ ܘܥܫܘܩܝܐ. ܘܚܙܝܬ ܟܕ ܕܡܿܝܟ ܐܢܐ ܒܕܝܘܩܢܝܩܘܢ ܒܗ ܒܠܠܝܐ. ܟܢܫ̈ܐ ܣܓܝ̈ܐܐ ܕܩܕܝܫ̈ܐ ܕܠܒܝ̈ܫܝܢ ܚܘ̈ܪܐ. ܘܩܕܝܫܬܐ ܝܠܕܬ ܐܠܗܐ ܩܝܡܐ ܗܘܬ ܒܡܨܥܬܗܘܢ. ܘܡܣܬܪܗܒܐ ܗܘܬ ܕܡܢ ܬܡܢ ܬܫܢܐ ܘܐܟ ܗܿܘ ܕܐܬܬܝܬܝ ܐܬܢܐ ܕܡܫܘܝ ܫܦܝܪܐܝܬ ܘܟܢܝܟܐܝܬ ܘܝܿܬܒܬ ܥܠܘܗܝ. ܟܕ ܩܕܝܫ̈ܐ ܐܣܩܘܗܿ. ܘܟܕ ܥܬܝܕܐ ܗܘܬ ܕܬܦܘܩ ܘܐܙܠܝܢ ܗܘܘ ܩܘܕܡܗܿ ܩܕܝܫ̈ܐ. ܚܙܬ ܒܝ ܟܕ ܝܬܒܬ ܥܠ ܐܬܢܐ. ܘܪܡܙܬ ܠܝ ܒܐܝܕܗܿ. ܘܟܕ ܩܪܬܢܝ ܐܡܪܬ ܠܝ ܦܘܩ ܡܢ ܗܪܟܐ ܘܠܐ ܬܟܬܪ ܘܩܦܝܢܝ. ܘܒܕܓܘܢ ܗܘ ܗܢܐ ܟܕ ܐܝܬ ܠܗ ܟܪܛܘܢܝܐ ܕܩܫܝܫܐ ܐܬܐ ܠܐܠܟܣܢܕܪܝܐ. ܘܟܕ ܣܓܝ ܐܬܪܚܡ ܡܢ ܐܒܗ̈ܬܐ ܬܪ̈ܝܨܝ ܫܘܒܚܐ. ܟܕ ܗܦܟ ܩܕܝܫܐ ܛܝܡܬܐܘܣ ܐܦܝܣܩܘܦܐ. pb. 130 ܐܫܟܚ ܠܘܬܗ ܛܝܒܘܬܐ ܣܓܝܐܬܐ ܐܟ ܡܿܢ ܕܐܝܬܘܗܝ ܗܘܐ ܓܒܪܐ ܒܚܝܪܐ ܐܪܬܘܕܘܟܣܐ ܘܡܨܒܬ ܗܘܐ ܒܡܝܬܪ̈ܘܬܐ ܐܚܪ̈ܢܝܬܐ ܘܐܬܠܒܟ ܬܡܢ ܡܢܗ ܘܥܕܡܐ ܠܚܪܬܐ ܐܬܢܨܚ ܒܗܝܡܢܘܬܐ. ܘܟܕ ܥܕܟܝܠ ܚܝ ܗܘܐ ܛܘܒܬܢܐ ܛܝܡܬܐܘܣ. ܘܡܢ ܒܬܪ ܕܫܟܒ ܟܕ ܡܟܢܫ ܠܥܡܐ ܘܡܫܪܪ ܘܡܒܢܐ ܥܕܡܐ ܠܢܫܡܬܐ ܐܚܪܝܬܐ܀

75 §75

ܥܗ- ܐܡܪ ܕܝܢ ܘܗܕܐ. ܕܟܕ ܥܬܝܕ ܗܘܐ ܐܟ ܕܐܡܿܪܬ ܐܦܝܣܩܘܦܐ ܗܿܘ ܗܪܛܝܩܐ ܕܢܐܬܐ ܠܪܢܐܩܪܘܪܐ. ܐܬܚܫܒܢ ܚܢܢ ܟܠܗܘܢ ܐܝܠܝܢ ܕܐܝܬܝܢ ܩܠܪ̈ܝܩܘ ܐܪ̈ܬܘܕܘܟܣܘ. ܕܩܕܡ ܡܐܬܝܬܗ ܢܫܢܐ. ܘܡܛܠ ܕܐܢܫ ܡܢ ܒܢ̈ܝ ܡܕܝܢܬܐ ܐܝܬ ܗܘܐ ܠܗ ܒܒܘܣܐ ܕܠܐ ܥܡܝܕ. ܡܦܝܣ ܗܘܐ ܕܢܥܡܕ ܡܢ ܐܪ̈ܬܕܘܟܣܘ. ܥܕܠܐ ܢܐܬܐ ܗܿܘ ܗܪܛܝܩܐ ܘܢܬܐܠܨ ܒܣܘܥܪܢܐ. ܘܟܕ ܐܫܬܡܠܝܬ ܗܝ ܡܥܡܘܕܝܬܐ. ܩܼܥܐ ܗܘ ܒܒܘܣܐ ܕܥܼܡܕ ܟܕ ܥܿܡܕ: ܠܒܘܟܘܢ ܠܒܘܟܘܢ ܠܝܘܢܐ ܗܕܐ ܕܦܪܚܐ ܘܥܪܩܐ. ܐܝܬܘܗܝ ܗܘܐ ܕܝܢ ܐܪܐ ܪܘܚܐ ܩܕܝܫܐ ܕܒܕܡܘܬܐ ܕܝܘܢܐ. ܗܝܕܝܢ ܐܬܚܙܝ ܘܚܘܝ ܕܡܢ ܒܬܪ ܐܘܚܕܢܐ ܕܗܪ̈ܛܝܩܘ ܛܝܒܘܬܐ ܕܪܘܚܐ ܩܕܝܫܐ ܡܫܢܝܐ ܘܫܒܩܐ ܠܥ̈ܕܬܐ܀

76 §76

ܥܘ- ܐܫܬܥܝ ܠܢ ܐܒܐ ܕܟܕ ܥܡܪܝܢ ܗܘܝܢ. ܒܡܐܘܙܐ ܕܝܐܡܢܝܐܣ ܡܕܝܢܬܐ: pb. 131 ܒܙܒܢܐ ܗܿܘ ܕܦܪܘܛܪܝܘܣ ܐܝܬܘܗܝ ܗܘܐ ܒܐܠܟܣܢܕܪܝܐ. ܐܝܬ ܗܘܐ ܠܝ ܐܢܫ ܪܚܿܡܐ ܩܠܪܝܩܐ. ܕܩܕܡܝܬ ܡܣܬܒܪ ܗܘܐ ܐܪܬܕܘܟܣܐ ܘܛܢܢܐ. ܗܢܐ ܠܚܪܬܐ ܐܬܩܪܒ ܠܦܪܘܛܪܝܘܣ ܘܦܢܛܐܦܛܪܘܦܘܣ. ܘܪܒܝܬܐ ܕܣܘܥܪ̈ܢܐ ܥܕܬܢ̈ܝܐ ܗܘܐ. ܟܕ ܡܬܕܒܪ ܒܦܢܛܣܝܐ ܣܓܝܐܬܐ. ܘܟܕ ܐܢܐ ܒܙܒܢ ܠܣܥܘܪܘܬܐ ܕܐܢܫ ܡܢ ܩܕܝܫ̈ܐ ܐܙܠ ܗܘܝܬ: ܘܡܣܪܗܒ ܗܘܝܬ. ܦܓܥ ܒܝ ܒܕܘܟܬܐ ܚܕܐ ܐܠܝܨܬܐ ܕܒܡܕܝܢܬܐ ܟܕ ܡܙܕܝܚ. ܘܟܕ ܚܙܝܬܗ ܘܐܨܛܒܝܬ ܕܐܣܛܐ ܘܠܐ ܐܫܟܚܬ ܕܘܟܬܐ ܕܠܚܿܡܐ. ܐܗܦܟܬ ܦܪܨܘܦܝ ܠܘܬ ܐܣܬܐ. ܗܘ ܕܝܢ ܟܕ ܚܙܢܝ ܘܐܫܬܘܕܥܢܝ. ܪܗܛ ܠܘܬ. ܟܕ ܫܐܠ ܒܫܠܡܝ. ܘܐܢܐ ܟܕ ܐܣܬܪܗܒܬ ܐܟܚܕܐ ܕܝܢ ܘܐܬܚܦܛܬ. ܦܢܝܬ ܘܫܐܠܬ ܫܠܡܗ: ܘܐܡܿܪܬ ܒܿܪܟ. ܘܟܕ ܐܡܪ ܠܘܬܝ ܠܡܢܐ ܥܿܪܩ ܐܢܬ ܡܢܝ܆ ܠܐ ܐܝܬܝ ܚܒܝܒܟ܆ ܡܢܐ ܚܛܝܬ ܕܐܬܗܦܟܬ ܡܢܝ. ܐܢܐ ܟܕ ܗܕܐ ܒܠܚܘܕ ܐܡܪܬ ܠܘܬܗ ܕܐܢܬ ܝܿܕܥ ܐܢܬ ܡܢܐ ܥܒܼܕܬ. ܥܒܪܬ ܡܢܗ. ܘܒܗ ܒܠܠܝܐ ܚܙܝܬ ܦܩܥܬܐ ܪܒܬܐ ܕܡܠܝܐ ܢܘܗܪܐ ܘܫܘܒܚܐ ܫܡܝܢܐ. ܘܟܢܫ̈ܐ ܕܩܕܝܫ̈ܐ ܘܛܟܣ̈ܐ ܕܡܠܐܟ̈ܐ ܕܡܫܒܚܝܢ ܘܡܩܠܣܝܢ ܠܐܠܗܐ. ܘܠܗ pb. 132 ܠܡܪܝܐ ܒܡܨܥܬܗܘܢ. ܘܟܕ ܚܙܝܬܗ ܪܗܛܬ ܠܘܬܗ ܕܐܣܓܘܕ ܠܗ ܘܡܬܚܿܦܛ ܗܘܝܬ ܟܕ ܐܝܬ ܗܘܐ ܠܝ ܒܬܪܥܝܬܝ ܡܣܒܪܢܘܬܐ܆ ܕܣܓܝ ܝܕܝܥܘܬܐ ܐܝܬ ܗܘܐ ܠܝ ܠܘܬܗ ܘܦܪܐܝܣܝܐ ܘܟܕ ܡܢ ܪܘܚܩܐ ܚܪ ܒܝ ܕܐܿܬܐ ܐܢܐ ܠܘܬܗ ܒܟܡܝܪܘܬܐ ܩܕܡ ܟܠܗܘܢ ܩܕܝܫ̈ܐ ܐܗܦܟ ܐܦܘ̈ܗܝ ܡܢܝ ܟܕ ܡܥܩ. ܕܗܟܢܐ ܟܠܗܘܢ ܩܕܝܫ̈ܐ ܢܬܕܡܪܘܢ. ܐܢܐ ܕܝܢ ܡܚܕܐ ܐܣܬܟܠܬ ܕܥܠܬܐ ܐܝܬܝܗܿ ܕܗܕܐ. ܦܓܥܐ ܐܘܟܝܬ ܥܢܝܢܐ ܗܿܘ ܕܓܕܫ ܠܝ ܠܘܬ ܗܿܘ ܟܦܘܪܐ. ܘܢܦܠ ܗܘܝܬ ܥܡ ܕܡܥ̈ܐ ܟܕ ܐܡܿܪ ܐܢܐ. ܕܡܪܝ ܪܚܡ ܥܠܝ. ܐܢܬ ܗܘ ܝܕܿܥ ܐܢܬ ܝܕܘܥܐ ܕܠܒܘ̈ܬܐ ܕܠܘ ܡܢ ܟܠܗ ܠܒܝ ܘܠܐ ܒܨܒܝܢܝ. ܐܠܐ ܟܕ ܐܬܚܦܛܬ ܘܐܣܬܪܗܒܬ ܗܕܐ ܥܒܕܬ ܘܠܡܚܣܢ ܟܕ ܡܬܟܫܦܝܢ ܟܠܗܘܢ ܩܕܝܫ̈ܐ ܚܠܦܝ ܐܬܛܦܝܣ ܕܢܩܒܠܢܝ܀

77 §77

ܥܙ- ܘܗܕܐ ܐܫܬܥܝ ܠܢ ܐܒܐ ܡܛܠ ܣܪܦܝܘܢ ܣܟܘܠܣܛܝܩܐ. ܓܒܪܐ ܡܗܝܡܢܐ ܣܓܝ ܘܛܢܢܐ ܕܐܪܬܘܕܘܟܣܝܐ ܘܪܚܿܡ ܩܕܝܫ̈ܐ ܘܩܕܡܝܐ ܕܣܟܘ̈ܠܝܣܛܝܩܐ ܕܒܐܠܟܣܢܕܪܝܐ܇ ܗܿܘ ܕܒܙܒܢܐ ܕܦܪܘܛܪܝܘܣ: ܕܡܢܝܚ ܗܘܐ ܠܗܠܝܢ ܕܡܢ ܟܠ ܕܘܟ ܡܬܪܕܦܝܢ ܩܕܝܫ̈ܐ: ܘܝܗܿܒ ܗܘܐ ܠܗܘܢ ܐܢܠܘܡܐ ܡܢ pb. 133 ܥܡܠܗ. ܘܡܛܠ ܗܕܐ ܠܚܙܘܐ ܐܠܗܝܐ ܕܐܟ ܗܢܐ ܐܫܬܘܝ. ܟܕ ܓܝܪ ܪ̈ܝܫܢܐ ܕܐܠܟܣܢܕܪܝܐ. ܡܛܠ ܢܝܚܗ ܕܦܪܘܛܪܝܘܣ. ܪܕܦܘܢ ܠܟܠܗܘܢ ܩܠܪ̈ܝܩܐ ܐܪ̈ܬܐܕܟܣܘ ܘܕܝܪ̈ܝܐ ܡܢ ܡܕܝܢܬܐ. ܘܡܢ ܕܝܪ̈ܬܐ ܕܒܚܘܕܪܐ ܘܠܐ ܡܡܪܚ ܗܘܐ ܐܢܫ ܡܢ ܩܕܝܫ̈ܐ ܕܢܬܚܙܐ ܘܢܥܒܕ ܩܘܪܒܢܐ ܠܡܗ̈ܝܡܢܐ ܟܕ ܥܐܕܐ ܡܪܐܢܝܐ ܕܟܠܗ ܥܠܡܐ ܕܦܨܚܐ ܡܢܥ. ܗܿܘ ܣܟܘܠܣܛܝܩܐ ܕܐܡܝܪ ܣܪܦܝܘܢ: ܟܕ ܒܒܝܬܗ ܡܬܛܫܐ ܗܘܐ ܡܛܠ ܕܚܠܬܗ ܕܟܦܘܪܐ܆ ܐܝܬܘܗܝ ܗܘܐ ܒܥܩܬܐ ܪܒܬܐ ܘܒܟܐܒܐ ܕܢܦܫܐ ܐܟ ܡܿܢ ܕܓܠܝܙ ܗܘܐ ܡܢ ܩܘܪܒܢܐ. ܒܝܘܡܐ ܩܕܝܫܐ ܕܐܟ ܗܢܐ. ܘܟܕ ܡܛܬ ܫܥܬܐ ܕܠܠܝܐ ܩܕܝܫܐ ܕܒܗ ܟܢܘܫܝܐ ܩܕܝܫܐ ܡܥܕܝܢ ܗܘܘ ܕܢܥܒܕܘܢ. ܢܦܩ ܠܕܘܟܬܐ ܠܬܚܬ ܫܡܝܐ ܠܕܪܬܗ: ܘܟܦ ܒܘܪ̈ܟܘܗܝ ܥܡ ܕܡܥ̈ܐ ܟܕ ܡܨܠܐ ܘܡܬܟܫܦ ܠܐܠܗܐ. ܘܦܫܝܛܝܢ ܗܿܘܝ ܐܝܕܘܗ̈ܝ ܠܫܡܝܐ. ܘܟܕ ܡܨܠܐ ܗܘܐ ܘܥܬܝܕ ܕܢܡܠܐ ܨܠܘܬܗ. ܘܢܚܡܠ ܐܝܕܘܗ̈ܝ ܐܫܬܟܚܬ ܡܢܬܐ ܒܐܝܕܗ ܡܢ ܦܓܪܐ ܡܪܐܢܝܐ. ܘܟܕ ܢܣܒ. ܗܟܢܐ ܐܬܚܝܠ ܘܐܫܬܪܪ ܒܗܝܡܢܘܬܐ. ܐܟ ܕܢܫܬܘܐ ܕܒܐܣܘܪ̈ܐ ܢܣܩ ܠܩܘܣܛܢܛܝܢܐܦܘܠܝܣ. ܟܕ ܐܬܡܣܪ ܠܘܬ ܡܪܩܝܢܐ ܡܢ ܦܪܘܛܘܪܝܣ. ܘܟܠܝܠܐ ܕܡܘܕܝ̈ܢܐ ܢܩܿܒܠ. ܘܐܦܢ ܝܬܝܪܐܝܬ ܟܕ ܣܠܩ ܠܩܘܣܛܢܛܝܢܐܦܘܠܝܣ ܐܫܬܘܝ ܠܛܝܒܘܬܐ ܘܥܘܕܪܢܐ ܕܡܢ ܡܪܢ. ܗܟܢܐ pb. 134 ܓܝܪ ܟܚܝܕܐ ܐܬܚܙܝ ܩܕܡ ܡܠܟܐ ܐܟ ܕܢܬܦܣܣ ܠܗ ܘܕܠܐ ܕܚܠܐ ܥܡ ܦܪܝܣܝܐ ܢܥܡܪ ܒܩܘܣܛܢܛܝܢܐܦܘܠܝܣ ܘܥܡ ܣܟܘܠܣ̈ܛܝܩܐ ܕܬܡܢ ܢܬܡܢܐ. ܘܛܟܣܐ ܩܕܡܝܐ ܢܗܘܐ ܠܗ܆ ܘܬܡܢ ܐܫܬܡܠܝ܀

78 §78

ܥܚ- ܐܢܫ̈ܝܢ ܡܢ ܣܟܘܠܣ̈ܛܝܩܐ ܕܐܠܟܣܢܕܪܝܐ ܐܪ̈ܬܐܕܟܣܘ. ܩܪܿܝܢ ܗܘܘ ܒܒܝܪܝܛܘܣ. ܘܟܕ ܐܬܡܢܥܘܢ ܥܡ ܐܚܪ̈ܢܐ ܠܘܬ ܐܣܛܘܢܪܐ ܐܢܫ ܕܩܿܐܡ ܗܘܐ ܒܩܪܝܬܐ ܚܕܐ ܥܠ ܓܢܒ ܡܕܝܢܬܐ: ܘܫܡܥ ܗܿܘ ܡܛܠܬܗܘܢ ܕܠܐ ܡܬܩܪܒܝܢ ܡܢ ܥܕܬܐ ܘܡܢ ܐܦܝܣܩܘ̈ܦܐ. ܡܢ ܐܚܪ̈ܢܐ ܕܐܡܪܝܢ ܗܘܘ ܗܕܐ ܡܛܠܬܗܘܢ܆ ܟܕ ܪܓܙ ܗܿܘ ܐܡܪ ܠܘܬܗܘܢ. ܕܡܢ ܐܝܟܐ ܡܬܩܪܒܝܢ ܐܢܬܘܢ. ܟܕ ܐܝܬܝܟܘܢ ܒܐܟܣܢܝܘܬܐ܆ ܗܠܝܢ ܕܝܢ ܒܦܪܗܣܝܐ ܐܡܪܘܢ. ܕܩܘܪܒܢܐ ܐܝܬ ܠܢ ܡܢ ܐܒܗ̈ܬܐ ܕܝܠܢ ܩܕܝܫ̈ܐ ܐܪ̈ܬܐܕܟܣܘ ܘܡܢܗ ܫܩܠܝܢܢ. ܗܘ ܕܝܢ ܐܡܼܪ ܠܘܬܗܘܢ. ܘܐܝܟܢܐ ܢܩܿܦܐ ܗܕܐ ܕܟܕ ܥܠܡ̈ܝܐ ܐܝܬܝܟܘܢ. ܬܦܣܘܢ ܐܢܬܘܢ ܠܟܘܢ ܕܬܣܒܘܢ ܩܘܪܒܢܐ. ܗܢܘܢ ܕܝܢ ܐܡܪܘܢ ܠܘܬܗ. ܐܒܗ̈ܝܢ ܩܠܪ̈ܝܩܐ ܕܐܝܬܝܗܘܢ ܐܪ̈ܬܐܕܘܟܣܘ ܚܬܝ̈ܬܐ ܐܦܣܘܢ ܠܢ ܦܢܛܘܣ ܕܢܥܒܕ ܗܕܐ. ܐܟ ܡܿܢ ܕܡܦܣܐ ܗܕܐ ܘܠܚܡܐ. ܘܟܕ ܗܦܟܘܢ ܠܒܝܪܝܛܘܣ. ܘܐܬܐ ܚܕܒܫܒܐ. ܚܕ ܡܢܗܘܢ ܡܬܦܫܟ ܗܘܐ. ܟܕ ܥܿܗܕ ܗܘܐ ܠܡ̈ܠܘܗܝ ܕܗܿܘ ܐܣܛܘܢܪܐ pb. 135 ܕܢܣܒ ܡܢ ܢܦܫܗ܇ ܡܢ ܩܘܪܒܢܐ ܗܿܘ ܩܕܝܫܐ. ܘܠܚܪܬܐ ܟܕ ܓܥܪ ܒܢܦܫܗ ܘܐܬܚܝܠ ܒܗܝܡܢܘܬܐ ܩܪܒ. ܘܟܕ ܫܩܠ ܓܡܘܪܬܐ. ܐܫܬܟܚܬ ܒܐܝܕܗ ܦܬܬܐ ܕܕܡܐ. ܘܗܝ ܗܕܐ ܬܕܡܘܪܬܐ ܗܘ ܣܟܘܠܣܛܝܩܐ ܐܫܬܥܝ ܠܢ. ܠܚܪܬܐ ܓܝܪ ܘܕܝܪܝܐ ܗܘܐ܀

79 §79

ܥܛ- ܛܘܒܢܐ ܐܣܛܦܢܘܣ ܩܫܝܫܐ. ܗܿܘ ܕܗܿܘܐ ܗܘܐ ܠܗ ܐܪܟܝܕܝܩܘܢ ܒܐܘܪܫܠܡ ܛܢܢܐ ܐܪܬܐܕܘܟܣܐ. ܚܬܐ ܐܝܬ ܗܘܐ ܠܗ ܩܕܝܫܬܐ. ܗܿܝ ܕܒܝܘ̈ܡܬܐ ܡܿܢ ܩܕܝܫ̈ܐ ܗܠܝܢ ܐܪ̈ܒܥܝܢ ܕܨܘܡܐ: ܫܒ̈ܐ ܢܦܿܩܐ ܗܘܬ. ܟܠܗܿ ܕܝܢ ܫܢܬܐ ܒܘ̈ܬܐ. ܘܣܒܝܣܐܝܬ ܐܬܝܐ ܗܘܬ ܠܒܝܬ ܣܗ̈ܕܐ ܕܩܕܝܫܐ ܐܣܛܦܢܘܣ. ܘܕܩܕܝܫܐ ܝܘܚܢܢ ܡܥܡܕܢܐ. ܘܬܡܢ ܫܿܗܪܐ ܗܘܬ ܘܠܕܐܟ ܗܕܐ ܡܫܘܚܬܐ ܕܩܕܝܫܘܬܐ ܘܕܕܟܝܘܬܐ ܐܬܬ ܐܟ ܕܬܚܙܐ ܦܪܨܘܦܐܝܬ ܠܩܕܝܫܐ ܐܣܛܦܢܘܣ ܘܠܩܕܝܫܐ ܝܘܚܢܢ. ܕܐܬܘ ܠܘܬܗܿ ܘܡܠܠܘ ܥܡܗܿ ܘܡܒܪܟܝܢ ܠܗܿ. ܘܟܕ ܗܝܕܝܢ ܗܘܬ ܣܘܢܕܘܣ ܕܟܠܩܝܕܘܢܐ ܡܬܦܫܟܐ ܗܘܬ ܡܟܝܠ ܕܐܟ ܥܝܕܗܿ ܬܐܬܐ ܠܒܝܬ ܣܗ̈ܕܘܬܐ ܘܬܨܠܐ ܥܡ ܛܠܘ̈ܡܐ. ܘܣܓܝ ܝܬܝܪܐܝܬ ܥܡ ܝܘܒܢܠܐܘܣ ܟܦܘܪܐ pb. 136 ܕܗܝܕܝܢ ܐܚܝܕ ܗܘܐ ܥܕܬܐ. ܘܟܕ ܡܥܩܐ ܗܘܬ ܕܥܬܝܕܐ ܗܘܬ ܕܬܬܦܪܫ ܡܢ ܥܢܝܢܐ ܕܩܕܝ̈ܫܐ܆ ܐܬܚܙܝ ܠܗܿ ܩܕܝܫܐ ܐܣܛܦܢܘܣ ܟܕ ܐܡܿܪ: ܕܙܠܝ ܫܠܝ ܒܩܠܝܬܟܝ ܘܠܐ ܬܚܣܪܝܢ ܬܐܪܬܟܝ܆ ܘܠܐ ܬܬܥܝܩܝܢ. ܐܟ ܡܿܢ ܕܡܬܦܪܫܐ ܐܢܬܝ ܡܢܢ. ܐܝܟܐ ܓܝܪ ܕܐܝܬܝܟܝ ܠܬܡܢ ܐܬܝܢܢ. ܘܥܡܟܝ ܥܒܕܝܢܢ ܡܥܡܪܐ܀

80 §80

ܦ- ܐܢܬܬܐ ܐܢܫ ܐܪܬܐܕܘܟܣܬܐ ܡܢ ܦܡܦܘܠܝܐ ܟܕ ܥܡ ܒܢ̈ܬܗܿ ܟܦܪܬ ܒܥܠܡܐ܆ ܐܬܬ ܠܐܘܪܫܠܡ ܘܠܒܟܬ ܫܠܝܐ ܒܛܘܪܐ ܕܙܝ̈ܬܐ. ܘܟܕ ܒܙܒܢ ܣܠܩܬ ܕܬܣܓܘܕ ܒܕܘܟܬܐ ܩܕܝܫܬܐ ܕܣܘܠܩܐ. ܓܕܫ ܕܢܗܘܐ ܟܢܘܫܝܐ ܬܡܢ ܒܗ ܒܝܘܡܐ. ܘܟܕ ܠܐ ܝܕܥܐ ܐܬܬܚܕܘܢ ܬܪ̈ܥܐ. ܘܟܕ ܠܐ ܡܫܟܚܐ ܗܘܬ ܕܬܦܘܩ ܩܡܬ ܠܘܬ ܐܣܛܘܢܐ ܚܕ ܟܕ ܡܬܛܫܝܐ܆ ܥܕܡܐ ܕܐܫܬܪܝ ܗܘ ܟܢܘܫܝܐ. ܘܗܦܟܬ ܠܩܠܝܬܗܿ ܠܘܬ ܒܢ̈ܬܗܿ. ܒܚܪܬܐ ܕܝܢ ܟܕ ܐܬܟܪܗܬ ܟܘܪܗܢܐ ܕܒܗ ܐܫܬܡܠܝܬ. ܘܟܕ ܩܪܝܒܐ ܗܘܬ ܠܘܬ ܥܘܢܕܢܐ ܩܥܿܝܐ ܗܘܬ ܘܐܡܪܐ. ܕܬܘ ܚܙܘ ܕܐܝܕܐ ܡܪܫܘܬܐ ܡܿܝܬܝܢ ܥܠܝ ܒܫܥܬܐ ܗܕܐ. ܟܕ ܐܡܪܝܢ pb. 137 ܕܐܝܟܢܐ ܡܫܟܚܐ ܐܢܬܝ ܕܬܪܕܕܩܝܢ ܡܟܝܠ܇ ܐܘ ܕܬܗܘܝܢ ܥܡ ܐܪ̈ܬܐܕܘܟܣܘ܇ ܐܢܬܝ ܕܟܕ ܡܫܬܡܠܐ ܟܢܘܫܝܐ ܡܢ ܗܠܝܢ ܟܦܘܪ̈ܐ܇ ܐܨܛܒܝܬܝ ܕܬܟܬܪܝܢ ܘܬܚܙܝܢ ܠܗܠܝܢ ܕܠܐ ܫܿܘܝܢ. ܟܕ ܝܗܒܿܝܢ ܪ̈ܐܙܐ ܠܗܠܝܢ ܕܝܬܝܪ ܡܢܗܘܢ ܠܐ ܫܿܘܝܢ. ܘܗܝ ܗܕܐ ܒܪܐ ܕܝܠܗܿ ܐܪܬܐܕܘܟܣܐ: ܕܗܼܘܐ ܡܫܡܫܢܐ ܐܫܬܥܝ ܠܢ. ܕܫܡܗ ܗܘܐ ܬܐܘܕܘܠܣ܀

81 §81

ܦܐ- ܟܕ ܐܘܣܦ ܘܗܕܐ. ܕܒܙܒܢ ܗܝ ܗܕܐ ܚܙܬ ܠܢܦܫܗܿ ܕܡܬܩܪܒܐ ܠܬܪܘܢܘܣ ܕܐܠܗܐ ܐܟ ܕܠܕܝܢܐ. ܘܫܡܥܬ ܩܠܐ ܕܐܬܿܐ ܗܘܐ ܠܘܬܗܿ ܡܢ ܠܓܘ ܡܢܗ ܕܬܪܘܢܘܣ. ܡܘܕܝܐ ܐܢܬܝ ܕܒܪܐ ܕܐܠܗܐ ܐܬܝܠܕ ܡܢ ܒܬܘܠܬܐ ܩܕܝܫܬܐ ܡܪܝܡ ܝܠܕܬ ܐܠܗܐ܆ ܡܘܕܝܐ ܐܢܬܝ ܕܒܪܐ ܕܐܠܗܐ ܐܨܛܠܒ ܘܚܫ ܚܠܦܝܢ܆ ܘܗܟܢܐ ܘܡܢ ܒܬܪ ܕܐܘܕܝܬ ܐܬܩܒܠܬ ܘܐܫܬܘܝܬ ܠܪܚܡܬ ܐܢܫܘܬܗ܀

82 §82

ܦܒ- ܒܐܝܛܠܝܐ ܕܦܡܦܘܠܝܐ ܗܘܬ ܐܢܫ ܪܝܫܬ ܕܝܪܐ ܚܕܐ ܘܡܗܕܝܢܝܬܐ ܕܕܝܪܐ ܕܒܬܘܠ̈ܬܐ ܐܪ̈ܬܕܟܣܘ܆ ܕܫܡܗܿ ܗܘܐ ܙܘܬܐ. ܘܕܟܝܐ ܗܘܬ ܣܓܝ ܒܕܘܒܪ̈ܝܗܿ ܘܒܬܪܥܝܬܗܿ. ܘܡܬܥܢܘܝܐ ܗܘܬ ܪܘܪܒܐܝܬ. ܗܕܐ ܒܙܒܢ ܟܕ ܗܘܬ ܒܬܡܗܐ ܡܢ ܒܬܪ ܗܦܘܟܝܐ ܕܐܢܩܘܩܠܝܘܢ. ܚܙܬ ܢܦܫܗܿ ܒܦܪܕܝܣܐ. ܘܩܝܣܐ ܕܚ̈ܝܐ ܒܡܨܥܬܗ. ܘܕܒܘܪ̈ܝܬܐ ܣܓܝ̈ܐܬܐ ܕܦܪ̈ܚܢ ܗܘ̈ܝ ܘܡܬܚܦ̈ܛܢ ܕܢܛܥܡ̈ܢ ܡܢ ܩܝܣܐ ܘܠܐ ܡܫܬܒܩܢ ܗܘ̈ܝ. ܐܟ ܡܿܢ ܕܡܢ ܐܢܫ ܡܫܡܫܢܐ ܡܬܛܪ̈ܕܢ ܗ̈ܘܝ. ܕܠܒܝܫ ܚܘܪ̈ܐ pb. 138 ܘܩܿܐܡ ܠܘܬ ܩܝܣܐ: ܘܒܐܘܪܪܗ ܛܪܿܕ ܗܘܐ ܠܗܝܢ. ܗܿܘ ܕܟܕ ܐܫܬܐܠ ܡܢܗܿ: ܕܡܛܠ. ܡܢܐ ܛܿܪܕ ܠܗܝܢ. ܐܡܪ ܠܘܬܗܿ܆ ܡܛܠ ܕܗܠܝܢ ܐܝܬܝܗܘܢ ܗܠܝܢ ܕܡܢ ܒܬܪ ܗܦܘܟܝܗ ܕܐܢܩܘܩܠܝܘܢ ܫܠܡܘ ܠܣܘܢܗܕܘܣ ܕܟܠܩܝܕܘܢܐ. ܠܘܬ ܗܕܐ ܒܙܒܢ ܟܕ ܐܬܐ ܐܦܝܣܩܦܐ ܕܐܝܛܠܝܐ ܩܠܘܕܝܢܘܣ܆ ܘܡܬܪܫܐ ܗܘܐ ܡܢܗܿ ܕܠܡܢܐ ܐܪܡܝ ܐܝܕܐ ܒܗܿܘ ܕܡܬܐܡܪ ܐܢܛܝܩܘܩܠܝܘܢ ܢܿܦܩ ܗܘܐ ܒܪܘܚܐ ܘܐܡܿܪ. ܕܒܐܝܕܐ ܟܬܒܬ ܘܠܘ ܒܢܦܫܐ ܘܠܐ ܒܠܒܐ. ܘܐܡܪܬ ܠܘܬܗ. ܘܐܝܟܢܐ ܡܨܝܐ ܐܝܕܐ ܕܬܬܙܝܥ. ܐܢ ܗܘ ܕܩܕܡܐܝܬ ܢܦܫܐ ܠܐ ܬܨܒܐ ܘܬܙܝܥܝܗܿ. ܕܠܡܐ ܡܫܟܚ ܡܝܬܐ ܕܢܬܬܙܝܥ. ܗܟܢܐ ܘܠܐ ܐܝܕܐ ܒܠܥܕ ܡܢ ܢܦܫܐ܀

83 §83

ܦܓ- ܐܒܐ ܠܐܘܢܛܝܣ ܡܕܒܪܢܐ ܗܿܘ ܕܡܢ ܠܘܩܝܐ. ܘܛܒܝܒܐ ܒܟܠܕܘܟ. ܟܕ ܥܬܝܕ ܗܘܐ ܕܢܗܘܐ ܗܿܘ ܕܡܬܐܡܪ ܐܢܛܝܩܘܩܠܝܘܢ ܘܗܦܘܟܝܐ ܕܐܢܩܘܩܠܝܘܢ ܬܪܝܨ ܫܘܒܚܐ. ܚܙܐ ܒܚܙܘܐ. ܕܡܿܫܠܚ ܗܘܐ ܡܕܒܚܐ ܕܥܕܬܐ. ܘܩܘ̈ܕܫܐ ܫܼܕܝܢ ܗܘܘ ܥܠ ܐܪܗܐ. ܘܡܛܠ ܗܕܐ ܡܿܣܗܕ ܗܘܐ ܠܟܠܢܫ ܟܕ ܐܡܿܪ. ܕܐܢܐ ܠܥܕܬܐ ܕܪܒܝ̈ܥܝܝ ܐܠܗ̈ܐ ܠܐ ܡܟܝܠ ܫܿܠܡ ܐܢܐ܀

84 §84

ܦܕ- ܐܢܫ ܕܝܢ ܐܚܪܢܐ ܡܢ ܩܕܝܫ̈ܐ ܒܗ ܒܙܒܢܐ ܚܙܐ. ܐܟ ܗܿܘ ܕܐܝܬܝܗܿ pb. 139 ܥܕܬܐ ܐܣܛܒܠܘܢ. ܘܬܡܢ ܫܘܚܠܦ̈ܐ ܕܚܝܘ̈ܬܐ ܠܐ ܡܠܝ̈ܠܬܐ ܘܣܪܝܘܬܐ ܣܓܝܐܬܐ܀

85 §85

ܦܗ- ܛܘܒܢܐ ܕܝܢ ܐܦܝܩܛܛܘܣ ܕܐܝܬܘܗܝ ܗܘܐ ܪܝܫ ܕܝܪܐ ܕܕܝܪܐ ܪܒܬܐ ܕܐܪ̈ܬܐܕܟܣܘ: ܘܛܢܢܐ ܒܦܡܦܘܠܝܐ ܐܟ ܕܐܫܬܥܝ ܠܢ ܐܦܝܦܢܝܘܣ ܐܦܝܣܩܘܦܐ: ܗܿܘ ܕܐܦ ܬܠܡܝܕܗ ܗܘܐ ܘܡܩܒܠܢܐ ܕܡܢܗ܆ ܒܙܒܢ ܟܕ ܗܘܐ ܒܚܙܘܐ ܐܡܿܪ ܗܘܐ ܕܚܼܙܐ ܠܐܦܝܣܩܘܦܐ ܕܣܝܕܐ ܐܡܦܠܝܟܝܘܣ: ܕܡܣܬܒܪ ܗܘܐ ܡܪܚܡܢܐ. ܘܕܐܝܬ ܗܘܐ ܠܗ ܕܘܒܪ̈ܐ ܠܐ ܥܕܝ̈ܠܐ. ܘܗܝܡܢܘܬܐ ܬܪܝܨܬܐ: ܒܪܡ ܕܝܢ ܟܬܒ ܛܘܡܣܐ ܕܠܐܘܢ܇ ܘܒܗܠܝܢ ܕܐܣܬܥܪ̈ܝܢ ܒܣܘܢܗܕܘܣ ܕܟܠܩܝܕܘܢܐ ܐܫܬܘܬܦ. ܘܥܡܗ ܠܐܦܝܦܢܝܘܣ ܐܦܝܣܩܘܦܐ ܕܦܪܓܐ. ܠܬܪ̈ܝܗܘܢ ܕܛܡܝܪ̈ܝܢ ܒܣܝܢܐ ܥܕܡܐ ܠܩܕܠܗܘܢ. ܘܥܡ ܒܟܝܐ ܗܘ ܐܒܐ ܐܦܝܩܛܛܘܣ ܐܡܿܪ ܗܘܐ ܠܘܬ ܐܡܦܝܠܝܟܝܘܣ: ܕܐܝܟܢܐ ܐܢܬ. ܗܿܘ ܕܗܟܢܐ ܐܒܪܩܬ ܒܚܝ̈ܐ ܕܡܝܬܪܘܬܐ. ܐܫܬܟܚܬ ܒܗܢܐ ܣܝܢܐ܆ ܗܘ ܕܝܢ ܐܡܪ ܠܘܬܗ. ܐܢ ܛܒܬܐ ܡܢ ܐܠܗܐ ܐܝܬܝܗܿ. ܐܢ ܕܝܢ ܚܛܝܬܐ ܡܢܢ. ܗܠܝܢ ܚܿܐܫ ܐܢܐ ܡܪܝ ܐܒܐ. ܡܛܠ ܣܘܢܕܘܣ ܕܟܠܩܝܕܘܢܐ ܕܫܠܡܬ ܠܗܿ܀

86 §86

ܦܘ- ܐܢܬܬܐ ܐܢܫ ܒܐܠܟܣܢܕܪܝܐ ܟܢܝܟܬܐ ܘܡܫܒܚܬܐ ܕܫܡܗܿ ܗܘܐ pb. 140 ܐܓܬܐܘܩܠܝܐ ܡܢ ܒܬܪ ܗܦܘܟܝܐ ܕܐܢܩܘܩܠܝܘܢ ܡܬܦܫܟܐ ܗܘܬ ܗܝ ܒܗܿ܆ ܕܐܝܟܢܐ ܙܕܿܩ ܕܐܬܩܕܫ. ܘܟܕ ܣܓܝ ܒܥܬ ܡܢ ܡܪܝܐ ܡܛܠ ܗܕܐ. ܕܐܡܪܐ ܠܗܿ ܦܠܪܘܦܪܝܐ. ܘܐܫܬܡܥܬ ܡܛܠ ܢܟܦܘܬܗܿ ܣܓܝܐܬܐ܆ ܚܙܬ ܒܚܙܘܐ ܥܕܬܐ ܪܒܬܐ܆ ܘܒܗܿ ܬܪܝܢ ܡܕܒܚ̈ܐ. ܗܿܘ ܡܢ ܪܒܐ ܫܚܝܡܐ ܘܥܪܛܠܝܐ. ܘܐܢܫ ܡܢ ܐܦܝܣܩ̈ܦܐ ܗܠܝܢ ܕܡܫܬܘܬܦܝܢ ܥܡ ܣܘܢܕܘܣ ܕܟܠܩܝܕܘܢܐ ܘܝܕܿܥܐ ܗܘܬ ܠܗ ܕܩܿܐܡ ܗܘܐ ܠܥܠ ܡܢܗ ܘܡܫܡܫ ܘܡܩܿܪܒ. ܗܿܘ ܕܝܢ ܐܚܪܢܐ ܕܡܢ ܝܡܝܢܐ. ܙܥܘܪܐ ܡܿܢ ܒܡܫܘܚܬܐ. ܒܕܗܒܐ ܕܝܢ ܣܓܝܐܐ ܘܒܟܐܦ̈ܐ ܛܒ̈ܬܐ ܡܩܣܡܣ ܗܘܐ ܘܡܒܪܩ. ܘܒܒܘܣܐ ܙܥܘܪܐ ܕܩܿܐܡ ܗܘܐ ܠܥܠ ܡܢܗ ܘܡܩܪܒ܆ ܕܐܝܬܘܗܝ ܗܘܐ ܗܘ ܡܪܝܐ. ܘܐܡܪ ܠܗܿ. ܕܡܢ ܗܪܟܐ ܐܬܩܿܪܒ. ܘܟܕ ܗܟܢܐ ܐܬܛܦܝܣܬ. ܫܒܚܬ ܠܐܠܗܐ. ܘܐܪܚܩܬ ܡܿܢ ܩܘܪܒܢܐ ܕܬܪ̈ܝܝ ܟܝ̈ܢܐ. ܘܗܟܢܐ ܟܬܪܬ ܐܪܬܐܕܘܟܣܬܐ ܚܬܝܬܬܐ ܘܚܿܙܝܬܐ܆ ܒܚܝ̈ܐ ܘܒܗܝܡܢܘܬܐ܀

87 §87

ܦܙ.- ܒܕܝܪܗ ܕܐܒܐ ܪܘܡܢܐ. ܗܘܘ ܬܪ̈ܝܢ ܐܚܝ̈ܢ ܕܐܝܬܝܗܘܢ ܗܘܘ ܒܓܢܣܐ ܡܢ ܦܠܘܣܝܘܢ ܡܢ ܩܕܡ̈ܝܐ ܕܡܕܝܢܬܐ. ܝܘܚܢܢ ܘܛܝܡܬܐܘܣ. ܘܟܕ ܥܕܟܝܠ ܚܝ ܗܘܐ ܛܘܒܢܐ ܪܘܡܢܘܣ ܟܦܪܘ ܒܥܠܡܐ ܘܡܢܗ ܐܟ ܕܠܡܐܡܪ ܩܒܠܘ ܐܣܟܝܡܐ pb. 141 ܕܕܝܪܝܘܬܐ. ܘܡܢ ܒܬܪ ܙܒܢܐ ܣܓܝܐܐ ܕܡܘܬܗ ܕܐܒܐ ܪܘܡܢܐ܆ ܛܝܡܬܐܘܣ ܚܕ ܡܢܗܘܢ ܐܬܡܚܠ ܟܕ ܒܟܘܪܗܢܐ ܐܚܪܝܐ ܗܘܐ. ܘܟܕ ܐܫܬܡܠܝ. ܫܩܠܘܗܝ ܐܚ̈ܐ ܐܟ ܥܝܕܐ. ܘܐܫܝܓܘܗܝ ܘܣܡܘܗܝ ܥܠ ܣܩܡܢܝܢ. ܟܕ ܥܬܝܕܝܢ ܕܢܥܦܘܢܝܗܝ. ܗܘ ܕܝܢ ܡܢ ܫܠܝܐ ܫܘܪ ܝܬܒ. ܟܕ ܕܝܢ ܟܠ ܐܢܫ ܡܿܬܕܡܪ ܗܘܐ ܘܐܝܬܝܗܘܢ ܗܘܘ ܒܬܡܗܐ: ܪܗܛ ܕܝܢ ܘܥܡܐ ܣܓܝܐܐ ܕܕܝܪ̈ܝܐ ܥܡ ܪܝܫ ܕܝܪܐ ܕܗܝܕܝܢ܇ ܘܡܫܐܠܝܢ ܗܘܘ ܠܗ ܕܐܢ ܗܘ ܕܒܫܪܪܐ ܡܝܬ. ܘܐܝܟܢܐ ܟܕ ܡܝܬ ܩܡ. ܐܡܪ ܠܘܬܗܘܢ ܕܒܫܪܪܐ ܡܝܬ. ܘܐܬܬܘܒܠ ܠܕܘܟܬܐ ܕܕܝܢܐ ܘܕܟܐܢܘܬܐ. ܘܕܐܬܩܪܒ ܨܝܕ ܕܝܢܐ. ܘܟܕ ܗܠܝܢ ܐܡܿܪ ܗܘܐ. ܒܟܿܐ ܗܘܐ ܡܪܝܪܐܝܬ. ܘܡܬܬܢܚ ܗܘܐ. ܘܩܥܿܐ ܗܘܐ ܘܐܡܧܪ. ܐܘ ܚܬܝܬܘܬܐ. ܐܘ ܚܬܝܬܘܬܐ. ܐܘ ܚܬܝܬܘܬܐ. ܐܢܬܘܢ ܣܿܗܕܝܢ ܐܢܬܘܢ ܠܝ܆ ܕܐܝܟܢܐ ܝܿܨܦܬ ܟܕ ܐܝܬܝ ܥܡܟܘܢ. ܕܠܐ ܐܟܫܠ ܬܪܥܝܬܐ ܕܐܢܫ ܐܚܐ. ܘܐܦܢ ܗܘܝܬ ܡܗܡܝܢܐ ܒܟܠܡܕܡ. ܒܪܡ ܕܝܢ ܘܠܐ ܡܢ ܕܘܟ ܐܬܡܨܝܬ ܕܐܫܟܚ ܪ̈ܚܡܐ ܘܥܘܕܪܢܐ ܒܫܥܬܐ ܗܕܐ. ܘܐܥܪܘܩ ܡܢ ܬܫܢܝܩܐ. ܐܠܐ ܒܗܿܝ ܕܢܛܪܬ ܕܠܐ ܡܘܡ ܗܝܡܢܘܬܐ ܬܪܝܨܬܐ. ܘܥܕܡܐ ܠܗܕܐ ܫܥܬܐ ܐܪܚܩܬ ܢܦܫܝ ܡܢ ܛܠܝܘܬܝ ܡܢ ܫܘܬܦܘܬܐ ܕܟܦܘܪ̈ܐ ܕܒܟܠܩܝܕܘܢܐ܀ pb. 142

88 §88

ܦܚ.- ܒܐܢܛܝܘܟܝܐ ܪܒܬܐ ܡܕܡ ܕܐܟ ܗܢܐ ܗܘܐ. ܗܿܘ ܕܐܢܐ ܚܙܝܬܗ. ܘܟܕ ܒܢܣܝܢܐ ܢܣܒܬ. ܕܿܐܠܨܐ ܐܣܬܒܪܬ ܠܝ ܕܐܣܝܡܝܘܗܝ ܥܡ ܗܠܝܢ ܕܩܕܝ̈ܡܢ ܟܬܝܒ̈ܢ ܠܗܝܡܢܘܬܐ ܘܠܦܠܪܦܪܝܐ ܕܣܓܝ̈ܐܐ. ܦܠܛܝܢ ܐܝܬ ܕܡܠܟܐ ܒܗܿ ܒܡܕܝܢܬܐ. ܕܠܐ ܒܨܝܪܐ ܐܟ ܕܐܡܿܪܝܢ ܗܠܝܢ ܕܚܙܘ. ܒܫܘܦܪܐ ܘܪܒܘܬܐ ܘܕܫܪܟܐ ܕܪܒܘܬܐ ܦܐܝܘܬܐ܇ ܡܢ ܗܠܝܢ ܦܠܛܝ̈ܐ ܕܐܝܬ ܒܪܗܘܡܝ ܘܒܩܘܣܛܢܛܝܢܐܦܘܠܝܣ. ܕܐܚܝܕܐ ܡܢ ܙܒܢܐ ܒܗܿܝ ܕܠܐ ܡܬܒܥܝܐ. ܘܒܠܚܘܕ ܡܬܢܛܪܐ. ܕܕܠܡܐ ܢܓܕܫ ܘܠܗܠܝܢ ܕܘܟܝ̈ܬܐ ܢܐܬܐ ܡܠܟܐ. ܠܘܬ ܬܪܥܐ ܪܒܐ ܕܗܕܐ: ܗܿܘ ܕܒܿܪܝ ܡܢ ܟܠܗܘܢ ܘܐܚܝܕ ܐܟ ܕܐܡܪܬ: ܐܢܫ ܐܬܐ ܕܠܒܝܫ ܐܣܟܝܡܐ ܫܚܝܡܐ ܕܗܕܝܘܛܐ. ܘܥܒܕ ܥܠܘܗܝ ܕܝܠܗ ܕܬܪܥܐ ܡܛܠܬܐ ܙܥܘܪܬܐ. ܘܫܠܐ ܒܗܿ ܒܩܝܛܐ ܘܒܣܛܘܐ. ܒܩܘܪܫܐ ܘܒܥܪܛܠܝܘܬܐ. ܠܐ ܓܝܪ ܐܝܬ ܗܘܐ ܠܗ: ܐܠܐ ܐܢ ܚܕܐ ܟܘܬܝܢܐ. ܘܠܒܝܟ ܗܘܐ ܫܠܝܐ. ܘܡܕܡ ܒܦܘܡܗ ܠܐ ܡܡܠܠ ܗܘܐ. ܣܘܓܐܗܝܢ ܕܝܢ ܕܫܢܝ̈ܐ ܩܿܐܡ ܗܘܐ ܗܘ ܠܘܬܗ܆ ܘܡܨܠܐ ܒܬܐܢܚ̈ܬܐ ܘܕܡܥ̈ܐ. ܠܐ ܕܝܢ ܡܕܡ ܡܬܘܡ ܨܿܒܐ ܗܘܐ ܕܢܣܒ ܡܢ ܐܢܫ. ܕܗܒܐ ܐܘ ܟܣܦܐ. ܐܦܠܐ ܢܘ̈ܡܐ ܕܢܚܫܐ. ܐܠܐ ܩܨܪܐ ܚܕ ܫܒܒܗ ܕܐܝܬ ܗܘܐ ܠܗ ܬܡܢ ܚܢܘܬܐ. ܠܐܦ̈ܝ ܪܡܫܐ ܠܚܡܐ ܩܠܝܠ ܘܒܘܫܠܐ ܕܝܪܩܐ ܐܘ ܕܕܩܐ܆ ܘܡܝ̈ܐ ܡܩܿܪܒ ܗܘܐ ܠܗ. pb. 143 ܘܟܕ ܣܘܢܩܢܗ ܢܣܿܒ ܗܘܐ܇ ܗܿܘ ܡܕܡ ܕܝܿܬܪ ܗܘܐ ܢܿܛܪ ܗܘܐ. ܘܠܡܣ̈ܟܢܐ ܕܡܢ ܥܝܕܐ ܐܬܝܢ ܗܘܘ ܠܘܬܗ ܝܗܿܒ ܗܘܐ ܠܗ. ܘܣܝܡ ܗܘܐ ܐܟ ܬܚܘܝܬܐ ܡܕܡ ܠܥܠܡܐ. ܐܢܐ ܕܝܢ ܟܕ ܗܠܝܢ ܫܡܥܬ ܡܛܠܬܗ. ܚܦܝܛܘܬܐ ܗܘܬ ܠܝ ܐܬܡܿܢܥ ܠܘܬܗ. ܡܣܬܪܕ ܗܘܝܬ ܕܝܢ܆ ܕܕܠܡܐ ܠܐ ܗܿܢܝ ܗܘܐ ܠܗ ܠܣܒܐ. ܘܐܙܿܠ ܗܘܝܬ ܫܚܿܩ ܐܢܐ ܠܗ. ܒܪܡ ܕܝܢ ܟܕ ܠܡܪܢ ܩܪܝܬ ܐܙܠܬ ܠܘܬܗ. ܗܘ ܕܝܢ ܟܕ ܚܙܢܝ ܚܘܝܚܐܝܬ ܩܒܠܢܝ ܘܒܦܪܨܘܦܐ ܦܨܝܚܐ ܚܪ ܒܝ. ܚܿܙܐ ܗܘܝܬ ܠܗ ܕܝܢ ܐܢܫ ܡܨܥ ܣܝܒܘܬܐ ܕܡܩܝܡ ܘܢܚܘܒ. ܘܐܝܬ ܗܘܐ ܠܗ ܦܪܨܘܦܐ ܝܒܝܫܐ ܘܕܡܛܠܩ ܡܢ ܐܒܠܐ ܘܕܡܥ̈ܐ ܘܥܢܘܝܘܬܐ. ܟܕ ܕܝܢ ܐܫܟܚܬ ܛܝܒܘܬܐ ܠܘܬܗ. ܝܿܠܦ ܗܘܝܬ ܡܢܗ ܕܡܢܐ ܟܕ ܡܿܚܒ ܐܢܬ ܚܝ̈ܐ ܕܥܢܘܝܘܬܐ܇ ܠܐ ܡܠܠܘܢ ܒܡܕܒܪܐ: ܐܘ ܒܩܢܘܒܝܘܢ ܐܠܐ ܒܡܕܝܢܬܐ ܕܐܟ ܗܕܐ ܢܨܝܚܬܐ ܘܗܕܝܪܬܐ: ܘܒܕܘܟܝ̈ܬܐ ܕܫܘܩܐ ܘܒܐܐܪ̈ܘܣ ܠܐ ܫܘ̈ܝܐ ܥܒܝܕ ܠܟ ܡܫܟܢܐ܆ ܗܘ ܕܝܢ ܒܫܠܝܐ ܟܕ ܐܝܕܗ ܕܝܡܝܢܐ ܦܫܛ ܠܫܡܝܐ ܒܪܡܙܐ ܡܫܘܕܥ ܗܘܐ܆ ܕܐܠܗܐ ܠܡ ܦܩܕ ܠܝ. ܘܟܕ ܐܡܿܪ ܗܘܝܬ ܠܘܬܗ ܕܡܛܠ ܐܝܕܐ ܥܠܬܐ ܒܿܟܐ ܐܢܬ܆ ܘܠܐ ܦܢܝ ܦܬܓܡܐ. ܐܡܿܪܚܬ ܘܐܡܿܪܬ ܠܘܬܗ. ܐܢܐ ܕܝܢ pb. 144 ܗܕܐ ܡܬܚܿܫܒ ܐܢܐ. ܕܙܒܢܐ ܕܫܘܠܡܐ ܐܕܪܟ. ܘܠܣܗܕܘܬܐ ܕܝܠܢ ܐܫܬܕܪܬ ܕܗܕܐ ܬܟܪܙ ܠܥܠܡܐ ܒܕܘܟܬܐ ܗܕܐ. ܗܘ ܕܝܢ ܒܠܚܘܕ ܡܕܡܿܥ ܗܘܐ. ܣܓܝ ܕܝܢ ܙܒ̈ܢܬܐ ܐܬܝܬ ܠܘܬܗ ܕܐܣܿܒ ܢܣܝܢܐ ܕܢܟܦܘܬܗ܇ ܘܐܬܬܪܬܐ ܡܢ ܚܙܬܗ ܒܠܚܘܕ. ܐܢ ܗܘ ܕܐܝܬ ܗܘܐ ܠܝ ܪܓܫܬܐ ܕܐܩܒܠ ܡܪܕܘܬܐ. ܐܝܬܘܗܝ ܗܘܐ ܕܝܢ ܘܒܗܝܡܢܘܬܐ ܐܪܬܘܕܘܟܣܐ ܘܛܢܢܐ. ܘܕܣܓܝ ܡܨܪܦ ܗܘܐ ܠܢܣܛܘܪ̈ܝܢܐ. ܘܡܗܦܟ ܗܘܐ ܐܦܘ̈ܗܝ ܡܢܗܘܢ. ܕܡܢܗܘܢ ܠܚܪܬܐ ܐܟ ܕܫܡܥܬ ܡܢ ܒܬܪ ܕܫܢܝܬ. ܒܡܚ̈ܘܬܐ ܩܫܝ̈ܬܐ ܐܬܬܒܪ. ܘܟܕ ܡܢܗܝܢ ܕܡܚ̈ܘܬܐ ܐܬܡܚܠ܆ ܒܣܗܕܘܬܐ ܐܫܬܡܠܝ܀

89 §89

ܦܛ.- ܒܗ ܕܝܢ ܒܗܿܘ ܙܒܢܐ ܗܘܐ ܐܢܫ ܐܦܝܣܩܘܦܐ ܕܩܢܫܪܝܢ ܕܫܡܗ ܗܘܐ ܢܐܘܢܐ. ܗܿܘ ܕܡܢ ܛܠܝܘܬܗ ܫܩܠ ܗܘܐ ܢܝܪܐ ܕܕܝܪܝܘܬܐ. ܘܣܓܝܐܝܬ ܡܬܥܢܘܐ ܗܘܐ. ܒܕܝܪܐ ܪܒܬܐ ܘܝܕܝܥܬܐ ܕܡܬܩܪܝܐ ܕܐܒܐ ܥܩܝܒܐ ܥܠ ܓܢܒܗܿ ܕܡܕܝܢܬܐ ܘܠܚܪܬܐ ܡܗܕܝܢܐ ܘܪܝܫ ܕܝܪܐ ܗܘܐ ܕܕܝܪܐ ܗܿܝ. ܘܒܙܒܢܗ ܕܡܪܛܘܪܝܘܣ ܢܣܛܘܪܝܢܐ ܘܐܦܝܣܩܘܦܐ: ܗܿܘ ܕܐܬܪܕܦ ܡܢ ܐܢܛܝܘܟܝܐ ܡܛܠ ܗܪܣܝܣ ܓܠܝܬܐ: ܟܕ ܡܨܘ̈ܬܐ ܣܓܝ̈ܐܬܐ ܗܿܘܝ ܒܡܕܝܢܬܐ. ܛܢܢܐ ܗܘܐ ܠܗ ܠܢܐܘܢܐ ܐܦܝܣܩܦܐ ܕܩܕܝܡ pb. 145 ܐܡܝܪ. ܟܕ ܥܕܟܝܠ ܐܝܬܘܗܝ ܗܘܐ ܪܝܫܕܝܪܐ. ܘܫܩܠ ܐܚ̈ܐ ܕܕܝܪܗ ܘܐܬܐ ܠܐܢܛܝܘܟܝܐ. ܘܥܿܕܪ ܣܓܝ ܠܐܪܬܐܕܘ̈ܟܣܘ. ܥܕܡܐ ܕܐܬܪܕܦ ܡܢ ܡܕܝܢܬܐ ܗܪܛܝܩܐ ܡܪܛܘܪܝܘܣ. ܡܢ ܗܪܟܐ ܡܕܝܢ ܟܕ ܒܥܿܐ ܕܢܦܪܥܗ ܡܛܠ ܛܢܢܗ ܘܚܦܝܛܘܬܗ: ܦܛܪܘܣ ܗܿܘ ܕܗܘܐ ܒܐܢܛܝܟܝܐ ܐܦܝܣܩܘܦܐ ܕܐܪ̈ܬܐܕܘܟܣܘ܆ ܒܙܒܢܐ ܕܐܢܩܘܩܠܝܘܢ܆ ܥܒܕܗ ܐܦܝܣܩܦܐ ܒܩܢܫܪܝܢ. ܘܡܛܠ ܕܐܝܬ ܗܘܐ ܠܗ ܠܘܬܝ ܚܘܒܐ ܣܓܝܐܐ ܡܢ ܥܝܕܐ. ܫܡܥ ܡܢܝ ܡܛܠ ܣܒܐ ܗܿܘ ܕܩܕܝܡ ܐܡܝܪ. ܕܟܢܝܫ ܗܘܐ ܠܘܬ ܗܿܝ ܦܠܛܝܢ. ܘܟܕ ܝܠܦ ܕܝܿܕܥ ܐܢܐ ܠܗ. ܐܦܝܣܢܝ ܕܐܣܒܝܘܗܝ ܥܡܝ ܠܘܬܗ ܕܢܗܘܐ ܒܥܢܝܢܗ. ܘܟܕ ܐܙܿܠܝܢ ܗܘܝܢ ܠܐܦ̈ܝ ܡܛܠܬܗ. ܐܡܿܪܬ ܠܐܦܝܣܩܦܐ܆ ܕܟܬܪ ܩܠܝܠ ܗܪܟܐ: ܥܕܡܐ ܕܐܩܕܘܡ ܘܐܝܠܦ ܕܡܢܐ ܥܿܒܕ ܣܒܐ: ܕܕܠܡܐ ܐܪܐ ܒܨܠܘܬܐ ܩܿܐܡ ܘܫܿܓܫܝܢܢ ܠܗ܆ ܒܚܕܐ ܕܝܢ ܘܐܫܘܕܥܝܘܗܝ ܡܛܠ ܪܚܡܬ ܐܠܗܐ ܕܝܠܟ. ܘܟܕ ܥܒܪܬ ܘܐܫܟܚܬܗ ܕܡܨܠܐ. ܟܬܪܬ ܥܕܡܐ ܕܫܿܠܡ. ܘܟܕ ܫܡܠܝ ܥܿܠܬ. ܘܟܕ ܐܢܐ ܥܕܟܝܠ ܡܡܠܠ ܗܘܝܬ ܠܗ. ܐܦܝܣܩܘܦܐ ܢܐܘܢܐ ܟܕ ܚܙܐ ܕܐܘܚܪܬ. ܩܪܒ ܘܢܩܿܫ ܗܘܐ ܡܢ ܠܒܪ ܟܕ ܨܿܒܐ ܕܢܥܘܠ. ܐܢܐ ܕܝܢ ܝܕܥܬ. ܘܟܕ ܐܡܪܬ ܠܗ ܠܣܒܐ܇ ܕܗܢܐ ܐܝܬܘܗܝ ܗܿܘ ܕܡܛܠܬܗ ܐܡܪܬ ܠܪܚܡܬ ܐܠܗܐ. ܕܒܟ. ܩܡܬ ܘܐܪܥܬܗ ܠܐܦܝܣܩܦܐ: ܘܡܚܕܐ ܕܥܠ pb. 146 ܒܠܚܘܕ ܚܪ ܒܦܪܨܘܦܗ ܣܒܐ. ܘܐܬܡܠܝ ܚܡܬܐ. ܘܫܪܝ ܕܢܦܘܚ ܒܦܪܨܘܦܗ ܣܓܝ ܙܒ̈ܢܬܐ. ܐܝܟܢܐ ܕܐܦܠ ܐܢܐ ܡܢ ܢܟܦܬܐ ܕܝܠܝ. ܘܗܘ ܐܦܝܣܩܘܦܐ ܢܫܬܓܫ ܪܘܪܒܐܝܬ ܘܒܒܗܬܬܐ ܢܗܘܐ. ܘܡܦܝܣ ܗܘܝܬ ܠܗ ܠܣܒܐ ܘܡܬܟܫܦ ܗܘܝܬ ܕܠܐ ܗܕܐ ܢܥܒܕ. ܟܕ ܐܡܿܪ ܐܢܐ ܕܐܦܝܣܩܘܦܐ ܐܝܬܘܗܝ ܘܛܢܢܐ ܘܣܓܝ ܥܡܝܠ ܠܗ ܒܐܪܬܘܕܟܣܝܐ. ܗܘ ܕܝܢ ܟܕ ܢܦܿܚ ܗܘܐ ܒܗ ܘܦܫܿܛ ܐܝܕܗ ܠܘܬܗ ܘܡܙܝܥ ܗܘܐ ܒܐܣܟܝܡܐ ܕܓܙܡܐ. ܡܫܘܕܥ ܗܘܐ ܚܡܬܐ ܣܓܝܐܬܐ ܘܐܡܿܪ ܗܘܐ. ܗܢܐ܆ ܗܢܐ܆ ܥܕܡܐ ܕܫܩܠܬܗ ܠܐܦܝܣܩܘܦܐ ܘܢܦܩܬ ܒܢܟܦܬܐ. ܕܠܐ ܬܘܒ ܐܫܓܫܗ ܠܣܒܐ. ܣܓܝ ܕܝܢ ܡܬܕܡܿܪ ܗܘܝܬ. ܟܕ ܡܬܦܫܟ ܐܢܐ. ܕܡܛܠ ܐܝܕܐ ܥܠܬܐ ܗܟܢܐ ܐܫܬܓܫ ܣܒܐ ܠܘܬ ܢܐܘܢܐ. ܘܡܢܐ ܐܪܐ ܚܙܐ ܒܗ. ܘܠܚܪܬܐ ܡܢ ܡܦܩܢܐ ܕܣܘܥܪ̈ܢܐ. ܐܝܕܥܬܗܧ ܠܥܠܬܐ. ܗܘ ܓܝܪ ܗܢܐ ܗܿܘ ܕܗܟܢܐ ܐܝܬܘܗܝ ܗܘܐ ܛܢܢܐ ܘܥܢܘܝܐ ܘܡܣܬܒܪ ܗܘܐ ܡܬܟܬܫܢܐ ܕܐܪ̈ܬܘܕܘܟܣܘ. ܒܝܘ̈ܡܬܗ ܕܩܠܢܕܝܘܢ ܠܐ ܚܣܝܐ ܗܪܛܝܩܐ ܛܢܦܐ. ܥܒܪ ܥܠ ܗܝܡܢܘܬܐ ܘܫܘܬܦܗ ܗܘܐ. ܘܐܒܠܐ ܗܘܐ ܘܚܣܕܐ ܠܐܪ̈ܬܘܕܟܣܘ. ܕܗܟܢܐ ܐܪܫܥ ܕܢܐܡܪ ܠܡܫܝܚܐ ܒܪܢܫܐ ܠܒܝܫ ܠܐܠܗܐ. ܘܒܪܢܫܐ ܕܐܬܢܣܒ ܘܝܠܕܬ ܠܡܫܝܚܐ ܒܬܘܠܬܐ ܩܕܝܫܬܐ. ܘܒܘܠܒܠܐ ܘܡܘܙܓܐ ܘܥܦܝܦܐ ܠܗ ܠܡܫܝܚܐ. ܘܐܚܪ̈ܢܝܬܐ pb. 147 ܕܐܟ ܗܠܝܢ. ܐܝܠܝܢ ܕܡܢ ܒܬܪ ܗܝܕܝܢ ܐܣܠܝܘ ܐܢܝ̈ܢ ܐܒܗ̈ܬܐ ܕܝܠܢ ܐܪ̈ܬܘܕܟܣܘ. ܘܟܕ ܐܡܝܪ̈ܢ ܟܒܪ ܒܦܫܝܛܘܬܐ ܠܐܢܫ̈ܝܢ ܡܢ ܐܒܗ̈ܬܐ ܩܕܝܫ̈ܐ ܠܘ ܕܢܚܘܘܢ ܬܪ̈ܝܢ ܒܢ̈ܝܐ ܐܘ ܦܪ̈ܨܘܦܐ ܐܘ ܡܫܝ̈ܚܐ ܐܘ ܟܝ̈ܢܐ܆ ܐܠܐ ܠܩܘܝܡܐ ܘܫܘܪܪܐ ܕܡܬܒܪܢܫܢܘܬܐ ܫܪܝܪܬܐ ܘܡܫܡܠܝܬܐ܆ ܐܝܟܢܐ ܕܡܢ ܡܟܬܒܢ̈ܘܬܗܘܢ ܣܓܝ̈ܐܬܐ ܘܣܝ̈ܡܐ ܕܝܠܗܘܢ ܝܿܠܦܝܢܢ. ܒܪܡ ܕܝܢ ܡܛܠ ܗܪ̈ܛܝܩܐ ܗܠܝܢ ܕܦܫܝܩܐܝܬ ܣܿܥܝܢ ܥܠ ܡ̈ܠܐ ܕܐܟ ܗܠܝܢ܇ ܐܟ ܗܿܘ ܕܠܒܝܫܘܬ ܬܫܒܘܚܬܐ ܕܝܠܗܘܢ ܫܠܡ̈ܢ ܡܫܡܠܝܐܝܬ ܐܟ ܕܐܡܪܬ ܐܣܠܝܘ ܐܢܝ̈ܢ ܐܒܗ̈ܬܐ ܐܪ̈ܬܘܕܘܟܣܘ. ܗܟܢܐ ܘܢܬܐܡܪܘܢ ܬܪ̈ܝܢ ܟܝ̈ܢܐ ܡܢ ܒܬܪ ܚܕܝܘܬܐ ܟܦܪܘ. ܘܕܢܐܡܪܘܢ ܬܘܒ ܡܐ ܕܝܗܿܒܝܢ ܩܘܕܫ̈ܐ: ܦܓܪܗ ܕܡܫܝܚܐ. ܗܘ ܦܬܓܡܐ ܒܠܚܘܕܘܗܝ. ܐܠܐ ܦܓܪܗ ܕܐܠܗܐ ܡܠܬܐ. ܘܦܓܪܗ ܕܡܫܝܚܐ ܐܠܗܐ ܡܠܬܐ ܘܦܪܘܩܢ. ܐܝܟܢܐ ܕܛܘܒܬܢܐ ܩܘܪܝܠܘܣ ܐܠܦ ܒܦܘܫܩܐ ܕܩܦܠܐܘܢ ܕܚܕܥܣܪ. ܬܘܒ ܕܝܢ ܘܛܘܒܬܢܐ ܛܝܡܬܐܘܣ ܒܡܐܡܪܐ ܗܿܘ ܕܣܝܡ ܠܗ ܥܠ ܛܘܡܣܗ ܕܠܐܘܢ ܘܥܠ ܣܘܢܕܘܣ ܕܟܠܩܝܕܘܢܐ܀ ܠܕܐܟ ܗܢܐ ܓܝܪ ܪܘܫܥܐ ܐܬܘ ܐܢܫܝ̈ܢ ܡܢ ܩܠܝܪܝܩܐ ܕܐܢܛܝܘܟܝܐ: ܟܕ ܥܕܟܝܠ ܡܪܛܘܪܝܣ ܗܪܛܝܩܐ ܠܥܕܬܐ ܐܚܝܕ ܗܘܐ. ܐܝܟܢܐ ܕܢܡܪܚܘܢ ܕܟܕ ܝܗܿܒܝܢ ܩܘܕܫ̈ܐ ܢܐܡܪܘܢ. ܦܓܪܗ ܕܙܕܝܩܐ. ܗܘ ܦܬܓܡܐ pb. 148 ܫܚܝܡܐ. ܕܠܘܬ ܗܠܝܢ ܙܕܿܩ ܕܢܐܡܪ ܟܐܢܐܝܬ ܒܪܬ ܩܠܐ ܕܫܠܝܚܐ. ܕܐܝܬܝܗܿ ܗܟܢܐ: ܐܢ ܓܝܪ ܐܝܢܐ ܕܥܒܪ ܥܠ ܢܡܘܣܐ ܕܡܘܫܐ܆ ܥܠ ܦܘܡ ܬܪ̈ܝܢ ܘܬܠܬܐ ܣܗ̈ܕܐ ܕܠܐ ܪܚܡܐ ܡܿܐܬ. ܟܡܐ ܣܒܿܪܝܢ ܐܢܬܘܢ ܡܣܡ ܒܪܝܫܐ ܩܫܝܐ ܢܩܒܠ܆ ܐܝܢܐ ܕܕܫܗ ܠܒܪܗ ܕܐܠܗܐ: ܘܚܫܒ ܕܡܐ ܕܡܐ ܕܕܝܬܝܩܐ ܕܝܠܗ ܐܟ ܕܟܠܢܫ. ܕܒܗ ܐܬܩܕܫܢ܇ ܘܨܥܪ ܠܪܘܚܐ ܕܛܝܒܘܬܐ܀ ܦܐܝܐ ܒܪܬ ܩܠܐ ܘܣܗܕܘܬܐ ܕܐܠܗܐ ܕܠܘܬ ܟܠܗܿ ܥܡܪܬܐ. ܗܿܝ ܕܗܘܬ ܡܢ ܐܠܗܐ ܠܘܬ ܩܕܝܫܐ ܝܫܘܥ ܒܪܢܘܢ. ܗܿܘ ܕܗܘܐ ܝܪܘܬܐ ܕܪܫܢܘܬܗ ܘܕܡܘܗܒܬܗ ܕܡܘܫܐ ܪܒܐ. ܡܢ ܒܬܪ ܓܝܪ ܗܠܝܢ ܬܕܡܪ̈ܬܐ ܪ̈ܘܪܒܬܐ ܗܠܝܢ ܕܗܘ̈ܝ ܒܡܨܪܝܢ ܡܢ ܐܠܗܐ. ܘܒܝܡܐ ܘܒܡܕܒܪܐ܇ ܡܢ ܒܬܪ ܗܿܘ ܡܢܢܐ: ܡܢ ܒܬܪ ܙܟܘ̈ܬܐ ܣܓܝ̈ܐܬܐ ܘܪ̈ܘܪܒܬܐ: ܡܢ ܒܬܪ ܡܥܒܪܬܐ ܦܐܝܬ ܠܐܠܗܐ ܕܒܝܘܪܕܢܢ: ܡܢ ܒܬܪ ܫܒܝܐ ܕܐܝܪܝܚܘ ܘܡܦܘܠܬܐ ܕܫܘܪ̈ܝܗܿ ܡܢ ܩܥܬܐ ܒܠܚܘܕ ܕܥܡܐ܆ ܘܐܒܕܢܐ ܡܫܡܠܝܐ ܘܚܪܡܐ ܕܝܠܗ: ܡܢ ܒܬܪ ܗܠܝܢ ܟܠܗܝܢ ܬܕܡܪ̈ܬܐ܆ ܡܛܠ ܚܛܗܐ ܕܚܕ ܒܪܢܫܐ ܕܐܥܒܪ ܥܠ ܦܘܩܕܢܐ ܕܐܠܗܐ: ܘܫܩܠ ܡܕܡ ܘܓܢܒ ܡܢ ܚܪܡܐ. ܪܓܙ ܐܠܗܐ ܥܠ ܟܠܗ ܥܡܐ. ܘܐܙܕܟܝ ܐܝܣܪܐܝܠ ܡܢ ܡܩܪ̈ܒܢܐ ܙܥܘܪ̈ܐ܆ ܐܟܡܐ ܕܣܓܝ̈ܐܐ ܡܢܗܘܢ pb. 149 ܢܦܠܘܢ܆ ܘܟܠܗ ܥܡܐ ܢܗܘܐ ܒܕܚܠܬܐ ܘܒܣܘܪܕܐ. ܐܝܟܢܐ ܕܗܘ ܥܡܐ ܢܦܣܘܩ ܣܒܪܐ ܘܐܦ ܗܘ ܪܝܫ ܚܝܠܐ ܪܒܐ ܝܫܘܥ. ܟܬܝܒ ܓܝܪ ܕܙܥ ܠܒܐ ܕܥܡܐ ܘܗܘܐ ܐܟ ܡܝ̈ܐ. ܢܫܡܥ ܡܕܝܢ ܡܢ ܬܫܥ̈ܝܬܐ ܕܒܬܪ ܗܠܝܢ ܕܒܟܬܒ̈ܐ ܩܕܝܫ̈ܐ ܗܠܝܢ ܕܢܩܦ̈ܢ ܕܐܡܪ̈ܢ ܗܟܢܐ: ܘܨܪܝ ܡܐܢܘ̈ܗܝ ܝܫܘܥ ܘܢܦܠ ܥܠ ܐܦܘ̈ܗܝ ܥܠ ܐܪܥܐ ܥܕܡܐ ܠܪܡܫܐ. ܗܘ ܘܣܒܘ̈ܗܝ ܕܥܡܐ. ܘܐܪܡܝܘ ܥܦܪܐ ܥܠ ܪ̈ܝܫܝܗܘܢ. ܘܐܡܪ ܝܫܘܥ: ܒܥܿܐ ܐܢܐ ܡܪܝ ܠܡܢܐ ܐܥܒܪ ܠܥܡܐ ܗܢܐ ܝܘܪܕܢܢ܇ ܕܢܫܠܡܝܘܗܝ ܠܐܡܘܪ̈ܝܐ. ܕܢܘܒܕܘܢ ܠܢ. ܐܠܘ ܟܬܪܢܢ ܘܥܡܪܢܢ ܥܠ ܓܢܒ ܝܘܪܕܢܢ. ܘܡܢܐ ܐܡܪ ܕܐܗܦܟ ܐܝܣܪܐܝܠ ܩܕܠܗ ܡܢ ܠܘܩܒܠ ܒܥܠܕܒܒܗ. ܘܟܕ ܢܫܡܥ ܟܢܥܢܝܐ ܘܟܠܗܘܢ ܗܿܢܘܢ ܕܥܿܡܪܝܢ ܒܐܪܥܐ ܡܬܟܪܟܝܢ ܠܢ ܘܥܿܛܝܢ ܠܢ ܡܢ ܐܪܥܐ. ܘܡܢܐ ܥܒܿܕ ܐܢܬ ܠܫܡܟ ܪܒܐ܆ ܘܐܡܪ ܡܪܝܐ ܠܘܬ ܝܫܘܥ܆ ܩܘܡ. ܡܛܠ ܡܢܐ ܢܦܝܠ ܐܢܬ ܥܠ ܐܦܝ̈ܟ. ܚܛܐ ܥܡܐ. ܘܥܒܪ ܥܠ ܩܝܡܐ ܕܝܠܝ ܗܿܘ ܕܡܩܡ ܗܘܐ ܠܝ ܠܘܬܗܘܢ. ܘܓܢܒܘ ܡܢ ܚܪܡܐ ܘܐܪܡܝܘ ܒܡܐܢܝܗ̈ܘܢ. ܘܠܐ ܡܟܝܠ ܡܨܝܢ ܒܢ̈ܝ ܐܝܣܪܐܝܠ ܕܢܩܘܡܘܢ ܠܘܩܒܠ ܒܥܠܕܒܒܝܗ̈ܘܢ. ܡܛܠ ܕܗܘܘ ܚܪܡܐ. ܠܐ ܐܘܣܦ ܬܘܒ ܕܐܗܘܐ pb. 150 ܥܡܗܘܢ ܐܢܗܘ ܕܠܐ ܬܦܣܩܘܢ ܚܪܡܐ ܡܢܟܘܢ܀ ܐܢܗܘ ܡܕܝܢ ܕܚܕ ܡܢ ܟܠܗ ܥܡܐ ܗܢܐ: ܟܕ ܥܒܪ ܥܠ ܦܘܩܕܢܐ ܕܐܠܗܐ ܘܚܛܐ܆ ܗܘܐ ܪܘܓܙܐ ܪܒܐ ܐܟܚܕܐ ܥܠ ܟܠܗܘܢ ܒܢ̈ܝ ܐܝܣܪܐܝܠ. ܗܫܐ ܥܠ ܣܘܢܕܘܣ ܣܪܝܬ ܫܡܐ ܕܟܠܩܝܕܘܢܐ܇ ܐܝܟܐ ܕܐܝܬ ܗܘܐ ܟܢܘܫܝܐ ܕܐܦܝܣܩܘ̈ܦܐ ܣܓܝ̈ܐܐ. ܘܠܘ ܒܠܚܘܕ ܟܢܘܫܝܐ ܕܐܦܝܣܩܘ̈ܦܐ ܐܠܐ ܘܣܘܓܐܐ ܕܥܡ̈ܡܐ ܕܒܐܝ̈ܕܝܗܘܢ ܛܠܡܘ ܘܥܒܪܘ. ܘܠܘ ܒܠܚܘܕ ܥܠ ܦܘܩܕܢܐ ܫܚܝܡܐ ܥܒܪܘܢ ܘܠܐ ܡܛܠ ܣܘܥܪܢܐ ܥܠܡܢܝܐ: ܐܠܐ ܒܗܿ ܒܗܝܡܢܘܬܐ ܬܪܝܨܬܐ ܕܒܐܠܗܐ ܘܒܬܘܕܝܬܐ ܕܒܗ ܟܦܪܘܢ ܘܗܘܘ ܚܪܡܐ: ܢܦܠܘܢ ܓܝܪ ܐܦ ܬܚܝܬ ܚܪܡܐ ܕܫܠܝܚܐ ܛܘܒܬܢܐ ܘܒܩ̈ܢܘܢܐ ܕܐܒܗ̈ܬܐ ܩܕܝ̈ܫܐ: ܘܣܘ̈ܢܕܘܣ ܩܕܝܫ̈ܬܐ ܗܠܝܢ ܕܩܕܝ̈ܡܢ܆ ܐܝܟܢܐ ܠܐ ܒܙܕܩܐ ܩܪܘ ܠܪܘܓܙܐ ܕܐܠܗܐ ܥܠ ܟܠܗܿ ܐܪܥܐ. ܟܕ ܐܡܿܪ ܘܗܫܐ ܠܘܬܗܘܢ܆ ܕܠܐ ܡܟܝܠ ܡܘܣܦ ܐܢܐ ܕܐܗܿܘܐ ܥܡܟܘܢ܇ ܐܢ ܗܘ ܕܠܐ ܡܦܪܩܝܢ ܐܢܬܘܢ ܡܢܟܘܢ ܚܪܡܐ. ܐܝܟܢܐ ܕܓܠܝܐܝܬ ܗܘ ܡܦܩܢܐ ܕܣܘܥܪ̈ܢܐ ܚܘܝ. ܗܐ ܓܝܪ ܡܢ ܗܝܕܝܢ. ܒܛܠܬ ܘܫܘܠܡܐ ܫܩܠܬ ܡܠܟܘܬܐ ܕܪ̈ܗܘܡܝܐ. ܡܢ ܗܝܕܝܢ ܕܗܘܬ ܪܝܫܐ ܕܒܝܫܬܐ܇ ܘܢܕܝܕܘܬܐ ܗܿܘ ܕܡܬܐܡܪ ܛܘܡܣܐ ܕܠܐܘܢ ܢܦܩ ܡܢܗܿ. ܘܗܢܐ ܗܿܝ ܕܐܝܬܝܗܿ ܗܘܬ pb. 151 ܡܪܬܐ ܘܡܠܟܬܐ ܕܟܠܗܿ ܡܬܥܡܪܢܝܬܐ ܗܘܬ ܫܒܝܬܐ ܘܐܫܬܠܛܘ ܒܗܿ ܒܪ̈ܒܪܝܐ. ܘܥܠܝܗܿ ܐܠܐ ܐܪܡܝܐ ܘܐܡܪ܇ ܐܝܟܢܐ ܝܬܒܬ ܒܠܚܘܕܝܗܿ ܡܕܝܢܬܐ ܗܿܝ ܕܡܠܝܐ ܗܘܬ ܡܢ ܥܡܡ̈ܐ܀ ܘܬܘܒ ܪܝܫܐ ܕܐܬܪ̈ܘܬܐ ܗܘܬ ܠܡܕܐܬܐ: ܡܕܝܢܬܐ ܪܒܬܐ. ܟܠܝܠܐ ܕܬܫܒܘܚܬܐ. ܚܕܘܬܐ ܕܟܠܗܿ ܐܪܥܐ. ܐܫܬܕܝܬ ܡܢܗܿ ܟܠܗܿ ܦܐܝܘܬܗܿ. ܚܛܝܬܐ ܚܛܬ ܐܘܪܫܠܡ. ܡܛܠ ܗܕܐ ܗܘܬ ܠܙܘܥܬܐ. ܡܛܠ ܕܡܪܝܐ ܡܣܟܢܗܿ. ܡܛܠ ܣܘܓܐܐ ܕܪ̈ܘܫܥܝܗܿ. ܡܛܠ ܕܚܪܡܐ ܐܝܬ ܒܝܢܬܗܘܢ܀ ܕܕܡܝ̈ܢ ܠܗܠܝܢ ܕܢܒܝܐ ܐܪܡܝܐ ܐܠܿܐ ܥܠܝܗܿ ܒܢܒܝܘܬܐ ܘܐܫܥܝܐ ܟܕ ܐܡܿܪ: ܐܝܟܢܐ ܗܘܬ ܙܢܝܬܐ ܡܕܝܢܬܐ ܡܗܝܡܢܬܐ ܨܗܝܘܢ. ܗܿܝ ܕܡܠܝܐ ܗܘܬ ܕܝܢܐ. ܘܒܗܿ ܙܕܝܩܘܬܐ ܕܡܟܬ. ܗܫܐ ܕܝܢ ܩܛܠ̈ܝ ܢܦܫ̈ܬܐ ܘܥܒܪ̈ܝ ܥܠ ܫܪܪܐ. ܕܠܘܬܗܘܢ ܒܕܘܟܬܐ ܐܚܪܬܐ ܐܡܪ ܟܕ ܝܗܿܒ ܠܗܘܢ ܘܝܿܐ܆ ܘܝ ܒܢܝ̈ܐ ܡܪ̈ܚܩܢܐ. ܥܒܕܬܘܢ ܚܘܫܒܐ ܘܠܐ ܒܐܝ̈ܕܝ. ܘܩܝܡܐ ܘܠܐ ܒܪܘܚܐ ܕܝܠܝ܀ ܬܡܢ ܓܝܪ ܐܬܬܣܝܡ. ܘܡܢ ܬܡܢ ܢܦܩ ܐܘܨܪܐ ܕܟܠܗܿ ܪܫܝܥܘܬܐ ܘܓܘܕܦܐ. ܗܿܘ ܕܡܬܐܡܪ ܛܘܡܣܐ ܐܘܟܝܬ ܐܓܪܬܗ ܕܠܐܘܢ. ܘܡܛܠ ܗܕܐ ܡܢ ܗܫܐ ܙܕܩܐܝܬ ܡܬܐܡܪ ܠܘܬܗܘܢ ܡܢ ܐܠܗܐ. ܕܠܐ ܡܟܝܠ ܡܘܣܦ ܐܢܐ ܕܐܗܘܐ ܥܡܟܘܢ. ܡܛܠ ܕܚܪܡܐ pb. 152 ܒܝܢܬܟܘܢ. ܠܐ ܡܟܝܠ ܡܨܝܢ ܒܢ̈ܝ ܐܝܣܪܐܝܠ ܕܢܩܘܡܘܢ ܠܘܩܒܠ ܒܥܠܕܒ̈ܒܝܗܘܢ ܥܕܡܐ ܕܢܫܬܩܠ ܡܢ ܒܝܢܬܗܘܢ ܚܪܡܐ. ܢܕܚܠ ܡܕܝܢ ܕܕܠܡܐ ܒܗܢܐ ܥܒܘܪܝܐ ܕܗܘܐ ܒܣܘܢܕܣ ܕܟܠܩܝܕܘܢܐ ܡܫܬܡܠܝܐ ܗܿܝ ܢܒܝܘܬܐ ܕܡܢ ܫܠܝܚܐ ܡܢܒܝܐ܇ ܐܡܿܪ ܐܢܐ ܕܝܢ ܡܪܘܕܘܬܐ ܗܿܝ ܕܒܬܪܗܿ ܢܦܿܩܐ ܡܐܬܝܬܗ ܕܐܢܛܝܟܪܝܣܛܘܣ. ܗܿܝ ܕܐܡܪ ܘܛܘܒܬܢܐ ܠܐ ܡܙܕܟܝܢܐ ܕܗܝܡܢܘܬܐ ܬܪܝܨܬܐ ܛܝܡܬܐܘܣ ܗܿܘ ܥܡܘܕܐ ܕܐܪܬܘܕܟܣܝܐ ܘܢܛܘܪܐ ܘܡܠܦܢܐ ܐܦܝܣܩܘܦܐ ܕܐܠܟܣܢܕܪܝܐ. ܗܿܘ ܕܒܪܘܚܐ ܕܐܠܗܐ ܐܡܿܪ ܗܘܐ ܘܥܒܿܕ ܘܡܫܪܪ ܟܕ ܐܡܿܪ ܓܠܝܐܝܬ: ܕܗܢܐ ܐܝܬܘܗܝ ܕܚܘܩܝܐ: ܕܒܗ ܡܫܬܡܠܝܐ ܡܠܬܐ ܫܠܝܚܝܬܐ܇ ܟܕ ܡܬܒܛܠ ܐܘܚܕܢܐ ܕܡܠܟܘܬܐ ܕܪ̈ܘܡܝܐ ܗܿܘ ܕܠܐ ܡܡܬܘܡ ܗܘܐ ܒܪܗܘܡܐ ܡܢ ܗܿܝ ܕܝܢ ܕܐܡܠܟܬ ܐܠܐ ܗܫܐ. ܟܕ ܚܛܝܬܐ ܪܒܬܐ ܚܛܬ. ܪܘܫܥܐ ܕܒܐܠܗܐ ܘܟܦܘܪܝܐ. ܘܡܗܕܝܢܐ ܕܪܘܫܥܐ ܗܿܘ ܕܡܬܐܡܪ ܛܘܡܣܐ ܕܠܐܘܢ ܕܡܢܗܿ ܢܦܩ. ܐܟ ܡܐ ܕܗܫܐ ܚܙܝܢܿܢ ܘܡܦܣܝܢܢ܀ ܐܝܬܝܗܿ ܕܝܢ ܟܠܗܿ ܢܒܝܘܬܐ ܕܫܠܝܚܐ ܗܟܢܐ ܒܐܓܪܬܐ ܕܬܪ̈ܬܝܢ ܕܠܘܬ ܬܣܠܘܢܝ̈ܩܝܐ. ܡܦܝܣܝܢܢ ܠܟܘܢ ܐܚ̈ܝ ܚܠܦ ܡܐܬܝܬܗ ܕܡܪܢ ܝܫܘܥ ܡܫܝܚܐ. ܘܟܢܘܫܝܐ ܕܝܠܢ ܕܥܠܘܗܝ ܕܠܐ pb. 153 ܒܥܓܠ ܬܬܙܝܥܘܢ ܡܢ ܗܘܢܐ. ܐܦ ܠܐ ܬܬܘܗܘܢ ܠܐ ܡܢ ܡܠܬܐ ܘܠܐ ܡܢ ܪܘܚܐ. ܐܦܠܐ ܡܢ ܐܓܪܬܐ ܕܐܟ ܕܡܢܢ ܗܘܐ ܠܡ ܡܛܠ ܚܘܒܗ ܕܡܪܢ ܠܐ ܐܢܫ ܢܛܥܝܟܘܢ ܘܠܐ ܒܚܕ ܙܢܐ. ܕܐܢܗܘ ܕܠܐ ܬܐܬܐ ܡܼܪܘܕܘܬܐ ܩܕܡܝܬ. ܘܢܬܓܠܐ ܒܪܢܫܐ ܕܚܛܝܬܐ ܒܪܐ ܕܐܒܕܢܐ: ܗܿܘ ܣܩܘܒܠܝܐ ܘܡܬܬܪܝܡ ܥܠ ܟܠ ܕܡܬܐܡܪ ܐܠܗ ܘܕܚܠܐ܇ ܐܝܟܢܐ ܕܒܗܝܟܠܐ ܕܐܠܗܐ ܢܬܒ ܟܕ ܡܚܘܐ ܢܦܫܗ ܕܐܝܬܘܗܝ ܐܠܗܐ. ܠܐ ܥܗܕܝܬܘܢ ܕܟܕ ܥܕܟܝܠ ܐܝܬܝ ܗܘܝܬ ܠܘܬܟܘܢ. ܗܠܝܢ ܐܡܿܪ ܗܘܝܬ ܠܟܘܢ܆ ܘܗܫܐ ܗܿܘ ܕܐܚܝܕ ܝܿܕܥܝܢ ܐܢܬܘܢ ܕܢܬܓܠܐ ܒܙܒܢܗ. ܪܐܙܐ ܡܟܝܠ ܗܐ ܡܣܬܥܪ ܕܥܘܠܐ. ܘܒܚܘܕ ܐܢ ܗܿܘ ܡܐ ܕܗܫܐ ܐܚܝܕ ܢܫܬܩܠ ܡܢ ܡܨܥܬܐ. ܘܒܬܪܗ ܢܬܓܠܐ ܥܘܠܐ. ܗܿܘ ܕܡܪܢ ܝܫܘܥ ܢܣܝܦܝܘܗܝ ܒܪܘܚ ܦܘܡܗ ܘܢܒܛܠܝܘܗܝ ܒܓܠܝܢܐ ܕܡܐܬܝܬܗ. ܡܐܬܝܬܗ ܓܝܪ ܕܗܿܘ ܒܡܥܒܕܢܘܬܐ ܗܝ ܕܣܛܢܐ. ܒܟܠ ܚܝܠ ܘܐܬܘ̈ܬܐ ܘܬܕܡܪ̈ܬܐ ܕܓ̈ܠܬܐ. ܘܒܟܠܗܿ ܛܘܥܝܝ ܗܢܐ ܢܫܕܪ ܠܗܘܢ ܐܠܗܐ ܡܥܒܕܢܘܬܐ ܕܛܘܥܝܝ ܕܢܬܛܦܝܣܘܢ ܠܫܘܩܪܐ. ܐܟ pb. 154 ܕܢܬܕܝܢܘܢ ܟܠܗܘܢ ܐܝܠܝܢ ܕܠܐ ܗܝܡܢܘ ܠܩܘܫܬܐ. ܐܠܐ ܐܨܛܒܝܘ ܒܥܘܠܐ. ܗܿܝ ܓܝܪ ܕܐܡܝܪܐ ܕܪܐܙܐ ܕܥܘܠܐ ܡܢ ܟܕܘ ܫܪܝ ܠܡܬܚܛܦܘ ܒܠܚܘܕ ܐܢ ܗܿܘ ܡܐ ܕܗܫܐ ܐܚܝܕ ܢܫܬܩܠ ܡܢ ܡܨܥܬܐ. ܡܛܠ ܒܘܛܠܗܿ ܕܡܠܟܘܬܐ ܕܪ̈ܗܘܡܝܐ ܐܡܪܘܢ ܐܒܗ̈ܬܐ ܩܕܝܫ̈ܐ ܘܡܠܦܢ̈ܐ. ܕܒܪܡܙܐ ܐܡܝܪܐ ܠܗ. ܡܢܘ ܡܕܝܢ ܕܡܫܬܟܚ ܛܘܒܬܢܐ ܘܬܠܝܬܝ ܛܘܒ̈ܐ. ܘܕܗܟܢܐ ܓܝܪ ܘܡܫܪܪ ܒܗܝܡܢܘܬܐ ܘܪܬܚ ܒܪܘܚ ܘܡܛܝܒ ܨܝܕ ܟܠ ܡܣܝܒܪܢܘܬܐ ܘܐܝܬ ܠܗ ܦܪܗܣܝܐ ܕܗܟܢܐ ܢܬܡܨܐ ܕܢܫܬܒܗܪ ܫܘܒܗܪܐ ܫܠܝܚܝܐ ܗܿܘ ܕܐܡܿܪ. ܐܓܘܢܐ ܫܦܝܪܐ ܐܬܟܿܬܫܬ. ܘܪܗܛܝ ܫܠܡܬ ܘܗܝܡܢܘܬܝ ܢܛܪܬ ܘܡܟܝܠ ܢܛܝܪ ܠܝ ܟܠܝܠܐ ܕܟܐܢܘܬܐ: ܗܿܘ ܕܢܦܪܥܝܘܗܝ ܠܝ ܡܪܢ ܒܝܘܡܐ ܗܿܘ. ܕܗܘܝܘ ܕܝܢܐ ܟܐܢܐ ܗܿܘ ܕܡܘܿܣܦ ܐܡܿܪ. ܕܠܘ ܒܠܚܘܕ ܠܝ. ܐܠܐ ܐܦ ܠܟܠܗܘܢ ܐܝܠܝܢ ܕܐܚܒܘ ܠܓܠܝܢܗ܀ ܗܝܕܝܢ ܓܝܪ ܡܪܢܐܝܬ ܘܝܕܝܥܐܝܬ ܡܫܬܡܠܝܐ ܢܒܝܘܬܐ ܕܙܟܪܝܐ ܢܒܝܐ ܗܿܝ ܕܐܡܪܐ: ܘܠܐ ܡܟܝܠ ܢܗܘܐ ܚܪܡܐ ܘܠܐ ܟܢܥܢܝܐ ܒܒܝܬܗ ܕܡܪܝܐ. ܗܕܐ ܕܝܢ ܐܝܬܝܗܿ ܣܘܢܗܕܘܣ ܕܟܠܩܝܕܘܢܐ. ܘܒܝܫܘܬ ܗܝܡܢܘܬܐ ܕܗܿܝ ܕܝܢ ܘܦܣܩܐ ܚܕܬܐ. ܗܕܐ ܐܝܬܝܗܿ ܐܬܿܐ ܛܢܦܬܐ ܐܚܪܝܬܐ ܘܚܪܡܐ ܘܪܗܛܿܬܬܐ ܩܕܡܝܬܐ ܕܐܢܛܝܟܪܝܣܛܘܣ ܘܗܠܝܢ ܒܢ̈ܝ ܪܐܙܐ ܕܝܠܗܿ ܘܕܫܘܝܢ ܠܗܿ pb. 155 ܒܬܪܥܝܬܐ. ܗܠܝܢ ܠܝ̈ܛܐ ܘܡܣܠܝ̈ܐ ܟܢܥ̈ܢܝܐ ܐܟ ܕܚܘܿܝܢ ܚܢܢ ܒܗܠܝܢ ܕܩܕ̈ܝܡܢ ܟܬܝ̈ܒܢ܀

ܐܝܬ ܕܝܢ ܘܐܚܪ̈ܢܝܬܐ ܣܗܕܘ̈ܬܐ ܘܬܚܘܝ̈ܬܐ ܘܦܠܪ̈ܦܘܪܝܣ. ܕܗ̈ܘܝܢ ܡܢ ܐܠܗܐ ܘܕܝܠܝܢܐܝܬ ܨܝܕ ܩܕܝܫ̈ܐ. ܘܒܓܘܐ ܨܝܕ ܟܠܗܘܢ ܒܢܝ̈ܢܫܐ. ܡܛܠ ܥܒܘܪܝܐ ܕܗܘܐ ܒܣܘܢܕܘܣ ܕܟܠܩܕܘܢܐ. ܐܠܐ ܕܠܐ ܣܓܝ ܢܡܬܘܚ ܟܬܝܒܬܐ܆ ܡܣܒܪ ܐܢܐ ܕܣܦܩ̈ܢ ܠܡܫܡ̈ܥܬܐ ܡܗܝ̈ܡܢܬܐ. ܟܕ ܡܩܒ̈ܠܢ ܫܦܝܪ ܕܪ̈ܚܝܡܢ ܠܐܠܗܐ܇ ܗܠܝܢ ܕܐܬܬܣܝܡܝܢ ܥܡ ܟܠܗܿ ܩܘܫܬܐ. ܡܛܠ ܗܿܘ ܕܥܬܝܕܝܢܢ ܕܢܬܠ ܡܠܬܐ ܠܗܿܘ ܕܥܬܝܕ ܕܢܕܘܢ ܒܟܐܢܘܬܐ ܚܝ̈ܐ ܘܡܝ̈ܬܐ. ܘܐܝܬܘܗܝ ܕܝܢܐ ܚܬܝܬܐ ܘܝܿܕܥ ܠܒܘ̈ܬܐ ܐܠܗܐ ܕܫܪܪܐ. ܘܡܛܠ ܗܟܢܐ ܫܦܝܪܐ. ܘܐܦ ܒܗܕܐ ܢܛܪ ܦܘܪܓܠܐ ܕܫܠܝܚܐ ܕܠܘܬ ܛܝܡܬܐܘܣ. ܐܢܬ ܗܟܝܠ ܒܪܝ. ܐܬܚܝܠ ܒܛܝܒܘܬܐ ܕܒܝܫܘܥ ܡܫܝܚܐ. ܘܗܠܝܢ ܕܫܡܥܬ ܡܢܝ ܒܝܕ ܣܗ̈ܕܐ ܣܓܝ̈ܐܐ. ܗܢܝܢ ܐܓܥܠ ܠܐܢܫ̈ܐ ܡܗܝ̈ܡܢܐ: ܐܝܠܝܢ ܕܡܿܛܝܐ ܒܐܝ̈ܕܝܗܘܢ ܐܦ ܠܐܚܪ̈ܢܐ ܠܡܿܠܦܘ. ܗܕܐ ܓܝܪ ܕܢܫܕܐ ܪܐܙܐ ܕܕܚܠܬ ܐܠܗܐ ܒܐܝܠܝܢ ܕܠܐ ܫܘܿܝܢ܆ ܐܡܿܪ ܩܕܝܫܐ ܒܣܝܠܝܘܣ ܕܕܡܝܐ ܠܗܿܝ ܕܢܪܡܐ ܡܘܪܘܢ ܝܩܝܪ ܛܝ̈ܡܐ ܒܡܐܢܐ ܨܐܐ܀ ܦܘܩܕܢܐ ܫܠܝܚܝܐ. ܐܬܟܬܫ ܐܓܘܢܐ ܫܦܝܪܐ ܕܗܝܡܢܘܬܐ ܫܪܐ ܒܚ̈ܝܐ pb. 156 ܕܠܥܠܡ. ܠܗܠܝܢ ܕܐܬܩܪܝܬ ܘܐܘܕܝܬ ܬܘܕܝܬܐ ܫܦܝܪܬܐ. ܩܕܡ ܣܗ̈ܕܐ ܣܓܝ̈ܐܐ ܐܘ ܛܝܡܬܐܐ. ܐܙܕܗܪ ܒܡܕܡ ܕܐܬܓܥܠ ܠܟ. ܟܕ ܥܿܪܩ ܐܢܬ ܡܢ ܒܢ̈ܬ ܩ̈ܠܐ ܣܪ̈ܝܩܬܐ ܘܛܡ̈ܐܬܐ. ܘܡܗ̈ܦܟܢܘܬܐ ܕܝܕܥܬܐ ܕܓܠܬܐ. ܗܿܝ ܕܐܢܫ̈ܝܢ ܟܕ ܡܫܬܘܕܝܢ ܢܦܠܘ ܡܢ ܫܪܪܐ. ܛܝܒܘܬܐ ܥܡܟ. ܐܡܝܢ.

ܫܠܡܘ ܦܠܪ̈ܘܦܪܝܘܣ ܘܣܗ̈ܕܘܬܐ ܘܓܠܝ̈ܢܐ ܕܗܘܘ ܡܢ ܐܠܗܐ ܒܝܕ ܩܕܝܫ̈ܐ. ܡܛܠ ܗܪܣܝܣ ܕܬܪ̈ܝܝ ܟܝ̈ܢܐ ܘܡܬܥܒܪܢܘܬܐ ܕܗܘܬ ܒܟܠܩܕܘܢܐ.

ܗܠܝܢ ܬܫܥܝ̈ܬܐ ܕܟܢܫ ܚܬܝܬܐܝܬ ܩܕܝܫܐ ܡܪܝ ܝܘܚܢܢ ܬܠܡܝܕܗ ܕܐܒܐ ܦܐܛܪܐ ܐܝܒܪܝܐ ܐܦܣܩܘܦܐ. ܩܕܝܫܐ. ܣܿܡܬ ܗܪܟܐ ܕܡܚܘ̈ܝܢ ܟܡܐ ܚܒܿܠܐ ܐܥܠܬ ܣܘܢܕܘܣ ܕܟܐܠܩܝܕܘܢܐ ܕܒܡܥܒܕܢܘܬܐ ܕܣܛܢܐ ܗܘܬ: pb. 157 ܬܘܒ ܕܥܠ ܚܕ ܕܝܪܝܐ ܡܫܡܫܢܐ܀ ܐܝܬ ܗܘܐ ܕܝܢ ܒܗܿ ܒܡܕܝܢܬܐ ܐܘܪܗܝ: ܗܝܟܠܐ ܕܩܕܝܫܐ ܡܪܝ ܝܘܚܢܢ ܡܥܡܕܢܐ. ܡܫܬܡܗ ܘܥܕܡܐ ܠܗܿܫܐ܇ ܕܬܕܡܪ̈ܬܐ ܣܥܿܪ: ܘܥܝܿܕܐ ܐܝܼܬ ܗܘܐ ܒܗܿ ܒܗܿܕܐ ܡܕܝܼܢܬܐ ܚܣܝܼܡܬܐ: ܡܢ ܙܒ̈ܢܐ ܠܒܝܼܟ ܒܗܿ: ܕܐܝܢܐ ܕܟܿܐܒ ܥܝ̈ܢܐ ܢܗܼܘܐ ܠܗ. ܒܗܿܘ ܗܝܟܠܐ ܐܙܿܠ ܗܼܘܐ ܘܡܬܓܘܣ ܕܢܦܐܫܐ ܢܗܼܘܐ ܠܗ܇ ܒܙܒܢܐ ܕܝܢ ܗܿܢܐ ܕܗܿܫܐ ܩܕܡ ܫܢܝ̈ܐ ܐܪ̈ܒܥ ܓܒܪܐ ܐܢܫ ܐܝܼܬ ܗܼܘܐ ܒܓܢܣܐ ܡܼܢ ܐܡܝܼܕ ܡܕܝܼܢܬܐ܇ ܕܝܪܝܐ ܢܟܦܐ܇ ܕܒܥܼܘܡܪܐ ܩܕܝܫܐ ܕܡܕܢܚ̈ܝܐ ܕܐܘܪܗܝ ܡܬܠܡܕ܇ ܘܡܫܡܫܢܐ ܐܝܬܘܗܝ܆ ܓܕܫ ܠܗ ܗܿܢܐ ܚܫܐ. ܘܟܐܒܐ ܕܥܝ̈ܢܐ: ܟܕ ܐܦ ܡܼܢ ܩܕܡ ܗܿܟܢ ܢܣ̈ܝܣܢ ܗܘ̈ܝ ܩܠܝܠ. ܢܦܼܩ ܕܝܢ܆ ܘܠܗ ܠܗܝܟܠܐ ܗܿܘ ܐܙܼܠ܇ ܘܟܬܪ ܬܡܿܢ ܝܘܡܐ ܘܠܠܝܐ܆ ܐܬܥܙܙ ܥܠܘܗܝ ܟܐܒܐ. ܐܝܟܢܐ ܕܐܦܣܩܣܒܪܐ ܐܚܪܝܐ ܢܐܬܐ: ܘܡܼܢ ܐܢܘܣܝܐ ܕܠܒܐ܇ ܨܒܼܐ ܕܒܒܐܪܐ ܕܡܝ̈ܐ: ܐܝܕܐ ܕܩܪܝܼܒܐ ܠܗ ܠܗܝܟܠܐ ܢܫܼܕܐ ܗܼܘ ܠܗ. ܘܟܕ ܥܒܪܗ ܠܬܪܥܐ ܠܡܼܐܙܠ܆ ܦܓܼܥ ܒܗ ܗܼܘ ܛܘܒܼܢܐ ܝܘܚܢܢ ܡܥܡܕܢܐ܆ pb. 158 ܘܫܐܠܗ ܕܡܿܢܐ ܨܒܿܐ ܐܢܬ ܠܡܥܿܒܕ܆ ܗܼܘ ܕܝܢ ܡܫܡܫܢܐ ܐܡܪ: ܕܐܫܿܕܐ ܐܢܐ ܠܝ ܒܒܐܪܐ. ܘܩܕܝܫܐ ܐܡܿܪ ܠܗ܇ ܠܐ ܬܬܥܝܼܩ: ܘܠܢܦܫܟ ܡܕܡ ܕܣܢܐ ܠܐ ܬܥܼܒܕ܆ ܘܟܕ ܐܝܼܕܐ ܥܠ ܐܦܘ̈ܗܝ ܐܥܒܼܪ܆ ܐܡܼܪ ܠܗ: ܙܠ ܠܟ ܠܘܬ ܡܫܓܬܐ ܗܿܝ ܕܡܝ̈ܐ܇ ܘܐܫܝܓ ܘܡܬܚܠܡ ܐܢܬ : ܘܒܗܝܟܠܐ ܕܝܢ ܗܿܢܐ ܠܐ ܬܒܥܝܢܝ: ܡܛܠ ܕܠܘ ܒܗ ܐܝܿܬܝ ܒܗܿܝ ܕܢܣܒܘܼܗܝ ܟܠܩܝ̈ܕܘܢܝܐ܇ ܘܠܐ ܬܘܒ ܥܐܿܠ ܐܢܐ ܠܗ ܒܗܿܝ ܛܡܘܼܗܝ ܫܢܝܬ ܠܝ ܡܢܗ: ܗܿܝܕܝܢ ܗܼܘ ܡܫܡܫܢܐ: ܥܒܼܕ ܐܟ ܕܐܡܼܪ ܗܼܘ ܩܕܝܫܐ. ܘܚܘܠܡܢܐ ܗܼܘܐ ܠܗ.

ܠܐ ܕܝܢ ܢܬܦܠܓ ܥܠ ܗܿܠܝܢ ܘܢܐܡܼܪ ܕܒܕܝܐ ܘܕܓܠܘܬܐ ܐܝܬܝܗܝܢ܇ ܕܐܟ ܕܩܕܡ ܐܠܗܐ ܐܡܿܪ ܐܢܐ ܠܟ܇ ܕܦܪ̈ܨܘܦܐ ܗܿܢܘܢ ܕܠܘܬܗܘܢ ܗܿܠܝܢ ܐܣܬܥܪ̈ܝ: ܬܢܝܘ ܩܕܡ ܐܢܫ̈ܐ ܣܓܝ̈ܐܐ. ܘܐܦܠܐ ܕܝܢ ܐܢܬ ܬܬܦܠܓ ܐܘ ܐܚܘܢ ܥܠ ܗܠܝܢ: ܐܠܐ ܒܟܠܗ ܫܪܪܐ ܘܚܬܝܬܘܬܐ ܩܿܒܠ ܐܢܝ̈ܢ. ܘܢܨܠܐ ܕܗܝܡܢܘܬܐ ܗܕܐ ܕܐܚܝܕܝܢܢ: ܢܫܘܙܒ ܠܢܫܡܬܐ ܐܚܪܝܬܐ. ܘܟܠܚܕ ܡܢܢ ܢܦܫܗ ܢܦܝܣ܆ ܕܕܘܒܪ̈ܐ ܕܠܚܿܡܝܢ ܠܗܝܡܢܘܬܐ ܢܬܕܿܒܪ: ܘܐܢ ܗܕܐ ܣܥܪܝܢܢ: ܠܡܠܟܘܬܐ ܕܫܡܝܐ ܡܫܬܘܝܢܢ: ܒܛܝܒܘܬܗ ܕܡܪܢ ܝܫܘܥ ܡܫܝܚܐ܇ ܕܠܗ ܫܘܒܚܐ ܘܠܐܒܘܗܝ ܘܠܪܘܚܗ ܩܕܝܫܐ ܠܥܠܡܥܠܡܝܢ ܐܡܝܢ܀ ܬܘܒ ܬܫܥܝܬܐ ܐܚܪܬܐ ܕܐܣܬܥܪܬ ܒܣܒܣܛܝ ܕܦܠܣܛܝܢܝ: ܐܝܟܐ pb. 159 ܕܣܝܼܡܐ ܫܿܠܕܗ ܕܝܘܚܢܢ ܡܥܡܕܢܐ܀ ܘܒܙܒܢܐ ܕܣܘܢܢܕܘܣ ܡܣܠܝܬܐ ܘܪܫܝܥܬܐ ܕܟܠܩܝܕܘܢܐ: ܦܝܪܡܘܢܪܐ ܐܝܬ ܗܘܐ ܕܡܫܡܫ ܒܕܘܟܬܐ ܗܿܝ ܛܘܼܒܛܢܐ ܩܘܣܛܢܛܝܢܐ܇ ܗܿܘ ܕܟܿܠ ܝܘܡ ܡܬܒܣܡ ܗܘܐ ܒܚܙܬܗܼ ܕܡܥܡܕܢܐ: ܘܕܐܠܝܫܥ ܢܒܝܐ: ܘܒܝܕ ܦܐܪܪܝܣܝܐ ܕܐܝܬ ܠܗ ܥܡ ܩܕܝܫܐ ܝܘܚܢܢ. ܟܕ ܗܘܐ ܛܠܘܡܝܐ ܘܪܕܘܦܝܐ ܕܟܠܩܝܕܘܢܐ. ܘܐܦܝܣܩܘܦ̈ܐ ܕܐܬܬܣܪܚܘ ܡܢ ܐܬܢܐܣܝܘܣ ܦܛܪܝܪܟܐ܇ ܐܬܬܪܕܘ ܡܢ ܡܪܩܝܢܐ ܪܫܝܥܐ: ܐܠܝܨ ܗܼܘܐ ܒܚܘܫܒܘ̈ܗܝ. ܕܐܢ ܥܿܪܩ ܡܢ ܫܘܬܦܘܬܐ ܕܟܦܘܪ̈ܐ: ܡܬܓܠܙ ܡܢ ܥܢܝܢܐ ܕܥܡ ܩܕܝܫܐ ܝܘܚܢܢ ܡܥܡܕܢܐ܇ ܘܕܐܢ ܢܟܬܪ ܢܗܘܐ ܡܬܥܒܪܢܐ܇ ܘܡܬܟܫܦ ܗܘܐ ܠܪܗܛܐ ܩܕܡܝܐ ܕܢܓܠܐ ܠܗ: ܗܿܝ ܕܫܿܦܪܐ ܠܐܠܗܐ ܘܥܿܕܪܐ ܠܗ: ܘܐܡܼܪ ܠܗ ܡܥܡܕܢܐ܇ ܩܫܝܫܐ܆ ܠܐ ܬܘܒܕ ܢܦܫܟ ܘܬܟܦܘܪ ܒܗܝܡܢܘܬܟ ܡܛܠܬܝ: ܦܘܩ ܘܛܪ ܗܝܡܢܘܬܟ ܕܠܐ ܙܐܦܐ܆ ܘܠܐܝܟܐ ܕܐܙܿܠ ܐܢܬ ܥܡܟ ܐܝܿܬܝ: ܘܢܦܼܩ ܩܫܝܫܐ: ܘܟܬܪ ܕܠܐ ܡܘܡ ܒܐܟܣܢܝܘܬܐ܀

ܬܫܥܝܬܐ ܐܚܪܬܐ܀ ܠܦܝܿܣܐ ܘܡܦܩܒܪܘܚܐ ܕܐܟ ܗܿܢܐ܇ ܘܠܚܼܙܘܐ ܐܫܬܘܝ ܕܚܿܠ ܠܐܠܗܐ ܩܕܝܫܐ ܪܘܣܝܘܣ ܐܟܣܢܝܐ܇ ܘܓܒܪܐ ܢܟܦܐ܇ ܗܿܢܐ ܕܝܢ ܟܕ ܐܝܬܘܗܝ ܗܘܐ ܒܩܠܝܬܐ ܒܛܘܪ ܣܝܢܝ܇ ܐܫܿܩܠ ܘܐܬܼܐ ܠܐܘܪܫܠܡ: ܟܕ ܒܿܥܐ ܕܘܟܬܐ pb. 160 ܕܫܠܝܐ܇ ܘܐܬܡܛܝܼ ܠܒܝܬ ܐܝܠ܆ ܐܝܿܢܐ ܕܚܼܙܐ ܝܥܩܘܒ ܪܝܫ ܐܒܗ̈ܬܐ ܠܣܒܠܬܐ܆ ܘܐܬܪܚܡ ܡܼܢ ܦܝܪܡܘܢܪܐ ܕܗܿܝ ܕܘܟܬܐ܇ ܘܐܦܝܣܗ ܒܣܓܝ̈ܐܬܐ܇ ܘܡܫܬܘܕܐ ܠܗ: ܕܢܝܿܚܐ ܕܫܿܘܐ ܢܩܪܒ ܠܗ: ܓܠܝܐܝܬ ܐܘܕܝ: ܕܠܐ ܡܫܟܚ ܐܢܐ ܕܗܿܕܐ ܐܥܿܒܕ܇ ܡܿܛܠ ܕܡܼܢ ܫܘܬܦܘܬܐ ܘܟܦܘܪܝܐ ܕܟܠܩܝܕܘܢܐ ܥܪܝܩ ܐܢܐ. ܐܡܿܪ ܠܗ ܦܝܪܡܘܢܪܐ ܥܡ ܡܘ̈ܡܬܐ ܕܐܦܠܐ ܚܕܐ ܠܙܬܐ ܢܩܪܒ ܠܟ ܒܗܕܐ: ܒܠܚܘܕ ܨܝܕܝ ܟܬܪ: ܘܡܙܡܪ ܐܢܬ ܥܡܝ܇ ܘܐܨܛܠܝ ܗܘܢܗ ܒܦܫܝܛܘܢܗ ܠܗܿܕܐ܆ ܚܼܙܐ ܒܠܠܝܐ ܗܿܘ ܠܪܝܫ ܐܒܗ̈ܬܐ ܝܥܩܘܿܒ: ܓܒܪܐ ܡܿܠܐ ܚܘܪ̈ܬܐ ܡܝܩܪܐ ܘܟܚܝܼܕܐ܆ ܕܡܥܛܦ ܦܪܝܣܐ ܘܠܒܼܝܟ ܡܘܪܢܝܬܐ ܘܡܛܝܠ ܒܗܿܝ ܕܘܟܬܐ: ܘܩܼܪܒ ܠܘܬܗ ܘܐܡܼܪ ܠܗ܇ ܐܝܟܢܐ ܐܢܬ ܟܕ ܐܪܬܘܕܘܟܣܐ ܐܝܬܝܟ: ܡܫܬܘܬܦܝ ܐܢܬ ܥܡ ܟܦܘܪ̈ܐ: ܘܒܥܝܿܬ ܕܥܪܟܐ ܬܥܡܼܪ: ܠܐ ܡܛܠܬܝ ܬܥܒܼܪ ܥܠ ܗܝܡܢܘܬܟ܇ ܐܠܐ ܝܼܨܦ ܘܥܪܘܿܩ ܡܢ ܫܘܬܦܘܬܐ ܕܥܡ ܟܦܘܪ̈ܐ܇ ܘܠܐ ܚܿܣܪ ܠܟ ܡܕܡ ܡܼܢ ܛܿܒܬܐ. ܘܒܥܪܘܩܝܗ ܥܕܡܐ ܠܚܪܬܐ ܐܬܢܛܪ ܒܗܝܡܢܘܬܐ ܬܪܝܨܬ ܫܘܒܚܐ܀

ܬܘܒ ܬܫܥܝܬܐ ܐܚܪܬܐ܀ ܡܚܕܐ ܡܿܢ ܕܐܘܪ̈ܬܘܕܘܟܣܘ ܡܬܪܕܦܝܢ ܡܼܢ ܗܝܟܠ̈ܝܗܘܢ: ܪܘܚܐ ܩܕܝܫܐ ܥܡܗܘܢ ܡܫܩܠ: ܘܗܿܘ ܕܠܩܘܒܠܐ ܥܡ ܗܪ̈ܝܛܝܩܘ ܥܿܐܠ܆ ܘܠܫܘܪܪ ܫܪܒܐ ܗܢܐ ܩܠܝܠ ܡܼܢ ܣܿܓܝ ܬܢܼܝܢܢ ܩܕܡ ܫܡܘ̈ܥܐ܆ ܐܢܫ pb. 161 ܩܕܝܫܐ ܫܿܘܐ ܠܡܬܗܝܡܢܘ ܐܫܼܬܥܝ܆ ܕܣܿܗܕܐ ܚܕ ܩܕܝܫܐ ܐܝܬ ܗܘܐ ܒܐܬܪܐ ܕܬܐܒܼܝܕܐ܇ ܕܣܿܥܪ ܬܕܡܪ̈ܬܐ ܘܚܝ̈ܠܐ܇ ܐܝܟܢܐ ܕܒܢܝ̈ܢܫܐ ܣܓܝ̈ܐܐ ܟܪ̈ܝܗܐ ܘܕܝܘ̈ܢܐ ܘܓܪ̈ܒܢܐ܇ ܐܬܝܢ ܗܘܘ ܠܗܝܟܠܗ܇ ܘܐܦ̈ܝܢ ܒܐܦ̈ܝܢ ܡܬܚܿܙܐ ܗܼܘܐ ܠܗܘܿܢ: ܘܒܬܪ ܙܒܢܐ ܚܛܦܘܗܝ ܐܪ̈ܛܝܩܘ ܠܗܝܟܠܗ: ܘܒܐܘܪ̈ܚܬܐ ܡܬܚܙܐ ܗܘܐ ܠܟܪ̈ܝܗܐ ܕܠܕܝܪܗ ܐܬܝܢ ܗܘܘ ܘܐܡܿܪ ܗܼܘܐ ܠܗܘܿܢ: ܐܢܐ ܐܝܬܝܿ ܡܪܩܠܘܣ ܣܗܕܐ ܕܠܘܬܗ ܐܙܿܠܝܬܘܢ܇ ܠܐ ܬܘܒ ܬܐܙܠܘܢ ܠܬܡܿܢ: ܠܐ ܐܝܿܬܝ ܬܡܿܢ: ܫܿܢܝܬ ܠܝ: ܛܡܘܗܝ ܓܝܪ ܠܒܝܬܝ ܟܿܦܪ̈ܝ ܒܐܠܗܐ܇ ܠܐ ܬܘܒ ܡܬܚܙܐ ܐܢܐ ܬܡܿܢ: ܗܿܠܝܢ ܣܦܩ̈ܢ ܠܡܗ̈ܝܡܢܐ܀

SEDRA IV

Syriac Lexeme

About This Digital Text
Corpus Text ID:
https://syriaccorpus.org/522
Source:
Françoise Nau, Jean Rufus, Évêque de Maïouma: Plérophories, Patrologia Orientalis, (Paris: Firmin-Didot, 1911)
Type of Text: Print Transcription  
Status: Uncorrected Transcription  
Publication Date: December 3, 2019
Preparation of Electronic Edition:
TEI XML encoding by James E. Walters.
Syriac text transcribed by Lebanon Team.
Open Access and Copyright:
This electronic edition is designed for open access reuse. The Syriac base text is in the public domain. The TEI XML edition is copyrighted by James E. Walters and is released under a Creative Commons Attribution 4.0 International Public License (CC BY 4.0).
The HTML page is copyrighted by Vanderbilt University and released under a under a Creative Commons Attribution 4.0 International Public License (CC-BY 4.0, https://creativecommons.org/licenses/by/4.0/). Attribution for reuse should follow the suggested citation and also credit the copyright holder of the TEI XML edition.

Creative Commons License

 See details...
How to Cite this Electronic Edition
Note:
John Rufus, “Plerophoriae - ܦܠܝܪ̈ܦܘܪܝܣ ܐܘܟܝܬ ܣܗ̈ܕܘܬܐ ܘܓܠܝ̈ܢܐ ܕܗܘܘ ܡܢ ܐܠܗܐ ܠܘܬ ܩܕܝ̈ܫܐ” based upon Françoise Nau, Jean Rufus, Évêque de Maïouma: Plérophories, Patrologia Orientalis, (Paris: Firmin-Didot, 1911), Digital Syriac Corpus, last modified December 3, 2019, https://syriaccorpus.org/522.
Bibliography:
“Plerophoriae - ܦܠܝܪ̈ܦܘܪܝܣ ܐܘܟܝܬ ܣܗ̈ܕܘܬܐ ܘܓܠܝ̈ܢܐ ܕܗܘܘ ܡܢ ܐܠܗܐ ܠܘܬ ܩܕܝ̈ܫܐ.” In Jean Rufus, Évêque de Maïouma: Plérophories, edited by . Syriaca.org, 2016-. Entry published . https://syriaccorpus.org/522.

Show Citation Styles
Linked Data