Narsai: On the Parable of the Ten Virgins - ܕܚܲܕܼܒܿܫܲܒܵܐ ܕܸܫܬܵܐ ܕܨܵܘܡܵܐ

1 :ܫܲܦܝܼܪ ܗܸܪܓܵܐ ܕܡܸܠܲܝ̈ ܪܘܼܚܵܐ ܕܣܝܼܡ ܒܲܟܼܬܼܵܒܹ̈ܐ 2 ܘܛܵܒܼ ܥܸܢܝܵܢܵܐ ܕܒܲܟܼܬܼܝܼ̈ܒܼܵܬܼܵܐ ܠܲܕܼܗܵܪܹܓܼ ܒܹܗ ܀ 3 :ܦܠܸܐ ܝܘܼܠܦܵܢܵܐ ܕܟܼܵܪܘܿܙܘܼܬܼܵܐ ܕܡܲܠܟܿܘܼܬܼ ܪܵܘܡ̇ܐ 4 ܘܛܘܼܒܹ̈ܐ ܛܵܒܹ̈ܐ ܡܦܲܠܸܓܼ ܚܘܼܒܹܿܗ ܠܲܕܼܪܵܚܹ̇ܡ ܠܹܗ ܀ 5 ܓܲܙܵܐ ܪܲܒܵܐ ܟܣܸܐ ܒܐܵܬܼ̈ܘܵܬܼܵܐ ܕܗܸܓܼܝܵܢ ܡܸܠܵܘ̈ܗܝ: pb. 244 6 ܐܲܝܢܵܐ ܕܩܵܪܹܐ ܒܪܸܚܡܲܬܼ ܢܲܦܫܵܐ ܥ̣ܬܲܪ ܘܲܠܥܵܠܲܡ ܀ 7 :ܠܨܸܡܚܵܐ ܕܢܘܼܗܪܵܐ ܕܵܡܹ̇ܝܢ ܚܘܼܩܹ̈ܐ ܕܲܟܼܬܼܝܼ̈ܒܼܵܬܹܗ 8 ܘܐܲܝܢܵܐ ܕܚܵܐܲ݁ܪ ܕܠܵܐ ܦܘܼܠܵܓܼܵܐ ܚ̣ܙܵܐ ܟܠ ܡܸܕܹܿܡ ܀ 9 :ܐܲܝܟ ܗܲܕܲܝܼܐܵܐ ܪܵܗܹ̇ܛ ܫܸܡܥܹܗ ܩܕܼܵܡ ܪܸܥܝܵܢܵܐ 10 ܘܐܲܝܢܵܐ ܕܪܵܚܹ̇ܡ ܠܘܝܼܬܼܵܐ ܕܚܘܼܒܹܿܗ ܡ̣ܛܵܐ ܠܲܫܡܲܝܵܐ ܀ 11 :ܚܘܼܒܵܢܵܐܝܼܬܼ ܩܵܪܹܐ ܠܐ̄ܢܵܫܵܐ ܠܡܸܩܪܲܒܼ ܨܹܐܕܼܵܘܗܝ 12 ܘܐܲܝܢܵܐ ܕܲܩ̣ܪܸܒܼ ܚܘܼܒܵܢܵܐܝܼܬܼ ܡ̣ܠܵܝܗܝ ܡ̣ܢ ܚܘܼܒܹܿܗ ܀ 13 :ܒܲܕܼܡܘܼܬܼ ܪܲܒܵܐ ܡܚܲܦܸܛ ܐ̄ܢܵܫܵܐ ܠܘܵܬܼ ܝܘܼܠܦܵܢܹܗ 14 ܘܐܲܝܢܵܐ ܕܩܲܒܸܿܠ ܬܲܠܡܝܼܕܼܘܼܬܹܗ ܗܘ̤ܵܐ ܠܹܗ ܪܲܒܵܐ ܀ 15 :ܪܲܒܵܢܘܼܬܹܗ ܕܪܲܒܵܐ ܡܗܝܼܪܵܐ ܚܙܹ̇ܝܬܼ ܕܲܡܗܝܼܪܵܐ 16 ܘܡܲܠ̣ܟܲܢܝ ܪܸܥܝܵܢܝ ܕܐܸܬܿܬܲܠܡܲܕܼ ܠܹܗ ܐܸܢ ܨܵܒܹ̇ܐ ܒܝܼ ܀ 17 :ܨܒܼܝܼ ܒܝܼ ܪܲܒܵܐ ܡܚܲܟܸܿܡ ܐ̄ܢܵܫܵܐ ܒܪܲܒܵܢܘܼܬܹܗ 18 ܕܐܵܘܓܲܪ ܠܸܫܵܢܝ ܒܬܲܠܡܝܼܕܼܘܼܬܼܵܐ ܕܗܸܓܼܝܵܢ ܡܸܠܲܝ̈ܟ ܀ 19 :ܠܥܸܢܝܵܢ ܡܸܠܲܝ̈ܟ ܪܓܼܝܼܓܼܵܐ ܡܸܠܲܬܼܝ ܠܡܸܬܿܬܲܠܡܵܕܼܘܼ 20 ܟܬܼܘܿܒܼ ܠܝܼ ܚܘܼܩܵܐ ܕܐܲܠܦܵܐ ܒܹܝܛܵܐ ܕܐܸܬܼܗܲܓܸܿܐ ܒܹܗ ܀ 21 :ܚܘܼܩܹ̈ܐ ܬܪ̈ܝܼܨܹܐ ܚܙܹ̇ܝܬܼ ܕܲܪܫܝܼܡܝܼܢ ܒܲܟܼܬܼܝܼ̈ܒܼܵܬܼܵܟ 22 ܘܛܵܒܼ ܪܵܓܵܐ ܠܝܼ ܕܐܸܪܕܹܿܐ ܒܛܲܟܼܣܵܐ ܕܣܘܼܟܵܠܲܝ̈ܗܘܿܢ ܀ 23 :ܡܲܠܵܐ ܪܸܓܲܬܼܝ ܛܵܒܼܵܐ ܕܲܡܠܸܐ ܟܠ ܛܵܒܼܵܬܹ̈ܐ 24 ܘܗܲܒܼܠܝܼ ܣܘܼܢܩܵܢܝ ܣܘܼܟܵܠ ܡܸܠܹ̈ܐ ܕܒܲܟܼܬܼܝܼ̈ܒܬܼܵܟ ܀ 25 :ܒܹܝܬܼ ܦܸܠ̈ܐܵܬܼܵܐ ܕܲܪ̈ܫܝܼܡܵܢ ܠܵܟ ܡܸܬܼܗܲܦܲܟ ܗ̄ܘܹ̇ܝܬܼ 26 ܘܫܲܚ̣ܩܲܢܝ ܪܸܥܝܵܢܝ ܕܐܸܒܼܥܹܐ ܒܥܵܬܼܵܐ ܕܚܲܝܠܵܐ ܕܲܒܼܗܹܝܢ ܀ 27 ܠܲܒܼܬܼܘܼ̈ܠܵܬܼܵܐ ܥܣܲܪ ܠܲܡ ܕܵܡ̇ܝܵܐ ܡܲܠܟܿܘܼܬܼ ܪܵܘܡ̇ܐ. 28 ܕܲܡܣܲܟܿܝ̈ܢ ܗ̣̄ܘܲܝ̈ ܠܡܹܐܪܲܥ ܚܲܬܼܢܵܐ ܒܠܲܡܦܹܝܕܲܝ̈ܗܹܝܢ ܀ 29 :ܚܲܡܸܫ ܡܸܢܗܹܝܢ ܚܲܟܿܝܼ̈ܡܵܬܼܵܐ ܢ̣ܣܲܒܼ ܠܲܡ ܡܸܫܚܵܐ 30 ܘܠܵܐ ܪ̈ܲܕܼܝܵܬܼܵܐ ܠܵܐ ܐܸܬܼܚܲܦܲܛ ܠܡܸܣܲܒܼ ܡܸܫܚܵܐ ܀ 31 :ܥ̣ܒܲܪ ܠܲܡ ܙܲܒܼܢܵܐ ܘܐܵܘܚܲܪ ܚܲܬܸܢܵܐ ܡ̣ܢ ܕܲܠܡܹܐܬܼܵܐ 32 ܘܲܙܟܼܵܬ̤ ܐܸܢܹܝܢ ܫܸܢܬܼܵܐ ܘܲܕܼܡܸܟ ܥܸܣܪ̈ܵܬܲܝ̈ܗܹܝܢ ܀ pb. 245 33 :ܒܦܸܠܓܹܿܗ ܕܠܸܠܝܵܐ ܐܸܡ݂ܲܪ ܕܐܲܙܥܸܩ ܩܵܠ ܫܝܼܦܘܿܪܵܐ 34 ܕܲܡܣܲܒܲܪ ܗ̄ܘ̣ܵܐ ܥܲܠ ܡܹܐܬܼܝܼܬܹܗ ܕܚܲܬܼܢܵܐ ܕܪܵܘܡܵܐ ܀ 35 :ܩ̣ܵܡ ܠܲܡ ܬܲܩܸܢ ܠܲܡܦܹܝܕܲܝ̈ܗܹܝܢ ܐܵܦ ܬܲܩ̈ܢܵܬܼܵܐ 36 ܕܲܒܼܢܲܗܝܼܪܹ̈ܐ ܢܲܩ̈ܒܿܠܵܢ ܚܲܬܼܢܵܐ ܕܲܫܪܸܐ ܒܢܘܼܗܪܵܐ ܀ 37 :ܒܲܚܕܼܵܐ ܫܲܘܝܘܼ ܩ̣ܵܡ ܣܲܟܼܠ̈ܠܵܬܼܵܐ ܘܚܲܟܿܝܼ̈ܡܵܬܼܵܐ 38 ܟܲܕܼ ܫܲܘ̈ܝܵܢ ܗ̣̄ܘܲܝ̈ ܠܵܐ ܫܲܘ̈ܝܵܢ ܒܲܚܕܼܵܐ ܫܲܘܝܘܼ ܀ 39 :ܡܸܫܚܵܐ ܚ̣ܪܲܪ ܗ̄ܘ̣ܵܐ ܒܠܲܡܦܹܝܕܲܝ̈ܗܹܝܢ ܕܗܸܕܼܝ̈ܘܿܛܵܬܼܵܐ 40 ܘܫܲܪܝܼ ܫܵܐܠ̈ܢ ܡ̣ܢ ܚܲܒܼܪ̈ܵܬܼܗܹܝܢ ܙܸܕܼܩܵܐ ܒܛܲܝܒܿܘܼ ܀ 41 :ܠܡܵܐ ܠܵܐ ܢܸܣܦܲܩ ܠܲܢ ܠܲܡ ܘܲܠܟܹܝܢ ܥܢܲܝ̈ ܬܲܩ̈ܢܵܬܼܵܐ 42 ܐܸܠܵܐ ܙܸܠܹܝ̈ܢ ܨܹܝܕܼ ܕܲܡܙܲܒܿܥܹܝܢ ܐܸܢ ܡܸܙܕܲܒܲܢ ܀ 43 :ܫ̣ܡܲܥ ܠܲܡ ܘܐܸܙܲܠ ܠܡܸܙܒܲܢ ܡܸܫܚܵܐ ܕܠܵܐ ܡܸܙܕܲܒܲܢ 44 ܘܐܸܬܼܵܐ ܚܲܬܼܢܵܐ ܘܥܲܠ̣ ܬܲܩ̈ܢܵܬܼܵܐ ܘܗܸܢܹܝܢ ܠܵܐ ܥܲܠ̣܀ 45 :ܠܒܲܪ ܡ̣ܢ ܬܲܪܥܵܐ ܦܵܫ̣ ܥܲܠ ܕܐܲܦܝܼܫ ܡ̣ܢ ܘܵܠܝܼܬܼܵܐ 46 ܘܫܲܪܝܼ ܢܵܩ̈ܫܵܢ ܢܵܩ̈ܫܵܢ ܥܲܠ ܬܘܼܟܼܠܵܢܵܐ ܕܕܼܘܼܒܵܪ̈ܲܝܗܹܝܢ ܀ 47 :ܦܬܲܚ ܠܲܢ ܡ̇ܪܲܢ ܬܪܲܥ ܒܹܝܬܼ ܓܲܙܵܐ ܕܒܹܝܬܸ ܡܲܠܟܿܘܼܬܼܵܟ 48 ܕܢܸܥܘܿܠ ܢܸܣ݂ܲܒܼ ܐܲܓܼܪܵܐ ܕܥܲܡܠܹ̈ܐ ܕܲܒܼܬܼܘܼܬܲܢ ܀ 49 :ܠܵܐ ܝܵ̇ܕܲܥܢܵܐ ܠܟܹܝܢ ܦܲܢܝܼ ܠܗܹܝܢ ܩܵܠܹܗ ܕܚܲܬܼܢܵܐ 50 ܘܠܵܐ ܒܲܒܼܬܼܘܼܠܹ̈ܐ ܕܲܢܛܲܪ̈ܬܹܿܝܢ ܠܝܼ ܡܦܵܣ ܐ̄ܢܵܐ ܡ̣ܢ ܡܬܼܘܿܡ ܀ 51 :ܗܵܫܵܐ ܕܫܲܠܸܡ ܦܘܼܡ̇ܐ ܚܲܝܵܐ ܡܸܠܲܬܼ ܦܘܼܡܹܗ 52 ܢܸܩܪܘܿܒܼ ܢܸܒܼܥܸܐ ܒܥܵܬܼܵܐ ܕܟܲܣܝܵܐ ܒܓܼܵܘ ܦܸܬܼܓܼܵܡܵܘ̈ܗܝ ܀ 53 :ܒܥܵܬܼܵܐ ܡܲܠܝܵܐ ܡܸܠܬܼܵܐ ܕܪܲܟܸܿܒܼ ܒܐܸܣܟܹܿܝܡ ܢܸܫܹ̈ܐ 54 ܕܐܲܝܟܲܢ ܐܲܪܦܝܼ ܬܸܓܼܡܵܐ ܕܓܲܒܼܪܹ̈ܐ ܘܐܸܡ݂ܲܪ ܢܸܫܹ̈ܐ ܀ 55 :ܘܐܸܢ ܒܲܟܼܝܵܢܵܐ ܚܵܪܵܬ̤ ܡܸܠܬܹܗ ܒܗܵܝ̇ ܕܐܵܦ ܚܲܕܼܘܼ 56 ܠܡܵܢ ܟܲܕܼ ܐܝܼܬܼ ܠܹܗ ܒܬܼܘܼܠܹ̈ܐ ܕܲܫܘܹܝܢ ܠܵܐ ܫܘܸܐ ܟܠܹܗ ܀ 57 :ܠܡܵܢܵܐ ܒܲܫܡܵܐ ܐܲܫܘܝܼ ܐܸܢܹܝܢ ܠܲܒܼܬܼܘܼ̈ܠܵܬܼܵܐ 58 ܘܲܒܼܣܘܼܥܪ̈ܵܢܹܐ ܦܲܪܸܫ ܐܸܢܹܝܢ ܠܲܬܼܪܹܝܢ ܓܲܒܿܝܼ̈ܢ ܀ 59 :ܠܡܵܢ ܟܲܕܼ ܕܲܟܼ̈ܝܵܢ ܡ̣ܢ ܟܘܼ̈ܬܼܡ̇ܬܼܵܐ ܕܙܲܠܝܼܠܘܼܬܼܵܐ 60 ܬܲܚܸܡ ܐܸܢܹܝܢ ܕܠܵܐ ܢܸܬܼܣ̈ܡܵܢ ܒܪܲܒܿܘܼܬܼ ܚܘܼܒܹܿܗ ܀ 61 :ܠܡܵܢܵܐ ܫܸܢܬܼܵܐ ܠܟܼܠܗܹܝܢ ܚܸܣܢܲܬ̤ ܘܦܵܫ̣ ܡ̣ܬܥܲܡܠܵܐ 62 ܘܲܒܼܥܝܼܪܘܼܬܼܵܐ ܗܝ̤ ܬܘܼܒܼ ܟܲܕܼ ܗܝ̤ ܒܚܲܒܼ ܐܸܣܟܹܿܡܵܐ ܀ 63 :ܠܡܵܢ ܟܲܕܼ ܟܠܗܹܝܢ ܦܲܡܦܹܝܕܲܝ̈ܗܹܝܢ ܐܲܚܝܼ̈ܕܵܢ ܗ̣̄ܘܲܝ̈ 64 ܡܸܫܚܵܐ ܠܵܐ ܦܵܫ̣ ܐܸܠܵܐ ܒܲܠܚܘܿܕܸ ܠܚܲܟܿܝܼ̈ܡܵܬܼܵܐ ܀ pb. 246 65 :ܐܸܢ ܕܘܼܒܵܪܹ̈ܐ ܕܲܒܼܬܼܘܼܠܘܼܬܼܵܐ ܦܠ݂ܲܚ ܫܲܘܝܵܐܝܼܬܼ 66 ܠܡܵܢ ܫܘܼܚܠܵܦܵܐ ܕܚܲܟܿܝܼܡܘܼܬܼܵܐ ܘܲܕܸܣܲܟܼܠܘܼܬܼܵܐ ܀ 67 :ܐܸܢܗܘ̤ ܕܚܲܕܼ ܗ̄ܘ̣ܵܝ̈ ܐܲܟܼܡܵܐ ܕܚܲܕܼ ܗ̣̄ܘܲܝ̈ ܒܦܲܓܼܪܵܐ ܘܢܲܦܫܵܐ 68 ܠܡܵܢ ܠܵܐ ܐܲܫܐܸܠ ܙܸܕܼܩܵܐ ܒܛܲܝܒܿܘܼ ܚܕܸܵܐ ܠܲܚܒܲܪܬܼܵܗ̇ ܀ 69 :ܠܡܵܢ ܫܲܕܲܕ ܗ̣̄ܘܲܝ̈ ܚܲܟܿܝܼ̈ܡܵܬܼܵܐ ܠܠܵܐ ܪ̈ܲܕܸܝܵܬܼܵܐ 70 ܟܲܕܼ ܝܵܕ̈ܥܵܢ ܗ̣̄ܘܲܝ̈ ܕܠܵܐ ܡܸܙܕܲܒܲܢ ܡܸܫܚܵܐ ܒܛܝܼܡܹ̈ܐ ܀ 71 :ܘܐܸܢ ܫܲܪܝܼܪܵܐ ܕܡܸܙܕܲܒܲܢ ܗ̄ܘ̣ܵܐ ܡܸܫܚܵܐ ܒܛܝܼܡܹ̈ܐ 72 ܠܡܵܢ ܠܵܐ ܗܸܢܹܝܢ ܙܲܒܸܿܢ ܡܸܫܚܵܐ ܘܲܫ̣ܩܲܠ ܛܝܼܡܹ̈ܐ ܀ 73 :ܘܐܸܢܗܘ̤ ܕܗܸܢܹܝܢ ܕܥܲܬܼܝܼܪ̈ܵܢ ܗ̣̄ܘܲܝ̈ ܠܵܐ ܙܲܒܸܿܢ ܗ̣̄ܘܲܝ̈ 74 ܡ̣ܢ ܫܵܩܹ̇ܠ ܗ̄ܘ̣ܵܐ ܡ̇ܙܘܿܢ ܚܲܝܵܘ̈ܗܝ ܘܝܵܗܹ̇ܒܼ ܠܲܐ̄ܚܪܹܝܢ ܀ 75 :ܘܐܸܢ ܕܹܝܢ ܐܸܙܲܠ ܚܲܣܝܼܪ̈ܵܬܼܵܐ ܠܡܸܙܒܲܢ ܡܸܫܚܵܐ 76 ܠܡܵܢ ܠܵܐ ܩܵܘܝܼ ܚܲܬܼܢܵܐ ܕܢܸܥ̈ܠܵܢ ܒܲܚܕܼܵܐ ܫܲܘܝܘܼ ܀ 77 :ܠܡܵܢ ܦܲܢܝܼ ܠܗܹܝܢ ܕܠܵܐ ܝܵ̇ܕܲܥܢܵܐ ܣܘܼܥܪ̈ܵܢܲܝܟܹܿܝܢ 78 ܕܗܵܐ ܝܵ̇ܕܲܥ ܗ̄ܘ̣ܵܐ ܕܲܢܛܝܼܪ̈ܵܢ ܗ̣̄ܘܲܝ̈ ܡ̣ܢ ܛܲܡܐܘܼܬܼܵܐ ܀ 79 :ܘܐܸܢ ܠܵܐ ܦܠܲܚ̣ ܗ̣̄ܘܲܝ̈ ܐܲܝܟ ܨܸܒܼܝܵܢܵܐ ܕܨܵܒܹ̇ܐ ܗ̄ܘ̣ܵܐ ܒܹܗ 80 ܠܡܵܢ ܠܵܐ ܐܸܡ݂ܲܪ ܕܙܸܠܹ̈ܝܢ ܠܢܘܼܪܵܐ ܘܲܠܚܸܫܘܿܟܼܵܐ ܀ 81 :ܫܘܼܚܠܵܦ ܩܵܠܵܐ ܕܐܲܫܡܲܥ ܐܸܢܹܝܢ ܫܲܚܩ݂ܲܢܝ ܣܲܓܿܝܼ 82 ܕܡܸܛܠ ܡܵܢܵܐ ܠܵܐ ܫܘܸܐ ܢܸܓܼܕܵܐ ܕܡܸܬܼܢܲܓܿܕܼܵܢܹ̈ܐ 83 :ܒܠܵܐ ܫܲܘܝܘܼܬܼܵܐ ܕܲܓܼܙܵܪ ܕܝܼܢܗܹܝܢ ܬܡܲܗ̣ܘ ܚܘܼܫܵܒܲܝ̈ 84 ܕܐܲܝܟܲܢ ܠܵܐ ܢܦ݂ܲܠ ܒܗܵܘܬܼܵܐ ܕܢܘܼܪܵܐ ܥܲܡ ܥܲܬܝܼܪܵܐ ܀ 85 :ܘܐܸܢ ܥܲܡ ܒܝܼܫܹ̈ܐ ܦܵܫ̣ ܥܲܠ ܐܲܪܥܵܐ ܒܝܘܼܩܪܵܐ ܕܲܒܼܗܹܝܢ 86 ܐܲܝܟܲܢ ܡܲܨܝܵܐ ܕܠܵܐ ܢܸܫܬܲܢ̈ܩܵܢ ܒܫܘܼܢܵܩܲܝ̈ܗܹܝܢ ܀ 87 :ܘܐܸܢ ܗܘ̤ ܕܠܲܐܬܼܪܵܐ ܕܲܡ̈ܣܲܟܿܝܵܢ ܗ̣̄ܘܲܝ̈ ܠܵܐ ܥܲܠ̣ ܘܲܚܙܲܝ̈ 88 ܡ̇ܢ ܝܘܼܬܼܪܵܢܵܐ ܡ̣ܢ ܚܘܼܡܣܵܢܵܐ ܕܲܒܼܬܼܘܼܠܘܼܬܼܗܹܝܢ ܀ 89 :ܠܡܵܢܵܐ ܫܚ݂ܲܩ ܗ̣̄ܘܲܝ̈ ܦܲܓܼܪܵܐ ܘܢܲܦܫܵܐ ܚܲܫܹ̈ܐ 90 ܘܲܒܼܝܘܿܡ ܕܝܼܢܵܐ ܫ̣ܩܲܠ ܟܘܼܐܵܪܵܐ ܚܠܵܦ ܟܘܼܠܵܠܵܐ ܀ 91 :ܠܡܵܢ ܐܸܬܼܟܲܬܲܫ ܥܲܡ ܚܘܼܬܼܚܵܬܹ̈ܐ ܕܝܲܨܪܵܐ ܕܲܒܼܗܹܝܢ 92 ܘܟܲܕܼ ܙܲܟܵܝܝܼܢ ܢܦ݂ܲܠ ܒܲܬܼܒܲܥܬܼܵܐ ܥܲܡ ܚܲܝܵܒܹ̈ܐ ܀ 93 :ܚܲܫܵܐ ܪܲܒܵܐ ܡܠܸܐ ܫܘܼܠܵܡܵܐ ܕܣܘܼܥܪ̈ܵܢܲܝܗܹܝܢ 94 ܕܐܲܝܟܲܢ ܫܲܪܝܼ ܘܠܵܐ ܣܦ݂ܲܩ ܫܲܠܸܡ ܫܲܦܝܼܪ̈ܵܬܼܵܐ ܀ 95 :ܢܫܲܪܸܐ ܡ̇ܕܹܝܢ ܢܸܒܼܥܸܐ ܒܥܵܬܼܵܐ ܕܥܲܠ ܥܲܡܠܲܝܗܹ̈ܝܢ 96 ܠܦܘܼܬܼ ܕܐܵܦ ܚܲܫܝܼܫ ܚܲܫܹܗ ܕܫܲܪܒܵܐ ܕܲܪ̈ܫܝܼܡܵܢ ܒܹܗ ܀ 97 ܢܸܒܼܥܹܐ ܕܐܲܝܟܲܢ ܟܬܼܝܼܒܼ ܕܐܸܬܿܕܲܡܝܲܬ̤ ܒܗܹܝܢ ܡܲܠܟܿܘܼܬܼܵܐ: pb. 247 98 ܕܗܵܐ ܠܵܐ ܣܦܲܩ ܗ̣̄ܘܲܝ̈ ܠܲܡܕܲܡܵܝܘܼ ܒܕܘܼܡܝܵܐ ܕܝܼܠܵܗ̇ ܀ 99 :ܠܡܵܢ ܠܵܐ ܥܠܲܝܗܹܝܢ ܐܵܡܲ݁ܪ ܕܕܼܵܡ̈ܝܵܢ ܠܗܵܝ̇ ܕܲܫܒܼܝܼܚܵܐ 100 ܕܗܵܐ ܩܲܫܝܼܫܵܐ ܗ̄ܝܼ ܒܲܫܒܼܝܼܚܘܼܬܼܵܗ̇ ܡ̣ܢ ܟܠ ܕܲܒܼܪܸܐ ܀ 101 :ܐܸܬܿܕܲܡܝܲܬ̤ ܠܲܡ ܡܲܠܟܿܘܼܬܼ ܪܵܘܡ̇ܐ ܠܲܒܼܬܼܘܼ̈ܠܵܬܼܵܐ 102 ܬܲܗܪܵܐ ܪܲܒܵܐ ܡ̇ܢ ܡܸܬܿܕܲܡܸܐ ܠܡܸܕܸܿܡ ܕܲܒܼܨܝܼܪ ܀ 103 :ܫܲܦܝܼܪ ܕܲܡܝܼ ܡܕܲܡܸܐ ܒܫܘܼܒܼܚܵܐ ܒܲܡܫܲܒܿܚܵܢܵܘ̈ܗܝ 104 ܕܗܘ̤ ܡܨܸܐ ܡܕܲܡܸܐ ܘܗܸܢ̣ܘܿܢ ܠܵܐ ܡܨܼܝܢ ܠܲܡܕܲܡ̇ܝܘܼ ܀ 105 :ܒܡܲܠܟܿܘܼܬܼ ܪܵܘܡ̇ܐ ܘܲܒܼܒܼܘܼܣܵܡܵܐ ܕܠܵܐ ܡܸܬܼܡܲܠܲܠ 106 ܗ̤ܝ ܕܹܝܢ ܡܕܲܡܝܵܐ ܒܲܕܩܵܪܝܵܐ ܠܗܘܿܢ ܨܹܝܕ ܒܘܼܣܵܡܵܗ̇ ܀ 107 :ܒܗܵܢܵܐ ܢܝܼܫܵܐ ܐܸܬܿܕܼܡܝܲܬ̤ ܠܲܢ ܠܐܲܪ̈ܥܵܢܵܝܹܐ 108 ܕܲܒܼܝܲܕܼ ܕܘܼܡܝܵܗ̇ ܢܸܒܼܥܸܐ ܕܘܼܡܝܵܐ ܕܲܫܒܼܝܼ̈ܚܵܬܼܵܐ ܀ 109 :ܣܲܓܿܝܼ ܕܵܡܹ̇ܐ ܕܘܼܡܝܵܐ ܕܕܲܡܝܼ ܡܲܠܸܦ ܩܘܼܫܬܵܐ 110 ܘܠܲܝܬܿ ܨܲܝܵܪܵܐ ܕܲܢܨܘܼܪ ܕܘܼܡܝܹܗ ܚܲܬܿܝܼܬܵܐܝܼܬܼ ܀ 111 :ܫܲܦܝܼܪ ܨܲܠܡܵܐ ܕܪܲܟܸܿܒܼ ܪܸܡܙܹܗ ܘܣ̣ܵܡ ܒܲܣܒܲܪܬܹܗ 112 ܘܚܲܬܿܝܼܬܼܵܐܝܼܬܼ ܙܵܕܹܩ ܕܲܢܚܘܼܪ ܒܦܲܐܝܘܼܬܼ ܫܘܼܦܪܹܗ ܀ 113 :ܬܵܘ ܚܲܙܵܝܹ̈ܐ ܚܘܼܪܘ ܬܲܩܢܵܐܝܼܬܼ ܒܡܸܠܲܬܼ ܡܪܲܢ 114 ܕܨܵܪܲܬ̤ ܐ̄ܢܵܫܵܐ ܘܡܲܠܟܿܘܼܬܼ ܪܵܘܡ̇ܐ ܒܝܘܼܩܢܵܐ ܕܥܲܡܠܹ̈ܐ ܀ 115 :ܥܲܡܠܹ̈ܐ ܕܐ̄ܢܵܫܵܐ ܨܵܪ ܒܲܣܒܲܪܬܹܗ ܡܚܲܕܸܿܬܼ ܐ̄ܢܵܫܵܐ 116 ܘܲܩܒ݂ܲܥ ܐܸܢܘܿܢ ܒܲܕܼܡܘܼܬܼ ܨܲܠܡܵܐ ܩܕܼܵܡ ܚܲܙܵܝܹ̈ܐ ܀ 117 :ܠܵܗ̇ ܠܲܣܒܲܪܬܹܗ ܩܪ̣ܵܐ ܡܲܠܟܿܘܼܬܼܵܐ ܕܕܼܵܡ̇ܝܵܐ ܠܢܸܫܹ̈ܐ 118 ܒܗܵܝ̇ ܕܲܡܣܲܒܿܪܵܐ ܡܲܠܟܿܘܼܬܼ ܪܵܘܡ̇ܐ ܠܲܒܼܢܲܝ̈ܢܵܫܵܐ ܀ 119 :ܒܩܲܪܝܼܒܼܘܼܬܼܵܗ̇ ܝܵܠ̇ܦܝܼܢ ܐ̄ܢܵܫܵܐ ܠܡܸܒܼܥܵܐ ܕܲܠܥܸܠ 120 ܘܲܒܼܓܲܠܝܘܼܬܼܵܗ̇ ܚܵܙܹ̇ܝܢ ܫܘܼܦܪܵܐ ܕܲܣܬܼܝܼܪ̈ܵܬܼܵܐ ܀ 121 :ܥܠܹܝܗ̇ ܗ̄ܘ̣ ܐܸܡ݂ܲܪ ܗܵܝ̇ ܕܐܸܬܿܕܲܡܚܲܬ̤ ܠܲܒܼܬܼܘܼ̈ܠܵܬܼܵܐ 122 ܒܚܲܕܼ ܕܲܡܚܵܘܝܵܐ ܕܘܼܒܵܪ ܚܲܝܹ̈ܐ ܕܠܵܐ ܙܘܼܘܵܓܼܵܐ ܀ 123 :ܒܫܸܡ ܒܬܼܘܼ̈ܠܬܼܵܐ ܩ̣ܪܵܐ ܠܲܟܼܢܘܼܫܝܵܐ ܕܲܡܗܲܝܡܸܢ ܒܹܗ 124 ܟܲܕܼ ܡܲܠܸܦ ܠܲܢ ܕܕܲܟܼܝܘܼ ܬܵܒܲܥ̇ ܡ̣ܢ ܫܲܡܵܫܵܘ̈ܗܝ ܀ 125 :ܒܐܸܣܟܹܿܝܡ ܢܸܫܹ̈ܐ ܨܵܪܹܗ ܠܝܘܼܩܢܵܐ ܕܨܸܒܼܝܵܢ ܚܘܼܒܹܿܗ 126 ܒܗܵܝ̇ ܕܲܒܼܢܸܫܹ̈ܐ ܒܟܼܝܼܚ ܐܸܣܟܹܿܡܵܐ ܕܲܟܼܢܝܼܟܼܘܼܬܼܵܐ ܀ 127 :ܠܓܲܒܼܪܹ̈ܐ ܘܢܸܫܹ̈ܐ ܚ̣ܒܲܫ ܒܲܛܝܵܪܹ̈ܐ ܕܡܸܠܲܬܼ ܦܘܼܡܹܗ 128 ܕܡܲܠܸܦ ܕܲܡܨܲܝܢ ܬܪ̈ܲܝܗܘܿܢ ܬܸܓܼܡܹ̈ܐ ܠܡܸܚܵܐ ܒܕܲܟܼܝܘܼ ܀ pb. 248 129 :ܐܸܠܘܼ ܨܵܪܹܗ ܠܝܘܼܩܢܵܐ ܕܡܸܠܬܹܗ ܒܐܸܣܟܹܿܝܡ ܓܲܒܼܪܹ̈ܐ 130 ܡܸܣܬܲܒܼܪܵܐ ܗ̄ܘ̣ܵܬܼ ܕܛܵܟ ܡܲܣܠܲܝ ܗ̄ܘ̣ܵܐ ܬܸܓܼܡܵܐ ܕܢܸܫܹ̈ܐ ܀ 131 :ܚܲܟܿܝܼܡܵܐܝܼܬܼ ܨܵܪ ܢܸܩܼ̈ܒܼܵܬܼܵܐ ܒܲܨܠܸܡ ܡܸܠܬܹܗ 132 ܕܠܵܐ ܢܸܬܼܦܲܠܲܓܼ ܟܝܵܢܵܐ ܫܲܘܝܵܐ ܠܲܡ̈ܢܵܘܵܬܼܵܐ ܀ 133 :ܟܠܹܗ ܟܝܵܢܲܢ ܨܵܪ ܚܵܘܝܼ ܠܲܢ ܒܹܗ ܒܲܟܼܝܵܢܲܢ 134 ܕܢܗܘܸܐ ܦܫܝܼܩ ܠܲܢ ܠܲܡܚܵܪ ܫܲܦܝܼܪ ܒܟܼܠ ܕܲܩܢܹܝܢܲܢ ܀ 135 :ܫܲܦܝܼܪ̈ܵܬܲܢ ܘܲܫܟܼܝܼܪ̈ܵܬܲܢ ܓܠ̣ܵܐ ܒܦܸܠ̈ܐܵܬܹܗ 136 ܘܛܘܼܒܹ̈ܐ ܘܢܸܓܼ̈ܕܹܿܐ ܕܲܥܬܼܝܼܕܼܝܼܢ ܠܲܢ ܨܵܪ ܚܵܘܝܼ ܠܲܢ ܀ 137 :ܠܲܬܼܪܹܝܢ ܬܸܓܼܡܝܼ̈ܢ ܦܲܠܓܹܗ ܠܪܲܗܛܵܐ ܕܕܼܘܼܒܵܪ ܚܲܝܲܝ̈ܢ 138 ܘܲܠܚܲܕܼ ܣܵܡ̣ ܠܹܗ ܫܡܵܐ ܚܲܟܿܝܼܡܵܐ ܘܠܲܐ̄ܚܪܹܝܢ ܣܲܟܼܠܵܐ ܀ 139 :ܒܚܲܟܿܝܼ̈ܡܵܬܼܵܐ ܦܲܚܸܡ ܪܲܗܛܵܐ ܕܲܓܼܡܝܼܪܘܼܬܼܵܐ 140 ܘܲܒܼܣܲܟܼ̈ܠܵܬܼܵܐ ܕܲܡܝܼ ܠܥܲܡܠܹ̈ܐ ܒܨܝܼܪܲܝ ܚܘܼܒܵܐ ܀ 141 :ܠܗܘܿܢ ܗ̄ܘ̣ ܠܥܲܡܠܹ̈ܐ ܩܪ̣ܵܐ ܠܲܡܦܹܝܕܼܵܐ ܕܲܡܬܲܩܢܝܼܢ ܗ̄ܘ̣ܵܘ 142 ܒܗܵܝ̇ ܕܲܥܡ݂ܲܠܘ ܗ̄ܘ̣ܵܘ ܐܵܦܸܢ ܠܵܐ ܥ̣ܡܲܠ ܒܲܚܕܵܐ ܫܲܘܝܘܼ ܀ 143 :ܠܵܐ ܫܲܘܝܘܼܬܼܵܐ ܕܥܲܡܠܹ̈ܐ ܥܸܒܼܕܲܬ̤ ܕܢܸܚܣܲܪ ܡܸܫܚܵܐ 144 ܕܐܸܠܘܼ ܫܘܹܝܢ ܗ̄ܘ̣ܵܘ ܠܵܐ ܚܵܣܲܪ ܗ̄ܘ̣ܵܐ ܡܸܕܲܡ ܕܲܫܘܸܐ ܀ 145 :ܒܡܸܫܚܵܐ ܕܚܵܣܲ݁ܪ ܒܨܝܼܪܘܼܬܼ ܥܲܡܠܹ̈ܐ ܨܵܪ ܚܵܘܝܼ ܠܲܢ 146 ܕܢܵܚܘܿܒܼܝܼܢ ܗ̄ܘ̣ܵܘ ܘܠܵܐ ܕܲܗܝܼܢܝܼܢ ܒܚܘܼܒܵܐ ܘܪ̈ܲܚܡܹܐ ܀ 147 :ܠܪ̈ܲܚܡܹܐ ܟܲܢܝܼ ܒܲܫܡܵܐ ܕܡܸܫܚܵܐ ܡܫܝܼܚܵܐ ܕܚܵܢ݂ܲܢ 148 ܕܲܟܼܡܵܐ ܕܚܵܢ݂ܲܢ ܗܵܟܲܢ ܢܹܚܘܼܢ ܠܲܟܼ̈ܢܵܘܵܬܲܢ ܀ 149 :ܠܡܸܫܚܵܐ ܕܲܡܝܹܗ ܠܐܲܝܢܵܐ ܕܚܵܐܹ̇ܢ ܠܲܟܼ̈ܢܵܘܵܬܹܗ 150 ܕܒܲܕܼܡܘܼܬܼ ܡܸܫܚܵܐ ܡܢܝܼܚ ܚܘܼܫܵܒܹ̈ܐ ܐܲܝܟ ܕܲܠܪܸ̈ܓܼܫܹܐ ܀ 151 :ܒܸܠܥܵܕܼ ܡܸܫܚܵܐ ܨܵܪܹܗ ܠܝܘܼܩܢܵܐ ܕܡܲܪ̈ܵܚܵܬܼܵܐ 152 ܒܲܪ ܠܵܐ ܪܲܟܸܿܟ ܦܸܬܼܓܼܵܡܲܝ̈ܗܹܝܢ ܫܘܼܚܢܵܐ ܕܥܵܘ̣ܠܵܐ ܀ 153 :ܒܡܸܫܚܵܐ ܡܲܕܿܟܹܗ ܠܕܼܘܼܒܵܪ ܚܲܝܹ̈ܐ ܕܚܲܟܿܝܼ̈ܡܵܬܼܵܐ 154 ܕܚܲܢ ܘܐܸܬܼܪܲܚܲܡ ܘܕܲܗܸܢ ܦܲܓܼܪܵܐ ܘܢܲܦܫܵܐ ܐܲܟܲܚ̄ܕܼ ܀ 155 :ܒܡܸܫܚܵܐ ܕܪ̈ܲܚܡܹܐ ܕܲܗܝܼܢܝܼܢ ܗ̄ܘ̣ܵܘ ܕܘܼܒܵܪ̈ܲܝܗܹܝܢ 156 ܥܲܠ ܗܵܝ̇ ܩܵܘܝܘܼ ܘܠܵܐ ܐܸܬܼܦܲܟܲܪܘ ܒܫܘܼܚܬܵܐ ܕܙܲܒܼܢܵܐ ܀ 157 ܡܥܵܕܼܝܼܢ ܐܸܢܘܿܢ ܐܵܦ ܨܲܝܵܪܹ̈ܐ ܠܡܸܣܥܲܪ ܗܵܕܹܐ: pb. 249 158 ܕܲܒܼܝܲܕܼ ܡܸܫܚܵܐ ܢܸܛܪܘܼܢ ܨܲܠܡܹ̈ܐ ܕܠܵܐ ܚܘܼܒܵܠܵܐ ܀ 159 :ܡܸܫܚܵܐ ܡܡܲܕܸܿܟ ܥܲܡ ܣܲܡܡܵܢܹ̈ܐ ܨܵܐܲܪ ܨܲܠܡܹ̈ܐ 160 ܕܲܒܼܝܲܕܼ ܗܵܕܹܐ ܢܩܵܘܸܐ ܨܲܠܡܹܗ ܕܠܵܐ ܫܘܼܓܼܢܵܝܵܐ ܀ 161 :ܘܐܸܢ ܨܲܒܵܪܹ̈ܐ ܝܼܕܲܥܘ ܕܢܸܛܪܘܼܢ ܨܲܠܡܹ̈ܐ ܫܐܝܼܠܹ̈ܐ 162 ܟܡܵܐ ܙܵܕܹܩ ܗ̄ܘ̣ܵܐ ܠܐ̄ܢܵܫܵܐ ܠܡܸܛܲܪ ܨܠܸܡ ܝܘܼܩܢܲܝ̈ܗܘܿܢ ܀ 163 :ܠܠܵܐ ܒܛܝܼܠܘܼܬܼܗܘܿܢ ܟܥܲܠ ܝܘܼܩܢܲܝ̈ܗܘܿܢ ܒܣ݂ܲܪ ܦܵܪܘܿܩܲܢ 164 ܒܫܸܡ ܣܟܼ̈ܠܵܬܼܵܐ ܕܠܵܐ ܫܩ݂ܲܠ ܡܸܫܚܵܐ ܒܲܙܘܵܕܲܝ̈ܗܘܿܢ ܀ 165 :ܠܲܚܦܝܼܛܘܼܬܼܵܐ ܕܨܸܒܼܝܵܢ ܛܵܒܹ̈ܐ ܩܲܠܸܣ ܘܐܵܘܪܸܒܼ 166 ܒܚܲܟܿܝܼ̈ܡܵܬܼܵܐ ܕܲܚܠ݂ܲܛ ܡܸܫܚܵܐ ܒܣܘܼܥܪ̈ܵܢܲܝܗܹܝܢ ܀ 167 :ܒܓܼܵܘ ܡܸܢܝܵܢܵܐ ܕܥܸܣܪ̈ܵܬܲܝܗܹܝܢ ܚ̣ܒܲܫ ܟܠ ܕܲܥܒܼܝܼܕܼ 168 ܪܸܪܓܼܝܼܓܼ ܣܲܓܿܝܼ ܕܲܢܩܲܒܿܠܘܼܢܵܝܗܝ ܒܝܘܿܡ ܓܸܠܝܵܢܹܗ ܀ 169 :ܠܝܘܿܡ ܓܸܠܝܵܢܹܗ ܩ̣ܪܵܐ ܡܹܐܬܼܝܼܬܹܗ ܕܚܲܬܼܢܵܐ ܕܐܵܬܹ̇ܐ 170 ܘܲܒܼܬܼܘܼ̈ܠܵܬܼܵܐ ܕܢܵܦ̈ܩܵܢ ܠܐܘܼܪܥܹܗ ܓܡܝܼܪܹ̈ܐ ܟܠܗܘܿܢ ܀ 171 :ܫܸܢܬܼܵܐ ܕܐܸܡ݂ܲܪ ܕܲܕܼܡܸܟ ܟܠܗܹܝܢ ܒܲܚܕܼܵܐ ܫܲܘܝܘܼ 172 ܡ̇ܘܬܵܐ ܕܐܲܫܘܝܼ ܠܛܵܒܹ̈ܐ ܘܒܼܝܼܫܹ̈ܐ ܒܚܲܕܼ ܚܘܼܒܵܠܵܐ ܀ 173 :ܩܥܵܬܼܵܐ ܕܲܗܘ̤ܿܬܼ ܒܦܸܠܓܿܘܼܬܼ ܠܸܠܝܵܐ ܘܢܵܕܼ ܕܲܡ̈ܟܵܬܼܵܐ 174 ܩܵܠ ܦܘܼܩܪܵܢܵܐ ܗ̄ܘ̣ ܕܩܵܪܹܐ ܒܚܲܪܬܼܵܐ ܘܲܡܢܲܚܸܡ ܟܠ ܀ 175 :ܒܦܸܠܓܿܘܼܬܼ ܠܸܠܝܵܐ ܐܸܡ݂ܲܪ ܕܐܵܬܹ̇ܐ ܚܲܬܼܢܵܐ ܕܡܲܟܼܪܲܢ 176 ܒܗܵܝ̇ ܕܐܵܦ ܚܲܬܼܢܹ̈ܐ ܒܠܸܠܝܵܐ ܢܵܣ̇ܒܿܝܼܢ ܠܲܡܟܼܝܼܪ̈ܵܬܼܵܐ ܀ 177 :ܕܩܵܡ̣ ܫܲܘܝܵܐܝܼܬܼ ܗܵܠܹܝܢ ܕܐܲܟܼܬܸܿܒܼ ܥܲܠ ܥܲܡܠܲܝ̈ܗܹܝܢ 178 ܩܝܵܡܬܵܐ ܕܟܼܠܢܵܫ ܚܵܘܝܼ ܠܟܼܠܢܵܫ ܕܩܵܐܹ̇ܡ ܟܠܢܵܫ ܀ 179 :ܒܚܲܕܼ ܠܲܡܦܹܝܕܹ̈ܐ ܕܚܲܡܸܫ ܕܲܕܼܥܸܟ ܠܚܲܪ̈ܡܹܐ ܟܵܘܸܢ 180 ܕܐܸܢ ܠܵܐ ܚܵܢ̇ܝܼܢ ܠܵܐ ܡܸܬܼܚܲܢܢܝܼܢ ܒܕܝܼܢܵܐ ܕܲܥܬܼܝܼܕܼ ܀ 181 :ܕܠܵܐ ܨܲܒܲܝ̈ ܙܲܒܸܿܢ ܚܲܟܿܝܼ̈ܡܵܬܼܵܐ ܠܗܸܕܝܘܿܛܵܬ̈ܐ 182 ܡܸܓܼܠܵܐ ܓܠ̣ܵܐ ܠܲܢ ܕܠܵܐ ܐܝܼܬܼ ܬܲܡ̇ܢ ܠܡܸܫܐܲܠ ܪ̈ܲܚܡܹܐ ܀ 183 :ܕܲܬܼܢܲܝ̈ ܘܐܸܡ݂ܲܪ ܕܕܲܡ ܠܵܐ ܢܸܣܦܲܩ ܠܲܢ ܠܲܡ ܘܲܠܟܹܝܢ 184 ܐܵܘܕܲܥ ܕܲܙܥܘܿܪ ܥܲܡܠܲܢ ܕܲܬܼܢܵܢ ܡ̣ܢ ܦܘܼܪܥܵܢܲܢ ܀ 185 :ܕܫܲܕܲܪ ܐܸܢܹܝܢ ܠܡܸܙܒܲܢ ܡܸܫܚܵܐ ܡ̣ܢ ܟܲܪ ܕܲܫܟܼܝܼܚ 186 ܚܵܘܝܼ ܕܐܼܝܼܬܼ ܗ̄ܘ̣ ܐܲܬܼܪܵܐ ܠܲܡܚܵܢ ܐܸܠܘܼ ܚܲܢ ܗ̣̄ܘܲܝܢ ܀ 187 :ܕܥܲܕܼ ܦܵܢ̈ܝܵܢ ܗ̣̄ܘܲܝ̈ ܡ̣ܢ ܟܲܕ ܕܐܸܙܲܠ ܐܸܬܼܵܐ ܚܲܬܼܢܵܐ 188 ܠܵܐ ܝܼܕܲܥܬܼܵܐ ܗ̄ܝܼ ܕܠܵܐ ܪܓܼܝܼܫܝܼܢܲܢ ܐܸܡܲܬܼܝ ܕܐܵܬܹܐ ܀ 189 :ܕܥܲܠ̣ ܥܲܡ ܚܲܬܼܢܵܐ ܚܲܟܿܝܼ̈ܡܵܬܼܵܐ ܘܐܸܬܿܬܿܚܸܕܼ ܬܲܪܥܵܐ 190 ܟܹܐܢܹ̈ܐ ܐܸܢܘܿܢ ܕܥܵܐ̇ܠܝܼܢ ܘܢܵܚ̇ܝܼܢ ܒܲܠܡܹܐܝܼܢ ܫܲܝܢܵܐ ܀ 191 ܕܦܵܫ̣ ܣܲܟܼܠܵܬܼ̈ܐ ܠܒܲܪ ܡ̣ܢ ܬܲܪܥܵܐ ܕܒܹܝܬܼ ܡܲܠܟܿܘܼܬܼܵܐ: pb. 250 192 ܒܝܼܫܹ̈ܐ ܐܸܢܘܿܢ ܕܦܵܝ̇ܫܝܼܢ ܒܐܲܪܥܵܐ ܠܡܸܫܬܲܢܵܩܘܼ ܀ 193 :ܕܲܟܼܬܼܝܼܒܼ ܕܲܩܪ̈ܲܝ ܠܵܐ ܪ̈ܲܕܝܵܬܼܵܐ ܡ̇ܪܲܢ ܡ̇ܪܲܢ 194 ܣܲܒܼܪܵܐ ܗ̄ܘ̣ ܕܲܟܼܒܲܪ ܚܵܢܝܼܢ ܪ̈ܲܚܡܹܐ ܠܲܕܼܚܲܛܵܚܢ ܀ 195 :ܥܲܠ ܥܲܡܠܲܝ̈ܗܹܝܢ ܕܕܲܠܵܐ ܒܘܼܝܵܢ ܡܸܬܼܪ̈ܲܥܝܵܢ ܗ̣̄ܘܲܝ̈ 196 ܕܛܵܟ ܠܵܐ ܛܵܠܹ̇ܡ ܗܵܘ̇ ܒܲܣܝܼܡܵܐ ܠܕܘܼܒܵܪ̈ܲܝܗܹܝܢ ܀ 197 :ܕܲܩܪ̈ܲܝ ܗܸܢܹܝܢ ܘܦܲܢܝܼ ܗܘ̤ ܠܗܹܝܢ ܕܠܵܐ ܝܵ̇ܕܲܥ ܐ̄ܢܵܐ 198 ܠܚܘܼܒܵܐ ܕܠܵܐ ܚܠܝܼܛ ܒܪܸܚܡܲܬܼ ܚܲܒܼܪ̈ܵܘܗܝ ܠܵܐ ܨܒܼܵܐ ܕܢܸܕܲܥ ܀ 199 :ܕܠܵܐ ܝܵ̇ܕܲܥ ܐ̄ܢܵܐ ܠܟܹܝܢ ܐܸܡ݂ܲܪ ܗ̄ܘ̣ܵܐ ܠܠܵܐ ܪ̈ܲܕܼܝܵܬܼܵܐ 200 ܕܠܵܐ ܝܼܕܲܥܬܹܿܝ̈ܢ ܠܡܸܓܼܡܲܪ ܨܸܒܼܝܵܢܝ ܒܝܲܕܼ ܚܵܘܣܵܢܵܐ ܀ 201 :ܬܲܪܥܵܐ ܐܸܬܿܬܿܚܸܕܼ ܒܐܲܦܲܝ̈ ܕܠܒܲܪ ܘܠܵܐ ܥܲܠ̣ ܥܲܡܹܗ 202 ܪܩܥܐ ܗ̄ܘ̣ ܕܲܠܥܸܠ ܕܡ̇ܐ ܕܥܲܠ̣ܘ ܛܵܒܹ̈ܐ ܐܲܚܕܹܿܗ ܪܸܡܙܵܐ ܀ 203 :ܪܸܡܙܵܐ ܗܵܘܹ̇ܐ ܟܘܼܪ ܒܘܼܚܪܵܢܵܐ ܠܛܵܒܹ̈ܐ ܘܒܼܝܼܫܹ̈ܐ 204 ܘܦܵܪܹܫ ܟܹܐܢܹ̈ܐ ܡ̣ܢ ܥܵܘܵܠܹ̈ܐ ܒܪܸܬܼܚܵܐ ܕܚܘܼܒܹܿܗ ܀ 205 :ܪܲܒܿ ܦܘܼܪܫܵܢܵܐ ܕܗܵܘܹ̇ܐ ܬܲܡ̇ܢ ܒܹܝܬܼ ܚܲܕ ܠܲܐ̄ܚܪܹܝܢ 206 ܘܠܵܐ ܡܸܬܼܡܲܫܚܵܐ ܪܲܚܝܼܩܘܼܬܼܵܐ ܕܪܵܘܡܵܐ ܘܥܘܼܡܩܵܐ ܀ 207 :ܪܲܡ ܘܲܡܥܲܠܲܝ ܪܵܘܡ̇ܐ ܕܟܹܐܢܹ̈ܐ ܡ̣ܢ ܟܠ ܪܘܡܝܼܢ 208 ܘܥܲܡܝܼܩܵܐ ܗ̄ܝܼ ܛܵܒܼ ܗܵܘܬܼܵܐ ܕܒܼܝܼܫܹ̈ܐ ܡ̣ܢ ܟܠ ܥܘܼܡܩܝܼ̈ܢ ܀ 209 :ܦܲܐܝܵܐ ܚܙܵܬܼܵܐ ܕܪ̈ܵܚܡܲܝ ܚܘܼܒܵܐ ܡ̣ܢ ܟܠ ܕܲܦܐܹܐ 210 ܘܲܫܟܼܝܼܪ ܓܵܘܢܵ ܕܢܲܟܿܘܼܠܬܼܵܢܹ̈ܐ ܡ̣ܢ ܟܠ ܕܲܫܟܼܝܼܪ ܀ 211 :ܠܲܝܬܿ ܠܵܗ̇ ܦܸܚܡܵܐ ܠܗܵܝ̇ ܬܸܫܒܿܘܿܚܬܵܐ ܕܲܒܼܢܲܝ̈ ܢܘܼܗܪܵܐ 212 ܘܠܵܐ ܬܘܼܒܼ ܕܘܼܡܝܵܐ ܠܲܫܟܼܝܼܪܘܼܬܼܵܐ ܕܲܒܼܢܲܝ̈ ܚܸܫܟܵܐ ܀ 213 :ܢܲܗܝܼܪܘܼܬܼܵܐ ܘܚܸܫܘܿܟܼܘܼܬܼܵܐ ܡܚܵܘܝܵܐ ܠܟܼܠܢܵܫ 214 ܕܒܲܐܝܼܠܹܝܢ ܥܲܡܠܹ̈ܐ ܐܲܥܢܝܼ ܢܲܦܫܹܗ ܒܥܘܼܡܪܵܐ ܕܲܬܼܢܵܢ ܀ 215 :ܚܙܵܬܼܵܐ ܕܓܼܘܼܫܡܵܐ ܗܵܘ̇ܝܵܐ ܣܵܗ̇ܕܵܐ ܥܲܠ ܪܸܥܝܵܢܵܐ 216 ܘܲܡܟܲܐܪܵܐ ܠܹܗ ܒܐܲܝܠܹܝܢ ܕܲܣܥ݂ܲܪ ܟܲܕܼܒܼܵܐܝܼܬܼ ܀ 217 :ܡܸܢܹܗ ܕܦܲܓܼܪܵܐ ܢܵܒܲ݁ܥ ܫܘܼܒܼܚܵܐ ܐܵܦ ܟܘܼܐܵܪܵܐ 218 ܘܗܘ̤ ܠܹܗ ܗܵܘܹ̇ܐ ܡܦܲܠܸܓܼ ܛܘܼܒܹ̈ܐ ܘܡܲܣܪܲܚ ܢܸܓܼ̈ܕܹܿܐ ܀ 219 :ܗܘ̤ ܒܲܪܢܵܫܵܐ ܡܢܲܓܸܿܕܼ ܢܲܦ̰ܫܹܗ ܒܐܲܝܠܹܝܢ ܕܲܚܝ̣ܛܵܐ 220 ܘܐܲܝܟ ܕܲܝܵܢܵܐ ܒܵܣܲ݁ܪ ܗܵܘܢܹܗ ܠܲܫܟܼܝܼܪ̈ܵܬܹܗ ܀ 221 :ܟܠ ܐ̄ܢܵܫ ܚܵܙܹ̇ܐ ܡܘܼܡܹ̈ܐ ܕܢܲܦܫܹܗ ܘܕܲܟܼܢܵܘܵܬܹ̈ܗ 222 ܘܠܵܐ ܐ̄ܢܵܫ ܛܵܫܹ̇ܐ ܠܵܐ ܡ̣ܢ ܢܲܦܫܹܗ ܘܠܵܐ ܡ̣ܢ ܚܲܒܼܪ̈ܵܘܗܝ ܀ 223 :ܒܟܼܠܹܗ ܟܝܵܢܵܐ ܕܲܡܠܝܼܠܘܼܬܼܵܐ ܚܵܐ̇ܲܪ ܐ̄ܢܵܫ 224 ܘܟܼܠ ܒܹܗ ܚܵܐ̇ܲܪ ܒܗܵܘ̇ ܐܸܣܟܹܿܝܡܵܐ ܕܚܵܘܪܵܐ ܕܝܼܠܹܗ ܀ 225 :ܟܠ ܡܸܬܼܒܲܩܸܐ ܒܚܲܕܼ ܒܲܪܢܵܫܵܐ ܚܲܬܿܝܼܬܼܵܐܝܼܬܼ 226 ܘܗܘ̤ ܒܲܪܢܵܫܵܐ ܡ̇ܬܲܚ ܗܵܘܢܹܗ ܨܼܝܕ ܟܠ ܕܲܚܙ̣ܵܝܗܝ ܀ 227 ܠܲܝܬܿ ܒܲܥܒܼܝܼܪܹ̈ܐ ܕܛܵܫܹܐ ܬܲܡ̇ܢ ܡ̣ܢ ܒܲܪ ܙܵܘܓܸܿܗ: pb. 251 228 ܘܠܵܐ ܬܘܼܒܼ ܡܸܢܹܗ ܡܨܸܐ ܡܸܬܿܛܲܫܹܐ ܟܢܵܬܹܗ ܘܚܲܒܼܪܹܗ ܀ 229 :ܠܐܲܪܒܲܥܦܸܢ̈ܝܵܢ ܪܵܗ̇ܛܵܐ ܚܙܵܬܼܵܐ ܩܲܠܝܼܠܵܐܝܼܬܼ 230 ܘܲܡܣܲܝܟܼܵܐ ܠܗܹܝܢ ܠܓܼܵܘ ܡ̣ܢ ܚܵܘܪܵܐ ܕܲܒܼܓܼܵܘ ܓܘܼܫܡܵܐ ܀ 231 :ܐܘܿ ܬܸܕܼܡܘܼܪܬܵܐ ܕܗܵܘܿܝܵܐ ܒܐ̄ܢܵܫܵܐ ܡ̣ܢ ܥܵܒܼ̇ܘܿܕܹܗ 232 ܕܲܡܣܲܝܸܟ ܠܹܗ ܠܪܵܘܡ̇ܐ ܘܥܘܼܡܩܵܐ ܒܲܡܣܲܝܟܼܘܼܬܹܗ ܀ 233 :ܡܣܲܝܸܟ ܟܠܹܗ ܦܲܓܼܪܵܐ ܘܢܲܦܫܵܐ ܒܲܚܕܼܵܐ ܕܘܼܟܵܐ 234 ܘܪܲܚܝܼܩ ܡ̣ܢ ܟܠ ܘܩܲܪܝܼܒܼ ܠܹܗ ܟܠ ܐܲܝܟ ܩܲܪܝܼܒܼܵܐ ܀ 235 :ܒܟܼܠ ܕܘܼܟ ܐܝܼܬܼܵܘܗܝ ܟܲܕܼ ܗܘ̤ ܐܝܼܬܼܵܘܗܝ ܒܲܚܕܼܵܐ ܕܘܼܟܵܐ 236 ܘܗܵܢܵܘ̇ ܬܲܗܪܵܐ ܕܐܝܼܬܼܵܘܗܝ ܨܼܝܕܼ ܟܠ ܘܠܲܝܬܵܘܗܝ ܨܹܝܕܼ ܟܠ ܀ 237 :ܒܐܲܠܵܗܘܼܬܼܵܐ ܡܕܲܡܸܐ ܒܛܲܟܼܣܵܐ ܕܗܵܘܹ̇ܐ ܨܹܐܕܼܵܘܗܝ 238 ܕܐܝܼܬܹܝܗ̇ ܒܟܼܠ ܕܘܼܟ ܘܠܵܐ ܡܸܬܿܕܲܪܟܵܐ ܕܐܲܝܟܲܢ ܐܝܼܬܹܝܗ̇ ܀ 239 :ܒܝܲܕܼ ܣܘܼܥܪ̈ܵܢܹܐ ܫܵܠ̇ܡܵܐ ܨܹܐܕܼܵܘܗܝ ܗܵܒ̇ ܒܲܪܬܼ ܩܵܠܵܐ 240 ܕܨܲܠܡܵܐ ܗ̄ܘ̣ ܐ̄ܢܵܫܵܐ ܕܲܡܬܲܩܢܵܢܹܗ ܘܣܲܓܿܝܼ ܕܵܡܹ̇ܐ ܀ 241 :ܕܵܡܹ̇ܐ ܒܗܵܕܹܐ ܕܲܗܘ̤ܵܐ ܒܟܼܠ ܕܘܼܟ ܟܲܕܼ ܠܵܐ ܐܝܼܬܼܵܘܗܝ 242 ܘܒܼܵܩܹܵܐ ܕܟܲܣ̈ܝܵܢ ܒܓܼܵܘ ܪܸܥܝܵܢܵܐ ܕܝܼܠܹܗ ܘܲܕܼܟܼܠ ܀ 243 :ܐܲܝܟ ܥܵܒܲܘܿܕܼܵܐ ܒܵܚܲ݁ܪ ܥܵܘ̣ܠܵܐ ܕܲܟܼܣܸܐ ܒܢܲܦܫܵܐ 244 ܘܲܒܼܒܼܘܼܚܪܵܢܹܗ ܡܦܲܪܸܫ ܣܲܢܝܵܐ ܡ̣ܢ ܫܲܦܝܼܪܵܐ ܀ 245 :ܡܲܢ̣ܘ ܣܵܦܹ̇ܩ ܕܢܸܬܼܢܸܐ ܒܡܸܠܹ̈ܐ ܪܲܒܿܘܼܬܼ ܕܲܪܓܹܗ 246 ܕܒܲܪ ܕܲܚܝܼܚܵܐ ܕܡܲܡܠܸܟ ܪܸܡܙܹܗ ܥܲܡ ܟܠ ܘܲܒܼܟܼܠ ܀ 247 :ܡܲܢ̣ܘ ܝܵ̇ܕܲܥ ܕܥܲܡ ܪܲܒܿܘܼܬܹܗ ܢܨܘܼܪ ܐܵܦ ܫܸܦܠܹܗ 248 ܕܟܲܕܼ ܐܝܼܬܼ ܡܸܢܹܗ ܕܡܲܡܠܸܟ ܥܲܠ ܟܠ ܐܝܼܬܼ ܕܫܝܼܛ ܡ̣ܢ ܟܠ ܀ 249 :ܡ̣ܿܢ ܠܵܐ ܢܸܬܼܗܲܪ ܒܚܲܕܼ ܦܘܼܪܫܵܢܵܐ ܕܗܵܘܹ̇ܐ ܨܹܐܕܼܵܘܗܝ 250 ܕܡܸܢܹܗ ܒܪܵܘܡ̇ܐ ܘܡܸܢܹܗ ܒܥܘܼܡܩܵܐ ܒܫܘܼܒܼܚܵܐ ܘܨܲܥܪܵܐ ܀ 251 :ܡ̣ܿܢ ܠܵܐ ܢܸܚܕܹܿܐ ܘܡܲܢ ܠܵܐ ܢܲܟܼܪܸܐ ܥܲܠ ܬܲܪ̈ܬܲܝܗܹܝܢ 252 ܡ̇ܐ ܕܡܸܬܼܒܲܩܸܐ ܒܛܘܼܒܹ̈ܐ ܕܛܵܒܹ̈ܐ ܘܢܸܓܼ̈ܕܹܿܐ ܕܒܼܝܼܫܹ̈ܐ ܀ 253 :ܡܲܢ ܠܵܐ ܢܹܐܡܲܪ ܕܪܲܒܿ ܒܲܪܢܵܫܵܐ ܘܫܝܼܛ ܒܲܪܢܵܫܵܐ 254 ܟܲܕܼ ܚܵܙܹ̈ܐ ܠܹܗ ܒܡܲܠܟܿܘܼܬܼ ܪܵܘܡ̇ܐ ܘܲܒܼܓܗܲܢܵܐ ܀ 255 :ܫܘܼܒܼܚܹܗ ܘܨܲܥܪܹܗ ܚܙܹ̇ܝܬܼ ܟܲܕܼ ܨܝܼܪܝܼܢ ܒܕܲܦܵܐ ܕܣܸܦܪܹ̈ܐ 256 ܘܲܚܕܝܼܬܼ ܘܐܲܟܼܪܝܼܬܼ ܥܲܠ ܫܝܼܛܘܼܬܹܗ ܘܥܲܠ ܪܘܼܡܪܵܡܹܗ ܀ 257 ܒܬܲܪܬܹܿܝܢ ܕܸܡ̈ܘܵܢ ܨܵܪܹܗ ܪܡܙܵܐ ܠܝܘܼܩܢܵܐ ܕܨܲܠܡܹܗ. 258 ܘܐܲܠܦܹܗ ܕܢܸܗܪܘܿܓܼ ܒܲܫܒܼܝܼ̈ܚܵܬܹܗ ܘܒܲܫܟܼܝܼܪ̈ܵܬܹܗ ܀ 259 :ܒܦܸܠ̄ܐܬܼܵܐ ܓܠ̣ܵܐ ܠܲܢ ܥܲܠ ܦܘܼܪܫܵܢܵܐ ܕܗܵܘܹ̇ܐ ܠܚܲܪܬܼܵܐ 260 ܕܢܸܗܘܸܐ ܪܵܢܹ̇ܐ ܠܡܸܦܪܲܫ ܫܲܦܝܼܪ ܩܕܼܵܡ ܗܵܘ̇ ܝܵܘܡ̇ܐ ܀ pb. 252 261 :ܒܲܒܼܬܼܘܼ̈ܠܵܬܼܵܐ ܐܲܠܦܹܗ ܪܲܗܛܵܐ ܕܙܲܕܿܝܼܩܘܼܬܼܵܐ 262 ܕܢܸܗܘܸܐ ܦܵܠ̇ܲܚ ܕܲܟܼܝܘܼܬܼ ܢܲܦܫܵܐ ܕܠܵܐ ܒܘܼܣܪܵܢܵܐ ܀ 263 :ܒܝܲܕܼ ܦܸܠܐܬܼܵܐ ܕܪܲܫ̣ ܠܹܗ ܐܘܼܪܚܵܐ ܕܥܲܡܠܹ̈ܐ ܫܒܼܝܼܚܹ̈ܐ 264 ܕܢܸܪܕܹܿܐ ܫܲܦܝܼܪ ܠܘܲܥܕܵܐ ܕܚܲܝܹ̈ܐ ܠܘܵܬܼ ܫܘܼܠܵܡܵܐ ܀ 265 :ܒܚܲܟܿܝܼ̈ܡܵܬܼܵܐ ܠܲܒܿܒܹܗ ܒܣܲܒܼܪܵܐ ܕܡܲܠܟܿܘܼܬܼ ܪܵܘܡ̇ܐ 266 ܘܲܒܼܣܲܟܼ̈ܠܵܬܼܵܐ ܣܲܪܕܹܗ ܒܫܸܡܥܵܐ ܩܲܫܝܵܐ ܀ 267 :ܒܲܒܼܬܼܘܼܠܲܝ̈ܗܘܿܢ ܐܲܟܼܪܸܙ ܕܲܡܨܸܐ ܠܡܸܚܵܐ ܒܕܲܟܼܝܘܼ 268 ܘܲܒܼܥܲܡܠܲܝ̈ܗܹܝܢ ܚܵܘܝܼ ܕܲܩܢܹܐ ܚܹܐܪܘܼܬܼ ܢܲܦܫܵܐ ܀ 269 :ܒܕܲܢܣ݂ܲܒܼ ܡܸܫܚܵܐ ܚܵܘܝܼ ܕܐܼܝܼܬܼ ܠܹܗ ܝܲܨܪܵܐ ܕܚܵܐܹ̇ܢ 270 ܘܒܲܕܼܠܵܐ ܢܣ݂ܲܒܼ ܗ̣̄ܘܲܝ̈ ܓܠ̣ܵܐ ܕܚܲܪܡܘܼܬܹܗ ܠܵܘ ܕܲܩܛܝܼܪܵܐ ܗ̄ܝܼ ܀ 271 :ܥܲܠ ܚܹܐܪܘܼܬܹܗ ܓܠ̣ܵܐ ܠܲܡܦܹܝܕܹ̈ܐ ܕܲܕܠܸܩܘ ܘܲܕܥܸܟܼܘ 272 ܕܐܸܠܘܼ ܫܦ݂ܲܪ ܠܹܗ ܡܨܸܐ ܗ̄ܘ̣ܵܐ ܕܢܲܕܼܠܸܩ ܠܥܸܣܪ̈ܵܬܲܝܗܹܝܢ ܀ 273 :ܗܵܘ̇ ܨܸܒܼܝܵܢܵܐ ܕܐܲܕܠܸܩ ܚܲܡܫܵܐ ܒܡܸܫܚܵܐ ܕܪ̈ܲܚܡܹܐ 274 ܕܠܝܼܠܵܐ ܗ̄ܘ̣ܵܬܼ ܠܹܗ ܕܢܲܕܼܠܸܩ ܚܲܡܫܵܐ ܐܲܝܟ ܕܲܠܚܲܡܫܵܐ ܀ 275 :ܚܲܕܼ ܗ̄ܘ̣ ܝܲܨܪܵܐ ܕܚܲܟܿܝܼ̈ܡܵܬܼܵܐ ܘܲܕܼܣܲܟܼ̈ܠܵܬܼܵܐ 276 ܘܐܸܠܘܼ ܫܦ݂ܲܪ ܠܹܗ ܟܠܹܗ ܒܟܼܠܹܗ ܡܸܬܼܚܲܟܲܡ ܗ̄ܘ̣ܵܐ ܀ 277 :ܒܕܿܣܕ݂ܲܩ ܢܲܦܫܹܗ ܒܠܵܐ ܚܵܘܣܵܢܵܐ ܕܥܲܠ ܩܲܪ̈ܝܼܒܼܵܘܗܝ 278 ܐܵܘܕܲܥ ܕܐܝܼܬܼ ܠܹܗ ܬܲܪܬܹܿܝܢ ܒܲܚܕܵܐ ܛܵܒܼܬܼܵܐ ܘܒܼܝܼܫܬܵܐ ܀ 279 :ܒܕܲܫܐܸ݂ܠ ܡܸܫܚܵܐ ܦܲܟܿܝܼ̈ܗܵܬܼܵܐ ܡ̣ܢ ܬܲܩ̈ܢܵܬܼܵܐ 280 ܗܘ̤ ܠܹܗ ܐܲܟܸܿܣ ܕܙܲܕܸܿܩ ܗܘ̤ ܠܹܗ ܠܡܸܚܲܢ ܚܲܒܼܪ̈ܵܘܗܝ ܀ 281 :ܕܠܵܐ ܨܒܲܝ̈ ܐܲܫܐܸܠ ܚܲܟܿܝܼ̈ܡܵܬܼܵܐ ܠܠܵܐ ܪ̈ܲܕܼܝܼܵܬܼܵܐ 282 ܠܚܲܪܡܘܼܬܼ ܢܲܦܫܵܐ ܕܲܕܠܵܐ ܪ̈ܲܚܡܹܐ ܒܣ݂ܲܪ ܓܲܠܝܵܐܝܼܬܼ ܀ 283 :ܕܐܸܡܲܪ̈ܲܝܢ ܠܗܹܝܢ ܙܸܠܝܹ̈ܢ ܙܒܸܢܹܝ̈ܢ ܡ̣ܢ ܕܲܡܙܲܒܿܢܝܼܢ 284 ܟܵܐܬܼܵܐ ܗ̄ܝܼ ܟܠܵܗ̇ ܕܥܲܠ ܡ̇ܢ ܠܵܐ ܦܠ݂ܲܚ ܒܙܲܒܼܢܵܐ ܕܲܥܒ݂ܲܪ ܀ 285 :ܡܨܸܐ ܗ̄ܘ̣ ܟܠ ܒܲܪܢܵܫ ܠܡܸܦܠܲܚ ܫܲܦܝܼܪ ܟܡܵܐ ܕܥܲܠ ܐܲܪܥܵܐ ܗ̄ܘ̣ 286 ܘܲܕܼܠܝܼܠܵܐ ܠܹܗ ܠܡܸܡܛܵܐ ܠܕܲܪܓܼܵܐ ܕܲܓܼܡܝܼܪܘܼܬܼܵܐ ܀ 287 :ܕܠܵܐ ܦܠ݂ܲܚ ܗܵܪܟܵܐ ܚܘܼܒܵܢܵܐܝܼܬܼ ܐܲܝܟ ܡ̇ܐ ܕܲܦܠܸܐ 288 ܚ̣ܫܟܼܘ ܢܲܗܝܼܪܹ̈ܐ ܕܠܲܡܦܹܝܕܲܝ̈ܗܹܝܢ ܒܝܘܿܡ ܡܸܫܬܿܘܼܬܼܵܐ ܀ 289 :ܕܠܵܐ ܐܲܣܪܲܚ ܗ̣̄ܘܲܝ̈ ܡ̣ܢ ܥܲܡܠܲܝ̈ܗܹܝܢ ܠܐܲܝܢܵܐ ܕܲܣܢܝܼܩ 290 ܟܠ݂ܲܝ̈ ܐܵܦ ܡܸܢܗܹܝܢ ܚܲܟܿܝܼ̈ܡܵܬܼܵܐ ܙܸܕܼܩܵܐ ܕܡܸܫܚܵܐ ܀ 291 :ܕܠܵܐ ܨܵܬܼ ܩܵܠܵܐ ܕܐܲܝܠܹܝܢ ܕܐܲܦܝܼܣܘ ܥܲܠ ܫܘܼܒܼܩܵܢܵܐ 292 ܫ̣ܡܲܥ ܒܲܪܬܼ ܩܵܠܵܐ ܕܠܵܐ ܝܵܕܲܥ̇ܢܵܐ ܠܥܲܡܠܹ̈ܐ ܕܲܒܼܟܹܝܢ ܀ pb. 253 293 :ܕܐܸܚܲܕܼ ܬܲܪܥܵܐ ܕܡܸܠܲܬܼ ܦܘܼܡ̇ܐ ܩܕܼܵܡ ܝܵܠܘܿܦܹ̈ܐ 294 ܐܸܬܿܬܿܚܸܕܼ ܬܲܪܥܵܐ ܕܒܹܝܬܼ ܡܲܠܟܿܘܼܬܼܵܐ ܩܕܼܵܡ ܫܸܐ̈ܠܵܬܼܗܹܝܢ ܀ 295 :ܕܢܲܟܼܪܝܼ ܚܘܼܒܿܗܹܝܢ ܡ̣ܢ ܥܸܢܝܵܢܵܐ ܕܝܼܘܼܬܼܪܵܢ ܐ̄ܢܵܫܵܐ 296 ܠܵܐ ܨܒܼܵܐ ܡܲܠܟܵܐ ܕܢܲܫܘܸܐ ܐܸܢܹܝܢ ܠܥܸܢܝܵܢ ܚܘܼܒܹܿܗ ܀ 297 :ܚܘܼܒܼܠܹ̈ܐ ܕܐܲܪܡܝܼ ܦܸܪܥܲܬ̤ ܐܸܢܹܝܢ ܐܵܦ ܟܹܐܢܘܼܬܼܵܐ 298 ܘܲܒܼܗܵܘ̇ ܟܲܝܠܵܐ ܕܣܘܿܥܪ̈ܵܢܲܝܗܹܝܢ ܫܩ݂ܲܠ ܦܘܼܪܥܵܢܵܐ ܀ 299 :ܗܸܢܹܝܢ ܚܲܝܸܒܼ ܠܲܩܢܘܿܡܲܝ̈ܗܹܝܢ ܩܕܼܵܡ ܕܲܝܢܵܐ 300 ܘܒܼܐܵܦܵܦܵܣܝܼܣ ܕܚܘܼܫܵܒܲܝ̈ܗܹܝܢ ܦܣ݂ܲܩ ܥܲܡܠܲܝ̈ܗܹܝܢ ܀ 301 :ܠܵܘ ܕܲܝܵܢܵܐ ܛܠ݂ܲܡ ܥܲܡܠܲܝ̈ܗܹܝܢ ܡ̣ܢ ܦܘܼܪܥܵܢܵܐ 302 ܗܸܢܹܝܢ ܠܵܐ ܨܒܲܝ̈ ܠܡܸܦܪܲܥ ܚܘܼܒܹܿܗ ܚܲܟܿܝܼܡܵܐܝܼܬܼ ܀ 303 :ܠܵܘ ܟܹܐܢܘܼܬܼܵܐ ܬܲܪܥܵܐ ܩܕܼܵܡ ܐܲܦܲܝ̈ܗܹܝܢ 304 ܗܸܢܹܝܢ ܐܲܚܕ̣ܵܝ̈ܗܝ ܒܲܕܼܠܵܐ ܦܬ݂ܲܚ ܗ̣̄ܘܲܝ̈ ܚܘܼܒܿܗܹܝܢ ܠܲܐ̄ܚܪܹܝܢ ܀ 305 :ܐܸܠܘܼ ܦܬ݂ܲܚ ܗ̣̄ܘܲܝ̈ ܬܪܲܥ ܨܸܒܼܝܵܗܹܝܢ ܩܕܼܵܡ ܕܲܣܢܝܼܩܝܼܢ 306 ܐܵܦܠܵܐ ܚܲܬܼܢܵܐ ܟܵܠܹ̇ܐ ܗ̄ܘ̣ܵܐ ܠܗܹܝܢ ܠܒܲܪ ܡ̣ܢ ܬܲܪܥܵܐ ܀ 307 :ܐܸܠܘܼ ܡ̣ܫܲܚ ܗ̣̄ܘܲܝ̈ ܒܡܸܫܚܵܐ ܕܡܸܠܬܼܵܐ ܠܡܲܪ̈ܥܹܐ ܕܥܵܘ̣ܠܵܐ 308 ܠܵܐ ܚܵܣܲ݁ܪ ܗ̄ܘ̣ܵܐ ܡܸܫܚܵܐ ܕܪ̈ܲܚܡܹܐ ܒܠܲܡܦܹܝܕܲܝ̈ܗܹܝܢ ܀ 309 :ܐܸܠܵܘܼ ܐܲܫܦܲܥ ܚܘܼܒܵܐ ܕܲܒܼܗܹܝܢ ܥܲܠ ܕܐܲܠܝܼܨܝܼܢ 310 ܡܸܫܬܲܦ̈ܥܵܢ ܗ̣̄ܘܲܝ̈ ܐܵܦ ܚܲܒܼܪ̈ܵܬܼܗܹܝܢ ܠܡܸܝܲܝܢ ܐܸܢܹܝܢ ܀ 311 :ܗܸܢܹܝܢ ܣܵܓܼ̈ܗ̇ ܠܐܘܼܪܚܵܐ ܕܪ̈ܲܚܡܹܐ ܩܕܼܵܡ ܐܲܦܲܝ̈ܗܹܝܢ 312 ܘܠܵܐ ܣܦܲܩ ܗܲܠܸܟ ܒܣܘܼܥܪ̈ܵܢܲܝܗܹܝܢ ܥܲܡ ܬܲܩ̈ܢܵܬܼܵܐ ܀ 313 :ܡܸܢܗܹܝܢ ܢܹܐܠܲܦ ܥܲܠ ܕܘܼܒܵܪܵܐ ܕܚܲܝܹ̈ܐ ܕܲܬܼܢܵܢ 314 ܘܲܒܼܦܘܼܪܥܵܢܗܹܝܢ ܢܨܘܼܪ ܦܘܼܪܥܵܢܵܐ ܕܕܼܝܼܢܵܐ ܕܲܠܗܲܠ ܀ 315 :ܡܸܛܠܵܬܲܢ ܟܼܬܲܒܼ ܦܸܠܐܬܼܵܐ ܕܕܘܼܒܵܪ̈ܲܝܗܹܝܢ 316 ܘܲܠܝܘܼܠܦܵܢܲܢ ܪܵܗ̇ܛܵܐ ܒܚܘܼܩܹ̈ܐ ܐܲܝܟ ܗܵܘ̇ ܕܐܝܼܬܹܝܗ̇ ܀ 317 :ܠܵܘ ܕܠܵܐ ܐܝܼܬܹܝܗ̇ ܐܸܡ̇ܪܹܬܼ ܗܵܕܹܐ ܕܐܲܝܟ ܗܵܘ̇ ܕܐܝܼܬܹܝܗ̇ 318 ܐܸܠܵܐ ܕܠܲܝܬܹܿܝܗ̇ ܒܝܲܕܼ ܣܘܼܥܪ̈ܵܢܹܐ ܐܲܝܟ ܕܲܟܼܬܼܝܼܒܼܵܐ ܀ 319 :ܠܵܐ ܗ̄ܘ̣ܵܐ ܡܸܗܘܵܐ ܗܘ̤ܵܬܼ ܒܲܥܒܼܵܕܼܵܐ ܠܦܘܼܬܼ ܕܐܵܬܼܡܲܠܠܲܬ̤ 320 ܐܸܠܵܐ ܕܡܸܗܘܵܐ ܥܬܼܝܼܕܼܵܐ ܕܬܸܗܘܸܐ ܕܠܵܐ ܦܘܼܠܵܓܼܵܐ ܀ 321 :ܦܸܠܐܬܼܵܐ ܗ̄ܝܼ ܓܹܝܪ ܟܡܵܐ ܐܸܢ ܐܝܼܬܼ ܠܵܗ̇ ܕܘܼܡܝܵܐ ܕܩܘܼܫܬܵܐ 322 ܘܥܲܠ ܣܘܼܥܪ̈ܵܢܹܐ ܕܒܼܵܬܲܪ ܙܲܒܼܢܵܐ ܡܕܲܡܝܵܐ ܒܕܼܘܼܡܝܵܗ̇ ܀ 323 :ܠܛܸܠܵܢܝܼܬܼܵܐ ܕܵܡ̇ܝܵܐ ܒܪܲܗܛܵܐ ܕܩܲܠܝܼܠܘܼܬܼܵܗ̇ 324 ܘܐܲܝܟ ܕܲܠܓܼܘܼܫܡܵܐ ܡܚܵܘܝܵܐ ܫܪܵܪܵܐ ܕܲܒܼܣܘܼܥܪ̈ܵܢܹܐ ܀ 325 :ܩܕܼܵܡ ܣܘܼܥܪ̈ܵܢܹܐ ܡܥܵܕܼܵܐ ܕܬܸܪܗܲܛ ܒܲܟܼܬܼܝܼ̈ܒܼܵܬܼܵܗ̇ 326 ܘܩܵܕܼ̇ܡ̇ܐ ܡܸܕܹܿܡ ܕܲܥܬܼܝܼܕܼ ܠܡܸܗܘܵܐ ܒܚܲܪܬܼܵܐ ܀ pb. 254 327 :ܪ̈ܲܚܝܼܩܵܬܼܵܐ ܡܚܵܘܝܵܐ ܒܩܘܼܪܒܵܐ ܠܲܕܼܚܵܐܲܪ ܒܵܗ̇ 328 ܘܟܲܕܼ ܪ̈ܲܚܝܼܩܵܢ ܡܸܫܬܲܥܝܵܐ ܠܗܹܝܢ ܩܲܪܝܼܒܼܵܐܝܼܬܼ ܀ 329 :ܐܲܝܟ ܨܲܝܵܪܵܐ ܨܵܝ̇ܪܵܐ ܡܸܠܹ̈ܐ ܕܠܵܐ ܣܘܼܥܪ̈ܵܢܹܐ 330 ܘܲܡܕܲܡܝܵܐ ܠܗܹܝܢ ܒܗܵܘ̇ ܐܸܣܟܹܿܡܵܐ ܕܨܲܠܡܵܐ ܘܝܘܼܩܢܵܐ ܀ 331 :ܠܨܲܠܡܵܐ ܕܵܡ̇ܝܵܐ ܦܸܠ̄ܐܬܼܵܐ ܕܨܝܼܪܵܐ ܒܲܒܼ̈ܬܼܘܼܠܵܬܼܵܐ 332 ܘܲܟܼܝܵܢ ܐ̄ܢܵܫܵܐ ܘܕܼܘܼܒܵܪ ܚܲܝܵܘ̈ܗܝ ܡܸܬܼܒܲܕܲܩ ܒܵܗ̇ ܀ 333 :ܒܵܗ̇ ܡܸܬܼܟܲܪܙܵܐ ܪܲܒܿܘܼܬܼ ܚܘܼܒܵܐ ܕܕܲܟܼܝܲܝ̈ ܢܲܦܫܵܐ 334 ܘܒܼܵܗ̇ ܡܸܬܼܒܲܣܪܵܐ ܚܲܪܡ̇ܢܘܼܬܼܵܐ ܕܠܵܐ ܪ̈ܲܚܡܵܢܹܐ ܀ 335 :ܠܕܲܟܼܝܲܝ̈ ܢܲܦܫܵܐ ܩܪܵܬ̤ ܚܲܟܿܝܼܡܹ̈ܐ ܘܩܲܢܝܲܝ̈ ܡܸܫܚܵܐ 336 ܘܲܠܚܲܪ̈ܡܵܢܹܐ ܟܲܢܝܲܬ̤ ܣܲܟܼܠܹ̈ܐ ܘܙܵܒܼܢܲܝ̈ ܡܸܫܚܵܐ ܀ 337 :ܡܸܫܚܵܐ ܪ̈ܲܚܡܹܐ ܗ̄ܘ̣ ܕܲܡܙܲܒܿܢܝܼܢ ܠܹܗ ܡܲܠܝܲܝ̈ ܪ̈ܲܚܡܹܐ 338 ܘܲܕܼܠܵܐ ܙܲܒܸܿܢ ܙܲܒܼܢܵܐ ܚܵܘܝܼ ܕܠܵܐ ܡܸܙܕܲܒܲܢ ܀ 339 :ܙܲܒܼܢܵܐ ܝ̄ܕܼܝܼܥܵܐ ܐܵܘܕܲܥ ܕܐܝܼܬܼ ܠܹܗ ܐܵܦ ܠܹܗ ܠܙܒܼܢܵܐ 340 ܕܐܸܠܵܐ ܒܙܲܒܼܢܹܗ ܠܵܐ ܡܸܙܕܲܒܲܢ ܡ̣ܢ ܚܲܕܼ ܠܲܐ̄ܚܪܹܝܢ ܀ 341 :ܒܥܵܠܡܵܐ ܥܡܝܼܠܵܐ ܐܝܼܬܼ ܠܹܗ ܠܙܒܼܢܵܐ ܠܡܸܙܕܲܒܵܢܘܼ 342 ܒܗܵܘ̇ ܕܹܝܢ ܕܲܥܬܼܝܼܕܼ ܒܵܛܹ̇ܠ ܙܸܒܼܢܵܐ ܥܲܡ ܙܘܼܒܵܢܵܐ ܀ 343 :ܒܗܵܢ ܐܸܣܟܹܿܡܑܵ ܠܵܐ ܙܲܒܸܿܢ ܗ̣̄ܘܲܝ̈ ܚܲܟܿܝܼ̈ܡܵܬܼܵܐ 344 ܕܠܵܐ ܢܸܬܿܕܼܵܘܲܕܼ ܛܲܟܼܣܵܐ ܪܲܒܵܐ ܕܗܵܘ̇ ܬܘܼܩܵܢܵܐ ܀ 345 :ܒܛܲܟܼܣܵܐ ܡܛܲܟܿܣܝܼܢ ܥܵܠܡܹ̈ܐ ܬܪ̈ܲܝܗܘܿܢ ܥܵܢܵܐ ܐܵܦ ܗܵܘ̇ 346 ܘܚܲܟܿܝܼܡܑܵܐܝܼܬܼ ܪܵܕܹܝܢ ܛܲܟܼܣܹ̈ܐ ܒܛܘܼܟܵܣܲܝ̈ܗܘܿܢ ܀ 347 :ܥܵܠܡܵܐ ܕܙܲܒܼܢܵܐ ܠܙ̣ܒܼܢܵܐ ܥܵܗܹ̇ܢ ܘܲܠܙܘܼܒܵܢܵܐ 348 ܘܗܵܘ̇ ܕܲܠܥܵܠܲܡ ܠܢܵܘܚܵܐ ܘܫܸܠܝܵܐ ܘܲܠܒܼܘܼܣܵܡܵܐ ܀ 349 :ܬܵܘ ܙܵܒܼܘܿܢܹ̈ܐ ܘܲܡܙܲܒܿܢܵܢܹ̈ܐܐ ܙܒܲܢܘ ܐܵܦ ܙܲܒܸܿܢܘ 350 ܒܥܵܠܡܵܐ ܕܝܼܗܝܼܒܼ ܠܡܸܙܒܲܢ ܙܸܒܼܢܵܐ ܘܠܲܡܙܲܒܵܢܘܼ ܀ 351 :ܠܵܐ ܐ̄ܢܵܫ ܢܸܫܪܸܐ ܛܲܟܼܣܵܐ ܪܲܒܵܐ ܕܲܬܼܪܹܝܢ ܥܵܠܡܹ̈ܐ 352 ܘܲܢܦܘܼܫ ܗܵܪܟܵܐ ܡ̣ܢ ܕܲܠܡܸܙܒܲܢ ܘܢܸܙܒܸܿܢ ܬܲܡ̇ܢ ܀ 353 :ܠܒܹܝܬܼ ܡܲܠܟܿܘܼܬܼܵܐ ܠܵܐ ܐ̄ܢܵܫ ܫܲܠܝܼܛ ܕܢܲܥܸܠ ܙܸܒܼܢܵܐ 354 ܘܐܸܢ ܗܘ̤ ܕܡܲܡܪܲܚ ܡܲܪܵܚܘܼܬܹܗ ܥܠܵܘܗܝ ܡܸܬܼܗܲܦܟܵܐ ܀ 355 :ܘܐܸܢ ܫܵܝܘܿܛܵܐ ܕܡܲܠܟܿܘܼܬܼ ܙܲܒܼܢܵܐ ܕܝܼܢܵܐ ܡܩܲܒܸܿܠ 356 ܟܡܵܐ ܥܦܝܼܦ ܕܝܼܢܹܗ ܕܐܲܝܢܵܐ ܕܲܡܫܝܼܛ ܠܡܲܠܟܿܘܼܬܼ ܪܵܘܡ̇ܐ ܀ 357 :ܒܪܵܘܡ̇ܐ ܗܵܘ̇ܝܵܐ ܗܵܝ̇ ܡܲܠܟܿܘܼܬܼܵܐ ܕܠܵܐ ܡܸܫܬܲܪܝܵܐ 358 ܘܠܲܝܬܿ ܒܵܗ̇ ܐܲܬܼܪܵܐ ܠܡܸܬܼܗܲܦܵܟܼܘܼ ܐܲܪܥܵܢܵܐܝܼܬܼ ܀ 359 :ܠܵܐ ܫܲܠܝܼܛܝܼܢ ܐܲܪ̈ܥܵܢܵܝܹܐ ܠܡܸܥܲܠ ܠܬܲܡ̇ܢ 360 ܟܲܕܼ ܐܝܼܬܼ ܥܲܡܗܘܿܢ ܡܲܣܒܼܵܐ ܘܡܲܬܿܠܵܐ ܕܐܲܪ̈ܥܵܢܵܝܹܐ ܀ 361 :ܒܲܒܼܬܼܘܼ̈ܠܵܬܼܵܐ ܚܲܡܸܫ ܕܲܟܼܠ̣ܵܐ ܡ̣ܢ ܕܲܐܡܸܥܲܠ 362 ܬܲܚܸܡ ܘܲܟܼܠ̣ܵܐ ܠܟܼܠ ܡܲܢ ܕܓܼܠܝܼܙ ܡ̣ܢ ܚܵܘܣܵܢܵܐ ܀ 363 :ܕܠܵܐ ܝܲܗ̣̄ܒܼ ܐܲܓܼܪܵܐ ܠܥܲܡܠܹ̈ܐ ܫܚܝܼܩܹ̈ܐ ܕܲܒܼܬܼܘܼܠܲܝ̈ܗܹܝܢ 364 ܚܵܘܝܼ ܕܡܲܣܠܲܝ ܟܠ ܕܘܼܒܵܪܵܐ ܕܠܵܘ ܡ̣ܢ ܚܘܼܒܵܐ ܗ̄ܘ̣ ܀ pb. 255 365 :ܒܬܼܘܼ̈ܠܵܬܼܵܐ ܗ̣̄ܘܲܝ̈ ܘܫܲܪܝܼܪܝܼܢ ܗ̄ܘ̣ܵܘ ܕܘܼܒܵܪ̈ܲܝܗܹܝܢ 366 ܘܲܕܼܠܵܐ ܐܵܘܬܲܪ ܡ̣ܢ ܥܲܡܠܲܝ̈ܗܹܝܢ ܗܘ̤ܵܘ ܚܲܣܝܼܪܹ̈ܐ ܀ 367 :ܕܠܵܐ ܝܘܼܬܼܪܵܢܵܐ ܗܘ̤ܵܘ ܕܘܼܒܵܪܹ̈ܐ ܠܩܲܢܵܝܲܝ̈ܗܘܿܢ 368 ܕܠܵܐ ܝܲܗ̣̄ܒܼܘ ܡܸܢܗܘܿܢ ܠܵܐ ܢܣ݂ܲܒܼܘ ܐܲܓܼܪܵܐ ܕܣܘܼܟܵܝܲܝ̈ܗܘܿܢ ܀ 369 :ܒܬܸܢܘܲܝ ܕܐܲܓܼܪܵܐ ܣܲܝܒܲܪ ܩܹܐܪܣܵܐ ܕܲܪ̈ܓܼܝܼܓܼܵܬܼܵܐ 370 ܘܠܵܐ ܚܢܲܝ̈ ܫܲܦܝܼܪ ܠܘܵܬܼ ܗܵܘ̇ ܢܝܼܫܵܐ ܕܡ̇ܪܹܐ ܐܲܓܼܪܵܐ ܀ 371 :ܢܝܼܫܵܐ ܪܚܝܼܡܵܐ ܚܵܘܝܼ ܐܸܢܹܝܢ ܕܢܸܬܿܕܲܡ̈ܝܵܢ ܠܹܗ 372 ܘܲܕܼܠܵܐ ܕܲܡܝܼ ܟܠ̣ܵܝܗܝ ܠܲܟܼܠܝܼܠܵܐ ܡ̣ܢ ܪ̈ܫܲܝܗܹܝܢ ܀ 373 :ܟܠܝܼܠ ܙܵܟܼܘܼܬܼܵܐ ܡܸܬܼܚܲܦ̈ܛܵܢ ܗ̣̄ܘܲܝ̈ ܠܡܸܣܲܒܼ ܡܸܢܹܗ 374 ܘܟܲܐܲܪ ܐܸܢܹܝܢ ܠܥܹܝܢ ܡܲܠܲܐܟܹ̈ܐ ܘܲܒܼܢܲܝ̈ܢܵܫܵܐ ܀ 375 :ܐܘܿ ܟܡܵܐ ܒܝܼܫܵܐ ܒܝܼܫܘܼܬܼ ܝܲܨܪܵܐ ܕܠܵܐ ܡܸܬܼܪܲܚܲܡ 376 ܕܥܵܒܹ̇ܕܼ ܥܲܡܠܹ̈ܐ ܐܲܝܟ ܠܵܐ ܥܲܡܠܹ̈ܐ ܒܝܼܘܡ ܦܘܼܪܥܵܢܵܐ ܀ 377 :ܐܘܿ ܟܡܵܐ ܣܲܝܢܵܐ ܕܐ̄ܢܵܫ ܠܵܐ ܢܫܵܘܬܸܿܦ ܐ̄ܢܵܫܵܐ ܒܛܘܼܒܹܗ 378 ܕܐܵܦ ܟܲܕܼ ܐܝܼܬܼ ܠܹܗ ܛܘܼܒܹ̈ܐ ܢܲܦܫܹܵܗ ܓܠܝܼܙ ܡ̣ܢ ܛܘܼܒܹ̈ܐ ܀ 379 :ܐܘܿ ܟܡܵܐ ܣܲܟܼܠܵܐ ܕܐ̄ܢܵܫ ܠܲܩܢܘܿܡܹܗ ܢܵܘܬܲܪ ܒܲܠܚܘܕܼ 380 ܕܥܵܠܡܵܐ ܟܠܹܗ ܐܸܢܗܘ̤ ܕܩܵܢܹ̇ܐ ܠܵܐ ܩܢܸܐ ܡܸܕܹܿܡ ܀ 381 :ܠܵܐ ܩܢܸܐ ܡܸܕܸܿܡ ܐܲܝܢܵܐ ܕܩܵܢܹܐ ܩܢܘܿܡܹܗ ܒܲܠܚܘܿܕܼ 382 ܒܗܵܝ̇ ܕܲܩܢܘܿܡܹܗ ܠܵܐ ܡܸܬܼܩܲܝܲܡ ܕܠܵܐ ܣܲܓܿܝܼ̈ܐܹܐ ܀ 383 :ܕܠܵܐ ܗܲܕܵܡܹ̈ܐ ܠܵܐ ܡܸܬܼܩܲܝܵܐ ܢܲܦ̰ܫܵܐ ܒܦܲܓܼܪܵܐ 384 ܘܠܵܐ ܦܘܼܪܥܵܢܵܐ ܕܥܲܡܠܹ̈ܝܗ̇ ܢܵܣ̇ܒܵܐ ܒܸܠܥܵܕܲܝܗܹܝܢ ܀ 385 :ܣܢܝܼܩܵܐ ܗ̄ܝܼ ܢܲܦܫܵܐ ܥܲܠ ܗܲܕܵܡܹ̈ܐ ܟܡܵܐ ܕܐܸܢ ܢܲܦܫܵܐ ܗ̄ܝܼ 386 ܡ̇ܕܹܝܢ ܝܲܬܝܼܪ ܣܢܝܼܩ ܒܲܪܢܵܫܵܐ ܥܲܠ ܒܲܪܢܵܫܵܐ ܀ 387 :ܐ̄ܢܵܫܵܐ ܒܐ̄ܢܵܫܵܐ ܓܵܡܲ݁ܪ ܪܲܗܛܵܐ ܕܙܲܕܲܝܼܩܘܼܬܹܗ 388 ܘܐܸܢ ܡܸܙܕܲܕܲܩ ܒܸܠܥܵܕܼ ܐ̄ܢܵܫܵܐ ܠܵܘ ܒܲܪܢܵܫܵܐ ܗ̄ܘ̣ ܀ 389 :ܠܵܐ ܡܨܸܐ ܐ̄ܢܵܫܵܐ ܕܢܸܗܘܸܐ ܐ̄ܢܵܫܵܐ ܒܸܠܥܵܕܼ ܐ̄ܢܵܫܵܐ 390 ܘܐܵܦ ܟܹܐܢܘܼܬܹܗ ܕܒܸܠܥܵܕܼ ܐ̄ܢܵܫܵܐ ܠܵܘ ܟܹܐܢܘܼܬܼܵܐ ܗ̄ܝܼ ܀ 391 :ܒܵܥܹ̇ܝܬܿ ܕܬܸܗܘܸܐ ܟܹܐܢܵܐ ܘܛܵܒܼܵܐ ܐܘܿ ܒܲܪܢܵܫܵܐ 392 ܣܥܘܿܪ ܨܹܝܕ ܝܲܒܼܪܵܟ ܗܵܝ̇ ܕܲܥܬܼܝܼܕܼ ܐܲܢ̄ܬܿ ܕܬܸܗܘܸܐ ܨܹܐܕܲܝܟ ܀ 393 :ܨܵܒܹ̇ܝܬܿ ܕܬܸܣܲܒܼ ܐܲܓܼܪܵܐ ܕܥܲܠܲܝ̈ܟ ܒܝܘܿܡ ܦܘܼܪܥܵܢܵܐ 394 ܦܪܘܿܥ ܠܲܟܼܢܵܬܼܵܟ ܚܵܘܒܲܬܼ ܚܘܼܒܵܐ ܘܗܵܐ ܡܸܬܼܦܲܪܥܲܬܿ ܀ 395 :ܪܓܼܝܼܓܼ ܐܲܢ̄ܬܿ ܠܡܹܐܪܲܥ ܚܲܬܼܢܵܐ ܕܪܵܘܡ̇ܐ ܒܢܲܚ̈ܬܹܿܐ ܕܢܘܼܗܪܵܐ 396 ܐܲܢܗܲܪ ܐܲܦܲܝ̈ܟ ܠܘܼܩܒܲܠ ܚܲܒܼܪܵܟ ܘܗܵܐ ܩܲܒܸܿܠܬܵܝܗܝ ܀ 397 :ܡܢܵܚܲܬܿ ܕܬܸܥܘܿܠ ܥܲܡ ܚܲܟܿܝܼܡܹ̈ܐ ܠܗܵܘ̇ ܒܘܼܣܵܡܵܐ 398 ܚܲܟܸܿܡ ܣܲܟܼܠܵܐ ܘܗܵܐ ܥܵܐܹ̇ܠ ܐܲܢ̄ܬܿ ܒܪܹܫ ܚܲܟܼܝܼܡܹ̈ܐ ܀ 399 ܠܵܐ ܐ̄ܢܵܫ ܥܵܐܹ̇ܠ ܥܕܲܡ̇ܐ ܕܡܲܥܸܠ ܥܲܡܹܗ ܠܲܐ̄ܚܪܹܝܢ: pb. 256 400 ܕܗܵܟܲܢ ܬܵܒܲܥ̇ ܗܵܘ̇ ܬܘܼܩܵܢܵܐ ܠܲܕܼܥܵܐܹ̇ܠ ܠܹܗ ܀ 401 :ܐܝܼܬܼ ܐ̄ܢܵܫ ܥܲܡܵܟ ܡܫܲܐܸܠ ܬܵܪܥܵܐ ܠܐܲܝܢܵܐ ܕܥܵܐܹ̇ܠ 402 ܘܐܸܢ ܐܝܼܬܼ ܥܵܐܹ̇ܠ ܘܐܸܢ ܠܲܝܬܿ ܦܵܐܹ̇ܫ ܠܒܲܪ ܡ̣ܢ ܬܲܪܥܵܐ ܀ 403 :ܬܵܘ ܥܵܠܘܼܠܹ̈ܐ ܕܲܪܓܼܝܼܓܼܵܘ ܠܗܘܿܢ ܗܵܝ̇ ܡܲܥܲܠܬܵܐ 404 ܫܡܲܥܘ ܡ̇ܢ ܬܵܒܼܥܵܐ ܠܐܲܝܢܵܐ ܕܒܼܵܥܹ̇ܐ ܕܢܸܥܘܿܠ ܢܸܚܙܹܝܗ̇ ܀ 405 :ܬܵܘ ܚܲܟܿܝܼܡܹ̈ܐ ܚܙܵܘ ܚܸܟܼ̈ܡܵܬܼܵܐ ܕܚܲܟܿܝܼ̈ܡܵܬܼܵܐ 406 ܕܲܦܪ̣ܵܫ ܘܝܼܕܲܥ ܠܡܸܣܲܒܼ ܥܲܡܗܹܝܢ ܙܘܵܕܹ̈ܐ ܕܪ̈ܲܚܡܹܐ ܀ 407 :ܒܬܼܘܼܠܹ̈ܐ ܬܵܘ ܨܘܼܬܼܘ ܗܵܝ̇ ܒܲܪܬܼ ܩܵܠܵܐ ܕܨܝܼܕ ܣܲܟܼ̈ܠܵܬܼܵܐ 408 ܘܟܲܦܲܪܘ ܡܸܢܟܼܘܿܢ ܫܸܡ ܣܲܟܼܠܘܼܬܼܵܐ ܕܠܵܐ ܬܨܘܼܬܼܘܼܢܵܗ̇ ܀ 409 :ܪ̈ܚܡܲܝ ܗܸܪܓܵܐ ܘܒܼܵܕܼܩܲܝ̈ ܐ̄ܪ̈ܵܙܹܐ ܕܲܣܬܼܝܼܪ̈ܵܬܼܵܐ 410 ܓܡܘܿܪܘ ܒܲܥܒܼܵܕܼܵܐ ܗܸܪܓܵܐ ܕܐܵܘܠܸܕܼܘ ܚܘܼܫܵܒܲܝ̈ܟܿܘܿܢ ܀ 411 :ܡܦܲܫܩܲܝ̈ ܚܲܝܠܵܐ ܕܲܒܼܦܸܠ̈ܐܵܬܼܵܐ ܩܕܼܵܡ ܝܵܠܘܼܦܹ̈ܐ 412 ܣܥܘܿܪܘ ܗܵܘ̇ ܡܸܕܹܿܡ ܕܲܡܬܲܢܹܝܢ ܐ̄ܢܬܿܘܿܢ ܒܲܩܢܘܿܡܲܝ̈ܟܿܘܿܢ ܀ 413 :ܙܡܝܼܢܲܝ̈ ܚܲܬܼܢܵܐ ܘܢܵܛܪ̈ܲܝ ܘܲܥܕܵܐ ܕܗܵܝ̇ ܡܲܠܟܿܘܼܬܼܵܐ 414 :ܗ̤ܘܲܝܬܿܘܿܢ ܥܝܼܪܝܼܢ ܡ̣ܢ ܕܲܡܟܿܘܼܬܼܵܐ ܕܠܵܐ ܝܼܕܲܥܬܼܵܐ ܥܘܼܢܵܝܵܐ ܀ ܫܘܼܒܼܚܵܐ ܠܪ̈ܲܚܡܲܝܟ ܡ̇ܪܹܟܿܠ ܕܚܵܢܲܬܿ ܡܲܓܵܢ ܠܚܲܛܵܝܹ̈ܐ ܀