On Virginity - ܡܺܐܡܪܳܐ ܕܡܳܪܝ̱ ܐܰܦܪܶܝܡ ܕܥܰܠ ܒܬܽܘܠܽܘܬܳܐ

ܫܠܽܘܚܳܝܗ̱ܝ ܐܰܘ ܦܰܓܪܳܐ ܠܒܰܪ ܐ̱ܢܳܫܰܐ ܗ̱ܘ ܥܰܬܺܝܩܳܐ ܕܰܣܢܰܐ ܗ̱ܘ ܟܽܠܶܗ ܕܠܳܐ ܢܶܒܠܶܝܗ ܠܚܰܕܬܽܘܬܳܐ ܕܥܶܒܪܰܬ ܘܠܶܒܫܰܬ ܗܦܰܟܝ̱ ܗܽܘ ܓܶܝܪ ܦܽܘܪܥܳܢ ܚܽܘܒܳܠܶܗ ܨܶܝܕ ܠܒܽܘܫ̈ܰܘܗ̱ܝ ܕܶܐܢ ܐܶܬܚܰܕܰܬ ܢܶܬܗܦܰܟ ܢܶܒܠܶܝܟ ܦܰܓܪܳܐ ܫܡܰܥ ܡܶܠܟܰܝ̈. ܫܠܽܘܚܳܝܗ̱ܝ ܒܕܽܘܒܳܪ̈ܶܐ ܕܠܳܐ ܢܰܠܒܫܳܟ ܗܽܘ ܠܳܟ ܒܰܥܝ̈ܳܕܶܐ܀

ܗܳܐ ܓܶܝܪ ܡܳܪܰܢ ܠܳܟ ܐܰܘ ܦܰܓܪܳܐ ܒܡܰܝ̈ܳܐ ܚܰܕܬܳܐ ܥܰܒܕܳܟ ܘܰܒܢܶܗ ܠܥܰܬܺܝܩܽܘܬܳܟ ܐܰܪܕܶܟܠ ܚܰܝ̈ܶܐ ܕܒܰܕܡܶܗ ܗܽܘ ܓܒܰܠ ܘܰܒܢܳܐ ܠܶܗ ܢܰܘܣܳܐ ܠܥܽܘܡܪܶܗ. ܠܳܐ ܬܶܥܡܰܪ ܚܠܳܦܰܘܗ̱ܝ ܠܒܰܪ ܐ̱ܢܳܫܳܐ ܗܰܘ ܥܰܬܺܝܩܳܐ ܒܢܰܘܣܳܐ ܕܰܚܕܰܬ ܦܰܓܪܳܐ ܐܶܢ ܬܶܫܪܶܐ ܒܢܰܘܣܳܟ ܠܰܐܠܳܗܳܐ ܐܳܦ ܐܰܢ̱ܬ ܬܶܗܘܶܐ ܗܰܝܟܰܠ ܡܰܠܟܽܘܬܶܗ ܘܟܰܗܶܢ ܕܶܒܚܬܶܗ܀

ܡܟܰܣܶܝܢ ܐܶܢܽܘܢ ܠܶܗ ܓܶܝܪ ܠܗܳܢܳܐ ܒܰܪܢܳܫܳܐ ܥܰܬܺܝܩܳܐ ܟܝܳܢܳܐ ܕܡܰܠܶܦ ܘܰܟܬܳܒܳܐ ܕܡܰܟܪܶܙ. ܣܝܳܡܳܐ ܗ̱ܝ ܓܶܝܪ ܥܰܘܠܽܘܬܶܗ ܒܶܝܬ ܬܪ̈ܶܝܢ ܟܺܐܢܺܝ̈ܢ ܕܶܐܢܗܽܘ ܕܡܶܚܛܳܐ ܠܰܕܠܳܐ ܢܳܡܽܘܣ ܢܰܟܣܶܗ ܟܝܳܢܶܗ. ܘܶܐܢ ܡܶܚܛܳܐ ܠܰܕܢܳܡܽܘܣܳܐ ܢܰܟܣܶܗ ܟܬܳܒܳܐ. ܗܳܐ ܗܽܘ ܡܶܡܚܳܐ ܘܗܶܢܽܘܢ ܡܰܐܣܶܝܢ. ܒܥܶܩܒܶܗ ܕܥܰܘܠܳܐ ܡܰܥܠܶܝܢ ܬܳܘܬܳܐ. ܕܒܶܗ ܢܶܬܰܐܣܶܐ ܐܰܝܢܳܐ ܕܰܚܛܳܐ܀

ܕܰܡܪܰܕ ܫܛܰܘ̈ܗ̱ܝ ܘܰܕܬܳܒ ܥܰܨܒܽܘܗ̱ܝ ܡܙܰܕܩܺܝܢ ܠܕܺܝܢܳܐ. ܡܟ̈ܰܣܝܳܢ ܠܡܳܪ̈ܽܘܕܶܐ ܚܳܢܶܝܢ ܘܡܰܐܣܶܝܢ ܠܬܰܝ̈ܳܒܶܐ. ܝܺܕܺܝܥܳܢ ܐܶܢܽܘܢ ܓܶܝܪ ܕܢܶܬܡܰܬܚܽܘܢ ܥܰܡ ܚܰܕ ܒܺܝܫܳܐ ܕܰܠܟܽܠ ܡܶܟܳܐ ܕܛܰܠܳܐ ܒܟܽܠ ܕܳܪ ܘܰܠܘܶܐ ܠܟܽܠܢܳܫ. ܘܡܶܟܳܐ ܒܟܽܠ ܫܳܥ ܐܳܦ ܗܶܢܽܘܢ ܠܶܘܝܳܢ ܠܟܽܠܢܳܫܳܐ ܘܛܰܠܝ̈ܳܢ ܒܟܽܠ ܕܳܪ ܘܰܫܟܺܝ̈ܚܺܝܢ ܒܟܽܠ ܫܳܥ܀

ܫܡܰܥ ܠܰܟܝܳܢܳܐ ܘܰܠܢܳܡܽܘܣܳܐ ܟܰܕ ܡܶܫܬܰܥܶܝܢ ܚܽܘܒ̈ܳܠܰܘܗ̱ܝ ܒܺܝ̈ܫܶܐ ܥܰܡܳܐ ܓܶܝܪ ܕܰܒܢܳܡܽܘܣܳܐ ܓܰܪܘ̱ ܘܰܙܢܺܝܘ ܕܠܳܐ ܒܢܳܡܽܘܣܳܐ ܥܰܡ̈ܡܶܐ ܚܠܳܦܘ̱ ܟܝܳܢܗܽܘܢ ܘܰܕܠܳܐ ܒܰܟܝܳܢܗܽܘܢ ܐܶܬܚܰܫܰܚܘ̱. ܟܝܳܢܳܐ ܘܢܳܡܽܘܣܳܐ ܒܓܰܢܘ̱ ܥܠܰܘܗ̱ܝ. ܕܰܚܒܳܠ ܫܓܽܘܫܳܐ ܛܽܘܟܣܰܘܗ̱ܝ܀

ܓܢܶܒܘ̱ ܫ̈ܰܦܠܶܐ ܡܶܢ ܙܽܘܘܳܓܳܐ ܒܫܶܡ ܬܽܘܠܡܳܕܳܐ ܘܡܳܐ ܕܶܐܬܡܨܰܥܘ̱ ܣܳܡ ܒܶܣܬܰܪܗܽܘܢ ܒܶܗܬܰܬ ܟܶܫܠܳܐ. ܘܰܩܕܳܡܰܝܗܽܘܢ ܪܶܓܬܳܐ ܣܢܺܝܬܳܐ ܒܰܕܒܳܗܬܶܝܢ ܠܡܶܥܛܰܦ ܠܙܽܘܘܳܓܳܐ. ܢܳܦܠܺܝܢ ܘܡܶܬܬܰܚܕܺܝܢ ܒܓܰܘ ܦܰܚ̈ܶܐ܀

ܟܡܳܐ ܩܰܠܺܝܠܺܝܢ ܓܶܦܰܝ̈ܟܝ̱ ܐܰܘ ܒܬܽܘܠܽܘܬܳܐ ܕܰܓܕܰܠܘ̱ ܘܰܣܠܶܩܘ̱ ܥܕܰܡܳܐ ܠܰܐܝܟܳܐ ܕܝܳܬܶܒ ܡܟܺܝܪܶܟܝ̱ ܥܰܠ ܝܰܡܺܝܢܶܗ ܕܡܳܪܗܽܘܢ ܕܪ̈ܰܘܡܶܐ. ܥܪ̈ܽܘܩܝ̱ ܡܶܢ ܡܶܠܟܶܗ ܕܢܳܟܽܘܠܳܐ ܕܰܡܦܰܠܶܓ ܬܽܘܟܳܐ ܠܫܰܒܪ̈ܶܐ ܡܠܽܘܐܶܗ ܡܰܓܳܢ ܡܥܳܕ ܪܳܡܳܐ ܠܚܽܘܣܪܳܢ ܬܰܓܳܪ̈ܶܐ܀

ܓܙܰܘ̈ܗ̱ܝ ܡܣܰܟܶܢ ܕܳܐܕܳܡ ܪܰܒܳܐ ܕܰܒܟܶܣܦܶܗ ܐܶܬܬܰܓܰܪ ܗܘܳܐ ܡܰܘܒܠܳܐ ܕܬܽܘܟܳܐ. ܦܰܓܪܳܐ ܠܳܐ ܬܺܐܙܶܦ ܡܶܢܶܗ. ܕܠܳܐ ܬܳܒܰܥ ܡܳܐ ܕܰܐܘܙܶܦ ܕܶܐܢ ܒܦܶܪܥܺܝܘܗ̱ܝ ܟܶܣܦܶܗ ܡܣܰܟܢܰܬ ܗܺܝ܀

ܠܶܘܝܳܢ ܐܶܢܽܘܢ ܓܶܝܪ ܠܰܐܪ̈ܓܺܝܓܳܬܶܗ ܩܶܢܛܳܐ ܘܦܽܘܫܳܟܳܐ ܘܒܽܘܣܪܳܢܳܐ ܥܰܡ ܟܽܘܐܳܪܳܐ. ܘܡܰܟܪ̈ܶܝܢ ܘܰܡܥܺܝܩܺܝܢ ܠܥܳܒܽܘ̈ܕܰܝܗܶܝܢ. ܘܰܐܦ̈ܶܐ ܗܽܘ ܒܰܠܚܽܘܕ ܓܰܠܝ̈ܳܢ ܘܕ̈ܰܟܝܳܢ. ܕܢ̈ܰܟܦܶܐ ܕܫܰܠܚܽܘܗ̱ܝ. ܠܳܐ ܬܶܬܚܰܕ ܦܰܓܪܳܐ ܒܪܶܚܡܬܳܐ ܣܢܺܝܬܳܐ. ܕܟܰܕ ܛܳܒ ܥܰܒܕܳܗܿ ܡܺܝܬ ܚܰܝ ܗܽܘ ܪܶܢܝܳܗܿ ܟܰܣܝܳܐܺܝܬ܀

ܩܰܛܺܝܢ ܘܰܨܢܺܝܥ ܬܽܘܠܡܳܕ ܕܥܰܡ ܟܽܠ ܟܽܠ ܢܶܗܘܶܐ ܡܫܰܦܰܥ ܡܰܘܗܰܒܬܶܗ ܥܰܠ ܛܳܒ̈ܶܐ. ܦܽܘܡ ܡܰܟ̈ܣܳܢܶܐ ܒܠܰܚܡܶܗ ܣܟܰܪ. ܒܫܳܪܽܘܬܳܐ ܕܡܰܓܳܢ. ܒ̈ܢܰܝ ܚܺܐܪ̈ܶܐ ܠܰܥܒܳܕܘ̱ ܙܒܰܢ. ܠܟܰܪܣܳܐ ܫܚܰܕ ܘܶܐܫܬܰܚܕܰܬ ܠܶܗ. ܥܰܝܢܳܐ ܕܬܳܗܡܳܐ ܘܦܽܘܡܳܐ ܕܢܶܫܠܳܐ. ܘܶܐܕܢܳܐ ܬܶܥܒܶܕ ܛܳܒܰܘ̈ܗ̱ܝ ܣ̈ܢܰܝܳܐ. ܚܰܡܪܶܗ ܫܰܬܺܝܩܳܐ ܡܠܺܝܠ ܗܽܘ ܒܶܫ̈ܬܺܝܘܗ̱ܝ ܠܳܥܶܙ ܒܩܳܠܰܝܗܽܘܢ ܚܠܳܦ ܡܳܪܶܗ܀

ܨܢܺܝܥ ܗܽܘ ܓܶܝܪ ܕܠܽܘܩܕܰܡ ܪܳܡܳܐ ܥܰܠ ܦܽܘܡ ܦܰܚܶܗ ܐܽܘܟܳܠܳܐ ܠܨܰܝܳܕܳܐ. ܩܕܳܡ ܗܰܘ ܚܽܘܒܶܗ ܠܚܽܘܒܳܠܶܗ. ܐܰܝܟ ܕܺܝܗܽܘܕܳܐ ܕܢܰܫܶܩ ܘܰܩܛܰܠ ܢܫܰܩ ܕܰܟܝܳܐ ܠܛܰܡܳܐܐ. ܕܢܰܠܶܦ ܕܢܽܘܫ̈ܩܳܬܶܗ ܡܳܪܬܳܐ ܘܡܰܘܬܳܐ ܓܒܺܝܠ ܒܗܶܝܢ ܟܰܣܝܳܐܺܝܬ. ܗܳܢܳܐ ܗܰܘ ܕܶܐܢ ܬܩܺܝܡܺܝܘܗ̱ܝ ܡܰܦܽܘܠܬܳܐ ܗܽܘ ܦܪܰܥ ܠܳܟ ܗܽܘ. ܕܡܳܐ ܕܩܳܡ ܢܰܕܡܶܝܟ ܕܪܶܓܬܶܗ ܡܺܝܬܳܐ ܗ̱ܝ. ܘܒܶܣܪܳܟ ܗܰܘ ܕܺܝܠܳܟ ܡܰܚܶܐ ܘܰܡܢܰܚܶܡ ܠܶܗ. ܘܡܳܐ ܕܰܚܺܝܬ ܒܶܗ ܗܶܦܟܰܬ ܩܛܰܠܬܶܗ. ܦܰܓܪܳܐ ܐܶܢ ܬܶܬܶܠ ܚ̈ܰܝܶܐ ܠܡܺܝܬܽܘܬܶܗ. ܐܳܦ ܗܽܘ ܢܶܗܘܶܐ ܡܰܘܬܳܐ ܠܚܰܝܽܘܬܳܟ܀

ܢܽܘܪܳܐ ܬܗܶܐ ܠܳܟ ܬܰܚܘܺܝܬܳܐ ܕܰܩܒܺܝܪܳܐ ܘܡܺܝܬܳܐ ܒܟܰܣܝܳܐ ܘܫܽܘܦܶܗ ܕܩܰܝܣܳܐ ܥܰܡ ܩܰܝܣܳܐ ܡܰܚܶܐ ܠܶܗ ܠܰܐܒܕܳܢܳܐ ܕܰܬܪ̈ܰܝܗܽܘܢ ܡܳܐ ܕܶܝܢ ܕܚܳܬ ܗܶܦܟܰܬ ܠܶܗ ܗܺܝ ܕܬܰܘܩܶܕ ܠܰܩܢܽܘܡܳܐ ܕܰܐܚܝܳܗܿ ܒܢܰܩܦܶܗ. ܐܰܘ ܠܛܽܘܦܣܳܐ ܓܰܠܝܳܐ. ܕܩܰܝܣܳܐ ܥܒܺܝܕ ܩܰܒܪܳܐ ܠܢܽܘܪܳܐ. ܘܡܳܐ ܕܶܐܬܢܰܚܡܰܬ ܡܶܢܶܗ ܒܶܗ ܛܠܰܩ܀

ܚܺܐܪܽܘܬܳܐ ܓܶܝܪ ܐܰܝܟ ܚܰܝܽܘܬܳܐ ܗ̱ܝ. ܘܰܐܝܟ ܢܰܦܫܳܐ ܠܰܐܪܓܺܝܓܬܳܐ ܘܒܳܗ ܗܽܘ ܚ̈ܰܝܰܝܢ. ܘܶܐܢ ܡܶܢܳܗܿ ܬܶܦܣܽܘܩ ܬܶܫܕܶܐ ܐܶܢܶܝܢ ܗ̈ܘܰܝ ܡܺܝ̈ܬܳܬܳܐ. ܡܫܰܠܛܬܳܐ ܗ̱ܝ ܕܰܒܨܶܒܝܳܢܳܗܿ ܩܳܝܡܺܝܢ ܚ̈ܰܘܒܶܐ. ܘܰܒܨܶܒܝܳܢܶܗ ܢܳܦܠܺܝܢ ܚ̈ܛܳܗܶܐ. ܕܡܽܘܬ ܥܶܠܳܝܳܐ ܗ̱ܝ ܕܚܰܝܠܶܗ ܐܰܚܺܝܕ ܟܽܠ. ܘܶܐܢܗܽܘ ܕܰܩܦܰܣ ܠܶܗ ܢܦܰܠ ܟܽܠ܀

ܕܰܝܳܢܳܐ ܗܰܘ ܟܺܐܢܳܐ. ܕܠܰܘ ܒܶܗ ܒܫܳܥܬܳܐ ܕܰܚܛܳܐ ܐ̱ܢܳܫ ܬܳܒܶܥ ܠܶܗ. ܡܶܛܽܠ ܗܰܘ ܐܳܬܝܳܐ ܬܘܳܬ ܢܰܦܫܳܐ ܡܶܛܽܠ ܬܰܪ̈ܬܶܝܢ. ܕܶܐܢ ܬܳܒ ܥܛܳܬܶܗ ܠܥܰܘܠܶܗ ܘܶܐܢ ܡܪܰܕ ܫܩܰܠܬܶܗ ܡܶܢܶܗ ܠܡܶܦܰܩ ܒܪܽܘܚܳܐ. ܒܰܕܓܽܘܢ ܒܟܽܠ ܚ̈ܰܘܒܰܝܢ ܡܕܺܝܩܳܐ ܗ̱ܝ ܬܘܳܬ ܢܰܦܫܳܐ ܕܬܶܣܰܒ ܣܳܗܕܽܘܬܳܐ ܠܒܶܝܬ ܕܺܝܢܳܐ܀

ܝܺܠܰܦ ܦܰܓܪܳܐ ܬܝܳܒܽܘܬܳܐ ܘܠܳܐ ܬܘܳܬ ܢܰܦܫܳܐ ܗ̱ܝ ܕܰܒܟܽܠܫܳܥ. ܬܝܳܒܽܘܬܳܐ ܓܶܝܪ ܠܚܰܒܪ̈ܳܬܰܢ ܐܰܝܟ ܐܰܣܺܝܬܳܐ ܗ̱ܝ. ܬܘܳܬ ܢܰܦܫܳܐ ܕܶܝܢ ܗܳܕܶܐ ܗܰܘ ܩܰܢܝܳܐ ܕܬܶܒܢܶܐ ܘܬܶܣܬܽܘܪ ܟܺܐܒ̈ܶܐ ܒܟܽܠ ܫܳܥ܀

ܟܶܬܒܰܬ ܐܺܝܕ̈ܰܝܳܐ ܒܟܽܠ ܫܛܳܪ ܡܟܰܣܶܐ ܠܰܐܝܢܳܐ ܕܚܳܒ ܟܶܣܦܳܐ. ܗܳܟܰܢܳܐ ܒܶܗ ܒܛܽܘܦܣܳܐ ܡܳܟܣܳܐ ܒܫܶܬܩܳܗܿ ܬܘܳܬ ܢܰܦܫܳܐ. ܠܰܐܝܢܳܐ ܕܚܳܒ ܚܛܳܗ̈ܶܐ ܦܰܓܪܳܐ ܐܶܢ ܬܥܺܝܕ ܕܬܶܬܽܘܒ ܘܬܽܘܒ ܬܶܚܛܶܐ. ܚܽܘܬܳܡ ܫܛܳܪܳܟ ܗ̱ܝ ܬܘܳܬ ܢܰܦܫܳܟ܀

ܟܬܺܝܒ ܕܶܐܢ ܥܫܶܩ ܓܰܒܪܳܐ ܠܰܐܢ̱ܬܬܶܗ. ܢܰܦܩܽܘܢ ܐܰܒܳܗܶܝ̈ܗ ܘܰܢܚܰܘܽܘܢ ܒܬܽܘ̈ܠܶܝܗ. ܡܶܛܽܠ ܕܠܰܘ ܕܰܝ̈ܳܢܳܐ ܗ̱ܘܰܘ ܕܰܡܨܶܝܢ ܕܚܰܝܰܘ ܟܰܣܝ̈ܳܬܳܐ. ܒܬܽܘ̈ܠܶܐ ܕܥܰܠ ܫܽܘܫܶܦܳܐ ܫܪܳܪܳܐ ܩܕܳܡ ܕ̈ܰܝܳܢܶܐ ܡܚܰܘܶܝܢ ܗ̱ܘܰܘ. ܡܶܛܽܠ ܕܶܝܢ ܕܰܡܟܺܝܪܶܟܝ̱ ܕܺܝܠܶܟܝ̱ ܚܳܙܶܐ ܟܰܣܝ̈ܳܬܳܐ ܗܽܘ. ܠܡܳܪ̈ܶܟܝ̱ ܟܰܣܝܳܐ ܒܰܒ̈ܬܽܘܠܶܐ ܟܣ̈ܰܝܳܐ ܒܒܶܣܪܳܐ ܚܰܘܺܝ. ܠܳܐ ܒܫܽܘܫܶܦܶܟܝ̱ ܐܶܠܳܐ ܒܦܰܓܪܶܟܝ̱ ܛܠܺܝ̈ܡܳܬܳܐ ܚܰܘܺܝ ܘܠܳܐ ܒܫܽܘ̈ܫܶܦܶܐ ܒܬܽܘ̈ܠܶܟܝ̱ ܕܺܝܠܶܟܝ̱ ܚܰܘܺܝ ܠܰܡܟܺܝܪܶܟܝ̱܀

ܒܰܠܒܽܘܫ ܐܶܡܪܰܐ ܗ̱ܘ ܩܰܪܶܒ ܗܘܳܐ ܠܘܳܬ ܢܶܩܝܳܐ ܚܰܡܢܽܘܢ ܨܢܺܝܥܳܐ. ܘܟܰܕ ܐܰܛܥܺܝܗܿ ܒܕܺܝܠܳܗܿ ܣܥܰܪ ܕܺܝܠܶܗ. ܕܰܚܙܳܐ ܕܡܰܪܺܝܕܳܐ ܗ̱ܝ ܒܰܩܢܳܗܿ ܒܬܽܘܠܽܘܬܳܐ. ܢܟܰܠ ܐܰܥܠܶܗ ܠܢܶܩܥܶܗ ܘܟܶܢ ܨܶܕܶܗ. ܕܰܐܒܳܐ ܚܠܺܝܡܳܐ ܕܶܟܪܶܗ ܢܰܦܫܶܗ. ܟܪܺܝܗܳܐ ܕܬܽܘܗ ܩܳܡ ܠܺܐܝܓܽܘܢܳܐ ܘܰܐܥܕܺܝ ܟܠܺܝܠܳܐ ܕܰܗܘܳܐ ܠܚܶܣܕܶܗ܀

ܐܰܬܠܺܝܛܰܐ ܗ̱ܘ ܕܰܚܙܳܐ ܕܰܟܡܳܐ ܕܩܳܐܶܡ ܗܘܳܐ ܠܳܐ ܪܳܡܳܐ. ܘܶܐܣܬܰܪܗܰܒ ܢܦܰܠ ܘܟܶܢ ܐܰܪܡܺܝ. ܬܰܒܪܶܗ ܠܢܺܝܪܳܐ ܒܫܰܘܬܳܦܽܘܬܳܐ ܘܰܣܥܳܐ ܥܰܠ ܓܰܘܪܳܐ ܘܥܰܘܠܳܐ ܕܙܳܪܰܥ ܒܬܽܘܢܳܐ ܚܶܨܕܶܗ ܒܕܰܒܪܶܗ ܚܒܳܠܬܶܗ ܚܰܪܒܳܐ ܕܰܚܒܰܠ ܒܬܽܘܠܽܘܬܳܐ ܘܰܕܦܰܠܦܠܳܗܿ ܒܰܕܡܶܗ ܣܚܳܐ ܒܰܕܡܶܗ. ܐܰܪܘܺܝܘܗ̱ܝ ܘܩܳܡܘ̱ ܢܶܥܓܽܘܗ̱ܝ ܘܕܰܨܥܰܪ ܠܦܶܪܬܳܐ ܐܶܬܬܰܒܰܥ ܒܰܙܒܰܢ

܀܀܀

ܓܰܙܳܐ܀

ܐܶܢ ܡܶܨܛܰܥܪܳܐ ܒܬܽܘܠܬܳܐ ܒܕܰܒܪܳܐ ܡܽܘܫܶܐ ܦܺܐܩܳܐ ܣܢܺܓܰܪ ܩܽܘܫܬܳܐ ܗܰܘ ܡܰܦܺܝܣ ܥܠܶܝܗ ܕܰܩܥܳܬ ܠܰܡ ܛܠܺܝܬܳܐ ܘܠܰܝܬ ܐܺܝܠܳܐ. ܚܠܳܦܶܝܟܝ̱ ܕܺܝܠܶܟܝ̱ ܐܰܘ ܒܬܽܘܠܽܘܬܳܐ ܡܰܢܽܘ ܕܰܢܦܺܝܣ. ܕܰܒܓܰܘ ܫܰܝܢܳܐ ܡܶܫܬܒܺܝܬܝ̱ ܘܰܫܠܺܝܬܝ̱ ܠܳܐ ܬܶܬܠܶܝܢ ܢܰܦܫܶܟܝ̱ ܠܫܶܒܝܳܐ ܒܓܰܘ ܫܰܝܢܳܐ ܕܠܳܐ ܢܶܩܛܰܪ ܠܶܟܝ̱ ܫܰܝܢܳܐ ܒܶܝܬ ܕܺܝܢܳܐ܀

ܠܰܒܥܺܝ̈ܠܳܬܳܐ ܘܠܰܒܬܽܘ̈ܠܳܬܳܐ ܕܺܐܝܬ ܗܘܳܐ ܒܡܳܕܶܝܢ. ܩܛܰܠ ܠܰܕܙܳܢܝ̱ ܘܰܐܚܺܝ ܠܰܐܝܠܶܝܢ ܕܰܚܬܳܡܳܐ ܕܰܒܬܽܘ̈ܠܶܐ ܥܠܰܝܗܶܝܢ ܪܳܡܳܐ ܗ̱ܘܳܐ. ܐܶܢ ܕܶܝܢ ܠܚܰܢ̈ܦܳܬܳܐ ܐܰܚܶܝܬ ܒܬܽܘܠܽܘܬܳܐ. ܚܰܕ ܟܡܳܐ ܬܺܚܶܐ ܠܢܰܟܦ̈ܳܬܳܐ܀

ܘܗܳܐ ܒܬܰܘܳܢܳܐ ܘܗܳܐ ܒܕܰܒܪܳܐ ܠܶܟܝ̱ ܗܽܘ ܟܡܺܝ̈ܢܺܝܢ ܐܳܘ ܒܬܽܘܠܽܘܬܳܐ. ܥܶܠܰܬܝ̱ ܠܬܰܘܳܢܳܐ ܚܶܡܢܽܘܢ ܨܢܺܝܥܳܐ ܓܰܢܒܶܗ ܠܥܽܘܬܪܶܟܝ̱. ܢܶܦܩܰܬܝ̱ ܠܕܰܒܪܳܐ ܫܟܺܝܡ ܓܰܝܳܣܳܐ ܚܠܰܨ ܓܰܙܶܟܝ̱. ܠܰܐܝܟܳܐ ܬܺܐܙܠ̱ܺܝܢ ܝܰܘܢܳܐ ܡܫܽܘܚܕܬܳܐ. ܕܗܳܐ ܣܰܓܺܝܘ ܠܗܽܘܢ ܒܟܽܘܠ ܕܽܘܟ ܨܶܝܕ̈ܰܝܟܝ̱܀

ܗܳܐ ܨܶܝܕܶܝܟܝ̱ ܐܳܘ ܒܬܽܘܠܽܘܬܳܐ ܕܰܨܕܽܘܟܝ̱ ܨܶܕܰܝܢ. ܒܗܶܦܟܳܐ ܦܪܺܝܥܳܢ ܫܟܺܝܡ ܓܶܝܪ ܕܰܒܕܰܒܪܳܐ ܦܓܰܥ ܒܶܟܝ̱ ܘܰܫܒܶܟܝ̱ ܒܒܰܝܬܶܗ ܢܰܟܣܽܘܗ̱ܝ ܘܚܰܡܢܽܘܢ ܬܽܘܒ ܕܰܒܬܰܘܳܢܳܐ ܟܡܶܢ ܠܶܟܝ̱ ܘܰܫܒܶܟܝ̱. ܒܕܰܒܪܳܐ ܢܶܥܓܽܘܝܗ̱ܝ ܚܰܒܠܽܘܟܝ̱ ܘܶܐܬܚܰܒܰܠܘ̱ ܐܶܬܨܺܝܪ ܒܗܽܘܢ ܛܽܘܦܣܳܐ. ܕܰܐܝܢܳܐ ܕܰܡܚܰܒܶܠ ܠܶܟܝ̱ ܡܶܬܚܰܒܰܠ܀

ܐܳܘ ܒܬܽܘܠܬܳܐ ܝܰܘܢܳܐ ܫܒܰܪܬܳܐ ܨܢܺܝܥ ܨܶܝܕܶܝܟܝ̱ ܘܰܐܢ̱ܬܝ̱ ܬܰܡܺܝܡܳܐ ܐܰܘܡܶܢ ܢܟܽܘܠܶܟܝ̱ ܘܰܐܢ̱ܬܝ̱ ܒܪܺܝܪܳܐ ܕܚܰܡܢܽܘܢ ܕܒܰܥܦܺܝ ܐܽܘܟܠܳܐ ܒܥܳܐ ܗ̱ܘܳܐ ܕܠܳܐ ܒܥܳܐ ܗ̱ܘܳܐ ܘܰܒܡܶܟܽܘܠܬܳܐ ܕܠܳܐ ܟܦܶܢ ܗ̱ܘܳܐ ܠܶܗ. ܫܰܡܶܫ ܪܶܓܰܬ ܒܶܣܪܳܐ ܗܳܝ ܕܠܳܗܿ ܟܦܶܢ ܗ̱ܘܳܐ. ܐܰܘ ܠܰܢܟܺܝܠܳܐ ܕܰܒܥܳܐ ܗ̱ܘܳܐ ܡܶܕܶܡ ܕܠܳܐ ܡܶܬܒܥܶܐ ܠܶܗ ܕܰܒܥܶܠܬܶܗ ܠܶܟܝ̱ ܢܶܫܟܰܚ ܗ̱ܘܳܐ܀

ܠܶܒܰܘ̈ܳܬܳܐ ܓܶܝܪ ܫܳܐܠܳܗܿ ܗ̱ܘܳܐ. ܐܰܘ ܠܰܡܗܰܘܢܬܳܐ ܕܠܶܒܰܘ̈ܳܬܳܐ ܥܶܠܰܬ ܣܳܡܰܬ ܠܰܫܩܺܝܠ ܠܶܒܳܐ. ܚܶܘܝܳܐ ܠܒܰܫ ܗ̱ܘܳܬ ܐܶܣܟܺܡܶܗ ܕܟܽܘܪܗܳܢܳܐ. ܕܬܶܒܣܶܐ ܥܠܰܘܗ̱ܝ ܐܺܝܕܳܐ ܘܟܶܢ ܢܰܡܚܶܝܗܿ. ܕܪܶܓܬܳܐ ܠܰܒܬܽܘܠܽܘܬܳܐ ܢܟܰܠܬܳܗܿ ܘܛܰܡܐܳܬܳܗܿ. ܢܟܰܠܬܳܗܿ ܚܶܡܬܳܐ ܠܪܶܓܬܳܐ ܘܰܚܒܳܠܬܶܗ܀ XXVI.

ܣܶܕܩܰܬ ܬܺܡܰܪ ܟܽܘܬܺܝܢܳܗܿ ܕܰܚܙܳܬ ܕܶܐܒܕܰܬ ܒܬܽܘܠܽܘܬܳܗܿ. ܩܢܳܬ ܟܽܘܬܺܝܢܳܐ. ܒܬܽܘܠܽܘܬܳܗܿ. ܩܢܳܬ ܟܽܘܬܺܝܢܳܐ ܚܠܳܦ ܟܽܘܬܺܝܢܳܐ. ܒܬܽܘܠܽܘܬܳܗܿ ܕܶܐܒܕܰܬ ܬܽܘܒ ܠܳܐ ܐܶܬܩܰܢܝܰܬ. ܣܶܕ̈ܩܶܐ ܕܰܠܒܽܘ̈ܫܶܝܗ ܣܦܰܩܘ̱ ܐܽܘܡ̈ܳܢܶܐ ܠܡܰܐܣܳܝܽܘ. ܚܽܘܒܳܠܳܗܿ ܕܶܝܢ ܕܰܒܬܽܘܠܽܘܬܶܗ ܠܚܰܕ ܗܽܘ ܒܰܠܚܽܘܕ ܕܠܺܝܠ ܠܡܰܐܣܳܝܽܘ. ܐܰܘ ܒܬܽܘܠܬܳܐ ܕܚܽܘܒܳܠܶܟܝ̱ ܦܫܺܝܩ ܠܟܽܠ. ܘܬܽܘܩܳܢܶܟܝ̱ ܠܰܒܪܳܐ ܟܽܠ ܕܠܺܝܠ ܗܽܘ ܒܰܠܚܽܘܕ܀

ܕܶܚܠܰܬ ܬܺܡܰܪ ܕܬܶܫܬܽܘܩ ܘܒܶܗܬܰܬ ܕܬܺܐܡܰܪ. ܡܶܛܽܠ ܕܶܝܢ ܕܠܳܐ ܠܡܶܫܬܰܩ ܡܰܨܝܳܐ ܗܘܳܬ ܐܳܦ ܠܳܐ ܠܡܺܐܡܰܪ ܣܶܕܩܰܬ ܢܶܚ̈ܬܶܝܗܿ. ܕܣܶܕ̈ܩܶܐ ܓܠܰܝ̈ܳܐ ܢܶܗܘܽܘܢ ܟܳܪ̈ܽܘܙܶܐ ܠܰܒ̈ܬܽܘܠܶܐ ܟܣ̈ܰܝܳܐ ܕܶܐܬܚܰܒܰܠܘ̱. ܬܶܗܪܳܐ ܘܕܽܘܡܳܪܳܐ ܕܒܰܪ̱ܬ ܡܰܠܟܳܐ ܕܠܳܐ ܐܶܫܟܰܚ ܒܝܳܐܳܗܿ ܡܰܪ̈ܓܳܢܝܳܬܳܐ ܕܰܥܠܶܝܗܿ ܬܰܠܝܳܢ ܥܰܠ ܚܕܳܐ ܕܶܐܒܕܰܬ܀

ܒܰܪ̱ܬ ܡܰܠܟ̈ܶܐ ܗܘܳܬ ܕܟܺܐܦ̈ܶܐ ܘܒܶܪ̈ܽܘܠܶܐ ܛܥܶܢܘ̱ ܗܰܕ̈ܳܡܶܝܗܿ. ܒܬܽܘܠܽܘܬܳܐ ܕܶܝܢ ܒܰܠܚܽܘܕܶܝܗܿ ܠܟܽܠܗܶܝܢ ܥܶܠܒܰܬ. ܒܰܕܓܽܘܢ ܛܰܡܐܳܐ ܫܛܳܐ ܒܶܪ̈ܽܘܠܶܐ ܘܰܓܒܳܐ ܡܰܪܓܳܢܺܝܬܳܐ. ܐܰܣܠܺܝ ܛܰܒ̈ܥܶܐ ܘܰܐܥܕܺܝ ܒܬܽܘ̈ܠܶܐ. ܓܰܢܳܒܳܐ ܛܺܝܡܶܝܟܝ̱ ܝܳܕܰܥ ܐܳܘ ܒܬܽܘܠܽܘܬܳܐ. ܐܰܢ̱ܬܝ̱ ܕܶܝܢ ܟܡܳܐ ܫܰܘܝܰܬܝ̱ ܠܳܐ ܪܶܓܫܰܬܝ̱܀

ܡܶܢ ܒܶܝܬ ܟܺܐܦ̈ܶܐ ܕܡܰܠܟܽܘܬܳܐ. ܓܒܳܐ ܘܓܰܢܶܒ ܡܰܪܓܳܢܺܝܬܳܐ. ܗܳܝ ܕܟܰܕ ܩܢܳܗܿ ܫܒܰܩܬܶܗ. ܡܰܪܓܳܢܺܝܬܳܐ ܗ̱ܝ ܕܰܐܒܕܳܐ ܡܶܢ ܩܶܢܝܳܗܿ. ܘܠܳܐ ܡܩܰܘܝܳܐ ܒܓܰܙܶܗ ܕܓܰܢܳܒܳܐ. ܚܰܘܳܐ

ܫܒܰܪܬܳܐ ܐܶܫܟܚܰܬ ܚܶܘܝܳܐ ܡܰܪܺܝܪ̈ܶܐ ܕܳܚ̈ܠܺܝܢ ܡ̈ܶܠܰܘܗ̱ܝ. ܚܒܳܒܬܶܗ ܗܳܝ ܒܚܽܘܒܳܐ. ܘܰܡܚܶܗ ܗܽܘ ܠܰܐܒܕܳܢ ܠܳܐ ܬܶܫܟܚܺܝܢ ܠܶܟܝ̱ ܐܳܦ ܐܰܢ̱ܬܝ̱ ܫܟܰܚܬܳܗܿ ܕܚܰܘܳܐ. ܕܠܳܐ ܬܶܫܟܚܺܝܢ ܠܶܟܝ̱ ܒܶܗ ܬܘܳܬ ܢܰܦܫܳܐ. ܐܶܠܽܘ ܓܶܝܪ ܐܶܚܕܰܬ ܗܘܳܬ ܗܳܝ ܬܪܰܥ ܡܰܫܡܰܥܬܶܗ ܩܽܘܕܡܰܬ ܡܰܡܠܠܶܗ. ܠܳܐ ܡܶܬܬܚܶܕ ܗܘܳܐ ܬܪܰܥ ܦܰܪܕܰܝܣܳܐ ܒܰܐܦܶܝ̈ܗ ܕܺܝܠܳܗܿ. ܕܝܶܗܒܰܬ ܗܳܝ ܐܰܬܪܳܐ ܒܓܰܘ ܬܰܪܥܺܝܬܳܗܿ ܠܡܶܠܰܬ ܒܺܝܫܳܐ. ܓܣܳܬ ܘܫܳܕܬܶܗ ܓܰܢܬܳܐ ܕܟܺܝܬܳܐ܀

ܛܰܪܝ̱ ܥܽܘܒܶܟܝ̱ ܩܰܕܺܝܫܳܐܺܝܬ. ܕܰܢܩܰܒܠܶܟܝ̱ ܥܽܘܒܶܗ ܕܰܟܝܳܐ ܕܦܰܪܕܰܝܣܳܐ. ܠܳܐ ܬܶܗܘܶܝܢ ܥܰܦܪܳܐ ܡܶܟܽܘܠܬܶܗ ܕܚܶܘܝܳܐ ܠܺܝܛܳܐ܇ ܕܥܰܦܪܰܐ ܗ̱ܘ ܠܰܚܡܶܗ ܘܡܶܠܚܳܐ ܐܰܢ̱ܬܝ̱ ܓܒܺܝܬܳܐ. ܗܳܝ ܕܶܐܢ ܬܰܦܟܶܗ ܠܳܐ ܡܰܨܝܳܐ ܕܡܶܕܪܺܝܫ ܬܶܗܘܶܐ ܡܶܠܚܳܐ ܚܰܕܬܳܐ܀

ܒܰܪ̱ܬ ܢܶܦܬܰܚ ܕܰܣܚܳܬ ܒܰܕܡܳܗܿ ܥܶܡܕܰܬ ܘܰܐܣܩܰܬ ܡܶܢܶܗ ܡܰܪܓܳܢܺܝܬܳܐ ܕܥܶܩܪܰܬ ܩܶܢܛܳܐ ܘܰܠܓܰܙܳܐ ܕܪܰܘܡܳܐ ܣܶܠܩܰܬ. ܛܠܺܝܬܳܐ ܕܦܶܫܛܰܬ ܨܽܘܪܳܗܿ ܠܢܶܟܣܬܳܐ ܕܣܰܝܦܳܐ. ܒܝܳܐܬܳܗܿ ܡܰܪܓܳܢܺܝܬܳܐ ܕܟܺܝܬܳܐ ܕܶܐܙܰܠ̱ܬ ܥܰܡܶܗ. ܘܰܐܝܕܳܐ ܕܰܬܢܳܢ ܡܰܘܒܕܳܐ ܠܶܗ ܠܰܒܬܽܘܠܽܘܬܳܗܿ ܟܰܪܝܽܘܬܳܐ ܗܳܘܝܳܐ ܠܶܗ ܠܘܺܝܬܳܐ ܒܝܽܘܡ ܥܽܘܢܕܳܢܳܐ. ܘܰܒܢܽܘܚܳܡܳܐ ܩܶܢܛܰܐ ܗ̱ܘ ܗ̱ܘܳܐ ܠܶܗ ܗܕܳܝܳܐ. ܩܕܳܡ ܕܰܝܳܢܳܐ ܡܳܐ ܕܛܳܒ ܬܳܒܶܬ܀

ܒܰܪ̱ܬ ܢܶܦܬܰܚ ܨܒܳܬ ܕܰܬܡܽܘܬ. ܡܶܛܽܘܠ ܕܢܶܕܪܶܗ ܕܰܐܒܽܘܗܿ ܠܳܐ ܢܶܒܛܰܠ. ܠܳܐ ܬܶܒܛܠܺܝܢܳܝܗ̱ܝ ܐܰܢ̱ܬܝ̱ ܒܥܰܝ̈ܢܶܝܟܝ̱ ܠܢܶܕܪܳܐ ܒ̈ܬܽܘܠܶܐ ܕܰܢܕܰܪ ܦܽܘܡܶܟܝ̱. ܢܶܦܬܰܚ ܫܦܰܥ ܕܡܳܐ ܕܪܳܬܶܗ. ܕܰܡܟܺܝܪܶܟܝ̱ ܕܶܝܢ ܕܺܝܠܶܟܝ̱. ܕܡܶܗ ܩܰܕܺܝܫܳܐ ܐܶܬܶܐܫܶܕ ܚܠܳܦ ܚܽܘܒܶܟܝ̱܀

ܗܳܐ ܗܳܟܺܝܠ ܙܰܒܢܶܗ ܕܡܳܐ ܐܺܝܚܺܝܕܳܝܳܐ ܠܰܕܡܳܐ ܒܬܽܘܠܳܐ ܕܒܶܗ ܚܬܺܝܡ ܬܰܪ̈ܥܶܟܝ̱. ܒܰܕܡܽܘܬ ܬܰܪ̈ܥܶܐ ܕܚ̈ܰܬܺܝܡܺܝܢ ܗ̱ܘܰܘ ܒܰܕܡܳܐ ܪܣܺܝܣܳܐ ܕܰܒܓܰܘ ܡܶܨܪܶܝܢ. ܟܡܳܐ ܓܶܝܪ ܕܗܽܘ ܗܽܘ ܕܡܳܐ ܥܠܰܝܗܽܘܢ ܕܬܰܪ̈ܥܶܐ ܪܫܺܝܡ ܗ̱ܘܳܐ ܡܶܢ ܠܒܰܪ. ܚܰܝ̈ܶܐ ܕܰܠܓܰܘ ܒܐ̱ܪܳܙ ܒܬܽܘ̈ܠܶܐ ܒܫܰܝܢܳܐ ܫܪܶܝܢ ܗ̱ܘܰܘ܀

ܐܰܘ ܠܰܕܡܳܐ ܕܰܗܘܳܐ ܫܽܘܪܳܐ. ܠܣܳܡܰܬ ܚܰܝ̈ܶܐ ܕܰܠܓܰܘ ܡܶܢܶܗ. ܘܒܶܗ ܙܟܰܘ ܠܡܰܘܬܳܐ. ܗܳܢܰܘ ܕܡܳܐ ܕܩܰܠܺܝܠ ܠܐܺܝܘ ܒܰܪܣܳܣܶܗ. ܘܰܐܢܺܝܚ ܐܶܢܽܘܢ ܣܰܓܺܝ ܒܢܽܘܛܪܶܗ ܫܰܡ̈ܠܶܝܟܝ̱ ܘܰܒܬܽܘ̈ܠܶܝܟܝ̱. ܫܽܘܪ̈ܶܐ ܐܶܢܽܘܢ ܕܢܳܛܪܺܝܢ ܘܡܶܬܢܰܛܪܺܝܢ. ܕܡܳܐ ܕܶܐܬܢܰܛܰܪܘ̱ ܩܰܠܺܝܠ ܢܛܰܪܘ̱ ܣܰܓܺܝ܀

ܒܥܺܝܠܬܳܐ ܨܳܒܰܬ ܕܰܬܡܽܘܬ ܕܓܰܘܪܳܐ ܢܶܬܒܰܛܰܠ. ܒܬܽܘܠܬܳܐ ܡܺܝܬܰܬ ܕܢܶܕܪܳܐ ܠܳܐ ܢܶܒܛܰܠ. ܐܶܢ ܗܽܘ ܗܳܟܺܝܠ ܕܫܰܘܬܳܦܽܘܬܳܐ ܐܶܡܳܐ ܕܙܰܪ̈ܥܶܐ ܨܒܳܬ ܕܰܬܡܽܘܬ. ܕܠܳܐ ܬܩܰܒܶܠ ܙܰܪܥܳܐ ܓܢܺܝܒܳܐ ܕܠܺܝܛ ܐܰܟܳܪܶܗ. ܒܬܽܘܠܬܳܐ ܠܳܐ ܬܶܓܢܽܘܒ ܠܙܰܪܥܳܐ ܛܰܡܳܐܐ. ܕܥܰܘܠܳܐ ܕܰܟܝܳܐ ܥܰܘܠܰܐ ܗ̱ܘ ܒܓܰܘܶܗ܀

ܠܳܐ ܬܪܰܕܦܶܝܗ ܐܰܘ ܦܰܓܪܳܐ ܠܰܒܬܽܘܠܽܘܬܳܐ. ܕܰܒܛܰܝܒܽܘܬܳܐ ܚܺܝܬܰܬ ܠܰܐܬܪܰܢ. ܘܰܐܝܟ ܕܬܰܘܬܳܒܳܐ ܫܳܪܝܳܐ ܒܰܐܪܥܰܢ. ܘܶܐܢ ܐ̱ܢܳܫ ܪܰܕܦܳܗܿ ܘܰܥܩܰܪ ܩܢܶܗ. ܒܰܕܠܳܐ ܡܰܨܝܳܐ ܕܬܶܗܦܽܘܟ ܬܶܒܢܺܝܘܗ̱ܝ ܠܪܰܘܡܳܐ ܓܶܦܶܝܗܿ ܒܰܥܓܰܠ ܡܰܫܩܰܠ. ܦܳܪܚܰܬܳܐ ܗ̱ܝ ܕܪܰܘܡܳܐ ܕܣܳܐܒܳܐ ܒܚܰܕ ܩܢܳܐ. ܘܶܐܢ ܡܰܫܩܠܳܐ ܫܒܰܩܬܶܗ ܠܥܳܠܰܡ܀

ܘܡܳܐ ܕܦܶܪܚܰܬ ܠܶܗ ܪܳܚܡܽܘܬ ܥܺܝܪ̈ܶܐ ܥܠܳܐ ܚܠܳܦܶܝܗ ܚܰܒܪܽܘܬ ܫܺܐܕ̈ܶܐ. ܕܪܶܓܬܳܐ ܕܺܐܝܬܶܝܗ ܒܥܶܠܰܬ ܕܳܪܳܐ ܕܰܒܬܽܘܠܽܘܬܳܐ. ܪܰܕܦܳܗܿ ܝܰܘܣܶܦ ܡܶܢ ܓܶܝܪ ܦܰܓܪܶܗ. ܕܠܳܐ ܬܶܫܪܶܐ ܒܶܗ ܪܳܚܡܽܘܬ ܥܺܝܪ̈ܶܐ. ܥܰܡܗܽܘܢ ܕܥܺܝܪ̈ܶܐ ܥܰܪܩܳܐ ܠܡܶܦܰܩ. ܘܡܰܢܽܘ ܕܠܳܐ ܢܶܒܟܳܐ ܕܰܚܠܳܦ ܗܳܝ ܡܫܺܝܢܬܳܐ. ܥܶܠܰܬ ܫܪܳܬ ܬܰܡܳܢ ܡܶܫܚܳܢܬܳܐ܀

ܬܶܕܚܰܠ ܛܰܠܝܽܘܬܳܐ ܡܶܢ ܚܰܡܪܳܐ. ܕܰܠܣܰܝܒܽܘܬܶܗ ܕܠܽܘܛ ܚܠܰܨ ܗܘܳܐ. ܐܶܢ ܕܶܝܢ ܥܒܰܕ ܚܰܡܪܳܐ ܐܺܝܕܳܐ ܕܥܰܣܩܳܐ. ܕܢܶܫ̈ܶܐ ܒܺܐܝܕܶܗ ܒܰܛܢܳܐ ܓܢܰܒ ܗܘ̈ܰܝ ܟܡܳܐ ܟܰܝ ܢܶܥܒܶܕ ܗܺܝ ܕܕܰܠܺܝܠܳܐ: ܕܓܰܒܪ̈ܶܐ ܒܺܐܝܕܶܗ ܢܓܰܢܒܽܘܢ ܒܬܽܘ̈ܠܶܐ. ܛܰܠܝ̈ܳܬܳܐ ܚܠܰܨ ܣܺܝܡܳܬܳܗܿ ܕܣܳܒܳܐ. ܛܰܪܝ̱ ܐܰܢ̱ܬܝ̱ ܒܶܝܬ ܓܰܙܶܟܝ̱ ܡܶܢ ܕܛܰܠܝ̈ܳܢ܀ XL.

ܕܚܶܠܝ̱ ܬܽܘܒ ܡܶܢ ܚܰܡܪܳܐ. ܕܗܽܘ ܦܰܪܣܺܝ ܠܢܽܘܚ ܝܰܩܺܝܪܳܐ. ܘܗܰܘ ܕܙܳܟܶܐ ܗܘܳܐ ܠܡܳܡܽܘܠ ܡܰܝ̈ܳܐ. ܡܶܢ ܫܽܘܥܠܳܐ ܕܚܰܡܪܳܐ ܐܶܙܕܰܟܺܝ. ܘܗܰܘ ܕܛܽܘܦܳܢܳܐ ܕܰܠܒܰܪ ܡܶܢܶܗ ܠܳܐ ܚܶܣܢܶܗ. ܚܰܡܪܳܐ ܕܰܠܓܰܘ ܡܶܢܶܗ ܒܫܶܬܩܳܐ ܓܰܢܒܶܗ. ܐܶܢ ܠܢܽܘܚ ܪܺܝܫ ܛܽܘ̈ܗܡܶܐ ܘܠܶܫܳܢ̈ܶܐ ܦܰܪܣܺܝ ܫܕܳܝܗ̱ܝ ܚܰܡܪܳܐ. ܠܶܟܝ̱ ܟܰܝ ܡܫܽܘܚܕܬܳܐ ܟܡܳܐ ܙܟܳܐ܀

ܠܳܐ ܬܶܬܟܠܺܝܢ ܥܰܠ ܚܰܡܪܳܐ. ܐܶܠܺܝܠܳܐ ܗܰܘ ܓܶܝܪ ܘܰܫܓܽܘܫܳܐ ܕܡܰܫܠܶܡ ܚܶܣܢܶܟܝ̱. ܕܢܺܐܬܶܐ ܫܰܒܝܳܐ ܢܶܫܒܳܐ ܚܺܐܪܽܘܬܶܟܝ̱ ܠܶܐܡܗܽܘܬܳܐ. ܕܒܳܬܰܪ ܨܶܒܝܳܢܶܗ ܢܺܐܙܰܠ ܚܽܘܒܶܟܝ̱܀

ܘܡܳܐ ܕܛܳܒ ܐܰܘܒܶܕܬܝ̱ ܠܰܡܟܺܝܪܶܟܝ̱ ܫܰܪܺܝܪܳܐ܇ ܘܰܩܢܰܝܬܝ̱ ܚܠܳܦܰܘܗ̱ܝ ܙܺܐܦܳܢܳܐ ܡܳܐ ܕܰܗܘܳܐ ܠܶܟܝ̱ ܒܽܘܝܳܐܳܐ ܕܳܐܦܶܢ ܐܰܘܒܶܕܬ. ܐܶܠܳܐ ܐܶܫܟܰܚܬ. ܡܶܛܽܠ ܕܚܽܘܒܶܗ ܟܰܕܳܒ ܗܽܘ ܘܰܢܟܺܝܠ ܘܥܰܠ ܟܽܠ ܫܰܟܶܢ. ܠܳܐ ܠܘܶܐ ܠܶܟܝ̱܇ ܘܗܳܝܕܶܝܢ ܗܰܘ ܣܰܓܺܝ̈ܐܶܐ ܬܘܳܬ ܢܰܦܫܳܐ܀

ܡܳܐ ܕܡܶܟܳܐ ܘܡܶܟܳܐ ܐܶܫܬܰܘܚܕܰܬܝ̱܇ ܘܡܶܢ ܓܰܒ̈ܶܐ ܬܪ̈ܰܝܗܽܘܢ ܐܶܬܓܰܙܝܰܬ. ܫܰܪܺܝܪܳܐ ܫܰܒܩܶܟܝ̱ ܥܰܠ ܕܰܫܒܰܩܬܺܝܘܗ̱ܝ ܘܠܶܘܝܳܐ ܟܰܕܳܒܳܐ ܕܰܪܚܶܡܬܝ̱. ܒܶܝܬ ܐܽܘܪ̈ܚܳܬܳܐ ܐܰܪܫܶܠ ܫܰܒܩܶܟܝ̱. ܘܠܰܐܝܟܳܐ ܡܶܟܺܝܠ ܢܶܣܛܶܐ ܚܶܝܪܶܟܝ̱܇ ܝܰܘܢܳܐ ܫܦܺܝܬܳܐ ܕܥܶܩܪܰܬ ܩܢܳܗܿ. ܘܒܳܬܰܪ ܚܶܘܝܳܐ ܒܚܽܘܒܳܗܿ ܢܶܦܩܰܬ܀

ܡܰܪܓܳܢܺܝܬܶܟܝ̱ ܡܰܪܓܳܢܺܝܬܳܐ ܗ̱ܝ. ܕܡܶܢ ܒܶܝܬ ܬܪ̈ܶܝܢ ܓܰܢ̱ܒܺܝ̈ܢ ܦܶܪܚܳܐ ܠܡܺܐܒܰܕ. ܬܰܓܳܪ̈ܶܐ ܗܰܘ ܓܶܝܪ ܝܺܚܺܝ̈ܕܳܝܶܐ ܡܨܶܝܢ ܩܶܢܝ̈ܳܢ ܠܶܗ. ܘܶܐܢ ܐܶܬܛܰܡܰܐܘ̱ ܐܰܘܒܕܽܘܗ ܬܪ̈ܰܝܗܽܘܢ. ܐܰܘ ܡܰܪܓܳܢܺܝܬܳܐ ܕܪܰܒܳܐ ܡܶܢ ܟܽܠ. ܘܣܰܟܠܰܐ ܗ̱ܘ ܒܺܐܝܕ̈ܰܘܗ̱ܝ. ܡܰܪܓܳܢܺܝܬܳܐ ܠܓܰܢܳܒܳܐ ܡܰܘܫܶܛ ܠܳܗܿ܀

ܦܫܺܝܚܼ ܗܽܘ ܠܶܗ ܠܰܐܝܢܳܐ ܕܰܪܘܶܐ ܒܚܰܡܪܳܐ ܡܶܢ ܗܰܘ ܕܰܪܘܳܐ ܒܚܽܘܒܳܐ ܣܰܢܝܳܐ. ܕܡܰܠܟܳܐ ܘܝܽܘܠܦܳܢܳܐ ܕܰܒܥܰܠܘܳܐ. ܚܶܠܡ̈ܶܐ ܐܶܢܽܘܢ ܠܶܗ. ܘܠܶܗ ܢܶܓܕܳܐ ܐܰܝܟ ܠܰܘ ܢܶܓܕܰܐ ܗ̱ܘ. ܕܪܰܦܶܝܢ ܐܶܢܽܘܢ ܠܶܗ ܦܟܳܪ̈ܶܐ ܚ̈ܺܝܨܶܐ ܫܺܝܛ ܗܽܘ ܚܽܘܛܪܳܐ ܘܰܡܚܺܝܠ ܓܽܘܙܥܳܐ. ܘܰܒܣܶܐ ܫܰܒܛܳܐ. ܡܟܰܘܢܳܢܽܘܬܳܐ ܠܶܗ ܬܶܫܥܺܝܬܳܐ ܗ̱ܝ. ܘܡܰܟܣܳܢܽܘܬܳܐ ܐܰܝܟ ܫܽܘܥܺܝܬܳܐ ܥܶܒܪܳܐ ܒܶܐܕ̈ܢܰܘܗ̱ܝ. ܟܽܘܳܐܪܳܐ ܐܰܝܟ ܦܽܘܪܓܳܝܳܐ ܘܰܐܝܟ ܛܰܠܳܐ ܪܰܘܩܳܐ ܕܰܐܦ̈ܶܐ܀

ܠܰܘ ܓܶܝܪ ܨܶܝܕ ܠܶܒܶܗ ܡܰܘܒܶܠ ܫܒܺܝܠܳܐ ܕܡ̈ܶܠܶܐ ܕܰܢܩܰܫ ܒܶܐܕ̈ܢܰܘܗ̱ܝ. ܦܬܺܝܚܺܝ̈ܢ ܐܶܢܽܘܢ ܚܰܕ ܠܽܘܩܒܰܠ ܚܰܕ ܬܰܪ̈ܥܶܐ ܕܶܐܕܢܰܘܗ̱ܝ ܡܶܠܬܳܐ ܕܥܶܠܳܐ ܒܶܐܕܢܶܗ ܠܩܽܘܒܠܶܗ ܢܳܦܩܳܐ ܒܰܐܚܪܺܬܳܐ. ܡܡܰܠܳܠܶܐ ܕܢܳܣܟܺܝܢ ܒܳܗ̇ ܡܕܰܒܰܪ ܗܽܘ ܠܒܰܪ ܢܳܦܶܩ ܟܽܠܶܗ ܡܰܠܦܳܢܶܗ ܣܳܒܰܪ ܕܰܠܓܰܘ ܥܳܐܶܠ ܝܽܘܠܦܳܢܳܐ ܠܳܐ ܕܶܝܢ ܪܓܺܝܫ ܕܟܽܠܶܗ ܠܒܰܪ ܗܰܘ ܫܳܦܰܥ ܘܡܶܬܶܐܫܶܕ ܒܰܕܠܰܝܬ ܐܰܬܪܳܐ ܒܪܶܥܝܳܢܳܐ ܕܰܢܩܰܒܶܠ܀

ܡܠܶܝܢ ܐܶܢܽܘܢ ܓܶܝܪ ܘܰܣܒܺܝ̈ܣܺܝܢ ܘܰܐܛܺܝ̈ܡܺܝܢ ܥܽܘ̈ܒܶܐ ܕܡܰܚ̈ܫܒܳܬܶܗ. ܡܶܢ ܡܛܽܘܦܺܝܬܳܐ ܕܪܶܚܡܬܳܐ ܒܺܝܫܬܳܐ ܕܢܶܛܦܰܬ ܒܶܗ. ܘܰܗܘܳܬ ܠܝܰܡܳܐ ܪܰܒܳܐ. ܘܗܳܐ ܥܳܡܕܺܝܢ ܘܢܳܒܓܺܝ̈ܢ ܬܰܡܳܢ ܚܽܘ̈ܫܳܒܶܐ ܐܰܝܟ ܡ̈ܰܠܳܚܶܐ ܕܰܐ̈ܠܦܰܝܗܽܘܢ ܐܶܬܬܰܒܰܪ ܘܗܳܐ ܛܰܢܦܳܐ ܬܰܡܳܢ ܚܫܰܒܬܳܐ ܐܰܝܟ ܐܰܠܦܳܐ ܕܣܰܦܢܳܐ ܠܰܝܬ ܠܶܗ. ܘܟܰܕ ܢܳܡܽܘܣܳܐ ܐܰܝܟ ܡܶܠܚܳܐ ܠܰܠܡܺܐܢܳܐ ܛܳܒܳܐ ܨܒܳܐ ܕܢܰܝܬܶܝܗܿ ܗܺܝ ܥܰܡ ܡܶܠܚܳܗܿ ܡܶܬܟܰܬܫܳܐ. ܘܠܚܽܘܣܪܳܢܳܗܿ ܗܰܘ ܪܰܚܡܳܐ܀

ܐܳܘ ܛܰܠܝܽܘܬܳܐ ܡܪܳܬ ܪ̈ܶܗܛܶܐ ܠܳܐ ܬܶܓܡܪܺܝܢܳܝܗ̱ܝ ܪܶܗܛܶܝܟܝ̱ ܒܬܰܘܫܳܐ ܕܰܪ̈ܓܺܝܓܳܬܳܐ. ܡܳܐ ܕܰܦܠܰܚ ܒܶܟܝ̱ ܘܰܫܩܰܠ ܚܰܝܠܶܟܝ̱ ܫܡܰܪ ܫܰܒܩܶܟܝ̱ ܕܬܺܐܬܶܐ ܠܒܶܙܚܳܐ ܣܰܝܒܽܘܬܶܟܝ̱ ܕܪܶܗܛܳܐ ܣܰܢܝܳܐ ܢܳܛܪܰܬܝ̱ ܠܶܗ ܠܚܶܣܕܳܐ܀

ܐܰܩܠܺܝ ܛܰܠܝܽܘܬܳܐ. ܪܶܗܛܶܟܝ̱ ܒܺܐܝܓܽܘܢܳܐ ܕܢܰܨܒܬܳܗܿ ܟܠܺܝܠܳܐ ܠܣܰܝܒܽܘܬܶܟܝ̱. ܡܳܐ ܕܦܶܟܗܰܬ ܓܶܝܪ ܣܰܝܒܽܘܬܳܐ ܘܰܙܥܰܪ ܗܰܘܢܳܗܿ ܡܶܬܕܰܟܪܺܝܢ ܠܶܗ ܟܢܺܝܟܽܘܬܳܐ ܕܛܰܠܝܽܘܬܳܗܿ. ܕܟܶܢܫܰܬ ܗܰܘܢܶܗ ܢܶܕ̈ܝܳܢ ܡܶܢܳܗܿ ܕܚܳܙܶܝܢ ܡܽܘ̈ܡܶܐ ܕܦܰܓܪܶܗ. ܡܚܰܒܒܺܝ̈ܢ ܠܶܗ ܕܶܝܢ ܕܚܳܙܶܝܢ ܢܶܨܒ̈ܳܬܶܝܗܿ ܟ̈ܣܰܝܳܐ ܕܪܽܘܚܳܐ܀

ܨܽܘܪܝ̱ ܐܳܘ ܛܰܠܝܽܘܬܳܐ ܢܶܨܚ̈ܳܢܰܝܟܝ̱ ܥܰܠ ܗܰܕܳܡܰܝ̈ܟܝ̱ ܕܰܒܗܽܘܢ ܬܶܬܝܰܩܪܺܝܢ ܡܳܐ ܕܣܒܳܬ ܨܽܘܪܝ̱ ܥܰܠ ܐܺܝ̈ܕܰܝܟܝ̱ ܟܽܠ ܙܶܕܩ̈ܳܬܳܐ. ܒܣܽܘܥܪ̈ܳܢ ܡܰܪ̈ܥܶܐ ܪܫܽܘܡܝ̱ ܥܶܩ̈ܒܳܬܶܟܝ̱܇ ܨܽܘܪܝ̱ ܥܰܠ ܠܶܒܶܟܝ̱ ܝܽܘܩܢܶܗ ܕܡܳܪܶܟܝ̱܀

ܘܶܐܢ ܕܰܦ̈ܶܐ ܩ̈ܒܺܝܥܶܐ ܕܪܰܟܶܒ ܢܰܓܳܪܳܐ ܘܨܳܪ ܨܰܝܳܪܳܐ ܡܶܬܩܪ̈ܶܝܢ܇ ܐܳܦ ܡܶܣܬܰܓܕ̈ܺܝܢ ܒܥܶܠܰܬ ܨܰܠܡܳܐ ܕܡܰܠܟܽܘܬܳܐ. ܟܡܳܐ ܗܳܟܺܝܠ ܢܶܬܝܰܩܪܽܘܢ ܗܰܕ̈ܳܡܰܝܟܝ̱ ܕܰܒܗܽܘܢ ܨܳܝܪ̈ܺܝܢ ܝܽܘܩ̈ܢܰܘܗ̱ܝ ܕܡܰܠܟܶܟܝ̱܀

LII.

ܕܳܡܝܳܐ ܗ̱ܝ ܛܰܠܝܽܘܬܳܐ ܠܣܰܘܟܰܬ ܦܺܐܪ̈ܶܐ ܛܳܒܳܐ ܕܦܰܐܝܳܐ ܒܩܰܝܛܳܐ ܘܡܳܐ ܕܶܐܫܬܠܰܚܘ̱ ܦܺܐܪ̈ܶܝܗ ܘܛܰܪ̈ܦܶܝܗ ܡܶܣܬܰܢܝܳܐ ܠܶܗ. ܘܟܽܠܢܳܫ ܡܰܗܦܶܟ ܐܰܦܰܘ̈ܗ̱ܝ ܡܶܢܶܗ. ܘܗܽܘܝܳܐ ܠܶܗ ܪܓܺܝܓܰܬ ܥܰܠ ܟܽܠ ܫܺܝܛܰܬ ܥܶܠ ܟܽܠ ܫܒܰܪܬܳܐ ܠܳܐ ܬܰܚܘܶܝܢ ܫܽܘܦܪܶܟܝ̱ ܠܒܰܪ̈ܳܝܳܐ. ܕܡܳܐ ܕܶܐܣܬܢܺܝ ܘܣܳܐܶܒ ܫܳܛܽܘܗ̱ܝ ܚܰܙܳܝ̈ܶܐ܀

ܐܳܘ ܥܰܝܢܳܐ ܠܳܐ ܢܶܫܒܶܝܟܝ̱ ܫܽܘܦܪܳܗܿ ܕܛܰܠܝܽܘܬܳܐ ܕܡܽܘ̈ܡܶܐ ܟܡܺܝܢܺܝܢ ܒܶܗ ܕܣܰܝܒܽܘܬܳܐ. ܛܥܺܝܢܺܝܢ ܐܶܢܽܘܢ ܓܶܝܪ ܗܰܕ̈ܳܡܶܝܗ ܕܥܰܠܰܝܡܽܘܬܳܐ ܚܙܳܬܳܐ ܦܐܺܝܬܳܐ. ܡܟܰܣܶܐ ܠܗܽܘܢ ܕܶܝܢ ܣܰܝܒܽܘܬܳܐ. ܕܫܽܘܦܪܳܐ ܫܐܺܝܠܳܐ ܫܪܶܐ ܗ̱ܘܳܐ ܥܠܰܝܗܽܘܢ ܗܰܘ ܕܥܰܕ ܫܪܶܐ ܘܫܰܟܶܢ. ܐܰܫܩܰܠ ܘܰܦܪܰܚ܀

ܐܶܢܕܶܝܢ ܢܶܣܬܰܩܒܰܠ ܫܰܒܝܳܐ ܕܡܰܠܟ̈ܶܐ. ܘܰܟܢܺܝܟܽܘܬܶܟܝ̱ ܒܕܰܒܪܳܐ ܢܦܰܪܣܽܘܢ ܗܽܘ ܩܛܺܝܪܶܗ ܛܰܡܳܐܐ ܕܫܰܒܝܳܐ ܡܦܺܝܣ ܥܠܶܝܟܝ̱ ܕܩܰܕܺܝܫܰܬܝ̱ ܗܽܘ. ܐܰܝܟ ܕܳܐܦ ܣܰܪܳܐ ܩܰܕܺܝܫܳܐ ܗܘܳܬ. ܒܥܽܘܒܶܗ ܛܰܡܳܐܐ ܕܦܶܪܥܽܘܢ ܛܰܢܦܳܐ. ܕܠܳܐ ܓܶܝܪ ܠܶܒܳܗܿ ܒܚܺܐܪܽܘܬܳܗܿ. ܗ̱ܘܳܐ ܨܶܒܝܳܢܳܗܿ ܟܳܗܢܳܐ ܠܓܽܘܫܡܳܗܿ ܘܰܒܙܽܘܦܶܗ ܚܰܠܶܠ ܦܰܓܪܳܐ. ܕܶܐܬܛܰܡܰܐ ܒܰܩܛܺܝܪܳܐ ܐܰܝܟܰܢܳܐ ܓܶܝܪ ܕܡܶܫܟܰܚ ܟܳܗܢܳܐ ܕܰܢܕܰܟܶܐ ܗܰܝܟܠܳܐ ܕܰܡܫܰܡܶܫ ܒܶܗ. ܗܳܟܰܢܳܐ ܡܶܫܟܰܚ ܨܶܒܝܳܢܳܐ ܕܰܟܝܳܐ ܕܰܢܕܰܟܺܝܘܗ̱ܝ ܠܦܰܓܪܳܐ ܗܰܝܟܠܳܐ ܕܰܡܟܰܗܶܢ ܒܓܰܘܶܗ.

ܬܶܗܪܳܐ ܗܰܘ ܓܶܝܪ ܒܰܪܢܳܫܳܐ. ܕܟܰܕ ܗܽܘ ܚܰܕ ܗܽܘ. ܗܰܘ ܠܢܰܦܫܶܗ ܗܰܝܟܠܳܐ. ܗܽܘ ܠܢܰܦܫܶܗ ܟܳܗܢܳܐ. ܗܽܘ ܠܢܰܦܫܶܗ ܟܽܘܡܪܳܐ. ܗܰܘ ܠܢܰܦܫܶܗ ܕܶܒܚܬܳܐ. ܗܽܘ ܩܽܘܪܒܳܢܳܐ ܘܗܽܘ ܡܩܰܪܒܳܢܶܗ ܕܩܽܘܪܒܳܢܳܐ. ܕܳܡܶܐ ܗܽܘ ܓܶܝܪ ܠܗܰܘ ܐܶܡܪܶܗ ܕܰܐܠܳܗܳܐ. ܕܗܽܘ ܗ̱ܘܳܐ ܠܢܰܦܫܶܗ ܟܽܠ ܡܶܕܶܡ܀