Digital Syriac Corpus

Nativity 1

   https://syriaccorpus.org/549
  TEI/XML   Text  
Table of Contents  
1 2 3 4 5 6 7 8 9 10 11 12 13 14 15 16 17 18 19 20 21 22 23 24 25 26 27 28 29 30 31 32 33 34 35 36 37 38 39 40 41 42 43 44 45 46 47 48 49 51 52 53 54 55 56 57 58 59 60 61 62 63 64 65 66 67 68 69 70 71 72 73 74 76 77 78 79 80 81 82 83 84 85 86 87 88 89 90 91 92 93 94 95 96 97 98 99
ܥܰܠ ܩܳܠܳܐ ܕܗܳܢܰܘ ܡܰܘܕ̈ܝܳܢܶܐ
1 ܗܳܢܳܐ ܝܰܘܡܳܐ ܚܰܕܺܝ ܡܳܪܝ ܠܡܰܠܟ̈ܶܐ ܟܳܗ̈ܢܶܐ ܘܰܢܒܺܝ̈ܶܐ ܕܒܶܗ ܐܶܫܬܰܠܰܡ ܡܶܠܰܝ̈ܗܽܘܢ ܘܰܗܘܰܝ̈ ܟܽܠܗܶܝܢ ܒܰܥܒܳܕܳܐ [ܥܽܘܢܝܳܐ : ܠܳܟ ܫܽܘܒܚܳܐ ܒܰܪ ܒܳܪܽܘܝܰܢ ܬܰܢܺܝ]
2 ܒܬܽܘܠܬܳܐ ܓܶܝܪ ܝܰܘܡܳܢ ܝܶܠܕܰܬ ܠܥܰܡܰܢܽܘܐܶܝܠ ܒܶܝܬ ܠܚܶܡ ܩܳܠܳܐ ܕܡܰܠܶܠ ܐܶܫܰܥܝܳܐ ܝܰܘܡܳܢܳܐ ܗܘܳܐ ܣܽܘܥܪܳܢܶܗ
3 ܗܳܢܳܐ ܐܶܬܺܝܠܶܕ ܬܰܡܳܢ ܕܒܰܟܬܳܒܳܐ ܠܥܰܡ̈ܡܶܐ ܡܳܢܶܐ ܙܡܺܝܪܬܳܐ ܕܙܰܡܰܪ ܗܘܳܐ ܕܰܘܺܝܕ ܝܰܘܡܳܢܳܐ ܗܘܳܐ ܫܽܘܠܳܡܳܗܿ
4 ܡܶܠܬܳܐ ܕܡܰܠܶܠ ܗܘܳܐ ܡܺܝܟܳܐ ܝܰܘܡܳܢܳܐ ܗܘܳܬ ܒܰܥܒܳܕܳܐ ܕܪܳܥܝܳܐ ܢܦܰܩ ܡܶܢ ܐܳܦܰܪܬܳܐ ܘܰܪܥܳܐ ܚܽܘܛܪܶܗ ܢܰܦܫ̈ܳܬܳܐ
5 ܗܳܐ ܕܚܰܕ ܟܰܘܟܒܳܐ ܡܶܢ ܝܰܥܩܽܘܒ ܘܩܳܡ ܪܺܫܳܐ ܡܶܢ ܐܺܝܣܪܳܐܶܝܠ ܢܺܒܝܽܘܬܳܐ ܕܡܰܠܶܠ ܒܶܠܥܰܡ ܝܰܘܡܳܢܳܐ ܗܘܳܐ ܦܽܘܫܳܩܳܗܿ
6 ܢܚܶܬ ܗܘܳܐ ܬܽܘܒ ܢܽܘܗܪܳܐ ܟܰܣܝܳܐ ܘܰܕܢܰܚ ܫܽܘܦܪܶܗ ܡܶܢ ܦܰܓܪܳܐ ܕܶܢܚܳܐ ܕܐܰܡܺܝܪ ܒܰܙܟܰܪܝܳܐ ܝܰܘܡܳܢ ܐܰܙܠܶܓ ܒܶܝܬ ܠܚܶܡ
7 ܕܢܰܚ ܠܶܗ ܢܽܘܗܪܳܐ ܕܡܰܠܟܽܘܬܳܐ ܒܐܳܦܰܪܬܳܐ ܩܽܘܪܝܰܬ ܡܰܠܟ̈ܶܐ ܒܽܘܪܟܬܳܐ ܕܒܰܪܶܟ ܗܘܳܐ ܝܰܥܩܽܘܒ ܝܰܘܡܳܢܳܐ ܗܘܳܐ ܫܽܘܠܳܡܳܗܿ
8 ܐܺܝܠܳܢܳܐ ܬܽܘܒ ܕܚܰܝ̈ܶܐ ܣܰܒܪܳܐ ܡܰܝܬܶܐ ܠܡܳܝ̈ܽܘܬܶܐ ܡܰܬܠܶܗ ܟܰܣܝܳܐ ܕܰܫܠܶܝܡܽܘܢ ܝܰܘܡܳܢܳܐ ܗܘܳܐ ܬܽܘܪܓܳܡܶܗ
9 ܝܰܘܡܳܢ ܐܶܬܺܝܠܶܕ ܝܰܠܕܳܐ ܘܰܫܡܶܗ ܐܶܬܩܪܺܝ ܕܽܘܡܳܪܳܐ ܕܽܘܡܳܪܰܐ ܗ̱ܘ ܓܶܝܪ ܕܐܰܠܳܗܳܐ [ܕܐܰܝܟ] ܥܽܘܠܳܐ ܚܰܘܺܝ ܢܰܦܫܶܗ
10 ܒܬܽܘܠܥܳܐ ܗܽܘ ܡܰܬܰܠܬܶܗ ܗܘܳܬ ܪܽܘܚܳܐ ܕܡܰܘܠܕܶܗ ܕܠܳܐ ܙܽܘܘܳܓܰܐ ܗ̱ܘ ܛܽܘܦܣܳܐ ܕܨܳܪܰܬ ܪܽܘܚ ܩܽܘܕܫܳܐ ܝܰܘܡܳܢܳܐ ܗܘܳܐ ܣܽܘܟܳܠܶܗ
11 ܣܠܶܩ ܐܰܝܟ ܥܶܩܳܪܳܐ ܩܕܳܡܰܘܗܝ ܥܶܩܳܪܳܐ ܕܐܰܪܥܳܐ ܨܗܺܝܬܳܐ ܡܶܕܶܡ ܕܐܰܡܺܝܪ ܟܰܣܝܳܐܺܝܬ ܗܘܳܐ ܠܶܗ ܝܰܘܡܳܢ ܓܰܠܝܳܐܺܝܬ
12 ܕܡܰܠܟܳܐ ܟܣܶܐ ܗܘܳܐ ܒܝܺܗܽܘܕܳܐ ܓܢܰܒܬܶܗ ܬܳܡܳܪ ܡܶܢ ܚܰܨܶܗ ܝܰܘܡܳܢܳܐ ܕܢܰܚ ܢܶܨܚܳܢܶܗ ܕܫܽܘܦܪܳܐ ܕܪܶܚܡܰܬ ܟܰܣܝܽܘܬܶܗ
13 ܪܥܽܘܬ ܨܶܝܕ ܒܳܥܳܙ ܢܶܦܠܰܬ ܗܘܳܬ ܕܣܰܡ ܚܰܝ̈ܶܐ ܚܙܳܬ ܕܰܟܣܶܐ ܒܶܗ ܝܰܘܡܳܢ ܐܶܫܬܰܠܰܡ ܢܶܕܪܳܗܿ ܕܡܶܢ ܙܰܪܥܳܗܿ ܕܢܰܚ ܡܰܚܶܐ ܟܽܠ
14 ܐܳܕܳܡ ܐܰܪܡܺܝ ܗܘܳܐ ܚܽܘܒܠܳܐ ܥܰܠ ܐܰܢܬܬܳܐ ܕܡܶܢܶܗ ܢܶܦܩܰܬ ܝܰܘܡܳܢܳܐ ܦܪܰܥܬܶܗ ܚܽܘܒܠܶܗ ܕܝܶܠܕܰܬ ܠܶܗ ܗܺܝ ܦܳܪܽܘܩܳܐ
15 ܠܚܰܘܳܐ ܝܳܠܽܘܕܬܳܐ ܝܰܠܕܳܗܿ ܓܰܒܪܳܐ ܕܡܶܡܬܽܘܡ ܠܳܐ ܝܳܠܶܕ ܟܡܳܐ ܬܶܬܗܰܝܡܰܢ ܒܰܪܬ ܚܰܘܳܐ ܕܠܳܐ ܓܰܒܪܳܐ ܝܰܠܕܳܐ ܝܶܠܕܰܬ
16 ܐܰܪܥܳܐ ܒܬܽܘܠܬܳܐ ܝܶܠܕܰܬ ܗܘܳܬ ܠܗܰܘ ܐܳܕܳܡ ܪܺܝܫܳܐ ܕܐܰܪܥܳܐ ܒܬܽܘܠܬܳܐ ܝܰܘܡܳܢܳܐ ܝܶܠܕܰܬ ܠܐܳܕܳܡ ܪܺܝܫܳܐ ܕܰܫܡܰܝܳܐ
17 ܫܰܒܛܶܗ ܕܐܰܗܪܽܘܢ ܐܰܦܪܰܥ ܗܘܳܐ ܘܐܰܦܪܰܝ ܩܰܝܣܳܐ ܝܰܒܺܝܫܳܐ ܐܪܳܙܶܗ ܝܰܘܡܳܢ ܐܶܬܦܰܫܰܩ ܕܥܽܘܒܳܐ ܒܬܽܘܠܳܐ ܕܐܰܘܠܶܕ ܗܘܳܐ
18 ܢܶܒܗܰܬ ܗܰܘ ܥܰܡܳܐ ܕܐܰܚܺܝܕ ܠܰܢܒܺܝ̈ܶܐ ܐܰܝܟ ܫܰܪܺܝܪ̈ܶܐ ܕܐܶܠܽܘ ܠܳܐ ܐܶܬܳܐ ܦܳܪܽܘܩܰܢ ܐܶܬܕܰܓܰܠ ܗܘܰܝ̈ ܡܶܠܰܝ̈ܗܽܘܢ
19 ܒܪܺܝܟ ܗܽܘ ܫܰܪܺܝܪܳܐ ܕܐܶܬܳܐ ܡܶܢ ܠܘܳܬ ܐܰܒܳܐ ܕܰܫܪܳܪܳܐ ܘܡܰܠܺܝ ܡ̈ܶܠܶܐ ܕܫܰܪܺܝܪ̈ܶܐ ܘܐܶܫܬܰܠܰܡ ܒܰܫܪܳܪܰܝܗܶܝܢ
20 ܡܶܢ ܒܶܝܬ ܓܰܙܳܟ ܢܰܣܪܰܚ ܡܳܪܝ ܡܶܢ ܣܺܝܡ̈ܳܬܳܐ ܕܰܟܬܳܒܰܝ̈ܟ ܫܡܳܗ̈ܶܐ ܕܟܺܐܢ̈ܶܐ ܩܰܕܡܳܝ̈ܶܐ ܕܣܰܟܺܝܘ ܕܢܶܚܙܽܘܢ ܡܶܐܬܺܝܬܳܟ
21 ܫܺܝܬ ܗܰܘ ܕܰܗܘܳܐ ܚܠܳܦ ܗܳܒܶܝܠ ܠܰܒܪܳܐ ܩܛܺܝܠܳܐ ܚܳܐܰܪ ܗܘܳܐ ܕܰܒܩܶܛܠܶܗ ܬܶܩܗܶܐ ܚܰܪܒܳܐ ܕܐܰܥܶܠ ܩܳܐܶܝܢ ܠܰܒܪܺܝܬܳܐ
22 ܚܙܳܐ ܢܽܘܚ ܠܰܒܢܰܝ̈ ܐܰܠܽܘܗܺܝܡ ܩܰܕܺܝ̈ܫܶܐ ܕܐܰܦܚܰܙܘ ܡܶܢ ܫܶܠܝ ܘܣܰܟܺܝ ܠܰܒܪܳܐ ܩܰܕܺܝܫܳܐ ܕܐܶܬܩܰܕܰܫܘ ܒܶܗ ܙܰܢܳܝ̈ܶܐ
23 ܬܪ̈ܶܝܢ ܐܰܚܺܝ̈ܢ ܕܰܠܢܽܘܚ ܟܰܣܺܝܘ ܚܳܪܘ ܠܺܝܚܺܝܕܶܗ ܕܐܰܠܳܗܳܐ ܕܢܺܐܬܶܐ ܢܟܰܣܶܐ ܦܽܘܪܣܳܝܶܗ ܕܐܳܕܳܡ ܕܰܪܘܺܝ ܒܪܳܡܽܘܬܳܐ
24 ܫܺܝܡ ܘܝܳܦܶܬ ܐܰܝܟ ܚ̈ܢܢܶܐ ܣܰܟܺܝܘ ܠܰܒܪܳܐ ܚܰܢܳܢܳܐ ܕܢܺܐܬܶܐ ܢܚܰܪܰܪ ܗܘܳܐ ܠܟܰܢܥܰܢ ܡܶܢ ܥܰܒܕܽܘܬܳܐ ܕܰܚܛܺܝܬܳܐ
25 ܡܠܟܺܝܙܕܶܩ ܠܶܗ ܗܽܘ ܣܰܟܺܝ ܢܳܛܰܪ ܕܽܘܟܬܳܐ ܚܳܐܰܪ ܗܘܳܐ ܕܢܶܚܙܶܐ ܠܡܳܪܳܗܿ ܕܟܽܘܡܪܽܘܬܳܐ ܕܙܽܘܦܶܗ ܚܰܘܰܪ ܒܶܪ̈ܝܳܬܳܐ
26 ܚܙܳܐ ܗܘܳܐ ܠܽܘܛ ܠܣܳܕܽܘܡܳܝ̈ܶܐ ܕܠܰܟܝܳܢܳܐ ܬܰܩܢܳܐ ܗܰܦܟܽܘܗܝ ܠܡܳܪܶܐ ܟܝ̈ܳܢܶܐ ܚܳܐܰܪ ܗܘܳܐ ܕܝܰܗܒ ܩܽܘܕܫܳܐ ܕܠܳܐ ܒܰܟܝܳܢܳܐ
27 ܠܶܗ ܣܰܟܺܝ ܐܰܗܪܽܘܢ ܕܰܚܙܳܐ ܕܐܶܢ ܚܽܘܛܪܶܗ ܒܠܰܥ ܬܰܢܺܝ̈ܢܶܐ ܨܠܺܝܒܶܗ ܒܳܠܰܥ ܬܰܢܺܝܢܳܐ ܕܰܒܠܰܥ ܠܐܳܕܳܡ ܘܰܠܚܰܘܳܐ
28 ܚܙܳܐ ܡܽܘܫܶܐ ܚܶܘܝܳܐ ܩܒܺܝܥܳܐ ܕܐܰܣܺܝ ܢܽܘܟ̈ܬܳܬ ܚܰܪ̈ܡܳܢܶܐ ܘܣܰܟܺܝ ܕܢܶܚܙܶܐ ܠܗܰܘ ܕܐܰܣܺܝ ܡܚܽܘܬܶܗ ܕܚܶܘܝܳܐ ܩܰܕܡܳܝܳܐ
29 ܚܙܳܐ ܡܽܘܫܶܐ ܕܗܽܘ ܒܰܠܚܽܘܕܰܘܗܝ ܩܰܒܶܠ ܙܺܝܘܳܐ ܕܐܰܠܳܗܳܐ ܘܣܰܟܺܝ ܠܗܰܘ ܕܐܳܬܶܐ ܡܰܣܓܶܐ ܐܠܺܝܗܳܝ̈ܶܐ ܒܝܽܘܠܦܳܢܶܗ
30 ܟܳܠܳܒ ܓܳܫܽܘܫܳܐ ܛܰܥܢܶܗ ܠܰܣܓܽܘܠܳܐ ܒܩܽܘܦܳܐ ܘܐܶܬܳܐ ܣܰܟܺܝ ܕܢܶܚܙܶܐ ܛܽܘܛܺܝܬܳܐ ܕܚܰܡܪܳܗܿ ܒܰܝܰܐ ܒܶܪ̈ܝܳܬܳܐ
31 ܠܶܗ ܣܰܟܺܝ ܝܶܫܽܘܥ ܒܰܪܢܽܘܢ ܕܰܢܨܽܘܪ ܚܰܝܠܳܐ ܕܟܽܘܢܳܝܶܗ ܕܐܶܢ ܒܰܫܡܶܗ ܗܳܟܰܢ ܐܰܝܪܶܒ ܒܝܰܠܕܶܗ ܟܡܳܐ ܟܰܝ ܝܳܪܶܒ ܗܘܳܐ
32 ܗܰܘ ܝܶܫܽܘܥ ܕܐܰܘܣܶܦ ܘܰܩܛܰܦ ܘܐܰܘܒܶܠ ܥܰܡܶܗ ܡܶܢ ܦܺܐܪ̈ܶܐ ܠܐܺܝܠܳܢ ܚܰܝ̈ܶܐ ܣܰܟܺܝ ܗܘܳܐ ܕܢܶܛܥܰܡ ܦܺܐܪܶܗ ܕܡܰܚܶܐ ܟܽܠ
33 ܪܳܚܳܒ ܠܶܗ ܗܽܘ ܚܳܪܰܬ ܗܘܳܬ ܕܐܶܢ ܚܽܘܛܳܐ ܕܰܙܚܽܘܪܺܝܬܳܐ ܒܐܪܳܙܳܐ ܦܰܪܩܳܗܿ ܡܶܢ ܪܽܘܓܙܳܐ ܒܐܪܳܙܳܐ ܛܥܰܡܬܶܗ ܠܰܫܪܳܪܳܐ
34 ܠܶܗ ܐܶܬܪܰܓܪܰܓ ܐܶܠܺܝܳܐ ܘܰܕܠܳܐ ܚܙܳܝܗܝ ܠܰܒܪܳܐ ܒܐܰܪܥܳܐ ܗܰܝܡܶܢ ܘܐܰܣܓܺܝ ܐܶܨܛܰܠܰܠ ܕܢܶܣܰܩ ܢܶܚܙܶܝܘܗܝ ܒܰܫܡܰܝܳܐ
35 ܠܶܗ ܚܳܪܘ ܡܽܘܫܶܐ ܘܐܶܠܺܝܳܐ ܡܰܟܺܝܟܳܐ ܣܠܶܩ ܡܶܢ ܥܽܘܡܩܳܐ ܘܛܰܢܳܢܳܐ ܢܚܶܬ ܡܶܢ ܪܰܘܡܳܐ ܘܰܚܙܰܘ ܠܰܒܪܳܐ ܒܰܡܨܰܥܬܳܐ
36 ܨܳܪܘ ܗܘܰܘ ܐܪܳܙܳܐ ܕܡܶܐܬܺܝܬܶܗ ܗܘܳܐ ܡܽܘܫܶܐ ܛܽܘܦܣܳܐ ܠܡܺܝ̈ܬܶܐ ܘܐܶܠܺܝܳܐ ܛܽܘܦܣܳܐ ܠܚܰܝ̈ܶܐ ܕܦܳܪ̈ܚܺܝܢ ܠܐܽܘܪܥܶܗ ܡܳܐ ܕܐܳܬܶܐ
37 ܚܠܳܦ ܡܰܘܬܳܐ ܕܰܛܥܰܡܘ ܡܺܝ̈ܬܶܐ ܠܗܽܘܢ ܗܽܘ ܥܳܒܶܕ ܩܰܕܡܳܝ̈ܶܐ ܘܐܚܪ̈ܳܝܶܐ ܕܠܳܐ ܡܶܬܩܰܒܪ̈ܺܝܢ ܒܚܰܪܬܳܐ ܠܐܽܘܪܥܶܗ ܡܶܬܚܰܛܦܺܝܢ
38 ܡܰܢܽܘ ܡܰܘܦܶܐ ܠܺܝ ܕܐܶܡܢܶܐ ܙܰܕܺܝܩ̈ܶܐ ܕܣܰܟܺܝܘ ܠܰܒܪܳܐ ܕܡܶܢܝܳܢܗܽܘܢ ܠܳܐ ܡܶܣܬܰܝܰܟ ܡܶܢ ܦܽܘܡܳܐ ܕܰܡܚܺܝܠܽܘܬܰܢ
39 ܨܰܠܰܘ ܥܠܰܝ ܚܰܒܺܝ̈ܒܰܝ ܕܐܶܬܚܰܝܰܠ ܒܰܐܚܪܺܝܢ ܥܕܶܢ ܘܐܰܣܪܰܚܘ ܬܰܘ ܒܐܚܪܺܝܢ ܫܰܪܒܳܐ ܛܰܥܡ̈ܳܬܗܽܘܢ ܐܰܝܟ ܕܰܡܨܶܐ ܐ̱ܢܳܐ
40 ܡܰܢܽܘ ܣܳܦܶܩ ܕܰܢܫܰܒܰܚ ܠܰܒܪܳܐ ܕܩܽܘܫܬܳܐ ܕܰܕܢܰܚ ܠܰܢ ܕܠܶܗ ܐܶܬܪܰܓܪܰܓܘ ܙܰܕܺܝܩ̈ܶܐ ܕܰܒܕܳܪ̈ܰܝܗܽܘܢ ܢܶܚܙܽܘܢܳܝܗܝ
41 ܐܳܕܳܡ ܠܶܗ ܗܽܘ ܣܰܟܺܝ ܗܘܳܐ ܕܗܽܘܝܽܘ ܡܳܪܶܗ ܕܰܟܪܽܘܒܳܐ ܘܗܽܘ ܡܨܶܐ ܗܘܳܐ ܕܢܰܥܶܠ ܢܶܫܪܶܝܘܗܝ ܥܰܠ ܣܰܘܟܰܘ̈ܗܝ ܕܐܺܝܠܳܢ ܚܰܝ̈ܶܐ
42 ܗܳܒܶܝܠ ܠܶܗ ܗܽܘ ܐܶܬܪܰܓܪܰܓ ܕܰܒܝܰܘܡ̈ܳܬܶܗ ܢܺܐܬܶܐ ܗܘܳܐ ܕܰܚܠܳܦ ܐܶܡܪܳܐ ܕܩܰܪܶܒ ܗܘܳܐ ܢܶܚܙܶܐ ܠܐܶܡܪܶܗ ܕܐܰܠܳܗܳܐ
43 ܚܰܘܳܐ ܠܶܗ ܗܽܘ ܚܳܪܰܬ ܗܘܳܬ ܕܦܽܘܪܣܳܝܳܐ ܕܢܶܫ̈ܶܐ ܪܰܒ ܗܽܘ ܘܗܽܘ ܡܨܶܐ ܗܘܳܐ ܕܰܠܗܽܘܢ ܢܶܠܒܰܫ ܚܠܳܦ ܛܰܪ̈ܦܶܐ ܫܽܘܒܚܳܐ ܕܰܫܠܰܚ
44 ܡܰܓܕܠܳܐ ܕܰܒܢܰܘ ܣܰܓܺܝ̈ܶܐܐ ܐܪܳܙܶܗ ܠܚܰܕ ܗܽܘ ܚܳܐܰܪ ܗܘܳܐ ܕܗܽܘ ܢܳܚܶܬ ܒܳܢܶܐ ܒܐܰܪܥܳܐ ܡܰܓܕܠܳܐ ܕܡܰܣܶܩ ܠܰܫܡܰܝܳܐ
45 ܐܳܦ ܟܽܘܝܳܠܳܐ ܕܚܰܝ̈ܘܳܬܳܐ ܛܽܘܦܣܳܗܿ ܠܡܳܪܰܢ ܚܳܐܰܪ ܗܘܳܐ ܕܗܽܘ ܒܳܢܶܐ ܥܺܕܰܬ ܩܽܘܕܫܳܐ ܕܒܳܗܿ ܡܶܣܬܰܬܪ̈ܳܢ ܢܰܦܫ̈ܳܬܳܐ
46 ܒܝܰܘܡܰܝ̈ ܦܰܠܶܓ ܐܶܬܦܰܠܓܰܬ ܐܰܪܥܳܐ ܠܫܰܒܥܺܝܢ ܠܶܫܳܢܺܝ̈ܢ ܣܰܟܺܝ ܠܗܰܘ ܕܰܒܠܶܫܳܢ̈ܶܐ ܐܰܪܥܳܐ ܦܰܠܶܓ ܠܰܫܠܺܝܚܰܘ̈ܗܝ
47 ܐܰܪܥܳܐ ܕܚܰܢܩܳܗܿ ܡܳܡܽܘܠܳܐ ܠܡܳܪܳܗܿ ܫܰܬܩܳܗܿ ܩܳܪܶܐ ܗܘܳܐ ܢܚܶܬ ܘܰܦܬܰܚ ܡܰܥܡܽܘܕܺܝܬܳܐ ܘܐܶܬܕܰܠܺܝܘ ܒܳܗܿ ܠܰܫܡܰܝܳܐ
48 ܫܺܝܬ ܘܐܰܢܽܘܫ ܘܩܺܝܢܳܢ ܒܢܰܝ̈ ܐܰܠܳܗ̈ܶܐ ܐܶܬܟܰܢܺܝܘ ܠܰܒܪܳܐ ܕܐܰܠܳܗܳܐ ܣܰܟܺܝܘ ܕܐܰܚ̈ܶܐ ܒܪ̈ܰܚܡܶܐ ܢܶܗܽܘܘܢ ܠܶܗ
49 ܒܨܺܝܪ ܩܰܠܺܝܠ ܕܶܝܢ ܡܶܢ ܐܰܠܦܳܐ ܚܝܳܐ ܡܬܽܘܫܰܠܰܚ ܕܰܫܢܰܝ̈ܳܐ ܣܰܟܺܝ ܠܰܒܪܳܐ ܕܗܽܘ ܡܰܘܪܶܬ ܚܰܝ̈ܶܐ ܕܡܶܢ ܡܬܽܘܡ ܠܳܐ ܡܰܘܦܝ̈ܳܢ 50 ܗܺܝ ܛܰܝܒܽܘܬܳܐ ܚܠܳܦܰܝܗܽܘܢ ܒܐܪܳܙܳܐ ܟܰܣܝܳܐ ܫܶܐܠܰܬ ܗܘܳܬ ܕܡܳܪܗܽܘܢ ܢܺܐܬܶܐ ܒܕܳܪ̈ܰܝܗܽܘܢ ܘܢܶܡܠܶܐ ܚܽܘܣܪ̈ܳܢܰܝܗܽܘܢ
51 ܪܽܘܚ ܩܽܘܕܫܳܐ ܓܶܝܪ ܗܳܝ ܕܰܒܗܽܘܢ ܒܪܶܢܝܳܐ ܫܶܠܝܳܐ ܚܠܳܦܰܝܗܽܘܢ ܐܰܕܺܝܠܰܬ ܐܶܢܽܘܢ ܘܰܚܙܰܘ ܒܳܗܿ ܠܦܳܪܽܘܩܳܐ ܕܐܶܬܪܰܓܪܰܓܘ ܠܶܗ
52 ܢܰܦܫܳܐ ܕܟܺܐܢ̈ܶܐ ܪܶܓܫܰܬ ܒܶܗ ܒܰܒܪܳܐ ܕܐܺܝܬܰܘܗܝ ܣܰܡ ܚܰܝ̈ܶܐ ܘܐܶܬܝܰܐܒܘ ܕܰܒܝܰܘ̈ܡܳܬܳܗܿ ܢܺܐܬܶܐ ܘܬܶܛܥܰܡ ܚܰܠܝܽܘܬܶܗ
53 ܚܢܽܘܟ ܠܶܗ ܗܽܘ ܐܶܬܪܰܓܪܰܓ ܗܘܳܐ ܘܰܕܠܳܐ ܚܙܳܝܗܝ ܠܰܒܪܳܐ ܒܐܰܪܥܳܐ ܐܰܣܓܺܝ ܗܰܝܡܶܢ ܘܐܶܙܕܰܕܰܩ ܕܢܶܣܰܩ ܢܶܚܙܶܝܘܗܝ ܒܰܫܡܰܝܳܐ
54 ܡܰܢܽܘ ܕܢܶܛܠܽܘܡ ܛܰܝܒܽܘܬܳܐ ܕܗܳܝ ܡܰܘܗܰܒܬܳܐ ܕܩܰܕܡܳܝ̈ܶܐ ܒܥܰܡܠܳܐ ܪܰܒܳܐ ܠܳܐ ܢܰܣܒܽܘܗܿ ܡܰܓܳܢ ܐܶܬܳܬ ܠܐܰܚܪ̈ܳܝܶܐ
55 ܠܶܗ ܗܽܘ ܚܳܐܰܪ ܗܘܳܐ ܐܳܦ ܠܡܳܟ ܕܢܺܐܬܶܐ ܢܒܰܝܐܶܗ ܚܰܢܳܢܳܐ ܡܶܢ ܥܰܡܠܶܗ ܘܰܥܒܳܕ ܐܺܝܕ̈ܰܘܗܝ ܘܡܶܢ ܐܰܪܥܳܐ ܕܠܳܛܳܗܿ ܟܺܐܢܳܐ
56 ܚܙܳܐ ܕܶܝܢ ܠܳܡܳܟ ܠܢܽܘܚ ܒܪܶܗ ܕܐܪ̈ܳܙܰܘܗܝ ܕܰܒܪܳܐ ܨܺܝܪ̈ܺܝܢ ܒܶܗ ܚܠܳܦ ܗܰܘ ܡܳܪܳܐ ܪܰܚܺܝܩܳܐ ܒܰܝܐܺܗ ܐܪܳܙܳܐ ܩܰܪܺܝܒܳܐ
57 ܕܢܶܚܙܶܝܘܗܝ ܐܳܦ ܢܽܘܚ ܐܶܬܪܰܓܪܰܓ ܕܰܛܥܶܡ ܛܰܥܡܳܐ ܕܥܽܘܕܪ̈ܳܢܰܘܗܝ ܕܐܶܢ ܐܪܳܙܶܗ ܢܛܰܪ ܚܰܝ̈ܘܳܬܳܐ ܗܽܘ ܟܡܳܐ ܡܰܚܶܐ ܢܰܦܫ̈ܳܬܳܐ
58 ܠܶܗ ܣܰܟܺܝ ܢܽܘܚ ܕܢܰܣܺܝ ܕܒܶܗ ܗܽܘ ܩܳܡܰܬ ܟܘܺܝܠܳܐ ܕܐܶܢ ܛܽܘܦܣܶܗ ܗܳܟܰܢ ܡܰܚܶܐ ܟܡܳܐ ܟܰܝ ܡܰܚܶܐ ܒܰܩܢܽܘܡܶܗ
59 ܒܪܽܘܚܳܐ ܐܰܪܓܶܫ ܐܰܒܪܳܗܳܡ ܕܪܰܚܺܝܩ ܗܽܘ ܝܰܠܕܶܗ ܕܰܒܪܳܐ ܚܠܳܦ ܩܢܽܘܡܶܗ ܐܶܬܝܰܐܰܒ ܕܐܳܦܶܢ ܝܰܘܡܶܗ ܢܶܚܙܶܐ ܗܘܳܐ
60 ܕܢܶܚܙܶܝܘܗܝ ܐܺܝܣܚܳܩ ܐܶܬܪܰܓܪܰܓ ܕܰܛܥܶܡ ܛܰܥܡܳܐ ܕܦܽܘܪܩܳܢܳܐ ܕܐܶܢ ܢܺܝܫܶܗ ܗܳܟܰܢ ܡܰܚܶܐ ܟܡܳܐ ܟܰܝ ܡܰܚܶܐ ܒܰܫܪܳܪܶܗ
61 ܥܺܝܪ̈ܶܐ ܝܰܘܡܳܢ ܚܳܕܶܝܢ ܗܘܰܘ ܕܐܶܬܳܐ ܥܺܝܪܳܐ ܕܰܢܥܺܝܪܰܢ ܒܠܺܠܝܳܐ ܗܳܢܳܐ ܡܰܢ ܢܶܕܡܰܟ ܕܒܶܗ ܥܺܝܪܳܐ ܟܽܠܳܗܿ ܒܪܺܝܬܳܐ
62 ܕܐܰܥܶܠ ܐܳܕܳܡ ܠܰܒܪܺܝܬܳܐ ܫܶܢܰܬ ܡܰܘܬܳܐ ܒܰܚܛܳܗ̈ܶܐ ܢܚܶܬ ܠܶܗ ܥܺܝܪܳܐ ܕܰܢܥܺܝܪܰܢ ܡܶܢ ܛܽܘܒܳܥܳܗܿ ܕܰܚܛܺܝܬܳܐ
63 ܠܳܐ ܢܶܫܗܰܪ ܐܰܝܟ ܥܳܠܽܘ̈ܒܶܐ ܕܰܒܟܶܣܦܳܐ ܕܐܰܘܙܶܦܘ ܪ̈ܶܢܝܰܢ ܕܰܒܠܠܺܝܳܐ ܥܺܝܪ̈ܺܝܢ ܣܰܓܺܝ ܠܡܶܚܫܰܒ ܩܰܪܢܳܐ ܘܪܒܺܝܬܳܐ
64 ܥܺܝܪ ܘܰܡܗܰܘܰܢ ܓܰܢܳܒܳܐ ܕܫܶܢܬܶܗ ܒܐܰܪܥܳܐ ܚܦܰܪ ܛܰܡܪܳܗܿ ܥܺܝܪܽܘܬܶܗ ܟܽܠܳܗܿ ܗܳܕܳܐ ܗ̱ܝ ܕܳܥܽܘܬܳܐ ܠܕܰܡ̈ܟܶܐ ܢܰܣܓܶܐ
65 ܫܳܗܰܪ ܗܽܘ ܐܳܦ ܐܳܣܽܘܛܳܐ ܕܐܶܟܰܠ ܐܰܣܓܺܝ ܘܐܶܬܩܰܠܺܝ ܗܘܳܐ ܠܶܗ ܫܰܗܪܶܗ ܫܽܘܢܳܩܶܗ ܕܠܳܐ ܐܶܣܬܰܝܒܰܪ ܒܰܡܫܽܘܚܬܳܐ
66 ܫܳܗܰܪ ܗܽܘ ܐܳܦ ܬܰܓܳܪܳܐ ܒܠܺܠܝܳܐ ܡܰܠܐܶܐ ܨܶܒ̈ܥܳܬܶܗ ܕܢܶܚܫܽܘܒ ܡܢܝܶܗ ܟܡܳܐ ܐܶܬܳܐ ܘܐܶܢ ܥܳܦ ܘܬܠܳܬ ܫܳܡܽܘܢܶܗ
67 ܫܳܗܰܪ ܗܽܘ ܐܳܦ ܥܰܬܺܝܪܳܐ ܕܪܰܕܦܳܗܿ ܠܫܶܢܬܶܗ ܡܳܡܽܘܢܳܐ ܟܰܠܒܰܘ̈ܗܝ ܕܳܡ̈ܟܺܝܢ ܘܗܽܘ ܢܳܛܰܪ ܣܺܝ̈ܡܳܬܶܗ ܡܶܢ ܓܰܢܳܒ̈ܶܐ
68 ܫܳܗܰܪ ܗܽܘ ܐܳܦ ܝܳܨܽܘܦܳܐ ܕܫܶܢܬܶܗ ܒܨܶܦܬܶܗ ܐܶܬܒܰܠܥܰܬ ܕܩܶܨܶܗ ܩܳܐܶܡ ܠܐܶܣܳܕܰܘ̈ܗܝ ܘܫܳܗܰܪ ܝܺܨܺܝܦ ܕܰܫܢܰܝ̈ܳܐ
69 ܣܛܢܳܐ ܗܽܘ ܡܰܠܶܦ ܐܰܚܰܝ̈ ܥܺܝܪܽܘܬܳܐ ܚܠܳܦ ܥܺܝܪܽܘܬܳܐ ܕܢܶܗܘܶܐ ܕܰܡ̈ܟܶܐ ܠܛܳܒ̈ܳܬܳܐ ܫܰܗܪ̈ܶܐ ܘܥܺܝܪ̈ܶܐ ܠܣܰܢܝ̈ܳܬܳܐ
70 ܐܳܦ ܐܺܝܗܽܘܕܳܐ ܐܣܟܰܪܝܽܘܛܳܐ ܠܠܺܝܳܐ ܟܽܠܶܗ ܫܳܗܰܪ ܗܘܳܐ ܘܙܰܒܶܢ ܗܘܳܐ ܕܶܡ ܙܰܕܺܝܩܳܐ ܕܙܰܒܢܳܗܿ ܗܘܳܐ ܠܟܽܠܳܗܿ ܒܪܺܝܬܳܐ
71 ܒܰܪ ܚܶܫܽܘܟܳܐ ܠܒܶܫ ܚܶܫܽܘܟܳܐ ܕܰܫܠܰܚ ܘܰܫܕܳܐ ܢܰܗܺܝܪܳܐ ܘܰܠܗܰܘ ܒܳܪܽܘܝܶܗ ܕܟܶܣܦܳܐ ܒܟܶܣܦܳܐ ܙܰܒܶܢ ܓܰܢܳܒܳܐ
72 ܐܳܦ ܦܪ̈ܺܝܫܶܐ ܒܢܰܝ̈ ܚܶܫܽܘܟܳܐ ܠܠܺܝܳܐ ܟܽܠܶܗ ܥܺܝܪ̈ܺܝܢ ܗܘܰܘ ܫܗܰܪܘ ܚܶܫܽܘ̈ܟܶܐ ܕܰܢܚܰܦܽܘܢ ܢܽܘܗܪܳܐ ܕܠܳܐ ܡܨܶܐ ܡܶܣܬܰܝܰܟ
73 ܫܗܰܪܘ ܐܰܢܬܽܘܢ ܐܰܝܟ ܢܰܗܺܝܪ̈ܶܐ ܒܗܳܢܳܐ ܠܠܺܝܳܐ ܢܰܗܺܝܪܳܐ ܕܐܳܦܶܢ ܓܰܘܢܶܗ ܐܽܘܟܳܡܰܐ ܗ̱ܘ ܐܶܠܳܐ ܒܚܰܝܠܶܗ ܢܰܨܺܝܚ ܗܽܘ
74 ܐܰܝܢܳܐ ܓܶܝܪ ܕܐܰܝܟ ܢܰܨܺܝܚܳܐ ܥܺܝܪ ܘܰܡܨܰܠܶܐ ܒܚܶܫܽܘܟܳܐ ܒܓܰܘ ܗܰܘ ܚܶܫܽܘܟܳܐ ܓܰܠܝܳܐ ܢܰܗܺܝܪܳܐ ܟܰܣܝܳܐ ܡܥܰܛܰܦ 75 ܣܰܢܝܳܐ ܕܩܳܐܶܡ ܒܐܺܝܡܳܡܳܐ ܕܽܘܒܳܪܶܗ ܕܒܰܪ ܚܶܫܽܘܟܰܐ ܗ̱ܘ ܕܐܳܦܶܢ ܢܽܘܗܪܳܐ ܠܒܺܝܫ ܡܶܢ ܒܰܪ ܟܒܶܝܢ ܗܽܘ ܡܶܢ ܓܰܘ ܚܶܫܽܘܟܳܐ
76 ܠܳܐ ܟܺܝܬ ܢܶܛܥܰܡ ܚܰܒܺܝܒܰܝ̈ ܒܗܳܕܶܐ ܕܰܡܥܳܪ ܥܺܝܪ̈ܺܝܢ ܚܢܰܢ ܕܐܰܝܢܳܐ ܕܐܰܝܟ ܙܶܕܩܶܗ ܠܳܐ ܥܺܝܪ ܥܺܝܪܽܘܬܶܗ ܕܰܕܠܳܐ ܒܙܶܕܩܳܐ ܗ̱ܝ
77 ܐܰܝܢܳܐ ܕܠܳܐ ܥܺܝܪ ܙܰܗܝܳܐܺܝܬ ܗܺܝ ܥܺܝܪܽܘܬܶܗ ܕܰܡܟܽܘܬܳܐ ܗ̱ܝ ܘܐܰܝܢܳܐ ܕܠܳܐ ܥܺܝܪ ܕܰܟܝܳܐܺܝܬ ܘܐܳܦ ܫܰܗܪܶܗ ܣܰܩܽܘܒܠܰܐ ܗ̱ܘ ܠܶܗ
78 ܐܳܦ ܗܽܘ ܫܰܗܪܶܗ ܕܰܚܣܳܡܳܐ ܡܠܽܘܐܰܐ ܗ̱ܘ ܕܰܡܠܶܐ ܚܽܘܣܪܳܢܳܐ ܘܗܺܝ ܥܺܝܪܽܘܬܶܗ ܬܶܐܓܽܘܪܬܳܐ ܗ̱ܝ ܕܡܰܠܝܳܐ ܒܶܙܚܳܐ ܘܡܽܘܝܳܩܳܐ
79 ܚܰܡܬܳܢܳܐ ܐܶܢܗܽܘ ܕܫܳܗܰܪ ܕܠܺܝܚ ܗܽܘ ܫܰܗܪܶܗ ܡܶܢ ܚܶܡܬܳܐ ܘܰܗܘܳܬ ܠܳܗܿ ܗܺܝ ܥܺܝܪܽܘܬܶܗ ܡܰܠܝܳܐ ܪܽܘܓܙܳܐ ܘܠܰܘ̈ܛܳܬܳܐ
80 ܡܰܠܳܠܳܐ ܐܶܢ ܗܽܘ ܕܫܳܗܰܪ ܗܘܳܐ ܠܶܗ ܦܽܘܡܶܗ ܡܰܥܒܰܪܬܳܐ ܕܰܠܚܰܪ̈ܒܳܬܳܐ ܟܰܫܺܝܪܰܐ ܗ̱ܘ ܘܠܰܨ̈ܠܰܘܳܬܳܐ ܡܰܐܺܝܢܳܐ
81 ܦܳܪܽܘܫܳܐ ܐܶܢ ܗܽܘ ܕܫܳܗܰܪ ܚܕܳܐ ܡܶܢ ܬܰܪ̈ܬܶܝܢ ܓܳܒܶܐ ܠܶܗ ܐܰܘ ܢܶܕܡܰܟ ܒܰܣܺܝܡܳܐܺܝܬ ܐܰܘ ܢܶܫܗܰܪ ܙܰܕܺܝܩܳܐܺܝܬ
82 ܠܠܺܝܰܐ ܗ̱ܘ ܫܰܦܝܳܐ ܕܰܕܢܰܚ ܒܶܗ ܫܰܦܝܳܐ ܕܐܶܬܳܐ ܕܰܢܫܰܦܝܰܢ ܠܳܐ ܢܶܥܽܘܠ ܥܰܠ ܥܺܝܪܽܘܬܰܢ ܡܶܕܶܡ ܕܰܡܨܶܐ ܕܳܠܰܚ ܠܳܗܿ
83 ܫܒܺܝܠܳܐ ܕܐܶܕܢܳܐ ܢܶܫܬܰܦܶܐ ܚܝܳܪܳܐ ܕܥܰܝܢܳܐ ܢܶܬܢܰܟܰܦ ܪܶܢܝܶܗ ܕܠܶܒܳܐ ܢܶܬܩܰܕܰܫ ܡܰܡܠܠܶܗ ܕܦܽܘܡܳܐ ܢܶܨܛܰܠܰܠ
84 ܡܰܪܝܰܡ ܝܰܘܡܳܢ ܛܶܡܪܰܬ ܒܰܢ ܚܡܺܝܪܳܐ ܡܶܢ ܒܶܝܬ ܐܰܒܪܳܗܳܡ ܢܶܪܚܰܡ ܗܳܟܺܝܠ ܡܶܣܟܺܢ̈ܶܐ ܐܰܝܟ ܐܰܒܪܳܗܳܡ ܠܰܣܢܺܝ̈ܩܶܐ
85 ܡܣܳܬܳܐ ܝܰܘܡܳܢ ܢܶܦܠܰܬ ܒܰܢ ܡܶܢ ܒܶܝܬ ܕܰܘܺܝܕ ܚܰܢܳܢܳܐ ܢܶܪܚܰܡ ܐܢܳܫ ܥܰܠ ܪܳܕܽܘܦܶܗ ܐܰܝܟ ܒܰܪ ܐܺܝܫܰܝ ܥܰܠ ܫܳܐܽܘܠ
86 ܡܶܠܚܳܐ ܚܠܺܝܬܳܐ ܕܰܢܒܺܝ̈ܶܐ ܒܥܰܡ̈ܡܶܐ ܝܰܘܡܳܢܳܐ ܐܶܬܒܰܕܪܰܬ ܢܶܩܢܶܐ ܒܳܗܿ ܛܰܥܡܳܐ ܚܰܕܬܳܐ ܕܰܦܟܶܗ ܒܳܗܿ ܥܰܡܳܐ ܩܰܕܡܳܐ
87 ܒܗܳܢܳܐ ܝܰܘܡܳܐ ܕܦܽܘܪܩܳܢܳܐ ܢܡܰܠܶܠ ܡܰܡܠܠܳܐ ܕܦܽܘܪܫܳܢܳܐ ܠܳܐ ܢܡܰܠܶܠ ܝܰܬܺܝܪ̈ܳܬܳܐ ܕܠܳܐ ܢܶܗܘܶܐ ܠܶܗ ܝܰܬܺܝܪ̈ܶܐ
88 ܗܳܢܰܘ ܠܠܺܝܳܐ ܕܬܰܪܥܽܘܬܳܐ ܠܳܐ ܢܗܶܐ ܒܶܗ ܕܪܰܓܺܝܙ ܘܰܟܡܺܝܪ ܒܗܳܢܳܐ ܠܠܺܝܳܐ ܡܫܰܝܶܢ ܟܽܠ ܠܳܐ ܢܗܶܐ ܒܶܗ ܕܰܠܚܺܝܡ ܘܰܫܓܺܝܫ
89 ܗܳܢܰܘ ܠܠܺܝܶܗ ܕܒܰܣܺܝܡܳܐ ܠܳܐ ܢܗܶܐ ܒܶܗ ܕܡܰܪܺܝܪ ܘܰܩܫܶܐ ܒܗܳܢܳܐ ܠܺܠܝܶܗ ܡܫܰܝܶܢ ܟܽܠ ܠܳܐ ܢܗܶܐ ܒܶܗ ܕܰܠܚܺܝܡ ܘܰܫܓܺܝܫ
90 ܒܗܳܢܳܐ ܝܰܘܡܳܐ ܕܫܽܘܒܩܳܢܳܐ ܠܳܐ ܢܶܬܒܰܥ ܒܶܗ ܣܰܟܠܽܘܬܳܐ ܒܗܳܢܳܐ ܝܰܘܡܳܐ ܕܚܰܕ̈ܘܳܬܳܐ ܠܳܐ ܢܦܰܠܶܓ ܒܶܗ ܥܳܩ̈ܳܬܳܐ
91 ܒܗܳܢܳܐ ܝܰܘܡܳܐ ܒܰܣܺܝܡܳܐ ܠܳܐ ܢܶܗܘܶܐ ܒܶܗ ܥܰܙܺܝ̈ܙܶܐ ܒܗܳܢܳܐ ܝܰܘܡܳܐ ܢܝܳܚܳܐ ܠܳܐ ܢܶܗܘܶܐ ܒܶܗ ܚܶܡ̈ܬܳܢܶܐ
92 ܒܗܳܢܳܐ ܝܰܘܡܳܐ ܕܐܶܬܳܐ ܒܶܗ ܐܰܠܳܗܳܐ ܨܶܝܕ ܚܰܛܳܝ̈ܶܐ ܠܳܐ ܢܶܫܬܰܥܠܶܐ ܒܪܶܥܝܳܢܶܗ ܙܰܕܺܝܩܳܐ ܥܰܠ ܚܰܛܳܝܳܐ
93 ܒܗܳܢܳܐ ܝܰܘܡܳܐ ܕܐܶܬܳܐ ܒܶܗ ܡܳܪܳܐ ܕܟܽܠܳܐ ܨܶܝܕ ܥܰܒ̈ܕܶܐ ܢܶܬܪܰܟܢܽܘܢ ܐܳܦ ܡܳܪ̈ܰܝܳܐ ܨܶܝܕ ܥܒܳܕ̈ܰܝܗܽܘܢ ܚܽܘܒܳܐܺܝܬ
94 ܒܗܳܢܳܐ ܝܰܘܡܳܐ ܕܐܶܬܡܰܣܟܰܢ ܥܰܬܺܝܪܳܐ ܡܶܛܽܠܳܬܰܢ ܢܫܰܘܬܶܦ ܒܶܗ ܐܳܦ ܥܰܬܺܝܪܳܐ ܠܡܶܣܟܺܢܳܐ ܥܰܠ ܦܳܬܽܘܪܶܗ
95 ܒܗܳܢܳܐ ܝܰܘܡܳܐ ܢܶܦܩܰܬ ܠܰܢ ܡܰܘܗܰܒܬܳܐ ܟܰܕܠܳܐ ܫܰܐܶܠܢܶܝܗܿ ܚܢܰܢ ܕܶܝܢ ܢܶܬܶܠ ܙܶܕܩ̈ܳܬܳܐ ܠܰܕܩܳܥܶܝܢ ܘܒܳܥܶܝܢ ܡܶܢܰܢ
96 ܗܳܢܰܘ ܝܰܘܡܳܐ ܕܰܦܬܰܚ ܠܰܢ ܬܪܰܥ ܪܰܘܡܳܐ ܠܰܨ̈ܠܰܘܳܬܰܢ ܐܳܦ ܚܢܰܢ ܢܶܦܬܰܚ ܬܰܪ̈ܥܶܐ ܠܒܰܥܳܝ̈ܶܐ ܕܐܰܣܟܶܠܘ ܘܰܒܥܰܘ
97 ܗܰܘ ܡܳܪܶܐ ܟܝܳܢ̈ܶܐ ܝܰܘܡܳܢ ܕܠܳܐ ܒܰܟܝܳܢܶܗ ܐܶܬܚܰܠܰܦ [ܠܐ] ܗܘܳܬ ܥܶܛܠܳܐ ܕܐܳܦ ܚܢܰܢ ܨܶܒܝܳܢܰܢ ܒܺܝܫܳܐ ܢܶܗܦܽܘܟ
98 ܐܰܣܺܝܪ ܗܽܘ ܦܰܓܪܳܐ ܒܰܟܝܳܢܶܗ ܕܠܳܐ ܡܨܶܐ ܝܳܪܶܒ ܐܰܘ ܙܳܥܰܪ ܡܫܰܠܶܛ ܗܽܘ ܕܶܝܢ ܨܶܒܝܳܢܳܐ ܕܰܒܟܽܠ ܡܽܘܫ̈ܚܳܢ ܢܶܬܪܰܒܶܐ
99 ܝܰܘܡܳܢܳܐ ܛܶܒܥܰܬ ܢܰܦܫܳܗܿ ܐܰܠܳܗܽܘܬܳܐ ܒܐܢܳܫܽܘܬܳܐ ܕܬܶܨܛܰܒܰܬ ܐܳܦ ܐܢܳܫܽܘܬܳܐ ܒܓܰܘ ܛܰܒܥܳܗܿ ܕܐܰܠܳܗܽܘܬܳܐ
ܫܠܶܡ
SEDRA IV

Syriac Lexeme

About This Digital Text
Corpus Text ID:
https://syriaccorpus.org/549
Source:
Edmund Beck (ed.), "Des heiligen Ephraem des Syrers Hymnen De Nativitate (Epiphania)." in Corpus Scriptorum Christianorum Orientalium (Louvain: Secrétariat du CorpusSCO, 1959).
Type of Text: Digital Edition  
Status: Edited  
Publication Date: December 17, 2019
Preparation of Electronic Edition:
TEI XML encoding by James E. Walters.
Syriac text transcribed by Michael Oez.
Open Access and Copyright:
This electronic edition is designed for open access reuse. The Syriac base text is in the public domain. The TEI XML edition is copyrighted by James E. Walters and is released under a Creative Commons Attribution 4.0 International Public License (CC BY 4.0).
The HTML page is copyrighted by Vanderbilt University and released under a under a Creative Commons Attribution 4.0 International Public License (CC-BY 4.0, https://creativecommons.org/licenses/by/4.0/). Attribution for reuse should follow the suggested citation and also credit the copyright holder of the TEI XML edition.

Creative Commons License

 See details...
How to Cite this Electronic Edition
Note:
Ephrem the Syrian, “Nativity 1” based upon Edmund Beck (ed.), "Des heiligen Ephraem des Syrers Hymnen De Nativitate (Epiphania)." in Corpus Scriptorum Christianorum Orientalium (Louvain: Secrétariat du CorpusSCO, 1959), Digital Syriac Corpus, last modified December 17, 2019, https://syriaccorpus.org/549.
Bibliography:
“Nativity 1.” In Corpus Scriptorum Christianorum Orientalium, edited by . Syriaca.org, 2016-. Entry published . https://syriaccorpus.org/549.

Show Citation Styles
Linked Data