Nativity 2

https://syriaccorpus.org/550

ܬܽܘܒ ܕܺܝܠܶܗ ܕܡܳܪܝ ܐܰܦܪܶܝܡ ܥܰܠ ܩܳܠܳܐ ܕܟܶܢ̈ܫܶܐ ܥܶܠܳܝ̈ܶܐ

1 ܠܟܶܢܫܳܐ ܥܶܠܳܝܳܐ ܕܐܶܫܬܠܰܚ ܠܬܶܫܒܽܘܚܬܳܐ ܠܙܰܒܢܳܐ ܢܰܨܺܝܚܳܐ ܕܐܶܬܪܫܶܡ ܠܦܽܘܪܩܳܢܳܐ ܘܰܠܝܰܘܡܳܐ ܒܪܺܝܟܳܐ ܕܐܶܬܢܰܛܪ ܠܚܰܕܘ̈ܳܬܳܐ ܐܶܫܬܰܘܬܰܦ ܠܶܗ ܒܚܽܘܒܳܐ ܐܳܦ ܐܶܢܳܐ ܘܐܶܬܦܨܰܚ ܒܩܺܝܢ̈ܳܬܳܐ ܕܪ̈ܟܶܝܢ ܐܰܗܶܠܠܺܝܘܗܝ ܘܰܒܩܳܠܳܐ ܕܩܰܕܺܝܫ ܐܶܙܰܡܪܺܝܘܗܝ ܠܗܰܘ ܝܰܠܕܳܐ ܕܦܰܪܩܰܢ ܐܶܫܰܒܚܺܝܘܗܝ [ܥܽܘܢܺܝܬܳܐ : ܐܰܫܘܳܢܝ ܐܳܦ ܠܺܝ ܕܰܒܟܶܢܳܪܳܟ ܐܶܣܰܩ ܠܳܟ ܫܽܘܒܚܳܐ ܒܝܽܘܡ ܡܰܘܠܳܕܳܟ]

2 ܟܶܢܳܪ ܢܒܺܝ̈ܶܐ ܕܐܰܟܪܙܽܘܗܝ ܙܡܰܪܘ ܩܽܘܕܡܰܘܗܝ ܐܳܦ ܙܽܘܦܳܐ ܕܟܽܘܡܪ̈ܶܐ ܕܐܰܚܒܽܘܗܝ ܣܘܰܚܘ ܠܐܰܦܰܘ̈ܗܝ ܥܰܡ ܬܳܓܳܐ ܕܡܰܠܟ̈ܶܐ ܕܐܺܝܬܰܘܗܝ ܒܝܽܘܒܳܠܳܐ ܠܗܰܘ ܡܳܪܶܐ ܒܬܽܘ̈ܠܶܐ ܕܐܳܦ ܐܶܡܶܗ ܒܬܽܘܠܬܳܐ ܗܺܝ ܘܰܕܡܰܠܟܰܐ ܗ̱ܘ ܡܰܠܟܽܘܬܳܐ ܝܰܗܒ ܠܟܽܠ ܘܰܕܟܽܘܡܪܰܐ ܗ̱ܘ ܚܽܘܣܳܝܳܐ ܝܰܗܒ ܠܟܽܘܠ ܘܰܕܐܶܡܪܰܐ ܗ̱ܘ ܡܶܐܟܽܘܠܬܳܐ ܦܪܰܣ ܠܟܽܠ

3 ܡܕܺܝܢ̈ܳܬܶܗ ܕܡܰܠܟܳܐ ܟܽܠܗܶܝܢ ܡܥܳܕ̈ܳܢ ܐܶܢܶܝ̈ܢ ܕܰܟܠܺܝ̈ܠܶܐ ܕܕܰܗܒܳܐ ܢܩܰܪ̈ܒܳܢ ܒܐܺܝܕ̈ܰܝܗܶܝܢ ܡܕ̈ܺܝܢܳܬܳܐ ܕܺܝܗܽܘܕ ܟܠܺܝ̈ܠܶܐ ܡܠܺܝ̈ܠܶܐ ܡܳܪܝ ܟܠܺܝܠܰܝ̈ܗܶܝܢ ܒܦܽܘܡܰܝ̈ܗܶܝܢ ܠܳܟ ܝܶܫܽܘܥ ܡܩܰܪ̈ܒܳܢ ܒܶܝܬ ܠܚܶܡ ܩܳܛܢܶܐ ܘܢܳܨܪܰܬ ܒܶܝܬ ܥܰܢܝܳܐ ܘܫܶܟܺܝܡ ܘܫܳܡܪܺܝܢ ܥܰܡ ܟܰܪ̈ܟܶܐ ܕܰܫܘܰܘ ܘܟܰܠܠܽܘܟ

4 ܟܠܺܝܠܳܐ ܩܰܕܡܳܝܳܐ ܡܕܺܝܢܬܳܟ ܬܩܰܪܶܒ ܠܳܟ ܬܪ̈ܶܝܢ ܟܠܺܝܠܺܝ̈ܢ ܐܰܟܚܰܕ ܕܡܰܪܝܰܡ ܘܐܳܦܰܪܬܳܐ ܘܰܒܣܶܕܪ̈ܶܐ ܐܰܟܚܰܕ ܟܽܠܗܶܝܢ ܡܕܺܝܢ̈ܳܬܳܐ ܗܳܐ ܠܳܟ ܡܶܢ ܕܺܝܠܳܟ ܟܠܺܝ̈ܠܰܝܗܶܝܢ ܡܩܰܪ̈ܒܳܢ ܡܰܠܟܳܐ ܡܳܪܝ ܢܳܣܶܒ ܕܠܳܐ ܝܳܗܶܒ ܡܕܺܝܢ̈ܳܬܳܟ ܢܶܨܚܳܢܰܝ̈ܟ ܓܳܕ̈ܠܳܢ ܘܰܟܠܺܝܠܳܐ ܠܫܽܘܒܚܳܟ ܡܩܰܪ̈ܒܳܢ

5 ܐܶܡܶܗ ܬܶܣܓܽܘܕ ܠܶܗ ܟܠܺܝܠܳܐ ܬܩܰܪܶܒ ܠܶܗ ܕܠܰܫܠܶܝܡܽܘܢ ܐܶܡܶܗ ܐܰܡܠܟܰܬ ܘܟܰܠܠܬܶܗ ܗܰܘ ܐܰܚܢܶܦ ܐܳܦ ܚܳܒ ܟܠܺܝܠܶܗ ܒܐܰܓܽܘܢܳܐ ܗܳܐ ܒܰܪ ܕܰܘܺܝܕ ܕܰܠܒܶܝܬ ܕܰܘܺܝܕ ܢܰܨܰܚ ܘܟܰܠܠܶܗ ܕܐܰܘܪܶܒܬܳܝܗܝ ܣܰܓܺܝ ܠܟܽܘܪܣܝܶܗ ܘܪܰܡܪܶܡܬܶܝܗܿ ܣܰܓܺܝ ܠܫܰܪܒܬܶܗ ܘܟܶܢܳܪܶܗ ܡܬܰܚܬܳܝܗܝ ܠܟܽܠ ܐܰܬܰܪ

6 ܐܶܡܳܐ ܕܺܝܠܶܕܬܶܗ ܫܳܘܝܳܐ ܗ̱ܝ ܠܕܽܘܟܪܳܢܳܐ ܟܶܢܦܳܐ ܕܰܛܥܶܢܬܶܗ ܫܳܘܝܳܐ ܗ̱ܝ ܠܒܽܘܪ̈ܟܳܬܳܐ ܐܳܦ ܝܰܘܣܶܦ ܕܐܰܒܳܐ ܐܶܬܩܪܺܝ ܒܛܰܝܒܽܘܬܳܐ ܠܰܒܪܳܐ ܕܰܫܪܳܪܳܐ ܗܰܘ ܕܐܰܒܽܘܗܝ ܡܫܰܒܚܰܐ ܗ̱ܘ ܪܳܥܶܐ ܟܽܠ ܒܶܪ̈ܝܳܢ ܕܐܶܫܬܠܰܚ ܥܰܠ ܥܶܪܒܳܐ ܕܐܶܒܰܕ ܘܐܶܬܛܥܰܝ ܘܰܠܕܰܝܪܶܗ ܙܰܝܰܚ ܘܐܰܥܠܶܗ

7 ܡܶܢ ܟܽܘܠ ܕܐܶܬܐܰܣܺܝܘ ܚܕܺܝܢܝ ܕܐܶܢܳܐ ܒܛܶܢܬܶܗ ܡܶܢ ܟܽܠ ܕܺܝܪܶܒ ܒܶܗ ܐܰܘܪܒܰܢܝ ܕܐܶܢܳܐ ܐܺܝܠܶܕܬܶܗ ܠܦܰܪܕܰܝܣܶܗ ܚܰܝܳܐ ܕܐܶܥܽܘܠ ܥܬܺܝܕܳܐ ܐܢܳܐ ܘܰܒܐܰܬܪܳܐ ܕܚܒܶܬ ܒܶܗ ܚܰܘܳܐ ܐܶܫܰܒܚܺܝܘܗܝ ܕܰܨܒܳܐ ܒܺܝ ܡܶܢ ܢܶܫ̈ܶܐ ܕܐܶܬܒܪܺܝ ܕܐܶܗܘܶܐ ܠܶܗ ܐܶܡܳܐ ܕܗܽܘ ܨܒܳܐ ܐܳܦ ܗܽܘ ܠܺܝ ܝܰܠܕܳܐ ܕܠܶܗ ܫܦܰܪ

8 ܒܶܝܬ ܠܚܶܡ ܬܰܘܕܶܐ ܠܳܟ ܕܰܫܘܳܬ ܠܡܰܘܠܳܕܳܟ ܠܦܶܬܓܳܡܶܗ ܕܡܺܝܟܳܐ ܬܶܓܕܠܶܗ ܠܰܟܠܺܝܠܳܟ ܢܒܺܝܽܘܬܳܐ ܗܺܝ ܕܰܗܘܳܬ ܓܰܢܬܳܐ ܕܗܰܒ̈ܳܒܶܐ ܬܶܩܪܶܐ ܠܰܢܒܺܝ̈ܶܐ ܘܡܰܠܟ̈ܶܐ ܕܒܰܟܠܺܝܠܳܗܿ ܢܥܰܕܪܽܘܢ ܕܗܰܘ ܡܽܘܫܶܐ ܛܽܘܦܣ̈ܶܐ ܛܥܺܝܢ ܠܶܗ ܘܐܶܫܰܥܝܳܐ ܐܪ̈ܳܙܶܐ ܕܪ̈ܳܘܙܺܝܢ ܘܫܽܘܫܰܢ̈ܶܐ ܦܶܠܳܐܬܳܐ ܒܟܽܠ ܟܬܰܒ

9 ܒܦܽܘܡܳܐ ܕܢܰܨܺܝܚܰܝ̈ ܡܰܘܕܝܳܐ ܐ̱ܢܳܐ ܕܐܩܰܒܶܠܬܶܗ ܠܥܽܘܠܳܐ ܒܰܪ ܟܰܣܝܳܐ ܟܰܕ ܢܦܰܩ ܠܓܰܠܝܽܘܬܳܐ ܘܰܠܪܰܘܡܳܐ ܪܰܒܳܐ ܢܰܣܩܰܢܝ ܒܩܰܕܺܝܫܰܝ̈ ܕܒܰܫܡܰܝܳܐ ܡܬܺܝܚ̈ܶܐ ܘܰܪ̈ܘܺܝܚܶܐ ܐܶܫܰܒܚܺܝܘܗܝ ܕܰܡܠܶܝܢ ܡܶܢ ܫܽܘܒܚܶܗ ܘܠܳܐ ܡܨܶܝܢ ܪܰܒܽܘܬܶܗ ܠܡܶܚܒܰܫ ܒܓܰܘܗܽܘܢ ܕܗܰܘ ܕܰܪܟܶܢ ܘܰܙܥܰܪ ܒܐܽܘܪܝܳܐ

10 ܩ̈ܳܠܶܐ ܥܶܠܳܝ̈ܶܐ ܣܰܒܪܽܘܟ ܠܬܰܚ̈ܬܳܝܶܐ ܐܶܕܢ̈ܶܐ ܕܥܶܠܳܝ̈ܶܐ ܐܶܫܬܶܝܟ ܒܣܰܒܪ̈ܳܬܳܐ ܡܰܒܽܘܥܳܐ ܚܰܕܬܳܐ ܕܦܰܬܚܽܘܗܝ ܫܡܰܝܳܢ̈ܶܐ ܠܐܰܪ̈ܥܳܢܶܐ ܕܰܨܗܺܝܘ ܠܚܰܝ̈ܶܐ ܘܠܳܐ ܛܥܶܡܘ ܐܳܘ ܢܶܒܥܳܐ ܕܠܳܐܕܳܡ ܠܳܐ ܛܥܺܝܡ ܕܡܰܒܽܘ̈ܥܶܐ ܡܠܺܝ̈ܠܶܐ ܬܪ̈ܶܥܣܰܪ ܦܬܰܚ ܘܰܡܠܰܐܽܘܗܝ ܚ̈ܰܝܶܐ ܠܥܳܠܡܳܐ

11 ܝܰܘܣܶܦ ܣܳܓܶܕ ܠܳܟ ܟܠܺܝܠܳܐ ܡܩܰܪܶܒ ܠܳܟ ܗܰܘ ܟܺܐܢܳܐ ܫܚܺܝܩܳܐ ܕܡܰܠܰܐܟܳܐ ܐܰܢܺܚܶܗ ܗܘܳܐ ܘܰܕܬܰܘܪܶܒ ܐܰܓܪܶܗ ܐܶܥܰܪܩܳܟ ܒܓܰܘ ܥܽܘܒܶܗ ܟܺܐܢܽܘܬܶܗ ܕܝܰܘܣܶܦ ܠܳܟ ܣܶܗܕܰܬ ܟܡܳܐ ܕܰܟܰܝܬ ܕܰܠܟܺܐܢܳܐ ܡܰܢܽܘ ܢܦܺܝܣ ܗܘܳܐ ܕܒܰܪ ܓܰܘܪܳܐ ܣܰܢܝܳܐܐ ܗܘܳܐ ܛܥܺܝܢ ܘܡܶܢ ܐܰܬܪܳܐ ܠܚܰܒܪܶܗ ܗܘܳܐ ܪܕܺܝܦ

12 ܐܰܢܬ ܡܳܪܝ ܐܰܠܶܦܰܝܢܝ ܕܐܰܝܟܰܢ ܘܥܰܠ ܡܳܢܳܐ ܡܶܢ ܥܽܘܒܳܐ ܒܬܽܘܠܳܐ ܫܦܰܪ ܠܳܟ ܕܬܶܕܢܰܚ ܠܰܢ ܠܡܳܐ ܛܽܘܦܣܶܗ ܗܽܘ ܕܐܳܕܳܡ ܙܰܗܝܳܐ ܕܡܶܢ ܐܰܪܥܳܐ ܒܬܽܘܠܬܳܐ ܕܠܳܐ ܐܶܬܦܰܪܚܰܬ ܥܕܰܟܺܝܠ ܐܶܬܓܒܶܠ ܡܶܢ ܗܳܟܺܝܠ ܐܰܠܰܨܐ ܗܘܳܬ ܕܬܶܬܡܟܰܪ ܠܝܰܘܣܶܦ ܒܰܪܬ ܕܰܘܺܝܕ ܘܟܶܢ ܢܗܶܐ ܡܰܘܠܳܕܳܟ ܡܶܢܳܗܿ ܕܠܳܐ ܓܰܒܳܪ

13 ܝܽܘܒܳܠ ܡܰܠܟ̈ܶܐ ܚܠܳܦ ܢܶܫ̈ܶܐ ܒܫܶܡ ܓܰܒܪ̈ܶܐ ܗܽܘ ܐܶܬܟܬܶܒ ܝܰܘܣܶܦ ܒܰܪ ܕܰܘܺܝܕ ܡܰܟܪܳܗܿ ܠܒܰܪ ܕܰܘܺܝܕ ܕܠܳܐ ܡܶܫܟܰܚ ܛܰܠܝܳܐ ܕܢܶܬܟܬܶܒ ܒܫܶܡ ܐܶܡܶܗ ܗܘܳܐ ܗܳܟܺܝܠ ܝܰܠܕܳܐ ܠܝܰܘܣܶܦ ܕܠܳܐ ܙܪܰܥ ܐܳܦ ܝܰܠܕܳܐ ܠܐܶܡܶܗ ܕܠܳܐ ܓܒܰܪ ܘܡܶܢ ܬܪ̈ܰܝܗܽܘܢ ܐܰܣܪܶܗ ܠܓܶܢܣܗܽܘܢ ܕܰܒܡܰܠܟ̈ܶܐ ܒܰܪ ܕܰܘܺܝܕ ܐܶܬܟܬܶܒܘ

14 ܠܳܐ ܦܰܐܝܳܐ ܗܘܳܬ ܕܡܶܢ ܙܰܪܥܶܗ ܕܝܰܘܣܶܦ ܕܢܶܬܺܝܠܶܕ ܘܠܳܐ ܒܶܠܥܳܕ ܝܰܘܣܶܦ ܡܶܢ ܡܰܪܝܰܡ ܕܢܶܬܒܛܶܢ ܡܰܪܝܰܡ ܕܺܝܠܶܕܬܶܗ ܠܳܐ ܐܶܬܟܬܶܒ ܒܰܫܡܳܗܿ ܘܝܰܘܣܶܦ ܕܡܶܟܬܰܒ ܠܰܘ ܙܰܪܥܶܗ ܗܽܘ ܕܢܰܟܬܒܶܗ ܕܠܳܐ ܦܰܓܪܶܗ ܕܝܰܘܣܶܦ ܢܩܶܦ ܫܡܶܗ ܕܠܳܐ ܡܟܺܝܪܳܗܿ ܕܡܰܪܝܰܡ ܕܢܰܚ ܒܪܳܗܿ ܗܘܳܐ ܡܳܪܳܐ ܠܕܰܘܺܝܕ ܐܳܦ ܐܰܒܳܐ

15 ܐܰܢܬܰܬ ܓܒܰܪ ܗܽܘ ܩܪܳܗܿ ܠܰܡܟܺܝܪܬܳܐ ܡܽܘܫܶܐ ܡܟܺܝܪܳܐ ܕܠܳܐ ܢܰܣܒܳܗܿ ܒܰܥܠܳܐ ܩܪܳܝܗܝ ܐܳܦ ܠܶܗ ܕܰܕܠܳܐ ܝܽܘܒܳܠܳܐ ܢܶܦܣܩܽܘܢ ܕܒܰܪ ܕܰܘܺܝܕ ܕܠܳܐ ܓܰܒܪܳܐ ܠܰܡ ܐܰܝܟܰܢ ܒܰܪ ܕܰܘܺܝܕ ܢܶܬܡܢܶܐ ܡܟܺܝܪܳܗܿ ܠܰܡ ܐܰܝܟ ܓܰܒܪܳܐ ܐܶܬܚܫܶܒ ܐܳܦ ܡܳܪܰܢ ܐܰܘܕܺܝ ܒܛܽܘܗܡܗܽܘܢ ܕܰܩܪܰܐܽܘܗܝ ܒܰܪ ܕܰܘܺܝܕ ܘܠܳܐ ܟܦܰܪܘ

16 ܐܶܢܗܽܘ ܕܪܐܽܘܡܳܐ ܡܶܬܩܪܶܐ ܒܪܳܐ ܠܓܰܒܪܳܐ ܕܰܠܛܽܘܗܡܶܗ ܘܓܶܢܣܶܗ ܡܶܫܬܟܰܚ ܕܢܽܘܟܪܳܝܰܐ ܗ̱ܘ ܘܡܶܛܽܠ ܕܰܨܒܳܐ ܒܶܗ ܝܳܪܬܳܐ ܗܽܘ ܕܨܶܒܝܳܢܳܐ ܡܰܢ ܢܶܬܦܰܠܰܓ ܥܰܠ ܡܰܘܠܳܕ ܦܰܓܪܶܗ ܕܦܰܪܩܰܢ ܕܡܶܢ ܗܳܝ ܒܰܪܬ ܕܰܘܺܝܕ ܐܶܬܒܛܶܢ ܘܰܒܟܶܢܦܶܗ ܕܒܰܪ ܕܰܘܺܝܕ ܐܶܬܥܦܶܩ ܘܰܒܩܽܘܪܝܰܬ ܕܰܘܺܝܕ ܐܶܣܬܓܶܕ

17 ܡܶܢ ܟܰܝ ܥܰܒܕܳܐ ܗܘܳܬ ܢܰܟܦܬܳܐ ܒܗܰܘ ܥܶܕܳܢ ܕܓܰܒܪܺܝܐܶܝܠ ܨܶܐܕܶܝܗܿ ܐܶܫܬܠܰܚ ܦܪܰܚ ܘܰܢܚܶܬ ܒܰܨܠܽܘܬܳܐ ܚܙܳܬܶܗ ܐܟܒܰܪ ܒܗܰܘ ܥܶܕܳܢ ܕܐܳܦ ܕܳܢܺܝܐܶܝܠ ܠܓܰܒܪܺܝܐܶܝܠ ܒܰܨܠܽܘܬܳܐ ܗܽܘ ܚܙܳܝܗܝ ܗܘܳܐ ܨܠܽܘܬܳܐ ܓܶܝܪ ܘܰܣܒܰܪܬܳܐ ܐܚܝܳܢܬܳܗܿ ܚܕܳܐ ܠܰܚܕܳܐ ܙܳܕܶܩ ܕܰܢܦܰܨܚܰܢ ܐܰܝܟ ܡܰܪܝܰܡ ܠܐܶܠܺܝܫܒܰܥ ܐܚܝܳܢܬܳܗܿ

18 ܝܰܘܢܳܐ ܠܰܨܠܽܘܬܳܐ ܣܒܰܪܬܳܐ ܛܥܺܝܢܳܐ ܗܘܳܬ ܒܰܨܠܽܘܬܶܗ ܕܐܰܒܪܳܡ ܬܟܶܒ ܗܘܰܝ̈ ܠܣܰܒܪ̈ܳܬܶܗ ܚܶܙܰܩܝܳܐ ܨܠܽܘܬܶܗ ܣܰܪܗܒܰܬ ܘܣܰܒܰܪܬܶܗ ܩܶܢܛܪܽܘܢܳܐ ܣܰܒܰܪܬܶܗ ܠܰܨܠܽܘܬܶܗ ܐܰܦܨܚܰܬ ܘܒܐܰܓܪܳܐ ܫܶܡܥܽܘܢ ܐܶܬܦܨܰܚ ܘܰܙܟܰܪܝܳܐ ܐܰܓܪܳܐ ܕܦܺܝܪܡܶܗ ܥܰܠ ܦܺܝܪܡܶܗ ܣܒܰܪܬܶܗ ܐܶܬܳܬ ܗܘܳܬ 19ܦ] ܟܽܠ ܣܰܒܪ̈ܳܢ ܠܰܠܡܺܐܢܳܐ ܗܽܘ ܨܳܝ̈ܒܳܢ ܕܒܳܥܽܘܬܳܐ ܗܺܝ ܣܰܒܪܰܬ ܣܰܒܪ̈ܳܬܳܐ ܥܶܠܬܳܐ ܕܟܽܠ ܚܰܕ̈ܘܳܢ ܒܰܨܠܽܘܬܳܐ ܠܡܰܪܝܰܡ ܐܶܫܟܚܰܬ ܘܣܶܘܚܰܬ ܠܳܗܿ ܕܓܰܒܪܺܝܐܶܝܠ ܐܰܝܟ ܣܳܒܳܐ ܗܕܺܝܪܳܐ ܡܝܰܬܒܳܐ ܥܰܠ ܘܫܰܐܠ ܒܰܫܠܳܡܳܗܿ ܕܠܳܐ ܬܙܽܘܥ ܕܠܳܐ ܬܶܚܙܶܐ ܛܠܺܝܬܳܐ ܟܢܺܝܟܬܳܐ ܦܰܪܨܽܘܦܳܐ ܕܛܰܠܳܐ ܘܬܶܬܟܡܰܪ

20 ܠܣܳܒ̈ܶܐ ܬܪ̈ܶܝܢ ܢܰܟ̈ܦܶܐ ܘܠܰܒܬܽܘܠܬܳܐ ܛܠܺܝܬܳܐ ܠܗܽܘܢ ܠܚܽܘܕ ܓܰܒܪܺܝܐܶܝܠ ܐܶܫܬܠܰܚ ܒܣܰܒܪ̈ܳܬܳܐ ܒܨܶܒܝܳܢܳܐ ܕܳܡܝ̈ܳܢ ܘܰܡܣܰܒܗܶܝܢ ܟܝܳܢܰܝ̈ܗܽܘܢ ܒܬܽܘܠܬܳܐ ܘܰܥܩܰܪܬܳܐ ܘܕܳܢܺܝܐܶܝܠ ܡܗܰܝܡܢܳܐ ܚܰܕ ܐܺܝܠܶܕ ܓܠܰܝܢܝ ܡܺܐܡܪܳܐ ܘܐܚܪܺܢܳܐ ܩܳܠܳܐ ܠܡܰܕܒܪܳܐ ܘܰܒܬܽܘܠܬܳܐ ܡܠܳܬ ܡܪܰܝܡܳܐ

21 ܕܠܳܐ ܢܶܦܗܶܐ ܐܶܢܽܘܢ ܒܣܽܘܓܐܶܗ ܠܚܶܙܝܰܘ̈ܗܝ ܟܽܠ ܢܰܦܫܶܗ ܡܶܢ ܟܽܠ ܠܐܰܪܥܳܐ ܕܥܶܒܪ̈ܳܝܶܐ ܘܡܶܢ ܟܽܠܳܗܿ ܠܺܝܗܽܘܕ ܘܡܶܢܳܗܿ ܠܒܶܝܬ ܠܚܶܡ ܥܕܰܡܳܐ ܕܰܗܘܳܐ ܡܠܶܐ ܟܶܢܦܳܐ ܙܥܽܘܪܬܳܐ ܘܐܰܝܟ ܕܰܗܘܳܐ ܦܶܪܕܬܳܐ ܒܓܰܢܬܰܢ ܘܙܰܗܪܺܝܪܳܐ ܙܥܽܘܪܳܐ ܠܒܳܒܬܰܢ ܕܢܰܚ ܘܰܦܪܰܣ ܘܰܡܠܳܝܗܝ ܠܥܳܠܡܳܐ

22 ܘܰܕܛܳܒ ܢܶܬܦܫܶܩ ܓܶܢܣܶܗ ܕܒܰܪ ܡܰܢܽܘ ܠܽܘܩܳܐ ܐܳܦ ܡܰܬܰܝ ܝܰܒܶܠܘ ܡ̈ܢܽܘ ܓܶܢܣܶܗ ܒܰܪ ܐܰܒܪܳܡ ܚܰܫܒܽܘܗܝ ܘܕܰܘܺܝܕ ܐܳܦ ܝܰܘܣܶܦ ܕܥܰܠ ܦܽܘܡ̈ܶܐ ܣܦܺܝܪ̈ܶܐ ܕܰܬܪ̈ܶܝܢ ܣܳܗܕ̈ܺܝܢ ܘܰܕܣܰܡܝܳܐ ܕܒܰܪ ܕܰܘܺܝܕ ܩܪܳܝܗܝ ܗܘܳܐ ܟܽܘܐܳܪܳܐ ܢܶܣܓܶܐ ܠܣܳܢܐܰܘ̈ܗܝ ܘܟܽܘܠܳܠܳܐ ܢܺܐܪܰܒ ܠܪ̈ܳܚܡܰܘܗܝ

23 ܝܽܘܒܳܠ ܝܺܗܽܘܕܳܐ ܕܶܝܢ ܡܶܢ ܡܬܽܘܡ ܠܳܐ ܦܣܰܩ ܗܘܳܐ ܡܒܰܕܩܳܢܳܐ ܕܡܶܢܶܗ ܕܡܶܢ ܡܬܽܘܡ ܠܳܐ ܩܛܰܥ ܗܘܳܐ ܡܶܢ ܡܳܪܰܢ ܘܰܠܟܳܐ ܐܶܬܟܣܶܣ ܕܐܰܘܦܺܝ ܠܶܗ ܐܳܦ ܢܽܘܓܪܳܐ ܪܰܒܳܐ ܗܳܐ ܣܳܗܶܕ ܕܒܰܠܒܠܶܗ ܠܡܶܢܝܳܢ ܫܰܪ̈ܒܳܬܳܐ ܘܠܰܝܬ ܗܽܘ ܠܘܳܬܳܟ ܝܽܘܒܳܠܳܐ ܡܛܳܐ ܘܩܳܡ ܕܐܰܢܬ ܗܽܘ ܒܰܪ ܕܰܘܺܝܕ ܘܠܰܝܬ ܬܽܘܒ

ܫܠܶܡ ܩܰܕܡܳܝܳܐ

How to Cite this Electronic Edition

Note:

Ephrem the Syrian, “Nativity 2” based upon Edmund Beck (ed.), "Des heiligen Ephraem des Syrers Hymnen De Nativitate (Epiphania)." in Corpus Scriptorum Christianorum Orientalium (Louvain: Secrétariat du CorpusSCO, 1959)., Digital Syriac Corpus, last modified December 17, 2019, https://syriaccorpus.org/550.

TEST2

Bibliography:

“Nativity 2.” In Corpus Scriptorum Christianorum Orientalium, edited by . Syriaca.org, 2016-. Entry published . https://syriaccorpus.org/550.

Show Citation Styles

SEDRA IV

Syriac Lexeme

About This Digital Text

Corpus Text ID:

https://syriaccorpus.org/550

NHSL Work ID(s):

http://syriaca.org/work/9043
http://syriaca.org/work/9041

Source:

Edmund Beck (ed.), "Des heiligen Ephraem des Syrers Hymnen De Nativitate (Epiphania)." in Corpus Scriptorum Christianorum Orientalium (Louvain: Secrétariat du CorpusSCO, 1959).

Type of Text: Digital Edition

Status: Edited

Publication Date: December 17, 2019

Preparation of Electronic Edition:

TEI XML encoding by James E. Walters.
Syriac text transcribed by Michael Oez.

Open Access and Copyright:

This electronic edition is designed for open access reuse. The Syriac base text is in the public domain. The TEI XML edition is copyrighted by James E. Walters and is released under a Creative Commons Attribution 4.0 International Public License (CC BY 4.0).

The HTML page is copyrighted by Vanderbilt University and released under a under a Creative Commons Attribution 4.0 International Public License (CC-BY 4.0, https://creativecommons.org/licenses/by/4.0/). Attribution for reuse should follow the suggested citation and also credit the copyright holder of the TEI XML edition.

See details...