Nativity 4

https://syriaccorpus.org/552
ܬܽܘܒ ܕܒܶܝܬ ܝܰܠܕܳܐ ܥܰܠ ܩܳܠܳܐ ܕܐܶܬܟܰܢܰܫܘ ܢܶܥܒܶܕ ܒܺܝܪܰܚ ܢܺܝܣܳܢ
1 ܒܪܺܝܟ ܗܽܘ ܡܳܪܝ ܝܰܘܡܳܟ ܗܰܘ ܩܰܕܡܳܝܳܐ ܕܒܶܗ ܗܽܘ ܪܫܺܝܡ ܗܳܢܳܐ ܝܽܘܡ ܥܰܕܥܺܕܳܟ [ܥܽܘܢܺܝܬܳܐ : ܒܪܺܝܟ ܗܽܘ ܕܝܰܗܒܳܟ ܠܰܢ ܟܰܕ ܠܳܐ ܫܰܐܶܠܢܳܟ ܕܒܳܟ ܢܰܘܕܶܐ ܠܐܰܒܽܘܟ ܥܰܠ ܡܰܘܗܰܒܬܶܗ]
2 ܝܰܘܡܳܟ ܠܳܟ ܕܳܡܶܐ ܕܪܳܚܶܡ ܐ̱ܢܳܫܰܐ ܗ̱ܘ ܕܡܶܬܝܰܒܰܠ ܘܐܳܬܶܐ ܥܰܡ ܟܽܠ ܕܳܪ̈ܺܝܢ
3 ܝܰܘܡܰܐ ܗ̱ܘ ܕܡܰܫܠܶܡ ܥܰܡ ܩܰܫܺܝ̈ܫܶܐ ܘܗܳܦܶܟ ܕܢܶܫܪܶܐ ܥܰܡ ܝܰܠܽܘܕ̈ܶܐ
4 ܝܰܘܡܰܐ ܗ̱ܘ ܕܰܒܚܽܘܒܶܗ ܡܚܰܕܶܬ ܢܰܦܫܶܗ ܕܰܢܚܰܕܶܬ ܚܰܝܠܶܗ ܥܰܬܺܝܩܽܘܬܰܢ
5 ܝܰܘܡܳܟ ܡܳܐ ܕܰܣܥܰܪܢ ܘܰܥܒܰܪ ܘܐܶܙܰܠ ܒܰܚܢܳܢܶܗ ܦܳܢܶܐ ܘܬܽܘܒ ܣܳܥܰܪ ܠܰܢ
6 ܝܳܕܰܥ ܕܰܣܢܺܝܩܳܐ ܗ̱ܝ ܐܢܳܫܽܘܬܳܐ ܟܽܠܶܗ ܠܳܟ ܕܳܡܶܐ ܟܰܕ ܫܳܐܶܠ ܠܳܗܿ
7 ܣܢܺܝܩܳܐ ܗ̱ܝ ܒܪܺܝܬܳܐ ܥܰܠ ܡܰܒܽܘܥܶܗ ܘܠܶܗ ܡܳܪܝ ܐܰܝܟ ܕܐܳܦ [ܠܳܟ] ܨܰܗܝܳܐ ܟܽܠܳܗܿ
8 ܝܰܘܡܰܐ ܗ̱ܘ ܕܥܰܠ ܙܰܒ̈ܢܶܐ ܡܰܡܠܶܟ [ܢܺܝܪܶܗ] ܘܢܽܘܓܪܳܐ ܙܳܟܶܐ ܟܽܠ ܠܳܐ [ܡܰܥܒܰܪ ܠܶܗ]
9 [ܥܒܰܪܘ ܓܶܝܪ ܐܳܦ ܡܰܠܟ̈ܶܐ ܥܰܡ ܝܽܘܩܢܰܝ̈ܗܽܘܢ ܘܰܒܛܶܠܘ] ܥܰܕܺܥ̈ܕܶܐ ܕܕܽܘܟܪ̈ܳܢܰܝܗܽܘܢ
10 ܫܽܘܠܛܳܢܶܗ ܕܝܰܘܡܳܟ ܐܰܝܟ ܕܺܝܠܳܟ ܗܽܘ ܕܰܡܬܺܝܚ ܥܰܠ ܕܳܪ̈ܶܐ ܕܐܶܬܰܘ ܘܐܳܬܶܝܢ
11 ܝܰܘܡܳܟ ܠܳܟ ܕܳܡܶܐ ܕܟܰܕ ܗܽܘ ܚܰܕ ܗܽܘ ܣܰܪܥܶܦ ܘܰܣܓܺܝ ܠܶܗ ܕܢܶܕܰܡܶܐ ܒܳܟ
12 ܒܗܳܢܳܐ ܡܳܪܝ ܝܰܘܡܳܟ ܕܠܰܢ ܩܰܪܺܝܒܰܐ ܗ̱ܘ ܚܙܰܝܢܳܝܗܝ ܠܝܰܠܕܳܟ ܗܰܘ ܪܰܚܺܝܩܳܐ
13 ܐܰܟܘܳܬܳܟ ܝܰܘܡܳܟ ܢܶܗܘܶܐ ܠܰܢ ܡܳܪܝ ܢܶܗܘܶܐ ܡܶܨܥܳܝܳܐ ܘܥܳܪܶܒ ܫܰܝܢܳܐ
14 ܝܰܘܡܳܟ ܗܽܘ ܪܰܥܺܝ ܫܡܰܝܳܐ ܘܐܰܪܥܳܐ ܕܒܶܗ ܢܚܶܬ ܥܶܠܳܝܳܐ ܨܶܝܕ ܬܰܚ̈ܬܳܝܶܐ
15 ܝܰܘܡܳܟ ܗܽܘ ܡܶܫܟܰܚ ܠܰܡܪܰܥܳܝܽܘ ܠܗܰܘ ܟܺܐܢܳܐ ܕܰܪܓܶܙ ܥܰܠ ܚܰܘ̈ܒܳܬܰܢ
16 ܗܳܐ ܪ̈ܶܒܽܘ ܚܰܘܒܺܝ̈ܢ ܫܒܰܩ ܠܰܢ ܝܰܘܡܳܟ ܕܒܶܗ ܗܰܘ ܕܢܰܚܘ ܪ̈ܰܚܡܶܐ ܥܰܠ ܚܰܝ̈ܳܒܶܐ
17 ܪܰܒ ܗܽܘ ܡܳܪܝ ܝܰܘܡܳܟ ܠܳܐ ܢܶܙܥܰܪ ܒܰܢ ܢܶܪܚܰܡ ܒܰܥܝܳܕܶܗ ܥܰܠ ܣܰܟܠܽܘܬܰܢ
18 ܘܐܶܢܗܽܘ ܕܟܽܠ ܝܽܘܡ ܡܳܪܝ ܫܦܺܝܥ ܫܽܘܒܩܳܢܳܟ ܟܡܳܐ ܝܰܬܺܝܪ ܢܶܣܓܶܐ ܒܗܳܢܳܐ ܝܰܘܡܳܐ
19 ܟܽܠܗܽܘܢ ܝܰܘܡ̈ܳܬܳܐ ܡܶܢ ܓܰܙܶܗ ܗܽܘ ܕܝܰܘܡܳܟ ܢܰܨܺܝܚܳܐ ܩܢܰܘ ܛܳܒ̈ܳܬܳܐ
20 ܟܽܠܗܽܘܢ ܥܰܕܥܺܕ̈ܶܐ ܡܶܢ ܣܺܝܡ̈ܳܬܶܗ ܕܗܳܢܳܐ ܥܰܕܥܺܕܳܐ ܫܦܰܪܘ ܘܐܶܨܛܰܒܰܬܘ
21 ܪ̈ܰܚܡܰܝܟ ܒܝܰܘܡܳܟ ܐܰܫܦܰܥ ܠܰܢ ܡܳܪܝ ܐܰܘܕܰܥ ܠܰܢ ܝܰܘܡܳܟ ܡܶܢ ܟܽܘܠ ܝܰܘܡܺܝ̈ܢ
22 ܕܪܰܒ ܗܽܘ ܒܶܝܬ ܓܰܙܶܗ ܕܝܽܘܡ ܡܰܘܠܳܕܳܟ ܢܶܗܘܶܐ ܦܳܪܽܘܥܳܐ ܚܠܳܦ ܚܰܝ̈ܳܒܶܐ
23 ܪܰܒ ܗܽܘ ܗܳܢ ܝܰܘܡܳܐ ܡܶܢ ܝܰܘܡܺܝ̈ܢ ܕܒܶܗ ܢܦܰܩ ܚܰܢܳܢܳܐ ܨܶܝܕ ܚܰܛܳܝ̈ܶܐ
24 ܣܺܝܡܰܬ ܣܰܡ̈ܡܳܢܶܐ ܗ̱ܘ ܝܰܘܡܳܟ ܪܰܒܳܐ ܕܒܶܗ ܕܢܰܚ ܣܰܡ ܚ̈ܰܝܶܐ ܠܰܡܡܰܚܰܝ̈ܳܐ
25 ܐܰܘܨܰܪ ܥܽܘܕܪ̈ܳܢܶܐ ܗ̱ܘ ܝܰܘܡܳܐ ܗܳܢܳܐ ܕܒܶܗ ܐܰܙܠܶܓ ܢܽܘܗܪܳܐ ܥܰܠ ܣܰܡܝܽܘܬܰܢ
26 ܟܶܐܡܰܬ ܐܳܦ ܟܰܦܳܐ ܛܥܺܝܢ ܠܰܢ ܘܐܳܬܶܐ ܕܡܶܢܳܗܿ ܪܕܳܐ ܣܶܒܥܳܐ ܥܰܠ ܟܰܦܢܽܘܬܰܢ
27 ܣܓܽܘܠܰܐ ܗ̱ܘ ܫܳܪܽܘܝܳܐ ܝܰܘܡܳܐ ܗܳܢܳܐ ܕܟܳܣܳܐ ܕܦܽܘܪܩܳܢܳܐ ܡܛܰܫܰܝ ܗܘܳܐ ܒܶܗ
28 ܥܺܐܕܰܐ ܗ̱ܘ ܒܰܟܳܪܳܐ ܝܰܘܡܳܐ ܗܳܢܳܐ ܕܡܰܒܟܰܪ ܙܳܟܶܐ ܠܟܽܠ ܥܰܕܥܺܕ̈ܺܝܢ
29 ܒܣܰܬܘܳܐ ܕܰܡܓܰܙܶܐ ܦܺܐܪ̈ܰܝ ܣܰܘ̈ܟܶܐ ܡܶܢ ܣܰܬܳܐ ܥܩܰܪܬܳܐ ܦܺܐܪܳܐ ܕܢܰܚ ܠܰܢ
30 ܒܩܽܘܪܳܫܳܐ ܕܡܰܫܠܰܚ ܟܽܠ ܐܺܝܠܳܢܺܝ̈ܢ ܢܽܘܪܒܳܐ ܐܰܦܪܰܥ ܠܰܢ ܡܶܢ ܒܶܝܬ ܐܺܝܫܰܝ
31 ܒܟܳܢܽܘܢ ܕܛܳܫܶܐ ܙܰܪܥܳܐ ܒܐܰܪܥܳܐ ܫܶܘܚܰܬ ܡܶܢ ܟܰܪܣܳܐ ܫܒܶܠ ܚܰܝ̈ܶܐ
32 ܒܢܺܝܣܳܢ ܕܫܳܘܰܚ ܙܰܪܥܳܐ ܒܐܳܐܰܪ ܒܶܗ ܙܶܪܥܰܬ ܢܰܦܫܶܗ ܟܰܦܳܐ ܒܐܰܪܥܳܐ
33 ܚܶܨܕܳܗܿ ܐܳܦ ܐܰܟܠܳܗܿ ܡܰܘܬܳܐ ܒܰܫܝܽܘܠ ܘܰܨܪܳܝܗܝ ܣܰܡ ܚܰܝ̈ܶܐ ܕܰܟܣܶܐ ܗܘܳܐ ܒܶܗ
34 ܒܢܺܝܣܳܢ ܓܶܝܪ ܕܐܶܡܪ̈ܶܐ ܒܕܰܒܪܳܐ ܦܳܥܶܝ̈ܢ ܠܟܰܪܣܳܐ ܥܰܠ ܗܘܳܐ ܒܶܗ ܐܶܡܰܪ ܦܶܨܚܳܐ
35 ܢܰܗܪܳܐ ܕܡܶܢܶܗ ܗܽܘ ܣܠܶܩܘ ܨܰܝܳܕ̈ܶܐ ܡܶܢܶܗ ܥܡܰܕ ܘܰܣܠܶܩ ܨܳܐܶܕ ܟܽܘܠܳܐ
36 ܢܰܗܪܳܐ ܕܨܳܐܶܕ ܗܘܳܐ ܫܡܶܥܽܘܢ ܢܽܘܢܰܘ̈ܗܝ ܡܶܢܶܗ ܣܠܶܩ ܨܳܕܶܗ ܨܳܐܶܕ ܐܢܳܫ̈ܳܐ
37 ܙܩܺܝܦܳܐ ܕܗܽܘ ܨܳܐܶܕ ܟܽܠ ܓܰܝܳܣܺܝ̈ܢ ܒܶܗ ܨܳܕܶܗ ܠܚܰܝ̈ܶܐ ܠܗܰܘ ܓܰܝܳܣܳܐ
38 ܚܰܝܳܐ ܒܝܰܕ ܡܰܘܬܶܗ ܣܰܪܩܳܗܿ ܠܰܫܝܽܘܠ ܨܳܪܳܗܿ ܘܐܰܦܪܰܚ ܡܶܢܳܗܿ ܟܶܢܫ̈ܶܐ ܫܶܠܡ̈ܶܐ
39 ܡܳܟܣ̈ܶܐ ܘܙܰܢܳܝ̈ܳܬܳܐ ܦܰܚ̈ܶܐ ܛܰܡ̈ܐܶܐ ܠܦܰܚܰܘ̈ܗܝ ܕܰܢܟܺܝܠܳܐ ܨܳܕ ܩܰܕܺܝܫܳܐ
40 ܚܛܺܝܬܳܐ ܕܰܗܘܳܬ ܦܰܚܳܐ ܠܓܰܒܪ̈ܶܐ ܥܰܒܕܳܗܿ ܡܰܚܙܺܝܬܳܐ ܠܬܰܝ̈ܳܒܳܬܳܐ
41 ܬܺܬܶܐ ܡܚܰܒܰܠܬܳܐ ܕܛܠܶܡܰܬ ܦܺܐܪ̈ܶܐ ܠܙܰܟܰܝ ܐܰܝܟ ܦܺܐܪܳܐ ܩܰܪܶܒܬܶܗ ܗܘܳܬ
42 ܦܺܐܪܳܐ ܕܰܟܝܳܢܳܗܿ ܠܳܐ ܝܶܗܒܰܬ ܗܘܳܬ ܝܶܗܒܰܬ ܕܶܝܢ ܦܺܐܪܳܐ ܚܰܕ ܡܰܠܳܠܳܐ
43 ܨܠܳܐ ܡܳܪܰܢ ܨܰܗܝܶܗ ܠܥܶܠ ܡܶܢ ܒܪܳܐ ܘܨܳܕܳܗܿ ܠܰܨܗܺܝܬܳܐ ܒܡܰܝ̈ܳܐ ܕܫܰܐܶܠ
44 ܨܳܕ ܗܘܳܐ ܚܕܳܐ ܢܰܦܫܳܐ ܡܶܢ ܡܰܒܽܘܥܳܐ ܘܰܗܦܰܟ ܨܳܕ ܒܳܗܿ ܗܽܘ ܠܟܽܠܶܗ ܟܰܪܟܳܐ
45 ܬܪ̈ܶܥܣܰܪ ܨܰܝܳܕܺܝܢ ܨܳܕ ܩܰܕܺܝܫܳܐ ܘܰܗܦܰܟ ܨܳܕ ܒܗܽܘܢ ܠܟܽܠܳܗܿ ܒܪܺܝܬܳܐ
46 ܣܩܰܪܝܽܘܛܰܐ ܗ̱ܘ ܕܰܦܠܰܛ ܡܶܢ ܒܶܝܬ ܢܶܫܒܰܘ̈ܗܝ ܘܢܶܦܠܰܬ ܠܳܗܿ ܒܨܰܘܪܶܗ ܡܰܚܢܽܘܩܺܝܬܳܐ
47 ܢܶܫܒܶܗ ܕܡܰܚܶܐ ܟܽܘܠ ܠܚܰܝ̈ܶܐ ܨܳܐܶܕ ܘܰܕܦܳܠܶܛ ܡܶܢܶܗ ܦܳܠܶܛ ܡܶܢ ܚܰܝ̈ܶܐ
48 ܘܡܰܢܽܘ ܡܰܘܦܶܐ ܠܺܝ ܠܰܡܬܰܢܳܝܽܘ ܥܽܘܕܪ̈ܳܢܶܐ ܦܪ̈ܺܝܫܶܐ ܕܰܟܣܶܝܢ ܒܳܟ ܡܳܪܝ
49 ܟܡܳܐ ܡܶܫܟܰܚ ܠܳܐܰܥ ܦܽܘܡܳܐ ܨܰܗܝܳܐ ܡܶܢ ܓܰܘ ܡܰܒܽܘܥܳܗܿ ܕܐܰܠܳܗܽܘܬܳܐ
50 ܦܰܢܳܐ ܠܰܢ ܝܰܘܡܳܢ ܩܳܠ ܒܳܥܽܘܬܰܢ ܨܠܽܘܬܰܢ ܕܰܒܡ̈ܶܠܶܐ ܬܶܗܘܶܐ ܒܰܥܒܳܕ̈ܶܐ
51 ܐܰܫܳܐ ܠܰܢ ܪܰܒܽܘܢܝ ܟܽܘܠ ܡܳܐ ܕܰܚܙܰܝܢ ܥܰܕܥܺܕܳܟ ܢܶܥܒܰܪ ܛܳܒܳܐ ܕܰܫܡܰܥܢ
52 ܦܗܳܐ ܠܶܗ ܪܶܥܝܳܢܰܢ ܒܰܝܢܳܬ ܩ̈ܳܠܶܐ ܐܳܘ ܩܳܠܶܗ ܕܐܰܒܽܘܗܝ ܫܰܝܶܢ ܩ̈ܳܠܶܐ
53 ܪܰܒܰܬ ܠܳܗܿ ܬܺܒܶܝܠ ܒܳܟ ܬܶܫܬܠܶܐ ܕܒܳܟ ܗܽܘ ܫܠܺܝ ܝܰܡܳܐ ܡܶܢ ܡܰܚ̈ܫܽܘܠܰܘܗܝ
54 ܚܕܺܝܽܘ ܫܺܐܕ̈ܶܐ ܕܰܫܡܰܥܘ ܩܳܠ ܓܽܘܕܳܦܳܐ ܥܺܝܪ̈ܶܐ ܢܶܚܕܽܘܢ ܒܰܢ ܐܰܝܟ ܕܰܡܥܳـ[ـܕܺܝܢ]
55 ܡܶܢ ܓܰܘ ܡܰܪܥܺܝܬܳܟ ܩܳܠ ܟܰܪܝܽܘܬܳܐ ܒܳܟ ܗܽܘ ܡܚܰܕܶܐ ܟܽܠ ܬܶܚܕܶܐ ܥܳܢܳܟ
56 ܪܽܘܥܳܡܰܢ ܪܰܒܽܘܢܝ ܠܳܐ ܬܶܩܰܨ ܠܰܢ ܡܶܬܪܰܥܰܡ ܦܽܘܡܰܢ ܟܰܕ ܗܽܘ ܚܰܛܳܝ
57 ܝܰܘܡܳܟ ܡܳܪܝ ܢܶܬܶܠ ܟܽܘܠ ܚܰܕ̈ܘܳܬܳܐ ܒܗܰܒ̈ܳܒܰܝ ܫܰܝܢܳܐ ܢܶܥܒܶܕ ܦܶܨܚܳܟ
58 ܝܰܘܡܳܐ ܕܣܽܘܠܳܩܳܟ ܒܶܗ ܢܶܬܪܰܡܪܰܡ ܥܰܡ ܠܰܚܡܳܐ ܚܰܕܬܳܐ ܢܶܗܘܶܐ ܕܽܘܟܪܳܢܶܗ
59 ܡܳܪܰܢ ܐܰܣܓܳܐ ܠܰܢ ܫܰܝܢܳܐ ܕܢܶܥܒܶܕ ܬܠܳܬܳܐ ܥܰܕܥܺܕ̈ܶܝܗܿ ܕܐܰܠܳܗܽܘܬܳܐ
60 ܪܰܒ ܗܽܘ ܡܳܪܝ ܝܰܘܡܳܟ ܠܳܐ ܢܶܬܒܰܙܰܚ ܡܝܰܩܰܪ ܗܽܘ ܟܽܠ ܐܢܳܫ ܝܽܘܡ ܡܰܘܠܳܕܳܟ
61 ܟܺܐܢܳܐ ܟܰܪ ܝܰܩܰܪ ܝܽܘܡ ܡܰܘܠܳܕܳܟ ܕܗܶܪܽܘܕܶܣ ܝܰܩܰܪ ܝܽܘܡ ܡܰܘܠܳܕܶܗ
62 ܪܰܩܕܳܐ ܕܛܰܡܐܽܘܬܳܐ ܒܣܶܡ ܠܛܳܪܽܘܢܳܐ ܠܳܟ ܡܳܪܝ ܢܶܒܣܰܡ ܠܳܟ ܩܳܠ ܢܰܟܦ̈ܳܬܳܐ
63 ܠܳܟ ܡܳܪܝ ܢܪܰܥܶܐ ܩܳܠ ܢܰܟ̈ܦܳܬܳܐ ܕܬܶܛܰܪ ܦܰܓܪ̈ܰܝܗܶܝܢ ܩܰܕܺܝܫܳܐܺܝܬ
64 ܝܰܘܡܶܗ ܕܗܶܪܽܘܕܶܣ ܠܶܗ ܗܽܘ ܕܳܡܶܐ ܐܳܦ ܝܰܘܡܳܟ ܕܺܝܠܳܟ ܠܳܟ ܗܽܘ ܕܳܡܶܐ
65 ܝܰܘܡܶܗ ܕܰܕܠܺܝܚܳܐ ܕܠܺܝܚ ܒܰܚܛܺܝܬܳܐ ܘܰܫܦܶܐ ܐܰܟܘܳܬܳܟ ܝܰܘܡܳܟ ܫܰܦܝܳܐ
66 ܥܺܐܕܶܗ ܕܰܛܪܽܘܢܳܐ ܩܛܰܠ ܟܳܪܽܘܙܳܐ ܒܥܰܕܥܺܕܳܟ ܟܽܠܢܳܫ ܫܽܘܒܚܳܐ ܡܰܟܪܶܙ
67 ܒܝܰܘܡܶܗ ܕܩܳܛܽܘܠܳܐ ܩܳܠܳܐ ܫܬܶܩ ܗܘܳܐ ܒܝܰܘܡܳܟ ܕܶܝܢ ܕܺܝܠܳܟ ܩ̈ܳܠܶܐ ܕܥܺܐܕܳܐ
68 ܛܰܡܐܳܐ ܒܥܰܕܺܥܕܶܗ ܫܪܳܓܳܐ ܐܶܕܥܳܟ ܕܰܢܛܰܫܶܐ ܚܶܫܟܳܐ ܥܰܠ ܓܰܝܳܪ̈ܶܐ
69 ܥܶܕܳܢ ܩܰܕܺܝܫܳܐ ܫܪ̈ܳܓܶܐ ܣܳܕܰܪ ܕܢܶܥܪܽܘܩ ܚܶܫܽܘܟܳܐ ܥܰܡ ܟܰܣܝ̈ܳܬܶܗ 70 ܝܰܘܡܶܗ ܕܗܰܘ ܬܰܥܠܳܐ ܙܦܰܪ ܐܰܟܘܳܬܶܗ ܘܩܰܕܺܝܫ ܥܰܕܥܺܕܶܗ ܕܐܶܡܰܪ ܩܽܘܫܬܳܐ
71 ܝܰܘܡܶܗ ܕܥܳܒܽܘܪܳܐ ܥܒܰܪ ܐܰܟܘܳܬܶܗ ܘܝܰܘܡܳܟ ܐܰܟܘܳܬܳܟ ܠܥܳܠܰܡ ܩܰـ[ـܝܳܡ]
72 ܝܰܘܡܶܗ ܕܰܛܪܽܘܢܳܐ ܦܩܰܪ ܐܰܟܘܳܬܶܗ ܕܫܶܠܝܶܗ ܒܰܩܛܺܝܪܶܗ ܩܳܠܳܐ ܟܺܐܢܳܐ
73 ܥܺܐܕܶܗ ܕܡܰܟܺܝܟܳܐ ܢܝܳܚܳܐ ܐܰܟܘܳܬܶܗ ܕܰܕܢܺܝܚ ܗܽܘ ܫܶܡܫܶܗ ܥܰܠ ܥܳܫܽܘܩܰܘ̈ܗܝ
74 ܝܳܕܰܥ ܗܘܳܐ ܛܪܽܘܢܳܐ ܕܠܰܘ ܡܰܠܟܳܐ ܗܘܳܐ ܒܰܕܓܽܘܢ ܝܰܗܒ ܐܰܬܪܳܐ ܠܰܡܠܶܟ ܡܰܠܟ̈ܶܐ
75 ܝܰܘܡܳܐ ܡܳܪܝ ܟܽܠܶܗ ܠܳܐ ܣܳܦܶܩ ܠܺܝ ܕܐܶܬܩܽܘܠ ܩܽܘܠܳܣܳܟ ܥܰܡ ܩܽܘܠܩܳܠܶܗ
76 ܝܰܘܡܳܟ ܚܰܢܳܢܳܐ ܢܰܥܒܰܪ ܣܰܟܠܽܘܬܝ ܕܥܰܡ ܝܰܘܡܳܐ ܛܰܡܐܳܐ ܬܰܩܶܠܬ ܝܰܘܡܳܟ
77 ܪܰܒ ܗܽܘ ܓܶܝܪ ܝܰܘܡܳܟ ܡܶܢ ܦܽܘܚܳܡܳܐ ܘܠܳܐ ܡܨܶܐ ܡܶܬܦܰܚܰܡ ܥܰܡ ܝܰܘܡ̈ܳܬܰܢ
78 ܝܰܘܡܶܗ ܕܒܰܪ ܐܢܳܫܳܐ ܐܰܝܟ ܕܐܰܪܥܳܢܳܐ ܘܝܰܘܡܶܗ ܕܐܰܠܳܗܳܐ ܐܰܝܟ ܕܐܰܠܳܗܳܐ
79 ܝܰܘܡܳܟ ܪܰܒ ܗܽܘ ܡܳܪܝ ܡܶܢ ܕܰܢܒܺܝ̈ܶܐ ܘܰܫܩܰܠܬ ܩܰܪܶܒܬܶܗ ܠܰܕܩܳܛܽܘܠܳܐ
80 ܝܳܕܰܥ ܐܰܢ̱ܬ ܗܽܘ ܡܳܪܝ ܐܰܝܟ ܝܳܕܰܥ ܟܽܠ ܕܬܶܫܡܰܥ ܦܽܘܚ̈ܳܡܶܐ ܕܦܰܚܶܡ ܠܶܫܳܢܝ
81 ܝܰܘܡܳܟ ܢܶܬܶܠ ܠܰܢ ܫܶܐܠܰܬ [ܚ̈ܰـ]ـܝܶܐ ܕܝܰܘܡܶܗ ܕܗܰܘ ܝܳܗܶܒ ܫܶܐܠܰܬ ܡܰܘܬܳܐ
82 ܝܺܡܳܐ ܒܥܰܕܥܺܕܶܗ ܡܰܠܟܳܐ ܣܢܺܝܩܳܐ ܕܦܶܠܓܳܗܿ ܕܡܰܠܟܽܘܬܶܗ ܬܗܶܐ ܐܰܓܰܪ ܪܰܩܕܳܐ
83 ܥܺܐܕܳܟ ܕܶܝܢ ܕܺܝܠܳܟ ܐܳܘ ܡܰܥܬܰܪ ܟܽܘܠ ܢܶܬܪܳܐ ܕܦܰܪܟܽܘܟܳܐ ܒܙܶܕܩܳܐ ܢܶܫܕܶܐ
84 ܡܶܢ ܐܰܪܥܳܐ ܨܗܺܝܬܳܐ ܓܣܳܐ ܡܰܒܽܘܥܳܐ ܕܗܽܘ ܣܦܰܩ ܕܰܢܣܰܒܰܥ ܨܰܗܝܳܐ ܕܥܰܡ̈ܡܶܐ
85 ܡܶܢ ܥܽܘܒܳܐ ܒܬܽܘܠܳܐ ܐܰܝܟ ܡܶܢ ܫܽܘܥܳܐ ܫܘܰܚ ܙܰܪܥܳܐ ܕܡܶܢܶܗ ܗܘܰܝ̈ ܥ̈ܠܠܳܬܳܐ
86 ܐܰܘܨܪ̈ܶܐ ܕܠܳܐ ܡܶܢܝܳܢ ܡܠܳܐ ܗܘܳܐ ܝܰܘܣܶܦ ܘܐܶܣܬܰܦܰܩܘ ܘܐܰܘܦܺܝܘ ܒܰܫ̈ܢܰܝ ܟܰܦܢܳܐ
87 ܚܕܳܐ ܫܒܶܠ ܩܽܘܫܬܳܐ ܝܶܗܒܰܬ ܠܰܚܡܳܐ ܠܰܚܡܳܐ ܫܡܰܝܳܢܳܐ ܕܠܳܐ ܡܶܣܬܰܝܰܟ
88 ܠܰܚܡܳܐ ܕܰܩܨܳܐ ܗܘܳܐ ܒܽܘܟܪܳܐ ܒܕܰܒܪܳܐ ܐܰܘܦܺܝ ܠܶܗ ܘܰܥܒܰܪ ܟܰܕ ܛܳܒ ܣܓܺܝ
89 ܗܦܰܟ ܬܽܘܒ ܘܰܩܨܳܐ ܗܘܳܐ ܠܰܚܡܳܐ ܚܰܕܬܳܐ ܕܕܳܪ̈ܶܐ ܘܫܰܪ̈ܒܳܬܳܐ ܠܳܐ ܡܰܘܦܶܝܢ ܠܶܗ
90 ܐܰܘܦܺܝܘ ܕܶܝܢ ܫܰܒܥܳܐ ܠܰܚܡܺܝ̈ܢ ܕܰܩܨܳܐ ܘܰܓܡܰܪܘ ܐܳܦ ܚܰܡܫܳܐ ܠܰܚ̈ܡܺܝܢ ܕܐܰܣܓܺܝ
91 ܚܰܕ ܠܰܚܡܳܐ ܕܰܩܨܳܐ ܙܟܳܗܿ ܠܰܒܪܺܝܬܳܐ ܕܰܟܡܳܐ ܕܡܶܬܦܰܠܰܓ ܡܶܣܓܳܐ ܣܳܓܶܐ
92 ܡܠܳܐ ܬܽܘܒ ܐܰܓܳܢ̈ܶܐ ܚܰܡܪܳܐ ܪܰܒܳܐ ܙܰܠܥܽܘܗܝ ܗܘܰܘ ܘܐܰܘܦܺܝ ܟܰܕ ܣܰܓܺܝܰܐܐ ܗ̱ܘ
93 ܟܰܕ ܟܳܣܳܐ ܕܝܰܗܒ ܙܥܽܘܪ ܗܘܳܐ ܫܶܩܝܶܗ ܪܰܒ ܗܽܘ ܛܳܒ ܚܰܝܠܶܗ ܕܠܳܐ ܡܶܣܬܰܝܰܟ
94 ܟܳܣܳܐ ܕܰܡܩܰܒܶܠ ܟܽܠ ܚܰܡܪ̈ܳܢܺܝܢ ܘܐܪܳܙܳܐ ܕܰܒܓܰܘܶܗ ܗܽܘܝܽܘ ܟܰܕ ܗܽܘ
95 ܚܰܕ ܠܰܚܡܳܐ ܕܰܩܨܳܐ ܠܳܐ ܡܶܬܬܰܚܰܡ ܘܚܰܕ ܟܳܣܳܐ ܕܰܡܙܰܓ ܠܳܐ ܡܶܣܬܰܝܰܟ
96 ܚܶܛܬܳܐ ܕܐܶܙܕܰܪܥܰܬ ܠܝܰܘܡ̈ܶܐ ܬܠܳܬܳܐ ܣܶܠܩܰܬ ܘܰܡܠܳܬܶܗ ܠܐܰܘܨܰܪ ܚ̈ܰܝܶܐ
97 ܠܰܝܚܡܰܐ ܗ̱ܘ ܪܽܘܚܳܢܳܐ ܐܰܝܟ ܝܳܗܽܘܒܶܗ ܠܪ̈ܽܘܚܳܢܶܐ ܗܽܘ ܡܰܚܶܐ ܪܽܘܚܳܢܳܐܺܝܬ
98 ܘܐܰܝܢܳܐ ܕܢܳܣܶܒ ܠܶܗ ܦܰܓܪܳܢܳܐܺܝܬ ܫܺܝܥܳܐܺܝܬ ܢܳܣܶܒ ܠܶܗ ܦܰܓܪܳܢܳܐܺܝܬ
99 ܠܰܚܡܰܐ ܗ̱ܘ ܕܰܚܢܳܢܳܐ ܦܰܪܽܘܫܳܐܺܝܬ ܢܳܣܶܒ ܠܶܗ ܗܰܘܢܳܐ ܐܰܝܟ ܣܰܡ ܚ̈ܰܝܶܐ
100 ܐܶܢ ܕܶܒܚ̈ܶܐ ܕܡܺܝ̈ܬܶܐ ܒܰܫܡܳܐ ܕܫܺܐܕ̈ܶܐ ܒܐܪܳܙܰܐ ܗ̱ܘ ܡܶܬܕܰܒܚܺܝܢ ܐܳܦ ܡܶܬܐܰܟܠܺܝܢ
101 ܠܩܽܘܕܫܳܐ ܕܦܽܘܪܫܳܢܳܐ ܟܡܳܐ ܙܳܕܶܩ ܠܰܢ ܕܐܪܳܙܶܗ ܙܰܗܝܳܐܺܝܬ ܢܶܫܬܰܡܰܫ ܒܰܢ
102 ܕܐܳܟܶܠ ܡܶܢ ܕܶܒܚܳܐ ܒܰܫܡܳܐ ܕܫܺܐܕ̈ܶܐ ܫܺܐܕܳܢܰܐ ܗܳܘܶܐ ܕܠܳܐ ܚܶܪܝܳܢܳܐ
103 ܕܐܳܟܶܠ ܡܶܢ ܠܰܚܡܶܗ ܕܰܫܡܰܝܳܢܳܐ ܫܡܰܝܳܢܳܐ ܗܳܘܶܐ ܕܠܳܐ ܦܽܘܠܳܓܳܐ
104 ܡܰܠܶܦ ܠܰܢ ܚܰܡܪܳܐ ܕܐܰܟܘܳܬܶܗ ܗܽܘ ܥܳܒܶܕ ܠܶܗ ܠܐܰܝܢܳܐ ܕܡܶܬ[ܚܶܝܢ] ܒܶܗ
105 ܣܳܢܶܐ ܓܶܝܪ ܣܰܓܺܝ ܠܰܕܪܳܚܶܡ ܠܶܗ ܕܡܰܪܘܶܐ ܘܰܡܫܰܢܶܐ ܠܶܗ ܘܰܡܒܰܙܰܚ ܒܶܗ
106 ܡܰܠܶܦ ܠܰܢ ܢܽܘܗܪܳܐ ܕܐܰܟܘܳܬܶܗ ܗܽܘ ܥܳܒܶܕ ܠܳܗܿ ܠܥܰܝܢܳܐ ܒܰܪܬ ܢܰܗܺܝܪܳܐ
107 ܥܰܝܢܳܐ ܒܝܰܕ ܢܽܘܗܪܳܐ ܚܙܳܬ ܦܽܘܪܣܳܝܳܐ ܘܪܶܗܛܰܬ ܢܰܟܦܬܶܗ ܠܓܰܒܪܳܐ ܢܰܟܦܳܐ
108 ܗܽܘ ܗܰܘ ܦܽܘܪܣܳܝܳܐ ܚܰܡܰܪܐ ܗ̱ܘ ܥܰܒܕܶܗ ܕܐܳܦ ܠܳܐ ܥܰܠ ܢܰܟ̈ܦܶܐ ܝܺܕܰܥ ܕܢܶܚܽܘܣ
109 ܙܰܝܢܶܗ ܕܰܢܟܺܝܠܳܐ ܠܰܒܫܶܗ ܒܽܘܟܪܳܐ ܕܰܒܙܰܝܢܳܐ ܕܰܩܛܰܠ ܢܶܗܦܽܘܟ ܢܺܚܳܐ
110 ܒܩܰܝܣܳܐ ܕܩܰܛܠܰܢ ܒܶܗ ܒܶܗ ܐܶܬܦܰܨܺܝܢ ܒܚܰܡܪܳܐ ܕܰܡܫܰܢܶܐ ܠܰܢ ܒܶܗ ܐܬܶܿܢܰܟܰܦܢ
111 ܒܐܶܠܥܳܐ ܕܡܶܢ ܐܳܕܳܡ ܐܶܫܬܰܡܛܰܬ ܗܘܳܬ ܒܳܗܿ ܫܰܡܛܶܗ ܒܺܝܫܳܐ ܠܶܒܶܗ ܕܐܳܕܳܡ
112 ܕܢܰܚ ܡܶܢܳܗܿ ܕܐܶܠܥܳܐ ܚܰܝܠܳܐ ܟܰܣܝܳܐ ܕܦܰܣܩܶܗ ܠܣܳܛܳܢܳܐ ܐܰܝܟ ܕܠܰܕܓܽܘܢ
113 ܒܗܳܝ ܓܶܝܪ ܩܺܒܽܘܬܳܐ ܣܶܦܪܳܐ ܟܣܳܐ ܒܳܗܿ ܕܩܳܥܶܐ ܘܡܰܟܪܶܙ ܗܘܳܐ ܥܰܠ ܙܰܟܳܝܳܐ
114 ܗܘܳܐ ܕܶܝܢ ܐܳܦ ܬܰܡܳܢ ܐܪܳܙܳܐ ܓܰܠܝܳܐ ܕܐܶܫܬܰܦܰܠ ܕܓܰܘܳܢ ܒܓܰܘ ܒܶܝܬ ܓܰܘܣܶܗ
115 ܐܶܬܳܐ ܠܶܗ ܫܽܘܡܠܳܝܳܐ ܒܳܬܰܪ ܐܪܳܙܳܐ ܕܐܶܫܬܰܦܰܠ ܒܺܝܫܳܐ ܒܶܝܬ ܬܽܘܟܠܳܢܶܗ
116 ܒܪܺܝܟ ܗܽܘ ܗܰܘ ܕܐܶܬܳܐ ܘܫܰܠܶܡܘ ܗܘܰܘ ܒܶܗ ܐܪܳ̈ܙܶܐ ܕܣܶܡܳܠܳܐ ܘܰܕܝܰܡܺܝܢܳܐ
117 ܓܰܡܪܶܗ ܠܗܰܘ ܐܪܳܙܳܐ ܕܰܗܘܳܐ ܒܐܶܡܪܳܐ ܘܓܰܡܪܶܗ ܠܗܰܘ ܛܽܘܦܣܳܐ ܕܰܗܘܳܐ ܒܰܕܓܽܘܢ
118 ܒܪܺܝܟ ܗܽܘ ܕܒܐܶܡܪܳܐ ܕܩܽܘܫܬܳܐ ܦܰܪܩܰܢ ܘܣܰܚܦܶܗ ܠܣܳܚܽܘܦܰܢ ܐܰܝܟ ܕܠܰܕܓܽܘܢ
119 ܒܟܳܢܽܘܢ ܕܐܰܪ̈ܺܝܟܺܝܢ ܠܰܝܠܰܘ̈ܳܬܳܐ ܕܢܰܚ ܠܰܢ ܐܺܝܡܳܡܳܐ ܕܠܳܐ ܡܶܣܬܰܝܰܟ
120 ܒܣܰܬܘܳܐ ܕܰܟܡܺܝܪܳܐ ܒܪܺܝܬܳܐ ܟܽܠܳܗܿ ܢܦܰܩ ܫܽܘܦܪܳܐ ܕܐܰܦܨܰܚ ܟܽܠ ܒܶܪ̈ܝܳܬܳܐ
121 ܣܰܬܘܳܐ ܕܥܳܒܶܕ ܠܳܗܿ ܠܐܰܪܥܳܐ ܥܩܰܪܬܳܐ ܒܬܽܘܠܽܘܬܳܐ ܒܶܗ ܗܽܘ ܝܶܠܦܰܬ ܝܰܠܕܳܐ
122 ܟܳܢܽܘܢ ܕܰܡܫܰܠܐ ܚܶܒܠܶܝ̈ܗܿ ܕܐܰܪܥܳܐ ܒܶܗ ܗܽܘ ܗܘܰܘ ܚܶܒ̈ܠܶܐ ܠܰܒܬܽܘܠܽܘܬܳܐ
123 ܐܶܡܪܳܐ ܫܳܪܽܘܝܳܐ ܠܳܐ ܐܢܳܫ ܠܽܘܩܕܰܡ ܚܳܙܶܐ ܠܶܗ ܐܶܠܳܐ ܪ̈ܳܥܰܘܳܬܳܐ
124 ܐܳܦ ܐܶܡܰܪ ܩܽܘܫܬܳܐ ܒܰܥܕܶܢ ܝܰܠܕܶܗ ܪܶܗܛܰܬ ܠܳܗܿ ܣܒܰܪܬܶܗ ܠܪ̈ܳܥܰܘܳܬܳܐ
125 ܐܰܟܒܰܪ ܐܳܦ ܬܰܡܳܢ ܥܳܦ ܕܽܘܡܳܪܳܐ ܕܐܶܡܪܳܐ ܕܠܳܐ ܒܝܰܪܚܶܗ ܡܰܠܶܠ ܘܰܢܦܰܩ
126 ܕܐܶܡܪܳܐ ܕܠܳܐ ܒܙܰܒܢܶܗ ܢܗܶܐ ܟܳܪܽܘܙܳܐ ܠܗܰܘ ܐܶܡܪܳܐ ܕܒܰܛܢܶܗ ܠܰܘ ܕܰܟܝܳܢܰܐ ܗ̱ܘ
127 ܚܙܳܝܗܝ ܕܺܐܒܳܐ ܣܳܒܳܐ ܠܐܶܡܰܪ ܚܰܠܒܳܐ ܘܐܰܩܢܶܛ ܡܶܢܶܗ ܕܰܡܫܰܓܢܰܝ ܗܘܳܐ
128 ܕܰܠܒܼܶܫ ܓܶܝܪ ܕܺܐܒܳܐ ܠܒܽܘܫܳܐ ܕܥܶܪܒܳܐ ܗܘܳܐ ܠܶܗ ܪܳܥܶܐ ܟܽܠ ܐܶܡܪܳܐ ܒܥܳܢܳܐ
129 ܕܡܳܐ ܕܰܣܥܳܐ ܝܰܥܢܳܐ ܥܰܠ ܡܰܟܺܝܟܳܐ ܢܰܨܪܝܘܗܝ ܥܰܙܺܝܙܳܐ ܠܗܰܘ ܒܳܠܽܘܥܳܐ
130 ܩܽܘܕܳܫܳܐ ܫܪܳܐ ܒܟܰܪܣܳܐ ܦܰܓܪܳܢܳܐܺܝܬ ܘܗܳܐ ܫܪܳܐ ܒܬܰܪܥܺܝܬܳܐ ܪܽܘܚܳܢܳܐܺܝܬ
131 ܡܰܪܝܰܡ ܕܰܒܛܰܢܬܶܗ ܣܢܳܬ ܙܽܘܘܳܓܳܐ ܠܳܐ ܬܶܙܢܶܐ ܢܰܦܫܳܐ ܕܰܫܪܳܐ ܒܓܰܘܳܗܿ
132 ܕܰܪܓܰܫܬܳܗܿ ܒܶܗ ܡܰܪܝܰܡ ܡܟܺܝܪܳܗܿ ܫܶܒܩܰܬ ܗܳܐ ܫܪܳܐ ܒܢܰܟܦ̈ܳܬܳܐ ܐܶܢ ܐܰܪܓܶܫ ܒܶܗ
133 ܠܳܐ ܡܰܪܓܶܫ ܚܰܪܫܳܐ ܒܪܰܥܡܳܐ ܪܰܒܳܐ ܐܳܦ ܠܳܐ ܡܰܪܳܚܳܐ ܒܩܳܠ ܦܽܘܩܕܳܢܳܐ
134 ܒܗܺܝܠ ܗܽܘ ܓܶܝܪ ܚܰܫܳܐ ܒܰܥܕܶܢ ܦܰܩܚܳܐ ܘܰܒܗܺܝܠ ܡܰܪܳܚܳܐ ܒܩܳܠ ܙܽܘܗܳܪܳܐ
135 ܠܚܰܪܫܳܐ ܐܶܢ ܓܰܢܚܶܗ ܪܰܥܡܳܐ ܕܚܺܝܠܳܐ ܠܛܰܡܐܳܐ ܐܶܢ ܬܰܟܒܶܗ ܪܽܘܓܙܳܐ ܕܚܺܝܠܳܐ
136 ܚܰܪܫܳܐ ܕܠܳܐ ܫܳܡܰܥ ܠܰܘ ܡܰܪܫܽܘܬܳܐ ܗ̱ܝ ܐܰܝܢܳܐ ܕܡܕܳܫ ܕܶܝܢ ܡܰܪܳܚܽܘܬܳܐ ܗ̱ܝ
137 ܡܶܢ ܙܒܰܢ ܕܶܝܢ ܠܰܙܒܰܢ ܗܳܘܶܐ ܪܰܥܡܳܐ ܩܳܠܶܗ ܕܢܳܡܽܘܣܳܐ ܟܽܠܝܽܘܡ ܪܳܥܶܡ
138 ܠܳܐ ܢܶܣܟܰܪ ܐܶܕܢܰܝ̈ܢ ܕܰܡܩܰܛܪܶܓ ܠܰܢ ܦܬܳܚ̈ܶܐ ܕܰܦܬܺܝܚܺܝܢ ܘܠܳܐ ܡܶܬܬܰܚܕܶܝܢ
139 ܬܰܪܥܳܐ ܕܡܰܫܡܰܥܬܳܐ ܦܬܺܝܚ ܒܰܟܝܳܢܳܐ ܕܒܰܩܛܺܝܪܶܗ ܢܟܰܣ ܡܰܪܳܚܽܘܬܰܢ
140 ܬܰܪ̈ܥܶܐ [ܕܒܳܒ̈ܳܬܳܐ] ܘܰܬܪܰܥ ܦܽܘܡܳܐ ܡܶܫܟܰܚ ܨܶܒܝܳܢܳܐ ܦܳܬܰܚ ܘܐܳܚܶܕ
141 ܢܶܚܙܶܐ - ܝܰܗܒ ܠܰܢ ܛܳܿܒܳܐ ܕܢܶܫܡܰܥ -- ܕܢܶܬܬܰܚܕܽܘܢ ----
142 ------ ---- --- ܙܰܘ̈ܥܶܝܗܿ ܡܶܢ ܨܶܒܝܳܢܰܢ
143 ܫܽܘܒܚܳܐ ܠܗܰܘ ܩܳܠܳܐ ܕܰܗܘܳܐ ܓܽܘܫܡܳܐ ܘܰܠܡܶܠܰܬ ܪܳܡܳܐ ܕܰܗܘܳܬ ܦܰܓܪܳܐ
144 ܫܰܡܥܶܝ̈ܗܝ ܐܳܦ ܐܶܕ̈ܢܶܐ ܚ̈ܙܰܝܳܝܗܝ ܥܰܝ̈ܢܶܐ ܡܳܫܳܝ̈ܗܝ ܐܳܦ ܐܺܝ̈ܕܶܐ ܘܐܰܟܠܶܗ ܦܽܘܡܳܐ
145 ܗܰܕܳܡ̈ܶܐ ܘܪ̈ܶܓܫܶܐ ܗܰܒܘ ܬܰܘܕܺܝܬܳܐ ܠܗܰܘ ܕܐܶܬܳܐ ܘܐܰܚܺܝ ܟܽܠܶܗ ܓܽܘܫܡܳܐ
146 ܛܥܺܝܢܳܐ ܗܘܳܬ ܡܰܪܝܰܡ ܥܽܘܠܳܐ ܫܰܠܝܳܐ ܟܰܕ ܒܶܗ ܗܽܘ ܟܣܶܝܢ ܗܘܰܘ ܟܽܠ ܠܶܫܳܢܺܝ̈ܢ
147 ܛܥܺܝܢ ܗܘܳܐ ܠܶܗ ܝܰܘܣܶܦ ܘܟܣܐ ܗܘܐ ܒܗ ܟܝܳܢܳܐ ܫܰܬܺܝܩܳܐ ܕܡܶܢ ܟܽܠ ܩܰܫܺܝܫ
148 ܪܳܡܳܐ ܗܘܳܐ ܐܰܝܟ ܫܰܒܪܳܐ ܘܰܟܣܶܐ ܗܘܳܐ ܒܶܗ ܓܰܙܳܐ ܕܚܶܟܡ̈ܳܬܳܐ ܕܰܠܟܽܠ ܣܳܦܶܩ
149 ܪܳܡܶܐ ܗܘܳܐ ܘܝܳܢܶܩ ܗܘܳܐ ܚܰܠܒܳܗܿ ܕܡܰܪܝܰܡ ܘܝ̈ܳܢܩܳܢ ܡܶܢ ܛܽܘܒܶܗ ܟܽܘܠ ܒܶܪ̈ܝܳܬܳܐ
150 ܗܽܘܝܽܘ ܬܕܳܐ ܚܰܝܳܐ ܕܣܰܘܩܳܐ ܚܰܝܳܐ ܐܰܝܢܶܩܘ ܡܶܢ ܚܰܝ̈ܰܘܗܝ ܡܺܝ̈ܬܶܐ ܘܰܚܝܰܘ
151 ܕܠܳܐ ܣܰܘܩܳܐ ܕܐܳܐܰܪ ܠܳܐ ܐܢܳܫ ܚܳܝܶܐ ܕܠܳܐ ܚܰܝܠܶܗ ܕܰܒܪܳܐ ܠܳܐ ܐܢܳܫ ܩܳܐܶܡ
152 ܒܣܰܘܩܶܗ ܗܽܘ ܚܰܝܳܐ ܕܗܰܘ ܡܰܚܶܐ ܟܽܠ ܬܰܠܝ̈ܳܢ ܢܶܫܡ̈ܳܬܳܐ ܕܰܠܥܶܠ ܘܕܰܠܬܰܚܬ
153 ܟܰܕ ܟܺܝܬ ܝܺܢܶܩ ܗܘܳܐ ܚܰܠܒܳܗܿ ܕܡܰܪܝܰܡ ܗܽܘܝܽܘ ܡܰܝܢܶܩ ܗܘܳܐ ܚܰܝ̈ܶܐ ܠܟܽܘܠܳܐ
154 ܟܰܕ ܬܽܘܒ ܫܪܳܐ ܗܘܳܐ ܒܥܽܘܒܳܐ ܕܐܶܡܶܗ ܒܥܽܘܒܶܗ ܫܰܪ̈ܝܳܢ ܗܘܰܝ̈ ܟܽܘܠ ܒܶܪ̈ܝܳܬܳܐ
155 ܫܠܳܐ ܗܘܳܐ ܐܰܝܟ ܥܽܘܠܳܐ ܘܗܽܘ ܦܳܩܶܕ ܗܘܳܐ ܠܟܽܠܗܶܝܢ ܒܶܪ̈ܝܳܬܳܐ ܟܽܠ ܦܽܘܩܕ̈ܳܢܰܘܗܝ
156 ܒܶܠܥܳܕ ܓܶܝܪ ܒܽܘܟܪܳܐ ܠܳܐ ܐܢܳܫ ܡܶܫܟܰܚ ܩܰܪܶܒ ܠܐܺܝܬܽܘܬܳܐ ܕܗܽܘ ܣܳܦܶܩ ܠܳܗܿ
157 ܬܠܳܬܺܝܢ ܟܺܝܬ ܫ̈ܢܺܝܢ ܕܰܗܘܳܐ ܒܐܰܪܥܳܐ ܡܰܢܽܘ ܡܕܰܒܰܪ ܗܘܳܐ ܟܽܠ ܒܶܪ̈ܝܳܬܳܐ
158 ܡܰܢܽܘ ܡܩܰܒܶܠ ܗܘܳܐ ܟܽܘܠ ܩܽܘܪ̈ܒܳܢܺܝܢ ܫܽܘܒܚܳܐ ܕܥܶܠܳܝ̈ܶܐ ܘܰܕܬܰܚ̈ܬܳܝܶܐ
159 ܟܽܠܶܗ ܒܥܽܘܡܩܳܐ ܗܘܳܐ ܘܟܽܠܶܗ ܒܪܰܘܡܳܐ ܟܽܠܶܗ ܨܶܝܕ ܟܽܠ ܗܘܳܐ ܘܟܽܠܶܗ ܨܶܝܕ ܚܰܕ
160 ܦܰܓܪܶܗ ܒܓܰܘ ܟܰܪܣܶܗ ܟܰܕ ܡܶܨܛܰܝܰܪ ܚܰܝܠܶܗ ܡܪܰܟܶܒ ܗܘܳܐ ܟܽܠ ܗܰܕܳܡܺܝ̈ܢ
161 ܟܰܕ ܡܶܬܨܺܝܪ ܒܰܛܢܳܐ ܕܰܒܪܳܐ ܒܟܰܪܣܳܐ ܗܽܘܝܽܘ ܨܳܐܶܪ ܗܘܳܐ ܥܽܘ̈ܠܶܐ ܒܟܰܪܣܳܐ
162 ܟܰܕ ܡܶܬܨܺܝܪ ܒܰܛܢܳܐ ܕܰܒܪܳܐ ܒܟܰܪܣܳܐ ܗܽܘܝܽܘ ܨܳܐܶܪ ܗܘܳܐ ܥܽܘ̈ܠܶܐ ܒܟܰܪܣܳܐ
163 ܠܰܘ ܬܽܘܒ ܐܰܝܟ ܕܰܡܚܺܝܠ ܦܰܓܪܶܗ ܒܩܰܝܣܳܐ ܗܳܟܰܢܳܐ ܡܚܺܝܠ ܗܘܳܐ ܚܰܝܠܶܗ ܒܩܰܝܣܳܐ
164 ܟܰܕ ܓܶܝܪ ܥܰܠ ܩܰܝܣܳܐ ܗܽܘ ܡܺܝ̈ܬܶܐ ܐܰܚܺܝ ܦܰܓܪܶܗ ܐܰܚܺܝ ܐܶܢܽܘܢ ܐܳܘ ܨܶܒܝܳܢܶܗ
165 ܗܳܟܰܢ ܟܰܕ ܟܽܠܶܗ ܫܪܳܐ ܗܘܳܐ ܒܟܰܪܣܳܐ ܨܶܒܝܳܢܶܗ ܟܰܣܝܳܐ ܟܽܠ ܣܳܥܰܪ ܗܘܳܐ
166 ܚܙܺܝ ܓܶܝܪ ܕܟܽܘܠܶܗ ܒܩܰܝܣܳܐ ܬܠܶܐ ܗܘܳܐ ܚܰܝܠܶܗ ܕܶܝܢ ܐܰܙܺܝܥ ܟܽܠ ܒܶܪ̈ܝܳܬܳܐ
167 ܐܰܚܫܶܟ ܓܶܝܪ ܫܶܡܫܳܐ ܘܐܰܙܺܝܥ ܐܰܪܥܳܐ ܨܰܪܺܝ ܗܘܳܐ ܩܰܒܪ̈ܶܐ ܘܐܰܦܶܩ ܡܺܝ̈ܬܶܐ
168 ܚܙܺܝ ܟܺܝܬ ܕܟܽܠܶܗ ܒܰܙܩܺܝܦܳܐ ܗܘܳܐ ܟܰܕ ܬܽܘܒ ܐܺܝܬܰܘܗܝ ܗܘܳܐ ܟܽܘܠܶܗ ܨܶܝܕ ܟܽܘܠ
169 ܗܳܟܰܢ ܐܺܝܬܰܘܗܝ ܗܘܳܐ ܟܽܘܠܶܗ ܒܟܰܪܣܳܐ ܟܰܕ ܬܽܘܒ ܐܺܝܬܰܘܗܝ ܗܘܳܐ ܟܽܠܶܗ ܒܟܽܘܠܳܐ
170 ܟܰܕ ܟܺܝܬ ܒܰܙܩܺܝܦܰܐ ܗ̱ܘ ܡܺܝ̈ܬܶܐ ܐܰܚܺܝ ܗܳܟܰܢ ܟܰܕ ܥܽܘܠܰܐ ܗ̱ܘ ܨܳܐܰܪ ܥ̈ܘܠܶܐ ܗ̱ܘ
171 ܟܰܕ ܗܽܘ ܩܛܺܝܠܳܐ ܗܘܳܐ ܩܰܒܪ̈ܶܐ ܦܳܬܰܚ ܟܰܕ ܗܽܘ ܒܟܰܪܣܳܐ ܗܘܳܐ ܦܬܰܚ ܟܰܪ̈ܣܳܬܳܐ
172 ܬܰܘ ܫܡܰܥܘ ܚܰܒܪ̈ܰܝ ܥܰܠ ܒܰܪ ܟܰܣܝܳܐ ܕܰܓܳܠܳܐ ܗܘܳܐ ܒܦܰܓܪܶܗ ܘܰܟܣܶܐ ܚܰܝܠܶܗ
173 ܚܰܝܠܶܗ ܓܶܝܪ ܕܰܒܪܳܐ ܚܰܝܠܰܐ ܗ̱ܘ ܫܰܪܝܳܐ ܠܳܐ ܚܒܰܫܬܶܗ ܟܰܪܣܳܐ ܐܰܝܟ ܕܰܠܦܰܓܪܳܐ
174 ܟܰܕ ܗܽܘ ܓܶܝܪ ܚܰܝܠܳܐ ܫܪܳܐ ܗܘܳܐ ܒܟܰܪܣܳܐ ܗܽܘܝܽܘ ܨܳܐܰܪ ܗܘܳܐ ܥܽܘ̈ܠܶܐ ܒܟܰܪܣܳܐ
175 ܚܰܝܠܶܗ ܥܰܦܺܝܩ ܗܘܳܐ ܠܳܗܿ ܠܗܳܝ ܕܥܰܦܶܩܬܶܗ ܕܐܶܢ ܩܳܦܶܣ ܚܰܝܠܶܗ ܢܳܦܶܠ ܠܶܗ ܟܽܠ
176 ܚܰܝܠܳܐ ܟܺܝܬ ܕܐܰܚܺܝܕ ܟܽܠ ܒܶܪ̈ܝܳܬܳܐ ܟܰܕ ܗܽܘ ܒܓܰܘ ܟܰܪܣܳܐ ܗܽܘ ܠܳܐ ܐܰܪܦܺܝ ܟܽܠ
177 ܨܳܪ ܗܘܳܐ ܠܰܩܢܽܘܡܶܗ ܨܰܠܡܳܐ ܒܟܰܪܣܳܐ ܘܨܳܪ ܗܘܳܐ ܒܟܽܠ ܟܰܪ̈ܣܳܢ ܟܽܠ ܦܰܪ̈ܨܽܘܦܺܝܢ
178 ܟܰܕ ܗܽܘ ܡܶܬܪܰܒܶܐ ܒܶܝܬ ܡܶܣ̈ܟܺܢܶܐ ܡܶܢ ܐܰܘܨܰܪ ܣܰܒܥܳܐ ܠܟܽܠ ܙܳܐܶܢ ܗܘܳܐ
179 ܟܰܕ ܬܽܘܒ ܡܫܰܚܬܶܗ ܗܳܝ ܕܰܡܫܰܚܬܶܗ ܒܰܛܠܶܗ ܘܰܒܡܶܛܪܶܗ ܠܟܽܠ ܡܳܫܰܚ ܗܘܳܐ
180 ܡܓܽܘ̈ܫܶܐ ܩܰܪܶܒܘ ܗܘܰܘ ܡܽܘܪܳܐ ܘܕܰܗܒܳܐ ܟܰܕ ܒܶܗ ܟܣܶܐ ܗܘܳܬ ܣܺܝܡܰܬ ܥܽܘܬܪܳܐ
181 ܡܽܘܪܳܐ ܘܗܶܪ̈ܽܘܡܶܐ ܕܐܰܟܺܝܢ ܘܰܒܪܳܐ ܩܰܪܶܒܘ ܠܶܗ ܡܓܽܘ̈ܫܶܐ ܠܶܗ ܡܶܢ ܕܺܝܠܶܗ
182 ܒܚܰܝܠܰܐ ܗ̱ܘ ܕܡܶܢܶܗ ܣܶܦܩܰܬ ܡܰܪܝܰܡ ܕܢܶܛܥܰܢ ܗܘܳܐ ܥܽܘܒܳܗܿ ܠܗܰܘ ܕܰܛܥܺܝܢ ܟܽܠ
183 ܡܶܢ ܓܰܙܳܐ ܪܰܒܳܐ ܕܟܽܠ ܒܶܪ̈ܝܳܬܳܐ ܝܶܗܒܰܬ ܠܶܗ ܡܰܪܝܰܡ ܟܽܠ ܡܳܐ ܕܝܶܗܒܰܬ
184 ܝܶܗܒܰܬ ܠܶܗ ܚܰܠܒܳܐ ܡܶܢ ܗܰܘ ܕܐܰܟܝܰܢ ܝܶܗܒܰܬ ܠܶܗ ܐܽܘܟܠܳܐ ܡܶܢ ܗܰܘ ܕܰܒܪܳܐ
185 ܝܰܗܒ ܚܰܠܒܳܐ ܠܡܰܪܝܰܡ ܐܰܝܟ ܐܰܠܳܗܳܐ ܗܦܰܟ ܝܰܢܩܶܗ ܡܶܢܳܗܿ ܐܰܝܟ ܒܰܪ ܐܢܳܫܳܐ
186 ܛܰܥܢܳܝܗܝ ܗ̈ܘܰܝ ܐܺܝܕ̈ܶܝܗܿ ܕܐܰܩܶܠ ܥܽܘܙܶܗ ܘܥܰܦܶܩܬܶܗ ܟܰܢܦܳܗܿ ܕܐܰܙܥܰܪ ܢܰܦܫܶܗ
187 ܡܶܬܚܳܐ ܕܪܰܒܽܘܬܶܗ ܡܰܢ ܡܶܫܟܰܚ ܗܘܳܐ ܟܪܺܝ ܡܽܘܫ̈ܚܳܬܶܗ ܨܶܝܕ ܬܰܟܣܺܝܬܳܐ
188 ܙܶܩܪܰܬ ܘܐܰܠܒܶܫܬܶܗ ܕܫܰܠܰܚ ܫܽܘܒܚܶܗ ܡܶܫܚܰܬ ܙܶܩܪܰܬ ܠܶܗ ܕܟܪܺܝ ܢܰܦܫܶܗ
189 ܝܰܡܳܐ ܛܰܥܢܶܗ ܗܘܳܐ ܫܠܺܝ ܘܐܶܫܬܰܗܺܝ ܘܐܰܝܟܰܢ ܟܰܝ ܛܰܥܢܶܗ ܥܽܘܒܶܗ ܕܝܰܘܣܶܦ
190 ܒܛܰܢܬܶܗ ܘܐܶܨܛܰܪܝܰܬ ܟܰܪܣܳܗܿ ܕܰܫܝܽܘܠ ܘܐܰܝܟܰܢ ܣܰܝܒܰܪܬܶܗ ܟܰܪܣܳܗܿ ܕܡܰܪܝܰܡ
191 ܟܺܐܦ̈ܶܐ ܕܥܰܠ ܩܰܒܪ̈ܶܐ ܒܩܳܠܶܗ ܨܪܺܝ ܘܐܰܝܟܰܢ ܣܰܝܒܰܪܬܶܗ ܟܶܢܦܳܐ ܕܡܰܪܝܰܡ
192 ܐܶܬܺܝܬ ܠܡܽܘܟܳܟܳܐ ܕܰܠܟܽܠ ܬܺܚܶܐ ܫܽܘܒܚܳܐ ܠܳܟ ܡܶܢ ܟܽܠ ܕܰܚܝܰܘ ܒܺܐܝܕܳܟ
193 ܡܰܢܽܘ ܡܨܶܐ ܕܢܺܐܡܰܪ ܥܰܠ ܒܰܪ ܟܰܣܝܳܐ ܕܰܢܚܶܬ ܘܐܶܬܥܰܛܰܦ ܦܰܓܪܳܐ ܒܟܰܪܣܳܐ
194 ܢܦܰܩ ܗܘܳܐ ܘܐܰܝܟ ܥܽܘܠܳܐ ܐܰܝܢܶܩ ܚܰܠܒܳܐ ܘܒܶܝܬ ܫܰܒܪ̈ܶܐ ܫܳܦܶܦ ܒܰܪ ܡܳܪܶܐ ܟܽܠ
195 ܒܫܽܘܩܳܐ ܐܰܝܟ ܫܰܒܪܳܐ ܚܳܙܶܝܢ ܗܘܰܘ ܠܶܗ ܟܰܕ ܫܰܪܝܳܐ ܗܘܳܬ ܒܶܗ ܪܶܚܡܰܬ ܟܽܘܠܳܐ
196 ܒܓܰܠܝܳܐ ܟܪ̈ܺܝܟܺܝܢ ܠܶܗ ܥܺܝܪ̈ܶܐ ܒܕܶܚܠܳܐ
197 ܦܨܺܝܚ ܗܘܳܐ ܨܶܝܕ ܫܰܒܪ̈ܶܐ ܐܰܝܟ ܝܰܠܽܘܕܳܐ ܕܚܺܝܠ ܗܘܳܐ ܨܶܝܕ ܥܺܝܪ̈ܶܐ ܐܰܝܟ ܦܳܩܽܘܕܳܐ
198 ܕܚܺܝܠ ܗܘܳܐ ܠܝܽܘܚܰܢܳܢ ܕܢܶܫܪܶܐ ܡܣܳܢܰܘ̈ܗܝ ܚܘܺܝܚ ܗܘܳܐ ܠܚܰܛܳܝ̈ܶܐ ܕܰܢܫܰܩܘ ܪ̈ܶܓܠܰܘܗܝ
199 ܥܺܝܪ̈ܶܐ ܐܰܝܟ ܥܺܝܪ̈ܶܐ ܚܳܙܶܝܢ ܗܘܰܘ ܠܶܗ ܒܡܽܘܫܚܳܬ ܐܺܝܕܰܥܬܶܗ ܟܽܠ ܐܢܳܫ ܚܙܳܝܗܝ
200 ܒܐܰܒܽܘܗܝ ܗܽܘ ܒܰܠܚܽܘܕ ܐܺܝܬܰܘܗܝ ܟܰܝܠܳܐ ܫܠܳܡܳܐ ܕܺܝܕܰܥܬܶܗ ܕܝܳܕܰܥ ܕܰܟܡܳܐ ܗܽܘ
202 ܒܟܰܝ̈ܠܺܝܢ ܕܶܝܢ ܟܰܝ̈ܠܺܝܢ ܩܢܶܝܢ ܝܺܕܰܥܬܶܗ ܟܝܳܢ̈ܶܐ ܕܥܶܠܳܝ̈ܶܐ ܥܰܡ ܬܰܚ̈ܬܳܝܶܐ
203 ܗܽܘܝܽܘ ܡܳܪܶܐ ܟܽܠ ܝܳܗܶܒ ܠܰܢ ܟܽܠ ܘܗܽܘܝܽܘ ܡܰܥܬܰܪ ܟܽܠ ܝܳܙܶܦ ܡܶܢ ܟܽܠ
204 ܗܽܘܝܽܘ ܝܳܗܶܒ ܟܽܠ ܐܰܝܟ ܠܳܐ ܣܢܺܝܩܳܐ ܘܗܳܦܶܟ ܝܳܙܶܦ ܟܽܠ ܐܰܝܟ ܚܰܣܺܝܪܳܐ
205 ܝܰܗܒ ܒܰܩܪ̈ܶܐ ܘܥܶܪ̈ܒܶܐ ܐܰܝܟ ܒܳܪܽܘܝܳܐ ܗܦܰܟ ܘܫܰܐܶܠ ܕܶܒܚ̈ܶܐ ܐܰܝܟ ܚܰܣܺܝܪܳܐ
206 ܥܒܰܕ ܡܰܝ̈ܳܐ ܚܰܡܪܳܐ ܐܰܝܟ ܥܳܒܽܘܕܳܐ ܗܦܰܟ ܐܶܫܬܺܝ ܡܶܢܶܗ ܐܰܝܟ ܡܶܣܟܺܢܳܐ
207 ܡܶܢ ܕܺܝܠܶܗ ܡܙܰܓ ܠܶܗ ܒܶܝܬ ܡܶܫܬܽܘܬܳܐ ܚܰܡܪܶܗ ܡܙܰܓ ܐܰܫܩܺܝ ܟܰܪ ܕܐܶܙܕܰܡܰܢ
208 ܒܚܽܘܒܶܗ ܗܽܘ ܝܺܪܶܒ ܫܶܡܥܽܘܢ ܣܳܒܳܐ ܕܰܩܪܶܒ ܡܳܝܽܘܬܳܐ ܠܗܰܘ ܡܰܚܶܐ ܟܽܠ
209 ܒܚܰܝܠܰܐ ܗ̱ܘ ܕܡܶܢܶܗ ܛܰܥܢܶܗ ܫܶܡܥܽܘܢ ܗܽܘܝܽܘ ܡܩܰܪܒܳܢܶܗ ܐܶܬܩܰܪܰܒ ܒܶܗ
210 ܝܰܗܒ ܗܘܳܐ ܣܝܳܡ ܐܺܝܕܳܐ ܠܡܽܘܫܶܐ ܒܛܽܘܪܳܐ ܘܫܰܩܠܳܗܿ ܒܓܰܘ ܢܰܗܪܳܐ ܡܶܢ ܝܽܘܚܰܢܳܢ
211 ܒܚܰܝܠܳܐ ܕܡܰܘܗܰܒܬܶܗ ܣܰܦܶܩ ܝܽܘܚܰܢܳܢ ܘܐܰܥܡܶܕ ܐܰܪܥܳܢܳܐ ܠܰܫـ[ـܡܰܝܳܢܳܐ]
212 ܒܚܰܝܠܰܐ ܗ̱ܘ ܕܡܶܢܶܗ ܛܥܰܢܬܶܗ ܐܰܪܥܳܐ ܐܶܙܰܠܬܝ ܕܬܶܫܬܪܶܐ ܘܚܰܙܩܳܗܿ ܚܰܝܠܶܗ
213 ܡܳܪܬܳܐ ܕܡܶܢ ܕܺܝܠܶܗ ܐܰܘܟܶܠܬܶܗ ܗܘܳܬ ܛܳܥܽܘ̈ܡܶܐ ܕܒܳܪ̈ܶܝܢ ܠܶܗ ܣܳܡܰܬ ܩܽܘܕܡܰܘܗܝ
214 ܡܶܢ ܕܺܝܠܶܗ ܢܕܰܪܘ ܗܘܰܘ ܟܽܠ ܝܰܗ̈ܽܘܒܶܐ ܡܶܢ ܓܰܙܶܗ ܐܰܪܡܺܝܘ ܥܰܠ ܦܳܬܽܘܪܶܗ
ܫܠܶܡ
How to Cite this Electronic Edition
Note:
Ephrem the Syrian, “Nativity 4” based upon Edmund Beck (ed.), "Des heiligen Ephraem des Syrers Hymnen De Nativitate (Epiphania)." in Corpus Scriptorum Christianorum Orientalium (Louvain: Secrétariat du CorpusSCO, 1959)., Digital Syriac Corpus, last modified December 17, 2019, https://syriaccorpus.org/552.

TEST2

Bibliography:
“Nativity 4.” In Corpus Scriptorum Christianorum Orientalium, edited by . Syriaca.org, 2016-. Entry published . https://syriaccorpus.org/552.

Show Citation Styles
SEDRA IV

Syriac Lexeme

About This Digital Text
Corpus Text ID:
https://syriaccorpus.org/552
Source:
Edmund Beck (ed.), "Des heiligen Ephraem des Syrers Hymnen De Nativitate (Epiphania)." in Corpus Scriptorum Christianorum Orientalium (Louvain: Secrétariat du CorpusSCO, 1959).
Type of Text: Digital Edition  
Status: Edited  
Publication Date: December 17, 2019
Preparation of Electronic Edition:
TEI XML encoding by James E. Walters.
Syriac text transcribed by Michael Oez.
Open Access and Copyright:
This electronic edition is designed for open access reuse. The Syriac base text is in the public domain. The TEI XML edition is copyrighted by James E. Walters and is released under a Creative Commons Attribution 4.0 International Public License (CC BY 4.0).
The HTML page is copyrighted by Vanderbilt University and released under a under a Creative Commons Attribution 4.0 International Public License (CC-BY 4.0, https://creativecommons.org/licenses/by/4.0/). Attribution for reuse should follow the suggested citation and also credit the copyright holder of the TEI XML edition.

Creative Commons License

See details...
How to Cite this Electronic Edition
Note:
Ephrem the Syrian, “Nativity 4” based upon Edmund Beck (ed.), "Des heiligen Ephraem des Syrers Hymnen De Nativitate (Epiphania)." in Corpus Scriptorum Christianorum Orientalium (Louvain: Secrétariat du CorpusSCO, 1959)., Digital Syriac Corpus, last modified December 17, 2019, https://syriaccorpus.org/552.

TEST2

Bibliography:
“Nativity 4.” In Corpus Scriptorum Christianorum Orientalium, edited by . Syriaca.org, 2016-. Entry published . https://syriaccorpus.org/552.

Show Citation Styles
Linked Data