ܡܰܕܪ̈ܳܫܶܐ ܕܒܶܝܬ ܝܰܠܕܳܐ ܥܰܠ ܩܳܠܳܐ ܕܡܰܢܽܘ ܣܳܦܶܩ ܠܰܡܡܰܠܳܠܽܘ

1 ܗܳܢܰܘ ܝܰܪܚܳܐ ܕܰܛܥܺܝܢ ܟܽܠܶܗ ܟܽܠ ܚܰܕ̈ܘܳܬܳܐ ܚܽܘܪܳܪ ܥܰܒ̈ܕ̈ܶܐ ܚܽܘܬܳܪ ܚܺܐܪ̈ܶܐ ܟܽܘܠܳܠ ܬܰܪ̈ܥܶܐ ܦܽܘܢܳܩ ܦܰܓܪ̈ܶܐ ܐܳܦ ܐܰܪ̈ܓܽܘܢܶܐ ܫܳܕܶܐ ܒܚܽܘܒܶܗ ܐܰܝܟ ܕܰܠܡܰܠܟܳܐ ܥܽܘܢܺܝܬܳܐ : ܠܳܟ ܬܶܫܒܽܘܚܬܳܐ ܝܰܠܕܳܐ ܦܰܐܝܳܐ ܕܰܒܬܽܘܠܽܘܬܳܐ

2 ܗܳܢܰܘ ܝܰܪܚܳܐ ܕܰܛܥܺܝܢ ܟܽܠܶܗ ܟܽܠ ܢܶܨܚ̈ܳܢܺܝܢ ܪܽܘܚܳܐ ܡܚܰܪܰܪ ܦܰܓܪܳܐ ܡܫܰܥܒܶܕ ܚܰܝ̈ܶܐ ܡܰܘܠܶܕ ܒܶܝܬ ܡܳܝܽܘ̈ܬܶܐ ܐܰܠܳܗܽܘܬܳܐ ܫܳܕܶܐ ܒܚܽܘܒܶܗ ܥܰܠ ܐ̱ܢܳܫܽܘܬܳܐ

3 [ܒܗܳܢܳܐ ܝܰܪܚܳܐ] ܓܢܰܘ ܒܶܗ ܥܰܒ̈ܕܶܐ ܥܰܠ [ܬܰܫܘܺܝܬܳܐ ܘܰܓܢܰܘ ܚܺܐܪ̈ܶܐ] ܥܰܠ ܐܶܡ̈ܠܶܐ [ܘܰܓܢܰܘ ܡܰܠܟ̈ܶܐ ܥܰܠ] ܡܺܝ̈ܠܳܬܳܐ ܒܐܽܘܪܝܳܐ ܓܢܶܐ [ܗܘܳܐ ܡܳܪܝ] ܕܟܽܠܐ ܡܶܛܽܠ ܟܽܠܳܐ

4 [ܗܳܐ] ܒܶܝܬ [ܠܚܶܡ] ܕܰܘܺܝܕ ܡܰܠܟܳܐ [ܒܽܘܨܳܐ] ܠܒܶܫ ܗܘܳܐ [ܡܳܪܶܗ ܕܕܰܘܺܝܕ ܘܰܒܪܶܗ ܕܕܰܘܺܝܕ ܒܓܰܘ ܥܰܙܪܽܘܪ̈ܶܐ] ܛܡܰܪ ܬܳܫܒܽܘܚܬܶܗ ܝܰܗܒ ܥܰܙܪܽܘܪ̈ܰܘܗܝ ܐܶܣܛܰܠ ܫܽܘܒܚܳܐ ܠܰܒܢܰܝ̈ܢܳܫܳܐ

5 ܒܗܳܢܳܐ ܝܰܘܡܳܐ ܙܺܝܘܳܐ ܒܨܰܥܪܳܐ ܚܰܠܶܦ ܡܳܪܰܢ ܐܰܝܟ ܡܰܟܺܝܟܳܐ ܕܚܰܠܶܦ ܡܳܪܰܢ ܐܰܝܟ ܡܰܟܺܝܟܳܐ ܕܚܰܠܶܦ ܐܳܕܳܡ ܩܽܘܫܬܳܐ ܒܥܽܘܠܳܐ ܐܰܝܟ ܗܦܟܝܳܐ ܚܳܢܶܗ ܛܳܒܳܐ ܙܟܰܝ̈ ܬܽܘܩ̈ܢܳܬܶܗ ܠܰܕܗ̈ܳܦܟܺܝܢ

6 ܢܶܪܕܽܘܦ ܟܽܠܢܳܫ ܡܰܐܺܝܢܽܘܬܶܗ ܕܠܳܐ ܡܶܐܢܰܬ ܠܳܗܿ ܠܗܳܝ ܪܰܒܽܘܬܳܐ ܕܬܶܗܘܶܐ ܒܟܰܪܣܳܐ ܝܰܪ̈ܚܶܐ ܬܶܫܥܳܐ ܡܶܛܽܘܠܳܬܰܢ ܘܬܶܗܘܶܐ ܫܢܰܝ̈ܳܐ ܬܠܳܬܺܝܢ ܒܣܳܕܽܘܡ ܒܰܝܢܳܬ ܦܰܩܪ̈ܶܐ

7 ܕܰܚܙܳܐ ܛܳܒܳܐ ܕܡܶܣܟܺܝܢ ܘܰܫܦܶܠ ܓܶܢܣܳܐ ܕܐܢܳܫܳܐ ܥܳܒ ܥܰܕܥܺܕ̈ܶܐ ܐܰܝܟ ܒܶܝܬ ܓܰܙ̈ܶܐ ܘܰܦܬܰܚ ܐܶܢܽܘܢ ܠܰܚܒܰܢܳܢ̈ܶܐ ܕܥܺܐܕܳܐ ܢܫܰܓܶܫ ܠܰܚܒܰܢܳܢܳܐ ܕܰܢܩܽܘܡ ܢܶܥܬܰܪ

8 ܗܳܐ ܥܰܕܥܺܕܶܗ ܐܰܝܟ ܒܶܝܬ ܓܰܙܶܗ ܦܬܰܚ ܠܰܢ ܒܽܘܟܪܳܐ ܚܰܕ ܗܽܘ ܝܰܘܡܳܐ ܫܠܳܡܳܐ ܒܫܰܢ̱ܬܳܐ ܦܬܰܚ ܒܰܠܚܽܘܕ ܗܳܢ ܒܶܝܬ ܓܰܙܳܐ ܬܰܘ ܢܶܬܟܰܫܰܪ ܢܶܥܬܰܪ ܡܶܢܶܗ ܥܰܕܠܳܐ ܐܰܚܕܽܘܗܝ

9 ܛܽܘܒ ܠܫܰܗܳܪ̈ܶܐ ܕܗܳܐ ܒܰܙܘ ܡܶܢܶܗ ܒܶܙܰܬ ܚ̈ܰܝܶܐ ܚܶܣܕܰܐ ܗ̱ܘ ܪܰܒܳܐ ܟܰܕ ܚܳܙܶܐ ܐܢܳܫ ܚܰܒܪܶܗ ܕܣܳܒܶܠ ܡܰܦܶܩ ܓܰܙ̈ܶܐ ܘܗܽܘ ܒܶܝܬ ܓܰܙܳܐ ܝܳܬܶܒ ܢܳܐܶܡ ܕܰܣܦܺܝܩ ܢܶܦܽܘܩ

10 ܒܗܳܢܳܐ ܥܺܐܕܳܐ ܢܟܰܠܶܠ ܟܽܠܢܳܫ ܬܰܪܥܳܐ ܕܠܶܒܶܗ ܬܪܰܓ ܬܰܪܥܶܗ ܪܽܘܚܳܐ ܕܩܽܘܕܫܳܐ ܬܶܥܽܘܠ ܬܶܫܪܶܐ ܘܰܬܩܰܕܶܫ ܒܶܗ ܕܗܳܐ ܡܶܬܟܰܪܟܳܐ ܥܰܠ ܟܽܠ ܬܰܪ̈ܥܺܝܢ ܕܐܰܝܟܳܐ [ܬܶܫܪܶܐ]

11 ܒܗܳܢܳܐ ܥܺܐܕܳܐ ܦܨܺܝܚܺܝܢ ܬܰܪ̈ܥܶܐ ܒܐܰܦܰܝ̈ ܬܰܪ̈ܥܶܐ ܘܚܳܕܶܐ ܩܽܘܕܫܳܐ ܒܗܰܝܟܰܠ ܩܽܘܕܫܳܐ ܘܪܳܥܶܡ ܩܳܠܳܐ ܒܦܽܘܡ ܝܰܠܽܘ̈ܕܶܐ ܘܚܰܕܳܐ ܡܫܺܝܚܳܐ ܒܓܰܘ ܥܰܕܥܺܕܶܗ ܐܰܝܟ ܪܰܒ ܚܰܝܠܳܐ

12 ܒܝܰܠܕܶܗ ܕܰܒܪܳܐ ܟܬܰܒ ܗܘܳܐ ܡܰܠܟܳܐ ܒܰܟܣܶܦ ܪܺܫܳܐ ܠܰܒܢܰܝ̈ܢܳܫܳܐ ܕܰܢܚܽܘܒܽܘܢ ܠܶܗ ܢܦܰܩ ܠܰܢ ܡܰܠܟܳܐ ܕܰܥܛܳܐ ܫܶܛܪ̈ܺܝܢ ܘܰܟܬܰܒ ܒܰܫܡܶܗ ܫܛܳܪܳܐ ܐܚܪܺܢܳܐ ܕܰܢܚܽܘܒ ܠܰܢ ܗܽܘ

13 ܙܟܳܐ ܢܰܗܺܝܪܳܐ ܘܰܪܫܰܡ ܐܪܳܙܳܐ ܒܕܰܪ̈ܓܶܐ ܕܰܣܠܶܩ ܬܪ̈ܶܥܣܰܪ ܝܰܘܡܺܝ̈ܢ ܗܳܐ ܡܶܢ ܕܰܣܠܶܩ ܘܗܳܢܳܐ ܕܝܰܘܡܳܢ ܕܰܬܠܳܬܰܥܣܰܪ ܐܪܳܙܳܐ ܫܰܠܡܳܐ ܕܝܰܠܕܶܗ ܕܰܒܪܳܐ ܘܕܰܬܪ̈ܶܥܣܰܪܬܶܗ

14 ܚܒܰܫ ܗܘܳܐ ܡܽܘܫܶܐ ܐܶܡܪܳܐ ܒܢܺܝܣܳܢ ܒܳܗܿ ܒܰܥܣܰܪܬܳܐ ܐܪܳܙܶܗ ܕܰܒܪܳܐ ܕܐܶܬܳܐ ܠܟܰܪܣܳܐ ܘܰܚܒܰܫ ܢܰܦܫܶܗ ܒܳܗܿ ܒܰܥܣܰܪܬܳܐ ܢܦܰܩ ܡܶܢ ܟܰܪܣܳܐ ܒܗܳܢܳܐ ܝܰܪܚܳܐ ܕܰܙܟܳܐ ܢܽܘܗܪܳܐ

15 ܚܳܒ ܚܶܫܽܘܟܳܐ ܕܰܢܒܰܕܶܩ ܗܘܳܐ ܕܚܳܒ ܣܛܳܢܐ ܘܰܙܟܳܐ ܢܽܘܗܪܳܐ ܕܰܢܝܰܒܶܒ ܗܘܳܐ ܕܰܢܨܰܚ ܒܽܘܟܪܳܐ ܚܳܒ ܠܶܗ ܚܶܫܟܳܐ ܥܰܡ ܚܶܫܽܘܟܳܐ ܘܰܙܟܳܐ ܢܽܘܗܪܰܢ ܥܰܡ ܢܰܗܺܝܪܳܐ

16 ܡܰܚܶܒ ܗܘܳܐ ܠܶܗ ܝܰܘܣܶܦ ܠܰܒܪܳܐ ܐܰܝܟ ܕܰܠܥܽܘܠܳܐ ܡܫܰܡܶܫ ܗܘܳܐ ܠܶܗ ܐܰܝܟ ܕܠܐܰܠܳܗܳܐ ܚܰܕ ܗܘܳܐ ܒܶܗ ܐܰܝܟ ܕܰܒܛܳܒܳܐ ܘܰܙܗܺܝܪ ܡܶܢܶܗ ܐܰܝܟ ܡܶܢ ܟܺܐܢܳܐ ܦܶܗܝܳܐ ܪܰܒܳܐ

17 ܡܰܢܽܘ ܝܰܗܒ ܠܺܝ ܒܰܪ ܥܶܠܳܝܳܐ ܕܰܒܪܳܐ ܢܗܶܐ ܠܺܝ [ܛܰܢܬ] ܒܐܶܡܳܟ ܘܨܳܒܶܝܬ ܕܐܫܪܶܝܗܿ ܠܳܐ ܝܳܕܰܥ ܗܺܘܝܬ ܕܰܒܓܰܘ ܟܰܪܣܳܗܿ ܓܰܙܰܐ ܗ̱ܘ ܪܰܒܳܐ ܕܰܠܡܶܣܟܺܢܽܘܬܝ ܐܰܥܬܰܪ ܡܶܢ ܫܶܠܝ

18 ܕܰܘܺܝܕ ܡܰܠܟܳܐ ܩܳܡ ܡܶܢ ܫܰܪܒܳܬܝ ܘܰܩܛܰܪ ܬܳܓܳܐ ܠܫܰܦܠܳܐ ܪܰܒܳܐ ܡܛܺܝܬ ܐܶܢܳܐ ܕܰܚܠܳܦ ܡܰܠܟܳܐ ܗܘܺܝܬ ܢܰܓܳܪܳܐ ܬܳܓܳܐ ܦܓܰܥ ܒܺܝ ܕܰܒܥܽܘܒܝ ܐܺܝܬܰܘܗܝ ܡܳܪܶܐ ܬܳܓ̈ܶܐ

19 ܒܩ̈ܳܠܶܐ ܚܣܺܝ̈ܡܶܐ ܪܶܬܚܶܬ ܡܰܪܝܰܡ ܐܳܦ ܢܰܨܪܰܬܶܗ ܡܰܢܽܘ ܝܰܗܒ ܠܳܗܿ ܠܰܡܓܰܙܰܝܬܳܐ ܕܬܶܒܛܰܢ ܬܺܐܠܰܕ ܚܰܕ ܣܰܓܺܝܳܐܐ ܙܥܽܘܪ ܐܳܦ ܣܰܓܺܝ ܕܨܐܶܕܝ ܟܽܠܶܗ ܘܨܶܝܕ ܟܽܠ ܟܽܠܶܗ

20 ܝܰܘܡܳܐ ܕܥܰܠ ܒܶܗ ܗܽܘ ܓܰܒܪܺܝܐܶܝܠ ܨܶܝܕ ܡܶܣܟܺܢܽܘܬܝ ܚܺܐܪܬܳܐ ܘܐܰܡܬܳܐ ܥܰܒܕܰܢܝ ܡܶܢ ܫܶܠܝ ܐܰܡܬܳܗܿ ܐ̱ܢܳܐ ܓܶܝܪ ܕܐܰܠܳܗܽܘܬܳܟ ܘܐܶܡܳܗܿ ܐ̱ܢܳܐ ܬܽܘܒ ܕܐ̱ܢܳܫܽܘܬܳܟ ܡܳܪܳܐ ܘܰܒܪܳܐ

21 ܡܶܢ ܫܶܠܝ ܐܰܡܬܳܐ ܗܘܳܬ ܒܰܪܬ ܡܰܠܟܳܐ ܒܳܟ ܒܰܪ ܡܰܠܟܳܐ ܗܳܐ ܡܫܰܦܰܠܬܳܐ ܒܓܰܘ ܒܶܝܬ ܕܰܘܺܝܕ ܡܶܛܠܳܬܳܟ ܐܳܘ ܒܰܪ ܕܰܘܺܝܪ ܗܳܐ ܒܰܪܬ ܐܰܪܥܳܐ ܡܛܳܬ ܠܰܫܡܰܝܳܐ ܒܰܫܡܰܝܳܢܳܐ

22 ܟܡܳܐ ܟܰܝ ܐܶܬܗܰܪ ܕܰܪܡܶܐ ܩܕܳܡܰܝ ܥܽܘܠܳܐ ܣܳܒܳܐ ܕܟܽܠ ܠܰܫܡܰܝܳܐ ܬܰܠܝܳܐ ܥܰܝܢܶܗ ܟܰܕ ܠܳܐ ܫܳܠܶܐ ܪܶܬܡܳܐ ܕܦܽܘܡܶܗ ܡܳܐ ܕܳܡܶܐ ܠܺܝ ܕܥܰܡ ܐܰܠܳܗܳܐ ܡܡܰܠܶܠ ܫܶܬܩܶܗ

23 ܡܰܢܽܘ ܚܙܳܐ ܟܰܝ ܥܽܘܠܳܐ ܕܚܳܐܰܪ ܟܽܠܶܗ ܠܟܽܠ ܕܽܘܟ ܕܳܡܶܐ ܚܶܙܘܶܗ ܕܗܽܘܝܽܘ ܡܕܰܒܰܪ ܟܽܠ ܒܶܪ̈ܝܳܬܳܐ ܕܰܠܥܶܠ ܘܕܰܠܬܰܚܬ ܕܳܡܶܐ ܚܝܳܪܶܗ ܠܗܰܘ ܦܳܩܽܘܕܳܐ ܕܰܠܟܽܠ ܦܳܩܶܕ

24 ܐܰܝܟܰܢ ܐܶܦܬܰܚ ܡܰܒܽܘܥ ܚܰܠܒܳܐ ܠܳܟ ܡܰܒܽܘܥܳܐ ܐܰܝܟܢ ܐܶܬܶܠ ܬܽܘܒ ܡܳܙܽܘܢܳܐ ܠܳܟ ܙܳܐܶܢ ܟܽܠ ܡܶܢ ܦܳܬܽܘܪܶܗ ܐܰܝܟܰܢ ܐܶܩܪܽܘܒ ܨܶܝܕ ܥܰܙܪܽܘܪ̈ܶܐ ܥܛܺܝܦ ܙܰܠܺܝܩ̈ܶܐ

Nativity 5