ܒܰܪ ܩܳܠܶܗ

1 ܠܳܐ ܝܳܕܰܥ ܦܽܘܡܝ ܐܰܝܟܰܢ ܐܶܩܪܶܝܟ ܐܳܘ ܒܰܪ ܚܰܝܳܐ ܕܐܰܡܪܰܚ ܘܐܶܩܪܶܝܟ ܐܰܝܟ ܒܰܪ ܝܰܘܣܶܦ ܪܥܺܝܠܐ ܐ̱ܢܳܐ ܕܠܰܘ ܙܰܪܥܶܗ ܐܶܢܳܐ ܘܕܐܶܟܦܽܘܪ ܒܰܫܡܶܗ ܩܰܢܺܝܛܳܐ ܐܢܳܐ ܕܠܶܗ ܗܽܘ ܡܟܪ̈ܽܘܢܰܝ [ܥܽܘܢܺܝܬܳܐ : ܠܳܟ ܬܶܫܒܽܘܚܬܳܐ ܒܰܪ ܥܶܠܳܝܳܐ ܕܰܫܩܰܠ ܦܰܓܪܰܢ]

2 ܟܰܕ ܒܰܪ ܚܰܕ ܐܰܢܬ ܐܶܩܪܶܝܟ ܡܶܟܺܝܠ ܒܰܪ ܣܰܓܺܝ̈ܶܐܐ ܕܠܳܐ ܣܳܦܩܺܝܢ ܠܳܟ ܪ̈ܶܒܽܘ ܣܰܓܺܝ̈ܶܐܐ ܕܠܳܐ ܣܳܦܩܺܝܢ ܠܳܟ ܪ̈ܶܒܽܘ ܫܡܳܗܺܝ̈ܢ ܕܒܰܪ ܐܰܠܳܗܳܐ ܐܰܢܬ ܐܳܦ ܒܰܪܢܳܫܳܐ ܐܳܦ ܒܰܪ ܝܰܘܣܶܦ ܐܳܦ ܒܰܪ ܕܰܘܺܝܕ ܘܡܳܪܳܗܿ ܕܡܰܪܝܰܡ

3 ܡܰܢܽܘ ܝܺܗܶܠ ܠܶܗ ܠܰܕܠܳܐ ܦܽܘܡܳܐ ܡܳܪܶܐ ܦܽܘܡ̈ܶܐ ܒܒܰܛܢܳܟ ܕܰܟܝܳܐ ܥܰܫܩܽܘܢܝ ܒܺܝ̈ܫܶܐ ܗܘܺܝ ܩܰܕܺܝܫܳܐ ܣܢܓܰܪ ܐܶܡܶܗ ܚܰܘܳܐ ܚܰܝ̈ܠܶܐ ܕܗܶܢܽܘܢ ܢܦܺܝܣܽܘܢ ܡܶܢ ܐܰܝܟܳܐ ܒܛܰܢܬܳܟ

4 ܡܶܛܠܳܬܳܟ ܗܳܐ ܣܰܢܝܳܐܐ ܐ̱ܢܳܐ ܪܳܚܶܡ ܟܽܘܠܳܐ ܗܳܐ ܪܕܺܝܦܳܐ ܐ̱ܢܳܐ ܕܒܶܛܢܰܬ ܝܶܠܕܰܬ ܚܰܕ ܒܶܝܬ ܓܰܘܣܳܐ ܠܰܒܢܰܝ̈ܢܳܫܳܐ ܢܶܚܕܶܐ ܐܳܕܳܡ ܕܐܰܢܬ ܗܽܘ ܐܩܠܺܝܕܶܗ ܕܗܰܘ ܦܰܪܕܰܝܣܳܐ

5 ܗܳܐ ܫܓܺܝܫ ܝܰܡܳܐ ܥܰܠ ܝܳܠܶܕܬܳܟ ܐܰܝܟ ܕܥܰܠ ܝܰܘܢܳܢ ܗܳܐ ܗܶܪܽܘܕܶܣ ܓܠܠܳܐ ܦܰܩܪܳܐ ܒܳܥܶܐ ܕܢܶܚܢܽܘܩ ܡܳܪܶܐ ܝܰܡ̈ܡܶܐ ܠܐܰܝܟܳܐ ܐܶܥܪܽܘܩ ܐܰܢܬ ܐܰܠܶܦܰܝܢܝ ܡܳܪܳܐ ܕܐܶܡܶܗ

6 ܥܰܡܳܟ ܐܶܥܪܽܘܩ ܕܐܶܬܰܓܶܪ ܒܳܟ ܚ̈ܰܝܶܐ ܒܟܽܠ ܕܽܘܟ ܓܽܘܒܳܐ ܥܰܡܳܟ ܠܳܐ ܗܘܳܐ ܓܽܘܒܰܐ ܗ̱ܘ ܕܒܳܟ ܗܽܘ ܣܳܠܶܩ ܐܢܳܫ ܠܰܫܡܰܝܳܐ ܩܰܒܪܳܐ ܥܰܡܳܟ ܠܳܐ ܗܘܳܐ ܩܰܒܪܰܐ ܗ̱ܘ ܕܐܳܦ ܢܽܘܚܳܡܳܐ ܐܰܢܬ

7 ܟܰܘܟܰܒ ܢܽܘܗܪܳܐ ܕܠܳܐ ܒܰܟܝܳܢܶܗ ܐܰܙܠܶܓ ܡܶܢ ܫܶܠܝ ܙܥܽܘܪ ܡܶܢ ܫܶܡܫܳܐ ܘܪܰܒ ܡܶܢ ܫܶܡܫܳܐ ܙܥܽܘܪ ܗܘܳܐ ܡܶܢܶܗ ܒܢܽܘܗܪܳܐ ܓܰܠܝܳܐ ܪܰܒ ܗܘܳܐ ܡܶܢܶܗ ܒܚܰܝܠܳܐ ܟܰܣܝܳܐ ܡܶܛܽܠ ܐܪܳܙܶܗ

8 ܟܰܘܟܰܒ ܕܶܢܚܳܐ ܫܕܳܐ ܙܰܠܺܝܩܰܘ̈ܗܝ ܒܶܝܬ ܚܶܫ̈ܽܘܟܶܐ ܘܰܢܓܰܕ ܐܶܢܽܘܢ ܐܰܝܟ ܠܰܣܡܰܝ̈ܳܐ ܘܐܶܬܰܘ ܐܰܩܒܶܠܘ ܢܽܘܗܪܳܐ ܪܰܒܳܐ ܝܰܗܒܘ ܩܽܘܪ̈ܒܳܢܶܐ ܘܰܢܣܰܒܘ ܚ̈ܰܝܶܐ ܘܰܣܓܶܕܘ ܘܰܗܦܰܟܘ

9 ܒܪܰܘܡܳܐ ܘܥܽܘܡܩܳܐ ܬܪ̈ܶܝܢ ܟܳܪ̈ܽܘܙܺܝܢ ܗܘܰܘ ܠܶܗ ܠܰܒܪܳܐ ܟܰܘܟܰܒ ܢܽܘܗܪܳܐ ܝܰܒܶܒ ܡܶܢ ܠܥܶܠ ܐܳܦ ܝܽܘܚܰܢܳܢ ܐܰܟܪܶܙ ܡܶܢ ܬܚܶܬ ܬܪ̈ܶܝܢ ܟܳܪ̈ܽܘܙܺܝܢ ܐܳܦ ܐܰܪܥܳܢܳܐ ܘܰܫܡܰܝܳܢܳܐ

10 ܗܰܘ ܥܶܠܳܝܳܐ ܚܰܘܺܝ ܟܝܳܢܶܗ ܕܡܶܢ ܪܰܒܽܘܬܳܐ ܗܽܘ ܘܐܳܦ ܬܰܚܬܳܝܳܐ ܚܰܘܺܝ ܟܝܳܢܶܗ ܕܡܶܢ ܐܢܳܫܽܘܬܰܐ ܗ̱ܘ ܬܶܗܪܳܐ ܪܰܒܳܐ ܕܐܰܠܳܗܽܘܬܶܗ ܐܳܦ ܐܢܳܫܽܘܬܶܗ ܒܗܽܘܢ ܐܶܬܟܰܪܙܰܬ

11 ܕܐܰܝܢܳܐ ܕܚܰܫܒܶܗ ܐܰܝܟ ܐܰܪܥܳܢܳܐ ܟܰܘܟܰܒ ܢܽܘܗܪܳܐ ܡܰܟܶܣ ܗܘܳܐ ܠܶܗ ܕܰܫܡܰܝܳܢܰܐ ܗ̱ܘ ܘܐܰܝܢܳܐ ܕܚܰܫܒܶܗ ܐܰܝܟ ܪܽܘܚܳܢܰܐ ܗ̱ܘ ܝܽܘܚܰܢܳܢ ܡܰܟܶܣ ܗܘܳܐ ܠܶܗ ܕܐܳܦ ܦܰܓܪܳܢܰܐ ܗ̱ܘ

12 ܒܗܰܝܟܰܠ ܩܽܘܕܫܳܐ ܛܰܥܢܶܗ ܫܶܡܥܽܘܢ ܘܰܡܢܰܨܰܪ ܠܶܗ ܐܶܬܰܝܬ ܚܰܢܳܢܳܐ ܚܳܐܶܢ ܣܰܝܒܽܘܬܝ ܡܰܥܶܠ ܓܰܪ̈ܡܰܝ ܒܰܫܠܳܡ ܠܰܫܝܽܘܠ ܒܳܟ ܐܶܬܢܰܚܰܡ ܡܶܢ ܓܰܘ ܩܰܒܪܳܐ ܠܓܰܘ ܦܰܪܕܰܝܣܳܐ

13 ܚܰܢܳܐ ܥܰܦܶܩܬܶܗ ܣܳܡܰܬ ܦܽܘܡܳܗܿ ܥܰܠ ܣܶܦܘ̈ܳܬܶܗ ܘܰܫܪܳܬ ܪܽܘܚܳܐ ܥܰܠ ܣܶܦܘ̈ܳܬܳܗܿ ܐܰܝܟ ܐܶܫܰܥܝܳܐ ܕܫܰܬܶܩ ܦܽܘܡܶܗ ܘܦܶܬܚܰܬ ܦܽܘܡܶܗ ܓܡܽܘܪܬܳܐ ܕܩܰܪܒܳܗܿ ܨܶܝܕ ܣܶܦܘ̈ܳܬܶܗ

14 ܪܶܬܚܰܬ ܚܰܢܳܐ ܒܪܽܘܚܳܐ ܕܦܽܘܡܶܗ ܐܳܦ ܢܰܨܰܪܬܶܗ ܒܰܪ ܡܰܠܟܽܘܬܳܐ ܒܰܪ ܫܺܝܛܽܘܬܳܐ ܫܳܡܰܥ ܘܰܫܠܳܐ ܚܙܳܐ ܘܰܟܣܳܐ ܝܺܕܰܥ ܘܰܛܫܳܐ ܐܰܠܳܗ ܒܰܪ ܐܢܳܫ ܫܽܘܒܚܳܐ ܠܰܫܡܳܟ

15 ܫܡܰܥܘ ܬܽܘܒ ܥܶܩܳܪ̈ܶܐ ܘܰܪܗܶܛܘ ܘܐܶܬܰܘ ܒܰܙܘܳܕ̈ܰܝܗܽܘܢ ܡܓܽܘ̈ܫܶܐ ܐܳܬܶܝܢ ܥܰܡ ܓܰܙܰܝ̈ܗܽܘܢ ܥܶܩܳܪ̈ܶܐ ܐܳܬܶܝܢ ܒܰܙܘܳܕܰܝ̈ܗܽܘܢ ܙܘ̈ܳܕܶܐ ܘܓ̈ܰܙܶܐ ܟܫܶܝܢ ܗܘܰܘ ܡܶܢ ܫܶܠܝ ܒܶܝܬ ܡܶܣ̈ܟܺܢܶܐ

16 ܩܥܳܬ ܥܩܰܪܬܳܐ ܐܰܝܟ ܕܰܡܥܳܕܳܐ ܡܰܢܽܘ ܝܰܗܒ ܠܺܝ ܕܐܶܚܙܶܐ ܥܽܘܠܶܟܝ ܛܽܘܒܳܢܺܝܬܳܐ ܕܡܰܠܝ̈ܳܢ ܡܶܢܶܗ ܫܡܰܝܳܐ ܘܐܰܪܥܳܐ ܒܪܝܟ ܗܼܘ ܦܐܪܟܝ ܕܐܰܦܪܺܝ ܣܓܽܘܠܳܐ ܒܣܰܬܳܐ ܥܩܰܪܬܳܐ

17 ܐܶܬܳܐ ܙܟܰܪܝܳܐ ܘܰܦܬܺܝܚ ܦܽܘܡܶܗ ܙܳܗܶܐ ܘܩܳܥܶܐ ܕܐܰܝܟܰܘ ܡܰܠܟܳܐ ܕܡܶܛܽܠܳܬܶܗ ܝܶܠܕܶܬ ܩܳܠܳܐ ܕܢܰܟܪܶܙ ܩܽܘܕܡܰܘܗܝ ܫܠܳܡ ܒܰܪ ܡܰܠܟܳܐ ܕܐܳܦ ܟܽܘܡܪܽܘܬܰܢ ܠܳܟ ܡܶܬܝܰܗܒܳܐ

18 ܩܪܶܒ ܝܽܘܚܰܢܳܢ ܥܰܡ ܐܰܒܳܗ̈ܰܘܗܝ ܘܰܣܓܶܕ ܠܰܒܪܳܐ ܘܰܫܪܳܐ ܙܺܝܘܳܐ ܥܰܠ ܦܰܪܨܽܘܦܶܗ ܠܳܐ ܐܶܙܕܰܠܰܠ ܐܰܝܟ ܕܰܒܟܰܪܣܳܐ ܬܶܗܪܳܐ ܪܰܒܳܐ ܕܰܬܢܳܢ ܣܳܓܶܕ ܘܰܠܗܰܠ ܕܳܐܶܨ

19 ܐܳܦ ܗܶܪܽܘܕܶܣ ܬܰܥܠܳܐ ܫܺܝܛܳܐ ܕܡܶܙܕܰܪܟܰܠ ܗܘܳܐ ܒܕܽܘܟܰܬ ܐܰܪܝܳܐ ܬܰܥܠܳܐ ܪܒܰܥ ܗܘܳܐ ܐܰܝܠܶܠ ܕܰܫܡܰܥ ܢܶܗܡܰܬ ܐܰܪܝܳܐ ܕܐܶܬܳܐ ܕܢܰܪܒܰܥ ܥܰܠ ܡܰܠܟܽܘܬܶܗ ܐܰܝܟ ܡܳܐ ܕܰܟܬܺܝܒ

20 ܫܡܰܥ ܕܶܝܢ ܬܰܥܠܳܐ ܕܐܰܪܝܳܐ ܓܽܘܪܝܰܐ ܗ̱ܘ ܘܐܰܝܟ ܒܰܪ ܚܰܠܒܰܐ ܗ̱ܘ ܘܰܠܛܰܫ ܢܝܳܒܶܗ ܕܥܰܕ ܝܰܠܽܘܕܰܐ ܗ̱ܘ ܢܟܰܡܶܢ ܢܶܚܢܽܘܩ ܬܰܥܠܐ ܠܐܰܪܝܳܐ ܥܰܕ ܠܳܐ ܥܳܫܶܢ ܘܰܡܛܰܠܶܩ ܠܶܗ ܗܰܘܦܳܐ ܕܦܽܘܡܶܗ

21 ܗܘܳܬ ܠܳܗܿ ܦܽܘܡ̈ܶܐ ܟܽܠܳܗܿ ܒܪܺܝܬܳܐ ܘܰܩܥܳܬ ܥܠܰܘܗܝ ܡܓܽܘ̈ܫܶܐ ܩ̈ܥܶܝܢ ܒܩܽܘܪ̈ܒܳܢܰܝܗܽܘܢ ܥܶܩܳܪ̈ܶܐ ܩܳܥܶܝܢ ܥܰܡ ܝܰܠܕܰܝ̈ܗܽܘܢ ܟܰܘܟܰܒ ܢܽܘܗܪܳܐ ܩܳܥܶܐ ܒܐܳܐܰܪ ܗܳܐ ܒܰܪ ܡܰܠܟܳܐ

22 ܫܡܰܝܳܐ ܦܬܺܝܚܺܝܢ ܡܰܝ̈ܳܐ ܦܨܺܝܚܺܝܢ ܝܰܘܢܳܐ ܫܒܺܝܚܳܐ ܩܳܠܶܗ ܕܐܰܒܳܐ ܛܳܒ ܡܶܢ ܪܰܥܡܳܐ ܬܳܟܶܒ ܘܐܳܡܰܪ ܗܳܢܰܘ ܚܰܒܺܝܒܝ ܥܺܝܪ̈ܶܐ ܣܰܒܰܪܘ ܫܰܒܪ̈ܶܐ ܝܰܒܶܒܘ ܒܐܽܘܫ̈ܰܥܢܰܝܗܽܘܢ

23 ܒܗܳܠܶܝܢ ܩ̈ܳܠܶܐ ܕܰܠܥܶܠ ܘܕܰܠܬܰܚܬ ܐܰܟܪܶܙܘ ܘܰܩܥܰܘ ܠܳܐ ܦܶܪܕܰܬ ܗܘܳܬ ܫܢܳܬ ܨܶܗܝܽܘܢ ܒܥܺܝܠܳܐ ܢܕܳܬ ܕܳܫ ܘܐܰܟܐܶܒ ܠܳܗܿ ܬܶܘܗܰܬ ܩܳܡܰܬ ܩܶܛܠܰܬ ܥܺܝܪܳܐ ܥܰܠ ܕܐܰܥܺܝܪܳܗܿ

24 ܩܳܡ ܠܶܗ ܥܺܝܪܳܐ ܡܶܢ ܓܰܘ ܩܰܒܪܳܐ ܕܰܕܡܶܟ ܟܰܕ ܥܺܝܪ ܘܐܶܬܳܐ ܐܶܫܟܰܚ ܥܰܡ̈ܡܶܐ ܕܰܡ̈ܟܶܐ ܝܰܒܶܒ ܘܰܩܥܳܐ [ܘܐܰܥܺܝܪ ܐܶܢܽܘܢ ܐܰܘܕܺܝܘ ܕܰܡ̈ܟܶܐ ܠܥܺܝܪܳܐ ܕܰܥܒܰܕ ܥܺܝܪ̈ܶܐ ܒܐܰܪܥܳܐ]

Nativity 6