ܒܰܪ ܩܳܠܶܗ

1 ܠܳܐ ܐܶܛܰܢ ܒܶܪܝ ܕܐܳܦ ܥܰܡܝ ܬܶܗܘܶܐ ܘܐܳܦ ܥܰܡ ܟܽܠܢܳܫ ܗܘܺܝ ܐܰܠܳܗܳܐ ܠܰܕܡܰܘܕܶܐ ܒܳܟ ܘܰܗܘܺܝ ܡܳܪܳܐ ܠܰܕܦܳܠܰܚ ܠܳܟ ܘܰܗܘܺܝ ܐܰܚܳܐ ܠܰܕܪܳܚܶܡ ܠܳܟ ܕܰܠܟܽܠ ܬܰܚܶܐ

2 ܟܰܕ ܒܺܝ ܫܪܳܐ ܗܘܰܝܬ ܒܺܝ ܘܰܠܒܰܪ ܡܶܢܝ ܫܪܳܬ ܪܰܒܽܘܬܳܟ ܘܟܰܕ ܐܺܝܠܶܕܬܳܟ ܬܽܘܒ ܓܰܠܝܳܐܺܝܬ ܚܰܝܠܳܟ ܟܰܣܝܳܐ ܠܳܐ ܫܰܢܺܝ ܡܶܢܝ ܐܰܢܬ ܠܓܰܘ ܡܶܢܝ ܘܐܰܢܬ ܠܒܰܪ ܡܶܢܝ ܡܰܦܗܶܐ ܠܐܶܡܶܗ

3 ܕܐܶܚܙܶܐ ܨܰܠܡܳܟ ܗܰܘ ܒܰܪܳܝܳܐ ܕܰܩܕܳܡ ܥܰܝܢܰܝ̈ ܨܰܠܡܳܟ ܟܰܣܝܳܐ ܨܺܝܪ ܒܪܶܥܝܳܢܝ ܒܨܰܠܡܳܟ ܓܰܠܝܳܐ ܚܙܺܝܬܶܗ ܠܐܳܕܳܡ ܘܰܒܗܰܘ ܟܰܣܝܳܐ ܚܙܺܝܬܶܗ ܠܐܰܒܽܘܟ ܕܰܡܰܡܙܶܓ ܒܳܟ

4 ܠܺܝ ܟܰܝ ܒܰܠܚܽܘܕ ܒܰܬܪ̈ܶܝܢ ܨܰܠܡܺܝ̈ܢ ܫܽܘܦܪܳܟ ܚܰܘܺܝܬ ܢܨܽܘܪܳܟ ܠܰܚܡܳܐ ܐܳܦ ܪܶܥܝܳܢܳܐ ܘܫܰܪܺܝ ܒܠܰܚܡܳܐ ܘܒܐܳܟܽܘܠܰܘ̈ܗܝ ܒܟܰܣܝܳܐ ܘܓܰܠܝܳܐ ܬܶܚܙܶܝܟ ܥܺܕܬܳܟ ܐܰܝܟ ܝܳܠܶܕܬܳܟ

5 ܕܣܳܢܶܐ ܠܰܚܡܳܟ ܕܳܡܶܐ ܗܽܘ ܠܗܰܘ ܕܣܳܢܶܐ ܦܰܓܪܳܟ ܐܳܦ ܪܰܚܺܝܩܳܐ ܕܪܳܚܶܡ ܠܰܚܡܳܟ ܐܳܦ ܩܰܪܺܝܒܰܐ ܗ̱ܘ ܕܐܰܚܶܒ ܨܰܠܡܳܟ ܒܠܰܚܡܳܐ ܘܦܰܓܪܳܐ ܚܙܰܐܽܘܟ ܩܰܕ̈ܡܶܐ ܐܳܦ ܐܚܪ̈ܳܝܶܐ

6 ܝܰܩܺܝܪ ܗܽܘ ܟܰܝ ܠܰܚܡܳܟ ܛܰܠܝܳܐ ܛܳܒ ܡܶܢ ܦܰܓܪܳܟ ܚܙܰܘ ܓܶܝܪ ܦܰܓܪܳܟ ܘܐܳܦ ܟܳܦܽܘܪ̈ܶܐ ܠܳܐ ܕܶܝܢ ܚܳܙܶܝܢ ܠܰܚܡܳܟ ܚܰܝܳܐ ܚܕܺܝܘ ܪ̈ܰܚܺܝܩܳܐ ܡܢܳܬܗܽܘܢ ܥܶܠܒܰܬ ܠܰܕܩܰܪ̈ܺܝܒܺܝܢ

7 ܗܳܐ ܨܶܝܪ ܨܰܠܡܳܟ ܒܰܕܡܳܐ ܕܥܶܢ̈ܒܶܐ ܠܥܶܠ ܡܶܢ ܠܰܚܡܳܐ ܘܨܶܝܪ ܥܰܠ ܠܶܒܳܐ ܒܨܶܒܥܳܐ ܕܚܽܘܒܳܐ ܡܶܢ ܣܰܡ̈ܡܳܢܶܐ ܕܗܰܝܡܳܢܽܘܬܳܐ ܒܪܺܝܟ ܗܽܘ ܕܐܰܥܒܰܪ ܨܰܠܡ̈ܶܐ ܓܠܺܝ̈ܦܶܐ ܒܰܨܠܶܡ ܩܽܘܫܬܶܗ

8 ܠܰܘ ܒܰܪܢܳܫܳܐ ܐܰܢܬ ܕܰܫܚܺܝܡܳܐܺܝܬ ܐܰܢܨܰܪ ܠܳܟ ܕܒܰܛܢܳܟ ܚܰܕܬܳܐ ܗܽܘ ܘܝܰܠܕܳܟ ܬܶܗܪܰܐ ܗ̱ܘ ܒܶܠܥܳܕ ܪܽܘܚܳܐ ܡܰܢ ܢܶܙܡܰܪ ܠܳܟ ܠܶܥܙܳܐ ܚܰܕܬܳܐ ܗܳܐ ܪܳܬܰܚ ܒܺܝ ܕܰܢܒܺܝܽܘܬܳܐ

9 ܐܰܝܟܰܢ ܐܶܩܪܶܝܟ ܢܽܘܟܪܳܝ ܡܶܢܰܢ ܕܰܗܘܳܐ ܡܶܢܰܢ ܒܪܳܐ ܟܰܝ ܐܶܩܪܶܝܟ ܡܳܪܳܐ ܐܶܩܪܶܝܟ ܡܰܘܠܶܕ ܠܐܶܡܶܗ ܝܰܠܕܳܐ ܐܚܪܺܢܳܐ ܡܶܢ ܓܰܘ ܡܰܝ̈ܳܐ

10 ܚܳܬܳܐ ܐܢܳܐ ܓܶܝܪ ܡܶܢ ܒܶܝܬ ܕܰܘܺܝܕ ܕܐܰܒܰܐ ܗ̱ܘ ܕܰܬܪ̈ܶܝܢ ܐܶܡܳܐ ܐܢܳܐ ܬܽܘܒ ܡܶܛܽܠ ܒܰܛܢܳܟ ܘܰܡܟܺܝܪܬܳܐ ܐܢܳܐ ܡܶܛܽܠ ܩܽܘܕܫܳܟ ܐܰܡܬܳܐ ܘܒܰܪܬܳܐ ܕܰܕܡܳܐ ܘܡܰܝ̈ܳܐ ܕܙܶܒܢܶܬ ܐܰܥܡܕܶܬ

11 ܒܰܪ ܥܶܠܳܝܳܐ ܕܐܶܬܳܐ ܫܪܳܐ ܒܺܝ ܘܰܗܘܺܝܬ ܐܶܡܶܗ ܘܐܰܝܟ ܕܐܺܝܠܶܕܬܶܗ ܝܰܠܕܳܐ ܐܚܪܺܢܳܐ ܝܰܠܕܰܢܝ ܐܳܦ ܗܽܘ ܝܰܠܕܳܐ ܕܰܬܪ̈ܶܝܢ ܠܒܽܘܫܳܐ ܕܐܶܡܶܗ ܕܰܠܒܶܫ ܦܰܓܪܶܗ ܠܶܒܫܶܬ ܫܽܘܒܚܶܗ

12 ܠܬܳܡܳܪ ܕܐܺܝܬܶܝܗܿ ܡܶܢ ܒܶܝܬ ܕܰܘܺܝܕ ܨܥܰܪ ܚܰܡܢܽܘܢ ܘܰܒܬܽܘܠܽܘܬܳܐ ܡܶܢ ܒܶܝܬ ܬܪ̈ܰܝܗܽܘܢ ܢܶܦܠܰܬ ܘܐܶܒܕܰܬ ܡܰܪܓܳܢܺܝܬܳܐ ܕܺܝܠܝ ܠܳܐ ܐܶܒܕܰܬ ܒܓܰܙܳܟ ܣܺܝܡܳܐ ܕܐܰܢܬ ܠܒܶܫܬܳܗܿ

13 ܒܬܽܘ̈ܠܶܐ ܟܽܘܠܗܽܘܢ ܕܰܡܟܺܝܪ̈ܳܬܳܟ [ܠܳܟ ܢܶܬܢܰܛܪܽܘܢ] ܐܰܪ̈ܓܽܘܢܶܐ ܐܶܢܽܘܢ ܘܠܳܐ ܐܢܳܫ ܫܰܠܺܝܛ ܕܰܠܗܽܘܢ ܢܶܩܪܽܘܒ ܐܶܠܳܐ ܡܰܠܟܰܢ ܕܰܒܬܽܘܠܽܘܬܳܐ ܐܰܝܟ ܫܽܘܫܶܦܳܐ ܗ̱ܝ ܠܳܟ ܪܰܒ ܟܽܘܡܪ̈ܶܐ

14 ܡܚܳܐ ܡܶܢ ܬܳܡܳܪ ܪܺܝܚܳܐ ܕܰܚܡܽܘܗܿ ܕܒܶܣ̈ܡܶܐ ܓܶܢܒܰܬ ܡܟܺܝܪܬܶܗ ܕܝܰܘܣܶܦ ܐܳܦܠܳܐ ܗܰܘܦܶܗ ܦܚ ܡܢ ܢܚ̈ܬܝܗܿ ܕܨܰܪܘܳܐ ܕܒܶܛܢܰܬ ܫܽܘܪܳܐ ܕܢܽܘܪܳܐ ܗܘܳܐ ܠܺܝ ܒܰܛܢܳܟ ܒܰܪ ܩܰܕܺܝܫܳܐ

15 ܦܰܩܚܳܐ ܦܰܟܶܗ ܗܘܳܐ ܕܪܺܝܚܳܐ ܥܰܙ ܗܘܳܐ ܕܫܽܘܫܰܢ ܫܽܘܒܚܳܐ ܠܳܐ ܣܢܺܝܩܳܐ ܗܘܳܬ ܣܺܝܡܰܬ ܒܶܣܡ̈ܶܐ ܥܰܠ ܗܰܒܳܒܳܐ ܘܥܰܠ ܪ̈ܺܝܚܳܢܰܘܗܝ ܐܰܪܚܶܩ ܒܶܣܪܳܐ ܕܰܚܙܳܐ ܒܟܰܪܣܳܐ ܒܰܛܢܳܐ ܕܪܽܘܚܳܐ

16 ܐܰܢܬܬܳܐ ܡܫܰܡܫܳܐ ܩܽܘܕܡܰܬ ܓܰܒܪܳܐ ܕܐܺܝܬܰܘܗܝ ܪܺܫܳܗܿ ܩܳܡ ܠܶܗ ܝܰܘܣܶܦ ܠܰܡܫܰܡܳܫܽܘ ܩܽܘܕܡܰܬ ܡܳܪܶܗ ܕܰܒܓܰܘ ܡܰܪܝܰܡ ܫܰܡܶܫ ܟܳܗܢܳܐ ܩܕܳܡ ܩܺܒܽܘܬܳܟ ܡܶܛܽܠ ܩܽܘܕܫܳܟ

17 ܛܥܶܢ ܗܘܳܐ ܡܽܘܫܶܐ ܠܽܘܚ̈ܶܐ ܕܟܺܐܦܳܐ ܕܰܟܬܰܒ ܡܳܪܶܗ ܘܙܰܝܰܚ ܝܰܘܣܶܦ ܠܽܘܚܳܐ ܕܟܺܝܬܳܐ ܕܒܳܗܿ ܗܽܘ ܫܪܳܐ ܗܘܳܐ ܒܰܪ ܒܳܪܽܘܝܳܐ ܦܳܫ ܗܘܰܝ̈ ܠܽܘ̈ܚܶܐ ܕܡܶܠܰܬ ܬܺܒܶܝܠ ܡܶܢ ܝܽܘܠܦܳܢܳܟ

Nativity 16