ܒܰܪ ܩܳܠܶܗ

1 ܒܰܫ̈ܢܰܝ ܡܰܠܟܰܐ ܗܰܘ ܕܰܩܪܰܐܽܘܗܝ ܒܰܫܡܳܐ ܕܨܶܡܚܳܐ ܕܢܰܚ ܗܘܳܐ ܡܳܪܰܢ ܒܶܝܬ ܥܶܒܪ̈ܳܝܶܐ ܘܐܰܡܠܶܟܘ ܘܐܶܬܰܘ ܨܶܡܚܳܐ ܘܕܶܢܚܳܐ ܡܰܠܟܳܐ ܒܐܰܪܥܳܐ ܘܰܒܪܳܐ ܒܪܰܘܡܳܐ ܒܪܺܝܟ ܫܽܘܠܛܳܢܶܗ [ܥܽܘܢܳܝܳܐ : ܠܳܟ ܬܶܫܒܽܘܚܬܳܐ ܕܰܒܗܳܢ ܥܺܐܕܳܐ ܐܰܦܨܰܚܬ ܥܰܠ ܟܽܠ]

2 ܒܝܰܘܡܰܝ̈ ܡܰܠܟܳܐ ܕܰܟܬܰܒ ܐܢܳܫܳܐ ܒܰܟܣܶܦ ܪܺܫܳܐ ܢܚܶܬ ܦܳܪܽܘܩܰܢ ܘܰܟܬܰܒ ܐܢܳܫܳܐ ܒܰܣܦܰܪ ܚ̈ܰܝܶܐ ܟܬܰܒ ܐܳܦ ܟܰܬܒܽܘܗܝ ܒܪܰܘܡܳܐ ܟܰܬܒܰܢ ܒܐܰܪܥܳܐ ܟܰܬܒܽܘܗܝ ܫܽܘܒܚܳܐ ܠܰܫܡܶܗ

3 ܐܺܝܠܺܝܕܽܘܬܶܗ ܒܝܰܘ̈ܡܰܝ ܡܰܠܟܳܐ ܕܰܫܡܶܗ [ܨܶܡܚܳܐ] ܡܰܠܟܳܐ ܘܡܰܠܟܳܐ ܨܶܡܚܳܐ ܘܕܶܢܚܳܐ ܨܠܺܝܒܶܗ ܛܶܥܢܶܬ ܗܿܝ ܡܠܟܘܬܐ [ܒܪܝܟ ܕܐܪܝܡܗܿ]

4 ܫ̈ܢܝܐ ܬܠܬܝܢ [ܩܘܝ ܒܐܪܥܐ] ܡܣܟܢܐܝܬ ܩ̈ܠܐ ܕܫܘܒܚܐ ܒܟܠ ܦܘܪ̈ܫܢܝܢ ܢܓܕܘܠ ܐܚ̈ܝ ܠܫ̈ܢܝ ܡܪܢ ܠܫ̈ܢܝܢ ܬܠܬܝܢ ܟ̈ܠܝܠܝܢ ܬܠܬܝܢ ܒܪܝܟ ܡܘܠܕܗ

5 ܒܫܰܢܬܳܐ ܚܕܰܬܳܐ ܡܳܪܰܬ ܓ̈ܰܙܶܐ ܘܡܰܠܝܰܬ ܛܽܘ̈ܒܶܐ ܢܰܘܕܽܘܢ ܥܰܡܰܢ ܟܪ̈ܽܘܒܶܐ ܕܰܛܥܶܢܘ ܠܰܒܪܳܐ ܒܫܽܘܒܚܳܐ ܫܒܰܩ ܬܶܫܒܽܘܚܬܶܗ ܘܠܐܺܝ ܘܐܶܫܟܰܚ ܥܶܪܒܳܐ ܕܐܶܒܰܕ ܠܶܗ ܬܰܘܕܺܝܬܳܐ

6 ܒܫܰܢܬܳܐ ܕܬܰܪ̈ܬܶܝܢ ܣܪ̈ܳܦܶܐ ܢܶܣܓܽܘܢ ܢܰܘܕܽܘܢ ܥܰܡܰܢ ܕܩܰܕܶܫܘ ܠܰܒܪܳܐ ܗܦܰܟܘ ܘܰܚܙܰܐܽܘܗܝ ܟܰܕ ܡܶܨܛܰܚܶܐ ܒܶܝܬ ܟܳܦܽܘܪ̈ܶܐ ܣܰܝܒܰܪ ܒܶܙܚܳܐ ܘܐܰܠܶܦ ܫܽܘܒܚܳܐ ܠܶܗ ܬܶܫܒܽܘܚܬܳܐ

7 ܒܫܰܢܬܳܐ ܕܰܬܠܳܬ ܕܒܶܝܬ ܡܺܝܟܳܐܶܝܠ ܢܰܘܕܽܘܢ ܥܰܡܰܢ ܕܰܡܫܰܡܫܺܝܢ ܗܘܰܘ ܠܰܒܪܳܐ ܒܪܰܘܡܳܐ ܚܙܰܐܽܘܗܝ ܒܐܰܪܥܳܐ ܕܰܡܫܰܡܶܫ ܗܘܳܐ ܐܰܫܺܝܓ ܪ̈ܶܓܠܶܐ ܡܪܰܩ ܢܰܦܫ̈ܳܬܳܐ ܒܪܺܝܟ ܡܽܘܟܳܟܶܗ

8 ܒܫܰܢܬܳܐ ܕܐܰܪܒܰܥ ܬܰܘܕܶܐ ܥܰܡܰܢ ܫܡܰܝܳܐ ܕܟܽܠܳܗܿ ܙܥܽܘܪܳܝܳܐ ܗ̱ܝ ܠܰܒܪܳܐ ܘܬܶܗܪܰܬ ܕܰܚܙܳܬ ܕܰܓܢܶܐ ܒܥܰܪܣܶܗ ܕܙܰܟܳܝ ܫܺܝܛܳܐ ܗܘܳܐ ܡܠܶܐ ܥܰܪܣܳܐ ܘܰܡܠܳܐ ܫܡܰܝܳܐ ܠܶܗ ܪܰܒܽܘܬܳܐ

9 ܒܫܰܢܬܳܐ ܕܚܰܡܶܫ ܫܶܡܫܳܐ ܕܡܰܘܩܶܕ ܠܐܰܪܥܳܐ ܒܗܰܘܦܶܗ ܢܰܘܕܶܐ ܠܫܶܡܫܰܢ ܕܐܰܪܟܶܢ ܡܶܬܚܶܗ ܘܐܰܪܶܟ ܥܽܘܙܶܗ ܕܰܬܣܰܦܶܩ ܬܶܚܙܶܝܘܗܝ ܥܰܝܢܳܐ ܪܦܺܝܬܳܐ ܕܢܰܦܫܳܐ ܟܣܺܝܬܳܐ ܒܪܺܝܟ ܙܰܠܺܝܩܶܗ

10 ܒܫܰܢܬܳܐ ܕܫܶܬ ܬܽܘܒ ܬܰܘܕܶܐ ܥܰܡܰܢ ܐܳܐܰܪ ܟܽܠܳܗܿ ܕܰܒܪܰܒܽܘܬܳܗܿ ܡܶܬܓܰܐܶܐ ܟܽܠ ܚܙܳܬ ܠܡܳܪܳܗܿ ܪܰܒܳܐ ܕܰܗܘܳܐ ܥܽܘܠܳܐ ܙܥܽܘܪܳܐ ܒܥܽܘܒܳܐ ܙܥܽܘܪܳܐ ܒܪܺܝܟ ܐܺܝܩܳܪܶܗ

11 ܒܫܰܢܬܳܐ ܕܰܫܒܰܥ ܥܢ̈ܳܢܶܐ ܘܪ̈ܽܘܚܶܐ ܝܰܒܶܒ ܥܰܡܰܢ ܘܪܰܣܶܣ ܛܰܠܳܐ ܒܐܰܦܰܝ̈ ܦܰܩ̈ܚܶܐ ܚ̈ܙܰܝ ܕܶܝܢ ܠܰܒܪܳܐ ܕܫܰܥܒܶܕ ܙܺܝܘܶܗ ܘܩܰܒܶܠ ܨܰܥܪܳܐ ܘܪܽܘܩܳܐ ܛܰܡܐܳܐ ܒܪܺܝܟ ܦܽܘܪܩܳܢܶܗ

12 ܐܳܦ ܒܫܰܢܬܳܐ ܬܽܘܒ ܗܳܝ ܕܬܶܡܢܶܐ ܒܪܺܝܬܳܐ ܬܫܰܒܰܚ ܕܝܳܢܩܺܝܢ ܦܺܐܪ̈ܶܝܗܿ ܡܶܢ ܡܰܒ̈ܽܘܥܶܝܗܿ ܣܶܓܕܰܬ ܕܰܚܙܳܬ ܠܰܒܪܳܐ ܒܟܶܢܦܶܐ ܘܐܰܝܢܶܩ ܕܰܟܝܳܐ ܚܰܠܒܳܐ ܕܰܟܝܳܐ ܒܪܺܝܟ ܨܶܒܝܳܢܶܗ

13 ܒܫܰܢܬܳܐ ܕܰܬܫܰܥ ܐܰܪܥܳܐ ܬܫܰܒܰܚ ܕܡܳܐ ܕܐܶܬܪܰܓܺܝ ܥܽܘܒܳܗܿ ܥܰܩܪܳܐ ܟܶܢ ܗܽܘ ܡܰܘܠܶܕ ܚܙܳܬ ܠܡܰܪܝܰܡ ܐܰܪܥܳܐ ܨܗܺܝܬܳܐ ܕܦܺܐܪܳܐ ܕܝܶܗܒܰܬ ܝܰܡܰܐ ܗ̱ܘ ܪܰܒܳܐ ܠܶܗ ܪܽܘܡܪܳܡܳܐ

14 ܒܫܰܢܬܳܐ ܕܰܥܣܰܪ ܛܽܘܪܳܐ ܕܣܺܝܢܰܝ ܢܫܰܒܰܚ ܕܰܦܫܰܪ ܩܽܘܕܡܰܬ ܡܳܪܶܗ ܚܙܳܐ ܕܥܰܠ ܡܳܪܶܗ ܟܺܐܦ̈ܶܐ ܫܩܰܠܘ ܗܘܰܘ ܩܰܒܶܠ ܟܺܐܦ̈ܶܐ ܕܥܺܕܬܶܗ ܢܶܒܢܶܐ ܠܥܶܠ ܡܶܢ ܟܺܐܦ̈ܶܐ ܒܪܺܝܟ ܒܶܢܝܳܢܶܗ

15 ܒܫܰܢܬܳܐ ܕܰܥܣܰܪ ܘܰܚܕܳܐ ܢܰܘܕܶܐ ܝܰܡܳܐ ܪܰܒܳܐ ܠܫܽܘܥܠܶܗ ܕܰܒܪܳܐ ܗܰܘ ܕܐܰܟܺܝܠܶܗ ܘܰܬܗܰܪ ܕܰܚܙܳܝܗܝ ܕܰܢܚܶܬ ܘܰܥܡܰܕ ܒܡ̈ܰܝܳܐ ܙܥܽܘܪ̈ܶܐ ܡܪܰܩ ܒܶܪ̈ܝܳܬܳܐ ܒܪܺܝܟ ܢܶܨܚܳܢܶܗ

16 ܒܫܰܢܬܳܐ ܕܬܰܪ̈ܬܶܝܢ ܘܰܥܣܰܪ̈ ܢܰܘܕܶܐ ܗܰܝܟܰܠ ܩܽܘܕܫܳܐ ܕܰܚܙܳܐ ܠܫܰܒܪܳܐ ܟܰܕ ܝܳܬܶܒ ܗܘܳܐ ܒܰܝܢܳܬ ܣܳܒ̈ܶܐ ܫܬܶܩܘ ܐܽܘܟܳܡ̈ܶܐ ܕܰܦܥܳܐ ܒܥܺܐܕܶܗ ܐܶܡܰܪ ܥܺܐܕܳܐ ܒܪܺܝܟ ܚܽܘܣܳܝܶܗ

17 ܒܫܰܢܬܳܐ ܕܰܬܠܳܬ ܘܰܥܣܰܪ̈ ܢܰܘܕܽܘܢ ܥܰܡܰܢ ܬܳܓ̈ܶܐ ܡܰܠܟܳܐ ܕܰܢܨܰܚ ܐܳܦ ܐܶܬܟܰܠܰܠ ܒܰܟܠܺܝܠ ܟܽܘܒ̈ܶܐ ܩܛܰܪ ܠܶܗ ܠܐܳܕܳܡ ܬܳܓܳܐ ܪܰܒܳܐ ܥܰܠ ܝܰܡܺܝܢܳܐ ܒܪܺܝܟ ܫܳܠܽܘܚܶܗ

18 ܒܫܰܢܬܳܐ ܕܰܥܣܰܪ̈ ܘܐܰܪ̈ܒܰܥ ܢܰܘܕܶܐ ܦܶܨܚܳܐ ܕܡܶܨܪ̈ܶܝܢ ܠܦܶܨܚܳܐ ܕܐܶܬܳܐ ܘܐܰܦܣܰܚ ܥܰܠ ܟܽܠ ܘܰܚܠܳܦ ܦܶܪܥܽܘܢ ܛܰܒܰܥ ܠܶܓܝܽܘܢ ܚܠܳܦ ܦܪ̈ܺܫܶܐ ܠܫܺܐܕ̈ܶܐ ܚܰܢܶܩ ܒܪܺܝܟ ܦܽܘܪܥܳܢܶܗ

19 ܒܫܰܢܬܳܐ ܕܚܰܡܶܫ ܘܰܥܣܰܪ̈ ܢܰܘܕܶܐ ܐܶܡܰܪ ܥܳܢܳܐ ܕܠܰܘ ܐܰܝܟ ܡܽܘܫܶܐ ܩܰܛܠܶܗ ܡܳܪܰܢ ܘܰܦܪܰܩ ܒܰܕܡܶܗ ܠܰܒܢܰܝ̈ܢܳܫܰܐ ܗ̱ܘ ܪܳܥܶܐ ܟܽܠ ܡܺܝܬ ܡܶܛܽܠ ܟܽܠ ܒܪܺܝܟ ܝܳܠܽܘܕܶܗ

20 ܒܫܰܢܬܳܐ ܕܰܥܣܰܪ̈ ܘܰܕܫܶܬ ܬܰܘܕܶܐ ܚܶܛܬܳܐ ܒܐܪܳܙܳܐ ܠܗܰܘ ܐܰܟܳܪܳܐ ܕܰܙܪܰܥ ܦܰܓܪܶܗ ܒܐܰܪܥܳܐ ܥܩܰܪܬܳܐ ܕܥܰܠ ܟܽܠ ܟܶܡܰܬ ܫܶܘܚܰܬ ܝܶܗܒܰܬ ܠܰܚܡܳܐ ܚܰܕܬܳܐ ܒܪܺܝܟ ܙܰܟܳܝܳܐ

21 ܒܫܰܢܬܳܐ ܕܥܶܣܪ̈ܶܐ ܘܰܫܒܰܥ ܬܰܘܕܶܐ ܓܦܶܬܳܐ ܠܡܳܪܰܢ ܟܰܪܡܳܐ ܕܩܽܘܫܬܳܐ ܗܘܰܝ̈ ܢܰܦܫ̈ܳܬܳܐ ܐܰܝܟ ܢܶܨܒ̈ܳܬܳܐ ܫܰܝܶܢ ܟܰܪܡܳܐ ܘܐܰܚܪܶܒ ܟܰܪܡܳܐ ܕܝܰܗܒ ܚܰܪ̈ܽܘܒܶܐ ܒܪܺܝܟ ܥܳܩܽܘܪܶܗ

22 ܒܫܰܢܬܳܐ ܕܰܥܣܰܪ̈ ܘܰܫܒܰܥ ܬܰܘܕܶܐ ܓܦܶܬܳܐ ܕܐܰܟܠܳܗܿ ܚܙܺܝܪܳܐ ܕܥܳܒܳܐ ܠܟܰܪܡܳܐ ܕܩܽܘܫܬܳܐ ܕܰܦܠܰܚ ܢܰܦܫܶܗ ܘܰܢܛܰܪ ܦܺܐܪܶܗ ܘܩܰܪܶܒ ܦܺܐܪܳܐ ܠܡܳܪܶܐ ܟܰܪܡܳܐ ܒܪܺܝܟ ܦܰܠܳܚܶܗ 23 ܒܫܰܢܬܳܐ ܕܰܥܣܰܪ̈ ܐܳܦ ܕܰܬܡܳܢܶܐ ܢܰܘܕܶܐ ܚܡܺܝܪܳܢ ܠܰܚܡܺܝܪ ܩܽܘܫܬܳܐ ܕܰܚܠܶܕ ܘܰܢܓܰܕ ܟܽܠ ܪ̈ܶܥܝܳܢܺܝܢ ܘܰܥܒܰܕ ܐܶܢܽܘܢ ܚܰܕ ܪܶܥܝܳܢܳܐ ܒܚܰܕ ܝܽܘܠܦܳܢܳܐ ܒܪܺܝܟ ܝܽܘܠܦܳܢܳܟ

24 ܒܫܰܢܬܳܐ ܕܰܥܣܰܪ̈ ܘܰܬܫܰܥ ܬܰܘܕܶܐ ܡܶܠܚܳܐ ܠܦܰܓܪܳܟ ܥܽܘܠܳܐ ܒܪܺܝܟܳܐ ܢܰܦܫܳܐ ܐܺܝܬܶܝܗܿ ܡܶܠܚܶܗ ܕܦܰܓܪܳܐ ܘܗܰܝܡܳܢܽܘܬܳܐ ܡܶܠܚܳܐ ܕܢܰܦܫܳܐ ܕܒܳܗܿ ܡܶܬܢܰܛܪܳܐ ܒܪܺܝܟ ܢܽܘܛܳܪܳܟ

25 ܒܫܰܢܬܳܐ ܕܥܶܣܪ̈ܺܝܢ ܢܰܘܕܶܐ ܥܰܡܰܢ ܥܽܘܬܪܳܐ ܕܙܰܒܢܳܐ ܕܐܰܪܫܠܶܘ ܫܰܒܩܽܘܗܝ ܐܢܳܫܳܐ ܓܡܺܝܪ̈ܶܐ ܡܶܛܽܠ ܘܳܝܳܐ ܘܐܶܬܰܘ ܪܰܚܡܽܘܗܿ ܠܡܶܣܟܺܢܽܘܬܳܐ ܡܶܛܽܠ ܛܽܘܒܳܗܿ ܒܪܺܝܟ ܕܰܨܒܳܐ ܒܳܗܿ

26 ܒܫܰܢܬܳܐ ܕܥܶܣܪ̈ܺܝܢ ܘܰܚܕܳܐ ܢܰܘܕܽܘܢ ܡܰܝ̈ܳܐ [ܕܚܰܠܺܝܘ ܒܪܳܐܙܶܗ ܕܰܒܪܳܐ ܒܕܶܒܫܶܗ] ܕܫܶܡܫܽܘܢ ܥܰܡ̈ܡܶܐ ܡܪܰܘ ܗܘܰܘ ܕܰܚܪܶܒ ܐܶܢܽܘܢ ܚܝܰܘ ܒܰܙܩܺܝܦܳܐ ܕܰܦܪܰܩ ܐܶܢܽܘܢ ܒܪܺܝܟ ܒܽܘܣܳܡܳܟ

27 ܒܫܰܢܬܳܐ ܕܥܶܣܪ̈ܺܝܢ ܘܬܰܪ̈ܬܶܝܢ ܢܰܘܕܶܐ ܙܰܝܢܳܐ ܘܣܰܝܦܳܐ ܠܳܐ ܣܦܰܩܘ ܩܰܛܠܽܘܗܝ ܠܰܒܥܶܠ ܕܳܪܰܢ ܐܰܢܬ ܗܽܘ ܩܰܛܠܽܘܗܝ ܘܐܰܢܬ ܗܽܘ ܩܒܰܥܬܶܗ ܠܐܶܕܢܳܐ ܕܦܰܣܩܳܗܿ ܣܰܝܦܶܗ ܕܫܶܡܥܽܘܢ ܒܪܺܝܟ ܚܽܘܠܡܳܢܳܟ

28 ܒܫܰܢܬܳܐ ܕܥܶܣܪ̈ܺܝܢ ܘܰܬܠܳܬ ܬܰܘܕܶܐ ܐܳܦ ܐܰܬܳܢܳܐ ܕܝܶܗܒܰܬ ܥܺܝܠܳܐ ܕܰܥܠܰܘܗܝ ܢܶܪܟܰܒ ܦܳܬܰܚ ܦܽܘܡܳܐ ܐܳܦ ܠܰܥܪ̈ܳܕܶܐ ܝܰܠܕܳܗܿ ܕܗܳܓܳܪ ܝܰܗܒ ܗܽܘܠܳܠܳܐ ܒܪܺܝܟ ܗܽܘܠܳܠܳܟ

29 ܒܫܰܢܬܳܐ ܕܥܶܣܪ̈ܺܝܢ ܘܐܰܪ̈ܒܰܥ ܢܰܘܕܶܐ ܥܽܘܬܪܳܐ ܠܰܒܪܳܐ ܬܗܰܪܘ ܗܘܰܘ ܓ̈ܰܙܶܐ ܒܡܳܪܶܐ ܓ̈ܰܙܶܐ ܟܰܕ ܡܶܬܪܰܒܶܐ ܒܶܝܬ ܡܶܣ̈ܟܺܢܶܐ ܡܰܣܟܶܢ ܢܰܦܫܶܗ ܕܰܠܟܽܠ ܢܶܥܬܰܪ ܒܪܺܝܟ ܚܽܘܠܛܳܢܳܟ

30 ܒܫܰܢܬܳܐ ܕܥܶܣܪ̈ܺܝܢ [ܘܚܰܡܶܫ] ܢܰܘܕܶܐ ܐܺܝܣܚܳܩ ܠܰܒܪܳܐ [ܕܚܣܟܶܗ] ܒܛܽܘܪܳܐ ܡܶܢ ܣܰܟܺܝܢܳܐ ܘܰܗܘܳܐ ܚܠܳܦܰܘܗܝ ܐܶܡܰܪ ܩܶܛܠܳܐ ܦܠܰܛ ܡܳܝܽܘܬܳܐ ܘܡܺܝܬ ܡܰܚܶܐ ܟܽܠ ܒܪܺܝܟ ܩܽܘܪܒܳܢܶܗ

31 ܒܫܰܢܬܳܐ ܕܥܶܣܪ̈ܺܝܢ ܘܰܕܫܶܬ ܢܰܘܕܶܐ ܥܰܡܰܢ ܡܽܘܫܶܐ ܕܰܕܚܶܠ ܘܰܥܪܰܩ ܡܶܢ ܩ̈ܳܛܽܘܠܶܐ ܢܰܘܕܶܐ ܠܰܒܪܳܐ ܕܗܽܘܝܽܘ ܒܪ̈ܶܓܠܰܘܗܝ ܥܰܠ ܠܳܗܿ ܠܰܫܝܽܘܠ ܒܰܙܳܗܿ ܘܰܢܦܰܩ ܒܪܺܝܟ ܢܽܘܚܳܡܳܟ

32 ܒܫܰܢܬܳܐ ܕܐܺܝܬܶܝܗܿ ܕܥܶܣܪ̈ܺܝܢ ܘܰܫܒܰܥ ܣܢܺܓܪ̈ܶܐ ܡ̈ܠܺܝܠܶܐ ܢܰܘܕܽܘܢ ܠܰܒܪܳܐ ܕܠܳܐ ܐܶܫܟܰܚܘ ܠܶܗ ܦܽܘܪܣܳܐ ܠܕܺܝܢܰܢ ܕܐܰܝܟܰܢ ܢܶܙܟܶܐ ܫܒܰܩ ܠܰܝܬ ܕܺܝܢܳܐ ܘܰܙܟܺܝ ܕܺܝܢܰܢ ܠܶܗ ܩܽܘܠܳܣܳܐ

33 ܒܫܰܢܬܳܐ ܕܥܶܣܪ̈ܺܝܢ ܘܰܫܒܰܥ ܢܰܘܕܽܘܢ ܟܽܠ ܕܰܝ̈ܳܢܶܐ ܕܰܠܥܰܘ̈ܳܠܶܐ ܩܛܰܠܘ ܐܰܝܟ ܟܺܐܢ̈ܶܐ ܢܰܘܕܽܘܢ ܠܰܒܪܳܐ ܕܰܚܠܳܦ ܒܺܝ̈ܫܶܐ ܡܺܝܬ ܐܰܝܟ ܛܳܒܳܐ ܟܰܕ ܒܰܪ ܟܺܐܢܰܐ ܗ̱ܘ ܒܪ̈ܺܝܟܺܝܢ ܪ̈ܰܚܡܰܘܗܝ

34 ܒܫܰܢܬܳܐ ܕܥܶܣܪ̈ܺܝܢ ܐܳܦ ܕܰܬܡܳܢܶܐ ܢܰܘܕܽܘܢ ܠܰܒܪܳܐ ܟܽܠ ܓܰܢܒܳܪ̈ܶܐ ܕܠܳܐ ܦܪܰܩܽܘܢ ܗܘܰܘ ܡܶܢ ܫܰܒܳܝܳܐ ܚܰܕ ܗܽܘ ܣܓܺܝܕܳܐ ܕܰܗܘܳܐ ܢܟܺܝܣܳܐ ܐܰܕܪܶܟ ܦܰܪܩܰܢ ܒܪܺܝܟ ܦܽܘܨܳܝܳܟ

35 ܒܫܰܢܬܳܐ ܕܥܶܣܪ̈ܺܝܢ ܘܰܬܫܰܥ ܢܰܘܕܶܐ ܥܰܡܰܢ ܐܺܝܽܘܒ ܕܰܣܒܰܠ ܚܰܫ̈ܶܐ ܡܶܛܽܠ ܢܰܦܫܶܗ ܘܰܣܒܰܠ ܡܳܪܰܢ ܡܶܛܠܳܬܰܢ ܪܽܘܩܳܐ ܘܢܶܓ̈ܕܶܐ ܟܰܘ̈ܒܶܐ ܘܨ̈ܶܨܶܐ ܒܪܺܝܟ ܗܽܘ ܚܢܳܢܶܗ

36 ܒܫܰܢܬܳܐ ܕܐܺܝܬܶܝܗܿ ܗܳܝ ܕܰܬܠܳܬܺܝܢ ܢܰܘܕܽܘܢ ܥܰܡܰܢ ܡܺܝ̈ܬܶܐ ܕܰܚܝܰܘ ܒܝܰܕ ܡܺܝܬܽܘܬܶܗ ܚ̈ܰܝܶܐ ܕܰܦܢܰܘ ܒܰܙܩܺܝܦܽܘܬܶܗ ܘܪܰܘܡܳܐ ܘܥܽܘܡܩܳܐ ܕܐܶܫܬܰܝܰܢ ܒܶܗ ܒܶܪܝ ܗܽܘ ܘܐܰܒܽܘܗܝ ܫܠܶܡܘ ܡܰܕܪ̈ܳܫܶܐ ܕܒܶܝܬ ܝܰܠܕܶܗ ܕܡܳܪܰܢ ܕܣܺܝܡ ܠܡܳܪܝ ܐܰܦܪܶܝܡ ܛܽܘܒܳܢܳܐ ܫܽܘܒܚܳܐ ܠܐܰܒܳܐ ܘܠܰܒܪܳܐ ܘܰܠܪܽܘܚܳܐ ܕܩܽܘܕܫܳܐ ܗܳܫܳܐ ܘܰܒܟܽܠܙܒܰܢ ܘܰܠܥܳܠܰܡ ܥܳܠܡܺܝܢ ܐܰܡܺܝܢ

Nativity 18

Syriac Lexeme

Corpus Text ID:

NHSL Work ID(s):

Source:

Preparation of Electronic Edition:

Open Access and Copyright:

Note:

Bibliography: