Nativity 21

https://syriaccorpus.org/569

ܫܽܘܚܠܳܦ ܩܳܠܶܐ ܥܽܘܢܳܝܳܐ : ܒܪܺܝܟ ܕܙܰܥܰܪ ܕܠܳܐ ܣܳܟ ܕܰܕܠܳܐ ܣܳܟܳܐ ܢܰܘܪܒܰܢ

1 ܥܰܠ ܝܰܠܕܶܗ ܕܒܽܘܟܪܳܐ ܒܥܰܕܥܺܕܶܗ ܢܡܰܠܶܠ ܝܳܗܶܒ ܗܽܘ ܒܝܰܘܡܶܗ ܥܽܘܕܪ̈ܳܢܶܐ ܟܣܰܝ̈ܳܐ ܐܶܢ ܛܰܡܐܳܐ ܒܥܺܐܕܶܗ ܘܰܒܕܽܘܟܪܳܢܳܐ ܕܝܰܘܡܶܗ ܝܰܗܒ ܡܰܘܗܰܒܬܳܐ ܕܪܽܘܓܙܳܐ ܪܺܝܫܳܐ ܥܰܠ ܦܺܝܢܟܳܐ ܟܡܳܐ ܢܶܬܶܠ ܒܪܺܝܟܳܐ ܒܽܘܪ̈ܟܳܬܳܐ ܠܐܰܝܢܳܐ ܕܰܡܙܰܡܰܪ ܒܥܺܐܕܶܗ

2 ܠܳܐ ܢܶܡܢܶܝܘܗܝ ܠܫܰܗܪܰܢ ܐܰܝܟ ܫܰܗܪ̈ܶܐ ܕܟܽܠܝܽܘܡ [ܥܰܕܥܺܐܕܰܐ ܗ̱ܘ ܕܐܰܓܪܶܗ ܚܰܕ ܒܰܡܳܐܐ ܡܝܰܬܰܪ] ܥܺܐܕܰܐ ܗ̱ܘ ܓܶܝܪ ܕܡܰܩܪܶܒ ܥܰܡ ܫܶܢܬܳܐ ܒܫܰܗܪܶܗ ܡܰܠܳܠܰܐ ܗ̱ܘ ܕܡܰܩܪܶܒ ܥܰܡ ܫܶܬܩܳܐ ܒܩܳܠܶܗ ܟܽܠ ܛܽܘ̈ܒܺܝܢ ܡܥܰܛܶܦ ܪܰܒ ܚܰܝܠܰܐ ܗ̱ܘ ܕܥܺܐܕ̈ܶܐ ܘܰܕܚܰܕ̈ܘܳܬܳܐ ܟܗܺܝܢ

3 ܝܰܘܡܳܢܳܐ ܡܰܠܰܐܟ̈ܶܐ ܘܐܳܦ ܪ̈ܰܒܰܝ ܡܰܠܰܐܟ̈ܶܐ ܬܶܫܒܽܘܚܬܳܐ ܚܕܰܬܳܐ ܢܚܶܬܘ ܫܰܒܰܚܘ ܒܐܰܪܥܳܐ ܒܗܰܘ ܪܳܐܙܳܐ ܢܳܚܬܺܝܢ ܘܥܰܡ ܫܰܗܳܪ̈ܶܐ ܕܳܝܨܺܝܢ ܒܗܰܘ ܙܰܒܢܳܐ ܕܫܰܒܰܚܘ ܓܽܘܕܳܦܳܐ ܡܠܶܐ ܗܘܳܐ ܒܪܺܝܟ ܝܰܠܕܳܐ ܕܒܶܗ ܗܽܘ ܗܳܐ ܪܳܥܶܡ ܥܳܠܡܳܐ ܒܗܽܘ̈ܠܳܠܶܐ ܕܫܽܘܒܚܳܐ

4 ܠܠܺܝܰܐ ܗ̱ܘ ܓܶܝܪ ܕܚܳܠܶܛ ܥܺܝܪ̈ܶܐ ܕܰܠܥܶܠ ܒܫܰܗܪ̈ܶܐ ܐܶܬܳܐ ܥܺܝܪܳܐ ܕܢܶܥܒܶܕ ܥܺܝܪ̈ܶܐ ܒܓܰܘ ܒܪܺܝܬܳܐ ܫܰܗܳܪ̈ܶܐ ܗܳܐ ܥܒܺܝܕܺܝܢ ܫܰܘ̈ܬܳܦܶܐ ܠܥܺܝܪ̈ܶܐ ܡܫܰܒܚܳܢ̈ܶܐ ܥܒܺܝܕܺܝܢ ܚܰܒܪ̈ܶܐ ܥܰܡ ܣܪ̈ܳܦܶܐ ܛܽܘܒܰܘܗܝ ܠܡܰܢ ܕܰܗܘܳܐ ܟܶܢܳܪܳܐ ܠܫܽܘܒܚܳܟ ܘܰܗܘܳܐ ܐܰܓܪܶܗ ܚܢܳܢܳܟ

5 ܠܝܰܠܕܶܗ ܕܶܝܢ ܕܒܽܘܟܪܳܐ ܢܶܙܡܰܪ ܠܶܗ ܕܐܰܝܟܰܢ ܐܰܠܳܗܽܘܬܳܐ ܒܟܰܪܣܳܐ ܙܶܩܪܰܬ ܠܳܗܿ ܠܒܽܘܫܳܐ ܠܒܰܫܬܶܗ ܘܢܶܦܩܰܬ ܒܝܰܠܕܳܐ ܒܡܰܘܬܳܐ ܬܽܘܒ ܫܠܰܚܬܶܗ ܚܕܳܐ ܙܒܰܢ ܫܠܰܚܬܶܗ ܬܰܪܬܶܝܢ ܙܰܒ̈ܢܺܝܢ ܠܒܰܫܬܶܗ ܕܣܶܡܳܠܳܐ ܥܛܰܦܬܶܗ ܘܡܶܢܳܗܿ ܐܰܥܕܝܰܬܶܗ ܘܥܰܠ ܝܰܡܺܝܢܳܐ ܣܳܡܬܶܗ

6 ܫܪܳܐ ܒܥܽܘܒܳܐ ܙܥܽܘܪܳܐ ܚܰܝܠܳܐ ܕܰܠܟܽܠ ܡܕܰܒܰܪ ܟܰܕ ܬܰܡܳܢ ܫܪܳܐ ܗܘܳܐ ܦܓܽܘܕ̈ܶܐ ܕܟܽܠܳܐ ܥܪܶܐ ܗܘܳܐ ܠܝܳܠܽܘܕܶܗ ܢܩܳܐ ܗܘܳܐ ܕܨܶܒܝܳܢܶܗ ܢܫܰܡܠܶܐ ܫܡܰܝܳܐ ܡܶܢܶܗ ܡܠܶܝܢ ܗܘܰܘ ܘܒܶܪ̈ܝܳܬܳܐ ܟܽܠܗܶܝܢ ܫܶܡܫܳܐ ܥܰܠ ܠܟܰܪܣܳܐ ܘܰܒܪܰܘܡܳܐ ܘܥܽܘܡܩܳܐ ܙܰܠܺܝܩܰܘ̈ܗܝ ܫܪܶܝܢ ܗܘܰܘ

7 ܫܪܳܐ ܒܥܽܘ̈ܒܶܐ ܪ̈ܘܺܝܚܶܐ ܕܒܶܪ̈ܝܳܬܳܐ ܟܽܠܗܶܝܢ ܙܥܽܘܪ̈ܝܳܢ ܐܶܢܶܝܢ ܠܡܶܐܚܰܕ ܪܰܒܽܘܬܶܗ ܕܒܽܘܟܪܳܐ ܐܰܝܟܰܢ ܟܰܝ ܣܦܰܩ ܠܶܗ ܗܰܘ ܥܽܘܒܳܐ ܕܡܰܪܝܰܡ ܬܶܗܪܳܐ ܐܶܢ ܣܦܰܩ ܠܶܗ [----] ܡܶܢ ܟܽܠ ܥܽܘ̈ܒܺܝܢ ܕܐܰܚܕܽܘܗܝ ܚܰܕ ܥܽܘܒܳܐ ܣܦܰܩ ܠܶܗ ܕܗܰܘ ܪܰܒܳܐ ܕܝܰܠܕܶܗ

8 ܫܘܶܐ ܗܽܘ ܥܽܘܒܳܐ ܕܐܰܚܕܶܗ ܐܶܢ ܐܰܚܕܶܗ ܠܟܽܠܶܗ ܥܰܡ ܥܽܘܒܳܐ ܬܡܺܝܗܳܐ ܕܪܰܒ ܡܶܢ ܕܝܰܠܕܶܗ ܘܡܰܢ ܢܰܡܪܰܚ ܕܢܺܐܡܰܪ ܕܰܫܘܶܐ ܥܽܘܒܳܐ ܙܥܽܘܪܳܐ ܚܰܠܳܫ ܘܫܺܝܛܳܐ ܥܰܡ ܕܐܺܝܬܽܘܬܳܐ ܪܰܒܬܳܐ ܫܪܳܐ ܡܶܛܽܠ ܚܢܳܢܶܗ ܘܰܕܪܰܒ ܗܽܘ ܟܝܳܢܶܗ ܠܳܐ ܐܶܣܬܰܝܰܟ ܒܡܶܕܶܡ

9 ܫܠܳܡܳܐ ܡܪܰܥܝܳܢܳܐ ܕܐܶܫܬܰܕܰܪ ܠܥܰܡ̈ܡܶܐ ܨܶܡܚܳܐ ܡܰܦܨܚܳܢܳܐ ܕܐܶܬܐܳ ܨܶܝܕ ܟܡܺܝܪ̈ܶܐ ܚܡܺܝܪܳܐ ܚܰܝܠܬܳܢܳܐ ܙܳܟܶܐ ܟܽܠ ܒܫܶܠܝܳܐ ܢܰܓܺܝܪ ܪܽܘܚܳܐ ܕܨܳܕܳܗܿ ܠܰܒܪܺܝܬܳܐ ܒܚܰܕ ܚܰܕ ܛܽܘܒܰܘܗܝ ܠܡܰܢ ܕܐܰܫܪܺܝ ܚܰܕ̈ܘܳܬܳܟ ܒܠܶܒܶܗ ܘܰܠܥܳܩ̈ܳܬܶܗ ܒܳܟ ܛܥܳܐ

10 ܝܰܒܶܒܘ ܗܘܰܘ ܫܠܳܡܳܐ ܦܽܘܡܳܐ ܕܥܺܝܪ̈ܶܐ ܠܫܰܗܳܪ̈ܶܐ ܦܶܓܥܰܬ ܒܫܰܗܳܪ̈ܶܐ ܣܒܰܪܬܳܐ ܡܶܢ ܥܺܝܪ̈ܶܐ ܕܐܰܝܬܝܽܘܗܿ ܡܰܢ ܢܶܕܡܰܟ ܒܗܳܢܳܐ ܠܺܠܝܳܐ ܕܐܰܥܺܝܪ ܒܪܺܝܬܳܐ ܣܰܒܰܪܘ ܓܶܝܪ ܫܠܳܡܳܐ ܕܪܰܓܺܝܙܽܘܬܳܐ ܐܺܝܬ ܗܘܳܬ ܒܪܺܝܟ ܥܽܘܠܳܐ ܕܪܰܥܺܝ ܪܰܒܽܘܬܳܐ ܒܫܶܬܩܶܗ ܕܡ̈ܰܠܳܠܶܐ ܕܐܰܪܓܙܽܘܗܝ

11 ܚܠܰܛܘ ܥܺܝܪ̈ܶܐ ܒܥܺܝܪ̈ܶܐ ܚܕܺܝܘ ܕܰܚܝܳܐ ܥܳܠܡܳܐ ܒܗܶܬ ܒܺܝܫܳܐ ܕܐܰܡܠܶܟ ܘܰܩܛܰܪ ܬܳܓܳܐ ܕܙܺܐܦܳܐ ܐܰܪܡܺܝ ܗܘܳܐ ܟܽܘܪܣܝܶܗ ܐܰܝܟ ܐܰܠܳܗܳܐ ܒܬܺܒܶܝܠ ܥܽܘܠܳܐ ܕܰܢܦܰܠ ܒܐܽܘܪܝܳܐ ܡܶܢ ܫܽܘܠܛܳܢܶܗ ܐܰܪܡܝܶܗ ܫܶܡܫܳܐ ܦܰܢܺܝ ܣܶܓܕܬܳܐ ܒܰܡܓܽܘܫܰܘ̈ܗܝ ܝܰܩܪܶܗ ܒܣܳܓܽܘܕ̈ܰܘܗܝ ܣܓܶܕܘ ܠܶܗ

12 ܐܰܠܳܗܳܐ ܚܙܳܐ ܗܘܳܐ ܕܠܰܥܒܺܝ̈ܕܶܐ ܣܳܓܕܺܝܢ ܠܒܶܫ ܦܰܓܪܳܐ ܥܒܺܝܕܳܐ ܕܒܰܥܝܳܕܰܢ ܢܨܽܘܕܰܢ ܗܳܐ ܒܗܳܢܳܐ ܓܒܺܝܠܳܐ ܓܳܒܽܘܠܰܢ ܐܰܣܝܰܢ ܘܰܒܗܳܢܳܐ ܒܪܺܝܬܳܐ ܒܳܪܽܘܝܰܢ ܐܰܚܝܰܢ ܠܳܐ ܕܰܒܪܰܢ ܩܛܺܝܪܶܗ ܒܪܺܝܟ ܕܐܶܬܳܐ ܒܕܺܝܠܰܢ ܘܰܒܕܺܝܠܶܗ ܚܰܠܛܰܢ

13 ܐܳܘ ܪܰܒ ܡܶܢ ܡܫܽܘܚܬܳܐ ܕܰܕܠܳܐ ܡܽܘܫܚܳܐ ܙܥܰܪ ܗܘܳܐ ܡܶܢ ܫܽܘܒܚܳܐ ܫܒܺܝܚܳܐ ܐܶܬܬܰܚܬܺܝܬ ܠܫܶܦܠܳܐ ܗܳܢܳܐ ܟܽܠܶܗ ܐܰܪܟܢܽܘܟ ܪ̈ܰܚܡܶܐ ܕܰܫܪܶܝܢ ܒܳܟ ܐܰܪܟܶܢ ܠܺܝ ܚܢܳܢܳܟ ܐܶܬܩܰܠܰܣ ܒܒܺܝܫܽܘܬܝ ܛܽܘܒܰܘܗܝ ܠܡܰܢ ܕܰܗܘܳܐ ܡܰܒܽܘܥܳܐ ܕܩ̈ܳܠܶܐ ܘܐܰܘܕܺܝ ܟܽܠܶܗ ܠܟܽܠܳܟ

14 ܗܘܳܐ ܥܰܒܕܳܐ ܒܐܰܪܥܳܐ ܗܘܳܐ ܡܳܪܳܐ ܒܪܰܘܡܳܐ ܝܺܪܶܬ ܪܰܘܡܳܐ ܘܥܽܘܡܩܳܐ ܕܰܗܘܳܐ ܐܰܟܣܶܢܝܳܐ ܘܕܕܳܢܽܘܗܝ ܒܥܽܘܠܳܐ ܗܘܳܐ ܕܳܐܶܢ ܒܩܽܘܫܬܳܐ ܘܰܕܪܰܩܘ ܠܶܗ ܒܐܰܦܰܘ̈ܗܝ ܢܦܰܚ ܪܽܘܚܳܐ ܒܐܰܦ̈ܶܐ ܕܐܰܚܺܝܕ ܩܰܢܝܳܐ ܡܚܺܝܠܳܐ ܗܘܳܐ ܚܽܘܛܪܳܐ ܠܥܳܠܡܳܐ ܕܰܣܐܶܒ ܘܰܥܠܰܘܗܝ ܐܶܣܬܡܶܟ

15 ܕܩܳܡ ܫܰܡܶܫ ܠܥܰܒܕ̈ܶܐ ܟܰܕ ܝܳܬܶܒ ܡܶܣܬܓܶܕ ܕܒܰܙܰܚܘ ܒܶܗ ܣܳܦܪ̈ܶܐ ܣܪ̈ܳܦܶܐ ܩܰܕܶܫܘ ܩܕܳܡܰܘܗܝ ܗܳܢ ܫܽܘܒܚܳܐ ܨܒܳܐ ܗܘܳܐ ܕܢܶܓܢܽܘܒ ܐܳܕܳܡ ܒܛܽܘܫܝܳܐ ܚܳܪ ܚܶܘܝܳܐ ܕܣܰܚܦܶܗ ܠܐܰܝܢܳܐ ܪܰܘܡܳܐ ܐܶܬܬܪܺܝܡ ܪܰܨܶܗ ܥܰܠ ܕܢܰܟܠܶܗ ܕܳܫ̈ܶܝܗܝ ܪ̈ܶܓܠܶܐ ܕܚܰܘܳܐ ܕܰܫܕܳܐ ܡܶܪܬܳܐ ܒܐܶܕܢܶܝ̈ܗܿ

16 ܡܶܙܕܰܘܓܳܐ ܗܘܳܬ ܥܩܰܪܬܳܐ ܘܥܰܠ ܦܺܐܪ̈ܶܐ ܟܳܝܡܳܐ ܥܽܘܒܳܗܿ ܕܶܝܢ ܕܡܰܪܝܰܡ ܩܰܕܺܝܫܳܐܺܝܬ ܒܛܶܢ ܗܘܳܐ ܒܐܰܪ̈ܥܳܬܳܐ ܠܡܶܬܗܰܪ ܘܰܒܢܶܨ̈ܒܳܬܳܐ ܠܡܶܬܡܰܗ ܗܳܝ ܛܶܠܡܰܬ ܕܢܶܣܒܰܬ ܘܰܕܠܳܐ ܝܶܙܦܰܬ ܦܰܢܝܰܬ ܐܰܘܕܺܝ ܟܝܳܢܳܐ ܕܐܶܙܕܟܺܝ ܟܰܪܣܳܐ ܠܶܗ ܛܠܰܡܬܶܗ ܘܰܕܠܳܐ ܝܰܗܒ ܠܳܗܿ ܦܪܰܥܬܶܗ

17 ܡܰܪܝܰܡ ܒܐܶܠܺܝܫܒܰܥ ܐܶܙܕܰܟܝܰܬ ܒܕܺܝܢܳܐ ܥܰܩܪܽܘܬܳܐ ܐܰܦܺܝܣܰܬ ܕܨܶܒܝܳܢܳܐ ܕܐܶܫܟܰܚ ܘܐܶܚܰܕ ܬܰܪܥܳܐ ܦܬܺܝܚܳܐ ܠܐܰܚܺܝܕܰܐ ܗ̱ܘ ܦܬܰܚ ܓܰܙܺܝ ܥܽܘܒܳܐ ܒܥܶܠܳܝܳܐ ܐܰܦܪܺܝ ܥܽܘܒܳܐ ܒܬܽܘܠܳܐ ܕܥܰܡܳܐ ܗܘܳܐ ܟܦܺܝܪܳܐ ܥܰܒܕܳܗܿ ܠܰܒܥܺܝܠܬܳܐ ܣܰܟܪܳܐ ܒܐܰܦܰܝ̈ ܕܟܺܝܬܳܐ

18 ܡܰܢ ܕܐܶܫܟܰܚ ܘܪܰܓܺܝ ܬܕ̈ܰܝܳܐ ܥܩܰܪ̈ܶܐ ܘܡ̈ܺܝܬܶܐ ܐܰܓܺܝܙ ܐܶܢܽܘܢ ܟܰܕ ܛܠܶܝܢ ܐܰܪܕܺܝ ܐܶܢܽܘܢ ܟܰܕ ܣܐܶܒܘ ܥܨܳܐ ܘܫܰܚܠܶܦ ܟܝܳܢܳܐ ܒܙܰܒܢܶܗ ܘܰܕܠܳܐ ܒܙܰܒܢܶܗ ܫܰܚܠܶܦ ܡܳܪܶܐ ܟܝܳܢ̈ܶܐ ܟܝܳܢܳܗܿ ܕܰܒܬܽܘܠܬܳܐ ܕܥܰܡܳܐ ܗܘܳܐ ܥܰܩܪܳܐ ܥܰܒܕܳܗܿ ܗܘܳܐ ܠܣܳܒܬܳܐ ܦܽܘܡܳܐ ܚܠܳܦ ܛܠܺܝܬܳܐ

19 ܘܐܰܝܟ ܕܫܰܪܺܝ ܒܝܰܠܕܳܐ ܪܕܳܐ ܘܫܰܠܶܡ ܒܡܰܘܬܳܐ ܝܰܠܕܶܗ ܫܩܰܠ ܣܶܓܕܬܳܐ ܡܰܘܬܶܗ ܦܪܰܥ ܚܰܘܒܬܳܐ ܐܰܝܟ ܕܐܶܬܳܐ ܠܝܰܠܕܳܐ ܘܰܡܓܽܘ̈ܫܶܐ ܣܓܶܕܘ ܠܶܗ ܬܽܘܒ ܐܶܬܳܐ ܠܚܰܫܳܐ ܘܓܰܝܳܣܳܐ ܛܦܰܣ ܒܶܗ ܒܶܝܬ ܝܰܠܕܶܗ ܠܡܰܘܬܳܐ ܡܨܰܥ ܣܳܡܶܗ ܠܥܳܠܡܳܐ ܒܝܰܠܕܳܐ ܘܡܰܘܬܳܐ ܐܰܚܝܶܗ

How to Cite this Electronic Edition

Note:

Ephrem the Syrian, “Nativity 21” based upon Edmund Beck (ed.), "Des heiligen Ephraem des Syrers Hymnen De Nativitate (Epiphania)." in Corpus Scriptorum Christianorum Orientalium (Louvain: Secrétariat du CorpusSCO, 1959)., Digital Syriac Corpus, last modified December 17, 2019, https://syriaccorpus.org/569.

TEST2

Bibliography:

“Nativity 21.” In Corpus Scriptorum Christianorum Orientalium, edited by . Syriaca.org, 2016-. Entry published . https://syriaccorpus.org/569.

Show Citation Styles

SEDRA IV

Syriac Lexeme

About This Digital Text

Corpus Text ID:

https://syriaccorpus.org/569

NHSL Work ID(s):

http://syriaca.org/work/9062
http://syriaca.org/work/9041

Source:

Edmund Beck (ed.), "Des heiligen Ephraem des Syrers Hymnen De Nativitate (Epiphania)." in Corpus Scriptorum Christianorum Orientalium (Louvain: Secrétariat du CorpusSCO, 1959).

Type of Text: Digital Edition

Status: Edited

Publication Date: December 17, 2019

Preparation of Electronic Edition:

TEI XML encoding by James E. Walters.
Syriac text transcribed by Michael Oez.

Open Access and Copyright:

This electronic edition is designed for open access reuse. The Syriac base text is in the public domain. The TEI XML edition is copyrighted by James E. Walters and is released under a Creative Commons Attribution 4.0 International Public License (CC BY 4.0).

The HTML page is copyrighted by Vanderbilt University and released under a under a Creative Commons Attribution 4.0 International Public License (CC-BY 4.0, https://creativecommons.org/licenses/by/4.0/). Attribution for reuse should follow the suggested citation and also credit the copyright holder of the TEI XML edition.

See details...