Nativity 24
1
ܐܶܬܩܰܛܰܠܘ ܗܘܰܘ ܝܰܠܽܘܕ̈ܶܐ ܡܶܛܽܠ ܝܰܠܕܳܟ ܡܰܚܶܐ ܟܽܠ
ܕܡܰܠܟܳܐ ܗܘܳܐ ܕܶܝܢ ܩܛܺܝܠܳܐ ܡܳܪܰܢ ܡܳܪܳܗܿ ܕܡܰܠܟܽܘܬܳܐ
ܗܰܘ ܛܪܽܘܢܳܐ ܟܰܕ ܡܶܨܛܰܢܰܥ ܗܡܺܝܪ̈ܶܐ ܩܛܺܝ̈ܠܶܐ ܝܰܗܒܘ ܗܘܰܘ ܠܶܗ
ܕܰܥܛܺܝܦܺܝܢ ܪ̈ܳܐܙܰܝ ܩܶܛܠܶܗ ܕܰܪ̈ܓܶܐ ܫܡܰܝܳܢ̈ܶܐ ܩܰܒܶܠܘ
ܗܡܺܝܪ̈ܶܐ ܕܩܰܪܶܒܘ ܐܰܪ̈ܥܳܢܶܐ ܒܪܺܝܟ ܡܰܠܟܳܐ ܕܐܰܘܪܶܒ ܐܶܢܽܘܢ
2
ܟܽܠܗܽܘܢ ܡܰܠܟ̈ܶܐ ܕܒܶܝܬ ܕܰܘܺܝܕ ܟܽܘܪܣܝܳܐ ܘܬܳܓܳܐ ܕܒܰܪ ܕܰܘܺܝܕ
ܝܰܒܶܠܘ ܘܐܰܫܠܶܡܘ ܠܰܚ̈ܕܳܕܶܐ ܐܰܝܟ ܢܳܛܽܘܪ̈ܶܐ ܕܓܽܘܥܠܳܢ̈ܶܐ
[ܦܣܰܩܘ ܟܽܘܡܪ̈ܶܐ ܢܒܺܝ̈ܶܐ ܘܡܰܠܟ̈ܶܐ] ܒܚܰܕ ܐܶܣܬܰܝܰܟܘ ܘܐܶܬܬܰܚܰܡܘ
ܕܐܶܬܳܐ ܡܳܪܳܐ ܕܟܽܠ ܡܶܕܶܡ ܘܰܫܩܰܠ ܡܶܢܗܽܘܢ ܟܽܠܡܶܕܶܡ
ܦܣܰܩ ܝܽܘ̈ܒܳܠܶܐ ܕܟܽܠܡܶܕܶܡ ܒܪܺܝܟ ܕܐܶܬܥܰܛܰܦ ܩܶܢܝܳܢܰܘ̈ܗܝ
3
ܢܗܰܡܝ̈ ܝܰܘ̈ܢܶܐ ܒܒܶܝܬ ܠܚܶܡ ܕܚܶܘܝܳܐ ܚܰܒܶܠ ܝܰܠܕܰܝ̈ܗܶܝܢ
ܢܶܫܪܳܐ ܠܡܶܨܪܶܝܢ ܐܰܫܩܶܠ ܗܘܳܐ ܕܢܶܚܽܘܬ ܢܶܣܰܒ ܡܽܘ̈ܠܟܳܢܶܐ
ܚܶܕܝܰܬ ܒܶܗ ܡܶܨܪܶܝܢ ܕܰܗܘܳܬ [ܡܠܽܘܐܳܐ ܠܦܽܘܪܥܳܢ ܚܰܘܒ̈ܳܬܳܗܿ
ܕܠܰܒ̈ܢܰܝ ܝܰܘܣܶܦ ܩܶܛܠܰܬ ܗܘܳܬ] ܒܒܰܪ ܝܰܘܣܶܦ ܥܶܡܠܰܬ ܦܶܪܥܰܬ
ܚ̈ܰܘܒܳܬܳܐ ܕܰܒ̈ܢܰܝ ܝܰܘܣܶܦ ܒܪܺܝܟ ܗܽܘ ܕܰܩܪܳܝܗܝ ܡܶܢ ܡܶܨܪܶܝܢ
4
ܣܳܦܪ̈ܶܐ ܩܳܪܶܝܢ ܗܘܰܘ ܟܽܠ ܝܽܘܡ ܕܟܰܘܟܒܳܐ ܕܳܢܰܚ ܡܶܢ ܝܰܥܩܽܘܒ
ܠܥܰܡܳܐ ܩܳܠܳܐ ܘܩܰܪܢܳܐ ܠܥܰܡ̈ܡܶܐ ܕܶܢܚܳܐ ܘܦܽܘܫܳܩܳܐ
ܠܗܽܘܢ ܣܶܦܪ̈ܶܐ ܘܠܰܢ ܣܽܘܥܪ̈ܳܢܶܐ ܠܗܽܘܢ ܣܰܘ̈ܟܶܐ ܘܠܰܢ ܦܺܐܪ̈ܰܝܗܶܝܢ
ܣܶܦܪ̈ܶܐ ܩܳܪܶܝܢ ܒܰܟܬܳܒ̈ܶܐ ܡܓܽܘ̈ܫܶܐ ܚܳܙܶܝܢ ܒܰܥܒ̈ܳܕܶܐ
ܙܰܠܺܝܩܳܐ ܕܗܰܘ ܩܶܪܝܳܢܳܐ ܒܪܺܝܟ ܕܐܰܘܣܶܦ ܠܰܢ ܣܶܦܪ̈ܰܝܗܽܘܢ
5
ܡܰܢܽܘ ܡܰܘܦܶܐ ܕܰܢܡܰܠܶܠ ܥܰܠ ܟܰܣ̈ܝܳܬܶܗ ܘܓܰܠܝ̈ܳܬܶܗ
ܕܟܰܘܟܰܒ ܢܽܘܗܪܳܐ ܕܐܳܙܶܠ ܗܘܳܐ ܩܕܳܡ ܛܥܺܝܢܰܝ̈ ܩܽܘܪ̈ܒܳܢܶܐ
ܐܶܬܓܠܺܝ ܘܐܰܟܪܶܙ ܬܳܓܳܐ ܐܶܬܚܰܦܺܝ ܘܛܰܫܺܝ ܦܰܓܪܳܐ
ܗܘܳܐ ܠܰܒܪܳܐ ܒܰܬܪ̈ܶܝܢ ܓܰܒܺܝ̈ܢ ܟܳܪܽܘܙܳܐ ܐܳܦ ܢܳܛܽܘܪܳܐ
ܢܛܰܪ ܦܰܓܪܶܗ ܘܐܰܟܪܶܙ ܬܳܓܶܗ ܒܪܺܝܟ ܗܽܘ ܕܚܰܟܶܡ ܟܳܪ̈ܽܘܙܰܘܗܝ
6
ܚܳܪ ܗܘܳܐ ܛܪܽܘܢܳܐ ܒܰܡܓܽܘ̈ܫܶܐ ܕܫܰܐܶܠܘ ܕܐܰܝܟܰܘ ܒܰܪ ܡܰܠܟܳܐ
ܟܰܕ ܠܶܒܶܗ ܕܰܟܡܺܝܪܳܐ ܗܘܳܐ ܫܰܐܶܠ ܠܶܗ ܕܰܦܨܺܝܚܳܐ
ܥܰܡ ܥܶܪ̈ܒܶܐ ܕܺܐܒ̈ܶܐ ܫܰܕܰܪ ܕܢܶܩܛܽܘܠ ܠܐܶܡܪܶܗ ܕܐܰܠܳܗܳܐ
ܐܶܡܪܳܐ ܠܡܶܨܪܶܝܢ ܐܳܙܶܠ ܗܘܳܐ ܕܰܢܕܽܘܢ ܐܶܢܽܘܢ ܡܶܢ ܬܰܡܳܢ
ܕܰܦܪܰܩ ܐܶܢܽܘܢ ܡܶܢ ܬܰܡܳܢ ܒܪܺܝܟ ܕܰܗܦܰܟ ܫܰܥܒܶܕ ܐܶܢܽܘܢ
7
ܡܓܽܘܫ̈ܶܐ ܒܰܕܶܩܘ ܠܰܛܪܽܘܢܳܐ ܕܡܳܐ ܕܰܚܠܰܛܘ ܥܰܡܰܢ ܥܒܳܕܰܝ̈ܟ
ܟܰܘܟܰܒ ܢܽܘܗܪܳܐ ܡܶܬܛܰܫܶܐ ܐܳܦ ܫܒܺܝ̈ܠܶܐ ܡܶܬܚܰܦܶܝܢ
ܠܳܐ ܝܺܕܰܥܘ ܗܘܰܘ ܛܽܘܒܳܢ̈ܶܐ ܕܣܳܪ̈ܽܘܚܶܐ ܐܰܝܟ ܣܳܓܽܘܕ̈ܶܐ
ܫܰܕܰܪ ܡܰܠܟܳܐ ܡܰܪܺܝܪܳܐ ܕܰܢܚܰܒܶܠ ܦܺܐܪܳܐ ܚܰܠܝܳܐ
ܕܐܰܟܠܽܘܗܝ ܡܰܪܺܝܪ̈ܶܐ ܘܚܰܠܺܝܘ ܠܳܟ ܬܶܫܒܽܘܚܬܳܐ ܣܰܡ ܚ̈ܰܝܶܐ
8
ܟܰܕ ܕܶܝܢ ܩܰܒܶܠܘ ܦܽܘܩܕܳܢܳܐ ܡܓܽܘ̈ܫܶܐ ܕܢܺܐܙܠܽܘܢ ܢܶܒܥܽܘܢܶܗ
ܟܬܺܝܒ ܥܠܰܝܗܽܘܢ ܕܰܚܙܰܐܽܘܗܝ ܠܗܰܘ ܟܰܘܟܰܒ ܢܽܘܗܪܳܐ ܘܰܚܕܺܝܘ
ܝܺܕܺܝܥܳܐ ܕܡܶܛܫܳܐ ܛܫܳܐ ܗܘܳܐ ܒܰܕܓܽܘܢ ܚܕܺܝܘ ܒܰܚܙܳܬܶܗ
ܐܶܣܬܰܚܰܦܝ ܟܽܠܳܐ ܣܳܪ̈ܽܘܚܶܐ ܐܶܬܬܪܺܝܡ ܘܰܩܪܳܐ ܣܳܓܽܘܕ̈ܶܐ
ܣܚܰܦ ܓܰܒܳܐ ܘܰܩܪܳܐ ܠܓܰܒܳܐ ܒܪܺܝܟ ܕܰܢܨܰܚ ܒܰܬܪ̈ܶܝܢ ܓܰܒܺܝ̈ܢ
9
ܛܰܡܳܐ ܕܩܳܛܶܠ ܠܰܛܠܳܝ̈ܶܐ ܐܰܝܟܰܢ ܐܰܗܡܺܝ ܡܶܢ ܛܰܠܝܳܐ
ܟܺܐܢܽܘܬܳܐ ܟܠܳܬܶܗ ܕܣܰܒܰܪ ܕܰܡܓܽܘ̈ܫܶܐ ܦܳܢܶܝܢ ܨܶܐܕܰܘܗܝ
ܟܰܕ ܡܰܘܪܶܟ ܫܪܳܐ ܕܰܢܨܽܘܕ ܠܰܣܓܺܝܕܳܐ ܘܰܠܣܳܓܽܘܕܰܘ̈ܗܝ
ܦܠܰܛܘ ܐܺܝ̈ܕܰܘܗܝ ܡܶܢ ܟܽܠܡܶܕܶܡ ܦܪܰܚܘ ܩܽܘܪ̈ܒܳܢܶܐ ܘܣܳܓܽܘܕ̈ܶܐ
ܡܶܢ ܛܪܽܘܢܳܐ ܨܶܝܕ ܒܰܪ ܡܰܠܟܳܐ ܫܽܘܒܚܳܐ ܠܝܳܕܰܥ ܟܽܠ ܦܽܘܪ̈ܣܺܝܢ
10
ܫܦܰܝ̈ܳܐ ܡܓܽܘ̈ܫܶܐ ܟܰܕ ܕܡܟܺܝܢ ܥܰܠ ܡܰܫܟܒܽܗܘܢ ܐܶܬܚܰܫܰܒܘ
ܕܰܗܘܳܬ ܫܶܢܬܳܐ ܡܰܚܙܺܝܬܳܐ ܘܰܕܢܰܚ ܚܶܠܡܳܐ ܐܰܝܟ ܢܽܘܗܪܳܐ
ܠܩܳܛܽܘܠܳܐ ܚܙܰܘ ܘܐܶܣܬܰܪܰܕܘ ܕܢܟܠܶܗ ܘܣܰܝܦܳܐ ܠܛܺܝܫܳܐ ܠܳܛܶܫ ܗܘܳܐ
ܥܺܝܪܳܐ ܠܕܰܡ̈ܟܶܐ ܡܰܠܶܦ ܗܘܳܐ ܒܪܺܝܟ ܗܽܘ ܕܰܥܪܺܝܡ ܠܰܦܫ̈ܺܝܛܶܐ
11
ܦܫ̈ܺܝܛܶܐ ܕܗܰܝܡܶܢܘ ܐܶܫܬܰܘܕܰܥܘ ܬܰܪ̈ܬܶܝܢ ܡܶܐܬܺܝ̈ܢ ܕܰܡܫܺܝܚܳܐ
ܣܳܦܪ̈ܶܐ ܕܶܝܢ ܣ̈ܰܟܠܶܐ ܕܐܳܦܠܳܐ ܒܰܚܕܳܐ ܡܶܐܬܺܝܬܳܐ ܐܰܪܓܶܫܘ
ܥܰܡ̈ܡܶܐ ܕܶܝܢ ܚܝܰܘ ܒܰܚܕܳܐ ܘܬܰܡܳܢ ܡܶܬܢܰܚܡܺܝܢ ܒܐܚܪܺܝܬܳܐ
ܥܰܡܳܐ ܕܰܥܘܺܝܪ ܣܽܘܟܳܠܶܗ ܚܕܳܐ ܡܶܐܬܺܝܬܳܐ ܒܰܕܰܪܬܶܗ
ܕܬܰܪ̈ܬܶܝܢ ܥܳܛܝܳܐ ܕܽܘܟܪܳܢܶܗ ܒܪܺܝܟ ܡܰܠܟܳܐ ܕܐܶܬܳܐ ܘܐܳܬܶܐ
12
ܕܢܰܚ ܦܳܪܽܘܩܳܐ ܠܰܥܘܺܝܪ̈ܶܐ ܘܗܶܢܽܘܢ ܚܳܝܪܺܝܢ ܠܐܚܪ̈ܳܢܶܐ
ܫܶܡܫܳܐ ܚܰܘܺܝ ܙܰܠܺܝܩܰܘ̈ܗܝ ܘܗܶܢܽܘܢ ܥܛܺܝܦܺܝܢ ܚܶܫܽܘܟܳܐ
ܙܰܗܪܺܝܪܳܐ ܫܰܕܰܪ ܢܽܘܗܪܳܐ ܘܐܰܝܬܺܝ ܠܰܒ̈ܢܰܝ ܢܰܗܺܝܪܳܐ
ܕܢܶܓܠܽܘܢ ܠܰܒ̈ܢܰܝ ܚܶܫܽܘܟܳܐ ܕܗܳܐ ܒܰܝܢܳܬܟܽܘܢ ܢܰܗܺܝܪܳܐ
ܘܥܰܠ ܥܰܝܢܰܝ̈ܟܽܘܢ ܬܰܚܦܺܝܬܳܐ ܠܳܟ ܫܽܘܒܚܳܐ ܫܶܡܫܳܐ ܚܰܕܬܳܐ
13
ܢܒܺܝ̈ܶܐ ܒܰܕܶܩܘ ܥܰܠ ܝܰܠܕܶܗ ܠܳܐ ܕܶܝܢ ܦܰܪܶܫܘ ܥܰܠ ܙܰܒܢܶܗ
ܫܰܕܰܪ ܐܶܢܽܘܢ ܠܰܡ̈ܓܽܘܫܶܐ ܘܐܶܬܰܘ ܘܚܰܘܺܝܘ ܥܰܠ ܙܰܒܢܶܗ
ܡܓ̈ܽܘܫܶܐ ܕܶܝܢ ܕܐܰܘܕܰܥܘ ܙܰܒܢܳܐ ܠܳܐ ܦܰܪܶܫܘ ܕܐܰܝܢܳܐ ܛܰܠܝܳܐ
ܟܰܘܟܰܒ ܢܽܘܗܪܳܐ ܢܰܨܺܝܚܳܐ ܒܪܺܝܟ ܕܰܒܟܽܠܗܽܘܢ ܐܶܬܬܰܪܓܰܡ
14
ܛܠܶܡܘ ܫܺܝܦܽܘܪܶܗ ܕܐܶܫܰܥܝܳܐ ܕܥܰܠ ܒܰܛܢܳܐ ܕܰܟܝܳܐ ܝܰܒܶܒ
ܫܰܠܺܝܘ ܟܶܢܳܪ ܡܰܙܡܽܘܪ̈ܶܐ ܕܥܰܠ ܟܽܘܡܪܽܘܬܶܗ ܙܳܡܰܪ ܗܘܳܐ
ܩܺܝܬܳܪܳܐ ܕܪܽܘܚܳܐ ܫܰܬܶܩܘ ܕܥܰܠ ܡܰܠܟܽܘܬܶܗ ܙܶܡܪܰܬ ܬܽܘܒ
ܬܚܶܝܬ ܫܶܬܩܳܐ ܪܰܒܳܐ ܚܰܒܫܽܘܗܝ ܠܡܰܘܠܳܕܳܐ ܪܰܒܳܐ ܕܐܰܩܥܺܝ
ܥ̈ܶܠܳܝܶܐ ܥܰܡ ܬܰܚ̈ܬܳܝܶܐ ܒܪܺܝܟ ܕܰܕܢܰܚ ܡܶܢ ܓܰܘ ܫܶܠܝܳܐ
15
ܗܘܳܐ ܩܳܠܶܗ ܩܠܺܝܕܳܐ ܟܰܣܝܳܐ ܘܰܦܬܰܚ ܦܽܘܡܳܐ ܕܰܡ̈ܓܽܘܫܶܐ
ܕܰܫܠܺܝܘ ܒܺܝܗܽܘܕ ܟܳܪ̈ܽܘܙܶܐ ܝܰܒܶܒܘ ܩܳܠܳܐ ܒܰܒܪܺܝܬܳܐ
ܘܰܣܒܰܪܬܳܐ ܕܰܛܠܰܡܘ ܗܳܢܽܘܢ ܛܰܥܢܽܘܗܿ ܘܐܶܬܰܘ ܪ̈ܰܚܺܝܩܶܐ
ܫܰܪܺܝܘ ܫܳܡܥܺܝܢ ܛܳܠܽܘܡ̈ܶܐ ܩܳܠܰܝ̈ܗܽܘܢ ܡܶܢ ܢܽܘܟܪ̈ܳܝܶܐ
ܟܰܕ ܩܳܥܶܝܢ ܥܰܠ ܒܰܪ ܕܰܘܺܝܕ ܒܪܺܝܟ ܕܰܒܩܳܠܰܢ ܫܠܺܝ ܐܶܢܽܘܢ
16
ܕܰܛܠܰܡ ܥܰܡܳܐ ܩܽܘܪ̈ܒܳܢܶܐ ܘܠܳܐ ܩܰܪܶܒܘ ܠܶܗ ܠܒܰܪ ܡܰܠܟܳܐ
ܢܦܰܩ ܐܺܝܙܓܰܕܶܗ ܨܶܝܕ ܥܰܡ̈ܡܶܐ ܘܐܰܝܬܺܝ ܐܶܢܽܘܢ ܒܩܽܘܪܒܳܢܗܽܘܢ
ܠܳܐ ܗܘܳܐ ܕܶܝܢ ܠܟܽܠܗܽܘܢ ܐܰܝܬܺܝ ܕܠܳܐ ܡܨܶܐ ܗܘܳܐ ܕܰܠܗܽܘܢ ܢܣܰܦܶܩ
ܥܽܘܒܳܐ ܙܥܽܘܪܳܐ ܕܒܶܝܬ ܠܚܶܡ ܕܥܽܘܒܰܐ ܗ̱ܘ ܕܥܺܕܰܬ ܩܽܘܕܫܳܐ
ܐܬܪܽܘܚ ܘܐܶܚܰܕ ܝܰܠܕܶܝ̈ܗܿ ܒܪܺܝܟ ܕܐܰܦܪܺܝ ܠܰܡܓܰܙܰܝܬܳܐ
17
ܚܨܰܕܘ ܩ̈ܳܛܽܘܠܶܐ ܒܶܝܬ ܠܚܶܡ ܗ̈ܰܒܳܒܶܐ ܪ̈ܓܰܝܳܐ ܕܰܒܗܽܘܢ
ܢܺܐܒܰܕ ܗܘܳܐ ܙܰܪܥܳܐ ܪܰܓܝܳܐ ܕܰܟܣܶܐ ܒܶܗ ܠܰܚܡܳܐ ܚܰܝܳܐ
ܥܶܪܩܰܬ ܗܘܳܬ ܫܒܶܠ ܚ̈ܰܝܶܐ ܕܬܺܐܬܶܐ ܠܟܰܦܳܐ ܒܰܚܨܳܕܳܐ
ܣܓܽܘܠܳܐ ܕܰܥܪܰܩ ܟܰܕ ܝܰܠܽܘܕ ܝܰܗܒ ܗܘܳܐ ܢܰܦܫܶܗ ܒܥܨܪܐ
ܕܳܢܚܳܐ ܒܚܰܡܪܶܗ ܢܰܦܫ̈ܳܬܳܐ ܫܽܘܒܚܳܐ ܠܳܟ ܣܺܝܡܰܬ ܚ̈ܰܝܶܐ
18
ܥܰܠܘ ܣܳܪ̈ܽܘܚܶܐ ܠܦܰܪܕܰܝܣܳܐ ܕܰܡܠܶܐ ܦܺܐܪ̈ܶܐ ܝ̈ܰܠܽܘܕܶܐ
ܐܰܬܰܪܘ ܦܰܩ̈ܚܶܐ ܡܶܢ ܣܰܘ̈ܟܶܐ ܣܡܰܕܪ̈ܶܐ ܘܦܶܪܥܳܐ ܚܰܒܶܠܘ ܗܘܰܘ
ܩܽܘܪ̈ܒܳܢܶܐ ܫ̈ܦܰܝܳܐ ܩܰܪܶܒ ܕܠܺܘܚܳܐ ܟܰܕ ܠܳܐ ܝܳܕܰܥ
ܠܶܗ ܘܳܝܳܐ ܘܰܠܗܽܘܢ ܛܽܘܒܳܐ ܒܰܟܪܰܬ ܝܶܗܒܰܬ ܒܶܝܬ ܠܚܶܡ
ܦܺܐܪ̈ܶܐ ܒ̈ܬܽܘܠܶܐ ܠܩܰܕܺܝܫܳܐ ܒܪܺܝܟ ܗܽܘ ܕܩܰܒܶܠ ܠܫܰܪ̈ܘܳܝܶܐ
19
ܕܰܫܬܶܩܘ ܣܳܦܪ̈ܶܐ ܒܰܚܣܳܡܳܐ ܘܰܦܪ̈ܺܝܫܳܝܶܐ ܒܰܛܢܳܢܳܐ
ܩܥܰܘ ܘܫܰܒܰܚܘ ܐܢ̈ܳܫܳܐ ܕܟܺܐܦܳܐ ܕܰܩܢܶܝܢ ܗܘܰܘ ܠܶܒܳܐ ܕܟܺܐܦܳܐ
ܩܰܠܶܣܘ ܗܘܰܘ ܩܽܘܕܡܰܬ ܟܺܐܦܳܐ ܡܰܣܠܰܝܬܳܐ ܕܰܗܘܳܬ ܪܺܝܫܳܐ
ܐܶܬܪ̈ܰܓܺܝ ܟܺܐܦ̈ܶܐ ܒܟܺܐܦܳܐ ܘܰܩ̈ܢܰܝ ܦܽܘܡ̈ܶܐ ܡ̈ܰܠܳܠܶܐ
ܩܥܰܝ̈ ܟܺܐܦ̈ܶܐ ܒܐܺܝܕܳܐ ܕܟܺܐܦܳܐ ܒܪܺܝܟ ܝܰܠܕܳܟ ܕܐܰܩܥܺܝ ܠܟܺܐܦ̈ܶܐ
20
ܟܰܘܟܒܳܐ ܕܰܟܬܺܝܒ ܒܰܟܬܳܒܳܐ ܚܙܰܐܽܘܗܝ ܥܰܡ̈ܡܶܐ ܪ̈ܰܚܺܝܩܶܐ
ܕܢܶܒܗܰܬ ܥܰܡܳܐ ܩܰܪܺܝܒܳܐ ܐܳܘ ܠܥܰܡܳܐ ܕܡܰܠܶܦ ܘܰܚܬܺܝܪ
ܕܡܶܢ ܥܰܡܳܐ ܗܦܰܟ ܝܺܠܶܦ ܗܘܳܐ ܕܐܰܝܟܰܢܳܐ ܘܐܰܝܟܳܐ ܚܙܰܐܽܘܗܝ
ܠܗܰܘ ܕܶܢܚܳܐ ܕܐܶܡܰܪ ܒܶܠܥܰܡ ܢܽܘܟܪܳܝܰܐ ܗ̱ܘ ܕܰܥܠܰܘܗܝ ܒܰܕܶܩ
ܢܽܘܟܪ̈ܳܝܶܐ ܐܶܢܽܘܢ ܕܰܚܙܰܐܽܘܗܝ ܒܪܺܝܟ ܗܽܘ ܕܐܰܛܶܢ ܒܰܝ̈ܬܳܝܶܐ
21
ܬܶܩܪܽܘܒ ܒܳܥܽܘܬܝ ܨܶܝܕ ܬܰܪܥܳܟ ܐܳܦ ܣܢܺܝܩܽܘܬܝ ܨܶܝܕ ܓܰܙܳܟ
ܗܰܒܠܺܝ ܡܳܪܝ ܕܰܕܠܳܐ ܚܽܘܫܒܳܢ ܐܰܝܟ ܐܰܠܳܗܳܐ ܠܒܰܪܢܳܫܳܐ
ܕܐܶܢ ܐܰܣܓܺܝܬ ܐܰܝܟ ܒܰܪ ܛܳܒܳܐ ܘܐܶܢ ܬܰܘܣܶܦ ܐܰܝܟ ܒܰܪ ܡܰܠܟܳܐ
ܐܶܢ ܛܳܠܶܡܬ ܐܰܝܟ ܥܰܦܪܳܢܳܐ ܐܰܝܟ ܐܳܕܳܡ ܝܰܠܕܶܗ ܕܐܳܕܳܡ
ܘܐܰܝܟ ܛܳܒܳܐ ܐܳܦ ܒܰܪ ܛܳܒܳܐ ܫܽܘܒܚܳܐ ܠܳܟ ܕܳܡܶܐ ܠܐܰܒܽܘܗܝ
22
ܠܳܐ ܪܳܓܶܫ ܥܰܡܳܐ ܕܐܰܚܺܝܕ ܟܬܳܒ̈ܶܐ ܕܩܳܪܶܝܢ ܚܰܘܒ̈ܳܬܶܗ
ܥܰܠ ܡܰܦܰܩܬܶܗ ܗܽܘ ܩܳܥܶܝܢ ܘܥܰܠ ܡܰܥܠܬܰܢ ܡܶܫܬܰܥܶܝܢ
ܗܳܐ ܩܳܪܶܐ ܣܰܟܠܳܐ [ܒـ]ـܣܶܦܪ̈ܰܘܗܝ ܡܽܘ̈ܠܟܳܢܶܐ ܕܐܶܬܦܰܠܰܓܘ ܠܰܢ
ܟܰܕ ܡܶܫܬܰܒܗܰܪ ܒܰܟ̈ܬܳܒܰܘܗܝ ܩܽܘܛܪܳܓܶܗ ܗܽܘ ܩܳܪܶܐ ܠܰܢ
ܘܥܰܠ ܝܽܘܪܬܳܢܰܢ ܣܳܗܶܕ ܠܰܢ ܒܪܺܝܟ ܕܐܰܿܠܝ ܐܶܢܽܘܢ ܠܰܢܝܳܚܰܢ
23
ܙܰܘܓܳܐ ܕܟܳܪ̈ܽܘܙܶܐ ܐܰܣܪܰ[ܚܘ] ܛܰܥܡ̈ܳܬܶܗ ܕܝܺܚܝܺܕܳܝܳܐ
ܟܰܘܟܰܒ ܢܽܘܗܪܳܐ ܘܝܽܘܚܰܢܳܢ ܚܰܕ ܕܶܢܚܳܐ ܘܰܐܚܪܺܝܢ ܩܳܠܳܐ
ܐܳܦ ܗܽܘ ܓܶܝܪ ܡܶܬܟܰܪܙܳܢܳܐ ܡܶܠܬܳܐ ܗܘܳܐ ܐܳܦ ܢܰܗܺܝܪܳܐ
ܫܶܡܫܶܗ [ܩܳܠܳܐ] ܘܙܰܠܺܝܩܳܐ ܐܰܟܪܶܙ ܕܶܢܚܳܐ ܥܰܠ ܢܽܘܗܪܶܗ
ܐܳܦ ܩܳܠܳܐ ܥܰܠ ܚܶܟ̈ܡܳܬܶܗ ܒܪܺܝܟ [ܒܽܘܟܪܳܐ] ܡܶܢ ܟܳܪ̈ܽܘܙܰܘܗܝ
Corpus Text ID:
Source:
Edmund Beck (ed.), "Des heiligen Ephraem des Syrers Hymnen De Nativitate (Epiphania)." in Corpus Scriptorum Christianorum Orientalium (Louvain: Secrétariat du CorpusSCO, 1959).Publication Date: December 17, 2019
Preparation of Electronic Edition:
TEI XML encoding by James E. Walters.Syriac text transcribed by Michael Oez.
Open Access and Copyright:
This electronic edition is designed for open access reuse. The Syriac
base text is in the public domain. The TEI XML edition is copyrighted by
James E. Walters and is released under a Creative Commons Attribution
4.0 International Public License (CC BY 4.0).
The HTML page is copyrighted by Vanderbilt University and released
under a under a Creative Commons Attribution 4.0 International Public
License (CC-BY 4.0, https://creativecommons.org/licenses/by/4.0/).
Attribution for reuse should follow the suggested citation and also
credit the copyright holder of the TEI XML edition.
See details...
How to Cite this Electronic Edition
Note:
Ephrem the Syrian, “Nativity 24” based upon Edmund Beck (ed.), "Des heiligen Ephraem des Syrers Hymnen De Nativitate (Epiphania)." in Corpus Scriptorum Christianorum Orientalium (Louvain: Secrétariat du CorpusSCO, 1959), Digital Syriac Corpus, last modified December 17, 2019, https://syriaccorpus.org/572.Bibliography:
“Nativity 24.” In Corpus Scriptorum Christianorum Orientalium, edited by . Syriaca.org, 2016-. Entry published . https://syriaccorpus.org/572.Show Citation Styles