Nativity 25

https://syriaccorpus.org/573

ܫܽܘܚܠܳܦ ܩܳܠܳܐ ܥܰܠ ܩܳܠܳܐ ܛܽܘܒܰܝܟܝ ܐܳܦܪܰܬ ܥܽܘܢܝܳܐ : ܫܽܘܒܚܳܐ ܠܫܳܠܽܘܚܶܗ ܫܽܘܒܚܳܐ ܠܫܳܠܽܘܚܶܗ

1 ܛܽܘܒܰܝܟܝ ܥܺܕܬܳܐ ܕܗܳܐ ܪܳܥܶܡ ܒܶܟܝ ܥܺܐܕܳܐ ܪܰܒܳܐ ܥܰܕܥܺܕ ܡܰܠܟܳܐ ܨܶܗܝܽܘܢ ܫܒܺܝܩܬܳܐ ܨܗܶܝܢ ܐܶܢܽܘܢ ܣܰܓܺܝ ܘܨܳܕܶܝܢ ܬܰܪ̈ܥܶܝܗܿ ܡܶܢ ܥܰܕܺܥܕ̈ܶܐ ܛܽܘܒ ܠܬܰܪ̈ܥܰܝܟܝ ܕܐܶܬܦܬܰܚܘ ܘܠܳܐ ܡܠܰܘ ܘܰܠܕܳܪ̈ܳܬܶܟܝ ܕܐܶܬܦܫܶܛܝ̈ ܘܠܳܐ ܣ̈ܦܰܩܝ ܒܓܰܘܶܟܝ ܪܳܥܡܺܝܢ ܥܰܡ̈ܡܶܐ ܕܗܳܐ ܩܥܰܘ ܘܫܰܬܩܽܘܗܝ ܠܗܰܘ ܥܰܡܳܐ

2 ܛܽܘܒܰܝܟܝ ܥܺܕܬܳܐ ܕܰܒܥܰܕܥܺܕܰܝ̈ܟܝ ܥܺܝܪ̈ܶܐ ܚܳܕܶܝܢ ܒܰܝܢܳܬ ܥܺܐܕ̈ܰܝܟܝ ܚܰܕ ܓܶܝܪ ܠܺܠܝܳܐ ܫܰܒܰܚܘ ܥܺܝܪ̈ܶܐ ܒܐܰܪܥܳܐ ܕܟܳܡܰܬ ܫܽܘܒܚܳܐ ܛܶܠܡܰܬ ܛܽܘܒ ܠܩ̈ܳܠܰܝܟܝ ܕܐܶܙܕܪܰܥܘ ܘܐܶܬܚܨܶܕܘ ܘܒܰܫܡܰܝܳܐ ܐܶܬܚܡܶܠܘ ܒܐܰܘܨܪ̈ܶܐ ܦܽܘܡܶܟܝ ܦܺܝܪܡܳܐ ܘܩܳܠܰܝ̈ܟܝ ܐܰܝܟ ܒܶܣ̈ܡܶܐ ܥܳܛܪܺܝܢ ܒܥܰܕ̈ܥܺܕܰܝܟܝ

3 ܛܽܘܒܰܝܟܝ ܥܺܕܬܳܐ ܕܟܽܠ ܩܽܘܪ̈ܒܳܢܺܝܢ ܠܶܟܝ ܗܽܘ ܐܳܬܶܝܢ ܒܗܳܢܳܐ ܥܺܐܕܳܐ ܡܓܽܘ̈ܫܶܐ ܚܰܕ ܙܒܰܢ ܒܶܝܬ ܢܳܟ̈ܽܘܠܶܐ ܠܩܽܘܫܬܳܐ ܩܰܪܶܒܘ ܩܽܘܪ̈ܒܳܢܰܝܗܽܘܢ ܛܽܘܒ ܠܕܰܝܪܶܟܝ ܕܐܶܬܪܟܶܢ ܘܒܳܗܿ ܫܪܳܐ ܒܰܪ ܡܰܠܟܳܐ ܕܐܶܣܬܓܶܕ ܒܕ̈ܳܫܢܶܐ ܕܰܗܒܳܐ ܕܡܰܥܪܒܳܐ ܘܗܶܪ̈ܽܘܡܶܐ ܕܡܰܕܢܚܳܐ ܡܩܰܪܒܺܝܢ ܠܥܰܕ̈ܥܺܕܰܝܟܝ

4 ܛܽܘܒܰܝܟܝ ܥܺܕܬܳܐ ܕܠܰܝܬܰܘܗܝ ܨܶܐܕܰܝܟܝ ܡܰܠܟܳܐ ܛܪܽܘܢܳܐ ܡܢܰܟܶܣ ܥܽܘ̈ܠܶܐ ܩܛܰܠ ܓܶܝܪ ܒܶܝܬ ܠܚܶܡ ܫܰܒܪ̈ܶܐ ܒܫܶܓܡܳܐ ܕܰܢܡܺܝܬ ܠܝܰܠܕܳܐ ܕܰܠܟܽܠ ܡܰܚܶܐ ܛܽܘܒ ܠܝܰܠܕܰܝ̈ܟܝ ܕܐܶܬܚܣܶܡܘ ܘܐܶܣܬܓܶܕܘ ܡܶܢ ܡ̈ܰܠܟܶܐ ܕܐܶܬܡܠܰܟ ܒܣܶܓܕܬܶܟܝ ܬܳܓܳܐ ܕܡܰܕܢܚܳܐ ܕܕܳܫ ܐܶܢܽܘܢ ܠܪ̈ܰܚܡܰܝܟܝ ܢܶܬܬܕܺܝܫ ܒܚܰܒܺܝܒܰܝ̈ܟܝ

5 ܛܽܘܒܰܝܟܝ ܥܺܕܬܳܐ ܕܗܳܐ ܕܳܐܶܨ ܒܶܟܝ ܐܳܦ ܐܶܫܰܥܝܳܐ ܒܰܢܒܺܝܽܘܬܶܗ ܗܳܐ ܠܰܡ ܒܬܽܘܠܬܳܐ ܬܶܒܛܰܢ ܬܺܐܠܰܕ ܝܰܠܕܳܐ ܕܰܫܡܶܗ ܪܳܐܙܳܐ ܪܰܒܳܐ ܐܳܘ ܠܦܽܘܫܳܩܳܐ ܕܐܶܬܓܠܺܝ ܒܥܺܕܬܳܐ ܬܪ̈ܶܝܢ ܫܡ̈ܳܗܺܝܢ ܕܐܶܬܡܙܰܓܘ ܘܚܰܕ ܗܘܰܘ ܥܰܡܰܢܽܘܐܶܝܠ ܐܺܝܠ ܥܰܡܶܟܝ ܒܟܽܠܙܒܰܢ ܕܡܰܙܓܶܟܝ ܒܗܰܕܳܡܰܘ̈ܗܝ

6 ܛܽܘܒܰܝܟܝ ܥܺܕܬܳܐ ܒܡܺܝܟܳܐ ܕܰܩܥܳܐ ܕܪܳܥܝܳܐ ܢܳܦܶܩ ܡܶܢ ܐܳܦܰܪܬܳܐ ܐܶܬܳܐ ܓܶܝܪ ܠܒܶܝܬ ܠܚܶܡ ܕܢܶܣܰܒ ܡܶܢܳܗܿ ܓܽܘܙܥܶܗ ܕܐܺܝܫܰܝ ܘܢܶܪܥܶܐ ܠܥ̈ܰܡܡܶܐ ܛܽܘܒ ܠܥܶܪ̈ܒܰܝܟܝ ܕܐܶܬܪܫܶܡܘ ܒܪܽܘܫܡܶܗ ܘܠܰܢܩܰܘ̈ܳܬܶܟܝ ܕܐܶܬܢܛܰܪ̈ܝ ܒܡܶܠܬܶܗ ܐܰܢܬܝ ܐܰܢܬܝ ܥܺܕܬܳܐ ܒܶܝܬ ܠܚܶܡ ܐܰܡܺܝܢܬܳܐ ܕܒܶܟܝ ܗܽܘ ܠܚܶܡ ܚ̈ܰܝܶܐ

7 ܛܽܘܒܰܝܟܝ ܥܺܕܬܳܐ ܕܗܳܐ ܚܳܕܶܐ ܒܶܟܝ ܐܳܦ ܕܳܢܺܝܐܶܝܠ ܓܰܒܪܳܐ ܕܪܶܓܬܳܐ ܒܰܕܶܩ ܕܡܶܬܩܛܶܠ ܡܫܺܝܚܳܐ ܫܒܺܝܚܳܐ ܘܩܽܘܪܝܰܬ ܩܽܘܕܫܳܐ ܒܩܶܛܠܶܗ ܬܶܚܪܰܒ ܘܳܝ ܠܥܰܡܳܐ ܕܐܶܫܬܕܺܝ ܘܠܳܐ ܦܢܳܐ ܛܽܘܒ ܠܥܰܡ̈ܡܶܐ ܕܐܶܬܩܪܺܝܘ ܘܠܳܐ ܗܦܰܟܘ ܙܡܺܝ̈ܢܶܐ ܐܶܫܬܐܶܠܘ ܘܰܐܚܪ̈ܳܢܶܐ ܚܠܳܦܰܝܗܽܘܢ ܒܳܣܡܺܝܢ ܚܠܽܘܠܰܝ̈ܗܽܘܢ

8 ܛܽܘܒܰܝܟܝ ܥܺܕܬܳܐ ܕܰܒܟܶܢܳܪܶܗ ܗܳܐ ܙܳܡܰܪ ܒܶܟܝ ܕܰܘܺܝܕ ܡܰܠܟܳܐ ܒܪܽܘܚܳܐ ܙܡܰܪ ܥܠܰܘܗܝ ܕܒܶܪܝ ܐܰܢܬ ܘܐܶܢܳܐ ܒܗܶܕܪ̈ܰܝ ܩܽܘܕܫܳܐ ܝܠܕܬܟ ܝܘܡܢ ܛܽܘܒ ܠܐܶܕܢܰܝ̈ܟܝ ܕܐܶܬܡܪ̈ܰܩܝ ܕܢܶܫ̈ܡܥܳܢ ܠܝܰܘܡܶܗ ܐܰܝܟ ܦܰܓܪܶܗ ܐܶܬܬܥܺܝܪܝ ܘܰܩܪܳܝܗܝ ܒܨܶܗܝܽܘܢ ܐܶܬܪܕܺܝ ܥܰܕܥܺܕܳܐ ܕܐܶܬܟܰܡܪܰܬ ܐܰܦܨܰܚܺܝܘܗܝ ܕܐܰܦܨܰܚ ܠܶܟܝ

9 ܛܽܘܒܰܝܟܝ ܥܺܕܬܳܐ ܕܟܽܠ ܥܰܕ̈ܥܺܕܺܝܢ ܦܪܰܚܘ ܡܶܢ ܨܶܗܝܽܘܢ ܘܰܫܟܶܢܘ ܨܶܐܕܰܝܟܝ ܒܓܰܘܶܟܝ ܐܶܬܬܢܺܝܚܘ ܢܒܺܝ̈ܶܐ ܠܐܰܝ̈ܳܐ ܡܶܢ ܗܰܘ ܥܰܡܠܳܐ ܘܨܰܥܪܳܐ ܕܒܺܝܗܽܘܕ ܛܽܘܒ ܠܣܶܦܪ̈ܶܝܗܿ ܕܐܶܬܦܪܶܣܘ ܒܗܰܝ̈ܟܠܰܝܟܝ ܘܰܠܥܰܕܥܺܕ̈ܶܝܗܿ ܕܐܶܬܦܣܰܚܘ ܒܢܰܘܣܰܝ̈ܟܝ ܨܶܗܝܽܘܢ ܨܳܕܝܳܐ ܘܗܳܐ ܝܰܘܡܳܢ ܥܳܠܡ̈ܶܐ ܪܳܥܡܺܝܢ ܒܥܰܕ̈ܥܕܰܝܟܝ

10 ܛܽܘܒܰܝܟܝ ܥܺܕܬܳܐ ܒܥܶܣܪܳܐ ܛܽܘ̈ܒܺܝܢ ܕܝܰܗܒ ܗܘܳܐ ܡܳܪܰܢ ܪܳܐܙܳܐ ܫܰܠܡܳܐ ܒܥܶܣܪܰܐ ܗ̱ܘ ܓܶܝܪ ܬܠܶܝܢ ܟܽܠ ܡܶܢܝ̈ܳܢܺܝܢ ܒܰܕܓܽܘܢ ܓܰܡܪܽܘܟܝ ܥܶܣܪܳܐ ܛܽܘܒܺܝ̈ܢ ܛܽܘܒ ܠܰܟ̈ܠܺܝܠܰܝܟܝ ܕܐܶܬܓܕܰܠܘ ܒܟܽܠܗܽܘܢ ܛܽܘ̈ܒܶܐ ܩܰܕܺܝ̈ܫܶܐ ܕܐܶܬܦܬܰܟܘ ܒܟܽܠ ܟܠܺܝܠ ܛܽܘܒܳܢܺܝܬܳܐ ܕܰܒܟܽܠ ܛܽܘܒ ܡܟܰܠܠܳܐ ܐܳܦ ܥܰܠܺܝ ܫܕܺܝ ܛܽܘܒܳܐ

11 ܛܽܘܒܰܝܟܝ ܐܳܦܪܰܬ ܐܶܡܳܐ ܕܡܰܠܟ̈ܶܐ ܕܰܕܢܰܚ ܡܶܢܟܶܝ ܡܳܪ̈ܶܐ ܬܳܓ̈ܶܐ ܡܺܝܟܰܐ ܗ̱ܘ ܣܰܒܪܶܟܝ ܕܡܶܢ ܥܳܠܰܡ ܗܽܘ ܘܡܶܬܚܳܐ ܕܙܰܒ̈ܢܰܘܗܝ ܠܳܐ ܡܶܬܕܰܪܟܺܝܢ ܛܽܘܒ ܠܥܰܝ̈ܢܰܝܟܝ ܕܰܩܕܳܡ ܟܽܠ ܐܰܩܒܠܳܝܘܗܝ ܠܶܟܝ ܐܰܫܺܘܝ ܕܬܶܚܙܶܝܢܳܝܗܝ ܟܰܕ ܕܢܰܚ ܪܺܝܫܳܐ ܕܒܽܘܪܟܬܳܐ ܘܫܽܘܪܳܝܳܐ ܕܚܰܕ̈ܘܳܬܳܐ ܫܩܰܠܬܳܝܗܝ ܩܕܳܡ ܟܽܠܳܐ

12 ܛܽܘܒܰܝܟܝ ܒܶܝܬ ܠܚܶܡ ܕܟܰܪ̈ܟܶܐ ܛܰܢܘ ܒܶܟܝ ܘܰܡܕܺܝܢ̈ܳܬܳܐ ܥܰܫܺܝ̈ܢܳܬܳܐ ܒܡܰܪܝܰܡ ܐܰܝܟ ܕܒܶܟܝ ܢܶܫ̈ܶܐ ܛܰܢ ܒܳܗܿ ܘܰܒܬܽܘ̈ܠܳܬܳܐ ܒܢ̈ܳܬ ܪ̈ܺܝܫܳܢܶܐ ܛܽܘܒ ܠܰܛܠܺܝܬܳܐ ܕܐܰܫܘܝܳܗܿ ܠܡܰܫܪܶܝܗ ܘܐܳܦ ܠܰܩܪܺܝܬܳܐ ܕܐܰܫܘܝܳܗܿ ܠܡܰܥܡܪܶܗ ܛܠܺܝܬܳܐ ܣܢܺܝܩܬܳܐ ܘܰܩܪܺܝܬܳܐ ܙܥܽܘܪܬܳܐ ܓܒܳܐ ܠܶܗ ܕܢܶܬܡܰܟܰܟ

13 ܛܽܘܒܰܝܟܝ ܒܶܝܬ ܠܚܶܡ ܕܒܶܟܝ ܫܽܘܪܳܝܳܐ ܗܘܳܐ ܠܶܗ ܠܰܒܪܳܐ ܕܡܶܢ ܡܬܽܘܡ ܒܐܰܒܰܐ ܗ̱ܘ ܥܛܶܠ ܗܽܘ ܕܢܶܬܕܪܶܟ ܕܰܩܕܳܡ ܙܰܒ̈ܢܶܐ ܗܽܘ ܕܒܶܟܝ ܗܽܘ ܠܙܰܒ̈ܢܶܐ ܫܰܥܒܶܕ ܢܰܦܫܶܗ ܛܽܘܒ ܠܐܶܕܢܰܝ̈ܟܝ ܕܒܳܟܰܪ ܘܒܶܟܝ ܦܥܳܐ ܗܘܳܐ ܐܶܡܪܶܗ ܕܐܰܠܳܗܳܐ ܕܕܳܨ ܒܶܟܝ ܕܒܐܽܘܪܝܟܝ ܙܥܰܪ ܗܘܳܐ ܘܐܶܬܦܪܶܣ ܒܟܽܠ ܦܶܢܝ̈ܳܢ ܘܐܶܣܬܓܶܕ ܒܟܽܠܒܶܪ̈ܝܳܢ

14 ܛܽܘܒܰܝܟܝ ܐܳܦ ܠܶܟܝ ܡܰܪܝܰܡ ܕܰܫܡܶܟܝ ܪܰܒ ܘܰܡܪܰܝܡ ܡܶܛܽܠ ܝܰܠܕܶܟܝ ܡܨܰܝܬ ܟܺܝܬ ܕܬܶܐܡܪܺܝܢ ܕܐܰܝܟܰܢ ܘܰܟܡܳܐ ܘܐܰܝܟܳܐ ܫܪܳܐ ܒܶܟܝ ܪܰܒܳܐ ܕܰܙܥܰܪ ܛܽܘܒ ܠܦܽܘܡܶܟܝ ܕܐܰܘܕܺܝ ܗܘܳܐ ܘܠܳܐ ܗܡܰܣ ܘܰܠܠܶܫܳܢܶܟܝ ܕܫܰܒܰܚ ܗܘܳܐ ܘܠܳܐ ܒܨܳܐ ܕܐܶܡܶܗ ܦܗܳܬ ܒܶܗ ܟܰܕ ܛܳܒ ܛܥܺܝܢܳܐ ܠܶܗ ܘܡܰܢܽܘ ܕܰܢܣܰܦܶܩ ܠܶܗ

15 ܐܳܘ ܠܶܟܝ ܐܰܢܬܬܳܐ ܕܠܳܐ ܐܢܳܫ ܚܰܟܶܡ ܐܰܝܟܰܢ ܢܶܚܙܶܝܘܗܝ ܠܰܒܪܳܐ ܕܺܝܠܶܕܬܝ ܠܳܐ ܓܶܝܪ ܣܳܦܩܳܐ ܥܰܝܢܳܐ ܕܰܬܩܽܘܡ ܥܰܠ ܫܽܘܚܠܳܦ̈ܶܐ ܕܫܽܘܒܚܳܐ ܕܰܥܠܰܘܗܝ ܠܶܫ̈ܳܢܶܐ ܓܶܝܪ ܕܢܽܘܪܳܐ ܫܪܶܝܢ ܒܶܗ ܕܠܶܫ̈ܳܢܶܐ ܫܰܕܰܪ ܗܘܳܐ ܒܡܰܣܩܶܗ ܟܽܠ ܠܶܫܳܢ ܢܶܙܕܗܰܪ ܕܰܒܨܳܬܰܢ ܚܳܒܬܳܐ ܗ̱ܝ ܘܢܽܘܪܳܐ ܥܽܘܩܒܰܢ

16 ܛܽܘܒܰܘܗܝ ܠܟܳܗܢܳܐ ܕܰܒܒܶܝܬ ܩܽܘܕܫܳܐ ܩܰܪܶܒ ܠܐܰܒܳܐ ܝܰܠܕܶܗ ܕܐܰܒܳܐ ܦܺܐܪܳܐ ܕܐܶܬܩܛܶܦ ܡܶܢ ܐܺܝܠܺܝܢ ܟܰܕ ܗܽܘ ܟܽܠܶܗ ܡܶܢ ܪܰܒܽܘܬܰܐ ܗ̱ܘ ܛܽܘܒ ܠܐܺܝܕ̈ܰܘܗܝ ܕܐܶܬܩܰܕܰܫܝ̈ ܕܩܰܪܒܳܝܗܝ ܘܰܠܣܰܝ̈ܒܳܬܶܗ ܕܐܶܬܥܡܰܠܝ ܕܚܰܒܒܶܝ̈ܗܝ ܪܽܘܚܳܐ ܒܗܰܝܟܠܳܐ ܣܶܘܚܰܬ ܠܡܰܥܠܶܗ ܘܕܐܶܙܕܩܶܦ ܨܪܳܬ ܢܶܦܩܰܬ

17 ܗܰܘ ܪܺܝܫ ܡܰܠܐܰܟ̈ܶܐ ܫܠܳܡܳܐ ܝܰܗܒ ܠܶܟܝ ܐܰܝܟ ܪܰܗܒܽܘܢܳܐ ܕܩܰܕܺܝܫܽܘܬܳܐ ܐܰܪܥܳܐ ܗܘܳܬ ܠܶܗ ܫܡܰܝܳܐ ܚܕܰܬܳܐ ܕܰܢܚܶܬܘ ܥܺܝܪ̈ܶܐ ܘܫܰܒܰܚܘ ܗܘܰܘ ܒܳܗܿ ܒܢܰܝ̈ ܪܰܘܡܳܐ ܐܶܬܟܰܪܟܽܘܗܝ ܠܡܰܫܟܢܶܟܝ ܡܶܛܽܠ ܒܰܪ ܡܰܠܟܳܐ ܕܒܶܟܝ ܫܪܳܐ ܕܰܝܪܶܟܝ ܡܶܢ ܠܬܰܚܬ ܠܰܫܡܰܝܳܐ ܕܡܶܢ ܠܥܶܠ ܕܳܡܶܝܬܝ ܒܥܺܝܪܽܘܬܳܐ

How to Cite this Electronic Edition

Note:

Ephrem the Syrian, “Nativity 25” based upon Edmund Beck (ed.), "Des heiligen Ephraem des Syrers Hymnen De Nativitate (Epiphania)." in Corpus Scriptorum Christianorum Orientalium (Louvain: Secrétariat du CorpusSCO, 1959)., Digital Syriac Corpus, last modified December 17, 2019, https://syriaccorpus.org/573.

TEST2

Bibliography:

“Nativity 25.” In Corpus Scriptorum Christianorum Orientalium, edited by . Syriaca.org, 2016-. Entry published . https://syriaccorpus.org/573.

Show Citation Styles

SEDRA IV

Syriac Lexeme

About This Digital Text

Corpus Text ID:

https://syriaccorpus.org/573

NHSL Work ID(s):

http://syriaca.org/work/9066
http://syriaca.org/work/9041

Source:

Edmund Beck (ed.), "Des heiligen Ephraem des Syrers Hymnen De Nativitate (Epiphania)." in Corpus Scriptorum Christianorum Orientalium (Louvain: Secrétariat du CorpusSCO, 1959).

Type of Text: Digital Edition

Status: Edited

Publication Date: December 17, 2019

Preparation of Electronic Edition:

TEI XML encoding by James E. Walters.
Syriac text transcribed by Michael Oez.

Open Access and Copyright:

This electronic edition is designed for open access reuse. The Syriac base text is in the public domain. The TEI XML edition is copyrighted by James E. Walters and is released under a Creative Commons Attribution 4.0 International Public License (CC BY 4.0).

The HTML page is copyrighted by Vanderbilt University and released under a under a Creative Commons Attribution 4.0 International Public License (CC-BY 4.0, https://creativecommons.org/licenses/by/4.0/). Attribution for reuse should follow the suggested citation and also credit the copyright holder of the TEI XML edition.

See details...