Nativity 28

1 ܡܶܛـ[ܠܐ] ܡܝܰܩܰܪܬܳܐ ܕܰܒܟܽܘܺܝܠܳܐ ܐܶ[ܢ ܒܶܗ] ܚܰܝ̈ܘܳܬܳܐ ܗ̈ܘܰܝ ܢܰܟܦ̈ܳܬܳܐ ܡܰـ[ـܪܝܰܡ] ܕܒܳܗܿ ܫܪܳܐ ܥܰܡܰܢܽܘܐܶܝܠ ܐܰܝܟܰܢ ܬܶܦܢܶܐ ܥܰܠ ܙܽܘܘܳܓܳܐ ܨܶܒܝܳܢܶܟܝ ܠܶܟܝ ܐܰܘܪܶܒ ܘܩܰܕܫܶܟܝ ܐܰܘܣܶܦ ܬܽܘܒ ܐܳܦ ܡܳܪܶܟܝ ܘܨܰܒܬܶܟܝ ܚܰܝ̈ܘܳܬ ܕܢܽܘܚ ܒܰܩܛܺܝܪܰܐ ܗ̱ܘ ܐܶܬܥܨܺܝ ܐܰܢܬ ܕܶܝܢ ܒܨܶܒܝܳܢܶܟܝ ܥܽܘܢܺܝܬܐ : ܬܶܫܒ̈ܚܳܢ ܠܡܰܘܠܳܕܶܗ Stropha 2 = XXV, 17 3 ܠܰܘ ܕܶܝܢ ܡܣܰܝܒܳܐ ܫܰܘܬܳܦܽܘܬܳܐ ܐܳܦ ܠܳܐ ܕܰܛܡܶܐ ܗ̱ܘ ܙܽܘܘܳܓܳܐ ܓܶܦܶܝ̈ܗܿ ܪܰܘܪ̈ܒܺܝܢ ܐܳܦ ܩܰܠܺܝܠܺܝ̈ܢ ܕܩܰܕܺܝܫܽܘܬܳܐ ܡܶܢ ܙܽܘܘܳܓܳܐܐ ܫܰܘܬܳܦܽܘܬܳܐ ܟܰܕ ܕܰܟܝܳܐ ܡܶܬܚܰܬܝܳܐ ܗ̱ܝ ܒܺܝܬ ܓܰܘܣܳܗܿ ܚܶܫܽܘܟܰܐ ܗ̱ܘ ܕܢܰܟܦܳܐ ܓܰܠܝܽܘܬ ܐܰܦ̈ܶܐ ܟܽܠܳܗܿ ܕܢܰܟܦܽܘܬܳܐ ܗ̱ܝ ܕܰܡܥܰܛܦܳܐ ܢܽܘܗܪܳܐ 4 ܢܽܘܗܪܳܐ ܕܰܢܝܳܚܳܐ ܗܘܳܐ ܒܡܶܕܝܳܪ̈ܰܝܟܽܘܢ ܘܰܠܙܽܘܘܳܓܳܐ ܐܰܬܪܳܐ ܠܳܐ ܝܰܗܒ ܠܳܐ ܓܶܝܪ ܐܺܝܬ ܗܘܳܐ ܥܒܳܕ̈ܰܝ [ܣܶܬܪܳܐ] ܒܓܰܘ ܡܰܫܪܺܝܬܶܟܝ ܡܰܠܝܰܬ [ܫܽܘܒܚܳܐ] ܛ̈ܠܳܠܶܐ ܕܪܰܦܝܽܘܬܳܐ [ܘܪܶܓܬܳܐ] ܒܙܰܠܺܝ̈ܩܰܘܗܝ ܐܶܬܛܰܠܰܩܘ [ܕܦـ]ـܪܩܳܐ ܪܽܘܚܳܢܳܝܬܳܐ ܟܽܘܠܶܟܝ ܕܪܽܘܚܳܐ ܗܘܰܝܬܝ ܕܺܝܠܶܕܬܝ ܪܽܘܚܳܢܳܐ

5 ܕܢܺܐܡܰܪ ܒܬܽܘܠܬܳܐ ܗܺܝ ܒܳܛܢܳܐ ܡܟܰܣ ܘܕܰܐܢܬܰܬ ܓܰܒܪܳܐ ܒܬܽܘ̈ܠܶܐ ܩܳܥܶܝܢ ܕܢܺܐܡܰܪ ܒܬܽܘܠܳܬܳܐ ܗ̱ܝ ܘܐܰܢܬܰܬ ܓܰܒܪܳܐ ܓܽܘܫܡܳܐ ܚܰܕ ܗܽܘ ܘܠܳܐ ܫܳܒܶܩ ܠܰܢ ܬܶܗܪܳܐ ܗܘܳܐ ܘܕܽܘܡܳܪܳܐ ܠܟܫܪ̈ܶܐ ܫܚܳܩܳܐ ܗܘܳܐ ܘܫܽܘܢܳܩܳܐ ܠܣܳܦܪ̈ܶܐ ܒܬܽܘ̈ܠܶܐ ܟܣܶܝܢ ܗܘܰܘ ܘܰܬܕ̈ܝܳܐ ܡܠܶܝܢ ܗܘܰܘ ܠܶܗ ܬܶܫ̈ܒܚܳܢ ܥܰܠ ܟܽܠ

6 ܒܰܛܢܳܐ ܕܥܳܠܡܳܐ ܥܶܠܰܬ ܙܰܘܥܶܗ ܪܶܓܰܬ ܦܰܓܪܳܐ [ܗܳܝ] ܕܰܒܗܰܕ̈ܳܡܶܐ ܒܰܛܢܶܟܝ ܡܨܰܠܠܳܐ ܟܳܦܰܪ ܫܰܩܠܳܗܿ ܪܶܓܰܬ ܙܰܘܥܳܐ ܡܶܢ ܗܰܕܳܡܰܝ̈ܟܝ ܩܽܘܕܫܳܐ ܘܕܰܟܝܽܘܬܳܐ ܢܣܰܟ ܡܠܶܟܝ ܒܫ̈ܶܦܥܶܐ ܩܰܕܺܝ̈ܫܶܐ ܘܚܰܠܠܶܟܝ ܕܐܰܝܢܳܐ ܕܚܳܙܶܐ ܠܶܟܝ ܢܺܐܡܰܪ ܕܡܳܐ ܛܳܒܳܗܿ ܕܗܳܕܶܐ ܡܰܫܒܰܚܬܳܐ

7 ܕܒܰܛܢܰܐ ܗ̱ܘ ܡܫܰܒܚܳܐ ܢܰܦܫܶܗ ܛܒܰܥ ܗܘܳܐ ܐܰܝܟ ܕܰܒܛܰܒܥܳܐ ܥܰܠ ܬܰܪܥܺܝܬܶܟܝ ܘܟܰܕ ܗܽܘ ܐܺܝܠܺܝܕ ܗܘܳܐ ܟܶܐܡܰܬ ܒܶܟܝ ܗܘܳܐ ܕܰܟܠܶܝܗ ܡܕܺܝܩ ܗܘܳܐ ܡܶܢ ܗܰܕܳܡܰܝ̈ܟܝ ܙܺܝܘܶܗ ܘܥܰܠ ܫܽܘܦܪܶܟܝ ܦܪܺܝܣ ܗܘܳܐ ܚܽܘܒܳܗܿ ܘܥܰܠ ܟܽܠܶܟܝ ܡܫܺܝܚ ܗܘܳܐ ܠܒܽܘܫܳܐ ܙܩܰܪܬܝ ܠܶܗ ܗܽܘ ܕܶܝܢ ܦܫܰܛ ܫܽܘܒܚܶܗ ܥܰܠ ܟܽܠܗܽܘܢ ܪ̈ܶܓܫܰܝܟܝ

8 ܛܽܘܥܝܰܝ ܟܡܳܐ ܛܥܳܬ ܕܡܰܪܺܝܪܽܘܬܳܐ ܡܶܢ ܗܰܒ̈ܳܒܶܐ ܚ̈ܠܰܝܳܐ ܠܶܩܛܰܬ ܐܰܟܙܳܢܐ ܗܺܝ ܕܐܳܟܠܳܐ ܦܺܐܪ̈ܶܐ ܚ̈ܠܰܝܳܐ ܘܒܳܗܿ ܡܶܬܗܰܦܟܺܝܢ ܠܡܳܪܰܬ ܡܰܘܬܳܐ ܡܶܢ ܣܳܦܪ̈ܶܐ ܒܰܣܺܝ̈ܡܶܐ ܡܠܰܩܛܳܐ ܐܳܦ ܛܽܘܥܝܰܝ ܣܰܡ ܡܰܘܬܳܐ ܠܪ̈ܳܚܡܶܝܗܿ ܟܳܣܳܐ ܡܩܰܪܒܺܝܢ ܒܢܰܝ̈ ܚܶܘܝܳܐ ܕܒܶܗ ܡܙܰܓܘ ܡܳܪܬܶܗ ܕܬܰܢܺܝܢܳܐ

9 ܠܶܟܝ ܛܽܘܒ ܥܺܕܬܳܐ ܕܒܽܘܪܺܝܬܳܐ ܕܦܰܩ̈ܚܶܐ ܚ̈ܠܰܝܳܐ ܠܳܗܿ ܣܰܓ̈ܺܝܐܺܝܢ ܢܺܝܣܳܢ ܐܺܝܬ ܠܶܟܝ ܚܰܕ ܡܶܨܪܳܝܳܐ ܢܺܝܣܳܢ ܕܰܬܪ̈ܶܝܢ ܗܰܘ ܥܶܒܪܳܝܳܐ ܡܶܢ ܗܰܒ̈ܳܒܶܐ ܩܰܕܺܝ̈ܫܶܐ ܡܠܰܩܛܳܐ ܡܶܢ ܟܽܠܗܽܘܢ ܟܽܠ ܥܽܘܕܪܳܢ ܡܟܰܢܫܳܐ ܠܶܟܝ ܛܽܘܒ ܥܺܕܬܳܐ ܕܡܶܢ ܦܰܩ̈ܚܶܐ ܕܗܰܝܟܠܶܟܝ ܟܰܢܶܫܬܶܝܗܿ ܠܚܰܠܝܽܘܬܳܐ

10 ܛܽܘܦܣܶܟܝ ܨܪܳܬܶܗ ܕܒܽܘܪܺܝܬܳܐ ܕܫܶܒܩܰܬ ܦܰܩ̈ܚܶܐ ܕܰܒܓܰܘ ܐܰܬܪܳܗܿ ܦܶܪܚܰܬ ܘܠܳܐ ܙܥܽܘܪܳܐ ܕܰܡܚܳܗܿ ܪܺܝܚܳܐ ܕܦܰܩܚܳܐ ܚܰܠܝܳܐ ܕܺܝܥܳܐ ܒܝܺܗܽܘܕ ܘܐܶܬܳܬ ܘܒܐܶܕܢܶܝ̈ܗܿ ܟܰܢܫܰܬ ܚܰܠܝܽܘܬܳܐ ܕܐܽܘܚܕ̈ܳܬܳܗܿ ܘܐܰܘܒܠܰܬ ܐܽܘܪܫܠܶܡ ܕܶܝܢ ܐܶܫܰܕܬܳܗܿ ܠܚܰܠܝܽܘܬܳܐ ܕܥܰܡ̈ܡܶܐ ܪܗܶܛܘ ܟܰܢܫܽܘܗܿ