History of Mar Qardagh - ܬܫܥܝܬܐ ܕܢܨܢܝܢܘ̈ܗܝ ܕܡܪܝ ܩܪܕܓ ܤܗܕܐ ܢܨܝܥܢܐ

ܚܲܒܿܝܼ̈ܒܲܝ: ܝܘܼܬܼܪܵܢܵܐ ܐܸܢܹܝܢ ܠܥܹܕܬܵܐ ܩܲܕܝܼܫܬܼܵܐ ܬܲܫ̈ܥܝܵܬܼܵܐ ܕܤܵܗܕܵܘ̈ܗܝ ܘܩܲܕܝܼܫܵܘ̈ܗܝ ܕܡܵܪܲܢ ܝܼܫܘܿܥ ܡܫܝܼܚܵܐ. ܘܬܼܘܼܪܤܵܝܵܐ ܐܸܢܹܝܢ ܪܘܼܚܵܢܵܝܵܐ ܠܲܟܼܢܘܼ̈ܫܵܬܼܵܐ ܩܲܕܝܼ̈ܫܬܼܵܐ ܕܲܨܠܝܼܒܼܵܐ: ܘܗܸܕܪܵܐ ܐܸܢܹܝܢ ܠܫܘܼܦܪܵܗ̇ ܪܵܡܵܐ ܕܲܟܼܪܸܤܛܝܵܢܘܼܬܼܵܐ ܙܠܝܼܚܲܬܸ ܒܲܕܡܹܗ ܕܒܲܪ ܐܲܠܵܗܵܐ: ܘܥܘܼܬܼܪܵܐ ܐܸܢܹܝܢ ܫܡܝܵܢܵܐ ܠܕܼܵܪܹ̈ܐ ܟܠܗܘܿܢ ܕܥܵܐ̇ܠܝܼܢ ܠܥܹܕܬܵܐ ܩܲܕܿܝܼܫܬܼܵܐ ܒܡܵܘܠܕܵܐ ܪܘܼܚܵܢܵܝܵܐ ܕܡܲܥܡܘܿܕܝܼܬܼܵܐ: ܘܡܲܚܙܝܼܬܼܵܐ ܐܸܢܹܝܢ ܡܪܝܼܩܬܼܵܐ ܕܒܼܵܗ̇ ܚܵܙܹ̇ܝܢ ܦܵܪ̈ܘܿܫܹܐ ܠܫܘܼܦܪܹܗ ܠܵܐ ܡܸܬܼܡܲܠܠܵܢܵܐ ܕܲܡܫܝܼܚܵܐ: ܘܩܸܢ̈ܝܵܢܹܐ ܐܸܢܹܝܢ ܕܙܲܕܝܼܩܘܼܬܼܵܐ ܠܲܒܼܢܹ̈ܝܗ̇ ܕܥܹܕܬܵܐ ܙܡܝܼ̈ܢܲܝ ܠܡܲܠܟܿܘܼܬܼܵܐ ܫܡܲܝܵܢܝܼܬܼܵܐ: ܘܢܘܼܪܵܐ ܕܚܘܼܒܹܗ ܕܲܡܫܝܼܚܵܐ ܡܓܼܵܘܙܲܠ ܒܢܲܦܫ̈ܬܼܵܐ ܕܲܡܗܲܝ̈ܡܢܹܐ. ܘܐܲܝܢܵܐ ܕܲܪܓܼܝܼܓܼ ܠܩܸܪܝܵܢܗܹܝܢ ܘܲܠܥܹܢ̈ܝܵܢܹܐ ܐܲܡܝܼ̈ܢܹܐ ܕܲܒܼܗܹܝܢ: ܒܪܵܐ ܗ̣̄ܘ ܚܲܒܿܝܼܒܼܵܐ ܕܩܲܕܿܝܼ̈ܫܹܐ: ܕܒܹܗ ܡܸܬܼܡܲܠܠܝܼܢ ܫܘܼܦܪ̈ܲܝܗܘܿܢ ܕܒܲܐܠܵܗܵܐ.

(1) ܥܲܠ ܚܲܝܠܵܐ ܐܲܠܵܗܵܝܵܐ: ܡܫܲܪܸܐ ܥܲܒܼܕܵܐ ܚܲܛܵܝܵܐ: ܠܡܸܟܼܬܿܒܼ ܬܲܫܥܝܼܬܼܵܐ ܕܝܵܢܝܵܐ: ܕܡܵܪܝ ܩܲܪܕܵܓܼ ܚܠܸܐ ܟܘܼܢܵܝܵܐ܀ ܕܡ̣ܢ ܐܲܬܼܪܵܐ ܐܵܬܼܘܿܪܵܝܵܐ: ܘܲܒܼܓܸܢܤܵܐ ܢܡܪܘܿܕܼܵܝܵܐ: ܚܲܝܸܠܲܝܢܝ ܒܚܲܝܠܵܟܼ ܡܵܪܝܵܐ: ܕܒܹܗ ܐܸܬܼܡܲܢܲܥ ܠܫܘܼܡܠܵܝܵܐ܀ pb. 443

ܒܲܕܓܼܘܿܢ ܚܲܒܿܝܼ̈ܒܲܝ ܪܓܝܼܓܼ ܐ̄ܢܵܐ ܕܐܸܫܬܲܥܸܐ ܠܟܼܘܿܢ ܢܸܨܚܵܢܵܘ̈ܗܝ ܬܡܝܼ̈ܗܹܐ ܘܐܵܓܼܘܿܢܵܘ̈ܗܝ ܪܵܘܪ̈ܒܹܐ ܕܐܲܬܼܠܹܝܛܐ ܕܙܲܕܝܼܩܘܼܬܼܵܐ: ܤܵܗܕܵܐ ܩܲܕܝܼܫܵܐ ܡܵܪܝ ܩܲܪܕܵܓܼ. ܗܵܘ̇ ܕܒܼܵܐܓܼܘܿܢܹ̈ܐ ܪܵܘܪ̈ܒܹܐ ܕܤܵܗܕܘܼܬܹܗ ܬܗܲܪܘ ܡܲܠܲܐܟܗܹܐ: ܘܐܸܬܿܕܲܡܲܪܘ ܒܢܲܝ̈ܢܵܫܵܐ: ܗ̤ܘ ܗܵܟܹܝܠ ܩܲܕܝܼܫܵܐ ܡܵܪܝ ܩܲܪܕܵܓܼ ܐܝܼܬܼܵܘܗܝ ܗ̄ܘ̣ܵܐ ܡ̣ܢ ܓܸܢܤܵܢ ܪܲܒܵܐ: ܘܡ̣ܢ ܫܵܩܵܐ ܕܡܲܠܟܿܘܼܬܼܵܐ ܕܐܸܬܼܘܿܪ̈ܵܝܹܐ. ܘܐܲܒܼܘܼܗܝ ܡܸܬܼܝܲܒܲܠ ܗ̄ܘ̣ܵܐ ܡ̣ܢ ܫܲܪܒܿܬܼܵܐ ܡܫܲܡܗܬܵܐ ܕܒܹܝܬܼ ܢܸܡܪܘܿܕܼ: ܘܐܸܡܹܗ ܡ̣ܢ ܫܲܪܒܿܬܼܵܐ ܡܫܲܡܲܗܬܵܐ ܕܒܹܝܬܼ ܤܲܢܚܹܪܝܼܒܼ. ܘܡ̣ܢ ܐܲܒܼܵܗܹ̈ܐ ܚܲܢ̈ܦܹܐ ܘܛܵܥܝܲܝ̈ ܒܛܵܥܝܘܼܬܼܵܐ ܕܲܡܓܼܫܘܼܬܼܵܐ ܐܸܬܼܝܼܠܸܕܼ: ܐܲܒܼܘܼܗܝ ܓܹܝܪ ܓܲܒܼܪܵܐ ܗ̄ܘ̣ܵܐ ܝܼܕܼܝܼܥܵܐ ܒܡܲܠܟܿܘܼܬܼܵܐ ܘܲܡܫܲܡܗܵܐ ܒܲܡܓܼܘ̈ܫܹܐ: ܓܘܼܫܢܵܘܝܼ ܫܡܹܝܗ. ܗ̤ܘ ܕܹܝܢ ܩܲܕܝܼܫܵܐ ܡܵܪܝ ܩܲܪܕܵܓܼ ܫܲܦܝܼܪ ܗ̄ܘ̣ܵܐ ܒܚܸܙܘܹܗ: ܘܪܲܒܿ ܗ̄ܘ̣ܵܐ ܒܓܼܘܼܫܡܹܗ: ܘܚܲܝܠܬܼܵܢ ܗ̄ܘ̣ܵܐ ܒܦܲܓܼܪܹܗ: ܘܢܲܦܫܵܐ ܡܗܝܼܪܲܬܼ ܒܲܩܪܵܒܹܐ ܩܢܸܐ ܗ̄ܘ̣ܵܐ: ܘܲܒܼܛܵܥܝܘܼܬܼܵܐ ܕܚܲܢܦܘܼܬܼܵܐ ܓܲܢ̄ܒܵܪܵܐܝܼܬܼ ܐܚܝܼܕܼ ܗ̄ܘ̣ܵܐ: ܘܲܒܼܦܵܠܚܘܼܬܹܗ ܡܸܬܼܖܩܠܲܣ ܗ̄ܘ̣ܵܐ ܒܟܼܠܵܗ̇ ܦܢܝܼܬܼܵܐ ܕܦܵܪ̈ܤܵܝܹܐ. ܘܟܲܕܼ ܐܝܼܬܼܵܘܗܝ ܗ̄ܘ̣ܵܐ ܐܲܝܟܼ ܒܲܪ ܥܸܤܪܝܼܢ ܘܚܲܡܸܫ ܫܢܝܼ̈ܢ: ܐܸܫܬܿܡܲܥ̣ ܛܸܒܹܿܗ ܘܓܲܢ̄ܒܵܪܘܼܬܹܗ ܠܫܵܒܼܘܿܪ ܡܲܠܟܵܐ ܕܦܵܪ̈ܤܵܝܹܐ: ܘܫܲܕܲܪ ܒܥ̣ܵܝܗܝ ܠܬܲܪܥܹܗ ܒܐܝܼܩܵܪܵܐ ܪܲܒܵܐ. ܘܟܲܕܼ ܦ̣ܩܲܕܼ ܘܥܲܠ̣ ܩܕܼܵܡܵܘܗܝ: ܘܲܚ̣ܙܵܐ ܠܦܲܐܝܘܼܬܼܵܐ ܕܚܸܙܘܹܗ ܘܲܠܚܲܠܬܼܵܢܘܼܬܼܵܐ pb. 444 ܕܦܲܓܼܪܹܗ: ܚ̣ܕܝܼ ܒܹܗ ܪܵܘܪܒܼܵܐܝܼܬܼ. ܘܲܦ̣ܩܲܕܼ ܠܹܗ ܕܒܸܐܤܛܵܕܝܼܘܿܢ ܩܕܼܵܡ ܪܵܘܪ̈ܒܼܵܢܹܐ ܟܠܗܘܿܢ ܕܡܲܠܟܼܿܘܼܬܼܵܐ ܢܸܫܬܿܥܸܐ: ܘܢܸܫܕܸܐ ܓܹܐܪܵܐ ܠܢܝܼܫܵܐ ܙܥܘܿܪܵܐ ܕܲܩܒܼܝܼܥ ܒܪܹܫ ܩܲܝܤܵܐ ܪܵܡܵܐ. ܘܐܲܝܬܿܝܼܘ ܩܸܫܬܼܵܐ ܘܓܹܐܪܹ̈ܐ ܚܲܡܫܵܐ ܡ̣ܢ ܒܹܝܬܼ ܙܲܝܢܵܐ ܕܡܲܠܟܵܐ. ܟܲܕܼ ܕܹܝܢ ܫ̣ܕܼܵܐ ܓܹܐܪܹ̈ܐ ܚܲܡܫܵܐ ܒܢܝܼܫܵܐ: ܘܟܼܠܗܘܿܢ ܒܲܚܕܼܵܐ ܕܘܿܟܿܬܼܵܐ ܐܸܬܼܩܲܒܲܥ̣ܘ: ܘܐܸܬܼܩܲܠܲܣ̣ ܡ̣ܢ ܡܲܠܟܵܐ ܘܡ̣ܢ ܟܠܗܘܿܢ ܪܵܘܪ̈ܒܼܵܢܵܘܗܝ. ܘܲܠܝܵܘܡܵܐ ܐ̄ܚܪܹܢܵܐ ܦ̣ܩܲܕܼ ܠܹܗ ܡܲܠܟܵܐ ܕܢܹܐܬܸܐ ܠܐܸܤܛܵܕܝܼܘܿܢ: ܘܢܸܫܬܿܥܸܐ ܥܲܡܹܗ ܒܐܸܤܦܹܪܵܐ ܥܲܡ ܫܲܪܟܵܐ ܕܪܵܘܪ̈ܒܼܵܢܵܘܗܝ. ܗܵܝ̇ ܕܟܲܕܼ ܗܘ̤ܸܵܬܼ: ܪܵܘܪܒܼܵܐܝܼܬܼ ܬܗܲܪܘ ܒܹܗ ܡܲܠܟܵܐ ܘܪܵܘܪ̈ܒܼܵܢܵܘܗܝ. ܘܲܠܝܵܘܡܵܐ ܕܲܬܼܠܵܬܼܵܐ: ܢܦܲܩ̣ ܗ̄ܘ̣ܵܐ ܡܠܟܵܐ ܠܨܲܝܕܵܐ ܒܲܡܵܐܐ ܪܵܘܪ̈ܒܼܵܢܝܼܢ ܘܒܲܬܼܠܵܬܼܡܵܐܐ ܦܲܪ̈ܫܝܼܢ. ܘܲܦ̣ܩܲܕܼ ܠܹܗ ܕܥܲܡܹܗ ܢܸܪܟܲܒܼ: ܒܤܘܼܤܝܵܐ ܕܡ̣ܢ ܐܘܿܪ̈ܵܘܵܬܹܗ ܕܡܲܠܟܵܐ: ܘܲܒܼܪܹܫܵܐ ܕܲܛܥ̈ܝܼܢܲܝ ܙܲܝܢܹܗ ܕܡܲܠܟܵܐ ܢܗܲܠܸܟܼ ܩܕܼܵܡܵܘܗܝ. ܘܟܲܕܼ ܩܲܪܝܼܒܼܝܼܢ ܠܡܸܥܲܠ ܠܥܵܒܼܵܐ ܚܲܕܼ: ܚ̣ܙܵܘ ܩܕܼܵܡܲܝܗܘܿܢ ܚܕܼܵܐ ܐܲܝܠܬܼܵܐ ܕܪܵܗܛܵܐ ܥܲܡ ܒܪܵܗ̇. ܘܡܸܚܕܼܵܐ ܡܲܠܟܵܐ ܩܥ̣ܵܐ ܟܲܕܼ ܐܵܡܲ݁ܪ: ܐܲܪܝܼܡ ܐܝܼܕܼܵܟܼ ܒܩܸܫܬܼܵܐ ܩܲܪܕܵܓܼ ܥܠܲܝܡܵܐ ܚܲܝܠܬܼܵܢܵܐܝܼܬܼ: ܘܚܵܘܵܐ ܟܘܪܫܪܵܟܼ. ܗ̤ܘ ܓܹܝܪ ܡܤܲܪܗܒܼܵܐܝܼܬܼ ܫܩܲܠ̣ ܓܹܐܪܵܐ ܚܲܕܼ ܘܤܵܡ̣ ܒܩܸܫܬܼܵܐ: ܘܲܡ̣ܬܲܚ ܒܚܲܝܠܵܐ: ܘܲܒܼܚܲܕܼ ܓܹܐܪܵܐ ܐܲܪܡ̣ܝܼ ܠܐܲܝܠܬܼܵܐ ܘܠܲܒܼܪܵܗ̇. ܗܵܝܕܹܿܝܢ ܡܲܠܟܵܐ ܩܥ̣ܵܐ ܒܩܵܠܵܐ ܪܵܡܵܐ ܘܐܸܡ݂ܲܪ: ܚܝܼ ܩܲܪܕܵܓܼ: ܚܝܼ ܘܲܚ̣ܕܝܼ ܒܲܥܠܲܡܘܼܬܼܵܟܼ: ܘܠܲܢ pb. 445 ܚܲܕܐ ܒܢܸܨܚܵܢܲܝܟ! ܘܡܸܚܕܼܵܐ ܕܲܦܢ̣ܵܐ ܡܲܠܟܵܐ ܡ̣ܢ ܢܲܚܫܝܼܪܵܐ: ܦ̣ܩܲܕܼ ܘܝܲܗ̣̄ܒܼܘ ܠܹܗ ܡܵܘܗ̈ܒܼܵܬܼܵܐ ܪܵܘܪ̈ܒܼܵܬܼܵܐ: ܘܥܲܒܼܕܹܗ ܦܲܛܚܵܫܵܐ ܕܐܵܬܼܘܿܪ: ܘܐܲܩ̣ܝܼܡܹܗ ܡܲܪܙܒܼܵܢܵܐ ܡ̣ܢ ܢܲܗܪܵܐ ܬܘܼܪܡܵܪܵܐ ܘܲܥܕܲܡܵܐ ܠܲܢܨܝܼܒܼܝܼܢ ܡܕܼܝܼܢ̄ܬܼܵܐ. ܘܫܲܕܪܹܗ ܒܙܵܘܚܵܐ: ܟܲܕܼ ܫܲܕܲܪ ܒܐܝܼܕܹܗ ܡܵܘܗ̈ܒܼܵܬܼܵܐ ܪܵܘܪ̈ܒܼܵܬܼܵܐ ܘܐܝܼܩܵܪܹ̈ܐ ܐܵܦ ܠܐܲܒܼܘܼܗܝ.

ܟܲܕܼ ܕܹܝܢ ܤ̣ܡܲܟܼ ܠܐܲܬܼܪ̈ܵܘܵܬܼܵܐ ܕܫܘܼܠܛܵܢܹܗ: ܛܵܒܼ ܐܸܬܿܬܿܙܝܼܥ̣ ܡܸܢܹܗ ܥܲܡܵܐ ܕܲܟܼܪܸ̈ܤܛܝܵܢܹܐ: ܝܵܕܼܥ̇ܝܼܢ ܗ̄ܘ̣ܵܐ ܓܹܝܪ ܠܲܛܢܵܢܹܗ ܠܵܐ ܡܡܲܫܚܵܐ ܕܲܚܠܵܦ ܛܵܥܝܘܼܬܼܵܐ ܕܲܡܓܼܘܼܫܘܼܬܼܵܐ. ܘܲܨܠܘܿܬܼܵܐ ܪܲܒܿܬܼܵܐ ܡܸܬܼܩܲܪܒܼܵܐ ܗ̄ܘ̣ܵܬܼ ܩܕܼܵܡ ܐܲܠܵܗܵܐ ܡܸܛܠܵܬܹܗ ܒܟܼܠܵܗ̇ ܥܹܕܬܵܐ: ܕܗ̤ܘ ܡܨܸܐ ܚܹܝܠ ܟܠ ܢܫܲܗܸܐ ܠܚܹܐܦܹܗ: ܘܠܵܐ ܢܲܪܦܹܝܘܗܝ ܕܲܢܙܝܼܥ ܕܪܘܼܦܝܵܐ ܥܲܠ ܟܪܸ̈ܤܛܝܵܢܹܐ. ܛܵܒܼ ܓܹܝܪ ܪܕܝܼܦܝܼܢ ܗ̄ܘ̣ܵܘ: ܒܡܲܠܟܿܘܼܬܹܗ ܕܫܵܒܼܘܿܪ ܨܗܸܐ ܠܲܕܼܡܵܐ ܕܩܲܕܿܝܼ̈ܫܹܐ. ܟܲܕܼ ܕܹܝܢ ܥܲܠ̣ ܠܒܲܝܬܹܗ ܕܒܲܐܪܒܹܝܠ ܡܕܼܝܼܢ̄ܬܼܵܐ ܕܐܵܬܼܘܿܪ̈ܵܝܹܐ: ܥܹܐܕܼܵܐ ܪܲܒܵܐ ܠܐܲܠܵܗܹ̈ܐ ܕܚܲܢ̈ܦܹܐ ܥ̣ܒܲܕܼ ܗ̄ܘ̣ܵܐ: ܘܠܲܡܓܼܘܼܫܘܼܬܼܵܐ ܛܵܒܼ ܝܲܩܲܪ: ܘܲܠܒܹܝܬܼ ܢܘܼܪ̈ܘܵܬܼܵܐ ܡܵܘܗ̈ܒܼܵܬܼܵܐ ܛܵܒܼ̈ܬܼܵܐ ܝܲܗ̣̄ܒܼ. ܘܒܼܵܬܲܪ ܝܵܘ̈ܡܵܬܼܵܐ ܩܲܠܝܼܠ ܫܲܪܝܼ ܕܢܸܒܼܢܸܐ ܚܸܤܢܵܐ ܘܒܲܝܵܬܼܵܐ ܥܲܠ ܬܸܠܵܐ ܚܲܕܼ ܕܡܸܬܼܩܪܸܐ ܡܲܠܩܝܼ. ܘܒܲܫ̈ܢܲܝܵܐ ܬܲܪܬܹܿܝܢ ܒܢ̣ܵܐ ܘܫܲܟܼܠܸܠ̣ ܚܸܤܢܵܐ ܥܲܫܝܼܢܵܐ ܘܒܲܝܬܼܵܐ ܫܲܦܝܼܪܵܐ: ܘܲܠܬܲܚܬܿ ܡ̣ܢ ܬܸܠܵܐ ܒܢ̣ܵܐ ܒܹܝܬܼ ܢܘܼܪܵܐ ܒܢܲܦܩ̈ܵܬܼܵܐ ܪܵܘܪ̈ܒܼܵܬܼܵܐ: ܘܐܲܩ̣ܝܼܡ ܒܹܗ ܡܓܼܘܼ̈ܫܹܐ ܠܬܸܫܡܸܬܼܵܐ ܕܢܘܼܪܵܐ. ܟܲܕܼ ܕܹܝܢ ܒܵܢܹ̇ܐ pb. 446 ܗ̄ܘ̣ܵܐ ܚܸܤܢܵܐ ܗܵܘ̇: ܒܚܲܕܼ ܡ̣ܢ ܠܲܝ̈ܠܵܘܵܬܼܵܐ ܟܲܕܼ ܐܝܼܬܼܵܘܗܝ ܗ̄ܘ̣ܵܐ ܒܫܸܢܬܼܵܐ: ܚ̣ܙܵܐ ܒܚܸܠܡܹܗ ܓܲܒܼܪܵܐ ܚܲܕܼ ܥܠܲܝܡܵܐ ܦܲܪܵܫܵܐ ܟܲܕܼ ܠܒܼܝܼܫ ܘܲܡܚܲܙܲܩ ܒܙܲܝܢܹܗ: ܘܲܪܟܼܝܼܒܼ ܥܲܠ ܤܘܼܤܝܵܐ: ܘܩܵܐܹ̇ܡ ܠܥܸܠ ܡܸܢܹܗ. ܘܕܲܩܪܹܗ ܒܓܲܒܹܗ ܒܕܼܘܼܢܒܵܐ ܕܢܲܝܙܟܹܗ ܘܐܸܡ݂ܲܪ ܠܹܗ: ܩܲܪܕܵܓܼ. ܘܐܸܡ݂ܲܪ: ܗܵܐ ܐܸܢܵܐ. ܘܐܸܡ݂ܲܪ ܠܹܗ: ܡܸܕܸܿܥ ܬܸܕܲܥ: ܕܲܩܕܼܵܡ ܚܸܤܢܵܐ ܗܵܢܵܐ ܐܝܼܬܼ ܠܵܟܼ ܕܲܬܼܡܘܼܬܼ ܒܤܵܗܕܘܼܬܼܵܐ ܕܲܚܠܵܦ ܡܫܝܼܚܵܐ. ܘܩܲܪܕܵܓܼ ܐܸܡ݂ܲܪ ܠܹܗ: ܕܐܲܢ̄ܬܿ ܡܲܢ ܐܲܢ̄ܬܿ: ܕܗܵܠܹܝܢ ܡܢܲܚܸܫ ܐܲܢ̄ܬܿ ܠܝܼ؟ ܛܘܼܒܼܵܢܵܐ ܕܹܝܢ ܐܸܡ݂ܲܪ ܠܹܗ: ܐܸܢܵܐ ܐ̄ܢܵܐ ܤܲܪܓܿܝܼܣ ܥܲܒܼܕܹܗ ܕܲܡܫܝܼܚܵܐ. ܠܵܘ ܡܢܲܚܵܫܘܼ ܡܢܲܚܸܫ ܐ̄ܢܵܐ ܠܵܟܼ: ܐܲܝܟܼ ܕܐܲܢ̄ܬܿ ܤܵܒܲ݁ܪ ܐܲܢ̄ܬܿ: ܐܸܠܵܐ ܗܵܝ̇ ܕܲܥܬܼܝܼܕܼܵܐ ܩܲܕܡܹ̇ܬܼ ܐܵܘܕܲܥ̇ܬܵܟܼ: ܐܲܝܟܼ ܕܲܡܫܝܼܚܵܐ ܡܵܪܝ ܐܵܘܕܥܲܢ̣ܝ. ܟܲܕܼ ܕܹܝܢ ܐܸܬܿܬܿܥ̣ܝܼܪ ܩܲܪܕܵܓܼ ܡ̣ܢ ܫܸܢܬܹܗ: ܕܚܸܠ̣ ܕܚܠܬܼܵܐ ܪܲܒܿܬܼܵܐ: ܘܐܸܫܬܲܥ̣ܝܹܗ ܠܚܸܠܡܵܐ ܩܕܼܵܡ ܐܸܡܹܗ ܒܲܝܬܵܐܝܼܬܼ. ܐܵܡ̇ܪܵܐ ܠܹܗ ܐܸܡܹܗ: ܗ̤ܘܲܝܬܿ ܝܵܕܲܥ̇ ܒܹܪܝ: ܠܵܐ ܬܲܥܡܸܠ ܠܥܲܡܵܐ ܕܲܟܼܪܸ̈ܤܛܵܝܵܢܹܐ. ܡܸܛܠ ܕܫܲܪܝܼܪܵܐ ܠܝܼ: ܕܐ̄ܢܵܫܵܐ ܐܸܢܘܿܢ ܕܲܠܚܲܕܼ ܐܲܠܵܗܵܐ ܫܲܪܝܼܪܵܐ ܤܵܓܼ̇ܕܲܝܼܢ: ܘܐܲܠܵܗܗܘܿܢ ܚ̣ܵܘܝܼ ܠܵܟܼ ܚܸܠܡܵܐ ܗܵܢܵ. ܗ̤ܘ ܕܹܝܢ ܠܵܐ ܐܲܝ̣ܬܿܝܼ ܥܲܠ ܒܵܠܹܗ.

ܓܲܒܼܪܵܐ ܕܹܝܢ ܚܲܕܼ ܛܘܼܒܼܵܢܵܐ ܐܝܼܬܼ ܗ̄ܘ̣ܵܐ: ܥܲܒܼܕܝܼܿܫܘܿܥ ܫܡܹܗ ܗ̄ܘ̣ܵܐ. ܘܥܵܡܲܪ ܗ̄ܘ̣ܵܐ ܒܲܡܥܲܪܬܼܵܐ ܚܕܼܵܐ ܒܛܘܼܪܵܐ ܚܲܕܼ ܕܒܲܐܬܼܪܵܐ ܕܒܹܝܬܼ ܒܓܼܵܫ. ܘܓܲܒܼܪܵܐ ܗ̄ܘ̣ܵܐ ܪܲܒܵܐ ܒܕܼܘܼܒܵܪ̈ܵܘܗܝ: ܘܲܒܼܓܸܠܝܵܢܹ̈ܐ pb. 447 ܐܲܠܵܗܵܝܹ̈ܐ ܡܸܬܼܒܲܤܲܡ ܗ̄ܘ̣ܵܐ. ܘܡܵܪܝܵܐ ܐܸܡ݂ܲܪ ܠܹܗ ܒܚܸܙܘܵܐ: ܩܘܼܡ ܚܘܿܬܼ ܘܐܸܬܼܚܲܙܝ ܠܩܲܪܕܵܓܼ ܡܲܪܙܒܼܵܢܵܐ: ܡܸܛܠ ܕܒܼܐܝܼܕܲܝ̈ܟ ܨܵܐܹ̇ܕ ܐ̄ܢܵܐ ܠܹܗ ܠܒܲܝܬܵܝܘܼܬܝ: ܤܲܓܿܝܼ ܓܹܝܪ ܐܝܼܬܼ ܠܹܗ ܕܢܸܚܲܫ ܡܸܛܠ ܫܹܡܝ. ܩܵܡ̣ ܕܹܝܢ ܛܘܼܒܼܵܢܵܐ ܥܲܒܼܕܝܼܫܘܿܥ: ܘܲܠ̣ܒܲܟܼ ܚܘܼܛܪܹܗ ܒܐܝܼܕܹܗ: ܘܲܛ̣ܥܲܢ ܒܬܲܪܡܵܠܵܐ ܙܥܘܿܪܬܵܐ ܐܹܘܲܢܓܲܠܝܼܘܿܢ ܩܲܕܿܝܼܫܵܐ: ܘܲܢ̣ܚܸܬܼ ܐܲܝܟܼ ܕܐܸܬܼܦ̣ܩܸܕܼ ܠܹܗ. ܘܲܒܼܚܲܕܼ ܡ̣ܢ ܝܵܘ̈ܡܵܬܼܵܐ: ܟܲܕܼ ܢܵܦܹ̇ܩ ܗ̄ܘ̣ܵܐ ܩܲܪܕܵܓܼ ܠܐܸܤܛܵܕܼܝܼܘܿܢ ܠܡܸܫܬܿܢܵܝܘܼ ܒܐܸܤܦܹܪܵܐ: ܗܵܐ ܩܲܕܿܝܼܫܵܐ ܥܲܒܼܕܝܼܫܘܿܥ ܐܲܪܲܥ̣ ܒܹܗ: ܘܲܦ̣ܤܲܩ ܐܘܼܪܚܵܐ ܩܕܼܵܡܵܘܗܝ ܘܲܥ̣ܒܲܪ. ܗ̤ܘ ܕܹܝܢ ܟܲܕܼ ܚ̣ܙܵܝܗܝ ܕܲܥ̣ܒܲܪ ܩܕܼܵܡܵܘܗܝ: ܐܸܬܼܚܲܡܲܬܼ ܛܵܒܼ. ܘܐܸܡ݂ܲܪ ܠܕܼܵܐܬܹ̇ܝܢ ܥܡܹܗ: ܦܸܓܼܥܵܐ ܗ̣̄ܘ ܒܝܼܫܵܐ ܗܵܢܵܐ ܓܲܒܼܪܵܐ. ܘܲܦ̣ܩܲܕܼ ܠܦܵܠܚܹ̈ܐ ܬܪܹܝܢ: ܕܢܸܡܚܘܿܢܵܝܗܝ ܠܩܲܕܝܼܫܵܐ ܡܵܪܝ ܥܲܒܼܕܝܼܫܘܿܥ ܥܲܠ ܐܲܦܵܘ̈ܗܝ. ܘܟܲܕܼ ܢܲܓܿܕܘܼܗܝ ܡܲܪܝܼܪܵܐܝܼܬܼ: ܦ̣ܩܲܕܼ ܕܢܸܬܼܢܛܲܪ ܥܲܕܼ ܦܵܩܹ̇ܕܼ ܡܸܛܠܵܬܹܗ ܡܸܕܸܿܡ ܕܙܵܕܹ̇ܩ. ܗ̤ܘ ܕܹܝܢ ܩܲܪܕܵܓܼ ܡܸܢܕܪܹܫ ܠܒܲܝܬܹܗ ܥ̣ܛܲܦ: ܘܟܲܕܼ ܩܲܠܝܼܠ ܩ̣ܵܘܝܼ: ܩܵܡ̣ ܪܟܸܒܼ ܡܸܢܕܪܹܫ ܕܢܹܐܙܲܠ ܠܐܸܤܛܵܕܝܼܘܿܢ. ܩܲܕܝܼܫܵܐ ܕܹܝܢ ܥܲܒܼܕܝܼܫܘܿܥ ܪܬܲܚ̣ ܒܲܛܢܵܢܵܐ ܕܐܲܠܵܗܵܐ: ܘܐܲܪܝܼܡ ܐܝܼܕܹܗ ܘܲܪܫܲܡ̣ ܐܵܬ̤ܵܐ ܕܲܨܠܝܼܒܼܵܐ ܘܐܸܡ݂ܲܪ: ܡܵܪܝܵܐ ܐܲܠܵܗܵܐ ܚܲܝܠܬܼܵܢܵܐ: ܚܵܘܵܝܗܝ ܫܘܼܒܼܚܵܟܼ: ܘܲܓܼܠܝܼ ܠܹܗ ܚܲܝܠܵܟܼ. ܕܢܸܕܿܥܵܟܼ ܕܐܲܢ̄ܬܿ ܐܲܢ̄ܬܿ ܐܲܠܵܗܵܐ ܫܲܪܝܼܪܵܐ: ܘܠܲܝܬܿ ܐ̄ܚܪܹܝܢ ܠܒܲܪ ܡܸܢܵܟܼ: ܐܲܝܟܼ ܕܚ̣ܵܘܝܼܬܼܵܢܝ ܒܓܸܠܝܵܢܵܐ. ܟܲܕܼ ܕܹܝܢ ܡܲܛ̣ܝܼܘ ܠܐܸܤܛܵܕܝܼܘܿܢ: ܘܫܲܪܝܼܘ ܕܢܸܛܪܘܿܢ ܠܐܸܤܦܹܪܵܐ ܟܲܕܼ ܡܲܪܗܛܝܼܢ ܒܪ̈ܲܟܼܫܵܐ: ܕܒܸܩܲܬ̤ ܠܵܗ̇ ܐܸܤܦܹܪܵܐ ܒܐܲܪܥܵܐ: ܘܠܵܐ pb. 448 ܐܸܫܟܲܚܘ ܕܲܢܙܝܼܥܘܼܢܵܗ̇ ܡ̣ܢ ܕܘܼܟܿܬܼܵܗ̇. ܘܡܸܚܕܼܵܐ ܦ̣ܩܲܕܼ ܠܚܲܕܼ ܡ̣ܢ ܦܵܠܚܹ̈ܐ: ܕܢܸܚܘܿܬܼ ܢܸܤܒܼܝܼܗ̇ ܠܐܸܤܦܹܪܵܐ ܒܐܝܼܕܹܗ: ܘܲܠܪܘܼܚܩܵܐ ܢܸܙܢܩܼܝܼܗ̇. ܘܟܲܕܼ ܫܲܩ̣ܠܵܗ̇ ܡ̣ܢ ܐܲܪܥܵܐ ܘܲܒܼܚܲܝܠܵܐ ܫ̣ܕܵܗ̇: ܩܕܼܵܡ ܪܸ̈ܓܼܠܵܘܗܝ ܢܸܦ̣ܠܲܬ̤. ܘܟܼܠܗܘܿܢ ܦܵܠܚܵܘ̈ܗܝ ܤܲܥ̣ܪܘܼܗ̇ ܠܗܵܕܹܐ ܚܲܕܼ ܒܵܬܲܪ ܚܲܕܼ: ܘܡܸܕܸܡ ܠܵܐ ܐܵܘܼܬܲܪܘ. ܗܵܝܕܹܿܝܢ ܬܡܲܗ̣ܘ ܟܲܕܼ ܐܵܡ̇ܪܝܼܢ: ܕܫܲܪܝܼܪܵܐܝܼܬܼ ܓܲܒܼܪܵܐ ܗܵܘ̇ ܕܲܦܓܲܥ̣ ܒܲܢ ܚܲܪܵܫܵܐ ܐܝܼܬܼܵܘܗܝ: ܘܗ̤ܘ ܒܚܲܪ̈ܫܵܘܗܝ ܐܲܤ̣ܪܵܗ̇ ܠܐܸܤܦܹܪܲܢ ܘܦܲܪܓܠܵܗ̇ ܠܚܲܕܘܼܬܲܢ. ܥܵܢ̣ܵܐ ܕܹܝܢ ܚܲܕܼ ܡܸܢܗܘܿܢ ܘܐܸܡ݂ܲܪ: ܕܟܲܕܼ ܡܛܲܝܒܼܝܼܢ ܗ̣̄ܘܲܝܢ ܠܡܸܪܟܲܒܼ: ܐܸܢܵܐ ܚܙܹ̇ܝܬܹܗ ܠܓܲܒܼܪܵܐ ܗܵܘ̇: ܕܐܲܪܝܼܡ ܐܝܼܕܹܗ ܕܝܲܡܝܼܢܵܐ: ܘܲܥ̣ܒܲܕܼ ܕܡܘܼܬܼ ܨܠܝܒܼܵܐ ܕܲܟܼܪܸ̈ܤܛܝܵܢܹܐ. ܘܤܸܦܘܵܬܹ̈ܗ ܡܸܬܿܬܿܙܝܼ̈ܥܵܢ ܗ̣̄ܘܲܝ̈: ܐܲܝܟܼ ܗܵܘ̇ ܕܡܸܕܲܡ ܡܠܲܚܸܫ ܗ̄ܘ̣ܵܐ.

ܗܵܝܕܹܿܝܢ ܥ̣ܛܲܦ ܡܲܪܙܒܼܵܢܵܐ ܘܥܲܠ̣ ܠܒܲܝܬܹܗ: ܟܲܕܼ ܬܵܡܲܗ ܘܡܸܬܿܕܲܡܲܪ ܥܲܠ ܡܸܕܸܿܡ ܕܲܗܘ̤ܵܐ: ܗ̤ܘ ܘܟܼܠܗܘܿܢ ܕܥܲܡܹܗ. ܘܡܸܚܕܼܵܐ ܕܝܸܬܸܒܼ: ܦ̣ܩܲܕܼ ܘܐܲܥ̣ܠܘܼܗܝ ܩܕܼܵܡܵܘܗܝ ܠܩܲܕܿܝܼܫܵܐ ܥܲܒܼܕܝܼܫܘܿܥ. ܘܫܲܐ̣ܠܹܗ ܙܥܼܦܵܐܝܼܬܼ ܘܐܸܡ݂ܲܪ ܠܹܗ: ܡ̣ܢ ܐܲܝܡܸܟܵܐ ܐܲܢ̄ܬܿ: ܓܲܒܼܪܵܐ؟ ܘܡܵܪܵܘ ܥ̇ܒܼܵܕܵܟܼ؟ ܥܢ̣ܵܐ ܕܹܝܢ ܛܘܼܒܼܵܢܵܐ ܥܲܒܼܕܝܼܫܘܿܥ ܘܐܸܡ݂ܲܪ ܠܹܗ: ܐܲܝܟܼ ܕܲܫܡܝܼܥ ܠܝܼ ܡ̣ܢ ܐܲܒܼܵܗܲܝ̈: ܡ̣ܢ ܚܲܙܵܐ ܩܪܝܼܬܼܵܐ ܕܒܲܐܬܼܪܵܐ ܕܐܵܬܼܘܿܪ̈ܵܝܹܐ ܐܝܼܬܲܝܗܘܿܢ ܗ̄ܘ̣ܵܘ. ܘܡܸܛܠ ܕܲܟܼܪܸ̈ܤܛܝܵܢܹܐ pb. 449 ܗ̄ܘ̣ܵܘ: ܐܸܬܿܛܪܸܕܼܘ ܡ̣ܢ ܚܲܢ̈ܦܹܐ ܛܵܥܲܝ̈ܵܐ: ܘܐܸܙܲܠܘ ܥ̣ܡܲܪܘ ܒܲܬܼܡܵܢܘܿܢ ܩܪܝܼܬܼܵܐ ܕܒܲܐܬܼܪܵܐ ܕܩܲܪ̈ܕܘܵܝܹܐ. ܠܝܼ ܕܹܝܢ ܕܘܼܟܿܬܼܵܐ ܝܼܕܼܝܼܥܬܼܵܐ ܘܒܹܝܬܼ ܡܲܥܡܪܵܐ ܦܪܝܼܫܵܐ ܠܲܝܬܿ ܠܝܼ. ܡܸܛܠ ܕܫܸܡܥܹ̇ܬܼ ܡ̣ܢ ܡܫܝܼܚܵܐ ܡܵܪܝ: ܗܵܘ̇ ܕܐܸܬ݂ܼܵܐ ܘܦܲܪܩܲܢ ܒܡܵܘܬܹܗ ܩܲܕܝܼܫܵܐ: ܕܠܲܝܬܿ ܗ̄ܘ̣ܵܐ ܠܹܗ ܐܲܝܟܵܐ ܕܢܸܤܡܘܿܟܼ ܪܹܫܹܗ: ܟܲܕܼ ܛܵܒܼ ܫܡܲܝܵܐ ܘܐܲܪܥܵܐ: ܘܥܸܠܵܝܹ̈ܐ ܘܬܲܚ̈ܬܵܝܹܐ: ܕܝܼܠܹܗ ܐܸܢܘܿܢ: ܘܗ̤ܘ ܐܲܚܝܼܕܼ ܘܲܡܕܲܒܲܪ ܘܲܡܢܲܛܲܪ ܠܗܘܿܢ. ܥ̇ܒܼܵܕܼܝ ܕܹܝܢ ܐܝܼܬܼܵܘܗܝ: ܕܲܕܠܵܐ ܫܲܠܘܵܐ ܐܲܤܸܩ ܬܸܫܒܿܘܿܚܬܼܵܐ ܘܐܸܦܪܘܿܥ ܬܵܘܕܝܼܬܼܵܐ ܠܐܲܠܵܗܵܐ ܥܵܒܼ̇ܘܿܕܲܢ ܘܲܡܦܲܪܢܤܵܢܲܢ: ܗܵܘ̇ ܕܲܒܼܪܵܢ ܒܨܲܠܡܹܗ ܘܲܩܪܵܬ ܒܲܕܼܡܘܼܬܹܗ: ܘܦܲܪܩܲܢ ܒܝܼܚܝܼܕܹܗ ܕܲܠ̣ܒܸܫ ܦܲܓܼܪܲܢ: ܘܝܲܗ̣̄ܒܼ ܠܲܢ ܝܼܕܲܥܬܼܵܐ ܘܤܘܼܟܵܠܑܵܐ: ܕܠܵܐ ܢܸܚܫܘܿܒܼ ܐܲܠܵܗܹ̈ܐ ܠܒܸܪ̈ܝܵܬܼܵܐ: ܘܠܵܐ ܢܸܬܸܿܠ ܤܸܓܼܕܬܼܵܐ: ܕܠܹܗ ܒܲܠܚܘܿܕܼܵܘܗܝ ܡܸܬܿܬܿܚܝܼܒܼܵܐ: ܠܒܸܪ̈ܝܵܬܼܵܐ ܕܡܸܢܹܗ ܗ̤ܘܲܝ̈ ܘܐܸܬܿܬܲܩܲܢ: ܐܲܟܼܘܵܬܼܟܼܘܿܢ ܚܲܢ̈ܦܹܐ ܛܵܥܲܝ̈ܐ. ܘܟܲܕܼ ܫܡܲܥ̣ ܩܲܪܕܵܓܼ ܐܸܬܼܚܲܡܲܬܼ ܛܵܒܼ: ܘܲܦ̣ܩܲܕܼ ܕܢܸܡܚܘܿܢܵܝܗܝ ܠܩܲܕܿܝܼܫܵܐ ܥܲܠ ܦܘܼܡܹܗ. ܟܲܕܼ ܕܹܝܢ ܛܘܼܒܼܵܢܵܐ ܥܲܒܼܕܝܼܫܘܿܥ ܡܲܪܝܼܪܵܐܝܼܬܼ ܒܵܠܲܥ̇̄ ܗ̄ܘ̣ܵܐ: ܥܲܝܢܵܘ̈ܗܝ ܒܲܡܫܲܝܵܐ ܚܵܝܪ̈ܵܢ ܗ̣̄ܘܲܝ̈. ܘܟܲܤܝܵܐܝܼܬܼ ܠܐܲܠܵܗܵܐ ܡܨܲܠܸܐ ܗ̄ܘ̣ܵܐ: ܕܢܸܓܼܡܘܿܪ ܒܲܥ̇ܒܼܵܕܵܐ ܗܵܘ̇ ܡܸܕܸܿܡ ܕܐܸܡ݂ܲܪ ܠܹܗ ܒܓܸܠܝܵܢܵܐ. ܘܐܸܡ݂ܪ ܠܹܗ ܩܲܪܕܵܓܼ ܙܥܝܼܦܵܐܝܼܬܼ: ܠܡܵܢܵܐ ܩܵܪܹܐ ܐܲܢ̄ܬܿ pb. 450 ܠܲܢ ܤܵܓܼܕܲܝ̈ ܠܒܸܪ̈ܝܵܬܼܵܐ: ܐܘܿ ܤܵܒܼܵܐ ܤܲܟܼܠܵܐ؟ ܛܘܼܒܼܵܢܵܐ ܕܹܝܢ ܥܲܒܼܝܼܫܘܿܥ ܫܬܸܩ̣: ܘܠܵܐ ܦܲܢ̣ܝܼ ܠܹܗ ܦܸܬܼܓܼܵܡܵܐ. ܘܐܸܡ݂ܲܪ ܠܹܗ ܩܲܪܕܵܓܼ: ܠܵܐ ܡܦܲܢܸܐ ܐܲܢ̄ܬܿ ܠܝܼ ܦܸܬܼܓܼܵܡܵܐ؟ ܠܵܐ ܝܵܕܲܥ̇ ܐܲܢ̄ܬܿ ܕܥܲܠ ܡܵܘܬܵܟܼ ܘܥܲܠ ܚܲܝܲܝ̈ܟ ܫܲܠܝܼܛ ܐ̄ܢܵܐ؟ ܛܘܼܒܼܵܢܵܐ ܕܹܝܢ ܥܲܒܼܕܝܼܫܘܿܥ ܐܸܡ݂ܲܪ ܠܹܗ: ܤܵܒܼ̇ܪ ܐ̄ܢܵܐ ܡܵܪܝ: ܕܗܵܘ̇ ܕܥܲܠ ܦܘܼܡܹܗ ܡܵܚܹ̇ܝܢ ܠܹܗ: ܗܵܕܹܐ ܡܲܠܦܝܼܢ ܠܹܗ: ܕܠܵܐ ܙܵܕܹܩ ܠܹܗ ܕܲܢܡܲܠܸܠ: ܘܡܸܛܠ ܗܵܕܹܐ ܠܵܐ ܦܲܢܝܼ̇ܬܼ ܦܸܬܼܓܼܵܡܵܐ ܠܪܲܒܿܘܼܬܼܵܟܼ. ܗܵܝ̇ ܕܹܝܢ ܕܐܸܡܲܪܬܿ: ܕܥܲܠ ܡܵܘܬܝ ܘܥܲܠ ܚܲܝܲܝ̈ ܫܲܠܝܼܛ ܐܲܢ̄ܬܿ: ܠܵܐ ܫܲܪܝܼܪܵܐ. ܠܵܟܼ ܐܝܼܬܼ ܠܵܟܼ ܫܘܼܠܛܵܢܵܐ ܕܬܸܩܛܘܿܠ ܦܲܓܼܪܵܐ: ܘܗܵܢܵܐ ܠܵܘ ܡܵܘܬܵܐ ܚܫܝܼܒܼ ܠܲܢ ܥܲܒܼܕܵܘ̈ܗܝ ܕܲܡܫܝܼܚܵܐ ܘܤܵܓܼܘܿ݁ܕܼܵܘ̈ܗܝ ܕܲܨܠܝܼܒܼܵܐ: ܐܸܠܵܐ ܚܲܝܹ̈ܐ ܫܲܪܝܼܪܹ̈ܐ ܘܠܵܐ ܡܵܝ̈ܘܿܬܹܐ. ܥܲܠ ܢܲܦܫܝ ܕܹܝܢ ܘܥܲܠ ܚܲܝܲܝ̈ ܕܒܲܡܫܝܼܚܵܐ: ܐܵܦ ܠܵܐ ܚܲܕܼ ܫܘܼܠܛܵܢܵܐ ܐܝܼܬܼ ܠܵܟܼ. ܘܠܲܢ ܡܵܪܲܢ ܠܲܒܸܒܼ ܘܦܲܩܸܕܼ ܒܲܤܒܲܤܬܹܗ ܟܲܕܼ ܐܵܡܲ݁ܪ: ܕܠܵܐ ܬܸܕܚܠܘܼܢ ܡ̣ܢ ܐܲܝܠܹܝܢ ܕܩܵܛ̇ܠܝܼܢ ܦܲܓܼܪܵܐ: ܢܲܦܫܵܐ ܕܹܝܢ ܠܵܐ ܡܸܫܟܿܚܝܼܢ ܠܡܸܩܛܲܠ: ܕܚܲܠܘ ܕܹܝܢ ܡܹܢܝ: ܕܡܸܫܟܲܚ ܐ̄ܢܵܐ ܕܲܠܢܲܦܫܵܐ ܘܲܠܦܲܓܼܪܵܐ ܐܵܘܒܸܕܼ ܒܓܹܗܲܢܵܐ. ܒܪܲܡ ܐܸܢ ܨܵܒܹܐ ܐܲܢ̄ܬܿ ܕܐܹܡܲܠܸܠ ܥܲܡܵܟܼ: ܐܲܢܝܼܚ ܪܘܼܓܼܙܵܟܼ ܘܫܲܝܸܢ ܢܲܦܫܵܟܼ: ܘܗܲܒܼ ܠܝܼ ܡܲܫܡܲܥܬܼܵܟܼ ܒܲܤܝܼܡܵܐܝܼܬܼ: ܘܲܦܩܘܿܕܼ ܕܠܵܐ ܬܘܼܒܼ ܡܸܢܚܘܿܢܵܢܝ.

ܗܵܝܕܹܝܢ ܝܼܡ̣ܵܐ ܠܹܗ ܩܲܪܕܵܓܼ ܟܲܕܼ ܐܵܡܲ݁ܪ: ܕܡܲܠܸܠ ܡܸܕܸܿܡ ܕܨܵܒܹ̇ܐ ܐܲܢ̄ܬܿ: ܘܬܼܘܼܒܼ ܠܲܝܬܿ ܕܲܡܵܚܹ̇ܐ ܠܵܟܼ. ܩܲܕܿܝܼܫܵܐ ܕܹܝܢ ܥܲܒܼܕܝܼܫܘܿܥ ܥܢ̣ܵܐ pb. 451 ܘܐܸܡ݂ܲܪ ܠܹܗ: ܫܵܠܹ̇ܡ ܐܲܢ̄ܬܿ ܠܗܵܕܹܐ: ܕܟܼܠ ܕܐܝܼܬܼܝܵܐ ܗ̄ܘ̣ ܘܠܵܐ ܗ̄ܘ̣ܵܐ ܥܒܼܝܼܕܵܐ ܗ̣̄ܘ: ܗ̤ܘܝܘܼ ܐܲܠܵܗܵܐ ܫܲܪܝܼܪܵܐ؟ ܐܵܡܲ݁ܪ ܠܹܗ ܡܲܪܙܒܼܵܢܵܐ: ܐܹܝܢ ܫܵܠܹ̇ܡ ܐ̄ܢܵܐ. ܐܵܡܲ݁ܪ ܠܹܗ ܛܘܼܒܼܵܢܵܐ: ܘܡܵܘܕܹܐ ܐܲܢ̄ܬܿ: ܕܟܼܠ ܕܲܥܒܼܝܼܕܼܵܐ ܗ̄ܘ̣ ܘܠܵܐ ܗ̄ܘ̣ܵܐ ܐܝܼܬܼܝܵܐ ܗ̣̄ܘ: ܗܵܘ̇ ܒܪܝܼܬܼܵܐ ܗ̣̄ܘ؟ ܐܵܡܲ݁ܪ ܠܹܗ ܡܲܪܙܒܼܵܢܵܐ: ܐܹܝܢ ܗܵܟܲܢܵܐ ܡܵܘܕܹܐ ܐ̄ܢܵܐ. ܘܬܼܘܼܒܼ ܐܸܡ݂ܲܪ ܠܹܗ ܛܘܼܒܼܵܢܵܐ: ܘܝܵܕܲܥ̇ ܐܲܢ̄ܬܿ ܕܲܠܒܸܪ̈ܝܵܬܼܵܐ ܠܵܐ ܙܵܕܹ̇ܩ ܠܡܸܤܓܲܕ: ܘܟܼܠ ܕܤܵܓܹ̇ܕܼ ܠܒܸܪ̈ܵܢܬܼܵܐ: ܠܐܲܠܵܗܵܐ ܒܵܪܘܿܝܗܹܝܢ ܡܲܪܓܸܿܙ؟ ܐܵܡܲ݁ܪ ܠܹܗ ܡܲܪܙܒܼܵܢܵܐ: ܐܹܝܢ ܡܵܪܝ: ܫܲܪܝܼܪܵܐܝܼܬܼ ܐܸܡ݂ܲܪܬܿ: ܘܗܵܟܲܢܵܐ ܐܝܼܬܹܝܗ̇. ܐܸܠܵܐ ܚܵܘܵܢܝ: ܡܲܢ̣ܘܼ ܕܤܵܓܹ̇ܕܼ ܠܒܸܪ̈ܝܵܬܼܵܐ؟ ܐܵܡܲ݁ܪ ܠܹܗ ܛܘܼܒܼܵܢܵܐ: ܐܲܢ̄ܬܿ ܘܟܼܠܗܘܿܢ ܚܲܢ̈ܦܹܐ ܚܲܒܼܪ̈ܲܝܟ: ܠܒܸܪ̈ܝܵܬܼܵܐ ܤܵܓܼ̇ܕܲܝܢ ܐܢ̄ܬܿܘܼܿܢ. ܐܵܡܲ݁ܪ ܠܹܗ ܡܲܪܙܒܼܵܢܵܐ: ܐܸܢ ܬܚܵܘܹܝܢܝ ܕܲܠܒܸܪ̈ܝܵܬܼܵܐ ܤܵܓܹ̇ܕܼ ܐ̄ܢܵܐ ܘܠܲܐܠܵܗܵܐ ܡܲܪܓܸܙܢܵܐ: ܚܲܕܼܝܵܐܝܼܬܼ ܫܵܠܹ̇ܡ ܐ̄ܢܵܐ ܠܵܟܼ: ܘܒܼܵܬܲܪ ܝܘܼܠܦܵܢܵܟܼ ܐܸܬܸܐ: ܘܛܲܝܒܿܘܼܬܼܵܐ ܪܹܫܵܝܬܼܵܐ ܠܵܟܼ ܚܵܫܹ̇ܒܼ ܐ̄ܢܵܐ. ܐܸܢ ܕܹܝܢ ܠܵܐ ܬܚܵܘܹܝܢܝ: ܕܲܥ ܘܲܚܙܝܼ: ܕܡܨܲܥܵܪܘܼ ܡܨܲܥܲܪ ܐܲܢ̄ܬܿ ܠܝܼ. ܐܵܡܲ݁ܪ ܠܹܗ ܛܘܼܒܼܵܢܵܐ: ܠܵܐ ܤܵܓܹ̇ܕܼ ܐܲܢ̄ܬܿ ܠܫܸܡܫܵܐ ܘܲܠܤܲܗܪܵܐ ܘܲܠܢܘܼܪܵܐ ܘܲܠܡܲܝ̈ܵܐ ܘܠܵܐܲܐܲܪ ܘܠܲܐܪܥܵܐ: ܘܐܲܠܵܗܹ̈ܐ ܘܐܲܠܵܗ̈ܬܼܵܐ ܩܵܪܹܐ ܐܲܢ̄ܬܿ ܠܗܘܿܢ؟ ܐܵܡܲ݁ܪ ܠܹܗ ܩܲܪܕܵܓܼ: ܐܹܝܢ ܤܵܓܹ̇ܕܼ ܐ̄ܢܵܐ ܠܗܘܿܢ: ܡܸܛܠ ܕܐܝܼܬܼܿܝܹ̈ܐ ܐܸܢܘܿܢ ܘܠܵܘ ܥܒܼܝܼ̈ܕܹܐ. ܐܵܡܲ݁ܪ ܠܹܗ ܛܘܼܒܼܵܢܵܐ: ܡ̣ܢ ܐܲܝܟܵܐ ܐܵܪܵܐ ܐܸܫܟܲܚܬܿܘܿܢ: ܕܢܲܗܝܼܪܹ̈ܐ ܐܝܼܬܼܝܹ̈ܐ ܐܸܢܘܿܢ ܘܠܵܘ ܥܒܝܼܝܼ̈ܕܹܐ؟ ܐܵܡܲ݁ܪ ܠܹܗ ܩܲܪܕܵܓܼ: ܡ̣ܢ ܪ̈ܲܗܛܗܘܿܢ ܐܲܡܝܼܢܵܐ: ܘܡܸܛܠ ܠܵܐ ܫܘܼܚܠܵܦܵܐ ܕܲܟܼܝܵܢܗܘܿܢ: ܘܡ̣ܢ ܗܵܝ pb. 452 ܕܲܡܟܲܬܿܪܝܼܢ ܒܚܲܝܠܵܐ ܕܲܟܼܝܵܢܗܘܿܢ ܘܠܵܐ ܡܸܫܬܲܚܠܦܝܼܢ ܐܲܝܟܼ ܫܲܪܟܵܐ: ܘܲܠܥܸܠ ܒܪܵܘܡܵܐ ܤܝܼܡܝܼܢ. ܐܵܡܲ݁ܪ ܠܹܗ ܛܘܼܒܼܵܢܵܐ: ܗܵܠܹܝܢ ܕܐܸܡ݂ܲܪܬܿ: ܒܬܼܘܼܩܵܢܗܘܿܢ ܗ̣̄ܘ ܫܩܲܠ̣ܘ ܡ̣ܢ ܒܵܪܘܿܝܗܘܿܢ: ܘܠܵܘ ܩܘܼܠܵܤܵܐ ܗ̣̄ܘ ܕܝܵܬܼܗܘܿܢ. ܕܠܵܘ ܕܹܝܢ ܐܝܼܬܝܹ̈ܐ ܐܸܢܘܿܢ: ܝܼܕܼܝܼܥܵܐ ܡ̣ܢ ܗܵܝ̇ ܕܐܵܦܠܵܐ ܚܝܹ̈ܐ ܐܸܢܘܿܢ. ܘܐܸܢ ܐܵܡܲ݁ܪ ܐܲܢ̄ܬܿ ܕܚܲܝܹ̈ܐ ܐܸܢܘܿܢ: ܐܹܫܲܠܵܟܼ ܦܲܢܵܐ ܠܝܼ: ܐܲܝܠܹܝܢ ܟܲܝ ܚܲܝܹ̈ܐ ܩܢܹܝܢ؟ ܕܚܲܝܵܘ̈ܬܼܵܐ ܐܵܘ ܕܲܡܠܝܼ̈ܠܹܐ؟ ܐܸܢ ܚܲܝܹ̈ܐ ܕܚܲܝ̈ܘܵܬܼܵܐ ܩܢܹܝܢ: ܠܡܵܢܵܐ ܠܵܐ ܡܸܤܬܲܝܒܿܪܝܼܢ ܐܲܝܟܼ ܚܲܝ̈ܘܵܬܼܵܐ؟ ܐܵܘ ܕܲܠܡܵܐ ܡܠܝܼ̈ܠܹܐ ܐܸܢܘܿܢ ܘܦܵܪ̈ܘܿܫܹܐ؟ ܘܐܸܢ ܡܠܝܼ̈ܠܹܐ ܘܦܵܪ̈ܘܿܫܹܐ ܐܵܡܲ݁ܪ ܐܲܢ̄ܬܿ ܠܗܘܿܢ: ܘܐܲܝܟܲܢ ܠܵܐ ܩܵܦ̇ܤܝܼܢ ܒܲܙܒܲܢ ܚܲܡܝܼܡܘܼܬܼܗܘܿܢ ܘܢܵܚܝܼ̇ܢ ܡ̣ܢ ܡܲܪܕܝܼܬܼܗܘܿܢ؟ ܐܸܠܘܼ ܓܹܝܪ ܡܠܝܼܠܵܐ ܗ̄ܘ̣ܵܐ ܫܸܡܫܵܐ: ܒܤܲܬܼܘܵܐ ܡܒܲܛܸܠ ܗ̄ܘ̣ܵܐ ܠܥܘܼܙܵܐ ܕܥܲܪܝܵܐ: ܘܲܒܼܩܲܝܛܵܐ ܠܵܐ ܡܲܤܓܸܐ ܗ̄ܘ̣ܵܐ ܚܲܡܝܼܡܘܼܬܹܗ: ܘܒܲܐܬܼܪܵܐ ܕܩܲܪܝܼܪ ܡ̣ܢ ܚܲܒܼܪܹܗ ܡܫܲܝܸܢ ܗ̄ܘ̣ܵܐ: ܘܐܲܝܟܵܐ ܕܚܲܡܝܼܡ ܩܵܦܹ̇ܣ ܗ̄ܘ̣ܵܐ ܙܲܠܝܼܩܵܘ̈ܗܝ: ܘܲܒܼܪܲܗܛܹܗ ܐܲܡܝܼܢܵܐ ܠܵܐܹ̇ܐ ܗ̄ܘ̣ܵܐ ܘܚܵܐܹ̇ܫ. ܟܠ ܓܹܝܪ ܕܚܲܝ ܘܡܸܬܼܚܙܸܐ ܘܡܸܬܿܬܿܙܝܼܥ ܡ̣ܢ ܵܬܹܗ: ܗܵܢܵܐ ܐܵܦ ܠܵܐܹ̇ܐ. ܘܟܼܠ ܕܠܵܐ ܚܲܝ ܘܠܵܐ ܠܵܐܹ̇ܐ: ܗܵܢܵܐ ܡ̣ܢ ܐ̄ܚܪܹܢܵܐ ܡܸܬܿܬܿܙܝܼܥ. ܟܹܐܦܵܐ ܘܓܹܐܪܵܐ ܘܥܵܓܹܠܬܼܵܐ ܡ̣ܢ ܐ̄ܚܪ̈ܵܢܹܐ ܡܸܬܿܬܿܙܝܼܥܝܼܢ: ܘܠܵܐ ܠܵܐܹ̇ܝܢ: ܡܸܛܠ ܕܐܵܦ ܠܵܐ ܚܲܝܼܢ. ܘܦܵܪܲܚܬܼܵܐ pb. 453 ܘܚܲܝ̈ܘܵܬܼܵܐ ܡ̣ܢ ܝܵܬܼܗܹܝܢ ܡܸܬܿܬܿܙܝܼ̈ܥܵܢ ܘܠܵܐܝ̈ܢ: ܡܸܛܠ ܕܐܵܦ ܚܲܝ̈ܢ. ܐܸܬ ܗܵܟܹܝܠ ܡ̣ܢ ܝܵܬܼܗܘܿܢ ܡܸܬܿܬܿܙܝܼܥܝܼܢ ܢܲܗܝܼܪܹ̈ܐ ܥܲܡ ܐܸܤܛܘܼ̈ܟܼܤܹܐ: ܐܵܦ ܠܵܐܹ̇ܝܢ ܘܚܵܐܫܝܼܢ: ܡܸܛܠ ܕܡܸܬܼܚܲܙܝܵܢܹ̈ܐ ܐܸܢܘܿܢ. ܐܸܠܵܐ ܡܸܛܠ ܕܠܵܘ ܡ̣ܢ ܝܵܬܼܗܘܿܢ ܡܸܬܿܬܿܙܥܝܼܢ: ܐܲܝܟܼ ܕܐܵܦ ܓܲܠܝܵܐ ܗ̣̄ܝ ܕܚܲܪ̈ܫܹܐ ܐܸܢܘܿܢ ܘܲܕܼܠܵܐ ܢܦܸܫ: ܘܡܸܛܠ ܗܵܕܹܐ ܠܵܐ ܠܐܹ̇ܝܢ. ܘܲܒܼܚܲܝܵܐ ܕܲܐ̄ܚܪ̈ܵܢܹܐ ܡܸܬܿܬܿܙܝܼܥܝܼܢ: ܒܲܕܼܡܘܼܬܼ ܟܹܐܦܵܐ ܘܓܹܐܪܵܐ ܘܥܵܓܹܠܝܵܬܼܵܐ. ܗܵܢ̇ܘܿܢ ܡ̇ܢ ܡ̣ܢ ܐܲܠܵܗܵܐ ܡܸܬܿܬܿܙܝܼܥܝܼܢ ܗܵܢܵܘ ܕܹܝܢ ܢܲܗܝܼܪܹ̈ܐ ܘܐܸܤܛܘܼ̈ܟܼܤܹܐ: ܗܵܠܹܝܢ ܕܹܝܢ ܡܸܢܲܢ ܗܵܢܵܘ ܕܹܝܢ ܟܹܐܦܵܐ ܘܓܹܐܪܵܐ ܘܫܲܪܟܵܐ.

ܐܵܡܲ݁ܪ ܠܹܗ ܡܲܪܙܒܼܵܢܵܐ: ܘܲܠܡܵܢܵܐ ܝܲܬܿܝܼܪ ܡ̣ܢ ܗܵܠܹܝܢ ܕܒܲܐܪܥܵܐ ܩܢܹܝܢ ܙܵܘܥܵܐ ܐܲܡܝܼܢܵܐ: ܘܢܘܼܗܪܵܐ ܘܚܲܝܠܵܐ ܕܲܡܒܲܪܲܝ ܡ̣ܢ ܫܘܼܚܠܵܦܵܐ ܘܚܘܼܒܵܠܵܐ ܘܥܘܼܘܵܟܼܵܐ؟ ܐܵܡܲ݁ܪ ܠܹܗ ܛܘܼܒܼܵܢܵܐ: ܡܸܛܠ ܕܗܸܢܘ̣ܿܢ ܒܛܲܟܼܤܵܐ ܐܸܢܘܿܢ ܕܗܲܕܸܵܡܹ̈ܐ ܡܵܪ̈ܵܢܵܝܹܐ ܕܲܒܼܓܼܘܼܫܡܵܐ: ܐܲܝܟܼ ܡܘܼܚܵܐ ܘܠܸܒܵܐ ܘܟܒܼܕܵܐ. ܐܲܟܼܙܢܵܐ ܕܐܸܢ ܡܪܝܼܡ ܐ̄ܢܵܫ ܡ̣ܢ ܓܘܼܫܡܵܐ ܛܸܦܪܵܐ ܐܵܘ ܤܲܥܪܵܐ ܐܵܘ ܫܸܢܵܐ: ܚܘܼܤܪܵܢܵܐ ܗ̣̄ܘ ܡܢܵܬܼܵܢܵܝܵܐ. ܐܸܢ ܕܹܝܢ ܡܪܝܼܡ ܐ̄ܢܵܫ ܠܡܘܼܚܵܐ ܐܵܘ ܠܠܸܒܵܐ ܐܵܘ ܠܟܲܒܼܕܵܐ: ܥܲܡ ܕܐܲܝܟܼ ܗܵܠܹܝܢ ܐܲܒܼܕܵܢܵܐ ܗ̣̄ܘ ܕܟܼܠܵܗ̇ ܚܲܝܘܼܬܼܵܐ. ܗܵܟܲܢܵܐ ܐܸܢ ܐܵܒܼܕܵܐ ܚܕܼܵܐ ܡ̣ܢ ܗܵܠܹܝܢ ܕܲܡ̈ܢܵܘܵܬܼܵܐ ܐܸܢܹܝܢ ܙܥܘܿܪ̈ܝܵܬܼܵܐ ܕܩܘܼܝܵܡܹܗ ܕܗܵܠܡܵܐ: ܐܲܝܟܼ ܚܲܝܵܘ̈ܬܼܵܐ ܘܙܲܪ݁ܥܹܐ: ܚܘܼܤܪܵܢܵܐ ܗ̣̄ܘ ܡܢܵܬܼܵܢܵܝܵܐ. ܐܸܢ ܕܹܝܢ ܫܵܒܹ̇ܩ ܗ̄ܘ̣ܵܐ ܒܵܪܘܿܝܵܐ: ܕܢܲܗܝܼܪܹ̈ܐ ܢܹܐܒܼܕܿܘܼܢ: ܚܘܼܒܵܠܵܐ ܗܵܘܹ̇ܐ ܗ̄ܘ̣ܵܐ ܕܥܵܠܡܵܐ pb. 454 ܟ̱ܠܹܗ: ܢܲܗܝܼܪܹ̈ܐ ܓܹܝܪ ܚܙܵܩܵܐ ܐܸܢܘܿܢ ܕܟܼܠܹܗ ܓܘܼܫܡܵܐ ܕܲܒܼܪܝܼܬܼܵܐ: ܗܲܕܵܡܹ̈ܐ ܐܸܢܘܿܢ ܓܹܝܪ ܪܹ̈ܫܵܝܹܐ ܘܥܲܝ̈ܢܹܐ ܘܡܘܼܚܹܗ ܕܥܵܠܡܵܐ. ܘܡܸܢܗܘܿܢ ܐܝܼܬܹܝܗ̇ ܟ̱ܠܵܗ̇ ܚܲܡܝܼܡܘܼܬܼܵܐ ܕܲܒܼܓܼܘܼܫ̈ܡܹܐ ܘܲܒܼܥܸܩܵܪܹ̈ܐ: ܘܛܘܼܟܵܤܵܐ ܕܙܲܒܼ̈ܢܹܐ: ܘܡܸܢܝܵܢܵܐ ܕܲܫ̈ܢܲܝܵܐ ܘܲܕܼܝܲܪ̈ܚܹܐ ܘܲܕܼܫܲܒܹ̈ܐ ܘܲܕܼܝܵܘ̈ܡܵܬܼܵܐ. ܠܵܘ ܕܹܝܢ ܡ̣ܢ ܝܵܬܼܗܘܿܢ ܡܵܪܵܢܵܐܝܼܬܼ ܩܢܹܝܢ ܗܵܠܹܝܢ: ܐܸܠܵܐ ܡ̣ܢ ܚܲܠܵܐ ܘܚܸܟܼܡܬܼܵܐ ܕܒܼܵܪܘܿܝܗܘܿܢ ܫܩܲܠ̣ܘ: ܟܲܕܼ ܠܵܐ ܚܲܝܼܢ ܘܠܵܐ ܪܓܼܝܼܫܝܼܢ. ܘܐܲܟܼܙܢܵܐ ܕܐܸܢ ܢܸܗܘܘܿܢ ܥܸܤܪܵܐ ܐ̄ܢܵܫܝܼ̈ܢ ܒܚܲܕܼ ܒܲܝܬܼܵܐ: ܘܚܲܕܼ ܡܸܢܗܘܿܢ ܢܩܲܒܸܿܠ ܢܸܟܼܝܵܢܵܐ ܒܲܚܙܵܬܹܗ: ܗ̤ܘ ܒܲܠܚܘܿܕܼܵܘܗܝ ܡܸܬܼܢܲܓܲܕܼ ܒܚܸܘܿܟܼܵܐ: ܟܲܕܼ ܗܵܢ̇ܘܿܢ ܐܚܪܵܢܹܐ ܡܓܼܗܹܝܢ ܡ̣ܢ ܟܹܐܒܹܐ. ܐܸܢ ܠܲܫܪܵܓܼܵܐ ܕܲܒܼܓܼܵܘ ܒܲܝܬܼܵܐ ܬܕܲܥܸܟܼ ܐܵܘ ܠܬܲܪܥܵܐ ܬܸܤܟܿܘܿܪ: ܠܟܼܠܗܘܿܢ ܕܲܒܼܒܲܝܬܼܵܐ ܢܸܤܝܵܢܵܗ̇ ܕܡܲܪܕܘܼܬܼܵܐ ܡܲܕܼܪܸܟܼ. ܗܵܟܲܢܵܐ ܐܝܼܬܼܵܘܗܝ ܚܘܼܤܪܵܢܵܐ ܕܗܵܠܹܝܢ ܕܫܲܪܟܵܐ: ܒܦܸܚܡܵܐ ܕܢܲܗܝܼܪܹ̈ܐ. ܘܡ̣ܢ ܗܵܕܹܐ ܐܸܬܼܚܲܙܝܲܬ̤: ܕܠܵܘ ܐܝܼܬܼܝܹ̈ܐ ܐܸܢܘܿܢ ܢܲܗܝܼܪܹ̈ܐ: ܐܸܠܵܐ ܥܒܼܝܼ̈ܕܹܐ: ܘܠܵܐ ܚܲܝܹ̈ܐ ܐܸܢܘܿܢ ܘܠܵܐ ܪ̈ܵܓܼܘܿܫܹܐ. ܘܡ̇ܢ ܕܲܠܗܘܿܢ ܤܵܓܹܕ̇: ܠܐܲܠܵܗܵܐ ܒܵܪܘܿܝܗܘܿܢ ܡܲܪܓܸܿܙ. ܘܗܵܟܲܢܵܐ ܘܐܵܦ ܐܸܤܛܘܼܟܼ̈ܤܹܐ: ܐܲܪܥܵܐ ܐܵܡܲ݁ܪܢܵܐ ܘܡܲܝ̈ܵܐ ܘܢܘܼܪܵܐ ܘܐܵܐܲܪ: ܥܒܼܝܼ̈ܕܹܐ ܐܸܢܘܿܢ: ܘܠܵܘ ܚܲܝܹ̈ܐ ܘܠܵܘ ܪ̈ܵܓܼܘܿܫܹܐ. ܘܐܲܝܟܲܢܵܐ ܢܸܬܼܩܪܘܿܢ ܐܝܼܬܼܝܹ̈ܐ: ܗܵܢ̇ܘܿܢ ܕܚܲܕܼ ܡ̣ܢ ܚܲܒܼܪܹܗ ܡܸܫܬܿܪܹܝܢ ܘܡܸܬܼܚܲܒܿܠܝܼܢ؟ ܘܟܼܠ ܚܲܕܼ ܡܸܢܗܘܿܢ ܙܵܟܼܘܼܬܹܗ ܚܲܝܵܒܼܘܼܬܼܵܐ ܗ̣̄ܝ ܕܲܟܼܢܵܬܹܗ. ܐܲܪܥܵܐ ܓܹܝܪ ܡܸܫܬܲܪܝܵܐ ܡ̣ܢ ܡܲܝ̈ܵܐ: ܘܐܵܦ ܡܸܬܼܓܲܪܦܵܐ. ܘܡܲܝ̈ܵܐ ܡܸܬܼܒܲܠܥܝܼܢ ܡ̣ܢ pb. 455 ܐܲܪܥܵܐ ܘܐܵܒܼ̇ܕܝܼܢ: ܘܡܸܬܿܛܲܠܩܝܼܢ ܐܵܦ ܡ̣ܢ ܐܵܐܲܪ. ܘܢܘܼܪܵܐ ܡܸܬܿܕܲܥܟܵܐ ܡ̣ܢ ܡܲܝ̈ܵܐ ܘܐܵܒܼ̇ܕܵܐ: ܘܐܵܐܲܪ ܡܸܬܼܚܒܸܫ ܒܙܸܩܵܐ: ܘܡܸܫܬܲܠܗܲܒܼ ܡ̣ܢ ܢܲܗܝܼܪܹ̈ܐ: ܘܡܸܬܼܡܲܙܓܼܵܐ ܒܹܗ ܤܲܪܝܘܼܬܼܵܐ ܘܡܲܐܝܼܢܘܼܬܼܵܐ. ܘܤܵܟܼܵܐ: ܟܠ ܚܲܕܼ ܚܲܕܼ ܡܸܢܗܘܿܢ ܡܸܢܹܗ ܘܠܹܗ ܡܵܘܒܕܵܢܵܐ ܗ̣̄ܘ ܕܟܼܠ ܐܵܦ ܕܚܲܒܼܪܹܗ. ܘܡܸܫܬܿܪܹܝܢ ܘܡܸܫܬܲܚܠܦܝܼܢ: ܘܲܤܝܼܩܝܼܢ ܚܲܕܼ ܥܲܠ ܚܕܼ. ܘܟܼܠ ܕܲܤܢܝܼܩܵܐ ܗ̄ܘ̣ ܗܲܝܘܝܵܐ ܗ̣̄ܘ: ܘܟܼܠ ܕܠܵܘ ܗܲܝܘܝܵܐ ܗ̣̄ܘ ܠܵܘ ܣܢܝܼܩܵܐ ܗ̣̄ܘ. ܐܲܟܼܙܢܵܐ ܓܹܝܪ ܕܠܵܐ ܗܲܝܘܝܵܐ ܠܵܐ ܤܝܼܩܵܐ ܐܝܼܬܼܵܘܗܝ ܒܟܼܠ: ܗܵܟܲܢܵܐ ܓܹܝܪ ܐܵܦ ܟܠ ܕܗܲܘܝܵܐ ܗ̣̄ܘ ܤܢܝܼܩܵܐ. ܕܲܤܢܝܼ̈ܩܹܐ ܓܹܝܪ ܐܝܼܬܲܝܗܘܿܬܢ ܐܸܤܛܘܼܟܼ̈ܤܹܐ: ܐܵܦ ܗ̤ܘ ܤܘܼܥܪܵܢܵܐ ܤܵܗܹ̇ܕܼ: ܘܲܕܼܠܵܐ ܡܨܼܐ ܟܐ ܚܲܕܼ ܡܸܢܗܘܿܢ: ܒܸܠܥܵܕ ܡ̣ܢ ܚܲܒܼܪܹܗ: ܠܲܡܥܲܕܵܪܘܼ ܠܓܼܵܘܵܐ. ܐܲܪܥܵܐ ܓܹܝܪ ܤܢܝܼܩܵܐ ܥܲܠ ܡܲܝ̈ܵܐ ܠܘܵܬܼ ܡܵܘܥܝܼܬܼܵܐ: ܘܡܲܝ̈ܵܐ ܤܢܝܼܩܝܼܢ ܥܲܠ ܐܵܐܲܪ ܕܡܲܤܸܩ ܘܙܵܠܲܚ̈ ܐܸܢܘܿܢ. ܘܢܘܼܪܵܐ ܬܘܼܒܼ: ܒܸܠܥܵܕܼ ܡ̣ܢ ܩܲܝ̈ܤܹܐ: ܕܡ̣ܢ ܐܲܪܥܵܐ ܘܡܲܝ̈ܵܐ ܘܐܵܐܲܪ ܡܸܬܼܪܲܒܹܿܝܢ: ܠܵܐ ܡܸܫܟܿܚܵܐ ܕܲܬܼܚܵܘܸܐ ܤܵܥܘܿܪܘܼܬܼܵܗ̇. ܡܵܕܹܝܢ ܐܸܬܼܚܲܙܝܲܬ̤ ܕܲܤܢܝܼ̈ܩܹܐ ܐܸܢܘܿܢ. ܘܐܸܢ ܤܢܝܼ̈ܩܹܐ ܐܸܢܘܿܢ ܚܲܕ ܥܲܠ ܚܲܕܼ: ܘܐܵܦ ܗܘܲܝ̈ܵܐ ܐܸܢܘܿܢ. ܠܵܐ ܗܲܘܝܵܐ ܓܹܝܪ ܥܲܠ ܝܵܬܹܗ ܤܢܝܼܩ: ܘܠܵܐ ܥܲܠ ܐ̄ܚܪ̈ܵܢܹܐ. ܘܠܵܐ ܗܲܘܝܵܐ ܚܲܝܵܐ ܐܝܼܬܼܵܘܗܝ ܐܵܦ ܡܠܝܼܠܵܐ: ܐܸܤܛܘܼ̈ܟܼܤܹܐ ܓܹܝܪ ܠܵܐ ܚܲܝܹ̈ܐ ܐܝܼܬܲܝܗܘܿܢ ܘܐܵܦ ܠܵܐ ܡܠܝܼܠܹ̈ܿܐ. ܟܠ ܓܹܝܪ ܕܚܲܝ pb. 456 ܘܡܸܬܼܚܙܹܐ: ܡ̣ܢ ܝܵܬܹܗ ܡܸܬܿܬܿܙܝܼܥ ܘܚܵܐܹ̇ܫ. ܐܸܤܛܘܼܟܼ̈ܤܹܐ ܓܹܝܪ ܠܵܘ ܒܲܠܚܘܿܕܼ ܠܵܐ ܡܠܝܼ̈ܠܹܐ ܐܝܼܬܲܝܗܘܿܢ: ܐܸܠܵܐ ܐܵܦ ܠܵܐ ܚܲܝܹ̈ܐ ܘܠܵܐ ܪ̈ܵܓܼܘܿܫܹܐ ܐܸܢܘܿܢ. ܠܢܸܨ̈ܒܼܵܬܼܵܐ ܓܹܝܪ ܥܲܡ ܚܲܝ̈ܘܵܬܼܵܐ ܐܝܼܬܼ ܚܲܝܹ̈ܐ: ܠܢܸܨ̈ܒܼܵܬܼܵܐ ܡ̇ܢ ܕܪ̈ܵܝܒܼܝܵܢ ܘܡܲܦܪ݁ܥܵܢ: ܘܲܠܚܲܝ̈ܘܵܬܼܵܐ ܡܸܬܿܬܿܙܝܼܥܵܢܘܼܬܼܵܐ ܘܫܘܼܢܵܝܵܐ ܥܲܡ ܦܵܪܘܿܫܘܼܬܼܵܐ ܕܪܸ̈ܓܼܫܹܐ. ܠܐܸܤܛܘܼ̈ܟܼܤܹܐ ܕܹܝܢ ܘܠܵܐ ܚܕܼܵܐ ܡ̣ܢ ܗܵܠܹܝܢ ܐܝܼܬܼ: ܐܸܠܵܐ ܫܲܬܿܝܼ̈ܩܹܐ ܐܸܢܘܿܢ ܒܲܕܼܡܘܼܬܼ ܟܹܐܦܹ̈ܐ. ܘܡ̇ܢ ܕܲܠܗܵܠܹܝܢ ܤܵܓܹ̇ܕܼ ܘܐܝܼܬܼܝܹ̈ܐ ܚܵܫܹ̇ܒܼ ܠܗܘܿܢ: ܠܐܲܠܵܗܵܐ ܒܵܪܘܿܗܝܘܿܢ ܡܲܪܓܸܿܙ. ܒܘܵܠܝܼܬܼܵܐ ܡܵܕܹܝܢ ܩܪܹܝ̇ܬܼܟܼܘܿܢ ܤܵܓܼܕܲܝ̈ ܠܒܸܪ̈ܝܵܬܼܵܐ: ܘܪ̈ܲܚܝܼܩܲܝ ܡ̣ܢ ܐܲܠܵܗܵܐ. ܘܟܲܕܼ ܗܵܠܹܝܢ ܫ̣ܡܲܥ ܡܲܪܙܒܼܵܢܵܐ: ܐܸܬܼܚܲܡܲܬܼ ܛܵܒܼ: ܒܲܕܼܠܵܐ ܫܒܲܩ̣ܬܹܗ ܛܵܥܝܘܼܬܼܵܐ ܕܢܸܬܿܛܦܝܼܣ ܠܡܸܠܵܘ̈ܗܝ ܕܛܘܼܒܼܵܢܵܐ. ܘܲܦ̣ܩܲܕܼ ܥܲܠ ܩܲܕܝܼܫܵܐ ܥܲܒܼܕܝܼܫܘܿܥ ܕܢܸܬܼܐܤܲܪ ܒܐܲܤܘܼܪܹ̈ܐ ܩܫܲܝ̈ܵܐ: ܘܢܸܬܼܚܒܸܫ ܒܒܲܝܬܼܵܐ ܚܸܫܘܟܼܵܐ. ܘܢܸܬܼܝܼܗܸܒܼ ܠܹܗ ܡ̣ܢ ܪܲܡܫܵܐ ܠܪܲܡܫܵܐ ܠܲܚܡܵܐ ܩܲܠܝܼܠ: ܘܡܲܝ̈ܵܐ ܠܵܐ ܢܸܬܿܠܘܼܢ ܠܹܗ. ܐܸܬܼܐܤܲܪ ܕܹܝܢ ܩܲܕܝܼܫܵܐ ܘܐܸܬܼܚ̣ܒܸܫ: ܟܲܕܼ ܚܵܕܹ̇ܐ ܗ̄ܘ̣ܵܐ ܘܲܡܙܲܡܲܪ ܘܐܵܡܲܪ: ܡܵܪܝܵܐ ܡܥܲܕܪܵܢܝ ܠܵܐ ܐܸܕܚܲܠ: ܡܵܢܵܐ ܥܵܒܹ̇ܕܼ ܠܝܼ ܒܲܪܢܵܫܵܐ؟

ܘܲܠܝܵܘܡܵܐ ܐ̄ܚܪܹܢܵܐ: ܢܦܲܩ̣ ܗ̄ܘ̣ܵܐ ܡܲܪܙܒܼܵܢܵܐ ܠܢܲܚܫܝܼܪܵܐ ܘܲܠܨܲܝܕܼܵܐ: ܘܲܡ̣ܬܲܚ ܗ̄ܘ̣ܵܐ ܩܸܫܬܹܗ ܕܢܸܫܕܸܐ ܓܹܐܪܵܐ: ܘܲܢܦܲܠ̣ ܩܕܼܵܐ ܪܸ̈ܓܼܠܵܘܗܝ. ܘܗ̤ܝ ܗܵܕܹܐ ܓܸܕܼܫܲܬ̤ ܐܵܦ ܠܦܵܠܚܹ̈ܐ ܕܥܲܡܹܗ. ܘܟܲܕܼ ܙܲܒܼ̈ܢܵܬܼܵܐ ܤܲܓܿܝܼ̈ܬܼܵܐ ܢܲܤ̣ܝܼܘ: ܠܵܐ ܨ̣ܒܼܵܐ ܐܵܐܲܪ ܠܡܸܛܥܲܢ ܓܹܐܪܹ̈ܐ ܕܫܵܕܹ̇ܝܢ pb. 457 ܗ̄ܘ̣ܵܘ. ܘܟܲܕܼ ܗܵܕܹܐ ܗܘ̤ܵܬܼ ܐܸܢܘܿܢ: ܕܚܸܠ̣ܘ ܕܸܚܠܬܼܵܐ ܪܲܒܿܬܼܵܐ. ܘܲܥܢ̣ܵܐ ܡܲܪܙܒܼܵܢܵܐ ܘܐܸܡ݂ܲܪ ܠܲܕܼܥܲܡܹܗ: ܤܵܒܲܪ̇ ܐ̄ܢܵܐ ܕܓܲܒܼܪܵܐ ܗ̣̄ܘ ܕܐܲܠܵܗܵܐ: ܤܵܒܼܵܐ ܗܵܘ̇ ܕܐܤܝܼܪ ܠܲܢ. ܘܒܲܨ̈ܠܵܘܵܬܹܗ ܗܘ̤ܵܬܼ ܬܸܕܼܡܘܼܪܬܵܐ ܗܵܕܹܐ: ܘܐܸܬܿܬܿܚܸܕܼܘ ܡܵܐܢܲܝ̈ ܙܲܝܢܲܢ: ܥܠ ܕܡܲܪܡܲܪܢܵܝܗܝ. ܘܲܥ̣ܛܲܦ ܡܸܚܕܼܵܐ ܘܥܠ̣ ܠܒܲܝܬܹܗ ܒܟܲܪܝܘܼܬܼܵܐ ܪܒܿܬܼܵܐ: ܘܒܼܵܬܼ ܟܲܕܼ ܠܵܐ ܠܠܸܣ̣ ܘܠܵܐ ܐܸܫ̣ܬܝܼ. ܘܤܵܡ̣ ܗ̄ܘ̣ܵܐ ܒܪܸܥܝܵܢܹܗ: ܕܠܥܸܕܵܢ ܨܲܦܪܵܐ ܢܸܫܪܹܝܘܗܝ ܠܛܘܼܒܼܵܢܵܐ ܥܲܒܼܕܝܼܫܘܿܥ. ܘܲܒܼܦܸܠܓܹܗ ܕܠܸܠܝܵܐ: ܢܘܼܗܪܵܐ ܪܲܒܵܐ ܘܲܫܒܼܝܼܚܵܐ ܐܸܬܼܡ̣ܠܝܼ ܒܲܝܬܼܵܐ: ܕܒܹܗ ܐܲܤܝܼܪ ܗ̄ܘ̣ܵܐ ܛܘܼܒܼܵܢܵܐ ܥܲܒܼܕܝܼܫܘܿܥ. ܘܟܸܢܫܵܐ ܪܲܒܵܐ ܕܪ̈ܘܼܚܵܢܹܐ ܐܬܸܚ̣ܙܝܼܘ ܠܘܵܬܹܗ: ܟܲܕܼ ܒܩܵܠܵܐ ܪܵܡܵܐ ܡܙܲܡܪܝܼܢ ܗ̄ܘ̣ܵܘ ܘܐܵܡ̇ܪܝܼܢ: ܓܥ̣ܵܘ ܙܲܕܝܼ̈ܩܹܐ ܘܡܵܪܝܵܐ ܫܡܲܥ̣ ܐܸܢܘܿܢ ܘܦܲܨܝܼ ܐܸܢܘܿܢ. ܘܩܲܪܝܼܒܼܘܼ ܡܵܪܝܵܐ ܠܐܲܝܠܹܝܢ ܕܩܵܪܹܝܢ ܠܹܗ ܒܩܘܼܫܬܼܵܐ: ܘܥܵܒܹ̇ܕܼ ܨܸܒܼܝܵܢܵܐ ܕܕܼܵܚ̇ܠܵܘ̈ܗܝ: ܫܵܡܲܥ̇ ܒܵܥܘܼܬܼܗܘܿܢ ܘܦܵܪܹܩ ܠܗܘܿܢ. ܟܲܕܼ ܐܵܦ ܗ̤ܘ ܛܘܼܒܼܵܢܵܐ ܥܲܒܼܕܝܼܫܘܿܥ ܥܲܡܗܘܿܢ ܡܙܲܡܲܪ ܗ̄ܘ̣ܵܐ ܟܲܕܼ ܚܵܕܹ̇ܐ. ܘܕܸܚܠܬܼܵܐ ܪܲܒܿܬܼܵܐ ܢܸܦ̣ܠܲܬ̤ ܥܲܠ ܟܠܗܘܿܢ ܐܲܝܠܹܝܢ ܕܩܲܪܝܼܒܼܝܼܢ ܗ̄ܘ̣ܵܘ ܚܕܼܵܪ̈ܲܝ ܒܲܝܬܼܵܐ: ܕܒܹܗ ܐܲܤܝܼܪ ܗ̄ܘ̣ܵܐ ܛܘܼܒܼܵܢܵܐ. ܘܡܸܚܕܼܵܐ ܬܲܪ̈ܥܹܐ ܟܠܗܘܿܢ ܐܸܬܼܦܬܲܚ̣ܘ: ܘܡܲܠܲܐܟܼܵܐ ܕܡܵܪܝܵܐ ܩܪܸܒܼ ܠܐܲܤܘܼܪ̈ܵܘܗܝ ܕܛܘܼܒܼܵܢܵܐ: ܘܲܢܦܲܠ̣ܘ ܐܲܤܘܼܪܹ̈ܐ ܡ̣ܢ ܐܝܼܕܼܵܘ̈ܗܝ ܘܡ̣ܢ ܪܸ̈ܓܼܠܵܘܗܝ: ܘܠܲܒܼܟܹܗ ܒܐܕܹܗ ܘܢܲܓܼܕܹܗ ܘܐܲܦ̣ܩܹܗ ܡ̣ܢ ܒܹܝܬܼ ܚܒܼܘܼܫܝܵܐ. ܘܟܲܕܼ ܐܲܦ̣ܩܹܗ ܠܒܲܪ: ܫܲܒܼܩܹܗ ܡ̣ܢ ܐܝܼܕܹܗ: ܘܐܸܡ݂ܲܪ ܠܹܗ: ܬܵܐ pb. 458 ܒܵܬܲܪܝ. ܘܗ̤ܘ ܐܵܙܹ̇ܠ ܗ̄ܘ̣ܵܐ ܩܕܼܵܡܵܘܗܝ ܒܲܠܒܼܘܼ̈ܫܹܐ ܡܲܦܪ̈ܓܹܐ: ܥܕܲܡܵܐ ܕܐܲܥ̣ܠܹܗ ܠܲܡܥܲܪܬܹܗ: ܘܫܲܒܼܩܹܗ ܘܫܲܢ̣ܝܼ.

ܘܟܲܕܼ ܗܘ̤ܵܐ ܨܲܦܪܵܐ: ܦ̣ܩܲܕܼ ܗ̄ܘ̣ܵܐ ܡܲܪܙܒܼܵܢܵܐ: ܕܢܸܫܪܘܿܢܵܝܗܝ ܠܩܲܕܝܼܫܵܐ ܘܢܲܝܬܘܿܢܵܝܗܝ ܠܲܩܕܼܵܡܵܘܗܝ. ܘܟܲܕܼ ܦܬܲܚ̣ܘ ܬܲܪ̈ܥܹܐ ܘܥܲܠ̣ܘ ܗܵܢ̇ܘܿܢ ܕܐܸܫ̣ܬܲܕܲܪܘ: ܐܸܫܟܲܚ̣ܘ ܐܲܤܘܼܪܹ̈ܐ ܟܲܕܼ ܤܝܼܡܝܼܢ ܒܲܠܚܘܿܕܼ: ܘܥܸܛܪܵܐ ܕܒܸܤ̈ܡܹܐ ܛܵܒܹ̈ܐ ܥܵܛܲ݁ܪ ܗ̄ܘ̣ܵܐ ܒܟܼܠܹܗ ܒܲܝܬܼܵܐ. ܘܟܲܕܼ ܒܥ̣ܵܐܘܼܗܝ ܠܛܘܼܒܼܵܢܵܐ ܘܠܵܐ ܐܸܫܟܿܚ̣ܘܼܗܝ: ܬܲܡܗ̣ܘ: ܘܲܗܘ̤ܵܘ ܒܕܼܚܠܬܼܵܐ ܪܲܒܿܬܼܵܐ. ܘܲܪܗܸܛ̣ܘ ܡܤܲܪܗܒܼܵܐܝܼܬܼ ܘܐܵܘܕܲܥ̣ܘ ܠܡܲܪܙܒܼܵܢܵܐ ܟܲܕܼ ܐܵܡ̇ܪܝܼܢ: ܐܸܙܲܠ̣ܘ ܡܵܪܝ ܐܲܝܟܼ ܕܲܦܩܲܕܬܿ: ܘܐܸܫܟܲܚ̣ܢ ܬܲܪ̈ܥܹܐ ܕܐܲܚܝܼܕܝܼܢ: ܘܲܦܬܲܚ̣ܢ ܘܥܲܠ̣ܢ: ܘܐܸܫܟܲܚ̣ܢ ܐܲܤܘܼܪܹ̈ܐ ܗܵܠܹܝܢ ܟܲܕܼ ܤܝܼܡܝܼܢ: ܘܒܲܝܵܬܼܵܐ ܟܲܕܼ ܡܠܸܐ ܗ̄ܘ̣ܵܐ ܥܸܛܪܵܐ ܕܗܹܪ̈ܘܿܡܹܐ: ܠܓܲܒܼܪܵܐ ܕܹܝܢ ܠܵܐ ܐܸܫܟܲܚ̣ܢܵܝܗܝ. ܘܟܲܕܼ ܗܵܠܹܝܢ ܫ̣ܡܲܥ ܡܲܪܙܒܼܵܢܵܐ: ܒܕܚܠܬܼܵܐ ܪܲܒܿܬܼܵܐ ܘܲܒܼܟܲܪܝܘܼܬܼܵܐ ܢܦܲܠ̣ ܗ̄ܘ̣ܵܐ: ܘܡܵܚܹ̇ܐ ܗ̄ܘ̣ܵܐ ܥܲܠ ܐܲܦܵܘ̈ܗܝ ܘܒܼܵܟܹ̇ܐ ܗ̄ܘ̣ܵܐ ܡܲܪܝܼܪܵܐܝܼܬܼ ܘܐܵܡܲ݁ܪ: ܘܵܝ ܠܝܼ ܘܵܝ ܠܝܼ: ܘܵܝ ܠܝܼ ܕܫܸܚܩܹ̇ܬܼ ܠܓܲܒܼܪܵܐ ܕܐܲܠܵܥܗܵܐ! ܫܲܪܝܼܪܵܐܝܼܬܼ ܕܪܲܒܿ ܗ̣̄ܘ ܐܲܠܵܗܗܘܿܢ ܕܲܟܼܪܸ̈ܤܛܝܵܢܹܐ! ܘܗ̤ܘܝܘ ܐܲܠܵܗܵܐ ܫܲܪܝܼܪܵܐ ܕܲܥ̣ܒܲܕܼ ܫܡܲܝܵܐ ܘܐܲܪܥܵܐ ܘܟܼܠ ܕܲܒܼܗܘܿܢ: ܘܠܲܝܬܿ ܐܲܠܵܗ ܐ̄ܚܪܹܝܢ ܠܒܲܪ ܡܸܢܹܗ!

ܘܡܸܚܕܼܵܐ ܩܵܡ̣ ܥܲܠ̣ ܠܩܲܝܛܘܿܢܵܐ: ܘܲܤ̣ܪܲܛ ܠܹܗ ܒܐܸܤܬܼܵܐ ܡܲܕܼܢܚܵܝܬܼܵܐ ܐܵܬ̤ܵܐ ܕܲܨܠܝܼܒܼܵܐ: ܘܲܢܦܲܠ̣ ܥܲܠ ܐܲܦܵܘ̈ܗܝ ܥܲܠ ܐܲܪܥܵܐ: ܘܲܡܨܲܠܸܐ ܗ̄ܘ̣ܵܐ ܩܕܼܵܡܵܘܗܝ ܘܐܵܡܲ݁ܪ: ܡܫܝܼܚܵܐ ܐܲܠܵܗܗܘܿܢ pb. 459 ܕܲܟܼܪܸ̈ܤܛܝܵܢܹܐ: ܥܢܝܼܢܝ ܘܲܒܼܥܝܼܢܝ ܘܠܵܐ ܬܲܤܠܹܝܢܝ. ܘܐܲܫܘܵܢܝ ܕܐܸܬܼܡܢܸܐ ܒܤܵܓܼ̇ܘܿܕܲܝ̈ܟ: ܘܐܸܬܼܪܫܸܡ ܒܪܘܼܫܡܵܐ ܩܲܕܝܼܫܵܐ. ܐܸܢܵܐ ܕܹܝܢ ܗܲܝܡܢܹ̇ܬܼ ܘܐܵܘܕܝܼ̇ܬܼ ܘܡܵܘܕܸܢܵܐ: ܕܐܲܢ̄ܬܿ ܐܲܢ̄ܬܿ ܐܲܠܵܗܵܐ ܫܲܪܝܼܪܵܐ: ܐܲܝܟܼ ܕܡܵܘܕܹܝܢ ܘܡܲܠܦܝܼܢ ܤܵܓܼܘܿܕܲܝ̈ܟ ܟܪܸ̈ܤܛܝܵܢܹܐ. ܐܸܢܗ̤ܘ ܗܵܟܹܝܠ ܕܒܲܪ ܐ̄ܢܵܫܵܐ ܗ̄ܘ̣ܵܐ ܗܵܘ̇ ܕܐܸܬܼܚ̣ܙܝܼ ܠܝܼ ܒܐܸܤܟܹܡܵܐ ܕܒܲܪܢܵܫܵܐ: ܘܡܲܠܸܠ̣ ܥܲܡܝ ܒܲܫܡܵܟܼ: ܘܐܸܢܵܐ ܒܠܵܐ ܝܼܕܲܥܬܼܝ ܡܲܪܡܲܪܬܹܗ: ܐܲܫܘܵܢܝ ܡܵܪܝ ܕܐܸܚܙܹܝܘܗܝ ܡܸܢܕܪܹܫ: ܘܐܸܫܐܲܠ ܡܸܢܹܗ ܫܙܼܒܼܩܵܢܵܐ ܕܤܲܟܼ̈ܠܘܵܬܼܝ: ܘܒܼܐܝܼܕܼܵܘ̈ܗܝ ܐܸܬܼܩܲܪܲܒܼ ܠܝܼܕܲܥܬܼܵܟܼ ܘܲܠܒܲܝܬܵܝܘܼܬܼܵܟܼ. ܘܐܸܢ ܚܲܕܼ ܡ̣ܢ ܡܲܠܲܐܟܲܝ̈ܟ ܩܲܕܝܼ̈ܫܹܐ ܐܝܼܬܼܵܘܗܝ ܗ̄ܘ̣ܵܐ ܗܵܘ̇ ܕܐܸܬܼܚ̣ܙܝܼ ܠܝܼ ܒܐܸܤܟܹܡܵܐ ܕܒܲܪܢܵܫܵܐ: ܢܸܬܼܚܙܸܐ ܠܝܼ ܡܸܢܕܪܹܫ: ܘܢܲܠܦܲܢܝ ܡܸܕܸܿܡ ܕܙܵܕܹ̇ܩ ܠܝܼ ܠܡܸܥܒܲܕܼ. ܘܡܸܚܕܼܵܐ ܕܫܲܠܸܡ̣ ܨܠܘܿܬܹܗ: ܘܲܚ̣ܬܲܡ ܢܲܦܫܹܗ ܒܐܵܬ̤ܵܐ ܕܲܨܠܝܼܒܼܵܐ: ܗܵܐ ܩܵܠܵܐ ܗܲܢܝܼܵܐܐ ܘܪܲܟܿܝܼܟܼܵܐ ܐܸܫܬܲܡܲܥ̣ ܠܹܗ ܕܐܵܡܲ݁ܪ: ܟܠ ܓܹܝܪ ܕܫܵܐܹ̇̄ܠ ܢܵܤܹ̇ܒܼ: ܘܲܕܼܒܼܵܥܹ̇̄ܐ ܡܸܫܟܲܚ: ܘܠܲܐܝܢܵܐ ܕܢܵܩܹ̇ܫ ܡܸܬܼܦܬܲܚ ܠܹܗ. ܘܟܲܕܼ ܫܡܲܥ̣ ܗ̄ܘ̣ܵܐ ܩܵܠܵܐ ܗܵܘ̇: ܐܸܬܼܒܲܝܲܐ ܘܲܚ̣ܕܼܝܼ ܪܵܘܪܒܼܵܐܝܼܬܼ: ܘܪܵܘܙܲܬ̤ ܢܲܦܫܹܗ ܘܫܲܒܼܚ̣ ܠܐܲܠܵܗܵܐ. ܘܲܢܦܲܩ̣ ܘܝܼܬܸܒܼ ܥܲܠ ܬܸܫܘܝܼܬܹܗ: ܘܩܲܒܸܿܠ̣ ܤܲܝܒܵܪܬܵܐ ܘܐܸܬܼܚܲܝܲܠ̣. ܡܓܼܘܼܫܵܐ ܕܹܝܢ ܗܵܘ̇ ܕܡܲܓܸܫ ܗ̄ܘ̣ܵܐ ܠܹܗ: ܟܠ ܐܸܡܲܬܼܝ ܕܠܵܥܹ̇ܣ ܗ̄ܘ̣ܵܐ: ܥܲܡ ܐܲܢ̄ܬܿܬܹܗ ܘܥܲܡ ܟܠܗܘܿܢ ܒܢܲܝ̈ ܒܲܝܬܹܗ: ܡܸܬܿܕܲܡܪܝܼܢ ܗ̄ܘ̣ܵܘ ܘܬܼܵܘܪܝܼܢ ܥܠܵܘܗܝ: ܕܟܲܕܼ ܠܵܐ ܡܲܓܸܿܫ ܠܹܗ ܐܵܟܹ̇ܠ ܠܲܚܡܵܐ. pb. 460 ܠܵܐ ܕܹܝܢ ܐ̄ܢܵܫ ܐܲܡ̣ܪܲܚ ܠܲܡܫܲܐܵܠܘܼܬܹܗ: ܩܫܸܐ ܗ̄ܘ̣ܵܐ ܓܹܝܪ ܛܵܒܼ ܘܲܙܥܝܼܦ ܥܲܠ ܒܢܲܝ̈ ܒܲܝܬܹܗ.

ܘܡ̣ܢ ܒܵܬܲܪ ܝܵܘ̈ܡܵܬܼܵܐ ܬܠܵܬܼܵܐ: ܐܸܬܼܚ̣ܙܝܼ ܠܹܗ ܒܚܸܙܘܵܐ ܕܠܸܠܝܵܐ ܩܲܕܿܝܼܿܫܵܐ ܡܵܪܝ ܜܲܒܼܕܝܼܫܘܿܥ ܟܲܕܼ ܚܵܕܼܵܐ ܘܲܦܨܝܼܚ ܘܐܵܡܲ݁ܪ ܠܹܗ: ܒܹܪܝ ܩܲܪܕܵܓܼ: ܐܸܢ ܒܵܥܹ̇ܐ ܐܲܢ̄ܬܿ ܕܬܸܚܙܹܝܢܝ: ܬܵܐ ܠܲܦܠܵܢܝܲܬܼ ܡܥܲܪܬܼܵܐ: ܘܬܲܡܵܢ ܡܸܫܟܲܚ ܐܲܢ̄ܬܿ ܠܝܼ. ܟܲܕܼ ܕܹܝܢ ܐܸܬܿܬܿܥܝܼܪ ܡ̣ܢ ܫܸܢܬܹܗ: ܚ̣ܕܝܼ ܪܵܘܪܒܼܵܐܝܼܬܼ ܘܪܸܘܙܲܬ̤ ܢܲܦܫܹܗ. ܘܲܒܼܥܸܕܵܢܵܐ ܕܨܲܦܪܵܐ ܩܵܡ̣ ܟܲܕܼ ܚܵܕܹ̇ܐ: ܘܫܲܚ̣ܠܸܦ ܡܵܐܢܵܘ̈ܗܝ ܘܐܸܫ̣ܬܲܓܼܢܝܼ. ܘܲܕܼܒܲܪ ܥܲܡܹܗ ܥܲܒܼܕܵܘ̈ܗܝ ܡܗܲܝܡ̈ܢܹܐ ܬܪܹܝܢ: ܗܵܢ̇ܘܿܢ ܕܲܬܼܟܼܝܼܠ ܗ̄ܘ̣ܵܐ ܥܠܲܝܗܘܿܢ ܕܢܵܛ̇ܪܝܼܢ ܗ̄ܘ̣ܵܘ ܐ̄ܪ̈ܵܙܵܘܗܝ: ܗܵܢ̇ܘܿܢ ܕܐܵܦ ܗܸܢ̣ܘܿܢ ܥܲܡܹܗ ܐܸܫ̣ܬܿܘܝܼܘ ܠܡܵܘܗܲܒܼܬܼܵܐ ܕܡܲܥܡܘܿܕܝܼܬܼܵܐ. ܘܲܪܟܸܒܼ ܘܪܵܕܹܐ ܗ̄ܘ̣ܵܐ ܟܲܕܼ ܚܵܕܹܐ ܠܐܲܬܼܪܵܐ ܕܒܹܝܬܼ ܒܓܼܵܫ: ܠܛܘܼܪܵܐ ܕܒܹܗ ܥܵܡܲ݁ܪ ܗ̄ܘ̣ܵܐ ܩܲܕܿܝܼܫܵܐ ܥܲܒܼܕܝܼܿܫܘܘܿܥ: ܐܲܝܟܵܐ ܕܘܲܥ̣ܕܹܗ ܒܚܸܙܘܵܐ. ܘܟܲܕܼ ܐܲܪܚܸܩ̣ ܡ̣ܢ ܚܸܤܢܹܗ ܐܲܝܟܼ ܡܝܼ̈ܠܹܐ ܚܲܡܫܵܐ: ܦܓܲܥ̣ ܒܹܗ ܤܵܛܵܢܵܐ ܒܐܸܤܟܹܡܵܐ ܕܓܲܒܼܪܵܐ ܤܵܒܼܵܐ ܟܲܕܼ ܚܲܡܝܲܬܼ ܘܲܟܼܡܝܼܪ: ܘܲܠܒܼܝܼܟ ܕܲܩܢܹܗ ܒܫܸܢܵܘ̈ܗܝ ܘܐܵܡܲ݁ܪ ܠܹܗ: ܠܐܲܝܟܵܐ ܐܵܙܹ̇ܠ ܐܲܢ̄ܬܿ ܕܓܵܠܵܐ ܘܒܼܝܼܫ ܚܲܝܹ̈ܐ؟ ܠܡܵܢܵܐ ܕܓܸܠ̣ܬܿ ܒܝܼ ܘܲܫܒܲܩܬܵܢܝ ܘܐܸܙܲܠ̣ܬܿ ܒܵܬܲܪ ܗܵܘ̇ ܠܝܼܛ ܚܸܘܵܪ̈ܵܬܼܵܐ ܬܲܠܡܝܼܕܹܗ ܕܝܼܫܘܿܥ: ܗܵܘ̇ ܕܲܙܩܲܦ̣ܘ ܚܲܒܼܪ̈ܲܝܢ ܝܗ̄ܘܼ̈ܕܵܝܹܐ ܒܐܘܿܪܸܫܠܸܡ ܘܡ̣ܝܼܬܼ؟ ܝܼܡܝܼ̇ܬܼ ܘܠܵܐ ܡܕܲܓܸܿܠ ܐ̄ܢܵܐ: ܕܐܸܫܓܿܘܿܫ ܥܠܲܝܟ ܠܡܲܠܟܵܐ pb. 461 ܘܲܠܟܼܠܗܘܿܢ ܪܵܘܪ̈ܒܼܵܢܹܝܗ̇ ܕܦܵܪܹܣ: ܘܐܹܫܘܿܕ ܠܲܕܼܡܵܟܼ ܐܲܝܟܼ ܕܠܸܤ̈ܛܵܝܹܐ ܘܥܵܒܼ̇ܕܲܝ̈ ܒܝܼ̈ܫܬܼܵܐ. ܚܲܕܼ ܕܹܝܢ ܡ̣ܢ ܥܲܒܼܕܵܘ̈ܗܝ ܟܲܕܼ ܗܵܠܹܝܢ ܫܡܲܥ̣: ܐܸܡ݂ܲܪ ܠܡܵܪܹ̈: ܐܸܫܡܘܿܛ ܤܲܝܦܝ: ܘܐܸܤܒܼܝܼܘܗܝ ܠܪܹܫܹܗ ܕܗܵܢܵܐ ܤܵܒܼܵܐ ܟܲܠܒܵܐ: ܕܐܲܡ̣ܪܲܚ ܠܲܡܨܲܥܵܪܘܼ ܠܡܵܪܲܢ؟ ܗܵܝܕܹܝܢ ܐܸܡ݂ܲܪ ܠܹܗ ܡܵܪܒܹܗ: ܫܒܼܘܿܩ ܠܹܗ: ܡܸܛܠ ܕܠܵܐ ܢܵܦܹ̇ܠ ܩܕܼܵܡ ܤܲܝܦܵܐ. ܡܵܪܲܢ ܝܼܫܘܿܥ ܡܫܝܼܚܵܐ ܕܗܲܝܡܢܹ̇ܬܼ ܒܹܗ: ܗ̤ܘ ܥܬܼܝܼܕܼ ܕܲܢܤܝܼܦܝܼܘܗܝ ܒܪܘܼܚ ܦܘܼܡܹܗ: ܘܲܢܒܲܛܠܝܼܘܗܝ ܒܓܸܠܝܵܢܵܐ ܕܡܹܐܬܼܝܼܬܹܗ. ܗܵܟܲܢܵܐ ܓܹܝܪ ܫܸܡܥܹ̇ܬܼ ܡ̣ܢ ܟܪܸ̈ܤܛܝܵܢܹܐ ܕܐܵܡ̇ܪܝܼܢ ܥܠܵܘܗܝ. ܐܸܤ̣ܬܲܟܲܠ ܗ̄ܘ̣ܵܐ ܕܹܝܢ ܗ̤ܘ ܩܲܕܝܼܫܵܐ ܡܵܪܝ ܩܲܪܕܵܓܼ: ܕܤܵܛܵܢܵܐ ܗ̣̄ܘ ܕܐܸܬܼܚ̣ܙܝܼ ܠܹܗ ܒܐܸܤܟܹܡܵܐ ܕܒܲܪܢܵܫܵܐ. ܘܡܸܚܕܼܵܐ ܪܲܩ̣ ܒܹܗ ܘܐܸܡ݂ܲܪ ܠܹܗ: ܢܸܓܼܥܘܿܪ ܒܵܟܼ ܡܫܝܼܚܵܐ ܡܵܪܝ: ܗܵܘ ܕܲܒܼܛܲܝܒܿܘܼܬܹܗ ܦܲܪܩܲܢ̣ܝ ܡ̣ܢ ܚܸܫܘܿܟܼܵܐ ܕܛܵܥܝܼܘܼܬܼܵܐ: ܘܲܩ̣ܪܵܢܝ ܘܩܲܪܒܲܢ̣ܝܼ ܠܢܘܼܗܪܵܐ ܪܲܒܵܐ ܕܝܼܕܲܥܬܹܗ: ܘܲܚ̣ܬܲܡ ܢܲܦܫܹܗ ܒܐܵܬ̤ܵܐ ܕܲܨܠܝܼܒܼܵܐ. ܘܟܲܕܼ ܫܡܲܥ̣ ܤܵܛܵܢܵܐ ܫܡܵܐ ܕܲܡܫܝܼܚܵܐ: ܡܸܚܕܼܵܐ ܐܸܫ̣ܬܲܚܠܲܦ ܘܲܗܘ̤ܵܐ ܐܲܝܟܼ ܚܸܘܝܵܐ ܐܘܼܟܵܡܵܐ: ܘܲܥ̣ܪܲܩ ܘܥܲܠ̣ ܒܨܸܪܝܵܐ ܕܫܘܿܥܵܐ.

ܛܘܼܒܼܵܢܵܐ ܕܹܝܢ ܩܲܪܕܵܓܼ ܪܵܕܹܐ ܗ̄ܘ̣ܵܐ ܒܐܘܼܪܚܹܗ: ܟܲܕܼ ܚܵܕܹ̇ܐ ܘܲܡܫܲܒܲܚ ܠܐܲܠܵܗܵܐ. ܘܟܲܕܼ ܗܘ̤ܵܐ ܒܒܹܝܬܼ ܒܵܘܬܵܐ ܒܐܘܼܪܚܵܐ: ܐܸܬܼܚ̣ܙܝܼ ܠܹܗ ܒܚܸܠܡܵܐ ܩܲܕܿܝܼܫܵܐ ܡܵܪܝ ܤܲܪܓܿܝܼܣ ܤܵܗܕܵܐ ܘܐܸܡ݂ܲܪ ܠܹܗ ܐܵܚܝ ܩܲܪܕܵܓܼ: ܫܲܦܝܼܪ ܫܲܪܝܼܬܿ. ܐܸܬܼܟܲܬܲܫ ܓܲܢ̄ܒܵܪܵܐܝܼܬܼ: ܕܬܸܗܘܸܐ pb. 462 ܠܝܼ ܐܲܚܵܐ ܠܥܵܠܲܡ. ܘܗܵܐ ܐܸܢܵܐ ܥܲܡܵܟܼ ܠܲܡܥܲܕܵܪܘܼܬܼܵܟܼ: ܥܕܲܡܵܐ ܕܬܸܫܬܲܡܸܠܐ ܘܬܸܤܲܒܼ ܟܠܝܼܠܵܐ ܕܤܵܗܕܘܼܬܼܵܐ. ܘܲܠܝܵܘܡܵܐ ܐ̄ܚܪܹܢܵܐ ܠܥܸܕܵܢܵܐ ܕܦܵܢܝܵܐ: ܟܲܕܼ ܫܲܪܝܼ ܕܲܢܡܲܢܲܥ ܠܐܲܦܲܝ̈ ܛܘܼܪܵܐ ܕܒܹܗ ܥܵܡܲ݁ܪ ܗ̄ܘ̣ܵܐ ܩܲܕܝܼܫܵܐ ܥܲܒܼܕܝܼܫܘܿܥ: ܐܸܬܼܚ̣ܙܝܼ ܠܹܗ ܡܲܠܲܐܟܼܵܐ ܕܡܵܪܝܵܐ ܠܲܩܕܿܝܼܫܵܐ ܥܲܒܼܕܝܼܫܘܿܥ ܘܐܸܡ݂ܲܪ ܠܹܗ: ܩܘܼܡ ܦܘܿܩ ܠܐܘܼܪܥܹܗ ܕܩܲܪܕܼܵܓܼ ܡܲܪܙܒܼܵܢܵܐ: ܘܩܲܒܸܿܠܲܝܗܝ ܚܲܕܼܝܵܐܝܼܬܼ: ܡܸܛܠ ܕܲܓܼܒܹܝܬܹܗ: ܐܵܡܲ݁ܪ ܡܵܪܝܵܐ: ܘܕܝܼܠܝ ܗ̄ܘ̣: ܘܤܲܓܿܝܼ̈ܐܬܼܵܐ ܥܬܼܝܼܕܼ ܕܢܸܚܲܫ ܡܸܛܠܵܬܼܝ. ܩܵܡ̣ ܕܹܝܢ ܩܲܕܝܼܫܵܐ ܥܲܒܼܕܝܼܫܘܿܥ ܟܲܕܼ ܚܵܕܹܐ: ܘܲܠ̣ܒܲܟܼ ܚܘܼܛܪܹܗ ܒܐܝܼܕܹܗ: ܘܥܲܠ ܕܪܵܥܹܗ ܕܤܸܡܵܠܵܐ ܟܬܼܵܒܼܵܐ ܩܲܕܝܼܫܵܐ ܕܐܹܘܲܢܓܲܠܝܼܘܿܢ. ܘܲܡܙܲܡܲܪ ܗ̄ܘ̣ܵܐ ܟܲܕܼ ܪܵܕܹܐ ܘܐܵܡܲ݁ܪ: ܡܗܲܠܵܟܼܘܼ ܡܗܲܠܸܵܟܼ ܘܒܼܵܟܹ̇ܐ: ܐܲܝܢܵܐ ܕܲܫܩܝܼܠ ܙܲܪܥܵܐ. ܡܹܐܬܼܵܐ ܐܵܬܹ̇ܐ ܒܚܲܕܼܘܼܬܼܵܐ: ܐܲܝܢܵܐ ܕܲܫܩܝܼܠ ܟܲܦܵܐ. ܘܟܲܕܼ ܚ̣ܙܵܝܗܝ ܠܛܘܼܒܼܵܢܵܐ ܩܲܪܕܵܓܼ ܡ̣ܢ ܪܘܼܚܩܵܐ: ܥܢ̣ܵܐ ܘܐܸܡ݂ܲܪ ܠܹܗ ܟܲܕܼ ܦܨܝܼܚ: ܕܤܲܓܿܝܼ ܡܚܝܼܠܝܼܢ ܐܲܤܘܼܪ̈ܲܝܟ: ܡܵܪܝ ܡܲܪܙܒܼܵܢܵܐ. ܘܠܲܢ ܐܲܤܝܼܪ̈ܲܝ ܒܪܘܼܚܵܐ ܕܩܘܼܕܼܫܵܐ ܘܪ̈ܵܕܼܝܲܝ ܠܲܫܡܲܝܵܐ: ܠܵܐ ܚܫܝܼܒܼܝܼܢ ܡܸܕܸܿܡ. ܒܪܲܡ ܗܵܟܲܢܵܐ ܡܩܲܒܿܠܝܼܢ ܪܵܘܪ̈ܒܼܵܢܹܐ ܘܪܹ̈ܫܲܝ ܥܵܠܡܵܐ: ܠܐܲܟܼܤܢܵܝܹ̈ܐ ܕܨܵܝ̇ܒܿܝܼܢ ܠܘܵܬܼܗܘܿܢ. ܥܢ̣ܵܐ ܛܘܼܒܼܵܢܵܐ ܩܲܪܕܵܓܼ ܒܚܲܕܼܘܼܬܼܵܐ ܪܲܒܿܬܼܵܐ ܘܐܸܡ݂ܲܪ ܠܹܗ: ܐܵܦܸܢ ܚܢܲܢ ܐܸܤܲܪܢܵܟܼ ܟܲܕܼ ܛܵܥܹ̇ܝܢܲܢ: ܐܸܠܵܐ ܐܲܢ̄ܬܿ ܫܪܲܝܬܿ ܠܲܢ ܡ̣ܢ ܦܟܼܵܪܹ̈ܝܗ̇ ܕܚܢܦܘܼܬܼܵܐ: ܘܲܢܓܲܪܬܿ ܠܲܢ pb. 463 ܕܢܹܐܬܸܐ ܘܢܸܫܐܲܠ ܡܸܢܵܟܼ ܫܘܼܒܼܩܵܢܵܐ. ܘܐܲܢ̄ܬܿ ܐܲܝܟܼ ܐܲܒܼܵܐ ܡܪܲܚܡܵܢܵܐ: ܬܸܫܐܲܠ ܡ̣ܢ ܡܵܪܲܢ ܚܘܼܤܵܝܵܐ ܕܲܚܛܵܗܲܝ̈ܢ ܕܲܩܕܼܵܡܵܘܗܝ ܚܛܲܝܢܲܢ. ܘܡܸܚܕܼܵܐ ܢ̣ܚܸܬܼ ܡ̣ܢ ܤܘܼܤܝܹܗ: ܘܲܢܦܲܠ̣ ܩܕܼܵܡ ܪܸ̈ܓܼܠܵܘܗܝ ܕܩܲܕܝܼܫܵܐ ܥܲܒܼܕܝܼܫܘܿܥ ܟܲܕܼ ܒܵܟܹ̇ܐ ܘܐܵܡܲ݁ܪ: ܫܒܼܘܿܩ ܠܝܼ ܡܵܪܝ ܥܲܒܼܕܹܗ ܕܐܲܠܵܗܵܐ. ܘܐܲܦܝܼܣ ܠܲܡܫܝܼܚܵܐ ܡܵܪܝ: ܕܢܲܫܘܹܝܢܝ ܕܐܸܫܬܲܡܠܸܐ ܒܪܸܚܡܬܹܗ. ܛܘܼܒܼܵܢܵܐ ܕܹܝܢ ܠܲܒܼܟܹܿܗ ܒܐܝܼܕܹܗ ܘܐܸܡ݂ܲܪ ܠܹܗ: ܩܘܼܡ. ܘܩܵܡ̣: ܘܢܲܫ̣ܩܹܗ ܘܐܸܡ݂ܲܪ ܠܹܗ: ܬܵܐ ܒܲܫܠܵܡ ܒܹܪܝ ܕܝܸܠܕܹܬܼ ܒܐܲܤܘܼܪ̈ܲܝ: ܡܤܲܟܸܿܐ ܠܵܟܼ ܡܵܪܲܢ ܝܼܫܘܿܥ ܡܫܝܿܚܵܐ: ܘܚܵܕܹܝܢ ܒܵܟܼ ܡܲܠܲܐܟܼܵܘ̈ܗܝ ܩܲܕܿܝܼ̈ܫܹܐ. ܗܵܝܕܹܿܝܢ ܛܠܵܝܹ̈ܐ ܕܒܲܪܘ ܠܲܒܼܥܝܼܪܵܐ ܠܕܲܝܪܵܐ ܚܕܼܵܐ: ܗܵܝ̇ ܕܐܝܼܬܹܝܗ̇ ܗ̄ܘ̣ܵܬܼ ܒܲܫܦܘܿܠܵܘ̈ܗܝ ܕܛܘܼܪܵܐ: ܟܲܕܼ ܐܸܬܼܦܲܩܲܕܼܘ ܕܠܵܐ ܢܹܐܡܪܘܼܢ ܡܲܢ̣ܘܼ ܡܵܪܵܗ̇ ܕܲܒܼܥܝܼܪܵܐ. ܗܸܢ̣ܘܿܢ ܕܹܝܢ ܬܪ̈ܲܝܗܘܿܢ ܤܠܸܩ̣ܘ ܠܲܡܥܲܪܬܼܵܐ ܗܵܝ̇: ܕܒܼܵܗ̇ ܥܵܡܲ݁ܪ ܗ̄ܘ̣ܵܐ ܩܲܕܿܝܼܫܵܐ ܥܲܒܼܕܝܼܫܘܿܥ. ܘܟܲܕܼ ܗܘ̤ܵܐ ܥܸܕܵܢܵܐ: ܩܵܡ̣ ܗ̄ܘ̣ܵܐ ܛܘܼܒܼܵܢܵܐ ܥܲܒܼܕܝܼܫܘܿܥ ܕܲܢܙܲܡܲܪ ܬܸܫܡܸܫܬܼܵܐ ܕܪܲܡܫܵܐ: ܘܛܘܼܒܼܵܢܵܐ ܩܲܕܕܵܓܼ ܩܵܐܹ̇ܡ ܗ̄ܘ̣ܵܐ ܠܘܵܬܹܗ ܒܕܚܠܬܼܵܐ ܘܲܒܼܚܲܕܘܼܬܼܵܐ ܪܲܒܿܬܼܵܐ. ܘܗܵܐ ܓܘܼܕܵܐ ܕܕܲܝܘܹ̈ܐ ܡܲܪܝܪܹ̈ܐ ܐܸܬܼܚܙܝܼܘ ܒܲܫܩܝܼܦܵܐ ܠܥܸܠ ܡܸܢܗܘܿܢ: ܟܲܕܼ ܡܪܲܩܕܼܝܼܢ ܘܢܵܩ̇ܫܝܼܢ ܟܲܦܵܐ ܘܓܼܵܚܟܿܝܼܢ ܘܐܵܡ̇ܪܝܼܢ: ܐܘܿ ܡܵܐ ܫܲܦܝܼܪ ܠܹܗ ܠܦܲܛܚܵܫܵܐ ܘܲܠܡܲܪܙܒܼܵܢܵܐ: ܟܲܕܼ ܫܒܼܝܼܩ ܠܹܗ ܒܲܝܬܹܗ ܘܐܝܼܩܵܪܹܗ ܘܫܘܼܠܛܵܢܹܗ ܘܪܲܒܘܼܬܹܗ: ܘܒܵܐܹ̇ܬܼ ܛܘܵܬܼ ܒܲܫܩܝܼ̈ܦܹܐ ܠܘܵܬܼ ܐ̄ܢܵܫ̈ܐ ܛܵܥܲܝ̈ܵܐ pb. 464 ܥܵܡ̇ܪ̈ܲܝ ܒܲܡܥܲܪܹ̈ܐ. ܛܘܼܒܼܵܢܵܐ ܕܹܝܢ ܥܲܒܼܕܝܼܫܘܿܥ ܠܵܐ ܒܛܸܠ̣ ܡ̣ܢ ܬܸܫܡܸܫܬܹܗ: ܐܸܠܵܐ ܪܡܲܙ݂ ܠܩܲܕܿܝܼܫܵܐ ܡܵܪܝ ܩܲܪܕܵܓܼ: ܕܲܢܦܲܢܸܐ ܠܗܘܿܢ ܦܸܬܼܓܼܵܡܵܐ ܕܠܵܚܹ̇ܡ. ܥܢ̣ܵܐ ܕܹܝܢ ܛܘܼܒܼܵܢܵܐ ܘܐܸܡ݂ܲܪ ܠܗܘܿܢ: ܐܲܢ̄ܬܿܘܿܢ ܒܟܼܠ ܙܒܲܢ ܕܲܓܵܠܹ̈ܐ ܐܲܢ̄ܬܿܘܿܢ ܘܐܲܒܼܵܗܹܝ̈ܗ̇ ܕܕܲܓܵܠܘܼܬܼܵܐ. ܒܪܲܡ ܗܵܕܹܐ ܫܪܵܪܵܐ ܐܸܡ݂ܲܪܬܿܘܿܢ: ܕܒܲܫܪܵܪܵܐ ܫܲܦܝܼܪ ܠܹܗ ܠܦܲܛܚܵܫܵܐ ܘܲܠܡܲܪܙܒܼܵܢܵܐ: ܟܲܕܼ ܡܸܬܼܒܲܤܲܡ ܒܬܼܘܼܪܤܵܝܵܐ ܪܘܼܚܵܢܵܝܵܐ ܕܲܡܠܸܐ ܚܲܝܹ̈ܐ ܫܲܪܝܼܪܹ̈ܐ: ܥܲܡ ܐ̄ܢܵܫ̈ܐ ܩܲܕܝܼ̈ܫܹܐ: ܕܲܒܼܡܠܲܝ̈ܗܘܿܢ ܙܟܼܵܘ ܠܦܘܼܪ̈ܤܲܝܟܿܘܿܢ ܨܢܝܼ̈ܥܹܐ. ܘܫܲܒܼܩܘܼܗ̇ ܠܐܲܪܥܵܐ: ܘܠܲܫܡܲܝܵܐ ܪܗܝܼܒܼܝܼܢ. ܐܸܢܵܐ ܕܹܝܢ ܟܲܕܼ ܒܦܵܬܼܘܿܪܹ̈ܐ ܡܡܲܕܿܟܹ̈ܐ ܘܲܒܼܚܲܡܪ̈ܵܢܹܐ ܡܨܲܠ̈ܠܹܐ: ܐܲܝܟܼ ܨܸܒܼܝܵܢܟܼܘܿܢ ܛܲܡܐܵܐ: ܡܸܬܼܒܲܤܲܡ ܗ̄ܘܹܝ̇ܬܼ: ܡ̣ܢ ܦܵܬܼܘܿܪܵܐ ܕܲܟܼܝܵܐ ܕܚܲܝܹ̈ܐ ܕܒܲܡܫܝܼܚܵܐ ܓܠܝܼܙ ܗ̄ܘܹܝ̇ܬܼ: ܘܡ̣ܢ ܐܲܠܵܗܵܐ ܪܲܚܝܼܩ ܗ̄ܘܹܝ̇ܬܼ. ܘܒܲܪ ܥܸܢܝܵܢܵܐ ܠܟܼܘܿܢ ܚܸܫ̈ܘܿܟܹܐ ܘܡܵܪ̈ܘܿܕܓܹܐ ܢܛܝܼܪ̈ܲܝ ܠܫܘܼܢܵܩܵܐ ܗܵܘ̇ ܕܠܵܐ ܫܵܠܹ̇ܡ ܥܒܼܝܼܕܼ ܗ̄ܘܹܝ̇ܬܼ. ܝܵܘܡܵܢܵܐ ܕܹܝܢ ܕܐܲܫ̣ܘܝܲܢܝ ܡܫܝܼܚܵܐ ܡܵܪܝ ܠܢܘܼܗܪܵܐ ܕܝܼܕܲܥܬܹܗ: ܗܵܐ ܡܸܬܼܒܲܤܲܡ ܐ̄ܢܵܐ ܒܦܵܬܼܘܿܪܵܐ ܪܘܼܚܵܢܵܝܵܐ ܕܝܘܼܠܦܵܢܹܗ ܩܲܕܿܝܼܫܵܐ. ܐܲܢ̄ܬܿܘܿܢ ܕܹܝܢ ܛܲܡ̈ܐܹܐ: ܙܸܠܘ ܠܚܸܫܘܿܟܼܵܐ ܒܲܪܵܝܵܐ. ܘܡܸܚܕܼܵܐ ܫܲܢ̣ܝܼܘ: ܟܲܕܼ ܡܲܝܠܠܝܼܢ ܘܩܵܥܹ̇ܝܢ ܘܫܵܓܼܫ̇ܝܼܢ ܠܹܗ ܠܛܘܼܪܵܐ.

ܘܟܲܕܼ ܕܹܝܢ ܫܲܠܸܡ̣ܘ ܛܘܼܒܼܵܢܹ̈ܐ ܬܸܫܡܸܫܬܗܘܿܢ ܘܝܼܬܸܒܼܘ: ܐܸܡ݂ܲܪ ܩܲܕܝܼܫܵܐ ܥܲܒܼܕܝܼܫܘܿܥ ܠܛܘܼܒܼܵܢܵܐ ܩܲܪܕܵܓܼ: ܗܵܐ ܒܹܪܝ ܐܝܼܬܼ pb. 465 ܠܲܢ ܗܵܪܟܵܐ ܩܲܠܝܼܠ ܚܸܡ̈ܨܹܐ ܕܡܲܬܼܪܹܝܢ: ܘܩܲܠܝܼܠ ܚܲܠܵܐ ܒܩܲܪܐܵܐ. ܢܸܠܥܲܣ ܒܹܪܝ: ܘܢܸܫܬܸܐ ܡܲܝ̈ܵܐ. ܥܢ̣ܵܐ ܩܲܪܕܵܓܼ ܘܐܸܡ݂ܲܪ ܠܹܗ: ܡܸܕܸܿܡ ܕܨܵܒܹ̇ܐ ܨܸܒܼܝܵܢܵܟܼ ܐܲܒܼܘܼܢ: ܒܚܲܕܼܘܼܬܼܵܐ ܡܫܲܡܠܸܐ ܐ̄ܢܵܐ. ܘܟܲܕܼ ܨܲܠܝܼܘ ܘܫܲܪܝܼܘ ܠܡܸܠܥܲܣ: ܗܵܐ ܡܲܠܲܐܟܼܵܐ ܕܡܵܪܝܵܐ ܐܸܬܼܚ̣ܙܝܼ ܠܗܘܿܢ ܘܐܸܡ݂ܲܪ: ܫܠܵܡ ܠܟܼܘܿܢ. ܘܥܲܡܵܗ̇ ܕܡܸܠܬܹܗ: ܦܫܲܛ̣ ܐܝܼܕܹܗ ܟܲܕܼ ܛܥܝܼܢ ܓܪܝܼܨܬܵܐ ܚܕܼܵܐ ܕܠܲܚܡܵܐ ܢܲܩܕܵܐ. ܘܐܸܡ݂ܲܪ ܠܛܘܼܒܼܵܢܵܐ ܩܲܪܕܵܓܼ: ܟܲܕܼ ܡܲܛܝܼܢܲܢ ܠܘܵܬܼܵܟܼ: ܒܦܲܪ̈ܙܠܹܐ ܐܸܤܲܪܬܿ ܠܲܢ: ܘܠܲܚܡܵܐ ܕܠܵܐ ܡܲܝ̈ܵܐ ܡܸܛܲܪ ܢܦܸܫ ܝܲܗ̣̄ܒܼܬܿ ܠܲܢ. ܝܵܘܡܵܢܵܐ ܕܹܝܢ ܕܡܲܛ̣ܝܼܬܿ ܠܘܵܬܲܢ: ܗܵܐ ܒܛܘܼܪܹ̈ܐ ܪ̈ܵܡܹܐ ܘܲܦܲܐ̈ܝܵܐ ܐܲܫܪܝܼܢܵܟܼ: ܘܠܲܚܡܵܐ ܢܲܩܕܵܐ ܗܵܐ ܐܲܝܬܿܝܼܢܲܢ ܠܵܟܼ: ܘܗܵܐ ܡܲܝ̈ܵܐ ܩܲܪܝܼܪܹ̈ܐ ܕܪܵܕܹܝܢ ܒܪܹܫ ܛܘܼܪܵܐ. ܒܪܲܡ ܬܵܐ ܒܲܫܠܵܡ: ܚܲܕܼܘܼܬܼܵܐ ܓܹܝܪ ܪܲܒܿܬܼܵܐ ܐܝܼܬܼ ܠܡܲܠܲܐܟܹ̈ܐ ܘܠܲܒܼܢܲܝ̈ܢܵܫܵܐ ܒܡܹܐܬܼܝܼܬܼܵܟܼ ܕܲܠܘܵܬܲܢ. ܘܤܵܡܹܗ ܠܠܲܚܡܵܐ ܥܲܠ ܦܵܬܼܘܿܪܵܐ ܘܫܲܢ̣ܝܼ. ܘܩܵܡ̣ܘ ܛܘܼ̈ܒܼܵܢܹܐ ܡܸܚܕܼܵܐ: ܘܤܵܡ̣ܘ ܒܘܼܪܟܵܐ ܬܪ̈ܲܝܗܘܿܢ ܐܲܝܟܼ ܫܵܥܹ̈ܐ ܬܠܵܬܼ: ܟܲܕܼ ܡܨܲܠܹܝܢ ܘܚܵܕܹ̇ܝܡ ܘܲܡܫܲܒܿܚܝܼܢ ܠܐܲܠܵܗܵܐ. ܘܟܲܕܼ ܫܲܠܸܡ̣ܘ ܨܠܘܿܬܼܗܘܿܢ: ܐܸܟܲܠ̣ܘ ܡܲܕܸܿܡ ܕܐܸܫ̣ܬܲܕܲܪ ܠܗܘܿܢ ܡ̣ܢ ܫܡܲܝܵܐ. ܘܠܸܠܝܵܐ ܟ̱ܠܹܗ ܒܬܸܫܡܸܫܬܼܵܐ ܕܠܲܐܵܗܵܐ ܚܦܝܼܛܝܼܢ ܗ̄ܘ̣ܵܘܘ

ܓܲܒܼܪܵܐ ܕܹܝܢ ܚܲܕܼ ܤܵܒܼܵܐ ܥܲܬܝܼܩ ܝܵܘ̈ܡܵܬܼܵܐ ܐܝܼܬܼ ܗ̄ܘ̣ܵܘ ܕܲܫܡܹܗ pb. 466 ܒܹܪܝ: ܘܥܵܡܲ݁ܪ ܗ̄ܘ̣ܵܐ ܒܲܡܥܲܪܬܼܵܐ ܚܕܼܵܐ ܕܦܲܪܝܼܩܵܐ ܡ̣ܢ ܡܥܲܪܬܹܗ ܕܛܘܼܒܼܵܢܵܐ ܥܲܒܼܕܝܼܫܘܿܥ ܐܲܝܟܼ ܬܸܫܥܵܐ ܡܝܼ̈ܠܝܼܢ. ܘܓܲܒܼܪܵܐ ܗ̄ܘ̣ܵܐ ܪܲܒܵܐ ܘܐܲܠܵܗܵܝܵܐ: ܘܲܫ̈ܢܲܝܵܐ ܫܬܝܼܢ ܘܲܬܼܡܵܢܹܐ ܐܝܼܬܼ ܗ̄ܘ̣ܵܐ ܠܹܗ ܕܥܵܡܲ݁ܪ ܗ̄ܘ̣ܵܐ ܒܛܘܼܪܵܐ ܗܵܘ̇. ܘܡܵܪܝܵܐ ܐܸܡ݂ܲܪ ܠܹܗ ܒܚܸܙܘܵܐ: ܩܘܼܡ ܙܸܠ ܠܲܡܥܲܪܬܹܗ ܕܥܲܒܼܕܝܼܫܘܿܥ: ܘܲܚܙܝܼ ܬܲܡܵܢ ܠܩܲܪܕܵܓܼ ܡܲܪܙܒܼܵܢܵܐ. ܘܠܲܒܸܿܒܲܝܗܝ ܒܲܚܙܵܬܼܵܟܼ: ܘܚܲܝܸܠܲܝܗܝ ܒܡܸܠܬܼܵܟܼ. ܩܵܡ̣ ܤܵܒܲܐ ܒܚܲܕܼܘܼܬܼܵܐ ܪܲܒܿܬܼܵܐ: ܘܟܲܕܼ ܢ̣ܗܲܪ ܨܲܦܪܵܐ: ܡܲܛ̣ܝܼ ܠܲܡܥܲܪܬܹܗ ܕܥܲܒܼܕܝܼܫܘܿܥ. ܘܟܲܕܼ ܚ̣ܙܵܝܗܝ ܥܲܒܼܕܝܼܫܘܿܥ ܬܡ݂ܲܗ: ܠܵܐ ܓܹܝܪ ܢܲܦܝܼܩ ܗ̄ܘ̣ܵܐ ܠܹܗ ܡ̣ܢ ܡܥܲܪܬܹܗ ܒܲܫ̈ܢܲܝܵܐ ܫܬܝܼܢ ܘܲܬܼܡܵܢܹܐ. ܥܢ̣ܵܐ ܕܹܝܢ ܤܵܒܼܵܐ ܘܐܸܡ݂ܲܪ ܠܥܲܒܼܕܝܼܫܘܿܥ: ܗܵܐ ܐܵܪܚܵܐ ܪܲܒܵܐ ܐܝܼܬܼ ܠܵܟܼ: ܘܡܸܛܠ ܡܵܢܵܐ ܩܪܲܝܬܿ ܠܲܢ ܥܲܡܹܗ ܠܒܼܘܼܤܵܡܵܐ؟ ܐܵܡܲ݁ܪ ܠܹܗ ܥܲܒܼܕܝܼܫܘܿܥ: ܫܒܼܘܿܩ ܠܝܼ ܐܲܒܼܘܼܢ: ܐܸܡ̇ܪܹܬܼ ܕܠܵܐ ܐܸܫܚܘܿܩ ܠܤܲܝܒܿܘܼܬܼܵܟܼ: ܗܵܝ̇ ܕܐܵܦ ܠܵܐ ܡܲܨܝܵܐ ܗ̄ܘ̣ܵܬܼ ܕܬܸܗܘܸܐ. ܐܵܡܲ݁ܪ ܠܹܗ ܤܵܒܼܵܐ: ܐܵܦܸܢ ܐܲܢ̄ܬܿ ܠܵܐ ܩܪ̈ܲܝܬܵܢܝ: ܐܸܠܵܐ ܡܵܪܝܵܐ ܫܲܕܪܲܢܝ. ܘܨܲܠ̣ܝܼܘ ܘܝܲܗ̣̄ܒܼܘ ܫܠܵܡܵܐ ܠܲܚ̈ܕܼܵܕܹܐ. ܘܠܲܒܼܟܹܗ ܤܵܒܼܵܐ ܠܩܲܪܕܵܓܼ ܘܢܲܫ̣ܩܹܗ ܘܐܸܡ݂ܲܪ: ܬܵܐ ܒܲܫܠܵܡ ܥܹܤܘܿ ܓܲܒܼܪܵܐ ܕܒܲܪܵܐ: ܕܐܸܫ̣ܬܲܚܠܲܦ ܘܲܗܘ̤ܵܐ ܝܲܥܩܘܿܒܼ ܬܲܡܝܼܡܵܐ: ܘܥܵܡܲ݁ܪ ܒܡܲܫܟܿܢܵܐ ܕܙܲܕܝܼ̈ܩܹܐ. ܘܝܼܬܸܒܼ ܘܡܲܠܸܠ̣ ܥܲܡܹܗ ܡܸܠܬܼܵܐ ܕܐܲܠܵܗܵܐ ܥܕܲܡܵܐ ܠܲܬܼܫܲܥ ܫܵܥܝܼ̈ܢ: ܘܒܲܪܟܹܗ ܘܢܲܫ̣ܩܹܗ: ܘܩܵܡ̣ ܗܦܲܟܼ ܠܲܡܥܲܪܬܹܗ. pb. 467 ܘܟܲܕܼ ܝܵܘ̈ܡܵܬܼܵܐ ܚܲܡܫܵܐ ܩ̣ܵܘܝܼ ܛܘܼܒܼܵܢܵܐ ܩܲܕܪܓܼ ܠܘܵܬܼ ܩܲܕܝܼܫܵܐ ܥܲܒܼܕܝܼܫܘܿܥ: ܡܸܬܼܟܲܫܲܦ ܗ̄ܘ̣ܵܐ ܠܹܗ ܤܲܓܿܝܼ ܒܠܸܠܝܵܐ ܘܒܼܐܝܼܡܵܡܵܐ: ܕܢܲܫܘܹܝܘܗܝ ܠܪܘܼܫܡܵܐ ܕܡܲܥܡܘܿܕܝܼܬܼܵܐ. ܘܲܒܼܠܸܠܸܝܵܐ ܕܢܸܓܲܗ ܝܵܘܡܵܐ ܕܸܫܬܼܵܐ: ܐܸܬܼܚ̣ܙܝܼ ܩܲܕܿܝܼܫܵܐ ܡܵܪܝ ܤܲܪܓܿܝܼܣ ܤܵܗܕܵܐ ܒܚܸܠܡܵܐ ܠܥܲܒܼܕܝܼܫܘܿܥ ܘܐܸܡ݂ܲܪ ܠܹܗ: ܠܡܵܢܵܐ ܡܸܬܿܬܲܗܸܐ ܐܲܢ̄ܬܿ ܠܡܸܦܬܲܚ ܬܲܪܥܵܐ ܕܤܵܗܕܘܼܬܼܵܐ ܩܕܼܵܡ ܐܵܚܝ ܩܲܪܕܵܓܼ؟ ܘܟܲܕܼ ܐܸܬܿܬܿܥ̣ܝܼܪ ܥܲܒܼܕܝܼܫܘܿܥ ܡ̣ܢ ܫܸܢܬܹܗ: ܕܚܸܠ ܕܸܚܠܬܼܵܐ ܪܲܒܿܬܼܵܐ. ܘܲܩ̣ܪܵܐ ܠܛܘܼܒܼܵܢܵܐ ܩܲܪܕܵܓܼ ܘܐܸܡ݂ܲܪ ܠܹܗ: ܩܘܼܡ ܒܪܹܝ: ܢܸܚܘܿܬܼ ܠܕܲܝܪܵܐ ܐܲܝܟܵܐ ܕܐܝܼܬܲܝܗܘܿܢ ܛܠܵܝܹ̈ܐ: ܘܲܢܫܲܡܠܸܐ ܡܸܕܸܿܡ ܕܐܸܬܼܦ̣ܩܸܕܼ ܠܝܼ ܒܠܸܠܝܵܐ ܗܵܢܵܐ. ܘܟܲܕܼ ܢܵܚ̇ܬܿܝܼܢ ܡ̣ܢ ܛܘܼܪܵܐ: ܡܸܫܬܲܥܸܐ ܗ̄ܘ̣ܵܐ ܛܘܼܒܼܵܢܵܐ ܥܲܒܼܕܝܼܫܘܿܥ ܠܩܲܪܕܵܓܼ ܚܸܙܘܵܐ ܕܲܚ̣ܙܵܐ ܒܠܸܠܝܵܐ. ܟܲܕܼ ܕܹܝܢ ܡܲܛ̣ܝܼܘ ܠܕܲܝܪܵܐ: ܐܸܬܼܟܲܢܲܫ̣ܘ ܐܲܚܹ̈ܐ ܘܐܲܬܼܩܸܢ̣ܘ ܡܲܥܡܘܿܕܝܼܬܼܵܐ. ܘܟܲܕܼ ܚܵܕܹ̇ܐ ܘܪܵܘܹ̇ܙ: ܩܲܒܸܿܠ̣ ܪܘܼܫܡܹܗ ܕܲܡܫܝܚܵܐ ܗ̤ܘ ܘܲܬܼܪܹܝܢ ܥܠܲܝܡܵܘ̈ܗܝ: ܘܐܸܫܬܵܘܬܲܦ̣ܘ ܒܐ̄ܪ̈ܵܙܹܐ ܩܲܕܿܝܼ̈ܫܹܐ. ܩ̣ܵܘܝܼ ܕܹܝܢ ܠܘܵܬܼ ܩܲܕܿܝܼܫܵܐ ܥܲܒܼܕܝܼܫܘܿܥ: ܡ̣ܢ ܒܵܬܲܪ ܕܩܲܒܸܿܠ̣ ܪܘܼܫܡܵܐ ܕܡܲܥܡܘܿܕܝܼܬܼܵܐ: ܝܵܘ̈ܡܬܼܵܐ ܫܲܒܼܥܵܐ. ܘܩܵܡ̣ ܥ̣ܛܲܦ ܠܒܲܝܬܹܗ: ܟܲܕܼ ܪܵܘܹ̇ܙ ܒܗܲܝܡܵܢܘܼܬܼܵܐ ܕܲܡܫܝܼܚܵܐ. ܘܟܲܕܼ ܐܝܼܬܼܵܘܗܝ ܒܒܹܝܬܼ ܒܵܘܬܵܐ ܒܐܘܼܪܚܵܐ: ܐܸܬܼܚ̣ܙܝܼ ܠܹܗ ܤܵܛܵܢܵܐ ܒܐܸܤܟܹܡܵܐ ܕܓܲܒܼܪܵܐ ܡܓܼܘܼܫܵܐ: ܟܲܕܼ ܡܨܲܪܹܝܢ ܡܵܐܢܵܘ̈ܗܝ ܘܲܡܲܝܠܸܠ ܘܒܼܵܟܹ̇ܐ ܘܐܵܡܲ݁ܪ: ܠܡܵܢܵܐ ܒܹܪܝ ܩܲܪܕܵܓܼ ܐܲܪܦܝܼܬܵܢܝ: ܘܲܢܩܸܦ̣ܬܿ ܠܲܒܼܥܸܠܕܲܒܼܵܒܲܝ̈؟ ܛܘܼܒܼܵܢܵܐ pb. 468 ܕܹܝܢ ܐܸܡ݂ܲܪ ܠܹܗ ܠܒܼܝܼܒܼܵܐܝܼܬܼ: ܬܟܼܝܼܠ ܐ̄ܢܵܐ ܥܲܠ ܚܲܝܠܹܗ ܕܲܡܫܝܼܚܵܐ ܡܵܪܝ: ܕܤܲܓܿܝܼ̈ܐܹܐ ܡܲܥܕܸܐ ܐ̄ܢܵܐ ܡ̣ܢ ܚܸܟܵܟܼ ܡܚܲܒܿܠܵܢܝܼܬܼܵܐ: ܘܲܠܒܹܝܬܼ ܤܸܓܼܕܬܹܗ ܕܲܡܫܝܼܚܵܐ ܡܵܪܝ ܡܩܲܪܸܒܼܢܵܐ ܠܗܘܿܢ. ܘܤܵܛܵܢܵܐ ܥܢ̣ܵܐ ܘܐܸܡ݂ܲܪ ܠܹܗ: ܠܵܟܼ ܐܝܼܬܼ ܠܵܟܼ ܐ̄ܢܵܫ̈ܐ ܬܵܚܘܿܒܹ̈ܐ ܥܵܡ̇ܪܲܝ ܒܲܫܩܝܼ̈ܦܹܐ: ܘܠܝܼ ܕܹܝܢ ܐܝܼܬܼ ܠܝܼ ܡܲܠܟܹ̈ܐ ܘܪܵܘܪ̈ܒܼܵܢܹܐ ܕܟܼܠܵܗ̇ ܦܵܪܹܣ. ܘܡܸܟܹܿܝܠ ܕܕܲܓܸܠ̣ܬܿ ܒܝܼ: ܐܵܙܹ̇ܠܢܵܐ ܘܡܵܘܕܲܥܢܵܐ ܠܡܲܠܟܹ̈ܐ ܘܲܠܫܲܠܝܼ̈ܛܵܢܹܐ: ܘܐܸܥܒܿܕܼܵܟܼ ܕܲܬܼܡܘܼܬܼ ܡܵܘܬܵܐ ܡܲܪܝܼܪܵܐ. ܛܘܼܒܼܵܢܵܐ ܕܹܝܢ ܩܲܪܕܵܓܼ ܚ̣ܬܲܡ ܢܲܦܫܹܗ ܒܐܵܬ̤ܵܐ ܕܲܨܠܝܼܒܼܵܐ ܘܐܸܡ݂ܲܪ ܠܹܗ: ܢܤܝܼܦܵܟܼ ܡܫܝܼܚܵܐ ܡܵܪܝ: ܗܵܘ̇ ܕܡܸܛܠ ܚܘܼܒܹܗ ܡܛܲܝܲܒܲ ܐ̄ܢܵܐ ܠܡܸܚܲܫ ܘܠܲܡܡܵܬܼ ܚܲܕܼܝܵܐܝܼܬܼ. ܘܡܸܚܕܼܵܐ ܐܸܫܬܲܚܠܲܦ̣: ܘܲܗܘ̤ܵܐ ܐܲܝܟܼ ܟܘܼܫܵܝܵܐ ܤܵܒܼܵܐ: ܟܲܕܼ ܤܝܼ̈ܡܵܢ ܐܝܼܕܼܵܘ̈ܗܝ ܥܲܠ ܪܹܫܹܗ: ܘܡܲܝܠܸܠ ܘܒܼܵܟܹ̇ܐ ܘܥܵܪܹܩ.

ܟܲܕܼ ܕܹܝܢ ܤ̣ܡܲܟܼ ܛܘܼܒܼܵܢܵܐ ܠܒܲܝܬܹܗ: ܫܲܕܲܪ ܐܲܝܬܿܝܼ ܠܹܗ ܐܲܚܵܐ ܚܲܕܼ ܝܼܚܝܼܕܼܵܝܵܐ ܫܵܘܹ̇ܐ ܠܕܼܘܼܟܼܪܵܢܵܐ ܛܵܒܼܵܐ: ܕܲܫܡܹܗ ܐܝܼܤܚܵܩ. ܘܡܲܠܸܦ ܗ̄ܘ̣ܵܐ ܠܹܗ ܡܲܙܡܘܿܪܹ̈ܐ ܕܛܘܼܒܼܵܢܵܐ ܕܵܘܝܼܕܼ: ܘܩܵܪܹܐ ܗ̄ܘ̣ܵܐ ܩܕܼܵܡܵܘܗܝ ܒܲܟܼܬܼܵܒܼܵܐ ܕܐܹܘܲܢܓܲܠܝܼܘܿܢ ܩܲܕܿܝܼܫܵܐ. ܘܡ̣ܢ ܗܵܝܕܹܿܝܢ ܚܤܲܠ̣ ܗ̄ܘ̣ܵܐ ܛܘܼܒܼܵܢܵܐ ܦܘܼܡܹܗ ܡ̣ܢ ܡܹܐܟܼܘܼܠܬܼܵܐ ܕܒܸܤܪܵܐ: ܘܡ̣ܢ ܪܲܡܫܵܐ ܠܪܲܡܫܵܐ ܡܸܤܬܲܝܒܲܪ ܗ̄ܘ̣ܵܐ ܒܲܡܫܝܼܚܬܼܵܐ ܬܩܲܢܬܼܵܐ: ܕܲܡܡܲܕܲܟܼܵܐ ܒܲܛܥܵܡܹ̈ܐ ܕܫܲܡܝܼ̈ܢܵܬܼܵܐ. ܦܬܲܚ̣ ܗ̄ܘ̣ܵܐ ܕܹܝܢ ܓܲܙܵܘ̈ܗܝ: ܘܡܦܲܠܸܓܼ ܗ̄ܘ̣ܵܐ ܡܵܘ̈ܗܒܼܵܬܼܵܐ ܪܵܘܪ̈ܒܼܵܬܼܵܐ ܘܙܸܕܼ̈ܩܵܬܼܵܐ ܫܦܝܼ̈ܥܵܬܼܵܐ ܠܥܹ̈ܕܵܬܼܵܐ ܘܲܠܕܲܝܪ̈ܵܬܼܵܐ ܘܲܠܥܘܼܡܪܹ̈ܐ ܩܲܕܝܼܫܹ̈ܐ: ܘܲܠܡܸܤ̈ܟܹܿܢܹܐ ܘܠܲܤܢܝܼ̈ܩܹܐ ܘܲܠܝܲܬܼܡܹ̈ܐ ܘܠܲܐܪ̈ܡܠܵܬܼܵܐ: ܘܟܸܢܫܹ̈ܐ pb. 469 ܕܲܟܼܪ̈ܝܼܗܹܐ ܐܲܡܝܼܢܵܐܝܼܬܼ ܟܵܢܫܝܼܢ ܗ̄ܘ̣ܵܘ ܩܕܼܵܡܵܘܗܝ ܘܲܒܼܬܲܪܥܹܗ. ܐܲܢ̄ܬܿܬܹܗ ܕܹܝܢ ܘܐܲܒܼܵܗܵܘ̈ܗܝ ܘܟܼܠܗܘܿܢ ܐ̄ܢܵܫܲܝ̈ ܒܲܝܬܹܗ: ܛܵܒܼ ܡ̇ܥܵܩܝܼܢ ܗ̄ܘ̣ܵܘ ܟܲܕܼ ܚܵܙܹ̇ܝܢ ܗ̄ܘ̣ܵܘ ܗܵܝ̇ ܟ̱ܠܵܗ̇ ܫܦܝܼܥܘܼܬܼܵܐ ܕܥܵܒܹ̇ܕܼ ܗ̄ܘ̣ܵܐ. ܩ̣ܪܵܐ ܐܸܢܘܿܢ ܕܹܝܢ ܛܘܼܒܼܵܢܵܐ ܘܐܸܡ݂ܲܪ ܠܗܘܿܢ: ܠܡܵܢܵܐ ܟܲܝ ܟܡܝܼܪܝܼܢ ܐ̄ܢ̄ܬܿܘܿܢ ܤܲܟܼ̈ܠܹܐ: ܥܲܠ ܩܸܢ̈ܝܵܢܹܐ ܐܲܪ̈ܥܵܢܵܝܹܐ ܕܒܲܫܢܡܲܝܵܐ ܡܸܬܼܚܡܠܝܼܢ؟ ܫܡܲܥܘ: ܐܸܢ ܨܵܒܹ̇ܝܬܿܘܿܢ: ܠܲܤܒܪܬܹܗ ܡܲܚܝܵܢܝܼܬܼܵܐ ܕܦܵܪܘܿܦܩܲܢ ܕܡܲܙܥܩܵܐ: ܕܠܵܐ ܬܤܝܼܡܘܼܢ ܠܟܼܘܿܢ ܤܝܼ̈ܡܵܬܼܵܐ ܒܐܲܪܥܵܐ: ܐܬܲܪ ܕܤܵܤܵܐ ܘܐܵܟܼܠܵܐ ܡܚܲܒܿܠܝܼܢ: ܘܐܲܝܟܵܐ ܕܓܲܢܵܒܹ̈ܐ ܦܵܠ̇ܫܝܼܢ ܘܓܼܵܢ̇ܒܿܝܼܢ. ܘܐܲܝܟܵܐ ܕܐܝܼܬܹܝܗ̇ ܤܝܼܡܲܬܼܟܼܘܿܢ: ܬܲܡܵܢ ܢܸܗܘܸܐ ܐܵܦ ܠܸܒܿܟܼܘܿܢ. ܐܸܢ ܗܵܟܹܝܠ ܠܝܼ ܪܵܚ̇ܡܝܼܢ ܐ̄ܢ̄ܬܿܘܿܢ ܘܕܝܼܠܝܼ ܐܲܢ̄ܬܿܘܿܢ: ܐܲܝܟܵܐ ܕܐܸܢܵܐ ܐܝܼܬܲܝ ܐܵܦ ܐܲܢ̄ܬܿܘܿܢ ܬܸܗܘܘܿܢ. ܘܐܸܢ ܥܲܡܝ ܠܵܐ ܐܝܼܬܲܝܟܿܘܿܢ: ܡܸܟܹܿܝܠ ܠܘܼܩܒܲܠܝ ܐܲܢ̄ܬܿܘܿܢ. ܘܥܲܠ ܩܸܢܝܵܢܹ̈ܐ ܕܝܼܠܝ ܠܵܐ ܬܚܘܼܤܘܼܢ: ܡܸܛܠ ܕܠܲܡܫܝܼܚܵܐ ܡܵܪܝ ܗܵܘ̇ ܕܗ̤ܘܝܘܼ ܡܲܠܟܵܐ ܫܲܪܝܼܪܵܐ ܝܵܗܹ̇ܒܼ ܐ̄ܢܵܐ ܠܗܘܿܢ. ܐܸܫ̣ܬܲܝܲܢ ܕܹܝܢ ܘܲܗܘ̤ܵܐ ܩܲܕܿܝܼܫܵܐ ܢܝܼܚܵܐ ܘܒܲܤܝܼܡܵܐ ܠܘܵܬܼ ܐ̄ܢܵܫܲܝ̈ ܒܲܝܬܹܗ ܘܲܠܘܵܬܼ ܟܠܢܵܫ: ܘܢ̣ܵܚ ܡ̣ܢ ܩܪ̈ܵܒܹܐ ܘܬܲܟܼܬܿܘܼܫܹ̈ܐ ܕܲܡܥܵܕܼ ܗ̄ܘ̣ܵܐ ܥܵܒܹ̇ܕܼ. ܘܦܵܫ̣ ܡ̣ܢ ܢܲܚܫܝܼܪܵܐ ܘܨܲܝܕܵܐ ܘܐܸܫܬܿܥܸܢܝܵܐ ܕܒܸܐܤܛܵܕܼܝܼܘܿܢ ܘܫܲܪܟܵܐ ܕܲܐ̄ܚܪ̈ܵܢܝܵܬܼܵܐ: ܘܲܥܢܸܐ ܗ̄ܘ̣ܵܐ ܒܨܵܘܡܵܐ ܘܲܒܼܬܸܫܡܸܫܬܼܵܐ ܘܲܒܼܩܸܪܝܵܢܵܐ ܕܲܟܼܬܼܵܒܹ̈ܐ. ܘܐܲܡܝܼܢ ܗ̄ܘ̣ܵܐ ܐܵܦ ܠܡܸܫܡܲܥ ܕܝܼ̈ܢܹܐ: ܘܠܲܡܚܲܪܵܪܘܼ ܠܲܥܠܝܼ̈ܒܹܐ ܡ̣ܢ pb. 470 ܥܵܠ̇ܘܿܒܹ̈ܐ: ܘܠܲܡܦܲܨܵܝܘܼ ܠܲܛܠܝܼ̈ܡܹܐ ܡ̣ܢ ܛܵܠ̇ܘܿܡܹ̈ܐ: ܒܟܼܠܗܘܿܢ ܐܲܬܼܪ̈ܵܘܵܬܼܵܐ ܕܫܘܼܠܛܵܢܹܗ.

ܐܲܒܼܘܼܗܝ ܕܹܝܢ ܘܐܸܡܹܗ ܥܵܡ̇ܪܝܼܢ ܗ̄ܘ̣ܵܘ ܒܟܼܘܿܪܵܐ ܚܲܕܼ ܕܡܸܬܼܩܪܸܐ ܕܒܲܪ ܚܹܘܬܘܿܢ: ܡܸܛܠ ܕܩܸܢ̈ܝܵܢܹܐ ܘܡܲܪ̈ܗܵܛܹܐ ܐܝܼܬܼ ܗ̄ܘ̣ܵܘ ܠܗܘܿܢ ܬܲܡܵܢ ܪܵܘܪ̈ܒܹܐ: ܘܒܹܝܬܼ ܢܘܼܪܵܐ ܚܲܕܼ ܡܫܲܡܗܵܐ: ܗܵܘ̇ ܕܐܸܬܼܒܿܢ̣ܝܼ ܡܸܢܗܘܿܢ: ܘܒܹܗ ܥܵܡ̇ܪܝܼܢ ܗ̄ܘ̣ܵܘ: ܗܵܘ̇ ܕܒܼܵܬܲܪ ܩܲܠܝܼܠ: ܕܲܝܪܵܐ ܪܲܒܿܬܼܵܐ ܥܲܒܼܕܹܗ ܗ̄ܘ̣ܵܐ ܗ̤ܘ ܛܘܼܒܼܵܢܵܐ ܩܲܪܕܵܓܼ: ܗܵܝ̇ ܕܐܝܼܬܹܝܗ̇ ܥܕܲܡܵܐ ܠܝܵܘܡܵܢܵܐ: ܘܥܲܠ ܫܡܹܗ ܡܸܬܼܩܲܪܝܵܐ. ܟܲܕܼ ܕܹܝܢ ܫܡܲܥ̣ܘ ܐܲܒܼܵܘ̈ܗܝ ܕܲܗܘ̤ܵܐ ܠܹܗ ܟܪܸ̈ܤܛܝܵܢܵܐ: ܘܗܵܐ ܡܦܲܠܸܓܼ ܩܸܢܝܵܢܵܘ̈ܗܝ ܘܲܡܒܲܕܲܪ ܢܸܟܼܤܵܘ̈ܗܝ ܠܥܹ̈ܕܼܵܬܼܵܐ ܘܲܠܕܲܝܪ̈ܵܬܼܵܐ ܘܲܠܡܸܤ̈ܟܹܿܢܹܐ: ܟܸܪܝܲܬ̤ ܠܗܘܿܢ ܛܵܒܼ. ܘܐܸܡ݂ܲܪ ܐܲܒܼܘܼܗܝ ܠܐܸܡܹܗ ܕܛܘܼܒܼܵܢܵܐ: ܪܲܒܵܐ ܗ̣̄ܝ ܒܝܼܫܬܼܵܐ ܕܓܸܕܼܫܲܬ̤ ܠܲܢ: ܘܠܵܘܛܬܼܵܐ ܗܵܘܹ̇ܝܢܲܢ ܠܲܟܼ̈ܢܵܘܵܬܲܢ. ܘܟܲܕܸ ܤܒܲܪܢ ܕܝܵܪܘܿܬܼܵܐ ܛܵܒܼܵܐ ܐܝܼܬܼ ܠܲܢ: ܥܵܩ̇ܘܿܪܵܐ ܕܒܲܝܬܲܢ ܝܼܠܸܕܼܢܲܢ ܘܪܲܒܿܝܼܢܲܢ. ܐܸܡܹܗ ܕܹܝܢ ܐܸܡ̣ܪܲܬ̤ ܠܒܲܥܠܵܗ̇: ܠܝܼ ܡܸܬܼܚܲܙܝܵܐ ܠܝܼ ܕܠܵܐ ܢܲܟܼܫܠܝܼܘܗܝ: ܐܸܠܵܐ ܫܒܼܘܿܩܲܝܗܝ ܒܨܸܒܼܝܵܢ ܢܲܦܫܹܗ: ܘܡܸܕܸܿܡ ܕܨܒܹ̇ܿܐ ܢܸܥܒܸܿܕ. ܚܢܲܢ ܕܹܝܢ ܡ̣ܢ ܟܲܕܼܘ ܤܐܸܒܼܢ ܠܲܢ: ܘܕܲܢܡܘܼܬܼ ܐܝܼܬܼ ܠܲܢ. ܘܡܲܪ̈ܗܵܛܹܐ ܘܩܸܢܝܵܢܹ̈ܐ ܕܝܼܠܹܗ ܐܸܢܘܿܢ: ܘܫܲܠܝܼܛ ܥܲܠ ܕܝܼܠܹܗ. ܘܕܲܠܡܵܐ ܫܲܦܝܼܪܬܵܐ ܐܝܼܬܹܝܗ̇ ܗܵܝ̇ ܕܡܸܢܹܗ ܡܸܬܼܦܲܠܚܵܐ؟ ܘܐܸܢ pb. 471 ܡܸܬܼܟܲܬܿܫܝܼܢ ܚ̄ܢܲܢ ܕܲܢܒܲܛܠܝܼܗ̇: ܟܒܲܪ ܚܵܛ̇ܝܢܲܢ. ܒܲܥܠܵܗ̇ ܕܹܝܢ ܟܐ̣ܵܐ ܒܵܗ̇ ܘܐܸܡ݂ܲܪ ܠܵܗ̇: ܫܠܵܝ ܠܹܟܼܝ ܫܵܛܝܼܬܼܵܐ: ܤܵܒܲܪ̇ ܐ̄ܢܵܐ ܕܐܵܦ ܐܲܢ̄ܬܿܝ ܢܵܨܪܵܝܬܼܵܐ ܐܝܼܬܲܝܟܿܝ. ܘܐܲܢ̄ܬܿܝ ܟܒܲܪ ܥܒܲܕܬܵܝܗܝ ܠܲܒܼܪܹܟܼܝ: ܕܢܸܦܘܿܩ ܡ̣ܢ ܗܵܘܢܹܗ. ܘܡܸܚܕܼܵܐ ܟܬܲܒܼ ܠܹܗ ܐܲܒܼܘܼܗܝ ܗܵܟܢܵܐ: ܐܸܦܸܢ ܐܲܢ̄ܬܿ ܤܢܲܝ̣ܬܿ ܠܲܩܢܘܿܡܵܟܼ ܘܒܲܤܲܪܬܿ ܥܲܠ ܚܲܝܲܝ̈ܨ: ܘܲܗ̤ܘܲܝܬܿ ܢܵܨܪܵܝܵܐ: ܘܨܲܥܲܪܬܿ ܠܫܲܪܒܿܬܲܢ: ܘܲܥܒܲܕܬܵܢ ܚܸܤܕܵܐ ܒܲܝܢܵܬܼ ܟ̈ܢܵܘܵܬܲܢ: ܐܸܠܵܐ ܩܸܢܝܵܢܹ̈ܐ ܘܡܲܪ̈ܗܵܛܹܐ ܕܒܹܝܬܼ ܢܘܼܪܵܐ ܠܵܐ ܫܲܠܝܼܛ ܐܲܢ̄ܬܿ ܠܲܡܦܲܠܵܓܼܘܼ ܠܢܵܨܪ̈ܵܝܹܐ. ܛܘܼܒܼܵܢܵܐ ܕܹܝܢ ܟܲܕܼ ܩܲܒܸܿܠ̣ ܐܸܓܲܪܬܵܐ ܕܐܲܒܼܘܼܗܝ ܘܲܩܪܵܗ̇: ܓܚܸܟܼ ܛܵܒܼ ܘܐܸܡ݂ܲܪ: ܤܲܓܿܝܼ ܤܟܲܠ ܤܵܒܲܢ ܘܲܠܓܹܗܲܢܵܐ ܪܗܝܼܒܼ. ܘܲܟܼܬܲܒܼ ܠܹܗ ܥܸܢܝܵܢܵܐ ܗܵܟܲܢܵܐ: ܐܘܿ ܤܵܒܼܵܐ: ܐܲܢ̄ܬܿ ܠܢܘܼܪܵܐ ܤܵܓܹ̇ܕܼ ܐܲܢ̄ܬܿ: ܕܲܒܼܢܘܼܪܵܐ ܐܝܼܬܼ ܠܵܟܼ ܠܡܸܫܬܲܢܵܩܘܼ. ܐܸܢܵܐ ܕܹܝܢ ܐܸܬܸܿܠ ܩܸܢܝܵܢܲܝ̈ ܠܲܡܫܝܼܚܵܐ: ܡܸܛܠ ܕܥܲܡܹܗ ܐܝܼܬܼ ܠܝܼ ܠܡܸܬܼܒܲܤܵܡܘܼ: ܘܒܹܗ ܡܤܲܒܲܪ ܐ̄ܢܵܐ ܘܲܥܠܵܙܝ ܬܟܼܝܼܠ ܐ̄ܢܵܐ. ܘܒܹܝܬܼ ܢܘܼܪ̈ܘܵܬܼܵܐ ܕܲܚܬܼܝܼܪ ܐܲܢ̄ܬܿ ܒܗܘܿܢ: ܩܲܠܝܼܠܵܐܝܼܬܼ ܗܲܝ̈ܟܿܠܹܐ ܕܲܡܫܝܼܚܵܐ ܥܵܒܹ̇ܕܼ ܐ̄ܢܵܐ ܠܗܘܿܢ: ܘܡܲܕܼܒ̈ܚܹܐ ܙܗܲܝ̈ܵܐ ܩܵܒܲܥ̇ ܐ̄ܢܵܐ ܒܗܘܿܢ. ܘܠܝܼ ܥܲܡܵܟܼ ܡܢܵܬܼܵܐ ܘܝܵܪܬܘܼܬܼܵܐ ܠܲܝܬܿ ܠܝܼ: ܡܸܛܠ ܕܲܡܫܝܼܚܵܐ ܩ̣ܪܵܢܝ ܘܩܲܪܒܲܢ̣ܝܼ ܠܵܘܵܬܹܗ: ܘܥܲܒܼܕܲܢܝܼ ܒܪܵܐ ܠܐܲܒܼܘܼܗܝ ܓܢܝܼܙܵܐ.

ܐܲܢ̄ܬܿܬܹܗ ܕܹܝܢ ܕܩܲܕܿܝܼܫܵܐ ܩܲܪܕܵܓܼ ܠܵܐ ܚܲܡ̣ܤܢܲܬ̤ ܠܲܡܤܲܝܒܵܪܘܼ: ܟܲܕܼ ܚܵܙ̇ܝܵܐ ܗ̄ܘ̣ܵܬܼ ܒܘܼܕܵܪܵܐ ܕܩܸܢܝܵܢܹ̈ܐ ܘܦܘܼܠܵܓܼܵܐ ܕܡܵܘܵܗ̈ܒܼܵܬܼܵܐ. pb. 472 ܘܐܸܬܼܚܲܫܒܲܬ̤ ܕܬܸܟܼܬܿܘܿܒܼ ܘܬܼܵܘܕܲܥ ܠܐܲܒܼܘܼܗ̇: ܗܵܘ̇ ܕܐܝܼܬܼܵܘܗܝ ܗ̄ܘ̣ܵܐ ܒܕܲܪܓܹܗ ܘܲܒܼܦܵܠܚܘܼܬܹܗ ܫܲܗܵܪܟܼܘܵܤܬ ܫܵܒܼܘܿܪ ܢܸܟܘܿܪܓܲܢ. ܘܟܲܕܼ ܟܸܬܼܒܲܬ̤ ܐܸܓܲܪܬܵܐ: ܘܲܡܛܲܝܒܼܵܐ ܗ̄ܘ̣ܵܬܼ ܕܲܠܨܲܦܪܹܗ ܕܝܵܘܡܵܐ ܬܫܲܕܪܝܼܗ̇: ܒܹܗ ܒܠܸܠܝܵܐ ܐܸܬܼܚ̣ܙܝܼ ܠܵܗ̇ ܒܚܸܠܡܵܐ ܥܠܲܝܡܵܐ ܚܲܕܼ ܕܲܦܐܸܐ ܒܚܸܙܘܹܗ: ܟܲܕܼ ܠܒܼܝܼܫ ܚܸܘܵܪܹ̈ܐ ܘܝܵܬܹ̇ܗ̇ ܥܲܠ ܤܝܼܠܝܼܢ ܕܕܲܗܒܼܵܐ ܒܬܲܪܥܵܐ ܕܚܸܤܢܹܗ ܕܛܘܼܒܼܵܢܵܐ: ܘܲܠܒܼܝܼܟܼ ܩܲܢܝܵܐ ܕܢܘܼܪܵܐ: ܘܟܼܵܬܹ̇ܒܼ ܐܸܓܿܪ̈ܵܬܼܵܐ ܥܲܠ ܤܘܿܡܘܿܛܘܿܢ ܚܸܘܪܵܐ ܘܦܲܬܼܝܵܐ: ܘܚܵܬܹ̇ܡ ܒܥܸܙܲܩܬܹܗ: ܘܒܼܬܝܼܿ̈ܕܲܝ ܥܠܲܝ̈ܡܹܐ ܪܸ̈ܓܼܝܼܓܹܐ: ܕܲܠܒܼܝܼܫܝܼܢ ܡܵܐܢܹ̈ܐ ܚܸܘܵܪܹ̈ܐ: ܘܦܵܪܚ̇ܝܼܢ ܒܓܸܦܹ̈ܐ ܕܢܘܼܪܵܐ: ܠܲܫܡܲܝܵܐ ܡܫܲܕܲܪ. ܗ̤ܝ ܕܹܝܢ ܟܲܕܼ ܚ̣ܙܵܬ̤ ܗܵܘ̇ ܚܸܙܘܵܐ ܕܚܝܼܠܵܐ: ܘܲܥܠܲܝ̈ܡܹܐ ܕܤܵܠ̇ܩܝܼܢ ܘܢܵܚ̇ܬܿܝܼܢ ܠܲܫܡܲܝܵܐ ܠܲܡܝܲܒܵܠܘܼ ܐܸܓܿܪ̈ܵܬܼܵܐ: ܩܸܪܒܲܬ̤ ܨܹܐܕܼܵܘܗܝ ܘܫܲܐܸܠ̣ܬܹܗ ܟܲܕܼ ܐܵܡܲ݁ܪܵܐ: ܡܲܢ ܐܲܢ̄ܬܿ ܡܵܪܝ؟ ܘܡܵܢܵܘ ܥܒܼܵܕܼܵܟܼ؟ ܘܗܵܪܟܵܐ ܠܡܵܢ ܝܵܬܹ̇ܒܼ ܐܲܢ̄ܬܿ: ܘܡܲܪܙܒܼܵܢܵܐ ܠܵܬܐ ܪܓܼܝܼܫ ܒܵܟܼ؟ ܘܡܵܢܵ̇݁ܘ ܕܟܼܵܬܹ̇ܒܼ ܐܲܢ̄ܬܿ؟ ܗ̤ܘ ܕܹܝܢ ܥܢ̣ܵܐ ܘܐܸܡ݂ܲܪ ܠܵܗ̇: ܐܸܢܵܐ ܪܲܒܿ ܚܲܝܵܠ̈ܘܵܬܹܗ ܐ̄ܢܵܐ ܕܡܵܪܝܵܐ ܐܲܠܵܗܵܐ: ܕܲܥ̣ܒܲܕܼ ܫܡܲܝܵܐ ܘܐܲܪܥܵܐ. ܘܫܲܕܪܲܢ̣ܝ ܡܲܠܟܵܐ ܪܲܒܵܐ ܕܥܵܠܡܹ̈ܐ: ܕܐܸܟܼܬܿܘܿܒܼ ܡܵܘ̈ܗܒܼܵܬܼܵܐ ܘܙܸܕܼ̈ܩܵܬܼܵܐ ܕܥܵܒܹ̇ܕܼ pb. 473 ܒܲܥܠܹܟܼܝ: ܘܠܲܫܡܲܝܵܐ ܐܹܫܲܕܲܪ ܚܘܼܫܒܵܢܗܹܝܢ. ܘܕܐܸܡ݂ܲܪܬܿܝ: ܕܡܲܪܙܒܼܵܢܵܐ ܠܵܐ ܪܓܼܝܼܫ ܒܵܟܼ: ܡܕܲܓܵܠܘܼ ܡܕܲܓܼܠܵܐ ܐܲܢ̄ܬܿܝ. ܡܲܪܙܒܼܵܢܵܐ ܠܝܼ ܝܲܕܲܥ̇: ܘܒܼܝܼ ܪܓܼܝܼܫ ܕܗܵܪܟܵܐ ܐܝܼܬܲܝ. ܐܲܢ̄ܬܿܝ ܕܹܝܢ ܠܵܐ ܝܵܕܼܥܵܐ ܐܲܢ̄ܬܿܝ ܠܝܼ: ܡܸܛܠ ܕܠܸܒܹܟܼܝ ܒܐܲܪܥܵܐ ܗ̣̄ܘ. ܘܟܲܕܼ ܐܸܬܿܬܿܥ̣ܝܼܪܲܬ̤ ܡ̣ܢ ܫܸܢܬܼܵܗ̇: ܗܘ̤ܵܬܼ ܒܕܸܚܠܬܼܵܐ ܪܲܒܿܬܼܵܐ. ܘܪܸܗܛܲܬ̤ ܟܲܕܼ ܪܲܬܿܝܼܬܼܵܐ ܠܘܵܬܼ ܛܘܼܒܼܵܢܵܐ ܩܲܪܕܵܓܼ: ܘܐܸܫ̣ܬܲܥܝܲܬ̤ ܠܹܗ ܡܸܕܸܿܡ ܕܲܚ̣ܙܵܬ̤. ܚܵܘܝܵܬܹܗ ܕܹܝܢ ܐܵܦ ܐܸܓܲܪܬܵܐ: ܕܲܒܼܥܸܕܵܢ ܪܲܡܫܵܐ ܟܸܬܼܒܲܬ̤ ܕܲܬܫܲܕܲܪ ܠܐܲܒܼܘܼܗ̇. ܗ̤ܘ ܕܹܝܢ ܐܸܡ݂ܲܪ ܠܵܗ̇: ܕܒܲܫܪܵܪܵܐ ܪܲܒܿ ܘܲܕܚܝܼܠ ܘܫܲܪܝܼܪ ܚܸܙܘܵܐ ܕܲܚ̣ܙܲܝܬܿܝ: ܘܕܸܝܼܠܹܟܼܝ ܡܥܲܒܲܝ ܠܸܒܹܟܼܝ. ܘܡܵܪܲܢ ܐܸܡ݂ܲܪ ܒܲܤܒܲܪܬܹܗ: ܕܐܸܬܹܝ̇ܬܼ ܕܐܸܦܠܘܿܓܼ ܓܲܒܼܪܵܐ ܥܲܠ ܐܲܒܼܘܼܗܝ: ܘܒܲܪܬܼܵܐ ܥܲܠ ܐܸܡܵܗ̇: ܘܟܲܠܬܼܵܐ ܥܲܠ ܚܡܵܬܼܵܗ̇: ܘܲܒܼܥܸܠܕܿܒܼܵܒܼܵܘ̈ܗܝ ܕܓܲܒܼܪܵܐ ܒܢܲܝ̈ ܒܲܝܬܹܗ. ܘܗܵܢܵܐ ܟ̱ܠܹܗ ܥܕܲܡܵܐ ܕܐܵܦ ܒܹܝܬܼ ܓܲܒܼܪܵܐ ܠܐܲܢ̄ܬܿܬܹܗ: ܕܚܲܕܼ ܒܤܲܪ ܐܝܼܬܲܝܗܘܿܢ: ܢܸܗܘܸܐ ܤܸܕܼܩܵܐ ܘܦܵܠܓܼܿܘܼܬܼܵܐ. ܘܗܵܕܲܐ ܗ̣̄ܝ ܕܲܒܼܕܘܼܟܿܬܼܵܐ ܐ̄ܚܪܹܬܼܵܐ ܐܸܡ݂ܲܪ: ܕܲܒܼܗܵܘ̇ ܝܵܘܡܵܐ ܕܡܸܬܼܓܿܠܸܐ ܒܫܘܼܒܼܚܵܐ ܘܥܵܒܹ̇ܕܼ ܢܘܼܚܵܡܵܐ: ܘܲܡܒܲܤܸܩ ܠܟܹ̈ܐܢܹ̈ܐ ܘܲܡܫܲܢܸܩ ܠܥܵܘ̈ܠܹܐ: ܬܪܹܝܢ ܢܸܗܘܘܿܢ ܒܲܚܕܼܵܐ ܥܲܪܤܵܐ: ܚܲܕܼ ܢܸܬܿܕܿܒܲܪ ܠܲܫܡܲܝܵܐ ܠܡܲܠܟܿܘܼܬܼܵܐ ܘܲܠܒܼܘܼܤܵܡܵܐ: ܘܚܲܕܼ ܢܸܫܬܿܒܸܩ ܒܐܲܪܥܵܐ ܒܓܹܗܲܢܵܐ ܘܲܒܼܫܘܼܢܵܩܵܐ. ܒܪܲܡ ܐܸܢܵܐ ܥܲܠ ܡܫܝܼܚܵܐ ܡܵܪܝ ܬܟܼܝܼܠ ܐ̄ܢܵܐ: ܕܐܵܦ ܐܸܢܵܐ ܩܲܠܝܼܠܵܐܝܼܬܼ ܒܵܬܲܪ ܩܸܢܝܵܢܲܝ̈ ܠܘܵܬܹܗ ܐܵܙܹ̇ܠ ܐ̄ܢܵܐ. ܘܡ̣ܢ ܗܵܘ̇ ܝܵܘܡܵܐ ܠܵܐ ܬܘܼܒܼ pb. 474 ܐܲܡ̣ܪܚܲܬ̤ ܐܲܢ̄ܬܿܬܹܗ ܕܬܹܐܡܲܪ ܠܹܗ ܡܸܕܸܿܡ: ܘܠܵܐ ܬܘܼܒܼ ܚ̣ܵܘܝܲܬ̤ ܦܲܪܨܘܿܦܵܐ ܟܡܝܼܪܵܐ ܡܸܛܠ ܒܘܼܕܵܪܵܐ ܕܩܸܢ̈ܝܵܢܹܐ ܕܥܵܒܹ̇ܕܼ ܗ̄ܘ̣ܵܐ ܛܘܼܒܼܵܢܵܐ.

ܘܟܲܕܼ ܫ̈ܢܲܝܵܐ ܬܲܪܬܹܿܝܢ ܘܝܲܪ̈ܚܹܐ ܬܠܵܬܼܵܐ ܢܦܲܩ̣ܘ: ܟܲܕܼ ܗ̤ܘ ܩܲܪܕܵܓܼ ܒܟܼܠܗܹܝܢ ܫܲܦܝܼܪ̈ܵܬܼܵܐ ܕܦܲܐ̈ܝܵܢ ܠܲܟܼܪܸ̈ܤܛܝܵܢܹܐ ܫܲܪܝܼܪܹ̈ܐ ܡܸܬܼܗܲܦܲܟܼ ܗ̄ܘ̣ܵܐ: ܘܲܫܡܲܥ̣ܘ ܥܲܡܡܹ̈ܐ ܢܫܲܚ̈ܠܦܹܐ ܕܲܒܼܬܲܝܡܢܵܐ ܘܲܒܼܡܲܥܪܒܼܵܐ ܥܲܠ ܫܘܼܚܠܵܦܵܐ ܕܲܙܢܵܘ̈ܗܝ ܕܛܘܼܒܼܵܢܵܐ: ܘܝܼܠܸܦ̣ܘ ܗ̄ܘ̣ܵܘ ܕܫܲܝܸܢ ܗ̄ܘ̣ܵܐ ܢܲܦܫܹܗ ܡ̣ܢ ܩܪ̈ܵܒܹܐ: ܘܦ̣ܵܫ ܡ̣ܢ ܬܲܟܼܬܿܘܼ̈ܫܹܐ: ܘܲܪܚܸܡ ܚܲܝܹ̈ܐ ܕܫܸܠܝܵܐ: ܐܸܬܿܛܲܝܲܒܼܘ. ܟܠܗܘܿܢ ܐܲܟܼܚ̄ܕܼܵܐ ܪ̈ܗܘܿܡܵܝܹܐ ܘܛܲܝܵܝܹ̈ܐ: ܘܥܲܡܡܹ̈ܐ ܐ̄ܚܪ̈ܵܢܹܐ ܕܒܲܚܕܼܵܪ̈ܲܝܗܘܿܢ: ܘܲܟܼܢܲܫ̣ܘ ܐܲܝܟܼ ܚܵܠܵܐ ܕܥܲܠ ܤܸܦܬܹܗ ܕܝܲܡܵܐ: ܘܐܲܫ̣ܩܸܠܘ ܕܢܹܐܬܼܘܿܢ ܠܐܲܬܼܪ̈ܵܘܵܬܼܵܐ ܕܫܘܼܠܛܵܢܹܗ ܕܛܘܼܒܼܵܢܵܐ. ܗ̤ܘ ܕܹܝܢ ܩܕܼܵܡ ܝܵܘ̈ܡܵܬܼܵܐ ܩܲܠܝܼܠ: ܤܠܸܩ̣ ܗ̄ܘ̣ܵܐ ܠܛܘܼܪܵܐ ܠܘܵܬܼ ܪܲܒܹܗ ܡܵܪܝ ܥܲܒܼܕܝܼܫܘܿܥ. ܘܟܲܕܼ ܝܼܪܲܚ ܝܵܘܡܝܼ̈ܢ ܩ̣ܵܘܝܼ ܠܘܵܬܹܗ: ܟܲܕܼ ܥܵܒܼ̇ܕܿܝܼܢ ܗ̄ܘ̣ܵܘ ܨܵܘܒܵܐ ܐܲܡܝܼܪܵܐ ܬܪ̈ܲܝܗܘܿܢ ܠܘܵܬܼ ܤܵܒܼܵܐ ܩܲܕܿܝܼܫܵܐ ܒܹܪܝ ܐܲܒܼܝܼܠܵܐ: ܥ̣ܒܲܕܼܘ ܓܲܝ̈ܤܹܐ ܪܵܘܪ̈ܒܹܐ ܪ̈ܗܘܿܡܵܝܹܐ ܘܛܲܝܵܝܹ̈ܐ: ܘܲܫ̣ܒܼܵܘ ܘܐܲܚ̣ܪܸܒܼܘ ܠܐܲܬܼܪ̈ܵܘܵܬܼܵܐ ܟܠܗܘܿܢ ܕܫܘܼܠܛܵܢܹܗ ܕܛܘܼܒܼܵܢܵܐ: ܡ̣ܢ ܢܲܗܪܵܐ ܬܘܼܪܡܵܪܵܐ: ܘܲܥܕܲܡܵܐ ܠܲܢܨܲܝܼܒܼܝܼܢ ܡܕܼܝܼܢ̄ܬܼܵܐ ܕܒܹܝܬܼ ܬܚܘܼ̈ܡܹܐ: ܫܒܼܵܘ ܕܹܝܢ ܐܵܦ ܠܐܲܒܼܘܼܗܝ ܘܠܸܐܡܹܗ: ܘܠܲܐܢ̄ܬܿܬܹܗ: ܘܠܲܐܚܘܼܗܝ ܘܲܠܚܵܬܹܗ: ܘܲܠܟܼܠ̇ܗܘܿܢ ܐ̄ܢܵܫܲܝ̈ ܒܲܝܬܹܗ. ܐܸܬܼܦܲܠܲܛ̣ܘ pb. 475 ܕܹܝܢ ܡ̣ܢ ܦܵܠܚܹ̈ܐ ܕܝܼܠܹܗ ܪ̈ܵܟܼܒܲܝ ܪ̈ܲܟܼܫܵܐ ܓܲܒܼܪܹ̈ܐ ܡܲܐܬܹܝܢ ܘܲܬܼܠܵܬܼܝܼܢ ܘܚܲܡܫܵܐ: ܘܐܸܤ̣ܬܲܪܗܲܒܼܘ ܠܛܘܼܪܵܐ: ܘܒܼܵܥܹ̇̄ܝܢ ܗ̄ܘ̣ܵܘ ܠܹܗ ܠܛܘܼܒܼܵܢܵܐ. ܘܐܸܙܲܠ̣ܘ ܘܐܸܫ̣ܟܿܚܘܼܗܝ ܒܲܡܥܲܪܬܹܗ ܕܒܹܪܝܼ ܐܲܒܼܝܼܠܵܐ ܥܲܡ ܪܲܒܹܗ ܥܲܒܼܕܝܼܫܘܿܥ: ܘܟܸܢܫܵܐ ܪܲܒܵܐ ܕܟܼܵܗ̈ܢܹܐ ܕܲܟܼܢܝܼܫܝܼܢ ܠܐܝܼܩܵܪܹܗ. ܘܟܲܕܼ ܚܙ̣̰ܵܐ ܐܸܢܘܿܢ ܛܘܼܒܼܵܢܵܐ ܩܲܪܕܵܓܼ: ܡܸܚܕܼܵܐ ܩܲܕܸܡ̣ ܗ̤ܘ ܘܐܸܡ݂ܲܪ ܠܗܘܿܢ: ܕܵܡܹ̇ܝܢ ܐ̄ܢ̄ܬܿܘܿܢ ܠܝܼ ܕܦܲܠܝܼ̈ܛܝ ܡ̣ܢ ܓܲܝܤܵܐ ܐܲܢ̄ܬܿܘܿܢ. ܥܢ̣ܵܐ ܕܹܝܢ ܚܲܕܼ ܡܸܢܗܘܿܢ ܓܲܒܼܪܵܐ ܒܲܥܪܝܼܪܵܝ ܒܲܙܢܵܘ̈ܗܝ ܘܒܼܝܼܫ ܒܚܲܢܦܘܼܬܹܗ ܘܐܸܡ݂ܲܪ ܠܹܗ: ܟܲܕܼ ܦܲܛܚܵܫܹ̈ܐ ܘܡܲܪ̈ܙܒܼܵܢܹܐ ܒܲܡܥܲܪܹ̈ܐ ܕܓܲܢܵܒܹ̈ܐ ܘܡܲܛܥ̈ܝܵܢܹܐ ܥܵܡ̇ܪܝܼܢ: ܠܲܢ ܗܵܟܲܢܵܐ ܙܵܕܹ̇ܩ ܗ̄ܘ̣ܵܐ ܕܬܸܓܼܕܲܫ. ܘܥܡܵܗ̇ ܕܡܸܠܬܹܗ: ܡܚ̣ܵܝܗܝ ܡܲܠܲܐܟܹܗ ܕܡܵܪܝܵܐ: ܘܲܢܦܲܠ̣ ܥܲܠ ܕܘܼܟܿܬܹܗ ܘܡ̣ܝܼܬܼ. ܘܟܲܕܼ ܚܙ̣ܵܘ ܚܲܒܼܪ̈ܵܘܗܝ ܡܸܕܸܿܡ ܕܲܗܘ̤ܵܐ: ܕܚܸܠ̣ܘ ܕܚܠܬܼܵܐ ܪܲܒܹܿܬܼܵܐ: ܘܗܲܝܡܸܢ̣ܘ ܗ̄ܘ̣ܵܘ ܟܠܗܘܿܢ ܒܡܵܪܲܢ ܝܼܫܘܿܥ ܡܫܝܼܚܵܐ: ܘܩܲܒܸܿܠ̣ܘ ܪܘܼܫܡܵܐ ܕܡܲܥܡܘܿܕܝܼܬܼܵܐ ܩܲܕܝܼܫܬܼܵܐ ܒܹܗ ܒܝܵܘܡܵܐ. ܛܘܼܒܼܵܢܵܐ ܕܹܝܢ ܩܲܪܕܵܓܼ ܐܸܡ݂ܲܪ ܠܩܲܕܲܝܼ̈ܫܹܐ ܛܘܼܒܼܵܢܹ̈ܐ ܒܹܪܝ ܘܥܲܒܼܕܝܼܫܘܿܥ: ܐܲܒܼܵܗܲܝ̈ ܘܡܵܪ̈ܲܝ: ܨܲܠܵܘ ܥܠܲܝ ܕܐܹܙܲܠ: ܘܲܒܼܚܝܠܹܗ ܕܲܡܫܝܼܚܵܐ ܡܵܪܲܢ ܘܒܲܨ̈ܠܵܘܵܬܼܟܼܘܿܢ ܐܲܦܢܸܐ ܠܲܫܒܼܝܼܬܼܵܐ ܪܲܒܿܬܼܵܐ ܡ̣ܢ ܒܵܙܘܿܙܹ̈ܐ. ܗܸܢܘ̣ܿܢ ܕܹܝܢ ܚܲܬܼܡ̣ܘܼܗܝ ܒܐܵܬ݂ܵܐ ܕܲܨܠܝܼܒܼܵܐ ܘܢܲܫ̣ܩܘܼܗܝ: ܘܫܲܕܪܘܼܗܝ ܒܲܫܠܵܡܵܐ. pb. 476

ܘܟܲܕܼ ܡܲܛ̣ܝܼ ܠܚܸܤܢܹܗ ܕܥܲܠ ܡܲܠܩܝܼ: ܘܲܚ̣ܙܵܐ ܚܪ̈ܝܼܒܹܐ ܕܲܪܡܹܝܢ: ܘܒܲܝܬܹܗ ܕܲܒܼܙܝܼܙ ܘܒܲܪܢܵܫ ܠܲܝܬܿ ܒܹܗ: ܟܸܪܝܲܬ̤ ܠܹܗ ܛܵܒܼ. ܘܡܸܚܕܼܵܐ ܫܲܕܲܪ ܒܵܬܲܪܗܘܿܢ ܐܝܼܙ̈ܓܲܕܹܐ ܩܲܠܝܼ̈ܠܹܐ: ܘܲܟܼܬܲܒܼ ܠܗܘܿܢ ܗܵܟܲܢܵܐ: ܤܒܲܪܬܿܘܿܢ ܠܟܼܘܿܢ ܕܐܸܢܵܐ ܩܲܪܕܵܓܼ ܫܸܠܚܹ̈ܬܼ ܥܘܼܫܢܵܐ ܩܲܕܼܡܵܝܵܐ ܕܬܼܘܼܩܦܵܐ ܕܲܩܪܵܒܼܵܐ: ܘܡܸܛܠܗܵܕܹܐ ܐܲܡ̣ܪܲܚܬܿܘܿܢ ܠܡܸܥܲܠ ܘܲܠܡܸܚܪܲܒܼ ܠܐܲܬܼܪ̈ܵܘܵܬܼܵܐ ܕܲܬܼܚܹܝܬܼ ܫܘܼܠܛܵܢܝ. ܗܵܕܹܐ ܕܹܝܢ ܗܘܲܝ̤ܬܿܘܿܢ ܝܵܕܼܥ̇ܝܼܢ: ܕܠܵܘ ܡܸܫܠܚ ܫܸܠܚܹ̈ܬܼ: ܐܸܠܵܐ ܡܸܠܒܲܫ ܠܸܒܼܫܹ̇ܬܼ ܥܘܼܫܢܵܐ ܕܠܵܐ ܡܸܙܕܟܸܐ. ܐܸܠܵܐ ܫܲܕܲܪܘ ܠܝܼ ܢܲܦܫ̈ܬܼܵܐ ܟܠܗܹܝܢ ܕܲܫ̣ܒܲܝܬܿܘܿܢ: ܘܩܸܢ̈ܝܵܢܹܐ ܤܲܒܼܘ ܠܟܼܘܿܢ ܘܙܸܠܘ ܒܲܫܠܵܡܵܐ. ܘܥܲܡܝ ܩܪܵܒܼܵܐ ܠܵܐ ܬܓܲܪܘܿܢ: ܘܗܵܕܹܐ ܦܲܩܚܵܐ ܠܟܼܘܿܢ. ܗܸܢܘ̣ܿܢ ܕܹܝܢ ܟܲܕܼ ܩܲܒܸܿܠ̣ܘ ܘܲܩ̣ܪܵܘ ܐܸܓܿܪ̈ܵܬܼܵܐ: ܟܬܲܒܼܘ ܠܹܗ ܨܲܥܪܵܐ ܘܨܘܼܚ̈ܝܵܬܼܵܐ ܘܡܸܠܹ݁̈ܐ ܕܒܸܙܚܵܐ. ܗ̤ܘ ܕܹܝܢ ܡܸܢܕܪܹܫ ܟܬܲܒܼ ܠܗܘܿܢ ܗܵܟܲܢܵܐ: ܐܸܠܵܐ ܡ̣ܢ ܕܠܸܒܼܫܹ̇ܬܼ ܠܲܡܫܝܼܚܵܐ ܫܲܝܢܹܗ ܕܥܵܠܡܵܐ: ܠܵܐ ܨܵܒܹ̇ܐ ܐ̄ܢܵܐ ܕܲܒܼܨܒܼܝܵܢܝ ܐܸܠܲܒܲܫ ܪܘܼܓܼܙܵܐ ܕܒܲܩܪ̈ܵܒܹܐ. ܐܸܠܵܐ ܫܲܕܲܪܘ ܠܝܼ ܠܐܵܒܼܝ ܘܠܹܐܡܝ ܘܠܲܐܢ̄ܬܲܬܼܝ ܘܠܵܐܚܝ ܘܲܠܚܵܬܼܝ ܘܲܠܐ̄ܢܵܫܲܝ̈ ܒܲܝܬܿܝ ܟܠܗܘܿܢ: ܘܲܠܟܼܠܵܗ̇ ܫܒܼܝܼܬܼܵܐ ܕܲܕܼܒܲܪܬܿܘܿܢ ܡ̣ܢ ܐܲܬܼܪ̈ܵܘܵܬܼܵܐ ܕܲܬܚܹܝܬܼ ܫܘܼܠܛܵܢܝ. ܘܤܲܒܼܘ ܠܟܼܘܿܢ ܩܸܢܝܵܢܵܐ: ܘܲܤܛܵܘ ܘܲܥܒܲܪ ܡܹܢܝ. ܘܠܵܐ ܬܸܥܒܿܕܼܘܼܢܵܢܝ: ܕܒܼܵܬܲܪܟܼܘܿܢ ܐܸܪܕܘܿܦ. ܗܸܢ̣ܘܿܢ ܕܹܝܢ ܟܲܕܼ ܫܡܲܥ̣ܘ pb. 477 ܗ̄ܘ̣ܵܘ ܗܵܠܹܝܢ: ܘܲܬܼܟܼܝܼܠܝܼܢ ܗ̄ܘ̣ܵܘ ܟܹܐܡܲܬܼ ܕܡ̣ܢ ܟܲܕܼܘ ܤ̣ܡܲܟܼܘ ܠܐܲܬܼܪ̈ܵܘܵܬܼܵܐ ܕܫܘܼܠܛܵܢܗܘܿܢ: ܦܤܲܩ̣ܘ ܪܹܫܹܗ ܕܐܲܚܘܼܗܝ ܘܫܲܕܲܪܘ ܠܹܗ. ܛܘܼܒܼܵܢܵܐ ܕܹܝܢ ܟܲܕܼ ܚ̣ܙܵܐ ܠܪܹܫܹܗ ܕܐܲܚܘܼܗܝ ܕܲܦܤܝܼܩ: ܒܟܲܪܝܘܼܬܼܵܐ ܡܸܫܬܲܢܲܩ ܗ̄ܘ̣ܵܐ: ܘܲܒܼܪܘܼܓܼܙܹܗ ܡܸܬܼܓܵܘܙܲܠ ܗ̄ܘ̣ܵܐ. ܘܲܦ̣ܩܲܕܼ ܡܸܚܕܼܵܐ: ܘܩܲܪܢܵܐ ܩܪܵܬ̤: ܘܥܲܠ̣ ܗ̤ܘ ܘܡܲܐܬܹܿܝܢ ܘܲܬܼܠܵܬܼܝܼܢ ܘܐܲܪܒܿܥܵܐ ܦܵܠܚܹ̈ܐ ܘܫܲܒܼܥܵܐ ܥܲܒܼܕܵܘ̈ܗܝ ܠܥܹܕܬܹܗ ܕܐܲܠܵܗܵܐ: ܘܲܦ̣ܫܲܛ ܐܝܼܕܼܵܘ̈ܗܝ ܘܲܡܨܲܠܸܐ ܗ̄ܘ̣ܵܐ ܘܐܵܡܲ݁ܪ: ܕܘܼܢ ܡܵܪܝܵܐ ܕܝܼܢܝ ܘܐܸܬܼܟܬܲܫ ܥܲܡ ܐܲܝܠܹܝܢ ܕܡܸܬܼܟܲܬܿܫܝܼܢ ܥܲܡܝ. ܐܲܚܘܼܿܕܼ ܙܲܝܢܵܐ ܘܤܲܟܿܪܵܐ ܘܩܘܼܡ ܒܥܘܼܕܪܵܢܝ: ܫܡܘܿܛ ܤܲܦܤܹܪܵܐ ܘܐܲܒܼܪܸܩ ܠܘܼܩܒܲܠ ܪ̈ܵܕܼܘܿܦܲܝ. ܘܐܸܡ݂ܲܪ ܠܢܲܦܫܝ: ܕܐܸܢܵܐ ܗ̣̄ܘ ܦܵܪܘܿܩܹܟܼܝ. ܘܟܲܕܼ ܫܲܠܸܡ̣ ܨܠܘܿܬܹܗ: ܫܩܲܠ̣ ܚܢܵܢܵܐ ܡ̣ܢ ܩܕܼܵܡ ܒܹܝܬܼ ܩܘܼܕܼܫܵܐ: ܘܲܒܼܕܲܪ ܥܲܠ ܙܲܝܢܹܗ ܘܥܲܠ ܤܘܼܤܝܹܗ ܘܥܲܠ ܦܵܠܵܚܵܘ̈ܗܝ. ܘܲܨܠܝܼܒܼܵܐ ܕܕܲܗܒܼܵܐ: ܕܲܩܒܼܝܼܥ ܒܹܗ ܩܲܝܤܵܐ ܩܲܕܿܝܼܫܵܐ ܕܲܙܩܝܼܦܹܗ ܕܦܵܪܘܿܩܲܢ: ܬܠ̣ܵܐ ܒܲܩܕܼܵܠܹܗ. ܘܐܲܪܝܼܡ̣ ܐܝܼܕܼܵܘ̈ܗܝ ܘܲܡ̣ܬܲܚ ܚܝܵܪܹܗ ܩܲܕܝܼܫܵܐ ܠܲܡܪܵܘܡܵܐ: ܘܲܢ̣ܕܲܪ ܢܸܕܼܪܵܐ ܠܡܵܪܝܵܐ ܘܐܸܡ݂ܲܪ: ܡܵܪܝܵܐ ܐܠܵܗܵܐ ܚܲܝܠܬܼܵܢܵܐ ܓܲܢ̄ܒܵܪܵܐ ܕܥܵܠܲܡܹ̈ܐ: ܐܸܢ ܬܸܗܘܸܐ ܥܲܡܝ ܒܐܘܼܪܚܵܐ ܗܵܕܹܐ ܕܐܵܙܹ̇ܠ ܐ̄ܢܵܐ ܒܵܗ̇: ܘܲܒܼܚܲܝܠܵܟܼ ܘܲܒܼܥܘܼܕܼܪܵܢܵܟܼ ܐܲܕܪܸܟܼ ܠܲܒܼܥܸܠܕܲܒܼܵܒܲܝ̈ ܘܐܸܙܟܸܐ ܐܸܢܘܿܢ: ܘܐܲܗܦܸܟܼ ܡܸܢܗܘܿܢ ܠܲܫܒܼܝܼܬܼܵܐ ܕܫ̣ܒܼܵܘ: ܘܐܸܦܢܸܐ ܒܲܫܠܵܡܵܐ ܡ̣ܢ ܩܵܪܵܒܼܵܐ pb. 478 ܗܵܢܵܐ ܕܤܝܼܡ ܩܕܼܵܡܲܝ: ܥܵܩܲܪ ܐ̄ܢܵܐ ܒܹܝܬܼ ܢܘܼܪ̈ܘܵܬܼܵܐ ܘܒܼܵܢܹ̇ܐ ܐ̄ܢܵܐ ܒܹܝܬܼ ܤܵܗ̈ܕܘܼܬܼܵܐ. ܘܲܡܤܲܚܸܦ ܐ̄̈ܢܵܐ ܐܲܕܪ̈ܘܿܩܹܐ ܘܩܵܒܲܥ̇ ܐ̄ܢܵܐ ܒܕܼܘܼ̈ܟܿܝܵܬܼܗܘܿܢ ܡܲܕܼܒ̈ܚܹܐ ܩܲܕܝ̈ܫܹܐ. ܘܲܛܠܵܝܹ̈ܐ ܒܲܢܝ̈ ܡܓܼܘܼܫܹ̈ܐ ܕܲܦܪܝܼܫܝܼܢ ܡ̣ܢ ܐܲܒܼܵܗܲܝ̈ܗܘܿܢ ܥܲܒܼ̈ܕܹܐ ܠܤܵܛܵܢܵܐ: ܥܲܒܼ̈ܕܹܐ ܠܲܡܫܝܼܚܵܐ ܐܸܬܸܿܠ: ܘܲܒܼܢܲܝ̈ ܩܝܵܡܵܐ ܐܸܥܒܸܿܕܼ ܐܸܢܘܿܢ. ܘܓܲܙܹ̈ܐ ܘܡܲܪ̈ܗܵܛܹܐ ܕܲܦܪܲܫ̣ܘ ܐܲܒܼܵܗܲܝ̈ ܘܝܲܗ̣̄ܒܼܘ ܠܒܹܝܬܼ ܢܘܼܪ̈ܘܵܬܼܵܐ: ܠܥܹ̈ܕܵܬܼܵܐ ܘܲܠܕܲܝܪ̈ܵܬܼܵܐ ܐܹܦܲܠܸܓܼ ܐܸܢܘܿܢ. ܘܟܲܕܼ ܫܲܠܸܡ̣ ܡܸܠܲܝ̈ ܢܸܕܼܪܹܗ ܘܦܸܬܼܓܼܵܡܲܝ̈ ܩܝܵܡܹܗ: ܗܵܐ ܩܵܠܵܐ ܐܸܫܬܲܡܲܥ̣ ܡ̣ܢ ܒܹܝܬܼ ܡܲܩܕܫܹܗ ܕܡܵܪܝܵܐ ܕܐܵܡܲ݁ܪ: ܐܸܬܼܠܲܒܲܒܼ: ܐܸܬܼܠܲܒܲܒܼ: ܐܸܬܼܚܲܝܲܠ ܘܐܸܬܼܥܲܫܲܢ: ܘܠܵܐ ܬܸܕܼܚܲܠ ܥܲܒܼܕܝܼ ܩܲܪܕܵܓܼ. ܡܸܛܠ ܕܥܲܡܵܟܼ ܐ̄ܢܵܐ: ܘܐܲܫܠܸܵܡ ܠܲܒܸܠܕܵܒܼܵܒܲܝ̈ܟ ܒܐܝܼܕܲܝ̈ܟ. ܘܟܲܕܼ ܩܵܠܵܐ ܗܵܘ̇ ܐܸܫܬܿܡܲܥ̣: ܡܸܚܕܼܵܐ ܗ̤ܘ ܘܦܵܠܚܵܘ̈ܗܝ ܢܦܲܠ̣ܘ ܥܲܠ ܐܲܦܲܝ̈ܗܘܿܢ ܩܕܼܵܡ ܐܵܪܘܿܢܹܗ ܕܡܵܪܝܵܐ: ܐܲܝܟܼ ܫܵܥܹ̈ܐ ܬܲܪܬܹܿܝܢ. ܘܩܵܡ̣ܘ ܒܚܲܕܼܘܼܬܼܵܐ: ܘܫܲܒܼܚ̣ܘ ܠܐܲܠܵܗܵܐ.

ܘܲܦ̣ܩܲܕܼ ܩܲܕܼܿܝܼܫܵܐ: ܘܲܩ̣ܪܵܬ̤ ܩܲܪܢܵܐ ܬܠܵܬܼ ܙܲܒܼܢܝܼ̈ܢ: ܘܲܪܟܸܿܒܼܘ. ܗܵܝܕܹܿܝܢ ܐܸܡ݂ܲܪ ܚܲܕܼ ܡ̣ܢ ܛܥܝܼܢܲܝ̈ ܙܲܝܢܹܗ: ܘܗܵܐ ܡܵܪܝ: ܠܵܐ ܝܵܕܼܥ̇ܝܼܢܲܢ ܐܘܼܪܚܵܐ ܕܒܼܵܗ̇ ܙܵܕܹ̇ܩ ܠܲܢ ܠܡܸܪܕܲܦ ܒܵܬܲܪ ܒܥܸܠܕܿܒܼܵܒܲܝ̈ܢ. ܛܘܼܒܵܢܵܐ ܕܹܝܢ ܓܚܸܟܼ ܦܨܝܼܚܵܐܝܼܬܼ ܘܐܸܡ݂ܲܪ ܠܹܗ: ܗܵܘ̇ ܕܐܲܫ̣ܡܲܥ ܠܲܢ ܩܵܠܵܐ ܕܙܵܟܼܘܼܬܼܵܐ: ܗ̤ܘ ܡܚܵܘܸܐ ܠܲܢ ܐܘܼܪܚܵܐ ܬܪܝܼܨܬܵܐ ܕܒܼܵܗ̇ ܢܸܪܕܸܐ pb. 479 ܘܢܸܪܕܿܘܿܦ ܘܢܲܕܼܪܸܵܟܼ ܠܲܒܼܥܸܠܕܿܒܼܵܒܲܝ̈ܢ. ܘܟܲܕܼ ܪܕܼܵܘ ܐܲܝܟܼ ܡܝܼ̈ܠܹܐ ܬܪܹܝܢ: ܗܵܐ ܪ̈ܘܼܩܹܐ ܡ̣ܢ ܫܹܐܪ̈ܝܹܐ ܕܐܲܢ̄ܬܿܬܹܗ ܕܡܹܝܢ ܒܐܘܼܪܚܵܐ. ܒܚܸܟܼܡܵܬܼܵܐ ܓܹܝܪ ܪܲܒܿܬܼܵܐ ܥܸܒܼܕܲܬ̤: ܘܲܒܼܟܼܠܵܗ̇ ܐܲܪܥܵܐ ܕܒܼܵܗ̇ ܕܕܼܵܘ ܫܲܒܵܝܹ̈ܐ: ܒܚܲܕܼ ܚܲܕܼ ܦܲܪܤܚܵܐ: ܘܒܲܬܼܪܹܝܢ ܦܲܪ̈ܤܚܝܼܢ: ܡܓܲܢܒܵܐ ܗ̄ܘ̣ܵܬܼ ܟܲܤܝܵܐܝܼܬܼ ܡ̣ܢ ܫܲܒܵܝܹ̈ܐ: ܘܲܡܨܲܪܝܵܐ ܗ̄ܘ̣ܵܬܼ ܪ̈ܘܼܩܥܹܐ ܡ̣ܢ ܫܹܐܪ̈ܝܹܐ ܕܲܠܒܼܘܼܫܵܗ̇: ܘܪܵܡ̇ܝܵܐ ܗ̄ܘ̣ܵܬܼ ܒܐܘܼܪܚܵܐ: ܐܲܝܟܼ ܕܢܸܗܘܘܿܢ ܟܹܐܡܲܬܼ ܐܵܬܼ̈ܘܵܬܼܵܐ ܘܝܲܕܼܥܹ̈ܐ ܠܒܲܥܠܵܗ̇ ܠܡܲܪܕܝܼܬܼܵܐ ܕܒܼܵܬܼܪܗܘܿܢ. ܬܟܼܝܼܠܵܐ ܗ̄ܘ̣ܵܬܼ ܓܹܝܪ ܥܲܠ ܙܪܝܼܙܘܼܬܹܗ ܘܲܚܠܝܼܨܘܼܬܹܗ ܘܲܡܪܲܚܡܵܢܘܼܬܹܗ ܕܒܲܥܠܵܗ̇: ܕܠܵܐ ܡܲܗܡܸܐ ܗ̄ܘ̣ܵܐ ܡ̣ܢ ܕܲܠܡܸܪܕܲܦ ܒܵܬܲܪ ܫܲܒܵܝܹ̈ܐ: ܟܲܕܼ ܚ̣ܙܵܐ ܕܹܝܢ ܛܘܼܒܼܵܢܵܐ ܗܵܕܹܐ: ܚ̣ܕܝܼ ܪܵܘܪܒܼܵܐܝܼܬܼ ܘܫܲܒܲܚ̣ ܠܐܲܠܵܗܵܐ. ܘܲܒܼܗܵܢ̇ܘܿܢ ܝܲܕܼܥܹ̈ܐ ܪܕܼܵܘ: ܥܕܲܡܵܐ ܕܲܤܡܲܟܼܘ ܠܐܲܬܼܪ̈ܵܘܵܬܼܵܐ ܕܩܲܪ̈ܕܘܵܝܹܐ. ܘܐܲܪܝܼܡ̣ ܥܲܝܢܵܘ̈ܗܝ ܘܲܚ̣ܙܵܐ: ܘܗܵܐ ܡܲܫܪ̈ܝܵܬܼܵܐ ܪܵܘܪ̈ܒܼܵܬܼܵܐ ܕܲܒܼܥܸܠܕܒܼܵܒܹ̈ܐ ܫܲܪ̈ܝܵܢ ܥܲܠ ܚܲܒܘܼܪܵܐ ܢܲܗܪܵܐ. ܫܪܹܝܢ ܓܹܝܪ ܬܟܼܝܼܠܵܐܝܼܬܼ: ܘܐܵܟܼܠܝܼܢ ܘܫܵܬܹܝܢ ܘܙܵܡ̇ܪܝܼܢ: ܘܚܵܕܹܝܢ ܘܲܦܨܝܼܚܝܼܢ ܒܲܫܒܼܝܼܬܼܵܐ ܪܲܒܿܬܼܵܐ ܘܒܸܙܬܼܵܐ ܥܲܫܝܼܢܬܼܵܐ ܕܒܼܐܝܼܕܲܝ̈ܗܘܿܢ.

ܗܵܝܕܹܝܢ ܢ̣ܚܸܢܬܼ ܛܘܼܒܼܵܢܵܐ ܡ̣ܢ ܤܘܼܤܝܹܗ: ܗ̤ܘ ܘܦܵܠܵܚܵܘ̈ܗܝ: ܘܲܢܦܲܠ̣ܘ ܥܲܠ ܐܲܦܲܝ̈ܗܘܿܢ ܥܲܠ ܐܲܪܥܵܐ. ܘܲܡܨܲܠܸܐ ܗ̄ܘ̣ܵܐ ܘܐܵܡܲ݁ܪ: pb. 480 ܡܠܸܟܼ ܡܲܠܟܹ̈ܐ ܫܡܲܝܵܢܵܐ: ܗܵܘ̇ ܕܕܼܝܼܠܹܗ ܗ̣̄ܝ ܡܲܠܟܿܘܼܬܼܵܐ ܠܵܐ ܡܸܫܬܲܚܠܦܵܢܝܼܬܼܵܐ ܘܚܲܝܠܵܐ ܘܫܘܼܠܛܵܢܵܐ ܘܓܲܢ̄ܒܵܪܘܼܬܼܵܐ ܒܲܫܡܲܝܵܐ ܘܒܲܐܪܥܵܐ: ܗܵܘ̇ ܕܲܒܼܚܲܝܠܹܗ ܚ̣ܪܲܒܼ ܝܼܫܘܿܥ ܒܲܪܢܘܿܢ ܡܲܠܟܹ̈ܐ ܪܵܘܪ̈ܒܹܐ ܘܥܲܫܝܼ̈ܢܹܐ: ܘܒܲܕܼܪܵܥܹܗ ܪܵܡܵܐ ܙܟܼܵܐ ܛܘܼܒܼܵܢܵܐ ܕܵܘܝܼܕܼ ܠܥܲܡܡܹ̈ܐ ܕܲܒܼܟܼܠܗܘܿܢ ܚܕܼܵܪ̈ܵܘܗܝ: ܐܲܢ̄ܬܿ ܥܲܕܲܪ ܠܲܡܚܝܼܠܘܼܬܲܢ: ܕܢܸܫܬܲܒܲܚ ܫܡܵܟܼ ܪܲܒܵܐ ܒܙܵܟܼܘܼܬܼܵܐ ܕܤܵܓ̇ܘܼܘܿܕܲܝ̈ܟ ܠܥܵܠܲܡ ܥܵܠܡܝܼܢ: ܐܵܡܹܝܢ. ܘܲܥ̣ܢܵܘ ܟܠܗܘܿܢ ܦܵܠܚܵܘ̈ܗܝ ܒܚܲܕܼ ܩܵܠܵܐ: ܐܵܡܹܝܢ. ܘܲܦ̣ܩܲܕܼ ܛܘܼܒܼܵܢܵܐ: ܘܝܲܒܸܿܒܼܘ ܬܠܵܬܼ ܩܲܪ̈ܢܵܬܼܵܐ ܝܘܼܒܵܒܹ̈ܐ ܪܵܘܪ̈ܒܹܐ ܘܲܕܚܝܼ̈ܠܹܐ. ܘܒܼܵܗ̇ ܒܫܵܥܬܼܵܐ ܐܵܬܼܚ̣ܙܝܼ ܠܹܗ ܠܛܘܼܒܼܵܢܵܐ ܩܲܪܕܵܓܼ ܩܲܕܝܼܫܵܐ ܡܵܪܝ ܥܲܒܼܕܝܼܫܘܿܥ ܪܲܒܹܿܗ: ܟܲܕܼ ܐܵܬ̤ܵܐ ܫܒܝܼܚܵܬܼܵܐ ܕܲܨܠܝܼܒܼܵܐ ܠܒܼܝܼܟܼ ܒܐܝܼܕܹܗ ܘܪܵܗܹ̇ܛ ܩܕܼܵܡܵܘܗܝ ܘܐܵܡܲ݁ܪ ܠܹܗ: ܗܵܐ ܒܹܪܝ ܐܵܬ̤ܵܐ ܪܲܒܿܬܼܵܐ ܕܙܵܟܼܘܼܬܼܵܟܼ. ܐܸܠܵܐ ܐܸܬܼܚܲܝܲܠ ܘܐܸܬܼܥܲܫܲܢ: ܡܸܛܠ ܕܐܲܫ̣ܠܸܡ ܡܵܪܝܵܐ ܠܲܒܼܥܸܠܕܿܒܼܵܒܲܝ̈ܟ ܒܐܝܼܕܲܝ̈ܟ. ܘܡ̣ܢ ܫܹܠܝ ܐܬܲܕܼܝܼܩ̣ ܥܠܲܝܗܘܿܢ ܕܲܒܼܥܸܠܕܿܒܼܵܒܹ̈ܐ ܢܲܨܝܼܚܵܐ: ܐܲܝܟܼ ܒܲܪܩܵܐ ܕܚܝܼܠܵܐ: ܘܐܲܝܟܼ ܫܸܡܫܵܐ ܒܕܸܢܚܹܗ: ܘܐܲܝܟܼ ܓܲܢ̄ܒܵܪܵܐ ܕܕܼܵܐܹ̇ܨ ܠܡܸܪܗܲܛ ܐܘܼܪܚܹܿܗ. ܘܲܩ̣ܥܵܐ ܬܠܵܬܼ ܙܲܒܼܢܝܼ̈ܢ ܩܵܠܹ̈ܐ ܙܥܝܼ̈ܦܹܐ ܘܐܸܡ݂ܲܪ ܠܗܘܿܢ: ܗܵܢܵܘ ܝܵܘܡܵܐ ܕܦܘܼܪܥܵܢܵܐ ܕܡܲܪܵܚܘܼܬܼܟܼܘܿܢ: ܟܲܠܒܹ̈ܐ ܛܲܡ̈ܐܹܐ. ܘܡܸܚܕܼܵܐ ܐܸܫ̣ܬܲܠܗܲܒܼ ܠܲܩܪܵܒܼܵܐ: ܫܒܼܝܼܬܼܵܐ ܕܹܝܢ ܟ̱ܠܵܗ̇ ܪܸܗܛܲܬ̤ ܠܐܘܼܪܥܹܗ ܕܛܘܼܒܼܵܢܵܐ: ܘܲܗܘ̤ܵܬܼ ܠܵܗ̇ ܡ̣ܢ ܒܸܤܬܿܪܹܗ. pb. 481 ܘܐܸܬܼܒܲܕܲܪ ܡܲܫܪ̈ܝܵܬܼܵܐ ܡ̣ܢ ܩܕܼܵܡܵܘܗܝ: ܘܲܚ̣ܪܲܒܼ ܐܸܢܘܿܢ ܐܲܝܟܼ ܕܲܠܫܸܒ̈ܠܹܐ ܕܚܲܩܠܵܐ. ܘܲܢܦܲܠ̣ ܫܠܲܕܲܝ̈ܗܘܿܢ ܒܚܲܒܘܼܪܵܐ ܢܲܗܪܵܐ: ܒܲܕܼܡܘܼܬܼ ܩܲܡ̈ܨܹܐ ܫܝܼ̈ܛܹܐ: ܘܕܲܠܝܼ̈ܠܹܐ ܡܸܢܗܘܿܢ ܠܛܘܼܪܵܐ ܐܸܬܼܦܲܠܲܛ̣ܘ ܒܲܪܓܸܠ. ܘܲܡ̣ܚܵܐ ܐܸܢܘܿܢ ܘܲܪܕܸܦ ܐܸܢܘܿܢ: ܥܕܲܡܵܐ ܠܲܫܦܘܼܠܵܘ̈ܗܝ ܕܛܘܼܪܵܐ: ܗܵܘ̇ ܕܥܲܠ ܪܹܫܹܗ ܐܸܬܿܬܿܢܝܲܝܲܬ̤ ܩܹܒܼܘܿܬܼܵܐ ܕܒܹܝܬܼ ܢܘܿܚ. ܘܲܢ̣ܦܢܵܐ ܩܲܕܿܝܼܫܵܐ ܒܙܵܟܼܘܼܬܼܵܐ ܪܲܒܿܬܼܵܐ ܘܲܒܼܚܲܕܼܘܼܬܼܵܐ: ܟܲܕܼ ܡܙܲܡܲܪ ܗ̄ܘ̣ܵܐ ܘܐܵܡ݁ܲܪ: ܗܵܠܹܝܢ ܒܡܲܪ̈ܟܿܒܼܵܬܼܵܐ ܘܗܵܠܹܝܢ ܒܪ̈ܲܟܼܫܵܐ: ܘܲܚܢܲܢ ܒܲܫܡܹܗ ܕܡܵܪܝܵܐ ܐܲܠܵܗܲܢ ܢܸܥܫܲܢ. ܘܗܸܢܘ̣ܿܢ ܒܪܲܟܼܘ ܘܢܦܲܠ̣ܘ: ܘܲܚܢܲܢ ܩܵܡ̣ܢ ܘܐܸܬܿܛܲܝܲܒܼܢ: ܡܸܛܠ ܕܡܵܪܝܵܐ ܐܲܠܵܗܲܢ ܦܲܪܩܲܢ. ܘܲܥ̣ܛܲܦ ܘܒܲܙ ܠܡܲܫܪ̈ܝܵܬܼܵܐ: ܘܐܲܝ̣ܬܿܝܼ ܒܸܙܬܼܵܐ: ܘܐܲܗ̣ܦܸܟܼ ܟ̱ܠܵܗ̇ ܫܒܼܝܼܬܼܵܐ. ܘܟܲܕܼ ܐܸܬ݂ܵܘ ܠܒܹܝܬܼ ܒܵܘܬܵܐ: ܦ̣ܩܲܕܼ ܘܲܩ̣ܪܵܬ̤ ܩܲܪܢܵܐ. ܘܐܸܬܼܟܲܢܲܫ̣ܘ ܟܠܗܘܿܢ ܦܵܠܵܚܵܘ̈ܗܝ: ܘܲܤ̣ܥܲܪ ܐܸܢܘܿܢ: ܘܐܸܫ̣ܟܲܚ ܕܲܢܛܝܼܪܝܼܢ ܟܠܗܘܿܢ ܕܠܵܐ ܢܸܟܼܝܵܢ.

ܘܡܸܚܕܼܵܐ ܕܲܤ̣ܡܲܟܼ ܛܘܼܒܼܵܢܵܐ ܠܒܲܝܬܹܗ: ܦ̣ܩܲܕܼ ܘܐܸܬܼܥ̣ܩܲܪܘ ܒܹܝܬܼ ܢܘܼܪ̈ܘܵܬܼܵܐ ܕܲܒܼܢܹܝܢ ܗ̄ܘ̣ܵܘ ܠܐܲܒܼܵܗܵܘ̈ܗܝ: ܘܲܥ̣ܒܲܕܼ ܐܸܢܘܿܢ ܗܲܝ̈ܟܿܠܹܐ ܩܲܕܝ̈ܫܹܐ ܠܲܡܪܲܝܡܵܐ. ܘܤܲܚܸܦ ܐܲܕܪ̈ܘܿܩܹܐ ܕܡܸܙܕܲܚܵܐ ܗ̄ܘ̣ܵܬܼ ܒܗܘܿܢ ܢܘܼܪܵܐ ܡ̣ܢ ܡܓܼܘܼ̈ܫܹܐ ܛܵܥܲܝ̈ܐ: ܘܲܩ̣ܒܲܠ ܡܲܕܼܒܿܚܹ̈ܐ ܙܗܲܝ̈ܐ ܠܲܡܫܝܼܚܵܐ. ܘܟܼܠ ܕܢܕܲܪ ܠܡܵܪܝܵܐ: ܓܡܲܪ ܘܫܲܡ̣ܠܝܼ ܒܚܲܕܼܘܼܬܼܵܐ pb. 482 ܪܲܒܿܬܼܵܐ. ܡܓܘܼܫܹ̈ܐ ܕܹܝܢ ܕܐܝܼܬܼ ܗ̄ܘ̣ܵܘ ܒܐܲܬܼܪ̈ܵܘܵܬܼܵܐ ܕܫܘܼܠܛܵܢܹܗ: ܟܲܕܼ ܚ̣ܙܵܘ ܗܵܠܹܝܢ ܟܠܗܹܝܢ: ܟܬܲܒܼܘ ܘܐܵܘܕܲܥ̣ܘ ܠܲܡܓܘܼܫܵܐ ܚܲܕܼ ܟܲܤܝܵܐܝܼܬܼ: ܕܡܸܬܼܩܪܸܐ ܗ̄ܘ̣ܵܐ ܡܵܘܒܿܕܵܢ ܡܵܘܒܸܿܕܸ. ܘܡܸܚܕܼܵܐ ܥܲܠ̣ ܠܘܵܬܼ ܡܲܠܟܵܐ ܫܵܒܼܘܿܪ ܘܐܸܡ݂ܲܪ ܠܹܗ: ܡܵܪܝ ܡܲܠܟܵܐ ܠܥܵܠܲܡ ܚܝܼ. ܩܲܪܕܵܓܼ ܗܵܘ̇ ܕܲܒܼܤܲܓܿܝܼܵܐܬܼܵܐ ܐܸܬܼܝܲܩܲܪ ܡ̣ܢ ܡܲܠܟܿܘܼܬܼܟܼܘܿܢ: ܘܲܥܒܲܕܬܘܿܢܵܝܗܝ ܦܲܛܚܵܫܵܐ ܕܐܵܬܼܘܿܪ ܘܡܲܪܙܒܼܵܢܵܐ ܒܐܲܬܼܪܵܐ ܕܡܲܥܪܒܼܵܐ: ܗܘ̤ܵܐ ܠܹܗ ܡ̣ܢ ܕܚܸܠܬܼܵܐ ܕܢܵܨܪ̈ܵܝܹܐ. ܘܲܥ̣ܩܲܪ ܒܹܝܬܼ ܢܘܼܪ̈ܘܵܬܼܵܐ: ܘܲܒܼܢܵܐ ܥܹ̈ܕܵܬܼܵܐ ܘܕܲܝܪ̈ܵܬܼܵܐ. ܘܲܡ̇ܢܲܓܸܿܕܼ ܡܓܼܘܼ̈ܫܹܐ: ܘܥܵܒܹ̇ܕܼ ܠܗܘܿܢ ܢܵܨܪܸ̈ܵܝܹܐ. ܘܫܵܛ̣ܵܗ̇ ܠܤܸܓܼܕܬܼܵܐ ܕܐܲܠܵܗܹ̈ܐ: ܘܨܲܥܲܪ ܠܝܘܼܦܠܵܢܵܐ ܪܲܒܵܐ ܕܲܡܓܼܘܼܫܘܼܬܼܵܐ: ܘܚܲܫ̣ܒܵܗ̇ ܠܡܲܟܿܘܼܬܼܟܼܘܿܢ ܐܲܝܟܼ ܐܲܪܡܲܠܬܼܵܐ ܕܠܲܝܬܿ ܠܵܗ̇ ܒܲܥܠܵܐ. ܡܲܠܟܵܐ ܕܹܝܢ ܟܲܕܼ ܫܡܲܥ̣: ܐܸܡ݂ܲܪ ܠܹܗ ܙܥܝܼܦܵܐܝܼܬܼ: ܘܐܲܝܟܲܢܵܐ ܗܵܠܹܝܢ ܫܡܲܥ̣ܬܿ: ܘܟܼܠܹܗ ܢܸܨܚܵܢܵܐ ܗܵܘ̇ ܪܲܒܵܐ ܕܲܥ̣ܒܲܕܼ ܩܲܪܕܵܓܼ: ܕܒܼܡܲܐܬܹܝܢ ܘܲܬܼܠܵܬܼܝܼܢ ܘܐܲܪܒܿܥܵܐ ܓܲܒܼܪ̈ܝܼܢ ܚ̣ܪܲܒܼ ܐܲܠܦܹ̈ܐ ܕܪ̈ܗܘܿܡܵܝܹܐ ܘܪܸ̈ܒܿܘܵܬܼܵܐ ܕܛܲܝܵܝܹ̈ܐ: ܠܵܐ ܫܡܲܥ̣ܬܿ؟ ܡܓܼܘܼܫܵܐ ܕܹܝܢ ܟܲܕܼ ܗܵܠܹܝܢ ܫܡܲܥ̣ ܡ̣ܢ ܡܲܠܟܵܐ: ܐܸܬܿܬܿܙܝܼܥ̣ ܘܲܗܘ̤ܵܐ ܒܕܸܚܬܼܵܐ: ܘܲܫܬܸܩ̣ ܘܠܵܐ ܡܲܠܸܠ̣. ܘܟܲܕܼ ܡܥܵܩ ܘܲܟܼܡܝܼܪ ܢܦܲܩ̣ ܡ̣ܢ ܩܕܼܵܡ ܡܲܠܟܵܐ: ܘܐܸܙܲܠ̣ ܟܲܢܸܫ̣ ܠܟܼܠܗܘܿܢ ܪܵ ܪ̈ܒܼܵܢܹܐ ܕܡܲܠܟܿܘܼܬܼܵܐ: ܘܓܲܪܝܼ ܐܸܢܘܿܢ ܒܡܸܠܵܘ̈ܗܝ: ܕܒܲܚܕܼܵܐ ܟܢܝܼܫܘܼ ܢܹܐܟܼܠܘܼܢ ܩܲܪ̈ܨܵܘܗܝ ܕܛܘܼܒܼܵܢܵܐ ܩܲܪܓܵܕܼ ܩܕܼܵܡ ܡܲܠܟܵܐ. ܗܵܝܕܹܿܝܢ ܐܸܬܼܟܲܢܲܫ̣ܘ ܟܠܗܘܿܢ: ܘܡ̣ܢ ܚܲܕܼ ܦܘܼܡ ܫܠܲܚ̣ܘ pb. 483 ܠܡܲܠܟܵܐ ܟܲܕܼ ܐܵܡ̇ܪܝܼܢ: ܡܵܪܲܢ ܡܲܠܟܵܐ: ܐܸܢ ܗܵܕܹܐ ܫܸܦ̣ܪܲܬ̤ ܠܨܸܒܼܝܵܢܟܼܘܿܢ ܒܲܤܝܼܡܵܐ: ܕܬܸܫܬܲܚܲܛ ܘܬܸܒܼܛܲܠ ܚܲܢܦܘܼܬܼܵܐ: ܘܟܼܠܲܢ ܢܵܨܪ̈ܵܝܹܐ ܢܸܗܘܸܐ: ܦܩܘܿܕܼܘ ܠܡܵܘܕܵܥܝܼܘ ܠܥܲܒܼܕܲܝ̈ܟܿܘܿܢ ܨܸܒܼܝܵܢܟܼܘܿܢ: ܕܢܸܕܲܥ ܡܸܕܸܿܡ ܕܙܵܕܹ̇ܩ ܠܲܢ ܠܡܸܥܒܲܕܼ. ܐܸܢ ܕܹܝܢ ܗܵܕܹܐ ܠܲܝܬܿ: ܠܡܵܢܵܐ ܐܲܗܡܝܼܬܿܘܿܢ ܡ̣ܢ ܡܲܪܵܚܵܐ ܩܲܪܕܵܓܼ: ܕܗܵܐ ܡܨܲܥܲܪ ܠܐܲܠܵܗܹ̈ܐ ܘܥܵ݁ܩܲܪ ܒܹܝܬܼ ܢܘܼܪ̈ܘܵܬܼܵܐ: ܘܒܼܵܢܹܐ ܒܹܝܬܼ ܤܸܓܼ̈ܕܵܬܵܐ ܠܕܸܚܠܬܼܵܐ ܒܝܼܫܬܼܵܐ ܕܢܵܨܪ̈ܵܝܹܐ.

ܡܲܠܟܵܐ ܕܹܝܢ ܟܲܕܼ ܗܵܠܹܝܢ ܫܡܲܥ̣: ܛܵܒܼ ܟܸܪܝܲܬ̤ ܠܹܗ: ܡܸܛܠ ܕܡ̣ܢ ܟ̱ܠܵܗ̇ ܢܲܦܫܹܗ ܪܵܚܹ̇ܡ ܗ̄ܘ̣ܵܐ ܠܹܗ ܠܛܘܼܒܼܵܢܵܐ ܩܲܪܕܵܓܼ. ܡܸܛܠ ܕܹܝܢ ܨܸܒܼܝܵܢܵܐ ܕܪܵܘܪ̈ܒܼܵܢܹܐ: ܐܸܬܼܐܠܸܨ ܠܡܸܒܼܥܹܝܗ ܠܛܘܼܒܼܵܢܵܐ ܩܲܪܕܵܓܼ. ܘܲܦ̣ܩܲܕ ܡܸܚܕܼܵܐ ܘܐܸܬܼܟܲܬܼܒܲܬ̤ ܤܲܩܪܵܐ ܠܘܵܬܼ ܩܲܕܿܝܼܫܵܐ ܩܲܪܕܵܓܼ ܗܵܟܲܢܵܐ: ܫܡܲܥ̣ܢܲܢ ܥܲܠ ܢܸܨܚܵܢܵܐ ܘܓܲܢ̈ܒܵܪܘܼܬܼܵܐ ܕܲܥ̣ܒܲܕܼܬܿ ܒܪ̈ܗܘܿܡܵܝܹܐ ܘܲܒܼܛܲܝܵܝܹ̈ܐ ܘܲܒܼܫܲܪܟܵܐ ܕܥܲܡܡܹ̈ܐܐ: ܕܐܲܡ̣ܪܲܚܘ ܠܡܸܥܲܠ ܠܐܘܼܚܕܵܢܲܢ: ܐܘܿ ܥܲܒܼܕܲܢ ܛܵܒܼܵܐ. ܘܒܲܕܼܓܘܿܢ ܫܸܦ̣ܪܲܬ̤ ܠܲܢ ܕܢܸܬܼܒܲܤܲܡ ܒܲܚܙܵܬܼܵܟܼ: ܘܢܸܦܪܥܵܟܼ ܐܝܼܩܵܪܵܐ ܚܠܵܦ ܙܵܟܼܘܼܬܼܵܟܼ ܪܲܒܿܬܼܵܐ. ܐܸܠܵܐ ܡܵܐ ܕܚܵܙܹ̇ܐ ܐܲܢ̄ܬܿ ܤܲܩܪܲܢ ܗܵܢܵܐ: ܒܲܚܦܝܼܛܘܼܬܼܵܐ ܬܵܐ ܠܬܲܪܥܲܢ: ܘܠܵܐ ܢܲܗܡܵܐ. ܕܚܸܠ̣ ܗ̄ܘ̣ܵܐ ܓܹܝܪ ܡܲܠܟܵܐ ܠܡܵܘܕܵܥܘܼܬܹܗ ܓܲܠܝܵܐܝܼܬܼ ܥܲܠ ܤܘܼܥܪܵܢܵܐ: ܕܕܲܡ ܠܲܡ ܢܸܡܪܲܕܼ ܘܢܸܥܒܸܿܕܼ ܫܓܼܘܼܫܝܵܐ ܘܢܙܝܼܥ ܠܡܲܠܟܿܘܼܬܼܵܐ. ܛܘܼܒܼܵܢܵܐ ܕܹܝܢ ܟܲܕܼ ܩܲܒܸܿܠ̣ ܐܸܓܲܪܬܵܐ ܕܡܲܠܟܵܐ ܘܲܩ̣ܪܵܗ̇: ܓܚܸܟܼ ܪܲܟܿܝܼܟܼܵܐܝܼܬܼ ܘܐܸܡ݂ܲܪ ܠܗܵܘ̇ ܕܝܲܒܿܠ̣ܵܗ̇: ܠܵܘ ܠܲܡ ܗܵܠܹܝܢ ܕܐܵܡ̇ܪܵܐ pb. 484 ܐܸܓܲܪܬܵܐ ܐܝܼܬܼ ܒܠܸܒܹܿܗ ܕܡܲܠܟܵܐ. ܒܪܲܡ ܫܪܵܪܵܐ ܐܸܡ݂ܲܪ: ܕܐܝܼܩܵܪܹ̈ܐ ܪܵܘܪ̈ܒܹܐ ܘܡܵܘ̈ܗܒܼܵܬܼܵܐ ܡܸܬܼܩܲܕܝܵܢ̈ܝܵܬܼܵܐ ܐܝܼܬܼ ܠܝܼ ܠܡܸܤܲܒܼ ܡ̣ܢ ܐܝܼܕܼܵܘ̈ܗܝ: ܘܲܡܛܲܝܲܒܼ ܐ̄ܢܵܐ ܠܡܹܐܙܲܠ ܒܚܲܕܼܘܼܬܼܵܐ ܪܲܒܿܬܼܵܐ. ܘܡܸܚܕܼܵܐ ܥܲܠ̣ ܠܥܹܕܬܵܐ: ܘܦܲܪܤ̣ܵܗ̇ ܒܐܸܓܲܪܬܵܐ ܩܕܼܵܡ ܡܵܪܝܵܐ: ܘܨܲܠ̣ܝܼ ܘܐܸܡ݂ܲܪ: ܡܫܝܼܚܵܐ ܒܪܹܗ ܕܐܲܠܵܗܵܐ: ܕܒܲܕܼܡܹܗ ܙܲܟܵܝܵܐ ܙܲܒܼܢܵܗ̇ ܠܥܹܕܬܹܗ: ܘܲܫ̣ܪܵܗ̇ ܠܲܚܛܝܼܬܼܵܐ: ܘܠܝܼ ܚܲܛܵܝܵܐ ܐܲܫ̣ܘܝܲܢܝ ܠܒܲܝܬܵܝܘܼܬܹܗ: ܐܲܢ̄ܬܿ ܚܲܝܸܠܹܝܗ̇ ܠܲܡܚܝܼܠܘܼܬܼܝ ܠܲܡܩܵܡ ܒܐܵܓܼܘܿܢܵܐ ܗܵܢܵܐ ܪܲܒܵܐ ܕܤܝܼܡ ܩܕܼܵܡܲܝ. ܘܗܲܒܼܠܝܼ ܕܐܸܦܘܿܩ ܡܸܢܹܗ ܒܙܵܟܼܘܼܬܼܵܐ: ܘܐܹܡܘܼܬܼ ܡܸܛܠ ܫܡܵܟܼ ܟܲܕܼ ܡܠܸܐ ܦܘܼܡܝ ܬܵܘܕܝܼܬܼܵܐ ܕܒܼܵܟܼ: ܘܬܸܫܒܿܘܿܚܬܼܵܐ ܕܲܫܡܵܟܼ ܩܲܕܿܝܼܫܵܐ. ܘܲܚ̣ܬܲܡ ܢܲܦܫܹܗ ܒܐܵܬ̤ܵܐ ܕܲܨܠܝܼܒܼܵܐ: ܘܲܚ̣ܙܲܩ ܟܲܕܼ ܡܫܲܒܲܚ ܠܐܲܠܵܗܵܐ. ܘܟܲܕܼ ܤ̣ܡܲܟܼ ܒܬܲܪܥܵܐ ܕܡܲܠܟܵܐ: ܫܠܲܚ̣ ܠܹܗ ܡܲܠܟܵܐ ܟܲܤܝܵܐܝܼܬܼ ܘܐܸܡ݂ܲܪ ܠܹܗ: ܗܵܐ ܡܓܼܘܼ̈ܫܹܐ ܘܪܵܘܪ̈ܒܼܵܢܹܐ ܟܠܗܘܿܢ ܕܡܲܠܟܿܘܼܬܼܵܐ ܠܚܝܼܡܝܼܢ ܠܵܟܼ: ܘܨܵܒܹ̇ܝܢ ܠܡܸܩܛܠܵܟܼ. ܡܸܛܠ ܕܲܫܡܲܥ̣ܘ: ܕܲܫܒܲܩ̣ܬܿ ܡܓܼܘܼܫܘܼܬܼܵܐ ܘܤܸܓܼܕܬܵܐ ܕܐܲܠܵܗܹ̈ܐ: ܘܲܗ̤ܘܲܝܬܿ ܟܪܸ̈ܤܛܝܵܢܵܐ. ܐܸܠܵܐ ܡܵܐ ܕܥܵܐܹ̇ܠ ܐܲܢ̄ܬܿ ܩܕܼܵܡܲܝ: ܠܵܐ ܬܹܐܡܲܪ ܕܲܟܼܪܸܤܛܝܵܢܵܐ ܐܲܢ̄ܬܿ: ܐܲܝܟܼ ܕܢܸܒܼܗܬܼܘܼܢ ܡܩܲܛܪ̈ܓܼܵܢܲܝܟܼ: ܘܲܚܢܲܢ ܢܝܲܩܪܵܟܼ ܐܝܼܩܵܪܹ̈ܐ ܪܵܘܪ̈ܒܹܐ. ܘܡܵܐ ܕܦܵܢܹ̇ܝܬܿ ܠܐܲܬܼܪܵܟܼ ܘܲܠܫܘܼܠܛܵܢܵܟܼ: ܐܲܝܟܼ ܕܨܵܒܹ̇ܐ ܐܲܢ̄ܬܿ ܗ̤ܘܝܼ. pb. 485

ܠܨܲܦܪܹܗ ܕܹܝܢ ܕܝܵܘܡܵܐ: ܐܸܬܼܦ̣ܸܕܼ ܛܘܼܒܼܵܢܵܐ ܠܡܸܥܲܠ ܩܕܼܵܡ ܡܲܠܟܵܐ. ܘܟܲܕܼ ܥܵܐܹ̇ܠ ܗ̄ܘ̣ܵܐ: ܡܓܼܘܼ̈ܫܹܐ ܟܠܗܘܿܢ ܘܪܵܘܪ̈ܒܼܵܢܹܐ ܕܡܲܠܟܿܘܼܬܼܵܐ ܐܸܬܼܟܲܢܲܫ̣ܘ ܘܦܵܡ̣ܘ: ܘܓܼܵܙ̇ܡܝܼܢ ܗ̄ܘ̣ܵܘ ܥܠܵܘܗܝ ܘܲܡܚܲܪܩܝܼܢ ܫܸܢܲܝ̈ܗܘܿܢ. ܗ̤ܘ ܕܹܝܢ ܛܘܼܒܼܵܢܵܐ ܚܵܐܲܪ ܗ̄ܘ̣ܵܐ ܒܗܘܿܢ ܢܲܟܼܦܵܐܝܼܬܼ: ܘܲܡܙܲܡܲܪ ܗ̄ܘ̣ܵܐ ܪܲܟܿܝܼܟܼܵܐܝܼܬܼ ܘܐܵܡܲ݁ܪ: ܟܠܗܘܿܢ ܥܲܡܡܹ̈ܐ ܚܲܕܼܪܘܼܢܝ: ܘܒܲܫܡܹܗ ܕܡܵܪܝܵܐ ܐܲܤܝܼܦܹ̇ܬܼ ܐܸܢܘܿܢ. ܐܸܬܼܟܲܪܟܿܘܼܢܝ ܘܚܲܕܼܪܘܼܢܝ: ܘܒܲܫܡܹܗ ܕܡܵܪܝܵܐ ܐܲܤܝܼܦܹ̇ܬܼ ܐܸܢܘܿܢ. ܚܲܕܼܪܘܼܢܝ ܐܲܝܟܼ ܕܲܒܿܘܿܪܹ̈ܐ ܘܲܕܥܸܟܼܘ ܐܲܝܟܼ ܢܘܼܪܵܐ ܕܓܸܠܹ̈ܐ: ܘܒܲܫܡܹܗ ܕܡܵܪܝܵܐ ܐܲܤܝܼܦܹ̇ܬܼ ܐܸܢܘܿܢ. ܘܟܲܕܼ ܥܲܠ̣ ܩܕܼܵܡ ܡܲܠܟܵܐ: ܩܥ̣ܵܐ ܡܲܠܟܵܐ ܒܩܵܠܵܐ ܪܵܡܵܐ ܘܐܸܡ݂ܲܪ ܠܹܗ. ܐܸܬܲܝ̣ܬܿ ܒܲܫܠܵܡ: ܦܵܠܚܵܐ ܙܲܟܵܝܵܐ ܫܘܼܦܪܵܗ̇ ܕܡܲܠܟܿܘܼܬܲܢ. ܫܡܲܥܢܲܢ ܥܲܠ ܢܸܨܚܵܢܲܝ̈ܟ: ܘܛܵܒܼ ܩܲܠܸܤܢܲܢ ܠܟܲܫܝܼܪܘܼܬܼܵܟܼ: ܘܲܡܛܲܝܒܼܝܼܢܲܢ ܕܢܸܦܪܥܵܟܼ ܐܝܼܩܵܪܵܐ. ܒܪܲܡ ܫܡܲܥܢܲܢ ܗܵܝ̇ ܕܛܵܒܼ ܥܲܤܩܵܐ: ܘܐܸܢ: ܚܵܣ! ܗܵܟܲܢܵܐ ܗ̣̄ܝ: ܠܡܵܘܬܵܐ ܡܲܪܝܼܪܵܐ ܫܵܘܹ̇ܐ ܐܲܢ̄ܬܿ. ܐܵܡ̇ܪܷܼܢ ܓܹܝܪ: ܕܲܫܒܲܩ̣ܬܿ ܕܚܠܬܼܵܐ ܪܲܒܿܬܼܵܐ ܕܲܡܓܼܘܼܫܘܼܬܼܵܐ: ܘܠܲܐܠܵܗܹ̈ܐ ܨܲܥܲܪܬܿ: ܘܲܠܢܵܨܪ̈ܵܝܹܐ ܐܸܬܼܢܩܸܦ̣ܬܿ ܘܲܗ̤ܘܲܝܬܿ ܢܵܨܪܵܝܵܐ. ܘܟܲܕܼ ܗܵܠܹܝܢ ܐܸܡ݂ܲܪ ܗ̄ܘ̣ܵܐ ܠܹܗ ܡܲܠܟܵܐ: ܒܥܲܝܵܢܵܘ̈ܗܝ ܪܵܡܹ̇ܙ ܗ̄ܘ̣ܵܐ ܠܹܗ ܕܢܸܟܼܦܘܿܪ: ܕܠܵܐ ܫܲܪܝܼܪ̈ܵܢ ܗܵܠܹܝܢ ܘܠܵܘ ܢܵܨܪܵܝܵܬ ܐܝܼܬܲܝ. ܛܘܼܒܼܵܢܵܐ ܕܹܝܢ ܩܲܪܕܵܓܼ ܩ̣ܪܵܐ ܠܐܲܠܵܗܵܐ ܟܲܤܝܵܐܝܼܬܼ: ܕܢܸܗܘܸܐ ܠܹܗ ܡܥܲܕܪܵܢܵܐ. ܘܲܬܼܪܵܐ ܒܠܸܒܹܿܗ ܦܸܬܼܓܼܵܡܵܐ ܗܵܘ̇ pb. 486 ܕܛܘܼܒܼܵܢܵܐ ܕܵܘܝܼܕܼ: ܕܐܹܡܲܠܸܠ ܒܙܲܕܝܼܩܘܼܬܼܵܐ ܩܕܼܵܡ ܡܲܠܟܹ̈ܐ ܘܠܵܐ ܐܸܒܼܗܲܬܼ. ܘܲܦ̣ܬܲܚ ܦܘܼܡܹܗ ܠܒܼܝܼܒܼܵܐܝܼܬܼ ܘܐܸܡ݂ܲܪ ܠܡܲܠܟܵܐ: ܫܲܪܝܼܪܵܐܝܼܬܼ ܡܵܪܝ ܡܲܠܟܵܐ: ܟܪܸܤܛܵܝܵܢܵܐ ܐܝܼܬܲܝ ܫܲܪܝܼܪܵܐ. ܘܐܵܘܕܝܼ̇ܬܼ ܘܡܵܘܕܼܢܵܐ ܒܟܸܤܝܵܐ ܘܲܒܼܓܸܠܝܵܐ: ܕܲܟܼܪܸܤܛܝܵܢܵܐ ܐܝܬܲܝ. ܘܲܒܼܚܲܝܠܹܗ ܕܲܡܫܝܼܚܵܐ ܡܵܪܝ ܙܟܹ̇ܝܬܼ ܠܲܒܼܥܸܠܕܿܒܼܵܒܹ̈ܐ: ܘܚܸܪܒܹ̇ܬܼ ܡܲܫܪ̈ܝܵܬܼܵܐ ܕܫܲܒܵܝܹ̈ܐ: ܕܐܲܡ̣ܪܲܚܘ ܥܲܠ ܐܲܬܼܪ̈ܵܘܵܬܼܵܐ ܕܐܘܼܚܕܵܢܟܼܘܿܢ: ܗܵܢ̇ܘܿܢ ܕܠܝܼ ܐܲܓܼܥܸܠܬܿܘܿܢ.

ܘܟܲܕܼ ܫܡܲܥ̣ ܡܲܠܟܵܐ ܗܵܠܹܝܢ: ܛܵܒܼ ܟܸܪܝܲܬ̤ ܠܹܗ. ܡܛܸܠ ܕܹܝܢ ܪܵܘܪ̈ܒܼܵܢܹܐ ܕܡܲܠܟܿܘܼܬܼܵܐ: ܫܲܚ̣ܠܸܦ ܐܲܦܵܘ̈ܗܝ ܠܪܘܼܓܼܙܵܐ ܘܲܠܚܸܡܬܼܵܐ. ܘܐܸܡ݂ܲܪ ܠܹܗ ܠܩܲܕܿܝܼܫܵܐ: ܡܸܛܠ ܕܲܩܕܼܵܡܲܝܢ ܟܦܲܪܬܿ ܒܐܲܠܵܗܹ̈ܐ ܕܲܡܕܲܒܿܪܝܼܢ ܫܡܲܝܵܐ ܘܐܲܪܥܵܐ: ܘܐܵܘܕܝܼܬܿ ܒܝܼܫܘܿܥ ܗܵܘ̇ ܕܙܲܩ̣ܦܘܼܗܝ ܝܗ̄ܘܼܕܵܝܹ̈ܐ: ܐܵܦ ܚܢܲܢ ܢܸܟܼܦܘܿܪ ܒܚܘܼܒܵܟܼ: ܘܢܸܠܚܸܐ ܠܪܸܚܡܬܼܵܟܼ ܡ̣ܢ ܪܸܥܝܵܢܲܢ: ܘܲܠܡܵܘ̈ܬܹܐ ܘܲܠܡܵܘ̈ܬܹܐ ܡܲܪܝܼܪܹ̈ܐ ܢܲܫܠܡܵܟܼ. ܪܵܘܪ̈ܒܼܵܢܹܐ ܕܹܝܢ ܘܟܼܠܗܘܿܢ ܡܓܼܘܼ̈ܫܹܐ: ܐܲܪܝܼܡ̣ܘ ܩܵܠܗܘܿܢ ܘܲܩ̣ܥܵܘ ܘܐܵܡ̇ܪܝܼܢ: ܗܵܢܵܐ ܠܪܸܒܿܘܿ ܡܵܘ̈ܬܝܼܢ ܫܵܘܹ̇ܐ. ܡܲܠܟܵܐ ܕܹܝܢ ܡܸܚܕܼܵܐ ܦ̣ܩܲܕܼ: ܕܢܸܬܼܐܤܲܪ ܒܐܝܼܕܼܵܘ̈ܗܝ ܘܲܒܼܪܸ̈ܓܼܠܵܘܗܝ: ܘܢܸܫܬܲܕܲܪ ܠܐܲܬܼܪܹܗ: ܘܬܲܡܵܢ ܢܸܬܿܬܿܕܝܼܢ. ܘܗܵܕܹܐ ܥ̣ܒܲܕܼ: ܒܕܸܐܬܼܚܲܫܲܒܼ ܕܕܲܡ ܟܲܕܼ ܒܐܬܲܤܘܼܪܹ̈ܐ ܡܸܬܼܠܒܸܟܼ ܙܲܒܼܢܵܐ ܢܲܓܿܝܼܪܵܐ: ܟܒܲܪ ܡܸܬܿܬܿܘܸܐ ܘܟܼܵܦܲܪ ܒܲܟܼܪܸܤܛܝܵܢܘܼܬܼܵܐ ܘܚܵܝܹ̇ܐ. ܡܓܼܘܼܫܵܐ ܕܹܝܢ ܪܲܒܵܐ ܡܦܝܼܣ ܗ̄ܘ̣ܵܐ: ܕܠܹܗ ܢܸܫܬܿܠܸܡ: ܘܗ̤ܘ ܢܕܘܼܢܝܼܘܗܝ ܠܦܘܼܬܼ ܪܲܒܿܘܼܬܼܵܐ ܕܤܲܟܼܠܘܼܬܹܗ. ܡܲܠܟܵܐ ܕܹܝܢ ܠܵܐ pb. 487 ܥܢ̣ܵܝܗܝ: ܒܲܕܼܨܵܒܹ̇ܐ ܗ̄ܘ̣ܵܐ ܕܢܲܚܹܝܘܗܝ ܠܩܲܕܿܝܼܫܵܐ. ܦ̣ܩܲܕܼ ܕܹܝܢ ܡܲܠܟܵܐ: ܘܐܲܫܠܡ̣ܘܼܗܝ ܠܦܲܪ̈ܵܫܹܐ ܡܵܐܐ ܘܲܠܦܲܝ̈ܓܹܐ ܚܲܡܫܝܼܢ: ܘܲܠܚܹܐܪܹ̈ܐ ܥܸܤܪܝܼܢ: ܕܢܵܘܒܿܠܘܼܢܵܝܗܝ ܠܐܲܬܼܪ̈ܵܘܵܬܼܵܐ ܕܲܒܼܗܘܿܢ ܐܲܚܝܼܕܼ ܗ̄ܘ̣ܵܐ ܫܘܼܠܛܵܢܹܗ: ܕܬܲܡܵܢ ܢܸܬܿܬܿܕܝܼܢ. ܘܲܟܼܬܲܒܼ ܤܲܩܪܵܐ ܠܓܼܘܼܫܢܲܙܕܵܕ ܘܲܠܕܼܝܼܢܓܘܼܫܢܲܤܦ ܡܵܘ̈ܗܦܵܛܹܐ ܕܐܲܬܼܪ̈ܵܘܵܬܼܵܐ ܗܵܢ̇ܘܿܢ ܗܵܟܲܢܵܐ: ܩܲܪܕܵܓܼ ܤܵܢܹ̈ܐ ܚܲܝܘ̈ܗܝ: ܗܵܘ̇ ܕܡܸܢܲܢ ܒܪܵܘܪ̈ܒܼܵܬܼܵܐ ܐܸܬܼܝܲܩܲܪ: ܐܲܝܟܼ ܕܝܵܕܼܥ̇ܝܼܢ ܐ̄ܢ̄ܬܿܘܿܢ: ܘܦܲܛܚܵܫܵܐ ܥܒܲܕܼܢܵܝܗܝ ܘܡܲܪܙܒܼܵܢܵܐ ܐܲܩܝܼܡܢܵܝܗܝ ܒܐܲܬܼܪ̈ܵܘܵܬܼܵܐ ܗܵܢ̇ܘܿܢ: ܗ̤ܘ ܕܹܝܢ ܟܦܲܪ ܒܐܲܠܵܗܹ̈ܐ: ܘܫ̣ܵܛ ܠܡܲܠܟܿܘܼܬܲܢ: ܘܨܲܥܲܪ ܠܕܼܚܸܠܬܲܢ: ܘܐܵܘܕܝܼ ܒܝܼܫܘܿܥ ܗܵܘ̇ ܕܐܸܙܕܩܸܦ̣: ܘܲܗܘ̤ܵܐ ܢܵܨܪܵܝܵܐ. ܗܵܐ ܒܐܲܤܘܼܪܹ̈ܐ ܩ̈ܫܲܝܵܐ ܘܲܒܼܢܵܛ̇ܘܿܪܹ̈ܐ ܫܲܪܝܼܪܹ̈ܐ ܫܲܕܲܪܢܵܝܗܝ ܠܘܵܬܼܟܼܘܿܢ: ܟܲܕܼ ܦܲܩܸܕܼܢܲܢ ܕܢܸܬܼܝܼܗܸܒܼ ܠܹܗ ܙܲܒܼܢܵܐ ܠܡܲܚܫܲܒܼܬܼܵܐ ܘܠܲܬܼܘܵܬܼܵܐ ܝܲܪ̈ܚܹܐ ܫܲܒܼܥܵܐ. ܘܐܸܢ ܒܙܲܒܼܢܵܐ ܕܲܚܪܝܼܩ ܠܵܐ ܡܲܪܚܸܩ ܡ̣ܢ ܕܸܚܠܬܼܵܐ ܒܝܼܫܬܼܵܐ ܕܢܵܨܪ̈ܵܝܹܐ: ܘܥܵܩܲܪ ܒܐܝܼܕܼܵܘ̈ܗܝ ܘܒܼܐ̈ܕܲܝ ܐ̄ܢܵܫܲܝ̈ ܒܲܝܬܹܗ ܥܹ̈ܕܵܬܼܵܐ ܘܕܲܝܪܵܬܼܵܐ ܕܲܒܼܢ̣ܵܐ: ܘܒܼܵܢܹ̇ܐ ܒܹܝܬܼ ܢܘܼܪ̈ܘܵܬܼܵܐ ܡܸܢܕܪܹܫ. ܘܲܡܕܲܟܸܿܐ ܢܲܦܫܹܗ ܒܲܡܓܼܘܼ̈ܫܹܐ: ܘܠܵܒܹܿܟܼ ܒܘܼܪ̈ܤܵܡܹܐ. ܘܡܲܓܸܫ ܠܐܲܠܵܗܹ̈ܐ: ܘܤܵܓܹ̇ܕܼ ܠܫܸܡܫܵܐ pb. 488 ܘܲܠܤܲܗܪܵܐ ܘܲܠܢܘܼܪܵܐ: ܦܩܲܕܼܢܲܢ ܕܢܸܬܼܪܓܸܡ ܒܟܹ̈ܐܦܹܐ ܥܲܠ ܬܲܪܥܵܐ ܕܒܲܝܬܹܗ. ܘܲܕܼܡܹܗ ܒܪܹܫܹܗ: ܘܲܚܢܲܢ ܡܚܲܤܹܝܢܲܢ ܡ̣ܢ ܕܡܹܗ.

ܟܲܕܼ ܕܹܝܢ ܡܲܛ̣ܝܼ ܟܬܼܝܼ̈ܒܼܵܬܼܵܐ ܕܡܲܠܟܵܐ ܠܘܵܬܼ ܓܘܼܫܢܲܙܕܵܕ ܘܕܝܼܢܓܘܼܫܢܲܤܦ ܡܲܘ̈ܗܦܵܛܹܐ: ܘܲܩ̣ܪܵܘ ܢܸܒܸܫܬܵܓܼ ܕܲܟܼܬܼܝܼܒܼܵܐ ܡܸܛܠܵܬܹܗ ܕܩܲܕܝܼܫܵܐ ܡܵܪܝ ܩܲܪܕܵܓܼ: ܩܵܡ̣ܘ ܡܤܲܪܗܒܼܵܐܝܼܬܼ ܘܐܲܝܬܝܘܼܗܝ ܠܘܵܬܼ ܒܘܼܪܙܡܲܝܗܪ: ܗܵܐ ܕܐܲܚܝܼܕܼ ܗ̄ܘ̣ܵܐ ܫܘܼܠܛܵܢܵܐ ܡ̣ܢ ܢܨܝܼܒܼܝܼܢ ܠܡܲܥܪܒܼܵܐ. ܡܸܛܠ ܕܲܪܲܒܿܚܲܝܠܵܐ ܗ̄ܘ̣ܵܐ: ܘܒܲܬܼܚܘܼܡܵܐ ܝܵܬܹ̇ܒܼ ܗ̄ܘ̣ܵܐ. ܟܲܕܼ ܕܹܝܢ ܡܲܛ̣ܝܼܘ ܠܲܢܨܝܼܒܼܝܼܢ: ܘܲܫ̣ܡܲܥ ܗ̄ܘ̣ܵܐ ܗ̤ܘ ܗܵܢܵܐ ܒܘܼܪܙܡܲܝܗܪ: ܟܲܢܸܫ̣ ܟܠܗܘܿܢ ܡܓܼܘܼ̈ܫܹܐ ܕܐܝܼܬܼ ܗ̄ܘ̣ܵܘ ܒܵܗ̇ ܒܲܡܕܝܼܢ̄ܬܼܵܐ ܐ̄ܢܵܫܵܐ ܝܼܕܲܝ̈ܥܹܐ: ܘܲܢܦܲܩ̣ܘ ܠܐܘܼܪܥܹܗ ܘܐܲܥ̣ܠܘܼܗܝ. ܘܲܡܦܝܼܤܝܼܢ ܗ̄ܘ̣ܵܘ ܠܹܗ ܟܠܗܘܿܢ: ܕܢܸܗܦܘܿܟܼ ܠܚܲܢܦܘܼܬܼܵܐ: ܘܲܢܩܝܼܡ ܒܫܘܼܠܛܵܢܹܗ ܐܲܝܟܼ ܦܘܼܩܕܵܢܹܗ ܕܡܲܠܟܵܐ. ܗ̤ܘ ܕܹܝܢ ܐܸܡ݂ܲܪ ܠܗܘܿܢ: ܕܐܸܢܵܐ ܡܸܟܹܝܠ ܟܪܸܤܛܝܵܢܵܐ ܐܝܼܬܲܝ: ܘܲܠܫܸܡܫܵܐ ܘܲܠܤܲܗܪܵܐ ܠܵܐ ܤܵܓ̇ܕܼܢܵܐ ܐܲܟܼܘܵܬܼܟܼܘܿܢ. ܘܟܲܕܼ ܠܵܐ ܐܸܬܿܛ̣ܦܝܼܣ ܠܗܘܿܢ: ܩܵܡ̣ܘ ܕܢܲܝܬܿܘܿܢܵܝܗܝ ܠܘܵܬܼ ܫܲܗܵܪܟܼܘܵܤܬܿ ܕܲܝܵܢܵܐ. ܗܵܘ̇ ܕܲܦܩܝܼܕܼ ܗ̄ܘ̣ܵܐ ܡ̣ܢ ܡܲܠܟܵܐ ܥܲܠ ܗܵܢܵܐ ܤܘܼܥܪܵܢܵܐ: ܕܟܼܠܢܵܫ ܕܟܼܵܦܲܪ ܒܲܡܓܼܘܼܫܘܼܬܼܵܐ ܠܹܗ ܢܸܫܬܿܠܸܡ. ܟܲܕܼ ܕܹܝܢ ܡܲܛ̣ܝܼܘ ܠܘܼܩܒܲܠ ܕܲܝܪܹܗ ܕܩܲܕܿܝܼܫܵܐ ܡܵܪܝ ܝܵܗܘܿܒܼ: ܗܘ̤ܵܐ ܗ̄ܘ̣ܵܐ ܡܸܟܹܿܝܠ ܪܲܡܫܵܐ. ܚܲܢ̈ܦܹܐ pb. 489 ܕܹܝܢ ܤܲܓܼܝܼ̈ܐܹܐ ܐܝܼܬܼ ܗ̄ܘ̣ܵܘ ܒܹܗ ܒܢܲܗܪܵܐ ܗܵܘ̇ ܕܲܠܘܵܬܼ ܕܲܝܪܹܗ ܕܩܲܕܿܝܼܫܵܐ ܡܵܪܝ ܝܵܗܘܼܒܼ: ܘܲܒܼܩܘܼܪ̈ܵܝܣ ܕܲܚܕܼܵܪ̈ܘܗܝ ܘܗ̤ܘ ܗܵܢܵܐ ܫܲܗܵܪܟܼܘܵܤܬ ܬܲܡܵܢ ܝܵܬܹ̇ܒܼ ܗ̄ܘ̣ܵܐ: ܘܤܲܓܿܝܼ ܒܝܼܫ ܗ̄ܘ̣ܵܐ ܒܚܲܢܦܘܼܬܹܗ. ܘܫܸܢ̈ܕܹܐ ܤܲܓܿܝܼ̈ܐܹܐ ܐܲܥ̣ܒܲܪ ܥܲܠ ܟܪܸ̈ܤܛܝܵܢܹܐ: ܕܢܲܗܦܸܟܼ ܐܸܢܘܿܢ ܠܚܲܢܦܘܼܬܼܵܐ: ܘܗ̤ܘ ܗܵܢܵܐ ܐܸܬ݂ܼܵܐ ܠܐܘܼܪܥܹܗ ܕܩܲܕܿܝܼܫܵܐ ܡܵܪܝ ܩܲܪܕܵܓܼ. ܘܟܲܕܼ ܚ̣ܙܵܝܗܝ ܐܸܡ݂ܲܪ ܠܹܗ: ܠܵܐ ܤܵܓܹ̇ܕܼܢܵܐ ܠܵܟܼ: ܡܸܛܠ ܕܲܫܒܲܩ̣ܬܿ ܡܓܼܘܼܫܘܼܬܼܵܐ: ܘܲܟܼܪܸܤܛܝܵܢܵܐ ܗ̤ܘܲܝܬܿ. ܒܪܲܡ ܐܸܬܿܛܦܝܼܣ ܠܝܼ: ܘܲܤܓܼܘܿܕܼ ܠܫܸܡܫܵܐ ܘܲܠܤܲܗܗܪܵܬ: ܘܚܲܤܵܐ ܢܲܦܫܵܟܼ ܒܲܡܓܼܘܼ̈ܫܹܐ: ܘܲܠܒܼܘܿܟܼ ܒܘܼܪ̈ܤܵܡܹܐ ܐܲܝܟܼ ܥܝܵܕܼܵܟܼ. ܘܐܸܢ ܕܹܝܢ ܠܵܐ: ܤܲܓܿܝܼ̈ܐܬܼܵܐ ܐܝܼܬܼ ܠܵܟܼ ܠܡܸܤܒܲܠ ܡܹܢܝ. ܛܘܼܒܼܵܢܵܐ ܕܹܝܢ ܐܸܡ݂ܲܪ ܠܹܗ: ܢܸܓܼܥܘܿܪ ܒܵܟܼ ܡܫܝܼܚܵܐ ܕܐܵܘܕܝܼ̇ܬܼ ܒܹܗ: ܟܲܠܒܵܐ ܟܲܡܐܵܐ. ܘܟܲܕܼ ܗܵܕܹܐ ܐܸܡ݂ܲܪ ܠܹܗ: ܐܸܬܼܚܲܡܲܬܼ ܛܵܒܼ ܗ̤ܘ ܕܲܝܢܵܐ. ܘܡܸܚܕܼܵܐ ܦ̣ܩܲܕܼ ܗ̄ܘ̣ܵܐ ܗ̤ܘ ܕܲܝܵܢܵܐ: ܘܐܲܪܡ̣ܝܼܘ ܐܲܤܘܼܪܹ̈ܐ ܘܦܲܪ̈ܙܠܹܐ ܥܲܠ ܐܲܪܘܼܪ̈ܵܘܗܝ ܩܲܕܼܡܵܝܹ̈ܐ. ܘܲܦ̣ܩܲܕܼ ܘܐܲܝܬܿܝܿܘ ܡܵܐܢܲܝ̈ ܫܸܢ̈ܕܹܐ ܘܐܲܡ̣ܝܼܘ ܩܕܼܵܡܵܘܗܝ: ܟܲܠܒ̈ܵܬܼܵܐ ܘܲܟܼܘܵܝܹ̈ܐ ܘܡܲܤܪܩܵܐ ܕܦܲܪܙܠܵܐ ܘܫܲܪܟܵܐ ܕܡܵܐܢܲܝ̈ ܫܸܢ̈ܕܹܐ ܐ̄ܚܪ̈ܵܢܹܐ. ܘܫܸܫܠܬܼܵܐ ܕܦܲܪܙܠܑܵ ܐܲܪܡ̣ܝܼܘ ܒܲܩܕܼܵܠܹܗ. ܘܤܲܪ̈ܵܩܹܐ ܘܢܸܓܼ̈ܕܹܐ ܤܲܓܿܝܼ̈ܐܹܐ ܐܲܪܡ̣ܝܼܘ ܥܠܵܘܗܝ.

ܘܒܹܗ ܒܗܵܘ̇ ܠܸܠܝܵܐ: ܐܸܬܼܚ̣ܙܝܼܘ ܠܹܗ ܩܲܕܝܼܫܵܐ ܡܵܪܝ pb. 490 ܥܲܒܼܕܝܼܫܘܿܥ ܪܲܒܹܗ: ܘܒܹܪܝ ܐܲܒܼܝܼܠܵܐ: ܘܛܘܼܒܼܵܢܵܐ ܡܵܪܝ ܤܲܪܓܿܝܼܣ ܤܵܗܕܐ: ܘܐܸܡ݂ܲܪܘ ܠܹܗ: ܐܸܬܼܚܲܝܲܠ: ܘܠܵܐ ܬܸܕܼܚܲܠ: ܡܵܪܝ ܩܲܪܕܵܓܼ. ܗܵܝܕܹܿܝܢ ܐܸܬܼܪܵܘܲܚ̣ ܡ̣ܢ ܐܲܤܘܼܪܹ̈ܐ ܗܵܢ̇ܘܿܢ: ܘܩܵܡ̣ ܘܖܲܠ̣ܝܼ ܥܲܡܗܘܿܢ ܕܩܲܕܝܼ̈ܫܹܐ. ܘܠܲܒܿܒܼܘܼܗܝ ܘܚܲܬܼܡ̣ܘܼܗܝ ܒܐܵܬ̤ܵܐ ܕܲܨܠܝܼܒܼܵܐ ܘܫܲܢ̣ܝܼܘ. ܗ̤ܘ ܕܹܝܢ: ܥܕܲܡܵܐ ܕܲܗܘ̤ܵܐ ܨܲܦܪܵܐ: ܠܵܐ ܫܠ̣ܵܐ ܡ̣ܢ ܨܠܘܿܬܹܗ ܘܒܼܵܥܘܼܬܹܗ ܕܲܠܘܵܬܼ ܐܲܠܵܗܵܐ: ܘܲܡܛܲܝܲܒܼ ܗ̄ܘ̣ܵܐ ܕܒܼܵܗ̇ ܒܗܵܝ̇ ܕܘܼܟܿܬܼܵܐ ܢܩܲܒܸܿܠ ܟܠܝܼܠܵܐ ܦܲܐܝܵܐ ܕܤܵܗܕܘܼܬܼܵܐ. ܘܨܲܠܝܼ ܩܕܼܵܡ ܐܲܠܵܗܵܐ ܘܐܸܡ݂ܲܪ ܗܵܟܲܢܵܐ: ܡܵܪܝܵܐ ܐܲܠܵܗܵܐ ܚܲܝܠܬܼܵܢܵܐ: ܡܲܠܟܵܐ ܕܡܲܠܟܹ̈ܐ ܘܡܵܪܵܐ ܕܡܵܪ̈ܵܘܵܬܼܵܐ: ܐܲܫܘܵܢܝ ܕܐܸܬܼܡܢܸܐ ܒܤܵܓܼ̇ܘܿܕܲܝ̈ܟ ܘܐܸܬܼܚܲܠܲܛ ܒܟܸܢ̈ܫܹܐ ܕܲܡܫܲܒܿܚܵܢܲܝ̈ܟ. ܘܟܼܠ ܐ̄ܢܵܫ ܕܐܵܬܹ̇ܐ ܘܡܸܬܼܓܵܘܲܣ ܒܕܼܘܼܟܿܬܼܵܐ ܗܵܕܹܐ: ܘܫܵܐܹ̇ܠ ܨܠܘܿܬܼܵܐ ܘܡܸܬܿܕܟܲܪ ܫܹܡܝ ܗܵܪܟܵܐ: ܢܸܬܼܦܲܢܸܐ ܠܹܗ ܡ̣ܢ ܓܲܙܵܐ ܕܲܡܪܲܚܡܵܢܘܼܬܼܵܟܼ: ܟܠ ܫܸܐܠܬܼܵܐ ܕܫܵܐܹ̇ܠ: ܐܸܢ ܥܲܠ ܟܘܼܪܗܵܢܵܐ ܕܲܒܼܢܲܝ̈ܢܵܫܵܐ ܘܐܸܢ ܕܲܒܼܥܝܼܪܵܐ: ܢܸܫܟܲܚ ܚܘܼܠܡܵܢܵܐ ܘܐܵܤܝܘܼܬܼܵܐ ܡ̣ܢ ܥܘܿܬܼܪܵܐ ܫܦܝܼܥܵܐ ܕܛܲܝܒܿܘܼܬܼܵܟܼ.

ܟܲܕܼ ܕܹܝܢ ܗܘ̤ܵܐ ܨܲܦܪܵܐ: ܐܸܬܼܟܲܢܲܫ̣ܘ ܚܲܢ̈ܦܹܐ ܟܠܗܘܿܢ ܘܓܼܵܙ̇ܡܝܼܢ ܗ̄ܘ̣ܵܘ ܥܠܵܘܗܝ ܘܐܵܡ̇ܪܝܼܢ: ܕܐܸܢܗ̤ܘ ܕܠܵܐ ܤܵܓܹ̇ܕܼ ܠܫܸܡܫܵܐ: ܒܡܵܘܬܵܐ ܡܲܪܝܼܪܵܐ ܢܡܝܼܬܼܘܼܢܵܝܗܝ. ܗ̤ܘ ܕܹܝܢ ܐܸܡ݂ܲܪ ܠܗܘܿܢ: ܙܸܠܘ ܠܟܼܘܿܢ ܡܹܢܝ ܒܢܲܝ̈ ܓܹܗܲܢܵܐ. ܐܸܢܵܐ ܠܡܲܠܟܵܐ ܡܫܝܼܚܵܐ ܤܵܓܹ̇ܕܼܢܵܐ: pb. 491 ܕܗ̤ܘܝܘܼ ܐܲܠܵܗ ܐܲܠܵܗ̈ܝܼܢ ܘܡܵܪܹܐ ܡܵܪ̈ܵܘܵܢ. ܕܲܝܵܢܵܐ ܕܹܝܢ ܗܵܘ̇ ܟܲܕܼ ܫܡܲܥ̣: ܨܵܒܹ̇ܐ ܗ̄ܘ̣ܵܐ ܕܬܲܡܵܢ ܢܸܩܛܠܝܼܘܗܝ. ܡܸܛܠ ܕܹܝܢ ܦܘܼܩܕܵܢܵܐ ܕܡܲܠܟܵܐ ܕܲܦ̣ܩܲܕܼ ܗ̄ܘ̣ܵܐ: ܕܐܸܢ ܒܡܸܬܼܚܵܐ ܕܫܲܒܼܥܵܐ ܝܲܪ̈ܚܝܼܢ ܠܵܐ ܡܸܬܿܬܿܘܸܐ ܘܗܵܦܹ̇ܟܼ ܠܲܡܓܼܘܼܫܘܼܬܼܵܐ: ܘܲܡܚܲܤܸܐ ܢܲܦܫܹܗ ܒܲܡܓܼܘܼ̈ܫܹܐ: ܘܒܼܵܢܹ̈ܐ ܒܹܝܬܼ ܢܘܼܪ̈ܘܵܬܼܵܐ ܕܲܥ̣ܩܲܪ: ܘܠܵܒܹܵܟ̇ ܒܘܼܪܤܵܡܹܐ ܘܡܲܓܸܿܫ: ܩܕܼܵܡ ܬܲܪܥܵܐ ܕܒܲܝܬܹܗ ܢܸܬܼܪܓܸܡ ܒܟܹ̈ܦܹܐ: ܠܵܐ ܬܸܬܼܡ̣ܨܝܼܘ ܠܡܸܥܒܲܪ ܥܲܠ ܦܘܼܩܕܵܢܵܐ ܕܡܲܠܟܵܐ ܘܲܠܡܸܩܛܠܹܗ ܬܲܡܵܢ. ܘܐܵܦ ܡܵܘ̈ܗܦܵܛܹܐ ܬܘܼܒܼ ܠܵܐ ܡܢܵܚܝܼܢ ܗ̄ܘ̣ܵܘ ܒܗܵܕܹܐ. ܐܸܠܵܐ ܒܲܪ ܫܵܥܬܹܗ ܐܲܝ̣ܬܿܝܘܼܗܝ ܠܒܲܝܬܹܗ: ܕܐܲܝܟܼ ܦܘܼܩܕܵܢܵܐ ܕܡܲܠܟܵܐ ܢܡܘܼܬܼ ܬܲܡܵܢ. ܟܲܕܼ ܕܹܝܢ ܡܲܛ̣ܝܼ ܛܘܼܒܼܵܢܵܐ ܠܘܲܥܕܵܐ ܕܚܸܤܢܹܗ ܥܲܠ ܓܸܢ̄ܒܼ ܡܲܠܩܝܼ ܩܪܝܼܬܼܵܐ: ܘܐܲܪܝܼܡ̣ ܥܲܝܢܵܘ̈ܗܝ ܘܲܚ̣ܙܵܐ ܚܸܤܢܹܗ ܘܒܲܝܬܹܗ: ܬܠ̣ܵܐ ܚܝܵܪܹܗ ܠܲܫܡܲܝܵܐ: ܘܲܡ̣ܬܲܚ ܡܲܕܬܹܗ ܠܲܡܪܵܘܡܵܐ ܠܘܵܬܼ ܐܲܠܵܗܵܐ ܘܨܲܠ̣ܝܼ ܘܐܸܡ݂ܲܪ: ܡܫܝܿܚܵܐ ܤܲܒܼܪܝܼ: ܕܝܲܗ̣̄ܒܼܬܿ ܩܵܘܡܬܼܵܟܼ ܠܲܙܩܝܼܦܵܐ: ܘܐܝܼܕܲܝ̈ܟ ܘܪܸ̈ܓܼܠܲܝܟ ܠܩܘܼܒܵܥ ܨܸܨܹ̈ܐ ܡܸܛܠ ܦܘܼܪܩܵܢܹܗ ܕܓܸܢܤܲܢ: ܘܲܫܪܲܝ̣ܬܿ ܠܐܵܕܼܵܡ ܘܲܠܝܲܠܕܵܘ̈ܗܝ ܡ̣ܢ ܐܲܤܘܼܪ̈ܵܘܗܝ ܕܡܵܘܬܵܐ: ܫܪܝܿܢܝ ܐܵܦ ܠܝܼ ܡ̣ܢ ܐܲܤܘܼܪܹ̈ܐ ܗܵܠܹܝܢ: ܘܲܦܪܘܿܩܲܝܢܝ ܡ̣ܢ ܥܲܡ̈ܡܹܐ ܛܵܥܲܝ̈ܵܐ. ܕܢܸܚܙܘܿܢ ܤܵܢ̈ܐܲܝ ܘܢܸܒܼܗܬܼܘܼܢ: ܕܐܲܢ̄ܬܿ ܡܵܪܝܵܐ ܥܲܕܲܪܬܵܢܝ ܘܒܲܝܲܐܬܵܢܝ. ܘܒܼܵܗ̇ ܒܫܵܥܬܼܵܐ ܢܦܲܠ̣ܘ ܐܲܤܘܼܪܹ̈ܐ ܡ̣ܢ ܐܝܼܕܼܵܘ̈ܗܝ pb. 492 ܘܡ̣ܢ ܪܸ̈ܓܼܠܵܘܗܝ: ܘܐܸܬܼܦ̣ܢܝܼ ܘܲܤ̣ܓܸܕܼ ܠܡܲܕܼܢܚܵܐ. ܘܲܦ̣ܫܲܛ ܐܝܼܕܼܵܘ̈ܗܝ ܠܲܫܡܲܝܵܐ: ܘܡܵܘܕܸܐ ܗ̄ܘ̣ܵܐ ܠܐܲܠܵܗܵܐܘ. ܟܲܕܼ ܚ̣ܙܵܘ ܕܹܝܢ ܚܹܐܪܹ̈ܐ ܘܚܲܢ̈ܦܹܐ ܘܦܲܝ̈ܓܹܐ ܡܸܕܸܿܡ ܕܲܗܘ̤ܵܐ: ܡܸܢܗܘܿܢ ܥܪܲܩ̣ܘ ܡܤܲܪܗܒܼܵܐܝܼܬܼ ܘܐܸܬܼܒܲܕܲܪܘ ܒܕܼܘܼ̈ܟܿܝܵܢ ܕܘܼ̈ܟܿܝܵܢ: ܘܡܸܢܗܘܿܢ ܪܗܸܛ̣ܘ ܘܐܸܤ̣ܬܲܬܲܪܘ ܡܸܨܥܲܬܼ ܩܢܲܝ̈ܵܐ ܘܙܲܠܵܐ ܕܝܲܡܬܼܵܐ ܕܥܲܠ ܓܸܢ̄ܒܼ ܚܸܤܢܹܗ ܕܛܘܼܒܼܵܢܵܐ. ܗ̤ܘ ܕܹܝܢ ܤ̣ܠܸܩ ܠܚܸܤܢܹܥܗ ܘܥܲܠ̣ ܠܒܲܝܬܹܗ: ܟܲܕܼ ܚܵܕܹܐ ܘܲܡܫܲܒܲܚ ܠܐܲܠܵܗܵܐ. ܘܠܲܒܸܿܒܼ ܠܐܲܢ̄ܬܿܬܹܗ ܘܲܠܚܵܬܹܗ ܘܲܠܟܼܠܗܘܿܢ ܐ̄ܢܵܫܲܝ̈ ܒܲܝܬܹܗ: ܘܲܦ̣ܩܲܕܼ ܢܵܛ̇ܘܿܪܹ̈ܐ ܘܐܲܩ̣ܝܼܡ ܕܵܘ̈ܩܹܐ ܥܲܠ ܫܘܼܪܵܐ ܕܚܸܤܢܹܗ.

ܘܟܲܕܼ ܗܵܕܹܐ ܐܸܬܼܝܲܕܼܥܲܬ̤ ܠܡܲܠܟܵܐ: ܐܸܬܿܕܲܠܲܚ̣ ܛܵܒܼ: ܘܫܸܢܵܘ̈ܗܝ ܒܪܘܼܓܼܙܹܗ ܡܚܲܪܸܒܼ ܗ̄ܘ̣ܵܐ: ܘܢܵܗܹ̇ܡ ܗ̄ܘ̣ܵܐ ܐܲܝܟܼ ܐܲܪܝܵܐ ܡܚܲܝܒܿܠܵܢܵܐ. ܘܡܸܚܕܼܵܐ ܟܬܲܒܼ ܤܲܩܪܵܐ ܠܒܼܘܼܪܙܡܲܝܗܪ ܫܵܒܼܘܿܪ: ܪܲܒܿ ܚܲܝܠܵܐ ܕܡܲܥܪܒܵܪܐ: ܕܲܢܫܲܕܲܪ ܤܝܼ̈ܥܵܬܼܵܐ ܕܦܲܪ̈ܫܹܐ ܘܢܸܟܼܒܿܫܝܼܘܗܝ ܠܚܸܤܢܹܗ ܕܛܘܼܒܼܵܢܵܐ ܘܢܸܠܒܿܟܼܝܼܘܗܝ: ܘܲܩܕܼܵܡ ܐܲܪܥܵܐ ܕܚܸܤܢܹܗ ܢܸܪܓܿܡܘܼܢܵܝܗܝ. ܘܐܸܢ ܒܦܲܪ̈ܵܫܹܐ ܕܲܡܫܲܕܲܪ ܠܵܐ ܡܸܬܼܠܒܸܟܼ ܛܘܼܒܼܵܢܵܐ ܘܡܸܬܼܟܿܒܸܫ ܚܸܤܢܹܗ: ܗ̤ܘ ܪܲܒܿܚܲܝܠܵܐ ܢܹܐܬܸܐ ܥܲܡ ܟ̱ܠܹܗ ܚܲܝܠܹܗ: ܘܢܸܬܼܟܲܬܲܫ ܥܲܡ ܚܸܤܢܵܐ ܘܢܸܟܼܒܿܫܝܼܘܗܝ. ܪܲܒܿܚܲܝܠܵܐܬ ܕܹܝܢ ܡܸܚܕܼܵܐ ܫܲܕܲܪ ܓܘܼ̈ܕܹܐ ܕܦܵܠܚܹ̈ܐ ܥܸܤܪܝܼܢ: ܘܝܼܬܸܒܼܘ ܥܲܠ ܚܸܤܢܹܗ ܕܛܘܼܒܼܵܢܵܐ ܝܼܪܲܚ ܝܵܘܡܝܼ̈ܢ: ܘܡܸܕܸܿܡ ܠܵܐ ܐܵܘ̣ܬܲܪܘ. ܘܤܲܓܿܝܼ̈ܐܹܐ ܡܸܢܗܘܿܢ ܡܝܼܬܼܘ pb. 493 ܒܬܲܟܼܬܿܘܼ̈ܫܹܐ ܐܲܝܟܼ ܒܲܪܩܵܐ ܓܹܝܪ ܥܲܙܝܼܙܵܐ ܡܲܒܼܪܸܩ ܗ̄ܘ̣ܵܐ ܥܠܲܝܗܘܿܢ ܡ̣ܢ ܫܘܼܪܵܐ ܕܚܸܤܢܹܗ: ܘܲܒܼܓܹܐܪ̈ܵܘܗܝ ܫܢܝܼ̈ܢܹܐ ܠܤܲܓܿܝܼ̈ܐܹܐ ܡܲܪܡܸܐ ܗ̄ܘ̣ܵܐ. ܐܸܬ݂ܼܵܐ ܕܹܝܢ ܗ̤ܘ ܪܲܒܿ ܚܲܝܠܵܐ ܥܲܡ ܟ̱ܠܹܗ ܚܲܝܠܹܗ: ܘܡܸܕܸܿܡ ܠܵܐ ܐܵܘ̣ܬܲܪܘ. ܗܵܝܕܹܿܝܢ ܟܬܲܒܼܘ ܘܐܵܘܕܲܥ̣ܘ ܠܡܲܠܟܵܐ: ܕܐܸܢ ܒܦܘܼܪ̈ܤܹܐ ܘܲܒܼܨܢ̈ܥܵܬܼܵܐ ܘܲܒܼܫܘܼ̈ܕܵܠܹܐ ܠܵܐ ܡܸܬܼܠܐܒܸܟܼ: ܒܚܲܝܠܵܐ ܘܲܒܼܬܲܟܼܬܿܘܼܫܵܐ ܠܵܐ ܡܸܬܿܬܿܚܸܕܼ. ܘܲܦ̣ܩܲܕܼ ܡܲܠܟܵܐ: ܘܫܲܢ̣ܝܼܘ ܚܲܝܵܠ̈ܘܵܬܼܵܐ: ܘܦ̣ܵܫ ܓܘܼ̈ܕܹܐ ܥܤܲܪ: ܟܲܕܼ ܝܵܬܼ̇ܒܵܢ ܠܗܲܠ ܡ̣ܢ ܚܸܤܢܹܗ ܕܛܘܼܒܼܵܢܵܐ ܬܲܒܼܪܹܝܢ ܘܒܲܬܼܠܵܬܼܵܐ ܡܝܼ̈ܠܝܼܢ. ܗܵܝܕܹܿܝܢ ܐܸܬܼܟܲܢܲܫ̣ܘ ܚܹܐܪܹ̈ܐ ܒܢܲܝ̈ ܓܸܢܤܹܗ ܒܦܘܼܩܕܵܢܵܐ ܕܡܲܠܟܵܐ: ܕܲܢܦܝܼܤܘܼܢܵܝܗܝ ܕܢܸܬܸܿܠ ܐܝܼܕܼܵܐ: ܘܠܵܐ ܢܹܐܒܼܕܿܘܼܢ ܐܲܒܵܗܵܘ̈ܗܝ ܘܐܲܚܵܘ̈ܗܝ ܡܸܛܠܵܬܹܗ. ܘܟܲܕܼ ܟܢܲܫ̣ܘ ܘܐܸܬ݂ܼܵܘ: ܤ̣ܠܸܩ ܛܘܼܒܼܵܢܵܐ ܠܫܘܼܪܵܐ ܕܚܸܤܢܹܗ ܕܐܸܡ݂ܲܪ ܠܗܘܿܢ: ܠܡܵܢܵܐ ܫܚܝܼܩܝܼܢ ܐ̄ܢ̄ܬܿܘܿܢ ܐܘܿ ܓܲܒܼܪܹ̈ܐ؟ ܘܲܠܡܵܢܵܐ ܟܢܝܼܫܝܼܢ ܐ̄ܢ̄ܬܿܘܿܢ؟ ܗܸܢܘ̣ܿܢ ܕܹܝܢ ܤ̣ܓܸܕܼܘ ܠܹܗ ܡ̣ܢ ܪܘܼܚܩܵܐ: ܘܲܒܼܟܼܵ. ܟܠܗܘܿܢ ܒܚܲܕܼ ܩܵܠܵܐ ܘܐܸܡ݂ܲܪܘ ܠܹܗ: ܚܘܼܣ ܡܵܪܝ ݁ܥܲܠ ܢܲܦܫܵܟܼ ܘܐܵܦ ܥܠܲܝܢ. ܘܠܵܐ ܬܩܘܼܡ ܠܘܼܩܒܲܠ ܡܲܠܟܵܐ: ܘܠܵܐ ܬܲܪܦܸܐ ܫܡܵܐ ܒܝܼܫܵܐ ܠܫܲܪܒܿܬܲܢ ܡܫܲܡܲܗܬܵܐ. ܐܸܠܵܐ ܦܩܘܿܕܼ ܕܢܸܬܼܦܬܲܚ ܬܲܪܥܵܐ ܕܚܸܤܢܵܐ: ܘܦܘܿܩ ܠܘܵܬܲܢ. ܘܐܸܫܬܲܡܥ ܠܦܘܼܩܕܵܢܵܐ ܕܡܲܠܟܵܐ: ܘܲܤܓܼܘܿܕܼ ܚܕܼܵܐ ܙܒܲܢ ܒܲܠܚܘܿܕܼ ܠܢܘܼܪܵܐ pb. 494 ܘܲܠܫܸܡܵܐ: ܘܫܵܘܙܸܒܼ ܚܲܝܲ̈ܨ: ܘܲܦܪܘܿܩ ܐܵܦ ܠܲܢ: ܘܒܼܵܬܲܟܸܢ ܐܲܝܟܼ ܕܨܵܒܹ̇ܐ ܐܲܢ̄ܬܿ ܗ̤ܘܝܼ. ܗ̤ܘ ܕܹܝܢ ܛܘܼܒܼܵܢܵܐ ܦܬܲܚ̣ ܦܘܼܡܹܗ ܘܐܸܡ݂ܲܪ ܠܗܘܿܢ: ܠܘܲܝ ܕܹܝܢ ܐܵܦ ܐܲܢ̄ܬܿܘܿܢ ܚܝ̇ܤܝܼܢ ܗ̣̄ܘܲܝܬܿܘܿܢ ܥܲܠ ܢܲܦܫܟܼܘܿܢ: ܐܲܝܟܼ ܡܵܐ ܕܐܵܦ ܐܸܢܵܐ ܚܐܹ̇ܣ ܐ̄ܢܵܐ ܥܠܲܝܟܿܘܿܢ. ܐܸܢܵܐ ܕܹܝܢ ܡܸܛܠ ܕܒܲܫܪܵܪܵܐ ܚܵܤܹ̇ܬܼ ܥܲܠ ܢܲܦܫܝ: ܗܵܐ ܐܲܥܕܝܼܬܵܗ̇ ܡ̣ܢ ܚܸܟܵܗ̇ ܕܛܵܥܝܼܘܼܬܼܵܐ ܗܵܝ̇ ܕܒܼܵܗ̇ ܐܚܝܼܕܝܼܢ ܐ̄ܢ̄ܬܿܘܿܢ: ܘܠܲܡܫܝܼܚܵܐ ܢܘܼܗܪܹܗ ܕܥܵܠܡܵܐ ܩܲܪܸܒܼܬܵܗ̇. ܘܲܡܛܲܝܲܒܼ ܐ̄ܢܵܐ ܕܚܲܠܵܦ ܫܡܹܗ ܩܲܕܿܝܼܫܵܐ: ܪܸܒܿܘܿ ܡܵܘ̈ܬܝܼܢ ܐܹܤܲܝܒܲܪ. ܘܐܸܢ ܠܝܼ ܡܸܬܿܛܦܝܼܤܝܼܬܿܘܿܢ: ܐܵܦ ܐܲܢ̄ܬܿܘܿܢ ܥܲܡܝܼ ܡܸܫܬܿܘܹܝܢ ܐܢ̄ܬܿܘܿܢ. ܘܲܚܕܼܵܐ ܓܘܼܕܵܐ ܕܤܵܗ̈ܕܹܐ ܠܲܡܫܝܼܚܵܐ ܐܲܠܵܗܵܐ ܡܩܲܪܒܼܝܼܢܲܢ: ܘܠܲܫܡܲܝܵܐ ܡܸܬܥܲܠܹܝܢܲܢ: ܘܥܲܡܹܗ ܡܸܬܼܒܲܤܡܝܼܢܲܢ ܒܗܵܢ̇ܘܿܢ ܚܲܝܹ̈ܐ ܕܠܵܐ ܡܸܫܬܿܪܹܝܢ. ܘܕܸܐܡܲܪܬܿܘܿܢ: ܕܠܵܐ ܬܩܘܼܢܡ ܠܘܼܩܒܲܠ ܡܲܠܟܵܐ: ܐܲܝܟܼ ܤܵܒܼ̈ܬܼܵܐ ܒܲܫܪܵܪܵܐ ܡܲܠܸܠܬܿܘܿܢ. ܐܲܝܕܵܐ ܓܹܝܪ ܥܲܤܩܵܐ: ܕܐܹܩܘܼܡ ܠܘܼܩܒܲܠ ܒܲܪܢܵܫܵܐ ܕܵܘܝܵܐ ܕܝܵܘܡܵܢ ܡܗܲܒܸܒܼ ܘܲܢܦܝܼܚ ܘܲܡܚܵܪ ܠܲܝܬܵܘܗܝ: ܐܵܘ ܕܐܹܩܘܼܡ ܠܘܼܩܒܲܠ ܡܠܸܟܼ ܡܲܠܟܹ̈ܐ ܫܡܲܝܵܢܵܐ: ܗܵܘ̇ ܕܠܵܐ ܥܵܒܼ̇ܪܵܐ ܡܲܠܟܿܘܼܬܹܗ: ܘܠܵܐ ܡܸܫܬܲܚܠܦܵܐ ܐܲܠܵܗܘܼܬܹܗ؟ ܟܡܵܐ ܓܹܝܪ ܕܲܒܼܛܵܥܝܘܼܬܼܵܐ ܐܲܚܝܼܕ ܗ̄ܘܹ̇ܝܬܼ ܐܲܟܼܘܵܬܼܟܼܘܿܢ: ܘܠܲܡܫܝܼܚܵܐ ܡܵܪܝ ܤܲܒܼܪܵܐ ܫܲܪܝܼܪܵܐ ܕܚܲܝܲܝ̈ ܠܵܐ ܝܵܕܲܥ̇ ܗ̄ܘܹܝ̇ܬܼ: ܠܡܲܠܟܵܐ ܚܲܢܦܵܐ ܘܪܲܫܝܼܥܵܐ ܐܸܫܬܲܥܒܿܕܹ̇ܬܼ: ܘܓܲܢ̄ܒܵܪܵܐܝܼܬܼ ܐܸܬܼܟܲܬܿܫܹ̇ܬܼ ܒܲܩܪ̈ܵܒܼܵܘܗܝ. ܗܵܫܵܐ ܕܹܝܢ pb. 495 ܕܝܸܕܼܥܹ̇ܬܼ ܠܲܡܫܝܼܚܵܐ ܕܗ̤ܘܝܘܼ ܡܲܠܟܵܐ ܫܡܲܝܵܢܵܐ ܘܤܲܒܼܪܵܐ ܫܲܪܝܼܪܵܐ: ܠܡܲܠܟܹ̈ܐ ܛܵܥܲܝ̈ܐ ܘܡܵܝ̈ܘܿܬܹܐ ܠܵܐ ܡܸܫܬܲܥܒܲܕܼ ܐ̄ܢܵܐ: ܘܡ̣ܢ ܓܙܵܡܲܝ̈ܗܘܿܢ ܠܵܐ ܕܵܚܹ̇ܠ ܐ̄ܢܵܐ. ܗܸܢܘ̣ܿܢ ܟܲܕܼ ܫܡܲܥ̣ܘ ܕܨܲܥܲܪ ܠܡܲܠܟܵܐ: ܘܲܩ̣ܪܵܝܗܝ ܪܲܫܝܼܥܵܐ ܘܛܵܥܝܵܐ: ܩܥ̣ܵܘ ܟܠܗܘܿܢ ܘܤܲܟܲܪܘ ܐܸܕܼܢܲܝ̈ܗܘܿܢ ܘܐܸܡ݂ܲܪܘ ܠܲܚ̈ܕܼܵܕܹܐ: ܢܲܪܚܸܩ ܢܲܪܚܸܩ: ܘܠܵܐ ܢܸܫܡܲܥ ܓܘܼܕܵܦܵܐ ܕܥܲܠ ܤܓܼܝܼܕܼܵܐ ܡܠܸܟܼ ܡܲܠܟܹ̈ܐ. ܛܘܼܒܼܵܢܵܐ ܕܹܝܢ ܓܚܸܟܼ ܘܐܸܡ݂ܲܪ ܠܗܘܿܢ: ܒܲܫܪܵܪܵܐ ܕܕܼܵܘܲܝ̈ܵܐ ܐܲܢ̄ܬܿܘܿܢ: ܕܥܲܠ ܐܲܠܵܗܵܐ ܒܵܪܘܿܝܵܐ ܘܲܡܦܲܪܢܤܵܢܵܐ ܕܥܵܠܡܹ̈ܐ ܡܓܲܕܦܝܼܢ ܐ̄ܢ̄ܬܿܘܿܢ: ܘܤܸܓܼܕܬܼܵܐ ܕܠܹܗ ܡܸܬܿܬܿܚܝܼܒܼܵܐ ܠܒܸܪ̈ܒܝܵܬܹܗ ܚܲܪ̈ܫܸܵܬܼܵܐ ܡܩܲܪܒܼܝܼܬܘܿܢ: ܘܲܠܒܲܪܢܵܫܵܐ ܡܵܝܘܿܬܼܵܐ ܕܪܲܚܝܼܩ (ܘܪܲܚܝܼܩ) ܡ̣ܢ ܐܲܠܵܗܵܐ ܡܸܫܬܲܦܪܝܼܬܿܘܿܢ.

ܘܟܲܕܼ ܗ̤ܘ ܡܡܲܠܸܠ ܗ̄ܘ̣ܵܐ ܥܲܡܗܘܿܢ: ܗܵܐ ܓܘܼܫܢܲܙܕܵܕ ܘܕܝܢܓܘܼܫܢܲܤܦ ܡܵܘ̈ܗܦܵܛܹܐ ܘܲܐ̄ܚܪ̈ܵܢܹܐ ܡܓܼܘܼ̈ܫܹܐ ܐܸܬ݂ܼܵܘ. ܘܲܩ̣ܪܸܒܼܘ ܨ݂ܝܕܼ ܚܸܤܢܹܗ ܕܛܘܼܒܼܵܢܵܐ ܘܐܸܡ݂ܲܪܘ ܠܹܗ: ܠܵܐ ܤܵܓܼ̇ܕܝܼܢܲܢ ܠܵܟܼ: ܡܸܛܠ ܕܠܲܐܠܵܗܹ̈ܐ ܨܲܥܲܪܬܿ: ܘܠܘܼܩܒܲܠ ܡܠܸܟܼ ܡܲܠܟܹ̈ܐ ܩܡ̣ܬܿ: ܘܢܵܨܪܵܝܵܐ ܗ̤ܘܲܝܬܿ. ܒܪܲܡ ܫܡܲܥ ܡܸܓܸܿܡ ܕܡ̣ܢ ܡܠܸܵܟܼ ܡܲܠܟܹ̈ܐ ܐܸܬܼܦܩܸܕܼ ܠܲܢ ܒܐܸܓܿܪ̈ܵܬܼܵܐ ܡܸܛܠܵܬܼܵܟܼ. ܡܠܸܟܼ ܡܲܠܟܹ̈ܐ ܡܪܲܚܡܵܢܵܐ ܦ̣ܩܲܕܼ: ܕܲܤܓܼܘܿܕܼ ܠܢܘܼܪܵܐ ܘܲܠܫܸܡܫܵܐ ܘܲܠܤܲܗܪܵܐ. ܘܒܹܝܬܼ ܢܘܼܪ̈ܘܵܬܼܵܐ ܕܲܥ̣ܩܲܪܬܿ ܡܸܢܕܪܹܫ ܒܢܝܼ: ܘܥܹ̈ܕܵܬܼܵܐ ܘܕܲܝܪ̈ܵܬܼܵܐ ܕܲܒܼܢܲܝ̣ܬܿ ܥܩܘܿܪ: ܘܲܒܼܟܸܢܫܵܐ ܕܲܡܓܼܘܼ̈ܫܹܐ ܢܲܦܫܵܟܼ ܕܲܟܵܐ: pb. 496 ܘܒܼܘܼܪ̈ܤܵܡܹܐ ܠܒܼܘܿܟܼ: ܘܲܚܝܼ ܘܠܵܐ ܬܡܘܼܬܼ: ܘܥܲܠ ܫܘܼܠܛܵܢܵܟܼ ܩܘܼܡ. ܛܘܼܒܼܵܢܵܐ ܕܹܝܢ ܩܲܪܕܵܓܼ ܐܸܬܿܬܿܦܝܼܪ ܘܐܸܡ݂ܲܪ ܠܗܘܿܢ: ܤܟܼܘܿܪܘ ܦܘܼܡܟܼܘܿܢ: ܛܲܡ̈ܐܹܐ ܘܲܢܕܝܼ̈ܕܹܐ ܡܫܲܡܫܵܢܵܘ̈ܗܝ ܕܤܵܛܵܢܵܐ. ܠܝܼ ܚܵܣ ܠܝܼ ܕܐܸܫܒܿܘܿܩ ܠܐܲܠܵܗܵܐ ܫܲܪܝܼܪܵܐ ܕܲܥ̣ܒܲܕܼ ܫܡܲܝܵܐ ܘܐܲܪܥܵܐ: ܘܐܸܤܓܿܘܿܕܼ ܠܒܸܪ̈ܝܵܬܼܵܐ ܚܲܪ̈ܫܵܬܼܵܐ. ܘܦܘܼܩ̈ܕܵܢܹܐ ܛܲܡ̈ܐܹܐ ܕܡܲܠܟܿܟܼܘܿܢ ܚܲܢܦܵܐ: ܚܫܝܼܒܼܝܼܢ ܠܝܼ ܒܓܼܘܼ̈ܕܵܦܹܐ ܕܡܲܡܪܚܝܼܢ ܕܲܝ̈ܘܹܐ ܥܲܠ ܐܲܠܵܗܵܐ. ܘܟܲܕܼ ܗܵܠܹܝܢ ܫܡܲܥ̣ܘ ܡܓܼܘܼ̈ܫܹܐ: ܠܒܸܤܬܲܪܗܘܿܢ ܐܵܙ̇ܠܝܼܢ ܗ̄ܘ̣ܵܘ ܟܲܕܼ ܡܲܝܠܠܝܼܢ ܘܩܵܥܹ̇ܝܢ: ܕܡܲܢ̣ܘܼ ܡܸܫܟܲܚ ܠܡܸܫܡܲܥ ܓܘܼܕܵܦܵܐ ܕܥܲܠ ܡܠܵܟܼ ܡܲܠܟܹ̈ܐ؟ ܚܲܕܼ ܕܹܝܢ ܡܸܢܗܘܿܢ ܕܲܫܡܹܗ ܤܿܝܒܲܪܙܵܕܼ ܐܸܬܼܓܿܗܸܢ ܫܩܲܠ̣ ܥܲܦܪܵܐ ܡ̣ܢ ܐܲܪܥܵܐ: ܘܲܕܼܪܵܐ ܠܩܘܼܒܼܠܹܗ ܕܛܘܼܒܼܵܢܵܐ ܘܐܸܡ݂ܲܪ: ܗܵܐ ܠܗܵܘ̇ ܦܘܼܡܵܐ ܕܲܓܼܕܲܦ̣ ܥܲܠ ܐܲܠܵܗܹ̈ܐ ܘܥܲܠ ܡܠܸܟܼ ܡܲܠܟܹ̈ܐ. ܛܘܼܒܼܵܢܵܐ ܕܹܝܢ ܪܡܲܙ ܠܚܲܕܼ ܡ̣ܢ ܥܲܒܼܕܵܘ̈ܗܝ: ܕܢܸܬܸܿܠ ܠܹܗ ܩܸܫܬܼܵܐ ܘܓܹܐܪܵܐ ܚܲܕܼ. ܘܲܠܒܲܟܼ ܩܸܫܬܹܗ ܟܲܤܝܵܐܝܼܬܸܼ ܒܛܸܠܵܠܵܐ ܕܲܚܕܼܵܐ ܡ̣ܢ ܥܵܥ̈ܝܵܬܼܵܐ ܕܫܘܼܪܵܐ: ܘܤܵܡ̣ ܒܵܗ̇ ܓܹܐܪܵܐ. ܘܲܡ̣ܬܲܚ ܘܲܡܚܵܝܗܝ ܠܲܡܓܼܘܼܫܵܐ ܗܵܘ̇ ܒܦܘܼܡܹܗ: ܘܲܢ̣ܦܲܩ ܓܹܐܪܵܐ ܠܒܸܤܬܿܪܹܗ: ܘܲܢܦܲܠ̣ ܘܡ̣ܝܬܼ ܥܲܠ ܕܘܼܟܿܬܹܗ. ܛܘܼܒܼܵܢܵܐ ܕܹܝܢ ܓܚܸܟܼ ܘܐܸܡ݂ܲܪ ܠܹܗ: ܤܲܒܼ ܠܵܟܼ ܦܘܼܪܥܵܢܵܐ ܕܚܘܼܒܵܟܼ ܕܥܲܡ ܐܲܠܵܗܲܝ̈ܟ ܘܥܲܡ ܡܲܠܟܵܟܼ. ܗܵܝܕܹܿܝܢ ܡܓܼܘܼ̈ܫܹܐ ܟܠܗܘܿܢ ܥܪܲܩ̣ܘ pb. 497 ܡܤܲܪܗܒܼܵܐܝܼܬܼ ܟܲܕܼ ܡܲܝܠܠܝܼܢ: ܘܚܹܐܪܹ̈ܐ ܒܢܲܝ̈ ܓܸܢܤܹܗ ܫܲܢ̣ܝܼܘ ܟܲܕܼ ܟܡܝܼܪܝܼܢ.

ܡ̣ܪܵܐ ܕܹܝܢ ܛܘܼܒܼܵܢܵܐ ܩܲܪܕܵܓܼ ܠܚܲܕܼ ܡܸܢܗܘܿܢ ܕܲܫܡܹܗ ܐܵܢܘܿܫ: ܓܼܲܪܵܐ ܕܒܼܝܕܲܥܬܼܵܐ ܘܲܒܼܬܲܩܢܘܼܬܼܵܐ ܡܸܬܼܩܲܠܲܣ ܗ̄ܘ̣ܵܐ. ܘܐܸܡ݂ܲܪ ܠܹܗ: ܠܡܵܐ ܡܲܤܒܲܪ ܐܲܢ̄ܬܿ ܐܘܿ ܐܵܢܘܿܫ: ܕܐܸܢܵܐ ܡ̣ܢ ܡܵܘܬܵܐ ܕܲܚܠܵܦ ܡܫܝܼܚܵܐ ܩܵܢܹ̇ܛ ܐ̄ܢܵܐ ܘܡܸܛܠ ܗܵܕܹܐ ܒܚܸܤܢܵܐ ܝܵܬܹ̇ܒܼ ܐ̄ܢܵܐ؟ ܠܵܐ ܗܵܟܲܢܵܐ: ܚܵܣ ܠܝܼ: ܠܵܐ ܗܵܟܲܢܵܐ. ܠܝܼ ܓܹܝܪ ܡܵܘܬܵܐ ܕܲܚܠܵܦ ܡܫܝܼܚܵܐ ܒܲܤܝܼܡ ܠܝܼ ܝܲܬܿܝܼܪ ܡ̣ܢ ܚܲܝܹ̈ܐ ܕܙܲܒܼܿܢܵܐ. ܒܪܲܡ ܥܕܲܡܵܐ ܕܗ̤ܘ ܡܫܝܼܚܵܐ ܦܵܩܹ̇ܕܼ ܠܝܼ: ܐܵܘ ܒܚܸܠܡܵܐ ܐܵܘ ܒܚܸܙܘܵܐ ܕܠܸܠܝܵܐ: ܕܲܙܲܒܼܢܵܐ ܗ̄ܘ̣ ܠܝܼ ܠܲܡܡܵܬܼ ܚܠܵܦ ܫܡܹܗ: ܢܲܦܫܝܼ ܠܐ̄ܢܵܫܵܐ ܫܩܝܼ̈ܦܲܝ ܒܛܵܥܝܘܼܬܼܵܐ ܠܵܐ ܡܲܫܠܸܡ ܐ̄ܢܵܐ. ܘܲܬܼܟܼܝܼܠܢܵܐ ܥܲܠ ܚܲܝܠܹܗ ܕܲܡܫܝܼܚܵܐ ܡܵܪܝ: ܕܲܠܲܝܬܿ ܐ̄ܢܵܫ ܕܡܸܟܲܚ ܕܢܲܟܹܿܝܢܝ. ܡܵܐ ܕܹܝܢ ܕܫܸܦ̣ܪܲܬ̤ ܠܲܡܫܝܼܚܵܐ ܕܐܹܡܘܼܬܼ ܡܸܛܠܵܬܹܗ: ܚܲܕܼܝܵܐܝܼܬܼ ܢܵܦܹ̇ܩ ܐ̄ܢܵܐ: ܘܢܲܦܫܝ ܠܩܸܛܠܵܐ ܡܲܫܐܸܡ ܐ̄ܢܵܐ.

ܟܲܕܼ ܕܹܝܢ ܗܵܠܹܝܢ ܠܡܲܠܟܵܐ ܐܸܬܼܝܼܕܲܥ̣: ܦ̣ܩܲܕܼ ܒܐܸܓܪ̈ܵܬܼܵܐ ܠܢܸܟܿܘܿܪܓܲܢ ܗܵܘ̇ ܕܐܝܼܬܼܵܘܗܝ ܗ̄ܘ̣ܵܐ ܚܡܘܼܗܝ ܕܛܘܼܒܼܵܢܐ: ܕܗ̤ܘ ܢܹܐܙܲܠ ܢܫܲܕܠܝܼܘܗܝ: ܕܢܸܦܬܲܚ ܬܲܪܥܵܐ ܕܚܸܤܢܹ݂ܗ ܘܢܸܬܸܿܠ ܐܝܼܕܼܵܐ. ܘܕܐܹܢ ܗܵܕܹܐ ܠܵܐ ܢܸܥܒܸܿܕ: ܓܙܵܪܟܼܝܼܬܼܵܐ ܕܡܵܘܬܵܐ ܡܲܪܝܼܪܵܐ ܢܤܲܝܒܲܪ ܗ̤ܘ ܢܸܟܿܪܓܲܢ. ܐܸܬ݂ܼܵܐ ܕܹܝܢ ܗ̤ܘ ܢܸܟܿܘܿܪܓܲܢ ܘܲܫ̣ܪܵܐ ܠܗܲܠ ܡ̣ܢ pb. 498 ܚܸܤܢܹܗ ܕܛܘܼܒܼܵܢܵܐ: ܐܲܝܟܼ ܡܲܫܕܹܐ ܬܪܹܝܢ ܓܹܐܪ̈ܝܼܢ: ܕܵܚܹ̇ܠ ܓܹܝܪ ܕܬܼܘܼܒܼ ܢܸܬܼܩܲܪܲܒܼ ܨܹܝܕ ܚܸܤܢܵܐ. ܘܲܫ̣ܠܲܚ ܠܹܗ ܠܛܘܼܒܼܵܢܵܐ: ܕܢܸܤܲܩ ܠܫܘܼܪܵܐ ܘܲܢܡܲܠܸܠܥܲܡܹܗ. ܤ̣ܠܸܩ ܕܹܝܢ ܛܘܼܒܼܵܢܵܐ ܘܝܼܬܸܒܼ ܠܩܘܼܒܼܠܹܗ ܘܐܸܡ݂ܲܪ ܠܹܗ: ܩܪܘܿܒܼ ܠܟܼܵܐ: ܤܵܒܼܵܐ: ܘܠܵܐ ܬܸܕܼܚܲܠ. ܘܟܲܕܼ ܩ̣ܪܸܒܼ ܐܸܡ݂ܲܪ ܠܹܗ: ܠܡ̇ܢ ܫܚܝܼܩ ܐܲܢ̄ܬܿ ܐܘܿ ܢܸܟܼܘܿܪܚܲܢ؟ ܘܡܸܛܠ ܡܵܢܵܐ ܐܸܬܲܝ̣ܬܿ ܠܗܵܪܟܐ؟ ܗ̤ ܕܹܝܢ ܒܟܼܵܐ ܡܲܪܝܼܪܵܐܝܼܬܼ ܘܐܸܡ݂ܲܪ ܠܹܗ: ܫܚܝܼܩ ܐ̄ܢܵܐ ܒܒܼܝܼ̈ܫܬܼܵܐ ܕܓܲܕܼܫܵܢܝ: ܕܐܘܒܿܕܹܬܼ ܚܲܬܼܢܵܐ: ܘܚܲܒܼܪܵܐ ܒܓܲܒܼܪܹ̈ܐ ܠܲܝܬܿ ܗ̄ܘ̣ܵܐ ܠܹܗ. ܘܗܵܐ ܐܵܦ ܥܠܲܝ ܡܵܘܬܵܐ ܠܚܝܼܡ: ܐܸܢ ܐܲܢ̄ܬܿ ܬܲܪܥܸܐ ܕܚܸܤܢܵܐ ܠܵܐ ܬܸܦܼܬܲܚ: ܘܐܝܼܕܼܵܐ ܠܵܐ ܬܸܬܸܿܠ ܠܝܼ. ܛܘܼܒܼܵܢܵܐ ܕܹܝܢ ܐܸܡ݂ܲܪ ܠܹܗ: ܡܸܛܠ ܕܐܲܒܿܝܼܕܼ ܗܵܘܢܵܟܼ ܒܛܵܥܝܼܘܼܬܼܵܐ ܕܫܹ̈ܐܕܹܐ: ܡܸܛܠ ܗܵܢܵܐ ܤܵܒܲ݁ܪ ܐܲܢ̄ܬܿ ܕܡܹܐܒܲܕܼ ܐܲܒܿܝܼܕܼ ܐ̄ܢܵܐ. ܐܸܢ ܕܹܝܢ ܠܵܐ ܐܲܒܿܝܼܕܼ ܗ̄ܘ̣ܵܐ ܗܵܘܢܵܟܼ: ܡܸܤܬܲܟܲܠ ܗ̣̄ܘܲܝܬܿ ܕܠܵܘ ܡܹܐܒܲܕܼ ܐܸܒܼܪܹܬܼ: ܐܸܠܵܐ ܡܸܫܬܿܟܼܵܚܘܼ ܐܸܫܬܲܟܼܚܹ̇ܬܼ ܠܲܡܫܝܼܚܵܐ ܡܸܫܟܿܚܵܢܵܐ ܕܐܲܒܿܝܼܪܹ̈ܐ. ܐܲܒܿܝܼܕܼܵܐ ܒܲܫܪܵܪܵܐ ܐܲܢ̄ܬܿ ܗ̣̄ܘ: ܕܠܲܐܠܵܗܵܐ ܒܵܪܘܿܝܵܐ ܫܒܲܩ̣ܬܿ: ܘܲܠܒܸܪ̈ܝܵܬܼܵܐ ܚܲܪ̈ܫܵܬܼܵܐ: ܗܵܢܹ̇ܿܝܢ ܕܠܐܝܼܩܵܪܵܟܼ ܘܲܠܒܼܘܼܤܵܡܵܟܼ ܐܸܬܼܒܿܪܝܼ: ܤܵܓܹ̇ܕܼ ܐܲܢ̄ܬܿ. ܢܸܟܿܘܿܪܓܲܢ ܕܹܝܢ ܐܸܡ݂ܲܪ ܠܹܗ: ܐܲܝܟܼ ܕܨܵܒܹ̇ܐ ܐܲܢ̄ܬܿ ܚܫܘܿܒܲܝܢܝ: ܘܐܲܝܟܼ ܡܵܐ ܕܪܵܓܵܐ ܠܵܟܼ ܨܲܥܲܪܲܝܢܝ: ܒܲܠܚܘܿܕܼ ܡ̣ܢ ܡܵܘܬܵܐ ܦܪܘܼܩܲܝܢܝ: ܕܗܵܐ ܡܠܸܟܼ ܡܲܠܟܹ̈ܐ ܒܪܘܼܓܼܙܵܐ ܡܸܬܼܠܲܚܲܡ ܠܝܼ ܡܸܛܠܵܬܼܵܟܼ. ܘܲܚܕܼܵܐ ܡ̣ܢ ܬܲܪܬܹܿܝܢ ܥܒܸܕܼ. ܐܵܘ ܐܸܬܿܛܦܝܼܣ ܠܡܲܠܟܵܐ: ܘܲܫܒܼܘܿܩ ܢܵܨܪܵܝܘܼܬܼܵܐ: ܘܲܗܦܘܿܟܼ pb. 499 ܠܲܡܓܼܘܼܫܘܼܬܼܵܐ: ܘܲܤܓܼܘܿܕܼ ܠܢܘܼܪܵܐ ܘܲܠܫܸܡܫܵܐ ܘܲܠܤܲܗܪܵܐ: ܘܲܒܼܢܝܼ ܒܹܝܬܼ ܢܘܼܪ̈ܘܵܬܼܵܐ ܕܲܥ̣ܩܲܪܬܿ ܘܲܚܝܼ. ܐܵܘ ܦܘܼܩ ܡܘܼܬܼ: ܐܲܝܟܼ ܕܡܵܝ̇ܬܿܝܼܢ ܟܪܸ̈ܤܛܝܵܢܹܐ ܤܲܟܼ̈ܠܹܐ: ܘܲܚܢܲܢ ܠܵܐ ܢܡܘܼܬܼ ܡܸܛܠܵܬܼܵܟܼ. ܥܢ̣ܵܐ ܕܹܝܢ ܛܘܼܒܼܵܢܵܐ ܩܲܪܕܵܓܼ ܘܐܸܡ݂ܲܪ ܠܹܗ: ܠܡܲܠܟܵܐ ܚܲܢܦܵܐ ܘܪܲܫܝܼܥܵܐ ܠܵܐ ܡܸܫܬܿܡܲܥ ܐ̄ܢܵܐ. ܘܠܲܐܠܵܗܵܐ ܕܲܒܼܪܵܢܝ ܘܦܲܪܩܲܢܝ ܘܡܲܦܲܪܢܸܣ ܠܝܼ ܘܲܥܬܼܝܼܕܼ ܕܲܒܼܡܲܠܟܿܘܼܬܹܗ ܢܒܲܤܡܲܢܝ ܠܵܐ ܫܵܒܹ̇ܩ ܐ̄ܢܵܐ: ܘܲܠܒܸܪ̈ܝܵܬܼܵܐ ܐܲܟܼܘܵܬܼܟܼܘܿܢ ܠܵܐ ܤܵܓܹ̇ܕܼ ܐ̄ܢܵܐ. ܘܡ̣ܢ ܡܵܘܬܵܐ ܕܲܚܠܵܦ ܡܫܝܼܚܵܐ ܠܵܐ ܡܸܫܬܿܐܸܠ ܐ̄ܢܵܐ: ܐܸܠܵܐ ܚܲܕܼܝܵܐܝܼܬܼ ܡܵܐܹ̇ܬܼ ܐ̄ܢܵܐ: ܘܐܲܢ̄ܬܿܘܿܢ ܚܠܵܦܲܝ ܠܵܐ ܡܵܝ̇ܬܿܝܼܢ ܐܢ̄ܬܿܘܿܢ. ܠܘܲܝ ܕܹܝܢ ܐܝܼܬܼ ܗ̄ܘ̣ܵܐ ܒܟܼܘܿܢ ܒܘܼܝܵܢܵܐ: ܘܐܲܢ̄ܬܿܘܿܢ ܚܠܵܦ ܚܲܝܲܝ̈ܟܿܘܿܢ ܡܝܼܬܼܬܿܘܿܢ! ܘܕܲܩܪܲܝ̣ܬܿ ܤܲܟܼ̈ܠܹܐ ܠܲܟܼܪܸ̈ܤܛܝܵܢܹܐ ܕܡܵܝ̇ܬܿܝܼܢ ܚܠܵܦ ܫܡܹܗ ܕܡܵܗܘܿܢ: ܡ̣ܢ ܥܘܼܡܩܵܗ̇ ܕܫܵܢܝܘܼܬܼܵܟܼ ܡܲܠܸܠ̣ܬܿ. ܒܪܲܡ ܬܸܒܼ ܠܵܟܼ: ܘܲܕܼܠܵܐ ܥܩܵܬܼܵܐ ܘܟܲܪܝܘܼܬܼܵܐ ܗ̤ܘܝܼ: ܘܐܸܢܵܐ ܗܵܐ ܡܦܝܼܣ ܐ̄ܢܵܐ ܠܲܡܫܝܼܚܵܐ ܡܵܪܝ: ܕܲܢܚܵܘܹܝܢܝ ܐܸܢ ܙܲܒܿܢܵܐ ܗ̣̄ܘ ܠܝܼ ܠܲܡܡܵܬܼ ܡܸܛܠ ܫܡܹܗ. ܘܐܸܢ ܫܵܦܪܵܐ ܠܨܸܒܼܝܵܢܵܐ ܕܐܲܠܵܗܘܼܬܹܗ: ܘܙܲܒܼܢܵܐ ܗ̣̄ܘ ܠܡܸܤܲܒܼ ܟܠܝܼܠܵܐ ܕܤܵܗܕܘܼܬܼܵܐ ܒܫܘܼܠܵܡ ܐܵܓܼܘܿܢܵܐ ܗܵܢܵܐ ܕܡܸܛܠܵܬܹܗ: ܚܲܕܼܝܵܐܝܼܬܼ ܢܵܦܹ̇ܩ ܐ̄ܢܵܐ ܘܡܲܫܠܸܡ ܐ̄ܢܵܐ ܢܲܦܫܝ ܠܩܵܛ̈ܘܿܠܹܐ.

ܗܵܝܕܹܿܝܢ ܐܸܫ̣ܬܿܡܲܥ ܛܸܒܼܵܐ ܒܟܼܠܗܘܿܢ ܐܲܬܼܪ̈ܵܘܵܬܼܵܐ ܕܫܘܼܠܛܵܢܹܗ ܕܛܘܼܒܼܵܢܵܐ: ܕܗܵܐ ܩܲܪܕܵܓܼ ܡܛܲܝܲܒܼ ܠܲܡܡܵܬܼ ܚܠܵܦ ܫܡܹܗ ܕܲܡܫܝܼܚܵܐ. ܘܐܸܬܼܟܲܢܲܫ̣ܘ ܘܐܸܬ݂ܼܵܐ ܡ̣ܢ ܟܠ ܐܲܬܼܪ̈ܵܘܵܢ ܟܸܢܫܹ̈ܐ ܤܲܓܿܝܼ̈ܐܹܐ pb. 500 ܕܲܟܼܪܸ̈ܤܛܝܵܢܹܐ ܘܕܲܝܗܘܼܕܵܝܹ̈ܐ ܘܲܕܼܚܲܢ̈ܦܹܐ: ܘܲܫ̣ܪܵܘ ܡܲܫܪ̈ܝܵܬܼܵܐ ܪܵܘܪ̈ܒܼܵܬܼܵܐ ܚܕܼܵܕ̈ܲܝ ܚܸܤܢܹܗ ܕܛܘܼܒܼܵܢܵܐ: ܟܲܕܼ ܡܤܲܟܹܝܢ ܕܢܸܚܙܘܿܢ ܝܘܿܡ ܟܘܼܠܵܠܹܗ ܕܐܲܬܼܠܹܝܛܵܐ ܕܙܲܕܝܼܩܘܼܬܼܵܐ. ܐܸܬ݂ܼܵܘ ܕܹܝܢ ܐܵܦ ܐܲܒܼܵܗܵܘ̈ܗܝ ܘܐܲܚܵܘ̈ܗܝ: ܘܲܗ̤ܘܲܝ̈ ܡܲܫܪ̈ܝܵܬܼܵܐ ܪܵܘܪ̈ܒܼܵܬܼܵܐ ܕܐܲܠܦܹ̈ܐ ܘܲܕܼܪܸ̈ܒܿܘܵܬܼܵܐ: ܘܟܲܬܼܪܘ ܟܲܕܼ ܫܪܹܝܢ ܝܵܘ̈ܡܵܬܼܵܐ ܥܸܤܪܝܼܢ ܘܚܲܕܼ. ܛܘܼܒܼܵܢܵܐ ܕܹܝܢ ܐܲܡܝܼܢ ܗ̄ܘ̣ܵܐ ܒܲܨܠܘܿܬܼܵܐ ܘܲܒܼܒܼܵܥܘܼܬܼܵܐ: ܟܲܕܼ ܡܸܬܼܟܲܫܲܦ ܠܲܡܫܝܼܡܵܐ: ܕܲܢܚܲܠܝܼܘܗܝ ܘܲܢܠܲܒܿܒܼܝܼܘܗܝ ܠܡܸܫܬܲܡܠܵܝܘܼ ܒܲܟܼܠܝܵܠܵܐ ܕܤܵܗܕܘܼܬܼܵܐ. ܐܲܒܼܘܼܗܝ ܕܹܝܢ ܡܦܝܼܣ ܗ̄ܘ̣ܵܐ ܠܹܗ ܒܤܲܓܿܝܼ̈ܐܬܼܵܐ ܟܲܕܼ ܒܵܟܹ̈ܐ: ܕܢܸܤܲܩ ܠܫܘܼܪܵܐ ܘܢܸܚܙܹܝܘܗܝ ܘܲܢܡܲܠܸܠ: ܘܢܸܫܡܲܥ ܡܸܢܹܗ ܡܸܕܸܿܡ ܕܨܵܒܹ̄ܐ ܕܢܹܐܡܲܪ ܠܹܗ. ܘܠܵܐ ܨܒܼܵܐ: ܐܸܠܵܐ ܫܠܲܚ̣ ܠܹܗ ܒܐܝܼܕܼܵܐ ܕܚܲܕܼ ܡ̣ܢ ܥܲܒܼܕܵܘ̈ܗܝ ܘܐܸܡ݂ܲܪ ܠܹܗ: ܕܲܡܫܝܼܚܵܐ ܡܪܲܢ ܩܵܥܹ̇ܐ ܠܘܵܬܲܢ ܒܤܒܲܪܬܹܗ: ܕܟܼܠ ܕܠܵܐ ܫܵܒܹ̇ܩ ܐܲܒܼܵܐ ܘܐܸܡܵܐ ܘܐܲܚܹ̈ܐ ܘܐܲܚ̈ܘܵܬܼܵܐ ܘܐܲܢ̄ܬܿܬܼܵܐ ܘܲܒܼ̈ܢܲܝܵܐ ܘܐܵܬܹ̇̄ܐ ܒܵܬܲܪܝ ܠܵܠ ܫܵܘܹ̇ܐ ܠܝܼ: ܘܡܸܛܠ ܗܵܕܹܐ ܠܵܐ ܨܵܒܹ̇ܐ ܐ̄ܢܵܐ ܕܐܸܚܙܸܐ ܐܲܦܲܝ̈ܟ: ܡܸܛܠ ܕܤܲܩܘܼܒܼܠܵܐ ܐܝܼܬܲܝܗܹܝܢ ܡܲܚܫ̈ܒܼܵܬܼܵܟܼ ܘܡܸܠܲܝ̈ܟ: ܠܐܘܼܪܚܵܐ ܗܵܕܹܐ ܕܒܼܵܗ̇ ܡܛܲܝܲܒܼ ܐ̄ܢܵܐ ܠܡܸܚܙܲܩ. ܘܒܼܵܬܲܪ ܗܵܕܹܐ ܫܠܲܚ̣ ܠܹܗ ܢܸܟܘܿܪܓܲܢ: ܕܫܲܕܲܪ ܠܝܼ ܫܘܿܫܲܢ ܒܪܲܬܼܝ: ܕܲܪܓܼܝܼܓܼ ܐ̄ܢܵܐ ܕܐܸܚܙܹܝܗ̇. ܗ̤ܘ ܕܹܝܢ ܛܘܼܒܼܵܢܵܐ ܐܸܡ݂ܲܪ ܠܐܲܢ̄ܬܿܬܹܗ: ܦܘܿܩܝ ܠܘܵܬܼ ܐܲܒܼܘܼܟܼܝ: ܘܲܚܙܵܝ ܡܵܢܵܐ ܒܵܥܹ̇ܐ ܠܹܟܼܝ. ܒܪܲܡ ܕܹܝܢ ܝܵܕܲܥ̇ܢܵܐ: ܕܐܲܒܼܕܵܢܵܐ ܕܲܚܲܝܲܝ̈ܟܿܝ pb. 501 ܡܸܬܿܬܲܓܿܪܵܐ ܐܢ̄ܬܿܝ ܡ̣ܢ ܡܸܠܵܘ̈ܗܝ. ܘܟܲܕ ܢܸܦ̣ܩܲܬ̤ ܠܘܵܬܼ ܐܲܒܼܘܼܗ̇ ܐܸܡ݂ܲܪ ܠܵܗ̇: ܒܪܲܬܼܝ ܘܚܲܒܿܝܼܒܼܬܿܝ: ܚܘܼܣܝ ܥܲܠ ܤܲܝܒܿܘܼܬܼܝ: ܘܠܵܐ ܬܚܲܠܦܝܼܢ ܚܘܼܒܵܐ ܕܐܲܒܼܘܼܟܼܝ ܒܪܸܚܡܬܼܵܐ ܕܒܲܥܠܹܟܼܝ. ܘܠܵܐ ܬܙܒܿܢܝܼܢ ܚܲܝܹ̈ܐ ܕܤܲܝܒܿܘܼܬܼܝ: ܒܓܲܒܼܪܵܐ ܕܲܡ̣ܪܲܕܼ ܡ̣ܢ ܐܲܠܵܗܹ̈ܐ ܘܡ̣ܢ ܡܠܼܟܼ ܡܲܠܟܹ̈ܐ. ܠܲܝܬܿ ܓܹܝܪ ܦܘܼܪܤܵܐ: ܕܐܲܒܼܵܐ ܐ̄ܚܪܹܢܵܐ ܬܸܩܢܹܝܢ. ܒܲܥܠܹܟܼܝ ܕܹܝܢ ܐܸܢ ܝܵܘܡܵܢ ܢܡܘܼܿܬܼ: ܠܨܲܦܪܵܐ ܕܛܵܒܼ ܡܸܢܹܗ ܡܸܫܘܟܿܚܵܐ ܐܲܢ̄ܬܿܝ. ܐܸܠܵܐ ܫܲܕܲܠܝܼܘܗܝ ܕܢܸܦܬܲܚ ܬܲܪܥܵܐ ܘܢܸܦܘܿܩ: ܘܢܸܫܬܵܘܙܲܒܼ ܚܢܲܢ ܡ̣ܢ ܩܹܘܲܢܕܹܢܘܿܣ. ܗ̤ܝ ܡܸܚܕܼܵܐ ܦܢ̣ܵܬ̤ ܠܘܵܬܼ ܛܘܼܒܼܵܢܵܐ ܘܐܸܡ̣ܪܲܬ̤ ܠܹܗ: ܐܸܢ ܟܪܸ̈ܤܛܝܵܢܵܐ ܐܲܢ̄ܬܿ: ܦܘܼܩ ܠܒܼܝܼܒܼܵܐܝܼܬܼ ܘܡܘܼܬܼ ܓܲܢ̄ܒܵܪܵܐܝܼܬܼ: ܐܲܝܟܼ ܕܡܵܝ̇ܬܿܝܼܢ ܟܪܸ̈ܤܛܝܵܢܹܐ. ܠܡܵܢܵܐ ܐܲܝܟܼ ܫܲܦ̈ܠܹܐ ܘܕܵܚܠܲܝ̈ ܡ̣ܢ ܡܵܘܬܵܐ ܗܵܐ ܚܒܼܝܼܫ ܐܲܢ̄ܬܿ ܒܚܸܤܢܵܐ: ܘܤܲܓܿܝܼ̈ܐܹܐ ܡܸܛܠܵܬܼܵܟܼ ܡܵܝܬܿܝܼܢ؟ ܛܘܼܒܼܵܢܵܐ ܕܹܝܢ ܥܢ̣ܵܐ ܘܐܸܡ݂ܲܪ ܠܵܗ̇: ܫܲܪܝܼܪܵܐܝܼܬܼ ܕܡ̣ܢ ܬܵܘܬܵܪ̈ܲܝ ܠܸܒܵܐ ܡܡܲܠ̈ܠܵܢ ܤܸܦ̈ܘܵܬܼܵܐ: ܐܲܝܟܼ ܡܸܠܬܹܗ ܡܲܚܝܵܢܝܼܬܼܵܐ ܕܦܵܪܘܿܩܲܢ. ܘܗܵܠܹܝܢ ܕܐܲܢ̄ܬܿܝ ܡܡܲܠܠܵܐ ܐܲܢ̄ܬܿܝ: ܨܸܢ̈ܥܵܬܼܵܗ̇ ܐܸܢܹܝܢ ܒܝܼ̈ܫܵܬܼܵܐ ܕܚܲܢܦܘܼܬܼܵܐ: ܘܦܹܐܪܹ̈ܝܗ̇ ܕܒܼܝܼܫܘܼܬܼܵܐ: ܘܡܸܠܵܘ̈ܗܝ ܕܲܢܟܼܝܼܠܵܐ. ܒܪܲܡ ܠܵܐ ܬܸܫܬܲܚܩܝܼܢ ܒܲܪܬܹܗ ܕܐܲܒܼܕܵܢܵܐ: ܡܛܲܝܲܒܼ ܐ̄ܢܵܐ ܗ̣̄ܘ ܓܹܝܪ ܠܲܡܡܵܬܼ: ܐܵܦ ܩܕܼܵܡ ܫܸܕܼ̈ܠܹܐ ܢܟܼܝܼ̈ܠܹܐ ܕܝܼܠܹܟܼܝ. pb. 502

ܘܒܼܵܬܲܪ ܗܵܠܹܝܢ ܟܠܗܹܝܢ: ܚܸܙܘܵܐ ܕܚܝܼܠܵܐ ܐܸܬܼܚ̣ܙܝܼ ܠܹܗ ܠܛܘܼܒܼܵܬܵܐ. ܒܠܸܠܝܵܐ ܓܹܝܪ ܕܒܹܗ ܢܵܓܲܗ ܝܵܘܡܵܐ ܕܲܥܪܘܼܒܼܬܼܵܐ: ܩܵܡ̣ ܛܘܼܒܼܵܢܵܐ: ܘܐܲܝܟܼ ܥܝܵܕܹܗ ܥ̣ܒܲܕܼ ܬܸܫܡܸܫܬܼܵܐ. ܘܟܲܕܼ ܫ̣ܠܸܡ̣ ܬܸܫܡܸܫܬܹܗ ܠܐܲܦܲܝ̈ ܕܢܵܗܲܪ ܨܲܦܪܵܐ: ܐܸܬܼܦ̣ܢܝܼ ܚ̣ܙܵܐ ܟܲܕܼ ܩܵܐܹ̇ܡ ܥܲܠ ܬܸܠܵܐ ܙܥܘܿܪܵܐ ܕܲܩܕܼܵܡ ܬܲܪܥܵܐ ܕܚܸܤܢܹܗ: ܘܟܸܢ̈ܫܹܐ ܤܲܓܿܝܼ̈ܐܹܐ ܕܐ̄ܢܵܫܵܐ ܚܕܝܼܪܝܼܢ ܠܹܗ: ܘܒܼܵܕܼܪܝܼܢ ܥܠܵܘܗܝ ܡܲܪ̈ܓܵܢܝܵܬܼܵܐ. ܘܟܲܕܼ ܢܵܦ̈ܠܵܢ ܗ̣̄ܘܲܝ̈ ܡܲܪ̈ܓܵܢܝܵܬܼܵܐ ܥܲܠ ܦܲܓܼܪܹܗ: ܡܸܙ̈ܕܲܠܚܵܢ ܗ̣̄ܘܲܝ̈ ܡ̣ܢ ܕܘܼ̈ܿܟܿܝܵܬܼܗܹܝܢ ܛܘܼ̈ܦܹܗ ܕܲܕܼܡܵܐ: ܘܲܠܠܲܡܦܹܝ̈ܕܹܐ ܕܢܘܼܪܵܐ ܡܸܫܬܲܚ̈ܠܦܵܢ ܗ̣̄ܘܲܝ̈: ܘܠܲܫܡܲܝܵܐ ܗ̣̄ܘܲܝ̈. ܘܓܲܒܼܪܵܐ ܚܲܕܼ ܕܲܠܒܼܝܼܫ ܡܐܢܹ̈ܐ ܡܲܦܪ̈ܓܹܐ: ܘܲܡܟܲܠܲܠ ܒܲܟܼܠܝܼܠܵܐ ܕܢܘܼܗܪܵܐ: ܩܵܐܹ̇ܡ ܠܥܸܠ ܡܸܢܹܗ ܒܐܵܐܲܪ ܘܐܵܡܲ݁ܪ ܠܹܗ: ܐܵܚܝ ܩܲܪܕܵܓܼ. ܘܐܸܡܹܲܪ: ܗܵܐ ܐܸܢܵܐ. ܘܐܸܡ݂ܲܪ ܠܹܗ: ܗܵܠܹܝܢ ܡܲܪ̈ܓܵܢܝܵܬܼܵܐ ܐܸܙܕܠܲܚ̣ ܐܵܦ ܥܠܲܝ ܒܐܘܼܪܸܫܠܸܡ: ܡ̣ܢ ܒܢܲܝ̈ ܥܲܡܝ ܘܡ̣ܢ ܒܢܲܝ̈ ܫܲܪܒܲܬܼܝ. ܗܵܫܵܐ ܢܹܐܬܸܐ ܐܲܒܼܘܼܟܼ: ܘܢܸܫܕܹܐ ܒܵܟܼ ܐܵܦ ܗ̤ܘ ܚܕܼܵܐ ܡܲܪܓܵܢܝܼܬܼܵܐ: ܘܡܸܚܕܼܵܐ ܤܵܠܹ̇ܩ ܐܲܢ̄ܬܿ ܠܘܵܬܼܝ ܒܚܲܕܼܘܼܬܼܵܐ. ܛܘܼܒܼܵܢܵܐ ܕܹܝܢ ܩܲܪܕܵܓܼ ܫܲܐܠܹܗ ܘܐܸܡ݂ܲܪ ܠܹܗ ܕܡ̇ܢ ܐܲܢ̄ܬܿ ܡܵܪܝ؟ ܘܗ̤ܘ ܐܸܡ݂ܲܪ ܠܹܗ: ܐܸܢܵܐ ܗ̣̄ܘ ܐܸܤܛܲܦܵܢܘܿܣ ܡܫܲܫܵܢܵܐ: ܕܒܼܐܘܿܪܸܫܠܸܡ ܐܸܬܼܪܲܓܼܡܹ̇ܬܼ ܡܸܛܠ ܟܵܪܘܿܙܘܼܬܹܗ ܕܚܲܝܹ̈ܐ. ܘܡܸܚܕܼܵܐ ܢܲܕܼ ܛܘܼܒܼܵܢܵܐ ܡ̣ܢ ܫܸܢܬܹܗ: ܘܲܗܘ̤ܵܐ ܒܕܼܚܠܬܼܵܐ ܪܲܒܿܬܼܵܐ. ܘܲܩ̣ܪܵܐ ܠܐܝܼܤܚܵܩ ܪܲܒܹܿܗ: ܗܵܘ̇ ܕܡܲܠܸܦ ܗ̄ܘ̣ܵܐ ܠܹܗ ܡܲܙܡܘܿܪܹ̈ܐ: ܘܩܵܪܹܐ ܗ̄ܘ̣ܵܐ ܩܕܼܵܡܵܘܗܝ ܟܬܼܵܒܹ̈ܐ ܩܲܕܝܼ̈ܫܹܐ: ܘܐܸܫ̣ܬܲܥܝܼ pb. 503 ܩܕܼܵܡܵܘܗܝ ܚܸܙܘܵܐ ܕܲܚ̣ܙܵܐ. ܘܟܲܕܼ ܬܲܗܝܼܪܝܼܢ ܐܸܬܼܒܲܝܲܢ̣ܘ ܒܹܗ ܒܚܸܙܘܵܐ: ܘܐܸܤ̣ܬܲܟܲܠܘ ܕܙܲܒܼܢܵܐ ܗ̣̄ܘ ܠܹܗ ܡܸܟܹܿܝܠ ܠܛܘܼܒܼܵܢܵܐ: ܠܲܡܡܵܬܼܒܲܪ ܓܘܼܡܝܵܐ ܕܟܹ̈ܐܦܹܐ ܚܠܵܦ ܫܡܹܗ ܕܲܡܫܝܼܚܵܐ. ܘܐܸܡ݂ܲܪ ܛܘܼܒܼܵܢܵܐ ܩܲܪܕܵܓܼ ܠܐܝܼܤܚܵܩ: ܐܲܝܟܵܐ ܟܬܼܝܼܒܼ ܫܲܪܒܹܗ ܕܐܸܤܟܲܦܵܢܘܿܣ ܗܵܗܕܵܐ ܫܲܕܝܼܫܵܐ؟ ܘܐܝܼܤܚܵܩ ܐܸܡ݂ܲܪ ܠܹܗ: ܗܵܐ ܟܬܼܝܼܒܼ ܒܲܦܪܲܟܤܝܼܣ ܕܲܫܠܝܼܚܹ̈ܐ ܩܲܕܝܼ̈ܫܹܐ. ܘܐܸܡ݂ܲܪ ܠܹܗ ܛܘܼܒܼܵܢܵܐ: ܐܲܝܬܼܵܐ ܘܲܩܪܝܼ ܩܕܼܵܡܲܝ: ܘܟܲܕܼ ܫܡܲܥ̣ ܬܲܫܥܝܬܼܵܐ ܕܤܵܗܕܘܼܬܹܗ ܕܩܲܕܝܼܫܵܐ ܐܸܤܛܲܦܵܢܘܿܣ: ܚ̣ܕܝܼ ܪܵܘܪܒܼܵܐܝܼܬܼ ܘܪܸܘܙܲܬ̤ ܢܲܦܫܹܗ. ܘܐܸܬܼܠܲܒܲܒܼ ܗ̄ܘ̣ܵܐ ܘܐܸܬܼܓܲܢܒܲܪ ܛܵܒܼ. ܘܐܸܬܼܪܲܓܼܪܲܓܼ ܗ̄ܘ̣ܵܐ ܠܡܵܘܬܵܐ ܕܲܚܠܵܦ ܡܫܝܼܚܵܐ: ܐܲܝܟܼ ܨܲܗܝܵܐ ܕܥܵܐܹ̇ܠ ܡ̣ܢ ܐܘܼܪܚܵܐ ܒܙܲܒܼܢܵܐ ܚܲܡܝܼܡܵܐ ܕܩܲܝܛܵܐ: ܘܲܪܓܼܝܼܓܼ ܠܡܲܝ̈ܵܐ ܩܲܪܝܼܪܹ̈ܐ.

ܘܡܸܚܕܼܐ ܩܵܡ̣ ܛܘܼܒܼܵܢܵܐ: ܘܤܵܡ̣ ܒܘܼܪܟܵܐ ܘܨܲܠ̣ܝܼ. ܘܢܫܸܩ̣ ܟܬܼܵܒܼܵܐ ܕܐܹܘܲܢܓܲܠܝܼܘܿܢ ܩܲܕܝܼܫܵܐ: ܘܲܚ̣ܬܲܡ ܢܲܦܫܹܗ ܒܐܵܬ̤ܵܐ ܕܲܨܠܝܼܒܼܵܐ. ܘܲܦ̣ܬܲܚ ܬܲܪܥܵܐ ܕܚܸܤܢܹܗ: ܘܲܢܦܲܩ̣ ܐܲܝܟܼ ܚܲܬܼܢܵܐ ܕܢܵܦܹ̇ܩ ܡ̣ܢ ܒܹܝܬܼ ܓܢܘܿܢܵܐ. ܘܟܲܕܼ ܗܵܕܹܐ ܐܸܬܼܝܲܕܼܥܲܬ̤ ܠܟܸܢ̈ܫܹܐ: ܢܦܲܠ̣ ܪܵܘܒܑܵܐ ܒܡܲܫܪ̈ܝܵܬܼܵܐ: ܘܲܪܗܸܛ̣ܘ ܟܠܗܘܿܢ ܒܤܘܼܪܗܵܒܼܵܐ: ܟܪܸ̈ܤܛܝܵܢܹܐ ܘܲܝܗܘܼܕܼܵܝܹ̈ܐ ܘܚܲܢ̈ܦܹܐ: ܪܵܘܪ̈ܒܹܐ ܘܲܙܥܘܿܪܹ̈ܐ: ܓܲܒܼܪܹ̈ܐ ܘܢܸܫܹ̈ܐ: ܘܪܵܗ̇ܛܝܼܢ ܗ̄ܘ̣ܵܘ ܕܢܸܚܙܘܿܢ ܠܛܘܼܒܼܵܢܵܐ ܕܲܡܩܲܒܸܿܠ ܟܠܝܼܠܵܐ ܕܤܵܗܕܘܼܬܼܵܐ. ܦܲܪ̈ܫܹܐ ܕܹܝܢ ܟܲܕܼ ܪܟܼܝܼܒܼܝܼܢ ܘܲܡܙܲܝܢܝܼܢ: ܪܗܸܛ̣ܘ ܟܲܕܼ ܐܵܠ̇ܨܝܼܢ ܗ̄ܘ̣ܵܘ ܠܟܸܢܫܹ̈ܐ pb. 504 ܘܐܵܡ̇ܪܝܼܢ: ܕܟܼܠܢܵܫ ܟܹܐܦܵܐ ܢܸܤܲܒܼ ܘܢܸܪܓܿܡܝܼܘܗܝ ܠܛܘܼܒܼܵܢܵܐ. ܡܓܼܘܼ̈ܫܹܐ ܕܹܝܢ ܐܸܬܼܟܲܢܲܫ̣ܘ ܥܲܡ ܪܵܘܪ̈ܒܼܵܢܹܐ ܟܠܗܘܿܢ: ܘܝܼܬܸܒܼܘ ܘܩܵܪܹܝܢ ܗ̄ܘ̣ܵܘ ܨܚܵܝܵܐ ܕܲܓܼܙܵܪܕܝܼܢܹܗ ܕܛܘܼܒܼܵܢܵܐ: ܗܵܘ̇ ܕܡ̣ܢ ܡܲܠܟܵܐ ܐܸܫ̣ܬܲܕܲܪ ܗ̄ܘ̣ܵܘ: ܗܵܘ̇ ܕܥܕܬܵܐ ܩܵܬܼܵܪܵܤܝܼܣ ܡܥܵܕܵܐ ܕܬܸܩܪܹܝܘܗܝ: ܦܵܪ̈ܤܵܝܹܐ ܕܹܝܢ ܩܵܪܹܝܢ ܠܹܗ ܢܸܒܸܫܬܵܓܼ. ܗ̤ܘ ܕܹܝܢ ܛܘܼܒܼܵܢܵܐ ܟܲܕܼ ܚ̣ܙܵܐ ܠܟܸܢܫܹ̈ܐ ܕܚܲܢ̈ܦܹܐ ܘܕܲܝܗܘܼܕܵܝܹ̈ܐ ܕܲܛܥܝܼܢܝܼܢ ܟܹܐ̈ܦܹܐ: ܘܪܵܗ̇ܛܝܼܢ ܕܢܸܪܓܿܡܘܼܢܵܝܗܝ: ܚ̣ܵܪ ܒܲܫܡܲܝܵܐ ܘܲܚ̣ܬܡ ܢܲܦܫܹܗ ܒܐܵܬ̤ܵܐ ܕܲܨܠܝܼܒܼܵܐ. ܘܨܲܠ̣ܝܼ ܒܩܵܠܵܐ ܪܵܡܵܐ ܘܐܸܡ݂ܲܪ: ܡܵܪܲܢ ܝܼܫܘܿܥ ܡܫܝܼܚܵܐ ܒܪܹܗ ܕܐܲܠܵܗܵܐ: ܥܲܕܲܪܲܝܢܝ ܒܫܵܥܬܼܵܐ ܗܵܕܹܐ: ܘܐܲܫܘܵܢܝ ܕܲܒܼܓܼܠܝܘܼܬܼ ܐܲܦܹ̈ܐ ܐܸܬܼܚܲܠܲܛ ܒܟܸܢ̈ܫܹܐ ܕܩܲܕܝܼܫܲܝ̈ܟ. ܘܡܸܚܕܼܵܐ ܤܵܡ̣ ܒܘܼܪܟܵܐ. ܘܟܲܕܼ ܩܵܡ̣ ܠܥܸܠ ܡܸܢܹܗ ܝܲܓܼܪܵܐ ܕܟܹܐܦܹ̈ܐ: ܢܲܦܸܨ ܐܸܢܹܝܢ ܡܸܢܹܗ ܘܩܵܡ̣ ܓܲܢ̄ܒܵܪܵܐܝܼܬܼ. ܘܗܵܟܲܢܵܐ ܐܵܦ ܙܒܲܢ̄ܬܼܵܐ ܕܬܲܪܬܹܿܝܢ ܥ̣ܒܲܕܼ. ܘܟܲܕܼ ܦܲܪ̈ܫܹܐ ܘܲܡܓܼܘܼ̈ܫܹܐ ܐܵܠ̇ܨܝܼܢ ܗ̄ܘ̣ܵܘ ܠܟܸܢ̈ܫܹܐ ܕܲܒܼܥܘܼܫܢܵܐ ܢܸܫܕܿܘܿܢ ܟܹܐ̈ܦܹܐ: ܥܢ̣ܵܐ ܛܘܼܒܼܵܢܵܐ ܘܐܸܡ݂ܲܪ ܠܗܘܿܢ: ܠܵܐ ܡܵܐܹ̇ܬܼ ܐ̄ܢܵܐ ܐܸܠܵܐ ܐܸܢ ܟܲܕܼ ܐܵܒܼܝ ܢܸܫܕܸܐ ܒܝܼ ܟܹܐܦܵܐ. ܐܲܒܼܘܼܗܝ ܕܹܝܢ ܕܲܪܘܸܐ ܗ̄ܘ̣ܵܐ ܒܛܘܼܥܝܲܝ ܕܲܡܓܼܘܼܫܘܼܬܼܵܐ: ܘܩܵܢܹ̇ܛ ܗ̄ܘ̣ܵܐ ܡ̣ܢ ܡܵܘܬܵܐ: ܘܡܸܫܬܿܦܲܪ ܗ̄ܘ̣ܵܐ ܠܡܲܠܟܵܐ ܘܲܠܪܵܘܪ̈ܒܼܵܢܹܐ: ܫ̣ܩܲܠ pb. 505 ܫܘܿܫܸܦܹܗ ܘܲܟܼܪܲܟܼ ܥܲܠ ܐܲܦܵܘ̈ܗܝ: ܘܲܫ̣ܕܼܵܐ ܟܹܐܦܵܐ ܒܲܪܓܼܘܼܡܬܼܵܐ ܕܲܒܼܪܹܗ. ܘܡܸܚܕܼܵܐ ܫܲܢ̣ܝܲܬ̤ ܢܲܦܫܹܗ ܕܐܬܼܠܹܝܛܵܐ ܕܙܲܕܝܼܩܘܼܬܼܵܐ ܠܚܲܝܹ̈ܐ ܕܲܠܥܵܠܲܡ.

ܘܒܼܵܗ̇ ܒܫܵܥܬܼܵܐ: ܥܸܛܪܵܐ ܕܒܸܤ̈ܡܹܐ ܦܵܝܼܚ ܒܟܼܠܹܗ ܐܲܬܼܪܵܐ ܕܒܹܗ ܐܸܬܼܪܓܸܡ̣ ܛܘܼܒܼܵܢܵܐ. ܘܗܵܐ ܩܵܠܵܐ ܐܸܫ̣ܬܿܡܲܥ ܕܐܵܡܲ݁ܪ: ܫܲܦܝܼܪ ܐܸܬܼܟܲܬܲܫ̣ܬܿ: ܘܓܲܢ̈ܒܵܪܵܐܝܼܬܼ ܙܟܲܝ̣ܬܿ ܢܲܨܝܼܚܵܐ ܩܲܪܕܵܓܼ: ܬܵܐ ܒܚܲܕܼܘܼܬܼܵܐ ܘܤܲܒܼ ܟܠܝܼܠܵܐ ܕܙܵܟܸܘܼܬܼܵܟܼ.

ܐܸܬܼܟܲܠܲܠ̣ ܕܹܝܢ ܗ̤ܘ ܩܲܕܝܪܫܵܐ ܡܵܪܝ ܩܲܪܕܵܓܼ: ܒܲܫܢܲܬܼ ܐܲܪܒܿܥܝܼܢ ܘܲܬܼܫܲܥ ܕܫܵܒܼܘܿܪ ܡܲܠܟܵܐ: ܒܝܘܿܡ ܥܪܘܼܒܼܬܼܵܐ. ܘܒܹܗ ܒܠܸܠܝܵܐ ܕܢܵܓܼܗܵܐ ܫܲܒܿܬܼܵܐ ܐܸܬܼܟܲܢܲܫ̣ܘ ܓܲܒܼܪܹ̈ܐ ܡܪ̈ܲܚܡܵܢܹܐ: ܘܲܚܛܲܦ̣ܘ ܠܦܲܓܼܪܹܗ ܕܩܲܕܿܝܼܫܵܐ ܡ̣ܢ ܢܵܛ̇ܘܿܪ̈ܵܘܗܝ: ܘܥܲܦܝܘܗܝ ܒܐܝܼܩܵܪܵܐ ܪܲܒܵܐ.

ܘܲܒܼܟܼܠ ܫܢܵܐ ܒܹܗ ܒܝܵܘܡܵܐ ܕܐܸܬܼܟܲܠܲܠ̣ ܒܹܗ ܛܘܼܒܼܵܢܵܐ: ܡܸܬܼܟܲܢܫܝܼܢ ܗ̄ܘ̣ܵܘ ܥܲܡܡܹ̈ܐ ܠܕܘܼܟܿܬܼܵܐ ܕܒܼܵܗ̇ ܐܸܬܼܟܲܠܲܠ̣: ܘܥܵܒܼ̇ܕܿܝܼܡܢ ܗ̄ܘ̣ܵܘ ܠܹܗ ܥܹܐܕܼܵܐ ܘܕܘܼܟܼܪܵܢܵܐ ܬܠܵܬܼܵܐ ܝܵܘ̈ܡܝܼܢ. ܘܡܸܛܠ ܤܲܓܿܝܼܐܘܼܬܼܵܐ ܕܟܸܢܫܹ̈ܐ: ܫܲܪܝܼܘ ܗ̄ܘ̣ܵܘ ܐܵܦܸܢ ܠܡܸܙܒܲܢ ܘܠܲܡܙܲܒܵܢܘܼ ܒܝܵܘ̈ܡܵܬܼܵܐ pb. 506 ܕܕܼܘܼܟܼܪܵܢܹܗ ܕܩܲܕܝܼܫܵܐ. ܘܟܲܕܼ ܪܕܼܵܐ ܗ̄ܘ̣ܵܐ ܙܲܒܼܢܵܐ ܠܲܩܕܼܵܡܵܘܗܝ: ܐܸܬܼܥܒܸܕܼ ܚܲܓܵܐ ܪܲܒܵܐ ܒܕܼܘܼܟܿܬܼܵܐ ܕܒܼܵܗ̇ ܐܸܬܼܪܓܸܡ ܛܘܼܒܼܵܢܵܐ ܥܕܲܡܵܐ ܠܝܵܘܡܵܢܵܐ: ܘܕܘܼܟܼܪܵܢܹܗ ܕܹܝܢ ܕܩܲܕܝܼܫܵܐ ܬܠܵܬܼܵܐ ܝܘܡܝܼ̈: ܘܚܲܓܵܐ ܫܬܼܵܐ ܝܵܘܡܝܼ̈ܢ. ܘܡܸܬܼܩܪܸܐ: ܫܘܼܩܵܐ ܕܡܲܠܩܝܼ: ܥܲܠ ܫܸܡ ܩܪܝܼܬܼܵܐ ܕܚܸܤܢܹܗ ܕܛܘܼܒܼܵܬܢܵܐ.

ܒܵܬܲܪܟܸܿܢ ܕܹܝܢ ܐܵܦ ܗܲܝܟܿܠܵܐ ܪܲܒܵܐ ܘܦܲܐܝܵܐ ܒܢܲܦ̈ܩܵܬܼܵܐ ܪܵܘܪ̈ܒܼܵܬܼܵܐ ܐܸܬܼܒܿܢ̣ܝܼ ܥܲܠ ܫܡܹܗ ܕܛܘܼܒܼܵܢܵܐ: ܡ̣ܢ ܐ̄ܢܵܫܵܐ ܡܗܲܝܡ̈ܢܹܐ ܘܫܵܘ̈ܚܲ ܠܕܼܘܼܟܼܪܵܢܵܐ ܛܵܒܼܵܐ: ܥܲܡܹܗ ܕܬܸܠܵܐ ܗܵܘ̇ ܕܲܥܠܵܘܗܝ ܐܸܬܼܪܓܸܡ ܩܲܕܿܝܼܫܵܐ ܡܵܪܝ ܩܲܪܕܵܓܼ. ܕܲܚܢܲܢ ܢܸܫܬܿܘܸܐ ܕܒܲܨ̈ܠܵܘܵܬܹܗ ܢܸܬܼܥܲܕܲܪ ܒܥܵܠܡܵܐ ܗܵܢܵܐ ܡܠܸܐ ܕܵܘܘܿܢܹ̈ܐ: ܘܲܒܼܥܵܠܡܵܐ ܚܲܕܼܬܵܐ ܗܵܘ̇ ܕܠܵܐ ܥܵܒܲ݁ܪ ܢܸܬܼܚܢܸܢ ܒܲܨ̈ܠܵܘܵܬܹܗ: ܘܥܲܡܹܗ ܢܸܬܼܒܲܤܲܡ. ܒܛܲܝܒܿܘܼܬܹܗ ܘܲܒܼܪܲܚܡܵܢܘܼܬܹܗ ܕܡܵܪܲܢ ܝܼܫܘܿܥܡܫܝܼܚܵܐ: ܗܵܘ̇ ܕܠܹܗ ܘܠܲܐܒܼܘܼܗܝ ܘܲܠܪܘܼܚܵܐ ܕܩܘܼܕܼܫܵܐ: ܬܸܫܒܿܘܼܿܚܬܼܵܐ ܘܐܝܼܩܵܪܵܐ ܘܪܘܼܡܪܵܡܵܐ ܠܥܵܠܲܡ ܥܵܠܡܝܼܢ: ܐܵܡܹܝܢ.

ܫܸܠܲܡܲܬ̤ ܤܵܗܕܘܼܬܼܵܐ ܕܡܵܪܝ ܩܲܪܕܵܓܼ ܩܲܕܝܼܫܵܐ ܤܵܗܕܵܐ ܢܲܨܝܼܚܵܐ

(4) ܒܵܬܲܪܟܸܿܢ ܐܲܝ̣ܬܿܝܼܘ ܡܗܲܝ̈ܡܢܹܐ ܕܲܗܒܼܵܐ ܘܤܹܐܡܵܐ: ܘܲܒܼܢ̣ܵܘ ܠܹܗ ܗܲܝ̈ܟܠܹܐ ܐܲܪܒܿܥܵܐ: ܘܗܲܝܟܿܠܵܐ ܐ̄ܚܪܹܢܵܐ ܕܒܹܝܬܼ ܤܵܗ̈ܕܹܐ: ܘܡܲܕܼܒ̇ܚܵܐ ܘܩܲܢܟܸܐ ܘܒܹܝܬܼ ܥܡܵܕܼܵܐ. ܘܐܸܬܼܩܲܕܲܫ̣ ܒܲܦܢܝܼܬܼ ܡܲܕܼܢܚܵܐ. ܘܐܲܦܸܩ̣ܘ ܥܠܵܘܗܝ ܢܲܦ̈ܩܵܬܼܵܐ ܪܵܘܪ̈ܒܼܵܬܼܵܐ ܥܲܠ ܫܡܹܗ ܕܛܘܼܒܼܵܢܵܐ ܡ̣ܢ ܐ̄ܢܵܫܵܐ ܡܗܲܝ̈ܡܢܹܐ ܫܵܘܼ̈ܚܲ ܠܕܼܘܼܟܼܪܵܢܵܐ ܛܵܒܼܵܐ. ܘܟܼܠܡ̇ܢ ܕܥܵܪܹܕ ܠܹܗ ܕܘܼܟܼܪܵܢܵܐ ܒܗܵܘ̇ ܝܵܘܡܵܐ ܕܒܹܗ ܐܸܬܼܪܓܸܡ: ܢܸܫܬܿܘܸܐ ܕܥܲܡܹܗ ܕܗܵܘ̇ ܛܘܼܒܼܵܢܵܐ ܢܸܗܘܸܐ ܠܹܗ ܡܢܵܬܼܵܐ ܘܚܲܪܬܼܵܐ ܛܵܒܼܬܼܵܐ. ܘܢܸܬܼܥܲܕܲܪ ܒܥܵܠܡܵܐ ܗܵܢܵܐ: ܘܲܒܼܥܵܠܡܵܐ ܚܲܕܼܬܼܵܐ ܕܠܵܐ ܦܵܛܲܪ ܢܸܬܼܚܢܸܢ ܒܲܨ̈ܠܵܘܵܬܹܗ. ܘܥܲܡܹܗ